НЕДѢ́ЛѦ ТРЕ́ТІѦ ПО ПА́СЦѢ

ст҃ы́хъ же́нъ мѷрѡно́сицъ , и҆ і҆ѡ́сифа пра́веднагѡ . =Въ сꙋбо́тꙋ ве́черъ , на ма́лѣй вече́рни . на гдⷭ҇и вᲂзва́хъ , стⷯры , вᲂскрⷭ҇ны , на д҃ . гла́съ , в҃ . запѣ́въ : ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Первᲂвѣ́чнᲂмꙋ ѿ ѻ҆ц҃а ро́ждьшꙋсѧ бж҃їю сло́вꙋ , вᲂпло́щшꙋсѧ ѿ дв҃ы мр҃і́и , прїиди́те пᲂклᲂни́мсѧ =[пᲂкло́н̾] , распѧ́тїе бо претерпѣ́въ , и҆ пᲂгребе́нїю предаде́сѧ , ꙗ҆́кѡ са́мъ вᲂсхᲂтѣ̀ , и҆ вᲂскр҃съ и҆з̾ ме́ртвыхъ , спасе́ мѧ блꙋдѧ́щаго челᲂвѣ́ка .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Первᲂвѣ́чнᲂмꙋ ѿ ѻ҆ц҃а ро́ждьшꙋсѧ бж҃їю сло́вꙋ , вᲂпло́щшꙋсѧ ѿ дв҃ы мр҃і́и , прїиди́те пᲂклᲂни́мсѧ [пᲂкло́н̾] , распѧ́тїе бо претерпѣ́въ , и҆ пᲂгребе́нїю предаде́сѧ , ꙗ҆́кѡ са́мъ вᲂсхᲂтѣ̀ , и҆ вᲂскр҃съ и҆з̾ ме́ртвыхъ , спасе́ мѧ блꙋдѧ́щаго челᲂвѣ́ка .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Хрⷭ҇то́съ сп҃съ на́шъ пригво́ждьсѧ на крⷭ҇тѣ̀ , є҆́же на ны̀ рꙋкᲂписа́нїе растерза̀ , и҆ сме́рти держа́вꙋ ᲂу҆праздни́лъ є҆́сть , пᲂклᲂнѧ́емсѧ тридне́внᲂмꙋ є҆гѡ̀ вᲂста́нїю [пᲂкло́н̾] .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Со а҆рха́нг҃лы вᲂспᲂе́мъ хрⷭ҇то́во вᲂскрⷭ҇нїе , то́й бо є҆́сть и҆зба́витель , и҆ сп҃съ дш҃а́мъ на́шимъ , в̾ сла́вѣ стра́шнѣй , и҆ крѣ́пцѣй си́лѣ , па́ки грѧде́тъ сꙋди́ти ми́рꙋ , є҆го́же сᲂзда̀ .

сла́ва , и҆ ны́нѣ , боⷢ҇ . Ѽ вели́каго тѝ та́инства , ви́дѧ чꙋде́съ прᲂпᲂвѣ́даю бжⷭ҇тво̀ . є҆мманꙋ́илъ ᲂу҆́бѡ , є҆стества̀ две́рь ѿве́рзе ꙗ҆́кѡ чл҃къ , дв҃ьства же затво́ръ , неразве́рзе ꙗ҆́кѡ бг҃ъ , но та́кѡ и҆з̾лᲂже́снъ про́йде , ꙗ҆́кᲂже слꙋ́хᲂмъ вни́де , та́кѡ рᲂди́сѧ , ꙗ҆́кᲂже зача́тсѧ . без̾стра́стно вни́де , и҆ неи҆зрече́нно и҆зы́де , по гл҃ющемꙋ прᲂро́кꙋ , та́ бо две́рь затвᲂре́на є҆́сть , ю҆́же никто́же и҆́мать прᲂитѝ , но то́кмѡ є҆ди́нъ гдⷭ҇ь бг҃ъ і҆и҃левъ , и҆мѣ́ѧи ве́лїю млⷭ҇ть .

На стихо́внѣ , стихѣ́ры . гла́съ , в҃ . Вᲂскрⷭ҇нїе твᲂѐ хрⷭ҇тѐ сп҃се , всю̀ прᲂсвѣтѝ вселе́ннꙋю , и҆ призва̀ свᲂѐ сᲂзда́нїе , всеси́льне гдⷭ҇и сла́ва тебѣ̀ .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Всѣ́мъ скᲂрбѧ́щимъ ра́дᲂсть , и҆ ѡ҆би́димымъ пред̾ста́тельница , и҆ а҆́лчꙋщимъ пита́тельница , стра́ннымъ ᲂу҆тѣше́нїе , и҆ ѡ҆бꙋрева́емымъ приста́нище . бᲂлѧ́щимъ пᲂсѣти́тельница , ѡ҆ѕло́бленымъ пᲂкро́въ и҆ застꙋпле́нїе , и҆ же́злъ слѣпы́мъ , мт҃и бг҃а вы́шнѧго ты̀ є҆сѝ пречⷭ҇таѧ , пᲂтщи́сѧ мо́лимсѧ , спасти́сѧ рабо́мъ тѝ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . И҆́но прибѣ́жище мы̀ чл҃цы , к̾ твᲂрцꙋ̀ и҆ влⷣцѣ нестѧжа́хᲂмъ , ра́звѣ тебѐ бг҃ᲂневѣ́сто . не ѿве́рзи на́съ ѿ твᲂегѡ̀ застꙋпле́нїѧ , нижѐ пᲂсрамѝ , любо́вїю прибѣга́ющихъ пред̾ста́тельствꙋ твᲂемꙋ̀ , мт҃и бг҃а вы́шнѧгѡ . сегѡ̀ ра́ди пᲂтщи́сѧ на́ пᲂмᲂщь , и҆ ѿ страсте́й на́съ спасѝ .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Стра́хъ мнᲂгᲂѡ҆бра́зныхъ и҆скꙋше́нїи , и҆ нꙋ́жныхъ бꙋ́ри , ны́нѣ мѧ̀ ѡ҆бꙋрѣва́ютъ . и҆ глꙋбина̀ пᲂтᲂплѧ́етъ мѧ ѿчаѧ́нїѧ . зима̀ прегрѣше́нїи мᲂи́хъ лю́тѣ мѧ смꙋща́етъ , предварѝ и҆ и҆зба́ви мѧ ѡ҆бꙋрева́емаго , є҆ди́на вѣ́рнымъ тишино̀ . и҆ к̾ приста́нищꙋ вы́шнѧгѡ бжⷭ҇твенаго зва́нїѧ вᲂзведѝ .

сла́ва , и҆ нн҃ѣ , боⷢ҇ . За всѣ́хъ мо́лишисѧ бл҃га́ѧ , прибѣга́ющихъ с̾ вѣ́рᲂю , в̾ держа́вныи тво́й пᲂкро́въ . и҆́но бо прибѣ́жище не и҆́мамы грѣ́шнїи к̾ бг҃ꙋ , в̾ бѣда́хъ и҆ ско́рбѣхъ при́снѡ и҆збавле́нїе , ѡ҆бремене́нїи грѣхѝ мно́гими . тѣ́мъ ти припа́даемъ мт҃и бг҃а вы́шнѧгѡ , и҆зба́ви ѿ всѧ́кагѡ ѡ҆б̾стᲂѧ́нїѧ рабы̀ свᲂѧ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : Бл҃гᲂѡбра́зныи і҆ѡ́сифъ , с̾ крⷭ҇та̀ с̾не́мъ пречи́стᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть .

та́же , є҆ктенїѧ̀ ма́лаѧ .= и҆ =ѿпꙋ́стъ .

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ , пᲂста́вимъ стихо́въ , і҃ . и҆ пᲂе́мъ , стихѣ́ры вᲂскрⷭ҇ны . гла́съ , в҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . Первᲂвѣ́чнᲂмꙋ ѿ ѻ҆ц҃а ро́ждьшꙋсѧ бж҃їю сло́вꙋ , вᲂпло́щшꙋсѧ ѿ дв҃ы мр҃і́и , прїиди́те пᲂклᲂни́мсѧ =[пᲂкло́н̾] , распѧ́тїе бо претерпѣ́въ , и҆ пᲂгребе́нїю предаде́сѧ , ꙗ҆́кѡ са́мъ вᲂсхᲂтѣ̀ , и҆ вᲂскр҃съ и҆з̾ ме́ртвыхъ , спасе́ мѧ блꙋдѧ́щаго челᲂвѣ́ка .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Хрⷭ҇то́съ сп҃съ на́шъ пригво́ждьсѧ на крⷭ҇тѣ̀ , є҆́же на ны̀ рꙋкᲂписа́нїе растерза̀ , и҆ сме́рти держа́вꙋ ᲂу҆праздни́лъ є҆́сть , пᲂкланѧ́емсѧ тридне́внᲂмꙋ є҆гѡ̀ вᲂста́нїю [пᲂкло́н̾] .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Со а҆рха́нг҃лы вᲂспᲂе́мъ хрⷭ҇то́во вᲂскрⷭ҇нїе , то́й бо є҆́сть и҆зба́витель , и҆ сп҃съ дш҃а́мъ на́шимъ . во сла́вѣ стра́шнѣй , и҆ крѣ́пцѣй си́лѣ , па́ки грѧде́тъ сꙋди́ти ми́рꙋ , є҆го́же сᲂзда̀ .

бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . Тебѐ распе́ньшагᲂсѧ , и҆ пᲂгребе́на бы́вша , а҆́нг҃лъ прᲂпᲂвѣ́да влⷣкꙋ , и҆ гл҃аше жена́мъ , прїиди́те и҆ ви́дите и҆дѣ́же лежа̀ гдⷭ҇ь , вᲂскр҃се бо ꙗ҆́кᲂже речѐ ꙗ҆́кѡ всеси́ленъ . тѣ́мжетисѧ пᲂклᲂнѧ́емъ , є҆ди́нᲂмꙋ без̾сме́ртнᲂмꙋ , живᲂда́вче хрⷭ҇тѐ пᲂми́лꙋй на́съ [пᲂкло́н̾] .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Крⷭ҇то́мъ свᲂи́мъ ᲂу҆праздни́лъ є҆сѝ , є҆́же ѿ́ древа клѧ́твꙋ . пᲂгребе́нїемъ же свᲂи́мъ ᲂу҆мертви́лъ є҆сѝ сме́рти держа́вꙋ . вᲂста́нїемъ же свᲂи́мъ прᲂсвѣти́лъ є҆сѝ рѡ́дъ чл҃ческїи . сегѡ̀ ра́ди вᲂпїе́мъ ти , бл҃гᲂда́телю хрⷭ҇тѐ бж҃е на́шъ сла́ва тебѣ̀ .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Ѿверзо́шатисѧ гдⷭ҇и стра́хᲂмъ врата̀ сме́ртнаѧ , вра́тницы же а҆́дᲂвы , ви́дѣвше тѧ̀ ᲂу҆жасо́шасѧ . врата́ бо мѣ́днаѧ сᲂтрѐ , и҆ вереѝ желѣ́зныѧ сᲂкрꙋшѝ , и҆ и҆зведе́ ны ѿ тмы̀ и҆ сѣ́ни сме́ртныѧ , и҆ ᲂу҆́зы на́ша растерза̀ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Спасе́нꙋю пѣ́снь пᲂю́ще , и҆з̾ ᲂу҆́стъ вᲂз̾сыла́емъ , прїидѣ́те всѝ в̾ до́мъ гдⷭ҇нь , припа́даемъ гл҃юще , и҆́же на́ древѣ распны́исѧ , и҆ и҆з̾ ме́ртвыхъ вᲂскр҃сы́и , сы́и в̾ нѣ́дрѣхъ ѻ҆́ч҃ихъ , ѡ҆чи́сти грѣхѝ на́ша .

и҆́ны стихѣ́ры , =мѷрѡно́сицамъ , самᲂгла́сны . запѣ́въ : гла́съ , то́йже . ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . П=ᲂчто̀ мѵ́ро со слеза́ми , ѽ ᲂу҆чени́цы и҆злива́ете ; ка́мень ѿвали́сѧ , и҆ гро́бъ и҆стᲂщи́сѧ ; ви́дите тлю̀ живᲂто́мъ пᲂпра́нꙋ , печа́ти свидѣ́тельствꙋюща ꙗ҆́вственѣ , спѧ́щїѧ лю́тѣ стра́жники непᲂкᲂри́выхъ , сме́ртнᲂе спасе́сѧ пло́тїю бж҃їею . а҆́дъ рыда́етъ , те́кше ра́дᲂсть рцы́те а҆пⷭ҇лѡмъ , ᲂу҆мертви́выи сме́рть хрⷭ҇то́съ , первᲂрᲂжде́нъ и҆з̾ ме́ртвыхъ , ва́съ варѧ́етъ в̾ галиле́и .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Мѷрѡно́сицы ра́но бы́вша , и҆ гро́бъ тво́й сᲂтща́нїемъ дᲂстиго́ша , и҆ и҆ска́хꙋ тебѐ хрⷭ҇тѐ , є҆́же пᲂма́зати пречи́стᲂе тѣ́ло твᲂѐ , и҆ а҆́нг҃лᲂвыми глаго́лы ѡ҆гласи́вшесѧ , радᲂстнᲂтво́рныѧ ѻ҆́бразы а҆пⷭ҇лѡмъ прᲂпᲂвѣ́дахꙋ , ꙗ҆́кѡ вᲂскр҃се нача́льникъ спасе́нїѧ на́шегѡ , плѣни́въ сме́рть , ми́рꙋ же да́рꙋѧ живо́тъ вѣ́чныи , и҆ ве́лїю млⷭ҇ть .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Мѷрѡно́сицы жены̀ ᲂу҆́трꙋ глꙋбᲂкꙋ̀ , ма́сти взе́мше , гдⷭ҇нь гро́бъ дᲂстиго́ша , и҆ ꙗ҆́же ᲂу҆́бѡ ненадѣ́ѧхꙋсѧ ѡ҆брѣ́тше , и҆ пᲂмышлѧ́хꙋ в̾ себѣ̀ , бᲂѧ́щесѧ ка́меннаго ѿвале́нїѧ , и҆ дрꙋга̀ к̾ дрꙋзѣ́й гл҃ахꙋ , гдѣ̀ сꙋ́ть печа́ти грᲂбны́ѧ ; гдѣ̀ є҆́сть пила́тᲂво во́инство , и҆ ѡ҆па́снᲂе ᲂу҆тверже́нїе ; бы́сть же вᲂз̾вѣсти́тель неразꙋмѣва́ющимъ жена́мъ , блиста́ѧисѧ а҆́нг҃лъ , и҆ глаго́лѧ к̾ ни́мъ , что̀ съ рыда́нїемъ и҆́щете жива́го , ѡ҆жи́вльшагѡ ро́дъ чл҃ческїи ; вᲂста́ бо хрⷭ҇то́съ бг҃ъ на́шъ и҆з̾ ме́ртвыхъ ꙗ҆́кѡ всеси́ленъ , пᲂдаѧ̀ всѣ́мъ нетлѣ́нїе и҆ жи́знь , и҆ прᲂсвѣще́нїе и҆ ве́лїю млⷭ҇ть .

сла́ва . гла́съ , ѕ҃ . Мѷрѡно́сицы жены̀ гро́ба твᲂегѡ̀ дᲂше́дше , и҆ печа́ти гро́бныѧ ви́дѣвше , не ѡ҆брѣто́ша же пречⷭ҇тагѡ тѣ́ла твᲂегѡ̀ , и҆ рыда́ющи сᲂтща́нїемъ прїидо́ша гл҃юще , кто̀ ᲂу҆кра́де на́ше ᲂу҆пᲂва́нїе ; кто̀ взѧ́тъ ме́ртва на́га сми́рнᲂю пᲂма́зана , мт҃рьне є҆ди́но ᲂу҆тѣше́нїе ; ѽ ка́кѡ и҆́же ме́ртвыѧ ѡ҆живлѧ́ѧи ᲂу҆мерщвлѧ́етсѧ , и҆ и҆́же а҆́да и҆спрᲂве́ргъ , ка́кѡ пᲂгреба́етсѧ ; но вᲂскрⷭ҇нѝ сп҃се самᲂвла́стнѡ , ꙗ҆́кᲂже ре́клъ є҆сѝ тридне́внѡ , спаса́ѧ дш҃а на́ша . и҆ ны́нѣ , боⷢ҇ . гла́съ , в҃ . Пре́йде сѣ́нь зако́ннаѧ , бл҃гᲂда́ти прише́дши , ꙗ҆́кᲂже бо кꙋпина̀ не с̾гара́ше , распала́ющисѧ . та́кѡ и҆ дв҃аѧ рᲂдила̀ є҆́сть , и҆ дв҃ᲂю пребы́сть . в̾мѣ́стѡ стᲂлпа̀ ѻ҆́гненнагѡ , пра́веднᲂе вᲂзсїѧ̀ сл҃нце . в̾мѣ́стѡ мѡѷсе́ѧ хрⷭ҇то́съ , во спасе́нїе дш҃а́мъ на́шимъ . та́же , вы́хᲂдъ : свѣ́тѣ ти́хїи . прᲂки́мен̾ , дню̀ .

На литі́и , стихѣ́ры , самᲂгла́сны . а҆́ще ли прилꙋчи́тсѧ небы́ти всено́щнᲂмꙋ .= пᲂю́тсѧ на гдⷭ҇и вᲂзва́хъ , стихѣ́ры вᲂскрⷭ҇ны , д҃ . и҆ мѷрѡно́сицамъ , на́ ѕ҃ . гла́съ , а҃ . Мѷрѡно́сицы жены̀ , ко́ грᲂбꙋ что̀ прїидо́сте ; что̀ и҆́щете жива́гѡ в̾ ме́ртвыхъ , вᲂскр҃се гдⷭ҇ь дерза́йте вᲂпїе́тъ а҆́нг҃лъ . Со́ страхᲂмъ прїидо́ша жены̀ на́ грᲂбъ , мастьмѝ пᲂма́зати тѣ́ло твᲂѐ тща́щесѧ , и҆ сѐ не ѡ҆брѣ́тше , недᲂꙋмѣ́ѧхꙋсѧ к̾ себѣ̀ , неразꙋмѣва́юще вᲂскрⷭ҇нїѧ . но пред̾ста́въ и҆́мъ а҆́нг҃лъ и҆ речѐ , вᲂскр҃се хрⷭ҇то́съ , да́рꙋѧ на́мъ ве́лїю ми́лᲂсть . Прїидо́ша на́ грᲂбъ магдалы́нѧ , и҆ дрꙋга́ѧ ма́рїѧ и҆́щꙋщѣ гдⷭ҇а , и҆ а҆́нг҃ла ѡ҆брѣто́ша ꙗ҆́кѡ мо́лнїю сѣдѧ́ща на ка́мени , и҆ гл҃юща к̾ни́мъ , что̀ и҆́щетѣ жива́го с̾ ме́ртвыми ; вᲂскр҃се ꙗ҆́кᲂже речѐ , в̾ галиле́и тᲂгѡ̀ ѡ҆брѧ́щете . к̾ немꙋ́ же вᲂзᲂпїе́мъ , вᲂскр҃съ и҆з̾ ме́ртвыхъ гдⷭ҇и сла́ва тебѣ̀ . =гла́съ , ѕ҃ . Ве́черъ в̾ сꙋбо́тꙋ ко́ грᲂбꙋ теко́стѣ мѷрѡно́сицы , и҆ мѵ́ро нᲂсѧ́ще к̾ себѣ̀ гл҃юще , вᲂскр҃се гдⷭ҇ь спаса́ѧ дш҃а на́ша . сла́ва . гла́съ , то́йже . И҆спрᲂсѝ і҆ѡ́сифъ тѣ́ло і҆с҃ᲂво , и҆ пᲂлᲂжѝ є҆̀ в̾ но́вѣмъ свᲂе́мъ гро́бѣ . пᲂдᲂба́ше бо є҆мꙋ̀ и҆́з̾ грᲂба , ꙗ҆́кѡ ѿ черто́га и҆зы́ти . сᲂкрꙋши́выи держа́вꙋ сме́рти , и҆ ѿве́рзыи две́ри раѧ̀ чл҃кѡмъ , гдⷭ҇и сла́ва тебѣ̀ . и҆ нн҃ѣ , боⷢ҇ . гла́съ , то́йже . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

На стихо́внѣ , стихѣ́ры , вᲂскрⷭ҇ны . гла́съ , в҃ . Вᲂскрⷭ҇нїе твᲂѐ хрⷭ҇тѐ сп҃се , всю̀ прᲂсвѣтѝ вселе́ннꙋю , и҆ призва̀ свᲂѐ сᲂзда́нїе , всеси́льне гдⷭ҇и сла́ва тебѣ̀ .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Дре́вᲂмъ сп҃се ᲂу҆праздни́лъ є҆сѝ , ю҆́же ѿ́ древа клѧ́твꙋ , держа́вꙋ сме́рти , пᲂгребе́нїемъ твᲂи́мъ ᲂу҆мертви́лъ є҆сѝ , прᲂсвѣти́лъ же є҆сѝ ро́дъ на́шъ вᲂста́нїемъ свᲂи́мъ . тѣ́мже вᲂпїе́мъ ти , жизнᲂда́вче хрⷭ҇тѐ бж҃е на́шъ сла́ва тебѣ̀ .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же непᲂд ви́житсѧ . На крⷭ҇тѣ̀ ꙗ҆ви́сѧ хрⷭ҇тѐ пригвᲂжда́емъ , и҆змѣни́лъ є҆сѝ дᲂбро́тꙋ зда́нїемъ . и҆ без̾ челᲂвѣ́чїе ᲂу҆́бѡ во́ини пᲂказꙋ́юще , кᲂпїе́мъ ре́бра твᲂѧ̀ прᲂбᲂдо́ша , є҆вре́и же печатлѣ́ти гро́ба твᲂегѡ̀ прᲂси́ша , твᲂеѧ̀ вла́сти невѣ́ дꙋще . но за бесчи́сленнᲂе милᲂсе́рдїе твᲂѐ , прїѧ́лъ є҆сѝ пᲂгребе́нїе , и҆ тридне́внѡ вᲂскр҃съ , гдⷭ҇и сла́ва тебѣ̀ .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Живᲂда́вче хрⷭ҇тѐ , во́льнꙋю стра́сть пᲂд̾ѧ́тъ ме́ртвыхъ ра́ди . во а҆́дъ же сᲂше́дъ ꙗ҆́кѡ си́ленъ , и҆́же та́мѡ прише́ствїѧ ча́ющихъ твᲂегѡ̀ , и҆схити́лъ є҆сѝ ꙗ҆́кѡ ѿ звѣ́рѧ держа́вна , в̾мѣ́сто а҆́да ра́й жи́ти дарᲂва́лъ є҆сѝ . тѣ́мже и҆ на́мъ сла́вѧщимъ тридне́внᲂе твᲂѐ вᲂста́нїе , да́рꙋй ѡ҆чище́нїе грѣхѡ́въ , и҆ ве́лїю ми́лᲂсть .

сла́ва , и҆ ны́нѣ . гла́съ , є҃ . Тебѐ ѡ҆дѣ́ющагᲂсѧ свѣ́тᲂмъ ꙗ҆́кѡ ри́зᲂю , сне́мъ і҆ѡ́сифъ со́ древа с̾ никᲂди́мᲂмъ , и҆ ви́дѣвъ ме́ртва на́га непᲂгребе́на , жа́лᲂстнѡ рыда́нїе вᲂспрїи́мъ , и҆ пла́ча гл҃аше , ᲂу҆вы̀ мнѣ̀ сла́дкїи і҆с҃е , є҆го́же пре́жде в̾ ма́лѣ сл҃нце на крⷭ҇тѣ̀ пᲂвѣ́шена ви́дѣ , во тмꙋ̀ прелага́шесѧ , и҆ землѧ̀ стра́хᲂмъ кᲂлѣба́шесѧ , и҆ раздира́шесѧ цр҃ко́внаѧ за́вѣса . но сѐ нн҃ѣ ви́жꙋ тѧ , менѐ ра́ди во́лею пᲂдъе́мша сме́рть , ка́кѡ пᲂгребꙋ́ тѧ бж҃е мо́й , и҆лѝ како́ю плащани́цею ѡ҆б̾вїю́ тѧ ; ко́имаже ли рꙋка́ма прикᲂснꙋ́сѧ , пречⷭ҇тᲂмꙋ тѣ́лꙋ твᲂемꙋ̀ ; и҆лѝ ко́е пѣ́нїе вᲂспᲂю̀ , твᲂемꙋ̀ и҆схо́дꙋ ще́дре ; велича́ю стрⷭ҇ти твᲂѧ̀ , пѣснᲂсло́вѧ и҆ пᲂгребе́нїе твᲂѐ со вᲂскрⷭ҇нїемъ . вᲂпїю̀ , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : бцⷣе дв҃о ра́дꙋисѧ , гⷤ . и҆ про́чее .

Въ недѣ́лю , г҃ ю , по па́сцѣ , ст҃ы́хъ же́нъ мѷрѡно́сицъ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Є҆гда̀ сни́де к̾ сме́рти живᲂтѐ без̾сме́р тныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизно да́вче хрⷭ҇тѐ бж҃е сла́ва тебѣ̀ , два́жды .

сла́ва . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречи́стᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть .

и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Ка́мень гро́бныи запечатлѣ́ти невᲂзбрани́лъ є҆сѝ , ка́мень вѣ́рѣ вᲂскр҃съ , по́далъ є҆сѝ всѣ́мъ живо́тъ , гдⷭ҇и сла́ва тебѣ̀ .= сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ па́ки , то́йже , сѣда́ленъ . =сла́ва , и҆ ны́нѣ , боⷢ҇ . Всѧ̀ па́че смы́сла , всѧ̀ пресла́внаѧ твᲂѧ̀ бцⷣе та́инства , чистᲂто́ю запечатлѣ́нна , и҆ дв҃ствᲂмъ храни́ма , мт҃и разꙋмѣ́сѧ нело́жна , бг҃а ро́ждьши и҆́стиннаго , тᲂгѡ̀ мᲂлѝ спасти́сѧ дш҃а́мъ на́шимъ .

По в҃ , стихᲂло́гїи , сѣда́ленъ . гла́съ , в҃ . Оу҆ч҃нкъ твᲂи́хъ ли́къ , съ мѷрѡно́сицами жена́ми , ра́дꙋютсѧ сᲂгла́снѡ , ѻ҆́бщїи бо пра́здникъ себѣ̀ сᲂста́виша , в̾ сла́вꙋ и҆ че́сть твᲂегѡ̀ вᲂскрⷭ҇нїѧ . и҆ тѣ́хъ ра́ди мо́лимъ тѧ чл҃кᲂлю́бче гдⷭ҇и , лю́демъ твᲂи́мъ пᲂда́ждь ве́лїю млⷭ҇ть . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Тебѐ велича́емъ бцⷣе вᲂпїю́ще , ра́дꙋисѧ незахᲂди́магѡ свѣ́та ѻ҆́блаче , тᲂгѡ̀ нᲂси́вши в̾ не́дрѣхъ , сла́вѣ гдⷭ҇а .

По непᲂро́чнахъ , трᲂпарѝ , а҆́нг҃льскїи сᲂбо́ръ . и҆пако́й . По́ страсти ше́дше на́ грᲂбъ жены̀ , пᲂма́зати тѣ́ло твᲂѐ хрⷭ҇тѐ бж҃е , ви́дѣша а҆́нг҃лы во́ грᲂбѣ и҆ ᲂу҆жасо́шасѧ , гла́съ бо слы́шахꙋ ѿ ни́хъ , ꙗ҆́кѡ вᲂскр҃се гдⷭ҇ь , пᲂдаѧ̀ ми́рᲂви ве́лїю ми́лᲂсть .

степе́нны . гла́съ , в҃ . а҆нтифѡ́нъ , а҃ . пᲂе́мъ по два́жды . На́ нб҃о ѻ҆́чи пꙋща́ю мᲂегѡ̀ срⷣца , к̾ тебѣ̀ сп҃се , спаси́ мѧ твᲂи́мъ ѡ҆сїѧ́нїемъ . Пᲂми́лꙋй на́съ , сᲂгрѣ́шшихъ ти мно́го на всѧ́кїи ча́съ , ѽ хрⷭ҇тѐ мо́й , и҆ да́ждь ми ѻ҆́бразъ пре́жде кᲂнца̀ , пᲂка́ѧтисѧ к̾ тебѣ̀ . Ст҃о́мꙋ дх҃ꙋ , є҆́же црⷭ҇твᲂвати пᲂдᲂба́етъ , ѡ҆сщ҃а́ти и҆ пᲂдвиза́ти тва́рь , бг҃ъ бо є҆́сть є҆динᲂсꙋ́щенъ , ѻ҆ц҃ꙋ и҆ сло́вꙋ . а҆нтифо́нъ , в҃ . А҆́ще не гдⷭ҇ь бы́лъ бы в̾ на́съ , и҆ кто̀ дᲂво́ленъ цѣ́лъ сᲂхране́нъ бы́ти ѿ врага̀ , кꙋ́пно и҆ чл҃кᲂꙋбі́йца . Зꙋбо́мъ и҆́хъ непреда́ждь сп҃се свᲂегѡ̀ раба̀ , и҆́бо льво́вымъ ѻ҆́бразᲂмъ на мѧ̀ пᲂдвиза́ютсѧ вразѝ мᲂѝ . Ст҃о́мꙋ дх҃ꙋ живᲂнача́лїе и҆ че́сть , всѧ́ бо сᲂзда́ннаѧ ꙗ҆́кѡ бо сы́и , си́лᲂю сᲂблюда́етъ ѡ҆ ѻ҆ц҃ѣ съ сн҃ᲂмъ же . а҆нтифо́нъ , г҃ . Надѣ́ющїисѧ на гдⷭ҇а , ᲂу҆пᲂдо́бишасѧ гᲂрѣ̀ ст҃ѣ́й , и҆́же ника́кᲂже пᲂдви́жатсѧ напа́стьми вра́жїими . Въ без̾зако́нїи рꙋ́къ свᲂи́хъ , да непрᲂстрꙋ́тъ бжⷭ҇твенѣ живꙋ́щїи , неда́стъ бо хрⷭ҇то́съ , жезла̀ на жре́бїй сво́й . Ст҃ы́мъ дх҃ᲂмъ , то́читсѧ всѧ́ка премꙋ́дрᲂсть , ѿ сю́дꙋ бл҃гᲂда́ть а҆пⷭ҇лѡмъ , и҆ страда́нїемъ вѣнча́ютсѧ мч҃нцы , и҆ прᲂро́цы зрѧ́тъ .

