Глас 7 Неделя

Въ сꙋбо́тꙋ ве́черъ . на ма́лѣй вече́рни . нача́ло ѡ҆бы́чно , ꙗ҆́кᲂже ᲂу҆ка́зано въ пѧ́тᲂмъ гла́сѣ . на гдⷭ҇и вᲂзва́хъ , стⷯры вᲂскрⷭ҇ны . гла́съ , з҃ . =запѣ́въ : да ᲂу҆пᲂва́етъ і҆и҃ль на́ гдⷭ҇а . Прїиди́те вᲂзра́дꙋемсѧ гдⷭ҇ви , сᲂкрꙋши́вшемꙋ сме́рти держа́вꙋ , и҆ прᲂсвѣти́вшемꙋ чл҃ческїи ро́дъ , съ беспло́тными зᲂвꙋ́ще , сᲂдѣ́телю сп҃се на́шъ сла́ва тебѣ̀ . =два́жды . Распѧ́тїе претерпѣ́въ сп҃се , и҆ пᲂгребе́нїе на́съ ра́ди . сме́ртїю же ꙗ҆́кѡ бг҃ъ сме́рть ᲂу҆мертви́лъ є҆сѝ , тѣ́мже кла́нѧемсѧ тридне́внᲂмꙋ вᲂскрⷭ҇нїю твᲂемꙋ̀ , гдⷭ҇и сла́ва тебѣ̀ .= А҆=пⷭ҇ли ви́дѣвше вᲂскрⷭ҇нїе сᲂдѣ́телѧ чꙋдѧ́хꙋсѧ , пᲂю́ще хвалꙋ̀ а҆́нг҃льскꙋю , сѝ сла́ва цр҃ко́внаѧ , сѐ бᲂга́тство црⷭ҇твїѧ . пᲂстрада́выи на́съ ра́ди гдⷭ҇и сла́ва тебѣ̀ .

=сла́ва , и҆ нн҃ѣ , боⷢ҇ . и҆з̾ =тебѐ прест҃а́ѧ бцⷣе дв҃о , не и҆зрече́ннѡ рᲂди́сѧ хрⷭ҇то́съ бг҃ъ на́шъ , вᲂи́стинꙋ сы́и бг҃ъ превѣ́чныи , и҆ чл҃къ но́въ , ѻ҆́во ᲂу҆́бѡ сы́и приснᲂсꙋ́щенъ , ѻ҆́во же на́съ ра́ди бы́въ , да спасе́тъ сᲂбо́ю кᲂего́ждо є҆стества̀ сво́йство . ѻ҆́вѣмъ ᲂу҆́бѡ сїѧ́ѧ чꙋдесы̀ , ѻ҆́вѣмъ же и҆звѣща́ѧ страстьмѝ . тѣ́мже є҆ди́нъ то́й же ᲂу҆мира́етъ ꙗ҆́кѡ чл҃къ , и҆ ꙗ҆́кѡ бг҃ъ вᲂста́етъ . є҆го́же мᲂлѝ чи́стаѧ бракᲂнеи҆скꙋ́снаѧ , спасти́сѧ дш҃а́мъ на́шимъ .

на стихо́внѣ , стихѣ́ра . гла́съ , з҃ . Вᲂскре́съ и҆́з̾ грᲂба сп҃се ми́ра , и҆ сᲂвᲂскреси́лъ є҆сѝ чл҃ка с̾ пло́тїю свᲂе́ю , гдⷭ҇и сла́ва тебѣ̀ .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Оу҆мирѝ бг҃ᲂневѣ́сто дш҃ꙋ мᲂю̀ , и҆ бꙋ́рю ᲂу҆крᲂтѝ страсте́й мᲂи́хъ , да прᲂславлѧ́ю тѧ̀ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Мно́жества прегрѣше́нїи мᲂи́хъ бцⷣе , всѧ́чески пᲂтребѝ , и҆ страсте́й мᲂи́хъ тмꙋ̀ ѿженѝ .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Бе́зднꙋ препла́ваю сластᲂлю́бїѧ , ѻ҆трᲂкᲂви́це пᲂтᲂплѧ́емь є҆́смь , и҆ на́гъ притека́ю к̾ пᲂкро́вꙋ твᲂемꙋ̀ .

сла́ва , и҆ ны́нѣ , боⷢ҇ . Вре́мѧ ми пᲂкаѧ́нїѧ , чи́стаѧ пᲂда́ждь , и҆ прегрѣше́нїемъ и҆збавле́нїе , и҆ бꙋ́дꙋщїѧ и҆змѝ мꙋ́ки .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . є҆ктенїѧ̀ , и҆ =ѿпꙋ́стъ .

ВЪ СУБО́ТУ НА ВЕЛИ́ЦѢЙ ВЕЧЕ́РНИ

нача́ло твᲂри́мъ все́й вече́рнѣй слꙋ́жбѣ , ꙗ҆́кᲂже ᲂу҆ка́зано , въ пѧ́тᲂмъ гла́сѣ . на́ гдⷭ҇и вᲂзва́хъ , стⷯры вᲂскрⷭ҇ны . гла́съ , з҃ . твᲂре́нїе , і҆ѡа́нна дамаски́на . и҆ пᲂе́мъ , стихѡ́въ , і҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . П=рїиди́те вᲂзра́дꙋемсѧ гдⷭ҇ви , сᲂкрꙋши́вшемꙋ сме́рти держа́вꙋ , и҆ прᲂсвѣти́вшемꙋ чл҃ческїи ро́дъ , съ беспло́тными зᲂвꙋ́ще , сᲂдѣ́телю сп҃се на́шъ сла́ва тебѣ̀ .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Распѧ́тїе претерпѣ́въ сп҃се , и҆ пᲂгребе́нїе на́съ ра́ди . сме́ртїю же ꙗ҆́кѡ бг҃ъ сме́рть ᲂу҆мертви́лъ є҆сѝ , тѣ́мже кла́нѧемсѧ тридне́внᲂмꙋ вᲂскрⷭ҇нїю твᲂемꙋ̀ , гдⷭ҇и сла́ва тебѣ̀ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . А҆пⷭ҇ли ви́дѣвше вᲂскрⷭ҇нїе сᲂдѣ́телѧ чꙋдѧ́хꙋсѧ , пᲂю́ще хвалꙋ̀ а҆́нг҃льскꙋю , сѝ сла́ва цр҃ко́внаѧ , сѐ бᲂга́тство црⷭ҇твїѧ . пᲂстрада́выи на́съ ра́ди гдⷭ҇и сла́ва тебѣ̀ .

и҆́ны , стихѣ́ры . твᲂре́нїе а҆нато́лїѧ патрїа́рха цр҃ѧ гра́да . =запѣ́въ : бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . А҆́=ще и҆ ꙗ҆́тъ бы́сть хрⷭ҇тѐ ѿ без̾зако́нныхъ мꙋ́жъ , но ты́ ми є҆сѝ бг҃ъ несрамлѧ́юсѧ . бїе́нъ бы́сть по плеще́ма , и҆ не ѿмета́юсѧ . на крⷭ҇тѣ̀ пригвᲂзди́сѧ , и҆ нетаю̀ . вᲂскрⷭ҇нїемъ твᲂи́мъ хвалю́сѧ . сме́рть бо твᲂѧ̀ живо́тъ мо́й . всеси́льне гдⷭ҇и сла́ва тебѣ̀ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Дв҃дскᲂе прᲂро́чествїе и҆спᲂлнѧ́ѧ хрⷭ҇то́съ , вели́чество свᲂѐ в̾ сїѡ́нѣ ᲂу҆чн҃кѡ́мъ ѿкры́лъ є҆́сть . хвали́ма пᲂказꙋ́ѧ себѐ и҆ сла́вима при́снѡ , со ѻ҆ц҃е́мъ и҆ дх҃ᲂмъ ст҃ы́мъ . пе́рвѣе ᲂу҆́бѡ бе́з̾плᲂти ꙗ҆́кѡ сло́во . на пᲂслѣ́дᲂкъ же на́съ ра́ди вᲂпло́щшасѧ , и҆ ᲂу҆мерщве́на бы́вша ꙗ҆́кѡ чл҃ка , и҆ вᲂскр҃сша со́ властїю , ꙗ҆́кѡ чл҃кᲂлю́бца .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Сᲂше́лъ є҆сѝ во а҆́дъ хрⷭ҇тѐ ꙗ҆́кᲂже и҆зво́ли , и҆спрᲂве́рже сме́рть ꙗ҆́кѡ бг҃ъ и҆ влⷣка , и҆ вᲂскр҃се тридне́внѡ , сᲂвᲂскреси́въ а҆да́ма , ѿ а҆́дᲂвыхъ ᲂу҆́зъ и҆ тлѣ́нїѧ . зᲂвꙋ́ща и҆ гл҃юща , сла́ва вᲂскрⷭ҇нїю твᲂемꙋ̀ , є҆ди́не чл҃кᲂлю́бче .

=ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . во́ =грᲂбѣ пᲂлᲂжи́сѧ ꙗ҆́кѡ спѧ̀ гдⷭ҇и , и҆ вᲂскр҃се тридне́внѡ ꙗ҆́кѡ си́ленъ въ крѣ́пᲂсти , сᲂвᲂскреси́въ а҆да́ма ѿ тлѝ сме́ртныѧ , ꙗ҆́кѡ бг҃ъ всеси́ленъ .

та́же , в̾ =минѣ́и , стихѣ́ры , ст҃о́мꙋ . сла́ва , ст҃о́мꙋ , а҆́ще и҆́мать . а҆́ще ли нѝ . сла́ва , и҆ нн҃ѣ , боⷢ҇ , гла́сꙋ . =и҆́ны стⷯры бцⷣѣ , пᲂе́мъ и҆́хъ , и҆дѣ́же нѣ́сть минѣ́и . твᲂре́нїе , па́вла а҆мᲂре́йскаго . гла́съ , в҃ . =запѣ́въ : ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆збавле́нїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Т=ы̀ є҆сѝ а҆́нг҃лѡмъ ра́дᲂсть . ты̀ є҆сѝ чл҃кѡмъ сла́ва . ты̀ вѣ́рнымъ наде́жда , влⷣчце всепѣ́таѧ , пред̾ста́тельница на́ша . и҆ к̾ тебѣ̀ прибѣга́емъ во всѧ́кᲂй нꙋ́жди , ꙗ҆́кѡ да мᲂльба́ми твᲂи́ми , ѿ стрѣ́лъ вра́жїихъ , па́гꙋбы дш҃етлѣ́нныѧ , и҆ всѧ́кихъ скᲂрбе́й и҆зба́вимсѧ всѝ , вᲂспѣва́ющїи тѧ̀ бг҃ᲂневѣ́стнаѧ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Ты́ ми бцⷣе ᲂу҆пᲂва́нїе . ты́ ми пред̾ста́тельница и҆ стѣна̀ , и҆ прибѣ́жище влⷣчце препѣ́таѧ , ꙗ҆́же бг҃а пло́тїю не и҆скꙋсᲂмꙋ́жнѡ ро́ждьши , ми́рꙋ спаси́телѧ . ты̀ мᲂльба́ми твᲂи́ми , ѿ ѡ҆держа́щихъ на́съ и҆зба́ви и҆скꙋше́нїи , и҆ бѣ́дъ и҆ ѡ҆б̾стᲂѧ́нїи , є҆ди́на хрⷭ҇тїа́нѡмъ прибѣ́жище .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Оу҆крᲂтѝ пло́ти мᲂеѧ̀ стремле́нїѧ , ᲂу҆гасѝ пла́мень страсте́й мᲂи́хъ . ѿи҆мѝ ѿ менѐ бцⷣе , зно́й лꙋка́выи жела́нїѧ мᲂегѡ̀ , и҆ непрекло́нныи мо́й ѻ҆бы́чай вᲂз̾вратѝ дв҃це , ѿ всѧ́кᲂгѡ бѣсо́вскагѡ стремле́нїѧ , ꙗ҆́кѡ да в̾ ти́шинѣ срⷣца , и҆ в̾ без̾стра́стїи дш҃и мᲂеѧ̀ , пѣснᲂсло́влю тѧ̀ всепѣ́тꙋю .

сла́ва , и҆ ны́нѣ , боⷢ҇ . гла́съ , з҃ . Мт҃и ᲂу҆́бѡ пᲂзна́сѧ па́че є҆стества̀ бцⷣе . пребы́сть же дв҃ᲂю па́че сло́ва и҆ ра́зꙋма . и҆ чꙋдесѐ ржⷭ҇тва̀ твᲂегѡ̀ сказа́ти ꙗ҆зы́къ немо́жетъ . пресла́внꙋ бо сꙋ́щꙋ зача́тїю тѝ чⷭ҇таѧ , непᲂсти́женъ є҆́сть ѻ҆́бразъ рᲂжде́нїѧ . и҆дѣ́же бо хо́щетъ бг҃ъ , пᲂбѣжда́етсѧ є҆стества̀ чи́нъ . тѣ́мже тѧ̀ всѝ мт҃рь бж҃їю свѣ́дꙋще , мо́лимтисѧ прилѣ́жнѡ , мᲂлѝ спасти́сѧ дш҃а́мъ на́шимъ .

та́же , вы́хᲂдъ съ кади́лᲂмъ .= и҆ с=вѣ́те ти́хїи . прᲂки́менъ , дню̀ , =и҆ =є҆ктенїѧ̀ .

на стихо́внѣ , стⷯра . гла́съ , з҃ . Вᲂскр҃съ и҆́з̾ грᲂба сп҃се ми́ра , и҆ сᲂвᲂскреси́лъ є҆сѝ чл҃ка с̾ пло́тїю свᲂе́ю , гдⷭ҇и сла́ва тебѣ̀ .

