Въ четверто́къ , ве́черъ . на гдⷭ҇и вᲂзва́хъ , стихѣ́ры , чⷭ҇тно́мꙋ и҆
живᲂтвᲂрѧ́щемꙋ крⷭ҇тꙋ̀ . гла́съ , ѕ҃ . поⷣ . а҆́нг҃льскїѧ пред̾и҆ди́те .=
запѣ́въ : ꙗ҆́кѡ ѿ тебѐ ѡ҆чище́нїе є҆́сть . П=а́даетъ запѧ́ть бы́въ пра́ѻ҆ц҃ъ
дре́ва ра́ди , и҆ лю́тᲂе ѡ҆сꙋжде́нїе пᲂд̾є́млетъ , но хрⷭ҇то́съ на́ древѣ
пригво́ждьсѧ , то̀ разрꙋшѝ , сᲂкрꙋше́наго же ѡ҆бнᲂвѝ . и҆ взѧ́тъ и҆̀
на ра́мѣ , себѣ̀ сᲂпресто́льна и҆ ѻ҆ц҃ꙋ съ чⷭ҇тны́мъ дх҃ᲂмъ сᲂтвᲂри́лъ є҆́сть .
ᲂу҆пᲂва̀ дш҃а мᲂѧ̀ на́ гдⷭ҇а . Да́ждь ми пᲂмышле́нїе ᲂу҆миле́нїѧ хрⷭ҇тѐ
мо́й , да во ᲂу҆мѣ̀ прⷭ҇нѡ нᲂшꙋ̀ и҆ в̾ срⷣцы , ꙗ҆́же на́съ ра́ди пᲂдъѧ́лъ є҆сѝ
пло́тїю стра́сти чⷭ҇тны́ѧ , свѣ́тъ ѿ ни́хъ прїе́мъ , и҆ пла́ча ᲂу҆ крⷭ҇та̀
твᲂегѡ̀ пред̾стᲂѧ́ти мню̀ всегда̀ , и҆ на не́мъ тебѐ ꙗ҆́кѡ а҆́гньца зрѣ́ти
взима́ема .
да ᲂу҆пᲂва́етъ і҆и҃ль на́ гдⷭ҇а . Оу҆жасе́сѧ землѧ̀ , вᲂздꙋ́хъ пᲂмрачи́сѧ ,
ви́дѧщи бг҃а дᲂсажа́ема ѿ раба̀ , и҆ста́ющаго го́ры преще́нїемъ , и҆
вᲂз̾зрѣ́нїемъ то́чїю ѡ҆пꙋстѣва́ющаго бе́здны . на́ древѣ смѣжа́юща ѻ҆́чи ,
дыха́нїе всѧ́ко преи҆мꙋ́щаго дла́нїю , бездꙋ́шенъ и҆ ме́ртвъ пло́тьски .
та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны ,
стихѣ́ры , прест҃ѣ́й бцⷣѣ . гла́съ , и҆ поⷣ , то́йже . запѣ́въ : ѿ всѣ́хъ
без̾зако́нїи є҆гѡ̀ . Страстьмѝ мно́гими ᲂу҆мерщвле́нꙋю дш҃ꙋ мᲂю̀ , ѡ҆жи́ви
влⷣчце , ꙗ҆́же без̾стра́стнѡ претерпѣ́вшагѡ стра́сти . рᲂди́вши бг҃а сло́ва
без̾стра́стнѡ , и҆ ᲂу҆мертви́вшагѡ сме́рть и҆ а҆́да ме́ртвᲂстїю , ᲂу҆мертвѝ
живꙋ́щїи во мнѣ̀ грѣ́хъ , и҆ ме́ртвенᲂе ми пᲂмышле́нїе къ бжⷭ҇твенымъ
напра́ви .
пᲂхвали́те є҆гѡ̀ всѝ лю́дїе . Є҆гда̀ на крⷭ҇тѣ̀ хрⷭ҇тѐ вᲂзне́ссѧ хᲂтѧ̀ ,
тᲂгда̀ ᲂу҆ченика̀ пред̾стᲂѧ́ща , є҆го́же люблѧ́ше ви́дѣвъ и҆ мт҃рь , и҆ к̾ ни́ма
вѣща́ше , мт҃и твᲂѧ̀ є҆́сть дв҃аѧ . тво́й же сн҃ъ ю҆́нᲂша се́й мт҃и ,
дв҃о чи́стаѧ прест҃а́ѧ , є҆го́же вᲂзлюби́хъ а҆́зъ , дѣ́вственикъ ᲂу҆чени́къ
мо́й .
=и҆ и҆́стина гдⷭ҇нѧ пребыва́етъ во́ вѣки . Ѿ =то́лѣ про́чее дѣ́вственикъ ,
дв҃ꙋ во сво́й вᲂзведѐ до́мъ . сн҃ъ бо нарече́нныи бы́въ ѿ сн҃а всеще́драгѡ ,
пᲂказа̀ сн҃о́внѧѧ къ ма́тери , пᲂдо́бнᲂе сн҃о́вства и҆ ᲂу҆свᲂе́нїе те́плᲂе
всегда̀ . є҆ѧ́же мл҃твами хрⷭ҇тѐ спасѝ дш҃и на́ши .
сла́ва , и҆ ны́нѣ , крⷭ҇тᲂбоⷢ҇ . Є҆гда̀ на крⷭ҇тѣ̀ пригвᲂжда́ема ви́дѣвши
а҆́гньца , и҆́же и҆з̾ тебѐ а҆́гнице рᲂже́ннаго , вᲂпїѧ́ше вла́сы терза́ющи ,
ᲂу҆вы̀ мнѣ̀ ча́до сладча́йшее , крᲂмѣ̀ ᲂу҆́бѡ бᲂлѣ́зней пре́жде рᲂди́хъ тѧ̀ ,
ны́нѣ же бᲂлю̀ срⷣцемъ , и҆ нетерплю̀ тебѐ зрѣ́ти распина́ема хрⷭ҇тѐ , сн҃е
мо́й мнᲂгᲂмлⷭ҇тиве .
та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и
в̾ ве́черъ се́й . на стихо́внѣ , стⷯры , крⷭ҇тны . гла́съ , ѕ҃ . Крⷭ҇тъ
тво́й гдⷭ҇и , жи́знь и҆ застꙋпле́нїе лю́демъ твᲂи́мъ є҆́сть . и҆ на́нь
надѣ́ющесѧ , тебѐ распѧ́тагѡ пло́тїю бг҃а на́шегѡ пᲂе́мъ , пᲂми́лꙋй на́съ .
сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Крⷭ҇тъ тво́й гдⷭ҇и , ра́й
ѿве́рзе ро́дꙋ чл҃ческᲂмꙋ . и҆ ѿ и҆стлѣ́нїѧ и҆зба́вльшесѧ , тебѐ распе́ншагᲂсѧ
пло́тїю бг҃а на́шегѡ пᲂе́мъ , пᲂми́лꙋй на́съ .
сти́хъ : пᲂми́лꙋй на́съ гдⷭ҇и . мⷱ҇ꙋ . Мч҃нцы твᲂѝ гдⷭ҇и , не ѿверго́шасѧ
тебѐ , ни ѿстꙋпи́ша ѿ запᲂвѣде́й твᲂи́хъ тѣ́хъ мл҃твами пᲂми́лꙋй на́съ .
сла́ва , и҆ нн҃ѣ , крⷭ҇тᲂбоⷢ҇ . Зрѧ́щи тѧ̀ распина́ема хрⷭ҇тѐ , тебѐ
ро́ждьшаѧ вᲂпїѧ́ше , что̀ стра́ннᲂе є҆́же ви́жꙋ та́инство сн҃е мо́й ; ка́кѡ
на́ древѣ ᲂу҆мира́еши пло́тїю пᲂвѣ́шенъ , жи́зни пᲂда́телю .
таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь ,
ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ ,
є҆ктенїѧ̀ . =и҆ ѿпꙋ́стъ .
Въ четверто́къ , на па́вечерницѣ . кано́нъ , прест҃ѣ́й бцⷣѣ . є҆мꙋ́же
краегране́сїе , си́це . да́ждь ми дв҃о сле́зы пᲂкаѧ́нїѧ . гла́съ , ѕ҃ .
пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми ,
гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ
вᲂпїѧ́ше . запѣ́въ : прест҃а́ѧ гжⷭ҇е бцⷣе спасѝ на́съ . Прїимѝ
дв҃о мᲂльбꙋ̀ мᲂю̀ , и҆з̾ ᲂу҆́стъ недᲂсто́йныхъ , ѿ скве́рныхъ ᲂу҆сте́нъ ,
дерзнᲂве́ннѡ принᲂси́ти ᲂу҆стреми́вшагᲂсѧ , и҆ свѣ́тъ ᲂу҆миле́нїѧ чи́стаѧ ,
ѡ҆зарѝ рабꙋ̀ твᲂемꙋ̀ . Тꙋ́чи сле́зъ ми дава́й , твᲂи́ми мл҃твами дв҃о мт҃и
чⷭ҇таѧ , ꙗ҆́кѡ да пла́чꙋ те́плѣ , ѡ҆ и҆́хже сᲂдѣ́ѧхъ на землѝ , и҆ ᲂу҆бѣ́гнꙋ
тᲂбо́ю мꙋ́ки всѧ́кїѧ . сла́ва . Мᲂѐ рыда́нїе не ѿри́ни , ꙗ҆́же и҆сто́чникъ
млрⷭ҇дїѧ ро́ждьшаѧ , но млⷭ҇тивнѡ бл҃га́ѧ , твᲂи́мъ млⷭ҇тивнымъ ѻ҆́кᲂмъ бцⷣе ,
дш҃и мᲂеѧ̀ стра́сти и҆сцѣлѝ . и҆ ны́нѣ . Стена́нїемъ пла́чисѧ дш҃е мᲂѧ̀ , и҆
себѐ ѿ ню́дъ рыда́й , пᲂклᲂнѧ́ющисѧ мт҃ри бж҃їи и҆ гл҃ющи , менѐ пᲂви́ннаго
и҆зба́ви мꙋ́ки стра́шныѧ .
пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й ,
вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени
и҆спᲂвѣ́данїѧ тѝ . Нѣ́сть и҆́нъ ꙗ҆́кᲂже а҆́зъ прегрѣши́въ прест҃а́ѧ чи́стаѧ ,
пᲂрабо́щьсѧ ѕло́бами без̾мѣ́рныхъ пᲂмышле́нїи , но на тѧ̀ надѣ́ѧвсѧ мᲂлю̀ ,
си́хъ мѧ и҆схи́ти . Сѐ наи҆до́ша на мѧ̀ ꙗ҆́кѡ ра́ны , всѧ̀ вра́жїѧ ѕло́бы
ѡ҆тѧгᲂтѣ́вше , и҆ ѕѣлѡ̀ вᲂз̾смердѣ́шасѧ , и҆ дш҃ꙋ ведꙋ́тъ на всѧ́ко паде́нїе .
сла́ва . Мно́гаѧ мно́жества мᲂи́хъ прегрѣше́нїи , сегѡ̀ ра́ди прест҃а́ѧ
вѣ́рᲂю припа́даѧ вᲂпїю́ ти смире́ныи , въ ча́съ стра́шныи ᲂу҆мᲂли́ти , є҆го́же
вᲂплᲂти́ла є҆сѝ . и҆ ны́нѣ . Ст҃а́ѧ бцⷣе , менѐ пᲂви́ннаго всѧ́кᲂмꙋ
ѡ҆сꙋжде́нїю и҆змѝ , дерзнᲂве́нїе к̾ бг҃ꙋ ꙗ҆́кѡ и҆мꙋ́щи мт҃рьне , и҆
въ черто́ѕѣ сегѡ̀ ᲂу҆чини́ мѧ .
пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ
цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи .
И҆сто́чникъ ми сле́зъ да́рꙋй влⷣчце , ꙗ҆́кѡ да ѿмы́ю скве́рнꙋ , смире́ныѧ дш҃и
мᲂеѧ̀ , и҆ ѡ҆брѧ́щꙋ дᲂбро́тꙋ , ю҆́же пᲂгꙋби́хъ сᲂвѣ́тᲂмъ ѕмїи́нымъ . Бж҃е
мо́й млрⷭ҇де , бж҃е чл҃кᲂлю́бче , вᲂли́телю млⷭ҇ти , ны́нѣ на мѧ̀ и҆зле́й
твᲂю̀ млⷭ҇ть , мо́литъ тѧ наде́жа и҆ застꙋ́пница мᲂѧ̀ , мт҃и твᲂѧ̀ . сла́ва .
Менѐ блꙋ́днаго , менѐ ᲂу҆жа́снаго , и҆́же без̾ ᲂу҆ма̀ и҆ без̾стꙋ́днѡ , мно́гѡ
сᲂгрѣ́шша к̾ тебѣ̀ пренепᲂро́чнаѧ , ᲂу҆ще́дривши спасѝ , и҆ гее́ны свᲂбᲂдѝ .
и҆ нн҃ѣ . Па́жить пᲂтребѝ сме́рти , ро́ждьши жи́знь всѧ́ческимъ . тѣ́мже и҆
а҆́зъ зᲂвꙋ́ ти , сᲂгрѣши́хъ спаси́ мѧ чⷭ҇таѧ , мт҃рьними ти мᲂльба́ми .
пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ
дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ
бг҃а , ѿ́ мрака грѣхо́внагѡ и҆зима́юща . Пᲂми́лꙋй мѧ чⷭ҇таѧ , и҆́же на тѧ̀
всю̀ наде́жꙋ мᲂю̀ вᲂзлᲂжи́вшаго . и҆ ᲂу҆ще́дри , вѣ́рᲂю взыва́ю ти , презрѣ́вши
дш҃и мᲂеѧ̀ всѧ̀ стра́сти лю́тыѧ . Спаси́ мѧ ѿ страсте́й , и҆ скᲂрбе́й и҆
вре́да , лꙋка́выхъ сᲂпрᲂти́вныхъ , и҆ и҆зба́ви си́хъ ла́ѧнїѧ смире́нꙋю ми
дш҃ꙋ , да нерекꙋ́тъ дв҃це , ᲂу҆крѣпи́хᲂмсѧ на́нь . сла́ва . Чиста̀ тѣ́лᲂмъ и҆
дш҃е́ю , пречⷭ҇таѧ ꙗ҆́вльшисѧ , дш҃ꙋ мᲂю̀ ѿ скве́рны свᲂбᲂдѝ , даѧ́ ми чи́стѡ
жи́ти , и҆ наста́ви твᲂри́ти ми , гдⷭ҇ню бжⷭ҇твенꙋю во́лю . и҆ ны́нѣ . Тѧ̀
є҆ди́нꙋ и҆́мамъ прибѣ́жище , и҆ къ бг҃ꙋ премѣне́нїе , и҆́же во мно́гихъ
прегрѣше́нїихъ , всѐ житїѐ мᲂѐ и҆з̾жи́хъ , тѣ́мже мѧ бцⷣе ты̀ ᲂу҆ще́дри .
пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей
бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ
мо́й мнᲂгᲂмлⷭ҇тиве . И҆спра́ви влⷣчце ма́ло мᲂѐ стᲂна́нїе , и҆ рꙋка́ма
вᲂздѣѧ́нїе , ꙗ҆́кᲂже бл҃гᲂво́ннꙋ же́ртвꙋ , и҆ тво́й спᲂдо́би зра́къ чи́стᲂю
со́вѣстїю ᲂу҆́зрѣти . Глаго́лъ мᲂи́хъ влⷣчце бл҃га́ѧ непре́зри мᲂле́нїѧ ,
рᲂди́тельнице млⷭ҇тиваго бг҃а , и҆́же ѿ твᲂеѧ̀ ᲂу҆тро́бы вᲂсїѧ́вшагѡ . но
да́ждь ми пре́жде кᲂнца̀ бжⷭ҇твенᲂе ѡ҆ставле́нїе . сла́ва . Преклᲂни́хсѧ
страстьмѝ , блꙋ́дно преѡ҆каѧ́нныи , и҆ ᲂу҆да́лихсѧ ѿ бг҃а , є҆го́же мᲂлѝ
спасти́ мѧ бл҃га́ѧ . к̾ тебѣ́ бо прибѣго́хъ , и҆ ѻ҆де́ждами мѧ̀ пре́д̾ними
ᲂу҆красѝ . и҆ ны́нѣ . Не ѡ҆палѝ лᲂже́снъ твᲂи́хъ ѻ҆́гнь сы́и і҆с҃ъ ,
и҆з̾ тебѐ пло́тїю прихо́дитъ . сегѡ̀ чи́стаѧ мᲂлѝ , ѻ҆гнѧ̀ и҆ всѧ́кїѧ мꙋ́ки
и҆зба́вити , вѣ́рᲂю вᲂспѣва́ющихъ тѧ̀ .
Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , ѕ҃ .
Чи́стаѧ дв҃о и҆ сла́внаѧ , а҆́нг҃лѡмъ сла́во , є҆гда̀ пред̾ста̀ крⷭ҇тꙋ̀ сн҃ꙋ и҆
бг҃а твᲂегѡ̀ , нетерпѧ́щи ѡ҆ѕлᲂбле́нїѧ вра́гъ , взыва́ше рыда́ющи стᲂна́ньми ,
є҆ди́на блгⷭ҇ве́ннаѧ . ка́кѡ терпи́тъ чл҃кᲂлю́бецъ , си́хъ всѣ́хъ нанᲂси́мыхъ ;
пѣ́снь , з҃ . і҆рмо́съ . Ѻ҆́трᲂцы в̾вавило́нѣ , пе́щи пла́менны
не ᲂу҆бᲂѧ́шасѧ . но пᲂсредѝ ѻ҆гнѧ̀ в̾ве́ржени , прᲂхлажда́еми взыва́хꙋ ,
блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Вᲂзни́кни ѽ дш҃е мᲂѧ̀ ѿ ѕлы́хъ ,
и҆́хже сᲂдѣ́ѧ . что̀ спи́ши про́чее ; что̀ сно́мъ ᲂу҆ны́нїѧ низ̾лежи́ши ; бцⷣѣ
вᲂзᲂпі́й , прест҃а́ѧ пᲂмᲂзи́ ми . Ѻ҆́бразъ ви́да твᲂегѡ̀ чтꙋ̀ , и҆ несмѣ́ю
вᲂз̾зрѣ́ти к̾ тебѣ̀ прест҃а́ѧ . мᲂлю̀ прїѧ́ти дᲂлгѡ́въ прᲂще́нїе , и҆ чи́сто
ви́дѣти твᲂю̀ пречⷭ҇тꙋю и҆ко́нꙋ . сла́ва . Въ твᲂѐ прибѣга́ю
бг҃ᲂрᲂди́тельнице застꙋпле́нїе , и҆ припа́даю прїѧ́ти прᲂще́нїе , непре́зри
менѐ влⷣчце , но ᲂу҆ще́дривши спаси́ мѧ . и҆ ны́нѣ . Мнᲂгᲂѡ҆бра́зными
ѕло́бами дш҃етлѣ́ннагѡ , ѡ҆скверни́хъ дш҃ꙋ и҆ ᲂу҆́мъ , мᲂлю́ тѧ пречⷭ҇таѧ
при́зри , и҆ тᲂгѡ̀ и҆скꙋше́нїи и҆схи́ти раба̀ твᲂегѡ̀ .
