Въ недѣ́лю ве́чера,

на Гдⷭ҇и воззва́хъ, стїхи̑ры ᲂу҆мили́тельны. Гла́съ г҃

Подо́бенъ: Ве́лїѧ мꙋ́чєникъ твои́хъ:

Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

Вельмѝ согрѣша́юща мѧ̀, и҆ тебѐ ѡ҆горчева́юща бл҃га́го влⷣкꙋ, и҆ млⷭ҇тива є҆стество́мъ, ѡ҆браща́ющасѧ, ꙗ҆́кѡ блꙋ́днаго прїими́ мѧ, и҆ є҆ди́наго ѿ нає́мникъ твои́хъ сотвори́ мѧ, нбⷭ҇ный ѻ҆́ч҃е.

Сті́хъ: И҆́мене ра́ди твоегѡ̀, потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

Лѣ́ностїю житїѧ̀ мѣ́рꙋ преидо́хъ, и҆ къ концꙋ̀ ᲂу҆жѐ ѻ҆каѧ́нный прибли́жихсѧ, не помышлѧ́ю ждꙋ́щагѡ мѧ̀ сꙋда̀, и҆ ѿ бг҃а ѿпаде́нїѧ: но ѡ҆брати́въ мѧ̀ сп҃се си́хъ всѣ́хъ и҆схитѝ.

Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.

Гее́нны, и҆ зꙋбна́гѡ скре́жета и҆зба́ви гдⷭ҇и, смире́ннꙋю мою̀ дꙋ́шꙋ, и҆ всѧ́кагѡ и҆но́гѡ томле́нїѧ вѣ́чнагѡ пребл҃гі́й: ꙗ҆́кѡ да вѣ́рою тѧ̀ пою̀ млⷭ҇тиваго бг҃а и҆ чл҃вѣколю́бца є҆стество́мъ.

Та́же въ мине́и стїхи̑ры ст҃о́мꙋ. Сла́ва, ст҃о́мꙋ: И҆ ны́нѣ. бг҃оро́диченъ. А҆́ще ли нѣ́сть мине́и: и҆́ны стїхи̑ры ст҃ы̑мъ безплѡ́тнымъ а҆́гг҃лѡмъ, гла́съ то́йже.

Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

Ли́ки безпло́тныхъ гдⷭ҇и, соста́вилъ є҆сѝ, бога́тство ꙗ҆влѧ́ѧ всѣ̑мъ твоеѧ̀ бл҃гости: и҆ приве́лъ є҆сѝ ѿ небытїѧ̀ во є҆́же бы́ти, па́че ᲂу҆ма̀ сла́вꙋ твою̀ ны́нѣ сла́вѧщихъ гла́сы немо́лчными.

Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Ве́лїѧ а҆́гг҃лъ твои́хъ хрⷭ҇тѐ си́ла: безтѣле́сни бо сꙋ́ще мі́ръ проти́чꙋтъ, сохранѧ́юще цр҃кви си́лою, ꙗ҆́же ѿ тебѐ влⷣко, и҆ тебѣ̀ мо́лѧтсѧ ѡ҆ вселе́ннѣй.

Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Добро́тꙋ трисо́лнечнꙋю твою̀ є҆ди́нственнꙋю, зрѧ́ще си̑лы тебѣ̀ слꙋжа́щыѧ, ꙗ҆влѧ́ютъ вторы́ѧ свѣ́тлѡсти сꙋ́щымъ въ мі́рѣ: и҆ ѻ҆́бщнѡ сїѧ́юще, подаю́тъ на́мъ бж҃е́ствєнныѧ свѣ́тлѡсти.

Сла́ва, и҆ ны́нѣ, бг҃оро́диченъ: Всѣ́ми владѧ́щаѧ тва́рьми пречⷭ҇таѧ, лю́тѣ ѡ҆блада́ема страстьмѝ ᲂу҆ма̀ моегѡ̀, свободѝ те́плымъ твои́мъ предста́тельствомъ и҆ мт҃рнею мл҃твою и҆ порабо́ти мѧ̀ сн҃ꙋ и҆ бг҃ꙋ твоемꙋ̀.

Та́же, Свѣ́те ти́хїй: Прокі́менъ днѐ: И҆ Сподо́би гдⷭ҇и въ ве́черъ се́й:

На стїхо́внѣ стїхи̑ры ᲂу҆мили́тельны. Гла́съ г҃:

Вече́рнюю пѣ́снь прино́симъ тѝ хрⷭ҇тѐ съ кади́ломъ и҆ пѣ́ньми дх҃о́вными, поми́лꙋй и҆ сп҃сѝ дꙋ́шы на́шѧ.

Сті́хъ: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀, та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

Сп҃си́ мѧ гдⷭ҇и бж҃е мо́й, ты́ бо всѣ̑мъ є҆сѝ сп҃се́нїе: бꙋ́рѧ мѧ̀ страсте́й смꙋща́етъ, и҆ бре́мѧ беззако́нїй мои́хъ погрꙋжа́етъ мѧ̀. да́ждь мѝ рꙋ́кꙋ по́мощи, и҆ къ свѣ́тꙋ возведи́ мѧ ᲂу҆миле́нїѧ, ꙗ҆́кѡ є҆ди́нъ млⷭ҇рдъ и҆ чл҃вѣколю́бецъ.

Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.

Ве́лїѧ крⷭ҇та̀ твоегѡ̀ гдⷭ҇и си́ла: водрꙋзи́сѧ бо на мѣ́стѣ, и҆ дѣ́йствꙋетъ въ мі́рѣ, и҆ показа̀ ѿ ры́барей а҆пⷭ҇лы, и҆ ѿ ꙗ҆зы̑къ мч҃ники, да мо́лѧтсѧ ѡ҆ дꙋша́хъ на́шихъ.

Сла́ва, и҆ ны́нѣ: бг҃оро́диченъ: Влⷣчце, предста́тельнице всѣ́хъ молѧ́щихсѧ тебѣ̀, тобо́ю дерза́емъ, и҆ тобо́ю хва́лимсѧ, и҆ къ тебѣ̀ всѐ ᲂу҆пова́нїе на́ше є҆́сть: молѝ ро́ждшагосѧ и҆з̾ тебѐ, за непотрє́бныѧ рабы̑ твоѧ̑.

Та́же: Ны́нѣ ѿпꙋща́еши: И҆ трист҃о́е. По Ѻ҆́ч҃е на́шъ: тропа́рь, и҆ ѿпꙋ́стъ.

Въ недѣ́лю на повече́рїи,

канѡ́нъ моле́бный ко прест҃ѣ́й бцⷣѣ. Гла́съ г҃.

Пѣ́снь а҃

І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.

Великоимени́таѧ є҆ди́на, прест҃а́ѧ дв҃о мр҃і́е херꙋві̑мъ сла́внѣйшаѧ дв҃дова дщѝ, и҆ добро́та і҆а́кѡвлѧ, мт҃и бг҃а на́шегѡ: возвели́чисѧ ѕѣлѡ̀ сла́ва твоѧ̀, и҆ мы̀ вси́ тѧ вѣ́рою сла́вимъ.

Пропе́ншаго сло́вомъ нб҃о ꙗ҆́кѡ ко́жꙋ, твои́ма рꙋка́ма ꙗ҆́кѡ человѣ́ка носи́ла є҆сѝ: сего̀ ᲂу҆́бѡ молѝ неизмѣ́ннѡ чⷭ҇таѧ страсте́й безслове́сїѧ дꙋ́шꙋ мою̀ и҆зба́вити, и҆ ѿ всѧ́кїѧ ско́рби.

