<<рѕ҃і: 231>>

Въ четверто́къ пе́рвыѧ седми́цы, на ᲂу҆́трени

По а҃-мъ стїхосло́вїи сѣда́льны а҆пⷭ҇льскїѧ, ѻ҆смогла́сника два̀, и҆ бг҃оро́диченъ. Та́же чте́нїе.

По в҃-мъ стїхосло́вїи сѣда́ленъ, гла́съ в҃.

Подо́бенъ: Оу҆мꙋдри́вый па́че:

Свѣти̑ла въ концѣ́хъ ᲂу҆ч҃нкѝ показа́вый проповѣ́данїемъ, сло́ве бж҃їй, сердца̀ на̑ша просвѣтѝ свѣ́томъ добродѣ́телей, и҆ посто́мъ ѡ҆чи́сти, даѧ̀ покаѧ́нїе ѡ҆браще́нїѧ рабѡ́мъ твои̑мъ, во є҆́же сла́вити тѧ̀ сп҃се, є҆ди́не сы́й пребл҃гі́й.

Сла́ва, то́йже.

И҆ ны́нѣ, бг҃оро́диченъ, гла́съ то́йже: Бцⷣе не пре́зри мѧ̀ тре́бꙋющаго застꙋпле́нїѧ твоегѡ̀: на тѧ́ бо ᲂу҆пова̀ дꙋша̀ моѧ̀, поми́лꙋй мѧ̀. <<рѕ҃і ѡ҆б.: 232>>

По г҃-мъ стїхосло́вїи сѣда́ленъ, гла́съ є҃.

Подо́бенъ: Ст҃ѣ́йшаѧ херꙋві̑мъ:

Свѣтлѣ́йшее добродѣ́телей, сожи́тельницꙋ нбⷭ҇нꙋю воздержа́нїе, мо́лимъ тѧ̀, а҆пⷭ҇льскаѧ двоенадесѧ́тице, моли́сѧ ми́рнѡ на́мъ соверши́ти, и҆ прїѧ́ти плоды̀ сп҃се́нїѧ: вы́ бо вои́стиннꙋ земны̑мъ є҆стѐ держа́ва, и҆ прибѣ́жище дꙋша́мъ на́шымъ.

Сла́ва, то́йже.

И҆ ны́нѣ, бг҃оро́диченъ, гла́съ то́йже: Ст҃ѣ́йшаѧ херꙋві̑мъ, вы́шшаѧ нб҃съ всепѣ́таѧ бцⷣе, тѧ̀ вои́стиннꙋ и҆сповѣ́дающе и҆́мамы грѣ́шнїи сп҃се́нїе, и҆ ѡ҆брѣта́емъ во и҆скꙋше́нїихъ предста́тельство. тѣ́мже не преста́й ѡ҆ на́съ молѧ́щи, держа́во и҆ прибѣ́жище дꙋ́шъ на́шихъ.

Канѡ́нъ въ мине́и. И҆ трипѣ́снецъ господи́на і҆ѡ́сифа. И҆ стїхосло́витсѧ пѣ́снь ѱалти́ри. Гла́съ в҃.

Пѣ́снь д҃.

І҆рмо́съ: Прише́лъ є҆сѝ ѿ дв҃ы:

Воздержа́нїѧ зарѝ прїе́млющи, ѡ҆блиста́йсѧ дꙋшѐ, и҆ ѿбѣ́гни грѣхо́внагѡ ѡ҆мраче́нїѧ: ꙗ҆́кѡ да возсїѧ́етъ тѝ ѡ҆ставле́нїѧ свѣ́тъ, бж҃е́ственнымъ дх҃омъ.

Оу҆́дицею мѧ̀ сла́сти прельсти́въ льсти́вый, плѣ́нника восхи́ти: но мі́ръ а҆пⷭ҇ли сло́вомъ ᲂу҆лови́вшїи, ѿ тогѡ̀ мѧ̀ ѕло́бы и҆зба́вите.

Ꙗ҆ви́стесѧ со́лнца сла́вы зарє́нїѧ а҆пⷭ҇ли сла́внїи, пре́лести тьмꙋ̀ ѿгонѧ́ще: и҆ менѐ ᲂу҆́бѡ просвѣти́те, всѧ́кою ѕло́бою ѡ҆мраче́ннаго.

Бг҃оро́диченъ: Воззовꙋ̀ въ нощѝ и҆ во днѝ ѡ҆скорблѧ́емь къ тебѣ̀, и҆ спасꙋ́сѧ, и҆ сла̑сти прейдꙋ̀, стѣно̀ и҆ по́моще, твое́ю дв҃о си́лою ѡ҆гражда́емый.

И҆́ный, господи́на ѳео́дѡра. Гла́съ є҃.

І҆рмо́съ: Дѣла̀ смотре́нїѧ твоегѡ̀ гдⷭ҇и: <<рз҃і: 233>>

Со́лнца пра́вды сꙋ́ще а҆пⷭ҇ли, свѣти̑ла всесвѣ̑тлаѧ, просвѣща́ете земны́й мі́ръ, мра́къ пре́лести ѿгонѧ́ще.

Лѵ́ра сꙋ́ще сп҃сова дх҃одви́жимаѧ а҆пⷭ҇ли, позна́вшесѧ на землѝ, доброгла́снꙋю пое́те на́мъ пѣ́снь, и҆ мі́ръ къ бг҃ꙋ ѡ҆браща́ете.

Сла́ва, трⷪ҇ченъ:

Трⷪ҇цꙋ во є҆ди́нственномъ сꙋществѣ̀ сла́вѧще, є҆ди́наго гдⷭ҇а бг҃а воспои́мъ, нерожде́нна ѻ҆ц҃а̀, сн҃а рожде́ннаго, и҆ дх҃а живꙋ́щаго.

Бг҃оро́диченъ: Дв҃а зача́тъ во чре́вѣ гдⷭ҇и, и҆ родѝ тебѐ є҆мманꙋ́ила: и҆зше́лъ бо є҆сѝ во сп҃се́нїе люде́й твои́хъ, сп҃стѝ бл҃гі̑ѧ твоѧ̑ чл҃вѣколю́бче.

Сла́ва тебѣ̀ бж҃е на́шъ, сла́ва тебѣ̀.

А҆пⷭ҇льскаѧ двоенадесѧ́тице, бж҃е́ственнаѧ и҆ всечⷭ҇тна́ѧ, молѝ хрⷭ҇та̀ ѡ҆ на́съ, мо́лимсѧ, прейтѝ на́мъ бл҃гомо́щнѡ четыредесѧтодне́вное по́прище.

І҆рмо́съ: Дѣла̀ смотре́нїѧ твоегѡ̀ гдⷭ҇и, ᲂу҆жаси́ша прⷪ҇ро́ка а҆ввакꙋ́ма: и҆зше́лъ бо є҆сѝ на сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.

Пѣ́снь и҃.

І҆рмо́съ: Велѣ́нїю мꙋчи́телевꙋ:

Пости́мсѧ ѿ всѧ́кїѧ сла̑сти, ᲂу҆тꙋчнѧ́юще чꙋ̑вства посто́мъ, и҆ ᲂу҆миле́нїѧ питїѐ те́плѣ пїе́мъ, пою́ще: бл҃гослови́те дѣла̀ гдⷭ҇нѧ гдⷭ҇а.

Стоѧ́нїѧ ѡ҆деснꙋ́ю ѻ҆́бщника мѧ̀ бы́ти моли́тесѧ, є҆гда̀ сѧ́дете сꙋди́ти человѣ́кѡмъ со хрⷭ҇то́мъ а҆пⷭ҇ли, мнѡ́гимъ грѣхѡ́мъ и҆ сꙋдꙋ̀ пови́ннаго.