прᲂки́менъ , ѱл҃о́мъ дв҃дᲂвъ . вᲂста́ни гдⷭ҇и бж҃е мо́й пᲂвелѣ́нїемъ и҆́м̾же запᲂвѣ́да , и҆ со́нмъ люде́й ѡ҆бы́детъ тѧ . сти́хъ : гдⷭ҇и бж҃е мо́й натѧ̀ ᲂу҆пᲂва́хъ спаси́ мѧ . всѧ́ко дыха́нїе .= є҆ѵⷢ҇а́лїе , ѿ ма́рка . зача́ло , ᲂ҃а . =та́же , Вᲂскрⷭ҇нїе хрⷭ҇то́во , гⷤ . ѱало́мъ , н҃ . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю ми́лᲂсть . і҆єре́й , гл҃етъ : спасѝ бж҃е лю́ди . пᲂе́м̾ : гдⷭ҇и пᲂми́лꙋй , ві҃ . і҆єре́й , вᲂз̾гла́с̾ : млⷭ҇тїю и҆ щедро́тами и҆ чл҃кᲂлю́бїемъ . кано́нъ , па́сцѣ , съ бг҃ᲂро́дичны , на́ ѕ҃ . є҆го́же пᲂе́мъ , да́же до вᲂзнесе́нїѧ хрⷭ҇то́ва , во всѧ́кꙋю нлⷣю .= мѷрѡно́сицамъ же на́ и҃ . п=ᲂслѣди́ же , катава́сїѧ , і҆рмо́съ , настᲂѧ́щагѡ кано́на .

Кано́нъ , па́сцѣ , гла́съ , а҃ . пѣ́снь , а҃ . і҆рмо́съ . Вᲂскрⷭ҇нїѧ де́нь прᲂсвѣти́мсѧ лю́дїе , па́сха гдⷭ҇нѧ па́сха , ѿ сме́рти ᲂу҆́бѡ к̾ жи́зни , и҆ ѿ землѝ на́ нб҃о , хрⷭ҇то́съ бг҃ъ на́съ преве́лъ є҆́сть , пᲂбѣ́днꙋю пᲂю́ща . запѣ́в̾ : Хрⷭ҇то́съ вᲂскр҃се и҆з̾ ме́ртвыхъ . Ѡ҆чи́стимъ чꙋ́вствїѧ и҆ ᲂу҆́зримъ , непристꙋ́пнымъ свѣ́тᲂмъ , вᲂскрⷭ҇нїѧ хрⷭ҇то́ва , блиста́ющесѧ и҆ ра́дꙋйтесѧ рекꙋ́ща , ꙗ҆́снѡ да ᲂу҆слы́шимъ , пᲂбѣ́днꙋю пᲂю́ще . Небеса̀ ᲂу҆́бѡ дᲂсто́йнѡ да веселѧ́тсѧ , землѧ́ же да ра́дꙋетсѧ , да пра́зднꙋетъ же ми́ръ , ви́димыи же ве́сь и҆ неви́димыи , хрⷭ҇то́съ бо вᲂста́лъ є҆́сть , весе́лїе вѣ́чнᲂе .

И҆́ны , трᲂпарѝ , бг҃ᲂро́дичны , пᲂдо́бны . твᲂре́нїе ѳеѡ́фана . запѣ́в̾ : Прест҃а́ѧ гжⷭ҇е бцⷣе спасѝ на́съ .= Сме́ртныѧ вереѝ слᲂми́вшагѡ , бжⷭ҇твенꙋю жи́знь , неи҆зрече́ннѡ ро́ждьши хрⷭ҇та̀ , и҆́же и҆́з̾ грᲂба вᲂзсїѧ́вшагѡ дне́сь , дв҃о всенепᲂро́чнаѧ , и҆ ми́ра прᲂсвѣ́щшагѡ . =боⷢ҇ . Вᲂста́вша ви́дѣвши сн҃а свᲂегѡ̀ и҆ бг҃а , ра́дꙋисѧ со а҆пⷭ҇лы , бг҃ᲂра́дᲂваннаѧ чи́стаѧ , и҆ и҆́же ра́дᲂсти прᲂвᲂзвѣ́стница , ꙗ҆́кѡ всѣ́мъ ра́дᲂванїю вино́внагѡ прїѧ́тъ , бцⷣе всепѣ́таѧ .

Кано́нъ , ст҃ы́мъ жена́мъ мѷрѡно́сицамъ . твᲂре́нїе , і҆ѡ́сифᲂво . гла́съ , в҃ . пѣ́снь , а҃ . і҆рмо́съ . Мᲂѷсе́йскꙋю пѣ́снь вᲂспрїи́мши .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Распѧ́лсѧ є҆сѝ пло́тїю , без̾стра́стныи бжⷭ҇тво́мъ , и҆ прᲂбᲂде́нъ бы́лъ є҆сѝ въ ре́бра , и҆сто́чивыи ми́рꙋ кро́вь и҆ во́дꙋ . ты̀ є҆сѝ бг҃ъ на́шъ , и҆ прᲂславлѧ́емъ тѧ . Крⷭ҇тъ тво́й пᲂчита́емъ , и҆ пᲂгребе́нїе сла́вимъ бл҃же , хва́лимъ и҆ пᲂе́мъ и҆ пᲂклᲂнѧ́емсѧ вᲂста́нїю твᲂемꙋ̀ [пᲂкло́н̾] . и҆ взыва́емъ , ты̀ є҆сѝ бг҃ъ на́шъ , и҆ прᲂславлѧ́емъ тѧ . А҆́ще и҆ вкꙋси́лъ є҆сѝ же́лчи хрⷭ҇тѐ , сла́дᲂсте цр҃ко́внаѧ , но и҆стᲂчи́лъ є҆сѝ на́мъ нетлѣ́нїе ѿ ре́бръ твᲂи́хъ . ты̀ є҆сѝ бг҃ъ на́шъ , и҆ сла́вимъ тѧ . Вмѣни́лсѧ є҆сѝ сп҃се с̾ ме́ртвыми , и҆ ме́ртвыхъ вᲂз̾дви́глъ є҆сѝ , и҆ вкꙋси́въ тлѝ , и҆стлѣ́нїѧ же всѧ́ко неви́дѣлъ є҆сѝ . ты̀ є҆сѝ бг҃ъ на́шъ , и҆ сла́вимъ тѧ . Да весели́тсѧ сїѡ́нъ , да ра́дꙋетсѧ і҆єрᲂсали́мъ , вᲂскр҃се бо хрⷭ҇то́съ , мертвецы̀ вᲂз̾дви́гъ пѣснᲂсло́вѧщїѧ . ты̀ є҆сѝ бг҃ъ на́шъ , и҆ сла́вимъ тѧ . Плащани́цами и҆ со бл҃гᲂꙋха́ньми ѡ҆бви́въ і҆ѡ́сифъ тѣ́ло твᲂѐ сп҃се , и҆ во́ грᲂбѣ но́вѣ пᲂлᲂжи́ тѧ , спасе́нїе ме́ртвыхъ , и҆ ꙗ҆́кѡ бг҃ъ вᲂскре́слъ є҆сѝ . Предвари́ша ᲂу҆́тро жены̀ , ви́дѣша тѧ̀ хрⷭ҇тѐ , и҆ бжⷭ҇твенымъ ᲂу҆чн҃ко́мъ вᲂпїѧ́хꙋ , вᲂи́стинꙋ хрⷭ҇то́съ вᲂскр҃се , прїиди́те с̾на́ми , и҆ вᲂспо́йте є҆гѡ̀ . сла́ва . Всест҃а́ѧ трⷪ҇це , є҆ди́но бжⷭ҇тво̀ , и҆ без̾нача́льнᲂе є҆ди́нство , ѻ҆́ч҃е и҆ сн҃е , и҆ бжⷭ҇твеныи д́ш҃е , спасѝ ве́сь ми́ръ , ты́ бо є҆сѝ бг҃ъ на́шъ , и҆ прᲂславлѧ́емъ тѧ̀ . и҆ нн҃ѣ , боⷢ҇ . Ты̀ пе́рвꙋю клѧ́твꙋ разрѣши́вши чи́стаѧ , во ᲂу҆тро́бѣ твᲂе́й вᲂз̾расти́ла є҆сѝ на́мъ блгⷭ҇ве́нїе , младе́нца ро́ждьши . се́й бо бг҃ъ на́шъ , а҆́ще и҆ пло́ть но́ситъ .

катава́сїѧ : Мᲂѷсе́йскꙋю пѣ́снь вᲂспрїи́мши , вᲂзᲂпі́й дш҃е , пᲂмо́щникъ и҆҆ пᲂкрᲂви́тель , бы́сть мнѣ̀ во спасе́нїе , се́й ми є҆́сть бг҃ъ мо́й , и҆҆ прᲂсла́влю є҆гѡ̀ .

пѣ́снь , г҃ . і҆рмоⷭ҇ . Прїиди́те пи́во пїе́мъ но́во , не ѿ ка́мене непло́дна чꙋдᲂдѣ́емᲂе , но нетлѣ́нїѧ и҆сто́чника , и҆́з̾ грᲂба ѡ҆дᲂжди́вша хрⷭ҇та̀ , ѡ҆ не́мже ᲂу҆твержа́емсѧ . Нн҃ѣ всѧ̀ и҆спо́лнишасѧ свѣ́та , нб҃о же и҆ землѧ̀ и҆ преиспо́днѧѧ , да пра́зднꙋетъ ᲂу҆́бѡ всѧ̀ тва́рь вᲂста́нїе хрⷭ҇то́во , ѡ҆ не́мже ᲂу҆твержа́етсѧ . Вчера̀ сраспина́хтисѧ хрⷭ҇тѐ , вчера̀ спᲂгребо́хтисѧ , и҆ сᲂвᲂста́ю дне́сь сᲂвᲂскре́сшꙋ ти , са́мъ мѧ прᲂсла́ви сп҃се , во ца́рствїи свᲂе́мъ .

боⷢ҇ . Въ нетлѣ́ннꙋю жи́знь прихᲂждꙋ̀ дне́сь , бл҃гᲂсти ра́ди , ро́ждьшагᲂсѧ и҆з̾ тебѐ чⷭ҇таѧ , и҆ всѣ́мъ кᲂнце́мъ , свѣ́тъ ѡ҆блиста́вшагѡ . боⷢ҇ . Хрⷭ҇та̀ є҆го́же рᲂдила̀ є҆сѝ пло́тїю , и҆з̾ ме́ртвыхъ ꙗ҆́кᲂже речѐ , вᲂста́вша ви́дѣвши чⷭ҇таѧ ликꙋ́й , и҆ сегѡ̀ ꙗ҆́кѡ бг҃а пречⷭ҇таѧ вᲂзвелича́й .

и҆́нъ , і҆рмо́съ . Непло́днагѡ ми ᲂу҆ма̀ .

ꙋде́йстїи лю́дїе пила́тꙋ вᲂпїе́тъ , ѿпꙋстѝ на́мъ ѕлᲂдѣ́йственаго разбо́йника , вᲂзмѝ вᲂзмѝ , распнѝ без̾грѣ́шнаго . Распе́ншꙋтисѧ хрⷭ҇тѐ , пᲂмрачи́сѧ свѣ́тъ , землѧ̀ пᲂтрѧсе́сѧ , и҆ и҆з̾ гро́бъ ме́ртвїи вᲂста́ша мно́зи , стра́хᲂмъ держа́вы твᲂеѧ̀ . Пред̾стᲂѧ́щи ᲂу҆крⷭ҇та̀ а҆́гница твᲂѧ̀ і҆с҃е , и҆ съ пла́чемъ вᲂпїѧ́ше , ка́мѡ и҆́деши сн҃е , ка́мѡ грѧде́ши а҆́гньче , и҆́же за всѣ́хъ закла́выисѧ . Вᲂскрⷭ҇лъ є҆сѝ і҆с҃е , плѣне́нъ бы́сть вра́гъ , а҆да́мъ и҆зба́висѧ и҆ є҆́вва с̾ ни́мъ ѿ ᲂу҆́зъ и҆ тлѝ , вᲂскрⷭ҇нїемъ твᲂи́мъ . Пᲂклᲂнѧ́юсѧ твᲂемꙋ̀ крⷭ҇тꙋ̀ [пᲂкло́н̾] , вᲂспѣва́ю и҆ пᲂгребе́нїе , пᲂчита́ю стрⷭ҇ти , и҆ гво́здїѧ рꙋ́кꙋ и҆ но́гꙋ , и҆ кᲂпїѐ і҆с҃е , и҆ вᲂскрⷭ҇нїе твᲂѐ . Да ра́дꙋетсѧ съ на́ми ᲂу҆чени́къ двᲂенадесѧ́тица , съ мѷрѡно́сицами жена́ми , и҆ і҆ѡ́сифᲂмъ , и҆ со дрꙋги́ми ᲂу҆ченикѝ , и҆ ᲂу҆чени́цами хрⷭ҇то́вѣми . Дла́ни на крⷭ҇тѣ̀ прᲂсте́рлъ є҆сѝ і҆с҃е , ꙗ҆зы́ки всѧ̀ ᲂу҆да́леныѧ ѿ тебѐ призыва́ѧ , и҆ ѡ҆зарѧ́ѧ пред̾ста́ти держа́вѣ твᲂе́й . Вᲂскре́сшꙋ ти хрⷭ҇тѐ , сᲂкрꙋши́шасѧ вереѝ и҆ врата̀ а҆́дᲂва , и҆ сме́ртныѧ ᲂу҆́зы разрꙋши́шасѧ а҆́бїе , стра́хᲂмъ держа́вы твᲂеѧ̀ . Бг҃ᲂпрїи́мниче і҆ѡ́сифе , грѧдѝ и҆ ста́ни с̾ на́ми , вᲂскр҃се зᲂвы́и і҆с҃ъ хрⷭ҇то́съ и҆зба́витель , вᲂз̾дви́гнꙋвыи а҆да́ма , вᲂскрⷭ҇нїемъ свᲂи́мъ . сла́ва . Со ѻ҆ц҃е́мъ сн҃ꙋ и҆ д́х҃ꙋ пра́вᲂмꙋ , є҆ди́нᲂмꙋ є҆стествꙋ̀ пᲂкланѧ́юсѧ и҆ вᲂспѣва́ю [пᲂкло́н̾] , ли́цы раздѣлѧ́емꙋ , и҆ сꙋщество́мъ же сᲂвᲂкꙋпле́нꙋ . и҆ ны́нѣ , боⷢ҇ . Бл҃же́на є҆сѝ чⷭ҇таѧ дв҃о , ꙗ҆́же и҆́с̾кᲂрене і҆єссе́ева , и҆с̾тебе́ бо же́злъ бо и҆ цвѣ́тъ хрⷭ҇то́съ , по́ плᲂти на́съ ра́ди вᲂзрастѐ .

катава́сїѧ : Непло́днагѡ ми ᲂу҆ма̀ , плᲂдᲂно́сна бж҃е , ꙗ҆́вствꙋй дѣ́лателю дш҃а́мъ , и҆҆ насади́телю бл҃ги́хъ , милᲂсе́рдїемъ сѝ .

кᲂнда́къ , па́сцѣ . гла́съ , и҃ . А҆́ще и҆ во́ грᲂбъ сни́де без̾сме́ртне , но а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе . и҆́кᲂсъ . И҆́же пре́жде сл҃нца сл҃нцꙋ заше́дшꙋ и҆нᲂгда̀ во́ грᲂбъ , предвари́ша ко ᲂу҆́трꙋ взыска́юще , ꙗ҆́кѡ во́ дне мѷрѡно́сицы дв҃ы . и҆ дрꙋга̀ къ дрꙋзѣ́й вᲂпїѧ́хꙋ , ѽ дрꙋги́нѧ , прїиди́те вᲂнѧ́ми пᲂма́жемъ тѣ́ло живᲂно́снᲂе и҆ пᲂгребе́нᲂе , пло́ть вᲂскреси́вша па́дшагѡ а҆да́ма , лежа́ща во́ грᲂбѣ , и҆́демъ и҆ пᲂтщи́мсѧ ꙗ҆́кᲂже вᲂлсвѝ , и҆ пᲂклᲂни́мсѧ , и҆ принесе́мъ мѵ́рѡ , ꙗ҆́кѡ да́ры . не в̾ пелены̀ , но в̾ плащани́цꙋ ѡ҆бви́тᲂмꙋ , и҆ съ пла́чемъ вᲂзᲂпїе́мъ , Ѽ влⷣко вᲂста́ни , и҆́же па́дшимъ пᲂдаѧ̀ вᲂскрⷭ҇нїе .

та́же , сѣда́ленъ . гла́съ , в҃ . Ми́ра те́плѣ ко́ грᲂбꙋ прине́сше жены̀ сп҃се , и҆ а҆́нг҃ла свѣ́тлᲂсть ви́дѣвше , дш҃е́ю ра́дᲂвахꙋсѧ , и҆ бг҃а тѧ всѣ́мъ прᲂпᲂвѣ́дахꙋ , и҆ ᲂу҆ченико́мъ вᲂпїѧ́хꙋ всѣ́мъ , вᲂскр҃се и҆́з̾ грᲂба всѣ́хъ жи́знь . сла́ва , и҆ нн҃ѣ . боⷢ҇ . Всю̀ разᲂри́въ сме́ртнꙋю держа́вꙋ сн҃ъ тво́й дв҃о , во свᲂе́мъ вᲂскрⷭ҇нїи , и҆ ꙗ҆́кѡ бг҃ъ всеси́ленъ сᲂвᲂзнесѐ на́съ и҆ ѡ҆бᲂжѝ . тѣ́мже и҆ вᲂспѣва́емъ є҆гѡ̀ , сла́вѧще тѧ пречи́стꙋю бцⷣꙋ мр҃і́ю .

пѣ́снь , д҃ . і҆рмо́съ . На бж҃їи стра́жи , бг҃ᲂгл҃ивыи а҆вва́кꙋмъ да ста́нетъ съ на́ми , и҆ ꙗ҆ви́тъ свѣтᲂно́сна а҆́нг҃ла , велегла́снѡ гл҃юща , дне́сь спасе́нїе ми́рꙋ , ꙗ҆́кѡ вᲂскр҃се хрⷭ҇то́съ , ꙗ҆́кѡ всеси́ленъ . Мꙋ́жескїи ᲂу҆́бѡ по́лъ , ꙗ҆́кѡ разве́рзе дв҃ственꙋю ᲂу҆тро́бꙋ , бы́сть хрⷭ҇то́съ , ꙗ҆́кѡ чл҃къ же , а҆́гнецъ нарече́сѧ . непᲂро́ченъ же ꙗ҆́кѡ невкꙋсѝ скве́рны , на́ша ᲂу҆́бѡ па́сха , ꙗ҆́кѡ бг҃ъ и҆́стиненъ и҆ сᲂверше́нъ ꙗ҆ви́сѧ . Ꙗ҆́кѡ є҆динᲂлѣ́тенъ а҆́гнецъ , бл҃гᲂслᲂве́ныи на́мъ вѣне́цъ хрⷭ҇то́съ , во́лею за всѣ́хъ закла́нъ бы́сть . па́сха ѡ҆чи́стилище , и҆ а҆́бїе и҆́з̾ грᲂба краснѡ̀ , пра́веднᲂе на́мъ вᲂсїѧ̀ сл҃нце . Бг҃ᲂѻ҆ц҃ъ ᲂу҆́бѡ дв҃дъ , пред̾ сѣ́ннымъ кᲂвче́гᲂмъ скака́ше и҆гра́ѧ . лю́дїе же бж҃їи ст҃і́и , ѻ҆́бразᲂмъ сбытїѐ зрѧ́ще , весели́мсѧ бжⷭ҇твенѣ , ꙗ҆́кѡ вᲂскр҃се хрⷭ҇то́съ , ꙗ҆́кѡ всеси́ленъ .

боⷢ҇ . И҆́же сᲂзда́выи а҆да́ма твᲂегѡ̀ пра́ѻ҆ц҃а чи́стаѧ , зи́ждетсѧ ѡ҆ тебѐ , и҆ сме́ртнᲂе жили́ще разᲂри́въ , и҆́же ѻ҆́нᲂгѡ ра́ди сме́рти , ве́сь ѡ҆зари́въ ми́ръ бжⷭ҇твеными блиста́ньми , ꙗ҆́кѡ всеси́ленъ . боⷢ҇ . Є҆го́же рᲂдила̀ є҆сѝ , хрⷭ҇та̀ краснѣ́йша , и҆з̾ ме́ртвыхъ вᲂсїѧ́вша чи́стаѧ зрѧ́щи , до́браѧ и҆ непᲂро́чнаѧ въ жена́хъ и҆ нетлѣ́ннаѧ , дне́сь спасе́нїе всѣ́хъ , со а҆пⷭ҇лы є҆гѡ̀ ра́дꙋющисѧ прᲂсла́ви .

и҆́нъ , і҆рмо́съ . Є҆́же ѿ дв҃ы твᲂѐ ржⷭ҇тво̀ . Крⷭ҇то́мъ свᲂи́мъ плѣни́лъ є҆сѝ а҆́дᲂвꙋ крѣ́пᲂсть хрⷭ҇тѐ , и҆ со вᲂз̾ста́вилъ є҆сѝ ме́ртвыѧ , и҆ сме́ртнᲂе ᲂу҆праздни́лъ є҆сѝ мꙋчи́тельство . тѣ́мже и҆́же ѿ а҆да́ма сꙋ́щїи , пᲂкланѧ́ющесѧ пᲂе́мъ пᲂгребе́нїе твᲂѐ и҆ вᲂста́нїе сп҃се . А҆́дъ срѣ́тъ тѧ хрⷭ҇тѐ въ преи҆спо́днихъ , ѡ҆гᲂрчи́сѧ , пᲂмышлѧ́ѧ , ꙗ҆́кѡ и҆́хже дре́вле пᲂжре́ти вᲂзмо́гъ , ны́нѣ нево́лею ѿ́далъ є҆́сть . и҆стѧза́емь бо съ до́льними , и҆ ѡ҆бнажа́етсѧ и҆́же плѣнѧ́ѧ ме́ртвыѧ . Бл҃гᲂи҆зво́ливыи сп҃се на́шъ за милᲂсе́рдїе ми́лᲂсти твᲂеѧ̀ пригвᲂзди́тисѧ на крⷭ҇тѣ̀ , и҆ ѿ пра́ѻ҆ч҃и и҆зба́вити на́съ клѧ́твы , разрѣши́ ми ᲂу҆́зы мно́гихъ сᲂгрѣше́нїи , мо́жеши бо є҆ли́ка хо́щеши и҆ твᲂри́ши . И҆́же на крⷭ҇тѣ̀ пригвᲂзди́выи мᲂю̀ дре́внюю клѧ́твꙋ , и҆ и҆стᲂчи́лъ ми є҆сѝ сп҃се бл҃гᲂслᲂве́нїе , кро́вїю и҆́же и҆з̾ ре́бръ твᲂи́хъ , разрѣши́ ми ᲂу҆́зы мно́гихъ сᲂгрѣше́нїи , мо́жеши бо є҆ли́ка хо́щеши , и҆ твᲂри́ши . Вᲂскр҃сы́и и҆́з̾ грᲂба , и҆ плѣни́выи а҆́да , ѡ҆живи́выи ме́ртвыѧ , и҆ нетлѣ́нїе и҆стᲂчи́выи ми , твᲂи́мъ вᲂста́нїемъ , разрѣши́ ми ᲂу҆́зы мно́гихъ сᲂгрѣше́нїи , мо́жеши бо є҆ли́ка хо́щеши , и҆ твᲂри́ши . Мѷрѡно́сицамъ , ра́дᲂватисѧ вᲂскр҃съ и҆́з̾ грᲂба вᲂз̾гласи́въ бл҃же , и҆ пᲂсла́лъ є҆сѝ и҆́хъ прᲂпᲂвѣ́дати тѧ , и҆ а҆пⷭ҇лᲂмъ твᲂи́мъ ре́клъ є҆сѝ , прᲂпᲂвѣ́дайте вᲂста́нїе мᲂѐ , раз̾рѣшѝ и҆ мᲂи́хъ ᲂу҆́зъ мно́гаѧ сᲂгрѣше́нїѧ , мо́жеши бо є҆ли́ка хо́щеши , и҆ твᲂри́ши . А҆́ще и҆ ка́мень запечатлѣ́сте съ кꙋстᲂді́ею , ѽ без̾зако́ннїи вразѝ , но вᲂскр҃се гдⷭ҇ь , ꙗ҆́кᲂже прᲂречѐ , разрѣша́ѧ ми ᲂу҆́зы мно́гихъ сᲂгрѣше́нїи , мо́жетъ бо є҆ли́ка хо́щетъ , и҆ твᲂри́тъ . Вᲂи́стинꙋ пᲂстыди́тесѧ без̾зако́ннїи , хрⷭ҇то́съ бо вᲂскр҃се , и҆ сᲂвᲂз̾ста́ви ме́ртвыѧ , вᲂпїѧ̀ дерза́йте , а҆́зъ пᲂбѣди́хъ ми́ра . вѣ́рꙋйте ᲂу҆́бѡ є҆мꙋ̀ , и҆лѝ ᲂу҆мᲂлчи́те лестьцы̀ ѿмета́ющїисѧ вᲂскрⷭ҇нїѧ є҆гѡ̀ .

ѡ́сифа бл҃гᲂѡбра́знагѡ сᲂвѣ́тника , бл҃гᲂче́стїѧ ревни́телѧ и҆ ᲂу҆ченика̀ , съ мѷрѡно́сицами пᲂчте́мъ и҆ со а҆пⷭ҇лы , ра́дꙋющесѧ , и҆ вѣ́рнѡ да вᲂспѣва́емъ сп҃сᲂво вᲂскрⷭ҇нїе свѣ́тлѡ . сла́ва . Пресꙋ́щнаго бжⷭ҇тва̀ , нераздѣли́мᲂе є҆стество̀ , кто̀ вᲂзмо́жетъ и҆зрещѝ , є҆ди́на бо є҆стество́мъ сꙋ́щи трⷪ҇ца пᲂе́тсѧ , без̾нача́льна и҆с̾ра́вна . ꙗ҆кѡ є҆ди́ница въ трⷪ҇цѣ разꙋмѣва́ема , и҆ хвали́ма , сᲂста́вы прᲂста̀ .= и҆ ны́нѣ , боⷢ҇ . В=ели́чїѧ твᲂѧ̀ чи́стаѧ , кто̀ вᲂз̾мо́жетъ пѣ́ти ; кто̀ и҆зрече́тъ ѿ земны́хъ ; ꙗ҆́кѡ зижди́телѧ рᲂдила̀ є҆сѝ , тлѝ непᲂз̾на́вши , раз̾рѣша́юща ᲂу҆́зы мнѡ́гихъ сᲂгрѣше́нїи . мо́жетъ бо є҆ли́ка хо́щетъ , и҆ твᲂри́тъ .

катава́сїѧ : Є҆́же ѿ дв҃ы твᲂѐ ржⷭ҇тво̀ , прᲂро́къ пред̾зрѧ̀ , прᲂпᲂвѣ́даше вᲂпїѧ̀ , слꙋ́хъ тво́й ᲂу҆слы́шахъ и҆҆ ᲂу҆бᲂѧ́хсѧ , ꙗ҆́кѡ ѿ ю҆́га и҆з̾ гᲂры̀ ст҃ы́ѧ , присѣ́нныѧ прише́лъ є҆сѝ хрⷭ҇тѐ .

пѣ́снь , є҃ . і҆рмо́съ . Оу҆́тренюемъ ᲂу҆́тренюю глꙋбᲂкꙋ̀ , и҆ вмѣ́стѡ ми́ра , пѣ́снь принесе́мъ влⷣцѣ , и҆ хрⷭ҇та̀ ᲂу҆́зримъ пра́веднᲂе сл҃нце , всѣ́мъ жи́знь вᲂсїѧ́юща . Без̾чи́сленᲂе твᲂѐ млрⷭ҇дїе , и҆́же а҆́дᲂвыми ᲂу҆́зами , сᲂдержи́ми зрѧ́ще , къ свѣ́тꙋ и҆дѧ́хꙋ хрⷭ҇тѐ , весе́лыми нᲂга́ми , па́схꙋ хва́лѧще вѣ́чнꙋю . Пристꙋ́пимъ свѣтᲂно́снїи , и҆схᲂдѧ́щꙋ хрⷭ҇тꙋ̀ и҆́з̾ грᲂба ꙗ҆́кѡ женихꙋ̀ . и҆ спра́зднꙋемъ празднᲂлюбе́зными чи́ньми , па́схꙋ бж҃їю спаси́тельнꙋю .

боⷢ҇ . Прᲂсвѣща́етсѧ бжⷭ҇твеными зарѧ́ми , и҆ живᲂно́снымъ вᲂста́нїемъ сн҃а твᲂегѡ̀ , бг҃ᲂмт҃и пречⷭ҇таѧ , и҆ ра́дᲂсти и҆спᲂлнѧ́етсѧ , бл҃гᲂчести́выхъ є҆ди́нственᲂе тᲂржество̀ . боⷢ҇ . Неразве́рзъ две́ри дѣ́вства въ вᲂплᲂще́нїи , и҆ гро́бꙋ неразве́рзъ же печа́ти , хрⷭ҇тѐ вᲂскр҃се , и҆ ра́дᲂсти и҆спᲂлнѧ́етсѧ , бл҃гᲂчести́выхъ є҆ди́нственᲂе тᲂржество̀ .

и҆́нъ , і҆рмо́съ . Мглꙋ̀ дꙋшѝ мᲂеѧ̀ . Твᲂю̀ пе́рвꙋю ѻ҆де́ждꙋ ю҆́же ми и҆с̾тка̀ , ᲂу҆вы̀ мнѣ̀ , сѣ́ѧтель грѣха̀ сᲂвлечѐ . ты́ же сп҃се мо́й ѡ҆бо́лксѧ в̾ мѧ̀ , сᲂѡ҆дѣ́лъ мѧ є҆сѝ . Ты̀ ѕлᲂнача́льнагѡ ѕмі́ѧ , ѻ҆рꙋ́жїемъ крⷭ҇та̀ твᲂегѡ̀ , низ̾лᲂжи́лъ є҆сѝ . и҆ твᲂи́мъ вᲂста́нїемъ бл҃же , сᲂкрꙋши́лъ є҆сѝ жа́ло сме́рти . Ли́ствїе смᲂко́внᲂе сшѝ мнѣ̀ грѣ́хъ мо́й , ᲂу҆вы̀ мнѣ̀ несᲂхра́ньшꙋ сп҃се мо́й пречи́стꙋю за́пᲂвѣдь твᲂю̀ , ѕмі́евымъ сᲂвѣ́тᲂмъ . Оу҆ѧзви́вшꙋюсѧ д́ш҃ꙋ мᲂю̀ раз̾бо́йническими пᲂмышле́ньми мᲂи́ми , пред̾ста́въ и҆́же ѿ мр҃і́и , ма́сло вᲂз̾лїѧ́въ и҆сцѣлѝ хрⷭ҇тѐ . Оу҆крⷭ҇та̀ пред̾стᲂѧ́щи пречⷭ҇таѧ бцⷣе , мт҃рьски в̾зыва́ше , ѡ҆ста́вилъ мѧ є҆сѝ є҆ди́нꙋ , ѽ сн҃е мо́й , и҆ бж҃е мо́й . Гдѣ́ти сме́рте жа́ло ; гдѣ́ти а҆́дѣ пᲂбѣ́да ; а҆да́мъ ны́нѣ вᲂпїѧ́ше , сᲂкрꙋши́лъ бо є҆сѝ вᲂста́нїемъ , ѡ҆живи́вшагѡ ме́ртвыѧ . Мѷрѡно́сицы жены̀ гро́ба твᲂегѡ̀ дᲂсти́гше , ѡ҆живи́вшагѡ въ до́льнихъ ме́ртвыѧ . и҆ гла́съ слы́шахꙋ ᲂу҆́бѡ гл҃ющь , вᲂскрⷭ҇лъ є҆́сть хрⷭ҇то́съ . Бл҃гᲂѡбра́знаго всѝ пᲂчте́мъ дᲂсто́йнѡ , и҆́же тѣ́ло гдⷭ҇не ѿ́ древа снѧ́тъ , и҆ пᲂгребѐ вѣ́рнѡ . Бл҃гᲂчести́выхъ мѷрѡно́сицъ па́мѧть сᲂверша́емъ , и҆ всѣ́хъ ᲂу҆чени́къ твᲂи́хъ , во свѣ́тлѣмъ ти вᲂста́нїи , вᲂспѣва́емъ тѧ хрⷭ҇тѐ . сла́ва . Тебѐ бг҃а ѻ҆ц҃а , и҆ сы́на и҆ дх҃а , пᲂчита́ю трисᲂста́вна . и҆ є҆ди́но в̾ трѝ вѣ́рꙋю , сꙋщество́мъ є҆ди́нѣмъ .= и҆ нн҃ѣ , боⷢ҇ . Т=ебѐ без̾сѣ́меннымъ ржⷭ҇тво́мъ ро́ждьшꙋю па́че є҆стества̀ , ѡ҆бно́вльшагѡ є҆стество̀ хрⷭ҇та̀ є҆ди́наго влⷣкꙋ , вᲂспѣва́емъ вѣ́рнїи .

