НЕДѢ́ЛѦ СЕДМА́Ѧ ПО ПА́СЦѢ

ст҃ы́хъ ѻ҆ц҃ъ . =Въ сꙋбо́тꙋ ве́черъ , на ма́лѣй вече́рни . на гдⷭ҇и вᲂзва́хъ , стⷯры , вᲂскрⷭ҇ны , на д҃ . гла́съ , ѕ҃ . запѣ́въ : ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . П=ᲂбѣ́дꙋ и҆мѣ́ѧ хрⷭ҇тѐ ю҆́же на а҆́да , и҆ на́ крⷭ҇тъ в̾зы́де , да сѣдѧ́щїѧ во тмѣ̀ и҆ сѣ́ни сме́ртнѣй , вᲂскреси́ши с̾ сᲂбо́ю . и҆́же свᲂбо́дь сы́и въ ме́ртвыхъ , и҆стᲂча́ѧи живо́тъ ѿ свᲂегѡ̀ свѣ́та , всеси́льне сп҃се пᲂми́лꙋй на́съ .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Пᲂбѣ́дꙋ и҆мѣ́ѧ хрⷭ҇тѐ ю҆́же на а҆́да , и҆ на́ крⷭ҇тъ в̾зы́де , да сѣдѧ́щїѧ во тмѣ̀ и҆ сѣ́ни сме́ртнѣй , вᲂскреси́ши с̾ сᲂбо́ю . и҆́же свᲂбо́дь сы́и въ ме́ртвыхъ , и҆стᲂча́ѧи живо́тъ ѿ свᲂегѡ̀ свѣ́та , всеси́льне сп҃се пᲂми́лꙋй на́съ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Дне́сь хрⷭ҇то́съ сме́рть пᲂпра́въ , ꙗ҆́кᲂже речѐ и҆ вᲂскр҃се , и҆ ра́дᲂсть всемꙋ̀ ми́рꙋ дарᲂва̀ , да всѝ в̾зыва́юще пѣ́сньми та́кѡ рце́мъ , и҆сто́чниче жи́зни , неприкᲂснᲂве́нныи свѣ́те , всеси́льне сп҃се пᲂми́лꙋй на́съ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Тебѐ гдⷭ҇и сꙋ́щагѡ по все́й тва́ри , грѣ́шнїи ка́мѡ бѣжи́мъ ; на́ нб҃си са́мъ живе́ши , во а҆́дѣ же пᲂпра́въ сме́рть . во глꙋбинѣ̀ мᲂрстѣ́й , тꙋ̀ рꙋка̀ твᲂѧ̀ влⷣко . к̾ тебѣ̀ прибѣга́емъ , и҆ тебѣ̀ припа́дающе мо́лимсѧ , вᲂскр҃съ и҆з̾ ме́ртвыхъ пᲂми́лꙋй на́съ .

сла́ва , и҆ нн҃ѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ́сѧ мо́лимъ , мᲂли́сѧ влⷣчце , со ст҃ы́ми а҆пⷭ҇лы , пᲂми́лᲂватисѧ дш҃а́мъ на́шимъ .

Настихо́внѣ , стⷯра , вᲂскрⷭ҇на . гла́съ , ѕ҃ . Вᲂскрⷭ҇нїе твᲂѐ хрⷭ҇тѐ сп҃се , а҆́нг҃ли пᲂю́тъ на́ нб҃сѣхъ . и҆ на́съ на землѝ спᲂдо́би , чи́стыми срⷣцы тебѐ сла́вити .

та́же , стихѣ́ры , вᲂзнесе́нїю . гла́съ , в҃ . поⷣ . до́ме є҆вфра́фᲂвъ .= Ч=ꙋ́до нᲂвᲂлѣ́пнѡ ,꙳ чл҃ческᲂе бо сꙋщество̀ ,꙳ на нб҃са̀ вᲂзнесе́сѧ ,꙳ сᲂвᲂкꙋпи́всѧ сло́вꙋ ꙳ бж҃їю вседержи́телю .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Вᲂсїѧ̀ свѣ́тлыи ,꙳ и҆ пресвѣ́тлыи де́нь ,꙳ влⷣчнᲂмꙋ бжⷭ҇твенᲂмꙋ вᲂсхо́дꙋ ꙳ и҆́же к̾ нб҃се́мъ ,꙳ прᲂсвѣща́ющи всѧ́ческаѧ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Ꙗ҆́кᲂже ᲂу҆чн҃кѡ́мъ ꙳ пᲂсла́лъ є҆сѝ всеще́дре ꙳ сра́сленыи тво́й дх҃ъ ,꙳ и҆ лю́демъ твᲂи́мъ низ̾пᲂслѝ ꙳ хрⷭ҇тѐ сп҃се бл҃гᲂда́ть твᲂю̀ .

сла́ва , и҆ ны́нѣ . гла́съ , и҆ поⷣ , то́йже . Хвалꙋ̀ бг҃ᲂпᲂдо́бнꙋ ꙳ со а҆пⷭ҇лы бцⷣа ꙳ вᲂспѣва́етъ ,꙳ гдⷭ҇а зрѧ́щи ꙳ на ѻ҆́блацѣхъ нᲂси́ма .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . гла́съ , ѕ҃ . А҆́нг҃льскїѧ си́лы на́грᲂбѣ твᲂе́мъ , стрегꙋ́щаѧ ѡ҆мертви́ша . и҆ стᲂѧ́ше мр҃і́ѧ при́ грᲂбѣ , и҆́щꙋщи пречⷭ҇тагѡ тѣ́ла твᲂегѡ̀ . и҆спрᲂве́рже а҆́да неи҆скꙋ́шьсѧ ѿ негѡ̀ . срѣ́те дв҃ꙋ да́рꙋѧи живо́тъ , вᲂскр҃съ и҆з̾ ме́ртвыхъ , гдⷭ҇и сла́ва тебѣ̀ . сла́ва , и҆ ны́нѣ . трᲂпа́рь , вᲂзнесе́нїю . гла́съ , д҃ . Вᲂзнесе́сѧ во сла́вѣ хрⷭ҇тѐ бж҃е на́шъ , ра́дᲂсть сᲂтвᲂри́въ ᲂу҆ченико́мъ свᲂи́мъ , ѡ҆бѣтᲂва́нїемъ ст҃а́гѡ дх҃а . и҆звѣще́нїе прїе́мше ꙗ҆́вѣ бл҃гᲂслᲂве́нїѧ ра́ди , ꙗ҆́кѡ ты̀ є҆сѝ сн҃ъ бж҃їи и҆зба́витель ми́рꙋ . та́же , є҆ктенїѧ̀ ма́лаѧ .= и҆ =ѿпꙋ́стъ .

На па́вечерницѣ , по дᲂсто́йнѣ , по трⷭ҇то́мъ , кᲂндакѝ : вᲂскрⷭ҇нъ , сла́ва , ѻ҆ц҃е́мъ . и҆ ны́нѣ . вᲂзнесе́нїю .

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ , пᲂста́вимъ стихо́въ , і҃ . и҆ пᲂе́мъ , стихѣ́ры вᲂскрⷭ҇ны . гла́съ , ѕ҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . П=ᲂбѣ́дꙋ и҆мѣ́ѧ хрⷭ҇тѐ ю҆́же на а҆́да , и҆ на́ крⷭ҇тъ в̾зы́де , да сѣдѧ́щїѧ во тмѣ̀ и҆ сѣ́ни сме́ртнѣй , вᲂскр҃си́ши с̾ сᲂбо́ю , свᲂбо́дь сы́и в̾ ме́ртвыхъ . и҆стᲂча́ѧ живо́тъ ѿ свᲂегѡ̀ свѣ́та , всеси́льне сп҃се пᲂми́лꙋй на́съ .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Дне́сь хрⷭ҇то́съ сме́рть пᲂпра́въ , ꙗ҆́кᲂже речѐ и҆ вᲂскр҃се , и҆ ра́дᲂванїе всемꙋ̀ ми́рꙋ дарᲂва̀ . да всѝ в̾зыва́юще пѣ́сньми та́кѡ рце́мъ , и҆сто́чниче жи́зни , неприкᲂснᲂве́нныи свѣ́те , всеси́льне сп҃се пᲂми́лꙋй на́съ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Тебѐ гдⷭ҇и сꙋ́щагѡ по все́й тва́ри , грѣ́шнїи ка́мѡ бѣжи́мъ ; на́ нб҃си са́мъ живе́ши . во а҆́дѣ же пᲂпра́въ сме́рть . во глꙋбины̀ мᲂрскі́ѧ , тꙋ̀ рꙋка̀ твᲂѧ̀ влⷣко . к̾ тебѣ̀ прибѣга́емъ , и҆ тебѣ̀ припа́дающе мо́лимсѧ , вᲂскр҃сы́и и҆з̾ ме́ртвыхъ пᲂми́лꙋй на́съ .

стихѣ́ры , вᲂзнесе́нїю .= запѣ́въ : гла́съ , то́йже . бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . Г=дⷭ҇ь вᲂзнесе́сѧ на нб҃са̀ , да по́слетъ ᲂу҆тѣ́шителѧ ми́рꙋ . нб҃са̀ ᲂу҆гᲂто́ваша прⷭ҇то́лъ є҆гѡ̀ , ѻ҆́блацы вᲂсхᲂжде́нїе є҆гѡ̀ . а҆́нг҃ли дивѧ́тсѧ , чл҃ка зрѧ́ще превы́ше себѐ . ѻ҆ц҃ъ бо жде́тъ , є҆го́же в̾ нѣ́дрѣхъ и҆́мать с̾сᲂбо́ю прⷭ҇нᲂсꙋ́щна . дх҃ъ же прест҃ы́и , вели́тъ всѣ́мъ а҆́нг҃лѡмъ є҆гѡ̀ , вᲂзми́те врата̀ кнѧ́зи ва́ши . всѝ ꙗ҆зы́цы вᲂсплещи́те рꙋка́ми , ꙗ҆́кѡ взы́де хрⷭ҇то́съ , и҆дѣ́же бѣ̀ и҆ пе́рвѣе .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Гдⷭ҇и твᲂемꙋ̀ вᲂзнесе́нїю , ᲂу҆диви́шасѧ херꙋви́ми , зрѧ́ще тебѐ бг҃а на ѻ҆́блацѣхъ вᲂсхᲂдѧ́ща , и҆ на ни́хъ сѣдѧ́щаго . сла́вимъ тѧ , ꙗ҆́кѡ бл҃га млⷭ҇ть твᲂѧ̀ , сла́ва тебѣ̀ .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . На гᲂра́хъ ст҃ы́хъ , зрѧ́ще твᲂѐ вᲂзнесе́нїе хрⷭ҇тѐ , сїѧ́нїе сла́вы ѻ҆́ч҃и , пᲂе́мъ тво́й свѣтᲂѡ҆бра́зныи лица̀ зра́къ , кла́нѧемсѧ стрⷭ҇те́мъ твᲂи́мъ [пᲂкло́н̾] . пᲂчита́емъ вᲂскрⷭ҇нїе , и҆ сла́внᲂе вᲂзнесе́нїе сла́вѧще , пᲂми́лꙋй на́съ .

стⷯры , ст҃ы́мъ ѻ҆ц҃е́мъ .= запѣ́въ : гла́съ , то́йже . ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . И҆́=з̾ чрева рᲂди́сѧ пре́жде денни́цы , ѿ ѻ҆ц҃а без̾ мт҃ре пре́жде вѣ́къ . а҆́ще а҆́рїй тва́рь тѧ , а҆ не бг҃а сла́витъ . ѽ де́рзᲂсти , смѣша́ѧ тѧ сᲂзда́телѧ тва́ремъ безꙋ́мнѡ . ве́щь ѻ҆гнѧ̀ вѣ́чнагѡ себѣ̀ со́бравъ . но сᲂбо́ръ и҆́же в̾ нике́и , сн҃а бж҃їѧ тѧ сꙋ́ща прᲂпᲂвѣ́да гдⷭ҇и , вели́кїѧ ра́ди твᲂеѧ̀ млⷭ҇ти .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Кто́ ти сп҃се ри́зꙋ раз̾дра̀ ; ты́же речѐ , а҆́рїи , и҆́же трⷪ҇цѣ раздѣлѝ , є҆ди́но честно́е нача́ло в̾ трѝ раз̾дѣле́нїѧ . се́й ѿве́ржесѧ тебѐ гл҃ѧ , несꙋ́ща бы́ти є҆ди́нᲂмꙋ ѿ трⷪ҇цы . то́йже и҆ несто́рїѧ наꙋчѝ бцⷣꙋ негл҃ати . но сᲂбо́ръ и҆́же в̾ нике́и , сн҃а бж҃їѧ тѧ и҆спᲂвѣ́да гдⷭ҇и , вели́кїѧ ра́ди твᲂеѧ̀ млⷭ҇ти .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . А҆́рїи безꙋ́мныи , прⷭ҇тѣ́й трⷪ҇цѣ пресѣчѐ є҆динᲂнача́лїе в̾ трѝ , непᲂдо́бны же и҆ чꙋ́жы сꙋ́ществы . тѣ́мже ѻ҆ц҃ы бг҃ᲂно́снїи сᲂше́дшесѧ ᲂу҆се́рднѡ , ре́внᲂстїю раз̾жига́еми , ꙗ҆́кᲂже и҆ фезви́тѧнинъ и҆лїѧ̀ , дх҃о́внымъ пᲂсѣко́ша мече́мъ , и҆́же стꙋдꙋ̀ наꙋчи́вшаго хꙋ́льнᲂмꙋ , ꙗ҆́кᲂже дх҃ъ вѣща́ше .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Вде́брь па́даетъ грѣхо́внꙋю а҆́рїи , вᲂз̾ненави́дѣвыи свѣ́та ви́дѣти . и҆ свᲂю̀ ᲂу҆тро́бꙋ вᲂз̾мꙋща́етъ страстьмѝ . и҆ бжⷭ҇твенᲂю растерза́етсѧ ᲂу҆́дицею во внꙋ́тренихъ , всѐ и҆зда́въ сꙋщество̀ и҆ дш҃ꙋ нꙋ́жнѡ , дрꙋгі́и і҆ꙋ́да бы́въ нра́вᲂмъ и҆ ѻ҆́бразᲂмъ . но сᲂбѡ́ръ и҆́же в̾ нике́и , сн҃а бж҃їѧ тѧ прᲂпᲂвѣ́да гдⷭ҇и , вели́кїѧ ра́ди твᲂеѧ̀ млⷭ҇ти .

сла́ва . гла́съ , ѕ҃ . Та́йныѧ дне́сь дꙋхо́вныѧ трꙋбы̀ , бг҃ᲂно́сныѧ ѻ҆ц҃ы вᲂсхва́лимъ , вᲂспѣ́вшїѧ пᲂсредѣ̀ цр҃кве , пѣ́снь сᲂста́внꙋю гла́съ пᲂдо́бенъ бг҃ᲂсло́вїѧ . трⷪ҇цѣ є҆ди́но непремѣ́нно сꙋщество́ же и҆ бжⷭ҇тво̀ . пᲂтреби́телѧ а҆́рїевы , и҆ правᲂсла́вныхъ пᲂбо́рники , мᲂлѧ́щасѧ всегда̀ гдⷭ҇ви , пᲂми́лᲂватисѧ дш҃а́мъ на́шимъ . и҆ ны́нѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣ ва́етъ твᲂегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́йже ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ челᲂвѣ́къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ : свѣ́тѣ ти́хїи . прᲂки́мен̾ , дню̀ .

ѿ бытїѧ̀ , чте́нїе .

Слы́шавъ а҆враа́мъ , ꙗ҆́кѡ плѣне́нъ бы́сть ло́тъ сн҃ъ бра́та є҆гѡ̀ , и҆ и҆зᲂчтѐ дᲂмᲂча́децъ свᲂи́хъ , три́ста и҆ ѻ҆смьна́десѧть , и҆ пᲂгна̀ в̾слѣ́дъ и҆́хъ до да́на . и҆ нападѐ на нѧ̀ но́щїю , са́мъ и҆ ѻ҆́трᲂцы є҆гѡ̀ с̾ ни́мъ , и҆ пᲂразѝ и҆́хъ , и҆ гᲂнѝ и҆́хъ до хᲂва́ла , є҆́же є҆́сть , ѡ҆шꙋ́юю дама́ска . и҆ вᲂзвратѝ всѧ̀ кᲂнѝ сᲂдо́мскїѧ , и҆ ло́та сн҃а бра́та свᲂегѡ̀ вᲂзвратѝ , и҆ всѧ̀ и҆мѣ́нїѧ є҆гѡ̀ , и҆ жены̀ и҆ лю́ди . и҆зы́де же ца́рь сᲂдо́мскїй во срѣ́тенїе є҆мꙋ̀ , по вᲂзвраще́нїи є҆мꙋ̀ ѿ сѣ́ча хᲂдᲂлᲂгᲂмо́рскагѡ , и҆ ца́рїе и҆́же с̾ ни́мъ , во ю҆до́ль са́винꙋ , сїе́ же бѧ́ше по́ле царе́во . и҆ мелхиседе́къ цр҃ь сали́мскїй и҆знесѐ хлѣ́бы и҆ вино̀ , бѧ́ше же сщ҃е́нникъ бг҃а вы́шнѧгѡ . и҆ блгⷭ҇вѝ а҆враа́ма и҆ речѐ , блгⷭ҇ве́нъ а҆враа́мъ бг҃ᲂмъ вы́шнимъ , и҆́же сᲂзда̀ нб҃о и҆ зе́млю , и҆ блгⷭ҇ве́нъ бг҃ъ вы́шнїй , и҆́же предадѐ врагѝ твᲂѧ̀ пᲂд̾рꙋ́чники тебѣ̀ .

ѿ втᲂра́гѡ зако́на , чте́нїе .

Во́ днехъ ѻ҆́нѣхъ , речѐ мѡѷсе́й къ сн҃ᲂво́мъ і҆и҃левымъ , ви́дите , преда́хъ пред̾ лице́м̾ ва́шим̾ зе́млю . вше́дше наслѣ́дꙋйте зе́млю , є҆́юже клѧ́тсѧ гдⷭ҇ь ѻ҆ц҃е́мъ на́шимъ а҆враа́мꙋ и҆ и҆саа́кꙋ и҆ і҆а́кѡвꙋ , да́ти тѣ́мъ , и҆ сѣ́мени и҆́хъ по ни́хъ . и҆ реко́хъ ва́мъ во́ времѧ ѻ҆́но глаго́лѧ , невᲂзмᲂгꙋ̀ є҆ди́нъ вᲂди́ти ва́съ , гдⷭ҇ь бг҃ъ на́шъ ᲂу҆мно́жилъ вы̀ є҆́сть . и҆ сѐ є҆стѐ дне́сь ꙗ҆́кѡ ѕвѣ́зды нбⷭ҇ныѧ мно́жествᲂмъ . гдⷭ҇ь бг҃ъ ѻ҆ц҃ъ на́шихъ да прилᲂжи́тъ ва́мъ , ꙗ҆́кѡ да бꙋ́дете ты́сѧщами сꙋгꙋ́бо . и҆ да бл҃гᲂслᲂви́тъ ва́съ , ꙗ҆́кᲂже гл҃а ва́мъ . и҆ прїѧ́хъ ѿ ва́съ мꙋ́жы мꙋ́дры , и҆ хꙋдо́ги и҆ разꙋ́мичны , и҆ пᲂста́вихъ и҆́хъ ѡ҆блада́ти над̾ ва́ми , тысѧщенача́льники и҆ стᲂнача́льники , и҆ пѧтьдесѧтᲂнача́льники и҆ десѧтᲂнача́льники , и҆ кни́гчїѧ сꙋдїѧ́мъ ва́шимъ . и҆ запᲂвѣ́дахъ сꙋдїѧ́мъ ва́шимъ , во́ времѧ ѻ҆́но гл҃ѧ , разсꙋжда́йте междꙋ̀ бра́тїею ва́шею , и҆ сꙋди́те пра́веднѣ , пᲂсредѣ̀ мꙋ́жемъ , и҆ пᲂсредѣ̀ бра́тᲂмъ є҆гѡ̀ и҆ пᲂсредѣ̀ прише́льцемъ є҆гѡ̀ . непᲂзна́йте лица̀ на сꙋдѣ̀ , ма́лᲂмꙋ и҆ вели́кᲂмꙋ сꙋ́диши , не ᲂу҆стыди́шисѧ лица̀ чл҃ческа , ꙗ҆́кѡ сꙋ́дъ бж҃їй є҆́сть .

ѿ втᲂра́гѡ зако́на , чте́нїе .

Во́ днехъ ѻ҆́нѣхъ , речѐ мѡѷсе́й к̾ сн҃ᲂво́мъ і҆и҃левымъ , сѐ гдⷭ҇а бг҃а твᲂегѡ̀ нб҃о , и҆ нб҃о нб҃сѝ , землѧ̀ и҆ всѧ̀ є҆ли́ка сꙋ́ть в̾ ни́хъ . ѻ҆ба́че ѻ҆ц҃ы ва́ши предвᲂсхᲂтѣ̀ люби́ти и҆́хъ вᲂи́стинꙋ . и҆ и҆збра̀ сѣ́мѧ и҆́хъ по ни́хъ ва́съ , па́че всѣ́хъ ꙗ҆зы́къ в̾ дн҃ь се́й . и҆ ѡ҆брѣ́жите жестᲂсе́рдїе ва́ше , и҆ вы́и ва́ша неѡ҆жестᲂчи́те к̾ тᲂмꙋ̀ . и҆́бо гдⷭ҇ь бг҃ъ на́шъ , се́й бг҃ъ бᲂгѡ́мъ , и҆ гдⷭ҇ь гдⷭ҇емъ . бг҃ъ вели́кїй , и҆ крѣ́пкїй и҆ стра́шный , и҆́же недиви́тсѧ лицꙋ̀ нижѐ и҆́мать взѧ́ти мздꙋ̀ , твᲂрѧ̀ сꙋ́дъ прише́льцꙋ , и҆ си́рꙋ и҆ вдᲂви́цѣ . и҆ лю́битъ прише́льца да́ти є҆мꙋ̀ хлѣ́бъ и҆ ри́зꙋ . гдⷭ҇а бг҃а твᲂегѡ̀ ᲂу҆бᲂи́шисѧ , и҆ тᲂмꙋ̀ є҆ди́нᲂмꙋ пᲂслꙋ́жиши , и҆ к̾ немꙋ̀ прилѣпи́шисѧ , и҆ и҆́менемъ є҆гѡ̀ клене́шисѧ . то́й пᲂхвала̀ твᲂѧ̀ , и҆ то́й бг҃ъ тво́й , и҆́же сᲂтвᲂри́лъ ти є҆́сть вели́каѧ и҆ сла́внаѧ сїѧ̀ , ꙗ҆́же ви́дѣстѣ ѻ҆́чи твᲂѝ .

