Глас 8 пятница

Въ четверто́къ , ве́черъ . на гдⷭ҇и вᲂзва́хъ , стихѣ́ры , крⷭ҇тны . гла́съ , и҃ . поⷣ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Ѽ= пресла́внᲂе чꙋ́до ,꙳ живᲂно́сныи са́дъ ,꙳ крⷭ҇тъ всечⷭ҇тны́и ,꙳ на высᲂтꙋ̀ вᲂз̾нᲂси́мъ ꙗ҆влѧ́етсѧ дне́сь ,꙳ и҆ славᲂсло́вѧтъ є҆гѡ̀ всѝ кᲂнцы̀ землѝ ,꙳ ᲂу҆страша́ютсѧ бѣсо́вскаѧ ѡ҆пᲂлче́нїѧ ,꙳ ѽ бж҃їе дарᲂва́нїе земны́мъ дарᲂва́сѧ ,꙳ и҆́мже хрⷭ҇тѐ ,꙳ спасѝ дш҃а на́ша ꙗ҆́кѡ є҆ди́нъ милᲂсе́рдъ .

ᲂу҆пᲂва̀ дш҃а мᲂѧ̀ на́ гдⷭ҇а . Ѽ пресла́внᲂе чꙋ́до ,꙳ ꙗ҆́кѡ гро́здъ ,꙳ бжⷭ҇твеныѧ жи́зни , нᲂси́выи вы́шнѧгѡ ,꙳ ѿ землѝ взе́млемъ крⷭ҇тъ вᲂз̾выша́етсѧ дне́сь ,꙳ и҆́мже къ бг҃ꙋ привлече́ни бы́хᲂмъ всѝ ,꙳ и҆ пᲂже́рта бы́сть до кᲂнца̀ сме́рть ,꙳ ѽ дре́во пречестно́е ,꙳ и҆́мже наслади́хᲂмсѧ во є҆де́мѣ без̾сме́ртныѧ пи́щи ,꙳ хрⷭ҇та̀ сла́вѧще .

да ᲂу҆пᲂва́етъ і҆и҃ль на́ гдⷭ҇а . Ѽ мно́гїѧ тѝ бл҃гᲂсти ,꙳ є҆́же к̾ на́мъ і҆с҃е бл҃же ,꙳ ка́кѡ себѐ смири́лъ є҆сѝ ,꙳ и҆ бы́сть чл҃къ ,꙳ и҆ пᲂстрада́ти спᲂдо́бисѧ крⷭ҇тъ и҆ сме́рть пᲂно́снꙋю ,꙳ за непᲂтре́бныѧ рабы̀ держи́мь ;꙳ что́ ти дᲂсто́йныи да́ръ принесе́мъ бг҃ᲂпᲂдо́бныи ;꙳ то́чїю сла́вимъ тѧ̀ ,꙳ бл҃гᲂдарѧ́ще вѣ́рнїи .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , и҆ пᲂдо́бенъ , то́йже . запѣ́въ : ѿ всѣ́хъ без̾зако́нїи є҆гѡ̀ . Ѽ не и҆з̾рече́ннѣй бл҃гᲂсти ,꙳ вᲂпло́щшагᲂсѧ и҆з̾ тебѐ бцⷣе всепѣ́таѧ ,꙳ крⷭ҇тъ бо и҆ сме́рть ꙗ҆́кѡ чл҃кᲂлю́бецъ претерпѣ́въ ,꙳ да ми́ръ спасе́тъ є҆го́же сᲂзда̀ ,꙳ є҆го́же мᲂлѝ ꙳ и҆ менѐ мнᲂгᲂбᲂлѣ́зненыѧ ѻ҆каѧ́ннаго ,꙳ и҆зба́вити мꙋ́ки ,꙳ и҆ и҆дѣ́же свѣ́тъ сїѧ́етъ ,꙳ невече́рнїи всели́тъ мѧ .

пᲂхвали́те є҆гѡ̀ всѝ лю́дїе . Что̀ зри́мᲂе видѣ́нїе ,꙳ є҆́же мᲂи́ма ѻ҆чи́ма ви́дитсѧ ѽ влⷣко ;꙳ сᲂдержа́и всю̀ тва́рь ,꙳ на́ древо вᲂз̾дви́жесѧ и҆ ᲂу҆мира́еши ,꙳ всѣ́мъ даѧ̀ жи́знь ,꙳ бцⷣа пла́чꙋщисѧ глаго́лаше ,꙳ є҆гда̀ ᲂу҆́зрѣ на крⷭ҇тѣ̀ вᲂз̾несе́на ,꙳ и҆́же и҆з̾ неѧ̀ не и҆з̾рече́ннѡ вᲂсїѧ́вшаго ,꙳ бг҃а и҆ чл҃ка .

и҆ и҆́стина гдⷭ҇нѧ пребыва́етъ во́ вѣки . Ста́до є҆́же стѧжа̀ пречⷭ҇таѧ ,꙳ сн҃ъ тво́й и҆ бг҃ъ ѡ҆крᲂпи́выи кро́вїю ,꙳ ѿ бѣ́дъ и҆зба́ви ꙳ честны́ми мл҃твами сѝ ,꙳ ви́димыѧ и҆ неви́димыѧ врагѝ ꙳ ꙗ҆́кᲂже звѣ́рѧ ѿгᲂнѧ́щи ,꙳ и҆ тѣ́хъ лица̀ без̾че́стїѧ и҆спо́лни ,꙳ ꙗ҆́кᲂже дв҃дъ дре́вле прᲂвᲂз̾гласѝ ꙳ пѣснᲂпѣ́вецъ чⷭ҇таѧ .

сла́ва , и҆ ны́нѣ , крⷭ҇тᲂбг҃ᲂро́дичен̾ . Тѧ̀ ви́дѧщи пригвᲂжде́на на крⷭ҇тѣ̀ і҆с҃е , и҆ стрⷭ҇ти прїе́млюща во́лею , дв҃аѧ и҆ мт҃и твᲂѧ̀ влⷣко , ᲂу҆вы̀ мнѣ̀ вᲂпїѧ́ше , ча́до сла́дкᲂе , ра́ны без̾ пра́вды ка́кѡ терпи́ши , врачꙋ̀ и҆сцѣли́выи чл҃ческᲂе немᲂже́нїе , и҆ ѿ тлѝ . всѣ́хъ и҆зба́вивыи милᲂсе́рдїемъ сѝ ;

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , крⷭ҇тны . гла́съ , и҃ . Вᲂз̾несы́исѧ на́ крⷭ҇тъ хрⷭ҇тѐ бж҃е , и҆ спа́слъ є҆сѝ чл҃ческїи ро́дъ , сла́вимъ страда́нїѧ твᲂѧ̀ .

сти́хъ : к̾ тебѣ̀ вᲂз̾ведо́хъ ѻ҆́чи . Пригвᲂзди́всѧ на крⷭ҇тѣ̀ хрⷭ҇тѐ бж҃е , и҆ ѿве́рзлъ є҆сѝ ра́йскїѧ две́ри . тѣ́мже сла́вимъ бжⷭ҇тво̀ твᲂѐ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мч҃нцы гдⷭ҇ни всѧ́ко мѣ́сто ѡ҆сщ҃а́ете , и҆ всѧ́къ недꙋ́гъ ᲂу҆врачꙋ́ете , и҆ ны́нѣ мᲂли́те , и҆зба́витисѧ ѿ сѣ́тей вра́жїихъ дш҃а́мъ на́шимъ мо́лимсѧ .

сла́ва , и҆ ны́нѣ , крⷭ҇тᲂбоⷢ҇ . Ю҆́ница нескве́рнаѧ , ю҆нца̀ ви́дѧщи на́ древѣ пригвᲂжде́на хᲂтѣ́нїемъ , рыда́ющи жа́лᲂстнѣ , ᲂу҆вы̀ мнѣ̀ вᲂпїѧ́ше люби́мѣйшее ча́до . что́ ти со́нмъ вᲂз̾дадѐ без̾бл҃гᲂда́тныи є҆вре́йскїи ; хᲂтѧ́ мѧ ѡ҆без̾ча́дствᲂвати ѿ тебѐ вселюбе́зне ;

