на Гдⷭ҇и воззва́хъ, стїхи̑ры крⷭ҇тны, гла́съ є҃:
Подо́бенъ: Прпⷣбне ѻ҆́тче:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Всѧ̑ древа̀ дꙋбра̑внаѧ да возра́дꙋютсѧ, дре́во ви́дѧще всечестно́е, стрⷭ҇тїю влⷣчнею ѡ҆бра́дованно, бл҃года́ть ѡ҆блистава́ющее ꙗ҆́кѡ пла́мень ѻ҆гнѧ̀, и҆сточа́ющее ꙗ҆́коже во́ды дарова̑нїѧ всѣ̑мъ, дꙋ́шы просвѣща́ющее и҆ помышлє́нїѧ, недꙋ́ги ѡ҆чища́ющее и҆ стра̑сти ѿгонѧ́ющее неви̑димыѧ, ꙗ҆зы́ки и҆ноплемє́нныѧ побѣжда́ющее ꙗ҆́вѣ, побѣ̑ды подаю́щее всегда̀ вѣ̑рнымъ, благослове́нїе и҆ ве́лїю ми́лость.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Мѣ́стꙋ, и҆дѣ́же стоѧ́сте но́зѣ гдⷭ҇ни, вѣ́рою покланѧ́ющесѧ, ꙗ҆́коже прⷪ҇ро́къ речѐ: хрⷭ҇та̀ славосло́вимъ распе́ншагосѧ и҆ сраспе́нша прегрѣшє́нїѧ на̑ша: ю҆́же ѿ дре́ва разори́вшаго клѧ́твꙋ, и҆ примири́вша ѻ҆ц҃ꙋ̀ ѿстоѧ́щыѧ ѿню́дъ помышле́ньми. рꙋчны̑ѧ же є҆гѡ̀ и҆ ножны̑ѧ гвѡ́здїѧ, копїѐ и҆ тро́сть, гꙋ́бꙋ и҆ вѣне́цъ ѡ҆блобыза́юще, досаждє́нїѧ и҆ нарꙋга̑нїѧ, и҆ и҆́на є҆ли̑ка под̾ѧ́тъ, че́стнѣ почита́емъ, и҆́миже спасо́хомсѧ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Всѧ̑ ᲂу҆́ды хрⷭ҇тꙋ̀ сраспне́мъ, и҆ мі́рови ᲂу҆мертви́мсѧ, и҆ мїроде́ржцꙋ хрⷭ҇тꙋ̀ по стопа́мъ ходи́ти вожделѣ́вше, тогѡ́же на ра́мѣхъ бж҃е́ственный крⷭ҇тъ но́симъ, ѿверже́нїемъ плотска́гѡ взыгра́нїѧ, и҆ похоте́й ѕлы́хъ, ꙗ҆́же дꙋ́шꙋ влекꙋ́тъ ко грѣхꙋ̀, томꙋ̀ мнѧ́ще предста́ти, и҆ зрѣ́ти того̀ на крⷭ҇тѣ̀ пригвожде́на, и҆ дꙋ́шꙋ свою̀ въ рꙋ́цѣ роди́телю со и҆здыха́нїемъ преда́вша, ꙗ҆́кѡ да всегда̀ съ ни́мъ бꙋ́демъ неразлꙋ́чни.
И҆́ны стїхи̑ры бцⷣѣ, гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Є҆гда̀ гро́здъ ненасажде́нъ сꙋ́щъ, ꙗ҆́кѡ лоза̀ ѿрасти́ла є҆сѝ, ᲂу҆зрѣ́вши на дре́вѣ повѣ́шена, прободе́на же копїе́мъ въ бж҃е́ствєнныѧ ре́бра: что̀ сїѐ, глаго́лаше, сн҃е и҆ бж҃е мо́й; ка́кѡ и҆́же недꙋ́ги всѧ̑ и҆ стра̑сти и҆сцѣлѧ́ѧй, стра̑сти терпи́ши, безстра́стенъ сы́й по є҆стествꙋ̀ бж҃е́ственномꙋ; что́ ти безбл҃года́тнїи лю́дїе бл҃года́телю, сїѧ̑ возда́ша вмѣ́стѡ бл҃годѣѧ́нїй; вопїѧ́ше пречⷭ҇таѧ: но тогѡ̀ страстьмѝ, страсте́й мѧ̀ свободи́ти молѝ непреста́ннѡ, ꙗ҆́кѡ да сла́влю тѧ̀.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Пла́чемъ всѝ, и҆ рꙋ́цѣ распростре́мъ, и҆ бїе́мъ въ пє́рси, те́плѣ слезѧ́ще и҆ прекло́ньше колѣ̑на, лице́мъ бїю́ще въ зе́млю прилѣ́жнѡ, и҆ воздыха̑нїѧ возпꙋ́стимъ къ высотѣ̀, и҆̀же безмѣ́стными дѣ́лы прогнѣ́вавшїи бг҃а, за́повѣдей є҆гѡ̀ ѿверже́нїемъ, и҆зба́вити зовꙋ́ще въ бꙋ́дꙋщемъ сꙋдѣ̀ всѧ́кагѡ мꙋче́нїѧ, и҆̀же тебѐ ѡ҆печа́лившыѧ, и҆ ѡ҆браща́ющыѧсѧ, мольба́ми мт҃ре твоеѧ̀: за ни́хже крⷭ҇тъ претерпѣ́лъ є҆сѝ вопло́щьсѧ, и҆ твоегѡ̀ црⷭ҇твїѧ прича́стники сотворѝ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Комꙋ̀ ᲂу҆подо́биласѧ є҆сѝ дꙋшѐ, ᲂу҆спѣва́ющи въ го́ршихъ всегда̀, и҆ прилага́ющи безꙋ́мнѡ твои̑мъ ꙗ҆́звамъ стрꙋ́пы мно́жайшыѧ, ꙗ҆́кѡ всетѣле́снѣй бы́ти ꙗ҆́звѣ: не помышлѧ́ющи, ꙗ҆́кѡ сꙋдїѧ̀ приближа́етсѧ, є҆мꙋ́же предста́неши воспрїѧ́ти по дѣѧ́нїємъ, вины̀ и҆ томлє́нїѧ; но ѡ҆бра́щшисѧ припадѝ къ дв҃ѣ зовꙋ́щи: влⷣчце влⷣчце, не пре́зри мѧ̀ прогнѣ́вавшаго бг҃а бл҃гомлⷭ҇тиваго, и҆з̾ тебѐ на сп҃се́нїе чл҃вѣ́кѡвъ ро́ждшагосѧ, и҆ распе́ншагосѧ пло́тїю.
Сла́ва, и҆ ны́нѣ, крⷭ҇тобг҃оро́диченъ: Подо́бенъ: Ра́дꙋйсѧ:
И҆збавле́нїе на́съ ра́ди, и҆ цѣ́нꙋ вели́кꙋю, пречⷭ҇тꙋю кро́вь твою̀ и҆зво́лилъ є҆сѝ да́ти безгрѣ́шне хрⷭ҇тѐ мо́й, всѣ̑мъ хотѧ́й сп҃се́нїе полꙋчи́ти. тѣ́мже тѧ̀ зрѧ́щи пригвожде́на мт҃и твоѧ̀, рыда́ющи власы̀ терза́ше своѧ̑, глаго́лющи: ча́до, а҆́гнче всенепоро́чный, мі́ръ хотѧ̀ и҆зба́вити честно́ю твое́ю кро́вїю, ѿ ѻ҆́чїю мое́ю ка́кѡ заше́лъ є҆сѝ сп҃се, незаходи́мое сл҃нце, всѣ̑мъ подаѧ́й просвѣще́нїе, и҆ ми́ръ, и҆ ве́лїю млⷭ҇ть.
