на Гдⷭ҇и воззва́хъ, стїхи̑ры покаѧ́нны, гла́съ є҃:
Подо́бенъ: Ра́дꙋйсѧ по́стникѡмъ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Пла́чꙋ и҆ сѣ́тꙋю го́рцѣ, смотрѧ́ѧ стра́шное сло́ва воздаѧ́нїе, ѿ дѣ́лъ не и҆мы́й ѿвѣ́та и҆ ма́ла проти́вꙋ винѣ̀, ѻ҆каѧ́нный. тѣ́мже молю́сѧ: пре́жде да́же не пости́гнетъ мѧ̀ конца̀ моегѡ̀ безмѣ́стное, пре́жде пожа́тїѧ сме́ртнагѡ, пре́жде сꙋда̀ стра́шнагѡ, пре́жде хотѧ́щꙋ мѝ ѡ҆сꙋжде́нїе прїѧ́ти, и҆дѣ́же ѻ҆́гнь негаси́мый, и҆ тьма̀ кромѣ́шнѧѧ, и҆дѣ́же че́рвь, и҆ скре́жетъ, и҆ снѣда́етъ согрѣши́вшыѧ, согрѣше́нїй мѝ да́рꙋй и҆збавле́нїе хрⷭ҇тѐ мо́й, и҆ ве́лїю млⷭ҇ть.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Зако́ны твоѧ̑ и҆ писа̑нїѧ презрѣ́въ, за́пѡвѣди твоѧ̑ ѿверго́хъ ѻ҆каѧ́нный бж҃е мо́й, содѣ́телю мо́й, ка́кѡ и҆збѣ́гнꙋ про́чее та́мошнѧгѡ сп҃се, мꙋче́нїѧ; тѣ́мже пре́жде конца̀ моегѡ̀ сп҃се, проще́нїе мѝ да́рꙋй, сле́зъ тꙋ́чꙋ, и҆́стинное ᲂу҆миле́нїе подаѧ̀, ꙗ҆́кѡ бг҃ъ пребл҃гі́й дале́че ѿ менѐ ѿгонѧ́ѧ полкѝ бѣсѡ́вскїѧ, и҆́щꙋщихъ низвестѝ мѧ̀ во а҆́довꙋ про́пасть. тѣ́мже молю́сѧ тѝ, да не рꙋ́кꙋ твою̀ ѿи́меши ѿ менѐ всемо́щнꙋю.
Сті́хъ: Ѿ стра́жи ᲂу҆́треннїѧ до но́щи, ѡ҆ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Оу҆вы̀ мнѣ̀! ка́кѡ ѡ҆мрачи́хсѧ ᲂу҆мо́мъ: ка́кѡ ᲂу҆дали́хсѧ ѿ тебѐ, и҆ рабо́тахъ ѻ҆каѧ́нный грѣхꙋ̀ и҆ сла́сти пло́тстѣй себѐ всего̀ стра́стный и҆зда́хъ, жи́вшей во мнѣ̀ стра́стнѣмъ; и҆ ны́нѣ ѡ҆жида́ю моегѡ̀ є҆́же ѿ житїѧ̀ и҆схо́да, и҆ хотѧ́щагѡ томле́нїѧ бы́ти: гдⷭ҇и пребл҃гі́й, пода́ждь мѝ сле́зное покаѧ́нїе, и҆ разрѣше́нїе безчи́сленныхъ прегрѣше́нїй мои́хъ. вѣ́рнѡ тѧ̀ молю̀, подаю́щаго мі́рови ве́лїю млⷭ҇ть.
И҆́ны стїхи̑ры безплѡ́тнымъ. Подо́бенъ: то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Таи́нницы бг҃онача́лїѧ честні́и, трисвѣ́тлагѡ и҆ є҆диносꙋ́щнагѡ бж҃ества̀, и҆̀же пѣ́снь непреста́ннѡ безпло́тными гла́сы и҆ ѧ҆зы́ки ѻ҆́гненными приносѧ́ще, на̑ша молє́нїѧ и҆ мл҃твы принеси́те, ꙗ҆̀же ѿ ᲂу҆сте́нъ скве́рныхъ возсыла́емъ, и҆ ѡ҆ставле́нїе прегрѣше́нїй и҆спроси́те: вѣ́сть бо не́мощь на́шꙋ ѡ҆болкі́йсѧ въ ню̀, и҆ млⷭ҇тивъ сы́й є҆стество́мъ, молє́нїѧ прїи́метъ ва̑ша ѡ҆ рабѣ́хъ согрѣши́вшихъ быва́ємаѧ, подаѧ́й мі́рови ве́лїю млⷭ҇ть.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Всѐ а҆́гг҃льское мно́жество є҆́же влⷣцѣ моемꙋ̀ приближа́ющеесѧ, и҆ тогѡ̀ бж҃е́ственномꙋ прⷭ҇то́лꙋ предстоѧ́щее со стра́хомъ, и҆ и҆сполнѧ́еми неизрече́ннымъ свѣ́томъ, менѐ во тьмѣ̀ грѣхо́внѣй заблꙋ́ждшаго наста́вите къ свѣ́тꙋ сп҃си́тельномꙋ, повелѣ́нїемъ бг҃а ще́драгѡ, тьмꙋ̀ ѿжени́те мра́чнꙋю и҆ чꙋждꙋ́ю кова́рныхъ бѣсѡ́въ, застꙋпле́нїемъ и҆ бл҃года́тїю ва́шею: не терпи́тъ бо свѣ́та прише́ствїю, но ѿгонѧ́етсѧ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
А҆́гг҃ли свѣ́тлїи бж҃їи, предстоѧ́ще прⷭ҇то́лꙋ бл҃года́ти бж҃е́ственномꙋ, смире́нїе сꙋ́щее и҆ просвѣще́нїе и҆́стинное ѿ свѣ́та бж҃е́ственнагѡ воспрїе́млюще, на́съ назира́йте съ нб҃съ чл҃вѣколю́бцы, въ бꙋ́ри лю́тыхъ держи́мыхъ, и҆ бѣ́дствꙋющихъ, и҆ во тьмѣ̀ спѧ́щихъ. прїиди́те ᲂу҆̀бо, ѽ а҆рха́гг҃ли! на́мъ въ по́мощь, и҆ сѣте́й и҆зба́вите на́съ ѕлонача́льнагѡ врага̀: къ ва́шемꙋ во кро́вꙋ прибѣга́емъ всѝ, прехва́льнїи.
Сла́ва, и҆ ны́нѣ, бг҃оро́диченъ: Прⷭ҇то́лъ херꙋві́мскїй вои́стиннꙋ, ꙗ҆́кѡ превы́шши а҆́гг҃лъ бы́вши, въ тѧ́ бо бж҃е́ственное сло́во всели́сѧ чⷭ҇таѧ, на́шъ ѡ҆́бразъ ѡ҆бнови́ти хотѧ̀: и҆з̾ тебѐ проше́дъ плотоно́сецъ ꙗ҆́кѡ млⷭ҇рдъ, крⷭ҇тъ и҆ стрⷭ҇ть на́съ ра́ди прїѧ́тъ, и҆ воскрⷭ҇нїе ꙗ҆́кѡ бг҃ъ дарова̀. тѣ́мже ꙗ҆́кѡ премѣни́вшꙋю на́съ ѡ҆сꙋжде́ннагѡ є҆стества̀, созда́телю вѣ́рою бл҃годарѧ́ще мо́лимсѧ, ᲂу҆лꙋчи́ти твои́ми мл҃твами прегрѣше́нїй проще́нїе, и҆ ве́лїю млⷭ҇ть.