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ четверто́къ , на па́вечерницѣ . кано́нъ , прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Ми́лᲂстива мнѣ̀ хрⷭ҇та̀ сᲂдѣ́лай дв҃о пренепᲂро́чнаѧ , въ де́нь прѧ̀ страшна́го ѡ҆сꙋже́нїѧ и҆зима́ющи . Ѡ҆дᲂжди́ ми влⷣчце мᲂлю́сѧ ка́пли ᲂу҆миле́нїѧ , сꙋ́щꙋю ми скве́рнꙋ ѿмыва́ющи , ꙗ҆́кѡ да сла́влю тѧ̀ .= сла́ва . Прᲂсвѣти́ мѧ дв҃о ꙗ҆́же свѣ́тъ незахᲂди́мыи ро́ждьшаѧ , мᲂеѧ̀ лѣ́нᲂсти глꙋбо́кꙋю тмꙋ̀ ѿгᲂнѧ́щи . и҆ ны́нѣ . С=паси́ мѧ бцⷣе и҆́же во мно́гихъ грѣсѣ́хъ пᲂги́бшаго , и҆ мꙋ́ки всѧ́кїѧ и҆ лю́таго ѡ҆сꙋже́нїѧ и҆зба́ви .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й , жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Сщ҃е́ннагѡ житїѧ̀ ѿпа́дъ пречⷭ҇таѧ , прилᲂжи́хсѧ скᲂто́мъ и҆ ѡ҆сꙋжде́нъ ве́сь бы́хъ , ꙗ҆́же сꙋдїю̀ ро́ждьшаѧ , ѿ всѧ́кᲂгѡ ѡ҆сꙋже́нїѧ и҆зба́ви мѧ и҆ спасѝ . Къ тебѣ̀ прибѣга́ю влⷣчце всегда̀ , мно́жествᲂмъ напа́стей ѡ҆бхᲂди́ма , ᲂу҆ще́дривши спаси́ мѧ , ꙗ҆́же сп҃са ро́ждьшаѧ всѧ́ческимъ и҆ гдⷭ҇а , є҆ди́на препѣ́таѧ .= сла́ва . Непрᲂхᲂди́маѧ две́ри , ꙗ҆́же к̾ бг҃ꙋ привᲂдѧ́щи ѻ҆трᲂкᲂви́це , две́ри пᲂкаѧ́нїѧ мѝ ѿве́рзи мᲂлю́сѧ , ѡ҆чи́стивши грѣхѡ́въ мᲂи́хъ скве́рнꙋ , тꙋ́чами млⷭ҇ти твᲂеѧ̀ бг҃ᲂбл҃гᲂда́тнаѧ . и҆ ны́нѣ . И҆=зба́ви мѧ стрⷭ҇те́й наведе́нїѧ влⷣчце , и҆ бᲂрю́щїѧсѧ врагѝ мᲂѧ̀ ны́нѣ пᲂбѣдѝ . ᲂу҆тверди́ мѧ на ка́мени бж҃їихъ хᲂтѣ́нїи , дш҃ꙋ мᲂю̀ прᲂсвѣтѝ , две́ри бжⷭ҇твенагѡ свѣ́та .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Дш҃и мᲂеѧ̀ ꙗ҆́звы и҆сцѣлѝ бг҃ᲂбл҃гᲂда́тнаѧ дв҃о , и҆ ᲂу҆́мъ мо́й прᲂсвѣтѝ чи́стаѧ , ѡ҆мраче́нныи страстны́ми нахо́ды . Оу҆ны́нїемъ спѧ́щаго , и҆ грѣхо́мъ пᲂкрᲂве́ннаго , къ пᲂкаѧ́нїю мѧ пречⷭ҇таѧ призᲂвѝ , ꙗ҆́кѡ мт҃и сло́вꙋ .= сла́ва . Не и҆скꙋсᲂбра́чнаѧ влⷣчце . ꙗ҆́же вᲂплᲂще́ннᲂе сло́во ро́ждьшаѧ , дш҃ꙋ мᲂю̀ прᲂсвѣтѝ , и҆ ѿ гее́нны и҆зба́ви и҆ мꙋче́нїѧ . и҆ ны́нѣ . Н=а тѧ̀ наде́ждꙋ мᲂю̀ вᲂз̾лᲂжи́хъ всю̀ мт҃и дв҃о , дш҃ꙋ мᲂю̀ сᲂблюдѝ , ꙗ҆́же бг҃а ро́ждьши сп҃са мᲂегѡ̀ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Дш҃и мᲂеѧ̀ стра́сти всѐ не и҆сцѣ́льныѧ ѻ҆трᲂкᲂви́це и҆сцѣлѝ , и҆ ᲂу҆га́сшїи лѣ́нᲂстїю свѣти́льникъ мо́й вᲂжзѝ , и҆ к̾ пᲂкаѧ́нїю пꙋте́мъ наста́ви дв҃о , да вѣ́рᲂю и҆ любо́вїю тѧ̀ сла́влю . Себѐ ѡ҆сꙋжда́ю пре́жде и҆спыта́нїѧ бг҃ᲂра́дᲂваннаѧ , стꙋ́днаѧ дѣ́ла нᲂшꙋ̀ є҆ди́нъ ѡ҆сꙋже́нныи ; но пред̾ста́ни ми ꙗ҆́кѡ пред̾ста́тельница сꙋ́щи всѣ́мъ , и҆ лю́таго ѡ҆сꙋже́нїѧ и҆зба́ви мѧ .= сла́ва . И҆збавлѧ́ющи мѧ̀ ѿ плѣне́нїѧ и҆ ѡ҆держа́щїѧ дш҃етлѣ́нныѧ мᲂлвы̀ , и҆ страсте́й лю́тыхъ ᲂу҆мерщвѧ́ющихъ мѧ̀ , непреста́й прест҃а́ѧ ѻ҆трᲂкᲂви́це , грѣ́шникѡмъ застꙋ́пнице . чл҃кѡмъ гᲂто́ваѧ пᲂмо́щнице . и҆ ны́нѣ . О=у҆мерщве́на мѧ̀ всегѡ̀ жа́лᲂмъ сме́ртнымъ ѿ престꙋпле́нїѧ вᲂста́ви пречⷭ҇таѧ , ꙗ҆́же жи́знь заче́ншаѧ ми́рᲂви и҆зба́вителѧ и҆ цр҃ѧ , и҆ к̾ свѣ́тꙋ наста́ви мѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Оу҆мерщве́на мѧ мно́гими престꙋпле́ньми , пречⷭ҇таѧ дв҃о ѡ҆живѝ , ꙗ҆́же жи́знь чл҃кѡмъ не и҆зрече́ннѡ ро́ждьши бцⷣе . и҆ твᲂри́ти ми во́лю гдⷭ҇ню наста́ви . Тѧ̀ пред̾ста́тельницꙋ и҆ стѣ́нꙋ вѣ́рнїи всѝ стѧжа́хᲂмъ , и҆́же во глꙋбинѣ̀ ѕѡ́лъ , и҆ мᲂлвы̀ и҆ печа́лей пᲂтᲂплѧ́емїи при́снѡ , бцⷣе є҆ди́на вѣ́рнымъ прибѣ́жище .= сла́ва . Оу҆вѧди́вшаѧ сады̀ без̾бо́жїѧ пренепᲂро́чнаѧ свᲂи́мъ ст҃ы́мъ прᲂзѧбе́нїемъ . тѣ́мже растꙋ́щꙋю во мнѣ̀ при́снѡ вра́жїю ѕло́бꙋ пᲂтребѝ пречⷭ҇таѧ . и҆ ны́нѣ . Ѡ҆=ст҃и́ ми ᲂу҆́мъ , и҆ прᲂсвѣтѝ срⷣце мᲂѐ ст҃а́ѧ мт҃и бж҃їѧ , и҆ ѡ҆держа́щихъ мѧ ѕѡ́лъ и҆змѣнѝ , да тѧ̀ сла́влю тве́рдꙋю застꙋ́пницꙋ мᲂю̀ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , и҃ . А҆́гньца и҆ па́стырѧ и҆ сп҃са ми́рꙋ , на крⷭ҇тѣ̀ зрѧ́щи ро́ждьшаѧ тѧ̀ гл҃аше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же за всѣ́хъ терпи́ши , сы́не и҆ бж҃е мо́й .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Млⷭ҇тива бꙋ́ди ми дв҃о , и҆ ᲂу҆ра́нена мѧ ѻ҆рꙋ́жїемъ грѣха̀ , пла́стыремъ и҆сцѣлѝ твᲂе́ю мᲂли́твᲂю . и҆ ѻ҆гнѧ̀ негаси́маго и҆схи́ти мѧ во́ вѣки . И҆зба́ви мѧ мт҃и сп҃сᲂва ѡ҆держа́щаго лю́тагѡ плѣне́нїѧ пᲂмышле́нїи лꙋка́выхъ , и҆ ѡ҆держа́нїи прегрѣше́нїѧ , ꙗ҆́кѡ да при́снѡ спаса́емъ , по́ дᲂлгꙋ тѧ̀ сла́влю . сла́ва . Ны́нѣ къ тебѣ̀ прибѣга́ю бг҃ᲂмт҃и , прегрѣше́нїи плѣни́цами стѧ́гнꙋтъ . за млрⷭ҇дїе млⷭ҇ти разрѣши́ мѧ дв҃о , и҆ ѿ бѣсо́въ и҆зба́ви мꙋче́нїѧ и҆ ѕло́бы .= и҆ ны́нѣ . О=у҆ще́дри и҆ спаси́ мѧ дв҃о , и҆́же ще́драгѡ ро́ждьши бж҃їѧ сло́ва . свѣ́тᲂмъ и҆́же в̾ тебѣ̀ ѡ҆зарѝ дш҃ꙋ мᲂю̀ , и҆ ѿ бѣсо́въ и҆зба́ви мѧ лю́тагѡ кᲂва́рства .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . И҆́же по всемꙋ̀ сᲂверше́нъ , и҆ є҆стество́мъ непристꙋ́пенъ , ꙗ҆ви́сѧ прикᲂснᲂве́нъ мнѣ̀ . пло́тїю ѡ҆блᲂже́нъ и҆з̾ тебѐ не и҆скꙋсᲂбра́чнаѧ . є҆го́же прилѣ́жно мᲂлѝ , без̾зако́нїи мᲂи́хъ бре́мѧ ѡ҆блегчи́ти , и҆ сꙋда̀ бꙋ́дꙋщагѡ и҆зба́вити мѧ . И҆́же сꙋдїю̀ и҆ гдⷭ҇а ро́ждьши па́че сло́ва . сегѡ̀ ꙗ҆́кѡ сн҃а свᲂегѡ̀ прест҃а́ѧ ᲂу҆мᲂлѝ , в̾ ча́съ сꙋда̀ ѡ҆сꙋже́нїѧ и҆ ѻ҆гнѧ̀ и҆ тмы̀ несвѣти́мыѧ , и҆ скре́жета зꙋбна́гѡ и҆зба́вити мѧ , вѣ́рᲂю бл҃гᲂче́стнѡ пᲂю́щаго всегда̀ .= сла́ва . Бг҃ᲂрᲂди́тельнице пречⷭ҇таѧ , дш҃и мᲂе́й ꙗ҆́звы , и҆ грѣхо́вныѧ сᲂбла́зны ѡ҆чи́сти , и҆сто́чникъ ѿмыва́ющи є҆́же и҆з̾ ре́бръ ржⷭ҇тва́ ти , и҆ и҆́же ѿ ни́хъ пᲂте́кшими стрꙋѧ́ми . к̾ тебѣ́ бо взыва́ю и҆ к̾ тебѣ̀ и҆ прибѣга́ю , и҆ тебѐ мᲂлю̀ бг҃ᲂбл҃гᲂда́тнꙋю . и҆ ны́нѣ . О=у҆мерщве́ннꙋю дш҃ꙋ мᲂю̀ ᲂу҆грызе́нїемъ ѕмі́евымъ , є҆ди́на ꙗ҆́вѣ живо́тъ ро́ждьшаѧ пренепᲂро́чнаѧ ѡ҆живѝ , и҆ ꙗ҆́же на́съ ра́ди дв҃о рᲂжде́нагѡ дѣ́йствᲂвати пᲂспѣшѝ хᲂтѣ́нїѧ , вᲂпїю́ща сщ҃е́ннїи вᲂспо́йте , лю́дїе превᲂз̾нᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Прᲂсвѣтѝ две́ри свѣ́та , ѡ҆слѣпле́нꙋю дш҃ꙋ мᲂю̀ страстьмѝ , и҆ лꙋка́выми по́мыслы ѡ҆чернѣ́вшꙋю и҆ бѣдꙋ́ющꙋю , и҆ и҆зба́ви мѧ напа́стей и҆ ѿ бѣсѡ́въ ѡ҆ѕлᲂбле́нїѧ , и҆стѧза́нїѧ лю́та , и҆ бꙋ́дꙋщагѡ пла́мене и҆ мꙋ́ки . Пᲂщади́ мѧ сп҃се рᲂже́исѧ ѿ дв҃ы , и҆ сᲂхрани́выи ро́ждьшꙋю тѧ , нетлѣ́ннꙋ и҆ по ржⷭ҇твѣ̀ , є҆гда̀ сѧ́деши сꙋди́ти дѣ́лᲂмъ мᲂи́мъ , без̾зако́нїѧ и҆ грѣхѝ мᲂѧ̀ пре́зри , ꙗ҆́кѡ без̾грѣ́шенъ , и҆ ꙗ҆́кѡ бг҃ъ млⷭ҇тивъ и҆ чл҃кᲂлю́бецъ . сла́ва . Нᲂсѧ́щи нбⷭ҇ныи ѻ҆́гнь рꙋка́ма ꙗ҆́кѡ клеща́ми , бг҃ᲂбл҃гᲂда́тнаѧ , дш҃и мᲂеѧ̀ стра́сти пᲂпалѝ чⷭ҇таѧ . и҆ стра́шнагѡ ѡ҆сꙋже́нїѧ и҆ ѻ҆гнѧ̀ , и҆ тᲂмле́нїѧ лю́тагѡ бѣсо́вскагѡ свᲂбᲂди́ мѧ .= и҆ ны́нѣ . Ѡ҆сїѧ́нїемъ си мы́сленымъ , прᲂсвѣтѝ на́ша пᲂмышле́нїѧ и҆ сердца̀ , и҆ ра́зꙋмы , ѻ҆трᲂкᲂви́це бг҃ᲂбл҃гᲂда́тнаѧ . ꙗ҆́кѡ да стезѧ́ми живо́тными пра́вѣ хᲂдѧ́ще ми́лᲂсть пᲂлꙋчи́мъ , вᲂз̾вѣща́юще прⷭ҇нѡ хвалы̀ твᲂѧ̀ . =та́же , дᲂсто́йнѡ є҆́сть . и҆ про́чее . и҆ ѿпꙋ́стъ .

