Всре́дꙋ , ве́черъ . на гдⷭ҇и вᲂзва́хъ , стⷯры , ст҃ы́мъ а҆пⷭ҇лѡмъ . гла́съ , є҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . В=сю̀ прᲂше́дше зе́млю , в̾сѣ́ѧсте бжⷭ҇твенаѧ ᲂу҆че́нїѧ , сло́во ꙗ҆́кѡ свѣ́щникъ то́чїю и҆ бᲂга́тьство всѐ , ᲂу҆ченицы̀ гдⷭ҇ни нᲂсѧ́ще . и҆́мже царѧ́ же и҆ мꙋчи́телѧ пᲂсрами́сте , и҆ любᲂмꙋдреце́мъ и҆ виті́ѧмъ лю́тᲂсть , ꙗ҆́кѡ паꙋчи́ннаѧ раз̾дра́сте плете́нїѧ , всѣ́хъ к̾ ра́зꙋмꙋ призыва́юще зижди́телѧ , и҆ сꙋ́етнагѡ слꙋже́нїѧ бѣсо́вскагѡ и҆зима́юще . тѣ́мже мᲂлю̀ без̾слᲂве́сныхъ и҆зба́вити мѧ страсте́й , мл҃твами ва́шими .

ᲂу҆пᲂва̀ дш҃а мᲂѧ̀ на́ гдⷭ҇а . Мѧте́жа и҆скꙋше́нїи , и҆ лю́таго пᲂбѣжде́нїѧ без̾зако́нныхъ є҆ресе́й , бѣсо́вскагѡ напа́данїѧ , и҆ челᲂвѣ́къ го́рькаго ѕлᲂсᲂвѣ́тїѧ , и҆ бꙋ́ри ѻ҆гнѧ̀ несвѣти́магѡ , и҆ вѣ́чнꙋющагѡ че́рвїѧ , и҆ скре́жета зꙋбна́гѡ , и҆ всѧ́кїѧ и҆ны́ѧ мꙋ́ки , є҆́же къ бг҃ꙋ мᲂльба́ми всеблаже́ннїи и҆зба́вите всѣ́хъ на́съ . и҆ мᲂлѧ́щи є҆гѡ̀ ᲂу҆мᲂли́те , вᲂздержа́нїемъ и҆ трꙋдо́мъ , дᲂбрᲂдѣ́телемъ , вᲂздаѧ́нїе пᲂлꙋчи́ти , наслѣ́дїе же нбⷭ҇нагѡ црⷭ҇твїѧ , и҆ ве́лїю ми́лᲂсть .

да ᲂу҆пᲂва́етъ і҆и҃ль на́ гдⷭ҇а . Всю̀ свѣ́тлᲂсть ꙗ҆́снѡ вᲂспрїе́млюще , тро́ичнꙋю , свѣ́тъ втᲂры́и не и҆з̾рече́ннаго смᲂтре́нїѧ , ꙗ҆́кѡ мо́щнѡ вᲂи́стинꙋ чл҃ческᲂмꙋ є҆стествꙋ̀ пᲂказа́сѧ всесᲂверше́но , всехва́льнаѧ десѧти́ца съ дво́ицею , вᲂдѧ́щи є҆динᲂревни́тельныи сᲂбо́ръ , се́дмьдесѧтихъ , и҆ два̀ и҆мꙋ́щи с̾ ни́ми , и҆ всѧ̀ прᲂсвѣща́юще ми́рꙋ кᲂнцы̀ , ѡ҆мрача́ющихсѧ тмо́ю ѕлᲂмꙋ́дреныхъ є҆ресе́й . хрⷭ҇та̀ мᲂлѧ́ще , пᲂдаю́щаго ми́рᲂви ве́лїю млⷭ҇ть .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ чꙋдᲂтво́рцꙋ нико́лѣ . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . Р=а́дꙋйсѧ сщ҃е́ннаѧ главо̀ чи́стᲂе дᲂбрᲂдѣ́телей ѡ҆би́телище , бжⷭ҇твенᲂе непᲂро́чнаго сщ҃е́ньства пра́вило , па́стырю вели́кїи ꙗ҆́вьственыи , свѣ́тлᲂе пᲂбѣ́ды нᲂсѧ̀ и҆́мѧ , мᲂлѧ́щимсѧ ми́лᲂстивныи приклᲂни́телю , преклᲂнѧ́ѧсѧ к̾ немᲂщны́хъ мᲂльба́мъ , и҆зба́вителю гᲂто́выи . прибѣ́жище спаси́тельнᲂе всѣ́мъ , и҆́же вѣ́рᲂю чтꙋ́щимъ приснᲂсла́внꙋю ти па́мѧть . хрⷭ҇та̀ мᲂлѝ низ̾пᲂсла́ти на́мъ ве́лїю млⷭ҇ть .

пᲂхвали́те є҆гѡ̀ всѝ лю́дїе . Ра́дꙋисѧ сщ҃е́ннѣйшїи ᲂу҆́ме , трⷪ҇цы чи́стᲂе жили́ще , сто́лпе цр҃ко́вныи , вѣ́рнымъ ᲂу҆тверже́нїе , ѡ҆ѕло́бленымъ пᲂмо́щниче . ѕвѣздо̀ , и҆́же блиста́ньми бл҃гᲂпрїѧ́тныхъ мл҃твъ , разᲂрѧ́ѧ напа́сти же и҆ ско́рби , и҆ тмꙋ̀ всегда̀ , ст҃лю нико́лае , приста́нище ти́хᲂе , въ не́же прибѣга́юще , тревᲂлне́нїи житїѧ̀ напа́ствꙋемїи спаса́ютсѧ . хрⷭ҇та̀ мᲂлѝ , низ̾пᲂсла́ти дш҃а́мъ на́шимъ ве́лїю млⷭ҇ть .

и҆ и҆́стина гдⷭ҇нѧ пребыва́етъ во́ вѣки . Ра́дꙋисѧ во ст҃лехъ пра́вило , бжⷭ҇твеныхъ чꙋде́съ не и҆з̾черпа́емаѧ пꙋчи́но , красᲂто̀ цр҃ко́внаѧ , свѣ́тлаѧ ѕвѣздо̀ . и҆́же сщ҃е́нными сѝ бл҃же́нне блиста́ньми , на́съ ѡ҆зарѧ́ѧ кᲂго́ждо ст҃ѣ́йшїи , пресвѣ́тлыми мо́лнїѧми прᲂсвѣща́емы , сто́лпе не ѡ҆бᲂри́мыи , степе́ню вѣ́ры , и҆́же честнꙋ́ю ти па́мѧть любо́вїю сᲂверша́ющимъ . хрⷭ҇та̀ мᲂлѝ , дш҃а́мъ на́шимъ дарᲂва́ти ве́лїю млⷭ҇ть .

сла́ва , и҆ ны́нѣ , боⷢ҇ . Ра́дꙋйсѧ прᲂро́ческаѧ печа́те , и҆ бг҃ᲂгла́сныхъ а҆пⷭ҇лъ прᲂпᲂвѣ́данїе . бг҃а бо вᲂи́стинꙋ сꙋ́щагѡ вᲂплᲂще́нна , па́че ᲂу҆ма̀ и҆ сло́ва рᲂдила̀ є҆сѝ чи́стаѧ . и҆́мже пе́рвᲂе вᲂспрїи́мше бл҃гᲂро́дїе , и҆ ра́йскїѧ пи́щи наслажда́ющесѧ , тебѐ хᲂда́таицꙋ такᲂвы́ѧ свѣ́тлᲂсти , и҆ мᲂли́твеницꙋ бл҃гᲂпрїѧ́тнꙋ , пѣ́сньми пᲂчита́емъ . тᲂбо́ю пречⷭ҇таѧ ѡ҆бᲂга́тившесѧ , приснᲂсꙋ́щныѧ спᲂдᲂблѧ́емсѧ жи́зни сн҃а твᲂегѡ̀ , пᲂдаю́щагѡ бᲂга́тнѡ ве́лїю млⷭ҇ть .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры . гла́съ , є҃ . Оу҆ченицы̀ спа́сᲂвы , та́йнамъ самᲂви́дцы бы́вше , неви́димагѡ и҆ зача́ла не и҆мꙋ́ща бг҃а , прᲂпᲂвѣ́дасте глаго́люще , в̾ нача́лѣ бѣ̀ сло́вѡ несо́здани бы́сте пре́жде а҆́нг҃лъ , ни наꙋчи́стесѧ ѿ чл҃къ , но ѿ вы́шнїѧ премꙋ́дрᲂсти . тѣ́мже дерзнᲂве́нїе и҆мꙋ́ще , мᲂли́тесѧ ѡ҆ дш҃а́хъ на́шихъ .

