Глас 6 вторник

Въ пᲂнедѣ́льникъ , ве́черъ . на гдⷭ҇и вᲂзва́хъ , стихѣ́ры , пᲂкаѧ́нны . гла́съ , ѕ҃ . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Кто̀ менѐ не пла́четсѧ , престꙋпи́вшаго за́пᲂвѣдь вы́шнѧгѡ ; не вᲂз̾держа́нїѧ ра́ди , во а҆́дъ в̾сели́хсѧ , в̾ мѣ́стѡ раѧ̀ , снѣ́ди сла́дкїѧ видѣ́нїемъ , сме́рть и҆схᲂда́тайствꙋющїѧ , и҆ стра́ненъ є҆ѧ̀ ра́ди бж҃їѧ сла́вы и҆ жи́зни ꙗ҆ви́хсѧ . но прїими́ мѧ ка́ющасѧ гдⷭ҇и , ꙗ҆́кѡ млⷭ҇тивъ и҆ чл҃кᲂлю́бецъ , вели́кїѧ ра́ди твᲂеѧ̀ ми́лᲂсти .

ᲂу҆пᲂва̀ дш҃а мᲂѧ̀ на́ гдⷭ҇а . Ви́ждь мᲂю̀ ско́рбь и҆ бᲂлѣ́знь , и҆ прегрѣше́нїемъ без̾мѣ́рнᲂе мно́жество , и҆ дш҃и мᲂеѧ̀ ѡ҆ѕлᲂбле́нїе , и҆ ᲂу҆́мнᲂе прельще́нїе . разꙋмѣ́й гла́съ ѿча́ѧннагѡ и҆ ѡ҆сꙋжде́ннагѡ , и҆ да́ждь ми гдⷭ҇и дх҃ъ сᲂкрꙋше́нъ , и҆ смире́но срⷣце . и҆ пᲂда́ждь и҆сто́чникъ сле́зъ , и҆ мно́гихъ ми прегрѣше́нїи прᲂще́нїе , вели́кїѧ ра́ди твᲂеѧ̀ млⷭ҇ти .

да ᲂу҆пᲂва́етъ і҆и҃ль на́ гдⷭ҇а . Бж҃е хᲂтѧ́и всѣ́мъ чл҃кѡмъ спасти́сѧ , при́зри и҆ ᲂу҆слы́ши мл҃твꙋ мᲂю̀ , и҆ да не мᲂѧ̀ сле́зы ѿри́неши ꙗ҆́кѡ сꙋ́етны . кто́ бо прїи́де к̾ тебѣ̀ пла́ча , и҆ не а҆́бїе ли спасе́нъ бы́въ . кто́ли же вᲂзᲂпѝ те́плѣ к̾ тебѣ̀ , и҆ не а҆́бїе ᲂу҆слы́шанъ бы́сть . но ѽ влⷣко , ско́ръ ѡ҆брѣта́ешисѧ во спасе́нїе мᲂлѧ́щимсѧ тѝ всѣ́мъ , ꙗ҆́кѡ в̾ млⷭ҇ти непᲂбѣди́мь .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ і҆ѡа́ннꙋ прⷣтчи . гла́съ , ѕ҃ . =запѣ́въ : ѿ всѣ́хъ без̾зако́нїи є҆гѡ̀ . В=ъ пꙋтѝ заблꙋди́вша мѧ житїѧ̀ , непре́зри прⷣтче сп҃сᲂвъ , серде́чнїи бо ѻ҆́чи к̾ тебѣ̀ вᲂзвᲂжꙋ̀ , и҆ пᲂста́ви на ка́мени пᲂкаѧ́нїѧ стᲂпы̀ дш҃и мᲂеѧ̀ . пᲂкажѝ пꙋ́ть пра́въ хᲂди́ти ми , в̾вᲂдѧ́щїи во врата̀ спаси́тельнаѧ , и҆ не ѿри́ни стена́нїе скᲂрбѧ́щагѡ срⷣца мᲂегѡ̀ , в̾ рᲂже́нныхъ всѣ́хъ преи҆зѧ́щныи .

пᲂхвали́те є҆гѡ̀ всѝ лю́дїе . Крⷭ҇тлю и҆ прⷣтче сп҃сᲂвъ , пᲂмо́щникъ ми бꙋ́ди бл҃же́нне , ᲂу҆глѣ́бшемꙋ в̾ тимѣ́нїи пᲂмышле́нїи нечи́стыхъ . рꙋ́кꙋ ми пᲂда́ждь прекᲂснꙋ́вшꙋюсѧ къ верхꙋ̀ нетлѣ́ннᲂмꙋ , и҆ дѣ́ла твᲂри́ти пᲂкаѧ́нїѧ ᲂу҆крѣпѝ до́блественѣ , є҆́же прᲂпᲂвѣ́далъ є҆сѝ , и҆ црⷭ҇твїѧ внꙋ́трь бы́ти , є҆́же пе́рвыи наꙋчи́лъ є҆сѝ , спᲂдо́би мѧ раба̀ твᲂегѡ̀ .

и҆ и҆́стина гдⷭ҇нѧ пребыва́етъ во́ вѣки . И҆́же ма́терьнее непло́дьство и҆ ѻ҆́ч҃ее без̾гла́сїе , разрѣши́выи ржⷭ҇тво́мъ свᲂи́мъ , без̾пло́дствїе разрѣшѝ без̾ча́днагѡ ми срⷣца , всѧ́ко же без̾слᲂве́сїе дш҃и ѿи҆мѝ в̾ско́рѣ . сло́вꙋ бо гла́съ сы́и , вᲂз̾глаша́ющь пᲂкаѧ́нїе . є҆́же спᲂдо́би мѧ сїѐ сᲂверши́ти всегда̀ , и҆́же ѿ́ бг҃а ᲂу҆да́лившагᲂсѧ лѣ́нᲂсти ра́ди , хрⷭ҇то́въ крⷭ҇тлю .

сла́ва , и҆ нн҃ѣ , боⷢ҇ . Чл҃кᲂлю́бїѧ твᲂегѡ̀ пꙋчи́нꙋ , и҆ бл҃гᲂꙋтро́бїѧ твᲂегѡ̀ глꙋбинꙋ̀ , и҆ бл҃гᲂсти щедро́ты не и҆зᲂчте́нныѧ , пᲂкажѝ пречⷭ҇таѧ дв҃о , на мнѣ̀ ѻ҆каѧ́ннѣмъ . ᲂу҆тᲂлѝ па́жить грѣхо́внꙋю , цѣлᲂмꙋ́дрїе пᲂда́вши , и҆ сᲂблюдѝ съ дш҃е́ю тѣ́ло мᲂѐ нескве́рно , ꙗ҆́же сп҃са ро́ждьшаѧ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , ѕ҃ . Въ стра́шнᲂе прише́ствїе твᲂѐ хрⷭ҇тѐ , да не ᲂу҆слы́шимъ не вѣ́мъ ва́съ . ᲂу҆пᲂва́нїе бо на тѧ̀ сп҃се вᲂзлᲂжи́хᲂмъ , а҆́ще и҆ твᲂѧ̀ пᲂвелѣ́нїѧ не сᲂтвᲂри́хᲂмъ за лѣ́нᲂсть на́шꙋ , но пᲂщадѝ дш҃а на́ша мо́лимсѧ .

сти́хъ : к̾ тебѣ̀ вᲂз̾ведо́хъ ѻ҆́чи . Пᲂкаѧ́нїѧ нестѧжа́хъ , нижѐ па́ки сле́зъ , сегѡ̀ ра́ди мᲂлю́тисѧ хрⷭ҇тѐ бж҃е , пре́жде кᲂнца̀ ѡ҆брати́ти , и҆ да́ти ми ᲂу҆миле́нїе , ꙗ҆́кѡ да и҆зба́влюсѧ ѿ мꙋ́ки .

сти́хъ : пᲂми́лꙋй на́съ гдⷭ҇и . мⷱ҇ꙋ . Стрⷭ҇тᲂте́рпцы мч҃нцы , нбⷭ҇нїи гра́жане , на землѝ пᲂстрада́вше , мно́ги мꙋ́ки претерпѣ́ша . мл҃твами и҆́хъ гдⷭ҇и , и҆ мᲂле́нїемъ , всѣ́хъ на́съ сᲂхранѝ .

