Въ четверто́къ ве́чера,

на Гдⷭ҇и воззва́хъ, стїхи̑ры крⷭ҇тны, гла́съ г҃.

Подо́бенъ: Поста́виша:

Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

Гдⷭ҇и безстра́стенъ сы́й бж҃е́ственнымъ є҆стество́мъ твои́мъ, стрⷭ҇ть претерпѣ́лъ є҆сѝ, по є҆стествꙋ̀ чл҃вѣ́ческомꙋ твоемꙋ̀, на крⷭ҇тѣ̀ ᲂу҆́бѡ пригвожда́емь, копїе́мъ же и҆скопова́емь въ ре́бра, и҆сточа́ѧ мнѣ̀ двѣ̀ рѣцѣ̀ ѿ ни́хъ та́инствъ неизрече́нныхъ.

Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

Вѣнце́мъ ѿ те́рнїѧ и҆сплете́ннымъ ᲂу҆вѧ́злсѧ є҆сѝ порꙋга́ннѡ цр҃ю̀ всѣ́хъ, запреще́нїе сп҃се, терно́внагѡ грѣха̀ и҆стерза́ѧ: рꙋка́ма же твои́ма тро́сть прїе́мъ, въ го́рнѣй кни́зѣ написа́лъ є҆сѝ всѣ́хъ на́съ: въ тѧ̀ вѣ́ровавшихъ.

Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.

Ника́коже преста̀ є҆вре́ѡвъ за́висть непра́веднаѧ, нижѐ распе́ншихъ тѧ̀ неѕло́биве, нижѐ ᲂу҆ме́ршꙋ тѝ хрⷭ҇тѐ: но и҆ та́кѡ ѡ҆клевета́хꙋ, ꙗ҆́коже лестца̀, ᲂу҆ пїла́та лю́тїи проси́ша стрещѝ гро́бъ тво́й. ѽ гнѣ́ва неисцѣ́льнагѡ!

И҆́ны стїхи̑ры прест҃ѣ́й бцⷣѣ. Гла́съ то́йже.

Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѡ҆ всѣ́хъ беззако́нїй є҆гѡ̀.

Є҆гда̀ и҆з̾ твоегѡ̀ чре́ва возсїѧ́вшаго, на крⷭ҇тѣ̀ заходѧ́ща ви́дѣвши сл҃нца незаходи́маго, со́лнца зарю̀ содержа́щаго, возопи́ла є҆сѝ ѡ҆тѧгче́ною дꙋше́ю тьмо́ю печа́лей, во́лею заше́дъ, и҆ па́ки возсїѧ́въ, въ моѐ просвѣще́нїе, и҆ мі́рови.

Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Влⷣчце ро́ждшаѧ грѧдꙋ́щаго живы̑мъ же и҆ мє́ртвымъ сꙋди́ти, ᲂу҆мерщвле́нꙋю мою̀ дꙋ́шꙋ болѣ́знїю, покаѧ́нїемъ ѡ҆живѝ, и҆ бж҃е́ственною кро́вїю и҆з̾ ре́бръ сн҃а твоегѡ̀ и҆сте́кшею: и҆ живы́мъ є҆гѡ̀ за́повѣдемъ дѣ́лателѧ ꙗ҆ви́ мѧ.

Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Є҆гда́ тѧ ча́до неболѣ́зненнѡ ражда́хъ, а҆́гница и҆ мт҃и глаго́лаше: ско́рби и҆збѣжа́хъ и҆ печа́лей мглы̀: но ны́нѣ тѧ̀ воздви́жена на крⷭ҇тѣ̀ зрѧ́щи, ᲂу҆тро́бо моѧ̀, го́рькими стрѣла́ми се́рдце ѡ҆блага́ю, и҆ печа́лїю безмѣ́рною погрꙋжа́юсѧ влⷣко.

Сла́ва, и҆ ны́нѣ, бг҃оро́диченъ: Мі́ръ поми́лованъ бы́сть сло́ве, распѧ́тїемъ твои́мъ, тва́рь просвѣти́сѧ, ꙗ҆зы́цы сп҃се́нїе ѡ҆брѣто́ша, влⷣко, вопїѧ́ше пречⷭ҇таѧ: а҆́зъ же ны́нѣ растерза́юсѧ, зрѧ́щи твою̀ во́льнꙋю стрⷭ҇ть.

На стїхо́внѣ стїхи̑ры, гла́съ г҃:

Крⷭ҇тꙋ̀ твоемꙋ̀ покланѧ́емсѧ, хрⷭ҇тѐ, честно́мꙋ, храни́телю мі́ра, сп҃се́нїю на́съ грѣ́шныхъ, вели́комꙋ ѡ҆чище́нїю, похвалѣ̀ всеѧ̀ вселе́нныѧ.

Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

Крⷭ҇тоѡбра́знѡ мѡѷсе́й на горѣ̀ рꙋ́цѣ распросте́ръ къ высотѣ̀, а҆мали́ка побѣжда́ше. ты́ же сп҃се, дла̑ни распросте́ръ на крⷭ҇тѣ̀ честнѣ́мъ, ѡ҆б̾е́мъ мѧ̀ сп҃слъ є҆сѝ ѿ рабо́ты вра́жїѧ: и҆ да́лъ мѝ є҆сѝ зна́менїе живота̀ бѣжа́ти ѿ лꙋ́ка сопроти́вныхъ мѝ. сегѡ̀ ра́ди сло́ве, покланѧ́юсѧ крⷭ҇тꙋ̀ твоемꙋ̀ чⷭ҇тно́мꙋ.

Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ. наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.

Ве́лїѧ крⷭ҇та̀ твоегѡ̀ гдⷭ҇и си́ла: водрꙋзи́сѧ бо на мѣ́стѣ, и҆ дѣ́йствꙋетъ въ мі́рѣ, и҆ показа̀ ѿ ры́барей а҆пⷭ҇лы, и҆ ѿ ꙗ҆зы̑къ мч҃нки, да мо́лѧтсѧ ѡ҆ дꙋша́хъ на́шихъ.

Сла́ва, и҆ ны́нѣ, крⷭ҇тобг҃оро́диченъ: Зрѧ́щи тѧ̀ всенепоро́чнаѧ воздви́жена на дре́во, хрⷭ҇тѐ мо́й пребл҃гі́й, пла́чꙋщи вопїѧ́ше мт҃рски: сн҃е мо́й вселюбе́зный! ка́кѡ со́нмъ беззако́нный на крⷭ҇тѣ́ тѧ воздви́же;

Въ четверто́къ на повече́рїи,

канѡ́нъ прест҃ѣ́й бцⷣѣ. Гла́съ г҃.

Пѣ́снь а҃

І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.

Присѣ́ннꙋю тѧ̀ го́рꙋ, ю҆́же прови́дѣ дх҃омъ а҆ввакꙋ́мъ прⷪ҇ро́къ, молю̀, пречⷭ҇таѧ ѡ҆сѣни́ти мѧ̀ страстьмѝ ѡ҆зное́наго, и҆ ѿ сѣ́ни сме́ртныѧ лю́тыхъ бѣ́дъ и҆зба́витисѧ.

Ѡ҆кропле́нїемъ бж҃е́ственныѧ кро́ве, и҆злїѧ́нныѧ ѿ бж҃е́ственныхъ ре́бръ чⷭ҇таѧ, сн҃а твоегѡ̀, моегѡ̀ се́рдца ѡ҆мы́й ра̑ны, ꙗ҆́кѡ да велича́ю тѧ̀, и҆ по до́лгꙋ сла́влю приснобл҃же́ннꙋю и҆ пренепоро́чнꙋю.

Сла́ва: Равнодѣ́тельное ѻ҆ц҃ꙋ̀ родила̀ є҆сѝ сло́во, ѡ҆божи́вшее человѣ́кѡвъ сꙋщество̀: того̀ молѝ, недоꙋмѣ́ннаго мѧ̀ и҆ и҆знемо́гшаго вра́жїими кова́рствы, бж҃е́ственныѧ ᲂу҆тѣ́хи сподо́бити чⷭ҇таѧ.

И҆ ны́нѣ: Ѡ҆чище́нїе мѝ пода́ждь прегрѣше́нїй бж҃е́ственными твои́ми мл҃твами дв҃о, си́льнꙋю бо и҆́маши мл҃твꙋ влⷣчце: и҆ тебѐ пою́щыѧ и҆зба́ви ѿ прегрѣше́нїй, и҆ страсте́й, и҆ скорбе́й, и҆ ѡ҆бстоѧ́нїѧ.

Пѣ́снь г҃

І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.

