на Гдⷭ҇и воззва́хъ, стїхи̑ры крⷭ҇тны, гла́съ и҃:
Подо́бенъ: Мч҃нцы гдⷭ҇ни:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
На крⷭ҇тѣ̀ хрⷭ҇тѐ пригво́ждсѧ, пронза́емь въ рꙋ́цѣ и҆ но́зѣ, въ ребро́ же ст҃о́е прободе́нъ бы́лъ є҆сѝ, и҆сточа́ѧ мѝ ка̑пли бж҃е́ственнагѡ сп҃се́нїѧ, пребл҃гі́й, кро́вь же и҆ во́дꙋ, ꙗ҆́кѡ да ѡ҆мы́еши мо́й гно́й и҆ скве́рнꙋ: сла́ва твое́й всеще́дре бл҃гости.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Страда́ти претерпѣ́лъ є҆сѝ влⷣко, ꙗ҆́кѡ да безстра́стїе всѣ̑мъ пода́си, покланѧ́ющымсѧ твои̑мъ стрⷭ҇тє́мъ, и҆ во́льномꙋ заколе́нїю, и҆ копїю̀, и҆ гвоздє́мъ, и҆ тро́сти, ꙗ҆̀же долготерпѣли́внѡ хотѧ̀ претерпѣ́лъ є҆сѝ: ꙗ҆́кѡ да и҆ мнѣ̀ и҆схода́таиши гдⷭ҇и, ра́ди стрⷭ҇те́й твои́хъ безстра́стїе.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Ю҆́ница нескве́рнаѧ, ю҆нца̀ ви́дѧщи на дре́во воздви́жена во́лею, рыда́ющи ᲂу҆ми́льнѡ вопїѧ́ше: ᲂу҆вы̀ мнѣ̀, возлю́бленнѣйшее ча́до, что́ ти со́нмъ воздадѐ безбл҃года́тный є҆вре́йскїй, хотѧ̀ мѧ̀ безча́дствовати ѿ тебѐ вселюби́мый;
Та́же, мине́и стїхи̑ры ст҃о́мꙋ. А҆́ще ли нѣ́сть мине́и:
И҆́ны стїхи̑ры бцⷣѣ, гла́съ и҃:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Не терплю̀ ча́до, зрѣ́ти тѧ̀ на дре́вѣ ᲂу҆снꙋ́вша, бо́дрость всѣ̑мъ даю́щаго: ꙗ҆́кѡ да дре́вле ѿ престꙋпле́нїѧ плода̀, сно́мъ всепа́гꙋбнымъ ᲂу҆снꙋ́вшымъ, бж҃е́ственнꙋю и҆ сп҃си́тельнꙋю бо́дрость пода́си, дв҃а глаго́лаше пла́чꙋщисѧ, ю҆́же велича́емъ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Собо́ръ непра́ведный тебѐ на крⷭ҇тъ воздви́же а҆́гнца, взе́млющаго мі́ра прегрѣшє́нїѧ, и҆ копїе́мъ твоѧ̑ ре́бра прободо́ша долготерпѣли́ве, и҆ рꙋ́ки пригвозди́ша твоѧ̑ и҆ но́ги. ѽ сꙋро́вства ѕла́гѡ! ѽле дерзнове́нїѧ! пречⷭ҇таѧ сїѧ̑ взыва́ше ᲂу҆ми́льнѡ слезѧ́щи.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Что̀ зри́мое сїѐ, є҆́же ны́нѣ ви́ждꙋ влⷣко; и҆́же го́рстїю всю̀ тва́рь пречꙋ́днѣ содержа́й, на дре́вѣ ꙗ҆́коже а҆́гнецъ непра́веднѣ ви́сиши, сло́ве бж҃їй, ѿ ра̑бъ непокори́выхъ повѣ́шенъ; ѽле терпѣ́нїѧ! ѽле твоеѧ̀ бл҃гости всеще́дре! слезѧ́щи глаго́лаше пренепоро́чнаѧ.
Сла́ва, и҆ ны́нѣ, крⷭ҇тобг҃оро́диченъ: А҆́гнца тѧ̀ є҆гда̀ а҆́гница и҆ дв҃аѧ къ заколе́нїю ведо́ма ᲂу҆зрѣ̀ со слеза́ми сло́ве послѣ́доваше, и҆ взыва́ше: гдѣ̀ тщи́шисѧ ча́до моѐ; сше́ствꙋю тебѣ̀ сладча́йшїй, не терплю́ бо не зрѣ́ти тебѐ і҆и҃се мо́й многомлⷭ҇тиве.
Та́же, Свѣ́те ти́хїй: и҆ прокі́менъ днѐ. И҆ Сподо́би гдⷭ҇и въ ве́черъ се́й:
На стїхо́внѣ стїхи̑ры крⷭ҇тны, гла́съ и҃:
Вознесы́йсѧ на крⷭ҇тъ хрⷭ҇тѐ бж҃е, и҆ сп҃слъ є҆сѝ человѣ́ческїй ро́дъ: сла́вимъ страда̑нїѧ твоѧ̑.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Пригвозди́лсѧ є҆сѝ на крⷭ҇тѣ̀ хрⷭ҇тѐ бж҃е, и҆ ѿве́рзлъ є҆сѝ ра̑йскїѧ двє́ри: сла́вимъ бж҃ество̀ твоѐ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ, наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нцы твоѝ гдⷭ҇и, забы́ша житє́йскаѧ, небре́гше ѡ҆ мꙋче́нїихъ, бꙋ́дꙋщїѧ ра́ди жи́зни, тоѧ̀ наслѣ̑дницы ꙗ҆ви́шасѧ: тѣ́мже и҆ со а҆́гг҃лы ра́дꙋютсѧ. тѣ́хъ мл҃твами да́рꙋй лю́демъ твои̑мъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Гдⷭ҇и, а҆́ще и҆ на сꙋди́щи:
Гдⷭ҇и, є҆гда́ тѧ сл҃нца пра́веднаго со́лнце ви́дѣ на дре́вѣ повѣ́шена, лꙋчы̀ скры̀, и҆ лꙋна̀ свѣ́тъ во тьмꙋ̀ преложѝ: всенепоро́чнаѧ же твоѧ̀ мт҃и ᲂу҆тро́бою ᲂу҆ѧзвлѧ́шесѧ.
Та́же, Ны́нѣ ѿпꙋща́еши: И҆ Трист҃о́е. По Ѻ҆́ч҃е на́шъ: тропа́рь, и҆ є҆ктенїа̀, и҆ ѿпꙋ́стъ.
канѡ́нъ моле́бный прест҃ѣ́й бцⷣѣ, гла́съ и҃:
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Припѣ́въ: Прест҃а́ѧ бцⷣе, сп҃сѝ на́съ.
Мно́гими содержи́мь напа́стьми, къ тебѣ̀ прибѣга́ю сп҃се́нїѧ и҆скі́й, ѽ мт҃и сло́ва и҆ дв҃о! ѿ тѧ́жкихъ и҆ лю́тыхъ мѧ̀ сп҃сѝ.
Страсте́й мѧ̀ смꙋща́ютъ прило́зи, мно́гагѡ ᲂу҆ны́нїѧ и҆спо́лнити мою̀ дꙋ́шꙋ: ᲂу҆мирѝ ѻ҆трокови́це тишино́ю сн҃а и҆ бг҃а твоегѡ̀ всенепоро́чнаѧ.
Сла́ва: Сп҃са ро́ждшꙋю тѧ̀ и҆ бг҃а, молю̀ дв҃о, и҆зба́вити ми сѧ лю́тыхъ: къ тебѣ́ бо ны́нѣ прибѣга́ѧ, простира́ю и҆ дꙋ́шꙋ и҆ помышле́нїе.
И҆ ны́нѣ: Недꙋ́гꙋюща тѣ́ломъ и҆ дꙋше́ю, посѣще́нїѧ бж҃е́ственнагѡ, и҆ промышле́нїѧ ѿ тебѐ сподо́би є҆ди́на бг҃ома́ти, ꙗ҆́кѡ бл҃га́ѧ, бл҃га́гѡ же роди́тельнице.