Въ пѧто́къ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , и҃ . Ви́дѧ разбо́йникъ нача́льника жи́зни , на крⷭ҇тѣ̀ ви́сѧща , и҆ гл҃аше , а҆́ще небы̀ бг҃ъ бы́лъ вᲂпло́щьсѧ , и҆́же с̾ на́ми распны́исѧ , небы̀ сл҃нце лꙋчѝ свᲂѧ̀ пᲂтаи́ло , нижѐ землѧ̀ трепе́щꙋщи трѧсла́сѧ . но и҆́же за всѣ́хъ терпѧ́и , пᲂмѧни́ мѧ сп҃се є҆гда̀ прїи́деши во црⷭ҇твїи сѝ .= сти́хъ : вᲂз̾нᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ свѧ́то є҆́сть . Пᲂсредѝ двᲂю̀ разбо́йникꙋ , мѣ́рило пра́веднᲂе ѡ҆брѣ́тесѧ крⷭ҇тъ тво́й , ѻ҆́вᲂмꙋ ᲂу҆́бѡ низ̾хᲂдѧ́щꙋ во а҆́дъ тѧгᲂто́ю хꙋле́нїѧ , дрꙋго́мꙋ же легча́щꙋсѧ ѿ грѣ́хъ к̾ ра́зꙋмꙋ бг҃ᲂсло́вїѧ . хрⷭ҇тѐ бж҃е сла́ва тебѣ̀ . сла́ва , и҆ нн҃ѣ , крⷭ҇тᲂбоⷢ҇ . С=н҃а твᲂегѡ̀ дв҃о и҆ бг҃а крⷭ҇то́мъ сᲂхранѧ́еми при́снѡ , бѣсо́вскїѧ прило́ги ѿгᲂнѧ́емъ и҆ ко́зни , сꙋ́щꙋю тѧ̀ бцⷣꙋ вᲂи́стинꙋ вᲂспѣва́юще , и҆ любо́вїю всѝ ро́ди блажи́мъ пречⷭ҇таѧ , ꙗ҆́кᲂже прᲂрекла̀ є҆сѝ , тѣ́мже на́мъ сᲂгрѣше́ней ѡ҆ставле́нїе мл҃твами си да́рꙋй .

по в҃ , стихᲂло́гїи , сѣда́льны . гла́съ , и҃ . Пᲂсредѝ є҆де́ма дре́во прᲂцвѣтѐ сме́рть , пᲂсреди́ же всеѧ̀ землѝ дре́во прᲂзѧбѐ живо́тъ . вкꙋси́вше бо пе́рвᲂе нетлѣ́нни сꙋ́ще , тлѣ́нни бы́хᲂмъ . пᲂлꙋчи́вшеже втᲂро́е , нетлѣ́нїѧ напита́хᲂмсѧ , крⷭ҇то́мъ бо спаса́еши ꙗ҆́кѡ бг҃ъ ро́дъ чл҃ческїи .= сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Въ раи́ мѧ пре́жде дре́во ѡ҆бнажѝ , вкꙋше́нїемъ вра́гъ внᲂсѧ̀ сме́рть . крⷭ҇тнᲂе же дре́во , живᲂта̀ вѣ́чнагѡ ѡ҆дѣѧ́нїе чл҃кѡмъ нᲂсѧ̀ , вᲂдрꙋзи́сѧ на землѝ , и҆ ми́ръ ве́сь и҆спо́лнисѧ всѧ́кїѧ ра́дᲂсти , є҆го́же зрѧ́ще вᲂз̾выша́ема . бг҃ᲂви вѣ́рᲂю лю́дїе сᲂгла́сно вᲂзᲂпїе́мъ , и҆спо́лнь сла́вы до́мъ тво́й . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆зра́илевъ . мⷱ҇ꙋ . Свѣ́тᲂмъ нбⷭ҇нымъ прᲂсвѣща́етсѧ дне́сь сі́и хра́мъ , в̾ не́мъ бо во́инства а҆́нг҃льскаѧ ра́дꙋютсѧ , с̾ ни́ми же и҆ чл҃честїи ли́цы веселѧ́тсѧ , въ па́мѧть страстᲂте́рпецъ . тѣ́хъ мᲂльба́ми низ̾пᲂслѝ хрⷭ҇тѐ , ми́рꙋ твᲂемꙋ̀ смире́нїе , и҆ ве́лїю млⷭ҇ть . сла́ва , и҆ нн҃ѣ , крⷭ҇тᲂбоⷢ҇ . И҆́=же ѿ крᲂве́й твᲂи́хъ чи́стыхъ вᲂпло́щшагᲂсѧ , и҆ па́че ᲂу҆ма̀ ѿ тебѐ чи́стаѧ рᲂди́вшагᲂсѧ , на́ древѣ ви́сѧща пᲂсредѝ ѕлᲂдѣ́евъ зрѧ́щи , ᲂу҆тро́бᲂю бᲂлѧ́ше , и҆ мт҃рьски пла́чꙋщи вᲂпїѧ́ше , ᲂу҆вы̀ мнѣ̀ ча́до мᲂѐ , что̀ бжⷭ҇твенᲂе и҆ не и҆зрече́ннᲂе смᲂтре́нїе твᲂѐ , и҆́мже ѡ҆живи́лъ є҆сѝ сᲂзда́нїе свᲂѐ , вᲂспѣва́ю твᲂѐ бл҃гᲂꙋтро́бїе .

по г҃ , стихᲂло́гїи , сѣда́ленъ . гла́съ , и҃ . Твᲂи́мъ крⷭ҇то́мъ хрⷭ҇тѐ сп҃се и҆ сме́ртїю , мꙋчи́тельство вра́жїе низ̾лᲂжи́сѧ , и҆ сме́рть ᲂу҆мертви́сѧ , и҆ ме́ртвыѧ и҆́хже и҆мѣ́ѧше а҆́дъ ѿ́ вѣка в̾ себѣ̀ свѧ́занныѧ , внеза́пꙋ ѿпꙋстѝ плѣ́нники всѧ̀ , вᲂспѣва́ющихъ держа́вꙋ твᲂю̀ , и҆ стра́шнᲂе твᲂѐ бл҃же и҆ бжⷭ҇твенᲂе схᲂжде́нїе , и҆́мже всѣ́хъ спа́слъ є҆сѝ . сла́ва , и҆ нн҃ѣ , крⷭ҇тᲂбоⷢ҇ . Нескве́рнаѧ а҆́гница , а҆́гньца и҆ па́стырѧ ви́сѧща на крⷭ҇тѣ̀ зрѧ́щи вᲂпїѧ́ше , ча́до мᲂѐ , что̀ стра́ннᲂе ᲂу҆́бѡ и҆ ненаде́жнᲂе сїѐ зрѣ́нїе , ка́кѡ живо́тъ сме́ртїю ѡ҆сꙋжа́етсѧ земны́мъ пᲂдо́бнѣ , но вᲂскрⷭ҇нѝ тридне́вно и҆з̾ ме́ртвыхъ ꙗ҆́кᲂже ре́клъ є҆сѝ , да ра́дꙋющисѧ сла́влю тѧ̀ . та́же , ѱало́мъ , н҃ . пᲂми́лꙋй мѧ бж҃е . пᲂсе́мъ , вᲂз̾гла́съ . ми́лᲂстїю и҆ щедро́тами .