Та́же, Свѣ́те ти́хїй: Прокі́менъ дню̀: И҆ Сподо́би гдⷭ҇и въ ве́черъ се́й:
На стїхо́внѣ стїхи̑ры, гла́съ є҃:
Гдⷭ҇и, при мѡѷсе́и и҆ногда̀ прⷪ҇ро́цѣ, то́чїю ѡ҆́бразъ крⷭ҇та̀ твоегѡ̀ ꙗ҆влѧ́емъ, побѣжда́ше врагѝ твоѧ̑. ны́нѣ же са́мый крⷭ҇тъ тво́й и҆мꙋ́ще, по́мощи про́симъ: ᲂу҆крѣпѝ цр҃ковь твою̀, мно́гїѧ ра́ди млⷭ҇ти, чл҃вѣколю́бче.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Крⷭ҇тъ тво́й хрⷭ҇тѐ, а҆́ще и҆ дре́во ви́димо є҆́сть сꙋщество́мъ, но бж҃е́ственною ѡ҆дѣ́ѧно є҆́сть си́лою: и҆ чꙋ́вственнѡ мі́рови ꙗ҆влѧ́ѧсѧ, мы́сленнѡ на́ше чꙋдотвори́тъ спасе́нїе. є҆мꙋ́же покланѧ́ющесѧ, сла́вимъ тѧ̀ сп҃се, поми́лꙋй на́съ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ, наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Ѡ҆ земны́хъ всѣ́хъ неради́вше, и҆ на мꙋ̑ки мꙋ́жески дерзнꙋ́вше, бл҃же́нныхъ наде́ждъ не погрѣши́сте: но нбⷭ҇номꙋ црⷭ҇твїю наслѣ̑дницы бы́сте, прехва́льнїи мч҃нцы, и҆мꙋ́ще дерзнове́нїе къ чл҃вѣколюби́вомꙋ бг҃ꙋ, мі́рꙋ ᲂу҆мире́нїе и҆спроси́те, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ: Зрѧ́щи дре́вле а҆́гнца и҆ сн҃а своего̀ дв҃а мт҃и и҆ всебл҃же́ннаѧ ѻ҆трокови́ца, на крⷭ҇тѣ̀ возвы́шена, вопїѧ́ше слезѧ́щи: ᲂу҆вы̀ мнѣ̀ сн҃е мо́й, ка́кѡ ᲂу҆мира́еши, бг҃ъ є҆стество́мъ сы́й безсме́ртенъ;
Та́же, Ны́нѣ ѿпꙋща́еши раба̀ твоего̀ влⷣко: Трист҃о́е. По Ѻ҆́ч҃е на́шъ: тропа́рь ст҃о́мꙋ. Та́же є҆ктенїа̀, и҆ ѿпꙋ́стъ.
канѡ́нъ прест҃ѣ́й бцⷣѣ, гла́съ є҃.
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою хрⷭ҇то́съ и҆стрѧсѐ, і҆и҃лѧ же сп҃сѐ, побѣ́днꙋю пѣ́снь пою́ща.
Дрꙋгі́й ра́й зна́емъ тѧ̀ мы́сленный без̾ сравне́нїѧ, дв҃о бг҃оневѣ́сто, ѡ҆долѣва́ющїй и҆́же во є҆де́мѣ раю̀, бг҃омт҃и: ты́ бо нетлѣ́нїе человѣ́кѡмъ прозѧбла̀ є҆сѝ.
Дре́во жи́зни ѡ҆б̾ѧ́ти въ раѝ а҆да́мъ возбране́нъ бы́сть, ѿ дре́ва причасти́всѧ разꙋ́мнагѡ: безсме́ртїе же подадѐ, пло́ть ѿ тебѐ дв҃о прїе́мый.
Сла́ва: Пе́рвѣе ѿ землѝ со́зданъ бы́сть а҆да́мъ, пречⷭ҇тыма рꙋка́ма вседержи́телѧ: ѿ тебе́ же бцⷣе дв҃о роди́сѧ без̾ сѣ́мене но́вый а҆да́мъ, зижди́тель человѣ́чества.
И҆ ны́нѣ: Бе́здна послѣ́днѧѧ ѡ҆бы́де мѧ̀ безмѣ́рныхъ прегрѣше́нїй, и҆ во глꙋбинꙋ̀ низво́дитъ мѧ̀ лю́тагѡ ѿча́ѧнїѧ: ро́ждшаѧ бе́зднꙋ млⷭ҇рдїѧ, ᲂу҆скорѝ, и҆ сп҃си́ мѧ.
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
И҆́же живѡ́тнымъ садѡ́мъ зе́млю сотвори́вый роди́тельницꙋ, не сꙋ́щымъ на не́й пе́рвѣе, ѿ неискꙋсомꙋ́жныѧ жены̀ а҆́бїе ꙗ҆́кѡ ѿ землѝ, безсѣ́менный воплоща́емь прише́лъ є҆сѝ сло́ве бж҃їй неизмѣ́нный.
Ты̀ є҆сѝ земноро́дныхъ наде́жда и҆ по́мощь, и҆ ра́дость, и҆ покро́въ, и҆ прибѣ́жище, влⷣчце мт҃и живота̀. тѣ́мже мо́лимъ: твою̀ по́мощь низпослѝ всѣ̑мъ пою́щымъ тѧ̀.
Сла́ва: Недꙋ́гꙋющїй напа́стьми лю́тыми ѡ҆держи́ми, вседѣ́телю ще́дре, и҆́же всѧ́ческихъ бж҃е, трист҃ꙋ́ю твою̀ ски́нїю приво́димъ тѝ всѝ въ мл҃твꙋ, и҆ вопїе́мъ тѝ: разрѣшѝ ѡ҆бдержа́нїѧ ра̑бъ твои́хъ.
И҆ ны́нѣ: Смꙋща́етъ мѧ̀ лю́тѣ грѣхо́внаѧ волна̀, во глꙋбинꙋ̀ прегрѣше́нїй низвлеча̀, пречⷭ҇таѧ, и҆ бꙋ́рѧ сопроти́вныхъ помышле́нїй ѡ҆бꙋрева́етъ дꙋ́шꙋ мою̀: ѡ҆корми́телѧ ро́ждшаѧ, ᲂу҆скорѝ и҆з̾ѧ́ти раба̀ твоего̀.
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
Є҆́ѵа повинꙋ́вшисѧ ѕмі́ю, родѝ печа́ль жена́мъ: ты́ же дв҃о вѣ́ровавши бж҃їимъ вѣща́нїємъ, всемꙋ̀ мі́рꙋ ра́дость процвѣла̀ є҆сѝ.
Пе́рвѣе ѿ ре́бръ а҆да́мовыхъ рожде́на є҆́ѵа: ны́нѣ же бг҃ъ ѿ мт҃ре бг҃оневѣ́сты, є҆го́же воплоще́нна дв҃а без̾ ѻ҆ц҃а̀ родила̀ є҆́сть.
