Въ четверто́къ ве́чера,

на Гдⷭ҇и воззва́хъ, стїхи̑ры крⷭ҇тны. Гла́съ з҃:

Подо́бенъ: Не ктомꙋ̀ возбранѧ́еми є҆смы̀:

Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

Да человѣ́ка бг҃а содѣ́лаеши, человѣ́къ бы́лъ є҆сѝ пребл҃гі́й хрⷭ҇тѐ, и҆ распѧ́лсѧ є҆сѝ: сла́ва си́лѣ твое́й.

Сті́хъ: И҆́мене ра́ди твоегѡ̀, потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

Є҆гда̀ на крⷭ҇тъ тѧ̀ і҆и҃се, со́нмъ є҆вре́йскїй ѡ҆сꙋдѝ, землѧ̀ трѧса́шесѧ, и҆ со́лнца свѣ́тъ скрыва́шесѧ.

Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.

Те́рнїемъ тѧ̀ безсме́ртне, вѣнча̀ собо́ръ беззако́нный, пре́лести те́рнїе и҆з̾ ко́рене сѣкꙋ́ща, цр҃ю̀ ст҃ы́й.

Та́же, въ мине́и стїхи̑ры ст҃о́мꙋ. Сла́ва, ст҃о́мꙋ, а҆́ще и҆́мать: И҆ ны́нѣ, крⷭ҇тобг҃оро́диченъ гла́са. А҆́ще ли нѣ́сть мине́и, и҆́ны стїхи̑ры прест҃ѣ́й бцⷣѣ, гла́съ з҃:

Подо́бенъ: Дне́сь бди́тъ і҆ꙋ́да:

Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

Ви́дѧщи просте́рта на дре́вѣ а҆́гнца, нескве́рнаѧ а҆́гница и҆ дв҃а, посредѣ̀ двою̀ разбѡ́йникꙋ, ᲂу҆вы̀ мнѣ̀, вопїѧ́ше, сладча́йшее моѐ ча́до! что̀ стра́нное сїѐ и҆ пресла́вное та́инство; ка́кѡ тѧ̀ беззако́нный со́нмъ на крⷭ҇тъ воздви́же, и҆ же́лчи напоѝ, ма́нны насы́щшаго человѣ́ки;

Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Є҆гда́ тѧ на крⷭ҇тѣ̀ пригвожде́на дв҃а и҆ мт҃и твоѧ̀ ᲂу҆зрѣ̀, хрⷭ҇тѐ мо́й, сꙋдо́мъ законопрестꙋ́пнымъ ѿ і҆ꙋдє́й на мѣ́стѣ ло́бнѣмъ, ᲂу҆вы̀ мнѣ̀, вопїѧ́ше, сн҃е мо́й любе́знѣйшїй! что̀ стра́нное видѣ́нїе сїѐ; ка́кѡ тѧ̀ ко крⷭ҇тꙋ̀ пригвожда́ютъ дѣ́ти неразꙋ́мнїи є҆вре́йстїи, всѣ́хъ гдⷭ҇а;

Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Є҆ди́нꙋ тѧ̀, всест҃а́ѧ влⷣчце, по ржⷭ҇твѣ̀ позна́хомъ всѝ дв҃ꙋ ꙗ҆́вльшꙋюсѧ, є҆го́же без̾ сѣ́мене родила̀ є҆сѝ, на дре́вѣ ви́дѧщи рꙋ́цѣ своѝ во́лею пригвозди́вша, пречⷭ҇таѧ пла́чꙋщи взыва́ше: во́лею, долготерпѣли́ве, ᲂу҆мира́еши, и҆збавлѧ́ѧ ѿ сме́рти всѧ̑ пою́щыѧ тѧ̀.

Сла́ва, и҆ ны́нѣ, крⷭ҇тобг҃оро́диченъ: Влⷣце всест҃а́ѧ дв҃о, ро́ждшаѧ гдⷭ҇а, за бл҃гоꙋтро́бїе на крⷭ҇тѣ̀ пригвозди́вшагосѧ, и҆ жи́зни стрꙋи̑ и҆сточи́вша мі́рꙋ, того̀ ᲂу҆молѝ сп҃сти́сѧ дꙋша́мъ на́шымъ: тебе́ бо є҆ди́нꙋ и҆́мамы вѣ́рнїи прибѣ́жище, и҆ стѣ́нꙋ, и҆ застꙋпле́нїе. тѣ́мже и҆ притека́емъ къ покро́вꙋ твоемꙋ̀.

Та́же, Свѣ́те ти́хїй: Прокі́менъ днѐ. И҆ Сподо́би гдⷭ҇и въ ве́черъ се́й:

На стїхо́внѣ стїхи̑ры крⷭ҇тны, гла́съ з҃: Подо́бенъ:

Не ктомꙋ̀ возбранѧ́еми є҆смы̀ дре́ва живо́тнагѡ, ᲂу҆пова́нїе и҆мꙋ́ще крⷭ҇тъ тво́й: гдⷭ҇и, сла́ва тебѣ̀.

Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

Повѣ́шенъ бы́въ безсме́ртне на дре́вѣ, сокрꙋши́лъ є҆сѝ всѧ̑ сѣ̑ти дїа́вѡли: гдⷭ҇и, сла́ва тебѣ̀.

Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ, наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.

Мч҃нченъ: Сла́ва тебѣ̀ хрⷭ҇тѐ бж҃е, а҆пⷭ҇лѡвъ похвала̀, и҆ мч҃нкѡвъ весе́лїе: и҆́хже про́повѣдь трⷪ҇ца є҆диносꙋ́щнаѧ.

Сла́ва, и҆ ны́нѣ, крⷭ҇тобг҃оро́диченъ: На дре́вѣ пригвожде́нна тѧ̀ во́лею всенепоро́чнаѧ ꙗ҆́кѡ ви́дѣ, пла́чꙋщи поѧ́ще держа́вꙋ твою̀.

Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.

Въ четверто́къ на повече́рїи,

канѡ́нъ прест҃ѣ́й бцⷣѣ, гла́съ з҃:

Пѣ́снь а҃

І҆рмо́съ: И҆стрѧ́сшемꙋ бг҃ꙋ фараѡ́на въ мо́ри чермнѣ́мъ, пѣ́снь побѣ́днꙋю пои́мъ, ꙗ҆́кѡ просла́висѧ.

Живота̀ моегѡ̀ прозрѧ̀ наста́вшїй коне́цъ, влⷣчце, вопїю̀: ты́ ми да́ждь ѡ҆чище́нїе согрѣше́нїй бг҃оневѣ́сто.

Въ пꙋчи́нѣ бл҃госты́ни твоеѧ̀ прите́къ, вопїю̀: влⷣчце бл҃га́ѧ, и҆зба́ви мѧ̀ всѧ́кагѡ мꙋче́нїѧ.

Сла́ва: Влⷣце, прїимѝ на́съ вѣ́рою прибѣга́ющихъ къ тебѣ̀, и҆ пода́ждь напа́стей и҆ скорбе́й и҆збавле́нїе.