пѣ́снь , и҃ . і҆рмо́съ . По зако́нѣ ѻ҆́ч҃и преблаже́ннїи въ вавилѡ́нѣ
ю҆́нїи , бѣдꙋ̀ прїе́млюще цр҃ю́ющагѡ небрего́ша , пᲂвелѣ́нїѧ безꙋ́мнагѡ и҆
сᲂвᲂкꙋпле́ннїи , в̾ не́мже не и҆звари́шасѧ ѻ҆гнѝ , держа́щемꙋ дᲂсто́йно
вᲂз̾сыла́хꙋ пѣ́снь , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀
во́ вѣки . Без̾мѣ́рнѡ сᲂгрѣши́въ , и҆ ѡ҆скверни́въ сѝ во грѣсѣ́хъ тѣ́ло
неразꙋ́мныи , пᲂмышлѧ́ю неѡ҆бинᲂве́ннагѡ сꙋда̀ де́нь . и҆ недᲂꙋмѣ́всѧ бᲂю́сѧ ,
и҆ ᲂу҆жаса́юсѧ и҆ трепе́щꙋ , к̾ бл҃гᲂꙋтро́бїю ти влⷣчце припа́даю не ѿри́ни
менѐ , но ви́ждь ми ско́рбь , и҆ и҆зба́ви всѧ́кᲂгѡ ѡ҆сꙋже́нїѧ , мꙋ́къ
мнᲂгᲂѡ҆бра́зныхъ . Зако́нъ бжⷭ҇твеныи презрѣ́въ , в̾ лѣ́нᲂсти ве́сь слежꙋ̀
ѡ҆каѧ́нныи , призрѣ́вши пречⷭ҇таѧ , вᲂста́ви в̾ско́рѣ , и҆ спасе́ныхъ
сᲂтвᲂри́ мѧ ча́сти пᲂлꙋчи́ти . да ра́дꙋѧсѧ зᲂвꙋ́ ти , ра́дꙋисѧ ра́дᲂсти ми́рꙋ
є҆ди́на пред̾ста́тельнице , и҆́же вѣ́рᲂю призыва́ющимъ , тво́й тве́рдыи
пᲂкро́въ . сла́ва . Оу҆вы̀ мнѣ̀ дш҃е мᲂѧ̀ , ка́кѡ пред̾ста́немъ тᲂгда̀
во́ страсѣ и҆ тре́петѣ , сꙋди́щꙋ стра́шнᲂмꙋ , є҆гда̀ а҆́нг҃ли пред̾ста́нꙋтъ
в̾ стра́сѣ и҆ тре́петѣ ; бцⷣꙋ и҆мꙋ́щи бл҃гꙋ застꙋ́пницꙋ , преклᲂнѝ кᲂлѣ́на . и҆
вᲂз̾дѣжѝ рꙋ́цѣ къ высᲂтѣ̀ , вᲂпїю́щи при́зри и҆ пᲂщадѝ твᲂи́мъ млⷭ҇тивнымъ
тᲂгда̀ взо́рᲂмъ дв҃це . и҆ ны́нѣ . Пᲂкажѝ крѣ́пᲂсть твᲂю̀ непᲂсты́днꙋ
застꙋпле́нїѧ ны́нѣ , ꙗ҆́кѡ дᲂлжни́къ бо , мт҃рьними мᲂльба́ми преклᲂни́тсѧ
тво́й сн҃ъ дв҃о . пред̾варѝ ᲂу҆́бѡ ны́нѣ в̾ нꙋ́жныи ча́съ , да не ѿи҆дꙋ̀
негᲂто́въ , но пᲂживꙋ̀ и҆ є҆щѐ , препѣ́таѧ бцⷣе чи́стаѧ .
пѣ́снь , ѳ҃ . і҆рмо́съ . Нерыда́й менѐ мт҃и , взира́ющи во́ грᲂбѣ ,
є҆го́же пло́тїю без̾ сѣ́мени зачала̀ є҆́си сн҃а . вᲂста́нꙋ бо и҆ сла́венъ
бꙋ́дꙋ , и҆ вᲂзнесꙋ̀ со сла́вᲂю , немо́лчнѡ ꙗ҆́кѡ бг҃ъ , вѣ́рᲂю и҆ любо́вїю тѧ
велича́ющїѧ . Да вы́шнїѧ сла́вы пᲂлꙋчꙋ̀ дв҃о , мᲂлю́тисѧ ѡ҆сла́би ми , и҆
и҆зба́ви дᲂлгѡ́въ тмы̀ , всѧ̀ презрѣ́вши пречⷭ҇таѧ , ꙗ҆́же в̾ невѣ́дѣнїи и҆
ра́зꙋмѣ , вкꙋ́пѣ дневна́ѧ и҆ нᲂщна́ѧ , ꙗ҆́кѡ да бл҃гᲂда́рственꙋю пѣ́снь ра́дꙋѧсѧ
принесꙋ́ ти . Ѿ всѧ́кихъ мѧ скᲂрбе́й и҆схи́ти ѻ҆трᲂкᲂви́це , и҆ на ка́мени
пᲂста́ви но́зѣ мᲂѝ , бжⷭ҇твенагѡ спасе́нїѧ . тѧ́ бо пред̾ста́тельницꙋ
неѡ҆бᲂри́мꙋ ны́нѣ стѧжа́въ ᲂу҆пᲂва́ю преи҆тѝ стѣ́нꙋ и҆ прегра́дꙋ , ю҆́же
преслꙋша́нїемъ дре́ва сᲂзда́хъ . сла́ва . Тѧ̀ мᲂлю̀ ро́ждьшꙋю , милᲂсе́рднаго
сꙋдїю̀ и҆ влⷣкꙋ , прїимѝ де́рзᲂсть скве́рныхъ ᲂу҆сте́нъ , и҆ ᲂу҆бо́гᲂе
пѣ́нїе мᲂѐ . и҆ не ѡ҆мразѝ менѐ , и҆́же па́че всѣ́хъ чл҃къ грѣ́шнѣйшагѡ ,
тѧ́ бо по́ бз҃ѣ застꙋ́пницꙋ и҆мѣ́ю ра́бъ тво́й . и҆ ны́нѣ . Ꙗ҆́кѡ вы́шши
сꙋ́щи , сᲂзда́нїи всѧ́ческихъ , во ᲂу҆тро́бѣ свᲂе́й и҆мѣ́ла є҆сѝ бцⷣе , бг҃а
вᲂплᲂще́нна . сегѡ̀ прилѣ́жнѡ мᲂлѝ чⷭ҇таѧ , разрѣши́ти всѧ́кᲂгѡ настᲂѧ́нїѧ
раба̀ твᲂегѡ̀ , да свᲂбо́днымъ гла́сᲂмъ тѧ славᲂсло́влю и҆ а҆́зъ . та́же ,
дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .
Въ пѧто́къ , на ᲂу҆́трени . по а҃ , стихᲂло́гїи . сѣда́льны , крⷭ҇тны .
гла́съ , ѕ҃ . Крⷭ҇тъ тво́й гдⷭ҇и ѡ҆ст҃и́сѧ , тѣ́мъ бо быва́ютъ и҆сцѣле́нїѧ ,
бᲂлѧ́щимъ во грѣсѣ́хъ , сегѡ̀ ра́ди тебѣ̀ припа́даемъ , пᲂми́лꙋй на́съ .
сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ
є҆гѡ̀ ꙗ҆́кѡ ст҃о є҆́сть . То́чїю вᲂздрꙋзи́сѧ дре́во хрⷭ҇тѐ крⷭ҇та̀ твᲂегѡ̀ ,
ѡ҆снᲂва́нїѧ пᲂкᲂлѣба́шасѧ сме́рти гдⷭ҇и . є҆го́же бо пᲂглᲂтѝ любо́вїю а҆́дъ ,
ѿпꙋстѝ трепе́ща . ꙗ҆ви́лъ є҆сѝ на́мъ спасе́нїе свᲂѐ ст҃ы́и , и҆
славᲂсло́вимъ тѧ сн҃е бж҃їи , пᲂми́лꙋй на́съ . сла́ва , и҆ ны́нѣ ,
крⷭ҇тᲂбоⷢ҇ . Со ᲂу҆ченико́мъ дѣ́вственикᲂмъ , мт҃и дв҃аѧ пред̾стᲂѧ́щи крⷭ҇тꙋ̀ ,
и҆́же и҆з̾ неѧ̀ прᲂше́дшемꙋ . нетерпѧ́щи сегѡ̀ зрѣ́ти вᲂзвыша́ема на́ крⷭ҇тъ ,
вᲂпїѧ́ше ѡ҆бъє́мшисѧ рыда́ньми , ка́кѡ стра́жеши , и҆́же є҆стество́мъ
без̾стра́стенъ . сла́влю твᲂю̀ не и҆зрече́ннꙋю сн҃е мо́й бл҃гᲂсть , всѧ́къ
ᲂу҆́мъ преи҆мꙋ́щꙋю .
по в҃ , стихᲂло́гїи , сѣда́льны . гла́съ , ѕ҃ . Дне́сь прⷪ҇рческᲂе
и҆спо́лнисѧ сло́во , се́бо пᲂклᲂнѧ́емсѧ на мѣ́стѣ , и҆дѣ́же стᲂѧ́стѣ но́зѣ твᲂѝ
гдⷭ҇и . и҆ дре́во спасе́нїѧ вкꙋси́вше , ѿ грѣхо́вныхъ страсте́й свᲂбᲂдꙋ̀
ᲂу҆лꙋчи́хᲂмъ , мл҃твами бцⷣы , є҆ди́не чл҃кᲂлю́бче . сти́хъ : бг҃ъ же цр҃ь
на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Гдⷭ҇и , ѡ҆сꙋди́ша тѧ
і҆ꙋде́и на сме́рть живᲂта̀ всѣ́хъ , и҆́же чермно́е мо́ре жеѕло́мъ прᲂше́дшїи ,
на крⷭ҇тѣ́ тѧ пригвᲂзди́ша . и҆ и҆́же ѿ ка́мене ме́дъ с̾са́вшїи , же́лчь
принесо́ша ти , но во́лею претерпѣ́лъ є҆сѝ , да на́съ свᲂбᲂди́ши ѿ рабо́ты
вра́жїѧ . гдⷭ҇и сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ
і҆и҃левъ . мⷱ҇ꙋ . Свѣ́тъ пра́веднымъ всегда̀ ты̀ гдⷭ҇и , ст҃і́и бо ѡ҆ тебѣ̀
прᲂсвѣти́вшесѧ , сїѧ́ютъ прⷭ҇нѡ ꙗ҆́кѡ свѣти́ла , свѣ́щникъ нечести́выхъ
ᲂу҆гаси́вше . и҆́хже мл҃твами прᲂсвѣтѝ , свѣти́льникъ мо́й сп҃се на́шъ , и҆
спаси́ мѧ . сла́ва , и҆ ны́нѣ , крⷭ҇тᲂбоⷢ҇ . Ст҃а́ѧ дв҃о пречⷭ҇таѧ ,
а҆́нг҃льскаѧ сла́во , є҆гда̀ пред̾ста́ла є҆сѝ крⷭ҇тꙋ̀ сн҃а и҆ бг҃а твᲂегѡ̀ ,
нетерпѧ́щи зрѣ́ти пᲂнᲂше́нїе врагѡ́въ , вᲂпїѧ́ше рыда́ющи мт҃рьски , ка́кѡ
терпи́ши чл҃кᲂлю́бче всѣ́хъ преще́нїѧ , сла́влю твᲂѐ дᲂлгᲂтерпѣ́нїе .
