НАЧА́ЛО ВЕЧЕ́РНИ МА́ЛЫЕ

по всѧ̀ сꙋбо́ты ве́черъ , наче́ншꙋ , і҆єре́ю , бл҃гᲂслᲂве́нъ бг҃ъ на́шъ . и҆ мы̀ гл҃емъ : а҆ми́нь . цр҃ю нбⷭ҇ныи . трⷭ҇то́е , и҆ по ѻ҆́ч҃е на́шъ , гдⷭ҇и пᲂми́лꙋй , ві҃ . сла́ва , и҆ ны́нѣ , прїиди́те пᲂклᲂни́мсѧ , гⷤ . та́же , ѱл҃о́мъ , бл҃гᲂслᲂвѝ дш҃е мᲂѧ̀ гдⷭ҇а . сла́ва , и҆ ны́нѣ . а҆ллилꙋ́їѧ , гⷤ . і҆єре́й , неглаго́летъ є҆ктенїѝ , но гдⷭ҇и пᲂми́лꙋй , гⷤ . сла́ва , и҆ ны́нѣ . та́же , ѱл҃о́мъ , гдⷭ҇и вᲂзва́хъ к̾ тебѣ̀ . та́же , стⷯры , вᲂскрⷭ҇ны , на д҃ . гла́съ , є҃ . =запѣ́въ : да ᲂу҆пᲂва́етъ і҆зра́иль на́ гдⷭ҇а . Честны́мъ твᲂи́мъ крⷭ҇то́мъ хрⷭ҇тѐ , дїа́вᲂла пᲂсрами́лъ є҆сѝ , и҆ вᲂскрⷭ҇нїемъ твᲂи́мъ жа́ло грѣхо́внᲂе притꙋпи́лъ є҆сѝ , и҆ спа́слъ є҆сѝ на́съ ѿ вра́тъ сме́ртныхъ , сла́вимъ тѧ є҆динᲂро́дныи . два́жды . Вᲂскрⷭ҇нїе даѧ̀ ро́дꙋ чл҃ческᲂмꙋ , ꙗ҆́кѡ ѻ҆вча̀ на закᲂле́нїе веде́сѧ . ᲂу҆страши́шасѧ сегѡ̀ кнѧ́зи а҆́дъстїи , и҆ взѧ́шасѧ врата̀ плаче́внаѧ . вни́де бо цр҃ь сла́вы хрⷭ҇то́съ , гл҃ѧ ᲂу҆́жникѡмъ и҆зыди́те , сꙋ́щїи во тмѣ̀ ѿкры́йтесѧ . Ве́лїе чꙋ́до , неви́димыхъ сᲂдѣ́тель , за чл҃кᲂлю́бїе пло́тїю пᲂстрада́въ , и҆ вᲂскр҃се без̾сме́ртныи . прїиди́те ѻ҆те́чествїѧ ꙗ҆зы́къ , тᲂмꙋ̀ пᲂклᲂни́мсѧ . милᲂсе́рдїемъ бо є҆гѡ̀ ѿ́ лести и҆зба́вльшесѧ , в̾ трїе́хъ сᲂста́вѣхъ , є҆ди́наго бг҃а пѣ́ти навыко́хᲂмъ . =сла́ва , и҆ ны́нѣ , боⷢ҇ . Ра́дꙋйсѧ две́ри мы́сленнаѧ , є҆ю́же про́йде первᲂвѣ́чныи бг҃ъ . ра́дꙋйсѧ же́зле а҆арѡ́нᲂвъ , и҆з̾расти́вшаѧ цвѣ́тъ ѿ ко́рене і҆єссе́ѡва . ра́дꙋйсѧ трапе́зо , ꙗ҆́же хлѣ́бъ жи́зни на пи́щꙋ всемꙋ̀ пᲂда́вши ро́дꙋ чл҃ческᲂмꙋ , дв҃о мт҃и чи́стаѧ .

та́же , свѣ́те ти́хїи . пᲂсе́мъ , прᲂки́менъ , гдⷭ҇ь вᲂцр҃и́сѧ в̾ лѣ́пᲂтꙋсѧ ѡ҆блечѐ . сти́хъ : ѡ҆блече́сѧ гдⷭ҇ь в̾ си́лꙋ и҆ препᲂѧ́сасѧ . та́же , спᲂдо́би гдⷭ҇и в̾ ве́черъ сі́й . і҆єре́й же , є҆ктенїѝ неглаго́летъ .

на стихо́внѣ , стихѣ́ра . гла́съ , є҃ . Тебѐ вᲂпло́щшагᲂсѧ сп҃са хрⷭ҇та̀ , и҆ ѿ небе́съ неразлꙋ́чьшасѧ , во́ гласѣхъ пѣ́нїѧ вᲂзвели́чимъ . ꙗ҆́кѡ крⷭ҇тъ и҆ сме́рть прїѧ́тъ за́ рᲂдъ на́шъ , ꙗ҆́кѡ чл҃кᲂлю́бецъ гдⷭ҇и , сᲂкрꙋши́выи а҆́дᲂва врата̀ , и҆ тридне́вно вᲂскрⷭ҇лъ є҆сѝ , спаса́ѧ дш҃а на́ша .

и҆́ны , стⷯры , бцⷣѣ . поⷣ . ра́дꙋйсѧ живᲂно́сныи .= сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . П=ѣ́нїе ѿ недᲂсто́йныѧ дш҃и , и҆ скве́рныхъ на́шихъ ᲂу҆сте́нъ , ꙗ҆́кѡ бл҃гᲂсе́рда прїимѝ бг҃ᲂрᲂди́тельнице , ꙗ҆́кᲂже в̾до́выѧ двѣ̀ лѣ́птѣ , бл҃гᲂда́рственѣ с̾ любо́вїю принᲂси́мᲂе , за ма́лаѧ вели́каѧ вᲂз̾даю́щи бл҃гᲂда́тїю си . и҆ ѿ всѧ́кᲂгѡ навѣ́та и҆ ѕло́бы и҆зба́ви , мл҃твеники свᲂѧ̀ влⷣчце . рѣша́щи затво́ры , напа́сти превᲂдѧ́щи и҆скꙋше́нїѧ , ꙗ҆́кѡ милᲂсе́рдаѧ ᲂу҆тишѝ сла́вными ти мл҃твами . и҆ ми́рᲂви да́рꙋющи ве́лїю млⷭ҇ть .

сти́хъ : лицꙋ̀ твᲂемꙋ̀ пᲂмо́лѧтсѧ ,꙳ бᲂга́тїи лю́дстїи . Прⷭ҇то́лъ херꙋви́мскїи вᲂи́стинꙋ , ꙗ҆́кѡ превы́шши тва́рей бы́вши . и҆з̾ тебе́ бо бжⷭ҇твенᲂе сло́во , на́шъ зра́къ назда́ти хᲂтѧ̀ , всели́сѧ в̾ тѧ̀ , и҆ прᲂше́дъ с̾ пло́тїю и҆з̾ тебѐ всечⷭ҇таѧ . крⷭ҇тнꙋю же стра́сть на́съ ра́ди вᲂспрїѧ́тъ , и҆ вᲂскрⷭ҇нїе ꙗ҆́кѡ бг҃ъ дарᲂва̀ , и҆змѣ́ньшемꙋсѧ на́шемꙋ ѡ҆сꙋжде́ннᲂмꙋ є҆стествꙋ̀ . тѣ́мъ ꙗ҆́кѡ сᲂдѣ́телю сн҃ꙋ твᲂемꙋ̀ мо́лимсѧ бг҃ᲂмт҃и , ᲂу҆лꙋчи́ти прᲂще́нїе и҆ ми́лᲂсть , в̾ ча́съ сꙋ́дныи .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . И҆мы́и ѡ҆бремене́нꙋ прⷭ҇нѡ дш҃и мᲂеѧ̀ вы́ю влⷣчце , ѿ мно́жества грѣхѡ́въ и҆ ᲂу҆́зъ лю́тыхъ , несмѣ́ю вᲂз̾зрѣ́ти на высᲂтꙋ̀ бж҃їю . тѣ́мже пᲂнича̀ на́ землю в̾зыва́ю ти пᲂми́лꙋй мѧ̀ , ꙗ҆́же бг҃а всемлⷭ҇тиваго вᲂз̾сїѧ́вши ѿ пречⷭ҇тыхъ лᲂже́снъ твᲂи́хъ . и҆ ны́нѣ пᲂкажѝ чꙋдеса̀ твᲂѧ̀ не и҆зрече́ннѡ , пречи́стѣи и҆ бжⷭ҇твенїи дла́ни свᲂѝ , к̾ сн҃ꙋ сѝ пречⷭ҇таѧ вᲂз̾дѣ́вши , пᲂсли́ ми мᲂлѧ́щꙋсѧ ве́лїю ми́лᲂсть . сла́ва , и҆ ны́нѣ , боⷢ҇ . Что̀ твᲂю̀ бг҃ᲂрᲂди́тельнице чи́стаѧ , нарекꙋ̀ цр҃кᲂвь бг҃ᲂпрїѧ́тнꙋю ; вертᲂгра́дъ ли є҆де́мскїи нарекꙋ̀ , и҆ но́евъ сла́вныи кᲂвче́гъ прᲂрекꙋ̀ спа́сшїи , бг҃а цр҃ѧ держа́вꙋ всѣ́хъ , ст҃ы́и ꙗ҆зы́къ , хрⷭ҇та̀ на́шегѡ ѡ҆би́тель . мѡѷсе́ѡвꙋ же кїѡ́тꙋ ᲂу҆пᲂдо́бисѧ , внꙋ́трь ѡ҆чище́нїе , и҆ же́злъ прᲂцвѣ́тшїи . внꙋ́трь свѣти́льницы , и҆ рꙋ́чка , кади́льница всезлата́ѧ , в̾ ню́же прибѣга́етъ всѧ́къ вѣ́рныи , и҆ и҆спрᲂша́етъ ве́лїю млⷭ҇ть .

таⷤ , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ , є҆гѡ̀ . є҆ктенїѧ̀ ма́лаѧ := пᲂми́лꙋй на́съ бж҃е по вели́цѣй млⷭ҇ти твᲂе́й . є҆щѐ мо́лимсѧ ѡ҆ странѣ̀ на́шей рᲂсси́йстей . є҆щѐ мо́лимсѧ за всю̀ бра́тїю и҆ за всѧ̀ хрⷭ҇тїа́ны . =и҆ пᲂсе́мъ , вᲂз̾гла́с̾ . ꙗ҆́кѡ млⷭ҇тивъ и҆ чл҃кᲂлю́бецъ бг҃ъ є҆сѝ . пᲂсе́мъ , ѿпꙋ́стъ . и҆ мнᲂгᲂлѣ́тїе .

ВЪ СУБО́ТУ НА ВЕЛИ́ЦѢЙ ВЕЧЕ́РНИ

кандилᲂв̾жига́тель прихо́дитъ к̾ настᲂѧ́телю , и҆ взе́мъ блгⷭ҇ве́нїе и҆схо́дитъ , и҆ кле́плетъ в̾ вели́кᲂе би́ло , и҆ сᲂбра́вшимсѧ на́мъ в̾ цр҃квь . и҆ пᲂто́мъ вжига́ютъ свѣщѝ , и҆ паликади́ла по мѣ́стᲂмъ . та́же , і҆єре́й , в̾хо́дитъ во ст҃ы́и ѻ҆лта́рь , и҆ ѡ҆блачи́тсѧ во сщ҃е́нныѧ ѻ҆де́жды по́ чинꙋ . и҆ ѿверза́емᲂмъ црⷭ҇кимъ две́ремъ . и҆ взе́мъ кади́ло , со бл҃гᲂво́ннымъ фимїа́нᲂмъ . и҆ ста́въ пред̾ ст҃о́ю трапе́зᲂю , зна́менаетъ кади́лᲂмъ три́жды , крⷭ҇тᲂѡ҆бра́знѡ . та́же , гл҃етъ : Блгⷭ҇ве́нъ бг҃ъ на́шъ , всегда̀ и҆ ны́нѣ и҆ при́снѡ и҆ во́ вѣки вѣкѡ́мъ . мы́же , гл҃емъ : а҆ми́нь . цр҃ю нбⷭ҇ныи . трⷭ҇то́е , и҆ по ѻ҆́ч҃е на́шъ . і҆єре́й , гл҃етъ : ꙗ҆́кѡ твᲂѐ є҆́сть црⷭ҇тво и҆ си́ла . мы́же : а҆ми́нь . гдⷭ҇и пᲂми́лꙋй , ві҃ . сла́ва , и҆ ны́нѣ , прїиди́те пᲂклᲂни́мсѧ , гⷤ . та́же , ѱл҃о́мъ , рг҃ . бл҃гᲂслᲂвѝ дш҃е мᲂѧ̀ гдⷭ҇а . сла́ва , и҆ нн҃ѣ , а҆ллилꙋ́їѧ , гⷤ .= є҆ктенїѧ̀ вели́каѧ : ми́рᲂмъ гдⷭ҇ꙋ пᲂмо́лимсѧ . =та́же , каѳи́сма : бл҃же́нъ мꙋ́жъ , всѧ̀ . пᲂе́мъ , а҃-ю сла́вꙋ , на́ гласъ , и҃ .

На гдⷭ҇и вᲂзва́хъ , стⷯры , вᲂскрⷭ҇ны . гла́съ , є҃ . твᲂре́нїе , прпⷣбнагѡ ѻ҆ц҃а на́шегѡ і҆ѡа́нна дамаски́на . =запѣ́в̾ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . Ч=естны́мъ твᲂи́мъ крⷭ҇то́мъ хрⷭ҇тѐ , дїа́вᲂла пᲂсрами́лъ є҆сѝ , и҆ вᲂскрⷭ҇нїемъ твᲂи́мъ жа́ло грѣхо́внᲂе притꙋпи́лъ є҆сѝ , и҆ спа́слъ є҆сѝ на́съ ѿ вра́тъ сме́ртныхъ , сла́вимъ тѧ є҆динᲂро́дныи .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Вᲂскрⷭ҇нїе даѧ̀ ро́дꙋ чл҃ческᲂмꙋ , ꙗ҆́кѡ ѻ҆вча̀ на закᲂле́нїе веде́сѧ . ᲂу҆страши́шасѧ сегѡ̀ кнѧ́зи а҆́дъстїи , и҆ взѧ́шасѧ врата̀ плаче́внаѧ . вни́де бо цр҃ь сла́вы хрⷭ҇то́съ , гл҃ѧ ᲂу҆́жникѡмъ и҆зыди́те , сꙋ́щїи во тмѣ̀ ѿкры́йтесѧ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Ве́лїе чꙋ́до , неви́димыхъ сᲂдѣ́тель , за чл҃кᲂлю́бїе пло́тїю пᲂстрада́въ , и҆ вᲂскр҃се без̾сме́ртныи . прїиди́те ѻ҆те́чествїѧ ꙗ҆зы́къ , тᲂмꙋ̀ пᲂклᲂни́мсѧ . милᲂсе́рдїемъ бо є҆гѡ̀ ѿ́ лести и҆зба́вльшесѧ , в̾ трїе́хъ сᲂста́вѣхъ , є҆ди́наго бг҃а пѣ́ти навыко́хᲂмъ .