Пѣ́снь
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Предста́тельство и҆ покро́въ жи́зни моеѧ̀, полага́ю тѧ̀ бг҃ороди́тельнице дв҃о, ты́ мѧ ѡ҆кормѝ ко приста́нищꙋ твоемꙋ̀, бл҃ги́хъ вино́вна, вѣ́рныхъ ᲂу҆твержде́нїе, є҆ди́на всепѣ́таѧ.
Молю̀ дв҃о, дꙋше́вное смꙋще́нїе, и҆ печа́ли моеѧ̀ бꙋ́рю разори́ти: ты́ бо бг҃оневѣ́стнаѧ, нача́льника тишины̀ хрⷭ҇та̀ родила̀ є҆сѝ є҆ди́на пречⷭ҇таѧ.
Сла́ва: Бл҃годѣ́телѧ ро́ждши до́брыхъ вино́внаго, бл҃годѣѧ́нїѧ бога́тство всѣ̑мъ и҆сточѝ: всѧ̑ бо мо́жеши, ꙗ҆́кѡ си́льнаго въ крѣ́пости хрⷭ҇та̀ ро́ждши, бг҃обл҃же́ннаѧ.
И҆ ны́нѣ: Лю́тыми недꙋ́ги, и҆ болѣ́зненными страстьмѝ и҆стѧза́емꙋ, дв҃о, ты́ ми помозѝ, и҆сцѣле́нїй бо неѡскꙋ́дное тѧ̀ зна́ю сокро́вище пренепоро́чнаѧ, неиждива́емое.
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство: разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Страсте́й мои́хъ смꙋще́нїе, ко́рмчїю ро́ждшаѧ гдⷭ҇а, и҆ бꙋ́рю ᲂу҆тишѝ мои́хъ прегрѣше́нїй, бг҃оневѣ́стнаѧ.
Млⷭ҇рдїѧ твоегѡ̀ бе́зднꙋ призыва́ющꙋ пода́ждь мѝ, ꙗ҆́же бл҃госе́рдаго ро́ждшаѧ, и҆ сп҃са всѣ́хъ пою́щихъ тѧ̀.
Сла́ва: Наслажда́ющесѧ пречⷭ҇таѧ, твои́хъ дарова́нїй, бл҃года́рственное воспѣва́емъ пѣ́нїе, вѣ́дꙋще тѧ̀ бг҃ома́терь.
И҆ ны́нѣ: На ѻ҆дрѣ̀ болѣ́зни моеѧ̀, и҆ не́мощи низлежа́щꙋ мѝ, ꙗ҆́кѡ бл҃голюби́ва помозѝ бцⷣе, є҆ди́на приснодв҃о.
І҆рмо́съ: Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
И҆спо́лни чⷭ҇таѧ, весе́лїѧ се́рдце моѐ, твою̀ нетлѣ́ннꙋю даю́щи ра́дость, весе́лїѧ ро́ждшаѧ вино́внаго.
И҆зба́ви на́съ ѿ бѣ́дъ бцⷣе чⷭ҇таѧ, вѣ́чное ро́ждши и҆збавле́нїе, и҆ ми́ръ всѧ́къ ᲂу҆́мъ преимꙋ́щїй.
Сла́ва: Разрѣшѝ мглꙋ̀ прегрѣше́нїй мои́хъ бг҃оневѣ́сто, просвѣще́нїемъ твоеѧ̀ свѣ́тлости, свѣ́тъ ро́ждшаѧ бж҃е́ственный и҆ превѣ́чный.
И҆ ны́нѣ: И҆сцѣлѝ чⷭ҇таѧ, дꙋшѝ моеѧ̀ неможе́нїе, посѣще́нїѧ твоегѡ̀ сподо́бльшаѧ, и҆ здра́вїе мл҃твами твои́ми пода́ждь мѝ.
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е, возведи́ мѧ.
Сме́рти и҆ тлѝ ꙗ҆́кѡ сп҃слъ є҆́сть, са́мъ сѧ̀ и҆зда́въ сме́рти, тлѣ́нїемъ и҆ сме́ртїю моѐ є҆стество̀ ꙗ҆́то бы́вшее, дв҃о, молѝ гдⷭ҇а и҆ сн҃а твоего̀, врагѡ́въ ѕлодѣ́йствїѧ мѧ̀ и҆зба́вити.
Предста́тельницꙋ тѧ̀ живота̀ вѣ́мъ, и҆ храни́тельницꙋ тве́рдꙋ дв҃о, и҆ напа́стей рѣша́щꙋ молвы̑, и҆ нало́ги бѣсѡ́въ ѿгонѧ́ющꙋ: и҆ молю́сѧ всегда̀. ѿ тлѝ страсте́й мои́хъ и҆зба́вити мѧ̀.
Сла́ва: Ꙗ҆́кѡ стѣ́нꙋ прибѣ́жища стѧжа́хомъ, и҆ дꙋ́шъ всесоверше́нное сп҃се́нїе, и҆ простра́нство въ ско́рбехъ, ѻ҆трокови́це, и҆ просвѣще́нїемъ твои́мъ при́снѡ ра́дꙋемсѧ. ѽ влⷣчце, и҆ ны́нѣ на́съ ѿ страсте́й и҆ бѣ́дъ сп҃сѝ.
И҆ ны́нѣ: На ѡ҆дрѣ̀ ны́нѣ немощствꙋ́ѧй лежꙋ̀, и҆ нѣ́сть и҆сцѣле́нїѧ пло́ти мое́й: но бг҃а и҆ сп҃са мі́рꙋ, и҆ и҆зба́вителѧ недꙋ́гѡвъ ро́ждшаѧ, тебѣ̀ молю́сѧ бл҃го́й, ѿ тлѝ недꙋ̑гъ возста́ви мѧ̀.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ и҃:
А҆́гнца и҆ па́стырѧ, и҆ сп҃са мі́ра, на крⷭ҇тѣ̀ зрѧ́щи, ро́ждшаѧ тѧ̀, глаго́лаше слезѧ́щи: мі́ръ ᲂу҆́бѡ ра́дꙋетсѧ, прїе́млѧ и҆збавле́нїе: ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же за всѣ́хъ терпи́ши сн҃е и҆ бж҃е мо́й.
І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
На́ше сп҃се́нїе ꙗ҆́коже восхотѣ́лъ є҆сѝ сп҃се, ᲂу҆стро́ити, во ᲂу҆тро́бꙋ дв҃ыѧ всели́лсѧ є҆сѝ, ю҆́же мі́рꙋ предста́тельницꙋ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
Воли́телѧ млⷭ҇ти є҆го́же родила̀ є҆сѝ мт҃и чⷭ҇таѧ, ᲂу҆молѝ, и҆зба́витисѧ ѿ прегрѣше́нїй, и҆ дꙋше́вныхъ скве́рнъ, вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Сла́ва: Сокро́вище сп҃се́нїѧ, и҆ и҆сто́чникъ нетлѣ́нїѧ, тѧ̀ ро́ждшꙋю, и҆ сто́лпъ ᲂу҆твержде́нїѧ, и҆ две́рь покаѧ́нїѧ зовꙋ́щымъ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
И҆ ны́нѣ: Тѣлє́сныѧ сла́бѡсти, и҆ дꙋшє́вныѧ недꙋ́ги бг҃ороди́тельнице, любо́вїю пристꙋпа́ющихъ къ кро́вꙋ твоемꙋ̀ дв҃о, и҆сцѣли́ти сподо́би, сп҃са хрⷭ҇та̀ на́мъ ро́ждшаѧ.
І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.
По́мощи ꙗ҆́же ѿ тебѐ тре́бꙋющыѧ не пре́зри дв҃о, пою́щыѧ и҆ превозносѧ́щыѧ тѧ̀ во вѣ́ки.