И҆ ны́нѣ: Ты̀ па́дшꙋю а҆да́мовꙋ ски́нїю прⷪ҇ро́чески возста́вила є҆сѝ, сп҃са и҆ бг҃а пречⷭ҇таѧ, во чре́вѣ носи́вши.

Пѣ́снь г҃

І҆рмо́съ: Оу҆тверди́сѧ вѣ́рою хрⷭ҇то́ва цр҃ковь, и҆́бо непреста́ннѡ пѣ́сньми вопїе́тъ пою́щи: ст҃ъ є҆сѝ гдⷭ҇и, и҆ тѧ̀ пое́тъ дх҃ъ мо́й.

Ꙗ҆́же бг҃а и҆ влⷣкꙋ неизрече́ннѡ заче́ншаѧ, ѡ҆бдержи́ма мѧ̀ бꙋ́рею грѣха̀, ты̀ ѿ си́хъ и҆зба́ви, и҆ сп҃си́ мѧ пречⷭ҇таѧ.

Согрѣше́нїй неподо́бныхъ но́щїю мѧ̀ ѡ҆держи́ма, покаѧ́нїѧ лꙋча́ми ѡ҆зарѝ ѻ҆трокови́це, дѣ́лати мѝ пода́вши свѣ́та дѣла̀ всегда̀.

Сла́ва: Ꙗ҆́же нбⷭ҇ный хлѣ́бъ ро́ждши бцⷣе, пита́ющи всѣ́хъ вѣ́рныхъ сердца̀, насы́ти а҆́лчꙋщꙋю дꙋ́шꙋ мою̀ стра́стнꙋю.

И҆ ны́нѣ: Оу҆тверди́хсѧ, бж҃е́ственное твоѐ ржⷭ҇тво̀ разꙋмѣ́въ, и҆ застꙋпле́нїемъ дв҃о, ѡ҆богаща́юсѧ, зовы́й: ст҃ъ є҆сѝ гдⷭ҇и, сп҃са́ѧ дꙋ́шы на́шѧ.

Пѣ́снь д҃

І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и.

Стеню́ща пред̾ тобо́ю влⷣчце, и҆ вопїю́ща прилѣ́жнѡ ѿ ᲂу҆ма̀ моегѡ̀, да не пре́зриши менѐ, нижѐ посрами́ши.

Попалѝ ᲂу҆́нзшїй те́рнъ ѻ҆каѧ́нныѧ моеѧ̀ дꙋшѝ, сласте́й плотски́хъ, ꙗ҆́же ѻ҆́гнь бж҃е́ственный влⷣчце, ро́ждшаѧ.

Сла́ва: Пода́ждь мѝ согрѣше́нїй ѡ҆ставле́нїе всебл҃гослове́ннаѧ чⷭ҇таѧ, и҆ и҆зба́ви вѣ́чнагѡ и҆ ᲂу҆жа́снагѡ мꙋче́нїѧ.

И҆ ны́нѣ: Сло́во въ тѧ̀ все́льшеесѧ пречⷭ҇таѧ, сꙋщество̀ моѐ воз̾ѡбразѝ, па́дшее престꙋпле́ньми.

Пѣ́снь є҃

І҆рмо́съ: Оу҆́тренюетъ дꙋ́хъ мо́й къ тебѣ̀ бж҃е, занѐ свѣ́тъ є҆сѝ, и҆ твоѧ̑ повелѣ̑нїѧ бы́ша и҆сцѣлє́нїѧ рабѡ́мъ твои̑мъ, чл҃вѣколю́бче.

Оу҆подо́бихсѧ безсловє́снымъ скотѡ́мъ преѻкаѧ́нный, страстьмѝ безслове́сными ѻ҆каѧ́ннѣй мое́й пло́ти рабо́таѧ: ты̀, бцⷣе, пода́ждь мѝ воспрѧнове́нїе.

Поми́лꙋй мѧ̀ па́че всѣ́хъ человѣ̑къ согрѣши́вшаго, и҆ къ твоемꙋ̀ покро́вꙋ прибѣга́юща те́пломꙋ бцⷣе дв҃о, и҆ мꙋче́нїй и҆схитѝ.

Сла́ва: И҆̀же бцⷣꙋ и҆сповѣ́дающїи тѧ̀ мт҃и дв҃о, непреидꙋ́щагѡ црⷭ҇твїѧ и҆ пи́щи, тобо́ю бг҃омт҃и, ᲂу҆лꙋчи́ти да сподо́бѧтсѧ.

И҆ ны́нѣ: Бл҃гослове́ннаѧ и҆ препросла́вленнаѧ мт҃и неискꙋсомꙋ́жнаѧ, ᲂу҆мерщвле́нꙋю грѣха́ми дꙋ́шꙋ мою̀, и҆ страстьмѝ погорбле́нꙋю неѡдержа́нными, ѡ҆животворѝ.

Пѣ́снь ѕ҃

І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.

Содержи́тъ мѧ̀ бꙋ́рѧ грѣхо́внаѧ, дв҃о, и҆ ко тлѝ ѿча́ѧнїѧ веде́тъ: но простри́ ми рꙋ́кꙋ по́мощи тве́рдꙋю и҆ всемо́щнꙋю.

Є҆ле́й, є҆́же въ тебѣ̀ те́плагѡ млⷭ҇рдїѧ, возле́й на мѧ̀ влⷣчце, и҆ и҆зба́ви согрѣше́нїй, и҆схитѝ ѻ҆гнѧ̀ вѣ́чнꙋющагѡ.

Сла́ва: Ꙗ҆́же разрѣши́вшаѧ ѿ болѣ́зни дв҃о є҆́ѵꙋ, ржⷭ҇тво́мъ твои́мъ пречⷭ҇тымъ, разрѣши́ ми ѻ҆трокови́це, болѣ̑зни страстны́ѧ моеѧ̀ дꙋшѝ и҆ тѣлесѐ.

И҆ ны́нѣ: Пѣсносло́виши и҆з̾ тебѐ воплоще́ннаго бг҃а, и҆ рыда́еши на крⷭ҇тѣ̀ вознесе́на, того̀ смотрѧ́ющи мт҃и дв҃о чⷭ҇таѧ и҆ пренепоро́чнаѧ.

Та́же, Гдⷭ҇и поми́лꙋй, три́жды. Сла́ва, и҆ ны́нѣ:

Сѣда́ленъ, гла́съ з҃:

Пло́дъ чре́ва твоегѡ̀ чⷭ҇таѧ, крⷭ҇тъ водрꙋзѝ въ концы̀, и҆ тлѝ мі́ръ и҆зба́ви: тѣ́мже тѧ̀ ꙗ҆́кѡ пресла́внꙋю велича́емъ.