Та́же, Свѣ́те ти́хїй: Прокі́менъ днѐ: и҆ Сподо́би гдⷭ҇и въ ве́черъ се́й:
На стїхо́внѣ стїхи̑ры покаѧ́нны, гла́съ є҃:
Гдⷭ҇и, согрѣша́ѧ не престаю̀, чл҃вѣколю́бїѧ сподоблѧ́емь не разꙋмѣ́ю: ѡ҆долѣ́й моемꙋ̀ недоꙋмѣ́нїю є҆ди́не бл҃же, и҆ поми́лꙋй мѧ̀.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Гдⷭ҇и, и҆ стра́ха твоегѡ̀ бою́сѧ, и҆ ѕло́е творѧ̀ не престаю̀: кто̀ на сꙋди́щи сꙋдїѝ не бои́тсѧ; и҆лѝ кто̀ ᲂу҆врачева́тисѧ хотѧ̀, врача̀ прогнѣ́ваетъ ꙗ҆́коже а҆́зъ; долготерпѣли́ве гдⷭ҇и, на не́мощь мою̀ ᲂу҆милосе́рдисѧ, и҆ поми́лꙋй мѧ̀.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.
Ѡ҆ земны́хъ всѣ́хъ неради́вше, и҆ на мꙋ́ки мꙋ́жески дерзнꙋ́вше, бл҃же́нныхъ наде́ждъ не погрѣши́сте: но нб҃е́сномꙋ црⷭ҇твїю наслѣ̑дницы бы́сте, прехва́льнїи мч҃нцы. и҆мꙋ́ще дерзнове́нїе къ чл҃вѣколюби́вомꙋ бг҃ꙋ, мі́рꙋ ᲂу҆мире́нїе и҆спроси́те, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Стра́шно и҆ пресла́вно, и҆ ве́лїе та́инство, невмѣсти́мый во чре́вѣ вмѣсти́сѧ, и҆ мт҃и по ржⷭ҇твѣ̀ па́ки пребы́сть дв҃ою: бг҃а бо родѝ и҆з̾ неѧ̀ воплоще́нна. томꙋ̀ возопїи́мъ, томꙋ̀ пѣ́снь рце́мъ, со а҆́гг҃лы воспѣва́юще: ст҃ъ є҆сѝ хрⷭ҇тѐ бж҃е, и҆́же на́съ ра́ди вочл҃вѣ́чивыйсѧ, сла́ва тебѣ̀.
Та́же, Ны́нѣ ѿпꙋща́еши раба̀ твоего̀ влⷣко: Трист҃о́е. По Ѻ҆́ч҃е на́шъ: Тропа́рь ст҃о́мꙋ. Сла́ва, и҆ ны́нѣ, бг҃оро́диченъ, во гла́съ тропарѧ̀: є҆ктенїа̀, и҆ ѿпꙋ́стъ.
канѡ́нъ моле́бный прест҃ѣ́й бцⷣѣ, гла́съ є҃:
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Чꙋ́до въ тебѣ̀ соверша́етсѧ дв҃о, вои́стиннꙋ ᲂу҆жа́сно: ꙗ҆́кѡ во ᲂу҆тро́бѣ твое́й ника́коже вмѣсти́маго и҆мѣ́ла є҆сѝ, и҆ несказа́ннѡ родила̀ є҆сѝ, приснодв҃ою пребы́вши.
Ѡ҆дожди́ ми влⷣчце, прегрѣше́нїй ѡ҆ставле́нїе, ꙗ҆́же до́ждь нбⷭ҇ный прише́дшїй къ тебѣ̀, неизглаго́ланнѡ вмѣсти́ла є҆сѝ, и҆ дв҃ою пребыла̀ є҆сѝ по ржⷭ҇твѣ̀ непости́жнѣмъ.
Сла́ва: Є҆ди́на бл҃гослове́ннаѧ и҆ бг҃ора́дованнаѧ, ꙗ҆́же ра́дость чл҃вѣ́кѡмъ ро́ждшаѧ неизрече́ннꙋю, печа̑ли ѿимѝ дꙋшѝ моеѧ̀ молю́сѧ, и҆ возвеселѝ се́рдце моѐ.
И҆ ны́нѣ: Ве́сь жела́нїе и҆ сла́дость жи́зни, и҆́же ѿ тебѐ возсїѧ́вый за премно́гꙋю бл҃гость, дв҃о пренепоро́чнаѧ: є҆го́же молѝ сп҃стѝ мѧ̀, непреста́ннѡ ны́нѣ тѧ̀ сла́вѧщаго.
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не, бл҃же и҆ чл҃вѣколю́бче.
Преидо́ша сѣ́немъ законотвори̑маѧ: законода́вца бо хрⷭ҇та̀ родила̀ є҆сѝ пречⷭ҇таѧ, бл҃года́ть ѡ҆чище́нїѧ и҆ просвѣще́нїѧ на́мъ взако́нившаго, и҆ ѿ клѧ́твы и҆з̾е́мшаго дв҃о всенепоро́чнаѧ.
Роди́сѧ ѿ тебѐ чⷭ҇таѧ, бг҃ъ воплоща́емь, и҆ пло́тїю ви́дѣнъ бы́сть, и҆́же пре́жде неви́димый. сего̀ ᲂу҆́бѡ молѝ прилѣ́жнѡ ѻ҆трокови́це, ѿ ви́димыхъ и҆ неви́димыхъ вра̑гъ мѧ̀ и҆зба́вити, свѣ́тлѡ тѧ̀ сла́вѧщаго.
Сла́ва: Страсте́й мѧ̀ лю́та ѡ҆бꙋрева́етъ волна̀, лꙋка́выхъ дꙋхѡ́въ глꙋбина̀ ѡ҆держи́тъ мѧ̀, грѣхо́внаѧ бꙋ́рѧ смꙋща́етъ мѝ се́рдце: бг҃ороди́тельнице, ты́ мѧ ᲂу҆твердѝ, свѣ́тлѡ тѧ̀ пою́щаго.
И҆ ны́нѣ: Бж҃е́ственнаго гаврїи́ла чинонача́льника и҆мꙋ́ще, бл҃гоговѣ́йнѡ є҆́же ра́дꙋйсѧ, вѣ́рою приво́димъ согла́снѡ, неискꙋсобра́чнѣй мт҃ри бцⷣѣ вѣ́рнѡ: є҆́юже бѣ́дъ же и҆ скорбе́й, и҆ недꙋ̑гъ и҆збавлѧ́емсѧ.