катава́сїѧ : Мглꙋ̀ дш҃и мᲂеѧ̀ сп҃се мо́й ѿгна́въ , свѣ́тᲂмъ запᲂвѣде́й твᲂи́хъ ѡ҆зари́ мѧ , є҆ди́не цр҃ю смире́нїѧ .

пѣ́снь , ѕ҃ . і҆рмо́с̾ . Сни́де в̾ преиспо́днїѧ страны̀ землѝ , и҆ сᲂкрꙋшѝ вереѝ вѣ́чныѧ преиспо́днїѧ свѧ́занныѧ хрⷭ҇тѐ , и҆ тридне́внѡ , ꙗ҆́кѡ ѿ ки́та і҆ѡ́на , вᲂскр҃се ѿ́ грᲂба . Сᲂхрани́въ цѣ́ла зна́менїѧ хрⷭ҇тѐ , вᲂскр҃съ ѿ́ грᲂба , и҆́же ключа̀ дв҃ыѧ невреди́выи въ рᲂжествѣ̀ свᲂе́мъ , и҆ ѿве́рзлъ є҆сѝ на́мъ ра́йскїѧ две́ри . Сп҃се мо́й жи́во , а҆ не же́ртвенᲂе закᲂле́нїе ꙗ҆́кѡ бг҃ъ , са́мъ себѐ во́лею приве́дъ ко ѻ҆ц҃ꙋ . сᲂвᲂскреси́ же всеро́дна а҆да́ма , вᲂскр҃се ѿ́ грᲂба .

боⷢ҇ . Вᲂзво́дитсѧ и҆́же дре́вле держи́мᲂе въ сме́рти и҆ тлѣ́нїи , вᲂплᲂще́нїемъ ѿ твᲂегѡ̀ пречⷭ҇тагѡ чре́ва , бцⷣе дв҃о , къ нетлѣ́ннᲂмꙋ и҆ прⷭ҇нᲂсꙋ́щнᲂмꙋ живᲂтꙋ̀ . боⷢ҇ . Сни́де в̾ ни́жнїѧ землѝ , и҆́же в̾ лᲂжесна̀ твᲂѧ̀ чи́стаѧ сᲂше́дыи , и҆ все́льсѧ и҆ вᲂпло́щьсѧ па́че ᲂу҆ма̀ , и҆ сᲂвᲂзста́ви с̾сᲂбо́ю а҆да́ма , вᲂскр҃съ ѿ́ грᲂба .

и҆́нъ , і҆рмо́съ . Во глꙋбинѣ̀ грѣхо́внѣй . Ме́ртвъ є҆́сть а҆́дъ , и҆ лежи́тъ ѡ҆бна́жьсѧ , дерза́йте земнᲂро́днїи , хрⷭ҇то́съ бо на́ древѣ ви́сѧ , низ̾ве́рже ѻ҆рꙋ́жїе на́нь , и҆ ме́ртвыхъ ꙗ҆́же и҆мѣ́ѧше , плѣни́лъ є҆́сть . Плѣни́сѧ а҆́дъ , дерза́йте земні́и . и҆ гро́бы ѿверзо́шасѧ , вᲂста́ните ме́ртвїи , вᲂпїе́тъ ва́мъ хрⷭ҇то́съ сꙋ́щимъ во а҆́дѣ , и҆́же всѣ́хъ прише́дъ и҆зба́вити ѿ сме́рти и҆ тлѝ . Ме́ртвыхъ и҆́хже вᲂз̾мо́гъ пᲂжретѝ и҆нᲂгда̀ , ны́нѣ и҆стѧза́емь а҆́дѣ , ѿда́ждь ми вᲂпїе́тъ тебѣ̀ живᲂда́вецъ и҆ бг҃ъ , всѧ̀ прише́дыи и҆зба́вити ѿ несы́тыѧ твᲂеѧ̀ ᲂу҆тро́бы . Плащани́цею тѧ̀ хрⷭ҇тѐ ѡ҆бви́въ і҆ѡ́сифъ бл҃гᲂѡ҆бра́зныи , во́ грᲂбѣ пᲂлᲂжѝ . сми́рнᲂю же пᲂма́завъ разᲂре́нꙋю цр҃кᲂвь твᲂегѡ̀ тѣлесѐ , привалѝ ка́мень вели́кїи ко́ грᲂбꙋ . Жены̀ мѷрѡно́сицы , что̀ спѣшитѐ про́чее , что́ же живо́мꙋ мѵ́ро принᲂша́ете . вᲂскр҃се хрⷭ҇то́съ , ꙗ҆́кᲂже пре́же речѐ , преста́ните ѿ сле́зъ , преше́дше на ра́дᲂсть . Гдⷭ҇ь вᲂскр҃се плѣни́выи врага̀ , и҆ ᲂу҆́зы расто́ргнꙋвъ , с̾ первᲂзда́ннымъ а҆да́мᲂмъ вᲂзвᲂдѧ̀ всѣ́хъ и҆ вᲂставлѧ́етъ , ꙗ҆́кѡ милᲂсе́рдъ и҆ чл҃кᲂлю́бецъ . сла́ва . Трⷪ҇цꙋ въ є҆ди́нствѣ вᲂспѣва́емъ вѣ́рнїи , съ сн҃ᲂмъ ѻ҆ц҃а сла́вѧще , и҆ дх҃а є҆динᲂсꙋ́щна сн҃ꙋ , и҆ сꙋ́ща во ѻ҆ц҃ѣ , сᲂбез̾нача́льна и҆ приснᲂсꙋ́щна бг҃а .= и҆ ны́нѣ , боⷢ҇ . В=о́ чревѣ невᲂздѣ́ланнѡ зачала̀ є҆сѝ чⷭ҇таѧ нетлѣ́нїѧ гро́здъ , ꙗ҆́кѡ винᲂгра́дъ , ѿ него́ же и҆стека́етъ на́мъ ꙗ҆́кѡ вино̀ без̾сме́ртїѧ стрꙋѧ̀ , вѣ́чныѧ жи́зни .

катава́сїѧ : Во глꙋбинѣ̀ грѣхо́внѣй сᲂдержи́мь є҆́смь сп҃се , и҆҆ въ пꙋчи́нѣ жите́йстѣй ѡ҆бꙋрева́емъ . но ꙗ҆́кᲂже прᲂро́ка і҆ѡ́нꙋ , и҆з̾ глꙋбины́ мѧ ѿ стрⷭ҇те́й , вᲂзведѝ и҆҆ спаси́ мѧ .

кᲂнда́къ . гла́съ , в҃ . Ра́дᲂватисѧ мѷрѡно́сицамъ пᲂвелѣ́въ , пла́чь пра́бабы є҆́ввы ᲂу҆ста́вилъ є҆сѝ , вᲂскрⷭ҇нїемъ твᲂи́мъ хрⷭ҇тѐ бж҃е . а҆пⷭ҇лѡмъ же свᲂи́мъ прᲂпᲂвѣ́дати пᲂвелѣ̀ , сп҃съ вᲂскр҃се ѿ́ грᲂба . и҆́кᲂсъ . На́ грᲂбъ тво́й сп҃се мѷрѡно́сицы и҆дꙋ́ще , к̾ себѣ̀ недᲂꙋмѣва́хꙋсѧ ᲂу҆мо́мъ , и҆ вѣща́хꙋ , кто̀ на́мъ ка́мень ѿвали́тъ гро́бныи , и҆ вᲂзрѣ́вше ви́дѣша ꙗ҆́кѡ ка́мень ѿвале́нъ бѣ̀ , зра́кꙋ же а҆́нг҃лᲂвꙋ со ѡ҆дѣѧ́нїемъ дивлѧ́хꙋсѧ , и҆ ѡ҆держи́ми бѧ́хꙋ тре́петᲂмъ , и҆ бѣжа́ти пᲂмышлѧ́хꙋ . къ ни́мже ю҆́нᲂша вᲂзᲂпѝ , что̀ рыда́ете вы̀ , є҆го́же и҆́щете , вᲂскр҃се . прїиди́те и҆ ви́дите мѣ́сто , и҆дѣ́же лежа̀ тѣ́ло хрⷭ҇то́во , и҆ ско́рѡ ше́дше вᲂзвѣсти́те ᲂу҆ченико́мъ , сп҃съ вᲂскр҃се ѿ́ грᲂба .

пѣ́снь , з҃ . і҆рмо́съ . Ѻ҆́трᲂки ѿ пе́щи и҆зба́вивъ , бы́въ ᲂу҆́бѡ чл҃къ , стра́ждетъ ꙗ҆́кѡ сме́ртенъ , и҆ стра́стїю ме́ртвенᲂю въ нетлѣ́нїе ѡ҆блачи́тъ бл҃гᲂлѣ́пїе , є҆ди́нъ бл҃гᲂслᲂве́нъ ѻ҆ц҃е́мъ бг҃ъ и҆ препрᲂсла́вленъ . Жены̀ с̾ мѵ́рᲂмъ бг҃ᲂмꙋ́дрыѧ , вᲂслѣ́дъ тебѐ теча́хꙋ . є҆го́же ꙗ҆́кѡ ме́ртва , со слеза́ми и҆ска́хꙋ , пᲂклᲂни́шасѧ и҆ ра́дꙋющесѧ живо́мꙋ бг҃ꙋ , и҆ па́схꙋ та́йнꙋю , твᲂи́мъ хрⷭ҇тѐ ᲂу҆ченикѡ́мъ бл҃гᲂвѣсти́ша . Ꙗ҆́кѡ вᲂи́стинꙋ сщ҃е́ннаѧ и҆ всепра́зднственнаѧ , сїѧ̀ спаси́тельнаѧ но́щь и҆ свѣтᲂза́рнаѧ , свѣтᲂно́снагѡ днѐ , вᲂста́нїю сꙋ́щи прᲂпᲂвѣ́дница , в̾ не́й же без̾лѣ́тныи свѣ́тъ , и҆́з̾грᲂба пло́тски всѣ́мъ вᲂсїѧ̀ . Сме́рти пра́зднꙋемъ ᲂу҆мерщве́нїе , а҆́дᲂво разрꙋше́нїе , и҆но́гѡ живᲂта̀ вѣ́чнагѡ нача́ло , и҆ и҆гра́юще пᲂе́мъ вино́внаго , є҆ди́нагѡ бл҃гᲂслᲂве́на ѻ҆ц҃е́мъ бг҃а и҆ препрᲂсла́влена .

боⷢ҇ . Оу҆мертви́въ сн҃ъ тво́й сме́рть , дв҃о всенепᲂро́чнаѧ , всѣ́мъ вѣ́рнымъ пребыва́ющїи живо́тъ , во́ вѣки вѣкѡ́мъ дарᲂва̀ , є҆ди́нъ бл҃гᲂслᲂве́нъ ѻ҆ц҃е́мъ бг҃ъ и҆ препрᲂсла́вленъ . боⷢ҇ . И҆́же всѣ́мъ црⷭ҇твꙋѧи сᲂзда́нїемъ , всели́сѧ во твᲂю̀ бг҃ᲂра́дᲂваннаѧ ᲂу҆тро́бꙋ , бы́въ чл҃къ , и҆ распѧ́тїе претерпѣ́въ и҆ сме́рть , вᲂскр҃се бг҃ᲂлѣ́пнѡ , сᲂвᲂзста́вивъ на́съ ꙗ҆́кѡ всеси́ленъ .

и҆́нъ , і҆рмо́съ . Херꙋви́мᲂмъ пᲂдо́бѧщесѧ . Ты̀ ꙗ҆́кѡ чл҃кᲂлю́бецъ хᲂтѧ́и всѣ́хъ спастѝ ѿ пре́лести и҆́хже сᲂзда̀ , и҆зво́ли пригвᲂзди́тисѧ на крⷭ҇тѣ̀ . да пᲂгребе́ныи ѻ҆́бразъ страстьмѝ , сегѡ̀ пло́тїю свᲂе́ю ѡ҆бнᲂви́ши ꙗ҆́кѡ бг҃ъ . и҆ а҆́да низ̾ло́жь , сᲂвᲂскр҃си́ши ᲂу҆ме́ршїѧ с̾ сᲂбо́ю . Ты̀ цр҃кᲂвь тѣле́снꙋю вᲂз̾дви́глъ є҆сѝ разᲂре́нꙋю тридне́внѡ и҆́з̾ грᲂба , ꙗ҆́кᲂже вᲂз̾вѣстѝ бл҃же , да вᲂи́стинꙋ ска́жеши сла́вꙋ свᲂю̀ , ю҆́же на́мъ и҆стᲂча́еши вѣ́рꙋющимъ . и҆ ᲂу҆́зы раз̾рѣ́шь и҆́ми же держа́ше дре́вле а҆́дъ свѧ́заныхъ . На́ крⷭ҇тъ вᲂз̾выша́емь , всѧ̀ призва̀ к̾ себѣ̀ ꙗ҆зы́ки , ꙗ҆́кᲂже пред̾вᲂзвѣстѝ бл҃же . ꙗ҆́кѡ вᲂи́стинꙋ спастѝ прише́лъ є҆сѝ сїѧ̀ всѧ̀ за млрⷭ҇дїе свᲂѐ . тѣ́мже и҆ разбо́йникꙋ ра́йскїѧ две́ри пре́жде ѿве́рзлъ є҆сѝ сп҃се . ѽ і҆ꙋде́йскᲂе безꙋ́мїе , ѽ враждо̀ без̾зако́нныхъ , что̀ невѣ́рно ви́дѣвше невѣ́рᲂвасте хрⷭ҇тꙋ̀ , ꙗ҆́кѡ немᲂщны́ѧ не сло́вᲂмъ ли вᲂздви́же , и҆лѝ ꙗ҆́кѡ ве́сь ми́ръ то́й не спасе́ ли . да ᲂу҆вѣрѧ́ютъ ва́съ пᲂнѐ во́ини , и҆ вᲂскре́сшїи мертвецы̀ . Оу҆мертви́вшїисѧ стра́жїе да пᲂвѣ́дѧтъ ᲂу҆́бѡ ка́кѡ ᲂу҆кра́денъ бы́сть , є҆го́же неви́дѣша неразꙋ́мнїи всегда̀ . а҆́ще бо вᲂскре́сша неви́дѣша ниразꙋмѣ́ша , ка́кѡ ᲂу҆кра́дена сегѡ̀ разꙋмѣ́ти и҆мѣ́ша кᲂгда̀ ; да ᲂу҆вѣ́ритъ ва́съ пᲂнѐ ка́мень се́й , и҆ пᲂгреба́льнаѧ хрⷭ҇то́ва . Что̀ ꙗ҆́кѡ ме́ртва блюде́те ; что̀ печа́ти на ка́мени пᲂлᲂжи́сте і҆ꙋде́е , и҆ со́ страхᲂмъ стрего́сте ѿ кра́денїѧ ; сѐ вᲂи́стинꙋ гро́бъ запечатлѣ́ненъ є҆́сть , ка́кѡ ᲂу҆́бѡ вᲂскр҃се , а҆́ще небы̀ бг҃ъ бы́лъ хрⷭ҇то́съ ; да ᲂу҆вѣ́рѧтъ ва́съ вᲂскрⷭ҇шїи , и҆́же ви́дѣни бы́вше мно́гими . сла́ва . Со ѻ҆ц҃е́мъ прᲂсла́вимъ сн҃а и҆ дх҃а ст҃а́гѡ , вᲂпїю́ще непреста́ннымъ гла́сᲂмъ , трⷪ҇це ꙗ҆́же во є҆ди́нᲂмъ сꙋществѣ̀ пᲂми́лꙋй и҆ спасѝ на́съ , ꙗ҆́кѡ въ трїе́хъ ли́цѣхъ є҆ди́нице , ᲂу҆ще́дри на́съ препрᲂсла́вленаѧ во всѧ̀ вѣ́ки .= и҆ ны́нѣ , боⷢ҇ . В=о ᲂу҆тро́бѣ свᲂе́й пречⷭ҇таѧ ка́кѡ вмѣсти́ла є҆сѝ младе́нца , є҆го́же трепе́щꙋтъ си́лы а҆́нг҃льскїѧ ꙗ҆́кѡ бг҃а . но и҆́же ꙗ҆́кᲂже вѣ́сть всели́сѧ в̾ тѧ̀ , спастѝ хᲂтѧ̀ и҆́же ѿ а҆да́ма земнᲂро́дныѧ , и҆ да разрѣши́тъ и҆ а҆да́ма ѿ клѧ́твы ѻ҆́нᲂѧ и҆́же ѿ снѣ́ди го́рькїѧ .

катава́сїѧ : Херꙋви́мᲂмъ пᲂдо́бѧщесѧ ѻ҆́трᲂцы , в̾ пещѝ ликᲂвствᲂва́хꙋ вᲂпїю́ще , бл҃гᲂслᲂве́нъ є҆сѝ бж҃е , ꙗ҆́кѡ и҆́стиннᲂю и҆҆ сꙋдо́мъ наве́лъ є҆сѝ сїѧ̀ всѧ̀ , грѣ́хъ ра́ди на́шихъ , препѣ́тыи и҆҆ препрᲂсла́вленныи во́ вѣки всѧ̀ .

пѣ́снь , и҃ . і҆рмо́съ . Се́й ᲂу҆́бѡ нарече́нныи ст҃ы́и дн҃ь , є҆ди́нъ сꙋбо́тамъ цр҃ь и҆ гдⷭ҇ь , пра́здникъ пра́здникᲂмъ и҆ тᲂржество̀ є҆́сть тᲂржество́мъ , во́ньже бл҃гᲂслᲂви́мъ хрⷭ҇та̀ во́ вѣки . Прїиди́те но́ваго винᲂгра́да ча́да , бжⷭ҇твенагѡ весе́лїѧ , в̾ наро́читᲂмъ днѝ вᲂскрⷭ҇нїѧ , црⷭ҇твїѧ хрⷭ҇то́ва прїѡбщи́мсѧ , пᲂю́ще є҆гѡ̀ ꙗ҆́кѡ бг҃а во́ вѣки . Вᲂзведѝ ѻ҆́крестъ ѻ҆́чи твᲂѝ сїѡ́не и҆ ви́ждь , се́бо прїидо́ша къ тебѣ̀ , ꙗ҆́кѡ бг҃ᲂсвѣ́тлаѧ свѣти́ла , ѿ за́пада и҆ сѣ́вера и҆ мо́рѧ , и҆ вᲂсто́ка ча́да твᲂѧ̀ , в̾ тебѣ̀ бл҃гᲂслᲂвѧ́ще хрⷭ҇та̀ во́ вѣки . трⷪ҇ченъ . Ѻ҆́ч҃е вседержи́телю и҆ сло́ве и҆ дꙋ́ше , тре́ми сᲂединѧ́емᲂе въ сᲂста́вѣхъ є҆стество̀ , пресꙋ́щественыи и҆ пребжⷭ҇твеныи , в̾ тѧ̀ крⷭ҇ти́хᲂмсѧ и҆ тѧ̀ бл҃гᲂслᲂви́мъ во всѧ̀ вѣ́ки .

боⷢ҇ . Прїи́де тᲂбо́ю въ ми́ръ гдⷭ҇ь , дв҃о бцⷣе , и҆ ᲂу҆тро́бꙋ а҆́дᲂвꙋ расто́ргъ , и҆ ме́ртвымъ на́мъ вᲂскрⷭ҇нїе дарᲂва̀ . є҆го́же бл҃гᲂслᲂвѧ́тъ всѧ́ческаѧ во́ вѣки . боⷢ҇ . Ви́дѣла є҆сѝ и҆з̾ ме́ртвыхъ вᲂста́вша дв҃о , є҆го́же пло́тїю неи҆зрече́ннѡ рᲂдила̀ є҆сѝ сло́ва , и҆ ра́дᲂсти дꙋ́ши и҆спо́лнила є҆сѝ . є҆го́же сни́тїе пѣснᲂсло́вѧще во́ вѣки .

и҆́нъ , і҆рмо́съ . Въ кꙋпинѣ̀ мѡѷсе́ю . Со́лнечныѧ лꙋчѝ сᲂкрыва́хꙋсѧ стра́хᲂмъ , хрⷭ҇то́выхъ ра́ди стрⷭ҇те́й , и҆ вᲂстава́хꙋ ме́ртвїи , и҆ го́ры кᲂлеба́хꙋсѧ , и҆ трѧса́шесѧ землѧ̀ , и҆ а҆́дъ ѡ҆бнажа́шесѧ . Мѡѷсе́й прᲂѡбразꙋ́ѧ крⷭ҇та̀ зна́менїе , на гᲂрѣ̀ рꙋ́цѣ вᲂз̾дви́же и҆нᲂгда̀ , пᲂбѣжда́ѧ сп҃се мо́й чꙋ́вственаго а҆мали́ка , ѻ҆́бразᲂмъ крⷭ҇та̀ твᲂегѡ̀ . Кто̀ и҆зсꙋши́выи смᲂко́вницꙋ ; кто́же сꙋхꙋ́ю и҆сцѣли́выи рꙋ́кꙋ ; кто̀ насы́ти и҆нᲂгда̀ мно́жество въ пꙋсты́ни ; а҆́ще не хрⷭ҇то́съ бг҃ъ , и҆́же ме́ртвыѧ вᲂз̾дви́гїи . И҆́же въ пещѝ и҆нᲂгда̀ требл҃же́ннїи ѻ҆́трᲂцы вᲂз̾двиза́юще рꙋ́цѣ , прᲂѡбража́хꙋ бл҃же пречⷭ҇тыи крⷭ҇тъ тво́й , и҆́мже низлᲂжѝ хрⷭ҇тѐ вра́жїю си́лꙋ . Что́же гро́бъ тво́й мни́тсѧ гро́бнаѧ нᲂсѧ̀ , и҆ пᲂнѧ́вицꙋ и҆мѣ́ѧ ; что́же прᲂтивлѧ́етесѧ про́чее ; нельсти́тесѧ і҆ꙋде́и , вᲂи́стинꙋ вᲂскр҃се хрⷭ҇то́съ , и҆ живе́тъ во́ вѣки . ѽ і҆ꙋде́е вразѝ , а҆́ще вы̀ невѣ́рꙋете , ва́ши во́ины вᲂпрᲂси́те , что̀ пᲂстрада́ша ѻ҆нѝ ; кто̀ ѿвали́выи рꙋка́ма ка́мень ѿ́ грᲂба ; Кто̀ прᲂсвѣти́выи слѣпца̀ , и҆ прᲂкаже́ныѧ ѻ҆чи́щь , и҆ хро́мыѧ и҆спра́вивъ , и҆ хᲂди́выи по́ мᲂрю немо́кренѡ ꙗ҆́кѡ по́ сꙋхꙋ ; то́кмѡ хрⷭ҇то́съ бг҃ъ , и҆́же ме́ртвыѧ вᲂз̾дви́гнꙋвыи . Кто̀ крᲂвᲂтᲂчи́вꙋю и҆нᲂгда̀ прикᲂснᲂве́нїемъ кра́ѧ ри́зы и҆сцѣли́выи сло́вᲂмъ ; кто̀ кнѧ́зева сы́на и҆сцѣли́выи ѿ недꙋ́га ; ра́звѣ хрⷭ҇то́съ бг҃ъ , и҆́же ме́ртвыѧ вᲂз̾дви́гнꙋвыи . Кто̀ вᲂз̾дви́гнꙋвыи ме́ртва четверᲂдне́вна и҆́з̾ грᲂба , и҆ вдᲂви́ча сы́на ; кто̀ стѧ́гнꙋвыи ꙗ҆́кѡ бг҃ъ раз̾сла́блена на ѻ҆дрѣ̀ ; а҆́ще не хрⷭ҇то́съ бг҃ъ , и҆́же ме́ртвыѧ вᲂз̾дви́гнꙋвыи . Вᲂи́стинꙋ вᲂскр҃се хрⷭ҇то́съ , и҆ плѣне́нъ бы́сть а҆́дъ , ᲂу҆мертви́сѧ ѕмі́й , и҆зба́висѧ а҆да́мъ , и҆ сᲂтро́шасѧ до́льнїи . что̀ невѣ́рꙋете про́чее , вразѝ и҆ престꙋ́пницы . Вᲂпїе́тъ ка́мень са́мыи , и҆ печа́ти зᲂвꙋ́тъ , ꙗ҆́же вы̀ пᲂло́жьше , пᲂста́висте стра́жꙋ хранѧ́щꙋ гро́бъ . но вᲂи́стинꙋ вᲂскр҃се хрⷭ҇то́съ , и҆ живе́тъ во́ вѣки . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Со ѻ҆ц҃е́мъ сн҃а и҆ ст҃а́гѡ дх҃а , ст҃ꙋ́ю трⷪ҇цꙋ въ бжⷭ҇твѣ̀ є҆ди́нᲂмъ прᲂсла́вимъ , вᲂпїю́ще , ст҃ъ , ст҃ъ , ст҃ъ є҆сѝ во́ вѣки .= и҆ ны́нѣ , боⷢ҇ .= Во ᲂу҆тро́бѣ свᲂе́й чи́стаѧ , при́снѡ живо́тныи хлѣ́бъ , смѣ́шеныи несмѣ́снѡ , смѣше́нїемъ на́шимъ , рᲂдила̀ є҆сѝ непрело́жнѡ , є҆ди́нᲂгѡ сн҃а и҆ бг҃а вᲂдвᲂю̀ сꙋществꙋ̀ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Въ кꙋпинѣ̀ мѡѷсе́ю дв҃ческᲂе чꙋ́до , на сина́йстѣй гᲂрѣ̀ прᲂѡбра́жьшаго дре́вле , по́йте блгⷭ҇ви́те и҆҆ превᲂзнᲂси́те є҆гѡ̀ во́ вѣки [пᲂкло́н̾] . честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ . ликꙋ́й нн҃ѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ . ѽ бжⷭ҇твенагѡ , ѽ любе́знагѡ , ѽ сла́дкагѡ ти гла́са , с̾ на́ми ᲂу҆́бѡ нело́жнѡ ѡ҆бѣща́лсѧ є҆сѝ бы́ти , до скᲂнча́нїѧ вѣ́ка хрⷭ҇тѐ , є҆го́же вѣ́рнїи держа́вꙋ и҆ наде́ждꙋ и҆мꙋ́ще ра́дꙋемсѧ . ѽ па́сха вели́ка , и҆ сщ҃е́ннаѧ хрⷭ҇тѐ . ѽ мꙋ́дрᲂсте сло́во бж҃їе и҆ си́ло , пᲂдава́й на́мъ и҆́стѣе тебѐ причаща́тисѧ , въ невече́рнѣмъ днѝ црⷭ҇твїѧ твᲂегѡ̀ .

боⷢ҇ . Сᲂгла́снѡ дв҃о тебѐ бл҃жи́мъ вѣ́рнїи , ра́дꙋисѧ две́ри гдⷭ҇нѧ , ра́дꙋисѧ гра́де ѡ҆дш҃евле́ныи , ра́дꙋисѧ є҆ѧ́же ра́ди на́мъ ны́нѣ вᲂзсїѧ̀ свѣ́тъ , и҆́же и҆з̾ тебѐ прᲂсїѧ́въ неи҆зрече́ннѡ , дв҃о мт҃и бг҃ᲂневѣ́сто . боⷢ҇ . Весели́сѧ и҆ ра́дꙋисѧ бжⷭ҇твенаѧ две́ри свѣ́та , и҆́бѡ в̾ си́лѣ і҆с҃ъ ѿ́ грᲂба вᲂсїѧ̀ , прᲂсїѧ́въ сл҃нца свѣтлѣ́йши , и҆ вѣ́рныѧ всѧ̀ ѡ҆зари́въ , бг҃ᲂра́дᲂваннаѧ влⷣчце .

и҆́нъ , і҆рмо́съ . И҆́же па́че є҆стества̀ . И҆́же на крⷭ҇тѣ̀ разбо́йника пᲂз̾на́вша тѧ бг҃а , наслѣ́дника сᲂдѣ́ла мы́сленᲂмꙋ раю̀ , пᲂмѧнѝ и҆ менѐ вᲂпїю́ща всеси́льне сп҃се . Ѻ҆цта̀ и҆ же́лчи сп҃се , напᲂе́нъ бы́сть на́съ ра́ди , и҆́же да́выи на́мъ тѣ́ло и҆ честнꙋ́ю кро́вь , в̾ снѣ́дь же и҆ питїѐ вѣ́чныѧ жи́зни . Заꙋше́нъ бы́сть на́съ ра́ди , и҆ ѡ҆плева́нъ бы́сть і҆с҃е ѿ без̾зако́нникъ , и҆́же скрижа́ли зако́на начерта́выи въ сина́и , ᲂу҆го́дникꙋ мѡѷсе́ю . Въ живᲂтво́рнаѧ ре́бра кᲂпїе́мъ прᲂбᲂде́нъ бы́въ хрⷭ҇тѐ , и҆стᲂчи́лъ є҆сѝ ми́рꙋ спасе́нїѧ пᲂто́ки , честнꙋ́ю свᲂю̀ кро́вь и҆ во́дꙋ бла́же . Бл҃гᲂѡбра́зныи сᲂвѣ́тникъ і҆ѡ́сифъ , да пᲂе́тсѧ съ мѷрѡно́сицами , и҆ бжⷭ҇твеными ᲂу҆ченикѝ , ꙗ҆́кѡ прᲂпᲂвѣ́дникъ сы́и и҆ сі́и , вᲂста́нїѧ хрⷭ҇то́ва . Вмѣни́лсѧ є҆сѝ въ ме́ртвыхъ , ѡ҆живле́и ме́ртвыѧ . и҆ во́ грᲂбѣ пᲂлᲂжи́сѧ , и҆стᲂщи́выи гро́бы . плѣни́лъ є҆сѝ а҆́да , вᲂскр҃си́въ а҆да́ма . Вᲂскрⷭ҇лъ є҆сѝ і҆с҃е , свѧ́занъ бы́сть вра́гъ , и҆ плѣни́сѧ а҆́дъ . и҆спраздни́шасѧ гро́бы , вᲂста́ша до́льнїи , пᲂкланѧ́ющетисѧ хрⷭ҇тѐ . Кто̀ ᲂу҆кра́дыи ме́ртваго па́че же и҆ на́га ; без̾зако́ннїи нельсти́тесѧ , хрⷭ҇то́съ бо вᲂскр҃се , и҆ разрꙋши́шасѧ а҆́дᲂвы ᲂу҆́зы и҆ вереѝ .

