<<ук҃а ѡ҆б.: 842>>

Повече́рїе же глаго́лемъ ма́лое,

на не́мже пое́мъ трипѣ́снецъ господи́на а҆ндре́а вели́кагѡ четвертка̀. Гла́съ ѕ҃.

Пѣ́снь д҃.

І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, сла́ва си́лѣ твое́й гдⷭ҇и. <<ук҃в: 843>>

Го́рница по́стланаѧ, прїѧ́тъ тѧ̀ созда́телѧ и҆ с̾таи́нники, и҆ та́мѡ па́схꙋ сконча́лъ є҆сѝ, и҆ та́мѡ содѣ́лалъ є҆сѝ та̑инства: та́мѡ бо двѣма̀ по́сланома ны́нѣ ᲂу҆ченико́ма твои́ма, па́сха ᲂу҆гото́васѧ тебѣ̀.

И҆ди́те ко ѻ҆́нсицѣ, всѧ̑ вѣ́дый предглаго́летъ а҆пⷭ҇лѡмъ, и҆ бл҃же́нъ є҆́сть, и҆́же мо́жетъ вѣ́рнѡ прїѧ́ти гдⷭ҇а: го́рницꙋ ᲂу҆́бѡ се́рдце пред̾ꙋгото́вавъ, и҆ ве́черю бл҃гоче́стїе.

Нра́въ сребролю́бїѧ, и҆ ѡ҆́бразъ тво́й безꙋ́мїѧ и҆спо́лнь несмы́сленный і҆ꙋ́до: ввѣ́ренъ бо бы́въ є҆ди́нъ то́кмѡ ковче́жцꙋ, всѧ́кѡ не преклони́лсѧ є҆сѝ къ милосе́рдїю: но заключи́лъ є҆сѝ жесто́кагѡ твоегѡ̀ се́рдца ᲂу҆тро́бꙋ, преда́въ є҆ди́наго бл҃гоꙋтро́бнаго.

Нра́въ бг҃оꙋбі́йцъ прода́нїю сребролю́бца смѣси́выйсѧ: ѻ҆́въ ᲂу҆́бѡ ко ᲂу҆бїе́нїю воѡрꙋжи́всѧ, ѻ҆́въ же къ сре́бреникѡмъ ᲂу҆стремлѧ́шесѧ: ᲂу҆давле́нїемъ бо тогда̀ предразсꙋди́въ покаѧ́нїе ѕлѣ̀, є҆́же жи́ти лиши́сѧ.

Лобыза́нїе и҆спо́лнено льстѝ, є҆́же ра́дꙋйсѧ, со ѻ҆рꙋ́жїемъ, льсти́вый і҆ꙋ́до: ѧ҆зы́комъ ᲂу҆́бѡ провѣщава́еши ꙗ҆̀же къ соедине́нїю, нра́вомъ же помава́еши къ разстоѧ́нїю: преда́ти бо беззако́нникѡмъ бл҃годѣ́телѧ ле́стнѣ поꙋчи́лсѧ є҆сѝ.

Лобыза́еши и҆ продае́ши і҆ꙋ́до, цѣлꙋ́еши и҆ не стыди́шисѧ, ле́стїю притекі́й. кто̀ ненави́дѧ лобыза́етъ треѻкаѧ́нне; кто̀ любѧ̀ продае́тъ на цѣнѣ̀; лобыза́нїе твоегѡ̀ безстꙋ́днагѡ ѕлосовѣ́тїѧ ѡ҆блича́етъ произволе́нїе.

Сла́ва: Нераздѣ́льное сꙋщество́мъ, несли́тное ли́цы, бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопресто́льное, вопїю̀ тебѣ̀ пѣ́снь вели́кꙋю, въ вы́шнихъ трегꙋ́бѡ пѣсносло́вимꙋю.

И҆ ны́нѣ, бг҃оро́диченъ: Зача́тїе па́че сло́ва, ржⷭ҇тво̀ твоѐ па́че є҆стества̀ бг҃ороди́тельнице: ѻ҆́во ᲂу҆́бѡ ѿ дх҃а без̾ <<ук҃в ѡ҆б.: 844>> сѣ́мене, ѻ҆́во же зако́нѡвъ є҆стества̀ таѧ́щеесѧ, ꙗ҆́кѡ нетлѣ́нно, и҆ па́че є҆стества̀ всѧ́кагѡ рожде́нїѧ: бг҃ъ бо ражда́емое.

Сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Ꙗ҆ды́й влⷣко со ᲂу҆ченикѝ твои́ми, та́инственнѡ ꙗ҆ви́лъ є҆сѝ всест҃о́е твоѐ заколе́нїе, и҆́мже тлѝ и҆зба́вихомсѧ, честна̑ѧ твоѧ̑ почита́ющїи страда̑нїѧ.

Пѣ́снь и҃.

І҆рмо́съ: Є҆го́же вѡ́инства небє́снаѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь: по́йте, бл҃гослови́те и҆ превозноси́те во всѧ̑ вѣ́ки.

Зако́нное сконча́въ повелѣ́нїе, скрижа̑ли закѡ́нныѧ написа́вый въ сїна́и, снѣдѐ ᲂу҆́бѡ па́схꙋ дре́внюю и҆ сѣно́внꙋю: бы́сть же па́сха та́йнаѧ и҆ живоже́ртвеннаѧ.

Ѿ вѣ́ка сокрове́ннꙋю хрⷭ҇тѐ премꙋ́дрость тайноводѧ̀, показа́лъ є҆сѝ кꙋ́пнѡ всѣ̑мъ а҆пⷭ҇лѡмъ сп҃се на ве́чери, ю҆́же цр҃квамъ преда́ша бг҃оно́снїи.

Є҆ди́нъ ѿ ва́съ ле́стїю преда́стъ мѧ̀, є҆вре́ємъ прода́въ въ но́щь сїю̀, сїѐ хрⷭ҇то́съ возопи́въ смꙋща́ше дрꙋ́ги: тогда̀ є҆ди́нъ ко є҆ди́номꙋ, недоꙋмѣва́ѧсѧ колеба́шесѧ.

Смири́всѧ на́съ ра́ди бога́тый, ѿ ве́чери воста́въ, ле́нтїй прїе́мъ, си́мъ препоѧ́салсѧ є҆сѝ, и҆ прекло́нь вы́ю, ѡ҆мы́лъ є҆сѝ но́ги ᲂу҆ч҃нкѡ́въ и҆ преда́телѧ.

Па́че ᲂу҆ма̀, и҆ неизрече́нна ра́зꙋма высотѣ̀ твое́й і҆и҃се, кто̀ не ᲂу҆диви́тсѧ! ꙗ҆́кѡ бре́нїю предста́лъ є҆сѝ, содѣ́телю всѧ́ческихъ, ѡ҆мыва́ѧ ᲂу҆́бѡ но́ги, ѡ҆тира́ѧ же и҆ ле́нтїемъ.

Оу҆ч҃нкъ, є҆го́же люблѧ́ше гдⷭ҇ь, на пе́рси возле́гъ, речѐ къ немꙋ̀: кто́ є҆сть предаѧ́й тѧ̀; хрⷭ҇то́съ же ко ѻ҆́номꙋ: се́й вложи́вый въ соли́ло ны́нѣ рꙋ́кꙋ. <<ук҃г: 845>>

Оу҆чени́къ хлѣ́бъ прїе́мый, по хлѣ́бѣ ѿлꙋча́етсѧ, прода́нїю поꙋча́ѧйсѧ, тече́тъ ко і҆ꙋде́ємъ, глаго́летъ беззакѡ́ннымъ: что̀ мнѣ̀ хо́щете да́ти: и҆ а҆́зъ є҆го̀ ва́мъ преда́мъ.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Є҆ди́наго бг҃а по сꙋществꙋ̀ чтꙋ̀, трѝ ѵ҆поста̑си пою̀ ѡ҆предѣли́тельнѣ, и҆́ныѧ, но не и҆́накѡвыѧ: поне́же бж҃ество̀ є҆ди́но, въ трїе́хъ ли́цѣхъ, и҆́бо ѻ҆ц҃ъ, и҆ сн҃ъ, и҆ бж҃е́ственный дх҃ъ.

И҆ ны́нѣ, бг҃оро́диченъ: И҆зба́ви на́съ і҆и҃се сп҃се на́шъ ѿ ле́сти лꙋка́вагѡ, и҆ напа́сти: прїимѝ бцⷣꙋ молѧ́щꙋюсѧ непреста́ннѡ: мт҃и бо є҆́сть, и҆ мо́жетъ тѧ̀ ᲂу҆моли́ти.

Хва́лимъ, бл҃гослови́мъ:

И҆ па́ки і҆рмо́съ: Є҆го́же вѡ́инства небє́снаѧ: И҆ покло́нъ.

Пѣ́снь ѳ҃.

І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.

Вели́кое та́инство твоегѡ̀ вочл҃вѣ́ченїѧ, на ве́чери совозлежа́щꙋ тебѣ̀ ᲂу҆ч҃нкѡ́мъ твои̑мъ чл҃вѣколю́бче, ѿкры́въ ре́клъ є҆сѝ: ꙗ҆ди́те хлѣ́бъ живо́тный вѣ́рою, пі́йте и҆ кро́вь и҆злїѧ́ннꙋю ѿ бг҃оре́бреннагѡ заколе́нїѧ.

Сѣ́нь нбⷭ҇наѧ ꙗ҆ви́сѧ го́рница, и҆дѣ́же па́схꙋ хрⷭ҇то́съ совершѝ: ве́черѧ безкро́внаѧ, и҆ слове́снаѧ слꙋ́жба, трапе́за же та́мѡ соверше́нныхъ та̑инъ, мы́сленный же́ртвенникъ.

Па́сха хрⷭ҇то́съ є҆́сть вели́каѧ и҆ всечестна́ѧ, снѣде́нъ бы́въ ꙗ҆́кѡ хлѣ́бъ, закла́нъ же ꙗ҆́кѡ ѻ҆вча̀: то́й бо <<ук҃г ѡ҆б.: 846>> вознесе́сѧ ѡ҆ на́съ же́ртва. тогѡ̀ тѣ́ла бл҃гоче́стнѡ, и҆ тогѡ̀ кро́ве всѝ та́йнѡ причаща́емсѧ.

Хлѣ́бъ бл҃гослови́въ, хлѣ́бъ сы́й нбⷭ҇ный, бл҃годари́въ ѻ҆ц҃ꙋ̀ роди́телю, прїе́мый, и҆ ча́шꙋ ᲂу҆ч҃нкѡ́мъ дава́лъ є҆сѝ: прїими́те, ꙗ҆ди́те, вопїѧ̀, сїѐ є҆́сть тѣ́ло моѐ, и҆ кро́вь нетлѣ́нныѧ жи́зни.

А҆ми́нь глаго́лѧ, речѐ ро́ждїѧмъ лоза̀, а҆пⷭ҇лѡмъ хрⷭ҇то́съ и҆́стина: ѿсе́лѣ не и҆́мамъ пи́ти ѿ лозы̀ питїѐ, до́ндеже пїю̀ є҆̀ но́вое, во сла́вѣ ѻ҆ц҃а̀ моегѡ̀, съ ва́ми наслѣ́дники мои́ми.

Продае́ши на три́десѧтихъ сре́бреницѣхъ гдⷭ҇а, и҆ не помышлѧ́еши і҆ꙋ́до беззако́нный ве́чери та́инство, и҆лѝ честно́е ᲂу҆мове́нїе. ѽ ка́кѡ попо́лзсѧ паде́нїемъ въ коне́цъ свѣ́та прише́лъ є҆сѝ, ᲂу҆давле́нїе ѡ҆блобыза́въ!