Пѣ́снь з҃

І҆рмо́съ: Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Прегрѣше́нїй мои́хъ ᲂу҆мно́жисѧ преще́нїе, сꙋда̀ досто́йно, чⷭ҇таѧ, припа́даю и҆ зовꙋ́ ти: пре́жде конца̀ пода́ждь мѝ ѡ҆чище́нїе, и҆ ᲂу҆миле́нїѧ сле́зы, и҆ нра́вѡмъ и҆справле́нїе.

Недꙋ́говавша мѧ̀ лю́тѣ скве́рными прегрѣше́нїи, чⷭ҇таѧ, и҆ ко ѿча́ѧнїѧ и҆дꙋ́ща гро́бꙋ, ꙗ҆́кѡ ро́ждши жи́знь всѧ́ческихъ пречⷭ҇таѧ, бж҃е́ственными дѣѧ́нїи ѡ҆живѝ.

Сла́ва: Бг҃ороди́тельнице бл҃га́ѧ, вѣ́рою призыва́ющихъ твою̀ бл҃года́ть присноживꙋ́щꙋю, мы́сленныѧ сме́рти и҆збавлѧ́ющи, црⷭ҇твїѧ сподо́би пречⷭ҇тыми твои́ми мл҃твами.

И҆ ны́нѣ: Непости́жное ржⷭ҇тво̀ дв҃ы славосло́вимъ, и҆́мже сме́рти и҆зба́вихомсѧ: є҆гѡ́же ра́ди ро́ждшесѧ въ нетлѣ́нїе, бл҃гослове́нъ є҆сѝ, зове́мъ, гдⷭ҇и бж҃е ѻ҆тє́цъ на́шихъ.

Пѣ́снь и҃

І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки.

Страсте́й мѧ̀ пе́щь попалѧ́етъ дв҃о, и҆ ѻ҆гне́мъ сласте́й поѧда́етъ, предвари́вши, млⷭ҇тивною твое́ю росо́ю ᲂу҆гасѝ ю҆̀, даю́щи дꙋшѝ мое́й ᲂу҆стꙋже́нїе крѣ́пко.

Дꙋ́шꙋ ѡ҆скверни́хъ, и҆ растли́хъ пло́ть сластьмѝ, валѧ́ѧсѧ въ си́хъ, и҆ бы́хъ порꙋга́нїе человѣ́кѡмъ, и҆ смѣ́хъ врагѡ́мъ: влⷣчце бцⷣе, помо́щница мнѣ̀ бꙋ́ди.

Сла́ва: Бг҃а, є҆го́же родила̀ є҆сѝ дв҃о, ᲂу҆молѝ низпосла́ти сп҃се́нїе вѣ́рнѡ чтꙋ́щымъ тѧ̀, и҆ бѣ́дъ разрꙋше́нїе, и҆ недꙋ́гѡвъ лю́тыхъ премѣне́нїе ско́рое, и҆ бл҃года́ть вѣ́чнꙋю.

И҆ ны́нѣ: Созда́вшаго а҆да́ма по ѡ҆́бразꙋ, и҆ ѿ смѣше́нїѧ є҆гѡ̀ проше́дша, и҆ разрѣ́шша пе́рвꙋю клѧ́твꙋ, по́йте свѧще́нницы гдⷭ҇а, и҆ превозноси́те є҆го̀ во вѣ́ки.

Пѣ́снь ѳ҃

І҆рмо́съ: Всепѣ́таѧ нб҃съ превы́шшаѧ, безнача́льное сло́во безсѣ́меннѡ заче́ншаѧ, и҆ воплоще́ннаго бг҃а ро́ждшаѧ человѣ́кѡмъ: тѣ́мъ тѧ̀ всѝ велича́емъ.

Всесвѣ́тлаѧ дв҃о мт҃и бцⷣе, ѻ҆каѧ́ннꙋю дꙋ́шꙋ мою̀, лю́тѣ ѡ҆мраче́ннꙋю страстьмѝ плотски́ми, свѣ́томъ мл҃твъ твои́хъ въ стра́хъ бж҃їй свѣ́тлѡ наста́ви.

Ѿча́ѧвсѧ ѿ мно́жества согрѣше́нїй моегѡ̀ сп҃се́нїѧ, и҆ недоꙋмѣ́ненъ ꙗ҆ви́хсѧ влⷣчце всест҃а́ѧ: твоѐ бл҃годѣѧ́нїе, и҆ млⷭ҇ть твою̀ низпослѝ мнѣ̀.

Сла́ва: Ржⷭ҇тво̀ твоѐ бцⷣе, є҆́же па́че є҆стества̀, ᲂу҆дивлѧ́етъ а҆́гг҃лы, ᲂу҆жаса́етъ же человѣ́ки: всѣ̑мъ бо несказа́нно є҆́сть и҆ непостижи́мо. сїе́ же пою́ще бл҃гоче́стнѡ тѧ̀ сла́вимъ.

И҆ ны́нѣ: Оу҆мерщвле́нїѧ и҆ тлѣ́нїѧ ри̑зы совлецы́ ми дв҃о, ꙗ҆́же сп҃се́нїѧ ри́зꙋ воплоще́ннаго сло́ва ро́ждши человѣ́кѡмъ: тѣ́мже вси́ тѧ при́снѡ велича́емъ.

Та́же, Досто́йно є҆́сть: и҆ покло́ны. Трист҃о́е. По Ѻ҆́ч҃е на́шъ: тропарѝ, и҆ про́чее, и҆ ѿпꙋ́стъ.

Въ пѧто́къ ᲂу҆́тра,

по а҃-мъ стїхосло́вїи сѣда́льны крⷭ҇тны. Гла́съ з҃:

Цр҃ковь вопїе́тъ тѝ, хрⷭ҇тѐ бж҃е, въ пе́ѵкѣ и҆ ке́дрѣ и҆ кѷпарі́сѣ, покланѧ́ющисѧ тебѣ̀: побѣ̑ды вѣ̑рнымъ да́рꙋй, бцⷣы ра́ди, и҆ поми́лꙋй на́съ.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.

И҆́же менѐ ра́ди претерпѣ́вый на крⷭ҇тѣ̀ пригвожде́нїе, прїимѝ и҆ моѐ бо́дренное хвале́нїе, хрⷭ҇тѐ бж҃е, ꙗ҆́кѡ чл҃вѣколю́бецъ.

Сла́ва, и҆ ны́нѣ, крⷭ҇тобг҃оро́диченъ: Крⷭ҇то́мъ сн҃а твоегѡ̀ храни́ми дв҃о, прилѡ́гъ бѣсо́вскихъ и҆збѣга́емъ: тѣ́мже тѧ̀ бцⷣе безневѣ́стнаѧ, по до́лгꙋ воспѣва́юще сла́вимъ.

По в҃-мъ стїхосло́вїи сѣда́льны, гла́съ з҃:

Ѻ҆гнѧ̀ свѣтлѣ́йшее, и҆ пла́мене дѣ́йственнѣйшее дре́во показа́лъ є҆сѝ хрⷭ҇тѐ крⷭ҇та̀ твоегѡ̀, попалѧ́ющее грѣхѝ человѣ́кѡвъ, и҆ просвѣща́ющее сердца̀ пою́щихъ во́льное твоѐ распѧ́тїе: хрⷭ҇тѐ бж҃е, сла́ва тебѣ̀.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.

Гдⷭ҇и, твоего̀ крⷭ҇та̀ зрѧ́ще возвыша́ема всегда̀, пристꙋпа́емъ вѣ́рнѡ пѣ́ньми и҆ пѣ́сньми, ѡ҆блобыза́юще того̀ стра́хомъ и҆ ра́достїю: ѡ҆ст҃ѝ рабы̑ твоѧ̑, и҆ ᲂу҆мирѝ мі́ръ тво́й сегѡ̀ ꙗ҆вле́нїемъ, є҆ди́не многомлⷭ҇тиве.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Ст҃і́и мч҃нцы, моли́те ѡ҆ставле́нїе да́ти на́мъ прегрѣше́нїй на́шихъ, и҆ ча́емыхъ мꙋ́къ и҆зба́витисѧ на́мъ, и҆ го́рькїѧ сме́рти, мо́лимсѧ.

Сла́ва, и҆ ны́нѣ, крⷭ҇тобг҃оро́диченъ: Бцⷣе чⷭ҇таѧ приснодв҃о, на крⷭ҇тѣ̀ зрѧ́щи сн҃а твоего̀ ви́сѧща, ꙗ҆́кѡ мт҃и пла́чꙋщи тогѡ̀ велича́ше стра́шное снизхожде́нїе неискꙋсобра́чнаѧ влⷣчце.

По г҃-мъ стїхосло́вїи, сѣда́льны, гла́съ з҃:

Крⷭ҇тъ тво́й хрⷭ҇тѐ, чⷭ҇тны́й, мі́ра ѻ҆рꙋ́жїе є҆́сть, и҆ непобѣди́маѧ побѣ́да: и҆́мже и҆ неви̑димыѧ врагѝ низлага́юще, бл҃года́рнѡ воспѣва́емъ тѧ̀.

И҆́же а҆да́мово ѡ҆сꙋжде́нїе дре́вомъ крⷭ҇та̀ и҆сцѣли́вый, и҆сцѣлѝ на̑ша сокрꙋшє́нїѧ сердє́чнаѧ, и҆ сп҃сѝ на́съ.

Сла́ва, и҆ ны́нѣ, крⷭ҇тобг҃оро́диченъ: Пло́дъ чре́ва твоегѡ̀ пречⷭ҇таѧ, крⷭ҇тъ насадѝ въ концѣ́хъ и҆ ѿ тлѝ мі́ръ и҆зба́вилъ є҆́сть: тѣ́мже тѧ̀ пресла́внаѧ, велича́емъ.

Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀ гдⷭ҇ню, [є҆го́же краегране́сїе: хрⷭ҇то́съ на дре́вѣ, ᲂу҆ста́вилъ є҆́сть дре́внїй вре́дъ.] Творе́нїе і҆ѡ́сифово. Гла́съ з҃:

Пѣ́снь а҃

І҆рмо́съ: И҆стрѧ́сшемꙋ бг҃ꙋ фараѡ́на въ мо́ри чермнѣ́мъ, пѣ́снь побѣ́днꙋю пои́мъ, ꙗ҆́кѡ просла́висѧ.

Хрⷭ҇то́съ возноси́мь на крⷭ҇тъ, къ себѣ̀ всѧ̑ привлечѐ человѣ́ки, и҆ низве́рже врага̀, всѣ́хъ низве́ргшаго.

Во́дꙋ животꙋ̀ моемꙋ̀ і҆и҃се, ѿ живоно́сныхъ ре́бръ и҆сточи́лъ є҆сѝ, и҆ ᲂу҆мертви́лъ є҆сѝ врага̀ влⷣко, бы́въ ме́ртвъ.

Мч҃нченъ: Мл҃твꙋ хрⷭ҇тꙋ̀ за на́съ стрⷭ҇тоте́рпцы прилѣ́жнꙋю принеси́те, стра́шнагѡ сꙋда̀ всѣ̑мъ на́мъ и҆зба́витисѧ.

Мч҃нченъ: Смири́вшесѧ вы̀ хрⷭ҇та̀ ра́ди, премꙋ́дрїи мч҃нцы, го́рдаго врага̀ низложи́сте бж҃е́ственною бл҃года́тїю.

Бг҃оро́диченъ: Возсїѧ́вшаго и҆з̾ тебѐ, превели́кимъ бл҃гоꙋтро́бїемъ влⷣчце, на крⷭ҇тѣ̀ зрѧ́щи пла́кала є҆сѝ, того̀ сла́вѧщи.

Дрꙋгі́й канѡ́нъ прест҃ѣ́й бцⷣѣ. Гла́съ з҃:

І҆рмо́съ то́йже.

Впа́дшаго въ тлѣ́нїе преслꙋша́нїѧ пра́дѣда а҆да́ма ѡ҆бнови́ла є҆сѝ, бг҃а пречⷭ҇таѧ, пло́тїю ро́ждши.

Съ весе́лїемъ гла́съ гаврїи́ловъ взыва́емъ тѝ, чⷭ҇таѧ: ра́дꙋйсѧ всѣ́хъ наде́жде пречⷭ҇таѧ, ра́дꙋйсѧ бг҃оневѣ́сто.

Оу҆мерщвле́нный мо́й ᲂу҆́мъ ѡ҆живѝ живо́тнымъ дѣ́йствїемъ и҆з̾ тебѐ ро́ждшимсѧ вои́стиннꙋ пречⷭ҇таѧ дв҃о.

Бл҃гословѧ́щїи тѧ̀ вѣ́рнѡ ѿ бг҃а бл҃гословлѧ́ютсѧ ꙗ҆́вѣ: бл҃гослове́нїѧ во и҆сто́чникъ родила̀ є҆сѝ, є҆ди́на всепѣ́таѧ.

Пѣ́снь г҃

І҆рмо́съ: Оу҆тверди́сѧ вѣ́рою хрⷭ҇то́ва цр҃ковь, и҆́бо непреста́ннѡ пѣ́сньми вопїе́тъ пою́щи: ст҃ъ є҆сѝ гдⷭ҇и, и҆ тѧ̀ пое́тъ дꙋ́хъ мо́й.

Безстра́стный по сꙋществꙋ̀, ка́кѡ стрⷭ҇ть терпи́ши, живо́тъ мнѣ̀ вдыха́ѧй; ка́кѡ ᲂу҆мира́еши на дре́вѣ; ве́лїѧ твоѧ̑ млⷭ҇ть и҆ долготерпѣ́нїе, сп҃се.

На крⷭ҇тѣ̀ посредѣ̀ разбо́йникѡвъ, сло́ве, непра́веднѡ воздви́глсѧ є҆сѝ, и҆ ѡ҆правда́лъ є҆сѝ вѣ́рою позна́вшаго тебѐ зижди́телѧ всеѧ̀ тва́ри, во́лею стра́ждꙋща.

