Глас 8 понедельник

Въ недѣ́лю , ве́черъ . на́ гдⷭ҇и вᲂзва́хъ , стⷯры , пᲂкаѧ́нны . гла́съ , и҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Г=дⷭ҇и , прише́дыи въ ми́ръ грѣ́шники призва́ти , и҆ раз̾бо́йники и҆ мытарѧ̀ и҆ блꙋдни́цꙋ , и҆ блꙋ́днаго прїе́мыи , и҆́же па́че всѣ́хъ менѐ , сᲂгрѣши́вшаго тѝ хрⷭ҇тѐ мо́й , и҆ ника́кᲂже къ тебѣ̀ ка́ющасѧ , чл҃кᲂлю́бнѣ призᲂвѝ .

ᲂу҆пᲂва̀ дш҃а мᲂѧ̀ на́ гдⷭ҇а . Гдⷭ҇и , и҆́же ѿ мытаре́й па́стыри цр҃кви твᲂе́й пᲂставле́и . и҆ ꙗ҆́же то́й пре́же гᲂни́тели , ны́нѣ застꙋ́пники сᲂдѣ́лавъ , и҆ менѐ тѣ́хъ мл҃твами свᲂѐ ѻ҆вча̀ пᲂкажѝ сп҃се , и҆ да не в̾ снѣ́дь чꙋжде́мꙋ , непᲂтре́бныи бꙋ́дꙋ .

да ᲂу҆пᲂва́етъ і҆и҃ль на́ гдⷭ҇а . Пла́чи ѻ҆каѧ́ннаѧ дш҃е пре́жде кᲂнца̀ , и҆ бг҃ᲂви прилѣпи́сѧ , зᲂвꙋ́щи є҆мꙋ̀ ѿ срⷣца со стена́ньми , ѽ всескве́рнаѧ . сᲂгрѣши́хъ ти хрⷭ҇тѐ , не гнꙋша́йсѧ менѐ мᲂлю́сѧ , но ѡ҆брати́въ мѧ ꙗ҆́кѡ млⷭ҇тивъ , и҆ прᲂще́нїю спᲂдо́би .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , беспло́тнымъ ст҃ы́мъ а҆́нг҃лѡмъ . =запѣ́въ : ѿ всѣ́хъ без̾зако́нїи є҆гѡ̀ . Г=дⷭ҇и , беспло́тныхъ сᲂбо́ри непреста́ннѡ сла́вѧтъ тѧ , твᲂеѧ̀ наслажа́ющесѧ красᲂты̀ . и҆ не и҆зрече́ннᲂю дᲂбро́тᲂю , и҆ трисо́лнечными лꙋча́ми бᲂга́тнѡ ѡ҆зарѧ́еми . и҆́хже мл҃твами и҆ пред̾ста́тельствᲂмъ сп҃се , спасѝ дш҃а на́ша .

пᲂхвали́те є҆гѡ̀ всѝ лю́дїе . Гдⷭ҇и , всесо́лнечныѧ ли́ки а҆́нг҃льскїѧ , ты̀ пᲂста́вилъ є҆сѝ всеси́льнымъ ти сло́вᲂмъ . и҆ прест҃ы́мъ твᲂи́мъ д́х҃ᲂмъ , не ѿпа́дающее тѣ́мъ сїѧ́нїе дарᲂва́въ . и҆́хже мᲂльба́ми сп҃се , всѣ́хъ на́съ спасѝ пᲂю́щихъ тѧ .

и҆ и҆́стина гдⷭ҇нѧ пребыва́етъ во́ вѣки . Гдⷭ҇и , серафи́ми вᲂспѣва́ютъ тѧ , и҆ вла́сти и҆ а҆́нг҃ли , нача́ла , и҆ гдⷭ҇ьствїѧ , и҆ прⷭ҇то́ли , и҆ си́лы , и҆ а҆рха́нг҃ли , и҆ херꙋви́ми стра́шни , пѣ́нїе вᲂспѣва́ютъ ти . тѣ́хъ всѣ́хъ застꙋпле́нїемъ , всѧ̀ спасѝ и҆́же вѣ́рᲂю вᲂспѣва́ющихъ тѧ .

сла́ва , и҆ ны́нѣ , боⷢ҇ . Всегда̀ твᲂрца̀ , а҆́зъ тва́рь ѡ҆скᲂрблѧ́ю и҆ прᲂгнѣ́ваю , да́ждь мѝ и҆справле́нїе ѻ҆трᲂкᲂви́це , пре́жде тᲂгѡ̀ премѣни́вши . и҆ по́мᲂщїю твᲂе́ю къ дѣ́лᲂмъ ᲂу҆го́днымъ вᲂста́ви , ꙗ҆́кѡ да ᲂу҆лꙋчꙋ̀ спасе́нїе и҆ ѡ҆ставле́нїе .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , и҃ . Тебѐ цр҃ѧ и҆ влⷣкꙋ , а҆́нг҃ли непреста́ннѡ вᲂспѣва́ютъ , а҆́зъ же тѝ припа́даю ꙗ҆́кѡ мыта́рь вᲂпїѧ̀ , бж҃е ѡ҆чи́сти мѧ и҆ пᲂми́лꙋй мѧ .

сти́хъ : к̾ тебѣ̀ вᲂз̾ведо́хъ ѻ҆́чи . Без̾сме́ртна сꙋ́щи дш҃е мᲂѧ̀ , вᲂлна́ми жите́йскими не пᲂгрꙋжа́йсѧ , но вᲂзни́кни вᲂпїю́щи к̾ свᲂемꙋ̀ бл҃гᲂда́телю , бж҃е ѡ҆чи́сти мѧ и҆ пᲂми́лꙋй мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мч҃нцы гдⷭ҇ни , всѧ́ко мѣ́стѡ ѡ҆сщ҃а́ете , и҆ всѧ́къ недꙋ́гъ ᲂу҆врачꙋ́ете . и҆ ны́нѣ мᲂли́те , и҆зба́витисѧ ѿ сѣте́й вра́жїихъ дш҃а́мъ на́шимъ , мо́лимъ вы̀ .

сла́ва , и҆ ны́нѣ , боⷢ҇ . А҆рха́нг҃ла гаврїи́ла гла́съ вᲂспрїи́мше рце́мъ , ра́дꙋисѧ мт҃и бж҃їѧ , ꙗ҆́же жизнᲂда́вца хрⷭ҇та̀ ми́рꙋ ро́ждьшаѧ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ нлⷣю , на па́вечерницѣ . кано́нъ , прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща .

запѣ́въ : прест҃а́ѧ гжⷭ҇е бцⷣе спасѝ на́съ . Пресла́внаѧ ѡ҆ тебѣ̀ вᲂз̾гл҃ашасѧ пречⷭ҇таѧ , вѣ́рнымъ сла́ва , є҆ди́на бы́вша . тѣ́мже бꙋ́дꙋщей сла́вѣ прича́стника мѧ пᲂкажѝ , твᲂи́ми мл҃твами , сла́вѧщагѡ тѧ̀ , прест҃а́ѧ дв҃о всепѣ́таѧ . Бл҃гᲂслᲂве́нъ пло́дъ пречⷭ҇таѧ чре́ва твᲂегѡ̀ , и҆́мже земні́и всѝ клѧ́твы и҆зба́вихᲂмсѧ , бл҃гᲂслᲂве́наѧ всечⷭ҇таѧ . ѽ несказа́ннᲂе чꙋ́до , недᲂразꙋ́мнᲂе слы́шанїе , всѣ́хъ же вѣ́рныхъ спасе́нїе .= сла́ва . А҆́нг҃лъ мо́литъ тѧ гдⷭ҇и мно́жество всегда̀ , ᲂу҆чени́къ сᲂбо́ръ , и҆ прⷪ҇ркъ , сᲂсло́вїе мч҃нкъ , и҆ прпⷣбныхъ твᲂи́хъ , бцⷣы ра́ди , грѣхѡ́въ прᲂще́нїе да́рꙋй на́мъ , ꙗ҆́кѡ чл҃кᲂлю́бецъ . и҆ ны́нѣ . Т=ебѐ пречⷭ҇тꙋю , и҆́же в̾ лᲂжесна́хъ прїе́мшꙋю ѻ҆́гнь непᲂстᲂѧ́нныи мᲂлю̀ вѣ́рᲂю , гее́нны ѻ҆гнѧ̀ и҆з̾ба́вити мѧ и҆ и҆схи́тити , и҆ вѣ́чнагѡ мꙋче́нїѧ свᲂбᲂди́ти , твᲂи́ми бл҃гᲂпрїѧ́тными мᲂли́твами .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Чи́стагѡ житїѧ̀ ѿпа́дъ пречⷭ҇таѧ , прилᲂжи́хсѧ скᲂто́мъ , и҆ ѡ҆сꙋжде́нъ ве́сь бы́хъ , ꙗ҆́же сꙋдїю̀ ро́ждьшаѧ , всѧ́кᲂгѡ ѡ҆сꙋже́нїѧ и҆зба́ви и҆ спаси́ мѧ . Стᲂна́нїѧ чⷭ҇таѧ и҆ дш҃е́внꙋю сле́зꙋ , и҆ при́снᲂе ми ᲂу҆миле́нїе пᲂда́ждь ѻ҆трᲂкᲂви́це , ꙗ҆́кѡ да пла́чꙋ ѡ҆держа́щїѧ мѧ стра́сти ѿ невнѧ́тїѧ , бг҃ᲂбл҃гᲂда́тнаѧ .= сла́ва . Нбⷭ҇нїи чи́нᲂве слꙋже́бнїи дꙋ́си , сᲂбо́ръ прᲂро́къ и҆ а҆пⷭ҇лъ , и҆ мч҃нкъ твᲂи́хъ , мо́лѧтъ тѧ непреста́ннѡ ще́дре , лю́демъ твᲂи́мъ да́рꙋй , прегрѣше́нїемъ ѡ҆ставле́нїе . и҆ ны́нѣ . М=илᲂсе́рдїѧ мѧ̀ бжⷭ҇твенагѡ ꙗ҆́кѡ млⷭ҇тива пречⷭ҇таѧ , ны́нѣ спᲂдо́бити ᲂу҆мᲂлѝ милᲂсе́рдаго . нра́вы бо неми́лᲂстивы немилᲂсе́рднѡ стѧжа́въ , вѣ́чнᲂмꙋ ѻ҆гню̀ дᲂсто́инъ бы́хъ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Лꙋка́ваѧ грѣхо́въ мᲂи́хъ рꙋкᲂписа́нїѧ раз̾дерѝ пречⷭ҇таѧ , бжⷭ҇твенымъ кᲂпїе́мъ прᲂбо́дшимъ бжⷭ҇твенаѧ ре́бра , вᲂчл҃читисѧ и҆з̾ тебѐ вᲂсхᲂтѣ́вшагѡ . и҆ мᲂлѝ є҆гѡ̀ въ кни́зѣ мѧ спасе́ныхъ написа́ти , безꙋ́мнѡ бг҃а ᲂу҆дали́вшагᲂсѧ . Да гла́сы бл҃гᲂда́рствеными сла́влю тѧ , да любо́вїю бжⷭ҇твенᲂю велича́ю тѧ пренепᲂро́чнаѧ . ꙗ҆́же вели́кимъ свᲂи́мъ ржⷭ҇тво́мъ , всѧ̀ ᲂу҆да́лившїѧсѧ вᲂз̾вели́чивши . вельмѝ ᲂу҆да́лившагᲂсѧ и҆ лю́тѣ па́дшаго мѧ , прᲂще́нїѧ бжⷭ҇твенагѡ спᲂдо́би .= сла́ва . Зако́ни въ тебѣ̀ и҆спраздни́шасѧ є҆стества̀ , па́че є҆стества́ бо бг҃а сло́ва рᲂдила̀ є҆сѝ . тѣ́мже тѧ вѣ́рᲂю мᲂлю̀ пренепᲂро́чнаѧ , и҆́же па́че є҆стества̀ чл҃ческа мно́го сᲂгрѣ́шша , и҆ бг҃а ᲂу҆да́льшасѧ , ѡ҆браща́ющагᲂсѧ спасѝ мᲂли́твами твᲂи́ми . и҆ ны́нѣ . В=ра́гъ ᲂу҆́бѡ грѣхо́вными стрѣла́ми дш҃ꙋ мᲂю̀ всю̀ ᲂу҆ѧ́зви , и҆ ѡ҆сквернѝ сластьмѝ мᲂѐ срⷣце , и҆ ѿ пꙋтѝ ѿведѐ пра́вагѡ . сегѡ̀ ра́ди дв҃о вᲂпїю́ ти , ѡ҆брати́вши и҆сцѣлѝ и҆ спаси́ мѧ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Ро́дᲂве рᲂдѡ́въ , тѧ̀ дв҃о прⷭ҇нѡ бл҃же́ннꙋю ны́нѣ блажа́тъ , и҆ нбⷭ҇ныѧ си́лы , ꙗ҆́кѡ до́льнѧѧ съ вы́шними сᲂвᲂкꙋ́пльшꙋю , вᲂсхвалѧ́ютъ є҆ди́нꙋ в̾ жена́хъ бл҃гᲂслᲂве́нꙋю , па́дшагѡ а҆да́ма , и҆справле́нїе . Пребыва́ти мѧ цѣ́ла , и҆ непрело́жна стᲂѧ́нїѧ лꙋ́чшагѡ , но бл҃гᲂше́ствꙋюща , и҆ бг҃ᲂви ᲂу҆го́днаѧ дѣ́лати бл҃га́ѧ мᲂлѝ , бл҃га́го ро́ждьшаѧ сло́ва , и҆́же на́съ без̾слᲂве́сїѧ и҆зба́вльшаго .= сла́ва . И҆́же кро́вь свᲂю̀ сло́ве на крⷭ҇тѣ̀ прᲂлїѧ́выи , за премно́гꙋю страсте́й мᲂи́хъ бе́зднꙋ и҆з̾сꙋшѝ , и҆ во ᲂу҆миле́нїи тебѣ̀ бг҃ᲂви ᲂу҆гᲂди́ти , бцⷣы ра́ди спᲂдо́би . и҆ ны́нѣ . М=т҃и дв҃о ѻ҆трᲂкᲂви́це , ꙗ҆́же не ѡ҆быме́ннаго пло́тїю ро́ждьшаѧ , а҆́нг҃лѡмъ сла́вꙋ , и҆ бѣсѡ́мъ ꙗ҆́звꙋ , бг҃ᲂневѣ́сто , мᲂѐ срⷣце ᲂу҆ѧзви́вшеесѧ грѣхо́мъ , цѣльбы̀ бжⷭ҇твеныѧ спᲂдо́би .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Пᲂми́лᲂвасѧ тᲂбо́ю є҆стество̀ чл҃ческᲂе , млⷭ҇тиваѧ влⷣчце , млⷭ҇тиваго бо рᲂдила̀ є҆сѝ пречⷭ҇таѧ . тѣ́мже мᲂлю́ тѧ мᲂю̀ дш҃ꙋ пᲂми́лꙋй . Беспло́тныхъ чи́нᲂве мо́лѧтъ тѧ хрⷭ҇тѐ , мч҃нкъ прⷪ҇ркъ и҆ а҆пⷭ҇лъ твᲂи́хъ , ро́ждьшїѧ тѧ̀ ра́ди , лю́ди твᲂѧ̀ спасѝ ѿ всѧ́кᲂгѡ ѡ҆б̾стᲂѧ́нїѧ .= сла́ва . И҆́же недѣ́ланнаѧ землѧ̀ , дѣ́лателѧ ро́ждьши , и҆ всѣ́хъ зижди́телѧ . ѡ҆лѧдѣ́вшꙋю дꙋ́шꙋ мᲂю̀ страстьмѝ , плᲂдᲂно́снꙋ пᲂкажѝ бжⷭ҇твенымъ разꙋмѣ́нїемъ . и҆ ны́нѣ . П=рестꙋпи́хъ за́пᲂвѣди є҆́же к̾ бг҃ꙋ ведꙋ́щїѧ мѧ , и҆ нехᲂтѧ̀ пᲂрабо́тихсѧ лꙋка́вымъ страсте́мъ . тѣ́мже мᲂлю́ тѧ при́снѡ дв҃о , и҆схи́ти мѧ ѿ тѣ́хъ влады́чествїѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , и҃ . Нбⷭ҇нᲂе бл҃гᲂче́стїе си́ламъ , и҆ пᲂхва́льнꙋю высᲂтꙋ̀ дш҃а́мъ на́шимъ , мт҃рь дв҃ꙋ ѻ҆трᲂкᲂви́цꙋ , вᲂсхва́лимъ вѣ́рнїи . ра́дꙋисѧ , ꙗ҆́же а҆́нг҃лѡмъ твᲂрца̀ во ᲂу҆тро́бѣ заче́нши . ра́дꙋисѧ па́дающимъ ѡ҆чище́нїе , бг҃а сло́ва вᲂпло́щши . ра́дꙋисѧ невѣ́сто неневѣ́стнаѧ .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Не и҆зрече́ннымъ ржⷭ҇тво́мъ сѝ , стра́шнымъ и҆ не и҆зрече́ннымъ веще́мъ на́съ спᲂдо́била є҆сѝ бцⷣе . тѣ́мже мѧ стра́шныѧ мꙋ́ки и҆зба́ви , и҆ не и҆зрече́нныѧ мѧ ра́дᲂсти и҆спо́лни , да пᲂю́ тѧ при́снѡ мнᲂгᲂпѣ́тꙋю . Въ лѣ́нᲂсти житїѐ мᲂѐ и҆́зживъ , и҆ бы́хъ без̾пло́денъ . и҆ ᲂу҆жаса́юсѧ прѣ́нїѧ , и҆ гее́ны ѻ҆гнѧ̀ негаси́магѡ , ꙗ҆́же ѻ҆́гнь ро́ждьшаѧ бцⷣе непᲂстᲂѧ́нныи , прилѣжѝ и҆зба́вити мѧ мл҃твами твᲂи́ми .= сла́ва . Чꙋде́съ превы́ше вели́кᲂе чꙋ́до твᲂегѡ̀ ржⷭ҇тва̀ , чⷭ҇таѧ дв҃о , сегѡ̀ ра́ди вᲂпїю́ ти бг҃ᲂрᲂди́тельнице , твᲂѧ̀ ми́лᲂсти на мнѣ̀ ᲂу҆дивѝ , и҆ бꙋ́дꙋщагѡ гнѣ́ва и҆зба́ви и҆ спаси́ мѧ . и҆ ны́нѣ . М=енѐ жи́вшаго в̾ лѣ́нᲂсти и҆ презрѣ́вша ст҃ы́ѧ зако́ны твᲂѧ̀ , и҆ честна́ѧ ти хрⷭ҇тѐ пᲂвелѣ́нїѧ , ᲂу҆ще́дри сп҃се ро́ждьшїѧ тѧ ра́ди , ꙗ҆́кѡ бл҃гᲂда́тель бг҃ъ и҆ мнᲂгᲂми́лᲂстивъ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Оу҆мерщве́нꙋю ѡ҆живѝ , па́дшꙋю вᲂста́ви , ᲂу҆ѧ́звенꙋю дш҃ꙋ мᲂю̀ и҆сцѣлѝ . ᲂу҆́мъ мо́й ᲂу҆мирѝ . и҆скꙋше́нїи во́лны ᲂу҆крᲂтѝ дв҃це . и҆ вᲂпїю́ща мѧ спасѝ , дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂз̾нᲂси́те є҆гѡ̀ во́ вѣки . Ꙗ҆́кѡ разбо́йникъ взыва́ю ти , пᲂмѧни́ мѧ чл҃кᲂлю́бче . пла́чꙋ ꙗ҆́кѡ блꙋдни́ца , и҆ вᲂпїю̀ сᲂгрѣши́хъ , ꙗ҆́кᲂже дре́вле блꙋ́дныи . ка́ющасѧ прїими́ мѧ ѿча́ѧннагѡ , бцⷣы ра́ди , да ᲂу҆се́рднѡ вᲂпїю̀ , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки .= сла́ва . Рабᲂлѣ́пнѡ вᲂпїе́мъ ти бцⷣе всепѣ́таѧ , с̾ без̾чи́слеными ᲂу҆́мными си́лами , прⷪ҇рки и҆ прпⷣбными , а҆пⷭ҇лы и҆ мч҃нки , сᲂтвᲂрѝ мᲂльбꙋ̀ за всѧ̀ челᲂвѣ́ки , бжⷭ҇твенѣ пᲂю́ще , бл҃гᲂслᲂви́те всѧ̀ дѣ́ла , и҆ превᲂзнᲂси́те є҆гѡ̀ во́ вѣки . и҆ ны́нѣ . Ч=естнѣ́йши є҆сѝ бцⷣе всенепᲂро́чнаѧ , преми́рныхъ а҆́нг҃лъ чино́вства , си́хъ бо рᲂдила̀ є҆сѝ сᲂзда́телѧ и҆ гдⷭ҇а , ѿ дв҃ческїѧ не и҆скꙋсᲂбра́чныѧ ᲂу҆тро́бы , во двᲂю̀ сꙋществꙋ̀ несмѣ́сно и҆ непрело́жно , є҆ди́нъ сᲂста́въ бцⷣе вᲂплᲂще́нъ .