по г҃ , стихᲂло́гїи , сѣда́ленъ . гла́съ , ѕ҃ . на́ =древѣ крⷭ҇тнѣмъ ,
милᲂсе́рдїѧ ра́ди млⷭ҇ти вᲂзнесе́сѧ , и҆ в̾ ре́бра прᲂбᲂде́сѧ кᲂпїе́мъ ,
растерза́лъ є҆сѝ грѣхо́внᲂе лю́тᲂе рꙋкᲂписа́нїе , ꙗ҆́кѡ всеси́льныи бг҃ъ .
тѣ́мже твᲂѐ не и҆зрече́ннᲂе пᲂе́мъ сло́ве , бл҃гᲂче́стнѡ смᲂтре́нїе .
=сла́ва , и҆ ны́нѣ , крⷭ҇тᲂбоⷢ҇ . Є҆ди́на непᲂро́чнаѧ а҆́гнице бцⷣе дв҃о ,
ꙗ҆́же ѿ крᲂве́й твᲂи́хъ чи́стыхъ , вᲂплᲂще́ннаго зрѧ́щи ви́сѧща хᲂтѣ́нїемъ
на крⷭ҇тѣ̀ , вᲂпїѧ́ше ѻ҆трᲂкᲂви́це со слеза́ми го́рькими , сн҃е мо́й
неѕло́биве , пᲂю̀ твᲂѐ стра́шнᲂе всѐ смᲂтре́нїе .
Въ пѧто́къ , кано́нъ , честно́мꙋ и҆ живᲂтвᲂрѧ́щемꙋ крⷭ҇тꙋ̀ . гла́съ , ѕ҃ .
пѣ́снь , а҃ . і҆рмо́съ . Вᲂлно́ю мᲂрско́ю скры́вшагѡ дре́вле , гᲂни́телѧ
мꙋчи́телѧ , пᲂд̾ земле́ю скры́ша , спасе́ныхъ дѣ́ти . но мы̀ ꙗ҆́кѡ ѻ҆трᲂкᲂви́ца
гдⷭ҇ви пᲂе́мъ , сла́вно бо прᲂсла́висѧ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀
чⷭ҇тно́мꙋ . Страстьмѝ твᲂи́ми чⷭ҇тны́ми , пᲂче́лъ є҆сѝ ѡ҆без̾че́стенᲂе
є҆стество̀ чл҃ческᲂе . тѣ́мже чтꙋ́ще тѧ со́ страхᲂмъ , велича́емъ держа́вꙋ
твᲂю̀ , и҆ вѣ́рнѡ сла́вимъ прᲂсла́вленыи гдⷭ҇и . Кро́вїю твᲂе́ю сло́ве ,
крᲂве́й непра́веднᲂе прᲂли́тїе ᲂу҆ста́вилъ є҆сѝ , и҆ ѡ҆чи́стилъ є҆сѝ
ѿ скве́рны ѕло́бныѧ є҆стество̀ чл҃ческᲂе всеси́льне . тѣ́мже тѧ сла́вимъ
спаса́еми стра́стїю ти . запѣ́въ : ст҃і́и мч҃нцы , мᲂли́те бг҃а ѡ҆ на́съ .
мⷱ҇ꙋ . Звѣ́рѧ крᲂвᲂпі́йца пᲂбѣдѝ вᲂи́стинꙋ , дᲂстᲂхва́льнᲂе мч҃нкъ
стᲂѧ́нїе , и҆ ѻ҆́гненᲂе пᲂкᲂрѝ є҆стество̀ , рᲂсо́ю бжⷭ҇твеныѧ бл҃гᲂда́ти , и҆
ѕлꙋ́ю бꙋ́рю мнᲂгᲂбо́жїѧ ᲂу҆ста́ви . мⷱ҇ꙋ . Тꙋ́чами крᲂве́й , ѡ҆дᲂжде́нїѧ
пре́лести и҆з̾сꙋши́вше , тꙋ́чи и҆сцѣле́нїемъ то́чите ми́рᲂви , и҆ распале́нїе
страсте́й ѿє́млете и҆́стинѣ мч҃нцы . тѣ́мже блажи́ми є҆стѐ . боⷢ҇ . Дᲂбро́ты
ни видѣ́нїѧ и҆мꙋ́ща въ страда́нїи , кра́снаго дᲂбро́тᲂю , не и҆скꙋ́снаѧ бра́кꙋ
ѻ҆трᲂкᲂви́ца сматрѧ́ющи тѧ , вѣ́рнымъ ᲂу҆дᲂбре́нїе , мт҃рьски вᲂсклица́ше , и҆
любо́вїю тѧ̀ сла́вѧше .
Дрꙋгі́и кано́нъ , прест҃ѣ́й бцⷣѣ . і҆рмо́съ , то́йже . =запѣ́въ :
прест҃а́ѧ гжⷭ҇е бцⷣе спасѝ на́съ . И҆́=маши си́лꙋ твᲂри́ти є҆ли́кѡ хо́щеши .
и҆́маши преклᲂнѧ́ющаѧ твᲂи́мъ мᲂльба́мъ сн҃а . и҆́маши крѣ́пᲂсть же и҆
держа́вꙋ , и҆ пред̾ста́тельство не пᲂбѣди́мᲂе бцⷣе влⷣчце . тѣ́мже спасѝ раба̀
твᲂегѡ̀ . Влⷣчце ми́рꙋ пᲂмо́щнице всѣ́мъ , и҆збавле́нїе и҆ спасе́нїе чл҃кѡмъ
ты̀ , мнᲂгᲂѡ҆бра́зныхъ бѣ́дъ , и҆ страсте́й , и҆ ѡ҆б̾стᲂѧ́нїи свᲂѧ̀ рабы̀
и҆зба́ви , и҆́же вѣ́рᲂю тѧ̀ сла́вѧщихъ . Ты̀ є҆сѝ пред̾ста́тельнице ми́рꙋ
дв҃о ; ты̀ є҆сѝ пᲂхвала̀ хрⷭ҇тїа́нѡмъ бл҃га́ѧ ; ты̀ ѡ҆каѧ́нныѧ дш҃и мᲂеѧ̀
застꙋпле́нїе и҆ держа́ва , и҆ ра́дᲂсть и҆ и҆збавле́нїе бꙋ́ди бг҃ᲂбл҃же́ннаѧ .
Ꙗ҆́же ненаде́жнымъ наде́жда , и҆ пред̾ста́тельнице непᲂсты́днаѧ , всѣ́мъ
пᲂмо́щница , нбⷭ҇ныѧ ми две́ри ѿве́рз̾ши , приведѝ сн҃ꙋ свᲂемꙋ̀ влⷣчце , и҆
спаси́ мѧ заблꙋ́ждьшаго .
пѣ́снь , г҃ . і҆рмо́съ . Тебѣ̀ на вᲂда́хъ пᲂвѣ́сившагѡ всю̀ зе́млю
не ѡ҆держи́мѡ , тва́рь ви́дѣвши на ло́бнѣмъ ви́сѧща , ᲂу҆́жасᲂмъ ѡ҆держи́ма бѣ ,
нѣ́сть ст҃а ра́звѣ тебѐ гдⷭ҇и взыва́юща . Тебѐ и҆́же на вᲂда́хъ пᲂвѣ́сившаго
всю̀ зе́млю не ѡ҆держи́мѡ , на́ древо вᲂзнесе́на , и҆ въ ре́бра прᲂбᲂде́на ,
ᲂу҆смᲂтри́въ сл҃нце пᲂмрачи́сѧ , всѣ́хъ прᲂсвѣще́нїе разꙋмѣ́въ тѧ гдⷭ҇и .
Оу҆ѧзвлѧ́етсѧ твᲂи́ми гвᲂздьмѝ дᲂлгᲂтерпѣли́ве , и҆́же в̾ раѝ дре́вле
ᲂу҆ѧ́звивыи а҆да́ма ѕлᲂдѣ́й . и҆ ᲂу҆ѧзви́сѧ не и҆сцѣ́льнѡ во́ вѣки
пребыва́етъ , вѣ́рнїи же ѡ҆брѣта́емъ всѣ́мъ ꙗ҆́звамъ и҆сцѣле́нїе . мⷱ҇ꙋ .
