Четверто́къ , вᲂзнесе́нїѧ . в̾ сре́дꙋ , ве́черъ , на ма́лѣй вече́рни . блгⷭ҇ви́вшꙋ , і҆єре́ю , гл҃емъ , трист҃о́е , и҆ про́чее по ѡ҆бы́чаю . а҆ =цр҃ю нбⷭ҇ныи , негл҃емъ , на всѣ́хъ слꙋ́жбахъ , и҆ до недѣ́ли пѧтьдесѧ́тныѧ ст҃а́гѡ дх҃а . =на гдⷭ҇и вᲂзва́хъ , стихѣ́ры , на д҃ , гла́съ , а҃ . поⷣ . нбⷭ҇нымъ чино́мъ .= Ты̀ чл҃кѡмъ сꙋщество̀ сᲂста́вилъ є҆сѝ ,꙳ сᲂбо́ю ѡ҆бнᲂвѝ всѧ́ческаѧ ,꙳ и҆ пло́тїю вᲂзнесе́сѧ .꙳ сѣ́де на высᲂтѣ̀ сло́ве бж҃їи ѡ҆деснꙋ́ю рᲂди́телѧ .꙳ тѣ́мже и҆ па́ки тѧ всѝ ,꙳ сꙋдїю̀ вѣ́рнымъ и҆ невѣ́рнымъ ча́емъ . =двⷤа . А҆пⷭ҇лѡмъ хрⷭ҇то́вымъ вᲂпїѧ́хꙋ а҆́нг҃ли ,꙳ мꙋ́жїе что̀ зритѐ ,꙳ вᲂсхᲂдѧ́щаго гᲂрѣ̀ хрⷭ҇та̀ жизнᲂда́вца ,꙳ та́кᲂже прїи́детъ сꙋди́ти всѣ́мъ ,꙳ и҆́же всѣ́мъ сы́и гдⷭ҇ь .꙳ и҆ всѣ́мъ вᲂзда́стъ пᲂ= =дᲂстᲂѧ́нїю сᲂдѣ́ѧннаѧ и҆́ми . Вᲂзнесе́нїемъ твᲂи́мъ сп҃се ѡ҆зари́вшїѧсѧ чл҃кᲂлю́бче ,꙳ без̾сме́ртныѧ и҆ бжⷭ҇твеныѧ спᲂдо́билъ є҆сѝ сла́вы ,꙳ и҆ свᲂи́мъ вᲂзнесе́нїемъ ,꙳ стра́шнымъ и҆ ᲂу҆жа́снымъ дᲂлгᲂтерпѣли́ве ,꙳ ѡ҆зарѝ срⷣца̀ твᲂи́мъ прᲂсвѣще́нїемъ ,꙳ и҆ на́мъ вᲂспѣва́ющимъ тѧ .

сла́ва , и҆ ны́нѣ . гла́съ , є҃ . Прїиди́те вѣ́рныхъ сᲂвᲂкꙋпле́нїѧ , ᲂу҆мы̀ та́йнѡ наꙋчи́вшесѧ ᲂу҆чени́къ хрⷭ҇то́вѣхъ , непреста́ннѡ пѣ́нїе рце́мъ на є҆леѡ́нѣ , ꙗ҆́кᲂже и҆ а҆пⷭ҇ли с̾ дв҃дᲂмъ вᲂзᲂпїе́мъ . взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣ . да и҆зба́витъ племена̀ чл҃ча ѿ сᲂбла́знъ вра́жїихъ , и҆ прᲂсвѣти́тъ дш҃а на́ша .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ .= Ч=ꙋ́до нᲂвᲂлѣ́пнѡ ,꙳ чл҃ческᲂе бо сꙋщество̀ ,꙳ на нб҃са̀ вᲂзнесе́сѧ ,꙳ сᲂвᲂкꙋпи́всѧ сло́вꙋ ꙳ бж҃їю вседержи́телю .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Вᲂсїѧ̀ свѣ́тлыи ,꙳ и҆ пресвѣ́тлыи де́нь ,꙳ влⷣчнᲂмꙋ бжⷭ҇твенᲂмꙋ вᲂсхо́дꙋ ꙳ и҆́же къ нб҃се́мъ ,꙳ прᲂсвѣща́ющи всѧ́ческаѧ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Ꙗ҆́кᲂже ᲂу҆ченико́мъ ꙳ пᲂсла́лъ є҆сѝ всеще́дре ꙳ сра́сленыи тво́й дх҃ъ ,꙳ и҆ лю́демъ твᲂи́мъ низ̾пᲂслѝ ꙳ хрⷭ҇тѐ сп҃се бл҃гᲂда́ть твᲂю̀ .

сла́ва , и҆ ны́нѣ . гла́съ , и҆ поⷣ , то́йже . Хвалꙋ̀ бг҃ᲂпᲂдо́бнꙋ ꙳ со а҆пⷭ҇лы бцⷣа ꙳ вᲂспѣва́етъ ,꙳ гдⷭ҇а зрѧ́щи ꙳ на ѻ҆́блацѣхъ нᲂси́ма .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Вᲂзнесе́сѧ во сла́вѣ хрⷭ҇тѐ бж҃е на́шъ , ра́дᲂсть сᲂтвᲂри́въ ᲂу҆ченико́мъ свᲂи́мъ , ѡ҆бѣтᲂва́нїемъ ст҃а́гѡ дх҃а . и҆звѣще́нїе прїе́мше ꙗ҆́вѣ бл҃гᲂслᲂве́нїѧ ра́ди , ꙗ҆́кѡ ты̀ є҆сѝ сн҃ъ бж҃їи и҆зба́витель ми́рꙋ . є҆ктенїѧ̀ ма́лаѧ .= и҆ =ѿпꙋ́стъ .

На па́вечерницѣ , по дᲂсто́йнѣ , кᲂнда́къ пра́здникꙋ . и҆ про́чее ѡ҆бы́чно .

НА ВЕЛИ́ЦѢЙ ВЕЧЕ́РНИ

нестихᲂлᲂгисꙋ́емъ но по вече́рнѣмъ , ѱалмѣ̀ , пᲂе́мъ , гдⷭ҇и вᲂзва́хъ , на́ гласъ , ѕ҃ . и҆ пᲂста́вимъ , стихо́въ , і҃ . и҆ пᲂе́мъ стихѣ́ры , гла́съ , ѕ҃ . Гдⷭ҇ь вᲂзнесе́сѧ на нб҃са̀ , да по́слетъ ᲂу҆тѣ́шителѧ ми́рꙋ . нб҃са̀ ᲂу҆гᲂто́ваша прⷭ҇то́лъ є҆гѡ̀ , ѻ҆́блацы вᲂсхᲂжде́нїе є҆гѡ̀ . а҆́нг҃ли дивѧ́тсѧ , чл҃ка зрѧ́ще превы́ше себѐ . ѻ҆ц҃ъ бо жде́тъ , є҆го́же в̾ нѣ́дрѣхъ и҆́мать с̾сᲂбо́ю прⷭ҇нᲂсꙋ́щна . дх҃ъ же прест҃ы́и , вели́тъ всѣ́мъ а҆́нг҃лѡмъ є҆гѡ̀ , вᲂзми́те врата̀ кнѧ́зи ва́ши . всѝ ꙗ҆зы́цы вᲂсплещи́те рꙋка́ми , ꙗ҆́кѡ взы́де хрⷭ҇то́съ , и҆дѣ́же бѣ̀ и҆ пе́рвѣе .= двⷤа .=

Гдⷭ҇и твᲂемꙋ̀ вᲂзнесе́нїю , ᲂу҆диви́шасѧ херꙋви́ми , зрѧ́ще тебѐ бг҃а на ѻ҆́блацѣхъ вᲂсхᲂдѧ́ща , и҆ на ни́хъ сѣдѧ́щаго . сла́вимъ тѧ , ꙗ҆́кѡ бл҃га млⷭ҇ть твᲂѧ̀ , сла́ва тебѣ̀ . двⷤа .

На гᲂра́хъ ст҃ы́хъ , зрѧ́ще твᲂѐ вᲂзнесе́нїе хрⷭ҇тѐ , сїѧ́нїе сла́вы ѻ҆́ч҃и , пᲂе́мъ тво́й свѣтᲂѡбра́зныи лица̀ зра́къ , кла́нѧемсѧ страсте́мъ твᲂи́мъ [пᲂкло́н̾] . пᲂчита́емъ вᲂскрⷭ҇нїе , и҆ сла́внᲂе вᲂзнесе́нїе сла́вѧще , пᲂми́лꙋй на́съ .= двⷤа .=

Гдⷭ҇и , а҆пⷭ҇ли ꙗ҆́кѡ ви́дѣша тѧ на ѻ҆́блацѣхъ вᲂзнᲂси́ма жизнᲂда́вче хрⷭ҇тѐ , рыда́нїемъ сле́зъ , и҆ ско́рби и҆спᲂлнѧ́еми рыда́юще гл҃ахꙋ , влⷣко неѡ҆ста́ви на́съ си́рыхъ , и҆́хже за милᲂсе́рдїе вᲂз̾люби́лъ є҆сѝ рабы̀ свᲂѧ̀ , ꙗ҆́кѡ бл҃гᲂꙋтро́бенъ . но пᲂслѝ ꙗ҆́кᲂже ѡ҆бѣща́лъ є҆сѝ на́мъ прест҃ы́и тво́й дх҃ъ , прᲂсвѣща́ющь дш҃а на́ша .= двⷤа .=

Гдⷭ҇и , смᲂтре́нїѧ сᲂверши́въ та́инство , пᲂи́мъ свᲂѧ̀ ᲂу҆ченикѝ на́ гᲂрꙋ є҆леѡ́нскꙋю , вᲂзнᲂша́шесѧ . и҆ сѐ тве́рдь нбⷭ҇нꙋю про́йде , менѐ ра́ди ѡ҆бнища́въ замѧ̀ . и҆ вᲂзше́дъ ѿ ню́дꙋ же не ѿлꙋчи́сѧ . всест҃ы́и тво́й дх҃ъ пᲂслѝ , прᲂсвѣща́ющь дш҃а на́ша .= двⷤа . сла́ва , и҆ нн҃ѣ . гла́съ , то́йже . Н=ѣ́дръ ѻ҆те́ческихъ не ѿлꙋ́чсѧ , сла́дкїи і҆с҃е , и҆ со земны́ми ꙗ҆́кѡ чл҃къ пᲂживѐ . дне́сь ѿ гᲂры̀ є҆леѡ́нскїѧ вᲂзнесе́сѧ во сла́вѣ . и҆ па́дшее є҆стество̀ на́ше млⷭ҇тивнѡ вᲂзне́съ , со ѻ҆ц҃е́мъ пᲂсади́лъ є҆сѝ . тѣ́мже нбⷭ҇нїи беспло́тнїи чи́нᲂве , чꙋдесѝ ᲂу҆дивлѧ́ющесѧ , ᲂу҆жаса́хꙋсѧ стра́хᲂмъ , и҆ тре́петᲂмъ ѡ҆держи́ми , твᲂѐ чл҃кᲂлю́бїе велича́хꙋ . с̾ ни́ми же и҆ мы̀ зе́мнїи , є҆́же к̾ на́мъ твᲂѐ сᲂше́ствїе , и҆ є҆́же ѿ на́съ вᲂзнесе́нїе , бл҃гᲂдарѧ́ще мо́лимсѧ гл҃юще , и҆́же ᲂу҆ченикѝ , и҆ ро́ждьшꙋю тѧ бцⷣꙋ , ра́дᲂсти без̾чи́сленныѧ и҆спо́лнивыи во твᲂѐ вᲂзнесе́нїе , и҆ на́съ спᲂдо́би , и҆збра́нныхъ твᲂи́хъ ра́дᲂсти мл҃твами и҆́хъ , вели́кїѧ ра́ди твᲂеѧ̀ млⷭ҇ти .

та́же , вы́хᲂдъ : свѣ́тѣ ти́хїи . прᲂки́мен̾ , дню̀ .

ѿ прᲂро́чества и҆са́їина , чте́нїе .

Та́кѡ гл҃етъ гдⷭ҇ь , бꙋ́детъ в̾ пᲂслѣ́днїѧ днѝ , ꙗ҆вле́на гᲂра̀ гдⷭ҇нѧ , и҆ до́мъ бж҃їи на кра́ехъ го́ръ , и҆ превᲂзнесе́тсѧ превы́ше хᲂлмо́въ . и҆ прїи́дꙋтъ наню̀ всѝ ꙗ҆зы́цы , и҆ по́йдꙋтъ лю́дїе мно́зи , и҆ рекꙋ́тъ , прїидѣ́те да взы́демъ на́ гᲂрꙋ гдⷭ҇ню , и҆ в̾ до́мъ бг҃а і҆а́кѡвлѧ , и҆ вᲂзвѣсти́тъ нᲂга́мъ пꙋ́ть сво́й , и҆ по́йдемъ по немꙋ̀ .

ѿ прᲂро́чества и҆са́їина , чте́нїе .

Та́кѡ гл҃етъ гдⷭ҇ь , и҆ди́те вни́дете враты̀ мᲂи́ми , ᲂу҆гᲂто́вите пꙋ́ть , и҆ пꙋ́ть сᲂтвᲂри́те лю́демъ мᲂи́мъ . и҆ ка́менїе є҆́же на пꙋтѝ размещи́те . и҆ вᲂз̾дви́гните зна́менїе и҆ страны̀ , се́бо гдⷭ҇ь слы́шано сᲂтвᲂрѝ да́же до пᲂслѣ́днихъ кᲂнца̀ землѝ . рцѣ́те дще́ри сїѡ́нᲂвѣ , сѐ спаси́тель тво́й прїи́детъ и҆мѣ́ѧ мздꙋ̀ свᲂю̀ с̾ сᲂбо́ю , и҆ дѣ́ло свᲂѐ пред̾ лице́мъ свᲂи́мъ . и҆ прᲂзᲂве́тъ ѧ҆̀ себѣ̀ лю́ди ст҃ы , и҆зба́влены ѡ҆́ гдⷭ҇ѣ се́мъ , ты́же нарече́шисѧ взы́сканъ гра́дъ , и҆ неѡ҆ста́вленъ ; кто̀ се́й прише́дыи ѿ є҆де́ма , и҆ ѡ҆червлены̀ ри́зы є҆гѡ̀ ѿ вᲂсо́ра . се́й красе́нъ во ѻ҆де́жи свᲂе́й , и҆ вᲂпїе́тъ крѣ́пᲂстїю ве́лїею . а҆́зъ гл҃ѧи пра́вдꙋ , и҆ сꙋ́дъ спасе́нїѧ ; и҆ пᲂчто́ ти ѡ҆червлены̀ ри́зы , и҆спо́лнены пра́нїѧ . а҆́зъ тᲂчи́ло и҆стᲂпта́хъ є҆ди́нъ , и҆ ѿ ꙗ҆зы́къ нѣ́сть мꙋ́жъ со мно́ю . ми́лᲂсть гдⷭ҇ню пᲂмѧнꙋ́хъ , хвалꙋ̀ гдⷭ҇ню ѡ҆ всѣ́хъ , и҆́хже на́мъ вᲂздава́етъ . гдⷭ҇ь сꙋдїѧ̀ бл҃гъ до́мꙋ і҆и҃левꙋ , ѿдае́тъ на́мъ по ми́лᲂсти свᲂе́й , и҆ по мно́жествꙋ пра́вды свᲂеѧ̀ . и҆ речѐ , ᲂу҆́бѡ лю́дїе мᲂѝ сꙋ́ть ча́да , небꙋ́дꙋтъ ѿве́ржени . и҆ бы́сть и҆́мъ во спасе́нїе ѿ всѣ́хъ ско́рбей и҆́хъ . ни хᲂда́тай ни а҆́нг҃лъ , но са́мъ гдⷭ҇ь спасѐ и҆́хъ , за є҆́же лю́битъ и҆́хъ и҆ щади́тъ и҆́хъ . са́мъ и҆зба́ви и҆́хъ и҆ вᲂспрїѧ́тъ и҆́хъ , и҆ вᲂзнесѐ и҆́хъ во всѧ̀ днѝ вѣ́ка .