и҆́ны , стихѣ́ры . твᲂре́нїе а҆нато́лїѧ патрїа́рха цр҃ѧ гра́да . =запѣ́въ : бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мᲂли́твы мᲂеѧ̀ . В=ече́рнее пᲂклᲂнѧ́нїе прино́симъ ти , невече́рнемꙋ свѣ́тꙋ , и҆́же на кᲂне́цъ вѣкѡ́мъ , ꙗ҆́кѡ в̾ зерца́лѣ , пло́тїю вᲂсїѧ́вшꙋ ми́рᲂви , и҆ да́же до а҆́да сᲂше́дшꙋ , и҆ та́мѡ сꙋ́щꙋю тмꙋ̀ разрꙋши́вшꙋ , и҆ свѣ́тъ вᲂскрⷭ҇нїѧ ꙗ҆зы́кѡмъ пᲂказа́вшꙋ , свѣтᲂда́вче гдⷭ҇и сла́ва тебѣ̀ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Нача́льника спасе́нїю на́шемꙋ хрⷭ҇та̀ славᲂсло́вимъ , тᲂмꙋ́ бо и҆з̾ ме́ртвыхъ вᲂскре́сшꙋ , ми́ръ ѿ́ лести спасе́сѧ . ра́дꙋетсѧ ли́къ а҆́нг҃льскїи , бѣ́гаетъ же бѣсо́вскаѧ ле́сть . а҆да́мъ пады́и вᲂста́етъ , и҆ дїа́вᲂлъ ᲂу҆праздни́сѧ .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . И҆́же ѿ кꙋстᲂді́ѧ , ᲂу҆чи́ми быва́хꙋ ѿ без̾зако́нникъ , пᲂкры́йте хрⷭ҇то́во вᲂскрⷭ҇нїе , и҆ прїими́те сре́бреники , и҆ рцы́те ꙗ҆́кѡ на́мъ спѧ́щимъ , ѿ́ грᲂба ᲂу҆кра́денъ бы́сть мертве́цъ . кто̀ ви́дѣ , и҆лѝ кто̀ слы́ша , мертвеца̀ ᲂу҆кра́дена кᲂгда̀ , па́че же пᲂма́зана и҆ на́га , ѡ҆ста́вльша во́ грᲂбѣ пᲂгреба́льнаѧ ; нельсти́тесѧ і҆ꙋде́и , наꙋчи́тесѧ рече́нїемъ прᲂро́ческимъ , и҆ разꙋмѣ́йте ꙗ҆́кѡ вᲂскр҃се вᲂи́стинꙋ и҆зба́витель ми́рꙋ , и҆ всеси́ленъ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Гдⷭ҇и , и҆́же а҆́да плѣни́въ , и҆ сме́рть пᲂпра́въ сп҃се на́шъ , и҆ прᲂсвѣ́щь ми́ръ крⷭ҇то́мъ честны́мъ , пᲂми́лꙋй на́съ .

та́же , в̾ =минѣ́и , стихѣ́ры , ст҃о́мꙋ . сла́ва , ст҃о́мꙋ , а҆́ще и҆́мать . а҆́ще ли нѝ . сла́ва , и҆ нн҃ѣ , боⷢ҇ , гла́сꙋ . =и҆́ны стⷯры бцⷣѣ , пᲂе́мъ и҆́хъ , и҆дѣ́же нѣ́сть минѣ́и . твᲂре́нїе , па́вла а҆мᲂре́йскаго . гла́съ , є҃ . =запѣ́въ : ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆збавле́нїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . П=ресто́лъ херꙋви́мскїи вᲂи́стинꙋ , ꙗ҆́кѡ превы́шши тва́рей бы́вши . и҆з̾ тебе́ бо бжⷭ҇твенᲂе сло́во , на́шъ зра́къ назда́ти хᲂтѧ̀ , всели́сѧ в̾ тѧ̀ , и҆ прᲂше́дъ с̾ пло́тїю и҆з̾ тебѐ всечⷭ҇таѧ . крⷭ҇тнꙋю же стрⷭ҇ть на́съ ра́ди вᲂспрїѧ́тъ , и҆ вᲂскрⷭ҇нїе ꙗ҆́кѡ бг҃ъ дарᲂва̀ , и҆змѣ́ньшемꙋсѧ на́шемꙋ ѡ҆сꙋжде́ннᲂмꙋ є҆стествꙋ̀ . тѣ́мъ ꙗ҆́кѡ сᲂдѣ́телю сы́нꙋ твᲂемꙋ̀ мо́лимсѧ бг҃ᲂмт҃и , ᲂу҆лꙋчи́ти прᲂще́нїе и҆ млⷭ҇ть , в̾ ча́съ сꙋ́дныи .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Что̀ твᲂю̀ бг҃ᲂрᲂди́тельнице чⷭ҇таѧ , нарекꙋ̀ цр҃кᲂвь бг҃ᲂсла́внꙋю ; вертᲂгра́дъ ли є҆де́мскїи и҆менꙋ́ю , и҆ но́евъ чи́стаѧ кᲂвче́гъ прᲂрекꙋ̀ спа́сшїи ; бг҃ꙋ цр҃ьскᲂе сщ҃е́нїе , ве́сь ст҃ъ ꙗ҆зы́къ , хрⷭ҇та̀ на́шегѡ сᲂбо́ръ ; мѡѷсе́ѡвꙋ же кїѡ́тꙋ ᲂу҆пᲂдᲂблѧ́ю тѧ , в̾ не́мже ѡ҆чисти́лище , и҆ же́злъ прᲂзѧ́бшїи . в̾ не́мже свѣ́щникъ , и҆ рꙋ́чка , кади́льницꙋ всезлатꙋ́ю , в̾ ню́же прибѣга́етъ всѧ́къ вѣ́рныи , и҆ и҆спрᲂша́етъ ве́лїю млⷭ҇ть .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Є҆ди́на без̾наде́жнымъ наде́жа , без̾по́мᲂщнымъ гᲂто́ваѧ по́мᲂще , млⷭ҇ти ро́ждьши вᲂли́телѧ і҆с҃а , мᲂю̀ пᲂми́лꙋй ны́нѣ не́мᲂщь чⷭ҇таѧ , и҆ пᲂда́ждь ми пᲂмысло́мъ ᲂу҆миле́нїе , стрꙋѧ́ми сле́зъ , самы́хъ сᲂгрѣше́нїи мᲂи́хъ непᲂбѣди́мꙋю пᲂтᲂпѝ пꙋчи́нꙋ . ѿженѝ без̾мѣ́рныхъ мᲂи́хъ страсте́й бꙋ́рю , и҆ и҆спо́лни ти́шины бжⷭ҇твеныѧ , смꙋще́нᲂе срⷣце мᲂѐ , хрⷭ҇та̀ мᲂлѧ́щи , пᲂда́ти ми сᲂгрѣше́нїемъ сверше́нᲂе ѡ҆ставле́нїе .

сла́ва , и҆ ны́нѣ , боⷢ҇ . гла́съ , є҃ . Во чермнѣ́мъ мо́ри , бракᲂнеи҆скꙋ́сныѧ невѣ́сты ѻ҆́бразъ написа́сѧ дре́вле . та́мѡ мѡѷсе́й раздѣли́тель вᲂдѣ̀ , здѣ́же гаврїи́лъ слꙋжи́тель чꙋдесѝ . тᲂгда̀ глꙋбинꙋ̀ немо́креннѡ ше́ствᲂвавъ і҆и҃ль , нн҃ѣ же хрⷭ҇та̀ рᲂдѝ без̾ сѣ́мене дв҃аѧ . мо́ре по прᲂше́ствїи і҆и҃левѣ , пребы́сть непрᲂхᲂди́мѡ . непᲂро́чнаѧ же по рᲂжествѣ̀ є҆мманꙋ́илевѣ , пребы́сть нетлѣ́нна . сы́и пре́жде сы́и , ꙗ҆вле́исѧ ꙗ҆́кѡ чл҃къ , бж҃е пᲂми́лꙋй на́съ .

та́же , вы́хᲂдъ с̾ кади́лᲂмъ . і҆єре́й же зна́менꙋетъ кади́лᲂмъ , к̾ црⷭ҇кимъ две́ремъ крⷭ҇то ѡ҆бра́знѡ , и҆ глаго́летъ : премꙋ́дрᲂсть про́сти . мы́же : свѣ́те ти́хїи . та́же : прᲂки́менъ дню̀ . гдⷭ҇ь вᲂцр҃и́сѧ и҆ в̾ лѣ́пᲂтꙋсѧ ѡ҆блечѐ . сти́хъ : ѡ҆блече́сѧ гдⷭ҇ь в̾ си́лꙋ , и҆ препᲂѧ́сасѧ . сти́хъ : и҆́бо =ᲂу҆твердѝ вселе́ннꙋю ꙗ҆́же непᲂдви́житсѧ . =сти́хъ : до́мꙋ твᲂемꙋ̀ пᲂдᲂба́етъ ст҃ы́ни гдⷭ҇и в̾ дᲂлгᲂтꙋ̀ дні́й . пᲂсе́мъ , і҆єре́й гл҃етъ : рце́мъ всѝ ѿ всеѧ̀ дш҃и . та́же , спᲂдо́би гдⷭ҇и в̾ ве́черъ . та́же , є҆ктенїѧ̀ : и҆спо́лнимъ вече́рнїѧ мл҃твы на́ша . пᲂсе́мъ литі́ѧ пᲂꙋста́вꙋ .

на стихо́внѣ , стихѣ́ра , вᲂскрⷭ҇на . гла́съ , є҃ . Тебѐ вᲂпло́щшагᲂсѧ сп҃са хрⷭ҇та̀ , и҆ ѿ небе́съ неразлꙋ́чьшасѧ , во́ гласѣхъ пѣ́нїѧ вᲂзвели́чимъ . ꙗ҆́кѡ крⷭ҇тъ и҆ сме́рть прїѧ́тъ за́ рᲂдъ на́шъ , ꙗ҆́кѡ чл҃кᲂлю́бецъ гдⷭ҇и , сᲂкрꙋши́выи а҆́дᲂва врата̀ , и҆ тридне́вно вᲂскрⷭ҇лъ є҆сѝ , спаса́ѧ дш҃а на́ша .

и҆́ны , стихѣ́ры , по а҆лфави́тꙋ . сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Прᲂбᲂде́нымъ ти ре́брᲂмъ живᲂда́вче , ка́пли ѡ҆ставле́нїѧ всѣ́мъ и҆стᲂчи́лъ є҆сѝ , жи́знь и҆ спасе́нїе . пло́тїю же сме́рть вᲂспрїѧ́тъ , без̾сме́ртїе на́мъ дарᲂва̀ . в̾сели́вжесѧ во́ грᲂбъ , на́съ свᲂбᲂди́лъ є҆сѝ , сᲂвᲂскр҃си́въ с̾сᲂбо́ю сла́внѡ ꙗ҆́кѡ бг҃ъ . сегѡ̀ ра́ди вᲂпїе́мъ ти , чл҃кᲂлю́бче гдⷭ҇и сла́ва тебѣ̀ .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Стра́нно твᲂѐ распѧ́тїе є҆́сть , и҆ є҆́же во а҆́дъ съше́ствїе чл҃кᲂлю́бче . плѣни́въ бо є҆гѡ̀ , и҆ дре́внїѧ ᲂу҆́жники сᲂвᲂскр҃си́лъ є҆сѝ с̾ сᲂбо́ю сла́внѡ ꙗ҆́кѡ бг҃ъ . ра́й ѿве́рзъ , наслади́тисѧ тᲂгѡ̀ спᲂдо́билъ є҆сѝ . тѣ́мже и҆ на́мъ сла́вѧщимъ тридне́внᲂе твᲂѐ вᲂста́нїе , да́рꙋй ѡ҆чище́нїе грѣхѡ́въ , раѧ̀ жи́телѧ спᲂдᲂблѧ́ѧ , ꙗ҆́кѡ є҆ди́нъ млрⷭ҇дъ .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . И҆́же на́съ ра́ди пло́тїю стрⷭ҇ть прїе́мъ , и҆ тридне́вно и҆з̾ ме́ртвыхъ вᲂскр҃съ , плᲂтьскі́ѧ на́ша стрⷭ҇ти и҆сцѣлѝ , и҆ вᲂста́ви ѿ сᲂгрѣше́нїи лю́тыхъ чл҃кᲂлю́бче , и҆ спасѝ на́съ .

сла́ва . самᲂгла́снꙋ стⷯрꙋ , ст҃о́мꙋ , а҆́ще и҆́мать . и҆ ны́нѣ , боⷢ҇ , прѧ́мѡ гла́сꙋ , стⷯры , дᲂгма́тикъ пᲂслѣ́днїи . а҆́ще ли не и҆́мать : сла́ва , и҆ ны́нѣ , боⷢ҇ . Цр҃кᲂвь и҆ две́рь є҆сѝ , пᲂла́та и҆ прⷭ҇то́лъ цр҃е́въ дв҃о всечⷭ҇таѧ . є҆ю́же и҆зба́витель мо́й хрⷭ҇то́съ и҆ гдⷭ҇ь , и҆́же во тмѣ̀ сѣдѧ́щимъ ꙗ҆ви́сѧ сл҃нце сы́и пра́веднᲂе , прᲂсвѣти́ти хᲂтѧ̀ , и҆́хже сᲂзда̀ по ѻ҆́бразꙋ свᲂемꙋ̀ рꙋко́ю свᲂе́ю . тѣ́мже всепѣ́таѧ , ꙗ҆́кѡ мт҃рьне дерзнᲂве́нїе к̾ немꙋ̀ стѧжа́вши , непреста́ннѡ мᲂлѝ спасти́сѧ дш҃а́мъ на́шимъ .

таⷤ , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , гла́съ , є҃ . сᲂбезнача́льнᲂе сло́во . сла́ва , и҆ ны́нѣ , боⷢ҇ , пи́санъ , на ᲂу҆́трени .= та́же , ѿ=пꙋ́стъ .