Въ ми́лости неизрече́ннаго, и҆ въ щедро́тахъ сꙋ́ща бога́таго, ми́лостива сꙋ́щи пречⷭ҇таѧ помолѝ ᲂу҆ще́дрити ны̀ ѡ҆ѕло́блєныѧ.

Хра́мъ сꙋ́щи всѧ́ческихъ творца̀, помоли́сѧ всели́тисѧ въ мѧ̀ ᲂу҆тѣ́шителю, бы́вша мѧ̀ верте́пъ дꙋшетлѣ́нныхъ разбо́йникѡвъ, чⷭ҇таѧ дв҃о.

Сла́ва: Ма́нїемъ всѧ̑ носѧ́щаго бж҃ески, на рꙋкꙋ̀ ꙗ҆́кѡ носи́ла є҆сѝ бцⷣе, при́зри на мѧ̀, и҆ и҆зба́ви мѧ̀, є҆́же къ страсте́мъ зрѣ́нїѧ неподо́бнагѡ.

И҆ ны́нѣ: Млⷭ҇рдїе млⷭ҇ти твоеѧ̀ молю̀, ѿве́рзи мѝ бцⷣе пречⷭ҇таѧ, и҆ те́плаѧ мѝ ꙗ҆ви́сѧ въ напа́стехъ помо́щница и҆ сп҃се́нїе.

Пѣ́снь д҃

І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.

Ра̑ны хрⷭ҇тѐ и҆ заколе́нїе, во́лею ꙗ҆́кѡ бг҃ъ претерпѣ́вый, ᲂу҆ра́ненꙋю мою̀ дꙋ́шꙋ разбо́йми бѣсо́вскихъ ѡ҆ѕлобле́нїй, мл҃твами тебѐ ро́ждшїѧ и҆сцѣлѝ, є҆ди́не многомлⷭ҇тиве.

Дѣ́ло твоє́ю рꙋкꙋ̀ зижди́телю є҆́смь и҆ творе́нїе: ѕло́ба же ѕмїи́на сластьмѝ житїѧ̀ сокрꙋши́ мѧ. тѣ́мже хрⷭ҇тѐ ѡ҆бнови́ мѧ, тебѐ ро́ждшїѧ сло́ве мольба́ми.

Сла́ва: Сло́во ѻ҆́ч҃ее па́че сло́ва родила̀ є҆сѝ, рѣша́щее всѧ́кагѡ безслове́сїѧ человѣ́ки: є҆го́же прилѣ́жнѡ молѝ, безслове́сными мѧ̀ сластьмѝ порабоще́нна свободи́ти, є҆ди́на приснодв҃о.

И҆ ны́нѣ: И҆сцѣле́нїе на́мъ ѿ дла́ни то́чиши всегда̀, всеѡсщ҃е́ннаѧ сѣ́не, всѧ̑ свѣ́та сꙋ́щи и҆спо́лнена, всѣ̑мъ и҆сточа́ющи мѵ́ро бл҃гово́нно, всечⷭ҇таѧ бг҃оневѣ́сто.

Пѣ́снь є҃

І҆рмо́съ: Ꙗ҆́кѡ ви́дѣ и҆са́їа ѡ҆бра́знѡ на прⷭ҇то́лѣ превознесе́на бг҃а, ѿ а҆́гг҃лъ сла́вы дорѷноси́ма, ѽ ѻ҆каѧ́нный, вопїѧ́ше а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.

Пло́ти моеѧ̀ болѣ̑зни, и҆ дꙋше́внꙋю мѝ печа́ль претворѝ и҆ ᲂу҆ны́нїѧ ѻ҆́блаки ѿженѝ дв҃о, свѣ́та ѻ҆́блаче, и҆ здра́вїе и҆ болѣ́зней премѣне́нїе да́ждь мѝ пою́щемꙋ, и҆ любо́вїю тѧ̀ сла́вѧщемꙋ.

Тѧ̀ хода́таицꙋ, и҆ мл҃твенницꙋ, ко и҆з̾ тебѐ ро́ждшемꙋсѧ ны́нѣ предлага́ю, всѧ́кагѡ грѣха̀ и҆спо́лненъ сы́й: дв҃о, бꙋ́ди мѝ житїѧ̀ и҆справле́нїе, и҆ наста́вница къ стезѝ бж҃е́ственнагѡ ра́зꙋма.

Сла́ва: Ѡ҆свѧтѝ ᲂу҆́мъ мо́й дв҃о, и҆ дꙋ́шꙋ просвѣтѝ, и҆ бж҃е́ственныѧ сла́вы прича́стника сотворѝ: се́ бо ѕѡ́лъ напо́лнихсѧ, и҆ всѧ́кими порабо́тихсѧ сластьмѝ, и҆ ѡ҆скверне́нꙋ приношꙋ̀ со́вѣсть.

И҆ ны́нѣ: Вїногра́дъ бж҃е́ственный, ꙗ҆́же кра́сный гро́здъ возрасти́вшаѧ, и҆́же дꙋша́мъ даю́щїй питїѐ незави́стное: дв҃о ст҃а́ѧ ѻ҆трокови́це, ты́ мѧ напо́й сла́дости є҆гѡ̀ и҆ сласте́й пїѧ́нство ѿимѝ, и҆ сп҃си́ мѧ.

Пѣ́снь ѕ҃

І҆рмо́съ: И҆̀же въ концы̀ вѣкѡ́въ доше́дшыѧ чл҃вѣколю́бче, и҆ треволне́ньми напа́стей поги́бнꙋти бѣ́дствꙋющыѧ, вопїю́щыѧ не пре́зри: сп҃сѝ сп҃се, ꙗ҆́коже сп҃слъ є҆сѝ ѿ ѕвѣ́рѧ прⷪ҇ро́ка.

Фарїсе́а вознесе́наго ᲂу҆мо́мъ превзыдо́хъ возноша́емь при́снѡ, и҆ про́пастемъ соедини́хсѧ безмѣ́рныхъ прегрѣше́нїй: смири́вшагосѧ лю́тѣ, є҆ди́на чⷭ҇таѧ, и҆зба́ви и҆ ᲂу҆ще́дри мѧ̀.

И҆́же пречꙋ́дное зача́тїе и҆мѣ́вши и҆ ржⷭ҇тво̀, твоѧ̑ млⷭ҇ти на мнѣ̀ ѻ҆каѧ́ннѣмъ ны́нѣ ᲂу҆дивѝ: и҆́бо въ беззако́нїихъ зача́хсѧ, и҆ роди́хсѧ, и҆ сластьмѝ поработи́хсѧ.

Сла́ва: Рыда́ю, и҆ пла́чꙋ, и҆ стеню̀, є҆гда̀ сꙋди́ще стра́шное воспомѧнꙋ̀: лꙋка̑ваѧ бо дѣла̀ стѧжа́хъ: но ты́ ми неискꙋсомꙋ́жнаѧ дв҃о мт҃и бж҃їѧ, въ ча́съ стра́шный предста́ни.

И҆ ны́нѣ: Разꙋмѣ́ти и҆ глаго́лати не мо́жетъ всѧ́къ ᲂу҆́мъ, дв҃о чⷭ҇таѧ, содѣ́ѧнное на тебѣ̀ чꙋ́до стра́нное и҆ пресла́вное: ка́кѡ родила̀ є҆сѝ, и҆ пребыва́еши па́ки чⷭ҇та̀; бг҃ъ є҆́сть рожде́йсѧ по сꙋществꙋ̀.

Та́же, Гдⷭ҇и поми́лꙋй, три́жды. Сла́ва, и҆ ны́нѣ:

Сѣда́ленъ, гла́съ г҃:

Неискꙋсобра́чнаѧ чⷭ҇таѧ мт҃и твоѧ̀ хрⷭ҇тѐ, зрѧ́щи тѧ̀ ме́ртва повѣ́шена на дре́вѣ, мт҃рски рыда́ющи, глаго́лаше: что̀ тѝ воздадѐ є҆вре́йскїй беззако́нный собо́ръ и҆ безбл҃года́тный, и҆́же мно́гихъ и҆ вели́кихъ твои́хъ дарѡ́въ наслади́выйсѧ сн҃е мо́й; пою̀ твоѐ бж҃е́ственное сни́тїе.

Пѣ́снь з҃

І҆рмо́съ: Трїѐ ѻ҆́троцы въ пещѝ трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Ѿ дѣ́лъ сп҃се́нїѧ нѣ́сть мѝ влⷣчце, грѣхи́ бо прилага́ю ко грѣхѡ́мъ, и҆ къ ѕло́бѣ ѕло́бꙋ: мл҃твою ᲂу҆́бѡ твое́ю чⷭ҇таѧ, предварѝ и҆ сп҃си́ мѧ.

