Глас 8 суббота

Впѧто́къ , ве́черъ . на́ гдⷭ҇и вᲂзва́хъ , стихѣ́ры , ст҃ы́мъ мч҃нкѡмъ . гла́съ , и҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Оу҆ѧз̾влѧ́емь є҆́смь ѻ҆каѧ́нныи , стрѣла́ми всегда̀ вра́жїими , и҆ что̀ сᲂтвᲂри́ти недᲂꙋмѣ́юсѧ ; но и҆́же тᲂгѡ̀ стрѣ́лы сᲂкрꙋши́сте вы̀ , и҆́же крѣ́пкѡ страда́вшїи , и҆ тече́нїемъ крᲂвны́мъ тва́рь всю̀ ѡ҆сщ҃а́ете , менѐ недꙋ́гꙋющаго и҆сцѣли́те мч҃нцы бжⷭ҇твенїи , ꙗ҆́кѡ и҆мꙋ́ще дерзнᲂве́нїе ко́ гдⷭ҇ꙋ дᲂстᲂбл҃же́ннїи . =два́жды . Ве́сь недᲂꙋмѣ́нїемъ сᲂдержи́мъ є҆́смь , є҆гда̀ прїимꙋ̀ во ᲂу҆мѣ̀ то́й ча́съ стра́шныи , и҆спыта́нїѧ твᲂегѡ̀ сꙋдїѝ всѣ́хъ бг҃а , и҆ пла́чꙋ и҆ сѣ́тꙋю и҆ рыда́ю , ѕѡ́лъ мᲂи́хъ пᲂмина́ѧ бе́зднꙋ . тѣ́мже мѧ спасѝ чл҃кᲂлю́бче , твᲂи́хъ мч҃нкъ мᲂльба́ми , и҆ и҆зба́ви мѧ мꙋ́ки ꙗ҆́кѡ бл҃гᲂꙋтро́бенъ .= Ѡ҆ сᲂверша́ющихъ ѿ вѣ́ры , всесщ҃е́ннꙋю ва́шꙋ па́мѧть , мᲂли́тесѧ бг҃ꙋ мч҃нцы бжⷭ҇твенїи , и҆зба́вити и҆́хъ и҆скꙋше́нїи , и҆ ᲂу҆лꙋчи́ти селе́нїѧ нбⷭ҇наѧ , и҆́хже преста́ви , ꙗ҆́кѡ є҆ди́нъ бл҃гᲂда́тель и҆ чл҃кᲂлю́бецъ . и҆ и҆дѣ́же чи́ни всегда̀ патрїа́рхѡвъ веселѧ́тсѧ , дш҃а тѣ́хъ ᲂу҆чини́ти ꙗ҆́кѡ дᲂлгᲂтерпѣли́въ . Мч҃нцы гдⷭ҇ни , всѧ́ко мѣ́сто ѡ҆сщ҃а́ете , и҆ всѧ́къ недꙋ́гъ ᲂу҆врачꙋ́ете . и҆ нн҃ѣ мᲂли́те , и҆зба́витисѧ ѿ сѣте́й вра́жїихъ , дш҃а́мъ на́шимъ мо́лимсѧ . М=ч҃нцы гдⷭ҇ни , мᲂли́те бг҃а на́шегѡ , и҆ и҆спрᲂси́те дш҃а́мъ на́шимъ мно́жество щедро́тъ , и҆ ѡ҆чище́нїе ѿ мно́гихъ сᲂгрѣше́нїи , мо́лимъ вы̀ .

сла́ва , и҆ нн҃ѣ , боⷢ҇ . Цр҃ь нбⷭ҇ныи , за чл҃кᲂлю́бїе на землѝ ꙗ҆ви́сѧ , и҆ с̾ чл҃ки пᲂживѐ . ѿ дв҃ы бо чи́стыѧ пло́ть прїи́мъ , и҆з̾ неѧ̀ прᲂше́дъ сᲂвᲂспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́ма , а҆ несᲂста́вᲂма . тѣ́мже сᲂверше́на тᲂгѡ̀ бг҃а , и҆ сᲂверше́на чл҃ка , вᲂи́стинꙋ прᲂпᲂвѣ́дающе , и҆спᲂвѣ́даемъ хрⷭ҇та̀ бг҃а на́шегѡ . є҆го́же мᲂлѝ , мт҃и без̾невѣ́стнаѧ , пᲂми́лᲂватисѧ дш҃а́мъ на́шимъ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ . на стихо́внѣ , стⷯры , мч҃нчны . гла́съ , и҃ . Мч҃нцы твᲂѝ гдⷭ҇и , забы́вше жите́йскихъ , и҆ небре́гше ѡ҆ мꙋче́нїихъ , бꙋ́дꙋщїѧ ра́ди жи́зни , тᲂѧ̀ наслѣ́дницы ꙗ҆ви́шасѧ , тѣ́мъ и҆ со а҆́нг҃лы ра́дꙋютсѧ тѣ́хъ мл҃твами , да́рꙋй лю́демъ свᲂи́мъ ве́лїю млⷭ҇ть . А҆́ще что̀ дᲂбрᲂдѣѧ́нїе , и҆ а҆́ще что̀ пᲂхвала̀ пᲂдᲂба́етъ ст҃ы́мъ , мече́мъ бо преклᲂни́ша вы́и , за тебѐ прекло́ньшаго нб҃са̀ и҆ сᲂше́дша , прᲂлїѧ́ша кро́вь свᲂю̀ , тебѐ ра́ди и҆з̾лїѧ́вшаго себѐ , и҆ зра́къ раба̀ прїе́мша , смири́шасѧ да́же до сме́рти , нищетѣ̀ твᲂе́й пᲂдо́бѧщесѧ , и҆́хже мл҃твами по мно́жествꙋ щедро́тъ твᲂи́хъ , бж҃е пᲂми́лꙋй на́съ . пᲂко́инъ . Пла́чꙋсѧ и҆ рыда́ю , є҆гда̀ пᲂмышлѧ́ю сме́рть . ви́дѣхъ бо во́ грᲂбѣ лежа́щꙋю , є҆́же по ѻ҆́бразꙋ бж҃їю , со́зданнꙋю на́шꙋ красᲂтꙋ̀ , без̾ѡ҆бра́знꙋ и҆ без̾сла́внꙋ , не и҆мꙋ́щꙋ видѣ́нїѧ ни дᲂбро́ты . ѽ чꙋдесѐ . что́ се є҆́же ѡ҆ на́съ бы́сть та́инство ; ка́кѡ преда́хᲂмсѧ тлѣ́нїю ; ка́кѡ припрѧго́хᲂмсѧ сме́рти ; вᲂи́стинꙋ бж҃їимъ пᲂвелѣ́нїемъ , ꙗ҆́кᲂже є҆́сть пи́сано , пᲂдаю́щагѡ преста́вльшимсѧ пᲂко́й . сла́ва , и҆ ны́нѣ , боⷢ҇ . Влⷣчце прїимѝ мл҃твы ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ , вᲂскрⷭ҇нъ , настᲂѧ́щаго гла́са . є҆ктенїѧ̀ . =и҆ ѿпꙋ́стъ .

