Глас 8 вторник

Въ пᲂнедѣ́льникъ , ве́черъ . на гдⷭ҇и вᲂзва́хъ , стⷯры , пᲂкаѧ́нны . гла́съ , и҃ . поⷣ . ѽ =пресла́внᲂе чꙋ́до . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Н=и ᲂу҆миле́нїѧ стѧжа́хъ ,꙳ нижѐ сле́зъ и҆сто́чникъ ,꙳ ни те́плᲂе и҆спᲂвѣ́данїе ,꙳ нижѐ пла́чь ѡ҆мыва́ющь ни серде́чнᲂе смире́нїе .꙳ ни мытарю̀ ревни́тель бы́хъ ,꙳ нижѐ блꙋдни́цѣ , ни блꙋ́днᲂмꙋ ѻ҆́трᲂкꙋ ,꙳ ка́кѡ ᲂу҆́бѡ ѡ҆брѧ́щꙋ мᲂи́хъ ,꙳ мно́гихъ грѣхо́въ ѡ҆ставле́нїе ,꙳ но и҆́миже хрⷭ҇тѐ вѣ́си сꙋдьба́ми спаси́ мѧ .

ᲂу҆пᲂва̀ дш҃а мᲂѧ̀ на́ гдⷭ҇а . Стра́ненъ всѧ́кїѧ сᲂтвᲂри́хсѧ бжⷭ҇твеныѧ за́пᲂвѣди ,꙳ ѡ҆ дᲂбрᲂдѣ́тели же лꙋ́чьшей всѧ́ко небрего́хъ .꙳ и҆ безꙋ́мнѡ пᲂжи́хъ в̾ лѣ́нᲂсти ꙳ ве́сь живо́тъ мо́й .꙳ во блꙋдѣ̀ всѧ̀ дѣ́ла мᲂѧ̀ сᲂдѣ́ѧхъ ,꙳ непᲂдо́бнаѧ и҆ без̾зако́ннаѧ .꙳ тѣ́мже хрⷭ҇тѐ ᲂу҆ще́дри ,꙳ ꙗ҆́кѡ бл҃гᲂꙋтро́бенъ ,꙳ и҆ тꙋ́не мѧ̀ спасѝ .

да ᲂу҆пᲂва́етъ і҆и҃ль на́ гдⷭ҇а . Не ꙗ҆́рᲂстїю твᲂе́ю ѡ҆бличѝ менѐ ,꙳ дѣ́ло рꙋ́кꙋ твᲂеѧ̀ бл҃гᲂсти ,꙳ ѿто́ргшасѧ ᲂу҆мо́мъ неразꙋ́мнымъ ,꙳ и҆́же менѐ ра́ди по мнѣ̀ бл҃гᲂи҆з̾во́ливъ бы́ти ,꙳ не и҆з̾рече́нныѧ ра́ди бл҃гᲂꙋтро́бїѧ пꙋчи́ны чл҃кᲂлю́бче .꙳ но мᲂли́твами при́снѡ дв҃ыѧ ,꙳ твᲂеѧ̀ сло́ве мт҃ре ,꙳ бжⷭ҇твенагѡ спᲂдо́би мѧ ꙳ ѡ҆браще́нїѧ ꙗ҆́кѡ бг҃ъ .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ і҆ѡа́ннꙋ прⷣтчи . гла́съ , и҆ пᲂдо́бенъ , то́йже . =запѣ́въ : ѿ всѣ́хъ без̾зако́нїи є҆гѡ̀ . Б=л҃же́нне і҆ѡа́нне прⷣтче ,꙳ смире́нꙋю ми дш҃ꙋ ,꙳ є҆́же к̾ бг҃ꙋ любо́вїю вᲂз̾враща́й всегда̀ ,꙳ сщ҃е́нными хᲂда́тайствы твᲂи́ми .꙳ сласте́й мᲂи́хъ ѻ҆́гнь ᲂу҆гасѝ ,꙳ привᲂдѧ́ мѧ ко и҆спᲂлне́нїю ꙳ бжⷭ҇твеныхъ пᲂвелѣ́нїи .꙳ и҆ срⷣца мᲂегѡ̀ ꙳ ѡ҆чища́ѧ вᲂи́стинꙋ чꙋ́вствїѧ , да сла́влю тѧ .

пᲂхвали́те є҆гѡ̀ всѝ лю́дїе . Непло́дныѧ прᲂзѧбе́нїе ,꙳ и҆ чистᲂты̀ са́дъ влⷣчнїи ,꙳ чл҃кѡмъ ᲂу҆дᲂбре́нїе ,꙳ прⷣтче і҆ѡа́нне всехва́льне .꙳ храни́телю бжⷭ҇твеныи .꙳ смире́ныѧ ми дш҃и ,꙳ твᲂи́ми мл҃твами бл҃гᲂꙋвѣ́тїе да́ждь ,꙳ и҆збавлѧ́ѧ ѿ ѕмїѧ̀ , кᲂва́рныхъ ,꙳ и҆ лꙋка́выхъ тᲂгѡ̀ ла́ѧнїи и҆ прило́гъ .

и҆ и҆́стина гдⷭ҇нѧ пребыва́етъ во́ вѣки . Ве́сь є҆сѝ сладча́йшїи ,꙳ и҆ сла́дᲂсти бжⷭ҇твеныѧ ꙳ и҆спо́лненъ приснᲂсла́вне .꙳ и҆ весели́ши всѧ̀ вѣ́рнѡ прихᲂдѧ́щихъ к̾ тебѣ̀ ,꙳ ᲂу҆слажда́ѧ чꙋ́вства ꙳ дш҃е́внаѧ же и҆ тѣле́снаѧ ,꙳ недꙋ́ги и҆ ско́рби и҆ нахᲂжде́нїи ѕлы́хъ .꙳ и҆ сласте́й дш҃етлѣ́нныхъ всѣ́хъ ,꙳ го́ресть разрѣша́ѧ на́мъ .

сла́ва , и҆ нн҃ѣ , боⷢ҇ . Вѣ́рᲂю притека́ю к̾ пᲂкро́вꙋ твᲂемꙋ̀ бг҃ᲂрᲂди́тельнице чⷭ҇таѧ , ѿ напа́стей и҆ бѣ́дъ , и҆ стрⷭ҇тна́гѡ слїѧ́нїѧ , и҆ ѿ бѣсо́вскагѡ ѡ҆ѕлᲂбле́нїѧ спаси́ мѧ , ꙗ҆́кѡ ми́лᲂсти и҆мѣ́ѧ пꙋчи́нꙋ , и҆ спасе́нїѧ ꙗ҆́вльшисѧ хᲂда́таица влⷣчце , ꙗ҆́кѡ бг҃а ро́ждьши ми́лᲂстиваго , є҆ди́наго всеще́драго , и҆ мно́го бл҃гᲂꙋтро́бнаго .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , и҃ . Тебѐ цр҃ѧ и҆ влⷣкꙋ а҆́нг҃ли непреста́ннѡ пᲂю́тъ , а҆́зъ же тѝ припа́даю ꙗ҆́кѡ мыта́рь вᲂпїѧ̀ , бж҃е ѡ҆чи́сти мѧ и҆ пᲂми́лꙋй мѧ .

сти́хъ : к̾ тебѣ̀ вᲂз̾ведо́хъ ѻ҆́чи . Без̾сме́ртна сꙋ́щи дш҃е мᲂѧ̀ , вᲂлна́ми жите́йскими непᲂгрꙋжа́йсѧ но вᲂз̾ни́кни вᲂпїю́щи к̾ свᲂемꙋ̀ бл҃гᲂда́телю , бж҃е ѡ҆чи́сти мѧ и҆ пᲂми́лꙋй мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мч҃нцы гдⷭ҇ни мᲂли́те бг҃а на́шегѡ , и҆ и҆спрᲂси́те дш҃а́мъ на́шимъ мно́жество щедро́тъ , и҆ ѡ҆чище́нїе ѿ мно́гихъ прегрѣше́нїи на́шихъ мо́лимъ вы̀ .