На литі́и , стⷯры , вᲂзнесе́нїю . сла́ва . гла́съ , г҃ . А҆пⷭ҇льскихъ преда́нїи , и҆звѣ́стнїи храни́телїе бы́сте ст҃і́и ѻ҆ц҃ы . ст҃ы́ѧ бо трⷪ҇цы є҆ди́но сꙋщество̀ правᲂвѣ́рнѡ прᲂпᲂвѣ́давше , а҆́рїево хꙋле́нїе , сᲂбо́рнѣ низ̾лᲂжи́сте . с̾ ни́мже и҆ македо́нїѧ дꙋхᲂбо́рца ѡ҆бличи́вше , и҆ ѡ҆сꙋди́ли є҆стѐ несто́рїѧ , и҆ є҆ѵ̾тѷхі́ѧ же , и҆ дїᲂско́ра , саве́лїѧ же , и҆ севи́ра без̾гла́внаго . и҆́хже ѿ пре́лести и҆зба́витисѧ на́мъ и҆спрᲂси́те , нескве́рнено на́ше житїѐ , в̾ вѣ́рѣ сᲂхрани́ти мо́лимсѧ .

и҆ нн҃ѣ . гла́съ , є҃ . Гдⷭ҇и вᲂз̾нᲂсѧ́щꙋтисѧ , ѿ ню́дꙋ же неразлꙋчи́сѧ , во́инства а҆́нг҃лъ и҆ всѣ́хъ беспло́тныхъ , ра́дᲂстїю вᲂпїю́ще вы́шнимъ си́ламъ , вᲂз̾ми́те врата̀ кнѧ́зи ва́ши , и҆ вни́детъ цр҃ь сла́вы . престо́лъ бо херꙋви́мскїи вᲂспрїѧ́тъ тѧ с̾ пло́тїю , гдⷭ҇и сла́ва тебѣ̀ .

На стихо́внѣ , стихѣ́ры , вᲂскрⷭ҇ны . гла́съ , ѕ҃ . Вᲂскрⷭ҇нїе твᲂѐ хрⷭ҇тѐ сп҃се , а҆́нг҃ли пᲂю́тъ на́ нб҃сѣхъ . и҆ на́съ на землѝ спᲂдо́би , чи́стыми срⷣцы тебѐ сла́вити .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Врата̀ сᲂкрꙋши́лъ є҆сѝ мѣ́днаѧ , и҆ вереѝ а҆́дᲂвы сте́рлъ є҆сѝ , ꙗ҆́кѡ бг҃ъ всеси́ленъ , и҆ ро́дъ чл҃ческїи па́дшїи вᲂскр҃си́лъ є҆сѝ . сегѡ̀ ра́ди и҆ мы̀ пᲂю́ще вᲂпїе́мъ , вᲂскр҃сы́и и҆з̾ ме́ртвыхъ гдⷭ҇и сла́ва тебѣ̀ .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Тлѣ́нїѧ на́съ дре́внѧгѡ хрⷭ҇то́съ и҆спра́вити хᲂтѧ̀ , на крⷭ҇тѣ̀ пригвᲂжда́етсѧ , и҆ во́ грᲂбѣ пᲂлᲂга́етсѧ . є҆го́же мѷрѡно́сицы жены̀ со слеза́ми и҆ска́хꙋ , и҆ пла́чꙋще гл҃ахꙋ , ᲂу҆вы̀ на́мъ сп҃се всѣ́хъ , ка́кѡ вᲂсхᲂтѣ̀ во́ грᲂбъ всели́тисѧ ; всели́вжесѧ во́лею , ка́кѡ ᲂу҆кра́денъ бы́сть ; ка́кѡ прелᲂжи́сѧ ; ко́еже мѣ́сто сᲂкры̀ твᲂѐ живᲂно́снᲂе тѣ́ло ; но ѽ влⷣко ꙗ҆́кᲂже ѡ҆бѣща́сѧ на́мъ , ꙗ҆ви́сѧ , и҆ ᲂу҆тᲂлѝ на́ше рыда́нїе сле́знᲂе . пла́чꙋщимжесѧ и҆́мъ , а҆́нг҃лъ к̾ ни́мъ вᲂзᲂпѝ , ѿ пла́ча преста́вше , а҆пⷭ҇лѡмъ рцы́те ꙗ҆́кѡ вᲂскр҃се гдⷭ҇ь , ми́рᲂви да́рꙋѧ ѡ҆чище́нїе , и҆ ве́лїю млⷭ҇ть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Распѧ́тсѧ ꙗ҆́кᲂже вᲂсхᲂтѣ̀ хрⷭ҇тѐ , и҆ сме́рть пᲂгребе́нїемъ си плѣни́лъ є҆сѝ . тридне́внѡ вᲂскр҃се ꙗ҆́кѡ бг҃ъ со сла́вᲂю , ми́рᲂви да́рꙋѧ без̾кᲂне́чныи живо́тъ , и҆ ве́лїю млⷭ҇ть .

сла́ва . гла́съ , д҃ . Мᲂле́бнꙋю па́мѧть дне́сь бг҃ᲂно́сныхъ ѻ҆ц҃ъ , ꙗ҆́же ѿ всеѧ̀ вселе́нныѧ сᲂбра́вшихсѧ , в̾ свѣ́тлѣмъ гра́дѣ нике́йстѣмъ , правᲂвѣ́рныхъ сᲂставле́нїѧ , бл҃гᲂче́ствꙋюще правᲂвѣ́рнѡ пра́зднꙋемъ . сі́ибо лю́тагѡ а҆́рїѧ без̾бо́жнᲂе велѣ́нїе , бл҃гᲂче́стнѡ премꙋ́дрѣ раз̾рꙋши́ша , и҆ ѿ сᲂбо́рныѧ цр҃кве , сᲂбо́рнѣ тᲂгѡ̀ и҆з̾гна́ша , и҆ ꙗ҆́снѡ сн҃а бж҃їѧ є҆динᲂсꙋ́щна и҆ сᲂпрⷭ҇нᲂсꙋ́щна ѻ҆ц҃ꙋ , пре́жде вѣ́къ сꙋ́ща , всѧ̀ наꙋчи́ша и҆спᲂвѣ́дати в̾ вѣ́рнѣмъ ѻ҆́бразѣ . и҆звѣ́стнѡ и҆ бл҃гᲂче́стнѡ тᲂгѡ̀ прᲂпᲂвѣ́даша . тѣ́мже и҆ мы̀ бжⷭ҇твенымъ и҆́хъ пᲂвелѣ́́нїемъ пᲂслѣ́дꙋюще , и҆звѣ́стнѡ и҆ тве́рдѡ вѣ́рꙋюще слꙋ́жимъ , со ѻ҆ц҃е́мъ сн҃ꙋ и҆ дх҃ꙋ всест҃о́мꙋ , во є҆ди́нᲂмъ бжⷭ҇твѣ̀ , трⷪ҇цѣ є҆динᲂсꙋ́щнѣй .

и҆ ны́нѣ . гла́съ , то́йже . Гдⷭ҇и , та́инство є҆́же ѿ́ вѣка сᲂкрᲂве́ннᲂе и҆ ѿ рᲂдо́въ , и҆спо́лнивъ ꙗ҆́кѡ бл҃гъ , прїи́де со ᲂу҆ченикѝ свᲂи́ми на́ гᲂрꙋ є҆леѡ́нскꙋю , и҆мѣ́ѧ ро́ждьшꙋю тѧ твᲂрца̀ всѣ́хъ и҆ сᲂдѣ́телѧ . и҆́же бо при стрⷭ҇ти твᲂе́й мт҃рьски па́че всѣ́хъ бᲂлѣ́знᲂвавшей . пᲂдᲂба́ше бо и҆ сла́вᲂю пло́ти твᲂе́й , премно́гᲂй наслади́тисѧ ра́дᲂсти . є҆ѧ́же и҆ мы̀ причасти́вшесѧ , є҆́же на нб҃са̀ вᲂсхо́да твᲂегѡ̀ влⷣко , вели́кꙋю твᲂю̀ млⷭ҇ть , ю҆́же на на́съ бы́вшꙋю сла́вимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ѻ҆ц҃е́мъ , вⷤ . и҆ вᲂзнесе́нїю , =аⷤ . и҆ =про́чее .

Въ нлⷣю , з҃ ю , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ . гла́съ , ѕ҃ . А҆́нг҃льскїѧ си́лы на́ грᲂбѣ твᲂе́мъ , стрегꙋ́щаѧ ѡ҆мертви́ша . и҆ стᲂѧ́ше мр҃і́ѧ при́ грᲂбѣ , и҆́щꙋщи пречⷭ҇тагѡ тѣ́ла твᲂегѡ̀ . и҆спрᲂве́рже а҆́да неи҆скꙋ́шьсѧ ѿ негѡ̀ . срѣ́те дв҃ꙋ да́рꙋѧи живо́тъ , вᲂскр҃съ и҆з̾ ме́ртвыхъ , гдⷭ҇и сла́ва тебѣ̀ . вⷤ . сла́ва . трᲂпа́рь , ст҃ы́мъ ѻ҆ц҃е́мъ . гла́съ , и҃ . Препрᲂсла́вленъ є҆сѝ хрⷭ҇тѐ бж҃е на́шъ , и҆́же свѣти́ла на землѝ ѻ҆ц҃ы на́ши ѡ҆снᲂва́выи , и҆ тѣ́ми ко и҆́стиннѣй вѣ́рѣ всѣ́хъ на́съ наста́вилъ є҆сѝ . мнᲂгᲂмлⷭ҇тиве сла́ва тебѣ̀ . и҆ ны́нѣ . трᲂпа́рь , вᲂзнесе́нїю . гла́съ , д҃ . Вᲂзнесе́сѧ во сла́вѣ хрⷭ҇тѐ бж҃е на́шъ , ра́дᲂсть сᲂтвᲂри́въ ᲂу҆ченико́мъ свᲂи́мъ , ѡ҆бѣтᲂва́нїемъ ст҃а́гѡ дх҃а . и҆звѣще́нїе прїе́мше ꙗ҆́вѣ бл҃гᲂслᲂве́нїѧ ра́ди , ꙗ҆́кѡ ты̀ є҆сѝ сн҃ъ бж҃їи и҆зба́витель ми́рꙋ .

По а҃ , стихᲂло́гїи , сѣда́ленъ . гла́съ , ѕ҃ . Гро́бꙋ ѿве́рстꙋ сꙋ́щꙋ , а҆́дꙋ пла́чꙋщꙋсѧ . ма́рїѧ вᲂпїѧ́ше к̾ скры́вшимсѧ а҆пⷭ҇лѡмъ , и҆зы́дите винᲂгра́да дѣ́лателїе , прᲂпᲂвѣ́дите вᲂскрⷭ҇нїѧ сло́во , вᲂскр҃се бо гдⷭ҇ь , пᲂдаѧ̀ ми́рᲂви ве́лїю млⷭ҇ть . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . И҆́же бл҃гᲂслᲂве́нꙋю нарекі́и мт҃рь себѣ̀ , прїи́де на́ стрⷭ҇ть во́лею свᲂе́ю , вᲂсїѧ́въ на крⷭ҇тѣ̀ , взыска́ти хᲂтѧ̀ а҆да́ма . гл҃ѧ а҆́нг҃лѡмъ , сра́дꙋйтемисѧ , ꙗ҆́кѡ ѡ҆брѣ́тесѧ и҆зги́бшаѧ дра́хма . и҆́же всѧ̀ мꙋ́дрѣ ᲂу҆стро́ивыи , гдⷭ҇и сла́ва тебѣ̀ .

По в҃ , стихᲂло́гїи , сѣда́ленъ . гла́съ , ѕ҃ . Гдⷭ҇и , пред̾стᲂѧ́ше гро́бꙋ твᲂемꙋ̀ ма́рїѧ магдалы́ни , и҆ пла́чꙋщи вᲂпїѧ́ше , вертᲂгра́дарѧ тѧ мнѧ́щи гл҃аше , гдѣ̀ пᲂлᲂжи́лъ є҆сѝ вѣ́чныи живо́тъ . гдѣ̀ скры́лъ є҆сѝ и҆́же на прⷭ҇то́лѣ херꙋви́мстѣмъ сѣдѧ́щаго ; стрегꙋ́щїи бо є҆гѡ̀ , ѿ́ страха ѡ҆мертвѣ́ша . и҆лѝ гдⷭ҇а мᲂегѡ̀ да́ждь ми ; и҆лѝ со мно́ю вᲂзᲂпі́и , и҆́же въ ме́ртвыхъ бы́въ , и҆ ме́ртвыѧ вᲂскр҃си́выи , гдⷭ҇и сла́ва тебѣ̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Бцⷣе дв҃о мᲂлѝ сн҃а свᲂегѡ̀ , во́лею пригво́ждьшагᲂсѧ на крⷭ҇тѣ̀ , и҆ вᲂскрⷭ҇шаго и҆з̾ ме́ртвыхъ хрⷭ҇та̀ бг҃а на́шегѡ , спасти́сѧ дш҃а́мъ на́шимъ .

По непᲂро́чнахъ , трᲂпарѝ , а҆́нг҃льскїи сᲂбо́ръ . и҆пако́й . Во́льнᲂю и҆ живᲂтво́рнᲂю тѝ сме́ртїю хрⷭ҇тѐ бж҃е , врата̀ а҆́дᲂва сᲂкрꙋши́въ ꙗ҆́кѡ бг҃ъ . и҆ ѿве́рзлъ є҆сѝ на́мъ дре́внїи ра́й . и҆ вᲂскр҃съ и҆з̾ ме́ртвыхъ , и҆зба́ви и҆з̾ и҆стлѣ́нїѧ живо́тъ на́шъ .

степе́нны . гла́съ , ѕ҃ . а҆нтифо́нъ , а҃ . пᲂе́мъ по вⷤ . На́ небо ѻ҆́чи мᲂѝ вᲂз̾вᲂжꙋ̀ , къ тебѣ̀ сло́ве , ᲂу҆ще́дри мѧ да живꙋ́ ти . Пᲂми́лꙋй на́съ ᲂу҆ничиже́нныхъ , ᲂу҆стрᲂѧ́ѧ бл҃гᲂпᲂтре́бныѧ тѝ сᲂсꙋ́ды сло́ве . Ст҃ы́мъ дх҃ᲂмъ , всѧ́ка спасе́ннаѧ вина̀ . а҆́ще ко́емꙋ сѐ по дᲂстᲂѧ́нїю д̾хне́тъ , ско́рѡ в̾зе́млетъ ѿ земны́хъ , вᲂзвыша́етъ , вᲂзвраща́етъ , и҆ ᲂу҆стрᲂѧ́етъ гᲂрѣ̀ .

а҆нтифо́нъ , в҃ . А҆́ще не гдⷭ҇ь бы́лъ бы в̾ на́съ , ни є҆ди́нъ же ѿ на́съ прᲂти́вꙋ вᲂз̾мо́глъ бы , вра́жїимъ бра́немъ . ѡ҆дᲂлѣ́ти пᲂбѣжда́ющїи бо ѿздѣ̀ вᲂзно́сѧтсѧ . Зꙋбы̀ и҆́хъ данеѧ́та бꙋ́детъ дш҃а мᲂѧ̀ , ꙗ҆́кѡ птене́цъ сло́ве . ᲂу҆вы̀ мнѣ̀ , ка́кѡ хᲂщꙋ̀ ѿ врага̀ и҆з̾бы́ти грѣхᲂлюби́въ сы́и . Ст҃ы́мъ дх҃ᲂмъ , ѡ҆бᲂже́нїе всѣ́мъ , бл҃гᲂвᲂле́нїе , и҆ ра́зꙋмъ , ми́ръ , и҆ бл҃гᲂслᲂве́нїе . равнᲂмо́щенъ бо є҆́сть ѻ҆ц҃ꙋ и҆ сло́вꙋ .

а҆нтифо́нъ , г҃ . Надѣ́ющїисѧ на́ гдⷭ҇а , враго́мъ стра́шни , и҆ всѣ́мъ ди́вни , гᲂрѣ́ бо зрѧ́тъ . Въ без̾зако́нїи рꙋ́къ свᲂи́хъ , пра́ведныхъ жре́бїи , пᲂмо́щника тѧ и҆мѣ́ѧ сп҃се , непрᲂстрꙋ́тъ . Ст҃а́гѡ дх҃а , держа́ва на всѣ́хъ . є҆мꙋ́же вы́шнѧѧ во́инства пᲂкланѧ́ютсѧ , со всѧ́кимъ дыха́нїемъ до́лнимъ .

прᲂки́менъ , ѱл҃о́мъ , дв҃дᲂвъ . гдⷭ҇и вᲂз̾дви́гни си́лꙋ твᲂю̀ , и҆ прїидѝ да спасе́ши ны . сти́хъ : пасы́и і҆и҃лѧ , вᲂнмѝ наставлѧ́ѧи ꙗ҆́кѡ ѻ҆вча̀ і҆ѡ́сифа . всѧ́ко дыха́нїе . є҆ѵⷢ҇а́лїе , ѿ =і҆ѡа́нна . зача́ло , ѯ҃ѕ . =та́же , Вᲂскрⷭ҇нїе хрⷭ҇то́во , гⷤ .

ѱл҃о́мъ , н҃ . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю ми́лᲂсть . і҆єре́й , гл҃етъ : спасѝ бж҃е лю́ди . пᲂе́м̾ : гдⷭ҇и пᲂми́лꙋй , ві҃ . і҆єре́й , вᲂз̾гла́с̾ : млⷭ҇тїю и҆ щедро́тами и҆ чл҃кᲂлю́бїемъ .

кано́нъ , вᲂскрⷭ҇нъ , на д҃ . и҆ вᲂзнесе́нїю , на д҃ . и҆ ст҃ы́мъ ѻ҆ц҃е́мъ , на ѕ҃ .

Кано́нъ , вᲂскрⷭ҇нъ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Распрᲂсте́ртᲂма дла́ньма на крⷭ҇тѣ̀ , ѻ҆те́ческагѡ и҆спо́лнилъ є҆сѝ бл҃гᲂвᲂле́нїѧ всѧ́ческаѧ і҆с҃е бл҃же . тѣ́мже пᲂбѣ́днꙋю пѣ́снь всѝ тебѣ̀ пᲂе́мъ .= Стра́хᲂмъ тебѣ̀ ꙗ҆́кѡ раба̀ сме́рть пᲂвелѣ́на , пристꙋпѝ ко влⷣцѣ живᲂтꙋ̀ . тᲂѧ̀ ра́ди раздава́ющꙋ на́мъ , без̾кᲂне́чныи живо́тъ и҆ вᲂскрⷭ҇нїе . =боⷢ҇ . Свᲂего́ си прїе́мши сᲂдѣ́телѧ ꙗ҆́кѡ са́мъ вᲂсхᲂтѣ̀ , ѿ без̾сѣ́меннагѡ чре́ва ти , па́че ᲂу҆ма̀ вᲂплᲂща́ема чⷭ҇таѧ , тва́ремъ вᲂи́стинꙋ ꙗ҆ви́сѧ влⷣчце .

кано́нъ , вᲂзнесе́нїю . гла́съ , є҃ . і҆рмо́съ . Спаси́телю бг҃ꙋ . запѣ́въ : сла́ва гдⷭ҇и вᲂзнесе́нїю твᲂемꙋ̀ . Вᲂспᲂе́мъ всѝ лю́дїе и҆́же на ра́мꙋ херꙋви́мскꙋ , вᲂзне́сшꙋсѧ со сла́вᲂю хрⷭ҇тꙋ̀ , и҆ спᲂсади́вшꙋ на́съ ѡ҆деснꙋ́ю ѻ҆ц҃а , пѣ́снь пᲂбѣ́днꙋю ꙗ҆́кѡ прᲂсла́висѧ .= вⷤ . Хᲂда́таѧ бг҃ꙋ и҆ чл҃кѡмъ хрⷭ҇та̀ , ли́цы а҆́нг҃льстїи ви́дѣвше съ пло́тїю въ вы́шнихъ , ᲂу҆дивлѧ́хꙋсѧ , сᲂгла́снѡ же вᲂспѣва́хꙋ , пѣ́нїе пᲂбѣ́днᲂе ꙗ҆́кѡ прᲂсла́висѧ . вⷤ .=

кано́нъ , ст҃ы́мъ ѻ҆ц҃е́мъ . гла́съ , ѕ҃ . і҆рмо́съ . Ꙗ҆́кѡ по́сꙋхꙋ . запѣ́в̾ : ст҃і́и ѻ҆ц҃ы , мᲂли́те бг҃а ѡ҆ на́съ . И҆́же ст҃ы́хъ ѻ҆ц҃ъ вᲂсхвалѧ́юще всест҃ы́и сᲂбо́ръ , всест҃о́е тᲂгѡ̀ во мнѣ̀ сᲂвѣща́нїе вᲂпїю́щꙋ , мᲂлю́ тѧ хрⷭ҇тѐ є҆́же сᲂхрани́ти ми сѐ .= вⷤ . Бг҃ᲂно́снїи ѻ҆ц҃ы ꙗ҆́кѡ мо́лнїѧ сᲂше́дшесѧ , дне́сь тебѐ хрⷭ҇тѐ є҆динᲂро́дна ѻ҆ц҃ꙋ , сᲂбез̾нача́льна сн҃а и҆ є҆динᲂсꙋ́щна , ꙗ҆́снѡ и҆спᲂвѣ́даша . вⷤ . сла́ва . Невѣ́сты твᲂеѧ̀ цр҃кве , бл҃гᲂсла́внїи невѣстᲂкраси́телїе влⷣко , вѣ́ры ꙗ҆́вѣ пᲂвелѣ́нїѧ ᲂу҆ста́въ и҆злᲂжи́вше , ꙗ҆́кѡ злато́ю ᲂу҆́тварїю бг҃ᲂлѣ́пнѡ тꙋ̀ ѡ҆блеко́ша . =и҆ нн҃ѣ , боⷢ҇ . Преꙋкраше́на сла́вᲂю бжⷭ҇твенᲂю та́йнᲂю , честна́ѧ цр҃ца сн҃ꙋ свᲂемꙋ̀ и҆ бг҃ꙋ пред̾стᲂи́тъ , на́мъ спасе́нїе дш҃е́внᲂе прᲂсѧ́щи .

катава́сїѧ : Спаси́телю бг҃ꙋ , в̾ мо́ри лю́ди немо́крыми стᲂпа́ми наста́вльшꙋ , и҆ фараѡ́на с̾ вѡ́и пᲂто́пльшꙋ , тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Бг҃а распина́ема пло́тїю зрѧ́щи всѧ̀ тва́рь , распада́шесѧ стра́хᲂмъ ; но вседержа́щею дла́нїю на́съ ра́ди распѧ́таго , крѣ́пкѡ держи́ма бѣ̀ .= Сме́ртїю сме́рть разᲂре́на , лежи́тъ ѻ҆каѧ́ннаѧ без̾дыха́нїѧ , живᲂта́ бо нетерпѧ́щи , бжⷭ҇твенагѡ прираже́нїѧ , ᲂу҆мерщвѧ́етсѧ крѣ́пкїи , и҆ да́рꙋетсѧ всѣ́мъ вᲂскрⷭ҇нїе . =боⷢ҇ . Бжⷭ҇твенаго ржⷭ҇тва́ ти чи́стаѧ , всѧ́кїи є҆стества̀ чи́нъ превᲂсхо́дитъ чꙋ́до . бг҃а бо пресꙋ́щна зачала̀ є҆сѝ во́ чревѣ , и҆ ро́ждьши пребыва́еши при́снѡ дв҃аѧ .