Є҆гда̀ ли́къ а҆́нг҃льскїи зрѧ́ше мч҃нкѡмъ стада̀ , за а҆́гньца закла́вшагᲂсѧ
с̾дрᲂблѧ́еми дивлѧ́шесѧ , ка́кѡ веще́ственїи , невеще́ственыѧ врагѝ
пᲂбѣжда́хꙋ , пᲂбѣ́ды вѣнцы̀ прїе́млюще . мⷱ҇ꙋ . Си́лᲂю ѡ҆дѣва́еми ст҃і́и ,
и҆́же в̾ си́лѣ є҆ди́наго всѧ̀ ᲂу҆крѣплѧ́ющаго , со враго́мъ сплета́хꙋсѧ , и҆
тᲂгѡ̀ не крѣ́пкꙋю пᲂпира́хꙋ си́лꙋ , пᲂбѣ́ды вѣнцы̀ прїе́млюще . боⷢ҇ . Ты̀
и҆́же и҆з̾ тебѐ ро́ждьшагᲂсѧ , ꙗ҆́кѡ ви́дѣ ᲂу҆ѧ́звена кᲂпїе́мъ , ᲂу҆ѧзвлѧ́шесѧ
срⷣцемъ пречⷭ҇таѧ всенепᲂро́чнаѧ . и҆ дивѧ́щисѧ гл҃аше , что́ ти вᲂздадѐ
ча́до , сᲂбо́ръ без̾зако́нныи .
и҆́нъ , і҆рмо́съ , то́йже . Вᲂда́ми спасе́нїѧ напо́й дв҃о мт҃и
ѻ҆трᲂкᲂви́це , ѿ тмы̀ и҆збавлѧ́ющи , и҆ пла́мене негаси́магѡ ѻ҆гнѧ̀ , свᲂѧ̀
мᲂли́твеники пречⷭ҇таѧ , и҆́же бцⷣꙋ тѧ̀ чтꙋ́щихъ и҆ вѣ́рᲂю сла́вѧщихъ . Ве́сь
ᲂу҆ѧ́звенъ стрꙋ́пы ꙗ҆́же ѿ прегрѣше́нїи , къ тебѣ̀ прибѣга́ю
бг҃ᲂрᲂди́тельнице , и҆ мᲂлю́сѧ , ты̀ па́гꙋбꙋ тѣ́хъ пᲂтребѝ и҆ спаси́ мѧ ,
здра́вїе бжⷭ҇твенᲂе пᲂдава́ющи ми . Ꙗ҆́же тварьмѝ всѣ́ми влⷣчествꙋющаѧ чⷭ҇таѧ
бг҃ᲂрᲂди́тельнице , менѐ пᲂрабᲂще́наго ѕлы́ми прегрѣше́ньми , и҆ непра́ведными
дѣѧ́ньми , пᲂкажѝ свᲂбо́дна ѿ си́хъ бжⷭ҇твенᲂю си́лᲂю си . Вѣ́мъ твᲂѐ и҆
разꙋмѣ́ю бл҃гᲂꙋтро́бїе пречи́стаѧ бг҃ᲂрᲂди́тельнице , тѣ́мже и҆ прибѣга́ю и҆
мᲂлю́сѧ , по́мᲂщь ᲂу҆лꙋчи́ти ми твᲂю̀ бг҃ᲂневѣ́сто , ꙗ҆́кѡ да ѡ҆брѧ́щꙋ ѕлы́хъ
ѡ҆чище́нїе .
пѣ́снь , д҃ . і҆рмо́съ . Є҆́же на крⷭ҇тѣ̀ твᲂѐ бжⷭ҇твеннᲂе смире́нїе ,
прᲂви́дѧ а҆вва́кꙋмъ , ᲂу҆жа́сно вᲂпїѧ́ше , ты̀ си́льныхъ с̾сѣчѐ держа́вꙋ
бл҃гі́и , прїѡбщи́всѧ сꙋ́щимъ во а҆́дѣ , ꙗ҆́кѡ всеси́ленъ . Прᲂсте́ртїе рꙋкѝ
неꙋдержа́нно , къ дре́вꙋ снѣ́днᲂмꙋ ѿє́млѧ гдⷭ҇и , рꙋ́цѣ на́ древѣ влⷣко
прᲂстре́ти вᲂсхᲂтѣ́лъ є҆сѝ , и҆з̾ ре́бръ же и҆ска́паѧ свѧ́занымъ
ѡ҆ставле́нїе . Стра́сти претерпѣ̀ пребл҃гі́и , ꙗ҆́кѡ да разрѣши́ши на́съ
ѿ страсте́й бесче́стїѧ . же́лчь вкꙋси́въ , и҆стᲂча́еши мнѣ̀ бжⷭ҇твенꙋю
сла́дᲂсть . ᲂу҆мертви́всѧ влⷣко живо́тъ мнѣ̀ пᲂдава́ѧ . мⷱ҇ꙋ . Ѻ҆́гнь
бжⷭ҇твеныѧ любвѐ , в̾ дш҃и слᲂве́снѣй нᲂсѧ́ще разꙋ́мнѡ . ѻ҆́гнь
без̾зако́ннꙋющихъ ᲂу҆гаси́ша . и҆ свѣ́тлыѧ свѣщѝ хрⷭ҇то́вы страстᲂно́сцы
ꙗ҆ви́шасѧ . мⷱ҇ꙋ . Бжⷭ҇твенїи дрꙋ́зи всѣ́хъ цр҃ѧ , пло́тьскїѧ себѐ
ѿлꙋчи́вше любвѐ , ᲂу҆стреми́шасѧ ко всѧ́кᲂмꙋ мꙋче́нїю крѣ́пкѡ , и҆ пᲂбѣди́вше
є҆̀ , сла́вᲂю вѣнча́шасѧ . боⷢ҇ . Крᲂмѣ̀ страсте́й тебѐ пᲂрᲂди́хъ , и҆ ка́кѡ
ви́жꙋ тѧ ны́нѣ стра́сти причаща́ющасѧ . ка́кѡ терпи́ши сїѐ , взыва́ше дв҃аѧ ,
без̾нача́льне сн҃е , сла́влю твᲂѐ дᲂлгᲂтерпѣ́нїе .
и҆́нъ , і҆рмо́съ , то́йже . Ѿча́ѧвсѧ спасе́нїѧ мᲂегѡ̀ , зᲂвы́и вᲂпїю́
ти , и҆ рꙋ́цѣ прᲂстира́ю , пᲂми́лꙋй мѧ влⷣчце мт҃и бж҃їѧ , ты̀ бꙋ́ди ми
пᲂмо́щница и҆ застꙋпле́нїе . Бꙋ́рею сᲂдержи́мъ є҆́смь , без̾мѣ́рныхъ
страсте́й , и҆ прегрѣше́нїи . со слеза́ми зᲂвꙋ́ ти влⷣчце чи́стаѧ ,
ѡ҆кᲂрмле́нїемъ свᲂи́мъ бжⷭ҇твенымъ ты́ мѧ спасѝ . Стра́шнᲂе ми сᲂпрѣ́нїе
во и҆схо́дъ дш҃и , и҆ разлꙋче́нїе ѿ́ тѣла , дв҃о влⷣчце ᲂу҆до́бнѡ сᲂтвᲂри́вши ,
и҆ пᲂкажѝ та́мѡ бжⷭ҇твенагѡ пᲂко́ѧ прича́стника . Ви́ждь ско́рбь , ви́ждь
пречⷭ҇таѧ мᲂѐ вᲂз̾дыха́нїе , ви́ждь ᲂу҆ны́нїе . и҆ мно́гꙋю свᲂю̀ пᲂкажѝ
блгⷣть во мнѣ̀ , весе́лїѧ и҆спᲂлнѧ́ющи смире́нꙋю мᲂю̀ дш҃ꙋ .
пѣ́снь , є҃ . і҆рмо́съ . Къ тебѣ̀ ᲂу҆́треннюю , млрⷭ҇дїѧ ра́ди самᲂгѡ̀
па́дшагѡ , прело́жшасѧ непрело́жнѡ , и҆ до́ страсти без̾стра́стїемъ
прекло́ньшасѧ сло́ве бж҃їи , ми́ръ пᲂда́ждь ми чл҃кᲂлю́бче . Ме́ртвъ ꙗ҆ви́сѧ
на ло́бнѣмъ пᲂвѣ́шенъ , ᲂу҆мертви́въ ѕмі́ѧ , стра́стїю пло́ти свᲂеѧ̀ ,
ни видѣ́нїѧ ты̀ хрⷭ҇тѐ , ни дᲂбро́ты и҆мѧ́ше , ᲂу҆до́брити мѧ хᲂтѧ̀ ꙗ҆́кѡ
чл҃кᲂлю́бецъ . А҆да́ма пе́рвагѡ , пригвᲂзди́ти хᲂтѧ̀ страстно́е любле́нїе ,
гвᲂздьмѝ пригвᲂжда́ешисѧ , и҆ кᲂпїе́мъ прᲂбᲂда́ешисѧ , пла́меннᲂмꙋ ѻ҆рꙋ́жїю
вᲂзбранѧ́еши хрⷭ҇тѐ , не вᲂз̾брани́ти рабѡ́мъ твᲂи́мъ вхо́да . мⷱ҇ꙋ .
Пᲂслѣ́дствꙋюще стра́сти влады́чнѣй , ли́цы мч҃нчестїи , на́ древѣ
пригвᲂжда́еми , и҆ рꙋ́ки кꙋ́пнѡ ѿє́млемы , и҆ но́зѣ къ стезѧ́мъ чⷭ҇тна́гѡ
мꙋче́нїѧ , бжⷭ҇твенѣ и҆справлѧ́еми . мⷱ҇ꙋ . Оу҆мо́мъ сᲂверше́нымъ , ᲂу҆́мъ
го́рдагѡ вᲂзнᲂсѧ́щїисѧ , сᲂкрꙋше́нїемъ низ̾лᲂжи́сте до кᲂнца̀ , смири́вшесѧ
пᲂдо́бїемъ , и҆́же всѣ́хъ вᲂз̾не́сшагѡ смире́нїемъ срⷣца , хрⷭ҇то́вы мч҃нцы .
боⷢ҇ . Ѿ ́кᲂрене дв҃о і҆єссе́ѡва прᲂзѧбла̀ є҆сѝ , и҆ ꙗ҆́кѡ цвѣ́тъ
прᲂи҆зне́сшаѧ сади́телѧ ми́рꙋ , ѿ́расли без̾бо́жїѧ и҆з̾сꙋши́вша , бжⷭ҇твенымъ
са́дᲂмъ крⷭ҇та̀ , є҆го́же пло́тїю прїѧ́тъ .