Неможе́нїе дꙋшѝ моеѧ̀ и҆сцѣлѧ́еши, и҆ тѣлє́сныѧ болѣ̑зни дв҃о, да тѧ̀ просла́влю чⷭ҇таѧ во вѣ́ки.
Сла́ва: И҆сцѣле́нїй бога́тство и҆злива́еши, вѣ́рнѡ пою́щымъ тѧ̀ дв҃о, и҆ превозносѧ́щымъ неизрече́нное твоѐ ржⷭ҇тво̀.
И҆ ны́нѣ: Напа́стей ты̀ прило́ги ѿгонѧ́еши, и҆ страсте́й нахо́ды дв҃о: тѣ́мже тѧ̀ пое́мъ во всѧ̑ вѣ́ки.
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще.
То́ка сле́зъ мои́хъ не ѿврати́сѧ, ꙗ҆́же ѿ всѧ́кагѡ лица̀ всѧ́кꙋ сле́зꙋ ѿе́мшаго, дв҃о, хрⷭ҇та̀ ро́ждшаѧ.
Ра́дости моѐ се́рдце и҆спо́лни дв҃о: ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.
Сла́ва: Свѣ́та твоегѡ̀ зарѧ́ми просвѣтѝ дв҃о, мра́къ невѣ́дѣнїѧ ѿгонѧ́щи, бл҃говѣ́рнѡ бцⷣꙋ тѧ̀ и҆сповѣ́дающихъ.
И҆ ны́нѣ: На мѣ́стѣ ѡ҆ѕлобле́нїѧ не́мощи, смири́вшагосѧ дв҃о, и҆сцѣлѝ, и҆з̾ нездра́вїѧ во здра́вїе претворѧ́ющи.
Та́же, Досто́йно є҆́сть: и҆ покло́нъ. Трист҃о́е. По Ѻ҆́ч҃е на́шъ: Тропа́рь, и҆ про́чее ѻ҆бы́чно, и҆ ѿпꙋ́стъ.
по а҃-мъ стїхосло́вїи сѣда́льны крⷭ҇тны, гла́съ и҃:
Ви́дѧ разбо́йникъ нача́льника жи́зни, на крⷭ҇тѣ̀ ви́сѧща, глаго́лаше: а҆́ще не бы бг҃ъ бы́лъ вопло́щьсѧ, и҆́же съ на́ми распны́йсѧ: не бы̀ со́лнце лꙋчѝ своѧ̑ потаи́ло, нижѐ бы землѧ̀ трепе́щꙋщи трѧсла́сѧ: но всѧ̑ терпѧ́й, помѧни́ мѧ гдⷭ҇и, во црⷭ҇твїи твое́мъ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Посредѣ̀ двою̀ разбѡ́йникꙋ, мѣ́рило пра́ведное ѡ҆брѣ́тесѧ крⷭ҇тъ тво́й: ѻ҆́вомꙋ ᲂу҆́бѡ низводи́мꙋ во а҆́дъ тѧгото́ю хꙋле́нїѧ: дрꙋго́мꙋ же легча́щꙋсѧ ѿ прегрѣше́нїй къ позна́нїю бг҃осло́вїѧ. хрⷭ҇тѐ бж҃е, сла́ва тебѣ̀.
Сла́ва, и҆ ны́нѣ, крⷭ҇тобг҃оро́диченъ: А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀ непра́веднѡ воздви́жена, пла́чꙋщисѧ го́рькѡ взыва́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе: ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за млⷭ҇рдїе млⷭ҇ти бж҃е пребл҃гі́й, безгрѣ́шне гдⷭ҇и. є҆́йже вѣ́рнѡ возопїи́мъ: бл҃гоꙋтро́бїе покажѝ дв҃о на ны̀, и҆ согрѣше́нїй ѡ҆ставле́нїе да́рꙋй, покланѧ́ющымсѧ тогѡ̀ страда́нїємъ.
По в҃-мъ стїхосло́вїи сѣда́льны, гла́съ и҃:
Посредѣ̀ є҆де́ма дре́во процвѣтѐ сме́рть, посредѣ́ же всеѧ̀ землѝ дре́во возрастѝ жи́знь: вкꙋси́вше бо пе́рвѣе плода̀, нетлѣ́нни сꙋ́ще, тлѣ́нни бы́хомъ: ᲂу҆лꙋчи́вше же второ́е, нетлѣ́нїѧ наслади́хомсѧ: крⷭ҇то́мъ бо сп҃са́еши ꙗ҆́кѡ бг҃ъ, ро́дъ человѣ́ческїй.
Сті́хъ: Бг҃ъ же ца́рь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Въ раи́ мѧ пре́жде дре́во ѡ҆бнажѝ, внꙋше́нїемъ вра́гъ вносѧ̀ ᲂу҆мерщвле́нїе: крⷭ҇та́ же дре́во, жи́зни вѣ́чныѧ ѡ҆дѣѧ̑нїѧ человѣ́кѡмъ носѧ̀, водрꙋзи́сѧ на землѝ, и҆ мі́ръ ве́сь и҆спо́лнисѧ всѧ́кїѧ ра́дости. є҆го́же зрѧ́ще возноси́ма, бг҃ꙋ вѣ́рою лю́дїе согла́снѡ возопїи́мъ: и҆спо́лнь сла́вы до́мъ тво́й.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Вселе́ннѣй свѣти̑ла присносвѣ̑тлаѧ показа́стесѧ вѣ́рою: мч҃нческꙋю всю̀ возложи́вше наде́ждꙋ на бг҃а, и҆ мы́сленнымъ є҆ле́емъ дх҃а ст҃а́гѡ, дꙋшє́вныѧ свѣщы̀ ва́шѧ просвѣти́сте. тѣ́мже и҆ ча́шы ᲂу҆́мныѧ, человѣ́кѡмъ пролива́юще и҆сцѣлє́нїѧ ꙗ҆́коже во́ды, цр҃кви ꙗ҆ви́стесѧ, стрⷭ҇тоте́рпцы всехва́льнїи. моли́те хрⷭ҇та̀ бг҃а, прегрѣше́нїй ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть ва́шꙋ.
Сла́ва, и҆ ны́нѣ, крⷭ҇тобг҃оро́диченъ: Дв҃о и҆з̾ тебѐ вопло́щшагосѧ, ꙗ҆́кѡ ви́дѣла є҆сѝ возвыша́ема на крⷭ҇тъ посредѣ̀ двою̀ разбѡ́йникꙋ, пла́чь воспрїе́мши вопїѧ́ше: ᲂу҆вы̀ мнѣ̀ ча́до сладча́йшее, ка́кѡ во́лею ра́спѧтъ бы́сть, и҆́же грѣхѝ взе́млѧй мі́ра ꙗ҆́кѡ бл҃гоꙋтро́бенъ; человѣ́чєскимъ хотѧ̀, ꙗ҆́кѡ бг҃ъ, пѣ́снемъ хвале́нїѧ приноси̑мымъ бы́ти тебѣ̀.
По г҃-мъ стїхосло́вїи сѣда́льны, гла́съ и҃:
Подо́бенъ: Повелѣ́нное та́йнѡ:
На крⷭ҇тѣ̀ тѧ̀ ви́дѣвше возвы́шена, сл҃нца незаходи́маго хрⷭ҇тѐ, стра́хомъ со́лнце помрачи́сѧ а҆́бїе: землѧ̀ поколеба́сѧ, и҆ ка́менїе тре́петомъ распада́шесѧ, и҆ цр҃ко́внаѧ завѣ́са раздра́сѧ, и҆ ме́ртвїи ѿ грѡ́бъ воста́ша, славосло́вѧще стра́шное твоѐ и҆ бж҃е́ственное снизхожде́нїе є҆ди́нагѡ бг҃а на́шегѡ.
