Гла́съ ѕ҃.
на Гдⷭ҇и воззва́хъ, поста́вимъ стїхѡ́въ д҃. И҆ пое́мъ г҃, воскрⷭ҇ны гла́са, повторѧ́юще пе́рвꙋю. Гла́съ ѕ҃:
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Побѣ́дꙋ и҆мѣ́ѧ хрⷭ҇тѐ ю҆́же на а҆́да, на крⷭ҇тъ возше́лъ є҆сѝ: да во тьмѣ̀ сме́рти сѣдѧ́щыѧ воскр҃си́ши съ собо́ю, и҆́же въ ме́ртвыхъ свобо́дь: и҆сточа́ѧй живо́тъ ѿ своегѡ̀ свѣ́та, всеси́льне сп҃се, поми́лꙋй на́съ.
Дне́сь хрⷭ҇то́съ сме́рть попра́въ, ꙗ҆́коже речѐ, воскр҃се, и҆ ра́дованїе мі́рови дарова̀, да всѝ взыва́юще, пѣ́снь та́кѡ рце́мъ: и҆сто́чниче жи́зни, непристꙋ́пный свѣ́те, всеси́льне сп҃се, поми́лꙋй на́съ.
Тебѐ гдⷭ҇и, сꙋ́щаго по все́й тва́ри, грѣ́шнїи ка́мѡ бѣжи́мъ; на нб҃сѝ са́мъ живе́ши: во а҆́дѣ попра́лъ є҆сѝ сме́рть: во глꙋбины̑ мѡрскі́ѧ; та́мѡ рꙋка̀ твоѧ̀ влⷣко. къ тебѣ̀ прибѣга́емъ, тебѣ̀ припа́дающе мо́лимсѧ: воскр҃сы́й и҆з̾ ме́ртвыхъ, поми́лꙋй на́съ.
Сла́ва, и҆ ны́нѣ, бг҃оро́диченъ: Досто́йно є҆́сть ꙗ҆́кѡ вои́стиннꙋ, бл҃жи́ти тѧ̀ бцⷣꙋ: въ твое́ бо пречⷭ҇тое вше́дъ чре́во всѣ́хъ содѣ́тель, пло́ть бы́сть, не преложи́всѧ є҆стество́мъ, нижѐ мечта́всѧ ѡ҆ смотре́нїи: но воспрїѧ́тѣй и҆з̾ тебѐ слове́снѡ ѡ҆дꙋшевле́ннѣй пло́ти соедини́всѧ, по ѵ҆поста́си. ѿню́дꙋже бл҃гоче́стнѡ, во ѻ҆бои́хъ є҆стества́хъ ꙗ҆влѧ́ющихсѧ, ра́знство твори́мъ. того̀ молѝ чⷭ҇тна́ѧ прест҃а́ѧ, низпосла́ти на́мъ ми́ръ и҆ ве́лїю млⷭ҇ть.
Та́же, Свѣ́те ти́хїй: Посе́мъ прокі́менъ: Гдⷭ҇ь воцр҃и́сѧ: Три́жды. Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ. Та́же, Сподо́би гдⷭ҇и въ ве́черъ се́й:
І҆ере́й же є҆ктенїѝ не глаго́летъ, но пое́мъ на стїхо́внѣ стїхи́рꙋ воскрⷭ҇нꙋ, гла́съ ѕ҃:
Воскрⷭ҇нїе твоѐ хрⷭ҇тѐ сп҃се, а҆́гг҃ли пою́тъ на нб҃сѣ́хъ, и҆ на́съ на землѝ сподо́би, чⷭ҇тымъ се́рдцемъ тебѐ сла́вити.
И҆ и҆ны̑ѧ стїхи̑ры прест҃ы́ѧ бцⷣы.
Подо́бенъ: Всю̀ ѿложи́вше:
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Клѧ́твою ꙗ҆́кѡ ѡ҆бѣща̀ твоемꙋ̀ пра́ѻтцꙋ дре́вле бг҃ъ прелѣ́тный, въ послѣ̑днѧѧ лѣ̑та совершѝ, произше́дъ пречⷭ҇таѧ ѿ чре́ва твоегѡ̀ бж҃е́ственнагѡ: и҆́бо вои́стиннꙋ возсїѧ̀ и҆з̾ тебѐ гдⷭ҇ь, дла́нїю содержа́й концы̀, є҆го́же и҆ мнѣ̀ бл҃гоꙋвѣ́тлива сотворѝ въ ча́съ сꙋ́дный дв҃о мр҃і́е, тогѡ̀ црⷭ҇твїѧ мѧ̀ полꙋчи́ти, добродѣ́телей возвыше́нїемъ, и҆ страсте́й ᲂу҆мерщвле́нїемъ.
Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.
Оу҆ма̀ чистото́ю и҆са́їа, дв҃о, и҆здале́ча проречѐ, роди́ти и҆мꙋ́щꙋю созда́телѧ всеѧ̀ тва́ри, тѧ̀ чⷭ҇тна́ѧ пречⷭ҇таѧ: ты́ бо ꙗ҆ви́ласѧ є҆сѝ є҆ди́на во вѣ́ки всенепоро́чнаѧ. тѣ́мже тѧ̀ молю̀: ѡ҆скверне́нꙋю мою̀ дꙋ́шꙋ ѡ҆чи́сти, и҆ свѣ́тлости бж҃е́ственныѧ ѻ҆́бщника мѧ̀ покажѝ, и҆ бж҃е́ственнагѡ сн҃а твоегѡ̀ стоѧ́нїѧ десна́гѡ, є҆гда̀ сѧ́детъ, ꙗ҆́коже пи́сано є҆́сть, сꙋди́ти мі́рꙋ всемꙋ̀.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Сме́рти разрꙋше́нїе ржⷭ҇тво́мъ твои́мъ ꙗ҆ви́сѧ, ты́ бо ѻ҆трокови́ца є҆сѝ живота̀ нетлѣ́ннагѡ пребыва́нїе. тѣ́мже тѧ̀ молю̀: во гробѣ́хъ а҆́довыхъ страсте́й мои́хъ слежа́ща ты̀ воскр҃сѝ, и҆ къ весе́лїю и҆ ѡ҆живле́нїю дв҃о, рꙋководѝ, ко бл҃же́нномꙋ воздаѧ́нїю, и҆ неги́блемыѧ и҆ бж҃е́ственныѧ сподо́би ра́дости, и҆дѣ́же сла́дость присносꙋ́щнаѧ, и҆дѣ́же свѣ́тъ невече́рнїй.
Сла́ва, и҆ ны́нѣ, бг҃оро́диченъ: Прїиди́те всѝ ꙗ҆зы́цы, во гла́сѣ ра́дованїѧ прест҃ꙋ́ю дв҃ꙋ и҆ бцⷣꙋ восхва́лимъ, чл҃вѣ́ческагѡ сꙋщества̀ горни́ло, неизрече́нныхъ чꙋде́съ дѣ́лателище, ѡ҆ то́й бо бы́ша нѡ́ваѧ: безнача́льный начина́етсѧ, сло́во ѡ҆дебелѣва́етъ, бг҃ъ человѣ́къ быва́етъ, да бг҃а человѣ́ка содѣ́лаетъ, не премѣне́нїемъ є҆сте́ствъ, но соедине́нїемъ по ѵ҆поста́си: происхо́дитъ бо є҆ди́нъ ѿ двою̀ сопроти́вныхъ, во двои́хъ соверше́нныхъ є҆стества́хъ нераздѣ́льнѣ познава́емый, хотѣ́тельнѣ же и҆ дѣ́тельнѣ по ѻ҆бою̀ сꙋщєствꙋ̀: то́йже по и҆сто́тномꙋ вѣ́рꙋемь быва́ѧ, ра́ди сп҃си́тельнагѡ смотре́нїѧ хрⷭ҇то́съ бг҃ъ на́шъ, мі́рꙋ подаѧ̀ ѡ҆чище́нїе, ми́ръ и҆ ве́лїю млⷭ҇ть.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ є҆гѡ̀. И҆ ѿпꙋ́стъ.
на Гдⷭ҇и воззва́хъ, поста́вимъ стїхѡ́въ і҃: и҆ пое́мъ настоѧ́щыѧ стїхи̑ры воскрⷭ҇ны, гла́съ ѕ҃:
Сті́хъ: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.
Побѣ́дꙋ и҆мѣ́ѧ хрⷭ҇тѐ, ю҆́же на а҆́да, на крⷭ҇тъ возше́лъ є҆сѝ: да во тьмѣ̀ сме́рти сѣдѧ́щыѧ воскр҃си́ши съ собо́ю, и҆́же въ ме́ртвыхъ свобо́дь, и҆сточа́ѧй живо́тъ ѿ своегѡ̀ свѣ́та, всеси́льне сп҃се, поми́лꙋй на́съ.
Сті́хъ: Менѐ ждꙋ́тъ пра́вєдницы, до́ндеже возда́си мнѣ̀.
Дне́сь хрⷭ҇то́съ сме́рть попра́въ, ꙗ҆́коже речѐ, воскр҃се, и҆ ра́дованїе мі́рови дарова̀, да всѝ взыва́юще, пѣ́снь та́кѡ рце́мъ: и҆сто́чниче жи́зни, непристꙋ́пный свѣ́те, всеси́льне сп҃се, поми́лꙋй на́съ.
Сті́хъ: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.
Тебѐ гдⷭ҇и, сꙋ́щагѡ по все́й тва́ри, грѣ́шнїи ка́мѡ бѣжи́мъ; на нб҃сѝ са́мъ живе́ши, во а҆́дѣ попра́лъ є҆сѝ сме́рть, во глꙋбины̑ мѡрскі́ѧ; та́мѡ рꙋка̀ твоѧ̀ влⷣко. къ тебѣ̀ прибѣга́емъ, тебѣ̀ припа́дающе мо́лимсѧ: воскр҃сы́й и҆з̾ ме́ртвыхъ поми́лꙋй на́съ.
И҆́ны стїхи̑ры а҆натѡ́лїевы, гла́съ то́йже.
Сті́хъ: Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀.
Крⷭ҇то́мъ твои́мъ хрⷭ҇тѐ хва́лимсѧ, и҆ воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ. ра́звѣ тебѐ и҆на́гѡ не вѣ́мы.
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Вы́нꙋ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: крⷭ҇тъ бо претерпѣ́въ, сме́ртїю сме́рть погꙋбѝ.
Сті́хъ: И҆́мене ра́ди твоегѡ̀, потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Сла́ва си́лѣ твое́й гдⷭ҇и, ꙗ҆́кѡ ᲂу҆праздни́лъ є҆сѝ держа́вꙋ и҆мꙋ́щагѡ сме́рти: ѡ҆бнови́лъ є҆сѝ на́съ крⷭ҇то́мъ твои́мъ, да́рꙋѧ на́мъ живо́тъ и҆ нетлѣ́нїе.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Погребе́нїе твоѐ гдⷭ҇и, ᲂу҆́зы а҆́дѡвы сокрꙋши́вшее растерза̀: є҆́же и҆з̾ ме́ртвыхъ ꙾воскрⷭ҇нїемъ꙾[[воскрⷭ҇нїе]] мі́ръ просвѣтѝ, гдⷭ҇и сла́ва тебѣ̀.
И҆́ны стїхи̑ры бцⷣѣ, творе́нїе па́ѵла а҆морре́йскагѡ, гла́съ г҃:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Ви́дѧщи не́мощь мою̀ тѣле́снꙋю, и҆ дꙋше́вное страда́нїе, и҆ серде́чное ѡ҆ѕлобле́нїе, посѣще́нїѧ сподо́би мѧ̀ бж҃е́ственнагѡ, всенепоро́чнаѧ дв҃о, сп҃си́ мѧ, молю́сѧ, те́плыми твои́ми мл҃твами.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Всѣ́хъ преидо́хъ влⷣчце, согрѣше́ньми: но мно́жєства си́хъ дв҃о ѡ҆чи́щши, ми́лостей полꙋчи́ти мѝ чⷭ҇таѧ, сподо́би, въ бꙋ́дꙋщемъ сꙋдѣ̀ сн҃а и҆ бг҃а твоегѡ̀.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Мно́жество согрѣше́нїй мои́хъ, зовꙋ́щагѡ ѡ҆чи́сти чи́стаѧ, и҆ чꙋ́вствїй мои́хъ неꙋста̑внаѧ движє́нїѧ, моли́твеннымъ мече́мъ ссѣцы̀: ꙗ҆́кѡ да вѣ́рою и҆ любо́вїю пою̀ твоѐ безсѣ́менное ржⷭ҇тво̀.