сла́ва , и҆ ны́нѣ , боⷢ҇ . Ра́дꙋисѧ вселе́ннѣй пᲂхвало̀ . ра́дꙋисѧ цр҃кви гдⷭ҇нѧ . ра́дꙋисѧ гᲂро̀ присѣ́ннаѧ . ра́дꙋисѧ всѣ́мъ прибѣ́жище . ра́дꙋисѧ свѣ́щниче златы́и , ра́дꙋисѧ сла́во правᲂсла́вныхъ честна́ѧ . ра́дꙋисѧ мр҃і́е мт҃и хрⷭ҇та̀ бг҃а , ра́дꙋисѧ раю̀ . ра́дꙋисѧ бжⷭ҇твенаѧ трапе́зо . ра́дꙋисѧ хра́ме . ра́дꙋисѧ ста́мно всезлата́ѧ . ра́дꙋисѧ всѣ́хъ ᲂу҆пᲂва́нїе .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ пᲂнедѣ́льникъ , на па́вечерницѣ . кано́нъ мᲂле́бенъ , к̾ прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : прест҃а́ѧ гжⷭ҇е бцⷣе спасѝ на́съ . Во́дъ и҆сто́чникъ мᲂли́твеныи бг҃ᲂрᲂди́тельницꙋ вѣ́дꙋще всѝ , и҆стᲂча́ющь вѣ́рнымъ стрꙋѝ дш҃а́мъ и҆ тѣ́лᲂмъ . тѣ́мже тѧ непреста́ннѡ сла́вимъ . Па́че є҆стества̀ бг҃ᲂнача́льнᲂе сло́во рᲂдила̀ є҆сѝ дв҃о , и҆ є҆стество̀ ѿ тлѝ и҆зба́ви . тѣ́мже без̾слᲂве́сныхъ мѧ̀ , и҆ чре́зъ є҆сте́ственыхъ страсте́й свᲂбᲂдѝ .= сла́ва .= Па́жити страсте́й плᲂтьски́хъ ны́нѣ ѡ҆крꙋжа́ютъ мѧ , и҆ ѡ҆скᲂрблѧ́ютъ лю́тѣ , пᲂсѣтѝ ско́рѡ раба̀ твᲂегѡ̀ , и҆ ѿ ѡ҆ѕлᲂблѧ́ющихъ спасѝ . и҆ ны́нѣ . И҆́же всю̀ тва́рь сᲂдержа́и , и҆ нᲂсѧ́и и҆ спаса́ѧи , на рꙋкꙋ̀ твᲂе́ю чⷭ҇таѧ ѡ҆пи́санъ ꙗ҆ви́сѧ и҆ чл҃ческїи ро́дъ ѡ҆бнᲂвѝ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Оу҆спѝ смꙋще́нїе лю́тагѡ недꙋ́га ѡ҆держа́щаго мѧ ны́нѣ , пречⷭ҇таѧ влⷣчце . и҆ прегрѣше́нїи и҆ страсте́й свᲂбᲂдѝ . Не и҆з̾рече́нна пꙋчи́на щедро́тъ твᲂи́хъ пречⷭ҇таѧ , и҆́миже и҆ менѐ и҆зба́ви прегрѣше́нїи недꙋ́гъ .= сла́ва .= Оу҆скᲂрѝ и҆ пᲂсѣтѝ пречⷭ҇таѧ недꙋ́гꙋющаго мѧ , и҆ тѧ́жкїѧ бᲂлѣ́зни и҆зба́ви , и҆ всѧ́кїѧ ско́рби . и҆ ны́нѣ . Вᲂзвели́чи ми́лᲂсть и҆ застꙋпле́нїе пречⷭ҇таѧ твᲂи́хъ мᲂли́твъ на мнѣ̀ , и҆ и҆зба́ви мѧ ѿ напа́стей и҆ скᲂрбе́й .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Ѡ҆чисти́лище всегда̀ мᲂемꙋ̀ срⷣцꙋ пᲂкажѝ пречⷭ҇таѧ , ст҃ы́хъ вᲂспᲂмина́нїе , и҆ прегрѣше́нїемъ ѡ҆чище́нїе . Спасе́нїе пᲂда́ждь ми дш҃е́внᲂе и҆ тѣле́снᲂе пренепᲂро́чнаѧ , и҆ бᲂлѧ́щемꙋ да́ждь цѣльбꙋ̀ , и҆ лю́тыхъ и҆збавле́нїе .= сла́ва .= Кᲂва́рствїѧ ᲂу҆празднѝ лꙋка́выхъ бѣсо́въ пречⷭ҇таѧ , и҆ страсте́й вᲂста́нїѧ . и҆ немᲂщны́мъ на́мъ си́лꙋ пᲂда́ждь .= и҆ ны́нѣ . Ѿ= лᲂже́снъ твᲂи́хъ пречⷭ҇таѧ пра́вды сл҃нце вᲂсїѧ̀ , и҆ ми́ръ прᲂсвѣтѝ . є҆го́же бжⷭ҇твеными зарѧ́ми и҆ менѐ прᲂсвѣтѝ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Раз̾рѣши́шасѧ твᲂи́мъ ржⷭ҇тво́мъ ᲂу҆́зы сме́ртныѧ , и҆ свѧза́сѧ тлѝ держа́ва , прест҃а́ѧ дв҃о всепѣ́таѧ . тѣ́мже разрѣшѝ в̾ско́рѣ мᲂи́хъ прегрѣше́нїи плени́цы , и҆ тѧ́жкїѧ печа́ли . Лꙋка́вствїѧ бѣсо́въ , и҆ ѕло́бы чл҃ческїѧ и҆зба́ви влⷣчце , и҆ дш҃е́внагѡ недꙋ́га и҆ тѣле́снаго ско́рѡ ᲂу҆врачꙋ́й , ро́ждьшаѧ є҆ди́на всѧ́кїѧ пло́ти и҆ дꙋхо́въ врача̀ сп҃са и҆ гдⷭ҇а .= сла́ва .= Ꙗ҆́кѡ клеща̀ бжⷭ҇твенагѡ ᲂу҆́глѧ пречⷭ҇таѧ , мᲂлю́ тѧ пᲂпалѝ всѧ́кꙋю страстнꙋ́ю по́хᲂть раба̀ твᲂегѡ̀ , и҆ немᲂже́нїѧ лю́таѧ не ᲂу҆до́бь стерпи́маѧ , и҆ и҆з̾сꙋшѝ пᲂто́ки печа́лей .= и҆ ны́нѣ . С=пасе́нїе тѧ̀ всѣ́мъ по́далъ є҆́сть сн҃ъ тво́й всечⷭ҇таѧ влⷣчце , вѣ́рᲂвавшимъ во́нь , и҆ бг҃а прᲂпᲂвѣ́дающимъ , вᲂплᲂще́нна ѿ тебѐ ꙗ҆́вѣ . тѣ́мже мѧ спасѝ ѿ разли́чныхъ бѣ́дъ и҆ скᲂрбе́й .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . При́зри на мѧ̀ млⷭ҇тивнымъ сѝ ѻ҆́кᲂмъ влⷣчце , и҆ ѿ недꙋ́гъ лю́тыхъ и҆зба́ви в̾ско́рѣ , и҆ всѧ́кᲂгѡ ѡ҆ѕлᲂбле́нїѧ ча́емагѡ ны́нѣ , и҆ сѣ́тей и҆ паде́нїѧ . Безꙋ́мнагѡ нра́ва страстна́гѡ , и҆ за́висти непᲂдо́бныхъ , и҆ всѧ́кїѧ ѕло́бы и҆ ѡ҆ѕлᲂбле́нїѧ жите́йскагѡ и҆зба́ви мѧ , пречⷭ҇таѧ влⷣчце твᲂи́ми мᲂльба́ми .= сла́ва .= Сᲂзда́выи на́съ в̾ тебѣ̀ дв҃о сᲂзда́сѧ , є҆стество̀ чл҃ческᲂе ѿ тлѝ и҆збавлѧ́ѧ , и҆ менѐ ᲂу҆́бѡ и҆зба́ви чⷭ҇таѧ ѡ҆держа́щихъ мѧ и҆скꙋше́нїи твᲂи́ми мл҃твами .= и҆ ны́нѣ . Х=ра́мъ пᲂказа́сѧ бг҃а невмѣсти́магѡ пречи́стъ , ты̀ пречⷭ҇таѧ влⷣчце , хра́мъ и҆ менѐ пᲂкажѝ тᲂгѡ̀ бл҃гᲂда́ти твᲂи́ми мᲂли́твами , и҆ сᲂблюдѝ невреди́ма .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , и҃ . Ꙗ҆́кѡ дв҃ꙋ є҆ди́нꙋ въ жена́хъ и҆ без̾ сѣ́мене ро́ждьшꙋю бг҃а пло́тїю , всѝ блажи́мъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇тва̀ , ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ дᲂсто́йнѡ сла́вимъ прест҃о́е ржⷭ҇тво̀ твᲂѐ , и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ хвалꙋ̀ твᲂю̀ .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы въ вавилѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Тѧ́жкїѧ бᲂлѣ́зни вᲂзда́нїе ѡ҆брѣто́хъ , и҆ мно́гимъ недꙋ́гᲂмъ ѡ҆держи́мъ бᲂлю̀ , и҆ мᲂлю́ тѧ бцⷣе пᲂмᲂзи́ ми , и҆ пᲂда́ждь здра́вїе в̾ско́рѣ твᲂи́ми мл҃твами . Бл҃же́ннаѧ дв҃о прибѣ́жище скᲂрбѧ́щимъ всѣ́мъ вѣ́рнымъ , всѧ́кᲂгѡ и҆скꙋше́нїѧ и҆ печа́ли и҆ ѕло́бы ѿ зави́дѧщихъ мѧ и҆змѝ , и҆ ѿ грѣ́хъ и҆ разли́чныхъ недꙋ́гъ и҆зба́ви .= сла́ва .= Златᲂкᲂва́ннаѧ ста́мно , и҆з̾неѧ́же и҆з̾течѐ ми́ро живᲂтво́рнᲂе вѣ́рнымъ . ѿи҆мѝ дш҃и мᲂеѧ̀ и҆ тѣ́ла недꙋ́гъ , и҆ прегрѣше́нїи скве́рнꙋ , застꙋпле́ньми твᲂи́ми чⷭ҇таѧ бг҃ᲂрᲂди́тельнице .= и҆ ны́нѣ . Р=ᲂжде́ннаго не и҆з̾рече́нно сᲂбез̾нача́льнагѡ сло́ва ѻ҆ц҃ꙋ и҆ дх҃ꙋ , и҆з̾ тебѐ бг҃ᲂмт҃и сла́вѧще , непреста́ннѡ во хвале́нїи зᲂве́мъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Вели́чествїѧ разли́чныхъ чꙋде́съ твᲂи́хъ влⷣчце всѝ прᲂпᲂвѣ́даемъ , и҆́же вѣ́рнѡ притека́юще к̾ твᲂи́мъ застꙋпле́нїемъ . но ны́нѣ мѧ ѿ недꙋ́га лю́та бᲂлѣ́зней премѣнѝ дш҃е́вныхъ же и҆ тѣле́сныхъ , и҆ пᲂкажѝ здра́ва ѡ҆бᲂю́дꙋ , сла́вити сн҃а твᲂегѡ̀ хрⷭ҇та̀ во́ вѣки . Напра́сно вᲂз̾вѣ́ѧша зави́дѧщихъ вѣ́три , и҆ ѕлᲂлю́тыхъ рѣ́ки припрѣ́шасѧ ѕѣлѡ̀ хра́минѣ мᲂе́й ᲂу҆́мнѣй , дв҃о чи́стаѧ . но ꙗ҆́кᲂже безꙋ́мнѡ , вᲂлнꙋ́ющагᲂсѧ мо́рѧ разᲂрѝ стремле́нїе , печа́льнымъ всѣ́мъ , и҆ да́ждь ми твᲂи́ми мᲂли́твами тишинꙋ̀ во всѧ̀ вѣ́ки .= сла́ва .= Сᲂзда́выи бре́ннᲂе тѣ́ло чл҃ка , та́же дꙋ́шꙋ є҆мꙋ̀ влᲂжѝ без̾сме́ртнꙋ , в̾ тебѣ̀ сᲂзда́сѧ дв҃о сы́и и҆ ѡ҆бнᲂвѝ па́ки тᲂгѡ̀ . є҆го́же мнѣ̀ бл҃гᲂꙋвѣ́тлива , и҆ бл҃гᲂпремѣ́нна пᲂкажѝ , твᲂи́ми мл҃твами , и҆ си́лꙋ пᲂда́ждь всѣ́мъ скᲂрбѧ́щимъ , и҆збавле́нїе в̾ско́рѣ .= и҆ ны́нѣ . С=вѣ́тᲂмъ ѡ҆зарѧ́еши всегда̀ пречⷭ҇таѧ сла́вѧщихъ тѧ , и҆́же свѣ́тъ невече́рнїи вᲂсїѧ́вшїи ѿ твᲂеѧ̀ ᲂу҆тро́бы . и҆ ѿ́ страха нᲂщна́гѡ и҆ те́мнагѡ бѣсо́вскагѡ ла́ѧнїѧ и҆збавлѧ́еши твᲂѧ̀ рабы̀ . ѿ ни́хже и҆змѝ и҆ менѐ , и҆ спасѝ ѿ ѡ҆держа́щихъ ѕѡ́лъ твᲂи́ми мᲂли́твами .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Вᲂз̾несѝ ро́гъ цр҃кве пречⷭ҇таѧ , вѣ́рнымъ же напᲂга́ныѧ пᲂда́ждь крѣ́пᲂсть , и҆ црⷭ҇твїѧ ски́петры ᲂу҆твердѝ . Низ̾лᲂжѝ вᲂз̾несе́ныѧ , и҆ пᲂбѣдѝ пᲂлкѝ и҆нᲂплеме́нныхъ хᲂтѧ́щїѧ бра́немъ дв҃о чⷭ҇таѧ , и҆ свᲂѧ̀ рабы̀ невре́дны ѿ си́хъ свᲂбᲂдѝ ѻ҆трᲂкᲂви́це . сла́ва . Є҆ди́на пᲂбо́рнице , хрⷭ҇тїа́нѡмъ правᲂсла́внымъ тебѐ сла́вѧщимъ , мᲂли́твами твᲂи́ми , а҆га́рѧны ѻ҆рꙋжено́сныѧ в̾ско́рѣ пᲂсрамѝ .= и҆ ны́нѣ . Вразꙋмѝ дв҃це вѣ́рныхъ ли́ки , на врагѝ неви́димыѧ и҆ ви́димыѧ ᲂу҆крѣ́пльши , и҆ спасѝ ѿ всѧ́кїѧ ско́рби . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Во вто́рникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , и҃ . Ѻ҆́кᲂмъ бл҃гᲂꙋтро́бнымъ , ви́ждь мᲂѐ смире́нїе гдⷭ҇и , ꙗ҆́кѡ пᲂма́лꙋ жи́знь мᲂѧ̀ скᲂнчава́етсѧ , и҆ ѿ дѣ́лъ нѣ́сть мнѣ̀ спасе́нїѧ . сегѡ̀ ра́ди мᲂлю́сѧ , ѻ҆́кᲂмъ млрⷭ҇дымъ ви́ждь мᲂѐ смире́нїе и҆ спаси́ мѧ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Ꙗ҆́кѡ сꙋдїѝ прише́дшꙋ пᲂпецы́сѧ ѽ дш҃е и҆ страшна́гѡ днѐ ча́съ пᲂмышлѧ́й , сꙋ́дъ бо без̾ млⷭ҇ти є҆́сть несᲂдѣ́лавшимъ млⷭ҇ти . тѣ́мже пᲂщади́ мѧ сп҃се , є҆ди́нъ бо є҆сѝ без̾грѣ́шенъ . сла́ва , и҆ нн҃ѣ , боⷢ҇ . Н=епᲂкᲂлеби́мᲂе ᲂу҆тверже́нїе вѣ́ры , и҆ чⷭ҇тно́е дарᲂва́нїе дш҃а́мъ на́шимъ , бцⷣꙋ въ пѣ́снехъ велича́емъ вѣ́рнїи . ра́дꙋисѧ ꙗ҆́же ка́мень живо́тныи во́ чревѣ свᲂе́мъ вмѣсти́вши . ра́дꙋисѧ кᲂнце́мъ ᲂу҆пᲂва́нїе , и҆ печа́льнымъ застꙋ́пнице . ра́дꙋисѧ невѣ́сто неневѣ́стнаѧ .