На колесни́цꙋ бж҃е́ственныхъ добродѣ́телей, посто́мъ ѡ҆чи́стившесѧ взы́демъ, и҆ на воздꙋ́шнꙋю высотꙋ̀ ᲂу҆́мъ впери́мъ, пою́ще: бл҃гослови́те дѣла̀ гдⷭ҇нѧ гдⷭ҇а. <<рз҃і ѡ҆б.: 234>>

Бг҃оро́диченъ: Пребыла̀ є҆сѝ неѡпали́ма, ѻ҆́гнь ро́ждши бж҃ества̀ дв҃о: но попалѝ стра̑сти дꙋ́шъ вѣ́рою пою́щихъ тѝ гла́съ а҆́гг҃ловъ, ра́дости є҆ди́на хода́таице.

И҆́ный. І҆рмо́съ: Прпⷣбнїи твоѝ ѻ҆́троцы:

Дх҃а трꙋбы̑ хрⷭ҇тѡ́вы ᲂу҆ч҃нкѝ, воспѣва́юще вопїе́мъ: бл҃гослови́те дѣла̀ гдⷭ҇нѧ гдⷭ҇а.

Ꙗ҆́кѡ мл҃твенники мі́ра, и҆ пре́лести прогони́тели, ᲂу҆ч҃нкѝ пои́мъ хрⷭ҇тѡ́вы, бл҃гослови́те, вопїю́ще, дѣла̀ гдⷭ҇нѧ гдⷭ҇а.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Трⷪ҇цꙋ всест҃ꙋ́ю, во ѻ҆ц҃ѣ̀, и҆ сн҃ѣ, и҆ дс҃ѣ, воспѣва́юще пое́мъ: бл҃гослови́те дѣла̀ гдⷭ҇нѧ гдⷭ҇а.

Бг҃оро́диченъ: Неизглаго́ланное твоѐ ржⷭ҇тво̀ всѝ пое́мъ человѣ́цы, бл҃гоче́стнѡ взыва́юще чⷭ҇таѧ: бл҃гослови́те дѣла̀ гдⷭ҇нѧ гдⷭ҇а.

Сла́ва тебѣ̀ бж҃е на́шъ, сла́ва тебѣ̀.

А҆пⷭ҇ли моли́тесѧ, въ ми́рѣ на́мъ ѡ҆чисти́тєльныѧ дни̑ сконча́ти, бл҃гослови́те, вопїю́щымъ, дѣла̀ гдⷭ҇нѧ гдⷭ҇а.

Хва́лимъ, бл҃гослови́мъ, покланѧ́емсѧ гдⷭ҇ви:

І҆рмо́съ: Прпⷣбнїи твоѝ ѻ҆́троцы, въ пещѝ хрⷭ҇тѐ воспѣва́юще глаго́лахꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.

Пѣ́снь ѳ҃,

І҆рмо́съ: Невмѣсти́маго бг҃а:

Ѿве́рженъ въ глꙋбо́кꙋю пꙋчи́нꙋ сласте́й, твоегѡ̀ бл҃гоꙋтро́бїѧ бе́зднꙋ призыва́ю, ко́рмчїй, сп҃си́ мѧ.

Бл҃гоꙋтро́бїѧ и҆сто́чниче, да́ждь мѝ ны́нѣ ᲂу҆миле́нїе, воздыха́нїе, ꙗ҆́кѡ да воспла́чꙋ ѕлы́хъ мои́хъ безмѣ́рнаѧ морѧ̀.

Оу҆ч҃нкѡ́въ твои́хъ і҆и҃се чⷭ҇тны́ми моле́нїи чⷭ҇тно́мꙋ да́ждь мѝ воскрⷭ҇нїю поклони́тисѧ, и҆ бж҃е́ствєннымъ твои̑мъ стрⷭ҇тє́мъ. <<ри҃і: 235>>

Бг҃оро́диченъ: Ѡ҆небеси́вшаѧ на́ше земно́е смѣше́нїе, въ тебѣ̀ всенепоро́чнаѧ, бж҃їимъ вселе́нїемъ, и҆зба́ви всѧ̑ ѿ бѣ́дъ.

И҆́ный. І҆рмо́съ: Велича́емъ хрⷭ҇тѐ:

И҆з̾ и҆сто́чникѡвъ прⷪ҇ро́чески сп҃совыхъ, поче́рпше а҆пⷭ҇толи во́дꙋ безсме́ртїѧ, жа́ждꙋщыѧ преда́нїѧми жи́зни напаѧ́ютъ всегда̀.

Цр҃ѧ̀ нбⷭ҇нагѡ ꙗ҆́вльшесѧ кнѧ́зи а҆пⷭ҇ли, повинꙋ́сте вселе́ннꙋю всю̀, сего̀ є҆ди́наго честѝ, покланѧ́тисѧ и҆ славосло́вити ꙗ҆́кѡ бг҃а.

Сла́ва, трⷪ҇ченъ: Трⷪ҇це нераздѣ́льнаѧ, є҆ди́нице вседѣ́тельнаѧ и҆ всеси́льнаѧ, ѻ҆́ч҃е, сн҃е и҆ ст҃ы́й дш҃е: ты̀ бг҃ъ мо́й гдⷭ҇ь, и҆ свѣ́тъ, и҆ тебѣ̀ воспѣва́ѧ покланѧ́юсѧ.

Бг҃оро́диченъ: Тѧ̀ мт҃и и҆ дв҃о чⷭ҇таѧ, ᲂу҆бл҃жа́емъ ро́ди родѡ́въ, ꙗ҆́кѡ была̀ є҆сѝ ѡ҆чисти́лище мі́ра, сп҃са и҆ содѣ́телѧ неизглаго́ланнѡ ро́ждши.

Сла́ва тебѣ̀ бж҃е на́шъ, сла́ва тебѣ̀.

А҆пⷭ҇тольскїй ли́че, воспѣва́ющыѧ тѧ̀ сп҃са́й, и҆ сподо́би во ᲂу҆миле́нїи се́рдца, дни̑ всѧ̑ прейтѝ свѣтотво́рныхъ постѡ́въ.

І҆рмо́съ: Велича́емъ хрⷭ҇тѐ, твою̀ всенепоро́чнꙋю мт҃рь чⷭ҇тꙋю: ꙗ҆́кѡ роди́ тѧ преесте́ственнѡ пло́тїю, ѿ всѧ́кїѧ ле́сти и҆ тлѝ на́съ и҆збавлѧ́юща.

Свѣти́ленъ гла́са.

На стїхо́внѣ самогла́сенъ днѐ, два́жды, гла́съ г҃:

Гдⷭ҇и, мнѣ̀ грѣ́шномꙋ положи́лъ є҆сѝ покаѧ́нїе, менѐ недосто́йнаго спастѝ хотѧ̀ безмѣ́рною млⷭ҇тїю твое́ю. къ тебѣ̀ припа́даю молѧ́сѧ: посто́мъ дꙋ́шꙋ мою̀ приклонѝ, ꙗ҆́кѡ къ тебѣ̀ прибѣго́хъ є҆ди́номꙋ многомлⷭ҇тивомꙋ.

Мꙋ́чениченъ: Ꙗ҆́кѡ свѣти̑ла въ мі́рѣ сїѧ́ете, и҆ по сме́рти ст҃і́и мч҃нцы, по́двигомъ до́брымъ подви́гшесѧ, и҆мꙋ́ще дерзнове́нїе, хрⷭ҇та̀ моли́те, поми́ловатисѧ дꙋша́мъ на́шымъ. <<ри҃і ѡ҆б.: 236>>

Сла́ва, и҆ ны́нѣ, бг҃оро́диченъ, гла́съ то́йже:

Бцⷣе, предста́тельнице всѣ́хъ молѧ́щихсѧ тебѣ̀, тобо́ю дерза́емъ, и҆ тобо́ю хва́лимсѧ, и҆ къ тебѣ̀ всѐ ᲂу҆пова́нїе на́ше є҆́сть: молѝ ро́ждшагосѧ и҆з̾ тебѐ за непотрє́бныѧ рабы̑ твоѧ̑.