сти́хъ : к̾ тебѣ̀ вᲂз̾ведо́хъ ѻ҆́чи . А҆пⷭ҇лы гдⷭ҇ни сᲂгла́сно пѣ́сньми пᲂхва́лимъ . ѡ҆бо́лкшебᲂсѧ въ крⷭ҇тнᲂе ѻ҆рꙋ́жїе , и҆́дᲂльскꙋю ле́сть ᲂу҆праздни́ша , и҆ пᲂбѣдᲂно́сни ꙗ҆ви́шасѧ вѣне́чницы . и҆́хже мл҃твами и҆ всѣ́хъ ст҃ы́хъ , бж҃е пᲂми́лꙋй на́съ .

сти́хъ : пᲂми́лꙋй на́съ гдⷭ҇и . мⷱ҇ꙋ . Несы́тнᲂю любо́вїю дш҃а , хрⷭ҇та̀ не ѿверго́стесѧ ст҃і́и мч҃нцы , и҆́же разли́чныѧ ра́ны страсте́й претерпѣ́вше , мꙋчи́телемъ гᲂрды́ни низ̾лᲂжи́сте . непрекло́ннꙋ и҆ невреди́мꙋ вѣ́рꙋ сᲂхра́ньше , на нб҃са̀ преста́вистесѧ . тѣ́мже и҆ дерзнᲂве́нїе и҆мꙋ́ще к̾ немꙋ̀ , прᲂси́те дарᲂва́ти на́мъ ве́лїю млⷭ҇ть .

сла́ва , и҆ ны́нѣ , боⷢ҇ . Бл҃жи́мъ тѧ̀ бцⷣе дв҃о , и҆ сла́вимъ тѧ̀ вѣ́рнїи по́ дᲂлгꙋ , гра́дъ непᲂкᲂлеби́мыи , стѣ́нꙋ не ѡ҆бᲂри́мꙋю , тве́рдꙋю пред̾ста́тельницꙋ , и҆ прибѣ́жище дш҃а́мъ на́шимъ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ сре́дꙋ , на па́вечерницѣ . кано́нъ , прест҃ѣ́й бцⷣѣ . гла́съ , є҃ . пѣ́снь , а҃ . і҆рмо́съ . Спаси́телю бг҃ꙋ , в̾ мо́ри лю́ди немо́крыми стᲂпа́ми наста́вльшꙋ , и҆ фараѡ́на с̾ во́и пᲂто́пльшꙋ , тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Свѣтᲂно́снаѧ ски́нїе цр҃ѧ хрⷭ҇та̀ , ѡ҆зари́ ми мы́сль , ѡ҆мраче́нꙋю ле́стїю бᲂрца̀ , и҆ тмо́ю ѡ҆слѣпле́нꙋю прегрѣше́ньми мᲂи́ми . Пᲂмышле́ней лꙋка́выхъ , смире́ннꙋю мᲂю̀ дш҃ꙋ бг҃ᲂрᲂди́тельнице свᲂбᲂдѝ , и҆ жили́ще бг҃ꙋ сїю̀ сᲂдѣ́лай , да по́ дᲂлгꙋ тѧ̀ сла́влю всегда̀ . сла́ва . Є҆гда̀ пᲂвелѣ́нїемъ бж҃їимъ , ѿ вре́менныѧ жи́зни ѿи҆тѝ хᲂщꙋ̀ пречⷭ҇таѧ , бѣсо́вскїѧ рꙋкѝ пᲂкажи́ мѧ вы́шша , а҆́нг҃лы пᲂдаю́щи с̾пꙋ́тники мнѣ̀ . и҆ ны́нѣ . Вскꙋ́ю ѽ дш҃е во ᲂу҆ны́нїи мно́зѣ всѐ житїѐ и҆з̾жила̀ є҆сѝ , пᲂтщи́сѧ ᲂу҆́бѡ про́чее и҆ вᲂзᲂпі́й гдⷭ҇ни мт҃ри , ѡ҆чи́сти и҆ спаси́ мѧ бг҃ᲂрᲂди́тельнице .

пѣ́снь , г҃ . і҆рмо́съ . Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , ꙗ҆́кѡ пѣ́ти и҆ сла́вити , тридне́внᲂе твᲂѐ вᲂскрⷭ҇нїе . и҆́з̾ =рᲂва страсте́й и҆ мꙋче́нїи вᲂзведи́ мѧ , несꙋмѣ́нно пᲂю́ща тѧ̀ бцⷣе всеблаже́ннаѧ . Вре́тище мᲂѐ расто́ргни , без̾мѣ́рныхъ прегрѣше́нїи мᲂи́хъ . и҆ весе́лїемъ ѡ҆пᲂѧ́ши дᲂбрᲂдѣ́телей , бг҃ᲂбл҃гᲂда́тнаѧ . =сла́ва . Ка́плю ми чи́стаѧ слеза́мъ пᲂда́ждь . ꙗ҆́кѡ да ѿженꙋ̀ срⷣца мᲂегѡ̀ недᲂꙋмѣ́нїе , и҆ прилѣ́жно вᲂспᲂю́ тѧ . и҆ ны́нѣ . Низ̾лᲂжѝ пренепᲂро́чнаѧ , вра́гъ беспло́тныхъ шата́нїе и҆ тѣ́хъ тᲂмле́нїѧ в̾ско́рѣ свᲂбᲂди́ мѧ .

пѣ́снь , д҃ . і҆рмо́съ . Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ вᲂзᲂпи́хъ , сла́ва си́лѣ твᲂе́й гдⷭ҇и . Вскꙋ́ю ᲂу҆пᲂдо́биласѧ є҆сѝ дш҃е , непло́днѣй смᲂко́вницѣ , бᲂѧ́щисѧ ника́кᲂже пᲂсѣче́нїѧ , и҆ пла́мене вѣ́чнаго . ᲂу҆скᲂрѝ ᲂу҆́бѡ пре́жде кᲂнца̀ и҆ вᲂзни́кни . Кі́и ꙗ҆зы́къ и҆з̾рече́тъ сᲂдѣ́ѧныхъ ми ѕѡ́лъ , без̾мѣ́рнаго мо́рѧ , и҆ глꙋбины̀ прегрѣше́нїи , спаси́ мѧ дв҃о пренепᲂро́чнаѧ ѿча́ѧннагѡ . сла́ва . Себѐ пла́чꙋ є҆гда̀ во ᲂу҆́мъ прїидꙋ̀ , мно́гихъ ми прегрѣше́нїи , и҆ ѻ҆гнѧ̀ негаси́маго . но и҆ мᲂлю́ тѧ да́ти ми вре́мѧ пᲂкаѧ́нїѧ чⷭ҇таѧ . и҆ ны́нѣ . Да невᲂсхи́титъ ꙗ҆́кѡ ле́въ стрᲂпти́выи вра́гъ , ѡ҆каѧ́ннꙋю ми дш҃ꙋ . но твᲂе́ю си́лᲂю , дш҃етлѣ́нныѧ сᲂкрꙋшѝ зꙋ́бы є҆гѡ̀ бл҃га́ѧ .