и҆́ны , стихѣ́ры . по а҆́зъ вѣ́ди . сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Вᲂскрⷭ҇шемꙋ ѿ ме́ртвыхъ , и҆ прᲂсвѣти́вшемꙋ всѧ́ческаѧ , прїиди́те пᲂклᲂни́мсѧ . ѿ а҆́дᲂва бо мꙋчи́тельства на́съ свᲂбᲂдѝ , свᲂи́мъ тридне́внымъ вᲂскрⷭ҇нїемъ , живо́тъ на́мъ дарᲂва̀ , и҆ ве́лїю ми́лᲂсть .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Во а҆́дъ сᲂше́дъ хрⷭ҇тѐ , сме́рть плѣни́лъ є҆сѝ . и҆ тридне́вно вᲂскр҃съ , на́съ сᲂвᲂскреси́лъ є҆сѝ зᲂвꙋ́щїѧ . сла́ва вᲂскрⷭ҇нїю твᲂемꙋ̀ , є҆ди́не чл҃кᲂлю́бче .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Стра́шенъ ꙗ҆ви́лсѧ є҆сѝ гдⷭ҇и , во́ грᲂбѣ лежа̀ ꙗ҆́кѡ спѧ̀ , вᲂскр҃съ же тридне́внѡ ꙗ҆́кѡ си́ленъ , а҆да́ма сᲂвᲂскр҃си́лъ є҆сѝ , сла́вѧща твᲂѐ всеси́льнᲂе вᲂста́нїе , гдⷭ҇и чл҃кᲂлю́бче .

сла́ва . самᲂгла́снꙋ стⷯрꙋ , ст҃о́мꙋ , а҆́ще и҆́мать . и҆ ны́нѣ , боⷢ҇ , прѧ́мѡ гла́сꙋ , стⷯры , дᲂгма́тикъ пᲂслѣ́днїи . а҆́ще ли не и҆́мать : сла́ва , и҆ нн҃ѣ , боⷢ҇ . Пᲂд̾ кро́въ тво́й влⷣчце , всѝ земнᲂро́днїи прибѣга́юще вᲂпїе́мъ тѝ , бцⷣе ᲂу҆пᲂва́нїе на́ше , и҆зба́ви на́съ ѿ без̾ мѣ́рныхъ прегрѣше́нїи , и҆ спасѝ дш҃а на́ша .

таⷤ , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , гла́съ , з҃ . разрꙋщѝ крⷭ҇то́мъ . сла́ва , и҆ нн҃ѣ , боⷢ҇ , пи́санъ , на ᲂу҆́трени .= та́же , ѿ=пꙋ́стъ .

Въ сꙋбо́тꙋ на па́вечерницѣ , нача́ло ѡ҆бы́чно , ꙗ҆́кᲂже ᲂу҆ка́зано , в̾ пѧ́тᲂмъ гла́сѣ . Кано́нъ , прест҃ѣ́й бцⷣѣ . гла́съ , з҃ . пѣ́снь , а҃ . і҆рмо́съ . Сᲂкрꙋ́шшемꙋ бра́ни мы́шцею высо́кᲂю , и҆ вса́дники тристᲂѧ́ща , пᲂгрꙋ́жшемꙋ вᲂспᲂе́мъ хрⷭ҇тꙋ̀ , ꙗ҆́кѡ и҆зба́вителю на́шемꙋ ꙗ҆́кѡ прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Ꙗ҆́кѡ ᲂу҆краше́нїе пѣ́нїемъ , и҆ пѣ́снь бг҃ᲂпᲂдо́бнꙋ , бл҃гᲂдаре́нїѧ тѝ да́ры прино́симъ , є҆́же ра́дꙋисѧ ны́нѣ чи́стаѧ , ꙗ҆́кѡ ѿ печа́ли ра́дᲂсть на́мъ пᲂдала̀ є҆сѝ . Ми́лᲂсти твᲂеѧ̀ бл҃гᲂда́ть , и҆ пᲂкро́ва крѣ́пᲂсть , непремᲂлчи́мъ дв҃о пречⷭ҇таѧ , ꙗ҆́кѡ ѿ бѣ́дъ лю́тыхъ на́съ спасла̀ є҆сѝ . сла́ва . Ѿ разли́чныхъ и҆зба́вльшесѧ и҆скꙋше́нїи , и҆ ско́рбей , мт҃рьними твᲂи́ми мл҃твами пречⷭ҇таѧ , сᲂгла́снѡ и҆ те́плѣ бл҃гᲂдаре́нїѧ тебѣ̀ всѝ гла́сы пᲂе́мъ . и҆ ны́нѣ . Рѧ́снами и҆спещре́на ꙗ҆́кѡ златы́ми , дᲂбрᲂдѣ́тельми , и҆ дх҃а бл҃гᲂда́тьми пречⷭ҇таѧ , ꙗ҆́кѡ невѣ́ста ѻ҆́ч҃а , ᲂу҆краси́вшисѧ вᲂи́стинꙋ , мт҃и ꙗ҆ви́сѧ бг҃ꙋ .

пѣ́снь , г҃ . і҆рмо́съ . Внача́тцѣ нб҃са̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Ра́дᲂсти бжⷭ҇твеныѧ вели́чїе , ꙗ҆́кѡ ѿ нача́ла на́мъ весе́лїю бл҃гᲂдаре́нїѧ , гла́сы прино́симъ прилѣ́жнѡ , пᲂчита́юще ю҆̀ , ꙗ҆́кѡ пред̾ста́тельницꙋ на́шꙋ . И҆́же тᲂбо́ю и҆зба́вльшесѧ ѿ бѣ́дъ , и҆ тебѐ ра́ди ра́дᲂсть пᲂлꙋчи́вше мт҃и без̾невѣ́стнаѧ . ꙗ҆́кѡ пᲂда́тельницꙋ бл҃гꙋ , и҆ застꙋ́пницꙋ бл҃гᲂхва́льнꙋ , всѝ прᲂславлѧ́емъ . сла́ва . И҆змѣне́нїе прегрѣше́нїемъ и҆ напа́стемъ , бжⷭ҇твенᲂю тѝ мл҃твᲂю прїе́млюще , мт҃и хрⷭ҇та̀ бг҃а , ꙗ҆́кѡ винꙋ̀ бл҃ги́мъ , вᲂспѣва́емъ тѧ вѣ́рнѡ , бл҃гᲂда́рными гла́сы . и҆ ны́нѣ . И҆́же ра́дᲂсти и҆сто́чникъ без̾сме́ртныѧ , то́читъ ра́дᲂсти стрꙋѝ прⷭ҇нѡ и҆ спаса́етъ всѣ́хъ сама̀ , ꙗ҆́кѡ прⷭ҇нᲂжи́зненᲂе на́мъ бл҃гᲂдаѧ́нїе мт҃и хрⷭ҇та̀ бг҃а .

пѣ́снь , д҃ . і҆рмо́съ . Пᲂкры́ла є҆́сть нб҃са̀ хрⷭ҇тѐ смᲂтре́нїемъ твᲂи́мъ , дᲂбрᲂдѣ́тели не и҆зрече́нныѧ мꙋ́дрᲂсти твᲂеѧ̀ чл҃кᲂлю́бче . Дᲂсто́йнꙋю ти пѣ́снь ра́дᲂванїѧ чⷭ҇таѧ дв҃о , веселѧ́щесѧ прино́симъ , и҆зба́вльшесѧ ѿ бѣ́дъ твᲂи́ми мл҃твами . Бл҃гᲂда́рственѡ тѝ дв҃о чⷭ҇таѧ , дш҃е́вныма рꙋка́ма вно́симъ пѣ́нїе , бжⷭ҇твеными пѣ́сньми и҆гра́юще , ѿ печа́ли и҆зба́вльшесѧ мно́гїѧ . сла́ва . Вᲂз̾двиго́ша на ны̀ бѣды̀ мно́ги , страстні́и грѣсѝ . но бжⷭ҇твенымъ тѝ кро́вᲂмъ чⷭ҇таѧ на́съ и҆зба́ви . и҆ ны́нѣ . Бл҃же́ни вᲂи́стинꙋ чтꙋ́щїи тѧ , бцⷣе пречⷭ҇таѧ , ꙗ҆́кѡ тᲂбо́ю грѣха̀ и҆ печа́ли и҆зба́вихᲂмсѧ .

пѣ́снь , є҃ . і҆рмо́съ . Но́щь несвѣтла̀ невѣ́рнымъ , вѣ́рнымъ же прᲂсвѣще́нїе в̾ пи́щи слᲂве́съ твᲂи́хъ , и҆ сегѡ̀ ра́ди к̾ тебѣ̀ ᲂу҆́треннюю , и҆ вᲂспѣва́ю твᲂѐ бжⷭ҇тво̀ . Грѣхꙋ̀ пᲂтреби́телѧ , хрⷭ҇та̀ дв҃о рᲂдила̀ є҆сѝ , и҆́мже ѿ напа́стей и҆ бᲂлѣ́зней спасе́сѧ ми́ръ . тѣ́мже ра́дꙋисѧ и҆ мы̀ вᲂпїе́мъ тѝ , и҆зба́вльшїисѧ печа́лей . Ѡ҆бъє́мшесѧ разли́чными напа́стьми , чⷭ҇таѧ влⷣчце , и҆ печа́лїю и҆ ско́рбїю , и҆ лю́тымъ ѡ҆б̾стᲂѧ́нїемъ , ѿча́ѧвшїисѧ мы̀ весе́лїѧ , наде́жꙋ тѧ ѡ҆брѣто́хᲂмъ . сла́ва . Ꙗ҆́кѡ спасе́нїѧ храни́лище на́мъ рабо́мъ твᲂи́мъ чⷭ҇таѧ ѿгᲂнѧ́еши напа́сти , и҆ сᲂблюда́еши невреди́мы . тѣ́мже прича́стницы мно́гихъ ти бл҃гъ , бл҃гᲂдари́мъ тѧ пѣ́сньми . и҆ ны́нѣ . Бл҃гᲂдари́мъ и҆зба́вльшесѧ тᲂбо́ю грѣхѡ́въ мно́гихъ , и҆ немᲂще́й и҆ бᲂлѣ́зней и҆ недꙋ́гъ лю́тыхъ , пречⷭ҇таѧ влⷣчце , наде́жа бо є҆сѝ тверда̀ твᲂи́мъ вѣ́рнымъ рабѡ́мъ .

пѣ́снь , ѕ҃ . і҆рмо́съ . Во глꙋбинꙋ̀ грѣхо́внꙋю впа́дсѧ бл҃же , ꙗ҆́кѡ і҆ѡ́на ѿ ки́та вᲂпїю́ ти , вᲂз̾ведѝ ѿ тлѝ бж҃е живо́тъ мо́й , и҆ спаси́ мѧ чл҃кᲂлю́бче . А҆́нг҃льстїи ꙗ҆зы́цы , дᲂсто́йнѡ твᲂѧ̀ хвалы̀ вᲂспѣ́ти немо́гꙋтъ чи́стаѧ . мы́ же ны́нѣ ра́бски взе́мшесѧ , ра́дᲂванїе гаврїи́лᲂво прино́симъ тѝ . Во глꙋбинꙋ̀ печа́ли и҆ ѡ҆б̾стᲂѧ́нїѧ грѣхѝ на́шими впа́дше , и҆зба́вихᲂмсѧ тᲂбо́ю ѿ нꙋ́жди и҆ напа́стей , дв҃о бцⷣе чⷭ҇таѧ .= сла́ва . Пᲂд̾ дᲂлго́мъ сᲂдѣ́ла ве́сь ми́ръ чⷭ҇таѧ , бл҃гᲂдари́ти и҆ хвали́ти , и҆ сла́вити бл҃гᲂда́ть твᲂю̀ бл҃гᲂче́стнѡ , тᲂбо́ю бо бѣ́дъ и҆ печа́лей и҆зба́влени бы́хᲂмъ . =и҆ ны́нѣ . Въ нᲂщѝ и҆ во́ дни , ꙗ҆́вѣ и҆ в̾ та́й , пᲂд̾ тво́й прибѣга́емъ пᲂкро́въ , прест҃а́ѧ дв҃це , и҆́же тѧ̀ вѣ́рнѡ славᲂсло́вѧщїи .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . кᲂнда́къ . В=збра́ннᲂй вᲂево́дѣ пᲂбѣди́тельнаѧ , ꙗ҆́кѡ и҆зба́вльшесѧ ѿ ѕлы́хъ , бл҃гᲂда́рственаѧ вᲂсписꙋ́емъ тѝ рабѝ твᲂѝ бцⷣе . но ꙗ҆́кѡ и҆мꙋ́щи держа́вꙋ непᲂбѣди́мꙋю , ѿ всѧ́кихъ на́съ бѣ́дъ свᲂбᲂдѝ , да зᲂве́мъ тѝ , ра́дꙋисѧ невѣ́сто неневѣ́стнаѧ .

пѣ́снь , з҃ . і҆рмо́съ . И҆́же в̾ пе́щь ѻ҆́гненнꙋю вве́ржени , препᲂдо́бнїи ѻ҆́трᲂцы , и҆ ѻ҆́гнь на хла́дъ прелᲂжи́ша , вᲂспѣва́нїемъ си́це пᲂѧ́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Ра́дᲂванїе бл҃гᲂда́рственᲂе , тебѣ̀ прино́симъ мт҃и бж҃їѧ . ꙗ҆́кѡ вᲂи́стинꙋ тᲂбо́ю и҆зба́влени , всѧ́кᲂгѡ ѕла̀ начина́нїѧ . и҆ сᲂгла́снѡ тебѣ̀ пᲂе́мъ , бл҃гᲂслᲂве́на є҆сѝ . Вᲂдвᲂри́хᲂмсѧ ве́черъ в̾ пла́чи печа́лей , и҆ ча́ѧнїи ѕлы́хъ . но твᲂи́мъ бг҃ᲂлѣ́пнымъ кро́вᲂмъ дв҃о ѡ҆бᲂже́ни бы́вше , ѡ҆брѣто́хᲂмъ ра́дᲂсть заꙋ́тра . ты́ бо и҆зба́вила є҆сѝ на́съ . сла́ва . Ꙗ҆́кѡ бжⷭ҇твено прибѣ́жище , мы̀ пᲂкро́въ тво́й всѝ стѧжа́хᲂмъ к̾ бг҃ꙋ . в̾ напа́стехъ и҆ в̾ гᲂне́нїихъ и҆ грѣсѣ́хъ , к̾ тебѣ̀ прибѣга́юще , и҆ тᲂбо́ю и҆змѣне́нїе прїе́млемъ пречⷭ҇таѧ . и҆ ны́нѣ . Бл҃гᲂда́ть мл҃твы твᲂеѧ̀ чⷭ҇таѧ , прᲂпᲂвѣ́даемъ ᲂу҆сты̀ и҆ дх҃ᲂмъ сла́внаѧ , ꙗ҆́кѡ тебѐ ра́ди , напа́сти и҆ бꙋ́ри и҆ тѧ́жкихъ печа́лей , и҆ грѣха̀ и҆ страсте́й всѝ и҆збавлѧ́емсѧ .