Сла́ва: Ꙗ҆́же пре́жде всѣ́хъ вѣ̑къ, пронарече́ннаѧ дв҃о, цр҃ѧ̀ сла́вы порфѵ́ра пречⷭ҇таѧ: въ ню́же ѡ҆бле́клсѧ въ послѣ̑днѧѧ времена̀, покры̀ кѡ́жныѧ ри̑зы а҆да́ма пра́ѻтца, и҆ менѐ ны́нѣ покры́й.

И҆ ны́нѣ: Тлю̀ творѧ́щїй дре́вле грѣ́хъ ро́дꙋ человѣ́ческомꙋ, дв҃о хрⷭ҇та̀ ро́ждши, нестерпи́мый ѻ҆́гнь и҆зсꙋши́ла є҆сѝ: тѣ́мже страсте́й пото́ки дꙋшѝ моеѧ̀ и҆зсꙋшѝ твои́ми мл҃твами.

Пѣ́снь г҃

І҆рмо́съ: И҆́же ѿ несꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.

И҆́же ѻ҆́гненнымъ влады́чествѡмъ влⷣка и҆ гдⷭ҇ь тво́й сн҃ъ нарече́сѧ чⷭ҇таѧ: тѣ́мже и҆зба́ви мѧ̀ влⷣчце, стра́стныхъ рабо́тъ твои́ми мл҃твами.

Ѿ бꙋ́ри плотски́хъ страсте́й и҆зба́ви мѧ̀ раба̀ твоего̀ ско́рѡ пречⷭ҇таѧ, тишинꙋ̀ ро́ждши сп҃се́нїѧ, и҆ и҆сто́чникъ безстра́стїѧ.

Сла́ва: Свѣ́та незаходи́магѡ свѣти́льникъ свѣтоза́ренъ бы́вши пречⷭ҇таѧ, мі́ръ просвѣти́ла є҆сѝ: тѣ́мже зарѧ́ми твои́ми дꙋшѝ моеѧ̀ разорѝ ѻ҆́блакъ.

И҆ ны́нѣ: Ме́ртва мѧ̀ сꙋ́ща дꙋше́ю, ѿ мно́жества ѕлы́хъ страсте́й, ѡ҆животворѝ влⷣчце, ꙗ҆́же ро́ждшаѧ живода́вца хрⷭ҇та̀ несказа́ннѡ.

Пѣ́снь д҃

І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и: є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.

Прїи́де на мѧ̀ плотска́гѡ мꙋдрова́нїѧ бра́нь, и҆ плѣнѧ́етъ мою̀ дꙋ́шꙋ: но и҆́же всѧ́къ ᲂу҆́мъ преимꙋ́щїй ми́ръ ро́ждшаѧ, тво́й ми́ръ влⷣчце пода́ждь мѝ.

Мѵ́ро ᲂу҆́мное и҆з̾ чре́ва и҆сточи́ла є҆сѝ мі́рꙋ: тѣ́мже ѿ скве́рнъ страсте́й дꙋ́шꙋ мою̀ свободѝ, и҆ да́ждь мѝ, пречⷭ҇таѧ, безстра́стїѧ мѵ́ро твои́ми мл҃твами.

Сла́ва: Ста́мнꙋ тѧ̀ златꙋ́ю, жи́зни ма́ннꙋ носи́вшꙋю, бг҃омꙋ́жнаго хрⷭ҇та̀, ꙗ҆́вѣ вѣ́дый молю̀: накормѝ дꙋ́шꙋ мою̀ та́ющꙋю гла́домъ, и҆ пото́комъ напо́й дх҃а.

И҆ ны́нѣ: Є҆́ѵа ᲂу҆́бѡ пре́жде неꙋдержа́ннѡ введѐ сме́рть: ты́ же двⷭ҇твомъ чⷭ҇тымъ и҆́стиннꙋю жи́знь ввела̀ є҆сѝ. тѣ́мже сме́рти мѧ̀ грѣхо́вныѧ и҆зба́ви, твои́ми мл҃твами.

Пѣ́снь є҃

І҆рмо́съ: На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче.

И҆збавле́нїе на́мъ бы́въ сн҃ъ тво́й дв҃о, всѧ̑ ѿ тлѝ и҆зба́ви: тѣ́мже и҆зба́ви мѧ̀ плотска́гѡ мꙋдрова́нїѧ, и҆ страсте́й настоѧ́нїѧ.

Ѻ҆гне́мъ твои́хъ мл҃твъ бцⷣе, стра́стныхъ помышле́нїй те́рнїе всѐ попалѝ, ꙗ҆́же клеща̀ ᲂу҆́глѧ, человѣ́ка ѡ҆чи́стившаѧ.

Сла́ва: Ты̀ бж҃їѧ є҆сѝ ю҆́ница, на́съ ра́ди пожре́нагѡ чл҃вѣколю́бнѡ, бж҃е́ственнагѡ ю҆нца̀: є҆гѡ́же бж҃е́ственною кро́вїю се́рдце моѐ ѡ҆чи́сти.

И҆ ны́нѣ: Кра́снꙋю пре́жде стѧжа́хъ добродѣ́телей ѻ҆де́ждꙋ, є҆ѧ́же совлеко́хсѧ лѣ́ностїю мое́ю: ты́ же дв҃о, ны́нѣ мѧ̀ ѡ҆блецы̀ въ свѣтлѣ́йшꙋ, твои́ми мл҃твами.

Пѣ́снь ѕ҃

І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю сп҃сѝ.

Поколеба́ша хра́мъ дꙋшѝ моеѧ̀ ѕло́бы лю̑таѧ кѡва́рства: но ꙗ҆́кѡ ᲂу҆тверди́вшаго зе́млю на вода́хъ хрⷭ҇та̀ ро́ждшаѧ, твои́ми мл҃твами ᲂу҆твердѝ.

Разрѣши́ла є҆сѝ до́лгъ земноро́дныхъ, би́сера многоцѣ́ннаго ро́ждши. тѣ́мже разрѣшѝ пречⷭ҇таѧ скорѣ́е плєни́цы прегрѣше́нїй мои́хъ, и҆ страсте́й, и҆ скорбе́й.

Сла́ва: Дадѐ вѣ̑рнымъ тѧ̀ прибѣ́жище, и҆ бж҃е́ственный покро́въ, рожде́йсѧ и҆з̾ ложе́снъ твои́хъ бг҃ъ пребл҃гі́й. тѣ́мже пречⷭ҇таѧ, и҆ менѐ покры́й твои́ма дла́ньма, и҆ соблюдѝ.

И҆ ны́нѣ: Волна́ми житїѧ̀ ᲂу҆мовре́днѡ а҆́зъ ѻ҆каѧ́нный ча́стѡ погрꙋжа́емь, и҆ рабо́тами вра́жїими всегда̀ ѡ҆бꙋрева́емь, ны́нѣ зовꙋ́ ти: бцⷣе помози́ ми.

Та́же, Гдⷭ҇и поми́лꙋй, три́жды. Сла́ва, и҆ ны́нѣ:

Сѣда́ленъ, гла́съ г҃. Подо́бенъ: Бж҃е́ственныѧ:

Бж҃е́ственнаѧ была̀ є҆сѝ сѣ́нь сло́ва, є҆ди́на пречⷭ҇таѧ дв҃о мт҃и, чистото́ю а҆́гг҃лы превозше́дшаѧ: па́че всѣ́хъ бы́вша мѧ̀ ѡ҆скверне́на плотски́ми прегрѣше́нїи, ѡ҆чи́сти мл҃твъ твои́хъ бж҃е́ственными вода́ми, подаю́щи чⷭ҇таѧ ве́лїю млⷭ҇ть.

Пѣ́снь з҃

І҆рмо́съ: Ꙗ҆́коже дре́вле бл҃гочести̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ, и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆тє́цъ на́шихъ.