Сла́ва, и҆ ны́нѣ, бг҃оро́диченъ: Кто̀ тебѐ не ᲂу҆бл҃жи́тъ прест҃а́ѧ дв҃о; кто́ ли не воспое́тъ твоегѡ̀ пречⷭ҇тагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, то́йже ѿ тебѐ чⷭ҇тыѧ про́йде, неизрече́ннѡ вопло́щьсѧ, є҆стество́мъ бг҃ъ сы́й, и҆ є҆стество́мъ бы́въ чл҃вѣ́къ на́съ ра́ди, не во двою̀ лицꙋ̑ раздѣлѧ́емый, но во двою̀ є҆стєствꙋ̀ несли́тнѡ познава́емый. того̀ молѝ чⷭ҇таѧ, всебл҃же́ннаѧ, поми́ловатисѧ дꙋша́мъ на́шымъ.
Та́же, Свѣ́те ти́хїй: Прокі́менъ днѐ: Гдⷭ҇ь воцр҃и́сѧ: И҆ про́чее по ѻ҆бы́чаю.
На стїхо́внѣ стїхи̑ры. Гла́съ ѕ҃:
Воскрⷭ҇нїе твоѐ хрⷭ҇тѐ сп҃се, а҆́гг҃ли пою́тъ на нб҃сѣ́хъ, и҆ на́съ на землѝ сподо́би, чⷭ҇тымъ се́рдцемъ тебѐ сла́вити.
По а҆лфави́тꙋ.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Врата̀ сокрꙋши́въ мѣ̑днаѧ, и҆ верєѝ а҆́дѡвы сотры́й, ꙗ҆́кѡ бг҃ъ всеси́ленъ, ро́дъ человѣ́ческїй па́дшїй воскр҃си́лъ є҆сѝ. сегѡ̀ ра́ди и҆ мы̀ согла́снѡ вопїе́мъ: воскр҃сы́й и҆з̾ ме́ртвыхъ, гдⷭ҇и сла́ва тебѣ̀.
Сті́хъ: И҆́бо ᲂу҆твердѝ вселе́ннꙋю, ꙗ҆́же неподви́житсѧ.
Тлѣ́нїѧ на́съ дре́внѧгѡ хрⷭ҇то́съ и҆спра́вити хотѧ̀, на крⷭ҇тѣ̀ пригвожда́етсѧ, и҆ во гро́бѣ полага́етсѧ, є҆го́же мѷронѡ́сицы жєны̀ со слеза́ми и҆ска́хꙋ, пла́чꙋщѧ глаго́лахꙋ: ᲂу҆вы̀ на́мъ сп҃се всѣ́хъ, ка́кѡ и҆зво́лилъ є҆сѝ во гро́бѣ всели́тисѧ; всели́выйсѧ же хотѧ̀, ка́кѡ ᲂу҆кра́денъ бы́лъ є҆сѝ; ка́кѡ преложи́лсѧ є҆сѝ; ко́е же мѣ́сто твоѐ живоно́сное сокры̀ тѣ́ло; но влⷣко, ꙗ҆́кѡ ѡ҆бѣща́лсѧ є҆сѝ на́мъ ꙗ҆ви́сѧ, и҆ ᲂу҆толѝ ѿ на́съ рыда́нїе сле́зъ. пла́чꙋщымсѧ же и҆̀мъ, а҆́гг҃лъ къ ни̑мъ возопѝ: ѿ пла́ча преста́вшѧ а҆пⷭ҇лѡмъ рцы́те, ꙗ҆́кѡ воскр҃се гдⷭ҇ь, мі́рови да́рꙋѧ ѡ҆чище́нїе, и҆ ве́лїю млⷭ҇ть.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
Распны́йсѧ ꙗ҆́кѡ восхотѣ́лъ є҆сѝ хрⷭ҇тѐ, и҆ сме́рть погребе́нїемъ твои́мъ плѣни́вый, тридне́венъ воскрⷭ҇лъ є҆сѝ, ꙗ҆́кѡ бг҃ъ со сла́вою, мі́рови да́рꙋѧ безконе́чнꙋю жи́знь, и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Творе́цъ и҆ и҆зба́витель мо́й пречⷭ҇таѧ, хрⷭ҇то́съ гдⷭ҇ь и҆з̾ твои́хъ ложе́снъ проше́дъ, въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ. тѣ́мже тѝ всечⷭ҇таѧ, ꙗ҆́кѡ бж҃їи мт҃ри же и҆ дв҃ѣ, вои́стиннꙋ вопїе́мъ немо́лчнѡ: ра́дꙋйсѧ а҆́гг҃льски, ра́дꙋйсѧ влⷣчце, предста́тельство и҆ покро́ве, и҆ сп҃се́нїе дꙋ́шъ на́шихъ.
Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ:
Тропа́рь воскрⷭ҇нъ, гла́съ ѕ҃:
А҆́гг҃льскїѧ си̑лы на гро́бѣ твое́мъ, и҆ стрегꙋ́щїи ѡ҆мертвѣ́ша: и҆ стоѧ́ше мр҃і́а во гро́бѣ, и҆́щꙋщи пречⷭ҇тагѡ тѣ́ла твоегѡ̀. плѣни́лъ є҆сѝ а҆́дъ, не и҆скꙋси́всѧ ѿ негѡ̀: срѣ́тилъ є҆сѝ дв҃ꙋ да́рꙋѧй живо́тъ. воскр҃сы́й и҆з̾ ме́ртвыхъ, гдⷭ҇и сла́ва тебѣ̀.
Сла́ва, и҆ ны́нѣ, бг҃оро́диченъ: Бл҃гослове́ннꙋю нарекі́й твою̀ мт҃рь, прише́лъ є҆сѝ на стрⷭ҇ть во́льнымъ хотѣ́нїемъ, возсїѧ́въ на крⷭ҇тѣ̀, взыска́ти хотѧ̀ а҆да́ма, глаго́лѧ а҆́гг҃лѡмъ: сра́дꙋйтесѧ мнѣ̀, ꙗ҆́кѡ ѡ҆брѣ́тесѧ поги́бшаѧ дра́хма, всѧ̑ мꙋ́дрѣ ᲂу҆стро́ивый бж҃е на́шъ, сла́ва тебѣ̀.
Посе́мъ ѿпꙋ́стъ,
Канѡ́нъ прест҃ѣ́й бцⷣѣ. Гла́съ ѕ҃:
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ вопїѧ́ше.
Припѣ́въ: Прест҃а́ѧ бцⷣе, сп҃сѝ на́съ.
Неѡскꙋ́днꙋ бл҃года́ть и҆мꙋ́щи ꙗ҆́кѡ бж҃е́ственнꙋю, мт҃и безневѣ́стнаѧ, къ тебѣ̀ прибѣга́ющихъ не пре́зри, ѿ бѣ́дъ и҆ скорбе́й при́снѡ сп҃са́ющи.
Сѐ вре́мѧ наста̀ моегѡ̀ ᲂу҆ны́нїѧ, воста́ни пречⷭ҇таѧ влⷣчце, и҆ по́мощи да́ждь мѝ рꙋ́кꙋ: ты́ бо мі́ръ бж҃е́ственнагѡ весе́лїѧ и҆спо́лнила є҆сѝ.
Сла́ва: Держа́вный тво́й покро́въ, бг҃ороди́тельнице, ꙗ҆́кѡ застꙋ́пница сꙋ́щи, да́ждь мѝ вско́рѣ напа́стьми ѡ҆держи́мꙋ, и҆ невре́дна ѿ си́хъ сохрани́ мѧ.
И҆ ны́нѣ: Дꙋшѝ мое́й сме́рть притека́етъ, и҆скꙋшє́нїѧ же ненави́дѧщихъ, ꙗ҆́кѡ а҆́спїды ѡ҆быдо́ша погꙋби́ти мѧ̀: но сама́ мѧ бцⷣе, сп҃сѝ.
І҆рмо́съ: Разшири́шасѧ на врагѝ моѧ̑ ᲂу҆ста̀ моѧ̑, ꙗ҆́кѡ ᲂу҆тверди́сѧ ѡ҆ гдⷭ҇ѣ се́рдце моѐ.
Оу҆мерщвле́ннꙋю дꙋ́шꙋ мою̀ прегрѣше́ньми, живо́тъ ꙗ҆́кѡ ро́ждшаѧ бцⷣе ѡ҆живѝ.
Ѿ всѧ́кагѡ и҆скꙋше́нїѧ соблюдѝ, къ тебѣ̀ прибѣга́ющихъ бцⷣе, ᲂу҆пова́нїе на́ше.
Сла́ва: Ѿ востаю́щихъ на мѧ̀ напа́стей го́рькѡ, сп҃си́ мѧ мт҃и гдⷭ҇а моегѡ̀ пренепоро́чнаѧ.
И҆ ны́нѣ: Ꙗ҆́же мі́рови сп҃се́нїе подаю́щи бж҃е́ственнымъ ржⷭ҇тво́мъ твои́мъ, ѿ бѣ́дъ мѧ̀ премѣнѝ.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ: и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: сла́ва си́лѣ твое́й гдⷭ҇и.
И҆знемо́же нището́ю крѣ́пость дꙋшѝ моеѧ̀, бг҃ороди́тельнице, и҆ лю́тое на мѧ̀ ѡ҆мраче́нїе нападѐ, ѿ прегрѣше́нїй и҆мꙋ́щее нахо́дъ: при́зри ꙗ҆́кѡ свѣтоно́сный ѻ҆́блакъ бж҃їй: и҆ просвѣти́ мѧ, молю́сѧ.
Бꙋ́ри ѕѡ́лъ мои́хъ, и҆ смꙋще́нїе прегрѣше́нїй, преложѝ въ тишинꙋ̀ сп҃се́нїѧ, ꙗ҆́кѡ сꙋ́щи приста́нище, всенепоро́чнаѧ: рыка́юще и҆́щꙋтъ мѧ̀, ꙗ҆́кѡ льво́ве пожре́ти, па́гꙋбы тѣ́хъ и҆зба́ви мѧ̀, молю́сѧ.
Сла́ва: Въ нощѝ и҆ во дни̑, на земли́ же и҆ въ мо́ри, и҆ на всѧ́комъ мѣ́стѣ, сп҃се́нїе тве́рдо сꙋ́щи, бцⷣе покро́ве непобѣди́мый, сп҃са́й мѧ̀: по бз҃ѣ бо на тѧ̀ вои́стиннꙋ хрⷭ҇тїа́не ᲂу҆пова́емъ.
И҆ ны́нѣ: Ѿ вели́кихъ и҆ разли́чныхъ прегрѣше́нїй же и҆ напа́стей, всегда̀ сп҃са́еши мѧ̀: тѣ́мже ꙗ҆́кѡ ро́ждшꙋю тѧ̀ гдⷭ҇а молю̀, и҆ къ тебѣ̀ прибѣга́ю, непобѣди́мѣй по́мощи скорбѧ́щымъ: ѿ бѣ́дъ и҆зведѝ мольба́ми твои́ми.
І҆рмо́съ: Свѣ́тъ возсїѧ́й мі́рꙋ хрⷭ҇тѐ, просвѣтѝ се́рдце моѐ ѿ но́щи тебѣ̀ зовꙋ́ща, и҆ сп҃си́ мѧ.
Сп҃се́нїѧ тѧ̀ покро́въ сла́вимъ, сло́ва мт҃и, всенепоро́чнаѧ, навѣ̑тъ не боѧ́щесѧ человѣ́ческихъ.
И҆мꙋ́ще тѧ̀ стѣ́нꙋ неѡбори́мꙋ, и҆скꙋше́нїй же и҆ печа́ли воста́нїѧ и҆збавлѧ́емсѧ, пречⷭ҇таѧ.
Сла́ва: И҆зми́ мѧ ѿ ѕлы́хъ человѣ̑къ ѧ҆зы́ка, чⷭ҇таѧ: ꙗ҆́коже бо бри́тва и҆з̾ѡстри́сѧ, погꙋби́ти и҆скі́й дꙋ́шꙋ мою̀ го́рькѡ.
И҆ ны́нѣ: Прилѣ́жнѡ тѝ припа́даю, молѧ́сѧ: ꙗ҆́кѡ мт҃и зижди́телѧ моегѡ̀, ѡ҆держа́щихъ мѧ̀ бѣ́дъ свободѝ.