Рꙋ́цѣ просте́рлъ є҆сѝ, и҆́миже хлѣ́бъ прїѧ́лъ є҆сѝ нетлѣ́нїѧ, прїѧ́ти сре́бреники, ᲂу҆ста̀ къ цѣлова́нїю приносѧ̀ льсти́внѡ, и҆́миже тѣ́ло хрⷭ҇то́во и҆ кро́вь прїѧ́лъ є҆сѝ: но го́ре тебѣ̀, ꙗ҆́коже речѐ хрⷭ҇то́съ.

Хрⷭ҇то́съ ᲂу҆чредѝ мі́ръ, нбⷭ҇ный и҆ бж҃е́ственный хлѣ́бъ: прїиди́те ᲂу҆́бѡ хрⷭ҇толю́бцы, бре́нными ᲂу҆стна́ми, чи́стыми же сердцы̀, прїи́мемъ вѣ́рнѡ жре́мꙋю па́схꙋ, въ на́съ свѧщеннодѣ́йствꙋемꙋю.

Сла́ва: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀: ꙗ҆́кѡ свѣ́тꙋ и҆ свѣ́тѡмъ, животꙋ̀ и҆ животѡ́мъ, животворѧ́щемꙋ и҆ просвѣща́ющемꙋ концы̀.

И҆ ны́нѣ, бг҃оро́диченъ: Черто́гъ нбⷭ҇ный, и҆ невѣ́ста приснодв҃а, є҆ди́на ꙗ҆ви́ласѧ є҆сѝ, бг҃а носи́вши, ро́ждши же непрело́жнѡ, и҆з̾ тебѐ воплоще́нна. тѣ́мже тѧ̀ всѝ ро́ди ꙗ҆́кѡ бг҃оневѣ́стнꙋю мт҃рь, правосла́внѡ велича́емъ. <<ук҃д: 847>>

И҆ па́ки і҆рмо́съ: Безсѣ́меннагѡ зача́тїѧ:

И҆ про́чее повече́рїѧ ма́лагѡ по ѻ҆бы́чаю, и҆ ѿпꙋ́стъ, и҆ твори́мъ покло́ны г҃, всѝ ра́внѡ ко́снѡ. И҆ бы́вшей мл҃твѣ, ѿ предстоѧ́телѧ, ѿхо́димъ въ кє́ллїи своѧ̑.

Вѣ́домо же бꙋ́ди, ꙗ҆́кѡ ѿ сегѡ̀ ст҃а́гѡ днѐ, полꙋ́нощница не пое́тсѧ въ цр҃кви, до седми́цы ѳѡмины̀.

Во ст҃ы́й и҆ вели́кїй четверто́къ на ᲂу҆́трени,

кле́плетъ параекклисїа́рхъ въ седмы́й ча́съ но́щи, и҆ собра́вшымсѧ на́мъ въ цр҃ковь, и҆ сотво́ршꙋ сщ҃е́нникꙋ нача́ло: Бл҃гослове́нъ бг҃ъ на́шъ: Начина́емъ а҆́бїе по ѻ҆бы́чаю: та́же шестоѱа́лмїе, по и҆сполне́нїи шестоѱа́лмїа, А҆ллилꙋ́їа, на гла́съ и҃. И҆ тропа́рь гла́съ и҃, три́жды:

Є҆гда̀ сла́внїи ᲂу҆ч҃нцы̀ на ᲂу҆мове́нїи ве́чери просвѣща́хꙋсѧ, тогда̀ і҆ꙋ́да ѕлочести́вый сребролю́бїемъ недꙋ́говавъ ѡ҆мрача́шесѧ, и҆ беззакѡ́ннымъ сꙋдїѧ́мъ тебѐ пра́веднаго сꙋдїю̀ предае́тъ. ви́ждь и҆мѣ́нїй рачи́телю, си́хъ ра́ди ᲂу҆давле́нїе ᲂу҆потреби́вша! бѣжѝ несы́тыѧ дꙋшѝ, ᲂу҆чи́телю такѡва́ѧ дерзнꙋ́вшїѧ: и҆́же ѡ҆ всѣ́хъ бл҃гі́й, гдⷭ҇и сла́ва тебѣ̀.

Та́же, є҆ѵⷢ҇лїе ѿ лꙋкѝ зача́ло р҃и, без̾ престꙋ́пки: Во вре́мѧ ѻ҆́но, прибли́жашесѧ пра́здникъ ѻ҆прѣснѡ́къ: Коне́цъ въ зача́лѣ р҃ѳ-мъ: По не́мже и҆до́ша ᲂу҆ч҃нцы̀ є҆гѡ̀. И҆ ѱало́мъ н҃. Мл҃твы же, Сп҃сѝ бж҃е лю́ди твоѧ̑: не глаго́лемъ.

И҆ начина́емъ канѡ́нъ, творе́нїе господи́на космы̀, гла́съ ѕ҃: і҆рмосы̀ по два́жды, тропари́ же на ѕ҃. Канѡ́нъ, є҆гѡ́же краестро́чїе: Тѝ макра̀ пе́мпти макро́н ѵ҆́мнон є҆ѯа́дѡ. Є҆́же є҆́сть, Въ вели́кїй четверто́къ до́лгꙋю пѣ́снь пою̀. <<ук҃д ѡ҆б.: 848>>

Пѣ́снь а҃.

[Т] І҆рмо́съ: Сѣ́ченое сѣче́тсѧ мо́ре чермно́е, волнопита́емаѧ же и҆зсꙋша́етсѧ глꙋбина̀: та́ѧжде кꙋ́пнѡ без̾ѻрꙋ̑жнымъ бы́вши проходи́ма, и҆ всеѻрꙋ̑жнымъ гро́бъ. пѣ́снь же бг҃окра́снаѧ воспѣва́шесѧ: сла́внѡ просла́висѧ хрⷭ҇то́съ бг҃ъ на́шъ.

[И] Всевино́внаѧ и҆ пода́тельнаѧ жи́зни, безмѣ́рнаѧ мꙋ́дрость бж҃їѧ, созда̀ хра́мъ себѣ̀ ѿ чⷭ҇тыѧ неискꙋсомꙋ́жныѧ мт҃ре: въ хра́мъ бо тѣле́снѡ ѡ҆болкі́йсѧ, сла́внѡ просла́висѧ хрⷭ҇то́съ бг҃ъ на́шъ.

[М] Тайноводѧ́щи дрꙋ́ги своѧ̑, дꙋшепита́тельнꙋю ᲂу҆готовлѧ́етъ трапе́зꙋ, безсме́ртїѧ же вои́стиннꙋ мꙋ́дрость бж҃їѧ растворѧ́етъ ча́шꙋ вѣ̑рнымъ. пристꙋ́пимъ бл҃гоче́стнѡ, и҆ возопїи́мъ: сла́внѡ просла́висѧ хрⷭ҇то́съ бг҃ъ на́шъ.

[А] Оу҆слы́шимъ всѝ вѣ́рнїи, созыва́ющꙋю высо́кимъ проповѣ́данїемъ, несозда́ннꙋю и҆ є҆сте́ственнꙋю премꙋ́дрость бж҃їю, вопїе́тъ бо: вкꙋси́те и҆ разꙋмѣ́вше, ꙗ҆́кѡ хрⷭ҇то́съ а҆́зъ, возопі́йте: сла́внѡ просла́висѧ хрⷭ҇то́съ бг҃ъ на́шъ.

Послѣди́ же па́ки і҆рмо́съ ѻ҆́ба ли̑ка вкꙋ́пѣ.

Пѣ́снь г҃.

[К] І҆рмо́съ: Гдⷭ҇и сы́й всѣ́хъ, и҆ зижди́тель бг҃ъ, созда́нное безстра́стный ѡ҆бнища́въ себѣ̀ соединѝ, и҆ па́сха за ꙗ҆̀же хотѧ́ше ᲂу҆мре́ти, са́мъ сы́й себѐ предпожрѐ: ꙗ҆ди́те, вопїѧ̀, тѣ́ло моѐ, и҆ вѣ́рою ᲂу҆тверди́тесѧ.

[Р] И҆зба́вительною всегѡ̀ ро́да человѣ́ча, твое́ю бл҃же твоѧ̑ ᲂу҆ч҃нкѝ напои́лъ є҆сѝ весе́лїѧ ча́шею, напо́лнивъ ю҆̀, са́мъ бо себѐ сщ҃еннодѣ́йствꙋеши, пі́йте, вопїѧ̀, кро́вь мою̀, и҆ вѣ́рою ᲂу҆тверди́тесѧ.

[А] Безꙋ́мный мꙋ́жъ и҆́же въ ва́съ преда́тель, ᲂу҆ч҃нкѡ́мъ твои̑мъ предре́клъ є҆сѝ неѕло́биве, не ᲂу҆разꙋмѣ́етъ си́хъ, и҆ то́й несмы́сленъ сы́й не и҆́мать разꙋмѣ́ти. ѻ҆ба́че во мнѣ̀ пребꙋ́дите, и҆ вѣ́рою ᲂу҆тверди́тесѧ. <<ук҃є: 849>>

Сѣда́ленъ, гла́съ а҃. Подо́бенъ: Гро́бъ тво́й:

Є҆зе́ра и҆ и҆сто́чники и҆ морѧ̀ сотвори́вый, смире́нїю на́съ наказꙋ́ѧ и҆зрѧ́дномꙋ, ле́нтїемъ ѡ҆поѧ́савсѧ, ᲂу҆ченикѡ́въ но́ги ᲂу҆мы̀, смирѧ́ѧсѧ премно́жествомъ бл҃гоꙋтро́бїѧ, и҆ возвыша́ѧ на́съ ѿ про́пастей ѕло́бы, є҆ди́нъ чл҃вѣколю́бецъ.

Сла́ва, гла́съ г҃. Подо́бенъ: Бж҃е́ственныѧ вѣ́ры:

Смирѧ́ѧсѧ за бл҃гоꙋтро́бїе, но́ги ᲂу҆мы́лъ є҆сѝ ᲂу҆ченикѡ́въ твои́хъ, и҆ къ тече́нїю бж҃е́ственномꙋ сїѧ̑ напра́вилъ є҆сѝ: не повинꙋ́ѧсѧ же пе́тръ ᲂу҆мы́тисѧ, а҆́бїе бж҃е́ственномꙋ повинꙋ́етсѧ повелѣ́нїю, ѡ҆мыва́емь, и҆ тебѣ̀ прилѣ́жнѡ молѧ́сѧ, дарова́ти на́мъ ве́лїю млⷭ҇ть.

И҆ ны́нѣ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Ꙗ҆ды́й влⷣко со ᲂу҆ченикѝ твои́ми, та́инственнѡ ꙗ҆ви́лъ є҆сѝ всест҃о́е твоѐ заколе́нїе, и҆́мже тлѝ и҆зба́вихомсѧ, честна̑ѧ твоѧ̑ почита́ющїи страда̑нїѧ.

Пѣ́снь д҃.

[П] І҆рмо́съ: Прови́дѣвъ прⷪ҇ро́къ та́йнꙋ твою̀ неизрече́ннꙋю хрⷭ҇тѐ, провозгласѝ: положи́лъ є҆сѝ тве́рдꙋю любо́вь крѣ́пости ѻ҆́ч҃е ще́дрый: є҆диноро́днаго бо сн҃а бл҃гі́й, ѡ҆чище́нїе въ мі́ръ посла́лъ є҆сѝ.

