Глас 7 пятница

Въ четверто́къ , ве́черъ . на гдⷭ҇и вᲂзва́хъ , стихѣ́ры , крⷭ҇тны . гла́съ , з҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Д=а чл҃ка бг҃а сᲂдѣ́лаеши , чл҃къ бы́лъ є҆сѝ пребл҃гі́и хрⷭ҇тѐ , и҆ распѧ́тсѧ , сла́ва си́лѣ твᲂе́й .

ᲂу҆пᲂва̀ дш҃а мᲂѧ̀ на́ гдⷭ҇а . Є҆гда̀ на крⷭ҇тъ тѧ̀ і҆с҃е со́нмъ є҆вре́йскїи ѡ҆сꙋдѝ , землѧ̀ трѧса́шесѧ , и҆ сл҃нцꙋ свѣ́тъ скрыва́шесѧ .

да ᲂу҆пᲂва́етъ і҆и҃ль на́ гдⷭ҇а . Те́рнїемъ тѧ̀ без̾сме́ртне вѣнча̀ , сᲂбо́ръ без̾зако́нныи , пре́лести те́рнїе и҆з̾ ко́рене сѣкꙋ́ща цр҃ю ст҃ы́и .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , то́йже . запѣ́въ : ѿ всѣ́хъ без̾зако́нїи є҆гѡ̀ . Ви́дѧщи прᲂсте́рта на́ древѣ а҆́гньца , нескве́рнаѧ а҆́гница и҆ дв҃аѧ , пᲂсредѣ̀ двᲂю̀ разбо́йникꙋ , ᲂу҆вы̀ мнѣ̀ вᲂпїѧ́ше , сладча́йшее мᲂѐ ча́дѡ , что̀ стра́ннᲂе сїѐ и҆ пресла́внᲂе та́инство . ка́кѡ тѧ̀ без̾зако́нныи со́нмъ на крⷭ҇тъ вᲂз̾дви́же , и҆ же́лчи напᲂѝ , ма́нны насы́щшагѡ челᲂвѣ́ки .

пᲂхвали́те є҆гѡ̀ всѝ лю́дїе . Є҆гда́ тѧ на крⷭ҇тѣ̀ пригвᲂжде́на дв҃аѧ и҆ мт҃и твᲂѧ̀ , ᲂу҆зрѣ̀ хрⷭ҇тѐ мо́й , сꙋдо́мъ закᲂнᲂпрестꙋ́пнымъ ѿ і҆ꙋде́й , на мѣ́стѣ ло́бнѣмъ , ᲂу҆вы̀ мнѣ̀ вᲂпїѧ́ше , сн҃е мо́й любе́знѣйшїи , что̀ стра́ннᲂе видѣ́нїе сѐ , ка́кѡ тѧ̀ ко крⷭ҇тꙋ̀ пригвᲂжда́ютъ дѣ́ти неразꙋ́мнїи є҆вре́йстїи , всѣ́хъ гдⷭ҇а .

и҆ и҆́стина гдⷭ҇нѧ пребыва́етъ во́ вѣки . Є҆ди́нꙋ тѧ̀ всест҃а́ѧ влⷣчце по ржⷭ҇твѣ̀ пᲂзна́хᲂмъ всѝ , дв҃ꙋ ꙗ҆́вльшꙋюсѧ ; и҆ є҆го́же без̾ сѣ́мене рᲂдила̀ є҆сѝ , на́ древѣ ви́дѧщи , рꙋ́цѣ свᲂѝ во́лею пригвᲂзди́вша , пречⷭ҇таѧ пла́чꙋщи взыва́ше , во́лею дᲂлгᲂтерпѣли́ве ᲂу҆мира́еши , и҆збавлѧ́ѧ ѿ сме́рти всѣ́хъ пᲂю́щихъ тѧ̀ .

сла́ва , и҆ ны́нѣ , крⷭ҇тᲂбоⷢ҇ . Влⷣчце всест҃а́ѧ дв҃о ро́ждьшаѧ гдⷭ҇а , и҆́же за бл҃гᲂꙋтро́бїе на крⷭ҇тѣ̀ пригвᲂзди́вшагᲂсѧ , и҆ жи́зни стрꙋѝ и҆стᲂчи́вша ми́рꙋ , тᲂгѡ̀ ᲂу҆мᲂлѝ спасти́сѧ дш҃а́мъ на́шимъ . тебе́ бо є҆ди́нꙋ и҆́мамы вѣ́рнїи прибѣ́жище , и҆ стѣ́нꙋ и҆ застꙋпле́нїе . тѣ́мже и҆ притека́емъ к̾ пᲂкро́вꙋ твᲂемꙋ̀ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , крⷭ҇тны . гла́съ , з҃ . Не к̾ тᲂмꙋ̀ вᲂз̾бранѧ́еми є҆смы̀ ѿ́ древа живо́тнаго , ᲂу҆пᲂва́нїе и҆мꙋ́ще крⷭ҇тъ тво́й , гдⷭ҇и сла́ва тебѣ̀ .

сти́хъ : к̾ тебѣ̀ вᲂз̾ведо́хъ ѻ҆́чи . Пᲂвѣ́шенъ бы́въ без̾сме́ртне на́ древѣ , сᲂкрꙋши́лъ є҆сѝ всѧ̀ сѣ́ти дїа́вᲂли , гдⷭ҇и сла́ва тебѣ̀ .

сти́хъ : пᲂми́лꙋй на́съ гдⷭ҇и . мⷱ҇ꙋ . Сла́ва тебѣ̀ хрⷭ҇тѐ бж҃е , а҆пⷭ҇лѡмъ пᲂхвало̀ , и҆ мч҃нкѡмъ весе́лїе , и҆́хже про́пᲂвѣдь трⷪ҇ца є҆динᲂсꙋ́щнаѧ .

=сла́ва , и҆ нн҃ѣ , крⷭ҇тᲂбоⷢ҇ . на́ =древѣ пригвᲂжде́на тѧ̀ во́лею , всенепᲂро́чнаѧ ꙗ҆́кѡ ви́дѣ , пла́чꙋщи пᲂѧ́ще держа́вꙋ твᲂю̀ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ четверто́къ , на па́вечерницѣ . кано́нъ , прест҃ѣ́й бцⷣѣ . гла́съ , з҃ . пѣ́снь , а҃ . і҆рмо́съ . И҆стрѧ́сшемꙋ бг҃ꙋ фараѡ́на , в̾ мо́ри чермнѣ́мъ , пᲂбѣ́днꙋю пѣ́снь вᲂспᲂе́мъ , ꙗ҆́кѡ прᲂсла́висѧ . запѣ́в̾ : прест҃а́ѧ гжⷭ҇е бцⷣе спасѝ на́съ . Живᲂта̀ мᲂегѡ̀ прᲂзрѧ̀ наста́вшїи кᲂне́цъ , влⷣчце вᲂпїю̀ , ты́ ми да́ждь ѡ҆чище́нїе сᲂгрѣше́нїемъ бг҃ᲂневѣ́сто . Къ пꙋчи́нѣ бл҃гᲂсты́ни твᲂеѧ̀ притеко́хъ , вᲂпїю̀ влⷣчце бл҃га́ѧ , и҆зба́ви мѧ всѧ́кᲂгѡ мꙋче́нїѧ .= сла́ва . Влⷣчце прїимѝ на́съ вѣ́рᲂю прибѣга́ющихъ к̾ тебѣ̀ , и҆ пᲂда́ждь напа́стемъ и҆ скᲂрбе́мъ и҆збавле́нїе . и҆ ны́нѣ . Т=ы̀ па́дшꙋю а҆да́мᲂвꙋ ски́нїю , прᲂро́чески вᲂста́вила є҆сѝ , сп҃са и҆ бг҃а пречⷭ҇таѧ во́ чревѣ нᲂси́вши .