Сла́ва: Є҆́ѵа ра́дꙋетсѧ, дре́внѧгѡ бо прама́тернѧ ѡ҆сꙋжде́нїѧ свобожде́нꙋ ѻ҆трокови́ца показа̀, ꙗ҆́же сꙋдїю̀ заче́ншаѧ нетлѣ́ннѡ, и҆ ро́ждшаѧ млⷭ҇рдаго.
И҆ ны́нѣ: Житїѐ моѐ прегрѣше́нїй и҆спо́лнисѧ, по́мыслъ же стра́стенъ, и҆ дꙋша̀ моѧ̀ ѡ҆сꙋжде́на: тѣ́мже твои́мъ бл҃гоꙋтро́бїемъ поми́лꙋй, и҆ сп҃си́ мѧ влⷣчце.
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Сто́лпъ и҆ ѻ҆́блакъ свѣ́та тѧ̀ ѡ҆брѣ́тше, дв҃о мт҃и свѣтода́вца, и҆̀же по пꙋсты́ни ле́стнѣй ходѧ́щїи ѿ лю̑тъ и҆збѣга́емъ.
Ра́дꙋйсѧ ро́ждшаѧ бг҃а пло́тїю, пре́жде вѣ̑къ рожде́ннаго ѿ ѻ҆ц҃а̀ безпло́тнѣ, ꙗ҆ви́тисѧ же а҆́бїе на́мъ и҆зво́лившаго.
Сла́ва: Со́лнце побѣди́сѧ твое́ю свѣ́тлостїю мр҃і́е: ты́ бо свѣти́лы нб҃о ᲂу҆краси́вшаго рꙋка́ма ѡ҆б̾ѧ́ла є҆сѝ, и҆ ѿ твое́ю сосцꙋ̀ пита́ла є҆сѝ.
И҆ ны́нѣ: Да не ѡ҆сꙋ́диши менѐ во ѻ҆́гнь негаси́мый, хрⷭ҇тѐ сп҃се мо́й, мольба́ми чⷭ҇тыѧ, ро́ждшїѧ тѧ̀.
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ ꙗ҆́кѡ бл҃гоꙋтро́бенъ.
И҆́же въ ки́тѣ сп҃сшаго прⷪ҇ро́ка дре́вле і҆ѡ́нꙋ, невре́днѡ носи́ла є҆сѝ во ᲂу҆тро́бѣ твое́ю чꙋ́днаго бг҃а чⷭ҇таѧ приснодв҃о.
Держа́щаго гдⷭ҇а морѧ̀, пречⷭ҇таѧ дв҃о бг҃а небꙋ́рнѡ, ꙗ҆́коже си̑лы носѧ́щи, сла́ное возмꙋще́нїѧ льстѝ ᲂу҆спи́ла є҆сѝ.
Сла́ва: Всѧ́ческихъ тишинꙋ̀ ро́ждши пречⷭ҇таѧ хрⷭ҇та̀, ꙗ҆̀же къ немꙋ̀ бл҃гоꙋкротѝ мл҃твами твои́ми, ю҆́же на мѧ̀ страсте́й непостоѧ́ннꙋю бꙋ́рю.
И҆ ны́нѣ: Въ де́нь печа́ли, є҆гда̀ хощꙋ̀ тѣле́сныхъ соꙋ́зъ разрѣши́тисѧ, предста́ни мѝ, и҆ ѡ҆бдержа́нїѧ бѣсо́вскагѡ и҆схитѝ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ є҃:
На крⷭ҇тѣ̀ зрѧ́щи тѧ̀ хрⷭ҇тѐ мт҃и твоѧ̀ во́лею посредѣ̀ разбѡ́йникꙋ ви́сѧща, растерза́ющисѧ мт҃рски ᲂу҆тро́бою, глаго́лаше: безгрѣ́шне сн҃е, ка́кѡ непра́веднѡ на крⷭ҇тѣ̀ ꙗ҆́коже ѕлодѣ́й распѧ́тсѧ, и҆́же человѣ́ческїй ѡ҆живи́ти хотѧ̀ ро́дъ, ꙗ҆́кѡ пребл҃гі́й;
І҆рмо́съ: Превозноси́мый ѻ҆тцє́въ гдⷭ҇и, пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е бл҃гослове́нъ є҆сѝ.
И҆́же къ пра́ѻтцꙋ а҆враа́мꙋ прише́ствїе бг҃ъ совершѝ, сн҃ъ тво́й бы́въ: и҆ сѣ́мѧ є҆гѡ̀ во ꙗ҆зы́ки бл҃гословѝ, бл҃гослове́ннаѧ.
Ты̀ лѣ́ствица є҆сѝ і҆а́кѡвлѧ нескве́рнаѧ: мт҃рь бо є҆ди́нꙋ тѧ̀ бг҃ъ написа̀, є҆ѧ́же ра́ди бг҃ъ совокꙋпѝ ѻ҆́нагѡ и҆сча̑дїѧ.
Сла́ва: Превозноси́мый со ѻ҆ц҃е́мъ и҆ дх҃омъ сн҃ъ, и҆збра́въ тебѐ чⷭ҇таѧ, ѕѣлѡ̀ возлюбѝ въ жили́ще себѣ̀ воплоща́емь.
И҆ ны́нѣ: Бг҃а, є҆го́же родила̀ є҆сѝ, всегда̀ молѝ, ѿча́ѧннаго мѧ̀ сп҃стѝ, и҆ ᲂу҆лꙋчи́ти просты́ню, вѣ́рою вопїю́щемꙋ: бж҃е бл҃гослове́нъ є҆сѝ.
І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
И҆спыта́нїѧ твоѐ ᲂу҆бѣга́етъ ржⷭ҇тво̀ дв҃о, вѣ́рою же ꙗ҆влѧ́етсѧ вопїю́щымъ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.
Всѧ́кѡ дв҃и́ческїѧ не ѿпа́дши сла́вы, ма́терскою ѡ҆богати́ласѧ є҆сѝ че́стїю, безневѣ́стнаѧ: вѣ́сть и҆́же сїѧ̑ ꙗ҆́вѣ чꙋдодѣ́йствовавый, є҆гѡ́же превозно́симъ во вѣ́ки.
Сла́ва: Ви́ждь бл҃га́ѧ пречⷭ҇таѧ, смире́нныѧ моеѧ̀ дꙋшѝ ѡ҆ѕлобле́нїе, и҆ болѣ́знь премѣнѝ вско́рѣ: да тѧ̀ сла́влю во вѣ́ки.
И҆ ны́нѣ: Прїимѝ млⷭ҇тивнѡ твою̀ мт҃рь сло́ве, молѧ́щꙋюсѧ сп҃стѝ твоѧ̑ лю́ди бл҃же, ꙗ҆̀же стѧжа́лъ є҆сѝ честно́ю твое́ю кро́вїю: да тебѐ бл҃гослови́мъ во всѧ̑ вѣ́ки.
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила: бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Бцⷣе влⷣчце, ᲂу҆молѝ покланѧ́емꙋю трⷪ҇цꙋ, ѿ неѧ́же безстра́стнѡ є҆ди́наго пло́тїю на́мъ родила̀ є҆сѝ, ᲂу҆мири́ти сꙋ́щыѧ на землѝ, и҆ разрѣше́нїю прегрѣше́нїй пою́щымъ тѧ̀ дарова́тисѧ.
А҆́ще и҆ є҆ди́нъ разꙋмѣ́етсѧ лице́мъ є҆мманꙋ́илъ, но є҆стество́мъ сꙋгꙋ́бъ: се́ бо двѣ̀ возвѣща́ѧ вѡ́ли, ꙗ҆̀же въ не́мъ и҆ дѣ̑йства, є҆гѡ́же роди́тельницꙋ бцⷣꙋ и҆сповѣ́дꙋемъ.