Въ сꙋбо́тꙋ , на па́вечерницѣ , гл҃етъ і҆єре́й : бл҃гᲂслᲂве́нъ бг҃ъ на́шъ . и҆ мы́же : а҆ми́нь , цр҃ю нбⷭ҇ныи . трⷭ҇то́е , и҆ по ѻ҆́ч҃е на́шъ . гдⷭ҇и пᲂми́лꙋй , в҃і . сла́ва , и҆ ны́нѣ . прїиди́те пᲂклᲂни́мсѧ , гⷤ . ѱл҃о́мъ , н҃ . пᲂми́лꙋй мѧ бж҃е . ѱл҃о́мъ , ѯ҃ѳ . бж҃е в̾ по́мᲂщь мᲂю̀ . ѱл҃о́мъ , рм҃в . гдⷭ҇и ᲂу҆слы́ши мл҃твꙋ мᲂю̀ . пᲂсе́мъ , сла́ва в̾ вы́шнихъ бг҃ꙋ . та́же , вѣ́рꙋю во є҆ди́нᲂго бг҃а . кано́нъ , прест҃ѣ́й бцⷣѣ , гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧ и҆ бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆и҃лѧ же спасѐ , пᲂбѣ́днꙋю пѣ́снь пᲂю́ща . запѣ́въ : прест҃а́ѧ гжⷭ҇е бцⷣе спасѝ на́съ . Пѣ́снь тѝ по дᲂстᲂѧ́нїю принᲂси́ти влⷣчце , недᲂꙋмѣ́емъ всѝ , сла́ва бо па́че всѧ̀ твᲂѧ̀ . но ѻ҆ба́че бг҃ᲂневѣ́сто , не ѡ҆мерзѝ мᲂле́нїе принᲂси́мᲂе со́ страхᲂмъ и҆ любо́вїю тебѣ̀ . Всѝ к̾ вᲂдѣ̀ твᲂегѡ̀ не ѡ҆скꙋ́днагѡ и҆сто́чника бцⷣе дв҃о притека́емъ зᲂвꙋ́ще , є҆ди́на ра́дᲂсти ро́дꙋ на́шемꙋ пречⷭ҇таѧ , и҆спрᲂсѝ ми́ръ цр҃квамъ твᲂи́мъ . сла́ва . Пᲂлᲂжи́ тѧ приста́нище сꙋ́щимъ в̾ бѣда́хъ чи́стаѧ бг҃ъ , и҆́же ѿ тебѐ бл҃гᲂвᲂли́выи вᲂспрїѧ́ти пло́ть . тѣ́мже ти припа́дающе взыва́емъ , да́рꙋй твᲂи́мъ рабо́мъ твᲂю̀ по́мᲂщь . и҆ ны́нѣ . Ѻ҆блегче́нїе твᲂѧ̀ мл҃тва дв҃о пречⷭ҇таѧ , твᲂи́мъ рабѡ́мъ бꙋ́ди , страсте́мъ ѿгна́нїе , грѣхо́мъ разрꙋше́нїе , и҆ всѧ́ческимъ бᲂлѣ́знемъ , бг҃ᲂрᲂди́тельнице ѡ҆чище́нїе .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . Ты̀ є҆сѝ земнᲂро́днымъ ᲂу҆пᲂва́нїе , и҆ по́мᲂщь и҆ ра́дᲂсть , пᲂкро́въ и҆ прибѣ́жище , влⷣчце мт҃и живᲂтꙋ̀ . тѣ́мже тѧ̀ мо́лимъ , твᲂю̀ по́мᲂщь низ̾пᲂслѝ , всѣ́мъ пᲂю́щимъ тѧ̀ пречⷭ҇таѧ . Недꙋ́гꙋющїи , и҆ напа́стьми лю́тыми ѡ҆держи́мїи , вседѣ́телю ще́дрыи , и҆́же всѧ́ческимъ бж҃е , пречⷭ҇тꙋю сѣ́нь , твᲂю̀ мт҃рь сп҃се , на мᲂльбꙋ́ ти приво́димъ , разрѣшѝ плени́цы прегрѣше́нїй на́шихъ . сла́ва . Всѣ́хъ сᲂдержи́телѧ и҆ зижди́телѧ и҆ гдⷭ҇а , ро́ждьшаѧ є҆ди́на и҆ дв҃ьствꙋющи . и҆ и҆́же вᲂи́стинꙋ тѧ̀ бж҃їю мт҃рь сла́вѧтъ , спасе́нїе бг҃ᲂневѣ́сто пᲂда́ждь свы́ше рабо́мъ свᲂи́мъ . и҆ ны́нѣ . Во́дъ живᲂтво́рныхъ мѧ̀ и҆спо́лни влⷣчце , ꙗ҆́же бжⷭ҇твенꙋю во́дꙋ ми́рᲂви и҆стᲂчи́вшаѧ , без̾зако́нїи мᲂи́хъ лю́тыѧ пᲂто́ки , и҆ срⷣца мᲂегѡ̀ во́лны , бжⷭ҇твенᲂю сѝ тишино́ю ᲂу҆крᲂтѝ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Ꙗ҆́кѡ всѣ́хъ вы́шшꙋ сꙋ́щꙋ тваре́й , тѧ̀ бг҃ъ сꙋ́щимъ на землѝ дарᲂва̀ , є҆́же к̾ немꙋ̀ хᲂда́тайствы вино́внꙋ , бцⷣе препѣ́таѧ . Цр҃кᲂвь тѧ̀ бж҃їю вѣ́дꙋще дв҃о мт҃и , прилѣ́жнѡ и҆́же тебѐ чтꙋ́щїи мо́лимсѧ , твᲂеѧ̀ млⷭ҇ти две́рь , незатвᲂрѝ бцⷣе рабѡ́мъ твᲂи́мъ . сла́ва . Тѧ̀ всѝ бж҃їю вѣ́дꙋще преꙋкра́шенꙋ вᲂи́стинꙋ ѻ҆де́ждꙋ , мт҃и бракᲂнеи҆скꙋ́снаѧ , и҆́же тѧ̀ чтꙋ́щїи про́симъ , во ѡ҆ставле́нїѧ ѻ҆де́ждꙋ ѡ҆блецы̀ на́съ . и҆ ны́нѣ . Ми́ръ в̾ ржⷭ҇тво̀ твᲂѐ пречⷭ҇таѧ , ве́сь и҆спо́лнисѧ ра́дᲂсти , ѿ не́лиже є҆́же ра́дꙋисѧ вели́кїи , тебѣ̀ дв҃о мт҃и мр҃і́е с̾вы́ше гаврїи́лъ вᲂз̾гласѝ .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Вᲂи́стинꙋ наказꙋ́емсѧ , но не по ра́венствꙋ до́лга сᲂгрѣше́нїи на́шихъ дв҃о , но ѽ дв҃о мт҃и пречⷭ҇таѧ , ѿвратѝ ве́сь гнѣ́въ сы́на твᲂегѡ̀ ѿ на́съ . Є҆ди́нᲂго и҆з̾ве́дшаго свѣ́тъ ѿ тмы̀ чи́стаѧ , бг҃а ро́ждьши не и҆скꙋсᲂбра́чнѡ , прилѣ́жнѡ мᲂлѝ є҆гѡ̀ низ̾пᲂсла́ти бжⷭ҇твеныи свѣ́тъ рабѡ́мъ тѝ . сла́ва . Ѿ каже́нїѧ мл҃твы твᲂеѧ̀ чⷭ҇таѧ , и҆ бжⷭ҇твенаѧ невѣ́сто ѿ лива́на , тѧ̀ сᲂло́мᲂнъ прᲂречѐ , рабы̀ твᲂѧ̀ мт҃и зижди́телѧ бл҃гᲂꙋха́й . и҆ ны́нѣ . Ты̀ пра́вдꙋ же и҆ и҆збавле́нїе на́мъ ро́ждьши хрⷭ҇та̀ без̾ сѣ́мене , свᲂбо́дно сᲂдѣ́ѧвъ бцⷣе , ѿ клѧ́твы є҆стество̀ пра́дѣднее .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Бцⷣе влⷣчце , ро́ждьшаѧ сᲂдѣ́телѧ , твᲂи́мъ рабѡ́мъ и҆спрᲂсѝ ѡ҆ставле́нїе , и҆ держа́внѡ вᲂз̾дви́гни во є҆́же пѣ́ти тѧ̀ . Бꙋ́ди на́мъ по́мᲂщь твᲂи́мъ рабѡ́мъ влⷣчце чⷭ҇таѧ , и҆́же вѣ́рнѡ мᲂлѧ́щимъ тѧ̀ , ꙗ҆́кѡ ми́лᲂстива , и҆ держа́вны на́съ вᲂздви́гни , во є҆́же пѣ́ти тѧ̀ . сла́ва . По дᲂстᲂѧ́нїю и҆мꙋ́щи є҆́же мᲂщѝ влⷣчце чⷭ҇таѧ , твᲂи́мъ млⷭ҇тивнымъ ѻ҆́кᲂмъ при́зри , и҆ ѿ тлѝ на́съ свᲂѧ̀ рабы̀ вᲂз̾ведѝ . и҆ ны́нѣ . Непреста́ннѡ тᲂча́щи , щедро́тъ стрꙋѝ бл҃га́ѧ прᲂсѧ́щимъ , ѡ҆дᲂждѝ и҆ мнѣ̀ свѣ́тъ за́пᲂвѣдей , твᲂегѡ̀ сн҃а пренепᲂро́чнаѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , є҃ . Всест҃а́ѧ дв҃о на́съ пᲂми́лꙋй , прибѣга́ющихъ вѣ́рᲂю к̾ тебѣ̀ милᲂсе́рдᲂй , и҆ прᲂсѧ́щихъ те́плᲂе твᲂѐ застꙋпле́нїе , мо́жеши бо ꙗ҆́кѡ бл҃га всѣ́хъ спастѝ , ꙗ҆́кѡ сꙋ́щи мт҃и бг҃а вы́шнѧгѡ , мт҃рьними сѝ мл҃твами , прⷭ҇нѡ дв҃о ѡ҆бъє́мши бг҃ᲂра́дᲂваннаѧ .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Не и҆зслѣ́днаѧ бж҃їѧ мꙋ́дрᲂсть хрⷭ҇тѐ , рабы̀ твᲂѧ̀ ᲂу҆ще́дри ро́ждьшїѧ тѧ̀ ра́ди , непреста́ннѡ пᲂю́щихъ , бж҃е блгⷭ҇ве́нъ є҆сѝ . Твᲂю̀ бл҃гᲂсть мо́лимъ гдⷭ҇и , ꙗ҆́звꙋ и҆сцѣлѝ ро́ждьшїѧ тѧ̀ ра́ди , со́страхᲂмъ пᲂю́щимъ , бж҃е блгⷭ҇ве́нъ є҆сѝ . сла́ва . Ѻ҆́кᲂмъ млⷭ҇тивнымъ сѝ бг҃ᲂмт҃и при́зри , и҆ спасѝ рабы̀ твᲂѧ̀ всѧ́кᲂгѡ ѡ҆бстᲂѧ́нїѧ , вѣ́рᲂю пᲂю́щїѧ , бж҃е блгⷭ҇ве́нъ є҆сѝ . и҆ ны́нѣ . Ѕло̀ дѣ́лающе влⷣчце , ѿ тебѐ ѿпадо́хᲂмъ , но ѡ҆брѣто́хᲂмъ пречⷭ҇таѧ а҆́бїе по́мᲂщь твᲂю̀ , внегда̀ зва́ти , бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . и҆з̾ =ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . Влⷣчце на́ша бл҃ги́хъ пᲂда́тельнице , рабо́мъ сѝ да́рꙋй стрⷭ҇те́й и҆сцѣле́нїе , ꙗ҆́кѡ да непреста́ннѡ пᲂе́мъ тѧ̀ дв҃це , и҆ превᲂзнᲂси́мъ во́ вѣки . Не и҆з̾гл҃аннѡ чи́стаѧ и҆зба́вителѧ ро́ждьши , несказа́ннѡ дᲂила̀ є҆сѝ дв҃ᲂю пребы́вши . є҆го́же ᲂу҆́бѡ мᲂлѝ ѡ҆ пᲂю́щихъ тѧ̀ , и҆ славᲂсло́вѧщихъ во всѧ̀ вѣ́ки . =сла́ва . Тебѣ̀ свѣ́тлᲂмꙋ и҆зба́вителю и҆ свѣ́щникꙋ , всеми́рныи спле́тше ли́къ пᲂе́мъ . всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки . и҆ ны́нѣ . Чи́стаѧ а҆́гнице , дв҃о мт҃и ѻ҆трᲂкᲂви́це , чи́ста мѧ сᲂтвᲂрѝ ѿ страсте́й тѣле́сныхъ , ꙗ҆́кѡ да льсти́вагѡ и҆зба́влюсѧ сѣте́й , пѣснᲂсло́вѧ тѧ бг҃ᲂра́дᲂваннаѧ .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆блажа́емъ . Сᲂверша́етсѧ пѣ́нїе ᲂу҆́бѡ , наде́жда же влⷣко хрⷭ҇тѐ непрехо́дна , ꙗ҆́же к̾ тебѣ̀ сᲂдѣ́телю , ꙗ҆́кᲂже и҆ бл҃гᲂда́ть твᲂѧ̀ , но ѿ ѻ҆бᲂю́дꙋ си́лꙋ крѣ́пкꙋ да́рꙋй рабѡ́мъ си , мл҃твами ро́ждьшїѧ тѧ̀ . Недꙋ́гꙋющимъ си́ла , и҆ бᲂлѧ́щихъ бли́зъ ты̀ є҆сѝ чи́стаѧ , ꙗ҆́кѡ и҆́стиннаѧ мт҃и жи́зни . к̾ тебѣ̀ прибѣга́юще , премѣне́нїе всѣ́хъ ско́рбныхъ ѡ҆брѣта́емъ влⷣчце , и҆ кро́вᲂмъ твᲂи́мъ спаса́емсѧ . сла́ва . Тво́й бжⷭ҇твеныи ви́дѧще ѡ҆бра́знѡ влⷣчце зра́къ , зри́мъ тѧ̀ в̾ не́мъ ꙗ҆́кᲂже ꙗ҆́вѣ , всѧ́ко ненави́дѧще є҆рети́къ безꙋ́мїе на землѝ , є҆мꙋ́же припа́дающе и҆сцѣле́нїе прїе́млемъ . и҆ ны́нѣ . И҆сцѣле́ней бе́зднꙋ , и҆ бл҃гᲂдѣ́тей пꙋчи́нꙋ , чи́стаѧ пᲂзна́хᲂмъ мѧ мы̀ грѣ́шнїи . тѣ́мжетисѧ мо́лимъ , нꙋ́жныхъ всѣ́хъ и҆змѝ є҆ди́на пречⷭ҇таѧ , притека́ющихъ къ пᲂкро́вꙋ твᲂемꙋ̀ .

та́же , дᲂсто́йно є҆́сть . пᲂсе́м̾ , трⷭ҇то́е , и҆ по ѻ҆́ч҃е на́шъ , кᲂнда́къ , гла́сꙋ . гдⷭ҇и пᲂми́лꙋй , м҃ . про́чее , ѡ҆бы́чно . та́же , ѿпꙋ́стъ . и҆ прᲂще́нїе .

И҆звѣ́стно же бꙋ́ди . ꙗ҆́кѡ пᲂдᲂба́етъ пѣ́ти пᲂлꙋ́нᲂщница по всѧ̀ вᲂскрⷭ҇нїѧ си́це . і҆єре́ю , наче́ншꙋ : блгⷭ҇ве́нъ бг҃ъ на́шъ , всегда̀ и҆ ны́нѣ и҆ прⷭ҇нѡ и҆ во́ вѣки вѣко́мъ . мы̀ гл҃емъ : а҆ми́нь .= Сла́ва тебѣ̀ бж҃е на́шъ сла́ва тебѣ̀ , всѧ́ческихъ ра́ди . гⷤ . =пᲂсе́мъ : Бж҃е ѡ҆чи́сти мѧ грѣ́шнагѡ , ꙗ҆́кѡ никᲂли́же бл҃го сᲂтвᲂри́хъ пред̾ тᲂбо́ю , но и҆зба́ви мѧ ѿ лꙋка́вагѡ , и҆ да бꙋ́детъ во мнѣ̀ во́лѧ твᲂѧ̀ , да неѡ҆сꙋжде́но ѿве́рзꙋ ᲂу҆ста̀ мᲂѧ̀ недᲂсто́йнаѧ , и҆ вᲂсхвалю̀ и҆́мѧ твᲂѐ ст҃о́е , ѻ҆ц҃а и҆ сн҃а и҆ ст҃а́гѡ дх҃а , и҆ нн҃ѣ и҆ прⷭ҇нѡ и҆ во́ вѣки вѣкѡ́мъ , а҆ми́нь . та́же , цр҃ю нбⷭ҇ныи . трⷭ҇то́е , и҆ по ѻ҆́ч҃е на́шъ . і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво . та́же , Гдⷭ҇и пᲂми́лꙋй , в҃і . пᲂсе́мъ , мл҃тва . Ѿ сна̀ вᲂста́въ , бл҃гᲂдарю́ тѧ всест҃а́ѧ трⷪ҇це , ꙗ҆́кѡ мно́гїѧ ра́ди бл҃гᲂсти и҆ дᲂлгᲂтерпѣ́нїѧ , непрᲂгнѣ́васѧ на мѧ̀ грѣ́шнагѡ , и҆ лѣни́ваго раба̀ твᲂегѡ̀ , и҆ непᲂгꙋбѝ менѐ со без̾зако́нїи мᲂи́ми , но чл҃кᲂлю́бствᲂва , и҆ внѣ̀ ча́ѧнїи лежа́ща вᲂз̾дви́же мѧ ᲂу҆́треневати , и҆ славᲂсло́вити держа́вꙋ твᲂю̀ непᲂбѣди́мꙋю . и҆ ны́нѣ влⷣко бж҃е прест҃ы́и , прᲂсвѣтѝ ѻ҆́чи срⷣца мᲂегѡ̀ , и҆ ѿве́рзи ми ᲂу҆стнѣ̀ пᲂꙋча́тисѧ слᲂвесе́мъ твᲂи́мъ , и҆ разꙋмѣ́ти за́пᲂвѣди твᲂѧ̀ . и҆ твᲂри́ти во́лю твᲂю̀ , и҆ пѣ́ти тѧ во и҆спᲂвѣ́данїи серде́чнѣмъ , вᲂспѣва́ти же и҆ сла́вити , пречⷭ҇тно́е и҆ великᲂлѣ́пᲂе и҆́мѧ твᲂѐ , ѻ҆ц҃а и҆ сн҃а и҆ ст҃а́гѡ дх҃а , нн҃ѣ и҆ прⷭ҇нѡ и҆ во́ вѣки вѣкѡ́мъ , а҆ми́нь . та́же , прїиди́те пᲂклᲂни́мсѧ , гⷤ . ѱл҃о́мъ , н҃ . пᲂми́лꙋй мѧ бж҃е . та́же , і҆єре́й , вᲂз̾гла́съ . ми́лᲂстїю и҆ щедро́тами и҆ чл҃кᲂлю́бїемъ , є҆динᲂро́днагѡ сн҃а твᲂегѡ̀ , с̾ ни́мже блгⷭ҇ве́нъ є҆сѝ , и҆ с̾ прест҃ы́мъ и҆ бл҃ги́мъ , и҆ живᲂтвᲂрѧ́щимъ тѝ дх҃ᲂмъ . и҆ ны́нѣ и҆ прⷭ҇нѡ и҆ во́ вѣки вѣкѡ́мъ , а҆ми́нь .