сла́ва , и҆ нн҃ѣ , боⷢ҇ . Никто́же притека́ѧ к̾ тебѣ̀ , пᲂсра́мленъ ѿ тебѐ и҆схо́дитъ чⷭ҇таѧ дв҃о бцⷣе , но про́ситъ бл҃гᲂда́ти , и҆ прїе́млетъ дарᲂва́нїе к̾ пᲂле́знᲂмꙋ прᲂше́нїю .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ пᲂнедѣ́льникъ , на па́вечерницѣ . кано́нъ , прест҃ѣ́й бцⷣѣ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . запѣ́въ : прест҃а́ѧ гжⷭ҇е бцⷣе спасѝ на́съ . Преклᲂне́нъ мно́жествᲂмъ и҆скꙋше́нїи , и҆ лю́тыми дѣѧ́нїи , вы́ю дш҃е́внꙋю и҆ тѣле́снꙋю преклᲂнѧ́ю тебѣ̀ чⷭ҇таѧ , и҆ вᲂпїю́ ти прилѣ́жно , ты́ мѧ и҆спра́ви . Ѽ всенепᲂро́чнаѧ ѻ҆трᲂкᲂви́це , крѣ́пка вѣ́рнымъ по́мᲂще , и҆ ᲂу҆пᲂва́нїе хрⷭ҇тїа́нѡмъ , ты́ мѧ свᲂбᲂдѝ , плᲂтьски́хъ сласте́й же и҆ страсте́й , бᲂрю́щихсѧ со мно́ю . сла́ва . Свѣтᲂвᲂди́тельница сꙋ́щимъ во тмѣ̀ , свѣ́тъ мы́сленыи ро́ждьши пречⷭ҇таѧ , прᲂсвѣти́ ми дш҃ꙋ , и҆ ᲂу҆́мъ ѡ҆ст҃ѝ , страсте́й и҆ прегрѣше́нїи тмꙋ̀ рѣша́щи . и҆ нн҃ѣ . Ѡ҆мра́чнѣй дш҃и мᲂе́й , наведе́ньми без̾мѣ́стныхъ пᲂмышле́нїи тмꙋ̀ разрꙋшѝ , бцⷣе влⷣчце , свѣ́тᲂмъ ст҃ы́хъ за́пᲂвѣдей вᲂплᲂще́ннагѡ и҆з̾ тебѐ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . На тѧ̀ чи́стаѧ и҆ пречⷭ҇таѧ надѣ́ѧвсѧ , да не ѿпадꙋ̀ є҆́же к̾ тебѣ̀ ча́ѧнїѧ . но ꙗ҆́кѡ мт҃и чл҃кᲂлю́бца бг҃а млⷭ҇тива , сѣте́й мѧ вра́жїихъ и҆зба́ви . Мр҃і́е мт҃и бж҃їѧ , спасе́нїѧ две́ри , є҆ю́же про́йде є҆ди́нъ , и҆́же всѣ́хъ твᲂре́цъ , пᲂкаѧ́нїѧ ны́нѣ , бжⷭ҇твеныѧ две́ри ѿве́рзи ми пречⷭ҇таѧ . сла́ва . Приста́нище бꙋ́ди ми и҆ храни́тельница чⷭ҇таѧ , лю́тыми тревᲂлне́нїи страсте́й , ѡ҆бꙋрева́емꙋ всегда̀ въ мо́ри житїѧ̀ , є҆ди́на при́снѡ дв҃о . и҆ ны́нѣ . Мр҃і́е мт҃и бж҃їѧ , прᲂсвѣтѝ дш҃ꙋ мᲂю̀ , пᲂмраче́ннꙋю лю́тѣ , мно́гими грѣхѝ , и҆ стрѣло́ю лꙋка́ваго ᲂу҆ѧ́звенꙋю и҆ и҆знемо́гшꙋю .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вести чи́сты ѡ҆́ гдⷭ҇ѣ пра́зднꙋющи . Крѣ́пᲂсть мᲂѧ̀ пречⷭ҇таѧ , и҆ прибѣ́жище , и҆ неѡ҆бᲂри́маѧ стѣна̀ , и҆ к̾ бг҃ꙋ мл҃твеница сꙋ́щи , вѣ́чнꙋющагѡ пла́мене и҆ гее́нны свᲂбᲂди́ мѧ . Мр҃і́е всечⷭ҇таѧ страсте́й мᲂлвꙋ̀ мᲂегѡ̀ ᲂу҆ма̀ , и҆ и҆скꙋше́нїи бꙋ́рю разᲂрѝ , ꙗ҆́же без̾стра́стїѧ и҆сто́чникъ ро́ждьши мт҃и при́снѡ дв҃о . сла́ва . Чтⷭ҇аѧ и҆ всенепᲂро́чнаѧ , ꙗ҆́же чистᲂтѣ̀ бы́вши прїѧ́телище в̾мѣ́стно , бжⷭ҇твенагѡ вселе́нїѧ , дш҃е́внꙋю ми скве́рнꙋ и҆ нечистᲂтꙋ̀ пᲂтребѝ . и҆ ны́нѣ . Є҆ди́нꙋ пречⷭ҇тꙋю , є҆ди́нꙋ нескве́рнꙋю , мᲂлю́ тѧ ѻ҆трᲂкᲂви́це , сла́дᲂстными ѡ҆скверни́вшасѧ страстьмѝ , и҆ ѡ҆калѧ́вша дш҃ꙋ , твᲂи́ми мл҃твами ѡ҆чи́сти .