пѣ́снь , г҃ . і҆рмо́съ . Оу҆тверди́сѧ вѣ́рᲂю цр҃кви хрⷭ҇то́ва , и҆́бо непреста́ннѡ пѣ́сньми пᲂе́тъ вᲂпїю́щи , ст҃ъ є҆сѝ гдⷭ҇и спаса́ѧи дш҃а на́ша . И҆́же бг҃а и҆ влⷣкꙋ , не и҆з̾рече́ннѡ заче́нши , ѡ҆бдержи́ма мѧ бꙋ́рею грѣха̀ , ты̀ ѿ си́хъ и҆зба́ви и҆ спаси́ мѧ пречⷭ҇таѧ . Сᲂгрѣше́нїи непᲂдо́бныхъ , но́щи мѧ ѡ҆держи́ма , пᲂкаѧ́нїѧ лꙋча́ми ѡ҆зарѝ ѻ҆трᲂкᲂви́це , дѣ́лати ми пᲂда́вши свѣ́тꙋ дѣ́ла всегда̀ .= сла́ва . И҆́же нбⷭ҇ныи хлѣ́бъ ро́ждьши бцⷣе , пита́ющи всѣ́хъ вѣ́рныхъ срⷣца̀ , насы́ти а҆́лчꙋщꙋю дꙋ́шꙋ мᲂю̀ страстнꙋ́ю . = и҆ ны́нѣ . Оу҆тверди́хсѧ , бжⷭ҇твенᲂе твᲂѐ ржⷭ҇тво̀ разꙋмѣ́въ , и҆ застꙋпле́нїемъ дв҃о ѡ҆бᲂгаща́юсѧ зᲂвы̀ , ст҃ъ є҆сѝ гдⷭ҇и спаса́ѧ дш҃а на́ша .

пѣ́снь , д҃ . і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ и҆ диви́хсѧ гдⷭ҇и . Стеню́ща пред̾ тᲂбо́ю влⷣчце , и҆ вᲂпїю́ща прилѣ́жнѡ ѿ ᲂу҆ма̀ мᲂегѡ̀ , да не пре́зриши менѐ , нижѐ пᲂсрами́ши . Пᲂпалѝ ᲂу҆́нзьшїи те́рнъ , ѻ҆каѧ́ннѣй мᲂе́й дш҃и , сласте́й плᲂтьски́хъ , ꙗ҆́же ѻ҆́гнь бжⷭ҇твеныи влⷣчце ро́ждьшаѧ .= сла́ва . Пᲂда́ждь ми сᲂгрѣше́нїй ѡ҆ставле́нїе всеблгⷭ҇ве́наѧ чи́стаѧ , и҆ и҆зба́ви вѣ́чнагѡ и҆ ᲂу҆жа́снагѡ мꙋче́нїѧ . и҆ ны́нѣ . С=ло́во в̾ тѧ̀ всели́сѧ пречⷭ҇таѧ , и҆ сꙋщество̀ мᲂѐ вᲂѡ҆бразѝ , па́дшее престꙋпле́ньми .

пѣ́снь , є҃ . і҆рмо́съ . Къ тебѣ̀ ᲂу҆́треннюю , и҆ тебѣ̀ вᲂпїю̀ милᲂсе́рде гдⷭ҇и , ѡ҆мраче́ннꙋю грѣхмѝ дш҃ꙋ , свѣ́тᲂмъ ѡ҆зари́въ , запᲂвѣде́й твᲂи́хъ наста́ви . Оу҆пᲂдо́бихсѧ без̾слᲂве́снымъ скᲂто́мъ преѻ҆каѧ́нныи , страстьмѝ без̾слᲂве́сными ѻ҆каѧ́ннѣй ми пло́ти рабо́таѧ , ты̀ бцⷣе пᲂда́ждь ми вᲂспрѧнᲂве́нїе . Пᲂми́лꙋй мѧ и҆́же па́че всѣ́хъ чл҃къ сᲂгрѣши́вшагѡ , и҆ к̾ твᲂемꙋ̀ пᲂкро́вꙋ прибѣга́юща те́плᲂмꙋ бцⷣе дв҃о . и҆ мꙋче́нїѧ и҆схи́ти .= сла́ва . И҆́же бцⷣꙋ и҆спᲂвѣ́дающїи тѧ̀ мт҃и дв҃о , не преидꙋ́щагѡ црⷭ҇твїѧ и҆ пи́щи , тᲂбо́ю бг҃ᲂмт҃и ᲂу҆лꙋчи́ти да спᲂдо́бѧтсѧ . и҆ ны́нѣ . Б=лгⷭ҇ве́наѧ и҆ препрᲂсла́вленаѧ мт҃и не и҆скꙋсᲂмꙋ́жнаѧ , ᲂу҆мерщве́нꙋю грѣхмѝ дш҃ꙋ мᲂю̀ , и҆ страстьмѝ пᲂгᲂрбле́нꙋю не ѡ҆держи́мыми , ѡ҆живᲂтвᲂрѝ .

пѣ́снь , ѕ҃ . і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . Сᲂдержи́тъ мѧ бꙋ́рѧ грѣхо́внаѧ дв҃о , и҆ к̾ тлѝ ѿчаѧ́нїѧ веде́тъ . но прᲂстри́ ми рꙋ́кꙋ по́мᲂщи тве́рдꙋю и҆ всемо́щнꙋю . Ма́сло , є҆́же в̾ тебѣ̀ те́плагѡ млрⷭ҇дїѧ , вᲂз̾ле́й на мѧ̀ влⷣчце , и҆ и҆зба́ви сᲂгрѣше́нїи , и҆ и҆схи́ти ѻ҆гнѧ̀ вѣ́чнꙋющагѡ .= сла́ва . И҆́же разрѣши́вшаѧ ѿ бᲂлѣ́зни дв҃о є҆́ввꙋ , ржⷭ҇тво́мъ свᲂи́мъ пречⷭ҇тымъ , разрѣши́ ми ѻ҆трᲂкᲂви́це , бᲂлѣ́зни страстны́ѧ ми дш҃и и҆ тѣлесѐ . и҆ ны́нѣ . П=ѣснᲂсло́виши и҆з̾ тебѐ вᲂплᲂще́ннаго бг҃а , и҆ рыда́еши на крⷭ҇тѣ̀ вᲂз̾несе́на , тᲂгѡ̀ смᲂтрѧ́ющи мт҃и дв҃о чⷭ҇таѧ , и҆ пренепᲂро́чнаѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , з҃ . Пло́дъ чре́ва твᲂегѡ̀ чⷭ҇таѧ , крⷭ҇тъ вᲂдрꙋзѝ в̾ кᲂнцы̀ , и҆ тлѝ ми́ра и҆зба́ви , тѣ́мъ тѧ ꙗ҆́кѡ пресла́внꙋю велича́емъ .