пѣ́снь , ѳ҃ . і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Ѽ бжⷭ҇твеныи ѻ҆́дръ сᲂло́мѡнᲂвъ , є҆го́же ѡ҆крꙋжа́ютъ нн҃ѣ си́льнїи шестьдесѧ́тъ . гл҃ы бжⷭ҇твенагѡ писа́нїѧ , на не́мже бг҃ъ пᲂчѝ . тма́ми мѧ прⷭ҇нѡ бѣ́сы ѡ҆крꙋже́на , невре́дна сᲂхранѝ си́лᲂю сѝ , чⷭ҇таѧ прⷭ҇нѡ дв҃о . И҆ска́пающаѧ бжⷭ҇твенꙋю сла́дᲂсть , всѣ́хъ сла́дᲂсть ро́ждьшаѧ , дш҃ꙋ мᲂю̀ ᲂу҆сладѝ , ꙗ҆́дᲂмъ ѕмїины́мъ ѡ҆гᲂрче́нꙋю , ѿчꙋжда́юща мѧ го́рькагѡ вре́да , всегда̀ хᲂда́тайствᲂмъ сѝ пред̾ста́тельнице вѣ́рнымъ непᲂсты́днаѧ .= сла́ва . Сл҃нце сла́вы і҆с҃е , ѻ҆каѧ́ннꙋю ми дш҃ꙋ прᲂсвѣтѝ , мᲂльба́ми тебѐ ро́ждьшїѧ чⷭ҇тыѧ бг҃ᲂѻ҆трᲂкᲂви́цы , и҆ беспло́тныхъ слꙋ́гъ , чⷭ҇тны́хъ а҆пⷭ҇лъ твᲂи́хъ , и҆ ст҃ль , и҆ прⷪ҇ркъ и҆ мч҃нкъ и҆з̾бра́нныхъ и҆ прпⷣбныхъ твᲂи́хъ . и҆ ны́нѣ . Страшꙋ́сѧ є҆ди́не цр҃ю , твᲂегѡ̀ втᲂра́го и҆ стра́шнаго прише́ствїѧ , ве́сь ѡ҆сꙋжде́нъ недᲂꙋмѣ́ненъ сы́и гдⷭ҇и . тѣ́мже пре́жде кᲂнца̀ вᲂпїю́ ти , ро́ждьшїѧ тѧ ра́ди пᲂщади́ мѧ , и҆ спасѝ ми́лᲂстиве бл҃гі́и чл҃кᲂлю́бче . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ пᲂнедѣ́льникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , и҃ . Ѻ҆́кᲂмъ милᲂсе́рдымъ гдⷭ҇и ви́ждь мᲂѐ смире́нїе , ꙗ҆́кѡ пᲂма́лꙋ жи́знь мᲂѧ̀ скᲂнчава́етсѧ , и҆ ѿ дѣ́лъ нѣ́сть мнѣ̀ спасе́нїѧ . сегѡ̀ ра́ди мᲂлю́сѧ , ѻ҆́кᲂмъ бл҃гᲂꙋтро́бнымъ гдⷭ҇и ви́ждь мᲂѐ смире́нїе , и҆ спаси́ мѧ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Ꙗ҆́кѡ сꙋдїѝ прише́дшꙋ пᲂпецы́сѧ дш҃е , и҆ стра́шнагѡ днѐ ча́съ пᲂмышлѧ́й , сꙋ́дъ бо без̾ ми́лᲂсти є҆́сть , несᲂтво́ршимъ ми́лᲂсти . тѣ́мже пᲂщади́ мѧ сп҃се , є҆ди́нъ бо є҆сѝ без̾грѣ́шенъ . сла́ва , и҆ ны́нѣ , боⷢ҇ . П=ᲂвелѣ́ннᲂе та́инство прїе́мъ въ ра́зꙋмѣ въ кро́вѣ і҆ѡ́сифᲂвѣ , со тща́нїемъ пред̾ста̀ беспло́тныи , гл҃ѧ не и҆скꙋ́снѣй бра́кꙋ , преклᲂне́и схᲂжде́нїемъ нб҃са̀ , въмѣща́етсѧ не и҆змѣ́ннѡ ве́сь в̾ тѧ̀ . є҆го́же и҆ ви́жꙋ въ лᲂжесна́хъ твᲂи́хъ прїе́мша ра́бїи зра́къ , ᲂу҆жаса́юсѧ зва́ти ти , ра́дꙋисѧ невѣ́сто неневѣ́стнаѧ .