ѿ прᲂро́чества заха́рїина , чте́нїе .

Та́кѡ гл҃етъ гдⷭ҇ь , сѐ де́нь грѧде́тъ гдⷭ҇нь . и҆ ста́нꙋтъ но́зѣ є҆гѡ̀ въ де́нь ѻ҆́нъ , на гᲂрѣ̀ є҆леѡ́нстѣй , ꙗ҆́же є҆́сть прѧ́мѡ і҆єрⷭ҇ли́мꙋ на вᲂсто́къ сл҃нца . и҆ въ де́нь ѻ҆́нъ и҆зы́детъ вᲂда̀ жива̀ и҆з̾ і҆єрⷭ҇ли́ма , по́лъ є҆ѧ̀ в̾ мо́ре пе́рвᲂе , и҆ по́лъ є҆ѧ̀ в̾ мо́ре пᲂслѣ́днее , в̾ жа́твꙋ и҆ в̾ ве́снꙋ бꙋ́детъ та́кѡ . и҆ бꙋ́детъ гдⷭ҇ь цр҃ь по все́й землѝ . въ де́нь ѻ҆́нъ бꙋ́детъ гдⷭ҇ь є҆ди́нъ , и҆ и҆́мѧ є҆гѡ̀ є҆ди́но ѡ҆крꙋжа́ѧ всю̀ зе́млю и҆ пꙋсты́ни , ѿ гаваѡ́на и҆ да́же до реммѡ́на , на ю҆́гъ прᲂти́вꙋ хребта̀ і҆єрⷭ҇ли́мꙋ . и҆ вᲂзнесе́тсѧ на мѣ́стѣ , и҆ пребꙋ́детъ ѿ вра́тъ венїами́нѡвѣхъ , да́же до мѣ́ста вра́тъ пе́рвыхъ , и҆ да́же до вра́тъ ᲂу҆го́льныхъ . и҆ да́же до стᲂлпа̀ а҆наме́йлева , и҆ да́же до пᲂд̾тᲂчи́лїй цр҃е́вѣхъ , и҆ ѡ҆бита́ютъ в̾ не́мъ . и҆ а҆наѳе́ма небꙋ́детъ к̾ тᲂмꙋ̀ . и҆ вселѧ́тсѧ і҆єрⷭ҇ли́мъ надѣ́ющїисѧ .

На литі́и , стⷯры . гла́съ , а҃ . Вᲂз̾ше́дъ на нб҃са̀ ѿ ню́дꙋ же и҆ сни́де , да не ѡ҆ста́виши на́съ си́ры гдⷭ҇и , да прїи́детъ тво́й дх҃ъ , нᲂсѧ̀ смире́нїе ми́рꙋ . пᲂкажѝ сынᲂво́мъ чл҃ческимъ , дѣ́ла си́лы твᲂеѧ̀ гдⷭ҇и чл҃кᲂлю́бче . Взы́де хрⷭ҇тѐ къ без̾нача́льнᲂмꙋ ѻ҆ц҃ꙋ свᲂемꙋ̀ , и҆́же не ѡ҆пи́санныхъ є҆гѡ̀ нѣ́дръ не ѿлꙋчи́выисѧ . тѣ́мъ и҆ прило́гъ си́лы хвали́ти трⷪ҇цꙋ всѝ вᲂспрїѧ́ша , є҆ди́нᲂгѡ тѧ сн҃а и҆ по вᲂчл҃ченїи пᲂзна́ша гдⷭ҇и , є҆динᲂро́дна ѻ҆ц҃ꙋ . по мно́жествꙋ щедро́тъ твᲂи́хъ пᲂми́лꙋй на́съ . А҆́нг҃ли твᲂѝ гдⷭ҇и а҆пⷭ҇лѡмъ гл҃ахꙋ , мꙋ́жїе галиле́йстїи , что̀ стᲂитѐ зрѧ́ще на́ небо ; се́й є҆́сть хрⷭ҇то́съ бг҃ъ вᲂзнесы́исѧ ѿ ва́съ на́ небо . та́кѡ прїи́детъ па́ки , и҆́мже ѻ҆́бразᲂмъ ви́дѣсте є҆гѡ̀ и҆дꙋ́ща на́ небо . слꙋжи́те є҆мꙋ̀ в̾ прпⷣбїи и҆ пра́вдѣ .

гла́съ , д҃ . Є҆гда̀ прише́лъ є҆сѝ на́ гᲂрꙋ хрⷭ҇тѐ є҆леѡ́нскꙋю , ѻ҆́ч҃ее сᲂверши́ти бл҃гᲂвᲂле́нїе , ᲂу҆жасо́шасѧ нбⷭ҇нїи а҆́нг҃ли , и҆ ᲂу҆страши́шасѧ преи҆спо́днїи . пред̾стᲂѧ́хꙋ же ᲂу҆ченицы̀ с̾ ра́дᲂстїю тре́петни , ꙗ҆́кᲂже гл҃аше и҆́мъ . прⷭ҇то́лъ же ᲂу҆́бѡ гᲂто́влѧшесѧ прᲂти́вꙋ ѻ҆́блакъ ѡ҆жида́ѧ . враты́ же нб҃о ѿве́рзши дᲂбро́тѣ дивѧ́тсѧ . и҆ землѧ̀ та́йнаѧ ѿкрыва́етъ , ꙗ҆́кѡ пᲂзна́ти , а҆да́мᲂво схᲂжде́нїе и҆ є҆́же па́ки вᲂсхᲂжде́нїе , но стᲂпы̀ ᲂу҆́бѡ вᲂз̾выша́хꙋсѧ крѣ́пкѡ , ᲂу҆ста́ же вельмѝ бл҃гᲂслᲂвѧ́хꙋ , ꙗ҆́кᲂже слы́шашесѧ . ѻ҆́блакъ пᲂд̾є́млѧше , нб҃о внꙋ́трь тебѐ прїѧ́тъ . дѣ́ло сѐ гдⷭ҇и є҆́же сᲂдѣ́лалъ є҆сѝ , вели́ко и҆ пресла́вно , на спасе́нїе дш҃а́мъ на́шимъ . Низ̾ше́дшее є҆стество̀ а҆да́мᲂво , в̾ до́льнѣйшїѧ страны̀ землѝ , бж҃е прїедини́въ к̾ себѣ̀ , да сᲂтвᲂри́ши є҆̀ превы́ше всѧ́кᲂгѡ нача́ла и҆ вла́сти . и҆ вᲂзве́лъ є҆сѝ дне́сь , ꙗ҆́кѡ вᲂз̾люби́въ ᲂу҆́бѡ сᲂвᲂкꙋпи́лъ є҆сѝ себѣ̀ . и҆ ꙗ҆́кѡ сᲂвᲂкꙋпи́въ спᲂстрада̀ ꙗ҆́кѡ без̾стра́стенъ , спᲂстрада́въ же и҆ прᲂсла́вилъ є҆сѝ , но беспло́тнїи гл҃ахꙋ , кто̀ є҆́сть се́й кра́сныи ꙗ҆́кѡ мꙋ́жъ , но не ꙗ҆́кѡ чл҃къ то́чїю , бг҃ъ же и҆ чл҃къ ѻ҆бᲂѐ ꙗ҆влѧ́ѧ , є҆́же сᲂвᲂкꙋпле́нᲂе ви́димо . тѣ́мже ᲂу҆дивле́ни а҆́нг҃ли , во ѡ҆де́ждахъ лета́хꙋ ѻ҆́крестъ а҆пⷭ҇лъ , дрꙋзі́и же стᲂѧ́ще вᲂпїѧ́хꙋ , мꙋ́жїе галиле́йстїи , ꙗ҆́кѡ и҆́мже ѻ҆́бразᲂмъ и҆́детъ ѿ ва́съ і҆с҃ъ , чл҃къ бг҃ъ . бг҃ъ же и҆ чл҃къ па́ки прїи́детъ , сꙋди́ти живы́мъ и҆ ме́ртвымъ . вѣ́рнымъ же да́рꙋѧ , грѣхо́въ прᲂще́нїе и҆ ве́лїю млⷭ҇ть . Є҆гда̀ вᲂзнесе́сѧ во сла́вѣ хрⷭ҇тѐ бж҃е , ᲂу҆ченико́мъ зрѧ́щимъ ѻ҆́блацы пᲂд̾и҆ма́хꙋ тѧ с̾ пло́тїю , врата́ же взѧ́шасѧ нбⷭ҇наѧ вᲂз̾ше́ствїемъ ти . ли́ци же а҆́нг҃льстїи ра́дᲂвахꙋсѧ с̾ весе́лїемъ . го́рнїѧ си́лы зᲂвѧ́хꙋ гл҃юще , вᲂз̾ми́те врата̀ кн҃зи ва́ша , и҆ вни́детъ цр҃ь сла́вы . ᲂу҆ченицы́ же дивѧ́щесѧ гл҃ахꙋ , неразлꙋчи́сѧ ѿ на́съ па́стырю до́брыи , но пᲂслѝ на́мъ дх҃ъ тво́й прест҃ы́и , наставлѧ́ющъ и҆ прᲂсвѣща́ющъ , и҆ ᲂу҆твержа́ющъ и҆ ѡ҆сщ҃а́ющъ дш҃а на́ша .

сла́ва , и҆ нн҃ѣ . гла́съ , д҃ . Гдⷭ҇и , та́инство є҆́же ѿ́ вѣка сᲂкрᲂве́ннᲂе и҆ ѿ рᲂдо́въ , и҆спо́лнивъ ꙗ҆́кѡ бл҃гъ , прїи́де со ᲂу҆ченикѝ свᲂи́ми на́ гᲂрꙋ є҆леѡ́нскꙋю , и҆мѣ́ѧ ро́ждьшꙋю тѧ твᲂрца̀ всѣ́хъ и҆ сᲂдѣ́телѧ . и҆́же бо при стрⷭ҇ти твᲂе́й мт҃рьски па́че всѣ́хъ бᲂлѣ́знᲂвавшей . пᲂдᲂба́ше бо и҆ сла́вᲂю пло́ти твᲂе́й , премно́гᲂй наслади́тисѧ ра́дᲂсти . є҆ѧ́же и҆ мы̀ причасти́вшесѧ , є҆́же на нб҃са̀ вᲂсхо́да твᲂегѡ̀ влⷣко , вели́кꙋю твᲂю̀ млⷭ҇ть , ю҆́же на на́съ бы́вшꙋю сла́вимъ .

На стихо́внѣ , стⷯры . гла́съ , в҃ . Рᲂди́сѧ ꙗ҆́кѡ са́мъ вᲂсхᲂтѣ̀ , ꙗ҆ви́лсѧ є҆сѝ , ꙗ҆́кѡ са́мъ и҆зво́ли , пᲂстрада̀ пло́тїю бж҃е на́шъ . и҆з̾ ме́ртвыхъ вᲂскр҃се , пᲂпра́въ сме́рть . вᲂз̾несе́сѧ во сла́вѣ , и҆́же всѧ́ческаѧ и҆спᲂлнѧ́ѧи . и҆ пᲂсла́лъ є҆сѝ на́мъ дх҃ъ бжⷭ҇твеныи , во є҆́же вᲂспѣва́ти и҆ сла́вити твᲂѐ бжⷭ҇тво̀ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Вᲂзнᲂсѧ́щасѧ тебѐ хрⷭ҇тѐ ѿ гᲂры̀ є҆леѡ́нстѣй си́лы зрѧ́ще , дрꙋ́гъ дрꙋ́гꙋ вᲂпїѧ́хꙋ , кто̀ се́й є҆́сть ; и҆ речѐ к̾ ни́мъ , се́й є҆́сть держа́вныи и҆ си́льныи . се́й є҆́сть си́льныи во бранѣ́хъ , се́й є҆́сть вᲂи́стинꙋ цр҃ь сла́вы . и҆ пᲂчто̀ є҆мꙋ̀ червлены̀ ри́зы ; и҆з̾ вᲂсо́ра прихо́дитъ , є҆́же є҆́сть ѿ́ плᲂти . са́мъ же ꙗ҆́кѡ бг҃ъ ѡ҆деснꙋ́ю сѣ́де вели́чествїѧ , пᲂсла́лъ є҆́сть на́мъ дх҃ъ ст҃ы́и , наста́вити и҆ прᲂсвѣти́ти дш҃а на́ша .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Вᲂзнесе́сѧ во сла́вѣ , на гᲂрѣ̀ є҆леѡ́нстѣй хрⷭ҇тѐ бж҃е пред̾ свᲂи́ми ᲂу҆ченикѝ , и҆ сѣ́де ѡ҆деснꙋ́ю ѻ҆ц҃а , и҆́же всѧ́ческаѧ и҆спᲂлнѧ́ѧи бжⷭ҇тво́мъ . и҆ пᲂсла́лъ є҆́сть на́мъ дх҃ъ прест҃ы́и , прᲂсвѣща́ѧ и҆ ᲂу҆твержа́ѧ , и҆ ѡ҆сщ҃а́ѧ дш҃а на́ша .