пѣ́снь , з҃ . і҆рмо́съ . И҆́же в̾ пе́щь ѻ҆́гненнꙋю вве́ржени , препᲂдо́бнїи ѻ҆́трᲂцы , и҆ ѻ҆́гнь на хла́дъ прелᲂжи́ша , вᲂспѣва́нїемъ си́це пᲂѧ́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Прегрѣше́нїи мᲂи́хъ ᲂу҆мно́жисѧ преще́нїе , сꙋдꙋ̀ дᲂсто́йнѡ , чⷭ҇таѧ припа́даю и҆ зᲂвꙋ́ ти , пре́жде кᲂнца̀ пᲂда́ждь ми ѡ҆чище́нїе , и҆ ᲂу҆миле́нїѧ сле́зы , и҆ нраво́мъ и҆справле́нїе . Недꙋ́гᲂвавша мѧ лю́тѣ скве́рными прегрѣше́нїи чⷭ҇таѧ , и҆ ко ѿча́ѧнїѧ и҆дꙋ́ща гро́бꙋ , ꙗ҆́кѡ ро́ждьши жи́знь всѧ́ческихъ пречⷭ҇таѧ , бжⷭ҇твеными дѣѧ́нїи ѡ҆живѝ .= сла́ва . Бг҃ᲂрᲂди́тельнице бл҃га́ѧ , и҆́же вѣ́рᲂю призыва́ющихъ твᲂю̀ бл҃гᲂда́ть приснᲂживꙋ́щꙋю , мы́сленыѧ сме́рти и҆збавлѧ́ющи , и҆ црⷭ҇твїю спᲂдо́би пречⷭ҇тыми ти мл҃твами . и҆ ны́нѣ . Н=епᲂсти́жнᲂе ржⷭ҇тво̀ дв҃ыѧ славᲂсло́вимъ , и҆́мже сме́рти и҆зба́вихᲂмсѧ , є҆го́же ра́ди ро́ждьшесѧ в̾ нетлѣ́нїе . блгⷭ҇ве́нъ є҆сѝ , зᲂвꙋ́ще , гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . Є҆ди́нагѡ без̾нача́льнагѡ цр҃ѧ сла́вы , є҆го́же хва́лѧтъ нбⷭ҇ныѧ си́лы , и҆ трепе́щꙋтъ чи́ни а҆́нг҃льстїи , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . Страсте́й мѧ пе́щь пᲂпалѧ́етъ дв҃о , и҆ ѻ҆гне́мъ сласте́й пᲂѧда́етъ , пред̾вари́вши . и҆ млⷭ҇тивнᲂю сѝ рᲂсо́ю ᲂу҆гасѝ ю҆̀ , даю́щи дш҃и мᲂе́й ᲂу҆стꙋже́нїе крѣ́пко . Дꙋ́шꙋ ѡ҆скверни́хъ , и҆ растли́хъ пло́ть сластьмѝ , валѧ́ѧсѧ в̾ си́хъ , и҆ бы́хъ пᲂрꙋга́нїе чл҃кѡмъ и҆ смѣ́хъ врагѡ́мъ . влⷣчце бцⷣе пᲂмо́щница ми бꙋ́ди .= сла́ва . Бг҃а є҆го́же рᲂдила̀ є҆сѝ дв҃о , ᲂу҆мᲂлѝ низ̾пᲂсла́ти спасе́нїе вѣ́рнѡ чтꙋ́щимъ тѧ̀ , и҆ бѣ́дъ раз̾рꙋше́нїе , и҆ недꙋ́гъ лю́тыхъ премѣне́нїе ско́рᲂе , и҆ бл҃гᲂда́ть вѣ́чнꙋю . и҆ ны́нѣ . С=ᲂзда́вшаго а҆да́ма по ѻ҆́бразꙋ , и҆ ѿ смѣше́нїѧ є҆гѡ̀ прᲂше́дша , и҆ раз̾рѣ́шша пе́рвꙋю клѧ́твꙋ , по́йте сщ҃е́ннїи гдⷭ҇а , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Препѣ́таѧ нб҃съ превы́шшаѧ , ꙗ҆́же без̾нача́льнᲂе сло́во без̾ сѣ́мени заче́ншаѧ , и҆ вᲂплᲂще́нна бг҃а ро́ждьшаѧ чл҃кѡмъ , тѣ́мже тѧ̀ всѝ прⷭ҇нѡ велича́емъ . Всесвѣ́тлаѧ дв҃о мт҃и бцⷣе ѻ҆каѧ́ннꙋю дш҃ꙋ мᲂю̀ , лю́тѣ ѡ҆мраче́нꙋю страстьмѝ плᲂтьски́ми , свѣ́тᲂмъ мл҃твъ твᲂи́хъ , въ стра́хъ бж҃їи свѣ́тло наста́ви . Ѿча́ѧвсѧ ѿ мно́жества сᲂгрѣше́нїй мᲂегѡ̀ спасе́нїѧ , и҆ недᲂꙋмѣ́ненъ ꙗ҆ви́хсѧ влⷣчце всест҃а́ѧ , твᲂѐ бл҃гᲂдѣѧ́нїе , и҆ млⷭ҇ть твᲂю̀ низ̾пᲂслѝ мнѣ̀ .= сла́ва . Рᲂжество̀ твᲂѐ бцⷣе є҆́же па́че є҆стества̀ , ᲂу҆дивлѧ́етъ а҆́нг҃лы , ᲂу҆жаса́етъ же чл҃ки . всѣ́мъ бо несказа́нно є҆́сть и҆ непᲂсти́жимо . се́же пᲂю́ще , бл҃гᲂче́стнѡ тѧ̀ сла́вимъ . и҆ ны́нѣ . О=у҆мерщве́нїѧ и҆ тлѣ́нїѧ ри́зы сᲂвлече́ ми дв҃це спасе́нїѧ ри́зꙋ , вᲂплᲂще́ннагѡ сло́ва ро́ждьши чл҃кѡмъ , тѣ́мже вси́ тѧ прⷭ҇нѡ велича́емъ .

та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ пѧто́къ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , з҃ . Цр҃кви вᲂпїе́тъ тѝ хрⷭ҇тѐ бж҃е в̾ пе́вгѣ и҆ ке́дрѣ и҆ кипари́сѣ , пᲂкланѧ́ющесѧ тебѣ̀ , пᲂбѣ́ды странѣ̀ на́шей да́рꙋй , бцⷣы ра́ди , пᲂми́лꙋй на́съ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . И҆́же менѐ ра́ди прїе́мыи , є҆́же на крⷭ҇тѣ̀ пригвᲂжде́нїе , прїимѝ и҆ мᲂѐ бо́дренᲂе хвале́нїе хрⷭ҇тѐ бж҃е , ꙗ҆́кѡ чл҃кᲂлю́бецъ .= сла́ва , и҆ ны́нѣ , крⷭ҇тᲂбоⷢ҇ . К=рⷭ҇то́мъ сн҃а твᲂегѡ̀ храни́ми дв҃о , прило́гъ бѣсо́вскихъ ᲂу҆клᲂнѧ́емсѧ . тѣ́мже тѧ̀ бцⷣе без̾невѣ́стнаѧ по́ дᲂлгꙋ вᲂспѣва́юще сла́вимъ .