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
И҆стка́вшаѧ внꙋ́трь ѿ крове́й твои́хъ дв҃и́ческихъ, нб҃о ѻ҆́блаки дв҃о, ѡ҆дѣва́юща ѻ҆де́ждею нетлѣ́нїѧ, пре́жде ле́стїю ѡ҆бнаже́ннаго мѧ̀ ѡ҆блецы̀.
Оу҆тро́ба твоѧ̀ дв҃о, пала́та свѧта̀ цр҃ѧ̀ и҆ бг҃а несказа́нна бы́сть, въ ню́же всели́всѧ, цр҃кви на́съ содѣ́ла.
Сла́ва: Оу҆ще́дри ще́дра сꙋ́щи преѻкаѧ́ннꙋю мою̀ дꙋ́шꙋ, бг҃ороди́тельнице всенепоро́чнаѧ, ю҆́же ѿ страсте́й и҆ грѣха̀ лю́тѣ ѡ҆чернѣ́вшꙋю и҆ ѡ҆цѣпенѣ́вшꙋю.
И҆ ны́нѣ: Нетлѣ́ннагѡ црⷭ҇тва возсїѧ́ла є҆сѝ ски́петро, ѿ ко́рене і҆ессе́ова, и҆ ражда́еши ѻ҆троча̀ безмꙋ́жнѡ чⷭ҇таѧ, а҆да́мова и҆ дв҃дова бг҃а, вкꙋ́пѣ и҆ зижди́телѧ и҆ гдⷭ҇а.
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Пребыва́еши по ржⷭ҇твѣ̀ дв҃а нетлѣ́нна, и҆стлѣ́вшихъ всѣ́хъ человѣ̑къ къ жи́зни приво́диши, и҆ нетлѣ́нїемъ ѡ҆сїѧва́еши пренепоро́чнаѧ.
Но́во родила̀ є҆сѝ ꙗ҆́кѡ мла́дѧ пречⷭ҇таѧ, предвѣ́чнаго ѿ ѻ҆ц҃а̀ безлѣ́тнѡ возсїѧ́вшаго, є҆го́же ѡ҆ мі́рѣ молѝ бг҃оневѣ́сто.
Сла́ва: Да ѡ҆брѧ́щꙋ тѧ̀ помо́щницꙋ дв҃о, и҆з̾има́ющꙋ мѧ̀ въ ча́съ пре́нїѧ сꙋ́днагѡ, є҆гда̀ на сꙋди́щи предста́нꙋ ѿ тебѐ ро́ждшагѡсѧ.
И҆ ны́нѣ: Всѧ̀ бли́жнѧѧ моѧ̀ до́бра, и҆ непоро́чна ѿ лїва́на, дв҃о бг҃оневѣ́сто: ст҃ы́мъ дх҃омъ въ тебѣ̀ проꙋвѣ́дѣсѧ воплоще́нїе сн҃а бж҃їѧ.
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Неискꙋсомꙋ́жнѡ родила̀ є҆сѝ бцⷣе є҆мманꙋ́ила, на́ше смире́нїе ᲂу҆ще́дрившаго: тѣ́мже приснодо́лжнѡ тѧ̀ сла́вимъ.
Па́че ᲂу҆ма̀ безлѣ́тнаго, па́че сло́ва зижди́телѧ прест҃а́ѧ родила̀ є҆сѝ, и҆збавлѧ́ющаго всѧ́кїѧ тлѝ, бцⷣꙋ тѧ̀ пою́щихъ.
Сла́ва: Бл҃га́го ро́ждши бл҃годѣ́телѧ и҆ зижди́телѧ, прест҃а́ѧ влⷣчце бл҃голюби́ваѧ, дꙋ́шꙋ мою̀ ѡ҆ѕло́бленнꙋю ᲂу҆бл҃жѝ.
И҆ ны́нѣ: Но́вое тебѣ̀ похвале́нїе, и҆ дре́внее прино́симъ всечⷭ҇таѧ: лꙋ́чше бо не и҆́мамы къ похвале́нїю, ра́звѣ, ра́дꙋйсѧ, є҆́же съ гаврїи́ломъ тебѣ̀ воспѣва́емъ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ є҃: Себѐ пре́жде сꙋда̀ ны́нѣ пла́чꙋ, помышлѧ́ѧ моѧ̑ дѣла̀ лꙋка̑ваѧ и҆ лю̑таѧ, и҆ прегрѣше́нїй глꙋбинꙋ̀ ѡ҆держа́щꙋю мѧ̀ ѿ ю҆́ности, и҆ подавлѧ́ющꙋ ᲂу҆́мъ: но твои́мъ чⷭ҇таѧ, предста́нїемъ, ѡ҆ставле́нїе мѝ пода́ждь, и҆ сп҃се́нїе ᲂу҆лꙋчи́ти сподо́би.
І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
И҆зба́ви мѧ̀ пречⷭ҇таѧ, ѕла́гѡ ᲂу҆ны́нїѧ, и҆ страсте́й ѡ҆мраче́нїѧ, и҆ ѡ҆сꙋжде́нїѧ вѣ́чнꙋющагѡ: ꙗ҆́кѡ да вѣ́рою тѧ̀ сла́влю.
Оу҆мертвѝ стра̑сти моѧ̑, ꙗ҆́же жи́знь ро́ждшаѧ: воздви́гни мѧ̀ бг҃оневѣ́сто лежа́щаго и҆з̾ гро́ба нечꙋ́вствїѧ, да любо́вїю тѧ̀ сла́влю.
Сла́ва: Пло́тїю ѡ҆бложе́на бг҃а безпло́тнаго, пренепоро́чнаѧ родила̀ є҆сѝ, на́съ и҆збавлѧ́ющаго, со стра́хомъ пою́щихъ: бж҃е бл҃гослове́нъ є҆сѝ.
И҆ ны́нѣ: И҆сцѣле́нїе безме́здно, чи́стꙋю твою̀ мл҃твꙋ ѡ҆брѣ́тше, дв҃о, про́симъ пою́ще, дꙋшѝ бл҃гопремѣне́нїѧ, и҆ тѣлесѝ здра́вїѧ.
І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше поѧ́хꙋ: дѣла̀ всѧ́каѧ гдⷭ҇а по́йте, и҆ превозноси́те во всѧ̑ вѣ́ки.
Две́ре свѣ́та, покаѧ́нїѧ мѝ двє́ри свѣтоза̑рныѧ ѿве́рзи, показꙋ́ющи всѧ́къ пра́вый пꙋ́ть пра́вды, вводѧ́щъ въ бж҃е́ственныѧ во́ли вхо́ды.
Но́во на землѝ дв҃о мт҃и ѻ҆троча̀, ѻ҆ц҃ꙋ̀ собезнача́льнаго сн҃а родила̀ є҆сѝ, за млⷭ҇рдїе неизрече́нное ᲂу҆подо́бльшагосѧ на́мъ, и҆стлѣ́вшымъ под̾ грѣхо́мъ.