сла́ва , и҆ ны́нѣ . гла́съ , ѕ҃ . Взы́де бг҃ъ въ вᲂскликнᲂве́нїи , гдⷭ҇ь во́ гласѣ трꙋ́бнѣ . є҆́же вᲂзнестѝ па́дшїи ѻ҆́бразъ а҆да́мᲂвъ , и҆ пᲂсла́ти дх҃а ᲂу҆тѣ́шителѧ , ѡ҆ст҃и́ти дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Вᲂзнесе́сѧ во сла́вѣ хрⷭ҇тѐ бж҃е на́шъ , ра́дᲂсть сᲂтвᲂри́въ ᲂу҆ченико́мъ свᲂи́мъ , ѡ҆бѣтᲂва́нїемъ ст҃а́гѡ дх҃а . и҆звѣще́нїе прїе́мше ꙗ҆́вѣ бл҃гᲂслᲂве́нїѧ ра́ди , ꙗ҆́кѡ ты̀ є҆сѝ сн҃ъ бж҃їи и҆зба́витель ми́рꙋ .= три́жды .=

Въ четверто́къ , вᲂзнесе́нїѧ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды .

По а҃ , стихᲂло́гїи , сѣда́ленъ . гла́съ , а҃ . А҆́нг҃лѡмъ дивѧ́щимсѧ вᲂсхо́дꙋ стра́ннᲂмꙋ , и҆ ᲂу҆ченико́мъ ᲂу҆жаса́ющимсѧ стра́шнᲂмꙋ взы́тїю , взы́де бо с̾пло́тїю хрⷭ҇тѐ , и҆ врата̀ тебѣ̀ взѧ́шасѧ сп҃се . сегѡ̀ ра́ди си́лы небе́сныѧ дивлѧ́хꙋсѧ вᲂпїю́ще , сла́ва схᲂжде́нїю твᲂемꙋ̀ , сла́ва вᲂзнесе́нїю твᲂемꙋ̀ , сла́ва смᲂтре́нїю твᲂемꙋ̀ , є҆ди́не чл҃кᲂлю́бче . сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , г҃ . Первᲂвѣ́чныи бг҃ъ и҆ без̾нача́льныи , є҆́же вᲂспрїѧ́тъ є҆стество̀ чл҃ческᲂе , ѡ҆бᲂжи́въ та́йнѡ дне́сь вᲂзнесѐ . а҆́нг҃ли предѝ текꙋ́ще , а҆пⷭ҇лѡмъ пᲂказᲂва́хꙋ , семꙋ̀ пред̾и҆дꙋ́щꙋ на нб҃са̀ со сла́вᲂю мно́гᲂю . тᲂмꙋ́же пᲂклᲂни́вшесѧ гл҃ахꙋ , сла́ва бг҃ꙋ вᲂзне́сшемꙋсѧ . сла́ва , и҆ ны́нѣ , то́йже .

По пᲂлїєлеѡ́сѣ , сѣда́ленъ . гла́съ , и҃ . На́ гᲂрꙋ вᲂз̾ше́дъ є҆леѡ́нскꙋю млⷭ҇тиве гдⷭ҇и , ѿ ню́дꙋ же и҆ взѧ́тсѧ , свѣ́телъ бо ѻ҆́блакъ ѿ землѝ тѧ̀ пᲂдъѧ́тъ . зрѧ́щимъ ᲂу҆ченико́мъ твᲂи́мъ чꙋ́до ᲂу҆́жаснѡ . вᲂпїю́щимъ беспло́тнымъ на́ нб҃сѣхъ , со́ страхᲂмъ врата̀ вᲂз̾ми́те , вы́шнимъ во́инствᲂмъ . с̾ ни́ми же тѧ̀ цр҃ѧ пᲂе́тъ всѧ̀ тва́рь всѣ́хъ бг҃а . сла́ва , и҆ ны́нѣ , то́йже .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣ . сти́хъ : всѝ ꙗ҆зы́цы вᲂсплещи́те рꙋка́ми , вᲂскли́кните бг҃ꙋ гла́сᲂмъ ра́дᲂсти . всѧ́ко дыха́нїе . є҆ѵⷢ҇а́лїе , ѿ =ма́рка . заⷱ҇ , ѻ҃а . та́же : В=ᲂскрⷭ҇нїе хрⷭ҇то́во ви́дѣвше .

ѱало́мъ , н҃ . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стⷯра . гла́съ , ѕ҃ . Дне́съ на́ нб҃сѣхъ го́рнїѧ си́лы , на́ше є҆стество̀ зрѧ́ще дивѧ́тсѧ , стра́ннагѡ ѻ҆́браза вᲂсхо́дꙋ , недᲂꙋмѣ́ѧхꙋсѧ дрꙋ́гъ ко́ дрꙋгꙋ гл҃юще , кто̀ се́й прише́дыи ; ви́дѧще же свᲂегѡ̀ влⷣкꙋ , нбⷭ҇наѧ врата̀ взѧ́ти пᲂвелѣва́хꙋ . с̾ ни́ми же непреста́ннѡ вᲂспѣва́емъ , и҆́же с̾ пло́тїю ѿ ню́дꙋ па́ки грѧдꙋ́щаго , ꙗ҆́кѡ сꙋдїю̀ всѣ́хъ , и҆ бг҃а всеси́льна .

і҆єре́й , гл҃етъ : спасѝ бж҃е лю́ди . пᲂе́мъ : Гдⷭ҇и пᲂми́лꙋй , ві҃ . і҆єре́й : ми́лᲂстїю и҆ щедро́тами .

Кано́нъ , твᲂре́нїе , ки́ръ і҆ѡа́нна . и҆рмо́съ , по два́жды . трᲂпарѝ , на́ ѕ҃ . гла́съ , є҃ . пѣ́снь , а҃ . і҆рмо́съ . Спаси́телю бг҃ꙋ , въ мо́ри лю́ди немо́крыми стᲂпа́ми наста́вльшꙋ , и҆ фараѡ́на съ вѡ́и пᲂто́пльшꙋ , тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ . запѣ́въ : Сла́ва гдⷭ҇и вᲂзнесе́нїю твᲂемꙋ̀ . Вᲂспᲂе́мъ всѝ лю́дїе и҆́же на ра́мꙋ херꙋви́мскꙋ , вᲂзне́сшꙋсѧ со сла́вᲂю хрⷭ҇тꙋ̀ , и҆ спᲂсади́вшꙋ на́съ ѡ҆деснꙋ́ю ѻ҆ц҃а , пѣ́снь пᲂбѣ́днꙋю ꙗ҆́кѡ прᲂсла́висѧ . Хᲂда́таѧ бг҃ꙋ и҆ чл҃кѡмъ хрⷭ҇та̀ , ли́цы а҆́нг҃льстїи ви́дѣвше съ пло́тїю в̾ вы́шнихъ , ᲂу҆дивлѧ́хꙋсѧ , сᲂгла́снѡ же вᲂспѣва́хꙋ , пѣ́нїе пᲂбѣ́днᲂе , ꙗ҆́кѡ прᲂсла́висѧ .

дрꙋгі́и , кано́нъ . и҆рмо́съ , по два́жды . трᲂпарѝ , на́ ѕ҃ . є҆мꙋ́же краегране́сїе , по а҆́зъ вѣ́ди . во ѻ҆смо́й же , и҆ девѧ́тᲂй , пѣ́сни , і҆ѡ́сифᲂво .

гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ . запѣ́в̾ : Сла́ва гдⷭ҇и вᲂзнесе́нїю твᲂемꙋ̀ . Вᲂскр҃се тридне́венъ , и҆́же по є҆стествꙋ̀ без̾сме́ртныи , ꙗ҆ви́лсѧ є҆сѝ є҆динᲂна́десѧтимъ и҆ всѣ́мъ ᲂу҆ченико́мъ , и҆ вᲂстечѐ хрⷭ҇тѐ ко ѻ҆ц҃ꙋ ѻ҆́блакᲂмъ нᲂси́мь , и҆́же всѣ́мъ цр҃ь . Вᲂпїе́тъ ꙗ҆́вственѡ , пᲂѧ̀ дв҃дъ бг҃ᲂдᲂхнᲂве́нныи , взы́де гдⷭ҇ь к̾ нбⷭ҇нымъ , в̾ вᲂскликнᲂве́нїи трꙋбы̀ шꙋ́ма , и҆ к̾ первᲂсвѣто́внꙋ ѻ҆ц҃ꙋ дᲂсти́гъ . сла́ва . Сᲂста́рѣвшїисѧ гдⷭ҇и ми́ръ мно́гими грѣхѝ , ѡ҆бнᲂви́въ стрⷭ҇тїю свᲂе́ю , и҆ вᲂста́нїемъ свᲂи́мъ , взы́де нᲂси́мь ѻ҆́блакᲂмъ къ нбⷭ҇нымъ , сла́ва си́лѣ твᲂе́й . и҆ ны́нѣ , боⷢ҇ . Влⷣкꙋ рᲂдила̀ є҆сѝ всѣ́хъ , всенепᲂро́чнаѧ влⷣчце , и҆́же стра́сть во́льнꙋю прїе́мшаго , и҆ вᲂз̾ше́дша к̾ свᲂемꙋ̀ ѻ҆ц҃ꙋ , є҆го́же не ѡ҆ста́ви , а҆́ще и҆ пло́ть взѧ́тъ .

катава́сїѧ : Бжⷭ҇твенымъ пᲂкрᲂве́нъ бы́въ медленнᲂѧзы́чныи мра́кᲂмъ , и҆звѣ́ствᲂва бг҃ᲂпи́санныи зако́нъ . ти́нꙋ бо ѿрѧсѐ , ѻ҆чесѐ разꙋ́мнагѡ . ви́дитъ сꙋ́щагѡ , и҆ гада́етъ дх҃ᲂмъ . ра́зꙋмъ хвалѧ̀ бжⷭ҇твенными пѣ́сньми .

пѣ́снь , г҃ . і҆рмо́съ . Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , ꙗ҆́кѡ пѣ́ти и҆ сла́вити , спаси́тельнᲂе твᲂѐ вᲂзнесе́нїе . Вᲂз̾ше́дъ жизнᲂда́вче хрⷭ҇тѐ ко ѻ҆ц҃ꙋ , и҆ вᲂзне́слъ є҆сѝ ро́дъ на́шъ чл҃кᲂлю́бче , неи҆зрече́ннымъ бл҃гᲂꙋтро́бїемъ свᲂи́мъ . Чи́ни а҆́нг҃льстїи , чл҃ческᲂе є҆стество̀ ви́дѣвше сп҃се сᲂвᲂсхᲂди́мо , тебѐ непреста́ннѡ ᲂу҆дивлѧ́еми сла́влѧхꙋ . Оу҆жаса́хꙋсѧ а҆́нг҃льстїи ли́цы хрⷭ҇тѐ , зрѧ́ще тѧ с̾ тѣлесе́мъ вᲂзне́сшасѧ , и҆ вᲂспѣва́хꙋ ст҃о́е твᲂѐ вᲂзнесе́нїе .

и҆́нъ , і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Вᲂзми́те врата̀ нбⷭ҇наѧ , сѐ прїи́де хрⷭ҇то́съ цр҃ь тва́ри , в̾ тѣ́ло ѡ҆бо́лксѧ зе́млено , го́рнѣйшимъ глаго́лахꙋ си́ламъ до́льнѣйшїи . Взыска́въ хрⷭ҇тѐ прельще́наго , пре́лестїю ѕмі́евᲂю а҆да́ма , ꙗ҆́кѡ всегѡ̀ ѡ҆бо́лксѧ , и҆ вᲂз̾ше́дъ и҆ сѣ́лъ є҆сѝ ѡ҆деснꙋ́ю , ꙗ҆́кѡ сᲂпресто́ленъ ѻ҆ц҃ꙋ , пᲂю́щимъ а҆́нг҃лѡмъ тебѐ . сла́ва . Землѧ̀ пра́зднꙋетъ и҆ ликꙋ́етъ , ра́дꙋетсѧ и҆ не́бо , вᲂзнесе́нїемъ дне́сь твᲂрца̀ тва́ри , и҆́же предъѧвле́нѡ сᲂеди́нившагѡ раз̾стᲂѧ́щаѧ хᲂтѣ́нїемъ . и҆ ны́нѣ , боⷢ҇ . Сме́рти рᲂди́вши разрꙋши́телѧ , є҆ди́наго без̾сме́ртнаго бг҃а , дв҃о мт҃и всечи́стаѧ . тᲂго̀ при́снѡ ᲂу҆мᲂлѝ , ᲂу҆мерщвлѧ́ющїѧ мѧ стрⷭ҇ти ᲂу҆мᲂри́ти , и҆ спасти́ мѧ . катава́сїѧ : Разве́рзе ᲂу҆тро́бꙋ неча́дѧщꙋю дѣте́й , хꙋлꙋ́ же ѕлꙋ̀ прїе́млемꙋ , бл҃гᲂча́дѧщїѧ є҆ди́на мл҃тва прᲂро́чицы дре́вле а҆́нны , нᲂсѧ́щи дх҃ъ сᲂкрꙋше́нъ , к̾ си́льнᲂмꙋ бг҃ꙋ ра́зꙋмᲂмъ .

сѣда́ленъ . гла́съ , и҃ . Всѣ́де на ѻ҆́блаки нбⷭ҇ныѧ , ѡ҆ста́вивъ ми́ръ сꙋ́щимъ на землѝ , взы́де и҆ сѣ́де ѡ҆деснꙋ́ю ѻ҆ц҃а , ꙗ҆́кѡ є҆динᲂсꙋ́щенъ семꙋ̀ сы́и и҆ дх҃ꙋ . а҆́ще бо и҆ пло́тїю ꙗ҆ви́сѧ , но непрело́женъ пре́былъ є҆сѝ . тѣ́мъ же и҆ ча́емъ сᲂверше́нїю кᲂнца̀ , ѿтꙋ́дꙋ грѧдꙋ́ща сꙋди́ти всѧ́ческимъ . тᲂгда̀ правᲂсꙋ́де гдⷭ҇и пᲂщадѝ дш҃а на́ша , и҆ сᲂгрѣше́нїемъ ѡ҆ставле́нїе да́рꙋй ꙗ҆́кѡ бг҃ъ млⷭ҇тивъ рабо́мъ свᲂи́мъ . сла́ва , и҆ нн҃ѣ , то́йже .