Мч҃нченъ: Строга̑нїѧ пло́ти терпѧ́ще, рꙋ́къ же ѿѧ́тїе, и҆ но́гъ, и҆ всѣ́хъ ᲂу҆дѡ́въ стрⷭ҇тоте́рпцы, сла́вы сподо́бишасѧ, ѡ҆ на́съ молѧ́щесѧ.

Мч҃нченъ: Премно́гими мꙋ́ками ѡ҆ бз҃ѣ просвѣти́вшесѧ, премно́гꙋю сла́вꙋ мꙋ́дрїи ны́нѣ наслѣ́довасте, всегда̀ молѧ́щесѧ ѡ҆ дꙋша́хъ на́шихъ.

Бг҃оро́диченъ: Разрѣше́нїе долгѡ́въ на́шихъ чⷭ҇таѧ дв҃о, пода́ждь ма́терними твои́ми мл҃твами, на крⷭ҇тѣ̀ пригвожде́ннаго чл҃вѣ́ка бы́вша, бг҃а сло́ва ро́ждшаѧ.

И҆́нъ І҆рмо́съ то́йже.

Тебѐ дв҃ꙋ, ѡ҆бра́знѡ сѣ́нь всест҃ꙋ́ю. законополо́жникꙋ на горѣ̀ бг҃ъ предсказа́ше: селе́нїе бо бы́сть всѣ́хъ ѡ҆свѧща́ющагѡ.

Зе́млю тѧ̀ ст҃ꙋ́ю дв҃о, разꙋмѣ́хомъ всѝ, на́мъ без̾ сѣ́мене возрасти́вшꙋю кра́сный кла́съ, і҆и҃са хрⷭ҇та̀, пита́ющъ вѣ́рою тѧ̀ и҆ любо́вїю бл҃жа́щихъ.

Ви̑дѣна бы́ша шє́ствїѧ бг҃а вы́шнѧгѡ, въ тебѣ̀ дв҃о неизрече́ннѡ томꙋ̀ вопло́щшꙋсѧ: мт҃и бо ты̀ была̀ є҆сѝ всѣ́ми ца́рствꙋющагѡ.

Оу҆тверди́хсѧ, бж҃е́ственное твоѐ ржⷭ҇тво̀ разꙋмѣ́въ, и҆ застꙋпле́нїемъ твои́мъ дв҃о, ѡ҆бога́щьсѧ, зовы́й: ст҃ъ є҆сѝ гдⷭ҇и, сп҃са́ѧй дꙋ́шы на́шѧ.

Пѣ́снь д҃

І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и.

Ꙗ҆́коже краснѣ́йшїй гро́здъ на крⷭ҇тѣ̀ воздви́глсѧ є҆сѝ влⷣко, весе́лїѧ вїно̀ и҆ска́палъ є҆сѝ чл҃вѣколю́бче.

Многоболѣ́знєнныѧ человѣ́кѡвъ стра̑сти ᲂу҆тиши́лъ є҆сѝ вои́стиннꙋ, стрⷭ҇ти влⷣко, во́лею на пло́ти твое́й прїе́мъ.

Мч҃нченъ: Ѡ҆стрꙋпи́ша ѡ҆стрꙋплѧ́еми стрⷭ҇тоте́рпцы борца̀: и҆ ꙗ҆ви́шасѧ вра́чеве дꙋ́шъ на́шихъ.

Мч҃нченъ: Ѡ҆полчи́шасѧ къ мꙋчи́телємъ стрⷭ҇тоно́сцы, и҆ побѣди́вше, вѣнча́ни бы́ша побѣ́дными вѣнцы̀.

Бг҃оро́диченъ: Родила̀ є҆сѝ без̾ сѣ́мене дв҃о сло́ва, на крⷭ҇тѣ̀ погꙋби́вшаго тлѣ́нїе бл҃гостїю.

И҆́нъ І҆рмо́съ то́йже.

Оу҆слы́шалъ є҆́сть а҆ввакꙋ́мъ тѧ̀ пречⷭ҇таѧ, го́рꙋ, дх҃о́вными ѡ҆сѣне́ньми просвѣща́емꙋ: и҆з̾ тебе́ бо бг҃ъ ꙗ҆ви́сѧ воплоща́емь.

И҆справлѧ́етсѧ правосла́вныхъ собо́ръ, тебѐ всест҃ꙋ́ю поѧ̀ ꙗ҆́кѡ бг҃ома́терь, со а҆рха́гг҃ломъ, ра́дꙋйсѧ, зовы́й тебѣ̀.

Бїе́тсѧ несто́рїа лицѐ, не восхотѣ́вшагѡ мꙋ́дрствовати тебѐ бцⷣꙋ чⷭ҇тꙋю: бг҃а бо вои́стиннꙋ пречⷭ҇таѧ, родила̀ є҆сѝ.

Кра́снꙋю тѧ̀ и҆ свѣ́тлꙋю добро́тами жени́хъ ѡ҆брѣ́тъ, въ тѧ̀ всели́сѧ, и҆ бцⷣꙋ всечⷭ҇таѧ содѣ́ла.

Пѣ́снь є҃

І҆рмо́съ: Оу҆́тренюетъ дꙋ́хъ мо́й къ тебѣ̀, бж҃е: занѐ свѣ́тъ є҆сѝ, и҆ твоѧ̑ повелѣ̑нїѧ бы́ша и҆сцѣлє́нїѧ рабѡ́мъ твои̑мъ, чл҃вѣколю́бче.

Воздви́жемь влⷣко, на дре́во пло́тїю, тва́рь всю̀ и҆з̾ ро́ва лю́тыхъ неразꙋ́мїѧ и҆звле́клъ є҆сѝ, къ ра́зꙋмꙋ твоемꙋ̀ чл҃вѣколю́бче.

На ло́бнѣмъ тѧ̀ мѣ́стѣ и҆спроси́ша лю́дїе беззако́ннїи распѧ́ти і҆и҃се, главꙋ̀ па́гꙋбнꙋю ѕмі́евꙋ сокрꙋша́ющаго.

Мч҃нченъ: Оу҆ста́висте ѕлоче́стїѧ тече́нїе хрⷭ҇тѡ́вы мч҃нцы, бж҃е́ственными кровьмѝ ва́шими, и҆ фараѡ́на мꙋчи́телѧ въ си́хъ потопи́сте.

Мч҃нченъ: Ноготьмѝ неща́днѡ стрꙋ́жеми, растерза́сте ѡ҆бличе́ньми страда́льцы сердца̀ сꙋемꙋ́дрєннаѧ, и҆ побѣди́телїе бы́сте.

Бг҃оро́диченъ: Ѡ҆свѧти́лъ є҆́сть бг҃ъ ᲂу҆тро́бꙋ твою̀, ст҃а́ѧ чⷭ҇таѧ, и҆ всели́сѧ въ ню̀: и҆ на крⷭ҇тъ воздви́жемь, тва́рь совоздви́глъ є҆́сть.

