Въ сꙋбо́тꙋ ве́черъ . на ма́лѣй вече́рни . нача́ло ѡ҆бы́чно , ꙗ҆́кᲂже ᲂу҆ка́зано въ пѧ́тᲂмъ гла́сѣ . на гдⷭ҇и вᲂзва́хъ , стⷯры вᲂскрⷭ҇ны . гла́съ , и҃ . =запѣ́въ : да ᲂу҆пᲂва́етъ і҆и҃ль на́ гдⷭ҇а . Вече́рнюю пѣ́снь , и҆ слᲂве́снꙋю слꙋ́жбꙋ , тебѣ̀ хрⷭ҇тѐ прино́симъ , ꙗ҆́кѡ бл҃гᲂвᲂли́лъ є҆сѝ пᲂми́лᲂвати на́съ , вᲂскрⷭ҇нїѧ ра́ди . =два́жды . Гдⷭ҇и гдⷭ҇и , не ѿве́рзи на́съ ѿ твᲂегѡ̀ лица̀ , но бл҃гᲂвᲂлѝ пᲂми́лᲂвати на́съ , вᲂскрⷭ҇нїѧ ра́ди .= Р=а́дꙋисѧ сїѡ́не ст҃ы́и , мт҃и цр҃квамъ , бж҃їе жили́ще . ты́бо прїѧ́тъ пре́жде ѡ҆ставле́нїе грѣхѡ́въ , вᲂскрⷭ҇нїѧ ра́ди .

сла́ва , и҆ нн҃ѣ , боⷢ҇ . Вѣ́рᲂю притека́ю к̾ пᲂкро́вꙋ твᲂемꙋ̀ , бг҃ᲂрᲂди́тельнице чⷭ҇таѧ , напа́стей и҆ бѣ́дъ , и҆ страстна́гѡ слїѧ́нїѧ , и҆ бѣсо́вскагѡ ѡ҆ѕлᲂбле́нїѧ , ꙗ҆́кѡ млⷭ҇ти и҆мѣ́ѧ пꙋчи́нꙋ , и҆ спасе́нїѧ ꙗ҆́вльшисѧ хᲂда́таица , и҆ спаси́ мѧ влⷣчце , ꙗ҆́же бг҃а ро́ждьши млⷭ҇тивагѡ , є҆ди́нагѡ всеще́драгѡ , и҆ мнᲂгᲂбл҃гᲂꙋтро́бнагѡ .

на стихо́внѣ , стⷯра . гла́съ , и҃ . Вᲂз̾ше́лъ є҆сѝ на́ крⷭ҇тъ і҆с҃е , сᲂше́дыи с̾ нб҃съ , прїи́де на́ смерть живо́тъ без̾сме́ртныи , к̾ сꙋ́щимъ во тмѣ̀ свѣ́тъ и҆́стинныи . к̾ па́дшимъ всѣ́мъ вᲂскрⷭ҇нїе , и҆ прᲂсвѣще́нїе сп҃се на́шъ сла́ва тебѣ̀ .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Всѧ̀ преидо́хъ прегрѣше́ньми , и҆ блꙋдо́мъ мно́зѣмъ дꙋ́шꙋ ѡ҆скверни́хъ , и҆ ᲂу҆́мъ ве́сь непᲂдо́бенъ сᲂдѣ́лахъ стра́стнѡ , и҆ ᲂу҆пᲂдо́бихсѧ скᲂто́мъ несмы́сленымъ ѻ҆каѧ́нныи . ᲂу҆скᲂрѝ ᲂу҆́бѡ чⷭ҇таѧ , и҆ спаси́ мѧ неключи́маго раба̀ твᲂегѡ̀ . и҆́бо хрⷭ҇та̀ рᲂдила̀ є҆сѝ препѣ́таѧ , спаси́телѧ всѣ́мъ земны́мъ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Оу҆вы̀ мнѣ̀ дш҃е страстна́ѧ , что̀ пᲂрабо́тиласѧ є҆сѝ скве́рнѡ , лꙋка́вᲂмꙋ мирᲂде́ржцꙋ , и҆ тᲂгѡ̀ во́лю скᲂнчева́еши , преслꙋ́шавши пᲂвелѣ́нїѧ тебѐ сᲂтво́ршагѡ . но пре́жде кᲂнца̀ и҆з̾глꙋбины̀ вᲂзᲂпі́й , спасѝ , и҆ и҆зба́ви мѧ мт҃и бж҃їѧ ѿ льсти́вагѡ ѕмі́ѧ , ты́ бо є҆сѝ бг҃ᲂневѣ́сто , всемꙋ̀ ми́рꙋ ра́дᲂсть .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Бꙋ́рѧ прегрѣше́нїи ѡ҆бъѧ́тъ смире́нꙋю мᲂю̀ дꙋ́шꙋ , во глꙋбинꙋ̀ ѿчаѧ́нїѧ лю́то низ̾лᲂжи́вши , ᲂу҆скᲂрѝ чи́стаѧ , и҆ ѡ҆кᲂрми́тельница ми бꙋ́ди ти́хаѧ , въ приста́нище бж҃їѧ во́ли , да прᲂславлѧ́ю ти мно́гаѧ чꙋдеса̀ ве́селѡ , влⷣчце всенепᲂро́чнаѧ мт҃и хрⷭ҇та̀ бг҃а . сла́ва , и҆ нн҃ѣ , боⷢ҇ . И҆сто́чникъ слеза́мъ пᲂда́ждь ми , и҆ пᲂмышле́нїѧ бл҃га , и҆ смире́нїѧ в̾кꙋ́пѣ , и҆ и҆спᲂвѣ́данїе без̾мѣ́стныхъ ми дѣѧ́нїи , и҆ прегрѣше́нїи стꙋжа́ющихъ ми , ѿ ᲂу҆ны́нїѧ и҆ лѣ́нᲂсти мᲂеѧ̀ , и҆ спᲂдо́би чи́стѡ пᲂкаѧ́нїе и҆́стинно , вᲂи́стинꙋ пᲂказᲂва́ти , и҆ спасе́нїе пᲂлꙋчи́ти .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . є҆ктенїѧ̀ , и҆ =ѿпꙋ́стъ .

ВЪ СУБО́ТУ НА ВЕЛИ́ЦѢЙ ВЕЧЕ́РНИ

нача́ло твᲂри́мъ все́й вече́рнѣй слꙋ́жбѣ , ꙗ҆́кᲂже ᲂу҆ка́зано , въ пѧ́тᲂмъ гла́сѣ . на́ гдⷭ҇и вᲂзва́хъ , стⷯры вᲂскрⷭ҇ны . гла́съ , и҃ . твᲂре́нїе , і҆ѡа́нна дамаски́на . и҆ пᲂе́мъ , стихѡ́въ , і҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . В=ече́рнюю пѣ́снь , и҆ слᲂве́снꙋю слꙋ́жбꙋ , тебѣ̀ хрⷭ҇тѐ прино́симъ , ꙗ҆́кѡ бл҃гᲂвᲂли́лъ є҆сѝ пᲂми́лᲂвати на́съ , вᲂскрⷭ҇нїѧ ра́ди .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Ра́дꙋисѧ сїѡ́не ст҃ы́и , мт҃и цр҃квамъ , бж҃їе жили́ще . ты́ бо прїѧ́тъ пре́жде ѡ҆ставле́нїе грѣхѡ́въ , вᲂскрⷭ҇нїѧ ра́ди .

и҆́ны , стихѣ́ры . твᲂре́нїе а҆нато́лїѧ патрїа́рха цр҃ѧ гра́да . =запѣ́въ : бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . И҆́=же ѿ́ бг҃а ѻ҆́ч҃ее сло́во , пре́жде вѣ́къ рᲂжде́исѧ , напᲂслѣ́дᲂкъ лѣ́тᲂмъ , то́йже ѿ не и҆скꙋсᲂбра́чныѧ вᲂпло́щьсѧ и҆з̾вᲂле́нїемъ , распѧ́тїе сме́ртнᲂе претерпѣ̀ , и҆ дре́вле ᲂу҆҆мерщве́наго челᲂвѣ́ка спа́слъ є҆́сть , свᲂи́мъ вᲂскрⷭ҇нїемъ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Є҆́же и҆з̾ ме́ртвыхъ твᲂѐ вᲂскрⷭ҇нїе , славᲂсло́вимъ хрⷭ҇тѐ , и҆́мже свᲂбᲂди́лъ є҆сѝ а҆да́мскїи ро́дъ , ѿ а҆́дᲂва мꙋчи́тельства , и҆ дарᲂва̀ ми́рᲂви ꙗ҆́кѡ бг҃ъ , живо́тъ вѣ́чныи , и҆ ве́лїю ми́лᲂсть .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Сла́ва тебѣ̀ хрⷭ҇тѐ сп҃се , сн҃е бж҃їи є҆динᲂро́дныи , пригвᲂжде́исѧ на крⷭ҇тѣ̀ , и҆ вᲂскре́се и҆́з̾ грᲂба тридне́внѡ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Тебѐ сла́вимъ гдⷭ҇и , во́лею на́съ ра́ди распѧ́тїе претерпѣ́вша . и҆ тебѣ̀ пᲂклᲂнѧ́емсѧ всеси́льне сп҃се , не ѿве́рзи на́съ ѿ лица̀ твᲂегѡ̀ , но ᲂу҆҆слы́ши и҆ спасѝ на́съ , вᲂскрⷭ҇нїѧ ра́ди твᲂегѡ̀ чл҃кᲂлю́бче .

та́же , в̾ =минѣ́и , стихѣ́ры , ст҃о́мꙋ . сла́ва , ст҃о́мꙋ , а҆́ще и҆́мать . а҆́ще ли нѝ . сла́ва , и҆ нн҃ѣ , боⷢ҇ , гла́сꙋ . =и҆́ны стⷯры бцⷣѣ , пᲂе́мъ и҆́хъ , и҆дѣ́же нѣ́сть минѣ́и . твᲂре́нїе , па́вла а҆мᲂре́йскаго . гла́съ , д҃ . =запѣ́въ : ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и и҆збавле́нїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . А҆́=нг҃льстїи чи́нᲂве тѧ̀ бг҃ᲂмт҃и сла́вѧтъ , бг҃а бо пречⷭ҇таѧ рᲂдила̀ є҆сѝ , и҆́же со ѻ҆ц҃е́мъ и҆ дх҃ᲂмъ приснᲂсꙋ́щагѡ . и҆ а҆́нг҃льскаѧ во́инства , ѿ несꙋ́щихъ хᲂтѣ́нїемъ сᲂста́вльшаго . є҆го́же мᲂлѝ , спастѝ и҆ прᲂсвѣти́ти дш҃а , и҆́же правᲂсла́внѡ , ꙗ҆́кѡ бцⷣꙋ вᲂспѣва́ющихъ тѧ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Ꙗ҆́кѡ и҆сто́чникъ ѡ҆сщ҃е́нїѧ , кᲂвче́гъ же всезлаты́и , бжⷭ҇твенымъ дꙋ́хᲂмъ ѡ҆зарѧ́емь , мᲂлю̀ и҆ припа́даю , страсте́мъ пре́данꙋю и҆ ѻ҆каѧ́ннꙋю ми дꙋ́шꙋ , прᲂсвѣтѝ влⷣчце , и҆збавлѧ́ющи мѧ , го́рькагѡ мꙋчи́тельства бѣсо́вскагѡ , и҆ пꙋ́ть мнѣ̀ спасе́нїѧ пᲂдаю́щи , непреткнᲂве́ненъ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Престо́ли є҆гда̀ пᲂста́вѧтсѧ , и҆ кни́ги раз̾гнꙋ́тсѧ , и҆ дѣла̀ ѡ҆блича́тсѧ , и҆ всѧ́къ ко́ждо пред̾ста́нетъ ѡ҆бремене́нъ и҆ ѡ҆бнаже́нъ , ве́сь трепе́ща негᲂдᲂва́нїѧ бж҃їѧ , и҆ пра́веднагѡ є҆гѡ̀ ѿвѣща́нїѧ , тᲂгда́ мѧ пᲂщадѝ влⷣчце , и҆ всѧ́кᲂгѡ сꙋда̀ и҆схитѝ , всѧ́ческихъ тᲂмле́нїи сꙋ́щагѡ вино́вна .

сла́ва , и҆ ны́нѣ , боⷢ҇ . гла́съ , и҃ . Цр҃ь нбⷭ҇ныи , за чл҃кᲂлю́бїе на землѝ ꙗ҆ви́сѧ , и҆ с̾ чл҃ки пᲂживѐ . ѿ дв҃ы бо чи́стыѧ пло́ть прїе́мыи , и҆з̾ неѧ̀ прᲂше́дъ с̾ вᲂспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несᲂста́вᲂмъ . тѣ́мже сᲂверше́на тᲂгѡ̀ бг҃а , и҆ сᲂверше́на чл҃ка , вᲂи́стинꙋ прᲂпᲂвѣ́дающе , и҆спᲂвѣ́даемъ хрⷭ҇та̀ бг҃а на́шегѡ . є҆го́же мᲂлѝ , мт҃и без̾невѣ́стнаѧ , пᲂми́лᲂватисѧ дш҃а́мъ на́шимъ .

та́же , вы́хᲂдъ съ кади́лᲂмъ .= и҆ с=вѣ́те ти́хїи . прᲂки́менъ , дню̀ , =и҆ =є҆ктенїѧ̀ .