по в҃ , стихᲂло́гїи , сѣда́льны . гла́съ , и҃ . Ꙗ҆́кѡ блꙋдни́ца припа́даю ти , да прїимꙋ̀ ѡ҆ставле́нїе , и҆ вмѣ́стѡ ми́ра сле́зы ѿ срⷣца принᲂшꙋ́ ти . да ꙗ҆́кѡ ѻ҆́нꙋю ᲂу҆ще́дриши мѧ сп҃се , и҆ пᲂда́си ми ѡ҆чище́нїе грѣхо́въ . ꙗ҆́кѡ бо ѻ҆на̀ зᲂвꙋ́ ти , и҆зба́ви мѧ ѿ скве́рныхъ дѣ́лъ мᲂи́хъ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Вѣ́къ мо́й скᲂнчава́етсѧ , житїѐ ми́мѡ и҆́детъ , и҆ стра́шныи тво́й престо́лъ гᲂто́витсѧ сп҃се , сꙋ́дъ менѐ жде́тъ , претѧ́ ми ѻ҆́гненᲂю мꙋ́кᲂю , и҆ пла́менемъ негаси́мымъ . сле́зъ тꙋ́чꙋ да́ждь ми и҆ ᲂу҆гасѝ є҆гѡ̀ си́лꙋ , хᲂтѧ́и спасти́сѧ всѣ́мъ чл҃кѡмъ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Свѣти́ла мы́сленаѧ ꙗ҆ви́стесѧ ст҃і́и мч҃нцы , мглꙋ́ бо пре́лести ᲂу҆праздни́сте вѣ́рᲂю дш҃е́вныѧ ва́ша свѣщѝ прᲂсвѣти́сте , и҆ съ женихо́мъ со сла́вᲂю внидо́сте в̾ нбⷭ҇ныи черто́гъ . и҆ ны́нѣ мᲂли́тесѧ спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . П=речⷭ҇таѧ дв҃о мт҃и хрⷭ҇то́ва , дш҃и мᲂеѧ̀ стра́сти лю́тыѧ и҆сцѣлѝ мᲂлю́сѧ . и҆ прᲂще́нїе да́рꙋй мᲂи́мъ прегрѣше́нїемъ , и҆́хже безꙋ́мнѣ сᲂдѣ́ѧхъ , дш҃ꙋ сѝ и҆ тѣ́ло ѡ҆скверни́въ ѻ҆каѧ́нныи . ᲂу҆вы̀ мнѣ̀ что̀ сᲂтвᲂрю̀ в̾ ча́съ ѻ҆́нъ , внегда̀ а҆́нг҃ли дш҃ꙋ мᲂю̀ разлꙋча́тъ ѿ ᲂу҆бо́гагѡ ми тѣлесѐ ; тᲂгда̀ пᲂмо́щница ми бꙋ́ди , и҆ пред̾ста́тельница , тебе́ бо и҆́мамъ ᲂу҆пᲂва́нїе ра́бъ тво́й .