Впѧто́къ , на па́вечерницѣ . кано́нъ , прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Оу҆мертвѝ пло́ти мᲂеѧ̀ мꙋдрᲂва́нїе пречⷭ҇таѧ дв҃о , ꙗ҆́же жи́знь ро́ждьшаѧ , и҆ мꙋ́ки всѧ́кїѧ и҆зба́ви мѧ . Заре́ю пресвѣ́тлᲂю , ꙗ҆́же ѿ тебѐ дв҃о вᲂсїѧ́вшагѡ , дш҃и мᲂеѧ̀ зѣ́ницы прᲂсвѣтѝ , ꙗ҆́кѡ да сла́влю тѧ̀ .= сла́ва . Мᲂли́сѧ влⷣчце є҆ди́на ст҃а́ѧ бцⷣе , ꙗ҆́кѡ да ᲂу҆лꙋчꙋ̀ въ де́нь сꙋда̀ спасе́нїе , и҆ бжⷭ҇твенꙋю свѣ́тлᲂсть . и҆ ны́нѣ . П=речⷭ҇таѧ бцⷣе ᲂу҆ти́ши бᲂлѣ́зни срⷣца мᲂегѡ̀ , ꙗ҆́же хрⷭ҇та̀ небᲂлѣ́знено па́че ᲂу҆ма̀ и҆ сло́ва ро́ждьшаѧ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . И҆зба́ви мѧ мл҃твами сѝ пречⷭ҇таѧ вра́жїихъ стрѣ́лъ , и҆ ѿ пᲂмышле́нїи нахᲂдѧ́щихъ пᲂщадѝ срⷣце мᲂѐ . И҆сцѣлѝ пренепᲂро́чнаѧ дш҃и мᲂеѧ̀ ра́ны , мт҃и бж҃їѧ ᲂу҆ти́ши твᲂи́ми мл҃твами , и҆ серде́чнᲂе смꙋще́нїе .= сла́ва . Оу҆крᲂтѝ не ᲂу҆ста́внᲂе пᲂмышле́нїи мᲂи́хъ , чⷭ҇таѧ влⷣчце , и҆ ѿи҆мѝ ѿ дш҃и всѧ́кꙋ печа́ль , ꙗ҆́же ра́дᲂсть ро́ждьшаѧ . и҆ ны́нѣ . Р=а́дꙋисѧ спасе́нїе притека́ющимъ ти дв҃це мт҃и хрⷭ҇то́ва , ра́дꙋисѧ а҆пⷭ҇лѡмъ и҆ мч҃нкѡмъ пᲂхвала̀ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Дш҃и мᲂеѧ̀ ꙗ҆́звы сло́во бж҃їе и҆сцѣлѝ , ᲂу҆ѧзви́выисѧ менѐ ра́ди ꙗ҆́кѡ чл҃кᲂлю́бецъ , и҆ ᲂу҆ма̀ мᲂегѡ̀ тмꙋ̀ прᲂсвѣтѝ . Дрема́нїемъ лѣ́нᲂсти мᲂеѧ̀ , со́нъ грѣхо́вныи пᲂсти́же дв҃о , бо́дренᲂю сѝ мл҃твᲂю , вᲂз̾дви́гни мѧ к̾ пᲂкаѧ́нїю .= сла́ва . Ꙗ҆́же ѿ и҆сто́чника и҆стᲂчи́вшаѧ во́дꙋ ѡ҆ставле́нїѧ , пренепᲂро́чнаѧ срⷣце мᲂѐ напо́й , и҆з̾со́хшее всѧ́кими престꙋпле́ньми . и҆ ны́нѣ . П=рест҃а́ѧ бг҃ᲂневѣ́сто , влⷣчце ми́рꙋ , ты́ мѧ спасѝ бѣ́дъ премѣнѧ́ющи , и҆ страсте́й мᲂлвꙋ̀ ѿгᲂнѧ́щи .

пѣ́снь , є҃ . і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . При́зри пречⷭ҇таѧ и҆ ᲂу҆слы́ши гла́съ мо́й , и҆ всѧ̀ ѡ҆чи́сти без̾зако́нїѧ мᲂѧ̀ влⷣчце . Сл҃нце незахᲂди́мᲂе ро́ждьшаѧ бцⷣе , всего́ мѧ прᲂсвѣтѝ ѡ҆мраче́ннаго страстьмѝ , да сла́влю тѧ̀ и҆ хвалю̀ пренепᲂро́чнаѧ .= сла́ва . Оу҆ще́дри прест҃а́ѧ ѻ҆трᲂкᲂви́це дш҃ꙋ мᲂю̀ , и҆ и҆зба́ви сꙋда̀ , и҆ вѣ́чнагѡ мꙋче́нїѧ . и҆ ны́нѣ . Н=едꙋ́гᲂвавшꙋю дш҃ꙋ мᲂю̀ и҆сцѣлѝ , ро́ждьшаѧ всѣ́хъ взе́млющаго недꙋ́ги , прест҃а́ѧ влⷣчце .

пѣ́снь , ѕ҃ . і҆рмо́съ . Бе́здна грѣхо́внаѧ и҆ прегрѣше́нїи бꙋ́рѧ мѧ смꙋща́етъ , и҆ во глꙋбинꙋ̀ нꙋ́жнꙋю рѣ́етъ ѿча́ѧнїѧ , но са́мъ крѣ́пкꙋю рꙋ́кꙋ ми прᲂстрѝ ꙗ҆́кѡ петро́ви , и҆ ѿ тлѝ бж҃е мо́й вᲂз̾веди́ мѧ . Оу҆мертвѝ бцⷣе пло́ти мᲂеѧ̀ , без̾чи́ннаѧ двиза́нїѧ , ꙗ҆́же ᲂу҆мерщве́ныѧ ѕло́бᲂю , ѡ҆живи́вшаѧ свᲂи́мъ живы́мъ ржⷭ҇тво́мъ , ꙗ҆́кѡ да сла́влю тѧ̀ , ꙗ҆́кѡ винꙋ̀ чл҃ческаго ѡ҆бнᲂвле́нїѧ . Бе́зднꙋ щедро́тъ ро́ждьши бцⷣе дв҃о , ѿ ско́рбныхъ житїѧ̀ дш҃ꙋ мᲂю̀ спасѝ , и҆ ра́дᲂсти дх҃о́вныѧ две́ри ѿве́рзими , на тѧ́ бо є҆ди́нꙋ наде́жꙋ вᲂз̾лᲂжи́хъ .= сла́ва . Да твᲂѧ̀ ра́дᲂстнѡ вᲂспᲂю̀ вели́чїѧ дв҃о пречⷭ҇таѧ , и҆ вели́кꙋю бл҃гᲂда́ть чꙋде́съ . без̾мѣ́стнаѧ пᲂмышле́нїѧ тᲂмѧ́щаѧ мѧ всегда̀ , мᲂли́твами свᲂи́ми премѣнѝ . и҆ ны́нѣ . Р=ᲂдила̀ є҆сѝ па́че є҆стества̀ , и҆́же нѣ́дръ ѻ҆те́ческихъ неразлꙋ́чнагѡ , и҆ тᲂбо́ю дв҃о к̾ чл҃кѡмъ бесѣ́дᲂвавша . но ꙗ҆́кѡ пᲂхвала̀ на́мъ всѣ́мъ , и҆ ᲂу҆тверже́нїе є҆сѝ бцⷣе , къ тебѣ̀ прибѣга́ющїѧ ᲂу҆ще́дри .

Гдⷭ҇и пᲂми́лꙋи , гⷤ . сла́ва , и҆ ны́нѣ . сѣда́ленъ , гла́съ , и҃ . Сло́во ѻ҆́ч҃ее на́ землю сни́де , и҆ а҆́нг҃лъ свѣ́телъ бцⷣѣ гл҃аше , ра́дꙋисѧ блгⷭ҇ве́наѧ , ꙗ҆́же черто́гъ є҆ди́на сᲂхра́ньшаѧ , зача́тїе прїе́мши превѣ́чнагѡ бг҃а и҆ гдⷭ҇а , да ѿ пре́лести ꙗ҆́кѡ бг҃ъ спасе́тъ ро́дъ чл҃ческїи .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Оу҆вы̀ мнѣ̀ ка́кѡ и҆збѣ́гнꙋ мꙋ́къ ждꙋ́щихъ мѧ , ѕлѣ̀ пᲂжи́въ здѣ̀ , ка́кѡ сꙋдїѝ стра́шнᲂмꙋ ꙗ҆влю́сѧ ѻ҆каѧ́нныи , бг҃ᲂрᲂди́тельнице влⷣчце , пᲂмо́щница тᲂгда̀ бꙋ́ди ми .= Оу҆гасѝ пла́мень страсте́й мᲂи́хъ , и҆ ᲂу҆ти́ши бꙋ́рю срⷣца мᲂегѡ̀ бг҃ᲂмт҃и чⷭ҇таѧ , и҆ и҆зба́ви мѧ пречⷭ҇таѧ , бѣсо́въ тᲂмле́нїѧ и҆ ѻ҆гнѧ̀ вѣ́чнагѡ . сла́ва . Ви́ждь ско́рбь мᲂю̀ дв҃о , є҆́же наведѐ мно́жество ѕѡ́лъ мᲂи́хъ . и҆ пре́же ѿше́ствїѧ пᲂко́й ми пᲂда́ждь , мт҃рьними сѝ мл҃твами , ᲂу҆мᲂлѧ́щи сн҃а свᲂегѡ̀ . и҆ ны́нѣ . П=ла́мень страсте́й срⷣца мᲂегѡ̀ , пᲂгасѝ рᲂсо́ю твᲂе́ю дв҃о , и҆ ѻ҆гнѧ̀ стра́шнагѡ и҆схи́ти ѻ҆трᲂкᲂви́це , и҆ вѣ́чнагѡ сꙋда̀ , и҆ бѣсо́вскагѡ тᲂмле́нїѧ .

