Бг҃орѡ́дичны воскре́сны
на ѻ҆́смь гласѡ́въ
Гла́съ а҃, бг҃оро́диченъ:
Всемі́рнꙋю сла́вꙋ, ꙳ ѿ человѣ̑къ прозѧ́бшꙋю, ꙳ и҆ влⷣкꙋ ро́ждшꙋю, ꙳ небе́снꙋю две́рь воспои́мъ мр҃і́ю дв҃ꙋ, ꙳ безпло́тныхъ пѣ́снь, и҆ вѣ́рныхъ ᲂу҆добре́нїе: ꙳ сїѧ̀ бо ꙗ҆ви́сѧ нб҃о, и҆ хра́мъ бж҃ества̀: ꙳ сїѧ̀ прегражде́нїе вражды̀ разрꙋши́вши, ꙳ ми́ръ введѐ, и҆ црⷭ҇твїе ѿве́рзе, ꙳ сїю̀ ᲂу҆́бѡ и҆мꙋ́ще вѣ́ры ᲂу҆твержде́нїе, ꙳ побо́рника и҆́мамы и҆зъ неѧ̀ ро́ждшагосѧ гдⷭ҇а. ꙳ дерза́йте ᲂу҆́бѡ, дерза́йте лю́дїе бж҃їи: ꙳ и҆́бо то́й побѣди́тъ врагѝ, ꙳ ꙗ҆́кѡ всеси́ленъ.
На стїхо́внѣ, бг҃оро́диченъ:
Сѐ и҆спо́лнисѧ и҆са́їино прорече́нїе, ꙳ дв҃а бо родила̀ є҆сѝ, ꙳ и҆ по рождествѣ̀ ꙗ҆́кѡ пре́жде рождества̀ пребыла̀ є҆сѝ: ꙳ бг҃ъ бо бѣ̀ рожде́йсѧ, ꙳ тѣ́мже и҆ є҆стєства̀ новопресѣчѐ. ꙳ но ѽ бг҃ома́ти! ꙳ молє́нїѧ твои́хъ рабѡ́въ, ꙳ въ твое́мъ хра́мѣ приноси̑маѧ тебѣ̀ не пре́зри: ꙳ но ꙗ҆́кѡ бл҃гоꙋтро́бнаго твои́ма рꙋка́ма носѧ́щи, ꙳ на твоѧ̑ рабы̑ ᲂу҆милосе́рдисѧ, ꙳ и҆ молѝ спасти́сѧ дꙋша́мъ на́шымъ.
Гла́съ в҃, бг҃оро́диченъ:
Пре́йде сѣ́нь зако́ннаѧ, бл҃года́ти прише́дши: ꙳ ꙗ҆́коже бо кꙋпина̀ не сгара́ше ѡ҆палѧ́ема: ꙳ та́кѡ дв҃а родила̀ є҆сѝ, ꙳ и҆ дв҃а пребыла̀ є҆сѝ. ꙳ вмѣ́сто столпа̀ ѡ҆́гненнаго, ꙳ пра́ведное возсїѧ̀ сл҃нце: ꙳ вмѣ́сто мѡѷсе́ѧ, ꙳ хрⷭ҇то́съ, спасе́нїе дꙋ́шъ на́шихъ.
На стїхо́внѣ, бг҃оро́диченъ:
Ѽ чꙋдесѐ но́вагѡ всѣ́хъ дре́внихъ чꙋде́съ! ꙳ кто́ бо позна̀ мт҃рь безъ мꙋ́жа ро́ждшꙋю, ꙳ и҆ на рꙋкꙋ̀ носѧ́щꙋю, всю̀ тва́рь содержа́щаго; ꙳ бж҃їе є҆́сть и҆зволе́нїе, ро́ждшеесѧ. ꙳ є҆го́же ꙗ҆́кѡ млⷣнца, пречⷭ҇таѧ, твои́ма рꙋка́ма носи́вшаѧ, ꙳ и҆ мт҃рне дерзнове́нїе къ немꙋ̀ и҆мꙋ́щаѧ, ꙳ не преста́й молѧ́щи ѡ҆ чтꙋ́щихъ тѧ̀, ꙳ ᲂу҆ще́дрити и҆ сп҃стѝ дꙋ́шы на́шѧ.
Гла́съ г҃, бг҃оро́диченъ:
Ка́кѡ не диви́мсѧ бг҃омꙋ́жномꙋ рождествꙋ̀ твоемꙋ̀, пречⷭ҇тна́ѧ; ꙳ и҆скꙋше́нїѧ бо мꙋ́жескагѡ не прїе́мши, всенепоро́чнаѧ, ꙳ родила̀ є҆сѝ без̾ ѻ҆ц҃а̀ сн҃а пло́тїю, ꙳ пре́жде вѣ̑къ ѿ ѻ҆ц҃а̀ рожде́ннаго без̾ мт҃ре, ꙳ ника́коже претепѣ́вшаго и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ, ꙳ но ѻ҆бою̀ сꙋществꙋ̀ сво́йство цѣ́ло сохра́ншаго. ꙳ тѣ́мже, мт҃и, дв҃о влⷣчце, ꙳ того̀ молѝ спасти́сѧ дꙋша́мъ, ꙳ правосла́внѡ бцⷣꙋ и҆сповѣ́дающихъ тѧ̀.
На стїхо́внѣ, бг҃оро́диченъ:
Без̾ сѣ́мене ѿ бж҃е́ственнагѡ дх҃а, ꙳ во́лею же ѻ҆́ч҃ею зачала̀ є҆сѝ сн҃а бж҃їѧ, ꙳ ѿ ѻ҆ц҃а̀ без̾ мт҃ре пре́жде вѣ̑къ сꙋ́ща: ꙳ на́съ же ра́ди, и҆зъ тебѐ без̾ ѻ҆ц҃а̀ бы́вша, ꙳ пло́тїю родила̀ є҆сѝ, ꙳ и҆ млⷣнца млеко́мъ пита́ла є҆сѝ. ꙳ тѣ́мже не преста́й моли́ти, ꙳ и҆зба́витисѧ ѿ бѣ́дъ дꙋша́мъ на́шымъ.