по г҃ , стихᲂло́гїи , сѣда́ленъ . гла́съ , и҃ . Стра́шнаго и҆ ᲂу҆жа́снаго и҆ неꙋмы́тнаго сꙋди́ща твᲂегѡ̀ влⷣко хрⷭ҇тѐ , во ᲂу҆мѣ̀ прїе́млю де́нь и҆ ча́съ , трепе́щꙋ ꙗ҆́кѡ ѕлᲂдѣ́й , стꙋ́днаѧ дѣ́ла и҆́мамъ и҆ дѣѧ́нїѧ лю́таѧ , ꙗ҆́же є҆ди́нъ сᲂдѣ́ѧхъ прилѣ́жно . тѣ́мже со́ страхᲂмъ припа́даю тѝ и҆ вᲂпїю̀ бᲂлѣ́знено , мл҃твами прⷣтчи твᲂегѡ̀ , мнᲂгᲂмлⷭ҇тиве спаси́ мѧ . сла́ва , и҆ ны́нѣ , боⷢ҇ . Беспло́тныхъ твᲂи́хъ хрⷭ҇тѐ , и҆ прⷣтчи твᲂегѡ̀ , и҆ ᲂу҆чени́къ , и҆ прᲂро́къ , и҆ мч҃нкъ , и҆ ст҃ы́хъ всѣ́хъ , и҆ бцⷣы не и҆скꙋсᲂмꙋ́жныѧ , и҆ бл҃гі́ѧ мт҃ре твᲂеѧ̀ мл҃твами , ᲂу҆мᲂле́нъ бы́въ , да́ждь на́мъ во́ свѣтѣ твᲂе́мъ хᲂди́ти , и҆ спᲂдо́би на́съ ᲂу҆лꙋчи́ти црⷭ҇твїе твᲂѐ , за милᲂсе́рдїе млⷭ҇ти твᲂеѧ̀ . та́же , ѱало́мъ , н҃ . пᲂми́лꙋй мѧ бж҃е . и҆ вᲂз̾гла́съ , ми́лᲂстїю и҆ щедро́тами .

Кано́нъ пᲂкаѧ́ненъ , ко́ гдⷭ҇ꙋ на́шемꙋ і҆с҃ꙋ хрⷭ҇тꙋ̀ , и҆ ст҃ы́мъ є҆гѡ̀ мч҃нкѡмъ . твᲂре́нїе , ки́ръ і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Сᲂкрꙋ́шшемꙋ бра́ни мы́шцею свᲂе́ю , и҆ прᲂве́дшемꙋ і҆и҃лѧ сквᲂзѣ̀ чермно́е мо́ре , вᲂспᲂе́мъ є҆мꙋ̀ ꙗ҆́кѡ и҆зба́вителю на́шемꙋ ꙗ҆́кѡ прᲂсла́висѧ .

запѣ́въ : сла́ва тебѣ̀ бж҃е на́шъ , сла́ва тебѣ̀ . И҆спо́лни мᲂѐ срⷣце ᲂу҆миле́нїѧ хрⷭ҇тѐ , ꙗ҆́кѡ да вни́дꙋ пᲂкаѧ́нїемъ в̾ се́ла твᲂѧ̀ , и҆ и҆спᲂвѣ́данїе принесꙋ̀ тебѣ̀ , ѿ дᲂлго́въ мѧ раз̾рѣша́ющꙋ . Раз̾рѣши́ мѧ сло́ве ѿ ᲂу҆́зъ без̾чи́сленыхъ мᲂи́хъ ѕѡ́лъ , да ше́ствꙋю въ пᲂкаѧ́нїи пра́ведныѧ пꙋтѝ твᲂѧ̀ , въ бжⷭ҇твенᲂе наставлѧ́ющи пᲂко́ище вѣ́чныхъ красо́тъ .

запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Взѧ́тсѧ к̾ высᲂтѣ̀ вели́кᲂе мч҃нкъ твᲂи́хъ хрⷭ҇тѐ великᲂлѣ́пїе , всесла́вно бо пᲂстрада́вше , и҆ превели́кими твᲂи́ми бл҃гᲂда́тьми вᲂз̾вели́чишасѧ .= мⷱ҇ꙋ . Крᲂпле́нїемъ бжⷭ҇твеныхъ крᲂве́й ст҃ы́хъ страда́лецъ , кро́вь в̾ тре́бища принᲂси́маѧ врагꙋ̀ преста̀ , и҆ ѡ҆ст҃и́шасѧ земна́ѧ дх҃а бл҃гᲂда́тїю . боⷢ҇ . П=ᲂкаѧ́нїѧ ми дв҃о пᲂкажѝ пꙋтѝ , и҆ ѿвᲂдѧ́щїѧ мѧ къ грѣхꙋ̀ ѡ҆братѝ стезѝ , да тѧ̀ пᲂю̀ мнᲂгᲂпѣ́тꙋю бж҃їю рᲂди́тельницꙋ .

и҆́нъ кано́нъ , ст҃о́мꙋ и҆ вели́кᲂмꙋ , і҆ѡа́ннꙋ прⷣтчи . гла́съ , и҃ . і҆рмо́съ . И҆стрѧ́сшагѡ в̾ мо́ри мꙋчи́тельство фараѡ́не , и҆ по́ сꙋхꙋ і҆и҃лѧ наста́вльша . вᲂспᲂе́мъ бг҃ᲂви , ꙗ҆́кѡ прᲂсла́висѧ во́ вѣки . запѣ́въ : ст҃ы́и вели́кїи , і҆ѡа́нне прⷣтче гдⷭ҇нь , мᲂлѝ бг҃а ѡ҆ на́съ . Прⷣтче прᲂпᲂвѣ́дателю пᲂкаѧ́нїѧ , пᲂка́ѧтимисѧ ѿ дш҃и всеѧ̀ , мᲂлѝ сп҃са и҆ гдⷭ҇а , и҆ ᲂу҆́мъ мо́й прᲂсвѣща́ѧ и҆ срⷣце , и҆́же любо́вїю чтꙋ́щаго тѧ̀ . Ꙗ҆́кѡ пꙋсты́ни кра́снᲂе ѻ҆вча̀ прⷣтче мч҃нче хрⷭ҇то́въ , нн҃ѣ в̾ пꙋсты́ни мѧ страсте́й вᲂдвᲂрѧ́ющасѧ , наста́ви к̾ жи́зни пᲂкаѧ́нїѧ , бжⷭ҇твенᲂю ти мл҃твᲂю . Мꙋча́щаго мѧ грѣха̀ ско́рѡ свᲂбᲂдѝ , хᲂда́тайствᲂмъ твᲂи́мъ мꙋ́дре прⷣтче мᲂлю́сѧ , и҆ разрꙋшѝ на мѧ̀ дви́жимꙋю бѣсо́вскꙋю бꙋ́рю .= боⷢ҇ . С=паси́ мѧ мт҃и и҆́стинѣ , ѡ҆бꙋрева́емаго лю́тѣ ѿ страсте́й и҆ ча́стѡ пᲂгрꙋжа́ема , и҆ и҆спра́ви мѧ чⷭ҇таѧ , ко спасе́нїю бл҃гᲂꙋти́шнагѡ приста́нища .

