кафизма 5

каѳи́сма , є҃ . ѱл҃о́мъ дв҃дᲂвъ , л҃в .

Ра́дꙋйтесѧ пра́веднїи ѡ҆́ гдⷭ҇ѣ , пра́вымъ пᲂдᲂба́етъ пᲂхвала̀ . И҆спᲂвѣ́дайтесѧ гдⷭ҇ви въ гꙋ́слѣхъ , во ѱалты́ри десѧтᲂстрꙋ́ннѣмъ по́йте є҆мꙋ̀ . Вᲂспо́йте є҆мꙋ̀ пѣ́снь но́вꙋ . до́брѣ по́йте є҆мꙋ̀ со вᲂсклица́нїемъ . Ꙗ҆́кѡ пра́во сло́во гдⷭ҇не , и҆ всѧ̀ дѣ́ла є҆гѡ̀ въ вѣ́рѣ . Лю́битъ млⷭ҇тыню и҆ сꙋ́дъ гдⷭ҇ь , млⷭ҇ти гдⷭ҇нѧ и҆спо́лнь землѧ̀ . Слᲂвесе́мъ гдⷭ҇нимъ нб҃са̀ ᲂу҆тверди́шасѧ , и҆ дх҃ᲂмъ ᲂу҆́стъ є҆гѡ̀ всѧ̀ си́ла и҆́хъ . Сᲂбира́ѧ ꙗ҆́кѡ мѣ́хъ во́ды мᲂрскі́ѧ , пᲂлага́ѧ въ сᲂкро́вищихъ бе́здны . Да ᲂу҆бᲂи́т̾жесѧ гдⷭ҇а всѧ̀ землѧ̀ , ѿ  него́же пᲂд̾ви́жатсѧ всѝ живꙋ́щїи на вселе́ннѣй . Ꙗ҆́кѡ то́й речѐ , и҆ бы́ша . то́й пᲂвелѣ̀ , и҆ сᲂзда́шасѧ . Гдⷭ҇ь разᲂрѧ́етъ сᲂвѣ́ты ꙗ҆зы́кѡмъ , ѿмета́етъ же мы́сли лю́демъ , и҆ ѿмета́етъ сᲂвѣ́ты кнѧ́зь . Сᲂвѣ́тъ же гдⷭ҇нь во́ вѣки пребыва́етъ , пᲂмышле́нїѧ срⷣца є҆гѡ̀ в̾ ро́дъ и҆ ро́дъ . Бл҃же́нъ ꙗ҆зы́къ , є҆мꙋ́же є҆́сть гдⷭ҇ь бг҃ъ є҆гѡ̀ . лю́ди , ꙗ҆́же и҆з̾бра̀ в̾ дᲂстᲂѧ́нїе себѣ̀ . Съ нб҃сѐ призрѣ̀ гдⷭ҇ь ви́дѣ всѧ̀ сн҃ы чл҃ческїѧ . Съ гᲂто́вагѡ жили́ща свᲂегѡ̀ , призрѣ̀ на всѧ̀ живꙋ́щїѧ на землѝ . Сᲂзда́выи на  є҆ди́нѣ срⷣца̀ и҆́хъ , разꙋмѣва́ѧи на  всѧ̀ дѣ́ла и҆́хъ . Не спасе́тсѧ цр҃ь мно́гᲂю си́лᲂю , и҆ и҆спᲂли́нъ не  спасе́тсѧ мно́жествᲂмъ крѣ́пᲂсти свᲂеѧ̀ . Ло́жь ко́нь во спасе́нїе , во  мно́жествѣ же си́лы свᲂеѧ̀ не спасе́тсѧ . Сѐ ѻ҆́чи гдⷭ҇ни на бᲂѧ́щїѧсѧ є҆гѡ̀ , и҆ ᲂу҆пᲂва́ющїѧ на млⷭ҇ть є҆гѡ̀ . И҆зба́вити ѿ сме́рти дш҃а и҆́хъ , и҆ препита́ти и҆́хъ в̾ гла́дъ . Дш҃а́  же на́ша ча́етъ гдⷭ҇а , ꙗ҆́кѡ пᲂмо́щникъ и҆ защи́тникъ на́шъ є҆́сть . Ꙗ҆́кѡ ѡ҆  не́мъ вᲂз̾весели́тсѧ срⷣце на́ше , и҆ во́ и҆мѧ ст҃о́е є҆гѡ̀ ᲂу҆пᲂва́хᲂмъ . Бꙋ́ди гдⷭ҇и ми́лᲂсть твᲂѧ̀ на на́съ , ꙗ҆́кᲂже ᲂу҆пᲂва́хᲂмъ на тѧ̀ .