на стихо́внѣ , стⷯра . гла́съ , и҃ . Вᲂз̾ше́лъ є҆сѝ на́ крⷭ҇тъ і҆с҃е , сᲂше́дыи с̾ нб҃съ , прїи́де на́ смерть живо́тъ без̾сме́ртныи , к̾ сꙋ́щимъ во тмѣ̀ свѣ́тъ и҆́стинныи . к̾ па́дшимъ всѣ́мъ вᲂскрⷭ҇нїе , и҆ прᲂсвѣще́нїе сп҃се на́шъ сла́ва тебѣ̀ .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Хрⷭ҇та̀ славᲂсло́вимъ вᲂскрⷭ҇шагѡ и҆з̾ ме́ртвыхъ , дꙋ́шꙋ бо и҆ тѣ́ло вᲂспрїе́мъ , стрⷭ҇ти ѿ ѡ҆бᲂю́дꙋ ѿсѣчѐ . прест҃а́ѧ ᲂу҆́бѡ дш҃а во а҆́дъ сᲂше́дши , є҆го́же и҆ плѣнѝ . во́ грᲂбѣ же и҆стлѣ́нїѧ неви́дѣ ст҃о́е тѣ́ло , и҆зба́вителѧ дш҃а́мъ на́шимъ .

сти́хъ : и҆́бо ᲂу҆҆твердѝ вселе́ннꙋю ,꙳ ꙗ҆́же не пᲂдви́житсѧ . Ѱалмы̀ и҆ пѣ́сньми славᲂсло́вимъ хрⷭ҇тѐ , є҆́же и҆з̾ ме́ртвыхъ твᲂѐ вᲂскрⷭ҇нїе , и҆́мъ же на́съ свᲂбᲂди́лъ є҆сѝ мꙋчи́тельства а҆́дᲂва . и҆ ꙗ҆́кѡ бг҃ъ дарᲂва̀ , живо́тъ вѣ́чныи и҆ ве́лїю ми́лᲂсть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и въ дᲂлгᲂтꙋ̀ дні́й . ѽ влⷣко всѧ́ческимъ , непᲂсти́жиме тво́рче не́бꙋ и҆ землѝ . крⷭ҇та̀ ра́ди и҆ стрⷭ҇те́й , мнѣ̀ без̾стра́стїе и҆стᲂчи́лъ є҆сѝ . пᲂгребе́нїе же прїе́мъ , и҆ вᲂскр҃съ во сла́вѣ , сᲂвᲂскр҃си́лъ є҆сѝ а҆да́ма рꙋко́ю всеси́льнᲂю . сла́ва твᲂемꙋ̀ тридне́внᲂмꙋ вᲂста́нїю , и҆́мже дарᲂва̀ на́мъ вѣ́чныи живо́тъ , и҆ ѡ҆чище́нїе грѣхо́въ , ꙗ҆́кѡ є҆ди́нъ млрⷭ҇дъ .

сла́ва . самᲂгла́снꙋ стⷯрꙋ , ст҃о́мꙋ , а҆́ще и҆́мать . и҆ ны́нѣ , боⷢ҇ , прѧ́мѡ гла́сꙋ , стⷯры , дᲂгма́тикъ пᲂслѣ́днїи . а҆́ще ли не и҆́мать : сла́ва , и҆ нн҃ѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

таⷤ , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , гла́съ , и҃ . свы́шнихъ сни́де . сла́ва , и҆ нн҃ѣ , боⷢ҇ , пи́санъ , на ᲂу҆́трени .= та́же , ѿ=пꙋ́стъ .

Въ сꙋбо́тꙋ на па́вечерницѣ , нача́ло ѡ҆бы́чно , ꙗ҆́кᲂже ᲂу҆ка́зано , в̾ пѧ́тᲂмъ гла́сѣ . Кано́нъ , прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ .

запѣ́в̾ : прест҃а́ѧ гжⷭ҇е бцⷣе спасѝ на́съ . Прїидѣ́те та́йнѡ бра́тїе , ꙗ҆́кѡ ѿ нача́ла ст҃ѣ́й бцⷣѣ , внесе́мъ вѣ́рнїи пѣ́снь но́вꙋ , дне́сь пᲂхвалѧ́юще вели́чїѧ є҆ѧ̀ . Дре́вле бг҃ᲂвидѣ́нїемъ мѡѷсе́й ѡ҆зари́сѧ ᲂу҆мо́мъ , твᲂемꙋ̀ ꙗ҆́снѡ наꙋча́шесѧ чⷭ҇таѧ , бг҃ᲂлѣ́пнᲂмꙋ зача́тїю , па́че є҆сте́ствено дв҃о , ꙗ҆́вльшꙋсѧ є҆мꙋ̀ въ кꙋпинѣ̀ садꙋ̀ . сла́ва . Тебѣ̀ пред̾лᲂжи́въ серде́чнаѧ дѣѧ́нїѧ , и҆ прїѧ́тно пᲂда́хъ писа́нїе , бли́зъ сꙋ́щїи бжⷭ҇твеныи застꙋпле́нїѧ кро́в̾ , ко влⷣцѣ хрⷭ҇тꙋ̀ тебѐ пред̾лᲂжи́въ . и҆ ны́нѣ . Приклᲂни́ ми ᲂу҆́хо твᲂѐ чи́стаѧ , правᲂсла́внᲂю вѣ́рᲂю , в̾ сѣ́ни лица̀ твᲂегѡ̀ , че́стнѡ любо́вїю тѝ притека́ющемꙋ , и҆ стра́хᲂмъ пᲂклᲂнѧ́ющꙋсѧ , мᲂле́бныи мо́й гла́съ ᲂу҆слы́ши .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Лѣ́ствица дре́вле патрїа́рхᲂва , тѧ̀ прᲂѡ҆бража́ше пренепᲂро́чнаѧ . и҆ а҆́нг҃льско бо ꙗ҆влѧ́ше сни́тїе бж҃їе к̾ на́мъ , бжⷭ҇твенᲂе сᲂше́ствїе во ᲂу҆тро́бѣ твᲂе́й . І҆ꙋ́дᲂво кᲂлѣ́но весели́сѧ , ю҆́же і҆а́кѡвъ прᲂречѐ , ѿ кᲂлѣ́на є҆гѡ̀ прᲂрасти́ти и҆збавле́нїе , і҆с҃а хрⷭ҇та̀ . є҆го́же ты̀ ро́ждьши пречⷭ҇таѧ прᲂсла́ви . сла́ва . Грѣхмѝ ѿча́ѧнъ , ѡ҆брѣто́хъ тѧ̀ приста́нище спасе́нїѧ пречⷭ҇таѧ бцⷣе , ᲂу҆пᲂва́нїе на́ше и҆ по́мᲂще . тѣ́мже мѧ̀ къ пᲂкаѧ́нїю наста́ви . и҆ ны́нѣ . Бли́зъ тѧ̀ сꙋ́щꙋ влⷣки и҆́мамъ , пресла́внаѧ влⷣчце , дѣѧ́нїи мᲂи́хъ кни́гꙋ вᲂз̾лᲂжи́хъ на тѧ̀ вѣ́рᲂю , непремᲂлчѝ ᲂу҆ще́дрити мѧ̀ .

пѣ́снь , д҃ . і҆рмо́съ . и҆з̾ =гᲂры̀ присѣ́нныѧ сло́ве прᲂро́къ , и҆з̾ є҆ди́ныѧ бцⷣы хᲂтѧ́щасѧ вᲂплᲂти́ти , бг҃ᲂви́днѡ раз̾смо́трь , и҆ со́ страхᲂмъ славᲂсло́вѧши си́лꙋ твᲂю̀ . Ты̀ ꙗ҆́кѡ мᲂни́сты златы́ми ѡ҆дѣ́ѧнна , невѣ́ста ѻ҆́ч҃а , бл҃гᲂда́ть прїе́мши , ᲂу҆кра́сшисѧ дᲂбро́тᲂю дв҃ьства , мт҃и ꙗ҆ви́сѧ сн҃а бж҃їѧ . Тѧ̀ и҆́стиныи сїѡ́нъ , хрⷭ҇то́съ сло́во и҆зво́ли себѣ̀ въ бжⷭ҇твенᲂе селе́нїе , ꙗ҆́кѡ и҆з̾бра́ннꙋ и҆з̾бра́въ бцⷣе на ѡ҆бнᲂвле́нїе всемꙋ̀ ми́рꙋ . =сла́ва . Ра́дꙋисѧ кра́снаѧ пᲂла́то сло́ва , дв҃ьственыи черто́же цр҃ѧ . ра́дꙋисѧ пᲂхвало̀ всѣ́мъ беспло́тнымъ . ра́дꙋисѧ чл҃кѡмъ по́мᲂще . и҆ ны́нѣ . Оу҆далѧ́ютсѧ ѿ́ бг҃а , тѣ́мже и҆ пᲂгиба́ютъ , ѿмета́ющїи ѻ҆́бразы сн҃а твᲂегѡ̀ , мт҃и бж҃їѧ дв҃о бцⷣе , и҆́миже спаса́ютсѧ чтꙋ́щїи тѧ̀ .

пѣ́снь , є҃ . і҆рмо́съ . Мра́къ дш҃и мᲂеѧ̀ ѿженѝ свѣтᲂда́вче хрⷭ҇тѐ бж҃е , зачалᲂбы́тнꙋю тмꙋ̀ и҆згна́въ бе́здны , и҆ да́рꙋй ми свѣ́тъ пᲂвелѣ́нїи твᲂи́хъ сло́ве , да ᲂу҆́треннюѧ прᲂславлѧ́ю тѧ̀ . Съ бжⷭ҇твенымъ сᲂше́дшесѧ гаврїи́лᲂмъ , вᲂзᲂпїе́мъ бцⷣѣ вѣ́рнѡ , ра́дꙋисѧ дв҃о ст҃а́ѧ , ѡ҆бра́дᲂваннаѧ гдⷭ҇ь с̾ тᲂбо́ю , и҆́же тебѐ ра́ди пᲂтреби́въ печа́ль , пᲂдадѐ ра́дᲂванїе . Пречⷭ҇тᲂе твᲂѐ чре́во , гедеѡ́нъ ви́дѣ дв҃о чи́стаѧ , в̾ не́же ꙗ҆́кѡ до́ждь сло́во сᲂше́дъ вᲂплᲂти́сѧ , бжⷭ҇твенымъ дх҃ᲂмъ , ѻ҆́ч҃а неразлꙋче́нъ сы́и бжⷭ҇тва̀ . сла́ва . Пᲂмо́щница ми́рꙋ , и҆ застꙋ́пница є҆сѝ чл҃кѡмъ грѣ́шникᲂмъ , бг҃ᲂрᲂди́тельнице дв҃о . и҆ и҆́же вѣ́рᲂю и҆ любо́вїю прибѣга́ющимъ к̾ тебѣ̀ , премѣне́нїе спасе́нᲂе , и҆ рѣши́ло прегрѣше́нїемъ мно́гимъ . и҆ ны́нѣ . Прᲂрасти́ла є҆сѝ без̾ сѣ́мене , и҆́же пре́же всѧ́кїѧ тва́ри , прᲂзѧбе́нїе сн҃а ѻ҆́ч҃а , без̾лѣ́тно же и҆ без̾нача́льно , дх҃ᲂмъ бжⷭ҇твенымъ , бг҃ᲂрᲂди́тельнице чⷭ҇таѧ . є҆го́же пᲂдо́бїе видѣ́нїѧ всѝ пᲂчита́емъ .

пѣ́снь , ѕ҃ . і҆рмо́съ . Ѡ҆держи́ма мѧ прїимѝ милᲂсе́рде , грѣхмѝ мно́гими , и҆ припа́дающа к̾ щедро́тамъ твᲂи́мъ ꙗ҆́кѡ прᲂро́ка гдⷭ҇и , и҆ спаси́ мѧ . Дв҃ства тѧ зерца́ло сꙋ́ще , и҆ прїѧ́телище чи́сто бжⷭ҇тва̀ вᲂсхвалѧ́емъ , дв҃о бракᲂнеи҆скꙋ́снаѧ , пѣ́сньми . Бг҃ъ во ᲂу҆тро́бѣ твᲂе́й вᲂплᲂти́сѧ , без̾стра́стно и҆ ᲂу҆жа́сно бг҃ᲂневѣ́сто , ꙗ҆́кᲂже в̾ сви́тцѣ но́вѣ пи́санъ пе́рстᲂмъ ѻ҆́ч҃имъ . сла́ва . Ѻ҆чище́нїе и҆́мамы пᲂкро́въ тво́й , и҆ и҆з̾вѣ́стнꙋю наде́жꙋ и҆ застꙋпле́нїе дв҃о чⷭ҇таѧ , непᲂсрамѝ влⷣчце рабы̀ твᲂѧ̀ . и҆ ны́нѣ . Стрⷭ҇те́й неꙋста́внᲂе бѣше́нїе , пред̾ста́нїемъ твᲂи́мъ бг҃ᲂневѣ́сто , ᲂу҆ста́ви , и҆ к̾ приста́нищꙋ тишины̀ наста́ви на́съ .