пѣ́снь , є҃ . і҆рмо́съ . Бж҃їимъ свѣ́тᲂмъ ти бл҃же , ᲂу҆́тренюющихъ ти дш҃а любо́вїю прᲂсвѣтѝ мᲂлю́сѧ , тѧ̀ вѣ́дѣте сло́во бж҃їе , и҆́стиннаго бг҃а , ѿ́ мрака грѣхо́внагѡ и҆зима́юща . Ѡ҆скверне́нъ по́мыслᲂмъ , и҆ ѡ҆калѧ́нъ мно́гими паде́ньми , мт҃и бж҃їѧ тѧ̀ мᲂлю̀ , є҆ди́на нескве́рнаѧ , ᲂу҆ще́дри и҆ спаси́ мѧ хᲂда́тайствᲂмъ сѝ . Бжⷭ҇твенымъ сїѧ́нїемъ сѝ бл҃га́ѧ , прᲂсвѣтѝ дш҃ꙋ мᲂю̀ ѡ҆мра́чнꙋю сла́дᲂстьми , и҆ къ спасе́нїю стезѝ напра́ви . є҆ди́на сп҃са хрⷭ҇та̀ ро́ждьшаѧ . сла́ва . Грѣхо́вныѧ ми плени́цы расто́ргни , твᲂи́мъ хᲂда́тайствᲂмъ дв҃о , и҆ застꙋпле́нїемъ , и҆ ра́дᲂсти бжⷭ҇твеныѧ тишины̀ и҆спо́лни , дш҃ꙋ мᲂю̀ ѡ҆каѧ́ннꙋю , и҆ тмы̀ и҆зба́ви . и҆ нн҃ѣ . Тѧ̀ є҆ди́нꙋ бжⷭ҇твено прибѣ́жище , ны́нѣ стѧжа́въ бл҃га́ѧ , зᲂвꙋ́ ти , и҆ вѣ́рнѡ припа́даю . ты̀ мнѣ̀ застꙋпле́нїе , и҆ пᲂкро́въ спасе́нїѧ бꙋ́ди влⷣчце ми́рꙋ , и҆ спаси́ мѧ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Пᲂви́ненъ сы́и грѣха́ми , и҆ лю́тѣ ᲂу҆ѧ́звихсѧ ѡ҆каѧ́нныи , к̾ тебѣ̀ бг҃ᲂмт҃и млⷭ҇тивѣй прибѣга́ю мᲂлѧ́сѧ , нападе́нїѧ пᲂтребѝ прегрѣше́нїи мᲂи́хъ . Две́ри бл҃гᲂда́тнаѧ , ѿве́рзшаѧ вѣ́рнымъ две́рь нбⷭ҇нꙋю , пᲂкаѧ́нїѧ две́рь свѣ́тлꙋю ѿве́рзи ми влⷣчце , и҆ вра́тъ сме́ртныхъ свᲂбᲂдѝ . сла́ва . Страстьми́ мѧ преклᲂне́на ѿ сᲂпрᲂти́вныхъ прило́гъ , мт҃и бж҃їѧ ᲂу҆твердѝ , ꙗ҆́кѡ без̾стра́стїѧ ро́ждьши и҆сто́чникъ . к̾ тебѣ́ бо прибѣго́хъ , ѡ҆каѧ́нныѧ ми дш҃и ᲂу҆тѣ́шительница . и҆ нн҃ѣ . При́зри влⷣчце на мѧ̀ смире́ннаго , и҆ ненаде́ждно спаси́ мѧ . ты̀ ᲂу҆́бѡ ᲂу҆пᲂва́нїе и҆ пᲂкро́въ ми , жи́знь и҆ свѣ́тъ срⷣцꙋ мᲂемꙋ̀ бцⷣе є҆сѝ , и҆ ᲂу҆тверже́нїе .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , ѕ҃ . Б=еспᲂмо́щнымъ крѣ́пᲂсть , ты̀ вᲂи́стинꙋ прест҃а́ѧ дв҃о мт҃и . ѿ сю́дꙋ смире́ннїи тᲂбо́ю вᲂзвыша́емсѧ . ѡ҆ тебѣ̀ высᲂтѣ̀ держи́мсѧ . всѣ́мъ ты̀ є҆сѝ пᲂкро́въ , и҆ к̾ бг҃ꙋ хᲂда́таица .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Ѡ҆чище́нїе и҆́мамы тѧ̀ всегда̀ к̾ бг҃ꙋ , пренепᲂро́чнаѧ . тѣ́мже и҆спрᲂсѝ и҆зба́вити всѣ́хъ пречⷭ҇таѧ , и҆́же та́мѡ мꙋче́нїи стра́шныхъ , и҆́же бцⷣꙋ вᲂи́стинꙋ и҆спᲂвѣ́дающихъ тѧ̀ . Лѣ́нᲂстїю мѧ ѡ҆держи́ма , вᲂздви́гни къ дѣ́ланїю пречⷭ҇таѧ , бжⷭ҇твеныхъ дѣѧ́нїи , ᲂу҆крѣплѧ́ющи мѧ на врагѝ прⷭ҇нѡ бᲂрю́щихъ мѧ лю́тѣ , и҆ сᲂпрᲂти́вными пᲂмышле́нїи , прельща́ющихъ мѧ . сла́ва . Не ѡ҆ста́ви менѐ дв҃о пᲂгиба́юща , ни пᲂпꙋстѝ снѣ́дь бы́ти , прⷭ҇нѡ жа́ждꙋщемꙋ мᲂю̀ па́гꙋбꙋ , ѕмі́ю лю́тᲂмꙋ . но пᲂда́ждь ми твᲂю̀ бᲂга́тꙋю ми́лᲂсть . и҆ ны́нѣ . Мᲂлѧ́щи непреста́й , чл҃кᲂлю́бца бг҃а на́шегѡ всенепᲂро́чнаѧ , ꙗ҆́кѡ да прїи́мемъ сᲂверше́нᲂе прᲂще́нїе чⷭ҇таѧ . и҆ ᲂу҆лꙋчи́мъ нбⷭ҇ныхъ ᲂу҆гᲂто́ванныхъ бл҃гъ , и҆ не ѿє́млемꙋ ра́дᲂсть .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Ꙗ҆́кᲂже ржⷭ҇тво́мъ сѝ всечⷭ҇таѧ , бл҃ги́хъ дѣ́лъ пᲂкажѝ плᲂдᲂно́сно непло́днᲂе срⷣце мᲂѐ , бг҃а ᲂу҆мᲂлѧ́ющи . Мᲂльбꙋ̀ дв҃о бг҃ꙋ принесѝ , дш҃а на́ша спасѝ бг҃ᲂбл҃гᲂда́тнаѧ . и҆ страсте́й прїѧ́тъ и҆зба́ви на́съ , и҆ ѿ бѣсо́въ ѕла́гѡ и҆скꙋше́нїѧ . =сла́ва . Къ твᲂемꙋ̀ прибѣга́ю пᲂкро́вꙋ всенепᲂро́чнаѧ , и҆ пред̾ста́тельницꙋ живᲂтꙋ̀ мᲂемꙋ̀ , ны́нѣ пред̾лага́ю , и҆зба́ви мѧ ѻ҆трᲂкᲂви́це сꙋда̀ стра́шнаго , и҆ и҆спыта́нїѧ , и҆ ѻ҆гнѧ̀ вѣ́чнагѡ . и҆ ны́нѣ . Пᲂкᲂлѣба́вшꙋюсѧ ѕло́бᲂю бᲂрца̀ , дш҃ꙋ мᲂю̀ ᲂу҆твердѝ дв҃о чи́стаѧ , и҆ ѻ҆́гненагѡ и҆зми́ мѧ мꙋче́нїѧ , и҆ ко́злищь бᲂлѣ́зненыѧ ча́сти .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Страсте́й вᲂлне́нїе смꙋща́етъ мѧ , и҆ сластьмѝ пᲂгрꙋжа́етъ мѧ дв҃о пренепᲂро́чнаѧ , ꙗ҆́же ко́рмчїю хрⷭ҇та̀ ро́ждьшаѧ , рꙋ́кꙋ ми по́мᲂщи прᲂстрѝ и҆ спаси́ мѧ , є҆ди́на спасе́нїе вѣ́рнѡ блажа́щихъ тѧ . Черто́же и҆ прⷭ҇то́лѣ црⷭ҇твꙋющагѡ , гᲂра̀ бж҃їѧ , и҆ гра́дѣ и҆збра́нныи и҆ раю̀ , сл҃нца ѻ҆́блаче всесвѣ́тлыи , прᲂсвѣтѝ дꙋ́шꙋ мᲂю̀ . ѻ҆́блакъ ѿгᲂнѧ́ющи грѣхѡ́въ мᲂи́хъ мно́гихъ , бг҃ᲂбл҃гᲂда́тнаѧ . сла́ва . Чи́стаѧ дв҃о бг҃ᲂѡ҆бра́дᲂваннаѧ две́ри свѣ́тꙋ , две́ри дш҃и мᲂеѧ̀ ѿве́рзи , грѣха̀ в̾хо́дъ заключа́ющи . да мѧ̀ непрїи́метъ рꙋка̀ льсти́вагѡ ведꙋ́щи лю́тѣ , ко всепа́гꙋбнѣй и҆ стра́шнѣй мꙋ́цѣ . и҆ ны́нѣ . Дш҃е вᲂзни́кни , и҆ пᲂбдѝ въ мᲂли́твахъ , во всебл҃ги́хъ пᲂпече́нїихъ , ᲂу҆ны́нїѧ со́нъ ѿгᲂнѧ́щи . бо́дрꙋю застꙋ́пницꙋ и҆мꙋ́щи всегда̀ , чⷭ҇тꙋю мт҃рь бж҃їю всеще́дрꙋю . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Во вто́рникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , ѕ҃ . Пᲂмышлѧ́ю де́нь стра́шныи , и҆ пла́чꙋсѧ дѣѧ́нїи мᲂи́хъ лꙋка́выхъ , ка́кѡ ѿвѣща́ю без̾сме́ртнᲂмꙋ цр҃ю ; кᲂи́мъ же дерзнᲂве́нїемъ во́зрю на сꙋдїю̀ , блꙋ́дныи а҆́зъ ; бл҃гᲂꙋтро́бныи ѻ҆́ч҃е , сн҃е є҆динᲂро́дныи , и҆ д́ш҃е ст҃ы́и пᲂми́лꙋй мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Во ᲂу҆до́ли плаче́внѣ , на мѣ́стѣ и҆дѣ́же пᲂлᲂжѝ , є҆гда̀ сѧ́деши млⷭ҇тиве сᲂтвᲂри́ти пра́ведныи сꙋ́дъ , не ѡ҆бличѝ мᲂѧ̀ сᲂкрᲂве́ннаѧ , нижѐ пᲂсрамѝ менѐ пред̾ а҆́нг҃лы , но пᲂщади́ мѧ бж҃е , и҆ пᲂми́лꙋй мѧ . сла́ва , и҆ ны́нѣ , боⷢ҇ . Млрⷭ҇дїѧ две́ри ѿве́рзи на́мъ блгⷭ҇ве́наѧ бцⷣе дв҃о . надѣ́ющїисѧ на тѧ̀ да непᲂги́бнемъ , но да и҆зба́вимсѧ тᲂбо́ю ѿ бѣ́дъ . ты́ бо є҆сѝ спасе́нїе ро́дꙋ хрⷭ҇тїа́нскᲂмꙋ .

по в҃ , стихᲂло́гїи , сѣда́льны . гла́съ , ѕ҃ . Дш҃е мᲂѧ̀ в̾скꙋ́ю ᲂу҆ныва́ющи , грѣхꙋ̀ рабо́таеши ; и҆ в̾скꙋ́ю бᲂлѧ́щи , ко врачꙋ̀ неприхо́диши ; вᲂзни́кни про́чее ѿ ѕѡ́лъ ꙗ҆́же сᲂдѣ́ѧла , и҆ вᲂзᲂпі́й ко сп҃сꙋ гл҃ющи , наде́же ненаде́жныхъ , живᲂтѐ ѿча́ѧннымъ сп҃се , вᲂздви́гни и҆ спаси́ мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Мꙋ́дрыхъ дв҃ъ да́рꙋй ми гдⷭ҇и бдѣ́нїе , и҆ дш҃и мᲂеѧ̀ свѣщꙋ̀ прᲂсвѣтѝ , ма́слᲂмъ щедро́тъ твᲂи́хъ , да пѣ́снь а҆́нг҃льскꙋю пᲂю́ ти , а҆ллилꙋ́їѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Страстᲂте́рпческїи по́двигъ претерпѣ́вше ст҃і́и , и҆ по́чести пᲂбѣ́ды ѿ тебѐ прїѧ́ша . ᲂу҆праздни́ша пᲂмышле́нїѧ без̾зако́нныхъ , и҆ вᲂспрїѧ́ша вѣнцы̀ нетлѣ́нныѧ . тѣ́хъ ра́ди бж҃е ᲂу҆мᲂле́нъ бы́въ , да́рꙋй на́мъ ве́лїю млⷭ҇ть . сла́ва , и҆ ны́нѣ , боⷢ҇ . Оу҆пᲂва́нїе ми́рꙋ , бл҃га́ѧ бцⷣе дв҃о , твᲂѐ и҆ є҆ди́нᲂе стра́шнᲂе пред̾ста́тельство пᲂдви́жемъ . ᲂу҆милᲂсе́рдисѧ на́ люди бѣ́днꙋющїѧ , мᲂлѝ млⷭ҇тиваго бг҃а , и҆зба́витисѧ дш҃а́мъ на́шимъ ѿ всѧ́кᲂго преще́нїѧ , є҆ди́на бл҃гᲂслᲂве́наѧ .

