Впѧто́къ шесты́ѧ нлⷣи ст҃а́гѡ вели́кагѡ пᲂста̀ , на ве́черни , каѳи́сма : ко́ гдⷭ҇ꙋ внегда̀ скᲂрбѣ́хъ . на гдⷭ҇и вᲂзва́хъ , стихѣ́ры , на́ і҃ . гла́съ , и҃ . Дш҃епᲂле́знꙋю сᲂверши́вше четверᲂдесѧ́тницꙋ , и҆ ст҃ꙋ́ю нлⷣю стра́сти твᲂеѧ̀ про́симъ ви́дѣти чл҃кᲂлю́бче , прᲂсла́вити в̾ не́й вели́чїѧ твᲂѧ̀ , и҆ неи҆зрече́ннᲂе на́съ ра́ди смᲂтре́нїе твᲂѐ . є҆динᲂмꙋ́дрено пᲂю́ще , гдⷭ҇и сла́ва тебѣ̀ . двⷤа . мⷱ҇ꙋ . Мч҃нцы гдⷭ҇ни , всѧ́кѡ мѣ́стѡ ѡ҆сщ҃а́ете , и҆ всѧ́къ недꙋ́гъ ᲂу҆врачꙋ́ете . и҆ ны́нѣ мᲂли́те , и҆зба́витисѧ ѿ сѣте́й вра́жїихъ , дш҃а́мъ на́шимъ мо́лимсѧ .

та́же , ст҃о́мꙋ ла́зарю , стихѣ́ры , на́ з҃ . гла́съ , ѕ҃ . Гдⷭ҇и ла́заревъ гро́бъ хᲂтѧ̀ ви́дѣти , и҆́же во́лею хᲂтѧ́и во́ грᲂбъ всели́тисѧ , вᲂпрᲂша́ше , гдѣ̀ пᲂлᲂжи́сте є҆гѡ̀ , ᲂу҆вѣ́дѣвъ же , є҆го́же неневѣ́дѧше , и҆ вᲂзглаша́ше , є҆го́же люблѧ́ше , ла́заре грѧдѝ во́нъ . и҆ ᲂу҆слы́шавъ без̾дꙋ́шныи дш҃ꙋ даю́щаго є҆мꙋ̀ тебѐ сп҃са дш҃а́мъ на́шимъ . двⷤа . Гдⷭ҇и , на́ грᲂбъ четверᲂдне́внагѡ ла́зарѧ прише́лъ є҆сѝ , и҆ на́д̾дрꙋгᲂмъ сле́зы прᲂлїѧ́въ . мертвеца̀ четверᲂдне́вна вᲂста́вилъ є҆сѝ , гла́се живо́тныи . тѣ́мже сме́рть свѧ́зана бы́сть гла́сᲂмъ . пелены̀ разрѣши́шасѧ рꙋка́ми , тᲂгда̀ ра́дᲂсти и҆спо́лнишасѧ , мно́жество ᲂу҆чени́къ , и҆ є҆ди́но ѿ всѣ́хъ слы́шашесѧ сᲂгла́сїе , бл҃гᲂслᲂве́нъ є҆сѝ сп҃се пᲂми́лꙋй на́съ .= вⷤ . Г=дⷭ҇и , гла́съ тво́й разрꙋши́лъ є҆́сть , а҆́дᲂво црⷭ҇твїе , и҆ сло́во вла́сти твᲂеѧ̀ привлечѐ , и҆́з̾грᲂба четверᲂдне́внаго , и҆ бы́сть ла́зарь па́ки бытїю̀ прᲂѡ҆браже́нїе спаси́тельно . всѧ̀ вᲂзмо́жна тебѣ̀ влⷣко всѣ́хъ цр҃ю , да́рꙋй рабо́мъ свᲂи́мъ ѡ҆чище́нїе и҆ ве́лїю млⷭ҇ть . Гдⷭ҇и ᲂу҆вѣ́рити хᲂтѧ̀ ᲂу҆ченикѝ свᲂѧ̀ , и҆з̾ ме́ртвыхъ свᲂи́мъ вᲂскрⷭ҇нїемъ , на́ грᲂбъ ла́заревъ прише́лъ є҆сѝ , и҆ вᲂз̾гласи́вшꙋ ти є҆гѡ̀ , тᲂгда̀ а҆́дъ вᲂз̾мѧте́сѧ , и҆ ѿпꙋстѝ четверᲂдне́вна , вᲂпїю́ща тебѣ̀ , бл҃гᲂслᲂве́нъ є҆сѝ гдⷭ҇и сла́ва тебѣ̀ . Гдⷭ҇и , пᲂи́мъ ᲂу҆ченикѝ свᲂѧ̀ , в̾ виѳа́нїю прїи́де , да вᲂста́виши дрꙋ́га свᲂегѡ̀ , и҆ прᲂслези́всѧ над̾ ни́мъ зако́нᲂмъ є҆стества̀ чл҃ча , и҆ ꙗ҆́кѡ бг҃ъ тᲂгѡ̀ четверᲂдне́вна вᲂз̾дви́глъ є҆сѝ . и҆ вᲂпїѧ́ше ти сп҃се , бл҃гᲂслᲂве́нъ є҆сѝ гдⷭ҇и сла́ва тебѣ̀ .

сла́ва . гла́съ , и҃ . Пред̾ста́лъ є҆сѝ гро́бꙋ ла́заревꙋ сп҃се на́шъ , и҆ вᲂз̾гласи́въ ме́ртваго ꙗ҆́кѡ ѿ сна̀ вᲂскреси́лъ є҆сѝ , и҆ ѿтрѧсѐ тлѣ́нїе неи҆стлѣ́нїѧ ма́нїемъ . и҆ и҆зы́де сло́вᲂмъ свѧ́занъ ᲂу҆кро́йми . всѧ̀ мо́жеши , всѧ̀ тебѣ̀ рабо́таютъ чл҃кᲂлю́бче , всѧ̀ пᲂвинꙋ́ютсѧ тѝ , сп҃се на́шъ сла́ва тебѣ̀ .

и҆ ны́нѣ . гла́съ , то́йже . Дш҃епᲂле́знꙋю сᲂвер ши́вше четверᲂдесѧ́тницꙋ , вᲂзᲂпїе́мъ , ра́дꙋисѧ гра́де виѳа́нїѧ ѻ҆те́чество ла́зарево . ра́дꙋйтасѧ ма́рѳа и҆ ма́рїѧ тᲂгѡ̀ сестры̀ . заꙋ́тра бо хрⷭ҇то́съ прихо́дит̾ , ѡ҆живи́ти гла́сᲂм̾ ᲂу҆ме́ршаго бра́та . є҆го́же гла́съ ᲂу҆слы́шавъ го́рькїи и҆ несы́тыи а҆́дъ , стра́хᲂмъ вᲂстрепета́въ , и҆ вельмѝ вᲂз̾стᲂна́въ , ѿпꙋстѝ ла́зарѧ ᲂу҆кро́йми ѡ҆бѧ́зана . є҆го́же чꙋдесѝ сᲂбо́ръ є҆вре́йскїи ᲂу҆диви́сѧ , с̾ ва́їемъ и҆ вѣ́твьми тᲂгѡ̀ срѣто́ша . и҆ ꙗ҆ви́шасѧ пᲂхва лѧ́юще дѣ́ти , є҆мꙋ́же зави́дѣша ѻ҆тцы̀ . бл҃го слᲂве́нъ грѧды́и во́ и҆мѧ гдⷭ҇не цр҃ь і҆и҃левъ .

вы́хᲂдъ : свѣ́те ти́хїи . прᲂки́менъ . гла́съ , в҃ . по́мᲂщь мᲂѧ̀ ѿ́ гдⷭ҇а , сᲂтво́ршагѡ нб҃о и҆ зе́млю . сти́хъ : а҆́ще небы̀ гдⷭ҇ь бы́лъ в̾ на́съ да рече́тъ ᲂу҆́бѡ і҆и҃ль . ѿ бытїѧ̀ , чте́нїе .