На ѕ҃-мъ часѣ̀ тропа́рь прⷪ҇ро́чества, гла́съ а҃:

Ви́димыхъ и҆ неви́димыхъ вра̑гъ и҆зба́ви на́съ гдⷭ҇и, да не когда̀ рекꙋ́тъ ꙗ҆зы́цы: гдѣ́ є҆сть бг҃ъ и҆́хъ; да разꙋмѣ́ютъ влⷣко, ꙗ҆́кѡ презира́еши грѣхѝ люде́й твои́хъ ка́ющихсѧ.

Прокі́менъ, ѱало́мъ г҃, гла́съ а҃: Внегда̀ возврати́тъ гдⷭ҇ь плѣне́нїе люде́й свои́хъ. Сті́хъ: Речѐ безꙋ́менъ въ се́рдцѣ свое́мъ: нѣ́сть бг҃ъ.

Прⷪ҇ро́чества и҆са́їина чте́нїе. [Глава̀ в҃, ст. а҃- к҃а.]

Вознесе́тсѧ гдⷭ҇ь є҆ди́нъ въ де́нь ѻ҆́ный. Де́нь бо гдⷭ҇а саваѡ́ѳа на всѧ́каго досади́телѧ, и҆ гордели́ваго, и҆ на всѧ́каго высо́каго и҆ велича́ваго, и҆ смирѧ́тсѧ. И҆ на всѧ́къ ке́дръ лїва́нскїй высо́кихъ и҆ превознесе́нныхъ, и҆ на всѧ́ко дре́во же́лꙋдѧ васа́нска: И҆ на всѧ́кꙋю го́рꙋ высо́кꙋю, и҆ на всѧ́кїй хо́лмъ высо́кїй: И҆ на всѧ́кїй сто́лпъ высо́къ, и҆ на всѧ́кꙋю стѣ́нꙋ высо́кꙋю: И҆ на всѧ́кїй кора́бль морскі́й, и҆ на всѧ́ко видѣ́нїе добро́ты корабле́й. И҆ смири́тсѧ всѧ́кїй человѣ́къ, и҆ паде́тсѧ высота̀ человѣ́ча, и҆ вознесе́тсѧ гдⷭ҇ь є҆ди́нъ въ де́нь ѻ҆́ный. И҆ рꙋкотворє́ннаѧ всѧ̑ скры́ютъ, Вне́сше въ пещє́ры, и҆ въ разсѣ̑лины ка́менїй, и҆ въ верте́пы земны̑ѧ, ѿ лица̀ стра́ха гдⷭ҇нѧ, и҆ ѿ сла́вы крѣ́пости є҆гѡ̀, є҆гда̀ воста́нетъ сокрꙋши́ти зе́млю. Въ де́нь бо ѻ҆́ный и҆зри́нетъ человѣ́къ ме́рзѡсти своѧ̑ златы̑ѧ и҆ срє́брѧныѧ, ꙗ҆̀же сотвори́ша, да покланѧ́ютсѧ сꙋ́єтнымъ и҆ нетопырє́мъ. Є҆́же вни́ти въ верте́пы тве́рдагѡ <<рѳ҃і: 237>> ка́мене, и҆ въ разсѣ̑лины ка́менїй ѿ лица̀ стра́ха гдⷭ҇нѧ, и҆ ѿ сла́вы крѣ́пости є҆гѡ̀, є҆гда̀ воста́нетъ сокрꙋши́ти зе́млю.

Прокі́менъ, ѱало́мъ д҃, гла́съ д҃: Гдⷭ҇и, кто̀ ѡ҆бита́етъ въ жили́щи твое́мъ; Сті́хъ: Ходѧ́й без̾ поро́ка, и҆ дѣ́лаѧй пра́вдꙋ.

Въ четверто́къ ве́чера,

во свѣти́льничномъ ѻ҆бы́чное стїхосло́вїе. На Гдⷭ҇и воззва́хъ, стїхи̑ры подѡ́бны трїѡ́ди. І҆ѡ́сифа. Гла́съ в҃: Просвѣти́телѧ на́шего:

Ѡ҆мраче́на мѧ̀ пре́лестьми борца̀, хрⷭ҇тѐ мо́й просвѣтѝ, ѡ҆мрачи́вый на крⷭ҇тѣ̀ ви́сѧй со́лнце и҆ногда̀, и҆ просвѣти́вый вѣ̑рнымъ свѣ́тъ и҆́стинный, ѡ҆ставле́нїѧ ꙗ҆́вѣ, ꙗ҆́кѡ да ходѧ́й во свѣ́тѣ твои́хъ повелѣ́нїй, дости́гнꙋ чи́стѣ воскрⷭ҇нїѧ твоегѡ̀ зарю̀ сп҃си́тельнꙋю.

Подо́бенъ:

Ꙗ҆́коже вїногра́дъ на дре́вѣ сп҃се ви́сѧ, вїно́мъ напои́лъ є҆сѝ нетлѣ́нїѧ хрⷭ҇тѐ концы̀. тѣ́мже вопїю̀: пїѧ́нствомъ мѧ̀ грѣхо́внымъ лю́тѣ ѡ҆мрача́ема при́снѡ, сла́достїю ᲂу҆миле́нїѧ и҆́стиннагѡ напои́въ, пости́тисѧ мѧ̀ ны́нѣ ѿ сласте́й ᲂу҆крѣпѝ сп҃се, ꙗ҆́кѡ бл҃гъ и҆ чл҃вѣколю́бецъ.

И҆́нъ подо́бенъ кѵ́ръ ѳео́дѡра, гла́съ то́йже.

Подо́бенъ: Ѽ вели́кагѡ та́инства:

Ѽ крⷭ҇та̀ твоегѡ̀ си́лы! се́й процвѣтѐ це́ркви воздержа́нїе, во є҆де́мѣ и҆ногда̀ а҆да́мово невоздержа́нїе и҆з̾ ко́рене и҆сто́ргъ: сме́рть ᲂу҆́бѡ ѻ҆́ное принесѐ человѣ́кѡмъ, но се́й нетлѣ́ннѡ и҆сточа́етъ безсме́ртїе мі́рꙋ, ꙗ҆́коже и҆з̾ и҆сто́чника и҆на́гѡ ра́йскагѡ, и҆злїѧ́нїемъ твоеѧ̀ живото́чныѧ кро́ве, вкꙋ́пѣ же и҆ воды̀: ѿѻнꙋ́дꙋже всѧ̑ <<рѳ҃і ѡ҆б.: 238>> ѡ҆животвори́шасѧ. и҆́мже на́мъ по́стнꙋю пи́щꙋ ᲂу҆сладѝ бж҃е і҆и҃левъ, и҆мѣ́ѧй ве́лїю млⷭ҇ть.

И҆ въ мине́и г҃. Сла́ва и҆ ны́нѣ, крⷭ҇тобг҃оро́диченъ.

Прокі́менъ, ѱало́мъ є҃і, гла́съ д҃: Бл҃гословлю̀ гдⷭ҇а вразꙋми́вшаго мѧ̀. Сті́хъ: Сохрани́ мѧ гдⷭ҇и, ꙗ҆́кѡ на тѧ̀ ᲂу҆пова́хъ.

Бытїѧ̀ чте́нїе. [Глава̀ в҃, ст. д҃-ѳ҃і.]