ѡ́сифа чꙋ́днаго да вᲂсхва́лимъ вѣ́рнїи , кꙋ́пнѡ съ никᲂди́мᲂмъ , и҆ мѷрѡно́сицами вѣ́рными вᲂпїю́щими , гдⷭ҇ь вᲂскр҃се вᲂи́стинꙋ . Сла́ва тебѣ̀ хрⷭ҇тѐ сп҃се , и҆стᲂчи́выи жи́знь , и҆ свѣ́тъ вᲂсїѧ́выи , сꙋ́щимъ во тмѣ̀ невѣ́дѣнїѧ , и҆ всю̀ зе́млю прᲂсвѣтѝ вᲂста́нїемъ сѝ . сла́ва . Без̾нача́ленъ є҆сѝ ѻ҆́ч҃е , несо́зданъ є҆сѝ сн҃е , и҆ сᲂпресто́ленъ д́ш҃е , и҆ трѝ сїѧ̀ є҆ди́но є҆стество́мъ , трѝ ᲂу҆́бѡ ли́ца , є҆ди́нъ же бг҃ъ и҆́стиненъ .= и҆ ны́нѣ , боⷢ҇ .= Ра́дꙋисѧ две́ре бж҃їѧ . ра́дꙋисѧ лѣ́ствице мы́сленаѧ , ра́дꙋисѧ ле́гкїи ѻ҆́блаче , ра́дꙋисѧ гᲂро̀ ст҃а́ѧ , ра́дꙋисѧ бцⷣе спасе́нїе вѣ́рнымъ .

катава́сїѧ : И҆́же па́че є҆стества̀ пло́тїю заче́ншꙋю во́ чревѣ , ѿ ѻ҆ц҃а пре́жде вѣ́къ вᲂз̾сїѧ́вшаго сло́ва , въ пѣ́снехъ немо́лчныхъ велича́емъ вѣ́рнїи .

задᲂсто́йникъ : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ , ликꙋ́й ны́нѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ [пᲂкло́н̾ до землѝ] . та́же , ст҃ъ гдⷭ҇ь бг҃ъ на́шъ ,= на́ гласъ , в҃ . свѣти́ленъ , па́сцѣ . П=ло́тїю ᲂу҆снꙋ́въ ꙗ҆́кѡ ме́ртвъ , цр҃ь и҆ гдⷭ҇ь , тридне́вно вᲂскр҃се , и҆ а҆да́ма вᲂздви́гъ и҆з̾ тлѝ , и҆ ᲂу҆праздни́въ сме́рть . па́сха нетлѣ́нїѧ , ми́рꙋ спасе́нїе .

дрꙋгі́и , мѷрѡно́сицамъ . Жены̀ ᲂу҆слы́шите гла́съ ра́дᲂванїѧ , мꙋчи́телѧ а҆́да пᲂпра́въ , ѿ тлѝ ми́ра вᲂз̾дви́гъ , тецы́те , дрꙋго́мъ рцы́те мᲂи́мъ бл҃гᲂвѣ́стникѡмъ , хᲂщꙋ́ бо сᲂзда́нїе свᲂѐ ра́дᲂстїю ѻ҆́нᲂю ѡ҆зари́ти , ѿ ню́дꙋ же прїи́де печа́ль . сла́ва , и҆ ны́нѣ , то́йже .

На хвали́тѣхъ , стихѣ́ры , вᲂскрⷭ҇ны . гла́съ , в҃ . =запѣ́въ : хвали́те бг҃а во ст҃ы́хъ є҆гѡ̀ . В=сѧ́ко дыха́нїе и҆ всѧ̀ тва́рь , тебѐ сла́витъ гдⷭ҇и , ꙗ҆́кѡ крⷭ҇то́мъ сме́рть ᲂу҆праздни́лъ є҆сѝ . да пᲂка́жеши лю́демъ , є҆́же и҆з̾ ме́ртвыхъ твᲂѐ вᲂскрⷭ҇нїе . ꙗ҆́кѡ є҆ди́нъ чл҃кᲂлю́бецъ .

хвали́те є҆гѡ̀ во ᲂу҆тверже́нїи си́лъ є҆гѡ̀ . Да рекꙋ́тъ і҆ꙋде́е , ка́кѡ во́ини пᲂгꙋби́ша стрегꙋ́щїи цр҃ѧ ; пᲂчто́ бо ка́мень несᲂхранѝ , ка́менѧ жи́зни ; и҆лѝ пᲂгребе́наго дадѧ́тъ ; и҆лѝ вᲂскрⷭ҇шемꙋ да пᲂкло́нѧтсѧ , гл҃юще съ на́ми , сла́ва мно́жествꙋ щедро́тъ твᲂи́хъ , сп҃се на́шъ сла́ва тебѣ̀ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ пᲂпремно́гᲂмꙋ вели́чествїю є҆гѡ̀ . Ра́дꙋйтесѧ лю́дїе и҆ весели́тесѧ , а҆́нг҃лъ бо сѣдѧ́и на ка́мени гро́бнѣмъ , то́й на́мъ бл҃гᲂвѣстѝ ре́къ , хрⷭ҇то́съ вᲂскр҃се и҆з̾ ме́ртвыхъ , сп҃съ ми́рꙋ , и҆ и҆спо́лни всѧ́ческаѧ бл҃гᲂꙋха́нїѧ . ра́дꙋйтесѧ лю́дїе и҆ весели́тесѧ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . А҆́нг҃лъ ᲂу҆́бѡ є҆́же ра́дꙋисѧ , пре́же зача́тїѧ твᲂегѡ̀ гдⷭ҇и , бл҃гᲂда́тнѣй принесѐ . а҆́нг҃лъ же в̾ твᲂѐ вᲂскрⷭ҇нїе , сла́внагѡ гро́ба твᲂегѡ̀ ка́мень ѿвалѝ . ѻ҆́въ ᲂу҆́бѡ в̾ печа́ли мѣ́сто весе́лїѧ ѻ҆́бразы вᲂзвѣща́ѧ . се́й же в̾ сме́рти мѣ́сто , влⷣкꙋ жизнᲂда́вца прᲂпᲂвѣ́да на́мъ . тѣ́мже вᲂпїе́мъ ти , бл҃гᲂда́телю всѣ́хъ гдⷭ҇и сла́ва тебѣ̀ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Вᲂзлїѧ́ша мѵ́ро со слеза́ми , на́ грᲂбъ тво́й жены̀ , и҆ и҆спо́лнишасѧ ра́дᲂсти ᲂу҆ста̀ и҆́хъ , внегда̀ гл҃ати и҆́мъ вᲂскр҃се гдⷭ҇ь .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Да пᲂхва́лѧтъ ꙗ҆зы́цы и҆ лю́дїе , хрⷭ҇та̀ бг҃а на́шегѡ , и҆́же во́лею на́съ ра́ди распѧ́тїе претерпѣ́вша , и҆ во а҆́дѣ тридне́внᲂвавша . и҆ да пᲂкло́нѧтсѧ є҆гѡ̀ тридне́внᲂмꙋ вᲂскрⷭ҇нїю , и҆́м̾же прᲂсвѣти́шасѧ всегѡ̀ ми́ра кᲂнцы̀ .

сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Распѧ́тсѧ и҆ пᲂгребе́сѧ хрⷭ҇тѐ , ꙗ҆́кᲂже и҆зво́ли . плѣни́лъ є҆сѝ сме́рть , и҆ вᲂскр҃се во сла́вѣ ꙗ҆́кѡ бг҃ъ и҆ влⷣка , да́рꙋѧ ми́рᲂви жи́знь вѣ́чнꙋю , и҆ ве́лїю млⷭ҇ть .

сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Ѽ вᲂи́стинꙋ без̾зако́нїи , запечатлѣ́вше ка́мень , бо́льшихъ чꙋде́съ на́съ спᲂдо́бисте . и҆́мꙋтъ ра́зꙋмъ стра́жїе . дне́сь про́йде и҆́з̾ грᲂба и҆ гл҃ахꙋ , рцы́те ꙗ҆́кѡ на́мъ спѧ́щимъ , прїидо́ша ᲂу҆ченицы̀ є҆гѡ̀ и҆ ᲂу҆кра́дᲂша и҆̀ . кто̀ кра́детъ мертвеца̀ , па́че же на́га ; то́й вᲂскр҃се самᲂвла́стно ꙗ҆́кѡ бг҃ъ , ѡ҆ста́вль во́ грᲂбѣ пᲂгреба́тельнаѧ свᲂѧ̀ . прїидѣ́те и҆ ви́дите і҆ꙋде́е , ка́кѡ неразрꙋшѝ печа́ти , и҆́же сме́рть пᲂпра́въ , и҆ ро́дꙋ чл҃ческᲂмꙋ без̾кᲂне́чнꙋю жи́знь дарᲂва̀ , и҆ ве́лїю млⷭ҇ть .

сла́ва . гла́съ , в҃ . Съ ми́рᲂмъ прише́дшимъ , є҆́же съ мр҃і́ею жена́мъ , и҆ недᲂмышлѧ́ющимсѧ , ка́кѡ бы и҆́мъ ᲂу҆лꙋчи́ти хᲂтѣ́нїе . ꙗ҆ви́сѧ ка́мень ѿвале́нъ , и҆ бжⷭ҇твеныи ю҆́нᲂша , разстила́ѧ мѧте́жь и҆́хъ дꙋ́шъ , вᲂста́ бо речѐ і҆с҃ъ гдⷭ҇ь . тѣ́мъ прᲂпᲂвѣ́дите прᲂпᲂвѣ́дникᲂмъ є҆гѡ̀ ᲂу҆ченико́мъ , в̾ галиле́ю тещѝ , и҆ ви́дѣти є҆гѡ̀ вᲂскре́сша и҆з̾ ме́ртвыхъ , ꙗ҆́кѡ жизнᲂда́вца и҆ гдⷭ҇а . и҆ ны́нѣ . гла́съ , то́йже . Пребл҃гᲂслᲂве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе . та́же , трᲂпа́рь . Вᲂскре́съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂмлⷭ҇тиве .

пᲂсе́мъ , є҆ктенїѝ . и҆ ѿпꙋ́стъ .

чте́цъ , гл҃етъ : а҆ми́нь , сла́ва , и҆ ны́нѣ . гла́съ , г҃ . Магдалы́ни мр҃їи , сп҃сᲂво бл҃гᲂвѣствꙋ́ющи є҆́же и҆з̾ ме́ртвыхъ вᲂскрⷭ҇нїе и҆ ꙗ҆вле́нїе , невѣ́рꙋющїи ᲂу҆ченицы̀ , пᲂнᲂси́ми бы́ша ѡ҆ жестᲂсе́рдїихъ . но зна́менїи напо́лнившесѧ и҆ чꙋде́съ , къ прᲂпᲂвѣ́данїю пᲂсыла́ютсѧ . и҆ ты̀ ᲂу҆́бѡ гдⷭ҇и , къ нача́льнᲂмꙋ свѣ́тꙋ вᲂзнесе́сѧ ѻ҆ц҃ꙋ , ѻ҆ни́ же прᲂпᲂвѣ́даша всю́дꙋ сло́во , чꙋдесы̀ вѣ́рꙋеми . и҆ тѣ́мъ прᲂсвѣти́вшесѧ и҆́хъ ра́ди , сла́вимъ твᲂѐ є҆́же и҆з̾ ме́ртвыхъ вᲂскрⷭ҇нїе , чл҃кᲂлю́бче гдⷭ҇и .

та́же , ча́съ , а҃ . ѱалмы̀ , ѻ҆бы́чны .

На а҃ мъ часѣ̀ , трᲂпарѝ : Є҆гда̀ сни́де . сла́ва . Бл҃гᲂѡбра́зныи і҆ѡ́сифъ . кᲂнда́к̾ : Ра́дᲂватисѧ мѷрѡно́сицамъ . и҆ кᲂне́чныи ѿпꙋ́стъ .

На г҃ мъ часѣ̀ , трᲂпарѝ : Є҆гда̀ сни́де к̾ сме́рти . сла́ва . Мѷрѡно́сицамъ жена́мъ .

кᲂнда́къ : Ра́дᲂватисѧ мѷрѡно́сицамъ .

На ѕ҃ мъ часѣ̀ , трᲂпарѝ : Є҆гда̀ сни́де к̾ сме́рти . сла́ва . Бл҃гᲂѡбра́зныи і҆ѡ́сифъ .

кᲂнда́къ : Ра́дᲂватисѧ мѷрѡно́сицамъ .

На ѳ҃ мъ часѣ̀ , трᲂпарѝ : Є҆гда̀ сни́де к̾ сме́рти . сла́ва . Мѷрѡно́сицамъ жена́мъ .

кᲂнда́къ : Ра́дᲂватисѧ мѷрѡно́сицамъ .

На литꙋргі́и , бл҃же́нна , гла́сꙋ , на́ ѕ҃ .

Во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . бл҃же́ни пла́чꙋщїи , ꙗ҆́кѡ ті́и ᲂу҆тѣ́шатсѧ . бл҃же́ни кро́тцыи , ꙗ҆́кѡ ті́и наслѣ́дѧтъ зе́млю .

пᲂе́мъ : Гла́съ ти прино́симъ разбо́йничь , и҆ мо́лимсѧ , пᲂмѧнѝ на́съ гдⷭ҇и во црⷭ҇твїи свᲂе́мъ .

Гла́съ , в҃ . бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Крⷭ҇тъ тво́й приво́димъ , в̾ прᲂще́нїе сᲂгрѣше́нїемъ , є҆го́же на́съ ра́ди прїѧ́тъ чл҃кᲂлю́бче .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Сме́ртїю твᲂе́ю гдⷭ҇и ᲂу҆мертви́лъ є҆сѝ сме́рть , свᲂи́мъ же вᲂскрⷭ҇нїемъ сп҃се мо́й , ми́ръ прᲂсвѣти́лъ є҆сѝ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Пᲂклᲂнѧ́емсѧ твᲂемꙋ̀ влⷣко пᲂгребе́нїю и҆ вᲂста́нїю [пᲂкло́н̾] , и҆́мъ же ѿ тлѣ́нїѧ и҆зба́вилъ є҆сѝ ми́ръ чл҃кᲂлю́бче .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Мѷрѡно́сицы срѣ́тъ вᲂскр҃съ ѿ́ грᲂба и҆ ре́къ , вᲂзвѣсти́ти твᲂи́мъ ᲂу҆ченикѡ́мъ , вᲂста́нїе твᲂѐ . Ꙗ҆́кᲂже ѿ́ грᲂба вᲂскр҃си́въ а҆да́ма пребл҃гі́и , си́це ꙗ҆́кѡ бг҃ъ дре́вᲂмъ ми́ръ спа́слъ є҆сѝ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѻ҆ц҃а прᲂсла́вимъ , сн҃ꙋ пᲂклᲂни́мсѧ [пᲂкло́н̾] , и҆ дх҃а ст҃а́гѡ всѝ вѣ́рнїи вᲂспᲂе́мъ .

и҆ =ѿ кано́на , пѣ́снь ѕ҃ , на д҃ . Гла́съ , то́йже . бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . П=лащани́цею тѧ̀ хрⷭ҇тѐ ѡ҆бви́въ і҆ѡ́сифъ бл҃гᲂѡ҆бра́зныи , во́ грᲂбѣ пᲂлᲂжѝ . сми́рнᲂю же пᲂма́завъ разᲂре́нꙋю цр҃кᲂвь твᲂегѡ̀ тѣлесѐ , привалѝ ка́мень вели́кїи ко́ грᲂбꙋ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Жены̀ мѷрѡно́сицы , что̀ спѣшитѐ про́чее , что́ же живо́мꙋ мѵ́ро принᲂша́ете . вᲂскр҃се хрⷭ҇то́съ , ꙗ҆́кᲂже пре́же речѐ , преста́ните ѿ сле́зъ , преше́дше на ра́дᲂсть . сла́ва . Трⷪ҇цꙋ въ є҆ди́нствѣ вᲂспѣва́емъ вѣ́рнїи , съ сн҃ᲂмъ ѻ҆ц҃а сла́вѧще , и҆ дх҃а є҆динᲂсꙋ́щна сн҃ꙋ , и҆ сꙋ́ща во ѻ҆ц҃ѣ , сᲂбез̾нача́льна и҆ приснᲂсꙋ́щна бг҃а . и҆ ны́нѣ . Во́ чревѣ невᲂздѣ́ланнѡ зачала̀ є҆сѝ чⷭ҇таѧ нетлѣ́нїѧ гро́здъ , ꙗ҆́кѡ винᲂгра́дъ , ѿ него́ же и҆стека́етъ на́мъ ꙗ҆́кѡ вино̀ без̾сме́ртїѧ стрꙋѧ̀ , вѣ́чныѧ жи́зни .

Пᲂвхо́дѣ , трᲂпарѝ : Є҆гда̀ сни́де къ сме́рти . Бл҃гᲂѡбра́зныи і҆ѡ́сифъ . Мѷрѡно́сицамъ жена́мъ . сла́ва , кᲂнда́къ : Ра́дᲂватисѧ мѷрѡно́сицамъ . и҆ ны́нѣ , кᲂнда́къ , па́сцѣ . прᲂки́менъ , ѱало́мъ дв҃дᲂвъ . спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . сти́хъ : къ тебѣ̀ гдⷭ҇и вᲂз̾зᲂвꙋ̀ , бж҃е мо́й непремᲂлчѝ ѿ менѐ . а҆пⷭ҇лъ , въ дѣѧ́нїихъ . заⷱ҇ , ѕ҃і . а҆ллилꙋ́їѧ . бл҃гᲂвᲂли́лъ є҆сѝ гдⷭ҇и зе́млю твᲂю̀ , вᲂзврати́лъ є҆сѝ плѣ́нъ і҆а́кѡвль . сти́хъ : млⷭ҇ть и҆ и҆́стина срѣто́стѣсѧ , пра́вда и҆ ми́ръ ѡ҆блᲂбыза́стасѧ . є҆ѵⷢ҇а́лїе , ѿ ма́рка . заⷱ҇ , ѯ҃ѳ . прича́стенъ , тѣ́ло хрⷭ҇то́во . дрꙋгі́и , хвали́те гдⷭ҇а с̾ небе́съ .

Въ тꙋ́же , недѣ́лю , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , в҃ . поⷣ . є҆гда̀ ѿ́ древа . Ꙗ҆ви́сѧ свѣ́тъ непристꙋ́пныи на́мъ , сїѧ́ѧ и҆́з̾ грᲂба краснѡ̀ хрⷭ҇то́съ гдⷭ҇ь . а҆́дъ плѣни́сѧ , и҆ дїа́вᲂлъ ᲂу҆праздни́сѧ . ра́дꙋютсѧ мирсті́и кᲂнцы̀ , ликᲂствꙋ́етъ тва́рь . вᲂспѣва́етъ пра́зднꙋющи цр҃кви хрⷭ҇то́ва , па́мѧть і҆ѡ́сифа премꙋ́драгѡ , и҆ мѷрѡно́сицъ с̾ни́мъ же́нъ , пᲂчита́етъ тᲂржество̀ . Ꙗ҆ви́сѧ тᲂржество̀ на́мъ бг҃ᲂлѣ́пныхъ мѷрѡно́сицъ , и҆ і҆ѡ́сифа премꙋ́драгѡ , ꙗ҆́кᲂже дрꙋгі́и ра́й и҆сто́чникъ пᲂдаѧ̀ жи́зни , бл҃гᲂда́тныѧ во́ды и҆стᲂча́ющь ми́рꙋ , и҆ напаѧ́ющь вᲂста́нїѧ хрⷭ҇то́ва стрꙋѧ́ми на землѝ , сᲂбо́ры вѣ́рныхъ пра́зднꙋющихъ и҆ взыва́ющихъ , сла́ва да́вшемꙋ свᲂѐ вᲂскрⷭ҇нїе кᲂнце́мъ . Равнѡ̀ ᲂу҆́бѡ ѽ бл҃гᲂѡ҆бра́зныи і҆ѡ́сифе , тебѐ ꙗ҆́кѡ херꙋви́мскꙋю кᲂлесни́цꙋ , цр҃ѧ хрⷭ҇та̀ со крⷭ҇та̀ сне́мше , и҆ на ра́мꙋ свᲂе́ю нᲂси́вша ᲂу҆бл҃жа́емъ . и҆ чте́мъ , рꙋ́цѣ твᲂѝ и҆ ѻ҆́чи бжⷭ҇твенїи , и҆ дла́ни твᲂѧ̀ , и҆́маже сл҃нца сло́ва и҆ бг҃а нᲂсѧ̀ во́ грᲂбъ пᲂлᲂжи́лъ є҆сѝ . тѣ́мже и҆ па́мѧть твᲂю̀ , любо́вїю пᲂчита́емъ .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , а҃ . Мѷрѡно́сицы жены̀ , ко́ грᲂбꙋ что̀ прїидо́сте ; что̀ и҆́щете жива́гѡ в̾ ме́ртвыхъ , вᲂскр҃се гдⷭ҇ь дерза́йте вᲂпїе́тъ а҆́нг҃лъ .

На стихо́внѣ , стихѣ́ры . гла́съ , в҃ . Первᲂвѣ́чнᲂмꙋ ѿ ѻ҆ц҃а ро́ждьшꙋсѧ бж҃їю сло́вꙋ , вᲂпло́щшꙋсѧ ѿ дв҃ы мр҃і́и , прїиди́те пᲂклᲂни́мсѧ , распѧ́тїе бо претерпѣ́въ , и҆ пᲂгребе́нїю предаде́сѧ , ꙗ҆́кѡ са́мъ вᲂсхᲂтѣ̀ , и҆ вᲂскр҃съ и҆з̾ ме́ртвыхъ , спасе́ мѧ блꙋдѧ́щаго челᲂвѣ́ка .

сти́хъ : к̾ тебѣ̀ вᲂзведо́хъ ѻ҆́чи . Сᲂгрѣши́хъ ти хрⷭ҇тѐ сп҃се , ꙗ҆́кѡ блꙋ́дныи сн҃ъ , прїими́ мѧ ѻ҆́ч҃е ка́ющасѧ , и҆ пᲂми́лꙋй мѧ бж҃е .

сти́хъ : пᲂми́лꙋй на́съ гдⷭ҇и . мⷱ҇ꙋ . И҆́же земны́ѧ сла́дᲂсти невᲂз̾лю́бльше страстᲂте́рпцы , нбⷭ҇нымъ бл҃ги́мъ спᲂдо́бишасѧ , и҆ а҆́нг҃лѡмъ сᲂгра́ждане бы́ша , гдⷭ҇и мᲂли́твами и҆́хъ , пᲂми́лꙋй и҆ спасѝ на́съ . сла́ва , и҆ ны́нѣ . гла́съ , а҃ . Со́ страхᲂмъ прїидо́ша жены̀ на́ грᲂбъ , мастьмѝ пᲂма́зати тѣ́ло твᲂѐ тща́щесѧ , и҆ сѐ не ѡ҆брѣ́тше , недᲂꙋмѣ́ѧхꙋсѧ к̾ себѣ̀ , неразꙋмѣва́юще вᲂскрⷭ҇нїѧ . но пред̾ста́въ и҆́мъ а҆́нг҃лъ и҆ речѐ , вᲂскр҃се хрⷭ҇то́съ , да́рꙋѧ на́мъ ве́лїю ми́лᲂсть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ пнⷣльникъ , г҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречⷭ҇тᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть . два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Мѷрѡно́сицы ра́нѡ бы́вше , и҆ гро́бъ то́щь ви́дѣвше , а҆пⷭ҇лѡмъ глаго́лахꙋ , тлю̀ низ̾лᲂжѝ крѣ́пкїи , и҆ и҆́же во а҆́дѣ вᲂсхи́ти ᲂу҆́зники , прᲂпᲂвѣ́дите со дерзнᲂве́нїемъ , ꙗ҆́кѡ вᲂскр҃се хрⷭ҇то́съ бг҃ъ , да́рꙋѧи на́мъ ве́лїю млⷭ҇ть . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Ꙗ҆́кѡ во́лны мᲂрскі́ѧ вᲂста́ша намѧ̀ , без̾зако́нїѧ мᲂѧ̀ , и҆ ꙗ҆́кѡ кᲂра́бль въ пꙋчи́нѣ , а҆́зъ є҆ди́нъ пᲂгрꙋжа́юсѧ сᲂгрѣше́нїи мᲂи́ми . но в̾ ти́хᲂе приста́нище пᲂкаѧ́нїѧ , наста́ви мѧ гдⷭ҇и и҆ спаси́ мѧ .= сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Тебѐ ѡ҆дѣва́ющагѡ нб҃о ѻ҆блакѝ , и҆мꙋ́ще ст҃і́и ѻ҆дѣѧ́нїе въ ми́рѣ , мꙋ́ки ѿ без̾зако́нникъ претерпѣ́ша , и҆ ле́сть и҆́дᲂльскꙋю ᲂу҆праздни́ша . тѣ́хъ мл҃твами и҆ на́съ свᲂбᲂдѝ ѿ неви́димагѡ врага̀ сп҃се , и҆ спасѝ на́съ . =сла́ва , и҆ ны́нѣ , боⷢ҇ . Милᲂсе́рдїѧ сꙋ́щи и҆сто́чникъ , млⷭ҇ти спᲂдо́би на́съ бцⷣе , при́зри на́ люди сᲂгрѣ́шшїѧ , ꙗ҆вѝ ꙗ҆́кѡ прⷭ҇нѡ си́лꙋ твᲂю̀ , на тѧ́ бо ᲂу҆пᲂва́юще , ра́дꙋисѧ вᲂпїе́мъ ти , ꙗ҆́кᲂже и҆нᲂгда̀ гаврїи́лъ , беспло́тнымъ а҆рхистрати́гъ .

По в҃ , стихᲂло́гїи , сѣда́ленъ . гла́съ , в҃ . Бл҃гᲂво́нїѧ пᲂгреба́льнаѧ жены̀ прине́сше , гла́съ а҆́нг҃льскїи ѿ́ грᲂба слы́шахꙋ , преста́ните ѿ сле́зъ , и҆ въ мѣ́стѡ печа́ли ра́дᲂсть прᲂпᲂвѣ́дите , и҆ вᲂзᲂпі́йте пᲂю́ще , ꙗ҆́кѡ вᲂскр҃се хрⷭ҇то́съ гдⷭ҇ь , бл҃гᲂи҆зво́ливыи спастѝ ꙗ҆́кѡ бг҃ъ ро́дъ чл҃ческїи . сла́ва , и҆ нн҃ѣ , то́йже .

та́же , вᲂскрⷭ҇нїе хрⷭ҇то́во , а҃ . ѱл҃о́мъ , н҃ .

кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , в҃ . Всѧ́ко дыха́нїе и҆ всѧ̀ тва́рь , тебѐ сла́витъ гдⷭ҇и , ꙗ҆́кѡ крⷭ҇то́мъ сме́рть ᲂу҆праздни́лъ є҆сѝ . да пᲂка́жеши лю́демъ , є҆́же и҆з̾ ме́ртвыхъ твᲂѐ вᲂскрⷭ҇нїе . ꙗ҆́кѡ є҆ди́нъ чл҃кᲂлю́бецъ . двⷤа . Вᲂпїю́ ти хрⷭ҇тѐ сп҃се мытаре́вымъ гла́сᲂмъ , ѡ҆чи́сти мѧ̀ ꙗ҆́кᲂже ѻ҆́нᲂго , и҆ пᲂми́лꙋй мѧ бж҃е . мⷱ҇ꙋ . По хрⷭ҇тѐ пᲂстрада́сте да́же до сме́рти , ѽ страстᲂте́рпцы мч҃нцы , дш҃а бо и҆́мате на́ нб҃сѣхъ в̾ рꙋцѣ̀ бж҃їи , и҆ по́ мирꙋ всемꙋ̀ пᲂчита́еми сꙋ́ть ва́ши мо́щи . сщ҃е́нницы и҆ цр҃їе пᲂкланѧ́ютсѧ , и҆ лю́дїе всѝ ра́дꙋющесѧ ѡ҆бы́чно вᲂпїе́мъ , со́нъ че́стенъ пред̾ гдⷭ҇емъ , сме́рть прпⷣбныхъ є҆гѡ̀ . сла́ва , и҆ ны́нѣ . гла́съ , в҃ . Прїидо́ша на́ грᲂбъ магдалы́нѧ , и҆ дрꙋга́ѧ ма́рїѧ и҆́щꙋщѣ гдⷭ҇а , и҆ а҆́нг҃ла ѡ҆брѣто́ша ꙗ҆́кѡ мо́лнїю сѣдѧ́ща на ка́мени , и҆ гл҃юща к̾ни́мъ , что̀ и҆́щетѣ жива́го с̾ ме́ртвыми ; вᲂскр҃се ꙗ҆́кᲂже речѐ , в̾ галиле́и тᲂгѡ̀ ѡ҆брѧ́щете . к̾ немꙋ́ же вᲂзᲂпїе́мъ , вᲂскр҃съ и҆з̾ ме́ртвыхъ гдⷭ҇и сла́ва тебѣ̀ .

На стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . Н=ачни́те лю́дїе ѱало́мски ,꙳ по́йте хрⷭ҇та̀ с̾ ра́дᲂстїю .꙳ па́сха ве́лїѧ вᲂсїѧ̀ на́мъ ,꙳ вᲂскр҃съ и҆́з̾ грᲂба хрⷭ҇то́съ жизнᲂда́вецъ ,꙳ и҆ и҆зба́витель дш҃а́мъ на́шимъ .

сти́хъ : бл҃гᲂвᲂли́лъ є҆сѝ гдⷭ҇и зе́млю твᲂю̀ ,꙳ вᲂз̾врати́лъ є҆сѝ плѣ́нъ і҆а́кѡвль . Ра́дᲂватисѧ мѷрѡно́сицамъ ре́къ хрⷭ҇тѐ ,꙳ є҆́ввино ѡ҆сꙋжде́нїе разᲂрѧ́еши .꙳ и҆ ра́дᲂсть ᲂу҆ченико́мъ вᲂскр҃съ пᲂсыла́еши ,꙳ прᲂпᲂвѣ́дати є҆́же и҆́з̾ грᲂба ,꙳ тридне́внᲂе твᲂѐ вᲂскрⷭ҇нїе .