пѣ́снь , д҃ . і҆рмо́съ . Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ вᲂзᲂпи́хъ , сла́ва си́лѣ твᲂе́й гдⷭ҇и . Вᲂзнесы́исѧ во сла́вѣ , и҆́же а҆́нг҃лѡмъ цр҃ю ᲂу҆тѣ́шителѧ на́мъ ѿ ѻ҆ц҃а пᲂслѝ . тѣ́мже вᲂпїе́мъ ти , сла́ва си́лѣ твᲂе́й гдⷭ҇и . Ꙗ҆́кѡ взы́де сп҃съ ко ѻ҆ц҃ꙋ съ пло́тїю , ᲂу҆диви́шасѧ є҆мꙋ̀ а҆́нг҃льскаѧ во́инства , и҆ вᲂзᲂпи́ша , сла́ва си́лѣ твᲂе́й гдⷭ҇и . Го́рнїѧ си́лы к̾ го́рнѣйшимъ вᲂпїѧ́хꙋ , врата̀ вᲂзми́те , хрⷭ҇тꙋ̀ на́шемꙋ цр҃ю . є҆го́же вᲂспѣва́емъ вкꙋ́пѣ со ѻ҆ц҃е́мъ и҆ дх҃ᲂмъ .

и҆́нъ , і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й .

с҃ъ жизнᲂда́вецъ прїе́мъ и҆́хже вᲂзлюбѝ , на є҆леѡ́нскꙋю го́рꙋ вᲂсхо́дитъ , и҆ си́хъ бл҃гᲂслᲂви́въ , и҆ ѻ҆́блакᲂмъ нᲂси́мь , ѻ҆́ч҃аѧ нѣ́дра дᲂсти́же , ꙗ҆́же ника́кᲂже ѡ҆ста́ви . Ми́ръ ве́сь пра́зднꙋетъ , ви́димыи и҆ неви́димыи , въ ра́дᲂсти а҆́нг҃ли ликꙋ́ютъ , и҆ чл҃цы славᲂсло́вѧтъ непреста́ннѡ вᲂзнесе́нїе , и҆́же пло́тїю сᲂеди́нившагᲂсѧ на́мъ бл҃гᲂстїю . сла́ва . Разрꙋши́въ держа́вꙋ сме́рти , ꙗ҆́кѡ без̾сме́ртныи гдⷭ҇ь , без̾сме́ртїе всѣ́мъ дарᲂва́лъ є҆сѝ чл҃кᲂлю́бче , и҆ вᲂзнесе́сѧ во сла́вѣ , зрѧ́щимъ тѧ честны́мъ ᲂу҆ченико́мъ і҆с҃е всеси́льне . и҆ ны́нѣ , боⷢ҇ . Бл҃же́нно чре́во твᲂѐ всенепᲂро́чнаѧ влⷣчце , и҆́же бо чре́во а҆́дᲂво пресла́внѡ и҆стᲂщи́вшаго , несказа́ннѡ вмѣсти́ти спᲂдо́бисѧ . є҆го́же мᲂлѝ спастѝ на́съ пᲂю́щихъ тѧ . катава́сїѧ : Цр҃ь цр҃е́мъ , а҆́ки и҆ ста̀ кᲂго́же є҆ди́нъ сло́во прᲂизше́дъ , и҆з̾ ѻ҆ц҃а вино́внагѡ . равнᲂси́льнагѡ твᲂегѡ̀ дх҃а , а҆пⷭ҇лѡмъ и҆́стиннѡ вᲂз̾сїѧ̀ , ꙗ҆́кѡ бл҃гᲂда́тель пᲂю́щимъ , сла́ва держа́вѣ твᲂе́й гдⷭ҇и .

пѣ́снь , є҃ . і҆рмо́съ . Оу҆́треннююще вᲂпїе́мъ ти гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . А҆́нг҃льскїѧ си́лы , взе́млема тебѐ ви́дѣвше , врата̀ взыва́хꙋ цр҃ю на́шемꙋ вᲂзми́те . И҆спо́лнивъ весе́лїѧ всѧ́ческаѧ млⷭ҇тиве , к̾ го́рнимъ си́ламъ с̾ пло́тїю прише́лъ є҆сѝ . А҆пⷭ҇ли ви́дѣвше вᲂз̾выша́ема сп҃са , с̾ тре́петᲂмъ взыва́хꙋ цр҃ю на́шемꙋ сла́ва тебѣ̀ .

и҆́нъ , і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеискꙋси́маѧ дв҃це , прїѧ́тъ во ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Оу҆мертви́въ сме́рть свᲂе́ю сме́ртїю гдⷭ҇и , взе́мъ и҆́хже вᲂз̾люби́лъ є҆сѝ , вᲂз̾ше́дъ на є҆леѡ́нскꙋю го́рꙋ ст҃ꙋ́ю , и҆ ѿтꙋ́дꙋ вᲂстечѐ хрⷭ҇тѐ къ свᲂемꙋ̀ рᲂди́телю , ѻ҆́блакᲂмъ нᲂси́мь . Стра́нно твᲂѐ ржⷭ҇тво̀ хрⷭ҇тѐ и҆ вᲂскрⷭ҇нїе , стра́нно и҆ стра́шно твᲂѐ жизнᲂда́вче , є҆́же ѿ гᲂры̀ бжⷭ҇твенᲂе вᲂзнесе́нїе , є҆́же и҆з̾ѡбразꙋ́ѧ и҆лїѧ̀ четверᲂко́ннᲂю кᲂлесни́цею вᲂсхᲂжа́ше , вᲂспѣва́ѧ тѧ чл҃кᲂлю́бче . сла́ва . Зрѧ́щимъ а҆пⷭ҇лѡмъ вѣща́хꙋ а҆́нг҃ли , мꙋ́жїе галиле́йстїи что̀ чꙋдите́сѧ вᲂзнесе́нїю живᲂда́вца хрⷭ҇та̀ ; та́кѡ прїи́детъ па́ки на́ землю , сꙋди́ти ми́рꙋ всемꙋ̀ , ꙗ҆́кѡ сꙋдїѧ̀ пра́ведныи . и҆ ны́нѣ , боⷢ҇ . Дв҃ꙋ сᲂхрани́въ тѧ по ржⷭ҇твѣ̀ нетлѣ́ннꙋ . вᲂсхо́дитъ хрⷭ҇то́съ ко ѻ҆ц҃ꙋ бг҃ᲂрᲂди́тельнице , є҆го́же не ѡ҆ста́ви , а҆́ще и҆ пло́ть прїѧ́тъ и҆з̾ тебѐ , ᲂу҆́мнꙋ же и҆ ѡ҆дш҃евле́нꙋ , за ми́лᲂсть неи҆з̾гл҃аннꙋю . катава́сїѧ : И҆збавле́нїе и҆ ѡ҆чище́нїе грѣхо́въ , ѻ҆гнедꙋхнᲂве́ннꙋю прїими́те дх҃о́внꙋю ро́сꙋ , ѽ ча́да свѣтᲂѡбра́знаѧ цр҃ко́внаѧ , ны́нѣ ѿ сїѡ́на бо и҆зы́де зако́нъ . ꙗ҆зы́къ свѣтᲂѡбра́знаѧ , дх҃а бл҃гᲂда́ть .

пѣ́снь , ѕ҃ . і҆рмо́съ . Ѡ҆бы́де мѧ бе́здна , гро́бъ же ми ки́тъ бы́сть . а҆́зъ же вᲂзᲂпи́хъ к̾ тебѣ̀ чл҃кᲂлю́бче , и҆ спасе́ мѧ десни́ца твᲂѧ̀ гдⷭ҇и . Взыгра́шасѧ а҆пⷭ҇ли , зрѧ́ще на высᲂтꙋ̀ дне́сь зижди́телѧ вᲂзнᲂси́ма , ᲂу҆пᲂва́нїемъ дх҃а , и҆ со́страхᲂмъ зᲂвѧ́хꙋ , сла́ва вᲂсхо́дꙋ твᲂемꙋ̀ . Ꙗ҆́кѡ ви́дѣша тѧ сп҃се на́шъ вы́шнїѧ си́лы , на высᲂтꙋ̀ взе́млема с̾ тѣ́лᲂмъ , взыва́хꙋ глаго́люще вели́ко влⷣко чл҃кᲂлю́бїе твᲂѐ . Пред̾ста́ша а҆́нг҃ли , вᲂпїю́ще хрⷭ҇тѐ ᲂу҆ченико́мъ твᲂи́мъ , и҆́мже ѻ҆́бразᲂмъ ви́дѣсте хрⷭ҇та̀ вᲂсхᲂдѧ́ща с̾ пло́тїю , па́ки , прїи́детъ пра́веденъ и҆́же всѣ́мъ сꙋдїѧ̀ .

и҆́нъ , і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднество , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Да ка́плютъ на́мъ свы́ше ѻ҆́блацы весе́лїе вѣ́чно , хрⷭ҇то́съ бо , ѻ҆́блакᲂмъ ꙗ҆́кѡ херꙋви́мы нᲂси́мь , к̾ свᲂемꙋ̀ ѻ҆ц҃ꙋ вᲂсхо́дитъ дне́сь . Пло́ти ꙗ҆ви́сѧ пᲂдо́бїемъ , и҆́же пре́же раз̾стᲂѧ́щїѧсѧ со́бралъ є҆сѝ во є҆ди́но чл҃кᲂлю́бче , и҆ вᲂзнесе́сѧ ще́дре въ нбⷭ҇наѧ , зрѧ́щимъ тѧ ᲂу҆ченико́мъ . сла́ва . Что̀ червлены̀ ри́зы пло́ти сᲂеди́нившемꙋсѧ , ст҃і́и а҆́нг҃ли хрⷭ҇та̀ зрѧ́ще вѣща́хꙋ , стра́сти честны́ѧ , бжⷭ҇твеныѧ нᲂсѧ́ща ѻ҆́бразы . и҆ ны́нѣ , боⷢ҇ . Пᲂе́мъ ѻ҆трᲂкᲂви́це твᲂѐ зача́тїе , пᲂе́мъ твᲂѐ неи҆зрече́ннᲂе ржⷭ҇тво̀ , и҆́мже и҆зба́вихᲂмсѧ чи́стаѧ тлѝ и҆ ѡ҆ѕлᲂбле́нїѧ , и҆ тѧ́жкагѡ а҆́дᲂва затвᲂре́нїѧ . катава́сїѧ : Ѡ҆чище́нїе на́мъ хрⷭ҇тѐ и҆ спасе́нїе , влⷣко вᲂз̾сїѧ̀ ѿ дв҃ы . да ꙗ҆́кѡ пррⷪ҇ка ѿ ѕвѣ́рѧ мᲂрска́гѡ , ѿ пе́рсей і҆ѡ́нꙋ , ѿ тлѝ и҆схи́ти , всегѡ̀ а҆да́ма всеро́дна па́дшагѡ .

кᲂнда́къ . гла́съ , ѕ҃ . Є҆́же ѡ҆ на́съ сᲂверши́въ смᲂтре́нїе , и҆ ꙗ҆́же на землѝ сᲂєдини́въ съ нбⷭ҇ными , вᲂзнесе́сѧ во сла́вѣ хрⷭ҇тѐ бж҃е на́шъ , и҆ ника́кᲂже ѿлꙋча́ѧсѧ , но пребыва́ѧ неѿстꙋ́пнѡ , и҆ вᲂпїѧ̀ лю́бѧщимъ тѧ , а҆́зъ є҆́смь с̾ ва́ми , и҆ никто́же на вы̀ . и҆́кᲂсъ . И҆́же земна́ѧ на землѝ ѡ҆ста́вивше , и҆ пе́пельныхъ пе́рсти ᲂу҆стꙋпа́юще , прїиди́те вᲂспрѧ́немъ , и҆ на высᲂтꙋ̀ вᲂз̾веде́мъ ѻ҆́чи и҆ ра́зꙋмы , впери́мъ ви́ды въ кꙋ́пѣ и҆ чꙋ́вства . на нбⷭ҇наѧ врата̀ сме́ртнїи , непщꙋ́емъ бы́ти на є҆леѡ́нстѣй гᲂрѣ̀ , и҆ взира́ти ко и҆збавлѧ́ющемꙋ на ѻ҆́блацѣхъ нᲂси́мꙋ . ѿ ню́дꙋ бо гдⷭ҇ь на небеса̀ вᲂзнесе́сѧ , ѿтꙋ́дꙋ и҆ дарᲂлюбе́зны да́ры раздаѧ̀ а҆пⷭ҇лѡмъ свᲂи́мъ , ᲂу҆тѣ́шивъ ѧ҆̀ ꙗ҆́кѡ ѻ҆ц҃ъ , и҆ вᲂзᲂпи́въ и҆́мъ , наста́вихъ вы ꙗ҆́кѡ сн҃ѡвы , и҆ речѐ к̾ ни́мъ , не ѿлꙋча́юсѧ ва́съ , а҆́зъ є҆́смь с̾ ва́ми , и҆ никто́же на вы̀ .

пѣ́снь , з҃ . і҆рмо́съ . Въ пещѝ ѻ҆́гненнѣй , пѣвцы̀ спа́слъ дѣ́ти , блгⷭ҇ве́нъ бг҃ъ ѻ҆ц҃ъ на́шихъ . На ра́мꙋ сп҃се заблꙋди́вшее взе́мъ є҆стество̀ вᲂзнесе́сѧ , бг҃ꙋ и҆ ѻ҆ц҃ꙋ приведѐ . И҆́же на ѻ҆́блацѣ свѣ́та вᲂзнесы́исѧ , и҆ спасѐ ми́ра , блгⷭ҇ве́нъ бг҃ъ ѻ҆ц҃ъ на́шихъ . Вᲂз̾ше́дыи во́ плᲂти къ беспло́тнᲂмꙋ ѻ҆ц҃ꙋ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , но ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . Свѣ́телъ тебѐ свѣ́та сꙋ́ща пᲂдъє́млѧше ѻ҆́блакъ гдⷭ҇и , ѿ землѝ па́че ᲂу҆ма̀ вᲂспрїе́млѧ , и҆ нбⷭ҇нїи сᲂбо́ри вᲂсхвали́ша со а҆пⷭ҇лы , глаго́люще , бл҃гᲂслᲂве́нъ бг҃ъ ѻ҆ц҃ъ на́шихъ . Рꙋка́ми всѝ вᲂспле́щемъ , ра́дꙋющесѧ вᲂзнесе́нїю хрⷭ҇то́вꙋ , и҆ вᲂскли́кнемъ , взы́де бг҃ъ во́ гласѣ трꙋ́бнѣ , и҆ сѣ́де ѡ҆деснꙋ́ю , ꙗ҆́кѡ сᲂпрⷭ҇то́ленъ ѻ҆ц҃ꙋ во́ вѣки . сла́ва . Пᲂѧ̀ дре́вле мѡѷсе́й вели́кїи взыва́ше , да ᲂу҆крѣпѧ́тсѧ нбⷭ҇нїи а҆́нг҃ли , хрⷭ҇тꙋ̀ вᲂсхᲂдѧ́щꙋ , ꙗ҆́кѡ всѣ́хъ цр҃ю зᲂве́мъ , и҆́же ѻ҆ц҃емъ гдⷭ҇ь и҆ бг҃ъ бл҃гᲂслᲂве́нъ є҆сѝ . и҆ ны́нѣ , боⷢ҇ . Ѽ чꙋде́съ пресла́вныхъ , ка́кѡ вмѣсти́ла є҆сѝ бг҃а невмѣсти́маго бг҃ᲂра́дᲂваннаѧ , и҆́же в̾ пло́ть ѡ҆бо́лкшасѧ , и҆ со сла́вᲂю мно́гᲂю в̾ нбⷭ҇наѧ вᲂзне́сшасѧ дне́сь , и҆ ѡ҆бᲂжи́вша чл҃ки . катава́сїѧ : Сᲂгла́снѡ ᲂу҆страшѝ пища́льскаѧ пѣ́снь , по́чести златᲂсᲂтвᲂре́нныи без̾дꙋ́шныи ѻ҆́бразъ . ᲂу҆тѣ́шителева же свѣтᲂно́снаѧ бл҃гᲂда́ть , пᲂчествᲂва́ти є҆́же вᲂпи́ти , трⷪ҇це є҆ди́наѧ равнᲂси́льнаѧ , без̾нача́льнаѧ бл҃гᲂслᲂве́на є҆сѝ .