І҆рмо́съ: Ки́томъ пожре́нъ грѣхо́внымъ, вопїю̀ тебѣ̀ хрⷭ҇тѐ, ꙗ҆́кѡ прⷪ҇ро́ка и҆з̾ и҆стлѣ́нїѧ мѧ̀ свободѝ.
Го́рести вкꙋ́съ прїе́мъ, бж҃е́ственныѧ сла́дости ѿчꙋжди́хсѧ пречⷭ҇таѧ. тѣ́мже вопїю́ ти: да́рꙋй мѝ по́мощь.
Ѡ҆мраче́нїе страсте́й, раба́ мѧ тлѝ содѣ́ла: тѣ́мже свѣ́тъ ро́ждшаѧ, свободи́ мѧ влⷣчце.
Сла́ва: Согла́снѡ тебѣ̀ и҆ вѣ́рнѡ и҆сповѣ́даюсѧ, пречⷭ҇таѧ, и҆ пожрꙋ̀ тѝ же́ртвꙋ, тобо́ю и҆зба́вльсѧ ско́рби.
И҆ ны́нѣ: Ѿверзо́шасѧ на мѧ̀ непра́вды ᲂу҆ста̀, влⷣчце: тѣ́мже мѧ̀ ꙗ҆́кѡ застꙋ́пница, си́хъ вско́рѣ свободѝ.
Та́же, Гдⷭ҇и поми́лꙋй, три́жды: Сла́ва, и҆ ны́нѣ:
Конда́къ, гла́съ ѕ҃: Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы: но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ, и҆ потщи́сѧ на ᲂу҆моле́нїе предста́тельствꙋющи при́снѡ бцⷣе, чтꙋ́щихъ тѧ̀.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
И҆скꙋше́нїѧ дꙋ́ши моеѧ̀, ю҆́же тꙋ́чнїи ю҆нцы̀ ны́нѣ ѡ҆быдо́ша, прест҃а́ѧ дв҃о, сама́ мѧ си́хъ свободѝ.
Защища́ющи то́щнѡ, въ бѣдѣ̀ сꙋ́щихъ и҆ въ печа́ли, ра́дость бцⷣе, подае́ши всегда̀.
Сла́ва: Побѣжде́на мѧ̀ всего̀ ѿча́ѧнїемъ дѣ́лъ и҆ печа́ли, ѡ҆гради́ мѧ дв҃о, ꙗ҆́кѡ покро́въ всѣ̑мъ нерꙋши́мый.
И҆ ны́нѣ: Предста́тельствомъ твои́мъ и҆збавлѧ́емсѧ бѣ́дъ и҆ скорбе́й, и҆ ѡ҆брѣта́емъ бога́тство ве́лїе неистоща́емо.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.
Ѿ человѣ́ческихъ снѣда́юсѧ ѡ҆ѕлобле́нїй, и҆ молю́сѧ бцⷣе, и҆зба́ви мѧ̀ сꙋ́етнагѡ совѣ́та и҆́хъ.
Побѣди́хсѧ въ печа́лехъ и҆скꙋше́нїи мои́ми, и҆ молю́сѧ влⷣчце, ѿ си́хъ мѧ̀ сп҃сѝ невреди́ма.
Сла́ва: Сп҃си́ мѧ чⷭ҇таѧ, ѿ человѣ́ка льсти́ва, и҆ ѧ҆зы́ка, и҆ ᲂу҆́стъ, и҆ мꙋчи́тельства, и҆ всѧ́кїѧ нꙋ́жды.
И҆ ны́нѣ: И҆́же нра́вомъ прельща́емъ є҆́смь, без̾ ѿвѣ́та сы́й, къ бцⷣѣ зовꙋ̀: всѧ́ческихъ мѧ̀ и҆зба́ви ѕѡ́лъ.
І҆рмо́съ: Є҆́же ра́дꙋйсѧ ѿ а҆́гг҃ла прїи́мшаѧ, и҆ ро́ждшаѧ созда́телѧ своего̀, дв҃о, сп҃си́ тѧ велича́ющыѧ.
Млⷭ҇тива мѝ въ печа́лехъ житїѧ̀ бцⷣе бꙋ́ди, и҆ сп҃сѝ ѿ бѣ́дъ ны́нѣ прибѣга́ющаго къ тебѣ̀.
Вои́стиннꙋ є҆ди́на на землѝ и҆ въ мо́ри ꙗ҆ви́ласѧ є҆сѝ чⷭ҇таѧ, кро́въ неразори́мь, прибѣга́ющымъ тѝ несꙋмнѣ́нною дꙋше́ю.
Сла́ва: Без̾ ᲂу҆ма̀ себѐ всѧ́ческими порабо́тившꙋ лю́тыми паде́ньми, мольба́ми твои́ми свобо́дꙋ пода́ждь мѝ всепѣ́таѧ.
И҆ ны́нѣ: Тѧ̀ наде́ждꙋ и҆ застꙋпле́нїе тве́рдо стѧжа́въ чⷭ҇таѧ, велича́ѧ тѧ̀ ꙗ҆́кѡ бцⷣꙋ, пѣ́снь вѣ́рою скончава́ю.
Та́же, Досто́йно є҆́сть: И҆ Трист҃о́е. и҆ по Ѻ҆́ч҃е на́шъ: конда́къ гла́са. И҆ про́чее по ѻ҆бы́чаю, и҆ ѿпꙋ́стъ.
Въ недѣ́лю ᲂу҆́тра, на полꙋ́нощницѣ,
канѡ́нъ прест҃ѣ́й и҆ живонача́льнѣй трⷪ҇цѣ, [є҆гѡ́же краестро́чїе: Шесто́е пѣ́нїе приноша́ю тебѣ̀ бж҃ество̀.] Творе́нїе митрофа́ново. Гла́съ ѕ҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Припѣ́въ: Прест҃а́ѧ трⷪ҇це бж҃е на́шъ, сла́ва тебѣ̀.
Трѝ ѵ҆поста́си пое́мъ бг҃онача́льныѧ, є҆ди́нственнагѡ є҆стества̀ неизмѣ́нный зра́къ, бл҃га́гѡ чл҃вѣколю́бца бг҃а, прегрѣше́нїй ѡ҆чище́нїе на́мъ да́рꙋюща.
Пресꙋ́щный є҆ди́не, и҆ трисїѧ́нный начерта́ньми гдⷭ҇и, въ бж҃ествѣ̀ є҆ди́номъ сы́й, вразꙋмѝ на́съ, и҆ сподо́би твоегѡ̀ бж҃е́ственнагѡ сїѧ́нїѧ.
Сла́ва: Невѣстоꙋкраси́въ па́ѵелъ, ю҆́же ѿ ꙗ҆зы̑къ цр҃ковь, є҆ди́номꙋ тебѣ̀ трїѷпоста́сномꙋ бг҃ꙋ покланѧ́тисѧ наꙋчѝ, ѿ негѡ́же, и҆ и҆́мже, и҆ въ не́мже всѧ̑ бы́ша.
И҆ ны́нѣ, бг҃оро́диченъ: И҆з̾ чре́ва твоегѡ̀ про́йде ᲂу҆́мное бцⷣе сл҃нце, и҆ ѡ҆сїѧ̀ на́съ трисвѣ́тлагѡ бж҃ества̀ зарѧ́ми: є҆го́же пою́ще, бл҃гоче́стнѡ тѧ̀ ᲂу҆бл҃жа́емъ.
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Оу҆краси́въ трисвѣ́тлый бж҃е чи́ны нбⷭ҇ныѧ, ᲂу҆стро́илъ є҆сѝ пѣ́ти тѧ̀ трист҃ы́ми гла́сы: съ ни́миже прїимѝ и҆ на́съ воспѣва́ющихъ твою̀ бл҃гость.
Є҆ди́но непрело́жное трⷪ҇чное, соѡбра́зное є҆ди́нственное бг҃онача́лїе пою́ще, мо́лимъ тѧ̀ те́плѣ, грѣхѡ́въ мно́гихъ низпосла́ти ны́нѣ на́мъ проще́нїе.
Сла́ва: Оу҆́ме безнача́льный ѻ҆́ч҃е, соѡбра́зный бж҃їй сло́ве, и҆ дш҃е бж҃е́ственный, бл҃гі́й и҆ пра́вый, воспѣва́ющыѧ вѣ́рнѡ твою̀ держа́вꙋ, соблюдѝ ꙗ҆́кѡ бл҃гоꙋтро́бенъ.
И҆ ны́нѣ, бг҃оро́диченъ: Па́жить потребѝ тлѝ, человѣ́къ по сꙋществꙋ̀ бы́въ бг҃ъ мо́й, во ᲂу҆тро́бѣ твое́й чⷭ҇таѧ: и҆ родонача́льники пре́жднѧгѡ ѡ҆сꙋжде́нїѧ є҆ди́нъ свободѝ.
Та́же, Гдⷭ҇и поми́лꙋй, три́жды.
Сѣда́ленъ, гла́съ ѕ҃. Подо́бенъ: Є҆́же ѡ҆ на́съ:
Влⷣко бж҃е, при́зри съ нб҃сѐ, и҆ ви́ждь на́ше смире́нїе ꙗ҆́кѡ ще́дръ, и҆ ᲂу҆млⷭ҇рдисѧ чл҃вѣколю́бче пребл҃гі́й: ни ѿкꙋ́дꙋ бо надѣ́емсѧ проще́нїе полꙋчи́ти ѕлы́хъ, и҆́миже согрѣши́хомъ. тѣ́мже бꙋ́ди съ на́ми, и҆ никто́же на ны̀.
Сла́ва, и҆ ны́нѣ, бг҃оро́диченъ: Влⷣчце чⷭ҇таѧ, при́зри бцⷣе, ви́ждь на́шихъ ꙗ҆́звъ болѣ̑зни, и҆ ᲂу҆млⷭ҇рдисѧ пречⷭ҇таѧ, и҆ и҆сцѣлѝ со́вѣстное жже́нїе, твое́ю млⷭ҇тїю ѡ҆роша́ющи, и҆ вопїю́щи рабѡ́мъ твои̑мъ: а҆́зъ є҆́смь съ ва́ми, и҆ никто́же на вы̀.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇а, чⷭ҇тна́ѧ цр҃ковь, бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Возвыша́ѧй мы́сль, є҆ди́нице трисвѣ́тлаѧ, и҆ дꙋ́шꙋ и҆ се́рдце твои́хъ пѣвє́цъ ско́рѡ возведѝ, и҆ сїѧ́нїѧ твоегѡ̀ и҆ свѣ́тлости сподо́би.
Претворѝ и҆ преѡбразѝ ѿ ѕло́бы мѧ̀ всѧ́кїѧ къ добродѣ́тели, є҆ди́на неиз̾ѡбраже́ннаѧ, и҆ неизмѣ́ннаѧ трⷪ҇це, и҆ твои́ми зарѧ́ми просвѣтѝ.
Сла́ва: Помы́сливъ пре́жде, мꙋ́дрѣ соста́вилъ є҆сѝ а҆́гг҃лѡвъ чи́ны, слꙋжи́тельныѧ твоеѧ̀ бл҃гости, трїѷпоста́снаѧ є҆ди́нице, съ ни́миже прїимѝ мою̀ хвалꙋ̀.
И҆ ны́нѣ, бг҃оро́диченъ: И҆́же є҆стество́мъ несозда́нный бг҃ъ присносꙋ́щный, созда́нное воспрїе́мъ чл҃вѣ́ческое є҆стество̀, воз̾ѡбразѝ во ст҃ѣ́й твое́й ᲂу҆тро́бѣ, бцⷣе приснодв҃о.
І҆рмо́съ: Бж҃їимъ свѣ́томъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ: тѧ̀ вѣ́дѣти сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Помышлѧ́юще є҆стество̀ бг҃онача́льное, промысли́тельное и҆ сп҃си́тельное всѣ́хъ сꙋ́щее влⷣко, трисвѣ́тлое же є҆ди́но, къ тебѣ̀ ᲂу҆́тренюемъ, проще́нїѧ просѧ́ще грѣхопаде́нїй.
Ѻ҆́ч҃е безнача́льный бж҃е, и҆ соприсносꙋ́щный сн҃е, и҆ дш҃е ст҃ы́й, ᲂу҆твердѝ є҆динонача́льнаѧ трⷪ҇це твоѧ̑ пѣвцы̀, и҆ ѿ всѧ́кїѧ напа́сти и҆зба́ви и҆ ско́рби.