Преста̀ і҆а́кѡвъ пᲂвелѣва́ѧ сыно́мъ свᲂи́мъ , и҆ прᲂсте́ръ но́зѣ свᲂѝ на ло́жи свᲂе́мъ и҆ ᲂу҆́мре , и҆ прилᲂжи́сѧ ко ѻ҆ц҃е́мъ свᲂи́мъ . и҆ па́дъ і҆ѡ́сифъ на лицы̀ ѻ҆ц҃а свᲂегѡ̀ , и҆ пла́касѧ над̾ ни́мъ , и҆ лᲂбыза̀ є҆гѡ̀ . и҆ пᲂвелѣ̀ і҆ѡ́сифъ ѻ҆трᲂкѡ́мъ свᲂи́мъ пᲂгреба́телемъ пᲂгребстѝ ѻ҆ц҃а свᲂегѡ̀ , и҆ пᲂгребо́ша пᲂгреба́тели і҆и҃лѧ . и҆ и҆спо́лнишасѧ є҆мꙋ̀ четы́редесѧть дні́й , та́кѡ бо ᲂу҆чита́ютсѧ дні́е пᲂгреба́нїѧ . и҆ пла́кахꙋсѧ по не́мъ є҆ги́птѧне се́дмьдесѧть дні́й . є҆гда́ же преидо́ша дні́е пла́ча , глаго́ла і҆ѡ́сифъ к̾ вельмо́жамъ фараѡ́нᲂвымъ гл҃ѧ , а҆́ще є҆́сть ѡ҆брѣто́хъ бл҃гᲂда́ть пред̾ ва́ми , гл҃ите во ᲂу҆́ши фараѡ́нꙋ , гл҃юще , ѻ҆ц҃ъ мо́й заклѧ́тъ мѧ̀ гл҃ѧ , пре́жде не́жели ᲂу҆́мре во́ грᲂбѣ є҆́же и҆скᲂпа̀ себѣ̀ въ землѝ ханао́нстѣй , тꙋ́ мѧ пᲂгребе́ши . и҆ нн҃ѣ ᲂу҆́бѡ ше́дъ да пᲂгребꙋ̀ ѻ҆ц҃а мᲂегѡ̀ , и҆ па́ки вᲂзвращꙋ́сѧ . и҆ реко́ша фараѡ́нꙋ по слᲂвесѝ і҆ѡ́сифᲂвꙋ . и҆ речѐ фараѡ́нъ взы́ди и҆ пᲂгребѝ ѻ҆ц҃а свᲂегѡ̀ , ꙗ҆́кᲂже заклѧ́тъ тѧ̀ , и҆ и҆зы́де і҆ѡ́сифъ пᲂгребстѝ ѻ҆ц҃а свᲂегѡ̀ . и҆ и҆до́ша с̾ ни́мъ всѝ ѻ҆́трᲂцы фараѡ́нᲂвы , и҆ старѣ́йшины до́мꙋ є҆гѡ̀ , и҆ вельмо́жи всеѧ̀ землѝ є҆ги́пет̾скїѧ . и҆ ве́сь до́мъ і҆ѡ́сифᲂвъ , и҆ бра́тїѧ є҆гѡ̀ , и҆ ве́сь до́мъ ѻ҆ц҃а є҆гѡ̀ , и҆ сро́дницы . а҆ ѻ҆́вцы и҆ вᲂлы̀ и҆ ве́сь ско́тъ ѡ҆ста́виша в̾ землѝ герсе́м̾стѣй . и҆ взыдо́ша с̾ ни́мъ кᲂлесни́цы и҆ ко́нницы , и҆ бы́сть по́лкъ вели́къ ѕѣлѡ̀ . и҆ прїидо́ша на гꙋмно̀ а҆та́дᲂво , є҆́же є҆́сть ѡ҆бо́нъ по́лъ і҆ѡрда́на . и҆ пла́кашасѧ пла́чемъ ве́лїемъ , и҆ крѣ́пкимъ ѕѣлѡ̀ . и҆ сᲂтвᲂрѝ пла́чь ѻ҆ц҃ꙋ свᲂемꙋ̀ , се́дмь дні́й . и҆ ви́дѣша жи́тели землѝ ханао́нскїѧ пла́чь на гꙋмнѣ̀ а҆та́дᲂвѣ , и҆ рѣко́ша пла́чь вели́къ є҆́сть сѐ є҆ги́птѧнѡмъ . сегѡ̀ ра́ди нареко́ша и҆́мѧ мѣ́стꙋ тᲂмꙋ̀ , пла́чь є҆ги́птꙋ , и҆́же є҆́сть ѡ҆бᲂнꙋ̀ странꙋ̀ і҆ѡрда́на . и҆ сᲂтвᲂри́ша є҆мꙋ̀ си́це сн҃ᲂве і҆и҃левы , ꙗ҆́кᲂже запᲂвѣ́да и҆́мъ . и҆ пᲂгребо́ша є҆гѡ̀ в̾ пеще́рѣ сꙋгꙋ́бѣй , ю҆́же прикꙋпѝ а҆враа́мъ на сᲂтвᲂре́нїе грᲂбѡ́мъ цѣно́ю сребра̀ , ѿ є҆ѳро́на хет̾те́ѧнина , прѧ́мѡ мамврі́и . и҆ вᲂз̾врати́сѧ і҆ѡ́сифъ во є҆ги́петъ , са́мъ и҆ бра́тїѧ є҆гѡ̀ , и҆ всѝ вᲂзше́дшїи пᲂгребстѝ ѻ҆ц҃а є҆гѡ̀ . ви́дѣвше же бра́тїѧ і҆ѡ́сифᲂва , ꙗ҆́кѡ ᲂу҆́мре ѻ҆ц҃ъ и҆́хъ , и҆ реко́ша , да некᲂгда̀ пᲂмѧ́нетъ ѕло́бꙋ на́шꙋ і҆ѡ́сифъ , и҆ вᲂзда́стъ на́мъ вᲂздаѧ́нїѧ всѧ̀ ѕла́ѧ , ꙗ҆́же пᲂказа́хᲂмъ є҆мꙋ̀ . и҆ прише́дше ко і҆ѡ́сифꙋ реко́ша , ѻ҆ц҃ъ тво́й заклѧ́тъ тѧ̀ пре́же кᲂнчи́ны свᲂеѧ̀ , гл҃ѧ , си́це рцѣ́те і҆ѡ́сифꙋ , ѡ҆ста́ви и҆́мъ непра́вдꙋ и҆ грѣ́хъ и҆́хъ , ꙗ҆́же лꙋка́ваѧ тебѣ̀ пᲂказа́ша . и҆ ны́нѣ прїимѝ непра́вдꙋ , ра́бъ бг҃а ѻ҆ц҃а твᲂегѡ̀ . и҆ пла́касѧ і҆ѡ́сифъ , гл҃ющимъ и҆́мъ к̾ немꙋ̀ . и҆ реко́ша , сѐ мы̀ тебѣ̀ рабы̀ . и҆ речѐ и҆́мъ і҆ѡ́сифъ , небо́йтесѧ , бж҃їи бо є҆́смь а҆́зъ . вы̀ сᲂвѣ́тᲂвасте намѧ̀ лꙋка́ваѧ , бг҃ъ же сᲂвѣща̀ ѡ҆ мнѣ̀ бл҃га́ѧ , ꙗ҆́кѡ да бꙋ́детъ ꙗ҆́кᲂже дне́сь , да препита́ютсѧ лю́дїе мно́зи . и҆ речѐ и҆́мъ , небо́йтесѧ , а҆́зъ препита́ю ва́съ и҆ до́мы ва́ша . и҆ ᲂу҆тѣ́ши и҆́хъ , и҆ глаго́ла и҆́мъ ѿ́ срⷣца . всели́вжесѧ і҆ѡ́сифъ во є҆ги́птѣ са́мъ , и҆ бра́тїѧ є҆гѡ̀ , и҆ ве́сь до́мъ ѻ҆ц҃а є҆гѡ̀ . и҆ пᲂживѐ і҆ѡ́сифъ лѣ́тъ сто̀ и҆ де́сѧть . и҆ ви́дѣ і҆ѡ́сифъ дѣ́ти є҆фре́мᲂвы до тре́тїѧгѡ ро́да , и҆ сы́нᲂве махи́рᲂвы сы́на манасі́ина , рᲂди́шасѧ при бедрѣ̀ і҆ѡ́сифᲂвѣ . и҆ речѐ і҆ѡ́сифъ к̾ бра́тїѧмъ свᲂи́мъ глаго́лѧ , а҆́зъ ᲂу҆мира́ю , пᲂсѣще́нїемъ же пᲂсѣти́тъ ва́съ бг҃ъ , и҆ и҆зведе́тъ ва́съ ѿ землѝ сеѧ̀ , в̾ зе́млю , є҆ю́же клѧ́тсѧ ѻ҆ц҃е́мъ на́шимъ , а҆враа́мꙋ и҆ и҆саа́кꙋ и҆ і҆а́кѡвꙋ . и҆ заклѧ́тъ і҆ѡ́сифъ сы́ны і҆и҃левы , глаго́лѧ , в̾ пᲂсѣще́нїе и҆́мже пᲂсѣти́тъ ва́съ бг҃ъ , и҆знеси́те ко́сти мᲂѧ̀ ѿ сю́дꙋ с̾ ва́ми . и҆ скᲂнча́сѧ і҆ѡ́сифъ сы́и лѣ́тъ ста̀ и҆ десѧтѝ , и҆ пᲂгребо́ша є҆гѡ̀ в̾ ра́цѣ во є҆ги́птѣ .

прᲂки́менъ . гла́съ , д҃ . надѣ́ющїисѧ на́ гдⷭ҇а , ꙗ҆́кѡ гᲂра̀ сїѡ́нъ не пᲂд̾ви́житсѧ во́ вѣки . сти́хъ : ꙗ҆́кѡ не ѡ҆ста́витъ гдⷭ҇ь жезла̀ грѣ́шныхъ на жре́бїи пра́ведныхъ .

ѿ при́тчей , чте́нїе .

Сы́не , ѿверза́й ᲂу҆ста̀ свᲂѧ̀ слᲂвесе́мъ бж҃їимъ , и҆ сꙋдѝ всѐ здра́во . ѿверза́й ᲂу҆ста̀ свᲂѧ̀ , и҆ сꙋдѝ пра́веднѡ , разсꙋжда́й же ᲂу҆бо́га и҆ не́мᲂщна . женꙋ̀ дᲂбрꙋ̀ а҆́ще кто̀ ѡ҆брѧ́щетъ , честнѣ́йши є҆́сть ка́менїѧ мнᲂгᲂцѣ́ннагѡ такᲂва́ѧ . дерза́етъ ѡ҆ не́й срⷣце мꙋ́жа є҆ѧ̀ , такᲂва́ѧ бᲂга́тства нелиши́тсѧ . дѣ́лаетъ бо мꙋ́жꙋ бл҃га́ѧ , а҆ не ѕла́ѧ . всѐ лѣ́то ѡ҆брѣ́тши во́лнꙋ и҆ ле́нъ , сᲂтвᲂри́тъ бл҃гᲂпᲂтре́бнаѧ рꙋка́ма свᲂи́ма . бы́сть ꙗ҆́кѡ кᲂра́бль кꙋ́плю дѣ́ющи , и҆з̾ дале́ча сᲂбира́етъ себѣ̀ бᲂга́тство . и҆ вᲂста́етъ ра́нѡ , и҆ да́стъ бра́шна до́мꙋ , и҆ дѣ́ла рабы́нѧмъ , ᲂу҆зрѣ́вши кꙋпᲂва́ше . ѿ плᲂдо́въ же рꙋ́кꙋ свᲂею̀ насадѝ стѧжа́нїе , препᲂѧ́савши крѣ́пкѡ чресла̀ свᲂѧ̀ . ᲂу҆тверди́тъ мы́шцы свᲂѝ на дѣ́ло , и҆ вкꙋсѝ ꙗ҆́кѡ дᲂбро̀ є҆́же дѣ́лати , и҆ не ᲂу҆гаса́етъ свѣ́щникъ є҆ѧ̀ всю̀ но́щь , рꙋ́цѣ свᲂѝ прᲂтѧ́жетъ на пᲂле́знаѧ , лактѧ̀ свᲂѧ̀ ᲂу҆твержа́етъ на вретено̀ . и҆ рꙋ́цѣ же свᲂѝ разверза́етъ ᲂу҆бо́гꙋ , пло́дъ же прᲂстре́тъ ни́щꙋ . непᲂпече́тсѧ ѡ҆ сꙋ́щихъ въ дᲂмꙋ̀ мꙋ́жъ є҆ѧ̀ , и҆ є҆гда̀ гдѣ̀ кᲂсни́тъ , всѝ ᲂу҆́бѡ и҆́же ᲂу҆ неѧ̀ ѡ҆бᲂлче́ни сꙋ́ть . сꙋгꙋ́бы ѻ҆де́жды и҆ багрѧни́цы сᲂтвᲂрѝ мꙋ́жꙋ свᲂемꙋ̀ , ѿ червле́на и҆ багра̀ себѣ̀ ѻ҆дѣѧ́нїѧ . сла́венъ быва́етъ во вратѣ́хъ мꙋ́жъ є҆ѧ̀ , внегда̀ а҆́ще сѣди́тъ в̾ сᲂбо́рѣ с̾ ста́рцы , и҆ жи́тельми землѝ . ѡ҆по́ны твᲂри́тъ и҆ да́стъ баго́рникѡмъ , ѡ҆пᲂѧ́санїѧ же хананѣ́ѧнѡмъ . въ крѣ́пᲂсть и҆ бл҃гᲂлѣ́пїе ѡ҆блече́сѧ , и҆ вᲂзвесели́сѧ во́ дни пᲂслѣ́днїѧ . ᲂу҆ста́ же свᲂѧ̀ ѿверза́етъ с̾мы́сленѣ , и҆ бл҃гᲂчи́ннѣ гл҃ѧ ꙗ҆зы́кᲂмъ свᲂи́мъ . ᲂу҆зка̀ прᲂхо́дища дᲂмо́въ є҆ѧ̀ , бра́шна же лѣ́нива да неснѣ́сть ; ᲂу҆ста́ же свᲂѧ̀ ѿверза́етъ премꙋ́дрѡ и҆ разꙋ́мнѡ и҆ зако́ннѡ . ми́лᲂстынѧ же є҆ѧ̀ вᲂздви́гнꙋ ча́да є҆ѧ̀ , и҆ ѡ҆бᲂгатѣ́ша и҆ вᲂста́ша ча́да є҆ѧ̀ и҆ пᲂхвали́ша ю҆̀ , и҆ мꙋ́жь є҆ѧ̀ пᲂхвалѝ є҆ѧ̀ . мно́ги дще́рѧ є҆ѧ̀ сᲂтвᲂри́ша си́лꙋ , и҆ мно́ги стѧжа́ша бᲂга́тьство , та́же преспѣ̀ и҆ превᲂзнесе́сѧ надо всѣ́ми . и҆ ло́жна ᲂу҆гᲂжде́нїѧ и҆ сꙋ́етны дᲂбро́ты же́нски небѣ̀ в̾ не́й . жена́ бо разꙋ́мна бл҃же́на є҆́сть , стра́хъ же гдⷭ҇нь та̀ да хва́литъ . дади́те є҆́й ѿ плᲂда̀ ᲂу҆́стъ є҆ѧ̀ , и҆ да хвали́мъ бꙋ́детъ во вратѣ́хъ мꙋ́жь є҆ѧ̀ .

и҆ про́чее пᲂслѣ́дᲂванїе прежеѡсщ҃е́нныхъ ꙗ҆́кѡ ѡ҆бы́чно .

Въ то́йже , пѧто́къ , пᲂе́мъ па́вечерню вели́кꙋю .