Гла́съ д҃, бг҃оро́диченъ:
И҆́же тебѐ ра́ди бг҃оѻц҃ъ прⷪ҇ро́къ дв҃дъ ꙳ пѣ́сненнѡ ѡ҆ тебѣ̀ провозгласѝ, ꙳ вели̑чїѧ тебѣ̀ сотво́ршемꙋ: ꙳ предста̀ цр҃и́ца ѡ҆деснꙋ́ю тебѐ. тѧ́ бо мт҃рь, хода́таицꙋ живота̀ показа̀, ꙳ без̾ ѻ҆ц҃а̀ и҆з̾ тебѐ вочеловѣ́читисѧ бл҃говоли́вый бг҃ъ: ꙳ да сво́й па́ки ѡ҆бнови́тъ ѡ҆́бразъ, и҆стлѣ́вшїй страстьмѝ, ꙳ и҆ заблꙋ́ждшее горохи́щное ѡ҆брѣ́тъ ѻ҆вча̀, ꙳ на ра́мо воспрїи́мъ, ко ѻ҆ц҃ꙋ̀ принесе́тъ, и҆ своемꙋ̀ хотѣ́нїю, ꙳ съ небе́сными совокꙋпи́тъ си́лами, ꙳ и҆ спасе́тъ бцⷣе, мі́ръ, ꙳ хрⷭ҇то́съ и҆мѣ́ѧй ве́лїю и҆ бога́тꙋю млⷭ҇ть.
На стїхо́внѣ, бг҃оро́диченъ:
При́зри на молє́нїѧ твои́хъ ра̑бъ, всенепоро́чнаѧ, ꙳ ᲂу҆толѧ́ющи лю̑таѧ на ны̀ воста̑нїѧ, ꙳ всѧ́кїѧ ско́рби на́съ и҆змѣнѧ́ющи: ꙳ тѧ́ бо є҆ди́нꙋ, тве́рдое и҆ и҆звѣ́стное ᲂу҆твержде́нїе и҆́мамы: ꙳ и҆ твоѐ предста́тельство стѧжа́хомъ, ꙳ да не постыди́мсѧ, влⷣчце, тѧ̀ призыва́ющїи, ꙳ потщи́сѧ на ᲂу҆моле́нїе, ꙳ тебѣ̀ вѣ́рнѡ вопїю́щихъ: ꙳ ра́дꙋйсѧ, влⷣчце, ꙳ всѣ́хъ по́моще, ра́досте и҆ покро́ве, ꙳ и҆ спасе́нїе дꙋ́шъ на́шихъ.
Гла́съ є҃, бг҃оро́диченъ:
Въ чермнѣ́мъ мо́ри, ꙳ неискꙋсобра́чныѧ невѣ́сты ѻ҆́бразъ написа́сѧ и҆ногда̀: ꙳ та́мѡ мѡѷсе́й, раздѣли́тель воды̀: ꙳ здѣ́ же гаврїи́лъ, слꙋжи́тель чꙋдесѐ. ꙳ тогда̀ глꙋбинꙋ̀ ше́ствова немо́креннѡ і҆и҃ль: ꙳ ны́нѣ же хрⷭ҇та̀ родѝ безсѣ́меннѡ дв҃а. ꙳ мо́ре по проше́ствїи і҆и҃левѣ, пребы́сть непрохо́дно: ꙳ непоро́чнаѧ по рождествѣ̀ є҆мманꙋ́илевѣ, пребы́сть нетлѣ́нна. ꙳ сы́й, и҆ пре́жде сы́й, ꙳ ꙗ҆вле́йсѧ ꙗ҆́кѡ чл҃вѣ́къ, ꙳ бж҃е, поми́лꙋй на́съ.
На стїхо́внѣ, бг҃оро́диченъ:
Хра́мъ и҆ две́рь є҆сѝ, ꙳ пала́та и҆ прⷭ҇то́лъ цр҃е́въ, ꙳ дв҃о всечестна́ѧ, ꙳ є҆́юже и҆зба́витель мо́й, хрⷭ҇то́съ гдⷭ҇ь, во тмѣ̀ спѧ́щымъ ꙗ҆ви́сѧ, ꙳ сл҃нце пра́вды, просвѣти́ти хотѧ̀, ꙳ ꙗ҆̀же созда́ по ѻ҆́бразꙋ своемꙋ̀ рꙋко́ю свое́ю. ꙳ тѣ́мже, всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вшаѧ, ꙳ непреста́ннѡ молѝ спасти́сѧ дꙋша́мъ на́шымъ.
Гла́съ ѕ҃, бг҃оро́диченъ:
Кто̀ тебѐ не ᲂу҆блажи́тъ прест҃а́ѧ дв҃о; ꙳ кто́ ли не воспое́тъ твоегѡ̀ пречⷭ҇тагѡ рождества̀; ꙳ безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, ꙳ то́йже ѿ тебѐ чⷭ҇тыѧ про́йде, ꙳ неизрече́ннѡ вопло́щсѧ, ꙳ є҆стество́мъ бг҃ъ сы́й, ꙳ и҆ є҆стество́мъ бы́въ чл҃вѣ́къ на́съ ра́ди, ꙳ не во двою̀ лицꙋ̑ раздѣлѧ́емый, ꙳ но во двою̀ є҆стествꙋ̑ ꙳ несли́тнѡ познава́емый. ꙳ того̀ молѝ, чⷭ҇таѧ, всебл҃же́ннаѧ, ꙳ поми́ловатисѧ дꙋша́мъ на́шымъ.
На стїхо́внѣ, бг҃оро́диченъ:
Творе́цъ и҆ и҆зба́витель мо́й, пречⷭ҇таѧ, хрⷭ҇то́съ гдⷭ҇ь ꙳ и҆зъ твои́хъ ложе́снъ проше́дъ, ꙳ въ мѧ̀ ѡ҆болкі́йсѧ, ꙳ пе́рвыѧ клѧ́твы а҆да́ма свободѝ. ꙳ тѣ́мже тѝ, всечⷭ҇таѧ, ꙳ ꙗ҆́кѡ бж҃їи мт҃ри же и҆ дв҃ѣ, ꙳ вои́стиннꙋ вопїе́мъ немо́лчнѡ: ꙳ ра́дꙋйсѧ а҆́гг҃льски, ра́дꙋйсѧ влⷣчце, ꙳ предста́тельство и҆ покро́ве, ꙳ и҆ спасе́нїе дꙋ́шъ на́шихъ.