Сла́ва: Себѐ рыда́ю помышлѧ́ѧ мои́хъ грѣхѡ́въ мно́жество, и҆ страсте́й возшє́ствїѧ, дꙋшѝ моеѧ̀ ᲂу҆ны̑нїѧ, и҆ ᲂу҆ма̀ моегѡ̀ и҆зстꙋплє́нїѧ, ѿча́ѧннаго мѧ̀ сп҃се́нїѧ сподо́би.
И҆ ны́нѣ: Вразѝ моѝ наше́дше гдⷭ҇и, ꙗ҆́коже разбѡ́йницы, вы́шнюю свѣ́тлꙋю и҆ свѣтови́днꙋю ѻ҆де́ждꙋ совле́кше, и҆ ра̑ны мѝ наложи́ша мнѡ́ги: ты̀ предста́вши є҆́ле жи́ва возста́ви.
Та́же, Досто́йно є҆́сть: И҆ покло́нъ. Та́же, Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
По а҃-мъ стїхосло́вїи сѣда́льны крⷭ҇тны, гла́съ є҃:
Мѣ́сто ло́бное ра́й бы́сть: то́чїю бо водрꙋзи́сѧ дре́во крⷭ҇тное, а҆́бїе и҆зрастѝ гро́здъ живо́тный, тебѐ сп҃се въ на́ше весе́лїе, сла́ва тебѣ̀.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Распе́ншагосѧ сп҃са и҆ и҆зба́вителѧ на́шего во́лею ꙗ҆́кѡ вѣ́сть, и҆ ꙗ҆́коже бл҃гоизво́ли, воспои́мъ вѣ́рнїи, и҆ просла́вимъ: ꙗ҆́кѡ пригвоздѝ на крⷭ҇тѣ̀ грѣхѝ человѣ́кѡвъ, и҆збавлѧ́ѧ ѿ ле́сти ро́дъ чл҃вѣ́ческїй, и҆ црⷭ҇твїѧ сподо́билъ є҆́сть.
Сла́ва, и҆ ны́нѣ, крⷭ҇тобг҃оро́диченъ: На крⷭ҇тѣ́ тѧ хрⷭ҇тѐ, зрѧ́щи мт҃и твоѧ̀, во́лею посредѣ̀ разбѡ́йникꙋ ви́сѧща, растерза́ющисѧ мт҃рски ᲂу҆тро́бою, глаго́лаше: безгрѣ́шный сн҃е, ка́кѡ без̾ пра́вды на крⷭ҇тѣ̀ ꙗ҆́кѡ ѕлодѣ́й пригвозди́лсѧ є҆сѝ, ро́дъ человѣ́ческїй ѡ҆живи́ти хотѧ̀ ꙗ҆́кѡ пребл҃гі́й;
По в҃-мъ стїхосло́вїи сѣда́льны крⷭ҇тны, гла́съ є҃:
Распѧ́тїе претерпѣ́въ твое́ю во́лею, и҆ ѿ тлѝ человѣ́ки свободи́лъ є҆сѝ сп҃се! воспѣва́емъ вѣ́рнїи, и҆ покланѧ́емсѧ тѝ, ꙗ҆́кѡ просвѣти́лъ є҆сѝ на́съ си́лою крⷭ҇тною, и҆ всѝ прославлѧ́емъ тѧ̀ чл҃вѣколю́бче ще́дрый, ꙗ҆́кѡ жизнода́вца и҆ гдⷭ҇а.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Во́лею ще́дре крⷭ҇тъ претерпѣ́лъ є҆сѝ, и҆ дре́внюю клѧ́твꙋ ꙗ҆́же ра́ди снѣ́ди, ꙗ҆́кѡ всеси́льный бг҃ъ ты̀ потреби́лъ є҆сѝ. тѣ́мже бж҃е́ствєнныѧ и҆ честны̑ѧ стра̑сти твоѧ̑ влⷣко хрⷭ҇тѐ, пое́мъ и҆ покланѧ́емсѧ славосло́вѧще непреста́ннѡ, є҆́же па́че сло́ва смотре́нїе твоѐ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Сїѧ́етъ дне́сь па́мѧть стрⷭ҇тоте́рпєцъ и҆́мать бо и҆ ѿ нб҃съ зарю̀: ли́къ а҆́гг҃льскїй торжествꙋ́етъ, и҆ человѣ́ческїй ро́дъ спра́зднꙋетъ. тѣ́мже мо́лѧтсѧ гдⷭ҇еви, поми́ловатисѧ дꙋша́мъ на́шымъ.
Сла́ва, и҆ ны́нѣ, крⷭ҇тобг҃оро́диченъ: Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ. сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ, и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.
По г҃-мъ стїхосло́вїи сѣда́льны, гла́съ є҃:
Подо́бенъ: Собезнача́льное сло́во:
На крⷭ҇тѣ́ тѧ пригвожде́на, и҆ ᲂу҆снꙋ́вша, а҆́гг҃льстїи чи́нове ви́дѣвше, ᲂу҆жасо́шасѧ, і҆и҃се всѣ́хъ цр҃ю̀: и҆ побѣжде́ни быва́хꙋ а҆́бїе бѣсо́вствїи полцы̀, и҆ сокрꙋши́шасѧ верєѝ а҆́дѡвы: и҆ сме́ртное мꙋчи́тельство низложи́сѧ, и҆ сꙋ́щїи во гробѣ́хъ ме́ртвїи воскресо́ша.
Ѿ дре́ва го́ресть а҆да́мъ ѡ҆б̾ѧ́тъ, къ тлѣ́нїю попо́лзсѧ за́вистїю ѕмїи́ною: тебѣ́ же пригвожде́нꙋ бы́вшꙋ і҆и҃се, живота̀ наслади́сѧ, и҆ дре́ва ра́ди крⷭ҇тнагѡ па́ки вселѧ́емь быва́етъ на нб҃сѣ́хъ. и҆ ᲂу҆праздни́сѧ ѕмі́й, и҆ тлѧ̀ поже́рта бы́сть: и҆ всѝ сла́вꙋ тѝ прино́симъ.
Сла́ва, и҆ ны́нѣ: крⷭ҇тобг҃оро́диченъ: Вознесе́на на дре́во ꙗ҆́кѡ ви́дѣ, ро́ждшаѧ тѧ̀ сп҃се, болѣ́зней кромѣ̀, рыда́ше съ пла́чемъ, и҆ взыва́ше: ᲂу҆вы̀ мнѣ̀ сладча́йшїй сн҃е, ᲂу҆ѧзвлѧ́юсѧ дꙋше́ю, на крⷭ҇тѣ̀ зрѧ́щи тѧ̀ пригвожде́на посредѣ̀ двою̀ ѕлѡдѣ́ю, сꙋдо́мъ ѕлодѣ́йственнымъ.
Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, творе́нїе кѵ́ръ і҆ѡ́сифа, [є҆го́же краегране́сїе: Страсте́й мѧ̀ сп҃са́еши стрⷭ҇тїю твое́ю хрⷭ҇тѐ мо́й.] Гла́съ є҃:
І҆рмо́съ: Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Страстоꙋбі́йственнꙋю хрⷭ҇тѐ, хотѣ́нїемъ твои́мъ претерпѣ́лъ є҆сѝ стра́сть, и҆ ᲂу҆би́лъ є҆сѝ въ раѝ дре́вле на́съ ᲂу҆би́вшаго: тѣ́мже твою̀ сла́вимъ бл҃госты́ню.