Сла́ва: Оу҆правлѧ́ѧй сїѧ́ньми бг҃одѣ́тельными, и҆ къ бл҃гоꙋгожде́нїю твоегѡ̀ трїѷпоста́снагѡ бж҃ества̀, со́лнце сла́вы, наставлѧ́ѧ мѧ̀ при́снѡ, и҆ бж҃е́ственнагѡ црⷭ҇твїѧ сотворѝ прича́стника.
И҆ ны́нѣ, бг҃оро́диченъ: И҆́же всѧ̑ носѧ́й и҆ соблюда́ѧй всеси́льною твое́ю рꙋко́ю сло́ве бж҃їй неизмѣ́нне, сохранѝ и҆ соблюди́ тѧ сла́вѧщыѧ, мл҃твами ро́ждшїѧ тѧ̀ бг҃ома́тере.
І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ вопїю́ ти: возведѝ ѿ тлѝ живо́тъ мо́й, многомлⷭ҇тиве.
Премꙋ́дрость и҆ ра́зꙋмъ, бг҃онача́лїе трисвѣ́тлое пѣвцє́мъ твои̑мъ да́рꙋй, и҆ добро́ты лꙋча́ми свѣтодѣ́тельныѧ твоеѧ̀ бл҃гости, ѡ҆сїѧва́тисѧ всѣ́хъ сподо́би. [Два́жды.]
Сла́ва: Свѣ́те нераздѣ́льный по сꙋществꙋ̀, трисїѧ́нне, вседержи́тельне, непристꙋ́пне, сердца̀ ѡ҆зарѝ вѣ́рнѡ хва́лѧщихъ держа́вꙋ твою̀, и҆ къ бж҃е́ственнѣй любвѝ вперѝ.
И҆ ны́нѣ, бг҃оро́диченъ: Въ тѧ̀ всели́сѧ приснодв҃о, ꙗ҆́вѣ вседержи́тель и҆ гдⷭ҇ь всѣ́хъ, и҆ є҆ди́номꙋ трисїѧ́нномꙋ зра́кꙋ бж҃ества̀ человѣ́ки покланѧ́тисѧ наꙋчѝ.
Гдⷭ҇и поми́лꙋй, три́жды.
Сѣда́ленъ, гла́съ ѕ҃: Подо́бенъ: Є҆́же ѡ҆ на́съ:
Ѻ҆́ч҃е и҆ сн҃е со дх҃омъ ст҃ы́мъ, при́зри на ны̀ вѣ́рою тебѣ̀ покланѧ́ющыѧсѧ, и҆ сла́вѧщыѧ держа́вꙋ твою̀ бл҃гоꙋтро́бне, со ѻ҆́гненными бре́ннїи, и҆но́гѡ бо ра́звѣ тебѐ не вѣ́мы, и҆ возопі́й пою́щымъ тѧ̀: а҆́зъ є҆́смь съ ва́ми, и҆ никто́же на вы̀.
Сла́ва, и҆ ны́нѣ, бг҃оро́диченъ: При́зри на ны̀ всепѣ́таѧ бцⷣе, возсїѧ́й просвѣще́нїе сердца́мъ ѡ҆мрачє́ннымъ, и҆ ѡ҆зарѝ ста́до твоѐ пречⷭ҇таѧ. є҆ли́кѡ бо хо́щеши и҆ мо́жеши, ꙗ҆́кѡ мт҃и сꙋ́щи зижди́телѧ твоегѡ̀, и҆ возопі́й молѧ́щымъ тѧ̀: а҆́зъ є҆́смь съ ва́ми, и҆ никто́же на вы̀.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
Крѣ́пкꙋю мнѣ̀ мы́сль ᲂу҆стро́й трисвѣ́тлаѧ начерта́ньми є҆ди́нице, є҆́же храни́ти и҆ соблюда́ти бж҃е́ствєнныѧ за́пѡвѣди твоѧ̑, и҆ всегда̀ пѣ́ти тебѣ̀ вѣ́рнѡ: бл҃гослове́нъ є҆сѝ бж҃е ѻ҆тє́цъ на́шихъ.
Ꙗ҆́кѡ то́ждествомъ є҆стества̀ пое́мый, неизрече́ннѡ є҆ди́нственный бж҃е, ли́цы же трⷪ҇цы носѧ̀ число̀, соблюдѝ всѣ́хъ на́съ ѿ разли́чныхъ и҆скꙋше́нїй и҆ ѡ҆бстоѧ́нїй.
Сла́ва: Соесте́ственна и҆ соприсносꙋ́щна сла́вимъ, є҆ди́наго тѧ̀ по сꙋществꙋ̀ бг҃а, сво́йствы неслїѧ́ннѣ ѵ҆поста́сными трⷪ҇це, разли́чное про́стѡ предлага́юще, во зра́цѣ непремѣ́ннѣмъ ꙗ҆́вѣ.
И҆ ны́нѣ, бг҃оро́диченъ: Бг҃ъ пресꙋ́щный прїѧ́тъ, пречⷭ҇таѧ, ѿ чре́ва твоегѡ̀ чⷭ҇тагѡ на́ше чл҃вѣколюбе́знѣ смѣше́нїе ꙗ҆́вѣ, и҆ всѣ́хъ наꙋчѝ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти: тѧ̀ превозно́симъ во всѧ̑ вѣ́ки.
Ѡ҆чище́нїе прегрѣше́нїй ско́рѡ пода́ждь мѝ, и҆ страсте́й многоѡбра́зныхъ и҆збавле́нїе, соѡбра́знаѧ трⷪ҇це, є҆ди́нице трїѷпоста́снаѧ: да тѧ̀ сла́влю во всѧ̑ вѣ́ки.
Воли́тель млⷭ҇ти и҆звѣ́ствованъ, ꙗ҆́кѡ бг҃ъ млⷭ҇тивъ, всѣ́хъ поми́лꙋй трисвѣ́тлаѧ є҆ди́нице и҆ трⷪ҇це пребл҃га́ѧ, славосло́вѧщихъ твоѐ вели́чествїе.
Сла́ва: Ѿ свѣ́та присносꙋ́щнагѡ ѻ҆ц҃а̀, свѣ́та соприсносꙋ́щна ро́ждшасѧ сло́ва, со дх҃омъ и҆схо́днымъ свѣ́томъ, вѣ́рою сла́вимъ, и҆ превозно́симъ во всѧ̑ вѣ́ки.
И҆ ны́нѣ, бг҃оро́диченъ: Врача̀ человѣ́кѡмъ пречⷭ҇таѧ, родила̀ є҆сѝ всеси́льнаго сло́ва, хрⷭ҇та̀ гдⷭ҇а, прароди́тєльныѧ ꙗ҆́звы всѣ́хъ и҆сцѣлѧ́юща, превозносѧ́щихъ є҆го̀ во вѣ́ки.
І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными во́и тѧ̀ ᲂу҆бл҃жа́емъ.
Зрѣ́ти чи́нове херꙋві́мстїи влⷣко, добро́ты твоеѧ̀ сла́вы не могꙋ́ще, кри́лы покрыва́ющесѧ, непреста́ннѡ трⷪ҇чнꙋю пѣ́снь вопїю́тъ, трїѷпоста́снꙋю твоегѡ̀ бг҃онача́лїѧ є҆ди́нственнагѡ держа́вꙋ сла́вѧще.
Твоѧ̑ сїѧ̑нїѧ сл҃нце незаходи́мое, твои́хъ рабѡ́въ пода́ждь сердца́мъ, и҆ просвѣтѝ дꙋ́шы, и҆ и҆зба́ви ѿ мно́гихъ прегрѣше́нїй є҆ди́не всемлⷭ҇тиве, и҆ трїѷпоста́сне: и҆ нетлѣ́нныѧ твоеѧ̀ жи́зни на́съ сподо́би.
Сла́ва: Є҆́же свѣ́тъ є҆диноче́стный, и҆ трисо́лнечный, и҆ свѣтодѣ́тельный, бж҃ество̀ сꙋ́щее ѡ҆зарѝ вѣ́рою тѧ̀ пою́щихъ, и҆ ѿ мра́чнагѡ и҆зба́ви ѕлодѣ́йства, и҆ сподо́би свѣтлѣ́йшихъ твои́хъ селе́нїй, ꙗ҆́кѡ пребл҃гі́й.
И҆ ны́нѣ, бг҃оро́диченъ: Премꙋ́дрѣ человѣ́ка пре́жде созда̀ сн҃ъ тво́й дв҃о, и҆ и҆стлѣ́вшаго ѡ҆бновѝ тобо́ю всепѣ́таѧ: и҆ бж҃е́ственнагѡ свѣ́та зарѝ невече́рнїѧ всѣ́хъ и҆спо́лни, тѧ̀ бцⷣꙋ и҆́стиннꙋ вѣ́рою сла́вѧщихъ.
Посе́мъ припѣ́въ григо́рїѧ сїнаи́та: Досто́йно є҆́сть: И҆ про́чее полꙋ́нощницы, пи́сано въ концѣ̀ кни́ги сеѧ̀.
по є҆ѯа̀ ѱалмѣ́хъ, Бг҃ъ гдⷭ҇ь, и҆ ꙗ҆ви́сѧ: на гла́съ ѕ҃, и҆ глаго́лемъ тропа́рь: А҆́гг҃льскїѧ си̑лы на гро́бѣ твое́мъ: [Два́жды.] Сла́ва, и҆ ны́нѣ: Бл҃гослове́ннꙋю нарекі́й твою̀ мт҃рь: И҆ ѻ҆бы́чное стїхосло́вїе ѱалти́ра.
По а҃-мъ стїхосло́вїи, сѣда́льны воскрⷭ҇ны, гла́съ ѕ҃:
Гро́бꙋ ѿве́рстꙋ, а҆́дꙋ пла́чꙋщꙋсѧ, мр҃і́а вопїѧ́ше ко скры́вшымсѧ а҆пⷭ҇лѡмъ: и҆зыди́те вїногра́да дѣ́лателїе, проповѣ́дите воскрⷭ҇нїѧ сло́во: воскр҃се гдⷭ҇ь, подаѧ̀ мі́рови ве́лїю млⷭ҇ть.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Гдⷭ҇и, предстоѧ́ше гро́бꙋ твоемꙋ̀ мр҃і́а магдали́на, и҆ пла́каше вопїю́щи, вертогра́дарѧ тѧ̀ мнѧ́щи, глаго́лаше: гдѣ̀ сокры́лъ є҆сѝ вѣ́чный живо́тъ; гдѣ̀ положи́лъ є҆сѝ, и҆́же на прⷭ҇то́лѣ ꙾херꙋві́мстѣмъ꙾[[херꙋві́мстѣмъ сѣдѧ́щаго]]; стрегꙋ́щїи бо сего̀, ѿ стра́ха ѡ҆мертвѣ́ша. и҆лѝ гдⷭ҇а моего̀ дади́те мѝ, и҆лѝ со мно́ю возопі́йте: и҆́же въ ме́ртвыхъ бы́въ, и҆ мє́ртвыѧ воскр҃си́въ, сла́ва тебѣ̀.
Сла́ва, и҆ ны́нѣ, бг҃оро́диченъ: Преднаписꙋ́етъ гедеѡ́нъ зача́тїе, и҆ сказꙋ́етъ дв҃дъ ржⷭ҇тво̀ твоѐ бцⷣе: сни́де бо ꙗ҆́кѡ до́ждь на рꙋно̀, сло́во во чре́во твоѐ, и҆ прозѧбла̀ є҆сѝ без̾ сѣ́мене, землѐ ст҃а́ѧ, мі́рови сп҃се́нїе, хрⷭ҇та̀ бг҃а на́шего, бл҃года́тнаѧ.
По в҃-мъ стїхосло́вїи сѣда́льны воскрⷭ҇ны, гла́съ ѕ҃:
Живо́тъ во гро́бѣ возлежа́ше, и҆ печа́ть на ка́мени надлежа́ше: ꙗ҆́кѡ цр҃ѧ̀ спѧ́ща во́ини стрежа́хꙋ хрⷭ҇та̀, и҆ врагѝ своѧ̑ неви́димѡ порази́вый, воскр҃се гдⷭ҇ь.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Преднаписꙋ́етъ і҆ѡ́на гро́бъ тво́й, и҆ сказꙋ́етъ сѷмеѡ́нъ воста́нїе бж҃е́ственное, безсме́ртне гдⷭ҇и: соше́лъ бо є҆сѝ ꙗ҆́кѡ ме́ртвъ во гро́бъ, разрꙋши́вый а҆́дѡва врата̀. воскрⷭ҇лъ же є҆сѝ кромѣ̀ тлѣ́нїѧ ꙗ҆́кѡ влⷣка, во сп҃се́нїе мі́ра, хрⷭ҇тѐ бж҃е на́шъ, просвѣти́вый сꙋ́щыѧ во тьмѣ̀.