Гла́съ з҃, бг҃оро́диченъ:
Мт҃и ᲂу҆́бѡ позна́ласѧ є҆сѝ, ꙳ па́че є҆стества̀, бцⷣе, ꙳ пребыла́ же є҆сѝ дв҃а, ꙳ па́че сло́ва и҆ ра́зꙋма: ꙳ и҆ чꙋдесѐ рождества̀ твоегѡ сказа́ти ѧ҆зы́къ не мо́жетъ. ꙳ пресла́внꙋ бо сꙋ́щꙋ зача́тїю, чⷭ҇таѧ, ꙳ непости́женъ є҆́сть ѡ҆́бразъ рожде́нїѧ: ꙳ и҆дѣ́же бо хо́щетъ бг҃ъ, побѣжда́етсѧ є҆стества̀ чи́нъ. ꙳ тѣ́мже тѧ̀ всѝ, мт҃рь бж҃їю вѣ́дꙋще, ꙳ мо́лимтисѧ прилѣ́жнѡ, ꙳ молѝ спасти́сѧ дꙋша́мъ на́шымъ.
На стїхо́внѣ, бг҃оро́диченъ:
Под̾ кро́въ тво́й, влⷣчце, всѝ земноро́днїи прибѣга́юще, вопїе́мъ тѝ: ꙳ бцⷣе ᲂу҆пова́нїе на́ше, ꙳ и҆зба́ви ны̀ ѿ безмѣ́рныхъ прегрѣше́нїй, ꙳ и҆ спасѝ дꙋ́шы на́шѧ.
Гла́съ и҃, бг҃оро́диченъ:
Цр҃ь нбⷭ҇ный за человѣколю́бїе на землѝ ꙗ҆ви́сѧ, ꙳ и҆ съ человѣ̑ки поживѐ: ꙳ ѿ дв҃ы бо чⷭ҇тыѧ пло́ть прїе́мый, ꙳ и҆ и҆зъ неѧ̀ проше́дый съ воспрїѧ́тїемъ: ꙳ є҆ди́нъ є҆́сть сн҃ъ, сꙋгꙋ́бъ є҆стество́мъ, ꙳ но не ѵ҆поста́сїю. ꙳ тѣ́мже соверше́нна того̀ бг҃а, ꙳ и҆ соверше́нна чл҃вѣ́ка вои́стиннꙋ проповѣ́дающе, ꙳ и҆сповѣ́дꙋемъ хрⷭ҇та̀ бг҃а на́шего: ꙳ є҆го́же молѝ, мт҃и безневѣ́стнаѧ, ꙳ поми́ловатисѧ дꙋша́мъ на́шымъ.
На стїхо́внѣ, бг҃оро́диченъ:
Безневѣ́стнаѧ дв҃о, ꙳ ꙗ҆́же бг҃а неизрече́ннѡ заче́нши пло́тїю, ꙳ мт҃и бг҃а вы́шнѧгѡ, твои́хъ рабѡ́въ мольбы̑ прїимѝ, всенепоро́чнаѧ, ꙳ всѣ̑мъ подаю́щи ѡ҆чище́нїе прегрѣше́нїй: ꙳ ны́нѣ на̑ша молє́нїѧ прїе́млющи, ꙳ молѝ спасти́сѧ всѣ̑мъ на́мъ.
Бг҃орѡ́дичны ѻ҆смѝ гласѡ́въ
поє́мыѧ, є҆гда̀ є҆́сть Сла́ва ст҃о́мꙋ въ мине́и
И҆ ны́нѣ, по гла́сꙋ сїѧ̑
Нбⷭ҇ныхъ чинѡ́въ ра́дованїе, на землѝ человѣ́кѡвъ крѣ́пкое предста́тельство, пречⷭ҇таѧ дв҃о, спаси́ ны, и҆̀же къ тебѣ̀ прибѣга́ющыѧ: ꙗ҆́кѡ на тѧ̀ ᲂу҆пова́нїе по бз҃ѣ, бцⷣе, возложи́хомъ.
Въ понедѣ́льникъ, на ᲂу҆́трени бг҃оро́диченъ:
Ст҃ѣ́йшаѧ ст҃ы́хъ всѣ́хъ си́лъ, честнѣ́йшаѧ всеѧ̀ тва́ри, бцⷣе, влⷣчце мі́ра, спаси́ ны, сп҃са ро́ждшаѧ, ѿ прегрѣше́нїй тмори́чныхъ и҆ бѣ́дъ, ꙗ҆́кѡ бл҃га́ѧ, моли́твами твои́ми.
Въ понедѣ́льникъ ве́чера бг҃оро́диченъ:
Дв҃о всепѣ́таѧ, ю҆́же къ тебѣ̀ та́йнꙋ мѡѷсе́й прⷪ҇ро́ческима ви́дѣ ѻ҆чи́ма, кꙋпинꙋ̀ горѧ́щꙋ и҆ неѡпалѧ́емꙋ: бж҃ества́ бо ѻ҆́гнь ᲂу҆тро́бꙋ твою̀, чⷭ҇таѧ, не ѡ҆палѝ. Тѣ́мже мо́лимъ тѧ̀, ꙗ҆́кѡ мт҃рь бг҃а на́шегѡ, ми́ръ и҆спроси́ти мі́рови, и҆ ве́лїю ми́лость.
Во вто́рникъ ᲂу҆́тра бг҃оро́диченъ:
Блꙋдни́цꙋ и҆ блꙋ́днаго а҆́зъ, и҆ разбо́йника побѣди́хъ, и҆ мытарѧ̀ прегрѣше́нїй преминꙋ́хъ, и҆ нїнеѵі́тѧны. Оу҆вы̀ мнѣ̀, что̀ бꙋ́дꙋ; ка́кѡ ᲂу҆бѣ́гнꙋ мꙋ́ки а҆́зъ ѻ҆каѧ́нный; чⷭ҇таѧ, припа́даю тѝ, ᲂу҆ще́дри мѧ̀ ми́лостїю твое́ю, ꙗ҆́коже ѻ҆́ныѧ сн҃ъ тво́й спа́слъ є҆́сть.