пѣ́снь , г҃ . і҆рмо́съ . Оу҆тверди́сѧ се́рдце мᲂѐ ѡ҆́ гдⷭ҇ѣ , вᲂз̾несе́сѧ ро́гъ мо́й ѡ҆́ бз҃ѣ мᲂе́мъ , разшири́шасѧ на врагѝ мᲂѧ̀ ᲂу҆ста̀ мᲂѧ̀ , вᲂз̾весели́хсѧ ѡ҆ спасе́нїи твᲂе́мъ . Скве́рны ѕло́бныѧ ѿмы́въ мᲂегѡ̀ срⷣца , и҆ ꙗ҆ви́тимисѧ непᲂро́чнꙋ пред̾ тᲂбо́ю въ де́нь стра́шныи спᲂдо́би хрⷭ҇тѐ мо́й , ꙗ҆́кѡ пребл҃гъ . Вᲂз̾мо́же лꙋка́вствᲂмъ ᲂу҆мертви́ти мѧ ѿстꙋ́пникъ , жа́лᲂмъ грѣхо́внымъ . но са́мъ мѧ сло́ве хрⷭ҇тѐ живᲂно́снымъ и҆сцѣлѝ бы́лїемъ пᲂкаѧ́нїѧ .= мⷱ҇ꙋ . Ста́немъ мꙋ́жески вᲂз̾глаша́хꙋ стрⷭ҇тᲂте́рпцы дрꙋ́гъ дрꙋ́гꙋ , да некто̀ ѿве́ржетсѧ . влⷣка пᲂмо́щникъ на́мъ пред̾стᲂи́тъ стра́ждꙋщимъ до́блественымъ ᲂу҆мо́мъ . мⷱ҇ꙋ . Пречестны́ѧ ка́менїѧ цр҃ко́вныѧ , бжⷭ҇твеныѧ стᲂлпы̀ бл҃гᲂче́стїѧ пре́лести пᲂбѣди́тели , вᲂспᲂе́мъ всѝ чтꙋ́ще вѣ́рᲂю мч҃нки гдⷭ҇ни . боⷢ҇ . Н=из̾па́дшимъ и҆справле́нїе бцⷣе , па́дшаго вᲂз̾дви́гни мѧ и҆́з̾ рᲂва ѕѡ́лъ мᲂи́хъ , и҆ ᲂу҆твердѝ влⷣчце на ка́мени запᲂвѣде́й бж҃їихъ .

и҆́нъ , і҆рмо́съ . Оу҆твердѝ на́шъ ᲂу҆́мъ и҆ сердца̀ , ᲂу҆тверже́и нб҃са̀ сло́вᲂмъ сѝ , вᲂспѣва́ти же и҆ сла́вити тѧ̀ сп҃се , и҆зба́вителѧ дш҃а́мъ на́шимъ . Ѡ҆дᲂждѝ и҆ мнѣ̀ ка́пли пᲂкаѧ́нїѧ , и҆́же в̾ рѣцѣ̀ бе́зднꙋ крⷭ҇ти́выи бл҃гᲂꙋтро́бїѧ гдⷭ҇а всѣ́хъ , прⷣтче мꙋ́чениче дᲂстᲂсла́вне . Напа́стными вᲂлна́ми житїѧ̀ всегда̀ ᲂу҆мо́мъ кᲂле́блемь , прибѣга́ю пᲂд̾ кро́въ тво́й прⷣтче сп҃сᲂвъ , пᲂтщи́сѧ пᲂмᲂщи́ ми рабꙋ̀ твᲂемꙋ̀ . Въ нᲂщны́хъ мл҃твахъ , призыва́ю дневна́го свѣти́льника тебѐ ми́рꙋ , бг҃ᲂблаже́нне прⷣтче , прᲂсвѣтѝ мᲂѧ̀ серде́чнаѧ чꙋ́вства .= боⷢ҇ . Р=а́дꙋисѧ ѿ на́съ ст҃а́ѧ бцⷣе . ра́дꙋисѧ ꙗ҆́же ра́дᲂсть ро́ждьши ми́рꙋ . ра́дꙋисѧ ста́мно и҆з̾ неѧ́же ма́нна нбⷭ҇наѧ всѣ́мъ вѣ́рнымъ даде́сѧ .

пѣ́снь , д҃ . і҆рмо́съ . Оу҆слы́шахъ гдⷭ҇и слꙋ́хъ тво́й и҆ ᲂу҆бᲂѧ́хсѧ , ꙗ҆́кѡ не и҆зрече́ннымъ сᲂвѣ́тᲂмъ бг҃ъ сы́и приснᲂсꙋ́щныи , ѿ дв҃ы прᲂизы́де вᲂпло́щьсѧ . сла́ва схᲂжде́нїю твᲂемꙋ̀ хрⷭ҇тѐ , сла́ва си́лѣ твᲂе́й . Прельсти́ мѧ вкꙋше́нїемъ грѣхо́внымъ вра́гъ льсте́цъ , и҆ ѿ тебѐ бла́же дале́ча ᲂу҆далѝ , и҆ зꙋбо́мъ свᲂи́мъ снѣ́дь сᲂдѣ́ла . є҆ди́не сп҃се пᲂтщи́сѧ и҆з̾ѧ́ти мѧ . Не ꙗ҆вле́ннаѧ гдⷭ҇и и҆ сᲂкрᲂве́ннаѧ мᲂѧ̀ са́мъ вѣ́си , сᲂгрѣши́вшагѡ тѝ мно́го , мно́гими твᲂи́ми щедро́тами ᲂу҆ще́дри сло́ве бж҃їи ꙗ҆́кѡ млⷭ҇тивъ . и҆ пᲂкаѧ́нїѧ ми вре́мѧ пᲂда́ждь ѡ҆чисти́тельно .= мⷱ҇ꙋ . Ꙗ҆́кѡ вᲂлна́ми мꙋче́ньми пᲂтᲂплѧ́еми мч҃нцы , ѡ҆кᲂрмле́нїемъ хрⷭ҇то́вымъ к̾ приста́нищꙋ приведо́стесѧ нбⷭ҇наго црⷭ҇твїѧ . ѿ негѡ̀ пᲂбѣ́ды вѣнцы̀ вᲂи́стинꙋ ᲂу҆краша́еми . мⷱ҇ꙋ . Ѡ҆бнᲂви́вше мч҃нцы бл҃гᲂче́стїемъ зе́млю серде́чнꙋю , и҆спᲂвѣ́данїѧ на не́й сѣ́мѧ пᲂсѣ́ѧсте , и҆ мꙋче́нїѧ пᲂжа́сте ꙗ҆́вѣ стᲂри́чествꙋющїи кра́сныи кла́съ бл҃гᲂда́тїю . боⷢ҇ . В=сепѣ́таѧ влⷣчце , велегла́снѡ вᲂспѣва́ющаго тѧ̀ и҆спо́лни всѧ́кїѧ ра́дᲂсти мᲂю̀ мы́сль , пᲂдаю́щи ми пла́чь бл҃гъ , и҆ пᲂкаѧ́нїѧ вины̀ , и҆ ра́зꙋмъ спасе́нїѧ .

и҆́нъ , і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Себѐ самᲂгѡ̀ пла́чꙋ , житїѐ не и҆спра́влено и҆мѣ́ѧ всегда̀ , спасѝ и҆ ᲂу҆ще́дри мѧ прⷣтче , грѣхѝ пᲂгиба́ющаго . Въ мᲂли́твахъ и҆ мᲂле́нїихъ , да ѡ҆брѧ́щꙋ тѧ пᲂмо́щника бл҃же́нне , дш҃ꙋ мᲂю̀ ᲂу҆крѣплѧ́юща , и҆ пᲂмышле́нїе мᲂѐ ѡ҆зарѧ́юща . Пᲂтᲂплѧ́ема бꙋ́рею сᲂгрѣше́нїи и҆ бѣ́дствꙋюща мѧ , крⷭ҇тлю хрⷭ҇то́въ , ѡ҆кᲂрмѝ к̾ приста́нищꙋ бжⷭ҇твенагѡ ра́зꙋма .= боⷢ҇ . С=мири́вши мѧ высᲂкᲂмꙋ́дрено живꙋ́щаго спасѝ пречⷭ҇таѧ , ро́ждьшаѧ вᲂз̾не́сшаго смири́вшеесѧ є҆стество̀ .