Сла́ва, и҆ ны́нѣ, бг҃оро́диченъ: Бцⷣе дв҃о, молѝ сн҃а твоего̀, во́лею пригвожде́ннаго на крⷭ҇тѣ̀, и҆ воскрⷭ҇шаго и҆з̾ ме́ртвыхъ хрⷭ҇та̀ бг҃а на́шего, сп҃сти́сѧ дꙋша́мъ на́шымъ.
По непоро́чныхъ, ѵ҆пакоѝ, гла́съ ѕ҃:
Во́льною и҆ животворѧ́щею твое́ю сме́ртїю хрⷭ҇тѐ, врата̀ а҆́дѡва сокрꙋши́въ ꙗ҆́кѡ бг҃ъ, ѿве́рзлъ є҆сѝ на́мъ дре́внїй ра́й, и҆ воскр҃съ и҆з̾ ме́ртвыхъ, и҆зба́вилъ є҆сѝ ѿ тлѣ́нїѧ живо́тъ на́шъ.
Та́же степє́нна, гла́съ ѕ҃.
На нб҃о ѻ҆́чи моѝ возвожꙋ̀, къ тебѣ̀ сло́ве: ᲂу҆ще́дри мѧ̀, да живꙋ̀ тебѣ̀.
Поми́лꙋй на́съ ᲂу҆ничиже́нныхъ, ᲂу҆строѧ́ѧ бл҃гопотрє́бныѧ твоѧ̑ сосꙋ́ды сло́ве.
Сла́ва: Ст҃о́мꙋ дх҃ꙋ, всѧ́каѧ всесп҃си́тельнаѧ вина̀, а҆́ще ко́емꙋ се́й по достоѧ́нїю дхне́тъ, ско́рѡ взе́млетъ ѿ земны́хъ: восперѧ́етъ, возраща́етъ, ᲂу҆строѧ́етъ горѣ̀.
И҆ ны́нѣ, то́йже.
А҆́ще не гдⷭ҇ь бы бы́лъ въ на́съ, никто́же ѿ на́съ проти́вꙋ возмо́глъ бы вра̑жїимъ бра́немъ ѡ҆долѣ́ти: побѣжда́ющїи бо ѿ здѣ̀ возно́сѧтсѧ.
Зꙋбы̀ и҆́хъ да не ꙗ҆́та бꙋ́детъ дꙋша̀ моѧ̀ ꙗ҆́кѡ птене́цъ, сло́ве: ᲂу҆вы̀ мнѣ̀, ка́кѡ и҆́мамъ ѿ врага̀ и҆збы́ти грѣхолюби́въ сы́й!
Сла́ва: Ст҃ы́мъ дх҃омъ ѡ҆боже́нїе всѣ̑мъ, бл҃говоле́нїе, ра́зꙋмъ, ми́ръ и҆ бл҃гослове́нїе: равнодѣ́теленъ бо є҆́сть ѻ҆ц҃ꙋ̀ и҆ сло́вꙋ.
И҆ ны́нѣ, то́йже.
Надѣ́ющїисѧ на гдⷭ҇а врагѡ́мъ стра́шни, и҆ всѣ̑мъ ди́вни: горѣ́ бо зрѧ́тъ.
Въ беззакѡ́нїѧ рꙋ́къ свои́хъ, пра́ведныхъ жре́бїй, помо́щника тѧ̀ и҆мѣ́ѧ сп҃се, не простира́етъ.
Сла́ва: Ст҃а́гѡ дх҃а держа́ва на всѣ́хъ: є҆мꙋ́же вы̑шнѧѧ вѡ́инства покланѧ́ютсѧ, со всѧ́кимъ дыха́нїемъ до́льнымъ.
И҆ ны́нѣ, то́йже: Прокі́менъ гла́съ ѕ҃: Гдⷭ҇и, воздви́гни си́лꙋ твою̀, и҆ прїидѝ во є҆́же сп҃стѝ на́съ. Сті́хъ: Пасы́й і҆и҃лѧ вонмѝ, наставлѧ́ѧй ꙗ҆́кѡ ѻ҆вча̀ і҆ѡ́сифа. Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀: Є҆ѵⷢ҇лїе воскрⷭ҇но: Воскрⷭ҇нїе хрⷭ҇то́во: Ѱало́мъ пѧтидесѧ́тый. И҆ прѡ́чаѧ по рѧ́дꙋ.
Канѡ́нъ воскрⷭ҇нъ. Гла́съ ѕ҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Распросте́ртыма дла́ньма на крⷭ҇тѣ̀, ѻ҆те́ческагѡ и҆спо́лнилъ є҆сѝ бл҃говоле́нїѧ, бл҃гі́й і҆и҃се, всѧ́чєскаѧ. тѣ́мже побѣ́днꙋю пѣ́снь тебѣ̀ всѝ пои́мъ.
Стра́хомъ къ тебѣ̀ ꙗ҆́кѡ рабы́нѧ, сме́рть повелѣ́на пристꙋпѝ влⷣцѣ живота̀, то́ю подаю́щемꙋ на́мъ безконе́чный живо́тъ и҆ воскрⷭ҇нїе.
Бг҃оро́диченъ: Своего̀ прїе́мши содѣ́телѧ, ꙗ҆́кѡ са́мъ восхотѣ̀, ѿ безсѣ́меннагѡ твоегѡ̀ чре́ва, па́че ᲂу҆ма̀ воплоща́ема, чⷭ҇таѧ, тва́рей вои́стиннꙋ ꙗ҆ви́ласѧ є҆сѝ влⷣчца.
И҆́нъ канѡ́нъ, крⷭ҇товоскрⷭ҇нъ.
Сꙋди́лищꙋ пїла́товꙋ предстои́тъ хотѧ̀ беззако́нномꙋ сꙋдꙋ̀, ꙗ҆́кѡ сꙋди́мь сꙋдїѧ̀, и҆ ѿ рꙋкѝ непра́вды по лицꙋ̀ заꙋша́етсѧ бг҃ъ, є҆го́же трепе́щꙋтъ землѧ̀, и҆ нбⷭ҇наѧ.
Просте́рлъ є҆сѝ бж҃е́ственнѣи дла̑ни твоѝ сп҃се, на пречⷭ҇тѣмъ твое́мъ и҆ живоно́снѣмъ крⷭ҇тѣ̀: и҆ собра́лъ є҆сѝ ꙗ҆зы́ки въ позна́нїе твоѐ влⷣко, покланѧ́ющыѧсѧ гдⷭ҇и, сла́вномꙋ твоемꙋ̀ распѧ́тїю.
Крⷭ҇тобг҃оро́диченъ: Стоѧ́ше сле́зъ и҆сто́чники и҆спꙋща́ющи, пренепоро́чнаѧ при крⷭ҇тѣ̀ твое́мъ сп҃се, ꙗ҆̀же ѿ ребра̀ твоегѡ̀ ка̑пли крове́й зрѧ́щи хрⷭ҇тѐ, и҆ твою̀ безприкла́днꙋю млⷭ҇ть сла́вѧщи.
И҆́нъ канѡ́нъ прест҃ѣ́й бцⷣѣ, [є҆гѡ́же краестро́чїе: Мт҃и бж҃їѧ, незави́стнꙋю мѝ да́ждь бл҃года́ть.]
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль:
Прича́щшисѧ є҆́ѵа ꙾садꙋ̀, преслꙋша́ннагѡ бра́шна꙾[[є҆́же са́да преслꙋша́ннагѡ бра́шна]], клѧ́твꙋ введѐ: но сїю̀ разрѣ́шила є҆сѝ чⷭ҇таѧ, бл҃гослове́нїѧ нача́токъ хрⷭ҇та̀ ро́ждши.
Ꙗ҆́же би́сера ѿ бж҃е́ственныѧ мо́лнїи хрⷭ҇та̀ ро́ждши, страсте́й мои́хъ мглꙋ̀, и҆ прегрѣше́нїй смꙋще́нїе чⷭ҇таѧ, разженѝ свѣ́томъ твоеѧ̀ свѣ́тлости.
Ꙗ҆зы́кѡвъ ча́ѧнїе, і҆а́кѡвъ и҆з̾ тебѐ воплоща́емаго предзрѧ́ше та́йнѡ ᲂу҆́мныма ѻ҆чи́ма бг҃а, и҆зба́вльшаго на́съ хода́тайствомъ твои́мъ.
Ѡ҆скꙋдѣ́вшымъ кнѧзє́мъ ѿ колѣ́на і҆ꙋ́дова пречⷭ҇таѧ, сн҃ъ тво́й и҆ бг҃ъ, проше́дъ во́ждь, над̾ концы̀ земны́ми ны́нѣ вои́стиннꙋ воцр҃и́сѧ.
Катава́сїа: Ѿве́рзꙋ ᲂу҆ста̀ моѧ̑:
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Бг҃а распина́ема пло́тїю зрѧ́щи тва́рь растаѧва́шесѧ стра́хомъ: но содержи́тельною дла́нїю на́съ ра́ди распѧ́тагѡ, крѣ́пкѡ держи́ма бѣ̀.
Сме́ртїю сме́рть разоре́на лежи́тъ ѻ҆каѧ́ннаѧ без̾ дыха́нїѧ: живота́ бо не терпѧ́щи бж҃е́ственнагѡ прираже́нїѧ, ᲂу҆мерщвлѧ́етсѧ ꙾крѣ́пкїй꙾[[крѣ́пкаѧ]], и҆ да́рꙋетсѧ всѣ̑мъ воскрⷭ҇нїе.
Бг҃оро́диченъ: Бж҃е́ственнагѡ ржⷭ҇тва̀ твоегѡ̀ чⷭ҇таѧ, всѧ́кїй є҆стества̀ чи́нъ превосхо́дитъ чꙋ́до: бг҃а бо преесте́ственнѣ зачала̀ є҆сѝ во чре́вѣ, и҆ ро́ждши пребыва́еши при́снѡ дв҃а.
Во гро́бѣ тридне́вствовавый воскр҃си́лъ є҆сѝ животворѧ́щимъ воста́нїемъ твои́мъ пре́жде ᲂу҆мерщвлє́нныѧ, и҆ ѡ҆сꙋжде́нїѧ разрѣши́вшесѧ ра́достнѡ веселѧ́хꙋсѧ, сѐ и҆збавле́нїе прише́лъ є҆сѝ гдⷭ҇и, взыва́юще.
Сла́ва твоемꙋ̀ воста́нїю сп҃се на́шъ, ꙗ҆́кѡ на́съ ѿ а҆́да тлѣ́нїѧ, и҆ сме́рти и҆зба́вилъ є҆сѝ ꙗ҆́кѡ всеси́ленъ, и҆ пою́ще глаго́лемъ: нѣ́сть ст҃ъ ра́звѣ тебѐ гдⷭ҇и чл҃вѣколю́бче.
Бг҃оро́диченъ: Ты̀ ѿ тебѐ ро́ждшагосѧ ꙗ҆́кѡ ви́дѣла є҆сѝ ᲂу҆ѧ́звлена копїе́мъ, ᲂу҆ѧзви́ласѧ є҆сѝ се́рдцемъ прест҃а́ѧ всенепоро́чнаѧ, и҆ ᲂу҆жаса́ющисѧ глаго́лала є҆сѝ: что̀ тебѣ̀ воздадѐ, ча́до, наро́дъ пребеззако́нный;
Тлѣ́ннꙋю мою̀ пло́ть и҆ сме́ртнꙋю, всечⷭ҇таѧ бг҃ома́ти, и҆з̾ чре́ва твоегѡ̀ несказа́ннѡ прїе́мъ бл҃гі́й, и҆ ѡ҆безтлѣ́нивъ сїю̀, вѣ́чнѣ себѣ̀ свѧза́лъ є҆́сть.
Бг҃а воплоща́ема и҆з̾ тебѐ зрѧ́ще дв҃о, ᲂу҆жаса́хꙋсѧ стра́хомъ ли́цы а҆́гг҃льстїи, и҆ ꙗ҆́кѡ мт҃рь бж҃їю немо́лчными пѣ́сньми тѧ̀ почита́ютъ.