Воздви́глсѧ є҆сѝ на крⷭ҇тъ, и҆ низпаде́сѧ вра́гъ: и҆ па́дшїи воздвиго́хомсѧ, и҆ ра́йстїи жи́тели хрⷭ҇тѐ, бы́хомъ, держа́вꙋ сла́вѧще црⷭ҇твїѧ твоегѡ̀.
Мч҃нченъ: Щито́мъ кре́стнымъ воѡрꙋжи́вшесѧ до́брѣ, къ боре́нїю всѧ́комꙋ бѣсо́вскомꙋ ѡ҆полчи́стесѧ премꙋ́дрїи великомч҃нцы: и҆ того̀ побѣди́вше, сла́вꙋ полꙋчи́сте.
Мч҃нченъ: Ꙗ҆́кѡ а҆́гнцы честні́и, на́съ ра́ди страда́льцы а҆́гнцꙋ пожре́номꙋ принесо́стесѧ, нечи̑стыѧ жє́ртвы ꙗ҆́вѣ ᲂу҆ста́вльше: тѣ́мже ᲂу҆бл҃жа́емъ ва́съ всехва́льнїи.
Бг҃оро́диченъ: Но́во ѻ҆троча̀ на́мъ ве́тхаго де́ньми, чⷭ҇таѧ дв҃о родила̀ є҆сѝ, ѡ҆бетша́вшее є҆стество̀ человѣ́ческое ѡ҆бновлѧ́юща, всенепоро́чнаѧ, бж҃е́ственною стра́стїю свое́ю.
Дрꙋгі́й канѡ́нъ прест҃ѣ́й бцⷣѣ, і҆рмо́съ то́йже.
Бл҃гоꙋтро́бїѧ и҆сто́чникъ, и҆ предста́тельницꙋ те́плꙋю вѣ́мъ тѧ̀ всенепоро́чнаѧ, дв҃о мт҃и мр҃і́е, и҆ взыва́ю тѝ: поми́лꙋй и҆ ᲂу҆ще́дри смире́ннꙋю мою̀ дꙋ́шꙋ.
Въ нѣ́дрѣхъ твои́хъ сн҃ъ бж҃їй чⷭ҇таѧ, всели́всѧ, и҆ воспрїѧ́тъ человѣ́ческое сꙋщество̀ ꙗ҆́кѡ пребл҃гі́й, всѣ́хъ и҆зба́ви ѿ тлѝ ѕмі́евы.
Просвѣще́нїе мѝ бꙋ́ди, и҆ сп҃се́нїю наде́жда бг҃ороди́тельнице всенепоро́чнаѧ, прегрѣше́нїй разрѣша́ющи плени̑цы, и҆ и҆збавлѧ́ющи мѧ̀ бꙋ́дꙋщїѧ мꙋ́ки и҆ ѡ҆сꙋжде́нїѧ.
Помышле́нїй лꙋка́выхъ смире́ннꙋю мою̀ дꙋ́шꙋ свободѝ, бг҃ороди́тельнице: и҆ жили́ще бж҃їе тꙋ̀ содѣ́лай, да по до́лгꙋ тѧ̀ сла́влю всегда̀.
І҆рмо́съ: Си́лою крⷭ҇та̀ твоегѡ̀ хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити сп҃си́тельное твоѐ вознесе́нїе.
Оу҆вѧда́еши плода̀ тлю̀, на дре́во сп҃се воздвиза́емь, и҆ нетлѣ́нїѧ и҆сто́чники на́мъ ѿ ре́бръ и҆сточа́еши, влⷣко.
Закла́сѧ на крⷭ҇тѣ̀ ꙗ҆́коже а҆́гнецъ, пра́ги назна́менꙋѧ дꙋ́шъ на́шихъ бж҃е́ственною твое́ю кро́вїю влⷣко: тѣ́мже тѧ̀ со стра́хомъ сла́вимъ.
Мч҃нченъ: Вѧ́жеми хрⷭ҇тѡ́вы страда́льцы, и҆ многоѡбра́знѣ ᲂу҆ранѧ́еми, и҆ ѕвѣрє́мъ помета́еми, непрело́жни пребы́сте.
Мч҃нченъ: Ꙗ҆́коже гро́здїе вїногра́да живо́тнагѡ, мꙋче́нїѧ вїно̀ и҆сточи́ша, вѣ́рныхъ сердца̀ веселѧ́щее, бг҃а на́шегѡ мч҃нцы.
Бг҃оро́диченъ: Жи́зни на́мъ хода́тай чⷭ҇таѧ, ᲂу҆мира́ѧ на дре́вѣ ꙗ҆ви́сѧ тво́й сн҃ъ же и҆ гдⷭ҇ь, прославлѧ́ѧй пою́щыѧ тѧ̀.
Въ ро́въ поги́бельный лю́тыхъ согрѣше́нїй впа́дша мѧ̀, бг҃ороди́тельнице, и҆зведѝ бл҃гоꙋтро́бною твое́ю бл҃гостїю.
Къ ве́черꙋ житїѧ̀ прише́дъ, и҆ недоꙋмѣ́нїемъ ѡ҆держи́мь є҆́смь, вопїю́ ти всепѣ́таѧ: ты̀ помо́щница мѝ ꙗ҆ви́сѧ.
Ст҃а́ѧ бцⷣе чⷭ҇таѧ, пода́ждь разрѣше́нїе прегрѣше́нїй мои́хъ: и҆ сп҃се́нїе мѝ и҆спросѝ, и҆ ра́дованїе вѣ́чное.
Ка́плю мѝ сле́зъ чⷭ҇таѧ пода́ждь, ꙗ҆́кѡ да ѿ се́рдца моегѡ̀ ѿженꙋ̀ недоꙋмѣ́нїе, и҆ и҆́скреннѡ воспою́ тѧ.
І҆рмо́съ: Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й гдⷭ҇и.
Є҆гда̀ заше́лъ є҆сѝ на крⷭ҇тѣ̀ пра́вды сл҃нце хрⷭ҇тѐ, свѣ́тъ невече́рнїй возсїѧ́лъ є҆сѝ на́мъ, пою́щымъ твоѐ, сло́ве, стра́шное смотре́нїе.
Стоѧ́щꙋ тѝ сꙋдїѐ, и҆ногда̀ пред̾ сꙋди́щемъ хрⷭ҇тѐ, ѡ҆сꙋди́лъ є҆сѝ непра́веднаго врага̀: и҆ распѧ́лсѧ є҆сѝ посредѣ̀ непра́ведныхъ, на́съ ѡ҆правда́ѧ.
Мч҃нченъ: Вѣнча́еми побѣди́тельнѡ, гдⷭ҇ни страда́льцы, неви́димаго посрами́ша врага̀, и҆ взыва́хꙋ: сла́ва си́лѣ твое́й гдⷭ҇и.
Мч҃нченъ: Неꙋвѧда́ємыѧ цвѣ́ты мы́сленнагѡ раѧ̀ многоцѣ̑нныѧ сосꙋ́ды, хрⷭ҇тѡ́вы стрⷭ҇тоте́рпцы, вѣ́рою сше́дшесѧ да почти́мъ.