пѣ́снь , и҃ . і҆рмо́съ . И҆з̾ ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . И҆́же во двᲂю̀ сꙋществꙋ̀ вᲂз̾летѣ́вшаго жизнᲂда́вца хрⷭ҇та̀ на нб҃са̀ со сла́вᲂю , и҆ ѻ҆ц҃ꙋ съсѣдѧ́ща , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . И҆́же ѿ рабо́ты и҆́дᲂльскїѧ тва́рь и҆зба́вившаго , и҆ пред̾ста́вивша тꙋ̀ свᲂбо́днꙋ свᲂемꙋ̀ ѻ҆ц҃ꙋ , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . И҆́же свᲂи́мъ сᲂше́ствїемъ низлᲂжи́вшаго сᲂпᲂста́та , и҆ свᲂи́мъ вᲂз̾ше́ствїемъ прᲂсла́вивша чл҃ка , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Ꙗ҆ви́шасѧ ᲂу҆мѝ а҆пⷭ҇лѡмъ на вᲂзнесе́нїе , и҆ вѣща́хꙋ , что̀ взира́юще стᲂитѐ дивѧ́щесѧ ; се́й вᲂсхᲂдѧ́и на нбⷭ҇наѧ , прїи́детъ па́ки сꙋди́ти ꙗ҆́же на землѝ чл҃кѡмъ , сꙋдїѧ̀ сы́и є҆ди́нъ . Дади́мъ бг҃ꙋ вели́чїе , хвалѣ̀ сᲂгла́сїе вᲂскли́кнемъ , вᲂспᲂе́мъ , ликꙋ́емъ , рꙋка́ми же вᲂспле́щемъ , взы́де бг҃ъ на́шъ на небеса̀ ѿ землѝ , а҆́нг҃лѡмъ и҆ а҆рха́нг҃лѡмъ пᲂю́щимъ тᲂго̀ , ꙗ҆́кѡ влⷣкꙋ и҆ твᲂрца̀ всѣ́хъ . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Взѧ́тсѧ превы́ше а҆́нг҃лъ є҆стество̀ на́ше , и҆́же дре́вле па́дшее , и҆ на прⷭ҇то́лѣ пᲂсажено̀ бы́сть бжⷭ҇твенѣ па́че смы́сла . прїиди́те тᲂржествꙋ́емъ , и҆ вᲂз̾зᲂве́мъ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки . и҆ нн҃ѣ , боⷢ҇ . Сѐ сн҃ъ тво́й бцⷣе , плѣни́въ крⷭ҇то́мъ свᲂи́мъ сме́рть , и҆ вᲂскр҃се тридне́венъ , и҆ ᲂу҆ченико́мъ свᲂи́мъ ꙗ҆́вльсѧ , взы́де къ нбⷭ҇нымъ . с̾ ни́ми же тебѣ̀ пᲂклᲂнѧ́ющесѧ пᲂе́мъ , и҆ превᲂзно́симъ є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Разрѣша́етъ ᲂу҆́зы , и҆ прᲂхлажда́етъ пла́мень , трисвѣ́тлыи бг҃ᲂнача́льствїѧ ѻ҆́бразъ . пᲂю́тъ дѣ́ти , бл҃гᲂслᲂви́тъ же є҆ди́нагѡ сп҃са и҆ сᲂдѣ́телѧ , ꙗ҆́кѡ бл҃гᲂда́телѧ , сᲂтвᲂре́наѧ всѧ́ческаѧ тва́рь= [пᲂкло́н̾] .=

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾ лѣ́то без̾лѣ́тнагѡ неи҆зрече́ннѡ ро́ждьшꙋю , вѣ́рнїи є҆динᲂмꙋ́дреннѡ , пѣ́сньми велича́емъ . Тебѐ и҆зба́вителѧ ми́рꙋ хрⷭ҇та̀ бг҃а , а҆пⷭ҇ли ви́дѧще бжⷭ҇твенѡ вᲂзвыша́ема , со́ страхᲂмъ и҆гра́юще велича́хꙋ . Тебѐ сᲂше́дшаго да́же до пᲂслѣ́днихъ землѝ , и҆ чл҃ка спа́сша , и҆ вᲂзнесе́нїемъ свᲂи́мъ вᲂзвы́сивша сего̀ , велича́емъ . Твᲂю̀ ѡ҆бᲂжи́вшꙋюсѧ пло́ть , зрѧ́ще хрⷭ҇тѐ на высᲂтѣ̀ а҆́нг҃ли , дрꙋ́гъ ко́ дрꙋгꙋ гл҃ахꙋ , вᲂи́стинꙋ се́й є҆́сть бг҃ъ на́шъ . боⷢ҇ . Ра́дꙋисѧ бцⷣе мт҃и хрⷭ҇та̀ бг҃а , є҆го́же рᲂдила̀ є҆сѝ , дне́сь ѿ землѝ вᲂзнᲂси́ма , со а҆пⷭ҇лы зрѧ́ще велича́емъ .

и҆́нъ , і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋисѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Ѽ дарѡ́въ и҆́же па́че пᲂстиже́нїѧ , ѽ та́инства стра́шна , всѣ́ми бо влады́чествꙋѧи , ѿ землѝ ѿше́дъ к̾ нбⷭ҇нымъ , ᲂу҆ченико́мъ пᲂсла́ти дх҃ъ прест҃ы́и , да прᲂсвѣти́тъ си́хъ смы́слъ , и҆ ѻ҆́гнены сᲂтвᲂри́тъ бл҃гᲂда́тїю . Пᲂлцы̀ ᲂу҆чени́честїи гдⷭ҇ь речѐ , вы̀ сѧ́дите во і҆єрⷭ҇ли́мѣ , и҆ а҆́зъ низ̾пᲂслю̀ ва́мъ ᲂу҆тѣ́шителѧ дрꙋга́го , ѻ҆ц҃ꙋ сᲂпресто́льна и҆ є҆динᲂсꙋ́щна , ꙗ҆́кᲂже ви́дите взима́ема и҆ ѻ҆́блакᲂмъ свѣ́тлымъ нᲂси́ма . сла́ва . Взѧ́тсѧ ꙗ҆́вѣ великᲂлѣ́пїе вы́ше нб҃съ пло́тїю ѡ҆бнища́вшагѡ , и҆ сᲂседѣ́нїемъ ѻ҆ц҃а пᲂчте́сѧ є҆стество̀ на́ше па́дшее . тᲂржествꙋ́емъ , и҆ сᲂгла́снѡ всѝ вᲂскли́кнемъ , и҆ вᲂспле́щемъ рꙋка́ми ра́дꙋющесѧ . и҆ ны́нѣ , боⷢ҇ . Свѣ́тъ ѿ́ свѣта вᲂсїѧ́вшїи , всенепᲂро́чнаѧ и҆з̾ тебѐ вᲂсїѧ̀ , и҆ че́рнᲂсть без̾бо́жїѧ всю̀ разрꙋшѝ , и҆ ꙗ҆́же въ нᲂщѝ спѧ́щихъ прᲂсвѣтѝ . сегѡ̀ ра́ди всѝ по́ дᲂлгꙋ тѧ во́ вѣки прⷭ҇нѡ ᲂу҆бл҃жа́емъ . катава́сїѧ : Ра́дꙋйсѧ цр҃це , мт҃ремъ и҆ дв҃амъ сла́ва , всѧ́ка бо дᲂбрᲂгла́сна бл҃гᲂглаго́лива ᲂу҆ста̀ , мꙋдрѧ́щаѧсѧ немо́гꙋтъ тебѐ вᲂспѣ́ти дᲂсто́йнѡ . ни дᲂꙋмѣ́етъ же ра́зꙋмъ всѧ́къ , твᲂегѡ̀ ржⷭ҇тва̀ разꙋмѣ́ти . тѣ́мже тѧ̀ сᲂгла́снѡ сла́вимъ .

задᲂсто́йникъ : Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾ лѣ́то без̾лѣ́тнагѡ неи҆зрече́ннѡ ро́ждьшꙋю , вѣ́рнїи є҆динᲂмꙋ́дренно , пѣ́сньми велича́емъ= [пᲂкло́н̾ до землѝ] .=

свѣти́ленъ . Оу҆ченико́мъ зрѧ́щимъ тѧ , вᲂзнесе́сѧ хрⷭ҇тѐ ко ѻ҆ц҃ꙋ сᲂсѣдѧ́и . а҆́нг҃ли предѝ текꙋ́ще зᲂвѧ́хꙋ , вᲂзми́те врата̀ вᲂзми́те , цр҃ь бо взы́де , к̾ нача́льнᲂмꙋ свѣ́тꙋ сла́вы .= гⷤ .=

На хвали́тѣхъ , стихѣ́ры , на д҃ . гла́съ , а҃ . поⷣ . нбⷭ҇нымъ чино́мъ .= Нача́льницы а҆́нг҃лѡмъ ,꙳ смᲂтрѧ́юще съ пло́тїю ,꙳ и҆́же вᲂз̾ше́ствїе стра́ннᲂе ,꙳ недᲂꙋмѣва́хꙋсѧ дрꙋ́гъ ко́ дрꙋгꙋ , что̀ видѣ́нїе сѐ ;꙳ чл҃къ ᲂу҆́бѡ зра́кᲂмъ ви́димыи ,꙳ ꙗ҆́кᲂже бг҃ъ превы́ше небе́съ съ пло́тїю вᲂсхо́дитъ . два́жды . Галиле́ѧне зрѧ́ще тѧ вᲂзнесе́на ,꙳ ѿ є҆леѡ́нскїѧ гᲂры̀ съ пло́тїю сло́ве ,꙳ слы́шахꙋ а҆́нг҃лѡмъ вᲂпїю́щимъ и҆́мъ ,꙳ что̀ стᲂитѐ зрѧ́ще ;꙳ та́кѡ прїи́детъ па́ки с̾ пло́тїю ,꙳ и҆́мже ѻ҆́бразᲂмъ ви́дѣсте . А҆́нг҃льски и҆́же в̾ ми́рѣ тᲂржествꙋ́юще ,꙳ є҆́же на прⷭ҇то́лѣ сла́вы бг҃ꙋ нᲂси́мꙋ ,꙳ вᲂзᲂпїе́мъ пѣ́нїе ,꙳ ст҃ъ є҆сѝ ѻ҆́ч҃е нбⷭ҇ныи ,꙳ и҆ сᲂпрⷭ҇нᲂсꙋ́щнᲂе сло́во ,꙳ ст҃ъ є҆сѝ и҆ дꙋ́ше всест҃ы́и . =сла́ва , и҆ нн҃ѣ . гла́съ , в҃ . Рᲂди́сѧ ꙗ҆́кѡ са́мъ вᲂсхᲂтѣ̀ , ꙗ҆ви́лсѧ є҆сѝ , ꙗ҆́кѡ са́мъ и҆зво́ли , пᲂстрада̀ пло́тїю бж҃е на́шъ . и҆з̾ ме́ртвыхъ вᲂскр҃се , пᲂпра́въ сме́рть . вᲂз̾несе́сѧ во сла́вѣ , и҆́же всѧ́ческаѧ и҆спᲂлнѧ́ѧи . и҆ пᲂсла́лъ є҆сѝ на́мъ дх҃ъ бжⷭ҇твеныи , во є҆́же вᲂспѣва́ти и҆ сла́вити твᲂѐ бжⷭ҇тво̀ .= Славᲂсло́вїе вели́кᲂе . трᲂпа́рь , пра́здникꙋ . =пᲂсе́мъ , є҆ктенїѝ . и҆ ѿпꙋ́стъ . та́же , ча́съ , а҃ . ѱалмы̀ , ѡ҆бы́чны . и҆ кᲂне́чныи ѿпꙋ́стъ .

На литꙋргі́и , а҆нтиѳо́нъ , а҃ . ѱл҃о́мъ , м҃ѕ . Всѝ ꙗ҆зы́цы вᲂсплещи́те рꙋка́ми , вᲂскли́кните бг҃ꙋ гла́сᲂмъ ра́дᲂсти . мл҃твами бцⷣы сп҃се спасѝ на́съ . сти́хъ : Ꙗ҆́кѡ гдⷭ҇ь вы́шнїи стра́шенъ , цр҃ь ве́лїи по все́й землѝ . мл҃твами бцⷣы сп҃се спасѝ на́съ . сти́хъ : Пᲂкᲂрѝ лю́ди на́мъ , и҆ ꙗ҆зы́ки по́д̾нᲂги на́ша . мл҃твами бцⷣы сп҃се спасѝ на́съ . сти́хъ : Взы́де бг҃ъ в̾ вᲂскликнᲂве́нїи гдⷭ҇ь во́ гласѣ трꙋ́бнѣмъ . мл҃твами бцⷣы сп҃се спасѝ на́съ . сла́ва , мл҃твами бцⷣы сп҃се спасѝ на́съ . и҆ ны́нѣ , мл҃твами бцⷣы сп҃се спасѝ на́съ .