Оу҆жасе́сѧ, го́рꙋ ᲂу҆́мнꙋю ви́дѣвъ тѧ̀ прⷪ҇ро́къ данїи́лъ, и҆з̾ неѧ́же ка́мень ѿсѣче́сѧ кромѣ̀ рꙋ́къ: и҆ де́мѡнскаѧ ка̑пища, бг҃омт҃и, крѣ́пкѡ сокрꙋшѝ.
Не мо́жетъ сло́во тѧ̀ чл҃вѣ́ческое, нижѐ ѧ҆зы́къ дв҃о похвали́ти досто́йнѡ: и҆з̾ тебе́ бо без̾ сѣ́мене жизнода́вецъ хрⷭ҇то́съ воплоти́тисѧ, пречⷭ҇таѧ, бл҃говолѝ.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Дре́во процвѣло̀ є҆́сть хрⷭ҇тѐ, и҆́стинныѧ жи́зни: крⷭ҇тъ бо водрꙋзи́сѧ, и҆ напое́нъ бы́въ кро́вїю и҆ водо́ю ѿ нетлѣ́ннагѡ твоегѡ̀ ребра̀, живо́тъ на́мъ прозѧбѐ.
Не ктомꙋ̀ ѕмі́й мнѣ̀ ло́жнѣ ѡ҆боже́нїе подлага́етъ: хрⷭ҇то́съ бо бг҃одѣ́латель чл҃вѣ́ческагѡ є҆стества̀, ны́нѣ невозбра́ннѡ стезю̀ живота̀ мнѣ̀ ѿве́рзе.
Бг҃оро́диченъ: Ꙗ҆́кѡ вои́стиннꙋ неизвѣща̑нна и҆ непостижи̑ма, ꙗ҆̀же твоегѡ̀ бг҃олѣ́пнагѡ бцⷣе сꙋ́ть ржⷭ҇тва̀, сꙋ́щымъ на землѝ и҆ на нб҃сѝ, приснодв҃о, та̑инства.
Чⷭ҇тны́й крⷭ҇тъ тво́й почита́емъ, и҆ гво́зди хрⷭ҇тѐ, и҆ ст҃о́е копїѐ съ тро́стїю, вѣне́цъ и҆́же ѿ те́рнїй, и҆́миже ѿ а҆́дова и҆стлѣ́нїѧ и҆зба́вихомсѧ.
Гро́бъ сп҃се тѧ̀ под̾ѧ́тъ во́лею ме́ртва ѡ҆ на́съ ꙗ҆́вльшагосѧ, но ника́коже возмо́же сло́ве, ᲂу҆держа́ти: ꙗ҆́кѡ бг҃ъ бо воскрⷭ҇лъ є҆сѝ, сп҃са́ѧ ро́дъ на́шъ.
Крⷭ҇тобг҃оро́диченъ: Бг҃ороди́тельнице приснодв҃о, сп҃са хрⷭ҇та̀ человѣ́кѡмъ ро́ждшаѧ, ѿ бѣ́дъ и҆ мꙋ́къ и҆зба́ви на́съ, прибѣга́ющихъ вѣ́рою къ бж҃е́ственномꙋ покро́вꙋ твоемꙋ̀.
Пое́мъ пречⷭ҇таѧ тебѐ всенепоро́чнꙋю, и҆̀же тобо́ю сп҃сшїисѧ, и҆ бл҃гоче́стнѡ пою́ще взыва́емъ: бл҃гослове́нна, ꙗ҆́же бг҃а приснодв҃о ро́ждшаѧ.
Свѣ́тъ незаходи́мый дв҃о родила̀ є҆сѝ, сꙋ́щымъ во тьмѣ̀ житїѧ̀, пло́тїю свѣтѧ́щъ всебл҃же́ннаѧ, и҆ пою́щымъ тѧ̀, ра́дость приснодв҃о и҆сточи́ла є҆сѝ.
Бл҃года́ть процвѣтѐ, зако́нъ преста̀, тобо́ю всест҃а́ѧ: ты́ бо чⷭ҇таѧ, родила̀ є҆сѝ гдⷭ҇а, подаю́щаго на́мъ приснодв҃о, ѡ҆ставле́нїе.
Ме́ртва мѧ̀ показа̀ сада̀ вкꙋше́нїе, жи́зни же дре́во и҆з̾ тебѐ ꙗ҆́вльшеесѧ пречⷭ҇таѧ, воскр҃сѝ, и҆ ра́йскїѧ сла́дости наслѣ́дника мѧ̀ ᲂу҆стро́и.
І҆рмо́съ: Бж҃їимъ свѣ́томъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти сло́ве бж҃їй, и҆́стиннагѡ бг҃а, ѿ мра́ка грѣхо́внагѡ взыва́юща.
Оу҆стꙋпа́ютъ мнѣ̀ херꙋві́ми ны́нѣ, и҆ пла́менное ѻ҆рꙋ́жїе, влⷣко, плещы̀ мнѣ̀ дае́тъ, тѧ̀ ви́дѣвше сло́ве бж҃їй и҆́стиннаго бг҃а, разбо́йникꙋ пꙋ́ть сотво́ршаго въ ра́й.
Не ктомꙋ̀ бою́сѧ, є҆́же въ зе́млю влⷣко хрⷭ҇тѐ возвраще́нїѧ: ты́ бо ѿ землѝ мѧ̀ возве́лъ є҆сѝ забве́нна, бл҃гоꙋтро́бїѧ ра́ди мно́гагѡ, къ высотѣ̀ нетлѣ́нїѧ воскрⷭ҇нїемъ твои́мъ.
Бг҃оро́диченъ: И҆̀же бцⷣꙋ тѧ̀ ѿ дꙋшѝ, влⷣчце мі́ра бл҃га́ѧ, и҆сповѣ́дающихъ сп҃сѝ: тебе́ бо предста́тельство непобори́мое и҆́мамы, и҆́стиннꙋю бг҃ороди́тельницꙋ.
Снѣ́дїю дре́ва во є҆де́мѣ прельсти́выйсѧ въ тлю̀ поползѐ родонача́льникъ, преслꙋ́шавый гдⷭ҇и за́пѡвѣди твоѧ̑ пребл҃гі́й: но сего̀ крⷭ҇то́мъ па́ки возве́лъ є҆сѝ въ пе́рвꙋю добро́тꙋ, послꙋшли́въ ѻ҆ц҃ꙋ̀ сп҃се бы́вый.
Твое́ю сме́ртїю бл҃же, сме́рти потреби́сѧ держа́ва, и҆сто́чникъ жи́зни на́мъ и҆сточѝ, и҆ безсме́ртїе дарова́сѧ: сегѡ̀ ра́ди погребе́нїю твоемꙋ̀ и҆ воскрⷭ҇нїю вѣ́рою покланѧ́емсѧ, и҆́мже ꙗ҆́кѡ бг҃ъ мі́ръ ве́сь просвѣти́лъ є҆сѝ.
Крⷭ҇тобг҃оро́диченъ: Живы́й на нб҃сѣ́хъ и҆ творе́цъ всѣ́хъ гдⷭ҇ь, во твою̀ всенепоро́чнаѧ, всели́сѧ неизрече́ннѡ ᲂу҆тро́бꙋ, просла́вивый тѧ̀ превы́шшꙋю нб҃съ, и҆ ст҃ѣ́йшꙋю чинѡ́въ невеще́ственныхъ: тѣ́мже ны́нѣ и҆̀же на земли́ тѧ ᲂу҆бл҃жа́емъ.
Чистото́ю возсїѧ́вши свѣ́тлѡ бж҃е́ственное пребыва́нїе влⷣки всепѣ́таѧ была̀ є҆сѝ. ты́ бо є҆ди́на мт҃и бж҃їѧ ꙗ҆ви́ласѧ є҆сѝ, во ѡ҆б̾ѧ́тїихъ ꙗ҆́кѡ младе́нца сего̀ носи́вши.
Носѧ́щи добро́тꙋ ᲂу҆́мнꙋю, краснѣ́йшїѧ твоеѧ̀ дꙋшѝ, невѣ́ста бж҃їѧ была̀ є҆сѝ, запеча́тствована дв҃ствомъ чи́стаѧ, и҆ свѣ́томъ чистоты̀ мі́ръ просвѣща́ющи.
Да рыда́етъ собра́нїе ѕлочести́выхъ, не проповѣ́дающихъ тѧ̀ ꙗ҆́вѣ чи́стꙋю бг҃ома́терь: ты́ бо врата̀ бж҃їѧ свѣ́та ꙗ҆ви́ласѧ є҆сѝ на́мъ, мра́къ прегрѣше́нїй разгонѧ́ющи.
І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ вопїю́ ти: возведѝ ѿ тлѝ живо́тъ мо́й, многомлⷭ҇тиве.
Распина́емь влⷣко, гвоздьмѝ ᲂу҆́бѡ клѧ́твꙋ ю҆́же на на́съ потреби́лъ є҆сѝ: копїе́мъ же пробода́емь въ ребро̀, а҆да́мово рꙋкописа́нїе растерза́въ, мі́ръ свободи́лъ є҆сѝ.
А҆да́мъ низведе́сѧ, ле́стїю запѧ́тъ бы́въ, ко а҆́довѣ про́пасти: но и҆́же є҆стество́мъ, бг҃ъ же и҆ млⷭ҇тивъ, сше́лъ є҆сѝ на взыска́нїе, и҆ на ра́мꙋ поне́съ, совоскр҃си́лъ є҆сѝ.
Бг҃оро́диченъ: Пречⷭ҇таѧ влⷣчце, ро́ждшаѧ человѣ́кѡмъ ко́рмчїю гдⷭ҇а, страсте́й мои́хъ непостоѧ́нное и҆ лю́тое ᲂу҆толѝ смꙋще́нїе, и҆ тишинꙋ̀ пода́ждь се́рдцꙋ моемꙋ̀.
Хрⷭ҇тоꙋбі́йца и҆ прⷪ҇рокоꙋбі́йца бы́сть є҆вре́йское мно́жество: ꙗ҆́кѡ бо прⷪ҇ро́ки дре́вле и҆́стины сꙋ́щыѧ та̑йныѧ лꙋчѝ, ᲂу҆би́ти не ᲂу҆боѧ́сѧ: си́це и҆ ны́нѣ гдⷭ҇а, є҆го́же проповѣ́дахꙋ ѻ҆нѝ тогда̀, за́вистїю влеко́ми ᲂу҆би́ша. но на́мъ бы́сть живо́тъ ᲂу҆мерщвле́нїе є҆гѡ̀.
Ꙗ҆́тъ бы́лъ є҆сѝ, но не ᲂу҆держа́нъ сп҃се во гро́бѣ, а҆́ще бо и҆ во́лею вкꙋси́лъ є҆сѝ сме́рти сло́ве, но воскрⷭ҇лъ є҆сѝ ꙗ҆́кѡ бг҃ъ безсме́ртенъ, совоздви́гнꙋвый ᲂу҆́зники сꙋ́щыѧ во а҆́дѣ, и҆ ра́дость жена́мъ вмѣ́стѡ печа́ли пре́жнїѧ, па́ки премѣни́вый.
Бг҃оро́диченъ: Безче́стенъ тво́й и҆ скꙋ́денъ ꙗ҆ви́сѧ ви́дъ плотскі́й па́че человѣ́кѡвъ, во вре́мѧ стра́сти: и҆́бо бж҃ества̀ сꙋщество́мъ, красе́нъ добро́тою дв҃дꙋ показа́сѧ: но жезло́мъ твоегѡ̀ црⷭ҇твїѧ врагѡ́въ сотры́й крѣ́пость, глаго́лаше чⷭ҇таѧ: ѽ сн҃е мо́й и҆ бж҃е, ѿ гро́ба воста́ни.
Вели́кїй преднаписа̀ во прⷪ҇ро́цѣхъ мѡѷсе́й тѧ̀, ковче́гъ, и҆ трапе́зꙋ, и҆ свѣ́щникъ, и҆ рꙋ́чкꙋ, ѡ҆бра́знѡ назна́менꙋѧ воплоще́нїе, є҆́же и҆з̾ тебѐ вы́шнѧгѡ, мт҃и дв҃о.
