Во ст҃ы́и и҆ вели́кїи четверто́къ , ве́черъ , начина́емъ вече́рню . по ѱалмѣ̀ : бл҃гᲂслᲂвѝ дш҃е мᲂѧ̀ гдⷭ҇а . є҆ктенїѧ̀ вели́каѧ .= та́же , гдⷭ҇и вᲂзва́хъ пᲂе́мъ , на гла́съ , в҃ . та́же , пᲂе́мъ стⷯры , на і҃ . гла́съ , в҃ . С=тека́етсѧ ᲂу҆́бѡ про́чее сᲂбо́рище і҆ꙋде́йскᲂе , да сᲂдѣ́телѧ и҆ зижди́телѧ всѧ́чес кихъ пила́тꙋ преда́стъ . ѽ без̾зако́нныхъ , ѽ невѣ́рныхъ , ꙗ҆́кѡ грѧдꙋ́щаго сꙋди́ти живы́мъ и҆ ме́ртвымъ , на сꙋ́дъ гᲂто́вѧтъ . и҆сцѣлѧ́ющагѡ стра́сти , к̾ стрⷭ҇ти ᲂу҆страѧ́ютъ . гдⷭ҇и дᲂлгᲂтерпѣли́ве , ве́лїѧ твᲂѧ̀ млⷭ҇ть сла́ва тебѣ̀ . =вⷤ . =

І҆ꙋ́да без̾зако́нныи , ѡ҆мᲂчи́выи на́ вечери рꙋ́кꙋ в̾ сᲂли́ло с̾ тᲂбо́ю гдⷭ҇и , прᲂстрѐ къ без̾зако́ннымъ рꙋ́цѣ прїѧ́ти сре́бреники . и҆ и҆́же ми́ра пᲂмы́сливыи цѣ́нꙋ , тебѐ бесцѣ́ннагѡ не ᲂу҆бᲂѧ́сѧ прᲂда́ти . и҆́же но́зѣ прᲂстры́и ᲂу҆мы́ти , влⷣкꙋ ѡ҆блᲂбыза̀ льсти́вно , во є҆́же преда́ти без̾зако́ннымъ . ли́ка же а҆пⷭ҇льска ѿве́ргсѧ , и҆ три́десѧть пᲂве́ргъ сре́бреники , твᲂѐ тридне́внᲂе вᲂскрⷭ҇нїе невѣ́дѣ , є҆го́же ра́ди пᲂми́лꙋй на́съ . =вⷤ . =

І҆ꙋ́да преда́тель льсти́въ сы́и , льсти́внымъ лᲂбза́нїемъ предадѐ сп҃са и҆ гдⷭ҇а , и҆ влⷣкꙋ всѧ́ческимъ . и҆ ꙗ҆́кѡ раба̀ бѣжа́ща прᲂдадѐ і҆ꙋде́ѡмъ . ꙗ҆́кѡ ѻ҆вча̀ на закᲂле́нїе , та́кѡ пᲂслѣ́дᲂваше а҆́гнецъ бж҃їи , сн҃ъ ѻ҆́ч҃ь , є҆ди́нъ мнᲂгᲂмлⷭ҇тивыи . вⷤ . І҆ꙋ́да ра́бъ и҆ льсте́цъ , ᲂу҆чени́къ сы́и и҆ навѣ́тникъ , и҆ дрꙋ́гъ дїа́вᲂль ѿ дѣ́лъ ꙗ҆ви́сѧ . пᲂслѣ́дᲂваше бо ᲂу҆чи́телю , и҆ на́нь пᲂꙋча́шесѧ на преда́нїе , гл҃аше в̾ себѣ̀ , преда́мъ сегѡ̀ и҆ прїѡ҆брѧ́щꙋ и҆мѣ́нїѧ . и҆ска́ше же и҆ ми́рꙋ про́данꙋ бы́ти , и҆ і҆с҃а ле́стїю ꙗ҆́ти , ѿда́стъ цѣлᲂва́нїе и҆ преда́стъ хрⷭ҇та̀ . и҆ ꙗ҆́кѡ ѻ҆вча̀ на закᲂле́нїе , та́кѡ пᲂслѣ́дᲂваше а҆́гнецъ бж҃їи , є҆ди́нъ млрⷭ҇дъ и҆ чл҃кᲂлю́бецъ .= вⷤ . Є҆го́же прᲂпᲂвѣ́да а҆́гньца и҆са́їѧ грѧде́тъ на закᲂле́нїе во́льнᲂе , и҆ плещѝ дае́тъ на ра́ны , и҆ лани́ты на ᲂу҆даре́нїе , лице́ же не ѿвратѝ ѿ стꙋда̀ заплева́нїѧ . сме́ртїю же без̾ѡ҆бра́знᲂю ѡ҆сꙋжа́етсѧ . всѧ̀ без̾грѣ́шныи во́лею прїе́млетъ , да всѣ́мъ да́рꙋетъ є҆́же и҆з̾ ме́ртвыхъ вᲂскрⷭ҇нїе . вⷤ .=

сла́ва , ны́нѣ . гла́съ , ѕ҃ . И҆з̾ча́дїе є҆хи́днᲂво вᲂи́стинꙋ і҆ꙋ́да , ꙗ҆́дшихъ ма́ннꙋ в̾ пꙋсты́ни , и҆ ро́пщꙋщихъ на пита́телѧ . и҆ є҆ще́ бо бра́шнꙋ сꙋ́щꙋ во ᲂу҆стѣ́хъ и҆́хъ , клевета́хꙋ на́ бг҃а не бл҃гᲂда́рнїи . и҆ се́й ѕлᲂчести́выи , нбⷭ҇ныи хлѣ́бъ во ᲂу҆стѣ́хъ нᲂсѧ̀ , на сп҃са преда́нїе сᲂдѣ́ла . ѽ нра́ва несы́тна , и҆ де́рзᲂсти без̾челᲂвѣ́чны , пита́ющаго прᲂдаѧ́ше . є҆го́же люблѧ́ше влⷣкꙋ , предаѧ́ше на сме́рть . вᲂи́стинꙋ ѻ҆́нѣхъ сы́нъ закᲂнᲂпрестꙋ́пныи . и҆ с̾ ни́ми па́гꙋбꙋ наслѣ́дᲂва . но пᲂщадѝ гдⷭ҇и дш҃а на́ша ѿ такᲂва́гѡ без̾челᲂвѣ́чества . и҆́же є҆ди́ныи в̾ дᲂлгᲂтерпѣ́нїи неи҆зрече́нныи .

вы́хᲂдъ , с̾ є҆ѵⷢ҇а́лїемъ : свѣ́тѣ ти́хїи .= прᲂки́менъ . гла́съ , д҃ . и҆зми́ мѧ гдⷭ҇и ѿ чл҃ка лꙋка́ва , и҆ ѿ́ мꙋжа непра́ведна и҆зба́ви мѧ . =сти́хъ : и҆́же пᲂмы́слиша непра́вдꙋ въ се́рдцы , ве́сь де́нь ѡ҆пᲂлча́хꙋ бра́ни .

ѿ и҆схо́да , чте́нїе .

Речѐ гдⷭ҇ь к̾ мѡѷсе́ю , низ̾ше́дъ засвидѣ́тельствꙋй лю́демъ си́мъ , и҆ ѡ҆чи́сти и҆́хъ дне́сь и҆ заꙋ́тра и҆ да и҆сперꙋ́тъ ри́зы свᲂѧ̀ , и҆ да бꙋ́дꙋтъ гᲂто́ви в̾ де́нь тре́тїи . в̾ де́нь бо тре́тїи сни́детъ гдⷭ҇ь на́ гᲂрꙋ сина́йскꙋю , пред̾ всѣ́ми людьмѝ . и҆ ѿлꙋчи́ши ѡ҆́крⷭ҇тъ люде́й , гл҃ѧ внемли́те себѣ̀ невᲂсхᲂди́ти на́ гᲂрꙋ , и҆ нижѐ кᲂснꙋ́тисѧ є҆ѧ̀ . всѧ́къ кᲂснꙋ́выисѧ гᲂрѣ̀ , сме́ртїю ᲂу҆́мретъ . а҆́ще ли прико́снетсѧ є҆́й рꙋка̀ ка́менїемъ пᲂбїе́тсѧ , и҆лѝ стрѣло́ю сᲂстрѣле́нъ бꙋ́детъ . а҆́ще же чл҃къ , а҆́ще ли ско́тъ не́живъ бꙋ́детъ . є҆гда́ же гла́съ трꙋбы̀ , и҆ ѻ҆́блакъ ѿи́детъ ѿ гᲂры̀ , ѻ҆нѝ взы́дꙋтъ на́ гᲂрꙋ . и҆ сни́де мѡѷсе́й к̾ лю́демъ ѿ гᲂры̀ и҆ ѡ҆ст҃ѝ и҆́хъ , и҆ и҆спра́ша ри́зы свᲂѧ̀ . и҆ речѐ лю́демъ , бꙋ́дите гᲂто́ви трѝ днѝ да непристꙋпи́те к̾ жена́мъ . бы́сть же в̾ де́нь тре́тїи , бы́вшꙋ ко ᲂу҆́трꙋ , бы́ша гла́си и҆ мо́лнїѧ , и҆ ѻ҆́блакъ мо́лнїѧнъ на гᲂрѣ̀ сина́йстѣй , гла́съ трꙋбы̀ шꙋмѧ́щъ вельмѝ . и҆ ᲂу҆бᲂѧ́шасѧ всѝ лю́дїе и҆́же бы́ша в̾ пᲂлцѣ̀ . и҆ и҆зведѐ мѡѷсе́й лю́ди во стрѣ́тенїе бг҃ꙋ ѿ пᲂлка̀ , и҆ ста́ша пред̾ гᲂро́ю сина́йскᲂю . гᲂра́ же сина́йскаѧ дымѧ́шесѧ всѧ̀ , схᲂжде́нїѧ ра́ди бж҃їѧ наню̀ во ѻ҆гнѝ , и҆ вᲂсхᲂжа́ше ды́мъ , ꙗ҆́кѡ па́ра пещна́ѧ , и҆ ᲂу҆жасо́шасѧ всѝ лю́дїе ѕѣлѡ̀ . бы́ша же гла́си трꙋ́бнїи , схᲂдѧ́ще крѣ́пцѣ ѕѣлѡ̀ . мѡѷсе́й же гл҃аше , бг҃ъ же ѿвѣщава́ше є҆мꙋ̀ гла́сᲂмъ .

прᲂки́менъ . гла́съ , з҃ . и҆зми́ мѧ ѿ вра́гъ мᲂи́хъ бж҃е , и҆ ѿ вᲂста́ющихъ на мѧ̀ и҆зба́ви мѧ .= сти́хъ : и҆=зба́ви мѧ ѿ твᲂрѧ́щихъ без̾зако́нїе , и҆ ѿ мꙋ́жь кро́вїи спаси́ мѧ .

ѿ і҆́ѡва , чте́нїе .

Речѐ гдⷭ҇ь ко і҆́ѡвꙋ , сквᲂзѣ̀ бꙋ́рю и҆ ѻ҆́блакъ , кто̀ скрыва́ѧи ѿ менѐ сᲂвѣ́тъ , сᲂдержа́же гл҃ы въ срⷣцы , мене́ ли непщꙋ́етъ ᲂу҆таи́ти ; ѡ҆пᲂѧ́ши ꙗ҆́кѡ мꙋ́жь чре́сла свᲂѧ̀ , вᲂпрᲂшꙋ́ же тѧ̀ , ты́ же ми ѿвѣща́й . гдѣ̀ бѣ̀ є҆гда̀ ѡ҆снᲂва́хъ зе́млю , вᲂз̾вѣсти́ ми а҆́ще вѣ́си ра́зꙋмъ ; кто̀ пᲂлᲂжѝ мѣ́ры є҆ѧ̀ , а҆́ще вѣ́си ; и҆лѝ кто̀ пᲂлᲂжѝ ве́рвь на не́й ; на че́мже стᲂлпы̀ є҆ѧ̀ ᲂу҆тверди́шасѧ ; кто́ же є҆́сть в̾лᲂжи́выи ка́мень краеꙋго́льныи на не́й ; є҆гда̀ бы́ша ѕвѣ́зды , вᲂсхвали́ша мѧ гла́сᲂмъ вели́кимъ всѝ а҆́нг҃ли мᲂѝ . загради́хъ же мо́ре враты̀ , є҆гда̀ ражда́шесѧ и҆́з̾чрева мт҃ре свᲂеѧ̀ , и҆ и҆схᲂжда́ше . пᲂлᲂжи́хъ же є҆мꙋ̀ ѻ҆́блакъ во ѡ҆дѣѧ́нїе , мгло́ю же пᲂви́хъ є҆̀ . пᲂлᲂжи́хъ же є҆мꙋ̀ предѣ́лы , ѡ҆блᲂжи́въ затво́ры и҆ врата̀ . реко́хъ же є҆мꙋ̀ , да́же до сегѡ̀ до́йдеши , и҆ непре́йдеши , но в̾ тебѣ̀ сᲂкрꙋша́тсѧ во́лны твᲂѧ̀ . и҆лѝ при тебѣ̀ с̾чини́хъ свѣ́тъ ᲂу҆́тренїи . денни́ца же вѣ́дѣ сво́й чи́нъ , ꙗ҆́тисѧ кри́лъ землѝ , и҆ и҆стрѧстѝ нечести́выхъ ѿ неѧ̀ . и҆лѝ ты̀ взе́мъ бре́нїе со́здалъ є҆сѝ живо́тно , и҆ гл҃ивᲂе пᲂсади́лъ є҆сѝ на землѝ . ѿꙗ҆́тълиже ѿ нечести́выхъ свѣ́тъ . и҆ мы́шцы го́рдыхъ сᲂкрꙋши́лъ ли є҆сѝ . прїи́дежели на и҆сто́чники мᲂрскі́ѧ . стᲂпа́ми по бе́зднѣ хᲂди́лъ ли є҆сѝ . ѿверза́ютълижесѧ тебѣ̀ , стра́хᲂмъ врата̀ сме́ртнаѧ . вра́тницы же а҆́дᲂвы , ви́дѣвше тѧ̀ ᲂу҆бᲂѧ́шалисѧ . навы́чежели высᲂтꙋ̀ пᲂд̾ нбⷭ҇нꙋю . вᲂз̾вѣсти́ ми ᲂу҆́бѡ , ка́кѡ , и҆лѝ кᲂѧ̀ є҆́сть . в̾ ко́ей же землѝ вᲂдвᲂрѧ́етсѧ свѣ́тъ . тмѣ́ же ко́е є҆́сть мѣ́сто . а҆́ще ᲂу҆́бѡ в̾веде́ши мѧ в̾ предѣ́лы и҆́хъ , а҆́ще ли же и҆ свѣ́си стезѝ и҆́хъ ; вѣ́мъ ᲂу҆́бѡ ꙗ҆́кѡ тᲂгда̀ бы́лъ є҆сѝ , число́ же лѣ́тъ твᲂи́хъ мно́го . и҆ прїи́дежели в̾ сᲂкро́вища снѣ́жнаѧ . сᲂкро́вища же гра́днаѧ ви́дѣлъ ли є҆сѝ . щадѧ́т̾желисѧ тебѣ̀ въ гᲂди́нꙋ враго́мъ . въ де́нь бра́ни тѧ́жи . ѿвѣща́въ же і҆́ѡвъ ко́ гдⷭ҇ꙋ гл҃ѧ , вѣ́мъ ꙗ҆́кѡ всѧ̀ мо́жеши , и҆ не невᲂз̾мо́жно тебѣ̀ ничто́же . кто́ бо є҆́сть и҆́же ᲂу҆таи́тъ ѿ тебѐ сᲂвѣ́тъ . щадѧ́и гл҃ъ , и҆ тебѐ мни́тсѧ ᲂу҆таи́ти . кто́ же вᲂз̾вѣсти́тъ ми сїѧ̀ ꙗ҆́же неви́дѣхъ , вели́каѧ и҆ ди́внаѧ , ꙗ҆́же несвѣ́дѣхъ . пᲂслꙋ́шай менѐ гдⷭ҇и да и҆ а҆́зъ рекꙋ̀ . вᲂпрᲂшꙋ́ же тѧ ты́ же ми ѿвѣща́й и҆ наꙋчи́ мѧ . слꙋ́хᲂмъ бо ᲂу҆́ха ᲂу҆слы́шахъ тѧ пре́же , ны́нѣ же и҆ ѻ҆́ко мᲂѐ ви́дѣ тѧ .

ѿ прⷪ҇рчества и҆са́ина , чте́нїе .

Гдⷭ҇ь даде́ ми ꙗ҆зы́къ наꙋче́нїѧ , є҆́же разꙋмѣ́ти во́ времѧ внегда̀ пᲂдᲂба́етъ рещѝ сло́во . прилᲂжи́ми ᲂу҆́трꙋ ᲂу҆́тро . и҆ прилᲂжи́ми ᲂу҆́хо слы́шати , и҆ наказа́нїе гдⷭ҇не ѿверза́етъ ми ᲂу҆́ши . а҆́зъ же непрᲂти́влюсѧ ни вᲂпрекѝ глаго́лю . плещѝ мᲂѝ вда́хъ на ра́ны , и҆ лани́тѣ мᲂѝ вᲂꙋдаре́нїе . лице́ же мᲂѐ не ѿврати́хъ ѿ стꙋда̀ заплева́нїѧ , и҆ гдⷭ҇ь пᲂмо́щникъ ми бы́сть . сегѡ̀ ра́ди не ᲂу҆срами́хсѧ , но пᲂлᲂжи́хъ лицѐ мᲂѐ ꙗ҆́кѡ тве́рдъ ка́мень , и҆ разꙋмѣ́хъ ꙗ҆́кѡ неи́мамъ пᲂстыдѣ́тисѧ , занѐ приближа́етсѧ ѡ҆правда́выи мѧ . кто̀ прѧ́исѧ со мно́ю , да сᲂпрᲂти́вꙋ ста́нетъ мнѣ̀ в̾кꙋ́пѣ ; и҆лѝ кто̀ сꙋдѧ́и мѧ , да прибли́житмисѧ ; сѐ гдⷭ҇ь пᲂмо́жетъ ми , и҆ кто̀ ѡ҆ѕло́битъ мѧ . сѐ вси́ вы ꙗ҆́кѡ ри́за ѡ҆бетша́ете . и҆ ꙗ҆́кѡ мо́ль снѣ́сть ва́съ . кто̀ є҆́сть в̾ ва́съ бᲂѧ́исѧ гдⷭ҇а , да ᲂу҆слы́шитъ гла́съ ѻ҆́трᲂка є҆гѡ̀ ; хᲂдѧ́щїи во тмѣ̀ , и҆ нѣ́сть и҆́мъ свѣ́та , ᲂу҆пᲂва́йте ѡ҆ и҆́мени гдⷭ҇ни , и҆ ᲂу҆тверди́тесѧ ѻ҆́ бз҃ѣ . сѐ вси́ вы ѻ҆́гнь раз̾жиза́ете , и҆ ᲂу҆крѣплѧ́ете пла́мень . ше́ствꙋйте свѣ́тᲂмъ ѻ҆гнѧ̀ ва́шегѡ , и҆ пла́менемъ є҆го́же вᲂз̾жего́сте ; ра́ди менѐ бы́ша сїѧ̀ ва́мъ . в̾ печа́ли ᲂу҆́снете .

та́же , є҆ктенїѧ̀ ма́лаѧ .= та́же , трⷭ҇то́е . прᲂки́мен̾ , ѱало́мъ дв҃дᲂвъ . кн҃зи лю́дстїи сᲂбра́шасѧ в̾кꙋ́пѣ , на́ гдⷭ҇а и҆ на хрⷭ҇та̀ є҆гѡ̀ . =сти́хъ : вскꙋ́ю шата́шасѧ ꙗ҆зы́цы , и҆ лю́дїе пᲂꙋчи́шасѧ тще́тнымъ . а҆пⷭ҇лъ , къ кᲂри́нѳѡмъ . заⷱ҇ , рм҃ѳ .= а҆ллилꙋ́їѧ . бл҃же́нъ разꙋмѣва́ѧи на ни́ща и҆ ᲂу҆бо́га . =сти́хъ : вразѝ мᲂѝ рѣ́ша ѕла́ѧ мнѣ̀ . сти́хъ : ꙗ҆ды́и хлѣ́бъ мо́й вᲂз̾вели́чилъ є҆́сть на мѧ̀ ко́въ .= є҆ѵⷢ҇а́лїе , ѿ= матѳе́ѧ . заⷱ҇ , р҃з .

и҆ про́чее , бжⷭ҇твеныѧ литꙋргі́и , вели́кагѡ васи́лїѧ .= в̾мѣ́сто же херꙋви́мскᲂй пѣ́сни . =пᲂе́мъ , сі́и , кᲂнда́къ , гⷤ : Ве́чери твᲂе́й та́йнѣй , дне́сь сы́не бж҃їи , прича́стника мѧ прїимѝ . непᲂвѣ́мъ бо враго́мъ твᲂи́мъ та́йны твᲂеѧ̀ . ни лᲂбза́нїѧ ти да́мъ ꙗ҆́кѡ і҆ꙋ́да , но ꙗ҆́кѡ разбо́йникъ , и҆спᲂвѣ́даѧсѧ вᲂпїю́ ти , пᲂмѧни́ мѧ гдⷭ҇и , во црⷭ҇твїи сѝ . ко в҃ ра́зꙋ кᲂне́ц̾ : пᲂмѧнѝ на́съ влⷣко , во црⷭ҇твїи сѝ . перено́съ по ѡ҆бы́чаю . къ г҃ ра́зꙋ кᲂне́ц̾ : пᲂмѧнѝ на́съ ст҃ы́и , во црⷭ҇твїи сѝ . на кᲂнцы́ же , а҆ллилꙋ́їѧ . то́йже , и҆ прича́стенъ . и҆ вмѣ́стѡ , да и҆спо́лнѧтсѧ ᲂу҆ста̀ на́ша , то́йже , до́ндеже и҆ причастѧ́тсѧ всѝ . вмѣ́стѡ дᲂсто́йнѡ , пᲂе́мъ і҆рмо́съ : стра́нствїѧ влⷣчнѧ .

Во ст҃ы́и и҆ вели́кїи четверто́къ , па́вечерницꙋ пᲂе́мъ ма́лꙋю . на не́йже пᲂе́мъ , трипѣ́снецъ , твᲂре́нїе ки́ръ а҆ндре́ѧ кри́тскагѡ .= і҆рмо́съ , по вⷤ . трᲂпарѝ , на́ і҃ . пᲂслѣдѝ і҆рмо́съ , ѻ҆́ба ли́ка в̾кꙋ́пѣ . гла́съ , и҃ . пѣ́снь , є҃ . і҆рмо́съ . М=ра́къ дш҃и мᲂеѧ̀ ѿженѝ свѣтᲂда́вче хрⷭ҇тѐ бж҃е , зачалᲂбы́тнꙋю тмꙋ̀ и҆згна́въ бе́здны , и҆ да́рꙋй ми свѣ́тъ пᲂвелѣ́нїи твᲂи́хъ сло́ве , да ᲂу҆́треннюѧ прᲂславлѧ́ю тѧ̀ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Оу҆краси́сѧ ве́черѧ , и҆ ᲂу҆гᲂто́васѧ тебѣ̀ па́сха , ꙗ҆́кᲂже ре́клъ є҆сѝ хрⷭ҇тѐ . но і҆ꙋ́да на преда́нїе твᲂѐ пᲂꙋча́шесѧ , и҆ бѧ́ше сы́и с̾ тᲂбо́ю , и҆ внѣ̀ ѡ҆ твᲂе́й цѣнѣ̀ сᲂглаша́шесѧ сребрᲂлю́бїемъ . Вᲂста́етъ с̾ ве́чери , и҆ ле́нтїемъ препᲂѧ́саетсѧ по чре́сламъ хрⷭ҇то́съ во́лею , и҆ преклᲂнѧ́етъ вы́ю , петрꙋ̀ вᲂпїю́щꙋ , не ᲂу҆мы́еши мᲂѝ но́зѣ никᲂли́же тво́рче мо́й . но ѡ҆ба́че ᲂу҆мы̀ ѧ҆̀ . Прїѧ́тъ хлѣ́бъ в̾ рꙋ́цѣ і҆ꙋ́да , и҆́маже и҆ преда́нїе сᲂдѣ́ла тебѣ̀ хрⷭ҇тѐ , и҆ прᲂстира́ше но́зѣ льсти́выи ᲂу҆чени́къ , и҆́хже са́мъ ᲂу҆мы́въ , и҆ ле́нтїемъ ѡ҆те́рлъ є҆сѝ . Лᲂбза́нїемъ льсти́внымъ і҆ꙋ́да тᲂгда̀ ᲂу҆ста̀ распира́ше тебѣ̀ , и҆́маже тѣ́ло твᲂѐ сло́ве недᲂсто́йнѣ прїима́ше , вᲂпїѧ̀ тебѣ̀ , ра́дꙋисѧ ᲂу҆чи́телю , лᲂбза́тель и҆ преда́тель , ра́бъ и҆ льсте́цъ . Пе́тръ ꙗ҆́кᲂже зрѧ́ше сᲂдѣва́емаѧ тᲂгда̀ , ᲂу҆́жасᲂмъ ѡ҆держи́мъ бы́въ , рабы́ни ѡ҆бличи́сѧ хꙋды́мъ вᲂпрᲂше́нїемъ . и҆́бо ѿве́ржесѧ тебѐ гдⷭ҇а , не ꙗ҆́кᲂже речѐ , но ꙗ҆́кѡ вѣ́дыи и҆́же всѧ̀ вѣ́дꙋщагѡ . Заꙋша́етсѧ зижди́тель , и҆ ᲂу҆дарѧ́етсѧ тва́рь пᲂнᲂше́нїемъ є҆гѡ̀ , тро́стїю бїе́тсѧ хᲂтѧ̀ , и҆ вы́шнѧѧ преклᲂнѧ́ютсѧ , ѡ҆плева́етсѧ сꙋдїѧ̀ , и҆ ѡ҆снᲂва́нїѧ всѧ̀ земна́ѧ пᲂдвиза́ютсѧ . сла́ва . Те́рнїемъ вѣнчева́етсѧ бг҃ъ , и҆́же зе́млю всю̀ ᲂу҆краше́и цвѣ́ты . и҆ ра́ны прїе́млетъ , и҆ терпи́тъ пᲂнᲂше́нїе дᲂлгᲂтерпѣли́внѡ . и҆ багрѧни́цꙋ пᲂрꙋга́нїѧ но́ситъ , и҆ терпи́тъ всѧ̀ , бг҃ъ сы́и , и҆ стра́ждетъ пло́тїю . и҆ ны́нѣ . Да вᲂпїе́тъ і҆ѡа́ннъ , сказꙋ́ѧ ᲂу҆че́нїи бжⷭ҇твеными вᲂплᲂще́нїе твᲂѐ . сло́во пло́ть бы́въ и҆з̾ дв҃ы непрело́жнѡ , и҆ пребы́сть є҆стество́мъ бг҃ъ ꙗ҆́кᲂже бѣ̀ , ѻ҆те́ческихъ є҆гѡ̀ нѣ́дръ не ѿстꙋпи́въ .

катава́сїѧ : Мра́къ дш҃и мᲂеѧ̀ .

пѣ́снь , и҃ . і҆рмо́съ . Пᲂкрыва́ѧй вᲂда́ми превы́спреннѧѧ свᲂѧ̀ , пᲂлага́ѧй мо́рю предѣ́лъ песо́къ , и҆ сᲂдержа́и зе́млю . тѧ̀ пᲂе́тъ сл҃нце , тѧ̀ сла́витъ лꙋна̀ , тебѣ̀ прино́ситъ хвалꙋ̀ всѧ̀ тва́рь , ꙗ҆́кѡ сᲂдѣ́телю всѣ́мъ во́ вѣки . Ѻ҆дѣва́ѧи ѻ҆́блаки нб҃о і҆с҃е , и҆́же на прⷭ҇то́лѣ сла́вы црⷭ҇твꙋѧи с̾ без̾нача́льнымъ ѻ҆ц҃е́мъ прїе́мъ ле́нтїй , и҆ си́мъ препᲂѧ́сасѧ , ᲂу҆мы́ти но́ги бре́ннїи , ве́сь ѻ҆́гнь сы́и сло́ве , а҆́ще и҆ вᲂплᲂти́сѧ . Ꙗ҆́кᲂже всѧ̀ ᲂу҆мы́въ , вᲂз̾ле́гъ і҆с҃ъ , къ свᲂи́мъ ᲂу҆ченико́мъ гл҃етъ вѣ́стели всѝ , что̀ сᲂтвᲂри́хъ ны́нѣ ; ѻ҆́бразъ бо да́хъ ва́мъ смире́нїѧ всѣ́мъ . да и҆́же хо́щетъ пе́рвыи бы́ти , да бꙋ́детъ всѣ́хъ пᲂслѣ́днїи прᲂи҆звᲂле́нїемъ . Чи́сти ᲂу҆́бѡ є҆стѐ , но не всѝ вы̀ , хрⷭ҇то́съ дрꙋго́мъ вᲂз̾лежа́щимъ на́ вечери речѐ . є҆ди́нъ ᲂу҆́бѡ ко дрꙋго́мꙋ , недᲂвѣ́мы речѐ сло́ва . тѣ́мже по си́хъ гл҃етъ ꙗ҆́вѣ , и҆́мѧ преда́телѧ . Ꙗ҆́кᲂже сїѧ̀ гл҃ѧ , на гᲂрѣ̀ є҆леѡ́нстѣй прише́дъ , сꙋдїѧ̀ всѧ́ческихъ со ᲂу҆ченикѝ , тᲂгда̀ ᲂу҆́бѡ гл҃аше , прїидѣ́те и҆ по́йдемъ ѿ сю́дꙋ . приспѣ́ бо ᲂу҆́же преда́тель , никто́же ѿве́рзисѧ менѐ , во́лею бо страждꙋ̀ . Ѽ ле́стнᲂмꙋ лᲂбза́нїѧ . ра́дꙋисѧ ᲂу҆чи́телю , хрⷭ҇тꙋ̀ і҆ꙋ́да гл҃етъ , в̾кꙋ́пѣ с̾ сло́вᲂмъ предадѐ на закᲂле́нїе . се́бо да́лъ є҆́сть зна́менїе без̾зако́ннымъ , є҆го́же а҆́зъ лᲂбжꙋ̀ то́й є҆́сть , є҆го́же преда́ти ва́мъ ѡ҆бѣща́хсѧ . Ꙗ҆́тъ бы́въ бж҃е на́шъ , ѿ без̾зако́нныхъ люде́й , и҆ непрерѣкꙋ́ѧ ѿ ню́дъ ни вᲂпїѧ̀ , а҆́гньче бж҃їи , претерпѣ́лъ є҆сѝ всѧ̀ , и҆спыта́тисѧ , и҆ сꙋди́тисѧ , и҆ бїе́нъ бы́ти , свѧ́занъ и҆ ведо́мъ бы́ти со ѻ҆рꙋ́жїи и҆ дреко́льми к̾ каїа́фѣ . Да ра́спнетсѧ вᲂпїѧ́хꙋ є҆вре́йстїи лю́дїе , со свѧще́нники и҆ кни́жники , і҆с҃ъ хрⷭ҇то́съ . ѽ лю́дїе невѣ́рнїи , что́ бо сᲂтвᲂрѝ ꙗ҆ви́выисѧ ; вᲂз̾дви́гнꙋвыи ла́зарѧ ѿ́ грᲂба , и҆ пꙋ́ть сᲂтвᲂри́выи чл҃кѡмъ на спасе́нїе . Пила́тᲂвꙋ сꙋди́щꙋ , без̾зако́ннїи лю́дїе крича́ще вᲂпїѧ́хꙋ , распнѝ сегѡ̀ , ѿпꙋсти́ же на́мъ свѧ́зана сꙋ́ща вара́ввꙋ , ᲂу҆бі́ицꙋ . хрⷭ҇та́ же пе́рвѣе би́въ , вᲂзмѝ вᲂзмѝ распнѝ со ѕлᲂдѣ́и . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ѽ несказа́ннагѡ смире́нїѧ , ѽ неи҆з̾гл҃аннагѡ сᲂвѣ́та ; ꙗ҆́кѡ ѻ҆́гнь сы́и , ѡ҆мы́лъ є҆сѝ но́зѣ преда́телю сп҃се , ѡ҆мы́въ же не ѡ҆палѝ . и҆ пᲂда́въ хлѣ́бъ на́ вечери , и҆ та́йнѣй слꙋ́жбѣ наꙋчи́лъ є҆сѝ . и҆ ны́нѣ , боⷢ҇ . ѽ но́вᲂе слы́шанїе . бг҃ъ сн҃ъ жены̀ , и҆ без̾сѣ́менна ржⷭ҇тва̀ , без̾мꙋ́жнаѧ мт҃и , и҆ рᲂжде́ннᲂе бг҃ъ . ѽ ᲂу҆жа́снᲂе слы́шанїе . ѽ зача́тїю стра́шнᲂмꙋ . ѽ дв҃ыѧ нетлѣ́ннᲂмꙋ ржⷭ҇твꙋ̀ . вᲂи́стинꙋ па́че ᲂу҆ма̀ всѧ̀ , и҆ вы́ше вѣ́дѣнїѧ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Пᲂкрыва́ѧй вᲂда́ми .= [пᲂкло́н̾ до землѝ] .=

пѣ́снь , ѳ҃ . і҆рмо́съ . Бл҃гᲂслᲂве́нъ гдⷭ҇ь бг҃ъ і҆и҃левъ , вᲂз̾дви́гнꙋвыи ро́гъ спасе́нїѧ на́мъ , в̾ дᲂмꙋ̀ дв҃дᲂвѣ ѻ҆́трᲂка свᲂегѡ̀ . в̾ ни́хже пᲂсѣтѝ на́съ вᲂсто́къ свы́ше , и҆ напра́вилъ ны̀ є҆́сть на пꙋ́ть ми́ренъ . Ка́кѡ вы̀ спитѐ , хрⷭ҇то́съ ᲂу҆ченико́мъ речѐ , бди́те , прибли́жисѧ ча́съ . про́чее вᲂста́ните , и҆́демъ дрꙋ́зи мᲂѝ , сѐ преда́тель ᲂу҆чени́къ всю̀ спи́рꙋ и҆мѣ́ѧ , грѧде́тъ преда́ти мѧ чл҃кᲂꙋбі́ицамъ . Лᲂбза́нїе твᲂѐ льсти́вно , и҆ цѣлᲂва́нїе го́рько . кᲂмꙋ̀ зᲂве́ши ле́стьче гл҃ѧ , ра́дꙋисѧ ра́вви , хрⷭ҇то́съ ко і҆ꙋ́дѣ вѣща́ше , дрꙋ́же , на не́же прїи́де речѐ ; а҆́ще ᲂу҆́бѡ цѣлᲂва́ти прише́лъ є҆сѝ , что̀ пред̾лага́еши но́жъ ме́дᲂмъ пᲂма́занъ . Пила́тᲂвꙋ сꙋди́щꙋ непᲂви́нныи сꙋдїѧ̀ , во́лею прише́лъ є҆сѝ пред̾ста́ти хрⷭ҇тѐ , и҆ и҆зба́вити на́съ ѿ дᲂлго́въ на́шихъ . тѣ́мже претерпѣ́лъ є҆сѝ бл҃гі́и , пло́тїю ᲂу҆ра́ненъ бы́ти , да всѝ прїи́мемъ свᲂбᲂжде́нїе . Млрⷭ҇дїѧ пꙋчи́на , ка́кѡ ѻ҆́гнь пред̾стᲂи́тъ пила́тꙋ , сѣ́нꙋ и҆ тро́сти и҆ землѝ сꙋ́щей . є҆го́же не ѡ҆палѝ ѻ҆́гнь бжⷭ҇тва̀ хрⷭ҇тѐ , но пᲂжида́ше терпѣли́внѡ и҆́же є҆стество́мъ свᲂбо́дъ ꙗ҆́кѡ чл҃кᲂлю́бецъ . Вᲂзмѝ вᲂзмѝ , распнѝ гл҃емаго хрⷭ҇та̀ , і҆ꙋде́и взыва́хꙋ пила́тꙋ и҆нᲂгда̀ , се́й же рꙋ́цѣ ѡ҆мыва́ше . тро́стїю же писа́ше и҆́ма , и҆́же на́нь винꙋ̀ , всѣ́мъ да́рꙋюща без̾сме́ртїе . Вᲂпїю́ще без̾зако́ннїи пила́тꙋ и҆зли́ше , вᲂзмѝ вᲂзмѝ , распнѝ хрⷭ҇та̀ , прᲂсѧ́щи ᲂу҆би́ти ꙗ҆́кѡ ѡ҆сꙋже́нна . не се́й ли вᲂскресѝ ме́ртвыѧ , и҆ прᲂкаже́нныѧ ѡ҆чи́щь , крᲂвᲂтᲂчи́вꙋю и҆сцѣлѝ , раз̾сла́бленыѧ стѧ́гнꙋвъ . Что̀ ᲂу҆́бѡ ѕло̀ сᲂтвᲂрѝ , ꙗ҆́кѡ взыва́ете вельмѝ вᲂзмѝ вᲂзмѝ распнѝ и҆̀ , пила́тъ и҆нᲂгда̀ вᲂпїѧ́ше лю́демъ неразꙋ́мнымъ , вины̀ не ѡ҆брѣта́ю в̾ не́мъ ; ѻ҆ни́ же го́рькѡ вᲂпїѧ́хꙋ , вᲂзмѝ вᲂзмѝ , распнѝ сп҃са всѣ́хъ . Ѽ і҆ꙋде́е без̾зако́ннїи , ѽ неразꙋ́мнїи лю́дїе , непᲂмѧнꙋ́сте ли что̀ ѿ чꙋде́съ хрⷭ҇то́выхъ , мно́жество и҆сцѣле́нїи ; но и҆ всеѧ̀ є҆гѡ̀ неразꙋмѣ́сте ли бжⷭ҇твеныѧ си́лы , ꙗ҆́кᲂже пе́рвїи ѻ҆тцы̀ ва́ши , ны́нѣ же и҆ вы̀ неразꙋмѣ́ете . сла́ва . Бїе́нъ бы́въ зижди́телю мо́й , и҆ преда́нъ є҆сѝ менѐ ра́ди распѧ́тисѧ , да спасе́нїе мᲂѐ пᲂсредѝ землѝ сᲂдѣ́лавъ , и҆стᲂчи́ши ми́рᲂви живо́тъ , и҆ ѡ҆без̾сме́ртиши честно́ю си кро́вїю , пᲂклᲂнѧ́ющїѧсѧ тебѣ̀ . и҆ ны́нѣ , боⷢ҇ . А҆́гница твᲂѧ̀ влⷣко пред̾стᲂѧ́щи ᲂу҆ крⷭ҇та̀ , рыда́ющи , тебѐ твᲂрца̀ всѧ́ческихъ , зрѧ́щи твᲂѐ дᲂлгᲂтерпѣ́нїе . во́лею бо рᲂди́сѧ пло́тїю , и҆ стра́сти всѧ̀ в̾ не́й претерпѣ̀ , да спасе́ши ми́ра .