и҆́нъ , і҆рмо́съ , то́йже . И҆́же бцⷣꙋ тѧ̀ и҆́стиннꙋю чⷭ҇таѧ , бл҃гᲂче́стнѡ
сла́вѧщїи , и҆ тво́й ѻ҆́бразъ цѣлꙋ́ющїи , є҆́же к̾ сн҃ꙋ твᲂи́ми мᲂльба́ми ,
наслажа́емсѧ ᲂу҆́бѡ прᲂсвѣще́нїѧ , и҆ непреста́нныѧ ра́дᲂсти со всѣ́ми
ст҃ы́ми . и҆збавлѧ́еми ѻ҆гнѧ̀ и҆ мꙋ́ки . По мно́жествꙋ щедро́тъ бл҃га́ѧ , и҆
бл҃гᲂꙋтро́бїѧ твᲂегѡ̀ , и҆́же к̾ тебѣ̀ прибѣга́ющагѡ ѿ вѣ́ры , и҆ прᲂсѧ́щагѡ
мл҃твꙋ твᲂю̀ , грѣхѡ́мъ ѡ҆чище́нїе , и҆ прᲂще́нїе сᲂгрѣше́нїемъ пᲂда́ждь ми ,
бцⷣе при́снѡ дв҃о . Ѿчаѧва́емаго мѧ лю́тѣ , ча́стыми житїѧ̀ ѡ҆ѕлᲂбле́ньми , и҆
страстьмѝ и҆ печа́льми , и҆ бѣсо́вскими напа́данїи , и҆зба́ви бл҃га́ѧ
дв҃о пречⷭ҇таѧ , и҆ спасе́нїѧ пᲂда́ждь ми ᲂу҆тѣше́нїе и҆ прᲂсвѣще́нїе . Въ
лѣ́нᲂсти жи́знь и҆з̾жи́въ , прᲂгнѣ́ваю тебѐ дв҃о . ᲂу҆ныва́ю всегда̀
ѻ҆каѧ́нныи , и҆ небрегꙋ̀ ми́лᲂсть твᲂю̀ ; но мᲂлю́тисѧ бл҃га́ѧ непре́зри менѐ ,
бѣсѡ́мъ бы́ти ѡ҆бра́дᲂванїе , и҆ гее́ннѣ снѣде́нїе .
пѣ́снь , ѕ҃ . і҆рмо́съ . Ꙗ҆́тъ бы́сть но неꙋде́ржанъ в̾ пе́рсѣхъ ки́тᲂвѣхъ
і҆ѡ́на , тво́й бо ѻ҆́бразъ нᲂсѧ̀ , пᲂстрада́вша и҆ пᲂгребе́нїю дана̀ , ꙗ҆́кѡ
ѿ черто́га ѿ ѕвѣ́рѧ и҆з̾ше́дъ . приглаша́ше же кꙋстᲂді́и , хранѧ́щїи всꙋ́е
лжꙋ̀ , млⷭ҇ти ва́шеѧ ѡ҆ста́вили є҆стѐ . Премѣне́нїемъ рꙋ́къ , дре́вле
і҆а́кѡвъ прᲂѡ҆бража́ше крⷭ҇тъ , бл҃гᲂслᲂвлѧ́ѧ дѣ́ти . тѣ́мже вы́шнїи на то́й
вᲂзше́дъ , клѧ́твы дре́внїѧ рѣши́ши чл҃чество и҆ и҆стᲂча́еши ны́нѣ
блгⷭ҇ве́нїе , бл҃гᲂсло́вѧщимъ тѧ . є҆ди́не блгⷭ҇ве́нне , и҆ сᲂдѣ́телю ,
пресла́вне . Твᲂю̀ стра́сть прᲂѡ҆бразꙋ́ѧ сло́ве , вели́кїи мѡѷсе́й ,
вᲂзнесѐ дре́вле мѣ́днꙋю ѕмїю̀ на́ древо , ѿє́млѧ ѿ зрѧ́щихъ ꙗ҆дᲂви́таго ѕмі́ѧ
ᲂу҆грызе́нїѧ . и҆́бо влⷣко ра́спѧтꙋ бы́вшꙋ ти , вреже́нїѧ ѕмі́инагѡ
бг҃ᲂненави́стнагѡ , всѝ вѣ́рнїи и҆зба́вихᲂмсѧ . мⷱ҇ꙋ . Ꙗ҆́кᲂже и҆но́мꙋ
стра́жꙋщꙋ , бжⷭ҇твенїи дре́вле и҆ крѣ́пцїи страда́льцы бѧ́хꙋ стра́жꙋще ,
пред̾зрѧ́ще , вᲂздаѧ́нїѧ вѣ́чнаѧ и҆ ра́дᲂванїе . мл҃твами и҆́хъ , сп҃се
ми́рꙋ , вᲂспѣва́ющихъ тѧ и҆зба́ви , ѿ и҆скꙋше́нїи , и҆ ѿ грѣхо́въ и҆ бѣ́дъ .
мⷱ҇ꙋ . Пᲂто́ки и҆з̾сꙋши́ша пре́лести , тече́нїемъ крᲂве́й , честні́и и҆
бжⷭ҇твенїи стрⷭ҇тᲂно́сцы . и҆ и҆сто́чницы вᲂи́стинꙋ ꙗ҆ви́шасѧ , вѣ́рнымъ
бг҃ᲂразꙋ́мїѧ тᲂча́ще во́ды , мл҃твами и҆́хъ , сп҃се ми́рꙋ , ѡ҆дᲂждѝ
ѡ҆ставле́нїе всѣ́мъ , и҆ ѡ҆чище́нїе грѣхо́въ , и҆ ве́лїю млⷭ҇ть . боⷢ҇ .
Па́стырѧ до́брагѡ всѣ́хъ влⷣкꙋ , вᲂздви́жена на́ древѣ зрѧ́щи а҆́гница
пла́чꙋщи , мт҃рьски вᲂпїѧ́ше , что̀ сїѐ ча́до но́вᲂе та́инство , ка́кѡ
без̾сме́ртенъ по сꙋществꙋ̀ сы́и , сме́рть прїе́млетъ , чл҃ки хᲂтѧ̀ и҆з̾ тлѝ
и҆зба́вити .
и҆́нъ , і҆рмо́съ , то́йже . Тебѣ̀ припа́даю влⷣчце чⷭ҇таѧ ми́рꙋ и҆
мᲂлю́сѧ , дш҃и мᲂеѧ̀ стра́сти , и҆ плᲂтьска́ѧ лю́таѧ хᲂтѣ́нїѧ , и҆ мы́сли мᲂеѧ̀
пᲂбѣжде́нїѧ пᲂтребѝ и҆ бѣсо́вскаѧ ѕлᲂдѣ́йства и҆ лᲂвле́нїѧ , си́лᲂю твᲂе́ю
до кᲂнца̀ низ̾лᲂжѝ пречⷭ҇таѧ , и҆ спаси́ мѧ . Ѡ҆мраче́нꙋю мы́сль мᲂю̀ ,
мра́кᲂмъ лꙋка́выхъ пᲂмышле́нїи , и сласте́й мгло́ю , и҆ тмо́ю прегрѣше́нїи ,
дв҃о мт҃и прᲂсвѣтѝ мл҃твами сѝ , ꙗ҆́же бжⷭ҇твеныи свѣ́тъ пᲂро́ждьшаѧ , и҆
непᲂстᲂѧ́ннᲂе ѡ҆блиста́й мнѣ̀ прᲂсвѣще́нїе пᲂкаѧ́нїѧ , и҆ бл҃гᲂда́ть .
И҆спра́ви мѧ къ бжⷭ҇твенымъ стезѧ́мъ , мт҃и всѣ́хъ цр҃ѧ . и҆ ѿ страсте́й
без̾пꙋ́тїѧ и҆ грѣха̀ и҆збавлѧ́ющи мѧ , и҆ наставлѧ́ющи к̾ живᲂтꙋ̀ нетлѣ́ннᲂмꙋ .
ты́ бо є҆сѝ всѣ́мъ до́брымъ вина̀ и҆ спасе́нїе чл҃кѡмъ , спаса́ющи ѿ тлѝ , и҆
ко спасе́нїю вᲂзвᲂдѧ́щи . Но́во мла́дѧ нᲂси́вши чⷭ҇таѧ , и҆́же пре́жде сꙋ́ще
всѣ́хъ вѣ́къ , тᲂгѡ̀ при́снѡ мᲂлѝ всебл҃гᲂслᲂве́наѧ дв҃о мт҃и ѡ҆́ мирѣ . и҆
ꙗ҆́кѡ мт҃и пречⷭ҇таѧ , сᲂгрѣше́нїемъ мᲂи́мъ и҆спрᲂсѝ разрѣше́нїе .
дерзнᲂве́нїе мно́го и҆мꙋ́щи всегда̀ къ сн҃ꙋ свᲂемꙋ̀ чи́стаѧ .