на не́йже пᲂе́мъ , кано́нъ , твᲂре́нїе ки́ръ а҆ндре́ѧ кри́тскагѡ . гла́съ , а҃ . пѣ́снь , а҃ . і҆рмо́съ . Пѣ́снь пᲂбѣ́днꙋю вᲂспᲂе́мъ всѝ бг҃ꙋ , сᲂтво́ршемꙋ ди́внаѧ чꙋдеса̀ мы́шцею высо́кᲂю , и҆ спа́сшꙋ і҆и҃лѧ , ꙗ҆́кѡ прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Ме́ртва четверᲂдне́вна , вᲂскреси́въ сп҃се мо́й ла́зарѧ , ѿ тлѧ̀ ѿрѣши́лъ є҆сѝ мы́шцею высо́кᲂю . и҆ пᲂказа́лъ є҆сѝ ꙗ҆́кѡ си́ленъ вла́сть свᲂю̀ . Вᲂз̾гласи́въ ла́зарѧ хрⷭ҇тѐ и҆́з̾грᲂба а҆́бїе вᲂскреси́лъ є҆сѝ . но а҆́дъ до́лѣ го́рцѣ рыда́ше , и҆ стᲂнѧ̀ трепета́ше сп҃се вла́сти твᲂеѧ̀ . Ма́рѳины сле́зы и҆ ма́рїины ᲂу҆тᲂли́лъ є҆сѝ гдⷭ҇и , и҆з̾ ме́ртвыхъ ла́зарѧ вᲂскреси́въ сп҃се , и҆ пᲂказа́лъ є҆сѝ дᲂхнᲂве́нна ме́ртвагѡ вла́стїю сѝ .= Прᲂслези́лсѧ є҆сѝ гдⷭ҇и над̾ ла́заремъ , пᲂказꙋ́ѧ смᲂтре́нїе вᲂплᲂще́нїѧ твᲂегѡ̀ . ꙗ҆́кѡ є҆стество́мъ бг҃ъ сы́и , и҆ є҆стество́мъ по на́съ бы́лъ є҆сѝ чл҃къ . Зако́нᲂмъ є҆стества̀ чл҃ча вᲂпрᲂси́лъ є҆сѝ влⷣко , гдѣ̀ пᲂлᲂжи́сте ла́зарѧ . пᲂказꙋ́ѧ всѣ́мъ сп҃се нечꙋ́же , є҆́же к̾ на́мъ смᲂтре́нїе твᲂѐ . Заключе́нїѧ сᲂкрꙋши́лъ є҆сѝ тᲂгда̀ а҆́дᲂва , вᲂз̾гласи́въ ла́зарѧ , и҆ держа́вꙋ разрꙋши́лъ є҆сѝ бᲂрца̀ . и҆ пᲂнꙋ́дилъ є҆сѝ пре́же крⷭ҇та̀ трепета́ти тебѐ є҆ди́не сп҃се . =сла́ва . Ѻ҆ц҃а сла́вимъ и҆ сн҃а и҆ дх҃а , трⷪ҇цꙋ нераздѣ́льнꙋ , во є҆ди́ницы є҆стества̀ и҆ со а҆́нг҃лы є҆ѧ̀ , ꙗ҆́кѡ є҆ди́нᲂго несᲂзда́ннаго бг҃а вᲂспᲂе́мъ . и҆ ны́нѣ , боⷢ҇ . Непрело́жно рᲂдила̀ є҆сѝ мт҃и дв҃о , зижди́телѧ є҆стествꙋ̀ . ѿ ст҃а́гѡ дх҃а , бл҃гᲂвᲂле́нїемъ ѻ҆́ч҃имъ , рᲂдила̀ є҆сѝ без̾ тлѧ̀ , дв҃ᲂю пребы́вши .

пѣ́снь , г҃ . і҆рмо́съ . Ка́мень є҆го́же неключи́мᲂваша зи́ждꙋщїи , се́й ᲂу҆́бѡ бы́сть во главꙋ̀ ᲂу҆́глꙋ . то́й є҆́сть ка́мень , на не́мъ же ᲂу҆твердѝ цр҃квь свᲂю̀ хрⷭ҇то́съ , ю҆́же ѿ ꙗ҆зы́къ и҆скꙋпѝ . Ка́мень є҆го́же тѝ привали́ша пᲂгре́бшїи тѧ , сегѡ̀ взѧ́ти і҆с҃ъ пᲂвелѣ́въ , а҆́бїе вᲂскреси́ тѧ , вᲂз̾гласи́въ тебѣ̀ ла́заре грѧдѝ ко мнѣ̀ , да твᲂегѡ̀ а҆́дъ ᲂу҆страши́тсѧ живᲂта̀ . Чꙋ́до стра́шно и҆ пресла́вно , ка́кѡ зижди́тель всѣ́хъ , є҆го́же не незна́ше , ꙗ҆́кѡ невѣ́дыи вᲂпрᲂша́ше . гдѣ̀ лежи́тъ є҆го́же рыда́ете . гдѣ̀ пᲂлᲂже́нъ бы́сть ла́зарь , є҆го́же пᲂма́лѣ и҆з̾ ме́ртвыхъ жи́ва ва́мъ вᲂскрешꙋ̀ а҆́зъ . Ма́рѳа и҆ ма́рїѧ гдⷭ҇и рыда́ньми вᲂпїѧ́хꙋ , сѐ є҆го́же люблѧ́ше , четверᲂдне́венъ смерди́тъ . а҆́ще бы є҆сѝ здѣ̀ бы́лъ , тᲂгда̀ небы̀ ᲂу҆́меръ ла́зарь . но ꙗ҆́кѡ неразлꙋ́ченъ вездѣ̀ , сегѡ̀ а҆́бїе вᲂскреси́въ вᲂз̾дви́глъ є҆сѝ . Оу҆вы̀ мнѣ̀ пᲂи́стинѣ , ны́нѣ пᲂгꙋби́хъ вᲂпїѧ́ше а҆́дъ , си́це вᲂз̾глаша́ше к̾ сме́рти глаго́лѧ , сѐ назарѧни́нъ до́льнѧѧ пᲂд̾виза̀ , и҆ ᲂу҆тро́бꙋ мᲂю̀ пᲂсѣ́къ , без̾ дыха́нїѧ ме́ртва вᲂз̾гласи́въ вᲂз̾дви́же . Прᲂлїѧ́въ на́д̾ дрꙋгᲂмъ сле́зы , и҆ смᲂтре́нїемъ пᲂказа́лъ є҆сѝ пло́ть , ю҆́же ѿ на́съ взѧ́тꙋю сꙋщество́мъ , а҆ не привидѣ́нїемъ сп҃се примѣси́вшꙋютисѧ , и҆ ꙗ҆́кѡ чл҃кᲂлю́бецъ бг҃ъ , сегѡ̀ а҆́бїе вᲂз̾гласи́въ вᲂз̾дви́же . Гдѣ̀ є҆вре́йскᲂе безꙋ́мїе ; гдѣ̀ невѣ́рїе ; дᲂко́лѣ чꙋжді́и ; дᲂко́лѣ лестьцы̀ зритѐ ᲂу҆ме́ршагѡ гла́сᲂмъ и҆ сше́дша , и҆ не вѣ́рꙋете хрⷭ҇тꙋ̀ ; вᲂи́стинꙋ сы́нᲂве вы̀ тмы̀ є҆стѐ . сла́ва . Є҆ди́наго ѿ трⷪ҇цы вѣ́мы тѧ , а҆́ще и҆ вᲂплᲂти́сѧ , и҆ є҆ди́наго сла́вимъ сн҃а вᲂплᲂще́нна , и҆́же ѿ бцⷣы без̾ сѣ́мене прᲂзѧ́бшаго , и҆ со ѻ҆ц҃е́мъ и҆ дх҃ᲂмъ є҆ди́наго бг҃а славᲂсло́вимъ . и҆ ны́нѣ , боⷢ҇ . Пребыва́ющее стра́шнᲂе видѣ́нїе смᲂтре́нїѧ твᲂегѡ̀ прᲂви́дѣша нело́жнїи прⷪ҇рцы , дв҃ꙋ бы́ти и҆ бцⷣꙋ без̾ сѣ́мене заче́ншꙋю , и҆ нетлѣ́ннѡ ро́ждьшꙋю бг҃а , пребыва́ющꙋ же и҆ по ржⷭ҇твѣ̀ чи́стꙋ .

пѣ́снь , д҃ . і҆рмо́съ . Вᲂз̾дви́жесѧ со́лнце и҆ лꙋна̀ ста̀ в̾ чинꙋ̀ свᲂе́мъ , вᲂз̾несе́сѧ дᲂлгᲂтерпѣ̀ на́ древо , и҆ вᲂтчѐ на не́мъ свᲂю̀ цр҃кᲂвь . Прᲂслези́лсѧ є҆сѝ гдⷭ҇и над̾ ла́заремъ , пᲂказꙋ́ѧ ꙗ҆́кѡ чл҃къ є҆сѝ , и҆ вᲂз̾дви́глъ є҆сѝ влⷣко ᲂу҆ме́ршаго , и҆ пᲂказа́лсѧ лю́демъ , ꙗ҆́кѡ сн҃ъ є҆сѝ бж҃їи . вⷤ . Без̾дꙋ́шныи ꙗ҆́кѡ ᲂу҆слы́ша пᲂвелѣ́нїе твᲂѐ , грѧдѝ во́нъ ла́заре . и҆ те́къ вᲂста́выи с̾ пелена́ми , и҆ хᲂжда́ше бл҃же , пᲂказꙋ́ѧ держа́вꙋ твᲂю̀ . Ма́рѳины сле́зы и҆ ма́рїины , ᲂу҆тᲂли́лъ є҆сѝ хрⷭ҇тѐ бж҃е , вᲂз̾гласи́въ бо ла́зарѧ , самᲂвла́стно вᲂз̾дви́глъ є҆сѝ гла́сᲂмъ , и҆ пᲂклᲂни́сѧ тебѣ̀ . Кто̀ ви́дѣ и҆ кто̀ слы́ша , ꙗ҆́кѡ а҆́дъ плѣне́нъ бы́сть ѿда́въ ме́ртва смердѧ́ща , и҆лїѧ̀ ᲂу҆́бѡ вᲂз̾дви́же , и҆ є҆лисе́й , но не ᲂу҆ съ ме́ртвыми пᲂлᲂже́ныхъ . Бг҃ъ сы́и чл҃къ , вᲂи́стинꙋ вещьмѝ и҆ и҆мены̀ , пред̾ста́лъ є҆сѝ гро́бꙋ пло́тїю сло́ве , и҆ вᲂз̾дви́глъ є҆сѝ ꙗ҆́кѡ бг҃ъ четверᲂдне́внагѡ . сла́ва . Сᲂбез̾нача́льнѡ вᲂсїѧ́лъ є҆сѝ ѿ ѻ҆ц҃а свᲂегѡ̀ , ꙗ҆́кѡ є҆ди́нъ сы́и ѿ трⷪ҇цы сп҃се , и҆ в̾ лѣ́то ѿ́ дх҃а прест҃а́гѡ , и҆ ѿ мт҃ре дв҃ы прише́лъ є҆сѝ , пло́ть взе́мъ неска́занныи . и҆ ны́нѣ , боⷢ҇ . Зача́тїе без̾ сѣ́менно бцⷣы , и҆ ржⷭ҇тво̀ крᲂмѣ̀ тлѣ́нїѧ . бг҃ъ бо ѻ҆бᲂѧ̀ чꙋдᲂдѣ́йствᲂвавъ , и҆ и҆з̾лїѧ̀ себѐ , да на́мъ сᲂєдини́тсѧ .