задᲂсто́йнѡ : Бл҃гᲂслᲂве́нъ гдⷭ҇ь бг҃ъ . [пᲂкло́н̾ до землѝ] . трⷭ҇то́е , и҆ по ѻ҆́ч҃е на́шъ . кᲂнда́къ , дню̀ . та́же , гдⷭ҇и пᲂми́лꙋй , м҃ . и҆ про́чее ѻ҆бы́чнᲂе . и҆ ѿпꙋ́стъ .

Слꙋ́жба ст҃ы́хъ стрⷭ҇те́й гдⷭ҇а на́шегѡ і҆с҃а хрⷭ҇та̀ . во ст҃ы́и и҆ вели́кїи пѧто́къ , кле́плетъ , во втᲂро́й ча́съ , но́щи . и҆ =сᲂбра́вшимсѧ бра́тїѧмъ в̾ цр҃квь , гл҃етъ , і҆єре́й : бл҃гᲂслᲂве́нъ бг҃ъ на́шъ . =и҆ =мы̀ : цр҃ю нбⷭ҇ныи . трⷭ҇то́е , и҆ по ѻ҆́ч҃е на́шъ . гдⷭ҇и пᲂми́лꙋй , в҃і . и҆ про́чее ѡ҆бы́чнᲂе ᲂу҆́трени . =та́же , є҆ѯа̀ ѱалмы̀ , и҆ є҆ктенїѧ̀ .= та́же ,= а҆ллилꙋ́їѧ , на гла́с̾ , и҃ .= трᲂпа́рь . гла́съ , и҃ . Є҆гда̀ сла́внїи ᲂу҆ченицы̀ , на ᲂу҆мᲂве́нїи ве́чери прᲂсвѣща́хꙋсѧ , тᲂгда̀ і҆ꙋ́да ѕлᲂчести́выи , сребрᲂлю́бїемъ недꙋ́гᲂвавъ ѡ҆мрача́шесѧ . и҆ без̾зако́ннымъ сꙋдїѧ́мъ тебѐ пра́веднагѡ сꙋдїю̀ предае́тъ , ви́ждь и҆мѣ́нїемъ люби́телю , и҆́же си́хъ ра́ди несы́тство стѧжа́вша , и҆ ᲂу҆давле́нїю вда́вшасѧ . бѣжѝ несы́тыѧ дш҃и , и҆́же ᲂу҆чи́телю такᲂва́ѧ сᲂдѣ́ѧвшїѧ , и҆́же ѡ҆ всѣ́хъ бл҃гі́и гдⷭ҇и сла́ва тебѣ̀ . =вⷤ . сла́ва , и҆ ны́нѣ , то́йже .

тᲂгда́же , цр҃кви нача́льникъ раз̾дава́етъ свѣщѝ бра́тїи . и҆́хже в̾жига́ютъ ко всѧ́кᲂмꙋ є҆ѵⷢ҇а́лїю , и҆ по чте́нїи ᲂу҆гаша́ютъ . і҆єре́й и҆лѝ дїа́кᲂнъ , кади́тъ ст҃ꙋ́ю трапе́зꙋ крⷭ҇тᲂѡ҆бра́зно . и҆ ве́сь ст҃ы́и ѻ҆лта́рь . та́же , гл҃етъ дїа́кᲂнъ : па́ки и҆ па́ки . застꙋпѝ и҆ спасѝ . прест҃ꙋ́ю чⷭ҇тꙋю . та́же , рече́тъ : и҆ ѡ҆спᲂдо́битисѧ на́мъ , дᲂсто́йнѡ пᲂслꙋ́шати ст҃а́гѡ є҆ѵⷢ҇а́лїѧ . є҆ѵⷢ҇а́лїе , а҃ е . ѿ і҆ѡа́нна . заⷱ҇ , м҃ѕ . речѐ гдⷭ҇ь свᲂи́мъ ᲂу҆ченико́мъ , ны́нѣ прᲂсла́висѧ сн҃ъ чл҃ческїи . кᲂне́ц̾ : и҆ =ᲂу҆ченицы̀ є҆гѡ̀ . пред̾ є҆ѵⷢ҇а́лїемъ , и҆ по є҆ѵⷢ҇а́лїи же кли́рицы пᲂю́тъ : сла́ва стрⷭ҇те́мъ твᲂи́мъ гдⷭ҇и [пᲂкло́н̾ до землѝ] .= и҆ а҆́бїе , а҆нтифо́ны , пᲂе́мъ на́ ѻ҆ба ли́ка , пᲂвтᲂрѧ́юще , всѧ̀ трᲂпарѝ , и҆ бг҃ᲂро́дичны , без̾ стихо́въ . а҆нтифо́нъ , а҃ . гла́съ , и҃ . Кнѧ́зи лю́дстїи сᲂбра́шасѧ в̾кꙋ́пѣ на́ гдⷭ҇а и҆ на хрⷭ҇та̀ є҆гѡ̀ . сло́во закᲂнᲂпрестꙋ́пнѡ вᲂз̾лᲂжи́ша на мѧ̀ , гдⷭ҇и гдⷭ҇и не ѡ҆ста́ви менѐ . Чꙋ́вствїѧ на́ша чи́ста хрⷭ҇то́ви пред̾ста́вимъ , и҆ ꙗ҆́кѡ дрꙋ́зи є҆гѡ̀ , дш҃а на́ша пᲂлᲂжи́мъ є҆гѡ̀ ра́ди , и҆ непеча́льми жите́йскими , сᲂꙋдави́мсѧ ꙗ҆́кᲂже і҆ꙋ́да . но во храмѣ́хъ дш҃ъ на́шихъ вᲂзᲂпїе́мъ , ѻ҆́ч҃е на́шъ и҆́же є҆сѝ на́ нб҃сѣхъ , ѿ лꙋка́вагѡ и҆зба́ви на́съ . Сн҃а ꙗ҆́кѡ а҆́гньца , ви́дѧщи чи́стаѧ влеко́ма , и҆ ле́стїю ѕло́ю предае́ма ᲂу҆би́ти заны̀ , и҆ ма́ло ѿ твᲂею̀ ѻ҆́чїю пре́дана и҆ ꙗ҆́та , вᲂпїѧ́ше в̾ бᲂлѣ́зни зᲂвꙋ́щи , сло́ве бж҃їи , и҆́же во́лею пре́данъ , и҆з̾ ме́ртвыхъ вᲂскр҃съ спасѝ на́съ . сла́ва , боⷢ҇ . Дв҃ᲂю рᲂдила̀ є҆сѝ бракᲂнеи҆скꙋси́маѧ . и҆ дв҃ᲂю пребыла̀ є҆сѝ мт҃и без̾невѣ́стнаѧ , бцⷣе мр҃і́е , хрⷭ҇та̀ бг҃а на́шегѡ мᲂлѝ , спасти́сѧ на́мъ . и҆ ны́нѣ , то́йже .

а҆нтифо́нъ , в҃ . гла́съ , ѕ҃ . Течѐ глаго́лѧ і҆ꙋ́да , к̾ без̾зако́ннымъ кни́гчїѧмъ , что́ ми хо́щете да́ти и҆ а҆́зъ ва́мъ преда́мъ є҆гѡ̀ ; среди́ же сᲂвѣщава́ющихъ са́мъ стᲂѧ́ше , неви́димъ сᲂвѣщава́емыи . срⷣцевѣ́дче пᲂщадѝ дш҃а на́ша . Млⷭ҇тїю бг҃ᲂви да пᲂслꙋ́жимъ , ꙗ҆́кѡ ма́рїѧ приве́чери , и҆ нестѧ́жимъ сребрᲂлю́бїѧ , ꙗ҆́кѡ і҆ꙋ́да , да всегда̀ со хрⷭ҇то́мъ и҆ бг҃ᲂмъ бꙋ́демъ . Ꙗ҆́кѡ ᲂу҆ще́дрити а҆да́ма , ꙗ҆́кѡ без̾сме́ртенъ , до сме́рти сн҃е мо́й прїи́де , и҆ не ᲂу҆щедрѧ́ютъ без̾ча́дїѧ мᲂегѡ̀ і҆ꙋде́и . но ѽ влⷣко ты̀ вᲂста́въ , на́съ сло́ве ᲂу҆ще́дри . сла́ва , боⷢ҇ . Є҆го́же рᲂдила̀ є҆сѝ дв҃о не и҆зрече́ннѡ , прⷭ҇нѡ ꙗ҆́кѡ млⷭ҇тиваго , непреста́й мᲂлѧ́щи , да ѿ бѣ́дъ спасе́тъ всѧ̀ к̾ тебѣ̀ прибѣга́ющїѧ . и҆ ны́нѣ , то́йже .

а҆нтифо́нъ , г҃ . гла́съ , в҃ . Ла́зарева ра́ди вᲂста́нїѧ гдⷭ҇и , ѡ҆са́нна ти вᲂпїѧ́хꙋ , дѣ́ти є҆вре́йскїѧ чл҃кᲂлю́бче , без̾зако́нныи же і҆ꙋ́да , невᲂсхᲂтѣ̀ разꙋмѣ́ти . На́ вечери ти хрⷭ҇тѐ бж҃е , ᲂу҆ченико́мъ сѝ пред̾гл҃аше , є҆ди́нъ ѿ ва́съ преда́стъ мѧ . без̾зако́нныи же і҆ꙋ́да , невᲂсхᲂтѣ̀ разꙋмѣ́ти .

ѡа́ннꙋ вᲂпрᲂси́вшꙋ тѧ̀ гдⷭ҇и , кто̀ є҆́сть предаѧ́и тѧ ; тᲂгѡ̀ хлѣ́бᲂмъ пᲂказа́лъ є҆сѝ . без̾зако́нныи же і҆ꙋ́да , невᲂсхᲂтѣ̀ разꙋмѣ́ти . На ᲂу҆мᲂве́нїи ти хрⷭ҇тѐ бж҃е , ᲂу҆ченико́мъ сѝ пред̾гл҃аше , си́це твᲂри́те ꙗ҆́кᲂже ви́дѣсте . без̾зако́нныи же і҆ꙋ́да , невᲂсхᲂтѣ̀ разꙋмѣ́ти . Бди́те и҆ мᲂли́тесѧ , да невни́дите в̾ напа́сть , ᲂу҆ченико́мъ сѝ хрⷭ҇тѐ бж҃е на́шъ глаго́лаше . без̾зако́нныи же і҆ꙋ́да , невᲂсхᲂтѣ̀ разꙋмѣ́ти . На три́десѧтихъ сре́бреникъ гдⷭ҇и , и҆ на лᲂбза́нїи льсти́внѣмъ , и҆ска́хꙋ і҆ꙋде́и ᲂу҆би́ти тѧ . без̾зако́нныи же і҆ꙋ́да , невᲂсхᲂтѣ̀ разꙋмѣ́ти . Рыда́ющи хрⷭ҇тѐ ро́ждьшаѧ тѧ , и҆ глаго́лъ пред̾вѣ́дѧши , и҆́же дре́вле сѷмеѡ́нъ до кᲂнца̀ взыва́ше . без̾зако́ннїи же лю́дїе , тебѐ невᲂсхᲂтѣ́ша разꙋмѣ́ти . сла́ва , боⷢ҇ . Спасѝ ѿ бѣ́дъ рабы̀ твᲂѧ̀ бцⷣе дв҃о , ꙗ҆́кѡ всѝ по́ бз҃ѣ к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ застꙋпле́нїю . и҆ ны́нѣ , то́йже .

та́же , дїа́кᲂнъ гл҃етъ є҆ктенїю̀ ма́лꙋю . вᲂз̾гла́сы же гл҃емъ , вече́рнїѧ и҆ ᲂу҆́треннїѧ . сїѧ́же є҆ктенїѝ ма́лыѧ гл҃ютсѧ пред̾ всѣ́ми сѣда́льны .

та́же , сѣда́ленъ . гла́съ , з҃ . На́ вечери ᲂу҆ченикѝ пита́ѧ , и҆ сᲂвѣща́нїе преда́нїѧ вѣ́дыи , на не́й же і҆ꙋ́дꙋ ѡ҆бличи́лъ є҆сѝ , неи҆спра́влена сегѡ̀ вѣ́дыи . сказа́ти же всѣ́мъ хᲂтѧ̀ , ꙗ҆́кѡ во́лею предае́шисѧ , да ми́ръ и҆схити́ши ѿ чꙋжда́гѡ , дᲂлгᲂтерпѣли́ве сла́ва тебѣ̀ . сла́ва , кᲂне́цъ . и҆ ны́нѣ , ве́сь .= та́же , дїа́кᲂнъ : и҆= ѡ҆спᲂдо́битисѧ на́мъ дᲂсто́йнѡ . є҆ѵⷢ҇а́лїе , в҃ е . ѿ і҆ѡа́нна . заⷱ҇ , н҃и . во́ времѧ ѻ҆́но , и҆зы́де і҆с҃ъ со ᲂу҆ченикѝ . кᲂне́ц̾ : но да ꙗ҆дѧ́тъ па́схꙋ .

а҆нтифо́нъ , д҃ . гла́съ , є҃ . Дне́сь і҆ꙋ́да ѡ҆ставлѧ́етъ ᲂу҆чи́телѧ , и҆ прїе́млетъ дїѧ́вᲂла . ѡ҆слѣпи́всѧ стра́стїю сребрᲂлю́бїѧ , и҆спадѐ ѿ́ свѣта ѡ҆мраче́нныи . ка́ко бо мᲂжа́ше зрѣ́ти , и҆́же свѣти́ло прᲂда́выи на три́десѧтихъ сре́бреницѣхъ ; но на́мъ вᲂсїѧ̀ страда́выи за́ миръ . к̾ немꙋ́же вᲂзᲂпїе́мъ , пᲂстрада́выи и҆ ми́лꙋѧи чл҃ки , гдⷭ҇и сла́ва тебѣ̀ . Дне́сь і҆ꙋ́да ѿлꙋча́етсѧ бл҃гᲂче́стїѧ , и҆ чꙋ́жь быва́етъ бл҃гᲂда́ти . бы́въ ᲂу҆чени́къ , и҆ бы́сть преда́тель , во ѡ҆бы́чнѣмъ лᲂбыза́нїи , ле́сть таѧ̀ , и҆ вᲂз̾любѝ па́че влⷣчни любвѐ , несмы́сленѡ рабо́тати сребрᲂлю́бїю , наста́вникъ бы́въ сᲂбо́рищꙋ лꙋка́вꙋ . мы́ же и҆мꙋ́ще спасе́нїе хрⷭ҇та̀ , тᲂгѡ̀ прᲂсла́вимъ . гла́съ , а҃ . Братᲂлю́бїе стѧ́жемъ , є҆́же ѡ҆ хрⷭ҇тѣ̀ бра́тїе , и҆ небꙋ́демъ неми́лᲂстиви ко бли́жнимъ на́шимъ , да не ꙗ҆́кѡ ра́бъ ѡ҆сꙋ́димсѧ неми́лᲂстивыи пѣ́нѧзей ра́ди , и҆ ꙗ҆́кѡ і҆ꙋ́да раска́ѧвшесѧ , ничто́же по́льзꙋемсѧ . Хрⷭ҇тᲂꙋбі́йство непра́веднᲂе пᲂꙋча́емᲂе натѧ̀ , вᲂпїѧ́ше бцⷣа мр҃і́ѧ зрѧ́щи хрⷭ҇та̀ , что̀ ра́ди ᲂу҆́бѡ в̾ такᲂвы́хъ тѧ ви́дѣхъ , ѡ҆сꙋжде́на ѿ і҆ꙋде́й ра́ди чꙋде́съ ; и҆ ꙗ҆́кѡ ѕлᲂдѣ́ѧ с̾ раз̾бо́йникᲂма тѧ ко крⷭ҇тꙋ̀ пригвᲂжда́ема .= сла́ва , боⷢ҇ . Ра́дꙋисѧ ѿ на́съ ст҃а́ѧ бцⷣе дв҃о , чи́стыи сᲂсꙋ́де все́й вселе́ннѣй , свѣщѐ неᲂу҆гаси́маѧ , вмѣсти́лище невмѣсти́магѡ , цр҃кви неѡ҆бᲂри́маѧ . ра́дꙋисѧ и҆з̾неѧ́же рᲂди́сѧ а҆́гнецъ бж҃їи , взе́млѧи грѣхѝ всегѡ̀ ми́ра . =и҆ ны́нѣ , то́йже .

а҆нтифо́нъ , є҃ . гла́съ , ѕ҃ . Оу҆чени́къ ᲂу҆чи́телевꙋ сᲂвѣщева́ше цѣ́нꙋ , на три́десѧтихъ сре́бреницѣхъ прᲂдаѧ́ше гдⷭ҇а . цѣлᲂва́нїемъ лꙋка́вымъ преда́въ є҆гѡ̀ , без̾зако́нникᲂмъ на сме́рть . Дне́сь зижди́тель нб҃ꙋ и҆ землѝ , гл҃аше свᲂи́мъ ᲂу҆ченико́мъ , прибли́жисѧ ча́съ , и҆ приспѣ̀ і҆ꙋ́да предаѧ́и менѐ . и҆ да никто́же ѿве́ржетсѧ менѐ , ви́дѧ мѧ на крⷭ҇тѣ̀ пᲂсредѝ двᲂю̀ разбо́йникꙋ . стражꙋ̀ ᲂу҆́бѡ ꙗ҆́кѡ чл҃къ , и҆ спасꙋ̀ ꙗ҆́кѡ чл҃кᲂлю́бецъ , в̾ мѧ̀ вѣ́рꙋющїѧ . Дне́сь зрѧ́щи чи́стаѧ , твᲂрца̀ тва́ри свᲂи́хъ ᲂу҆чени́къ ѿлꙋча́ема , и҆ є҆ди́нагѡ держи́ма ѿ і҆ꙋде́й , мт҃рьски крича́ше в̾ себѣ̀ свѣ́дꙋщи ꙗ҆́же пре́жде , что̀ стра́ннᲂе чꙋ́до ; ѽ ка́кѡ сн҃е презрѣ́ мѧ , и҆́же пре́жде чи́стꙋ сᲂхрани́выи мѧ . сла́ва , боⷢ҇ . И҆́же неи҆з̾рече́ннѡ заче́нши в̾ пᲂслѣ́днѧѧ , и҆ ро́ждьшаѧ зижди́телѧ свᲂегѡ̀ , хрⷭ҇та̀ бг҃а на́шего дв҃о , спасѝ тебѐ велича́ющїѧ . и҆ ны́нѣ , то́йже .

а҆нтифо́нъ , ѕ҃ . гла́съ , з҃ . Дне́сь бди́тъ і҆ꙋ́да преда́ти гдⷭ҇а , первᲂвѣ́чнаго сп҃са ми́рꙋ , и҆́же ѿ пѧтѝ хлѣ́бъ насы́тившаго мно́жество . дне́сь без̾зако́нныи ѿме́щетсѧ ᲂу҆чи́телѧ , ᲂу҆чени́къ бы́въ , влⷣкꙋ предадѐ на сребрѣ̀ , ма́нны насы́тившаго челᲂвѣ́ки . Дне́сь на крⷭ҇тѣ̀ пригвᲂзди́ша , і҆ꙋде́и гдⷭ҇а , раздѣли́вшаго мо́ре жезло́мъ , и҆ прᲂве́дшаго и҆́хъ в̾ пꙋсты́ню . дне́сь без̾зако́ннїи кᲂпїе́мъ ре́бра є҆мꙋ̀ прᲂбᲂдо́ша , ꙗ҆́звами казни́вшаго и҆́хъ ра́ди є҆гѵ́пта , и҆ же́лчїю напᲂи́ша , ма́ннꙋ пи́щꙋ и҆́мъ ѡ҆дᲂжди́вшаго . Гдⷭ҇и на мꙋ́кꙋ во́льнꙋю прише́дъ , вᲂпїѧ́ше ᲂу҆ченико́мъ свᲂи́мъ , пᲂнѐ є҆ди́нагѡ часа̀ невᲂз̾мᲂго́сте бдѣ́ти со мно́ю , ка́кѡ ѡ҆бѣща́стесѧ ᲂу҆́мрети менѐ ра́ди ; пᲂнѐ і҆ꙋ́дꙋ зри́те , ка́кѡ неспи́тъ , но тщи́тсѧ преда́ти мѧ без̾зако́нникѡмъ ; вᲂста́ните мᲂли́тесѧ , є҆да̀ кто̀ менѐ ѿве́ржетсѧ , зрѧ̀ менѐ на крⷭ҇тѣ̀ . дᲂлгᲂтерпѣли́ве сла́ва тебѣ̀ . Гдⷭ҇и вѣ́дꙋщи ро́ждьшаѧ тѧ неи҆з̾рече́нна ржⷭ҇тво́мъ , вᲂпїѧ́ше к̾ распина́льникѡмъ твᲂи́мъ , а҆́ще и҆ вᲂплᲂти́сѧ беспло́тныи , но непремѣни́сѧ є҆́же бѣ̀ . что̀ ᲂу҆́бѡ прїидо́сте ᲂу҆би́ти живᲂта̀ ; а҆́ще и҆ на́ древо вᲂзвы́сите , живо́тъ пᲂда́стъ . а҆́ще ли во́ грᲂбъ ѿ́слете , мертвецы̀ вᲂста́витъ . дᲂлгᲂтерпѣли́ве вᲂскрⷭ҇нѝ , и҆ пᲂкажѝ свᲂѐ вᲂскрⷭ҇нїе . вᲂскреси́выи на́съ чл҃кᲂлю́бче сла́ва тебѣ̀ . сла́ва , боⷢ҇ . Оу҆мирѝ мл҃твами бцⷣе жи́знь на́шꙋ , вᲂпїю́щихъ ти , млⷭ҇тиве гдⷭ҇и сла́ва тебѣ̀ . и҆ ны́нѣ , то́йже .

сѣда́ленъ . гла́съ , з҃ . Кі́и тѧ ѻ҆́бразъ і҆ꙋ́до преда́телѧ сп҃сꙋ сᲂтвᲂрѝ , є҆да̀ ѿ ли́ка тѧ а҆пⷭ҇льска ѿлꙋчѝ ; є҆да̀ дарᲂва́нїѧ и҆сцѣле́нїемъ лиши́ тѧ ; є҆да̀ со ѻ҆́нѣми вечерѧ̀ , тебе́ же ѿ трапе́зы ѿри́нꙋ ; є҆да̀ ѻ҆́нѣмъ но́зѣ ᲂу҆мы̀ , твᲂи́ же презрѣ̀ ; ѽ кᲂли́кихъ бл҃гъ , без̾па́мѧтливъ бы́въ . и҆ тво́й ᲂу҆́бѡ небл҃гᲂда́рныи ѡ҆блича́етсѧ нра́въ , тᲂго́ же без̾мѣ́рнᲂе прᲂпᲂвѣ́дꙋетсѧ дᲂлгᲂтерпѣ́нїе , и҆ вели́каѧ ми́лᲂсть . сла́ва , кᲂне́цъ . и҆ ны́нѣ , ве́сь . та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , г҃ е . ѿ матѳе́ѧ . заⷱ҇ , р҃ѳ . во́ времѧ ѻ҆́но , во́ини є҆́мше і҆с҃а ведо́ша к̾ каїа́фѣ а҆рхїєре́ѡви . кᲂне́ц̾ : пла́касѧ го́рькѡ .

а҆нтифо́нъ , з҃ . гла́съ , и҃ . И҆́мшимъ тѧ без̾зако́нникѡмъ , претерпѣва́ѧ , си́це вᲂпїѧ́ше гдⷭ҇и , а҆́ще и҆ пᲂрази́сте па́стырѧ , и҆ раз̾лꙋчи́сте ѻ҆́ба на́десѧте ѻ҆ве́цъ ᲂу҆чени́къ мᲂи́хъ ; мᲂжа́хъ ᲂу҆́бѡ бо́лѣ двᲂю̀ на́десѧте легеѡ́на пред̾ста́вити а҆́нг҃лъ . но дᲂлгᲂтерплю̀ , да сбꙋ́детсѧ ꙗ҆́же ꙗ҆ви́хъ ва́мъ прⷪ҇рки мᲂи́ми , без̾вѣ́стнꙋю и҆ неꙗ҆ви́мꙋю та́йнꙋ . гдⷭ҇и сла́ва тебѣ̀ . Трети́цею ѿве́ржесѧ пе́тръ , но в̾ско́рѣ рече́нᲂе є҆мꙋ̀ разꙋмѣ̀ , и҆ принесѐ к̾ тебѣ̀ сле́зы пᲂкаѧ́нїѧ , бж҃е ѡ҆чи́сти мѧ и҆ спаси́ мѧ . Є҆стества̀ ᲂу҆ста́вы преше́дшаѧ , распѧ́тїю ѻ҆́браза неразꙋмѣ̀ . тѣ́мже принесе́ ти сле́зы любо́вныѧ гл҃ющи , бж҃е вᲂскрⷭ҇нѝ ны́нѣ и҆ спаси́ мѧ .= сла́ва , боⷢ҇ . Кро́въ тво́й бцⷣе дв҃о , врачевство̀ є҆́сть дх҃о́внᲂе . въ ѻ҆́нь бо прибѣга́юще , ѿ дш҃е́вныхъ недꙋ́гъ и҆збавлѧ́емсѧ . =и҆ ны́нѣ , то́йже .

а҆нтифо́нъ , и҃ . гла́съ , в҃ . Рцы́те без̾зако́ннїи , что̀ слы́шасте ѿ сп҃са на́шегѡ ; не зако́нъ ли ва́мъ пᲂлᲂжѝ , и҆ прⷪ҇ро́ческаѧ ᲂу҆че́нїѧ . ка́кѡ ᲂу҆́бѡ пᲂмы́слисте пила́тꙋ преда́ти , и҆́же ѿ́ бг҃а бг҃а сло́ва , и҆ и҆зба́вителѧ дш҃а́мъ на́шимъ . Да ра́спнетсѧ вᲂпїѧ́хꙋ , и҆́же твᲂи́хъ дарᲂва́нїи при́снѡ наслажа́ющїисѧ , и҆ ѕлᲂдѣ́ѧ въ бл҃гᲂда́телѧ мѣ́сто прᲂша́хꙋ прїѧ́ти , и҆́же пра́ведникѡмъ ᲂу҆бі́ицы . мᲂлча́ше же хрⷭ҇тѐ , терпѧ̀ и҆́хъ сꙋрᲂвство̀ , пᲂстрада́ти хᲂтѧ̀ и҆ спастѝ на́съ , ꙗ҆́кѡ чл҃кᲂлю́бецъ . Распина́ема ви́дѧщи тѧ̀ чⷭ҇таѧ , ꙗ҆́же ѿ пречⷭ҇тыхъ лᲂже́снъ ро́ждьши , и҆ бᲂлѣ́знїю прїе́млема , прᲂша́ше ра́дᲂсти ѿ вᲂскрⷭ҇нїѧ твᲂегѡ̀ , вᲂпїѧ́ше к̾ тебѣ̀ , разрꙋшѝ а҆да́мᲂво рꙋкᲂписа́нїе , пᲂстрада́ти хᲂтѧ́и и҆ спастѝ на́съ , ꙗ҆́кѡ чл҃кᲂлю́бецъ .= сла́ва , боⷢ҇ . Непрᲂхᲂди́маѧ две́ри , та́йнѡ зна́менана , бл҃гᲂслᲂве́ннаѧ бцⷣе дв҃о , прїимѝ мл҃твы на́ша , и҆ дᲂнесѝ ѧ҆̀ сн҃ꙋ свᲂемꙋ̀ и҆ бг҃ꙋ на́шемꙋ , да спасе́тъ тебѐ ра́ди дш҃а на́ша . =и҆ ны́нѣ , то́йже .

а҆нтифо́нъ , ѳ҃ . гла́съ , г҃ . Пᲂста́виша три́десѧть сре́бреникъ цѣ́нꙋ цѣне́нагѡ , є҆го́же ѡ҆цѣни́ша ѿ сыно́въ і҆и҃левъ . бди́те и҆ мᲂли́тесѧ , да невни́дете во и҆скꙋ́съ . дх҃ъ ᲂу҆́бѡ бо́дръ , пло́ть же немᲂщна̀ , сегѡ̀ ра́ди бди́те . Вда́ша в̾ ꙗ҆́дь мᲂю̀ же́лчь , и҆ в̾ жа́ждꙋ мᲂю̀ напᲂи́ша мѧ ѻ҆цта̀ , ты́ же гдⷭ҇и вᲂста́ви менѐ , и҆ вᲂз̾да́мъ и҆́мъ . Оу҆жаса́шесѧ ви́дѧщи чⷭ҇таѧ , твᲂѐ во́льнᲂе пригвᲂжде́нїе ко крⷭ҇тꙋ̀ , и҆ вᲂпїѧ́ше хрⷭ҇тѐ , ᲂу҆ще́дри млⷭ҇тивыи свᲂѐ ста́до .= сла́ва , боⷢ҇ . И҆́же ѿ ꙗ҆зы́къ сꙋ́щїи , пᲂе́мъ тѧ бцⷣе пречⷭ҇таѧ , ꙗ҆́кѡ хрⷭ҇та̀ бг҃а на́шегѡ рᲂдила̀ є҆сѝ , и҆́же ѿ клѧ́твы чл҃ки тебѐ ра́ди свᲂбо́ждьшагѡ . =и҆ ны́нѣ , то́йже .

сѣда́ленъ . гла́съ , и҃ . Ѽ =ка́кѡ і҆ꙋ́да и҆нᲂгда̀ тво́й ᲂу҆чени́къ , на твᲂѐ преда́нїе пᲂꙋча́шесѧ . вечерѧ̀ с̾ тᲂбо́ю льсти́внѡ , навѣ́тникъ и҆ непра́ведникъ . ше́дъ речѐ сщ҃е́нникѡмъ , что́ ми хо́щете да́ти , и҆ а҆́зъ ва́мъ преда́мъ є҆гѡ̀ , и҆́же зако́нъ разо́ршагѡ , и҆ ѡ҆скверни́вшагѡ сꙋбо́ты . дᲂлгᲂтерпѣли́ве гдⷭ҇и сла́ва тебѣ̀ . =сла́ва , кᲂне́цъ . и҆ ны́нѣ , ве́сь .= та́же , дїа́кᲂнъ : и҆= ѡ҆спᲂдо́битисѧ на́мъ дᲂсто́йнѡ . є҆ѵⷢ҇а́лїе , д҃ е . ѿ і҆ѡа́нна . заⷱ҇ , н҃ѳ . во́ времѧ ѻ҆́но , ведо́ша і҆с҃а ѿ каїа́фы в̾ прето́ръ . кᲂне́цъ : да є҆гѡ̀ про́пнꙋтъ .

а҆нтифо́нъ , і҃ . гла́съ , ѕ҃ . Ѻ҆дѣѧ́исѧ свѣ́тᲂмъ ꙗ҆́кѡ ри́зᲂю , на́гъ на сꙋдѣ̀ стᲂи́тъ , и҆ в̾ лани́тꙋ ᲂу҆даре́нїе прїе́млетъ , ѿ рꙋкꙋ̀ и҆́хже сᲂзда̀ . без̾зако́ннїи же лю́дїе , на крⷭ҇тѣ̀ пригвᲂзди́ша гдⷭ҇а сла́вы . тᲂгда̀ и҆ за́вѣса цр҃ко́внаѧ распаде́сѧ , сл҃нце пᲂме́рче , нетерпѧ̀ зрѣ́ти бг҃а дᲂсажда́ема . є҆го́же трепе́щꙋтъ всѧ́ческаѧ , тᲂмꙋ̀ пᲂклᲂни́мсѧ . Оу҆чени́къ ѿве́ржесѧ , разбо́йникъ вᲂзᲂпѝ , пᲂмѧни́ мѧ гдⷭ҇и во црⷭ҇твїи сѝ . Без̾ стра́сти ро́ждьшаѧ тѧ , за ны̀ мо́литъ тѧ , пᲂмѧнѝ чл҃кᲂлю́бче вѣ́рᲂю пᲂю́щїѧ тѧ . Ꙗ҆́же ра́дᲂсть ѿ а҆́нг҃ла прїи́мшаѧ , и҆ ро́ждьшаѧ зижди́телѧ свᲂегѡ̀ , дв҃о спасѝ тебѐ велича́ющїѧ . сла́ва , боⷢ҇ . Оу҆мирѝ ми́ръ , и҆́же ѿ дв҃ы пло́ть прїѧ́тъ гдⷭ҇и за рабы̀ свᲂѧ̀ , да сᲂгла́снѡ тебѐ славᲂсло́вимъ чл҃кᲂлю́бче . и҆ ны́нѣ , то́йже .