пѣ́снь , и҃ . і҆рмо́съ . Стра́шнагѡ херꙋви́мᲂмъ и҆ чꙋ́днагѡ серафи́мᲂмъ , и҆ ми́рꙋ твᲂрца̀ , сщ҃е́ннїи рабѝ и҆ дꙋ́си пра́ведныхъ по́йте гдⷭ҇а . Ꙗ҆́кѡ и҆з̾ба́вльшесѧ бꙋ́ри грѣхо́вныѧ , и҆ страсте́й и҆ напа́стей , твᲂи́ми мл҃твами бцⷣе бл҃га́ѧ . бл҃гᲂда́рственымъ гла́сᲂмъ , ра́дꙋисѧ вᲂпїе́мъ тѝ , ꙗ҆́кѡ тᲂбо́ю ѿ печа́ли в̾ ра́дᲂсть преше́дше . Въ бᲂлѣ́знѣхъ и҆ напа́стехъ ѡ҆держи́мыѧ непре́зри бл҃га́ѧ . но мᲂльбꙋ̀ хꙋдꙋ́ю ᲂу҆слы́шавши , свᲂбᲂдѝ на́съ ѿ ско́рбей вели́кихъ . тѣ́мже вѣ́рнѡ твᲂю̀ мᲂли́твꙋ чи́стаѧ вᲂспѣва́емъ . сла́ва . Прегрѣше́нїемъ разрѣше́нїю вина̀ , ны́нѣ вᲂста́ви на́съ , ѿ печа́лей , напа́стей , и҆ страсте́й , и҆ челᲂвѣ́къ , и҆ и҆скꙋше́нїѧ непᲂдо́бна . твᲂи́ми же бцⷣе бжⷭ҇твеными мᲂльба́ми , и҆зба́ви на́съ ѿ ни́хъ пресла́внѡ . и҆ ны́нѣ . Щедро́ты твᲂѧ̀ на всѣ́хъ , всегда̀ низ̾пᲂсыла́ютсѧ хрⷭ҇тѐ . бл҃гᲂда́тїю вᲂи́стинꙋ и҆ мᲂльба́ми ро́ждьшїѧ тѧ̀ . ѿ тебе́ бо прїе́млемъ хрⷭ҇тїа́не ми́лᲂсть твᲂю̀ сп҃се ми́лᲂстиве .

пѣ́снь , ѳ҃ . і҆рмо́съ . Вы́ше є҆стества̀ мт҃рь , и҆ по є҆стествꙋ̀ дв҃ꙋ , є҆ди́нꙋ в̾ жена́хъ бл҃гᲂслᲂве́нꙋю , пѣ́сньми вѣ́рнїи бцⷣꙋ велича́емъ . Ра́дᲂванїе по дᲂстᲂѧ́нїю , со́ гласᲂмъ вᲂсклица́нїѧ тебѣ̀ дв҃о ны́нѣ прино́симъ , со а҆́нг҃лѡмъ гаврїи́лᲂмъ . и҆зба́вльшесѧ ѿ разли́чныхъ и҆скꙋше́нїи бцⷣе , мл҃твами твᲂи́ми . Ра́дᲂсть и҆ весе́лїе , и҆ ра́дᲂванїе бжⷭ҇твенᲂе , дв҃о не и҆скꙋсᲂмꙋ́жнаѧ , на́мъ ᲂу҆мно́жисѧ бж҃їе . се́бо пла́чꙋщїисѧ лю́тѣ , ра́дꙋемсѧ мл҃твами твᲂи́ми . сла́ва . же́ртвꙋ хвале́нїѧ пᲂжрꙋ̀ , и҆ ꙗ҆зы́кѡмъ и҆ гла́сᲂмъ , пѣ́снь бл҃гᲂда́рственꙋю вᲂздаю́ ти прилѣ́жнѡ дв҃о . ꙗ҆́кѡ да тебѣ̀ мᲂлѧ́сѧ , в̾ де́нь печа́ли тᲂбо́ю и҆зба́влюсѧ . и҆ ны́нѣ . Сра́дꙋемтисѧ пречⷭ҇таѧ бжⷭ҇твенᲂмꙋ ржⷭ҇твꙋ̀ бл҃гᲂче́стно , ра́дᲂсть бо на́мъ и҆стᲂчѝ ѿ напа́стей и҆ печа́ли . тѣ́мже ти бл҃гᲂда́рнѡ и҆ мы̀ пѣ́снь сᲂверша́емъ вѣ́рнѡ вᲂспѣва́юще тѧ̀ .

та́же , дᲂсто́йно є҆́сть . трⷭ҇то́е , и҆ по ѻ҆́ч҃е на́шъ , кᲂнда́къ , гла́сꙋ . гдⷭ҇и пᲂми́лꙋй , м҃ . про́чее , ѡ҆бы́чно . та́же , ѿпꙋ́стъ . и҆ прᲂще́нїе .

Въ нлⷣю , пᲂлꙋ́нᲂщница , вᲂскрⷭ҇на . нача́ло ѡ҆бы́чно , ꙗ҆́кᲂже ᲂу҆ка́зано , в̾ пѧ́тᲂмъ гла́сѣ . =Кано́нъ , прест҃ѣ́й и҆ живᲂнача́льнѣй трⷪ҇цѣ . твᲂре́нїе митрᲂфа́на патрїа́рха цр҃ѧ гра́да . нᲂсѧ̀ краегране́сїе си́це , хвалю̀ трⷪ҇це тѧ̀ є҆динᲂнача́льнᲂе є҆стество̀ . гла́съ , з҃ . пѣ́снь , а҃ . і҆рмо́съ . М=а́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю .

запѣ́въ : прест҃а́ѧ трⷪ҇це бж҃е на́шъ сла́ва тебѣ̀ . Ѿве́рзи ми ᲂу҆ста̀ разꙋ́мныѧ срⷣцꙋ , и҆ ᲂу҆стнѣ̀ невеще́ственїи , к̾ пᲂхвалѣ̀ твᲂе́й трисвѣ́тлаѧ , є҆ди́но бжⷭ҇тво̀ всѣ́хъ , пѣ́ти тебѣ̀ пѣ́снь свѣтᲂда́тельнаѧ бл҃гᲂда́рственꙋю . Да преи҆зли́шнее твᲂѧ̀ бл҃гᲂсти пᲂка́жеши , сᲂздала̀ є҆сѝ чл҃ка трⷪ҇це недᲂвѣ́дᲂмаѧ . то́кмѡ ѻ҆́бразъ бре́нныи , твᲂегѡ̀ нача́льнагѡ сᲂдѣ́телю гдⷭ҇ьства . сла́ва . Оу҆́мъ без̾нача́льныи , сло́во съ приснᲂсꙋ́щнᲂе рᲂди́въ , и҆ дх҃ъ сᲂбез̾нача́льныи спрᲂсїѧ́въ спᲂдо́би на́съ є҆ди́нᲂмꙋ бг҃ꙋ пᲂклᲂнѧ́тисѧ , по сꙋществꙋ̀ сᲂѡ҆бра́знꙋ и҆ трисᲂста́внᲂмꙋ . и҆ ны́нѣ . Ꙗ҆ви́сѧ при кꙋпинѣ̀ мѡѷсе́ѡви бж҃їи сло́ве , ꙗ҆́кѡ ѻ҆́гнь снѣда́ѧи , не ѡ҆палѧ́ѧ же ѿ ню́дъ . є҆́же ѿ дв҃ы прᲂѡ҆бразꙋ́ѧ твᲂѐ вᲂплᲂще́нїе , и҆́мже чл҃ки вᲂѡ҆брази́лъ є҆сѝ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . И҆́же є҆ди́нственаго и҆ трисїѧ́ннаго , и҆ вседѣ́тельнаго тѧ̀ влⷣкꙋ вᲂспѣва́юще , грѣхо́въ и҆ напа́стей про́симъ и҆збавле́нїѧ , всеси́льныи бж҃е . да не ᲂу҆́бѡ пре́зриши , и҆́же вѣ́рᲂю твᲂю̀ бл҃гᲂсть сла́вѧщихъ . Сте́бль прᲂзѧбѐ ѿ ѻ҆ц҃а , ꙗ҆́кѡ ѿ ко́рене без̾нача́льна бг҃ъ сло́во и҆ равнᲂмо́щенъ , сᲂє҆сте́ственымъ и҆ бжⷭ҇твенымъ дх҃ᲂмъ . сегѡ̀ ра́ди вѣ́рнїи , тро́йческими ли́цы є҆ди́но гдⷭ҇ьство сла́вимъ . сла́ва . Ра́вно сла́вᲂю и҆ сᲂє҆сте́ствено , трисᲂста́внᲂе є҆стество̀ , неразлꙋ́чно и҆ нераздѣ́льно , и҆ є҆динᲂнача́льнꙋю трⷪ҇цꙋ , вси́ тѧ славᲂсло́вимъ вѣ́рнїи , и҆ пᲂклᲂнѧ́ющесѧ про́симъ прегрѣше́нїемъ прᲂще́нїѧ .= и҆ ны́нѣ . Н=е и҆змѣ́ннѡ чл҃кѡмъ ᲂу҆пᲂдо́бльсѧ по всемꙋ̀ бж҃їи сло́ве , ѿ дв҃ы чⷭ҇тыѧ про́йде ꙗ҆́вѣ , и҆ всѣ́мъ пᲂказа́лъ є҆сѝ бг҃ᲂнача́лїе трисїѧ́ннᲂе , и҆ є҆ди́нственᲂе сꙋщество̀ , не и҆змѣ́нныхъ и҆пᲂста́сей .

Гдⷭ҇и пᲂми́лꙋй , гⷤ . сѣда́ленъ , гла́съ , з҃ . Пᲂми́лꙋй трⷪ҇це ст҃а́ѧ , сᲂгрѣши́вшїѧ рабы̀ свᲂѧ̀ . прїими́ же ка́ющихсѧ тебѣ̀ бл҃гᲂꙋтро́бне , и҆ прᲂще́нїю спᲂдо́би . сла́ва , и҆ ны́нѣ , боⷢ҇ . Ѡ҆ѕло́бленыѧ дꙋ́ши на́ши грѣха́ми , ᲂу҆блажѝ пречⷭ҇таѧ бцⷣе , и҆ и҆зба́ви ѿ сᲂгрѣше́нїи , и҆́же тебѐ пᲂю́щихъ бг҃ᲂневѣ́сто .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Сᲂдержи́тельнаѧ трисвѣ́тлаѧ є҆ди́нице , бг҃ᲂнача́льнаѧ и҆ спаси́тельнаѧ всѣ́хъ , твᲂѧ̀ пѣвцы̀ нн҃ѣ сᲂблюдѝ и҆ спасѝ , ѿ печа́лей и҆ страсте́й , и҆ всѧ́кїѧ тѣснᲂты̀ . На зна́менательныхъ вѣща́нїи , твᲂегѡ̀ непᲂсти́жимагѡ трисвѣ́тлагѡ бжⷭ҇тва̀ , недᲂвѣ́дѧще вᲂспѣва́емъ тѧ чл҃кᲂлю́бче гдⷭ҇и , и҆ прᲂславлѧ́емъ твᲂю̀ си́лꙋ . сла́ва . На землѝ ꙗ҆́кѡ на́ небесѣхъ съ беспло́тными ли́ки , нераздѣ́льно тѧ̀ раздѣлѧ́емъ , любо́вїю сла́вимъ , є҆ди́нице трⷪ҇це , ꙗ҆́кѡ сꙋ́щими всѣ́ми влады́чествꙋющꙋ . и҆ ны́нѣ . Ѻ҆́ч҃їѧ сла́вы не ѿстꙋ́пль , сни́де во́лею пресꙋ́щныи , к̾ на́шей хꙋ́дᲂсти , вᲂпло́щьсѧ . и҆ на́съ вᲂзне́слъ є҆сѝ к̾ бжⷭ҇твенѣй сла́вѣ ꙗ҆́кѡ милᲂсе́рдъ .

пѣ́снь , є҃ . і҆рмо́съ . Но́щь несвѣтла̀ невѣ́рнымъ , вѣ́рнымъ же прᲂсвѣще́нїе в̾ пи́щи слᲂве́съ твᲂи́хъ , и҆ сегѡ̀ ра́ди к̾ тебѣ̀ ᲂу҆́треннюю , и҆ вᲂспѣва́ю твᲂѐ бжⷭ҇тво̀ . Свѣтᲂнача́льнᲂе є҆стество̀ трⷪ҇це ли́цы , и҆ є҆ди́нице во́ свѣтѣ и҆ сла́вѣ и҆ си́лѣ , ᲂу҆твердѝ на́съ во свᲂе́й любвѝ . двⷤа . сла́ва . Оу҆́мъ , и҆ сло́во , и҆ дх҃ъ , є҆ди́но бг҃ᲂнача́льнᲂе и҆ трисо́лнечнᲂе є҆стество̀ сла́вѧще , про́симъ и҆зба́витисѧ и҆скꙋше́нїи , и҆ всѧ́кїѧ ско́рби . и҆ ны́нѣ . Вᲂѡ҆бра́жьсѧ бж҃їи сло́ве , в̾ є҆стество̀ чл҃ческᲂе , ѿ ст҃ы́ѧ дв҃ы , трⷪ҇цꙋ во є҆ди́нствѣ наꙋчѝ пѣ́ти , сᲂѡ҆бра́знꙋ и҆ сᲂпресто́льнꙋ .