пѣ́снь , є҃ . і҆рмо́съ . Тво́й ми́ръ да́ждь на́мъ сн҃е бж҃їи , и҆но́го бо ра́звѣ тебѐ бг҃а незна́емъ , и҆́мѧ твᲂѐ и҆мѧнꙋ́емъ , ꙗ҆́кѡ бг҃ъ живы́мъ и҆ ме́ртвымъ є҆сѝ . Жи́знь сы́и гдⷭ҇и , и҆ свѣ́тъ и҆́стиненъ , ла́зарѧ ме́ртва вᲂскреси́лъ є҆сѝ , ꙗ҆́кѡ си́ленъ бг҃ъ , всѣ́мъ пᲂказа́лъ є҆сѝ , ꙗ҆́кѡ бг҃ъ живы́мъ и҆ ме́ртвымъ є҆сѝ .= Непᲂстᲂѧ́ннᲂе твᲂѐ пᲂвелѣ́нїе і҆с҃е , нетерпѧ̀ а҆́дъ , и҆́же мно́гихъ прїе́мыи ᲂу҆бᲂѧ́сѧ , и҆ четверᲂдне́вна сꙋ́ща ла́зарѧ , со́ гласᲂмъ жи́ва а҆ не ме́ртва даѧ́ше . Пе́рсть сᲂвᲂкꙋ́пль дꙋшѝ , и҆́же дре́вле бре́нїе дх҃ᲂмъ жи́зни ѡ҆дꙋши́въ сло́вᲂмъ свᲂи́мъ . и҆ нн҃ѣ дрꙋ́га вᲂскреси́лъ є҆сѝ , ѿ тлѧ̀ разрѣши́въ и҆ преиспо́днихъ . Велѣ́нїю твᲂемꙋ̀ гдⷭ҇и непрᲂти́витсѧ никто́же . є҆гда́ бо ме́ртваго вᲂзва̀ ла́зарѧ , и҆ а҆́бїе вᲂста̀ без̾дꙋ́шныи , и҆ ᲂу҆́зы нᲂсѧ̀ нᲂга́ма хᲂжда́ше . =Ѽ і҆ꙋде́йскᲂе безꙋ́мїе . ѽ ѡ҆мраче́нїе враго́въ , кто̀ ви́дѣ мертвеца̀ и҆́з̾грᲂба вᲂста́юща ; и҆лїѧ̀ дре́вле вᲂскресѝ , но не ѿ́ грᲂба , ни четверᲂдне́вна . Непᲂбѣди́ме дᲂлгᲂтерпѣли́ве , и҆́же всѧ̀ на́съ ра́ди терпѧ̀ бл҃гі́и бж҃е , и҆ стража̀ ꙗ҆́кѡ чл҃къ , прича́стники всѣ́хъ на́съ сᲂтвᲂрѝ црⷭ҇твїѧ твᲂегѡ̀ , мл҃твами ла́заревыми . сла́ва . Пренача́льнаѧ и҆ без̾нача́льнаѧ , є҆динᲂпресто́льнаѧ трⷪ҇це , ѻ҆́ч҃е и҆ сн҃е и҆ дш҃е ст҃ы́и , є҆ди́нице ст҃а́ѧ трисᲂста́внаѧ , сꙋ́щїѧ ѿ а҆да́ма спасѝ , вѣ́рно тѧ̀ вᲂспѣва́ющїѧ . и҆ ны́нѣ , боⷢ҇ . Пречи́стᲂе чре́во твᲂѐ ѡ҆ст҃ѝ чⷭ҇таѧ , пло́ть и҆з̾ негѡ̀ прїе́мыи пребжⷭ҇твеныи , и҆́же в̾ трⷪ҇цѣ пᲂкланѧ́емыи , и҆́же и҆́з̾ ѻ҆ц҃а сло́во , и҆ съ дх҃ᲂмъ бг҃ъ .

пѣ́снь , ѕ҃ . і҆рмо́съ . Ѿве́рже мѧ во глꙋбинꙋ̀ срⷣца мᲂрска́гѡ , и҆ спа́слъ мѧ є҆сѝ сп҃се рабо́ты а҆́дᲂвы , и҆ разрѣши́лъ є҆сѝ ᲂу҆́зы без̾зако́нїи мᲂи́хъ . Вᲂз̾гласи́лъ мѧ є҆сѝ сп҃се , и҆з̾ а҆́да преи҆спо́днѧгѡ вᲂпїе́тъ ла́зарь к̾ тебѣ̀ , раз̾рꙋши́телю а҆́да , и҆ вᲂз̾дви́глъ мѧ є҆сѝ ме́ртва пᲂвелѣ́нїемъ сѝ . вⷤ . Вᲂпрᲂси́лъ є҆сѝ гдѣ̀ є҆́сть пᲂлᲂже́нъ , и҆́же всѧ̀ вѣ́дыи . прᲂслези́лсѧ же є҆сѝ сп҃се ꙗ҆́кѡ чл҃къ є҆стество́мъ , и҆ вᲂз̾дви́глъ мѧ є҆сѝ ме́ртва пᲂвелѣ́нїемъ сѝ . Всеснѣ́днᲂе растерза́въ чре́во а҆́дᲂво , и҆ и҆сто́ргнꙋлъ мѧ є҆сѝ сп҃се твᲂе́ю вла́стїю , и҆ вᲂз̾дви́глъ мѧ є҆сѝ ме́ртва пᲂвелѣ́нїемъ сѝ . Ѻ҆дꙋши́лъ є҆сѝ без̾дыха́нныи ѻ҆́бразъ пло́ти мᲂеѧ̀ сп҃се , стѧгнꙋ́лъ мѧ є҆сѝ кᲂстьмѝ и҆ жи́лами , и҆ вᲂз̾дви́глъ мѧ є҆сѝ и҆з̾ тлѧ̀ пᲂвелѣ́нїемъ сѝ . Ѻ҆дѣ́ѧлъ мѧ є҆сѝ гдⷭ҇и въ бре́ннᲂе тѣ́ло , и҆ вдᲂхнꙋ́лъ ми є҆сѝ живо́тъ , и҆ ви́дѣхъ свѣ́тъ тво́й , и҆ вᲂз̾дви́глъ мѧ є҆сѝ ме́ртва пᲂвелѣ́нїемъ сѝ . сла́ва . Жи́знь сла́влю , и҆ чтꙋ̀ свѣ́тъ ѻ҆ц҃а , и҆ сн҃а , та́кᲂжде и҆ дх҃а , трⷪ҇цꙋ ст҃ꙋ́ю неслїѧ́ннꙋ , тꙋ́же въ трїе́хъ ли́цѣхъ . и҆ ны́нѣ , боⷢ҇ . Ѻ҆бо́лксѧ є҆сѝ сп҃се мо́й в̾ мᲂѐ смѣше́нїе всѐ , сᲂхрани́лъ же є҆сѝ чи́стꙋ пречи́стꙋю ᲂу҆тро́бꙋ , и҆з̾ неѧ́же про́йде вᲂпло́щьсѧ , є҆ди́нъ сы́и ѿ трⷪ҇цы .

пѣ́снь , з҃ . і҆рмо́съ . Ꙗ҆́же в̾ пещѝ ѻ҆́трᲂки твᲂѧ̀ сп҃се , неприкᲂснꙋ́сѧ ни вредѝ и҆́хъ ѻ҆́гнь . тᲂгда̀ трїѐ , ꙗ҆́кѡ є҆ди́неми ᲂу҆сты̀ пᲂѧ́хꙋ , и҆ блгⷭ҇влѧ́хꙋ глаго́люще , бл҃гᲂслᲂве́нъ бг҃ъ ѻ҆ц҃ъ на́шихъ . Четверᲂдне́вныи ла́зарь сп҃се , ꙗ҆́кѡ ᲂу҆слы́ша ни́зꙋ гла́съ тво́й , вᲂста́въ вᲂспѣ́ тѧ , и҆ ра́дꙋѧсѧ си́це вᲂпїѧ́ше , ты̀ бг҃ъ и҆ зижди́тель мо́й . тебѣ̀ пᲂкланѧ́юсѧ и҆ хвалю̀ вᲂскреси́вшаго мѧ̀ . Над̾ мертвеце́мъ прᲂслези́лсѧ є҆сѝ сп҃се ꙗ҆́кѡ чл҃къ , да пᲂка́жеши всѣ́мъ лю́демъ , ꙗ҆́кѡ бг҃ъ сы́и . на́съ ра́ди чл҃къ ꙗ҆ви́лсѧ є҆сѝ , и҆ во́лею прᲂслези́сѧ . ѻ҆́бразъ на́мъ пред̾лага́ѧ любе́знагѡ щадѣ́нїѧ . Что̀ невᲂста́еши ла́заре ско́рѡ , вᲂзва̀ и҆́з̾дᲂлꙋ а҆́дъ плаче́внѣ . что̀ не а҆́бїе вᲂскре́съ тече́ши ѿ сю́дꙋ , да не и҆ дрꙋги́хъ мѝ плѣни́тъ хрⷭ҇то́съ вᲂскреси́въ тебѐ . Мᲂлю́ тѧ ла́заре , а҆́дъ речѐ , вᲂста́ни и҆зы́ди ѿ закле́пᲂвъ мᲂи́хъ ско́рѡ , и҆ ѿи҆дѝ ты̀ . дᲂбро́ бо ми є҆ди́наго рыда́тисѧ , го́рцѣ ѿє҆́млема , не́жели всѣ́хъ и҆́хже дре́вле а҆́лча пᲂглᲂти́хъ и҆ пᲂгꙋби́хъ . Ѽ что̀ кᲂсни́ши ла́заре , грѧдѝ во́нъ , зᲂве́тъ стᲂѧ̀ дрꙋ́гъ тво́й . и҆зы́ди ᲂу҆́бѡ , да и҆ а҆́зъ ѡ҆сла́бꙋ прїимꙋ̀ . ѿ не́лѣ бо тебѐ снѣдо́хъ , на блева́нїе пи́щи ᲂу҆стро́имисѧ . Оу҆диви́лъ є҆сѝ влⷣко хрⷭ҇тѐ , чꙋ́днаѧ тᲂгда̀ сᲂдѣ́ла мно́гаѧ . свѣ́тъ бо слѣпы́мъ , и҆ глꙋхи́мъ ᲂу҆́ши ѿве́рзлъ є҆сѝ сло́вᲂмъ . и҆ дрꙋ́га ла́зарѧ и҆з̾ ме́ртвыхъ , ꙗ҆́кѡ бг҃ъ вᲂз̾гласи́въ вᲂз̾дви́глъ є҆сѝ . сла́ва . Тро́йческꙋю вᲂспᲂе́мъ пѣ́снь , сла́вѧще без̾нача́льнаго ѻ҆ц҃а и҆ сн҃а и҆ дх҃а про́стꙋ є҆ди́ницꙋ сꙋщество́мъ . ю҆́же тро́йчески вᲂспᲂе́мъ , ст҃ъ , ст҃ъ , ст҃ъ є҆сѝ зᲂвꙋ́ще . и҆ ны́нѣ , боⷢ҇ . Ꙗ҆́кѡ є҆ди́наго ѿ трⷪ҇цы тебѐ хрⷭ҇тѐ сла́вимъ , и҆́же ѿ дв҃ы вᲂпло́щьшасѧ непрелᲂже́нїемъ . и҆ чл҃чески всѧ̀ пᲂстрада̀ , не ѿстꙋ́пль є҆стества̀ ѻ҆те́ческа і҆с҃е , а҆́ще и҆ примѣси́сѧ на́мъ .

пѣ́снь , и҃ . і҆рмо́съ . Нб҃са̀ нб҃съ , и҆ вᲂда̀ ꙗ҆́же превы́ше нб҃съ , блгⷭ҇ви́те по́йте гдⷭ҇а . Твᲂре́цъ и҆ сᲂдержи́тель всѣ́хъ , за милᲂсе́рдїе в̾ виѳа́нїю прїи́де , и҆ вᲂз̾дви́глъ є҆́сть ла́зарѧ .

ꙋде́йстїи лю́дїе , ꙗ҆́кѡ ви́дѣша ᲂу҆ме́ршаго , твᲂи́мъ гла́сᲂмъ вᲂста́вша хрⷭ҇тѐ , распыха́хꙋсѧ . Да ра́дꙋетсѧ сїѡ́нъ , и҆ да пᲂе́тъ жизнᲂда́вца , вᲂскреси́вшаго сло́вᲂмъ ѿ́ грᲂба ла́зарѧ . Ѻ҆мраче́нїи ѡ҆́ свѣтѣ і҆ꙋде́е , что̀ невѣ́рꙋете ла́заревꙋ вᲂста́нїю , и҆ бж҃їю начина́нїю . Четверᲂдне́вныи смердѧ́щь , и҆ пᲂво́йми ѡ҆бѧ́занъ , и҆ хᲂжда́ше съ дыха́нїемъ без̾дꙋ́шныи , вᲂз̾глаше́нїемъ тѝ гдⷭ҇и . Гла́съ ᲂу҆́бѡ є҆гѡ̀ речѐ ꙗ҆́кѡ челᲂвѣ́чь , пᲂвелѣ́нїе же всѐ бж҃їе , смꙋща́ѧ лю́тѣ ᲂу҆тро́бꙋ мᲂю̀ . сла́ва . Со ѻ҆ц҃е́мъ сн҃а и҆ дх҃а славᲂсло́влю , и҆ вᲂспѣва́ю немо́лчнѡ , вᲂпїѧ̀ трист҃ы́и сла́ва тебѣ̀ . и҆ ны́нѣ , боⷢ҇ . Тебѐ бл҃гᲂслᲂвлю̀ и҆ пᲂкланѧ́юсѧ ро́ждьшемꙋсѧ ѿ дв҃ы , и҆ неразлꙋ́чьшемꙋсѧ прⷭ҇то́ла ст҃ы́ѧ сла́вы свᲂеѧ̀ .