а҆нтифо́нъ , а҃і . гла́съ , ѕ҃ . За бл҃га́ѧ ꙗ҆́же сᲂтвᲂрѝ хрⷭ҇тѐ ро́дꙋ є҆вре́йскᲂмꙋ , распѧ́ти тѧ ѡ҆сꙋди́ша , ѻ҆цта̀ и҆ же́лчи напᲂи́ша . но да́ждь и҆́мъ гдⷭ҇и по дѣ́лᲂмъ и҆́хъ , ꙗ҆́кѡ неразꙋмѣ́ша твᲂегѡ̀ смᲂтре́нїѧ . Ѡ҆ преда́нїи недᲂво́льни бы́ша хрⷭ҇тѐ , ро́ди є҆вре́йстїи , но пᲂкива́хꙋ глава́ми свᲂи́ми , хꙋлꙋ̀ и҆ рꙋга́нїе принᲂсѧ́ще . но да́ждь и҆́мъ гдⷭ҇и по дѣ́лᲂмъ и҆́хъ , ꙗ҆́кѡ неразꙋмѣ́ша твᲂегѡ̀ смᲂтре́нїѧ . Ни землѧ̀ є҆гда̀ пᲂтрѧсе́сѧ , ни ка́менїе є҆гда̀ распаде́сѧ , жидо́въ препрѣ́ша , ни цр҃ко́внаѧ катапета́зма , ни ме́ртвыхъ вᲂскрⷭ҇нїе . . но да́ждь и҆́мъ гдⷭ҇и по дѣ́лᲂмъ и҆́хъ , ꙗ҆́кѡ тще́тнымъ натѧ̀ пᲂꙋчи́шасѧ . Живᲂтꙋ̀ пᲂда́телѧ , и҆ сме́ртїю ѡ҆блада́ющагѡ , мт҃и зрѧ́щи без̾дꙋ́шна ме́ртва на́ древѣ , вᲂпїѧ́ше , ви́ждь ꙗ҆́кѡ тва́рь с̾ бᲂлѣ́знꙋетъ мѝ сн҃е ; но прᲂсвѣти́сѧ свѣ́те незахᲂди́мыи , и҆з̾ ме́ртвыхъ і҆с҃е , ꙗ҆́кѡ ты̀ є҆сѝ ѻ҆́ч҃ее сїѧ́нїе .= сла́ва , боⷢ҇ . Є҆динᲂча́де и҆ є҆динᲂсꙋ́щне , ѻ҆ц҃ꙋ свᲂемꙋ̀ и҆ дх҃ᲂви , ѿ дв҃ы вᲂплᲂти́сѧ несмѣ́снѡ ꙗ҆́кᲂже вѣ́си са́мъ , в̾ чистᲂтѣ̀ сᲂхранѧ́й ста́до твᲂѐ , в̾ ми́рѣ же и҆ сᲂвᲂкꙋпле́нїи сᲂдержѝ прⷭ҇нѡ . =и҆ ны́нѣ , то́йже .

а҆нтифо́нъ , в҃і . гла́съ , и҃ . Си́це глаго́летъ гдⷭ҇ь і҆ꙋде́ѡмъ , лю́дїе мᲂѝ что̀ ва́мъ сᲂтвᲂри́хъ ; и҆лѝ чи́мъ вы̀ смꙋти́хъ ; слѣпцы̀ ва́ша прᲂсвѣти́хъ , прᲂкаже́нныѧ ѡ҆чи́стихъ , мꙋ́жа сꙋ́щїѧ на ѻ҆дрѣ́хъ вᲂз̾ста́вихъ . лю́дїе мᲂѝ чи́мъ ѡ҆скᲂрби́хъ вы , и҆ что́ ми вᲂз̾да́сте ; за ма́ннꙋ же́лчь , за́ вᲂдꙋ же ѻ҆це́тъ . занѐ є҆́же люби́ти мѧ , ко крⷭ҇тꙋ́ мѧ пригвᲂзди́сте . к̾ тᲂмꙋ̀ нетерплю̀ про́чее , но призᲂвꙋ̀ мᲂѧ̀ ꙗ҆зы́ки , и҆ ті́и менѐ прᲂсла́вѧтъ со ѻ҆ц҃е́мъ и҆ со ст҃ы́мъ дх҃ᲂмъ , и҆ а҆́зъ да́рꙋю и҆́мъ живо́тъ вѣ́чныи . Дне́сь цр҃ко́внаѧ за́вѣса распаде́сѧ на ѡ҆бличе́нїе без̾зако́нным̾ , и҆ сл҃нце свᲂѧ̀ лꙋчѝ скрыва́етъ , влⷣкꙋ ви́дѧ распина́ема . Закᲂнᲂпᲂло́жницы і҆и҃левы , і҆ꙋде́и и҆ фарисѣ́и , ли́къ а҆пⷭ҇льскїи вᲂпїе́тъ къ ва́мъ , сѐ цр҃кᲂвь , ю҆́же вы̀ разᲂри́сте ; сѐ а҆́гнецъ , є҆го́же вы̀ распѧ́сте , и҆ гро́бꙋ преда́сте , но вла́стїю свᲂе́ю вᲂста́нетъ . нельсти́тесѧ і҆ꙋде́и , то́й бо є҆́сть и҆́же в̾ мо́ри спасы́и , и҆ в̾ пꙋсты́ни пита́выи . то́й є҆́сть живо́тъ и҆ свѣ́тъ , и҆ ми́ръ ми́рᲂви . Без̾зако́ннꙋющимъ є҆дина́кѡ , кꙋстᲂді́ѧ пагꙋбᲂꙋби́йственаѧ . дв҃аѧ же и҆ мт҃и вᲂпїе́тъ к̾ ва́мъ , сѐ бг҃ъ , пло́ть вᲂспрїе́мыи . сѐ зе́менъ , ѡ҆бᲂжи́выи забве́нᲂе , стра́сть прїе́млетъ , си́лᲂю же дви́жетъ тва́рь . раз̾сѣда́етсѧ ка́менїе , и҆ землѧ̀ трѧсе́тсѧ . цр҃кви ри́зꙋ раз̾дира́етъ , сл҃нце ᲂу҆жаса́етсѧ дерзнᲂве́нїѧ . ᲂу҆стыди́тесѧ непᲂкᲂри́вїи , и҆ ва́съ пита́вшагѡ разꙋмѣ́йте . сла́ва , боⷢ҇ . Ты̀ є҆сѝ бцⷣе ѻ҆рꙋ́жїе на́ше и҆ стѣна̀ . ты̀ є҆сѝ застꙋ́пница , и҆ к̾ тебѣ̀ прибѣга́емъ , и҆ тѧ̀ ны́нѣ на мᲂли́твꙋ призыва́емъ , да и҆зба́вимсѧ ѿ вра́гъ на́шихъ . и҆ ны́нѣ , то́йже .

сѣда́ленъ . гла́съ , и҃ . Є҆гда̀ пред̾ста̀ каїа́фѣ бж҃е , и҆ преда́лсѧ є҆сѝ пила́тꙋ сꙋдїѧ̀ всѣ́хъ , тᲂгда̀ нбⷭ҇ныѧ си́лы ѿ́ страха пᲂкᲂлѣба́шасѧ . є҆гда́ же вᲂзнесе́сѧ на́ древо , пᲂсредѝ двᲂю̀ разбо́йникꙋ , и҆ в̾мѣни́сѧ со без̾зако́нными без̾грѣ́шне , за є҆́же спастѝ челᲂвѣ́ка . неѕло́биве гдⷭ҇и сла́ва тебѣ̀ . сла́ва , кᲂне́цъ . и҆ ны́нѣ , ве́сь .

та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , є҃ е . ѿ матѳе́ѧ . заⷱ҇ , ра҃і . во́ времѧ ѻ҆́но , ви́дѣвъ і҆ꙋ́да преда́тель . кᲂне́ц̾ : пᲂнестѝ крⷭ҇тъ є҆гѡ̀ .

а҆нтифо́нъ , г҃і . гла́съ , ѕ҃ . Сᲂбо́рище і҆ꙋде́йскᲂе , ᲂу҆ пила́та и҆спрᲂси́ша распѧ́ти тѧ гдⷭ҇и , и҆ вины̀ ᲂу҆́бѡ в̾ тебѣ̀ не ѡ҆брѣто́ша , пᲂви́ннаго же вара́ввꙋ свᲂбᲂди́ша , и҆ тѧ̀ пра́веднагѡ ѡ҆сꙋди́ша , и҆ па́гꙋбнагѡ ᲂу҆бі́йства , грѣ́хъ наслѣ́дᲂваша . но да́ждь и҆́мъ гдⷭ҇и по дѣ́лᲂмъ и҆́хъ , ꙗ҆́кѡ сꙋ́етнымъ натѧ̀ пᲂꙋчи́шасѧ . Є҆го́же всѧ̀ ᲂу҆жаса́ютсѧ и҆ трепе́щꙋтъ , и҆ всѧ́къ ꙗ҆зы́къ пᲂе́тъ хрⷭ҇та̀ , бж҃їю си́лꙋ и҆ бж҃їю премꙋ́дрᲂсть . сщ҃е́нницы в̾ лани́тꙋ ᲂу҆да́риша , и҆ да́ша є҆мꙋ̀ же́лчь , и҆ всѧ̀ пᲂстрада́ти и҆з̾во́ли , спасти́ ны хᲂтѧ̀ ѿ без̾зако́нїи на́шихъ . свᲂе́ю кро́вїю , ꙗ҆́кѡ чл҃кᲂлю́бецъ . Да́выи зако́нъ и҆ прᲂро́ки , ка́кѡ пᲂд̾зако́ннымъ сꙋди́щемъ сн҃е и҆ бж҃е без̾нача́льне , во́лею пред̾стᲂи́ши ; ка́кᲂжели тѧ прїи́мꙋтъ а҆́дᲂва црⷭ҇твїѧ , всѧ́ческаѧ го́рстїю сᲂдержа́щагѡ , речѐ чи́стаѧ ; зрѧ́щи ви́сѧща свᲂе́ю во́лею без̾сме́ртнагѡ . сла́ва , боⷢ҇ . Ви́дѧщи тѧ распина́ема хрⷭ҇тѐ , тебѐ ро́ждьшаѧ вᲂпїѧ́ше , что̀ стра́ннᲂе є҆́же ви́жꙋ та́инство сн҃е мо́й ; ка́кѡ на́ древѣ ᲂу҆мира́еши , пло́тїю пᲂвѣ́шенъ всѣ́хъ живᲂтѐ . и҆ ны́нѣ , то́йже .

а҆нтифо́нъ , д҃і . гла́съ , и҃ . Гдⷭ҇и и҆́же разбо́йника с̾пꙋ́тника прїе́мъ , и҆́же кро́вїю рꙋ́цѣ ѡ҆скве́рньшагѡ , и҆ на́съ с̾ ни́мъ причтѝ , ꙗ҆́кѡ бл҃гъ и҆ чл҃кᲂлю́бецъ . Ма́лъ гла́съ и҆спꙋстѝ разбо́йникъ на крⷭ҇тѣ̀ , ве́лїю вѣ́рꙋ ѡ҆брѣ́те , и҆ во є҆ди́нъ ча́съ спасе́сѧ , и҆ пе́рвыи ра́еви две́ри ѿве́рзъ вни́де . и҆́же тᲂгѡ̀ пᲂкаѧ́нїе вᲂспрїе́мыи , гдⷭ҇и сла́ва тебѣ̀ . Нема́лꙋ бᲂлѣ́знь и҆мѧ́ше чи́стаѧ при крⷭ҇тѣ̀ стᲂѧ́щи , и҆ ви́дѧщи пагꙋбᲂꙋбі́йственѡ дерзнᲂве́нїе , и҆ рыда́нїемъ ве́лїимъ ᲂу҆жа́снѡ пла́чꙋщисѧ гл҃аше , и҆́же земны́хъ не́мᲂщь свѣ́дыи , гдⷭ҇и сла́ва тебѣ̀ . сла́ва , боⷢ҇ . Ра́дꙋисѧ прⷭ҇нᲂживо́тныи и҆сто́чниче нетлѣ́нїѧ . ра́дꙋисѧ всесвѣ́тлыи сл҃нца ѻ҆́блаче . ра́дꙋисѧ нᲂси́ло бжⷭ҇тва всегѡ̀ , ра́дꙋисѧ кᲂвче́же ѡ҆сщ҃е́нїѧ . и҆ ны́нѣ , то́йже .

а҆нтифо́нъ , є҃і . гла́съ , ѕ҃ . Дне́сь ви́ситъ на́ древѣ , и҆́же на вᲂда́хъ зе́млю пᲂвѣ́шеи . вѣнце́мъ ѿ те́рнїѧ ѡ҆блага́етсѧ , и҆́же а҆́нг҃лѡмъ цр҃ь . въ ло́жнꙋю багрѧни́цꙋ ѡ҆блачи́тсѧ , ѡ҆блача́ѧи нб҃са̀ ѻ҆́блаки . ᲂу҆даре́нїе прїѧ́тъ , и҆́же во і҆ѡрда́нѣ свᲂбᲂди́выи а҆да́ма . гвᲂздьмѝ пригвᲂзди́сѧ , жени́хъ цр҃ко́вныи . кᲂпїе́мъ прᲂбᲂде́сѧ , сн҃ъ дв҃ыѧ . пᲂклᲂнѧ́емсѧ страсте́мъ твᲂи́мъ хрⷭ҇тѐ= [пᲂкло́н̾ до землѝ] .= пᲂклᲂнѧ́емсѧ страсте́мъ твᲂи́мъ хрⷭ҇тѐ= [пᲂкло́н̾ до землѝ] .= пᲂклᲂнѧ́емсѧ стрⷭ҇те́мъ твᲂи́мъ хрⷭ҇тѐ= [пᲂкло́н̾ до землѝ] .= пᲂкажѝ на́мъ и҆ сла́внᲂе твᲂѐ вᲂскрⷭ҇нїе . Не ꙗ҆́кѡ і҆ꙋде́и пра́зднꙋемъ , и҆́бо па́сха на́ша заны̀ пᲂжре́сѧ хрⷭ҇то́съ бг҃ъ . но ѡ҆чи́стимъ са́ми себѐ ѿ всѧ́кїѧ скве́рны , и҆ вᲂи́стинꙋ пᲂмо́лимсѧ є҆мꙋ̀ , вᲂскрⷭ҇нѝ гдⷭ҇и , спасѝ на́съ , ꙗ҆́кѡ чл҃кᲂлю́бецъ . Крⷭ҇тъ тво́й гдⷭ҇и , жи́знь и҆ застꙋпле́нїе лю́демъ твᲂи́мъ є҆́сть , и҆ на́нь надѣ́ющесѧ , тебѐ распѧ́таго бг҃а на́шегѡ пᲂе́мъ , пᲂми́лꙋй на́съ . Свѣти́ло сы́и ра́зꙋма , прᲂсвѣти́лсѧ в̾ лю́дехъ твᲂи́хъ , і҆с҃е чл҃кᲂлю́бче , и҆́же во́лею ѡ҆ᲂу҆бо́жавъ , хᲂтѧ̀ ѿве́рсти є҆де́мъ , є҆го́же затвᲂрѝ а҆да́мъ пре стꙋпле́нїемъ дре́вле . сла́ва , боⷢ҇ . Пресла́внꙋю хрⷭ҇то́вꙋ мт҃рь , и҆ ст҃ы́хъ а҆́нг҃лъ ст҃ѣ́йшꙋ , немо́лчнѡ вᲂспᲂе́мъ срⷣцемъ и҆ ᲂу҆стна́ми , бцⷣꙋ тѧ̀ и҆спᲂвѣ́дающе , ꙗ҆́кѡ вᲂи́стинꙋ ро́ждьшꙋю на́мъ бг҃а вᲂплᲂще́нна , и҆ мᲂлѧ́щꙋсѧ непреста́нно ѡ҆ дш҃а́хъ на́шихъ .= и҆ нн҃ѣ , то́йже .=

сѣда́ленъ . гла́съ , д҃ . И҆скꙋпи́лъ ны̀ є҆сѝ ѿ клѧ́твы зако́нныѧ , честно́ю си кро́вїю хрⷭ҇тѐ бж҃е . на крⷭ҇тѣ̀ пригвᲂзди́всѧ , и҆ кᲂпїе́мъ прᲂбᲂде́сѧ без̾сме́ртїе и҆стᲂчи́лъ є҆сѝ чл҃кѡмъ , сп҃се на́шъ сла́ва тебѣ̀ . сла́ва , кᲂне́цъ . и҆ ны́нѣ , ве́сь .

та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , ѕ҃ е . ѿ ма́рка . заⷱ҇ , ѯ҃з . во́ времѧ ѻ҆́но , во́ини ведо́ша і҆с҃а внꙋ́трь двᲂра̀ є҆́же є҆́сть . кᲂне́цъ : да вѣ́рꙋ и҆́мемъ є҆мꙋ̀ .

та́же , бл҃же́нны . пᲂста́вимъ , стихо́въ , і҃ . гла́съ , д҃ . Во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . бл҃же́ни пла́чꙋщїи , ꙗ҆́кѡ ті́и ᲂу҆тѣ́шатсѧ . бл҃же́ни кро́тцїи , ꙗ҆́кѡ ті́и наслѣ́дѧтъ зе́млю . Дре́ва ра́ди а҆да́мъ раѧ̀ бы́сть и҆зселе́нъ , дре́вᲂмъ же крⷭ҇тнымъ разбо́йникъ в̾ ра́й всели́сѧ . ѻ҆́въ ᲂу҆́бѡ вкꙋ́шъ за́пᲂвѣдь престꙋпѝ сᲂтво́ршаго и҆̀ . ѻ҆́въ же сраспина́емъ , бг҃а тѧ̀ и҆спᲂвѣ́да таѧ́щагᲂсѧ . пᲂмѧни́ мѧ сп҃се вᲂпїѧ̀ во црⷭ҇твїи сѝ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Зако́нꙋ твᲂрца̀ , ѿ ᲂу҆ченика̀ кꙋпи́ша без̾зако́ннїи , и҆ ꙗ҆́кѡ престꙋ́пника зако́нꙋ , тᲂгѡ̀ пила́тᲂвꙋ сꙋди́щꙋ пред̾ста́виша , зᲂвꙋ́ще распнѝ и҆̀ , и҆́же в̾ пꙋсты́ни си́хъ ма́нны напита́вшаго . мы́же бл҃гᲂразꙋ́мнᲂмꙋ разбо́йникꙋ пᲂдо́бѧщесѧ , вѣ́рᲂю зᲂве́мъ , пᲂмѧнѝ на́съ гдⷭ҇и во црⷭ҇твїи сѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Бг҃ᲂꙋбі́ицъ сᲂбо́ръ і҆ꙋде́йскїи и҆ ꙗ҆зы́къ без̾зако́нныи , к̾ пила́тꙋ гнѣ́вающесѧ взыва́хꙋ гл҃юще , распнѝ хрⷭ҇та̀ непᲂви́ннаго , вара́ввꙋ же па́че на́мъ ѿпꙋстѝ . мы́же прᲂвѣщава́емъ гла́съ к̾ немꙋ̀ разбо́йника бл҃гᲂразꙋ́мнаго , пᲂмѧнѝ на́съ сп҃се во црⷭ҇твїи сѝ .

=бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ѿ =живᲂно́снаго ти ребра̀ , ꙗ҆́кѡ и҆сто́чникъ и҆з̾ є҆де́ма и҆стека́ѧи , цр҃квь ст҃ꙋ́ю твᲂю̀ хрⷭ҇тѐ , ꙗ҆́кѡ слᲂве́сенъ ра́й напᲂѧ́етъ . ѿ сю́дꙋ раздѣлѧ́ѧсѧ , ꙗ҆́кѡ и҆з̾ нача́ла в̾ четы́ри є҆ѵⷢ҇а́лїѧ , ми́ръ напᲂѧ́ѧ , и҆ тва́рь веселѧ̀ . и҆ ꙗ҆зы́ки вѣ́рнѡ наꙋча́ѧ пᲂклᲂнѧ́тисѧ црⷭ҇твїю твᲂемꙋ̀ .

бл҃же́ни мирᲂтво́рцы ,꙳ ꙗ҆́кѡ ті́и сн҃ѡве бж҃їи нарекꙋ́тсѧ . Распѧ́лсѧ є҆сѝ менѐ ра́ди , да мнѣ̀ и҆стᲂчи́ши без̾сме́ртїе . и҆ прᲂбᲂде́сѧ в̾ ре́бра , да ка́пли жи́зни и҆стᲂчи́ши ми . гвᲂздьмѝ пригвᲂзди́всѧ , да и҆ а҆́зъ стра́стїю спасе́нᲂю ти , высᲂто́ю держа́вы твᲂеѧ̀ , ᲂу҆вѣрѧ́емь зᲂвꙋ̀ тебѣ̀ , живᲂда́вче хрⷭ҇тѐ , сла́ва крⷭ҇тꙋ̀ и҆ стрⷭ҇ти твᲂе́й .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Рꙋкᲂписа́нїе на́ше , на крⷭ҇тѣ̀ растерза́лъ є҆сѝ гдⷭ҇и , и҆ вмѣни́сѧ в̾ ме́ртвыхъ , та́мᲂшнѧгѡ мꙋчи́телѧ свѧза́лъ є҆сѝ , и҆зба́вль всѣ́хъ ѿ ᲂу҆́зъ сме́ртныхъ , вᲂскрⷭ҇нїемъ свᲂи́мъ . и҆́мже прᲂсвѣти́хᲂмсѧ чл҃кᲂлю́бче гдⷭ҇и , и҆ вᲂпїе́мъ ти , пᲂмѧнѝ на́съ во црⷭ҇твїи сѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕѡ́лъ гл҃ъ ,꙳ на вы̀ лжꙋ́ще менѐ ра́ди . Распина́емꙋ ти хрⷭ҇тѐ , всѧ̀ тва́рь ви́дѧщи трепета́ше . и҆ ѡ҆снᲂва́нїѧ землѝ кᲂлеба́хꙋсѧ стра́хᲂмъ держа́вы твᲂеѧ̀ . свѣти́ла же скрыва́хꙋсѧ . и҆ цр҃ко́внаѧ раздира́шесѧ ѡ҆по́на . го́ры вᲂстрепета́шасѧ , и҆ ка́менїе раз̾пада́шесѧ . и҆ разбо́йникъ вѣ́рныи зᲂве́тъ тебѣ̀ с̾ на́ми сп҃се , є҆́же пᲂмѧнѝ на́съ во црⷭ҇твїи сѝ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́шѧ мно́га на́ небесѣхъ . Вᲂз̾ше́дъ на́ крⷭ҇тъ , и҆ сме́ртнꙋю держа́вꙋ разᲂри́лъ є҆сѝ . и҆ во́ грᲂбѣ пᲂлᲂже́нъ бы́въ , пра́ведники всѧ̀ вᲂскр҃си́лъ є҆сѝ , и҆ бы́сть пе́рвенецъ и҆з̾ ме́ртвыхъ , жи́знь пᲂдаѧ̀ вѣ́чнꙋю . тѣ́мже вᲂста́нїемъ ти спа́сшесѧ , вᲂпїе́мъ тебѣ̀ и҆зба́вителю і҆с҃е , пᲂмѧнѝ на́съ во црⷭ҇твїи сѝ .

сла́ва . Ѻ҆ц҃а и҆ сн҃а и҆ дх҃а ст҃а́гѡ , всѝ є҆дино мꙋ́дренѡ вѣ́рнїи славᲂсло́вити дᲂсто́йнѡ мо́лимсѧ . є҆ди́ницꙋ бжⷭ҇тва̀ , въ трїе́хъ сꙋ́щꙋ сᲂста́вѣхъ , неслїѧ́ннѡ пребыва́ющꙋ , про́стꙋ нераздѣ́льнꙋ и҆ непристꙋ́пнꙋ . є҆́юже и҆збавлѧ́емсѧ ѻ҆́гненагѡ мꙋче́нїѧ .

и҆ ны́нѣ , боⷢ҇ . Кади́льницꙋ зла́тꙋ , кᲂвче́гъ и҆ рꙋ́чкꙋ и҆ трапе́зꙋ дв҃о пᲂе́мъ тѧ , ю҆́же ѿ всѣ́хъ рᲂдо́въ и҆збра́ннꙋю , є҆ди́нꙋ зижди́телю свᲂемꙋ̀ , ꙗ҆́кѡ в̾ тебѣ̀ сᲂдѣ́ѧшасѧ ꙗ҆́же вы́ше чл҃ка . ѻ҆́гнь бо нᲂси́ла є҆сѝ всегѡ̀ бжⷭ҇тва̀ мт҃и дв҃о . ра́дꙋисѧ ᲂу҆́бѡ сᲂкро́вище живᲂтꙋ̀ на́шемꙋ .

прᲂки́менъ . гла́съ , д҃ . раздѣли́ша ри́зы мᲂѧ̀ себѣ̀ , и҆ ѡ҆ ѻ҆де́жди мᲂе́й мета́ша жре́бїѧ . сти́хъ : бж҃е бж҃е мо́й вᲂнми́ ми вскꙋ́ю ѡ҆ста́ви мѧ . та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , з҃ е . ѿ матѳе́ѧ . заⷱ҇ , рг҃і . во́ времѧ ѻ҆́но , прише́дше во́ини . кᲂне́ц̾ : вᲂи́стинꙋ бж҃їи бѣ̀ сн҃ъ се́й . пᲂто́мъ , ѱало́мъ , н҃ .

та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , и҃ е . ѿ лꙋкѝ . заⷱ҇ , ра҃і . во́ времѧ ѻ҆́но , ведѧ́хꙋ со і҆с҃ᲂмъ и҆́на два̀ ѕлᲂдѣ́ѧ . кᲂне́цъ : ѿ галиле́и зрѧ́ще си́хъ .

пᲂсе́мъ пᲂе́мъ , трипѣ́снецъ , твᲂре́нїе ки́ръ кᲂзмы̀ . і҆рмо́съ , по вⷤ . трᲂпарѝ , на в҃і . гла́съ , ѕ҃ . пѣ́снь , є҃ . і҆рмо́съ . Къ тебѣ̀ ᲂу҆́треннюю , млрⷭ҇дїѧ ра́ди самᲂгѡ̀ па́дшагѡ , прело́жшасѧ непрело́жнѡ , и҆ до́ страсти без̾стра́стїемъ прекло́ньшасѧ сло́ве бж҃їи , ми́ръ пᲂда́ждь ми чл҃кᲂлю́бче .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Оу҆мы́вше но́ги , и҆ пред̾ѡ҆чи́стившесѧ та́инства причаще́нїемъ , бжⷭ҇твенагѡ ᲂу҆ма̀ хрⷭ҇тѐ твᲂѝ слꙋжи́телїе . ѿ сїѡ́на въ є҆леѡ́нскꙋю го́рꙋ вели́кꙋю , с̾ тᲂбо́ю взыдо́ша , пᲂю́ще тѧ̀ чл҃кᲂлю́бче . Зри́те речѐ дрꙋ́зи и҆ небо́йтесѧ , ны́нѣ бо прибли́жисѧ ча́съ ꙗ҆́тꙋ ми бы́ти , и҆ ᲂу҆бїе́нꙋ рꙋка́ма без̾зако́нныхъ . вси́же разы́детесѧ , менѐ ѡ҆ста́вивше . но сᲂберꙋ̀ ᲂу҆́бѡ вы̀ , прᲂпᲂвѣ́дати мѧ чл҃кᲂлю́бца .

катава́сїѧ : Къ тебѣ̀ ᲂу҆́треннюю .

кᲂнда́къ . гла́съ , и҃ . На́съ ра́ди распѧ́тагѡ , прїиди́те всѝ вᲂспᲂе́мъ . тᲂго́ бо ви́дѣвши мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , но ты̀ є҆сѝ сн҃ъ и҆ бг҃ъ мо́й . и҆́кᲂсъ . Свᲂегѡ̀ а҆́гньца а҆́гница зрѧ́щи , къ закᲂле́нїю ведо́ма , пᲂслѣ́дствꙋющи мр҃і́ѧ вла́сы прᲂсте́рши со и҆нѣ́ми жена́ми , си́це вᲂпїю́щи , ка́мѡ и҆́деши ча́до ; чесѡ̀ ра́ди ско́рѡ тече́нїе твᲂри́ши ; є҆да̀ дрꙋгі́и бра́къ па́ки є҆́сть в̾ ка́нѣ галиле́йстѣй , и҆ та́мѡ ны́нѣ тщи́шисѧ , да во́дꙋ въ вино̀ прелᲂжи́ши и҆́мъ ; и҆дꙋ́ ли с̾ тᲂбо́ю ча́до , и҆лѝ пᲂждꙋ̀ тебѐ ; да́ждь ми сло́во сло́ве , немо́лча ми́мѡ и҆дѝ менѐ . и҆́же чи́стꙋ сᲂблюды́и мѧ̀ , ты́ бо є҆сѝ сн҃ъ и҆ бг҃ъ мо́й .

пѣ́снь , и҃ . і҆рмо́съ . Тѣ́ло ѕло́бы бг҃ᲂпрᲂти́внᲂе , ѻ҆́трᲂцы бжⷭ҇твеннїи ѡ҆бличи́ша . на хрⷭ҇та́ же шата́ющеесѧ без̾зако́нныхъ сᲂбо́рище , пᲂмышлѧ́етъ тще́тнаѧ , ᲂу҆би́ти пᲂꙋча́етсѧ , живᲂта̀ держа́щагѡ дла́нїю , є҆го́же всѧ̀ тва́рь бл҃гᲂслᲂви́тъ , сла́вѧщи во́ вѣки . Ѿ ѻ҆́чїю ᲂу҆ченико́мъ , ны́нѣ ре́клъ є҆сѝ хрⷭ҇тѐ , со́нъ ѿтрѧси́те . въ мл҃твѣ же ста́вше бди́те , да не в̾ напа́сть вни́дете . и҆ па́че же си́мѡне , крѣпча́йшемꙋ бо бо́лїи и҆скꙋ́съ . разꙋмѣ́й мѧ пе́тре , є҆го́же всѧ̀ тва́рь бл҃гᲂслᲂви́тъ , и҆ превᲂзно́ситъ во́ вѣки . Скве́рнена сло́ва , ника́кᲂже ᲂу҆стна́ма и҆з̾реко́хъ тебѣ̀ влⷣко . съ тᲂбо́ю ᲂу҆мрꙋ̀ ꙗ҆́кѡ бл҃гᲂразꙋ́менъ , а҆́ще и҆ всѝ ѿве́ргꙋтсѧ вᲂзᲂпѝ пе́тръ . пло́ть же и҆ кро́вь не ѿкры̀ мнѣ̀ тебѐ , но ѻ҆ц҃ъ тво́й ѿкры́ ми . є҆го́же всѧ̀ тва́рь бл҃гᲂслᲂви́тъ , и҆ превᲂзно́ситъ во́ вѣки . Глꙋбины̀ премꙋ́дрᲂсти бж҃їѧ ра́зꙋма , не всѧ̀ и҆спыта́лъ є҆сѝ . бе́зднъ же мᲂи́хъ сꙋде́бъ , непᲂсти́глъ є҆сѝ чл҃че , гдⷭ҇ь речѐ . пло́ть ᲂу҆́бѡ сы́и нехвали́сѧ , ѿве́ржешибᲂсѧ менѐ три́жды . є҆го́же всѧ̀ тва́рь бл҃гᲂслᲂви́тъ , и҆ превᲂзно́ситъ во́ вѣки . Ѿвѣщава́еши сᲂпрᲂти́въ си́мѡне пе́тре , и҆ є҆́же сᲂтвᲂри́ши в̾ско́рѣ , ꙗ҆́кᲂже рече́сѧ , и҆ тѧ̀ рабы́нѧ срѣ́тши грѧдꙋ́ща , ᲂу҆страши́тъ тѧ̀ , гдⷭ҇ь речѐ . го́рцѣ же прᲂслези́въ , ѡ҆брѧ́щеши мѧ млⷭ҇тива . є҆го́же всѧ̀ тва́рь бл҃гᲂслᲂви́тъ , и҆ превᲂзно́ситъ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Тѣ́ло ѕло́бы .= [пᲂкло́н̾ до землѝ] .=

пѣ́снь , ѳ҃ . і҆рмо́съ . Чтⷭ҇нѣ́йшꙋю херꙋви́мъ , и҆ сла́внѣйшꙋю вᲂи́стинꙋ серафи́мъ , без̾ и҆стлѣ́нїѧ бг҃а сло́ва ро́ждьшꙋю , сꙋ́щꙋю бцⷣꙋ тѧ велича́емъ . Лꙋка́вныхъ сᲂбо́рище бг҃ᲂме́рзско , лꙋка́вствꙋющихъ бг҃ᲂꙋбі́ицъ со́нмища , пред̾ста́ша тебѣ̀ хрⷭ҇тѐ , и҆ ꙗ҆́кѡ непра́ведника влеча́хꙋ тѧ̀ , твᲂрца̀ всѧ́ческимъ . є҆го́же велича́емъ . Зако́на неразꙋмѣ́юще нечести́вїи , гла́сᲂмъ прᲂро́ческимъ пᲂꙋча́ющесѧ вᲂтщетꙋ̀ . ꙗ҆́кѡ ѻ҆вча̀ ведѧ́хꙋ тѧ всѣ́хъ влⷣкꙋ , непра́веднѡ закла́ти . є҆го́же велича́емъ . Ꙗ҆зы́кѡмъ даю́щаго жи́знь , съ кни́жники ᲂу҆би́ти сщ҃е́нницы тща́хꙋсѧ , пᲂраже́ни за́вистїю ѕло́бнᲂю , є҆стество́мъ живᲂда́вца . є҆го́же велича́емъ . Ѡ҆быдо́ша тѧ ꙗ҆́кѡ псѝ мно́зи , сᲂбра́шасѧ цр҃ю на заꙋше́нїе твᲂѐ . вᲂпраша́юще же тебѐ ло́жнымъ свидѣ́тельствᲂмъ , и҆ всѧ̀ претерпѣ́въ , всѣ́хъ спа́слъ є҆сѝ . катава́сїѧ : Честнѣ́йшꙋю херꙋви́мъ .= [пᲂкло́н̾ до землѝ] .=

свѣти́ленъ . Разбо́йника бл҃гᲂразꙋ́мнагѡ , въ є҆ди́нᲂмъ часѣ̀ ра́еви спᲂдо́билъ є҆сѝ хрⷭ҇тѐ . мене́ же дре́вᲂмъ крⷭ҇та̀ твᲂегѡ̀ прᲂсвѣтѝ чл҃кᲂлю́бче , и҆ спаси́ мѧ . двⷤа . сла́ва , и҆ ны́нѣ , то́йже .

та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , ѳ҃ е . ѿ і҆ѡа́нна . заⷱ҇ , ѯ҃а . во́ времѧ ѻ҆́но , стᲂѧ́хꙋ при крⷭ҇тѣ̀ і҆с҃ᲂвѣ . кᲂне́ц̾ : є҆го́же прᲂбᲂдо́ша .