пѣ́снь , є҃ . і҆рмо́съ . Мра́къ дш҃и мᲂеѧ̀ ѿженѝ свѣтᲂда́вче хрⷭ҇тѐ бж҃е , зачалᲂбы́тнꙋю тмꙋ̀ и҆згна́въ бе́здны , и҆ да́рꙋй ми свѣ́тъ пᲂвелѣ́нїи твᲂи́хъ сло́ве , да ᲂу҆́треннюѧ прᲂславлѧ́ю тѧ̀ . И҆́же блꙋдни́цꙋ ѡ҆чи́стивыи и҆ прᲂкаже́нныѧ , твᲂи́мъ пᲂвелѣ́нїемъ сᲂдѣ́телю всѧ́ческихъ , непᲂдо́бнагѡ грѣха̀ смире́нꙋю дш҃ꙋ мᲂю̀ ѡ҆чи́сти и҆ ѻ҆де́ждами блиста́ющими краснꙋ̀ сᲂдѣ́лай влⷣко . Ѿ ᲂу҆́зъ разрѣши́въ мѧ мно́гихъ мѝ прегрѣше́нїи хрⷭ҇тѐ бж҃е , невᲂзбра́ннѡ хᲂди́ти и҆спра́ви въ пꙋте́хъ твᲂи́хъ , ꙗ҆́кѡ да и҆з̾рѣши́всѧ ѿ́ плᲂти , в̾ пᲂко́ище ст҃о́е всели́всѧ сла́влю тѧ .= мⷱ҇ꙋ . И҆стка́вше ѿ трꙋдо́въ себѣ̀ ри́зꙋ сла́вы мч҃нцы , и҆ ѡ҆дѣ́ѧвшесѧ краснѡ̀ , в̾ вы́шнѣмъ живꙋ́тъ црⷭ҇твїи и҆ въ ра́дᲂсти , пᲂбѣ́ды вѣнцы̀ кра́сными ᲂу҆дᲂбрѧ́еми . мⷱ҇ꙋ . Текꙋ́щаѧ в̾стᲂѧ́щаѧ и҆з̾мѣни́ша бг҃ᲂмꙋ́дрено мч҃нцы . ᲂу҆тѣсне́ньми мꙋче́нїй разли́чныхъ ѡ҆бъѧ́ти бы́вше , къ прᲂстра́нствꙋ и҆́стиннᲂмꙋ нбⷭ҇нагѡ црⷭ҇твїѧ ᲂу҆стреми́шасѧ ра́дꙋющесѧ . боⷢ҇ . С=т҃а́ѧ бцⷣе , ꙗ҆́же ст҃о́е сло́во пᲂро́ждьши пло́тїю , пᲂчива́ющаго є҆ди́нᲂго на всѣ́хъ ст҃ы́хъ , ѡ҆ст҃ѝ мо́й ᲂу҆́мъ во бл҃ги́хъ дѣ́лѣхъ прⷭ҇нѡ пребыва́ти .

и҆́нъ , і҆рмо́съ . Ѿн́ᲂщи невѣ́дѣнїѧ , бг҃ᲂразꙋ́мїемъ прᲂсвѣще́й кᲂнцы̀ , прᲂсвѣти́ мѧ ᲂу҆́трᲂмъ , славᲂсло́вїѧ твᲂегѡ̀ гдⷭ҇и . Въ нᲂщѝ житїѧ̀ заблꙋ́ждьшаго мѧ , прᲂсвѣтѝ сла́вныи прⷣтче , свѣти́льникъ сы́и сл҃нца пра́веднагѡ . Въ бꙋ́дꙋщѣмъ сꙋдѣ̀ , є҆гда̀ и҆́мамъ гдⷭ҇ви пред̾ста́ти , да ѡ҆брѧ́щꙋ тѧ пред̾ста́телѧ прⷣтче , ѡ҆сꙋжде́нїѧ мѧ стра́шнагѡ и҆зима́юща . Напа́ствꙋемаго мѧ , и҆ и҆скꙋше́ньми бѣсо́вскими кᲂле́блемаго , ᲂу҆твердѝ на ка́мени бжⷭ҇твеныхъ хᲂтѣ́нїи прⷭ҇нѡ сла́вне .= боⷢ҇ . Ꙗ҆́=кѡ превы́шшаѧ всѣ́хъ тва́рей , мт҃и бж҃їѧ прⷭ҇нѡ дв҃о , вы́шша пᲂкажи́ мѧ вра́жїихъ сѣте́й .

пѣ́снь , ѕ҃ . і҆рмо́съ . Ꙗ҆́кᲂже пррⷪ҇ка и҆зба́ви и҆з̾ глꙋбины̀ преи҆спо́днїѧ , хрⷭ҇тѐ бж҃е , и҆ менѐ ѿ грѣ́хъ мᲂи́хъ и҆зба́ви , ꙗ҆́кѡ чл҃кᲂлю́бецъ . и҆ напра́ви живо́тъ мо́й мᲂлю́тисѧ . Ка́ющасѧ прїими́ мѧ . ꙗ҆́кᲂже и҆нᲂгда̀ ниневи́тѧны пла́кавшїѧсѧ , бжⷭ҇твенымъ прᲂпᲂвѣ́данїемъ хрⷭ҇тѐ прᲂро́ка твᲂегѡ̀ , и҆ ѡ҆кᲂрмѝ живо́тъ мᲂлю́тисѧ . Ꙗ҆́кѡ мыта́рь вᲂз̾дыха́ю . ꙗ҆́кᲂже блꙋдни́ца слезю̀ . ꙗ҆́кѡ пе́тръ вᲂпїю̀ , мно́гими пᲂгрꙋжа́емь прегрѣше́нїи хрⷭ҇тѐ , по́мᲂщи ми рꙋ́кꙋ да́ждь и҆ спаси́ мѧ .= мⷱ҇ꙋ . Ꙗ҆́кѡ бг҃ᲂсвѣ́тлаѧ свѣ́тила мч҃нцы , лꙋча́ми страда́нїѧ ѡ҆зарѧ́ете всегда̀ земны́и ми́ръ , и҆ ѿго́ните пре́лести тмꙋ̀ глꙋбо́кꙋю . мⷱ҇ꙋ . Блаже́ннѣйшїи кᲂне́цъ ѡ҆брѣ́тше всест҃і́и мч҃нцы , пᲂчита́ете всегда̀ бг҃а бл҃же́ннаго , наслажда́еми тᲂгѡ̀ свѣ́тлᲂстїю . боⷢ҇ . М=аннᲂпрїе́мнаѧ ста́мно , тѧ̀ бцⷣе и҆нᲂгда̀ прᲂѡ҆бразѝ , хрⷭ҇та́ бо нᲂси́ла є҆сѝ , и҆́же ма́ннꙋ ра́зꙋма ѡ҆дᲂжди́вшаго , всѣ́мъ чтꙋ́щимъ тѧ .

и҆́нъ , і҆рмо́съ . Ри́зꙋ ми пᲂда́ждь свѣ́тлꙋ , ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , мнᲂгᲂмлⷭ҇тиве хрⷭ҇тѐ бж҃е на́шъ . Сѣки́рᲂю пᲂкаѧ́нїѧ и҆́стиннагѡ , ве́щи ѡ҆чи́сти срⷣца мᲂегѡ̀ і҆ѡа́нне премꙋ́дре , и҆ плᲂдᲂно́сно дᲂбрᲂдѣ́тельми сᲂдѣ́лай є҆̀ . Ки́тᲂмъ сᲂдержи́мь напа́стей , и҆з̾ глꙋбины̀ срⷣца мᲂегѡ̀ взыва́ю ти прⷣтче . бᲂлѣ́зней мѧ лю́тыхъ свᲂбᲂдѝ . Дш҃е мᲂѧ̀ пᲂка́йсѧ , сѐ сꙋди́ще прїи́де . вᲂз̾ни́кни зᲂвꙋ́щи , і҆с҃е бж҃е мо́й , прⷣтчи ра́ди твᲂегѡ̀ ты́ мѧ ᲂу҆ще́дри .= боⷢ҇ . Є҆=ди́на сло́вᲂмъ , пло́тїю сло́во ро́ждьшаѧ чⷭ҇таѧ , мо́лимсѧ и҆зба́ви сѣ́тей вра́жїихъ дш҃а на́ша .

пѣ́снь , з҃ . і҆рмо́съ . А҆́нг҃лѡмъ ѻ҆́трᲂки ѿ ѻ҆гнѧ̀ спасѐ , и҆ гремѧ́щꙋю пе́щь прелᲂжи́въ на́ хладъ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Ꙗ҆́кѡ въ без̾зако́нїихъ заче́нсѧ и҆ рᲂди́хсѧ ще́дре , сᲂгрѣши́хъ па́че всѣ́хъ чл҃къ , ѡ҆браще́нїѧ ми пᲂда́ждь вре́мѧ ѡ҆правда́ющее мѧ . Превᲂзне́ссѧ безꙋ́мнѡ , ꙗ҆́кᲂже пре́жде фарисе́й , и҆ паде́нїемъ лю́тымъ падо́хсѧ . и҆ ви́дѧ мѧ ра́дꙋетсѧ вра́гъ , сло́ве бж҃їи непре́зри менѐ .= мⷱ҇ꙋ . Сᲂбо́ръ честны́хъ мч҃нкъ , во́инство непᲂбᲂри́мᲂе , по́лкъ ст҃ы́и гра́дꙋ написа́сѧ на́ нб҃сѣхъ , на землѝ мꙋ́жествᲂвавъ . мⷱ҇ꙋ . Во́лею стра́сть прᲂше́дше мч҃нцы , хᲂда́таицꙋ без̾сме́ртїю , стрꙋѝ и҆сцѣле́нїи и҆стᲂча́ете чл҃кѡмъ , стра́сти ѿгᲂнѧ́юща . боⷢ҇ . П=а́че вины̀ ражда́еши всѧ́ческихъ винꙋ̀ премно́жествᲂмъ бл҃гᲂсти , чл҃ка бы́вшаго . тѣ́мже сᲂгла́снѡ тѧ̀ чи́стаѧ ᲂу҆блажа́емъ .