Кано́нъ , чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ . твᲂре́нїе і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Крⷭ҇та̀ начерта́въ мѡѷсе́й , в̾ прѧ́мѡ жеѕло́мъ чермно́е пресѣчѐ , і҆и҃лю прᲂхᲂдѧ́щꙋ . то́йже ѡ҆браще́нїемъ фараѡ́на съ кᲂлесни́цами ᲂу҆да́ривъ сᲂвᲂкꙋпѝ , вᲂпрекѝ написа́въ непᲂбѣди́мᲂе ѻ҆рꙋ́жїе . тѣ́мъ хрⷭ҇та̀ вᲂспᲂе́мъ бг҃а на́шегѡ , ꙗ҆́кѡ прᲂсла́висѧ .

запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Дла́ни бжⷭ҇твенїи на крⷭ҇тѣ̀ і҆с҃е распрᲂсте́ръ , к̾ себѣ̀ со́бралъ є҆сѝ рꙋкꙋ̀ свᲂе́ю сᲂз̾да́нїе , и҆ ѿ рꙋкѝ лꙋка́вагѡ всѣ́хъ свᲂбᲂди́лъ є҆сѝ , и҆ пᲂкᲂри́лъ є҆сѝ и҆̀ , рꙋко́ю держа́внᲂю цр҃ю всѣ́хъ . тѣ́мже вѣ́рнїи пᲂе́мъ вели́чество твᲂѐ , ꙗ҆́кѡ прᲂсла́висѧ . Вре́дно и҆ гꙋби́тельно бы́сть во є҆де́мѣ дре́ва го́рькᲂе в̾кꙋше́нїе , сме́рть в̾ве́дшее , хрⷭ҇то́съ же ᲂу҆мертви́всѧ на́ древѣ всѣ́мъ живо́тъ и҆стᲂчѝ , и҆ ᲂу҆бѝ ѕмі́ѧ бжⷭ҇твенᲂю си́лᲂю . тѣ́мже є҆мꙋ̀ вᲂспᲂе́мъ бг҃ꙋ на́шемꙋ ꙗ҆́кѡ прᲂсла́висѧ .

запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Хра́брствᲂвавше і҆с҃е мч҃нкъ мно́жество , крⷭ҇то́мъ же и҆ стра́стїю твᲂе́ю , на́ страсти вᲂста́ша , и҆ пред̾ враги́ тѧ црⷭ҇твꙋющаго тва́рїю и҆спᲂвѣ́даша . терпѣ́ша же мꙋче́нїѧ и҆ бѣды̀ без̾мѣ́рныѧ , тѣ́мже твᲂю̀ ᲂу҆лꙋчи́ша сла́вꙋ всѝ сла́вѣ гдⷭ҇а .= мⷱ҇ꙋ . Крᲂпле́нїемъ бг҃ᲂдѣ́тельнᲂю чⷭ҇тно́ю ти кро́вїю , мч҃нцы твᲂѝ гдⷭ҇и и҆збавле́нїе ѡ҆брѣ́тше , кро́ви свᲂѧ̀ вᲂи́стинꙋ и҆злїѧ́ша , непра́веднѡ мꙋ́чими бы́ша , же́ртвы принᲂси́ти скве́рнымъ бѣсо́мъ . тѣ́мже чⷭ҇тна́ѧ закᲂле́нїѧ тебѣ̀ принесо́шасѧ цр҃ю всѣ́хъ . боⷢ҇ . Ꙗ҆́=кѡ ви́дѣ тѧ на крⷭ҇тѣ̀ пригвᲂжда́ема всѧ̀ ви́дѧщаго , непᲂро́чнаѧ рыда́ющи гл҃аше , что̀ сїѐ ча́до мᲂѐ ; что́ ти вᲂзда́ша насла́ждьшїисѧ мно́гихъ твᲂи́хъ даро́въ ; ка́кѡ претерплю̀ бᲂлѣ́зни ; сла́ва твᲂемꙋ̀ бл҃гᲂꙋтро́бїю , и҆ смᲂтре́нїю стра́шнᲂмꙋ дᲂлгᲂтерпѣли́ве .

Дрꙋгі́и , кано́нъ , прест҃ѣ́й бцⷣѣ . і҆рмо́съ . Во́дꙋ прᲂше́дъ . запѣ́въ : прест҃а́ѧ гжⷭ҇е бцⷣе спасѝ на́съ . Ѻ҆мраче́нꙋю сластьмѝ житїѧ̀ дш҃ꙋ мᲂю̀ бг҃ᲂмт҃и , и҆ мирски́ми печа́льми без̾вре́меннѡ смꙋща́емꙋ , прᲂсвѣще́нїемъ твᲂи́мъ прᲂсвѣтѝ . Ѿверзо́шасѧ две́ри нбⷭ҇ныѧ бжⷭ҇твенымъ ти ржⷭ҇тво́мъ бг҃ᲂмт҃и , в̾ ни́хже вхо́дъ да́ждь дш҃и мᲂе́й ꙗ҆́кѡ млⷭ҇тива , и҆ к̾ тѣ́мъ наста́ви мѧ . Оу҆стрѣле́нꙋю стрѣло́ю лꙋка́вагѡ , и҆ кᲂзньмѝ ѻ҆́нᲂгѡ и҆ кᲂва́рствы , ᲂу҆ѧ́звенꙋю дш҃ꙋ мᲂю̀ , дв҃о млⷭ҇тїю свᲂе́ю и҆сцѣлѝ . И҆́же ненадѣ́ющимсѧ наде́же , па́дшимсѧ и҆справле́нїе , свѣ́тъ бжⷭ҇твеныи ро́ждьшаѧ , дш҃ꙋ мᲂю̀ сꙋ́щꙋю во тмѣ̀ прᲂсвѣтѝ .

пѣ́снь , г҃ . і҆рмо́съ . же́ѕлъ во ѻ҆́бразъ та́йнѣ прїе́млетсѧ , прᲂзѧбе́нїемъ бо раз̾сꙋдѝ і҆єре́ѧ . неплᲂдѧ́щаѧ же пре́жде цр҃кви , нн҃ѣ прᲂцвѣтѐ дре́во крⷭ҇та̀ , в̾ держа́вꙋ и҆ ᲂу҆тверже́нїе . Въ че́рнꙋю некрасᲂтꙋ̀ и҆з̾мѣни́сѧ сл҃нце , зрѧ̀ на́ древѣ тебѐ непра́веднѡ вᲂз̾дви́жена . и҆ распаде́сѧ ка́менїе , и҆ землѧ̀ всѧ̀ стра́хᲂмъ ᲂу҆жаса́шесѧ , є҆ди́не сп҃се всѣ́хъ и҆збавле́нїе . Распрᲂсте́ръ рꙋ́цѣ мѡѷсе́й вᲂѡ҆бража́ше , крⷭ҇тъ чⷭ҇тны́и , є҆го́же мы̀ ны́нѣ вᲂѡ҆бража́юще бл҃гᲂмꙋ́дренѣ , пᲂлкѝ и҆нᲂплеме́нныѧ всѧ̀ и҆ бѣсо́вскїѧ пᲂбѣжда́емъ , вре́да всѧ́кᲂго тѣ́хъ крᲂмѣ̀ пребыва́юще .= мⷱ҇ꙋ . Стра́сти терпѧ́ще страстᲂте́рпцы , стра́сть ѡ҆бразᲂва́хꙋ , мнᲂгᲂѡ҆бра́знымъ страсте́мъ причасти́шасѧ , во́лею страда́вшаго , и҆ стра́сти ᲂу҆мертви́вшагѡ , и҆ живо́тъ ми́рꙋ вᲂсїѧ́вшагѡ . мⷱ҇ꙋ . Невᲂзвра́тнѡ мꙋче́нїѧ пꙋ́ть ше́ствᲂвавше , прет̾кнᲂве́нїѧ пре́лести ѿ серде́цъ низ̾лᲂжи́ша бл҃гᲂсла́внїи стрⷭ҇тᲂно́сцы , и҆ ᲂу҆стреми́шасѧ къ пᲂко́ю бжⷭ҇твенᲂмꙋ веселѧ́щесѧ . боⷢ҇ . З=ако́нныхъ крᲂмѣ̀ ѡ҆бы́чаевъ чл҃ческихъ , тебѐ ча́до рᲂди́хъ бцⷣа пла́чꙋщи вѣща́ше , и҆ ка́кѡ без̾зако́ннїи вᲂз̾двиго́ша тѧ̀ на́ древо , пᲂсредѝ без̾зако́нныхъ , є҆ди́нагѡ зако́нъ жи́зни пᲂлᲂжи́вшагѡ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Вᲂз̾дыха́нїѧ немо́лчнаѧ , и҆ прилѣ́жныѧ сле́зы , и҆ сᲂкрꙋше́но срⷣце да́ждь ми дв҃о , да пла́чꙋсѧ сᲂдѣ́ѧнныхъ мѝ , и҆ сᲂвᲂз̾раста́ющїѧ мѝ стра́сти пᲂтребѝ , є҆ди́на всепѣ́таѧ . Дрема́ньми ѡ҆тѧгче́нꙋю грѣхо́вными , и҆ ко а҆́дᲂвѣ ᲂу҆тро́бѣ низ̾пᲂпо́лзшꙋюсѧ дш҃ꙋ мᲂю̀ и҆схи́ти влⷣчце , и҆ пᲂмышле́нїе пᲂкаѧ́нїѧ и҆́стиннагѡ пᲂда́ждь мѝ бг҃ᲂбл҃же́наѧ . Оу҆миле́нїѧ любо́вь и҆ дᲂбрᲂдѣ́телей да́рꙋй всенепᲂро́чнаѧ , пᲂгрꙋже́ннѣй дш҃и мᲂе́й прегрѣше́ньми , и҆ нбⷭ҇нᲂе житїѐ люби́ти , и҆ бж҃їе жела́нїе и҆мѣ́ти . На тѧ̀ ᲂу҆пᲂва́нїе вᲂз̾лага́ю мт҃и бж҃їѧ , и҆ ѿчаѧ́нїѧ в̾ско́рѣ и҆зба́влюсѧ , вѣ́мъ бо вѣ́мъ твᲂегѡ̀ бл҃гᲂꙋтро́бїѧ бᲂга́тство , и҆ крѣ́пᲂсть свѣ́дыи дерзнᲂве́нїѧ твᲂегѡ̀ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Ꙗ҆́кѡ ке́дръ бл҃гᲂче́стїе , вѣ́рꙋ ꙗ҆́кѡ кипари́съ , любо́вь же ꙗ҆́кѡ пѣ́вгъ нᲂсѧ́ще , крⷭ҇тꙋ̀ бжⷭ҇твенᲂмꙋ пᲂклᲂни́мсѧ . Крⷭ҇то́мъ твᲂи́мъ сп҃се ра́й ѿве́рзесѧ , и҆ ѡ҆сꙋжде́ныи чл҃къ па́ки вни́де въ ѻ҆́нь , твᲂю̀ велича́ѧ бл҃гᲂсты́ню . Оу҆мерщве́ныѧ ѡ҆живи́лъ є҆сѝ сп҃се чл҃ки ме́ртвъ бы́въ , и҆ ѕмі́ѧ ᲂу҆мертви́лъ є҆сѝ , и҆́же грѣ́хъ в̾ве́дшагѡ .= мⷱ҇ꙋ . Страсте́мъ бы́вше ѻ҆́бщницы хрⷭ҇то́вымъ бжⷭ҇твенїи мч҃нцы , прича́стники же и҆ свѣ́тлᲂсти нбⷭ҇нѣй ꙗ҆ви́шасѧ . мⷱ҇ꙋ . Оу҆краси́стесѧ мч҃нцы , сло́вꙋ кра́снᲂмꙋ сᲂє҆дини́вшесѧ , и҆ свѣ́тлѡ прᲂсвѣти́стесѧ , сл҃нце пра́веднᲂе вᲂз̾люби́вше . боⷢ҇ . Н=о́во ѻ҆трᲂча̀ рᲂдила̀ є҆сѝ , и҆́же пре́жде вѣ́къ сꙋ́ща сᲂверше́нагѡ , ѻ҆трᲂкᲂви́це всенепᲂро́чнаѧ , и҆ крⷭ҇то́мъ сᲂверша́юща всѧ́ческаѧ и҆ бл҃гᲂстїю .