Дре́во го́ресть во є҆де́мѣ пре́жде произнесѐ, дре́во же крⷭ҇тное сла́дкꙋю жи́знь процвѣтѐ: а҆да́мъ бо ꙗ҆ды́й во тлю̀ поползе́сѧ: мы́ же наслажда́ющесѧ пло́ти хрⷭ҇то́вы ѡ҆живлѧ́еми быва́емъ, и҆ ѡ҆божа́еми та́инственнѣ, црⷭ҇твїе прїе́млюще присносꙋ́щное бж҃їе. тѣ́мже и҆ вѣ́рою зове́мъ: сла́ва, сло́ве, стрⷭ҇ти твое́й.
Сла́ва, и҆ ны́нѣ, крⷭ҇тобг҃оро́диченъ: Сн҃а твоегѡ̀ и҆ бг҃а крⷭ҇то́мъ дв҃о, сохранѧ́еми при́снѡ, бѣсѡ́вскїѧ прило́ги и҆ кѡ́зни побѣжда́емъ, сꙋ́щꙋю бцⷣꙋ тѧ̀ вои́стиннꙋ воспѣва́юще: и҆ любо́вїю всѝ ро́ди бл҃жи́мъ пречⷭ҇таѧ, ꙗ҆́коже прорекла̀ є҆сѝ. тѣ́мже согрѣше́нїй на́шихъ ѡ҆ставле́нїе мл҃твами твои́ми да́рꙋй.
Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, [є҆гѡ́же краегране́сїе без̾ бг҃оро́дичнѡвъ: Пригво́ждшемꙋсѧ на дре́вѣ бг҃ꙋ бл҃года́ть.] Творе́нїе і҆ѡ́сифово. Гла́съ и҃:
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца сп҃сѐ, пѣ́снь бг҃ови воспѣва́юща.
И҆́же ѿ дре́ва сла́стною снѣ́дїю ме́ртва мѧ̀ бы́вшаго, на крⷭ҇тѣ̀ сло́ве ᲂу҆мертви́выйсѧ, ѡ҆живи́лъ є҆сѝ, и҆ сла́вою ᲂу҆добри́лъ є҆сѝ: покланѧ́юсѧ твое́й держа́вѣ, славосло́вѧ страда̑нїѧ, и҆ бл҃гоꙋтро́бїе неисче́тное.
Є҆гда̀ распростре́сѧ на дре́вѣ вїногра́дъ невоздѣ́ланный, вїно̀ на́мъ бж҃е́ственныѧ бл҃года́ти и҆сточѝ, сердца̀ веселѧ́щее, и҆ пре́лести пїѧ́нство ѿню́дъ потреблѧ́ющее, и҆ грѣхѝ ѡ҆чища́ющее.
Мч҃нченъ: Преиспещре́ни ра́нами великомч҃нцы, и҆ страда́нїй болѣ́зньми ᲂу҆краша́еми, красны̀ добротвори́тельномꙋ влⷣцѣ предста́сте со сла́вою, всесла́внѡ веселѧ́щесѧ, и҆ бг҃ови́дны познава́еми.
Мч҃нченъ: Си́лою бж҃е́ственною проѧвле́ннѡ ᲂу҆крѣплѧ́еми ст҃і́и, си́льнагѡ всю̀ крѣ́пость гꙋби́тельнꙋю мꙋ́жески низложи́сте: и҆ вѣнча́вшесѧ краснѡ̀ побѣди́тельными вѣнцы̀, ра́дꙋющесѧ бг҃ꙋ предста́сте.
Мч҃нченъ: Предстоѧ́щи крⷭ҇тꙋ̀ твоемꙋ̀ гдⷭ҇и, неискꙋсобра́чнаѧ, и҆ твоѐ ᲂу҆ѧзвле́нїе зрѧ́щи влⷣко, ᲂу҆ѧзвлѧ́ема глаго́лаше: ᲂу҆вы̀ мнѣ̀ ча́до, болѣ́зни и҆збѣ́гши въ ржⷭ҇твѣ̀ твое́мъ, ны́нѣ болѣ́зненнѡ терза́юсѧ.
Дрꙋгі́й канѡ́нъ прест҃ѣ́й бцⷣѣ. Гла́съ и҃: І҆рмо́съ то́йже.
На тѧ̀ дв҃о, наде́ждꙋ возложи́хъ сп҃се́нїѧ моегѡ̀, грѣхо́вныѧ скве́рны всего́ мѧ ѡ҆мы́й, и҆ чи́ста содѣ́лай, бг҃ꙋ и҆ сн҃ꙋ твоемꙋ̀ бл҃гоꙋгожда́ти и҆ дѣ́ѧти, и҆ тогѡ̀ всест҃о́мꙋ и҆́мени.
Двє́ри свѣ́та, ѻ҆́чи моѝ просвѣтѝ, и҆̀же помрачѝ мра́чный ѕмі́й тьмо́ю прегрѣше́нїй, и҆ двє́ри мѝ ѿве́рзи покаѧ́нїѧ дв҃о, и҆ къ животꙋ̀ наста́ви мѧ̀, ѿ пла́мене и҆ тьмы̀ и҆схитѝ.
Мт҃и бж҃їѧ, ꙗ҆́кѡ дерзнове́нїе и҆мꙋ́щи къ ро́ждшемꙋсѧ и҆з̾ тебѐ, є҆диноро́дномꙋ сло́вꙋ, и҆ ѻ҆ц҃ꙋ̀ собезнача́льномꙋ, молѝ всенепоро́чнаѧ, дꙋ́шꙋ мою̀ и҆зба́вити ѿ бѣсо́вскагѡ ѡ҆ѕлобле́нїѧ, и҆ ѻ҆гнѧ̀, и҆ всѧ́кагѡ мꙋче́нїѧ.
Бл҃гослове́нъ пло́дъ бг҃оневѣ́сто твоегѡ̀ чре́ва, и҆́мже земні́и всѝ ѿ клѧ́твы и҆зба́вихомсѧ, бл҃гослове́ннаѧ, пречⷭ҇таѧ, несказа́нное чꙋ́до, недоразꙋмѣ́емое вѣ́дѣнїе, всѣ́хъ вѣ́рныхъ сп҃се́нїе.
І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебѐ є҆ди́не чл҃вѣколю́бче.
Оу҆твержде́й нб҃са̀, и҆ зе́млю ѡ҆снова́вый, и҆ мо́ре сло́вомъ свѧза́вый, ты̀ свѧ́занъ бы́лъ є҆сѝ менѐ ра́ди, и҆ на крⷭ҇тѣ̀ пригвожда́емь: ꙗ҆́кѡ да ѿ ᲂу҆́зъ грѣха̀ разрѣши́ши мѧ̀ чл҃вѣколю́бче.
Крⷭ҇тномꙋ дре́вꙋ вра́гъ прирази́всѧ, ᲂу҆мертви́сѧ съ бѣ́сы свои́ми ѕлодѣ́йственными: и҆ вкꙋше́нїемъ лꙋка́вымъ ѡ҆сꙋжде́нный, поми́лованъ бы́сть, и҆ ᲂу҆твержде́нїемъ бл҃гоче́стїѧ тва́рь ᲂу҆тверди́сѧ.
Мч҃нченъ: Многови̑днымъ ра́намъ, и҆ мечє́мъ, и҆ ѕвѣрє́мъ, и҆ ѡ҆бнаже́нїємъ тѣлє́снымъ вдава́еми, лꙋка̑вымъ гони́телємъ, бж҃е́ственнїи и҆ до́блїи страда́льцы, и҆ не ꙗ҆́ты пребы́ша манове́нїемъ лꙋ́чшимъ.
Мч҃нченъ: Взира́юще помышле́нїемъ, и҆ тре́звенною мы́слїю къ бꙋ́дꙋщымъ, и҆ текꙋ́щыѧ до конца̀ пренебрего́ша хрⷭ҇тѡ́вы мч҃нцы сла́внїи: тѣ́мже нестерпи́мыѧ болѣ̑зни претерпѣ́ша ра́дꙋющесѧ.