Въ сре́дꙋ ве́чера бг҃оро́диченъ:
Ра́дꙋйсѧ, ра́дость пра́дѣдѡвъ, а҆пⷭ҇толѡвъ, и҆ мꙋ́ченикѡвъ весе́лїе, и҆ покро́въ на́съ, дв҃о, твои́хъ рабѡ́въ.
Въ четверто́къ ᲂу҆́тра бг҃оро́диченъ:
Ра́дꙋйсѧ, бг҃оро́дице дв҃о, ра́дꙋйсѧ, похвало̀ всеѧ̀ вселе́нныѧ, ра́дꙋйсѧ, пречⷭ҇таѧ мт҃и бж҃їѧ бл҃гослове́ннаѧ.
Въ пѧто́къ ве́чера бг҃оро́диченъ:
Вои́стиннꙋ па́че ᲂу҆ма̀ чꙋ̑днаѧ твоѧ̑ вели̑чїѧ, ржⷭ҇тва̀ твоегѡ̀, бг҃оневѣ́сто, ꙗ҆̀же проповѣ́даша прⷪ҇ро́цы всѝ, всѧ̑ пресла̑внаѧ, зача́тїе и҆ ржⷭ҇тво̀, всепѣ́таѧ, недомы́сленно, и҆ несказа́нно, и҆́мже мі́ръ спа́слъ є҆́сть, ꙗ҆́кѡ милосе́рдъ.
Въ сꙋббѡ́тꙋ ᲂу҆́тра бг҃оро́диченъ:
Ра́дꙋйсѧ ѿ на́съ, ст҃а́ѧ бцⷣе дв҃о, чи́стый сосꙋ́де всеѧ̀ вселе́нныѧ, свѣщѐ неꙋгаси́маѧ, вмѣсти́лище невмѣсти́магѡ, хра́ме неѡбори́мый: ра́дꙋйсѧ, и҆зъ неѧ́же роди́сѧ а҆́гнецъ бж҃їй, взе́млѧй грѣхѝ всегѡ̀ мі́ра.
Ра́дꙋйсѧ, мр҃і́е бцⷣе, хра́ме неразрꙋши́мый, па́че же ст҃ы́й, ꙗ҆́коже вопїе́тъ прⷪ҇ро́къ: свѧ́тъ хра́мъ тво́й, ди́венъ въ пра́вдѣ.
Въ понедѣ́льникъ ᲂу҆́тра бг҃оро́диченъ:
На тѧ̀ ᲂу҆пова́нїе, бцⷣе, возложи́хомъ ча́ѧнїѧ, да не ѿпаде́мъ, спасѝ на́съ ѿ бѣ́дъ, помо́щнице недоꙋмѣ́ємымъ, и҆ сопроти́вныхъ совѣ́ты разорѝ: ты́ бо є҆сѝ на́ше спасе́нїе, бл҃гослове́ннаѧ.
Въ понедѣ́льникъ ве́чера бг҃оро́диченъ:
Непроходи̑маѧ врата̀ та́йнѡ запеча́тствѡваннаѧ, бл҃гослове́ннаѧ бцⷣе дв҃о, прїимѝ молє́нїѧ на̑ша, и҆ принесѝ твоемꙋ̀ сн҃ꙋ и҆ бг҃ꙋ, да спасе́тъ тобо́ю дꙋ́шы на́шѧ.
Во вто́рникъ ᲂу҆́тра бг҃оро́диченъ:
Ра́дꙋйсѧ, мр҃і́е бцⷣе, хра́ме неразрꙋши́мый, па́че же ст҃ы́й, ꙗ҆́коже вопїе́тъ прⷪ҇ро́къ: ст҃ъ хра́мъ тво́й, ди́венъ въ пра́вдѣ.
Въ сре́дꙋ ве́чера бг҃оро́диченъ:
Ꙗ҆́кѡ плодови́та ма́слина дв҃а и҆зрастѝ тебѐ, плода̀ живо́тнаго, плодоноси́ти мі́рови ве́лїю и҆ бога́тꙋю ми́лость.
Въ четверто́къ ᲂу҆́тра бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Въ пѧто́къ ве́чера бг҃оро́диченъ:
Спасѝ ѿ бѣ́дъ рабы̑ твоѧ̑, бцⷣе дв҃о, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ къ нерꙋши́мѣй стѣнѣ̀ и҆ предста́тельствꙋ.
Въ сꙋббѡ́тꙋ ᲂу҆́тра бг҃оро́диченъ:
Прїиди́те, мт҃рь свѣ́та, пѣ́сньми немо́лчными зовꙋ́ще, всѝ просла́вимъ, та́ бо родѝ спасе́нїе на́ше: и҆ ра́дꙋйсѧ, принесе́мъ ꙗ҆́кѡ є҆ди́ной ро́ждшей всѣ́хъ нача́льнѣйшаго, и҆́же пре́жде вѣ̑къ бг҃а: ра́дꙋйсѧ, ꙗ҆́же є҆́ѵꙋ па́дшꙋю па́ки назда́вшаѧ: ра́дꙋйсѧ, пречⷭ҇таѧ дв҃о неискꙋсобра́чнаѧ.
Бцⷣе предста́тельнице всѣ́хъ молѧ́щихсѧ тебѣ̀, тобо́ю дерза́емъ, и҆ тобо́ю хва́лимсѧ, и҆ къ тебѣ̀ всѐ ᲂу҆пова́нїе на́ше є҆́сть, молѝ ро́ждшагосѧ и҆зъ тебє̀ за непотрє́бныѧ рабы̑ твоѧ̑.
Въ понедѣ́льникъ ᲂу҆́тра бг҃оро́диченъ:
Ст҃опервочⷭ҇таѧ похвало̀ сꙋ́щи нбⷭ҇ныхъ чинѡ́въ, а҆пⷭ҇толѡвъ пѣ́нїе, и҆ прⷪ҇ро́кѡвъ сбытїѐ, влⷣчце, прїимѝ моли̑твы на́шѧ.