и҆́нъ , і҆рмо́съ . Ты́ ми хрⷭ҇тѐ гдⷭ҇ь . Ꙗ҆́же бг҃а сло́ва не и҆з̾рече́нно ро́ждьшаѧ , дш҃и мᲂе́й стрꙋ́пы ѡ҆бвѧжѝ , дѣ́йственымъ цѣле́нїемъ , кро́вь сн҃а свᲂегѡ̀ чⷭ҇тнꙋ́ю вᲂз̾лїѧ́вши , разрꙋши́вшаго а҆́дᲂво дш҃етлѣ́ннᲂе чре́во , и҆ и҆стᲂчи́вшаго ми́рꙋ вᲂскрⷭ҇нїе . Невѣ́сто бж҃їѧ прегрѣше́нїемъ ѡ҆чище́нїе дш҃и мᲂе́й стрꙋѝ пᲂслѝ , и҆ лꙋка́ваѧ ѿмы́й пᲂмышле́нїѧ , чи́стѣ бы́ти то́й спᲂдо́би , къ твᲂемꙋ́ бо хᲂда́тайствꙋ и҆ твᲂе́й по́мᲂщи , бцⷣе дв҃о прибѣго́хъ . Къ твᲂемꙋ̀ ны́нѣ прибѣга́ю застꙋпле́нїю пречⷭ҇таѧ , пред̾вари́ мѧ и҆зба́вити лю́тыѧ бꙋ́ри вра́жїѧ , и҆ смꙋща́ющихъ пᲂто́къ без̾зако́нїѧ , к̾ твᲂемꙋ́ же приста́нищꙋ , и҆ к̾ твᲂе́й тишинѣ̀ не ᲂу҆кло́нно бг҃ᲂмт҃и наста́ви мѧ . Вра́гъ грѣхо́вными стрѣла́ми дш҃ꙋ мᲂю̀ всю̀ ᲂу҆ѧзвѝ , и҆ ѡ҆сквернѝ сластьмѝ мᲂѐ срⷣце , и҆ ѿвратѝ ѿ пꙋтѝ пра́вагѡ . сегѡ̀ ра́ди вᲂпїю́ ти , ѡ҆брати́вши и҆сцѣли́ мѧ и҆ спасѝ .

пѣ́снь , є҃ . і҆рмо́съ . ѽ треблаже́ннᲂе дре́во , на не́мже распѧ́тсѧ хрⷭ҇то́съ цр҃ь и҆ гдⷭ҇ь . и҆́мже паде́сѧ и҆́же дре́вᲂмъ прельще́и , тᲂбо́ю прельще́нъ бы́стъ , хрⷭ҇то́ви пригво́ждьшемꙋсѧ пло́тїю , пᲂдаю́щемꙋ ми́ръ дш҃а́мъ на́шимъ . Ѻ҆де́жею нетлѣ́нїѧ , ѡ҆бнаже́ныхъ на́съ ѡ҆блещѝ вᲂз̾желѣ́въ , сᲂвлече́сѧ . и҆ на крⷭ҇тѣ̀ распѧ́тсѧ , ѡ҆бнажи́лъ є҆сѝ вра́жїѧ хрⷭ҇тѐ кᲂва́рства . сегѡ̀ ра́ди твᲂѧ̀ страда́нїѧ сла́вимъ . Кро́вь и҆з̾ ре́бръ и҆сте́кшаѧ спаси́тельнаѧ ꙗ҆́вѣ , ми́ръ ѡ҆чи́стила є҆́сть , жерто́вныѧ же кро́ви раз̾рꙋшѝ , и҆ и҆стлѣ́вшаѧ плᲂдо́мъ разꙋ́мнымъ ѡ҆бнᲂвѝ , и҆ и҆стᲂчѝ нетлѣ́нїѧ дш҃а́мъ на́шимъ .= мⷱ҇ꙋ . Прᲂсвѣще́ни дᲂбро́тᲂю мнᲂгᲂви́дныхъ ра́нъ , мч҃нцы сла́внїи , бжⷭ҇твенᲂюже кро́вїю зна́менавшесѧ , вᲂз̾бранѧ́ющее пре́жде ѻ҆рꙋ́жїе прᲂи҆до́ша ꙗ҆́вѣ , и҆ всели́шасѧ ра́дꙋющесѧ в̾ ра́й . мⷱ҇ꙋ . Ꙗ҆́кѡ ди́венъ ты̀ є҆сѝ во ст҃ы́хъ хрⷭ҇тѐ , и҆́же вѣ́рᲂю тебѐ вᲂз̾люби́вшихъ , ѿ тебе́ бо ѡ҆бᲂгати́вшесѧ бжⷭ҇твеныѧ и҆сцѣле́нїи рѣ́ки ми́рᲂви и҆стᲂча́ютъ , и҆ и҆з̾сꙋша́ютъ и҆злїѧ́нїе страсте́й на́шихъ . боⷢ҇ . Н=едꙋ́гᲂвавшихъ грѣхѡ́мъ на́съ , и҆сцѣли́ла є҆сѝ дв҃о ро́ждьши сп҃са и҆ врача̀ всѣ́хъ , и҆́же на́ древѣ крⷭ҇тнѣмъ пригвᲂжде́наго пречⷭ҇таѧ , и҆ и҆стᲂчи́вша спасе́нїе дш҃а́мъ на́шимъ .

и҆́нъ , і҆рмо́съ . Вскꙋ́ю мѧ ѿри́нꙋ . Со всѣ́мъ ᲂу҆се́рдїемъ тщꙋ́сѧ к̾ твᲂемꙋ̀ всенепᲂро́чнаѧ застꙋпле́нїю , и҆ дш҃е́внᲂе ѻ҆́ко вᲂз̾вᲂжꙋ̀ , не ѿвратѝ менѐ , но застꙋпи́ мѧ ꙗ҆́кѡ бл҃га́ѧ и҆ и҆зба́ви мѧ , и҆ прегрѣше́нїи мᲂи́хъ скве́рнꙋ ѿмы́й . Ꙗ҆́дъ смертᲂно́сенъ грѣхо́вными зꙋ́бы влᲂжи́сѧ , но тᲂгѡ̀ пᲂгꙋбѝ гвᲂздьмѝ и҆ кᲂпїе́мъ бжⷭ҇твенымъ ржⷭ҇тва̀ твᲂегѡ̀ , за млрⷭ҇дїе на́съ ра́ди пло́тїю пᲂстрада́вшагѡ , є҆ди́на всепѣ́таѧ . Оу҆мерщве́на мѧ нра́вᲂмъ , и҆ и҆стлѣ́вшаго прегрѣше́ньми , ѡ҆живи́ мѧ ро́ждьшаѧ живо́тъ вѣ́чныи , и҆ ѡ҆бнᲂвле́нїемъ дх҃о́внымъ , к̾ нетлѣ́нїю претвᲂри́ мѧ бг҃ᲂбл҃же́наѧ . Лꙋка́вства бѣсо́вскагѡ , и҆ ѕло́бы чл҃ческїѧ и҆зба́ви мѧ влⷣчце , и҆ дш҃е́внꙋю бᲂлѣ́знь , и҆ тѣле́снꙋю в̾ско́рѣ и҆сцѣлѝ , ро́ждьшаѧ є҆ди́на всѧ́кᲂй пло́ти , сᲂгрѣше́нїемъ , врача̀ сп҃са и҆ гдⷭ҇а .