по г҃ , стихᲂло́гїи , сѣда́ленъ . гла́съ , ѕ҃ . Страсте́й мѧ бꙋ́ри , и҆ лю́тᲂе тревᲂлне́нїе прегрѣше́нїи , во ѿча́ѧнїе глꙋбины̀ пᲂтᲂпѝ сло́ве . но прᲂстри́ ми держа́внꙋю си десни́цꙋ , и҆ спаси́ мѧ ꙗ҆́кᲂже петра̀ , сщ҃е́нными мл҃твами прⷣтчи твᲂегѡ̀ , и҆зъ глꙋбины̀ ѕлᲂлю́тыхъ без̾зако́нїи мᲂи́хъ . сла́ва , и҆ ны́нѣ , боⷢ҇ . И҆́же пре́жде вѣ́къ и҆з̾ ѻ҆ц҃а , без̾ мт҃ре ро́ждьшагᲂсѧ , сн҃а сло́ва бж҃їѧ , и҆ в̾ пᲂслѣ́днѧѧ лѣ́та рᲂдила̀ є҆сѝ вᲂплᲂще́нна , ѿ чи́стыхъ крᲂве́й твᲂи́хъ бг҃ᲂрᲂди́тельнице , крᲂмѣ̀ мꙋ́жа , є҆го́же мᲂлѝ дарᲂва́ти на́мъ грѣхѡ́въ прᲂще́нїе пре́же кᲂнца̀ .

Кано́нъ , пᲂкаѧ́ненъ къ гдⷭ҇ꙋ на́шемꙋ , і҆с҃ꙋ хрⷭ҇тꙋ̀ . и҆ ст҃ы́мъ мч҃нкѡмъ , твᲂре́нїе , ки́ръ і҆ѡ́сифа . гла́съ , ѕ҃ . пѣ́снь , а҃ . і҆рмо́съ . Пᲂмо́щникъ и҆ пᲂкрᲂви́тель , бы́сть мнѣ̀ во спасе́нїе . се́й ми є҆́сть бг҃ъ , и҆ прᲂсла́влю и҆̀ , бг҃ъ ѻ҆ц҃а мᲂегѡ̀ , и҆ вᲂзнесꙋ̀ и҆̀ , сла́вно бо прᲂсла́висѧ .

запѣ́въ : сла́ва тебѣ̀ бж҃е на́шъ , сла́ва тебѣ̀ . И҆зба́вителю мо́й і҆с҃е , ꙗ҆́кᲂже и҆зба́вилъ є҆сѝ мно́гихъ прегрѣше́нїи , блꙋдни́цꙋ и҆нᲂгда̀ пᲂка́ѧвшꙋсѧ до́брѣ , мᲂлю́сѧ ти , и҆ менѐ и҆зба́ви без̾чи́сленыхъ ѕѡ́лъ , ꙗ҆́кѡ млⷭ҇тивъ . Препла́ваю въ сꙋ́етнѣмъ пᲂмышле́нїи житїѧ̀ і҆с҃е , лю́тꙋю сїю̀ пꙋчи́нꙋ , во и҆стᲂпле́нїѧ мно́гаѧ впадо́хъ , ѿ ни́хже и҆зба́вивъ спаси́ мѧ . запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . До́брыѧ страда́льцы , чꙋжа́гѡ пᲂтреби́тели , терпѣли́внѡ пᲂстрада́вшїѧ , и҆ вѣнцы̀ прїе́мшїѧ ѿ́ бг҃а пᲂбѣ́дныѧ , ра́дᲂстнѡ да пᲂчте́мъ . мⷱ҇ꙋ . Виті́йствꙋюще премꙋ́дрїи , со дерзнᲂве́нїемъ бг҃а сло́ва , виті́ѧ ѕлы́ѧ пᲂбѣди́сте , и҆ всѧ́къ ви́дъ пᲂдъє́мше ра́нъ , вельмѝ прᲂсла́вистесѧ . боⷢ҇ . Ꙗ҆ви́ласѧ є҆сѝ две́рь живᲂтꙋ̀ , сме́рти две́ри затво́рши , ржⷭ҇тво́мъ сѝ чⷭ҇таѧ . ꙗ҆ви́ласѧ є҆сѝ землѧ̀ и҆збра́ннаѧ , є҆ѧ́же ра́ди вᲂзнесе́сѧ ѿ землѝ на нб҃са̀ , чл҃ческᲂе сꙋщество̀ .

и҆́нъ , кано́нъ . ст҃о́мꙋ и҆ вели́кᲂмꙋ , і҆ѡа́ннꙋ прⷣтчи . твᲂре́нїе , і҆ѡ́сифᲂво . гла́съ , ѕ҃ . і҆рмо́съ . Чꙋ́вственныи фараѡ́нъ , пᲂтᲂпле́нъ бы́сть с̾ вѡ́и , і҆зра́иль же прᲂше́дъ пᲂсредѣ̀ мᲂрѧ̀ , вᲂпїѧ́ше гдⷭ҇ви бг҃ꙋ на́шемꙋ пᲂе́мъ , ꙗ҆́кѡ прᲂсла́висѧ . запѣ́въ : ст҃ы́и вели́кїи , і҆ѡа́нне прⷣтче гдⷭ҇нь , мᲂлѝ бг҃а ѡ҆ на́съ . А҆́нг҃лъ бжⷭ҇твеныи , твᲂѐ рᲂжество̀ а҆́нг҃ле бж҃їи пред̾вᲂзвѣстѝ ѻ҆ц҃ꙋ твᲂемꙋ̀ , с̾ ни́мже на́съ пᲂмѧнѝ въ де́нь сꙋ́дныи , ѡ҆брѣстѝ на́мъ ми́лᲂсть ст҃ы́и прⷣтче . Ѿр́асль сы́и кра́снаѧ пꙋсты́нѧ прⷣтче хрⷭ҇то́въ , во мнѣ̀ непреста́ннѡ вᲂзраста́ющꙋю лѣ́нᲂсть , и҆́з̾кᲂрене и҆сто́ргнꙋвъ , пᲂкаѧ́нїе мѧ принᲂси́ти плᲂды̀ сᲂтвᲂрѝ . Оу҆тро́ба без̾ча́днаѧ тѧ̀ , пло́дъ ражда́етъ всесла́вно , бл҃гᲂплᲂди́тельна срⷣца̀ , ꙗ҆́же пре́же непло́днаѧ пᲂказа́вша . но вѣ́рᲂю вᲂпїю́ ти крⷭ҇тлю , непло́днаѧ ми пᲂмышле́нїѧ и҆сто́ргни . боⷢ҇ . Ле́стїю непреста́ннѡ , вра́гъ лᲂви́тъ мѧ лꙋка́выи , тᲂгѡ̀ мѧ̀ лᲂвле́нїѧ всенепᲂро́чнаѧ и҆схи́ти , и҆ твᲂри́ти бцⷣе наста́ви влⷣчнюю бжⷭ҇твенꙋю во́лю .

пѣ́снь , г҃ . і҆рмо́съ . Оу҆твердѝ гдⷭ҇и на ка́мени за́пᲂвѣдей ти , пᲂдви́гшеесѧ срⷣце мᲂѐ , ꙗ҆́кѡ є҆ди́нъ ст҃ъ є҆сѝ и҆ пра́веденъ . Млⷭ҇тивнымъ си ѻ҆́кᲂмъ при́зри на мѧ̀ , є҆гда̀ хᲂщꙋ̀ пред̾ тᲂбо́ю пред̾ста́ти и҆ сꙋди́тисѧ , є҆ди́не бл҃гᲂпремѣни́телю гдⷭ҇и . Вᲂздыха́юща мѧ прїимѝ , ꙗ҆́кᲂже мытарѧ̀ и҆з̾ глꙋбины̀ дш҃е́вныѧ , и҆ пᲂкаѧ́нїе ми да́рꙋй сп҃се , грѣха̀ всѧ́кᲂгѡ мѧ̀ и҆збавлѧ́ѧ . мⷱ҇ꙋ . Тече́нїемъ ст҃і́и прест҃ы́хъ ва́шихъ крᲂве́й , скве́рнаѧ кро́вь , принᲂси́маѧ бѣсѡ́мъ и҆нᲂгда̀ в̾ тре́бищехъ преста̀ . мⷱ҇ꙋ . Дх҃ᲂмъ прест҃ы́мъ ᲂу҆крѣплѧ́еми ст҃і́и , разᲂри́сте ка́пища пᲂги́бельнаѧ , всѣ́хъ к̾ вѣ́рѣ ᲂу҆твержа́юще . боⷢ҇ . Зачала̀ є҆сѝ прест҃а́ѧ сᲂдержа́щаго ве́сь ми́ръ , сегѡ̀ ра́ди мᲂлю́тисѧ , и҆зба́ви мѧ всѧ́кᲂгѡ ѡ҆бдержа́нїѧ ѕло́бы .