и҆́нъ , і҆рмо́съ . Ѡ҆снᲂва́выи зе́млю в̾ нача́тцѣ , и҆ нб҃са̀ сло́вᲂмъ ᲂу҆тверже́й , блгⷭ҇ве́нъ є҆сѝ гдⷭ҇и , бж҃е ѻ҆ц҃ъ на́шихъ . И҆́же пꙋтѝ гдⷭ҇ни ᲂу҆гᲂто́вавыи прⷣтче , к̾ тᲂмꙋ́ же и҆спра́ви и҆ мᲂѧ̀ стезѝ , да зᲂвꙋ̀ , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . Прᲂпᲂвѣ́дниче свѣ́та , прᲂсвѣтѝ дш҃ꙋ мᲂю̀ , и҆ лю́тыѧ тмы̀ , и҆ гее́нны палѧ́щїѧ и҆зба́ви мѧ , прибѣга́ющаго к̾ тебѣ̀ несꙋмѣ́ннᲂю дш҃е́ю . Непло́дныѧ и҆з̾раще́нїе плᲂдᲂви́то сы́и , мᲂегѡ̀ се́рдца непло́дїе во бл҃гᲂпло́дїе претвᲂрѝ твᲂи́ми мᲂли́твами , премꙋ́дре крⷭ҇тлю хрⷭ҇то́въ .= боⷢ҇ . И҆=з̾бра́ннаѧ а҆́гнице бж҃їѧ сло́ва , мᲂлѝ и҆з̾ тебѐ вᲂпло́щшагᲂсѧ бг҃а ко и҆збра́ннымъ ѻ҆вца́мъ мѧ̀ причта́ти в̾ ча́съ стра́шныи .

пѣ́снь , и҃ . і҆рмо́съ . Пᲂкрыва́ѧй вᲂда́ми превы́спреннѧѧ свᲂѧ̀ , пᲂлага́ѧй мо́рю предѣ́лъ песо́къ , и҆ сᲂдержа́и зе́млю . тѧ̀ пᲂе́тъ сл҃нце , тѧ̀ сла́витъ лꙋна̀ , тебѣ̀ прино́ситъ хвалꙋ̀ всѧ̀ тва́рь , ꙗ҆́кѡ сᲂдѣ́телю всѣ́мъ во́ вѣки . Рꙋ́цѣ всѧ́кими ѡ҆скверни́ла є҆сѝ ѕлᲂдѣѧ́ньми дш҃е мᲂѧ̀ , и҆ ка́кѡ тѣ́хъ вᲂз̾дѣва́еши на высᲂтꙋ̀ бесѣ́дꙋющи бг҃ᲂви ; но́зѣ ѡ҆безче́стила є҆сѝ по дѣ́лᲂмъ хᲂдѧ́щи стꙋ́днымъ , пᲂтщи́сѧ хᲂди́ти пᲂкаѧ́нїемъ в̾ пꙋтѝ спаси́тельныѧ . Непребы́хъ гдⷭ҇и в̾ за́пᲂвѣдехъ твᲂи́хъ никᲂгда́же , несᲂтвᲂри́хъ ни де́нъ є҆ди́нъ твᲂегѡ̀ хᲂтѣ́нїѧ бл҃же . кᲂто́рыма ᲂу҆́бѡ ѻ҆чи́ма вᲂз̾зрю̀ на тѧ̀ тᲂгда̀ , твᲂрѧ́ща сꙋ́дъ пра́ведныи , и҆ пᲂви́нныѧ ѿсыла́юща въ пла́мень .= мⷱ҇ꙋ . Раз̾жже́нꙋю ᲂу҆гаси́сте пе́щь мнᲂгᲂбо́жїѧ мꙋ́дрїи страда́льцы , ꙗ҆́кᲂже во́дꙋ и҆злива́юще непра́веднѡ мно́гїѧ ва́ша кро́ви , прᲂлїѧ́вшїѧсѧ за любо́вь твᲂрца̀ . тѣ́мже пᲂто́къ пи́щи наслѣ́дᲂвасте . мⷱ҇ꙋ . Презрѣ́сте ст҃і́и смире́нїемъ земно́е тѣ́ло , и҆ мꙋче́нїѧ пᲂдъѧ́сте , ꙗ҆́кᲂже и҆но́мꙋ стра́ждꙋщꙋ , ѿсѣче́нїе рꙋка́мъ же и҆ нᲂга́мъ . тѣ́мже пребо́льшемꙋ ны́нѣ спᲂдо́бистесѧ живᲂтꙋ̀ и҆ црⷭ҇твїю . боⷢ҇ . В=ᲂлнꙋ́ѧисѧ бꙋ́рею грѣхо́внᲂю , вᲂпїю́ ти влⷣчце чⷭ҇таѧ , твᲂи́мъ хᲂда́тайствᲂмъ напра́ви мѧ . ко спаси́тельнᲂмꙋ пᲂкаѧ́нїю , и҆ ко всеꙋти́шнᲂмꙋ приста́нищꙋ , ꙗ҆́кѡ да ᲂу҆ви́жꙋ свѣ́тъ спасе́нїѧ . а҆́зъ пᲂмрача́емыи прⷭ҇нѡ лѣ́нᲂстїю .

и҆́нъ , і҆рмо́съ . Без̾нача́льнагѡ цр҃ѧ сла́вы , є҆го́же трепе́щꙋтъ нбⷭ҇ныѧ си́лы , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . Взе́млющаго грѣхѝ ми́рꙋ а҆́гньца бж҃їѧ , є҆го́же пᲂказа́лъ є҆сѝ всѣ́мъ . мᲂлѝ крⷭ҇тлю , стра́сти мᲂѧ̀ ᲂу҆мертви́ти , и҆ спастѝ дш҃ꙋ мᲂю̀ . Ѡ҆блегчѝ бре́мѧ дш҃и мᲂе́й , и҆ ра́тꙋй бᲂрю́щихъ мѧ , гдⷭ҇нь крⷭ҇тлю , и҆ не ᲂу҆ѧ́звена пᲂкажи́ мѧ ѿ тѣ́хъ ѕлᲂдѣѧ́нїи . Оу҆да́лилсѧ є҆сѝ бѣ́гаѧ прᲂро́че , вᲂд̾вᲂри́вжесѧ в̾ пꙋсты́ню непрᲂхо́днꙋю . тѣ́мже тѧ̀ мᲂлю̀ , стра́сти дш҃и мᲂеѧ̀ разрꙋшѝ в̾ско́рѣ .= боⷢ҇ . Л=ᲂза̀ є҆сѝ дв҃о , ꙗ҆́же гро́здъ зрѣ́лъ ро́ждьши , ᲂу҆миле́нїѧ вино́мъ напᲂѧ́ющи мѧ̀ ны́нѣ , ѿи҆мѝ пїѧ́нство ѕѡ́лъ мᲂи́хъ .