Бг҃оро́диченъ: Многопѣ́таѧ а҆́гница, а҆́гнца зрѧ́щи воздвиза́ема на дре́во непра́веднѣ, пла́чꙋщи восклица́ше, мт҃рски слезѧ́щи: и҆ долготерпѣ́нїе поѧ́ше, того̀ сла́вѧщи.
І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Всѐ моѐ жела́нїе къ тебѣ̀ движа̀, влⷣчце чⷭ҇таѧ, плотски́хъ мѧ̀ жела́нїй вско́рѣ премѣнѝ.
Возсїѧ́й мѝ покаѧ́нїѧ чи̑стыѧ зари̑, влⷣчце две́ре свѣ́та, и҆ грѣхѡ́въ мои́хъ мглꙋ̀ потребѝ.
Є҆ди́на всенепоро́чнаѧ, поро́ка всѧ́кагѡ на́съ и҆зба́ви, и҆ и҆скꙋше́нїй находѧ́щихъ, и҆ ѻ҆гнѧ̀ вѣ́чнꙋющагѡ.
Оу҆скорѝ посѣти́ти болѧ́щаго, пречⷭ҇таѧ, и҆ ѿ лю́тыѧ ра́ны и҆зба́ви мѧ̀, и҆ всѧ́кїѧ ско́рби.
І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ̑мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва чл҃вѣколю́бче.
Ро́дъ человѣ́ческїй ѿ паде́нїѧ призва́сѧ, є҆го́же под̾ѧ́тъ дре́вле первозда́нный: всѣ́хъ бо содѣ́тель воздви́женъ бы́сть на дре́во, пе́рсты ѡ҆кровавлѧ́емь, и҆ гвоздьмѝ во́лею пригвожда́емь въ рꙋ́цѣ, и҆ въ ре́бра копїе́мъ пробода́емь.
Ста̀ крⷭ҇тъ, и҆ ле́сть всѧ̀ низпаде́сѧ: тебѣ̀ сп҃се, ѡ҆бнаже́нꙋ бы́вшꙋ, ѡ҆бнажи́сѧ чꙋ́ждїй: и҆ а҆да́мъ бж҃е́ственнагѡ нетлѣ́нїѧ ри́зою ѡ҆дѣ́ѧнъ бы́сть, тва́рь просвѣти́сѧ помрача́емꙋ со́лнцꙋ, на дре́вѣ хрⷭ҇тѐ распина́емꙋ тѝ.
Мч҃нченъ: Но́вагѡ заколе́нїѧ, ꙗ҆́коже ѻ҆вча́та мч҃нцы, пожре́номꙋ сло́вꙋ принесо́стесѧ: кро́вными тече́нїи, пре́лести морѧ̀ и҆зсꙋши́вше бж҃е́ственною бл҃года́тїю, и҆злїѧ́нїе страсте́й ѡ҆дожде́нїемъ чꙋде́съ потреблѧ́ете всегда̀ сла́внїи.
Мч҃нченъ: Ѿсѣче́нїе ᲂу҆дѡ́въ всѣ́хъ под̾ѧ́сте мч҃нцы, и҆ зꙋбѡ́въ и҆ ногте́й и҆скорене́нїе, рꙋ́къ ѿрѣ́занїе неща́дно, ѧ҆зы́ка же и҆ но́гъ и҆ соста́вѡвъ тѣле́сныхъ: тѣ́мже превели́кїѧ сподо́бистесѧ сла́вы, всѣ́хъ бг҃ꙋ предстоѧ́ще.
Бг҃оро́диченъ: Своего́ си ю҆нца̀ непоро́чнаѧ ю҆́ница ви́дѣвши на дре́во воздви́жена, вопїѧ́ше со восклица́нїемъ: ча́до, ка́кѡ тѧ̀ законопрестꙋ́пныхъ со́нмъ ѿню́дъ не ᲂу҆ще́дри, ᲂу҆ще́дрившаго и҆̀; но ᲂу҆смотре́нїемъ льсти́вымъ сме́рти преда́ти непра́веднѡ произво́ли.
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство: разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Дꙋ́шꙋ мою̀, ѡ҆мраче́ннꙋю прегрѣше́ньми, ѡ҆зарѝ свѣ́томъ приснодв҃о, ꙗ҆́же сл҃нце ро́ждшаѧ пра́вды.
И҆скꙋше́нїй мѧ̀ и҆схитѝ, и҆ житїѧ̀ дꙋшетлѣ́нныѧ бꙋ́ри, и҆ ѻ҆гнѧ̀ вѣ́чнагѡ свободи́ мѧ бг҃оневѣ́сто.
Дв҃ства сщ҃е́нный сосꙋ́де, и҆ невмѣсти́магѡ є҆стество́мъ вселе́нїе. дꙋ́шꙋ мою̀ ѡ҆мраче́ннꙋю ѿ мно́гихъ страсте́й, просвѣтѝ.
Всест҃а́ѧ бг҃оневѣ́сто, влⷣчце мі́ра, ты́ мѧ сп҃сѝ, ѿ бѣ́дъ и҆збавлѧ́ющи, и҆ страсте́й молвꙋ̀ ѿгонѧ́ющи.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Да сла́стнагѡ вкꙋше́нїѧ и҆зба́виши мѧ̀, же́лчи долготерпѣли́ве вкꙋси́лъ є҆сѝ хотѧ̀: и҆ ꙗ҆́кѡ да ме́ртвости совлече́ши мѧ̀ і҆и҃се, страсте́й, на́гъ пригвозди́тисѧ и҆зво́лилъ є҆сѝ на дре́вѣ: пою̀ твоѐ бл҃гоꙋтро́бное.
И҆стлѣ́вшꙋю страстьмѝ дꙋ́шꙋ мою̀, сло́ве, но́вꙋ творѧ̀, дꙋ́шꙋ пре́далъ є҆сѝ ѻ҆ц҃ꙋ̀, на дре́вѣ ви́сѧ, и҆ не терпи́тъ бездꙋ́шнаѧ землѧ̀ сїѧ̑ поразꙋмѣва́ющи, но стра́хомъ коле́блетсѧ воспѣва́ющи тѧ̀.
Мч҃нченъ: Оу҆краси́стесѧ мч҃нцы бж҃е́ственными стрⷭ҇тьмѝ ᲂу҆добрѧ́еми, и҆ стопа́мъ послѣ́довавше стрⷭ҇тьмѝ всѣ̑мъ безстра́стїе пода́вшемꙋ, сло́вꙋ є҆диноро́дномꙋ, ѻ҆тца̀ безнача́льнагѡ: сегѡ̀ ра́ди съ ни́мъ прославлѧ́етесѧ.
Мч҃нченъ: Оу҆страни́вшесѧ до́льнихъ, неви̑димыѧ наслѣ́довасте, въ нбⷭ҇ныхъ водворѧ́ющесѧ бж҃е́ственныхъ селе́нїихъ, и҆ прича́стїемъ бж҃е́ственнымъ ѡ҆божа́еми невеще́ственнѡ, сп҃совы непобѣди́мїи мч҃нцы.
Бг҃оро́диченъ: Стра́нно видѣ́нїе, ви́жꙋ, взыва́ше препѣ́таѧ: ка́кѡ и҆́же зрѣ́нїемъ всю̀ зе́млю коле́блѧй, на дре́вѣ возвыша́емь ᲂу҆снꙋ́лъ є҆сѝ, спѧ́щыѧ ѿ вѣ́ка хотѧ̀ возбꙋди́ти; покланѧ́юсѧ сн҃е, твоемꙋ̀ долготерпѣ́нїю.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Пое́мъ тѧ̀ дв҃о всепѣ́таѧ, ꙗ҆́же сло́во бж҃їе вмѣсти́вшаѧ во чре́вѣ твое́мъ пренепоро́чнаѧ.
Ѻ҆гнѧ̀ негаси́магѡ, и҆ че́рвїѧ и҆зба́ви мѧ̀ мт҃и бж҃їѧ, ꙗ҆́кѡ и҆мꙋ́щаѧ є҆́же ми́ловати цѣле́бнѡ.