а҆нтиѳо́нъ , в҃ . ѱл҃о́мъ , м҃з . Ве́лїи гдⷭ҇ь и҆ хва́ленъ ѕѣлѡ̀ . спасѝ на́съ сн҃е бж҃їи , вᲂзнесы́исѧ во сла́вѣ пᲂю́щихъ ти , а҆ллилꙋ́їѧ , гⷤ . сти́хъ : Го́ры сїѡ́нскїѧ ре́бра сѣ́верᲂва , гра́дъ цр҃ѧ вели́кагѡ . спасѝ на́съ сн҃е бж҃їи . сти́хъ : Бг҃ъ в̾ тѧ́жестѣхъ є҆гѡ̀ зна́емь є҆́сть є҆гда̀ застꙋпа́етъ и҆̀ . спасѝ на́съ сн҃е бж҃їи . сти́хъ : Ꙗ҆́кѡ сѐ ца́рїе зе́мстїи сᲂбра́шасѧ , и҆ снидо́шасѧ вкꙋ́пѣ . спасѝ на́съ сн҃е бж҃їи . сла́ва , и҆ ны́нѣ . Є҆динᲂро́дныи сн҃е .

а҆нтиѳо́нъ , г҃ . ѱл҃о́мъ , м҃и . Оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . трᲂпа́рь : Вᲂзнесе́сѧ во сла́вѣ хрⷭ҇тѐ бж҃е на́шъ , ра́дᲂсть сᲂтвᲂри́въ ᲂу҆ченико́мъ свᲂи́мъ , ѡ҆бѣтᲂва́нїемъ ст҃а́гѡ дх҃а . и҆звѣще́нїе прїе́мше ꙗ҆́вѣ бл҃гᲂслᲂве́нїѧ ра́ди , ꙗ҆́кѡ ты̀ є҆сѝ сн҃ъ бж҃їи и҆зба́витель ми́рꙋ . сти́хъ : Зе́мнїи же и҆ сы́нᲂве чл҃честїи вкꙋ́пѣ бᲂга́тъ и҆ ᲂу҆бо́гъ . Вᲂзнесе́сѧ во сла́вѣ . сти́хъ : Оу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . Вᲂзнесе́сѧ во сла́вѣ . сти́х̾ : Приклᲂню̀ в̾ при́тчꙋ ᲂу҆́хо мᲂѐ , прᲂвѣща́ю во ѱл҃ты́ри гана́нїе мᲂѐ . Вᲂзнесе́сѧ во сла́вѣ . та́же , вхо́дъ : Взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣмъ .

і҆єре́й , пᲂе́тъ : Прїиди́те пᲂклᲂни́мсѧ и҆ припа де́мъ є҆мꙋ̀ вᲂпїю́ще .= мы́же : спасѝ на́съ сн҃е бж҃їи , вᲂзнесы́исѧ во сла́вѣ пᲂю́щихъ ти , а҆ллилꙋ́їѧ , гⷤ . =трᲂпа́рь : Вᲂзнесе́сѧ во сла́вѣ . сла́ва , и҆ ны́нѣ . кᲂнда́къ : Є҆́же ѡ҆ на́съ сᲂверши́въ смᲂтре́нїе , и҆ ꙗ҆́же на землѝ сᲂєдини́въ съ нбⷭ҇ными , вᲂзне се́сѧ во сла́вѣ хрⷭ҇тѐ бж҃е на́шъ , и҆ ника́кᲂже ѿлꙋча́ѧсѧ , но пребыва́ѧ неѿстꙋ́пнѡ , и҆ вᲂпїѧ̀ лю́бѧщимъ тѧ , а҆́зъ є҆́смь с̾ ва́ми , и҆ никто́же навы̀ . та́же , трⷭ҇то́е .= прᲂки́мен̾ , ѱл҃о́мъ дв҃дᲂвъ . вᲂзнесы́исѧ на нб҃са̀ бж҃е , и҆ по все́й землѝ сла́ва твᲂѧ̀ . =сти́хъ : гᲂто́во срⷣце мᲂѐ бж҃е , гᲂто́во срⷣце мᲂѐ . а҆пⷭ҇лъ , въ дѣѧ́нїихъ . заⷱ҇ , а҃ . а҆ллилꙋ́їѧ . взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣмъ . сти́хъ : всѝ ꙗ҆зы́цы вᲂсплещи́те рꙋка́ми , вᲂскли́кните бг҃ꙋ гла́сᲂмъ ра́дᲂсти . є҆ѵⷢ҇а́лїе , ѿ лꙋкѝ . заⷱ҇ , рд҃і . прича́стенъ , взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣ .

Въ то́й же , четверто́къ , ве́черъ . кафи́смꙋ , негл҃емъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , а҃ . Вᲂз̾ше́дъ на нб҃са̀ ѿ ню́дꙋ же и҆ сни́де , да не ѡ҆ста́виши на́съ си́ры гдⷭ҇и , да прїи́детъ тво́й дх҃ъ , нᲂсѧ̀ смире́нїе ми́рꙋ . пᲂкажѝ сынᲂвѡ́мъ чл҃ческимъ , дѣ́ла си́лы твᲂеѧ̀ гдⷭ҇и чл҃кᲂлю́бче . Взы́де хрⷭ҇тѐ к̾ без̾нача́льнᲂмꙋ ѻ҆ц҃ꙋ свᲂемꙋ̀ , и҆́же не ѡ҆пи́санныхъ є҆гѡ̀ нѣ́дръ не ѿлꙋчи́выисѧ . тѣ́мъ и҆ прило́гъ си́лы хвали́ти трⷪ҇цꙋ всѝ вᲂспрїѧ́ша , є҆ди́нᲂгѡ тѧ сн҃а и҆ по вᲂчл҃ченїи пᲂзна́ша гдⷭ҇и , є҆динᲂро́дна ѻ҆ц҃ꙋ . по мно́жествꙋ щедро́тъ твᲂи́хъ пᲂми́лꙋй на́съ . А҆́нг҃ли твᲂѝ гдⷭ҇и а҆пⷭ҇лѡмъ гл҃ахꙋ , мꙋ́жїе галиле́йстїи , что̀ стᲂитѐ зрѧ́ще на́ нб҃о ; се́й є҆́сть хрⷭ҇то́съ бг҃ъ вᲂзнесы́исѧ ѿ ва́съ на́ нб҃о . та́кѡ прїи́детъ па́ки , и҆́м̾же ѻ҆́бразᲂмъ ви́дѣсте є҆гѡ̀ и҆дꙋ́ща на́ нб҃о . слꙋжи́те є҆мꙋ̀ в̾ прпⷣбїи и҆ пра́вдѣ .

та́же , стихѣ́ры , въ минѣ́и , г҃ . сла́ва , и҆ ны́нѣ . гла́съ , в҃ . Рᲂди́сѧ ꙗ҆́кѡ са́мъ вᲂсхᲂтѣ̀ , ꙗ҆ви́лсѧ є҆сѝ , ꙗ҆́кѡ са́мъ и҆зво́ли , пᲂстрада̀ пло́тїю бж҃е на́шъ . и҆з̾ ме́ртвыхъ вᲂскр҃се , пᲂпра́въ сме́рть . вᲂз̾несе́сѧ во сла́вѣ , и҆́же всѧ́ческаѧ и҆спᲂлнѧ́ѧи . и҆ пᲂсла́лъ є҆сѝ на́мъ дх҃ъ бжⷭ҇твеныи , во є҆́же вᲂспѣва́ти и҆ сла́вити твᲂѐ бжⷭ҇тво̀ . та́же , вы́хᲂдъ : свѣ́тѣ ти́хїи . прᲂки́менъ , ѱл҃о́мъ дв҃дᲂвъ . бг҃ъ на́шъ на́ нб҃си и҆ на землѝ , всѧ̀ є҆ли́ка вᲂсхᲂтѣ̀ и҆ сᲂтвᲂрѝ . сти́хъ : во и҆схо́дѣ і҆и҃левѣ ѿ є҆гѵ́пта до́мꙋ і҆а́кѡвлѧ , и҆з̾ люді́й ва́рваръ , бы́сть і҆ꙋде́ѧ ст҃ы́нѧ є҆гѡ̀ . сти́хъ : мо́ре ви́дѣ и҆ пᲂбѣжѐ , і҆ѡрда́нъ вᲂзврати́сѧ вспѧ́ть . сти́хъ : что́ ти бы́сть мо́ре да пᲂбѣжѐ , и҆ тебѣ̀ і҆ѡрда́не ꙗ҆́кѡ вᲂзврати́сѧ вспѧ́ть . та́же , бг҃ъ на́шъ на́ нб҃си и҆ на землѝ , всѧ̀ є҆ли́ка вᲂсхᲂтѣ̀ и҆ сᲂтвᲂрѝ .

Н=а стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . За без̾чи́сленᲂе млрⷭ҇дїе хрⷭ҇тѐ ,꙳ рᲂди́сѧ и҆з̾ дв҃ы пло́тїю ,꙳ во́лею же претерпѣ́лъ є҆сѝ распѧ́тїе ,꙳ тридне́внѡ вᲂскр҃слъ є҆сѝ и҆́з̾ грᲂба всеще́дре ,꙳ сᲂвᲂскр҃си́лъ и҆ ѡ҆живи́лъ є҆сѝ на́съ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Зрѧ́ще тѧ хрⷭ҇тѐ бж҃е ,꙳ бжⷭ҇твенїи ᲂу҆ченицы̀ ,꙳ ꙗ҆́вѣ взе́млема ѿ землѝ к̾ нб҃сѝ ,꙳ и҆ си́мъ ѡ҆бѣща́сѧ пᲂсла́ти тво́й дх҃ъ ,꙳ ᲂу҆твержа́ющь и҆ прᲂсвѣща́ющь на́съ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Дивѧ́тсѧ а҆́нг҃лъ мно́жества ,꙳ стра́ннᲂмꙋ вᲂз̾ше́ствїю твᲂемꙋ̀ ,꙳ и҆ стра́шнᲂмꙋ і҆с҃е всецр҃ю ,꙳ и҆ врата̀ нбⷭ҇наѧ взѧ́ти ,꙳ вᲂпїѧ́хꙋ го́рнимъ си́ламъ .

сла́ва , и҆ ны́нѣ . гла́съ , ѕ҃ . На гᲂра́хъ ст҃ы́хъ зрѧ́ще твᲂѐ вᲂзнесе́нїе хрⷭ҇тѐ , сїѧ́нїе сла́вы ѻ҆́ч҃и . вᲂспѣва́емъ твᲂегѡ̀ лица̀ свѣтᲂви́дныи зра́къ , пᲂклᲂнѧ́емсѧ страсте́мъ твᲂи́мъ [пᲂкло́н̾] , чте́мъ вᲂскрⷭ҇нїе , сла́внᲂе вᲂзнесе́нїе сла́вѧще , пᲂми́лꙋй на́съ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ ѿпꙋ́стъ . пра́з̾днꙋетжесѧ слꙋ́жба влⷣчнѧ пра́здника до пѧтка̀ , и҆́же пре́жде пѧтьдесѧ́тницы , и҆ тᲂгда̀ ѿдае́тсѧ . На па́вечерницѣ , по дᲂсто́йнѣ , кᲂнда́къ , пра́здникꙋ . =и҆ про́чее ѡ҆бы́чно .

Въ пѧто́къ , ѕ҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь пра́здникꙋ , три́жды .

По а҃ , стихᲂло́гїи , сѣда́ленъ . гла́съ , а҃ . А҆́дꙋ плѣни́вшꙋсѧ тᲂбо́ю живᲂда́вче , и҆ ми́рꙋ прᲂсвѣти́вшꙋсѧ твᲂи́мъ вᲂста́нїемъ , взы́де со сла́вᲂю сп҃се , всѧ̀ сᲂдержа́и рꙋко́ю . сегѡ̀ ра́ди со а҆́нг҃лы славᲂсло́вимъ тѧ , вседержи́телю гдⷭ҇и . сла́ва вᲂзнесе́нїю твᲂемꙋ̀ хрⷭ҇тѐ , сла́ва црⷭ҇твїю твᲂемꙋ̀ , сла́ва млрⷭ҇дїю твᲂемꙋ̀ , є҆ди́не чл҃кᲂлю́бче . сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , є҃ . Сᲂше́дъ с̾ нб҃сѐ к̾ земны́мъ и҆ до́лꙋ лежа́щїѧ во а҆́дᲂвѣ темни́цѣ сᲂвᲂскр҃си́лъ є҆сѝ , ꙗ҆́кѡ бг҃ъ а҆да́мскїи зра́къ . вᲂзнесе́нїемъ твᲂи́мъ хрⷭ҇тѐ на нб҃са̀ вᲂз̾ве́дъ , прⷭ҇то́лꙋ ѻ҆те́ческᲂмꙋ со пред̾стᲂѧ́теленъ то́й сᲂдѣ́лалъ є҆сѝ , ꙗ҆́кѡ млрⷭ҇дъ и҆ чл҃кᲂлю́бецъ . сла́ва , и҆ ны́нѣ , то́йже .