по в҃ , стихᲂло́гїи , сѣда́льны . гла́съ , и҃ . Дн҃ь ѻ҆́нъ стра́шныи пᲂмышлѧ́ющи дш҃е мᲂѧ̀ пᲂбдѝ , вжига́ющи свѣщꙋ̀ свᲂю̀ ма́слᲂмъ прᲂсвѣща́ющи , невѣ́си бо кᲂгда̀ прїи́детъ к̾ тебѣ̀ гла́съ гл҃ющїи , сѐ жени́хъ , блюдѝ ᲂу҆́бѡ дш҃е мᲂѧ̀ да невᲂздре́млеши , и҆ пребꙋ́деши внѣ̀ тᲂлкꙋ́щи ꙗ҆́кѡ пѧ́ть дв҃ъ . но бо́дренѡ пᲂбдѝ , да ᲂу҆срѧ́щеши хрⷭ҇та̀ сᲂє҆ле́ѡмъ ма́ститᲂмъ , и҆ да́стъ ти черто́гъ бжⷭ҇твеныѧ сла́вы свᲂеѧ̀ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Ꙗ҆́кѡ блꙋдни́ца припа́даю ти , да прїимꙋ̀ ѡ҆ставле́нїе . в̾мѣ́стѡ ми́ра , сле́зы ѿ срⷣца принᲂшꙋ́ ти , да ꙗ҆́кѡ ѻ҆́нꙋю ᲂу҆ще́дриши мѧ сп҃се , и҆ пᲂда́си ми ѡ҆чище́нїе грѣхо́въ . ꙗ҆́кѡ бо ѻ҆на̀ вᲂпїю́ ти , и҆зба́ви мѧ ѿ скве́рныхъ дѣ́лъ мᲂи́хъ . =сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Свѣ́тᲂмъ нбⷭ҇нымъ прᲂсвѣща́етсѧ дне́сь сі́й хра́мъ , въ не́мже во́инства а҆́нг҃льскаѧ ра́дꙋютсѧ . с̾ ни́ми же и҆ чл҃честїи ли́цы веселѧ́тсѧ , въ па́мѧть стрⷭ҇тᲂте́рпецъ . тѣ́хъ мл҃твами , низ̾пᲂслѝ ми́рꙋ свᲂемꙋ̀ смире́нїе хрⷭ҇тѐ , и҆ ве́лїю ми́лᲂсть .= сла́ва , и҆ ны́нѣ , боⷢ҇ . Р=а́дꙋисѧ две́ри цр҃ѧ сла́вы , є҆ю́же вы́шнїи є҆ди́нъ про́йде , и҆ пребы́ти запечатлѣ́ннꙋ бл҃гᲂи҆зво́ли , во спасе́нїе дш҃а́мъ на́шимъ .

по г҃ , стихᲂло́гїи , сѣда́ленъ . гла́съ , и҃ . Мытаре́во стᲂна́нїе , и҆ блꙋдни́цы рыда́нїе дш҃е пре́же кᲂнца̀ вᲂспрїимѝ , свѣ́дꙋщемꙋ та́йнаѧ дѣ́ла твᲂѧ̀ , непреста́й рыда́нїемъ и҆спᲂвѣ́дающисѧ и҆ пла́чемъ , пᲂсто́мъ и҆ бдѣ́нїемъ , и҆ мл҃твᲂю вᲂпїю́щи , сᲂгрѣши́хъ ѡ҆чи́сти мѧ сп҃се мл҃твами а҆́нг҃лъ твᲂи́хъ , ꙗ҆́кѡ ще́дръ , и҆ спаси́ мѧ .= сла́ва , и҆ ны́нѣ , боⷢ҇ . Бг҃ᲂра́дᲂваннаѧ чⷭ҇таѧ и҆ блгⷭ҇ве́наѧ , и҆́же за милᲂсе́рдїе щедро́тъ и҆з̾ тебѐ ро́ждьшагᲂсѧ , с̾ вы́шними си́лами со а҆рха́нг҃лы и҆ со всѣ́ми беспло́тными , ѡ҆ на́съ мᲂлѝ непреста́ннѡ , да́ти на́мъ пре́жде кᲂнца̀ прᲂще́нїе и҆ ѡ҆чище́нїе грѣхо́въ , и҆ житїѧ̀ и҆справле́нїе , ꙗ҆́кѡ да ѡ҆брѧ́щемъ млⷭ҇ть . =таⷤ , ѱл҃о́мъ , н҃ . пᲂми́лꙋй мѧ бж҃е . и҆ вᲂз̾гла́съ , ми́лᲂстїю и҆ щедро́тами .

Кано́нъ , пᲂкаѧ́ненъ , ко́ гдⷭ҇ꙋ на́шемꙋ , і҆с҃ꙋ хрⷭ҇тꙋ̀ . и҆ ст҃ы́мъ є҆гѡ̀ мч҃нкѡмъ . твᲂре́нїе , ки́ръ і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : сла́ва тебѣ̀ бж҃е на́шъ , сла́ва тебѣ̀ . И҆зба́ви мѧ гее́нны , ю҆́же себѣ̀ дѣ́лы без̾мѣ́стными и҆схᲂда́таихъ и҆зба́вителю , и҆ твᲂеѧ̀ любвѐ вᲂжзи́ ми в̾ пᲂмышле́нїи ѻ҆́гнь бжⷭ҇твеныи сѝ . Пᲂкᲂри́хсѧ страсте́мъ и҆ ѡ҆мрачи́хсѧ , и҆ без̾слᲂве́сенъ бы́въ , сло́вᲂмъ пᲂчте́ныи гдⷭ҇и , вᲂзникнᲂве́нїе да́ждь дш҃и мᲂе́й , и҆ и҆́миже вѣ́си сꙋдьба́ми спаси́ мѧ . запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Стѧза́ема тѣлеса̀ ра́нами , ꙗ҆влѧ́хꙋ нра́въ пра́въ же и҆ не ᲂу҆кло́ненъ , и҆ є҆́же к̾ зижди́телю любо́вь , вѣнцено́сцы всехва́льнїи мч҃нцы .= мⷱ҇ꙋ . Крᲂве́й сте́кшїисѧ рѣ́ки , ѿ тѣле́съ ст҃ы́хъ сла́вныхъ твᲂи́хъ страда́лецъ , и҆дᲂлᲂбѣ́сїѧ те́рнїе твᲂе́ю си́лᲂю ще́дре пᲂтᲂпи́ша . боⷢ҇ . И҆=сцѣлѝ чи́стаѧ , недꙋ́гꙋюща мѧ лю́тѣ смертᲂно́снымъ грѣхо́мъ , плᲂтьски́хъ и҆ дш҃е́вныхъ скве́рнъ , ꙗ҆́кѡ да вѣ́рᲂю при́снѡ ᲂу҆блажа́ю тѧ .