Сꙋ́дъ при две́рехъ, и҆ сꙋди́ще гото́во, гото́висѧ смире́ннаѧ дꙋшѐ, и҆ возопі́й: є҆гда̀ сꙋ́диши мѝ сло́ве, не ѡ҆сꙋдѝ менѐ, мл҃твами ро́ждшїѧ тѧ̀.

Сла́ва: Ѡ҆б̾е́мъ грѣхѡ́вныѧ плоды̀, ᲂу҆мертви́хсѧ, и҆ приноша́ю дꙋ́шꙋ непло́днꙋ, и҆ зовꙋ́ ти пречⷭ҇таѧ: плодоно́сна мѧ̀ покажѝ, ꙗ҆́же плодо́мъ твои́мъ тлю̀ потре́бльшаѧ.

И҆ ны́нѣ: Ѽ стра́ннагѡ та́инства! ѽ ᲂу҆жа́снагѡ ра́зꙋма! ка́кѡ бг҃ъ на землѝ ꙗ҆ви́сѧ ꙗ҆́кѡ чл҃вѣ́къ; ꙗ҆́кѡ вѣ́сть, ꙗ҆́кѡ хо́щетъ, ꙗ҆́кѡ бл҃говоли́тъ, и҆ дѣ́йствꙋетъ, ꙗ҆́коже и҆ хо́щетъ.

Пѣ́снь и҃

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.

Всѧ̀ ꙗ҆́кѡ добра̀, ꙗ҆́кѡ бли́жнѧѧ всѣ́хъ цр҃ю̀ бы́вши бцⷣе, напо́лни мѧ̀ бл҃ги́хъ дѣ́лъ въ ѕло́бѣ пожи́вшаго, и҆ въ лѣ́ности всѐ житїѐ сконча́вшаго, ꙗ҆́кѡ да тѧ̀ сла́влю во всѧ̑ вѣ́ки.

Ки́товы ᲂу҆тро́бы, ꙗ҆́коже и҆зба́вилъ є҆сѝ дре́вле прⷪ҇ро́ка пресла́внѡ, бж҃їй сло́ве: та́кѡ и҆зба́ви сп҃се ны́нѣ дꙋ́шꙋ мою̀ попо́лзшꙋюсѧ во глꙋбинꙋ̀ поги́бели, и҆мѣ́ѧ молѧ́щꙋю тѧ̀, неискꙋсобра́чнѡ ро́ждшꙋю тѧ̀ дв҃ꙋ.

Сла́ва: Кра́сною ѻ҆де́ждею ѡ҆блече́на, ѡ҆брѣ́тше мѧ̀ ѕло́бы дѣ́латели, и҆ сеѧ̀ совлеко́ша мѧ̀: но сама́ мѧ бг҃ороди́тельнице дв҃о, бж҃е́ственными ѻ҆де́ждами ᲂу҆ѧснѝ покаѧ́нїемъ, мл҃твами твои́ми бцⷣе.

И҆ ны́нѣ: то́же трепе́щетъ всѧ́ко созда́нїе, сего̀ чⷭ҇таѧ на рꙋкꙋ̀ и҆мѣ́ла є҆сѝ, за млⷭ҇рдїе на́съ ра́ди млⷣнца бы́вша, сего̀ молѝ сп҃стѝ всѧ̑ вѣ́рою зовꙋ́щыѧ: тѧ̀ превозно́симъ пречⷭ҇таѧ во всѧ̑ вѣ́ки.

Пѣ́снь ѳ҃

І҆рмо́съ: Въ зако́нѣ сѣ́ни и҆ писа́нїй, ѡ҆́бразъ ви́димъ вѣ́рнїи, всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ: тѣ́мъ перворожде́нное сло́во, ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.

И҆стлѣ́вша ᲂу҆мо́мъ, и҆ дꙋше́ю, и҆ со́вѣсть ѕло́бою ѡ҆скверни́вша, и҆ на́га всѣ́хъ бл҃ги́хъ ꙗ҆́вльшагосѧ, дв҃о нетлѣ́ннаѧ, непоро́чнаѧ, не пре́зри менѐ, но дѣ́лы бл҃гоче́стїѧ ᲂу҆красѝ.

Напо́лнихсѧ ѕѡ́лъ, напо́лнихсѧ помышле́нїй ѿчꙋжда́ющихъ мѧ̀ ѿ тебѐ чл҃вѣколю́бца, сегѡ̀ ра́ди стеню̀ и҆ вопїю̀: ка́ющасѧ прїими́ мѧ, и҆ не ѿри́ни менѐ тебѐ ро́ждшїѧ мольба́ми, бл҃года́телю многомлⷭ҇тиве.

Сла́ва: Да и҆зба́влюсѧ твои́ми мл҃твами всенепоро́чнаѧ ѻ҆трокови́це ѿ всѧ́кагѡ гнѣ́ва, и҆ страсте́й смертоно́сныхъ лю́тагѡ гее́нскагѡ ѻ҆гнѧ̀, ѿ человѣ̑къ непра́ведныхъ, и҆ ѿ вра̑гъ ѕлы́хъ, прибѣгі́й въ кро́въ тво́й, и҆ зовы́й тѧ̀ на по́мощь.

И҆ ны́нѣ: Краснꙋ̀ дꙋше́ю, краснꙋ̀ помышле́ньми, краснꙋ̀ тѣ́ломъ, ѡ҆брѣ́тъ тѧ̀ прекра́сный, ѿ чре́слъ твои́хъ дв҃и́ческихъ воплоти́сѧ, ꙗ҆́коже вѣ́сть, без̾ѡбра́зїе на́ше ᲂу҆краша́ѧ дв҃о, є҆го́же молѝ сп҃сти́сѧ на́мъ.

Та́же, Досто́йно є҆́сть: и҆ покло́нъ.Трист҃о́е. По Ѻ҆́ч҃е на́шъ: І҆ере́й, возгла́съ. Тропарѝ, и҆ про́чее ѻ҆бы́чное, и҆ ѿпꙋ́стъ.

Въ пѧто́къ ᲂу҆́тра,

по а҃-мъ стїхосло́вїи сѣда́льны крⷭ҇тны. Гла́съ г҃:

Крⷭ҇тъ водрꙋзи́сѧ на землѝ, и҆ коснꙋ́сѧ нб҃сѐ, не ꙗ҆́кѡ дре́вꙋ досѧ́гшꙋ высотꙋ̀, но тебѣ̀ на не́мъ, и҆сполнѧ́ющемꙋ всѧ́чєскаѧ: сла́ва тебѣ̀.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїи нѡ́гꙋ є҆гѡ̀, ꙗ҆́кѡ ст҃о є҆́сть.

Крⷭ҇тъ и҆ сме́рть пострада́ти и҆зво́ливый, посредѣ̀ тва́рей сїѧ̑ претерпѣ́лъ є҆сѝ, є҆гда̀ бл҃гоизво́лилъ є҆сѝ сп҃се, тѣ́ло твоѐ пригвозди́ти, тогда̀ и҆ со́лнце лꙋчы̀ скры̀: тогда̀ и҆ разбо́йникъ сїѧ̑ зрѧ̀, на крⷭ҇тѣ́ тѧ воспѣ́тъ, вопїѧ̀ бл҃гоговѣ́йнѡ: помѧни́ мѧ гдⷭ҇и: и҆ вѣ́ровавъ, прїѧ́тъ ра́й.

Сла́ва, и҆ ны́нѣ, крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆з̾ неѧ̀ без̾ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀ ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

По в҃-мъ стїхосло́вїи, сѣда́ленъ, гла́съ г҃:

На кѷпарі́сѣ, и҆ пе́ѵкѣ, и҆ ке́дрѣ, возне́слсѧ є҆сѝ а҆́гнче бж҃їй: да сп҃се́ши и҆̀же вѣ́рою покланѧ́ющыѧсѧ во́льномꙋ твоемꙋ̀ распѧ́тїю. хрⷭ҇тѐ бж҃е, сла́ва тебѣ̀.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.