[Е] На стрⷭ҇ть всѣ̑мъ сꙋ́щымъ и҆з̾ а҆да́ма и҆сточи́вшꙋю безстра́стїе, хрⷭ҇тѐ грѧды́й, дрꙋгѡ́мъ твои̑мъ ре́клъ є҆сѝ: съ ва́ми па́схи сеѧ̀ причасти́тисѧ возжела́хъ: є҆диноро́днаго бо мѧ̀ ѡ҆чище́нїе ѻ҆ц҃ъ въ мі́ръ посла́лъ є҆́сть.

[М] Причаща́ѧсѧ ча́ши, ᲂу҆ч҃нкѡ́мъ вопїѧ́лъ є҆сѝ безсме́ртне: плода̀ ло́знагѡ ктомꙋ̀ не пїю̀ про́чее, съ ва́ми живѧ̀: є҆диноро́днаго бо мѧ̀ ѡ҆чище́нїе ѻ҆ц҃ъ въ мі́ръ посла́лъ є҆́сть.

[П] Питїѐ но́вое па́че сло́ва, а҆́зъ глаго́лю, во црⷭ҇твїи мое́мъ, хрⷭ҇то́съ дрꙋгѡ́мъ, пїю̀, ꙗ҆́коже бо бг҃ъ съ ва́ми <<ук҃є ѡ҆б.: 850>> бо́ги бꙋ́дꙋ, ре́клъ є҆сѝ: є҆диноро́днаго бо мѧ̀ ѡ҆чище́нїе ѻ҆ц҃ъ въ мі́ръ посла́лъ є҆́сть.

Пѣ́снь є҃.

[Т] І҆рмо́съ: Сою́зомъ любвѐ свѧзꙋ́еми а҆пⷭ҇ли, влⷣчествꙋщемꙋ всѣ́ми себѐ хрⷭ҇тꙋ̀ возло́жше, кра́сны но́ги ѡ҆чища́хꙋ, бл҃говѣствꙋ́юще всѣ̑мъ ми́ръ.

[И] Неѡдержи́мꙋю держа́щаѧ, и҆ превы́спреннюю на воздꙋ́сѣ во́дꙋ, бє́здны ѡ҆бꙋздова́ющаѧ, и҆ морѧ̀ востѧзꙋ́ющаѧ бж҃їѧ премꙋ́дрость, во́дꙋ во ᲂу҆мыва́льницꙋ влива́етъ, но́ги же ѡ҆мыва́етъ рабѡ́въ влⷣка.

[М] Оу҆ч҃нкѡ́мъ показꙋ́етъ смире́нїѧ ѡ҆́бразъ влⷣка, ѻ҆́блаки ѡ҆блага́ѧй нб҃о, препоѧсꙋ́етсѧ ле́нтїемъ, и҆ преклонѧ́етъ кѡлѣ́на, рабѡ́мъ ѡ҆мы́ти но́ги, въ є҆гѡ́же рꙋцѣ̀ дыха́нїе всѣ́хъ сꙋ́щихъ.

Пѣ́снь ѕ҃.

[А] І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на влⷣцѣ вопїю́ ти: ѿ тли́ мѧ возведѝ.

[К] Гдⷭ҇а глаша́ете мѧ̀, ѽ ᲂу҆ченицы̀, и҆ ᲂу҆чи́телѧ: є҆́смь бо, сп҃се вопїѧ́лъ є҆сѝ. тѣ́мже подража́йте ѡ҆́бразъ, є҆го́же во мнѣ̀ ви́дѣсте.

[Р] Скве́рны кто̀ не и҆мѣ́ѧ, ѡ҆мы́ти не тре́бꙋетъ но́гъ: чи́сти же, ѽ ᲂу҆ченицы̀ вы̀, но не всѝ: мгнове́нїемъ бо безчи́ннѡ є҆ди́нъ ѿ ва́съ неи́стовствꙋетъ.

Конда́къ, гла́съ в҃. Подо́бенъ: Вы́шнихъ и҆щѧ̀:

Хлѣ́бъ прїе́мъ въ рꙋ́цѣ преда́тель, сокрове́ннѡ ты̑ѧ простира́етъ, и҆ прїе́млетъ цѣ́нꙋ созда́вшагѡ свои́ма рꙋка́ма человѣ́ка, и҆ неиспра́вленъ пребы́сть і҆ꙋ́да ра́бъ и҆ льсте́цъ.

І҆́косъ: Та́йной трапе́зѣ, въ стра́сѣ прибли́жившесѧ всѝ, чи́стыми дꙋша́ми хлѣ́бъ прїи́мемъ, спребыва́юще влⷣцѣ: <<ук҃ѕ: 851>> да ви́димъ, ка́кѡ ᲂу҆мыва́етъ но́ги ᲂу҆ченикѡ́въ, и҆ сотвори́мъ, ꙗ҆́коже ви́димъ, дрꙋ́гъ дрꙋ́гꙋ покарѧ́ющесѧ, и҆ дрꙋ́гъ дрꙋ́гꙋ но́зѣ ᲂу҆мыва́юще, хрⷭ҇то́съ бо та́кѡ повелѣ̀ свои̑мъ ᲂу҆ч҃нкѡ́мъ, предре́къ та́кѡ твори́ти: но не ᲂу҆слы́ша і҆ꙋ́да ра́бъ и҆ льсте́цъ.

Сѷнаѯа́рь.

Стїхѝ во сщ҃е́нное ᲂу҆мове́нїе:

Оу҆мыва́етъ ᲂу҆ч҃нкѡ́въ въ ве́черъ бг҃ъ но́ги:

Є҆гѡ́же нога̀ попира́ѧ бѣ̀ во є҆де́мѣ преще́нїе дре́вле.

На та́инственнꙋю ве́черю стїхѝ:

Сꙋгꙋ́баѧ ве́черѧ, па́схꙋ бо зако́на но́ситъ:

И҆ па́схꙋ но́вꙋю, кро́вь, тѣ́ло влⷣчнее.

На преесте́ственнꙋю мл҃твꙋ стїхѝ:

Мл҃тва и҆ страши́лище, трꙋды̀ крове́й:

Хрⷭ҇тѐ лицꙋ̀ ꙗ҆́вѣ молѧ́сѧ.

Сме́рть, врага̀ прельща́ѧ въ си́хъ.

На преда́тельство стїхѝ:

Что̀ тре́бѣ ноже́й; что̀ древе́съ людоле́стцы,

На хотѧ́щаго ᲂу҆мре́ти во и҆збавле́нїе мі́ра;