пѣ́снь , и҃ . і҆рмо́съ . Бл҃гᲂслᲂви́те дѣ́ти , трⷪ҇цы равнᲂчи́сленнїи , сᲂдѣ́телѧ ѻ҆ц҃а бг҃а . по́йте сᲂше́дшагѡ сло́ва , и҆ ѻ҆́гнь въ ро́сꙋ претво́ршагѡ . и҆ превᲂзнᲂси́те всѣ́мъ живо́тъ даю́щагѡ , дх҃а прест҃а́гѡ во́ вѣки всѧ̀ .= Оу҆мертвѝ дв҃це , всѧ̀ тѣле́снаѧ на́ша двиза́нїѧ . ꙗ҆́же ме́ртва ѕмі́ѧ , живᲂно́снымъ ржⷭ҇тво́мъ си сᲂдѣ́лавши , и҆ жи́знь нестарѣ́ющꙋю ᲂу҆лꙋчи́ти на́мъ пᲂмᲂли́сѧ , ꙗ҆́кѡ да тѧ̀ пᲂе́мъ во́ вѣки . Тѧ̀ бг҃ᲂрᲂди́тельнице на́ пᲂмᲂщь всегда̀ призыва́ю , не пᲂсрамѝ менѐ стѧжа́вшаго стꙋ́дна дѣ́ла , но ᲂу҆ще́дри мѧ пречⷭ҇таѧ , и҆ пла́мене и҆схи́ти , и҆ вѣ́чныхъ и҆зба́ви мꙋче́нїи . сла́ва . Ѡ҆бра́дᲂваннаѧ пᲂмо́щница ми ꙗ҆ви́сѧ , во ѡ҆бстᲂѧ́нїи ѕѡ́лъ , и҆збавлѧ́ющи ѿ нахᲂдѧ́щихъ ми бѣсо́вскихъ навѣ́тъ , ꙗ҆́кѡ да ᲂу҆блажа́ю тѧ̀ всегда̀ бцⷣе пред̾ста́тельнице всѣ́хъ . и҆ ны́нѣ . П=рест҃а́ѧ ѻ҆трᲂкᲂви́це а҆пⷭ҇лѡмъ пᲂхвало̀ , мч҃нкѡмъ сла́во , сла́вы вѣ́чныѧ прича́стника мѧ сᲂтвᲂрѝ , взыва́юща , бл҃гᲂслᲂви́те дх҃а прест҃а́гѡ во́ вѣки всѧ̀ .

пѣ́снь , ѳ҃ . і҆рмо́съ . Оу҆ста́въ пре́йде є҆стества̀ , сᲂдѣ́телѧ заче́нши тва́ри , и҆ две́рь спасе́нїѧ ми́рᲂви бы́сть , тѣ́мъ тѧ̀ бцⷣе непреста́ннѡ велича́емъ . Свѣ́тᲂмъ тѝ невече́рнимъ две́ри свѣ́та , дш҃и мᲂеѧ̀ тмꙋ̀ ѿженѝ лю́тꙋю , и҆ пᲂкаѧ́нїѧ мѝ пꙋтѝ свѣтᲂза́рныѧ пᲂкажѝ , ꙗ҆́кѡ да ше́ствꙋѧ в̾ ни́хъ , мра́ка ѿбѣ́гнꙋ грѣхо́внагѡ , и҆ непреста́ннѡ велича́ю тѧ . Ѡ҆чи́сти рабы̀ свᲂѧ̀ бла́же , и҆ прегрѣше́нїемъ прᲂще́нїе да́рꙋй , и҆ вѣ́чнꙋющаго пла́мене и҆зба́ви на́съ , и҆ прича́стники сᲂдѣ́лай , твᲂегѡ̀ црⷭ҇твїѧ сло́во бж҃їе , и҆́бо за є҆́же хᲂтѧ̀ спастѝ ро́дъ чл҃чь , крⷭ҇тъ претерпѣ́лъ є҆сѝ .= сла́ва . Оу҆до́бь бцⷣе преити́ ми житїѧ̀ пᲂда́ждь прехᲂжде́нїе , и҆ напа́стей вᲂста́нїѧ и҆ страсте́й , ꙗ҆́кѡ бл҃га̀ ᲂу҆крᲂтѝ , и҆ наста́ви къ дᲂбрᲂдѣ́тели нбⷭ҇наго црⷭ҇твїѧ , и҆ пᲂко́ѧ бжⷭ҇твена , ꙗ҆́кѡ да спаса́емь прᲂславлѧ́ю тѧ̀ . и҆ ны́нѣ . Недꙋ́гᲂвавшꙋю дш҃ꙋ мᲂю̀ стра́стїю лю́тᲂю , ꙗ҆́же ро́ждьши бг҃а пребл҃га́го ꙗ҆́кѡ млⷭ҇тива и҆сцѣлѝ , и҆ и҆зба́ви при́снѡ ѡ҆скᲂрблѧ́ющихъ мѧ пречⷭ҇таѧ , и҆ прибыва́ющихъ ѕлᲂлю́тыхъ , ꙗ҆́кѡ да спаса́емъ , тѧ̀ ᲂу҆се́рднѡ велича́ю вᲂз̾вели́чившꙋю ро́дъ на́шъ . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ сꙋбо́тꙋ , на ᲂу҆́трени . по а҃ , стихᲂло́гїи . сѣда́льны , мч҃нчны . гла́съ , и҃ . Свѣ́тᲂмъ нбⷭ҇нымъ , прᲂсвѣща́етсѧ дне́сь сі́и хра́мъ , в̾ не́мъ бо во́инства а҆́нг҃льскаѧ ра́дꙋютсѧ , съ ни́ми же и҆ чл҃честїи ли́цы веселѧ́тсѧ , ѡ҆ па́мѧти страстᲂте́рпецъ . тѣ́хъ мл҃твами низ̾пᲂслѝ ми́рꙋ свᲂемꙋ̀ смире́нїе хрⷭ҇тѐ , и҆ ве́лїю млⷭ҇ть .= сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . Свѣти́ла мы́сленаѧ ꙗ҆ви́стесѧ ст҃і́и мч҃нцы , мглꙋ́ бо пре́лести ᲂу҆праздни́сте вѣ́рᲂю , и҆ дш҃е́вныѧ свѣщѝ ва́ша прᲂсвѣти́сте , и҆ с̾ женихо́мъ со сла́вᲂю внидо́сте въ нбⷭ҇ныи черто́гъ . и҆ ны́нѣ мо́лимъ вы̀ , мᲂли́тесѧ спасти́сѧ дш҃а́мъ на́шимъ . =сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи смр҃тїю сме́рть , и҆ вᲂскрⷭ҇нїе ꙗ҆вле́и ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю , ꙗ҆вѝ чл҃кᲂлю́бїе свᲂѐ ми́лᲂстиве , прїимѝ ро́ждьшꙋю тѧ̀ бцⷣꙋ мᲂлѧ́щꙋюсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ .

по в҃ , стихᲂло́гїи , сѣда́льны , мч҃нчны . гла́съ , и҃ . Вселе́ннѣй свѣти́льницы прⷭ҇нѡ сїѧ́юще , пᲂказа́стесѧ вѣ́рᲂю мч҃нческᲂю , всю̀ вᲂз̾лᲂжи́сте наде́ждꙋ ко́ гдⷭ҇ꙋ , и҆ ᲂу҆́мнымъ ма́слᲂмъ дх҃а ст҃і́и , дш҃е́вныѧ свѣщѝ ва́ша ᲂу҆ѧсни́сте . тѣ́мже и҆ ча́ши дх҃о́вныѧ цр҃кви ꙗ҆ви́стесѧ , и҆з̾лива́юще кро́ви ꙗ҆́кѡ во́ды , страстᲂте́рпцы прехва́льнїи , мᲂли́те хрⷭ҇та̀ бг҃а , грѣхо́въ ѡ҆ставле́нїе дарᲂва́ти чтꙋ́щимъ любо́вїю ст҃ꙋ́ю па́мѧть ва́шꙋ .= сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆зра́илевъ . Вᲂз̾держа́нїемъ страсте́й ѻ҆гнепа́льныѧ , ᲂу҆мертви́ша зра́ки и҆ двиза́нїѧ , хрⷭ҇то́вы мч҃нцы , и҆ прїѧ́ша бл҃гᲂда́ть , недꙋ́ги ѿгᲂнѧ́ти бᲂлѧ́щимъ . и҆ жи́ви сꙋ́ще , и҆ по сме́рти чꙋдᲂдѣ́йствᲂвати . вᲂи́стинꙋ чꙋ́до пресла́вно , ꙗ҆́кѡ ко́сти на́ги и҆стᲂча́ютъ и҆сцѣле́нїѧ . сла́ва є҆ди́нᲂмꙋ премꙋ́дрᲂмꙋ зижди́телю бг҃ꙋ . сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда в̾ ро́дъ . И҆́же глꙋбина́ми мꙋ́дрᲂсти , чл҃кᲂлю́бнѣ всѧ̀ стро́ѧ , и҆ є҆́же на по́льзꙋ всѣ́мъ пᲂдава́ѧ є҆ди́не сᲂдѣ́телю , пᲂко́й гдⷭ҇и дꙋ́ши ра́бъ свᲂи́хъ . на тѧ́ бо ᲂу҆пᲂва́нїе вᲂз̾лᲂжи́ша , твᲂрца̀ и҆ зижди́телѧ и҆ бг҃а на́шегѡ . =сла́ва , и҆ ны́нѣ , боⷢ҇ . Тебѐ гра́дъ и҆ приста́нише и҆́мамы , и҆ мᲂли́твеницꙋ бл҃гᲂпрїѧ́тнꙋ , к̾ ро́ждьшемꙋсѧ и҆з̾ тебѐ бг҃ꙋ , бцⷣе без̾невѣ́стнаѧ вѣ́рнымъ спасе́нїе . та́же , ѱало́мъ , н҃ . пᲂми́лꙋй мѧ бж҃е . і҆єре́й , вᲂз̾глаⷭ҇ . ми́лᲂстїю и҆ щедро́тами .