пѣ́снь , ѕ҃ . і҆рмо́съ . Во́днагѡ ѕвѣ́рѧ во ᲂу҆тро́бѣ , дла́ни і҆ѡ́на крⷭ҇тᲂѡ҆бра́знѡ распрᲂсте́ръ , спасе́ннꙋю стра́сть прᲂѡбража́ше ꙗ҆́снѣ . тѣ́мъ и҆ тридне́внѡ и҆з̾ше́дъ , преми́рнᲂе вᲂскрⷭ҇нїе прᲂписа́ше , пло́тїю пригвᲂжде́на хрⷭ҇та̀ бг҃а . и҆ тридне́внымъ вᲂскрⷭ҇нїемъ , ми́ра прᲂсвѣ́щшагѡ . Крⷭ҇тъ вᲂдрꙋзи́сѧ на мѣ́стѣ ло́бнѣмъ , пᲂсредѝ землѝ , и҆ пᲂсредѝ раѧ̀ прᲂзѧ́бшꙋю дре́вᲂмъ ꙗ҆́звꙋ и҆сцѣлѝ . месі́ѧ бо хрⷭ҇то́съ , пᲂсредѝ без̾зако́нныхъ разбо́йникъ , є҆ди́нъ пра́ведныи ꙗ҆ви́сѧ , с̾ сᲂбо́ю сᲂвᲂздви́же всѧ̀ , и҆ с̾ высᲂты̀ па́дшаго в̾ прᲂпа́сть в̾ве́рже . Лꙋ́къ хрⷭ҇тѐ напрѧ́гъ бжⷭ҇твеныи всечⷭ҇тны́и сво́й крⷭ҇тъ , и҆спꙋсти́лъ є҆сѝ стрѣ́лы на ᲂу҆бі́ицꙋ . гво́зди же рꙋ́кꙋ свᲂе́ю влⷣко вᲂнзи́лъ є҆сѝ , в̾ тᲂгѡ̀ гнѣвли́вᲂе и҆ всескверна́вᲂе срⷣце , и҆ до кᲂнца̀ тᲂгѡ̀ ᲂу҆мертви́лъ є҆сѝ , и҆ ѿ негѡ̀ ᲂу҆мерщве́ныѧ ще́дре ѡ҆живи́лъ є҆сѝ .= мⷱ҇ꙋ . Кро́вныѧ и҆сте́кшїѧ стрꙋѝ , и҆з̾ тѣле́съ ст҃ы́хъ страда́лецъ , ᲂу҆гаси́ша дх҃ᲂмъ , ве́сь и҆дᲂлᲂбѣ́сїѧ пла́мень , и҆ цр҃кви чⷭ҇тны́ѧ бразды̀ напᲂи́ша , и҆ кла́съ и҆зрасти́ти сᲂтвᲂри́ша спасе́нїѧ наде́жы и҆ вѣ́ры , и҆́миже пита́етсѧ всѧ́ка дш҃а бжⷭ҇твенᲂю бл҃гᲂда́тїю . мⷱ҇ꙋ . Вᲂспалѧ́хꙋсѧ ѻ҆гнѧ̀ мно́жае нра́вᲂмъ , стра́жꙋщїи сла́внїи страстᲂте́рпцы , є҆гда̀ веще́ственымъ ѻ҆гне́мъ ѡ҆палѧ́тисѧ , лꙋка́вными сꙋдїѧ́ми сꙋдо́мъ ѿдава́еми . и҆ не ᲂу҆ѧ́звени сᲂхранѧ́еми быва́хꙋ , дѣ́йствᲂмъ и҆ бл҃гᲂда́тїю ст҃а́гѡ д́х҃а , вѣнча́вшагѡ тѣ́хъ зако́нно пᲂстрада́вшихъ . боⷢ҇ . Ѻ҆=рꙋ́жїе срⷣце твᲂѐ про́йде , пречⷭ҇таѧ ѻ҆трᲂкᲂви́це зрѧ́щи сн҃а свᲂегѡ̀ на крⷭ҇тѣ̀ прᲂсте́рта , и҆ стрⷭ҇ти терпѧ́ща , и҆ кᲂпїе́мъ бжⷭ҇твенаѧ ре́бра и҆скᲂпᲂва́ема во́лею , и҆ закала́юща си́мъ бᲂри́тельнаго ѕмі́ѧ , тѣ́мже пла́чꙋщи мт҃рьски тᲂгѡ̀ велича́ше .

и҆́нъ , і҆рмо́съ . Ѡ҆чи́сти мѧ сп҃се . Ѿстꙋпи́хъ ѿ́ бг҃а блꙋ́днѡ жи́въ , и҆ ра́бъ сласте́мъ ѻ҆каѧ́нныи бы́хъ , и҆ всѧ́кїѧ ѡ҆б̾нажи́хсѧ дᲂбрᲂдѣ́тели бжⷭ҇твеныѧ , но пᲂсѣти́ мѧ пречⷭ҇таѧ . Бѣжа́тель бы́хъ ѿ запᲂвѣде́й да́нныхъ мѝ , и҆ ᲂу҆да́лихсѧ ѿ живᲂта̀ , к̾ сме́рти прибли́жихсѧ , но наста́ви мѧ̀ къ вᲂз̾враще́нїю бг҃ᲂмт҃и пречⷭ҇таѧ . Житїѐ мᲂѐ лꙋка́вно , и҆спо́лнено нерадѣ́нїѧ , но ми́лᲂсть твᲂѧ̀ мно́га и҆ не и҆з̾рече́нна пречⷭ҇таѧ , да ѡ҆дᲂлѣ́етъ милᲂсе́рдїемъ бл҃гᲂсть твᲂѧ̀ , немᲂщнѣ́и мы́сли мᲂе́й . Сп҃са и҆ и҆зба́вителѧ ро́ждьши всеще́драго , ᲂу҆ще́дри мѧ чⷭ҇таѧ , и҆ спасѝ и҆ и҆зба́ви ѿ ѡ҆быше́дшихъ мѧ̀ , и҆ напа́дающихъ немлⷭ҇тивно на не́мᲂщь мᲂю̀ .

пѣ́снь , з҃ . і҆рмо́съ . Безꙋ́мна за́пᲂвѣдь мꙋчи́телѧ ѕлᲂчести́вагѡ , людьмѝ пᲂкᲂлеба̀ , ды́шꙋща преще́нїемъ и҆ ѕлᲂхꙋле́нїемъ бг҃ᲂстꙋ́днымъ . ѡ҆ба́че трїе́хъ ѻ҆́трᲂкъ не и҆скꙋсѝ ꙗ҆́рᲂсть ѕвѣ́рьскаѧ , ни ѻ҆́гнь снѣда́ѧи . но ды́шꙋщꙋ хла́днᲂмꙋ дх҃ꙋ , со ѻ҆гне́мъ сꙋ́ще пᲂѧ́хꙋ , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Є҆гда̀ распрᲂстре́сѧ на́ древѣ крⷭ҇тнѣмъ , ꙗ҆́кᲂже винᲂгра́дъ , сло́во ѻ҆́ч҃ее , вино̀ и҆ска́палъ є҆сѝ та́йны , и҆змѣнѧ́ющо пїѧ́нство престꙋпле́нїѧ , и҆ всѧ̀ веселѧ́що , вѣ́дꙋщихъ тѧ̀ бг҃а и҆ зижди́телѧ во́лею стра́ждꙋща , и҆ спаса́юща пᲂю́щїѧ , препѣ́тыи ѻ҆ц҃ъ на́шихъ бж҃е блгⷭ҇ве́нъ є҆сѝ .= Распѧ́тїе претерпѣ́въ хрⷭ҇тѐ мо́й і҆с҃е пᲂно́снᲂе , ᲂу҆ставлѧ́ющее чл҃кѡмъ пᲂнᲂше́нїе и҆ вᲂз̾дыха́нїе , же́лчи же вкꙋ́шъ , го́ресть всю̀ ѕло́бы ѿє́млѧ , ᲂу҆ѧзви́въ же рꙋ́цѣ свᲂѝ , ꙗ҆́звы ще́дре дш҃е́вныѧ на́ша и҆сцѣлѧ́ѧ , и҆ пѣ́ти пᲂвелѣва́ѧ , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . =мⷱ҇ꙋ . Бᲂлѣ́зньми , небᲂлѣ́зненыи живо́тъ до́блїи страда́льцы притѧжа́ли є҆стѐ , тѣ́мже на́ша бᲂлѣ́зни ѡ҆блегча́ете ѿ ню́дъ , бл҃гᲂда́ть прїе́мше с̾вы́ше ст҃і́и , и҆сцѣлева́ти стра́сти , и҆ дꙋ́хи ѿгᲂнѧ́ти , и҆ вѣ́рнымъ пред̾стᲂитѐ и҆ спаса́ете вᲂпїю́щїѧ , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . мⷱ҇ꙋ . Ста́сте мч҃нцы пред̾ сꙋди́щи хрⷭ҇та̀ и҆спᲂвѣ́дающе , пло́ть на́съ ра́ди вᲂспрїе́мшаго по на́съ , и҆ пᲂдо́бницы стрⷭ҇те́мъ є҆гѡ̀ ꙗ҆влѧ́еми вᲂи́стинꙋ . ѻ҆гнѧ̀ ѡ҆ѕлᲂбле́нїе и҆ всѧ́кїѧ и҆ны́ѧ мꙋ́ки претерпѣ́сте , въ весе́лїи зᲂвꙋ́ще , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Печа́лїю и҆спо́лнихсѧ , зрѧ́щи тебѐ сн҃е без̾ пра́вды стра́ждꙋща , ᲂу҆ѧзвлѧ́юсѧ дꙋше́ю , кᲂпїе́мъ ᲂу҆ѧ́звенꙋ тѝ в̾ ре́бра , бцⷣа вᲂпїѧ́ше пла́чꙋщи и҆ рыда́ющи є҆ди́на влⷣчца . є҆ѧ́же дᲂсто́йнѡ всѝ ᲂу҆блажа́емъ , бл҃гᲂче́стнѡ зᲂвꙋ́ще , препѣ́тыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Дѣ́ти є҆вре́йскїѧ въ пещѝ . Всѧ̀ є҆сѝ свѣтᲂно́сна , свѣ́тъ незахᲂди́мыи дв҃о прїе́мши , и҆ прᲂсвѣща́ющи чⷭ҇таѧ , вѣ́рᲂю тебѣ̀ вᲂпїю́щїѧ , блгⷭ҇ве́нъ пречⷭ҇таѧ пло́дъ твᲂегѡ̀ чре́ва . Да твᲂѐ чл҃кᲂлю́бїе и҆ млⷭ҇ть дв҃о ꙗ҆ви́ши , и҆з̾ глꙋбины́ мѧ ѕѡ́лъ вᲂз̾ведѝ вᲂпїю́ща , блгⷭ҇ве́нъ пречⷭ҇таѧ пло́дъ твᲂегѡ̀ чре́ва . Къ тебѣ̀ мт҃и дв҃о притека́ю , ᲂу҆ѧзвлѧ́емъ стрѣла́ми дш҃етлѣ́нными , всего́ мѧ мл҃твᲂю твᲂе́ю ѡ҆градѝ вᲂпїю́ща , блгⷭ҇ве́нъ пречⷭ҇таѧ пло́дъ твᲂегѡ̀ чре́ва . И҆зба́ви мѧ мт҃и сп҃сᲂва , ѡ҆держа́щагѡ лю́таго плѣне́нїѧ , пᲂмышле́нїи лꙋка́выхъ , и҆ ви́нъ грѣхо́вныхъ , ꙗ҆́кѡ да прⷭ҇нѡ спаса́емь по́ дᲂлгꙋ тѧ сла́влю .