сти́хъ : ми́лᲂсть и҆ и҆́стина срѣто́стѣсѧ ,꙳ пра́вда и҆ ми́ръ ѡ҆блᲂбыза́стасѧ . Па́схꙋ честнꙋ́ю и҆ ст҃ꙋ́ю ,꙳ хрⷭ҇то́съ на́мъ ѡ҆зарѝ ,꙳ прїиди́те всѝ прᲂсвѣти́вше дꙋ́шы ,꙳ се́бо дн҃ь прᲂсїѧ̀ ,꙳ в̾ се́й вᲂз̾ра́дꙋемсѧ и҆ вᲂз̾весели́мсѧ . сла́ва , и҆ ны́нѣ . гла́съ , в҃ . Пᲂчто̀ мѵ́ро со слеза́ми , ѽ ᲂу҆чени́цы и҆злива́ете ; ка́мень ѿвали́сѧ , и҆ гро́бъ и҆стᲂщи́сѧ ; ви́дите тлю̀ живᲂто́мъ пᲂпра́нꙋ , печа́ти свидѣ́тельствꙋюща ꙗ҆́вственѣ , спѧ́щїѧ лю́тѣ стра́жники непᲂкᲂри́выхъ , сме́ртнᲂе спасе́сѧ пло́тїю бж҃їею . а҆́дъ рыда́етъ , те́кше ра́дᲂсть рцы́те а҆пⷭ҇лѡмъ , ᲂу҆мертви́выи сме́рть хрⷭ҇то́съ , первᲂрᲂжде́нъ и҆з̾ ме́ртвыхъ , ва́съ варѧ́етъ в̾ галиле́и .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

Въ пнⷣе , на блаже́ннахъ , трипѣ́снецъ , є҆мꙋ́же краегране́сїе : пᲂе́тъ сїѧ̀ і҆ѡ́сифъ . гла́съ , в҃ . пѣ́снь , а҃ . і҆рмо́съ . грѧди́те лю́дїе .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Пᲂвѣ́шенъ на крⷭ҇тѣ̀ во́лею хрⷭ҇тѐ , тве́рдаѧ црⷭ҇твїѧ а҆́дᲂва разрꙋши́лъ є҆сѝ , и҆ вѣ́чныѧ ᲂу҆́зники и҆зве́лъ є҆сѝ мꙋ́жествᲂмъ , сла́ва держа́вѣ твᲂе́й .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Прїиди́те речѐ мѷрѡно́сицамъ а҆́нг҃лъ , ви́дѣвше мѣ́сто и҆дѣ́же лежа́ше всѣ́хъ гдⷭ҇ь , сегѡ̀ вᲂскрⷭ҇нїе , дрꙋго́мъ є҆гѡ̀ прᲂпᲂвѣ́дите .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Въ но́вѣмъ дре́вле гро́бѣ тебѐ пᲂлᲂжѝ , і҆ѡ́сифъ пра́ведныи , ѡ҆бнᲂви́вшагѡ чл҃ческᲂе и҆стлѣ́вшее є҆стество̀ , живᲂда́вче вᲂскрⷭ҇нїемъ твᲂи́мъ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Ви́дѣла є҆сѝ бг҃ᲂбл҃гᲂда́тнаѧ хрⷭ҇та̀ ѿ ме́ртвыхъ вᲂсїѧ́вша пра́вдѣ сл҃нце . є҆го́же мᲂлѝ всѣ́хъ прᲂсвѣти́ти срⷣца̀ вᲂспѣва́ющихъ тѧ .

пѣ́снь , и҃ . і҆рмо́съ . ве́щь ѻ҆́гненнꙋю .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Вᲂз̾дви́женаго на́ крⷭ҇тъ , и҆ пᲂгребе́на пло́тїю хᲂтѣ́нїемъ , и҆ сᲂкрꙋши́вша врата̀ желѣ́знаѧ и҆ вереѝ а҆́дᲂвы , прᲂсла́вимъ гдⷭ҇а вᲂста́вшагѡ тридне́внѡ во сла́вѣ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Да ра́дꙋетсѧ нб҃о , да весели́тсѧ землѧ̀ с̾ чл҃ки , хрⷭ҇то́съ вᲂскр҃се , и҆ свᲂи́мъ ᲂу҆ченико́мъ ꙗ҆ви́сѧ . и҆́м̾же сᲂвᲂдвᲂрѧ́ѧсѧ , си́хъ весе́лїѧ и҆спо́лни срⷣца̀ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Слезѧ́щимъ жена́мъ , ра́дᲂсть прᲂвᲂз̾глаша́етъ жизнᲂда́вецъ , прикᲂснꙋ́вшимсѧ є҆гѡ̀ сщ҃е́ннымъ нᲂга́мъ . и҆́х̾же шꙋ́ма дре́вле ᲂу҆бᲂѧ́вшисѧ прамт҃и є҆́вва внꙋ́трь раѧ̀ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . трⷪ҇ченъ . Є҆ди́нᲂгѡ бг҃а славᲂсло́вѧ сᲂста́вы тремѝ , є҆ди́нѣмъ же є҆стество́мъ , ѻ҆ц҃а и҆ сло́ва , и҆ дх҃а бжⷭ҇твена пра́ва , зᲂвꙋ́ще , по́йте гдⷭ҇а , и҆ превᲂзнᲂси́те є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Сщ҃е́нными гла́сы мт҃рь бж҃їю пѣснᲂсло́вимъ , ꙗ҆́кѡ вы́шнихъ чино́въ ст҃ѣ́йшꙋ ꙗ҆́вѣ , и҆ бжⷭ҇твеныи мо́стъ превᲂдѧ́щь к̾ преми́рнымъ ликᲂстᲂѧ́нїемъ челᲂвѣ́ки .

пѣ́снь , ѳ҃ . і҆рмо́съ . и҆́же ѿ́ бг҃а бг҃а сло́ва .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ѽ є҆вре́йскагѡ гнѣ́ва , ка́кѡ на́ древѣ без̾ пра́вды ѡ҆сꙋжда́ютъ ᲂу҆́мрети хрⷭ҇та̀ , пра́ведна є҆ди́нагѡ сꙋ́ща , и҆ ме́ртвымъ и҆́же во а҆́дѣ вдыха́юща жи́знь бг҃ᲂнача́льнѡ . є҆го́же бжⷭ҇твенᲂе вᲂскрⷭ҇нїе сᲂгла́снѡ вᲂспᲂе́мъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Печа́темъ надлежа́щемъ , вᲂскр҃слъ є҆сѝ ѿ́ грᲂба всѣ́хъ вᲂскрⷭ҇нїе хрⷭ҇тѐ , и҆ ᲂу҆ченико́мъ ꙗ҆ви́лсѧ є҆сѝ . недᲂвѣ́дᲂмымъ си́хъ ᲂу҆ча̀ . и҆ и҆ди́те вᲂпїѧ̀ в̾ ве́сь ми́ръ , прᲂпᲂвѣ́дающе сла́вꙋ мᲂю̀ .

сла́ва . Вᲂста́нїѧ сі́и всест҃ы́и дн҃ь , ᲂу҆тѣше́нїе сы́и на́мъ , и҆ весе́лїе ра́дᲂстнѡ , вѣ́рныхъ сᲂзыва́етъ бжⷭ҇твенѣ пра́зднᲂвати и҆ вᲂпи́ти , ѻ҆́ч҃е и҆ сн҃е и҆ бжⷭ҇твеныи дш҃е , сла́ва тебѣ̀ .

и҆ ны́нѣ , боⷢ҇ . Свѣтᲂрᲂди́тельнице дв҃о , свѣ́тᲂмъ сѝ бжⷭ҇твенымъ ѡ҆зарѝ на́ша мы́сли и҆ срⷣца̀ , мл҃твами тѝ , стрⷭ҇те́й мглꙋ̀ раз̾сыпа́ющи , и҆ всѣ́хъ ѡ҆бе́щники невече́рнѧгѡ днѐ , сᲂдѣва́ющи бл҃гᲂда́тїю .

Въ пнⷣльникъ , г҃ , нлⷣи , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , и҃ . поⷣ . ѽ =пресла́внᲂе чꙋ́до . Х=рⷭ҇тꙋ̀ ꙗ҆́вльшꙋсѧ ,꙳ стᲂпа́мъ пᲂслѣ́дꙋюще честны́ѧ мѷрѡно́сицы ,꙳ тᲂмꙋ̀ ᲂу҆гᲂди́ти ,꙳ нра́вᲂмъ ᲂу҆се́рднымъ и҆ пра́вᲂстїю .꙳ ни ᲂу҆ме́рша сегѡ̀ ѡ҆ста́висте ,꙳ но ше́дше мѵ́ра со слеза́ми принесо́сте ,꙳ млⷭ҇тивнѡ дви́жꙋщесѧ .꙳ тѣ́мже ва́шꙋ па́мѧть ,꙳ всесщ҃е́ннꙋю тᲂржествꙋ́емъ . Бжⷭ҇твеныхъ же́нъ сᲂсло́вїе ,꙳ ви́дѣти жела́ѧ жи́знь ᲂу҆мертви́вшꙋюсѧ во́ грᲂбѣ ,꙳ но́щїю прїидо́ша ,꙳ и҆ ѿ а҆́нг҃ла слы́шаша ,꙳ ꙗ҆́кᲂже прᲂречѐ хрⷭ҇то́съ вᲂста̀ ,꙳ сᲂтща́нїемъ сегѡ̀ ᲂу҆ченико́мъ рцы́те ,꙳ и҆ ᲂу҆ны́нїе ѿ дꙋшѝ ѿри́ните ,꙳ вмѣ́стѡ пла́ча ,꙳ ра́дᲂсть неи҆з̾гл҃аннꙋю вᲂспрїими́те . Дне́сь вѣ́рнїи ликꙋ́емъ ,꙳ въ па́мѧти ва́шей мѷрѡно́сицы ,꙳ сла́вѧще и҆́же ва́съ прᲂсла́вльшаго ,꙳ пребл҃га́го гдⷭ҇а .꙳ є҆го́же мᲂли́те непреста́ннѡ всечⷭ҇тны́ѧ ,꙳ вѣ́чнꙋющїѧ сла́вы ᲂу҆лꙋчи́ти на́мъ ,꙳ и҆ свѣ́тлᲂсти ст҃ы́хъ ,꙳ и҆мꙋ́ще к̾ немꙋ̀ дерзнᲂве́нїе всегда̀ ,꙳ бг҃ᲂблаже́нныѧ .

та́же , стихѣ́ры , въ минѣ́и , г҃ . сла́ва , и҆ ны́нѣ . гла́съ , в҃ . Мѷрѡно́сицы ра́но бы́вша , и҆ гро́бъ тво́й сᲂтща́нїемъ дᲂстиго́ша , и҆ и҆ска́хꙋ тебѐ хрⷭ҇тѐ , є҆́же пᲂма́зати пречи́стᲂе тѣ́ло твᲂѐ , и҆ а҆́нг҃лᲂвыми глаго́лы ѡ҆гласи́вшесѧ , радᲂстнᲂтво́рныѧ ѻ҆́бразы а҆пⷭ҇лѡмъ прᲂпᲂвѣ́дахꙋ , ꙗ҆́кѡ вᲂскр҃се нача́льникъ спасе́нїѧ на́шегѡ , плѣни́въ сме́рть , ми́рꙋ же да́рꙋѧ живо́тъ вѣ́чныи , и҆ ве́лїю млⷭ҇ть .

На стихо́внѣ , стихѣ́ры . гла́съ , в҃ . Хрⷭ҇то́съ сп҃съ на́шъ , є҆́же наны̀ рꙋкᲂписа́нїе пригво́ждь на крⷭ҇тѣ̀ растерза̀ , и҆ сме́рти держа́вꙋ , ᲂу҆праздни́лъ є҆́сть , пᲂкланѧ́емсѧ є҆гѡ̀ тридне́внᲂмꙋ вᲂскрⷭ҇нїю .

сти́хъ : к̾ тебѣ̀ вᲂз̾ведо́хъ ѻ҆́чи . Без̾зако́нїѧ мᲂѧ̀ пре́зри гдⷭ҇и , и҆́же ѿ дв҃ы рᲂжде́исѧ , и҆ срⷣце мᲂѐ ѡ҆чи́сти , цр҃квь сїѐ твᲂрѧ̀ ст҃о́мꙋ твᲂемꙋ̀ дх҃ꙋ . не ѿри́ни менѐ ѿ твᲂегѡ̀ лица̀ , и҆́же без̾мѣ́рнꙋю и҆мѣ́ѧи ве́лїю млⷭ҇ть .

сти́хъ : пᲂми́лꙋй на́съ гдⷭ҇и . мⷱ҇ꙋ . Ст҃ы́мъ мꙋ́ченикѡмъ мᲂлѧ́щимсѧ ѡ҆ на́съ , и҆ хрⷭ҇та̀ пᲂю́щимъ , всѧ́ка ле́сть преста̀ , и҆ чл҃ческїи ро́дъ вѣ́рᲂю спаса́етсѧ . сла́ва , и҆ ны́нѣ . гла́съ , в҃ . Мѷрѡно́сицы жены̀ , ѕѣлѡ̀ ра́нѡ а҆рама́ты взе́мше , гдⷭ҇нѧ гро́ба дᲂстиго́ша , и҆ ꙗ҆́же ᲂу҆́бѡ ненадѣ́ѧхꙋсѧ ѡ҆брѣ́тше , и҆ пᲂмышлѧ́хꙋ в̾ себѣ̀ , бᲂѧ́щесѧ ка́меннаго ѿвале́нїѧ , и҆ дрꙋга̀ к̾ дрꙋзѣ́й гл҃ахꙋ , гдѣ̀ сꙋ́ть печа́ти грᲂбны́ѧ ; гдѣ̀ є҆́сть пила́тᲂво во́инство , и҆ ѡ҆па́снᲂе ᲂу҆тверже́нїе ; бы́сть же вᲂз̾вѣсти́тель неразꙋмѣва́ющимъ жена́мъ , блиста́ѧисѧ а҆́нг҃лъ , и҆ глаго́лѧ к̾ ни́мъ , что̀ съ рыда́нїемъ и҆́щете жива́го , ѡ҆жи́вльшагѡ ро́дъ чл҃ческїи ; вᲂста́ бо хрⷭ҇то́съ бг҃ъ на́шъ и҆з̾ ме́ртвыхъ ꙗ҆́кѡ всеси́ленъ , пᲂдаѧ̀ всѣ́мъ нетлѣ́нїе и҆ жи́знь , и҆ прᲂсвѣще́нїе и҆ ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Во вто́рникъ , г҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречⷭ҇тᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть . два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Ка́мень гро́бныи запечатлѣ́ти невᲂз̾брани́въ , ка́меню вѣ́ры , вᲂскрⷭ҇нїе по́далъ є҆сѝ всѣ́мъ , гдⷭ҇и сла́ва тебѣ̀ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . А҆́зъ є҆́смь дре́во непло́днᲂе гдⷭ҇и , пᲂкаѧ́нїѧ плᲂда̀ нетвᲂрѧ̀ ѿ ню́дъ , и҆ пᲂсѣче́нїѧ бᲂю́сѧ , и҆ ѻ҆гнѧ̀ ѻ҆́нᲂгѡ ᲂу҆страша́юсѧ не ᲂу҆гаса́ющагѡ . тѣ́мже тѧ мᲂлю̀ , пре́же ѻ҆́нᲂѧ бѣды̀ ѡ҆братѝ и҆ спаси́ мѧ . =сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Прᲂсвѣти́выи ст҃ы́ѧ свᲂѧ̀ , па́че зла́та , и҆ прᲂславле́и прпⷣбныѧ , ꙗ҆́кѡ бг҃ъ . тѣ́ми ᲂу҆мᲂле́нъ быва́ѧ хрⷭ҇тѐ бж҃е , жи́знь на́шꙋ ᲂу҆мирѝ ꙗ҆́кѡ чл҃кᲂлю́бецъ , и҆ мл҃твꙋ и҆спра́ви ꙗ҆́кѡ кади́ло , є҆ди́не во ст҃ы́хъ пᲂчива́ѧи . сла́ва , и҆ ны́нѣ , боⷢ҇ . Бжⷭ҇твенагѡ є҆стества̀ бы́хᲂмъ ѻ҆́бщницы , тᲂбо́ю бцⷣе при́снѡ дв҃о , бг҃а бо на́мъ вᲂплᲂще́нна рᲂдила̀ є҆сѝ . тѣ́мже по́ дᲂлгꙋ тѧ всѝ бл҃гᲂче́стнѡ велича́емъ .

По в҃ , стихᲂло́гїи , сѣда́ленъ . гла́съ , в҃ . Мѵ́ро жены̀ принесо́ша тебѣ̀ сп҃се , и҆ска́хꙋ сᲂтща́нїемъ пᲂма́зати твᲂѐ тѣ́ло . и҆ гла́съ слы́шахꙋ а҆рха́нг҃лѡвъ , сѐ вᲂста̀ жизнᲂда́вецъ и҆ гдⷭ҇ь , пᲂпра́въ а҆́да и҆ сме́рть .= сла́ва , и҆ ны́нѣ , то́йже . та́же , в=ᲂскрⷭ҇нїе хрⷭ҇то́во , а҃ . ѱл҃о́мъ , н҃ .

кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , в҃ . Да рекꙋ́тъ і҆ꙋде́е , ка́кѡ во́ини пᲂгꙋби́ша стрегꙋ́щїи цр҃ѧ ; пᲂчто́ бо ка́мень несᲂхранѝ , ка́менѧ жи́зни ; и҆лѝ пᲂгребе́наго дадѧ́тъ ; и҆лѝ вᲂскрⷭ҇шемꙋ да пᲂкло́нѧтсѧ , глаго́люще съ на́ми , сла́ва мно́жествꙋ щедро́тъ твᲂи́хъ , сп҃се на́шъ сла́ва тебѣ̀ . двⷤа . Сᲂдѣ́ѧнныхъ мᲂи́хъ ѕѡ́лъ , пᲂмышлѧ́ю непᲂдо́бнаѧ , ко твᲂи́мъ прибѣга́ю щедро́тамъ , мытарю̀ пᲂдо́бѧсѧ , и҆ блꙋдни́цѣ слези́вшей , и҆ блꙋ́днᲂмꙋ сн҃ꙋ . тѣ́мже припа́даю ти млⷭ҇тиве , пре́жде да́же не ѡ҆сꙋди́ши менѐ , пᲂщади́ мѧ бж҃е и҆ пᲂми́лꙋй мѧ . мⷱ҇ꙋ . Крⷭ҇тъ хрⷭ҇то́въ вᲂспрїи́мше ст҃і́и мч҃нцы , ѻ҆рꙋ́жїе непᲂбѣди́мо , всю̀ дїа́вᲂлю крѣ́пᲂсть раз̾рꙋши́сте . и҆ прїе́мше вѣнцы̀ нбⷭ҇ныѧ . стѣна̀ на́мъ бы́ша , ѡ҆ на́съ мᲂлѧ́щесѧ . сла́ва , и҆ ны́нѣ . гла́съ , ѕ҃ . Мѷрѡно́сицы жены̀ гро́ба твᲂегѡ̀ дᲂше́дше , и҆ печа́ти гро́бныѧ ви́дѣвше , не ѡ҆брѣто́ша же пречⷭ҇тагѡ тѣ́ла твᲂегѡ̀ , и҆ рыда́ющи сᲂтща́нїемъ прїидо́ша гл҃юще , кто̀ ᲂу҆кра́де на́ше ᲂу҆пᲂва́нїе ; кто̀ взѧ́тъ ме́ртва на́га сми́рнᲂю пᲂма́зана , мт҃рьне є҆ди́но ᲂу҆тѣше́нїе ; ѽ ка́кѡ и҆́же ме́ртвыѧ ѡ҆живлѧ́ѧи ᲂу҆мерщвлѧ́етсѧ , и҆ и҆́же а҆́да и҆спрᲂве́ргъ , ка́кѡ пᲂгреба́етсѧ ; но вᲂскрⷭ҇нѝ сп҃се самᲂвла́стнѡ , ꙗ҆́кᲂже ре́клъ є҆сѝ тридне́внѡ , спаса́ѧ дш҃а на́ша .

На стихо́внѣ , стихѣ́ры . гла́съ , в҃ . поⷣ . є҆гда̀ ѿ́ древа .= Р=а́дꙋютсѧ ᲂу҆чени́цы хрⷭ҇то́вы , ꙗ҆́же ѿ а҆́нг҃ла гл҃ы ᲂу҆слы́шавше , тѣ́мже вᲂскрⷭ҇нїе , и҆́же на́съ ра́ди въ ме́ртвыхъ вмѣни́вшасѧ ᲂу҆вѣ́дѣвше . а҆́ще и҆ пе́рвѣе мѷрѡно́сицы ко́ грᲂбꙋ пред̾ста́ша , и҆ рыда́юще хрⷭ҇та̀ , ка́мень сегѡ̀ ви́дѣвше ѿвале́нъ внеза́пꙋ , є҆го́же недᲂмышлѧ́хꙋсѧ прелᲂже́нїю .

сти́хъ : бл҃гᲂвᲂли́лъ є҆сѝ гдⷭ҇и зе́млю твᲂю̀ ,꙳ вᲂз̾врати́лъ є҆сѝ плѣ́нъ і҆а́кѡвль . Не ѿє́млемꙋю и҆ бжⷭ҇твенꙋю ра́дᲂсть принᲂсѧ́ще , бжⷭ҇твенымъ и҆ сщ҃е́ннымъ ᲂу҆ченико́мъ ꙗ҆ви́шасѧ , ᲂу҆чени́цы мѷрѡно́сицы хрⷭ҇то́вы , и҆спо́лнивше пᲂвелѣ́нїе бжⷭ҇твенагѡ а҆́нг҃ла . є҆го́же ᲂу҆жасо́шасѧ бѣлᲂно́снꙋю нᲂсѧ́ща ѻ҆де́ждꙋ , и҆ гл҃юща , плѣне́нъ бы́сть а҆́дъ живᲂтво́рнымъ вᲂскрⷭ҇нїемъ , и҆́же на́съ ра́ди ᲂу҆ме́ршагѡ цр҃ѧ .

сти́хъ : млⷭ҇ть и҆ и҆́стина срѣто́стѣсѧ ,꙳ пра́вда и҆ ми́ръ ѡ҆блᲂбыза́стасѧ . Стрꙋѝ сле́зъ ꙗ҆́кѡ и҆сто́чникъ рыда́юще и҆спꙋсти́ша , бжⷭ҇твеныѧ хрⷭ҇то́вы ᲂу҆чени́цы , глаго́лы ра́дᲂстныѧ принᲂша́ютъ ны́нѣ самᲂви́дцемъ бл҃гᲂда́ти , вᲂзвѣща́юще си́мъ сло́ва вᲂста́нїе , и҆ ю҆́же и҆́з̾ грᲂба ра́дᲂсть . тѣ́мже ско́рѡ ше́дше , и҆ слы́шахꙋ гла́съ пресла́внѡ си́мъ , є҆́же ра́дꙋйтесѧ пᲂвелѣва́ющь . сла́ва , и҆ ны́нѣ . гла́съ , а҃ . Мѷрѡно́сицы жены̀ , ко́ грᲂбꙋ что̀ прїидо́сте ; что̀ и҆́щете жива́гѡ в̾ ме́ртвыхъ , вᲂскр҃се гдⷭ҇ь дерза́йте вᲂпїе́тъ а҆́нг҃лъ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

Во вто́рникъ , на блаже́ннахъ , трипѣ́снецъ , є҆мꙋ́же краегране́сїе : хрⷭ҇тѐ спаси́ мѧ . гла́съ , в҃ . пѣ́снь , в҃ . і҆рмо́съ . внемли́те лю́дїе .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Рꙋка́ма свᲂи́ма сᲂтвᲂри́выи чл҃ка , рꙋ́цѣ пригвᲂзди́лъ є҆сѝ всеси́льне на́ древѣ , вра́жїѧ рꙋкѝ на́съ и҆збавлѧ́ѧ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Разᲂри́въ хрⷭ҇тѐ а҆́дᲂвꙋ несвѣ́тлꙋю темни́цꙋ , и҆ и҆́х̾же стѧжа̀ ᲂу҆́зники , взѧ́лъ є҆сѝ , и҆ са́мъ себѐ ꙗ҆́кѡ си́ленъ вᲂскр҃си́лъ є҆сѝ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Ви́дѣвше тѧ̀ хрⷭ҇тѐ а҆пⷭ҇ли пᲂклᲂни́шасѧ , и҆́з̾ грᲂба тридне́внѡ вᲂста́вшемꙋ , и҆ всю́дꙋ твᲂѐ вᲂста́нїе прᲂпᲂвѣ́даша .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Стенѧ́ще и҆ сле́зы прᲂлива́юще , гро́бъ ст҃ы́и дᲂстиго́ша бжⷭ҇твеныѧ жены̀ . и҆ ᲂу҆чи́ми быва́хꙋ хрⷭ҇то́вѣмъ вᲂскрⷭ҇нїемъ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Всѣ́хъ сᲂдержи́телѧ прїѧ́ла є҆сѝ , всенепᲂро́чнаѧ влⷣчце , сте́ршагѡ а҆́дᲂва врата̀ , и҆ вᲂскр҃сша ꙗ҆́кᲂже речѐ тридне́внѡ .

пѣ́снь , и҃ . і҆рмо́съ . въ кꙋпинѣ̀ мѡѷсе́ю .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . На́ крⷭ҇тъ вᲂз̾несе́сѧ , сᲂвᲂзне́слъ є҆сѝ ми́ра , и҆ пᲂлᲂжи́всѧ сп҃се во́ грᲂбѣ , и҆́же во грᲂбѣ́хъ спѧ́щїѧ вᲂставлѧ́еши , твᲂю̀ славᲂсло́вѧщихъ вели́кꙋю си́лꙋ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ты̀ сᲂше́дъ в̾ ме́ртвыѧ , ᲂу҆мертви́лъ є҆сѝ а҆́дъ , и҆ сᲂкрꙋши́лъ є҆сѝ врата̀ сме́рти и҆ вереѝ , и҆ ѡ҆кᲂва́нныѧ вᲂз̾ве́лъ є҆сѝ мꙋ́жествᲂмъ , всѣ́мъ во спасе́нїе .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ꙗ҆ви́лсѧ є҆сѝ ще́дре свᲂи́мъ ᲂу҆ченико́мъ , во мно́зѣхъ зна́менїихъ , де́ньми четы́редесѧтьми , тѣ́хъ ᲂу҆вѣрѧ́ѧ прᲂпᲂвѣ́дати в̾ ве́сь ми́ръ бг҃а тѧ вᲂста́вша .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ты̀ є҆сѝ всѣ́хъ жи́знь , ты̀ ме́ртвымъ же и҆ живы́мъ ᲂу҆тѣше́нїе сло́ве , и҆ ра́дᲂсть и҆ прᲂсвѣще́нїе вᲂсїѧ́выи и҆з̾ дв҃ы , и҆ вᲂскр҃съ и҆́з̾ грᲂба тридне́внѡ во сла́вѣ .

пѣ́снь , ѳ҃ . і҆рмо́съ . зе́менъ кто̀ слы́ша .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Распны́исѧ тридне́внѡ вᲂскр҃слъ є҆сѝ , ꙗ҆́кᲂже пре́же речѐ , и҆ и҆з̾ ме́ртвыхъ же вᲂста́въ , сᲂвᲂскр҃си́въ ми́ръ вᲂскрⷭ҇нїемъ свᲂи́мъ , и҆ жена́мъ мѷрѡно́сицамъ пе́рвѣе ꙗ҆ви́лсѧ є҆сѝ , прᲂвѣща́въ ра́дᲂватисѧ , всѣ́хъ ра́дᲂсте , и҆́же ѿ дш҃и тебѐ лю́бѧщимъ мнᲂгᲂмлⷭ҇тиве .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ны́нѣ тлѧ̀ пᲂтреби́сѧ , хрⷭ҇то́съ бо нетлѣ́нїе и҆ жи́знь , и҆з̾ ме́ртвыхъ вᲂста̀ , вᲂдвᲂрѧ́етсѧ со свᲂи́ми а҆пⷭ҇лы , ᲂу҆ча̀ си́хъ лꙋ́чшимъ и҆ бжⷭ҇твенымъ , и҆ приглаша́ѧ ѿ і҆єрⷭ҇ли́ма не ѿлꙋча́тисѧ .

сла́ва . Мѵ́рѡ и҆нᲂгда̀ со слеза́ми прине́сшимъ а҆́нг҃лъ речѐ жена́мъ , с̾ ме́ртвыми что̀ и҆́щете жива́гѡ дне́сь , ꙗ҆́кᲂже пре́же речѐ вᲂста̀ , нѣ́сть здѣ̀ , и҆спраздни́въ гро́бы , и҆ ме́ртвымъ без̾сме́ртїе вдᲂхнꙋ́въ , ꙗ҆́кѡ чл҃кᲂлю́бецъ .

и҆ ны́нѣ , боⷢ҇ . И҆з̾ ме́ртвыхъ ви́дѣвши бцⷣе свᲂегѡ̀ сн҃а и҆ бг҃а вᲂста́вша , и҆спо́лниласѧ є҆сѝ ра́дᲂсти , сꙋ́щаѧ всѣ́хъ ра́дᲂсть же , и҆ весе́лїѧ вина̀ . тѣ́мже тѧ ра́дᲂстнѡ всѧ́ка дш҃а вᲂсхвалѧ́етъ , и҆ сла́витъ при́снѡ дв҃о .

Во вто́рникъ , г҃ , нлⷣи , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , в҃ . поⷣ . є҆гда̀ ѿ́ древа .= М=ѵ́рѡ ᲂу҆гᲂто́вивше честны́ѧ мѷрѡно́сицы , и҆ є҆щѐ тмѣ̀ сꙋ́щи , во є҆ди́нꙋ ѿ сꙋбо́тъ прїидо́ша ко́ грᲂбꙋ твᲂемꙋ̀ хрⷭ҇тѐ , пᲂма́зати пречⷭ҇тᲂе и҆ бжⷭ҇твенᲂе твᲂѐ тѣ́ло . тѣ́мже вᲂскрⷭ҇нїе твᲂѐ ᲂу҆вѣ́дѣвше , тща́хꙋсѧ вᲂзвѣсти́ти ᲂу҆ченико́мъ , и҆́хъ же срѣ́тъ ѿ́ грᲂба , ра́дꙋйтесѧ вᲂпїѧ́ше чл҃кᲂлю́бнѣ . Вы́шнѧгѡ бг҃а на землѝ пᲂгребе́на , ꙗ҆́кѡ ме́ртва пᲂма́зати тща́щесѧ сегѡ̀ ᲂу҆чени́цы вᲂнѧ́ми честны́ми , и҆ на́ грᲂбѣ сѣдѧ́ща но́вѣ ю҆́нᲂшꙋ ви́дѣвше , ꙗ҆́кѡ мо́лнїю зра́кᲂмъ , ᲂу҆жасо́шасѧ , тѣ́мже є҆́же и҆́з̾ грᲂба вᲂста́нїе твᲂѐ тридне́внᲂе ᲂу҆вѣ́дѣвше , а҆пⷭ҇лѡмъ вᲂз̾вѣща́хꙋ . Гл҃ы ᲂу҆слы́шавше ра́дᲂсти , и҆́же ᲂу҆́грᲂба присѣдѧ́щимъ слᲂвесе́мъ внима́хꙋ , тече́нїе пᲂказа́хꙋ спѣ́шнѣйше стремле́нїемъ , и҆ чи́нъ ѡ҆ста́вивше пе́рвагѡ мѷрᲂпринᲂше́нїѧ , ꙗ҆́кѡ бл҃гᲂвѣ́стницы ви́дѣшасѧ , вᲂста́нїе и҆з̾ а҆́да сꙋ́щимъ бл҃гᲂвѣствꙋ́юще таи́нникѡмъ , и҆́же на́съ ра́ди вᲂчл҃чьшагᲂсѧ .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , а҃ . Со́ страхᲂмъ прїидо́ша жены̀ на́ грᲂбъ , мастьмѝ пᲂма́зати тѣ́ло твᲂѐ тща́щесѧ , и҆ сѐ не ѡ҆брѣ́тше , недᲂꙋмѣ́ѧхꙋсѧ к̾ себѣ̀ , неразꙋмѣва́юще вᲂскрⷭ҇нїѧ . но пред̾ста́въ и҆́мъ а҆́нг҃лъ и҆ речѐ , вᲂскр҃се хрⷭ҇то́съ , да́рꙋѧ на́мъ ве́лїю ми́лᲂсть .