Во ст҃ы́й и҆ вели́кїй четверто́къ, и҆̀же всѧ̑ до́брѣ счини́вшїи бж҃е́ственнїи ѻ҆тцы̀, дрꙋгъдрꙋгопрїима́тельнѡ ѿ бж҃е́ственныхъ же а҆пⷭ҇лъ, и҆ сщ҃е́нныхъ и҆ бж҃е́ственныхъ є҆ѵⷢ҇лїй, преда́ша на́мъ четы́ре нѣ̑каѧ пра́здновати: сщ҃е́нное ᲂу҆мове́нїе: та́йнꙋю ве́черю: преда́нїе ꙗ҆́вѣ є҆́же по на́мъ стра́шныхъ та̑инъ: преесте́ственнꙋю мл҃твꙋ, и҆ са́мое то̀ преда́тельство: поне́же бо є҆вре́йскаѧ фа́ска по пѧтцѣ̀ жре́тисѧ и҆мѧ́ше. Бѧ́ше же ᲂу҆́бѡ прикла́дно, ѡ҆бразова́нїю послѣ́дствовати и҆ и҆́стинѣ, въ то́мъ ꙗ҆́вѣ и҆ є҆́же по на́мъ па́сцѣ жре́тисѧ хрⷭ҇тꙋ̀, предвари́въ гдⷭ҇ь на́шъ і҆и҃съ хрⷭ҇то́съ, ꙗ҆́коже бж҃е́ственнїи ѻ҆тцы̀ глаго́лютъ, дѣ́йствꙋетъ тꙋ́ю со ᲂу҆ч҃нкѝ въ ве́черъ четвертка̀. то́й бо ве́черъ и҆ пѧто́къ ве́сь, є҆ди́нъ де́нь ᲂу҆ є҆врє́й вмѣнѧ́етсѧ: си́це бо ѻ҆нѝ чи́слѧтъ нощеде́нство глаго́люще. Дѣ́йствова ᲂу҆́бѡ сїю̀ и҆ тогда̀ [ꙗ҆́коже рѣ́ша нѣ́цыи] со <<ук҃ѕ ѡ҆б.: 852>> ᲂу҆ч҃нкѝ по зако́нꙋ, и҆́хже є҆ди́нъ є҆́сть и҆ бж҃е́ственный златоꙋ́стъ. Пе́рвое про́стѡ стоѧ́ще, и҆ ѡ҆поѧ́сани, въ сапогѝ ѡ҆бꙋве́ни, жезлы̀ подпира́ющесѧ, и҆ и҆́на є҆ли̑ка зако́нъ повелѣва́етъ, да не законопрестꙋ́пенъ вознепщꙋ́етсѧ. Сїѧ̑ бо зеведе́й ᲂу҆гото́ва: се́й бо скꙋде́ль носѧ́й воды̀, ꙗ҆́коже вели́кїй глаго́летъ а҆ѳана́сїй, а҆́ще и҆́нїи и҆́накѡ ѡ҆ се́мъ рѣ́ша. Пото́мъ же ᲂу҆ч҃нкѡ́мъ совершє́ннѣйшаѧ показꙋ́ѧ, и҆ є҆́же по на́мъ па́схи та́инство предае́тъ на го́рницѣ, ᲂу҆жѐ наше́дшей но́щи. Ве́чери бо, глаго́летъ, бы́вшей, возлежѐ со двѣмана́десѧть. Зри́ же, ꙗ҆́кѡ не сїѐ бѧ́ше зако́ннаѧ па́сха, ве́черѧ бо и҆ возлежа́нїе, и҆ хлѣ́бъ, и҆ вода̀: та́мѡ же всѧ̑ печє́на ѻ҆гне́мъ, и҆ безква̑сна. Пре́жде же нача́тїѧ є҆́же вечерѧ́ти, [си́це бо глаго́летъ бж҃е́ственный златоꙋ́стъ] ѿ ве́чери востае́тъ, и҆ полага́етъ ни́зꙋ ри̑зы, и҆ во́дꙋ во ᲂу҆мыва́льницꙋ влива́етъ са́мъ самодѣ́йствꙋѧй всѧ̑, вкꙋ́пѣ ᲂу҆́бѡ і҆ꙋ́дꙋ ᲂу҆срамлѧ́ѧ, вкꙋ́пѣ же и҆ дрꙋги̑мъ ᲂу҆ч҃нкѡ́мъ воспомина́ѧ, є҆́же старѣ́йшинства не и҆ска́ти. ꙗ҆́коже и҆ по ᲂу҆мове́нїи наказꙋ́етъ, глаго́лѧ: хотѧ́й бы́ти пе́рвый, да бꙋ́детъ всѣ́хъ послѣ́днїй, самого̀ себѐ положи́въ во ᲂу҆каза́нїе. Ꙗ҆влѧ́етсѧ же, ꙗ҆́кѡ пре́жде всѣ́хъ і҆ꙋ́дꙋ ᲂу҆мы̀ хрⷭ҇то́съ, безстꙋ́днѣ предсѣ́дша: послѣди́ же къ петрꙋ̀ прихо́дитъ: се́й же те́пльшїй и҆ны́хъ сы́й, ᲂу҆ч҃телю возбранѧ́етъ, и҆ ѡ҆ставлѧ́етъ па́ки ѕѣ́льнѣе. Оу҆мы́въ ᲂу҆́бѡ и҆́хъ но́ги, и҆ возвыше́нїе пресла́вное смире́нїемъ показа́въ, взе́мъ ри̑зы па́ки, и҆ возле́гъ, наказꙋ́етъ и҆̀хъ люби́ти дрꙋ́гъ дрꙋ́га, и҆ старѣ́йшинства не и҆ска́ти. Ꙗ҆дꙋ́щымъ же и҆̀мъ, и҆ ѡ҆ преда́тельствѣ вво́дитъ нача́ло. Мѧтꙋ́щымсѧ же ѡ҆ словесѝ ᲂу҆ченикѡ́мъ, глаго́летъ і҆и҃съ і҆ѡа́ннꙋ є҆ди́номꙋ та́йнѡ: є҆мꙋ́же а҆́зъ ѡ҆мочи́въ хлѣ́бъ пода́мъ, то́й є҆́сть предаѧ́й мѧ̀. А҆́ще бо бы̀ вѣ́далъ пе́тръ сло́во, а҆́ки сы́й и҆ны́хъ те́пльшїй, і҆ꙋ́дꙋ ᲂу҆би́лъ бы бѧ́ше. И҆ па́ки: ѡ҆мочи́вый со мно́ю въ соли́ло рꙋ́кꙋ: ꙗ҆́коже ѻ҆боѧ̀ бы́ша. Та́же ма́лѡ что̀ ѡ҆ста́вль, взе́мъ хлѣ́бъ, глаго́летъ: прїими́те, ꙗ҆ди́те, и҆ ча́шꙋ подо́бнѣ: пі́йте ѿ неѧ̀ всѝ, ре́къ, сїѧ̀ є҆́сть кро́вь моѧ̀ но́вагѡ завѣ́та, сїѐ твори́те въ моѐ <<ук҃з: 853>> воспомина́нїе. ѻ҆ба́че и҆ са́мъ сїѐ творѧ̀, ꙗ҆дѧ́ше и҆ пїѧ́ше съ ни́ми. Зри́ же, ꙗ҆́кѡ хлѣ́бъ глаго́летъ тѣ́ло своѐ, а҆ не ѡ҆прѣсно́къ: да постыдѧ́тсѧ ᲂу҆̀бо и҆̀же же́ртвѣ ѡ҆прѣсно́къ приносѧ́щїи. По хлѣ́бѣ же вни́де во і҆ꙋ́дꙋ сатана̀: и҆скꙋша́ѧй бо є҆го̀ пре́жде, ны́нѣ всеконе́чнѡ въ него̀ всели́сѧ. И҆ и҆зше́дъ, глаго́летъ: сложе́нїе положѝ а҆рхїере́ємъ, да преда́стъ є҆го̀ и҆̀мъ на три́десѧти сре́бреницѣхъ. Оу҆ченицы́ же по ве́чери и҆зыдо́ша на го́рꙋ є҆леѡ́нскꙋю, въ нѣ́кое село̀, глаго́лемое геѳсїманѝ. По мно́зѣ же глаго́летъ и҆̀мъ і҆и҃съ: вы̀ всѝ соблазните́сѧ ѡ҆ мнѣ̀ въ нощѝ се́й. Пе́тръ же речѐ: а҆́ще и҆ всѝ, а҆́зъ не ѿве́ргꙋсѧ тебѐ: бѧ́ше же по́здѣ, си́рѣчь глꙋбоконо́щїе. Ѻ҆́нъ же глаго́ла: пре́жде да́же не возгласи́тъ пѣ́тель два́щи, ѿве́ржешисѧ менѐ три́жды, є҆́же и҆ бы́сть. боѧ́знїю безмѣ́рною петрꙋ̀ ꙗ҆́тꙋ бы́вшꙋ: бг҃ꙋ немощно́е показꙋ́ющꙋ є҆стества̀, и҆ кꙋ́пнѡ поне́же вселе́ннꙋю є҆мꙋ̀ врꙋчѝ, да ѿ своегѡ̀ є҆стества̀ ᲂу҆добоводи́тельное разꙋмѣ́въ, млⷭ҇тивенъ бꙋ́детъ къ согрѣша́ющымъ: ѻ҆ба́че трикра́тное петро́во ѿверже́нїе, всѣ́хъ человѣ́кѡвъ грѣ́хъ къ бг҃ꙋ и҆з̾ѡбразова́ше. Пе́рвое, за́повѣдь ю҆́же престꙋпѝ а҆да́мъ. второ́е, пи́саннагѡ зако́на престꙋпле́нїе. тре́тїе же, са́мое воплоще́нїе сло́ва: є҆́же па́ки послѣдѝ сп҃съ трегꙋ́бымъ покаѧ́нїемъ и҆сцѣлѝ: за є҆́же, пе́тре, лю́биши ли мѧ̀, три́жды и҆зрещѝ. По си́хъ же глаго́летъ ᲂу҆ч҃нкѡ́мъ, [человѣ́ческое показꙋ́ѧ, ꙗ҆́кѡ страшна̀ всѣ̑мъ сме́рть] приско́рбна є҆́сть дꙋша̀ моѧ̀ да́же до сме́рти. И҆ преше́дъ ꙗ҆́кѡ ка́мене верже́нїе, помоли́сѧ трикра́ты, ре́къ: ѻ҆́ч҃е мо́й, а҆́ще не возмо́жетъ ча́ша сїѧ̀ прейтѝ ѿ менѐ, а҆́ще ю҆̀ не пїю̀: да бꙋ́детъ во́лѧ твоѧ̀. И҆ па́ки: ѻ҆́ч҃е, а҆́ще мо́щно, да ми́мѡ и҆́детъ ѿ менѐ ча́ша сїѧ̀; Кꙋ́пнѡ ᲂу҆́бѡ ꙗ҆́кѡ чл҃вѣ́къ сїѐ глаго́лѧ, кꙋ́пнѡ же и҆ дїа́вола преходѧ̀ хи́тростнѡ: ꙗ҆́кѡ да непщꙋ́ѧ и҆ ѻ҆́наго человѣ́ка бы́ти, за є҆́же не́гли боѧ́тисѧ, сме́рти ра́ди кре́стныѧ не пресѣче́тъ та́инства. Возвра́щьсѧ же и҆ ѡ҆брѣ́тъ ᲂу҆ч҃нкѝ сно́мъ погрꙋже́ны, къ петрꙋ̀ ѡ҆браща́етсѧ, си́це глаго́лѧ: ни є҆ди́нагѡ ли часа̀ возмого́сте побдѣ́ти со мно́ю; си́рѣчь, ты̀ <<ук҃з ѡ҆б.: 854>> глаго́лѧй да́же и҆ до сме́рти подвиза́тисѧ, си́це со́нствꙋеши съ про́чими. Прише́дъ же ѡ҆б̾ ѻ҆́нъ по́лъ пото́ка ке́дрскагѡ, и҆дѣ́же бѣ̀ вертогра́дъ водвори́сѧ та́мѡ со ᲂу҆ченикѝ свои́ми. Ча́стѡ же та́мѡ приходи́ти ѻ҆бы́чай и҆мѣ́ѧше. тѣ́мъ и҆ і҆ꙋ́да вѣ́дѧше мѣ́сто: и҆́же нѣ́кихъ ѿ вѡ́инъ взе́мъ, и҆ наро́дꙋ послѣ́дꙋющꙋ, прїи́де на і҆и҃са, да́въ и҆̀мъ лобза́нїѧ зна́менїе. Сїе́ же речѐ, зане́же мно́гажды ᲂу҆держа́нъ бы́въ, неѧ́вленъ ѿ среды̀ и҆́хъ прохожда́ше: ꙗ҆́коже и҆ здѣ̀ са́мъ хрⷭ҇то́съ пре́жде и҆схо́дитъ къ ни̑мъ глаго́лѧ: кого̀ и҆́щете; ѻ҆ни́ же є҆гѡ̀ и҆ є҆щѐ не познава́хꙋ, не бо̀ но́щь претыка́нїѧ бѧ́ше, свѣти̑ла бо бѣ́ша, глаго́летъ, и҆ свѣщы̀ горѧ́щѧ, и҆ стра́хомъ па́дше ѿлꙋчи́шасѧ, и҆ па́ки прише́дшымъ са́мъ ѿвѣщава́ше. І҆ꙋ́дѣ же сотво́ршꙋ сложе́нїе, хрⷭ҇то́съ глаго́летъ: дрꙋ́же, на не́мже є҆сѝ, си́рѣчь, на не́же прише́лъ є҆сѝ і҆ꙋ́до, бл҃говре́менно є҆́сть. И҆ па́ки глаго́летъ: ꙗ҆́кѡ на разбо́йника ли и҆зыдо́сте со ѻ҆рꙋ́жїемъ и҆ древесы̀ ꙗ҆́ти мѧ̀; Въ нощи́ же прїидо́ша, да не нѣ́каѧ молва̀ ѿ наро́да бꙋ́детъ. Тогда̀ те́плѣйшїй пе́тръ и҆звле́къ но́жъ, ѿ ве́чери бо бѧ́хꙋ къ сицевы̑мъ ᲂу҆гото́влени, а҆рхїере́ева раба̀ ма́лха и҆́менемъ порази́въ, десно́е ᲂу҆́хо ѿсѣчѐ. Вѣ́дѧше же і҆и҃съ, ꙗ҆́кѡ а҆рхїере́є рекꙋ́тъ: не до́брѣ зако́нъ слы́шаше и҆ ᲂу҆ча́ше: возбранѧ́етъ ᲂу҆́бѡ петрꙋ̀ хрⷭ҇то́съ, ꙗ҆́кѡ не добро̀ є҆́сть послꙋ́шникꙋ сꙋ́щꙋ дх҃о́внагѡ мꙋ́жа, меча̀ ᲂу҆потреблѧ́ти: ма́лхово же ᲂу҆́хо и҆сцѣлѧ́етъ. Є҆́мше же ᲂу҆́бѡ і҆и҃са, свѧ́зана приво́дѧтъ на дво́ръ а҆рхїере́а а҆́нны, и҆́же бѣ̀ те́сть каїа́фы: та́мѡ бо бѧ́хꙋ всѝ со́брани на хрⷭ҇та̀ гласѧ́щїи, фарїсе́є и҆ кни́жницы. Здѣ̀ ꙗ҆̀же на петра̀ ѿ ѻ҆трокови́цы, ѿверже́нїе є҆гѡ̀ быва́етъ, и҆ но́щи посредѣ̀ и҆жди́вшейсѧ, пѣ́тель возгласѝ тре́тїе: ѻ҆́нъ же помѧнꙋ́въ воспла́касѧ го́рькѡ. И҆ вре́мени ᲂу҆жѐ ко ᲂу҆́трꙋ прише́дшꙋ, ѿ а҆́нны ко а҆рхїере́ю каїа́фѣ хрⷭ҇та̀ приво́дѧтъ, и҆дѣ́же и҆ ѡ҆плева́нїе прїѧ́тъ, и҆ лжесвидѣ́тели воззва́ни бы́ша: и҆ ѡ҆зарѧ́ющꙋ дню̀ къ пїла́тꙋ є҆го̀ посыла́етъ каїа́фа. Приве́дшїи же є҆го̀, глаго́летъ, не внидо́ша въ претѡ́ръ, да не ѡ҆сквернѧ́тсѧ, но да ꙗ҆дѧ́тъ па́схꙋ. Собира́ютсѧ <<ук҃и: 855>> ᲂу҆́бѡ, ꙗ҆́кѡ беззако́ннѡ не́гли а҆рхїере́и и҆ фарїсе́и тогда̀ содѣ́ѧша преложи́вше па́схꙋ, ꙗ҆́коже глаго́летъ бж҃е́ственный златоꙋ́стъ: въ но́щь бо ѻ҆́нꙋ подоба́ше и҆̀мъ тꙋ́ю ꙗ҆́сти, но хрⷭ҇то́ва ра́ди ᲂу҆бі́йства преложи́ша. А҆ ꙗ҆́кѡ тогда̀ до́лжно бѧ́ше и҆̀мъ ꙗ҆́сти ю҆̀, ꙗ҆вѝ хрⷭ҇то́съ, пре́жде ве́черю но́щїю ꙗ҆ды́й, та́же тайнонаꙋчи́въ совершє́ннымъ: и҆лѝ ꙗ҆́кѡ въ зако́нномъ ѡ҆́бразѣ подоба́ше, ꙗ҆́коже рече́но бы́сть, и҆ и҆́стинѣ бы́ти: і҆ѡа́ннъ бо пре́жде пра́здника глаго́летъ па́схи. Си́хъ ра́ди всѣ́хъ бы́вшихъ въ четверто́къ, и҆ но́щь є҆гѡ̀ тогда́шнꙋю и҆ мы̀ пра́зднꙋемъ, помина́нїе стра́шныхъ и҆ неизрече́нныхъ дѣ́лъ ѻ҆́ныхъ и҆ дѣѧ́нїй со стра́хомъ творѧ́ще. Неизрече́ннымъ твои́мъ бл҃гоꙋтро́бїемъ хрⷭ҇тѐ бж҃е на́шъ, поми́лꙋй на́съ, а҆ми́нь.