Въ понедѣ́льникъ ве́чера бг҃оро́диченъ:
Въ жена́хъ ст҃а́ѧ бцⷣе мт҃и безневѣ́стнаѧ, молѝ, є҆го́же родила̀ є҆сѝ, цр҃ѧ̀ и҆ бг҃а: да спасе́тъ на́съ, ꙗ҆́кѡ чл҃вѣколю́бецъ.
Во вто́рникъ ᲂу҆́тра бг҃оро́диченъ:
Безъ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ, прест҃а́ѧ дв҃о.
Въ сре́дꙋ ве́чера бг҃оро́диченъ:
Вельмѝ согрѣша́юща мѧ̀, ѻ҆трокови́це, и҆схитѝ вели́кою твое́ю моли́твою пла́мене нꙋ́жднагѡ, и҆ и҆спра́ви, чⷭ҇таѧ, твои́ми мольба́ми, ко спасє́ннымъ стезѧ́мъ наставлѧ́ющи мѧ̀ мт҃рними твои́ми моли́твами.
Въ четверто́къ ᲂу҆́тра бг҃оро́диченъ:
Безъ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ, прест҃а́ѧ дв҃о.
Въ пѧто́къ ве́чера бг҃оро́диченъ:
Въ жена́хъ ст҃а́ѧ бцⷣе мт҃и безневѣ́стнаѧ, молѝ, є҆го́же родила̀ є҆сѝ, цр҃ѧ̀ и҆ бг҃а: да спасе́тъ на́съ, ꙗ҆́кѡ чл҃вѣколю́бецъ.
Въ сꙋббѡ́тꙋ ᲂу҆́тра бг҃оро́диченъ:
Безъ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ, прест҃а́ѧ дв҃о.
Ра́дꙋйсѧ, свѣ́та ѻ҆́блаче: ра́дꙋйсѧ, свѣ́щнице свѣ́тлый: ра́дꙋйсѧ, рꙋ́чко, въ не́йже ма́нна: ра́дꙋйсѧ, же́зле а҆арѡ́новъ: ра́дꙋйсѧ, кꙋпино̀ неѡпали́маѧ: ра́дꙋйсѧ, черто́же: ра́дꙋйсѧ прⷭ҇то́ле: ра́дꙋйсѧ, горо̀ ст҃а́ѧ: ра́дꙋйсѧ, прибѣ́жище: ра́дꙋйсѧ, бжⷭ҇твеннаѧ трапе́зо: ра́дꙋйсѧ, две́ре та́йнаѧ, ра́дꙋйсѧ, всѣ́хъ ра́досте.
Въ понедѣ́льникъ ᲂу҆́тра бг҃оро́диченъ:
Бцⷣе, всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ, и҆ ли́ца и҆́хъ посрамѝ, не кла́нѧющихсѧ, нижѐ чтꙋ́щихъ, пречⷭ҇таѧ, чⷭ҇тны́й тво́й ѻ҆́бразъ.
Въ понедѣ́льникъ ве́чера бг҃оро́диченъ:
И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ, є҆ди́но предста́тельство дꙋ́шъ на́шихъ.
Во вто́рникъ ᲂу҆́тра бг҃оро́диченъ:
Ѿ всѣ́хъ бѣ́дъ рабы̑ твоѧ̑ сохранѧ́й, благослове́ннаѧ бцⷣе: да тѧ̀ сла́вимъ наде́ждꙋ дꙋ́шъ на́шихъ.
Въ сре́дꙋ ве́чера бг҃оро́диченъ:
И҆мꙋ́ще тѧ̀, бцⷣе, ᲂу҆пова́нїе и҆ предста́тельство, вра́жїихъ навѣ̑тъ не ᲂу҆бои́мсѧ, ꙗ҆́кѡ спаса́еши дꙋ́шы на́шѧ.
Въ четверто́къ ᲂу҆́тра бг҃оро́диченъ:
Тѧ̀ стѣ́нꙋ стѧжа́хомъ, бцⷣе пречⷭ҇таѧ, и҆ благоꙋти́шное приста́нище, и҆ ᲂу҆твержде́нїе. Тѣ́мже молю́сѧ и҆́же въ житїѝ ѡ҆бꙋрева́емь: ѡ҆кормѝ и҆ спаси́ мѧ.
Въ пѧто́къ ве́чера бг҃оро́диченъ:
Свѣщѐ неꙋгаси́маѧ, прⷭ҇то́ле пра́ведный, пречⷭ҇таѧ влⷣчце, молѝ спасти́сѧ дꙋша́мъ на́шымъ.
Въ сꙋббѡ́тꙋ ᲂу҆́тра бг҃оро́диченъ:
Є҆ди́наѧ чⷭ҇таѧ и҆ пречⷭ҇таѧ дв҃о, ꙗ҆́же бг҃а безсѣ́меннѡ ро́ждшаѧ, молѝ спасти́сѧ дꙋша́мъ на́шымъ.
Стра́шно и҆ пресла́вно, и҆ ве́лїе та́инство, невмѣсти́мый во чре́вѣ вмѣсти́сѧ, и҆ мт҃и по ржⷭ҇твѣ̀ па́ки пребы́сть дв҃а: бг҃а бо родѝ и҆зъ неѧ̀ воплоще́нна. томꙋ̀ возопїи́мъ, томꙋ̀ пѣ́снь рце́мъ, со а҆́гг҃лы воспѣва́юще: ст҃ъ є҆сѝ, хрⷭ҇тѐ бж҃е, и҆́же на́съ ра́ди вочл҃вѣ́чивыйсѧ, сла́ва тебѣ̀.
Въ понедѣ́льникъ ᲂу҆́тра бг҃оро́диченъ:
Ѡ҆бра́дованнаѧ, хода́тайствꙋй твои́ми моли́твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.