и҆́нъ , і҆рмо́съ . На тве́рдѣмъ вѣ́ры твᲂеѧ̀ ка́мени , пᲂмышле́нїе ᲂу҆твердѝ дꙋшѝ мᲂеѧ̀ , ᲂу҆тверди́ мѧ гдⷭ҇и , тѧ́ бо и҆́мамъ бл҃же , прибѣ́жище и҆ ᲂу҆тверже́нїе . Вᲂз̾враще́нїе ѿ пꙋтѝ заблꙋ́ждьшемꙋ да́ждь ми ны́нѣ , и҆ прᲂстри́ ми рꙋ́кꙋ бл҃же́нне прⷣтче , въ пꙋчи́нѣ лю́тыхъ всегда̀ ѡ҆бꙋрева́емꙋ . Живꙋ̀ въ небреже́нїи , и҆ пᲂсѣче́нїе приближа́етсѧ , твᲂи́ми мл҃твами вᲂзникнᲂве́нїе ми да́ждь , прⷭ҇нᲂсла́вныи прⷣтче . да не ꙗ҆́кѡ беспло́денъ ѡ҆то́сланъ бꙋ́дꙋ во ѻ҆́гнь неᲂу҆гаси́мыи . Стра́шныи де́нь при две́рехъ , и҆ лю́тыми ѡ҆блᲂже́нъ є҆́смь бременьмѝ , ѿ ни́хже мѧ ѡ҆блегчѝ гдⷭ҇нь крⷭ҇тлю , чи́стыми твᲂи́ми мᲂльба́ми . боⷢ҇ . Прⷭ҇то́лъ бж҃їи ꙗ҆ви́ласѧ є҆сѝ бцⷣе , на не́мже пло́тїю сѣ́де хрⷭ҇то́съ , ѿ пе́рвагѡ паде́нїѧ чл҃ки вᲂз̾дви́же , во́ гласѣхъ ра́дᲂстныхъ пᲂю́щїѧ тѧ̀ .

пѣ́снь , д҃ . і҆рмо́съ . Оу҆слы́шавъ же прᲂро́къ прихо́дъ тво́й гдⷭ҇и , и҆ ᲂу҆бᲂѧ́хсѧ , ꙗ҆́кѡ хо́щеши ѿ дв҃ы рᲂди́тисѧ , и҆ чл҃кѡмъ ꙗ҆ви́тисѧ , и҆ гл҃аше , ᲂу҆слы́шахъ слꙋ́хъ тво́й и҆ ᲂу҆бᲂѧ́хсѧ , сла́ва си́лѣ твᲂе́й . Ка́пли сле́зъ да́ждь ми , ще́дре мнᲂгᲂмлⷭ҇тиве , и҆з̾сꙋша́ющїѧ страсте́й мᲂи́хъ и҆сто́чники , и҆ грѣха̀ всѧ́кᲂгѡ скве́рнꙋ ѿмыва́юща , и҆ ᲂу҆гаша́юща ѻ҆гнѧ̀ гее́нскагѡ вѣ́чнꙋющїи пла́мень негаси́мыи . Непреста́ѧ чешꙋ̀ стрꙋ́пы дш҃и мᲂеѧ̀ сластᲂлю́бїемъ , и҆ пребыва́ѧ не и҆сцѣ́ленъ , в̾ чꙋ́вство са́мъ прїитѝ нехᲂщꙋ̀ . что̀ бꙋ́дꙋ , и҆ что̀ сᲂтвᲂрю̀ ; хрⷭ҇тѐ ще́дрыи , ᲂу҆ще́дри и҆ спаси́ мѧ . мⷱ҇ꙋ . Во́дъ пᲂги́бельныхъ , и҆ бꙋ́ри ѕло́бныѧ , мч҃нцы прⷭ҇нᲂсла́внїи вѣ́рᲂю преплы́вше , ѡ҆кᲂрмле́нїемъ бжⷭ҇твенымъ , в̾ без̾бѣ́днᲂе и҆ небꙋ́рнᲂе , црⷭ҇твїѧ нбⷭ҇нагѡ приста́нище дᲂи҆до́сте . мⷱ҇ꙋ . Свѣти́льницы бл҃гᲂче́стїѧ , прᲂсвѣ́щницы и҆́стинѣ бы́вше , свѣ́тлыми по́двиги , пᲂтреби́сте тмꙋ̀ без̾бо́жїѧ мнᲂгᲂбᲂлѣ́зненꙋю . чꙋде́съ же лꙋча́ми ст҃і́и , страсте́й мглꙋ̀ прᲂгᲂнѧ́ете . боⷢ҇ . Седьмᲂсвѣ́тлыи тѧ̀ свѣ́щникъ , ѻ҆́гнь бг҃ᲂразꙋ́мїѧ нᲂсѧ́щь ѻ҆трᲂкᲂви́це , прᲂро́къ дре́вле пред̾ви́дѣ , свѣтѧ́щь , сꙋ́щимъ во тмѣ̀ невѣ́дѣнїѧ бѣ́дствꙋющимъ , тѣ́мже вᲂпїю́ ти всенепᲂро́чнаѧ , прᲂсвѣти́ мѧ мᲂлю́сѧ .

и҆́нъ , і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ , и҆ диви́хсѧ гдⷭ҇и . И҆сцѣлѝ прⷣтче , ᲂу҆ѧ́звенᲂе на пꙋте́хъ разбо́йническихъ срⷣце мᲂѐ мᲂлю́тисѧ , дѣ́йственымъ бы́лїемъ бжⷭ҇твеныхъ ти мл҃твъ . Низ̾лᲂжѝ прⷣтче , и҆́же є҆щѐ живꙋ́щїи в̾ дш҃и мᲂе́й грѣ́хъ , и҆ вᲂзникнᲂве́нїе ми ны́нѣ да́ждь , къ сла́стемъ пᲂпᲂлза́ющемꙋсѧ . Приста́нище на́мъ ꙗ҆ви́сѧ вᲂлнꙋ́ющимсѧ въ пꙋчи́нѣ , жите́йскїѧ бꙋ́ри прелага́ющи всѣ́хъ , в̾ тишинꙋ̀ пребᲂга́те . боⷢ҇ . Не ѡ҆сꙋдѝ менѐ гдⷭ҇и по дѣ́лᲂмъ мᲂи́мъ , но млⷭ҇тивъ ми ꙗ҆ви́сѧ всеще́дрыи , мо́литъ со крⷭ҇тлемъ ро́ждьшаѧ тѧ̀ .

пѣ́снь , є҃ . і҆рмо́съ . и҆з̾ =нᲂщѝ ᲂу҆́треннююща чл҃кᲂлю́бче прᲂсвѣтѝ мᲂлю́сѧ , и҆ наста́ви мѧ на пᲂвелѣ́нїѧ твᲂѧ̀ , и҆ наꙋчи́ мѧ сп҃се , твᲂри́ти во́лю твᲂю̀ . Сѐ и҆́же тала́нтъ тво́й скры́выи хрⷭ҇тѐ , лѣни́выи ра́бъ тво́й дѣ́лы , а҆́зъ є҆́смь , и҆ ᲂу҆пражнѧ́юсѧ лꙋка́выми страстьмѝ , тѣ́мже да мѧ̀ во ѻ҆́гнь не по́слеши . Тво́й сн҃ъ бы́въ бл҃гᲂда́тїю бл҃гᲂꙋтро́бне гдⷭ҇и , пᲂрабо́тихсѧ врагꙋ̀ , и҆ ѿ тебѐ ᲂу҆да́лихсѧ жи́въ блꙋ́днѡ . тѣ́мже ѡ҆брати́въ мѧ спасѝ . =мⷱ҇ꙋ . Мч҃нцы ста́ша пред̾ сꙋди́щемъ , брᲂнѧ̀ вѣ́ры нᲂсѧ́ще , тѣ́мже стрѣла́ми пре́лести , ᲂу҆ѧзви́ти лю́тыи ѿстꙋ́пникъ тѣ́хъ не вᲂзмо́же . мⷱ҇ꙋ . Оу҆мерщвѧ́еми тѣлесы̀ мч҃нцы , всѧ́ка ᲂу҆мертви́ша кᲂва́рства вра́жїѧ , и҆ к̾ живᲂтꙋ̀ нестарѣ́ющемꙋсѧ преи҆до́ша в̾ ра́дᲂсти , вѣнцы̀ прїе́мше пᲂбѣ́ды . боⷢ҇ . Две́ри непрᲂхᲂди́маѧ , ѿве́рзи ми две́ри мᲂлю́сѧ пᲂкаѧ́нїѧ и҆́стиннагѡ , и҆ ѿ вра́тъ а҆́дᲂвыхъ и҆схи́ти мѧ чи́стаѧ , ꙗ҆́же всѣ́мъ наста́внице .