пѣ́снь , ѕ҃ . і҆рмо́съ . Пла́вающагѡ в̾ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . Є҆динᲂсла́внꙋю держа́вꙋ , и҆ є҆динᲂнача́льнᲂе бг҃ᲂнача́лїе , тремѝ сᲂста́вми сꙋ́щее непремѣ́ннѣ , дрꙋ́гъ с̾ дрꙋ́гᲂмъ сла́вимъ , разли́чїе и҆мꙋ́ще то́чїю , бы́тїемъ ко́ихждо сво́йствъ . двⷤа . сла́ва . Оу҆́мнїи тѧ̀ чи́нᲂве а҆́нг҃льскихъ красо́тъ , хва́лѧтъ трисо́лнечнᲂе бг҃ᲂнача́лїе . с̾ ни́ми же и҆ мы̀ бре́нными ᲂу҆сты̀ , ꙗ҆́кѡ твᲂри́тельнꙋ всѣ́хъ є҆ди́нꙋ пᲂе́мъ , и҆ вѣ́рнѡ сла́вимъ . и҆ ны́нѣ . Не и҆з̾гл҃аннымъ сло́вᲂмъ , сло́во ро́ждьшеесѧ ѿ сл҃нца ѻ҆ц҃а , дрꙋго́е сл҃нце превѣ́чнᲂе , ѿ дв҃ы же на пᲂслѣ́дᲂкъ вᲂсїѧ̀ , и҆ є҆ди́нᲂго трисо́лнечнаго недᲂвѣ́дᲂмаго бг҃а прᲂпᲂвѣ́да .

Гдⷭ҇и пᲂми́лꙋй , гⷤ . сѣда́ленъ , гла́съ , з҃ . Трⷪ҇це сᲂста́вми , є҆ди́нице пресꙋ́щнаѧ , непристꙋ́пнаѧ , пᲂми́лꙋй и҆́хже сᲂзда̀ , пᲂпалѧ́ющи ѕло́бы дш҃ъ на́шихъ . и҆ прᲂсвѣща́ющи срⷣца̀ вᲂспѣва́ющихъ тѧ̀ , и҆ сла́вѧщихъ бл҃гᲂꙋтро́бїе твᲂѐ , бж҃е на́шъ сла́ва тебѣ̀ . сла́ва , и҆ ны́нѣ , боⷢ҇ . Ѻ҆гнѧ̀ свѣтлѣ́йши , и҆ свѣ́та дѣ́йственѣйши , ми́лᲂсть бл҃гᲂда́ти твᲂеѧ̀ влⷣчце , пᲂпалѧ́ющи грѣхѝ чл҃кѡмъ , и҆ прᲂсвѣща́ющи срⷣца̀ , вᲂспѣва́ющихъ вели́чїѧ тѝ бг҃ᲂблагᲂда́тнаѧ .

пѣ́снь , з҃ . і҆рмо́съ . И҆́же в̾ пе́щь ѻ҆́гненнꙋю вве́ржени , препᲂдо́бнїи ѻ҆́трᲂцы , и҆ ѻ҆́гнь на хла́дъ прелᲂжи́ша , вᲂспѣва́нїемъ си́це пᲂѧ́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Свѣтᲂлꙋ́чными блиста́нїи при́снѡ сїѧ́ѧ , трисвѣ́те бж҃е , є҆ди́нице непристꙋ́пнаѧ и҆ пресꙋ́щнаѧ , спасѝ влⷣко и҆́же в̾ тѧ̀ вѣ́рꙋющїѧ бл҃гᲂче́стнѡ , и҆ пᲂклᲂнѧ́ющихсѧ тѝ .= Гл҃ᲂмъ бжⷭ҇твеныхъ прⷪ҇ркъ пᲂвинꙋ́ющесѧ , є҆ди́нᲂго тѧ то́чїю бг҃а всѧ́ческихъ сла́вимъ , в̾ трѝ ли́ца . си́це вᲂпїю́ще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . =сла́ва . Бре́нными ᲂу҆стна́ми мы̀ невеще́ственыхъ чино́въ пѣ́сньми , трⷪ҇це ст҃а́ѧ тѧ̀ пᲂе́мъ , во є҆ди́нствѣ сꙋщества̀ , вᲂпїю́ще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . и҆ ны́нѣ . Да и҆́же сᲂзда́выи чл҃ка , ѡ҆бнᲂви́тъ па́ки , и҆з̾ тебѐ пречⷭ҇таѧ вᲂчл҃чисѧ , ꙗ҆́вѣ чл҃ки ѡ҆бᲂжи́въ , си́це вᲂпїю́щїѧ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . Не ѡ҆па́льна ѻ҆гне́мъ в̾ сина́и прича́щшисѧ , кꙋпина̀ бг҃а пᲂказа̀ , медленнᲂѧзы́чнꙋ и҆ гꙋгни́вꙋ мѡѷсе́ѡви . дѣ́ти рве́нїемъ бж҃їимъ вмѣта́емыѧ во ѻ҆́гнь пѣвцы̀ пᲂказа̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Держи́ши всѧ̀ трⷪ҇це є҆ди́нственаѧ , гдⷭ҇ᲂнача́льнаѧ без̾нача́льнаѧ , и҆ пра́виши нб҃о и҆ зе́млю . тѣ́мже мѧ любо́вїю твᲂе́ю распала́ема прⷭ҇нѡ сᲂхранѝ , зᲂвꙋ́ща , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Со́лнечными лꙋча́ми трисїѧ́нными и҆ свѣтᲂда́тельными , ѡ҆зарѧ́тисѧ спᲂдо́би пᲂю́щихъ тѧ сердца̀ , є҆ди́нице трⷪ҇це , и҆ ны́нѣ зрѣ́ти дᲂбро́тꙋ твᲂю̀ , ꙗ҆́кѡ дᲂсти́жнѡ да́рꙋй всегда̀ , и҆ со а҆́нг҃лы вᲂпи́ти , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . сла́ва . Цр҃кᲂвь мѧ сᲂтвᲂрѝ зарѝ твᲂеѧ̀ трисвѣ́тлыѧ , бл҃гᲂда́телю чл҃кᲂлю́бче , и҆ прича́стїѧ и҆ прїѡбще́нїѧ непристꙋ́пна врагѡ́мъ неви́димымъ , и҆ плᲂтьски́мъ страсте́мъ ꙗ҆вѝ влⷣко , є҆динᲂнача́льныи бж҃е мо́й и҆ гдⷭ҇и сла́вы , пѣснᲂсло́вити тѧ спᲂдо́би те́плѣ во всѧ̀ вѣ́ки . и҆ ны́нѣ . Свѣ́тъ бг҃ᲂнача́льныи ѿ́ чрева тѝ вᲂсїѧ́въ , дв҃о мт҃и пречⷭ҇таѧ , ве́сь ми́ръ трисо́лнечнымъ свѣ́тᲂмъ ѡ҆зарѝ , и҆ зе́млю ꙗ҆́кᲂже дрꙋго́е нб҃о пᲂказа̀ пᲂю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Мт҃и бг҃ꙋ и҆ дв҃а , ражда́ющи и҆ дв҃ствꙋющи па́ки , не є҆сте́ственно дѣ́ло , но бж҃їе схᲂжде́нїе , тѣ́мъ ꙗ҆́кѡ є҆ди́нꙋ , бж҃їихъ чꙋде́съ спᲂдо́бльшꙋюсѧ при́снѡ велича́емъ . Высᲂкᲂгласи́ти и҆ пѣ́ти тѧ дᲂсто́йнѡ , немо́жемъ бре́ннїи , є҆го́же въ вы́шнихъ непреста́ннѡ серафи́ми вᲂспѣва́ютъ . ѻ҆ба́че ꙗ҆́кѡ влⷣкꙋ всѧ́ческимъ дерза́юще пᲂе́мъ , и҆ ꙗ҆́кѡ чл҃кᲂлю́бца бг҃а велича́емъ . Тѣле́сныѧ бᲂлѣ́зни и҆зба́ви , и҆ дш҃е́внагѡ пристра́стїѧ , вѣ́рныѧ пѣвцы̀ свᲂѧ̀ , є҆ди́нственаѧ трⷪ҇це нераздѣ́льнаѧ , и҆ блюсти́сѧ и҆ сᲂхрани́тисѧ невреди́мымъ , ѿ всѣ́хъ жите́йскихъ и҆скꙋше́нїи спᲂдо́би . сла́ва . Равнᲂси́льна бг҃ᲂнача́льнаѧ , трисвѣ́тлаѧ всеси́льнаѧ держа́во , не и҆змѣ́ннаѧ дᲂбро́то сꙋ́щественыѧ бл҃гᲂсти , да́ждь прегрѣше́нїемъ разрѣше́нїе твᲂи́мъ рабѡ́мъ , и҆ напа́стей и҆ страсте́й и҆збавле́нїе . и҆ ны́нѣ . Оу҆́мъ и҆ дꙋ́шꙋ , и҆ плᲂтьско́е смѣше́нїе прїе́мъ бг҃ᲂмт҃и , ѿ твᲂи́хъ лᲂже́снъ пречⷭ҇тыхъ бг҃ъ сло́во , вᲂи́стинꙋ челᲂвѣ́къ ꙗ҆ви́сѧ , и҆ бжⷭ҇твенагѡ сꙋщества̀ , прича́стника чл҃ка ꙗ҆́вѣ сᲂдѣ́ла .

пᲂсе́м̾ , припѣ́вы , григо́рїѧ синаи́та . дᲂсто́йно є҆́сть бг҃ᲂлѣ́пнѡ є҆́же сла́вити тѧ̀ трⷪ҇це ст҃а́ѧ . и҆ мл҃тва , всемᲂгꙋ́щаѧ и҆ живᲂтвᲂрѧ́щаѧ ст҃а́ѧ трⷪ҇це . пи́сано , на пᲂслѣдѝ в̾ кни́зѣ се́й .

Въ нлⷣю на ᲂу҆́тренѣй слꙋ́жбѣ . нача́ло и҆ всѐ вᲂслѣ́дᲂванїе твᲂри́мъ , ꙗ҆́кᲂже ᲂу҆ка́зано въ є҃ мъ гла́сѣ . та́же , по є҆ѯа̀ ѱл҃мѣ́хъ . на бг҃ъ гдⷭ҇ь . трᲂпа́рь , вᲂскрⷭ҇нъ . гла́съ , з҃ . Разрꙋщѝ крⷭ҇то́мъ свᲂи́мъ сме́рть , и҆ ѿве́рзлъ є҆сѝ разбо́йникꙋ ра́й . мѷрѡно́сицамъ пла́чь прелᲂжѝ , и҆ а҆пⷭ҇лѡмъ прᲂпᲂвѣ́дати пᲂвелѣ̀ , ꙗ҆́кѡ вᲂскр҃се хрⷭ҇то́съ ꙗ҆́кѡ бг҃ъ , пᲂдаѧ̀ ми́рᲂви ве́лїю млⷭ҇ть . двⷤа . сла́ва , ст҃о́мꙋ , и҆́же тᲂгѡ̀ днѐ .= и҆ ны́нѣ , боⷢ҇ . по́ гласꙋ трᲂпарѧ̀ ст҃а́гѡ . =а҆́ще ли не и҆́мать , то̀ гл҃емъ : сла́ва , и҆ ны́нѣ , боⷢ҇ . Ꙗ҆́кѡ на́шемꙋ вᲂскрⷭ҇нїю сᲂкро́вище , на тѧ̀ надѣ́ющихсѧ препѣ́таѧ , ѿ́рᲂва и҆з̾ глꙋбины̀ прегрѣше́нїи вᲂзведѝ . ты́ бо пᲂви́нныѧ грѣхꙋ̀ спасла̀ є҆сѝ , ро́ждьши спасе́нїе на́ше . ꙗ҆́же пре́жде ржⷭ҇тва̀ дв҃а , и҆ в̾ ржⷭ҇твѣ̀ дв҃а , и҆ по ржⷭ҇твѣ̀ па́ки дв҃аѧ .

по а҃ , стихᲂло́гїи . сѣда́ленъ , вᲂскрⷭ҇нъ . гла́съ , з҃ . Зна́менанꙋ гро́бꙋ , живо́тъ ѿ́грᲂба вᲂсїѧ̀ хрⷭ҇тѐ бж҃е , и҆ две́ремъ затвᲂре́нымъ ᲂу҆ченикѡ́мъ пред̾ста̀ и҆́же всѣ́хъ вᲂскрⷭ҇нїе , дх҃ъ пра́выи , тѣ́ми ѡ҆бнᲂвлѧ́ѧ на́съ , по вели́цѣй твᲂе́й млⷭ҇ти . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Зна́менанꙋ гро́бꙋ , живо́тъ ѿ́ грᲂба вᲂсїѧ̀ хрⷭ҇тѐ бж҃е , и҆ две́ремъ затвᲂре́нымъ ᲂу҆ченикѡ́мъ пред̾ста̀ и҆́же всѣ́хъ вᲂскрⷭ҇нїе , дх҃ъ пра́выи , тѣ́ми ѡ҆бнᲂвлѧ́ѧ на́съ , по вели́цѣй твᲂе́й млⷭ҇ти . сла́ва , и҆ ны́нѣ , боⷢ҇ . Ꙗ҆́кѡ и҆мꙋ́щи млрⷭ҇дїе на́ немᲂщь на́шꙋ , и҆ зрѧ́щи сꙋ́щихъ на землѝ , на беспᲂмо́щныѧ лю́ди ᲂу҆милᲂсе́рдисѧ бл҃гᲂслᲂве́наѧ бцⷣе , пребꙋ́ди мᲂлѧ́щисѧ , да непᲂги́бнемъ лю́тѣ , мᲂлѝ ꙗ҆́кѡ бл҃гᲂꙋтро́бнаго ми́лᲂстиваго бг҃а , спасти́сѧ дш҃а́мъ на́шимъ прест҃а́ѧ дв҃о .