пѣ́снь , є҃ . і҆рмо́съ . Оу҆́треннююще вᲂпїе́мъ ти гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . При́зри и҆ ᲂу҆слы́ши влⷣчце гла́съ мо́й , и҆ и҆зба́ви мѧ мᲂлю́сѧ вѣ́чнагѡ ѡ҆сꙋже́нїѧ . Оу҆ѧзви́хсѧ грѣха̀ стрѣла́ми , и҆ вᲂпїю́ ти , ᲂу҆врачꙋ́й пречⷭ҇таѧ срⷣца мᲂегѡ̀ ꙗ҆́звы . сла́ва . Пᲂми́лꙋй мѧ є҆ди́не чл҃кᲂлю́бче ще́дрыи , мᲂли́твами ро́ждьшїѧ тѧ̀ . ты́ ми є҆сѝ бг҃ъ и҆ гдⷭ҇ь . и҆ ны́нѣ . Пᲂми́лꙋй мѧ є҆ди́на всепѣ́таѧ , мᲂлю̀ твᲂю̀ бл҃гᲂсть , и҆ ми́лᲂсти спᲂдо́би .

пѣ́снь , ѕ҃ . і҆рмо́съ . Ѡ҆бы́де мѧ бе́здна , гро́бъ же ми ки́тъ бы́сть , а҆́зъ же вᲂзᲂпи́хъ к̾ тебѣ̀ чл҃кᲂлю́бче , и҆ спасе́ мѧ десни́ца твᲂѧ̀ гдⷭ҇и . Ꙗ҆́кѡ ле́въ рыка́ѧ льсти́выи , и҆́щетъ мѧ расто́ргнꙋти , и҆ пᲂказа́ти снѣ́дь свᲂе́й и҆ ѕло́бѣ чи́стаѧ . но сегѡ̀ вре́да свᲂбᲂди́ мѧ . Ѡ҆чи́сти чл҃кᲂлю́бче , мᲂли́твами чи́стѡ ро́ждьшїѧ тѧ̀ , и҆ и҆зба́ви ми́ръ сво́й ѿ всѧ́кїѧ ско́рби , и҆ вѣ́чнѣй сла́вѣ спᲂдо́би . сла́ва . Ѡ҆бы́де мѧ бе́здна прегрѣше́нїи , во глꙋбинꙋ̀ низ̾ве́дши ѿча́ѧнїѧ . мᲂлю́сѧ чⷭ҇таѧ , вᲂзведѝ ѿ преи҆спо́днѧго а҆́да , тебѐ сла́вѧщаго . и҆ ны́нѣ . Житїѐ мᲂѐ и҆спо́лнисѧ прегрѣше́нїи , и҆ всѧ́кїѧ лѣ́нᲂсти . тѣ́мже к̾ пᲂкаѧ́нїю , пре́жде кᲂнчи́ны мᲂеѧ̀ чⷭ҇таѧ ѡ҆братѝ , и҆ спаси́ мѧ препѣ́таѧ .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , є҃ . Р=а́дꙋисѧ стѣно̀ тве́рдаѧ бг҃ᲂпᲂбѣ́днаѧ , ра́дꙋисѧ паде́нїе ва́рварᲂмъ всевᲂе́ваннᲂе , ра́дꙋисѧ вᲂзведе́нїе вѣ́рныхъ , правᲂсла́вныхъ люде́й , бцⷣе вᲂи́стинꙋ ᲂу҆пᲂва́ющихъ на тѧ̀ , мл҃твами сѝ и҆збавлѧ́ющи на́съ , ѿ бѣ́дъ всѧ́ческихъ и҆ ѿ без̾бо́жныхъ вра́гъ .

пѣ́снь , з҃ . і҆рмо́съ . Въ пещѝ ѻ҆́гненнѣй , пѣвцы̀ спа́слъ дѣ́ти , блгⷭ҇ве́нъ бг҃ъ ѻ҆ц҃ъ на́шихъ . Нево́льныхъ ѕѡ́лъ и҆ во́льныхъ , прᲂще́нїе твᲂе́ю бл҃гᲂстїю влⷣчце пᲂда́ждь мѝ . И҆знемᲂга́етъ мѝ ᲂу҆́мъ , прило́ги нече́стїѧ лꙋка́выхъ по́мыслъ , пᲂмᲂзи́ ми бл҃га́ѧ . сла́ва . Дш҃е́вныхъ ми страсте́й ра́ны , бцⷣе твᲂи́хъ мл҃твъ лѣчба́ми ны́нѣ и҆сцѣлѝ . и҆ ны́нѣ . Сᲂкрꙋше́нꙋ дш҃ꙋ , и҆ по́мыслъ смире́нъ , пᲂда́ждь ми бл҃га́ѧ , ꙗ҆́кѡ да сла́влю тѧ̀ .

пѣ́снь , и҃ . і҆рмо́съ . и҆з̾ =ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . Влѣ́нᲂсти житїѐ скᲂнча́въ ѻ҆каѧ́нныи , и҆ прибли́жихсѧ къ кᲂнцꙋ̀ живᲂта̀ мᲂегѡ̀ , взыва́ю ти бцⷣе сᲂпрᲂти́вныхъ и҆схи́ти сѣте́й смире́ннꙋю мᲂю̀ дш҃ꙋ . Тѣле́сныхъ бᲂлѣ́зней , ра́нъ лю́тыхъ , и҆ страсте́й настᲂѧ́нїѧ дш҃е́вныхъ и҆стѧза́емꙋ , твᲂегѡ̀ црⷭ҇твїѧ си́лꙋ ми пᲂда́ждь , ꙗ҆́кѡ є҆ди́нъ ми́лᲂстивъ . =сла́ва . Въ пꙋчи́нѣ житїѧ̀ ѡ҆бꙋрева́ема , и҆ бѣсо́вскими вᲂлна́ми пᲂгрꙋжа́ема , спасѝ чⷭ҇таѧ , и҆ къ бжⷭ҇твенᲂмꙋ ᲂу҆стремле́нїю . ко бл҃гᲂꙋго́днᲂмꙋ житїю̀ в̾веди́ мѧ ѻ҆трᲂкᲂви́це . и҆ нн҃ѣ . Ꙗ҆́кѡ в̾ невѣ́стныи черто́гъ в̾хᲂдѧ̀ дв҃це гаврїи́лъ по́сланъ , ра́дꙋисѧ вᲂзᲂпѝ гл҃ѧ , пресла́внаѧ пᲂла́то всѣ́хъ цр҃ѧ хрⷭ҇та̀ , в̾ ню́же всели́сѧ , земны́ѧ всѧ̀ ѡ҆бᲂжѝ .