пѣ́снь , ѳ҃ . і҆рмо́съ . Сᲂтвᲂрѝ держа́вꙋ мы́шцею свᲂе́ю , низ̾лᲂжѝ си́льныѧ со престо́лъ , и҆ вᲂзнесѐ смире́нныѧ бг҃ъ і҆и҃левъ . въ ни́хже пᲂсѣтѝ на́съ вᲂсто́къ с̾ вы́ше , и҆ напра́вилъ ны̀ є҆́сть на пꙋ́ть ми́ренъ . Да пᲂе́тъ чꙋ́до виѳа́нїѧ с̾на́ми , все́й бо прᲂслези́сѧ зижди́тель , зако́нᲂмъ є҆стества̀ пло́ти , ла́зарѧ вᲂскреша́ѧ . ма́рѳины же сле́зы и҆ пла́чь ма́рїинъ в̾ ра́дᲂсть прелᲂжѝ , мертвеца̀ вᲂз̾дви́глъ є҆́сть . И҆з̾вѣща́ѧ хрⷭ҇тѐ вᲂскрⷭ҇нїе свᲂѐ , при́звалъ є҆сѝ ла́зарѧ и҆́з̾грᲂба , и҆ вᲂз̾дви́глъ є҆сѝ ꙗ҆́кѡ бг҃ъ , да ꙗ҆ви́ши лю́демъ , бг҃а же и҆ чл҃ка в̾ вкꙋ́пѣ , вᲂи́стинꙋ сꙋ́ща , и҆ вᲂз̾дви́жꙋща цр҃кᲂвь тѣлесѐ свᲂегѡ̀ . Стрѧ́слъ є҆сѝ врата̀ и҆ вереѧ̀ желѣ́зныѧ , ᲂу҆страши́въ а҆́да гла́сᲂмъ свᲂи́мъ сп҃се , и҆ ᲂу҆жасе́сѧ с̾ ни́ми и҆ сме́рть , ꙗ҆́кѡ ви́дѣста ла́зарѧ в̾ско́рѣ во́звана , є҆́же ѿ нею̀ ᲂу҆́зника , ѡ҆дꙋшевле́на и҆ вᲂскре́сша . Пᲂд̾виза́шасѧ врата̀ и҆ сᲂкрꙋши́шасѧ вереѧ̀ , раз̾рѣши́шасѧ ᲂу҆́зы ме́ртвагѡ , гла́сᲂмъ си́лы хрⷭ҇то́вы , и҆ а҆́дъ го́рькѡ вᲂз̾дыха́ше рыда́ѧ и҆ свᲂи́мъ вᲂпїѧ́ше , кто̀ и҆ ѿ кꙋ́дꙋ гла́съ ѡ҆живлѧ́ѧи ме́ртвыѧ . И҆ ѿ кꙋ́дꙋ ми се́й пᲂвелѣва́ѧи ме́ртвымъ , пᲂвелѣ́нїемъ бо речѐ ла́заре грѧдѝ во́нъ , и҆ всю̀ мᲂю̀ крѣ́пᲂсть смꙋща́етъ ꙗ҆́кѡ бг҃ъ , ѡ҆ставлѧ́етъ мѧ ла́зарь и҆ про́стъ и҆схо́дитъ и҆́з̾грᲂба , невмѣща́етъ ми чре́во назаре́ѡвыхъ . Пᲂе́мъ ти сло́ве непᲂбѣди́мꙋю крѣ́пᲂсть , кᲂстьми́ бо и҆ жи́лами ме́ртва вᲂз̾дви́глъ є҆сѝ сло́вᲂмъ свᲂи́мъ , ꙗ҆́кѡ всѣ́хъ сᲂдѣ́тель , и҆ сегѡ̀ вᲂскреси́лъ є҆сѝ сп҃се ѿ преиспо́днихъ , ꙗ҆́кᲂже вдо́выѧ сн҃а и҆́же на ѻ҆дрѣ̀ . сла́ва . Пᲂю̀ ѻ҆ц҃а , и҆ сла́влю сн҃а , и҆ чтꙋ̀ бжⷭ҇твенаго дх҃а , зᲂвы̀ , ст҃ъ є҆сѝ є҆динᲂсꙋ́щнаѧ , без̾нача́льнаѧ трⷪ҇це , є҆ди́но сꙋщество̀ и҆ ѻ҆́бразъ , бг҃ъ вᲂспѣва́емыи , ꙗ҆́кѡ спасе́нїю наде́жда , тебѣ̀ кла́нѧющимсѧ . и҆ ны́нѣ , боⷢ҇ . И҆́же всѧ̀ сᲂтвᲂри́выи в̾ премꙋ́дрᲂсти і҆с҃е , и҆ во всего́ мѧ ѡ҆бᲂлкі́исѧ и҆з̾ дв҃ы , и҆ ве́сь пребыва́ѧи прⷭ҇нѡ в̾ нѣ́дрѣхъ ѻ҆ц҃а , ст҃ы́и дх҃ъ тво́й хрⷭ҇тѐ на ста́до твᲂѐ низ̾пᲂсла́въ , ꙗ҆́кѡ бг҃ъ ѡ҆сѣнѝ и҆́хъ . задᲂсто́йнѡ : Сᲂтвᲂрѝ держа́вꙋ . [пᲂкло́н̾ до землѝ] .

Пᲂдᲂба́етъ вѣ́дати , ꙗ҆́кѡ ѿ́ дне сегѡ̀ пѧтка̀ , непᲂе́тсѧ во ѻ҆кта́и . ни мꙋ́чениченъ , ни бг҃ᲂро́диченъ , и҆ ничто́же и҆́но , ни в̾ минѣ́и , до сꙋбо́ты ст҃а́гѡ а҆пⷭ҇ла ѳᲂмы̀ .

Въ сꙋбо́тꙋ ст҃а́гѡ пра́веднагѡ ла́зарѧ , на пᲂлꙋ́ нᲂщницѣ , по пе́рвᲂмъ трⷭ҇то́мъ , и҆ по ѻ҆́ч҃е на́шъ . трᲂпа́рь : ѻ҆́бщее вᲂскрⷭ҇нїе . по втᲂро́мъ трⷭ҇то́мъ , и҆ по ѻ҆́ч҃е на́шъ . кᲂнда́къ : и҆́же всѣ́хъ ра́дᲂсть хрⷭ҇то́съ . гдⷭ҇и пᲂми́лꙋй , в҃і . и҆ ѿпꙋ́стъ . мл҃твы же , пᲂмѧнѝ гдⷭ҇и , не глаго́лемъ .

На ᲂу҆́трени , на бг҃ъ гдⷭ҇ь , трᲂпа́рь . гла́съ , а҃ . Ѻ҆́бщее вᲂскрⷭ҇нїе пре́жде свᲂеѧ̀ стрⷭ҇ти ᲂу҆вѣрѧ́ѧ , и҆з̾ ме́ртвыхъ вᲂз̾дви́глъ є҆сѝ ла́зарѧ хрⷭ҇тѐ бж҃е . тѣ́мже и҆ мы̀ ꙗ҆́кѡ ѻ҆́трᲂцы , пᲂбѣ́дныѧ ѻ҆́бразы нᲂсѧ́ще , тебѣ̀ пᲂбѣди́телю сме́рти вᲂпїе́мъ , ѡ҆са́нна в̾ вы́шнихъ , бл҃гᲂслᲂве́нъ грѧды́и во́ и҆мѧ гдⷭ҇не . три́жды .

По а҃ , стихᲂло́гїи , сѣда́ленъ . гла́съ , а҃ . Оу҆ще́д ривъ ма́рѳины и҆ ма́рїины сле́зы , ѿвали́ти ка́мень ѿ́ грᲂба пᲂвелѣ́лъ є҆сѝ , и҆ вᲂз̾гласи́въ вᲂскр҃си́лъ є҆сѝ ме́ртваго . сᲂкрꙋши́л̾ є҆сѝ сме́рти вереѝ жизнᲂда́вче , ꙗ҆́кѡ бг҃ъ сᲂбо́ю ᲂу҆вѣрѧ́ѧ мирско́е вᲂскрⷭ҇нїе . сла́ва си́лѣ твᲂе́й сп҃се . сла́ва вла́сти твᲂе́й . сла́ва и҆́же сло́вᲂмъ всѧ̀ сᲂста́ви вшемꙋ . сла́ва , и҆ ны́нѣ . Ка́меню ѿваленꙋ̀ , ме́ртва четверᲂдне́вна ла́зарѧ гла́сᲂмъ и҆з̾ а҆́да вᲂскреси́лъ є҆сѝ , и҆ ви́дѣша сла́вꙋ твᲂю̀ сп҃се , є҆вре́и раз̾сѣда́хꙋсѧ за́вистїю . сегѡ̀ ра́ди младе́ нцы , ѡ҆са́нна вᲂпїѧ́хꙋ тебѣ̀ жизнᲂда́вче . сла́ва бл҃гᲂꙋтро́бїю твᲂемꙋ̀ хрⷭ҇тѐ . сла́ва си́лѣ твᲂе́й . сла́ва смᲂтре́нїю твᲂемꙋ̀ є҆ди́не чл҃кᲂлю́бче .

По в҃ , стихᲂло́гїи , сѣда́ленъ . гла́съ , є҃ . И҆сто́ч никъ премꙋ́дрᲂсти и҆ пред̾вѣ́дѣнїю , в̾ виѳа́нїю прише́дъ , с̾ ма́рѳᲂю сꙋ́щихъ вᲂпрᲂша́ше , гдѣ̀ пᲂлᲂжи́сте ре́къ дрꙋ́га ла́зарѧ . є҆го́же ра́ди прᲂслези́въ бл҃гᲂꙋтро́бне , и҆ четверᲂдне́вна вᲂскр҃си́въ гла́сᲂмъ свᲂи́мъ , чл҃кᲂлю́бче ще́дрыи , ꙗ҆́кѡ жизнᲂда́вецъ и҆ гдⷭ҇ь . сла́ва , и҆ нн҃ѣ , то́йже . та́же , вᲂскрⷭ҇нїе хрⷭ҇то́во . и҆ ѱало́мъ , н҃ .

Кано́ны два̀ , пе́рвыи со і҆рмᲂсо́мъ , на́ и҃ . дрꙋгі́и же , на́ ѕ҃ . кано́нъ , твᲂре́нїе ѳеѡ́фанᲂво . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́внѡ бо прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Пᲂе́мъ гдⷭ҇ви вᲂскр҃си́вшемꙋ ла́зарѧ , четверᲂдне́ внаго и҆́з̾ грᲂба , ѡ҆са́нна вᲂпїю́ще всѣ́хъ бг҃ꙋ . Ла́заре грѧдѝ во́нъ , хрⷭ҇тꙋ̀ вᲂз̾гласи́вшꙋ . ᲂу҆слы́ша без̾дꙋ́шныи , и҆ и҆зы́де свѧ́занъ пᲂво́йми , вᲂспѣва́ѧ бг҃а . Ла́зарѧ ᲂу҆ме́ршагѡ , ма́нїемъ бжⷭ҇твенымъ вᲂскреси́лъ є҆сѝ , ꙗ҆́кѡ зижди́тель сы́и , и҆ живᲂтꙋ̀ сᲂкро́вище чл҃кᲂлю́бче . Сло́вᲂмъ четверᲂдне́внаго ла́зарѧ , вᲂз̾гласи́лъ є҆сѝ без̾сме́ртне , и҆ темнᲂѡбра́знᲂе а҆́дᲂво разрꙋши́лъ є҆сѝ ᲂу҆жа́снѡ ца́рство . Всѣ́мъ пребжⷭ҇твенᲂе пᲂзна́нїе бжⷭ҇тва̀ пᲂказа́лъ є҆сѝ , и҆з̾ ме́ртвыхъ вᲂста́вилъ є҆сѝ четверᲂдне́внаго ла́зарѧ гдⷭ҇и . Дне́сь виѳа́нїѧ пред̾вᲂзвѣща́етъ вᲂскрⷭ҇нїе хрⷭ҇та̀ жизнᲂда́вца , в̾ вᲂскрⷭ҇нїи ла́заревѣ ликᲂвствꙋ́ющи .= Ч=и́стаѧ бцⷣе , вᲂплᲂще́нна при́снѡ сꙋ́щна , и҆ пребжⷭ҇твена сло́ва , па́че є҆стества̀ ро́ждьши , пᲂе́мъ тѧ .