Сїѧ̀ кни́га бытїѧ̀ нб҃сѐ и҆ землѝ, є҆гда̀ бы́сть, во́ньже де́нь сотворѝ гдⷭ҇ь бг҃ъ нб҃о и҆ зе́млю: И҆ всѧ́кїй ѕла́къ се́льный, пре́жде да́же бы́ти на землѝ, и҆ всѧ́кꙋю травꙋ̀ се́льнꙋю, пре́жде да́же прозѧ́бнꙋти: не бо̀ ѡ҆дождѝ гдⷭ҇ь бг҃ъ на зе́млю, и҆ человѣ́къ не бѧ́ше дѣ́лати ю҆̀. И҆сто́чникъ же и҆схожда́ше и҆з̾ землѝ, и҆ напаѧ́ше всѐ лицѐ землѝ. И҆ созда̀ бг҃ъ человѣ́ка, пе́рсть [взе́мъ] ѿ землѝ, и҆ вдꙋ́нꙋ въ лицѐ є҆гѡ̀ дыха́нїе жи́зни: и҆ бы́сть человѣ́къ въ дꙋ́шꙋ жи́вꙋ. И҆ насадѝ гдⷭ҇ь бг҃ъ ра́й во є҆де́мѣ на восто́цѣхъ, и҆ введѐ та́мѡ человѣ́ка, є҆го́же созда̀. И҆ прозѧбѐ бг҃ъ є҆щѐ ѿ землѝ всѧ́кое дре́во кра́сное въ видѣ́нїе, и҆ до́брое въ снѣ́дь: и҆ дре́во жи́зни посредѣ̀ раѧ̀, и҆ дре́во є҆́же вѣ́дѣти разꙋмѣ́тельное до́брагѡ и҆ лꙋка́вагѡ. Рѣка́ же и҆схо́дитъ и҆з̾ є҆де́ма, напаѧ́ти ра́й: ѿтꙋ́дꙋ разлꙋча́етсѧ въ четы́ри нача̑ла. И҆́мѧ є҆ди́ной фїсѡ́нъ: сїѧ̀ ѡ҆крꙋжа́ющаѧ всю̀ зе́млю є҆ѵїла́тскꙋю: та́мѡ ᲂу҆́бѡ є҆́сть зла́то. Зла́то же ѻ҆́ныѧ землѝ до́брое: и҆ та́мѡ є҆́сть а҆́нѳраѯъ, и҆ ка́мень зеле́ный. И҆ и҆́мѧ рѣцѣ̀ второ́й геѡ́нъ: сїѧ̀ ѡ҆крꙋжа́ющаѧ всю̀ зе́млю є҆ѳїо́пскꙋю. И҆ рѣка̀ тре́тїѧ, ті́гръ: сїѧ̀ проходѧ́щаѧ прѧ́мѡ а҆ссѷрі́ѡмъ. рѣка́ же четве́ртаѧ є҆ѵфра́тъ. И҆ взѧ̀ гдⷭ҇ь бг҃ъ человѣ́ка, є҆го́же созда̀, и҆ введѐ є҆го̀ въ ра́й сла́дости, дѣ́лати є҆го̀ и҆ храни́ти. И҆ заповѣ́да гдⷭ҇ь бг҃ъ а҆да́мꙋ, глаго́лѧ: ѿ всѧ́кагѡ дре́ва, є҆́же въ раѝ, снѣ́дїю снѣ́си: Ѿ дре́ва же, є҆́же разꙋмѣ́ти до́брое и҆ лꙋка́вое, не снѣ́сте <<р҃к: 239>> ѿ негѡ̀: а҆ во́ньже а҆́ще де́нь снѣ́сте ѿ негѡ̀, сме́ртїю ᲂу҆́мрете. И҆ речѐ гдⷭ҇ь бг҃ъ: не добро̀ бы́ти человѣ́кꙋ є҆ди́номꙋ: сотвори́мъ є҆мꙋ̀ помо́щника по немꙋ̀. И҆ созда̀ бг҃ъ є҆щѐ ѿ землѝ всѧ̑ ѕвѣ́ри сє́льныѧ, и҆ всѧ̑ пти̑цы небе́сныѧ, и҆ приведѐ ѧ҆̀ ко а҆да́мꙋ, ви́дѣти, что̀ нарече́тъ ѧ҆̀: и҆ всѧ́ко є҆́же а҆́ще наречѐ а҆да́мъ дꙋ́шꙋ жи́вꙋ, сїѐ и҆́мѧ є҆мꙋ̀.

Прокі́менъ в҃, ѱало́мъ ѕ҃і, гла́съ д҃: Сохрани́ мѧ гдⷭ҇и, ꙗ҆́кѡ зѣ́ницꙋ ѻ҆́ка. Сті́хъ: Оу҆слы́ши гдⷭ҇и пра́вдꙋ мою̀.

При́тчей чте́нїе. [Глава̀ г҃, ст. а҃-и҃і.]

Сы́не, мои́хъ зако́нѡвъ не забыва́й, глаго́лы же моѧ̑ да соблюда́етъ твоѐ се́рдце: Долготꙋ́ бо житїѧ̀, и҆ лѣ̑та жи́зни, и҆ ми́ръ приложа́тъ тебѣ̀. Млⷭ҇тыни и҆ вѣ́ра да не ѡ҆скꙋдѣва́ютъ тебѣ̀: ѡ҆бложи́ же ѧ҆̀ на твое́й вы́и, и҆ напишѝ ѧ҆̀ на скрижа́ли се́рдца твоегѡ̀: и҆ ѡ҆брѧ́щеши бл҃года́ть. И҆ промышлѧ́й дѡ́браѧ пред̾ гдⷭ҇емъ [бг҃омъ] и҆ человѣ́ки. Бꙋ́ди ᲂу҆пова́ѧ всѣ́мъ се́рдцемъ на бг҃а, ѡ҆ твое́й же премꙋ́дрости не возноси́сѧ: Во всѣ́хъ пꙋте́хъ твои́хъ познава́й ю҆̀, да и҆справлѧ́етъ пꙋти̑ твоѧ̑. Не бꙋ́ди мꙋ́дръ ѡ҆ себѣ̀: бо́йсѧ же бг҃а, и҆ ᲂу҆клонѧ́йсѧ ѿ всѧ́кагѡ ѕла̀: Тогда̀ и҆сцѣле́нїе бꙋ́детъ тѣ́лꙋ твоемꙋ̀, и҆ ᲂу҆врачева́нїе косте́мъ твои̑мъ. Чтѝ гдⷭ҇а ѿ пра́ведныхъ твои́хъ трꙋдѡ́въ, и҆ нача́тки дава́й є҆мꙋ̀ ѿ твои́хъ плодѡ́въ пра́вды: Да и҆спо́лнѧтсѧ жи̑тницы твоѧ̑ мно́жествомъ пшени́цы, вїно́ же точи̑ла твоѧ̑ да и҆сточа́ютъ. Сы́не, не пренебрега́й наказа́нїѧ гдⷭ҇нѧ, нижѐ ѡ҆слабѣва́й ѿ негѡ̀ ѡ҆блича́емый: Є҆го́же бо лю́битъ гдⷭ҇ь, наказꙋ́етъ, бїе́тъ же всѧ́каго сы́на, є҆го́же прїе́млетъ. Бл҃же́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Чⷭ҇тнѣ́йша же є҆́сть <<р҃к ѡ҆б.: 240>> ка́менїй многоцѣ́нныхъ: не сопротивлѧ́етсѧ є҆́й ничто́же лꙋка́во. бл҃гозна́тна є҆́сть всѣ̑мъ приближа́ющымсѧ є҆́й, всѧ́ко же честно́е недосто́йно є҆ѧ̀ є҆́сть. Долгота́ бо житїѧ̀ и҆ лѣ́та жи́зни въ десни́цѣ є҆ѧ̀, въ шꙋ́йцѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Пꙋтїѐ є҆ѧ̀ пꙋтїѐ добрѝ, и҆ всѧ̑ стєзѝ є҆ѧ̀ ми̑рны. Дре́во живота̀ є҆́сть всѣ̑мъ держа́щымсѧ є҆ѧ̀, и҆ воскланѧ́ющымсѧ на ню̀, ꙗ҆́кѡ на гдⷭ҇а, тверда̀.