пѣ́снь , ѳ҃ . і҆рмо́съ . Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾ лѣ́то без̾лѣ́тнагѡ не и҆зрече́нно ро́ждьшꙋю , вѣ́рнїи є҆динᲂмꙋ́дреннѡ , пѣ́сньми велича́емъ . Тѧ̀ и҆́же бг҃а несказа́нно ро́ждьшꙋю , застꙋ́пницꙋ стѧжа́хᲂмъ , и҆ стѣ́нꙋ недви́жимꙋ , и҆ дш҃а́мъ спасе́нїе , и҆ чꙋдесе́мъ и҆сто́чника . Ми́лᲂстивъ бꙋ́ди ми , сло́ве и҆́стиннаго бг҃а , въ де́нь сꙋда̀ , мᲂльба́ми ро́ждьшїѧ тѧ̀ . и҆ сꙋ́щимъ ѡ҆деснꙋ́ю тебѐ сᲂчета́й . сла́ва . И҆зба́ви мѧ̀ чи́стаѧ , ѻ҆гнѧ̀ вѣ́чнꙋющаго , и҆ неᲂу҆сыпа́ющаго че́рвїѧ , и҆ всѧ́кїѧ мꙋ́ки , и҆́же на тѧ̀ наде́жꙋ вᲂзло́жшаго . и҆ нн҃ѣ . Є҆гда̀ хо́щетъ дш҃а мᲂѧ̀ разлꙋчи́тисѧ , ѿ ѻ҆каѧ́ннаго мᲂегѡ̀ тѣлесѐ , неви́димыхъ вра́гъ тᲂми́тельства и҆зба́ви мѧ̀ , бг҃ᲂневѣ́стнаѧ . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ четверто́къ , на ᲂу҆́трени . по а҃ , стихᲂло́гїи . сѣда́ленъ а҆пⷭ҇лѡмъ . гла́съ , є҃ . Ꙗ҆́кѡ самᲂви́дцы и҆ слꙋгѝ сло́вꙋ , премꙋ́дрыѧ а҆пⷭ҇лы пᲂхва́лимъ , пѣ́сньми дх҃о́вными и҆ пѣ́ньми всѝ земні́и . ті́и бо хрⷭ҇та̀ прилѣ́жнѡ мо́лѧтъ , ѡ҆ на́съ пᲂю́щихъ сщ҃е́ннꙋю и҆́хъ па́мѧть , и҆ кла́нѧющихсѧ мᲂще́мъ и҆́хъ .= сти́хъ : во всю̀ зе́млю и҆зыдо́ша веща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Ꙗ҆́кѡ самᲂви́дцы и҆ слꙋгѝ сло́вꙋ , премꙋ́дрыѧ а҆пⷭ҇лы пᲂхва́лимъ , пѣ́сньми дх҃о́вными и҆ пѣ́ньми всѝ земні́и . ті́и бо хрⷭ҇та̀ прилѣ́жнѡ мо́лѧтъ , ѡ҆ на́съ пᲂю́щихъ сщ҃е́ннꙋю и҆́хъ па́мѧть , и҆ кла́нѧющихсѧ мᲂще́мъ и҆́хъ . сла́ва , и҆ ны́нѣ , боⷢ҇ . Ѻ҆=сꙋжде́нъ є҆́смь сꙋдо́мъ со́вѣсти , и҆ пре́жде сꙋда̀ сꙋ́дъ пᲂмышлѧ́ѧ , трепе́щꙋ ѻ҆каѧ́нныи , пᲂмина́ѧ ѕѡ́лъ мᲂи́хъ мно́жество , но к̾ тебѣ̀ не ѡ҆бᲂри́мѣй , ᲂу҆миле́нїемъ вᲂпїю̀ , и҆ пред̾ста́тельницѣ и҆ пᲂкро́вꙋ , ѻ҆́нᲂго стꙋда̀ и҆зба́ви мѧ , и҆ спасѝ мл҃твами сѝ .

по в҃ , стихᲂло́гїи , сѣда́ленъ . гла́съ , є҃ . А҆пⷭ҇лы сᲂгла́снѡ пᲂхва́лимъ , ꙗ҆́кѡ прᲂпᲂвѣ́даша всѣ́мъ правᲂсла́внᲂе гдⷭ҇не ᲂу҆че́нїе , и҆ прᲂгна́ша є҆рети́ческꙋю мглꙋ̀ , и҆ прᲂсвѣще́нїе дх҃о́вно всѣ́ѧша в̾ ми́рѣ . бл҃гᲂда́ти ᲂу҆че́нїемъ , и҆ мо́лѧтъ спасти́сѧ на́мъ . сти́хъ : нб҃са̀ пᲂвѣ́даютъ сла́вꙋ бж҃їю , твᲂре́нїе же рꙋ́кꙋ є҆гѡ̀ вᲂзвѣща́етъ тве́рдь . А҆пⷭ҇лы сᲂгла́снѡ пᲂхва́лимъ , ꙗ҆́кѡ прᲂпᲂвѣ́даша всѣ́мъ правᲂсла́внᲂе гдⷭ҇не ᲂу҆че́нїе , и҆ прᲂгна́ша є҆рети́ческꙋю мглꙋ̀ , и҆ прᲂсвѣще́нїе дх҃о́вно всѣ́ѧша в̾ ми́рѣ . бл҃гᲂда́ти ᲂу҆че́нїемъ , и҆ мо́лѧтъ спасти́сѧ на́мъ .= сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ст҃ы́хъ мч҃нкъ и҆справле́нїемъ , нбⷭ҇ныѧ си́лы преꙋдиви́шасѧ , ꙗ҆́кѡ в̾ тѣ́лѣ ме́ртвенѣмъ , до́брѣ пᲂдви́гшесѧ , беспло́тнаго врага̀ , си́лᲂю крⷭ҇тнᲂю неви́димо пᲂбѣди́ша , и҆ мо́лѧтсѧ гдⷭ҇ви пᲂми́лᲂватисѧ дш҃а́мъ на́шимъ . =сла́ва , и҆ ны́нѣ , боⷢ҇ . Тѧ̀ приста́нище , и҆ стѣ́нꙋ , и҆ прибѣ́жище , и҆ наде́жꙋ , и҆ пᲂкро́въ , и҆ застꙋпле́нїе те́плᲂе , ѡ҆брѣ́тше вѣ́рнїи , к̾ тебѣ̀ притека́емъ , и҆ вᲂпїе́мъ прилѣ́жнѡ . и҆ зᲂве́мъ вѣ́рнѡ , пᲂми́лꙋй бцⷣе ᲂу҆пᲂва́ющихъ на тѧ̀ , и҆ ѿ прегрѣше́нїи и҆зба́ви .

по г҃ , стихᲂло́гїи , сѣда́ленъ . гла́съ , є҃ . Оу҆ченицы̀ сп҃сᲂвы , бжⷭ҇твенїи а҆пⷭ҇ли , и҆́же сло́во спаси́тельнᲂе всѣ́ѧвше в̾ кᲂнцы̀ землѝ , и҆ ѡ҆зари́вше во тмѣ̀ и҆ сѣ́ни сѣдѧ́щїѧ , мᲂю̀ прᲂсвѣти́те дш҃ꙋ , ѡ҆мра́чнꙋю страсте́й че́рнᲂстїю , мᲂльба́ми ва́шими всехва́льнїи . сла́ва , и҆ ны́нѣ , боⷢ҇ . И҆́же ᲂу҆пᲂва́нїе на тѧ̀ дв҃о пречⷭ҇таѧ , непᲂткнᲂве́нᲂе и҆мꙋ́щимъ , пᲂкро́въ сꙋ́щїи , ѿ разли́чныхъ напа́стей и҆ ѡ҆б̾стᲂѧ́нїи , и҆ бѣ́дъ лю́тыхъ свᲂбᲂдѝ на́съ , мᲂлѧ́щи сн҃а свᲂегѡ̀ , со а҆пⷭ҇лы є҆гѡ̀ , и҆ спасѝ всѣ́хъ вᲂспѣва́ющихъ тѧ̀ .

Въ четверто́къ кано́нъ , ст҃ы́мъ а҆пⷭ҇лѡмъ . твᲂре́нїе ѳео́фанᲂво , є҆пкⷭ҇па никі́йскаго . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧи бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆и҃лѧ же спасѐ , пᲂбѣ́днꙋю пѣ́снь пᲂю́ща . запѣ́въ : ст҃і́и а҆пⷭ҇ли мᲂли́те бг҃а ѡ҆ на́съ . Сїѧ́нїемъ первᲂда́тнаго свѣтᲂда́нїѧ , и҆́же пло́тїю бесѣ́дᲂвати челᲂвѣ́кѡмъ спᲂдо́бившагᲂсѧ , ѡ҆бᲂгати́вшесѧ сла́внїи , дш҃ѝ мᲂеѧ̀ разрꙋши́те мра́къ бжⷭ҇твенїи а҆пⷭ҇ли . двⷤа . Напрѧ́гъ бжⷭ҇твеныи лꙋ́къ , и҆ ꙗ҆́кᲂже стрѣ́лы ва́съ в̾ ве́сь ми́ръ пᲂсла̀ а҆пⷭ҇ли , стрѣ́лы сᲂкрꙋша́юща ѕлᲂко́зненаго всѧ̀ , и҆ и҆сцѣлѧ́юща вѣ́рныхъ ꙗ҆́звы . И҆мꙋ́ще премꙋ́дрᲂсть са́мꙋю ᲂу҆чи́телѧ , ᲂу҆премꙋ́дристе а҆пⷭ҇ли всѧ̀ кᲂнцы̀ . тѣ́мже мѧ ᲂу҆мꙋ́дрите , вра́жїе всеѕлᲂдѣ́йство ѿгᲂнѧ́ти . боⷢ҇ . Є҆ди́на бл҃гᲂслᲂве́наѧ бг҃ᲂра́дᲂваннаѧ , бл҃гᲂслᲂве́нїемъ чл҃ческїи ро́дъ ѡ҆бра́дᲂвавши . хрⷭ҇та̀ мᲂлѝ , съ бжⷭ҇твеными всегда̀ а҆пⷭ҇лы , пᲂми́лᲂвати на́съ .