ѱл҃о́мъ дв҃дᲂвъ , л҃г .

Бл҃гᲂслᲂвлю̀ гдⷭ҇а на всѧ́ко вре́мѧ , вы́нꙋ хвала̀ є҆гѡ̀ во ᲂу҆стѣ́хъ мᲂи́хъ . Ѻ҆́ гдⷭ҇ѣ пᲂхва́литсѧ дш҃а мᲂѧ̀ , да ᲂу҆слы́шатъ кро́тцыи , и҆ вᲂз̾веселѧ́тсѧ . Вᲂз̾вели́чите гдⷭ҇а со мно́ю , и҆ вᲂз̾несе́мъ и҆́мѧ є҆гѡ̀ вкꙋ́пѣ . Взыска́хъ гдⷭ҇а , и҆ ᲂу҆слы́ша мѧ , и҆ ѿ  всѣ́хъ ско́рбїи мᲂи́хъ и҆зба́ви мѧ . Пристꙋпи́те къ немꙋ̀ , и҆ прᲂсвѣти́тесѧ , и҆ ли́ца ва́ша не пᲂстыдѧ́тсѧ . Сѐ ни́щїи вᲂзва̀ , и҆ гдⷭ҇ь ᲂу҆слы́ша и҆̀ , и҆ ѿ  всѣ́хъ ско́рбїи є҆гѡ̀ спасѐ и҆̀ . Ѡ҆пᲂлчи́тсѧ а҆́нг҃лъ гдⷭ҇нь ѻ҆́крестъ бᲂѧ́щихсѧ є҆гѡ̀ , и҆ и҆зба́витъ и҆́хъ . Вкꙋси́те , и҆ ви́дите , ꙗ҆́кѡ бл҃гъ гдⷭ҇ь . бл҃же́нъ мꙋ́жь и҆́же ᲂу҆пᲂва́етъ на́нь . Бо́йтесѧ гдⷭ҇а всѝ ст҃і́и є҆гѡ̀ , ꙗ҆́кѡ нѣ́сть лише́нїѧ бᲂѧ́щимсѧ є҆гѡ̀ . Бᲂга́тїи ѡ҆бнища́ша и҆ взалка́ша , взыска́ющїи же гдⷭ҇а не лиша́тсѧ всѧ́кᲂгѡ бл҃га . Прїидѣ́те ча́да пᲂслꙋ́шайте менѐ , стра́хꙋ гдⷭ҇ню наꙋчꙋ̀ ва́съ . Кто̀ є҆́сть чл҃къ хᲂтѧ́и живо́тъ , любѧ́и днѝ ви́дѣти бл҃ги ; Оу҆держѝ ꙗ҆зы́къ сво́й ѿ  ѕла̀ , и҆ ᲂу҆стнѣ̀ свᲂѝ є҆́же не гл҃ати льстѝ . Оу҆клᲂни́сѧ ѿ  ѕла̀ , и҆ сᲂтвᲂрѝ бл҃го . взыщѝ ми́ръ , и҆ пᲂженѝ и҆̀ . Ѻ҆́чи гдⷭ҇ни на пра́ведныѧ , и҆ ᲂу҆́ши є҆гѡ̀ въ мл҃твꙋ и҆́хъ . Лице́ же гдⷭ҇не на твᲂрѧ́щїѧ ѕла́ѧ , є҆́же пᲂтреби́ти ѿ  землѝ па́мѧть и҆́хъ . Вᲂз̾ва́ша пра́веднїи , и҆ гдⷭ҇ь ᲂу҆слы́ша и҆́хъ , и҆ ѿ  всѣ́хъ печа́лей и҆́хъ и҆зба́ви и҆́хъ . Бли́зъ гдⷭ҇ь сᲂкрꙋше́нныхъ срⷣцемъ , и҆ смире́нныѧ дх҃ᲂмъ спасе́тъ . Мно́ги ско́рби пра́веднымъ , и҆ ѿ  всѣ́хъ и҆́хъ и҆зба́витъ ѧ҆̀ гдⷭ҇ь . Храни́тъ гдⷭ҇ь всѧ̀ ко́сти и҆́хъ , и҆ ни є҆ди́на ѿ  ни́хъ сᲂкрꙋши́тсѧ . Сме́рть грѣ́шникѡмъ люта̀ , и҆ ненави́дѧщїи пра́веднагѡ прегрѣша́тъ . И҆зба́витъ гдⷭ҇ь дш҃а ра́бъ свᲂи́хъ , и҆ не прегрѣша́тъ всѝ ᲂу҆пᲂва́ющїи на́нь .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , л҃д .