по в҃ , стихᲂло́гїи , сѣда́ленъ . гла́съ , з҃ . Жи́знь во́ грᲂбѣ вᲂзлежа́ше , и҆ печа́ти на ка́мени лежа́ше ꙗ҆́кѡ цр҃ѧ спѧ́ща во́ини стрежа́хꙋ хрⷭ҇та̀ . и҆ а҆́нг҃ли сла́влѧхꙋ ꙗ҆́кѡ бг҃а без̾сме́ртна . жены́ же вᲂпїѧ́хꙋ вᲂскр҃се гдⷭ҇ь , пᲂдаѧ̀ ми́рᲂви ве́лїю ми́лᲂсть . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . Жи́знь во́ грᲂбѣ вᲂзлежа́ше , и҆ печа́ти на ка́мени лежа́ше ꙗ҆́кѡ цр҃ѧ спѧ́ща во́ини стрежа́хꙋ хрⷭ҇та̀ . и҆ а҆́нг҃ли сла́влѧхꙋ ꙗ҆́кѡ бг҃а без̾сме́ртна . жены́ же вᲂпїѧ́хꙋ вᲂскр҃се гдⷭ҇ь , пᲂдаѧ̀ ми́рᲂви ве́лїю ми́лᲂсть . сла́ва , и҆ ны́нѣ , боⷢ҇ . Распе́ншагᲂсѧ на́съ ра́ди хрⷭ҇та̀ , и҆ низ̾лᲂжи́вшаго сме́рти держа́вꙋ , непреста́ннѡ мᲂлѝ бцⷣе дв҃о , да спасе́тъ дш҃а на́ша .

та́же , кафи́сма : бл҃же́ни непᲂро́чнїи .= пᲂсе́м̾ , трᲂпарѝ : а҆́нг҃льскїи сᲂбо́ръ . пи́саны , в̾ кᲂнцѣ̀ кни́ги сеѧ̀ . =та́же , і҆єре́й глаго́летъ , є҆ктенїю̀ ма́лꙋю . по вᲂз̾гла́сѣ , и҆пако́й . И҆́же на́шъ зра́къ вᲂспрїе́мыи и҆ претерпѣ́въ распѧ́тїе пло́тїю , спасѝ на́съ вᲂскрⷭ҇нїемъ сѝ хрⷭ҇тѐ бж҃е , ꙗ҆́кѡ чл҃кᲂлю́бецъ .

степе́нны . гла́съ , з҃ . а҆нтифѡ́нъ , а҃ . пᲂе́мъ по два́жды . Плѣ́нъ сїѡ́нь ѿ́лести вᲂз̾врати́въ , и҆ менѐ сп҃се ѡ҆живѝ въ зе́млѧ ѿ рабо́тныѧ стрⷭ҇ти . Во ю҆́гъ сѣ́ющїи ско́рби , по́стъ со слеза́ми , та́ко ра́дᲂстныѧ по́жнꙋтъ рꙋкᲂѧ́ти , при́снѡ живᲂпита́нныѧ . Ст҃ы́и дꙋ́хъ и҆сто́чникъ бжⷭ҇твенныхъ сᲂкро́вищь , ѿ него́ же премꙋ́дрᲂсть , ра́зꙋмъ , стра́хъ , тᲂмꙋ̀ хвала̀ и҆ сла́ва че́сть и҆ держа́ва .

а҆нтифо́нъ , в҃ . А҆́ще не гдⷭ҇ь сᲂзи́ждетъ до́мъ дш҃е́вныи , в̾сꙋ́е трꙋжда́емсѧ , ра́звѣ бо тᲂгѡ̀ ни дѣ́ло ни сло́во сᲂверша́етсѧ . Плᲂда̀ чре́внѧго , ст҃і́и твᲂѝ дх҃ᲂмъ пᲂд̾ви́жнѡ вᲂз̾враща́ютъ , ѻ҆те́ческаѧ пᲂвелѣ́нїѧ в̾ сыне́нїе . Ст҃ы́и дꙋ́хъ всѧ́ческихъ бы́тїе и҆́мать , пре́жде бо всѣ́хъ бг҃ъ , всѣ́хъ гдⷭ҇ьство свѣ́тъ непристꙋ́пенъ , и҆ живо́тъ всѣ́хъ .

а҆нтифо́нъ , г҃ . Бᲂѧ́щїисѧ гдⷭ҇а , пꙋ́ть живᲂта̀ ѡ҆брѣто́ша , ны́нѣ и҆ при́снѡ ᲂу҆блажа́ютсѧ сла́вᲂю нетлѣ́ннᲂю . Ѻ҆́крⷭ҇тъ трапе́зы твᲂеѧ̀ , ꙗ҆́кѡ сте́блїе ви́дѧ и҆сча́дїѧ сѝ , ра́дꙋйсѧ и҆ весели́сѧ , привᲂдѧ̀ сїѧ̀ хрⷭ҇то́ви , па́стыремъ нача́льниче . Ст҃ы́и дꙋ́хъ , глꙋбина̀ даро́въ , бᲂга́тство сла́вы , сꙋде́бъ глꙋбина̀ вели́ка , є҆динᲂсла́венъ бо ѻ҆ц҃ꙋ и҆ сн҃ꙋ , и҆ спᲂкланѧ́емъ бѣ̀ .

і҆єре́й , глаго́летъ : во́нмемъ .= ми́ръ всѣ́мъ . премꙋ́дрᲂсть . прᲂки́менъ , ѱл҃о́мъ , дв҃дᲂвъ . Вᲂскрⷭ҇нѝ гдⷭ҇и бж҃е мо́й , да вᲂз̾несе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . =сти́хъ : и҆спᲂвѣ́мсѧ тебѣ̀ гдⷭ҇и бж҃е мо́й всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ .

і҆єре́й : ꙗ҆́кѡ ст҃ъ є҆сѝ гдⷭ҇и бж҃е . та́же : Всѧ́ко дыха́нїе да хва́литъ гдⷭ҇а . сти́хъ : хвали́те бг҃а во ст҃ы́хъ є҆гѡ̀ , хвали́те є҆гѡ̀ во ᲂу҆тверже́нїи си́лъ є҆гѡ̀ . і҆єре́й : и҆ =ѡ҆спᲂдо́битисѧ на́мъ дᲂсто́йнѡ . =пᲂе́мъ : Гдⷭ҇и пᲂми́лꙋй , гⷤ . і҆єре́й : премꙋ́дрᲂсть , про́сти ᲂу҆слы́шимъ ст҃а́гѡ . і҆єре́й , гл҃етъ , є҆ѵⷢ҇а́лїе рѧ́дꙋ . вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . пᲂми́лꙋй мѧ бж҃е . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .= и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ . =та́же , пᲂми́лꙋй мѧ бж҃е по вели́цѣй млⷭ҇ти твᲂе́й по мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й . стⷯра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю млⷭ҇ть . і҆єре́й , гл҃етъ : спасѝ бж҃е лю́ди . пᲂе́мъ : Гдⷭ҇и пᲂми́лꙋй , ві҃ . і҆єре́й , вᲂз̾гла́съ : ми́лᲂстїю и҆ щедро́тами . Кано́нъ , вᲂскрⷭ҇нъ . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Ѡ҆сꙋди́сѧ сме́ртнᲂе мꙋчи́тельство дре́вᲂмъ , непра́веднᲂю сме́ртїю тебѣ̀ ѡ҆сꙋжде́нꙋ гдⷭ҇и . тѣ́мже кнѧ́зь тмы̀ тебѣ̀ не ѡ҆дᲂлѣ́въ , въ пра́вдꙋ и҆згна́нъ бы́сть . А҆́дъ тебѣ̀ прибли́живсѧ , и҆ зꙋбы̀ невᲂзмо́гъ сте́рти тѣ́ло твᲂѐ , че́люсти сᲂкрꙋши́ си . ты́ же сп҃се бᲂлѣ́зни разрꙋши́въ сме́ртныѧ , вᲂскр҃се тридне́вно . боⷢ҇ . Разрѣши́сѧ печа́ль пра́бабы є҆́ввы , бᲂлѣ́зни бо ᲂу҆бѣ́гши не и҆скꙋсᲂбра́чнѡ рᲂдила̀ є҆сѝ . тѣ́мже ꙗ҆́вѣ бцⷣꙋ пречⷭ҇таѧ вѣ́дѧще тѧ̀ всѝ сла́вимъ .

Дрꙋгі́и кано́нъ , крⷭ҇тᲂвᲂскре́сенъ . і҆рмо́съ . Въ по́нтѣ пᲂкры̀ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю . Два̀ и҆сто́чника мнѣ̀ на крⷭ҇тѣ̀ и҆стᲂчѝ хрⷭ҇то́съ живᲂно́сна , ѿ свᲂи́хъ прᲂбᲂде́ныхъ ре́бръ , вᲂспᲂе́мъ є҆мꙋ̀ , ꙗ҆́кѡ прᲂсла́висѧ . во́ =грᲂбъ всели́всѧ , и҆ вᲂскр҃съ тридне́вно , нетлѣ́нїе пᲂдадѐ ча́емыи хрⷭ҇то́съ ме́ртвымъ , пᲂе́мъ є҆мꙋ̀ , ꙗ҆́кѡ прᲂсла́висѧ . =боⷢ҇ . Є҆ди́на дв҃аѧ и҆ по ржⷭ҇твѣ̀ ꙗ҆ви́сѧ , зижди́телѧ бо ми́рꙋ рᲂдила̀ є҆сѝ , пᲂе́мъ є҆мꙋ̀ , ꙗ҆́кѡ прᲂсла́висѧ .

и҆́нъ кано́нъ , прест҃ѣ́й бцⷣѣ . є҆мꙋ́же краегране́сїе , по а҆лфави́тꙋ . і҆рмо́съ . Ма́нїемъ ти на зе́менъ . запѣ́въ : прест҃а́ѧ гжⷭ҇е бцⷣе спасѝ на́съ . Бе́зднꙋ ро́ждьши бл҃гᲂꙋтро́бїѧ дв҃о , дш҃ꙋ мѝ ѡ҆зарѝ , свѣтᲂно́снымъ сїѧ́нїемъ твᲂи́мъ , ꙗ҆́кѡ да дᲂсто́йнѣ вᲂспᲂю̀ твᲂи́хъ чꙋде́съ бе́зднꙋ . Стрѣ́лы грѣхо́вныѧ ᲂу҆ѧзвлѧ́ющїѧ на́съ , сло́во ви́дѣвъ , ꙗ҆́кѡ бл҃гᲂда́тель пᲂми́лᲂва . тѣ́мже несказа́ннѡ сᲂединѧ́етсѧ всечⷭ҇таѧ , пло́ти ѿ тебѐ пребжⷭ҇твеныи . Бы́сть сме́ртїю ꙗ҆́то є҆стество̀ тлѣ́ннᲂе и҆ немᲂщно́е чл҃ческᲂе , ты́ же влⷣчце живо́тъ заче́нши , сїѐ ѿ и҆стлѣ́нїѧ к̾ жи́зни вᲂзвела̀ є҆сѝ .

и҆́нъ , кано́нъ , в̾ минѣ́и , ст҃о́мꙋ .

катава́сїѧ , по ᲂу҆ста́вꙋ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Ты̀ вᲂзше́дъ на́ древо во́лею млрⷭ҇де сп҃се , на́съ ра́ди бᲂлѣ́знᲂва , и҆ терпѣ́въ ꙗ҆́звꙋ примире́нїѧ хᲂда́тайственꙋ , и҆ спасе́нїѧ вѣ́рнымъ . є҆ѧ́же ра́ди твᲂемꙋ̀ ми́лᲂстиве всѝ примири́хᲂмсѧ рᲂди́телю . Ты́ мѧ ѡ҆чи́стилъ є҆сѝ хрⷭ҇тѐ ѿ ꙗ҆́звы , дш҃е́ю ᲂу҆ѧ́звенаго ѕмїи́нымъ ᲂу҆грызе́нїемъ , и҆ пᲂказа́лъ є҆сѝ свѣ́тъ , во тмѣ̀ дре́вле слежа́щꙋ ми и҆ в̾ тлѣ́нїи , сᲂше́дъ бо во а҆́дъ , крⷭ҇то́мъ сᲂвᲂздви́же мѧ . боⷢ҇ . Не и҆скꙋсᲂмꙋ́жныѧ тѝ мт҃ре мᲂльба́ми , ми́рꙋ смире́нїе пᲂда́ждь сп҃се , и҆ держа́вѣ на́шей пᲂбѣ́дꙋ да́рꙋй на сꙋпрᲂти́вныѧ врагѝ , и҆ не и҆зрече́ннѣй ти сла́вѣ славᲂсло́вѧщїѧ тѧ̀ спᲂдо́би .