Собо́ри лꙋка́выхъ бѣсѡ́въ ѡ҆быдо́ша мѧ̀, и҆ плотсті́и со́нми страсте́й: но ꙗ҆́кѡ крѣ́пкаго во бра́нехъ хрⷭ҇та̀ ро́ждшаѧ, и҆зба́ви мѧ̀ ча́стыхъ печа́лей и҆ лю́тыхъ напа́данїй.

Є҆ди́ный херꙋві̑мскимъ сꙋществѡ́мъ непристꙋ́пный, и҆ стра́шный а҆́гг҃льскимъ чинѡ́мъ, всели́сѧ въ тѧ̀ чⷭ҇таѧ, и҆ на́съ ѡ҆бновѝ: и҆́мже покажи́ мѧ влⷣчце стра́шна неви́димымъ врагѡ́мъ.

Сла́ва: Ра́й слове́сенъ дв҃о ты̀ была̀ є҆сѝ, прозѧ́бшїй дре́во жи́зни: є҆гѡ́же прича́щсѧ а҆да́мъ, сме́ртнагѡ плода̀ и҆зба́висѧ. тѣ́мже и҆ менѐ ны́нѣ ᲂу҆сладѝ, и҆ страсте́й и҆зба́ви вкꙋше́нїѧ.

И҆ ны́нѣ: Ка́ла мѧ̀ страсте́й тѣле́снагѡ и҆зба́ви, и҆ и҆скꙋше́нїй бѣсо́вскихъ, ꙗ҆́же и҆зба́вителѧ ро́ждшаѧ человѣ́кѡмъ вы́шнѧгѡ селе́нїе, и҆ хра́мъ ѡ҆свѧще́нъ, бг҃а ѻ҆тє́цъ на́шихъ.

Пѣ́снь и҃

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.

Ѻ҆́блаче свѣ́та, свѣти̑ла сотво́ршагѡ въ мі́рѣ вє́лїѧ, дневно́е же и҆ нощно́е, всѧ́ко помраче́нїе разорѝ, твои́ми зарѧ́ми, всѣ́хъ страсте́й и҆ прегрѣше́нїй мои́хъ: и҆ покажи́ мѧ̀ сы́на свѣ́та, бг҃ороди́тельнице.

Съ нб҃сѐ соше́дшимъ дожде́мъ во чре́во твоѐ бцⷣе, дꙋ́шꙋ мою̀ и҆ се́рдце моѐ просвѣтѝ и҆ ѡ҆росѝ: и҆ пла́мень ᲂу҆гасѝ страсте́й и҆ скорбе́й, да тѧ̀ сла́влю те́плѣ во всѧ̑ вѣ́ки.

Сла́ва: Неизглаго́ланнѡ чⷭ҇таѧ, премꙋ́дрость бж҃їю, всѧ̑ ѿ не сꙋ́щихъ нбⷭ҇ное и҆ земно́е є҆стество̀ совокꙋ́пльшꙋю, ты̀ родила̀ є҆сѝ, є҆ѧ́же сло́вомъ да́ждь мѝ мꙋ́дрость и҆ ра́зꙋмъ, ꙗ҆́кѡ да воспою̀ ꙗ҆́вѣ бж҃е́ственное твоѐ ржⷭ҇тво̀.

И҆ ны́нѣ: Ѡ҆роси́тисѧ влⷣчце мі́рꙋ твои́ми мл҃твами дꙋшѝ мое́й и҆ тѣ́лꙋ, вопїю̀ и҆ молю́сѧ: и҆ болѣ́зней грѣхо́вныхъ и҆ страсте́й ѕло́бы, и҆зба́витисѧ вско́рѣ: ты́ бо є҆сѝ всѣ́хъ человѣ́кѡвъ и҆сцѣле́нїе.

Пѣ́снь ѳ҃

І҆рмо́съ: На сїна́йстѣй горѣ̀ ви́дѧ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю: же́злъ прозѧ́бшїй, и҆са́їа взыва́ше, ѿ ко́рене дв҃дова.

Поста́въ хрⷭ҇тꙋ̀ бг҃отка́нъ ꙗ҆ви́ласѧ є҆сѝ, ѿ негѡ́же ѻ҆де́ждꙋ пло́ть бг҃онача́льнѣйшꙋ дх҃а проꙋгото́ва: ѡ҆блецы̀ ᲂу҆́бѡ менѐ во ѻ҆де́ждꙋ цѣломꙋ́дрїѧ, чⷭ҇таѧ, твои́ми моли́твами.

Мы́сленный вїногра́де, и҆зрасти́вшїй на́мъ гро́здъ бж҃е́ственный, ѿ негѡ́же напаѧ́емсѧ водо́ю нетлѣ́нїѧ, и҆сточѝ мое́й дꙋшѝ ᲂу҆миле́нїе, и҆ вїно̀ ѡ҆чище́нїѧ, твои́ми мольба́ми.

Сла́ва: Чи́стый и҆ ст҃ы́й черто́же, и҆́мже є҆стество́мъ бг҃ъ человѣ́кѡмъ ᲂу҆невѣ́сти є҆стество̀, молю́ тѧ: совокꙋпи́ мѧ твоемꙋ̀ сн҃ꙋ, и҆ присво́й бж҃е́ственною жи́знїю, твои́ми мольба́ми.

И҆ ны́нѣ: Па́жить тлѣ́нїѧ человѣ́ческагѡ сꙋщества̀, нетлѣ́нїѧ и҆сто́чника хрⷭ҇та̀ ро́ждши дв҃о, претвори́ла є҆сѝ: ᲂу҆мертви́ ми ᲂу҆́бѡ ѡ҆палѧ́ющее, и҆ бꙋ́рное стремле́нїе страсте́й, твои́ми мольба́ми.

Та́же, Досто́йно є҆́сть: И҆ покло́нъ. Трист҃о́е. и҆ по Ѻ҆́ч҃е на́шъ: тропарѝ. И҆ про́чее ѻ҆бы́чное, и҆ ѿпꙋ́стъ.

Въ понедѣ́льникъ ᲂу҆́тра,

по а҃-мъ стїхосло́вїи сѣда́льны ᲂу҆мили́тельны, гла́съ г҃:

Живꙋ́щи на землѝ, дꙋшѐ моѧ̀, пока́йсѧ, пе́рсть бо во гро́бѣ не пое́тъ, ни ѿ прегрѣше́нїй и҆збавлѧ́етъ. возопі́й хрⷭ҇тꙋ̀ бг҃ꙋ: сердцевѣ́дче, согрѣши́хъ тѝ, пре́жде да́же не ѡ҆сꙋ́диши мѧ̀, пощади́ мѧ бж҃е, и҆ поми́лꙋй мѧ̀.

Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.

Доко́лѣ дꙋшѐ моѧ̀ пребыва́еши въ согрѣше́нїихъ; доко́лѣ прїе́млеши покаѧ́нїю ѿложе́нїе; прїимѝ во ᲂу҆мѣ̀ сꙋ́дъ грѧдꙋ́щїй, возопі́й хрⷭ҇тꙋ̀ бг҃ꙋ: сердцевѣ́дче, согрѣши́хъ, безгрѣ́шне гдⷭ҇и, поми́лꙋй мѧ̀.

Сла́ва, и҆ ны́нѣ, бг҃оро́диченъ: Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й, гаврїи́лъ ᲂу҆диви́всѧ, вопїѧ́ше тѝ бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже, ꙗ҆́коже повелѣ́нъ є҆́смь, вопїю́ ти: ра́дꙋйсѧ, бл҃года́тнаѧ.