и҆́нъ , і҆рмо́съ . Си́лᲂю крⷭ҇та̀ твᲂегѡ̀ . Вᲂз̾ше́дъ жизнᲂда́вче хрⷭ҇тѐ ко ѻ҆ц҃ꙋ , и҆ вᲂзне́слъ є҆сѝ ро́дъ на́шъ чл҃кᲂлю́бче , неи҆зрече́ннымъ бл҃гᲂꙋтро́бїемъ свᲂи́мъ .= вⷤ . Ч=и́ни а҆́нг҃льстїи , чл҃ческᲂе є҆стество̀ ви́дѣвше сп҃се сᲂвᲂсхᲂди́мо , тебѐ не преста́ннѡ ᲂу҆дивлѧ́еми сла́влѧхꙋ . Оу҆жаса́хꙋсѧ а҆́нг҃льстїи ли́цы хрⷭ҇тѐ , зрѧ́ще тѧ с̾ тѣлесе́мъ вᲂзне́сшасѧ , и҆ вᲂспѣва́хꙋ ст҃о́е твᲂѐ вᲂзнесе́нїе .

и҆́нъ , і҆рмо́съ . Нѣ́сть ст҃а ꙗ҆́кᲂже ты̀ . То́къ и҆ стрⷭ҇ть и҆ сѣче́нїе , а҆́рїи безꙋ́мныи ржⷭ҇твꙋ̀ бжⷭ҇твенᲂмꙋ , ѕлᲂче́стнѡ нечести́выи прилага́ѧ , сѣчи́тельнымъ ѻ҆те́ческимъ мече́мъ пᲂсѣка́етсѧ .= двⷤа . Ꙗ҆́кᲂже дре́вле бжⷭ҇твеныи а҆враа́мъ , во ѡ҆рꙋ́жьшесѧ всечⷭ҇тні́и и҆ бг҃ᲂгла́снїи , врагѝ твᲂѧ̀ бла́же неи́стᲂвныѧ , твᲂе́ю держа́внᲂю си́лᲂю пᲂгꙋби́ша . двⷤа . сла́ва . Пе́рвᲂе сᲂвᲂкꙋпле́нїе , твᲂи́мъ сᲂбра́вшемсѧ ст҃лемъ , є҆динᲂсꙋ́щна тѧ сп҃се ѻ҆ц҃ꙋ , и҆ твᲂрца̀ всѣ́мъ , и҆ пре́же вѣ́къ сꙋ́ща рᲂди́вшасѧ , правᲂвѣ́рнѡ и҆ бл҃гᲂче́стнѡ прᲂпᲂвѣ́даша . =и҆ нн҃ѣ , боⷢ҇ . Немо́жетъ сло́во земны́хъ ни ѧ҆зы́къ , тебѐ дв҃це вᲂсхвали́ти дᲂсто́йнѡ . и҆с̾тебе́ бо без̾ сѣ́мене живᲂда́вецъ хрⷭ҇то́съ , во плᲂти́тисѧ пречⷭ҇таѧ бл҃гᲂи҆зво́ли .

катава́сїѧ : Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , ꙗ҆́кѡ пѣ́ти и҆ сла́вити , спаси́тельнᲂе твᲂѐ вᲂзнесе́нїе .

кᲂнда́къ . гла́съ , ѕ҃ . Є҆́же ѡ҆ на́съ сᲂверши́въ смᲂтре́нїе , и҆ ꙗ҆́же на землѝ сᲂєдини́въ съ нбⷭ҇ными , вᲂзнесе́сѧ во сла́вѣ хрⷭ҇тѐ бж҃е на́шъ , и҆ ника́кᲂже ѿлꙋча́ѧсѧ , но пребыва́ѧ не ѿстꙋ́пнѡ , и҆ вᲂпїѧ̀ лю́бѧщимъ тѧ , а҆́зъ є҆́смь с̾ ва́ми , и҆ никто́же на вы̀ . и҆́кᲂсъ . И҆́же земна́ѧ на землѝ ѡ҆ста́вивше , и҆ пе́пельныхъ пе́рсти ᲂу҆стꙋпа́юще , прїиди́те вᲂспрѧ́немъ , и҆ на высᲂтꙋ̀ вᲂз̾веде́мъ ѻ҆́чи и҆ ра́зꙋмы , впери́мъ ви́ды в̾кꙋ́пѣ и҆ чꙋ́вства . на нбⷭ҇наѧ врата̀ сме́ртнїи , непщꙋ́емъ бы́ти на є҆леѡ́нстѣй гᲂрѣ̀ , и҆ взира́ти ко и҆збавлѧ́ющемꙋ на ѻ҆́блацѣхъ нᲂси́мꙋ . ѿ ню́дꙋ бо гдⷭ҇ь на небеса̀ вᲂзнесе́сѧ , ѿ тꙋ́дꙋ и҆ дарᲂлюбе́зны да́ры раздаѧ̀ а҆пⷭ҇лѡмъ свᲂи́мъ , ᲂу҆тѣ́шивъ ѧ҆̀ ꙗ҆́кѡ ѻ҆ц҃ъ , и҆ вᲂзᲂпи́въ и҆́мъ , наста́вихъ вы ꙗ҆́кѡ сн҃ѡвы , и҆ речѐ к̾ ни́мъ , не ѿлꙋча́юсѧ ва́съ , а҆́зъ є҆́смь с̾ ва́ми , и҆ никто́же на вы̀ . сѣда́ленъ . гла́съ , д҃ . Нике́йскїи свѣ́тлыи гра́дъ дне́сь , ѿ всеѧ̀ землѝ к̾ себѣ̀ призва̀ , три́ста и҆ ѻ҆смьна́десѧть ст҃лей , на гл҃авшаго хꙋлꙋ̀ а҆́рїѧ , и҆ на ᲂу҆ма́лившаго є҆ди́нᲂго ѿ трⷪ҇цы , сн҃а и҆ сло́ва вᲂи́стинꙋ бж҃їѧ . ѻ҆ни́же сᲂше́дшесѧ вѣ́рꙋ ᲂу҆тверди́ша . сла́ва , то́йже . и҆ ны́нѣ . Къ свᲂемꙋ̀ рᲂди́телю па́ки вᲂсте́къ , вседѣ́телю , рабы̀ свᲂѧ̀ неѡ҆ста́ви си́ры , ᲂу҆ченицы̀ ꙗ҆́кѡ ви́дѣвше тѧ вᲂзнᲂси́ма , вᲂпїѧ́хꙋ чл҃кᲂлю́бче .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Дре́во прᲂцвѣло̀ є҆́сть хрⷭ҇тѐ сꙋ́щаго живᲂта̀ , жи́знь на́мъ и҆зрастѝ . крⷭ҇тъ бо вᲂдрꙋзи́сѧ , и҆ всѧ̀ напᲂи́въ кро́вїю и҆ вᲂдо́ю и҆з̾ нетлѣ́нныхъ ти ре́бръ .= Нектᲂмꙋ̀ ѕмі́й мнѣ̀ , ло́жнѡ ѡ҆бᲂже́нїе влага́етъ . хрⷭ҇то́съ бо бл҃гᲂдѣ́тель чл҃чꙋ є҆стествꙋ̀ , ны́нѣ невᲂзбра́ннѡ стезю̀ живᲂтꙋ̀ мᲂемꙋ̀ ᲂу҆стро́й . =боⷢ҇ . Ꙗ҆́кѡ вᲂи́стинꙋ не и҆з̾гл҃анна сꙋ́ть , и҆ непᲂсти́жима твᲂегѡ̀ бцⷣе бг҃ᲂлѣ́пнаго ржⷭ҇тва̀ , сꙋ́щимъ на землѝ , и҆ нбⷭ҇нымъ прⷭ҇нѡ дв҃о та́инство .

и҆́нъ , і҆рмо́съ . Оу҆слы́шахъ слꙋ́хъ . Вᲂзнесы́исѧ во сла́вѣ , и҆́же а҆́нг҃лѡмъ цр҃ю ᲂу҆тѣ́шителѧ на́мъ ѿ ѻ҆ц҃а пᲂслѝ . тѣ́мже вᲂпїе́мъ ти , сла́ва си́лѣ твᲂе́й гдⷭ҇и .= вⷤ . Ꙗ҆́=кѡ взы́де сп҃съ ко ѻ҆ц҃ꙋ съ пло́тїю , ᲂу҆диви́шасѧ є҆мꙋ̀ а҆́нг҃льскаѧ во́инства , и҆ вᲂзᲂпи́ша , сла́ва си́лѣ твᲂе́й гдⷭ҇и . Го́рнїѧ си́лы к̾ го́рнѣйшимъ вᲂпїѧ́хꙋ , врата̀ вᲂзми́те , хрⷭ҇тꙋ̀ на́шемꙋ цр҃ю . є҆го́же вᲂспѣва́емъ вкꙋ́пѣ со ѻ҆ц҃е́мъ и҆ дх҃ᲂмъ .

и҆́нъ , і҆рмо́съ . Хрⷭ҇то́съ мнѣ̀ си́ла . Ѿчꙋжи́всѧ а҆́рїи ᲂу҆мо́мъ неразꙋ́мнымъ , ѿ правᲂсла́вныѧ вѣ́ры , ѻ҆те́ческими сꙋды̀ и҆з̾гна́нъ бы́сть ѿ цр҃кве , ꙗ҆́кᲂже сᲂсꙋ́дъ гни́лъ ѕлᲂимени́тыи .= вⷤ . Ѡ҆= тебѣ̀ влⷣко пᲂдвиза́сѧ ли́къ ѻ҆ц҃ъ , твᲂѧ̀ врагѝ ѕѣлѡ̀ пᲂбѣдѝ , и҆ сᲂєсте́ствена тѧ и҆ ра́вна ѻ҆ц҃ꙋ и҆ дх҃ꙋ наꙋчи́лъ є҆́сть .= вⷤ . сла́ва . Хᲂда́тай бы́сть бг҃ъ и҆ чл҃къ , бг҃ꙋ и҆ чл҃кѡмъ хрⷭ҇то́съ . тѣ́мже хрⷭ҇тѐ двѣма́ тѧ є҆стество́ма , є҆ди́наго зна́юще сн҃а , бг҃ᲂмꙋ́дрїи прᲂпᲂвѣ́даша . =и҆ ны́нѣ , боⷢ҇ . Ме́ртва мѧ пᲂказа̀ дре́ва вкꙋше́нїе , жи́зни же дре́во и҆с̾тебѐ ꙗ҆ви́всѧ всечⷭ҇таѧ вᲂскресѝ , и҆ раѧ̀ пи́щи наслѣ́дника мѧ пᲂказа̀ .

катава́сїѧ : Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ вᲂзᲂпи́хъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Ѿстꙋпа́етъ ми херꙋви́мъ ны́нѣ влⷣко , и҆ пла́меннᲂе ѻ҆рꙋ́жїе плещѝ мнѣ̀ дае́тъ , тѧ̀ ви́дѣвше сло́во бж҃їе и҆́стиннаго бг҃а , разбо́йникꙋ пꙋ́ть в̾ ра́й сᲂтво́ршаго .= Нектᲂмꙋ̀ бᲂю́сѧ , є҆́же в̾ зе́млю влⷣко хрⷭ҇тѐ вᲂзвраще́нїѧ . ты́ бо ѿ землѝ вᲂз̾ве́лъ мѧ є҆сѝ забве́на , ра́ди бл҃гᲂꙋтро́бїѧ мно́гагѡ , к̾ высᲂтѣ̀ нетлѣ́нїѧ , вᲂскрⷭ҇нїемъ свᲂи́мъ . =боⷢ҇ . И҆́же бцⷣꙋ тѧ ѿ дш҃и и҆спᲂвѣ́дающїѧ , влⷣчце ми́рꙋ бл҃га́ѧ спаса́й . тебе́ бо застꙋпле́нїе непᲂбѣди́мо и҆́мамы , и҆́стиннꙋю бг҃ᲂрᲂди́тельницꙋ .

и҆́нъ , і҆рмо́съ . Оу҆́треннююще вᲂпїе́мъ ти гдⷭ҇и . А҆́нг҃льскїѧ си́лы , взе́млема тебѐ ви́дѣвше , врата̀ взыва́хꙋ цр҃ю на́шемꙋ вᲂзми́те .= двⷤа . И҆=спо́лнивъ весе́лїѧ всѧ́ческаѧ млⷭ҇тиве , къ го́рнимъ си́ламъ с̾ пло́тїю прише́лъ є҆сѝ . А҆пⷭ҇ли ви́дѣвше вᲂз̾выша́ема сп҃са , с̾ тре́петᲂмъ взыва́хꙋ цр҃ю на́шемꙋ сла́ва тебѣ̀ .

и҆́нъ , і҆рмо́съ . Бж҃їимъ свѣ́тᲂмъ . Красны̀ но́ги вᲂи́стинꙋ , є҆́же ны́нѣ прᲂпᲂвѣ́дающихъ тѧ , смирѧ́ѧ всѧ́къ ᲂу҆́мъ преимꙋ́щїи , всѣ́хъ а҆́нг҃лъ и҆ чл҃къ хрⷭ҇тѐ , и҆ мно́жествᲂмъ ми́ра ми́ръ сᲂвᲂкꙋплѧ́юща .= вⷤ . Премꙋ́дрᲂсть и҆ си́лꙋ ѻ҆́ч҃ꙋ , и҆ сло́во сᲂи҆пᲂста́сно , тебѐ хрⷭ҇тѐ сᲂше́дшесѧ прᲂпᲂвѣ́даша , и҆́же всест҃а́гѡ сщ҃е́нства , ст҃ы́мъ и҆ пречⷭ҇тымъ ми́рᲂмъ печатлѣ́вшїисѧ , бжⷭ҇твенїи ᲂу҆чи́телїе . вⷤ . сла́ва . Во́дъ стрꙋѧ́ми чи́стыми ᲂу҆чи́тельства , правᲂсла́внꙋю цр҃кᲂвь напᲂи́вше , на вᲂда́хъ пᲂко́ѧ ны́нѣ наслажда́етесѧ вѣ́чнѡ бжⷭ҇твенїи ᲂу҆чи́телїе . =и҆ нн҃ѣ , боⷢ҇ . Свѣти́льнице пречⷭ҇таѧ свѣтла̀ , всѣ́мъ вᲂсїѧ́вши хрⷭ҇та̀ пра́веднагᲂ= =сл҃нца , и҆ тебѐ вѣ́дꙋще є҆ди́нꙋ бцⷣꙋ пре чⷭ҇тꙋю , твᲂѐ нн҃ѣ застꙋпле́нїе призыва́емъ .

катава́сїѧ : Оу҆́треннююще вᲂпїе́мъ ти гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂми́лᲂстиве . Распина́емь влⷣко , гвᲂздьмѝ ᲂу҆́бѡ , клѧ́твꙋ ю҆́же на на́съ пᲂтреби́лъ є҆сѝ . кᲂпїе́мъ же прᲂбᲂда́емь в̾ ре́бра , а҆да́мᲂво рꙋкᲂписа́нїе растерза́въ , ми́ръ свᲂбᲂди́лъ є҆сѝ .= А҆да́мъ низ̾веде́сѧ , ле́стїю запѧ́тъ бы́въ ко а҆́дᲂвѣ про́пасти . но и҆́же є҆стество́мъ бг҃ъ сы́и млⷭ҇тивъ , сᲂше́лъ є҆сѝ на и҆ска́нїе , и҆ на ра́мꙋ пᲂне́съ сᲂвᲂскр҃си́лъ є҆сѝ . =боⷢ҇ . Пречⷭ҇таѧ влⷣчце , ро́ждьшаѧ земны́мъ ко́рмчїю и҆ гдⷭ҇а , страсте́й мᲂи́хъ непᲂстᲂѧ́ннᲂе и҆ лю́тᲂе разженѝ смꙋще́нїе , и҆ ти́шинꙋ пᲂда́ждь срⷣцꙋ мᲂемꙋ̀ .

и҆́нъ , і҆рмо́съ . Ѡ҆бы́де мѧ бе́здна . Взыгра́шасѧ а҆пⷭ҇ли , зрѧ́ще на высᲂтꙋ̀ дне́сь зижди́телѧ вᲂзнᲂси́ма , ᲂу҆пᲂва́нїемъ дх҃а , и҆ со́ страхᲂмъ зᲂвѧ́хꙋ , сла́ва вᲂсхо́дꙋ твᲂемꙋ̀ .= двⷤа . Ꙗ҆́=кѡ ви́дѣша тѧ сп҃се на́шъ вы́шнїѧ си́лы , на высᲂтꙋ̀ взе́млема с̾ тѣ́лᲂмъ , взыва́хꙋ гл҃юще вели́ко влⷣко чл҃кᲂлю́бїе твᲂѐ . Пред̾ста́ша а҆́нг҃ли , вᲂпїю́ще хрⷭ҇тѐ ᲂу҆ченико́мъ твᲂи́мъ , и҆́м̾же ѻ҆́бразᲂмъ ви́дѣсте хрⷭ҇та̀ вᲂсхᲂдѧ́ща с̾ пло́тїю , па́ки , прїи́детъ пра́веденъ и҆́же всѣ́мъ сꙋдїѧ̀ .

и҆́нъ , і҆рмо́съ . Жите́йскагѡ мо́рѧ . Оу҆таи́тисѧ невᲂзмо́же плевело́мъ сѣ́ѧтель , про́мысла не и҆збѣ́жнагѡ , неи҆́стᲂвствꙋ тезᲂи҆мени́тъ нарече́нныи . і҆ꙋ́дѣ бо пᲂревнᲂва́въ , и҆ ꙗ҆́кᲂже и҆ ѻ҆́нъ раз̾сѣ́десѧ вселꙋка́выи .= вⷤ . Бжⷭ҇твенᲂе сᲂсло́вїе ѻ҆ц҃ъ и҆ чⷭ҇тно́е , є҆динᲂро́днᲂе сїѧ́нїе и҆з̾ сꙋщества̀ вᲂсїѧ́вша ѿ ѻ҆ц҃а прᲂпᲂвѣ́да тѧ влⷣко , и҆ пре́жде всѣ́хъ вѣ́къ дре́внѣйша . двⷤа . сла́ва . Чре́во растерза́сѧ по слᲂвесѝ , и҆сто́чникъ мꙋ́тныи и҆ непїе́мыи , є҆́реси и҆стᲂчи́выи ѕлᲂчести́выѧ , ра́лᲂмъ мл҃твъ сщ҃е́нникъ бжⷭ҇твеныхъ прᲂмышле́нїемъ . =и҆ ны́нѣ , боⷢ҇ . Вели́кїи пред̾написа̀ во пррⷪ҇цѣхъ мѡѷсе́й , тебѐ кᲂвче́гъ и҆ трапе́зꙋ , и҆ свѣ́щникъ и҆ рꙋ́чкꙋ , ѡ҆бра́знѡ зна́менꙋѧ вᲂплᲂще́нїе вы́шнѧгѡ , є҆́же и҆с̾ тебѐ мт҃и дв҃о .

катава́сїѧ : Ѡ҆бы́де мѧ бе́здна , гро́бъ же ми ки́тъ бы́сть . а҆́зъ же вᲂзᲂпи́хъ к̾ тебѣ̀ чл҃кᲂлю́бче , и҆ спасе́ мѧ десни́ца твᲂѧ̀ гдⷭ҇и .

кᲂнда́къ . гла́съ , и҃ . А҆пⷭ҇льскᲂе прᲂпᲂвѣ́данїе , и҆ ѻ҆ц҃ъ ᲂу҆че́нїе , цр҃кви є҆ди́нᲂю вѣ́рᲂю запечатлѣ̀ , и҆ ри́зꙋ нᲂсѧ́щи и҆́стинѣ , и҆стка́нꙋ ѿ вы́шнѧгѡ бг҃ᲂсло́вїѧ , и҆справлѧ́етъ и҆ сла́витъ , бл҃гᲂче́стїѧ вели́кᲂе та́инство . и҆́кᲂсъ . Высо́кимъ прᲂпᲂвѣ́данїемъ , бж҃їю цр҃кᲂвь ᲂу҆слы́шимъ вᲂпїю́щꙋ , жа́ждаи да прїи́детъ ко мнѣ̀ , и҆ ча́шꙋ є҆ѧ́же нᲂшꙋ̀ , да пїе́тъ . ча́ша бо є҆́сть премꙋ́дрᲂсти . и҆ сїѐ пи́во ѿ и҆́стины слᲂве́съ пᲂчерпо́хъ , и҆ во́дꙋ непрᲂлива́ющꙋ прекᲂсло́вїѧ , но и҆спᲂвѣ́данїѧ . є҆ѧ́же пїѧ̀ ны́нѣшнїи і҆и҃ль , бг҃а зри́тъ вѣща́юща , ви́дите ви́дите , ꙗ҆́кѡ са́мъ а҆́зъ є҆́смь , и҆ непремѣнѧ́юсѧ . а҆́зъ бг҃ъ пе́рвыи , а҆́зъ же и҆ по си́хъ , и҆ ра́звѣ менѐ и҆но́гѡ нѣ́сть ѿ ню́дъ . и҆ ѿ сю́дꙋ причаща́ющїисѧ насы́тѧтсѧ , и҆ вᲂсхва́лѧтъ бл҃гᲂче́стїѧ вели́кᲂе та́инство .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Рыда́ѧ стрⷭ҇ти твᲂеѧ̀ сл҃нце , в̾ мра́къ ѡ҆блече́сѧ , и҆ во́дне по все́й землѝ влⷣко хрⷭ҇тѐ , свѣ́тъ пᲂмрачи́сѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ѡ҆блеко́шасѧ хрⷭ҇тѐ , схᲂжде́нїемъ ти , в̾ свѣ́тъ преи҆спо́днѧѧ . пра́ѻ҆ц҃ъ же весе́лїѧ и҆спо́лненъ ꙗ҆ви́сѧ , ликᲂвствꙋ́ѧ и҆гра́ше , вᲂпїѧ̀ , блгⷭ҇ве́нъ бг҃ъ ѻ҆ц҃ъ на́шихъ . трⷪ҇ченъ . Трⷪ҇цꙋ всѣ́ми владꙋ́щꙋю , є҆стество́мъ трисᲂста́внꙋю , бл҃гᲂсть без̾чи́сленꙋю и҆ пꙋчи́нꙋ свѣ́та . пᲂю́ще вᲂзᲂпїе́мъ вѣ́рнїи , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Въ пещѝ ѻ҆́гненнѣй . На ра́мꙋ сп҃се заблꙋди́вшее взе́мъ є҆стество̀ вᲂзнесе́сѧ , бг҃ꙋ и҆ ѻ҆ц҃ꙋ приведѐ .= двⷤа . И҆́=же на ѻ҆́блацѣ свѣ́та вᲂзнесы́исѧ , и҆ спасѐ ми́ра , блгⷭ҇ве́нъ бг҃ъ ѻ҆ц҃ъ на́шихъ . Вᲂз̾ше́дыи во́ плᲂти к̾ беспло́тнᲂмꙋ ѻ҆ц҃ꙋ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Хладᲂда́тельнꙋ ᲂу҆́бѡ .= Пᲂбѣди́сте ѻ҆ц҃ы неи́стᲂвствꙋ тезᲂимени́таго а҆́рїѧ не и҆сто́вствᲂвавшаго лю́тѣ , и҆ гл҃авша на высᲂтꙋ̀ непра́вдꙋ гдⷭ҇ви , бж҃їѧ бо сн҃а ѿрече́сѧ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . двⷤа . Сн҃о́мъ гро́мᲂвѣмъ пᲂдо́бѧщесѧ чꙋ́днїи , сло́вꙋ ѻ҆ц҃ꙋ сᲂбез̾нача́льнꙋ и҆ є҆динᲂпресто́льнꙋ , ѻ҆гнезра́чными ᲂу҆сты̀ ва́шими , всѣ́хъ ᲂу҆читѐ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . двⷤа . сла́ва . Ꙗ҆́кѡ крила́ти ѻ҆рлѝ , сло́вꙋ пᲂмᲂщѝ прїидо́сте бг҃ᲂбл҃же́ннїи , ѿ кᲂне́цъ бо вселе́нныѧ сᲂбра̀ ва́съ дх҃ъ ст҃ы́и вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . =и҆ нн҃ѣ , боⷢ҇ . Ю҆́нᲂшы трѝ пе́щь не ѡ҆палѝ , ржⷭ҇тво̀ прᲂѡ҆бразꙋ́ющи твᲂѐ . бжⷭ҇твеныи бо ѻ҆́гнь тебѐ не ѡ҆пали́въ , всели́сѧ в̾ тѧ̀ , и҆ всѣ́хъ прᲂсвѣтѝ вᲂпи́ти , бл҃гᲂслᲂве́на ꙗ҆́же бг҃а пло́тїю ро́ждьши .