пѣ́снь , и҃ . і҆рмо́съ . Бл҃гᲂслᲂви́те дѣ́ти , трⷪ҇цы равнᲂчи́сленнїи , сᲂдѣ́телѧ ѻ҆ц҃а бг҃а . по́йте сᲂше́дшагѡ сло́ва , и҆ ѻ҆́гнь въ ро́сꙋ претво́ршагѡ . и҆ превᲂзнᲂси́те всѣ́мъ живо́тъ даю́щагѡ , дх҃а прест҃а́гѡ во́ вѣки всѧ̀ . Бл҃гᲂслᲂве́но є҆́сть дре́во , и҆́мже всѧ̀ пᲂтреби́сѧ ꙗ҆́же во є҆де́мѣ ле́стнаѧ клѧ́тва , вᲂз̾ра́стшаѧ снѣ́дїю лꙋка́вᲂю дре́ва , и҆ хрⷭ҇то́съ вᲂз̾но́ситсѧ препрᲂсла́вленыи , и҆́же вᲂз̾нести́сѧ на се́мъ во́лею свᲂе́ю вᲂсхᲂтѣ́выи за милᲂсе́рдїе . Сщ҃е́ннѡ в̾ премѣне́нїи рꙋка́ма прⷭ҇нᲂсла́вныи , бл҃гᲂслᲂвлѧ́ѧ внꙋ́ки и҆нᲂгда̀ , ѻ҆́бразъ ꙗ҆влѧ́ѧ сщ҃е́ннагѡ дре́ва , и҆́мже бл҃гᲂслᲂве́нїе всѣ́мъ дарᲂва́сѧ , прᲂклѧты́мъ ѕло́ю дре́ва снѣ́дїю , и҆ пᲂпо́лзшимсѧ во глꙋбинꙋ̀ ѕѡ́лъ . И҆справлѧ́етсѧ всѐ чл҃чество влⷣко , тебѣ̀ распрᲂсте́ртꙋ бы́вшꙋ на крⷭ҇тѣ̀ , и҆ по́лкъ падѐ лꙋка́выхъ бѣсѡ́въ , и҆ раз̾стᲂѧ́щаѧсѧ сᲂвᲂкꙋпле́нїе прїе́млютъ , и҆ превᲂзно́ситсѧ держа́ва вла́сти твᲂеѧ̀ , и҆ си́ла твᲂѧ̀ во́ вѣки .= мⷱ҇ꙋ . Блаже́ннꙋю сла́вꙋ , и҆ пи́щꙋ нетлѣ́ннꙋю , и҆ свѣтᲂза́рнаѧ сᲂставле́нїѧ наслѣ́дᲂвасте ны́нѣ бжⷭ҇твенїи страда́льцы гдⷭ҇ни , и҆ нбⷭ҇нымъ примѣси́стесѧ чинѡ́мъ . и҆ прⷭ҇нѡ сла́вныхъ наде́ждъ ва́шихъ , кᲂне́цъ ны́нѣ вᲂспрїѧ́сте с̾ весе́лїемъ . мⷱ҇ꙋ . Ва́ше мꙋ́жество па́че сл҃нца вᲂсїѧ̀ , свѣтᲂви́днїи хрⷭ҇то́вы страда́льцы , и҆ всю̀ дїа́вᲂлю пре́лесть бжⷭ҇твенᲂю си́лᲂю пᲂмрачѝ . и҆ вѣ́рныхъ всѣ́хъ срⷣца̀ бл҃гᲂче́стно мꙋ́дренѣ прᲂсвѣтѝ во́вѣки . боⷢ҇ . М=ы́сленыи ѻ҆́блакъ , и҆ сѣ́нь сщ҃е́нїѧ , прⷭ҇то́лъ бж҃їи , и҆ две́рь , свѣ́та свѣ́щникъ , и҆ вᲂсто́къ сло́ва , вѣ́рнїи всѝ и҆менꙋ́емъ тѧ пречⷭ҇таѧ дв҃о , и҆́же всѧ̀ сᲂтво́ршаго мт҃и сꙋ́щи бл҃гᲂслᲂве́наѧ .

и҆́нъ , і҆рмо́съ . Се́дмь седми́цею . Вседержи́тель гдⷭ҇ь всели́всѧ во ᲂу҆тро́бꙋ твᲂю̀ , и҆ сто́лпъ ᲂу҆тверже́нїѧ вѣ́рнымъ тѧ пᲂказа̀ , к̾ немꙋ́же прибѣга́юще напа́стей и҆збавлѧ́емсѧ и҆ бѣ́дъ . и҆ свᲂбᲂжда́емсѧ и҆скꙋше́нїѧ , сᲂгла́снѡ пᲂю́ще , сщ҃е́ннїи вᲂспо́йте , лю́дїе превᲂз̾нᲂси́те є҆гѡ̀ во́ вѣки . Сщ҃е́ннагѡ влⷣчце ѿпадо́хъ житїѧ̀ , к̾ грѣхꙋ̀ невᲂздержи́мо влеко́мъ , и҆ си́мъ пᲂрабᲂща́емь , свᲂбᲂжде́нїѧ є҆́же ѡ҆ хрⷭ҇тѣ̀ , и҆ пра́вды и҆́стинныѧ ѡ҆бнажи́хсѧ . но непре́зри мѧ сᲂкро́вище спасе́нїѧ к̾ тебѣ̀ прибѣга́ющаго , на́га и҆ ѡ҆бнища́вшаго . Да и҆спра́витсѧ мᲂльба̀ мл҃твы мᲂеѧ̀ ко гдⷭ҇ꙋ , и҆́же и҆з̾ ᲂу҆тро́бы твᲂеѧ̀ прᲂи҆зше́дшемꙋ влⷣчце , и҆ ѿ престꙋпле́нїѧ за́пᲂвѣдей да и҆зба́витъ мѧ , и҆ ѡ҆сꙋжде́нїѧ и҆ клѧ́твы зако́нныѧ , и҆ скве́рнꙋ да ѿмы́етъ лю́тыхъ мᲂи́хъ прегрѣше́нїи , ꙗ҆́кѡ є҆ди́нъ млⷭ҇тивъ . Бг҃ᲂрᲂди́тельнице пречⷭ҇таѧ , дш҃и мᲂеѧ̀ ꙗ҆́звы и҆ грѣхо́вныѧ сᲂбла́зны ѡ҆чи́сти , и҆сто́чникᲂмъ ѡ҆мыва́ющи и҆́же и҆з̾ ре́бръ сн҃а твᲂегѡ̀ , и҆ и҆́же ѿ ни́хъ пᲂте́кшими стрꙋѧ́ми . к̾ тебѣ́ бо взыва́ю , и҆ к̾ тебѣ̀ прибѣга́ю , и҆ тебѐ призыва́ю бг҃ᲂбл҃гᲂда́тнꙋю . та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Снѣ́ди ра́ди древѧ́ныѧ ро́дꙋ прибы́вшаѧ сме́рть , крⷭ҇та̀ ра́ди ᲂу҆праздни́сѧ дне́сь , и҆́бо прамт҃рьнѧѧ всеро́днаѧ клѧ́тва разрꙋши́сѧ , прᲂзѧбе́нїемъ чⷭ҇тыѧ бж҃їѧ мт҃ре , ю҆́же всѧ̀ си́лы нбⷭ҇ныѧ велича́ютъ . Сщ҃е́ннѣйше тѧ̀ вᲂзнᲂсѧ́ще ще́дре , пᲂклᲂнѧ́емсѧ твᲂемꙋ̀ крⷭ҇тꙋ̀ , кᲂпїю́ же и҆ гꙋ́бѣ и҆ тро́сти , и҆ в̾ рꙋ́кꙋ вᲂнзе́ннымъ и҆ в̾ но́гꙋ ст҃ы́мъ гвᲂзде́мъ влⷣко , и҆́миже ѡ҆брѣто́хᲂмъ сᲂверше́нᲂе ѡ҆ставле́нїе , и҆ ра́йскᲂмꙋ житїю̀ спᲂдо́бихᲂмсѧ . Ѽ ка́кѡ непра́веднѡ ѡ҆сꙋди́лсѧ пригвᲂзди́тисѧ на́ древѣ распина́емь , пра́веднѣйшїи є҆ди́не всѣ́хъ цр҃ю , ѡ҆пра́вдити всѣ́хъ и҆скі́и , вѣ́рᲂю сла́вѧщихъ страда́нїѧ твᲂѧ̀ во́льнаѧ и҆ смᲂтре́нїе , и҆ тебѐ хрⷭ҇тѐ мо́й , вѣ́рнѡ велича́ющихъ .= мⷱ҇ꙋ . Тѣ́ло преда́вше мꙋ́камъ вседꙋ́шнѡ мч҃нцы сла́внїи , претерпѣ́ша ра́ны и҆ нꙋ́жнꙋю сме́рть , ѿсѣче́нїе ᲂу҆дѡ́въ , и҆ растерза́нїѧ , и҆ ѻ҆́гненᲂе ѡ҆пале́нїе , любо́вїю же разгара́еми ко́ гдⷭ҇ꙋ . тѣ́мже вѣнцено́сцы на́ нб҃сѣхъ жи́тельствꙋютъ . мⷱ҇ꙋ . И҆́же а҆пⷭ҇лѡмъ и҆ мч҃нкѡмъ сла́дᲂсте , мл҃твами и҆́хъ всѣ́хъ на́съ ми́лᲂсти и҆спо́лни , ꙗ҆́кѡ бл҃гᲂꙋтро́бенъ сᲂгрѣше́нїемъ разрѣше́нїе пᲂдаѧ̀ , и҆ лю́тыхъ всѣ́хъ и҆збавле́нїе . и҆ твᲂегѡ̀ црⷭ҇твїѧ вселе́нїе хрⷭ҇тѐ бж҃е , и҆́же на́съ ра́ди ꙗ҆вле́исѧ чл҃къ . боⷢ҇ . С=вѣтᲂви́дныи черто́гъ ꙗ҆ви́ласѧ є҆сѝ дв҃о , в̾се́лшемꙋсѧ в̾ твᲂю̀ нетлѣ́ннꙋю ᲂу҆тро́бꙋ , и҆ стрⷭ҇ть бл҃же́ннꙋю претерпѣ́вшемꙋ хᲂтѣ́нїемъ , и҆ всѣ́мъ без̾стра́стїе пᲂда́вшемꙋ за не и҆з̾рече́ннꙋю ми́лᲂсть . є҆мꙋ́же вѣ́рᲂю пᲂклᲂнѧ́ющесѧ , тебѐ бл҃гᲂче́стнѡ велича́емъ .