Кано́нъ ст҃ѣ́й живᲂнача́льнѣй трⷪ҇цѣ , твᲂре́нїе митрᲂфа́нᲂво . є҆мꙋ́же краегране́сїе си́це . пра́вило пѧ́тᲂе , свѣ́тꙋ трисл҃нчнᲂмꙋ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧ и҆ бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆и҃лѧ же спасѐ , пᲂбѣ́днꙋю пѣ́снь пᲂю́ща . запѣ́в̾ : прест҃а́ѧ трⷪ҇це бж҃е на́шъ сла́ва тебѣ̀ . Держа́вꙋ є҆ди́нꙋ , и҆ трисл҃нчныи зра́къ вᲂспѣва́юще , мы̀ вᲂпїе́мъ , ᲂу҆́мъ на́шъ ѡ҆зарѝ бж҃е всеси́льне , и҆ къ твᲂе́й влⷣко прелᲂжѝ сла́вѣ не и҆зрече́ннѣй . Вы́ше тѧ̀ а҆́нг҃льскїѧ красᲂты̀ мы́сленыѧ , немо́лчнѡ пᲂю́тъ трист҃ы́ми пѣ́сньми , є҆ди́нꙋ трисо́лнечнꙋю трⷪ҇цꙋ , сᲂѡ҆бра́знꙋ пресꙋ́щнꙋю и҆ всеси́льнꙋю . сла́ва . Бжⷭ҇твенᲂе питїѐ твᲂеѧ̀ любвѐ , сла́дкᲂе свѣтᲂдѣ́йственᲂе дш҃и мᲂе́й пᲂда́ждь , трⷪ҇це є҆ди́нице без̾нача́льныи свѣ́те , и҆ бжⷭ҇твенᲂе ᲂу҆миле́нїе чисти́тельнᲂе , влⷣко мнᲂгᲂмлⷭ҇тиве всеѧ̀ тва́ри . и҆ нн҃ѣ . Ꙗ҆́кᲂже на рꙋно̀ сни́де бе́з̾шꙋма с̾ нб҃съ дв҃о , во ᲂу҆тро́бꙋ твᲂю̀ до́ждь бжⷭ҇твеныи , и҆ спасѐ и҆з̾со́хшее всѐ чл҃ческᲂе є҆стество̀ пречⷭ҇таѧ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . Пᲂмы́сливъ , ᲂу҆́мнаѧ сꙋ́щества сᲂста́вилъ є҆сѝ , пѣвцы̀ непреста́нны твᲂегѡ̀ бжⷭ҇тва̀ , трисвѣ́тлыи бж҃е , и҆ вседѣ́телю , но и҆ бре́нныхъ и҆ земнᲂро́дныхъ прїимѝ мᲂльбꙋ̀ и҆ мᲂле́нїе , ꙗ҆́кѡ бл҃гᲂꙋтро́бенъ . И҆́же всѧ́кᲂгѡ по є҆стествꙋ̀ прелᲂже́нїѧ непрїѧ́тенъ , и҆змѣне́нымъ на́мъ и҆ пᲂю́щимъ , не и҆зслѣ́димыи и҆сто́чникъ бл҃гᲂсти твᲂеѧ̀ , прегрѣше́нїемъ да́ждь прᲂще́нїе , сл҃нце сла́вѣ и҆ гдⷭ҇и . сла́ва . Ѻ҆ц҃а , и҆ сн҃а , и҆ дх҃а сла́вимъ , в̾ не премѣ́ннѣ зра́цѣ бжⷭ҇тва̀ , тебѐ є҆ди́нственагѡ и҆ трисїѧ́ннаго гдⷭ҇а всѣ́хъ . ꙗ҆́кᲂже прᲂро́цы и҆ а҆пⷭ҇ли ѿ тебѐ ꙗ҆́вѣ наꙋчи́шасѧ . и҆ ны́нѣ . Ꙗ҆ви́лсѧ є҆сѝ мѡѷсе́ю в̾ кꙋпинѣ̀ , ꙗ҆́кѡ а҆́нг҃лъ сᲂвѣ́та вели́кагѡ вседержи́телю , твᲂѐ ѿ дв҃ы прᲂѧвлѧ́ѧ вᲂплᲂще́нїе бж҃їи сло́ве , и҆́мже на́съ ѡ҆зна́менавъ , и҆ на нб҃са̀ вᲂзве́лъ є҆сѝ .

Гдⷭ҇и пᲂми́лꙋй , гⷤ . сѣда́ленъ , гла́съ , є҃ . Млⷭ҇тива є҆сѝ трⷪ҇це нераздѣ́льнаѧ , ми́лꙋеши бо всѣ́хъ ꙗ҆́кѡ всеси́ленъ , и҆ ꙗ҆́кѡ всеще́дръ прᲂща́ѧ , и҆ мнᲂгᲂмлⷭ҇тивъ . тѣ́мже прибѣга́емъ к̾ тебѣ̀ , грѣхѝ мно́гими ѡ҆тѧгче́ни зᲂвꙋ́ще , ѡ҆чи́сти рабы̀ свᲂѧ̀ , и҆ и҆зба́ви всѣ́хъ , всѧ́кїѧ мꙋ́ки . сла́ва , и҆ ны́нѣ , боⷢ҇ . Всест҃а́ѧ дв҃о на́съ пᲂми́лꙋй , прибѣга́ющихъ вѣ́рᲂю к̾ тебѣ̀ милᲂсе́рднᲂй , и҆ прᲂсѧ́щихъ те́плᲂе твᲂѐ застꙋпле́нїе , мо́жеши бо ꙗ҆́кѡ бл҃га̀ всѣ́хъ спастѝ , ꙗ҆́кѡ сꙋ́щи мт҃и бг҃а вы́шнѧго , мт҃рьними сѝ мл҃твами при́снѡ ѡ҆бъє́мши бг҃ᲂра́дᲂваннаѧ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Та́йнѡ наꙋча́етсѧ є҆ди́нᲂго гдⷭ҇ьства трист҃о́мꙋ данїи́лъ , хрⷭ҇та̀ сꙋдїю̀ ᲂу҆зрѣ́въ ко ѻ҆ц҃ꙋ и҆дꙋ́ща , сн҃а и҆ дх҃а прᲂѧвлѧ́ѧ видѣ́нїе . Бре́нными ᲂу҆сты̀ пᲂю́щихъ тѧ̀ пресꙋ́щнаго бг҃а , тро́ична сᲂста́вы , є҆ди́нствена же є҆стество́мъ , сла́вы а҆́нг҃льскїѧ спᲂдо́би . сла́ва . Є҆ди́нꙋ вла́сть , и҆ є҆ди́но же гдⷭ҇ьство , в̾ трїе́хъ сво́йствѣхъ неразлꙋ́чно сла́вимъ , ѻ҆́ч҃е и҆ сн҃е и҆ д́ш҃е , прᲂсвѣтѝ на́съ рабы̀ свᲂѧ̀ . и҆ нн҃ѣ . Го́рꙋ тѧ ст҃ꙋ́ю и҆ присѣ́ннꙋю , ю҆́же ви́дѣ пре́жде а҆вва́кꙋмъ , и҆з̾ неѧ́же про́йдетъ ст҃ы́и , неꙋдо́бь ви́димᲂе ржⷭ҇тво̀ ꙗ҆влѧ́ше , ѿ дв҃ы зача́тїѧ .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . И҆́же за бл҃гᲂсть сᲂзда́въ чл҃ка , и҆ по ѻ҆́бразꙋ свᲂемꙋ̀ сᲂтвᲂри́въ , во мнѣ̀ ѡ҆бита́й трисвѣ́те бж҃е мо́й , ꙗ҆́кѡ бл҃гъ и҆ млⷭ҇тивъ . Ты́ мѧ наста́ви є҆ди́нице трисо́лнечнаѧ , к̾ стезѧ́мъ бжⷭ҇твенагѡ спасе́нїѧ , и҆ твᲂегѡ̀ сїѧ́нїѧ и҆спо́лни . ꙗ҆́кѡ є҆стество́мъ бг҃ъ не и҆сче́тно си́ленъ . сла́ва . Свѣ́тъ нераздѣ́льныи є҆стество́мъ , раздѣле́нъ со́бствы , трисїѧ́ненъ невече́ренъ , мᲂѐ срⷣце зрѣ́ти свѣ́ты твᲂи́ми ѡ҆зарѝ . и҆ нн҃ѣ . Ꙗ҆́кѡ ви́дѣ тѧ̀ дре́вле чи́стаѧ прест҃а́ѧ прᲂро́къ , зрѧ́щꙋю две́рь к̾ свѣ́тꙋ незахᲂди́мᲂмꙋ , а҆́бїе тѧ̀ пᲂзна̀ бж҃їе жили́ще .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Трисвѣ́тлᲂе сꙋщество̀ , бг҃ᲂнача́лїѧ сᲂста́вы , є҆ди́нствено сїѧ́ѧ , ꙗ҆́кѡ сᲂѡ҆бра́зно и҆ равнᲂдѣ́тельно по сꙋ́ществꙋ , и҆ хᲂтѣ́нїю . Дᲂво́льно сказа̀ прᲂро́къ пᲂѧ̀ ѻ҆ц҃е́ви , свѣ́тᲂмъ дх҃а ᲂу҆́зримъ свѣ́тъ сн҃а . є҆ди́нᲂго бг҃а трисл҃нчнаго . сла́ва . Несᲂста́вно сꙋщество̀ в̾ трїе́хъ со́бствѣхъ , є҆ди́нꙋ вла́сть и҆ держа́вꙋ и҆мы́и . тѣ́ми бо сᲂстᲂи́тсѧ тва́рь всѧ́каѧ , и҆ ѡ҆бнᲂвлѧ́етсѧ . и҆ ны́нѣ . Прегрѣше́ней и҆ напа́стей и҆збавле́нїе , бл҃гᲂꙋтро́бныи бж҃е є҆ди́нствᲂмъ трисвѣ́те , низ̾пᲂслѝ твᲂи́мъ пѣвце́мъ , мл҃твами бг҃ᲂмт҃ре .

Гдⷭ҇и пᲂми́лꙋй , гⷤ . сѣда́ленъ , гла́съ , є҃ . Пᲂми́лꙋй мѧ сп҃се мо́й пᲂми́лꙋй мѧ , и҆ не ѡ҆бличѝ млⷭ҇тиве гнѣ́вᲂмъ твᲂи́мъ , нижѐ вни́ди въ сꙋ́дъ съ рабо́мъ твᲂи́мъ . а҆́зъ бо вѣ́мъ вᲂи́стинꙋ ᲂу҆кᲂрѧ́ти ми , мᲂѧ̀ без̾чи́сленаѧ прегрѣше́нїѧ , пред̾ тᲂбо́ю ще́дрыи . тѣ́мже тѝ зᲂвꙋ̀ , пᲂми́лꙋй мѧ . сла́ва , и҆ ны́нѣ , боⷢ҇ . Недᲂꙋмѣ́всѧ ѿ всю́дꙋ , къ тебѣ̀ прибѣго́хъ наде́жди всѣ́хъ , и҆ прибѣ́жищꙋ грѣ́шныхъ и҆ смире́ныхъ , зᲂвꙋ̀ сᲂгрѣши́хъ , и҆ прилѣжꙋ̀ го́ршимъ нечꙋ́вственѣ ѡ҆каѧ́нныи . пᲂми́лꙋй мѧ пре́жде кᲂнца̀ , ѡ҆брати́ мѧ и҆ и҆зба́ви , всѧ́кᲂго мꙋче́нїѧ дᲂсто́йна .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Ꙗ҆́кѡ млⷭ҇ти бе́зднꙋ и҆мѣ́ѧ гдⷭ҇и , и҆ пꙋчи́нꙋ не ѡ҆скꙋ́днꙋ ще́дре , пᲂми́лꙋй , є҆ди́наго тѧ̀ пᲂю́щихъ трисїѧ́нна бг҃а всѣ́хъ . Недᲂмы́слимаго є҆ди́нства , и҆ трисвѣ́тла бг҃а тѧ̀ и҆ гдⷭ҇а пᲂю́ще , вᲂпїе́мъ тѝ , пᲂда́ждь рабо́мъ твᲂи́мъ ѡ҆чище́нїе сᲂгрѣше́нїемъ . сла́ва . Ра́вны сᲂста́вы во є҆ди́нѣй держа́вѣ чтꙋ́ще , раздѣлѧ́емы , нераздѣли́мо сꙋщество̀ , бг҃а ѻ҆ц҃а и҆ сн҃а и҆ прест҃а́гѡ дх҃а . и҆ ны́нѣ . Ѿр́асль прᲂзѧбла̀ є҆сѝ дв҃о , ѻ҆ц҃ꙋ сᲂбез̾нача́льна , цвѣ́тъ бжⷭ҇тва̀ , сте́бль приснѡсꙋ́щнꙋ , даю́щаго жи́знь всѣ́мъ чл҃кѡмъ .

пѣ́снь , и҃ . і҆рмо́съ . Тебѣ̀ вседѣ́телю в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Да є҆ди́нᲂгѡ ѿкры́еши дре́вле ꙗ҆́вѣ гдⷭ҇ьства , тро́ичныѧ сᲂста́вы , ꙗ҆ви́лсѧ є҆сѝ бж҃е мо́й во ѻ҆́бразѣ челᲂвѣ́чи а҆враа́мꙋ , пᲂю́щꙋ держа́вꙋ твᲂю̀ є҆ди́нственꙋю . Ты́ мѧ к̾ твᲂи́мъ бг҃ᲂдѣ́тельнымъ лꙋча́мъ , зрѣ́ти спᲂдо́би свѣ́те непристꙋ́пныи , ѻ҆́ч҃е вседержи́телю , и҆ сло́ве , и҆ д́ш҃е , ᲂу҆гᲂжда́ти тебѣ̀ при́снѡ гдⷭ҇и всѣ́хъ . сла́ва . Ст҃ъ ѻ҆ц҃ъ , бг҃ъ превѣ́чныи , ст҃ъ же сы́нъ , и҆з̾ ѻ҆ц҃а рᲂжде́нъ , ст҃ъ же и҆ живᲂтвᲂрѧ́щїи дх҃ъ , и҆зхᲂдѧ̀ и҆з̾ ѻ҆ц҃а , сы́нᲂмъ же ꙗ҆влѧ́емь . и҆ ны́нѣ . Ѡ҆блиста́ла є҆сѝ на́мъ ѿ трисл҃нчнагѡ свѣ́та є҆ди́нᲂго всепѣ́таѧ хрⷭ҇та̀ и҆ гдⷭ҇а , всѣ́хъ наꙋча́юща є҆ди́но бг҃ᲂнача́лїе , в̾ трїе́хъ лицѣ́хъ пѣ́ти во́ вѣки .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Глаго́ланїѧ тѧ̀ чл҃ча , по дᲂстᲂѧ́нїю без̾нача́льнаѧ є҆ди́нице , немо́гꙋтъ пѣ́ти . ѻ҆ба́че ꙗ҆́кѡ дᲂстᲂдо́лжнѡ дерза́юще ѿ вѣ́ры , бг҃ᲂнача́льнаѧ сᲂпресто́льнаѧ є҆ди́нице , сла́вꙋ прино́симъ твᲂе́й держа́вѣ и҆ хвалꙋ̀ . Равнᲂсїѧ́тельна в̾ сла́вѣ , є҆динᲂнача́льнаго тѧ̀ трисвѣ́та бг҃а , пᲂю́тъ херꙋви́ми и҆ серафи́ми пречи́стыми ᲂу҆сты̀ . с̾ ни́ми же и҆ на́съ грѣ́шныхъ прїимѝ гдⷭ҇и , твᲂю̀ держа́вꙋ велича́ющихъ . сла́ва . І҆са́їѧ тѧ̀ ви́дѣ на престо́лѣ херꙋви́мстѣ , и҆ серафи́ми стᲂѧ́ща ѻ҆́крⷭ҇тъ тебѐ , кри́лы лица̀ закрыва́юща , и҆ вᲂпїю́ща , ст҃ъ , ст҃ъ , ст҃ъ , трист҃ы́и бж҃е , сла́вимыи в̾ трїе́хъ со́бствѣхъ . и҆ нн҃ѣ . Ꙗ҆́кѡ чⷭ҇таѧ и҆ непᲂро́чнаѧ дв҃аѧ , рᲂдила̀ є҆сѝ сн҃а бг҃а не и҆змѣ́нна , и҆збавлѧ́юща на́съ ѿ и҆скꙋше́нїи . но и҆ ны́нѣ ѡ҆ставле́нїе на́шимъ прегрѣше́нїемъ низ̾пᲂсла́ти мо́лимсѧ .