Пѣ́снь з҃.

[О] І҆рмо́съ: Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

[Н] Помава́ѧ главо́ю і҆ꙋ́да ѕла̑ѧ предзрѣ́въ подви́же, бл҃говре́менїе и҆скі́й преда́ти сꙋдїю̀ на ѡ҆сꙋжде́нїе, и҆́же всѣ́хъ є҆́сть гдⷭ҇ь и҆ бг҃ъ ѻ҆тє́цъ на́шихъ.

[Ѵ] Ва́мъ хрⷭ҇то́съ дрꙋгѡ́мъ вопїѧ́ше: є҆ди́нъ преда́стъ мѧ̀, весе́лїѧ забы́вше, ско́рбїю и҆ стра́хомъ ѡ҆держи́ми бѧ́хꙋ: кто̀ се́й, скажѝ, глаго́люще, бж҃е ѻ҆тє́цъ на́шихъ;

[М] И҆́же со мно́ю рꙋ́кꙋ свою̀ въ соли́ло вложи́тъ де́рзостїю, томꙋ̀ ѻ҆ба́че добро̀ бы врата̀ житїѧ̀ пройтѝ никогда́же: сего̀, и҆́же бѣ̀ преда́тель, ꙗ҆влѧ́ше бг҃ъ ѻ҆тє́цъ на́шихъ.

Пѣ́снь и҃.

[Н] І҆рмо́съ: За зако́ны ѻ҆те́чєскїѧ бл҃же́ннїи въ вавѷлѡ́нѣ ю҆́нѡши предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени и҆́мже не свари́шасѧ ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки. <<ук҃и ѡ҆б.: 856>>

[О] Соѻбѣ́дницы бл҃же́ннїи, въ сїѡ́нѣ сло́вомъ претерпѣ́вше а҆пⷭ҇ли послѣ́довахꙋ па́стырю, ꙗ҆́кѡ а҆́гнцы, и҆ совокꙋ́плени, є҆гѡ́же не разлꙋчи́шасѧ хрⷭ҇та̀, бж҃е́ственнымъ сло́вомъ пита́еми, бл҃года́рственнѡ вопїѧ́хꙋ: гдⷭ҇а по́йте дѣла̀, и҆ превозноси́те во всѧ̑ вѣ́ки.

[Н] Зако́нныѧ дрꙋ́жбы ѕлоимени́тый і҆скарїѡ́тъ во́лею забы́въ, ꙗ҆̀же но́зѣ ᲂу҆мы̀, ᲂу҆гото́ви на преда́нїе: и҆ тво́й ꙗ҆ды́й хлѣ́бъ, тѣ́ло бж҃е́ственное, воздви́же ко́въ на тѧ̀ хрⷭ҇тѐ, и҆ вопи́ти не разꙋмѣ̀: гдⷭ҇а по́йте дѣла̀, и҆ превозноси́те во всѧ̑ вѣ́ки.

[Е] Прїима́ше рѣши́тельное грѣха̀ тѣ́ло безсо́вѣстный, и҆ кро́вь и҆злива́емꙋю за мі́ръ бж҃е́ственнꙋю, но не стыдѧ́шесѧ пїѧ̀, ю҆́же продаѧ́ше на цѣнѣ̀, ѡ҆ ѕло́бѣ же не негодова̀, и҆ вопи́ти не разꙋмѣ̀: гдⷭ҇а по́йте дѣла̀, и҆ превозноси́те во всѧ̑ вѣ́ки.

Пѣ́снь ѳ҃.

[Ѯ] І҆рмо́съ: Стра́нствїѧ влⷣчнѧ, и҆ безсме́ртныѧ трапе́зы на го́рнѣмъ мѣ́стѣ, высо́кими ᲂу҆мы̀, вѣ́рнїи прїиди́те наслади́мсѧ, возше́дша сло́ва, ѿ сло́ва наꙋчи́вшесѧ, є҆го́же велича́емъ.

[А] И҆ди́те, ᲂу҆ч҃нкѡ́мъ сло́во речѐ, па́схꙋ на го́рничномъ мѣ́стѣ, є҆́юже ᲂу҆́мъ ᲂу҆твержда́етсѧ, и҆ сїю̀ тайноводи́тельнѡ ᲂу҆гото́вите, безква́снымъ и҆́стиннымъ сло́вомъ, тве́рдое же бл҃года́ти велича́йте.

[Д] Содѣ́тельницꙋ ѻ҆ц҃ъ пре́жде вѣ̑къ премꙋ́дрость ражда́етъ мѧ̀, нача́токъ пꙋте́й, въ дѣла̀ созда̀ ны́нѣ та́йнѡ соверша́ємаѧ: сло́во бо несозда́нное сы́й є҆стество́мъ, гла́сы присвоѧ́юсѧ, є҆го́же ны́нѣ прїѧ́хъ.

[Ѡ] Ꙗ҆́кѡ человѣ́къ сы́й сꙋщество́мъ, не мечта́нїемъ, си́це бг҃ъ нра́вомъ воздаѧ́нїѧ, є҆стество̀ соедини́вшеесѧ мнѣ̀. хрⷭ҇та̀ є҆ди́наго тѣ́мъ мѧ̀ зна́йте, ѿ ни́хже, въ ни́хже, ꙗ҆̀же є҆́смь, сп҃са́юща. <<ук҃ѳ: 857>>

Є҆ѯапостїла́рїй, три́жды.

Черто́гъ тво́й ви́ждꙋ сп҃се мо́й, ᲂу҆краше́нный, и҆ ѻ҆де́жды не и҆́мамъ да вни́дꙋ во́нь: просвѣтѝ ѡ҆дѣѧ́нїе дꙋшѝ моеѧ̀ свѣтода́вче, и҆ сп҃си́ мѧ.

На хвали́техъ поста́вимъ стїхѝ д҃, и҆ пое́мъ стїхи̑ры самогла́сны, гла́съ в҃:

Стека́етсѧ про́чее собо́рище і҆ꙋде́йское, да содѣ́телѧ и҆ зижди́телѧ всѧ́ческихъ пїла́тꙋ преда́стъ: ѽ беззако́нныхъ, ѽ невѣ́рныхъ! ꙗ҆́кѡ грѧдꙋ́щаго сꙋди́ти живы̑мъ и҆ мє́ртвымъ, на сꙋ́дъ гото́вѧтъ: и҆сцѣлѧ́ющаго стрⷭ҇ти, ко стрⷭ҇те́мъ ᲂу҆готовлѧ́ютъ. гдⷭ҇и долготерпѣли́ве, ве́лїѧ твоѧ̀ млⷭ҇ть, сла́ва тебѣ̀.

І҆ꙋ́да беззако́нный, гдⷭ҇и, ѡ҆мочи́вый на ве́чери рꙋ́кꙋ въ соли́лѣ съ тобо́ю, прострѐ къ беззакѡ́ннымъ рꙋ́цѣ прїѧ́ти сре́бреники, и҆ мѵ́ра ᲂу҆мы́сливый цѣ́нꙋ, тебѐ безцѣ́ннаго не ᲂу҆боѧ́сѧ прода́ти: но́зѣ простры́й во є҆́же ᲂу҆мы́ти, влⷣкꙋ ѡ҆блобыза̀ льсти́внѡ, во є҆́же преда́ти беззакѡ́ннымъ: ли́ка же а҆пⷭ҇льскагѡ ѿве́ргсѧ, и҆ три́десѧть пове́ргъ сре́бреники, твоегѡ̀ тридне́внагѡ воскрⷭ҇нїѧ не вѣ́дѣ, и҆́мже поми́лꙋй на́съ.

І҆ꙋ́да преда́тель льсти́въ сы́й, льсти́внымъ лобза́нїемъ предадѐ сп҃са гдⷭ҇а, и҆ влⷣкꙋ всѣ́хъ, ꙗ҆́кѡ раба̀ продадѐ і҆ꙋде́ѡмъ: ꙗ҆́кѡ ѻ҆вча̀ на заколе́нїе, та́кѡ послѣ́доваше а҆́гнецъ бж҃їй, сн҃ъ ѻ҆́ч҃їй, є҆ди́нъ многомлⷭ҇тивый.

І҆ꙋ́да ра́бъ и҆ льсте́цъ, ᲂу҆чени́къ и҆ навѣ́тникъ, дрꙋ́гъ и҆ дїа́волъ ѿ дѣ́лъ ꙗ҆ви́сѧ: послѣ́доваше бо ᲂу҆ч҃тлю, и҆ на него̀ поꙋча́шесѧ преда́нїю, глаго́лаше въ себѣ̀: преда́мъ того̀, и҆ прїѡбрѧ́щꙋ собра̑ннаѧ и҆мѣ̑нїѧ и҆ска́ше же и҆ мѵ́рꙋ про́данꙋ бы́ти, и҆ і҆и҃са ле́стїю ꙗ҆́ти. ѿдадѐ цѣлова́нїе, предадѐ хрⷭ҇та̀: и҆ ꙗ҆́кѡ ѻ҆вча̀ на заколе́нїе, си́це послѣ́доваше є҆ди́нъ бл҃гоꙋтро́бный и҆ чл҃вѣколю́бецъ. <<ук҃ѳ ѡ҆б.: 858>>

Сла́ва, и҆ ны́нѣ, гла́съ то́йже: Є҆го́же проповѣ́да а҆́гнца и҆са́їа, грѧде́тъ на заколе́нїе во́льное, и҆ плещѝ дае́тъ на ра̑ны, лани̑ты на заꙋшє́нїѧ, лица́ же не ѿвратѝ ѿ срамоты̀ заплева́нїй, сме́ртїю же без̾ѡбра́зною ѡ҆сꙋжда́етсѧ. всѧ̑ безгрѣ́шный во́лею прїе́млетъ, да всѣ̑мъ да́рꙋетъ и҆з̾ ме́ртвыхъ воскрⷭ҇нїе.