и҆́нъ , і҆рмо́съ . Къ тебѣ̀ ᲂу҆́треннюю , милᲂсе́рдїѧ ра́ди самᲂгѡ̀ па́дшагѡ , прело́жшасѧ непрело́жнѡ , и҆ до́ страсти без̾стра́стїемъ прекло́ньшасѧ сло́ве бж҃їи ми́ръ пᲂда́ждь ми чл҃кᲂлю́бче . Цр҃квь бы́въ бл҃же́нне трⷪ҇цѣ , и҆ въ цр҃кви твᲂе́й ст҃ѣ́й се́й , со́браннїи , въ вѣ́рѣ те́плѣ мо́лимсѧ ти прⷣтче , и҆зба́ви на́съ ѿ напа́стей и҆ скᲂрбе́й , всехва́льне . Оу҆страни́выисѧ всѧ́кїѧ дᲂбрᲂдѣ́тели ᲂу҆́мъ мо́й , тебѐ и҆́же стра́ннымъ хᲂди́вша пꙋте́мъ въ житїѝ бл҃же́нне , ны́нѣ мᲂлю̀ , всѧ́ческихъ бг҃ꙋ прибли́жи мѧ , ᲂу҆твержа́ѧ мѧ ᲂу҆го́дными даѧ́ньми . Пᲂгрꙋже́и і҆ѡрда́нскими вᲂда́ми , млⷭ҇ти бе́зднꙋ прⷪ҇рче , тече́нїѧ страсте́й мᲂи́хъ мл҃твами сѝ и҆з̾сꙋшѝ ны́нѣ , и҆сто́чникъ ми слеза́мъ пᲂдава́ѧ . боⷢ҇ . Преꙋкра́шена бжⷭ҇твеными свѣтлᲂстьмѝ , кра́снагѡ въ дᲂбро́тахъ пᲂрᲂдила̀ є҆сѝ дв҃о . тᲂгѡ̀ ᲂу҆́бѡ при́снѡ мᲂлѝ , спасти́сѧ на́мъ ѿ тлѝ , и҆́же вѣ́рᲂю и҆ любо́вїю тѧ̀ сла́вѧщимъ .

пѣ́снь , ѕ҃ . і҆рмо́съ . Вᲂзᲂпи́хъ всѣ́мъ срⷣцемъ мᲂи́мъ , к̾ ще́дрᲂмꙋ бг҃ꙋ , и҆ ᲂу҆слы́ша мѧ ѿ а҆́да преи҆спо́днѧгѡ , и҆ вᲂзведѐ ѿ тлѝ живо́тъ мо́й . Не ꙗ҆вѝ менѐ бѣсо́мъ ѻ҆бра́дᲂванїе в̾ де́нь стра́шныи хрⷭ҇тѐ і҆с҃е , да не ᲂу҆слы́шꙋ тᲂгда̀ гла́са ѿсыла́юща , во ѻ҆́гнь гее́нскїи . Пᲂгрꙋзи́ мѧ во глꙋбинѣ̀ прегрѣше́нїи , и҆́же пра́ведныхъ вра́гъ , и҆ к̾ щедро́тъ твᲂи́хъ притека́ю пꙋчи́нѣ , і҆с҃е к̾ приста́нищꙋ живᲂта̀ и҆спра́ви мѧ . мⷱ҇ꙋ . Бᲂлѣ́зней мно́гихъ ра́лᲂмъ , ѡ҆бнᲂви́сте , дш҃е́внꙋю браздꙋ̀ премꙋ́дрїи , бжⷭ҇твенымъ сѣ́менемъ вѣ́ры , мнᲂгᲂпло́дныи мꙋче́нїѧ кла́съ , ꙗ҆́вѣ плᲂдᲂнᲂси́сте . мⷱ҇ꙋ . Ꙗ҆́звами ᲂу҆ѧзви́сте ᲂу҆ѧзви́вшаго ва́съ , бл҃гᲂче́стїи ѻ҆рꙋ́жницы , тѣ́мже преста́вльшесѧ к̾ живᲂтꙋ̀ , стра́сти нн҃ѣ чл҃кѡмъ и҆сцѣлѧ́ете . боⷢ҇ . Хра́мъ бж҃їи ꙗ҆ви́ласѧ є҆сѝ всенепᲂро́чнаѧ бцⷣе , во́ньже всели́сѧ па́че ᲂу҆ма̀ , и҆́же чл҃ческᲂе сꙋщество̀ ѡ҆бᲂжѝ , и҆ сᲂтвᲂри́лъ є҆́сть вѣ́рныхъ хра́мы себѣ̀ .

и҆́нъ , і҆рмо́съ . Бе́здна пᲂслѣ́днѧѧ грѣхо́въ ѡ҆бы́де мѧ , и҆҆ вᲂлне́нїѧ ᲂу҆́же нетерпѧ̀ , ꙗ҆́кѡ і҆ѡ́на ко влⷣцѣ вᲂпїю́ ти , и҆з̾ тли́ мѧ вᲂзведѝ . Цвѣ́тъ прᲂро́че ѿ ко́рене непло́дна прᲂзѧ́блъ є҆сѝ , и҆ срⷣца̀ непло́днаѧ всѣ́хъ , бг҃ᲂразꙋ́мїемъ плᲂди́тельна въ хвалꙋ̀ гдⷭ҇ню ꙗ҆ви́лъ є҆сѝ . Сᲂкрꙋшѝ в̾ско́рѣ лꙋка́ваго по́днᲂги на́ша , и҆ и҆спра́ви на́ша стᲂпы̀ мы́сленыѧ , на пꙋ́ть ми́ра , прⷣтче хᲂда́тайствᲂмъ ти . Ѡ҆градѝ прⷪ҇рче пра́вдᲂю ста́до свᲂѐ , и҆збавлѧ́ѧ на́съ всѧ́кᲂго навѣ́та бѣсо́вскаго , и҆ вѣ́чнаго мꙋче́нїѧ . боⷢ҇ . Пѣ́снь ти дв҃о бл҃гᲂдаре́нїѧ прино́симъ , тебѐ ра́ди чⷭ҇таѧ спа́сшїисѧ ѿ пе́рвыѧ клѧ́твы , всѧ́ко бл҃гᲂслᲂве́нїе плᲂди́мъ .

пѣ́снь , з҃ . і҆рмо́съ . Сᲂгрѣши́хᲂмъ и҆ без̾зако́ннᲂвахᲂмъ , и҆ не ѡ҆правди́хᲂмсѧ пред̾ тᲂбо́ю , ни сᲂблюдо́хᲂмъ ни сᲂтвᲂри́хᲂмъ , ꙗ҆́кᲂже запᲂвѣ́да на́мъ , но непреда́ждь на́съ до кᲂнца̀ , ѻ҆те́ческїи бж҃е . Призира́ю в̾ млⷭ҇ть твᲂю̀ без̾чи́сленꙋю , без̾мѣ́рно сᲂгрѣши́выи , вѣ́мъ твᲂю̀ млⷭ҇ть , вѣ́мъ и҆ дᲂлгᲂтерпѣ́нїе и҆ неѕло́бїе , пᲂкаѧ́нїѧ ми да́рꙋй плᲂды̀ , ще́дрыи хрⷭ҇тѐ и҆ спаси́ мѧ . И҆сцѣлѝ ще́дре срⷣца мᲂегѡ̀ не и҆сцѣ́льныѧ стра́сти , да́ждь ѿсѣче́нїе дᲂлго́въ мᲂи́хъ , тѧ́жкᲂе бре́мѧ ѡ҆блегчѝ , да во ᲂу҆миле́нїи тѧ сла́влю , и҆́же ѻ҆ц҃ъ на́шихъ бг҃а . мⷱ҇ꙋ . Вѧ́жеми , и҆ с̾сѣца́еми , и҆ снѣда́еми ѻ҆гне́мъ веще́ственымъ , льво́мъ и҆з̾дава́еми на снѣ́дь , и҆ прᲂтѧза́еми на кᲂлесѣ́хъ , не ѿверго́шасѧ тебѐ жива́гѡ бг҃а на́шегѡ , бжⷭ҇твенїи и҆ сщ҃е́ннїи страда́льцы . мⷱ҇ꙋ . Раздѣлѧ́еми ѿ тѣле́съ , но нераздѣ́льни ѿ бг҃а ꙗ҆ви́стесѧ мч҃нцы , ра́ди сᲂє҆дине́нїѧ бжⷭ҇твенагѡ , сᲂє҆дини́вшаго себѐ нетлѣ́нно ва́мъ , є҆го́же прⷭ҇нѡ мᲂли́те , и҆зба́вити на́съ всѧ́кїѧ нꙋ́жды стра́шныѧ . боⷢ҇ . Прᲂрасти́ла є҆сѝ без̾ сѣ́мене влⷣчце , є҆го́же рᲂдѝ ѻ҆ц҃ъ нетлѣ́нно , пребы́вши дв҃ᲂю по ржⷭ҇твѣ̀ , ꙗ҆́кᲂже и҆ пре́жде ржⷭ҇тва̀ , тѣ́мже ᲂу҆бл҃жа́ема є҆сѝ , и҆ прᲂславлѧ́ема непреста́нно , ꙗ҆́кѡ мт҃и бж҃їѧ сꙋ́щи .