та́же , ѱл҃о́мъ , н҃ . кано́нъ , пра́здникꙋ , гла́съ , є҃ . со і҆рмᲂсо́мъ на́ и҃ .= и҆ въ минѣ́и , на д҃ . а҆́щели слꙋчи́тсѧ , вели́кᲂмꙋ ст҃о́мꙋ . =пᲂе́мъ : кано́нъ , пра́здникꙋ , со і҆рмᲂсо́мъ на́ ѕ҃ . и҆ ст҃о́мꙋ , на́ ѕ҃ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . И҆спо́лнивъ бл҃же ,꙳ ѻ҆те́ческᲂе бл҃гᲂвᲂле́нїе ,꙳ сᲂвᲂкꙋпи́въ же ,꙳ вы́шнѧѧ съ ни́жними ,꙳ вᲂзнесе́сѧ вᲂсла́вѣ к̾ пе́рвѣйшим̾ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Ѻ҆́блакъ тѧ свѣ́телъ ,꙳ вᲂспрїѧ́тъ на высᲂтꙋ̀ ,꙳ и҆ а҆́нг҃ли со́ страхᲂмъ ,꙳ и҆ тре́петᲂмъ слꙋжа́хꙋ ,꙳ бжⷭ҇твенᲂмꙋ ти вᲂзнесе́нїю .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Не ѡ҆ста́влю си́рыхъ ,꙳ и҆́хже а҆́зъ сᲂбра́хъ ,꙳ гдⷭ҇ь дрꙋго́мъ гл҃аше ,꙳ но пᲂслю̀ ꙳ дх҃ъ прест҃ы́и . сла́ва , и҆ нн҃ѣ . гла́съ , в҃ . Вᲂзнᲂсѧ́щасѧ тебѐ хрⷭ҇тѐ ѿ гᲂры̀ є҆леѡ́нстѣй си́лы зрѧ́ще , дрꙋ́гъ дрꙋ́гꙋ вᲂпїѧ́хꙋ , кто̀ се́й є҆́сть ; и҆ речѐ к̾ ни́мъ , се́й є҆́сть держа́вныи и҆ си́льныи . се́й є҆́сть си́льныи во бранѣ́хъ , се́й є҆́сть вᲂи́стинꙋ цр҃ь сла́вы . и҆ пᲂчто̀ є҆мꙋ̀ червлены̀ ри́зы ; и҆з̾ вᲂсо́ра прихо́дитъ , є҆́же є҆́сть ѿ́ плᲂти . са́мъ же ꙗ҆́кѡ бг҃ъ ѡ҆деснꙋ́ю сѣ́де вели́чествїѧ , пᲂсла́лъ є҆́сть на́мъ дх҃ъ ст҃ы́и , наста́вити и҆ прᲂсвѣти́ти дш҃а на́ша .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , трипѣ́снецъ , гла́съ , д҃ . пѣ́снь , є҃ . і҆рмо́съ . нечести́вїи не ᲂу҆́зрѧтъ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вᲂз̾ше́дъ ѿ землѝ к̾ нб҃сѝ влⷣко , не ѿлꙋче́нъ бѣ̀ ѿ ѻ҆ц҃а , но и҆ сᲂвᲂкꙋпле́нъ и҆ со ст҃ы́мъ дх҃ѡмъ , и҆ ᲂу҆ченико́мъ сегѡ̀ пᲂсла́лъ є҆сѝ с̾ нб҃сѐ ᲂу҆тѣ́шителѧ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Беспло́тныхъ чи́ни , ꙗ҆́кѡ ви́дѣша тебѐ і҆с҃е съ пло́тїю на нб҃са̀ вᲂз̾ше́дша , ра́дꙋющесѧ , дивлѧ́хꙋсѧ мно́гᲂмꙋ твᲂемꙋ̀ гдⷭ҇и к̾ чл҃кѡмъ милᲂсе́рдїю .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . И҆стлѣ́вшее влⷣко сꙋщество̀ на́ше , на прⷭ҇то́лѣ ѻ҆те́честѣ пᲂсади́лъ є҆сѝ гдⷭ҇и и҆ ᲂу҆дᲂбри́лъ . с̾ ни́мже хо́щеши прїитѝ сꙋди́ти ми́рꙋ всеси́льне .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Чтⷭ҇ꙋю и҆ пречⷭ҇тꙋю пᲂчте́мъ мы́сленѡ , дᲂбро́тꙋ і҆а́кѡвлю , бжⷭ҇твеными дѣ́тельми ᲂу҆дᲂбрѧ́еми , бл҃гᲂче́стнѡ пᲂе́мъ ꙗ҆́кѡ мт҃рь бг҃а на́шегѡ .

пѣ́снь , и҃ . і҆рмо́съ . и҆зба́вителю всѣ́хъ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . На херꙋви́мскихъ ра́мѣхъ нᲂси́мь вᲂзнесе́сѧ въ сла́вѣ , зрѧ́щимъ тѧ ᲂу҆ченико́мъ твᲂи́мъ гдⷭ҇и , и҆ вᲂпїю́щимъ непреста́ннѡ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Низ̾лᲂжи́въ враждꙋ̀ средᲂгра́дїѧ , ᲂу҆ме́ршїѧ ѻ҆ц҃ꙋ свᲂемꙋ̀ примири́лъ є҆сѝ . и҆ вᲂзше́дъ с̾ приведѐ , ю҆́же прїѧ́тъ пло́ть без̾нача́льне сло́ве вы́ше нача́лъ и҆ си́лъ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Бл҃гᲂслᲂвлѧ́ѧ ᲂу҆ченикѝ , вᲂзнᲂша́ шесѧ на высᲂтꙋ̀ хрⷭ҇тѐ , и҆ ᲂу҆тѣ́шителѧ си́мъ пᲂсла́въ , є҆динᲂмꙋ́дренѡ вᲂпїю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ѻ҆́бщее вѣ́рнымъ ѡ҆чисти́лище , гᲂто́вꙋю чл҃кѡмъ по́мᲂщь , и҆ ꙗ҆́же къ зижди́телю мо́стъ , привᲂдѧ́щꙋю всѣ́хъ ко спасе́нїю , бж҃їю мт҃рь сла́вимъ .

пѣ́снь , ѳ҃ . і҆рмо́съ . є҆́вва ᲂу҆́бѡ недꙋ́гᲂмъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ѿ гᲂры̀ хрⷭ҇тѐ є҆леѡ́нскїѧ , ѻ҆́блакъ тебѐ ꙗ҆́кᲂже прⷭ҇то́лъ прїѧ́тъ , всѣ́мъ бжⷭ҇твенымъ твᲂи́мъ ᲂу҆ченико́мъ зрѧ́щимъ , и҆ съ тре́петᲂмъ вᲂпїю́щимъ ти непреста́ннѡ , не ѡ҆ста́ви си́ры , и҆́х̾же вᲂзлюби́лъ є҆сѝ за млрⷭ҇дїе несказа́ннᲂе .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Что̀ стᲂитѐ вы̀ зрѧ́ще вᲂз̾ше́ствїе стра́шнᲂе , дре́вле реко́ша а҆́нг҃ли бжⷭ҇твенымъ а҆пⷭ҇лѡмъ ; и҆́м̾же ѻ҆́бразᲂмъ ви́дите вᲂсхᲂдѧ́ща , па́ки на́ землю прїи́детъ сꙋди́ти всѣ́мъ , со сла́вᲂю неи҆зрече́ннᲂю .

сла́ва . Сᲂше́лъ є҆сѝ пе́рвїе бе́з̾ плᲂти , взы́де же пло́ть нᲂсѧ̀ ю҆́же прїѧ́лъ є҆сѝ . стра́хᲂмъ же врата̀ нбⷭ҇наѧ тебѣ̀ ѿверзо́шасѧ , и҆ ᲂу҆мѝ нбⷭ҇нїи зрѧ́ще дивлѧ́хꙋсѧ , гл҃юще , сла́ва и҆́же на́съ ра́ди твᲂемꙋ̀ влⷣко вᲂз̾ше́ствїю .

и҆ ны́нѣ , боⷢ҇ . Сᲂвᲂкꙋплѧ́ющисѧ с̾ бжⷭ҇твеными ᲂу҆ченикѝ пречⷭ҇таѧ , зрѧ́щи є҆го́же рᲂдила̀ є҆сѝ , ѿ землѝ вᲂзнᲂси́ма вᲂпїѧ́ше , вᲂсхо́диши сн҃е къ без̾нача́льнᲂмꙋ ѻ҆ц҃ꙋ , сла́вы свᲂеѧ̀ и҆спᲂлнѧ́ѧи всѧ́ческаѧ , препрᲂсла́вленыи є҆ди́не гдⷭ҇и .

Въ пѧто́къ , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , д҃ . поⷣ . да́лъ є҆сѝ зна́менїе .= П=ᲂстрада̀ ꙗ҆́кѡ челᲂвѣ́къ ,꙳ без̾стра́стныи бжⷭ҇тво́мъ ,꙳ и҆ вᲂскрⷭ҇лъ є҆сѝ тридне́венъ ,꙳ плѣни́въ сме́рть ,꙳ и҆ вᲂскреси́въ всѧ̀ и҆стлѣ́вшїѧ престꙋпле́нїемъ ,꙳ и҆ вᲂзнесе́сѧ хрⷭ҇тѐ ко ѻ҆ц҃ꙋ ,꙳ ѡ҆бѣща́въ пᲂсла́ти ᲂу҆тѣ́шителѧ ,꙳ сщ҃е́ннымъ а҆пⷭ҇лѡмъ свᲂи́мъ ,꙳ і҆с҃е всеси́льне ,꙳ сп҃се дш҃а́мъ на́шимъ . Вы̀ что̀ стᲂитѐ зрѧ́ще на́ небо ;꙳ ви́дими а҆́нг҃лы ꙗ҆́кѡ чл҃цы гл҃ахꙋ ,꙳ слᲂвесѐ таи́нникѡмъ .꙳ се́й є҆го́же зритѐ ,꙳ ѻ҆́блакᲂмъ свѣ́тлымъ вᲂзнᲂсѧ́щасѧ ,꙳ та́кᲂже прїи́детъ ,꙳ и҆́м̾же ѻ҆́бразᲂмъ ви́дѣсте є҆гѡ̀ ,꙳ сꙋди́ти ми́рꙋ ꙗ҆́кᲂже пи́шетъ ,꙳ ше́дше ᲂу҆́бѡ всѝ ,꙳ рече́ннᲂе сᲂтвᲂри́те . По є҆́же и҆́з̾ грᲂба твᲂе́мъ ,꙳ не и҆з̾рече́ннѣмъ вᲂста́нїи всеси́льне гдⷭ҇и ,꙳ прїе́мъ и҆́хъ же вᲂзлюби́лъ є҆сѝ ,꙳ да́же до виѳа́нїи и҆з̾ведѐ сло́ве .꙳ и҆ на гᲂрѣ̀ бы́въ є҆леѡ́нстѣй ,꙳ си́хъ бл҃гᲂслᲂви́лъ є҆сѝ ,꙳ и҆ та́кѡ вᲂзнесе́сѧ .꙳ пᲂвинꙋ́ющимсѧ а҆́нг҃лѡмъ тебѣ̀ ,꙳ і҆с҃е пребл҃гі́и ,꙳ сп҃се дш҃а́мъ на́шимъ .

та́же , стихѣ́ры , въ минѣ́и , г҃ . сла́ва , и҆ ны́нѣ . гла́съ , в҃ . Вᲂзнесе́сѧ во сла́вѣ , на гᲂрѣ̀ є҆леѡ́нстѣй хрⷭ҇тѐ бж҃е пред̾ свᲂи́ми ᲂу҆ченикѝ , и҆ сѣ́де ѡ҆деснꙋ́ю ѻ҆ц҃а , и҆́же всѧ́ческаѧ и҆спᲂлнѧ́ѧи бжⷭ҇тво́мъ . и҆ пᲂсла́лъ є҆́сть на́мъ дх҃ъ прест҃ы́и , прᲂсвѣща́ѧ и҆ ᲂу҆твержа́ѧ , и҆ ѡ҆сщ҃а́ѧ дш҃а на́ша .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . А҆́нг҃ли мꙋ́дрымъ ꙳ вᲂпїѧ́хꙋ а҆пⷭ҇лѡмъ ,꙳ ѽ мꙋ́жїе галиле́йстїи ,꙳ и҆́мже ѻ҆́бразᲂмъ ви́дѣсте хрⷭ҇та̀ ,꙳ па́ки прїи́детъ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Снидо́ша с̾ ра́дᲂстїю ѿ є҆леѡ́на ,꙳ ᲂу҆ченицы̀ твᲂѝ сло́ве ,꙳ вᲂпїю́ще и҆ сла́вѧще ,꙳ бжⷭ҇твенᲂе твᲂѐ вᲂзнесе́нїе .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Дѣ́ло ᲂу҆ченико́мъ ꙳ ꙗ҆́кᲂже запᲂвѣ́да сло́ве ,꙳ пᲂсла́лъ є҆сѝ бжⷭ҇твеныи ꙳ и҆ ст҃ы́и тво́й дх҃ъ ,꙳ и҆ си́хъ прᲂсвѣти́лъ є҆сѝ .

сла́ва , и҆ ны́нѣ . гла́съ , д҃ . Є҆гда̀ прїи́де хрⷭ҇тѐ , на́ гᲂрꙋ є҆леѡ́нскꙋю , ѻ҆те́ческᲂе и҆спо́лнити бл҃гᲂвᲂле́нїе , ᲂу҆жасо́шасѧ нбⷭ҇нїи а҆́нг҃ли и҆ ᲂу҆страши́шасѧ преи҆спо́днїи . пред̾стᲂѧ́хꙋ же ᲂу҆ченицы̀ с̾ ра́дᲂстїю тре́петни , ꙗ҆́кᲂже гл҃аше и҆́мъ , прⷭ҇то́лъ же ᲂу҆́бѡ гᲂтᲂвлѧ́шесѧ прᲂти́вꙋ ѻ҆́блакъ ѡ҆жида́ѧ . две́ри же нб҃са̀ ѿве́рзше , дᲂбро́тᲂю ѡ҆блиста́шасѧ , и҆ землѧ̀ сᲂкро́вища ѿкрыва́етъ , ꙗ҆́кѡ пᲂзна́тисѧ а҆да́мᲂвꙋ с̾ни́тїю , и҆ сегѡ̀ а҆́бїе вᲂзведе́нїю . но пᲂслѣдѝ ᲂу҆́бѡ вᲂзнᲂша́шесѧ ꙗ҆́кѡ рꙋко́ю , ᲂу҆ста́ же вельмѝ бл҃гᲂслᲂвлѧ́хꙋ , ꙗ҆́кᲂже слы́шашесѧ . ѻ҆́блакъ же прїима́ше , и҆ нб҃о в̾нꙋ́трь прїѧ́тъ . дѣ́ло сїѐ гдⷭ҇и є҆́же сᲂдѣ́ла , ве́лїе и҆ пресла́внѡ , во спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

На па́вечерницѣ , по дᲂсто́йнѣ , и҆ по трⷭ҇то́мъ , кᲂнда́къ , пра́здникꙋ . и҆ про́чее ѡ҆бы́чно .

Въ сꙋбо́тꙋ , ѕ҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь пра́здникꙋ , три́жды .

По а҃ , стихᲂло́гїи , сѣда́ленъ . гла́съ , а҃ . Прїи́де беспло́тенъ с̾ нб҃съ сло́ве на́ землю , да всѣ́хъ с̾ сᲂбо́ю вᲂзнесе́ши , взы́де с̾ пло́тїю хрⷭ҇тѐ . сегѡ̀ ра́ди си́лы нбⷭ҇ныѧ вᲂпїѧ́хꙋ зᲂвꙋ́ще , сла́ва сᲂше́ствїю твᲂемꙋ̀ , сп҃се , сла́ва вᲂзнесе́нїю твᲂемꙋ̀ , сла́ва смᲂтре́нїю твᲂемꙋ̀ , є҆ди́не чл҃кᲂлю́бче . сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , д҃ . К̾свᲂемꙋ̀ рᲂди́телю па́ки вᲂсте́клъ є҆сѝ , вседѣ́телю рабы̀ свᲂѧ̀ не ѡ҆ста́ви си́ры , ᲂу҆ченицы̀ ꙗ҆́кѡ ви́дѣша тѧ вᲂзнᲂсѧ́щасѧ , вᲂпїѧ́хꙋ чл҃кᲂлю́бче . сла́ва , и҆ ны́нѣ , то́йже .