На хвали́тѣхъ стихѣ́ры , на д҃ . гла́съ , г҃ . Два̀ лꙋка́вства сᲂтвᲂрѝ , пе́рвенецъ сн҃ъ мо́й і҆и҃ль , менѐ ѡ҆ста́ви и҆сто́чника во́дъ живо́тныхъ , и҆ и҆скᲂпа̀ себѣ̀ кла́дѧзь сᲂкрꙋше́нъ . менѐ на́ древѣ распѧ́тъ , вара́ввꙋже и҆спрᲂсѝ и҆ ѿпꙋстѝ . ᲂу҆жасе́сѧ не́бо ѡ҆ се́мъ , и҆ сл҃нце лꙋчѝ съкры̀ , ты́же і҆и҃лю неꙋсрами́сѧ менѐ , но сме́рти мѧ пре́далъ є҆сѝ . но ѡ҆ста́ви и҆́мъ ѻ҆́ч҃е ст҃ы́и , невѣ́дѧтъ бо что̀ сᲂтвᲂри́ша . Ко́йждо ᲂу҆́дъ ст҃ы́ѧ твᲂеѧ̀ пло́ти , без̾че́стїе на́съ ра́ди претерпѣ̀ . те́рнїе глава̀ , лицѐ ѡ҆плева́нїе , лани́тѣ ᲂу҆даре́нїе , ᲂу҆ста̀ и҆́же во ѻ҆це́тѣ смѣше́ныѧ же́лчи вкꙋ́съ . ᲂу҆́ши ѕлᲂчести́выѧ хꙋле́нїѧ . плещѝ бїе́нїѧ , и҆ рꙋка̀ тро́сть . и҆ ꙗ҆́же всегѡ̀ тѣлесѐ , прᲂтѧже́нїѧ на крⷭ҇тѣ̀ . сᲂста́вы гво́здїѧ , и҆ ре́бра кᲂпїѐ . пᲂстрада́выи заны̀ , и҆ ѿ стрⷭ҇те́й свᲂбᲂди́выи на́съ , сше́дыи к̾ на́мъ за чл҃кᲂлю́бїе , и҆ вᲂзнесы́и на́съ , всеси́льныи сп҃се пᲂми́лꙋй на́съ . Распе́ншꙋтисѧ хрⷭ҇тѐ , всѧ̀ тва́рь ви́дѧщи трепета́ше , ѡ҆снᲂва́нїѧ землѝ пᲂзыба́шасѧ , стра́хᲂмъ держа́вы твᲂеѧ̀ . тебѣ́ бо вᲂз̾дви́гшꙋсѧ дне́сь , ро́дъ є҆вре́йскїи пᲂги́бе . цр҃ко́внаѧ за́вѣса раздра́сѧ на́ двᲂе , и҆ ме́ртвїи ѿ гро́бъ вᲂскресо́ша . со́тникъ же ви́дѣвъ чꙋ́до , ᲂу҆жасе́сѧ . пред̾стᲂѧ́щи же мт҃и твᲂѧ̀ вᲂпїѧ́ше , пла́чꙋщи мт҃рьски , ка́кѡ нерыда́ю , и҆ ᲂу҆тро́бᲂю не ᲂу҆ѧзвлѧ́юсѧ , зрѧ́щи тѧ на́га ꙗ҆́кѡ ѡ҆сꙋжде́на , на́ древѣ ви́сѧща . распѧ́тыи и҆ пᲂгребе́ныи , и҆ вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ . Дне́сь влⷣка и҆ гдⷭ҇ь тва́ри пред̾стᲂи́тъ пила́тꙋ , и҆ на распѧ́тїе предае́тсѧ зижди́тель всѣ́хъ , ꙗ҆́кѡ а҆́гнецъ привᲂди́мъ на закᲂле́нїе свᲂе́ю во́лею , гвᲂздьмѝ пригвᲂжда́етсѧ , и҆ в̾ ре́бра прᲂбᲂда́етсѧ , и҆ гꙋ́бᲂю напᲂѧ́етсѧ , и҆́же ма́ннꙋ ѡ҆дᲂжди́выи . по лани́тᲂма ᲂу҆дарѧ́етсѧ , и҆зба́витель ми́рꙋ . и҆ ѿ свᲂи́хъ ра́бъ пᲂрꙋга́емь быва́етъ , сᲂдѣ́тель всѧ́ческихъ . ѽ влⷣчнѧгѡ чл҃кᲂлю́бїѧ . за распина́ющїѧ мᲂлѧ́ше свᲂегѡ̀ ѻ҆ц҃а . ѻ҆́ч҃е ѿпꙋстѝ и҆́мъ грѣ́хъ се́й , невѣ́дѧтъ бо без̾зако́ннїи , что̀ непра́веднѡ сᲂтвᲂрѧ́ютъ . сла́ва . гла́съ , ѕ҃ . Сᲂвлеко́ша с̾ менѐ ри́зы мᲂѧ̀ , и҆ ѡ҆блеко́ша мѧ в̾ ри́зꙋ червленꙋ̀ . вᲂз̾лᲂжи́ша на главꙋ̀ мᲂю̀ вѣне́цъ ѿ те́рнїѧ , и҆ в̾ деснꙋ́ю ми рꙋ́кꙋ да́ша тро́сть , да сᲂкрꙋшꙋ̀ и҆́хъ , ꙗ҆́кѡ сᲂсꙋ́ды скꙋде́льничи . и҆ ны́нѣ . гла́съ , то́йже . Плещѝ мᲂѝ вда́хъ на ра́ны , лице́ же мᲂѐ не ѿврати́хъ ѿ заплева́нїѧ . сꙋди́щꙋ пила́тᲂвꙋ пред̾ста́хъ , и҆ распѧ́тїе претерпѣ́хъ , за мирско́е спасе́нїе .

та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , і҃ . ѿ ма́рка . заⷱ҇ , ѯ҃ѳ . во́ времѧ ѻ҆́но , прише́дъ і҆ѡ́сифъ . кᲂне́цъ : и҆зрѧ́ста гдѣ̀ є҆гѡ̀ пᲂлᲂга́хꙋ . пᲂсе́мъ : сла́ва в̾ вы́шнихъ бг҃ꙋ . та́же , є҆ктенїѧ̀ : и҆спо́лнимъ ᲂу҆́тренїѧ мл҃твы . и҆ про́чаѧ , по ѡ҆бы́чаю . та́же , дїа́кᲂн̾ : и҆ ѡ҆спᲂдо́битисѧ на́м̾ . є҆ѵⷢ҇а́лїе , а҃і . ѿ і҆ѡа́нна . заⷱ҇ , ѯ҃в . во́ времѧ ѻ҆́но , мᲂлѝ пила́та і҆ѡ́сифъ . кᲂне́цъ : пᲂлᲂжи́ста і҆с҃а .

На стихо́внѣ , стихѣ́ры . гла́съ , а҃ . Всѧ̀ тва́рь и҆змѣнѧ́шесѧ стра́хᲂмъ , зрѧ́щи тѧ на крⷭ҇тѣ̀ ви́сѧща хрⷭ҇тѐ . сл҃нце ѡ҆мрача́шесѧ , и҆ землѝ ѡ҆снᲂва́нїѧ трѧса́хꙋсѧ , всѧ̀ с̾ тᲂбо́ю сᲂстрада́хꙋ , и҆́же всѧ̀ сᲂзда́вшимъ . во́лею на́съ ра́ди претерпѣ́выи , гдⷭ҇и сла́ва тебѣ̀ .

сти́хъ : гла́съ , в҃ . раздѣли́ша ри́зы мᲂѧ̀ себѐ ,꙳ и҆ ѡ҆ ѻ҆де́жди мᲂе́й мета́ша жре́бїѧ . Лю́дїе ѕлᲂчести́вїи и҆ без̾зако́ннїи , в̾скꙋ́ю пᲂꙋча́ютсѧ тще́тнымъ , пᲂчто̀ живᲂта̀ всѣ́хъ , сме́ртїю ѡ҆сꙋди́ша ; ве́лїе чꙋ́до , ꙗ҆́кѡ зижди́тель ми́рꙋ , в̾ рꙋ́цѣ без̾зако́нныхъ предае́тсѧ , и҆ на́ древо вᲂз̾выша́етсѧ ꙗ҆́кѡ чл҃кᲂлю́бецъ . да и҆́же во а҆́дѣ ᲂу҆́зники свᲂбᲂди́тъ , вᲂпїю́щихъ , дᲂлгᲂтерпѣли́ве гдⷭ҇и сла́ва тебѣ̀ .

сти́хъ : да́ша в̾ снѣ́дь мᲂю̀ же́лчь ,꙳ и҆ в̾ жа́ждꙋ мᲂю̀ напᲂи́ша мѧ ѻ҆цта̀ . На́ древѣ ви́дѧщи ви́сѧща хрⷭ҇тѐ , тебѐ всѣ́хъ зижди́телѧ и҆ бг҃а , ꙗ҆́же тебѐ без̾ сѣ́мене ро́ждьшаѧ , вᲂпїѧ́ше го́рькѡ , сн҃е мо́й , гдѣ̀ дᲂбро́та за́йде зра́ка твᲂегѡ̀ ; нетерплю̀ зрѣ́ти тѧ , непра́веднѡ распина́ема . ᲂу҆скᲂрѝ ᲂу҆́бѡ и҆ вᲂскр҃снѝ , ꙗ҆́кѡ да ви́жꙋ и҆ а҆́зъ твᲂѐ и҆з̾ ме́ртвыхъ вᲂскрⷭ҇нїе .

сти́хъ : бг҃ъ же цр҃ь на́шъ пре́жде вѣ́къ ,꙳ сᲂдѣ́ла спасе́нїе пᲂсредѣ̀ землѝ . Дне́сь зрѧ́щи тѧ непᲂро́чнаѧ дв҃а на крⷭ҇тѣ̀ , прᲂсте́рта сло́ве , рыда́ющи мт҃рьски ᲂу҆тро́бᲂю , снѣда́шесѧ срⷣцемъ го́рцѣ , и҆ стᲂнѧ́щи бᲂлѣ́зненѡ и҆з̾ глꙋбины̀ дꙋшѝ , вла́сы прᲂсте́рши рыда́ше . тѣ́мже и҆ пе́рси бїю́щи , взыва́ше жа́лᲂстнѣ , ᲂу҆вы̀ мнѣ̀ бжⷭ҇твенᲂе ча́до . ᲂу҆вы̀ мнѣ̀ свѣ́те ми́рꙋ , ка́кѡ за́йде ѿ ѻ҆́чїю мᲂе́ю а҆́гньче бж҃їи . тѣ́мже во́инства беспло́тныхъ . тре́петᲂмъ ѡ҆держи́ми бѣ́ѧхꙋ гл҃юще , непᲂсти́жиме гдⷭ҇и сла́ва тебѣ̀ . сла́ва . гла́съ , и҃ . Гдⷭ҇и вᲂсхᲂдѧ́щꙋ ти на́ крⷭ҇тъ , стра́хъ и҆ тре́петъ нападѐ тва́ри . и҆ землѝ ᲂу҆́бѡ вᲂз̾бранѧ́лъ є҆сѝ , пᲂглᲂти́ти распина́ющихъ тѧ̀ , а҆́дꙋ же пᲂвелѣва́лъ є҆сѝ и҆спꙋсти́ти ᲂу҆́зники , на ѡ҆бнᲂвле́нїе чл҃кѡмъ , сꙋдїѐ живы́мъ и҆ ме́ртвымъ , жи́знь прише́лъ є҆сѝ пᲂда́ти а҆ не сме́рть , дᲂлгᲂтерпѣли́ве гдⷭ҇и сла́ва тебѣ̀ . и҆ нн҃ѣ . гла́съ , то́йже . Оу҆́же ѡ҆мака́етсѧ тро́сть ѡ҆сꙋжде́нїѧ , ѿ сꙋде́й непра́ведныхъ . и҆ і҆с҃ъ сꙋди́мь быва́ше , и҆ ѡ҆сꙋжда́етсѧ на распѧ́тїе , и҆ стра́ждетъ тва́рь , на крⷭ҇тѣ̀ ви́дѧщи тѧ̀ гдⷭ҇а . но и҆́же є҆стество́мъ тѣлесѐ , менѐ ра́ди стражда̀ пребл҃гі́и , гдⷭ҇и сла́ва тебѣ̀ .

та́же , дїа́кᲂнъ : и҆ ѡ҆спᲂдо́битисѧ на́мъ . є҆ѵⷢ҇а́лїе , в҃і . ѿ матѳе́ѧ . заⷱ҇ , рд҃і . во ᲂу҆́трѣи же де́нь є҆́же є҆́сть по пѧтцѣ̀ . кᲂне́ц̾ : и҆ зна́менаша гро́бъ с̾ кꙋстᲂді́ею . та́же , бл҃го є҆́сть и҆спᲂвѣ́датисѧ гдⷭ҇ви .= трист҃о́е , и҆ по ѻ҆́ч҃е на́шъ . =трᲂпа́рь . гла́съ , д҃ . И҆скꙋпи́лъ ны є҆сѝ ѿ клѧ́твы зако́нныѧ , честно́ю сѝ кро́вїю , на крⷭ҇тѣ̀ пригвᲂзди́сѧ , и҆ кᲂпїе́мъ прᲂбᲂде́сѧ , без̾сме́ртїе и҆стᲂчи́лъ є҆сѝ чл҃кѡмъ . сп҃се на́шъ сла́ва тебѣ̀ . пᲂсе́мъ , є҆ктенїѧ̀ : пᲂми́лꙋй на́съ бж҃е . честнѣ́йшꙋю херꙋви́мъ .= и҆ ѿпꙋ́стъ .=

пе́рвыи же ча́съ не присᲂвᲂкꙋплѧ́емъ .

Причасѣ́же , в҃ мъ , днѝ . кле́плетъ , в̾ ма́лᲂе . и҆ сᲂбра́вшесѧ въ цр҃кᲂвь . і҆єре́й ѡ҆блачи́тсѧ в̾ патрахи́ль и҆ в̾ ѳело́нь . дїа́кᲂнъ же в̾ стиха́рь . пᲂе́мъ , а҃ , ча́съ . начина́етъ , і҆єре́й : блгⷭ҇ве́нъ бг҃ъ на́шъ . и҆ мы̀ : а҆ми́нь . цр҃ю нбⷭ҇ныи . трⷭ҇то́е . и҆ по ѻ҆́ч҃е на́шъ . гдⷭ҇и пᲂми́лꙋй , в҃і . сла́ва , и҆ ны́нѣ . прїиди́те пᲂклᲂни́мсѧ , гⷤ .= та́же , ѱало́мъ , є҃ . Г=л҃ы мᲂѧ̀ внꙋшѝ гдⷭ҇и , разꙋмѣ́й зва́нїе мᲂѐ . вᲂньмѝ гла́съ мл҃твы мᲂеѧ̀ , цр҃ю мо́й и҆ бж҃е мо́й . ꙗ҆́кѡ к̾ тебѣ̀ пᲂмᲂлю́сѧ гдⷭ҇и , заꙋ́тра ᲂу҆слы́ши гла́съ мо́й . заꙋ́тра пред̾ста́нꙋ тѝ и҆ ᲂу҆́зриши мѧ̀ , ꙗ҆́кѡ бг҃ъ нехᲂтѧ́и без̾зако́нїе , ты̀ є҆сѝ . не прїи́детъ к̾ тебѣ̀ лꙋка́внꙋѧи , ни пребꙋ́дꙋтъ же закᲂнᲂпрестꙋ́пницы , пред̾ ѻ҆чи́ма твᲂи́ма . вᲂз̾ненави́дѣлъ є҆сѝ всѧ̀ твᲂрѧ́щїѧ без̾зако́нїе , пᲂгꙋби́ши всѧ̀ гл҃ющїѧ лжꙋ̀ . мꙋ́жа кро́ви и҆ льсти́ва гнꙋша́етсѧ гдⷭ҇ь . а҆́зъ же мно́жествᲂмъ млⷭ҇ти твᲂеѧ̀ , в̾ни́дꙋ в̾ до́мъ тво́й , пᲂклᲂню́сѧ къ цр҃кви ст҃ѣ́й твᲂе́й в̾ стра́сѣ твᲂе́мъ . гдⷭ҇и , наста́ви мѧ пра́вдᲂю твᲂе́ю , вра́гъ мᲂи́хъ ра́ди и҆спра́ви пред̾ сᲂбо́ю пꙋ́ть мо́й . ꙗ҆́кѡ нѣ́сть во ᲂу҆стѣ́хъ и҆́хъ и҆́стины , срⷣце и҆́хъ сꙋ́етно . гро́бъ ѿве́рстъ гᲂрта́нь и҆́хъ , ꙗ҆зы́ки свᲂи́ми льща́хꙋ , сꙋдѝ и҆́мъ бж҃е . да ѿпадꙋ́тъ ѿ мы́слей свᲂи́хъ , по мно́жествꙋ нече́стїѧ и҆́хъ и҆зри́ни ѧ҆̀ , ꙗ҆́кѡ прᲂгнѣ́ваша тѧ̀ гдⷭ҇и . и҆ вᲂз̾веселѧ́тсѧ всѝ ᲂу҆пᲂва́ющїи на тѧ̀ , во́ вѣки вᲂз̾ра́дꙋютсѧ , и҆ всели́шисѧ в̾ ни́хъ . и҆ пᲂхва́лѧтсѧ ѡ҆ тебѣ̀ лю́бѧщїи и҆́мѧ твᲂѐ , ꙗ҆́кѡ ты̀ бл҃гᲂслᲂви́ши пра́ведника . гдⷭ҇и ꙗ҆́кѡ ѻ҆рꙋ́жїемъ бл҃гᲂвᲂле́нїѧ вѣнча́лъ є҆сѝ на́съ .

ѱало́мъ , в҃ . Вскꙋ́ю шата́шасѧ ꙗ҆зы́цы , и҆ лю́дїе пᲂꙋчи́шасѧ тще́тнымъ . пред̾ста́ша цр҃їе зе́мстїи . и҆ кнѧ́зи сᲂбра́шасѧ в̾кꙋ́пѣ , на́ гдⷭ҇а и҆ на хрⷭ҇та̀ є҆гѡ̀ . расто́ргнемъ ᲂу҆́зы и҆́хъ , и҆ ѿве́ржемъ ѿ на́съ и҆́го и҆́хъ . живы́и на́ нб҃сѣхъ пᲂсмѣе́тсѧ и҆́мъ , и҆ гдⷭ҇ь пᲂрꙋга́етсѧ и҆́мъ . тᲂгда̀ вᲂз̾гл҃етъ к̾ ни́мъ гнѣ́вᲂмъ свᲂи́мъ , и҆ ꙗ҆́рᲂстїю свᲂе́ю смꙋти́тъ ѧ҆̀ . а҆́зъ же пᲂста́вленъ є҆́смь цр҃ь ѿ негѡ̀ . над̾ сїѡ́нᲂмъ гᲂро́ю ст҃о́ю є҆гѡ̀ , вᲂз̾вѣща́ѧ пᲂвелѣ́нїе гдⷭ҇не . гдⷭ҇ь речѐ ко мнѣ̀ , сн҃ъ мо́й є҆сѝ ты̀ , а҆́зъ дне́сь рᲂди́хъ тѧ̀ . прᲂсѝ ѿ менѐ , и҆ да́мъ тѝ ꙗ҆зы́ки дᲂстᲂѧ́нїе твᲂѐ , и҆ ѡ҆держа́нїе твᲂѐ кᲂнцы̀ землѝ . ᲂу҆пасе́ши ѧ҆̀ па́лицею желѣ́знᲂю , ꙗ҆́кѡ сᲂсꙋ́ды скꙋде́льнича сᲂкрꙋши́ши ѧ҆̀ . и҆ ны́нѣ ца́рїе разꙋмѣ́йте , накажи́тесѧ всѝ сꙋдѧ́щїи землѝ . рабо́тайте гдⷭ҇ви со́страхᲂмъ , и҆ ра́дꙋйтесѧ є҆мꙋ̀ с̾ тре́петᲂмъ . прїимѣ́те наказа́нїе , да некᲂгда̀ прᲂгнѣ́ваетсѧ гдⷭ҇ь , и҆ пᲂги́бнете ѿ пꙋтѝ пра́веднагѡ , є҆гда̀ вᲂз̾гᲂри́тсѧ в̾ско́рѣ ꙗ҆́рᲂсть є҆гѡ̀ , бл҃же́ни всѝ надѣ́ющїисѧ на́нь .

ѱало́мъ , к҃а . Бж҃е бж҃е мо́й вᲂньми́ ми , въскꙋ́ю ѡ҆ста́ви мѧ . дале́че ѿ спасе́нїѧ мᲂегѡ̀ , слᲂвеса̀ грѣхᲂпаде́нїи мᲂи́хъ . бж҃е мо́й вᲂз̾зᲂвꙋ̀ во́ днехъ и҆ не ᲂу҆слы́шиши , и҆ в̾ нᲂщѝ и҆ не в̾ безꙋ́мїе мнѣ̀ . ты́же во ст҃ѣ́мъ живе́ши хвала̀ і҆и҃лева . натѧ̀ ᲂу҆пᲂва́ша ѻ҆ц҃ы на́ши . ᲂу҆пᲂва́ша , и҆ и҆зба́вилъ є҆сѝ и҆́хъ . къ тебѣ̀ вᲂз̾ва́ша и҆ спасо́шасѧ , натѧ̀ ᲂу҆пᲂва́ша и҆ не пᲂстыдѣ́шасѧ . а҆́зъ же є҆́смь че́рвь , а҆ не чл҃къ . пᲂнᲂше́нїе чл҃кѡмъ , и҆ ᲂу҆ничиже́нїе лю́демъ . всѝ ви́дѧщїи мѧ̀ пᲂрꙋга́шамисѧ гл҃аша ᲂу҆стна́ми , пᲂкива́ша главꙋ̀ . ᲂу҆пᲂва̀ на́ гдⷭ҇а , да и҆зба́витъ и҆̀ , да спасе́тъ є҆гѡ̀ ꙗ҆́кѡ хо́щетъ є҆гѡ̀ . ꙗ҆́кѡ ты̀ є҆сѝ и҆сто́ргїи мѧ и҆́з̾ чрева . ᲂу҆пᲂва́нїе мᲂѐ ѿ сᲂсцꙋ̀ мт҃ре мᲂеѧ̀ . къ тебѣ̀ приве́рженъ є҆́смь ѿ лᲂже́снъ , ѿ́ чрева мт҃ре мᲂеѧ̀ . бг҃ъ мо́й є҆сѝ ты̀ , не ѿстꙋпѝ ѿ менѐ . ꙗ҆́кѡ ско́рбь бли́зъ , ꙗ҆́кѡ нѣ́сть пᲂмᲂга́ющагѡ мѝ . ѡ҆быдо́ша мѧ тельцы̀ мно́зи , ю҆́ньцы тꙋ́чнїи ѡ҆держа́ша мѧ . ѿверзо́ша на мѧ̀ ᲂу҆ста̀ свᲂѧ̀ , ꙗ҆́кѡ ле́въ вᲂсхища́ѧи и҆ рыка́ѧи . ꙗ҆́кѡ вᲂда̀ и҆злїѧ́сѧ , и҆ разсы́пашасѧ всѧ̀ ко́сти мᲂѧ̀ . бы́сть срⷣце мᲂѐ , ꙗ҆́кѡ во́скъ та́ѧ пᲂсредѣ̀ чре́ва мᲂегѡ̀ . и҆́з̾сше ꙗ҆́кѡ скꙋде́ль крѣ́пᲂсть мᲂѧ̀ , и҆ ꙗ҆зы́къ мо́й прильпѐ гᲂрта́ни мᲂемꙋ̀ , и҆ въ пе́рсть сме́рти све́лъ мѧ є҆сѝ . ꙗ҆́кѡ ѡ҆быдо́ша мѧ псѝ мно́зи , со́нмъ лꙋка́выхъ ѡ҆держа́ша мѧ . и҆скᲂпа́ша рꙋ́цѣ мᲂѝ и҆ но́зѣ мᲂѝ , и҆счето́ша всѧ̀ ко́сти мᲂѧ̀ . ті́и же смᲂтри́ша , и҆ презрѣ́ша мѧ . раздѣли́ша ри́зы мᲂѧ̀ себѣ̀ , и҆ ѡ҆ ѻ҆де́жди мᲂе́й мета́ша жре́бїѧ . ты́же гдⷭ҇и не ᲂу҆да́ли по́мᲂщь твᲂю̀ ѿ менѐ , на застꙋпле́нїе мᲂѐ вᲂнмѝ . и҆змѝ ѿ ѻ҆рꙋ́жїѧ дш҃ꙋ мᲂю̀ , и҆ и҆з̾ рꙋкѝ пе́сїѧ є҆динᲂро́днꙋю мᲂю̀ . спаси́ мѧ ѿ ᲂу҆́стъ льво́въ , и҆ ѿ ро́гъ є҆динᲂро́жь смире́нїе мᲂѐ . пᲂвѣ́мъ и҆́мѧ твᲂѐ бра́тїи мᲂе́й , пᲂсредѣ̀ цр҃кве вᲂспᲂю́ тѧ . бᲂѧ́щїисѧ гдⷭ҇а вᲂсхвали́те и҆̀ , всѐ сѣ́мѧ і҆а́кѡвле , прᲂсла́вите є҆гѡ̀ . да ᲂу҆бᲂи́тъжесѧ ѿ негѡ̀ всѐ сѣ́мѧ і҆и҃лево , ꙗ҆́кѡ не ᲂу҆ничижѝ ни негᲂдᲂва̀ мл҃твы ни́щагѡ . ни ѿврати́ же лица̀ свᲂегѡ̀ ѿ менѐ . и҆ є҆гда̀ вᲂз̾ва́хъ к̾ немꙋ̀ , ᲂу҆слы́ша мѧ̀ . ѿ тебѣ̀ пᲂхвала̀ мᲂѧ̀ , въ цр҃кви вели́цѣ и҆спᲂвѣ́мсѧ тебѣ̀ , мᲂли́твы мᲂѧ̀ вᲂз̾да́мъ пред̾ бᲂѧ́щимисѧ є҆гѡ̀ . ꙗ҆дѧ́тъ ни́щїи , и҆ насы́тѧтсѧ , и҆ вᲂсхва́лѧтъ гдⷭ҇а взыска́ющїи є҆гѡ̀ , жива̀ бꙋ́дꙋтъ срⷣца̀ и҆́хъ в̾ вѣ́къ вѣ́ка . пᲂмѧнꙋ́тсѧ и҆ ѡ҆братѧ́тсѧ ко́ гдⷭ҇ꙋ всѝ кᲂнцы̀ землѝ , и҆ пᲂкло́нѧтсѧ пред̾ ни́мъ всѧ̀ ѻ҆те́чествїѧ ꙗ҆зы́къ . ꙗ҆́кѡ гдⷭ҇не є҆́сть црⷭ҇твїе , и҆ то́й ѡ҆блада́етъ ꙗ҆зы́ки . ꙗ҆до́ша и҆ пᲂклᲂни́шасѧ всѝ тꙋ́чнїи землѝ . пред̾ ни́мъ припадꙋ́тъ всѝ низ̾хᲂдѧ́щїи в̾ зе́млю . и҆ дш҃а мᲂѧ̀ тᲂмꙋ̀ живе́тъ , и҆ сѣ́мѧ мᲂѐ пᲂрабо́таетъ є҆мꙋ̀ . вᲂз̾вѣсти́тъ гдⷭ҇ви ро́дъ грѧдꙋ́щїи , и҆ вᲂз̾вѣстѧ́тъ пра́вдꙋ є҆гѡ̀ лю́демъ ро́ждьшимсѧ , и҆́хъ же сᲂтвᲂрѝ гдⷭ҇ь .

сла́ва , и҆ ны́нѣ . а҆ллилꙋ́їѧ , гⷤ . гдⷭ҇и пᲂми́лꙋй , гⷤ . сла́ва . трᲂпа́рь , гла́съ , а҃ . Распе́ншꙋтисѧ хрⷭ҇тѐ , пᲂги́бе мꙋчи́тельство , и҆ пᲂпрана̀ бы́сть си́ла вра́жїѧ . ни а҆́нг҃лъ бо ни челᲂвѣ́къ , но ты̀ са́мъ гдⷭ҇и спа́слъ є҆сѝ на́съ , сла́ва тебѣ̀ . и҆ ны́нѣ , боⷢ҇ . Что́ тѧ нарече́мъ ѽ ѡ҆бра́дᲂваннаѧ ; нб҃о , ꙗ҆́кѡ вᲂсїѧ́ла є҆сѝ сл҃нце пра́вды . ра́й , ꙗ҆́кѡ вᲂз̾расти́ла є҆сѝ цвѣ́тъ нетлѣ́нїѧ . дв҃ꙋ , ꙗ҆́кѡ пребыла̀ є҆сѝ нетлѣ́нна . чⷭ҇тꙋю мт҃рь , ꙗ҆́кѡ и҆мѣ́ла є҆сѝ на рꙋкꙋ̀ сн҃а всѣ́хъ бг҃а . тᲂгѡ̀ мᲂлѝ спасти́сѧ дш҃а́мъ на́шимъ .

та́же , стихѣ́ры . гла́съ , и҃ . Дне́сь цр҃ко́внаѧ за́вѣса , раздра́сѧ на ѡ҆бличе́нїе без̾зако́ннымъ . и҆ сл҃нце лꙋчѝ свᲂѧ̀ скрыва́етъ , влⷣкꙋ зрѧ̀ распина́ема . два́жды .

сти́хъ : раздѣли́ша ри́зы мᲂѧ̀ себѐ ,꙳ и҆ ѡ҆ ѻ҆де́жди мᲂе́й мета́ша жре́бїѧ . Ꙗ҆́кѡ ѻ҆вча̀ на закᲂле́нїе веде́нъ бы́сть хрⷭ҇тѐ цр҃ю . и҆ ꙗ҆́кѡ а҆́гнецъ непᲂро́ченъ пригвᲂзди́сѧ на крⷭ҇тѣ̀ ѿ без̾зако́нныхъ мꙋже́й , грѣ́хъ ра́ди на́шихъ чл҃кᲂлю́бче .

сти́хъ : да́ша в̾ снѣ́дь мᲂю̀ же́лчь ,꙳ и҆ в̾ жа́ждꙋ мᲂю̀ напᲂи́ша мѧ ѻ҆цта̀ . и҆ =па́ки , тꙋ́же , стⷯрꙋ . =сла́ва . гла́съ , и҃ . И҆́м̾шимъ тѧ̀ без̾зако́нникᲂм̾ , терпѧ̀ си́це вᲂпїѧ́ше гдⷭ҇и , а҆́ще и҆ пᲂрази́сте па́стырѧ , и҆ растᲂчи́сте двана́десѧте ѻ҆ве́цъ ᲂу҆ченикѝ мᲂѧ̀ , мᲂжа́хъ бо бо́лїи , двана́десѧте легеѡ́на пред̾ста́вити а҆́нг҃лъ . но дᲂлгᲂтерплю̀ , да сᲂверша́тсѧ ꙗ҆́же гл҃ахъ ва́мъ прⷪ҇рки мᲂи́ми , без̾вѣ́стнаѧ и҆ та́йнаѧ , гдⷭ҇и сла́ва тебѣ̀ . и҆ ны́нѣ , то́йже . та́же , прᲂки́менъ . гла́съ , д҃ . срⷣце є҆гѡ̀ сᲂбра̀ без̾зако́нїе себѣ̀ . сти́хъ : бл҃же́нъ разꙋмѣва́ѧи на ни́ща и҆ ᲂу҆бо́га .

ѿ прⷪ҇рчества заха́рїина , чте́нїе .

Та́кѡ гл҃етъ гдⷭ҇ь , прїимꙋ̀ же́злъ мо́й до́брыи . и҆ ѿве́ргꙋ разᲂри́ти завѣ́тъ мо́й , є҆го́же завѣща́хъ ко всѣ́мъ лю́демъ земны́мъ , и҆ разᲂри́тсѧ въ де́нь ѻ҆́нъ . и҆ разꙋмѣ́ютъ всѝ ханане́и , ѻ҆́вцы храни́мыѧ мнѣ̀ , занѐ сло́во гдⷭ҇не є҆́сть . и҆ рекꙋ̀ к̾ ни́мъ , а҆́ще дᲂбро̀ пред̾ ва́ми є҆́сть , дади́те цѣ́нꙋ мᲂю̀ , и҆лѝ ѿрецы́тесѧ . и҆ пᲂста́виша цѣ́нꙋ мᲂю̀ три́десѧть сре́бреникъ . и҆ речѐ гдⷭ҇ь ко мнѣ̀ , в̾ве́рзи и҆́хъ в̾ гᲂрни́ло , и҆ смᲂтрѝ а҆́ще и҆скꙋ́снѡ є҆́сть , и҆́мже ѻ҆́бразᲂмъ и҆скꙋше́нъ бы́хъ ѡ҆ ни́хъ . и҆ прїѧ́хъ три́десѧть сре́бреникъ , и҆ влᲂжи́хъ и҆́хъ въ хра́мъ гдⷭ҇нь в̾ гᲂрни́ло , ꙗ҆́кᲂже пᲂвелѣ́ ми гдⷭ҇ь . и҆ ѿврати́хъ же́злъ мо́й втᲂры́и . мѣ́рило , є҆́же разꙋмѣ́ти завѣ́тъ , междꙋ̀ і҆ꙋ́дᲂю , и҆ междꙋ̀ і҆и҃лемъ . и҆ во́зрѧтъ на́нь є҆го́же прᲂбᲂдо́ша . и҆ речѐ гдⷭ҇ь , что̀ ра́ны сїѧ̀ пᲂсредѣ̀ рꙋ́къ твᲂи́хъ . и҆ речѐ , и҆́миже ᲂу҆ра́нихсѧ в̾ дᲂмꙋ̀ вᲂз̾лю́бленагѡ мᲂегѡ̀ . ѻ҆рꙋ́жїе и҆зы́детъ на па́стырѧ мᲂегѡ̀ , и҆ на́ мꙋжа ѿ кᲂлѣ́на мᲂегѡ̀ . гл҃етъ гдⷭ҇ь вседержи́тель . пᲂражꙋ̀ па́стырѧ , и҆ разы́дꙋтсѧ ѻ҆́вцы . и҆ прᲂстрꙋ̀ рꙋ́кꙋ мᲂю̀ и҆ на ма́лыѧ па́стыри . во ѻ҆́нже де́нь небꙋ́детъ свѣ́та , и҆ зима̀ и҆ мра́зъ бꙋ́детъ во є҆ди́нъ де́нь . и҆ де́нь то́й зна́емъ бꙋ́детъ гдⷭ҇ви , и҆ ни де́нь ни но́щь . и҆ к̾ ве́черꙋ бꙋ́детъ свѣ́тъ . и҆ в̾ де́нь ѻ҆́нъ и҆зы́детъ вᲂда̀ жива̀ и҆з̾ і҆єрⷭ҇ли́ма . и҆ по́лъ є҆ѧ̀ в̾ мо́ре пе́рвᲂе , и҆ по́лъ є҆ѧ̀ в̾ мо́ре пᲂслѣ́днее , в̾ жа́твꙋ и҆ в̾ ве́снꙋ бꙋ́детъ та́кѡ . и҆ бꙋ́детъ гдⷭ҇ь цр҃ь по все́й землѝ . в̾ де́нь ѻ҆́нъ бꙋ́детъ гдⷭ҇ь є҆ди́нъ , и҆ и҆́мѧ є҆гѡ̀ є҆ди́но ѡ҆крꙋжа́ѧ всю̀ зе́млю , и҆ пꙋсты́ни . и҆ бꙋ́детъ и҆́же во ᲂу҆здꙋ̀ кᲂню̀ , ст҃о гдⷭ҇ви вседержи́телю , и҆ небꙋ́детъ ханане́й к̾ тᲂмꙋ̀ во́ храмѣ гдⷭ҇а вседержи́телѧ , в̾ де́нь ѻ҆́нъ .

та́же , а҆пⷭ҇лъ , къ гала́тѡмъ . заⷱ҇ , сє҃і . ѿ пᲂлꙋ̀ . Бра́тїе мнѣ̀ да небꙋ́детъ хвали́тисѧ , то́кмѡ ѡ҆ крⷭ҇тѣ̀ гдⷭ҇а на́шегѡ і҆с҃а хрⷭ҇та̀ и҆́мже мнѣ̀ ве́сь ми́ръ распѧ́сѧ , и҆ а҆́зъ всемꙋ̀ ми́рꙋ . ѡ҆ хрⷭ҇тѣ́ бо і҆с҃е , ни ѡ҆брѣ́занїе что̀ мо́жетъ , ни не ѡ҆брѣ́занїе , но нᲂва̀ тва́рь . и҆ є҆ли́цы пра́вилᲂмъ си́мъ жи́тельствꙋютъ , ми́ръ на ни́хъ и҆ млⷭ҇ть , на і҆и҃ли бж҃їи . про́чее же трꙋды̀ да никто́же ми дае́тъ , а҆́зъ бо ꙗ҆́звы гдⷭ҇а і҆с҃а на́ тѣлѣ мᲂе́мъ нᲂшꙋ̀ . бл҃гᲂда́ть гдⷭ҇а на́шегѡ і҆с҃а хрⷭ҇та̀ с̾ дх҃ᲂмъ ва́шимъ бра́тїе , а҆ми́нь .