Гдⷭ҇и пᲂми́лꙋй ,= гⷤ .= сла́ва , и҆ ны́нѣ . кᲂнда́къ , гла́съ , и҃ . Взбра́ннᲂй вᲂево́дѣ пᲂбѣди́тельнаѧ , ꙗ҆́кѡ и҆зба́вльшесѧ ѿ ѕлы́хъ , бл҃гᲂда́рственаѧ вᲂсписꙋ́емъ ти рабѝ твᲂѝ бцⷣе . но ꙗ҆́кѡ и҆мꙋ́щи держа́вꙋ непᲂбѣди́мꙋю , ѿ всѧ́кихъ на́съ бѣ́дъ свᲂбᲂдѝ , да зᲂве́мъ ти , ра́дꙋисѧ невѣ́сто неневѣ́стнаѧ .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Ра́дᲂсти на́шеѧ хᲂда́таица ꙗ҆ви́сѧ дв҃о , и҆ бл҃гᲂда́ти принᲂсѧ́ще вѣне́цъ любо́вїю , ра́дꙋисѧ вᲂпїе́мъ ти , блгⷭ҇ве́наѧ чⷭ҇таѧ пᲂхвалѧ́юще тѧ̀ . Гᲂра̀ ст҃а́ѧ є҆сѝ бж҃їѧ присѣ́ннаѧ . гᲂра̀ тꙋчна́ѧ пренепᲂро́чнаѧ . гᲂра̀ ᲂу҆сыре́наѧ , бжⷭ҇твеными сїѧ́нїи . гᲂра̀ в̾ не́й же бг҃ъ бл҃гᲂвᲂлѝ жи́ти . сла́ва . Пᲂбѣжда́ющїи бл҃гᲂда́ть твᲂю̀ нѣ́сть грѣ́хъ , мт҃рьне бо дерзнᲂве́нїе , и҆ во́лю и҆́маши , и҆ рѣши́ши прегрѣше́нїѧ мл҃твами сѝ , и҆ прево́диши всѧ̀ стремле́нїѧ . и҆ ны́нѣ . Ѿ трⷪ҇цы рᲂдила̀ є҆сѝ є҆ди́нᲂго бцⷣе , бы́вша непрело́жна , плᲂтьски́мъ сᲂедине́нїемъ , сꙋгꙋ́ба сꙋ́ща є҆стество́мъ . є҆го́же видѣ́нїѧ зра́къ и҆ ѻ҆́бразъ пᲂчита́емъ .

пѣ́снь , и҃ . і҆рмо́съ . Прᲂѧвле́ннагѡ на гᲂрѣ̀ ст҃ѣ́й , и҆ въ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превᲂзнᲂси́те є҆гѡ̀ во́ вѣки . Кади́льница ꙗ҆ви́сѧ прⷪ҇ркꙋ , бжⷭ҇твенагѡ ᲂу҆́глѧ сꙋ́щи , грѣхѝ ѿє́млющагѡ , бцⷣе дв҃о мт҃и бг҃а на́шегѡ . Данїи́лъ прᲂви́дѣ тѧ го́рꙋ ве́лїю бцⷣе дв҃о , и҆з̾неѧ́же честны́и ка́мень хрⷭ҇то́съ , пло́тїю ѡ҆блече́сѧ , и҆ льстѝ низ̾лᲂжѝ и҆́дᲂльскїѧ хра́мы . сла́ва . Вели́кїи ки́тъ и҆́щетъ пᲂжре́ти мѧ , лю́таго грѣха̀ , и҆ страсте́й мᲂи́хъ ѿчаѧ́нїе . но пред̾варѝ и҆ спасѝ раба̀ свᲂегѡ̀ влⷣчце . и҆ ны́нѣ . И҆́же тᲂбо́ю бесѣ́дᲂвавъ к̾ чл҃кѡмъ , бг҃ъ сы́и всѧ́ческихъ , зра́къ чл҃ка вᲂспрїѧ́тъ , є҆го́же взо́ръ пᲂчита́емъ дв҃о в̾ писа́нїихъ .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Вертᲂгра́дъ затвᲂре́нъ тѧ̀ дв҃о бцⷣе , и҆ запечатлѣ́ненъ и҆сто́чникъ , дх҃ᲂмъ бжⷭ҇твенымъ , премꙋ́дрыи в̾ пѣ́снехъ пᲂе́тъ . тѣ́мже ꙗ҆́кѡ са́дъ жи́зни , вᲂплᲂща́етсѧ хрⷭ҇то́съ . Твᲂегѡ̀ неска́заннагѡ ржⷭ҇тва̀ прᲂписꙋ́ѧ прⷪ҇ркъ , кни́гꙋ запечатлѣ́ннꙋ прᲂви́дѣ , є҆ѧ́же никто́же та́инство разꙋмѣ̀ , вᲂчл҃ченїѧ ржⷭ҇тва̀ твᲂегѡ̀ . сла́ва . Тебѣ̀ во ᲂу҆миле́нїи дш҃и мо́лимсѧ всѝ , непре́зри влⷣчце на́ши мᲂльбы̀ , но бꙋ́ди бл҃гᲂꙋвѣ́тливъ на́мъ пᲂкро́въ , и҆ мᲂли́твꙋ на́шꙋ ᲂу҆слы́ши .

и҆ ны́нѣ . Твᲂемꙋ̀ и҆ сн҃а твᲂегѡ̀ припа́даю ѡ҆бразо́мъ , и҆ мнѧ́щихсѧ пᲂчита́ти , ꙗ҆́кѡ ма́нентᲂвы лжѝ ѿмета́ю бцⷣе дв҃о . тѣ́мже правᲂсла́внѡ пѣ́снь скᲂнчева́ю .

та́же , дᲂсто́йно є҆́сть . трⷭ҇то́е , и҆ по ѻ҆́ч҃е на́шъ , кᲂнда́къ , гла́сꙋ . гдⷭ҇и пᲂми́лꙋй , м҃ . про́чее , ѡ҆бы́чно . та́же , ѿпꙋ́стъ . и҆ прᲂще́нїе .

Въ нлⷣю , пᲂлꙋ́нᲂщница , вᲂскрⷭ҇на . нача́ло ѡ҆бы́чно , ꙗ҆́кᲂже ᲂу҆ка́зано , в̾ пѧ́тᲂмъ гла́сѣ . =Кано́нъ , прест҃ѣ́й и҆ живᲂнача́льнѣй трⷪ҇цѣ . твᲂре́нїе митрᲂфа́на , патрїа́рха цр҃ѧгра́да . нᲂсѧ̀ краегране́сїе си́це , трⷪ҇це є҆ди́нице спаси́ мѧ раба̀ твᲂегѡ̀̀ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща . =запѣ́в̾ : прⷭ҇та́ѧ трⷪ҇це бж҃е на́шъ , сла́ва тебѣ̀ . Трисл҃нчнᲂмꙋ цр҃ю и҆ стрᲂи́телю , и҆ прᲂмы́сленикꙋ всемꙋ̀ , и҆ бл҃го́мꙋ є҆ди́нᲂмꙋ є҆стество́мъ сꙋ́щꙋ , и҆ є҆ди́нственꙋ и҆мꙋ́щꙋ бжⷭ҇тва̀ сла́вꙋ бг҃ᲂнача́льнꙋ , припа́даемъ пѣ́нїе трист҃о́е пᲂю́ще . Рече́нїѧ бжⷭ҇твенаѧ , и҆ прⷪ҇ро́чествїѧ ꙗ҆́же свы́ше пᲂмина́юще ꙗ҆́вѣ , бг҃ᲂнача́льнᲂе є҆стество̀ , є҆ди́нственᲂе сла́вимъ , приснᲂсꙋ́щно и҆ сᲂбез̾нача́льно , въ трїе́хъ ли́цѣхъ , ѻ҆ц҃ꙋ и҆ сн҃ꙋ и҆ дх҃ꙋ вседѣ́тельнᲂмꙋ и҆ всеси́льнᲂмꙋ . сла́ва . Сщ҃еннᲂтаи́нникъ а҆враа́мъ бы́въ , сщ҃еннᲂѡ҆бра́знѡ пре́жде твᲂрца̀ всѣ́хъ бг҃а и҆ гдⷭ҇а , трѝ в̾ сᲂста́вѣхъ прїѧ́тъ ра́дꙋѧсѧ , и҆ тре́хъ и҆пᲂста́сѣхъ держа́вꙋ є҆ди́нственꙋю разꙋмѣ̀ . и҆ нн҃ѣ . Не и҆скꙋсᲂбра́чнѡ хрⷭ҇та̀ рᲂдила̀ є҆сѝ , и҆́же по на́съ , на́съ ра́ди непремѣ́нна є҆стество́мъ пречⷭ҇таѧ , и҆ непрело́жна во ѻ҆бᲂи́хъ пребы́вша . є҆го́же мᲂлѝ непреста́ннѡ , грѣхо́мъ ми и҆ напа́стемъ дарᲂва́ти и҆збавле́нїе .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . Тебѐ непристꙋ́пнаго бг҃а , и҆ цр҃ѧ сла́вы , на прⷭ҇то́лѣ і҆са́їѧ ви́дѣ высо́цѣ , херꙋви́ми и҆ серафи́ми сла́вѧща непреста́нными пѣ́нїи , є҆ди́но нача́ло трисᲂста́внᲂе . Є҆ди́нᲂго ѿ ѻ҆ц҃а ꙗ҆́кѡ ѿ ᲂу҆ма̀ , рᲂжде́наго сло́ва , и҆ дх҃ъ прᲂи҆схᲂдѧ́щь не и҆з̾глаго́ланнѡ , пᲂслѣ́дᲂванными пᲂмышле́нїи , и҆ писа́тельными ᲂу҆че́нїи прїе́мше , є҆ди́нᲂго бг҃а трисл҃нечнаго чте́мъ . сла́ва . Сы́и нерᲂжде́нныи ѻ҆ц҃ъ , и҆ свᲂегѡ̀ сꙋщества̀ сїѧ́нїе рᲂди́въ нетлѣ́нно сн҃а , свѣ́тъ ѿ́ свѣта , и҆схо́днѣ пред̾лага́етъ сᲂесте́ственыи свѣ́тъ дх҃ъ , вседѣ́теленъ и҆ є҆динᲂче́стенъ . и҆ ны́нѣ . Хра́мъ ꙗ҆ви́ласѧ є҆сѝ чи́стъ , дв҃о мт҃и мр҃і́е , и҆́же всѧ́ческаѧ всеси́льнѡ и҆ премꙋ́дрѡ сᲂста́вльшаго хрⷭ҇та̀ , и҆ вчини́вша и҆ нᲂсѧ́щаго , є҆го́же ми́лᲂстива сᲂтвᲂри́ми , мт҃рьними сѝ мл҃твами .

Гдⷭ҇и пᲂми́лꙋй , гⷤ . сѣда́ленъ , гла́съ , и҃ . Трисл҃нчнагѡ и҆ чⷭ҇тна́гѡ бг҃ᲂнача́лїѧ си́лꙋ , вѣ́рнїи вᲂспᲂе́мъ , ꙗ҆́кѡ манᲂве́нїемъ є҆ди́нѣмъ всѧ̀ пᲂста́ви , ꙗ҆́же вы́ше ликᲂстᲂѧ́нїѧ а҆́нг҃льскаѧ , и҆ ꙗ҆́же ни́зꙋ слꙋжбᲂнача́лїѧ цр҃квамъ , є҆́же зва́ти ст҃ъ ст҃ъ ст҃ъ є҆сѝ бж҃е пребл҃гі́и , сла́ва и҆ пѣ́нїе держа́вѣ твᲂе́й . сла́ва , и҆ ны́нѣ , боⷢ҇ . И҆́же непремѣ́ннаго бг҃а ро́ждьшаѧ , премѣнѧ́емᲂе ми при́снѡ срⷣце мᲂѐ , грѣхо́мъ и҆ лѣ́нᲂстїю , прило́гми льсти́вагѡ , ꙗ҆́кѡ бл҃га ᲂу҆твердѝ , мл҃твами ти мт҃рьними , ꙗ҆́кѡ да и҆ а҆́зъ бл҃гᲂда́рнѡ зᲂвꙋ́ти , бг҃ᲂрᲂди́тельнице мр҃і́е , пᲂми́лꙋй ста́до твᲂѐ , є҆́же стѧжа̀ всенепᲂро́чнаѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Вᲂсто́къ ꙗ҆́вльшисѧ бжⷭ҇тва̀ , сꙋ́щимъ во тмѣ̀ всѣ́мъ , разᲂрѝ несвѣ́тлꙋю но́щь страсте́й . и҆ пра́вды сл҃нце вᲂсїѧ̀ , про́стѡ ᲂу҆́бѡ по сꙋществꙋ̀ , трисвѣ́тло же ли́цы , вᲂспѣва́емо и҆ сла́вимо . Серафи́мски ми ᲂу҆сты̀ вᲂспѣва́емаго , бре́нными ᲂу҆сты̀ сла́вимъ , є҆ди́нствена и҆ тро́ична гдⷭ҇а сла́вы , є҆стество́мъ и҆ сᲂста́вми , вᲂпїю́ще ти всѣ́хъ цр҃ю , свᲂи́мъ рабѡ́мъ пᲂда́ждь разли́чнымъ сᲂгрѣше́нїемъ прᲂще́нїе . сла́ва . Сᲂдержи́тельнаѧ всѣ́мъ сꙋ́щимъ неви́димаѧ , всеще́драѧ , бл҃гᲂсе́рдаѧ , чл҃кᲂлюби́ваѧ трⷪ҇це , чⷭ҇тна́ѧ и҆ бг҃ᲂнача́льнаѧ , не ѡ҆ста́ви менѐ твᲂегѡ̀ раба̀ до кᲂнца̀ , нижѐ разрꙋшѝ , и҆́же пᲂлᲂжѝ свᲂи́мъ рабѡ́мъ завѣ́тъ , за не и҆зрече́ннꙋю млⷭ҇ть . и҆ нн҃ѣ . Кра́снꙋю тѧ всечⷭ҇таѧ , є҆ди́нꙋ ѡ҆брѣ́тъ ѿ́ вѣка , і҆а́кѡвлю дᲂбро́тꙋ , вседѣ́тельнᲂе и҆ бг҃ᲂнача́льнᲂе сло́во , и҆ всели́сѧ в̾ тѧ̀ , всѐ ѡ҆бнᲂвѝ чл҃ческᲂе сꙋщество̀ . є҆го́же мᲂлѝ непреста́ннѡ , ѿ всѧ́кїѧ и҆зба́вити мѧ ско́рби .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Сᲂприснᲂсꙋ́щна трѝ ли́ца сла́вимъ , є҆ди́нᲂго же гдⷭ҇а , тѧ̀ бжⷭ҇твенᲂе є҆стество̀ , раздѣлѧ́юще про́стѡ и҆ сᲂвᲂкꙋплѧ́юще , и҆ вѣ́рнѡ вᲂпїе́мъ , є҆динᲂнача́льнаѧ трⷪ҇це ст҃а́ѧ , твᲂѧ̀ рабы̀ и҆зба́ви ѿ печа́ли . Рыда́ю ѕѣ́льнѣ за не́мᲂщь ᲂу҆ма̀ мᲂегѡ̀ , ка́кѡ нехᲂтѧ̀ страждꙋ̀ , нево́льнᲂе вᲂи́стинꙋ и҆змѣне́нїе . сегѡ̀ ра́ди вᲂпїю̀ . живᲂнача́льнаѧ трⷪ҇це ст҃а́ѧ , въ стᲂѧ́нїи мѧ до́брыхъ ᲂу҆чинѝ . сла́ва . Дрема́нїемъ ѡ҆тѧгче́на мѧ грѣхо́внымъ , и҆ в̾несе́на к̾ сме́ртнᲂмꙋ снꙋ̀ , ꙗ҆́кѡ чл҃кᲂлюби́ваѧ и҆ пребл҃га́ѧ , и҆ всеми́лᲂстиваѧ бг҃ᲂнача́льнаѧ трⷪ҇це ст҃а́ѧ , ᲂу҆ще́дри и҆ вᲂз̾дви́гни мѧ . и҆ нн҃ѣ . Мт҃и дв҃о ѻ҆трᲂкᲂви́це пречⷭ҇таѧ , всенепᲂро́чнаѧ , бг҃ᲂра́дᲂваннаѧ , твᲂи́ми мᲂли́твами , сн҃а свᲂегѡ̀ бг҃а и҆ гдⷭ҇а млⷭ҇тива сᲂтвᲂрѝ мнѣ̀ , и҆ страсте́й прегрѣше́нїи , твᲂегѡ̀ раба̀ и҆зба́ви в̾ско́рѣ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Нбⷭ҇ныхъ ᲂу҆мо́въ чинᲂнача́лїю пᲂдо́бѧщесѧ , є҆динᲂнача́льнаѧ всѣ́хъ трⷪ҇це пресꙋ́щнаѧ , трист҃ы́ми пѣ́сньми тѧ пѣснᲂсло́вимъ , бре́нными на́шими ᲂу҆сты̀ . И҆́же по ѻ҆́бразꙋ свᲂемꙋ̀ чл҃ка сᲂзда́вшемꙋ , и҆ ѿ несꙋ́щихъ всегѡ̀ премꙋ́дре сᲂста́вльшемꙋ , бг҃ꙋ трисᲂста́внᲂмꙋ пᲂклᲂнѧ́юсѧ , и҆ чтꙋ̀ и҆ пᲂю̀ и҆ велича́ю тѧ . сла́ва . Вседержи́телю бж҃е , и҆ є҆ди́ныи недᲂвѣ́дᲂмыи , всели́сѧ в̾ мѧ̀ за не и҆зрече́ннꙋю ми́лᲂсть , трисл҃нчныи влⷣко , ѡ҆зари́ мѧ и҆ вразꙋмѝ , ꙗ҆́кѡ бл҃гᲂꙋтро́бенъ . и҆ ны́нѣ . Хра́мъ пᲂказа́сѧ бг҃ꙋ невмѣсти́мᲂмꙋ всенепᲂро́чнаѧ , хра́мъ и҆ менѐ пᲂкажѝ тᲂгѡ̀ бл҃гᲂда́ти бжⷭ҇твеныѧ , всест҃а́ѧ влⷣчце твᲂи́ми мᲂльба́ми , и҆ сᲂблюдѝ невреди́ма .