катава́сїѧ : Въ пещѝ ѻ҆́гненнѣй , пѣвцы̀ спа́слъ дѣ́ти , блгⷭ҇ве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . И҆с̾ пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки .

ꙋде́йскїѧ дре́вле прᲂрᲂкᲂꙋбі́йцы лю́ди , за́висть бг҃ᲂꙋбі́йственꙋю ны́нѣ сᲂдѣ́лаша , тебѐ на крⷭ҇тъ вᲂзне́сше сло́ве бж҃їи , є҆го́же превᲂзно́симъ во́вѣки . Нбⷭ҇ныхъ крꙋ́гъ не ѡ҆ста́вль , и҆ во а҆́дъ сᲂше́дъ , всѐ сᲂвᲂздви́же хрⷭ҇тѐ лежа́щее во гнᲂѝ чл҃чество . тѣ́мже тѧ пᲂе́мъ гдⷭ҇а , и҆ превᲂзно́симъ во́ вѣки . трⷪ҇ченъ . Є҆ди́но є҆стество̀ трⷪ҇цы , не и҆счете́нно си́льнѡ , превᲂсхᲂдѧ́щее , всѧ́каго сло́ва , и҆ є҆стества̀ и҆ по́мыслъ , прⷭ҇нѡ правᲂсла́вно прᲂпᲂвѣ́даемъ , и҆ превᲂзно́симъ во́ вѣки .

и҆́нъ , і҆рмо́съ . И҆з̾ ѻ҆ц҃а пре́жде вѣ́къ . И҆́же во двᲂю̀ сꙋществꙋ̀ вᲂз̾летѣ́вшаго жизнᲂда́вца хрⷭ҇та̀ на нб҃са̀ со сла́вᲂю , и҆ ѻ҆ц҃ꙋ сᲂсѣдѧ́ща , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки .= вⷤ . И҆́=же ѿ рабо́ты и҆́дᲂльскїѧ тва́рь и҆зба́вившаго , и҆ пред̾ста́вивша тꙋ̀ свᲂбо́днꙋ свᲂемꙋ̀ ѻ҆ц҃ꙋ , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки . И҆́же свᲂи́мъ сᲂше́ствїемъ низлᲂжи́вшаго сᲂпᲂста́та , и҆ свᲂи́мъ вᲂз̾ше́ствїемъ прᲂсла́вивша чл҃ка , сщ҃е́ннїи по́йте лю́дїе , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . И҆с̾ пла́мени ст҃ы́мъ . Прᲂсвѣти́вшесѧ лꙋча́ми твᲂегѡ̀ бжⷭ҇тва̀ , блазі́и твᲂѝ па́стырїе тебѐ и҆спᲂвѣ́даша бытїю̀ твᲂрца̀ всѣ́хъ бг҃а . є҆го́же превᲂзно́симъ гдⷭ҇а во́ вѣки .= двⷤа . Ли́къ па́стырей при́снѡ пᲂмина́емыи сᲂбра́сѧ , бг҃ᲂмꙋ́дрено трⷪ҇цꙋ несᲂзда́ннꙋ ны́нѣ бг҃ᲂсло́вѧ . ᲂу҆чи́тъ всѣ́хъ вᲂпи́ти , тѧ̀ превᲂзно́симъ во́ вѣки . вⷤ . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Сщ҃еннᲂнача́льницы и҆ па́стырїе дᲂстᲂсла́внїи , хрⷭ҇то́вꙋ цр҃кᲂвь прᲂсвѣща́ютъ , и҆ ны́нѣ та́инъ бл҃гᲂче́стїемъ ѡ҆свѣща́юще ю҆̀ , и҆ превᲂзнᲂсѧ́ще хрⷭ҇та̀ во́ вѣки . =и҆ нн҃ѣ , боⷢ҇ . Та́йныхъ ѻ҆бразѣ́хъ пред̾ви́дѣша тебѐ пррⷪ҇цы всѝ , сло́во ро́ждьшꙋю , пло́ть бо и҆с̾тебѐ взе́мъ , се́й про́йде сꙋгꙋ́бъ . є҆го́же превᲂзно́симъ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . = И҆з̾ ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки [пᲂкло́н̾] . честнѣ́йшꙋю пᲂе́мъ .=

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Страсте́мъ неприча́стенъ пребы́сть ты̀ , сло́ве бж҃їи , пло́тїю причасти́всѧ страсте́мъ , но рѣши́ши ѿ страсте́й чл҃ка , страсте́мъ бы́въ стра́сть сп҃се на́шъ . є҆ди́нъ бо є҆сѝ без̾стра́стенъ и҆ всеси́ленъ . Тлю̀ сме́ртнꙋю прїе́мъ , тлѣ́нїемъ сᲂблю́дъ тѣ́ло свᲂѐ невкꙋше́но , твᲂѧ́ же живᲂтвᲂрѧ́щаѧ и҆ бжⷭ҇твенаѧ дш҃а влⷣко , во а҆́дѣ не ѡ҆ста́влена бы́сть . но ꙗ҆́кᲂже ѿ сна̀ вᲂскр҃съ , на́съ сᲂвᲂздви́глъ є҆сѝ . трⷪ҇ченъ . Бг҃а ѻ҆ц҃а , сн҃а сᲂбез̾нача́льна , всѝ земні́и ᲂу҆стна́ми чⷭ҇тыми прᲂсла́вимъ , неи҆зрече́ннꙋю же и҆ пресла́внꙋю , дх҃а прест҃а́го си́лꙋ чтꙋ́ще . є҆ди́на бо є҆́сть всеси́льнаѧ трⷪ҇ца нераздѣ́льна .

и҆́нъ , і҆рмо́съ . Тѧ̀ па́че ᲂу҆ма̀ . Тебѐ и҆зба́вителѧ ми́рꙋ хрⷭ҇та̀ бг҃а , а҆пⷭ҇ли ви́дѧще бжⷭ҇твенѡ вᲂзвыша́ема , со́ страхᲂмъ и҆гра́юще велича́хꙋ . Тебѐ сᲂше́дшаго да́же до пᲂслѣ́днихъ землѝ , и҆ чл҃ка спа́сша , и҆ вᲂзнесе́нїемъ свᲂи́мъ вᲂзвы́сивша сего̀ , велича́емъ . Твᲂю̀ ѡ҆бᲂжи́вшꙋюсѧ пло́ть , зрѧ́ще хрⷭ҇тѐ на высᲂтѣ̀ а҆́нг҃ли , дрꙋ́гъ ко́ дрꙋгꙋ гл҃ахꙋ , вᲂи́стинꙋ се́й є҆́сть бг҃ъ на́шъ . боⷢ҇ . Ра́дꙋисѧ бцⷣе мт҃и хрⷭ҇та̀ бг҃а , є҆го́же рᲂдила̀ є҆сѝ , дне́сь ѿ землѝ вᲂзнᲂси́ма , со а҆пⷭ҇лы зрѧ́ще велича́ем̾ .

и҆́нъ , і҆рмо́съ . Бг҃а чл҃кѡмъ .= Ѡ҆брѣ́тъ с̾ пᲂбо́рники ва́съ сᲂбра̀ , и҆ держа́внᲂю си́лᲂю вᲂѡ҆рꙋжи́въ дх҃а , и҆́же ѻ҆ц҃ꙋ сᲂбез̾нача́льнᲂе и҆ сᲂпрⷭ҇то́льнᲂе сло́во пре́жде вѣ́къ . є҆го́же всѝ сщ҃е́ннїи , съ нбⷭ҇ными во́инствы прⷭ҇нѡ сла́вимъ . вⷤ . Па́жить а҆́рїевꙋ лю́тыѧ є҆́реси , ꙗ҆́кѡ вра́чеве дш҃а́мъ же и҆ тѣлесе́мъ и҆стреби́сте , сщ҃е́нныи же ѻ҆́бразъ вѣ́ры всѣ́мъ написа́ша . є҆го́же ны́нѣ держа́ще , па́мѧть ва́шꙋ сщ҃еннᲂдѣ́теле прⷭ҇нѡ сла́вимъ . вⷤ . сла́ва . Ꙗ҆́кѡ свѣ́тъ сы́и хрⷭ҇тѐ пречи́стъ , ѿ стрⷭ҇те́й мглы̀ дш҃ꙋ мᲂю̀ ѡ҆чи́сти , мл҃твами влⷣко твᲂи́хъ слꙋжи́телей , и҆́же нн҃ѣ тебѐ прᲂпᲂвѣ́даюшихъ , без̾нача́льна и҆ несᲂзда́нна . зижди́телѧ же всѣ́хъ бг҃а , и҆ ѻ҆ц҃ꙋ сᲂбез̾нача́льна . =и҆ ны́нѣ , боⷢ҇ . Ме́ртвымъ вᲂскрⷭ҇нїе нн҃ѣ дарᲂва́сѧ , твᲂегѡ̀ ра́ди неи҆зрече́ннагѡ и҆ неи҆з̾гл҃аннагѡ ржⷭ҇тва̀ , бцⷣе всечⷭ҇таѧ . жи́знь бо и҆с̾тебѐ пло́тїю ѡ҆блᲂже́на всѣ́мъ вᲂсїѧ̀ , и҆ сме́рти неꙋскла́бнᲂе ꙗ҆́вѣ разрꙋшѝ .

катава́сїѧ : Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾ лѣ́то без̾лѣ́тнагѡ неи҆зрече́ннѡ ро́ждьшꙋю , вѣ́рнїи є҆динᲂмꙋ́дреннѡ , пѣ́сньми велича́емъ .

та́же , дᲂсто́йнѡ є҆́сть . свѣти́ленъ , вᲂскрⷭ҇нъ , і҃ . Тиверїа́дскᲂе мо́ре , с̾ дѣтьмѝ зеведе́ѡвыми , и҆ нафана́илъ с̾ петро́мъ , и҆ с̾ дрꙋги́ма двѣма̀ дре́вле , и҆ ѳѡмꙋ̀ и҆мѧ́ше на́лᲂвѣ . и҆́же хрⷭ҇то́вымъ пᲂвелѣ́нїемъ ѡ҆деснꙋ́ю в̾ве́ргше мре́жꙋ , мно́жество и҆з̾влеко́ша ры́бъ , є҆го́же пе́тръ пᲂзна́въ к̾ немꙋ̀ брᲂдѧ́ше . сѐ ᲂу҆́же трети́цею ꙗ҆ви́всѧ , и҆ хлѣ́бъ пᲂказа̀ и҆ ры́бꙋ на ᲂу҆́глехъ . сла́ва , ѻ҆ц҃е́мъ . И҆́же и҆з̾ нача́ла бᲂри́тель , а҆́рїево разгᲂрѣ́нїе бꙋ́рнѡ прине́съ , на твᲂю̀ сп҃се цр҃кᲂвь . на сїѐ пᲂдви́гшесѧ ѻ҆ц҃ъ во́инства , ѻ҆́нᲂго пᲂбѣди́ша . и҆ є҆динᲂсꙋ́щна сло́ва , со ѻ҆ц҃е́мъ тебѐ вѣ́рнѡ прᲂсла́виша . и҆ ны́нѣ , вᲂзнесе́нїю . Оу҆ченико́мъ зрѧ́щимъ тѧ , вᲂзнесе́сѧ хрⷭ҇тѐ ко ѻ҆ц҃ꙋ сᲂсѣдѧ́и . а҆́нг҃ли предѝ текꙋ́ще зᲂвѧ́хꙋ , вᲂзми́те врата̀ вᲂзми́те , цр҃ь бо взы́де , к̾ нача́льнᲂмꙋ свѣ́тꙋ сла́вы .

На хвали́тѣхъ , стихѣ́ры , вᲂскрⷭ҇ны . гла́съ , ѕ҃ . =запѣ́въ : хвали́те бг҃а во ст҃ы́хъ є҆гѡ̀ . К=рⷭ҇тъ тво́й гдⷭ҇и , жи́знь и҆ вᲂскрⷭ҇нїе лю́демъ твᲂи́мъ є҆́сть . и҆ на́нь надѣ́ющесѧ , тебѐ вᲂскрⷭ҇шагѡ бг҃а на́шегѡ пᲂе́мъ , пᲂми́лꙋй на́съ .

хвали́те є҆гѡ̀ во ᲂу҆тверже́нїи си́лъ є҆гѡ̀ . Пᲂгребе́нїе твᲂѐ влⷣко , ра́й ѿве́рзе ро́дꙋ чл҃ческᲂмꙋ . и҆ ѿ тлѝ и҆зба́вльшесѧ , тебѐ вᲂскрⷭ҇шагѡ бг҃а на́шегѡ пᲂе́мъ , пᲂми́лꙋй на́съ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ пᲂпремно́гᲂмꙋ вели́чествїю є҆гѡ̀ . Со ѻ҆ц҃е́мъ и҆ дх҃ᲂмъ хрⷭ҇та̀ вᲂспᲂе́мъ , вᲂскрⷭ҇шагѡ и҆з̾ ме́ртвыхъ . и҆ к̾ немꙋ̀ вᲂзᲂпїе́мъ , ты̀ є҆сѝ жи́знь на́ша и҆ вᲂскрⷭ҇нїе , пᲂми́лꙋй на́съ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Тридне́внѡ вᲂскрⷭ҇лъ є҆сѝ хрⷭ҇тѐ и҆́з̾ грᲂба , ꙗ҆́кᲂже є҆́сть пи́сано , и҆ сᲂвᲂскр҃си́въ пра́дѣда на́шегѡ . сегѡ̀ ра́ди тѧ̀ сла́витъ ро́дъ чл҃ческїи , и҆ пᲂе́тъ твᲂѐ вᲂскрⷭ҇нїе .

стихѣ́ры , ѻ҆ц҃е́мъ . гла́съ , ѕ҃ . поⷣ . всѐ ᲂу҆пᲂва́нїе . запѣ́въ : хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Всѐ сᲂбра́вше , дх҃о́внᲂе хꙋдо́жество , и҆ бжⷭ҇твенымъ дх҃ᲂмъ спᲂꙋчи́вшесѧ , спасе́нᲂе и҆ чⷭ҇тно́е и҆з̾ѻ҆браже́нїе , чⷭ҇тні́и ѻ҆ц҃ы бг҃ᲂписа́тельнѣ начерта́ша . в̾ не́мже ꙗ҆́вственѣ , ро́ждьшемꙋ сᲂбез̾нача́льна сло́ва наꙋча́ютъ , и҆ всеи́стинно є҆динᲂсꙋ́щна , а҆пⷭ҇льскимъ пᲂслѣ́дꙋюще ꙗ҆́вѣ ᲂу҆че́нїемъ , бл҃гᲂсла́внїи и҆ бг҃ᲂмꙋ́дрїи , вᲂи́стинꙋ и҆ всебᲂга́тїи .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Всю̀ сᲂбра́вше , па́стырскꙋю хи́трᲂсть , и҆ ꙗ҆́рᲂсть пᲂдви́гше твᲂю̀ пра́веднѣйшꙋю , и҆ ѿмсти́тельнѣ ѡ҆сꙋже́ннѡ тѧ́жкїѧ врагѝ , и҆ па́гꙋбныѧ во́лки ѿгна́ша , и҆ ꙗ҆́кѡ пра́щею дх҃а и҆змета́вше пле́велы , ѿ цр҃ко́внагѡ и҆спᲂлне́нїѧ . и҆ па́дшихъ к̾ сме́рти , и҆ ꙗ҆́кѡ неи҆сцѣ́льнѡ недꙋ́гᲂвавшихъ , бжⷭ҇твенїи па́стырїе , рабѝ прⷭ҇нїи хрⷭ҇то́ви , и҆ бжⷭ҇твенагѡ прᲂпᲂвѣ́данїѧ , ᲂу҆чн҃цы̀ сщ҃е́ннѣйшїи и҆сцѣли́ша .

сти́хъ : блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ ,꙳ хва́льно и҆ прᲂсла́влено и҆́мѧ твᲂѐ во́ вѣки . Всѐ прїе́мше , бг҃ᲂꙋ́мнᲂе сїѧ́нїе прест҃а́гѡ дх҃а . пресꙋ́щественᲂе бг҃ᲂсло́вїе , кра́ткими гл҃ы и҆ мно́гимъ ра́зꙋмᲂм̾ , бг҃ᲂдᲂхнᲂве́ннѡ прᲂвѣща́ша , ꙗ҆́кѡ хрⷭ҇то́ви прᲂпᲂвѣ́дницы . и҆ є҆ѵⷢ҇а́льскимъ приста́вницы ᲂу҆че́нїемъ бл҃же́ннїи . и҆ бл҃гᲂчести́выхъ преда́нїе , с̾вы́ше прїе́мше си́хъ ѿкрᲂве́нїе ꙗ҆́вѣ , и҆ прᲂсвѣти́вшесѧ , написа́ша вѣ́рꙋ бг҃ᲂнаꙋче́нꙋ .

сти́хъ : ꙗ҆́кѡ пра́веденъ є҆сѝ ѡ҆ всѣ́хъ ,꙳ и҆́хже сᲂтвᲂри́лъ є҆сѝ на́мъ . Всѐ сᲂбра́вше , дх҃о́внᲂе хꙋдо́жество , и҆ бжⷭ҇твенымъ дх҃ᲂмъ спᲂꙋчи́вшесѧ , спасе́нᲂе и҆ чⷭ҇тно́е и҆з̾ѻ҆браже́нїе , чⷭ҇тні́и ѻ҆ц҃ы бг҃ᲂписа́тельнѣ начерта́ша . в̾ не́мже ꙗ҆́вственѣ , ро́ждьшемꙋ сᲂбез̾нача́льна сло́ва наꙋча́ютъ , и҆ всеи́стинно є҆динᲂсꙋ́щна , а҆пⷭ҇льскимъ пᲂслѣ́дꙋюще ꙗ҆́вѣ ᲂу҆че́нїемъ , бл҃гᲂсла́внїи и҆ бг҃ᲂмꙋ́дрїи , вᲂи́стинꙋ и҆ всебᲂга́тїи . сла́ва . гла́съ , и҃ . Ст҃ы́хъ ѻ҆ц҃ъ ли́къ , ѿ вселе́нскихъ кᲂне́цъ сте́кшесѧ , ѻ҆ц҃а и҆ сн҃а и҆ дх҃а ст҃а́гѡ , є҆ди́но сꙋщество̀ и҆ є҆стество̀ прᲂпᲂвѣ́даша , и҆ та́инство бг҃ᲂсло́вїѧ , ꙗ҆́снѡ преда́ша цр҃кви . и҆́хже пᲂхвалѧ́юще вѣ́рнїи ᲂу҆бл҃жа́емъ гл҃юще , ѽ бжⷭ҇твеныи пᲂлчѐ , бг҃ᲂгла́снїи ѻ҆рꙋ́жницы , ѡ҆пᲂлче́нїѧ гдⷭ҇нѧ , звѣ́зды всесвѣ́тлыѧ разꙋ́мныѧ тве́рди , та́йнагѡ сїѡ́на неѡ҆бᲂри́мїи стᲂлпѝ , мирᲂдᲂхнᲂве́ннїи цвѣ́ти ра́йстїи , всезлата́ѧ ᲂу҆ста̀ сло́вꙋ . нике́йскаѧ пᲂхвало̀ , вселе́ннѣй ᲂу҆краше́нїе , прилѣ́жнѡ мᲂли́тесѧ ѡ҆ дш҃а́хъ на́шихъ . и҆ ны́нѣ . гла́съ , в҃ . Преблгⷭ҇ве́на є҆сѝ бцⷣе дв҃о , вᲂпло́щьшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе .

трᲂпа́рь . Вᲂскре́съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂмлⷭ҇тиве . пᲂсе́мъ , є҆ктенїѝ . и҆ ѿпꙋ́стъ .

чте́цъ , гл҃етъ : а҆ми́нь , сла́ва , и҆ ны́нѣ . гла́съ , ѕ҃ .

По є҆́же во а҆́дъ сᲂше́ствїи , и҆ є҆́же и҆з̾ ме́ртвыхъ вᲂскрⷭ҇нїи , скᲂрбѧ́ще ꙗ҆́кᲂже дᲂсто́ѧше , ѡ҆ разлꙋче́нїи твᲂе́мъ хрⷭ҇тѐ ᲂу҆ченицы̀ , на дѣ́ло ᲂу҆бѣди́шасѧ , и҆ па́ки кᲂра́бль и҆ мре́жа , и҆ ло́ва ни ма́ла . но ты̀ сп҃се ꙗ҆ви́всѧ ꙗ҆́кѡ влⷣка всѣ́хъ , ѡ҆деснꙋ́ю пᲂвелѣва́еши мре́жꙋ вᲂврещѝ . и҆ бы́сть сло́во дѣ́лᲂмъ вско́рѣ , и҆ мно́жество ры́бъ мно́гѡ . и҆ ве́черѧ стра́нна гᲂто́ва на землѝ , є҆ѧ́же причасти́вшимсѧ тᲂгда̀ твᲂи́мъ ᲂу҆ченикѡ́мъ . и҆ на́съ нн҃ѣ разꙋ́мнѡ спᲂдо́би насы́титисѧ чл҃кᲂлю́бче гдⷭ҇и .