та́же , є҆ѵⷢ҇а́лїе , ѿ матѳе́ѧ . заⷱ҇ , р҃і . Во́ времѧ ѻ҆́но , ᲂу҆́трꙋ бы́вшꙋ , сᲂвѣ́тъ сᲂтвᲂри́ша всѝ а҆рхїєре́е и҆ ста́рцы людсті́и на і҆с҃а , ꙗ҆́кѡ ᲂу҆би́ти є҆гѡ̀ . и҆ свѧза́вше є҆гѡ̀ ведо́ша , и҆ преда́ша є҆гѡ̀ пᲂнті́йскᲂмꙋ пила́тꙋ и҆ге́мᲂнꙋ . Тᲂгда̀ ви́дѣвъ і҆ꙋ́да преда́выи є҆гѡ̀ , ꙗ҆́кѡ ѡ҆сꙋди́ша є҆гѡ̀ , раска́ѧвсѧ , вᲂз̾вратѝ три́десѧте сре́бреники а҆рхїєре́ѡмъ и҆ ста́рцемъ , глаго́лѧ , сᲂгрѣши́хъ , преда́въ кро́вь непᲂви́ннꙋю . ѻ҆ни́же рѣ́ша , что̀ є҆́сть на́мъ , ты̀ ᲂу҆́зриши . и҆ пᲂве́ргъ сре́бреники въ цр҃кви , ѿи҆́де , и҆ ше́дъ ᲂу҆дави́сѧ . а҆рхїєре́е же прїе́мше сре́бреники , рѣ́ша , недᲂсто́йнѡ є҆́сть влᲂжи́ти и҆́хъ в̾ кᲂрва́нꙋ , пᲂне́же цѣна̀ кро́ве є҆́сть . сᲂвѣ́тъ же сᲂтво́рше , кꙋпи́ша и҆́ми село̀ скꙋде́льниче , в̾ пᲂгреба́нїе стра́ннымъ . тѣ́мже нарече́сѧ село̀ то̀ , село̀ кро́ве , до сегѡ̀ днѐ . тᲂгда̀ сбы́стсѧ рече́нᲂе і҆єремі́емъ прⷪ҇ро́кᲂмъ гл҃ющемъ . и҆ прїѧ́ша три́десѧте сре́бреникъ , цѣ́нꙋ цѣне́нагѡ , є҆го́же цѣни́ша ѿ сн҃ѡ́въ і҆зра́илевъ , и҆ да́ша ѧ҆̀ на селѣ̀ скꙋде́льничи , ꙗ҆́кᲂже сказа̀ мнѣ̀ гдⷭ҇ь . і҆с҃ъ же ста̀ пред̾ и҆ге́мᲂнᲂмъ , и҆ вᲂпрᲂсѝ є҆гѡ̀ и҆ге́мᲂнъ гл҃ѧ , ты́ли є҆сѝ цр҃ь і҆ꙋде́йскїи ; і҆с҃ъ же речѐ є҆мꙋ̀ , ты̀ гл҃еши . и҆ є҆гда̀ на́нь гл҃ахꙋ а҆рхїєре́е и҆ ста́рцы , ничесо́же ѿвѣщава́ше . тᲂгда̀ гл҃а є҆мꙋ̀ пила́тъ , неслы́шиши ли , кᲂли́кѡ натѧ̀ свидѣ́тельствꙋютъ ; и҆ не ѿвѣща̀ є҆мꙋ̀ ни к̾ є҆ди́нᲂмꙋ гл҃ꙋ , ꙗ҆́кѡ диви́тисѧ и҆ге́мᲂнꙋ ѕѣлѡ̀ . на всѧ́къ же пра́здникъ ѻ҆бы́чай бѣ̀ и҆ге́мᲂнꙋ ѿпꙋща́ти є҆ди́нᲂго наро́дꙋ свѧ́знѧ , є҆го́же хᲂтѧ́хꙋ . и҆мѧ́хꙋ же тᲂгда̀ свѧ́зана наро́чита , гл҃емаго вара́вва . со́бранᲂмъ же и҆́мъ , речѐ и҆́мъ пила́тъ , кᲂго̀ хо́щете ѿ ѻ҆бᲂю̀ ѿпꙋщꙋ̀ ва́мъ , вара́ввꙋли , и҆лѝ і҆с҃а гл҃емаго хрⷭ҇та̀ ; вѣ́дѧше бо ꙗ҆́кѡ за́висти ра́ди преда́ша є҆гѡ̀ . сѣдѧ́щꙋ же є҆мꙋ̀ на сꙋди́щи , пᲂсла̀ к̾ немꙋ̀ жена̀ є҆гѡ̀ , гл҃ющи , ничто́же тебѣ̀ , и҆ пра́ведникꙋ тᲂмꙋ̀ , мно́гѡ бо пᲂстрада́хъ дне́сь во снѣ̀ є҆гѡ̀ ра́ди . а҆рхїєре́е же и҆ ста́рцы , наꙋсти́ша наро́ды , да и҆спро́сѧтъ вара́ввꙋ , і҆с҃а же пᲂгꙋбѧ́тъ . ѿвѣща́въ же и҆ге́мᲂнъ , речѐ и҆́мъ , кᲂго̀ хо́щете ѿ ѻ҆бᲂю̀ ѿпꙋщꙋ̀ ва́мъ ; ѻ҆ни́же рѣ́ша , вара́ввꙋ . глаго́ла и҆́мъ пила́тъ , что̀ ᲂу҆́бѡ сᲂтвᲂрю̀ і҆с҃ꙋ гл҃емᲂмꙋ хрⷭ҇тꙋ̀ . гл҃аша є҆мꙋ̀ всѝ , да ра́спѧтъ бꙋ́детъ . и҆ге́мᲂнъ же речѐ , ко́е ᲂу҆́бѡ ѕло̀ сᲂтвᲂрѝ ; ѻ҆ни́же и҆́злиха вᲂпїѧ́хꙋ глаго́люще , да про́пѧтъ бꙋ́детъ . ви́дѣвъ же пила́тъ , ꙗ҆́кѡ ничто́же ᲂу҆спѣва́етъ , но па́че мᲂлва̀ быва́етъ , прїе́мъ во́дꙋ , ᲂу҆мы̀ рꙋ́цѣ пред̾ наро́дᲂмъ , гл҃ѧ , непᲂви́ненъ є҆́смь ѿ́ крᲂве пра́веднагѡ сегѡ̀ , вы̀ ᲂу҆́зрите . и҆ ѿвѣща́вше всѝ лю́дїе , рѣ́ша , кро́вь є҆гѡ̀ на на́съ , и҆ на ча́дѣхъ на́шихъ . тᲂгда̀ ѿпꙋстѝ и҆́мъ вара́ввꙋ . і҆с҃а же би́въ преда́стъ и҆́мъ , да є҆гѡ̀ про́пнꙋтъ . Тᲂгда̀ во́ини и҆гѣ́мᲂнᲂви , прїе́мше і҆с҃а на сꙋди́щи , сᲂбра́ша на́нь всѐ мно́жество вѡ́инъ . и҆ сᲂвле́кше є҆гѡ̀ , ѡ҆дѣ́ѧша є҆гѡ̀ хлами́дᲂю червле́нᲂю . и҆ спле́тше вѣне́цъ ѿ те́рнїѧ , вᲂзлᲂжи́ша на главꙋ̀ є҆гѡ̀ . и҆ тро́сть въ десни́цꙋ є҆гѡ̀ . и҆ пᲂкло́ньшесѧ на кᲂлѣ́нꙋ пред̾ ни́мъ , рꙋга́хꙋсѧ є҆мꙋ̀ , глаго́люще , ра́дꙋисѧ цр҃ю і҆ꙋде́йскїи . и҆ плю́нꙋвше на́нь , прїѧ́ша тро́сть , и҆ бїѧ́хꙋ по главѣ̀ є҆гѡ̀ . и҆ є҆гда̀ пᲂрꙋга́шасѧ є҆мꙋ̀ , сᲂвлеко́ша с̾ негѡ̀ багрѧни́цꙋ , и҆ ѡ҆блеко́ша є҆гѡ̀ в̾ ри́зы є҆гѡ̀ , и҆ ведо́ша є҆гѡ̀ на прᲂпѧ́тїе . и҆схᲂдѧ́ще же , ѡ҆брѣто́ша чл҃ка кирине́йска , и҆́менемъ сі́мᲂна , и҆ семꙋ̀ задѣ́ша пᲂнестѝ крⷭ҇тъ є҆гѡ̀ . И҆ прише́дше на мѣ́сто нарица́емᲂе гᲂлго́ѳа , є҆́же є҆́сть глаго́лемо кра́нїево мѣ́сто , да́ша є҆мꙋ̀ , пи́ти ѻ҆це́тъ с̾ же́лчїю смѣ́шенъ . и҆ вкꙋ́шь , нехᲂтѧ́ше пи́ти . распе́нше же є҆гѡ̀ , раз̾дѣли́ша ри́зы є҆гѡ̀ , ве́ргше жре́бїѧ . и҆ сѣдѧ́ще стрежа́хꙋ є҆гѡ̀ тꙋ̀ . и҆ вᲂз̾лᲂжи́ша верхꙋ̀ главы̀ є҆гѡ̀ винꙋ̀ є҆гѡ̀ напи́санꙋ , се́й є҆́сть і҆с҃ъ цр҃ь і҆ꙋде́йскїи . тᲂгда̀ распѧ́ша с̾ ни́мъ два̀ разбо́йника , є҆ди́нᲂго ѡ҆деснꙋ́ю , и҆ є҆ди́нᲂго ѡ҆шꙋ́юю . Ми́мо хᲂдѧ́щїи же хꙋ́лѧхꙋ є҆гѡ̀ , пᲂкива́юще глава́ми свᲂи́ми , и҆ гл҃юще , разᲂрѧ́ѧи цр҃кᲂвь и҆ тремѝ дн҃ьми сᲂзида́ѧ , спаси́сѧ са́мъ . а҆́ще сн҃ъ є҆сѝ бж҃їи , сни́ди с̾ крⷭ҇та̀ ; та́кᲂжде же и҆ а҆рхїєре́е рꙋга́ющесѧ с̾ кни́жники и҆ ста́рцы и҆ фарисе́и , глаго́лахꙋ , и҆ны́ѧ спасѐ , себе́ ли немо́жетъ спастѝ ; а҆́ще цр҃ь і҆зра́илевъ є҆́сть , да сни́детъ ны́нѣ съ крⷭ҇та̀ , и҆ вѣ́рꙋемъ в̾ него̀ . ᲂу҆пᲂва̀ на́ бг҃а , да и҆зба́витъ нн҃ѣ є҆гѡ̀ , а҆́ще хо́щетъ є҆мꙋ̀ . рече́ бо , ꙗ҆́кѡ бж҃їи є҆́смь сн҃ъ . то́жде же и҆ разбо́йника распѧ́таѧ с̾ ни́мъ , пᲂнᲂша́ста є҆мꙋ̀ . ѿ шеста́гѡ же часа̀ , тма̀ бы́сть по все́й землѝ , до часа̀ девѧ́тагѡ . ѡ҆ девѧ́тᲂмъ же часѣ̀ , вᲂзᲂпѝ і҆с҃ъ гла́сᲂмъ ве́лїемъ , гл҃ѧ , и҆лѝ и҆лѝ , лима̀ савахѳа́ни ; є҆́же є҆́сть бж҃е мо́й бж҃е мо́й , вскꙋ́ю мѧ є҆сѝ ѡ҆ста́вилъ ; нѣ́цыи же ѿ тꙋ̀ стᲂѧ́щихъ ; слы́шавше , гл҃ахꙋ , ꙗ҆́кѡ и҆лїю̀ глаша́етъ се́й . и҆ а҆́бїе те́къ є҆ди́нъ ѿ ни́хъ , и҆ прїе́мъ гꙋ́бꙋ и҆спо́лнивъ же ѻ҆цта̀ , и҆ вᲂнзѐ на́ трᲂсть , напаѧ́ше є҆гѡ̀ . про́чїи же гл҃ахꙋ , ѡ҆ста́ви , да ви́димъ , а҆́ще прїи́детъ и҆лїѧ̀ спастѝ є҆гѡ̀ . і҆с҃ъ же па́ки вᲂзᲂпи́въ гла́сᲂмъ ве́лїемъ , и҆спꙋстѝ дх҃ъ . и҆ сѐ завѣ́са цр҃ко́внаѧ раздра́сѧ на́ двᲂе , с̾ вы́шнѧгѡ кра́ѧ до ни́жнѧгѡ . и҆ землѧ̀ пᲂтрѧсе́сѧ , и҆ ка́менїе распаде́сѧ , и҆ гро́би ѿверзо́шасѧ , и҆ мно́га тѣлеса̀ ᲂу҆со́пшихъ ст҃ы́хъ вᲂста́ша . и҆ и҆з̾ше́дше и҆з̾ грѡ́бъ по вᲂскрⷭ҇нїи є҆гѡ̀ , внидо́ша во ст҃ы́и гра́дъ , и҆ ꙗ҆ви́шасѧ мно́зѣмъ . со́тникъ же и҆ и҆́же с̾ ни́мъ стрегꙋ́щїи і҆с҃а , ви́дѣвше трꙋ́съ , и҆ бы́вшаѧ , ᲂу҆бᲂѧ́шасѧ ѕѣлѡ̀ , гл҃юще , вᲂи́стинꙋ бж҃їи сн҃ъ бѣ̀ се́й . Бѧ́хꙋже тꙋ̀ и҆ жены̀ мно́ги и҆з̾дале́че зрѧ́ще , и҆́же и҆до́ша по і҆с҃ѣ ѿ галиле́ѧ , слꙋжа́ще є҆мꙋ̀ . в̾ ни́хже бѣ̀ и҆ ма́рїѧ магдалы́ни , и҆ ма́рїѧ і҆а́кѡвлѧ , и҆ і҆ѡсі́и мт҃и . и҆ мт҃и сн҃ꙋ зеведе́ѡвꙋ .

та́же , Стᲂпы̀ мᲂѧ̀ напра́ви по слᲂвесѝ твᲂемꙋ̀ , и҆ да не ѡ҆дᲂлѣ́етъ ми всѧ́ко без̾зако́нїе . и҆зба́ви мѧ ѿ клеветы̀ чл҃ческїѧ , и҆ сᲂхраню̀ за́пᲂвѣди твᲂѧ̀ . лицѐ твᲂѐ прᲂсвѣтѝ на раба̀ твᲂегѡ̀ , и҆ наꙋчи́ мѧ ѡ҆правда́нїемъ твᲂи́мъ .

Да и҆спо́лнѧтсѧ ᲂу҆ста̀ мᲂѧ̀ пᲂхвалы̀ , ꙗ҆́кѡ да вᲂспᲂю̀ сла́вꙋ твᲂю̀ , ве́сь де́нь велелѣ́пᲂтꙋ твᲂю̀ .

трⷭ҇то́е , и҆ по ѻ҆́ч҃е на́шъ . кᲂнда́к̾ . гла́съ , и҃ . На́съ ра́ди распѧ́тагѡ , прїиди́те всѝ вᲂспᲂе́мъ . тᲂго́ бо ви́дѣвши мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , но ты̀ є҆сѝ сн҃ъ и҆ бг҃ъ мо́й .

гдⷭ҇и пᲂми́лꙋй , м҃ . пᲂсе́м̾ , мл҃твꙋ . и҆́же на всѧ́ко вре́мѧ . гдⷭ҇и пᲂми́лꙋй , гⷤ . сла́ва , и҆ ны́нѣ . чтⷭ҇нѣ́йшꙋю херꙋви́мъ . и҆́менемъ гдⷭ҇нимъ блгⷭ҇вѝ ѻ҆́ч҃е . і҆єре́й : за мл҃твъ ст҃ы́хъ ѻ҆ц҃ъ . та́же , мл҃твꙋ сїю̀ : Хрⷭ҇тѐ свѣ́те и҆́стинныи , и҆́же прᲂсвѣща́ѧ и҆ ѡ҆свѣща́ѧ всѧ́кᲂго челᲂвѣ́ка грѧдꙋ́щаго въ ми́ръ , да зна́менаетсѧ на на́съ свѣ́тъ лица̀ твᲂегѡ̀ гдⷭ҇и , ꙗ҆́кѡ да в̾ не́мъ хᲂдѧ́ще ᲂу҆́зримъ свѣ́тъ , неприкᲂснᲂве́нныѧ тѝ сла́вы , и҆спра́ви стᲂпы̀ на́ша , к̾ дѣ́ланїю за́пᲂвѣдей твᲂи́хъ , мл҃твами пречⷭ҇тыѧ тѝ мт҃ре , и҆ всѣ́хъ ст҃ы́хъ твᲂи́хъ , ꙗ҆́кѡ бл҃гᲂслᲂве́нъ є҆сѝ во́ вѣки , а҆ми́нь . и҆ ѿпꙋ́стъ .

та́же , ча́съ , г҃ . прїиди́те пᲂклᲂни́мсѧ , гⷤ .

ѱало́мъ , м҃ . Блаже́нъ разꙋмѣва́ѧи на ни́ща и҆ ᲂу҆бо́га , в̾ де́нь лю́тъ и҆зба́витъ и҆̀ гдⷭ҇ь . гдⷭ҇ь сᲂхрани́тъ и҆̀ и҆ живи́тъ и҆̀ , и҆ ᲂу҆блажи́тъ и҆̀ на землѝ , и҆ не преда́стъ є҆гѡ̀ в̾ рꙋ́ки врагѡ́мъ є҆гѡ̀ . гдⷭ҇ь пᲂмо́жетъ є҆мꙋ̀ на ѻ҆дрѣ̀ бᲂлѣ́зни є҆гѡ̀ , всѐ ло́же є҆гѡ̀ ѡ҆брати́лъ є҆сѝ в̾ бᲂлѣ́зни є҆гѡ̀ . а҆́зъ рѣ́хъ , гдⷭ҇и пᲂми́лꙋй мѧ , и҆сцѣлѝ дш҃ꙋ мᲂю̀ , ꙗ҆́кѡ сᲂгрѣши́хъ ти . вразѝ мᲂѝ рѣ́ша мнѣ̀ ѕла́ѧ , кᲂгда̀ ᲂу҆́мретъ и҆ пᲂги́бнетъ и҆́мѧ є҆гѡ̀ ; и҆ вхᲂжда́ше ви́дѣти , в̾сꙋ́е гл҃аше , срⷣце є҆гѡ̀ сᲂбра̀ без̾зако́нїе є҆мꙋ̀ . и҆схᲂжда́ше во́нъ , и҆ гл҃аше вкꙋ́пѣ . на мѧ̀ шепта́хꙋ всѝ вразѝ мᲂѝ , на мѧ̀ пᲂмышлѧ́хꙋ ѕла́ѧ мнѣ̀ . сло́во закᲂнᲂпрестꙋ́пно вᲂз̾лᲂжи́ша на мѧ̀ , є҆да̀ спѧ́и не прилᲂжи́тъ вᲂскре́снꙋ ти . и҆́бо чл҃къ ми́ра мᲂегѡ̀ на́нь же ᲂу҆пᲂва́хъ , ꙗ҆ды́и хлѣ́бы мᲂѧ̀ вᲂз̾вели́чи на мѧ̀ пѧ́тꙋ . ты́ же гдⷭ҇и пᲂми́лꙋй мѧ̀ и҆ вᲂз̾дви́гни мѧ̀ , и҆ вᲂз̾да́мъ и҆́мъ . ѡ҆ се́мъ пᲂзна́хъ ꙗ҆́кѡ вᲂсхᲂтѣ́ мѧ , ꙗ҆́кѡ не вᲂз̾ра́дꙋетсѧ вра́гъ мо́й ѡ҆ мнѣ̀ . мене́ же за не ѕло́бїе прїѧ́тъ , и҆ ᲂу҆тверди́лъ мѧ є҆сѝ пред̾ сᲂбо́ю в̾ вѣ́къ . бл҃гᲂслᲂве́нъ гдⷭ҇ь бг҃ъ і҆и҃левъ , ѿ́ вѣ́ка и҆ до́ вѣка , бꙋ́детъ бꙋ́детъ .

ѱало́мъ , ѯ҃и . Спаси́ мѧ бж҃е , ꙗ҆́кѡ внидо́ша во́ды до дꙋшѝ мᲂеѧ̀ . ᲂу҆глѣбо́хъ в̾ тимѣ́нїи глꙋбины̀ , и҆ нѣ́сть пᲂстᲂѧ́нїѧ . прїидо́хъ въ глꙋбины̀ мᲂрскі́ѧ , и҆ бꙋ́рѧ пᲂтᲂпи́ мѧ . ᲂу҆трꙋди́хсѧ зᲂвы̀ , и҆з̾мᲂлчѐ гᲂрта́нь мо́й . и҆счезо́стѣ ѻ҆́чи мᲂѝ , ᲂу҆пᲂва́ющꙋ мѝ на́ бг҃а мᲂегѡ̀ . ᲂу҆мно́жишасѧ па́че вла́съ главы̀ мᲂеѧ̀ , ненави́дѧщїи мѧ̀ в̾сꙋ́е . ᲂу҆крѣпи́шасѧ вразѝ мᲂѝ , и҆з̾гᲂнѧ́щїи мѧ без̾ пра́вды . ꙗ҆́же невᲂсхища́хъ , тᲂгда̀ вᲂз̾даѧ́хъ . бж҃е ты̀ ᲂу҆вѣ́дѣ безꙋ́мїе мᲂѐ , и҆ прегрѣше́нїѧ мᲂѧ̀ ѿ тебѐ не ᲂу҆таи́шасѧ . да не пᲂстыдѧ́тсѧ ѡ҆ мнѣ̀ терпѧ́щїи тебѐ гдⷭ҇и , гдⷭ҇и си́лъ . нижѐ пᲂсра́мѧтсѧ ѡ҆ мнѣ̀ и҆́щꙋщїи тебѐ бж҃е і҆и҃левъ . ꙗ҆́кѡ тебѐ ра́ди прїѧ́хъ пᲂнᲂше́нїе , пᲂкры̀ срамᲂта̀ лицѐ мᲂѐ . чꙋ́ждь бы́хъ бра́тїи мᲂе́й , и҆ стра́ненъ сн҃ᲂво́мъ ма́тере мᲂеѧ̀ . ꙗ҆́кѡ ре́внᲂсть до́мꙋ твᲂегѡ̀ снѣ́сть мѧ , и҆ пᲂнᲂше́нїе пᲂнᲂсѧ́щихъ тѝ , нападо́ша на мѧ̀ . и҆ пᲂкры́хъ пᲂстѡ́мъ дш҃ꙋ мᲂю̀ , и҆ бы́сть в̾ пᲂнᲂше́нїе мнѣ̀ . и҆ пᲂлᲂжи́хъ ѻ҆дѣѧ́нїе мᲂѐ вре́тище , и҆ бы́хъ и҆́мъ в̾ при́тчꙋ . ѡ҆ мнѣ̀ глꙋмлѧ́хꙋсѧ сѣдѧ́щїи во вратѣ́хъ , и҆ ѡ҆ мнѣ̀ пᲂѧ́хꙋ пїю́щїи вино̀ . а҆́зъ же мл҃твᲂю мᲂе́ю к̾ тебѣ̀ бж҃е , вре́мѧ бл҃гᲂвᲂле́нїѧ . бж҃е , во мно́жествѣ млⷭ҇ти твᲂеѧ̀ ᲂу҆слы́ши мѧ , вᲂи́стинѣ спасе́нїѧ твᲂегѡ̀ . спаси́ мѧ ѿ бре́нїѧ да не ᲂу҆глѣ́бнꙋ , и҆зба́ви мѧ ѿ ненави́дѧщихъ мѧ̀ , и҆ ѿ глꙋбо́кихъ во́дъ . да непᲂтᲂпи́тъ менѐ бꙋ́рѧ вᲂдна́ѧ , нижѐ пᲂжре́тъ менѐ глꙋбина̀ , нижѐ сведе́тъ ѡ҆ мнѣ̀ рᲂве́никъ ᲂу҆́стъ свᲂи́хъ . ᲂу҆слы́ши мѧ гдⷭ҇и , ꙗ҆́кѡ бл҃га млⷭ҇ть твᲂѧ̀ . по мно́жествꙋ щедро́тъ твᲂи́хъ при́зри на мѧ̀ . не ѿвратѝ лица̀ твᲂегѡ̀ ѿ ѻ҆́трᲂка твᲂегѡ̀ , ꙗ҆́кѡ скᲂрблю̀ , ско́рѡ ᲂу҆слы́ши мѧ . вᲂньмѝ дꙋшѝ мᲂе́й и҆ и҆зба́ви є҆ѧ̀ , вра́гъ мᲂи́хъ ра́ди и҆зба́ви мѧ . ты́ бо свѣ́си пᲂнᲂше́нїе мᲂѐ , и҆ стꙋ́дъ мо́й , и҆ срамᲂтꙋ̀ мᲂю̀ . пред̾ тᲂбо́ю всѝ стꙋжа́ющїи ми . пᲂнᲂше́нїе прича́ѧ дш҃а мᲂѧ̀ и҆ стра́сть . и҆ жда́хъ и҆́же со мно́ю пᲂскᲂрби́тъ , и҆ не бѣ̀ , и҆ ᲂу҆тѣша́ющихъ , и҆ не ѡ҆брѣто́хъ . и҆ да́ша в̾ снѣ́дь мᲂю̀ же́лчь , и҆ в̾ жа́ждꙋ мᲂю̀ напᲂи́ша мѧ ѻ҆цта̀ . да бꙋ́детъ трапе́за и҆́хъ пред̾ ни́ми в̾ сѣ́ть , и҆ в̾ вᲂз̾даѧ́нїе , и҆ в̾ сᲂбла́знъ . пᲂмрачи́тѣсѧ ѻ҆́чи и҆́хъ неви́дѣти , и҆ хребе́тъ и҆́хъ ѿ ню́дъ преклᲂнѝ . прᲂле́й на нѧ̀ гнѣ́въ тво́й , и҆ ꙗ҆́рᲂсть гнѣ́ва твᲂегѡ̀ пᲂсти́гнетъ и҆́хъ . да бꙋ́детъ дво́ръ и҆́хъ пꙋ́стъ , и҆ в̾ жили́щихъ и҆́хъ да небꙋ́детъ живꙋ́щагѡ . занѐ є҆го́же ты̀ пᲂразѝ , ті́и пᲂгна́ша . и҆ къ бᲂлѣ́зни ꙗ҆́звъ мᲂи́хъ прилᲂжи́ша . прилᲂжѝ без̾зако́нїе къ без̾зако́нїю и҆́хъ , и҆ да не вни́дꙋтъ в̾ пра́вдꙋ твᲂю̀ . да пᲂтребѧ́тсѧ ѿ кни́гъ живꙋ́щихъ , и҆ с̾ пра́ведными ненапи́шꙋтсѧ . ни́щь и҆ бᲂлѧ̀ є҆́смь а҆́зъ , спасе́нїе твᲂѐ бж҃е прїѧ́тъ мѧ . вᲂсхвалю̀ и҆́мѧ бг҃а мᲂегѡ̀ с̾ пѣ́снїю , и҆ вᲂз̾вели́чꙋ є҆гѡ̀ во хвале́нїи . и҆ ᲂу҆го́днѡ бꙋ́детъ бг҃ꙋ , па́че тельца̀ ю҆́на , ро́ги и҆здаю́ща и҆ па́знᲂкти . да ᲂу҆́зрѧтъ ни́щїи и҆ вᲂз̾веселѧ́тсѧ . взыщи́те бг҃а и҆ жива̀ бꙋ́детъ дш҃а ва́ша . ꙗ҆́кѡ ᲂу҆слы́ша ни́щїѧ гдⷭ҇ь , и҆ ѡ҆кᲂва́нныхъ свᲂи́хъ не ᲂу҆ничижи́тъ . да вᲂсхва́лѧтъ є҆гѡ̀ нб҃са̀ и҆ землѧ̀ , мо́ре , и҆ всѧ̀ живꙋ́щаѧ в̾ не́мъ . ꙗ҆́кѡ бг҃ъ спасе́тъ сїѡ́на , и҆ сᲂзи́ждꙋтсѧ гра́ди і҆ꙋде́йстїи , и҆ вселѧ́тсѧ та́мѡ и҆ наслѣ́дѧтъ и҆̀ . и҆ сѣ́мѧ ра́бъ твᲂи́хъ ᲂу҆держи́тъ и҆̀ , и҆ лю́бѧщїи и҆́мѧ твᲂѐ , вселѧ́тсѧ в̾ не́мъ .

ѱало́мъ , н҃ . Пᲂми́лꙋй мѧ бж҃е по вели́цѣй млⷭ҇ти твᲂе́й . и҆ по мно́жествꙋ щедро́тъ твᲂи́хъ , ѡ҆чи́сти без̾зако́нїе мᲂѐ . наипа́че ѡ҆мы́й мѧ ѿ без̾зако́нїѧ мᲂегѡ̀ , и҆ ѿ грѣха̀ мᲂегѡ̀ ѡ҆чи́сти мѧ . ꙗ҆́кѡ без̾зако́нїе мᲂѐ а҆́зъ зна́ю , и҆ грѣ́хъ мо́й предо мно́ю є҆́сть вы́нꙋ . тебѣ̀ є҆ди́нᲂмꙋ сᲂгрѣши́хъ , и҆ лꙋка́вᲂе пред̾ тᲂбо́ю сᲂтвᲂри́хъ . ꙗ҆́кѡ да ѡ҆правди́шисѧ во слᲂвесѣ́хъ свᲂи́хъ , и҆ пᲂбѣди́ши внегда̀ сꙋди́ти . се́бо въ без̾зако́нїихъ зача́тъ є҆́смь , и҆ во грѣсѣ́хъ рᲂди́ мѧ мт҃и мᲂѧ̀ . се́бо и҆́стинꙋ вᲂз̾люби́лъ є҆сѝ , без̾вѣ́стнаѧ и҆ та́йнаѧ премꙋ́дрᲂсти твᲂеѧ̀ , ꙗ҆ви́лъ ми є҆сѝ . ѡ҆крᲂпи́ши мѧ ѵ҆с̾со́пᲂмъ , и҆ ѡ҆чи́щꙋсѧ . ѡ҆мы́еши мѧ̀ , и҆ па́че снѣ́га ᲂу҆бѣлю́сѧ . слꙋ́хꙋ мᲂемꙋ̀ да́си ра́дᲂсть и҆ весе́лїе , вᲂз̾ра́дꙋютсѧ ко́сти смире́нныѧ . ѿвратѝ лицѐ твᲂѐ ѿ грѣ́хъ мᲂи́хъ , и҆ всѧ̀ без̾зако́нїѧ мᲂѧ̀ ѡ҆чи́сти . срⷣце чи́сто сᲂзи́жди во мнѣ̀ бж҃е , и҆ дх҃ъ пра́въ ѡ҆бнᲂвѝ во ᲂу҆тро́бѣ мᲂе́й . не ѿве́рзи менѐ ѿ лица̀ твᲂегѡ̀ , и҆ дх҃а твᲂегѡ̀ ст҃а́гѡ не ѿи҆мѝ ѿ менѐ . вᲂз̾да́ждь мѝ ра́дᲂсть спасе́нїѧ твᲂегѡ̀ , и҆ дх҃ᲂмъ влⷣчнᲂмъ ᲂу҆тверди́ мѧ . наꙋчꙋ̀ без̾зако́нныѧ пꙋте́мъ твᲂи́мъ , и҆ нечести́вїи к̾ тебѣ̀ ѡ҆братѧ́тсѧ . и҆зба́ви мѧ ѿ крᲂві́й бж҃е , бж҃е спасе́нїѧ мᲂегѡ̀ , вᲂз̾ра́дꙋетсѧ ꙗ҆зы́къ мо́й пра́вдѣ твᲂе́й . гдⷭ҇и ᲂу҆стнѣ̀ мᲂѝ ѿве́рзеши , и҆ ᲂу҆ста̀ мᲂѧ̀ вᲂз̾вѣстѧ́тъ хвалꙋ̀ твᲂю̀ . ꙗ҆́кѡ а҆́ще бы вᲂсхᲂтѣ́лъ же́ртвѣ , да́лъ бы́хъ ᲂу҆́бѡ . всесᲂжже́нїѧ не бл҃гᲂвᲂли́ши . же́ртва бг҃ꙋ дх҃ъ сᲂкрꙋше́нъ . срⷣце сᲂкрꙋше́но и҆ смире́но бг҃ъ не ᲂу҆ничижи́тъ . ᲂу҆блажѝ гдⷭ҇и бл҃гᲂвᲂле́нїемъ твᲂи́мъ сїѡ́на , и҆ да сᲂзи́ждꙋтсѧ стѣ́ны і҆єрⷭ҇ли́мскїѧ . тᲂгда̀ бл҃гᲂвᲂли́ши же́ртвꙋ пра́вдѣ , вᲂз̾нᲂше́нїе и҆ всесᲂжега́емаѧ . тᲂгда̀ вᲂз̾лᲂжа́тъ на ѻ҆лта́рь тво́й тельца̀ .

сла́ва , и҆ ны́нѣ . а҆ллилꙋ́їѧ , гⷤ . гдⷭ҇и пᲂми́лꙋй , гⷤ . сла́ва . трᲂпа́рь , гла́съ , ѕ҃ . Гдⷭ҇и ѡ҆сꙋди́ша тѧ і҆ꙋде́и на сме́рть , живᲂта̀ всѧ́ческимъ . и҆́же чермно́е мо́ре жезло́мъ прᲂше́дшїи , на крⷭ҇тѣ́ тѧ пригвᲂзди́ша . и҆ и҆́же ѿ ка́мене ме́дъ с̾са́вшїи , же́лчь ти принесо́ша . но во́лею пᲂстрада̀ , да на́съ свᲂбᲂди́ши ѿ рабо́ты вра́жїѧ , гдⷭ҇и сла́ва тебѣ̀ .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂз̾расти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце со ст҃ы́ми а҆пⷭ҇лы , пᲂми́лᲂватисѧ дш҃а́мъ на́шимъ .

та́же , стⷯры . гла́съ , и҃ . Стра́ха ра́ди і҆ꙋде́йскагѡ , дрꙋ́гъ тво́й бли́жнїи пе́тръ , ѿве́ржесѧ тебѐ гдⷭ҇и , и҆ пла́часѧ си́це вᲂпїѧ́ше , сле́зъ мᲂи́хъ непремᲂлчѝ , рѣ́хъ бо сᲂхрани́ти вѣ́рꙋ ще́дре , и҆ несᲂхрани́хъ . и҆ на́ше пᲂкаѧ́нїе та́кᲂже прїимѝ , и҆ пᲂми́лꙋй на́съ . два́жды .

сти́хъ : раздѣли́ша ри́зы мᲂѧ̀ себѐ ,꙳ и҆ ѡ҆ ѻ҆де́жди мᲂе́й мета́ша жре́бїѧ . Пре́же чⷭ҇тна́гѡ ти крⷭ҇та̀ , во́инѡмъ рꙋга́ющимсѧ тебѣ̀ гдⷭ҇и , разꙋ́мнаѧ во́инства ᲂу҆жаса́хꙋсѧ . ѡ҆блᲂжи́л̾бᲂсѧ є҆сѝ вѣнце́мъ пᲂрꙋга́нїѧ , и҆́же зе́млю ᲂу҆краси́выи цвѣ́ты , и҆ багрѧни́цею пᲂрꙋга́нїѧ ѡ҆дѣ́ѧсѧ , ѻ҆́блаки ѡ҆дѣва́ѧи тве́рдь . такᲂвы́мъ бо смᲂтре́нїемъ разꙋмѣ́сѧ твᲂѐ млрⷭ҇дїе хрⷭ҇тѐ , ве́лїѧ твᲂѧ̀ млⷭ҇ть сла́ва тебѣ̀ .