Гдⷭ҇и пᲂми́лꙋй , гⷤ . сѣда́ленъ , гла́съ , и҃ . Ѻ҆ц҃а без̾нача́льна вѣ́рнїи , и҆ сн҃а сᲂбез̾нача́льна , и҆ дх҃а бжⷭ҇твенаго , вᲂи́стинꙋ и҆спᲂвѣ́даемъ , несмѣ́снꙋ непрело́жнꙋ и҆ нераздѣ́льнꙋ трⷪ҇цꙋ , про́стꙋ ст҃ꙋ и҆ сᲂесте́ственꙋю , пѣснᲂсло́вѧще со а҆́нг҃лы , ст҃ъ є҆сѝ ѻ҆́ч҃е и҆ сн҃е съ дх҃ᲂмъ всест҃ы́мъ и҆ честны́мъ , пᲂми́лꙋй и҆́хже со́здалъ є҆сѝ по ѻ҆́бразꙋ свᲂемꙋ̀ влⷣко . сла́ва , и҆ ны́нѣ , боⷢ҇ . Бл҃гᲂдари́мъ тѧ при́снѡ дв҃о бцⷣе , и҆ велича́емъ вѣ́рнѡ и҆ пᲂклᲂнѧ́емсѧ , вᲂспѣва́юще ржⷭ҇тво̀ твᲂѐ ѡ҆бра́дᲂваннаѧ , вᲂпїе́мъ непреста́ннѡ , спасѝ на́съ дв҃о всемлⷭ҇тиваѧ ꙗ҆́кѡ бл҃га̀ , и҆ бѣсо́вскагѡ и҆схи́ти сᲂпрѣ́нїѧ стра́шнагѡ , в̾ ча́съ и҆спыта́нїѧ , да непᲂсра́млени бꙋ́демъ рабѝ твᲂѝ .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Премꙋ́дрᲂстїю не и҆з̾гл҃аннᲂю тѝ , и҆ пꙋчи́нᲂю бл҃гᲂсти , тꙋ́не твᲂегѡ̀ раба̀ пᲂми́лᲂванна пᲂкажи́ мѧ , и҆ ны́нѣ ꙗ҆́кᲂже дре́вле и҆змѝ , и҆ и҆зба́ви трⷪ҇це є҆ди́нице бж҃е , ѿ грѣхо́въ и҆ страсте́й . двⷤа . сла́ва . Оу҆́ме , нерᲂжде́нныи ѻ҆́ч҃е , и҆ сло́во ро́ждьшеесѧ ѿ негѡ̀ , и҆ дꙋ́ше бжⷭ҇твеныи , непреста́ннѡ и҆схо́денъ сы́и , бж҃е є҆динᲂнача́льне , и҆ трисл҃нчне пᲂю̀ тебѣ̀ , бл҃гᲂслᲂве́нъ бг҃ъ ѻ҆ц҃ъ на́шихъ . и҆ нн҃ѣ . Оу҆мертви́хсѧ грѣхо́внымъ ꙗ҆́дᲂмъ и҆ па́дъ , и҆ притека́ю к̾ тебѣ̀ вѣ́рᲂю пречⷭ҇таѧ , ро́ждьшей нача́льника жи́зни , твᲂи́ми мл҃твами раба̀ свᲂегѡ̀ ѡ҆живѝ , и҆ ѿ напа́стей и҆ страсте́й и҆зба́ви , є҆ди́на чⷭ҇таѧ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Свѣ́тъ сы́и незахᲂди́мъ , трисїѧ́ненъ и҆ трисл҃нчныи , и҆ є҆динᲂнача́ленъ , и҆ є҆динᲂдержа́венъ , про́стъ , трⷪ҇це пресꙋ́щнаѧ , и҆ вседержи́телю гдⷭ҇и , нн҃ѣ те́мнᲂе и҆ ѡ҆мраче́нᲂе мѝ срⷣце ѡ҆зарѝ , и҆ пᲂкажѝ свѣтᲂза́рнѡ и҆ свѣтᲂно́снѡ , пѣ́ти тѧ̀ и҆ сла́вити вѣ́рнѡ во всѧ̀ вѣ́ки . Сщ҃е́нными крилы̀ , серафи́ми бжⷭ҇твенїи , ли́ца и҆ но́ги бл҃гᲂгᲂвѣ́йнѡ пᲂкрыва́ютъ , сла́вы нетерпѧ́ще , недᲂмы́сленыѧ дᲂбро́ты твᲂеѧ̀ , бг҃ᲂнача́льнаѧ , є҆динᲂнача́льнаѧ , без̾нача́льнаѧ трⷪ҇це прест҃а́ѧ . ѻ҆ба́че мы̀ вᲂспѣва́ти тѧ дерза́емъ , и҆ сла́вити во всѧ̀ вѣ́ки . сла́ва . Гдⷭ҇ᲂнача́льнꙋю без̾нача́льнꙋю , всеси́льнꙋю и҆ всебл҃гꙋ́ю , сᲂвершенᲂнача́льнꙋю бл҃гᲂда́тельнꙋю , без̾предѣ́льнꙋ , винꙋ̀ непᲂви́ннꙋю , твᲂри́тельнꙋю , приснᲂсꙋ́щнꙋю , прᲂмы́сленꙋю , и҆ спаси́тельнꙋю всѣ́хъ , и҆ є҆ди́ницꙋ по сꙋществꙋ̀ , и҆ трⷪ҇цꙋ ли́цы , сла́влю тѧ бж҃е мо́й вѣ́рнѡ , во всѧ̀ вѣ́ки . и҆ ны́нѣ . На землѝ вᲂсїѧ̀ невече́рнее сл҃нце , и҆́же ѿ твᲂегѡ̀ дв҃ческагѡ ржⷭ҇тва̀ пречⷭ҇таѧ влⷣчце , и҆ челᲂвѣ́ки премѣнѝ , ѿ и҆́дᲂльскагѡ и҆ лꙋка́вагѡ те́мнагѡ гнѣ́ва . тѣ́мже и҆ ны́нѣ мѧ па́че тᲂгѡ̀ бг҃ᲂнача́лїѧ ѡ҆зарѝ лꙋча́ми , и҆ сᲂблюдѝ свᲂегѡ̀ раба̀ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Всѧ́ческихъ цр҃ѧ , и҆ вседѣ́тельницꙋ , пренача́льнᲂе є҆стество̀ , прелѣ́тнᲂе живᲂнача́лїе , бл҃гᲂꙋтро́бнꙋю , чл҃кᲂлю́бнꙋю бл҃гꙋ́ю , без̾нача́льнꙋю трⷪ҇цꙋ , тѧ̀ ны́нѣ славᲂсло́вимъ грѣ́шнїи , прᲂще́нїе прᲂсѧ́ще , ми́рᲂви смире́нїе , и҆ цр҃квамъ є҆динᲂмы́слїе . два́жды . сла́ва . Є҆ди́но гдⷭ҇ьство трисїѧ́ннᲂе , є҆ди́нственᲂе бг҃ᲂнача́лїе трисл҃нечнᲂе , пѣвцы̀ прїимѝ твᲂѧ̀ бл҃гᲂпᲂдо́бнѡ , и҆ прегрѣше́нїи и҆зба́ви , и҆ напа́стей , и҆ ѕлы́хъ начина́нїи , и҆ в̾ско́рѣ ми́ръ пᲂда́ждь чл҃кᲂлю́бнѡ , и҆ цр҃квамъ сᲂедине́нїе . =и҆ ны́нѣ . во́ =чрево дв҃че хрⷭ҇тѐ сп҃се мо́й все́льсѧ , и҆ ꙗ҆ви́лсѧ є҆сѝ ми́рꙋ свᲂемꙋ̀ , бг҃ᲂмꙋ́жнѡ , непрело́жнѡ , неслїѧ́ннѡ вᲂи́стинꙋ , и҆ ѡ҆бѣща́сѧ всегда̀ с̾ твᲂи́ми рабы̀ бы́ти ꙗ҆́вѣ , тѣ́мже тебѐ ро́ждьшїѧ мл҃твами , ми́ръ цр҃кви твᲂе́й ᲂу҆стро́й .

пᲂсе́м̾ , припѣ́вы , григо́рїѧ синаи́та . дᲂсто́йно є҆́сть бг҃ᲂлѣ́пнѡ є҆́же сла́вити тѧ̀ трⷪ҇це ст҃а́ѧ . и҆ мл҃тва , всемᲂгꙋ́щаѧ и҆ живᲂтвᲂрѧ́щаѧ ст҃а́ѧ трⷪ҇це . пи́сано , на пᲂслѣдѝ в̾ кни́зѣ се́й .

Въ нлⷣю на ᲂу҆́тренѣй слꙋ́жбѣ . нача́ло и҆ всѐ вᲂслѣ́дᲂванїе твᲂри́мъ , ꙗ҆́кᲂже ᲂу҆ка́зано въ є҃ мъ гла́сѣ . та́же , по є҆ѯа̀ ѱл҃мѣ́хъ . на бг҃ъ гдⷭ҇ь . трᲂпа́рь , вᲂскрⷭ҇нъ . гла́съ , и҃ . Свы́шнихъ сни́де милᲂсе́рде , и҆ пᲂгребе́нїе прїѧ́тъ тридне́вно , да на́съ свᲂбᲂди́ши ѿ страсте́й . живᲂтѐ и҆ вᲂскрⷭ҇нїе на́ше сла́ва тебѣ̀ . двⷤа . сла́ва , ст҃о́мꙋ , и҆́же тᲂгѡ̀ днѐ .= и҆ ны́нѣ , боⷢ҇ . по́ гласꙋ трᲂпарѧ̀ ст҃а́гѡ . =а҆́ще ли не и҆́мать , то̀ гл҃емъ : сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ ми́лᲂстиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ за ны̀ , и҆ спасѝ сп҃се на́шъ лю́ди сᲂгрѣ́шшїѧ .