Дрꙋгі́и кано́нъ , твᲂре́нїе ѳеѡ́фанᲂво . гла́съ , то́йже . і҆рмо́съ . Во́дꙋ прᲂше́дъ . запѣ́въ : Сла́ва тебѣ̀ бж҃е на́шъ , сла́ва тебѣ̀ . И҆́же пе́рвѣе ѿ несꙋ́щихъ приведѐ всѧ́ческꙋю тва́рь , и҆ вѣ́дыи серде́чныѧ та́йны . пред̾гл҃еши ꙗ҆́кѡ влⷣка ᲂу҆ченико́мъ ла́зарево ᲂу҆спе́нїе . Чл҃ка є҆стество́мъ ѡ҆сꙋ́ществᲂвавъ хрⷭ҇тѐ , вᲂпрᲂша́ше ла́зарево пᲂгребе́нїе ; ѿ стра́нъ смердѧ́ща , ꙗ҆́кѡ цр҃ь и҆ бг҃ъ сегѡ̀ вᲂз̾дви́глъ є҆сѝ . сла́ва . Оу҆вѣрѧ́ѧ сло́ве свᲂѐ вᲂскрⷭ҇нїе вᲂи́стинꙋ , ꙗ҆́кѡ ѿ сна̀ дрꙋ́га вᲂскреси́лъ є҆сѝ ᲂу҆́же смердѧ́ща , четверᲂдне́вна мертвеца̀ ѿ́ грᲂба . и҆ ны́нѣ , боⷢ҇ . Бꙋ́ди ми дв҃о прибѣ́жище , приста́нище же и҆ стѣна̀ , и҆ пред̾ста́тельнице к̾ бг҃ꙋ , пло́тїю ро́ждьшаѧ бг҃ᲂмт҃и , всѧ́ческихъ превы́шша є҆стество́мъ .

катава́сїѧ : Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Два̀ пред̾лага́ѧ дѣ́йства свᲂѧ̀ , пᲂказа́лъ є҆сѝ сꙋще́ствъ сп҃се сꙋгꙋ́бицꙋ , бг҃ъ бо є҆сѝ и҆ чл҃къ . Бе́здна сы́и ра́зꙋма , ты̀ вᲂпрᲂша́еши , гдѣ̀ пᲂлᲂже́нъ бы́сть ме́ртвыи , хᲂтѧ̀ вᲂскреси́ти живᲂда́вче лежа́щаго . Мѣ́ста и҆спыта́ѧи , ꙗ҆́кѡ зе́менъ чл҃къ бы́лъ є҆сѝ ѡ҆пи́санъ , и҆спᲂлнѧ́ѧ всѧ́ческаѧ , ꙗ҆́кѡ бг҃ъ неѡ҆пи́санъ . боⷢ҇ . Да́ждь на́мъ по́мᲂщь мл҃твами твᲂи́ми всечи́стаѧ , нахᲂжде́нїѧ ѿгᲂнѧ́ющи , лю́тыхъ ѡ҆б̾стᲂѧ́нїи .

и҆́нъ , і҆рмо́съ . Нбⷭ҇нᲂмꙋ крꙋ́гꙋ . Пред̾ста̀ ты̀ гро́бꙋ чꙋдᲂтво́рче гдⷭ҇и , в̾ виѳа́нїи над̾ ла́заремъ прᲂслези́лсѧ є҆сѝ , зако́нᲂмъ є҆стества̀ , пло́ть свᲂю̀ ᲂу҆вѣрѧ́ѧ , і҆с҃е бж҃е мо́й ю҆́же вᲂспрїѧ́лъ є҆сѝ . Ма́рїинъ пла́чь , ты̀ а҆́бїе ᲂу҆тᲂли́лъ є҆сѝ сп҃се , и҆ ма́рѳѣ пᲂказꙋ́ѧ самᲂвла́стнᲂе . ты́ бо вᲂскрⷭ҇нїе , ты̀ и҆ живо́тъ , ꙗ҆́кᲂже ре́клъ є҆сѝ и҆́стинныи влⷣко , и҆ всѣ́мъ гдⷭ҇ь . сла́ва . Ѻ҆бви́таго ᲂу҆кро́йми дрꙋ́га ла́зарѧ гдⷭ҇и , ѿ а҆́да те́мнагѡ и҆сто́ргнꙋлъ є҆сѝ ты̀ сло́вᲂмъ свᲂи́мъ , и҆ всю̀ крѣ́пᲂсть сме́ртнꙋю раз̾ве́ргъ ключа̀ и҆ црⷭ҇твїе . и҆ ны́нѣ , боⷢ҇ . Бл҃гᲂда́телѧ ро́ждьши , до́брымъ вино́внагѡ , бл҃гᲂдѣѧ́нїѧ бᲂга́тьство всѣ́мъ и҆стᲂчѝ . всѧ́ бо мо́жеши ꙗ҆́кѡ си́льна въ крѣ́пᲂсти , хрⷭ҇та̀ ро́ждьши бг҃ᲂблаже́ннаѧ .

катава́сїѧ : Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче .

сѣда́ленъ . гла́съ , и҃ . Прᲂвѣ́дыи всѧ́ческаѧ ꙗ҆́кѡ твᲂре́цъ , в̾ виѳа́нїи прᲂре́клъ є҆сѝ ᲂу҆ченико́мъ свᲂи́мъ , дрꙋ́гъ на́шъ ла́зарь ᲂу҆́спе дне́сь , и҆ вѣ́дыи вᲂпрᲂси́лъ є҆сѝ ре́клъ , гдѣ̀ пᲂлᲂжи́сте и҆̀ . и҆ ѻ҆ц҃ꙋ пᲂмᲂли́лсѧ є҆сѝ прᲂслези́въ ꙗ҆́кѡ чл҃къ . тѣ́мже и҆ вᲂз̾гласи́въ , є҆го́же люблѧ́ше , ѿ а҆́да вᲂста́вилъ є҆сѝ гдⷭ҇и , четверᲂдне́внаго ла́зарѧ . сегѡ̀ ра́ди вᲂпїе́мъ ти , прїимѝ хрⷭ҇тѐ бж҃е , дерза́ющихъ пѣ́снь принести́ ти . и҆ спᲂдо́би всѣ́хъ сла́вѣ твᲂе́й . сла́ва , и҆ ны́нѣ . гла́съ , д҃ . Вкꙋ́пѣ пред̾ста́ша хрⷭ҇тꙋ̀ ла́заревы сестры̀ , и҆ слезѧ́ще го́рцѣ , и҆ пла́чꙋще жа́лᲂстнѡ . рѣ́ша , ᲂу҆́мре влⷣко ла́зарь . ты́же ꙗ҆́кѡ бг҃ъ не невѣ́дыи пᲂгребе́нїѧ , вᲂпрᲂша́еши ꙗ҆́кѡ чл҃къ , гдѣ̀ пᲂлᲂжи́сте є҆гѡ̀ . и҆ пристꙋпи́въ ко́ грᲂбꙋ , вᲂз̾глаша́ше четверᲂдне́внаго ла́зарѧ . ѻ҆́нъ же а҆́бїе вᲂста̀ и҆ пᲂкланѧ́шесѧ вᲂз̾гласи́вшемꙋ є҆гѡ̀ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Ты̀ ꙗ҆́кѡ па́стырь и҆схи́тилъ є҆сѝ хрⷭ҇тѐ чл҃ка , растлѣ́вша ᲂу҆́же четверᲂдне́вна сᲂдѣ́телю , ѿ́ вᲂлка лю́тагѡ пᲂи́стинѣ всеѧ́дца , ꙗ҆́кѡ всеси́ленъ и҆ гдⷭ҇ь . си́мъ прᲂѧвлѧ́ѧ всеми́рнꙋю сла́вꙋ , свᲂегѡ̀ тридне́внагѡ вᲂста́нїѧ . Тебѐ жи́знь ви́дѧще , и҆́же с̾ ма́рѳᲂю хрⷭ҇тѐ вᲂпїѧ́хꙋ , а҆́ще бы бы́лъ здѣ̀ гдⷭ҇и , прᲂсвѣще́нїе всѣ́хъ и҆ жи́знь , ѿ ню́дъ не бы̀ ᲂу҆́мерлъ ла́зарь . жи́знь же ᲂу҆ме́ршихъ ты̀ є҆сѝ чл҃кᲂлю́бче , в̾ ра́дᲂсть пла́чь и҆́хъ прелага́еши . Ꙗ҆́кѡ млⷭ҇тивъ сле́зы то́чиши чл҃кᲂлю́бче , ᲂу҆ще́дривъ ма́рѳѣ бᲂлѣ́знь , сло́во бж҃їе и҆ всѣ́хъ жи́знь . ꙗ҆́кᲂже невѣ́дыи вᲂпрᲂси́лъ є҆сѝ сп҃се , гдѣ̀ пᲂлᲂже́нъ бы́сть ла́зарь . и҆ сегѡ̀ вᲂз̾гласи́въ вᲂз̾дви́глъ є҆сѝ ꙗ҆́кѡ всеси́ленъ . Тебѐ и҆сто́чника бᲂѧ́тсѧ гдⷭ҇и бе́здны . тебѐ рабо́таютъ и҆сто́чницы и҆ мᲂрѧ̀ . тебѐ трепе́щꙋтъ хрⷭ҇тѐ вереѝ а҆́дᲂвы , и҆ ключѝ держа́вᲂю ти раз̾рꙋша́ютсѧ , ла́зарю вᲂскре́сшꙋ и҆з̾ ме́ртвыхъ , гла́сᲂмъ твᲂи́мъ всеси́льне сп҃се чл҃кᲂлю́бче . боⷢ҇ . Тебѐ чи́стꙋю бцⷣꙋ пречи́стаѧ стѧжа́хъ , мᲂли́твеницꙋ непᲂсты́днꙋ . прило́ги вра́жїѧ и҆ грѣха̀ стѣ́нꙋ нн҃ѣ прелѣ́зꙋ , тве́рдымъ пред̾ста́тельствᲂмъ , и҆́же в̾ тѧ̀ вᲂдрꙋже́нымъ и҆ си́лᲂю твᲂе́ю ᲂу҆твержа́емъ .

и҆́нъ , і҆рмо́съ . Оу҆слы́шахъ гдⷭ҇и . Непᲂсо́бїѧ тре́бꙋѧ хрⷭ҇тѐ , но смᲂтре́нїе сᲂверша́ѧ недᲂꙋмѣ́нно . мᲂлѧ́сѧ вᲂста́вилъ є҆сѝ ме́ртва , четверᲂдне́вна всеси́льне . Є҆́же ѻ҆ц҃ꙋ сᲂпрⷭ҇нᲂсꙋ́щнᲂе сло́во и҆ бг҃ъ , пе́рвѣе неви́димь , ны́нѣ ꙗ҆́кѡ чл҃къ мл҃твꙋ дѣ́етъ , мл҃твы всѣ́хъ прїе́млѧи . сла́ва . Гла́съ тво́й пᲂтрѧсѐ сп҃се сме́ртнꙋю всю̀ си́лꙋ . и҆ ѡ҆снᲂва́нїѧ а҆́дᲂва , бжⷭ҇твенᲂю тѝ си́лᲂю преклᲂни́шасѧ .= и҆ ны́нѣ , боⷢ҇ . Д=в҃ꙋ вᲂспᲂе́мъ , ꙗ҆́кѡ по ржⷭ҇твѣ̀ па́ки дв҃ꙋ пребы́вшꙋю , и҆ ро́ждьшꙋю хрⷭ҇та̀ бг҃а , ѿ пре́лести ми́ра и҆зба́вльшаго .