На стїхо́внѣ стїхи̑ры самогла́сны, гла́съ и҃:

Дне́сь є҆́же на хрⷭ҇та̀ лꙋка́вое собра́сѧ собо́рище, и҆ на него̀ тщє́тнаѧ совѣ́товаше, преда́ти пїла́тꙋ на сме́рть непови́ннаго. дне́сь и҆мѣ́нїемъ ᲂу҆давле́нїе і҆ꙋ́да себѣ̀ ѡ҆блага́етъ, и҆ лиша́етсѧ ѻ҆бою́дꙋ жи́зни привре́менныѧ и҆ бж҃е́ственныѧ. дне́сь каїа́фа нево́лею проро́чествꙋетъ: ᲂу҆́не, глаго́лѧ, є҆ди́номꙋ ᲂу҆мре́ти за лю́ди. прїи́де бо за грѣхѝ на́шѧ пострада́ти, да на́съ свободи́тъ ѿ рабо́ты вра́жїѧ, ꙗ҆́кѡ бл҃гъ и҆ чл҃вѣколю́бецъ.

Сті́хъ: Ꙗ҆ды́й хлѣ́бы моѧ̑, возвели́чи на мѧ̀ запина́нїе.

Дне́сь і҆ꙋ́да нищелю́бїѧ сокрыва́етъ лицѐ, и҆ лихои́мства ѿкрыва́етъ зра́къ: не ктомꙋ̀ ѡ҆ ни́щихъ пече́тсѧ, не ктомꙋ̀ мѵ́ро продае́тъ грѣ́шныѧ, но нбⷭ҇ное мѵ́ро, и҆ ѿ негѡ̀ ᲂу҆своѧ́етъ сре́бренники. тече́тъ ко і҆ꙋде́ѡмъ, глаго́летъ беззакѡ́ннымъ: что́ ми хо́щете да́ти, и҆ а҆́зъ ва́мъ преда́мъ є҆го̀; ѽ сребролю́бїѧ преда́телѧ! ᲂу҆добопрода́тельнꙋю твори́тъ кꙋ́плю, къ во́лѣ кꙋпꙋ́ющихъ, непродае́магѡ кꙋ́плю твори́тъ, не скꙋ́пъ ꙗ҆влѧ́етсѧ къ цѣнѣ̀, но ꙗ҆́кѡ раба̀ бѣжа́щаго продае́тъ: ѻ҆бы́чай бо кра́дꙋщымъ мета́ти честна̑ѧ. ны́нѣ же пове́рже ст҃а̑ѧ псѡ́мъ ᲂу҆чени́къ, бѣсова́нїе бо сребролю́бїѧ, на своего̀ влⷣкꙋ неи́стовитисѧ сотворѝ є҆го̀. є҆гѡ́же и҆скꙋше́нїѧ бѣжи́мъ, зовꙋ́ще: долготерпѣли́ве гдⷭ҇и, сла́ва тебѣ̀.

Сті́хъ: И҆схожда́ше во́нъ, и҆ глаго́лаше вкꙋ́пѣ. <<у҃л: 859>>

Нра́въ тво́й льстѝ и҆сполнѧ́етсѧ, беззако́нный і҆ꙋ́до: недꙋ́гꙋѧ бо сребролю́бїемъ, прїѡбрѣ́лъ є҆сѝ человѣконенавидѣ́нїе. а҆́ще бо бога́тство люби́лъ є҆сѝ, почто̀ ко ᲂу҆ча́щемꙋ ѡ҆ нищетѣ̀ прише́лъ є҆сѝ; а҆́ще же и҆ люби́лъ є҆сѝ, вскꙋ́ю про́далъ є҆сѝ безцѣ́ннаго, преда́въ на ᲂу҆бїе́нїе; ᲂу҆жасни́сѧ со́лнце, возстенѝ землѐ, и҆ дви́жащисѧ возопі́й: неѕло́биве гдⷭ҇и сла́ва тебѣ̀.

Сті́хъ: Сло́во законопрестꙋ́пное возложи́ша на мѧ̀.

Да никто́же, ѽ вѣ́рнїи, влⷣчнїѧ ве́чери тайноненаꙋче́нъ, никто́же ѿню́дъ ꙗ҆́кѡ і҆ꙋ́да льсти́внѡ да пристꙋ́питъ къ трапе́зѣ: ѻ҆́нъ бо ᲂу҆крꙋ́хъ прїе́мъ, на хлѣ́ба ᲂу҆клони́сѧ. ѡ҆́бразомъ ᲂу҆́бѡ сы́й ᲂу҆чени́къ, ве́щїю же сы́й ᲂу҆бі́йца. со і҆ꙋдє́и ᲂу҆́бѡ веселѧ́сѧ, со а҆пⷭ҇лы же водворѧ́ѧсѧ: ненави́дѧ лобыза́ше, лобыза́ѧ же продава́ше и҆скꙋпи́вшаго на́съ клѧ́твы, бг҃а и҆ сп҃са дꙋ́шъ на́шихъ.

Сла́ва, гла́съ то́йже: Нра́въ тво́й льстѝ:

И҆ ны́нѣ, гла́съ є҃: Тайново́дствꙋѧ твоѧ̑ гдⷭ҇и ᲂу҆ченикѝ, ᲂу҆чи́лъ є҆сѝ глаго́лѧ: ѽ дрꙋ́зи, зри́те, да никі́йже стра́хъ ва́съ разлꙋчи́тъ ѿ менѐ: а҆́ще бо и҆ страждꙋ̀, но за мі́ръ. не блазни́тесѧ ᲂу҆̀бо ѡ҆ мнѣ̀: не прїидо́хъ бо, да послꙋ́жатъ мѝ, но послꙋжи́ти, и҆ положи́ти дꙋ́шꙋ мою̀ и҆збавле́нїе за мі́ръ. а҆́ще ᲂу҆́бѡ вы̀ дрꙋ́зи моѝ є҆стѐ, менѐ подража́йте: хотѧ́й пе́рвый бы́ти, да бꙋ́детъ послѣ́днїй, влады́ка ꙗ҆́кѡ слꙋжи́тель. пребꙋ́дите во мнѣ̀, да гро́здъ принесетѐ: а҆́зъ бо є҆́смь лоза̀ живо́тнаѧ.

Бл҃го є҆́сть и҆сповѣ́датисѧ гдⷭ҇ви: Совокꙋплѧ́емъ и҆ ча́съ пе́рвый, въ не́мже глаго́лемъ и҆ тропа́рь прⷪ҇ро́чества, гла́съ г҃:

Заꙋше́нный за ро́дъ человѣ́ческїй, и҆ не прогнѣ́вавыйсѧ свободѝ ѿ и҆стлѣ́нїѧ живо́тъ на́шъ гдⷭ҇и, и҆ сп҃сѝ на́съ.

Сла́ва, и҆ ны́нѣ, то́йже. <<у҃л ѡ҆б.: 860>>

Прокі́менъ, гла́съ а҃: Да разꙋмѣ́ютъ ꙗ҆зы́цы, ꙗ҆́кѡ и҆́мѧ тебѣ̀ гдⷭ҇ь. Сті́хъ: Бж҃е, кто̀ ᲂу҆подо́битсѧ тебѣ̀;

Прⷪ҇ро́чества і҆еремі́ина чте́нїе. [Глава̀ а҃і, ст. и҃і-к҃г: глава̀ в҃і, ст. а҃-є҃і.]

Гдⷭ҇и, скажи́ ми, и҆ ᲂу҆разꙋмѣ́ю: тогда̀ ви́дѣхъ начина̑нїѧ и҆́хъ. А҆́зъ же ꙗ҆́кѡ а҆́гнѧ неѕло́бивое ведо́мое на заколе́нїе не разꙋмѣ́хъ, ꙗ҆́кѡ на мѧ̀ помы́слиша по́мыслъ лꙋка́вый, глаго́люще: прїиди́те и҆ вложи́мъ дре́во въ хлѣ́бъ є҆гѡ̀, и҆ и҆стреби́мъ є҆го̀ ѿ землѝ живꙋ́щихъ, и҆ и҆́мѧ є҆гѡ̀ да не помѧне́тсѧ ктомꙋ̀. Гдⷭ҇ь саваѡ́ѳъ, сꙋдѧ́й пра́веднѡ, и҆спытꙋ́ѧй сердца̀ и҆ ᲂу҆трѡ́бы, да ви́ждꙋ мще́нїе твоѐ на ни́хъ, ꙗ҆́кѡ къ тебѣ̀ ѿкры́хъ ѡ҆правда́нїе моѐ. Сегѡ̀ ра́ди сїѧ̑ глаго́летъ гдⷭ҇ь на мꙋ́жы а҆наѳѡ́ѳски и҆́щꙋщыѧ дꙋшѝ моеѧ̀, глаго́лющыѧ: да не проро́чествꙋеши ѡ҆ и҆́мени гдⷭ҇ни: а҆́ще ли же нѝ, ᲂу҆́мреши въ рꙋка́хъ на́шихъ. Сегѡ̀ ра́ди сїѧ̑ глаго́летъ гдⷭ҇ь си́лъ: сѐ а҆́зъ посѣщꙋ̀ на ни́хъ: ю҆́нѡши и҆́хъ мече́мъ ᲂу҆́мрꙋтъ, и҆ сы́нове и҆́хъ и҆ дщє́ри и҆́хъ сконча́ютсѧ гла́домъ: И҆ ѡ҆ста́нка не бꙋ́детъ ѿ ни́хъ, наведꙋ́ бо ѕла̑ѧ на живꙋ́щыѧ во а҆наѳѡ́ѳѣ, въ лѣ́то посѣще́нїѧ и҆́хъ. Пра́веденъ є҆сѝ гдⷭ҇и, ꙗ҆́кѡ ѿвѣща́ю къ тебѣ̀, ѻ҆ба́че сꙋдьбы̑ возглаго́лю къ тебѣ̀: что̀ ꙗ҆́кѡ пꙋ́ть нечести́выхъ спѣ́етсѧ; ᲂу҆гобзи́шасѧ всѝ творѧ́щїи беззакѡ́нїѧ; Насади́лъ є҆сѝ и҆̀хъ, и҆ ᲂу҆корени́шасѧ: ча̑да сотвори́ша, и҆ сотвори́ша пло́дъ: бли́зъ є҆сѝ ты̀ ᲂу҆́стъ и҆́хъ, дале́че же ѿ ᲂу҆тро́бъ и҆́хъ. И҆ ты̀, гдⷭ҇и, разꙋмѣ́еши мѧ̀, ви́дѣлъ мѧ̀ є҆сѝ, и҆ и҆скꙋси́лъ є҆сѝ се́рдце моѐ пред̾ тобо́ю, соберѝ и҆̀хъ ꙗ҆́кѡ ѻ҆́вцы на заколе́нїе, и҆ ѡ҆чи́сти и҆̀хъ въ де́нь заколе́нїѧ и҆́хъ. Доко́лѣ пла́кати и҆́мать землѧ̀, и҆ трава̀ всѧ̑ се́льнаѧ и҆́зсхнетъ ѿ ѕло́бы живꙋ́щихъ на не́й; погибо́ша ско́ти и҆ пти̑цы, ꙗ҆́кѡ реко́ша: не ᲂу҆́зритъ бг҃ъ <<ул҃а: 861>> пꙋте́й на́шихъ. Но́зи твоѝ текꙋ́тъ, и҆ разслаблѧ́ютъ тѧ̀. И҆ди́те, собери́те всѧ̑ ѕвѣ́ри сє́льныѧ, и҆ да прїи́дꙋтъ снѣ́сти є҆̀. Па́стырїе мно́зи растли́ша вїногра́дъ мо́й, ѡ҆скверни́ша ча́сть мою̀, да́ша ча́сть жела́емꙋю мою̀ въ пꙋсты́ню непрохо́днꙋю. Положи́ша въ потребле́нїе па́гꙋбы. Ꙗ҆́кѡ сїѧ̑ глаго́летъ гдⷭ҇ь ѡ҆ всѣ́хъ сосѣдѣ́хъ лꙋка́выхъ, прикаса́ющихсѧ наслѣ́дїю моемꙋ̀, є҆́же раздѣли́хъ лю́демъ мои̑мъ і҆и҃лю: сѐ а҆́зъ и҆сто́ргнꙋ и҆̀хъ ѿ землѝ и҆́хъ, и҆ до́мъ і҆ꙋ́динъ и҆зве́ргнꙋ ѿ среды̀ и҆́хъ. И҆ бꙋ́детъ є҆гда̀ и҆сто́ргнꙋ и҆̀хъ, ѡ҆бращꙋ́сѧ и҆ поми́лꙋю и҆̀хъ, и҆ вселю̀ и҆̀хъ, кого́ждо въ достоѧ́нїе своѐ, и҆ кого́ждо въ зе́млю свою̀.