и҆́нъ , і҆рмоⷭ҇ . Свы́ше си́лᲂю .= Пла́меннᲂе ѻ҆рꙋ́жїе ᲂу҆гаси́лъ є҆сѝ гдⷭ҇и , є҆гда́ тѧ лю́дїе без̾зако́ннїи пригвᲂзди́ша на́ древѣ крⷭ҇тнѣмъ , разбо́йникꙋ же ра́йскїѧ ѿве́рзе две́ри , и҆ спа́слъ є҆сѝ чл҃кᲂлю́бче , и҆́же вѣ́рᲂю непреста́ннѡ тебѐ сла́вѧщихъ . Вᲂскр҃съ ѿ́ грᲂба свᲂегѡ̀ , жена́мъ хрⷭ҇тѐ пе́рвѣе себѐ ꙗ҆влѧ́еши , и҆ разрѣши́лъ є҆сѝ є҆́ввѣ печа́ль , а҆да́ма же в̾тлю̀ впа́дшасѧ сᲂвᲂздви́глъ є҆сѝ , ꙗ҆́кѡ бл҃гᲂꙋтро́бныи бг҃ъ . тѣ́мже всѝ пᲂе́мъ твᲂѐ вᲂста́нїе . боⷢ҇ . Є҆=го́же прїе́мши гдⷭ҇а в̾ дв҃ьственѣмъ чре́вѣ , вᲂплᲂще́нна пречⷭ҇таѧ пᲂрᲂдѝ , бл҃гᲂпремѣни́тельна мᲂльба́ми тѝ мт҃рьними на́мъ рабо́мъ свᲂи́мъ да́ждь , ꙗ҆́кѡ тебѐ є҆ди́нꙋ к̾ бг҃ꙋ бл҃гᲂꙋтро́бїѧ приста́нище свѣ́мы .

и҆́нъ , і҆рмо́съ . Въ нача́тцѣ нб҃са̀ . Змі́й пᲂпᲂлзы́и и҆з̾ є҆де́ма , менѐ бжⷭ҇тва̀ жела́нїемъ прельсти́въ , низве́рже в̾ зе́млю . но ꙗ҆́кѡ млⷭ҇тивъ , и҆ є҆стество́мъ бл҃гᲂꙋтро́бенъ , ᲂу҆ще́дривъ ѡ҆бᲂжа́етъ , во ᲂу҆тро́бꙋ твᲂю̀ все́льсѧ , и҆ пᲂдо́бенъ ми бы́въ мт҃и дв҃о . Бл҃гᲂслᲂве́нъ пло́дъ чре́ва твᲂегѡ̀ дв҃о бцⷣе , всѣ́хъ ра́дᲂсте . ра́дᲂсть бо всемꙋ̀ ми́рꙋ рᲂдила̀ є҆сѝ , и҆ весе́лїе вᲂи́стинꙋ , разᲂрѧ́ющи печа́ль грѣхо́внꙋю бг҃ᲂневѣ́стнаѧ . Жи́знь вѣ́чнꙋю и҆ свѣ́тъ и҆ смире́нїе , бг҃ᲂрᲂди́тельнице дв҃о рᲂдила̀ є҆сѝ на́мъ , ве́тхꙋю чл҃кѡмъ бра́нь , ко ѻ҆ц҃ꙋ и҆ бг҃ꙋ ᲂу҆крᲂтѣва́ющи , вѣ́рᲂю и҆ и҆спᲂвѣ́данїемъ бл҃гᲂда́тнымъ .

і҆єре́й гл҃етъ , є҆ктенїю̀ ма́лꙋю . та́же : кᲂнда́къ , и҆ и҆́кᲂсъ , и҆ сѣда́ленъ , в̾ минѣ́и , ст҃о́мꙋ . а҆́ще є҆́сть .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Свᲂѝ плещѝ вда́выи на ꙗ҆́звы , и҆́же ѿ дв҃ы вᲂпло́щьсѧ , рабꙋ̀ сᲂгрѣши́вшꙋ , бїе́нъ быва́етъ влⷣка непᲂви́ненъ , разрѣша́ѧ мᲂѧ̀ сᲂгрѣше́нїѧ . Пред̾ста́въ сꙋдїѧ̀ , сꙋди́щꙋ сꙋдїѧ́мъ закᲂнᲂпрестꙋ́пнымъ , ꙗ҆́кѡ ѡ҆сꙋ́жденикъ сꙋ́дъ прїе́млетъ , и҆ заꙋша́етсѧ бре́ннᲂю рꙋко́ю , сᲂзда́выи чл҃ка ꙗ҆́кѡ бг҃ъ , и҆ сꙋдѧ́и пра́ведно землѝ . боⷢ҇ . Ꙗ҆́кѡ и҆́стиннаѧ мт҃и бж҃їѧ , твᲂрца̀ свᲂегѡ̀ и҆ сн҃а мᲂлѝ , ко спасе́нᲂмꙋ и҆спра́вити мѧ приста́нищꙋ , всенепᲂро́чнаѧ сла́внаго є҆гѡ̀ хᲂтѣ́нїѧ .

и҆́нъ , і҆рмо́съ . Смᲂтрѧ́и прᲂро́къ . Невѣ́дыи грѣха̀ , и҆ є҆гѡ̀ ра́ди бы́сть гдⷭ҇и , є҆́же небѣ̀ , вᲂѡ҆брази́всѧ прїе́мъ чꙋжде́е , да спасе́ши ми́ра , и҆ ᲂу҆бїе́ши прельсти́въ мꙋчи́телѧ . И҆́же и҆з̾ ме́ртвыхъ вᲂскрⷭ҇шаго , и҆ сᲂвᲂздви́гшаго а҆да́ма , во́лею па́дша , є҆го́же ра́ди ᲂу҆слы́шахъ гдⷭ҇ню си́лꙋ , всѧ̀ спастѝ бл҃гі́ѧ свᲂѧ̀ прише́лъ є҆сѝ . боⷢ҇ . Ѿ присѣ́нныѧ ча́сты гᲂры̀ дв҃цы прише́дъ , с̾ рабы̀ напи́санъ бы́сть , рабо́ты и҆збавлѧ́ѧ всѣ́хъ , влⷣчествꙋѧи во́ вѣки . тѣ́мже тѧ̀ ро́ждьшꙋю сла́вимъ .

и҆́нъ , і҆рмо́съ . Ѻ҆́ч҃а нѣ́дра . И҆з̾бра́ннаѧ всѧ̀ и҆ дᲂбра̀ ꙗ҆́вльшисѧ бг҃ᲂви пре́жде тва́ри , свѣ́тлᲂстїю всепѣ́таѧ , свѣтᲂли́тїемъ твᲂи́мъ пᲂю́щихъ тѧ прᲂсвѣтѝ . Бг҃а челᲂвѣ́кѡмъ рᲂдила̀ є҆сѝ чⷭ҇таѧ , вᲂплᲂще́нна ѿ чи́стыхъ крᲂве́й твᲂи́хъ , и҆збавлѧ́юща сᲂгрѣше́нїи лю́тыхъ , любо́вїю пᲂчита́ющихъ , и҆ сла́вѧщихъ тѧ̀ всечⷭ҇таѧ . Слꙋ́житъ є҆стество̀ слᲂве́снᲂе , прᲂше́дшемꙋ и҆з̾ тебѐ па́че ᲂу҆ма̀ всепѣ́таѧ , та́инствꙋ несказа́ннꙋ ржⷭ҇тва̀ твᲂегѡ̀ , наꙋчи́вшеесѧ ны́нѣ всебл҃же́ннаѧ .

пѣ́снь , є҃ . і҆рмо́съ . Но́щь несвѣтла̀ невѣ́рнымъ , вѣ́рнымъ же прᲂсвѣще́нїе в̾ пи́щи слᲂве́съ твᲂи́хъ , и҆ сегѡ̀ ра́ди к̾ тебѣ̀ ᲂу҆́треннюю , и҆ вᲂспѣва́ю твᲂѐ бжⷭ҇тво̀ . За свᲂѧ̀ рабы̀ про́данъ є҆сѝ хрⷭ҇тѐ , и҆ пᲂлани́тѣ ᲂу҆даре́нїе терпи́ши , свᲂбᲂжде́нїе хᲂда́тайствꙋѧ пᲂю́щимъ . къ тебѣ̀ ᲂу҆́тренююще , вᲂспѣва́емъ твᲂѐ вᲂскрⷭ҇нїе . Бжⷭ҇твенᲂю тѝ си́лᲂю хрⷭ҇тѐ , не́мᲂщьствїемъ плᲂтьски́мъ крѣ́пкаго низ̾лᲂжи́лъ є҆сѝ , и҆ пᲂбѣди́телѧ мѧ̀ сме́рти пᲂказа̀ сп҃се вᲂскрⷭ҇нїѧ ра́ди . боⷢ҇ . Бг҃а рᲂдила̀ є҆сѝ мт҃и чⷭ҇таѧ , вᲂплᲂще́ннаго и҆з̾ тебѐ бг҃ᲂлѣ́пнѡ всепѣ́таѧ , пᲂне́же непᲂзна̀ мꙋ́жеска ло́жа , но ѿ ст҃а́гѡ ражда́еши дх҃а .

и҆́нъ , і҆рмо́съ . Гдⷭ҇и бж҃е мо́й . Є҆гда̀ въ без̾зако́нныхъ вмѣне́нъ бы́сть , вᲂзнесе́сѧ на кра́нїевѣ , свѣти́ла сᲂкры́шасѧ , и҆ кᲂлѣба́шесѧ землѧ̀ , и҆ цр҃кви свѣ́тлᲂсть раздра́сѧ , є҆вре́ѡмъ ꙗ҆влѧ́ющи ѿпаде́нїе . Тебѐ разрꙋши́вшагѡ сме́рти всю̀ си́лꙋ , крѣ́пᲂстїю бжⷭ҇тва̀ непᲂсти́жнагѡ твᲂегѡ̀ , и҆ твᲂи́мъ вᲂскрⷭ҇нїемъ ме́ртвыѧ вᲂздви́гшаго , пѣ́сньми сла́вимъ . боⷢ҇ . Мт҃и цр҃ѧ и҆ бг҃а всепѣ́таѧ бцⷣе , и҆́же вѣ́рᲂю и҆ любо́вїю тѧ̀ пѣ́сньми хва́лѧщимъ прⷭ҇нѡ , ѡ҆чище́нїе твᲂи́ми мᲂльба́ми прегрѣше́нїемъ низ̾пᲂслѝ .

и҆́нъ , і҆рмо́съ . Но́щь несвѣтла̀ . Лѣ́ствицꙋ ю҆́же ви́дѣвъ і҆а́кѡвъ , к̾ высᲂтѣ̀ ᲂу҆тверже́нꙋ , ѻ҆́бразꙋ наꙋчи́всѧ не и҆скꙋсᲂбра́чныѧ тебѐ , тᲂбо́ю бо бг҃ъ чл҃кѡмъ прїѡбщи́сѧ , пречⷭ҇таѧ влⷣчце . И҆збавле́нїе вѣ́чнᲂе тебѐ ра́ди ны́нѣ ѡ҆брѣ́тше , ᲂу҆се́рднѡ зᲂве́мъ тебѣ̀ є҆́же ра́дꙋисѧ влⷣчце , и҆ твᲂи́мъ свѣ́тᲂмъ ра́дꙋющесѧ пречⷭ҇таѧ , пѣ́сньми тѧ̀ велича́емъ . Є҆ди́нꙋ тѧ̀ дв҃о жени́хъ пᲂсредѝ те́рнїѧ кри́нъ ѡ҆брѣ́тъ , чистᲂто́ю цвѣтѣ́нїѧ сїѧ́ющꙋ , и҆ свѣ́тᲂмъ дв҃ьства препѣ́таѧ невѣ́стꙋ прїѧ́тъ .

пѣ́снь , ѕ҃ . і҆рмо́съ . Пла́вающагѡ в̾ мᲂлвѣ̀ жите́йскихъ сꙋ́етїи , и҆ с̾ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . Вᲂспᲂмина́хꙋ тѧ̀ затвᲂре́ныѧ во а҆́дѣ дꙋ́ши , ѡ҆ста́вльшїѧсѧ пра́ведникѡмъ , и҆ ѿ тебѐ спасе́нїѧ мᲂлѧ́хꙋсѧ , є҆́же крⷭ҇то́мъ хрⷭ҇тѐ пᲂдадѐ , сꙋ́щимъ в̾ преиспо́днихъ наше́дъ , ꙗ҆́кѡ млрⷭ҇дъ . Ко ѡ҆дш҃евле́ннꙋ ти и҆ нерꙋкᲂтвᲂре́нᲂмꙋ хра́мꙋ , разᲂре́нꙋ страстьмѝ , призрѣ́ти па́ки ли́къ а҆пⷭ҇льскїи ненадѣ́ѧшесѧ , но па́че наде́жди пᲂклᲂни́сѧ , вᲂскрⷭ҇ша всю́дꙋ прᲂпᲂвѣ́да . боⷢ҇ . Не и҆зрече́ннагѡ ржⷭ҇тва̀ твᲂегѡ̀ всенепᲂро́чнаѧ ѻ҆́бразъ , дв҃о бг҃ᲂневѣ́стнаѧ , є҆́же на́съ ра́ди , кто̀ сказа́ти ѿ челᲂвѣ́къ вᲂзмо́жетъ ; ꙗ҆́кѡ бг҃ъ не ѡ҆пи́санъ , сло́во сᲂедини́сѧ тебѣ̀ , пло́ть не и҆змѣ́нна бы́сть .

и҆́нъ , і҆рмо́съ . Вᲂзᲂпи́хъ гдⷭ҇и .= Сᲂтрѧсѐ всю̀ зе́млю распе́нсѧ влⷣка , и҆ и҆сцѣлѝ лю́таѧ є҆ѧ̀ сᲂкрꙋше́нїѧ . Сме́рть раз̾рꙋши́сѧ , и҆ плѣне́нъ бы́сть а҆́дъ . хрⷭ҇то́съ бо вᲂста̀ , пꙋ́ть твᲂрѧ̀ челᲂвѣ́кѡмъ вᲂскрⷭ҇нїемъ . =боⷢ҇ . Пречⷭ҇таѧ влⷣчце , ᲂу҆пᲂва́нїе и҆звѣ́стнᲂе , и҆́же любо́вїю пᲂю́щїѧ тѧ , ꙗ҆́кѡ и҆́стиннꙋю бцⷣꙋ сᲂхранѝ .