по а҃ , стихᲂло́гїи . сѣда́ленъ , вᲂскрⷭ҇нъ . гла́съ , и҃ . Вᲂскрⷭ҇лъ є҆сѝ и҆з̾ ме́ртвыхъ живᲂтѐ всѣ́хъ , и҆ а҆́нг҃лъ свѣ́телъ жена́мъ вᲂпїѧ́ше , преста́ните ѿ сле́зъ , и҆ а҆пⷭ҇лѡмъ бл҃гᲂвѣсти́те , вᲂзᲂпі́йте пᲂю́ще , ꙗ҆́кѡ вᲂскр҃се хрⷭ҇то́съ бг҃ъ , бл҃гᲂи҆зво́ливыи спастѝ , ꙗ҆́кѡ бг҃ъ ро́дъ чл҃ческїи . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Вᲂскрⷭ҇лъ є҆сѝ и҆з̾ ме́ртвыхъ живᲂтѐ всѣ́хъ , и҆ а҆́нг҃лъ свѣ́телъ жена́мъ вᲂпїѧ́ше , преста́ните ѿ сле́зъ , и҆ а҆пⷭ҇лѡмъ бл҃гᲂвѣсти́те , вᲂзᲂпі́йте пᲂю́ще , ꙗ҆́кѡ вᲂскр҃се хрⷭ҇то́съ бг҃ъ , бл҃гᲂи҆зво́ливыи спастѝ , ꙗ҆́кѡ бг҃ъ ро́дъ чл҃ческїи . сла́ва , и҆ ны́нѣ , боⷢ҇ . Ра́дꙋисѧ ꙗ҆́же ѿ а҆́нг҃ла ра́дᲂсть ми́рꙋ прїе́мши . ра́дꙋисѧ ро́ждьшаѧ твᲂрца̀ тва́ри . ра́дꙋисѧ спᲂдо́бльшаѧсѧ бы́ти мт҃и хрⷭ҇тꙋ̀ бг҃ꙋ .

по в҃ , стихᲂло́гїи , сѣда́ленъ . гла́съ , и҃ . Чл҃цы сп҃се гро́бъ тво́й зна́менаша , и҆ а҆́нг҃лъ ка́мень ѿ две́рей ѿвалѝ , жены́ же зрѧ́хꙋ вᲂста́вша ѿ ме́ртвыхъ , и҆ ты́ѧ бл҃гᲂвѣсти́ша ᲂу҆ченико́мъ твᲂи́мъ в̾ сїѡ́нѣ , ꙗ҆́кѡ вᲂскр҃се живо́тъ всѣ́хъ , и҆ разрꙋши́шасѧ ᲂу҆́зы сме́ртныѧ , гдⷭ҇и сла́ва тебѣ̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . Чл҃цы сп҃се гро́бъ тво́й зна́менаша , и҆ а҆́нг҃лъ ка́мень ѿ две́рей ѿвалѝ , жены́ же зрѧ́хꙋ вᲂста́вша ѿ ме́ртвыхъ , и҆ ты́ѧ бл҃гᲂвѣсти́ша ᲂу҆ченико́мъ твᲂи́мъ в̾ сїѡ́нѣ , ꙗ҆́кѡ вᲂскр҃се живо́тъ всѣ́хъ , и҆ разрꙋши́шасѧ ᲂу҆́зы сме́ртныѧ , гдⷭ҇и сла́ва тебѣ̀ .

=сла́ва , и҆ ны́нѣ , боⷢ҇ . Ѡ҆ =тебѣ̀ ра́дꙋетсѧ ѡ҆бра́дᲂваннаѧ всѧ́каѧ тва́рь , а҆рха́нг҃льскїи сᲂбо́ръ , и҆ чл҃ческїи ро́дъ . ѽ сщ҃е́ннаѧ цр҃кви , и҆ раю̀ слᲂве́сныи . дв҃ьственаѧ пᲂхвало̀ , и҆з̾ неѧ́ же бг҃ъ вᲂплᲂти́сѧ , и҆ младе́нецъ бы́сть , и҆́же пре́жде вѣ́къ сы́и бг҃ъ на́шъ . лᲂжесна́ бо твᲂѧ̀ прⷭ҇то́лъ сᲂтвᲂрѝ , и҆ твᲂе́ же чре́во прᲂстра́ннѣйши нб҃съ сᲂдѣ́ла дв҃це . ѡ҆ тебѣ̀ ра́дꙋетсѧ ѡ҆бра́дᲂваннаѧ всѧ́каѧ тва́рь , сла́ва тебѣ̀ .

та́же , кафи́сма : бл҃же́ни непᲂро́чнїи .= пᲂсе́м̾ , трᲂпарѝ : а҆́нг҃льскїи сᲂбо́ръ . пи́саны , в̾ кᲂнцѣ̀ кни́ги сеѧ̀ . =та́же , і҆єре́й глаго́летъ , є҆ктенїю̀ ма́лꙋю . по вᲂз̾гла́сѣ , и҆пако́й . Мѷрѡно́сицы живᲂда́внᲂмꙋ пред̾стᲂѧ́ще гро́бꙋ , влⷣкꙋ и҆ска́хꙋ в̾ ме́ртвыхъ без̾сме́ртнаго . и҆ ра́дᲂсть бл҃гᲂвѣ́щенїѧ ѿ а҆́нг҃ла прїе́мше , а҆пⷭ҇лѡмъ вᲂз̾вѣща́хꙋ , вᲂскр҃се хрⷭ҇то́съ бг҃ъ , пᲂдаѧ̀ ми́рᲂви ве́лїю млⷭ҇ть .

степе́нны . гла́съ , и҃ . а҆нтифѡ́нъ , а҃ . пᲂе́мъ по двⷤа . Ѿ ю҆́нᲂсти мᲂеѧ̀ вра́гъ мѧ̀ и҆скꙋша́етъ , и҆ сластьмѝ пали́тъ мѧ , а҆́зъ же надѣ́ѧсѧ на тѧ̀ гдⷭ҇и , пᲂбѣжда́ю сегѡ̀ . Ненави́дѧщїи сїѡ́на да бꙋ́дꙋтъ ᲂу҆́бѡ , пре́жде вᲂстᲂрже́нїѧ ꙗ҆́кѡ трава̀ , с̾сѣче́тъ бо хрⷭ҇то́съ вы́и и҆́хъ , ᲂу҆сѣче́нїемъ мꙋ́къ . Ст҃ы́мъ дх҃ᲂмъ є҆́же жи́ти всѧ́ческимъ , свѣ́тъ ѿ́ свѣта бг҃ъ вели́къ , со ѻ҆ц҃е́мъ бо пᲂе́мъ є҆гѡ̀ и҆ съ сло́вᲂмъ .

а҆нтифо́нъ , в҃ . Вᲂзва́хъ к̾ тебѣ̀ гдⷭ҇и , вᲂнмѝ , приклᲂни́ ми ᲂу҆́хо твᲂѐ вᲂпїю́щꙋ , и҆ ѡ҆чи́сти пре́жде да́же нево́змеши менѐ ѿ сю́дꙋ . =на́ =гдⷭ҇а и҆мѣ́ѧ наде́ждꙋ , не ᲂу҆страши́тсѧ тᲂгда̀ , є҆гда̀ ѻ҆гне́мъ всѧ̀ сꙋди́ти и҆́мать и҆ мꙋ́кᲂю . Ст҃ы́и дх҃ъ бг҃ᲂсло́вїѧ є҆ди́ница трист҃а́ѧ , ѻ҆ц҃ъ бо без̾нача́ленъ ѿ него́же рᲂди́сѧ сн҃ъ без̾лѣ́тенъ , и҆ дх҃ъ сᲂпрⷭ҇то́ленъ , со ѡ҆бра́зно ѿ ѻ҆ц҃а спрᲂсїѧ́ша .

а҆нтифо́нъ , г҃ . Срⷣце мᲂѐ , стра́хᲂмъ твᲂи́мъ да пᲂкры́етсѧ , смиреннᲂмꙋ́дрствꙋющи , да невᲂзне́ссѧ ѿпаде́тъ ѿ тебѐ всеще́дре . Къ мт҃ри свᲂе́й землѝ , ѿхᲂдѧ́и всѧ́къ , а҆́бїе разрѣша́етсѧ прїѧ́ти мꙋ́ки , и҆лѝ по́чести пᲂжи́вшихъ . Ст҃ы́мъ дх҃ᲂмъ , всѧ́къ кто̀ бжⷭ҇твеннѣ ви́дитъ и҆ пред̾гл҃етъ , чꙋдᲂдѣ́етъ вы́шнѧѧ , в̾ трїе́хъ є҆ди́нагѡ бг҃а пᲂѧ̀ . а҆́ще бо и҆ трисїѧ́нно , є҆ди́но нача́ло бжⷭ҇твеннᲂе .

а҆нтифо́нъ , д҃ . Сѐ что̀ дᲂбро̀ , и҆лѝ что̀ красно̀ , но є҆́же жи́ти бра́тїе в̾ кꙋ́пѣ . ѡ҆ се́мъ бо гдⷭ҇ь ѡ҆бѣща̀ живо́тъ вѣ́чныи . Ри́зы є҆гѡ̀ и҆́же кри́ны се́льныѧ , ми́рᲂви пᲂвелѣва́етъ ничи́мже пещи́сѧ . Ст҃ы́мъ дх҃ᲂмъ , є҆динᲂви́днᲂю вино́ю всѧ̀ сᲂдержа́и мирᲂпᲂда́тельнѡ , бг҃ъ бо се́й є҆́сть , ѻ҆ц҃ꙋ́ же и҆ сн҃ꙋ є҆динᲂсꙋ́щенъ , и҆ гдⷭ҇ь .

і҆єре́й , глаго́летъ : во́нмемъ .= ми́ръ всѣ́мъ . премꙋ́дрᲂсть . прᲂки́менъ , ѱл҃о́мъ , дв҃дᲂвъ . Вᲂцр҃и́тсѧ гдⷭ҇ь во́ вѣки , бг҃ъ тво́й сїѡ́не в̾ ро́дъ и҆ ро́дъ . =сти́хъ : хвалѝ дш҃е мᲂѧ̀ гдⷭ҇а , вᲂсхвалю̀ гдⷭ҇а в̾ живᲂтѣ̀ мᲂе́мъ .

і҆єре́й : ꙗ҆́кѡ ст҃ъ є҆сѝ гдⷭ҇и бж҃е . та́же : Всѧ́ко дыха́нїе да хва́литъ гдⷭ҇а . сти́хъ : хвали́те бг҃а во ст҃ы́хъ є҆гѡ̀ , хвали́те є҆гѡ̀ во ᲂу҆тверже́нїи си́лъ є҆гѡ̀ . і҆єре́й : и҆ =ѡ҆спᲂдо́битисѧ на́мъ дᲂсто́йнѡ . =пᲂе́мъ : Гдⷭ҇и пᲂми́лꙋй , гⷤ . і҆єре́й : премꙋ́дрᲂсть , про́сти ᲂу҆слы́шимъ ст҃а́гѡ . і҆єре́й , гл҃етъ , є҆ѵⷢ҇а́лїе рѧ́дꙋ . вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . пᲂми́лꙋй мѧ бж҃е . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .= и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ . =та́же , пᲂми́лꙋй мѧ бж҃е по вели́цѣй млⷭ҇ти твᲂе́й по мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й . стⷯра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю млⷭ҇ть . і҆єре́й , гл҃етъ : спасѝ бж҃е лю́ди . пᲂе́мъ : Гдⷭ҇и пᲂми́лꙋй , ві҃ . і҆єре́й , вᲂз̾гла́съ : ми́лᲂстїю и҆ щедро́тами . Кано́нъ , вᲂскрⷭ҇нъ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща . запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Всеси́льнꙋ хрⷭ҇то́вꙋ бжⷭ҇твꙋ̀ ка́кѡ недиви́мсѧ , ѿ страсте́й ᲂу҆́бѡ всѣ́мъ вѣ́рнымъ , без̾стра́стїе и҆ нетлѣ́нїе тᲂча́ща . ѿ ребра́ же ст҃а́гѡ и҆сто́чникъ без̾сме́ртныи и҆ска́пающа и҆ живо́тъ и҆́з̾ грᲂба приснᲂсꙋ́щныи . Ꙗ҆́кѡ бл҃гᲂлѣ́пенъ жена́мъ а҆́нг҃лъ ны́нѣ ꙗ҆ви́сѧ , и҆ свѣ́тлыѧ нᲂсѧ̀ є҆сте́ственыѧ ѻ҆́бразы , невеще́ственыѧ чистᲂты̀ . зра́кᲂмъ же вᲂзвѣща́ѧ свѣ́тъ вᲂскрⷭ҇нїѧ , вᲂпїѧ̀ вᲂскр҃се гдⷭ҇ь . боⷢ҇ . Пресла́внаѧ вᲂз̾гл҃ашасѧ ѡ҆ тебѣ̀ в̾ ро́дѣхъ рᲂдо́въ , ꙗ҆́же бж҃їе сло́во во́ чревѣ вмѣсти́вши , чи́ста же пребы́вши бцⷣе мр҃і́е . тѣ́мже тѧ всѝ пᲂчита́емъ , сꙋ́щее с̾ бг҃ᲂмъ застꙋпле́нїе на́ше .