Неизче́тнѣй вла́сти твое́й, и҆ во́льномꙋ твоемꙋ̀ распѧ́тїю, а҆́гг҃льскаѧ вѡ́инства дивлѧ́хꙋсѧ зрѧ́ще, ка́кѡ и҆́же неви́димый пло́тїю ра̑ны прїѧ́тъ, хотѧ̀ и҆зба́вити ѿ и҆стлѣ́нїѧ человѣ́чество; тѣ́мже ꙗ҆́кѡ бл҃года́телю вопїе́мъ тѝ: сла́ва, хрⷭ҇тѐ, бл҃гоꙋтро́бїю твоемꙋ̀.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Благодꙋ́шственное терпѣ́нїѧ ва́шегѡ побѣдѝ кѡ́зни ѕлонача́льнагѡ врага̀, мч҃нцы прехва́льнїи: сегѡ̀ ра́ди вѣ́чнагѡ сподо́бистесѧ блаже́нства. но моли́тесѧ гдⷭ҇еви, хрⷭ҇толюби́выхъ люде́й сп҃стѝ ста́до, свидѣ́телїе сꙋ́ще и҆́стины.

Сла́ва, и҆ ны́нѣ, крⷭ҇тобг҃оро́диченъ: Поно́снꙋю, ще́дре, сме́рть въ распѧ́тїи во́лею претерпѣ́лъ є҆сѝ: тебе́ же ро́ждшаѧ хрⷭ҇тѐ, зрѧ́щи ᲂу҆ѧзвлѧ́шесѧ: є҆ѧ́же мольба́ми за милосе́рдїе млⷭ҇ти твоеѧ̀, є҆ди́не преблагі́й чл҃вѣколю́бче гдⷭ҇и, ᲂу҆ще́дри и҆ сп҃сѝ мі́ръ, взе́млѧй мі́ра грѣхѝ.

По г҃-мъ стїхосло́вїи, сѣда́льны, гла́съ г҃:

Крⷭ҇тъ претерпѣ́лъ є҆сѝ безгрѣ́шне, клѧ́твы сосꙋ́дъ, за млⷭ҇рдїе неизрече́нное: первозда́ннаго пе́рвыѧ клѧ́твы свободи́лъ є҆сѝ. тѣ́мже твои́мъ чⷭ҇тны̑мъ покланѧ́емсѧ стрⷭ҇те́мъ, смотре́нїе твоѐ ст҃о́е сла́вѧще: є҆́же є҆ди́нъ за млⷭ҇рдїе млⷭ҇ти и҆спо́лнивъ, созда́нїе твоѐ сп҃слъ є҆сѝ.

Въ лани́тꙋ ᲂу҆да́ренъ бы́въ за ро́дъ человѣ́ческїй, и҆ не разгнѣ́валсѧ є҆сѝ: свободѝ и҆з̾ и҆стлѣ́нїѧ живо́тъ на́шъ гдⷭ҇и, и҆ поми́лꙋй на́съ ꙗ҆́кѡ чл҃вѣколю́бецъ.

Сла́ва, и҆ ны́нѣ, крⷭ҇тобг҃оро́диченъ: Же́злъ си́лы стѧжа́вшїи крⷭ҇тъ сн҃а твоегѡ̀ бцⷣе, тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.

Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, [є҆гѡ́же краегране́сїе си́це: Похвала̀ вѣ̑рнымъ крⷭ҇тъ є҆́сть, и҆ сла́ва. Творе́нїе і҆ѡ́сифово.] Гла́съ г҃.

Пѣ́снь а҃

І҆рмо́съ: Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ, и҆ бг҃оꙋго́днѡ пою́щымъ: пои́мъ гдⷭ҇еви, сла́внѡ бо просла́висѧ.

Во́лны морскі̑ѧ жезло́мъ ѡ҆гꙋсти́въ, и҆ прове́лъ є҆сѝ лю́ди, проѡбразꙋ́ѧ крⷭ҇тъ тво́й, и҆́мже ссѣ́клъ є҆сѝ во́дꙋ ле́стнꙋю, и҆ къ землѝ ще́дре, бг҃оразꙋ́мїѧ сп҃слъ є҆сѝ всѣ́хъ, вѣ́рою пою́щихъ твою̀ си́лꙋ.

Бе́зднꙋ сотвори́вый повелѣ́нїемъ, и҆́же вода́ми превы́спрєннѧѧ си́льнѣ покрыва́ѧй, и҆ и҆́же на вода́хъ зе́млю повѣ́сивый, ви́сиши на дре́вѣ, и҆ коле́блеши всю̀ тва́рь ма́нїемъ: всѣ́хъ же сердца̀ ᲂу҆твержда́еши въ стра́сѣ твое́мъ.

Мч҃нченъ: Сы́нове прича́стїемъ быва́ете бж҃е́ственнїи мч҃нцы хрⷭ҇тѡ́вы, и҆ жи́телїе вы́шнагѡ сїѡ́на и҆ наслѣ̑дницы, въ не́мже и҆ вѣнцы̀ носѧ́ще взыва́ете свѣ́тлѡ: пои́мъ гдⷭ҇еви, сла́внѡ бо просла́висѧ.

Мч҃нченъ: Рꙋ́къ ѿсѣчє́нїѧ и҆ но́гъ под̾ѧ́сте мч҃нцы, и҆ стрꙋ́жеми лю́тѣ, и҆ ѻ҆гню̀ примѣша́ющесѧ, не ѿверго́стесѧ ѿню́дъ хрⷭ҇та̀ бг҃а сꙋ́ща всѣ́хъ, но те́плѣ вопїѧ́сте: пои́мъ гдⷭ҇еви, сла́внѡ бо просла́висѧ.

Бг҃оро́диченъ: Предо́браѧ и҆ дв҃о влⷣчце, є҆го́же родила̀ є҆сѝ сн҃а, зрѧ́щи на дре́вѣ воздви́жена во́лею, пла́чꙋщи восклица́ла є҆сѝ, вопїю́щи болѣ́зненнѡ: бж҃е всѣ́хъ бл҃гоꙋтро́бне, гдⷭ҇ь сы́й сла́вы, ка́кѡ сїѧ̑ стра́ждеши влⷣко;

Дрꙋгі́й канѡ́нъ прест҃ѣ́й бцⷣѣ, гла́съ г҃.

Пѣ́снь а҃

І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.

Ѡ҆чище́нїе мѝ пода́ждь прегрѣше́нїй, бж҃е́ственными твои́ми мольба́ми дв҃о: си́льнꙋ бо и҆́маши мл҃твꙋ пречⷭ҇таѧ, и҆ тебѐ чтꙋ́щыѧ и҆збавлѧ́еши ѿ согрѣше́нїй, и҆ страсте́й, и҆ скорбе́й, и҆ ѡ҆бстоѧ́нїй.

Вода́ми мл҃твъ твои́хъ дв҃о, и҆ста́ѧвшꙋю зно́емъ безмѣ́рныхъ мои́хъ согрѣше́нїй и҆ страсте́й, ѡ҆росѝ дꙋ́шꙋ мою̀ смире́ннꙋю: ꙗ҆́кѡ да прохлажде́нїе бж҃е́ственно ᲂу҆лꙋчи́въ, пѣ́сньми тѧ̀ велича́ю, ꙗ҆́кѡ предста́тельницꙋ те́плꙋю.

Всего̀ погрꙋжа́ема грѣхмѝ и҆ всего̀ ѿча́ѧнна мѧ̀ сꙋ́ща, ты̀ чⷭ҇таѧ влⷣчце, млⷭ҇рдїѧ твоегѡ̀ рꙋ́кꙋ просте́рши, къ покаѧ́нїѧ мѧ̀ высотѣ̀ привлецы̀, подаю́щи мѝ и҆сто́чникъ сле́зъ.

Раздерѝ пречⷭ҇таѧ, грѣхо́вное рꙋкописа́нїе мои́хъ прегрѣше́нїй твои́ми мл҃твами, ꙗ҆́кѡ и҆мꙋ́щи къ сн҃ꙋ твоемꙋ̀ дерзнове́нїе за ны̀ моли́ти прилѣ́жнѡ: тѧ́ бо є҆ди́нꙋ и҆́мамы хрⷭ҇тїа́не застꙋ́пницꙋ.

Пѣ́снь г҃

І҆рмо́съ: Оу҆твержде́нїе на тѧ̀ надѣ́ющихсѧ, ᲂу҆твердѝ гдⷭ҇и цр҃ковь, и҆́же стѧжа́лъ є҆сѝ честно́ю твое́ю кро́вїю.

Є҆ди́нъ сложе́нъ носѧ̀ соста́въ сло́ве, претерпѣ́лъ є҆сѝ распѧ́тїе безче́стнѣйшее: чтꙋ́щыѧ тѧ̀ че́сти сподо́би сꙋ́щїѧ.