И҆́нъ І҆рмо́съ то́йже.

Бг҃олѣ́пнꙋю твою̀ госпожѐ, и҆ кра́снꙋю, и҆ сладча́йшꙋю и҆ бл҃гꙋ́ю добро́тꙋ возлюби́въ влⷣка, въ тѧ̀ дв҃о, всели́сѧ.

Всест҃а́ѧ и҆ свѣтоно́снаѧ две́ре бл҃года́ти, вселе́ннꙋю свѣтлѣ́йшимъ твои́мъ свѣ́томъ ѡ҆зари́вши ѻ҆трокови́це, тебѐ пою́щыѧ просвѣтѝ.

Бцⷣꙋ и҆сповѣ́дающїи тѧ̀ мт҃и дв҃о, непреидꙋ́щагѡ црⷭ҇твїѧ и҆ пи́щи тобо́ю бг҃ома́ти ᲂу҆лꙋчи́ти да сподо́бѧтсѧ.

Хра́мъ ꙗ҆ви́ласѧ є҆сѝ всеви́дца и҆ вседержи́телѧ: твою́ бо ᲂу҆тро́бꙋ чⷭ҇тѣ́йшꙋю нб҃съ ѡ҆брѣ́тъ водвори́сѧ, бг҃ороди́тельнице всечⷭ҇таѧ.

Пѣ́снь ѕ҃

І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.

Недꙋ́говавшее человѣ́ческое є҆стество̀, ꙗ҆́вльсѧ за млⷭ҇рдїе млⷭ҇ти, врачꙋ̀ недꙋ́гꙋющихъ, и҆сцѣли́лъ є҆сѝ крⷭ҇то́мъ и҆ стра́стїю твое́ю.

Дре́вомъ дре́вле а҆да́мъ ѡ҆сꙋди́сѧ: дре́вомъ же ны́нѣ кре́стнымъ ѡ҆правда́сѧ, вхожде́нїе прїе́мъ въ ра́й, и҆ сла́дости воспрїѧ́тїе.

Пое́мъ тѧ̀ пло́тїю распе́ншагосѧ, сла́вимъ те́рнїемъ вѣнча́вшагосѧ, и҆ сла́вою вѣнча́вшаго человѣ́ки, цр҃ю̀ пребл҃гі́й.

Мч҃нченъ: Гꙋби́тельный ны́нѣ ѿри́нꙋвше вре́дъ страда́льцы і҆дѡлобѣ́сїѧ, мꙋ́камъ причасти́шасѧ: и҆ ᲂу҆ме́рше со хрⷭ҇то́мъ ца́рствꙋютъ.

Мч҃нченъ: Ни гоне́нїе, ни гла́дъ, ни нагота̀, ни бѣды̑, нижѐ сме́рть, ѿню́дъ бж҃е́ствєнныѧ стрⷭ҇тоте́рпцы, ѿ любвѐ хрⷭ҇то́вы разлꙋчи́ша.

Бг҃оро́диченъ: Славосло́виши и҆з̾ тебѐ вопло́щшагосѧ, и҆ пла́чеши на крⷭ҇тѣ̀ воздви́женаго, того̀ смотрѧ́ющи дв҃о мт҃и ст҃а́ѧ всенепоро́чнаѧ.

И҆́нъ І҆рмо́съ то́йже.

Бг҃омꙋ́жнѡ въ человѣ́цѣхъ пожи́вшаго родила̀ є҆сѝ бцⷣе дв҃о, є҆ди́наго бл҃годѣ́телѧ, є҆́же бы́ти человѣ́кѡмъ да́рꙋющаго.

Є҆мманꙋ́ила бцⷣе, сꙋгꙋ́ба по сꙋществꙋ̀ родила̀ є҆сѝ, пре́жде соверше́нно сло́во, бг҃а воплоще́нна, и҆збавле́нїе на́мъ подава́ющаго.

Ковче́гъ прїе́мый зако́на скрижа̑ли, преднаписа̀ тебѐ бцⷣе, сло́во бж҃їе, ꙗ҆́кѡ прїе́мшꙋю во чре́вѣ свое́мъ на́съ ра́ди воплоща́ема.

А҆́гг҃льскїѧ ѧ҆зы́ки и҆спо́лнены, твоѧ̑ похвалы̑ проповѣ́дати не мо́гꙋтъ чⷭ҇таѧ: мы́ же ны́нѣ ра́бски прїе́мше, є҆́же ра́дꙋйсѧ, гаврїи́лово прино́симъ.

Пѣ́снь з҃

І҆рмо́съ: Пе́щь ѻ҆́троцы ѻ҆гнепа́льнꙋ дре́вле росоточа́щꙋ показа́ша, є҆ди́наго бг҃а воспѣва́юще, и҆ глаго́люще: превозноси́мый ѻ҆тцє́въ бг҃ъ, и҆ препросла́вленъ.

Тѧготꙋ̀ ѡ҆блегча́ѧ беззако́нїй мои́хъ, посредѣ̀ беззако́нныхъ воздви́глсѧ є҆сѝ на крⷭ҇тъ, пребл҃гі́й гдⷭ҇и, превозноси́мый ѻ҆тцє́въ гдⷭ҇ь, и҆ бг҃ъ бл҃гослове́нъ є҆сѝ.

Копїе́мъ пробо́дьсѧ въ бж҃е́ствєннаѧ рє́бра твоѧ̑, и҆ ре́бренное поползне́нїе и҆спра́вилъ є҆сѝ сп҃се, пла́менномꙋ же ѻ҆рꙋ́жїю дава́ти мѝ вхо́дъ раѧ̀ повелѣва́еши всегда̀.

Мч҃нченъ: Ѕвѣ́зды на высотѣ̀ ѡ҆снова́нныѧ цр҃кве мч҃нцы бы́вше, тва́рь ѡ҆зарѧ́ете страда́нїй свѣ́тлостїю, и҆ и҆сцѣле́нїй сїѧ́нїемъ.

Мч҃нченъ: Кни́га прино́ситъ при́снѡ напи́санныхъ живы́хъ гдⷭ҇нихъ мч҃нкъ, напи̑санаѧ бж҃їѧ ѡ҆правда̑нїѧ ᲂу҆се́рднѡ сохрани́вшихъ, и҆ пострада́вшихъ крѣ́пкѡ.

Бг҃оро́диченъ: Всест҃а́ѧ, прест҃о́е сло́во, є҆́же ѿ неѧ̀ возсїѧ́вшее, на ст҃ѣ́мъ крⷭ҇тѣ̀ воздви́жено, и҆ ѡ҆свѧща́ющо земны̑ѧ, зрѧ́щи рыда́ше.

И҆́нъ І҆рмо́съ то́йже.

Ꙗ҆̀же въ пещѝ ѻ҆́гненнѣй, твоѐ ржⷭ҇тво̀ сп҃сло̀ є҆́сть ᲂу҆́бѡ дре́вле: ны́нѣ же на́съ всенепоро́чнаѧ сп҃сѝ, є҆гѡ̀ прише́ствїю є҆́же па́че сло́ва зовꙋ́щихъ: бл҃гослове́нъ є҆сѝ бж҃е ѻ҆тє́цъ на́шихъ.