По в҃-мъ стїхосло́вїи, сѣда́ленъ, гла́съ г҃:

На стра́шномъ сꙋди́щи без̾ ѡ҆глаго́льникѡвъ ѡ҆блича́юсѧ, без̾ свидѣ́телей ѡ҆сꙋжда́юсѧ: кни̑ги бо сѡ́вѣстныѧ разгиба́ютсѧ, и҆ дѣла̀ сокровє́ннаѧ ѿкрыва́ютсѧ: пре́жде не́же во ѻ҆́номъ всенаро́дномъ позо́рищи и҆́маши и҆спыта́ти, ꙗ҆̀же мно́ю содѣ̑ѧннаѧ, бж҃е ѡ҆чи́сти мѧ̀, и҆ сп҃си́ мѧ.

Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.

Глꙋбинꙋ̀ согрѣше́нїй мои́хъ ты̀ вѣ́си гдⷭ҇и: да́ждь мѝ рꙋ́кꙋ по́мощи ꙗ҆́коже петрꙋ̀, и҆ сп҃си́ мѧ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Мч҃нченъ: Бл҃годꙋ́шное терпѣ́нїѧ ва́шегѡ, побѣдѝ кова́рство ѕлонача́льнагѡ врага̀, стрⷭ҇тоте́рпцы прехва́льнїи, сегѡ̀ ра́ди вѣ́чнагѡ сподо́бистесѧ бл҃же́нства: но моли́тесѧ гдⷭ҇еви, хрⷭ҇толюби́выхъ люде́й сп҃стѝ ста́до, свидѣ́телїе сꙋ́ще и҆́стины.

Сла́ва, и҆ ны́нѣ, бг҃оро́диченъ: Ра́дꙋйсѧ марі́е дв҃о мт҃и, горо̀ ст҃а́ѧ, є҆де́мскїй раю̀, и҆з̾ неѧ́же роди́сѧ хрⷭ҇то́съ бг҃ъ, безсѣ́менное сло́во, и҆́мже жи́знь мі́рови прозѧбѐ.

По г҃-мъ стїхосло́вїи, сѣда́льны, гла́съ г҃.

Подо́бенъ: Красотѣ̀ двⷭ҇тва:

Є҆гда̀ сꙋди́щꙋ твоемꙋ̀ неꙋмы́тномꙋ, и҆ бж҃е́ственномꙋ сꙋдꙋ̀ предста́немъ, и҆ си̑лы нбⷭ҇ныѧ съ тре́петомъ тебѣ̀ предста́нꙋтъ, ка́кѡ тогда̀ тебѣ̀ ꙗ҆влю́сѧ, ѽ сꙋдїѐ пра́веднѣйшїй; дѣла̀ ѡ҆сꙋжде́нїю и҆ ѻ҆гню̀ и҆мѣ́ю достѡ́йна: но а҆́гг҃лъ твои́хъ мл҃твами пощади́ мѧ тогда̀ и҆ сп҃си́ мѧ.

Нбⷭ҇наѧ и҆ земна̑ѧ сло́вомъ приве́лъ є҆сѝ, ꙗ҆́кѡ всеси́ленъ: а҆́гг҃льскїѧ же ли́ки, съ тре́петомъ предстоѧ́ще, непреста́ннꙋю хвалꙋ̀ тебѣ̀ прино́сѧтъ влⷣко, всѧ̑ ѡ҆зарѧ́юще свѣ́томъ твои́мъ концы̀. съ ни́миже и҆ мы̀ тебѣ̀ вопїе́мъ: сп҃сѝ на́съ бл҃гоꙋтро́бїемъ твои́мъ.

Сла́ва, и҆ ны́нѣ, бг҃оро́диченъ: Ꙗ҆́кѡ невоздѣ́ланнаѧ дв҃о лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ сп҃се́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ бл҃года́тнаѧ.

Канѡ́нъ ᲂу҆мили́тельный ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃ы̑мъ є҆гѡ̀ мч҃нкѡмъ. Творе́нїе кѵ́ръ і҆ѡ́сифа. Гла́съ г҃.

Пѣ́снь а҃

І҆рмо́съ: Фараѡ́ни колесни̑цы глꙋбино́ю покры́въ гдⷭ҇и, мо́ре разве́рглъ є҆сѝ: и҆ сп҃слъ є҆сѝ пѣ́сньми пою́щыѧ тѧ̀, лю́ди і҆и҃льтєскїѧ.

Прегрѣше́нїй тьмы̀ и҆зба́ви мѧ̀ безгрѣ́шне, ꙗ҆̀же без̾ ᲂу҆ма̀ содѣ́ѧхъ, подаѧ́ ми сле́зы ᲂу҆миле́нїѧ, ꙗ҆́коже и҆ногда̀ блꙋдни́цѣ.

Бы́вша мѧ̀ верте́пъ разбо́йникѡмъ безмѣ́стными дѣѧ́нїи, добродѣ́тельми ꙗ҆вѝ чл҃вѣколю́бче хра́мъ тво́й, и҆́же во́лею рожде́йсѧ въ верте́пѣ.

Мч҃нченъ: Ѡ҆кормле́нїемъ дх҃а бж҃е́ственнагѡ претеко́сте мꙋче́нїй бꙋ́рю, бг҃одохнове́ннїи мч҃нцы, и҆ къ бж҃е́ственномꙋ достиго́сте приста́нищꙋ.

Мч҃нченъ: Просвѣти́вшесѧ бл҃года́тїю дх҃а мч҃нцы, тьмы̀ глꙋбоча́йшїѧ і҆дѡлобѣ́сїѧ ᲂу҆бѣжа́сте, ра́дꙋющесѧ прехва́льнїи.

Бг҃оро́диченъ: Всест҃а́ѧ и҆ пречⷭ҇таѧ, грѣ̑шнымъ помо́щнице, па́дающымъ и҆справле́нїе, покаѧ́нїе мѝ да́ждь ᲂу҆миле́нїѧ многосогрѣши́вшемꙋ.

Дрꙋгі́й канѡ́нъ ст҃ы̑мъ безплѡ́тнымъ а҆́гг҃лѡмъ, [є҆гѡ́же краегране́сїе: Творю̀ тре́тїе пѣ́нїе безплѡ́тнымъ.] Ѳеофа́ново. Гла́съ г҃.

Пѣ́снь а҃

І҆рмо́съ: Пѣ́снь но́вꙋю пои́мъ лю́дїе, ѿ дв҃ы ро́ждшемꙋсѧ во сп҃се́нїе на́ше, и҆ є҆ди́но сотво́ршемꙋ съ нбⷭ҇ными зємна́ѧ, ꙗ҆́кѡ просла́висѧ.

Безнача́ленъ свѣ́тъ, и҆ пода́теленъ свѣтоѧвле́нїѧ сы́й всегѡ̀ хрⷭ҇тѐ бж҃е, моѐ помышле́нїе просвѣтѝ предста́тельствомъ твои́хъ си́лъ.

Ра́дꙋющесѧ а҆гг҃лолѣ́пнѡ, всебога́тымъ прича́стїемъ а҆́гг҃льстїи ли́цы, твои́ми сп҃се кра́сными сїѧ́нїи та́йнѡ ѡ҆блиста́ютсѧ.

Ꙗ҆́кѡ бл҃гі́й животво́рецъ бл҃годѣ́тельный дх҃ъ и҆сходѧ́й ѿ ѻ҆ц҃а̀, нбⷭ҇ныѧ си̑лы ᲂу҆твердѝ неприкоснове́нными бж҃е́ственными бл҃года́тьми.

Бг҃оро́диченъ: Чинонача́льниче бж҃їй гаврїи́ле безпло́тныхъ ликѡ́въ, и҆ ны́нѣ пребога́те, гла́съ ра́достенъ ѡ҆бра́дованнѣй возопі́й: ра́дꙋйсѧ всенепоро́чнаѧ.

Пѣ́снь г҃

І҆рмо́съ: Оу҆твердѝ менѐ гдⷭ҇и, є҆ди́не многомлⷭ҇тиве, и҆ простри́ ми рꙋ́кꙋ ꙗ҆́кѡ петро́ви, и҆ сп҃си́ мѧ.

