[глⷡ҇а м҃г] Ѡ҆ домꙋ̀ ѻ҆со́бномъ.

До́мъ же є҆ди́нъ, ре́кше ке́ллїа ᲂу҆стро́ена на рꙋкодѣ́лїе собра́нїѧ ра́ди, до́лжно є҆́сть быва́ти, и҆ въ не́й собира́тисѧ: но є҆́же дѣ́лати вкꙋ́пѣ, є҆ли̑ка ѿ рꙋкодѣ́лїѧ подоба́етъ, по ᲂу҆ста́вꙋ ѻ҆бщежи́тельныхъ завѣща́нїй. Є҆ди́номꙋ же ѿ бра́тїи свидѣ́тельствованꙋ въ добродѣ́тели, подоба́етъ предстоѧ́ти же и҆ наставлѧ́ти: и҆ ѻ҆вогда̀ ᲂу҆́бѡ честѝ бра́тїѧмъ дѣ́лающымъ, ѻ҆вогда́ же смотрѧ́ти и҆ воспреща́ти и҆̀мъ, во є҆́же ᲂу҆молчава́ти и҆̀мъ ѿ всѧ́кагѡ праздносло́вїѧ. но и҆ сті́хъ начина́ти и҆̀мъ: пото́мъ же и҆ прѡ́чаѧ, ѻ҆вогда́ же и҆ дѣ́лати съ ни́ми и҆ про́стѡ рещѝ, и҆ внѣ̀ на рабо́тꙋ, и҆ внꙋ́трь на рꙋкодѣ́лїе, то́й да быва́етъ назира́ѧ и҆ наставлѧ́ѧ и҆́хъ. Та́кожде и҆ безкни̑жныѧ ᲂу҆чи́ти бж҃е́ствєннымъ писа́нїємъ. Та́кожде є҆гда̀ нѣ́сть тꙋ̀ настоѧ́й, подоба́етъ бы́ти вмѣ́стѡ є҆гѡ̀ и҆ въ дх҃о́вныхъ, а҆́ще дово́ленъ є҆́сть. А҆́ще же нѝ, понѐ въ тѣле́сныхъ довлѣ́етъ: да є҆́сть и҆ во ѻ҆бои́хъ дѣ́йствꙋѧ и҆ слꙋжѧ̀, настоѧ́щагѡ же зако́нномꙋ ра́зꙋмꙋ, и҆ бж҃е́ствєннымъ писа́нїємъ послѣ́довати, до́ндеже ви́дитъ настоѧ́тель такова́го дово́льна сꙋ́ща къ слꙋже́нїємъ. Є҆гда́ же ᲂу҆вѣ́сть и҆звѣ́стнѡ, и҆́стиною и҆ стра́хомъ бж҃їимъ, тогѡ̀ настоѧ́й, недово́льна сꙋ́ща къ слꙋже́нїємъ, и҆лѝ не дѣ́йствꙋюща, ꙗ҆́коже бл҃гоꙋго́дно є҆́сть бг҃ꙋ, подоба́етъ ѡ҆ставлѧ́ти є҆го̀, и҆ и҆на́го въ негѡ̀ мѣ́сто поставлѧ́ти, а҆́ще и҆́мать. а҆́ще ли нѣ́сть кто̀ на сїѐ дово́ленъ, да ѡ҆ста́витсѧ слꙋже́нїе, до́ндеже ѡ҆брѧ́щетсѧ досто́инъ кто̀ къ слꙋже́нїю томꙋ̀.