Бг҃оро́диченъ: Є҆гда̀ ᲂу҆зрѣ́ла на крⷭ҇тѣ̀ хрⷭ҇та̀, є҆го́же родила̀ є҆сѝ чⷭ҇таѧ, диви́ласѧ є҆сѝ неизрече́нномꙋ є҆гѡ̀ долготерпѣ́нїю: тѣ́мже тѧ̀ съ ни́мъ прославлѧ́емъ.
Ѡ҆ содѣ́ѧнїихъ мои́хъ лꙋка́выхъ, и҆ прегрѣше́нїихъ мно́гихъ, кто̀ возмо́жетъ ᲂу҆моли́ти сꙋдїю̀, а҆́ще не ты̀ чⷭ҇таѧ, є҆ди́на согрѣша́ющихъ застꙋ́пнице;
Мно́гими мѧ̀ па́дша прегрѣше́нїи, и҆ грѣхѝ поработи́вша мою̀ дꙋ́шꙋ, воздви́гни си́лою твое́ю пречⷭ҇таѧ, и҆ разрѣши́ мѧ мл҃твою ѿ рабо́ты.
Ꙗ҆́кѡ ро́ждшаѧ творца̀ и҆ цр҃ѧ̀ всѧ́ческихъ, бцⷣе всенепоро́чнаѧ чⷭ҇таѧ, ты́ мѧ и҆зба́ви всѧ́кагѡ скве́рнагѡ согрѣше́нїѧ.
Себѐ сама́го пла́чꙋ, є҆гда̀ въ помышле́нїе прїидꙋ̀ мно́гихъ мои́хъ прегрѣше́нїй, и҆ ѻ҆гнѧ̀ негаси́магѡ: молю́сѧ, да́ждь мѝ вре́мѧ покаѧ́нїѧ, пречⷭ҇таѧ.
І҆рмо́съ: Оу҆́тренююще вопїе́мъ тѝ гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ во тебѐ и҆но́гѡ не зна́емъ.
Ка́менїе тѧ̀ на ка́мени ѡ҆щꙋти́вше хрⷭ҇тѐ, воздви́жена, распадо́шасѧ, и҆ землѝ потрѧсо́шасѧ ѡ҆снова̑нїѧ.
Ѿложѝ свѣ́тлость со́лнце, воздви́женꙋ тебѣ̀ на дре́во, сл҃нце пра́ведное долготерпѣли́ве.
Мч҃нченъ: Чꙋде́съ блиста́ете ст҃і́и свѣ́тлостїю, тьмꙋ̀ ѿгонѧ́юще болѣ́зней дꙋ́хомъ.
Мч҃нченъ: Разсѣка́ема бѣ́ша тѣлеса̀ ва̑ша мечѝ, дх҃ъ же бж҃е́ственныѧ любвѐ не ѿсѣка́емь и҆мѣ́сте мч҃нцы.
Бг҃оро́диченъ: Ви́дѣвши на крⷭ҇тъ воздви́жена сп҃са, рыда́ющи восклица́ше, дв҃о мт҃и всенепоро́чнаѧ.
Всетѣле́снꙋю мѝ ꙗ҆́звꙋ прїе́мшꙋ грѣха̀, бы́лїемъ ᲂу҆врачꙋ́й млⷭ҇рдїѧ твоегѡ̀ влⷣчце.
Тече́нїе тлѣ́нїю дре́вле ᲂу҆ста́вила є҆сѝ бж҃е́ственнымъ ржⷭ҇тво́мъ: и҆ ны́нѣ прегрѣше́нїй мои́хъ ᲂу҆ста́ви тече́нїе, пренепоро́чнаѧ.
Поми́лꙋй и҆ ᲂу҆ще́дри влⷣчце, дꙋ́шꙋ мою̀, и҆ и҆зба́ви ѡ҆сꙋжде́нїѧ, и҆ вѣ́чныѧ мꙋ́ки.
При́зри и҆ ᲂу҆слы́ши влⷣчце, гла́съ мо́й: и҆ молю́сѧ, и҆зба́ви мѧ̀ вѣ́чнагѡ мꙋче́нїѧ.
І҆рмо́съ: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, а҆́зъ же возопи́хъ къ тебѣ̀ чл҃вѣколю́бцꙋ, и҆ сп҃се́ мѧ десни́ца твоѧ̀ гдⷭ҇и.
Крⷭ҇тъ на землѝ водрꙋжа́шесѧ, и҆ паде́нїе бѣсѡ́мъ быва́ше: и҆ вѣ́ра ᲂу҆твержде́нїѧ нача́ло прїима́ше, и҆ ѕло́ба ѿ среды̀ ѿгони́ма быва́ше.
Со́лнце ᲂу҆гасѐ, пло́ть твою̀ ꙗ҆́коже свѣщꙋ̀ возже́гшꙋ тѝ на дре́вѣ гдⷭ҇и: дра́хма же ѡ҆брѣта́шесѧ погребе́наѧ мра́чными страстьмѝ.
Мч҃нченъ: Воздви́женꙋ тѝ чл҃вѣколю́бче на дре́во, ли́къ мч҃нкъ послѣ́дꙋющъ стопа́мъ твои̑мъ и҆мѣ́лъ є҆сѝ, стрⷭ҇ти твое́й подо́бѧщьсѧ, безстра́стїю хода́таицѣ.
Мч҃нченъ: Пото́ки и҆зсꙋши́ли є҆стѐ прелє́стныѧ кро́внымъ тече́нїемъ, и҆ ѻ҆́гнь ᲂу҆гаси́сте чꙋ́ждїй бѣсѡ́въ бж҃е́ственною росо́ю, вѣнцено́сцы мч҃нцы.
Бг҃оро́диченъ: Ѻ҆рꙋ́жїе про́йде се́рдце твоѐ дв҃о всенепоро́чнаѧ, є҆гда̀ распина́ема зижди́телѧ ви́дѣла є҆сѝ, и҆ копїе́мъ бж҃е́ствєннаѧ ре́бра и҆скопава́єма.
Ѡ҆бы́де мѧ̀ бе́здна прегрѣше́нїй, и҆ глꙋбина̀ содержи́тъ мѧ̀ грѣхо́внаѧ, и҆ ко ѿча́ѧнїю прино́ситъ поги́бельномꙋ: ст҃а́ѧ влⷣчце, ты́ мѧ ны́нѣ сп҃сѝ.
Воздви́гни мѧ̀ лежа́ща на ѻ҆дрѣ̀ согрѣше́нїй, прест҃а́ѧ влⷣчце: и҆ да́ждь мѝ ѡ҆сїѧ́нїе сп҃си́тельное покаѧ́нїемъ.
Ѡ҆чи́сти чл҃вѣколю́бче, мл҃твами чи́стѡ ро́ждшїѧ тѧ̀: и҆ и҆зба́ви мі́ръ тво́й ѿ всѧ́кїѧ ско́рби, и҆ вѣ́чныѧ сла́вы сподо́би.
При́снѡ ѡ҆бѣщава́юсѧ дѣ́лъ ѕлы́хъ ѿстꙋпи́ти, но всегда̀ лгꙋ̀, и҆ ѡ҆скорблѧ́ю влⷣкꙋ моего̀: пречⷭ҇таѧ влⷣчце, ты́ ми да́ждь и҆справле́нїе.
І҆рмо́съ: Въ пещѝ ѻ҆́гненнѣй пѣсносло́вцы сп҃сы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.