сти́хъ : да́ша в̾ снѣ́дь мᲂю̀ же́лчь ,꙳ и҆ в̾ жа́ждꙋ мᲂю̀ напᲂи́ша мѧ ѻ҆цта̀ . и҆ =па́ки , тꙋ́же , стⷯрꙋ . =сла́ва . гла́съ , є҃ . Влеко́мъ на крⷭ҇тъ си́це вᲂпїѧ́ше гдⷭ҇и , зако́е дѣ́ло хо́щете мѧ распѧ́ти і҆ꙋде́и ; ꙗ҆́кѡ раз̾сла́бленыѧ ва́ша и҆сцѣли́хъ , и҆ мертвецы̀ ꙗ҆́кѡ ѿ сна̀ вᲂз̾ста́вихъ . крᲂвᲂтᲂчи́вꙋю и҆сцѣли́хъ , ханане́ю пᲂми́лᲂва , зако́е дѣ́ло хо́щете мѧ ᲂу҆би́ти і҆ꙋде́и ; но ᲂу҆́зрите є҆го́же ны́нѣ прᲂбᲂда́ете хрⷭ҇та̀ , без̾зако́нницы . и҆ ны́нѣ , то́йже . та́же , прᲂки́менъ . гла́съ , д҃ . ꙗ҆́кѡ а҆́зъ на ра́ны гᲂто́въ , и҆ бᲂлѣ́знь мᲂѧ̀ предᲂмно́ю є҆́сть вы́нꙋ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ .

ѿ прⷪ҇рчества и҆са́ина , чте́нїе .

Гдⷭ҇ь даде́ ми ꙗ҆зы́къ наказа́нїѧ , є҆́же разꙋмѣ́ти во́ времѧ , внегда̀ пᲂдᲂба́етъ рещѝ сло́во . прилᲂжи́ ми ᲂу҆́трꙋ ᲂу҆́тро , и҆ прилᲂжи́ ми ᲂу҆́хо слы́шати , и҆ наказа́нїе гдⷭ҇не ѿверза́етъ ми ᲂу҆́ши . а҆́зъ же несᲂпрᲂти́влюсѧ , ни вᲂпрекѝ глаго́лю . плещѝ мᲂѝ да́хъ на ра́ны , и҆ лани́тѣ мᲂѝ на ᲂу҆даре́нїе , лице́ же мᲂѐ не ѿврати́хъ ѿ стꙋда̀ заплева́нїѧ , и҆ гдⷭ҇ь пᲂмо́щникъ мнѣ̀ бы́сть . сегѡ̀ ра́ди не ᲂу҆срами́хсѧ , но пᲂлᲂжи́хъ лицѐ мᲂѐ ꙗ҆́кѡ тве́рдъ ка́мень , и҆ разꙋмѣ́хъ ꙗ҆́кѡ непᲂстыжꙋ́сѧ , ꙗ҆́кѡ приближа́етсѧ ѡ҆правда́выи мѧ . кто̀ сꙋдѧ́и со мно́ю , да сᲂпрᲂти́вꙋ ста́нетъ ми в̾кꙋ́пѣ ; и҆ кто̀ сꙋдѧ́и ми да прибли́житсѧ ко мнѣ̀ ; сѐ гдⷭ҇ь бг҃ъ пᲂмо́жетъ ми . и҆ кто̀ ѡ҆ѕло́битъ мѧ ; сѐ всѝ вы̀ ꙗ҆́кѡ ри́за ѡ҆бетша́ете , и҆ ꙗ҆́кѡ мо́лїе пᲂѧ́стъ ва́съ . кто̀ ѿ ва́съ бᲂѧ́исѧ гдⷭ҇а , да ᲂу҆слы́шитъ гла́са ѻ҆́трᲂка є҆гѡ̀ ; хᲂдѧ́щїи во тмѣ̀ , и҆ нѣ́сть и҆́мъ свѣ́та . надѣ́йтесѧ на́ и҆мѧ гдⷭ҇не , и҆ ᲂу҆тверди́тесѧ ѡ҆́ бз҃ѣ . сѐ всѝ вы̀ ѻ҆́гнь разжиза́ете , и҆ ᲂу҆крѣплѧ́ете пла́мень . хᲂди́те свѣ́тᲂмъ ѻ҆гнѧ̀ ва́шегѡ , и҆ пла́менемъ и҆́мже раз̾жего́стесѧ . менѐ ра́ди бы́сть сїѧ̀ ва́мъ , въ ско́рби ᲂу҆́снете .

та́же , а҆пⷭ҇лъ , къ ри́млѧнѡмъ . заⷱ҇ , п҃и . ѿ пᲂлꙋ̀ . Бра́тїе , хрⷭ҇то́съ сꙋ́щимъ на́мъ немᲂщны́мъ , на́ времѧ за нечести́выхъ ᲂу҆́мре . є҆два́ бо за пра́ведника кто̀ ᲂу҆́мретъ , за бл҃га́го же не́гли кто̀ и҆ де́рзнетъ ᲂу҆мретѝ ; сᲂставлѧ́етъ же свᲂю̀ любо́вь в̾ на́съ бг҃ъ , ꙗ҆́кѡ и҆ є҆щѐ грѣ́шникѡмъ сꙋ́щемъ на́мъ хрⷭ҇то́съ заны̀ ᲂу҆́мре . мно́го же ᲂу҆́бѡ па́че ѡ҆правда́ни бы́вше ны́нѣ кро́вїю є҆гѡ̀ , спасе́мсѧ и҆́мъ ѿ́ гнѣва . а҆́ще бо вразѝ бы́вше , примири́хᲂмсѧ къ бг҃ꙋ сме́ртїю сн҃а є҆гѡ̀ , мно́жае па́че примири́вшесѧ спасе́мсѧ в̾ живᲂтѣ̀ є҆гѡ̀ .

та́же , є҆ѵⷢ҇а́лїе , ѿ ма́рка . заⷱ҇ , ѯ҃з . Во́ времѧ ѻ҆́но , во́ини ведо́ша і҆с҃а на дво́ръ каїа́финъ , є҆́же є҆́сть прето́ръ . и҆ сᲂзва́ша всю̀ спи́рꙋ , и҆ ѡ҆блеко́ша є҆гѡ̀ в̾ препрѧ́дꙋ . и҆ вᲂз̾лᲂжи́ша на́нь с̾пле́тше те́рнᲂвъ вѣне́цъ . и҆ нача́ша цѣлᲂва́ти є҆гѡ̀ , и҆ гл҃ати , ра́дꙋисѧ цр҃ю і҆ꙋде́йскїи . и҆ бїѧ́хꙋ є҆гѡ̀ по главѣ̀ тро́стїю , и҆ плюва́хꙋ на́нь . и҆ прегиба́юще кᲂлѣ́на , пᲂкланѧ́хꙋсѧ є҆мꙋ̀ . и҆ є҆гда̀ пᲂрꙋга́шасѧ є҆мꙋ̀ , сᲂвлеко́ша с̾ негѡ̀ препрѧ́дꙋ , и҆ ѡ҆блеко́ша є҆гѡ̀ в̾ ри́зы свᲂѧ̀ . и҆ и҆з̾ведо́ша є҆гѡ̀ , да про́пнꙋтъ є҆гѡ̀ . и҆ задѣ́ша ми́мѡ хᲂдѧ́щꙋ нѣ́кᲂемꙋ си́мᲂнꙋ кирине́ю , грѧдꙋ́щꙋ с̾ села̀ , ѻ҆ц҃ꙋ а҆леѯа́ндрᲂвꙋ и҆ рꙋ́фᲂвꙋ , да во́зметъ крⷭ҇тъ є҆гѡ̀ . и҆ приведо́ша є҆гѡ̀ на гᲂлго́ѳꙋ мѣ́сто . є҆́же є҆́сть сказа́емо ло́бнᲂе мѣ́сто . и҆ даѧ́хꙋ є҆мꙋ̀ пи́ти , є҆смирнисме́но вино̀ . ѻ҆́нъ же непрїѧ́тъ . и҆ распе́ншїи є҆гѡ̀ , раз̾дѣли́ша ри́зы є҆гѡ̀ , мета́юще жре́бїѧ ѻ҆нѧ̀ кто̀ что̀ во́зметъ . бѣ́же ча́съ тре́тїи , и҆ прᲂпѧ́ша є҆гѡ̀ . и҆= бѣ̀ написа́нїе вины̀ є҆гѡ̀ напи́сано , цр҃ь і҆ꙋде́йскъ . и҆ с̾ ни́мъ распѧ́ша два̀ раз̾бо́йника , є҆ди́нᲂго ѡ҆деснꙋ́ю , и҆ є҆ди́нᲂго ѡ҆шꙋ́юю є҆гѡ̀ . и҆ с̾бы́стьсѧ писа́нїе , є҆́же гл҃етъ . и҆ со без̾зако́нными вмѣни́сѧ . и҆ ми́мѡ хᲂдѧ́щїи хꙋ́лѧхꙋ є҆гѡ̀ пᲂкива́юще глава́ми свᲂи́ми , и҆ глаго́люще , ᲂу҆а̀ , разᲂрѧ́ѧи цр҃квь , и҆ тремѝ де́ньми сᲂзида́ѧ , спаси́сѧ са́мъ , и҆ сни́ди с̾ крⷭ҇та̀ . та́кᲂже и҆ а҆рхїєре́е рꙋга́ющесѧ дрꙋ́гъ ко́ дрꙋгꙋ с̾ кни́жники гл҃ахꙋ . и҆́ны спасѐ , себе́ ли немо́жетъ спастѝ . хрⷭ҇то́съ , цр҃ь і҆и҃левъ , да сни́детъ ны́нѣ съ крⷭ҇та̀ , да ви́димъ и҆ вѣ́рꙋ и҆́мемъ є҆мꙋ̀ . и҆ прᲂпѧ́таѧ с̾ ни́мъ пᲂнᲂша́ста є҆мꙋ̀ . =бы́вшꙋ же часꙋ̀ шесто́мꙋ , тма̀ бы́сть по все́й землѝ , до часа̀ девѧ́тагѡ . и҆ в̾ ча́съ девѧ́тыи , вᲂзᲂпѝ і҆с҃ъ гла́сᲂмъ ве́лїемъ , гл҃ѧ , є҆ло́й є҆ло́й , лимасавахѳа́ни . є҆́же є҆́сть сказа́емо , бж҃е бж҃е мо́й , во что́ мѧ ѡ҆ста́ви ; и҆ нѣ́цыи ѿ стᲂѧ́щихъ , слы́шавше гл҃ахꙋ , сѐ и҆лїю̀ гласи́тъ . те́къ же є҆ди́нъ , и҆ напо́лнивъ гꙋ́бꙋ ѻ҆цта̀ , и҆ вᲂзло́жь на́трᲂсть , напаѧ́ше є҆гѡ̀ , гл҃ѧ , ѡ҆ста́вите да ви́димъ , а҆́ще прїи́детъ и҆лїѧ̀ снѧ́ти є҆гѡ̀ . і҆с҃ъ же пꙋ́щь гла́съ ве́лїи , и҆́з̾дше . и҆ за́вѣса цр҃ко́внаѧ раз̾дра́сѧ на́ двᲂе , с̾вы́ше дᲂни́же . ви́дѣвъ же со́тникъ стᲂѧ̀ прѧ́мѡ є҆мꙋ̀ , ꙗ҆́кѡ та́кѡ вᲂзᲂпи́въ и҆́з̾дше , речѐ , вᲂи́стинꙋ чл҃къ се́й , сн҃ъ бѣ̀ бж҃їи . бѧ́хꙋ же и҆ жены̀ , и҆з̾ дале́ча зрѧ́ще . в̾ ни́хже бѣ̀ мр҃їѧ магдалы́ни , и҆ мр҃їѧ і҆а́кѡва ма́лагѡ , и҆ і҆ѡсі́и мт҃и , и҆ салᲂмі́ѧ . ꙗ҆́же и҆ є҆гда̀ бѣ̀ в̾ галиле́и хᲂжда́хꙋ по не́мъ , и҆ слꙋжа́хꙋ є҆мꙋ̀ , и҆ и҆́ны мно́гїѧ , ꙗ҆́же взыдо́ша с̾ ни́мъ во і҆єрⷭ҇ли́мъ .

та́же , Гдⷭ҇ь бг҃ъ блгⷭ҇ве́нъ , блгⷭ҇ве́нъ гдⷭ҇ь де́нь днѐ . пᲂспѣши́тъ на́мъ бг҃ъ спасе́нїи на́шихъ , бг҃ъ на́шъ , бг҃ъ спаса́ти .

трⷭ҇то́е , и҆ по ѻ҆́ч҃е на́шъ . кᲂнда́к̾ . гла́съ , и҃ . На́съ ра́ди распѧ́тагѡ , прїиди́те всѝ вᲂспᲂе́мъ . тᲂго́ бо ви́дѣвши мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , но ты̀ є҆сѝ сн҃ъ и҆ бг҃ъ мо́й .

гдⷭ҇и пᲂми́лꙋй , м҃ . пᲂсе́м̾ , мл҃твꙋ . и҆́же на всѧ́ко вре́мѧ . гдⷭ҇и пᲂми́лꙋй , гⷤ . сла́ва , и҆ ны́нѣ . чтⷭ҇нѣ́йшꙋю херꙋви́мъ . и҆́менемъ гдⷭ҇нимъ блгⷭ҇вѝ ѻ҆́ч҃е . і҆єре́й : за мл҃твъ ст҃ы́хъ ѻ҆ц҃ъ . та́же , мл҃твꙋ сїю̀ : Влⷣко бж҃е ѻ҆́ч҃е вседержи́телю , и҆ гдⷭ҇и сн҃е є҆динᲂро́дныи і҆с҃е хрⷭ҇тѐ , и҆ ст҃ы́и д́ш҃е , є҆ди́но бжⷭ҇тво̀ и҆ є҆ди́на си́ла , пᲂми́лꙋй мѧ грѣ́шнаго , и҆ и҆́ми же вѣ́си сꙋдьба́ми , спаси́ мѧ недᲂсто́йнаго раба̀ твᲂегѡ̀ , ꙗ҆́кѡ бл҃гᲂслᲂве́нъ є҆сѝ во́ вѣки , а҆ми́нь .

та́же , ча́съ , ѕ҃ . прїиди́те пᲂклᲂни́мсѧ , гⷤ .

ѱало́мъ , н҃а . Что́ сѧ хва́лиши въ ѕло́бѣ си́льне без̾зако́нїемъ ; ве́сь де́нь не пра́вдꙋ ᲂу҆мы́сливъ . ꙗ҆зы́къ тво́й ꙗ҆́кѡ бри́тва и҆з̾ѡ҆щре́нна , сᲂтвᲂри́лъ є҆сѝ ле́сть . вᲂз̾люби́лъ є҆сѝ ѕло́бꙋ , па́че бл҃гᲂсты́ни , не пра́вдꙋ , не́же глаго́лати пра́вдꙋ . вᲂз̾люби́лъ є҆сѝ всѧ̀ гл҃ы пᲂто́пныѧ , ꙗ҆зы́къ льсти́въ . сегѡ̀ ра́ди бг҃ъ разрꙋши́тъ тѧ до кᲂнца̀ , вᲂсто́ргнетъ тѧ̀ и҆ пресели́тъ тѧ ѿ селе́нїѧ твᲂегѡ̀ , и҆ ко́рень тво́й ѿ землѝ живы́хъ . ᲂу҆́зрѧтъ пра́веднїи и҆ ᲂу҆бᲂѧ́тсѧ , и҆ ѡ҆ не́мъ вᲂз̾смѣю́тсѧ и҆ рекꙋ́тъ . се́й чл҃къ , и҆́же непᲂлᲂжѝ бг҃а пᲂмо́щника себѣ̀ , но ᲂу҆пᲂва̀ на мно́жество бᲂга́тства свᲂегѡ̀ , и҆ вᲂз̾мо́же сꙋето́ю свᲂе́ю . а҆́зъ же ꙗ҆́кѡ ма́слина плᲂдᲂви́та в̾ дᲂмꙋ̀ бж҃їи , ᲂу҆пᲂва́хъ на млⷭ҇ть бж҃їю во́ вѣки , и҆ в̾ вѣ́къ вѣ́ка . и҆спᲂвѣ́мсѧ тебѣ̀ во́ вѣки , ꙗ҆́кѡ сᲂтвᲂри́лъ є҆сѝ . и҆ терплю̀ и҆́мѧ твᲂѐ ꙗ҆́кѡ бл҃го , пред̾ прпⷣбными твᲂи́ми .

ѱало́мъ , р҃и . Бж҃е хвалꙋ̀ мᲂю̀ не премᲂлчѝ , ꙗ҆́кѡ ᲂу҆ста̀ грѣ́шнича , и҆ ᲂу҆ста̀ льсти́вагѡ на мѧ̀ ѿверзо́шасѧ . гл҃аша на мѧ̀ ꙗ҆зы́кѡмъ льсти́вымъ , и҆ слᲂвесы̀ ненави́стными ѡ҆быдо́ша мѧ , и҆ бра́шасѧ со мно́ю тꙋ́не . вмѣ́стѡ любвѐ ѡ҆бᲂлга́хꙋ мѧ , а҆́зъ же мл҃твꙋ дѣ́ѧхъ . и҆ пᲂлᲂжи́ша на мѧ̀ ѕла̀ вᲂз̾бл҃га́ѧ , и҆ не́нависть за вᲂз̾любле́нїе мᲂѐ . пᲂста́ви на́нь грѣ́шника , и҆ дїѧ́вᲂлъ да ста́нетъ ѡ҆деснꙋ́ю є҆гѡ̀ . внегда̀ сꙋди́тисѧ є҆мꙋ̀ , да и҆зы́детъ ѡ҆сꙋжде́нъ , и҆ мл҃тва є҆гѡ̀ бꙋ́ди в̾ грѣ́хъ . да бꙋ́дꙋтъ дні́е є҆гѡ̀ ма́ли , и҆ є҆пи́скᲂпство є҆гѡ̀ преи́метъ и҆́нъ . да бꙋ́дꙋтъ сы́нᲂве є҆гѡ̀ си́ры , и҆ жена̀ є҆гѡ̀ вдᲂва̀ . дви́жꙋщесѧ да преселѧ́тсѧ сы́нᲂве є҆гѡ̀ , и҆ вᲂспро́сѧтъ . да и҆згна́ни бꙋ́дꙋтъ и҆з̾ дᲂмѡ́въ свᲂи́хъ . да взы́щетъ заимᲂда́вецъ всѧ̀ є҆ли́ка сꙋ́ть є҆гѡ̀ , и҆ да вᲂсхи́тѧтъ чꙋжді́и трꙋды̀ є҆гѡ̀ . да небꙋ́детъ є҆мꙋ̀ застꙋ́пника , нижѐ бꙋ́детъ и҆́же ᲂу҆ще́дритъ сирᲂты̀ є҆гѡ̀ . да бꙋ́дꙋтъ ча́да є҆гѡ̀ въ па́гꙋбꙋ , въ ро́дъ є҆ди́нъ . да пᲂтреби́тсѧ и҆́мѧ є҆гѡ̀ . да вᲂспᲂмѧне́тсѧ без̾зако́нїе ѻ҆те́цъ є҆гѡ̀ пре́д̾ гдⷭ҇емъ , и҆ грѣ́хъ ма́тере є҆гѡ̀ да не ѡ҆чи́ститсѧ . да бꙋ́дꙋтъ пре́д̾ гдⷭ҇емъ вы́нꙋ , и҆ да пᲂтреби́тсѧ ѿ землѝ па́мѧть и҆́хъ . зане́же не пᲂмѧнꙋ̀ сᲂтвᲂри́ти млⷭ҇ть . и҆ пᲂгна̀ чл҃ка ни́ща и҆ ᲂу҆бо́га , и҆ смире́на срⷣцемъ ᲂу҆мертви́ти . и҆ вᲂз̾любѝ клѧ́твꙋ , и҆ прїи́детъ є҆мꙋ̀ . и҆ невᲂсхᲂтѣ̀ бл҃гᲂслᲂве́нїѧ , и҆ ᲂу҆да́литсѧ ѿ негѡ̀ . и҆ ѡ҆блече́сѧ в̾ клѧ́твꙋ ꙗ҆́кѡ в̾ ри́зꙋ . и҆ вни́де ꙗ҆́кѡ вᲂда̀ во ᲂу҆тро́бꙋ є҆гѡ̀ , и҆ ꙗ҆́кѡ є҆ле́й в̾ ко́сти є҆гѡ̀ . да бꙋ́детъ є҆мꙋ̀ ꙗ҆́кѡ ри́за в̾ ню́же ѡ҆блачи́тсѧ , и҆ ꙗ҆́кѡ по́ѧсъ и҆́мже вы́нꙋ ѡ҆пᲂѧсꙋ́етсѧ . сѐ дѣ́ло ѡ҆бᲂлга́ющихъ мѧ̀ ѿ́ гдⷭ҇а , и҆ гл҃ющихъ лꙋка́ваѧ на́ дш҃ꙋ мᲂю̀ . и҆ ты̀ гдⷭ҇и , гдⷭ҇и сᲂтвᲂрѝ со мно́ю и҆́мене ра́ди свᲂегѡ̀ , ꙗ҆́кѡ бл҃га млⷭ҇ть твᲂѧ̀ . и҆зба́ви мѧ̀ ꙗ҆́кѡ ни́щь и҆ ᲂу҆бо́гъ є҆́смь а҆́зъ , и҆ срⷣце мᲂѐ смꙋти́сѧ во мнѣ̀ . ꙗ҆́кѡ сѣ́нь є҆гда̀ ᲂу҆клᲂни́тсѧ ѿѧ́хсѧ , сᲂтрѧсо́хсѧ ꙗ҆́кѡ прꙋ́зи . кᲂлѣ́на мᲂѧ̀ и҆знемᲂго́ста ѿ пᲂста̀ , и҆ пло́ть мᲂѧ̀ и҆змѣни́сѧ є҆ле́ѧ ра́ди . и҆ а҆́зъ бы́хъ пᲂнᲂше́нїе и҆́мъ . ви́дѣша мѧ пᲂкива́ша глава́ми свᲂи́ми . пᲂмᲂзи́ ми гдⷭ҇и бж҃е мо́й , и҆ спаси́ мѧ по ми́лᲂсти твᲂе́й . и҆ разꙋмѣ́ютъ ꙗ҆́кѡ рꙋка̀ твᲂѧ̀ сѝ , и҆ ты̀ гдⷭ҇и сᲂтвᲂри́лъ є҆сѝ ю҆̀ . прᲂкленꙋ́тъ ті́и , и҆ ты̀ бл҃гᲂслᲂви́ши . вᲂста́ющїи на мѧ̀ пᲂстыдѧ́тсѧ , ра́бъ же тво́й вᲂз̾весели́тсѧ . да ѡ҆блекꙋ́тсѧ ѡ҆бᲂлга́ющїи мѧ̀ въ сра́мъ , и҆ ѻ҆де́ждꙋтсѧ ꙗ҆́кѡ ѻ҆де́жею стꙋдо́мъ свᲂи́мъ . и҆спᲂвѣ́мсѧ гдⷭ҇ви ѕѣлѡ̀ ᲂу҆сты̀ мᲂи́ми , и҆ пᲂсредѣ̀ мно́гъ вᲂсхвалю̀ и҆̀ . ꙗ҆́кѡ ста̀ ѡ҆деснꙋ́ю ᲂу҆бо́гагѡ , спастѝ ѿ гᲂнѧ́щихъ дш҃ꙋ мᲂю̀ .

ѱало́мъ , ч҃ . Живы́и въ по́мᲂщи вы́шнѧгѡ , въ кро́вѣ бг҃а нбⷭ҇нагѡ вᲂдвᲂри́тсѧ . рече́тъ гдⷭ҇ви , застꙋ́пникъ мо́й є҆сѝ , и҆ прибѣ́жище мᲂѐ , бг҃ъ мо́й , и҆ ᲂу҆пᲂва́ю на́нь . ꙗ҆́кѡ то́й и҆зба́витъ тѧ̀ ѿ сѣ́ти ло́вчи , и҆ ѿ слᲂвесѐ мѧте́жна . пле́щьма свᲂи́ма ѡ҆сѣ́нитъ тѧ̀ , и҆ пᲂд̾ крилѣ̀ є҆гѡ̀ надѣ́ешисѧ . ѻ҆рꙋ́жїе ѡ҆бы́детъ тѧ̀ и҆́стина є҆гѡ̀ , не ᲂу҆бᲂи́шисѧ ѿ́ страха нᲂщна́гѡ , ѿ стрѣлы̀ летѧ́щїѧ во́ дне . ѿ ве́щи во тмѣ̀ прехᲂдѧ́щїѧ , ѿ срѧ́ща и҆ бѣ́са пᲂлꙋ́деннагѡ . паде́тъ ѿ страны̀ твᲂеѧ̀ ты́сѧща , и҆ тма̀ ѡ҆деснꙋ́ю тебѐ , к̾ тебѣ́ же не прибли́житсѧ . ѻ҆ба́че ѻ҆чи́ма свᲂи́ма смо́триши , и҆ вᲂздаѧ́нїе грѣ́шникѡмъ ᲂу҆́зриши . ꙗ҆́кѡ ты̀ гдⷭ҇и ᲂу҆пᲂва́нїе мᲂѐ , вы́шнѧгѡ пᲂлᲂжи́лъ є҆сѝ прибѣ́жище твᲂѐ . непрїи́детъ к̾ тебѣ̀ ѕло̀ , и҆ ра́на неприбли́житсѧ тѣлесѝ твᲂемꙋ̀ . ꙗ҆́кѡ а҆́нг҃лѡмъ свᲂи́мъ запᲂвѣ́сть ѡ҆ тебѣ̀ , сᲂхрани́ти тѧ̀ во всѣ́хъ пꙋте́хъ твᲂи́хъ . на рꙋка́хъ во́змꙋтъ тѧ̀ , да некᲂгда̀ преткне́ши ѡ҆ ка́мень нᲂгѝ твᲂеѧ̀ . на а҆́спида и҆ васили́ска настꙋ́пиши , и҆ пᲂпере́ши льва̀ и҆ ѕмїѧ̀ . ꙗ҆́кѡ на мѧ̀ ᲂу҆пᲂва̀ , и҆ и҆зба́влю и҆̀ , пᲂкры́ю и҆̀ , ꙗ҆́кѡ пᲂзна̀ и҆́мѧ мᲂѐ . вᲂз̾зᲂве́тъ ко мнѣ̀ , и҆ ᲂу҆слы́шꙋ и҆̀ . с̾ ни́мъ є҆́смь в̾ ско́рби , и҆змꙋ̀ и҆̀ , и҆ прᲂсла́влю є҆гѡ̀ . дᲂлгᲂтꙋ̀ дні́й и҆спо́лню и҆̀ . и҆ ꙗ҆влю̀ є҆мꙋ̀ спасе́нїе мᲂѐ .

сла́ва , и҆ ны́нѣ . а҆ллилꙋ́їѧ , гⷤ . гдⷭ҇и пᲂми́лꙋй , гⷤ . сла́ва . трᲂпа́рь , гла́съ , в҃ . Спасе́нїе сᲂдѣ́ѧ пᲂсредѣ̀ землѝ хрⷭ҇тѐ бж҃е , на крⷭ҇тѣ̀ пречⷭ҇тѣи рꙋ́цѣ свᲂѝ прᲂсте́ръ , сᲂбира́ѧ всѧ̀ ꙗ҆зы́ки , вᲂпїю́щїѧ , гдⷭ҇и сла́ва тебѣ̀ . и҆ ны́нѣ , боⷢ҇ . Ꙗ҆́кѡ не и҆́мамы дерзнᲂве́нїѧ , за премно́гїѧ грѣхѝ на́ша , но ты̀ и҆́же ѿ тебѐ ро́ждьшагᲂсѧ , мᲂлѝ бцⷣе дв҃о , мно́го бо мо́жетъ мᲂли́тва ма́терьнѧ , на ᲂу҆мᲂле́нїе влⷣки , непре́зри грѣ́шныхъ мᲂльбы̀ всечⷭ҇таѧ , ꙗ҆́кѡ млⷭ҇тивъ є҆́сть , и҆ спастѝ мᲂгі́и , и҆́же страда́ти на́съ ра́ди и҆з̾во́ливыи .

та́же , стихѣ́ры . гла́съ , и҃ . Та́кѡ гл҃етъ гдⷭ҇ь і҆ꙋде́ѡмъ , лю́дїе мᲂѝ что̀ сᲂтвᲂри́хъ ва́мъ , и҆лѝ чи́мъ ва́мъ стꙋжи́хъ ; слѣпцы̀ ва́ша прᲂсвѣти́хъ , прᲂкаже́нныѧ ѡ҆чи́стихъ , мꙋ́жи сꙋ́щїѧ на ѻ҆дрѣ́хъ вᲂз̾дра́вихъ . лю́дїе мᲂѝ чи́мъ ва́съ ѡ҆скᲂрби́хъ , и҆ что́ ми вᲂздае́те ; за ма́ннꙋ же́лчь , за́ вᲂдꙋ же ѻ҆це́тъ , за є҆́же люби́ти мѧ ко крⷭ҇тꙋ́ мѧ пригвᲂжда́ете . к̾ тᲂмꙋ̀ нетерплю̀ про́чее , но призᲂвꙋ̀ мᲂѧ̀ ꙗ҆зы́ки , и҆ ті́и менѐ прᲂсла́вѧтъ со ѻ҆ц҃е́мъ и҆ со ст҃ы́мъ дх҃ᲂмъ , и҆ а҆́зъ да́мъ и҆́мъ живо́тъ вѣ́чныи . два́жды .

сти́хъ : гла́съ , є҃ . раздѣли́ша ри́зы мᲂѧ̀ себѐ ,꙳ и҆ ѡ҆ ѻ҆де́жди мᲂе́й мета́ша жре́бїѧ . Прїиди́те хрⷭ҇тᲂно́снїи лю́дїе , да ви́димъ что̀ сᲂвѣща̀ і҆ꙋ́да преда́тель , съ свѧще́нники без̾зако́нными , на сп҃са на́шегѡ дне́сь ; пᲂви́нна сме́рти , без̾сме́ртнаго сло́ва сᲂтвᲂри́ша , и҆ пила́тꙋ преда́вше , на мѣ́стѣ ло́бнѣмъ распѧ́ша . и҆ сїѧ̀ стражда̀ вᲂпїѧ́ше сп҃съ на́шъ , глаго́лѧ , ѡ҆ста́ви и҆́мъ ѻ҆́ч҃е грѣ́хъ се́й , и҆ да ᲂу҆вѣ́дѧтъ ꙗ҆зы́цы и҆з̾ ме́ртвыхъ мᲂѐ вᲂскрⷭ҇нїе .

сти́хъ : да́ша в̾ снѣ́дь мᲂю̀ же́лчь ,꙳ и҆ в̾ жа́ждꙋ мᲂю̀ напᲂи́ша мѧ ѻ҆цта̀ . и҆ =па́ки , тꙋ́же , стⷯрꙋ . =сла́ва . гла́съ , и҃ . Закᲂнᲂпᲂло́жницы і҆и҃левы , і҆ꙋде́и и҆ фарисе́и , ли́къ а҆пⷭ҇льскїи вᲂпїе́тъ к̾ ва́мъ , сѐ цр҃кᲂвь , ю҆́же вы̀ разᲂри́сте . сѐ а҆́гнецъ , є҆го́же вы̀ распѧ́сте , и҆ гро́бꙋ преда́сте . но вла́стїю свᲂе́ю вᲂскр҃се . нельсти́тесѧ і҆ꙋде́и , то́й бо є҆́сть и҆́же в̾ мо́ри спасы́и , и҆ в̾ пꙋсты́ни пита́выи . то́й є҆́сть жи́знь и҆ свѣ́тъ , и҆ ми́ръ ми́рᲂви . и҆ ны́нѣ , то́йже . та́же , прᲂки́менъ . гла́съ , д҃ . да́ша въ снѣ́дь мᲂю̀ же́лчь , и҆ в̾ жа́ждꙋ мᲂю̀ напᲂи́ша мѧ ѻ҆цта̀ . сти́хъ : спаси́ мѧ бж҃е ꙗ҆́кѡ внидо́ша во́ды до дꙋшѝ мᲂеѧ̀ .

ѿ прⷪ҇рчества и҆са́ина , чте́нїе .

Та́кѡ гл҃етъ гдⷭ҇ь , сѐ разꙋмѣ́етъ ѻ҆́трᲂкъ мо́й , и҆ вᲂзнесе́тсѧ и҆ прᲂсла́витсѧ и҆ превᲂзнесе́тсѧ ѕѣлѡ̀ . и҆́м̾же ѻ҆́бразᲂмъ ᲂу҆дивѧ́тсѧ мно́зи ѡ҆ тебѣ̀ , та́кѡ ѡ҆без̾сла́витсѧ ѿ чл҃къ видѣ́нїе твᲂѐ , и҆ сла́ва твᲂѧ̀ ѿ сыно́въ чл҃ческихъ . та́ко бо ᲂу҆дивѧ́тсѧ ꙗ҆зы́цы мно́зи ѡ҆ не́мъ , и҆ за́ймꙋтъ цр҃їе ᲂу҆ста̀ свᲂѧ̀ , ꙗ҆́кѡ и҆́м̾же невᲂзвѣсти́сѧ ѡ҆ не́мъ , ᲂу҆́зрѧтъ , и҆ и҆́же неслы́шаша , разꙋмѣ́ютъ . гдⷭ҇и кто̀ вѣ́рᲂва слꙋ́хꙋ на́шемꙋ , и҆ мы́шца гдⷭ҇нѧ кᲂмꙋ̀ ѿкры́сѧ ; вᲂзвѣсти́хᲂмъ пре́д̾ гдⷭ҇емъ , ꙗ҆́кѡ по́ле , и҆ ꙗ҆́кѡ ко́рень в̾ землѝ жа́ждꙋщей . нѣ́сть ѻ҆́браза є҆мꙋ̀ ни сла́вы . и҆ ви́дѣхᲂмъ є҆гѡ̀ , и҆ не и҆мѧ́ше видѣ́нїѧ ни дᲂбро́ты , но видѣ́нїе є҆гѡ̀ без̾че́стно , ᲂу҆ма́лено па́че сыно́въ чл҃ческихъ . чл҃къ в̾ ꙗ҆́звѣ сы́и , и҆ ᲂу҆мѣ́ѧ терпѣ́ти бᲂлѣ́знь , и҆ не ѿвратѝ лицѐ свᲂѐ , ᲂу҆гᲂто́вивсѧ и҆ не вмѣни́сѧ є҆́же без̾че́стенъ бы́ти , се́й грѣхѝ на́ша но́ситъ , и҆ ѡ҆ на́съ пᲂбᲂлѧ́етъ . и҆ мы̀ вмѣни́хᲂмъ є҆гѡ̀ бы́ти в̾ бᲂлѣ́зни сꙋ́ща , и҆ в̾ ра́нахъ ѿ́ бг҃а , и҆ во ѡ҆ѕлᲂбле́нїи . то́й же ᲂу҆ѧ́звенъ бы́сть за без̾зако́нїѧ на́ша , и҆ мꙋ́ченъ бы́сть за грѣхѝ на́ша , и҆ наказа́нїе смире́нїѧ на́шегѡ на не́мъ , ꙗ҆́звᲂю бо є҆гѡ̀ мы̀ и҆сцѣлѣ́хᲂмъ всѝ , ꙗ҆́кѡ ѻ҆́вцы заблꙋди́хᲂмъ . хᲂдѧ́ бо чл҃къ пꙋте́мъ свᲂи́мъ прельсти́сѧ , и҆ гдⷭ҇ь преда́стъ є҆гѡ̀ , грѣ́хъ ра́ди на́шихъ . и҆ то́й за є҆́же ѡ҆ѕло́битисѧ , не ѿверза́етъ ᲂу҆́стъ свᲂи́хъ . ꙗ҆́кѡ ѻ҆вча̀ на закᲂле́нїе веде́сѧ , и҆ ꙗ҆́кѡ а҆́гнецъ пред̾ стригꙋ́щимъ є҆гѡ̀ без̾гла́сенъ , та́ко же не ѿверза́етъ ᲂу҆́стъ свᲂи́хъ . во смире́нїи є҆гѡ̀ сꙋ́дъ є҆гѡ̀ взѧ́тсѧ , ро́дъ же є҆гѡ̀ кто̀ и҆спᲂвѣ́сть ; ꙗ҆́кѡ взе́млетсѧ ѿ землѝ живо́тъ є҆гѡ̀ , ѡ҆ без̾зако́нїи люде́й мᲂи́хъ прїи́де на́ смерть . и҆ да́мъ лꙋка́выѧ вмѣ́стѡ пᲂгребе́нїѧ є҆гѡ̀ , и҆ бᲂга́тыѧ вмѣ́стѡ сме́рти є҆гѡ̀ . ꙗ҆́кѡ без̾зако́нїѧ несᲂтвᲂрѝ , ни ѡ҆брѣ́тесѧ ле́сть во ᲂу҆стѣ́хъ є҆гѡ̀ . и҆ хо́щетъ гдⷭ҇ь ѡ҆чи́стити є҆гѡ̀ ѿ ра́ны . а҆́ще дадитѐ ѡ҆ грѣсѣ́хъ дꙋша̀ ва́ша , ᲂу҆́зрите сѣ́мѧ дᲂлгᲂживо́тнѡ ; и҆ хо́щетъ гдⷭ҇ь рꙋко́ю свᲂе́ю ѿꙗ҆́ти бᲂлѣ́знь ѿ дꙋшѝ є҆гѡ̀ , и҆ ꙗ҆ви́ти и҆́мъ свѣ́тъ , и҆ сᲂзда́ти ра́зꙋмъ , ѡ҆правда́ти пра́ведника до́брѣ слꙋжа́ща мно́гимъ , и҆ грѣхѝ и҆́хъ то́й вᲂзнесе́тъ . сегѡ̀ ра́ди наслѣ́дитъ мно́гихъ , и҆ крѣ́пкихъ раздѣли́тъ кᲂры́сть . занѐ предана̀ бы́сть на́ смерть дш҃а є҆гѡ̀ , и҆ со без̾зако́нными вмѣне́нъ бы́сть . и҆ то́й ᲂу҆́бѡ грѣхѝ мно́гихъ вᲂз̾несе́тъ , и҆ за грѣхѝ и҆́хъ преда́стсѧ . вᲂз̾весели́сѧ непло́ды неражда́ющаѧ , расто́ргни и҆ вᲂзᲂпѝ небᲂлѣ́вшаѧ . ꙗ҆́кѡ мно́га ча́да пꙋсты́ѧ па́че , не́жели и҆мꙋ́щїѧ мꙋ́жа .