Разрѣше́ни бы́ша земноро́днїи ѿ клѧ́твы, клѧ́твѣ тебѣ̀ влⷣко бы́вшꙋ, и҆ крⷭ҇то́мъ бл҃гослове́нїе и҆сточи́вшемꙋ.

Мч҃нченъ: Прише́льцы во всю̀ зе́млю бы́вше, и҆ нбⷭ҇нїи вои́стиннꙋ гра́ждане ꙗ҆ви́стесѧ, и҆ хрⷭ҇тꙋ̀ снаслѣ́дницы всехва́льнїи.

Мч҃нченъ: Крѣпча́йшее ѻ҆рꙋ́жїе, крⷭ҇тъ стѧжа́вше мч҃нцы, всю̀ си́лꙋ гꙋби́телѧ врага̀ до конца̀ побѣди́ша.

Бг҃оро́диченъ: Ты̀ соблюла́сѧ є҆сѝ и҆ по ржⷭ҇твѣ̀ дв҃а, ꙗ҆́же бг҃а чⷭ҇таѧ ро́ждши воплоще́на, на крⷭ҇тѣ̀ пригво́ждшасѧ хотѣ́нїемъ.

И҆́нъ

І҆рмо́съ: И҆́же ѿ не сꙋ́щихъ всѧ̑ приведы́й сло́вомъ созида́ємаѧ, соверша́ємаѧ дх҃омъ вседержи́телю вы́шнїй, въ любвѝ твое́й ᲂу҆твердѝ менѐ.

Благоꙋтрѡ́бїѧ млⷭ҇рдїѧ твоегѡ̀, молю́сѧ, ѿве́рзи мѝ вско́рѣ бцⷣе пречⷭ҇таѧ, и҆ те́плаѧ мнѣ̀ ꙗ҆ви́сѧ во и҆скꙋше́нїихъ помо́щница, и҆ сп҃се́нїе.

И҆зба́ви мѧ̀ ѿ всѧ́кїѧ содержа́щїѧ лю́тыѧ грѣхо́вныѧ бꙋ́ри, раба̀ твоего̀ пречⷭ҇таѧ, и҆ ко сп҃си́тельномꙋ мѧ̀ приста́нищꙋ напра́ви, мл҃твами твои́ми.

Сп҃си́ мѧ мт҃и дв҃о чⷭ҇таѧ, ѿ страсте́й мои́хъ мꙋ́тныхъ слїѧ́нїй, и҆ ѡ҆бходѧ́щихъ ны́нѣ смире́ннꙋю мою̀ дꙋ́шꙋ, и҆ ѡ҆скорблѧ́ющихъ.

Сле́зъ тꙋ́чꙋ пода́ждь мѝ бл҃га́ѧ, и҆ си́ми ᲂу҆гасѝ страсте́й мои́хъ пе́щь, и҆ всѧ́кїѧ ѡ҆мы́й дꙋшє́вныѧ моѧ̑ сквє́рны бцⷣе.

Пѣ́снь д҃

І҆рмо́съ: Покры́ла є҆́сть нб҃са̀ добродѣ́тель твоѧ̀ хрⷭ҇тѐ, и҆з̾ кївѡ́та бо проше́дъ ст҃ы́ни твоеѧ̀ нетлѣ́нныѧ мт҃ре: въ хра́мѣ сла́вы твоеѧ̀ ꙗ҆ви́лсѧ є҆сѝ ꙗ҆́кѡ млⷣнецъ рꙋконоси́мь, и҆ и҆спо́лнишасѧ всѧ̑ твоегѡ̀ хвале́нїѧ.

Паде́нїе а҆да́мово є҆ди́нъ воздви́глъ є҆сѝ хрⷭ҇тѐ, но́въ бы́въ а҆да́мъ, на крⷭ҇тѣ̀ рꙋ́цѣ пригвожде́й, тро́стїю же бїе́нъ хотѧ̀, и҆ ѻ҆́цта и҆ же́лчи вкꙋша́ѧ, превозноша́емый высото́ю црⷭ҇твїѧ твоегѡ̀.

Ꙗ҆́кѡ ѻ҆вча̀ на заколе́нїе тѧ̀ прⷪ҇ро́къ предзри́тъ, и҆ ꙗ҆́кѡ а҆́гнца сло́ве бж҃їй, не проти́вѧщасѧ ѿню́дъ, нижѐ вопїю́ща: и҆́бо хотѣ́нїемъ претерпѣ́лъ є҆сѝ распѧ́тисѧ, ꙗ҆́кѡ да и҆̀же во́лею согрѣши́вшыѧ и҆зба́виши, и҆ сп҃се́ши милосе́рде гдⷭ҇и.

Мч҃нченъ: Ѡ҆бно́вльше дꙋ́шы ра́ломъ вѣ́ры, мч҃нцы хрⷭ҇тѡ́вы, сѣ́мѧ терпѣ́нїемъ мꙋ́къ всѣ́ѧша, и҆ кла́съ мꙋче́нїѧ гобзꙋ́ющїй ѡ҆б̾ѧ́ша, вѣ́рныхъ составлє́нїѧ пита́ющъ. тѣ́мже при́снѡ сла́вими сꙋ́ть.

Мч҃нченъ: Оу҆тѣснѧ́еми стꙋже́нїемъ нестерпи́мыхъ лю̑тъ, ча́ѧнїемъ кра́сныхъ, къ простра́нствꙋ вы́шнѧгѡ црⷭ҇твїѧ ꙗ҆́вѣ мч҃нцы достиго́ша, ꙗ҆́кѡ да разширѧ́тъ на́ша ᲂу҆ста̀, тѣ́хъ непреста́ннѡ пѣ́ти борє́нїѧ.

Бг҃оро́диченъ: Ꙗ҆́же ᲂу҆́гль бж҃е́ственный прїе́мши, ꙗ҆́коже клеща̀, не ѡ҆палѧ́ющь ѿню́дъ, ѡ҆роша́ющъ же па́че, мт҃и дв҃о, безсѣ́меннꙋю и҆ бж҃е́ственнꙋю ᲂу҆тро́бꙋ твою̀: є҆го́же ви́дѧщи пло́тїю повѣ́шена во́лею на дре́вѣ, пѣ́сньми сла́влѧше.

И҆́нъ

І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.

Всю̀ на тѧ̀ наде́ждꙋ возложи́хъ влⷣчце, молю́сѧ припа́даѧ ѿ дꙋшѝ: смертоно́сныѧ и҆зба́ви болѣ́зни, къ жи́зни сп҃се́нїѧ возводѧ́щи мѧ̀, ꙗ҆́же жи́знь ро́ждшаѧ.

Влⷣчце чⷭ҇таѧ, крѣ́пкаѧ мі́рꙋ помо́щница, не ѿве́ржи менѐ ѿ себѐ, нижѐ посра́млена ѿсле́ши мѧ̀ ѿ лица̀ твоегѡ̀, нижѐ бѣсѡ́мъ покажи́ мѧ ѡ҆бра́дованїе.

Ве́сь ѡ҆бнаже́нъ бы́хъ ѻ҆каѧ́нный бж҃е́ственныхъ дѣ́лъ, и҆ ᲂу҆ѧзви́хсѧ сласте́й ѻ҆́стрыми стрѣла́ми, и҆ ѡ҆стрꙋпле́нъ бы́хъ. тѣ́мже вопїю́ ти влⷣчце: сп҃си́ мѧ пречⷭ҇таѧ.

Прїидо́ша чⷭ҇таѧ, безмѣ́стныхъ дѣѧ́нїй во́ды до ѻ҆каѧ́нныѧ моеѧ̀ дꙋшѝ, и҆ по́мыслы бре́нными ѡ҆держи́мь, вопїю́ ти съ болѣ́знїю: не пре́зри влⷣчце раба̀ твоегѡ̀.

Пѣ́снь є҃

І҆рмо́съ: Ꙗ҆́кѡ ви́дѣ и҆са́їа ѡ҆бра́знѡ на престо́лѣ превознесе́на бг҃а, ѿ а҆́гг҃лъ сла́вы дорѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.

Оу҆поко́илъ мѧ̀ є҆сѝ сло́ве, претрꙋжде́наго трꙋдо́мъ прегрѣше́нїй, препочива́ѧ на дре́вѣ влⷣко, и҆ взѧ́тъ поноше́нїе моѐ, и҆́миже пострада́лъ є҆сѝ і҆и҃се поноше́ньми. пою̀ твою̀ держа́вꙋ и҆ бж҃е́ствєннаѧ страда̑нїѧ.