Стѣна̀ ты̀ вѣ́рныхъ и҆ держа́ва всест҃а́ѧ є҆сѝ, сп҃са́ющи ѿ и҆скꙋше́нїй пою́щыѧ тѧ̀.
Недꙋ́гꙋющꙋю дꙋ́шꙋ мою̀ и҆сцѣлѝ, ро́ждшаѧ всѣ́хъ сп҃се́нїе, и҆ взе́млющаго недꙋ́ги, пречⷭ҇таѧ влⷣчце.
І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю, и҆ сп҃сѝ.
Воспѣ́ша нбⷭ҇ныѧ си̑лы всѧ̑ и҆ ᲂу҆диви́шасѧ, на крⷭ҇тѣ́ тѧ сло́ве взира́юще ви́сѧща: и҆ а҆да́мъ ᲂу҆ѧ́звленный сп҃се, и҆сцѣлѣ̀ ꙗ҆́звою твое́ю, и҆ клѧ́тва прогна́на бы́сть.
Разрѣша́етсѧ ѿ ᲂу҆́зъ нерѣши́мыхъ человѣ́чество, тебѣ̀ сло́ве пло́тїю свѧ́занꙋ бы́вшꙋ: и҆ свѧзꙋ́етсѧ мꙋчи́тель ꙗ҆́кѡ пти́ца, и҆ ѿ всѣ́хъ вѣ́рныхъ нарꙋга́емь: сла́ва хрⷭ҇тѐ бл҃гоꙋтро́бїю твоемꙋ̀.
Мч҃нченъ: Ꙗ҆ви́стесѧ бг҃озра́чнїи стрⷭ҇тоте́рпцы ꙗ҆́коже ᲂу҆́глїе, всѧ́кꙋ ѕлоче́стїѧ ве́щь попалѧ́юще бл҃года́тїю, на ᲂу҆́глїѧхъ же ѻ҆гнѧ̀ всесожига́еми, и҆ бж҃е́ственное прохлажде́нїе прїе́млюще.
Мч҃нченъ: Ѻ҆вча́та и҆́стиннагѡ па́стырѧ стрⷭ҇тоно́сцы ꙗ҆влѧ́еми, посредѣ̀ ди́вїихъ волкѡ́въ неврежде́ни пребы́сте, и҆ сконча́вше до́брѣ тече́нїе бж҃е́ственнїи, ко ѡ҆гра́дꙋ нбⷭ҇нꙋю всели́стесѧ.
Бг҃оро́диченъ: Гдⷭ҇а тѧ̀ живота̀ породи́хъ, и҆ кра́сна добро́тою па́че сынѡ́въ человѣ́ческихъ, дв҃а взыва́ше: и҆ ка́кѡ ны́нѣ ᲂу҆мира́еши сн҃е, добро́ты не и҆мѣ́ѧ въ распѧ́тїи, ᲂу҆добри́вый всѧ̑ манове́нїемъ;
І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Мр҃і́е, чи́стое и҆ всечестно́е жили́ще всѣ́хъ содѣ́телѧ, дꙋ́шꙋ ѡ҆чища́ющыѧ пода́ждь мѝ сле́зы, и҆ бꙋ́дꙋщагѡ сꙋда̀ и҆ мꙋ́ки и҆схити́ мѧ.
Двє́ри бж҃їѧ, вхо́ды бж҃е́ственныѧ покажѝ смире́ннѣй мое́й дꙋшѝ: въ нѧ́же вше́дъ и҆сповѣ́даѧсѧ, ѕлы́хъ разрѣше́нїе бцⷣе воспрїимꙋ̀.
Пꙋчи́на грѣхѡ́въ, и҆ во́лны ѿча́ѧнїѧ ѡ҆бꙋрева́ютъ мо́й ᲂу҆́мъ: ᲂу҆млⷭ҇рдисѧ влⷣчце, и҆ рꙋ́кꙋ мѝ прострѝ, и҆ сп҃си́ мѧ, ꙗ҆́же сп҃са ро́ждшаѧ.
Тѧ̀ предста́тельницꙋ и҆ стѣ́нꙋ вѣ́рнїи всѝ и҆́мамы, и҆̀же во глꙋбинѣ̀ ѕлы́хъ, и҆ мѧте́жей и҆ скорбе́й при́снѡ бѣ́дствꙋющїи, бцⷣе, є҆ди́на вѣ́рныхъ прибѣ́жище.
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Оу҆ра́ненъ бы́лъ є҆сѝ въ рꙋ́цѣ твоѝ хрⷭ҇тѐ, и҆́маже содѣ́лалъ є҆сѝ чꙋдеса̀: и҆ ра̑ны претерпѣ́лъ є҆сѝ, ра̑ны моѧ̑ всѧ̑ и҆сцѣлѧ́ѧ. пою́ тѧ є҆ди́не долготерпѣли́ве, зовы́й: бл҃гослове́нъ бг҃ъ ѻ҆тє́цъ на́шихъ.
Пригвожде́нъ бы́лъ є҆сѝ въ рꙋ́цѣ твоѝ и҆ но́зѣ гвоздьмѝ сп҃се, распина́емь, и҆ въ ре́бра прободе́нъ бы́въ, ка̑пли и҆сточа́ѧ всѣ̑мъ ѡ҆ставле́нїѧ пою́щымъ непреста́ннѡ, и҆ глаго́лющымъ: бл҃гослове́нъ бг҃ъ ѻ҆тє́цъ на́шихъ.
Мч҃нченъ: Ли́къ соста́вимъ пѣсносло́вѧще бж҃їѧ мч҃нки, и҆̀же ликѡ́мъ а҆́гг҃льскимъ сопричтє́ныѧ, и҆ зємны́ѧ просвѣща́ющыѧ, и҆ всегда̀ пою́щыѧ: бл҃гослове́нъ бг҃ъ ѻ҆тє́цъ на́шихъ.
Мч҃нченъ: Во ст҃ы́хъ свѣ́тлостехъ ѡ҆ст҃и́вшесѧ всели́стесѧ, посыла́юще всѣ̑мъ ѡ҆сщ҃е́нїе же и҆ и҆збавле́нїе, восхвалѧ́ющымъ ва́съ бж҃е́ственнїи мч҃нцы, и҆ воспѣва́ющымъ хрⷭ҇та̀, ѻ҆тє́цъ на́шихъ бж҃е бл҃гослове́нъ є҆сѝ.
Бг҃оро́диченъ: Незаходи́мое сл҃нце, ка́кѡ за́йде на дре́вѣ распина́емь; дв҃а вопїѧ́ше тѝ сло́ве: и҆ ви́дѣвъ со́лнце, ѡ҆ста́ви тече́нїе, свѣти́ти не могі́й, тебѣ̀ стра́ждꙋщꙋ влⷣко. пѣсносло́влю твоѐ сн҃е безѕло́бїе.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.
Молю́ тѧ пречⷭ҇таѧ, ᲂу҆мертвѝ живꙋ́щїй ко мнѣ̀ грѣ́хъ, и҆ живота̀ полꙋчи́ти сподо́би мѧ̀ дв҃о: и҆ ча́сти мѧ̀ и҆зба́ви та́мѡ мꙋ́чимыхъ.
Стра̑сти разли̑чныѧ мѧ̀ ѡ҆бꙋрева́ютъ, ро́ждшаѧ чⷭ҇таѧ, и҆сто́чника безстра́стїѧ, тѣ́хъ ѡ҆держа́нїѧ, и҆ ѻ҆гнѧ̀ вѣ́чнагѡ и҆зба́ви мѧ̀ бцⷣе, мл҃твами твои́ми.
Нра́вомъ во́льнымъ согрѣша́ю, и҆ порабоща́емь є҆́смь безмѣ́стнымъ ѻ҆бы́чаемъ, ны́нѣ ко ѻ҆бы́чнѣй твое́й млⷭ҇ти притека́ю: ѿча́ѧннаго сп҃си́ мѧ всест҃а́ѧ бцⷣе.