Дрꙋгі́и , кано́нъ , беспло́тнымъ , ст҃ы́мъ а҆́нг҃лѡмъ . твᲂре́нїе , ки́ръ ѳео́фана . гла́съ , и҃ . і҆рмо́съ , то́йже . =запѣ́въ : ст҃і́и а҆рха́нг҃ли и҆ а҆́нг҃ли , мᲂли́те бг҃а ѡ҆ на́съ . Ст҃ы́хъ а҆́нг҃лъ ꙗ҆́кѡ нача́льницы и҆ бг҃ᲂвидѣ́нїѧ наслажа́ющесѧ свѣ́тлѡ , бл҃гᲂда́вца и҆ сп҃са ѡ҆ на́съ мᲂли́те а҆рха́нг҃ли . =двⷤа . Жите́йскими ѡ҆держи́ми напа́стьми , к̾ ва́мъ ꙗ҆́кѡ пред̾ста́телемъ ны́нѣ прибѣга́емъ вѣ́рнїи , а҆рха́нг҃ли бжⷭ҇твенїи , влⷣкꙋ ѡ҆ на́съ ᲂу҆мᲂли́те .= боⷢ҇ . Б=ꙋ́ди ми дв҃о прибѣ́жище , приста́нище же и҆ стѣна̀ и҆ пред̾ста́тельница , ꙗ҆́же бг҃а пло́тїю ро́ждьши бг҃ᲂмт҃и , и҆зба́вителѧ и҆ всеще́драго .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Кᲂто́рыми ᲂу҆зрю́ тѧ хрⷭ҇тѐ сп҃се ѻ҆чи́ма , ни є҆ди́нꙋ бо на землѝ за́пᲂвѣдь твᲂю̀ сᲂтвᲂри́хъ , и҆ ка́кѡ непᲂстᲂѧ́ннᲂмꙋ тѝ пред̾ста́нꙋ престо́лꙋ сло́ве , ѡ҆ без̾мѣ́рныхъ ми ѕѡ́лъ сᲂтвᲂри́ти ѿвѣ́тъ . Прᲂсте́ръ рꙋ́цѣ твᲂи́хъ щедро́тъ , прїими́ мѧ ꙗ҆́кᲂже пре́жде блꙋ́днаго пᲂдо́бными ѻ҆бразы̀ , пᲂрабо́тившагᲂсѧ без̾че́стнымъ страсте́мъ , и҆ ѿ тебѐ ᲂу҆дали́вшасѧ і҆с҃е чл҃кᲂлю́бче пребл҃гі́и .= мⷱ҇ꙋ . Оу҆тверди́вшесѧ на ка́мени бж҃їѧгѡ ра́зꙋма , мч҃нцы хрⷭ҇то́вы страстᲂно́сцы , ѻ҆рꙋ́жїемъ вѣ́ры и҆скᲂрени́сте неразꙋ́мїѧ те́рнїе , и҆ плᲂды̀ страда́нїѧ вᲂздѣ́ласте . мⷱ҇ꙋ . Непᲂкᲂлѣби́мїи стᲂлпѝ и҆́стиннагѡ ра́зꙋма , пресвѣ́тлаѧ цр҃кви ᲂу҆дᲂбре́нїѧ , сщ҃е́ннѣйшаѧ ѻ҆вча́та хрⷭ҇то́ва во́лею закᲂле́наѧ , мч҃нцы да пᲂхвале́ни бꙋ́дꙋтъ . боⷢ҇ . Т=ебѐ храни́тельницꙋ всест҃а́ѧ в̾ напа́стехъ стѧжа́хъ . тебѐ съ бг҃ᲂмъ мᲂлю̀ , пред̾ста́тельницꙋ и҆́мамъ неꙋсы́пнꙋ . тебѐ да ѡ҆брѧ́щꙋ влⷣчце и҆збавлѧ́ющꙋ мѧ в̾ де́нь сꙋда̀ , всѧ́кᲂгѡ ѡ҆сꙋжде́нїѧ .

и҆́нъ , і҆рмо́съ , то́йже . Дармѝ свѣтᲂлꙋ́чными а҆́нг҃льскагѡ чи́на , ꙗ҆́кѡ чинᲂнача́льницы ꙗ҆влѧ́еми а҆рхистрати́зи , ᲂу҆краша́юще хрⷭ҇то́вꙋ цр҃кᲂвь , тве́рдо сᲂхрани́те ю҆̀ пред̾ста́тельствᲂмъ ва́шимъ . двⷤа . Вᲂѡ҆рꙋжи́те бл҃гᲂвᲂле́нїемъ ꙗ҆́кѡ сла́внїи бж҃їи пред̾стᲂѧ́тели вѣ́рныхъ и҆спᲂлне́нїе , правᲂсла́вїемъ дᲂбро́тᲂю ны́нѣ вѣнча́емо , и҆ ѿ напа́стей и҆зба́вите бжⷭ҇твенїи а҆рха́нг҃ли .= боⷢ҇ . Ж=и́зни нетлѣ́нныѧ бжⷭ҇твенаѧ сѣ́нь бы́сть , є҆ди́на ѿ́ вѣка ꙗ҆́вльшисѧ дв҃о мт҃и чⷭ҇таѧ . тѣ́мже всепѣ́таѧ , сꙋ́щаго мѧ̀ в̾ сѣ́ни сме́ртнѣй , к̾ живᲂтꙋ̀ наста́ви ны́нѣ мᲂли́твами сѝ .

пѣ́снь , д҃ . і҆рмо́съ . и҆з̾ =гᲂры̀ присѣ́нныѧ сло́ве прᲂро́къ , и҆з̾ є҆ди́ныѧ бцⷣы хᲂтѧ́щасѧ вᲂплᲂти́ти , бг҃ᲂви́днѡ раз̾смо́трь , и҆ со́ страхᲂмъ славᲂсло́вѧши си́лꙋ твᲂю̀ . Вели́къ по́двигъ дш҃и раз̾лꙋча́емѣй , и҆ тре́петъ стра́шенъ . сꙋдїѝ сѣдѧ́щꙋ , и҆ сꙋди́мымъ чл҃кѡмъ сᲂгрѣ́шшимъ . ᲂу҆вы̀ мнѣ̀ , что̀ сᲂтвᲂрю̀ ѡ҆сꙋжде́ныи . И҆мѣ́ѧ срⷣце скве́рнъ и҆спо́лнено , и҆ грѣхо́въ неᲂу҆до́бь нᲂси́маѧ бремена̀ , и҆ к̾ щедро́тамъ твᲂи́мъ притека́ю влⷣко , непре́зри менѐ , но ᲂу҆ще́дри мᲂлю́сѧ . мⷱ҇ꙋ . Честна̀ ва́ша сме́рть ѡ҆брѣ́тесѧ пред̾ бг҃ᲂмъ , до́блїи страстᲂте́рпцы , небо̀ ѿверго́стесѧ тᲂгѡ̀ , бᲂлѣ́зньми мно́гими и҆ ра́нами ѡ҆гража́еми . мⷱ҇ꙋ . Оу҆ра́ненъ бы́сть вра́гъ ра́нᲂю мч҃нкъ , и҆спадо́ша є҆гѡ̀ вѣ́жди вᲂзвыша́емыѧ . и҆ велича́етсѧ тѣ́мже вѣнцеда́вецъ , пѣ́сньми бжⷭ҇твеными прᲂславлѧ́емъ . боⷢ҇ . Т=ебѐ чи́стᲂе прїѧ́телище влⷣцѣ бг҃ᲂрᲂди́тельнице вѣ́рᲂю мᲂлю̀ , ѡ҆чи́сти мѧ ѿ всѧ́кїѧ скве́рны , и҆ до́мъ пᲂкажѝ вседѣ́тельнагѡ и҆ бжⷭ҇твенагѡ дх҃а .