та́же , а҆пⷭ҇лъ , къ є҆вре́ѡмъ . заⷱ҇ , т҃ѕ . Бра́тїе , ст҃ѧ́и и҆ ст҃ѧ́емїи , ѿ є҆ди́нᲂгѡ всѝ , є҆ѧ́же ра́ди вины̀ нестыди́тсѧ бра́тїю нарица́ти и҆́хъ гл҃ѧ . вᲂз̾вѣщꙋ̀ и҆́мѧ твᲂѐ бра́тїи мᲂе́й . пᲂсредѣ̀ цр҃кве вᲂспᲂю́ тѧ . и҆ па́ки , а҆́зъ бꙋ́дꙋ надѣ́ѧсѧ на́нь . и҆ па́ки , сѐ а҆́зъ и҆ дѣ́ти ꙗ҆́же ми да́лъ є҆́сть бг҃ъ . пᲂне́же ᲂу҆́бѡ дѣ́ти прїѡ҆бщи́шасѧ пло́ти и҆ кро́ви , и҆ то́й пᲂдо́бнѣ прїѡ҆бщи́сѧ тѣ́хже , да сме́ртїю ᲂу҆пра́зднитъ и҆мꙋ́щаго держа́вꙋ сме́рти , си́рѣчь дїѧ́вᲂла . и҆ и҆зба́витъ си́хъ є҆ли́цы стра́хᲂмъ сме́рти по всемꙋ̀ житїю̀ пᲂви́нны бѣ́ша рабо́тѣ . не ѿ а҆́нг҃лъ ᲂу҆́бѡ кᲂгда̀ прїе́млетъ , но ѿ сѣ́мене а҆враа́мᲂва прїе́млетъ , ѿ ню́дꙋ же до́лженъ бѣ̀ по всемꙋ̀ пᲂдо́битисѧ бра́тїи , да ми́лᲂстивъ бꙋ́детъ и҆ вѣ́ренъ первᲂсщ҃е́нникъ ꙗ҆́же к̾ бг҃ꙋ , во є҆́же ѡ҆чи́стити грѣхѝ людьскі́ѧ . ѡ҆ не́мже бо пᲂстрада̀ са́мъ и҆скꙋше́нъ бы́въ , мо́жетъ и҆ напа́ствᲂваннымъ пᲂмᲂщѝ .

та́же , є҆ѵⷢ҇а́лїе , ѿ лꙋкѝ . заⷱ҇ , ра҃і . Во́ времѧ ѻ҆́но , ведѧ́хꙋ со і҆с҃ᲂмъ , и҆ и҆́на два̀ ѕлᲂдѣ́ѧ с̾ ни́мъ ᲂу҆би́ти . и҆ є҆гда̀ прїидо́ша на мѣ́сто , нарица́емᲂе ло́бнᲂе , тꙋ̀ распѧ́ша є҆гѡ̀ , и҆ ѕлᲂдѣ́ѧ , ѻ҆́вᲂгѡ ᲂу҆́бѡ ѡ҆деснꙋ́ю , а҆ дрꙋга́го ѡ҆шꙋ́юю . і҆с҃ъ же гл҃аше , ѻ҆́ч҃е , ѿпꙋстѝ и҆́мъ , невѣ́дѧтъ бо что̀ твᲂрѧ́тъ . раз̾дѣлѧ́юще же ри́зы є҆гѡ̀ , мета́хꙋ жре́бїѧ . и҆ стᲂѧ́хꙋ лю́дїе зрѧ́ще . рꙋга́хꙋжесѧ и҆ кнѧ́зи с̾ ни́ми , гл҃юще , и҆ны́ѧ спасѐ , да спасе́тъ и҆ себѐ , а҆́ще то́й є҆́сть хрⷭ҇то́съ , бж҃їи и҆збра́нныи . рꙋга́хꙋжесѧ є҆мꙋ̀ и҆ во́ини пристꙋпа́юще , и҆ ѻ҆це́тъ придѣ́юще є҆мꙋ̀ , и҆ гл҃ахꙋ , а҆́ще ты̀ є҆сѝ цр҃ь і҆ꙋде́йскъ , спаси́сѧ са́мъ . бѣ́ же и҆ написа́нїе напи́сано над̾ ни́мъ , писмены̀ є҆́ллинскими , и҆ ри́мскими , и҆ є҆вре́йскими , се́й є҆́сть цр҃ь і҆ꙋде́йскъ . є҆ди́нъ же ѿ ѡ҆бѣ́шенᲂю ѕлᲂдѣ́ю , хꙋ́лѧше є҆гѡ̀ , гл҃ѧ , а҆́ще ты̀ є҆сѝ хрⷭ҇то́съ , спасѝ себѐ и҆ на́ю . ѿвѣща́въ же дрꙋгі́и , преща́ше є҆мꙋ̀ , гл҃ѧ , нилѝ ты̀ бᲂи́шисѧ бг҃а , ꙗ҆́кѡ в̾ то́мже ѡ҆сꙋжде́нъ є҆сѝ ; и҆ мы̀ ᲂу҆́бѡ в̾ пра́вдꙋ , дᲂсто́йнаѧ бо по дѣ́лᲂмъ на́ю вᲂспрїе́млева , се́й же ни є҆ди́нᲂгѡ ѕла̀ сᲂтвᲂрѝ . и҆ гл҃аше і҆с҃ᲂви , пᲂмѧни́ мѧ гдⷭ҇и , є҆гда̀ прїи́деши во црⷭ҇твїи сѝ . и҆ речѐ є҆мꙋ̀ і҆с҃ъ , а҆ми́нь гл҃ю тебѣ̀ , дне́сь со мно́ю бꙋ́деши в̾ раѝ . бѣ́ же ча́съ ꙗ҆́кѡ шесты́и , и҆ тма̀ бы́сть по все́й землѝ , до часа̀ девѧ́тагѡ . и҆ пᲂме́рче сл҃нце , и҆ за́вѣса цр҃ко́внаѧ раздра́сѧ пᲂсредѣ̀ . и҆ вᲂз̾гла́шь гла́сᲂмъ ве́лїемъ і҆с҃ъ , речѐ , ѻ҆́ч҃е , в̾ рꙋ́цѣ твᲂѝ предаю̀ дх҃ъ мо́й . и҆ сїѧ̀ ре́къ , и҆́з̾дше . ви́дѣвъ же со́тникъ бы́вшее , прᲂсла́ви бг҃а , гл҃ѧ , вᲂи́стинꙋ чл҃къ се́й , пра́веденъ бѣ̀ . и҆ всѝ прише́дшїи наро́ди на пᲂзо́ръ се́й , ви́дѧще быва́ющаѧ , бїю́ще пе́рси свᲂѧ̀ , вᲂз̾враща́хꙋсѧ . стᲂѧ́хꙋ же всѝ зна́емїи є҆гѡ̀ и҆з̾дале́че . и҆ жены̀ спᲂслѣ́дствᲂвавшїѧ є҆мꙋ̀ ѿ галиле́и , зрѧ́ще си́хъ .

та́же , Ско́рѡ да пред̾варѧ́тъ ны̀ щедро́ты твᲂѧ̀ гдⷭ҇и , ꙗ҆́кѡ ѡ҆бнища́хѡмъ ѕѣлѡ̀ , пᲂмᲂзѝ на́мъ бж҃е спаси́телю на́шъ , сла́вы ра́ди и҆́мене твᲂегѡ̀ гдⷭ҇и , и҆зба́ви на́съ , и҆ ѡ҆чи́сти грѣхѝ на́ша , и҆́мене твᲂегѡ̀ ра́ди .

трⷭ҇то́е , и҆ по ѻ҆́ч҃е на́шъ . кᲂнда́к̾ . гла́съ , и҃ . На́съ ра́ди распѧ́тагѡ , прїиди́те всѝ вᲂспᲂе́мъ . тᲂго́ бо ви́дѣвши мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , но ты̀ є҆сѝ сн҃ъ и҆ бг҃ъ мо́й .

гдⷭ҇и пᲂми́лꙋй , м҃ . пᲂсе́м̾ , мл҃твꙋ . и҆́же на всѧ́ко вре́мѧ . гдⷭ҇и пᲂми́лꙋй , гⷤ . сла́ва , и҆ ны́нѣ . чтⷭ҇нѣ́йшꙋю херꙋви́мъ . и҆́менемъ гдⷭ҇нимъ блгⷭ҇вѝ ѻ҆́ч҃е . і҆єре́й : за мл҃твъ ст҃ы́хъ ѻ҆ц҃ъ . та́же , мл҃твꙋ сїю̀ : Бж҃е и҆ гдⷭ҇и си́ламъ , и҆ всеѧ̀ тва́ри сᲂдѣ́телю , и҆́же за милᲂсе́рдїе не и҆зрече́нныѧ млⷭ҇ти твᲂеѧ̀ , є҆динᲂро́днагѡ сн҃а твᲂегѡ̀ гдⷭ҇а на́шегѡ і҆с҃а хрⷭ҇та̀ , низ̾пᲂсла́въ на спасе́нїе ро́дꙋ на́шемꙋ , и҆ честны́мъ є҆гѡ̀ крⷭ҇то́мъ , рꙋкᲂписа́нїе грѣ́хъ на́шихъ растерза́въ , и҆ ѡ҆бличи́въ тѣ́мъ нача́ла и҆ вла́сти тмы̀ . са́мъ влⷣко чл҃кᲂлю́бче , прїимѝ ѿ на́съ грѣ́шныхъ , бл҃гᲂда́рныѧ сїѧ̀ мл҃твы , и҆ и҆зба́ви на́съ ѿ всѧ́кагѡ всегꙋби́тельнагѡ и҆ мра́чнагѡ грѣхᲂпаде́нїѧ , и҆ всѣ́хъ и҆́же ѡ҆ѕло́бити на́съ и҆́щꙋщихъ , ви́димыхъ и҆ неви́димыхъ вра́гъ . пригвᲂздѝ стра́сѣ твᲂе́мъ пло́ти на́ша , и҆ не ᲂу҆клᲂнѝ серде́цъ на́шихъ , в̾ слᲂвеса̀ и҆ пᲂмышле́нїѧ лꙋка́вствїѧ , но любо́вїю твᲂе́ю ᲂу҆ѧзвѝ дш҃а на́ша . да к̾ тебѣ̀ всегда̀ взира́юще , и҆ є҆́же ѿ тебѐ свѣ́тᲂмъ наставлѧ́еми , тебѐ неприкᲂснᲂве́ннагѡ и҆ приснᲂсꙋ́щнагѡ зрѧ́ще свѣ́та , непреста́ннᲂе тебѣ̀ и҆спᲂвѣ́данїе , и҆ бл҃гᲂдаре́нїе вᲂз̾сыла́емъ , без̾нача́льнᲂмꙋ ѻ҆ц҃ꙋ , со є҆динᲂро́днымъ тѝ сн҃ᲂмъ , и҆ съ прест҃ы́мъ и҆ бл҃ги́мъ и҆ живᲂтвᲂрѧ́щимъ тѝ дх҃ᲂмъ , ны́нѣ и҆ при́снѡ и҆ во́ вѣки вѣко́мъ , а҆ми́нь .

та́же , ча́съ , ѳ҃ . прїиди́те пᲂклᲂни́мсѧ , гⷤ .

ѱало́мъ , н҃и . И҆зми́ мѧ ѿ вра́гъ мᲂи́хъ бж҃е , и҆ ѿ вᲂста́ющихъ намѧ̀ и҆зба́ви мѧ . и҆зми́ мѧ ѿ твᲂрѧ́щихъ без̾зако́нїе , и҆ ѿ мꙋ́жь кро́ве спаси́ мѧ . ꙗ҆́кѡ сѐ ᲂу҆лᲂви́ша дш҃ꙋ мᲂю̀ , нападо́ша намѧ̀ крѣ́пцыи . ни без̾зако́нїе мᲂѐ , ни грѣ́хъ мо́й гдⷭ҇и . без̾ без̾зако́нїѧ теко́хъ , и҆ напра́вихъ . вᲂста́ни в̾ стрѣ́тенїе мᲂѐ , и҆ ви́ждь . и҆ ты̀ гдⷭ҇и бж҃е си́лъ , бж҃е і҆и҃левъ . вᲂньмѝ пᲂсѣти́ти всѧ̀ ꙗ҆зы́ки , не ᲂу҆ще́дриши всѧ̀ дѣ́лающїѧ без̾зако́нїе . вᲂз̾вратѧ́тсѧ на́ вечеръ , и҆ вза́лчꙋтъ ꙗ҆́кѡ псѝ , и҆ ѡ҆бы́дꙋтъ гра́дъ . сѐ ті́и ѿвѣща́ютъ ᲂу҆сты̀ свᲂи́ми , и҆ ѻ҆рꙋ́жїе во ᲂу҆стна́хъ и҆́хъ . ꙗ҆́кѡ кто̀ слы́ша ; и҆ ты̀ гдⷭ҇и пᲂсмѣе́шисѧ и҆́мъ , ᲂу҆ничижи́ши всѧ̀ ꙗ҆зы́ки . держа́вꙋ мᲂю̀ к̾ тебѣ̀ сᲂхраню̀ . ꙗ҆́кѡ ты̀ бж҃е застꙋ́пникъ мо́й є҆сѝ . бг҃ъ мо́й , млⷭ҇ть є҆гѡ̀ пред̾вари́тъ мѧ . бг҃ъ мо́й ꙗ҆ви́тъ мнѣ̀ на вразѣ́хъ мᲂи́хъ . не ᲂу҆бі́й и҆́хъ , да некᲂгда̀ забꙋ́дꙋтъ зако́нъ тво́й . разженѝ и҆́хъ си́лᲂю твᲂе́ю , и҆ низ̾лᲂжѝ и҆́хъ защи́тниче мо́й гдⷭ҇и . грѣ́хъ ᲂу҆́стъ и҆́хъ , сло́во ᲂу҆сте́нъ и҆́хъ , и҆ ꙗ҆́ти бꙋ́дꙋтъ в̾ гᲂрды́ни свᲂе́й . и҆ ѿ клѧ́твы и҆ лжѝ вᲂз̾вѣстѧ́тсѧ в̾ кᲂнчи́нѣ , во́ гнѣвѣ кᲂнчи́ны , и҆ небꙋ́дꙋтъ . и҆ ᲂу҆вѣ́дѧтъ , ꙗ҆́кѡ бг҃ъ ѡ҆блада́етъ і҆а́кѡвᲂмъ и҆ кᲂнцы̀ землѝ . вᲂз̾вратѧ́тсѧ на́ вечеръ , и҆ вза́лчꙋтъ ꙗ҆́кѡ псѝ , и҆ ѡ҆бы́дꙋтъ гра́дъ . ті́и разы́дꙋтсѧ ꙗ҆́сти . а҆́ще ли же ненасы́тѧтсѧ и҆ пᲂро́пщꙋтъ . а҆́зъ же вᲂспᲂю̀ си́лꙋ твᲂю̀ , и҆ вᲂз̾ра́дꙋюсѧ заꙋ́тра млⷭ҇ти твᲂе́й . ꙗ҆́кѡ бы́сть застꙋ́пникъ мо́й , и҆ прибѣ́жище мᲂѐ , въ де́нь печа́ли мᲂеѧ̀ . пᲂмо́щникъ мо́й є҆сѝ тебѣ̀ пᲂю̀ . ꙗ҆́кѡ бг҃ъ пᲂмо́щникъ мо́й є҆́сть , бж҃е мо́й млⷭ҇ть мᲂѧ̀ .

ѱало́мъ , рл҃ѳ . И҆зми́ мѧ гдⷭ҇и ѿ чл҃ка лꙋка́ва , ѿ́ мꙋжа непра́ведна и҆зба́ви мѧ . и҆́же пᲂмы́слиша непра́вдꙋ в̾ срⷣцы , ве́сь де́нь ѡ҆пᲂлча́хꙋ бра́ни . и҆з̾ѡ҆стри́ша ꙗ҆зы́къ сво́й ꙗ҆́кѡ ѕмі́инъ , ꙗ҆́дъ а҆́спидинъ пᲂд̾ ᲂу҆стна́ми и҆́хъ . сᲂхрани́ мѧ гдⷭ҇и и҆з̾ рꙋкѝ грѣ́шничи , ѿ чл҃къ непра́веденъ и҆зми́ мѧ . и҆́же пᲂмы́слиша запѧ́ти стᲂпы̀ мᲂѧ̀ . скры́ша го́рдїи сѣ́ть мнѣ̀ . и҆ ᲂу҆́жи препѧ́ша сѣ́ть нᲂга́мъ мᲂи́мъ , при стезѝ сᲂбла́зны пᲂлᲂжи́ша ми . рѣ́хъ гдⷭ҇ви , бг҃ъ мо́й є҆сѝ ты̀ , внꙋшѝ гдⷭ҇и гла́съ мᲂле́нїѧ мᲂегѡ̀ . гдⷭ҇и гдⷭ҇и си́ла спасе́нїѧ мᲂегѡ̀ , ѡ҆сѣни́лъ є҆сѝ над̾ главо́ю мᲂе́ю в̾ де́нь бра́ни . не преда́ждь менѐ гдⷭ҇и ѿ жела́нїѧ мᲂегѡ̀ грѣ́шникꙋ . пᲂмы́слиша намѧ̀ , не ѡ҆ста́ви менѐ , да некᲂгда̀ вᲂз̾несꙋ́тсѧ . глава̀ ѡ҆крꙋже́нїѧ и҆́хъ , трꙋ́дъ ᲂу҆сте́нъ и҆́хъ , пᲂкры́етъ и҆́хъ . падꙋ́тъ на ни́хъ ᲂу҆́глїѧ ѻ҆́гненаѧ . низ̾лᲂжи́ши и҆́хъ в̾ страсте́хъ и҆ непᲂстᲂѧ́тъ . мꙋ́жь ꙗ҆зы́ченъ не и҆спра́витсѧ на землѝ . мꙋ́жа непра́ведна ѕло̀ ᲂу҆лᲂви́тъ во и҆стлѣ́нїе . пᲂзна́хъ ꙗ҆́кѡ сᲂтвᲂри́тъ гдⷭ҇ь сꙋ́дъ ни́щимъ , и҆ ме́сть ᲂу҆бо́гимъ . ѻ҆ба́че пра́веднїи и҆спᲂвѣ́дѧтсѧ и҆́мени твᲂемꙋ̀ , и҆ вселѧ́тсѧ пра́вїи с̾ лице́мъ твᲂи́мъ .

ѱало́мъ , п҃є . Приклᲂнѝ гдⷭ҇и ᲂу҆́хо твᲂѐ , и҆ ᲂу҆слы́ши мѧ , ꙗ҆́кѡ ни́щь и҆ ᲂу҆бо́гъ є҆́смь а҆́зъ . сᲂхранѝ дш҃ꙋ мᲂю̀ , ꙗ҆́кѡ прⷣпбенъ є҆́смь . спасѝ раба̀ твᲂегѡ̀ бж҃е мо́й , ᲂу҆пᲂва́ющагѡ натѧ̀ . пᲂми́лꙋй мѧ гдⷭ҇и , ꙗ҆́кѡ к̾ тебѣ̀ вᲂз̾зᲂвꙋ̀ ве́сь де́нь . вᲂз̾веселѝ дш҃ꙋ раба̀ твᲂегѡ̀ , ꙗ҆́кѡ к̾ тебѣ̀ взѧ́хъ дш҃ꙋ мᲂю̀ . ꙗ҆́кѡ ты̀ гдⷭ҇и бл҃гъ , и҆ дᲂлгᲂтерпѣли́въ , и҆ мнᲂгᲂмлⷭ҇тивъ всѣ́мъ призыва́ющимъ тѧ̀ . внꙋшѝ гдⷭ҇и мᲂли́твꙋ мᲂю̀ , и҆ вᲂньмѝ гла́сꙋ мᲂле́нїѧ мᲂегѡ̀ . въ де́нь печа́ли мᲂеѧ̀ вᲂз̾ва́хъ к̾ тебѣ̀ , ꙗ҆́кѡ ᲂу҆слы́ша мѧ . нѣ́сть пᲂдо́бенъ тебѣ̀ в̾ бо́зѣхъ гдⷭ҇и , и҆ нѣ́сть по дѣ́лᲂмъ твᲂи́мъ . всѝ ꙗ҆зы́цы є҆ли́кѡ сᲂтвᲂрѝ , прїи́дꙋтъ и҆ пᲂкло́нѧтсѧ пред̾ тᲂбо́ю гдⷭ҇и , и҆ прᲂсла́вѧтъ и҆́мѧ твᲂѐ . ꙗ҆́кѡ ве́лїи є҆сѝ ты̀ , и҆ твᲂрѧ́и чꙋдеса̀ , ты̀ є҆сѝ бг҃ъ є҆ди́нъ . наста́ви мѧ гдⷭ҇и на пꙋ́ть тво́й , и҆ пᲂйдꙋ̀ во и҆́стинѣ твᲂе́й . да вᲂз̾весели́тсѧ се́рдце мᲂѐ , бᲂѧ́тисѧ и҆́мене твᲂегѡ̀ . и҆спᲂвѣ́мсѧ тебѣ̀ гдⷭ҇и бж҃е мо́й всѣ́мъ срⷣцемъ мᲂи́мъ , и҆ прᲂсла́влю и҆́мѧ твᲂѐ в̾ вѣ́къ . ꙗ҆́кѡ млⷭ҇ть твᲂѧ̀ ве́лїѧ на мнѣ̀ , и҆ и҆зба́ви дш҃ꙋ мᲂю̀ ѿ а҆́да преи҆спо́днѧгѡ . бж҃е , закᲂнᲂпрестꙋ́пницы вᲂста́ша намѧ̀ , и҆ со́нмъ держа́вныхъ взыска́ша дш҃ꙋ мᲂю̀ , и҆ непред̾лᲂжи́ша тебѐ пред̾ сᲂбо́ю . и҆ ты̀ гдⷭ҇и бж҃е мо́й ще́дръ и҆ млⷭ҇тивъ , дᲂлгᲂтерпѣли́въ и҆ мнᲂгᲂмлⷭ҇тивъ и҆ и҆́стиненъ . при́зри намѧ̀ и҆ пᲂми́лꙋй мѧ̀ . да́ждь держа́вꙋ твᲂю̀ ѻ҆́трᲂкꙋ твᲂемꙋ̀ , и҆ спасѝ сы́на рабы̀ твᲂеѧ̀ . сᲂтвᲂрѝ со мно́ю зна́менїе во́ бл҃го , и҆ да ви́дѧтъ ненави́дѧщїи мѧ̀ , и҆ пᲂстыдѧ́тсѧ . ꙗ҆́кѡ ты̀ гдⷭ҇и пᲂмо́же мѝ и҆ ᲂу҆тѣ́шилъ мѧ є҆сѝ .

сла́ва , и҆ ны́нѣ . а҆ллилꙋ́їѧ , гⷤ . гдⷭ҇и пᲂми́лꙋй , гⷤ . сла́ва . трᲂпа́рь , гла́съ , и҃ . Ви́дѧ разбо́йникъ нача́льника жи́зни , на крⷭ҇тѣ̀ ви́сѧща , и҆ глаго́лаше , а҆́ще небы̀ бг҃ъ бы́лъ вᲂпло́щьсѧ , и҆́же с̾ на́ми распны́исѧ , небы̀ сл҃нце лꙋчѝ свᲂѧ̀ пᲂтаи́ло , нижѐ землѧ̀ трепе́щꙋщи трѧсла́сѧ . но и҆́же за всѧ̀ терпѧ́и , пᲂмѧни́ мѧ сп҃се є҆гда̀ прїи́деши во црⷭ҇твїи сѝ . и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ млⷭ҇тиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ заны̀ , и҆ спасѝ сп҃се на́шъ лю́ди сᲂгрѣ́ш̾шїѧ .

та́же , стихѣ́ры . гла́съ , з҃ . Оу҆́жасъ бѣ̀ ви́дѣти , нб҃ꙋ и҆ землѝ твᲂрца̀ на крⷭ҇тѣ̀ ви́сима . сл҃нце пᲂме́ркше , де́нь же па́ки в̾ но́щь прелᲂжи́сѧ . и҆ зе́млю и҆з̾ грᲂбо́въ и҆спꙋща́ющꙋ тѣлеса̀ ме́ртвыхъ . с̾ ни́миже пᲂклᲂнѧ́ем̾тисѧ , спасѝ на́съ . два́жды .

сти́хъ : раздѣли́ша ри́зы мᲂѧ̀ себѐ ,꙳ и҆ ѡ҆ ѻ҆де́жди мᲂе́й мета́ша жре́бїѧ . Є҆гда̀ на крⷭ҇тѣ̀ пригвᲂзди́ша без̾зако́ннїи гдⷭ҇а сла́вы , вᲂпїѧ́ше к̾ ни́мъ , чи́мъ ва́съ ѡ҆печа́лихъ , и҆лѝ ѡ҆ че́мъ прᲂгнѣ́вахъ , и҆ пре́жде менѐ кто̀ ва́съ и҆зба́ви ѿ ско́рби ; и҆ ны́нѣ что́ ми вᲂз̾да́сте ѕла́ѧ за блага́ѧ ; за сто́лпъ ѻ҆́гненыи , на крⷭ҇тѣ́ мѧ пригвᲂзди́сте . за ѻ҆́блакъ , гро́бъ ми и҆скᲂпа́сте . за ма́ннꙋ , же́лчь ми принесо́сте , за́вᲂдꙋ , ѻ҆цта́ мѧ напᲂи́сте . про́чее призᲂвꙋ̀ мᲂѧ̀ ꙗ҆зы́ки , и҆ ті́и мѧ прᲂсла́вѧтъ , со ѻ҆ц҃е́мъ и҆ со ст҃ы́мъ дх҃ᲂмъ .

сти́хъ : да́ша в̾ снѣ́дь мᲂю̀ же́лчь ,꙳ и҆ в̾ жа́ждꙋ мᲂю̀ напᲂи́ша мѧ ѻ҆цта̀ . и҆ =па́ки , тꙋ́же , стⷯрꙋ . =сла́ва . гла́съ , ѕ҃ . Дне́сь ви́ситъ на́ древѣ , и҆́же на вᲂда́хъ зе́млю пᲂвѣ́шеи . вѣнце́мъ ѿ те́рнїѧ ѡ҆блага́етсѧ , и҆́же а҆́нг҃лѡмъ цр҃ь . въ ло́жнꙋю багрѧни́цꙋ ѡ҆блачи́тсѧ , ѡ҆блача́ѧи нб҃са̀ ѻ҆́блаки . ᲂу҆даре́нїе прїѧ́тъ , и҆́же во і҆ѡрда́нѣ свᲂбᲂди́выи а҆да́ма . гвᲂздьмѝ пригвᲂзди́сѧ , жени́хъ цр҃ко́вныи . кᲂпїе́мъ прᲂбᲂде́сѧ , сн҃ъ дв҃ыѧ . пᲂклᲂнѧ́емсѧ страсте́мъ твᲂи́мъ хрⷭ҇тѐ= [пᲂкло́н̾ до землѝ] .= пᲂклᲂнѧ́емсѧ страсте́мъ твᲂи́мъ хрⷭ҇тѐ= [пᲂкло́н̾ до землѝ] .= пᲂклᲂнѧ́емсѧ стрⷭ҇те́мъ твᲂи́мъ хрⷭ҇тѐ= [пᲂкло́н̾ до землѝ] .= пᲂкажѝ на́мъ и҆ сла́внᲂе твᲂѐ вᲂскрⷭ҇нїе . и҆ ны́нѣ , то́йже . та́же , прᲂки́менъ . гла́съ , ѕ҃ . речѐ безꙋ́менъ в̾ срⷣцы свᲂе́мъ , нѣ́сть бг҃а . сти́хъ : нѣ́сть твᲂрѧ́и бл҃гᲂсты́ню , нѣ́сть до є҆ди́нагѡ .

ѿ пррⷪ҇чества і҆єремі́ина , чте́нїе .

Гдⷭ҇и скажи́ ми да разꙋмѣ́ю . тᲂгда̀ ви́дѣхъ начина́нїѧ и҆́хъ , а҆́зъ же ꙗ҆́кѡ а҆́гнѧ неѕло́биво ведо́мо на закᲂле́нїе , но разꙋмѣ́хъ , ꙗ҆́кѡ намѧ̀ пᲂмы́слиша по́мыслъ лꙋка́въ , гл҃юще , прїиди́те и҆ влᲂжи́мъ дре́во в̾ хлѣ́бъ є҆гѡ̀ , и҆ и҆стреби́мъ є҆гѡ̀ ѿ землѝ живы́хъ , и҆ и҆́мѧ є҆гѡ̀ да непᲂмѧне́тсѧ к̾ тᲂмꙋ̀ . гдⷭ҇и си́ламъ и҆́же сꙋ́диши пра́веднѡ , и҆ и҆спыта́ѧ срⷣца̀ и҆ ᲂу҆тро́бы , да ви́жꙋ є҆́же ѿ тебѐ ѿмще́нїе твᲂѐ на ни́хъ , ꙗ҆́кѡ к̾ тебѣ̀ ѿкры́хъ ѡ҆правда́нїе мᲂѐ . сегѡ̀ ра́ди та́кѡ гл҃етъ гдⷭ҇ь к̾ мꙋ́жемъ а҆наѳѡ́ѳскимъ и҆́щꙋщимъ дш҃ꙋ твᲂю̀ , и҆ гл҃ющимъ , не и҆́маши прᲂро́чествᲂвати ѡ҆ и҆́мени гдⷭ҇ни . а҆́ще ли же нѝ , ᲂу҆́мреши в̾ рꙋка́хъ на́шихъ . сегѡ̀ ра́ди та́кѡ гл҃етъ гдⷭ҇ь си́ламъ , сѐ а҆́зъ пᲂсѣщꙋ̀ на ни́хъ , ю҆́нᲂши и҆́хъ ѻ҆рꙋ́жїемъ ᲂу҆́мрꙋтъ , и҆ сн҃ᲂве и҆́хъ и҆ дще́рѧ и҆́хъ скᲂнча́ютсѧ гла́дᲂмъ , и҆ ѡ҆ста́нка небꙋ́дꙋтъ ѿ ни́хъ . занѐ , наведꙋ̀ ѕла́ѧ на живꙋ́щихъ во а҆наѳѡ́ѳѣ , в̾ лѣ́то пᲂсѣще́нїѧ и҆́хъ . пра́веденъ є҆сѝ гдⷭ҇и , ꙗ҆́кѡ ѿвѣща́ю к̾ тебѣ̀ . ѻ҆ба́че сꙋдьбы̀ вᲂз̾глаго́лю к̾ тебѣ̀ . что̀ ꙗ҆́кѡ пꙋ́ть нечести́вымъ спѣ́етсѧ , и҆ дᲂбро̀ є҆́сть всѣ́мъ и҆́же престꙋпа́ютъ и҆ без̾зако́ннѡ дѣ́ютъ . ᲂу҆гᲂбзи́шасѧ всѝ ѿмѣта́ющїи ѿмета́нїѧ . насади́лъ є҆сѝ и҆́хъ , и҆ ᲂу҆кᲂрени́шасѧ . ча́да сᲂтвᲂри́ша , и҆ сᲂтвᲂри́ша пло́дъ . бли́зъ є҆сѝ ты̀ ᲂу҆сто́мъ и҆́хъ , дале́че же ѿ ᲂу҆тро́бъ и҆́хъ . и҆ ты̀ гдⷭ҇и вѣ́си мѧ и҆ ви́дѣлъ мѧ є҆сѝ , и҆ и҆скꙋси́лъ є҆сѝ се́рдце мᲂѐ пред̾ сᲂбо́ю . сᲂберѝ и҆́хъ ꙗ҆́кѡ ѻ҆́вцы на закᲂле́нїе , и҆ ѡ҆чи́сти ѧ҆̀ в̾ де́нь закᲂле́нїѧ и҆́хъ . дᲂко́лѣ вᲂспла́четсѧ всѧ̀ землѧ̀ , и҆ трава̀ всѧ̀ се́льнаѧ и҆́з̾схнетъ , ѿ ѕло́бъ живꙋ́щихъ на не́й . и҆ пᲂгибо́ша ско́ти и҆́хъ и҆ пти́цы , ꙗ҆́кѡ реко́ша , не ᲂу҆́зритъ бг҃ъ пꙋте́й на́шихъ , твᲂѧ́ же но́ги текꙋ́тъ и҆ ѡ҆слабѣ́стасѧ . сᲂбере́тесѧ всѧ̀ ѕвѣ́ри се́льныѧ , и҆ да прїи́дꙋтъ є҆́же снѣ́сти є҆ѧ̀ . па́стырїе мно́зи прᲂсмради́ша винᲂгра́дъ мо́й , и҆ ѡ҆скверни́ша ча́сть мᲂю̀ жела́емꙋю . в̾ пꙋсты́ню же непрᲂхо́днꙋю пᲂлᲂжи́сѧ , и҆ в̾ требле́нїе па́гꙋбы . ꙗ҆́кѡ та́кѡ гл҃етъ гдⷭ҇ь ѡ҆ всѣ́хъ сᲂсѣ́дѣхъ лꙋка́выхъ , и҆ каса́ющихсѧ наслѣ́дїю мᲂемꙋ̀ , є҆́же раздѣли́хъ лю́демъ мᲂи́мъ і҆и҃лю . сѐ а҆́зъ вᲂстерза́ю и҆́хъ ѿ землѝ и҆́хъ . и҆ до́мъ і҆ꙋ́дᲂвъ и҆змꙋ̀ ѿ среды̀ и҆́хъ . и҆ бꙋ́детъ пᲂвнегда̀ и҆зѧ́ти ми и҆́хъ , и҆ вселю̀ и҆́хъ кᲂго́ждо в̾ дᲂстᲂѧ́нїе свᲂѐ , и҆ кᲂго́ждо в̾ зе́млю и҆́хъ .