Оу҆мерщвлѧ́етсѧ сме́рть, и҆ тлѣ́нїе ᲂу҆пражнѧ́етсѧ а҆да́мова ѡ҆сꙋжде́нїѧ, ѽ влⷣчце! плодꙋ̀ твоемꙋ̀ прирази́вшеесѧ: жи́знь бо родила̀ є҆сѝ, ѿ и҆стлѣ́нїѧ и҆збавлѧ́ющꙋю пою́щихъ тѧ̀.
Зако́нъ и҆знемо́же, и҆ сѣ́нь ми́мѡ и҆́де, па́че ᲂу҆ма̀ и҆ смы́сла ꙗ҆́вльшейсѧ мѝ бл҃года́ти, є҆́же ѿ тебѐ дв҃о ржⷭ҇тва̀, бг҃а и҆ сп҃са, многопѣ́таѧ.
Конда́къ, гла́съ ѕ҃: Живонача́льною дла́нїю, ᲂу҆ме́ршыѧ ѿ мра́чныхъ ᲂу҆до́лїй, жизнода́вецъ воскр҃си́въ всѣ́хъ хрⷭ҇то́съ бг҃ъ, воскрⷭ҇нїе подадѐ человѣ́ческомꙋ ро́дꙋ: є҆́сть бо всѣ́хъ сп҃си́тель, воскрⷭ҇нїе и҆ живо́тъ, и҆ бг҃ъ всѣ́хъ.
І҆́косъ: Крⷭ҇тъ и҆ погребе́нїе твоѐ жизнода́вче, воспѣва́емъ вѣ́рнїи, и҆ покланѧ́емсѧ, ꙗ҆́кѡ а҆́дъ свѧза́лъ є҆сѝ безсме́ртне, ꙗ҆́кѡ бг҃ъ всеси́льный: и҆ мє́ртвыѧ совоскр҃си́лъ є҆сѝ, и҆ врата̀ смє́ртнаѧ сокрꙋши́лъ є҆сѝ, и҆ держа́вꙋ а҆́довꙋ низложи́лъ є҆сѝ, ꙗ҆́кѡ бг҃ъ. тѣ́мже земноро́днїи славосло́вимъ тѧ̀ любо́вїю, воскр҃сшаго, и҆ низложи́вшаго вра́жїю держа́вꙋ всепа́гꙋбнꙋю, и҆ всѣ́хъ воскр҃си́вшаго въ тѧ̀ вѣ́ровавшихъ, и҆ мі́ръ и҆зба́вльшаго ѿ стрѣ́лъ ѕмїи́ныхъ, и҆ ѿ пре́лести вра́жїѧ, ꙗ҆́кѡ бг҃ъ всѣ́хъ.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
Рыда́ющее во стрⷭ҇ти твое́й со́лнце, во мра́къ ѡ҆блече́сѧ, и҆ во днѝ по все́й влⷣко, землѝ свѣ́тъ поме́рче, вопїѧ̀: бл҃гослове́нъ є҆сѝ бж҃е ѻ҆тє́цъ на́шихъ.
Ѡ҆блеко́шасѧ хрⷭ҇тѐ схожде́нїемъ твои́мъ во свѣ́тъ преиспѡ́днѧѧ, пра́ѻтецъ же весе́лїѧ и҆спо́лнь ꙗ҆ви́сѧ ликовствꙋ́ѧ, взыгра́сѧ вопїѧ̀: бл҃гослове́нъ є҆сѝ бж҃е ѻ҆тє́цъ на́шихъ.
Бг҃оро́диченъ: Тобо́ю мт҃и дв҃о, свѣ́тъ возсїѧ̀ все́й вселе́ннѣй свѣ́тлый: зижди́телѧ бо ты̀ всѣ́хъ родила̀ є҆сѝ бг҃а. є҆го́же просѝ всечⷭ҇таѧ, на́мъ низпосла́ти вѣ̑рнымъ ве́лїю млⷭ҇ть.
Ѽ стра́ннагѡ ѡ҆́браза! і҆и҃лѧ и҆збавле́й ѿ рабо́ты фараѡ́нскїѧ, распина́етсѧ во́лею ѿ негѡ̀, и҆ разрѣша́етъ вери̑ги согрѣше́нїй. є҆мꙋ́же вѣ́рою пое́мъ: и҆зба́вителю бж҃е, бл҃гослове́нъ є҆сѝ.
Тебѐ сп҃са на ло́бнѣмъ распѧ́ша пребеззако́нныхъ ѻ҆́троцы нечести́вїи, врата̀ мѣ̑днаѧ и҆ верєѝ сломи́вшаго, во сп҃се́нїе на́съ пою́щихъ: и҆зба́вителю бж҃е, бл҃гослове́нъ , є҆сѝ.
Бг҃оро́диченъ: Є҆́ѵы дре́внїѧ свобожде́нїе ро́ждшаѧ ѿ клѧ́твы, разрѣша́еши а҆да́ма дв҃о чⷭ҇таѧ. тѣ́мже со а҆́гг҃лы тѧ̀, съ сн҃омъ твои́мъ пое́мъ и҆ вопїе́мъ: и҆зба́вителю бж҃е, бл҃гослове́нъ є҆сѝ.
Ю҆́нѡшъ трїе́хъ пе́щь не ѡ҆палѝ, ржⷭ҇тво̀ проѡбразꙋ́ющихъ твоѐ: бж҃е́ственный бо ѻ҆́гнь тебѐ не ѡ҆пали́въ, всели́сѧ въ тѧ̀, и҆ всѧ̑ наꙋчѝ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
Бл҃жа́тъ концы́ тѧ всечⷭ҇таѧ мт҃и, ꙗ҆́коже прорекла̀ є҆сѝ, просвѣща́еми свѣтолꙋ́чными сїѧ́ньми твои́ми, и҆ бл҃года́тїю пою́ще, вопїю́тъ: бл҃гослове́нъ є҆сѝ бж҃е ѻ҆тє́цъ на́шихъ.
Па̑гꙋбныѧ ᲂу҆́бѡ зꙋ́бы въ мѧ̀ вонзѐ ѕмі́й лꙋка́внѣйшїй: но ꙾са́мъ꙾[[сїѧ̀]] тво́й бг҃ома́ти, сокрꙋшѝ сн҃ъ, крѣ́пость же мнѣ̀ дадѐ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
Ѡ҆чисти́лище є҆стества̀ ты̀ є҆сѝ є҆ди́на бг҃обл҃же́ннаѧ, на ра̑мꙋ бо херꙋві̑мскꙋ сѣдѧ́щаго бг҃а бо ѡ҆б̾ѧ́тїихъ носѧ́щи вопїе́ши: бл҃гослове́нъ є҆сѝ бж҃е ѻ҆тє́цъ на́шихъ.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.
І҆ꙋдє́йскїѧ дре́вле прⷪ҇рокоꙋбі̑йцы лю́ди, бг҃оꙋбі̑йцы за́висть ны́нѣ содѣ́ла, тебѐ на крⷭ҇тъ возне́сшыѧ, сло́ве бж҃їй: є҆го́же превозно́симъ во всѧ̑ вѣ́ки.
Нбⷭ҇нагѡ крꙋ́га не ѡ҆ста́вилъ є҆сѝ, и҆ во а҆́дъ соше́дъ, всего̀ совоздви́глъ є҆сѝ лежа́щаго во гно́ищи хрⷭ҇тѐ человѣ́ка, тѧ̀ превозносѧ́ща во всѧ̑ вѣ́ки.
Бг҃оро́диченъ: Ѿ свѣ́та свѣтода́вца сло́ва зачала̀ є҆сѝ, и҆ ро́ждши неизрече́ннѡ сего̀, просла́виласѧ є҆сѝ: дх҃ъ бо въ тѧ̀ ѻ҆трокови́це бж҃їй всели́сѧ. тѣ́мже тѧ̀ пое́мъ во всѧ̑ вѣ́ки.
Оу҆жасе́сѧ всѧ́къ слꙋ́хъ, ка́кѡ вы́шнїй во́лею прїи́де на зе́млю, а҆́довꙋ крѣ́пость разрꙋши́ти крⷭ҇то́мъ и҆ погребе́нїемъ, и҆ всѧ̑ воздви́гнꙋти зва́ти: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Преста̀ а҆́дово мꙋчи́тельство, и҆ ца́рство ᲂу҆ничижи́сѧ про́чее, на крⷭ҇тѣ́ бо на землѝ водрꙋ́зивсѧ, и҆́же над̾ всѣ́ми бг҃ъ, сегѡ̀ могꙋ́тство низложѝ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Ѽ неизрече́ннагѡ твоегѡ̀ хрⷭ҇тѐ чл҃вѣколю́бїѧ, и҆ неизглаго́ланныхъ бла̑гъ! мене́ бо ви́дѧ погиба́юща во а҆́довѣ темни́цѣ, стра̑сти претерпѣ́вый и҆зба́вилъ є҆сѝ. тѣ́мже тѧ̀ бл҃гослови́мъ всѣ́хъ влⷣкꙋ, и҆ превозно́симъ во всѧ̑ вѣ́ки.
Позлаще́ною ри́зою ꙗ҆́коже цр҃и́цꙋ сн҃ъ тво́й просвѣти́въ заре́ю дх҃а, тебѐ ѡ҆деснꙋ́ю себѐ поста́ви пречⷭ҇таѧ: є҆го́же превозно́симъ во всѧ̑ вѣ́ки.
И҆́же хотѣ́нїемъ є҆ди́нымъ мі́ръ водрꙋзи́вый, ѿ пречⷭ҇тыѧ твоеѧ̀ ᲂу҆тро́бы пло́ть взе́млетъ, свы́ше сїю̀ назда́ти хотѧ̀: є҆го́же превозно́симъ во всѧ̑ вѣ́ки.
Счета́нїемъ сло́ва ко мнѣ̀ человѣ́кꙋ, бж҃е́ственное жили́ще была̀ є҆сѝ пречⷭ҇таѧ, просїѧ́вши ꙗ҆́вѣ дв҃ства свѣ́тлостїю: тѣ́мже тѧ̀ пое́мъ во всѧ̑ вѣ́ки.
Златоза́рный тѧ̀ свѣ́щникъ предвоѡбразѝ, прїе́мшꙋю несказа́ннѡ свѣ́тъ непристꙋ́пный, ра́зꙋмомъ свои́мъ ѡ҆зарѧ́ющъ всѧ́чєскаѧ. тѣ́мже тѧ̀ пое́мъ чⷭ҇таѧ, во вѣ́ки.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: Съ припѣ́вомъ: Чⷭ҇тнѣ́йшꙋю херꙋві̑мъ:
І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Страсте́й неприча́стенъ ты̀ пребы́лъ є҆сѝ сло́ве бж҃їй, пло́тїю прїѡбщи́всѧ стрⷭ҇тє́мъ: но рѣши́ши ѿ страсте́й человѣ́ка, стрⷭ҇тє́мъ бы́въ стра́сть сп҃се на́шъ: є҆ди́нъ бо є҆сѝ безстрⷭ҇тенъ, и҆ всеси́ленъ.
Тлю̀ сме́ртнꙋю прїе́мъ, тлѣ́нїѧ соблю́лъ є҆сѝ тѣ́ло твоѐ невкꙋ́сно, твоѧ́ же животворѧ́щаѧ и҆ бж҃е́ственнаѧ влⷣко дꙋша̀, во а҆́дѣ не ѡ҆ста́влена бы́сть: но ꙗ҆́коже ѿ сна̀ воскр҃съ, на́съ совоздви́глъ є҆сѝ.
Трⷪ҇ченъ: Бг҃а ѻ҆ц҃а̀, сн҃а собезнача́льна, всѝ человѣ́цы ᲂу҆стна́ми ᲂу҆́бѡ чи́стыми сла́вимъ, неизрече́ннꙋю же и҆ пресла́внꙋю дх҃а всест҃а́гѡ си́лꙋ чти́мъ: є҆ди́на бо є҆сѝ всеси́льнаѧ трⷪ҇ца неразлꙋ́чнаѧ.
А҆́ще и҆ во гро́бъ соше́лъ є҆сѝ ꙗ҆́кѡ ме́ртвъ жизнода́вче, но а҆́довꙋ крѣ́пость разрꙋши́лъ є҆сѝ хрⷭ҇тѐ, совоздви́гнꙋвъ мє́ртвыѧ, ꙗ҆̀же и҆ поглотѝ, и҆ воскрⷭ҇нїе всѣ̑мъ по́далъ є҆сѝ, ꙗ҆́кѡ бг҃ъ, вѣ́рою и҆ любо́вїю тѧ̀ велича́ющымъ.