Бг҃оѻте́цъ ᲂу҆́бѡ дв҃дъ твою̀ сла́вꙋ написꙋ́етъ дв҃о, и҆ тебѐ тва́рей цр҃и́цꙋ ꙗ҆вле́ннѡ прⷪ҇ро́чествꙋетъ, предстоѧ́щꙋю ѡ҆деснꙋ́ю всенепоро́чнаѧ, бг҃а ѻ҆тє́цъ на́шихъ.

Ѡ҆бнови́ла є҆сѝ чⷭ҇таѧ, земны́хъ є҆стество̀, ѡ҆бновле́нїемъ ржⷭ҇тва̀ твоегѡ̀. тѣ́мже тѝ вопїе́мъ: бл҃гослове́нъ є҆́сть во вѣ́ки всѧ̑, гпⷭ҇жѐ, пло́дъ твоегѡ̀ чре́ва.

Ѡ҆сꙋжде́ннаго бы́вша а҆да́ма, и҆ сме́ртїю держи́ма, а҆да́мъ вторы́й, пречⷭ҇таѧ, тобо́ю поми́ловавъ призва̀, бл҃гослове́нъ є҆сѝ зовꙋ́ща, рожде́йсѧ, и҆ ѡ҆бновле́й мѧ̀.

Пѣ́снь и҃

І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки.

Ме́ртва мѧ̀ показа̀ дре́во ра́зꙋма, ты́ же хрⷭ҇тѐ мо́й, ᲂу҆мертви́всѧ на дре́вѣ ѡ҆живи́лъ є҆сѝ, и҆ просвѣти́лъ є҆сѝ пѣ́ти: по́йте сщ҃е́нницы, лю́дїе превозноси́те во всѧ̑ вѣ́ки.

Те́рнїемъ вѣнча̀ законопрестꙋ́пный со́нмъ тѧ̀, цр҃ю̀, преслꙋша́нїѧ и҆скоренева́юща те́рнїе а҆да́ма первозда́ннагѡ, и҆ воздви́же на крⷭ҇тъ, всѧ̑ и҆з̾ глꙋбины̀ пре́лести и҆звле́кшаго.

Мч҃нченъ: Ра́зꙋмомъ просте́ршаго нб҃са̀, тебѐ простира́ютъ на дре́вѣ лю́дїе неразꙋ́мнїи, и҆сцѣлѧ́юща на́шѧ стра̑сти стрⷭ҇тїю твое́ю, сп҃се, и҆ ᲂу҆ставлѧ́юща болѣ̑зни, ꙗ҆̀же ѿ гвозде́й болѣ́зньми.

Мч҃нченъ: Мч҃нкъ мѡ́щи бл҃гоꙋха̑нїѧ и҆спꙋща́ютъ чꙋде́съ приходѧ́щымъ несꙋмнѣ́ннымъ се́рдцемъ, и҆ страсте́й ѕлово́нїе прогонѧ́ютъ при́снѡ, и҆ всѣ̑мъ здра́вїе ѡ҆ бз҃ѣ подава́ютъ.

Бг҃оро́диченъ: Ст҃ы́хъ чи́нове мо́лѧтсѧ дв҃о, и҆з̾ ᲂу҆тро́бы твоеѧ̀ проше́дшемꙋ влⷣцѣ, показа́вшемꙋ на крⷭ҇тѣ̀ си́мъ пꙋ́ть страда́нїѧ, чⷭ҇таѧ, и҆ славосло́вѧтъ тѧ̀ ꙗ҆́кѡ всѣ́хъ цр҃и́цꙋ.

И҆́нъ І҆рмо́съ то́йже.

Непостижи́мый влⷣка всѣ́хъ, є҆го́же не вмѣща́ютъ нб҃са̀, бг҃ороди́тельнице, вмѣща́етсѧ во твою̀ ᲂу҆тро́бꙋ дв҃о. тѣ́мже тѧ̀ вѣ́рнїи любо́вїю превозно́симъ во вѣ́ки.

Оу҆ма̀ превы́шшаго всеѧ̀ тва́ри, ѻ҆трокови́це, є҆го́же не возмога́етъ рожде́нное зрѣ́ти є҆стество̀, носи́ла є҆сѝ на своє́ю пречⷭ҇тою рꙋкꙋ̀. тѣ́мже вѣ́рнїи любо́вїю превозно́симъ во всѧ̑ вѣ́ки.

Бг҃а, є҆го́же родила̀ є҆сѝ, ᲂу҆молѝ дв҃о, низпосла́ти сп҃се́нїе вѣ́рнѡ чтꙋ́щымъ тѧ̀, и҆ бѣ́дъ разрꙋше́нїе, и҆ недꙋ́гѡвъ лю́тыхъ премѣне́нїе ско́рое, и҆ бл҃года́ть вѣ́чнꙋю.

Оу҆краше́нъ тѧ̀ добродѣ́тельми разли́чными, и҆ просвѣще́нъ хра́мъ вы́шнѧгѡ, ᲂу҆вѣ́дѣвше всест҃а́ѧ дв҃о, пое́мъ бл҃гоче́стнѡ тѧ̀, и҆ славосло́вимъ во всѧ̑ вѣ́ки.

Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:

Пѣ́снь ѳ҃

І҆рмо́съ: Всепѣ́таѧ нб҃съ превы́шшаѧ, безнача́льное сло́во безсѣ́меннѡ заче́ншаѧ, и҆ воплоще́ннаго бг҃а ро́ждшаѧ человѣ́кѡмъ: тѣ́мъ тѧ̀ всѝ велича́емъ.

На крⷭ҇тѣ́ тѧ возвы́шена, цр҃ю̀ вѣкѡ́въ, ꙗ҆́кѡ ви́дѣ со́лнце ѡ҆мрачи́сѧ, и҆ землѧ̀ потрѧсе́сѧ, и҆ цр҃кве раздра́сѧ завѣ́са свѣ́тлости, і҆и҃се всеси́льне.

И҆скопа́ша рꙋ́цѣ и҆ но́зѣ твоѝ беззакѡ́нницы, и҆ ре́бра живонѡ́снаѧ прободо́ша копїе́мъ, и҆ же́лчи со ѻ҆́цтомъ напои́ша тѧ̀ хрⷭ҇тѐ мо́й, всѣ́хъ сла́дость, и҆ бг҃а и҆́стинна.

Мч҃нченъ: Сокрꙋши́ша началоѕло́бнагѡ сѣ̑ти, сокрꙋша́еми всѧ́кими ви́ды мꙋче́нїѧ, и҆ вѣнцено́сцы побѣ́дою бы́вше, до́блїи страда́льцы ᲂу҆бл҃жа́ютсѧ.