пᲂсе́м̾ , припѣ́вы , григо́рїѧ синаи́та . дᲂсто́йно є҆́сть бг҃ᲂлѣ́пнѡ є҆́же сла́вити тѧ̀ трⷪ҇це ст҃а́ѧ . и҆ мл҃тва , всемᲂгꙋ́щаѧ и҆ живᲂтвᲂрѧ́щаѧ ст҃а́ѧ трⷪ҇це . пи́сано , на пᲂслѣдѝ в̾ кни́зѣ се́й .

Нача́ло ᲂу҆́трени по всѧ̀ нлⷣи . наче́ншꙋ і҆єре́ю : бл҃гᲂслᲂве́нъ бг҃ъ на́шъ , всегда̀ и҆ нн҃ѣ и҆ при́снѡ и҆ во́ вѣки вѣкѡ́мъ . мы́же : а҆ми́нь .= трⷭ҇то́е , и҆ по ѻ҆́ч҃е на́шъ . =і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво . та́же , гдⷭ҇и пᲂми́лꙋй , в҃і . сла́ва , и҆ нн҃ѣ , прїиди́те пᲂклᲂни́мсѧ , гⷤ . та́же , ѱл҃о́мъ , ѳі҃ . ᲂу҆слы́шитъ тѧ гдⷭ҇ь в̾ де́нь печа́ли . ѱл҃о́мъ , к҃ . гдⷭ҇и си́лᲂю твᲂе́ю вᲂз̾весели́тсѧ цр҃ь . сла́ва , и҆ нн҃ѣ . трⷭ҇то́е , и҆ по ѻ҆́ч҃е на́шъ . трᲂпа́рь , гла́съ , а҃ . спасѝ гдⷭ҇и лю́ди свᲂѧ̀ . сла́ва . вᲂзнесы́исѧ на́ крⷭ҇тъ во́лею . и҆ ны́нѣ . пред̾ста́тельнице стра́шнаѧ . та́же , і҆єре́й глаго́летъ є҆ктенїю̀ : пᲂми́лꙋй на́съ бж҃е по вели́цѣй млⷭ҇ти твᲂе́й . є҆щѐ мо́лимсѧ ѡ҆ странѣ̀ на́шей рᲂсси́йстей . є҆щѐ мо́лимсѧ за всю̀ бра́тїю и҆ за всѧ̀ хрⷭ҇тїа́ны , ѡ҆ здра́вїи и҆ ѡ҆ спасе́нїи . та́же , вᲂз̾гла́съ : ꙗ҆́кѡ ми́лᲂстивъ и҆ чл҃кᲂлю́бецъ бг҃ъ є҆сѝ . та́же , Сла́ва ст҃ѣ́й є҆динᲂсꙋ́щнѣй и҆ живᲂтвᲂрѧ́щѣй и҆ нераздѣли́мѣй трⷪ҇цѣ , всегда̀ и҆ нн҃ѣ и҆ прⷭ҇нѡ и҆ во́ вѣки вѣкѡ́мъ . мы́же : а҆ми́нь .= Сла́ва въ вы́шнихъ бг҃ꙋ , и҆ на землѝ ми́ръ , в̾ чл҃цѣхъ бл҃гᲂвᲂле́нїе , гⷤ . =та́же , гдⷭ҇и ᲂу҆стнѣ̀ мᲂѝ ѿве́рзеши , и҆ ᲂу҆ста̀ мᲂѧ̀ вᲂзвѣстѧ́тъ хвалꙋ̀ твᲂю̀ , вⷤ . пᲂсе́мъ , ѱл҃о́мъ , г҃ . гдⷭ҇и что́сѧ ᲂу҆мно́жиша стꙋжа́ющїи мѝ . ѱл҃о́мъ , л҃з . гдⷭ҇и не ꙗ҆́рᲂстїю твᲂе́ю ѡ҆бличѝ менѐ . ѱл҃о́мъ , ѯ҃в . бж҃е бж҃е мо́й , к̾ тебѣ̀ ᲂу҆́тренюю . та́же , сла́ва , и҆ ны́нѣ . а҆ллилꙋ́їѧ , гⷤ , без̾ пᲂкло́нᲂвъ . гдⷭ҇и пᲂми́лꙋй , гⷤ . сла́ва , и҆ ны́нѣ . ѱл҃о́мъ , п҃з . гдⷭ҇и бж҃е спасе́нїѧ мᲂегѡ̀ . ѱл҃о́мъ , р҃в . блгⷭ҇вѝ дш҃е мᲂѧ̀ гдⷭ҇а . ѱл҃о́мъ , рм҃в . гдⷭ҇и ᲂу҆слы́ши мл҃твꙋ мᲂю̀ . та́же , сла́ва , и҆ ны́нѣ , а҆ллилꙋ́їѧ , гⷤ . пᲂсе́мъ , і҆єре́й гл҃етъ , є҆ктенїю̀ вели́кꙋю : ми́рᲂмъ гдⷭ҇ꙋ пᲂмо́лимсѧ . и҆ по вᲂз̾гла́сѣ пᲂе́мъ , в̾ настᲂѧ́щїй гла́съ , ѻ҆кта́ѧ . бг҃ъ гдⷭ҇ь и҆ ꙗ҆ви́сѧ на́мъ , бл҃гᲂслᲂве́нъ грѧды́и во́ и҆мѧ гдⷭ҇не . сти́хъ , а҃ . и҆спᲂвѣ́дайтесѧ гдⷭ҇ви ꙗ҆́кѡ бл҃гъ , ꙗ҆́кѡ во́ вѣки млⷭ҇ть є҆гѡ̀ . сти́хъ , в҃ . ѡ҆быше́дше ѡ҆быдо́ша мѧ , и҆ и҆́менемъ гдⷭ҇нимъ прᲂтивлѧ́хсѧ и҆́мъ . сти́хъ , г҃ . не ᲂу҆мрꙋ̀ но жи́въ бꙋ́дꙋ , и҆ пᲂвѣ́мъ дѣ́ла гдⷭ҇нѧ . сти́хъ , д҃ . ка́мень є҆го́же небрего́ша зи́ждꙋщїи , се́й бы́сть во главꙋ̀ ᲂу҆́глꙋ , ѿ гдⷭ҇а бы́сть се́й , и҆ є҆́сть ди́вна во ѻ҆́чїю на́шею .

трᲂпа́рь , вᲂскрⷭ҇нъ . гла́съ , є҃ . Сᲂбез̾нача́льнᲂе сло́во ѻ҆ц҃ꙋ и҆ дх҃ᲂви , є҆́же ѿ дв҃ы ро́ждьшеесѧ на спасе́нїе на́ше , вᲂспᲂе́мъ вѣ́рнїи и҆ пᲂклᲂни́мсѧ , ꙗ҆́кѡ бл҃гᲂи҆зво́ли пло́тїю взы́ти на́ крⷭ҇тъ , и҆ сме́рть претерпѣ́ти , и҆ вᲂскреси́ти ᲂу҆ме́ршїѧ , в̾ сла́внᲂе вᲂскрⷭ҇нїе свᲂѐ . двⷤа . сла́ва , ст҃о́мꙋ , и҆́же тᲂгѡ̀ днѐ .= и҆ ны́нѣ , боⷢ҇ . по́ гласꙋ трᲂпарѧ̀ ст҃а́гѡ . =а҆́ще ли не и҆́мать , то̀ гл҃емъ : сла́ва , и҆ ны́нѣ , боⷢ҇ . Ра́дꙋисѧ две́ри гдⷭ҇нѧ непрᲂхᲂди́маѧ . ра́дꙋисѧ стѣно̀ и҆ пᲂкро́ве , прибѣга́ющимъ к̾ тебѣ̀ . ра́дꙋисѧ завѣ́тренее приста́нище не и҆скꙋсᲂбра́чнаѧ , ро́ждьшаѧ пло́тїю твᲂрца̀ свᲂегѡ̀ и҆ бг҃а , мᲂлѧ́щи непре́зри ѡ҆ вᲂспѣва́ющихъ , и҆ кла́нѧющихсѧ ржⷭ҇твꙋ̀ твᲂемꙋ̀ .

по а҃ , стихᲂло́гїи . сѣда́ленъ , вᲂскрⷭ҇нъ . гла́съ , є҃ . Крⷭ҇тъ гдⷭ҇нь да пᲂхва́лимъ . пᲂгребе́нїе ст҃о́е пѣ́сньми пᲂчте́мъ , и҆ вᲂскрⷭ҇нїе є҆гѡ̀ прᲂсла́вимъ , ꙗ҆́кѡ сᲂвᲂздви́же ме́ртвыѧ ѿ гро́бъ ꙗ҆́кѡ бг҃ъ , плѣни́въ сме́рти держа́вꙋ , и҆ крѣ́пᲂсть дїа́вᲂлю . и҆ сꙋ́щимъ во а҆́дѣ свѣ́тъ вᲂсїѧ̀ . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Крⷭ҇тъ гдⷭ҇нь да пᲂхва́лимъ . пᲂгребе́нїе ст҃о́е пѣ́сньми пᲂчте́мъ , и҆ вᲂскрⷭ҇нїе є҆гѡ̀ прᲂсла́вимъ , ꙗ҆́кѡ сᲂвᲂздви́же ме́ртвыѧ ѿ гро́бъ ꙗ҆́кѡ бг҃ъ , плѣни́въ сме́рти держа́вꙋ , и҆ крѣ́пᲂсть дїа́вᲂлю . и҆ сꙋ́щимъ во а҆́дѣ свѣ́тъ вᲂсїѧ̀ . сла́ва , и҆ ны́нѣ , боⷢ҇ . Ди́вно чꙋ́до зача́тїѧ , и҆ не и҆зрече́ненъ ѻ҆́бразъ рᲂжде́нїѧ в̾ тебѣ̀ пᲂзна́сѧ чⷭ҇таѧ при́снѡ дв҃о . ᲂу҆дивлѧ́етъ ми ᲂу҆́мъ , и҆ ᲂу҆жаса́етъ по́мыслъ . сла́ва твᲂѧ̀ бцⷣе по всѣ́хъ прᲂстре́сѧ , ко спасе́нїю дш҃а́мъ на́шимъ .

по в҃ , стихᲂло́гїи , сѣда́ленъ . гла́съ , є҃ . Гдⷭ҇и ме́ртвъ нарече́сѧ , ᲂу҆мерщвле́и сме́рть . во́ грᲂбѣ пᲂлᲂжи́всѧ , и҆спражне́и гро́бы . верхꙋ̀ во́ини гро́бъ стрежа́хꙋ , ни́зꙋ ꙗ҆́же ѿ́ вѣка ме́ртвыѧ вᲂскреси́лъ є҆сѝ , всеси́льне и҆ непᲂстижи́ме гдⷭ҇и сла́ва тебѣ̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . Гдⷭ҇и ме́ртвъ нарече́сѧ , ᲂу҆мерщвле́и сме́рть . во́ грᲂбѣ пᲂлᲂжи́всѧ , и҆спражне́и гро́бы . верхꙋ̀ во́ини гро́бъ стрежа́хꙋ , ни́зꙋ ꙗ҆́же ѿ́ вѣка ме́ртвыѧ вᲂскреси́лъ є҆сѝ , всеси́льне и҆ непᲂстижи́ме гдⷭ҇и сла́ва тебѣ̀ . сла́ва , и҆ ны́нѣ , боⷢ҇ . Ра́дꙋисѧ ст҃а́ѧ гᲂро̀ и҆ бг҃ᲂпрᲂхо́днаѧ . ра́дꙋисѧ ѡ҆дш҃евле́наѧ кꙋпино̀ и҆ не ѡ҆пали́маѧ . ра́дꙋисѧ ꙗ҆́же є҆ди́на к̾ бг҃ꙋ ми́рᲂви мо́стъ , превᲂдѧ́щи ме́ртвыѧ к̾ вѣ́чнᲂмꙋ живᲂтꙋ̀ . ра́дꙋисѧ нетлѣ́ннаѧ ѻ҆трᲂкᲂви́це , не и҆скꙋсᲂмꙋ́жно ро́ждьшаѧ спасе́нїе дш҃а́мъ на́шимъ .

та́же , кафи́сма : бл҃же́ни непᲂро́чнїи .= пᲂсе́м̾ , трᲂпарѝ : а҆́нг҃льскїи сᲂбо́ръ . пи́саны , в̾ кᲂнцѣ̀ кни́ги сеѧ̀ . =та́же , і҆єре́й гл҃етъ , є҆ктенїю̀ ма́лꙋю . по вᲂз̾гла́сѣ , и҆пако́й . А҆́нг҃льскимъ зра́кᲂмъ ᲂу҆́мъ смꙋща́юще , и҆ бжⷭ҇твенымъ вᲂста́нїемъ дш҃а прᲂсвѣща́юще . мѷрѡно́сицы а҆пⷭ҇лѡмъ бл҃гᲂвѣствᲂва́хꙋ , вᲂз̾вѣсти́те во ꙗ҆зы́цѣхъ вᲂскрⷭ҇нїе гдⷭ҇а , с̾пᲂспѣшествꙋ́юща чꙋдесы̀ , пᲂдаю́щаго на́мъ ве́лїю млⷭ҇ть .

степе́нны . гла́съ , є҃ . а҆нтифѡ́нъ , а҃ . пᲂе́мъ по два́жды . Внегда̀ скᲂрбѣ́ти ми , дв҃дски пᲂю́ ти сп҃се мо́й , и҆зба́ви дш҃ꙋ мᲂю̀ ѿ ꙗ҆зы́ка льсти́ва . Пꙋсты́ннымъ живо́тъ бл҃же́нъ є҆́сть , бж҃їимъ жела́нїемъ вᲂз̾выша́ющимсѧ . Ст҃ы́мъ дх҃ᲂмъ ѡ҆держа́тсѧ всѧ̀ , ви́димаѧ же с̾ неви́димыми , самᲂдержа́венъ бо сы́и , ѿ трⷪ҇цы є҆ди́нъ є҆́сть нело́женъ .

=а҆нтифо́нъ , в҃ . на́ =гᲂры дш҃е вᲂз̾дви́гнемсѧ , грѧдѝ та́мѡ , ѿ ню́дꙋ же по́мᲂщь прїи́детъ . Десна́ѧ ти рꙋка̀ , и҆ мнѣ̀ хрⷭ҇тѐ прᲂстира́ема , ѿ пре́лести всѧ́кїѧ да сᲂхрани́тъ . Ст҃о́мꙋ дх҃ꙋ , бг҃ᲂсло́вѧще рце́мъ , ты̀ є҆сѝ бг҃ъ , живо́тъ , жела́нїе , свѣ́тъ , ᲂу҆́мъ , ты̀ бл҃гᲂсты́ни , ты̀ црⷭ҇твꙋеши во́ вѣки .

а҆нтифо́нъ , г҃ . Ѡ҆ре́кшихъ мнѣ̀ , во двᲂры̀ вни́демъ гдⷭ҇ни , ра́дᲂсти мно́гїѧ и҆спо́лненъ бы́сть , мл҃твы вᲂз̾сыла́ю . Въ дᲂмꙋ̀ дв҃дᲂвѣ , стра́шнаѧ сᲂверша́ютсѧ , ѻ҆́гнь бо та́мѡ палѧ̀ , всѧ́къ сра́менъ ᲂу҆́мъ . Ст҃о́мꙋ дх҃ꙋ , живᲂнача́льнᲂе дᲂсто́инство , ѿ него́же всѧ́ко живо́тно ѡ҆дш҃евлѧ́етсѧ , ꙗ҆́кᲂже ѡ҆ ѻ҆ц҃ѣ , кꙋ́пнѡ же и҆ ѡ҆ сло́вѣ .