На стихо́внѣ , стихѣ́ры . гла́съ , в҃ . Спаси́ мѧ хрⷭ҇тѐ сп҃се си́лᲂю крⷭ҇тнᲂю , спасы́и петра̀ в̾ мо́ри , и҆ пᲂми́лꙋй мѧ бж҃е .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Со а҆рха́нг҃лы вᲂспᲂе́мъ хрⷭ҇то́во вᲂскрⷭ҇нїе , то́й бо є҆́сть и҆зба́витель , и҆ сп҃съ дш҃а́мъ на́шимъ , в̾ сла́вѣ стра́шнѣй , и҆ крѣ́пцѣй си́лѣ , па́ки грѧде́тъ сꙋди́ти ми́рꙋ , є҆го́же сᲂзда̀ .

сти́хъ : пᲂми́лꙋй на́съ гдⷭ҇и . мⷱ҇ꙋ . Ли́цы мч҃нчестїи прᲂти́вишасѧ мꙋчи́телемъ гл҃юще , мы̀ во́инствꙋемъ цр҃е́ви си́ламъ , а҆́ще ѻ҆гню̀ и҆ мꙋ́камъ преда́сте на́съ , но не ѿмета́емсѧ трⷭ҇ческїѧ си́лы . сла́ва , и҆ ны́нѣ . гла́съ , а҃ . Прїидо́ша на́ грᲂбъ магдалы́нѧ , и҆ дрꙋга́ѧ ма́рїѧ и҆́щꙋщѣ гдⷭ҇а , и҆ а҆́нг҃ла ѡ҆брѣто́ша ꙗ҆́кѡ мо́лнїю сѣдѧ́ща на ка́мени , и҆ гл҃юща к̾ни́мъ , что̀ и҆́щетѣ жива́го с̾ ме́ртвыми ; вᲂскр҃се ꙗ҆́кᲂже речѐ , в̾ галиле́и тᲂгѡ̀ ѡ҆брѧ́щете . к̾ немꙋ́ же вᲂзᲂпїе́мъ , вᲂскр҃съ и҆з̾ ме́ртвыхъ гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ сре́дꙋ , г҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречⷭ҇тᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть . два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Спасе́нїе сᲂдѣ́ла , пᲂсредѝ землѝ хрⷭ҇тѐ бж҃е , на крⷭ҇тѣ̀ пречⷭ҇тѣи рꙋ́цѣ свᲂѝ прᲂсте́ръ , сᲂбира́ѧ всѧ̀ ꙗ҆зы́ки , зᲂвꙋ́щїѧ , гдⷭ҇и сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂдно́жїю но́гꙋ є҆гѡ̀ ꙗ҆́кѡ ст҃о є҆́сть . Нѣ́дръ пречⷭ҇тыхъ , и҆́же в̾ вы́шнихъ не и҆стᲂщи́въ , пᲂгребе́нїе и҆ вᲂскрⷭ҇нїе за всѣ́хъ прїе́мъ , гдⷭ҇и сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ бг҃ъ і҆и҃левъ . мⷱ҇ꙋ . Страстᲂно́сцы гдⷭ҇ни , блаже́на землѧ̀ напи́вшаѧсѧ кро́ве ва́шеѧ , и҆ ст҃и хра́мы прїе́мшїи тѣлеса̀ ва́ша . на сꙋди́щи бо врага̀ ѡ҆бличи́сте , и҆ хрⷭ҇та̀ со дерзнᲂве́нїемъ прᲂпᲂвѣ́дасте . тᲂгѡ̀ ꙗ҆́кѡ бл҃га мᲂли́те , спасти́сѧ мо́лимсѧ дш҃а́мъ на́шимъ . сла́ва , и҆ ны́нѣ , боⷢ҇ . Дв҃аѧ и҆ мт҃и твᲂѧ̀ хрⷭ҇тѐ , на́ древѣ зрѧ́щи тѧ ме́ртва прᲂсте́рта , пла́чꙋщи го́рькѡ . сн҃е мо́й гл҃аше , что̀ стра́ннᲂе сѐ та́инство ; и҆́же всѣ́мъ да́рꙋѧи жи́знь вѣ́чнꙋю , во́лею на крⷭ҇тѣ̀ ка́кѡ ᲂу҆мира́еши , сме́ртїю пᲂно́снᲂю .

По в҃ , стихᲂло́гїи , сѣда́ленъ . гла́съ , в҃ . Мѵ́ро пᲂгребе́нїѧ жены̀ прине́сше кры́ющесѧ , ко́ грᲂбꙋ прїидо́ша ра́нѡ . і҆ꙋде́йскагѡ бᲂѧ́щесѧ сꙋрᲂвства̀ , и҆ во́инъ пред̾зрѧ́ще стра́жꙋ . но є҆стество̀ немᲂщно́е , мꙋ́жество пᲂбѣдѝ , ꙗ҆́кѡ нра́въ ми́лᲂстивенъ , бг҃ꙋ ᲂу҆гᲂдѝ . ра́нѡ ᲂу҆́бѡ вᲂпїѧ́хꙋ , вᲂскрⷭ҇нѝ гдⷭ҇и пᲂмᲂзѝ на́мъ , и҆ и҆зба́ви на́съ и҆́мене твᲂегѡ̀ ра́ди .= сла́ва , и҆ ны́нѣ , то́йже . та́же , в=ᲂскрⷭ҇нїе хрⷭ҇то́во , а҃ . ѱл҃о́мъ , н҃ .

кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , в҃ . Крⷭ҇та̀ твᲂегѡ̀ дре́во хрⷭ҇тѐ бж҃е , дре́во живо́тнᲂе пᲂказа̀ , на́мъ вѣ́рꙋющимъ в̾ тѧ̀ , и҆ си́мъ ᲂу҆празднѝ , и҆́же и҆мꙋ́щаго держа́вꙋ сме́рти , и҆ ѡ҆живи́лъ є҆сѝ на́съ ᲂу҆мерщве́ныѧ грѣхо́мъ . тѣ́мже вᲂпїе́мъ тѝ , бл҃гᲂда́телю всѣ́хъ , гдⷭ҇и сла́ва тебѣ̀ . вⷤ . Ра́дꙋйтесѧ лю́дїе и҆ весели́тесѧ , а҆́нг҃лъ бо сѣдѧ́и на ка́мени гро́бнѣмъ , то́й на́мъ бл҃гᲂвѣстѝ ре́къ , хрⷭ҇то́съ вᲂскр҃се и҆з̾ ме́ртвыхъ , сп҃съ ми́рꙋ , и҆ и҆спо́лни всѧ́ческаѧ бл҃гᲂꙋха́нїѧ . ра́дꙋйтесѧ лю́дїе и҆ весели́тесѧ . мⷱ҇ꙋ . Ст҃ы́хъ твᲂи́хъ стра́сти мо́лѧтъ тѧ хрⷭ҇тѐ , пᲂми́лꙋй на́съ ꙗ҆́кѡ чл҃кᲂлю́бецъ . сла́ва , и҆ ны́нѣ . гла́съ , в҃ . Пᲂчто̀ мѵ́ро со слеза́ми , ѽ ᲂу҆чени́цы и҆злива́ете ; ка́мень ѿвали́сѧ , и҆ гро́бъ и҆стᲂщи́сѧ ; ви́дите тлю̀ живᲂто́мъ пᲂпра́нꙋ , печа́ти свидѣ́тельствꙋюща ꙗ҆́вственѣ , спѧ́щїѧ лю́тѣ стра́жники непᲂкᲂри́выхъ , сме́ртнᲂе спасе́сѧ пло́тїю бж҃їею . а҆́дъ рыда́етъ , те́кше ра́дᲂсть рцы́те а҆пⷭ҇лѡмъ , ᲂу҆мертви́выи сме́рть хрⷭ҇то́съ , первᲂрᲂжде́нъ и҆з̾ ме́ртвыхъ , ва́съ варѧ́етъ в̾ галиле́и .

На стихо́внѣ , стихѣ́ры . гла́съ , в҃ . поⷣ . є҆гда̀ ѿ́ древа .= Н=о́сиши и҆́же на херꙋви́мѣхъ , пᲂчива́ющаго сло́ва бл҃же́нне і҆ѡ́сифе , ꙗ҆́кᲂже на и҆но́мъ нᲂси́лѣ на ра́мꙋ твᲂе́ю , вᲂплᲂще́на пе́рвѣе , и҆ ны́нѣ ᲂу҆мерщве́на , и҆ ѡ҆живᲂтвᲂри́вша на́съ ᲂу҆мерщве́ныѧ . є҆го́же вᲂскрⷭ҇нїе ви́дѧ , ра́дꙋешисѧ съ честны́ми мѷрѡно́сицами , а҆́ще и҆ пред̾рыда́сте сегѡ̀ ᲂу҆мерщве́нїе .

сти́хъ : бл҃гᲂвᲂли́лъ є҆сѝ гдⷭ҇и зе́млю твᲂю̀ ,꙳ вᲂз̾врати́лъ є҆сѝ плѣ́нъ і҆а́кѡвль . Оу҆́трѡ пред̾вари́вше глꙋбᲂкꙋ̀ , со́ страхᲂмъ мѷрѡно́сицы жены̀ гро́бꙋ пред̾стᲂѧ́хꙋ , мѵ́ро прине́сше живᲂда́вцꙋ хрⷭ҇тꙋ̀ , въ ме́ртвыхъ вмѣне́нᲂмꙋ , и҆ а҆́да ᲂу҆мертви́вшꙋ . но бжⷭ҇твеныи а҆́нг҃лъ пред̾ста̀ вᲂпїѧ̀ , что̀ живᲂно́снаго и҆ жива́го с̾ ме́ртвыми и҆́щете ; и҆ди́те , вᲂста́нїе сегѡ̀ прᲂпᲂвѣ́дающе .

сти́хъ : млⷭ҇ть и҆ и҆́стина срѣто́стѣсѧ ,꙳ пра́вда и҆ ми́ръ ѡ҆блᲂбыза́стасѧ . Гл҃ᲂмъ мѷрѡно́сицъ же́нъ ᲂу҆ченицы̀ невѣ́рᲂвавше , и҆́же ѿ ме́ртвыхъ прᲂпᲂвѣ́дающихъ хрⷭ҇та̀ вᲂскр҃сша , но тща́хꙋсѧ ви́дѣти гро́ба , и҆ плащани́цꙋ и҆ сꙋда́рь во́ грᲂбѣ ви́дѣша , є҆го́же и҆ска́хꙋ неви́дѣша . тѣ́мже вᲂскрⷭ҇нїе разꙋмѣ́ша , прᲂпᲂвѣ́дницы ꙗ҆ви́шасѧ въ ми́рѣ , сїѐ и҆ ꙗ҆зы́кѡмъ вᲂз̾вѣща́юще . сла́ва , и҆ ны́нѣ . гла́съ , то́йже . Мѷрѡно́сицы ра́но бы́вша , и҆ гро́бъ тво́й сᲂтща́нїемъ дᲂстиго́ша , и҆ и҆ска́хꙋ тебѐ хрⷭ҇тѐ , є҆́же пᲂма́зати пречи́стᲂе тѣ́ло твᲂѐ , и҆ а҆́нг҃лᲂвыми глаго́лы ѡ҆гласи́вшесѧ , радᲂстнᲂтво́рныѧ ѻ҆́бразы а҆пⷭ҇лѡмъ прᲂпᲂвѣ́дахꙋ , ꙗ҆́кѡ вᲂскр҃се нача́льникъ спасе́нїѧ на́шегѡ , плѣни́въ сме́рть , ми́рꙋ же да́рꙋѧ живо́тъ вѣ́чныи , и҆ ве́лїю млⷭ҇ть .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

Въ сре́дꙋ , на блаже́ннахъ , трипѣ́снецъ , є҆мꙋ́же краегране́сїе : вᲂста̀ сп҃съ . гла́съ , в҃ . пѣ́снь , г҃ . і҆рмо́съ . прᲂцвѣла̀ є҆́сть пꙋсты́нѧ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Тва́рь ви́дѣвши тѧ на крⷭ҇тѣ̀ стра́ждꙋща во́лею гдⷭ҇и , и҆змѣни́сѧ и҆ смꙋща́шесѧ , и҆ ме́ртвїи ѿ гро́бъ вᲂста́хꙋ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Бы́вшꙋ ти во а҆́дѣ живᲂда́вче гдⷭ҇и с̾ дш҃е́ю , ꙗ҆́кѡ ви́дѣвъ всепа́гꙋбнаѧ сме́рть ᲂу҆жасе́сѧ , и҆ ѿрѣша́ѧ ᲂу҆́зники и҆́х̾же пᲂжрѐ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . И҆спо́лнисѧ тва́рь всѧ̀ ра́дᲂсти , ще́дрыи гдⷭ҇и , и҆з̾ ме́ртвыхъ вᲂста́нїемъ твᲂи́мъ , ꙗ҆́кѡ ми́ръ ве́сь сᲂвᲂста́вилъ є҆сѝ , низло́жь сме́ртнᲂе црⷭ҇тво .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ѻ҆рꙋ́жїе дш҃ꙋ твᲂю̀ про́йде чⷭ҇таѧ всенепᲂро́чнаѧ , є҆гда̀ хрⷭ҇та̀ распина́ема ви́дѣла є҆сѝ , вᲂз̾ра́дᲂважесѧ , вᲂста́вша и҆́з̾ грᲂба сегѡ̀ ви́дѣвши .

пѣ́снь , и҃ . і҆рмо́съ . пе́щь ѻ҆́гненна и҆нᲂгда̀ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Оу҆мира́еши на крⷭ҇тѣ̀ живо́тъ сы́и всѣ́хъ , и҆ ꙗ҆́кѡ ме́ртвъ без̾дꙋ́шенъ во́ грᲂбѣ пᲂлᲂжи́лсѧ є҆сѝ дᲂлгᲂтерпѣли́ве , и҆ тридне́венъ вᲂста̀ , на вᲂста́нїе ми́рꙋ . тѣ́мже тѧ живᲂда́вче , весе́лїемъ сла́вимъ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Оу҆слы́ша сїѡ́нъ вᲂста́нїе гдⷭ҇не , весе́лїѧ ны́нѣ и҆спо́лнисѧ . дще́ри же сегѡ̀ , прᲂѧвле́ннѡ вᲂзра́дᲂвашасѧ , и҆ ᲂу҆ченико́мъ прᲂпᲂвѣ́дахꙋ гл҃юще нескᲂрби́те , живᲂда́вецъ вᲂста́лъ є҆́сть .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Оу҆́тро сᲂтща́нїемъ бы́вше жены̀ , на́ грᲂбъ прїидо́ша , и҆ с̾ тре́петᲂмъ прини́кше , в̾ бѣ́лахъ ѻ҆де́жахъ а҆́нг҃лы ви́дѣвше . и҆ стра́хᲂмъ ѡ҆держи́ми , слы́шахꙋ , небо́йтесѧ , жизнᲂда́вецъ вᲂста́лъ є҆́сть .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Тѧ̀ свѣ́телъ ѻ҆́блакъ , сл҃нца мы́сленагѡ бг҃ᲂра́дᲂваннаѧ , пᲂю́ще сла́вимъ , срⷣца̀ на́ша прᲂсвѣтѝ , тмꙋ̀ ѿгᲂнѧ́щи всю̀ ᲂу҆ны́нїѧ и҆ страсте́й , бг҃ᲂневѣ́сто .

пѣ́снь , ѳ҃ . і҆рмо́съ . без̾нача́льна рᲂди́телѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆́кѡ ви́дѣ тѧ сл҃нце , пра́веднагѡ сл҃нца на крⷭ҇тѣ̀ прᲂсте́рта , свѣ́тъ сᲂкрыва́ше . ка́менїе распада́шесѧ , а҆́дъ ме́ртвыѧ ско́рѡ ѿсыла́ше , пᲂю́щихъ держа́вꙋ твᲂю̀ , живᲂда́вче всеси́льне .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . А҆́дᲂвꙋ несы́тнꙋю ᲂу҆тро́бꙋ , пребжⷭ҇твеныи пресла́внѡ и҆стᲂщи́въ ꙗ҆́кѡ всеси́ленъ . а҆́бїе вᲂскр҃съ во сла́вѣ , и҆ ᲂу҆ченико́мъ бжⷭ҇твенымъ ви́дѣнъ бы́сть . тᲂмꙋ̀ пᲂкло́нимсѧ со ѻ҆ц҃е́мъ же и҆ дх҃ᲂмъ .

сла́ва . Вᲂста̀ гдⷭ҇ь мѷрѡно́сицамъ гл҃аше ꙗ҆вле́исѧ во́ грᲂбѣ ст҃ы́и а҆́нг҃лъ , и҆ди́те и҆ рцы́те сегѡ̀ ᲂу҆ченико́мъ , в̾ галиле́и пла́чꙋщимъ и҆ рыда́ющимъ , ꙗ҆́кѡ да сегѡ̀ та́мѡ ᲂу҆́зрѧтъ .

и҆ ны́нѣ , боⷢ҇ . И҆зба́витисѧ всенепᲂро́чнаѧ , ѿ напа́стей и҆ скᲂрбе́й , и҆ страсте́й бꙋ́ри и҆ ѡ҆мраче́нїѧ , и҆ мнᲂгᲂплете́нныхъ сѣте́й лꙋка́вагѡ , мᲂлѝ непреста́ннѡ хрⷭ҇та̀ бг҃а на́шегѡ , за при́снѡ блажа́щихъ тѧ .

Въ сре́дꙋ , г҃ , нлⷣи , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , є҃ . Гвᲂздьмѝ пригвᲂзди́всѧ , клѧ́твꙋ ю҆́же на́ древѣ , дре́вᲂмъ ᲂу҆праздни́лъ є҆сѝ . пᲂлᲂжи́вжесѧ во́ грᲂбѣ , и҆́же ѿ́ вѣка ме́ртвыѧ бжⷭ҇твенᲂю си́лᲂю вᲂскр҃си́лъ є҆сѝ , твᲂю̀ си́лꙋ велегла́снѡ сла́вѧщихъ . па́сха бжⷭ҇твена і҆с҃е всеси́льне , жи́знь на́ша ѻ҆́ч҃ее сїѧ́нїе . тѣ́мже нбⷭ҇наѧ съ земны́ми ра́дꙋютсѧ , пᲂбѣ́дныѧ пѣ́сни тебѣ̀ пᲂбѣдᲂтво́рче сло́ве пᲂю́ще , хрⷭ҇тѐ вседержи́телю , пᲂдаю́щемꙋ ми́ръ и҆ ве́лїю ми́лᲂсть . Оу҆́бѡ с̾ ме́ртвыми живо́тъ , и҆ по́д̾ землю же незахᲂди́мᲂе сл҃нце за́йде . и҆ ны́нѣ мѷрѡно́сицъ ли́къ рыда́ѧ вᲂпїѧ́ше , прїиди́те и҆ теце́мъ спѣ́шнѡ , и҆ ᲂу҆́зримъ ᲂу҆́грᲂба ст҃а́гѡ внꙋ́трь блиста́ющасѧ а҆́нг҃ла . ᲂу҆зрѣ́вше же , недᲂꙋмѣ́ющесѧ , дивлѧ́хꙋсѧ . и҆ претвᲂри́въ и҆́мъ рыда́нїе вᲂзᲂпи́въ , живᲂда́вецъ вᲂскр҃се , не ᲂу҆жаса́йтесѧ любᲂче́стныѧ жены̀ , то́й црⷭ҇твꙋетъ , да́рꙋѧ ми́рᲂви ве́лїю ми́лᲂсть . Ра́нѡ же́нскїи ли́къ , и҆́же пре́же сл҃нца взыска́ѧ сл҃нца во́ грᲂбъ заше́дша тᲂгда̀ , свѣтᲂза́рныи же тѣ́мъ прᲂвᲂз̾глаша́ше а҆́нг҃лъ . вᲂсїѧ̀ свѣ́тъ ѡ҆зарѧ́ѧи и҆́же во тмѣ̀ спѧ́щїѧ , свѣтᲂза́рнымъ ᲂу҆ченико́мъ вᲂз̾вѣсти́те , и҆ пла́чь в̾ ра́дᲂсть прелᲂжи́те . па́схꙋ же ра́дᲂстнꙋю и҆ ми́рꙋ спаси́тельнꙋю , несꙋмѣ́ннымъ срⷣцемъ пле́щꙋще ликꙋ́йте , хрⷭ҇то́съ вᲂскр҃се , да́рꙋѧ ми́рᲂви ве́лїю ми́лᲂсть .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , в҃ . Мѷрѡно́сицы жены̀ , ѕѣлѡ̀ ра́нѡ а҆рама́ты взе́мше , гдⷭ҇нѧ гро́ба дᲂстиго́ша , и҆ ꙗ҆́же ᲂу҆́бѡ ненадѣ́ѧхꙋсѧ ѡ҆брѣ́тше , и҆ пᲂмышлѧ́хꙋ в̾ себѣ̀ , бᲂѧ́щесѧ ка́меннаго ѿвале́нїѧ , и҆ дрꙋга̀ к̾ дрꙋзѣ́й гл҃ахꙋ , гдѣ̀ сꙋ́ть печа́ти грᲂбны́ѧ ; гдѣ̀ є҆́сть пила́тᲂво во́инство , и҆ ѡ҆па́снᲂе ᲂу҆тверже́нїе ; бы́сть же вᲂз̾вѣсти́тель неразꙋмѣва́ющимъ жена́мъ , блиста́ѧисѧ а҆́нг҃лъ , и҆ глаго́лѧ к̾ ни́мъ , что̀ съ рыда́нїемъ и҆́щете жива́го , ѡ҆жи́вльшагѡ ро́дъ чл҃ческїи ; вᲂста́ бо хрⷭ҇то́съ бг҃ъ на́шъ и҆з̾ ме́ртвыхъ ꙗ҆́кѡ всеси́ленъ , пᲂдаѧ̀ всѣ́мъ нетлѣ́нїе и҆ жи́знь , и҆ прᲂсвѣще́нїе и҆ ве́лїю млⷭ҇ть .

На стихо́внѣ , стихѣ́ры . гла́съ , в҃ . Вᲂскрⷭ҇нїе твᲂѐ хрⷭ҇тѐ сп҃се , всю̀ прᲂсвѣтѝ вселе́ннꙋю , и҆ призва̀ свᲂѐ сᲂзда́нїе , всеси́льне гдⷭ҇и сла́ва тебѣ̀ .

сти́хъ : к̾ тебѣ̀ вᲂзведо́хъ ѻ҆́чи . Вᲂз̾вели́чилъ є҆сѝ хрⷭ҇тѐ по вселе́ннѣй , верхо́вныхъ а҆пⷭ҇лъ и҆мена̀ , навы́кша бо нбⷭ҇нымъ , и҆ неи҆зрече́ннаѧ да́ша земны́мъ и҆сцѣле́нїѧ , и҆ сѣ́ни и҆́хъ є҆ди́ны недꙋ́ги ᲂу҆врачева́хꙋ . и҆́бо ѿ ры́барей чꙋдᲂтвᲂрѧ́ще , и҆ и҆́же ѿ і҆ꙋде́й бг҃ᲂсло́вѧше , бл҃гᲂда́ти ᲂу҆че́нїѧ , и҆́хъ же ра́ди милᲂсе́рде , да́ждь на́мъ ве́лїю млⷭ҇ть .

сти́хъ : пᲂми́лꙋй на́съ гдⷭ҇и . мⷱ҇ꙋ . Ве́лїѧ сла́ва , ю҆́же стѧжа́сте ст҃і́и вѣ́рᲂю . не то́кмѡ бо во страсте́хъ врага̀ пᲂбѣди́ли є҆стѐ , но и҆ по сме́рти дꙋ́хи прᲂго́ните , недꙋ́жныѧ и҆сцѣлѧ́ете , дш҃а́мъ и҆ тѣ́лᲂмъ вра́чеве , мᲂли́тесѧ ко́ гдⷭ҇ꙋ пᲂми́лᲂватисѧ дш҃а́мъ на́шимъ . сла́ва , и҆ ны́нѣ . гла́съ , ѕ҃ . Мѷрѡно́сицы жены̀ гро́ба твᲂегѡ̀ дᲂше́дше , и҆ печа́ти гро́бныѧ ви́дѣвше , не ѡ҆брѣто́ша же пречⷭ҇тагѡ тѣ́ла твᲂегѡ̀ , и҆ рыда́ющи сᲂтща́нїемъ прїидо́ша гл҃юще , кто̀ ᲂу҆кра́де на́ше ᲂу҆пᲂва́нїе ; кто̀ взѧ́тъ ме́ртва на́га сми́рнᲂю пᲂма́зана , мт҃рьне є҆ди́но ᲂу҆тѣше́нїе ; ѽ ка́кѡ и҆́же ме́ртвыѧ ѡ҆живлѧ́ѧи ᲂу҆мерщвлѧ́етсѧ , и҆ и҆́же а҆́да и҆спрᲂве́ргъ , ка́кѡ пᲂгреба́етсѧ ; но вᲂскрⷭ҇нѝ сп҃се самᲂвла́стнѡ , ꙗ҆́кᲂже ре́клъ є҆сѝ тридне́внѡ , спаса́ѧ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ четверто́къ , г҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречⷭ҇тᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть . два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Оу҆чени́къ твᲂи́хъ ли́къ , с̾ мѷрѡно́сицами жена́ми ра́дꙋютсѧ сᲂгла́снѡ , ѻ҆́бщїи бо пра́здникъ себѣ̀ сᲂста́виша , въ сла́вꙋ и҆ че́сть твᲂегѡ̀ вᲂскрⷭ҇нїѧ . тѣ́хъ ра́ди мо́лимъ тѧ̀ чл҃кᲂлю́бче гдⷭ҇и , лю́демъ твᲂи́мъ пᲂда́ждь ве́лїю ми́лᲂсть . сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . И҆́же ᲂу҆мꙋ́дривыи па́че ри́тᲂръ лᲂвцы̀ , и҆ пᲂсла́въ ꙗ҆́кᲂже прᲂпᲂвѣ́дники по все́й землѝ , неи҆з̾гл҃аннымъ чл҃кᲂлю́бїемъ свᲂи́мъ хрⷭ҇тѐ бж҃е . тѣ́ми ᲂу҆твердѝ цр҃кᲂвь свᲂю̀ , и҆ вѣ́рнымъ низ̾пᲂслѝ блгⷭ҇ве́нїе твᲂѐ , є҆ди́не во ст҃ы́хъ пᲂчива́ѧи . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . А҆пⷭ҇ли прᲂро́цы и҆ мч҃нцы , ст҃лїе прпⷣбнїи и҆ пра́веднїи , и҆́же до́брѣ по́двигъ скᲂнча́вше , и҆ вѣ́рꙋ сᲂхра́ньше , дерзнᲂве́нїе и҆мꙋ́ще ко сп҃сꙋ , мо́лимъ вы̀ , ѡ҆ на́съ тᲂгѡ̀ мᲂли́те ꙗ҆́кѡ бл҃га , спастѝ дш҃а на́ша . сла́ва , и҆ ны́нѣ , боⷢ҇ . Зако́нъ ᲂу҆таи́вшисѧ є҆сте́ственыхъ , бжⷭ҇твенымъ ржⷭ҇тво́мъ дв҃ство сᲂчета́ла є҆сѝ , ты́ бо рᲂдила̀ є҆сѝ є҆ди́на , и҆́же пре́же тебѐ рᲂжде́наго без̾лѣ́тнѡ . тѣ́мже тѧ̀ бцⷣе велича́емъ .

По в҃ , стихᲂло́гїи , сѣда́ленъ . гла́съ , в҃ . Вᲂскр҃съ ѿ́ грᲂба ꙗ҆́кѡ бг҃ъ , прпⷣбнымъ пᲂвелѣ̀ жена́мъ , прᲂпᲂвѣ́дати вᲂста́нїе а҆пⷭ҇лѡмъ , ꙗ҆́кᲂже пи́шетъ , и҆ тече́нїемъ пе́тръ пред̾ста̀ гро́бꙋ , и҆ свѣ́тъ во́ грᲂбѣ зрѧ̀ , дивлѧ́шесѧ . тѣ́мже и҆ ви́дѣвъ ри́зы є҆ди́ны , никто́же бо мо́жетъ ви́дѣти в̾ нᲂщѝ пред̾лежа́щаѧ , и҆ вѣ́рᲂвавъ вᲂзᲂпѝ , сла́ва тебѣ̀ хрⷭ҇тѐ бж҃е , ꙗ҆́кѡ спаса́еши всѧ̀ сп҃се на́шъ . ѻ҆те́ческᲂе бо є҆сѝ сїѧ́нїе . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , а҃ . ѱл҃о́мъ , н҃ .

кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стⷯры , на д҃ . гла́съ , в҃ . А҆́нг҃лъ ᲂу҆́бѡ є҆́же ра́дꙋисѧ , пре́же зача́тїѧ твᲂегѡ̀ гдⷭ҇и , бл҃гᲂда́тнѣй принесѐ . а҆́нг҃лъ же в̾ твᲂѐ вᲂскрⷭ҇нїе , сла́внагѡ гро́ба твᲂегѡ̀ ка́мень ѿвалѝ . ѻ҆́въ ᲂу҆́бѡ в̾ печа́ли мѣ́сто весе́лїѧ ѻ҆́бразы вᲂзвѣща́ѧ . се́й же в̾ сме́рти мѣ́сто , влⷣкꙋ жизнᲂда́вца прᲂпᲂвѣ́да на́мъ . тѣ́мже вᲂпїе́мъ ти , бл҃гᲂда́телю всѣ́хъ гдⷭ҇и сла́ва тебѣ̀ .= двⷤа . И҆́же ѿ непра́ведныхъ дѣѧ́нїи всегда̀ бᲂри́ми , и҆ к̾ тебѣ̀ прибѣга́юще вᲂи́стинꙋ сꙋ́щемꙋ бг҃ꙋ , гла́съ твᲂи́хъ ᲂу҆чени́къ прино́симъ тѝ гл҃юще , спаси́ ны наста́вниче пᲂгиба́емъ , пᲂкажѝ и҆ ны́нѣ враго́мъ на́шимъ мо́лимсѧ . ꙗ҆́кѡ пᲂкрыва́еши лю́ди , и҆ спаса́еши ѿ бѣ́дъ мл҃твами а҆пⷭ҇лъ , презрѧ̀ грѣхѝ за мно́гꙋю бл҃гᲂсты́ню гдⷭ҇и . =мⷱ҇ꙋ . Всѧ́къ гра́дъ и҆ страна̀ , чтꙋ́тъ мо́щи ва́ша , ѽ стрⷭ҇тᲂте́рпцы мч҃нцы . вы́ бо зако́ннѡ пᲂстрада́вше , вѣнцы̀ съ нб҃сѐ прїѧ́сте , и҆ сегѡ̀ ра́ди сщ҃е́нникѡмъ є҆стѐ пᲂхвала̀ , цр҃е́мъ пᲂбѣ́да , и҆ цр҃квамъ бл҃гᲂлѣ́пїе . сла́ва , и҆ ны́нѣ . гла́съ , а҃ . Мѷрѡно́сицы жены̀ , ко́ грᲂбꙋ что̀ прїидо́сте ; что̀ и҆́щете жива́гѡ в̾ ме́ртвыхъ , вᲂскр҃се гдⷭ҇ь дерза́йте вᲂпїе́тъ а҆́нг҃лъ .

На стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . Н=ачни́те лю́дїе ѱало́мски ,꙳ по́йте хрⷭ҇та̀ с̾ ра́дᲂстїю .꙳ па́сха ве́лїѧ вᲂсїѧ̀ на́мъ ,꙳ вᲂскр҃съ и҆́з̾ грᲂба хрⷭ҇то́съ жизнᲂда́вецъ ,꙳ и҆ и҆зба́витель дш҃а́мъ на́шимъ .

сти́хъ : бл҃гᲂвᲂли́лъ є҆сѝ гдⷭ҇и зе́млю твᲂю̀ ,꙳ вᲂз̾врати́лъ є҆сѝ плѣ́нъ і҆а́кѡвль . Ра́дᲂватисѧ мѷрѡно́сицамъ ре́къ хрⷭ҇тѐ ,꙳ є҆́ввино ѡ҆сꙋжде́нїе разᲂрѧ́еши .꙳ и҆ ра́дᲂсть ᲂу҆ченико́мъ вᲂскр҃съ пᲂсыла́еши ,꙳ прᲂпᲂвѣ́дати є҆́же и҆́з̾ грᲂба ,꙳ тридне́внᲂе твᲂѐ вᲂскрⷭ҇нїе .

сти́хъ : ми́лᲂсть и҆ и҆́стина срѣто́стѣсѧ ,꙳ пра́вда и҆ ми́ръ ѡ҆блᲂбыза́стасѧ . Па́схꙋ честнꙋ́ю и҆ ст҃ꙋ́ю ,꙳ хрⷭ҇то́съ на́мъ ѡ҆зарѝ ,꙳ прїиди́те всѝ прᲂсвѣти́вше дꙋ́шы ,꙳ се́бо дн҃ь прᲂсїѧ̀ ,꙳ в̾ се́й вᲂз̾ра́дꙋемсѧ и҆ вᲂз̾весели́мсѧ . сла́ва , и҆ нн҃ѣ . гла́съ , а҃ . Прїидо́ша на́ грᲂбъ магдалы́нѧ , и҆ дрꙋга́ѧ ма́рїѧ и҆́щꙋщѣ гдⷭ҇а , и҆ а҆́нг҃ла ѡ҆брѣто́ша ꙗ҆́кѡ мо́лнїю сѣдѧ́ща на ка́мени , и҆ гл҃юща к̾ни́мъ , что̀ и҆́щетѣ жива́го с̾ ме́ртвыми ; вᲂскр҃се ꙗ҆́кᲂже речѐ , в̾ галиле́и тᲂгѡ̀ ѡ҆брѧ́щете . к̾ немꙋ́ же вᲂзᲂпїе́мъ , вᲂскр҃съ и҆з̾ ме́ртвыхъ гдⷭ҇и сла́ва тебѣ̀ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

Въ четверто́къ , на блаже́ннахъ , трипѣ́снецъ , є҆мꙋ́же краегране́сїе : пѣ́снь пᲂе́мъ бг҃ꙋ . гла́съ , в҃ . пѣ́снь , д҃ . і҆рмо́съ . пᲂю́ тѧ слꙋ́хᲂмъ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вᲂзше́лъ є҆сѝ на крⷭ҇тъ во́лею гдⷭ҇и , си́лᲂю препᲂѧ́санъ . и҆ сᲂше́дъ бл҃гᲂꙋтро́бне съ дш҃е́ю во а҆́дъ , дш҃а вѣ́чныхъ ᲂу҆́зъ разрѣши́лъ є҆сѝ , и҆ с̾ сᲂбо́ю ще́дре сᲂвᲂскр҃си́лъ є҆сѝ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Сᲂкрꙋши́въ стра́шнѡ , вереѝ и҆ врата̀ а҆́дᲂва крѣ́пᲂстїю сѝ влⷣко , и҆ и҆стᲂщи́лъ є҆сѝ є҆мꙋ̀ бᲂга́тство . тѣ́мже мно́гᲂе твᲂѐ схᲂжде́нїе , и҆ честно́е вᲂскрⷭ҇нїе сла́вимъ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Пᲂма́зати пречи́стᲂе тѣ́ло твᲂѐ на́ грᲂбъ прїидо́ша жены̀ , ѡ҆брѣ́тше же а҆́нг҃ла на ка́мени сѣдѧ́ща хрⷭ҇тѐ , и҆ бᲂѧ́щесѧ ᲂу҆диви́шасѧ . с̾ ни́ми же пѣснᲂсло́вимъ твᲂѐ вᲂста́нїе .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ст҃ы́хъ ст҃а́гѡ па́че ᲂу҆ма̀ пᲂрᲂдила̀ є҆сѝ бцⷣе , ѡ҆сщ҃е́нїе и҆ и҆збавле́нїе и҆ ѡ҆ставле́нїе грѣхо́въ вѣ́рнымъ пᲂдаю́ща хᲂда́тайствᲂмъ тѝ , и҆́же є҆гѡ̀ сла́вѧщимъ вᲂскрⷭ҇нїе .

пѣ́снь , и҃ . і҆рмо́съ . велѣ́нїѧ мꙋчи́телева .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Вᲂзвы́силъ є҆сѝ є҆стество̀ чл҃ческᲂе хрⷭ҇тѐ , и҆́же на крⷭ҇тѣ̀ твᲂи́мъ вᲂзвыше́нїемъ , и҆ є҆́же свы́ше па́дшаго врага̀ , в̾ про́пасть низ̾ве́рглъ є҆сѝ , и҆ пᲂгребе́сѧ вᲂста́лъ є҆сѝ плѣни́въ сме́рть .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Сᲂкрꙋши́лъ є҆сѝ а҆́дꙋ вереѝ хрⷭ҇тѐ , и҆ ѡ҆кᲂва́нныѧ ᲂу҆́зники в̾ мꙋ́жествѣ и҆зве́лъ є҆сѝ , твᲂю̀ сла́вѧщихъ си́лꙋ , и҆ є҆́же и҆́з̾ грᲂба тридне́внᲂе вᲂста́нїе .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ꙗ҆́кѡ ви́дѣ тѧ дре́вле ли́къ ст҃ы́хъ а҆пⷭ҇лъ , и҆́з̾ грᲂба вᲂста́вша во сла́вѣ хрⷭ҇тѐ , весе́лїѧ и҆спо́лнь бы́въ вᲂпїѧ́ше , сла́ва вᲂста́нїю твᲂемꙋ̀ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Пла́чь тво́й пречⷭ҇таѧ ст҃а́ѧ прелᲂжи́сѧ на ра́дᲂсть , внегда̀ ви́дѣ свᲂегѡ̀ сн҃а и҆ влⷣкꙋ хрⷭ҇та̀ , и҆з̾ ме́ртвыхъ тридне́внѡ вᲂскр҃сша во сла́вѣ , и҆ ми́ръ прᲂсвѣти́вша .

пѣ́снь , ѳ҃ . і҆рмо́съ . ꙗ҆́же пре́жде сл҃нца .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆ви́лсѧ є҆сѝ пᲂсредѝ двᲂю̀ разбо́йникꙋ ра́спѧтъ мнᲂгᲂмлⷭ҇тиве , и҆ пᲂлᲂже́ныхъ в̾ ро́вѣ преи҆спо́днѣмъ , и҆ и҆́же во тмѣ̀ и҆ сѣ́ни сме́ртнѣй вᲂскр҃си́лъ є҆сѝ , пѣснᲂсло́вѧщихъ бл҃гᲂꙋтро́бне , твᲂѐ тридне́внᲂе вᲂскрⷭ҇нїе .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Сме́рть не є҆щѐ чл҃ки ѡ҆блада́етъ ꙗ҆́кᲂже є҆́сть пи́сано , ѿне́лѣже хрⷭ҇то́съ вᲂскр҃се без̾сме́ртныи а҆́дᲂва и҆стᲂщи́въ несы́таѧ црⷭ҇твїѧ . да ра́дꙋетсѧ всѧ̀ вселе́ннаѧ пра́зднꙋющи .

сла́ва . Речѐ мѷрѡно́сицамъ а҆́нг҃лъ блиста́ѧисѧ пре́д̾ грᲂбᲂмъ , и҆́же в̾ ме́ртвыхъ свᲂбо́днаго , что̀ пла́чꙋще и҆́щете , ꙗ҆́кᲂже пре́же речѐ , ᲂу҆́же вᲂста̀ , и҆ди́те ѿ сю́дꙋ ра́дꙋющесѧ .

и҆ ны́нѣ , боⷢ҇ . Ꙗ҆ви́ласѧ є҆сѝ прᲂстра́ннѣе дв҃о нб҃съ , бг҃а вмѣсти́вши , и҆́же пᲂд̾ земле́ю пᲂлᲂже́наго бл҃гᲂстїю , и҆ сме́ртїю без̾сме́ртїе всѣ́мъ дарᲂва́вша , є҆го́же бл҃гᲂче́стнѡ сла́вѧще , тебѐ по́ дᲂлгꙋ ᲂу҆блажа́емъ .

Въ четверто́къ , г҃ , недѣ́ли , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , и҃ . поⷣ . ѽ =пресла́внᲂе чꙋ́до . Хрⷭ҇тꙋ̀ ꙗ҆́вльшꙋсѧ ,꙳ стᲂпа́мъ пᲂслѣ́дꙋюще честны́ѧ мѷрѡно́сицы ,꙳ тᲂмꙋ̀ ᲂу҆гᲂди́ти ,꙳ нра́вᲂмъ ᲂу҆се́рднымъ и҆ пра́вᲂстїю .꙳ ни ᲂу҆ме́рша сегѡ̀ ѡ҆ста́висте ,꙳ но ше́дше мѵ́ра со слеза́ми принесо́сте ,꙳ млⷭ҇тивнѡ дви́жꙋщесѧ .꙳ тѣ́мже ва́шꙋ па́мѧть ,꙳ всесщ҃е́ннꙋю тᲂржествꙋ́емъ . Бжⷭ҇твеныхъ же́нъ сᲂсло́вїе ,꙳ ви́дѣти жела́ѧ жи́знь ᲂу҆мертви́вшꙋюсѧ во́ грᲂбѣ ,꙳ но́щїю прїидо́ша ,꙳ и҆ ѿ а҆́нг҃ла слы́шаша ,꙳ ꙗ҆́кᲂже прᲂречѐ хрⷭ҇то́съ вᲂста̀ ,꙳ сᲂтща́нїемъ сегѡ̀ ᲂу҆ченико́мъ рцы́те ,꙳ и҆ ᲂу҆ны́нїе ѿ дꙋшѝ ѿри́ните ,꙳ вмѣ́стѡ пла́ча ,꙳ ра́дᲂсть неи҆з̾гл҃аннꙋю вᲂспрїими́те . Дне́сь вѣ́рнїи ликꙋ́емъ ,꙳ въ па́мѧти ва́шей мѷрѡно́сицы ,꙳ сла́вѧще и҆́же ва́съ прᲂсла́вльшаго ,꙳ пребл҃га́го гдⷭ҇а .꙳ є҆го́же мᲂли́те непреста́ннѡ всечⷭ҇тны́ѧ ,꙳ вѣ́чнꙋющїѧ сла́вы ᲂу҆лꙋчи́ти на́мъ ,꙳ и҆ свѣ́тлᲂсти ст҃ы́хъ ,꙳ и҆мꙋ́ще к̾ немꙋ̀ дерзнᲂве́нїе всегда̀ ,꙳ бг҃ᲂблаже́нныѧ . =

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , в҃ . Пᲂчто̀ мѵ́ро со слеза́ми , ѽ ᲂу҆чени́цы и҆злива́ете ; ка́мень ѿвали́сѧ , и҆ гро́бъ и҆стᲂщи́сѧ ; ви́дите тлю̀ живᲂто́мъ пᲂпра́нꙋ , печа́ти свидѣ́тельствꙋюща ꙗ҆́вственѣ , спѧ́щїѧ лю́тѣ стра́жники непᲂкᲂри́выхъ , сме́ртнᲂе спасе́сѧ пло́тїю бж҃їею . а҆́дъ рыда́етъ , те́кше ра́дᲂсть рцы́те а҆пⷭ҇лѡмъ , ᲂу҆мертви́выи сме́рть хрⷭ҇то́съ , первᲂрᲂжде́нъ и҆з̾ ме́ртвыхъ , ва́съ варѧ́етъ в̾ галиле́и .

На стихо́внѣ , стихѣ́ры . гла́съ , в҃ . Во́лею ѡ҆бнища́въ , ѡ҆бнища́нїѧ ра́ди а҆да́мᲂва хрⷭ҇тѐ бж҃е . прише́лъ є҆сѝ на́ землю ѿ дв҃ы вᲂпло́щьсѧ , и҆ распѧ́тїе прїѧ́тъ , да на́съ свᲂбᲂди́ши , ѿ рабо́ты вра́жїѧ , гдⷭ҇и сла́ва тебѣ̀ .

сти́хъ : къ тебѣ̀ вᲂзведо́хъ ѻ҆́чи мᲂѝ . Первᲂвѣ́чнᲂмꙋ ѿ ѻ҆ц҃а ро́ждьшꙋсѧ бж҃їю сло́вꙋ , вᲂпло́щшꙋсѧ ѿ дв҃ы мр҃і́и , прїиди́те пᲂклᲂни́мсѧ , распѧ́тїе бо претерпѣ́въ , и҆ пᲂгребе́нїю предаде́сѧ , ꙗ҆́кѡ са́мъ вᲂсхᲂтѣ̀ , и҆ вᲂскр҃съ и҆з̾ ме́ртвыхъ , спасе́ мѧ блꙋдѧ́щаго челᲂвѣ́ка .

сти́хъ : пᲂми́лꙋй на́съ гдⷭ҇и . мⷱ҇ꙋ . И҆́же земны́ѧ сла́дᲂсти невᲂз̾лю́бльше страстᲂте́рпцы , нбⷭ҇нымъ бл҃ги́мъ спᲂдо́бишасѧ , и҆ а҆́нг҃лѡмъ сᲂгра́ждане бы́ша , гдⷭ҇и мᲂли́твами и҆́хъ , пᲂми́лꙋй и҆ спасѝ на́съ . сла́ва , и҆ ны́нѣ . гла́съ , в҃ . Мѷрѡно́сицы ра́но бы́вша , и҆ гро́бъ тво́й сᲂтща́нїемъ дᲂстиго́ша , и҆ и҆ска́хꙋ тебѐ хрⷭ҇тѐ , є҆́же пᲂма́зати пречи́стᲂе тѣ́ло твᲂѐ , и҆ а҆́нг҃лᲂвыми глаго́лы ѡ҆гласи́вшесѧ , радᲂстнᲂтво́рныѧ ѻ҆́бразы а҆пⷭ҇лѡмъ прᲂпᲂвѣ́дахꙋ , ꙗ҆́кѡ вᲂскр҃се нача́льникъ спасе́нїѧ на́шегѡ , плѣни́въ сме́рть , ми́рꙋ же да́рꙋѧ живо́тъ вѣ́чныи , и҆ ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ пѧто́къ , г҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречⷭ҇тᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть . два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Живᲂтвᲂрѧ́щїи крⷭ҇тъ твᲂеѧ̀ бл҃гᲂсти , є҆го́же дарᲂва̀ на́мъ недᲂсто́йнымъ гдⷭ҇и , тебѣ̀ прино́симъ в̾ мᲂли́твꙋ , спасѝ гра́дъ тво́й , мᲂлѧ́щїѧсѧ бцⷣы ра́ди , є҆ди́не чл҃кᲂлю́бче . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂдно́жїю но́гꙋ є҆гѡ̀ ꙗ҆́кѡ ст҃о є҆́сть . Нѣ́дръ пречⷭ҇тыхъ , и҆́же в̾ вы́шнихъ не и҆стᲂщи́въ , пᲂгребе́нїе и҆ вᲂскрⷭ҇нїе за всѣ́хъ прїе́мъ , гдⷭ҇и сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Тебѐ ѡ҆дѣва́ющаго нб҃о ѻ҆́блаки , и҆мꙋ́ще ст҃і́и ѻ҆дѣѧ́нїе , в̾ ми́рѣ мꙋ́ки ѿ без̾зако́нныхъ претерпѣ́ша , и҆ ле́сть и҆́дᲂльскꙋю ᲂу҆праздни́ша . тѣ́хъ мᲂли́твами и҆ на́съ свᲂбᲂдѝ сп҃се ѿ неви́димаго врага̀ , и҆ спасѝ на́съ . сла́ва , и҆ ны́нѣ , крⷭ҇тᲂбоⷢ҇ . Чтⷭ҇ны́мъ крⷭ҇то́мъ сн҃а твᲂегѡ̀ сᲂхранѧ́еми влⷣчце , чⷭ҇таѧ бцⷣе , всѧ́къ прило́гъ бᲂри́телѧ всѝ ᲂу҆до́бнѣ пᲂбѣжда́емъ . сегѡ̀ ра́ди по́ дᲂлгꙋ тѧ̀ ᲂу҆блажа́емъ , ꙗ҆́кѡ бж҃їю мт҃рь , и҆ є҆ди́нꙋ ᲂу҆пᲂва́нїе дш҃а́мъ на́шимъ .

По в҃ , стихᲂло́гїи , сѣда́ленъ . гла́съ , в҃ . Мѷрѡно́сицы ра́нѡ бы́вше , и҆ гро́бъ то́щь ви́дѣвше , а҆пⷭ҇лѡмъ глаго́лахꙋ , тлю̀ низ̾лᲂжѝ крѣ́пкїи , и҆ и҆́же во а҆́дѣ вᲂсхи́ти ᲂу҆́зники , прᲂпᲂвѣ́дите со дерзнᲂве́нїемъ , ꙗ҆́кѡ вᲂскр҃се хрⷭ҇то́съ бг҃ъ , да́рꙋѧи на́мъ ве́лїю млⷭ҇ть . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , а҃ . ѱл҃о́мъ , н҃ . кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , в҃ . Да ра́спнетсѧ вᲂпїѧ́хꙋ , и҆́же твᲂи́хъ дарᲂва́нїи при́снѡ наслажа́ющїисѧ . и҆ ѕлᲂдѣ́ѧ во бл҃гᲂда́телѧ мѣ́стѡ прᲂша́хꙋ прїѧ́ти , и҆́же пра́ведникѡмъ ᲂу҆бі́ица . мᲂлча́ше же хрⷭ҇тѐ терпѧ̀ и҆́хъ сꙋро́вство , пᲂстрада́ти хᲂтѧ̀ , и҆ спастѝ на́съ , ꙗ҆́кѡ чл҃кᲂлю́бецъ . двⷤа . Всѧ́ко дыха́нїе и҆ всѧ̀ тва́рь , тебѐ сла́витъ гдⷭ҇и , ꙗ҆́кѡ крⷭ҇то́мъ сме́рть ᲂу҆праздни́лъ є҆сѝ . да пᲂка́жеши лю́демъ , є҆́же и҆з̾ ме́ртвыхъ твᲂѐ вᲂскрⷭ҇нїе . ꙗ҆́кѡ є҆ди́нъ чл҃кᲂлю́бецъ . мⷱ҇ꙋ . По хрⷭ҇тѐ пᲂстрада́сте да́же до сме́рти , ѽ страстᲂте́рпцы мч҃нцы , дш҃а бо и҆́мате на́ нб҃сѣхъ в̾ рꙋцѣ̀ бж҃їи , и҆ по́ мирꙋ всемꙋ̀ пᲂчита́еми сꙋ́ть ва́ши мо́щи . сщ҃е́нницы и҆ цр҃їе пᲂкланѧ́ютсѧ , и҆ лю́дїе всѝ ра́дꙋющесѧ ѡ҆бы́чно вᲂпїе́мъ , со́нъ че́стенъ пред̾ гдⷭ҇емъ , сме́рть прпⷣбныхъ є҆гѡ̀ . сла́ва , и҆ ны́нѣ . гла́съ , а҃ . Со́ страхᲂмъ прїидо́ша жены̀ на́ грᲂбъ , мастьмѝ пᲂма́зати тѣ́ло твᲂѐ тща́щесѧ , и҆ сѐ не ѡ҆брѣ́тше , недᲂꙋмѣ́ѧхꙋсѧ к̾ себѣ̀ , неразꙋмѣва́юще вᲂскрⷭ҇нїѧ . но пред̾ста́въ и҆́мъ а҆́нг҃лъ и҆ речѐ , вᲂскр҃се хрⷭ҇то́съ , да́рꙋѧ на́мъ ве́лїю ми́лᲂсть .

На стихо́внѣ , стихѣ́ры . гла́съ , в҃ . поⷣ . є҆гда̀ ѿ́ древа . Ꙗ҆ви́сѧ свѣ́тъ непристꙋ́пныи на́мъ , сїѧ́ѧ и҆́з̾ грᲂба краснѡ̀ хрⷭ҇то́съ гдⷭ҇ь . а҆́дъ плѣни́сѧ , и҆ дїа́вᲂлъ ᲂу҆праздни́сѧ . ра́дꙋютсѧ мирсті́и кᲂнцы̀ , ликᲂствꙋ́етъ тва́рь . вᲂспѣва́етъ пра́зднꙋющи цр҃кви хрⷭ҇то́ва , па́мѧть і҆ѡ́сифа премꙋ́драгѡ , и҆ мѷрѡно́сицъ с̾ни́мъ же́нъ , пᲂчита́етъ тᲂржество̀ .

сти́хъ : бл҃гᲂвᲂли́лъ є҆сѝ гдⷭ҇и зе́млю твᲂю̀ ,꙳ вᲂз̾врати́лъ є҆сѝ плѣ́нъ і҆а́кѡвль . Ꙗ҆ви́сѧ тᲂржество̀ на́мъ бг҃ᲂлѣ́пныхъ мѷрѡно́сицъ , и҆ і҆ѡ́сифа премꙋ́драгѡ , ꙗ҆́кᲂже дрꙋгі́и ра́й и҆сто́чникъ пᲂдаѧ̀ жи́зни , бл҃гᲂда́тныѧ во́ды и҆стᲂча́ющь ми́рꙋ , и҆ напаѧ́ющь вᲂста́нїѧ хрⷭ҇то́ва стрꙋѧ́ми на землѝ , сᲂбо́ры вѣ́рныхъ пра́зднꙋющихъ и҆ взыва́ющихъ , сла́ва да́вшемꙋ свᲂѐ вᲂскрⷭ҇нїе кᲂнце́мъ .

сти́хъ : ми́лᲂсть и҆ и҆́стина срѣто́стѣсѧ ,꙳ пра́вда и҆ ми́ръ ѡ҆блᲂбыза́стасѧ . Равнѡ̀ ᲂу҆́бѡ ѽ бл҃гᲂѡ҆бра́зныи і҆ѡ́сифе , тебѐ ꙗ҆́кѡ херꙋви́мскꙋю кᲂлесни́цꙋ , цр҃ѧ хрⷭ҇та̀ со крⷭ҇та̀ сне́мше , и҆ на ра́мꙋ свᲂе́ю нᲂси́вша ᲂу҆бл҃жа́емъ . и҆ чте́мъ , рꙋ́цѣ твᲂѝ и҆ ѻ҆́чи бжⷭ҇твенїи , и҆ дла́ни твᲂѧ̀ , и҆́маже сл҃нца сло́ва и҆ бг҃а нᲂсѧ̀ во́ грᲂбъ пᲂлᲂжи́лъ є҆сѝ . тѣ́мже и҆ па́мѧть твᲂю̀ , любо́вїю пᲂчита́емъ . сла́ва , и҆ ны́нѣ . гла́съ , а҃ . Прїидо́ша на́ грᲂбъ магдалы́нѧ , и҆ дрꙋга́ѧ ма́рїѧ и҆́щꙋщѣ гдⷭ҇а , и҆ а҆́нг҃ла ѡ҆брѣто́ша ꙗ҆́кѡ мо́лнїю сѣдѧ́ща на ка́мени , и҆ гл҃юща к̾ни́мъ , что̀ и҆́щетѣ жива́го с̾ ме́ртвыми ; вᲂскр҃се ꙗ҆́кᲂже речѐ , в̾ галиле́и тᲂгѡ̀ ѡ҆брѧ́щете . к̾ немꙋ́ же вᲂзᲂпїе́мъ , вᲂскр҃съ и҆з̾ ме́ртвыхъ гдⷭ҇и сла́ва тебѣ̀ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

Въ пѧто́къ , на блаже́ннахъ , трипѣ́снецъ , є҆мꙋ́же краегране́сїе : сла́ва бг҃ꙋ а҆ми́нь . твᲂре́нїе і҆ѡ́сифѡво . гла́съ , в҃ . пѣ́снь , є҃ . і҆рмо́съ . прᲂсвѣще́нїе во тмѣ̀ лежа́щимъ .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Сᲂбо́ръ и҆нᲂгда̀ без̾зако́ннꙋющихъ є҆вре́й , тебѐ чл҃кᲂлю́бче на́ древо вᲂз̾дви́же ᲂу҆мертви́въ , но во́ грᲂбѣ пᲂлᲂже́нъ , а҆́дᲂвы ᲂу҆́зы всѧ̀ разрꙋши́лъ є҆сѝ , и҆ ꙗ҆́же ѿ́ вѣка ме́ртвыѧ вᲂскр҃си́лъ є҆сѝ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Є҆гда̀ тлѣ́нїе вкꙋси́лъ є҆сѝ и҆́же всѣ́хъ без̾сме́ртїе , тᲂгда̀ мꙋ́жески свѧ́занныѧ всѧ̀ и҆зведѐ , вᲂскр҃слъ є҆сѝ ѿ́ грᲂба живᲂда́вче , разᲂри́въ сме́рть , и҆ прᲂсвѣти́въ на́съ вᲂста́нїемъ свᲂи́мъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Стра́ннᲂю ѻ҆де́ждею блиста́ющасѧ дре́вле , на́ грᲂбѣ ви́дѣвше а҆́нг҃ла жены̀ чꙋдѧ́хꙋсѧ . ѻ҆́нъ же к̾ ни́мъ вᲂпїѧ́ше небо́йтесѧ , хрⷭ҇то́съ вᲂскр҃се , и҆ди́те дрꙋго́мъ є҆гѡ̀ вᲂз̾вѣсти́те .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Вᲂсто́къ сл҃нца пра́веднагѡ пᲂказа́сѧ дв҃о , є҆го́же ви́дѣвши вᲂскре́сша и҆з̾ ме́ртвыхъ ꙗ҆́кᲂже речѐ , и҆ ми́ръ ве́сь прᲂсвѣ́щша , ра́дᲂвашесѧ пᲂю́щи чи́стаѧ , ꙗ҆́кѡ чл҃кᲂлю́бца .

=пѣ́снь , и҃ . і҆рмо́съ . ѡ҆ =пᲂдо́бїи зла́тѣ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Бг҃ъ сы́и бл҃же спᲂдо́билсѧ є҆сѝ чл҃къ бы́ти , и҆ распѧ́тисѧ на́ древѣ во́лею , на спасе́нїе вѣ́рᲂю вᲂпїю́щимъ всегда̀ , ѡ҆сꙋ́ществившаѧсѧ да пᲂе́тъ гдⷭ҇а всѧ̀ тва́рь , и҆ превᲂзно́ситъ є҆гѡ̀ во́ вѣки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Въ ро́вѣ преи҆спо́днѣмъ пᲂлᲂжи́ тѧ і҆ѡ́сифъ , по́вивъ в̾ пᲂнѧ́вахъ же и҆ и҆зми́рнѣ и҆ а҆лло́и , но вᲂскр҃слъ є҆сѝ спаса́ѧ вѣ́рнѡ зᲂвꙋ́щихъ , ѡ҆сꙋ́ществившаѧсѧ да пᲂе́тъ гдⷭ҇а всѧ̀ тва́рь , и҆ превᲂзно́ситъ є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ꙗ҆ви́лсѧ є҆сѝ ᲂу҆ченико́мъ всеси́льне вᲂскр҃съ , и҆ тѣ́мъ ре́къ , и҆ди́те в̾ ми́ръ прᲂпᲂвѣ́дите мᲂѐ смᲂтре́нїе , пᲂю́ще , ѡ҆сꙋ́ществившаѧсѧ да пᲂе́тъ гдⷭ҇а всѧ̀ тва́рь , и҆ превᲂзно́ситъ є҆гѡ̀ во́ вѣки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ꙗ҆́кѡ ви́дѣша тѧ бг҃ᲂно́сныѧ жены̀ , вᲂста́вша бг҃ᲂлѣ́пнѡ и҆з̾ ме́ртвыхъ , и҆ вᲂскр҃си́вша и҆́же ѿ́ вѣка ме́ртвыѧ , и҆ а҆́да плѣни́вша , ра́дꙋющесѧ вᲂпїѧ́хꙋ , ѡ҆сꙋ́ществившаѧсѧ да пᲂе́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ѡ҆ст҃ѝ на́ша срⷣца̀ всест҃а́ѧ дв҃о бг҃ᲂневѣ́сто , ви́дѣвшаѧ всест҃а́го бг҃а сло́ва вᲂста́вша , и҆ въ весе́лїи зᲂвꙋ́щи , ѡ҆сꙋ́ществившаѧсѧ да пᲂе́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́с̾ . недᲂꙋмѣ́етъ всѧ́къ ꙗ҆зы́къ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . То́чїю вᲂдрꙋзи́сѧ сп҃се крⷭ҇тъ тво́й на ло́бнѣмъ , сме́ртнᲂе всѐ жили́ще и҆з̾ глꙋбины̀ пᲂкᲂлеба́сѧ . а҆ и҆́же в̾ сѣ́ни сѣдѧ́щїи сме́ртнѣй , ѿ ᲂу҆́зъ нерѣши́мыхъ вᲂи́стинꙋ разрѣши́шасѧ всѝ , сла́ва вᲂпїю́ще держа́вѣ си́лы твᲂеѧ̀ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Землѧ̀ пᲂтрѧсе́сѧ , и҆ ка́менїе распаде́сѧ стра́хᲂмъ , го́ры и҆ хо́лми всѝ пᲂкᲂлеба́шасѧ , и҆ сл҃нце пᲂме́рче , ви́дѣвъ тѧ на крⷭ҇тѣ̀ пᲂвѣ́шена . вереѝ а҆́дᲂвы и҆ врата̀ желѣ́знаѧ сᲂтро́шасѧ хрⷭ҇тѐ , є҆гда̀ и҆з̾ ме́ртвыхъ свᲂи́мъ вᲂста́нїемъ , ми́ръ сᲂвᲂз̾дви́глъ є҆сѝ .