та́же , ча́съ , а҃ . =На а҃ мъ часѣ̀ , трᲂпа́рь , вᲂскрⷭ҇нъ . сла́ва , вᲂзнесе́нїю . =кᲂнда́къ , вᲂскрⷭ҇нъ .

и҆ кᲂне́чныи ѿпꙋ́стъ .

На г҃ мъ часѣ̀ , трᲂпа́рь , вᲂскрⷭ҇нъ . сла́ва , ѻ҆ц҃е́мъ . кᲂнда́къ , вᲂзнесе́нїю .

На ѕ҃ мъ часѣ̀ , трᲂпа́рь , вᲂскрⷭ҇нъ . сла́ва , вᲂзнесе́нїю . кᲂнда́къ , ѻ҆ц҃е́мъ .

На ѳ҃ мъ часѣ̀ , трᲂпа́рь , вᲂскрⷭ҇нъ . сла́ва , ѻ҆ц҃е́мъ . кᲂнда́къ , вᲂскрⷭ҇нъ .

По ѡ҆сла́би , кᲂндакѝ : вᲂскрⷭ҇нъ , сла́ва , ѻ҆ц҃е́мъ . и҆ ны́нѣ , вᲂзнесе́нїю .

На литꙋргі́и , бл҃же́нна , вᲂскрⷭ҇на , на́ ѕ҃ .

Во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . Бл҃же́ни ни́щїи дх҃ᲂмъ , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Бл҃же́ни пла́чꙋщїи , ꙗ҆́кѡ ті́и ᲂу҆тѣ́ша тсѧ . Бл҃же́ни кро́тцыи , ꙗ҆́кѡ ті́и наслѣ́дѧтъ зе́млю .

пᲂе́мъ : Пᲂмѧни́ мѧ бж҃е сп҃се мо́й , є҆гда̀ прїи́ деши во црⷭ҇твїи сѝ , и҆ спаси́ мѧ , ꙗ҆́кѡ є҆ди́нъ чл҃кᲂлю́бецъ .

гла́съ , ѕ҃ . бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Дре́вᲂмъ а҆да́мꙋ прельще́нꙋ бы́вшꙋ , дре́вᲂмъ же крⷭ҇тнымъ па́ки спа́слъ є҆сѝ разбо́йника , вᲂпїю́ща , пᲂмѧни́ мѧ гдⷭ҇и , є҆гда̀ прїи́деши во црⷭ҇твїи сѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Вᲂспᲂе́мъ и҆́же во́лею распе́ншагᲂсѧ , и҆ пᲂгребе́на хрⷭ҇та̀ бг҃а на́шегѡ , и҆ вᲂскрⷭ҇ша во сла́вѣ тридне́внѡ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Врата̀ а҆́дᲂва и҆ вереѝ сᲂкрꙋши́въ , и҆ сꙋ́щїѧ жизнᲂда́вче во а҆́дѣ , всѧ̀ вᲂскр҃си́лъ є҆сѝ , зᲂвꙋ́щїѧ , сп҃се ще́дрыи , сла́ва вᲂста́нїю тѝ .

бл҃же́ни мирᲂтво́рцы ,꙳ ꙗ҆́кѡ ті́и сы́нᲂве бж҃їи нарекꙋ́тсѧ . И҆́же и҆́з̾ грᲂба вᲂскрⷭ҇шаго , ꙗ҆́кᲂже речѐ пре́жде стра́сти , и҆ а҆́да плѣни́вша , хрⷭ҇та̀ сᲂгла́снѡ всѝ вᲂспᲂе́мъ .= С=вѣ́тъ ми́рꙋ а҆пⷭ҇ли пᲂказа́вшесѧ , ве́сь мра́къ пре́лести ѿгна́ша , зарѧ́ми бжⷭ҇твеными , ᲂу҆че́нїи свᲂи́хъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѻ҆ц҃а и҆ сн҃а славᲂсло́вимъ , и҆ дх҃а ст҃а́гѡ гл҃юще , трⷪ҇це ст҃а́ѧ спасѝ дш҃а на́ша .

и҆ =ѿ кано́на , ст҃ы́хъ ѻ҆ц҃ъ . пѣ́снь г҃ ѧ , на д҃ . =бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . То́къ и҆ стра́сть и҆ сѣче́нїе , а҆́рїи безꙋ́мныи ржⷭ҇твꙋ̀ бжⷭ҇твенᲂмꙋ , ѕлᲂче́стнѡ нечести́выи прилага́ѧ , сѣчи́тельнымъ ѻ҆те́чес кимъ мече́мъ пᲂсѣка́етсѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ꙗ҆́кᲂже дре́вле бжⷭ҇твеныи а҆враа́мъ , вᲂѡ҆рꙋ́жьшесѧ всечⷭ҇тні́и и҆ бг҃ᲂгла́снїи , врагѝ твᲂѧ̀ бла́же неи́стᲂвныѧ , твᲂе́ю держа́ внᲂю си́лᲂю пᲂгꙋби́ша .

сла́ва . Пе́рвᲂе сᲂвᲂкꙋпле́нїе , твᲂи́мъ сᲂбра́вше мсѧ ст҃лемъ , є҆динᲂсꙋ́щна тѧ сп҃се ѻ҆ц҃ꙋ , и҆ тво рца̀ всѣ́мъ , и҆ пре́же вѣ́къ сꙋ́ща рᲂди́вшасѧ , правᲂвѣ́рнѡ и҆ бл҃гᲂче́стнѡ прᲂпᲂвѣ́даша .

и҆ нн҃ѣ . Немо́жетъ сло́во земны́хъ ни ѧ҆зы́къ , тебѐ дв҃це вᲂсхвали́ти дᲂсто́йнѡ . и҆с̾тебе́ бо без̾ сѣ́мене живᲂда́вецъ хрⷭ҇то́съ , вᲂплᲂти́тисѧ пре чⷭ҇таѧ бл҃гᲂи҆зво́ли .

По вхо́дѣ , трᲂпарѝ : вᲂскрⷭ҇нъ , вᲂзнесе́нїю , ѻ҆ц҃е́мъ . кᲂндакѝ : вᲂскрⷭ҇нъ . сла́ва , ѻ҆ц҃е́мъ . и҆ ны́нѣ , вᲂзнесе́нїю . прᲂки́менъ , пѣ́снь ѻ҆ц҃е́мъ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ , хва́льнѡ и҆ прᲂсла́вленѡ и҆́мѧ твᲂѐ во́ вѣки . сти́хъ : ꙗ҆́кѡ пра́веденъ є҆сѝ ѡ҆ всѣ́хъ , и҆́хъ же сᲂтвᲂри́лъ є҆сѝ на́мъ . а҆пⷭ҇лъ , въ дѣѧ́нїихъ . заⷱ҇ , м҃д .= а҆ллилꙋ́їѧ . бг҃ъ бᲂго́мъ гдⷭ҇ь гл҃а , и҆ призва̀ зе́млю ѿ вᲂсто́къ сл҃нца до за́падъ . =сти́хъ : сᲂберѣ́те є҆мꙋ̀ прпⷣбныѧ є҆гѡ̀ , завѣща́ющїѧ завѣ́тъ є҆гѡ̀ ѡ҆ же́ртвахъ . є҆ѵⷢ҇а́лїе , ѿ і҆ѡа́нна . заⷱ҇ , н҃ѕ . Задᲂсто́йно : Тѧ̀ па́че ᲂу҆ма̀ . прича́стенъ , хвали́те гдⷭ҇а с̾ небе́съ . дрꙋгі́и , въ па́мѧть вѣ́чнꙋю .

Въ тꙋ́же , нлⷣю , ве́черъ . на гдⷭ҇и вᲂзва́хъ , стⷯры , ст҃ы́мъ ѻ҆ц҃е́мъ , г҃ . гла́съ , ѕ҃ . И҆́з̾ чрева рᲂди́сѧ пре́жде денни́цы , ѿ ѻ҆ц҃а без̾ мт҃ре пре́жде вѣ́къ . а҆́ще а҆́рїй тва́рь тѧ , а҆ не бг҃а сла́витъ . ѽ де́рзᲂсти , смѣша́ѧ тѧ сᲂзда́телѧ тва́ремъ безꙋ́мнѡ . ве́щь ѻ҆гнѧ̀ вѣ́чнагѡ себѣ̀ со́бравъ . но сᲂбѡ́ръ и҆́же в̾ нике́и , сн҃а бж҃їѧ тѧ сꙋ́ща прᲂпᲂвѣ́да гдⷭ҇и , вели́кїѧ ра́ди твᲂеѧ̀ млⷭ҇ти . Кто́ ти сп҃се ри́зꙋ раз̾дра̀ ; ты́ же речѐ , а҆́рїи , и҆́же трⷪ҇цѣ раздѣлѝ , є҆ди́но честно́е нача́ло в̾ трѝ раз̾дѣле́нїѧ . се́й ѿве́ржесѧ тебѐ гл҃ѧ , несꙋ́ща бы́ти є҆ди́нᲂмꙋ ѿ трⷪ҇цы . то́йже и҆ несто́рїѧ наꙋчѝ бцⷣꙋ не гл҃ати . но сᲂбо́ръ и҆́же в̾ нике́и , сн҃а бж҃їѧ тѧ и҆спᲂвѣ́да гдⷭ҇и , вели́кїѧ ра́ди твᲂеѧ̀ млⷭ҇ти . А҆́рїи безꙋ́мныи , прⷭ҇тѣ́й трⷪ҇цѣ пресѣчѐ є҆динᲂнача́лїе в̾ трѝ , непᲂдо́бны же и҆ чꙋ́жы сꙋ́ществы . тѣ́мже ѻ҆ц҃ы бг҃ᲂно́снїи сᲂше́дшесѧ ᲂу҆се́рднѡ , ре́внᲂстїю раз̾жига́еми , ꙗ҆́кᲂже и҆ ѳезви́тѧнинъ и҆лїѧ̀ , дх҃о́внымъ пᲂсѣко́ша мече́мъ , и҆́же стꙋдꙋ̀ наꙋчи́вшаго хꙋ́льнᲂмꙋ , ꙗ҆́кᲂже дх҃ъ вѣща́ше .

та́же , стихѣ́ры , в̾ минѣ́и , г҃ . сла́ва . гла́съ , ѕ҃ . Та́йныѧ дне́сь дꙋхо́вныѧ трꙋбы̀ , бг҃ᲂно́сныѧ ѻ҆ц҃ы вᲂсхва́лимъ , вᲂспѣ́вшїѧ пᲂсредѣ̀ цр҃кве , пѣ́снь сᲂста́внꙋю гла́съ пᲂдо́бенъ бг҃ᲂсло́вїѧ . трⷪ҇цѣ є҆ди́нѡ непремѣ́ннѡ сꙋщество́ же и҆ бжⷭ҇тво̀ . пᲂтреби́телѧ а҆́рїевы , и҆ правᲂсла́вныхъ пᲂбо́рники , мᲂлѧ́щасѧ всегда̀ гдⷭ҇ви , пᲂми́лᲂватисѧ дш҃а́мъ на́шимъ .

и҆ ны́нѣ . гла́съ , то́йже . На гᲂра́хъ ст҃ы́хъ зрѧ́ще твᲂѐ вᲂзнесе́нїе хрⷭ҇тѐ , сїѧ́нїе сла́вы ѻ҆́ч҃и . вᲂспѣва́емъ твᲂегѡ̀ лица̀ свѣтᲂви́дныи зра́къ , пᲂклᲂнѧ́емсѧ страсте́мъ твᲂи́мъ [пᲂкло́н̾] , чте́мъ вᲂскрⷭ҇нїе , сла́внᲂе вᲂзнесе́нїе сла́вѧще , пᲂми́лꙋй на́съ . прᲂки́менъ , дню̀ .

На стихо́внѣ , стихѣ́ры . гла́съ , ѕ҃ . поⷣ . всѐ ᲂу҆пᲂва́нїе . Всѐ сᲂбра́вше , дх҃о́внᲂе хꙋдо́жество , и҆ бжⷭ҇твенымъ дх҃ᲂмъ спᲂꙋчи́вшесѧ , спасе́нᲂе и҆ чⷭ҇тно́е и҆з̾ѻ҆браже́нїе , чⷭ҇тні́и ѻ҆ц҃ы бг҃ᲂписа́тельнѣ начерта́ша . в̾ не́мже ꙗ҆́вственѣ , ро́ждьшемꙋ сᲂбез̾нача́льна сло́ва наꙋча́ютъ , и҆ всеи́стинно є҆динᲂсꙋ́щна , а҆пⷭ҇льскимъ пᲂслѣ́дꙋюще ꙗ҆́вѣ ᲂу҆че́нїемъ , бл҃гᲂсла́внїи и҆ бг҃ᲂмꙋ́дрїи , вᲂи́стинꙋ и҆ всебᲂга́тїи .

сти́хъ : блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ ,꙳ хва́льно и҆ прᲂсла́влено и҆́мѧ твᲂѐ во́ вѣки . Всю̀ сᲂбра́вше , па́стырскꙋю хи́трᲂсть , и҆ ꙗ҆́рᲂсть пᲂдви́гше твᲂю̀ пра́веднѣйшꙋю , и҆ ѿмсти́тельнѣ ѡ҆сꙋже́ннѡ тѧ́жкїѧ врагѝ , и҆ па́гꙋбныѧ во́лки ѿгна́ша , и҆ ꙗ҆́кѡ пра́щею дх҃а и҆змета́вше пле́велы , ѿ цр҃ко́внагѡ и҆спᲂлне́нїѧ . и҆ па́дшихъ к̾ сме́рти , и҆ ꙗ҆́кѡ неи҆сцѣ́льнѡ недꙋ́гᲂвавшихъ , бжⷭ҇твенїи па́стырїе , рабѝ прⷭ҇нїи хрⷭ҇то́ви , и҆ бжⷭ҇твенагѡ прᲂпᲂвѣ́данїѧ , ᲂу҆чн҃цы̀ сщ҃е́ннѣйшїи и҆сцѣли́ша .

сти́хъ : ꙗ҆́кѡ пра́веденъ є҆сѝ ѡ҆ всѣ́хъ ,꙳ и҆́хже сᲂтвᲂри́лъ є҆сѝ на́мъ . Всѐ прїе́мше , бг҃ᲂꙋ́мнᲂе сїѧ́нїе прест҃а́гѡ дх҃а . пресꙋ́щественᲂе бг҃ᲂсло́вїе , кра́ткими гл҃ы и҆ мно́гимъ ра́зꙋмᲂмъ , бг҃ᲂдᲂхнᲂве́ннѡ прᲂвѣща́ша , ꙗ҆́кѡ хрⷭ҇то́ви прᲂпᲂвѣ́дницы . и҆ є҆ѵⷢ҇а́льскимъ приста́вницы ᲂу҆че́нїемъ бл҃же́ннїи . и҆ бл҃гᲂчести́выхъ преда́нїе , с̾вы́ше прїе́мше си́хъ ѿкрᲂве́нїе ꙗ҆́вѣ , и҆ прᲂсвѣти́вшесѧ , написа́ша вѣ́рꙋ бг҃ᲂнаꙋче́нꙋ .

сла́ва . гла́съ , г҃ . А҆пⷭ҇льскихъ преда́нїи , и҆звѣ́стнїи храни́телїе бы́сте ст҃і́и ѻ҆ц҃ы . ст҃ы́ѧ бо трⷪ҇цы є҆ди́но сꙋщество̀ правᲂвѣ́рнѡ прᲂпᲂвѣ́давше , а҆́рїево хꙋле́нїе , сᲂбо́рнѣ низ̾лᲂжи́сте . с̾ ни́мже и҆ македо́нїѧ дх҃ᲂбо́рца ѡ҆бличи́вше , и҆ ѡ҆сꙋди́ли є҆стѐ несто́рїѧ , и҆ є҆ѵ̾тѷхі́ѧ же , и҆ дїᲂско́ра , саве́лїѧ же , и҆ севи́ра без̾гла́внаго . и҆́хже ѿ пре́лести и҆зба́витисѧ на́мъ и҆спрᲂси́те , нескве́рнено на́ше житїѐ , в̾ вѣ́рѣ сᲂхрани́ти мо́лимсѧ . и҆ ны́нѣ . гла́съ , ѕ҃ . Взы́де бг҃ъ въ вᲂскликнᲂве́нїи , гдⷭ҇ь во́ гласѣ трꙋ́бнѣ . є҆́же вᲂзнестѝ па́дшїи ѻ҆́бразъ а҆да́мᲂвъ , и҆ пᲂсла́ти дх҃а ᲂу҆тѣ́шителѧ , ѡ҆ст҃и́ти дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , ст҃ы́мъ ѻ҆ц҃е́мъ . сла́ва , и҆ нн҃ѣ . трᲂпа́рь , пра́здникꙋ . є҆ктенїѧ̀ .= и҆ ѿпꙋ́стъ . =и҆ ѿдае́тсѧ слꙋ́жба ст҃ы́мъ ѻ҆ц҃е́мъ .

На па́вечерницѣ , по дᲂсто́йнѣ , и҆ по трⷭ҇то́мъ , кᲂнда́къ , пра́здникꙋ . и҆ про́чее ѡ҆бы́чно .

Въ пнⷣе , з҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь пра́здникꙋ , гⷤ . =По а҃ , стихᲂло́гїи , сѣда́ленъ . гла́съ , в҃ . Свы́ше на́ землю хрⷭ҇тѐ мо́й сᲂше́лъ є҆сѝ , и҆ а҆́бїе ѿ землѝ на высᲂтꙋ̀ вᲂсте́клъ є҆сѝ к̾ свᲂемꙋ̀ рᲂди́телю , ᲂу҆ченико́мъ зрѧ́щимъ тво́й вᲂсхо́дъ . с̾ ни́ми же ᲂу҆́бѡ пра́зднꙋюще пᲂе́мъ сп҃се твᲂѐ вᲂзнесе́нїе . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , и҃ . Всѣ́дъ на ѻ҆́блаки нбⷭ҇ныѧ , ѡ҆ста́вивъ ми́ръ сꙋ́щимъ на землѝ , взы́де и҆ сѣ́де ѡ҆деснꙋ́ю ѻ҆ц҃а , ꙗ҆́кѡ є҆динᲂсꙋ́щенъ є҆мꙋ̀ сы́и и҆ дх҃ꙋ . а҆́ще и҆ пло́тїю ꙗ҆ви́сѧ , но непрело́женъ пре́былъ є҆сѝ . тѣ́мже ча́емъ сᲂверше́нїѧ кᲂне́цъ . тᲂгда̀ грѧды́и сꙋди́ти всѧ́ческимъ , правᲂсꙋ́де гдⷭ҇и пᲂщадѝ дш҃а на́ша , сᲂгрѣше́нїемъ ѡ҆ставле́нїе да́рꙋѧ , ꙗ҆́кѡ бг҃ъ млⷭ҇тивъ рабо́мъ свᲂи́мъ . сла́ва , и҆ нн҃ѣ , то́йже .

та́же , ѱл҃о́мъ , н҃ . кано́нъ , пра́здникꙋ , гла́съ , д҃ . со і҆рмᲂсо́мъ на́ и҃ .= и҆ въ минѣ́и , на д҃ . а҆́щели слꙋчи́тсѧ , вели́кᲂмꙋ ст҃о́мꙋ . =пᲂе́мъ : кано́нъ , пра́здникꙋ , со і҆рмᲂсо́мъ на́ ѕ҃ . и҆ ст҃о́мꙋ , на́ ѕ҃ .= с=вѣти́ленъ , пра́здникꙋ .

На стихо́внѣ , стⷯры . гла́съ , ѕ҃ . поⷣ . а҆́нг҃льскїѧ . Всего́ мѧ хрⷭ҇тѐ вᲂспрїѧ́тъ , несказа́ннѡ ве́сь всего́ мѧ свᲂемꙋ̀ сраствᲂри́лъ є҆сѝ , бжⷭ҇твенᲂмꙋ є҆стествꙋ̀ . смѣше́нїѧ непретерпѣ̀ , ни прилᲂже́нїѧ ни раздѣле́нїѧ . сла́ва стра́шнᲂмꙋ твᲂемꙋ̀ сни́тїю , и҆ стрⷭ҇те́мъ и҆ вᲂскрⷭ҇нїю и҆ вᲂзнесе́нїю . и҆́миже пе́рвѣе , па́дшее є҆стество̀ на́ше ѡ҆бнᲂви́сѧ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Вскꙋ́ю ᲂу҆́бѡ взира́ете на́ нб҃о , и҆ ᲂу҆жа́снѡ неви́димагѡ зритѐ , а҆́нг҃ли твᲂѝ сп҃се вᲂпїѧ́хꙋ ᲂу҆ченико́мъ твᲂи́мъ , се́й со сла́вᲂю вᲂсхᲂдѧ́и , та́кᲂже прїи́детъ плᲂтᲂно́сецъ , дыха́нїю всемꙋ̀ сꙋди́ти пра́веднѡ в̾ мѣ́рилѣхъ , бг҃ъ сы́и и҆ чл҃къ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Съ рыда́нїемъ и҆ ра́дᲂстїю ли́къ ᲂу҆ченикъ твᲂи́хъ , въ честнѣ́мъ вᲂзнесе́нїи твᲂе́мъ , стᲂѧ́ще вкꙋ́пѣ на гᲂрѣ̀ бж҃їи чл҃цы , влⷣко неѡ҆ста́ви си́ры рабы̀ свᲂѧ̀ вᲂпїѧ́хꙋ . но пᲂслѝ дх҃ъ бжⷭ҇твеныи дш҃а́мъ на́шимъ , прᲂсвѣща́ющь рабы̀ свᲂѧ̀ . сла́ва , и҆ ны́нѣ . гла́съ , з҃ . На́ гᲂрꙋ є҆леѡ́нскꙋю прише́лъ є҆сѝ , ми́лꙋѧи ро́дъ чл҃чь , и҆ ѻ҆́блакъ пᲂдъѧ́тъ тѧ ѿ ѻ҆́чїю ᲂу҆чени́къ твᲂи́хъ . трепе́щꙋщимъ ᲂу҆́бѡ завидѣ́нїе , ра́дꙋющимжесѧ за ча́ѧнїе ст҃а́гѡ дх҃а . и҆́мже ᲂу҆тверди́въ сп҃се пᲂми́лꙋй на́съ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , трипѣ́снецъ . гла́съ , а҃ . пѣ́снь , а҃ . і҆рмо́съ . твᲂѧ̀ пᲂбѣди́тельнаѧ десни́ца .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Твᲂѐ є҆́же на́ землю нᲂвᲂлѣ́пнᲂе сᲂше́ствїе , неразꙋмѣ́вшимъ а҆́нг҃лѡмъ тᲂгда̀ , и҆ вᲂсхᲂдѧ́щꙋ ти на нб҃са̀ , ᲂу҆вѣ́дѣша . и҆ гл҃юще кто̀ се́й є҆́сть цр҃ь си́ламъ ;

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Распѧ́тїе во́льнᲂе хрⷭ҇тѐ претерпѣ́въ , вᲂскр҃слъ є҆сѝ тридне́венъ . та́же вᲂз̾ше́лъ є҆сѝ к̾ нбⷭ҇нымъ , ᲂу҆ченико́мъ зрѧ́щимъ тѧ , и҆ дивѧ́щимсѧ є҆́же па́че ᲂу҆ма̀ си́лѣ твᲂе́й .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Ѻ҆́блаки вᲂсхᲂжде́нїе свᲂѐ , всеси́льнᲂю во́лею пᲂлага́ѧ недᲂмы́сленыи , ѿ гᲂры̀ ма́сличныѧ ны́нѣ вᲂстечѐ гᲂрѣ̀ , к̾ высᲂтѣ̀ ѻ҆́блакᲂмъ нᲂси́мъ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Чи́ны а҆́нг҃лъ нбⷭ҇ныхъ , вᲂи́стинꙋ чи́стаѧ превᲂз̾шла̀ є҆сѝ , сло́во вᲂплᲂти́вши ѻ҆́ч҃ее . є҆го́же ны́нѣ прилѣ́жнѡ мᲂлѝ , дѣѧ́нїи без̾слᲂве́сныхъ на́мъ и҆зба́витисѧ всенепᲂро́чнаѧ .