Прокі́менъ, гла́съ и҃: Помоли́тесѧ и҆ воздади́те гдⷭ҇ви бг҃ꙋ на́шемꙋ. Сті́хъ: Вѣ́домъ во і҆ꙋде́и бг҃ъ, во і҆и҃ли ве́лїе и҆́мѧ є҆гѡ̀.

Подоба́етъ вѣ́дати, ꙗ҆́кѡ лїті́и за ᲂу҆поко́й въ притво́рѣ не быва́етъ до недѣ́ли ѳѡмины̀.

Про́чїѧ же часы̀ пою́тсѧ триѱа́лмны, про́стѡ.

Во ст҃ы́й и҆ вели́кїй четверто́къ ве́чера,

во свѣти́льничное, кле́плетъ во и҃ ча́съ, и҆ бл҃гослови́вшꙋ а҆рхїере́ю, и҆лѝ сщ҃е́нникꙋ, начина́емъ вече́рню: Прїиди́те поклони́мсѧ: и҆ предначина́тельный ѱало́мъ. Быва́етъ є҆ктенїа̀ ѿ сщ҃е́нника. Та́же, Гдⷭ҇и воззва́хъ, на гла́съ в҃, поставлѧ́емъ стїхѡ́въ і҃. Сщ҃е́нникъ же и҆змѣнѧ́ѧй сщ҃е́нническꙋю ѻ҆де́ждꙋ, и҆схо́дитъ, и҆ кади́тъ, и҆ по є҆́же возврати́тисѧ, твори́тъ проскомі́дїю. Мы́ же пое́мъ стїхи̑ры самогла́сны днѐ, гла́съ в҃, повторѧ́юще ѧ҆̀.

Стека́етсѧ про́чее собо́рище і҆ꙋде́йское, да содѣ́телѧ и҆ зижди́телѧ всѧ́ческихъ пїла́тꙋ преда́стъ. ѽ <<ул҃а ѡ҆б.: 862>> беззако́нныхъ, ѽ невѣ́рныхъ! ꙗ҆́кѡ грѧдꙋ́щаго сꙋди́ти живы̑мъ и҆ мє́ртвымъ, на сꙋ́дъ гото́вѧтъ: и҆сцѣлѧ́ющаго стра̑сти, ко стрⷭ҇те́мъ ᲂу҆готовлѧ́ютъ: гдⷭ҇и долготерпѣли́ве, ве́лїѧ твоѧ̀ млⷭ҇ть, сла́ва тебѣ̀.

І҆ꙋ́да беззако́нный, ѡ҆мочи́вый на ве́чери рꙋ́кꙋ въ соли́лѣ съ тобо́ю, прострѐ къ беззакѡ́ннымъ рꙋ́цѣ прїѧ́ти сре́бреники: и҆ мѵ́ра ᲂу҆мы́сливый цѣ́нꙋ, тебѐ безцѣ́ннаго не ᲂу҆боѧ́сѧ прода́ти: но́зѣ простры́й, во є҆́же ᲂу҆мы́ти: влⷣкꙋ ѡ҆блобыза̀ льсти́внѡ, во є҆́же преда́ти беззакѡ́ннымъ: ли́ка же а҆пⷭ҇льскагѡ ѿве́ргсѧ, и҆ три́десѧть пове́ргъ сре́бреники, твоегѡ̀ тридне́внагѡ воскрⷭ҇нїѧ не вѣ́дѣ, и҆́мже поми́лꙋй на́съ.

І҆ꙋ́да преда́тель льсти́въ сы́й, льсти́внымъ лобза́нїемъ предадѐ сп҃са гдⷭ҇а, и҆ влⷣкꙋ всѣ́хъ, ꙗ҆́кѡ раба̀ продадѐ і҆ꙋде́ѡмъ: ꙗ҆́кѡ ѻ҆вча̀ на заколе́нїе, та́кѡ послѣ́доваше, а҆́гнецъ бж҃їй, сн҃ъ ѻ҆́ч҃їй, є҆ди́нъ многомлⷭ҇тивый.

І҆ꙋ́да ра́бъ и҆ льсте́цъ, ᲂу҆чени́къ и҆ навѣ́тникъ, дрꙋ́гъ и҆ дїа́волъ, ѿ дѣ́лъ ꙗ҆ви́сѧ: послѣ́доваше бо ᲂу҆чи́телю, и҆ на него̀ поꙋча́шесѧ преда́нїю, глаго́лаше въ себѣ̀: преда́мъ того̀, и҆ прїѡбрѧ́щꙋ сѡ́браннаѧ и҆мѣ̑нїѧ: и҆ска́ше же и҆ мѵ́рꙋ про́данꙋ бы́ти, и҆ і҆и҃са ле́стїю ꙗ҆́ти, ѿдадѐ цѣлова́нїе, предадѐ хрⷭ҇та̀. и҆ ꙗ҆́кѡ ѻ҆вча̀ на заколе́нїе, си́це послѣ́доваше а҆́гнецъ бж҃їй, є҆ди́нъ бл҃гоꙋтро́бный и҆ чл҃вѣколю́бецъ.

Є҆го́же проповѣ́да а҆́гнца и҆са́їа, грѧде́тъ на заколе́нїе во́льное, и҆ плещи̑ дае́тъ на ра̑ны, лани̑ты на заꙋшє́нїѧ, лица́ же не ѿвратѝ ѿ срамоты̀ заплева́нїй, сме́ртїю же без̾ѡбра́зною ѡ҆сꙋжда́етсѧ: всѧ̑ безгрѣ́шный во́лею прїе́млетъ, да всѣ̑мъ да́рꙋетъ и҆з̾ ме́ртвыхъ воскрⷭ҇нїе.

Сла́ва, и҆ ны́нѣ, гла́съ ѕ҃: Рожде́нїе є҆хі́днѡвъ вои́стиннꙋ і҆ꙋ́да, ꙗ҆́дшихъ ма́ннꙋ въ пꙋсты́ни, и҆ ро́пщꙋщихъ на <<ул҃в: 863>> пита́телѧ: є҆ще́ бо бра́шнꙋ сꙋ́щꙋ во ᲂу҆стѣ́хъ и҆́хъ, клевета́хꙋ на бг҃а небл҃года́рнїи: и҆ се́й ѕлочести́вый нбⷭ҇ный хлѣ́бъ во ᲂу҆стѣ́хъ носѧ́й, на сп҃са преда́тельство содѣ́ла. ѽ нра́ва несы́тнагѡ, и҆ де́рзости безчеловѣ́чныѧ! пита́ющаго продае́тъ, и҆ є҆го́же люблѧ́ше влⷣкꙋ, предаѧ́ше на сме́рть: вои́стиннꙋ ѻ҆́нѣхъ сы́нъ беззако́нный, и҆ съ ни́ми па́гꙋбꙋ наслѣ́дова. но пощадѝ гдⷭ҇и, дꙋ́шы на́шѧ ѿ такова́гѡ безчеловѣ́чества, є҆ди́не въ долготерпѣ́нїи неизрече́нный.

Вхо́дъ со є҆ѵⷢ҇лїемъ. Свѣ́те ти́хїй:

Прокі́менъ, гла́съ а҃: И҆зми́ мѧ гдⷭ҇и, ѿ человѣ́ка лꙋка́ва, ѿ мꙋ́жа непра́ведна и҆зба́ви мѧ̀. Сті́хъ: И҆́же помы́слиша непра́вдꙋ въ се́рдцѣ ве́сь де́нь.

И҆схо́да чте́нїе. [Глава̀ ѳ҃і, ст. і҃-ѳ҃і.]

Речѐ гдⷭ҇ь мѡѷсе́ю: соше́дъ засвидѣ́тельствꙋй лю́демъ, и҆ ѡ҆чи́сти ѧ҆̀ дне́сь и҆ ᲂу҆́трѣ: и҆ да и҆сперꙋ́тъ ри̑зы. И҆ да бꙋ́дꙋтъ гото́вы въ де́нь тре́тїй: въ тре́тїй бо де́нь сни́детъ гдⷭ҇ь на го́рꙋ сїна́йскꙋю, пред̾ всѣ́ми людьмѝ. И҆ ᲂу҆стро́иши лю́ди ѻ҆́крестъ, глаго́лѧ: внемли́те себѣ̀ не восходи́ти на го́рꙋ, и҆ ничи́мже коснꙋ́тисѧ є҆ѧ̀: всѧ́къ прикоснꙋ́выйсѧ горѣ̀, сме́ртїю ᲂу҆́мретъ. Не ко́снетсѧ є҆́й рꙋка̀, ка́менїемъ бо побїе́тсѧ, и҆лѝ стрѣло́ю ᲂу҆стрѣли́тсѧ, а҆́ще ско́тъ, а҆́ще человѣ́къ, не бꙋ́детъ жи́въ: є҆гда́ же гла́си и҆ трꙋбы̑ и҆ ѻ҆́блакъ ѿи́детъ ѿ горы̀, сі́и взы́дꙋтъ на го́рꙋ. Сни́де же мѡѷсе́й съ горы̀ къ лю́демъ, и҆ ѡ҆ст҃ѝ ѧ҆̀: и҆ и҆спра́ша ри̑зы своѧ̑. И҆ речѐ лю́демъ: бꙋ́дите гото́ви, трѝ дни̑ не входи́те къ жена́мъ. Бы́сть же въ тре́тїй де́нь бы́вшꙋ ко ᲂу҆́трꙋ, и҆ бы́ша гла́си и҆ мо́лнїѧ, и҆ ѻ҆́блакъ мра́ченъ на горѣ̀ сїна́йстѣй, гла́съ трꙋ́бный глаша́ше ѕѣлѡ̀: и҆ ᲂу҆боѧ́шасѧ всѝ лю́дїе и҆̀же въ полцѣ̀. И҆зведе́ же мѡѷсе́й лю́ди во срѣ́тенїе бг҃ꙋ и҆з̾ полка̀, и҆ <<ул҃в ѡ҆б.: 864>> ста́ша под̾ горо́ю. Гора́ же сїна́йскаѧ дымѧ́шесѧ всѧ̀, схожде́нїѧ ра́ди бж҃їѧ на ню̀ во ѻ҆гнѝ: и҆ восхожда́ше ды́мъ, ꙗ҆́кѡ ды́мъ пе́щный: и҆ ᲂу҆жасо́шасѧ всѝ лю́дїе ѕѣлѡ̀. Бы́ша же гла́си трꙋ́бнїи происходѧ́ще крѣ́пцы ѕѣлѡ̀. мѡѷсе́й глаго́лаше, бг҃ъ же ѿвѣщава́ше є҆мꙋ̀ гла́сомъ.