Дрꙋгі́и кано́нъ , и҆́же во ст҃ы́хъ ѻ҆ц҃ꙋ на́шемꙋ , нико́лѣ чꙋдᲂтво́рцꙋ . твᲂре́нїе , ки́ръ і҆ѡ́сифᲂво . і҆рмо́съ , то́йже . =запѣ́въ : ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Вѣ́рᲂю и҆ любо́вїю ѻ҆́ч҃е , присво́ивсѧ бг҃ᲂви . прест҃а́гѡ и҆спо́лнилсѧ є҆сѝ хᲂтѣ́нїѧ . и҆́миже бы́сть по всемꙋ̀ ст҃ъ , ст҃лю мꙋ́дре нико́лае . И҆мꙋ́ще тѧ̀ пред̾ста́телѧ къ ще́дрᲂмꙋ . и҆́же напа́стьми и҆ печа́льми ѡ҆держи́мїи к̾ тебѣ̀ прибѣга́емъ . да́рꙋй рꙋ́кꙋ спаса́ющꙋю на́съ , ѿ всѧ́кїѧ тѣснᲂты̀ . Ми́рѧнᲂмъ ст҃лѧ хрⷭ҇то́съ пᲂказа́ тѧ , бл҃гᲂво́нїемъ чꙋде́съ на́съ ѡ҆бл҃гᲂꙋха́юща , тѣ́мже мо́лимъ тѧ̀ нико́лае , ѕлᲂво́нїѧ грѣхо́внаго и҆зба́вити на́съ . =боⷢ҇ . Дре́вле пррⷪ҇ческїи тѧ̀ ли́къ , прᲂнаречѐ го́рꙋ бжⷭ҇твенꙋю дв҃о , и҆ две́рь непрᲂхᲂди́мꙋю . тѣ́мже мо́лимсѧ тѝ , пᲂкаѧ́нїѧ две́ри бжⷭ҇твенїи ѻ҆трᲂкᲂви́це ѿве́рзи на́мъ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . И҆́же пло́тїю ѡ҆бнища́выи , премно́гїи бл҃гᲂстїю , є҆гѡ̀ ра́ди ѡ҆бнища́вшїѧ , ѡ҆бᲂгатѝ ва́съ сла́внїи а҆пⷭ҇ли , дарᲂва́ньми всѧ́кими , ѡ҆бᲂгаща́юща кᲂнцы̀ бжⷭ҇твеными и҆ честны́ми ра́зꙋмы . двⷤа . Оу҆ѧзви́хсѧ ꙗ҆дᲂви́тымъ ѕмі́ѧ ᲂу҆грызе́нїемъ , ᲂу҆ѧ́звено срⷣце стѧжа́хъ . тѣ́мже тѝ вᲂпїю̀ хрⷭ҇тѐ , менѐ ра́ди ᲂу҆ѧзви́вшагᲂсѧ , а҆пⷭ҇лъ твᲂи́хъ мᲂльба́ми и҆сцѣлѝ , и҆ спаси́ мѧ мᲂлю́сѧ . Мре́жею мл҃твъ ва́шихъ всебл҃же́ннїи , ѿ глꙋбины̀ ѕло́бныѧ бᲂри́телѧ , и҆ ѿ тревᲂлне́нїѧ пᲂмышле́нїи , и҆ ѿ страсте́й смертᲂно́сныхъ вᲂзве́дше мѧ , приведи́те бг҃ᲂви всѣ́хъ спаса́ема . боⷢ҇ . И҆́же до́ждь прїе́мшаѧ нбⷭ҇ныи , со а҆пⷭ҇лы тᲂгѡ̀ мᲂлѝ , ᲂу҆ста́вити пᲂто́ки мᲂи́хъ страсте́й , пꙋчи́нꙋ и҆з̾сꙋша́ющи грѣха̀ мᲂегѡ̀ , и҆ спаси́ мѧ и҆́же чи́стѡ тебѐ сла́вѧщаго .

и҆́нъ , і҆рмо́съ , то́йже . Стрѣ́лы лꙋка́вагѡ притꙋпи́лъ є҆сѝ прпⷣбне , прᲂтивле́нїемъ бжⷭ҇твеныхъ тѝ трꙋдо́въ . но твᲂи́ми мл҃твами мꙋ́дре , ѿ тᲂгѡ̀ ѕлᲂдѣ́йствїѧ сᲂблюдѝ неврежде́ны , тебѐ вᲂспѣва́ющїѧ , вели́кїи нико́лае . Житїѐ а҆́нг҃льско на землѝ пᲂказа́въ , ны́нѣ со а҆́нг҃лы при́снѡ пред̾стᲂи́ши прⷭ҇то́лꙋ трⷪ҇ческᲂмꙋ сщ҃е́нне , на́шимъ сᲂгрѣше́нїемъ и҆ напа́стемъ разрѣше́нїѧ прᲂсѧ̀ , ѻ҆́ч҃е ст҃лю нико́лае . Оу҆ма̀ мᲂегѡ̀ ѡ҆мраче́нїе всѐ ѿженѝ нико́лае , твᲂи́ми свѣтᲂно́сными мл҃твами , ᲂу҆ти́ши бꙋ́рю страсте́й . ᲂу҆пра́ви мѧ ѻ҆́ч҃е к̾ без̾стра́стїѧ приста́нищꙋ мᲂлю́сѧ , ꙗ҆́кѡ да во хвале́нїи сла́влю тѧ̀ . боⷢ҇ . Пред̾стᲂѧ́щи ѡ҆деснꙋ́ю хрⷭ҇та̀ , ꙗ҆́кѡ цр҃ца рѧ́сны златы́ми бг҃ᲂѡ҆бра́дᲂваннаѧ ѡ҆дѣ́ѧнна вᲂи́стинꙋ , на́мъ црⷭ҇твїе нбⷭ҇нᲂе , мᲂли́твами сѝ бг҃ᲂѻ҆трᲂкᲂви́це хᲂда́тайствꙋющи всенепᲂро́чнаѧ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Две́рь ѿве́рзлъ є҆сѝ і҆с҃е бж҃е на́шъ , свᲂегѡ̀ а҆пⷭ҇лѡмъ ра́зꙋма . всѣ́мъ ꙗ҆зы́кѡмъ ѿве́рзесѧ две́рь , тѣ́хъ ᲂу҆че́нїемъ . двⷤа . Сн҃е бж҃їи , сн҃ы по прича́стїю нбⷭ҇наго тѝ ѻ҆ц҃а а҆пⷭ҇лы ꙗ҆ви́лъ є҆сѝ , и҆ мᲂле́нїемъ и҆́хъ сн҃ы свѣ́та , всѣ́хъ на́съ сᲂтвᲂрѝ . И҆́же на прⷭ҇то́лѣхъ двᲂю̀ на́десѧтихъ , съ сꙋдїе́ю и҆ цр҃е́мъ , хᲂтѧ́ще пресла́вно сѣ́сти , стра́шнагѡ и҆ ᲂу҆жа́снагѡ мѧ , а҆пⷭ҇ли и҆зба́вите сꙋда̀ . боⷢ҇ . Бжⷭ҇твенагѡ сщ҃е́нїѧ кᲂвче́же , ѡ҆ст҃и́ ми дш҃ꙋ , пᲂмышле́нїе прᲂсвѣтѝ , всегда̀ мᲂлѧ́щи хрⷭ҇та̀ со а҆пⷭ҇лы , спасти́ мѧ .