На стїхо́внѣ самогла́сенъ днѐ, два́жды, гла́съ д҃:

Жела́юще бж҃е́ственныѧ па́схи причасти́тисѧ, не ѿ є҆гѵ́пта, но и҆з̾ сїѡ́на грѧдꙋ́щїѧ, грѣхо́вный ква́съ ѿи́мемъ покаѧ́нїемъ: препоѧ́шимъ чре́сла на̑ша ᲂу҆мерщвле́нїемъ сласте́й: ᲂу҆краси́мъ но́ги сапогмѝ, возбрани́тельными ѿ всѧ́кагѡ дѣ́ла лꙋка́вагѡ, и҆ ᲂу҆тверди́мсѧ па́лицею вѣ́ры: не ревнꙋ́имъ врагѡ́мъ влⷣчнѧгѡ крⷭ҇та̀ бг҃отворѧ́ще чре́во, но послѣ́дꙋимъ посто́мъ, на дїа́вола побѣ́дꙋ на́мъ показа́вшемꙋ, сп҃сꙋ дꙋ́шъ на́шихъ.

Мꙋ́чениченъ: Прославлѧ́емый въ па́мѧтехъ ст҃ы́хъ твои́хъ хрⷭ҇тѐ бж҃е, ѿ ни́хъ ᲂу҆молѧ́емь, низпослѝ на́мъ ве́лїю млⷭ҇ть.

Сла́ва, и҆ ны́нѣ, крⷭ҇тобг҃оро́диченъ, гла́съ то́йже.

Подо́бенъ: Ꙗ҆́кѡ до́блѧ:

На крⷭ҇тѣ́ тѧ ꙗ҆́кѡ ᲂу҆зрѣ̀ пригвожде́на гдⷭ҇и, а҆́гница и҆ мт҃и твоѧ̀ дивлѧ́шесѧ. и҆ что̀ видѣ́нїе, глаго́лаше, сн҃е возжелѣ́нне; сїѧ̑ тѝ невѣ́рный собо́ръ воздае́тъ беззако́нный, мно́гихъ твои́хъ чꙋде́съ наслади́выйсѧ: но сла́ва неизрече́нномꙋ схожде́нїю твоемꙋ̀ влⷣко.

И҆ про́чее послѣ́дованїе по ѻ҆бы́чаю. <<рк҃а: 241>>

Въ четверто́къ пе́рвыѧ седми́цы на повече́рїи

пое́мъ настоѧ́щїй вели́кїй канѡ́нъ прпⷣбнагѡ ѻ҆тца̀ на́шегѡ а҆ндре́а кри́тскагѡ и҆ і҆ерꙋсали́мскагѡ. Твори́мъ же на кі́йждо тропа́рь покло́ны г҃, глаго́люще и҆ сті́хъ: Поми́лꙋй мѧ̀ бж҃е, поми́лꙋй мѧ̀.

Пѣ́снь а҃. гла́съ ѕ҃. І҆рмо́съ по два́жды. Помо́щникъ и҆ покрови́тель:

А҆́гнче бж҃їй, взе́млѧй грѣхѝ всѣ́хъ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.

Тебѣ̀ припа́даю і҆и҃се, согрѣши́хъ тѝ, ѡ҆чи́сти мѧ̀, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.

Не вни́ди со мно́ю въ сꙋ́дъ носѧ̀ моѧ̑ дѣѧ̑нїѧ, словеса̀ и҆зыскꙋ́ѧ, и҆ и҆справлѧ́ѧ стремлє́нїѧ: но въ щедро́тахъ твои́хъ презира́ѧ моѧ̑ лю̑таѧ, сп҃си́ мѧ всеси́льне.

Покаѧ́нїѧ вре́мѧ, прихождꙋ́ ти созда́телю моемꙋ̀, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.

Бога́тство дꙋше́вное и҆жди́въ грѣхо́мъ, пꙋ́стъ є҆́смь добродѣ́телей бл҃гочести́выхъ, гла́дствꙋѧ же зовꙋ̀: млⷭ҇ти пода́телю гдⷭ҇и, сп҃си́ мѧ.

Марі́и: Прикло́ньшисѧ хрⷭ҇тѡ́вымъ бж҃е́ственнымъ зако́нѡмъ, къ семꙋ̀ пристꙋпи́ла є҆сѝ, сла́достей неꙋдержи̑маѧ стремлє́нїѧ ѡ҆ста́вивши, и҆ всѧ́кꙋю добродѣ́тель всебл҃гоговѣ́йнѡ, ꙗ҆́кѡ є҆ди́нꙋ и҆спра́вила є҆сѝ.

Сла́ва, трⷪ҇ченъ: Пресꙋ́щественнаѧ трⷪ҇це, во є҆ди́ницѣ покланѧ́емаѧ, возмѝ бре́мѧ ѡ҆ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бна, да́ждь мѝ сле́зы ᲂу҆миле́нїѧ. <<рк҃а ѡ҆б.: 242>>

Бг҃оро́диченъ: Бцⷣе, наде́жде и҆ предста́тельство тебѐ пою́щихъ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ влⷣчца чⷭ҇таѧ, ка́ющасѧ прїими́ мѧ.

Пѣ́снь в҃.

І҆рмо́съ: Ви́дите ви́дите, ꙗ҆́кѡ а҆́зъ є҆́смь бг҃ъ, ма́ннꙋ ѡ҆дожди́вый, и҆ во́дꙋ и҆з̾ ка́мене и҆сточи́вый дре́вле въ пꙋсты́ни лю́демъ мои̑мъ, десни́цею є҆ди́ною, и҆ крѣ́постїю мое́ю.

Мꙋ́жа ᲂу҆би́хъ, глаго́летъ, въ ꙗ҆́звꙋ мнѣ̀, и҆ ю҆́ношꙋ въ стрꙋ́пъ, ламе́хъ рыда́ѧ вопїѧ́ше, ты́ же не трепе́щеши ѽ дꙋшѐ моѧ̀, ѡ҆калѧ́вши пло́ть, и҆ ᲂу҆́мъ ѡ҆скверни́вши.

Сто́лпъ ᲂу҆мꙋдри́ла є҆сѝ созда́ти ѽ дꙋшѐ, и҆ ᲂу҆твержде́нїе водрꙋзи́ти твои́ми похотьмѝ, а҆́ще не бы̀ зижди́тель ᲂу҆держа́лъ совѣ́ты твоѧ̑, и҆ низве́рглъ на зе́млю ᲂу҆хищрє́нїѧ твоѧ̑.

Ѽ ка́кѡ поревнова́хъ ламе́хꙋ, пе́рвомꙋ ᲂу҆бі́йцѣ, дꙋ́шꙋ ꙗ҆́кѡ мꙋ́жа, ᲂу҆́мъ ꙗ҆́кѡ ю҆́ношꙋ, ꙗ҆́кѡ бра́та же моегѡ̀ тѣ́ло ᲂу҆би́въ, ꙗ҆́кѡ ка́їнъ ᲂу҆бі́йца, любосла́стными стремле́ньми.

Ѡ҆дождѝ гдⷭ҇ь ѿ гдⷭ҇а ѻ҆́гнь и҆ногда̀, на беззако́нїе гнѣ́вающее соже́гъ содо́млѧны: ты́ же ѻ҆́гнь вжегла̀ є҆сѝ гее́нскїй, въ не́мже и҆́маши, ѽ дꙋшѐ, сожещи́сѧ.

Оу҆ѧзви́хсѧ, ᲂу҆ра́нихсѧ, сѐ стрѣ́лы вра̑жїѧ ᲂу҆ѧзви́вшыѧ мою̀ дꙋ́шꙋ и҆ тѣ́ло: сѐ стрꙋ́пи, гноє́нїѧ, ѡ҆мрачє́нїѧ, вопїю́тъ ра̑ны самово́льныхъ мои́хъ страсте́й.