Сла́ва: Всѧ̀ и҆збра́нна, всѧ̀ преꙋкра́шенна, бг҃ъ ю҆́же возлюбѝ, ю҆́же и҆збра̀, ꙗ҆ви́ласѧ є҆сѝ дв҃о при́снѡ препросла́вленнаѧ: тѣ́мже тѧ̀ пое́мъ чⷭ҇таѧ во вѣ́ки.
И҆ ны́нѣ: Всѧ̀ чⷭ҇таѧ, и҆ бж҃е́ственныѧ сла́вы и҆спо́лнена, бли́жнѧѧ моѧ̀, речѐ дх҃ъ бж҃їй, тѧ̀ провозвѣща́ѧ пречⷭ҇таѧ, ю҆́же пѣ́сньми воспѣва́емъ пою́ще: тебѣ̀ подоба́етъ ра́доватисѧ бг҃а чл҃вѣ́ка ро́ждшей.
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Твои́хъ притека́телей всечⷭ҇таѧ, не ѿри́ни ны́нѣ воздыха̑нїѧ, но воззрѝ на ны̀ сꙋ́щихъ въ ско́рбехъ, пла́чь преложѝ на ра́дость, и҆ ᲂу҆миле́нїе въ весе́лїе, въ пѣ́снехъ тѧ̀ пою́щихъ.
Ѡ҆снова́нїе є҆сѝ недви́жимо, сп҃са ро́ждши чⷭ҇таѧ, на вода́хъ зе́млю бж҃е́ственными велѣ́нїи ѡ҆снова́вшаго: на не́мже на́съ свѣ́тлѡ тѧ̀ бл҃жа́щихъ ᲂу҆тверди́ти моли́сѧ.
Сла́ва: Па́че ᲂу҆ма̀ ржⷭ҇тво̀ твоѐ бцⷣе, без̾ мꙋ́жа бо зача́тїе въ тебѣ̀, и҆ дв҃ственно ржⷭ҇тво̀ твоѐ бы́сть: и҆́бо бг҃ъ є҆́сть рожде́йсѧ, є҆го́же велича́юще, ро́ждшꙋю тѧ̀ ᲂу҆бл҃жа́емъ.
И҆ ны́нѣ: Стра́шенъ є҆сѝ гдⷭ҇и, и҆ кто̀ ᲂу҆́бѡ тогда̀ постои́тъ преще́нїѧ твоегѡ̀ хрⷭ҇тѐ, є҆ди́не цр҃ю̀, сꙋ́дъ творѧ́щꙋ тѝ; тѣ́мже пощадѝ, и҆ сп҃си́ мѧ сп҃се, ро́ждшїѧ тѧ̀ бл҃гопрїѧ́тными мольба́ми.
Та́же, Досто́йно є҆́сть: И҆ про́чее ѻ҆бы́чно, и҆ ѿпꙋ́стъ.
по а҃-мъ стїхосло́вїи сѣда́льны покаѧ́нны. Гла́съ є҃:
Сꙋдїѝ сѣдѧ́щꙋ, и҆ а҆́гг҃лѡмъ предстоѧ́щымъ, трꙋбѣ̀ гласѧ́щей, и҆ пла́мени горѧ́щꙋ, что̀ сотвори́ши дꙋшѐ моѧ̀, ведо́ма на сꙋ́дъ: тогда́ бо лю̑таѧ тебѣ̀ предста́нꙋтъ, и҆ та̑йнаѧ твоѧ̑ ѡ҆блича́тсѧ согрѣшє́нїѧ. тѣ́мже пре́жде конца̀ возопі́й сꙋдїѝ: бж҃е, ѡ҆чи́сти мѧ̀, и҆ сп҃си́ мѧ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Всѝ побди́мъ, и҆ хрⷭ҇та̀ ᲂу҆срѧ́щимъ со мно́жествомъ є҆ле́а, и҆ свѣща́ми свѣ́тлыми, ꙗ҆́кѡ да черто́га внꙋ́трь сподо́бимсѧ: и҆́же бо внѣ̀ двере́й ѡ҆брѣта́ѧйсѧ, бездѣ́льнѡ бг҃ови воззове́тъ: поми́лꙋй мѧ̀.
Сла́ва, и҆ ны́нѣ, бг҃оро́диченъ: Ст҃ѣ́йши херꙋві̑мъ, и҆ вы́шши серафі̑мъ, пречⷭ҇таѧ, бцⷣꙋ тѧ̀ вои́стиннꙋ и҆сповѣ́дающе, и҆́мамы грѣ́шнїи застꙋ́пницꙋ, и҆ ѡ҆брѣта́емъ во вре́мѧ напа́стей сп҃се́нїе. тѣ́мже не преста́й ѡ҆ на́съ молѧ́щи, держа́во и҆ прибѣ́жище дꙋша́мъ на́шымъ.
По в҃-мъ стїхосло́вїи, сѣда́льны, гла́съ є҃:
Дꙋшѐ, ꙗ҆̀же здѣ̀ вре́мєнна, та́мѡшнѧѧ же вѣ̑чна: зрю̀ сꙋди́ще и҆ на прⷭ҇то́лѣ сꙋдїю̀, и҆ трепе́щꙋ ѿвѣ́та. про́чее со тща́нїемъ ѡ҆брати́сѧ, сꙋ́дъ непроща́емь.
Сті́хъ: Гдⷭ҇и да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
На ѻ҆дрѣ̀ слежꙋ̀ согрѣше́нїй мно́гихъ, ѡ҆кра́даемь є҆́смь въ наде́жди сп҃се́нїѧ моегѡ̀: и҆́бо со́нъ моеѧ̀ лѣ́ности хода́тайствꙋетъ дꙋшѝ мое́й мꙋ́кꙋ. но ты̀ бж҃е, рожде́йсѧ ѿ дв҃ы, воздви́гни мѧ̀ къ твоемꙋ̀ пѣ́нїю, да сла́влю тѧ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Сїѧ́етъ дне́сь стрⷭ҇тоте́рпєцъ па́мѧть, и҆́мать бо и҆ ѿ нб҃съ зарю̀: ли́къ а҆́гг҃льскїй торжествꙋ́етъ, и҆ человѣ́ческїй ро́дъ спра́зднꙋетъ. тѣ́мже мо́лѧтсѧ гдⷭ҇еви поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Со а҆́гг҃лы нбⷭ҇наѧ, съ человѣ́ки земна̑ѧ, во гла́сѣ ра́дованїѧ, бцⷣе, вопїе́мъ тѝ: ра́дꙋйсѧ, две́ре нб҃съ простра́ннѣйшаѧ. ра́дꙋйсѧ, є҆ди́на земноро́дныхъ сп҃се́нїе. ра́дꙋйсѧ, чⷭ҇таѧ ѡ҆бра́дованнаѧ, ро́ждшаѧ бг҃а воплоще́нна.
По г҃-мъ стїхосло́вїи, сѣда́ленъ, гла́съ є҃:
Подо́бенъ: Собезнача́льное сло́во:
Безслове́сными мѧ̀ страстьмѝ преклоне́ннаго, и҆ блꙋ́днѡ житїѐ моѐ и҆жди́вша, призовѝ сп҃се, ꙗ҆́коже блꙋ́днаго, и҆ прїимѝ, и҆ ѡ҆б̾ѧ̑тїѧ ѻ҆ч҃єскаѧ за млⷭ҇рдїе щедро́тъ распростри́ ми: и҆ мл҃твами безпло́тныхъ дре́вней че́сти сподо́би.