Кано́нъ , ст҃ы́мъ мч҃нкѡмъ , и҆ ст҃лемъ , и҆ прпⷣбнымъ , и҆ ᲂу҆со́пшимъ . є҆мꙋ́же краегране́сїе си́це . ѡ҆смᲂгла́сника но́вагѡ бжⷭ҇твеныи кᲂне́цъ . трꙋ́дъ же і҆ѡ́сифᲂвъ . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ . запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Честно́е би́серїе ꙗ҆ви́стесѧ , вѣне́цъ прᲂсвѣща́юще честны́ѧ цр҃кве , стрⷭ҇тᲂте́рпцы хрⷭ҇то́вы до́блїи . запѣ́въ : ст҃і́и всѝ мᲂли́те бг҃а ѡ҆ на́съ . Ѻ҆блиста́ша ᲂу҆че́ньми , и҆ дᲂбрᲂдѣ́телей бжⷭ҇твеными свѣтлᲂстьмѝ хрⷭ҇то́ви ст҃лїе , и҆ тѣ́ми вѣ́рныхъ срⷣца прᲂсвѣти́ша . Тебѐ и҆́же в̾ прᲂро́цѣхъ , и҆ въ прпⷣбныхъ ᲂу҆дивлѧ́емагѡ мо́лимъ сло́ве , тѣ́хъ мᲂльба́ми спасѝ на́съ .= сла́ва . Є҆гда̀ сꙋдїѐ пра́ведныи гдⷭ҇и , прїи́деши твᲂри́ти сꙋ́дъ пра́веднѣйшїи , неѡ҆сꙋжде́нне є҆ди́не , ѡ҆сꙋже́нїѧ и҆зба́ви рабы̀ свᲂѧ̀ . боⷢ҇ . Б=г҃а ро́ждьшꙋю тѧ ᲂу҆вѣ́дѣ же́нскїи ли́къ , тебѐ вᲂслѣ́дъ до́блествᲂвавъ тᲂмꙋ̀ приведе́сѧ .

Дрꙋгі́и кано́нъ ᲂу҆со́пшимъ , пᲂе́мъ є҆гѡ̀ нарѧдꙋ̀ , и҆дѣ́же нѣ́сть минѣ́ѧ . і҆рмо́съ . Во́дꙋ прᲂше́дъ . запѣ́въ : ди́венъ бг҃ъ во ст҃ы́хъ свᲂи́хъ бг҃ъ і҆и҃левъ . Сме́ртїю сме́рти хрⷭ҇то́вѣ , и҆ страстьмѝ стра́сти пᲂдража́юще чⷭ҇тні́и , мч҃нцы всѝ , бжⷭ҇твеныѧ и҆ бл҃же́нныѧ жи́зни пᲂлꙋчи́ша .= запѣ́въ : пᲂко́й гдⷭ҇и дш҃и ᲂу҆со́пшихъ ра́бъ свᲂи́хъ . Ю҆́нᲂсти сᲂгрѣше́нїѧ презира́ѧ , и҆ грѣхѝ превᲂдѧ̀ хрⷭ҇тѐ сп҃се , пре́же ᲂу҆со́пшихъ ра́бъ твᲂи́хъ со и҆збра́нными твᲂи́ми причтѝ . сла́ва . Ю҆́же пᲂлꙋчи́ша сла́вꙋ же и҆ ра́дᲂсть , и҆́же бл҃же́ннᲂе стѧжа́вше пребыва́нїе . пᲂда́ждь бᲂга́тнѡ свᲂи́мъ рабо́мъ , и҆́хже прїѧ́тъ мнᲂгᲂмлⷭ҇тиве . и҆ ны́нѣ . З=ачала̀ є҆сѝ сло́во ѻ҆́ч҃ее , пло́ти сᲂє҆ди́ньшасѧ по сᲂста́вꙋ , ꙗ҆́же и҆з̾ тебѐ всенепᲂро́чнаѧ ѻ҆трᲂкᲂви́це , и҆́же а҆́да бжⷭ҇твенᲂю си́лᲂю ᲂу҆праздни́вшаго .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . мⷱ҇ꙋ . Ме́рзскїѧ же́ртвы , страда́льцы крѣ́пкимъ нра́вᲂмъ ѿри́нꙋвше . же́ртва честнѣ́йшаѧ сло́вꙋ закла́вшемꙋсѧ бы́ша . Ѡ҆бнᲂвлѧ́юще слᲂвесы̀ ст҃лїе , ѡ҆бѣтша́вшаѧ всѧ́ческими страстьмѝ , ѡ҆бнᲂви́вшагѡ ми́ръ бжⷭ҇твенїи ᲂу҆ченицы̀ ꙗ҆ви́стесѧ . Ꙗ҆́же прⷪ҇ркѡмъ пре́жде ꙗ҆́вьственно , да́ннаѧ бл҃гᲂда́ть бжⷭ҇твенагѡ дх҃а . по́стники в̾ пᲂслѣ́днѧѧ бжⷭ҇твеными дарᲂва́нїи и҆спо́лни .= сла́ва . Ли́кѡмъ ст҃ы́хъ сᲂчета́й бж҃е , и҆́же вѣ́рнѡ ѿ житїѧ̀ преше́дшаѧ , и҆ раѧ̀ жи́телѧ сᲂтвᲂрѝ , за не и҆з̾рече́ннꙋю ми́лᲂсть . боⷢ҇ . И҆́=же нигдѣ́же вмѣща́емыи і҆с҃ъ , нетѣ́сно в̾мѣсти́тельнѣ въ твᲂю̀ всели́сѧ ѡ҆сщ҃е́ннꙋю ᲂу҆тро́бꙋ , пречⷭ҇таѧ дв҃о всепѣ́таѧ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . ди́венъ бг҃ъ . Ѡ҆чи́стившесѧ дре́внѧгѡ прарᲂди́тельнагѡ паде́нїѧ , ра́ди креще́нїѧ пᲂрᲂжде́нїемъ , стрꙋѧ́ми же кро́вїи свᲂи́хъ ѡ҆крᲂпи́вшесѧ , со хрⷭ҇то́мъ бл҃же́ннїи црⷭ҇твꙋете . пᲂко́й гдⷭ҇и . И҆́же ме́ртвъ во́лею пᲂлᲂжи́сѧ во́ грᲂбѣ , живꙋ́щїѧ во грᲂбѣ́хъ вᲂз̾вᲂдѧ̀ сп҃се , бл҃гᲂвᲂлѝ и҆́хже ѿ на́съ прїѧ́тъ , в̾ се́лѣхъ ст҃ы́хъ твᲂи́хъ си́мъ вᲂдвᲂрѧ́тисѧ . сла́ва . Млрⷭ҇дїемъ бжⷭ҇твенымъ влⷣко , сᲂє҆сте́ственѣ разꙋмѣва́емыѧ тѝ бл҃гᲂсти , ᲂу҆мᲂле́нъ быва́ѧ , сᲂгрѣше́нїемъ разрѣше́нїе пᲂда́въ рабо́мъ свᲂи́мъ , и҆ ᲂу҆ себѐ и҆́хъ ᲂу҆пᲂко́й . и҆ ны́нѣ . Вᲂпло́щьсѧ и҆́з̾ чрева твᲂегѡ̀ , и҆ бы́въ чл҃къ , и҆́же и҆зрѧ́днѣ сы́и є҆ди́нъ чл҃кᲂлю́бецъ , спаса́етъ чл҃ка ѿ вра́тъ сме́ртныхъ , бг҃ᲂмт҃и пречⷭ҇таѧ є҆ди́на препѣ́таѧ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . мⷱ҇ꙋ . Преше́дше по́прище мꙋче́нїѧ , теплᲂто́ю дх҃о́внᲂю , страда́льцы бг҃ᲂбл҃же́ннїи , веще́ственнꙋю ле́сть пᲂпали́сте . Прпⷣбныѧ твᲂѧ̀ гдⷭ҇и , и҆ ст҃ли свѣ́тлѡ прᲂсла́вилъ є҆сѝ . тѣ́хъ бжⷭ҇твеными мᲂльба́ми , прича́стника мѧ сла́вы твᲂеѧ̀ сᲂтвᲂрѝ . И҆́же бжⷭ҇твенагѡ дх҃а в̾дх҃нᲂве́нїе прᲂро́ки прᲂсвѣти́вше , жена́мъ крѣ́пᲂсть дарᲂва̀ , вра́жїѧ пᲂгꙋблѧ́ти шата́нїѧ .= сла́ва . Сликᲂвствᲂва́ти спᲂдо́би со всѣ́ми ст҃ы́ми , ꙗ҆́же преста́вилъ є҆сѝ пребл҃гі́и рабы̀ свᲂѧ̀ , в̾ се́лѣхъ ст҃ы́хъ , мо́лимъ тѧ̀ . боⷢ҇ . З=ако́на бжⷭ҇твенаго пᲂда́телѧ , є҆сте́ственыхъ зако́нъ крᲂмѣ̀ рᲂдила̀ є҆сѝ , ѡ҆бнᲂвлѧ́ющаго бг҃ᲂневѣ́стнаѧ , чл҃ческᲂе є҆стество̀ пᲂпо́лзшеесѧ .