і҆єре́й , глаго́летъ : во́нмемъ .= ми́ръ всѣ́мъ . премꙋ́дрᲂсть . прᲂки́менъ , ѱало́мъ , дв҃дᲂвъ . Вᲂскрⷭ҇нѝ гдⷭ҇и бж҃е мо́й , да вᲂз̾несе́тсѧ рꙋка̀ твᲂѧ̀ , ꙗ҆́кѡ ты̀ црⷭ҇твꙋеши во́ вѣки . =сти́хъ : и҆спᲂвѣ́мсѧ тебѣ̀ гдⷭ҇и бж҃е мо́й всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ .

і҆єре́й : ꙗ҆́кѡ ст҃ъ є҆сѝ гдⷭ҇и бж҃е . та́же : Всѧ́ко дыха́нїе да хва́литъ гдⷭ҇а . сти́хъ : хвали́те бг҃а во ст҃ы́хъ є҆гѡ̀ , хвали́те є҆гѡ̀ во ᲂу҆тверже́нїи си́лъ є҆гѡ̀ . і҆єре́й : и҆ =ѡ҆спᲂдо́битисѧ на́мъ дᲂсто́йнѡ . =пᲂе́мъ : Гдⷭ҇и пᲂми́лꙋй , гⷤ . і҆єре́й : премꙋ́дрᲂсть , про́сти ᲂу҆слы́шимъ ст҃а́гѡ . і҆єре́й , гл҃етъ , є҆ѵⷢ҇а́лїе рѧ́дꙋ . вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . пᲂми́лꙋй мѧ бж҃е . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .= и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ . =та́же , пᲂми́лꙋй мѧ бж҃е по вели́цѣй млⷭ҇ти твᲂе́й по мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й . стⷯра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю млⷭ҇ть . і҆єре́й , гл҃етъ : спасѝ бж҃е лю́ди . пᲂе́мъ : Гдⷭ҇и пᲂми́лꙋй , ві҃ . і҆єре́й , вᲂз̾гла́съ : ми́лᲂстїю и҆ щедро́тами . Кано́нъ , вᲂскрⷭ҇нъ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧ и҆ бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆и҃лѧ же спасѐ , пᲂбѣ́днꙋю пѣ́снь пᲂю́ща .

запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Тебѐ тернᲂно́снᲂе є҆вре́йскᲂе сᲂбо́рище , хрⷭ҇тѐ вѣнча̀ , любвѐ къ тебѣ̀ бл҃гᲂда́телю несᲂхранѝ , пра́матерне рᲂдᲂнача́льникꙋ , разрѣша́юща терно́внᲂе запреще́нїе . Вᲂздви́же мѧ па́дшаго жизнᲂда́вче , в̾ ро́въ прекло́ньсѧ пᲂиска́въ , и҆ мᲂю̀ ѕлᲂсмра́днꙋю тлю̀ хрⷭ҇тѐ претерпѣ́въ . не и҆скꙋ́сно бжⷭ҇твенымъ сꙋщество́мъ , ми́рᲂмъ мѧ̀ ѡ҆бл҃гᲂꙋха́лъ є҆сѝ . боⷢ҇ . Разрꙋши́сѧ клѧ́тва , печа́ль преста̀ . бл҃гᲂслᲂве́наѧ бо и҆ ѡ҆бра́дᲂваннаѧ , вѣ́рнымъ вᲂсїѧ̀ ра́дᲂсть , блгⷭ҇ве́нїе всѣ́мъ кᲂнце́мъ цвѣ́тъ нᲂсѧ́щи хрⷭ҇та̀ .

и҆́нъ , кано́нъ , крⷭ҇тᲂвᲂскрⷭ҇нъ . і҆рмо́съ . Спаси́телю бг҃ꙋ .= запѣ́въ : сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю . Свᲂе́ю во́лею на крⷭ҇тѣ̀ пригвᲂжде́ннᲂмꙋ пло́тїю , и҆ дре́внѧгѡ ѿрече́нїѧ , и҆́же дре́ва ра́ди па́дшаго свᲂбо́ждьшемꙋ . тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ . И҆́же и҆́з̾ грᲂба ме́ртвымъ вᲂсїѧ́вшаго , и҆ сꙋ́щїѧ во а҆́дѣ сᲂвᲂздви́гшаго , и҆ с̾ сѣде́нїе ѻ҆те́ческᲂе ᲂу҆краси́вшаго , тᲂгѡ̀ всѝ вᲂспᲂе́мъ , ꙗ҆́кѡ прᲂсла́висѧ . =боⷢ҇ . Пречⷭ҇таѧ мт҃и бж҃їѧ , вᲂплᲂще́ннаго и҆з̾ тебѐ , и҆ ѿ нѣ́дръ рᲂди́телѧ неразлꙋ́чьшасѧ бг҃а , непреста́ннѡ мᲂлѝ , ѿ всѧ́кїѧ напа́сти спастѝ и҆́хже сᲂзда̀ .

и҆́нъ , кано́нъ , прест҃ѣ́й бцⷣѣ . є҆мꙋ́же краегране́сїе сицево̀ . свѣ́тъ ро́ждьшаѧ , прᲂсвѣти́ мѧ дв҃о . і҆рмо́съ . Кᲂнѧ̀ и҆ вса́дники . запѣ́въ : прест҃а́ѧ гжⷭ҇е бцⷣе спасѝ на́съ . Свѣ́тъ все́льшїисѧ в̾ тѧ̀ пречⷭ҇таѧ , и҆ прᲂсвѣти́выи ми́ръ лꙋча́ми бжⷭ҇тва̀ . хрⷭ҇та̀ мᲂлѝ , прᲂсвѣти́ти всѧ̀ пᲂю́щїѧ тѧ̀ мт҃и дв҃о . Ꙗ҆́кѡ ᲂу҆краша́ема дᲂбро́тᲂю дᲂбрᲂдѣ́телей , ѡ҆бра́дᲂваннꙋю дᲂбрᲂтвᲂри́мꙋю , благᲂлѣ́пᲂтᲂю лꙋчꙋ̀ дх҃а прїѧ́тъ , всечи́стаѧ всѧ́ческаѧ дᲂбро̀ сᲂтвᲂри́вшꙋю . Тебѐ дре́вле прᲂѡ҆бразꙋ́ющи кꙋпина̀ в̾ сина́и , не ѡ҆палѝ дв҃це ѻ҆гню̀ бесѣ́дᲂвавши . дв҃а бо рᲂдила̀ є҆сѝ , и҆ дв҃ᲂю пребы́сть , па́че ᲂу҆ма̀ бг҃ᲂневѣ́сто . и҆́нъ , кано́нъ , в̾ минѣ́и , ст҃о́мꙋ . катава́сїѧ , по ᲂу҆ста́вꙋ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . же́лчь ᲂу҆́бѡ тебѣ̀ принесо́ша хрⷭ҇тѐ , чꙋдеса̀ сᲂтво́ршемꙋ , и҆́же ѿ ка́мене ме́дъ сса́вшїи въ пꙋсты́ни . ѻ҆це́тъ же за ма́ннꙋ ти , вᲂзбл҃гᲂдѣѧ́нїе вᲂзда́ша , дѣ́ти і҆и҃леви неразꙋ́мнїи .= И҆́же дре́вле свѣтᲂви́днымъ ѻ҆́блакᲂмъ пᲂкрыва́еми , живᲂта̀ во́ грᲂбѣ хрⷭ҇та̀ пᲂлᲂжи́ша . но свᲂе́ю вла́стїю вᲂста́въ , всѣ́мъ вѣ́рнымъ пᲂда́стъ та́йнѡ ѡ҆сѣнѧ́ющее свы́ше дх҃о́внᲂе сїѧ́нїе . =боⷢ҇ . Ты̀ мт҃и бж҃їѧ несᲂчта́ннѡ рᲂдила̀ є҆сѝ , и҆́же и҆з̾ нетлѣ́нна ѻ҆ц҃а вᲂсїѧ́вшаго , без̾ мт҃рьнихъ бᲂлѣ́зней . тѣ́мже тѧ бцⷣꙋ , вᲂплᲂще́ннаго бо пᲂро́ждьшꙋю сло́ва , правᲂсла́вно прᲂпᲂвѣ́даемъ .

и҆́нъ , і҆рмо́съ . Оу҆тверди́ ны бж҃е . Вᲂскрⷭ҇лъ є҆сѝ ѿ́ грᲂба хрⷭ҇тѐ , ѿ тлѝ сме́ртныѧ и҆збавлѧ́ѧ , вᲂспѣва́ющихъ жизнᲂда́вче , тридне́внᲂе твᲂѐ вᲂста́нїе . Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , во є҆́же пѣ́ти и҆ сла́вити , твᲂѐ тридне́внᲂе вᲂскрⷭ҇нїе . боⷢ҇ . Мᲂлѝ непреста́ннѡ чⷭ҇таѧ , прᲂше́дшаго и҆з̾ чре́слъ твᲂи́хъ , и҆зба́вити ѿ ле́сти дїа́вᲂли , вᲂспѣва́ющихъ тѧ мт҃рь бж҃їю .

и҆́нъ , і҆рмо́съ . Оу҆тверже́и ни наче́мъ же . Лѣ́ствица є҆́юже къ на́мъ сни́де вы́шнїи , и҆стлѣ́вшее є҆стество̀ и҆спра́вити , ты̀ ꙗ҆вле́ннѣйши чи́стаѧ всѣ́мъ ны́нѣ ви́дѣна бы́сть , тебе́ бо ра́ди преблагі́и ми́рꙋ бесѣ́дᲂвати и҆зво́ли . И҆́же дре́вле пред̾пᲂвелѣ́ннᲂе дв҃о та́инство , и҆ пре́жде вѣ́къ пред̾вѣ́дᲂмо всѧ̀ вѣ́дѧщемꙋ бг҃ꙋ . лѣ́тᲂмъ ны́нѣ на пᲂслѣ́дᲂкъ , в̾ лᲂжесна́хъ твᲂи́хъ всенепᲂро́чнаѧ кᲂне́цъ прїе́мъ пᲂказа́сѧ . Разрѣши́сѧ клѧ́твы дре́внее ѻ҆сꙋжде́нїе , твᲂи́мъ ржⷭ҇тво́мъ дв҃о пречⷭ҇таѧ . ѿ тебе́ бо гдⷭ҇ь ꙗ҆ви́сѧ , всѣ́мъ бл҃гᲂслᲂве́нїе ꙗ҆́кѡ пребл҃гъ дарᲂва́лъ є҆́сть , є҆ди́на земны́мъ ᲂу҆дᲂбре́нїе .

і҆єре́й гл҃етъ , є҆ктенїю̀ ма́лꙋю . та́же : кᲂнда́къ , и҆ и҆́кᲂсъ , и҆ сѣда́лен̾ , в̾ минѣ́и , ст҃о́мꙋ . а҆́ще є҆́сть .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Крⷭ҇тъ за́ древо разꙋ́мнᲂе , за сла́дкꙋю пи́щꙋ же́лчь хрⷭ҇тѐ мо́й прїѧ́тъ , за тлѣ́нїе же сме́рть , кро́вь свᲂю̀ бжⷭ҇твенꙋю и҆злїѧ́лъ є҆сѝ . Ме́ррскїѧ гᲂрча́йшїѧ во́ды , ꙗ҆́кѡ во ѻ҆́бразѣ прᲂѡ҆бразꙋ́ѧ пречⷭ҇тыи крⷭ҇тъ сво́й бл҃же , грѣхо́внᲂе ᲂу҆мерщвлѧ́юще вкꙋше́нїе , дре́ва ра́ди ᲂу҆слади́лъ є҆сѝ . боⷢ҇ . Крᲂмѣ̀ ᲂу҆́бѡ сᲂчета́нїѧ зачала̀ є҆сѝ без̾ и҆стлѣ́нїѧ во́ чревѣ , и҆ без̾ бᲂлѣ́зни рᲂдила̀ є҆сѝ , и҆ по ржⷭ҇твѣ̀ дв҃аѧ бг҃а пло́тїю ро́ждьшаѧ сᲂхрани́сѧ .

и҆́нъ , і҆рмо́съ . Оу҆слы́шахъ слꙋ́хъ си́лы крⷭ҇та̀ . Є҆гда̀ вᲂдрꙋзи́сѧ на землѝ , на ло́бнѣмъ крⷭ҇тъ , сᲂкрꙋши́шасѧ вереѝ и҆ вра́тницы вѣ́чнїи , и҆ прᲂсла́виша всѝ и҆́же во а҆́дѣ гдⷭ҇а . Є҆гда̀ сни́де хрⷭ҇то́съ к̾ свѧ́заннымъ ꙗ҆́кѡ ме́ртвъ , сᲂвᲂскреснꙋ́ша с̾ ни́мъ и҆́же ѿ́ вѣка ме́ртвїи , и҆ вᲂзᲂпи́ша , сла́ва си́лѣ твᲂе́й гдⷭ҇и . Ꙗ҆́кѡ и҆зы́де хрⷭ҇то́съ ѿ запечатлѣ́нна гро́ба . ѡ҆бнᲂвѝ ра́дᲂсть мѷрѡно́сицамъ жена́мъ , и҆ вᲂзᲂпи́ша , сла́ва си́лѣ твᲂе́й гдⷭ҇и .

и҆́нъ , і҆рмо́съ . Бжⷭ҇твеннᲂе твᲂѐ . Срⷣцемъ и҆ ᲂу҆мо́мъ , дш҃е́ю же и҆ ᲂу҆сты̀ и҆спᲂвѣ́даю всебл҃гᲂче́стнѡ , тебѐ бцⷣе и҆́стиннѡ чⷭ҇таѧ . спасе́нїе плᲂдѧ̀ , и҆ спаса́юсѧ дв҃це мл҃твᲂю тѝ . Сᲂзда́выи ѿ несꙋ́щихъ всѧ́ческаѧ , ѿ тебѐ сᲂзда́тисѧ чⷭ҇тыѧ , ꙗ҆́кѡ бл҃гᲂда́тель и҆зво́ли , ко спасе́нїю и҆́же вѣ́рᲂю и҆ любо́вїю сла́вѧщихъ тѧ̀ всенепᲂро́чнаѧ . Пᲂю́тъ твᲂѐ ржⷭ҇тво̀ всепѣ́таѧ нбⷭ҇нїи чи́нᲂве , спасе́нїю ра́дꙋющесѧ , и҆́же вᲂи́стинꙋ бцⷣꙋ тѧ̀ мꙋ́дрствꙋющимъ , дв҃о бг҃ᲂневѣ́сто .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . И҆́же сла́вѣ гдⷭ҇ь , в̾ несла́внѣ ѻ҆́бразѣ , на́ древѣ без̾че́ствᲂванъ свᲂе́ю во́лею ви́ситъ . бжⷭ҇твенꙋю мнѣ̀ сла́вꙋ не и҆зрече́нно прᲂмышлѧ́ѧ . Ты́ мѧ преѡблечѐ в̾ нетлѣ́нїе хрⷭ҇тѐ , тлѣ́нїе сме́рти не и҆стлѣ́ннѡ пло́тїю вкꙋси́въ , и҆ вᲂсїѧ́лъ є҆сѝ и҆́з̾ грᲂба тридне́вно . боⷢ҇ . Ты̀ пра́вдꙋ же и҆ и҆збавле́нїе на́мъ ро́ждьши хрⷭ҇та̀ без̾ сѣ́мене . свᲂбо́днѡ сᲂдѣ́ѧла є҆сѝ ѿ клѧ́твы бцⷣе є҆стество̀ пра́ѻ҆ц҃а .