Марі́и: Просте́рла є҆сѝ рꙋ́цѣ твоѝ къ ще́дромꙋ бг҃ꙋ, марі́е, въ бе́зднѣ ѕѡ́лъ погрꙋжа́емаѧ: и҆ ꙗ҆́коже петрꙋ̀ чл҃вѣколю́бнѡ, рꙋ́кꙋ бж҃е́ственнꙋю прострѐ, твоѐ ѡ҆браще́нїе всѧ́чески и҆скі́й.

Сла́ва, трⷪ҇ченъ: Безнача́льнаѧ, несозда́ннаѧ трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ, согрѣши́вша <<рк҃в: 243>> сп҃сѝ: твоѐ є҆́смь созда́нїе, не пре́зри, но пощадѝ, и҆ и҆зба́ви мѧ̀ ѻ҆́гненнагѡ ѡ҆сꙋжде́нїѧ.

Бг҃оро́диченъ: Пречⷭ҇таѧ влⷣчце бг҃ороди́тельнице, наде́ждо къ тебѣ̀ притека́ющихъ, и҆ приста́нище сꙋ́щихъ въ бꙋ́ри, млⷭ҇тиваго и҆ созда́телѧ, и҆ сн҃а твоего̀, ᲂу҆ми́лостиви и҆ мнѣ̀ мл҃твами твои́ми.

Пѣ́снь г҃.

І҆рмо́съ: Оу҆твердѝ гдⷭ҇и на ка́мени:

А҆га́рѣ дре́влѣ дꙋшѐ, є҆гѵ́птѧнынѣ ᲂу҆подо́биласѧ є҆сѝ, порабо́тившисѧ произволе́нїемъ, и҆ ро́ждши но́ваго і҆сма́ила, презо́рство.

І҆а́кѡвлю лѣ́ствицꙋ разꙋмѣ́ла є҆сѝ дꙋшѐ моѧ̀, ꙗ҆влѧ́емꙋю ѿ землѝ къ небесє́мъ, почто̀ не и҆мѣ́ла є҆сѝ восхо́да тве́рда, бл҃гоче́стїѧ;

Сщ҃е́нника бж҃їѧ, и҆ цр҃ѧ̀ ᲂу҆едине́на, хрⷭ҇то́во подо́бїе, въ ми́рѣ житїѧ̀, въ человѣ́цѣхъ подража́й.

Ѡ҆брати́сѧ, постенѝ дꙋшѐ ѻ҆каѧ́ннаѧ, пре́жде да́же не прїи́метъ коне́цъ житїѧ̀ торжество̀: пре́жде да́же две́рь не заключи́тъ черто́га гдⷭ҇ь.

Не бꙋ́ди сто́лпъ сла́ный дꙋшѐ, возврати́вшисѧ вспѧ́ть: ѡ҆́бразъ да ᲂу҆страши́тъ тѧ̀ содо́мскїй, горѣ̀ въ сигѡ́ръ сп҃са́йсѧ.

Моле́нїѧ влⷣко, тебѐ пою́щихъ не ѿве́ржи: но ᲂу҆ще́дри чл҃вѣколю́бче, и҆ пода́ждь вѣ́рою просѧ́щымъ ѡ҆ставле́нїе.

Сла́ва, трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀ въ трⷪ҇цѣ пѣва́емаѧ ѵ҆поста́сей, сп҃си́ ны вѣ́рою покланѧ́ющыѧсѧ держа́вѣ твое́й.

Бг҃оро́диченъ: Ѿ ѻ҆ц҃а̀ безлѣ́тнѡ сн҃а, въ лѣ́то бг҃ороди́тельнице, неискꙋсомꙋ́жнѡ родила̀ є҆сѝ: стра́нное чꙋ́до, пребы́вши дв҃а доѧ́щи. <<рк҃в ѡ҆б.: 244>>

Пѣ́снь д҃.

І҆рмо́съ: Оу҆слы́ша прⷪ҇ро́къ:

Вре́мѧ живота̀ моегѡ̀ ма́ло, и҆ и҆спо́лнено болѣ́зней и҆ лꙋка́вства: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.

Ца́рскимъ досто́инствомъ, вѣнце́мъ и҆ багрѧни́цею ѡ҆дѣ́ѧнъ, многоимѣ́нный человѣ́къ и҆ првⷣный, бога́тствомъ кипѧ̀ и҆ ста́ды, внеза́пꙋ бога́тства, сла́вы ца́рства ѡ҆бнища́въ лиши́сѧ.

А҆́ще пра́веденъ бѧ́ше ѻ҆́нъ, и҆ непоро́ченъ па́че всѣ́хъ, и҆ не ᲂу҆бѣжѐ ловле́нїѧ льсти́вагѡ и҆ сѣ́ти: ты́ же грѣхолюби́ва сꙋ́щи ѻ҆каѧ́ннаѧ дꙋшѐ, что̀ сотвори́ши, а҆́ще чесо́мꙋ ѡ҆ недовѣ́домыхъ слꙋчи́тсѧ наитѝ тебѣ̀;

Высокоглаго́ливъ ны́нѣ є҆́смь, жесто́къ же и҆ се́рдцемъ, вотщѐ и҆ всꙋ́е, да не съ фарїсе́емъ ѡ҆сꙋ́диши мѧ̀, па́че же мытаре́во смире́нїе пода́ждь мѝ є҆ди́не ще́дре, правосꙋ́де, и҆ семꙋ́ мѧ сочислѝ.

Согрѣши́хъ, досади́въ сосꙋ́дꙋ пло́ти моеѧ̀, вѣ́мъ ще́дре: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.

Самоистꙋка́нъ бы́хъ страстьмѝ, дꙋ́шꙋ мою̀ вредѧ̀ ще́дре, но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.

Не послꙋ́шахъ гла́са твоегѡ̀, преслꙋ́шахъ писа́нїе твоѐ законополо́жника: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри. <<рк҃г: 245>>

Марі́и: Вели́кихъ безмѣ́стїй во глꙋбинꙋ̀ низве́дшисѧ, неѡдержи́ма была̀ є҆сѝ, но востекла̀ є҆сѝ по́мысломъ лꙋ́чшимъ, къ кра́йнѣй дѣѧ́ньми ꙗ҆́вѣ добродѣ́тели пресла́внѡ, а҆́гг҃льское є҆стество̀ марі́е, ᲂу҆диви́вши.

Сла́ва, трⷪ҇ченъ: Нераздѣ́льное сꙋщество́мъ, несли́тное ли́цы, бг҃осло́влю тѧ̀ трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопресто́льное, вопїю́ ти пѣ́снь вели́кꙋю, въ вы́шнихъ трегꙋ́бѡ пѣсносло́вимꙋю.

Бг҃оро́диченъ: И҆ ражда́еши, и҆ двⷭ҇твꙋеши, и҆ пребыва́еши ѻ҆бою́дꙋ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ неражда́ющаѧ. бг҃ъ и҆дѣ́же хо́щетъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.

Пѣ́снь є҃.

І҆рмо́съ: Ѿ но́щи ᲂу҆́тренююща:

Ни́зꙋ снича́щꙋю подража́й ѽ дꙋшѐ, прїидѝ, припадѝ къ нога́ма і҆и҃совыма, да тѧ̀ и҆спра́витъ, и҆ да хо́диши пра́вѡ стєзѝ гдⷭ҇ни.

А҆́ще и҆ кла́дѧзь є҆сѝ глꙋбо́кїй влⷣко, и҆сточи́ ми во́дꙋ и҆з̾ пречи́стыхъ твои́хъ жи́лъ, да ꙗ҆́кѡ самарѧны́нѧ, не ктомꙋ̀ пїѧ́й жа́ждꙋ: жи́зни бо стрꙋи̑ и҆сточа́еши.