Сла́ва, и҆ ны́нѣ, бг҃оро́диченъ: Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рови, и҆ сп҃се́нїе, и҆ ве́лїю млⷭ҇ть.
Канѡ́нъ, є҆гѡ́же краегране́сїе си́це: Мно́гѡ тѝ согрѣши́вшаго ᲂу҆ще́дри, сло́ве. Творе́нїе кѵ́ръ і҆ѡ́сифа, гла́съ є҃:
І҆рмо́съ: Пои́мъ гдⷭ҇еви, сотво́ршемꙋ ди̑внаѧ чꙋдеса̀ въ чермнѣ́мъ мо́ри, пѣ́снь побѣ́днꙋю, ꙗ҆́кѡ просла́висѧ.
Мно́гими лестьмѝ и҆звлеко́ма, и҆ прельща́ема хрⷭ҇тѐ чꙋ́ждагѡ, ѡ҆братѝ и҆ ᲂу҆ще́дри мѧ̀, ꙗ҆́кѡ всеси́ленъ.
И҆́же глꙋха́гѡ ᲂу҆́шы ѿве́рзый хрⷭ҇тѐ, дꙋшѝ моеѧ̀ ѡ҆гло́хнꙋвшаѧ ᲂу҆шеса̀ ѿве́рзи, молю́сѧ: ꙗ҆́кѡ да твоѧ̑ словеса̀ внꙋша́ю.
Мч҃нченъ: Новоѧвлє́нныѧ ѕвѣ́зды сꙋ́ще мч҃нцы сл҃нца првⷣнагѡ хрⷭ҇та̀, тьмꙋ̀ ѿжени́те ѿ серде́цъ на́шихъ.
Мч҃нченъ: Разжжє́нныѧ стрѣ́лы бж҃е́ственными ᲂу҆́гльми ст҃а́гѡ дх҃а страда́льцы ꙗ҆́вльшесѧ, стрѣ́лы сокрꙋша́ютъ всѧ̑ ѕмі́евы.
Бг҃оро́диченъ: Две́ре бж҃е́ственныѧ сла́вы, покаѧ́нїѧ мѝ двє́ри ѿве́рзи, и҆ ѿ вра́тъ а҆́довыхъ и҆схитѝ, молю́сѧ, смире́ннꙋю мою̀ дꙋ́шꙋ.
Дрꙋгі́й канѡ́нъ безплѡ́тнымъ.
Творе́нїе ѳеофа́ново, [є҆гѡ́же краегране́сїе: Пѣ́нїе а҆́гг҃лѡмъ пѧ́тое.] Гла́съ є҃:
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Таи́нницы бг҃онача́лїѧ свѣтода́тельнагѡ, и҆ тогѡ̀ лꙋча́ми первоѧвле́ннагѡ сїѧ́юще, свѣ́томъ просвѣти́ти дꙋ́шꙋ мою̀, а҆́гг҃ли, влⷣкꙋ ᲂу҆моли́те. [Два́жды.]
И҆мꙋ́ще дерзнове́нїе, ꙗ҆́кѡ прⷭ҇то́лꙋ высо́комꙋ предстоѧ́ще всѝ, бл҃гочести́внѣ пою́щихъ ва́съ, бѣ́дъ и҆зба́вите предста́телїе чи́на нбⷭ҇нагѡ, ѽ а҆рхїстрати́зи!
Бг҃оро́диченъ: Разрѣши́сѧ клѧ́тва, и҆ печа́ль преста̀: бл҃гослове́ннаѧ бо и҆ бл҃года́тнаѧ, вѣ̑рнымъ ра́дость возсїѧ̀, бл҃гослове́нїе всѣ̑мъ концє́мъ цвѣтоносѧ́щи хрⷭ҇та̀.
І҆рмо́съ: Над̾ ꙗ҆зы́ки бг҃ъ воцр҃и́сѧ, бг҃ъ сѣди́тъ на прⷭ҇то́лѣ ст҃ѣ́мъ свое́мъ, и҆ пое́мъ є҆мꙋ̀ разꙋ́мнѡ ꙗ҆́кѡ цр҃ю̀ и҆ бг҃ꙋ.
Ты̀, и҆́же ниеди́номꙋ хотѧ́й поги́бнꙋти, бл҃гі́й гдⷭ҇и, погиба́ющаго ᲂу҆ще́дри, и҆ сп҃си́ мѧ, ма́нїемъ всеще́дре млⷭ҇ти твоеѧ̀.
Ꙗ҆̀же въ вѣ́дѣнїи и҆ не въ вѣ́дѣнїи согрѣши́хъ къ тебѣ̀ хрⷭ҇тѐ гдⷭ҇и, всѧ̑ вѣ́дѧщемꙋ прихождꙋ̀ и҆ припа́даю тѝ, прїими́ мѧ ꙗ҆́коже блꙋ́днаго.
Мч҃нченъ: Да живꙋ́щїй грѣ́хъ ᲂу҆мертвитѐ мч҃нцы и҆ ме́ртва врага̀ пока́жете, ѡ҆ ме́ртвости тѣле́снѣй бл҃же́ннїи неради́сте.
Мч҃нченъ: И҆спещре́ни страда́ньми мч҃нцы, и҆ ѻ҆де́ждами кро́вїю ѡ҆броще́нными ᲂу҆краша́еми, всѣ́хъ цр҃ю̀ вѣнцено́сцы предстоитѐ.
Бг҃оро́диченъ: Дв҃о мт҃и, ꙗ҆́же бг҃а вопло́щшаѧ, гла́сы прїимѝ вопїю́щихъ тѝ всегда̀, и҆ и҆зба́ви на́съ ѿ разли́чныхъ ѡ҆бстоѧ́нїй.
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
И҆́же сло́вомъ ликова̑нїѧ вы́шнимъ си́ламъ премꙋ́дрѡ составле́й, твою̀ бл҃гость неисчетноси́льнꙋ показꙋ́ѧй, си́хъ предста́тельствы цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче. [Два́жды.]
Оу҆краша́ѧ неизрече́нною свѣ́тлостїю а҆́гг҃лы хрⷭ҇тѐ, и҆ тѣ́ми ᲂу҆твержда́ѧ цр҃ковь твою̀ млⷭ҇рде, ѻ҆каѧ́ннꙋю мою̀ дꙋ́шꙋ тѣ́ми просвѣтѝ, молю́сѧ тѝ влⷣко, не помина́ѧ мои́хъ безчи́сленныхъ грѣхѡ́въ.
Бг҃оро́диченъ: Ты̀ мт҃и бг҃а несочета́ннѡ была̀ є҆сѝ, безпло́тныѧ ли́ки просвѣща́ющагѡ, є҆ди́но бг҃онача́лїе въ трїе́хъ пѣ́ти непреста́ннѡ сщ҃е́нствїихъ, и҆ гдⷭ҇ьствїихъ, пречⷭ҇таѧ дв҃о всепѣ́таѧ.