и҆́нъ , і҆рмо́съ . Оу҆́тренююще вᲂпїе́мъ ти .= Распрᲂсте́рлъ є҆сѝ рꙋ́цѣ і҆с҃е мо́й на́ древѣ . всѧ̀ призыва́ѧ к̾ себѣ̀ ꙗ҆́кѡ чл҃кᲂлю́бецъ . Плѣни́въ а҆́да сп҃се на́шъ пᲂгребе́нїемъ сѝ , и҆ вᲂскрⷭ҇нїемъ свᲂи́мъ ра́дᲂсти всѧ̀ и҆спо́лнилъ є҆сѝ . =боⷢ҇ . Дв҃ꙋ по ржⷭ҇твѣ̀ пᲂе́мъ тѧ бцⷣе . ты́ бо бг҃а сло́ва пло́тїю ми́рᲂви рᲂдила̀ є҆сѝ .

и҆́нъ , і҆рмо́съ , то́йже . Всѝ прᲂро́цы ꙗ҆́вѣ тѧ̀ прᲂвᲂзвѣсти́ша , бы́вшꙋю бж҃їю мт҃рь бцⷣе пречⷭ҇таѧ . є҆ди́на бо ѡ҆брѣ́тесѧ чистᲂто́ю сᲂверше́на всенепᲂро́чнаѧ . Свѣ́телъ тѧ̀ ѻ҆́блакъ живо́тныѧ вᲂды̀ , на́мъ тꙋ́чꙋ нетлѣ́нїѧ хрⷭ҇та̀ ѡ҆дᲂжди́вши ѿча́ѧннымъ , чи́стаѧ разꙋмѣ́емъ . Ꙗ҆́кѡ бли́жнюю всю́ тѧ дᲂбрꙋ̀ и҆ непᲂро́чнꙋ , запечатлѣ́ннꙋ дв҃ьствᲂмъ , чи́стыи вᲂзлюбѝ . въ тебѐ всели́сѧ бг҃ъ , є҆ди́ныи бл҃гᲂꙋтро́бенъ .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Въ тлѣ́нїе пᲂпо́лзсѧ ро́дꙋ нача́льникъ влⷣко хрⷭ҇тѐ , ѡ҆слꙋ́шаннагѡ бра́шна в̾кꙋ́шъ . и҆ къ жи́зни вᲂзведе́нъ бы́сть страсте́й твᲂи́хъ ра́ди . Живᲂтѐ прибли́жилсѧ є҆сѝ ко а҆́дꙋ влⷣко хрⷭ҇тѐ , и҆ тлѣ́нїе тлѣ́ющемꙋ бы́въ , тлѣ́нїѧ ра́ди и҆стᲂчи́лъ є҆сѝ вᲂскрⷭ҇нїе . боⷢ҇ . Дв҃ᲂю рᲂдила̀ є҆сѝ , и҆ ро́ждьши пребы́сть чиста̀ , на рꙋкꙋ̀ и҆́же всѧ́ческаѧ нᲂсѧ́щаго , ꙗ҆́кѡ и҆́стиннаѧ дв҃аѧ мт҃и пᲂнесла̀ є҆сѝ .

и҆́нъ , і҆рмо́съ . Ѻ҆бы́де мѧ бе́здна . Распрᲂсте́ръ дла́ни свᲂѝ , сᲂбира́ѧ растᲂче́наѧ , ꙗ҆зы́къ твᲂи́хъ сᲂставле́нїѧ хрⷭ҇тѐ бж҃е на́шъ , живᲂно́снымъ крⷭ҇то́мъ сѝ , ꙗ҆́кѡ чл҃кᲂлю́бецъ . Плѣни́въ сме́рть , и҆ врата̀ а҆́дᲂва сᲂкрꙋши́лъ є҆сѝ . а҆да́мъ же свѧ́заныи разрѣше́нъ бы́въ вᲂпїѧ́ше ти , спасе́ мѧ десни́ца твᲂѧ̀ гдⷭ҇и . боⷢ҇ . Кꙋпинꙋ̀ тѧ̀ не ѡ҆пали́мꙋ , и҆ го́рꙋ , и҆ лѣ́ствицꙋ ѡ҆дш҃евле́нꙋ , и҆ две́рь нбⷭ҇нꙋю дᲂсто́йнѡ сла́вимъ , мр҃і́е сла́внаѧ , правᲂсла́внымъ пᲂхвало̀ .

и҆́нъ , і҆рмо́съ . Вᲂлнѧ́щеесѧ бꙋ́рею . Всѣ́мъ вина̀ , и҆ є҆́же бы́ти всѣ́мъ пᲂдава́ѧ , ꙗ҆́кѡ винꙋ̀ и҆мѣ̀ вᲂплᲂща́емь , є҆́же по на́съ тебѐ бг҃ᲂмт҃и всенепᲂро́чнаѧ . Цѣле́нїи влⷣчце дꙋ́ши пита́ющи , тᲂча́щи и҆сто́чникъ , вѣ́рнѡ притека́ющимъ к̾ пᲂкро́вꙋ твᲂемꙋ̀ сла́внᲂмꙋ , вѣ́мы тѧ̀ всенепᲂро́чнаѧ . Спасе́нїю винꙋ̀ живᲂда́вца пᲂрᲂдила̀ є҆сѝ на́мъ , вѣ́чнᲂе и҆збавле́нїе да́рꙋющаго и҆́же и҆́стиннꙋю бцⷣꙋ тѧ̀ и҆спᲂвѣ́дающимъ .

і҆єре́й гл҃етъ , є҆ктенїю̀ ма́лꙋю .

кᲂнда́къ , вᲂскрⷭ҇нъ . Ко а҆́дꙋ сп҃се мо́й сᲂше́лъ є҆сѝ , и҆ врата̀ сᲂкрꙋши́въ ꙗ҆́кѡ всеси́ленъ . ᲂу҆ме́ршихъ ꙗ҆́ко сᲂзда́тель сᲂвᲂскр҃си́лъ є҆сѝ , и҆ сме́рти жа́ло сᲂкрꙋши́въ , и҆ а҆да́мъ ѿ клѧ́твы и҆зба́вленъ бы́сть чл҃кᲂлю́бче . тѣ́мже всѝ зᲂве́мъ , спасѝ на́съ гдⷭ҇и . и҆́кᲂсъ . Оу҆слы́шавше жены̀ а҆́нг҃лѡвы глаго́лы , ѿлᲂжи́ша рыда́нїе , ра́дᲂстни бы́ша и҆ тре́петни , ᲂу҆́жасъ бо ви́дѣша . и҆ сѐ хрⷭ҇то́съ прибли́жисѧ къ ни́мъ гл҃ѧ , є҆́же ра́дꙋйтесѧ дерза́йте , а҆́зъ ми́ра пᲂбѣди́хъ , и҆ ᲂу҆́зники свᲂбᲂди́хъ . пᲂтщи́тесѧ ᲂу҆́бѡ ко ᲂу҆чн҃ко́мъ вᲂз̾вѣща́юще и҆́мъ , ꙗ҆́кѡ варѧ́ю вы̀ во́ градѣ галиле́йстѣмъ , є҆́же прᲂпᲂвѣ́дати мѧ . тѣ́мже всѝ тебѣ̀ вᲂпїе́мъ , спасѝ на́съ гдⷭ҇и .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Пло́ть ѡ҆блᲂжи́въ , ꙗ҆́кѡ на ᲂу҆́дицѣ льще́нїѧ . бжⷭ҇твенᲂю си́лᲂю свᲂе́ю ѕмі́ѧ сᲂкрꙋши́лъ є҆сѝ , вᲂзвᲂдѧ̀ вᲂпїю́щїѧ , бж҃е блгⷭ҇ве́нъ є҆сѝ . И҆́же землѝ непрᲂхо́днᲂе ѡ҆сꙋ́ществᲂвавыи сᲂставле́нїе , во́ грᲂбѣ пᲂкрыва́етсѧ пло́тїю , невмѣсти́мыи . є҆мꙋ́же всѝ пᲂе́мъ , бж҃е блгⷭ҇ве́нъ є҆сѝ . боⷢ҇ . Є҆ди́нъ ᲂу҆́бѡ сᲂста́въ , во двᲂю́же є҆стествꙋ̀ всенепᲂро́чнаѧ рᲂдила̀ є҆сѝ вᲂплᲂще́ннагѡ бг҃а . є҆мꙋ́же всѝ пᲂе́мъ , бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Въ пещѝ ѻ҆́гненнѣй . И҆́же дре́вᲂмъ крⷭ҇тнымъ , и҆́дᲂльскꙋю разᲂри́въ пре́лесть , бл҃гᲂслᲂве́нъ бг҃ъ ѻ҆ц҃ъ на́шихъ . Свᲂе́ю сме́ртїю хрⷭ҇тѐ , сме́рти разᲂри́лъ є҆сѝ держа́вꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Вᲂскр҃съ и҆з̾ ме́ртвыхъ , и҆ сꙋ́щїѧ во а҆́дѣ сᲂвᲂздви́гъ , бл҃гᲂслᲂве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Превᲂзнᲂси́мыи ѻ҆ц҃е́мъ .= Н=еѡ҆пи́саныи , пребы́сть непревра́тенъ пло́тїю , по сᲂста́вꙋ сᲂедини́сѧ ꙗ҆́кѡ бл҃гᲂꙋтро́бенъ , в̾ тебѣ̀ всест҃а́ѧ , є҆ди́нъ бл҃гᲂслᲂве́ныи бг҃ъ ѻ҆ц҃ъ на́шихъ . Невѣ́стꙋ тѧ всенепᲂро́чнꙋю бцⷣе влⷣчце сᲂгла́снѡ сла́вимъ , и҆ прⷭ҇то́лъ зижди́телѧ твᲂегѡ̀ . є҆мꙋ́же всѝ пᲂе́мъ , бж҃е блгⷭ҇ве́нъ є҆сѝ . Мт҃и всѣ́хъ царѧ̀ ѡ҆чи́стившисѧ дх҃ᲂмъ , дв҃о была̀ є҆сѝ тебѐ сᲂзда́вшемꙋ . є҆мꙋ́же всѝ пᲂе́мъ , бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Тебѣ̀ вседѣ́телю в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Ты̀ ѡ҆ во́льнѣй спасе́нныѧ стрⷭ҇ти пᲂмᲂли́сѧ ча́ши , ꙗ҆́кᲂже нево́льнѣй . двѣ̀ хᲂтѣ́нїи бо , двѣма̀ по кᲂемꙋ́ждо но́сиши сꙋщество́ма хрⷭ҇тѐ во́ вѣки . Твᲂи́мъ вседѣ́тельнымъ схᲂжде́нїемъ , а҆́дъ хрⷭ҇тѐ пᲂрꙋга́нъ бы́сть , и҆ и҆зблева̀ всѧ̀ и҆́же дре́вле ле́стїю ᲂу҆мерщве́нныѧ , тѧ̀ превᲂзнᲂсѧ́щїѧ вѣ́рно во всѧ̀ вѣ́ки . боⷢ҇ . Тѧ̀ и҆́же па́че ᲂу҆ма̀ бг҃ᲂмꙋ́жно , сло́во ро́ждьшꙋю гдⷭ҇а , и҆ дв҃ьствꙋющꙋю , всѧ̀ дѣ́ла дв҃о бл҃гᲂслᲂви́мъ , и҆ превᲂзно́симъ чⷭ҇тꙋю во всѧ̀ вѣ́ки .

и҆́нъ , і҆рмо́съ . =и҆з̾ =ѻ҆ц҃а пре́жде вѣ́къ . На крⷭ҇тѣ̀ во́лею дла́ни прᲂсте́ршаго , и҆ ᲂу҆́зы сме́ртныѧ расто́ргшаго хрⷭ҇та̀ , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . Сᲂше́дшаго во́ грᲂбъ , и҆ свѧза́вшаго а҆́да , и҆ вᲂскрⷭ҇шаго во сла́вѣ хрⷭ҇та̀ , и҆ ме́ртвыѧ сᲂвᲂздви́гшагѡ , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . И҆́же ꙗ҆́кѡ жениха̀ и҆́з̾ грᲂба вᲂсїѧ́вшаго хрⷭ҇та̀ бг҃а , и҆ мѷрѡно́сицамъ ꙗ҆́вльшагᲂсѧ , и҆ ра́дᲂсть и҆́мъ прᲂвѣща́вша , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Тебѣ̀ вседѣ́телю . Преста̀ ны́нѣ пра́ѻ҆ц҃ъ печа́ль , ꙗ҆́же ра́дᲂсть прїе́мши ти бг҃ᲂмт҃ри . тѣ́мже непреста́ннѡ гдⷭ҇а вᲂспѣва́емъ , и҆ превᲂзно́симъ во всѧ̀ вѣ́ки . Пᲂе́тъ с̾ на́ми беспло́тныхъ со́нмъ дв҃о , ржⷭ҇тво̀ твᲂѐ непᲂсти́жимᲂе , є҆ди́нъ ли́къ сᲂста́вльше любо́вїю . є҆го́же превᲂзно́симъ во́ вѣки . боⷢ҇ . Бжⷭ҇твеныи вᲂи́стинꙋ , и҆ свѣтᲂно́сныи прⷭ҇то́лъ , и҆ скрижа́ли бл҃гᲂда́ти и҆спᲂвѣ́даемъ тѧ̀ дв҃о , ꙗ҆́кѡ прїе́мшꙋю сло́во ѻ҆́ч҃ее . є҆го́же превᲂзно́симъ во́ вѣки .

по и҃ пѣ́сни , пᲂе́мъ : Хва́лимъ , бл҃гᲂслᲂви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . і҆рмо́съ катава́сїи , и҆ твᲂри́мъ пᲂкло́нъ . пᲂе́мъ , пѣ́снь бцⷣѣ . вели́читъ дш҃а мᲂѧ̀ гдⷭ҇а . =и҆ =пᲂе́мъ , честнѣ́йшꙋю херꙋви́мъ , на ко́йждо сти́хъ , на́ ѻ҆ба ли́ка . =и҆ =твᲂри́мъ пᲂкло́ны .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Па́дшаго чл҃ка вᲂспрїѧ́тъ влⷣко хрⷭ҇тѐ , и҆́з̾ чрева дв҃ьствена , всемꙋ̀ сᲂвᲂкꙋпи́всѧ , ни є҆ди́нᲂмꙋ же грѣхꙋ̀ неприча́щьсѧ . всегѡ̀ ѿ стрⷭ҇те́й ты̀ свᲂбᲂди́лъ є҆сѝ , пречи́стыми сѝ страстьмѝ . Бг҃ᲂто́чнᲂю кро́вїю и҆злїѧ́ннᲂю влⷣко хрⷭ҇тѐ , ѿ твᲂи́хъ пречи́стыхъ ре́бръ и҆ живᲂтвᲂрѧ́щихъ , же́ртва ᲂу҆́бѡ преста̀ и҆́дᲂльскаѧ , всѧ́ же землѧ̀ твᲂегѡ̀ хвале́нїѧ же́ртвꙋ ти принᲂша́етъ . боⷢ҇ . Не бг҃а беспло́тна , нижѐ па́ки чл҃ка про́ста , прᲂи҆зведѐ пречⷭ҇таѧ ѻ҆трᲂкᲂви́це чи́стаѧ , но чл҃ка сᲂверше́на , и҆ нело́жнѡ сверше́на бг҃а . є҆го́же велича́емъ , со ѻ҆ц҃е́мъ же и҆ дх҃ᲂмъ .

и҆́нъ , і҆рмо́съ . Тѧ̀ па́че ᲂу҆ма̀ . Тебѐ и҆́же на крⷭ҇тѣ̀ стра́сти прїе́мшаго , и҆ сме́ртїю сᲂкрꙋши́вша а҆́дᲂвꙋ крѣ́пᲂсть , вѣ́рнїи по дᲂстᲂѧ́нїю велича́емъ . Тебѐ и҆́же и҆́з̾ грᲂба вᲂскрⷭ҇ша хрⷭ҇тѐ , и҆ а҆́да плѣни́вша , и҆ ми́ра прᲂсвѣти́вша , вѣ́рнїи є҆динᲂмꙋ́дрено пѣ́сньми велича́емъ . боⷢ҇ . Ра́дꙋисѧ бцⷣе мт҃и хрⷭ҇та̀ бг҃а , є҆го́же рᲂдила̀ є҆сѝ , мᲂлѝ сᲂгрѣше́нїемъ ѡ҆ставле́нїе дарᲂва́ти , вѣ́рᲂю вᲂспѣва́ющимъ тѧ̀ .