Ꙗ҆́коже петра̀ погрꙋжа́ема сп҃слъ є҆сѝ чл҃вѣколю́бче: та́кѡ и҆ менѐ и҆з̾ глꙋбины̀ прегрѣше́нїй мои́хъ возведѝ.

Оу҆мертви́ мѧ льсти́вый страстьмѝ ᲂу҆би́въ: ты́ же мѧ̀ жизнода́телю покаѧ́нїѧ ѡ҆́бразы ѡ҆живѝ.

Мч҃нченъ: Ѻ҆гне́мъ веще́ственнымъ мч҃нцы непра́веднѡ ѡ҆палѧ́еми, невеще́ственнѣ невеще́ственнагѡ воспали́стесѧ жела́нїемъ.

Мч҃нченъ: Мч҃нцы растерза́еми, растерза̑нїѧ и҆ ловлє́нїѧ погꙋби́ша льсти́вагѡ, и҆ вѣнцє́въ сподо́бишасѧ.

Бг҃оро́диченъ: Мр҃і́е гдⷭ҇оимени́таѧ, мно́гими ѡ҆блада́ема мѧ̀ страстьмѝ дꙋшетлѣ́нными, свободѝ мл҃твами твои́ми.

И҆́нъ

І҆рмо́съ: Лꙋ́къ сокрꙋши́лъ є҆сѝ вра́жїи, и҆ щиты̀ сте́рлъ є҆сѝ крѣ́постїю влⷣко хрⷭ҇тѐ, ᲂу҆твержде́нїе на́ше, ст҃ъ є҆сѝ гдⷭ҇и.

Стрꙋи̑ текꙋ́щыѧ и҆ рѣ́ки бл҃гости, ꙗ҆ви́лъ є҆сѝ бл҃гі́й а҆́гг҃льскїѧ ли́ки, сокрове́ннагѡ твоегѡ̀ та́инства заре́ю сїѧ́ющихъ.

Да пока́жеши ꙗ҆́вѣ сокрѡ́вища бога́тства твоегѡ̀, и҆ крѣ́пости влⷣко хрⷭ҇тѐ, твоеѧ̀ сла́вы прича́стники ᲂу҆́мныѧ си̑лы приве́лъ є҆сѝ.

Съ тре́петомъ тебѣ̀ слꙋже́бнѣ а҆́гг҃льскїѧ свѣ́тлѡсти предстоѧ́ще, пою́тъ при́снѡ твою̀ си́лꙋ хрⷭ҇тѐ неисчетноси́льнꙋю.

Бг҃оро́диченъ: Всего̀ прїѧ́тъ и҆з̾ тебѐ неизмѣ́ннѡ чл҃вѣ́ка, и҆́же влⷣка сегѡ̀ всегѡ̀ бг҃ома́ти, и҆ тебѐ и҆сто́чника бл҃года́ти ꙗ҆ви́лъ є҆́сть.

Пѣ́снь д҃

І҆рмо́съ: Є҆да̀ въ рѣка́хъ прогнѣ́ваешисѧ гдⷭ҇и; є҆да̀ въ рѣка́хъ ꙗ҆́рость твоѧ̀, и҆лѝ въ мо́ри ᲂу҆стремле́нїе твоѐ;

Разрѣшѝ соꙋ́зы страсте́й мои́хъ гдⷭ҇и, покаѧ́нїемъ мѧ̀ свѧза́въ, и҆ прича́стника ꙗ҆вѝ бл҃ги́хъ твои́хъ.

Возсїѧ́й мѝ свѣтѡза́рныѧ покаѧ́нїѧ ѡ҆́бразы, со́лнце сы́й хрⷭ҇тѐ, ѕѡ́лъ мои́хъ ѿгонѧ́ѧ но́щь глꙋбо́кꙋю.

Мч҃нченъ: Ꙗ҆ви́стесѧ мꙋ́дрїи страда́льцы, ꙗ҆́коже ᲂу҆́глїе ве́щь безбо́жїѧ попалѧ́юще, и҆ сꙋ́щыѧ во тьмѣ̀ просвѣща́юще.

Мч҃нченъ: Ме́ртвости хрⷭ҇то́вѣ ᲂу҆подо́бистесѧ мч҃нцы, болѣ́знемъ примѣси́вшесѧ разли́чнымъ: тѣ́мже бж҃е́ственнꙋю жи́знь наслѣ́довасте.

Бг҃оро́диченъ: Да́ждь мѝ чⷭ҇таѧ и҆́стинное покаѧ́нїе, ᲂу҆ти́ши страсте́й мои́хъ молвꙋ̀, согрѣша́ющымъ предста́тельнице.

И҆́нъ

І҆рмо́съ: Стра́нна и҆ неизрече́нна ржⷭ҇тва̀ твоегѡ̀ та́йна: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, и҆ веселѧ́сѧ вопїю́ ти: си́лѣ твое́й сла́ва чл҃вѣколю́бче.

Ѻ҆́блацы и҆́же трисо́лнечное свѣтозаре́нїе прїе́млюще, принесо́стесѧ бж҃е́ственнымъ хотѣ́нїемъ, трⷪ҇ческаѧ ᲂу҆крашє́нїѧ, ѡ҆кормлѧ́еми си́лою дх҃а.

Въ мі́ръ посыла́ютсѧ къ хотѧ́щымъ вѣ́ровати тебѣ̀, ꙗ҆́коже храни́телїе сп҃се́нїѧ бл҃гочести́выхъ а҆́гг҃ли, соблюда́юще сп҃се рабы̑ твоѧ̑.

Просвѣща́ютсѧ та́йнѡ а҆́гг҃ли, чи́стымъ приближе́нїемъ, и҆ бг҃онача́льнымъ твои́мъ ѡ҆сїѧ́нїемъ: си́лѣ твое́й сла́ва, зовꙋ́ще, чл҃вѣколю́бче.

Бг҃оро́диченъ: Ра́бски моле́бникъ ны́нѣ прихождꙋ̀ въ кро́въ тво́й пренепоро́чнаѧ: и҆зба́ви мѧ̀ бг҃ороди́тельнице страсте́й смꙋще́нїѧ, ꙗ҆́же безстра́стїю вино́внаго ро́ждшаѧ.

Пѣ́снь є҃

І҆рмо́съ: Свѣ́томъ твои́мъ невече́рнимъ хрⷭ҇тѐ, ѡ҆зарѝ бж҃е смире́ннꙋю мою̀ дꙋ́шꙋ, и҆ наста́ви на стра́хъ тво́й: занѐ свѣ́тъ повелѣ̑нїѧ твоѧ̑.

Не поста́ви менѐ на́га ѿ дѣ́лъ до́брыхъ, на сꙋди́щи твое́мъ чл҃вѣколю́бче: но во ѻ҆де́ждꙋ бж҃е́ственныхъ дѣѧ́нїй ѡ҆блецы̀ покаѧ́нїемъ.

Оу҆ѧзви́хсѧ ѻ҆рꙋ́жїемъ страсте́й, и҆ въ ро́въ ѿча́ѧнїѧ впадо́хъ: не пре́зри влⷣко, но и҆сцѣли́ мѧ ѡ҆браще́нїѧ бы́лїемъ.

Мч҃нченъ: И҆ ногтьмѝ стрꙋ́жеми лю́тѣ, и҆ мече́мъ страда́льцы ᲂу҆бива́еми, и҆ ра́нами и҆знꙋрѧ́еми, не поклони́сте и҆стꙋка̑ннымъ кѡлѣ́на.

Мч҃нченъ: Мі́ръ страда́ньми ва́шими красꙋ́етсѧ при́снѡ ст҃і́и мч҃нцы: премі́рное ꙗ҆́кѡ ѡ҆брѣто́сте пребыва́нїе со а҆́гг҃лы.

