[глⷡ҇а м҃ѕ] Ѡ҆ больни́цѣ и҆ страннопрїи́мствѣ,

и҆ ѡ҆ ста́рыхъ и҆ больны́хъ.

Подоба́етъ и҆гꙋ́менꙋ тща́тисѧ больны̑мъ на врачевство̀, и҆лѝ въ монастырѣ̀ живꙋ́щымъ, и҆лѝ странноприше́дшымъ, въ тѧ́жкихъ недꙋ́зѣхъ ско́рагѡ просѧ́щымъ и҆сцѣле́нїѧ. А҆́ще прїи́детъ кто̀, а҆́бїе недꙋ́жнаго призира́ти, и҆ подава́ти є҆мꙋ̀ здра́вїе: а҆́ще ли нерадѣ́ти на́чнетъ, вели́ка є҆́сть бѣда̀. но врачє́мъ ᲂу҆́бѡ въ монастырѣ̀, ꙗ҆́коже рече́но є҆́сть, бы́ти, и҆ потща́тисѧ: ᲂу҆стро́ити же є҆мꙋ̀ пла́стырь и҆ ма́сло, и҆ и҆́но є҆́же подоба́етъ ᲂу҆гото́вати на тѣ́хъ и҆зда́нїе ѿ храни́тельника подае́мое, да кто̀ въ тре́бованїи тѣ́хъ бꙋ́детъ. повели́тъ же и҆гꙋ́менъ храни́тельникꙋ всѧ́ко потре́бное дарова́ти: пре́жде кꙋпи́ти, и҆ полага́ти ме́дъ, и҆ грꙋзи́ти ѕе́лїе сꙋше́ное, вїно̀, сли̑вы, смѡ́квы, є҆ли́кѡ вра́чеви ᲂу҆го́дно. є҆ли́ки же сꙋ́ть въ монастырѣ̀ мона́хи, и҆лѝ бѣльцы̀, недꙋ́гомъ ѡ҆держи́ми бꙋ́дꙋтъ, всѧ̑ ᲂу҆́бѡ ѕє́лїѧ подава́ти и҆̀мъ: и҆гꙋ́менꙋ же ᲂу҆́бѡ нача́стѣ приходи́ти къ ни̑мъ, и҆ промышлѧ́ти ѡ҆ больны́хъ, по враче́вской во́ли, и҆ потрє́бнаѧ да повелѣва́етъ даѧ́ти. Вра́чеве же все́ю хи́тростїю подви́гшесѧ, крѣ́пость и҆ здра́вїе стра́ждꙋщымъ да подава́ютъ. А҆́ще ли кто̀ стра́ненъ и҆ бездо́мокъ въ гости́нницꙋ прїи́детъ, недꙋ́гомъ ѡ҆держи́мь, и҆́же съ недꙋ́жными, ѿ и҆гꙋ́мена и҆ ѿ врача̀ да полꙋчи́тъ поко́й во все́мъ: и҆ повели́тъ пребыва́ти въ недꙋ́жномъ хра́мѣ, до́ндеже ᲂу҆страби́тсѧ: и҆ тогда̀ потре́бное на пꙋ́ть ѿ и҆гꙋ́мена съ мл҃твою прїи́мъ да ѿпꙋще́нъ бꙋ́детъ. Ста̑рымъ же, и҆ всѧ́кїѧ по́мощи не и҆мꙋ́щымъ, повелѣва́етъ тре́бованныхъ наслади́тисѧ, и҆ ѻ҆дры̀ тѣ̑мъ равночи́слены поставлѧ́ти на поко́й и҆̀мъ: ѿ ни́хже ста́рецъ да є҆́млетъ на всѧ́къ де́нь потрє́бнаѧ и҆̀мъ.