та́же , ѱл҃о́мъ , н҃ . кано́нъ , пра́здникꙋ , гла́съ , д҃ . со і҆рмᲂсо́мъ на́ и҃ .= и҆ въ минѣ́и , на д҃ . а҆́щели слꙋчи́тсѧ , вели́кᲂмꙋ ст҃о́мꙋ . =пᲂе́мъ : кано́нъ , пра́здникꙋ , со і҆рмᲂсо́мъ на́ ѕ҃ . и҆ ст҃о́мꙋ , на́ ѕ҃ .

На стихо́внѣ , стихѣ́ры . гла́съ , ѕ҃ . пᲂдо́бенъ . а҆́нг҃льскїѧ . Да и҆́же на землѝ вᲂзнесе́ши мѧ па́дшагѡ , прїи́де на́ землю . прїе́мъ же сᲂвᲂкꙋпи́ши ѿ сю́дꙋ , и҆ прᲂсвѣти́ши свѣ́тᲂмъ рᲂди́телѧ , всѧ̀ вᲂзнᲂше́нїѧ низ̾лᲂжи́въ , и҆́же дре́вле менѐ низ̾лᲂжи́вшагѡ . пᲂю̀ влⷣко непᲂсти́жимꙋю глꙋбинꙋ̀ чл҃кᲂлю́бїѧ твᲂегѡ̀ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . И҆гра́й а҆да́ме , с̾ра́дꙋйсѧ є҆́вва , и҆́ми же бо тлѣ́нными ѡ҆дѣ́ѧстесѧ ри́зами в̾ раѝ дре́вле , нетлѣ́нїѧ надѣ́ющесѧ . прїе́мъ сᲂдѣ́телю , не и҆зрече́ннѡ прелᲂжѝ к̾ нетлѣ́нїю и҆ сᲂвᲂзнесѐ , и҆ свѣ́тᲂмъ ѻ҆́ч҃їимъ пᲂчтѐ дне́сь .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Мꙋчи́телѧ врага̀ ѿстꙋ́пника пᲂпра́въ , си́лᲂю бж҃їею , ѡ҆бᲂлкі́исѧ въ мᲂѐ є҆стество̀ , непрело́жнѡ и҆ неслїѧ́ннѡ и҆ нераздѣ́льнѡ , вᲂстечѐ а҆́бїе с̾ ни́мъ ко ѻ҆ц҃ꙋ , пᲂстыдѣ́шисѧ є҆рети́чествꙋющихъ лю́таѧ шата́нїѧ , бг҃ᲂмꙋ́дрїи же вѣ́рнїи тᲂгѡ̀ велича́емъ .

сла́ва , и҆ нн҃ѣ . гла́съ , д҃ . Гдⷭ҇и , та́инство є҆́же ѿ́ вѣка сᲂкрᲂве́ннᲂе и҆ ѿ рᲂдо́въ , и҆спо́лнивъ ꙗ҆́кѡ бл҃гъ , прїи́де со ᲂу҆ченикѝ свᲂи́ми на́ гᲂрꙋ є҆леѡ́нскꙋю , и҆мѣ́ѧ ро́ждьшꙋю тѧ твᲂрца̀ всѣ́хъ и҆ сᲂдѣ́телѧ . и҆́же бо при стрⷭ҇ти твᲂе́й мт҃рьски па́че всѣ́хъ бᲂлѣ́знᲂвавшей . пᲂдᲂба́ше бо и҆ сла́вᲂю пло́ти твᲂе́й , премно́гᲂй наслади́тисѧ ра́дᲂсти . є҆ѧ́же и҆ мы̀ причасти́вшесѧ , є҆́же на нб҃са̀ вᲂсхо́да твᲂегѡ̀ влⷣко , вели́кꙋю твᲂю̀ млⷭ҇ть , ю҆́же на на́съ бы́вшꙋю сла́вимъ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , четверᲂпѣ́снецъ . гла́съ , и҃ . пѣ́снь , ѕ҃ . і҆рмо́съ . мл҃твꙋ прᲂлїю̀ ко́ гдⷭ҇ꙋ .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . И҆спо́лнивъ ꙗ҆́же на землѝ сла́вы твᲂеѧ̀ , вᲂзнесе́сѧ со сла́вᲂю несказа́ннᲂю , и҆ ѻ҆ц҃ꙋ принесѐ пло́ть , в̾ ню́же ѿ на́съ за милᲂсе́рдїе ѡ҆блече́сѧ , и҆ вᲂспѣ́ша нбⷭ҇ныѧ си́лы тебѐ , є҆ди́не чл҃кᲂлю́бче .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вᲂзми́тесѧ нбⷭ҇наѧ врата̀ , и҆ прїими́те бг҃а плᲂтᲂно́сца , мы́сленыѧ вᲂпїѧ́хꙋ си́лы пᲂвинꙋ́ющимсѧ , кто̀ се́й є҆го́же глаго́лете , и҆ хвалꙋ̀ ꙗ҆́кѡ твᲂрцꙋ̀ всѧ́ческимъ , непреста́ннѡ прино́сите .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Вᲂсхо́дъ стра́шныи зрѧ́ще сло́ва ᲂу҆ченицы̀ вᲂпїѧ́хꙋ , пᲂслѝ на́мъ прест҃ы́и дх҃ъ , и҆ си́ры не ѡ҆ста́ви рабы̀ твᲂѧ̀ , вѣ́дѧщихъ тѧ и҆́стиннагѡ бг҃а , и҆ чл҃ка без̾грѣ́шна .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Ѡ҆бᲂжи́лъ є҆сѝ чл҃ческᲂе є҆стество̀ , не и҆зрече́ннѡ рᲂди́всѧ ѿ дв҃ы , ѻ҆ц҃а є҆динᲂсꙋ́щнᲂе сло́во , и҆ вᲂзнесе́сѧ со сла́вᲂю . да́рꙋй ми́ръ тво́й ᲂу҆ченико́мъ , и҆ ми́рᲂви бᲂга́тꙋю млⷭ҇ть .

пѣ́снь , з҃ . і҆рмо́съ . дѣ́ти є҆вре́йскїѧ в̾ пещѝ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Стра́сть и҆ сме́рть претерпѣ̀ , и҆ тридне́венъ вᲂста́лъ є҆сѝ , ꙗ҆́кᲂже речѐ , и҆ къ нбⷭ҇нымъ вᲂз̾ше́лъ є҆сѝ , пᲂю́щимъ тѧ ᲂу҆ченико́мъ , гдⷭ҇и бж҃е во́ вѣки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Дх҃ъ на́мъ ꙗ҆́кᲂже ѡ҆бѣща̀ прест҃ы́и пᲂслѝ ще́дре , мꙋ́дрїи ᲂу҆ченицы̀ вᲂпїѧ́хꙋ , ᲂу҆мꙋдрѧ́ѧи и҆ в̾разꙋмлѧ́ѧи , всѧ̀ вѣ́рныѧ во́ вѣки .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Рꙋка́ми вᲂсплещи́те ꙗ҆зы́цы , и҆ вᲂскли́кните бг҃ꙋ в̾ весе́лїи , вᲂзнесе́сѧ хрⷭ҇то́съ , и҆ сѣди́тъ въ сла́вѣ ѡ҆деснꙋ́ю , ꙗ҆́кѡ сᲂпресто́ленъ ѻ҆ц҃ꙋ во́ вѣки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . Нѣ́дра ѻ҆́ч҃а не и҆стᲂщи́въ , въ нѣ́дрѣхъ твᲂи́хъ сло́во вᲂплᲂти́сѧ дв҃о , без̾слᲂве́сїѧ на́съ и҆збавлѧ́ѧ , пᲂю́щихъ , гдⷭ҇и бж҃е во́ вѣки бл҃гᲂслᲂве́нъ є҆сѝ .

пѣ́снь , и҃ . і҆рмо́съ . се́дмь седми́цею пе́щь .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Преѡ҆бра́жьсѧ ꙗ҆́кᲂже пи́шетъ па́че ᲂу҆ма̀ въ чꙋ́ждее , и҆ страстьмѝ всѣ́мъ вѣ́рнымъ без̾стра́стїе ꙗ҆́вѣ да́рꙋѧ , ѿ землѝ вᲂсхо́дитъ , ны́нѣ ꙗ҆ви́тисѧ ѻ҆те́ческᲂмꙋ лицꙋ̀ , а҆́нг҃лѡмъ и҆ а҆рха́нг҃лѡмъ , престо́лѡмъ є҆гѡ̀ и҆ гдⷭ҇ьствᲂмъ , тᲂгѡ̀ славᲂсло́вѧщимъ во всѧ̀ вѣ́ки .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Бѣлᲂно́сцы а҆́нг҃ли , а҆пⷭ҇лѡмъ пред̾ста́ша , недᲂмышлѧ́ющимсѧ но́вᲂмꙋ видѣ́нїю , твᲂегѡ̀ вᲂзнесе́нїѧ сло́ве ѻ҆ц҃ꙋ сᲂбезнача́льне , гл҃юще , вы̀ что̀ взира́ете та́кѡ на высᲂтꙋ̀ ; і҆с҃ъ се́й па́ки прїи́детъ сꙋди́ти ми́рꙋ , и҆́м̾же ѻ҆́бразᲂмъ ви́дите .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Всѧ̀ сᲂверши́въ гдⷭ҇и , ꙗ҆́кѡ бг҃ъ непрело́женъ , къ нбⷭ҇нымъ съ пло́тїю вᲂстечѐ , пᲂвинꙋ́ющимтисѧ а҆́нг҃льскимъ си́ламъ , и҆ ра́дᲂстнѡ ᲂу҆ченико́мъ тебѣ̀ вᲂпїю́щимъ , и҆ со́ страхᲂмъ сла́вѧщимъ , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки .

пᲂмѧнѝ на́съ гдⷭ҇и ,꙳ є҆гда̀ прїи́деши во црⷭ҇твїи сѝ . боⷢ҇ . Бг҃ᲂрᲂди́тельнице пречⷭ҇таѧ , дш҃и мᲂеѧ̀ ꙗ҆́звы , и҆ грѣха̀ мᲂегѡ̀ стрꙋ́пы ѡ҆чи́сти , и҆сто́чники и҆з̾лива́ющи и҆́же и҆з̾ ре́бръ ржⷭ҇тва́ ти , и҆ и҆́же и҆з̾ негѡ̀ ѡ҆чища́ющи стрꙋѧ́ми , к̾ тебѣ́ бо взыва́ю , и҆ к̾ тебѣ̀ припа́даю , и҆ тебѐ призыва́ю є҆ди́нꙋ спаси́тельницꙋ .

пѣ́снь , ѳ҃ . і҆рмо́съ . ᲂу҆страши́сѧ всѧ́къ слꙋ́хъ .

пᲂмѧнѝ на́съ влⷣко ,꙳ є҆гда̀ прїи́деши во црⷭ҇твїи сѝ . Вᲂзми́те врата̀ мы́сленыѧ нбⷭ҇ныѧ си́лы , прїи́де цр҃ь на́шъ , ме́ртвено сꙋщество̀ прїе́мъ , и҆ вни́детъ бг҃ъ сы́и чл҃къ ко ѻ҆ц҃ꙋ свᲂемꙋ̀ , сᲂдѣ́лавъ стра́шнаѧ и҆ пресла́внаѧ .

пᲂмѧнѝ на́съ ст҃ы́и ,꙳ є҆гда̀ прїи́деши во црⷭ҇твїи сѝ . По́йте всѝ разꙋ́мнѡ , вᲂскли́кните бг҃ꙋ сᲂтво́ршемꙋ дѣ́ла пресла́внаѧ , и҆ вᲂзше́дшемꙋ къ нбⷭ҇нымъ , и҆ а҆пⷭ҇лѡмъ ст҃ы́и дх҃ъ низ̾пᲂсла́вшемꙋ , прᲂсвѣща́ющемꙋ на́съ сла́вѧщихъ бжⷭ҇тво̀ є҆гѡ̀ .

сла́ва . Свѧза́сѧ а҆́дъ пᲂгребе́нїемъ , и҆ вᲂскрⷭ҇нїе чл҃кѡмъ дарᲂва́сѧ , вᲂскрⷭ҇нїемъ твᲂи́мъ , и҆ ѡ҆зари́сѧ землѧ̀ и҆ нбⷭ҇наѧ вᲂскрⷭ҇нїемъ ти хрⷭ҇тѐ , є҆ди́не непремѣ́нне и҆ всеси́льне , да́телю бл҃ги́мъ и҆ спаси́телю на́шъ .

и҆ ны́нѣ , боⷢ҇ . Гла́съ ти гаврїи́лᲂвъ , со всѣ́ми а҆́нг҃лы прино́симъ . ра́дꙋисѧ пᲂла́то цр҃ѧ вᲂжделѣ́ннаѧ . ра́дꙋисѧ земна́ѧ съ нбⷭ҇ными дв҃о сᲂвᲂкꙋпи́вши . є҆ѧ́же ра́ди спаса́емсѧ , вѣ́дꙋще тѧ чⷭ҇тꙋю бг҃ᲂмт҃рь .

На литꙋргі́и . прᲂки́менъ , ѱл҃о́мъ дв҃дᲂвъ . весе ли́тесѧ ѡ҆́ гдⷭ҇ѣ , и҆ ра́дꙋйтесѧ пра́веднїи . сти́хъ : бл҃же́ни и҆́мже ѿпꙋсти́шасѧ без̾зако́нїѧ , и҆ и҆́мже прикры́шасѧ грѣсѝ . дрꙋгі́и , дш҃а и҆́хъ во бл҃ги́хъ вᲂдвᲂрѧ́тсѧ . а҆пⷭ҇лъ , в̾ дѣѧ́нїихъ . заⷱ҇ , м҃г . дрꙋгі́и , заꙋпᲂко́й . заⷱ҇ , с҃о .= а҆ллилꙋ́їѧ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ . сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . =сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда и҆ в̾ ро́дъ . є҆ѵⷢ҇а́лїе , ѿ і҆ѡа́нна . заⷱ҇ , м҃и . дрꙋго́е , заꙋпᲂко́й , ѿ і҆ѡа́нна . заⷱ҇ , ѕ҃і . прича́стенъ , ра́дꙋйтесѧ пра́веднїи ѡ҆́ гдⷭ҇ѣ . дрꙋгі́и , бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда и҆ в̾ ро́дъ .