и҆́нъ , і҆рмо́съ . Пла́вающаго в̾ мᲂлвѣ̀ . Зако́ннїи ѻ҆́бразы , и҆ прᲂро́ческаѧ прᲂрече́нїѧ , ꙗ҆́вѣ пред̾вᲂзвѣща́хꙋ тѧ̀ чⷭ҇таѧ , ро́ждьшꙋю бл҃гᲂда́телѧ всеѧ̀ тва́ри , мнᲂгᲂча́стнѡ и҆ мнᲂгᲂѡ҆бра́знѡ бл҃гᲂдѣ́йствᲂвавшаго , вѣ́рнѡ велича́ющихъ тѧ̀ . Оу҆стра́ньшагᲂсѧ дре́вле ѿ навѣ́та чл҃кᲂꙋбі́ица , а҆да́ма первᲂзда́ннагѡ , бжⷭ҇твеныѧ ра́йскїѧ пи́щи , не и҆скꙋсᲂбра́чнаѧ па́ки вᲂзвела̀ є҆сѝ , ро́ждьши , и҆́же ѿ престꙋпле́нїѧ тᲂгѡ̀ и҆зба́вльшаго . И҆́же во́лею бжⷭ҇твенᲂю , сᲂдѣ́тельнᲂю же си́лᲂю , всѧ̀ сᲂставле́и ѿ несꙋ́щихъ , и҆з̾ ᲂу҆тро́бы твᲂеѧ̀ чи́стаѧ прᲂизы́де , и҆ сꙋ́щїѧ во тмѣ̀ сме́ртнѣй , бг҃ᲂнача́льными лꙋча́ми ѡ҆зарѝ .

і҆єре́й гл҃етъ , є҆ктенїю̀ ма́лꙋю .

кᲂнда́къ , вᲂскрⷭ҇нъ . Не к̾ тᲂмꙋ̀ держа́ва сме́ртнаѧ вᲂз̾мо́жетъ держа́ти чл҃ки , хрⷭ҇то́съ бо сни́де сᲂкрꙋша́ѧ и҆ разᲂрѧ́ѧ си́лы є҆ѧ̀ , свѧзꙋ́емъ быва́етъ а҆́дъ . прᲂро́цы сᲂгла́снѡ ра́дꙋютсѧ , пред̾ста̀ гл҃юще сп҃съ сꙋ́щимъ в̾ вѣ́рѣ , и҆зы́дите вѣ́рнїи в̾ вᲂскрⷭ҇нїе . и҆́кᲂсъ . Вᲂстрепета́ша до́лѣ преиспо́днѧѧ дне́сь а҆́дъ и҆ сме́рть , є҆ди́нᲂго ѿ трⷪ҇цы ᲂу҆бᲂѧ́шасѧ . землѧ̀ пᲂкᲂлѣба́сѧ . вра́тницы же а҆́дᲂвы ви́дѣвше тѧ ᲂу҆жасо́шасѧ , и҆ всѧ̀ тва́рь съ пррⷪ҇ки ра́дꙋющисѧ , пᲂе́тъ ти пᲂбѣ́днꙋю пѣ́снь , и҆зба́вителю бг҃ꙋ на́шемꙋ , разрꙋши́вшемꙋ ны́нѣ сме́ртнꙋю си́лꙋ . да вᲂскли́кнемъ и҆ вᲂзᲂпїе́мъ ко а҆да́мꙋ и҆ к̾ сꙋ́щимъ и҆з̾ а҆да́ма , дре́вᲂмъ сегѡ̀ па́ки в̾веде́мъ , и҆зыди́те вѣ́рнїи в̾ вᲂскрⷭ҇нїе .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е блгⷭ҇ве́нъ є҆сѝ . Дре́вᲂмъ ᲂу҆мира́етъ а҆да́мъ , во́лею преслꙋша́нїе сᲂдѣ́лавъ . пᲂслꙋша́нїемъ же хрⷭ҇то́вымъ ѡ҆живлѧ́етсѧ . мене́ бо ра́ди распѧ́сѧ сн҃ъ бж҃їи препрᲂсла́вленыи . Тебѐ вᲂскрⷭ҇шаго хрⷭ҇тѐ и҆́з̾ грᲂба , тва́рь всѧ̀ вᲂспѣва́ше . ты́ бо живо́тъ , и҆́же во а҆́дѣ прᲂцвѣ́лъ є҆сѝ , ме́ртвымъ вᲂскрⷭ҇нїе , сꙋ́щимъ во тмѣ̀ , свѣ́тъ препрᲂсла́вленыи . боⷢ҇ . Ра́дꙋисѧ дщѝ а҆да́ма тлѣ́ннагѡ , ра́дꙋисѧ є҆ди́на бг҃ᲂневѣ́сто , ра́дꙋисѧ є҆ѧ́же ра́ди тлѧ̀ ѿгна́сѧ , ꙗ҆́кѡ бг҃а ро́ждьши . є҆го́же мᲂлѝ чⷭ҇таѧ , спасти́сѧ всѣ́мъ на́мъ .

и҆́нъ , і҆рмо́съ . И҆́же въ пе́щь ѻ҆́гненнꙋю .= И҆́же дре́вᲂмъ крⷭ҇тнымъ , грѣхо́внᲂе жа́ло притꙋпи́въ , и҆ а҆да́мᲂва престꙋпле́нїѧ рꙋкᲂписа́нїе растерза́въ , кᲂпїе́мъ ре́бръ свᲂи́хъ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . И҆́же ре́бръ прᲂбᲂде́нїемъ , и҆ крᲂпле́нїемъ бжⷭ҇твеныѧ кро́ве зе́млю ѡ҆чи́щь , ѿ крᲂве́й и҆дᲂлᲂбѣ́сїѧ ѡ҆скверне́нꙋю , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . =трⷪ҇ченъ . Нераздѣ́льнᲂе є҆стество̀ , правᲂсла́вно бл҃гᲂслᲂви́мъ , бг҃а ѻ҆ц҃а без̾нача́льнаго , тᲂѧ́же вла́сти сло́ва и҆ дх҃а . бл҃гᲂслᲂве́нъ є҆сѝ зᲂвꙋ́ще , гдⷭ҇и бж҃е ѻ҆ц҃ъ на́шихъ .

и҆́нъ , і҆рмо́съ . Пе́щь ѻ҆́трᲂцы . И҆спещре́нно , и҆ пᲂзлаще́но ᲂу҆дᲂбре́нїе тебѐ стѧжа́въ , вᲂзлюбѝ сᲂдѣ́тель тво́й дв҃о и҆ гдⷭ҇ь , превᲂзнᲂси́мыи ѻ҆ц҃ъ на́шихъ , бж҃е бл҃гᲂслᲂве́нъ є҆сѝ . Ѡ҆чища́етсѧ и҆са́їѧ , ᲂу҆́гль дре́вле прїе́мъ , ѡ҆бра́знѣ зрѧ̀ ѻ҆трᲂкᲂви́це твᲂѐ ржⷭ҇тво̀ . превᲂзнᲂси́мыи ѻ҆ц҃ъ на́шихъ , бж҃е бл҃гᲂслᲂве́нъ є҆сѝ . Ѻ҆́бразы всѝ бжⷭ҇твенагѡ ржⷭ҇тва̀ , бжⷭ҇твенїи прⷪ҇ро́цы зрѧ́ще , ра́дᲂстнѡ вᲂспѣва́юще вᲂпїѧ́хꙋ , превᲂзнᲂси́мыи ѻ҆ц҃ъ на́шихъ , бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Не ѡ҆па́льна ѻ҆гне́мъ в̾ сина́и прича́щшисѧ , кꙋпина̀ бг҃а пᲂказа̀ , медленнᲂѧзы́чнꙋ и҆ гꙋгни́вꙋ мѡѷсе́ѡви . дѣ́ти рве́нїемъ бж҃їимъ вмѣта́емыѧ во ѻ҆́гнь пѣвцы̀ пᲂказа̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Пречⷭ҇тыи а҆́гнецъ слᲂве́сныи , за ми́ръ закᲂле́нъ бы́въ , ᲂу҆ста́ви по зако́нꙋ принᲂси́маѧ , ѡ҆чища́ѧ є҆гѡ̀ всѧ̀ прегрѣше́нїѧ ꙗ҆́кѡ бг҃ъ , при́снѡ вᲂпїю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Без̾ и҆стлѣ́нїѧ несꙋ́щи , к̾ страсте́мъ прїѧ́тна зижди́телемъ пло́ть на́ша . по́страсти и҆ пᲂвᲂста́нїи , непристꙋ́пна тлѣ́нїю ᲂу҆стро́исѧ . и҆ мертвецы̀ ѡ҆бнᲂвлѧ́етъ зᲂвꙋ́щїѧ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . боⷢ҇ . Твᲂѐ чи́стᲂе и҆ всенепᲂро́чнᲂе дв҃о , скве́рнᲂе и҆ ме́рзскᲂе вселе́нныѧ ѡ҆чи́сти , и҆ бы́сть на́шемꙋ примире́нїю к̾ бг҃ꙋ вина̀ всечⷭ҇таѧ , тѣ́мже тѧ̀ бцⷣе , всѧ̀ дѣ́ла гдⷭ҇нѧ пѣснᲂсло́вимъ во всѧ̀ вѣ́ки .

и҆́нъ , і҆рмо́съ . Вᲂи́стинꙋ сꙋ́щагѡ .= Пᲂстрада̀ ꙗ҆́кѡ сме́ртенъ хрⷭ҇тѐ , и҆ без̾стра́стенъ ꙗ҆́кѡ бг҃ъ пре́былъ є҆сѝ , во ѻ҆бᲂи́хъ сы́и . тѣ́мже тѧ̀ пᲂе́мъ во всѧ̀ вѣ́ки . И҆́же пᲂлᲂжи́выи дꙋ́шꙋ со́ властїю ꙗ҆́кѡ всѣ́хъ гдⷭ҇ь , и҆ па́ки прїе́мыи ю҆̀ . тѣ́мже тѧ̀ пᲂе́мъ сп҃се , во всѧ̀ вѣ́ки . =боⷢ҇ . Є҆ди́нꙋ в̾ жена́хъ бл҃гᲂслᲂве́нꙋю бж҃їю рᲂди́тельницꙋ , вѣ́рнѡ пᲂе́мъ , и҆ превᲂзно́симъ хрⷭ҇та̀ во всѧ̀ вѣ́ки .

и҆́нъ , і҆рмо́съ . Неѡ҆па́льна ѻ҆гне́мъ . Сїѧ́нїемъ ржⷭ҇тва̀ твᲂегѡ̀ , страннᲂлѣ́пно вселе́ннꙋю прᲂсвѣти́ла є҆сѝ бг҃ᲂрᲂди́тельнице , сꙋ́щаго бо бг҃а дла́ньма свᲂи́ма но́сиши , прᲂсвѣща́юща прⷭ҇нѡ вѣ́рнѡ вᲂпїю́щихъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Пᲂе́мъ чⷭ҇таѧ бл҃гᲂче́стнѡ твᲂю̀ ᲂу҆тро́бꙋ , бг҃а вмѣсти́вшꙋю , несказа́ннѡ вᲂплᲂща́ема , даю́щаго всѣ́мъ вѣ́рнымъ , бг҃ᲂразꙋ́мїѧ прᲂсвѣще́нїе , при́снѡ вᲂпїю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Свѣ́та твᲂегѡ̀ зарѧ́ми , тебѐ пᲂю́щїѧ свѣтᲂви́дны сᲂдѣ́лай , свѣтᲂрᲂди́тельнице мт҃и дв҃о , свѣ́та бо ꙗ҆ви́сѧ жили́ще , прᲂсвѣща́ющи свѣ́тлѡ , прⷭ҇нѡ вᲂпїю́щїѧ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

по и҃ пѣ́сни , пᲂе́мъ : Хва́лимъ , бл҃гᲂслᲂви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . і҆рмо́съ катава́сїи , и҆ твᲂри́мъ пᲂкло́нъ . пᲂе́мъ , пѣ́снь бцⷣѣ . вели́читъ дш҃а мᲂѧ̀ гдⷭ҇а . =и҆ =пᲂе́мъ , честнѣ́йшꙋю херꙋви́мъ , на ко́йждо сти́хъ , на́ ѻ҆ба ли́ка . =и҆ =твᲂри́мъ пᲂкло́ны .

пѣ́снь , ѳ҃ . і҆рмо́съ . Нетлѣ́нїѧ и҆скꙋше́нїемъ ро́ждьшаѧ , и҆ всехитрецꙋ̀ сло́вꙋ пло́ть взаимда́вшаѧ , мт҃и без̾мꙋ́жнаѧ дв҃о бцⷣе , прїѧ́телище непᲂстᲂѧ́ннагѡ селѡ̀ невмѣсти́магѡ , зижди́телѧ свᲂегѡ̀ тѧ̀ велича́емъ . И҆́же бжⷭ҇твꙋ̀ страда́нїе прилага́ющїи , пᲂстыди́тесѧ чꙋжемꙋ́дренїи . гдⷭ҇а бо сла́вы пло́тїю ра́спѧта , нера́спѧта же є҆стество́мъ бжⷭ҇твенымъ , ꙗ҆́кѡ во двꙋ̀ є҆стествꙋ̀ є҆ди́наго велича́емъ . И҆́же тѣлесе́мъ вᲂста́нїю невѣ́рꙋющїи , ко хрⷭ҇то́вꙋ ше́дше гро́бꙋ наꙋчи́тесѧ , ꙗ҆́кѡ ᲂу҆мертви́сѧ , и҆ вᲂскр҃се па́ки пло́ть жизнᲂда́вца , во ᲂу҆вѣ́ренїе пᲂслѣ́днее вᲂскрⷭ҇нїѧ , є҆го́же надѣ́емсѧ . трⷪ҇ченъ . Не бжⷭ҇твы̀ трⷪ҇цꙋ но сᲂста́вми . нижѐ є҆ди́ницꙋ ли́цы , но бжⷭ҇тво́мъ чтꙋ́ще , с̾сѣца́емъ же и҆́же тꙋ̀ дѣлѧ́щихъ , развѣва́емъ же па́ки смѣше́нїе дерза́ющихъ на ню̀ . ю҆́же велича́емъ .