по в҃ , стихᲂло́гїи , сѣда́льны . гла́съ , з҃ . Ѻ҆гнѧ̀ свѣтлѣ́йше , и҆ пла́мене дѣ́йственѣйше , дре́во ꙗ҆ви́лъ є҆сѝ крⷭ҇та̀ твᲂегѡ̀ хрⷭ҇тѐ , пᲂпалѧ́юще грѣхѝ недꙋ́гꙋющимъ , и҆ прᲂсвѣща́ѧ срⷣца̀ пᲂю́щимъ во́льнᲂе твᲂѐ распѧ́тїе , бж҃е сла́ва тебѣ̀ . сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Гдⷭ҇и крⷭ҇та̀ твᲂегѡ̀ зрѧ́ще вᲂз̾выша́ема , всегда̀ прихо́димъ вѣ́рнѡ пѣ́ньми и҆ пѣ́сньми , цѣлꙋ́юще тᲂгѡ̀ , со́ страхᲂмъ и҆ ра́дᲂстїю . ѡ҆ст҃ѝ рабы̀ свᲂѧ̀ , и҆ ᲂу҆мирѝ ми́ръ сво́й , тᲂгѡ̀ ꙗ҆вле́нїемъ , є҆ди́не мнᲂгᲂмлⷭ҇тиве . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ст҃і́и мч҃нцы мᲂли́те , ѡ҆ставле́нїе да́ти сᲂгрѣше́нїемъ на́шимъ , и҆ ча́емыхъ мꙋ́къ и҆зба́витисѧ на́мъ , и҆ го́рькїѧ сме́рти , мо́лимсѧ .= сла́ва , и҆ ны́нѣ , крⷭ҇тᲂбоⷢ҇ . Б=цⷣе чⷭ҇таѧ прⷭ҇нѡ дв҃о , на крⷭ҇тѣ̀ зрѧ́щи сн҃а свᲂегѡ̀ ви́сѧща , ꙗ҆́кѡ мт҃и пла́чꙋщисѧ тᲂгѡ̀ велича́ше стра́шнᲂе сᲂше́ствїе не и҆скꙋсᲂбра́чнаѧ влⷣчце .

по г҃ , стихᲂло́гїи , сѣда́ленъ . гла́съ , з҃ . Крⷭ҇тъ тво́й хрⷭ҇тѐ чⷭ҇тны́и смире́нїѧ ѻ҆рꙋ́жїе є҆́сть и҆ непᲂбѣди́маѧ пᲂбѣ́да , и҆́мже неви́димыѧ врагѝ низ̾лага́юще , бл҃гᲂда́рнѡ вᲂспѣва́емъ тѧ̀ . сла́ва , и҆ нн҃ѣ , крⷭ҇тᲂбоⷢ҇ . Пло́дъ чре́ва твᲂегѡ̀ пречⷭ҇таѧ , крⷭ҇тъ насадѝ в̾ кᲂнцѣ́хъ , и҆ ѿ тлѝ ми́ра и҆зба́вилъ є҆́сть . тѣ́мже тѧ̀ пресла́внаѧ велича́емъ .

Въ пѧто́къ , кано́нъ , честно́мꙋ и҆ живᲂтвᲂрѧ́щемꙋ крⷭ҇тꙋ̀ . гла́съ , з҃ . пѣ́снь , а҃ . і҆рмо́съ . И҆стрѧ́сшемꙋ бг҃ꙋ фараѡ́на , в̾ мо́ри чермнѣ́мъ , пᲂбѣ́днꙋю пѣ́снь вᲂспᲂе́мъ , ꙗ҆́кѡ прᲂсла́висѧ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Хрⷭ҇то́съ вᲂз̾несы́исѧ на́ крⷭ҇тъ , к̾ себѣ̀ всѧ̀ привлечѐ чл҃ки , и҆ низ̾ве́рже врага̀ , всѣ́хъ низ̾ве́ргшаго . Во́дꙋ живᲂтꙋ̀ мᲂемꙋ̀ і҆с҃е , ѿ живᲂно́сныхъ ре́бръ и҆стᲂчи́лъ є҆сѝ . и҆ ᲂу҆мертви́лъ є҆сѝ врага̀ , влⷣко бы́въ ме́ртвъ .

запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Мл҃твꙋ хрⷭ҇тꙋ̀ за на́съ стрⷭ҇тᲂте́рпцы прилѣ́жнꙋю принеси́те , стра́шнагѡ сꙋда̀ и҆зба́вити на́съ .= мⷱ҇ꙋ . Смири́вшесѧ вы̀ хрⷭ҇та̀ ра́ди премꙋ́дрїи мч҃нцы , го́рдаго врага̀ низ̾лᲂжи́сте бжⷭ҇твенᲂю бл҃гᲂда́тїю . боⷢ҇ . В=ᲂсїѧ́вшаго и҆з̾ тебѐ , превели́кимъ бл҃гᲂꙋтро́бїемъ влⷣчце , на крⷭ҇тѣ̀ зрѧ́щи пла́каше тᲂгѡ̀ сла́вѧщи .

Дрꙋгі́и кано́нъ , прест҃ѣ́й бцⷣѣ . і҆рмо́съ , то́йже . =запѣ́в̾ : прест҃а́ѧ гжⷭ҇е бцⷣе спасѝ на́съ . В=па́дшаго в̾ тлѣ́нїе преслꙋша́нїемъ , пра́дѣда а҆да́ма ѡ҆бнᲂви́ла є҆сѝ , бг҃а пречⷭ҇таѧ пло́тїю ро́ждьши . Съ весе́лїемъ гла́съ гаврїи́лᲂвъ , вᲂпїе́мъ ти пречⷭ҇таѧ . ра́дꙋисѧ всѣ́хъ наде́жде чи́стаѧ , ра́дꙋисѧ бг҃ᲂневѣ́сто . Оу҆мерщве́ныи ми ᲂу҆́мъ ѡ҆живѝ , живо́тнымъ дѣ́йствїемъ , и҆́же и҆з̾ тебѐ ро́ждьшимсѧ вᲂи́стинꙋ пречⷭ҇таѧ дв҃о . Бл҃гᲂслᲂвѧ́щїи тѧ̀ вѣ́рнѡ всепѣ́таѧ , ѿ́ бг҃а бл҃гᲂслᲂвлѧ́ютсѧ ꙗ҆́вѣ , бл҃гᲂслᲂве́нїѧ бо и҆сто́чникъ рᲂдила̀ є҆сѝ .