Дрꙋгі́и кано́нъ , крⷭ҇тᲂвᲂскрⷭ҇нъ . і҆рмо́съ . Во́дꙋ прᲂше́дъ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю . Взѧта̀ бы́ша врата̀ бᲂлѣ́зненаѧ , и҆ ᲂу҆страши́шасѧ а҆́дъстїи вра́тарїе , зрѧ́ще в̾ преи҆спо́днѧѧ сᲂше́дшаго , и҆́же всѧ́кᲂгѡ превы́ше є҆стества̀ . Оу҆диви́шасѧ чи́ни а҆́нг҃льстїи , зрѧ́ще на прⷭ҇то́лѣ бжⷭ҇твенѣмъ пᲂсажено̀ ѿпа́дшее є҆стество̀ чл҃ческᲂе , затвᲂре́нᲂе в̾ преи҆спо́днихъ землѝ . боⷢ҇ . Чи́ни тѧ̀ а҆́нг҃льстїи , и҆ челᲂвѣ́честїи , без̾невѣ́стнаѧ мт҃и хва́лѧтъ непреста́ннѡ , зижди́телѧ бо и҆́хъ , ꙗ҆́кѡ млⷣнца на рꙋкꙋ̀ свᲂе́ю нᲂси́ла є҆сѝ .

и҆́нъ кано́нъ , прест҃ѣ́й бцⷣѣ . і҆рмо́съ . Пᲂе́мъ гдⷭ҇ви . запѣ́въ : прест҃а́ѧ гжⷭ҇е бцⷣе спасѝ на́съ . Прест҃а́ѧ бцⷣе , ꙗ҆́же вᲂпло́щшеесѧ прⷭ҇нᲂсꙋ́щнᲂе и҆ пребжⷭ҇твенᲂе сло́во , па́че є҆стества̀ ро́ждьши пᲂе́мъ тѧ . Гро́здъ тѧ живᲂно́сенъ и҆ всекра́сныи . дв҃аѧ хрⷭ҇тѐ пᲂрᲂдила̀ є҆́сть , и҆́же всемꙋ̀ ми́рꙋ ка́плюща сла́дᲂсть спасе́нїѧ . Ро́дъ а҆да́мскїи ко и҆́же па́че ᲂу҆ма̀ бл҃же́нствꙋ , тᲂбо́ю вᲂз̾веде́ныи бцⷣе дᲂсто́йнѡ сла́витъ тѧ .

и҆́нъ , кано́нъ , в̾ минѣ́и , ст҃о́мꙋ .

катава́сїѧ , по ᲂу҆ста́вꙋ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . Ѻ҆сꙋжде́наго а҆да́ма вкꙋше́нїемъ грѣха̀ , пло́ти твᲂеѧ̀ спаси́тельнᲂю стра́стїю ѡ҆правда́лъ є҆сѝ хрⷭ҇тѐ . са́мъ бо сы́и непᲂви́ненъ сме́ртна го и҆скꙋ́са бы́лъ є҆сѝ без̾грѣ́шне . Вᲂскрⷭ҇нїѧ свѣ́тъ вᲂсїѧ̀ , сꙋ́щимъ во тмѣ̀ и҆ сѣ́ни сме́ртнѣй сѣдѧ́щимъ , бг҃ъ мо́й і҆с҃ъ , и҆ свᲂи́мъ бжⷭ҇тво́мъ крѣ́пкаго свѧза́въ , и҆ сᲂсꙋ́ды є҆гѡ̀ расхити́лъ є҆́сть . боⷢ҇ . Херꙋви́мъ и҆ серафи́мъ , превы́шши ꙗ҆ви́ласѧ є҆сѝ бцⷣе . ты́ бо є҆ди́на прїѧ́тъ невмѣсти́маго бг҃а , во свᲂе́мъ чре́вѣ несквѣ́рнаѧ . тѣ́мже тѧ вѣ́рнїи всѝ чⷭ҇таѧ пѣ́сньми ᲂу҆бл҃жа́емъ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Ѿве́ргшагᲂсѧ пре́жде за́пᲂвѣди гдⷭ҇и , и҆з̾ринᲂве́на мѧ ѿ тебѐ сᲂтвᲂри́лъ є҆сѝ , в̾ него́ же вᲂѡ҆брази́сѧ . пᲂслꙋша́нїемъ же наказа́въ , к̾ себѣ̀ всели́лъ є҆сѝ распѧ́тїѧ ра́ди . Въ премꙋ́дрᲂсти всѧ̀ прᲂꙋвѣ́дѣвъ со́здалъ є҆сѝ , и҆ ра́зꙋмᲂмъ вᲂдрꙋзи́въ преи҆спо́днѧѧ . не неспᲂдо́билъ є҆сѝ схᲂжде́нїемъ тѝ сло́ве бж҃їи , вᲂскр҃си́ти сꙋ́щаго и҆́же по ѻ҆́бразꙋ свᲂемꙋ̀ . боⷢ҇ . Всели́всѧ в̾ дв҃цꙋ тѣле́снѣ гдⷭ҇и , и҆ ꙗ҆ви́лсѧ є҆сѝ чл҃кѡмъ , ꙗ҆́кᲂже пᲂдᲂба́етъ ви́дѣти тебѐ . є҆ѧ́же и҆ пᲂказа́лъ є҆сѝ ꙗ҆́кѡ и҆́стиннꙋю бцⷣꙋ , и҆ вѣ́рнымъ пᲂмо́щницꙋ , є҆ди́нѣ чл҃кᲂлю́бче .

и҆́нъ , і҆рмо́съ . Ты̀ є҆сѝ ᲂу҆тверже́нїе . Да́ждь на́мъ по́мᲂщь твᲂи́ми мᲂли́твами всечи́стаѧ , прило́ги разрꙋша́ющи лю́тыхъ ѡ҆б̾стᲂѧ́нїи . Є҆́ввѣ пра́мт҃ри ты̀ и҆справле́нїе бы́сть , нача́льника жи́зни ми́рꙋ хрⷭ҇та̀ , бцⷣе ро́ждьши . Препᲂѧ́ши мѧ си́лᲂю свы́ше всечи́стаѧ , ꙗ҆́же вᲂи́стиннꙋ бг҃а ро́ждьши пло́тїю , ѻ҆́ч҃ꙋю сᲂста́внꙋю си́лꙋ . і҆єре́й гл҃етъ , є҆ктенїю̀ ма́лꙋю . та́же : кᲂнда́къ , и҆ и҆́кᲂсъ , и҆ сѣда́ленъ , в̾ минѣ́и , ст҃о́мꙋ . а҆́ще є҆́сть .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Ты̀ ме́рзска мѧ сꙋ́ща ѕѣлѡ̀ вᲂз̾люби́лъ є҆сѝ . ты̀ и҆стᲂща́нїемъ стра́ннымъ сни́де на́ землю , бл҃гᲂꙋтро́бне сп҃се , пᲂслѣ́днѧго ми дᲂсажде́нїѧ не ѿве́ргсѧ . и҆ пребы́въ на высᲂтѣ̀ пречⷭ҇тыѧ твᲂеѧ̀ сла́вы , пре́жде без̾че́ствᲂванаго прᲂсла́вилъ є҆сѝ . Кто̀ зрѧ̀ влⷣко ны́нѣ недиви́тсѧ , ра́ди стрⷭ҇те́й сме́рть разᲂрѧ́емꙋ , крⷭ҇то́мъ же бѣжа́щꙋ тлѣ́нїю ; и҆ сме́рти ра́ди , а҆́дᲂво бᲂга́тство и҆стᲂщава́емо бжⷭ҇твенᲂю си́лᲂю , тебѐ распѧ́таго . чꙋ́дно дѣ́ло чл҃кᲂлю́бче . боⷢ҇ . Ты̀ вѣ́рнымъ пᲂхвала̀ є҆сѝ без̾невѣ́стнаѧ . ты̀ пред̾ста́тельница . ты̀ и҆ прибѣ́жище хрⷭ҇тїа́нѡмъ , стѣна̀ и҆ приста́нище . к̾ сы́нꙋ бо свᲂемꙋ̀ мᲂльбы̀ но́сиши всенепᲂро́чнаѧ , и҆ спаса́еши ѿ бѣ́дъ , и҆́же вѣ́рᲂю и҆ любо́вїю бцⷣꙋ чи́стꙋю тебѐ вѣ́дꙋщихъ .

и҆́нъ , і҆рмо́съ . Оу҆слы́шахъ гдⷭ҇и смᲂтре́нїѧ . На крⷭ҇тѣ́ тѧ пригвᲂзди́ша , закᲂнᲂпрестꙋ́пныхъ дѣ́ти хрⷭ҇тѐ бж҃е , и҆́мже спа́слъ є҆сѝ ꙗ҆́кѡ милᲂсе́рдъ , сла́вѧщихъ твᲂѧ̀ страда́нїѧ . Вᲂскр҃съ ѿ́ грᲂба , всѧ̀ сᲂвᲂскр҃си́лъ є҆сѝ сꙋ́щїѧ во а҆́дѣ ме́ртвыѧ , и҆ прᲂсвѣти́лъ є҆сѝ ꙗ҆́кѡ бл҃гᲂꙋтро́бенъ , сла́вѧщихъ твᲂѐ вᲂскрⷭ҇нїе . боⷢ҇ . Бг҃а є҆го́же рᲂдила̀ є҆сѝ пречⷭ҇таѧ мр҃і́е , тᲂгѡ̀ мᲂлѝ дарᲂва́ти рабѡ́мъ твᲂи́мъ , сᲂгрѣше́нїи прᲂще́нїе .

и҆́нъ , і҆рмо́съ , то́йже . И҆́же кла́съ вᲂзрасти́вши живᲂтво́рныи , неѡ҆ра́ннаѧ ни́ва , даю́щаго ми́рᲂви жи́знь , бцⷣе спаса́й пᲂю́щихъ тѧ . Бцⷣꙋ тѧ всечⷭ҇таѧ , прᲂсвѣ́щшїисѧ всѝ зна́емъ , сл҃нце бо пра́вды рᲂдила̀ є҆сѝ прⷭ҇нѡ дв҃о . Ѡ҆чище́нїе да́рꙋй на́шимъ невѣ́дѣнїемъ , ꙗ҆́кѡ без̾грѣ́шенъ , и҆ ᲂу҆мирѝ ми́ръ сво́й бж҃е , мл҃твами ро́ждьшїѧ тѧ̀ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Ѡ҆дѣ́ѧтисѧ претерпѣ̀ в̾ багрѧни́цꙋ пᲂрꙋга́емъ , пре́жде страсте́й твᲂи́хъ сп҃се , первᲂзда́ннаго пᲂкрыва́ѧ без̾ѡ҆бра́знᲂе ѡ҆бнаже́нїе , и҆ на́гъ пригвᲂзди́сѧ на крⷭ҇тѣ̀ пло́тїю , сᲂвлача́ѧ хрⷭ҇тѐ ѻ҆дѣѧ́нїе ᲂу҆мерщве́нїѧ . Ѿ =пе́рсти сме́ртныѧ па́дшее ми па́ки на́здалъ є҆сѝ сꙋщество̀ , вᲂскр҃съ и҆з̾ ме́ртвыхъ , несᲂстарѣ́ющесѧ хрⷭ҇тѐ сᲂтвᲂри́лъ є҆сѝ , ꙗ҆́вль па́ки ꙗ҆́кᲂже ца́рскїи ѻ҆́бразъ , нетлѣ́нїѧ свѣ́тᲂмъ блиста́ющь . =боⷢ҇ . Мт҃рьне дерзнᲂве́нїе , є҆́же к̾ сн҃ꙋ свᲂемꙋ̀ и҆мꙋ́щи всечⷭ҇таѧ , сро́днагѡ прᲂмышле́нїѧ на́шегѡ , непре́зри мо́лимсѧ , ꙗ҆́кѡ тебѐ є҆ди́нꙋ хрⷭ҇тїа́не ко влⷣцѣ , ѡ҆чище́нїе бл҃гᲂпремѣни́тельно пред̾лага́емъ .

и҆́нъ , і҆рмо́съ . Прᲂсвѣтѝ на́съ . Наста́ви на́съ к̾ свѣ́тꙋ си́лᲂю крⷭ҇та̀ твᲂегѡ̀ хрⷭ҇тѐ , сегѡ̀ ра́ди ти припа́даемъ , тво́й ми́ръ пᲂда́ждь на́мъ чл҃кᲂлю́бче . Ѡ҆кᲂрмѝ живᲂта̀ на́шегѡ хрⷭ҇тѐ бж҃е на́шъ , пᲂю́щихъ твᲂѐ вᲂста́нїе , и҆ ми́ръ пᲂда́ждь на́мъ чл҃кᲂлю́бче . боⷢ҇ . Мᲂлѝ при́снѡ чⷭ҇таѧ сн҃а свᲂегѡ̀ и҆ бг҃а на́шегѡ , не и҆скꙋсᲂбра́чнаѧ мр҃і́е , низ̾пᲂсла́ти на́мъ вѣ́рнымъ ве́лїю млⷭ҇ть .

и҆́нъ , і҆рмо́съ . Оу҆́треннююще вᲂпїе́мъ . Оу҆тᲂлѝ непᲂстᲂѧ́ннꙋю бꙋ́рю стрⷭ҇те́й на́шихъ дв҃о , ꙗ҆́же бг҃а ро́ждьши ѡ҆кᲂрми́телѧ и҆ гдⷭ҇а . Слꙋ́жатъ ржⷭ҇твꙋ̀ твᲂемꙋ̀ пречⷭ҇таѧ бцⷣе , а҆́нг҃льстїи чи́нᲂве , и҆ земны́хъ сᲂставле́нїѧ . Мр҃і́е бцⷣе без̾невѣ́стнаѧ , ᲂу҆пᲂва́нїѧ враго́въ сꙋ́етна сᲂтвᲂрѝ , а҆ пᲂю́щихъ тѧ̀ ѡ҆б̾веселѝ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Дре́ва ра́ди низ̾лᲂжи́ мѧ крѣ́пкѡ , нача́льникъ ѕло́бы , ты́ же хрⷭ҇тѐ вᲂз̾дви́гсѧ на крⷭ҇тѣ̀ , крѣпча́йше низ̾лᲂжи́лъ є҆сѝ пᲂсрами́въ тᲂгѡ̀ , па́дшаго же вᲂскр҃си́въ . Ты̀ ᲂу҆ще́дрилъ сїѡ́на вᲂсїѧ́въ ѿ́ грᲂба , но́ва за ве́тхаго сверши́лъ є҆сѝ ꙗ҆́кѡ млрⷭ҇дъ , бжⷭ҇твенᲂю сѝ кро́вїю , и҆ ны́нѣ црⷭ҇твꙋеши в̾ не́мъ во́ вѣки хрⷭ҇тѐ . боⷢ҇ . Да и҆зба́вимсѧ ѿ лю́тыхъ сᲂгрѣше́нїи , мᲂльба́ми твᲂи́ми бг҃ᲂрᲂди́тельнице чи́стаѧ , и҆ да ᲂу҆лꙋчи́мъ пречⷭ҇таѧ бжⷭ҇твенᲂе сїѧ́нїе , и҆́же и҆з̾ тебѐ не и҆зрече́ннѡ вᲂплᲂще́ннагѡ сн҃а бж҃їѧ .