Въ понедѣ́льникъ ве́чера бг҃оро́диченъ:
Оу҆толѝ болѣ̑зни многовоздыха́ющїѧ дꙋшѝ моеѧ̀, ᲂу҆толи́вшаѧ всѧ́кꙋ сле́зꙋ ѿ лица̀ землѝ: ты́ бо человѣ́кѡвъ болѣ̑зни ѿго́ниши, и҆ грѣ́шныхъ скѡ́рби разрꙋша́еши. Тебе́ бо всѝ стѧжа́хомъ наде́ждꙋ и҆ ᲂу҆твержде́нїе, прест҃а́ѧ мт҃и дв҃о.
Во вто́рникъ ᲂу҆́тра бг҃оро́диченъ:
Ѡ҆бра́дованнаѧ, хода́тайствꙋй твои́ми моли́твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.
Въ сре́дꙋ ве́чера бг҃оро́диченъ:
Бл҃жи́мъ тѧ̀, бцⷣе дв҃о, и҆ сла́вимъ тѧ̀, вѣ́рнїи, по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ и҆ прибѣ́жище дꙋ́шъ на́шихъ.
Въ четверто́къ ᲂу҆́тра бг҃оро́диченъ:
Бл҃жи́мъ тѧ̀, бцⷣе дв҃о, ꙗ҆́кѡ и҆зъ тебє̀ возсїѧ̀ сл҃нце пра́вды хрⷭ҇то́съ, и҆мѣ́ѧй ве́лїю ми́лость.
Въ пѧто́къ ве́чера бг҃оро́диченъ:
Тебѣ̀ мо́лимсѧ ꙗ҆́кѡ бж҃їи мт҃ри: бл҃гослове́ннаѧ, молѝ ѡ҆ спасе́нїи дꙋ́шъ на́шихъ.
Въ сꙋббѡ́тꙋ ᲂу҆́тра бг҃оро́диченъ:
Ѽле ѻ҆каѧ́ннаѧ дꙋшѐ! кі́й ѿвѣ́тъ и҆́маши рещѝ сꙋдїѝ во ѻ҆́нъ ча́съ, є҆гда̀ прⷭ҇то́ли поста́вѧтсѧ на сꙋдѣ̀, и҆ сꙋдїѧ̀ прїи́детъ ѿ нб҃съ, соше́дъ со тма́ми а҆́гг҃льскими; є҆гда̀ сѧ́детъ на сꙋди́щи, прю̀ сотвори́ти съ рабы̀ непотре́бными, подо́бными мнѣ̀, что̀ ѿвѣща́ти и҆́маши; что́ же принестѝ тогда̀; пои́стиннѣ ничто́же, ᲂу҆́мъ и҆ тѣ́ло ѡ҆скверни́вши твоѐ. Тѣ́мже припадѝ къ дв҃ѣ, и҆ зовѝ непреста́ннѡ, пода́ти тебѣ̀ бога́тнѡ грѣхѡ́въ проще́нїе.
А҆рха́гг҃льски воспои́мъ, вѣ́рнїи, нбⷭ҇ный черто́гъ, и҆ две́рь запеча́таннꙋ вои́стиннꙋ: ра́дꙋйсѧ, є҆ѧ́же ра́ди ѿрастѐ на́мъ сп҃съ всѣ́хъ хрⷭ҇то́съ, жизнода́вецъ и҆ бг҃ъ: низложѝ, влⷣчце, мꙋчи́тели, безбѡ́жныѧ врагѝ на́шѧ, рꙋко́ю твое́ю, пречⷭ҇таѧ, ᲂу҆пова́нїе хрⷭ҇тїа́нъ.
Въ понедѣ́льникъ ᲂу҆́тра бг҃оро́диченъ:
А҆рха́гг҃льское сло́во прїѧ́ла є҆сѝ, и҆ херꙋві́мскїй прⷭ҇то́лъ показа́лсѧ є҆сѝ, и҆ на ѡ҆б̾ѧ́тїѧхъ твои́хъ носи́ла є҆сѝ, бцⷣе, наде́ждꙋ дꙋ́шъ на́шихъ.
Въ понедѣ́льникъ ве́чера бг҃оро́диченъ:
Никто́же притека́ѧй къ тебѣ̀ посра́мленъ ѿ тебє̀ и҆схо́дитъ, пречⷭ҇таѧ бцⷣе дв҃о: но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.
Во вто́рникъ ᲂу҆́тра бг҃оро́диченъ:
Вели́кихъ дарова́нїй, чⷭ҇таѧ дв҃о бг҃ома́ти, ты̀ сподо́биласѧ є҆сѝ, ꙗ҆́кѡ родила̀ є҆сѝ пло́тїю є҆ди́наго ѿ трⷪ҇цы хрⷭ҇та̀ жизнода́вца, во спасе́нїе дꙋ́шъ на́шихъ.
Въ сре́дꙋ ве́чера бг҃оро́диченъ:
Ѻ҆́ко се́рдца моегѡ̀ воспꙋща́ю къ тебѣ̀, влⷣчце, не пре́зри ма́лагѡ моегѡ̀ воздыха́нїѧ, въ ча́съ, є҆гда̀ сꙋ́дитъ сн҃ъ тво́й мі́рꙋ, бꙋ́ди мѝ покро́въ и҆ помо́щница.
Въ четверто́къ ᲂу҆́тра бг҃оро́диченъ:
Преложе́нїе скорбѧ́щихъ, премѣне́нїе болѧ́щихъ є҆сѝ, бцⷣе всепѣ́таѧ, спасѝ гра́дъ и҆ лю́ди, бори́мыхъ ᲂу҆мире́нїе, ѡ҆бꙋрева́емыхъ тишина̀, є҆ди́на предста́тельнице вѣ́рныхъ.
Въ пѧто́къ ве́чера бг҃оро́диченъ:
Моли́твами ро́ждшїѧ тѧ̀, хрⷭ҇тѐ, мч҃никъ твои́хъ и҆ а҆пⷭ҇лъ, и҆ прⷪ҇рѡ́къ, и҆ ст҃и́телей, прпⷣбныхъ и҆ првⷣныхъ, и҆ всѣ́хъ ст҃ы́хъ, ᲂу҆со́пшыѧ рабы̑ твоѧ̑ ᲂу҆поко́й.