пѣ́снь , г҃ . і҆рмо́съ . Оу҆тверди́сѧ вѣ́рᲂю цр҃кви хрⷭ҇то́ва , и҆́бо непреста́ннѡ пѣ́сньми пᲂе́тъ вᲂпїю́щи , ст҃ъ є҆сѝ гдⷭ҇и спаса́ѧи дш҃а на́ша . Без̾стра́стныи по сꙋществꙋ̀ , ка́кѡ стра́сть терпи́ши ; и҆́же живо́тъ мнѣ̀ вдыха́ѧи , ка́кѡ ᲂу҆мира́еши на́ древѣ ; ве́лїѧ твᲂѧ̀ ми́лᲂсть и҆ дᲂлгᲂтерпѣ́нїе сп҃се . На крⷭ҇тѣ̀ пᲂсредѣ̀ разбо́йникꙋ сло́ве беспра́вды вᲂз̾дви́жесѧ , и҆ ѡ҆правда́лъ є҆сѝ вѣ́рᲂю пᲂзна́вшїѧ тебѐ зижди́телѧ всеѧ̀ тва́ри , во́лею стра́ждꙋща .= мⷱ҇ꙋ . Стрᲂга́нїѧ пло́ти терпѧ́ще , и҆ рꙋ́къ ѿѧ́тїе и҆ но́гъ и҆ всѣ́хъ ᲂу҆дѡ́въ , страстᲂте́рпцы сла́вѣ спᲂдо́бишасѧ ѡ҆ на́съ мᲂлѧ́щесѧ . мⷱ҇ꙋ . Премно́гими мꙋ́ками ѻ҆́ бз҃ѣ прᲂсвѣти́вшесѧ , премно́гꙋю сла́вꙋ мꙋ́дрїи ны́нѣ наслѣ́дᲂвасте , всегда̀ мᲂлѧ́щесѧ ѡ҆ дш҃а́хъ на́шихъ . боⷢ҇ . Р=азрѣше́нїе дᲂлгѡ́мъ на́шимъ чⷭ҇таѧ дв҃о пᲂда́ждь , мт҃рьними ти мл҃твами , ꙗ҆́же на крⷭ҇тѣ̀ пригвᲂжде́ннаго чл҃ка бы́вша , бг҃а сло́ва ро́ждьшаѧ .

и҆́нъ , і҆рмо́съ , то́йже . Тебѐ дв҃ꙋ , ѻ҆бра́знѡ сѣ́нь всест҃ꙋ́ю , закᲂнᲂпᲂло́жникꙋ на гᲂрѣ̀ бг҃ъ прᲂѧвлѧ́ше селе́нїе , и҆́же всѣ́хъ ѡ҆сщ҃а́ющаго . Зе́млю тѧ̀ ст҃ꙋ́ю дв҃о разꙋмѣ́хᲂмъ всѝ , без̾ сѣ́мене на́мъ кра́сныи вᲂз̾расти́вшꙋю кла́съ пита́ющь , вѣ́рᲂю тѧ̀ и҆ любо́вїю блажа́щихъ . Ви́дѣна бы́ша ше́ствїѧ бг҃а вы́шнѧгѡ , в̾ тебѣ̀ дв҃о не и҆зрече́ннѡ тᲂмꙋ̀ вᲂпло́щшꙋсѧ , мт҃и бо ты̀ бы́сть всѣ́ми црⷭ҇твꙋющемꙋ . Оу҆тверди́хсѧ бжⷭ҇твенᲂе твᲂѐ ржⷭ҇тво̀ разꙋмѣ́въ , и҆ застꙋпле́нїемъ тѝ дв҃о ѡ҆бᲂга́щьсѧ , зᲂвѧ̀ , ст҃ъ є҆сѝ гдⷭ҇и спаса́ѧ дш҃а на́ша .

пѣ́снь , д҃ . і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ и҆ диви́хсѧ гдⷭ҇и . Краснѣ́йшїи ꙗ҆́кᲂже гро́здъ на крⷭ҇тѣ̀ вᲂз̾дви́жесѧ влⷣко , весе́лїѧ вино̀ и҆ска́пилъ є҆сѝ чл҃кᲂлю́бче . Мнᲂгᲂбᲂлѣ́зненыѧ чл҃кѡмъ стра́сти , ᲂу҆ти́шилъ є҆сѝ вᲂи́стинꙋ , стра́сти влⷣко во́лею на́ плᲂти свᲂе́й прїе́мъ .= мⷱ҇ꙋ . Ѡ҆стрꙋпи́ша ѡ҆стрꙋплѧ́еми страстᲂте́рпцы бᲂрца̀ , и҆ ꙗ҆ви́шасѧ вра́чеве дш҃а́мъ на́шимъ . мⷱ҇ꙋ . Ѡ҆пᲂлчи́шасѧ к̾ мꙋчи́телемъ стрⷭ҇тᲂно́сцы и҆ пᲂбѣди́вше , вѣнча́ни бы́вше пᲂбѣ́дными вѣнцы̀ . боⷢ҇ . Р=ᲂдила̀ є҆сѝ без̾ сѣ́мене дв҃о сло́ва , и҆́же крⷭ҇то́мъ пᲂгꙋби́вшаго тлѣ́нїе бл҃гᲂстїю .

и҆́нъ , і҆рмо́съ , то́йже . Оу҆слы́шалъ є҆́сть а҆вва́кꙋмъ тѧ̀ пречⷭ҇таѧ го́рꙋ , дх҃о́вными ѡ҆сѣне́ньми прᲂсвѣща́емꙋ , и҆з̾ тебе́ бо бг҃ъ ꙗ҆ви́сѧ вᲂплᲂща́емь . И҆справлѧ́етсѧ правᲂсла́вныхъ сᲂбо́ръ , тебѐ всест҃ꙋ́ю пᲂю́щихъ сꙋ́щꙋю бг҃ᲂмт҃рь , со а҆рха́нг҃лѡмъ ра́дꙋисѧ зᲂвꙋ́ще тебѣ̀ . Бїе́тсѧ несто́рїево лицѐ , не вᲂсхᲂтѣ́вшаго мꙋ́дрствᲂвати тѧ̀ бцⷣꙋ чⷭ҇тꙋю . бг҃а бо вᲂи́стинꙋ пречⷭ҇таѧ рᲂдила̀ є҆сѝ . Кра́снꙋю тѧ̀ и҆ свѣ́тлꙋю дᲂбро́тами жени́хъ ѡ҆брѣ́тъ , в̾ тѧ̀ всели́сѧ , и҆ бцⷣꙋ всечⷭ҇таѧ сᲂдѣ́ла .

пѣ́снь , є҃ . і҆рмо́съ . Оу҆́треннюетъ дх҃ъ мо́й к̾ тебѣ̀ хрⷭ҇тѐ бж҃е , занѐ свѣ́тъ пᲂвелѣ́нїѧ твᲂѧ̀ , бы́ша и҆сцѣле́нїѧ рабо́мъ твᲂи́мъ чл҃кᲂлю́бче . Вᲂз̾дви́женъ влⷣко на́ древо пло́тїю , тва́рь всю̀ и҆́з̾ рᲂва лю́тыхъ неразꙋ́мїѧ и҆з̾вле́клъ є҆сѝ , к̾ ра́зꙋмꙋ твᲂемꙋ̀ чл҃кᲂлю́бче . На ло́бнѣмъ тѧ̀ мѣ́стѣ , и҆спрᲂси́вше лю́дїе без̾зако́ннїи распѧ́ти і҆с҃е , главꙋ̀ гꙋби́тельнꙋю ѕмі́евꙋ сᲂкрꙋша́ющагѡ .= мⷱ҇ꙋ . Оу҆ста́висте ѕлᲂче́стїѧ тече́нїе хрⷭ҇то́ви мч҃нцы , бжⷭ҇твеными крᲂвьмѝ ва́шими , и҆ фараѡ́на мꙋчи́телѧ в̾ си́хъ ᲂу҆дави́сте . мⷱ҇ꙋ . Нᲂгᲂтьмѝ неща́дно стрꙋ́жеми , и҆стᲂрго́сте ѡ҆бличе́ньми страда́льцы срⷣца̀ сꙋемꙋ́дренаѧ , и҆ пᲂбѣди́тели бы́сте . боⷢ҇ . Ѡ҆=ст҃ѝ бг҃ъ ᲂу҆тро́бꙋ твᲂю̀ ст҃а́ѧ чⷭ҇таѧ , и҆ всели́сѧ в̾ ню̀ , и҆ на крⷭ҇тъ вᲂз̾дви́женъ , тва́рь сᲂвᲂз̾дви́глъ є҆́сть .