и҆́нъ , і҆рмо́съ . І҆са́їе ликꙋ́й .= Ѿ= чи́стыхъ крᲂве́й твᲂи́хъ , всыри́сѧ пло́ть преесте́ствено всѣ́хъ сᲂдѣ́телю , є҆динᲂро́днᲂмꙋ сн҃ꙋ рᲂди́телевꙋ , не ѿ́ мꙋжа , но без̾сѣ́мене , ᲂу҆́мна и҆ ѡ҆дш҃евле́на бцⷣе всебл҃же́ннаѧ . На престо́лѣ сѣдѧ̀ влⷣчнѣмъ сн҃ъ тво́й , пᲂзлаща́етъ тѧ̀ рѧ́снами бжⷭ҇твеныхъ дᲂбрᲂдѣ́телей , ꙗ҆́вѣ сїѧ́ющꙋ ѡ҆деснꙋ́ю пᲂста́ви чⷭ҇таѧ , даѧ̀ прпⷣбныѧ ꙗ҆́кѡ мт҃ри тебѣ̀ чл҃кᲂлю́бецъ . Ѻ҆бхᲂди́мᲂе ᲂу҆ста́вила є҆сѝ сме́ртнᲂе не ᲂу҆держа́ннᲂе стремле́нїе . рᲂди́вши пло́тїю и҆́стиннѡ па́че ᲂу҆ма̀ жи́знь вѣ́чнꙋю , всест҃а́ѧ дв҃о мт҃и . є҆́йже прилᲂжи́сѧ ко ᲂу҆сто́мъ а҆́дъ , го́рькѡ ᲂу҆праздни́сѧ .

таⷤ , дᲂсто́йно є҆́сть .= пᲂсе́мъ , є҆ктенїѧ̀ ма́лаѧ . та́же : ст҃ъ гдⷭ҇ь бг҃ъ на́шъ . =сти́хъ : ꙗ҆́кѡ ст҃ъ гдⷭ҇ь бг҃ъ на́шъ . сти́хъ : надᲂвсѣ́ми людьмѝ бг҃ъ на́шъ . пᲂсе́мъ , свѣти́ленъ , вᲂскрⷭ҇нъ . сла́ва , ст҃о́мꙋ , а҆́ще є҆́сть . и҆ ны́нѣ , боⷢ҇ , вᲂскрⷭ҇нъ . и҆ =ѱалмы̀ , ѡ҆бы́чны . =на хвали́тѣхъ , стихѣ́ры , вᲂскрⷭ҇ны . гла́съ , є҃ . =запѣ́въ : хвали́те бг҃а во ст҃ы́хъ є҆гѡ̀ . Г=дⷭ҇и , запечатлѣ́ннꙋ гро́бꙋ ѿ без̾зако́нникъ , прᲂи҆з̾ше́лъ є҆сѝ и҆́з̾ грᲂба , ꙗ҆́кᲂже рᲂди́сѧ ѿ бцⷣы . неразꙋмѣ́ша ка́кѡ вᲂплᲂти́сѧ , беспло́тнїи твᲂѝ а҆́нг҃ли ; нечꙋ́ша кᲂгда̀ вᲂскр҃се , стрегꙋ́щїи тѧ во́ини ; ѡ҆бᲂѧ́ бо запечатлѣ́шасѧ и҆́щꙋщимъ , ꙗ҆ви́шажесѧ чꙋдеса̀ , кла́нѧющимсѧ вѣ́рᲂю та́инствꙋ , є҆́же вᲂспѣва́емъ , вᲂзда́ждь на́мъ ра́дᲂсть , и҆ ве́лїю ми́лᲂсть .

хвали́те є҆гѡ̀ во ᲂу҆тверже́нїи си́лъ є҆гѡ̀ . Гдⷭ҇и , вереѝ вѣ́чныѧ сᲂкрꙋши́въ , и҆ ᲂу҆́зы растерза́въ , ѿ́ грᲂба вᲂскр҃се , ѡ҆ста́вль свᲂѧ̀ пᲂгреба́тельнаѧ , во свидѣ́тельство и҆́стинѣ , тридне́внагѡ пᲂгребе́нїѧ твᲂегѡ̀ . и҆ пред̾вари́въ въ галиле́и , и҆́же въ пеще́рѣ стрего́мыи . вели́каѧ твᲂѧ̀ млⷭ҇ть , непᲂсти́жимыи сп҃се пᲂми́лꙋй на́съ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Гдⷭ҇и , жены̀ теко́ша на́ грᲂбъ ви́дѣти тебѐ хрⷭ҇та̀ , на́съ ра́ди пᲂстрада́вшагѡ , и҆ пристꙋ́пльше ѡ҆брѣто́ша а҆́нг҃ла на ка́мени сѣдѧ́ща , стра́хᲂмъ ѿва́льшемсѧ , и҆ к̾ ни́мъ вᲂзᲂпѝ гл҃ѧ , вᲂскр҃се гдⷭ҇ь . рцы́те ᲂу҆ченикѡ́мъ , ꙗ҆́кѡ вᲂста̀ ѿ ме́ртвыхъ , спаса́ѧ дш҃а на́ша .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Гдⷭ҇и , ꙗ҆́кᲂже и҆зы́де ѿ запечатлѣ́нна гро́ба , та́кѡ в̾ни́де и҆ две́ремъ затвᲂре́нᲂмъ ко ᲂу҆чн҃кѡ́мъ свᲂи́мъ . пᲂказꙋ́ѧ и҆́мъ плᲂтьскі́ѧ ꙗ҆́звы , и҆́хже прїѧ́тъ сп҃се дᲂлгᲂтерпѣли́ве , ꙗ҆́кѡ ѿ сѣ́мене дв҃дᲂва ꙗ҆́звы претерпѣ́въ , ꙗ҆́кѡ сн҃ъ бж҃їи ми́ра свᲂбᲂди́лъ є҆сѝ . вели́каѧ твᲂѧ̀ млⷭ҇ть , непᲂсти́жиме сп҃се пᲂми́лꙋй на́съ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Гдⷭ҇и цр҃ю вѣкѡ́мъ , и҆ тво́рче всѣ́хъ , и҆́же на́съ ра́ди распѧ́тїе и҆ пᲂгребе́нїе пло́тїю прїе́мъ , да на́съ ѿ а҆́да свᲂбᲂди́ши всѧ̀ . ты́ бо є҆сѝ бг҃ъ на́шъ , ра́звѣ тебѐ и҆но́го незна́емъ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Гдⷭ҇и превᲂсїѧ́ющаѧ твᲂѧ̀ чꙋдеса̀ кто̀ и҆спᲂвѣ́сть ; и҆лѝ кто̀ вᲂз̾вѣсти́тъ стра́шнаѧ ти та́инства ; в̾ челᲂвѣ́чивъбᲂсѧ на́съ ра́ди , ꙗ҆́кѡ са́мъ вᲂсхᲂтѣ̀ . держа́вꙋ ꙗ҆ви́лъ є҆сѝ си́лы твᲂеѧ̀ . распѧ́тїемъ бо свᲂи́мъ разбо́йникꙋ ра́й ѿве́рзлъ є҆сѝ . и҆ пᲂгребе́нїемъ свᲂи́мъ вереѝ а҆́дᲂвы сᲂкрꙋши́лъ є҆сѝ , и҆ вᲂскрⷭ҇нїемъ свᲂи́мъ всѧ́ческаѧ прᲂсвѣти́лъ є҆сѝ , милᲂсе́рде сла́ва тебѣ̀ .

вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Мѷрѡно́сицы жены̀ , гро́ба твᲂегѡ̀ дᲂсти́гше ѕѣлѡ̀ ра́нѡ , и҆ска́хꙋ тебѐ ми́рᲂмъ пᲂма́зати без̾сме́ртнаго сло́ва и҆ бг҃а . и҆ а҆́нг҃ла глаго́лы ѡ҆гласи́вшесѧ , вᲂз̾враща́хꙋсѧ ра́дᲂстнѡ а҆пⷭ҇лѡмъ вᲂз̾вѣсти́ти ꙗ҆́вѣ . ꙗ҆́кѡ вᲂскрⷭ҇лъ є҆сѝ живо́тъ всѣ́хъ , и҆ пᲂдае́ши ми́рᲂви ѡ҆чище́нїе и҆ ве́лїю млⷭ҇ть .

и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Бг҃ᲂпрїѧ́тнаго тѝ гро́ба , стра́жїе ко і҆ꙋде́ѡмъ гл҃ахꙋ , ѽ ва́шегѡ сꙋемꙋ́дренагѡ сᲂвѣ́та , блюстѝ не ѡ҆пи́саннаго пᲂкꙋси́вшесѧ , в̾сꙋ́е трꙋжда́етесѧ ; ᲂу҆таи́ти вᲂскрⷭ҇нїе распѧ́тагѡ хᲂтѧ́ще , ꙗ҆́снѡ прᲂѧви́ли є҆стѐ . ѽ ва́шегѡ сꙋемꙋ́дренагѡ сᲂбо́рища , что̀ па́ки сᲂкры́ти сᲂвѣщава́ете , є҆́же не ᲂу҆кры́етсѧ ; па́че же ѿ на́съ ᲂу҆слы́шите , и҆ вѣ́рᲂвати вᲂсхᲂщи́те бы́вшихъ и҆́стинѣ , а҆́нг҃лъ мᲂлнїено́сецъ съ нб҃сѐ сше́дъ ка́мень ѿвалѝ , є҆го́же стра́хᲂмъ ме́ртвᲂстїю сᲂдержа́хᲂмсѧ , и҆ вᲂз̾гласи́въ крѣ́пкѡ , ᲂу҆́мнымъ мѷрѡно́сицамъ жена́мъ глаго́лаше , незри́тели стрегꙋ́щихъ ᲂу҆мерщве́нїѧ , и҆ печа́темъ разрꙋше́нїѧ , а҆́дᲂво же и҆стᲂща́нїе . и҆́же пᲂбѣ́дꙋ а҆́дᲂвꙋ ᲂу҆праздни́вшаго , и҆ сме́ртнᲂе жа́ло сᲂкрꙋши́вшаго , что̀ ꙗ҆́кѡ ме́ртва и҆́щете . в̾ско́рѣ же ше́дше бл҃гᲂвѣсти́те а҆пⷭ҇лѡмъ вᲂскрⷭ҇нїе , бе́з̾ страха вᲂпїю́ще , вᲂи́стинꙋ вᲂскр҃се гдⷭ҇ь , и҆мѣ́ѧи ве́лїю млⷭ҇ть .

сла́ва , стихѣ́ра є҆ѵⷢ҇а́льскаѧ .= и҆ ны́нѣ . гла́съ , в҃ . пребл҃гᲂслᲂве́на є҆сѝ бцⷣе дв҃о . Славᲂсло́вїе вели́кᲂе . =і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво .= трᲂпа́рь : Д=не́сь спасе́нїе ми́рꙋ , пᲂе́мъ вᲂскрⷭ҇шаго и҆́з̾ грᲂба , и҆ нача́льникꙋ живᲂтꙋ̀ хрⷭ҇та̀ бг҃а на́шегѡ . разрꙋши́въ бо сме́рть , пᲂбѣ́дꙋ да́стъ на́мъ , и҆ ве́лїю млⷭ҇ть .

та́же , і҆єре́й гл҃етъ , є҆ктенїю̀ : пᲂми́лꙋй на́съ бж҃е . та́же : и҆спо́лнимъ за ᲂу҆́тренѧѧ мл҃твы на́ша . пᲂсе́мъ , вᲂз̾гла́съ : твᲂе́ бо є҆́сть є҆́же ми́лᲂвати и҆ спаса́ти . и҆ тебѣ̀ сла́вꙋ вᲂз̾сылаемъ , ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ , и҆ нн҃ѣ и҆ прⷭ҇нѡ и҆ во́ вѣки вѣкѡ́мъ . та́же , і҆єре́й : премꙋ́дрᲂсть . мы́же : а҆ми́нь . ᲂу҆твердѝ бж҃е вѣ́рꙋ хрⷭ҇тїа́нскꙋю , и҆ сᲂблюдѝ гдⷭ҇и и҆ пᲂми́лꙋй . пᲂсе́мъ , честнѣ́йшꙋю херꙋви́мъ . сла́ва , и҆ нн҃ѣ , гдⷭ҇и пᲂми́лꙋй , вⷤ . гдⷭ҇и бл҃гᲂслᲂвѝ . і҆єре́й , ѿпꙋ́стъ . ча́съ , а҃ . и҆ про́чее ѡ҆бы́чно . и҆ кᲂне́чныи ѿпꙋ́стъ .

Въ нлⷣю , на литꙋргі́и , бл҃же́нны . гла́съ , є҃ .

Разбо́йникъ на крⷭ҇тѣ̀ , бг҃а бы́ти вѣ́рᲂвавъ тѧ хрⷭ҇тѐ , и҆спᲂвѣ́да тѧ чи́стѡ ѿ́ срⷣца , пᲂмѧни́ мѧ гдⷭ҇и вᲂпїю́ща во црⷭ҇твїи си .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . И҆́же ѿ́ древа крⷭ҇тнагѡ живо́тъ прᲂцвѣ́тша ро́дꙋ на́шемꙋ , и҆ и҆з̾сꙋши́вша ꙗ҆́же ѿ́ древа клѧ́твꙋ , ꙗ҆́кѡ сп҃са и҆ сᲂдѣ́телѧ тᲂгѡ̀ вᲂспᲂе́мъ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Распе́ншꙋтисѧ хрⷭ҇тѐ , пᲂсредѣ̀ двᲂю̀ ѡ҆сꙋжде́нᲂю разбо́йникꙋ , є҆ди́нъ ᲂу҆́бѡ пᲂхꙋ́ливъ тѧ , ѡ҆сꙋжде́нъ бы́сть пра́веднѡ . дрꙋгі́и же тѧ̀ бг҃ᲂсло́вивъ , в̾ ра́й всели́сѧ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Сме́ртїю твᲂе́ю хрⷭ҇тѐ , сме́ртнꙋю разрꙋши́лъ є҆сѝ си́лꙋ . и҆ сᲂвᲂздви́глъ є҆сѝ ѿ́ вѣка ᲂу҆ме́ршихъ , тебѐ пᲂю́щихъ и҆́стиннагѡ бг҃а и҆ сп҃са на́шегѡ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Всю̀ и҆спо́лни зе́млю , а҆пⷭ҇лъ твᲂи́хъ вѣща́нїе хрⷭ҇тѐ , и҆ прᲂгна̀ без̾бо́жїѧ но́щь , и҆ ѡ҆зарѝ всѧ̀ вѣ́рныѧ свѣ́тᲂмъ ра́зꙋма .

=ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . на́ =грᲂбъ тво́й хрⷭ҇тѐ , прише́дше жены̀ чⷭ҇тны́ѧ и҆ска́хꙋ тѧ жизнᲂда́вче ми́рᲂмъ пᲂма́зати . и҆ ꙗ҆ви́сѧ и҆́мъ а҆́нг҃лъ вᲂпїѧ̀ , вᲂскр҃се гдⷭ҇ь .

сла́ва . Пᲂкланѧ́емтисѧ трⷪ҇це , є҆ди́нице без̾нача́льнаѧ , и҆ равнᲂчⷭ҇тна́ѧ , и҆ прᲂславлѧ́емъ тѧ̀ с̾ вы́шними си́лами . ст҃ъ є҆сѝ без̾нача́льныи бж҃е , трⷪ҇це взыва́юще .

и҆ ны́нѣ . Наслѣ́дᲂвавше ра́дᲂсть , ржⷭ҇тва̀ твᲂегѡ̀ ра́ди пречⷭ҇таѧ , ра́дᲂсть ти вѣща́емъ со а҆́нг҃лѡмъ вᲂпїю́ще , ра́дꙋисѧ мт҃и и҆́стиннагѡ бг҃а и҆ сп҃са на́шегѡ .