та́же , а҆пⷭ҇лъ , къ є҆вре́ѡмъ . заⷱ҇ , тк҃д . Бра́тїе , и҆мꙋ́ще дерзнᲂве́нїе , вхо́дъ ст҃ы́хъ кро́вїю і҆с҃ъ хрⷭ҇то́вᲂю , є҆го́же ѡ҆бнᲂви́лъ є҆́сть на́мъ пꙋ́ть но́въ и҆ жи́въ , завѣ́сᲂю ; си́рѣчь , пло́тїю свᲂе́ю , и҆ а҆рхїєре́ѧ вели́ка в̾ дᲂмꙋ̀ бж҃їи . да пристꙋпа́емъ со и҆́стиннымъ срⷣцемъ , и҆ и҆з̾вѣще́нїемъ вѣ́ры , ѡ҆чище́ни срⷣца̀ ѿ со́вѣсти лꙋка́выѧ , и҆ и҆змᲂве́ни тѣлеса̀ вᲂдо́ю чи́стᲂю , да держи́мъ и҆спᲂвѣ́данїе ᲂу҆пᲂва́нїю неꙋкло́нно , вѣ́ренъ бо є҆́сть ѡ҆бѣща́выи . и҆ да разꙋмѣва́емъ дрꙋ́гъ дрꙋ́га в̾ пᲂѡ҆щре́нїи любвѐ , и҆ до́брыхъ дѣ́лъ , не ѡ҆ставлѧ́юще цр҃ко́вныхъ сᲂбра́нїи свᲂи́хъ , ꙗ҆́кᲂже є҆́сть нѣ́кимъ ѻ҆бы́чай , но дрꙋ́гъ дрꙋ́га пᲂд̾виза́юще . и҆ тᲂли́кѡ па́че мᲂлѧ́щесѧ , є҆ли́кѡ ви́дите приближа́ющьсѧ де́нь сꙋ́дныи . во́лею бо сᲂгрѣша́ющимъ на́мъ по прїѧ́тїи ра́зꙋма и҆́стины , к̾ тᲂмꙋ̀ ѡ҆ грѣсѣ́хъ не ѡ҆брѣта́етсѧ же́ртва . стра́шно же нѣ́кᲂе ча́ѧнїе сꙋда̀ , и҆ ѻ҆гнѧ̀ ре́внᲂсть , пᲂѧ́сти хᲂтѧ́щагѡ сᲂпрᲂти́вныѧ . ѿве́ргъсѧ кто̀ зако́на мѡѷсе́ѡва , без̾ милᲂсе́рдїѧ придвᲂю̀ и҆лѝ тре́хъ свидѣ́тель ᲂу҆мира́етъ . кᲂли́цѣ мни́тъ го́ршей спᲂдо́битисѧ мꙋ́цѣ , и҆́же сн҃а бж҃їѧ пᲂпра́выи , и҆ кро́вь завѣ́тнꙋю скве́рнꙋ вᲂз̾мни́въ , в̾ не́йже ѡ҆ст҃и́сѧ , и҆ дх҃ъ бл҃гᲂда́ти ᲂу҆кᲂри́въ . вѣ́мъ бо ре́кшаго , мнѣ̀ ѿмще́нїе , а҆́зъ вᲂзда́мъ гл҃етъ гдⷭ҇ь . и҆ па́ки , ꙗ҆́кѡ сꙋ́дитъ гдⷭ҇ь лю́демъ свᲂи́мъ . стра́шно є҆́же впа́сти в̾ рꙋ́цѣ бг҃а жива́гѡ .

та́же , є҆ѵⷢ҇а́лїе , ѿ і҆ѡа́нна . заⷱ҇ , н҃ѳ . Во́ времѧ ѻ҆́но , ведо́ша і҆с҃а ѿ каїа́фы в̾ прето́ръ , бѣ́ же ᲂу҆́тро . и҆ ті́и невнидо́ша в̾ прето́ръ , да неѡ҆сквернѧ́тсѧ , но да ꙗ҆дѧ́тъ фа́скꙋ . и҆зы́де же пила́тъ к̾ ни́мъ во́нъ , и҆ речѐ , кꙋ́ю рѣ́чь прино́сите на чл҃ка сего̀ ; ѿвѣща́ша и҆ рѣ́ша є҆мꙋ̀ , а҆́ще небы̀ бы́лъ се́й ѕлᲂдѣ́й , небы́хᲂмъ пре́дали є҆гѡ̀ тебѣ̀ . рече́ же и҆́мъ пила́тъ , пᲂимѣ́те є҆гѡ̀ вы̀ , и҆ пᲂзако́нꙋ ва́шемꙋ сꙋди́те є҆мꙋ̀ . рѣ́ша же є҆мꙋ̀ і҆ꙋде́е , на́мъ недᲂсто́итъ ᲂу҆би́ти никᲂго́же . да сло́во і҆с҃ᲂво сбꙋ́детсѧ є҆́же речѐ , назна́менꙋѧ ко́ею сме́ртїю хᲂтѧ́ше ᲂу҆́мрети . вни́де же па́ки пила́тъ в̾ прето́ръ , и҆ гласѝ і҆с҃а , и҆ речѐ є҆мꙋ̀ , ты́ ли є҆сѝ цр҃ь і҆ꙋде́йскъ ; ѿвѣща̀ є҆мꙋ̀ і҆с҃ъ , ѡ҆ себѣ́ ли ты̀ сѐ гл҃еши , и҆лѝ и҆ні́и тебѣ̀ реко́ша ѡ҆ мнѣ̀ . ѿвѣща̀ пила́тъ , є҆да̀ а҆́зъ жидᲂви́нъ є҆́смь ; ро́дъ тво́й и҆ а҆рхїєре́е преда́ша тѧ̀ мнѣ̀ , что̀ є҆сѝ сᲂтвᲂри́лъ ; ѿвѣща̀ і҆с҃ъ , црⷭ҇тво мᲂѐ , нѣ́сть ѿ́ мира сегѡ̀ . а҆́ще ѿ́ мира сегѡ̀ бы́ло бы црⷭ҇тво мᲂѐ , слꙋгѝ мᲂѧ̀ ᲂу҆́бѡ пᲂдвиза́лисѧ бы́ша , да непре́данъ бы́хъ бы́лъ і҆ꙋде́ѡмъ . ны́нѣ же црⷭ҇тво мᲂѐ , нѣ́сть ѿ сю́дꙋ . рече́ же є҆мꙋ̀ пила́тъ , ᲂу҆́бѡ цр҃ь ли є҆сѝ ты̀ ; ѿвѣща̀ і҆с҃ъ . ты̀ гл҃еши , ꙗ҆́кѡ цр҃ь є҆́смь а҆́зъ . а҆́зъ на сѐ рᲂди́хсѧ , и҆ на сѐ прїидо́хъ въ ми́ръ , да свидѣ́тельствꙋю и҆́стинꙋ . и҆ всѧ́къ и҆́же є҆́сть ѿ и҆́стины , пᲂслꙋ́шаетъ гла́са мᲂегѡ̀ . гл҃а є҆мꙋ̀ пила́тъ , что̀ є҆́сть и҆́стина ; и҆ сѐ ре́къ , па́ки и҆зы́де ко і҆ꙋде́ѡмъ , и҆ гл҃а и҆́мъ , а҆́зъ ни є҆ди́ныѧ вины̀ ѡ҆брѣта́ю в̾ не́мъ . є҆́сть же ѻ҆бы́чай ва́мъ , да є҆ди́наго ва́мъ ѿпꙋщꙋ̀ на па́схꙋ . хо́щете ли ᲂу҆́бѡ да ѿпꙋщꙋ̀ ва́мъ цр҃ѧ і҆ꙋде́йска ; вᲂзᲂпи́ша же всѝ гл҃юще , несего̀ , но вара́ввꙋ , бѣ́ же вара́вва разбо́йникъ . тᲂгда̀ ᲂу҆́бѡ пила́тъ пᲂѧ́тъ і҆с҃а , и҆ бѝ є҆гѡ̀ . и҆ во́ини спле́тше вѣне́цъ ѿ те́рнїѧ , вᲂзлᲂжи́ша є҆мꙋ̀ на главꙋ̀ , и҆ в̾ ри́зꙋ багрѧ́нꙋ ѡ҆блеко́ша є҆гѡ̀ , и҆ гл҃ахꙋ , ра́дꙋисѧ цр҃ю і҆ꙋде́йскїи , и҆ бїѧ́хꙋ є҆гѡ̀ по лани́тама . и҆зы́де же па́ки во́нъ пила́тъ , и҆ гл҃а и҆́мъ , сѐ и҆звᲂжꙋ̀ є҆гѡ̀ ва́мъ во́нъ , да разꙋмѣ́ете , ꙗ҆́кѡ в̾ не́мъ ни є҆ди́ныѧ вины̀ ѡ҆брѣта́ю . и҆зы́де же во́нъ і҆с҃ъ , нᲂсѧ̀ терно́венъ вѣне́цъ , и҆ багрѧ́нꙋ ри́зꙋ . и҆ гл҃а и҆́мъ , сѐ чл҃къ є҆гда́ же ви́дѣша є҆гѡ̀ а҆рхїєре́е и҆ слꙋгѝ , вᲂзᲂпи́ша гл҃юще . распнѝ распнѝ є҆гѡ̀ . гл҃а и҆́мъ пила́тъ , пᲂйми́те є҆гѡ̀ вы̀ и҆ распни́те , а҆́зъ бо не ѡ҆брѣта́ю в̾ не́мъ вины̀ . ѿвѣща́ша є҆мꙋ̀ і҆ꙋде́е , мы̀ зако́нъ и҆́мамы , и҆ по зако́нꙋ на́шемꙋ , до́лженъ є҆́сть ᲂу҆́мрети , ꙗ҆́кѡ себѐ сн҃а бж҃їѧ сᲂтвᲂрѝ . є҆гда́ же слы́ша пила́тъ сѐ сло́во , па́че ᲂу҆бᲂѧ́сѧ . и҆ вни́де в̾ прето́ръ па́ки , и҆ глаго́ла і҆с҃ᲂви , ѿ кꙋ́дꙋ є҆сѝ ты̀ . і҆с҃ъ же ѿвѣ́та неда́стъ є҆мꙋ̀ . гл҃а же є҆мꙋ̀ пила́тъ , мнѣ́ ли негл҃еши . невѣ́си ли ꙗ҆́кѡ вла́сть и҆́мамъ распѧ́ти тѧ , и҆ вла́сть и҆́мамъ пꙋсти́ти тѧ̀ ; ѿвѣща̀ і҆с҃ъ , не и҆́маши вла́сти ни є҆ди́ныѧ на мнѣ̀ , а҆́ще небы̀ тѝ дано̀ свы́ше . сегѡ̀ ра́ди преда́выи мѧ̀ тебѣ̀ , бо́лїи грѣ́хъ и҆́мать . ѿ сегѡ̀ и҆ска́ше пила́тъ пꙋсти́ти є҆гѡ̀ . і҆ꙋде́е же вᲂпїѧ́хꙋ гл҃юще , а҆́ще сего̀ пꙋ́стиши , нѣ́си дрꙋ́гъ кесаре́въ . всѧ́къ и҆́же цр҃ѧ себѐ твᲂрѧ́и , прᲂти́витсѧ кесарю̀ . пила́тъ же слы́шавъ сѐ сло́во , и҆зведѐ во́нъ і҆с҃а , и҆ сѣ́де на сꙋди́щи , на мѣ́стѣ гл҃емѣмъ лиѳᲂстрᲂто́нъ , є҆вре́йски же гавва́ѳа , бѣ́ же пѧто́къ па́сцѣ , ча́съ же ꙗ҆́кѡ шесты́и , и҆ гл҃а і҆ꙋде́ѡмъ , сѐ цр҃ь ва́шъ . ѻ҆ни́ же вᲂпїѧ́хꙋ , вᲂзмѝ вᲂзмѝ распнѝ є҆гѡ̀ . гл҃а и҆́мъ пила́тъ , цр҃ѧ́ ли ва́шегѡ распнꙋ̀ ; ѿвѣща́ша а҆рхїєре́е , не и҆́мамы цр҃ѧ , то́кмѡ кесарѧ̀ . тᲂгда́ же преда́стъ є҆гѡ̀ и҆́мъ , да ра́спнетсѧ .= =пᲂе́мше же і҆с҃а , и҆ ведо́ша . и҆ нᲂсѧ̀ крⷭ҇тъ сво́й , и҆зы́де в̾ гл҃емᲂе ло́бнᲂе мѣ́сто , є҆́же гл҃етсѧ є҆вре́йски , гᲂлго́ѳа , и҆дѣ́же прᲂпѧ́ша є҆гѡ̀ . и҆ с̾ ни́мъ и҆́на два̀ , сю́дꙋ и҆ сю́дꙋ , пᲂсредѣ́ же і҆с҃а . написа́ же и҆ ти́тла пила́тъ , и҆ пᲂлᲂжѝ на крⷭ҇тѣ̀ . бѣ́ же напи́сано , і҆с҃ъ назарѧни́нъ , цр҃ь і҆ꙋде́йскїи . сего́ же ти́тла мно́зи что́ша ѿ і҆ꙋде́й . ꙗ҆́кѡ бли́зъ бѣ̀ мѣ́сто гра́да , и҆дѣ́же прᲂпѧ́ша і҆с҃а . и҆ бѣ̀ напи́сано , є҆вре́йски , гре́чески , ри́мски . гл҃ахꙋ же пила́тꙋ а҆рхїєре́е і҆ꙋде́йстїи , непишѝ , цр҃ь і҆ꙋде́йскїи , но ꙗ҆́кѡ са́мъ речѐ , цр҃ь є҆́смь і҆ꙋде́йскїи . ѿвѣща̀ пила́тъ , є҆́же писа́хъ , писа́хъ . во́ини же є҆гда̀ прᲂпѧ́ша і҆с҃а , прїѧ́ша ри́зы є҆гѡ̀ и҆ сᲂтвᲂри́ша четы́ри ча́сти , кᲂмꙋ́ждо во́инꙋ ча́сть , и҆ хито́нъ . бѣ́ же хито́нъ нешве́нъ , свы́ше и҆стка́нъ ве́сь . рѣ́ша же къ себѣ̀ , непредере́мъ є҆гѡ̀ , но ме́тнемъ жре́бїѧ ѡ҆ не́мъ , кᲂмꙋ̀ бꙋ́детъ . да сбꙋ́детсѧ писа́нїе гл҃ющее , раздѣли́ша ри́зы мᲂѧ̀ себѣ̀ , и҆ ѡ҆ мати́смѣ мᲂе́й мета́ша жре́бїѧ . во́ини же ᲂу҆́бѡ сїѧ̀ сᲂтвᲂри́ша . стᲂѧ́хꙋ же при крⷭ҇тѣ̀ і҆с҃ᲂвѣ , мт҃и є҆гѡ̀ , и҆ сестра̀ мт҃ре є҆гѡ̀ , ма́рїѧ клеѡ́пᲂва , и҆ ма́рїѧ магдалы́ни . і҆с҃ъ же ви́дѣвъ мт҃рь и҆ ᲂу҆ченика̀ стᲂѧ́ща , є҆го́же люблѧ́ше , гл҃а мт҃ри свᲂе́й , же́но сѐ сн҃ъ тво́й . пᲂто́мъ же гл҃а ᲂу҆ченикꙋ̀ , сѐ мт҃и твᲂѧ̀ . и҆ ѿ тᲂгѡ̀ часа̀ пᲂѧ́тъ ю҆̀ ᲂу҆чени́къ во свᲂѧ́ си . пᲂсе́мъ вѣ́дыи і҆с҃ъ , ꙗ҆́кѡ всѧ̀ ᲂу҆́же сᲂверши́шасѧ . да сбꙋ́детсѧ писа́нїе , глаго́ла , жа́ждꙋ . сᲂсꙋ́дъ же стᲂѧ́ше по́лнъ ѻ҆цта̀ . ѻ҆ни́ же и҆спо́лнивше гꙋ́бꙋ ѻ҆цта̀ , и҆ на́ трᲂсть во́нзше , придѣ́ша ко ᲂу҆сто́мъ є҆гѡ̀ . є҆гда́ же прїѧ́тъ ѻ҆це́тъ і҆с҃ъ , речѐ , сᲂверши́шасѧ . и҆ прекло́нь главꙋ̀ , преда́стъ дх҃ъ . і҆ꙋде́е же , пᲂне́же пѧто́къ бѣ̀ , да не ѡ҆ста́нꙋтъ на крⷭ҇тѣ̀ тѣлеса̀ в̾ сꙋбо́тꙋ . бѣ́ бо вели́къ де́нь тᲂѧ̀ сꙋбо́ты , мᲂли́ша пила́та , да пребїю́тъ го́лени и҆́хъ , и҆ во́змꙋтъ . прїидо́ша же во́ини , и҆ пе́рвᲂмꙋ ᲂу҆́бѡ преби́ша го́лени , и҆ дрꙋго́мꙋ распѧ́тᲂмꙋ с̾ ни́мъ . на і҆с҃а же прише́дше , ꙗ҆́кѡ ви́дѣша є҆гѡ̀ ᲂу҆́же ᲂу҆ме́рша , непреби́ша є҆мꙋ̀ го́ленїи , но є҆ди́нъ ѿ во́инъ кᲂпїе́мъ ре́бра є҆мꙋ̀ прᲂбᲂдѐ , и҆ а҆́бїе и҆зы́де кро́вь и҆ вᲂда̀ . и҆ ви́дѣвыи , свидѣ́тельствᲂва , и҆ и҆́стинно є҆́сть свидѣ́тельство є҆гѡ̀ . и҆ то́й вѣ́сть ꙗ҆́кѡ и҆́стинꙋ гл҃етъ , да вы̀ вѣ́рꙋ и҆́мете . бы́ша бо сїѧ̀ , да сбꙋ́детсѧ писа́нїе , ко́сть несᲂкрꙋши́тсѧ ѿ негѡ̀ . и҆ па́ки дрꙋго́е писа́нїе гл҃етъ , во́з̾зрѧтъ на́нь є҆го́же прᲂбᲂдо́ша .

та́же , Непреда́ждь на́съ дᲂкᲂнца̀ , и҆́мене твᲂегѡ̀ ра́ди , и҆ неразᲂрѝ завѣ́та твᲂегѡ̀ , и҆ не ѿста́ви ми́лᲂсти твᲂеѧ̀ ѿ на́съ , а҆враа́ма ра́ди вᲂз̾лю́бленнагѡ ѿ тебѐ . и҆ за и҆саа́ка раба̀ твᲂегѡ̀ , и҆ і҆зра́илѧ ст҃а́гѡ твᲂегѡ̀ .

трⷭ҇то́е , и҆ по ѻ҆́ч҃е на́шъ . кᲂнда́к̾ . гла́съ , и҃ . На́съ ра́ди распѧ́тагѡ , прїиди́те всѝ вᲂспᲂе́мъ . тᲂго́ бо ви́дѣвши мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , но ты̀ є҆сѝ сн҃ъ и҆ бг҃ъ мо́й .

гдⷭ҇и пᲂми́лꙋй , м҃ . пᲂсе́м̾ , мл҃твꙋ . и҆́же на всѧ́ко вре́мѧ . гдⷭ҇и пᲂми́лꙋй , гⷤ . сла́ва , и҆ ны́нѣ . чтⷭ҇нѣ́йшꙋю херꙋви́мъ . и҆́менемъ гдⷭ҇нимъ блгⷭ҇вѝ ѻ҆́ч҃е . і҆єре́й : за мл҃твъ ст҃ы́хъ ѻ҆ц҃ъ . та́же , мл҃твꙋ сїю̀ : Влⷣко гдⷭ҇и і҆с҃е хрⷭ҇тѐ бж҃е на́шъ , дᲂлгᲂтерпѣли́ве ѡ҆ на́шихъ сᲂгрѣше́нїихъ , да́же и҆ до ны́нѣшнѧгѡ часа̀ приведы́и на́съ , во́ньже на живᲂтвᲂрѧ́щемъ дре́вѣ ви́сѧ , бл҃гᲂразꙋ́мнᲂмꙋ разбо́йникꙋ , и҆́же в̾ ра́й пꙋ́ть сᲂтвᲂри́лъ є҆сѝ вхо́дъ , и҆ сме́ртїю сме́рть раз̾рꙋши́лъ є҆сѝ , ѡ҆чи́сти на́съ грѣ́шныхъ , и҆ недᲂсто́йныхъ ра́бъ твᲂи́хъ . сᲂгрѣши́хᲂмъ бо и҆ без̾зако́ннᲂвахᲂмъ , и҆ нѣ́смы дᲂсто́йни вᲂз̾вестѝ ѻ҆́чїю на́шею , и҆ вᲂз̾рѣ́ти на высᲂтꙋ̀ нбⷭ҇нꙋю , зане́же ѡ҆ста́вихᲂмъ пꙋ́ть пра́вды твᲂеѧ̀ , и҆ хᲂди́хᲂмъ в̾ во́лѧхъ серде́цъ на́шихъ . но мо́лимъ твᲂю̀ бл҃гᲂсть , пᲂщадѝ на́съ гдⷭ҇и по мно́жествꙋ млⷭ҇ти твᲂеѧ̀ , и҆ спасѝ на́съ и҆́мене твᲂегѡ̀ ра́ди ст҃а́гѡ , ꙗ҆́кѡ и҆счезо́ша в̾ сꙋетѣ̀ дні́е на́ши . и҆змѝ на́съ и҆з̾ рꙋкѝ сᲂпрᲂти́внагѡ , и҆ ѡ҆ста́ви на́мъ прегрѣше́нїѧ на́ша , и҆ ᲂу҆мертвѝ плᲂтьско́е на́ше мꙋдрᲂва́нїе , да ве́тхагѡ ѿлᲂжи́вше чл҃ка , и҆ в̾ но́вагѡ ѡ҆блеце́мсѧ , и҆ тебѣ̀ пᲂживе́мъ на́шемꙋ влⷣцѣ и҆ бл҃гᲂда́телю . и҆ та́кѡ твᲂи́мъ пᲂвелѣ́нїемъ пᲂслѣ́дꙋюще , в̾ вѣ́чный пᲂко́й дᲂсти́гнемъ , и҆дѣ́же є҆́сть всѣ́мъ веселѧ́щимсѧ жили́ще , ты́ бо є҆сѝ вᲂи́стинꙋ и҆́стиннᲂе весе́лїе , и҆ ра́дᲂсть лю́бѧщимъ тѧ̀ хрⷭ҇тѐ бж҃е на́шъ . и҆ тебѣ̀ сла́вꙋ вᲂз̾сыла́емъ , съ без̾нача́льнымъ тѝ ѻ҆ц҃е́мъ , и҆ съ прест҃ы́мъ и҆ бл҃ги́мъ и҆ живᲂтвᲂрѧ́щимъ тѝ дх҃ᲂмъ , ны́нѣ и҆ прⷭ҇нѡ и҆ во́ вѣки вѣко́мъ , а҆ми́нь .

та́же , Во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . бл҃же́ни пла́чꙋщїи , ꙗ҆́кѡ ті́и ᲂу҆тѣ́шатсѧ . бл҃же́ни кро́тцыи , ꙗ҆́кѡ ті́и наслѣ́дѧтъ зе́млю . бл҃же́ни а҆́лчꙋщїи и҆ жа́ждꙋщїи пра́вды , ꙗ҆́кѡ ті́и насы́тѧтсѧ . бл҃же́ни ми́лᲂстивїи , ꙗ҆́кѡ ті́и пᲂми́лᲂвани бꙋ́дꙋтъ . бл҃же́ни чи́стїи срⷣцемъ , ꙗ҆́кѡ ті́и бг҃а ᲂу҆́зрѧтъ . бл҃же́ни мирᲂтво́рцы , ꙗ҆́кѡ ті́и сн҃ѡве бж҃їи нарекꙋ́тсѧ . бл҃же́ни и҆з̾гна́ни пра́вды ра́ди , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕѡ́лъ гл҃ъ , навы̀ лжꙋ́ще менѐ ра́ди .= ра́дꙋйтесѧ и҆ весели́тесѧ , ꙗ҆́кѡ мзда̀ ва́ша мно́га на́ небесѣхъ . =сла́ва , и҆ нн҃ѣ . Пᲂмѧнѝ на́съ гдⷭ҇и , є҆гда̀ прїи́деши во црⷭ҇твїи сѝ . пᲂмѧнѝ на́съ влⷣко , є҆гда̀ прїи́деши во црⷭ҇твїи сѝ . пᲂмѧнѝ на́съ ст҃ы́и , є҆гда̀ прїи́деши во црⷭ҇твїи сѝ . ли́къ нбⷭ҇ныи пᲂе́тъ тѧ̀ и҆ гл҃етъ , ст҃ъ ст҃ъ ст҃ъ гдⷭ҇ь саваѡ́ѳъ , и҆спо́лнь нб҃о и҆ зе́млю сла́вы твᲂеѧ̀ . пристꙋпи́те к̾ немꙋ̀ и҆ прᲂсвѣти́тесѧ , и҆ ли́ца ва́ша непᲂстыдѧ́тсѧ . ли́къ нбⷭ҇ныи пᲂе́тъ тѧ̀ и҆ гл҃етъ , ст҃ъ ст҃ъ ст҃ъ гдⷭ҇ь саваѡ́ѳъ , и҆спо́лнь нб҃о и҆ зе́млю сла́вы твᲂеѧ̀ . сла́ва . сᲂбо́ръ ст҃ы́хъ а҆́нг҃лъ и҆ а҆рха́нг҃лъ , со всѣ́ми нбⷭ҇ными си́лами пᲂе́тъ тѧ и҆ гл҃етъ , ст҃ъ ст҃ъ ст҃ъ гдⷭ҇ь саваѡ́ѳъ , и҆спо́лнь нб҃о и҆ зе́млю сла́вы твᲂеѧ̀ . и҆ ны́нѣ . и҆спᲂвѣ́данїе правᲂсла́вныѧ вѣ́ры , пе́рвагѡ сᲂбо́ра . Вѣ́рꙋю во є҆ди́наго бг҃а ѻ҆ц҃а вседержи́телѧ , твᲂрца̀ нб҃ꙋ и҆ землѝ , ви́димымъ же всѣ́мъ и҆ неви́димымъ . и҆ во є҆ди́наго гдⷭ҇а і҆с҃а хрⷭ҇та̀ сн҃а бж҃їѧ , є҆динᲂро́днаго , и҆́же ѿ ѻ҆ц҃а рᲂжде́ннаго пре́жде всѣ́хъ вѣ́къ . свѣ́та ѿ́ свѣта , бг҃а и҆́стинна ѿ́ бг҃а и҆́стинна , рᲂжде́на а҆ несᲂтвᲂре́на , є҆динᲂсꙋ́щна ѻ҆ц҃ꙋ , и҆́мъ же всѧ̀ бы́ша . на́съ ра́ди чл҃къ , и҆ на́шегѡ ра́ди спасе́нїѧ , с̾ше́дшагѡ с̾ нб҃съ , и҆ вᲂплᲂти́вшагᲂсѧ ѿ́ дх҃а ст҃а , и҆ мр҃і́и дв҃ы вᲂчл҃чьшасѧ . распѧ́тагѡ заны̀ при пᲂнті́йстѣмъ пила́тѣ , страда́вша и҆ пᲂгребе́на , и҆ вᲂскрⷭ҇шаго в̾ тре́тїи де́нь по писа́нїихъ . и҆ вᲂзше́дшаго на нб҃са̀ , и҆ сѣдѧ́ща ѡ҆деснꙋ́ю ѻ҆ц҃а . и҆ па́ки грѧдꙋ́щаго со сла́вᲂю , сꙋди́ти живы́мъ и҆ ме́ртвымъ , є҆го́же црⷭ҇твїю нѣ́сть кᲂнца̀ . втᲂра́гѡ сᲂбо́ра . И҆ въ дх҃а ст҃а́гѡ гдⷭ҇а и҆́стиннаго , и҆ живᲂтвᲂрѧ́щаго , и҆́же ѿ ѻ҆ц҃а и҆з̾хᲂдѧ́щаго , и҆́же со ѻ҆ц҃е́мъ и҆ сн҃ᲂмъ с̾пᲂкланѧ́ема и҆ с̾сла́вима , гл҃авшаго прⷪ҇рки . и҆ во є҆ди́нꙋ ст҃ꙋ́ю сᲂбо́рнꙋю и҆ а҆пⷭ҇льскꙋю цр҃кᲂвь . и҆спᲂвѣ́дꙋю є҆ди́но кр҃ще́нїе , во ѡ҆ставле́нїе грѣхо́въ . ча́ю вᲂскрⷭ҇нїѧ ме́ртвымъ . и҆ жи́зни бꙋ́дꙋщагѡ вѣ́ка , а҆ми́нь .

пᲂсе́мъ , мл҃тва : Ѡ҆сла́би ѡ҆ста́ви , ѿпꙋстѝ бж҃е сᲂгреше́нїѧ на́ша , во́льнаѧ и҆ нево́льнаѧ , ꙗ҆́же в̾ сло́вѣ и҆ в̾ дѣ́лѣ , и҆ ꙗ҆́же в̾ вѣ́дѣнїи и҆ не в̾ вѣ́дѣнїи , и҆ ꙗ҆́же во ᲂу҆мѣ̀ и҆ в̾ пᲂмышле́нїи , ꙗ҆́же во́ дни и҆ в̾ нᲂщѝ , всѧ́ ми прᲂстѝ , ꙗ҆́кѡ бл҃гъ и҆ чл҃кᲂлю́бецъ . та́же , ѻ҆́ч҃е на́шъ . кᲂнда́къ . гла́съ , и҃ . На́съ ра́ди распѧ́тагѡ , прїиди́те всѝ вᲂспᲂе́мъ . тᲂго́ бо ви́дѣвши мр҃і́ѧ на́ древѣ , и҆ гл҃аше , а҆́ще и҆ распѧ́тїе терпи́ши , но ты̀ є҆сѝ сн҃ъ и҆ бг҃ъ мо́й . гдⷭ҇и пᲂми́лꙋй , м҃ . та́же , мл҃тва : Всест҃а́ѧ трⷪ҇це є҆динᲂсꙋ́щнаѧ , не ѡ҆держи́маѧ держа́ва , и҆ не раз̾дѣли́мᲂе црⷭ҇тво , ꙗ҆́же всѣ́мъ благи́мъ вино́вна , благᲂвᲂлѝ в̾ настᲂѧ́щїй се́й ча́съ ѡ҆ мнѣ̀ грѣ́шнѣмъ , и҆ всѧ́ ми ѡ҆мы́й скве́рны , и҆ прᲂсвѣти́ ми смы́слъ , ꙗ҆́кѡ да всегда̀ вᲂспѣва́ю тѧ , и҆ славᲂсло́влю и҆ глаго́лю , є҆ди́нъ ст҃ъ , є҆ди́нъ гдⷭ҇ь і҆с҃ъ хрⷭ҇то́съ , в̾ сла́вꙋ бг҃ꙋ ѻ҆ц҃ꙋ , а҆ми́нь .

та́же , бꙋ́ди и҆́мѧ гдⷭ҇не бл҃гᲂслᲂве́но ѿ ны́нѣ и҆ до́ вѣка , гⷤ . сла́ва , и҆ ны́нѣ . та́же , ѱало́мъ , л҃г . Бл҃гᲂслᲂвлю̀ гдⷭ҇а на всѧ́ко вре́мѧ , вы́нꙋ хвала̀ є҆гѡ̀ во ᲂу҆стѣ́хъ мᲂи́хъ . ѻ҆́ гдⷭ҇ѣ пᲂхва́литсѧ дш҃а мᲂѧ̀ . да ᲂу҆слы́шатъ кро́тцыи , и҆ вᲂз̾веселѧ́тсѧ . вᲂз̾вели́чите гдⷭ҇а со мно́ю , и҆ вᲂз̾несе́мъ и҆́мѧ є҆гѡ̀ в̾кꙋ́пѣ . взыска́хъ гдⷭ҇а и҆ ᲂу҆слы́ша мѧ , и҆ ѿ всѣ́хъ ско́рбїй мᲂи́хъ и҆зба́ви мѧ . пристꙋпи́те къ немꙋ̀ и҆ прᲂсвѣти́тесѧ , и҆ лица̀ ва́ша непᲂстыдѧ́тсѧ . сѐ ни́щїи вᲂзва̀ , и҆ гдⷭ҇ь ᲂу҆слы́ша и҆̀ , и҆ ѿ всѣ́хъ ско́рбїй є҆гѡ̀ спасѐ и҆̀ . ѡ҆пᲂлчи́тсѧ а҆́нг҃лъ гдⷭ҇нь ѡ҆́крестъ бᲂѧ́щихсѧ є҆гѡ̀ , и҆ и҆зба́витъ и҆́хъ . вкꙋси́те и҆ ви́дите ꙗ҆́кѡ бл҃гъ гдⷭ҇ь . бл҃же́нъ мꙋ́жъ и҆́же ᲂу҆пᲂва́етъ на́нь . бо́йтесѧ гдⷭ҇а всѝ сті́и є҆гѡ̀ , ꙗ҆́кѡ нѣ́сть лише́нїѧ бᲂѧ́щимсѧ є҆гѡ̀ . бᲂга́тїи ѡ҆бнища́ша и҆ взалка́ша , взыска́ющїи же гдⷭ҇а нелиша́тсѧ ѿ всѧ́кᲂгѡ бла́га . прїиди́те ча́да пᲂслꙋ́шайте менѐ , стра́хꙋ гдⷭ҇ню наꙋчꙋ̀ ва́съ . кто̀ є҆́сть чл҃къ хᲂтѧ́и живо́тъ , любѧ́и днѝ ви́дѣти бла́ги . ᲂу҆держѝ ꙗ҆зы́къ сво́й ѿ ѕла̀ , и҆ ᲂу҆стнѣ̀ свᲂѝ є҆́же не гл҃ати льстѝ . ᲂу҆клᲂни́сѧ ѿ ѕла̀ , и҆ сᲂтвᲂрѝ бл҃го . взыщѝ ми́ръ , и҆ пᲂженѝ и҆̀ . ѻ҆́чи гдⷭ҇ни на пра́ведныѧ , и҆ ᲂу҆́ши є҆гѡ̀ в̾ мл҃твꙋ и҆́хъ . лице́ же гдⷭ҇не на твᲂрѧ́щїѧ ѕла́ѧ , є҆́же пᲂтреби́ти ѿ землѝ па́мѧть и҆́хъ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . бли́зъ гдⷭ҇ь сᲂкрꙋше́нныхъ се́рдцемъ , и҆ смире́нныѧ дх҃ᲂмъ спасе́тъ . мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . храни́тъ гдⷭ҇ь всѧ̀ ко́сти и҆́хъ , и҆ ни є҆ди́на ѿ ни́хъ сᲂкрꙋши́тсѧ . сме́рть грѣ́шникѡмъ люта̀ , и҆ ненави́дѧщїи пра́веднагѡ прегрѣша́тъ . и҆зба́витъ гдⷭ҇ь дш҃а ра́бъ свᲂи́хъ , и҆ непрегрѣша́тъ всѝ ᲂу҆пᲂва́ющїи на́нь .

та́же , дᲂсто́йнѡ є҆́сть .= сла́ва , =и҆ ны́нѣ . гдⷭ҇и пᲂми́лꙋй , двⷤа . гдⷭ҇и бл҃гᲂслᲂвѝ .= и҆ =ѿпꙋ́стъ .