Сꙋдѝ гдⷭ҇и ѡ҆би́дѧщїѧ мѧ̀ . вᲂз̾бранѝ бᲂрю́щїѧ мѧ̀ . Прїимѝ ѻ҆рꙋ́жїе и҆ щи́тъ , и҆ вᲂста́ни въ по́мᲂщь мᲂю̀ . И҆з̾сꙋ́ни ѻ҆рꙋ́жїе , и҆ заврѝ сᲂпрᲂти́въ гᲂнѧ́щихъ мѧ̀ . рцы̀ дш҃и мᲂе́й , спасе́нїе твᲂѐ є҆́смь а҆́зъ . Да пᲂстыдѧ́тсѧ и҆ пᲂсра́мѧтсѧ и҆́щꙋщїи дш҃ꙋ мᲂю̀ . да вᲂз̾вратѧ́тсѧ вспѧ́ть и҆ пᲂстыдѧ́тсѧ мы́слѧщїи мѝ ѕла́ѧ . Да бꙋ́дꙋтъ ꙗ҆́кѡ пра́хъ пред̾ лице́мъ вѣ́тра , и҆ а҆́нг҃лъ гдⷭ҇нь ѡ҆скᲂрблѧ́ѧ и҆́хъ . Бꙋ́ди пꙋ́ть и҆́хъ тма̀ и҆ по́лзᲂкъ , и҆ а҆́нг҃лъ гдⷭ҇нь пᲂгᲂнѧ́ѧ и҆́хъ . Ꙗ҆́кѡ в̾сꙋ́е скры́ша ми па́гꙋбꙋ сѣ́ти свᲂеѧ̀ , в̾сꙋ́е пᲂнᲂси́ша дш҃и мᲂе́й . Да прїи́детъ є҆мꙋ̀ сѣ́ть , ю҆́же не  свѣ́сть , и҆ лᲂви́тва ю҆́же скры̀ да  ѡ҆бъи́метъ и҆̀ , и҆ в̾ сѣ́ть да впаде́тсѧ в̾ ню̀ . Дш҃а́ же мᲂѧ̀ вᲂз̾ра́дꙋетсѧ ѡ҆́ гдⷭ҇ѣ , вᲂз̾весели́тсѧ ѡ҆ спасе́нїи є҆гѡ̀ . Всѧ̀ ко́сти мᲂѧ̀ рекꙋ́тъ гдⷭ҇и , гдⷭ҇и кто̀ пᲂдо́бенъ тебѣ̀ ; и҆збавлѧ́ѧи и҆з̾ рꙋ́къ крѣ́пльшихъ є҆гѡ̀ , и҆ ни́ща и҆ ᲂу҆бо́га ѿ расхища́ющихъ є҆гѡ̀ . Вᲂста́ша ми свидѣ́теле не пра́веднїи , ꙗ҆́же не вѣ́дѧхъ вᲂпрᲂша́хꙋ мѧ . Вᲂзда́ша ми лꙋка́ваѧ вᲂз̾блага́ѧ , и҆ без̾ча́дїе дш҃и мᲂе́й . А҆́зъ же внегда̀ ѻ҆нѝ стꙋжа́хꙋ ми , ѡ҆блача́хсѧ во вре́тище , и҆ смирѧ́хъ пᲂстѡ́мъ дш҃ꙋ мᲂю̀ , и҆ мл҃тва мᲂѧ̀ в̾ нѣ́дра мᲂѧ̀ вᲂз̾врати́тсѧ . Ꙗ҆́кѡ бли́жнемꙋ , ꙗ҆́кѡ бра́тꙋ на́шемꙋ , та́кѡ ᲂу҆гᲂжда́хъ . ꙗ҆́кѡ пла́ча и҆ сѣ́тꙋѧ , та́кѡ смирѧ́хсѧ . И҆ на мѧ̀ вᲂз̾весели́шасѧ и҆ сᲂбра́шасѧ , сᲂбра́шасѧ на мѧ̀ ра́ны , и҆ не чꙋ́хъ , раз̾дѣли́шасѧ , и҆ не ᲂу҆мили́шасѧ . И҆скꙋси́ша мѧ , пᲂд̾ража́ша  мѧ пᲂд̾ража́нїемъ , пᲂскрежета́ша на мѧ̀ зꙋбы̀ свᲂи́ми . Гдⷭ҇и , кᲂгда̀ ᲂу҆́зриши ; ᲂу҆стро́й дш҃ꙋ мᲂю̀ ѿ ѕлᲂдѣ́йства и҆́хъ , ѿ ле́въ є҆динᲂро́днꙋю мᲂю̀ . И҆спᲂвѣ́мсѧ тебѣ̀ в̾ цр҃кви мно́зѣ , в̾ лю́дехъ тѧ́жцѣхъ вᲂсхвалю́ тѧ . Да не вᲂз̾ра́дꙋютсѧ мѝ враждꙋ́ющїи мѝ без̾ пра́вды , ненави́дѧщїи мѧ̀ в̾сꙋ́е , и҆ пᲂмиза́ющїи ѻ҆чи́ма . Ꙗ҆́кѡ мнѣ̀ ᲂу҆́бѡ ми́рнѡ гл҃ахꙋ , и҆ на гнѣ́въ льстѝ пᲂмышлѧ́хꙋ . И҆ раз̾шири́ша на мѧ̀ ᲂу҆ста̀ свᲂѧ̀ , рѣ́ша , бл҃го  же бл҃го  же ви́дѣша ѻ҆́чи на́ши . Ви́дѣлъ є҆сѝ гдⷭ҇и , да не премᲂлчи́ши , гдⷭ҇и не  ѿстꙋпѝ ѿ менѐ . Вᲂста́ни гдⷭ҇и , и҆ вᲂнмѝ сꙋ́дъ мо́й . бж҃е мо́й и҆ гдⷭ҇и мо́й , на прю̀ мᲂю̀ . Сꙋди́ ми гдⷭ҇и по пра́вдѣ твᲂе́й , гдⷭ҇и бж҃е мо́й , и҆ да не пᲂра́дꙋют̾мисѧ . Да не рекꙋ́тъ въ сердцы́хъ свᲂи́хъ , бл҃го  же бл҃го  же дш҃и на́шей . Да не рекꙋ́тъ пᲂжре́мъ и҆̀ . да пᲂстыдѧ́тсѧ и҆ пᲂсра́мѧтсѧ вкꙋ́пѣ , ра́дꙋющїисѧ ѕлѡ́мъ мᲂи́мъ . да ѡ҆блекꙋ́тсѧ въ стꙋ́дъ и҆ сра́мъ велерѣ́чꙋющїи на мѧ̀ . Да вᲂз̾ра́дꙋютсѧ и҆ вᲂз̾веселѧ́тсѧ хᲂтѧ́щїи пра́вдѣ мᲂе́й , и҆ рекꙋ́тъ вы́нꙋ , да вᲂз̾вели́читсѧ гдⷭ҇ь , хᲂтѧ́щїи ми́ръ рабꙋ̀ є҆гѡ̀ . И҆ ꙗ҆зы́къ мо́й пᲂꙋчи́тсѧ пра́вдѣ твᲂе́й , ве́сь де́нь хвалѣ̀ твᲂе́й .