пѣ́снь , и҃ . і҆рмо́съ . пѣснᲂслᲂве́сники в̾ пещѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . И҆́же к̾ без̾нача́льнᲂмꙋ свѣ́тꙋ ѻ҆ц҃ꙋ вᲂз̾ше́дшаго во сла́вѣ , и҆ низ̾пᲂсла́ти а҆пⷭ҇лѡмъ дх҃ъ ст҃ы́и ре́кша , по́йте бл҃гᲂслᲂви́те и҆ превᲂзнᲂси́те є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Вᲂспо́йте и҆ по́йте гдⷭ҇ви , вᲂскли́кните стра́хᲂмъ ѻ҆те́чествїѧ земна́ѧ , вᲂзнесе́бᲂсѧ во сла́вѣ дне́сь , сᲂвᲂкꙋпи́въ съ нбⷭ҇ными во всѧ̀ вѣ́ки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Мꙋ́жїе галиле́йстїи , что̀ зрѧ́ще на высᲂтꙋ̀ , со́ страхᲂмъ та́кѡ стᲂитѐ , ᲂу҆ченико́мъ беспло́тнїи глаго́лахꙋ , и҆́м̾же ѻ҆́бразᲂмъ ви́дите , и҆ па́ки хрⷭ҇то́съ во сла́вѣ прїи́детъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ꙗ҆́же невᲂздѣ́ланнѡ вᲂзрасти́вшаѧ , нбⷭ҇ныи кла́съ пита́ющїи бжⷭ҇твенᲂю си́лᲂю кᲂнца̀ дв҃о , насы́ти а҆́лчꙋщꙋю смире́нꙋю дш҃ꙋ мᲂю̀ .

пѣ́снь , ѳ҃ . і҆рмо́съ . ѻ҆́бразъ чи́стагѡ ржⷭ҇тва̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Стрⷭ҇ть и҆ распѧ́тїе и҆ сме́рть , за на́съ претерпѣ́лъ є҆сѝ без̾грѣ́шне . и҆ вᲂскр҃се бг҃ᲂлѣ́пно , в̾зы́де к̾ без̾нача́льнᲂмꙋ сло́ве ѻ҆ц҃ꙋ свᲂемꙋ̀ . тѣ́мже ти пᲂклᲂнѧ́емсѧ , непᲂсти́жи мᲂмꙋ бжⷭ҇твꙋ̀ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Зᲂве́тъ мѡѷсе́й дх҃ᲂмъ , а҆́нг҃льскїѧ си́лы да ᲂу҆крѣпѧ́тсѧ , всѣ́хъ цр҃ю тѣле́снѡ вᲂсхᲂдѧ́щꙋ ѿ землѝ , к̾ го́рнимъ црⷭ҇твїѧмъ , и҆ на прⷭ҇то́лѣ ѻ҆те́честѣмъ ᲂу҆ставлѧ́ющꙋ , є҆стество̀ па́дшее .

сла́ва . Врата̀ ᲂу҆́мнаѧ вᲂзми́те , прᲂро́чески вᲂпїѧ́ше дв҃дъ дх҃ᲂмъ , є҆динᲂро́дныи сн҃ъ бж҃їи вᲂцр҃и́сѧ надᲂвсѣ́ми ꙗ҆зы́ки . и҆ в̾зы́де пло́тїю ко ѻ҆ц҃ꙋ , є҆го́же и҆ низ̾хᲂдѧ̀ не ѡ҆ста́ви .

и҆ ны́нѣ , боⷢ҇ . Ве́сь сла́дᲂсть и҆ жела́нїе , тво́й сн҃ъ бг҃ъ и҆ гдⷭ҇ь прест҃а́ѧ чи́стаѧ . є҆го́же прилѣ́жнѡ мᲂлѝ с̾ вы́шними и҆ беспло́тными во́инствы , го́рести дꙋшетлѣ́нныѧ грѣхо́въ и҆зба́витисѧ на́мъ .

Въ то́йже , пнⷣе , з҃ ѧ , недѣ́ли , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , д҃ . поⷣ . и҆́же зва́нныи свы́ше .= И҆́=же ѡ҆ всѣ́хъ сᲂверши́въ спасе́нїе ,꙳ на́ гᲂрꙋ прїи́де є҆леѡ́нскꙋю хрⷭ҇тѐ ,꙳ ѿ ню́дꙋ же взѧ́тсѧ ꙳ пред̾ ᲂу҆ченикѝ свᲂи́ми ,꙳ на́ нб҃о со сла́вᲂю нᲂси́мъ .꙳ тѣ́мже та́инствꙋ дивѧ́щесѧ ,꙳ вы́шнїи взыва́хꙋ до́льнимъ чи́нᲂве ,꙳ вᲂзми́те врата̀ ,꙳ и҆ вни́детъ ѿ ню́дꙋ же и҆зы́де ,꙳ всѣ́хъ цр҃ь и҆ бг҃ъ ꙗ҆́кᲂже и҆зво́ли .꙳ пресла́внѡ ми́рꙋ спасе́нїе сᲂдѣ́лавъ . Оу҆чени́ческїи ли́къ ,꙳ тебѐ ꙗ҆́кᲂже зрѧ́ше в̾зима́ема гл҃аше .꙳ влⷣко , ка́кѡ ны́нѣ ѡ҆ставлѧ́еши дрꙋ́ги свᲂѧ̀ , и҆ ка́мѡ и҆́деши ,꙳ и҆́же сᲂдержа́и рꙋко́ю всѧ́ческаѧ .꙳ мы́ же ѡ҆ста́вивше всѧ̀ ,꙳ тебѣ̀ бг҃ꙋ пᲂслѣ́дᲂвахᲂмъ ра́дꙋющесѧ ,꙳ во́ вѣки с̾ тᲂбо́ю наде́ждꙋ и҆мꙋ́ще бы́ти ,꙳ не ѡ҆ста́ви си́рыхъ на́съ ,꙳ ꙗ҆́кᲂже ѡ҆бѣща́сѧ сп҃се на́шъ млрⷭ҇де ,꙳ ᲂу҆тѣ́шителѧ пᲂслѝ ,꙳ и҆ сп҃са дш҃а́мъ на́шимъ . Сᲂверше́нᲂе пᲂдаѧ̀ бл҃гᲂслᲂве́нїе ,꙳ дрꙋго́мъ свᲂи́мъ влⷣко ,꙳ та́йнѡ ᲂу҆ча́ше и҆́хъ ,꙳ зри́те дрꙋ́зи и҆дꙋ̀ ко ѻ҆ц҃ꙋ ва́мъ пᲂслю̀ дх҃а ᲂу҆тѣ́шителѧ ,꙳ вы́ же ско́рбь всю̀ ѿлᲂжи́те ,꙳ не ѡ҆ста́влю ѻ҆ве́цъ ꙗ҆́же сᲂбра́хъ ,꙳ не ѡ҆ста́влю и҆́хъ же вᲂзлюби́хъ ,꙳ бжⷭ҇твенᲂю с̾ нб҃сѐ ѡ҆бо́лкшесѧ си́лᲂю ,꙳ и҆ди́те гл҃юще ,꙳ по всѣ́хъ ꙗ҆зы́цѣхъ , прᲂпᲂвѣ́дайте спасе́нїѧ бл҃гᲂвѣща́нїе .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , є҃ . Прїиди́те вѣ́рныхъ сᲂвᲂкꙋпле́нїѧ , ᲂу҆мы̀ та́йнѡ наꙋчи́вшесѧ ᲂу҆чени́къ хрⷭ҇то́вѣхъ . непреста́ннѡ пѣ́нїе рцѣ́мъ , на ма́сличнѣй ꙗ҆́кᲂже а҆пⷭ҇ли с̾ дв҃дᲂмъ вᲂзᲂпїе́мъ , в̾зы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣ . да и҆зба́витъ племена̀ чл҃ча ѿ сᲂбла́знъ вра́жїихъ , и҆ прᲂсвѣти́тъ дш҃а на́ша .

Н=а стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . Кᲂне́чнагѡ ра́ди млрⷭ҇дїѧ хрⷭ҇тѐ ,꙳ рᲂди́лсѧ є҆сѝ и҆з̾ дв҃ы пло́тїю .꙳ во́лею же претерпѣ́въ распѧ́тїе ,꙳ тридне́венъ вᲂскр҃се и҆́зъ грᲂба всеще́дре ,꙳ сᲂвᲂскр҃си́въ и҆ ѡ҆бᲂжи́въ на́съ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Зрѧ́щимъ тѧ хрⷭ҇тѐ ꙳ бжⷭ҇твенымъ ᲂу҆ченико́мъ ꙗ҆́вѣ ,꙳ вᲂзнесе́сѧ ѿ землѝ к̾ нбⷭ҇нымъ .꙳ и҆ си́мъ ѡ҆бѣща̀ пᲂсла́ти сво́й дх҃ъ ,꙳ ᲂу҆твержа́ѧ и҆ прᲂсвѣща́ѧ на́съ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Диви́тсѧ а҆́нг҃лъ мно́жество ,꙳ стра́ннᲂмꙋ вᲂсхᲂжде́нїю твᲂемꙋ̀ ,꙳ и҆ стра́шнᲂмꙋ і҆с҃е всецр҃ю ,꙳ и҆ врато́мъ нбⷭ҇нымъ взѧ́тисѧ вᲂпїѧ́хꙋ ,꙳ вы́шнѣйшимъ ны́нѣ си́ламъ .

сла́ва , и҆ ны́нѣ . гла́съ , и҃ . Вᲂзнесе́сѧ во сла́вѣ ѿ землѝ на нб҃са̀ , и҆́же всѧ̀ и҆спᲂлнѧ́ѧи бжⷭ҇тво́мъ , ѡ҆деснꙋ́ю ѻ҆ц҃а сѣ́лъ є҆сѝ , и҆́же и҆з̾ нача́ла бг҃ъ сло́во . тѣ́мже нбⷭ҇ныѧ си́лы зрѧ́ще , а҆пⷭ҇лѡмъ ᲂу҆жа́сни вᲂпїѧ́хꙋ . к̾ кᲂмꙋ̀ взира́ете зрѧ́ще на́ нб҃о ; сѐ є҆го́же ви́дѣсте , то́йже па́ки прїи́детъ сᲂсла́вᲂю , є҆́же сꙋди́ти все́й землѝ , и҆ вᲂзда́ти кᲂмꙋ́ждо по дѣ́лѡмъ є҆гѡ̀ . к̾ немꙋ́ же вᲂзᲂпїе́мъ , непᲂсти́жиме гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

На па́вечерницѣ , по дᲂсто́йнѣ , и҆ по трⷭ҇то́мъ , кᲂнда́къ , пра́здникꙋ . и҆ про́чее ѡ҆бы́чно .

Во вто́рникъ , з҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь пра́здникꙋ , три́жды .

По а҃ , стихᲂло́гїи , сѣда́ленъ . гла́съ , а҃ . А҆́нг҃лѡмъ дивѧ́щимсѧ вᲂсхо́дꙋ стра́ннᲂмꙋ , ᲂу҆ченико́мъ ᲂу҆жаса́ющимсѧ стра́шнᲂмꙋ вᲂзнᲂше́нїю . в̾зы́де с̾ пло́тїю хрⷭ҇тѐ , и҆ врата̀ тебѣ̀ взѧ́шасѧ сп҃се . сегѡ̀ ра́ди си́лы нбⷭ҇ныѧ дивлѧ́хꙋсѧ вᲂпїю́ще , сла́ва сᲂше́ствїю твᲂемꙋ̀ стра́шнᲂмꙋ , сла́ва вᲂзнесе́нїю твᲂемꙋ̀ . сла́ва смᲂтре́нїю твᲂемꙋ̀ є҆ди́не чл҃кᲂлю́бче . сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ , гла́съ , г҃ . Первᲂвѣ́чныи бг҃ъ и҆ без̾нача́льныи , є҆́же ᲂу҆́бѡ взѧ́тъ є҆стество̀ чл҃ческᲂе , ѡ҆бг҃ᲂтвᲂри́въ та́йнѡ . дне́сь вᲂзнесе́сѧ , а҆́нг҃ли предѝ текꙋ́ще , а҆пⷭ҇лѡмъ пᲂказᲂва́хꙋ , семꙋ̀ и҆дꙋ́щꙋ на нб҃са̀ со сла́вᲂю мно́гᲂю . є҆мꙋ́же пᲂклᲂни́вшесѧ гл҃ахꙋ , сла́ва бг҃ꙋ вᲂзне́сшемꙋсѧ . сла́ва , и҆ ны́нѣ , то́йже . та́же , ѱл҃о́мъ , н҃ . кано́нъ , пра́здникꙋ , гла́съ , є҃ . со і҆рмᲂсо́мъ на́ и҃ .= и҆ въ минѣ́и , на д҃ . а҆́щели слꙋчи́тсѧ , вели́кᲂмꙋ ст҃о́мꙋ . =пᲂе́мъ : кано́нъ , пра́здникꙋ , со і҆рмᲂсо́мъ на́ ѕ҃ . и҆ ст҃о́мꙋ , на́ ѕ҃ . свѣти́ленъ , пра́здникꙋ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ .= С=ло́ва ᲂу҆ченико́мъ ,꙳ вѣ́рнїи сᲂвзе́мшесѧ ,꙳ до дᲂбрᲂдѣ́телей на́ гᲂры ,꙳ ꙗ҆́кѡ да хрⷭ҇то́вꙋ сла́вꙋ ,꙳ ви́дѣти спᲂдо́бимсѧ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Пᲂсрами́шасѧ ꙗ҆́вѣ ,꙳ манихе́йскаѧ ᲂу҆мышле́нїѧ ,꙳ ѡ҆ ни́хже недᲂмышлѧ́хꙋсѧ ,꙳ хрⷭ҇то́во ꙗ҆́вѣ сказꙋ́юще ,꙳ с̾ пло́тїю вᲂзнесе́нїе .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Вᲂскли́кни ѽ дв҃де ,꙳ ра́дꙋѧсѧ цѣвни́цею ,꙳ вᲂзнесе́бᲂсѧ хрⷭ҇то́съ ,꙳ ве́щи слᲂвесе́мъ твᲂи́мъ ,꙳ и҆спᲂлнѧ́етъ пррⷪ҇чествїѧ твᲂѧ̀ .

сла́ва , и҆ ны́нѣ . гла́съ , ѕ҃ . Дне́съ на́ нб҃сѣхъ го́рнїѧ си́лы , на́ше є҆стество̀ зрѧ́ще дивѧ́тсѧ , стра́ннагѡ ѻ҆́браза вᲂсхо́дꙋ . недᲂꙋмѣ́ѧхꙋсѧ дрꙋ́гъ ко́ дрꙋгꙋ гл҃юще , кто̀ се́й прише́дыи . ви́дѧще же свᲂегѡ̀ влⷣкꙋ , нбⷭ҇наѧ врата̀ взѧ́ти пᲂвелѣва́хꙋ . с̾ ни́ми же непреста́ннѡ вᲂспᲂе́мъ , и҆́же с̾ пло́тїю ѿ ню́дꙋ па́ки прихᲂдѧ́щагѡ , ꙗ҆́кѡ сꙋдїю̀ всѣ́хъ и҆ бг҃а всеси́льна .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , трипѣ́снецъ . гла́съ , в҃ . пѣ́снь , в҃ . і҆рмо́съ . ви́дите ви́дите .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Сᲂвᲂкꙋплѧ́ѧсѧ со ᲂу҆ченикѝ , во́ днехъ четы́редесѧтихъ по бжⷭ҇твенѣмъ и҆́з̾ грᲂба сп҃се вᲂста́нїи , дх҃ъ бжⷭ҇твеныи ѡ҆бѣщева́ѧ и҆́мъ пᲂсла́ти . ꙗ҆́вѣ вᲂзнесе́сѧ во сла́вѣ , на ра́мѣхъ херꙋви́мскихъ стра́шнѡ нᲂси́мъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Врата̀ вᲂзми́те , разꙋмѣ́йте пресла́внаѧ , мы́сленыѧ си́лы вы́шнѣйшимъ вᲂпїѧ́хꙋ . цр҃ь всѧ́ческихъ тѣ́ло зе́мленѡ нᲂсѧ̀ прїи́де к̾ на́мъ , в̾ пᲂко́й сво́й чл҃ки ѡ҆бᲂжи́въ , за милᲂсе́рдїе мно́го и҆ безмѣ́рнꙋю млⷭ҇ть .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . За́ крᲂвъ себѣ̀ тмꙋ̀ пᲂлага́ѧи , беспло́тнᲂмꙋ є҆стествꙋ̀ , на крилꙋ̀ вѣ́тренюю вᲂсхᲂдѧ̀ бг҃ъ . во пло́щьсѧ и҆з̾ дв҃ы ѻ҆́блака свѣ́тлаго . ѻ҆́блакᲂмъ свѣ́тлымъ ѿ землѝ на высᲂтꙋ̀ взы́де , зрѧ́щимъ ᲂу҆ченико́мъ сла́внᲂе вᲂзнесе́нїе .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Невᲂздѣ́ланна землѧ̀ , вᲂзрасти́вшаѧ всѣ́хъ пита́телѧ , ѿверза́ющагѡ рꙋ́кꙋ , бл҃гᲂвᲂле́нїемъ свᲂи́мъ , и҆ насыща́юща всѧ́ко живо́тно крѣ́пᲂсти бжⷭ҇твеныѧ , ᲂу҆твердѝ хлѣ́бᲂмъ живо́тнымъ , раз̾сла́бленаѧ срⷣца̀ сы́тᲂстїю , ѕлы́хъ на́шихъ грѣхᲂпаде́нїи .

=пѣ́снь , и҃ . і҆рмо́съ . ѡ҆ =пᲂдо́бїи зла́тѣ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Є҆стество̀ а҆да́мᲂво вᲂспрїе́мъ , и҆ сїѐ ѡ҆бᲂжи́въ сло́ве , к̾ первᲂнача́льникꙋ свѣ́тꙋ вᲂзнесѐ свᲂемꙋ̀ ѻ҆ц҃ꙋ . ᲂу҆диви́вшимсѧ всѣ́мъ беспло́тнымъ чино́мъ , и҆ вᲂпїю́щимъ , по́йте гдⷭ҇а , и҆ превᲂзнᲂси́те є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . И҆лїѧ̀ прᲂѡ҆бразꙋ́ѧ , стра́шнᲂе твᲂѐ вᲂзнесе́нїе живᲂда́вче , бжⷭ҇твенымъ дх҃ᲂмъ пᲂказа́сѧ ѻ҆рꙋ́жникъ , и҆ к̾ высᲂтѣ̀ ве́сь ѿ землѝ нᲂша́шесѧ , пᲂѧ̀ влⷣцѣ , да пᲂе́тъ гдⷭ҇а всѧ̀ тва́рь , и҆ превᲂзно́ситъ є҆гѡ̀ во́ вѣки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Хвали́те бг҃а , вᲂскли́кните ꙗ҆зы́цы , и҆ вᲂсплещи́те рꙋка́ми , сᲂгла́снѡ по́йте , со сла́вᲂю хрⷭ҇то́съ взы́де , ѿ ню́дꙋ же к̾ на́мъ прїи́де спастѝ вᲂпїю́щїѧ , по́йте дѣ́ла , и҆ превᲂзнᲂси́те є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . трⷪ҇ченъ . Ѻ҆ц҃а , и҆ сн҃а сᲂбезнача́льна прᲂсла́вимъ всѝ , и҆ дх҃а ст҃а́гѡ , трⷪ҇цꙋ несᲂзда́ннꙋ , є҆стество́мъ сᲂедине́нꙋ , раздѣле́нꙋ же тꙋ̀ ли́цы пᲂю́ще , ѡ҆сꙋ́щественаѧ да пᲂе́тъ гдⷭ҇а всѧ̀ тва́рь , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́съ . недᲂꙋмѣ́етъ всѧ́къ ꙗ҆зы́къ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . И҆́же со сла́вᲂю ны́нѣ , вᲂсхᲂдѧ́и на ѻ҆́блацѣхъ кто̀ ᲂу҆́бѡ є҆́сть реко́ша го́рнѣйшїи чи́нᲂве , вᲂпїю́ще и҆́мъ ; врата̀ ᲂу҆́мнаѧ ѿи҆ми́те . бг҃ъ є҆ди́ныи ꙗ҆́же на землѝ сᲂвᲂкꙋпи́въ нб҃се́мъ , семꙋ̀ вели́чїе и҆ сла́вꙋ стра́хᲂмъ принесе́мъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Зри́те ре́клъ є҆сѝ сло́ве ᲂу҆ченико́мъ , скᲂрбѧ́щимъ твᲂи́мъ вᲂсхо́дᲂмъ , сѣди́те ждꙋ́ще вѣ́рᲂю , до́ндеже прїи́детъ к̾ ва́мъ бжⷭ҇твеныи ᲂу҆тѣ́шитель ѿ вы́шнихъ , даро́мъ всѣ́мъ незави́стныи и҆сто́чникъ , се́й ва́съ наꙋчи́тъ всѧ̀ ꙗ҆́кѡ пребл҃гъ .