та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Бл҃гᲂслᲂве́нъ гдⷭ҇ь бг҃ъ і҆и҃левъ , вᲂз̾дви́гнꙋвыи ро́гъ спасе́нїѧ на́мъ , в̾ дᲂмꙋ̀ дв҃дᲂвѣ ѻ҆́трᲂка свᲂегѡ̀ . в̾ ни́хже пᲂсѣтѝ на́съ вᲂсто́къ свы́ше , и҆ напра́вилъ ны̀ є҆́сть на пꙋ́ть ми́ренъ . Да и҆ а҆́зъ спаса́емь бл҃гᲂда́рнѡ тебѐ хрⷭ҇тѐ велича́ю , вᲂз̾зрѝ на мѧ̀ и҆́же мно́ги ра́ны наплещꙋ̀ прїе́мшаго , и҆ и҆сцѣлѝ , вино̀ на ни́хъ и҆ ма́сло прᲂлива́ѧ твᲂегѡ̀ разꙋмѣ́нїѧ сп҃се бл҃гᲂꙋтро́бне . Ꙗ҆́кѡ разбо́йника бл҃гᲂнра́внаго , и҆спꙋсти́вшаго гла́съ , и҆зба́вилъ є҆сѝ ᲂу҆бі́йствъ и҆ тмы̀ ѕо́лъ , ꙗ҆́кᲂже ᲂу҆ще́дрилъ є҆сѝ блꙋдни́цꙋ слези́вшꙋю . ꙗ҆́кᲂже петра̀ вели́кагѡ ᲂу҆ченика̀ , и҆ дв҃да прᲂро́ка , и҆ менѐ сп҃се пᲂми́лꙋй ѿчаѧ́ннаго .= мⷱ҇ꙋ . Сᲂѡ҆брази́вшесѧ стрⷭ҇те́мъ , страда́вшагѡ на́съ ра́ди стрⷭ҇тᲂте́рпцы , с̾ ни́мъ прᲂславлѧ́етесѧ ны́нѣ , ѡ҆бᲂжа́еми бжⷭ҇твеными прича́стїѧми , и҆ сїѧ́юще па́че заре́й чꙋ́вственагѡ со́лнца , прᲂсвѣща́ете вѣ́рныхъ срⷣца̀ . мⷱ҇ꙋ . Дᲂбрᲂдѣ́тель прᲂсїѧ̀ ст҃ы́хъ страда́лецъ , и҆ всѧ́къ гра́дъ си́ми сᲂкро́вищи некра́дᲂмыми ѡ҆бᲂгаща́етсѧ вѣ́рᲂю . ѡ҆блиста́ющихъ бл҃гᲂда́ть ѡ҆би́льно чꙋде́съ пресла́вныхъ . и҆́хже пѣснᲂсло́вимъ ꙗ҆́кѡ те́плыѧ пред̾ста́тели . боⷢ҇ . С=вѣ́тлыми мо́лнїѧ ми всенепᲂро́чнаѧ , и҆з̾ твᲂеѧ̀ прᲂше́дшагѡ ᲂу҆тро́бы , сн҃а бж҃їѧ , вѣ́рᲂю пᲂю́щїѧ тѧ прᲂсвѣтѝ , и҆ тмы̀ несвѣ́тлыѧ и҆ вѣ́чныѧ мꙋ́ки и҆змѝ на́съ , всѣ́хъ пред̾ста́тельнице .

и҆́нъ , і҆рмо́съ . Прᲂѧвле́ннᲂе на гᲂрѣ̀ закᲂнᲂда́вцꙋ , ѻ҆гне́мъ и҆ кꙋпино́ю , ржⷭ҇тво̀ при́снѡ дв҃ыѧ . въ на́ше вѣ́рныхъ спасе́нїе , пѣ́сньми немо́лчными велича́емъ . Хᲂтѧ̀ стра́шнᲂмꙋ ти пред̾ста́ти престо́лꙋ сло́ве . и҆ дѣѧ́нїемъ мᲂи́мъ прїѧ́ти сꙋ́дъ , кᲂто́рыи ѡ҆брѧ́щꙋ ѿвѣ́тъ ѻ҆каѧ́нныи . твᲂегѡ̀ ра́ди крⷭ҇тлѧ , гдⷭ҇и бж҃е мо́й тᲂгда̀ пᲂщади́ мѧ . Ꙗ҆́кѡ гла́съ сло́вꙋ , и҆спра́ви гла́сы мᲂѧ̀ к̾ бг҃ꙋ мꙋ́дре крⷭ҇тлю . и҆ и҆зба́ви мѧ ѕло́бы бѣсо́вскїѧ , и҆ и҆скꙋше́нїѧ чл҃къ , да по́ дᲂлгꙋ ᲂу҆блажа́ю тѧ . Вᲂспита́й мѧ , пи́щею без̾сме́ртнᲂю хрⷭ҇то́выхъ запᲂвѣде́й . напо́й мѧ пи́ва живо́тнаго крⷭ҇тлю и҆ прⷪ҇рче , и҆ пред̾ста́ви бг҃ꙋ спасе́на , пᲂд̾ кро́въ тво́й притека́ющаго .= боⷢ҇ . В=лⷣчце дв҃о чⷭ҇таѧ и҆ препрᲂсла́вленаѧ , с̾ прⷣтчею сн҃а свᲂегѡ̀ и҆ цр҃ѧ мᲂлѝ , ѿ всѧ́кїѧ нꙋ́жды спастѝ и҆́же вѣ́рᲂю тѧ блажа́щїѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , и҃ . Є҆гда̀ прїимꙋ̀ во ᲂу҆мѣ̀ мно́жество сᲂдѣ́ѧнныхъ ми ѕѡ́лъ , и҆ в̾ пᲂмышле́нїе прїидꙋ̀ стра́шнагѡ ѻ҆́нᲂгѡ и҆спыта́нїѧ , тре́петᲂмъ сᲂдержи́мъ к̾ тебѣ̀ прибѣга́ю чл҃кᲂлю́бцꙋ бг҃ꙋ . тѣ́мже непре́зри менѐ мᲂлю́ тѧ є҆ди́не без̾грѣ́шне , да́рꙋй ᲂу҆миле́нїе смире́ннѣй мѝ дш҃и пре́жде кᲂнца̀ и҆ спаси́ мѧ .

сти́хъ : и҆спо́лнихᲂмсѧ за ᲂу҆́тра . Сле́зы ми да́ждь бж҃е , ꙗ҆́кᲂже дре́вле женѣ̀ грѣ́шницѣ , и҆ спᲂдо́би мѧ ѡ҆мᲂчи́ти но́зѣ твᲂѝ , ꙗ҆́же мѧ̀ ѿ пꙋтѝ льсти́вагѡ свᲂбо́ждьшаѧ , и҆ ми́ро бл҃гᲂꙋха́нїѧ тебѣ̀ принᲂси́ти при́снѡ , житїѐ чи́сто пᲂкаѧ́нїемъ мѝ стѧжа́нно , да ᲂу҆слы́шꙋ и҆ а҆́зъ бл҃гі́и тво́й гла́съ , вѣ́ра твᲂѧ̀ спасе́ тѧ и҆дѝ в̾ ми́ръ .

сти́хъ : и҆ бꙋ́ди свѣ́тлᲂсть . мⷱ҇ꙋ . Вельмѝ пᲂд̾виза́стесѧ ст҃і́и , мꙋ́ки ѿ без̾зако́нникъ претерпѣ́сте до́блественѣ , и҆ хрⷭ҇та̀ и҆спᲂвѣ́давше пред̾ царѝ . и҆ преста́вльшесѧ ѿ житїѧ̀ , па́ки си́лы дѣ́йствꙋете в̾ ми́рѣ , и҆ недꙋ́гꙋющїѧ и҆сцѣлѧ́ете страстьмѝ свᲂи́ми ст҃і́и . мᲂли́те спасти́сѧ дш҃а́мъ на́шимъ .

сла́ва , и҆ ны́нѣ , боⷢ҇ . Кро́въ тво́й бцⷣе дв҃о врачевство̀ є҆́сть дх҃о́внᲂе , во́нь бо прибѣга́юще ѿ дш҃е́вныхъ недꙋ́гъ и҆збавлѧ́емсѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Во вто́рникъ , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Пꙋчи́нꙋ ꙗ҆́кѡ и҆мѣ́ѧ хрⷭ҇тѐ милᲂсе́рдїѧ , и҆з̾сꙋшѝ мᲂи́хъ прегрѣше́нїи пꙋчи́нꙋ , и҆ ᲂу҆миле́нїѧ слеза́ми дш҃ꙋ мᲂю̀ ѡ҆камене́нꙋю претвᲂрѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Дре́вле хрⷭ҇та̀ в̾ вᲂдѣ̀ крⷭ҇ти́въ , бжⷭ҇твеныи крⷭ҇тлю , ѿ страсте́й мѧ̀ тревᲂлне́нїѧ ѡ҆бꙋрева́ема , ко приста́нищꙋ пᲂкаѧ́нїѧ твᲂи́ми мᲂльба́ми ᲂу҆стремѝ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Крᲂвьмѝ ва́шими ст҃і́и страстᲂте́рпцы , ᲂу҆гаси́вше ѻ҆́гнь и҆дᲂлᲂбѣ́сїѧ , стрꙋѝ и҆стᲂча́ете всегда̀ и҆сцѣле́нїемъ , стра́сти разли́чныѧ и҆сцѣлѧ́юще .

сла́ва . Без̾нача́льне ѻ҆́ч҃е и҆ сн҃е , и҆ бжⷭ҇твеныи д́ш҃е , крⷭ҇тлѧ мл҃твами , мнᲂгᲂлѣ́тныѧ стрⷭ҇ти дш҃и мᲂеѧ̀ ᲂу҆тᲂлѝ мᲂлю́сѧ , и҆ спаси́ мѧ раба̀ твᲂегѡ̀ .

и҆ ны́нѣ . И҆зба́ви на́съ ѿ страсте́й и҆ грѣха̀ , и҆ лю́тагѡ во а҆́дѣ мꙋче́нїѧ , мᲂльба́ми свᲂи́ми пречⷭ҇таѧ бцⷣе , и҆́же бл҃гᲂче́стнѡ тѧ̀ велича́ющихъ .

<< Previous

Contents

Next >>