пѣ́снь , з҃ . і҆рмо́съ . Не и҆зрече́ннᲂе чꙋ́до и҆́же в̾ пещѝ и҆зба́вивыи ,
прпⷣбныѧ ѻ҆́трᲂки и҆з̾ пла́мени , во́ грᲂбѣ но́вѣ без̾дꙋ́шенъ пᲂлага́етсѧ ,
на спасе́нїе на́мъ пᲂю́щимъ , и҆зба́вителю бж҃е блгⷭ҇ве́нъ є҆сѝ . Є҆гда́ тѧ
на крⷭ҇тѣ̀ сᲂбо́ръ є҆вре́йскїи ѡ҆сꙋдѝ , зрѧ́щи землѧ̀ ᲂу҆жасе́сѧ , и҆ сл҃нце
свѣ́тъ сво́й с̾кры̀ , и҆ сꙋ́щїи во тмѣ̀ свѣ́тъ ви́дѣша пᲂю́ще , и҆зба́вителю
бж҃е блгⷭ҇ве́нъ є҆сѝ . Дᲂсажде́нїе пᲂдъѧ́лъ є҆сѝ сп҃се тро́стїю бїе́мь ,
и҆ те́рнїемъ вѣнчева́емь ꙗ҆́кѡ цр҃ь , во́лею хрⷭ҇тѐ бж҃е , на спасе́нїе на́мъ
пᲂю́щимъ , и҆зба́вителю бж҃е блгⷭ҇ве́нъ є҆сѝ .= мⷱ҇ꙋ . Вѧ́жꙋще всю̀ дїа́вᲂлю
ѕло́бꙋ всехва́льнїи мч҃нцы , и҆ рѣша́ще чл҃ки , ꙗ҆́вственѡ терпитѐ мꙋ́ки и҆
сме́рть непра́веднꙋю , жи́знь жела́юще вы́шнюю . и҆ вᲂпїю́ще , и҆зба́вителю
бж҃е бл҃гᲂслᲂве́нъ є҆сѝ . =мⷱ҇ꙋ . Ста́сте пᲂсредѣ̀ пла́мене , всехва́льнїи
мч҃нцы , пре́лесть пᲂпалѧ́юще ꙗ҆́вѣ , и҆ ѡ҆рᲂше́нїемъ бжⷭ҇твеныѧ бл҃гᲂда́ти ,
не ѡ҆пали́вшесѧ , вᲂпїе́те пᲂю́ще , и҆зба́вителю бж҃е бл҃гᲂслᲂве́нъ є҆сѝ .
боⷢ҇ . Распѧ́тсѧ хᲂтѧ́и без̾нача́льне , бцⷣа зрѧ́щи тѧ̀ вᲂпїѧ́ше , печа́лїю
дш҃и ны́нѣ ѡ҆блива́ема є҆́смь , ᲂу҆мира́еши бо пᲂдаѧ́и жи́знь пᲂю́щимъ ,
и҆зба́вителю бж҃е бл҃гᲂслᲂве́нъ є҆сѝ .
и҆́нъ , і҆рмо́съ , то́йже . Оу҆твердѝ на ка́мени хᲂтѣ́нїи зижди́телѧ
мᲂегѡ̀ , дш҃ꙋ мᲂю̀ влⷣчце чⷭ҇таѧ . бꙋ́рю сласте́й , и҆ страсте́й мѧте́жь ,
твᲂи́ми мл҃твами ᲂу҆крᲂти́вши , и҆ бжⷭ҇твенꙋю да́рꙋющи ми тишинꙋ̀ , и҆
смире́нїе . Тꙋ́чꙋ ми да́ждь сле́зъ пречⷭ҇таѧ влⷣчце , скве́рнꙋ всю̀ и҆
сласте́й ти́нꙋ дш҃и ѿмыва́ющꙋю , и҆ чи́ста мѧ привᲂдѧ́щи зижди́телю , и҆ мꙋ́къ
всѣ́хъ и҆збавлѧ́ющи . Тѧ̀ пред̾ста́тельницꙋ , и҆ непᲂбѣди́мᲂе ᲂу҆тверже́нїе ,
стѧжа́вше чⷭ҇таѧ и҆ пречⷭ҇таѧ , навѣ́та вра́жїѧ , и҆ сѣте́й вы́шши
да ꙗ҆ви́мсѧ , и҆ стра́шнагѡ вѣ́чнагѡ ѡ҆сꙋже́нїѧ да и҆зба́вимсѧ .= Н=о́щь
сᲂдержи́тъ мѧ лꙋка́выхъ прегрѣше́нїи мᲂи́хъ , и҆ мгла̀ без̾зако́нїи , и҆
глꙋбина̀ ѕлы́хъ , сѐ пᲂкрыва́етъ мѧ . и҆зведи́ мѧ и҆́з̾ рᲂва грѣхо́внагѡ ,
бг҃ᲂрᲂди́тельнице и҆ пред̾ста́тельнице вѣ́рнымъ .
пѣ́снь , и҃ . і҆рмо́съ . Оу҆жасни́сѧ бᲂѧ́исѧ нб҃о , и҆ да пᲂдви́жатсѧ
ѡ҆снᲂва́нїѧ землѝ . сѐ ᲂу҆́бѡ в̾ мертвецѣ́хъ вмѣнѧ́етсѧ и҆́же въ вы́шнихъ
живы́и , и҆ во́ грᲂбѣ ма́лѣ ѡ҆битᲂва́етъ . є҆го́же дѣ́ти бл҃гᲂслᲂви́те ,
сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . Пи́выи ча́шꙋ хрⷭ҇тѐ ,
є҆ѧ́же вᲂзжелѣ́лъ є҆сѝ стра́стїю крⷭ҇тнᲂю , и҆стᲂча́ѧ ми пᲂто́ки
ѡ҆ставле́нїѧ , ѿ живᲂтвᲂрѧ́щихъ ре́бръ , ра́ди ребра̀ ᲂу҆ме́ршемꙋ , пѣ́сньми
вᲂспѣва́ю тѧ , є҆го́же дѣ́ти бл҃гᲂслᲂви́те , сщ҃е́ннїи по́йте , и҆
превᲂзнᲂси́те є҆гѡ̀ во́ вѣки . Є҆гда̀ тѧ̀ без̾зако́ннїи лю́дїе , ѡ҆сꙋди́ша
распѧ́ти і҆с҃е , пᲂсредѣ̀ без̾зако́ннᲂю закᲂнᲂда́вца и҆ гдⷭ҇а , ᲂу҆бᲂѧ́сѧ
землѧ̀ , и҆ всѝ вᲂспѣва́хꙋ со́ страхᲂмъ , дѣ́ти бл҃гᲂслᲂви́те , сщ҃е́ннїи
по́йте , и҆ превᲂзнᲂси́те є҆гѡ̀ во́ вѣки . мⷱ҇ꙋ . Честна̀ пред̾ бг҃ᲂмъ
ꙗ҆ви́сѧ ва́ша сме́рть мꙋ́ченицы , мно́гимъ бо причасти́вшесѧ стрⷭ҇те́мъ ,
стра́сти честнѣ́й хрⷭ҇то́вѣ ѻ҆́бщницы пᲂказа́стесѧ . є҆мꙋ́же вᲂпїю́ще
непреста́ннѡ , дѣ́ти бл҃гᲂслᲂви́те , сщ҃е́ннїи по́йте , и҆ превᲂзнᲂси́те є҆гѡ̀
во́ вѣки . мⷱ҇ꙋ . Вᲂи́стинꙋ не пло́тьскаѧ ва́ша ѻ҆рꙋ́жїѧ мꙋ́ченицы ,
ко ѡ҆пᲂлче́нїю вра́жїю , наде́жа же , и҆ вѣ́ра и҆́стинна , и҆́миже пᲂлꙋчи́вше
бг҃а , ликѡ́мъ и҆з̾бра́нныхъ сᲂчета́стесѧ , вᲂпїю́ще влⷣцѣ , дѣ́ти
бл҃гᲂслᲂви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . боⷢ҇ .
Вы́шнїи без̾нача́льныи сн҃е , терпи́ши ѡ҆плева́нїѧ , и҆ пᲂнᲂше́нїѧ , и҆
крⷭ҇тъ , тро́стїю рꙋга́тельнѡ бїе́мь , бцⷣа вᲂпїѧ́ше , сла́влю твᲂѐ
дᲂлгᲂтерпѣ́нїе . є҆го́же дѣ́ти бл҃гᲂслᲂви́те , сщ҃е́ннїи по́йте , и҆
превᲂзнᲂси́те є҆гѡ̀ во́ вѣки .
и҆́нъ , і҆рмо́съ , то́йже . Свѣ́тъ ро́ждьшаѧ хрⷭ҇та̀ , свѣ́тлыми ти
мᲂльба́ми и҆ мл҃твами дв҃о , незахᲂди́мымъ и҆спо́лни свѣ́тᲂмъ рабы̀ свᲂѧ̀ ,
и҆́же вѣ́рᲂю бл҃гᲂче́стнѡ тебѐ пᲂю́щихъ . и҆́бо твᲂе́ю мᲂли́твᲂю , и҆ твᲂи́мъ
пред̾ста́тельствᲂмъ , сильна̀ є҆сѝ спастѝ и҆́хже хо́щеши . Бѣды̀ а҆́дᲂвы
ѕлы́ѧ , и҆ ско́рби ѡ҆брѣто́ша мѧ , и҆ нꙋ́жи ѕѣ́льныѧ и҆ бᲂлѣ́зни , лю́тѣ
сᲂдержа́тъ и҆ пᲂгꙋблѧ́ютъ . а҆́зъ же твᲂю̀ призыва́ю по́мᲂщь дв҃о , ты́ мѧ
и҆зба́ви ѿ си́хъ бѣ́дъ , къ тишинѣ̀ наставлѧ́ющи и҆́стиннѣй . Пᲂлкѝ сᲂкрꙋшѝ
вра́жїѧ , крѣ́пᲂстїю сѝ бцⷣе бл҃га́ѧ , всꙋ́е бᲂрю́щихъ мѧ , и҆ мꙋ́чащихъ
ѕѣлѡ̀ , и҆ пᲂги́бели мᲂе́й ра́дꙋющихсѧ , хранѧ́щи и҆ сᲂблюда́ющи , и҆
и҆зба́ви мѧ ѿ тѣ́хъ лꙋка́вагѡ бѣсᲂва́нїѧ , и҆ лю́тагѡ кᲂва́рства . Ви́ждь
ско́рбь мᲂю̀ чⷭ҇таѧ , є҆ю́же ми и҆стᲂчи́сѧ мно́жество грѣхо́въ . и҆ ᲂу҆гасѝ
пе́щь ѻ҆гнепа́льныхъ страсте́й мᲂлю́сѧ , рᲂсо́ю бжⷭ҇твеныѧ ти мл҃твы , да пᲂю̀
твᲂѐ ѻ҆трᲂкᲂви́це те́плᲂе застꙋпле́нїе , и҆ превᲂзнᲂшꙋ̀ тебѐ во всѧ̀ вѣ́ки .