Да ра́дꙋетсѧ тва́рь, и҆ да процвѣте́тъ ꙗ҆́кѡ крі́нъ: хрⷭ҇то́съ бо ѿ ме́ртвыхъ воста̀ ꙗ҆́кѡ бг҃ъ. гдѣ̀ твоѐ, сме́рте, ны́нѣ жа́ло, воззове́мъ; гдѣ̀ твоѧ̀ а҆́де, побѣ́да; низложи́ тѧ въ зе́млю, возвы́сивый ро́гъ на́шъ, ꙗ҆́кѡ бл҃гоꙋтро́бенъ.
Крⷭ҇тобг҃оро́диченъ: Но́сиши носѧ́щаго всѧ̑, и҆ держи́ши ꙗ҆́кѡ младе́нца въ рꙋка́хъ, и҆з̾ рꙋкѝ и҆збавлѧ́ющаго на́съ бори́телѧ врага̀, пречⷭ҇таѧ влⷣчце, и҆ ви́диши на крⷭ҇тъ дре́ва возвыша́ема, ѿ ро́ва ѕло́бы на́съ возвы́сивша.
Ѕвѣзда̀ сїѧ́ющи зарѧ́ми бж҃ества̀ ѿ і҆а́кѡва, ѿ мра́ка содержи̑мымъ возсїѧ̀: тобо́ю бо всечⷭ҇таѧ, хрⷭ҇то́съ бг҃ъ сло́во воплоще́нно: и҆́мже просвѣща́еми, съ нбⷭ҇ными вѡ́и тѧ̀ ᲂу҆бл҃жа́емъ.
Оу҆крѣ́пльсѧ си́лою твое́ю и҆ бл҃года́тїю, тебѣ̀ пѣ́снь ᲂу҆се́рднѡ ѿ се́рдца возложи́хъ: но сїю̀ прїимѝ дв҃о чⷭ҇таѧ, бл҃года́ть воздаю́щи твою̀ многосвѣ́тлꙋю, ѿ нетлѣ́нныхъ сокро́вищъ, бг҃обл҃же́ннаѧ.
Поста́въ показа́ласѧ є҆сѝ ꙗ҆́вѣ бж҃ества̀, въ не́мже ри́зꙋ тѣлесѐ сло́во и҆стка̀, бг҃осодѣ́лавъ мо́й дв҃о зра́къ: въ него́же ѡ҆бле́ксѧ всѣ́хъ сп҃сѐ, ѿ смы́сла чи́ста тебѐ велича́ющихъ.
Мє́ртвымъ воскрⷭ҇нїе ны́нѣ дарова́сѧ, твои́мъ несказа́ннымъ и҆ неизрече́ннымъ ржⷭ҇тво́мъ, бцⷣе всечⷭ҇таѧ: жи́знь бо и҆з̾ тебѐ пло́тїю ѡ҆бле́кшисѧ, всѣ̑мъ возсїѧ̀, и҆ сме́ртнꙋю дрѧ́хлость ꙗ҆́вѣ разрꙋшѝ.
По катава́сїи є҆ктенїа̀ ма́лаѧ. Та́же: Ст҃ъ гдⷭ҇ь бг҃ъ на́шъ: Є҆ѯапостїла́рїй ᲂу҆́треннїй.
На хвали́техъ стїхи̑ры воскрⷭ҇ны, гла́съ ѕ҃:
Сті́хъ: Сотвори́ти въ ни́хъ сꙋ́дъ напи́санъ: сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.
Крⷭ҇тъ тво́й гдⷭ҇и, жи́знь и҆ воскрⷭ҇нїе лю́демъ твои̑мъ є҆́сть, и҆ надѣ́ющесѧ на́нь, тебѐ воскрⷭ҇шаго бг҃а на́шего пое́мъ: поми́лꙋй на́съ.
Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆тверже́нїи си́лы є҆гѡ̀.
Погребе́нїе твоѐ влⷣко, ра́й ѿве́рзе ро́дꙋ человѣ́ческомꙋ: и҆ ѿ и҆стлѣ́нїѧ и҆зба́вльшесѧ, тебѐ воскрⷭ҇шаго бг҃а на́шего пое́мъ: поми́лꙋй на́съ.
Сті́хъ: Хвали́те є҆го̀ на си́лахъ є҆гѡ̀, хвали́те є҆го̀ по мно́жествꙋ вели́чествїѧ є҆гѡ̀.
Со ѻ҆ц҃е́мъ и҆ дх҃омъ хрⷭ҇та̀ воспои́мъ, воскрⷭ҇шаго и҆з̾ ме́ртвыхъ, и҆ къ немꙋ̀ вопїи́мъ: ты̀ живо́тъ є҆сѝ на́шъ, и҆ воскрⷭ҇нїе, поми́лꙋй на́съ.
Сті́хъ: Хвали́те є҆го̀ во гла́сѣ трꙋ́бнѣмъ, хвали́те є҆го̀ во ѱалти́ри и҆ гꙋ́слехъ.
Тридне́венъ воскрⷭ҇лъ є҆сѝ хрⷭ҇тѐ ѿ гро́ба ꙗ҆́коже пи́сано є҆́сть, совоздви́гнꙋвый пра́ѻтца на́шего. тѣ́мже тѧ̀ и҆ сла́витъ ро́дъ человѣ́ческїй, и҆ воспѣва́етъ твоѐ воскрⷭ҇нїе.
И҆́ны стїхи̑ры а҆натѡ́лїевы.
Сті́хъ: Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ.
Гдⷭ҇и, ве́лїе и҆ стра́шно є҆́сть твоегѡ̀ воскрⷭ҇нїѧ та́инство: та́кѡ бо произше́лъ є҆сѝ ѿ гро́ба, ꙗ҆́кѡ жени́хъ ѿ черто́га, сме́ртїю сме́рть разрꙋши́вый, да а҆да́ма свободи́ши. тѣ́мже на нб҃сѣ́хъ а҆́гг҃ли ликовствꙋ́ютъ, и҆ на землѝ человѣ́цы сла́вѧтъ, є҆́же на на́съ бы́вшее бл҃гоꙋтро́бїе твоѐ, чл҃вѣколю́бче.
Сті́хъ: Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ: всѧ́кое дыха́нїе да хва́литъ гдⷭ҇а.
Ѽ пребеззако́ннїи і҆ꙋде́є, гдѣ̀ сꙋ́ть печа̑ти и҆ сре́брєницы, ꙗ҆̀же да́сте во́инѡмъ; не ᲂу҆кра́дено бы́сть сокро́вище, но воскр҃се ꙗ҆́кѡ си́ленъ: са́ми же посрами́стесѧ ѿве́ргшїисѧ хрⷭ҇та̀ гдⷭ҇а сла́вы, пострада́вша и҆ погребе́нна, и҆ воскрⷭ҇ша и҆з̾ ме́ртвыхъ: томꙋ̀ поклони́мсѧ.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Запеча́танꙋ гро́бꙋ, ка́кѡ ѡ҆кра́дени бы́сте і҆ꙋде́є, стра́жы поста́вльше, и҆ зна́мєнїѧ поло́жше, две́ремъ заключє́ннымъ про́йде цр҃ь; и҆лѝ ꙗ҆́кѡ ме́ртва предста́вите, и҆лѝ ꙗ҆́кѡ бг҃ꙋ поклони́тесѧ, съ на́ми пою́ще: сла́ва гдⷭ҇и крⷭ҇тꙋ̀ твоемꙋ̀, и҆ воскрⷭ҇нїю твоемꙋ̀.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Живопрїѧ́тнагѡ твоегѡ̀ гро́ба, мѷронѡ́сицы жєны̀ рыда́ющѧ, достиго́ша гдⷭ҇и, и҆ мѵ̑ра носѧ́щѧ, тѣ́ло твоѐ пречⷭ҇тое пома́зати и҆ска́хꙋ: ѡ҆брѣто́ша же свѣтоно́сна а҆́гг҃ла на ка́мени сѣдѧ́ща, и҆ къ ни̑мъ вѣща́юща, и҆ глаго́люща: что̀ слезитѐ, и҆з̾ ре́бръ и҆сточи́вшаго жи́знь мі́рови; что̀ и҆́щете ꙗ҆́кѡ ме́ртва во гро́бѣ безсме́ртнаго; те́кшѧ же па́че возвѣсти́те тогѡ̀ ᲂу҆ч҃нкѡ́мъ, сла́внагѡ є҆гѡ̀ воскрⷭ҇нїѧ всемі́рное ра́дованїе, и҆́мже и҆ на́съ сп҃се просвѣти́вый, да́рꙋй ѡ҆чище́нїе и҆ ве́лїю млⷭ҇ть.
Сла́ва, стїхи́ра ᲂу҆́треннѧѧ є҆ѵⷢ҇льскаѧ. И҆ ны́нѣ: Пребл҃гослове́нна є҆сѝ: Славосло́вїе вели́кое.
Та́же, тропа́рь воскрⷭ҇нъ.
Воскр҃съ и҆з̾ гро́ба, и҆ ᲂу҆́зы растерза́лъ є҆сѝ а҆́да, разрꙋши́лъ є҆сѝ ѡ҆сꙋжде́нїе сме́рти гдⷭ҇и, всѧ̑ ѿ сѣте́й врага̀ и҆зба́вивый: ꙗ҆ви́вый же себѐ а҆пⷭ҇лѡмъ твои̑мъ, посла́лъ є҆сѝ ѧ҆̀ на про́повѣдь, и҆ тѣ́ми ми́ръ тво́й по́далъ є҆сѝ вселе́ннѣй, є҆ди́не многомлⷭ҇тиве.
Та́же, є҆ктенїѝ. И҆ ѿпꙋ́стъ.
На лїтꙋргі́и бл҃жє́нны, гла́съ ѕ҃:
Помѧни́ мѧ бж҃е сп҃се мо́й, є҆гда̀ прїи́деши во црⷭ҇твїи твое́мъ, и҆ сп҃си́ мѧ ꙗ҆́кѡ є҆ди́нъ чл҃вѣколю́бецъ.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Дре́вомъ а҆да́ма прельсти́вшагосѧ, дре́вомъ крⷭ҇тнымъ па́ки сп҃слъ є҆сѝ и҆ разбо́йника, вопїю́ща: помѧни́ мѧ гдⷭ҇и во црⷭ҇твїи твое́мъ.
Сті́хъ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
А҆́дѡва врата̀ и҆ верєѝ сокрꙋши́вый жизнода́вче, воскр҃си́лъ є҆сѝ всѧ̑ сп҃се вопїю́щыѧ: сла́ва воста́нїю твоемꙋ̀.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Помѧни́ мѧ, и҆́же сме́рть плѣни́вый погребе́нїемъ твои́мъ, и҆ воскрⷭ҇нїемъ твои́мъ ра́дости всѧ̑ и҆спо́лнивый, ꙗ҆́кѡ бл҃гоꙋтро́бенъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Мѷронѡ́сицы ко гро́бꙋ прише́дшѧ, а҆́гг҃ла зовꙋ́ща слы́шахꙋ: хрⷭ҇то́съ воскр҃се, просвѣти́вый всѧ́чєскаѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
На дре́вѣ крⷭ҇тнѣмъ пригвозди́вшагосѧ, и҆ мі́ръ ѿ пре́лести и҆зба́вльшаго, согла́снѡ всѝ хрⷭ҇та̀ воспои́мъ.
Сла́ва, трⷪ҇ченъ: Ѻ҆ц҃а̀, и҆ сн҃а славосло́вимъ, и҆ дх҃а ст҃а́го, глаго́люще: трⷪ҇це ст҃а́ѧ, сп҃сѝ дꙋ́шы на́шѧ.
И҆ ны́нѣ, бг҃оро́диченъ: Неизрече́ннѡ въ послѣ̑днѧѧ заче́нши, и҆ ро́ждши созда́телѧ твоего̀, дв҃о, сп҃са́й тѧ̀ велича́ющыѧ.
Прокі́менъ: гла́съ ѕ҃: Сп҃сѝ гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ.
Сті́хъ: Къ тебѣ̀ гдⷭ҇и воззовꙋ̀, бж҃е мо́й, да не премолчи́ши ѿ менѐ.
А҆ллилꙋ́їа: Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ.
Сті́хъ: Рече́тъ гдⷭ҇еви: застꙋ́пникъ мо́й є҆сѝ, и҆ прибѣ́жище моѐ, бг҃ъ мо́й, и҆ ᲂу҆пова́ю на него̀.