ѱл҃о́мъ дв҃дᲂвъ , л҃є .

Речѐ закᲂнᲂпрестꙋ́пныи сᲂгрѣша́ти въ себѣ̀ , нѣ́сть стра́ха бж҃їѧ пред̾ ѻ҆чи́ма є҆гѡ̀ . Ꙗ҆́кѡ ᲂу҆льстѝ пред̾ ни́мъ , ѡ҆брѣстѝ без̾зако́нїе свᲂѐ , и҆ вᲂз̾ненави́дѣти . Глаго́лы ᲂу҆́стъ є҆гѡ̀ без̾зако́нїе и҆ ле́сть , не вᲂсхᲂтѣ̀ разꙋмѣ́ти да  ᲂу҆блажи́тъ . Без̾зако́нїе пᲂмы́сли на ло́жи свᲂе́мъ , пред̾ста̀ всѧ́кᲂмꙋ пꙋтѝ небла́гꙋ , ѡ҆ ѕло́бѣ же не  негᲂдᲂва̀ . Гдⷭ҇и на́  нб҃си млⷭ҇ть твᲂѧ̀ , и҆ и҆́стина твᲂѧ̀ до ѻ҆́блакъ . Пра́вда твᲂѧ̀ ꙗ҆́кѡ го́ры бж҃їѧ , сꙋдьбы̀ твᲂѧ̀ бе́здна мно́га . Чл҃ки и҆ ско́ты спасе́ши гдⷭ҇и , ꙗ҆́кѡ ᲂу҆мно́жилъ є҆сѝ млⷭ҇ть твᲂю̀ бж҃е . сн҃ᲂве же чл҃честїи , въ кро́вѣ крилꙋ̀ твᲂе́ю надѣ́ютсѧ . Оу҆пїю́тсѧ ѿ ѻ҆би́лїѧ до́мꙋ твᲂегѡ̀ , и҆ пᲂто́кᲂмъ пи́щи твᲂеѧ̀ напᲂи́ши и҆́хъ . Ꙗ҆́кѡ ѿ  тебѐ є҆́сть и҆сто́чникъ живᲂта̀ , во́ свѣтѣ твᲂе́мъ ᲂу҆́зримъ свѣ́тъ . Прᲂба́ви млⷭ҇ть твᲂю̀ вѣ́дꙋщимъ тѧ̀ , и҆ пра́вдꙋ твᲂю̀ пра́вымъ срⷣцемъ . Да не прїи́детъ мнѣ̀ нᲂга̀ гᲂрды́ни , и҆ рꙋка̀ грѣ́шнича да не пᲂдви́житъ менѐ . Та́мѡ падо́ша всѝ дѣ́лающїи без̾зако́нїе , и҆зринᲂве́ни бы́ша , и҆ не мо́гꙋтъ ста́ти .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , л҃ѕ .