и҆́нъ , і҆рмо́съ , то́йже . Бг҃ᲂлѣ́пнꙋю твᲂю̀ гжⷭ҇е и҆ кра́снꙋю , и҆ сладча́йшꙋю и҆ бл҃гꙋ́ю дᲂбро́тꙋ вᲂз̾люби́въ влⷣка , в̾ тѧ̀ дв҃о всели́сѧ . Всест҃а́ѧ и҆ свѣтᲂно́снаѧ две́ри бл҃гᲂда́ти , ꙗ҆́же вселе́ннꙋю свѣтлѣ́йшимъ тѝ свѣ́тᲂмъ , ѡ҆зари́вши ѻ҆трᲂкᲂви́це , тебѐ пᲂю́щїѧ прᲂсвѣтѝ . И҆́же бцⷣꙋ и҆спᲂвѣ́дающїи тѧ̀ мт҃и дв҃о , не преи҆дꙋ́щагѡ црⷭ҇твїѧ и҆ пи́щи , тᲂбо́ю бг҃ᲂмт҃и ᲂу҆лꙋчи́ти да спᲂдо́бѧтсѧ . Хра́мъ ꙗ҆ви́ласѧ є҆сѝ всеви́дца и҆ вседержи́телѧ , твᲂю́ бо ᲂу҆тро́бꙋ чи́стѣйшꙋ нб҃съ ѡ҆брѣ́тъ вᲂдвᲂри́сѧ , бг҃ᲂрᲂди́тельнице всечи́стаѧ .

пѣ́снь , ѕ҃ . і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . Бᲂлѧ́щꙋ чл҃чꙋ є҆стествꙋ̀ , ꙗ҆́вльсѧ за млрⷭ҇дїе млⷭ҇ти вра́чь недꙋ́гꙋющимъ , и҆ и҆сцѣли́лъ є҆сѝ крⷭ҇то́мъ и҆ стра́стїю сѝ . Дре́вᲂмъ дре́вле а҆да́мъ ѡ҆сꙋди́сѧ , дре́вᲂмъ же ны́нѣ крⷭ҇тнымъ ѡ҆правда́сѧ , в̾хᲂжде́нїе прїе́мъ ра́йскᲂе , и҆ пи́щи наслажде́нїе . Пᲂе́мъ тѧ̀ пло́тїю распе́ншагᲂсѧ , и҆ сла́вимъ те́рнїемъ вѣнча́вшагᲂсѧ , и҆ сла́вᲂю вѣнча́вшаго челᲂвѣ́ки , цр҃ю пребл҃гі́и .= мⷱ҇ꙋ . Гꙋби́тельныи ны́нѣ ѿри́нꙋвше вре́дъ страда́льцы и҆дᲂлᲂбѣ́сїѧ , мꙋ́камъ причасти́шасѧ , и҆ ᲂу҆ме́рше со хрⷭ҇то́мъ црⷭ҇твꙋютъ . мⷱ҇ꙋ . Ни гᲂне́нїе ни гла́дъ , ни нагᲂта̀ , ни бѣды̀ , нижѐ сме́рть , ѿ ню́дъ бжⷭ҇твеныѧ стрⷭ҇тᲂте́рпцы ѿ любвѐ хрⷭ҇то́вы неразлꙋчи́ша . боⷢ҇ . С=лавᲂсло́виши и҆з̾ тебѐ вᲂпло́щшагᲂсѧ , и҆ пла́чеши на крⷭ҇тѣ̀ вᲂз̾дви́жена , тᲂгѡ̀ смᲂтрѧ́ющи дв҃о мт҃и ст҃а́ѧ и҆ всенепᲂро́чнаѧ .

и҆́нъ , і҆рмо́съ , то́йже . Бг҃ᲂмꙋ́жно в̾ чл҃цѣхъ пᲂжи́вшаго рᲂдила̀ є҆сѝ бцⷣе дв҃о , є҆ди́наго бл҃гᲂда́телѧ , є҆́же бы́ти чл҃кѡмъ дарᲂва́вшаго . Є҆мманꙋ́ила бцⷣе сꙋгꙋ́ба по сꙋществꙋ̀ рᲂдила̀ є҆сѝ , пре́жде сᲂверше́но сло́во бг҃а вᲂплᲂще́нна , и҆збавле́нїе на́мъ пᲂдава́юща . Кᲂвче́гъ прїе́мыи зако́на скрижа́ли , пред̾написа̀ тебѐ бцⷣе , сло́во бж҃їе ꙗ҆́кѡ прїе́мшꙋю во́ чревѣ свᲂе́мъ , на́съ ра́ди вᲂплᲂща́емо .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е блгⷭ҇ве́нъ є҆сѝ . Тѧгᲂтꙋ̀ ѡ҆блегча́ѧ без̾зако́нїи мᲂи́хъ , пᲂсредѝ без̾зако́ннᲂю вᲂз̾дви́жесѧ на́ крⷭ҇тъ пребл҃гі́и гдⷭ҇и , превᲂзнᲂси́мыи ѻ҆ц҃е́мъ гдⷭ҇ь и҆ бг҃ъ , бл҃гᲂслᲂве́нъ є҆сѝ . Кᲂпїе́мъ прᲂбᲂде́нъ бы́сть в̾ бжⷭ҇твенаѧ ре́бра свᲂѧ̀ , и҆ ре́бренᲂе пᲂпᲂлзе́нїе и҆спра́ви сп҃се . пла́меннᲂмꙋ же ѻ҆рꙋ́жїю даѧ́ти ми вхо́дъ раѧ̀ пᲂвелѣва́еши всегда̀ .= мⷱ҇ꙋ . Звѣ́ѕды на высᲂтѣ̀ ѡ҆снᲂва́нныѧ цр҃кве , мч҃нцы бы́вше , тва́рь ѡ҆зарѧ́ете страда́нїи свѣ́тлᲂстїю , и҆ и҆сцѣле́нїи сїѧ́нїемъ . мⷱ҇ꙋ . Кни́га живꙋ́щихъ прᲂи҆зно́ситъ при́снѡ напи́санаѧ гдⷭ҇ни мч҃нки , напи́санныхъ бж҃їимъ ѡ҆правда́нїемъ , ᲂу҆се́рднѡ сᲂхрани́вшїѧ , и҆ пᲂстрада́вшїѧ крѣ́пко . боⷢ҇ . В=сест҃а́ѧ , прест҃о́е сло́во , и҆́же ѿ неѧ̀ вᲂсїѧ́вшее , на ст҃ѣ́мъ крⷭ҇тѣ̀ вᲂз̾дви́жено , и҆ ѡ҆сщ҃а́юще земны́ѧ зрѧ́щи рыда́ше .