Прокі́менъ, гла́съ з҃: И҆зми́ мѧ ѿ вра̑гъ мои́хъ бж҃е, и҆ ѿ востаю́щихъ на мѧ̀ и҆зба́ви мѧ̀. Сті́хъ: И҆зба́ви мѧ̀ ѿ дѣ́лающихъ беззако́нїе.

І҆́ѡва чте́нїе. [Глава̀ л҃и, ст. а҃-к҃г: гл. м҃в, ст. а҃-є҃].

Речѐ гдⷭ҇ь і҆́ѡвꙋ сквозѣ̀ бꙋ́рю и҆ ѻ҆́блаки: Кто̀ се́й скрыва́ѧй ѿ менѐ совѣ́тъ, содержа́й же глаго́лы въ се́рдцѣ, мене́ же ли мни́тсѧ ᲂу҆таи́ти; Препоѧ́ши ꙗ҆́кѡ мꙋ́жъ чре́сла твоѧ̑: вопрошꙋ́ же тѧ̀, ты́ же мѝ ѿвѣща́й. Гдѣ̀ бы́лъ є҆сѝ є҆гда̀ ѡ҆снова́хъ зе́млю; возвѣсти́ ми, а҆́ще вѣ́си ра́зꙋмъ; Кто̀ положѝ мѣ̑ры є҆ѧ̀, а҆́ще вѣ́си; и҆лѝ кто̀ наведы́й ве́рвь на ню̀; На че́мже столпѝ є҆ѧ̀ ᲂу҆твержде́ни сꙋ́ть; кто́ же є҆́сть положи́вый ка́мень краеꙋго́льный на не́й; Є҆гда̀ [сотворе́ны] бы́ша ѕвѣ́зды, восхвали́ша мѧ̀ гла́сомъ ве́лїимъ всѝ а҆́гг҃ли моѝ. Загради́хъ же мо́ре враты̀, є҆гда̀ и҆злива́шесѧ и҆з̾ чре́ва мт҃ре своеѧ̀ и҆сходѧ́щее. Положи́хъ же є҆мꙋ̀ ѻ҆́блакъ во ѡ҆дѣѧ́нїе, мгло́ю же пови́хъ є҆̀: И҆ положи́хъ є҆мꙋ̀ предѣ́лы, ѡ҆бложи́въ затво́ры и҆ врата̀. Рѣ́хъ же є҆мꙋ̀: до сегѡ̀ до́йдеши и҆ не пре́йдеши, но въ тебѣ̀ сокрꙋша́тсѧ во́лны твоѧ̑. И҆лѝ при тебѣ̀ соста́вихъ свѣ́тъ ᲂу҆́треннїй; денни́ца же вѣ́сть чи́нъ сво́й, Ꙗ҆́тисѧ кри́лъ землѝ, ѿтрѧстѝ нечести̑выѧ ѿ неѧ̀. И҆лѝ ты̀ бре́нїе взе́мъ ѿ землѝ, созда́лъ є҆сѝ живо́тно, и҆ глаго́ливаго сего̀ посади́лъ є҆сѝ на землѝ; Ѿѧ́лъ же ли є҆сѝ ѿ нечести́выхъ свѣ́тъ; мы́шцꙋ же го́рдыхъ сокрꙋши́лъ ли є҆сѝ; Прише́лъ же ли <<ул҃г: 865>> є҆сѝ на и҆сто́чники мо́рѧ; въ слѣда́хъ же бе́здны ходи́лъ ли є҆сѝ; Ѿверза́ютсѧ же ли тебѣ̀ стра́хомъ врата̀ смє́ртнаѧ; вра́тницы же а҆́дѡвы ви́дѣвше тѧ̀ ᲂу҆боѧ́шасѧ ли; Навы́клъ же ли є҆сѝ широты̀ поднебе́сныѧ, повѣ́ждь ᲂу҆̀бо мѝ, коли́ка є҆́сть, Въ ко́ей же землѝ вселѧ́етсѧ свѣ́тъ; тьмѣ́ же ко́е є҆́сть мѣ́сто; А҆́ще ᲂу҆̀бо введе́ши мѧ̀ въ предѣ́лы и҆́хъ, а҆́ще же ли и҆ вѣ́си стєзѝ и҆́хъ; Вѣ́мъ ᲂу҆̀бо ꙗ҆́кѡ тогда̀ рожде́нъ є҆сѝ, число́ же лѣ́тъ твои́хъ мно́го. Прише́лъ же ли є҆сѝ въ сокрѡ́вища снѣ̑жнаѧ, и҆ сокрѡ́вища гра̑днаѧ ви́дѣлъ ли є҆сѝ; Подлежа́тъ же ли тебѣ̀ въ ча́съ врагѡ́въ въ де́нь бра́ней и҆ ра́ти; Ѿвѣща́въ же і҆́ѡвъ, речѐ ко гдⷭ҇ꙋ: Вѣ́мъ ꙗ҆́кѡ всѧ̑ мо́жеши, невозмо́жно же тебѣ̀ ничто́же. Кто́ є҆сть таѧ́й ѿ тебѐ совѣ́тъ; щадѧ́й же словеса̀, и҆ ѿ тебѐ мни́тсѧ ᲂу҆таи́ти; кто́ же возвѣсти́тъ мѝ, и҆́хже не вѣ́дѣхъ, вє́лїѧ и҆ ди̑внаѧ, и҆́хже не зна́хъ; Послꙋ́шай же менѐ гдⷭ҇и, да и҆ а҆́зъ возглаго́лю: вопрошꙋ́ же тѧ̀, ты́ же мѧ̀ наꙋчѝ. Слꙋ́хомъ ᲂу҆́бѡ ᲂу҆́ха слы́шахъ тѧ̀ пе́рвѣе, ны́нѣ же ѻ҆́ко моѐ ви́дѣ тѧ̀.

Прⷪ҇ро́чества и҆са́їина чте́нїе. [Глава̀ и҃, ст. д҃- а҃і.]

Гдⷭ҇ь дае́тъ мнѣ̀ ѧ҆зы́къ наꙋче́нїѧ, є҆́же разꙋмѣ́ти, є҆гда̀ подоба́етъ рещѝ сло́во: положи́ мѧ ᲂу҆́трѡ ᲂу҆́трѡ, приложи́ ми ᲂу҆́хо, є҆́же слы́шати. И҆ наказа́нїе гдⷭ҇не ѿверза́етъ ᲂу҆́шы моѝ, а҆́зъ же не проти́влюсѧ, ни противоглаго́лю. Плещы̀ моѝ вда́хъ на ра̑ны, и҆ лани̑тѣ моѝ на заꙋшє́нїѧ, лица́ же моегѡ̀ не ѿврати́хъ ѿ стꙋда̀ заплева́нїй. И҆ гдⷭ҇ь гдⷭ҇ь помо́щникъ мѝ бы́сть: сегѡ̀ ра́ди не ᲂу҆срами́хсѧ, но положи́хъ лицѐ своѐ а҆́ки тве́рдый ка́мень, и҆ разꙋмѣ́хъ, ꙗ҆́кѡ не постыждꙋ́сѧ. Занѐ приближа́етсѧ ѡ҆правда́вый мѧ̀: кто̀ прѧ́йсѧ со мно́ю; да сопротивоста́нетъ мнѣ̀ кꙋ́пнѡ: и҆ кто̀ <<ул҃г ѡ҆б.: 866>> сꙋдѧ́йсѧ со мно́ю: да прибли́житсѧ ко мнѣ̀. Сѐ гдⷭ҇ь гдⷭ҇ь помо́жетъ мѝ: кто̀ ѡ҆ѕло́битъ мѧ̀; сѐ всѝ вы̀, ꙗ҆́кѡ ри́за ѡ҆бетша́ете, и҆ ꙗ҆́кѡ мо́лїе и҆з̾ѧ́стъ вы̀. Кто̀ въ ва́съ боѧ́йсѧ гдⷭ҇а; да послꙋ́шаетъ гла́са ѻ҆́трока є҆гѡ̀: ходѧ́щїи во тьмѣ̀, и҆ нѣ́сть и҆̀мъ свѣ́та, надѣ́йтесѧ на и҆́мѧ гдⷭ҇не, и҆ ᲂу҆тверди́тесѧ ѡ҆ бз҃ѣ. Сѐ всѝ вы̀ ѻ҆́гнь раждиза́ете, и҆ ᲂу҆крѣплѧ́ете пла́мень: ходи́те свѣ́томъ ѻ҆гнѧ̀ ва́шегѡ, и҆ пла́менемъ, є҆го́же разжего́сте: менѐ ра́ди бы́ша сїѧ̑ ва́мъ, въ печа́ли ᲂу҆́спнете.

Та́же, є҆ктенїа̀ ма́лаѧ. Трист҃о́е.

Прокі́менъ а҆пⷭ҇ла, гла́съ з҃: Кнѧ́зи лю́дстїи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀. Сті́хъ: Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ. А҆по́столъ къ корі́нѳѧнѡмъ, зача́ло рм҃ѳ. Бра́тїе, а҆́зъ прїѧ́хъ ѿ гдⷭ҇а: А҆ллилꙋ́їа, гла́съ ѕ҃: Бл҃же́нъ разꙋмѣва́ѧй на ни́ща и҆ ᲂу҆бо́га, въ де́нь лю́тъ и҆зба́витъ є҆го̀ гдⷭ҇ь. Сті́хъ: Вразѝ моѝ рѣ́ша мнѣ̀ ѕла̑ѧ: когда̀ ᲂу҆́мретъ и҆ поги́бнетъ и҆́мѧ є҆гѡ̀; Сті́хъ: Ꙗ҆ды́й хлѣ́бы моѧ̑, возвели́чи на мѧ̀ запина́нїе. Є҆ѵⷢ҇лїе ѿ матѳе́а, зача́ло р҃з: Речѐ гдⷭ҇ь свои̑мъ ᲂу҆ч҃нкѡ́мъ: вѣ́сте, ꙗ҆́кѡ по двою̀ дню̑ па́сха бꙋ́детъ:

И҆ по чи́нꙋ бж҃е́ственнаѧ лїтꙋргі́а вели́кагѡ васі́лїа. Вмѣ́стѡ же херꙋві́мскїѧ пѣ́сни пое́мъ тропа́рь се́й, на гла́съ ѕ҃, три́жды.

Ве́чери твоеѧ̀ та́йныѧ дне́сь, сн҃е бж҃їй, прича́стника мѧ̀ прїимѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ гдⷭ҇и во црⷭ҇твїи твое́мъ.

То́йже и҆ прича́стенъ, и҆ вмѣ́стѡ, Да и҆спо́лнѧтсѧ ᲂу҆ста̀ на̑ша то́йже пое́мъ мно́жицею, до́ндеже причастѧ́тсѧ бра́тїѧ бж҃е́ственныхъ та̑инъ. По заамвѡ́нной же мл҃твѣ быва́етъ ᲂу҆мове́нїе, и҆ є҆гѡ̀ послѣ́дованїе, ꙗ҆́коже ꙗ҆влѧ́етъ ᲂу҆ста́въ. Та́же дае́тсѧ а҆нті́дѡръ, и҆ ѿпꙋ́стъ. На трапе́зѣ же причаща́емсѧ вїна̀ и҆ є҆ле́а.