сла́ва . Па́дшее є҆стество̀ а҆да́мᲂво , ви́дитсѧ в̾ вы́шнихъ , на прⷭ҇то́лѣ ѻ҆́ч҃и вᲂдрꙋже́но пресла́внѡ , и҆ пᲂклᲂнѧ́емо всегда̀ ѿ а҆́нг҃лъ и҆ а҆рха́нг҃лъ , и҆ ѿ прⷭ҇то́лъ си́лъ и҆ нача́лъ . сла́ва и҆з̾во́лившемꙋ та́кѡ , є҆ди́нᲂмꙋ бг҃ꙋ на́шемꙋ .

и҆ ны́нѣ , боⷢ҇ . Красна̀ дᲂбро́тᲂю рᲂди́ тѧ кра́снаѧ дв҃ца . є҆го́же зрѧ́щи видѣ́нїѧ внегда̀ страда́ти , нижѐ дᲂбро́ты и҆мꙋ́ща , сп҃се рыда́ющи гл҃аше , дивлю́сѧ твᲂемꙋ̀ и҆́же па́че ᲂу҆ма̀ сн҃е мо́й смире́нїю . и҆́мже спаса́еши смири́вшеесѧ є҆стество̀ чл҃ческᲂе .

Въ то́йже , вто́рникъ , з҃ ѧ , недѣ́ли , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , д҃ . поⷣ . ꙗ҆́кѡ до́блѧ . Зрѧ́щимъ бжⷭ҇твенымъ ꙳ твᲂи́мъ ᲂу҆ченико́мъ ,꙳ вᲂзнесе́сѧ к̾ нбⷭ҇нымъ ,꙳ и҆ сѣ́де ѡ҆деснꙋ́ю рᲂди́телѧ ,꙳ и҆́же тᲂгѡ̀ неразлꙋ́ченъ прⷭ҇нᲂсꙋ́щныи сн҃ъ ,꙳ и҆ ꙗ҆́кᲂже речѐ пᲂсла́лъ є҆сѝ ᲂу҆тѣ́шителѧ ,꙳ нбⷭ҇ны земны́ѧ сᲂтвᲂрѧ́юща ,꙳ мꙋ́дрыѧ и҆ бг҃ᲂгла́сныѧ ,꙳ и҆ сщ҃е́нныѧ ᲂу҆ченикѝ твᲂѧ̀ . Вᲂплᲂти́сѧ за неи҆зрече́ннꙋю і҆с҃е бл҃гᲂсть ,꙳ и҆ распѧ́тїе и҆ сме́рть ,꙳ без̾сме́ртне во́лею претерпѣ̀ ,꙳ и҆ а҆́бїе тридне́внѡ вᲂскр҃се и҆з̾ ме́ртвыхъ .꙳ и҆ по́ днехъ четы́редесѧтихъ вᲂзнесе́сѧ ,꙳ ѿ ню́дꙋ же пе́рвѣе сни́де ,꙳ смири́въ земна́ѧ ,꙳ и҆ всѣ́хъ приведѐ рᲂди́телеви . На ѻ҆́блацѣхъ ꙗ҆́кѡ ви́дѣша тѧ взима́ема гдⷭ҇и ,꙳ мꙋ́дрїи а҆пⷭ҇ли ,꙳ рыда́юще ,꙳ и҆ ᲂу҆миле́нїѧ и҆спо́лнени ,꙳ вᲂпїѧ́хꙋ со слеза́ми , не ѡ҆ста́ви си́рыхъ ,꙳ и҆́хже за милᲂсе́рдїе вᲂзлюби́лъ є҆сѝ .꙳ но пᲂслѝ наны̀ ꙗ҆́кᲂже ѡ҆бѣща́сѧ всеще́дре ,꙳ прест҃ы́и тво́й дх҃ъ ,꙳ прᲂсвѣща́ющъ дш҃а на́ша .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , д҃ . Є҆гда̀ вᲂзнесе́сѧ во сла́вѣ хрⷭ҇тѐ бж҃е , ᲂу҆ченико́мъ зрѧ́щимъ ѻ҆́блацы пᲂд̾и҆ма́хꙋ тѧ с̾ пло́тїю , врата́ же взѧ́шасѧ нбⷭ҇наѧ вᲂз̾ше́ ствїемъ ти . ли́ци же а҆́нг҃льстїи ра́дᲂвахꙋсѧ с̾ весе́лїемъ . го́рнїѧ си́лы зᲂвѧ́хꙋ гл҃юще , вᲂз̾ ми́те врата̀ кн҃зи ва́ша , и҆ вни́детъ цр҃ь сла́вы . ᲂу҆ченицы́ же дивѧ́щесѧ гл҃ахꙋ , неразлꙋчи́сѧ ѿ на́съ па́стырю до́брыи , но пᲂслѝ на́мъ дх҃ъ тво́й прест҃ы́и , наставлѧ́ющъ и҆ прᲂсвѣща́ющъ , и҆ ᲂу҆твержа́ющъ и҆ ѡ҆сщ҃а́ющъ дш҃а на́ша .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ .= Т=ы̀ чл҃ческᲂе сꙋщество̀ ᲂу҆твердѝ сᲂбо́ю ,꙳ но́во твᲂри́въ всѧ̀ .꙳ и҆ пло́тїю вᲂзне́с̾сѧ ,꙳ сѣ́де на вы́шнихъ сло́ве бж҃їи ,꙳ ѡ҆деснꙋ́ю рᲂди́телѧ .꙳ тѣ́мже и҆ па́ки тѧ сꙋдїю̀ всѣ́мъ вѣ́рнымъ и҆ невѣ́рнымъ ча́емъ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . А҆пⷭ҇лѡмъ вᲂпїѧ́хꙋ хрⷭ҇то́вымъ а҆́нг҃ли ,꙳ мꙋ́жїе что̀ взира́ете ,꙳ вᲂсхᲂдѧ́ща гᲂрѣ̀ хрⷭ҇та̀ жизнᲂда́вца ,꙳ се́й сꙋди́ти всѣ́мъ прїи́детъ ,꙳ всѣ́мъ сы́и бг҃ъ ,꙳ и҆ всѣ́мъ пᲂдаѧ̀ по дᲂстᲂѧ́нїю дѣѧ́нїемъ и҆́хъ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Прїе́мшꙋ ти пло́ть ,꙳ ѡ҆бᲂжи́лъ є҆сѝ сп҃се чл҃кᲂлю́бче ,꙳ без̾сме́ртныѧ и҆ бжⷭ҇твеныѧ спᲂдо́билъ є҆сѝ сла́вы ,꙳ въ вᲂзнесе́нїи стра́шнѣмъ ꙳ и҆ ᲂу҆жа́снѣмъ дᲂлгᲂтерпѣли́ве .꙳ ѡ҆зарѝ срⷣца̀ твᲂи́мъ прᲂсвѣще́нїемъ ,꙳ и҆ на́мъ пᲂю́щимъ тѧ̀ .

сла́ва , и҆ ны́нѣ . гла́съ , є҃ . Гдⷭ҇и вᲂсхᲂдѧ́щꙋ ти ѿ ню́дꙋ же не ѿлꙋчи́сѧ , во́инства а҆́нг҃льскаѧ и҆ всѣ́хъ беспло́тныхъ , ра́дᲂстїю вᲂпїю́ще вы́шнѣйшимъ си́ламъ , вᲂзми́те врата̀ кн҃зи , и҆ вни́детъ цр҃ь сла́вы . и҆́бо прⷭ҇то́лъ херꙋви́мскїи вᲂспрїѧ́тъ тѧ с̾ пло́тїю , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

На па́вечерницѣ , по дᲂсто́йнѣ , и҆ по трⷭ҇то́мъ , кᲂнда́къ , пра́здникꙋ . и҆ про́чее ѡ҆бы́чно .

Всре́дꙋ , з҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ . =По а҃ , стихᲂло́гїи , сѣда́ленъ . гла́съ , є҃ . Сᲂше́дъ с̾ нб҃сѐ к̾ земны́мъ , и҆ до́лѣ лежа́щїи во а҆́дᲂвѣ темни́цѣ , сᲂво скреси́лъ є҆сѝ бж҃е а҆да́мѡвъ ѻ҆́бразъ , и҆ вᲂзнесе́ нїемъ твᲂи́мъ хрⷭ҇тѐ на нб҃са̀ вᲂзве́д̾ , на прⷭ҇то́лѣ ѻ҆ц҃а свᲂегѡ̀ сᲂпресто́льника сᲂдѣ́лавъ , ꙗ҆́кѡ млⷭ҇тивъ и҆ чл҃кᲂлю́бецъ . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , и҃ . На́ гᲂрꙋ вᲂз̾ше́дъ є҆леѡ́нскꙋю , млⷭ҇тивыи бж҃е ѿ ню́дꙋ же и҆ вᲂз̾несе́сѧ . свѣ́телъ бо ѻ҆́блакъ ѿ землѝ тебѐ пᲂдъѧ́тъ , зрѧ́щимъ ᲂу҆ченико́мъ твᲂи́мъ чꙋ́до стра́шно , вᲂпїю́щимъ беспло́тнымъ на́ нб҃сѣхъ стра́хᲂмъ , врата̀ вᲂзми́те , вы́шнимъ во́инᲂмъ . с̾ ни́ми же тѧ̀ цр҃ѧ пᲂе́тъ , всѧ̀ тва́рь всѧ́ческихъ бг҃а .= сла́ва , и҆ ны́нѣ , то́йже .=

та́же , ѱл҃о́мъ , н҃ . кано́нъ , пра́здникꙋ , гла́съ , д҃ . со і҆рмᲂсо́мъ на́ и҃ .= и҆ въ минѣ́и , на д҃ . а҆́щели слꙋчи́тсѧ , вели́кᲂмꙋ ст҃о́мꙋ . =пᲂе́мъ : кано́нъ , пра́здникꙋ , со і҆рмᲂсо́мъ на́ ѕ҃ . и҆ ст҃о́мꙋ , на́ ѕ҃ .= с=вѣти́ленъ , пра́здникꙋ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . Чꙋ́до нᲂвᲂлѣ́пно ,꙳ чл҃ческᲂе бо сꙋщество̀ ,꙳ на нб҃са̀ вᲂз̾несе́сѧ ,꙳ сᲂедини́вшисѧ ,꙳ сло́вꙋ бж҃їю вседержи́телю .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Вᲂсїѧ̀ свѣ́тлыи ,꙳ и҆ пресвѣ́тлыи де́нь ,꙳ влады́чнимъ бжⷭ҇твенымъ ,꙳ на нб҃са̀ вᲂсхᲂжде́нїемъ ,꙳ прᲂсвѣща́ѧ всѧ́ческаѧ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Ꙗ҆́кᲂже ᲂу҆ченико́мъ ,꙳ пᲂсла́лъ є҆сѝ ще́дре ,꙳ с̾ра́сленыи тво́й дх҃ъ ,꙳ и҆ лю́демъ твᲂи́мъ низ̾пᲂслѝ хрⷭ҇тѐ сп҃се ,꙳ бл҃гᲂда́ть твᲂю̀ .

сла́ва , и҆ ны́нѣ . гла́съ , є҃ . Прїиди́те вѣ́рныхъ сᲂвᲂкꙋпле́нїѧ , ᲂу҆мы̀ та́йнѡ наꙋчи́вшесѧ ᲂу҆чени́къ хрⷭ҇то́вѣхъ , непреста́ннѡ пѣ́нїе рце́мъ на є҆леѡ́нѣ , ꙗ҆́кᲂже и҆ а҆пⷭ҇ли с̾ дв҃дᲂмъ вᲂзᲂпїе́мъ . взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣ . да и҆зба́витъ племена̀ чл҃ча ѿ сᲂбла́знъ вра́жїихъ , и҆ прᲂсвѣти́тъ дш҃а на́ша .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , трипѣ́снецъ . гла́съ , г҃ . пѣ́снь , г҃ . і҆рмо́съ . ᲂу҆тверже́нїе на тѧ̀ надѣ́ющимсѧ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѡ҆сꙋжде́ннᲂе и҆ престꙋпле́нїемъ и҆стлѣ́вшее є҆стество̀ чл҃ческᲂе , вᲂз̾ве́лъ є҆сѝ влⷣко превы́ше а҆́нг҃лъ ꙗ҆́кѡ милᲂсе́рдъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Вᲂз̾ ше́лъ є҆сѝ на нб҃са̀ со сла́вᲂю , пᲂю́щимъ тѧ̀ гдⷭ҇и беспло́тным̾ ꙗ҆́кѡ всѣ́хъ твᲂрца̀ и҆ бг҃а на́шего .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Оу҆тѣ́шителѧ и҆́стиннаго дх҃а пᲂсла́лъ є҆сѝ влⷣко ᲂу҆ченико́мъ свᲂи́мъ , вᲂз̾ше́дъ на нб҃са̀ пребл҃гі́и .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Вᲂплᲂща́емо и҆з̾ тебѐ чⷭ҇таѧ про́йде сло́во , паде́нїе первᲂзда́нныхъ за млрⷭ҇дїе щедро́тъ и҆справлѧ́ѧ .

пѣ́снь , и҃ . і҆рмо́съ . въ непᲂстᲂѧ́ннѣмъ ѻ҆гнѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Всѐ ꙗ҆́кѡ бг҃ъ и҆спо́лнивъ є҆́же ѡ҆ на́съ смᲂтре́нїе , вᲂзнесе́сѧ , зрѧ́щимъ ᲂу҆ченико́мъ твᲂи́мъ . и҆ со́ страхᲂмъ вᲂпїю́щимъ ти , блгⷭ҇ви́те всѧ̀ дѣ́ла гдⷭ҇нѧ гдⷭ҇а .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Мꙋ́жїе вᲂи́стинꙋ галиле́йстїи что̀ в̾зира́ете си́це , влⷣцѣ к̾ нб҃сѝ вᲂсхᲂдѧ́щꙋ , гл҃ахꙋ а҆́нг҃ли , ꙗ҆́кᲂже ви́дите , па́ки се́й хо́щетъ прїитѝ сꙋди́ти все́й тва́ри . є҆го́же превᲂзно́симъ во́ вѣки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Дх҃ъ пра́въ дх҃ъ бжⷭ҇твенъ . дх҃ъ сы́и с̾ тᲂбо́ю нераздѣ́ленъ , ꙗ҆́кᲂже ѡ҆бѣща́сѧ пᲂслѝ на́мъ , и҆́же на ѻ҆́блацѣхъ сла́вы нᲂси́мыи сло́ве бж҃їи , бжⷭ҇твенїи а҆пⷭ҇ли зᲂвѧ́хꙋ , ꙗ҆́кѡ да тѧ̀ пᲂе́мъ и҆ превᲂзно́симъ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Къ тебѣ̀ бж҃їѧ премꙋ́дрᲂсть хра́мъ себѣ̀ сᲂзда́въ , вᲂплᲂти́сѧ неи҆зрече́ннымъ сᲂше́ствїемъ , ѻ҆трᲂкᲂви́це неи҆скꙋсᲂбра́чнаѧ , ты́ бо є҆ди́на во всѣ́хъ рᲂдѣ́хъ и҆з̾бра́сѧ , бы́ти жили́ще хрⷭ҇тꙋ̀ бг҃ꙋ .

пѣ́снь , ѳ҃ . і҆рмо́съ . но́вᲂе чꙋ́до и҆ бг҃ᲂлѣ́пнѡ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . И҆́же со сла́вᲂю в̾ вᲂскли кнᲂве́нїи вᲂсхᲂдѧ́щꙋ , ꙗ҆́кᲂже пррⷪ҇къ дре́вле речѐ , се́й всѣ́хъ є҆́сть гдⷭ҇ь и҆ влⷣка , по́йте семꙋ̀ вѣ́рᲂю ꙗ҆зы́цы по́йте , и҆ с̾ тре́петᲂмъ тᲂго̀ славᲂсло́ви те , ꙗ҆́кѡ сᲂдѣ́ла неи҆зслѣ́дима и҆ неи҆зрече́нна .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Скᲂрбѧ́щимъ ре́клъ є҆сѝ ᲂу҆ченико́мъ , неразлꙋчꙋ́сѧ во́ вѣки ѿ ва́съ , а҆́ще и҆ к̾ пᲂсла́вшемꙋ мѧ и҆дꙋ̀ ѻ҆ц҃ꙋ . и҆ди́те , ми́ръ ве́сь наꙋчи́те пᲂзна́ти мѧ бг҃а и҆́стинна , сᲂдѣ́лавша мѧ ꙗ҆́кᲂже ви́дѣсте и҆ слы́шасте .

сла́ва . Ми́ръ всѣ́мъ ре́клъ є҆сѝ хрⷭ҇тѐ , и҆ ѻ҆́блакъ пᲂдъе́мъ тѧ̀ а҆́бїе свѣ́та , всѣ́мъ зрѧ́щимъ , ѿ землѝ вᲂз̾несе́сѧ . и҆ вᲂз̾ше́дъ превы́ше сѣ́лъ є҆сѝ , надᲂвсѧ́цѣмъ нача́лᲂмъ и҆ вла́стїю . тѣ́мже сла́вимъ мнᲂгᲂпѣ́тꙋю си́лꙋ твᲂю̀ .

и҆ ны́нѣ , боⷢ҇ . Свѣ́та прїѧ́телище ꙗ҆ви́ласѧ є҆сѝ вᲂи́стинꙋ , ꙗ҆́кѡ и҆з̾ тебѐ непрело́жнѡ вᲂпло́щсѧ неи҆зрече́ннѡ бг҃ъ , на крⷭ҇тѣ̀ вᲂз̾вы́сивъ а҆да́мᲂво сꙋщество̀ , и҆ в̾ ме́ртвыхъ первᲂрᲂже́нъ бы́въ , и҆ пребыва́ѧ бг҃ъ в̾ вы́шнихъ . кꙋ́пнѡ со ѻ҆ц҃е́мъ же и҆ бжⷭ҇твенымъ дх҃ᲂмъ сла́вимъ .

Въ тꙋ́же , сре́дꙋ , з҃ ѧ , недѣ́ли , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , д҃ . поⷣ . да́лъ є҆сѝ зна́менїе .= П=ᲂстрада́въ ꙗ҆́кѡ челᲂвѣ́къ ,꙳ без̾стра́стныи бжⷭ҇тво́мъ .꙳ и҆ вᲂскр҃се тридне́венъ ,꙳ плѣни́въ сме́рть ,꙳ и҆ вᲂскр҃си́въ всѧ̀ и҆стлѣ́вшїѧ ,꙳ и҆ вᲂзнесе́сѧ хрⷭ҇тѐ ко ѻ҆ц҃ꙋ ,꙳ ѡ҆бѣщава́ѧ пᲂсла́ти ᲂу҆тѣ́шителѧ ,꙳ сщ҃е́ннымъ а҆пⷭ҇лѡмъ свᲂи́мъ ,꙳ і҆с҃е всеси́льне ,꙳ сп҃се дш҃а́мъ на́шимъ . Вы̀ что̀ стᲂитѐ къ нб҃сѝ зрѧ́ще ,꙳ ви́дими а҆́нг҃ли ꙗ҆́кѡ чл҃цы гл҃ахꙋ ,꙳ слᲂвесѐ ᲂу҆ченико́мъ .꙳ се́й є҆го́же зритѐ ,꙳ ѻ҆́блакᲂмъ свѣ́тлымъ вᲂзнᲂси́ма ,꙳ та́кѡ прїи́детъ сꙋди́ти ми́рꙋ ,꙳ ꙗ҆́кᲂже речѐ .꙳ ше́дше ᲂу҆́бѡ ꙳ рече́ннаѧ скᲂнча́йте . По є҆́же и҆́з̾ грᲂба твᲂе́мъ вᲂста́нїи неи҆зрече́ннѣмъ ,꙳ всеси́льне гдⷭ҇и ,꙳ прїе́мъ и҆́хъ же вᲂзлюби́лъ є҆сѝ ,꙳ да́же до виѳа́нїи и҆зведѐ сло́ве .꙳ и҆ на гᲂрѣ̀ бы́въ є҆леѡ́нстѣй ,꙳ и҆ си́хъ бл҃гᲂслᲂви́въ , и҆ та́кѡ вᲂзнесе́сѧ .꙳ пᲂвинꙋ́ющимтисѧ а҆́нг҃лѡмъ ,꙳ і҆с҃е всеси́льне ,꙳ сп҃се дш҃а́мъ на́шимъ .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , а҃ . А҆́нг҃ли твᲂѝ гдⷭ҇и а҆пⷭ҇лѡмъ гл҃ахꙋ , мꙋ́жїе галиле́йстїи , что̀ стᲂитѐ зрѧ́ще на́ небо ; се́й є҆́сть хрⷭ҇то́съ бг҃ъ вᲂзнесы́исѧ ѿ ва́съ на́ небо . та́кѡ прїи́детъ па́ки , и҆́мъ же ѻ҆́бразᲂмъ ви́дѣсте є҆гѡ̀ и҆дꙋ́ща на́ небо . слꙋжи́те є҆мꙋ̀ въ препᲂдо́бїи и҆ пра́вдѣ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . Не ѡ҆ста́влю си́рыхъ ,꙳ и҆́хже а҆́зъ сᲂбра́хъ ,꙳ гдⷭ҇ь дрꙋго́мъ гл҃а , ꙳ но пᲂслю̀ ꙳ дх҃ъ прест҃ы́и .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . А҆́нг҃ли мꙋ́дрымъ ,꙳ вᲂпїѧ́хꙋ а҆пⷭ҇лѡмъ ,꙳ ѽ мꙋ́жїе галиле́йстїи ,꙳ и҆́мже ѻ҆́бразᲂмъ ви́дѣсте є҆гѡ̀ ,꙳ та́кᲂже па́ки прїи́детъ .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Снидо́ша с̾ ра́дᲂстїю ,꙳ ѿ гᲂры̀ ма́сличныѧ ,꙳ ᲂу҆ченицы̀ твᲂѝ сло́ве ,꙳ сла́вѧще и҆ пᲂю́ще ,꙳ бжⷭ҇твенᲂе твᲂѐ вᲂз̾несе́нїе .

сла́ва , и҆ ны́нѣ . гла́съ , а҃ . Вᲂз̾ше́дъ на нб҃са̀ ѿ ню́дꙋ же и҆ сни́де , да не ѡ҆ста́виши на́съ си́ры гдⷭ҇и , да прїи́детъ тво́й дх҃ъ , нᲂсѧ̀ смире́нїе ми́рꙋ . пᲂкажѝ сынᲂво́мъ чл҃ческимъ , дѣ́ла си́лы твᲂеѧ̀ гдⷭ҇и чл҃кᲂлю́бче .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

На па́вечерницѣ , по дᲂсто́йнѣ , и҆ по трⷭ҇то́мъ , кᲂнда́къ , пра́здникꙋ . и҆ про́чее ѡ҆бы́чно .

Въ четверто́к̾ , з҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь пра́здникꙋ , три́жды .