и҆́нъ , і҆рмо́съ , то́йже . Мимᲂтекꙋ́щими и҆змѣни́лъ є҆сѝ бꙋ́дꙋщаѧ . и҆́хже прича́стники и҆ на́съ ст҃ы́ми ти мл҃твами сᲂтвᲂрѝ нико́лае , и҆ и҆скꙋше́нїѧ всѧ́кᲂгѡ и҆збавлѧ́ѧ жите́йскаго . Ми́рѧнᲂмъ первᲂпрⷭ҇то́льникъ бы́въ нико́лае , всѧ̀ чꙋ́вствїѧ срⷣца мᲂегѡ̀ ѡ҆бл҃гᲂꙋха́й ст҃е , и҆ стра́сти ѕлᲂсмра́дныѧ ѿ негѡ̀ , мл҃твами тѝ ѿгᲂнѧ́й всегда̀ . Сᲂкрꙋшѝ вра́жїѧ ко́зни ви́димыѧ и҆ неви́димыѧ нико́лае . всегда̀ бᲂрю́щїѧ ны̀ , на́ша врагѝ в̾ бескᲂне́чнꙋю па́гꙋбꙋ пᲂслѝ . боⷢ҇ . Ст҃а́ѧ бцⷣе пᲂмᲂзи́ ми , сладᲂстьмѝ вы́нꙋ пᲂтᲂплѧ́емꙋ тѣле́сными . и҆ на ѻ҆дрѣ̀ ᲂу҆ны́нїѧ прⷭ҇нѡ слежа́щꙋ и҆ стенѧ́щꙋ .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Дх҃о́внїи виті́и , честні́и а҆пⷭ҇ли , на го́рницѣ во ѻ҆́гненѣ видѣ́нїи , дх҃а ст҃а́гѡ къ ни́мъ прише́дша стра́шнѡ прїѧ́ша . вⷤ . Сᲂкрꙋша́юще нече́стїѧ , сᲂкрꙋше́нꙋю прегрѣше́ньми мᲂю̀ мы́сль , рᲂсо́ю и҆сцѣле́нїѧ а҆пⷭ҇ли и҆сцѣли́те . Стрѣ́лы и҆з̾бра́нныѧ ва́съ хрⷭ҇то́съ пᲂсла̀ а҆пⷭ҇ли , сᲂкрꙋша́юща стрѣ́лы лꙋка́вьствїѧ . тѣ́мже мѧ и҆сцѣли́те , ᲂу҆ѧ́звенагѡ вра́жїими стрѣла́ми . боⷢ҇ . Не ѡ҆сꙋдѝ менѐ , ни ѿве́рзи менѐ ѿ лица̀ твᲂегѡ̀ мнᲂгᲂмлⷭ҇тиве , мо́литъ тѧ̀ чи́стѡ ро́ждьшаѧ , и҆ а҆пⷭ҇льскїи сᲂбо́ръ .

и҆́нъ , і҆рмо́съ , то́йже . Кꙋми́ры сᲂкрꙋши́лъ є҆сѝ и҆́дᲂльскїѧ ст҃е , и҆ сᲂвѣ́ты без̾дѣ́льны є҆рети́чествꙋющихъ пᲂказа́лъ є҆сѝ нико́лае , и҆ ведо́мыѧ на сме́рть и҆зба́вилъ є҆сѝ . Оу҆́треневавъ ко́ гдⷭ҇ꙋ и҆́з̾млада прпⷣбне , и҆ та́мѡ сꙋ́щими свѣтᲂли́тїи ве́сь прᲂсвѣти́всѧ . тѣ́мже мᲂлю́сѧ , дш҃и мᲂе́й ѻ҆́блаки разженѝ . Тебѣ́сѧ мо́лимъ ѻ҆́ч҃е нико́лае , в̾ ча́съ сі́и пᲂсредѣ̀ бꙋ́ди всѣ́хъ призыва́ющихъ тѧ̀ , и҆ ꙗ҆́же ко спасе́нїю да́рꙋй на́мъ прᲂше́нїѧ . боⷢ҇ . Неѡ҆бъє́мныи ᲂу҆мо́мъ бг҃ᲂра́дᲂваннаѧ , ѡ҆б̾держа́нїе тѧ̀ и҆мѣ́лъ є҆́сть плᲂтᲂно́сецъ бы́въ , чл҃ки и҆збавлѧ́ѧ ѿ ѡ҆держа́щихъ скᲂрбе́й .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Ѻ҆держа́щꙋю ᲂу҆ста́вилъ є҆сѝ ѕло́бѣ гни́лᲂсть , ꙗ҆зы́кѡмъ дш҃а чл҃кᲂлю́бче . со́лїю ᲂу҆че́нїѧ , сщ҃е́нныхъ ᲂу҆чени́къ твᲂи́хъ . двⷤа . Глꙋбинꙋ̀ свѣ́си ѕѡ́лъ мᲂи́хъ влⷣко хрⷭ҇тѐ , да́ждь ми рꙋ́кꙋ , и҆ спаси́ мѧ чл҃кᲂлю́бче , мᲂльба́ми сщ҃е́нныхъ а҆пⷭ҇лъ твᲂи́хъ . Сꙋдїѧ̀ пра́ведныи , въ де́нь сꙋда̀ страшна́гѡ , тре́петнагѡ мѧ и҆зба́ви ѡ҆сꙋжде́нїѧ , сла́вныхъ а҆пⷭ҇лъ твᲂи́хъ мᲂльба́ми . боⷢ҇ . Ѿча́емаго мѧ ѿ мно́жества без̾зако́нїи спасе́нїю гдⷭ҇и спᲂдо́би , ᲂу҆чени́къ и҆ мт҃ре твᲂеѧ̀ мᲂльба́ми .

и҆́нъ , і҆рмо́съ , то́йже . Млⷭ҇тива сᲂтвᲂрѝ влⷣкꙋ твᲂи́ми мᲂльба́ми , всѣ́мъ чтꙋ́щимъ тѧ̀ нико́лае , ꙗ҆́кѡ да на́шимъ прегрѣше́нїемъ разрѣше́нїе да́рꙋетъ . Ѿ =недꙋ́гъ и҆ сᲂбла́знъ жите́йскихъ , напа́стей же и҆ скᲂрбе́й и҆зба́ви нико́лае , и҆́же мл҃твеника тѧ̀ стѧжа́вшихъ ко́ гдⷭ҇ꙋ . Врача̀ и҆зрѧ́дна пᲂказа̀ тѧ̀ влⷣка хрⷭ҇то́съ , тѣ́мже бᲂлѣ́зни и҆сцѣлѝ бл҃гᲂче́стно к̾ тебѣ̀ прихᲂдѧ́щихъ нико́лае . =боⷢ҇ . Рᲂди́тельница без̾мꙋ́жнаѧ , чⷭ҇таѧ бг҃ᲂмт҃и бы́вши , сегѡ̀ ра́ди мᲂлю́ тѧ , дш҃ѝ мᲂеѧ̀ ᲂу҆ны́нїе ѿженѝ .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Превᲂзнᲂси́мыи ѻ҆ц҃е́мъ гдⷭ҇ь , ва́съ превᲂзнесѐ , и҆ всю̀ низве́рже вра́жїю си́лꙋ , ᲂу҆ченицы̀ хрⷭ҇то́ви бг҃ᲂви́дцы . вⷤ . Скве́рнꙋ срⷣца мᲂегѡ̀ , стрꙋѧ́ми пᲂкаѧ́нїѧ , ва́шими мᲂльба́ми а҆пⷭ҇ли ѡ҆мы́йте , ᲂу҆ча́ще взыва́ти , бж҃е блгⷭ҇ве́нъ є҆сѝ . Ѻ҆гне́мъ бжⷭ҇твенагѡ дх҃а , веще́ствїе пᲂпали́сте , всѧ́кагѡ сꙋ́етства . тѣ́мже палѧ́щїѧ мѧ̀ и҆зба́вите гее́ны , ᲂу҆ченицы̀ бж҃їѧ сло́ва . боⷢ҇ . И҆́же паде́нїѧ а҆да́мᲂва и҆справле́нїе , вᲂз̾дви́гни мѧ па́дшаго въ ѕло́бныи ро́въ , мл҃твами твᲂи́ми дв҃о , и҆ бжⷭ҇твеныхъ а҆пⷭ҇лъ .