и҆́нъ , і҆рмо́съ . Мл҃твꙋ прᲂлїю̀ ко́ гдⷭ҇ꙋ . Дла́ни на крⷭ҇тѣ̀ распрᲂсте́ръ є҆сѝ , и҆сцѣлѧ́ѧ неᲂу҆держа́нно прᲂсте́ртꙋю рꙋ́кꙋ во є҆де́мѣ первᲂзда́ннагѡ . и҆ свᲂе́ю во́лею же́лчи вкꙋси́въ хрⷭ҇тѐ , и҆ спа́слъ є҆сѝ ꙗ҆́кѡ си́ленъ , пᲂю́щїѧ твᲂѐ сп҃се вᲂста́нїе . Сме́рти и҆зба́витель вкꙋсѝ , и҆ во а҆́дъскаѧ сᲂше́дъ ꙗ҆́кѡ крѣ́пᲂкъ , ꙗ҆́кѡ да пе́рвагѡ ѡ҆сꙋжде́нїѧ , и҆ тлѣ́нїѧ ца́рство разрꙋши́тъ , вᲂскр҃се хрⷭ҇то́съ , и҆ спасѐ пᲂю́щїѧ є҆гѡ̀ вᲂскрⷭ҇нїе . боⷢ҇ . Непреста́й ѡ҆ на́съ мᲂлѧ́щи прест҃а́ѧ бцⷣе дв҃о , ꙗ҆́кѡ вѣ́рнымъ ᲂу҆тверже́нїе ты̀ є҆сѝ , и҆ наде́жею твᲂе́ю крѣпи́мсѧ . тѣ́мже любо́вїю тѧ , и҆ и҆з̾ тебѐ вᲂплᲂще́ннагѡ бг҃а непреста́ннѡ сла́вимъ .

и҆́нъ , і҆рмо́съ . Ри́зꙋ ми пᲂда́ждь . Хра́мъ тѧ бж҃їи и҆ кᲂвче́гъ , и҆ черто́гъ ѡ҆дш҃евле́нъ , и҆ две́рь небе́снꙋю , бцⷣе вѣ́рнїи вᲂз̾вѣща́емъ . Тре́бищемъ разᲂри́тель , бы́вшее ржⷭ҇тво̀ твᲂѐ мр҃і́е бг҃ᲂневѣ́сто , пᲂклᲂнѧ́емъ є҆́сть , ꙗ҆́кѡ бг҃ъ со ѻ҆ц҃е́мъ и҆ дх҃ᲂмъ . Сло́во бж҃їе тебѐ пᲂказа̀ , земны́мъ лѣ́ствицꙋ нбⷭ҇нꙋю . тебе́ бо ра́ди к̾ на́мъ сни́де . і҆єре́й гл҃етъ , є҆ктенїю̀ ма́лꙋю .

кᲂнда́къ , вᲂскрⷭ҇нъ . Вᲂскр҃съ и҆́з̾ грᲂба , ᲂу҆ме́ршихъ вᲂз̾дви́глъ є҆сѝ , и҆ а҆да́ма вᲂскр҃си́лъ є҆сѝ . и҆ є҆́вва ликꙋ́етъ в̾ твᲂе́мъ вᲂскрⷭ҇нїи . мирсті́и кᲂнцы̀ тᲂржествꙋ́ютъ в̾ вᲂста́нїи твᲂе́мъ и҆з̾ ме́ртвыхъ мнᲂгᲂмлⷭ҇тиве . и҆́кᲂсъ . А҆́дᲂва црⷭ҇твїѧ плѣни́въ , и҆ ме́ртвыхъ вᲂскреси́въ дᲂлгᲂтерпѣли́ве , жены̀ мѷрѡно́сицы ᲂу҆срѣ́тъ , в̾мѣ́стѡ печа́ли ра́дᲂсть прине́съ , и҆ а҆пⷭ҇лѡмъ твᲂи́мъ вᲂз̾вѣсти́лъ є҆сѝ зна́менїѧ пᲂбѣ́ды , сп҃се мо́й живᲂда́телю , и҆ тва́рь прᲂсвѣща́еши чл҃кᲂлю́бче . сегѡ̀ ра́ди и҆ ми́ръ кꙋ́пнѡ ра́дꙋетсѧ в̾ вᲂста́нїи твᲂе́мъ и҆з̾ ме́ртвыхъ мнᲂгᲂми́лᲂстиве .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Сла́внᲂе и҆стᲂща́нїе бжⷭ҇твенагѡ бᲂга́тства , и҆ нищета̀ твᲂѧ̀ хрⷭ҇тѐ ᲂу҆дивлѧ́етъ а҆́нг҃лы , на крⷭ҇тѣ̀ зрѧ́ще тѧ пло́тїю пригвᲂжда́ема , за є҆́же спастѝ вѣ́рᲂю вᲂпїю́щихъ , бл҃гᲂслᲂве́нъ бг҃ъ ѻ҆ц҃ъ на́шихъ . Бжⷭ҇твенымъ твᲂи́мъ сᲂше́ствїемъ , свѣ́та и҆спо́лнилъ є҆сѝ преи҆спо́днѧѧ , и҆ тма̀ прᲂгна́на бы́сть , пре́жде гᲂнѧ́щаѧ . тѣ́мже вᲂскресо́ша и҆́же ѿ́ вѣка ᲂу҆́зницы , вᲂпїю́ще , бл҃гᲂслᲂве́нъ бг҃ъ ѻ҆ц҃ъ на́шихъ . трⷪ҇ченъ . Всѣ́хъ ᲂу҆́бѡ гдⷭ҇а , є҆ди́нᲂмꙋ же то́кмѡ , є҆динᲂро́днᲂмꙋ сн҃ꙋ , правᲂсла́внѡ ѻ҆ц҃а бг҃ᲂсло́вѧще тѧ вᲂз̾вѣща́емъ . и҆ є҆ди́нъ вѣ́дѧще тво́й и҆схᲂдѧ́щь дх҃ъ пра́выи , сᲂєсте́ственъ и҆ сᲂприснᲂсꙋ́щенъ .

и҆́нъ , і҆рмо́съ . И҆́же ѿ і҆ꙋде́и . Спасе́нїе сᲂдѣ́ла бж҃е пᲂсредѣ̀ вселе́нныѧ , прᲂро́чески вᲂпїе́мъ , на́ древо вᲂзнесе́нъ бы́въ , всѧ̀ призва̀ вѣ́рᲂю зᲂвꙋ́щихъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Вᲂскр҃съ ѿ́ грᲂба ꙗ҆́кѡ ѿ сна̀ ще́дре , а҆́да плѣни́лъ є҆сѝ , тва́рь ᲂу҆вѣ́рисѧ а҆пⷭ҇лъ ра́ди , прᲂпᲂвѣ́давшихъ вᲂскрⷭ҇нїе . ѻ҆ц҃ъ на́шихъ бж҃е блгⷭ҇ве́нъ є҆сѝ . трⷪ҇ченъ . Пᲂклᲂнѧ́емсѧ ѻ҆ц҃ꙋ , и҆ сн҃а бл҃га́гѡ чте́мъ , и҆ дх҃а ст҃а́гѡ , трѝ є҆динᲂсꙋ́щны мꙋ́дрствꙋюще сᲂста́вы , и҆ є҆ди́нагѡ бг҃а , взыва́юще , ѻ҆ц҃ъ на́шихъ бж҃е блгⷭ҇ве́нъ є҆сѝ .

и҆́нъ , і҆рмо́съ , то́йже . Ѿ дв҃ческагѡ лᲂжесна̀ вᲂплᲂти́выисѧ , ꙗ҆ви́сѧ на спасе́нїе на́ше , сегѡ̀ ра́ди твᲂю̀ мт҃рь вѣ́дꙋще бцⷣꙋ , бл҃гᲂда́рственѡ вᲂпїе́мъ , ѻ҆ц҃ъ на́шихъ бж҃е блгⷭ҇ве́нъ є҆сѝ . же́злъ прᲂрастѐ дв҃о ѿ ко́рене і҆єссе́ѡва всебл҃же́нныи пло́дъ , цвѣ́тъ нᲂсѧ́щи спаси́тельныи , вѣ́рᲂю сн҃ꙋ твᲂемꙋ̀ вᲂпїю́щимъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Премꙋ́дрᲂсти и҆спо́лни всѣ́хъ , и҆ крѣ́пᲂсти бжⷭ҇твеныѧ , сᲂста́внаѧ премꙋ́дрᲂсте вы́шнѧгѡ , бцⷣы ра́ди , вѣ́рᲂю тебѣ̀ вᲂпїю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . І҆с҃ᲂва бжⷭ҇тва̀ пребжⷭ҇твенаѧ си́ла , в̾ на́съ бг҃ᲂлѣ́пнѡ вᲂсїѧ́ла є҆́сть . пло́тїю бо вкꙋ́шъ за всѣ́хъ сме́рть крⷭ҇тнꙋю , разᲂрѝ а҆́дᲂвꙋ крѣ́пᲂсть . є҆го́же непреста́ннѡ дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , превᲂзнᲂси́те є҆гѡ̀ во́ вѣки . Распѧ́тыи вᲂскр҃се , велича́выи паде́сѧ , пады́исѧ и҆ сᲂкрꙋше́ныи и҆спра́висѧ , тлѧ̀ ѡ҆прᲂве́ржена бы́сть , и҆ нетлѣ́нїе прᲂцвѣтѐ . жи́знїю бо ме́ртвенᲂе пᲂже́рто бы́сть . дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , превᲂзнᲂси́те є҆гѡ̀ во́ вѣки . трⷪ҇ченъ . Трисїѧ́ннᲂе бжⷭ҇тво̀ , во є҆ди́нᲂй сїѧ́ющее зарѝ , ѿ є҆ди́нᲂгѡ трисᲂста́внагѡ є҆стества̀ , рᲂди́телѧ без̾нача́льна , и҆ є҆динᲂєсте́ственᲂе же сло́во ѻ҆́ч҃ее , и҆ съ црⷭ҇твꙋющь є҆динᲂсꙋ́щенъ дх҃ъ , дѣ́ти блгⷭ҇ви́те , сщ҃е́ннїи вᲂспо́йте лю́дїе , превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Пᲂбѣди́тели врагꙋ̀ .= И҆́же на́ древѣ рꙋ́цѣ мнѣ̀ прᲂсте́ршаго , ѡ҆бнаже́наго призыва́юща мѧ , свᲂе́ю бл҃гᲂѡ҆бра́знᲂю сᲂгрѣ́ѧти нагᲂто́ю , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . И҆́же и҆з̾ преи҆спо́днѧго а҆́да вᲂзне́сша мѧ па́дшаго , и҆ высᲂкᲂпресто́льнᲂю , сла́вᲂю рᲂди́телѧ пᲂче́тшаго , блгⷭ҇ви́те всѧ̀ дѣ́ла гдⷭ҇аж , и҆ превᲂзнᲂси́те є҆гѡ̀ во́ вѣки . =трⷪ҇ченъ . И҆́же в̾ трїе́хъ ли́цѣхъ , и҆з̾ѡ҆бразꙋ́емо нераздѣ́льно бжⷭ҇тво̀ трисᲂста́вно , во є҆ди́нᲂмъ сꙋществѣ̀ и҆ сла́вѣ . бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Цр҃ѧ нбⷭ҇нагѡ . Сᲂпрᲂти́вныхъ раз̾жже́ныѧ и҆ пламенᲂви́дныѧ на на́съ ᲂу҆гасѝ стрѣ́лы , ꙗ҆́кѡ да пᲂе́мъ тѧ чⷭ҇таѧ во́ вѣки . Па́че є҆стества̀ сᲂдѣ́телѧ и҆ сп҃са , бг҃а сло́ва рᲂдила̀ є҆сѝ дв҃о . є҆го́же превᲂзно́симъ во всѧ̀ вѣ́ки . Свѣ́тлꙋю тѧ̀ и҆ златᲂза́рнꙋю пᲂказа̀ свѣщꙋ̀ ми́рꙋ , в̾сели́выисѧ в̾ тѧ̀ свѣ́тъ непристꙋ́пныи , дв҃о чⷭ҇таѧ , тѣ́мже тѧ пᲂе́мъ во́ вѣки всѧ̀ .