и҆́нъ , і҆рмо́съ . Ты́ ми хрⷭ҇тѐ гдⷭ҇ь . ди́венъ бг҃ъ . Да твᲂю̀ влⷣко сла́вꙋ ᲂу҆́зрѧтъ , и҆ лꙋчѝ твᲂеѧ̀ свѣтᲂда́тельныѧ на́ нб҃сѣхъ пᲂлꙋча́тъ свѣ́тлᲂсть , всѧ́къ ви́дъ мꙋче́нїѧ нᲂсѧ́ще претерпѣ́ша , мч҃нцы бжⷭ҇твенїи тебѣ̀ хрⷭ҇тѐ пᲂю́ще , си́лѣ твᲂе́й сла́ва чл҃кᲂлю́бче . пᲂко́й гдⷭ҇и . Мно́ги ѻ҆би́тели ᲂу҆ тебѐ сп҃се сꙋ́ть , по дᲂстᲂѧ́нїю всѣ́мъ раздѣлѧ́еми , по мѣ́рѣ дᲂбрᲂдѣ́телей . тѣ́хъ ᲂу҆́бѡ ще́дре и҆спо́лнити си́хъ спᲂдо́би , вѣ́рнѡ преста́вльшїѧсѧ , бл҃гᲂче́стно тѝ вᲂпїю́щихъ , си́лѣ твᲂе́й сла́ва чл҃кᲂлю́бче . сла́ва . Ра́венъ на́мъ чл҃къ ꙗ҆ви́лсѧ є҆сѝ без̾сме́ртне , всѣ́мъ ра́внꙋ сме́рть претерпѣ́лъ є҆сѝ , и҆ жи́зни пᲂказа́лъ є҆сѝ пꙋ́ть . є҆ѧ́же преста́вльшїѧсѧ спᲂдо́би , ꙗ҆́кѡ чл҃кᲂлю́бецъ , прᲂще́нїе сᲂгрѣше́нїемъ ꙗ҆́кѡ влⷣка пᲂдава́ѧ , и҆ свѣ́та прича́стїе да́рꙋѧ . и҆ ны́нѣ . Ты̀ вѣ́рнымъ пᲂхвала̀ є҆сѝ без̾невѣ́стнаѧ , ты̀ пред̾ста́тельница , ты̀ прибѣ́жище хрⷭ҇тїа́нѡмъ , стѣна̀ и҆ приста́нище . къ сн҃ꙋ бо свᲂемꙋ̀ мᲂльбы̀ но́сиши всенепᲂро́чнаѧ , и҆ спаса́еши ѿ бѣ́дъ , и҆́же вѣ́рᲂю и҆ любо́вїю бцⷣꙋ чⷭ҇тꙋю тѧ̀ вѣ́дꙋщїѧ .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . мⷱ҇ꙋ . Претерпѣ́ша ꙗ҆́звы плᲂтьскі́ѧ бжⷭ҇твенїи мч҃нцы , сегѡ̀ ра́ди ꙗ҆́звы на́ша при́снѡ и҆сцѣлѧ́ютъ , ᲂу҆ѧзвлѧ́юще бѣ́сы . Ст҃і́и бж҃їи ст҃ли мᲂли́те , со всѣ́ми прпⷣбными хрⷭ҇та̀ , сᲂгрѣше́нїемъ ѡ҆ставле́нїе дарᲂва́ти на́мъ . Пло́ть ра́нами и҆ пᲂсто́мъ и҆з̾нꙋри́вше , жены̀ великᲂбг҃ᲂлю́бныѧ , въ наде́жи бл҃ги́хъ спᲂдо́бишасѧ .= сла́ва . Сме́рть ᲂу҆би́въ , без̾сме́ртїемъ свᲂи́мъ без̾сме́ртне , ᲂу҆ме́ршихъ ѡ҆ наде́жи жи́зни , вѣ́рныѧ тѝ рабы̀ ꙗ҆́кѡ чл҃кᲂлю́бецъ ᲂу҆пᲂко́й . боⷢ҇ . О=у҆праздни́ла є҆сѝ чи́стаѧ пра́ѻ҆ц҃емъ ѡ҆сꙋжде́нїе , и҆́же всѣ́хъ ѡ҆правда́вшаго пло́тїю ро́ждьши , і҆с҃а є҆ди́наго гдⷭ҇а .

и҆́нъ , і҆рмо́съ . Вскꙋ́ю мѧ ѿри́нꙋ . ди́венъ бг҃ъ . Несказа́нныѧ тѝ сла́вы , и҆ па́че сло́ва твᲂегѡ̀ бл҃же́нства , в̾ селе́нїихъ пра́ведныхъ , и҆дѣ́же гла́съ красе́нъ пра́зднꙋющихъ , преста́вленыѧ к̾ без̾сме́ртнѣй жи́зни ᲂу҆ще́дривъ , спᲂдо́би є҆ди́не чл҃кᲂлю́бче . пᲂко́й гдⷭ҇и . И҆дѣ́же чи́ни а҆́нг҃льстїи , и҆ и҆дѣ́же пра́ведныхъ сᲂбо́ри ра́дꙋютсѧ , а҆враа́мꙋ в̾ нѣ́дрѣхъ вселѝ сп҃се рабы̀ свᲂѧ̀ , со дерзнᲂве́нїемъ стра́шнᲂмꙋ и҆ бжⷭ҇твенᲂмꙋ престо́лꙋ , пред̾ста́ти бл҃гᲂвᲂлѝ милᲂсе́рде . сла́ва . Ѡ҆чище́нїе на́мъ ꙗ҆ви́лсѧ є҆сѝ пра́вда же и҆ и҆збавле́нїе , и҆ ꙗ҆́звᲂю твᲂе́ю на́ша не́мᲂщи ᲂу҆врачева́лъ є҆сѝ , са́мъ ᲂу҆́бѡ ще́дре ꙗ҆́кѡ бл҃гъ , преста́вльшїѧсѧ в̾ пи́щи ра́йстѣй ᲂу҆чинѝ . и҆ нн҃ѣ . Ми́лᲂстивно млрⷭ҇де , чл҃чества мѣ́рꙋ вᲂспрїѧ́лъ є҆сѝ , ю҆́же бжⷭ҇твеныѧ сла́вы превы́шшаѧ ᲂу҆краша́ѧ вᲂз̾выше́ньми , ѿ дв҃ческихъ лᲂже́снъ пло́ть прїе́мъ ѡ҆дш҃евле́нꙋ и҆ слᲂве́снꙋ , є҆ю́же сме́рть раз̾рꙋши́лъ є҆сѝ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . мⷱ҇ꙋ . Гнᲂе́нїи ва́шими чⷭ҇тны́ми , дш҃а́мъ и҆сцѣлѧ́ете недꙋ́ги ст҃і́и мч҃нцы , и҆ сᲂгни́тїѧ тѣле́съ при́снѡ ѿє҆́млете , ᲂу҆ѧзвлѧ́юще лꙋка́выхъ бѣсо́въ мно́жество . Прпⷣбныхъ ли́къ , пррⷪ҇къ же сᲂсло́вїе , и҆ же́нъ сщ҃е́нныхъ бжⷭ҇твенаѧ чета̀ , хрⷭ҇та̀ вᲂз̾люби́вше , тве́рдо пᲂстрада́ша , и҆ нбⷭ҇наѧ вᲂз̾даѧ́нїѧ наслѣ́дᲂваша . Оу҆мертви́вше по́стницы пло́ти , живо́тъ пᲂлꙋчи́ша . ᲂу҆па́сше же до́брѣ хрⷭ҇то́во ста́до , і҆єра́рси всемꙋ́дрїи , без̾сме́ртнѣй сла́вѣ по кᲂнчи́нѣ спᲂдо́бистесѧ .= сла́ва . Живо́тъ сло́ве живы́мъ , и҆ ᲂу҆мира́ющимъ вᲂскрⷭ҇нїе є҆сѝ , ꙗ҆́же ѿ на́съ бжⷭ҇твенымъ тѝ манᲂве́нїемъ , преста́вленыѧ рабы̀ твᲂѧ̀ , а҆враа́мꙋ въ нѣ́дра ᲂу҆го́дникꙋ твᲂемꙋ̀ вселѝ . боⷢ҇ . В=сели́сѧ в̾ тѧ̀ чⷭ҇таѧ ѻ҆́ч҃ее сїѧ́нїе , и҆ невеще́ствеными зарѧ́ми свᲂегѡ̀ бжⷭ҇тва̀ , тмꙋ̀ разрꙋшѝ мнᲂгᲂбо́жїѧ , и҆ ми́ръ прᲂсвѣтѝ .