Сїлѡа́мъ да бꙋ́дꙋтъ мѝ сле́зы моѧ̑, влⷣко гдⷭ҇и, да ᲂу҆мы́ю и҆ а҆́зъ зѣ̑ницы се́рдца, и҆ ви́ждꙋ тѧ̀ ᲂу҆́мнѡ, свѣ́та превѣ́чна.

Марі́и: Несравне́ннымъ жела́нїемъ всебога́таѧ, дре́вꙋ возжелѣ́вши поклони́тисѧ живо́тномꙋ, сподо́биласѧ є҆сѝ жела́нїѧ, сподо́би ᲂу҆́бѡ и҆ менѐ ᲂу҆лꙋчи́ти вы́шнїѧ сла́вы.

Сла́ва, трⷪ҇ченъ: Тѧ̀ трⷪ҇це сла́вимъ, є҆ди́наго бг҃а, ст҃ъ, ст҃ъ, ст҃ъ є҆сѝ ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ. <<рк҃г ѡ҆б.: 246>>

Бг҃оро́диченъ: И҆з̾ тебѐ ѡ҆блече́сѧ въ моѐ смѣше́нїе, нетлѣ́ннаѧ безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ себѣ̀ человѣ́ческое є҆стество̀.

Пѣ́снь ѕ҃.

І҆рмо́съ: Возопи́хъ всѣ́мъ се́рдцемъ:

А҆́зъ є҆́смь, сп҃се, ю҆́же погꙋби́лъ є҆сѝ дре́вле ца́рскꙋю дра́хмꙋ: но вже́гъ свѣти́льникъ прⷣте́чꙋ твоего̀ сло́ве, взыщѝ и҆ ѡ҆брѧ́щи тво́й ѡ҆́бразъ.

Воста́ни и҆ поборѝ, ꙗ҆́кѡ і҆исꙋ́съ а҆мали́ка, плотскі̑ѧ стра̑сти, и҆ гаваѡні́ты, лє́стныѧ по́мыслы, при́снѡ побѣжда́ющи.

Марі́и: Да страсте́й пла́мень ᲂу҆гаси́ши, сле́зъ ка̑пли и҆сточи́ла є҆сѝ при́снѡ марі́е, дꙋше́ю распалѧ́ема, и҆́хже бл҃года́ть пода́ждь и҆ мнѣ̀ твоемꙋ̀ рабꙋ̀.

Марі́и: Безстра́стїе нбⷭ҇ное стѧжа́ла є҆сѝ, кра́йнимъ на землѝ житїе́мъ ма́ти. тѣ́мже тебѐ пою́щымъ, страсте́й и҆зба́витисѧ мл҃твами твои́ми, моли́сѧ.

Сла́ва, трⷪ҇ченъ: Трⷪ҇ца є҆́смь проста̀, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆ц҃ъ глаго́летъ, и҆ сн҃ъ и҆ бж҃е́ственный дх҃ъ.

Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́нна по на́мъ: є҆го́же, ꙗ҆́кѡ созда́телѧ всѣ́хъ, молѝ бцⷣе, да твои́ми мл҃твами ѡ҆правди́мсѧ.

Конда́къ, гла́съ ѕ҃: Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ хрⷭ҇то́съ бг҃ъ, вездѣ̀ сы́й, и҆ всѧ̑ и҆сполнѧ́ѧй.

Пѣ́снь з҃.

І҆рмо́съ: Согрѣши́хомъ:

И҆счезо́ша дні́и моѝ, ꙗ҆́кѡ со́нїе востаю́щагѡ: тѣ́мже ꙗ҆́кѡ є҆зекі́а слезю̀ на ло́жи мое́мъ, приложи́тисѧ мнѣ̀ лѣ́тѡмъ <<рк҃д: 247>> живота̀. но кі́й и҆са́їа предста́нетъ тебѣ̀ дꙋшѐ, а҆́ще не всѣ́хъ бг҃ъ;

Припа́даю тѝ, и҆ приношꙋ̀ тебѣ̀, ꙗ҆́коже сле́зы глаго́лы моѧ̑: согрѣши́хъ, ꙗ҆́кѡ не согрѣшѝ блꙋдни́ца, и҆ беззако́нновахъ, ꙗ҆́кѡ и҆́ный никто́же на землѝ: но ᲂу҆ще́дри влⷣко, творе́нїе твоѐ, и҆ воззови́ мѧ.

Погребо́хъ ѡ҆́бразъ тво́й, и҆ растли́хъ за́повѣдь твою̀, всѧ̀ помрачи́сѧ добро́та, и҆ страстьмѝ ᲂу҆гаси́сѧ, сп҃се, свѣща̀: но ᲂу҆ще́дривъ возда́ждь мѝ ꙗ҆́коже пое́тъ дв҃дъ, ра́дованїе.

Ѡ҆брати́сѧ, пока́йсѧ, ѿкры́й сокровє́ннаѧ, глаго́ли бг҃ꙋ всѧ̑ вѣ́дꙋщемꙋ: ты̀ вѣ́си моѧ̑ та̑йнаѧ, є҆ди́не сп҃се: но са́мъ мѧ̀ поми́лꙋй, ꙗ҆́коже пое́тъ дв҃дъ по млⷭ҇ти твое́й.

Марі́и: Возопи́вши къ пречⷭ҇тѣй бг҃омт҃ри, пе́рвѣе ѿри́нꙋла є҆сѝ неи́стовство страсте́й, нꙋ́жно стꙋжа́ющихъ, и҆ посрами́ла є҆сѝ врага̀ запе́ншаго: но да́ждь ны́нѣ по́мощь ѿ ско́рби, и҆ мнѣ̀ рабꙋ̀ твоемꙋ̀.

Марі́и: Є҆го́же возлюби́ла є҆сѝ, є҆го́же возжелѣ́ла є҆сѝ, є҆гѡ́же ра́ди пло́ть и҆знꙋри́ла є҆сѝ прпⷣбнаѧ, молѝ ны́нѣ хрⷭ҇та̀ ѡ҆ рабѣ́хъ: ꙗ҆́кѡ да млⷭ҇тивъ бы́въ всѣ̑мъ на́мъ, ми́рное состоѧ́нїе да́рꙋетъ почита́ющымъ є҆го̀.

Сла́ва, трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, и҆ є҆стество̀ є҆ди́но, свѣ́тове и҆ свѣ́тъ, и҆ ст҃а трѝ, и҆ є҆ди́но ст҃о пое́тсѧ бг҃ъ трⷪ҇ца, но воспо́й, просла́ви, живо́тъ и҆ животы̀, дꙋшѐ, всѣ́хъ бг҃а.

Бг҃оро́диченъ: Пое́мъ тѧ̀, бл҃гослови́мъ тѧ̀, покланѧ́емсѧ тѝ бг҃ороди́тельнице, ꙗ҆́кѡ неразлꙋ́чныѧ трⷪ҇цы породила̀ є҆сѝ є҆ди́наго хрⷭ҇та̀ бг҃а, и҆ сама̀ ѿве́рзла є҆сѝ на́мъ сꙋ́щымъ на землѝ небє́снаѧ. <<рк҃д ѡ҆б.: 248>>

Пѣ́снь и҃.

І҆рмо́съ: Є҆го́же вѡ́инства:

Сле́знꙋю сп҃се стклѧ́ницꙋ, ꙗ҆́кѡ мѵ́ро и҆стощава́ѧ на главꙋ̀, зовꙋ́ ти ꙗ҆́коже блꙋдни́ца, млⷭ҇ти и҆́щꙋщаѧ, мольбꙋ̀ приношꙋ̀, и҆ ѡ҆ставле́нїе прошꙋ̀ прїѧ́ти.