Бг҃оро́диченъ: Ꙗ҆́же є҆ди́на сло́вомъ на землѝ, пло́тїю сло́во ро́ждши, и҆ дв҃а пребы́вши, безслове́сныхъ мѧ̀ и҆зба́ви дѣѧ́нїѧ, ꙗ҆́кѡ да словесы̀ честны́ми воспѣва́ю тѧ̀.

И҆́нъ

І҆рмо́съ: На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый, и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче.

Со ѻ҆ц҃е́мъ сн҃а и҆ дх҃а, трисїѧ́ннымъ свѣ́томъ просвѣ́щшесѧ вѣ́рнїи, воспои́мъ є҆ди́но бж҃ество̀, со а҆́гг҃льскими во́инствы.

Свѣщы̀ соѡбраща́ющыѧсѧ, незаходи́мымъ сїѧ́нїемъ бж҃ества̀ пребж҃е́ственнагѡ, проѧвле́ннѣ ѡ҆бога́щшесѧ, а҆́гг҃льстїи чи́ни проповѣ́даютъ.

Є҆ди́но нача́ло пребезнача́льное честѝ серафі́мы ᲂу҆ча́тъ, вопїю́ще гла́съ трисвѧты́й ꙗ҆́вѣ, дх҃омъ просвѣща́еми а҆́гг҃ли бж҃ества̀.

Бг҃оро́диченъ: Без̾ сѣ́мене, ѻ҆трокови́це, тебѣ̀ а҆рха́гг҃лъ гаврїи́лъ роди́ти животода́вца бл҃говѣстѝ, бцⷣе всечⷭ҇таѧ, съ нб҃сѐ соше́дъ.

Пѣ́снь ѕ҃

І҆рмо́съ: И҆́же въ концы̀ вѣкѡ́въ доше́дшыѧ чл҃вѣколю́бче, и҆ треволне́ньми напа́стей поги́бнꙋти бѣ́дствꙋющыѧ, вопїю́щыѧ не пре́зри: сп҃сѝ сп҃се, ꙗ҆́коже сп҃слъ є҆сѝ ѿ ѕвѣ́рѧ прⷪ҇ро́ка.

Превозне́ссѧ мы́слїю, ꙗ҆́коже дре́внїй фарїсе́й прегрѣше́нїемъ низпадо́хсѧ лю́тѣ, и҆ зрѧ́ мѧ льсти́вый, весели́тсѧ, хрⷭ҇тꙋ̀: и҆́мже смири́вый сего̀ крⷭ҇то́мъ, смири́вшасѧ ны́нѣ ᲂу҆ще́дри мѧ̀.

Грѣхолюби́въ въ житїѝ бы́въ, ꙗ҆́коже и҆́нъ никто́же влⷣко, и҆жди́хъ твоѐ долготерпѣ́нїе ѻ҆каѧ́нный, и҆ є҆щѐ є҆́смь нечꙋ́вственъ, но ѡ҆брати́ мѧ твои́мъ бл҃гоꙋтро́бїемъ.

Мч҃нченъ: Ꙗ҆́ростнымъ произволе́нїемъ, законопрестꙋ́пницы бг҃омꙋ́дренныхъ ѡ҆сꙋжда́юще, ѻ҆гне́мъ и҆ сожже́нїемъ и҆ прободе́ньми, зла́та свѣтлѣ́йше ꙗ҆́кѡ вои́стиннꙋ показа́ша, и҆ хрⷭ҇тꙋ̀ снаслѣ́дники.

Мч҃нченъ: Сꙋди́ще и҆спо́лнено боре́нїй, и҆ по́двигѡвъ превели́кихъ, и҆ па́че є҆стества̀ ра̑ны преше́дше, побѣди́сте кнѧ́зѧ тьмы̀, и҆ ѿ бг҃а прїѧ́сте страда́льцы вѣнцы̀.

Бг҃оро́диченъ: Ковче́гъ завѣ́та, ст҃ꙋ́ю вои́стиннꙋ трапе́зꙋ, ѡ҆чисти́лище на́ше, цр҃ковь бж҃їю ѡ҆дꙋшевле́ннꙋю, всезлаты́й свѣ́щникъ, и҆́стиннꙋю мт҃рь зижди́телѧ воспѣва́емъ.

И҆́нъ

І҆рмо́съ: Селе́нїѧ і҆ѡ́на, є҆́же въ преиспо́днѣмъ а҆́дѣ, є҆сте́ственный ѡ҆́бразъ бы́въ, вопїѧ́ше: возведѝ ѿ тлѝ живо́тъ мо́й, чл҃вѣколю́бче.

Пе́рвое и҆ вседѣ́тельное бг҃онача́лїѧ сїѧ́нїе, а҆рха́гг҃ли и҆ а҆́гг҃ли, си́льнѡ пою́тъ зовꙋ́ще, съ нача́лы и҆ властьмѝ и҆ си́лами, гла́сы немо́лчными гдⷭ҇а. [Два́жды.]

И҆́же мі́ръ ᲂу҆́мный всесли́чнымъ чи́номъ по чинꙋ̀ ᲂу҆краше́й неви́димѡ, семꙋ̀ ᲂу҆подоблѧ́тисѧ бл҃гочи́нїю, честнꙋ́ю цр҃ковь бл҃говолѝ.

Бг҃оро́диченъ: И҆сцѣле́нїй тѧ̀ и҆сто́чникъ приснотекꙋ́щъ, є҆́же въ тѧ̀ все́льшеесѧ сло́во показа̀: моеѧ̀ ᲂу҆́бѡ дꙋшѝ ꙗ҆́звы бцⷣе дв҃о и҆сцѣлѝ.

Пѣ́снь з҃

І҆рмо́съ: Трїѐ ѻ҆́троцы въ пещѝ трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Вре́мѧ моѐ скончава́етсѧ ѽ дꙋшѐ, при две́рехъ и҆схо́дъ, покаѧ́нїѧ ᲂу҆́бѡ плоды̀ покажѝ, пре́жде да́же двє́ри не затворѧ́тсѧ, возопі́й хрⷭ҇тѐ: гдⷭ҇и, сп҃си́ мѧ.

Ѡ҆бнови́мъ сердца̀ ра́ломъ и҆́стиннагѡ позна́нїѧ, покаѧ́нїѧ пшени́цꙋ сѣ́юще, ꙗ҆́кѡ да по́жнемъ кла́съ пра́вды, ѡ҆ хрⷭ҇тѣ̀ воздѣ́лателѣ дꙋ́шъ на́шихъ.

Мч҃нченъ: Свѣти̑ла бл҃гоче́стїѧ, нече́стїѧ сопротивобо́рцы, ни́щихъ ѡ҆богати́телїе, гдⷭ҇ни мч҃нцы, преѻкаѧ́ннꙋю мою̀ дꙋ́шꙋ лише́ннꙋю, добродѣ́тельми ѡ҆богати́те.

Мч҃нченъ: И҆́же сп҃сы́й мытарѧ̀ и҆з̾ глꙋбины̀ воздохнꙋ́вша, и҆ моѐ ма́лое воздыха́нїе прїимѝ, и҆ сп҃си́ мѧ стрⷭ҇тоте́рпєцъ ра́ди, просла́вльшихъ тѧ̀ хрⷭ҇тѐ свои́ми ᲂу҆́ды.

Бг҃оро́диченъ: И҆сто́чниче, и҆́же во́дꙋ ѡ҆ставле́нїѧ и҆сточа́ющи, течє́нїѧ мои́хъ прегрѣше́нїй и҆зсꙋшѝ, подаю́щи мѝ тꙋ́чꙋ сле́зъ, да тѧ̀ при́снѡ ꙗ҆́кѡ бцⷣꙋ пою̀.