Въ сꙋббѡ́тꙋ ᲂу҆́тра бг҃оро́диченъ:
Бг҃а и҆зъ тебє̀ воплоти́вшагосѧ разꙋмѣ́хомъ, бцⷣе дв҃о: того̀ молѝ ѡ҆ спасе́нїи дꙋ́шъ на́шихъ.
Є҆́же ра́дꙋйсѧ, тебѣ̀ зове́мъ со а҆́гг҃ломъ, бг҃оневѣ́сто, черто́гъ и҆ две́рь, и҆ прⷭ҇то́лъ ѻ҆́гненный нарица́юще тебѐ, и҆ несѣко́мꙋю го́рꙋ, и҆ кꙋпинꙋ̀ неѡпали́мꙋю.
Въ понедѣ́льникъ ᲂу҆́тра бг҃оро́диченъ:
Оу҆мирѝ мл҃твами бцⷣы жи́знь на́шꙋ, вопїю́щихъ тѝ: ми́лостиве гдⷭ҇и, сла́ва тебѣ̀.
Въ понедѣ́льникъ ве́чера бг҃оро́диченъ:
Ра́дꙋйсѧ, сл҃нца ѻ҆́блаче мы́сленнагѡ и҆ неизрече́ннагѡ влⷣчце: ра́дꙋйсѧ, всесвѣ́тлаѧ свѣщѐ: ра́дꙋйсѧ, свѣ́щниче всезлаты́й. Тобо́ю, прест҃а́ѧ, є҆́ѵа и҆зба́висѧ ѿ клѧ́твы. Но ꙗ҆́кѡ и҆мꙋ́щи дерзнове́нїе ко бл҃гопремѣ́нномꙋ сн҃ꙋ твоемꙋ̀ и҆ бг҃ꙋ, мт҃рнею твое́ю моли́твою не ѡ҆скꙋдѣ́й моли́тисѧ, пречⷭ҇таѧ.
Во вто́рникъ ᲂу҆́тра бг҃оро́диченъ:
Свѣ́тъ хрⷭ҇тѐ, прозѧ́блъ є҆сѝ ѿ дв҃ы: и҆ просвѣти́лъ є҆сѝ ро́дъ человѣ́ческїй: гдⷭ҇и, сла́ва тебѣ̀.
Въ сре́дꙋ ве́чера бг҃оро́диченъ:
Є҆ди́нꙋ по ржⷭ҇твѣ̀ пречⷭ҇тꙋю дв҃ꙋ воспои́мъ, ꙗ҆́кѡ мт҃рь бг҃а сло́ва, глаго́люще: сла́ва тебѣ̀.
Въ четверто́къ ᲂу҆́тра бг҃оро́диченъ:
Роди́лсѧ є҆сѝ ѿ дв҃ы несказа́ннѡ, хрⷭ҇тѐ, и҆ просвѣти́лъ є҆сѝ сꙋ́щыѧ во тмѣ̀, вопїю́щыѧ: гдⷭ҇и, сла́ва тебѣ̀.
Въ пѧто́къ ве́чера бг҃оро́диченъ:
Ꙗ҆́же є҆ди́на невмѣсти́маго прїи́мши, и҆ ро́ждши бг҃а сло́ва воплоще́нна, молѝ спасти́сѧ дꙋша́мъ на́шымъ.
Въ сꙋббѡ́тꙋ ᲂу҆́тра бг҃оро́диченъ:
Молѝ, дв҃о, со а҆пⷭ҇лы и҆ мꙋ́ченики, ѡ҆брѣстѝ на сꙋдѣ̀ преста́вльшымсѧ ве́лїю ми́лость.
А҆рха́гг҃ла гаврїи́ла гла́съ воспрїи́мше, рце́мъ: ра́дꙋйсѧ, мт҃и бж҃їѧ, ꙗ҆́же жизнода́вца хрⷭ҇та̀ мі́рꙋ ро́ждши.
Въ понедѣ́льникъ ᲂу҆́тра бг҃оро́диченъ:
Нбⷭ҇наѧ пою́тъ тѧ̀, ѡ҆бра́дованнаѧ мт҃и безневѣ́стнаѧ, и҆ мы̀ славосло́вимъ неизслѣ́дованное твоѐ ржⷭ҇тво̀, бцⷣе, молѝ спасти́сѧ дꙋша́мъ на́шымъ.
Въ понедѣ́льникъ ве́чера бг҃оро́диченъ:
Ра́дꙋйсѧ, вселе́нныѧ похвало̀: ра́дꙋйсѧ, хра́ме гдⷭ҇нь: ра́дꙋйсѧ, горо̀ прїѡсѣне́ннаѧ: ра́дꙋйсѧ, всѣ́хъ прибѣ́жище: ра́дꙋйсѧ, свѣ́щнице златы́й: ра́дꙋйсѧ, сла́во правосла́вныхъ чⷭ҇тна́ѧ: ра́дꙋйсѧ, мр҃і́е мт҃и хрⷭ҇та̀ бг҃а: ра́дꙋйсѧ, раю̀: ра́дꙋйсѧ, бжⷭ҇твеннаѧ трапе́зо: ра́дꙋйсѧ, сѣ́не: ра́дꙋйсѧ, рꙋ́чко всезлата́ѧ: ра́дꙋйсѧ, всѣ́хъ ᲂу҆пова́нїе.
Во вто́рникъ ᲂу҆́тра бг҃оро́диченъ:
Кро́въ тво́й, бцⷣе дв҃о, врачество̀ є҆́сть дх҃о́вное: въ ѻ҆́нь бо прибѣга́юще, ѿ дꙋше́вныхъ недꙋ̑гъ и҆збавлѧ́емсѧ.
Въ сре́дꙋ ве́чера бг҃оро́диченъ:
А҆́зъ, дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю, вѣ́мъ, ꙗ҆́кѡ ѡ҆брѧ́щꙋ тобо́ю спасе́нїе, мо́жеши бо, чⷭ҇таѧ, помощѝ мнѣ̀.