и҆́нъ , і҆рмо́съ , то́йже . Ве́сь вᲂзлᲂжи́всѧ гдⷭ҇ви нико́лае , всего́ мѧ спасѝ бг҃ᲂмꙋ́дре , в̾ жите́йскїѧ стра́сти ѻ҆каѧ́ннѣ , всегда̀ в̾па́дающасѧ . Свѣти́льнице бг҃ᲂсвѣтлѣ́йшїи , ᲂу҆́мъ мо́й ѡ҆зарѝ , страсте́й че́рнᲂстїю при́снѡ ѡ҆мрача́емыи , и҆ да́ждь бл҃гᲂѡ҆бра́знѡ хᲂди́ти в̾ житїѝ . Ѿверза́ющаѧсѧ на мѧ̀ ᲂу҆ста̀ лꙋка́ваѧ заградѝ нико́лае мл҃твами сѝ , и҆ и҆зба́ви мѧ ви́димыхъ вра́гъ и҆ неви́димыхъ . =боⷢ҇ . и҆з̾ =тебѐ ѻ҆́блаче всесвѣ́тлыи , вᲂсїѧ̀ на́мъ невече́рнее сл҃нце , хрⷭ҇то́съ бг҃ъ на́шъ прᲂсвѣща́ѧ , и҆́же во тмѣ̀ невѣ́дѣнїѧ сѣдѧ́щїѧ .

пѣ́снь , и҃ . і҆рмо́съ . Тебѣ̀ вседѣ́телю , в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Ты̀ мы́сленыѧ ѻ҆́блаки распрᲂсте́рлъ є҆сѝ а҆пⷭ҇лы сло́ве , ѡ҆крᲂплѧ́щїѧ на́мъ тꙋ́чи , всемꙋ́дрыхъ и҆ бжⷭ҇твеныхъ ᲂу҆че́нїи , и҆ напᲂѧ́ющїѧ на́съ во́ вѣки . двⷤа . Предо́брїи стᲂлпѝ цр҃ко́внїи , и҆́же сїѧ̀ пᲂд̾держа́ще , и҆ вѣ́ры ᲂу҆че́нїемъ сᲂгни́вшꙋюсѧ дш҃и мᲂеѧ̀ хра́минꙋ , бжⷭ҇твенымъ хитрᲂдѣ́йствїемъ , ᲂу҆тверди́те бг҃ᲂви́дцы . Вᲂздыха́й дш҃е , и҆ сле́зъ пᲂто́ки ᲂу҆се́рднѡ принесѝ гдⷭ҇ви зᲂвꙋ́щи , є҆ди́не ще́дре ѡ҆чи́стивъ мѧ и҆ спасѝ , всесла́вныхъ а҆пⷭ҇лъ мл҃твами . боⷢ҇ . Сїѡ́не и҆з̾бра́нныи цр҃е́въ гра́де , вы́шнѧгѡ мѧ̀ гра́да жи́телѧ сᲂтвᲂрѝ , съ бжⷭ҇твеными ᲂу҆ченикѝ мᲂлѧ́щи пречⷭ҇таѧ дв҃о , без̾лѣ́тнагѡ сн҃а свᲂегѡ̀ .

и҆́нъ , і҆рмо́съ , то́йже . Оу҆ста́вилъ є҆сѝ премꙋ́дре твᲂегѡ̀ ст҃а́гѡ ꙗ҆зы́ка стрꙋѧ́ми , пᲂто́ки а҆́рїѧ ѕлᲂчести́вагѡ . тѣ́мже вᲂпїю́ ти , тече́нїе ѕѡ́лъ мᲂи́хъ и҆з̾сꙋшѝ мл҃твами сѝ , нико́лае всебл҃же́нне . Мѵ́рѧнᲂмъ бы́въ ст҃ль вели́кїи , дш҃и мᲂеѧ̀ чꙋ́вства ѡ҆бл҃гᲂꙋха́й нико́лае , ꙗ҆́кѡ да и҆з̾бѣ́гнꙋвъ стра́стнагѡ ѕлᲂво́нїѧ , и҆ ᲂу҆тѣ́шителевꙋ прїимꙋ̀ бл҃гᲂда́ть . И҆зба́ви на́съ мл҃твами сѝ нико́лае , ѿ грѣ́хъ бѣсо́вскагѡ ѡ҆ѕлᲂбле́нїѧ , и҆ ꙗ҆зы́ческагѡ плѣне́нїѧ , и҆ всѣ́хъ челᲂвѣ́къ лꙋка́выхъ врежде́нїѧ , да тѧ̀ ꙗ҆́кѡ и҆зба́вителѧ на́шегѡ вᲂсхва́лимъ . боⷢ҇ . Въ пло́ть на́съ ра́ди и҆з̾ тебѐ бг҃ъ ѡ҆бо́лксѧ чⷭ҇таѧ , тебѐ всенепᲂро́чнаѧ , всемꙋ̀ ро́дꙋ на́шемꙋ бжⷭ҇твенꙋю пᲂказа̀ застꙋ́пницꙋ . тѣ́мже тѧ̀ чте́мъ во всѧ̀ вѣ́ки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Нбⷭ҇ныѧ звѣ́зды , блиста́нїемъ бжⷭ҇твеныхъ дᲂбрᲂдѣ́телей ꙗ҆ви́стесѧ мы́слено пᲂсредѣ̀ хрⷭ҇та̀ и҆мꙋ́ще ꙗ҆́кѡ сл҃нце . и҆ земны́ѧ кᲂнцы̀ премꙋ́дрїи прᲂсвѣти́сте , и҆ сегѡ̀ ра́ди ᲂу҆блажа́етесѧ . двⷤа . Хрⷭ҇то́вы бжⷭ҇твеныѧ ра́ны , на тѣлесѣ́хъ ва́шихъ , ꙗ҆́кѡ ᲂу҆краше́нїе всебл҃гᲂлѣ́пнѡ нᲂсѧ́ще премꙋ́дрїи . ᲂу҆ѧ́звенꙋю мᲂю̀ дш҃ꙋ бѣсо́вскими стрѣла́ми , є҆́же ко́ гдⷭ҇ꙋ мл҃твами и҆сцѣли́те . Въ ро́вѣ преи҆спо́днѣмъ грѣхо́внѣмъ лежа́ща мѧ̀ хрⷭ҇тѐ , и҆ ᲂу҆ны́нїѧ лю́тагѡ сно́мъ дш҃ꙋ ѡ҆тѧгчи́вшаго , твᲂи́хъ ра́ди ᲂу҆чени́къ сло́ве , ꙗ҆́кᲂже ла́зарѧ вᲂз̾дви́гъ спаси́ мѧ гдⷭ҇и . боⷢ҇ . Дш҃и мᲂеѧ̀ и҆спра́ви ше́ствїѧ сло́ве бж҃їи , к̾ стезѧ́мъ запᲂвѣде́й твᲂи́хъ незаблꙋ́дныхъ , и҆мѣ́ѧ мᲂлѧ́щꙋюсѧ ро́ждьшꙋю тѧ̀ пречⷭ҇тꙋю дв҃ꙋ , и҆ премꙋ́дрыѧ твᲂѧ̀ а҆пⷭ҇лы мнᲂгᲂмлⷭ҇тиве .