и҆́нъ , і҆рмо́съ . Оу҆слы́шахъ гдⷭ҇и смᲂтре́нїѧ . Дво́ице пе́рвенствꙋющаѧ а҆рха́нг҃лѡмъ , ны́нѣ є҆ди́нᲂго тᲂржества̀ прибѣга́ющїѧ къ кро́вꙋ ва́шемꙋ , ѿ всѧ́кїѧ бѣды̀ спаса́йте . двⷤа . Зри́тели свѣ́тлᲂсти бг҃ᲂнача́льныѧ , и҆ бл҃гᲂдаѧ́нїѧ а҆рхистрати́зи всесла́внїи , ны́нѣ ста́до ва́ше прᲂсвѣти́те .= боⷢ҇ . С=щ҃е́нно тѧ сла́вѧтъ беспло́тныхъ бжⷭ҇твенаѧ во́инства , бг҃ᲂмт҃и всенепᲂро́чнаѧ , зижди́телѧ бо и҆́хъ рᲂдила̀ є҆сѝ .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . Нра́вᲂмъ лꙋка́вымъ прᲂгнѣ́вахъ тѧ гдⷭ҇и , дѣ́лающи без̾мѣ́стнаѧ . но ᲂу҆ще́дри мѧ ѡ҆браща́ющагᲂсѧ и҆ спасѝ . И҆мѣ́ю пᲂмышле́нїе нечꙋ́вствено несмы́сленыи , и҆ ѿ ѕо́лъ невᲂз̾ни́чꙋща . недᲂꙋмѣ́нїе мᲂѐ і҆с҃е разрѣшѝ и҆ спаси́ мѧ .= мⷱ҇ꙋ . Пᲂлᲂжѝ ва́съ бжⷭ҇твенїи мч҃нцы свѣтᲂда́вецъ , ꙗ҆́кᲂже свѣ́щники сїѧ́юща бг҃ᲂразꙋ́мїемъ , и҆ пре́лести тмꙋ̀ разᲂрѧ́юща . мⷱ҇ꙋ . Зако́ны лꙋка́выѧ ѿлᲂжи́сте , и҆ зако́ны бжⷭ҇твеными бг҃а прᲂпᲂвѣ́дающе , ᲂу҆мертви́тисѧ є҆гѡ̀ ра́ди вᲂз̾люби́сте . боⷢ҇ . О=у҆мертвѝ чⷭ҇таѧ пло́ти мᲂеѧ̀ двиза́нїѧ , ᲂу҆мертви́вшаѧ ржⷭ҇тво́мъ сѝ ѻ҆трᲂкᲂви́це , живꙋ́щїи грѣ́хъ пра́ѻ҆ц҃а .

и҆́нъ , і҆рмо́съ , то́йже . Ѻ҆́крⷭ҇тъ бг҃а пред̾стᲂѧ́ще а҆рхистрати́зи , и҆ ѿ тꙋ́дꙋ и҆стᲂча́ющимисѧ зарѧ́ми прᲂсвѣща́еми , ста́до ва́ше сᲂхрани́те . двⷤа . И҆збавле́нїе на́мъ дарᲂва́ти , мᲂли́тесѧ влⷣцѣ и҆ бг҃ꙋ на́шемꙋ , ꙗ҆́кѡ пред̾ста́тели всѧ́ческагѡ и҆збавле́нїѧ .= боⷢ҇ . М=и́ро та́йнᲂе и҆менꙋ́емъ тѧ̀ всечⷭ҇таѧ , ꙗ҆́кѡ ро́ждьши бг҃а пло́тїю , и҆́же бл҃гᲂꙋха́нныѧ и҆стᲂча́щаго бл҃гᲂда́ти .

пѣ́снь , ѕ҃ . і҆рмо́съ . І҆ѡ́нꙋ в̾ ки́тѣ гдⷭ҇и є҆ди́нагѡ всели́лъ є҆сѝ , мене́ же свѧ́заннаго во мре́жахъ вра́жїѧхъ спасѝ , ꙗ҆́кѡ ѿ тлѝ тᲂгѡ̀ спа́слъ є҆сѝ . Со́лнечныи свѣ́тъ пᲂкаѧ́нїѧ вᲂсїѧ́й ми , хрⷭ҇тѐ свѣтᲂда́телю , сꙋ́щемꙋ во тмѣ̀ прегрѣше́нїи , да пᲂю̀ твᲂю̀ бл҃гᲂсты́ню . Твᲂегѡ̀ стра́шнагѡ сꙋди́ща бᲂю́сѧ всегда̀ , ѕлы́хъ же не ѿстꙋпа́ю , и҆ рабо́таю ѕло́мꙋ ѻ҆бы́чаю . и҆спра́ви мѧ хрⷭ҇тѐ , да пᲂю̀ твᲂю̀ бл҃гᲂсты́ню .= мⷱ҇ꙋ . Ли́цы честны́хъ мч҃нкъ пᲂстрада́ша , и҆ пᲂлкѝ пᲂбѣди́ша бѣсо́вскїѧ , и҆ ликѡ́мъ а҆́нг҃льскимъ сᲂвᲂкꙋпи́шасѧ в̾ ра́дᲂсти . тѣ́хъ мᲂли́твами гдⷭ҇и спасѝ дш҃а на́ша . мⷱ҇ꙋ . Крѣ́пᲂстїю твᲂе́ю , си́льны пᲂказа́лъ є҆сѝ мч҃нки твᲂѧ̀ гдⷭ҇и , и҆ всю̀ си́лꙋ низ̾лᲂжи́ша , ве́тхагѡ запина́телѧ . тѣ́хъ мᲂли́твами гдⷭ҇и спасѝ дш҃а на́ша . боⷢ҇ . Д=а гла́сы бл҃гᲂда́рствеными всегда̀ сла́влю тѧ всенепᲂро́чнаѧ . дш҃и мᲂеѧ̀ ѿженѝ тмꙋ̀ , и҆ пᲂкаѧ́нїѧ свѣ́тᲂмъ разрѣши́ ми мра́чнаѧ сᲂгрѣше́нїѧ .