Неревнꙋ́й лꙋка́внꙋющимъ , нижѐ зави́ди твᲂрѧ́щимъ без̾зако́нїе . Занѐ ꙗ҆́кѡ трава̀ ско́рѡ и҆́з̾сшꙋтъ , и҆ ꙗ҆́кѡ ѕе́лїе ѕла́ка ско́рѡ ѿпадꙋ́тъ . Оу҆пᲂва́й на́  гдⷭ҇а и҆ твᲂрѝ бл҃гᲂсты́ню . и҆ населѝ зе́млю , и҆ ᲂу҆пасе́шисѧ въ бᲂга́тствѣ є҆ѧ̀ . Наслади́сѧ гдⷭ҇ви , и҆ да́стъ ти прᲂше́нїе срⷣца твᲂегѡ̀ . Ѿкры́й ко́ гдⷭ҇ꙋ пꙋ́ть тво́й , и҆ ᲂу҆пᲂва́й на́нь , и҆ то́й сᲂтвᲂри́тъ . И҆ и҆зведе́тъ ꙗ҆́кѡ свѣ́тъ пра́вдꙋ твᲂю̀ , и҆ сꙋдьбꙋ̀ твᲂю̀ ꙗ҆́кѡ пᲂлꙋ́дне . Пᲂвини́сѧ гдⷭ҇ви , и҆ ᲂу҆мᲂлѝ и҆̀ . не ревнꙋ́й спѣ́ющемꙋ пꙋте́мъ свᲂи́мъ , чл҃кꙋ твᲂрѧ́щемꙋ закᲂнᲂпрестꙋпле́нїе . Преста́ни ѿ́ гнѣва , и҆ ѡ҆ста́ви ꙗ҆́рᲂсть . не ревнꙋ́й , є҆́же лꙋка́внᲂвати . Ꙗ҆́кѡ лꙋка́внꙋющїи пᲂтребѧ́тсѧ , терпѧ́щїи  же гдⷭ҇а , ті́и наслѣ́дѧтъ зе́млю . И҆ є҆щѐ ма́лѡ , и҆ не бꙋ́детъ грѣ́шника , и҆ взы́щеши мѣ́ста є҆гѡ̀ , и҆ не ѡ҆брѧ́щеши . Пра́ведницы  же наслѣ́дѧтъ зе́млю , и҆ насладѧ́тсѧ ѡ҆ мно́жествѣ ми́ра . Назира́етъ грѣ́шныи пра́веднаго , и҆ пᲂскреже́щетъ на́нь зꙋбы̀ свᲂи́ми . Гдⷭ҇ь же пᲂсмѣе́тсѧ є҆мꙋ̀ , ꙗ҆́кѡ про́зритъ , ꙗ҆́кѡ прїи́де де́нь є҆гѡ̀ . Ѻ҆рꙋ́жїе и҆звлеко́ша грѣ́шницы , напрѧго́ша лꙋ́къ сво́й , сᲂстрѣлѧ́ти ᲂу҆бо́га и҆ ни́ща . закла́ти пра́выѧ срⷣцемъ . Ѻ҆рꙋ́жїе и҆́хъ вни́детъ въ срⷣца̀ и҆́хъ , и҆ лꙋ́цы и҆́хъ сᲂкрꙋша́тсѧ . Лꙋ́чше ма́лѡ пра́ведникꙋ , па́че бᲂга́тства грѣ́шныхъ мно́га . Ꙗ҆́кѡ мы́шцы грѣ́шныхъ сᲂкрꙋша́тсѧ , ᲂу҆твержа́етъ  же пра́ведныѧ гдⷭ҇ь . Свѣ́сть гдⷭ҇ь пꙋтѝ непᲂро́чныхъ , и҆ дᲂстᲂѧ́нїе и҆́хъ в̾ вѣ́къ бꙋ́детъ . Не пᲂстыдѧ́тсѧ во́ времѧ лю́то , и҆ во́ днехъ гла́да насы́тѧтсѧ , ꙗ҆́кѡ грѣ́шницы пᲂги́бнꙋтъ . Врази́ же гдⷭ҇ни , кꙋ́пнѡ прᲂсла́витисѧ и҆́мъ и҆ вᲂз̾нести́сѧ , и҆счеза́юще ꙗ҆́кѡ ды́мъ и҆счезо́ша . Зае́млетъ грѣ́шныи , и҆ не вᲂзвраща́етъ , пра́ведныи  же ще́дритъ и҆ дае́тъ . Ꙗ҆́кѡ бл҃гᲂслᲂвѧ́щїи є҆гѡ̀ наслѣ́дѧтъ зе́млю , кленꙋ́щїи  же є҆гѡ̀ пᲂтребѧ́тсѧ . Ѿ ́гдⷭ҇а стᲂпы̀ чл҃кꙋ и҆спра́вѧтсѧ , и҆ пꙋтѝ є҆гѡ̀ вᲂсхо́щетъ ѕѣлѡ̀ . Є҆гда́ сѧ паде́тъ , не разбїе́тсѧ , ꙗ҆́кѡ гдⷭ҇ь пᲂд̾крѣплѧ́етъ рꙋ́кꙋ є҆гѡ̀ . Ю҆нѣ́йшїи бы́хъ , и҆́бо сᲂстарѣ́хсѧ , и҆ не ви́дѣхъ пра́ведника ѡ҆ста́влена , нижѐ сѣ́мене є҆гѡ̀ прᲂсѧ́ща хлѣ́бы . Ве́сь де́нь ми́лꙋетъ , и҆ взаи́мъ дае́тъ пра́ведныи , и҆ сѣ́мѧ є҆гѡ̀ во бл҃гᲂслᲂве́нїи бꙋ́детъ . Оу҆клᲂни́сѧ ѿ ѕла̀ , и҆ сᲂтвᲂрѝ бл҃го , и҆ всели́сѧ в̾ вѣ́къ вѣ́ка . Ꙗ҆́кѡ гдⷭ҇ь лю́битъ сꙋ́дъ , и҆ не ѡ҆ста́витъ прпⷣбныхъ свᲂи́хъ , во́ вѣки сᲂхранѧ́тсѧ . без̾зако́нницы же и҆з̾женꙋ́тсѧ , и҆ сѣ́мѧ нечести́выхъ пᲂтреби́тсѧ . Пра́ведницы  же наслѣ́дѧтъ зе́млю , и҆ вселѧ́тсѧ въ  вѣ́къ вѣ́ка на не́й . Оу҆ста̀ пра́веднагѡ пᲂꙋча́тсѧ премꙋ́дрᲂсти , и҆ ꙗ҆зы́къ є҆гѡ̀ вᲂз̾гл҃етъ сꙋ́дъ . Зако́нъ бг҃а є҆гѡ̀ въ срⷣцы є҆гѡ̀ , и҆ не за́пнꙋтсѧ стᲂпы̀ є҆гѡ̀ . Сматрѧ́етъ грѣ́шныи пра́веднагѡ , и҆ и҆́щетъ є҆́же ᲂу҆мертви́ти є҆гѡ̀ . Гдⷭ҇ь же не ѡ҆ста́витъ є҆гѡ̀ въ рꙋкꙋ̀ є҆гѡ̀ , нижѐ ѡ҆сꙋ́дитъ є҆гѡ̀ , є҆гда̀ сꙋ́дитъ є҆мꙋ̀ . Пᲂтерпѝ гдⷭ҇а , и҆ сᲂхранѝ пꙋтѝ є҆гѡ̀ , и҆ вᲂз̾несе́тъ  тѧ є҆́же наслѣ́дити зе́млю . внегда̀ пᲂтреблѧ́тисѧ грѣ́шникѡмъ ᲂу҆́зриши . Ви́дѣхъ нечести́ваго превᲂз̾нᲂсѧ́щасѧ , и҆ вы́сѧщасѧ ꙗ҆́кѡ ке́дры лива́нскїѧ . И҆ ми́мѡ и҆до́хъ , и҆ сѐ не бѣ̀ , и҆ взыска́хъ є҆гѡ̀ , и҆ не ѡ҆брѣ́тесѧ мѣ́сто є҆гѡ̀ . Хранѝ неѕло́бїе , и҆ ви́ждь пра́вᲂтꙋ , ꙗ҆́кѡ є҆́сть ѡ҆ста́нᲂкъ чл҃кꙋ ми́рнꙋ . Без̾зако́нницы же пᲂтребѧ́тсѧ вкꙋ́пѣ , ѡ҆ста́нцы же нечести́выхъ пᲂтребѧ́тсѧ . Спасе́нїе же пра́веднымъ ѿ́ гдⷭ҇а , и҆ защи́титель и҆́мъ є҆́сть во́ времѧ ско́рби . И҆ пᲂмо́жетъ и҆́мъ гдⷭ҇ь , и҆ и҆зба́витъ и҆́хъ , и҆ и҆з̾ме́тъ и҆́хъ ѿ грѣ́шникъ , и҆ спасе́тъ и҆́хъ , ꙗ҆́кѡ ᲂу҆пᲂва́ша на́нь .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

<< Previous

Contents

Next >>