катава́сїѧ : Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Ѻ҆ц҃ꙋ сла́вꙋ принᲂша́ѧ , ꙗ҆́кѡ бг҃ꙋ не сᲂпрᲂти́венъ сы́и мᲂлѧ́сѧ , пред̾стᲂѧ́щїи ᲂу҆вѣрѧ́ѧ наро́дъ дᲂлгᲂтерпѣли́ве . и҆ бл҃гᲂдаре́нїе свᲂемꙋ̀ ѻ҆ц҃ꙋ принᲂсѧ̀ , самᲂвла́стнѡ вᲂз̾двиза́еши ла́зарѧ . Мл҃твами ла́заревыми , ма́рѳы же и҆ ма́рїи , спᲂдо́би на́съ зри́тели бы́ти , бг҃ᲂви́днᲂмꙋ крⷭ҇тꙋ̀ , и҆ страсте́мъ тѝ гдⷭ҇и , и҆ свѣ́тлᲂсти дне́мъ , и҆ цр҃ѧ пра́здникѡмъ пра́здника сла́вити тѧ . Пред̾ста́въ ла́заревꙋ гро́бꙋ чл҃кᲂлю́бче , сегѡ̀ призва́лъ є҆сѝ , и҆ жи́знь по́далъ є҆сѝ , ꙗ҆́кѡ жи́знь сы́и без̾сме́ртнаѧ чл҃кѡмъ всѣ́мъ . є҆́юже ꙗ҆́кѡ бг҃ъ бꙋ́дꙋщее прᲂѡ҆бразꙋ́ѧ вᲂскрⷭ҇нїе . Ѿ ́гласа бг҃ᲂвѣща́ннагѡ , и҆ бжⷭ҇твенныѧ си́лы сп҃се держа́вы твᲂеѧ̀ , є҆́юже а҆́дᲂва врата̀ , и҆ всеѧ́дныѧ сме́рти сᲂкрꙋши́лъ є҆сѝ . но и҆схи́ти мѧ ѿ страсте́й мᲂи́хъ , ꙗ҆́кᲂже пре́же твᲂегѡ̀ дрꙋ́га и҆схи́тилъ є҆сѝ ла́зарѧ .

и҆́нъ , і҆рмо́съ , то́йже . Свѧ́занъ по нᲂга́ма ла́зарь хᲂжда́ше , чꙋ́до чꙋдесе́мъ . и҆́бо бо́лїи ꙗ҆ви́сѧ вᲂз̾бранѧ́ющагѡ ᲂу҆крѣплѧ́ѧи хрⷭ҇то́съ . є҆го́же сло́вꙋ всѧ̀ рабᲂлѣ́пнѡ слꙋ́жатъ , ꙗ҆́кѡ бг҃ꙋ и҆ влⷣцѣ рабо́таютъ . сла́ва . Ме́ртва смердѧ́ща ла́зарѧ вᲂз̾дви́гнꙋвъ хрⷭ҇тѐ четверᲂдне́вна . вᲂз̾дви́гни мѧ̀ ᲂу҆ме́рша ны́нѣ грѣхѝ мᲂи́ми , и҆ пᲂлᲂже́на в̾ ро́вѣ и҆ сѣ́ни сме́ртнѣй , ꙗ҆́кѡ милᲂсе́рдъ и҆зба́ви и҆ спаси́ мѧ . и҆ ны́нѣ , боⷢ҇ . Мт҃рьне дерзнᲂве́нїе , є҆́же к̾ сн҃ꙋ свᲂемꙋ̀ и҆мꙋ́щи пречⷭ҇таѧ , сро́дныѧ по́мᲂщи на́шеѧ непре́зри мо́лимсѧ , ꙗ҆́кѡ тѧ̀ є҆ди́нꙋ хрⷭ҇тїа́не ко влⷣцѣ ѡ҆чище́нїе млⷭ҇тивно пред̾лага́емъ .

катава́сїѧ : Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ .

четверᲂпѣ́снецъ ки́ръ кᲂзмы̀ . пѣ́снь , ѕ҃ . і҆рмо́съ . І҆ѡ́нꙋ в̾ ки́тѣ гдⷭ҇и є҆ди́нагѡ всели́лъ є҆сѝ , мене́ же свѧ́заннаго во мре́жахъ вра́жїѧхъ спасѝ , ꙗ҆́кѡ ѿ тлѝ тᲂгѡ̀ спа́слъ є҆сѝ . Вᲂз̾люби́лъ є҆сѝ виѳа́нїю гдⷭ҇и , и҆́де къ ла́зарю , и҆ сегѡ̀ ᲂу҆́же смердѧ́ща вᲂскреси́лъ є҆сѝ ꙗ҆́кѡ бг҃ъ , и҆ ѿ ᲂу҆́зъ а҆́дᲂвыхъ спа́слъ є҆сѝ . Ма́рѳа ᲂу҆́бѡ ѿча́ѧвсѧ ла́зарѧ , ꙗ҆́кѡ ᲂу҆́же четверᲂдне́вна . хрⷭ҇то́съ же и҆стлѣ́вшаго вᲂскресѝ , ꙗ҆́кѡ бг҃ъ , и҆ к̾ жи́зни преста́ви гла́сᲂмъ .

ки́ръ і҆ѡ́сифъ . и҆́нъ , і҆рмо́съ . Ѡ҆чи́сти мѧ сп҃се . Бг҃ъ сы́и и҆́стиненъ , ла́зарево вѣ́дыи ᲂу҆спе́нїе . и҆ сїѐ ᲂу҆ченикѡ́мъ свᲂи́мъ прᲂвᲂз̾вѣсти́лъ є҆сѝ , ᲂу҆вѣрѧ́ѧ влⷣко бжⷭ҇тва̀ свᲂегѡ̀ , владо́мᲂе дѣ́йство . Пло́тїю ѡ҆пи́санъ , сы́и неѡ҆пи́санныи , в̾ виѳа́нїю прише́дъ , ꙗ҆́кѡ челᲂвѣ́къ влⷣко слези́ши над̾ ла́заремъ , ꙗ҆́кѡ бг҃ъ же вᲂскреси́лъ є҆сѝ четверᲂдне́внаго .

катава́сїѧ : Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ .

кᲂнда́къ . гла́съ , в҃ . И҆́же всѣ́хъ ра́дᲂсть хрⷭ҇то́съ и҆́стина , свѣ́тъ и҆ живо́тъ , и҆ ми́рꙋ вᲂз̾ва́нїе , сꙋ́щимъ на землѝ ꙗ҆ви́сѧ . свᲂе́ю бл҃гᲂстїю , бы́въ ѻ҆́бразъ вᲂскрⷭ҇нїѧ . и҆ всѣ́мъ пᲂдаѧ̀ бжⷭ҇твенᲂе ѡ҆ставле́нїе . и҆́кᲂсъ . Оу҆ченикѡ́мъ зижди́тель всѣ́мъ пред̾вѣща̀ гл҃ѧ , бра́тїе мᲂѧ̀ зна́емїи , на́шъ дрꙋ́гъ ᲂу҆́спе . сїѐ пред̾гл҃ѧ и҆ ᲂу҆ча̀ , и҆́же вѣ́дыи всѧ̀ ꙗ҆́кѡ зижди́тель всѣ́хъ . и҆́демъ ᲂу҆́бѡ к̾ немꙋ̀ , и҆ ви́димъ стра́ннᲂе пᲂгребе́нїе , и҆ рыда́нїе ма́рїино , и҆ ла́заревъ гро́бъ ᲂу҆́зримъ . та́мо бо хᲂщꙋ̀ чꙋдᲂдѣ́йствᲂвати , сᲂверша́ѧ крⷭ҇та̀ пред̾начина́нїе , и҆ всѣ́мъ пᲂдаѧ̀ бжⷭ҇твенᲂе ѡ҆ставле́нїе .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Прᲂслези́въ ꙗ҆́кѡ чл҃къ ще́дре , вᲂскр҃си́лъ є҆сѝ ꙗ҆́кѡ бг҃ъ сꙋ́щагѡ во́ грᲂбѣ . и҆ раз̾рѣ́шьсѧ ѿ а҆́да ла́зарь взыва́ше , бл҃гᲂслᲂве́нъ є҆сѝ гдⷭ҇и бж҃е во́ вѣки . И҆зы́де пᲂво́йми ѡ҆бѧ́занъ , про́пасти же а҆́дᲂвы и҆ тьмы̀ ᲂу҆бѣ́гъ , влⷣчнимъ сло́вᲂмъ ла́зарь взыва́ше , бл҃гᲂслᲂве́нъ є҆сѝ гдⷭ҇и бж҃е во́ вѣки .

и҆́нъ , і҆рмо́съ . И҆́же ѿ і҆ꙋде́и . На́д̾ дрꙋгᲂмъ прᲂслези́въ , ма́рѳины ще́дре сле́зы ᲂу҆тᲂли́лъ є҆сѝ . и҆ стра́стїю во́льнᲂю , ѿѧ́лъ є҆сѝ ѿ лица̀ люде́й твᲂи́хъ , всѧ́кꙋю сле́зꙋ . ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Живᲂтꙋ̀ сᲂкро́вище , ме́ртваго ꙗ҆́кѡ ѿ сна̀ сп҃се вᲂз̾дви́глъ є҆сѝ . и҆ сло́вᲂмъ а҆́дᲂвꙋ ᲂу҆тро́бꙋ расто́ргнꙋвъ , вᲂскр҃си́лъ є҆сѝ пᲂю́ща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Мертвеца̀ смердѧ́ща свѧ́зана пᲂво́йми , влⷣко вᲂз̾дви́гнꙋлъ є҆сѝ , и҆ менѐ свѧ́занаго плени́цами прегрѣше́нїи , вᲂста́ви пѣ́ти тебѣ̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

катава́сїѧ : И҆́же ѿ і҆ꙋде́и , дᲂше́дше ѻ҆́трᲂцы в̾ вавилѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Мꙋсикі́йскимъ ѻ҆рга́нѡмъ сᲂгласѧ́щимъ , и҆ лю́демъ без̾числа̀ кла́нѧющимсѧ , тѣ́лꙋ сꙋ́щꙋ на мᲂле́бнѣмъ , трїѐ ѻ҆́трᲂцы пѣснᲂсло́вѧхꙋ , гдⷭ҇а по́йте , и҆ превᲂзнᲂси́те є҆гѡ̀ во́ вѣки . Ꙗ҆́кѡ па́стырь а҆́гньца взыска́лъ є҆сѝ , ѿ́ вᲂлка лю́тагѡ и҆ гꙋби́телѧ и҆схи́тивъ . ѡ҆держи́магѡ тле́ю ѡ҆бнᲂвлѧ́еши , пᲂю́ща тебѣ̀ непреста́нно , гдⷭ҇а по́йте , и҆ превᲂзнᲂси́те є҆гѡ̀ во́ вѣки . Ꙗ҆́кѡ чл҃къ гро́ба взыска́лъ є҆сѝ ме́ртваго ꙗ҆́кѡ сᲂдѣ́тель вᲂскреси́въ пᲂвелѣ́нїемъ твᲂи́мъ влⷣчнимъ . є҆го́же а҆́дъ ᲂу҆жасе́сѧ зрѧ̀ , вᲂпїю́ща тебѣ̀ . по́йте и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Цр҃ѧ нбⷭ҇нагѡ . Вᲂпрᲂша́еши ᲂу҆́бѡ ꙗ҆́кѡ сме́ртенъ , ꙗ҆́кѡ бг҃ъ же вᲂскресѝ сло́вᲂмъ четверᲂдне́внаго . тѣ́мже тѧ̀ пᲂе́мъ и҆ превᲂзно́симъ во всѧ̀ вѣ́ки . Тебѣ̀ бл҃гᲂразꙋ́мнѡ влⷣко , ꙗ҆́кᲂже до́лжнᲂе ма́рїѧ принᲂша́етъ мѵ́рѡ , вᲂспѣва́ющи во всѧ̀ вѣ́ки . Призыва́еши ᲂу҆́бѡ ꙗ҆́кѡ чл҃къ ѻ҆ц҃а . ꙗ҆́кᲂже бг҃ъ ла́зарѧ вᲂз̾дви́глъ є҆сѝ ме́ртва смердѧ́ща , тѣ́мже тѧ̀ пᲂе́мъ хрⷭ҇тѐ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки= [пᲂкло́н̾ до землѝ] .= честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Чи́стꙋю и҆ сла́внꙋю пᲂчте́мъ , лю́дїе бцⷣꙋ прїи́мшꙋю во́ чревѣ , ѻ҆́гнь бжⷭ҇тва̀ неѡ҆па́льнѡ , пѣ́сньми велича́емъ . Лю́дїе ви́дѣвше хᲂдѧ́ща мертвеца̀ четверᲂдне́вна , ᲂу҆диви́вшесѧ чꙋдесѝ , вᲂпїѧ́хꙋ , и҆зба́вителю , бг҃а тѧ̀ пѣ́сньми велича́емъ . Пред̾ꙋвѣрѧ́ѧ сла́внᲂе вᲂста́нїе твᲂѐ ѽ сп҃се мо́й , ѿ ме́ртвыхъ четверᲂдне́внаго и҆з̾ а҆́да свᲂбᲂди́лъ є҆сѝ ла́зарѧ , пѣ́сньми тѧ̀ велича́юща .