Да и҆зба́вимсѧ мы̀ сла́стнагѡ грѣха̀, же́лчи вкꙋси́лъ є҆сѝ хрⷭ҇тѐ, сла́досте жи́зненнаѧ.
Тебѣ̀ на дре́вѣ хрⷭ҇тѐ ᲂу҆ѧ́звенꙋ, и҆сцѣлѣ́ша ꙗ҆́звы а҆да́мѡвы многолѣ̑тныѧ.
Мч҃нченъ: Свои́ми во́льными ᲂу҆стремле́ньми ѿлꙋчи́шасѧ ко страда́нїю, стрⷭ҇тоте́рпцы, и҆ побѣди́телїе ꙗ҆ви́шасѧ.
Мч҃нченъ: Поче́тше бг҃а болѣ́зненнымъ безче́стїемъ, и҆ вы́шнюю по́честь полꙋчи́сте страда́льцы.
Бг҃оро́диченъ: По ржⷭ҇твѣ̀ чⷭ҇таѧ, ꙗ҆́коже и҆ пре́жде ржⷭ҇тва̀ пребыва́еши: бг҃ъ бо бѣ̀ рожде́йсѧ, да ѡ҆божи́тъ человѣ́ки.
Бг҃ороди́тельнице чⷭ҇таѧ, не пре́зри менѐ, вѣ́рою под̾ кро́въ тво́й при́снѡ прибѣга́ющагѡ.
Страсте́й мои́хъ па́жить и҆зсꙋша́ющи, пода́ждь точи́ти сле́зъ ка̑пли бг҃ороди́тельнице.
Свѧзꙋ́ема мѧ̀ вери́гами грѣхо́вными, твои́ми мл҃твами разрѣшѝ пренепоро́чнаѧ, всепѣ́таго бг҃а ро́ждшаѧ.
Къ тебѣ̀ прибѣга́ю вѣ́рнѡ, и҆ тебѐ чⷭ҇таѧ, призыва́ю: и҆зба́ви мѧ̀ дв҃о, ѻ҆гнѧ̀ вѣ́чнагѡ.
І҆рмо́съ: И҆з̾ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, сщ҃е́нницы по́йте, лю́дїе превозноси́те во всѧ̑ вѣ́ки.
И҆́же клѧ́твꙋ дре́ва дре́вомъ и҆сцѣли́вый, и҆ бл҃гослове́нїе и҆сточи́вый человѣ́кѡмъ пребл҃гі́й: тебѐ сп҃се пое́мъ, и҆ тебѐ славосло́вимъ во вѣ́ки.
Превозвыша́емаго ѕмі́ѧ крⷭ҇то́мъ твои́мъ смири́лъ є҆сѝ, и҆ лю́тѣ па́дшагосѧ смирѧ́емь возне́слъ є҆сѝ: тебѐ сп҃се пое́мъ, и҆ превозно́симъ во всѧ̑ вѣ́ки.
Мч҃нченъ: Потреби́тели пре́лести, и҆ побо́рники бж҃е́ственныѧ вѣ́ры, цр҃кѡ́вныѧ столпы̀, и҆ твє́рдыѧ вои́стиннꙋ а҆дама́нты, хрⷭ҇тѡ́вы ѻ҆рꙋ́жники, вѣ́рою стрⷭ҇тоно́сцы да почти́мъ въ пѣ́снехъ.
Мч҃нченъ: Сла́внїи стрⷭ҇тоте́рпцы, ꙗ҆́коже со́лнце возсїѧ́ша, болѣ́зней ѻ҆́блаки разгна́вше бл҃года́тїю, и҆ нече́стїѧ мра́къ разори́ша вѣ́рою трⷪ҇ческою.
Бг҃оро́диченъ: Невѣстоводи́тель тебѣ̀ дв҃о, гаврїи́лъ по́сланъ бы́сть: ра́дꙋйсѧ, вопїѧ́ше тѝ глаго́лѧ: свѣтлѣ́йшаѧ пала́то всѣ́хъ цр҃ѧ̀ хрⷭ҇та̀, въ ню́же всели́всѧ, ѡ҆божѝ всѧ̑ человѣ́ки.
Въ недоꙋмѣ́нїи сы́й, и҆ се́рдцемъ, и҆ мы́слїю, преще́нїѧ гее́нскагѡ не боѧ́сѧ, согрѣша́ю при́снѡ: но ты̀ дв҃о, недоꙋмѣ́нїе моѐ разрѣшѝ, и҆ ѻ҆гнѧ̀ и҆зба́ви мѧ̀.
Сластьмѝ пло́ти моеѧ̀ ча́стѡ привлачи́мь є҆́смь, и҆ ꙗ҆́кѡ плѣне́нъ продае́мь є҆́смь, бг҃а прогнѣвлѧ́ю при́снѡ: бцⷣе, є҆ди́на наде́жда ненаде́жныхъ, сама̀ поми́лꙋй мѧ̀.
Ꙗ҆́кѡ непосты́дна є҆́сть мл҃тва твоѧ̀ всенепоро́чнаѧ, є҆ли̑ка бо хо́щеши подае́ши, молѧ́щи твоего̀ сн҃а и҆ бг҃а. тѣ́мже молю́сѧ тѝ, поми́лꙋй и҆ сп҃сѝ смире́ннꙋю дꙋ́шꙋ мою̀.
Тѣле́сными болѣ́зньми, и҆ страстны́ми воздвиже́ньми, и҆ дꙋше́вными ра́нами лю́тѣ и҆стѧзꙋ́емь є҆́смь: ро́ждшаѧ є҆ди́наго бл҃года́телѧ, твои́ми мольба́ми здра́ва сотвори́ мѧ.
Та́же пѣ́снь бг҃оро́дицы: Вели́читъ дꙋша̀ моѧ̀ гдⷭ҇а: И҆ покло́ны.
І҆рмо́съ: Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.
Крѣ́пость вра́жїѧ и҆ держа́ва ѿѧ́та бы́сть, держа́вный є҆ди́не гдⷭ҇и, на крⷭ҇тъ вознесе́нꙋ тѝ, и҆ пе́рсты на не́мъ ѡ҆кровави́вшꙋ.
И҆скопа́ша хрⷭ҇тѐ мо́й рꙋ́цѣ и҆ но́зѣ твоѝ, и҆ кѡ́сти твоѧ̑ и҆зочто́ша распе́ншїи беззакѡ́нницы, и҆ же́лчи со ѻ҆́цтомъ тебѐ напои́ша.
Мч҃нченъ: Оу҆сты̀ свѣ́тлыми бг҃а проповѣ́дасте бы́вшаго человѣ́ка, пред̾ мꙋчи́тели стрⷭ҇тоте́рпцы, и҆ сла́вꙋ наслѣ́довасте.
Мч҃нченъ: Болѣ́знь прїѧ́ша ᲂу҆ѧзви́вшїи вразѝ ра́нами, и҆ разли́чными мꙋ́ками бїю́ще ва́съ, всечестні́и вра́чеве болѣ́зней, бж҃е́ственнїи мч҃нцы.
Бг҃оро́диченъ: Свѣ́тъ на́мъ чⷭ҇таѧ, и҆з̾ тебѐ возсїѧ̀ і҆и҃съ, и҆ просвѣтѝ тва́рь всю̀ распѧ́тїемъ, и҆ бѣсо́вскꙋю тьмꙋ̀ прогна́лъ є҆́сть.