и҆́нъ , і҆рмо́съ , то́йже . Ꙗ҆́же в̾ пещѝ ѻ҆́гненѣй , твᲂѐ ржⷭ҇тво̀ спасло̀ є҆́сть ᲂу҆́бѡ дре́вле . ны́нѣ же на́съ всенепᲂро́чнаѧ спасѝ , и҆́же є҆гѡ̀ прише́ствїю є҆́же па́че сло́ва зᲂвꙋ́щихъ , блгⷭ҇ве́нъ є҆сѝ бж҃е ѻ҆ц҃ъ на́шихъ . Бг҃о ѻ҆ц҃ъ ᲂу҆́бѡ дв҃дъ твᲂю̀ сла́вꙋ пи́шетъ дв҃о , и҆ тебѐ тваре́мъ цр҃цꙋ ꙗ҆вле́нно прᲂро́чествꙋетъ , пред̾стᲂѧ́щꙋю ѡ҆деснꙋ́ю всенепᲂро́чнаѧ бг҃а , ѻ҆ц҃ъ на́шихъ . Ѡ҆бнᲂви́ла є҆сѝ чи́стаѧ земны́хъ є҆стество̀ , ѡ҆бнᲂвле́нїемъ ржⷭ҇тва̀ твᲂегѡ̀ . тѣ́мже ти вᲂпїе́мъ , бл҃гᲂслᲂве́нъ є҆́сть во́ вѣки всѧ̀ гжⷭ҇е пло́дъ твᲂегѡ̀ чре́ва . Ѡ҆сꙋжде́наго а҆да́ма , и҆ сме́ртїю держи́ма , а҆да́мъ втᲂры́и , пречⷭ҇таѧ тᲂбо́ю пᲂми́лᲂвавъ призва̀ , бл҃гᲂслᲂве́нъ є҆сѝ зᲂвꙋ́ща , рᲂжде́исѧ и҆ ѡ҆бнᲂвле́и мѧ .

пѣ́снь , и҃ . і҆рмо́съ . Є҆ди́нагѡ без̾нача́льнагѡ цр҃ѧ сла́вы , є҆го́же хва́лѧтъ нбⷭ҇ныѧ си́лы , и҆ трепе́щꙋтъ чи́ни а҆́нг҃льстїи , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . Ме́ртва мѧ пᲂказа̀ разꙋ́мнᲂе дре́во , ты́ же хрⷭ҇тѐ мо́й ᲂу҆мертви́сѧ на́ древѣ ѡ҆живи́лъ є҆сѝ , и҆ прᲂсвѣти́лъ є҆сѝ пѣ́ти . по́йте сщ҃е́ннїи лю́дїе , и҆ превᲂзнᲂси́те є҆гѡ̀ во́ вѣки . Те́рнїемъ вѣнча̀ закᲂнᲂпрестꙋ́пныи со́нмъ , тебѐ цр҃ѧ , преслꙋша́нїѧ и҆скᲂренева́юща те́рнїе , а҆да́ма первᲂзда́ннагѡ , и҆ вᲂз̾дви́же на́ крⷭ҇тъ , всѣ́хъ и҆з̾ глꙋбины̀ пре́лести и҆з̾вле́кшаго .= мⷱ҇ꙋ . Ра́зꙋмᲂмъ прᲂсте́ршаго небеса̀ , тебѐ прᲂстира́ютъ на́ древѣ лю́дїе неразꙋ́мнїи , и҆сцѣлѧ́юща на́ши стра́сти стрⷭ҇тїю твᲂе́ю сп҃се , и҆ ᲂу҆ставлѧ́юща бᲂлѣ́зни , ꙗ҆́же ѿ гвᲂзде́й бᲂлѣ́зньми . мⷱ҇ꙋ . Мч҃нкъ мо́щи бл҃гᲂꙋха́нїѧ и҆спꙋща́ютъ чꙋде́съ , прихᲂдѧ́щимъ несꙋмѣ́ннымъ срⷣцемъ , и҆ страсте́й ѕлᲂво́нїе прᲂгᲂнѧ́ютъ при́снѡ , и҆ всѣ́мъ здра́вїе ѻ҆́ бз҃ѣ пᲂдава́ютъ . боⷢ҇ . С=т҃ы́хъ чи́ни мо́лѧтсѧ дв҃о и҆з̾ ᲂу҆тро́бы , твᲂеѧ̀ прᲂше́дшемꙋ влⷣцѣ , пᲂказа́вшемꙋ на крⷭ҇тѣ̀ си́мъ пꙋ́ть страда́нїѧ чⷭ҇таѧ , и҆ славᲂсло́вѧтъ тѧ̀ ꙗ҆́кѡ всѣ́хъ цр҃цꙋ .

и҆́нъ , і҆рмо́съ , то́йже . Непᲂстижи́мыи влⷣка всѣ́хъ , є҆го́же невмѣща́ютъ небеса̀ бг҃ᲂрᲂди́тельнице , вмѣща́етсѧ в̾ твᲂю̀ ᲂу҆тро́бꙋ дв҃о . тѣ́мже тѧ̀ вѣ́рнїи любо́вїю превᲂз̾но́симъ во́ вѣки . Оу҆ма̀ превы́шшаго всеѧ̀ тва́ри ѻ҆трᲂкᲂви́це , є҆го́же не вᲂз̾мᲂга́етъ рᲂжде́ннᲂе зрѣ́ти є҆стество̀ , пᲂнесла̀ є҆сѝ на свᲂе́ю пречⷭ҇тꙋю рꙋкꙋ̀ . тѣ́мже тѧ̀ вѣ́рнїи любо́вїю превᲂз̾но́симъ во́ вѣки . Бг҃а є҆го́же рᲂдила̀ є҆сѝ , ᲂу҆мᲂлѝ дв҃о , низ̾пᲂсла́ти спасе́нїе вѣ́рнѡ чтꙋ́щимъ тѧ̀ , и҆ бѣда́мъ раз̾рꙋше́нїе , и҆ недꙋ́гѡвъ лю́тыхъ премѣне́нїе ско́рᲂе , и҆ бл҃гᲂда́ть вѣ́чнꙋю . Оу҆краше́нꙋ тѧ дᲂбрᲂдѣ́тельми раз̾ли́чными , и҆ прᲂсвѣще́нꙋ цр҃кᲂвь вы́шнѧгѡ , ᲂу҆вѣ́дѣвше всест҃а́ѧ дв҃о , пᲂе́мъ бл҃гᲂче́стнѡ тѧ̀ , и҆ славᲂсло́вимъ во всѧ̀ вѣ́ки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Препѣ́таѧ небе́съ превы́шшаѧ , ꙗ҆́же без̾нача́льнᲂе сло́во без̾ сѣ́мени заче́ншаѧ , и҆ вᲂплᲂще́нна бг҃а ро́ждьшаѧ чл҃кѡмъ , тѣ́мже тѧ̀ всѝ прⷭ҇нѡ велича́емъ . На крⷭ҇тѣ́ тѧ вᲂз̾вы́шена цр҃ю вѣкѡ́мъ , ꙗ҆́кѡ ви́дѣ сл҃нце , ѡ҆мрачи́сѧ , и҆ землѧ̀ пᲂтрѧсе́сѧ . и҆ цр҃кви раз̾дра́сѧ свѣ́тлᲂсть і҆с҃е всеси́льне . И҆скᲂпа́ша рꙋ́цѣ и҆ но́зѣ твᲂѝ без̾зако́нницы , и҆ ре́бра живᲂно́снаѧ прᲂбᲂдо́ша кᲂпїе́мъ , и҆ же́лчи со ѻ҆цто́мъ напᲂи́ша тѧ хрⷭ҇тѐ мо́й , всѣ́хъ сла́дᲂсти и҆ бг҃а и҆́стина .= мⷱ҇ꙋ . Сᲂкрꙋши́ша началᲂѕло́бнаго сѣ́ти , сᲂкрꙋша́еми всѧ́кими ви́ды мꙋче́нїѧ , и҆ вѣнцено́сцы пᲂбѣ́дᲂю бы́вше до́блїи страда́льцы ᲂу҆блажа́ютсѧ . мⷱ҇ꙋ . Ѡ҆ст҃и́ша пᲂлᲂже́нїемъ мᲂще́й всю̀ зе́млю стрⷭ҇тᲂте́рпцы , и҆ ᲂу҆гаси́ша сква́ры и҆дᲂлᲂже́ртвеныѧ , ѻ҆гню̀ примѣша́ющесѧ , и҆ въ не́мъ та́йнѡ всесᲂжига́еми . боⷢ҇ . Б=л҃гᲂлюби́ваѧ , херꙋви́мъ ст҃ѣ́йшаѧ , ꙗ҆́же бж҃їе сло́во бг҃а пло́тїю ро́ждьшаѧ , вᲂз̾дви́женаго на крⷭ҇тѣ̀ хᲂтѣ́нїемъ , за всѣ́хъ прилѣ́жнѡ тᲂмꙋ̀ мᲂли́сѧ .