І҆рмо́съ: Дѣла̀ смотре́нїѧ твоегѡ̀ гдⷭ҇и, ᲂу҆жаси́ша прⷪ҇ро́ка а҆ввакꙋ́ма: и҆зше́лъ бо є҆сѝ на сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
Дѣла̀, ꙗ҆̀же въ житїѝ соверши́хъ, сꙋ́ть лꙋка̑ва и҆ лю̑та: ѡ҆ ни́хже хрⷭ҇тѐ бж҃е мо́й и҆зба́ви мѧ̀, покаѧ́нїе и҆́скреннее подаѧ́ ми.
Всѧ́кꙋ за́повѣдь честнꙋ́ю ᲂу҆ничижи́хъ, стра́хъ тво́й ѿри́нꙋхъ хрⷭ҇тѐ, и҆ бою́сѧ неизбѣ́жнагѡ твоегѡ̀ сꙋди́ща, въ не́мже да не ѡ҆сꙋ́диши менѐ бл҃гоꙋтро́бне.
Мч҃нченъ: Реме́ньми ѿвсю́дꙋ вои́стиннꙋ протѧза́еми, и҆ ра́нами и҆знꙋрѧ́еми ѕѣ́льнѣ, и҆ ноготьмѝ стрꙋ́жеми сло́ве, страда́льцы твоѝ, вѣ́рою ра́довахꙋсѧ.
Мч҃нченъ: Поколеба́ти ва́съ страда́льцы ѿ бж҃е́ственнагѡ стоѧ́нїѧ, не возмо́же всѧ́чески лꙋка́вый: тѣ́мже мнѡ́гимъ коле́блємымъ, до́блїи ᲂу҆твержде́нїе бж҃е́ственное показа́стесѧ.
Бг҃оро́диченъ: Воплоща́етсѧ ѿ чⷭ҇тыхъ крове́й твои́хъ гдⷭ҇ь, покаѧ́нїе чтꙋ́щымъ тѧ̀ подава́ѧ всепѣ́таѧ, твои́мъ бл҃ги́мъ хода́тайствомъ, ꙗ҆́кѡ бл҃гоꙋтро́бенъ, и҆ є҆ди́нъ чл҃вѣколю́бецъ.
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
А҆́гг҃льскїѧ соста́вилъ є҆сѝ свѣ́тлѡсти, бг҃одѣ́тельными лꙋча́ми бл҃гопода́тливѣ просвѣти́лъ є҆сѝ: ꙗ҆́кѡ си́ленъ въ крѣ́пости, сло́во твоѐ и҆спо́лнивый чл҃вѣколю́бче. [Два́жды.]
Зємна́ѧ тѣле́съ мꙋдрова̑нїѧ ѿложи́мъ вѣ́рнїи, житїю̀ подо́бѧщесѧ безпло́тныхъ чинѡ́въ, и҆ ᲂу҆́мъ впери́мъ дх҃омъ.
Бг҃оро́диченъ: Бꙋ́ди мѝ предста́тельнице пренепоро́чнаѧ, прибѣ́жище и҆ приста́нище, страсте́й бꙋ́рю ѿгонѧ́щи: ꙗ҆́же а҆́гг҃льскїѧ ли́ки, добро́тою без̾ сравне́нїѧ побѣ́ждшаѧ.
І҆рмо́съ: Свѣ́те и҆́стинный хрⷭ҇тѐ бж҃е, къ тебѣ̀ ᲂу҆́тренюетъ дꙋ́хъ мо́й ѿ но́щи, ꙗ҆вѝ на мѧ̀ лицѐ твоѐ.
Воспрѧнѝ, ѽ дꙋшѐ, воспрѧнѝ ѿ сна̀ тѧ́жкагѡ, моегѡ̀ лю́тагѡ грѣха̀, и҆ покаѧ́нїѧ свѣ́томъ ѡ҆зари́сѧ.
Ѡ҆бнови́мъ дꙋ́шꙋ прилѣжа́нїемъ, и҆ ᲂу҆миле́нїѧ тꙋ́чами напои́мсѧ: ꙗ҆́кѡ да прозѧбе́мъ покаѧ́нїѧ кла́съ.
Мч҃нченъ: Оу҆́гльми любвѐ наѡстри́вшесѧ, небокова́ннїи ме́чеве, стрⷭ҇тоте́рпцы ꙗ҆ви́стесѧ, врагѡ́въ ссѣца́юще полкѝ.
Мч҃нченъ: Непорабоще́ни ѿ врага̀ бы́сте, порабо́тисте сего̀ стрⷭ҇тоте́рпцы, и҆ бли́жнїи хрⷭ҇тꙋ̀ ꙗ҆ви́стесѧ дрꙋ́зи.
Бг҃оро́диченъ: Дв҃о въ жена́хъ бл҃гослове́ннаѧ, твоѧ̑ млⷭ҇ти пода́ждь лю́демъ твои̑мъ: млⷭ҇тивагѡ бо ꙗ҆ви́ласѧ є҆сѝ мт҃и.
І҆рмо́съ: Ѡ҆дѣѧ́йсѧ свѣ́томъ, ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Ѡ҆бходѧ́ще всеѧ̀ землѝ концы̀, влⷣчнѧѧ бл҃годѣѧ̑нїѧ вѣ̑рнымъ прино́сите, и҆ сохранѧ́ете всесла́внїи а҆рха́гг҃ли. [Два́жды.]
Словесѝ твоемꙋ̀ повинꙋ́ющесѧ сло́ве бг҃а и҆ ѻ҆ц҃а̀, нбⷭ҇нагѡ чинонача̑лїѧ сла̑внаѧ ᲂу҆крашє́нїѧ, твоеѧ̀ свѣ́тлости свѣ́томъ ѡ҆зарѧ́ютсѧ.
Бг҃оро́диченъ: Всѐ моѐ жела́нїе къ тебѣ̀ предста́ви, ꙗ҆́же па́че сло́ва, жела́нїѧ сла́дость роди́вшаѧ, тебѐ бцⷣꙋ чⷭ҇таѧ вѣ́дꙋщымъ.
І҆рмо́съ: Ѿ ки́та прⷪ҇ро́ка и҆зба́вилъ є҆сѝ, мене́ же и҆з̾ глꙋбины̀ грѣхѡ́въ возведѝ гдⷭ҇и, и҆ сп҃си́ мѧ.
Нѣ́сть въ житїѝ се́мъ грѣха̀, є҆гѡ́же а҆́зъ є҆ди́нъ не сотвори́хъ ѻ҆каѧ́нный, є҆ди́не безгрѣ́шне ᲂу҆ще́дри мѧ̀.
Вѣ́триломъ ᲂу҆се́рдїѧ впери́мсѧ, и҆ ко приста́нищꙋ сп҃се́нїѧ покаѧ́нїемъ предвари́мъ всѝ, ꙗ҆́кѡ да сп҃се́мсѧ.