и҆́нъ , і҆рмо́съ , то́йже . ди́венъ бг҃ъ . Мч҃нцы твᲂѝ сп҃се , мно́гїѧ мꙋ́ки претерпѣ́ша , любо́вїю твᲂе́ю дш҃и ᲂу҆ѧ́звивше ст҃і́и , твᲂеѧ̀ жела́юще приснᲂсꙋ́щныѧ сла́вы , и҆ сла́дкагѡ ти прича́стїѧ . пᲂко́й гдⷭ҇и . Чре́во враже́бныѧ сме́рти растерза́лъ є҆сѝ сп҃се , и҆ всѣ́хъ и҆́же въ то́й ᲂу҆́зники вᲂскр҃си́лъ є҆сѝ , и҆ живо́тъ дарᲂва́въ є҆го́же преста́вленыѧ бл҃гᲂда́телю спᲂдо́би . сла́ва . Сле́зъ и҆ вᲂз̾дыха́нїѧ и҆́же во а҆́дѣ , рабы̀ свᲂѧ̀ свᲂбᲂдѝ сп҃се , ꙗ҆́кѡ є҆ди́нъ бо млрⷭ҇дъ , ѿѧ́тъ всѧ́кꙋ сле́зꙋ ѿ всѧ́кᲂгѡ лица̀ , вѣ́рнѡ бг҃ᲂсло́вѧщихъ мѧ . и҆ ны́нѣ . И҆́же є҆стество́мъ сᲂдѣ́тель , сᲂдѣ́телствꙋетсѧ въ лᲂжесна́хъ твᲂи́хъ , и҆ по́лнъ сы́и ꙗ҆́кѡ бг҃ъ и҆стᲂщава́етсѧ всенепᲂро́чнаѧ , є҆ди́нъ без̾сме́ртныи , за всѣ́хъ спасе́нїе ᲂу҆мира́етъ сме́ртїю .

кᲂнда́къ . гла́съ , и҃ . Со ст҃ы́ми пᲂко́й хрⷭ҇тѐ дш҃а ра́бъ свᲂи́хъ , и҆дѣ́же нѣ́сть бᲂлѣ́зни , ни печа́ли , ни вᲂз̾дыха́нїѧ , но жи́знь вѣ́чнаѧ . и҆́кᲂсъ . Са́мъ є҆ди́нъ є҆сѝ без̾сме́ртенъ , сᲂтвᲂри́выи и҆ сᲂзда́выи чл҃ка . тлѣ́ннїи и҆́же ѿ землѝ со́здани бы́хᲂмъ , и҆ въ зе́млю тꙋ́же по́йдемъ , ꙗ҆́кᲂже пᲂвелѣ́лъ є҆сѝ , сᲂзда́выи мѧ и҆ ре́клъ ми , ꙗ҆́кѡ землѧ̀ є҆сѝ и҆ в̾ зе́млю па́ки по́йдеши , и҆дѣ́же всѝ земні́и ѿхо́димъ , над̾гро́бнᲂе рыда́нїе твᲂрѧ́ще , и҆ пᲂю́ще пѣ́снь а҆́нг҃льскꙋю , а҆ллилꙋ́їѧ .

пѣ́снь , з҃ . і҆рмо́съ . Дѣ́ти бл҃гᲂчести́выѧ въ вавилѡ́нѣ , тѣ́лꙋ злато́мꙋ непᲂклᲂни́шасѧ , но пᲂсредѝ пе́щи пла́менны прᲂхлажда́еми , пѣ́снь вᲂспѣва́хꙋ гл҃юще , блгⷭ҇ве́нъ бг҃ъ ѻ҆ц҃ъ на́шихъ . мⷱ҇ꙋ . Разрꙋши́вше ѡ҆пло́тъ ѕлᲂче́стїѧ , ᲂу҆́зами сщ҃е́нными ва́шими всехва́льнїи , мᲂи́хъ прегрѣше́нїи бре́мѧ растᲂчи́те , и҆ вᲂпїю́ща мч҃нцы спаси́те , блгⷭ҇ве́нъ бг҃ъ ѻ҆ц҃ъ на́шихъ . Тꙋ́чами сщ҃е́нныхъ ва́шихъ ᲂу҆че́нїи , є҆ресе́й ѻ҆́гнь ᲂу҆гаси́сте , и҆ свѣ́тᲂмъ і҆єра́рси премꙋ́дрїи бл҃гᲂче́стїѧ , нече́стїѧ ле́сти пле́велы пᲂпали́сте , и҆ вѣ́рныхъ дш҃а прᲂсвѣти́сте . По́стницы вᲂз̾держа́нїемъ пло́ти ᲂу҆мертви́вше , живꙋ́тъ по сме́рти . прⷪ҇ркъ же ст҃ы́хъ ли́къ , и҆ сᲂсло́вїе же́нскᲂе пᲂстрада́вши прᲂсла́висѧ . тѣ́хъ мᲂли́твами хрⷭ҇тѐ , бѣ́дъ и҆зба́ви на́съ .= сла́ва . Всѣ́хъ и҆́же в̾ наде́жи жи́зни ᲂу҆со́пшихъ дш҃и пᲂко́й хрⷭ҇тѐ . презира́ѧ ꙗ҆́же в̾ житїѝ тѣ́хъ прегрѣше́нїѧ , мно́гагѡ ра́ди бл҃гᲂꙋтро́бїѧ твᲂегѡ̀ млрⷭ҇де є҆ди́не сп҃се , и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . боⷢ҇ . В=сѧ̀ ꙗ҆́кѡ чи́стаѧ вᲂспрїѧ́ла є҆сѝ во ᲂу҆тро́бꙋ сло́во вᲂплᲂща́емо . но тᲂгѡ̀ мᲂлѝ пречⷭ҇таѧ , ѿ сᲂгрѣше́нїи ѡ҆чи́стити мѧ , и҆́же дш҃е́ю и҆ тѣ́лᲂмъ к̾ тебѣ̀ притека́ющаго и҆ чи́стᲂю вѣ́рᲂю .

и҆́нъ , і҆рмо́съ . Дѣ́ти є҆вре́йскїѧ . ди́венъ бг҃ъ . Всѐ жела́нїе мч҃нкъ , прᲂстре́сѧ къ є҆ди́нᲂмꙋ влⷣцѣ , любо́вїю тᲂмꙋ̀ сᲂє҆динѧ́еми , пᲂю́ще , блгⷭ҇ве́нъ є҆сѝ гдⷭ҇и бж҃е во́ вѣки . пᲂко́й гдⷭ҇и . Пᲂдае́ши и҆́же вѣ́рᲂю преста́вльшимсѧ , свѣ́тлᲂсть бжⷭ҇твенагѡ црⷭ҇твїѧ , нетлѣ́нїѧ ѻ҆де́ждꙋ да́рꙋѧ вᲂпїю́щимъ , блгⷭ҇ве́нъ є҆сѝ гдⷭ҇и бж҃е во́вѣки . сла́ва . И҆спо́лни ра́дᲂсти и҆ весе́лїѧ , и҆́хже преста́вилъ є҆сѝ рабы̀ твᲂѧ̀ ще́дре , и҆ спᲂдо́би и҆́хъ взыва́ти тебѣ̀ и҆ пѣ́ти , блгⷭ҇ве́нъ є҆сѝ гдⷭ҇и бж҃е во́вѣки . и҆ ны́нѣ . Раз̾рѣша́ѧ є҆́ввинꙋ клѧ́твꙋ , в̾ пренепᲂро́чнꙋю всели́лсѧ є҆сѝ дв҃ꙋ , блгⷭ҇ве́нїѧ и҆сто́чникъ и҆стᲂча́ѧ вᲂпїю́щимъ , блгⷭ҇ве́нъ пречⷭ҇таѧ пло́дъ твᲂегѡ̀ чре́ва .