и҆́нъ , і҆рмо́съ . Ѻ҆́трᲂцы в̾ вавило́нѣ , пе́щи пла́менны не ᲂу҆бᲂѧ́шасѧ . но пᲂсредѝ ѻ҆гнѧ̀ в̾ве́ржени , прᲂхлажда́еми взыва́хꙋ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Гла́съ сло́ва сы́и , нн҃ѣ гла́сы на́ша прїимѝ крⷭ҇тлю , и҆ ѿ страсте́й и҆ бѣ́дъ , и҆ мно́гихъ напа́стей , и҆ вѣ́чнагѡ мꙋче́нїѧ , и҆зба́ви лю́ди свᲂѧ̀ . Рꙋко́ю пᲂказꙋ́еши прᲂро́че а҆́гньца бж҃їѧ , ми́рꙋ взе́млющагѡ грѣхѝ . є҆го́же при́снѡ мᲂлѝ , ѿѧ́ти мᲂѧ̀ прегрѣше́нїѧ лю́таѧ и҆ лѣ́ты ᲂу҆держа́ннаѧ , и҆ живᲂтꙋ̀ спᲂдо́бити мѧ . Дш҃е мᲂѧ̀ пᲂтщи́сѧ , пᲂмраче́нїе ѡ҆ста́вльши без̾слᲂве́сныхъ страсте́й и҆ вᲂзᲂпі́й ᲂу҆ще́дри мѧ і҆с҃е , мᲂльба́ми крⷭ҇тлѧ . и҆ и҆зба́ви мѧ тимѣ́нїѧ ѕо́лъ мᲂи́хъ . боⷢ҇ . Є҆мꙋ́же пред̾стᲂѧ́тъ съ тре́петᲂмъ нбⷭ҇нїи чи́ни , тᲂгѡ̀ рᲂдила̀ є҆сѝ чⷭ҇таѧ , сᲂвᲂкꙋ́пльшагᲂсѧ чл҃кѡмъ бл҃гᲂстїю . є҆го́же мᲂлѝ , ᲂу҆ще́дрити рабы̀ твᲂѧ̀ .

пѣ́снь , и҃ . і҆рмо́съ . Є҆го́же во́и нбⷭ҇нїи сла́вѧтъ , и҆ трепе́щꙋтъ херꙋви́ми и҆ серафи́ми , всѧ́кѡ дыха́нїе и҆ тва́рь , по́йте бл҃гᲂслᲂви́те , и҆ превᲂзнᲂси́те є҆гѡ̀ во́ вѣки . Взира́ю на вели́кꙋю млⷭ҇ть щедро́тъ твᲂи́хъ сп҃се , ꙗ҆́кᲂже дв҃дъ , сᲂгрѣши́въ па́че ѻ҆́нᲂго , и҆ зᲂвꙋ̀ со ѻ҆́нѣмъ . є҆ди́не ми́лᲂстиве пᲂми́лꙋй мѧ в̾ско́рѣ . Кᲂне́цъ бл҃гъ бы́ти ми мᲂлю́сѧ , и҆ пᲂлᲂжи́тиже никᲂгда̀ кᲂне́цъ лꙋка́выхъ дѣѧ́нїи , не ᲂу҆се́рдствꙋю , пᲂмраче́нїемъ ѡ҆жестᲂче́нно и҆мѣ́ѧ мᲂѐ срⷣце . ᲂу҆ще́дри мѧ бж҃їи сло́ве . мⷱ҇ꙋ . Ꙗ҆́кѡ и҆з̾бра́ннаѧ и҆ непᲂро́чнаѧ закла́нїѧ , пᲂже́ршемꙋсѧ на́съ ра́ди , є҆динᲂро́днᲂмꙋ сло́вꙋ , во́лею принесо́стесѧ страстᲂте́рпцы , же́ртвы всѧ̀ ᲂу҆праздни́вше бѣсо́вскїѧ . мⷱ҇ꙋ . Жи́лъ ѿрѣ́занїѧ , зꙋбѡ́въ и҆скᲂрене́нїѧ , ѿѧ́тїе же рꙋ́къ , и҆ раздрᲂбле́нїе ᲂу҆дѡ́въ . и҆ всѧ́кѡ и҆́но тᲂмле́нїе , претерпѣ́сте до́блественѣ мч҃нцы , пᲂю́ще хрⷭ҇та̀ є҆ди́нᲂгѡ стрⷭ҇тᲂпᲂло́жника . боⷢ҇ . Но́ва на́мъ млⷣнца пᲂрᲂдила̀ є҆сѝ , ве́тхагѡ де́ньми , но на землѝ стезѝ пᲂказꙋ́юща , и҆ ѡ҆бетша́вшее є҆стество̀ ѡ҆б̾нᲂвлѧ́юща , без̾невѣ́стнаѧ бл҃гᲂслᲂве́наѧ .

и҆́нъ , і҆рмо́съ . По зако́нѣ ѻ҆́ч҃и преблаже́ннїи в̾ вавилѡ́нѣ ю҆́нїи , бѣдꙋ̀ прїе́млюще царю́ющагѡ небрего́ша , пᲂвелѣ́нїѧ безꙋ́мнагѡ и҆ сᲂвᲂкꙋпле́ннїи , в̾ не́мже не и҆звари́шасѧ ѻ҆гнѝ , держа́щемꙋ дᲂсто́йно вᲂз̾сыла́хꙋ пѣ́снь , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . на́ =слᲂво креща́емо , ви́дѣвъ дх҃ъ ст҃ы́и низ̾хᲂдѧ́щь , в̾ видѣ́нїи гᲂлꙋби́нѣ , и҆ гла́съ ѻ҆ч҃ь ᲂу҆слы́шати спᲂдо́билсѧ є҆сѝ бл҃же́нне , се́й є҆́сть сн҃ъ мо́й сᲂпресто́льныи . є҆го́же пᲂе́тъ всѧ̀ тва́рь гдⷭ҇а во́ вѣки . Ѻ҆гне́мъ прᲂро́че твᲂи́хъ мл҃твъ , хврастны́ѧ стра́сти мы́сли мᲂеѧ̀ пᲂпалѝ , и҆ ᲂу҆гаше́ныи срⷣца мᲂегѡ̀ свѣ́щникъ вᲂж̾зѝ па́ки , ꙗ҆́кѡ да и҆з̾ дале́че разꙋмѣ́въ , вᲂспᲂю̀ сᲂзда́вшагѡ , свѣ́тъ пᲂвелѣ́нїи , гдⷭ҇а вᲂспѣва́йте дѣ́ла , и҆ превᲂз̾нᲂси́те є҆гѡ̀ во́ вѣки . Сᲂкры́выи ра́бъ тала́нтъ , є҆го́же въ дѣ́ланїе ѿ тебѐ прїѧ́хъ , а҆́зъ є҆́смь страстны́и , и҆ что̀ сᲂтвᲂрю̀ є҆гда̀ на сꙋ́дъ прїи́деши , кᲂго́ждо дѣ́ло и҆зыска́ѧ ; но пᲂщади́ мѧ влⷣко , мᲂльба́ми прⷣтчи твᲂегѡ̀ , и҆ не во ѻ҆́гнь мѧ̀ пᲂслѝ пᲂю́ща , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . =боⷢ҇ . Сᲂблюдѝ мᲂю̀ мы́сль во смире́нїи ѻ҆трᲂкᲂви́це бг҃ᲂра́дᲂваннаѧ , ꙗ҆́же ржⷭ҇тво́мъ свᲂи́мъ сᲂкрꙋши́вши вᲂзнᲂше́нїѧ бѣсо́вскаѧ . и҆ вᲂздви́гни мѧ ѿ́ гнᲂѧ страсте́й , и҆ а҆́лчꙋща насытѝ блгⷣти твᲂеѧ̀ пᲂю́ща , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки .

та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Без̾сѣ́менно зача́тїе , и҆ ржⷭ҇тво̀ несказа́нно , и҆ мт҃ре без̾мꙋ́жныѧ без̾ тлѝ прижи́тїе . бж҃їе бо ржⷭ҇тво̀ ѡ҆бнᲂвлѧ́етъ є҆стество̀ . тѣ́мже тѧ̀ всѝ ро́ди бг҃ᲂневѣ́стнꙋю мт҃рь правᲂсла́вно велича́емъ . І҆с҃е чл҃кᲂлю́бче , ты̀ є҆ди́нъ не́мᲂщь на́шꙋ с̾вѣ́си . в̾ сїю́ бо ѻ҆блече́сѧ милᲂсе́рдїѧ ра́ди , хᲂтѧ̀ сїю̀ ѡ҆чи́стити . тѣ́мже скве́рны лꙋка́выѧ , и҆ гнᲂе́нїѧ страсте́й мᲂи́хъ ѡ҆чи́сти , и҆ спаси́ мѧ . Ꙗ҆́кѡ блꙋдни́ца сле́зы принᲂшꙋ́ ти чл҃кᲂлю́бче , ꙗ҆́кѡ мыта́рь вᲂздыха́ѧ зᲂвꙋ́ ти ѡ҆чи́сти . ꙗ҆́кᲂже ханане́ѧ вᲂпїю̀ , пᲂми́лꙋй мѧ . ꙗ҆́кᲂже петра̀ пᲂка́ѧвшасѧ , прᲂще́нїю спᲂдо́би , и҆ спаси́ мѧ . мⷱ҇ꙋ . Пло́тїю спле́тшесѧ , беспло́тнᲂмꙋ мирᲂде́ржцꙋ , по́двиги страда́нїи тᲂгѡ̀ низ̾лᲂжи́сте , и҆ пᲂбѣ́ды вѣнцы̀ прїѧ́сте дᲂсто́йнѡ . тѣ́мже мᲂли́те прилѣ́жнѡ ѡ҆ всѣ́хъ , и҆́же вѣ́рᲂю вᲂспѣва́ющихъ ва́съ ст҃і́и . мⷱ҇ꙋ . Ѡ҆ст҃и́лъ є҆сѝ гдⷭ҇и зе́млю , ст҃ы́ми крᲂвьмѝ ст҃ы́хъ твᲂи́хъ , и҆ тѣ́хъ прест҃ы́ѧ дꙋ́хи , дꙋхᲂвѡ́мъ си́лъ ст҃ы́хъ сᲂвᲂкꙋпи́лъ є҆сѝ . всѣ́хъ же си́ми ѡ҆сщ҃а́еши , и҆́же вѣ́рᲂю и҆́стиннᲂю тебѐ ѡ҆сщ҃а́ющихъ . боⷢ҇ . Гла́съ ти прино́симъ а҆рха́нг҃лѡвъ пречⷭ҇таѧ , ра́дꙋисѧ дв҃о . ра́дꙋисѧ в̾мѣсти́вшаѧ бг҃а невмѣсти́маго . ра́дꙋисѧ клѧ́твѣ разрꙋше́нїе , и҆ блгⷭ҇ве́нїѧ в̾вᲂже́нїе . ра́дꙋисѧ є҆ди́на раю̀ две́ри ѿве́рзшаѧ .

и҆́нъ , і҆рмо́съ . Стра́нствїѧ влады́чнѧ , и҆ без̾сме́ртнѣй трапе́зѣ , на го́рнѣмъ мѣ́стѣ , высо́кими ᲂу҆мы̀ вѣ́рнїи прїиди́те вᲂспрїи́мемъ вᲂз̾ше́дша сло́ва , ѿ́ слᲂва наꙋ́чшесѧ , є҆го́же велича́емъ . И҆сцѣлѝ мо́й ᲂу҆́мъ лю́тѣ ᲂу҆ѧ́звенагѡ , и҆ ᲂу҆тᲂлѝ ѕлѣ̀ смꙋща́ющꙋю мѧ̀ бꙋ́рю сластᲂлю́бїемъ житїѧ̀ , и҆ пᲂкажи́ ми пᲂкаѧ́нїѧ пꙋтѝ пра́выѧ , гдⷭ҇нь прⷣтче . Ꙗ҆ви́лсѧ є҆сѝ пᲂсредѣ̀ стᲂѧ̀ , ве́тхаго же и҆ но́ваго прⷪ҇рче , ѻ҆́вᲂмꙋ ᲂу҆́бѡ преста́ти твᲂрѧ̀ , ѻ҆́вагᲂже свѣ́тъ пᲂказꙋ́ѧ . в̾не́мже хᲂди́ти наста́ви на́съ , въ ра́зꙋмѣ бжⷭ҇твенѣмъ , ꙗ҆́кѡ да тмы̀ и҆зба́вимсѧ вѣ́чнꙋющїѧ . Сᲂвᲂкꙋпи́лсѧ є҆сѝ с̾ во́инствы нбⷭ҇ными бг҃ᲂмꙋ́дре с̾ ни́ми же хрⷭ҇та̀ мᲂлѝ , спасти́сѧ на́мъ сꙋ́щимъ на землѝ чтꙋ́щимъ тѧ̀ , в̾ честнѣ́мъ твᲂе́мъ се́мъ хра́мѣ крⷭ҇тлю і҆ѡа́нне гдⷭ҇нь прⷣтче . Де́нь и҆спо́лнь гнѣ́ва , дн҃ь тмы̀ є҆́сть , и҆́же дѣ́ла и҆мꙋ́щимъ тмы̀ , сꙋ́дъ стра́шныи . крⷭ҇тлю хрⷭ҇то́въ и҆ прⷣтче , мл҃твами сѝ тᲂгда̀ и҆зба́ви ѡ҆сꙋжде́нїѧ всѣ́хъ , тебѐ чтꙋ́щихъ . боⷢ҇ . Ꙗ҆ви́ласѧ є҆сѝ херꙋви́мъ ст҃ѣ́йши дв҃о , ꙗ҆́кѡ бг҃а ро́ждьши прест҃а́го . всѣ́хъ на́съ ѡ҆ст҃ѝ , и҆́же во́ гласѣхъ ст҃ы́хъ вѣ́рᲂю , в̾ нᲂщѝ и҆ во́дни тебѐ ѡ҆сщ҃а́ющихъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , ѕ҃ . На́га мѧ ѡ҆брѣ́те ѿ дᲂбрᲂдѣ́телей вра́гъ , стрѣло́ю грѣхо́внᲂю ᲂу҆ѧзви́въ . но ты̀ бж҃е ꙗ҆́кѡ вра́чь дш҃а́мъ же и҆ тѣ́лᲂмъ , ꙗ҆́звы дш҃и мᲂеѧ̀ и҆сцѣлѝ , и҆ пᲂми́лꙋй мѧ .

сти́хъ : и҆спо́лнихᲂмсѧ за ᲂу҆́тра . Срⷣца мᲂегѡ̀ стрꙋ́пы ѿ мно́гихъ грѣ́хъ прᲂзѧ́бшїѧ ми и҆сцѣлѝ сп҃се , ꙗ҆́кѡ дш҃а́мъ и҆ тѣ́лᲂмъ вра́чь , и҆ пᲂдаѧ̀ прᲂсѧ́щимъ прегрѣше́нїемъ прᲂще́нїе . при́снѡ да́рꙋй ми сле́зы пᲂкаѧ́нїѧ , даѧ́ ми разрѣше́нїе дᲂлгѡ́въ гдⷭ҇и , и҆ пᲂми́лꙋй мѧ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Гдⷭ҇и , а҆́ще небы́хᲂмъ ст҃ы́ѧ твᲂѧ̀ и҆мѣ́ли мᲂли́твеники , и҆ бл҃гᲂсты́ню твᲂю̀ ми́лꙋющꙋю на́съ , ка́кѡ смѣ́ли бы́хᲂмъ сп҃се пѣ́ти тѧ̀ , є҆го́же славᲂсло́вѧтъ непреста́ннѡ а҆́нг҃ли . срⷣцевѣ́дче пᲂщадѝ дш҃а на́ша . сла́ва , и҆ ны́нѣ , боⷢ҇ . Вели́кимъ дарѡ́мъ спᲂдо́биласѧ є҆сѝ , є҆ди́на пречⷭ҇таѧ дв҃о мт҃и бж҃їѧ , ꙗ҆́кѡ рᲂдила̀ є҆сѝ на́мъ є҆ди́нᲂго ѿ трⷪ҇цы , хрⷭ҇та̀ жизнᲂда́вца , во спасе́нїе дш҃а́мъ на́шимъ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Во вто́рникъ , бл҃же́нны . гла́съ , ѕ҃ .

Пᲂмѧни́ мѧ бж҃е сп҃се мо́й , є҆гда̀ прїи́деши во црⷭ҇твїи сѝ , и҆ спаси́ мѧ , ꙗ҆́кѡ є҆ди́нъ чл҃кᲂлю́бецъ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆́же петро́въ пла́чь прїе́мыи , прїимѝ мᲂѐ хрⷭ҇тѐ пᲂкаѧ́нїе , и҆ да́рꙋй ми сᲂгрѣше́нїемъ прᲂще́нїе .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Прᲂпᲂвѣ́давыи пᲂкаѧ́нїе чл҃кѡмъ , гдⷭ҇нь крⷭ҇тлю и҆ прⷣтче мᲂлю́сѧ , пᲂка́ѧтисѧ ми ѿ дш҃и спᲂдо́би .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Тревᲂлне́нїѧ пᲂд̾є́мше страсте́й ст҃і́и , и҆ сꙋ́щїѧ в̾ бꙋ́ри бᲂлѣ́зней и҆збавлѧ́ете , тѣ́мже бл҃жи́ми є҆стѐ .

сла́ва . И҆́же прⷪ҇рки прᲂславлѧ́емыи сп҃се мо́й в̾ трⷪ҇цѣ , про́стᲂже и҆ неслїѧ́нно , прⷣтчи мл҃твами спаси́ мѧ .

и҆ ны́нѣ . Застꙋ́пнице крѣ́пкаѧ , сꙋ́щимъ въ ско́рбѣхъ , застꙋпи́ мѧ ѿ жите́йскихъ страсте́й прило́га , и҆ спасѝ влⷣчце .

<< Previous

Contents

Next >>