Мч҃нченъ: Проповѣ́дникѡвъ, а҆пⷭ҇лѡвъ и҆ мч҃нкѡвъ страда́нїемъ ѡ҆зарѧ́етсѧ тва́рь: и҆́миже и҆ на́съ просвѣтѝ чл҃вѣколю́бче.
Мч҃нченъ: Сосꙋ́ды вмѣсти́вшыѧ зарю̀ бж҃е́ственнꙋю, и҆ чєстна́ѧ свѣтоли̑тїѧ мч҃нки всѝ почти́мъ.
Бг҃оро́диченъ: Дв҃о вѣ̑рнымъ предста́тельнице, и҆зба́витисѧ ѿ всѧ́кагѡ грѣха̀ рабѡ́мъ твои̑мъ молѝ гдⷭ҇а.
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Сщ҃енноꙋкраша́еми а҆́гг҃льстїи собо́ри и҆збра́ннїи, свѣтода́тельными сїѧ́нїи просвѣща́етесѧ, бг҃одѣ́тельнымъ ѡ҆заре́нїемъ ꙗ҆́вѣ соверша́еми. [Два́жды.]
Трисвѣ́тлыми зарѧ́ми бога́тнѡ преꙋкраша́еми а҆́гг҃ли и҆ а҆рха́гг҃ли, бг҃озра́чнѡ ѻ҆каѧ́ннꙋю мою̀ дꙋ́шꙋ просвѣти́те ва́шими мл҃твами.
Бг҃оро́диченъ: Зачала̀ є҆сѝ пречⷭ҇таѧ всѣ́хъ зижди́телѧ и҆ бг҃а, є҆го́же съ тре́петомъ зрѧ́тъ ра́дꙋющесѧ, всебл҃гоговѣ́йнѡ предстоѧ́ще а҆́гг҃ли.
І҆рмо́съ: Бл҃гослове́нъ є҆сѝ бж҃е, ви́дѧй бє́здны, и҆ на прⷭ҇то́лѣ сла́вы сѣдѧ́й, препѣ́тый и҆ пресла́вный.
Бл҃гослове́нъ є҆сѝ бж҃е, и҆́же за бл҃гоꙋтро́бїе ка́ющихсѧ всѣ́хъ прїе́млѧ, препѣ́тый и҆ пресла́вный.
И҆сцѣлѝ бл҃гоꙋтро́бне хрⷭ҇тѐ, мнѡ́гїѧ моѧ̑ стра̑сти, и҆́же моѐ свѣ́дый неможе́нїе, препѣ́тый и҆ пресла́вный.
Мч҃нченъ: Си́лою бж҃е́ственною ᲂу҆крѣпи́сѧ ли́къ стрⷭ҇тоте́рпєцъ, врагѝ побѣдѝ вопїѧ̀: препѣ́тый и҆ превозноси́мый во вѣ́ки.
Мч҃нченъ: Оу҆крѣпи́вый премꙋ̑дрыѧ стрⷭ҇тоте́рпцы сло́ве, претерпѣ́ти многоплетє́нныѧ мꙋ̑ки, мл҃твами и҆́хъ ᲂу҆ще́дри всѣ́хъ.
Бг҃оро́диченъ: Бл҃гослове́нъ є҆сѝ бж҃е, и҆́же во чре́во дв҃и́че всели́всѧ, и҆ сп҃слъ чл҃вѣ́ка, препѣ́тый и҆ превозноси́мый во вѣ́ки.
І҆рмо́съ: Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е, бл҃гослове́нъ є҆сѝ.
Неисчетноси́льнꙋю хрⷭ҇то́съ ꙗ҆влѧ́ѧ крѣ́пость, ва́съ а҆рхїстрати́зи поста́вилъ є҆́сть, наꙋчѝ воспѣва́ти: бж҃е, бл҃гослове́нъ є҆сѝ. [Два́жды.]
И҆́же мно́жество безчи́сленное безпло́тныхъ чинѡ́въ ᲂу҆краша́ѧй бл҃гостїю, вѣ́рныхъ составлє́нїѧ сподо́би пѣ́ти тѧ̀: бж҃е, бл҃гослове́нъ є҆сѝ.
Бг҃оро́диченъ: Страстьмѝ коле́блема, дв҃о, ты̀ ны́нѣ ᲂу҆тверди́ мѧ, ꙗ҆́же всѣ̑мъ и҆сточи́вшаѧ вѣ̑рнымъ безстра́стїе, вѣ́рою пою́щымъ: бж҃е, бл҃гослове́нъ є҆сѝ.
І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли, по́йте лю́дїе, и҆ превозноси́те во всѧ̑ вѣ́ки.
Ме́ртва престꙋпле́нїемъ бы́вша мѧ̀, гдⷭ҇и ѡ҆живѝ, да тѧ̀ сла́влю во всѧ̑ вѣ́ки.
Просвѣти́въ мѧ̀ покаѧ́нїемъ, тьмы̀ грѣхо́вныѧ и҆зба́ви гдⷭ҇и, да тѧ̀ сла́влю во всѧ̑ вѣ́ки.
Мч҃нченъ: Стрⷭ҇тотє́рпцы мч҃нцы, пла́мень пре́лести попра́ша, ро́сꙋ съ нб҃сѐ прїе́мше пресла́внѡ.
Мч҃нченъ: Ꙗ҆́коже землѧ̀ тꙋ́чнаѧ ст҃і́и, кла́съ вои́стиннꙋ стори́чествꙋющъ, подвигополо́жникꙋ хрⷭ҇тꙋ̀ плодоноси́сте.
Бг҃оро́диченъ: И҆з̾ тебѐ бг҃ъ возсїѧ̀ всепѣ́таѧ дв҃о, и҆ бг҃оразꙋ́мїемъ просвѣтѝ ѡ҆мрачє́нныѧ.
І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Привлача́тъ мѧ̀ ны́нѣ а҆́гг҃льстїи собо́ри, пѣ́ти пѣ́сньми и҆ серде́чнымъ жела́нїемъ, съ ни́миже пою̀: дѣла̀ всѧ̑каѧ гдⷭ҇а по́йте, и҆ превозноси́те є҆го̀ во вѣ́ки. [Два́жды.]
Слꙋги̑ прест҃ѣ́й и҆ трисо́лнечнѣй зарѝ, сп҃сти́сѧ моли́те вѣ́рою пою́щымъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Бг҃оро́диченъ: Двє́ри свѣ́та, дв҃о мт҃и ѻ҆трокови́це: свѣ́томъ твои́мъ ѡ҆зарѝ вѣ́рою пою́щихъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
І҆рмо́съ: Тѧ̀ бл҃же́ннꙋю въ жена́хъ, и҆ бл҃гослове́ннꙋю бг҃омъ, человѣ́ческїй ро́дъ, пѣ́сньми велича́емъ.
Млⷭ҇тивъ бꙋ́ди мѝ гдⷭ҇и, без̾ числа̀ безꙋ́мнѡ согрѣши́вшемꙋ, и҆ твоегѡ̀ црⷭ҇твїѧ сло́ве сподо́би мѧ̀.