Мч҃нченъ: Ѡ҆свѧти́ша положе́нїемъ моще́й всю̀ зе́млю стрⷭ҇тоте́рпцы, и҆ ᲂу҆гаси́ша сква̑ры і҆дѡложе́ртвєнныѧ, ѻ҆гню̀ примѣша́ющесѧ, и҆ въ не́мъ та́йнѡ всесожига́еми.

Бг҃оро́диченъ: Бл҃голюби́ваѧ, херꙋві̑мъ ст҃ѣ́йшаѧ, ꙗ҆́же бж҃їе сло́во бг҃а пло́тїю ро́ждшаѧ, воздви́женнаго на крⷭ҇тѣ̀ хотѣ́нїемъ, за всѣ́хъ прилѣ́жнѡ томꙋ̀ моли́сѧ.

И҆́нъ І҆рмо́съ то́йже.

Всесоверше́но человѣ́чество прїѧ́то бы́сть и҆з̾ тебѐ, пречⷭ҇таѧ ѻ҆трокови́це, сло́вꙋ совокꙋ́пльшꙋсѧ пло́ти ѡ҆дꙋшевле́ннѣй, сло́вомъ дꙋшѝ ᲂу҆кра́шеннѣй: тѣ́мже всѝ вѣ́рнїи тѧ̀ велича́емъ.

Виті́йское ᲂу҆́бѡ бꙋесло́вїе да ᲂу҆молчи́тъ, а҆пⷭ҇льскаѧ же трꙋба̀ да возгласи́тъ, тебѐ и҆́стинными гла́сы дв҃о восхвалѧ́ющи, бцⷣꙋ и҆́стиннꙋю возвѣща́ющи.

Поми́ловасѧ тебѐ ра́ди человѣ́чество, по ѵ҆поста́си вои́стиннꙋ сло́вꙋ соеди́ншеесѧ, и҆ воздаѧ́нїемъ бг҃ъ, дв҃о, бы́вшее: тѣ́мже тѧ̀ всѝ при́снѡ велича́емъ.

Проразꙋмѣ́сѧ прⷪ҇ро́ческими быстрозрѣ́нїи та́инство, ѻ҆трокови́це, твоегѡ̀ ржⷭ҇тва̀, ꙗ҆́кѡ воплоще́нна бг҃а ро́ждши человѣ́кѡмъ, и҆збавлѧ́ющаго на́съ ѿ напа́стей мл҃твами твои́ми.

Та́же, Досто́йно є҆́сть: И҆ є҆ктенїа̀, и҆ свѣти́ленъ, и҆ ѱалмы̀ ѻ҆бы́чны.

На стїхо́внѣ стїхи̑ры крⷭ҇тны, гла́съ з҃:

Влⷣко сы́й чл҃вѣколю́бче жизнода́вче, и҆скꙋпи́лъ є҆сѝ крⷭ҇то́мъ твои́мъ вселе́ннꙋю, гдⷭ҇и, сла́ва тебѣ̀.

Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.

На крⷭ҇тѣ̀ пригвозди́сѧ лоза̀ и҆́стиннаѧ, ѡ҆б̾има́ша ꙗ҆зы́цы ра́й съ разбо́йникомъ: сїѧ̀ сла́ва цр҃ко́внаѧ, сїѐ бога́тство црⷭ҇твїѧ. пострада́вый на́съ ра́ди, гдⷭ҇и, сла́ва тебѣ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.

Па́мѧть ст҃ы́хъ твои́хъ стрⷭ҇тоте́рпєцъ пра́зднꙋюще, тебѐ пое́мъ хрⷭ҇тѐ, вопїю́ще, гдⷭ҇и, сла́ва тебѣ̀.

Сла́ва, и҆ ны́нѣ, крⷭ҇тобг҃оро́диченъ: Своего̀ сн҃а на дре́вѣ ви́дѧщи дре́вле, се́рдце своѐ ѻ҆рꙋ́жїемъ печа́ли ᲂу҆ѧзвлѧ́ше пречⷭ҇таѧ.

Та́же, Бл҃го є҆́сть: Трист҃о́е. По Ѻ҆́ч҃е на́шъ: тропа́рь, и҆ є҆ктенїа̀, и҆ ча́съ пе́рвый, и҆ ѿпꙋ́стъ.

Въ пѧто́къ бл҃жє́нны, гла́съ з҃:

Красе́нъ бѣ̀ и҆ до́бръ въ снѣ́дь, и҆́же менѐ ᲂу҆мертви́вый пло́дъ, хрⷭ҇то́съ є҆́сть дре́во живо́тное, ѿ негѡ́же ꙗ҆ды́й не ᲂу҆мира́ю, но вопїю̀ съ разбо́йникомъ: помѧни́ мѧ гдⷭ҇и, во црⷭ҇твїи твое́мъ.

Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

И҆сцѣлѧ́ѧ а҆да́мовꙋ болѣ́знь, ю҆́же под̾ѧ́тъ вра́жїимъ совѣ́томъ, возне́ссѧ на дре́во всѣ́хъ цр҃ю̀, и҆ болѣ̑зни претерпѣ́лъ є҆сѝ, рꙋка́ма и҆ нога́ма пригвожде́нъ: тѣ́мже сла́вимъ твоѐ, сло́ве, долготерпѣ́нїе.

Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.

Посредѣ́ тѧ беззакѡ́нною со́нмъ є҆вре́йскїй распѧ́тъ, є҆ди́наго законода́вца и҆ и҆зба́вителѧ, всѧ́кагѡ беззако́нїѧ и҆збавлѧ́юща хрⷭ҇тѐ, ро́дъ человѣ́ческїй: тѣ́мже воспѣва́емъ тѧ̀.

Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Мч҃нченъ: Ꙗ҆́звы мно́гихъ мꙋ́къ, ꙗ҆́кѡ кра̑снаѧ ᲂу҆добрє́нїѧ носѧ́ще до́блественнѣ страда́льцы, ᲂу҆краше́нїе цр҃ко́вное позна́ни бы́ша свѣ́тлое, всегда̀ молѧ́щесѧ ѡ҆ дꙋша́хъ на́шихъ.

Сла́ва: Ѽ трⷪ҇це ст҃а́ѧ! вѣ̑рныѧ рабы̑ твоѧ̑ и҆зба́ви мꙋ́къ, въ тѧ̀ вѣ́ровавшыѧ, во є҆ди́номъ бж҃ествѣ̀, непреста́ннѡ сла́вимꙋю бл҃гоче́стнѡ, и҆ вѣ́чное твоѐ црⷭ҇твїе да́рꙋй.

И҆ ны́нѣ: Не и҆мꙋ́ща ви́да, нижѐ добро́ты, зрѧ́щи тебѐ хрⷭ҇тѐ, пло́тїю возвы́шена на дре́вѣ крⷭ҇тнѣмъ всечⷭ҇таѧ дв҃а, взыва́ше болѣ́зненнѣ: ᲂу҆вы̀ мнѣ̀, ка́кѡ тѧ̀ ча́до, беззако́ннїи ᲂу҆ѧзви́ша;