и҆́нъ , і҆рмо́съ , то́йже . Всесᲂверше́но чл҃чество прїѧ́то бы́сть , и҆з̾ тебѐ пречⷭ҇таѧ ѻ҆трᲂкᲂви́це , сло́вꙋ сᲂвᲂкꙋ́пльшᲂсѧ пло́ти ѡ҆дш҃евле́ннѣй , и҆ дш҃и сло́вᲂмъ ᲂу҆кра́шенѣй . тѣ́мже всѝ вѣ́рнїи тѧ̀ велича́емъ . Виті́ѧмъ ᲂу҆́бѡ блѧдᲂсло́вїе да ᲂу҆мᲂлчи́тъ , а҆пⷭ҇льскаѧ же трꙋба̀ да вᲂз̾гласи́тъ , тебѐ и҆́стинными гла́сы дв҃о вᲂсхвалѧ́ющи , бцⷣꙋ и҆́стиннꙋю вᲂз̾вѣща́ющи . Пᲂми́лᲂвасѧ тебѐ ра́ди чл҃чество , по сᲂста́вꙋ вᲂи́стинꙋ сло́вꙋ сᲂєди́ньшеесѧ , и҆ вᲂз̾даѧ́нїемъ бг҃ъ дв҃о бы́сть . тѣ́мже тѧ̀ всѝ при́снѡ велича́емъ . Пᲂзна́но бы́сть прⷪ҇рческими быстрᲂгада́нїи , та́инство ѻ҆трᲂкᲂви́це твᲂегѡ̀ плᲂдᲂно́сїѧ , ꙗ҆́кѡ вᲂплᲂще́нна бг҃а ро́ждьши чл҃кѡмъ . и҆збавлѧ́ющаго на́съ ѿ напа́стей мл҃твами твᲂи́ми .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , крⷭ҇тны . гла́съ , з҃ . Влⷣко сы́и чл҃кᲂлю́бче жизнᲂда́вче , и҆скꙋпи́лъ є҆сѝ крⷭ҇то́мъ свᲂи́мъ вселе́ннꙋю , гдⷭ҇и сла́ва тебѣ̀ .

сти́хъ : и҆спо́лнихᲂмсѧ за ᲂу҆́тра . На крⷭ҇тѣ̀ пригвᲂзди́сѧ лᲂза̀ и҆́стиннаѧ , и҆ ѡ҆бъє́мше ꙗ҆зы́цы ра́й с̾ разбо́йникѡмъ вᲂпїю́тъ , сѝ сла́ва цр҃ко́внаѧ , сѐ бᲂга́тство црⷭ҇твїѧ , пᲂстрада́выи на́съ ра́ди гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Па́мѧть ст҃ы́хъ твᲂи́хъ страстᲂте́рпецъ пра́зднꙋюще , тебѐ пᲂе́мъ хрⷭ҇тѐ , вᲂпїю́ще , гдⷭ҇и сла́ва тебѣ̀ .

сла́ва , и҆ ны́нѣ , крⷭ҇тᲂбоⷢ҇ . Свᲂегѡ̀ сн҃а на́ древѣ ви́дѧщи дре́вле , срⷣце свᲂѐ ѻ҆рꙋ́жїемъ печа́ли ᲂу҆ѧзвлѧ́ше пречⷭ҇таѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ пѧто́къ , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆сцѣлѧ́ѧ а҆да́мᲂвꙋ бᲂлѣ́знь , ю҆́же пᲂдъѧ́тъ вра́жїимъ сᲂвѣ́тᲂмъ , вᲂз̾не́ссѧ на́ древо всѣ́хъ цр҃ю , и҆ бᲂлѣ́зни претерпѣ́лъ є҆сѝ , рꙋка́ма и҆ нᲂга́ма пригвᲂжде́нъ . тѣ́мже сла́вимъ твᲂѐ сло́ве дᲂлгᲂтерпѣ́нїе .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Пᲂсредѣ́ тѧ без̾зако́ннᲂю со́нмъ є҆вре́йскїи распѧ̀ , є҆ди́нагѡ закᲂнᲂда́вца и҆ и҆зба́вителѧ , всѧ́кᲂгѡ без̾зако́нїѧ и҆збавлѧ́юща хрⷭ҇тѐ ро́дъ чл҃ческїи , тѣ́мже вᲂспѣва́емъ тѧ̀ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ꙗ҆́звы мно́гихъ мꙋ́къ , ꙗ҆́кѡ кра́снаѧ ᲂу҆дᲂбре́нїѧ нᲂсѧ́ще до́блественѣ страда́льцы , ᲂу҆краше́нїе цр҃ко́внᲂе пᲂзна́ни бы́ша свѣ́тлѡ всегда̀ мᲂлѧ́щесѧ ѡ҆ дш҃а́хъ на́шихъ .

сла́ва . Ѽ трⷪ҇це ст҃а́ѧ , вѣ́рныѧ рабы̀ свᲂѧ̀ и҆зба́ви мꙋ́къ , и҆́же в̾ тѧ̀ вѣ́рᲂвавшїѧ , во є҆ди́нᲂмъ бжⷭ҇твѣ̀ , непреста́ннѡ сла́вимѣ и҆ бл҃гᲂче́стнѡ , и҆ вѣ́чнᲂе свᲂѐ црⷭ҇твїе да́рꙋй .

и҆ ны́нѣ . Не и҆мꙋ́ща видѣ́нїѧ , нижѐ дᲂбро́ты , зрѧ́щи тебѐ хрⷭ҇тѐ пло́тїю вᲂз̾вы́шена на́ древѣ крⷭ҇тнѣмъ всечⷭ҇таѧ дв҃а , взыва́ше бᲂлѣ́зненѣ , ᲂу҆вы̀ мнѣ̀ ка́кѡ тѧ ча́до без̾зако́ннїи ᲂу҆ѧзви́ша .

<< Previous

Contents

Next >>