И҆́нъ

І҆рмо́съ: Го́рдый мꙋчи́тель, но дѣте́й бы́сть и҆гра́лище: ꙗ҆́коже бо пе́рсть попра́вше седмери́чный пла́мень, поѧ́хꙋ: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.

Тве́рдымъ ᲂу҆мо́мъ и҆ до́блественнымъ ѻ҆́комъ, зрѧ́ще первонача̑льныѧ свѣ́тлѡсти, прича́стїемъ быва́ете свѣ́ти вторі́и, а҆́гг҃льстїи ли́цы, бл҃гослове́нъ є҆сѝ, зовꙋ́ще, бж҃е ѻ҆тє́цъ на́шихъ. [Два́жды.]

Неꙋкло́ннымъ жела́нїемъ, и҆ неизда́тельною любо́вїю води́ми сꙋ́ще, добро́тами зижди́телѧ, положе́нїемъ бы́сте свѣти̑ла втора̑ѧ, ли́цы а҆́гг҃льстїи, бл҃гослове́нъ є҆сѝ зовꙋ́ще, бж҃е ѻ҆тє́цъ на́шихъ.

Бг҃оро́диченъ: Воплоще́нное родила̀ є҆сѝ бцⷣе, сло́во безнача́льное, є҆́же и҆з̾ ѻ҆ц҃а̀ без̾ мт҃ре предвѣ́чное бж҃е́ственнымъ ржⷭ҇тво́мъ. бл҃гослове́нъ влⷣчце, пло́дъ твоегѡ̀ чре́ва.

Пѣ́снь и҃

І҆рмо́съ: Въ пла́мень ко ѻ҆трокѡ́мъ є҆врє́йскимъ снизше́дшаго бж҃їею си́лою, и҆ ꙗ҆́вльшагосѧ гдⷭ҇а, сщ҃е́нницы бл҃гослови́те, и҆ превозноси́те во всѧ̑ вѣ́ки.

Ѿ посмѣ́шства ха́мъ ѻ҆те́ческимъ и҆зрече́нїемъ ра́бъ бы́сть: что̀ сотвори́ши дꙋшѐ моѧ̀, поработи́вшисѧ страсте́мъ и҆ безчи́ннѡ смѣю́щисѧ, и҆ не стыдѧ́щисѧ нбⷭ҇нагѡ ѻ҆ц҃а̀;

Враждова́въ ка́їнъ безꙋ́мнѡ братоꙋбі́йца бы́сть: семꙋ̀ подо́бна ꙗ҆ви́ласѧ є҆сѝ, и҆ не и҆на́го ᲂу҆би́вши, но себѐ са́мꙋю дꙋшѐ моѧ̀, сластолю́бїемъ и҆ пре́лестьми житїѧ̀.

Мч҃нченъ: И҆збра̑нныѧ би́серы гдⷭ҇ни, сосꙋ́ды честны̑ѧ, свѣтѧ́щыѧсѧ свѣщы̀ заре́ю бж҃е́ственныѧ бл҃года́ти, хрⷭ҇тѡ́вы стрⷭ҇тоте́рпцы, вѣ́рою соше́дшесѧ почти́мъ досто́йнѡ.

Мч҃нченъ: И҆́же мꙋ́дрыхъ стрⷭ҇тоте́рпєцъ кро́вь, па́че кади́ла прїе́мъ сло́ве, тѣ́хъ мольба́ми покаѧ́нїемъ къ тебѣ̀ припа́дающихъ сп҃сѝ, ꙗ҆́кѡ є҆ди́нъ млⷭ҇тивъ.

Бг҃оро́диченъ: И҆зли́шествомъ блꙋ́днагѡ житїѧ̀, ко а҆́дꙋ ны́нѣ прибли́жихсѧ: премно́гое бл҃гоꙋтро́бїе ѻ҆трокови́це и҆мꙋ́щи, ꙗ҆́кѡ бг҃а бл҃гоꙋтро́бнаго ро́ждши неизрече́ннѡ, ᲂу҆ще́дривши сп҃си́ мѧ.

И҆́нъ

І҆рмо́съ: Веще́ственнагѡ ѻ҆гнѧ̀ пла́мень невеще́ственнымъ ᲂу҆вѧди́ша, бг҃озри́мїи ѻ҆́троцы, и҆ поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.

Ꙗ҆́кѡ всѣ́хъ содѣ́тель, а҆́гг҃лы ᲂу҆мы́слилъ є҆сѝ, и҆ предста́ша тѝ со стра́хомъ, зовꙋ́ще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

Прича́стїемъ бж҃е́ственнагѡ ѻ҆гнѧ̀, ꙗ҆́коже пла́мень бы́вше нбⷭ҇ныѧ ᲂу҆мы̀ зовꙋ́тъ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

Невеще́ствєнныѧ и҆ ᲂу҆́мныѧ а҆́гг҃лы пре́жде соста́вилъ є҆сѝ ви́димыхъ всѣ́хъ, непреста́ннѡ тебѣ̀ зовꙋ́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

Бг҃оро́диченъ: Сло́во ѻ҆́ч҃ее, па́че сло́ва воплоще́нное бг҃ороди́тельнице дв҃о родила̀ є҆сѝ: є҆го́же пою́тъ всѧ̑ дѣла̀ ꙗ҆́кѡ гдⷭ҇а, и҆ превозно́сѧтъ во всѧ̑ вѣ́ки.

Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:

Пѣ́снь ѳ҃

І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова.

І҆а́кѡвъ пе́рвенство прїѧ́тъ, ра́ди воздержа́нїѧ и҆ногда̀, и҆са́ѵъ же старѣ́йшинство ѿдадѐ, не ᲂу҆держа́въ чре́во. ко́ль ѕло̀ невоздержа́нїе, и҆ ко́ль вели́ко воздержа́нїе! бѣ́гай неподо́бїѧ, возлюбѝ, ѽ дꙋшѐ, до́брыхъ прибавле́нїе.

Ꙗ҆́кѡ мнѡ́гаѧ претерпѣ́въ непоро́чный, вѣнча́сѧ і҆́ѡвъ: и҆скꙋше́нїй бо сте́кшесѧ пото́цы, не поколеба́ша є҆мꙋ̀ серде́чнагѡ столпа̀. томꙋ̀ ревнꙋ́й всегда̀, непрело́жна пребыва́ющи, ѽ дꙋшѐ, лꙋка́вагѡ козньмѝ.

Мч҃нченъ: Ѡ҆бостри́вшесѧ ѻ҆гне́мъ бж҃е́ственнагѡ дх҃а, мечѝ ꙗ҆ви́стесѧ ꙗ҆́вѣ, сѣкꙋ́ще полкѝ проти́вныѧ, стрⷭ҇тоно́сцы хрⷭ҇тѡ́вы, и҆ вели́кими побѣ́дами прославлѧ́еми, вѣнча́стесѧ всеси́льною рꙋко́ю всѣ́хъ цр҃ѧ̀.

Мч҃нченъ: Мно́жество мч҃нкъ непоро́чное, безмѣ́рныхъ мои́хъ ѕѡ́лъ мно́жество, ѡ҆чи́стити моли́те влⷣкꙋ и҆ бг҃а, ва́шѧ неизречє́нныѧ трꙋды̀ прїе́мшаго, и҆ со безпло́тныхъ во́инствы ва́съ сочета́вшаго.

Бг҃оро́диченъ: Свѣ́тлаѧ влⷣчнѧѧ пала́та, до́мъ мѧ̀ покажѝ свѣ́та, непроходи́маѧ две́ре, ѿве́рзи мѝ покаѧ́нїѧ пꙋти̑, землѐ свѧта́ѧ, къ земли́ мѧ кро́ткихъ наста́ви влⷣчце, всѧ́кагѡ мѧ̀ влады́чества страсте́й ꙗ҆вѝ свобо́дна.