Возже́гъ ꙗ҆́коже свѣ́щникъ на крⷭ҇тѣ̀ пло́ть твою̀, и҆ поиска́лъ є҆сѝ поги́бшꙋю дра́хмꙋ человѣколю́бче, и҆ всѧ̑ призыва́еши дрꙋ́ги твоѧ̑ си̑лы, на сеѧ̀ ѡ҆брѣ́тенїе: пое́мъ держа́вꙋ хрⷭ҇тѐ, црⷭ҇твїѧ твоегѡ̀.

Мч҃нченъ: Пове́рженъ льсте́цъ, при нога́хъ нельсти́выхъ стрⷭ҇тоте́рпєцъ хрⷭ҇то́выхъ, ме́ртвъ зри́мь є҆́сть и҆ недѣ́йственъ: са́ми же нельсти́внѡ сопричита́еми сꙋ́ть со а҆́гг҃лы, неизрече́нныѧ ра́дости и҆сполнѧ́ющесѧ.

Мч҃нченъ: Ст҃і́и стꙋ́денїю, и҆ лю́тыми мꙋ́ками и҆ скорбьмѝ, и҆ ра́нами вельмѝ померза́еми, къ теплотѣ̀ преидо́ша бж҃е́ственнѣй нбⷭ҇нагѡ црⷭ҇твїѧ вои́стиннꙋ, и҆ те́плїи предста́тели вѣ̑рнымъ при́снѡ ꙗ҆влѧ́ютсѧ.

Бг҃оро́диченъ: Распина́ема на дре́вѣ, и҆ ре́бра копїе́мъ и҆скопова́ема, ѿ ре́бръ дре́вле созда́вшаго є҆́ѵꙋ, пречⷭ҇таѧ дв҃о зрѧ́щи, вопїѧ́ше мт҃рски: ка́кѡ ᲂу҆мира́еши сн҃е мо́й животѐ безсме́ртный;

И҆́нъ. І҆рмо́съ то́йже.

Вїногра́де бж҃е́ственный, и҆́же кра́сный гро́здъ прозѧ́бшаѧ, и҆ дꙋша́мъ подаю́щъ питїѐ бж҃е́ственное дв҃о, напое́нїѧ го́рькагѡ, и҆ пїѧ́нства страсте́й, и҆ сласте́й и҆зба́ви дꙋ́шꙋ мою̀, и҆ ѻ҆гнѧ̀ вѣ́чнагѡ.

Тимѣ́нїѧ и҆сто́ргни мѧ̀ грѣхѡ́въ, пречⷭ҇таѧ бг҃оневѣ́сто, па́дшаго въ ка́лъ страсте́й: и҆ стрꙋѧ́ми мл҃твъ твои́хъ ѡ҆мы́вши мѧ̀ страсте́й скве́рнъ, ри́зою сп҃се́нїѧ свѣтови́дною ѡ҆дежѝ.

Ꙗ҆́же мі́рови ми́ръ, и҆ сп҃се́нїе всѣ̑мъ пода́вшаѧ, ꙗ҆́кѡ бж҃е́ственный ми́ръ поро́ждши дв҃о чⷭ҇таѧ, настоѧ́щꙋю бра́нь страсте́й дꙋшѝ моеѧ̀ и҆ тѣ́ла ᲂу҆мирѝ, стра́хомъ и҆ любо́вїю сп҃са хрⷭ҇та̀.

Болѣ́вшꙋю дꙋ́шꙋ мою̀ грѣхмѝ пречⷭ҇таѧ, и҆сцѣлѝ твои́мъ млⷭ҇рдїемъ, и҆ сподо́би наставлѧ́ющи мѧ̀ твори́ти во смире́нїи сн҃а твоегѡ̀ повелѣ̑нїѧ при́снѡ, ꙗ҆́кѡ да воспрїимꙋ̀ сегѡ̀ бла́гость.

Пѣ́снь ѕ҃

І҆рмо́съ: Возопѝ къ тебѣ̀, ви́дѣвъ ста́рецъ ѻ҆чи́ма сп҃се́нїе, є҆́же лю́демъ прїи́де ѿ бг҃а: хрⷭ҇тѐ, ты̀ бг҃ъ мо́й.

Во́лею закла́лсѧ є҆сѝ ꙗ҆́кѡ а҆́гнецъ, снѣ́дїю дре́ва ᲂу҆ме́ршаго во́лею, па́ки къ жи́зни хрⷭ҇тѐ возводѧ̀.

На крⷭ҇тъ воздви́глсѧ є҆сѝ, и҆ низпаде́сѧ бѣсо́вскаѧ пре́лесть: вознесе́сѧ же вѣ́рныхъ мно́жество, воспѣва́юще тѧ̀ живода́вче.

Мч҃нченъ: Багрѧни́цею ꙗ҆́же ѿ крове́й и҆спещре́ни мч҃нцы, цр҃ю̀ всѣ́хъ ны́нѣ предстоѧ́тъ, вѣнцы̀ свѣ́тлыми ᲂу҆краша́еми.

Мч҃нченъ: И҆сцѣле́нїе всѣ̑мъ пристꙋпа́ющымъ и҆сточа́ютъ мо́щи ст҃ы́хъ мч҃нкъ, и҆ страсте́й мно́жество потоплѧ́ютъ.

Бг҃оро́диченъ: Разꙋмѣ́ти не мо́жетъ ᲂу҆́мъ человѣ́ческїй ѻ҆трокови́це, па́че є҆стества̀ рождества̀ твоегѡ̀ та́йнꙋ: па́че бо ᲂу҆ма̀ бг҃а родила̀ є҆сѝ.

И҆́нъ

І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю сп҃сѝ.

И҆збавле́нїе прегрѣше́нїй пода́ждь ꙗ҆́кѡ бл҃га́ѧ, твоемꙋ̀ рабꙋ̀ пречⷭ҇таѧ, твоегѡ̀ застꙋпле́нїѧ просѧ́щемꙋ съ вѣ́рою, и҆ бꙋ́дꙋщагѡ мѧ̀ сꙋда̀ и҆схитѝ.

Влⷣчце и҆ мт҃и и҆зба́вителѧ, ты̀ предста́ни мѝ въ ча́съ и҆схо́да моегѡ̀, и҆стѧза́емꙋ мнѣ̀ ѿ воздꙋ́шныхъ дꙋхѡ́въ, ѡ҆ ꙗ҆̀же несмы́сленною мы́слїю содѣ́ѧхъ.

Ѡ҆каѧ́ненъ ꙗ҆ви́хсѧ ве́сь а҆́зъ, нечистота́ми всегда̀ ѡ҆б̾ѧ́тъ: и҆ прозрѧ̀ ны́нѣ созадѝ ногꙋ̀ мое́ю сме́рть, взыва́ю тѝ бцⷣе, помози́ ми.

Во́лны стра́стныхъ помышле́нїй, всегда̀ мѧ̀ смꙋща́ютъ пречⷭ҇таѧ, и҆ лꙋка́выхъ дꙋхѡ́въ бꙋ́рѧ погрꙋжа́етъ мѧ̀: но ᲂу҆твердѝ на ка́мени безстра́стїѧ.

Пѣ́снь з҃

І҆рмо́съ: Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, благоче́стнѡ пою́ще: бл҃гослове́нъ бг҃ъ ѻ҆тє́цъ на́шихъ.

На ке́дрѣ возне́слсѧ є҆сѝ, и҆ пе́ѵкѣ, и҆ кѷпарі́сѣ влⷣко, ѿ трⷪ҇цы є҆ди́нъ сы́й, и҆ возне́слъ є҆сѝ сꙋ́щыѧ бо глꙋбинꙋ̀ мно́гихъ сласте́й впа́дшыѧ: бл҃гослове́нъ бг҃ъ ѻ҆тє́цъ на́шихъ.

Кро́вїю чⷭ҇тно́ю гдⷭ҇и, тва́рь ѡ҆чи́стилъ є҆сѝ ѿ кро́ве, приноси́мыѧ ме́рзкимъ бѣсѡ́мъ, и҆ разрꙋши́лъ є҆сѝ жє́ртвы сквє́рныѧ сло́ве бж҃їй, поже́рсѧ ꙗ҆́кѡ неѕло́бивъ а҆́гнецъ: сла́ва держа́вѣ твое́й.