сла́ва . Ме́ртва тѧ влⷣко ви́дѣвъ дре́вле на крⷭ҇тѣ̀ , бл҃гᲂѡ҆бра́зныи а҆римаѳе́й , снѧ́тъ ѿ́ древа , и҆ пᲂнѧ́вицею тᲂгда̀ чи́стᲂю пᲂви́въ , и҆ во́ грᲂбѣ но́вѣ с̾ премно́гимъ стра́хᲂмъ пᲂлᲂжѝ сᲂтща́нїемъ , ты́ же ꙗ҆́кѡ прᲂре́къ , вᲂста̀ сло́ве тридне́внѡ . и҆ ны́нѣ , боⷢ҇ . Зако́нъ крᲂмѣ̀ влⷣчце всенепᲂро́чнаѧ , рᲂдила̀ є҆сѝ неи҆зрече́ннѡ сло́ва . є҆го́же ѿ без̾зако́нныхъ сᲂвѣ́тᲂмъ ра́спѧта , и҆ пᲂлᲂже́на во́ грᲂбѣ , и҆ вᲂста́вша и҆з̾ ме́ртвыхъ ꙗ҆́кѡ ви́дѣвши , и҆спо́лнисѧ ра́дᲂсти . сегѡ̀ мᲂлѝ ѡ҆ на́съ вᲂспѣва́ющихъ тѧ .

Въ пѧто́къ , г҃ , нлⷣи , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , в҃ . Пᲂчто̀ мѵ́ро со слеза́ми , ѽ ᲂу҆чени́цы и҆злива́ете ; ка́мень ѿвали́сѧ , и҆ гро́бъ и҆стᲂщи́сѧ ; ви́дите тлю̀ живᲂто́мъ пᲂпра́нꙋ , печа́ти свидѣ́тельствꙋюща ꙗ҆́вственѣ , спѧ́щїѧ лю́тѣ стра́жники непᲂкᲂри́выхъ , сме́ртнᲂе спасе́сѧ пло́тїю бж҃їею . а҆́дъ рыда́етъ , те́кше ра́дᲂсть рцы́те а҆пⷭ҇лѡмъ , ᲂу҆мертви́выи сме́рть хрⷭ҇то́съ , первᲂрᲂжде́нъ и҆з̾ ме́ртвыхъ , ва́съ варѧ́етъ в̾ галиле́и .= Мѷрѡно́сицы ра́но бы́вша , и҆ гро́бъ тво́й сᲂтща́нїемъ дᲂстиго́ша , и҆ и҆ска́хꙋ тебѐ хрⷭ҇тѐ , є҆́же пᲂма́зати пречи́стᲂе тѣ́ло твᲂѐ , и҆ а҆́нг҃лᲂвыми глаго́лы ѡ҆гласи́вшесѧ , радᲂстнᲂтво́рныѧ ѻ҆́бразы а҆пⷭ҇лѡмъ прᲂпᲂвѣ́дахꙋ , ꙗ҆́кѡ вᲂскр҃се нача́льникъ спасе́нїѧ на́шегѡ , плѣни́въ сме́рть , ми́рꙋ же да́рꙋѧ живо́тъ вѣ́чныи , и҆ ве́лїю млⷭ҇ть . М=ѷрѡно́сицы жены̀ , ѕѣлѡ̀ ра́нѡ а҆рама́ты взе́мше , гдⷭ҇нѧ гро́ба дᲂстиго́ша , и҆ ꙗ҆́же ᲂу҆́бѡ ненадѣ́ѧхꙋсѧ ѡ҆брѣ́тше , и҆ пᲂмышлѧ́хꙋ в̾ себѣ̀ , бᲂѧ́щесѧ ка́меннаго ѿвале́нїѧ , и҆ дрꙋга̀ к̾ дрꙋзѣ́й гл҃ахꙋ , гдѣ̀ сꙋ́ть печа́ти грᲂбны́ѧ ; гдѣ̀ є҆́сть пила́тᲂво во́инство , и҆ ѡ҆па́снᲂе ᲂу҆тверже́нїе ; бы́сть же вᲂз̾вѣсти́тель неразꙋмѣва́ющимъ жена́мъ , блиста́ѧисѧ а҆́нг҃лъ , и҆ глаго́лѧ к̾ ни́мъ , что̀ съ рыда́нїемъ и҆́щете жива́го , ѡ҆жи́вльшагѡ ро́дъ чл҃ческїи ; вᲂста́ бо хрⷭ҇то́съ бг҃ъ на́шъ и҆з̾ ме́ртвыхъ ꙗ҆́кѡ всеси́ленъ , пᲂдаѧ̀ всѣ́мъ нетлѣ́нїе и҆ жи́знь , и҆ прᲂсвѣще́нїе и҆ ве́лїю млⷭ҇ть .

та́же , стихѣ́ры , в̾ минѣ́и , г҃ . сла́ва . гла́съ , ѕ҃ . Мѷрѡно́сицы жены̀ гро́ба твᲂегѡ̀ дᲂше́дше , и҆ печа́ти гро́бныѧ ви́дѣвше , не ѡ҆брѣто́ша же пречⷭ҇тагѡ тѣ́ла твᲂегѡ̀ , и҆ рыда́ющи сᲂтща́нїемъ прїидо́ша гл҃юще , кто̀ ᲂу҆кра́де на́ше ᲂу҆пᲂва́нїе ; кто̀ взѧ́тъ ме́ртва на́га сми́рнᲂю пᲂма́зана , мт҃рьне є҆ди́но ᲂу҆тѣше́нїе ; ѽ ка́кѡ и҆́же ме́ртвыѧ ѡ҆живлѧ́ѧи ᲂу҆мерщвлѧ́етсѧ , и҆ и҆́же а҆́да и҆спрᲂве́ргъ , ка́кѡ пᲂгреба́етсѧ ; но вᲂскрⷭ҇нѝ сп҃се самᲂвла́стнѡ , ꙗ҆́кᲂже ре́клъ є҆сѝ тридне́внѡ , спаса́ѧ дш҃а на́ша . и҆ ны́нѣ , боⷢ҇ . гла́съ , в҃ . Пре́йде сѣ́нь зако́ннаѧ , бл҃гᲂда́ти прише́дши , ꙗ҆́кᲂже бо кꙋпина̀ не с̾гара́ше , распала́ющисѧ . та́кѡ и҆ дв҃аѧ рᲂдила̀ є҆́сть , и҆ дв҃ᲂю пребы́сть . в̾мѣ́стѡ стᲂлпа̀ ѻ҆́гненнагѡ , пра́веднᲂе вᲂзсїѧ̀ сл҃нце . в̾мѣ́стѡ мѡѷсе́ѧ хрⷭ҇то́съ , во спасе́нїе дш҃а́мъ на́шимъ .

На стихо́внѣ , стихѣ́ры . гла́съ , в҃ . Первᲂвѣ́чнᲂмꙋ ѿ ѻ҆ц҃а ро́ждьшꙋсѧ бж҃їю сло́вꙋ , вᲂпло́щьшꙋсѧ ѿ дв҃ы мр҃і́и , прїиди́те пᲂклᲂни́мсѧ , распѧ́тїе бо претерпѣ́въ , и҆ пᲂгребе́нїю предаде́сѧ , ꙗ҆́кѡ са́мъ вᲂсхᲂтѣ̀ , и҆ вᲂскр҃съ и҆з̾ ме́ртвыхъ , спасе́ мѧ блꙋдѧ́щаго челᲂвѣ́ка .

сти́хъ : гдⷭ҇ь вᲂцр҃и́сѧ ,꙳ в̾лѣ́пᲂтꙋсѧ ѡ҆блечѐ . Хрⷭ҇то́съ сп҃съ на́шъ пригво́ждьсѧ на крⷭ҇тѣ̀ , є҆́же на ны̀ рꙋкᲂписа́нїе растерза̀ , и҆ сме́рти держа́вꙋ ᲂу҆҆праздни́лъ є҆́сть , пᲂклᲂнѧ́емсѧ тридне́внᲂмꙋ є҆гѡ̀ вᲂста́нїю .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Со а҆рха́нг҃лы вᲂспᲂе́мъ хвⷭ҇о вᲂскрⷭ҇нїе , то́й бо є҆́сть и҆зба́витель , и҆ сп҃съ дш҃а́мъ на́шимъ , во сла́вѣ стра́шнѣй , и҆ крѣ́пцѣй си́лѣ , па́ки грѧде́тъ сꙋди́ти ми́рꙋ , є҆го́ же сᲂзда̀ .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Вᲂскрⷭ҇нїе твᲂѐ хрⷭ҇тѐ сп҃се , всю̀ прᲂсвѣтѝ вселе́ннꙋю , и҆ призва̀ свᲂѐ сᲂзда́нїе , всеси́льне гдⷭ҇и сла́ва тебѣ̀ .

сла́ва , и҆ ны́нѣ . гла́съ , є҃ . Тебѐ ѡ҆дѣ́ющагᲂсѧ свѣ́тᲂмъ ꙗ҆́кѡ ри́зᲂю , сне́мъ і҆ѡ́сифъ со́ древа с̾ никᲂди́мᲂмъ , и҆ ви́дѣвъ ме́ртва на́га непᲂгребе́на , жа́лᲂстнѡ рыда́нїе вᲂспрїи́мъ , и҆ пла́ча гл҃аше , ᲂу҆вы̀ мнѣ̀ сла́дкїи і҆с҃е , є҆го́же пре́жде в̾ ма́лѣ сл҃нце на крⷭ҇тѣ̀ пᲂвѣ́шена ви́дѣ , во тмꙋ̀ прелага́шесѧ , и҆ землѧ̀ стра́хᲂмъ кᲂлѣба́шесѧ , и҆ раздира́шесѧ цр҃ко́внаѧ за́вѣса . но сѐ нн҃ѣ ви́жꙋ тѧ , менѐ ра́ди во́лею пᲂдъе́мша сме́рть , ка́кѡ пᲂгребꙋ́ тѧ бж҃е мо́й , и҆лѝ како́ю плащани́цею ѡ҆б̾вїю́ тѧ ; ко́имаже ли рꙋка́ма прикᲂснꙋ́сѧ , пречⷭ҇тᲂмꙋ тѣ́лꙋ твᲂемꙋ̀ ; и҆лѝ ко́е пѣ́нїе вᲂспᲂю̀ , твᲂемꙋ̀ и҆схо́дꙋ ще́дре ; велича́ю стрⷭ҇ти твᲂѧ̀ , пѣснᲂсло́вѧ и҆ пᲂгребе́нїе твᲂѐ со вᲂскрⷭ҇нїемъ . вᲂпїю̀ , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ сꙋбо́тꙋ , г҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпарѝ , гла́съ , в҃ . Бл҃гᲂѡ҆бра́зныи і҆ѡ́сифъ , съ крⷭ҇та̀ с̾не́мъ пречⷭ҇тᲂе тѣ́ло твᲂѐ , плащани́цею чи́стᲂю ѡ҆б̾ви́въ , и҆ со бл҃гᲂꙋха́ньми во́ грᲂбѣ но́вѣ закры́въ пᲂлᲂжѝ , но в̾ тре́тїи дн҃ь вᲂскр҃се сп҃се , да́рꙋѧ ми́рᲂви ве́лїю млⷭ҇ть . два́жды . сла́ва . Є҆гда̀ сни́де к̾ сме́рти живᲂтѐ без̾сме́ртныи , тᲂгда̀ а҆́да ᲂу҆мертви́лъ є҆сѝ блиста́нїемъ бжⷭ҇тва̀ . є҆гда́ же ᲂу҆ме́ршїѧ ѿ преи҆спо́днихъ вᲂскресѝ , всѧ̀ си́лы нбⷭ҇ныѧ взыва́хꙋ , жизнᲂда́вче хрⷭ҇тѐ бж҃е сла́ва тебѣ̀ . и҆ ны́нѣ . Мѷрѡно́сицамъ жена́мъ , при́ грᲂбѣ пред̾ста́въ а҆́нг҃лъ вᲂпїѧ́ше , мѵ́ро ме́ртвымъ є҆́сть дᲂсто́йнѡ , хрⷭ҇то́съ же и҆стлѣ́нїѧ ꙗ҆ви́сѧ чꙋ́жь . но вᲂзᲂпі́йте пᲂю́ще , вᲂскр҃се гдⷭ҇ь , да́рꙋѧ ми́рᲂви ве́лїю млⷭ҇ть .

По а҃ , стихᲂло́гїи , сѣда́ленъ . гла́съ , в҃ . Ка́мень гро́бныи запечатлѣ́ти невᲂз̾брани́въ , ка́меню вѣ́ры , вᲂскрⷭ҇нїе по́далъ є҆сѝ всѣ́мъ , гдⷭ҇и сла́ва тебѣ̀ .= сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Оу҆чени́къ твᲂи́хъ ли́къ , с̾ мѷрѡно́сицами жена́ми ра́дꙋютсѧ сᲂгла́снѡ , ѻ҆́бщїи бо пра́здникъ себѣ̀ сᲂста́виша , въ сла́вꙋ и҆ че́сть твᲂегѡ̀ вᲂскрⷭ҇нїѧ . тѣ́хъ ра́ди мо́лимъ тѧ̀ чл҃кᲂлю́бче гдⷭ҇и , лю́демъ твᲂи́мъ пᲂда́ждь ве́лїю ми́лᲂсть . =сла́ва , и҆ ны́нѣ , боⷢ҇ . Всѧ̀ па́че смы́сла , всѧ̀ пресла́внаѧ твᲂѧ̀ бцⷣе та́инства , чистᲂто́ю запечатлѣ́нна , и҆ дв҃ствᲂмъ храни́ма , мт҃и разꙋмѣ́сѧ нело́жна , бг҃а ро́ждьши и҆́стиннаго , тᲂгѡ̀ мᲂлѝ спасти́сѧ дш҃а́мъ на́шимъ .

По в҃ , стихᲂло́гїи , сѣда́ленъ . гла́съ , в҃ . по в҃ , стихᲂло́гїи . сѣда́ленъ . гла́съ , в҃ . Мѵ́ро пᲂгребе́нїѧ жены̀ прине́сше кры́ющесѧ , ко́ грᲂбꙋ прїидо́ша ра́нѡ . і҆ꙋде́йскагѡ бᲂѧ́щесѧ сꙋрᲂвства̀ , и҆ во́инъ пред̾зрѧ́ще стра́жꙋ . но є҆стество̀ немᲂщно́е , мꙋ́жество пᲂбѣдѝ , ꙗ҆́кѡ нра́въ ми́лᲂстивенъ , бг҃ꙋ ᲂу҆гᲂдѝ . ра́нѡ ᲂу҆́бѡ вᲂпїѧ́хꙋ , вᲂскрⷭ҇нѝ гдⷭ҇и пᲂмᲂзѝ на́мъ , и҆ и҆зба́ви на́съ и҆́мене твᲂегѡ̀ ра́ди .= сла́ва , и҆ ны́нѣ , то́йже . та́же , в=ᲂскрⷭ҇нїе хрⷭ҇то́во , а҃ . ѱл҃о́мъ , н҃ .

кано́ны , пра́здникꙋ , на́ ѕ҃ . хра́мꙋ , на д҃ . в̾минѣ́и , на д҃ .

На хвали́тѣхъ , стихѣ́ры , на д҃ . гла́съ , в҃ . Всѧ́ко дыха́нїе и҆ всѧ̀ тва́рь , тебѐ сла́витъ гдⷭ҇и , ꙗ҆́кѡ крⷭ҇то́мъ сме́рть ᲂу҆праздни́лъ є҆сѝ . да пᲂка́жеши лю́демъ , є҆́же и҆з̾ ме́ртвыхъ твᲂѐ вᲂскрⷭ҇нїе . ꙗ҆́кѡ є҆ди́нъ чл҃кᲂлю́бецъ .= Да рекꙋ́тъ і҆ꙋде́е , ка́кѡ во́ини пᲂгꙋби́ша стрегꙋ́щїи цр҃ѧ ; пᲂчто́ бо ка́мень несᲂхранѝ , ка́менѧ жи́зни ; и҆лѝ пᲂгребе́наго дадѧ́тъ ; и҆лѝ вᲂскрⷭ҇шемꙋ да пᲂкло́нѧтсѧ , гл҃юще с̾ на́ми , сла́ва мно́жествꙋ щедро́тъ твᲂи́хъ , сп҃се на́шъ сла́ва тебѣ̀ . Ра́дꙋйтесѧ лю́дїе и҆ весели́тесѧ , а҆́нг҃лъ бо сѣдѧ́и на ка́мени гро́бнѣмъ , то́й на́мъ бл҃гᲂвѣстѝ ре́къ , хрⷭ҇то́съ вᲂскр҃се и҆з̾ ме́ртвыхъ , сп҃съ ми́рꙋ , и҆ и҆спо́лни всѧ́ческаѧ бл҃гᲂꙋха́нїѧ . ра́дꙋйтесѧ лю́дїе и҆ весели́тесѧ . А҆́нг҃лъ ᲂу҆́бѡ є҆́же ра́дꙋисѧ , пре́же зача́тїѧ твᲂегѡ̀ гдⷭ҇и , бл҃гᲂда́тнѣй принесѐ . а҆́нг҃лъ же в̾ твᲂѐ вᲂскрⷭ҇нїе , сла́внагѡ гро́ба твᲂегѡ̀ ка́мень ѿвалѝ . ѻ҆́въ ᲂу҆́бѡ в̾ печа́ли мѣ́сто весе́лїѧ ѻ҆́бразы вᲂзвѣща́ѧ . се́й же в̾ сме́рти мѣ́сто , влⷣкꙋ жизнᲂда́вца прᲂпᲂвѣ́да на́мъ . тѣ́мже вᲂпїе́мъ ти , бл҃гᲂда́телю всѣ́хъ гдⷭ҇и сла́ва тебѣ̀ . =сла́ва , и҆ ны́нѣ . гла́съ , а҃ . Мѷрѡно́сицы жены̀ , ко́ грᲂбꙋ что̀ прїидо́сте ; что̀ и҆́щете жива́гѡ в̾ ме́ртвыхъ , вᲂскр҃се гдⷭ҇ь дерза́йте вᲂпїе́тъ а҆́нг҃лъ .

На стихо́внѣ , стихѣ́ры . гла́съ , в҃ . пᲂдо́бны . Є҆гда̀ ѿ́ древа тѧ ме́ртва , а҆римаѳе́й снѧ́тъ всѣ́хъ живᲂта̀ , смѵ́рнᲂю и҆ плащани́цею тѧ̀ хрⷭ҇тѐ ѡ҆бви́въ , и҆ любо́вїю пᲂдвиза́шесѧ , се́рдцемъ и҆ ᲂу҆стна́ми тѣ́ло нетлѣ́ннᲂе твᲂѐ ѡ҆блᲂбыза́ти . ѻ҆ба́че ѡ҆держи́мь стра́хᲂмъ , ра́дꙋѧсѧ вᲂпїѧ́ше тѝ : сла́ва снизхᲂжде́нїю твᲂемꙋ̀ , чл҃кᲂлю́бче .

сти́хъ : бл҃гᲂвᲂли́лъ є҆сѝ гдⷭ҇и зе́млю твᲂю̀ ,꙳ вᲂз̾врати́лъ є҆сѝ плѣ́нъ і҆а́кѡвль . Є҆гда̀ во́ грᲂбѣ но́вѣ , за всѣ́хъ пᲂлᲂжи́сѧ и҆зба́витель всѣ́хъ , а҆́дъ вселꙋка́выи ви́дѣвъ тѧ ᲂу҆жасе́сѧ , вереи́ же сᲂкрꙋши́шасѧ , сᲂтро́шасѧ врата̀ , и҆ гро́бы ѿверзо́шасѧ , ме́ртвїи вᲂста́хꙋ , тᲂгда̀ а҆да́мъ бл҃гᲂда́рственѡ ра́дꙋѧсѧ вᲂпїѧ́ше тѝ , сла́ва сᲂше́ствїю твᲂемꙋ̀ чл҃кᲂлю́бче .

сти́хъ : млⷭ҇ть и҆ и҆́стина срѣто́стѣсѧ ,꙳ пра́вда и҆ ми́ръ ѡ҆блᲂбыза́стасѧ . Є҆гда̀ си́лы зрѧ́ще тѧ хрⷭ҇тѐ , ꙗ҆́кѡ лестьца̀ ѿ без̾зако́нникъ ѡ҆бᲂлга́ема , ᲂу҆жаса́хꙋсѧ не и҆зрече́ннᲂмꙋ дᲂлгᲂтерпѣ́нїю твᲂемꙋ̀ . и҆ рꙋка́ма запечатлѣ́ша ка́мень гро́ба твᲂегѡ̀ гдⷭ҇и , и҆́ми же твᲂѧ̀ ре́бра прᲂбᲂдо́ша . ѡ҆ба́че ѡ҆ на́шемъ спасе́нїи ра́дꙋющесѧ вᲂпїѧ́хꙋ ти , сла́ва смᲂтре́нїю твᲂемꙋ̀ чл҃кᲂлю́бче .

сла́ва , и҆ ны́нѣ . гла́съ , ѕ҃ . Прᲂсѝ і҆ѡ́сифъ тѣ́ло і҆с҃ᲂво , и҆ пᲂлᲂжѝ є҆̀ в̾ но́вѣмъ свᲂе́мъ гро́бѣ . пᲂдᲂба́ше бо є҆мꙋ̀ и҆́з̾ грᲂба , ꙗ҆́кѡ ѿ черто́га и҆зы́ти . сᲂкрꙋши́выи держа́вꙋ сме́рти , и҆ ѿве́рзыи две́ри раѧ̀ чл҃кѡмъ , гдⷭ҇и сла́ва тебѣ̀ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

Въ сꙋбо́тꙋ , на блаже́ннахъ , четверᲂпѣ́снецъ . гла́съ , в҃ . пѣ́снь , ѕ҃ . і҆рмо́съ . и҆з̾ глꙋбины̀ вᲂзведи́ мѧ . во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Мѷрѡно́сицы гро́ба твᲂегѡ̀ дᲂсти́гше слезѧ́хꙋ , и҆ а҆́нг҃лъ тѣ́мъ ра́дᲂсть вᲂзвѣща́ше , взыва́ѧ , хрⷭ҇то́съ вᲂскр҃се , ми́рꙋ прᲂпᲂвѣ́дите .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . На крⷭ҇тъ вᲂз̾несе́нꙋ ти , сїѧ́нїе сᲂкры̀ сл҃нце , но і҆и҃ль тебѐ бг҃а и҆ зижди́телѧ непᲂзна̀ , за всѣ́хъ во́лею дш҃ꙋ пᲂлᲂжи́вшаго .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Да ра́дꙋютсѧ всѧ́ческаѧ , ꙗ҆́кѡ хрⷭ҇то́съ и҆́з̾ грᲂба вᲂста̀ . плѣни́въ всѧ̀ а҆́дᲂва сᲂкро́вища , и҆ ѻ҆́бщїи весе́лїѧ пра́здникъ да сᲂверша́ютъ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . А҆́ще и҆ младе́нца рᲂдила̀ є҆сѝ , но дв҃ᲂю пребыва́еши , ꙗ҆́кᲂже бѣ̀ пре́же ржⷭ҇тва̀ чи́стаѧ бцⷣе дв҃о , рᲂжде́ибᲂсѧ є҆стество̀ ѡ҆бнᲂвѝ ꙗ҆́кѡ бг҃ъ .

пѣ́снь , з҃ . і҆рмо́съ . и҆́же пе́щь дре́вле .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Неразꙋ́мнїи лю́дїе і҆ꙋде́йскагѡ сᲂбо́ра , вмѣ́стѡ бл҃гᲂдѣѧ́нїи и҆́хже тѣ́мъ дарᲂва̀ , ко крⷭ҇тꙋ̀ хрⷭ҇тѐ пригвᲂзди́ша тѧ̀ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . И҆сто́чникъ млⷭ҇ти за всѣ́хъ пᲂлᲂжи́лсѧ є҆сѝ , да всѝ до́лга сме́ртнагѡ разрѣши́вшесѧ , пᲂе́мъ тѧ чл҃кᲂлю́бче .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Тридне́внᲂю сме́ртїю , и҆ пᲂгребе́нїемъ живᲂно́снымъ , сꙋ́щимъ во грᲂбѣ́хъ пᲂдава́ше жи́знь вѣ́чнꙋю , вѣ́рнѡ сп҃се пᲂю́щимъ тѧ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . Тебѣ̀ є҆ди́нᲂй хᲂда́тайцѣ пᲂдᲂба́етъ , ра́дᲂсти ѿ а҆́нг҃ла є҆́же ра́дꙋисѧ , и҆́же вѣ́рнїи тебѣ̀ вᲂпїе́мъ , мр҃і́е при́снѡ дв҃о .

пѣ́снь , и҃ . і҆рмо́съ . ᲂу҆страши́сѧ ѻ҆́трᲂкъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Разрꙋши́сѧ безбо́жнᲂе велѣ́нїе и҆ печа́ти , вᲂтщѐ і҆ꙋде́ѡвъ , вᲂста̀ пᲂгребы́исѧ , пᲂрꙋга́всѧ всѣ́мъ , бг҃ъ бо во́лею пᲂстрада́ти вᲂсхᲂтѣ̀ , и҆ во́лею свᲂе́ю ᲂу҆страѧ́етъ всѧ̀ ꙗ҆́кᲂже хо́щетъ , є҆го́же непреста́ннѡ пᲂе́мъ гдⷭ҇а , и҆ превᲂзно́симъ во́ вѣки .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . И҆ди́те речѐ жена́мъ блиста́ѧ исѧ зра́кᲂмъ , хрⷭ҇то́съ вᲂскр҃се , прᲂпᲂвѣ́дите про́чее , тᲂгѡ̀ вᲂскрⷭ҇нїе ми́рꙋ всемꙋ̀ , и҆ непла́чи тесѧ , нѣ́сть бо слеза́мъ вре́мѧ , не к̾ тᲂмꙋ́ бо црⷭ҇твꙋетъ сме́рть , не к̾ тᲂмꙋ̀ ѡ҆блада́етъ а҆́дъ , не к̾ тᲂмꙋ̀ ѡ҆сꙋжде́нїѧ пᲂбѣди́тъ вы грѣ́хъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Скры́сѧ влⷣко хрⷭ҇тѐ живо́тъ на́шъ в̾ тебѣ̀ , пᲂстрада́вшѣмъ пло́тїю , и҆ и҆з̾ ме́ртвыхъ вᲂскр҃сшѣмъ сло́ве , живꙋ́щїи при́снѡ , и҆ тебѣ̀ ᲂу҆́бѡ надѣ́емсѧ хрⷭ҇тїа́не причасти́тисѧ , на стра́шнᲂмъ втᲂро́мъ прише́ствїи твᲂе́мъ вѣ́рнїи , дᲂсто́йнѡ пᲂю́ще твᲂѧ̀ стра́сти бжⷭ҇твеныѧ , и҆ є҆́же и҆з̾ ме́ртвыхъ твᲂѐ вᲂскрⷭ҇нїе .

пᲂмѧнѝ на́съ гдⷭ҇и ,꙳ є҆гда̀ прїи́деши во црⷭ҇твїи сѝ . боⷢ҇ . Прїѧ́тъ разрѣше́нїе тᲂбо́ю пра́баба дре́внѧгѡ ѡ҆сꙋжде́нїѧ , не к̾ тᲂмꙋ́ бо в̾ печа́лѣхъ рᲂди́тъ . ты́ бо рᲂдила̀ є҆сѝ бг҃ᲂрᲂди́тельнице хрⷭ҇та̀ . тѣ́мъ тѧ дᲂсто́йнѡ ᲂу҆блажа́емъ , пᲂю́ще и҆з̾ тебѐ рᲂжде́ннаго без̾ сѣ́мене , и҆ превᲂзнᲂсѧ́ще во́ вѣки .

пѣ́снь , ѳ҃ . і҆рмо́съ . вᲂзвели́чилъ є҆сѝ хрⷭ҇тѐ .

пᲂмѧнѝ на́съ влⷣко ,꙳ є҆гда̀ прїи́деши во црⷭ҇твїи сѝ . Оу҆слы́ши гла́съ жениха̀ свᲂегѡ̀ цр҃кви , вᲂпїе́тъ бжⷭ҇твеныи дв҃дъ , тебѣ́ бо и҆з̾ ре́бръ дарᲂва́сѧ вᲂда̀ , с̾ кро́вїю бжⷭ҇твенᲂю , на ѡ҆чище́нїе сᲂгрѣше́нїемъ , то́й бо и҆зба́вилъ є҆́сть тебѐ ѿ ле́сти и҆́дᲂльскїѧ , ꙗ҆́кѡ чл҃кᲂлю́бецъ .

пᲂмѧнѝ на́съ ст҃ы́и ,꙳ є҆гда̀ прїи́деши во црⷭ҇твїи сѝ . Ты̀ вᲂсїѧ́лъ є҆сѝ жи́знь , вᲂста́нїемъ тридне́внымъ , ꙗ҆зы́къ мно́жествꙋ хрⷭ҇тѐ . не вᲂпрᲂша́ющимъ ни и҆́щꙋщимъ тебѐ , ꙗ҆вле́нъ бы́сть тѣ́мъ бжⷭ҇твенᲂю сла́вᲂю , люде́й же і҆ꙋде́йскихъ , тебѣ̀ невѣ́рᲂвавшихъ ѡ҆сꙋди́лъ є҆сѝ .

сла́ва . Дре́ва є҆́же во є҆де́мѣ , пре́лестїю прᲂзѧ́бшꙋю ми клѧ́твꙋ , разрѣши́лъ є҆сѝ , да́же до крⷭ҇та̀ пᲂслꙋ́шавъ сло́ве , ты̀ ѻ҆те́ческимъ сᲂвѣ́тᲂмъ самᲂвла́стнѡ . тѣ́мже твᲂѐ несказа́ннᲂе смире́нїе , пᲂю̀ и҆ велича́ю .

и҆ ны́нѣ , боⷢ҇ . Ты̀ прибли́жилъ є҆сѝ к̾ себѣ̀ ꙗ҆зы́къ ст҃ъ , дале́че ѿстᲂѧ́щїи , вᲂплᲂще́исѧ и҆з̾ дв҃ы сп҃се , и҆ не́люди твᲂѧ̀ наре́клъ є҆сѝ лю́ди свᲂѧ̀ бжⷭ҇твены . сегѡ̀ ра́ди всѝ , ны́нѣ пᲂклᲂнѧ́ем̾тисѧ всеси́льне .

На литꙋргі́и . прᲂки́мен̾ , ѱл҃о́мъ дв҃дᲂв̾ . ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . сти́хъ : въ цр҃квахъ бл҃гᲂслᲂви́те бг҃а гдⷭ҇а ѿ и҆сто́чникъ і҆и҃левъ . дрꙋгі́и , дш҃а и҆́хъ во бл҃ги́хъ вᲂдвᲂрѧ́тсѧ . а҆пⷭ҇лъ , въ дѣѧ́нїихъ . заⷱ҇ , к҃в . и҆ заꙋпᲂко́й , къ сᲂлꙋ́нѧнѡмъ . заⷱ҇ , с҃о .= а҆ллилꙋ́їѧ . и҆́стина ѿ землѝ вᲂсїѧ̀ , и҆ пра́вда с̾ нб҃сѐ прини́че . =сти́хъ : вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ . сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда и҆ в̾ ро́дъ . є҆ѵⷢ҇а́лїе , ѿ і҆ѡа́нна . заⷱ҇ , н҃в . и҆ дрꙋго́е , заꙋпᲂко́й , ѿ і҆ѡа́нна . зача́ло , ѕ҃і . прича́стенъ . ра́дꙋйтесѧ пра́веднїи ѡ҆́ гдⷭ҇ѣ . дрꙋгі́и , бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь , па́мѧть и҆́хъ в̾ ро́дъ и҆ ро́дъ .