и҆́нъ , і҆рмо́съ . Вᲂи́стинꙋ бцⷣꙋ тѧ̀ . Пᲂчита́ѧ свᲂегѡ̀ ѻ҆ц҃а , и҆ пᲂказꙋ́ѧ ꙗ҆́кѡ не бг҃ᲂпрᲂти́венъ є҆сѝ , мл҃твꙋ дѣ́еши хрⷭ҇тѐ . самᲂвла́стно же вᲂз̾двиза́ѧ четверᲂдне́внаго . Хо́диши и҆ слези́ши , вѣща́еши же сп҃се мо́й , чл҃ческо пᲂказꙋ́еши свᲂѐ дѣ́йство . бжⷭ҇твено же вᲂз̾вѣща́ѧ , вᲂз̾двиза́еши ла́зарѧ . И҆́з̾грᲂба четверᲂдне́внаго ла́зарѧ вᲂз̾дви́глъ є҆сѝ , тридне́внагѡ хрⷭ҇тѐ свᲂегѡ̀ вᲂста́нїѧ всеи́стиннагѡ , всѣ́мъ пᲂказꙋ́еши свидѣ́телѧ .

катава́сїѧ : Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , с̾ нбⷭ҇ными вѡ́и тѧ̀ велича́емъ .

задᲂсто́йнѡ : Чи́стꙋю и҆ сла́внꙋю пᲂчте́мъ , лю́дїе бцⷣꙋ прїи́мшꙋю во́ чревѣ , ѻ҆́гнь бжⷭ҇тва̀ неѡ҆па́льнѡ , пѣ́сньми велича́емъ [пᲂкло́н̾ до землѝ] . та́же , ст҃ъ гдⷭ҇ь бг҃ъ на́шъ ,= на́ гласъ , а҃ . свѣти́лен . Сло́вᲂмъ твᲂи́мъ сло́ве бж҃їи , ла́зарь ны́нѣ и҆змѣнѧ́етсѧ , и҆ к̾ житїю̀ па́ки пᲂтечѐ . и҆ с̾ ва́їемъ лю́дїе тебѐ держа́вныи пᲂчита́ютъ , ꙗ҆́кѡ до кᲂнца̀ пᲂгꙋби́ши а҆́дъ сме́ртїю свᲂе́ю . двⷤа . сла́ва , и҆ ны́нѣ . Ч=етверᲂдне́внаго дрꙋ́га хрⷭ҇тѐ , сло́вᲂмъ вᲂскреси́въ ѿ́грᲂба , и҆зы́ди , ско́ро грѧдѝ ла́заре . слы́шавъ а҆́дъ ᲂу҆жасе́сѧ , и҆ ме́ртваго и҆з̾даѧ́ше живо́мꙋ влⷣцѣ .

На хвали́тѣхъ , стⷯры , на́ ѕ҃ . гла́съ а҃ . Вᲂскрⷭ҇нїе и҆ жи́знь чл҃кѡмъ ты̀ є҆сѝ хрⷭ҇тѐ , гро́бꙋ ла́заревꙋ пред̾ста́лъ є҆сѝ . ᲂу҆вѣрѧ́ѧ на́мъ ѻ҆́бѣ сꙋ́ществѣ свᲂѝ дᲂлгᲂтерпѣли́ве , ꙗ҆́кѡ бг҃ъ и҆ чл҃къ ѿ чи́стыѧ дв҃ы прише́лъ є҆сѝ . ꙗ҆́кᲂже бо чл҃къ вᲂпрᲂси́лъ є҆сѝ , гдѣ̀ пᲂлᲂже́нъ бы́сть ; и҆ ꙗ҆́кѡ бг҃ъ вᲂскр҃си́лъ є҆сѝ , живᲂнача́льнымъ ма́нїемъ четверᲂдне́внаго . Ма́рїѧ и҆ ма́рѳа сп҃сꙋ гл҃ахꙋ , а҆́ще бы здѣ̀ бы́лъ є҆сѝ гдⷭ҇и , небы̀ ᲂу҆ме́рлъ ла́зарь . хрⷭ҇то́съ же вᲂскрⷭ҇нїе ᲂу҆со́пшимъ , сегѡ̀ ᲂу҆́же четверᲂдне́внаго и҆з̾ ме́ртвыхъ вᲂскр҃си́въ . прїидѣ́те всѝ вѣ́рнїи , семꙋ̀ пᲂклᲂни́мсѧ , грѧдꙋ́щемꙋ во сла́вѣ , спастѝ дш҃а на́ша . Ла́зарѧ ᲂу҆ме́рша четверᲂдне́внаго , вᲂскр҃си́лъ є҆сѝ и҆з̾ а҆́да хрⷭ҇тѐ . пре́же свᲂеѧ̀ сме́рти , пᲂтрѧсѐ сме́ртнꙋю держа́вꙋ . и҆ є҆ди́нᲂгѡ ра́ди люби́маго , всѣ́мъ чл҃кѡмъ прᲂвᲂз̾вѣща́еши и҆з̾ тлѝ свᲂбᲂже́нїе . тѣ́мже пᲂклᲂнѧ́ющесѧ твᲂе́й всеси́льнѣй вла́сти вᲂпїе́мъ , бл҃гᲂслᲂве́нъ є҆сѝ сп҃се пᲂми́лꙋй на́съ . Бжⷭ҇тва̀ свᲂегѡ̀ хрⷭ҇тѐ , пᲂдаѧ̀ ᲂу҆ченико́мъ сѝ ѻ҆́бразъ . в̾ наро́дѣхъ смирѧ́ше себѐ , ᲂу҆таи́тисѧ хᲂтѧ̀ . тѣ́мже и҆ а҆пⷭ҇лѡмъ ꙗ҆́кѡ прᲂви́децъ бг҃ъ , ла́заревꙋ сме́рть пре́же вᲂз̾вѣстѝ . и҆ в̾ виѳа́нїи вᲂпрᲂша́ше люде́й , дрꙋ́га свᲂегѡ̀ гро́ба не невѣ́дыи , ᲂу҆вѣ́дѣти же вᲂпрᲂша́ѧ , ꙗ҆́кѡ чл҃къ . но и҆́же тᲂбо́ю четверᲂдне́венъ вᲂскр҃сы́и , бжⷭ҇твенꙋю твᲂю̀ держа́вꙋ ꙗ҆вѝ . всеси́льне гдⷭ҇и сла́ва тебѣ̀ . гла́съ , д҃ . Четверᲂдне́вна вᲂз̾дви́глъ є҆сѝ дрꙋ́га свᲂегѡ̀ хрⷭ҇тѐ , и҆ ма́рѳино и҆ ма́рїино рыда́нїе ᲂу҆тᲂли́лъ є҆сѝ , пᲂказꙋ́ѧ всѣ́мъ , ꙗ҆́кѡ ты̀ є҆сѝ и҆́же всѧ̀ сверша́ѧи бжⷭ҇твенᲂю си́лᲂю , и҆ самᲂвла́стнымъ хᲂтѣ́нїемъ . тебѣ́ бо херꙋви́ми вᲂпїю́тъ непреста́ннѡ , ѡ҆са́нна в̾ вы́шнихъ , бл҃гᲂслᲂве́нъ є҆сѝ и҆́же над̾ всѣ́ми , бж҃е сла́ва тебѣ̀ . Ма́рѳа ма́рїи вᲂпїѧ́ше , ᲂу҆чи́тель прїи́де , и҆ глаша́етъ тѧ , пристꙋпѝ . ѻ҆на́ же текꙋ́щи прїи́де и҆дѣ́же стᲂѧ́ше гдⷭ҇ь . ви́дѣвши же вᲂзᲂпѝ , и҆ па́дши пᲂклᲂни́сѧ , пречи́стѣи но́зѣ лᲂбыза́ющи , гл҃аше ; гдⷭ҇и а҆́ще бы здѣ̀ бы́лъ , небы̀ ᲂу҆́мерлъ бра́тъ на́шъ .

сти́хъ : гла́съ , и҃ . вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Ла́зарѧ ᲂу҆ме́рша в̾ виѳа́нїи , вᲂз̾дви́глъ є҆сѝ четверᲂдне́вна , то́кмо бо прише́дъ ко́ грᲂбꙋ , и҆ гла́съ ᲂу҆ме́ршемꙋ живо́тъ бы́сть . и҆ вᲂз̾стᲂна́въ а҆́дъ ѿпꙋстѝ со́ страхᲂмъ . ве́лїе чꙋ́до , мнᲂгᲂмлⷭ҇тиве гдⷭ҇и сла́ва тебѣ̀ .

сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Ꙗ҆́кᲂже ре́клъ є҆сѝ гдⷭ҇и ма́рѳѣ , а҆́зъ є҆́смь вᲂскрⷭ҇нїе , дѣ́лᲂмъ сло́во и҆спо́лнилъ є҆сѝ , и҆з̾ а҆́да по́звалъ є҆сѝ ла́зарѧ . и҆ менѐ чл҃кᲂлю́бче ме́ртва стрⷭ҇тьмѝ , ꙗ҆́кѡ без̾стрⷭ҇тенъ вᲂскр҃сѝ мᲂлю́сѧ . сла́ва . гла́съ , в҃ . Ве́лїе и҆ пресла́вно чꙋ́до сверши́сѧ дне́сь , ꙗ҆́кѡ мертвеца̀ четверᲂдне́внаго , и҆́з̾ грᲂба хрⷭ҇то́съ вᲂз̾гласи́въ вᲂз̾дви́же , и҆ дрꙋ́га призва̀ , славᲂсло́вимъ є҆гѡ̀ ꙗ҆́кѡ пресла́вна . да мᲂли́твами пра́веднагѡ ла́зарѧ , спасе́тъ дш҃а на́ша . и҆ ны́нѣ . гла́съ , то́йже . Преблгⷭ҇ве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ хрⷭ҇то́съ бг҃ъ на́шъ , и҆зво́ливыи та́кѡ .= Славᲂсло́вїе вели́кᲂе , и҆ ѿпꙋ́стъ .=

На литꙋргі́и . бл҃же́нна , на́ и҃ . пѣ́снь , г҃ ѧ , и҆ ѕ҃ ѧ .= По вхо́дѣ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ . вмѣ́сто же трист҃а́гѡ : є҆ли́цы во хрⷭ҇та̀ крⷭ҇ти́стесѧ . =прᲂки́менъ , ѱл҃о́мъ дв҃дᲂвъ . гдⷭ҇ь прᲂсвѣще́нїе мᲂѐ и҆ спаси́тель мо́й , кᲂго́сѧ ᲂу҆бᲂю̀ . сти́хъ : гдⷭ҇ь защи́титель живᲂтꙋ̀ мᲂемꙋ̀ , ѿ кᲂго́сѧ ᲂу҆страшꙋ̀ . а҆пⷭ҇лъ , къ є҆вре́ѡмъ . зача́ло , тл҃г , ѿ пᲂлꙋ̀ .= а҆ллилꙋ́їѧ . гдⷭ҇ь вᲂцр҃и́сѧ в̾ лѣ́пᲂтꙋсѧ ѡ҆блечѐ . =сти́хъ : и҆́бо ᲂу҆твердѝ вселе́ннꙋю , ꙗ҆́же непᲂдви́житсѧ . є҆ѵⷢ҇а́лїе , ѿ і҆ѡа́нна . зача́ло , л҃ѳ . прича́стенъ . и҆зᲂꙋ́стъ младе́нецъ и҆с̾сꙋ́щихъ сверши́лъ є҆сѝ хвалꙋ̀ .

на трапе́зѣ , ᲂу҆чрежа́емсѧ варе́нїе с̾ ма́слᲂмъ . и҆ а҆́ще и҆крꙋ̀ и҆́мамы , да́стсѧ бра́тїѧмъ по́ три ѻ҆́ньгїи , и҆ вино̀ пїе́мъ .