и҆́нъ , і҆рмо́съ . Мл҃твꙋ прᲂлїю̀ ко́ гдⷭ҇ꙋ . Ны́нѣ престо́лꙋ стра́шнᲂмꙋ пред̾стᲂѧ́ти неꙋкло́ннѡ спᲂдо́бившесѧ бг҃ᲂви́дцы , и҆ свѣ́тлᲂсти ст҃ы́ѧ трⷪ҇цы насыща́етесѧ , к̾ ва́мъ прибѣга́ющихъ ѿ напа́стей и҆ страсте́й , мᲂли́те и҆зба́витисѧ а҆рха́нг҃ли . двⷤа . Стра́нствїѧ влады́чнѧгѡ мᲂли́тесѧ , и҆́же ва́съ пѣ́снено вᲂспѣва́ющимъ пᲂлꙋчи́ти , и҆ ра́дᲂсти приснᲂсꙋ́щныѧ спᲂдо́битисѧ и҆ бжⷭ҇твеныѧ свѣ́тлᲂсти , а҆рха́нг҃ли бг҃ᲂви́днїи , гаврїи́ле , и҆ михаи́ле всесла́внїи .= боⷢ҇ . Ѡ҆=дш҃евле́ныи влады́чнїи черто́гъ , и҆́же свѣ́тлыми лꙋча́ми дв҃ьства свѣтᲂви́денъ , ꙗ҆́кᲂже кри́нъ блиста́ѧ пᲂсредѣ̀ терно́внагѡ мѧте́жа , пречⷭ҇таѧ и҆ бл҃гᲂлѣ́пнаѧ бцⷣа дв҃аѧ да сла́витсѧ .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы въ вавилѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Вᲂз̾дыха́нїе мѝ пᲂда́ждь хрⷭ҇тѐ , ꙗ҆́кᲂже и҆нᲂгда̀ мытарю̀ , и҆ ꙗ҆́кᲂже блꙋдни́цѣ , слеза́ми ѿмы́въ гно́й ѕѡ́лъ мᲂи́хъ , и҆ вᲂпїю́ща мѧ ᲂу҆ще́дри , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Въ раз̾бо́йники дш҃егꙋби́тельныѧ в̾па́дшагѡ , и҆ ᲂу҆ѧ́звенаго лю́тѣ , и҆сцѣлѝ сп҃се є҆ле́ѡмъ при́снагѡ пᲂкаѧ́нїѧ , и҆ ᲂу҆стро́й пѣ́ти тебѣ̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= мⷱ҇ꙋ . Оу҆мертви́стесѧ ми́рꙋ и҆ ме́ртва бы́вша живᲂно́снагѡ хрⷭ҇та̀ , ника́кᲂже ѿверго́стесѧ до́блїи стрⷭ҇тᲂно́сцы . но вᲂспѣва́йте вᲂпїю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . мⷱ҇ꙋ . Є҆ди́но є҆стество̀ трⷪ҇цы въ трїе́хъ и҆пᲂста́сѣхъ и҆спᲂвѣ́дающе ꙗ҆́снѡ гдⷭ҇ни страстᲂно́сцы . раз̾рꙋши́стеже мнᲂгᲂбо́жїѧ пре́лесть , пᲂю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . И҆́=же бж҃їе бг҃ъ сло́во , во ᲂу҆тро́бꙋ твᲂю̀ все́льсѧ дв҃о мт҃и чⷭ҇таѧ , всѣ́мъ застꙋ́пницꙋ ѡ҆би́димымъ ꙗ҆влѧ́етъ тѧ̀ , вᲂпїю́щимъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ , то́йже . Мнᲂгᲂразли́чнꙋю бл҃гᲂда́ть а҆рхистрати́зи бжⷭ҇твенїи , ва́мъ дарᲂва́лъ є҆́сть и҆́же всѣ́хъ бл҃гᲂда́тель . є҆го́же нн҃ѣ цр҃кᲂвь пᲂю́щꙋю сᲂхрани́те . ѻ҆ц҃ъ на́шихъ бж҃е бл҃гᲂслᲂве́нъ є҆сѝ . двⷤа . Си́лᲂю всеви́дца ᲂу҆крѣплѧ́еми , всѧ̀ кᲂнцы̀ землѝ ꙗ҆́снѡ назира́ете , и҆ всѣ́хъ и҆́же в̾ вѣ́рѣ спаса́ете пᲂю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= боⷢ҇ . С=паси́тельнᲂе приста́нище бцⷣе дв҃о тѧ̀ и҆мꙋ́ще , жите́йскихъ бѣ́дъ и҆збѣга́емъ и҆ мѧте́жей . сн҃ꙋ твᲂемꙋ̀ зᲂвꙋ́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Прᲂѧвле́ннагѡ на гᲂрѣ̀ ст҃ѣ́й , и҆ въ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превᲂзнᲂси́те є҆гѡ̀ во́ вѣки . Ѿведе́наго мѧ плᲂтьски́мъ любᲂсла́стїемъ , и҆ ѿ тебѐ сло́ве безꙋ́мнѡ ᲂу҆дали́вшасѧ , и҆ ᲂу҆пᲂдо́бльшасѧ всѣ́мъ скᲂто́мъ непре́зри сп҃се , но пре́жде кᲂнца̀ ѡ҆брати́въ спаси́ мѧ . Ѿ грѣ́хъ ника́кᲂже ѡ҆ста́юсѧ , и҆ ѡ҆браще́нїѧ никᲂли́же твᲂрю̀ . и҆ вᲂпїю̀ ѻ҆каѧ́нныи сᲂгрѣши́хъ ти гдⷭ҇и , и҆ ѡ҆жести́вшꙋю ᲂу҆милѝ дш҃ꙋ мᲂю̀ ще́дре .= мⷱ҇ꙋ . До́блїи гдⷭ҇ни страстᲂте́рпцы , крᲂвьны́ми стрꙋѧ́ми крⷭ҇ти́вшесѧ , втᲂры́ми скве́рнами не ѡ҆скверни́шасѧ . и҆ вѣнцено́сцы со а҆́нг҃лы ликᲂствꙋ́ютъ непреста́ннѡ . мⷱ҇ꙋ . Оу҆крѣ́пльшесѧ наде́жею бꙋ́дꙋщихъ бл҃гᲂче́стїѧ мч҃нцы , мꙋ́къ мно́жество лю́тᲂсть до́блїи претерпѣ́ша , и҆ скᲂнча́вшесѧ прⷭ҇то́лꙋ влⷣчню пред̾стᲂѧ́тъ непреста́ннѡ . боⷢ҇ . С=тᲂѧ́щимъ ᲂу҆тверже́нїе є҆сѝ , и҆ па́дшимъ и҆справле́нїе дв҃о . тѣ́мже па́дшаго мѧ̀ вᲂз̾ста́ви . да тѧ̀ сла́влю бл҃гᲂслᲂве́нꙋю и҆ ѡ҆бра́дᲂваннꙋю .

и҆́нъ , і҆рмо́съ . Цр҃ѧ нбⷭ҇нагѡ . Пред̾стᲂѧ́тели и҆ пѣвцы̀ не и҆зрече́нныѧ и҆ не и҆з̾глаго́ланныѧ тѝ сла́вы прїимѝ , тѧ̀ ны́нѣ мᲂлѧ́щїѧ хрⷭ҇тѐ ѡ҆́ мирѣ . двⷤа . Є҆ди́не бл҃же хрⷭ҇тѐ , ѡ҆ на́съ мᲂлѧ́щїѧсѧ ны́нѣ во́инства а҆́нг҃льскаѧ прїимѝ , тебѣ̀ вᲂспѣва́ющихъ во́ вѣки .= боⷢ҇ . Свѣ́тлѣйшими блиста́ньми бг҃ᲂмт҃и , вѣ́рнѡ пᲂю́щїѧ тѧ̀ , прᲂсвѣща́еши , и҆ превᲂзнᲂсѧ́щїѧ хрⷭ҇та̀ во всѧ̀ вѣ́ки . =та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Ꙗ҆́кᲂже дре́вле блꙋдни́цꙋ , с̾ пла́чемъ припа́дшꙋю к̾ тебѣ̀ сп҃се ѡ҆чи́стилъ є҆сѝ , и҆ ꙗ҆́кѡ ѡ҆правда̀ мытарѧ̀ сло́ве , то́чїю вᲂз̾дᲂхнꙋ́вша . и҆ ꙗ҆́кᲂже прїѧ́тъ манасі́ю , и҆ дв҃да пᲂми́лᲂва пᲂка́ѧвшасѧ , та́кѡ и҆ менѐ прїимѝ и҆ спаси́ мѧ чл҃кᲂлю́бче . Вᲂз̾дᲂхнѝ и҆ прᲂслези́сѧ дш҃е , и҆ пе́рвыхъ свᲂи́хъ сᲂгрѣше́нїи ѿстꙋпѝ . и҆ къ вѣ́дꙋщемꙋ та́йнаѧ твᲂѧ̀ ꙗ҆́вственнѡ припадѝ , и҆ вᲂзᲂпі́й те́плѣ , сᲂгрѣши́хъ ти гдⷭ҇и , да́рᲂмъ мѧ̀ ᲂу҆ще́дри , и҆мѣ́ѧи мно́жество щедро́тъ мнᲂгᲂмлⷭ҇тиве .= мⷱ҇ꙋ . Пᲂстрада́вше бг҃ᲂзра́чнїи страстᲂте́рпцы , на землѝ терпѣли́внѣйше , и҆ непᲂкᲂлеби́магѡ црⷭ҇твїѧ наслѣ́дїе прїѧ́ша , и҆ ра́йскїѧ пи́щи причаща́ютсѧ ра́дꙋющесѧ . тѣ́хъ мл҃твами хрⷭ҇тѐ бж҃е , твᲂеѧ̀ сла́вы прича́стники сᲂтвᲂрѝ и҆ на́съ . мⷱ҇ꙋ . Свѣти́ла вᲂсто́ка невече́рнѧгѡ , вᲂз̾люби́вше ꙗ҆ви́стесѧ , и҆ но́щь без̾бо́жїѧ ѿгна́сте премꙋ́дрїи , и҆ лꙋча́ми сщ҃е́нными всѣ́хъ ѡ҆зарѧ́ете , и҆́же свѣтᲂно́сныи ва́шъ страстᲂно́сцы пра́здникъ велича́ющихъ . боⷢ҇ . П=рᲂсвѣтѝ влⷣчце две́ри свѣ́та срⷣца мᲂегѡ̀ ѻ҆́чи мᲂлю́сѧ , и҆́хже ѡ҆мрачѝ грѣхо́внаѧ тма̀ глꙋбо́каѧ . и҆ пᲂкаѧ́нїѧ ми , зарю̀ низ̾пᲂслѝ и҆ ѻ҆гнѧ̀ вѣ́чнагѡ хᲂда́тайствᲂмъ ти чи́стаѧ свᲂбᲂдѝ .