Мч҃нченъ: Стоѧ́хꙋ пред̾ мꙋчи́тели, ꙗ҆́кѡ столпѝ неподви́жимїи, поколеба́юще пре́лесть, и҆ ᲂу҆твержда́юще вѣ́рныхъ сердца̀, страда́льцы пою́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Мч҃нченъ: Не ѡ҆пали́стесѧ ѻ҆гне́мъ, ѻ҆гнѧ̀ теплѣ́йшее произволе́нїе стѧжа́вше, стрⷭ҇тоте́рпцы хрⷭ҇тѡ́вы вѣнцено́сцы, вопїѧ́ше: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Бг҃оро́диченъ: Зача́тїе несравне́но, и҆ ржⷭ҇тво̀ несказа́нно и҆мѣ́ла є҆сѝ чⷭ҇таѧ є҆ди́на, влⷣкꙋ вопло́щши пло́тїю распе́ншагосѧ, є҆мꙋ́же пою́ще вопїе́мъ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

И҆́нъ

І҆рмо́съ: Ꙗ҆́коже дре́вле бл҃гочєсти́выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ и҆ на́съ ѡ҆зарѝ: бл҃гослове́нъ є҆сѝ, взыва́ющыѧ, бж҃е ѻ҆тє́цъ на́шихъ.

Тебѐ мт҃ри бж҃їи, чⷭ҇тѣй и҆ непоро́чнѣй молю́сѧ, ѡ҆скверне́нный тѣ́ломъ и҆ дꙋше́ю, и҆ ѡ҆калѧ́нный дѣѧ́нїи нечи́стыми, и҆ надѣ́юсѧ влⷣчце, на млⷭ҇ть твою̀, ты́ мѧ ᲂу҆ще́дри, пречⷭ҇таѧ.

Прегрѣше́нїй мои́хъ мно́жество, и҆ ѕлы́хъ и҆спыта́нїе, недоꙋмѣ́нїемъ мѧ̀ препира́етъ ѕѣлѡ̀, и҆ во ѿча́ѧнїѧ влече́тъ глꙋбинꙋ̀: пречⷭ҇таѧ влⷣчце, сп҃си́ мѧ погиба́ющаго, и҆ лю́тѣ потоплѧ́ема.

Поми́лꙋй бл҃га́ѧ смири́вшꙋюсѧ дꙋ́шꙋ мою̀ лꙋка́выми дѣѧ́ньми, и҆ къ покаѧ́нїѧ мѧ̀ пꙋтѝ наста́ви, и҆ твори́ти хотѣ̑нїѧ твоегѡ̀ сн҃а и҆спра́ви, и҆ ѿ мꙋ́ки и҆зба́ви.

Мно́жествомъ щедро́тъ твоеѧ̀ бл҃гости, грѣхѡ́въ на́шихъ мно́жество пре́зри бл҃га́ѧ, и҆ благопремѣни́тельна бꙋ́ди, немо́лчнѡ зовꙋ́щымъ: бл҃гослове́нъ, пречⷭ҇таѧ, пло́дъ твоегѡ̀ чре́ва.

Пѣ́снь и҃

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.

Лю́дїе непокори́вїи и҆ неразꙋ́мнїи, тѧ̀ нра́вомъ благопоко́рнымъ восхотѣ́вша распѧ́тисѧ, ѡ҆сꙋжда́ютъ ᲂу҆мре́ти: ꙗ҆́кѡ да хотѣ́нїемъ ᲂу҆мерщвлє́нныѧ сло́ве, ѡ҆живи́ши, пою́щыѧ тѧ̀ и҆ превозносѧ́щыѧ во вѣ́ки.

Распросте́ръ на крⷭ҇тѣ̀ дла̑ни, рꙋ́цѣ неꙋдержа́ннѡ простє́ртыѧ ко дре́вꙋ снѣ́дномꙋ первозда́ннагѡ и҆сцѣлѧ́ѧ влⷣко: и҆ зрѧ́щи тѧ̀ стра́хомъ со́лнце, лꙋчы̀ скрыва́ше, и҆ всѧ̀ тва́рь поколеба́сѧ.

Мч҃нченъ: Лꙋча́ми сщ҃е́нныхъ боре́нїй стрꙋи̑ нече́стїѧ, и҆злїѧ̑нїѧ безбо́жїѧ и҆зсꙋши́ша стрⷭ҇тоте́рпцы, и҆ и҆сто́чники и҆сточи́ша и҆сцѣле́нїй, скве́рнꙋ страсте́й ѡ҆мыва́ющыѧ, и҆ вѣ́рныхъ сердца̀ напаѧ́ющыѧ бога́тнѡ.

Мч҃нченъ: Соѡбра́знѡ честны́хъ стрⷭ҇те́й, и҆ бж҃е́ственныхъ за́повѣдей и҆сполни́телїе стрⷭ҇тоте́рпцы, согра́ждане безплѡ́тнымъ: написа́тисѧ ны́нѣ въ вы́шнѣмъ гра́дѣ, бг҃а моли́те, ва́съ чтꙋ́щымъ во всѧ̑ вѣ́ки.

Бг҃оро́диченъ: Рꙋ́чкꙋ тѧ̀ златꙋ́ю и҆ свѣ́щникъ, трапе́зꙋ и҆ же́злъ, бж҃е́ственнꙋю го́рꙋ и҆ ѻ҆́блакъ, пала́тꙋ цр҃е́вꙋ и҆ прⷭ҇то́лъ ѻ҆гнеѡбра́зенъ, бцⷣꙋ всѝ вѣ́рнїи и҆менꙋ́емъ, по ржⷭ҇твѣ̀ дв҃ою сохра́ншꙋюсѧ.

И҆́нъ

І҆рмо́съ: Въ пла́мень ко ѻ҆трокѡ́мъ є҆вре́йскимъ снизше́дшаго, бж҃їею си́лою, и҆ ꙗ҆́вльшагосѧ гдⷭ҇а, сщ҃е́нницы бл҃гослови́те, и҆ превозноси́те во всѧ̑ вѣ́ки.

Сласте́й го́ресть, чꙋ̑вства всѧ̑ тѣлє́снаѧ проше́дши, дꙋ́шꙋ мою̀ безмѣ́стнѡ ѡ҆калѧ́етъ, и҆ въ сме́рть влече́тъ: влⷣчце мі́ра, бꙋ́ди мѝ сп҃се́нїе.

На тѧ̀ возложи́хъ влⷣчце, се́рдце, и҆ дꙋ́шꙋ, и҆ тѣ́ло: не и҆́мамъ бо и҆ны́ѧ наде́жди, ра́звѣ тебѐ, є҆́юже полꙋчꙋ̀ млⷭ҇ть. тѣ́мже пода́ждь мѝ бога́тꙋю твою̀ бл҃года́ть.

Ѕмі́й мнѣ̀ ꙗ҆́домъ приползѐ, и҆ плотско́ю сла́достїю ѻ҆каѧ́ннꙋю дꙋ́шꙋ мою̀ лю́тѣ ᲂу҆морѝ: но ѡ҆живѝ сїю̀ сопроти́вными лѣчьба́ми, чⷭ҇таѧ, твои́ми мл҃твами.

Лю́таѧ мѧ̀ но́щь покрыва́етъ прегрѣше́нїй, ст҃а́ѧ влⷣчце: не и҆́мамъ бо свѣщѝ, дꙋ́шꙋ просвѣща́ющїѧ благодѣѧ́нїѧ є҆ле́емъ. тѣ́мже и҆з̾ черто́га и҆зринꙋ́хсѧ вы́шнѧгѡ.

Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:

Пѣ́снь ѳ҃

І҆рмо́съ: Въ зако́нѣ сѣ́ни и҆ писа́нїй ѡ҆́бразъ ви́димъ вѣ́рнїи: всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ: тѣ́мъ перворожде́нное сло́во, ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.

На крⷭ҇тѣ̀ пригво́ждсѧ і҆и҃се, и҆́же ѡ҆снова́вый на ниче́мже всю̀ зе́млю, ᲂу҆глѣ́бшаго мѧ̀ въ ка́лѣ грѣхо́внѣмъ нра́вомъ лꙋка́вымъ, ꙗ҆́кѡ бл҃гъ ᲂу҆ще́дривъ хрⷭ҇тѐ, и҆ и҆звле́къ, и҆ безче́стною твое́ю сме́ртїю почти́лъ є҆сѝ, многомлⷭ҇тиве.

Ви́дѣнъ бы́лъ є҆сѝ бг҃ъ неви́димый є҆стество́мъ, пло́тїю возвыша́емъ, ꙗ҆́кѡ да ѿ врагѡ́въ неви́димыхъ и҆зба́виши мі́ръ ви́димый, и҆ сꙋ́щыѧ ни́зꙋ, небе́сны сотвори́ши хрⷭ҇тѐ, славосло́вѧщыѧ держа́вꙋ вели́кїѧ вла́сти твоеѧ̀.