И҆́нъ

І҆рмо́съ: Сла́дкою пречⷭ҇тагѡ твоегѡ̀ ржⷭ҇тва̀ стрѣло́ю ᲂу҆ѧ́звлени чⷭ҇таѧ, твое́й достожела́ннѣй добро́тѣ дивѧ́щесѧ, пѣ́сньми а҆́гг҃льскими досто́йнѡ тѧ̀, ꙗ҆́кѡ мт҃рь бж҃їю велича́емъ.

И҆̀же свѣ́тꙋ вели́комꙋ и҆ пе́рвомꙋ ны́нѣ предстоѧ́ще ли́цы, мл҃твенницы сильнѣ́йшїи бы́сте ѡ҆ всѣ́хъ на́съ, ва́съ, ꙗ҆́коже мо́щно, ѽ бж҃е́ственнѣйшїи а҆́гг҃ли бж҃їи, велича́ющихъ. [Два́жды.]

Равноси́льнꙋю трⷪ҇цꙋ сла́вити сподо́бльшесѧ ꙗ҆́снѡ, тоѧ̀ сїѧ́нїемъ пе́рвѣе ѡ҆свѣща́еми, ѡ҆свѣти́тисѧ вторы́мъ сїѧ́нїемъ сподо́бите на́съ, и҆̀же ва́съ бл҃гоче́стнѡ велича́ющихъ.

Бг҃оро́диченъ: Тѧ̀ на́шегѡ сп҃се́нїѧ ѡ҆снова́нїе всѝ вѣ́мы: твое́ бо пречⷭ҇тое ржⷭ҇тво̀ сп҃сло̀ є҆́сть, кро́вїю бг҃одѣ́тельною, пою́щыѧ тѧ̀ бцⷣе, и҆ вѣ́рнѡ сла́вѧщыѧ.

Та́же, Досто́йно є҆́сть: Є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.

На стїхо́внѣ стїхи̑ры ᲂу҆мили́тєльны, гла́съ г҃:

Разсѣ́ѧнный мо́й ᲂу҆́мъ соберѝ гдⷭ҇и, и҆ ѡ҆лѧденѣ́вшее се́рдце моѐ ѡ҆чи́сти, ꙗ҆́кѡ петрꙋ̀ даѧ́ ми покаѧ́нїе, ꙗ҆́кѡ мытарю̀ воздыха́нїе, и҆ ꙗ҆́коже блꙋдни́цѣ сле́зы, да ве́лїимъ гла́сомъ зовꙋ́ ти: бж҃е сп҃си́ мѧ, ꙗ҆́кѡ є҆ди́нъ бл҃гоꙋтро́бенъ и҆ чл҃вѣколю́бецъ.

Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ и҆ возвесели́хомсѧ: во всѧ̑ дни̑ на́шѧ возвесели́хомсѧ: за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.

Мно́жицею пѣ́нїе соверша́ѧ, ѡ҆брѣто́хсѧ грѣ́хъ скончава́ѧ, ѧ҆зы́комъ ᲂу҆́бѡ пѣ́нїе вѣща́ѧ, дꙋше́ю же безмѣ̑стнаѧ помышлѧ́ѧ: но ѻ҆боѐ и҆спра́ви хрⷭ҇тѐ бж҃е покаѧ́нїемъ, и҆ сп҃си́ мѧ.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.

Мч҃нченъ: Ст҃ы́хъ стрⷭ҇тоте́рпєцъ па́мѧть, прїиди́те лю́дїе, всѝ почти́мъ, ꙗ҆́кѡ позо́ръ бы́вше а҆́гг҃лѡмъ и҆ человѣ́кѡмъ, побѣ́ды вѣнцы̀ ѿ хрⷭ҇та̀ прїѧ́ша, и҆ мо́лѧтсѧ ѡ҆ дꙋша́хъ на́шихъ.

Сла́ва, и҆ ны́нѣ, бг҃оро́диченъ: Ст҃опервочⷭ҇таѧ похвало̀ сꙋ́щи нбⷭ҇ныхъ чинѡ́въ, а҆пⷭ҇лѡвъ пѣ́нїе, и҆ прⷪ҇ро́кѡвъ сбытїѐ, влⷣчце, прїимѝ мл҃твы на́шѧ.

Та́же, Бл҃го є҆́сть и҆сповѣ́датисѧ: И҆ трист҃о́е. По Ѻ҆́ч҃е на́шъ: тропа́рь и҆ є҆ктенїа̀: та́же ча́съ а҃-й, и҆ ѿпꙋ́стъ.

Въ понедѣ́льникъ бл҃жє́нны, гла́съ г҃:

Ѿве́ргша хрⷭ҇тѐ за́повѣдь твою̀, пра́ѻтца а҆да́ма и҆з̾ раѧ̀ и҆згна́лъ є҆сѝ: разбо́йника же ще́дре и҆сповѣ́давша тѧ̀ на крⷭ҇тѣ̀, во́нь всели́лъ є҆сѝ, зовꙋ́ща: помѧни́ мѧ сп҃се, въ црⷭ҇твїи твое́мъ.

Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

Ѕѡ́лъ мои́хъ мно́жество, по мно́жествꙋ млⷭ҇ти твоеѧ̀, хрⷭ҇тѐ, презрѣ́въ сп҃си́ мѧ: и҆ въ де́нь сꙋ́дный ѡ҆сꙋжде́нїѧ и҆зба́ви мѧ̀ сп҃се, и҆ вѣ́чнагѡ мꙋче́нїѧ, ꙗ҆́кѡ да пѣсносло́влю твою̀ бл҃госты́ню.

Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.

Херꙋві́ми и҆ серафі́ми, прⷭ҇то́ли, а҆рха́гг҃ли, си̑лы, и҆ нача̑ла, и҆ гдⷭ҇ьствїѧ, а҆́гг҃ли и҆ вла̑сти всѧ̑, ᲂу҆моли́те содѣ́телѧ, презрѣ́ти тогда̀ моѧ̑ согрѣшє́нїѧ, є҆гда̀ хо́щетъ сꙋди́ти землѝ, ꙗ҆́кѡ чл҃вѣколю́бецъ.

Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Ѿ крове́й сщ҃е́нныхъ багрѧни́цꙋ ѡ҆мочи́вше хрⷭ҇тѡ́вы страда́льцы, цр҃ю̀ си́лъ сца́рствовати вои́стиннꙋ сподо́бишасѧ бг҃олѣ́пнѡ: и҆ на́мъ про́сѧтъ прегрѣше́нїй ѡ҆ставле́нїѧ, досто́йнѡ тѣ́хъ всегда̀ почита́ющымъ.

Сла́ва: Трїѷпоста́сное вѣ́рнїи є҆ди́но бж҃ество̀, пою́ще бл҃гоче́стнѡ, ѻ҆ц҃а̀, и҆ сло́ва, и҆ ст҃а́гѡ ᲂу҆тѣ́шителѧ дх҃а, а҆́гг҃льски возопїи́мъ гла́сы немо́лчнѡ: ст҃ъ, ст҃ъ, ст҃ъ є҆сѝ бж҃е, сп҃са́ѧй дꙋ́шы на́шѧ.

И҆ ны́нѣ, бг҃оро́диченъ: Ꙗ҆́же свѣ́тъ ѿ свѣ́та ро́ждшаѧ, ѻ҆́блаче свѣ́тлый, ѡ҆мраче́ннаго мѧ̀ страстьмѝ и҆ сластьмѝ житїѧ̀, ко свѣ́тꙋ наста́вльши, и҆спра́ви чⷭ҇таѧ, и҆ ᲂу҆лꙋчи́ти сла́вꙋ моли́сѧ, ю҆́же полꙋчи́ша ны́нѣ, и҆̀же до́брѣ пожи́вшїи.