и҆́нъ , і҆рмо́съ . Вᲂи́стинꙋ бцⷣꙋ . Ликѡ́мъ беспло́тныхъ , твᲂю̀ цр҃кᲂвь дᲂбрᲂдѣ́телемъ пᲂдража́ющꙋ ᲂу҆до́бнꙋ пᲂкажѝ , ѡ҆гражда́ѧ а҆́нг҃лы хрⷭ҇тѐ ста́до свᲂѐ . двⷤа . Дш҃а́мъ спасе́нїе ѿ́ бг҃а дарᲂва́тисѧ а҆́нг҃ли застꙋ́пницы мᲂли́тесѧ , прибѣга́ющимъ пᲂд̾ кро́въ ва́шъ всесла́внїи .= боⷢ҇ . Ꙗ҆́=кѡ ᲂу҆́тро сꙋ́щимъ во тмѣ̀ и҆ заблꙋ́ждьшимъ дв҃о , пра́веднᲂе сл҃нце на рꙋкꙋ̀ держа́щи хрⷭ҇та̀ вᲂсїѧ́ла є҆сѝ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , и҃ . Є҆гда̀ прїимꙋ̀ во ᲂу҆мѣ̀ мно́жество сᲂдѣ́ѧнныхъ ми ѕѡ́лъ , и҆ в̾ пᲂмышле́нїе прїидꙋ̀ стра́шнагѡ ѻ҆́нᲂгѡ и҆спыта́нїѧ , тре́петᲂмъ сᲂдержи́мъ к̾ тебѣ̀ прибѣга́ю чл҃кᲂлю́бцꙋ бг҃ꙋ . тѣ́мже непре́зри менѐ мᲂлю́ тѧ є҆ди́не без̾грѣ́шне , да́рꙋй ᲂу҆миле́нїе смире́ннѣй ми дш҃и пре́жде кᲂнца̀ , и҆ спаси́ мѧ .

сти́хъ : и҆спо́лнихᲂмсѧ за ᲂу҆́тра . Сле́зы ми да́ждь бж҃е ꙗ҆́кᲂже дре́вле женѣ̀ грѣ́шницѣ , и҆ спᲂдо́би мѧ ѡ҆мᲂчи́ти но́зѣ твᲂѝ , ꙗ҆́же мѧ ѿ пꙋтѝ льсти́вагѡ свᲂбо́ждьшаѧ . и҆ ми́ро бл҃гᲂꙋха́нїѧ тебѣ̀ принᲂси́ти прⷭ҇нѡ , житїѐ чи́сто , пᲂкаѧ́нїемъ ми стѧжа́нно , да ᲂу҆слы́шꙋ и҆ а҆́зъ бл҃га́гѡ твᲂегѡ̀ гла́са , вѣ́ра твᲂѧ̀ спасе́ тѧ и҆дѝ в̾ ми́ръ .

сти́хъ : и҆ бꙋ́ди свѣ́тлᲂсть . мⷱ҇ꙋ . Что̀ ва́съ нарече́мъ ст҃і́и . херꙋви́мъ ли , ꙗ҆́кѡ на ва́съ пᲂчи́лъ є҆́сть хрⷭ҇то́съ . серафи́мъ , ꙗ҆́кѡ непреста́ннѡ прᲂсла́висте є҆гѡ̀ . а҆́нг҃лы , тѣ́ла бо ѿврати́стесѧ . си́лы , дѣ́йствꙋете бо чꙋдеса̀ . мно́га ва́ша и҆мена̀ , и҆ бо́льша дарᲂва́нїѧ . мᲂли́те спасти́сѧ дш҃а́мъ на́шимъ .

сла́ва , и҆ ны́нѣ , боⷢ҇ . Нбⷭ҇наѧ пᲂю́тъ тѧ ѡ҆бра́дᲂваннаѧ мт҃и без̾невѣ́стнаѧ , и҆ мы̀ славᲂсло́вимъ , не и҆з̾слѣ́дᲂваннᲂе твᲂѐ ржⷭ҇тво̀ бцⷣе . мᲂлѝ спасти́сѧ дш҃а́мъ на́шимъ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ пᲂнедѣ́льникъ , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆сцѣлѝ хрⷭ҇тѐ стра́сти дш҃и мᲂеѧ̀ , ꙗ҆́кѡ є҆ди́нъ вра́чь дш҃а́мъ же и҆ тѣ́лᲂмъ . и҆ ᲂу҆миле́нїѧ стрꙋѧ́ми мѧ ѡ҆мы́въ всегѡ̀ ѡ҆чи́сти , ꙗ҆́кѡ милᲂсе́рдъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Престо́лъ честны́и ѡ҆б̾стᲂѧ́ще бг҃ᲂнача́лїѧ , престо́ли , херꙋви́ми , нача́ла , и҆ вла́сти , и҆ про́чаѧ беспло́тныхъ чинᲂнача́лїѧ сщ҃е́нно вᲂспѣва́ютъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Раз̾гᲂрѣ́нїемъ распала́ющесѧ , хрⷭ҇то́вᲂю любо́вїю , не ѻ҆пали́ми ѻ҆гне́мъ пребы́ша пᲂсредѝ страда́льцы , пᲂпали́ша те́рнїе ѕлᲂче́стїѧ бжⷭ҇твенᲂю бл҃гᲂда́тїю .

сла́ва . Ѽ трⷪ҇це прест҃а́ѧ є҆ди́нице нача́льнѣйшаѧ , и҆зба́ви рабы̀ свᲂѧ̀ ѻ҆гнѧ̀ негаси́маго , мᲂльба́ми бжⷭ҇твеныхъ беспло́тныхъ си́лъ , и҆ црⷭ҇твїю сѝ спᲂдо́би .

и҆ ны́нѣ . Сви́тᲂкъ тѧ̀ и҆нᲂгда̀ прᲂви́дѣ и҆са́їѧ бг҃ᲂбл҃гᲂда́тнаѧ , в̾ не́мже ѻ҆́ч҃имъ пе́рстᲂмъ написа́сѧ сло́во несказа́ннѡ , въ кни́гахъ живо́тныхъ написꙋ́ющее на́съ .

<< Previous

Contents

Next >>