Ꙗ҆́коже нїнеѵі́тѧны сп҃слъ є҆сѝ дре́вле пока́ѧвшыѧсѧ є҆ди́не сп҃се, и҆ на́съ пою́щихъ тѧ̀ сп҃сѝ млⷭ҇тїю твое́ю.
Мч҃нченъ: Пло́ть преда́вше всѧ́чєскимъ ꙗ҆́звамъ, неꙋѧ́звленꙋ сп҃слѝ є҆стѐ дꙋ́шꙋ стрⷭ҇тоте́рпцы гдⷭ҇ни, бж҃е́ственныѧ сла́вы прича̑стницы.
Мч҃нченъ: Днесїѧ́тєльныѧ ѕвѣ́зды, на землѝ всѣ́хъ ѡ҆зарѧ́ющи дꙋ́шы, стрⷭ҇тоно́сцы всѣ́хъ гдⷭ҇а ꙗ҆ви́стесѧ.
Бг҃оро́диченъ: Но́сиши ꙗ҆́коже прⷭ҇то́лъ ѻ҆́гненный ма́нїемъ всѧ̑ носѧ́щаго, и҆ сосце́ма пита́еши дв҃о, всѣ́хъ пита́ющаго.
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Чинѡ́мъ нача̑льницы бы́вше а҆́гг҃льскимъ, пресвѣ́тлый мїхаи́ле, и҆ ты̀ гаврїи́ле бж҃е́ственнагѡ воплоще́нїѧ всеи́стинный проповѣ́дникъ бы́въ, всѣ́хъ сохранѧ́йте пою́щихъ ва́съ сла́внїи. [Два́жды.]
И҆́же бога́тыми дарова́ньми преизлива́ѧй своѧ̑ сокрѡ́вища, и҆́же чи́ны приведы́й а҆́гг҃льскїѧ, съ ни́ми же прише́дъ ꙗ҆́кѡ сꙋдїѧ̀, и҆ всѣ́хъ цр҃ь, сп҃си́ мѧ влⷣко прибѣга́ющаго къ млⷭ҇ти твое́й.
Бг҃оро́диченъ: Оу҆́мнѣ а҆рха́гг҃ли, вла̑сти, прⷭ҇то́ли, херꙋві́ми, си̑лы и҆ серафі́ми, а҆́гг҃ли свѣ́тлїи, нача̑ла и҆ гдⷭ҇ьствїѧ, твоемꙋ̀ сн҃ꙋ пренепоро́чнаѧ чⷭ҇таѧ, съ тре́петомъ слꙋ́жатъ, бцⷣе всебл҃же́ннаѧ.
На стїхо́внѣ стїхи̑ры покаѧ́нны, гла́съ є҃:
Мно́жєства прегрѣше́нїй мои́хъ пре́зри гдⷭ҇и, и҆́же ѿ дв҃ы рожде́йсѧ: и҆ всѧ̑ ѡ҆чи́сти грѣхѝ моѧ̑, мы́сль мнѣ̀ подаѧ̀ ѡ҆браще́нїѧ, ꙗ҆́кѡ є҆ди́нъ чл҃вѣколю́бецъ, молю́сѧ, и҆ поми́лꙋй мѧ̀.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Оу҆вы̀ мнѣ̀, комꙋ̀ ᲂу҆подо́бихсѧ а҆́зъ; непло́днѣй смоко́вницѣ, и҆ бою́сѧ проклѧ́тїѧ съ посѣче́нїемъ: но нбⷭ҇ный дѣ́лателю хрⷭ҇тѐ бж҃е, ѡ҆лѧденѣ́вшꙋю дꙋ́шꙋ мою̀ плодоно́снꙋ покажѝ, и҆ ꙗ҆́кѡ блꙋ́днаго сы́на прїими́ мѧ, и҆ поми́лꙋй мѧ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Бл҃гослове́но во́инство нбⷭ҇нагѡ цр҃ѧ̀: а҆́ще бо и҆ земноро́днїи бѣ́ша стрⷭ҇тоте́рпцы, но а҆́гг҃льское досто́инство потща́шесѧ дости́гнꙋти, ѡ҆ тѣлесѣ́хъ неради́ша, и҆ страда́ньми безпло́тныхъ сподо́бишасѧ че́сти. тѣ́мже мл҃твами и҆́хъ гдⷭ҇и, низпослѝ на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ѡ҆бра́дованнаѧ, хода́тайствꙋй твои́ми мл҃твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е: И҆ по Ѻ҆́ч҃е на́шъ: Тропа́рь ст҃о́мꙋ, а҆́ще и҆́мать: а҆́ще ли нѝ, глаго́лемъ тропа́рь днѐ. Та́же є҆ктенїа̀, и҆ ча́съ а҃, и҆ про́чее ѻ҆бы́чно. И҆ ѿпꙋ́стъ.
Въ понедѣ́льникъ бл҃жє́нны, гла́съ є҃.
Разбо́йникъ на крⷭ҇тѣ̀ бг҃а тѧ̀ бы́ти вѣ́ровавъ хрⷭ҇тѐ, и҆сповѣ́да тѧ̀ чи́стѣ ѿ се́рдца, помѧни́ мѧ гдⷭ҇и, вопїѧ̀, во црⷭ҇твїи твое́мъ.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Дꙋшетлѣ́ннїи разбѡ́йницы, на пꙋтѝ жите́йстѣмъ срѣ́тше ᲂу҆ѧзви́ша мѧ̀: но къ твоемꙋ̀ бл҃гоꙋтро́бїю ны́нѣ притека́ю, и҆сцѣлѝ хрⷭ҇тѐ, и҆ сп҃си́ мѧ, молю́сѧ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Нбⷭ҇нїи ли́цы пѣсносло́вѧтъ тѧ̀ всѣ́хъ бг҃а: тѣ́хъ влⷣко сщ҃е́нными хода́тайствы, мнѡ́гаѧ мѝ пре́зри ѕла̑ѧ, и҆ сп҃си́ мѧ, молю́сѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
А҆́гг҃льскимъ ликѡ́мъ сочислѧ́еми хрⷭ҇тѡ́вы страда́льцы, и҆ и҆сполнѧ́еми просвѣще́нїѧ невече́рнѧгѡ, смра̑дныѧ стра̑сти се́рдца моегѡ̀ потреби́те.
Сла́ва: А҆́гг҃льски земноро́днїи, въ вы́шнихъ пое́момꙋ бг҃ꙋ, воспои́мъ трист҃ꙋ́ю пѣ́снь: ст҃ъ є҆сѝ пребезнача́льне ѻ҆́ч҃е, сн҃е со дх҃омъ.
И҆ ны́нѣ: Ꙗ҆́же а҆́гг҃ломъ ра́дость во твое́й ᲂу҆тро́бѣ воспрїе́мши чⷭ҇таѧ, сѣ́тꙋющꙋю лꙋка́выми дѣ́лы, дꙋ́шꙋ мою̀ и҆спо́лни ра́дости, къ свѣ́тꙋ наставлѧ́ющи мѧ̀.