Мч҃нченъ: Во́инство сщ҃е́нное, ст҃ы̑мъ а҆́гг҃лѡмъ подо́бнѡ и҆збра́нное, ра́й, посредѣ̀ и҆мы́й живо́тное дре́во, хрⷭ҇та̀, бг҃окра́сныѧ цр҃кве сосло́вїе честно́е, всесла́внїи стрⷭ҇тоте́рпцы сп҃сѡвы ꙗ҆ви́стесѧ.

Мч҃нченъ: На́съ на землѝ ва́съ помина́ющихъ, помина́йте ст҃і́и престо́лꙋ влⷣчнемꙋ предстоѧ́ще ра́достнѡ: и҆ ꙗ҆̀же ѿѻнꙋ́дꙋ зарѧ́ми бога́тнѡ сщ҃е́ннїи просвѣща́йте ны̀, ꙗ҆́кѡ да долгѡ́въ разрѣше́нїе прїи́мемъ.

Бг҃оро́диченъ: Свѣти̑ла, твоѐ зрѧ́ще сн҃е мо́й распѧ́тїе, заидо́ста: и҆ ка́кѡ є҆вре́йскїй со́нмъ не за́йде невѣ́рный, преда́въ тѧ̀ на сме́рть нача́льника жи́зни; бцⷣа вопїѧ́ше. ю҆́же непреста́ннѡ велича́емъ.

И҆́нъ

І҆рмо́съ: Тебѐ неѡпали́мꙋю кꙋпинꙋ̀, и҆ ст҃ꙋ́ю дв҃ꙋ, мт҃рь свѣ́та, и҆ бцⷣꙋ, наде́ждꙋ всѣ́хъ на́съ, велича́емъ.

Скве́рнꙋ стра́стныхъ помышле́нїй моегѡ̀ ᲂу҆ма̀ ѡ҆чи́стивши чⷭ҇таѧ, безстра́стїѧ свѣ́тлою ри́зою ѡ҆дежи́ мѧ.

Ѿве́рзи мѝ бж҃е́ствєнныѧ вхо́ды покаѧ́нїѧ дв҃о, вхо́ды страсте́й и҆ сласте́й мои́хъ загражда́ющи, и҆ возбранѧ́ющи си́лою твое́ю.

Оу҆слы́ши гла́съ стена́нїѧ моегѡ̀, и҆ гла́съ пла́ча моегѡ̀, дв҃о всенепоро́чнаѧ, и҆ пода́ждь ѡ҆чище́нїе и҆ сп҃се́нїе ѻ҆каѧ́ннѣй мое́й дꙋшѝ.

Ве́сь ѿча́ѧхсѧ ѻ҆каѧ́нный, и҆ недоꙋмѣ́юсѧ, помышлѧ́ѧ лꙋка̑ваѧ моѧ̑ дѣѧ̑нїѧ: тꙋ́не ᲂу҆ще́дри влⷣчце. и҆ сп҃си́ мѧ.

Та́же, Досто́йно є҆́сть: є҆ктенїа̀, и҆ свѣти́ленъ.

На стїхо́внѣ стїхи̑ры крⷭ҇тны, гла́съ г҃:

Дре́во преслꙋша́нїѧ мі́рови сме́рть прозѧбѐ, дре́во же крⷭ҇тное живо́тъ и҆ нетлѣ́нїе. тѣ́мже тебѐ мо́лимъ распе́ншагосѧ гдⷭ҇а: да зна́менаетсѧ на на́съ свѣ́тъ лица̀ твоегѡ̀.

Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑ и҆ на дѣла̀ твоѧ̑, и҆ наста́ви сы́ны и҆́хъ.

За́вистїю ѿ пи́щи и҆згна́нъ бы́хъ, паде́нїемъ падо́хсѧ лю́тымъ: но не презрѣ́въ влⷣко, и҆ воспрїе́мъ менѐ ра́ди є҆́же по мнѣ̀ распѧ́тїе твоѐ, и҆ сп҃са́еши мѧ̀, и҆ въ сла́вꙋ вво́диши, и҆зба́вителю мо́й, сла́ва тебѣ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.

Ст҃ы́хъ страстоте́рпєцъ па́мѧть, прїиди́те лю́дїе всѝ почти́мъ: ꙗ҆́кѡ позо́ръ бы́вше а҆́гг҃лѡмъ и҆ человѣ́кѡмъ, побѣ́ды вѣнцы̀ ѿ хрⷭ҇та̀ прїѧ́ша, и҆ мо́лѧтсѧ ѡ҆ дꙋша́хъ на́шихъ.

Сла́ва, и҆ ны́нѣ, крⷭ҇тобг҃оро́диченъ: Зрѧ́щи и҆з̾ тебѐ рожде́ннаго всенепоро́чнаѧ, повѣ́шена на дре́вѣ, восклица́ше вопїю́щи: сла́дкое моѐ ча́до, гдѣ̀ твоѧ̀ за́йде добро́та свѣтоно́снаѧ, добро̀ сотвори́вшагѡ ро́дꙋ человѣ́ческомꙋ;

Та́же, Бл҃го є҆́сть: Трист҃о́е. По Ѻ҆́ч҃е на́шъ, тропа́рь, є҆ктенїа̀, и҆ ча́съ а҃-й, и҆ ѿпꙋ́стъ.

Въ пѧто́къ бл҃жє́нны, гла́съ г҃:

Ѿве́ргша хрⷭ҇тѐ за́повѣдь твою̀, пра́ѻтца а҆да́ма и҆з̾ раѧ̀ и҆згна́лъ є҆сѝ: разбо́йника же ще́дре, и҆сповѣ́даша тѧ̀ на крⷭ҇тѣ̀, во́нь всели́лъ є҆сѝ, зовꙋ́ща: помѧни́ мѧ сп҃се во црⷭ҇твїи твое́мъ.

Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

Зрѧ́щи тѧ̀ на крⷭ҇тѣ̀ сл҃нца незаходи́маго, помрачѝ свѣ́тъ со́лнце: ка́менїе распаде́сѧ влⷣко, землѧ̀ поколеба́сѧ всѧ̀, завѣ́са же цр҃ко́внаѧ раздра́сѧ посредѣ̀, непра́веднѡ стра́ждꙋща ви́дѧщи тѧ̀ сп҃се, всѣ́ми недомы́слимаго.

Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.

За всѣ́хъ і҆и҃се веде́нъ бы́лъ є҆сѝ на сме́рть, живы́хъ животѐ: ꙗ҆́кѡ да бж҃е́ственными твои́ми страстьмѝ, ꙗ҆̀же дре́внею снѣ́дїю ᲂу҆мерщвлє́ныѧ сп҃се́ши ꙗ҆́кѡ бг҃ъ, и҆ раѧ̀ пока́жеши жи́тели. тѣ́мже вѣ́рою твоѧ̑ стрⷭ҇ти ны́нѣ сла́вимъ.

Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Пострада́вшаго во́лею на́съ ра́ди, и҆ поношє́нїѧ ѿе́мшагѡ человѣ́кѡвъ, стрⷭ҇те́мъ ᲂу҆подо́бльшесѧ мч҃нцы, мно́гихъ ра́ди мꙋ́къ низложи́сте врага̀, и҆ вы́шнюю сла́вꙋ полꙋчи́сте. тѣ́мже бг҃олѣ́пнѡ сла́вими є҆стѐ.

Сла́ва: Ѻ҆ц҃ꙋ̀, и҆ сн҃ꙋ, и҆ ᲂу҆тѣ́шительномꙋ дх҃ꙋ пра́вомꙋ, всѝ вѣ́рнїи поклони́мсѧ: є҆ди́но нача́ло, и҆ сла́вꙋ бг҃олѣ́пнѡ пою́ще, благоче́стнѡ правосла́внымъ ра́зꙋмомъ возопїи́мъ: помѧнѝ на́съ во црⷭ҇твїи твое́мъ.

И҆ ны́нѣ: Стрⷭ҇ти терпѧ́ща пло́тїю хотѣ́нїемъ, зрѧ́щи на крⷭ҇тѣ̀ своего̀ сн҃а всенепоро́чнаѧ, смꙋти́сѧ всѧ̀, и҆ пла́чꙋщи взыва́ше чⷭ҇таѧ: ᲂу҆вы̀ мнѣ̀ ча́до моѐ, ка́кѡ ᲂу҆мерщвле́нъ є҆сѝ, и҆́же ᲂу҆ме́ршыѧ лю́тѣ ѡ҆живи́ти хотѧ̀;