и҆́нъ , і҆рмо́съ , то́йже . Ст҃ль бжⷭ҇твенъ бы́въ , всѧ̀ за́пᲂвѣди сᲂхрани́въ хрⷭ҇то́вы . тѣ́мже вѣ́рнымъ храни́тель бжⷭ҇твеныи бы́сть ѻ҆́ч҃е нико́лае , сᲂблюда́й тѣ́хъ ѿ всѧ́кихъ напа́стей , и҆ ѡ҆ѕлᲂбле́нїѧ . Ꙗ҆́кᲂже и҆нᲂгда̀ препита́лъ є҆сѝ гра́дъ тво́й и҆знемᲂга́ющь гла́дᲂмъ , ꙗ҆́кѡ до́бръ па́стырь прпⷣбне . та́кᲂжде и҆ ны́нѣ препита́й дш҃ꙋ мᲂю̀ хлѣ́бᲂмъ разꙋ́мнымъ ѻ҆́ч҃е нико́лае , тѧ̀ застꙋ́пника бл҃га стѧжа́вшагѡ . Тѧ̀ вели́кᲂе сл҃нце на высᲂтѣ̀ лежа́щаго прⷭ҇нѡ , цр҃кве хрⷭ҇то́вы , прпⷣбне па́стырю вѣ́рнѡ мо́лимъ , свѣтᲂно́сными блиста́ньми глꙋбо́кїѧ тмы̀ ѿженѝ грѣхѝ дш҃ъ на́шихъ . Прибли́жисѧ ꙗ҆́кᲂже пи́шетъ дн҃ь стра́шныи прише́ствїѧ хрⷭ҇то́ва , пᲂд̾ви́гнисѧ дш҃е , ѿри́ни лѣ́нᲂсть , ᲂу҆се́рднѡ хрⷭ҇тꙋ̀ вᲂзᲂпі́й , спаси́ мѧ гдⷭ҇и , нико́лы твᲂегѡ̀ мᲂле́нїемъ . боⷢ҇ . Свѣ́телъ тѧ̀ свѣ́щникъ пррⷪ҇къ прᲂви́дѧше пречⷭ҇таѧ , свѣщꙋ̀ разꙋ́мнꙋю нᲂсѧ́щꙋ хрⷭ҇та̀ , и҆́мже прᲂсвѣти́хᲂмсѧ , во тмѣ̀ лежа́ще и҆ страстѣ́хъ , тѧ̀ ᲂу҆блажа́юще бцⷣе при́снѡ дв҃о .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , а҆пⷭ҇лѡмъ . гла́съ , є҃ . Оу҆ченицы̀ сп҃сᲂвы , та́йнамъ самᲂви́дцы бы́вше , неви́димаго и҆ зача́ла не и҆мꙋ́ща , бг҃а прᲂпᲂвѣ́дасте , гл҃юще , и҆скᲂнѝ бѣ̀ сло́во . не со́здани бы́сте пре́жде а҆́нг҃лъ , нижѐ наꙋчи́стесѧ ѿ чл҃къ , но ѿ вы́шнїѧ премꙋ́дрᲂсти . тѣ́мже дерзнᲂве́нїе и҆мꙋ́ще , мᲂли́те за дш҃а на́ша .

сти́хъ : и҆спо́лнихᲂмсѧ за ᲂу҆́тра . А҆пⷭ҇лы гдⷭ҇ни сᲂгла́снѡ в̾ пѣ́снехъ пᲂхва́лимъ . ѡ҆бо́лкшебᲂсѧ въ крⷭ҇тнᲂе всеѻ҆рꙋ́жїе , и҆́дᲂльскꙋю ле́сть ᲂу҆праздни́ша , и҆ пᲂбѣдᲂно́снїи ꙗ҆ви́шасѧ вѣне́чницы . и҆́хже мл҃твами и҆ всѣ́хъ ст҃ы́хъ , бж҃е пᲂми́лꙋй на́съ .

сти́хъ : и҆ бꙋ́ди свѣ́тлᲂсть . мⷱ҇ꙋ . Вмꙋ́кахъ сꙋ́ще ст҃і́и ра́дꙋющесѧ вᲂпїѧ́хꙋ , кꙋ́плѧ на́мъ сꙋ́ть сїѧ̀ ко влⷣцѣ , вмѣ́стѡ быва́ющихъ ра́нъ на тѣлесѣ́хъ , свѣ́тло ѻ҆дѣѧ́нїе в̾ вᲂскрⷭ҇нїи прᲂцвѣте́тъ на́мъ . в̾мѣ́стѡ без̾че́стїѧ , вѣнцы̀ . за ᲂу҆́зы темни́чныѧ , ра́й . и҆ за є҆́же со ѕлᲂдѣ́и ѡ҆сꙋжде́нїе , є҆́же со а҆́нг҃лы житїѐ . и҆́хже мл҃твами гдⷭ҇и спасѝ дш҃а на́ша .

сла́ва , и҆ нн҃ѣ , боⷢ҇ . Бл҃жи́мъ тѧ̀ бцⷣе дв҃о , ꙗ҆́кѡ и҆з̾ тебѐ вᲂсїѧ̀ сл҃нце пра́веднᲂе хрⷭ҇то́съ , и҆мѣ́ѧи ве́лїю млⷭ҇ть .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ четверто́къ , бл҃же́нны . гла́съ , є҃ .

Разбо́йникъ на крⷭ҇тѣ̀ , бг҃а бы́ти вѣ́рᲂвавъ тѧ хрⷭ҇тѐ , и҆спᲂвѣ́да тѧ чи́стѡ ѿ́ срⷣца , пᲂмѧни́ мѧ гдⷭ҇и вᲂпїю́ща во црⷭ҇твїи си .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кᲂже ѻ҆́блацы свѣ́тлїи , зе́млю прᲂидо́сте бжⷭ҇твенїи ᲂу҆ченицы̀ , во́дꙋ живо́тнꙋю ѡ҆крᲂплѧ́юще , и҆ срⷣца̀ и҆ста́ѧвшїѧ прегрѣше́нїи , бᲂга́тнѡ напᲂѧ́ете .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Ꙗ҆́кᲂже лꙋчѝ та́йныѧ сл҃нца , вᲂсїѧ́вшагѡ ѿ дв҃ы чⷭ҇тыѧ , прᲂсвѣти́ли є҆стѐ сꙋ́щїѧ во тмѣ̀ невѣ́дѣнїѧ сѣдѧ́щїѧ , бжⷭ҇твенїи ᲂу҆ченицы̀ хрⷭ҇та̀ бг҃а на́шегѡ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Раз̾жже́нїѧ лю́тыхъ мꙋче́нїи , премꙋ́дрїи претерпѣ́вше ᲂу҆се́рднᲂю дш҃е́ю , пᲂпали́сте и҆́дᲂльскꙋю ле́сть , и҆ къ бжⷭ҇твенᲂмꙋ ᲂу҆тѣше́нїю преидо́сте ст҃і́и .

сла́ва . Да дра́хмꙋ во глꙋбинѣ̀ прегрѣше́нїи пᲂгребе́нꙋю хрⷭ҇тѐ , взе́мъ ко ѻ҆ц҃ꙋ принесе́ши . а҆пⷭ҇лы прᲂпᲂвѣ́дники сᲂтвᲂри́лъ є҆сѝ бжⷭ҇твенымъ дх҃ᲂмъ .

и҆ ны́нѣ . А҆пⷭ҇лѡмъ ᲂу҆дᲂбре́нїе бг҃ᲂѡ҆бра́дᲂваннаѧ сꙋ́щи , ѡ҆мраче́на мѧ сладᲂстьмѝ жите́йскими , пᲂкаѧ́нїѧ прᲂсвѣтѝ зарѧ́ми , ꙗ҆́кѡ да велича́ю тѧ .