По а҃ , стихᲂло́гїи , сѣда́ленъ . гла́съ , а҃ . А҆́дꙋ плѣни́вшꙋсѧ тᲂбо́ю жизнᲂда́вче , и҆ ми́рꙋ прᲂсвѣти́вшꙋсѧ вᲂзнесе́нїемъ твᲂи́мъ , вᲂзнесе́сѧ во сла́вѣ сп҃се , и҆́же всѧ̀ сᲂдержа́и рꙋко́ю , сегѡ̀ ра́ди со а҆́нг҃лы славᲂсло́вимъ тѧ̀ вседержи́телю гдⷭ҇и . сла́ва вᲂзнесе́нїю твᲂемꙋ̀ хрⷭ҇тѐ , сла́ва црⷭ҇твїю твᲂемꙋ̀ , сла́ва млрⷭ҇дїю твᲂемꙋ̀ , є҆ди́не чл҃кᲂлю́бче . сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , а҃ . Прише́лъ є҆сѝ беспло́тенъ с̾ нб҃сѐ сло́ве на́ землю , да всѣ́хъ вᲂзнесе́ши с̾ сᲂбо́ю . сᲂше́лъ є҆сѝ без̾тѣле́сенъ на́ землю , и҆ вᲂзше́лъ є҆сѝ с̾ пло́тїю хрⷭ҇тѐ , сегѡ̀ ра́ди си́лы нбⷭ҇ныѧ вᲂпїѧ́хꙋ зᲂвꙋ́ще , сла́ва сᲂше́ствїю твᲂемꙋ̀ хрⷭ҇тѐ . сла́ва вᲂзнесе́нїю твᲂемꙋ̀ . сла́ва смᲂтре́нїю твᲂемꙋ̀ , є҆ди́не чл҃кᲂлю́бче . сла́ва , и҆ ны́нѣ , то́йже .

та́же , ѱл҃о́мъ , н҃ . кано́нъ , пра́здникꙋ , гла́съ , є҃ . со і҆рмᲂсо́мъ на́ и҃ .= и҆ въ минѣ́и , на д҃ . а҆́щели слꙋчи́тсѧ , вели́кᲂмꙋ ст҃о́мꙋ . =пᲂе́мъ : кано́нъ , пра́здникꙋ , со і҆рмᲂсо́мъ на́ ѕ҃ . и҆ ст҃о́мꙋ , на́ ѕ҃ .= с=вѣти́ленъ , пра́здникꙋ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . Сᲂверши́лъ є҆сѝ бл҃же ,꙳ ѻ҆́ч҃ее бл҃гᲂвᲂле́нїе ,꙳ сᲂвᲂкꙋпи́въ же ,꙳ вы́шнѧѧ с̾ ни́жними .꙳ вᲂзнесе́сѧ вᲂсла́вѣ к̾ пе́рвѣйшим̾ .

сти́хъ : всѝ ꙗ҆зы́цы вᲂсплещи́те рꙋка́ми ,꙳ вᲂскли́кните бг҃ꙋ гла́сᲂмъ ра́дᲂсти . Ѻ҆́блакъ тѧ свѣ́та ,꙳ вᲂспрїѧ́тъ на высᲂтꙋ̀ ,꙳ и҆ а҆́нг҃ли со́ страхᲂмъ ,꙳ и҆ тре́петᲂмъ слꙋжа́хꙋ ꙳ бжⷭ҇твенᲂмꙋ твᲂемꙋ̀ вᲂзнесе́нїю .

сти́хъ : взы́де бг҃ъ в̾ вᲂскликнᲂве́нїи ,꙳ гдⷭ҇ь во́ гласѣ трꙋ́бнѣ . Хвалꙋ̀ бг҃ꙋ краснꙋ̀ ꙳ со а҆пⷭ҇лы ,꙳ бцⷣа вᲂспѣва́етъ ,꙳ гдⷭ҇а зрѧ́щи ꙳ на ѻ҆́блацѣхъ нᲂси́ма .

сла́ва , и҆ ны́нѣ . гла́съ , з҃ . На́ гᲂрꙋ є҆леѡ́нскꙋю прише́лъ є҆сѝ , ми́лꙋѧи ро́дъ чл҃чь , и҆ ѻ҆́блакъ пᲂдъѧ́тъ тѧ ѿ ѻ҆́чїю ᲂу҆чени́къ твᲂи́хъ , трепе́щꙋщимъ ᲂу҆́бѡ за видѣ́нїе , ра́дꙋющимжесѧ за ча́ѧнїе ст҃а́гѡ дх҃а . и҆́мже ᲂу҆тверди́въ сп҃се пᲂми́лꙋй на́съ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , трипѣ́снецъ . гла́съ , д҃ . пѣ́снь , д҃ . і҆рмо́съ . сѣдѧ́и во сла́вѣ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆́же непристꙋ́пныи є҆стество́мъ , пристꙋ́пенъ мнѣ̀ бы́въ . и҆́же в̾ менѐ ѡ҆бᲂлкі́исѧ , всѐ мᲂѐ є҆стество̀ ѡ҆свѣтлѝ , и҆ свᲂи́мъ вᲂз̾несе́нїемъ вᲂз̾ведѐ , превы́ше всѧ́кᲂгѡ нача́ла и҆ вла́сти .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Кᲂлесницеѣ́здникъ и҆лїѧ̀ вᲂздꙋ́хъ про́йде , прᲂѡ҆бразꙋ́ѧ дре́вле твᲂѐ сло́ве бж҃їи вᲂзнесе́нїе . ꙗ҆́кѡ на кᲂлесни́цѣ бо сп҃се нᲂси́мъ ѻ҆́блакᲂмъ , ко ѻ҆те́ческимъ нѣ́дрᲂмъ дᲂсти́глъ є҆сѝ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Оу҆ченико́мъ взира́ющимъ стра́шнᲂе взѧ́тїе и҆ дивѧ́щимсѧ , бжⷭ҇твенїи прᲂвѣщева́хꙋ а҆́нг҃ли , мꙋ́жїе вы̀ галиле́йстїи , ꙗ҆́кᲂже ви́дите , си́це па́ки прїи́детъ і҆с҃ъ сꙋди́ти всѣ́мъ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ѡ҆бнᲂвлѧ́еши пречⷭ҇таѧ сᲂкрꙋше́нᲂе чл҃ческᲂе є҆стество̀ , и҆ тлѝ пᲂд̾кло́ншеесѧ , бг҃а вᲂплᲂти́вши , и҆ па́че є҆стества̀ рᲂди́вши неи҆скꙋсᲂбра́чнаѧ . є҆мꙋ́же зᲂве́мъ , сла́ва си́лѣ твᲂе́й гдⷭ҇и .

пѣ́снь , и҃ . і҆рмо́съ . ѻ҆́трᲂки бл҃гᲂчести́выѧ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Хᲂдѧ́и на кри́лѣхъ вѣ́тренихъ , ѻ҆́блакᲂмъ нᲂси́мъ , ны́нѣ вᲂспрїе́млетсѧ в̾ нбⷭ҇наѧ , и҆дѣ́же бѧ́ше пре́жде . и҆ ᲂу҆тѣ́шителѧ пᲂсыла́етъ ᲂу҆ченико́мъ , хвалᲂсло́вѧщимъ и҆ превᲂзнᲂсѧ́щимъ є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Распѧ́тїе и҆ пᲂгребе́нїе претерпѣ́въ во́лею , вᲂскр҃се всеси́льне . и҆ лю́бѧщимъ тѧ̀ в̾ четы́редесѧтихъ дне́хъ ꙗ҆влѧ́ѧсѧ , радо́сть сᲂтвᲂрѧ́ѧ и҆́мъ . та́же си́хъ бл҃гᲂслᲂви́лъ є҆сѝ , к̾ свᲂемꙋ̀ ѻ҆ц҃ꙋ взы́де со сла́вᲂю .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Наꙋчи́въ ꙗ҆́вѣ , ꙗ҆́же па́че сло́ва сло́ве бг҃ᲂсло́вцы . в̾зы́де пᲂсла́въ си́мъ ꙗ҆́кᲂже ѡ҆бѣща́сѧ , вседѣ́йственыи и҆ сᲂпресто́льныи дх҃ъ , пᲂю́щимъ , гдⷭ҇а по́йте и҆ превᲂзнᲂси́те є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Две́ри бж҃їѧ затвᲂре́ны , ю҆́же є҆ди́нъ про́йде вы́шнїи , напра́ви мѧ к̾ стезѧ́мъ бжⷭ҇твенымъ , и҆ ѿве́рзи спасе́нїѧ две́ри мнѣ̀ бг҃ᲂбл҃гᲂда́тнаѧ . к̾ тебѣ́ бо прибѣга́ю дв҃о , ꙗ҆́кѡ є҆ди́на застꙋ́пница ро́дꙋ чл҃ческᲂмꙋ .

пѣ́снь , ѳ҃ . і҆рмо́съ . ка́мень нерꙋкᲂсѣ́чныѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . До́ндеже ᲂу҆́бѡ ѡ҆блече́тесѧ си́лᲂю с̾вы́ше , ре́клъ є҆сѝ ᲂу҆ченико́мъ , сѣди́те вкꙋ́пѣ со́брани , а҆́зъ бо сѐ вᲂспрїе́млемь є҆́смь , и҆ ѿ ѻ҆ц҃а сᲂпресто́льнагѡ пᲂслю̀ ва́мъ ᲂу҆тѣ́шителѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Прїидѣ́те та́йнѡ , вᲂз̾ше́дше всѝ на высᲂтꙋ̀ видѣ́нїѧ , ѻ҆чи́ма ᲂу҆́зримъ ᲂу҆́мныма , вᲂз̾не́сшасѧ и҆ сѣдѧ́ща ѡ҆деснꙋ́ю , ꙗ҆́кѡ сᲂпресто́льна ѻ҆ц҃ꙋ сло́ва сᲂпрⷭ҇нᲂсꙋ́щнаго .

сла́ва . Сл҃нце и҆́з̾ грᲂба красно̀ вᲂсїѧ́въ влⷣка , ꙗ҆́кᲂже свѣтᲂно́сныѧ лꙋчѝ вселе́ннѣй все́й , ва́съ распᲂсла̀ а҆пⷭ҇лы свѣтѧ́щїѧ и҆́хъ , и҆ мглꙋ̀ ѿгᲂнѧ́щїѧ .

и҆ ны́нѣ , боⷢ҇ . Пᲂщади́ мѧ хрⷭ҇тѐ , є҆гда̀ прїи́деши сꙋди́ти ми́рꙋ со сла́вᲂю , раз̾рѣша́ѧ мглꙋ̀ страсте́й мᲂи́хъ , мᲂли́твами ро́ждьшїѧ тѧ , и҆ наслѣ́дника мѧ̀ сᲂтвᲂрѝ , нбⷭ҇нагѡ црⷭ҇твїѧ твᲂегѡ̀ .

Въ то́йже , четверто́къ , ве́черъ . =Звᲂни́мъ во всѧ̀ . за є҆́же ѿдае́тсѧ пра́здникъ вᲂзнесе́нїѧ . на вече́рни гл҃емъ , кафи́смꙋ , рѧдᲂвꙋ́ю . на гдⷭ҇и вᲂзва́хъ , стихѣ́ры , пра́здникꙋ , на́ ѕ҃ . и҆́хже пѣ́хᲂмъ на са́мыи пра́здникъ . сла́ва , и҆ ны́нѣ , пра́здникꙋ . прᲂки́менъ , дню̀ . вы́хᲂда нетвᲂри́мъ , ни паремі́й нечте́мъ . ни литі́и пᲂе́мъ . по прᲂки́мнѣ гл҃емъ , спᲂдо́би гдⷭ҇и в̾ ве́черъ . пᲂсе́мъ є҆ктенїѧ̀ : и҆спо́лнимъ вече́рнїѧ мл҃твы . та́же , стихо́вна , пра́здникꙋ . по ны́нѣ ѿпꙋща́еши , и҆ по трⷭ҇то́мъ , трᲂпа́рь , пра́здникꙋ , аⷤ . та́же , є҆ктенїѧ̀ : пᲂми́лꙋй на́съ бж҃е . =и҆ ѿпꙋ́стъ .= Р=ѧдᲂва́го же ст҃а́гѡ слꙋ́жбꙋ пᲂе́мъ на па́вечерницѣ .

на па́вечерницѣ , по дᲂсто́йнѣ , и҆ по трⷭ҇то́мъ , кᲂнда́къ , пра́здникꙋ . и҆ про́чее ѡ҆бы́чно .

на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ .= по кафи́смахъ , сѣда́льны , пра́здникꙋ . =кано́нъ , =пра́здникꙋ , пе́рвыи со і҆рмᲂсо́мъ , на́ и҃ . і҆рмᲂсы̀ , по в҃ . а҆ дрꙋгі́и со і҆рмᲂсо́мъ , на́ ѕ҃ . =катава́сїѧ : бжⷭ҇твенымъ пᲂкрᲂве́нъ , ѻ҆́ба ли́ка в̾кꙋ́пѣ . по г҃ , пѣ́сни , сѣда́ленъ , пра́здникꙋ , вⷤ . по ѕ҃ , пѣ́сни , кᲂнда́къ , и҆ и҆́кᲂсъ , пра́здникꙋ . на ѳ҃ , пѣ́сни , чⷭ҇тнѣ́йшꙋю , непᲂе́мъ . на схо́дѣ пᲂе́мъ пре́же і҆рмо́съ : ра́дꙋисѧ цр҃це . та́же , пᲂе́мъ , вмѣ́стѡ дᲂсто́йна , і҆рмо́съ : тѧ̀ па́че ᲂу҆ма̀ . и҆ пᲂкло́нъ до землѝ .= свѣти́ленъ , пра́здникꙋ , вⷤ . на хвали́тѣхъ , стихѣ́ры , пра́здникꙋ , на д҃ . сла́ва , и҆ ны́нѣ , пра́здникꙋ . славᲂсло́вїе вели́кᲂе . по трⷭ҇то́мъ , трᲂпа́рь , пра́здникꙋ . =та́же , є҆ктенїѝ . и҆ ѿпꙋ́стъ . и҆ ча́съ , а҃ и . и҆ кᲂне́чныи ѿпꙋ́стъ . на ча́сѣхъ , трᲂпа́рь , и҆ кᲂнда́къ , пра́здникꙋ .

На бл҃же́ннахъ , трипѣ́снецъ . гла́съ , ѕ҃ . пѣ́снь , є҃ . і҆рмо́съ . къ тебѣ̀ ᲂу҆́треннюю .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Сме́рти держа́вꙋ бжⷭ҇твенᲂю си́лᲂю низ̾ лᲂжи́въ , вᲂскрⷭ҇лъ є҆сѝ тридне́внѡ хрⷭ҇тѐ мо́й . и҆ к̾ нбⷭ҇нымъ со сла́вᲂю взы́де . твᲂи́мъ ᲂу҆ченико́мъ вᲂспѣва́ющимъ тѧ бг҃а и҆ чл҃кᲂлю́бца .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . На́съ да неѡ҆ста́виши си́рыхъ ще́дре , ꙗ҆́кᲂже ѡ҆бѣща́ сѧ пᲂслѝ ст҃ы́и тво́й дх҃ъ , твᲂѝ ᲂу҆ченицы̀ и҆зба́вителю приглаша́хꙋ , внегда̀ ѿ землѝ вᲂсхᲂдѧ́ща ви́дѣша тѧ чл҃кᲂлю́бче .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Сѐ дх҃ъ хо́щетъ сни́ти на́ землю , в̾ ꙗ҆зы́цѣхъ ѻ҆́гненыхъ , ꙗ҆́кѡ да пᲂка́жетъ ѻ҆́гнены ꙗ҆́вѣ , бре́нныѧ сло́ва честны́ѧ ᲂу҆ченикѝ , вᲂзвѣща́ющихъ сегѡ̀ чл҃кᲂлю́бнᲂе .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Въ чл҃ческᲂе є҆стество̀ , ѿ неи҆скꙋсᲂмꙋ́жныѧ ѡ҆бо́лксѧ сло́ве , кра́йнѧгѡ ра́ди бл҃гᲂꙋтро́бїѧ , тве́рдꙋ на́мъ тꙋ̀ стѣ́нꙋ да́лъ є҆сѝ и҆ кро́въ прⷭ҇нѡ , вѣ́дѧщимъ тѧ бг҃а и҆ чл҃ка .

пѣ́снь , и҃ . і҆рмо́съ . по зако́нѣ ѻ҆́ч҃и .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Раз̾стᲂѧ́щаѧсѧ сᲂвᲂкꙋпи́въ бл҃гᲂстїю сло́ве всепребл҃гі́и , пᲂрази́въ сᲂпᲂста́та , стра́стїю пло́ти твᲂеѧ̀ . ко ѻ҆ц҃ꙋ є҆го́же не ѡ҆ста́вилъ є҆сѝ кᲂгда̀ , со сла́вᲂю вᲂстечѐ , ᲂу҆ченико́мъ зрѧ́щимъ . тѣ́мже тѧ с̾ ни́ми бл҃гᲂсло́вимъ и҆ превᲂзно́симъ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Пᲂми́лᲂвавъ сп҃се и҆́хже вᲂзлюбѝ , ѡ҆ѕло́бленыхъ вра́жїею лю́тᲂстїю . ѿ ма́сличныѧ гᲂры̀ влⷣко вᲂзнесе́сѧ , зрѧ́щимъ ᲂу҆ченико́мъ твᲂи́мъ и҆ дивѧ́щимсѧ , ка́кѡ с̾ пло́тїю тѧ̀ ѻ҆́блакъ пᲂдъѧ́тъ , ꙗ҆́кѡ херꙋви́мскїи престо́лъ . тѣ́мже тѧ̀ с̾ ни́ми бл҃гᲂсло́вимъ , и҆ превᲂзно́симъ во́ вѣки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Не ѡ҆ста́влю си́рыхъ ва́съ , сн҃ᲂве и҆ наслѣ́дницы црⷭ҇твїѧ мᲂегѡ̀ . вᲂз̾ше́дъ же , ᲂу҆тѣ́шителѧ пᲂслю̀ с̾вы́ше , ва́съ та́йнѡ наꙋча́юща , па́че пᲂстиже́нїѧ и҆ ᲂу҆ма̀ , и҆ ѻ҆́гненыхъ пᲂказꙋ́юща прича́стїемъ бре́нныхъ , вᲂпїѧ́ше ᲂу҆ченико́мъ свᲂи́мъ ще́дре . тѣ́мже с̾ ни́ми тѧ̀ пᲂе́мъ и҆ превᲂзно́симъ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Зако́нныхъ крᲂмѣ̀ дв҃о є҆сте́ствъ , закᲂнᲂда́вца ро́ждьши , зако́нꙋ ѿе́млюща сѣно́внᲂе , и҆ бл҃гᲂда́ти да́рꙋюща свѣ́тлᲂсть . тѣ́мже зако́нᲂмъ грѣха́ мѧ чⷭ҇таѧ лю́тѣ ны́нѣ пᲂбѣжда́ема , пѣ́ти спᲂдо́би , гдⷭ҇а по́йте всѧ̀ дѣ́ла , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . недᲂꙋмѣ́етъ всѧ́къ ꙗ҆зы́къ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ѿве́рженᲂе и҆ ѡ҆ѕло́бленᲂе є҆стество̀ пᲂми́лᲂвавъ , є҆ди́нъ бо сы́и млⷭ҇тивъ и҆ чл҃кᲂлю́бивъ бл҃гᲂда́телю . пло́ть чл҃ческꙋю вᲂспрїѧ́лъ є҆сѝ , и҆ стра́стїю крѣ́пкагѡ свѧза́въ , вᲂстечѐ хрⷭ҇тѐ гᲂрѣ̀ ко ѻ҆ц҃ꙋ , и҆спо́лнивъ сла́вы всѧ́ческаѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Что̀ скᲂрбитѐ , что̀ ᲂу҆дивлѧ́етесѧ , вᲂпїѧ́хꙋ а҆пⷭ҇лѡмъ а҆́нг҃ли , стᲂѧ́ще с̾ ни́ми на гᲂрѣ̀ ; сѐ і҆с҃ъ є҆го́же ви́дите вᲂзне́сшасѧ , си́це во сла́вѣ мно́зѣ па́ки прїи́детъ , сꙋди́ти вселе́ннѣй , и҆ па́ки да́ти дᲂсто́йнаѧ .

сла́ва . И҆́же смире́нїе да́выи сщ҃е́ннымъ ᲂу҆ченико́мъ твᲂи́мъ , дх҃ᲂмъ твᲂи́мъ всѣ́хъ бл҃гᲂслᲂви́въ ꙗ҆́кѡ ще́дръ бл҃гᲂда́телю , ѿ лꙋка́вагѡ сᲂблюдѝ невреди́мыхъ . ꙗ҆́кѡ да твᲂю̀ сᲂтвᲂри́вше во́лю хрⷭ҇тѐ , всѝ црⷭ҇твїю твᲂемꙋ̀ вкꙋ́пѣ спᲂдо́бимсѧ .

и҆ ны́нѣ , боⷢ҇ . Свѣ́та прїѧ́телище , всю̀ прᲂсвѣти́вшагѡ тва́рь , пᲂказа́сѧ є҆ди́на пречⷭ҇таѧ всенепᲂро́чнаѧ мр҃і́е бцⷣе . тѣ́мже мᲂлю́ тѧ , прᲂсвѣтѝ ѡ҆мрачи́вшꙋюсѧ сластьмѝ житїѧ̀ , стрⷭ҇тнꙋ́ю ми дш҃ꙋ , ꙗ҆́кѡ да во́ дни , бжⷭ҇твеными стезѧ́ми пᲂйдꙋ̀ .

А҆нтифо́нᲂвъ же пра́здничныхъ не гл҃емъ . По вхо́дѣ , трᲂпа́рь , пра́здникꙋ . сла́ва , и҆ ны́нѣ , кᲂнда́къ , пра́здникꙋ . прᲂки́менъ , ѱл҃о́мъ дв҃дᲂвъ . вᲂзнесы́исѧ на нб҃са̀ бж҃е , и҆ по все́й землѝ сла́ва твᲂѧ̀ . сти́хъ : гᲂто́во срⷣце мᲂѐ бж҃е , гᲂто́во срⷣце мᲂѐ . а҆пⷭ҇лъ , въ дѣѧ́нїихъ . заⷱ҇ , н҃ . а҆ллилꙋ́їѧ . взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣмъ . сти́х̾ : всѝ ꙗ҆зы́цы вᲂсплещи́ те рꙋка́ми , вᲂскли́кните бг҃ꙋ гла́сᲂмъ ра́дᲂсти . є҆ѵⷢ҇а́лїе , ѿ і҆ѡа́нна . заⷱ҇ , н҃з . прича́стен̾ , взы́де бг҃ъ в̾ вᲂскликнᲂве́нїи , гдⷭ҇ь во́ гласѣ трꙋ́бнѣмъ . Рѧдᲂва́го же ст҃а́гѡ слꙋ́жба прилꙋчи́вшагᲂсѧ в̾ пѧто́къ , пᲂе́тсѧ на па́вечерницѣ .