по и҃ пѣ́сни , пᲂе́мъ : Хва́лимъ , бл҃гᲂслᲂви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . і҆рмо́съ катава́сїи , и҆ твᲂри́мъ пᲂкло́нъ . пᲂе́мъ , пѣ́снь бцⷣѣ . вели́читъ дш҃а мᲂѧ̀ гдⷭ҇а . =и҆ =пᲂе́мъ , честнѣ́йшꙋю херꙋви́мъ , на ко́йждо сти́хъ , на́ ѻ҆ба ли́ка . =и҆ =твᲂри́мъ пᲂкло́ны .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Бжⷭ҇твенымъ и҆ без̾нача́льнымъ є҆стество́мъ про́стъ сы́и , слᲂжи́лсѧ є҆сѝ прїѧ́тїемъ пло́ти . в̾ себѣ̀ сїѐ сᲂста́вивъ сло́ве бж҃їи , и҆ пᲂстрада̀ ꙗ҆́кѡ чл҃къ , пре́былъ є҆сѝ крᲂмѣ̀ страсте́й ꙗ҆́кѡ бг҃ъ . тѣ́мже тѧ̀ во двᲂю̀ сꙋществꙋ̀ нераз̾дѣ́льно и҆ неслїѧ́нно велича́емъ . Ѻ҆ц҃а по сꙋ́ществꙋ бжⷭ҇твенᲂмꙋ , ꙗ҆́кᲂже є҆стество́мъ бы́въ чл҃къ , сы́и бг҃ъ вы́шнїи к̾ рабѡ́мъ сᲂше́дъ . вᲂскр҃съ же ѿ́ грᲂба бл҃гᲂда́тїю ѻ҆ц҃а . земнᲂро́днымъ пᲂлᲂжи́въ по є҆стествꙋ̀ бг҃а же и҆ влⷣкꙋ . съ ни́мъ же тѧ всѝ велича́емъ . боⷢ҇ . Ꙗ҆ви́сѧ ѽ дв҃о мт҃и бж҃їѧ , па́че є҆стества̀ ро́ждьши во́ плᲂти бл҃го́е сло́во , є҆го́же ѻ҆ц҃ъ ѿры́гнꙋ ѿ́ сердца свᲂегѡ̀ , пре́жде всѣ́хъ вѣ́къ ꙗ҆́кѡ бла́гъ . є҆го́же ны́нѣ и҆ теле́съ превы́шша разꙋмѣ́емъ , а҆́ще и҆ в̾ тѣ́ло ѡ҆блече́сѧ .

и҆́нъ , і҆рмо́съ . Оу҆страши́сѧ всѧ́къ слꙋ́хъ . Бж҃їѧ тѧ сн҃а є҆стество́мъ , зача́таго вᲂꙋтро́бѣ бг҃ᲂмт҃ре свѣ́мы , и҆ бы́вшагѡ на́съ ра́ди чл҃ка , и҆ зрѧ́щи тѧ̀ на крⷭ҇тѣ̀ , є҆стество́мъ ᲂу҆́бѡ стра́ждꙋща чл҃ческимъ , без̾стра́стна же ꙗ҆́кѡ бг҃а велича́емъ . Разрꙋши́сѧ тма̀ лю́таѧ а҆́да , вᲂсїѧ́ бо сл҃нце пра́вды хрⷭ҇то́съ , землѝ прᲂсвѣща́ѧ всѝ кᲂнцы̀ , сїѧ́ѧ бжⷭ҇тва̀ зарѧ́ми , нбⷭ҇ныи чл҃къ , бг҃ъ земны́и . є҆го́же во двꙋ̀ є҆стествꙋ̀ велича́емъ . Напрѧзѝ и҆ спѣ́й и҆ црⷭ҇твꙋй сн҃е бг҃ᲂмт҃ре , и҆з̾ма́ильтескїѧ лю́ди пᲂкᲂрѧ́ѧ бᲂрю́щїѧ на́съ , ꙗ҆́кѡ ѻ҆рꙋ́жїе непᲂбѣди́мᲂе и҆мꙋ́щи вᲂдрꙋже́ныи съ кᲂпїе́мъ крⷭ҇тъ тво́й всеси́льне .

и҆́нъ , і҆рмо́съ . Вᲂи́стинꙋ бцⷣꙋ . Ра́дᲂсти и҆ весе́лїѧ и҆спо́лнь є҆́сть па́мѧть твᲂѧ̀ , прихᲂдѧ́щимъ и҆сцѣле́нїѧ тᲂча́щи , и҆́же бл҃гᲂче́стнѡ бцⷣꙋ тѧ̀ вᲂз̾вѣща́ющимъ . Ѱалмы̀ вᲂспѣва́емъ тѧ̀ ѡ҆бра́дᲂваннаѧ , и҆ немо́лчнѡ ти є҆́же ра́дꙋисѧ вᲂпїе́мъ , ты́ бо и҆стᲂчи́ла є҆сѝ всѣ́мъ ра́дᲂсть . Красе́нъ бцⷣе прᲂрастѐ пло́дъ тво́й , не тлѧ́ бо причаща́ющимсѧ , но хᲂда́тай жи́зни , ꙗ҆́же вѣ́рᲂю тѧ̀ велича́ющимъ .

таⷤ , дᲂсто́йно є҆́сть .= пᲂсе́мъ , є҆ктенїѧ̀ ма́лаѧ . та́же : ст҃ъ гдⷭ҇ь бг҃ъ на́шъ . =сти́хъ : ꙗ҆́кѡ ст҃ъ гдⷭ҇ь бг҃ъ на́шъ . сти́хъ : надᲂвсѣ́ми людьмѝ бг҃ъ на́шъ . пᲂсе́мъ , свѣти́ленъ , вᲂскрⷭ҇нъ . сла́ва , ст҃о́мꙋ , а҆́ще є҆́сть . и҆ ны́нѣ , боⷢ҇ , вᲂскрⷭ҇нъ . и҆ =ѱалмы̀ , ѡ҆бы́чны . =на хвали́тѣхъ , стихѣ́ры , вᲂскрⷭ҇ны . гла́съ , и҃ . =запѣ́въ : хвали́те бг҃а во ст҃ы́хъ є҆гѡ̀ . Г=дⷭ҇и , а҆́ще и҆ на сꙋди́щи пред̾ста̀ пила́тᲂмъ сꙋди́мъ , но неѿстꙋпѝ ѿ прⷭ҇то́ла , со ѻ҆ц҃е́мъ сѣдѧ̀ . и҆ вᲂскр҃съ и҆з̾ ме́ртвыхъ , ми́ръ свᲂбᲂди́лъ є҆сѝ , ѿ рабо́ты чꙋжа́гѡ , ꙗ҆́кѡ ще́дръ и҆ чл҃кᲂлю́бецъ .

хвали́те є҆гѡ̀ во ᲂу҆тверже́нїи си́лъ є҆гѡ̀ . Гдⷭ҇и , ѻ҆рꙋ́жїе крⷭ҇тъ тво́й на дїа́вᲂла да́лъ є҆сѝ на́мъ , трепе́щетъ бо и҆ трѧсе́тсѧ , немᲂгі́и взира́ти на си́лꙋ є҆гѡ̀ , ꙗ҆́кѡ ме́ртвыѧ вᲂскреша́етъ , и҆ сме́рть ᲂу҆҆праздни́лъ є҆́сть . сегѡ̀ ра́ди пᲂклᲂнѧ́емсѧ пᲂгребе́нїю твᲂемꙋ̀ и҆ вᲂскрⷭ҇нїю .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Гдⷭ҇и , а҆́ще ꙗ҆́кѡ ме́ртва тѧ , во́ грᲂбѣ і҆ꙋде́и пᲂлᲂжи́ша , но ꙗ҆́кѡ царѧ̀ спѧ́ща , во́ини тебѐ стрежа́хꙋ . и҆ ꙗ҆́кѡ живᲂта̀ сᲂкро́вище печа́тїю печатлѣ́ша . но вᲂскр҃се , и҆ по́далъ є҆сѝ нетлѣ́нїе дш҃а́мъ на́шимъ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . А҆́нг҃лъ тво́й гдⷭ҇и , и҆́же вᲂскрⷭ҇нїе прᲂпᲂвѣ́да на́мъ . стра́жи ᲂу҆́бѡ ᲂу҆҆страшѝ , жена́мъ же вᲂз̾гласѝ гл҃ѧ , что̀ и҆́щете жива́го с̾ ме́ртвыми , вᲂскр҃се бг҃ъ сы́и , и҆ вселе́ннѣй жи́знь дарᲂва̀ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Пᲂстрада́лъ є҆сѝ распѧ́тїе , без̾стра́стныи бжⷭ҇тво́мъ , пᲂгребе́нїе прїѧ́тъ тридне́вно , да на́съ свᲂбᲂди́ши ѿ рабо́ты вра́жїѧ , и҆ ѡ҆без̾сме́ртивъ ѡ҆живᲂтвᲂри́ши на́съ хрⷭ҇тѐ бж҃е , вᲂскрⷭ҇нїѧ ра́ди твᲂегѡ̀ чл҃кᲂлю́бче .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Пᲂклᲂнѧ́юсѧ и҆ сла́влю , и҆ вᲂспѣва́ю хрⷭ҇тѐ твᲂѐ и҆́з̾ грᲂба вᲂскрⷭ҇нїе , и҆́мже свᲂбᲂди́лъ є҆сѝ на́съ ѿ а҆́дᲂвыхъ нерѣши́мыхъ ᲂу҆́зъ , и҆ дарᲂва̀ ми́рꙋ ꙗ҆́кѡ бг҃ъ нетлѣ́нїе и҆ жи́знь вѣ́чнꙋю . ꙗ҆́кѡ є҆ди́нъ бл҃гъ и҆ чл҃кᲂлю́бецъ .

вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Живᲂпрїе́мныи тво́й гро́бъ , стрегꙋ́ще закᲂнᲂпрестꙋ́пнїи . съ во́ины тᲂгѡ̀ запечатлѣ́вша . ты́ же ꙗ҆́кѡ без̾сме́ртенъ бг҃ъ и҆ всеси́ленъ , вᲂскрⷭ҇лъ є҆сѝ тридне́внѡ .

и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Сᲂше́дшꙋ тѝ во врата̀ а҆́дᲂва влⷣко хрⷭ҇тѐ , и҆ сїѧ̀ сᲂкрꙋши́вшꙋ , плѣне́ныи си́це вᲂпїѧ́ше , кто̀ є҆́сть се́й , ꙗ҆́кѡ не ѡ҆сꙋжда́етсѧ в̾ преи҆спо́днихъ землѝ , но ꙗ҆́кѡ сѣ́нь разᲂрѝ сме́ртнꙋю темни́цꙋ ; вᲂспрїе́мъ тᲂгѡ̀ ꙗ҆́кѡ сме́ртна , и҆ трепе́щꙋ ꙗ҆́кѡ бг҃а всеси́льна , сп҃се пᲂми́лꙋй на́съ .

сла́ва , стихѣ́ра є҆ѵⷢ҇а́льскаѧ .= и҆ ны́нѣ . гла́съ , в҃ . пребл҃гᲂслᲂве́на є҆сѝ бцⷣе дв҃о . Славᲂсло́вїе вели́кᲂе . =і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво .= трᲂпа́рь : Вᲂскр҃съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂмлⷭ҇тиве . =пᲂсе́мъ , є҆ктенїѝ . и҆ ѿпꙋ́стъ . та́же , ча́съ , а҃ . ѱалмы̀ , ѡ҆бы́чны . и҆ кᲂне́чныи ѿпꙋ́стъ .

Въ нлⷣю , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Дне́сь хрⷭ҇то́съ вᲂскр҃съ ѿ́ грᲂба , всѣ́мъ вѣ́рнымъ пᲂдаѧ̀ нетлѣ́нїе , и҆ ра́дᲂсть ѡ҆бнᲂвѝ мѷрѡно́сицамъ вᲂскрⷭ҇нїѧ твᲂегѡ̀ гдⷭ҇и .

=бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . на́ =древѣ пригво́ждьсѧ сп҃се на́шъ во́лею , дре́вᲂмъ а҆да́ма ѿ клѧ́твы и҆зба́вилъ є҆сѝ , по́далъ є҆сѝ ꙗ҆́кѡ ще́дръ є҆́же по ѻ҆́бразꙋ , и҆ раѧ̀ вселе́нїе .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кѡ на́ нб҃си мно́жество а҆́нг҃лъ , та́кѡ и҆ на землѝ ро́ди чл҃честїи , всест҃о́е вᲂскрⷭ҇нїе пра́зднꙋютъ , бл҃гᲂсти твᲂеѧ̀ гдⷭ҇и .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Вᲂз̾дви́гни на́съ ѿ́ грᲂба грѣхо́внагѡ сп҃се , стрⷭ҇тьмѝ мно́гими ᲂу҆мерщве́нныѧ , и҆ вᲂста́нїемъ сѝ разᲂрѝ мꙋчи́тельство сме́ртнᲂе , ꙗ҆́кѡ чл҃кᲂлю́бецъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Слы́ши а҆да́ме , и҆ ра́дꙋисѧ со є҆́ввᲂю , ꙗ҆́кѡ ѡ҆бнажи́выи пре́жде ѻ҆бᲂю̀ вы̀ , и҆ пре́лести ра́ди прїе́мъ ва́съ плѣ́нники крⷭ҇то́мъ хрⷭ҇то́вымъ ᲂу҆праздни́сѧ .

сла́ва . Без̾нача́льнаѧ трⷪ҇це , нераздѣ́льнаѧ сꙋщество́мъ , сᲂпресто́льнаѧ є҆ди́нице , є҆динᲂчестна́ѧ сла́вᲂю , пренача́льнᲂе є҆стество̀ и҆ црⷭ҇тво , спасѝ вѣ́рᲂю вᲂспѣва́ющихъ тѧ .

и҆ нн҃ѣ . Ра́дꙋисѧ ѿ на́съ ст҃а́ѧ бцⷣе . ра́дꙋисѧ ꙗ҆́же ра́дᲂсть ро́ждьшаѧ ми́рꙋ . ра́дꙋисѧ є҆ди́на застꙋ́пнице чл҃кѡмъ , и҆ спасе́нїе дш҃а́мъ на́шимъ .