и҆́нъ , і҆рмо́съ . Оу҆диви́сѧ ᲂу҆́бѡ . Вᲂи́стинꙋ бг҃ᲂмт҃и сꙋ́щагѡ бг҃а , мᲂлѧ́щи непреста́й , є҆го́же рᲂдила̀ є҆сѝ , грѣхѡ́въ ѡ҆ставле́нїе рабо́мъ твᲂи́мъ пᲂда́ти , и҆ всекᲂне́чнᲂе прᲂще́нїе , тѣ́мъ ны́нѣ сᲂдѣ́ѧнныхъ ѕѡ́лъ , и҆ си́хъ спᲂдо́бити со всѣ́ми ст҃ы́ми вѣ́чнᲂмꙋ наслажде́нїю . Крѣ́пᲂстїю и҆ си́лᲂю дх҃о́внᲂю , и҆ ѻ҆рꙋ́жїемъ , и҆ держа́вᲂю , препᲂѧ́ши смире́нꙋю дш҃ꙋ мᲂю̀ всест҃а́ѧ бцⷣе , и҆ крⷭ҇тнымъ ѻ҆рꙋ́жїемъ ѡ҆блецы̀ , и҆ грѣха̀ мᲂегѡ̀ ра́ны ѡ҆чи́сти , рᲂсо́ю твᲂегѡ̀ чл҃кᲂлю́бїѧ , и҆ вели́кᲂю млⷭ҇тїю твᲂе́ю . Спасе́нїѧ бꙋ́ди ми сто́лпъ чⷭ҇таѧ , бѣсо́въ без̾дѣ́льны сᲂтвᲂрѝ пᲂлкѝ , и҆ напа́стей мно́жество , и҆ бѣды̀ ѿгᲂнѧ́ющи , и҆ страсте́й нахо́ды дале́че прᲂгᲂнѧ́ѧ , и҆ чи́стᲂе даѧ̀ свᲂбᲂжде́нїе . Чи́стаѧ препрᲂсла́вленаѧ мт҃и бж҃їѧ , пᲂю́щїѧ тѧ̀ любо́вїю спасѝ , и҆ и҆скꙋше́нїи мᲂлвꙋ̀ разᲂрѧ́ющи млⷭ҇тивно , ꙗ҆́кѡ бг҃а ро́ждьши дв҃о , все́ бо є҆ли́ко хо́щеши твᲂри́ти мо́жеши , и҆ пᲂдае́ши млⷭ҇ть невᲂз̾бра́нно , тѣ́мже тѧ̀ всѝ велича́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , крⷭ҇тны . гла́съ , з҃ . Мѡѷсе́ѡвъ же́злъ , честны́и крⷭ҇тъ тво́й прᲂѡ҆бража́ше сп҃се на́шъ , тѣ́мъ бо спаса́еши ꙗ҆́кѡ и҆з̾ глꙋбины̀ мᲂрскі́ѧ , лю́ди твᲂѧ̀ челᲂвѣкᲂлю́бче .

сти́хъ : и҆спо́лнихᲂмсѧ за ᲂу҆́тра . И҆́же во є҆де́мѣ в̾ раѝ дре́вле , дре́во снѣ́днᲂе вᲂзрастѝ пᲂсредѣ̀ садо́въ , цр҃кви же твᲂѧ̀ хрⷭ҇тѐ крⷭ҇тъ тво́й прᲂцвѣтѐ , и҆стᲂча́ющь всемꙋ̀ ми́рꙋ жи́знь . но ѻ҆́но ᲂу҆́бѡ ᲂу҆мертвѝ снѣ́дїю ꙗ҆́дшаго а҆да́ма , ѻ҆́вᲂже жи́ва сᲂтвᲂрѝ , вѣ́рᲂю спа́сшасѧ разбо́йника . є҆го́же спасе́нїю прича́стники и҆ на́съ пᲂкажѝ хрⷭ҇тѐ бж҃е , и҆́же стра́стїю свᲂе́ю разрѣши́выи є҆́же на на́съ гнѣ́въ вра́жїи , и҆ спᲂдо́би ны црⷭ҇твїю твᲂемꙋ̀ гдⷭ҇и .

сти́хъ : и҆ бꙋ́ди свѣ́тлᲂсть . мⷱ҇ꙋ . Что̀ ва́съ нарече́мъ ст҃і́и ; херꙋви́мъ , ꙗ҆́кѡ на ва́съ пᲂчи́лъ є҆́сть хрⷭ҇то́съ ; серафи́мъ , ꙗ҆́кѡ непреста́ннѡ прᲂславлѧ́ете є҆гѡ̀ ; а҆́нг҃лы , тѣ́ла бо ѿврати́стесѧ ; си́лы , дѣ́йствꙋете бо чꙋдеса̀ ; мно́га ва́ша и҆мена̀ ; бо́льшаѧ дарᲂва́нїѧ . мᲂли́те спасти́сѧ дш҃а́мъ на́шимъ .

сла́ва , и҆ ны́нѣ , крⷭ҇тᲂбоⷢ҇ . Нетерплю̀ ча́до ви́дѧщи тѧ̀ на́ древѣ ᲂу҆снꙋ́вша , и҆́же бо́дрᲂсть всѣ́мъ пᲂдаю́щаго , ꙗ҆́кѡ да и҆́же дре́вле престꙋпле́нїѧ плᲂдо́мъ , сно́мъ пᲂги́бельнымъ ᲂу҆снꙋ́вшимъ , бжⷭ҇твенꙋю и҆ спаси́тельнꙋю бо́дрᲂсть пᲂда́си , дв҃аѧ гл҃аше пла́чꙋщисѧ , є҆ѧ́же велича́емъ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ пѧто́къ , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Распрᲂсте́рлъ є҆сѝ хрⷭ҇тѐ дла́ни на́ древѣ , и҆ лꙋка́ваѧ нача́ла и҆ вла́сти ѡ҆бличи́въ , и҆ спа́слъ є҆сѝ ѿ тѣ́хъ вре́да бл҃гᲂче́стнѡ славᲂсло́вѧщїѧ тѧ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Кᲂпїе́мъ прᲂбᲂде́сѧ ви́сѧ на́ древѣ , и҆стᲂчи́лъ є҆сѝ на́мъ пᲂто́ки без̾сме́ртїѧ , ᲂу҆мерщве́ннымъ без̾ ᲂу҆ма̀ престꙋпле́нїемъ . тѣ́мже со́ страхᲂмъ сла́вимъ тѧ̀ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Стра́нны земны́мъ ꙗ҆влѧ́еми видѣ́нїемъ , стра́нны бо себѐ вда́вше мꙋ́камъ страда́льцы , ᲂу҆ѧзвлѧ́юще ѿстꙋ́пника свᲂи́ми ст҃ы́ми ꙗ҆́звами .

сла́ва . И҆́же ѿ без̾нача́льныѧ трⷪ҇цы є҆ди́нъ сы́и , стра́сть на крⷭ҇тѣ̀ претерпѣ́лъ є҆сѝ во́лею , страсте́й мᲂи́хъ и҆з̾сꙋшѝ всѧ̀ пᲂто́ки , и҆ спасе́нїю спᲂдо́би мѧ .

и҆ ны́нѣ . Є҆мманꙋ́ила а҆́гньца бж҃їѧ и҆ сло́ва , ви́дѧщи пло́тїю ви́сѧща на́ древѣ , а҆́гница є҆ди́на нескве́рнаѧ и҆ дв҃аѧ , ско́рбїю ѡ҆держи́ма бѧ́ше слезѧ́щи .

<< Previous

Contents

Next >>