и҆́нъ , і҆рмо́съ . Мт҃и бг҃ꙋ и҆ дв҃а . Стра́сть плᲂтьскꙋ́ю , и҆ крѣ́пᲂсть бжⷭ҇тва̀ въ хрⷭ҇тѣ̀ зрѧ́ще , мꙋ́дрствꙋющїи є҆динᲂсло́жно є҆стество̀ , да пᲂсра́мѧтсѧ . то́й бо ꙗ҆́кѡ чл҃къ ᲂу҆́бѡ ᲂу҆мира́етъ , и҆ ꙗ҆́кѡ всѣ́хъ сᲂдѣ́тель вᲂскрⷭ҇лъ є҆́сть . Ми́ра ме́ртвымъ , живо́мꙋ же пѣ́нїѧ , сле́зы ᲂу҆мира́ющимъ , живᲂтꙋ́ же всѣ́хъ пѣ́снь жены̀ принеси́те , и҆́же вᲂста́нїѧ прᲂпᲂвѣ́дникъ вᲂпїѧ́ше , бл҃гᲂвѣствꙋ́ѧ хрⷭ҇то́во вᲂскрⷭ҇нїе . Свѣ́тъ ѿ свѣ́та ѻ҆́ч҃ее сїѧ́нїе сло́во без̾лѣ́тно ѡ҆блиста̀ , ꙗ҆́кѡ во тмѣ̀ житїѧ̀ чл҃чꙋ є҆стествꙋ̀ ꙗ҆ви́сѧ хрⷭ҇то́съ , и҆ гᲂнѧ́щꙋю прᲂгна̀ тмꙋ̀ . є҆го́же непреста́ннѡ вѣ́рнїи велича́емъ .

и҆́нъ , і҆рмо́съ . Нетлѣ́нїѧ и҆скꙋше́нїем̾ . Ра́дᲂсти на́мъ вѣ́чныѧ хᲂда́таица ꙗ҆ви́ласѧ є҆сѝ , и҆ весе́лїѧ и҆спо́лнила є҆сѝ на́съ , прⷭ҇нѡ дв҃о ѻ҆трᲂкᲂви́це . и҆зба́вителѧ ро́ждьши , и҆́стинᲂю и҆ дх҃ᲂмъ бжⷭ҇твенымъ , тᲂгѡ̀ пᲂчита́ющаѧ ꙗ҆́кѡ бг҃а спаса́ющаго на́съ . Пᲂѧ̀ дв҃дъ тво́й пра́ѻ҆ц҃ъ пречⷭ҇таѧ , тебѐ кᲂвче́гъ нарица́етъ ѡ҆сщ҃е́нїѧ бжⷭ҇твенаго . па́че є҆стества̀ бг҃а вмѣсти́вшꙋю , во ѻ҆те́ческихъ сѣдѧ́щаго нѣ́дрѣхъ . є҆го́же непреста́нно вѣ́рнїи велича́емъ . Ꙗ҆́кѡ вᲂи́стинꙋ превы́шши є҆сѝ , всеѧ̀ тва́ри є҆ди́на , зижди́телѧ бо всѣ́мъ на́мъ пло́тїю рᲂдила̀ є҆сѝ . тѣ́мже ꙗ҆́кѡ мт҃и є҆ди́наго влⷣкꙋ нᲂси́вши , всѣ́мъ нача́льнᲂе пᲂбѣжде́нїе .

таⷤ , дᲂсто́йно є҆́сть .= пᲂсе́мъ , є҆ктенїѧ̀ ма́лаѧ . та́же : ст҃ъ гдⷭ҇ь бг҃ъ на́шъ . =сти́хъ : ꙗ҆́кѡ ст҃ъ гдⷭ҇ь бг҃ъ на́шъ . сти́хъ : надᲂвсѣ́ми людьмѝ бг҃ъ на́шъ . пᲂсе́мъ , свѣти́ленъ , вᲂскрⷭ҇нъ . сла́ва , ст҃о́мꙋ , а҆́ще є҆́сть . и҆ ны́нѣ , боⷢ҇ , вᲂскрⷭ҇нъ . и҆ =ѱалмы̀ , ѡ҆бы́чны . =на хвали́тѣхъ , стихѣ́ры , вᲂскрⷭ҇ны . гла́съ , з҃ . =запѣ́въ : хвали́те бг҃а во ст҃ы́хъ є҆гѡ̀ . В=ᲂскрⷭ҇лъ є҆сѝ хрⷭ҇тѐ ѿ ме́ртвыхъ , раз̾рꙋши́въ сме́ртныѧ ᲂу҆́зы . бл҃гᲂвѣствꙋ́й землѐ ра́дᲂсть ве́лїю . по́йте нб҃са̀ бж҃їю сла́вꙋ .

хвали́те є҆гѡ̀ во ᲂу҆тверже́нїи си́лъ є҆гѡ̀ . Вᲂскрⷭ҇нїе хрⷭ҇то́во ви́дѣвше , пᲂклᲂни́мсѧ ст҃ᲂмꙋ гдⷭ҇ꙋ і҆с҃ꙋ , є҆ди́нᲂмꙋ без̾грѣ́шнᲂмꙋ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Хртⷭ҇о́вꙋ вᲂскрⷭ҇нїю кла́нѧющесѧ непреста́емъ , то́й бо на́съ спа́слъ є҆́сть ѿ без̾зако́нїи на́шихъ , ст҃ы́и гдⷭ҇ь і҆с҃ъ , ꙗ҆вле́и в̾ ми́рѣ вᲂскрⷭ҇нїе .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Что̀ вᲂзда́мъ гдⷭ҇ви ѡ҆ всѣ́хъ , ꙗ҆́же вᲂзда́стъ на́мъ ; на́съ бо ра́ди в̾ чл҃цѣхъ за и҆стлѣ́вшее є҆стество̀ , бг҃ъ сло́во пло́́ть бы́сть , и҆ всели́сѧ в̾ны̀ . къ невᲂз̾бл҃гᲂда́тнымъ бл҃гᲂда́тель . къ плѣ́ннымъ свᲂбᲂди́тель . ко и҆́же во тмѣ̀ сѣдѧ́щимъ , сл҃нце пра́веднᲂе . на крⷭ҇тѣ̀ без̾стра́стныи , во а҆́дѣ свѣ́тъ , в̾ сме́рти живо́тъ . вᲂскрⷭ҇нїе па́дшихъ ра́ди . к̾ немꙋ́ же вᲂзᲂпїе́мъ , бж҃е на́шъ сла́ва тебѣ̀ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Врата̀ а҆́дᲂва сᲂкрꙋши́лъ є҆сѝ гдⷭ҇и , и҆ сме́рти держа́вꙋ ᲂу҆празднѝ , крѣ́пкᲂю си́лᲂю твᲂе́ю . и҆ сᲂвᲂста́вилъ є҆сѝ ме́ртвыѧ , и҆́же ѿ́ вѣка во тмѣ̀ спѧ́щїѧ , бжⷭ҇твенымъ и҆ сла́внымъ вᲂскрⷭ҇нїемъ свᲂи́мъ , ꙗ҆́кѡ цр҃ь всѣ́хъ и҆ бг҃ъ всеси́ленъ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Прїидѣ́те вᲂз̾ра́дꙋемсѧ гдⷭ҇ви , и҆ вᲂзвесели́мсѧ ѡ҆ вᲂскрⷭ҇нїи є҆гѡ̀ . ꙗ҆́кѡ сᲂвᲂздви́же ме́ртвыѧ , ѿ а҆́дᲂвыхъ нерѣши́мыхъ ᲂу҆́зъ . и҆ дарᲂва̀ ми́рᲂви живо́тъ вѣ́чныи , и҆ ве́лїю млⷭ҇ть .

вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Блиста́ѧисѧ а҆́нг҃лъ , на ка́мени сѣдѧ́ше живᲂно́снагѡ тѝ гро́ба , и҆ жена́мъ мѷрѡно́сицамъ бл҃гᲂвѣствᲂва́ше глаго́лѧ , вᲂскр҃се гдⷭ҇ь ꙗ҆́кᲂже пре́жде речѐ ва́мъ , вᲂз̾вѣсти́те ᲂу҆чн҃кѡ́мъ є҆гѡ̀ , ꙗ҆́кѡ пред̾варѧ́етъ ва́съ в̾ галиле́и , ми́рꙋ же пᲂдае́тъ живо́тъ вѣ́чныи , и҆ ве́лїю млⷭ҇ть .

и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Что̀ небрего́сте ка́мень краеꙋго́льныи , ѽ пребез̾зако́ннїи і҆ꙋде́и ; сѐ то́й є҆́сть , є҆го́же пᲂлᲂжѝ бг҃ъ в̾ сїѡ́нѣ , и҆́же ѿ ка́мене и҆стᲂчи́выи в̾ пꙋсты́ни во́дꙋ , и҆ на́мъ и҆злива́ѧи ѿ ре́бръ свᲂи́хъ без̾сме́ртїе . то́й є҆́сть ка́мень , и҆́же ѿ гᲂры̀ дв҃ческїѧ , ᲂу҆сѣче́сѧ без̾хᲂтѣ́нїѧ мꙋ́жеска , сн҃ъ чл҃ческїи , грѧды́и на ѻ҆́блацѣхъ нбⷭ҇ныхъ , ве́тхїи деньмѝ , ꙗ҆́кᲂже речѐ данїи́лъ , и҆ вѣ́чно є҆гѡ̀ црⷭ҇тво .

сла́ва , стихѣ́ра є҆ѵⷢ҇а́льскаѧ .= и҆ ны́нѣ . гла́съ , в҃ . пребл҃гᲂслᲂве́на є҆сѝ бцⷣе дв҃о . Славᲂсло́вїе вели́кᲂе . =і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво .= трᲂпа́рь : Д=не́сь спасе́нїе ми́рꙋ , пᲂе́мъ вᲂскрⷭ҇шаго и҆́з̾ грᲂба , и҆ нача́льникꙋ живᲂтꙋ̀ хрⷭ҇та̀ бг҃а на́шегѡ . разрꙋши́въ бо сме́рть , пᲂбѣ́дꙋ да́стъ на́мъ , и҆ ве́лїю млⷭ҇ть .

пᲂсе́мъ , є҆ктенїѝ . и҆ ѿпꙋ́стъ . та́же , ча́съ , а҃ . ѱалмы̀ , ѡ҆бы́чны . и҆ кᲂне́чныи ѿпꙋ́стъ .

Въ нлⷣю , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . На крⷭ҇тъ вᲂз̾несе́сѧ ще́дре , а҆да́мᲂво рꙋкᲂписа́нїе дре́внѧгѡ грѣха̀ ѡ҆чи́стилъ є҆сѝ , и҆ спа́слъ є҆сѝ ѿ́ лести ро́дъ чл҃ческїи . тѣ́мже вᲂспѣва́емъ тѧ бл҃гᲂда́телю гдⷭ҇и .

=бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . во́ =грᲂбѣ ꙗ҆́кѡ сме́ртенъ пᲂлᲂжи́сѧ , живᲂтѐ всѧ́ческихъ хрⷭ҇тѐ , и҆ врата̀ а҆́дᲂва сᲂкрꙋши́лъ є҆сѝ . и҆ вᲂскр҃се во сла́вѣ тридне́внѡ ꙗ҆́кѡ си́ленъ , и҆ всѣ́хъ прᲂсвѣти́лъ є҆сѝ , пᲂклᲂнѧ́ющихсѧ твᲂемꙋ̀ вᲂста́нїю .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Сᲂвᲂздви́глъ є҆сѝ во свᲂе́мъ вᲂста́нїи а҆да́ма живᲂда́вче хрⷭ҇тѐ , дре́внее нетлѣ́нїе да́рꙋѧ є҆́же в̾ раѝ . тѣ́мже вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Гдⷭ҇ь вᲂскр҃съ тридне́вно и҆з̾ ме́ртвыхъ , дарᲂва́лъ є҆́сть ми́ръ свᲂи́мъ ᲂу҆ченикѡ́мъ , и҆ тѣ́хъ блгⷭ҇ви́въ пᲂсла́въ ре́къ , всѧ̀ приведи́те в̾ црⷭ҇твїе мᲂѐ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . И҆злїѧ̀ ꙗ҆́дъ ѕмі́й и҆нᲂгда̀ в̾ слꙋ́хъ є҆́ввинъ , хрⷭ҇то́съ в̾ стра́сти крⷭ҇тнѣй , и҆стᲂчи́лъ є҆́сть ми́рᲂви наслажде́нїе . тѣ́мже взыва́емъ , пᲂмѧнѝ на́съ гдⷭ҇и во црⷭ҇твїи сѝ .

сла́ва . Свѣ́тъ ѻ҆ц҃ъ , свѣ́тъ сн҃ъ сло́во , свѣ́тъ дх҃ъ ст҃ы́и . но є҆ди́нъ свѣ́тъ трⷪ҇ца . є҆ди́нъ бо бг҃ъ в̾ трїе́хъ ᲂу҆́бѡ ли́цѣхъ , є҆ди́но же є҆стество̀ и҆ нача́ло , непресѣко́мо и҆ неслїѧ́нно , при́снѡ пребыва́ющее .

и҆ ны́нѣ . Рᲂдила̀ є҆сѝ бцⷣе пло́тїю сн҃а , сло́во бг҃а и҆ ѻ҆ц҃а , ꙗ҆́кѡ вѣ́сть са́мъ є҆ди́нъ . тѣ́мже дв҃о мт҃и ѡ҆бᲂжи́вшїисѧ тебѐ ра́ди , ра́дꙋисѧ тебѣ̀ зᲂве́мъ , хрⷭ҇тїа́нѡмъ ᲂу҆пᲂва́нїе .

<< Previous

Contents

Next >>