Оу҆гасѝ пла́мень страсте́й мои́хъ, и҆ ᲂу҆тишѝ бꙋ́рю се́рдца моегѡ̀, бг҃ома́ти чⷭ҇таѧ: и҆ и҆зба́ви мѧ̀ пречⷭ҇таѧ, ѿ бѣсѡ́въ мꙋчи́тельства, и҆ ѻ҆гнѧ̀ вѣ́чнагѡ.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
И҆з̾ ко́рене хрⷭ҇тѐ, прозѧ́блъ є҆сѝ і҆ессе́ова воплоща́емь, и҆ и҆скоренѧ́еши и҆зра́стшее те́рнїе а҆да́мова престꙋпле́нїѧ, вѣне́цъ носѧ́й терно́въ: на дре́вѣ же пригво́ждьсѧ, ю҆́же ѿ дре́ва и҆сцѣлѧ́еши и҆зра́стшꙋю клѧ́твꙋ, и҆ пою́щыѧ сп҃са́еши: сщ҃е́нницы воспо́йте, лю́дїе превозноси́те во всѧ̑ вѣ́ки.
Да бг҃а человѣ́ка содѣ́лаеши чл҃вѣколю́бче, бы́лъ є҆сѝ чл҃вѣ́къ, и҆ крⷭ҇тꙋ̀ прїѡбщи́всѧ въ ре́бра пробода́емь, и҆ ѻ҆́цтомъ съ же́лчїю напоѧ́емь, ѿѻнꙋ́дꙋже сп҃сшїисѧ твои́ми стрⷭ҇тьмѝ сло́ве, вопїе́мъ бл҃года́рственнѡ: сщ҃е́нницы воспо́йте, лю́дїе превозноси́те хрⷭ҇та̀ во всѧ̑ вѣ́ки.
Мч҃нченъ: Свѧ́зани бы́вше мч҃нцы, и҆ ꙗ҆́кѡ а҆́гнцы закала́еми, и҆ на ѻ҆гнѝ немлⷭ҇тивнѡ и҆спеца́еми, ѕвѣрє́мъ же ѿдава́еми, и҆ въ главы̑ ᲂу҆сѣка́еми, ра́довастесѧ ра́достїю неизглаго́ланною, вопїю́ще: дѣ́ти бл҃гослови́те, сщ҃е́нницы воспо́йте, лю́дїе превозноси́те хрⷭ҇та̀ во вѣ́ки.
Мч҃нченъ: Вѣнцено́сцы мч҃нцы, а҆́гг҃лѡмъ соприча̑стницы, и҆̀же безплѡ́тныѧ врагѝ попра́вше, мл҃твꙋ сотвори́те ѡ҆ на́съ ко гдⷭ҇ꙋ, ꙗ҆́кѡ да въ любвѝ и҆ во мно́зѣ є҆диномы́слїи поживе́мъ, вопїю́ще несꙋмнѣ́ннымъ се́рдцемъ: дѣ́ти бл҃гослови́те, сщ҃е́нницы воспо́йте, лю́дїе превозноси́те хрⷭ҇та̀ во вѣ́ки.
Бг҃оро́диченъ: Болѣ́зненнѣ стеню́щи, ма́терски восклица́ше, и҆ ᲂу҆тро́бнагѡ смꙋще́нїѧ не терпѧ́щи на крⷭ҇тѣ̀, взира́ше къ ро́ждшемꙋсѧ и҆з̾ твоегѡ̀ чре́ва, вопїю́щи: что̀ зрѣ́нїе сїѐ ча́до, ка́кѡ стра́ждеши, и҆́же є҆стество́мъ безстрⷭ҇тный, всѧ́кѡ хотѧ̀ ро́дъ человѣ́ческїй ѿ страсте́й свободи́ти;
І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.
Бг҃ороди́тельнице дв҃о, ты̀ моѧ̑ грѣхѝ и҆ бре́мѧ ѡ҆блегчѝ ѿ прегрѣше́нїй, ꙗ҆́кѡ да тѧ̀ велича́ю.
Ꙗ҆́же сꙋдїю̀ ро́ждши и҆ бг҃а, мольба́ми бл҃гопремѣни́тельными твои́ми млⷭ҇тива мнѣ̀ того̀ покажѝ, чⷭ҇таѧ: ꙗ҆́кѡ да сп҃се́тъ мѧ̀ ѿ вѣ́чнагѡ ѻ҆гнѧ̀.
Прегрѣшє́нїѧ моѧ̑ мнѡ́га превзыдо́ша бцⷣе, да́ждь мѝ ны́нѣ рꙋ́кꙋ по́мощи, и҆ ѿ пла́мене негаси́магѡ и҆зба́ви мѧ̀ непотре́бнаго.
Просвѣтѝ пречⷭ҇таѧ, се́рдца моегѡ̀ ѻ҆́чи молю́сѧ, че́рностїю грѣхо́вною ѡ҆слѣплє́ныѧ, и҆ прїѧ́тны бж҃е́ственнагѡ сїѧ́нїѧ покажѝ, ꙗ҆́кѡ да ꙗ҆влю́сѧ тебѐ ра́ди твоемꙋ̀ сн҃ꙋ чи́стъ.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.
И҆сцѣли́лъ є҆сѝ влⷣко моѧ̑ ꙗ҆́звы, ᲂу҆ѧзви́всѧ и҆ ѡ҆кровави́въ рꙋ́цѣ своѝ, и҆ къ пꙋтє́мъ ходи́ти сп҃си́тєльнымъ, ꙗ҆́кѡ бл҃гъ напра́вилъ мѧ̀ є҆сѝ гдⷭ҇и, но́зѣ и҆скопа́въ своѧ̑ на крⷭ҇тѣ̀, и҆́хже дре́вле родонача́льницы ви́дѣвше ходѧ́ща тѧ̀ въ раѝ, сокрыва́хꙋсѧ.
И҆спра́вившꙋсѧ тѝ на крⷭ҇тѣ̀, и҆спра́висѧ пады́й паде́нїемъ ве́лїимъ первозда́нный. крѣ́пость же всѧ̀ паде́сѧ вра́жїѧ, всѧ́ же землѧ̀ ѡ҆ст҃и́сѧ кро́вїю и҆ водо́ю, ѿ ре́бръ твои́хъ и҆злїѧ́нною. тѣ́мже тѧ̀ всеще́дре, непреста́ннѡ велича́емъ.
Мч҃нченъ: Вѧ́жеми ст҃і́и мч҃нцы, вѧза̑нїѧ лꙋка́вагѡ разрꙋши́сте, и҆ ᲂу҆́зами, ꙗ҆̀же претерпѣ́сте терпѣли́внѡ, того̀ свѧза́сте, и҆ покори́сте под̾ но́зѣ, стꙋда̀ и҆спо́лнена, и҆ смѣ́хъ зрѧ́щымъ сотвори́сте, бл҃года́тїю бж҃е́ственною.
Мч҃нченъ: Землѧ̀ положе́нїемъ сщ҃е́нныхъ мч҃нкъ моще́й ѡ҆ст҃и́сѧ: и҆́бо и҆сто́чникъ и҆сточа́ющъ и҆сцѣле́нїй всѧ́ческихъ сїѧ̀ бж҃е́ственнагѡ стѧжава́етъ, стра̑сти тѣлє́сныѧ и҆ дꙋшє́вныѧ непреста́ннѡ и҆сцѣлѧ́ющи, и҆ врежде́нїе бѣсо́вское ѿрѣва́ющи бж҃е́ственною бл҃года́тїю.
Бг҃оро́диченъ: И҆збѣ́гши болѣ́зней ма́тернихъ во вре́мѧ рожде́нїѧ, долготерпѣли́ве, є҆гда́ же тѝ ны́нѣ стрⷭ҇ти во́льнѣй причасти́вшꙋсѧ, и҆ болѣ̑зни прїи́мшꙋ, поболѣ́хъ ᲂу҆тро́бою, и҆ дꙋше́ю болѣ́зни и҆спо́лнихсѧ, пречⷭ҇таѧ вопїѧ́ше, ю҆́же досто́йнѡ велича́емъ.