пѣ́снь , и҃ . і҆рмо́съ . Бг҃ᲂзра́чныѧ дѣ́ти в̾ пещѝ , со ѻ҆гне́мъ и҆ ле́сть пᲂпра́вше пᲂѧ́хꙋ , бл҃гᲂслᲂви́те дѣ́ла гдⷭ҇нѧ гдⷭ҇а . мⷱ҇ꙋ . Хра́мы и҆́дᲂльскїѧ низ̾лᲂжи́сте стра́ждꙋще , и҆ себѐ трⷪ҇цы бжⷭ҇твеныѧ хра́мы сᲂзда́сте , стрⷭ҇тᲂте́рпцы гдⷭ҇ни а҆́нг҃лѡмъ сᲂприча́стницы . Сщ҃е́нницы твᲂѝ хрⷭ҇тѐ , в̾ пра́вдꙋ ѡ҆бле́кшесѧ препᲂдо́бнѡ , с̾сꙋ́щими ѿ́ вѣка ра́дꙋютсѧ , твᲂю̀ дᲂбро́тꙋ зрѧ́ще бжⷭ҇твенꙋю ꙗ҆снѣ́йше . Сщ҃е́нныхъ мᲂли́твами прᲂро́къ твᲂи́хъ , и҆ же́нъ приснᲂсла́вныхъ , и҆ є҆́же ѿ́ вѣка пра́ведныхъ , ми́лᲂсти твᲂѧ̀ сло́ве ми́рꙋ свᲂемꙋ̀ да́рꙋй .= бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Пра́ведныи сꙋдїѧ̀ , є҆гда̀ хо́щеши сꙋди́ти , ꙗ҆́же ѿ на́съ прїѧ́тъ не ѡ҆сꙋже́ны сᲂблюдѝ , презрѣ́въ тѣ́хъ ꙗ҆́же на землѝ сᲂгрѣше́нїѧ гдⷭ҇и . боⷢ҇ . Ꙗ҆́=вльшисѧ дв҃о , дш҃и мᲂеѧ̀ те́мныѧ ѻ҆́блаки , прᲂсвѣще́нїемъ твᲂи́мъ ѿженѝ , ꙗ҆́же пра́веднᲂе ро́ждьши сл҃нце .

и҆́нъ , і҆рмо́съ . Мꙋсикі́йскимъ ѻ҆рга́нᲂмъ . ди́венъ бг҃ъ . Земны́ѧ стра́сти прᲂше́дше , нбⷭ҇ныѧ прїѧ́ша вѣнцы̀ мч҃нцы и҆́стиннїи , вᲂпїю́ще сп҃сꙋ , гдⷭ҇а по́йте и҆ превᲂзнᲂси́те є҆гѡ̀ во́ вѣки . пᲂко́й гдⷭ҇и . Сᲂше́дъ в̾ ро́въ преи҆спо́днїи , и҆́же во грᲂбѣ́хъ живꙋ́щїѧ вᲂскр҃си́лъ є҆сѝ живᲂнача́льнᲂю дла́нїю , и҆ пᲂдае́ши рабо́мъ твᲂи́мъ , и҆́же вѣ́рᲂю пре́жде ᲂу҆со́пшимъ пᲂко́й ще́дре . сла́ва . Ꙗ҆́кѡ и҆сто́чникъ жи́зни приснᲂсꙋ́щныѧ , ꙗ҆́кѡ пи́щи сы́и пᲂто́къ , рабы̀ свᲂѧ̀ бл҃гᲂче́стнѡ къ тебѣ̀ преста́вльшїѧсѧ напᲂѧ́еши , вᲂспѣва́ющїѧ и҆ превᲂзнᲂсѧ́щїѧ тѧ̀ хрⷭ҇тѐ во всѧ̀ вѣ́ки . и҆ ны́нѣ . Мр҃і́е бцⷣе дв҃о , ꙗ҆́же бг҃а сп҃са чл҃кѡмъ ро́ждьши пло́тїю , спаса́й вѣ́рᲂю пᲂю́щихъ твᲂѐ ржⷭ҇тво̀ , и҆ превᲂз̾нᲂсѧ́щихъ тѧ чи́стꙋю во́ вѣки . та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны .

пѣ́снь , ѳ҃ . і҆рмо́съ . Тѧ̀ бракᲂнеи҆скꙋси́мꙋю мт҃рь бг҃а вы́шнѧгѡ , тѧ̀ па́че ᲂу҆ма̀ ро́ждьшꙋю сло́во сꙋ́щагѡ бг҃а , и҆ вы́шшꙋ пречⷭ҇тыхъ си́лъ , немо́лчными славᲂслᲂвле́нїи велича́емъ . мⷱ҇ꙋ . Стᲂѧ́хꙋ мч҃нцы пред̾непра́ведными сꙋди́щи , всѧ́кꙋ непра́вдꙋ , бл҃гᲂда́тїю хрⷭ҇то́вᲂю ѡ҆сꙋжда́юще , и҆ ѿ врага̀ держи́мыѧ и҆зе́млюще , и҆ вѣнцы̀ пра́ведныѧ прїе́млюще . Ꙗ҆ви́стесѧ ꙗ҆́кᲂже кᲂрми́ла цр҃кви , кᲂраблѧ̀ то́й и҆справлѧ́юще , въ приста́нище бж҃їихъ запᲂвѣде́й , всѝ первᲂсщ҃е́нницы и҆ па́стырїе бл҃же́ннїи . сегѡ̀ ра́ди ꙗ҆́кѡ ко́рмчїѧ ва́съ пᲂчита́емъ . Сᲂбо́ръ мо́литъ тѧ гдⷭ҇и прⷪ҇ркъ , и҆ прпⷣбныхъ , и҆ сᲂсло́вїе же́нъ пᲂстрада́вшихъ свѣ́тлѡ , и҆ ᲂу҆краси́вшихсѧ въ пᲂще́нїи . чл҃кᲂлю́бче мо́литъ тѧ , щедро́ты твᲂѧ̀ на́мъ да́рꙋй .= сла́ва . Є҆́йже спᲂдо́бишасѧ че́сти и҆ сла́вѣ вѣ́чнѣй всѝ ст҃і́и хрⷭ҇тѐ , вѣ́рнѡ ѿше́дшїѧ житїѧ̀ сꙋ́етнагѡ , причасти́тисѧ рабы̀ свᲂѧ̀ спᲂдо́би млⷭ҇тиве , мл҃твами ст҃ы́хъ твᲂи́хъ . боⷢ҇ . Н=ᲂсѧ́щи и҆спᲂлне́нїе бл҃ги́хъ свᲂи́ма рꙋка́ма всенепᲂро́чнаѧ , и҆спо́лни на́ша мᲂльбы̀ ра́бъ твᲂи́хъ . и҆ къ бг҃ꙋ ше́ствїѧ на́ша и҆спра́ви , въ дᲂбрᲂдѣ́телѣхъ ᲂу҆крѣплѧ́ющи жи́ти на́съ .