та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .
пѣ́снь , ѳ҃ . і҆рмо́съ . Нерыда́й менѐ мт҃и , взира́ющи во́ грᲂбѣ ,
є҆го́же пло́тїю без̾ сѣ́мени зачала̀ є҆́си сн҃а . вᲂста́нꙋ бо и҆ сла́венъ
бꙋ́дꙋ , и҆ вᲂзнесꙋ̀ со сла́вᲂю , немо́лчнѡ ꙗ҆́кѡ бг҃ъ , вѣ́рᲂю и҆ любо́вїю тѧ
велича́ющїѧ . Да и҆́же снѣ́дїю и҆стлѣ́вшаго сла́стїю дре́ва , є҆ди́не сп҃се
ꙗ҆́кѡ бл҃гъ и҆зба́виши всѧ̀ ѿ тлѝ , распѧ́тисѧ пло́тїю и҆ ᲂу҆мертви́тисѧ
прїѧ́тъ . вᲂспѣва́емъ непреста́ннѡ і҆с҃е , мно́гᲂе бл҃гᲂꙋтро́бїе и҆ си́лꙋ
твᲂю̀ . Ѽ ка́кѡ претерпѣ́лъ є҆сѝ бᲂлѣ́зни , на крⷭ҇тѣ̀ распина́емь ,
ѿ бᲂлѣ́зней лю́тыхъ и҆зима́ѧ мѧ хрⷭ҇тѐ ; ка́кѡ те́рнїемъ вѣнча́сѧ , всѐ
и҆сто́ргъ страсте́й те́рнїе ; ка́кѡ ѻ҆цта̀ напᲂи́всѧ , весе́лїѧ ча́шꙋ на́мъ
пᲂче́рплъ є҆сѝ ; мⷱ҇ꙋ . Стѣснѧ́еми всѝ , и҆ в̾ темни́цꙋ вмета́еми , и҆
на ᲂу҆́ды страда́льцы раз̾сѣца́еми лю́тѣ , и҆ по кᲂле́сѣхъ жестᲂкѡ̀
прᲂтѧза́еми . и҆ в̾ снѣде́нїе ѕвѣре́мъ вдава́еми , хрⷭ҇та̀ всѣ́хъ влⷣки
не ѿверго́стесѧ . мⷱ҇ꙋ . Со́лнечныхъ сїѧ́нїи , мно́жайше сїѧ́етъ
страда́лецъ всесвѣ́тлаѧ и҆ до́браѧ па́мѧть , и҆ дш҃а бл҃гᲂчести́выхъ
прᲂсвѣща́етъ всегда̀ , и҆ ѿгᲂнѧ́етъ тмꙋ̀ страсте́й , и҆ напа́стей , и҆
бѣсо́вскїи пᲂтреблѧ́етсѧ мра́къ глꙋбо́кїи . боⷢ҇ . Но́сиши нᲂсѧ́щаго всѧ̀ ,
и҆ держи́ши ꙗ҆́кѡ младе́нца на рꙋкꙋ̀ , и҆́же и҆збавлѧ́ющаго на́съ ѿ рꙋкѝ
бᲂрю́щагѡ врага̀ , пречⷭ҇таѧ влⷣчце . и҆ зри́ши пᲂвѣ́шена на́ древѣ крⷭ҇тнѣмъ ,
и҆́же и҆з̾ глꙋбины̀ ѕло́бы чл҃ки вᲂзне́сшагѡ .
и҆́нъ , і҆рмо́съ , то́йже . Всекᲂне́чнѣ ѿ́ срⷣца , себѐ самᲂгѡ̀ тебѣ̀
принᲂшꙋ̀ , и҆ вᲂзлага́ю мꙋ́дрᲂсть всю̀ на тѧ̀ . тебѐ ра́ди , сᲂгрѣше́нїемъ
ѡ҆брѣсти́ ми и҆збавле́нїе . тᲂбо́ю да ꙗ҆влю́сѧ ѻ҆́бщникъ бꙋ́дꙋщагѡ црⷭ҇твїѧ и҆
сла́вы , бг҃ᲂрᲂди́тельнице чи́стаѧ . Тебѐ пред̾ста́тельницꙋ и҆ пᲂкро́въ , и҆
наде́жꙋ и҆ стѣ́нꙋ , и҆ прибѣ́жище и҆ ѡ҆чище́нїе , и҆ разрꙋше́нїе лю́тымъ
ѡ҆брѣ́тше пречⷭ҇таѧ , спаса́емсѧ ѿ напа́стей и҆ бѣ́дъ , и҆ бᲂлѣ́зней и҆
страсте́й , и҆ непреста́ннѡ чте́мъ си́лꙋ твᲂю̀ . Ꙗ҆́же тве́рдᲂе спасе́нїе ,
и҆ ᲂу҆пᲂва́нїе и҆звѣ́стнᲂе , ѡ҆небеси́вшаѧ ро́дъ чл҃ческїи , ꙗ҆́же бжⷭ҇твенꙋю
тꙋ́чꙋ на́мъ и҆зрасти́вши , бцⷣе дв҃о спасѝ на́съ ѿ страсте́й и҆ бѣ́дъ , и҆
ѿ вѣ́чнагѡ ѻ҆гнѧ̀ . Не сказа́ннѡ ро́ждьши пребез̾нача́льнᲂе сло́во , и҆з̾ ѻ҆ц҃а
є҆динᲂро́днагѡ сн҃а же и҆ бг҃а , тᲂгѡ̀ ѻ҆трᲂкᲂви́це чⷭ҇таѧ прⷭ҇нѡ мᲂлѝ ,
и҆зба́витисѧ бѣ́дъ и҆ всѧ́кᲂгѡ преще́нїѧ , вѣ́рᲂю и҆ любо́вїю тебѐ
велича́ющимъ .
та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀
ма́лаѧ . и҆ свѣти́ленъ . и҆ ѱалмы̀ ѡ҆бы́чны .
на стихо́внѣ , стихѣ́ры , крⷭ҇тны . гла́съ , ѕ҃ . Ѡ҆ крⷭ҇тѣ̀ ᲂу҆пᲂва́нїе
и҆мѣ́ѧ хрⷭ҇тѐ , и҆ ѡ҆ не́мъ хвалѧ́сѧ вᲂпїю̀ , чл҃кᲂлю́бче гдⷭ҇и , гᲂрды́ню
низ̾лᲂжѝ , не и҆спᲂвѣ́дающихъ тебѐ бг҃а и҆ чл҃ка .
сти́хъ : и҆спо́лнихᲂмсѧ за ᲂу҆́тра . И҆́же крⷭ҇то́мъ ѡ҆гражда́еми , врагꙋ̀
прᲂтивлѧ́емсѧ , небᲂѧ́щесѧ тᲂгѡ̀ кᲂва́рства ни ла́ѧнїѧ , ꙗ҆́кѡ бо гᲂрды́и
ᲂу҆праздни́сѧ и҆ пᲂпра́нъ бы́сть , на́ древѣ си́лᲂю распѧ́таго хрⷭ҇та̀ .
сти́хъ : и҆ бꙋ́ди свѣ́тлᲂсть . мⷱ҇ꙋ . Гдⷭ҇и в̾ па́мѧть ст҃ы́хъ твᲂи́хъ ,
всѧ̀ тва́рь пра́зднꙋетъ , нб҃са̀ ра́дꙋютсѧ со а҆́нг҃лы , и҆ землѧ̀ весели́тсѧ
съ чл҃ки . тѣ́хъ мл҃твами пᲂми́лꙋй на́съ .
сла́ва , и҆ нн҃ѣ , крⷭ҇тᲂбоⷢ҇ . Пречⷭ҇таѧ ꙗ҆́кѡ ви́дѣ тѧ на крⷭ҇тѣ̀
пᲂвѣ́шена , пла́чꙋщи вᲂпїѧ́ше мт҃рьски , сн҃е мо́й и҆ бж҃е мо́й ,
сладча́йшее ча́до мᲂѐ , ка́кѡ терпи́ши стра́сть пᲂно́снꙋю .
та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ .
трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны .
и҆ про́чее , и҆ кᲂне́чныи ѿпꙋ́стъ .
Въ пѧто́къ , бл҃же́нны . гла́съ , ѕ҃ .
Пᲂмѧни́ мѧ бж҃е сп҃се мо́й , є҆гда̀ прїи́деши во црⷭ҇твїи сѝ , и҆ спаси́
мѧ , ꙗ҆́кѡ є҆ди́нъ чл҃кᲂлю́бецъ .
бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе .
Распрᲂсте́ръ дла́ни на́ древѣ , прїѧ́лъ є҆сѝ ꙗ҆зы́ки , пᲂю́щїѧ твᲂѐ
бл҃гᲂꙋтро́бїе , хрⷭ҇тѐ бж҃е на́шъ .
бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ
всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Пригвᲂзди́всѧ на крⷭ҇тѣ̀
во́лею , и҆ жа́ла мꙋчи́телева , свᲂе́ю хрⷭ҇тѐ си́лᲂю до кᲂнца̀ сᲂкрꙋши́лъ
є҆сѝ .
ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Мꙋ́ками
пита́ющесѧ стрⷭ҇тᲂте́рпцы , ра́йскїѧ пи́щи спᲂдо́бистесѧ , ѡ҆́ мирѣ
непреста́ннѡ мᲂлѧ́щесѧ .
сла́ва . Ѿ всѧ́кїѧ и҆змѝ на́съ мꙋ́ки , ѻ҆́ч҃е и҆ сн҃е и҆ сᲂпресто́льныи
дꙋ́ше рабы̀ свᲂѧ̀ гдⷭ҇и .
и҆ ны́нѣ . Зрѧ́щи тѧ̀ на крⷭ҇тѣ̀ распрᲂсте́рта , дв҃аѧ вᲂздыха́ше слезѧ́щи ,
є҆ѧ́же мл҃твами спасѝ на́съ гдⷭ҇и пᲂю́щихъ тѧ .