І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ: тѣ́мже пречⷭ҇тꙋю бцⷣꙋ вѣ́рнїи велича́емъ.
Оу҆ще́дри пречⷭ҇таѧ, ѻ҆каѧ́ннꙋю мою̀ дꙋ́шꙋ, и҆ ᲂу҆мертвѝ стра̑сти гꙋби́тєльныѧ, и҆ мꙋчи́тельное недоꙋмѣ́нїе ѿженѝ: стрꙋи̑ же сле́зъ ст҃ы̑ѧ да́рꙋй присноживѡ́тныѧ, и҆́миже и҆зба́влюсѧ ждꙋ́щагѡ мѧ̀ лю́тагѡ ѡ҆сꙋжде́нїѧ.
Стѣна̀ хрⷭ҇тїа́нѡмъ, и҆ прибѣ́жище тве́рдое мі́рꙋ, въ не́мже сп҃са́емсѧ, ты̀ є҆сѝ дв҃о чⷭ҇таѧ бг҃оневѣ́сто: и҆з̾ тебе́ бо бг҃ъ воплоти́всѧ, тебѐ всѣ̑мъ подадѐ покро́въ сп҃си́тельный. тѣ́мже чⷭ҇таѧ, сп҃си́ мѧ недосто́йнаго.
Безнача́льне сло́ве ѻ҆́ч҃їй, и҆ сн҃е мо́й, и҆ ст҃о́мꙋ дх҃ꙋ сопрⷭ҇то́льный, ка́кѡ своѝ пречⷭ҇тѣи дла̑ни на крⷭ҇тѣ̀ просте́рлъ є҆сѝ; что̀ ны́нѣ толи́каѧ твоѧ̀ нищета̀, пребл҃гі́й; предстоѧ́щи твоемꙋ̀ распѧ́тїю, вопїѧ́ше всенепоро́чнаѧ.
И҆ска́пающи бж҃е́ственнꙋю сла́дость, ꙗ҆́же всѣ́хъ сла́дость ро́ждшаѧ, ᲂу҆сладѝ дꙋ́шꙋ мою̀, ѡ҆горче́ннꙋю ꙗ҆́домъ ѕмі́ѧ, ѿчꙋжда́ющи мѧ̀ го́рькагѡ грѣха̀ всегда̀ хода́тайствомъ твои́мъ, предста́тельнице вѣ́рныхъ непосты́днаѧ.
Та́же, Досто́йно є҆́сть: И҆ покло́нъ, є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры крⷭ҇тны, гла́съ и҃:
Мѡѷсе́евъ же́злъ проѡбража́ше чⷭ҇тны́й крⷭ҇тъ тво́й сп҃се на́шъ: тѣ́мъ бо сп҃са́еши ꙗ҆́кѡ и҆з̾ глꙋбины̀ морскі́ѧ, лю́ди твоѧ̑ чл҃вѣколю́бче.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ: за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Є҆́же дре́вле во є҆де́мѣ въ раѝ, дре́во снѣ́дное прозѧбло̀ є҆́сть посредѣ̀ садѡ́въ: цр҃ковь же твоѧ̀ хрⷭ҇тѐ, крⷭ҇тъ тво́й процвѣтѐ, и҆сточа́ющъ всемꙋ̀ мі́рꙋ жи́знь. но ѻ҆́но ᲂу҆́бѡ ᲂу҆мертвѝ снѣ́дїю ꙗ҆́дшаго а҆да́ма: сїе́ же жи́ва сотворѝ, вѣ́рою сп҃сшасѧ разбо́йника: є҆гѡ́же сп҃се́нїѧ прича́стники и҆ на́съ ꙗ҆вѝ хрⷭ҇тѐ бж҃е, и҆́же стрⷭ҇тїю твое́ю разрꙋши́въ, ꙗ҆́же на ны̀ кѡ́зни вра̑жїѧ, и҆ сподо́би на́съ црⷭ҇твїѧ твоегѡ̀ гдⷭ҇и.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Мч҃нцы хрⷭ҇тѡ́вы непобѣди́мїи, побѣди́вше ле́сть си́лою крⷭ҇тною, воспрїѧ́сте бл҃года́ть вѣ́чныѧ жи́зни, мꙋчи́телей преще́нїѧ не ᲂу҆боѧ́вшесѧ, мꙋ́ками ᲂу҆ранѧ́еми весели́стесѧ: и҆ ны́нѣ крѡ́ви ва́шѧ бы́ша и҆сцѣлє́нїѧ дꙋша́мъ на́шымъ. моли́те сп҃сти́сѧ дꙋша́мъ на́шымъ.
Сла́ва, и҆ ны́нѣ, крⷭ҇тобг҃оро́диченъ: На крⷭ҇тѣ̀ повѣ́шена зрѧ́щи чⷭ҇таѧ тебѐ ро́ждшаѧ гдⷭ҇и, и҆ бли́зъ бы́вши, пла́чꙋщи глаго́лаше: ча́до, что̀ сїѧ̑ стра́ждеши пло́тїю, и҆ тщи́шисѧ безча́дствовати мѧ̀; потщи́сѧ просла́витисѧ, ꙗ҆́кѡ да возвели́чꙋсѧ стрⷭ҇тїю твое́ю.
Та́же, Бл҃го є҆́сть: И҆ Трист҃о́е. По Ѻ҆́ч҃е на́шъ: тропа́рь, и҆ є҆ктенїа̀, и҆ ча́съ а҃-й, и҆ ѿпꙋ́стъ.
Въ сре́дꙋ бл҃жє́нны, гла́съ и҃:
Помѧнѝ на́съ, хрⷭ҇тѐ сп҃се мі́ра, ꙗ҆́коже разбо́йника помѧнꙋ́лъ є҆сѝ на дре́вѣ: и҆ сподо́би всѣ́хъ є҆ди́не ще́дре, нбⷭ҇номꙋ црⷭ҇твїю твоемꙋ̀.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Жезло́мъ мѡѷсе́й крⷭ҇тъ воѡбража́ѧ, раздѣлѧ́ше глꙋбинꙋ̀, лю́ди і҆и҃льтєскїѧ преводѧ̀: мы́ же того̀ воѡбража́юще, мы́слєнныѧ врагѝ побѣжда́емъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Дре́вле і҆а́кѡвъ бл҃гословлѧ́ѧ ѻ҆́троки, сы́ны сынѡ́въ свои́хъ, рꙋ́цѣ премѣнѧ́ѧ простира́ше, зна́менаѧ тво́й крⷭ҇тъ хрⷭ҇тѐ сп҃се, и҆́мже всѝ ѿ клѧ́твы свободи́хомсѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Стрⷭ҇те́мъ хрⷭ҇тѡ́вымъ ревнꙋ́юще стрⷭ҇тоте́рпцы, мꙋ̑ки гѡ́рькїѧ под̾ѧ́сте мꙋ́жески, и҆ нетлѣ́нными вѣнцы̀ вѣнча́вшесѧ, на нб҃сѣ́хъ живетѐ.
Сла́ва: Сла́ва ѻ҆ц҃ꙋ̀ є҆ди́номꙋ безсме́ртномꙋ: сла́ва сн҃ꙋ во вѣ́ки живꙋ́щемꙋ: сла́ва кꙋ́пнѡ дх҃ꙋ всест҃о́мꙋ, всю̀ тва́рь ѡ҆сщ҃а́ющемꙋ.
И҆ ны́нѣ: И҆з̾ дв҃и́ческагѡ чре́ва твоегѡ̀ чⷭ҇таѧ, возсїѧ̀ содѣ́тель со́лнца и҆ лꙋны̀: є҆го́же зрѧ́щи повѣ́шена на дре́вѣ, всѧ̀ тва́рь колеба́шесѧ.