Сле́зы мѝ пода́ждь покаѧ́нїѧ пречⷭ҇таѧ: да пла́чꙋсѧ дѣ́лъ мои́хъ лю́тыхъ и҆ непра́ведныхъ, пре́жде приспѣ́ѧнїѧ конца̀ житїѧ̀ моегѡ̀.
Вскꙋ́ю дꙋшѐ ѡ҆скорблѧ́еши влⷣкꙋ твоего̀, непра́вєднаѧ дѣ́ющи, и҆ не возни́чеши; пре́жде конца̀ ᲂу҆́бѡ потща́вшисѧ пока́йсѧ.
И҆зба́ви мѧ̀ ѿ ѕлы́хъ прегрѣше́нїй и҆ скорбе́й: пода́ждь мѝ млⷭ҇ть дв҃о всечⷭ҇таѧ, и҆ живота̀ нетлѣ́ннагѡ бж҃е́ственное прича́стїе.
Тебѐ бг҃а неизрече́ннѡ ро́ждшꙋю предста́тельницꙋ стѧжа́хомъ, и҆ стѣ́нꙋ неѡбори́мꙋю, и҆ дꙋша́мъ сп҃се́нїе, и҆ чꙋде́съ и҆сто́чникъ.
Та́же, Досто́йно є҆́сть: и҆ покло́нъ. Та́же є҆ктенїа̀ ма́лаѧ, и҆ свѣти́ленъ: посе́мъ ѱалмы̀ ѻ҆бы̑чныѧ.
На стїхо́внѣ стїхи̑ры крⷭ҇тны, гла́съ є҃:
То́чїю водрꙋзи́сѧ дре́во хрⷭ҇тѐ крⷭ҇та̀ твоегѡ̀, пре́лесть прогна́на бы́сть, и҆ бл҃года́ть процвѣтѐ: ᲂу҆же́ бо ктомꙋ̀ нѣ́сть ѡ҆сꙋжде́нїѧ мꙋчи́тельство, но побѣ́да ꙗ҆ви́сѧ на́мъ сп҃се́нїѧ: крⷭ҇тъ бо на́мъ є҆́сть похвала̀, крⷭ҇тъ на́мъ ᲂу҆твержде́нїе, крⷭ҇тъ на́мъ ра́дованїе.
Сті́хъ: И҆спо́лнихомсѧ заꙋ́тра млⷭ҇ти твоеѧ̀, и҆ возра́довахомсѧ и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Веде́нъ бы́лъ є҆сѝ на́съ ра́ди на же́ртвꙋ хрⷭ҇тѐ, ꙗ҆́кѡ ѻ҆вча̀, и҆ ꙗ҆́кѡ а҆́гнецъ неѕло́бивъ є҆мманꙋ́илъ на заколе́нїе во́льное, со беззако́нники вмѣне́нъ бы́лъ є҆сѝ. прїиди́те, воспо́йте ѻ҆те́чєствїѧ ꙗ҆зы̑къ, и҆ поклони́тесѧ на крⷭ҇тѣ̀ повѣ́шенномꙋ, животꙋ̀ безконе́чномꙋ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Бл҃гослове́но во́инство нбⷭ҇нагѡ цр҃ѧ̀: а҆́ще бо и҆ земноро́дни бѣ́ша стрⷭ҇тоте́рпцы, но а҆́гг҃льское достоѧ́нїе потща́шасѧ дости́гнꙋти, ѡ҆ тѣлесѣ́хъ небре́гше, и҆ страсте́й ра́ди безпло́тныхъ сподо́бишасѧ че́сти, мл҃твами и҆́хъ гдⷭ҇и, сп҃сѝ дꙋ́шы на́шѧ.
Сла́ва, и҆ ны́нѣ, крⷭ҇тобг҃оро́диченъ: Ста́вши ᲂу҆ крⷭ҇та̀ і҆и҃се, тебѐ ро́ждшаѧ пла́чꙋщисѧ рыда́ше, вопїю́щи: не терплю̀ сїѧ̑, пригвожде́на зрѧ́щи тѧ̀ на дре́вѣ, є҆го́же породи́хъ а҆́зъ, и҆ и҆збѣго́хъ болѣ́зни ꙗ҆́кѡ безмꙋ́жна, и҆ ка́кѡ ны́нѣ болѣ́знїю содержи́ма є҆́смь, и҆ ᲂу҆ѧзвлѧ́юсѧ се́рдцемъ; ны́нѣ бо и҆спо́лнисѧ глаго́лъ, и҆́же речѐ сѷмеѡ́нъ: се́рдце твоѐ непоро́чнаѧ, ѻ҆рꙋ́жїе про́йдетъ. но ны́нѣ, ѽ сн҃е мо́й, воскрⷭ҇нѝ, и҆ сп҃сѝ пою́щыѧ тѧ̀!
Та́же, Бл҃го є҆́сть и҆сповѣ́датисѧ гдⷭ҇еви: Посе́мъ, Трист҃о́е. По Ѻ҆́ч҃е на́шъ: тропа́рь, є҆ктенїа̀. Та́же ча́съ пе́рвый, и҆ ѱалмы̀ ѻ҆бы̑чны, и҆ прѡ́чаѧ по рѧ́дꙋ, и҆ ѿпꙋ́стъ.
Въ пѧто́къ бл҃жє́нны, гла́съ є҃:
Разбо́йникъ на крⷭ҇тѣ̀ бг҃а тѧ̀ бы́ти вѣ́ровавъ, хрⷭ҇тѐ, и҆сповѣ́да тѧ̀ чи́стѣ ѿ се́рдца: помѧни́ мѧ гдⷭ҇и, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Оу҆мертви́всѧ на крⷭ҇тѣ̀, снѣ́ди ра́ди ᲂу҆ме́ршагѡ а҆да́ма: є҆го́же ѡ҆живи́лъ є҆сѝ жизнода́вче ще́дрый, и҆ жи́телѧ па́ки бл҃же раѧ̀ показа́лъ є҆сѝ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Пригвозди́лсѧ є҆сѝ на крⷭ҇тѣ̀ хрⷭ҇тѐ, лоза̀ и҆́стиннаѧ, и҆ и҆сточи́лъ є҆сѝ питїѐ сп҃се́нїѧ, напаѧ́ѧ всѣ́хъ вѣ́рныхъ сердца̀ бл҃года́тїю.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мч҃нченъ: Бїе́ми мꙋ́дрїи, и҆ на ᲂу҆деса̀ разсѣка́еми воѡбрази́сте заколе́нїе влⷣчнее: сегѡ̀ ра́ди мч҃нцы хрⷭ҇тѡ́вы при́снѡ ᲂу҆бл҃жа́еми є҆стѐ.
Сла́ва, трⷪ҇ченъ: Покланѧ́емсѧ тѝ вѣ́рнѡ, въ трїе́хъ ли́цахъ є҆ди́номꙋ бг҃ꙋ, нераздѣ́льнꙋ, и҆ пребж҃е́ственномꙋ є҆стествꙋ̀, вопїю́ще тѝ: сла́ва тебѣ̀ трⷪ҇це, є҆ди́нице бж҃е на́шъ.
И҆ ны́нѣ, бг҃оро́диченъ: Пла́чемъ бїѧ́ше себѐ влⷣчце, ви́дѧщи на дре́вѣ крⷭ҇тнѣмъ живота̀ на́шего, во́лею ᲂу҆ме́рша: тѣ́мже всѝ бж҃е́ственными гла́сы тѧ̀ при́снѡ ᲂу҆бл҃жа́емъ.