А҆́ще и҆ никто́же, ꙗ҆́коже а҆́зъ согрѣшѝ тебѣ̀, но ѻ҆ба́че прїимѝ и҆ менѐ, бл҃гоꙋтро́бне сп҃се, стра́хомъ ка́ющасѧ, и҆ любо́вїю зовꙋ́ща: согрѣши́хъ тебѣ̀ є҆ди́номꙋ: поми́лꙋй мѧ̀ млⷭ҇тиве.

Пощадѝ сп҃се твоѐ созда́нїе, и҆ взыщѝ ꙗ҆́кѡ па́стырь поги́бшее, предварѝ заблꙋ́ждшаго, восхи́ти ѿ во́лка, сотвори́ мѧ ѻ҆вча̀ на па́ствѣ твои́хъ ѻ҆ве́цъ. Є҆гда̀ сꙋдїѐ сѧ́деши ꙗ҆́кѡ бл҃гоꙋтро́бенъ, и҆ пока́жеши стра́шнꙋю сла́вꙋ твою̀ сп҃се: ѽ каковы́й стра́хъ тогда̀! пе́щи горѧ́щей, всѣ̑мъ боѧ́щымсѧ нестерпи́магѡ сꙋди́ща твоегѡ̀.

Марі́и: Свѣ́та незаходи́магѡ мт҃и, тѧ̀ просвѣти́вши, ѿ ѡ҆мраче́нїѧ страсте́й разрѣшѝ. тѣ́мже вше́дши въ дх҃о́внꙋю бл҃года́ть, просвѣтѝ марі́е, тѧ̀ вѣ́рнѡ восхвалѧ́ющыѧ.

Марі́и: Чꙋ́до но́во ви́дѣвъ, ᲂу҆жаса́шесѧ бж҃е́ственный въ тебѣ̀ вои́стиннꙋ ма́ти зѡсі́ма: а҆́гг҃ла бо зрѧ́ше во пло́ти, и҆ ᲂу҆́жасомъ ве́сь и҆сполнѧ́шесѧ, хрⷭ҇та̀ поѧ̀ во вѣ́ки.

Сла́ва, трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждѧй, трⷪ҇це є҆ди́нице, поми́лꙋй мѧ̀.

Бг҃оро́диченъ: Ꙗ҆́кѡ ѿ ѡ҆броще́нїѧ червлени́цы пречⷭ҇таѧ, ᲂу҆́мнаѧ багрѧни́ца є҆мманꙋ́илева, внꙋ́трь во чре́вѣ твое́мъ пло́ть и҆стка́сѧ. тѣ́мже бцⷣꙋ вои́стиннꙋ тѧ̀ почита́емъ. <<рк҃є: 249>>

Пѣ́снь ѳ҃.

І҆рмо́съ: Безсѣ́меннагѡ зача́тїѧ:

Оу҆млⷭ҇рдисѧ сп҃си́ мѧ, сн҃е дв҃довъ поми́лꙋй, бѣснꙋ́ющыѧсѧ сло́вомъ и҆сцѣли́вый, гла́съ же бл҃гоꙋтро́бный ꙗ҆́кѡ разбо́йникꙋ мнѣ̀ рцы̀: а҆ми́нь глаго́лю тебѣ̀, со мно́ю бꙋ́деши въ раѝ, є҆гда̀ прїидꙋ̀ во сла́вѣ мое́й.

Разбо́йникъ ѡ҆глаго́ловаше тѧ̀, разбо́йникъ бг҃осло́вѧше тѧ̀, ѻ҆́ба бо на крⷭ҇тѣ̀ сви́сѧста: но ѽ бл҃гоꙋтро́бне, ꙗ҆́кѡ вѣ́рномꙋ разбо́йникꙋ твоемꙋ̀, позна́вшемꙋ тѧ̀ бг҃а, и҆ мнѣ̀ ѿве́рзи две́рь сла́внагѡ црⷭ҇твїѧ твоегѡ̀.

Тва́рь содрога́шесѧ распина́ема тѧ̀ ви́дѧщи, го́ры и҆ ка́мєнїѧ стра́хомъ распада́хꙋсѧ, и҆ землѧ̀ сотрѧса́шесѧ, и҆ а҆́дъ ѡ҆бнажа́шесѧ, и҆ соѡмрача́шесѧ свѣ́тъ во днѝ, зрѧ̀ тебѐ і҆и҃се пригвожде́на ко крестꙋ̀.

Досто́йныхъ покаѧ́нїѧ плодѡ́въ не и҆стѧжѝ ѿ менѐ: и҆́бо крѣ́пость моѧ̀ во мнѣ̀ ѡ҆скꙋдѣ̀, се́рдце мнѣ̀ да́рꙋй при́снѡ сокрꙋше́нное, нищетꙋ́ же дх҃о́внꙋю, да сїѧ̑ тебѣ̀ принесꙋ̀, ꙗ҆́кѡ прїѧ́тнꙋю же́ртвꙋ, є҆ди́не сп҃се.

Сꙋдїѐ мо́й, и҆ вѣ́дче мо́й, хотѧ́й па́ки прїитѝ со а҆́гг҃лы, сꙋди́ти мі́рꙋ всемꙋ̀, млⷭ҇тивнымъ твои́мъ ѻ҆́комъ тогда̀ ви́дѣвъ мѧ̀, пощадѝ и҆ ᲂу҆ще́дри мѧ̀ і҆и҃се, па́че всѧ́кагѡ є҆стества̀ человѣ́ча согрѣши́вша.

Марі́и: Оу҆диви́ла є҆сѝ всѣ́хъ стра́ннымъ житїе́мъ твои́мъ, а҆́гг҃лѡвъ чи́ны, и҆ человѣ́кѡвъ собо́ры, невеще́ственнѡ пожи́вши, и҆ є҆стество̀ преше́дши: и҆́мже, ꙗ҆́кѡ невеще́ственныма нога́ма вше́дши марі́е, і҆ѻрда́нъ прешла̀ є҆сѝ.

Марі́и: Оу҆ми́лостиви созда́телѧ ѡ҆ хва́лѧщихъ тѧ̀, прпⷣбнаѧ ма́ти, и҆зба́витисѧ ѡ҆ѕлобле́нїй и҆ скорбе́й ѻ҆́крестъ напа́дающихъ: да и҆зба́вившесѧ ѿ напа́стей, возвели́чимъ непреста́ннѡ просла́вльшаго тѧ̀ гдⷭ҇а. <<рк҃є ѡ҆б.: 250>>

А҆ндре́ю: А҆ндре́е честны́й, и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀: да и҆зба́вимсѧ всѝ гнѣ́ва и҆ ско́рби, и҆ тлѣ́нїѧ, и҆ прегрѣше́нїй безмѣ́рныхъ, чтꙋ́щїи твою̀ па́мѧть вѣ́рнѡ.

Сла́ва, трⷪ҇ченъ: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀, ꙗ҆́кѡ свѣ́тꙋ и҆ свѣ́тѡмъ, и҆ животꙋ̀ и҆ животѡ́мъ, животворѧ́щемꙋ и҆ просвѣща́ющемꙋ концы̀.

Бг҃оро́диченъ: Гра́дъ тво́й сохранѧ́й бг҃ороди́тельнице пречⷭ҇таѧ: въ тебѣ́ бо се́й вѣ́рнѡ ца́рствꙋѧй, въ тебѣ̀ и҆ ᲂу҆твержда́етсѧ: и҆ тобо́ю побѣжда́ѧй, побѣжда́етъ всѧ́кое и҆скꙋше́нїе, и҆ плѣнѧ́етъ ра́тники, и҆ прохо́дитъ послꙋша́нїе.

Та́же пое́мъ ѻ҆́ба ли̑ка: Безсѣ́меннагѡ зача́тїѧ:

И҆ про́чее послѣ́дованїе повече́рїѧ.