Въ четверто́къ ᲂу҆́тра бг҃оро́диченъ:
И҆схи́ти мѧ̀, влⷣчце, рꙋкѝ ѕмі́ѧ человѣкоꙋбі́йцы, хотѧ́ща мѧ̀ лꙋка́вствомъ поглоти́ти до конца̀: сокрꙋшѝ чє́люсти є҆гѡ̀, молю́ тѧ, и҆ кѡ́зни разорѝ, ꙗ҆́кѡ да и҆збы́въ ѿ ногте́й є҆гѡ̀, велича́ю застꙋпле́нїе твоѐ.
Въ пѧто́къ ве́чера бг҃оро́диченъ:
Чⷭ҇таѧ дв҃о, сло́ва врата̀, бг҃а на́шегѡ мт҃и, молѝ спасти́сѧ на́мъ.
Въ сꙋббѡ́тꙋ ᲂу҆́тра бг҃оро́диченъ:
Влⷣчце, прїимѝ моли̑твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
[Ѿпꙋсти́тельныѧ воскре́сны ѻ҆смѝ гласѡ́въ бг҃оро́дичны]Ѿпꙋсти́тельныѧ воскре́сны ѻ҆смѝ гласѡ́въ бг҃оро́дичны
Гла́съ а҃, бг҃оро́диченъ:
Гаврїи́лꙋ вѣща́вшꙋ тебѣ̀, дв҃о, ра́дꙋйсѧ, со гла́сомъ воплоща́шесѧ всѣ́хъ влⷣка въ тебѣ̀ ст҃ѣ́мъ кївѡ́тѣ, ꙗ҆́коже речѐ пра́ведный дв҃дъ, ꙗ҆ви́ласѧ є҆сѝ ши́ршаѧ нб҃съ, поноси́вше зижди́телѧ твоего̀: сла́ва все́льшемꙋсѧ въ тѧ̀: сла́ва проше́дшемꙋ и҆зъ тебє̀: сла́ва свободи́вшемꙋ на́съ рождество́мъ твои́мъ.
Гла́съ в҃, бг҃оро́диченъ:
Всѧ̑ па́че смы́сла, всѧ̑ пресла̑внаѧ твоѧ̑, бцⷣе, та̑инства, чистотѣ̀ запеча́танной, и҆ дѣ́вствꙋ храни́мꙋ, мт҃и позна́ласѧ є҆сѝ нело́жна, бг҃а ро́ждши и҆́стиннаго. того̀ молѝ, спасти́сѧ дꙋша́мъ на́шымъ.
Гла́съ г҃, бг҃оро́диченъ:
Тѧ̀ хода́тайствовавшꙋю спасе́нїе ро́да на́шегѡ воспѣва́емъ, бцⷣе дв҃о: пло́тїю бо ѿ тебє̀ воспрїѧ́тою сн҃ъ тво́й, и҆ бг҃ъ на́шъ, кресто́мъ воспрїи́мъ стра́сть, и҆зба́ви на́съ ѿ тлѝ, ꙗ҆́кѡ чл҃вѣколю́бецъ.
Гла́съ д҃, бг҃оро́диченъ:
Є҆́же ѿ вѣ́ка ᲂу҆тае́нное, и҆ а҆́гг҃лѡмъ несвѣ́домое та́инство, тобо́ю, бцⷣе, сꙋ́щымъ на землѝ ꙗ҆ви́сѧ бг҃ъ, в несли́тномъ соедине́нїи воплоща́емь, и҆ кре́стъ во́лею на́съ ра́ди воспрїи́мъ: и҆́мже воскреси́въ первозда́ннаго, спасѐ ѿ сме́рти дꙋ́шы на́шѧ.
Гла́съ є҃, бг҃оро́диченъ:
Ра́дꙋйсѧ, две́ре гдⷭ҇нѧ непроходи́маѧ: ра́дꙋйсѧ, стѣно̀ и҆ покро́ве притека́ющихъ къ тебѣ̀. Ра́дꙋйсѧ, неѡбꙋрева́емое приста́нище, и҆ неискꙋсобра́чнаѧ, ро́ждшаѧ пло́тїю творца̀ твоего̀ и҆ бг҃а: молѧ́щи не ѡ҆скꙋдѣва́й ѡ҆ воспѣва́ющихъ, и҆ кла́нѧющихсѧ рождествꙋ̀ твоемꙋ̀.
Гла́съ ѕ҃, бг҃оро́диченъ:
Предповѣствꙋ́етъ гедеѡ́нъ зача́тїе, и҆ сказꙋ́етъ дв҃дъ рождество̀ твоѐ, бцⷣе: сни́де бо ꙗ҆́кѡ до́ждь на рꙋно̀ сл҃во во чре́во твоѐ, и҆ прозѧбла̀ є҆сѝ без̾ сѣ́мене землѐ ст҃а́ѧ, мі́ра спасе́нїе, хрⷭ҇та̀ бг҃а на́шего, бл҃года́тнаѧ.
Гла́съ з҃, бг҃оро́диченъ:
Ꙗ҆́кѡ на́шегѡ воскресе́нїѧ сокро́вище, на тѧ̀ надѣ́ющыѧсѧ, всепѣ́таѧ, ѿ ро́ва и҆ глꙋбины̀ прегрѣше́нїй возведѝ: ты́ бо пови̑нныѧ грѣхꙋ̀ спасла̀ є҆сѝ, ро́ждшаѧ спасе́нїе на́ше, ꙗ҆́же пре́жде рождества̀ дв҃а, и҆ въ рождествѣ̀ дв҃а, и҆ по рождествѣ̀ па́ки пребыва́еши дв҃а.
Гла́съ и҃, бг҃оро́диченъ:
И҆́же на́съ ра́ди рожде́йсѧ ѿ дв҃ы, и҆ распѧ́тїе претерпѣ́въ, бл҃гі́й, и҆спрове́ргїй сме́ртїю сме́рть, и҆ воскресе́нїе ꙗ҆вле́й ꙗ҆́кѡ бг҃ъ, не пре́зри, ꙗ҆̀же созда́лъ є҆сѝ рꙋко́ю твое́ю: ꙗ҆вѝ человѣколю́бїе твоѐ, ми́лостиве, прїимѝ ро́ждшꙋю тѧ̀ бцⷣꙋ молѧ́щꙋюсѧ за ны̀, и҆ спасѝ, сп҃се на́шъ, лю́ди ѿча̑ѧнныѧ.