и҆́нъ , і҆рмо́съ . Оу҆страши́сѧ всѧ́къ . ди́венъ бг҃ъ . И҆мꙋ́ще мч҃нцы хрⷭ҇то́вы непᲂбᲂри́мꙋю крѣ́пᲂсть , и҆ непᲂбѣди́мꙋю , ᲂу҆ничижи́сте мꙋчи́телей без̾бо́жнᲂе велѣ́нїе , и҆ црⷭ҇твїѧ нбⷭ҇наго спᲂдо́бистесѧ , прᲂсвѣща́еми тро́ичными зарѧ́ми дᲂстᲂбл҃же́ннїи . пᲂко́й гдⷭ҇и . Разрꙋши́сѧ а҆́дъ го́рькїи , разрꙋши́вшꙋ ти є҆гѡ̀ чл҃кᲂлю́бче , и҆ вᲂскр҃си́вшꙋ ѿ́ вѣка та́мѡ спѧ́щихъ . но и҆ нн҃ѣ ꙗ҆́кѡ бл҃гъ , преше́дшїѧ к̾ тебѣ̀ милᲂсе́рдᲂмꙋ , невече́рнѧгѡ свѣ́та твᲂегѡ̀ спᲂдо́би . сла́ва . Ве́сь є҆сѝ сп҃се мо́й сла́дᲂсть , ве́сь є҆сѝ жела́нїе и҆ любо́вь вᲂи́стинꙋ ненасы́тнаѧ , ве́сь є҆сѝ дᲂбро́та несказа́ннаѧ . преста́вльшїѧсѧ ᲂу҆́бѡ к̾ тебѣ̀ , твᲂеѧ̀ красᲂты̀ наслажда́тисѧ бл҃гᲂвᲂлѝ , и҆ бжⷭ҇твеныѧ дᲂбро́ты твᲂеѧ̀ спᲂдо́би . и҆ ны́нѣ . Спаси́ мѧ мт҃и бж҃їѧ , ро́ждьшаѧ хрⷭ҇та̀ сп҃са мᲂегѡ̀ , бг҃а же и҆ челᲂвѣ́ка , сꙋгꙋ́ба є҆стество́мъ , а҆ не сᲂста́вᲂмъ . є҆динᲂро́дна ᲂу҆́бѡ ѿ ѻ҆ц҃а и҆з̾ тебе́ же пе́рвенца все́й тва́ри . є҆го́же во двѣ́хъ є҆стествѣ́хъ велича́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на хвали́тѣхъ , стⷯры , мч҃нчны . гла́съ , и҃ . Что̀ ва́съ нарече́мъ ст҃і́и ; херꙋви́мъ , ꙗ҆́кѡ на ва́съ пᲂчи́лъ є҆́сть хрⷭ҇то́съ ; серафи́мъ , ꙗ҆́кѡ непреста́ннѡ прᲂславлѧ́ете є҆гѡ̀ ; а҆́нг҃лы , тѣ́ла бо ѿврати́стесѧ ; си́лы , дѣ́йствꙋете бо чꙋдеса̀ ; мно́га ва́ша и҆мена̀ ; бо́льшаѧ дарᲂва́нїѧ . мᲂли́те спасти́сѧ дш҃а́мъ на́шимъ . Вельмѝ пᲂд̾виза́стесѧ ст҃і́и , мꙋ́ки ѿ без̾зако́нникъ претерпѣ́сте до́блественѣ , хрⷭ҇та̀ и҆спᲂвѣ́давше пред̾ цр҃и . и҆ преста́вльшесѧ ѿ житїѧ̀ па́ки си́лы дѣ́йствꙋете въ ми́рѣ , и҆ недꙋ́жныѧ и҆сцѣлѧ́ете страстьмѝ свᲂи́ми ст҃і́и , мᲂли́те спасти́сѧ дш҃а́мъ на́шимъ . Мч҃нцы хрⷭ҇то́вы непᲂбѣди́мїи , пᲂбѣди́ша ле́сть си́лᲂю крⷭ҇тнᲂю , вᲂспрїѧ́сте бл҃гᲂда́ть вѣ́чныѧ жи́зни , мꙋчи́телей преще́нїѧ не ᲂу҆страши́стесѧ , мꙋ́ками ᲂу҆ранѧ́еми веселѧ́стесѧ , и҆ нн҃ѣ кро́ви ва́ша , бы́ша и҆сцѣле́нїѧ дш҃а́мъ на́шимъ . мᲂли́те спасти́сѧ дш҃а́мъ на́шимъ . Во брᲂнѧ̀ вѣ́ры ѡ҆бо́лкшесѧ до́брѣ , и҆ ѻ҆́бразᲂмъ крⷭ҇тнымъ вᲂѡ҆рꙋжи́вше себѐ , во́ини бл҃гᲂмо́щни ꙗ҆ви́стесѧ , мꙋчи́телемъ мꙋ́жески прᲂти́вистесѧ , и҆ дїа́вᲂлю пре́лесть низ̾лᲂжи́сте , пᲂбѣди́телїе бы́вше , вѣнце́мъ спᲂдо́бистесѧ мᲂли́тесѧ при́снѡ ѡ҆ на́съ спасти́сѧ дш҃а́мъ на́шимъ .= сла́ва , пᲂко́инъ .= Сме́рть твᲂѧ̀ гдⷭ҇и , без̾сме́ртїю бы́сть хᲂда́тай , а҆́ще бо во́ грᲂбѣ небы̀ пᲂлᲂже́нъ бы́лъ , небы̀ ра́й ѿве́рзлсѧ , тѣ́мже преста́вленыѧ ᲂу҆пᲂко́й гдⷭ҇и .= и҆ ны́нѣ , боⷢ҇ . Ч=и́стаѧ дв҃о , сло́вꙋ две́ри , бг҃а на́шегѡ мт҃и , мᲂлѝ спасти́сѧ на́мъ .

на стихо́внѣ , стⷯры , пᲂко́йны . гла́съ , и҃ . поⷣ . Ѽ пресла́внᲂе чꙋ́до . Цр҃ьски мнѣ̀ пᲂд̾писа́лъ є҆сѝ свᲂбᲂжде́нїе ,꙳ ша́рᲂмъ червле́нымъ ,꙳ пе́рсты свᲂѧ̀ ѡ҆крᲂвави́въ влⷣко ,꙳ и҆ ѡ҆багри́въ свᲂе́ю кро́вїю .꙳ и҆ ны́нѣ тѧ̀ вѣ́рᲂю мо́лимъ ,꙳ съ первᲂрᲂжде́нными тѝ с̾причтѝ ,꙳ и҆ съ пра́ведныхъ твᲂи́ми ꙳ ра́дᲂсти спᲂдо́би ᲂу҆лꙋчи́ти ,꙳ преше́дшїѧ к̾ тебѣ̀ млрⷭ҇дᲂмꙋ .

сти́хъ : бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь ,꙳ па́мѧть и҆́хъ ѿ́ рᲂда в̾ ро́дъ . Сщ҃е́нствᲂвавъ ꙗ҆́кѡ чл҃къ ,꙳ закла́въ себѐ ,꙳ принᲂше́нїе прине́слсѧ є҆сѝ ѻ҆ц҃ꙋ ,꙳ чл҃ка и҆з̾ тлѝ вᲂзвᲂдѧ̀ ,꙳ преста́вльшїѧсѧ ᲂу҆́бѡ ꙗ҆́кѡ чл҃кᲂлю́бецъ .꙳ въ живꙋ́щихъ странѣ̀ ᲂу҆чинѝ ,꙳ и҆дѣ́же пᲂто́цы пи́щнїи прᲂлива́ютсѧ ,꙳ и҆ и҆дѣ́же и҆сто́чницы ꙳ приснᲂтекꙋ́щеи и҆стека́ютъ . сти́хъ : дш҃а и҆́хъ ,꙳ во бл҃ги́хъ вᲂдвᲂрѧ́тсѧ . Глꙋбино́ю мꙋ́дрᲂсти твᲂеѧ̀ не и҆з̾рече́нныѧ ,꙳ ᲂу҆ро́къ пᲂлага́ѧ живᲂтꙋ̀ ,꙳ и҆ прᲂви́дѧ сме́рть ,꙳ и҆ к̾ жи́зни дрꙋго́й преселѧ́еши рабы̀ твᲂѧ̀ ,꙳ и҆́хже прїѧ́тъ влⷣко ,꙳ ны́нѣ ᲂу҆чинѝ на вᲂда́хъ пᲂко́йнахъ ꙳ во свѣ́тлᲂстѣхъ ст҃ы́хъ ,꙳ и҆дѣ́же гла́съ ꙳ весе́лїѧ и҆ ѡ҆слабле́нїѧ . сла́ва , и҆ ны́нѣ , боⷢ҇ , самᲂгла́сенъ . Ꙗ҆́кѡ заче́нши без̾нача́льнᲂе сло́во бж҃їе и҆ бг҃а , мт҃рьнимъ сѝ дерзнᲂве́нїемъ прилѣ́жнѡ мᲂлѝ бцⷣе , ᲂу҆чини́ти рабы̀ твᲂѧ̀ , и҆дѣ́же ли́цы пра́ведныхъ веселѧ́щихсѧ и҆ сла́вѧщихъ тѧ̀ , и҆ и҆дѣ́же свѣ́тлᲂсть вѣ́чнѡ свѣтѧ́щисѧ , и҆ сла́дкїи гла́съ пра́зднꙋющихъ бг҃ᲂбл҃же́ннаѧ . таⷤ , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ ны́нѣ , боⷢ҇ , вᲂскрⷭ҇нъ , настᲂѧ́щаго гла́са . є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сꙋбо́тꙋ , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Всѣ́мъ бᲂлѣ́знемъ крѣ́пкѡ прїѡбща́ющесѧ , ꙗ҆́звами ва́шими ст҃і́и страстᲂте́рпцы , ᲂу҆ѧзви́сте всѐ мно́жество бѣсо́вскᲂе , бжⷭ҇твенᲂю бл҃гᲂда́тїю .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Прпⷣбнїи хрⷭ҇то́вы , и҆ бжⷭ҇твенїи ст҃лїе , сᲂбо́ръ прⷪ҇рческїи , и҆ всѣ́хъ пра́ведныхъ , нбⷭ҇наѧ пᲂлꙋчи́ша наслѣ́дїѧ , и҆́хже дᲂсто́йнѡ да ᲂу҆блажа́емъ .

ра́дꙋитесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Всѧ̀ вѣ́рнѡ ѿ житїѧ̀ преста́вльшїѧсѧ , ᲂу҆чинѝ бж҃е въ странѣ̀ пра́ведныхъ , и҆ раѧ̀ пᲂкажѝ наслѣ́дники , бг҃ᲂлѣ́пнѡ пѣснᲂсло́вѧщихъ тѧ̀ .

сла́ва . Пѣ́нїе тебѣ̀ трⷪ҇це принᲂшꙋ̀ кᲂне́чнᲂе , ꙗ҆́же ѿ землѝ преста́вила є҆сѝ в̾ вѣ́рѣ , ст҃ы́хъ спᲂдо́би селе́нїю , и҆ менѐ блꙋ́днаго пᲂми́лꙋй .

и҆ нн҃ѣ . Всѣ́хъ до́брыхъ и҆спᲂлне́нїе ро́ждьши . и҆спо́лни на́ша дв҃о мᲂле́нїѧ , грѣхо́мъ на́шимъ и҆збавле́нїе , прᲂсѧ́щи и҆ прᲂсвѣще́нїе на́мъ , и҆ ве́лїю млⷭ҇ть .

кᲂне́цъ ѻ҆сьмо́мꙋ гла́сꙋ .

<< Previous

Contents

Next >>