НЕДѢ́ЛѦ ЧЕТВЕ́РТАѦ ПО ПА́СЦѢ

ѡ҆ раз̾сла́бленѣмъ . =Въ сꙋбо́тꙋ ве́черъ , на ма́лѣй вече́рни . на гдⷭ҇и вᲂзва́хъ , стⷯры , вᲂскрⷭ҇ны , на д҃ . гла́съ , г҃ . запѣ́въ : ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Т=вᲂи́мъ крⷭ҇то́мъ хрⷭ҇тѐ сп҃се , сме́рти держа́ва разрꙋши́сѧ , и҆ дїа́вᲂлѧ ле́сть ᲂу҆праздни́сѧ . ро́дъ же чл҃ческїи вѣ́рᲂю спаса́емь , пѣ́снь ти всегда̀ прино́ситъ .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Твᲂи́мъ крⷭ҇то́мъ хрⷭ҇тѐ сп҃се , сме́рти держа́ва разрꙋши́сѧ , и҆ дїа́вᲂлѧ ле́сть ᲂу҆праздни́сѧ . ро́дъ же чл҃ческїи вѣ́рᲂю спаса́емь , пѣ́снь ти всегда̀ прино́ситъ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Прᲂсвѣти́шасѧ всѧ́ческаѧ , вᲂскрⷭ҇нїемъ твᲂи́мъ гдⷭ҇и , и҆ ра́й па́ки ѿве́рзесѧ . всѧ́ же тва́рь вᲂсхвалѧ́ющи тѧ , пѣ́снь ти всегда̀ прино́ситъ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Сла́влю ѻ҆ц҃а и҆ сн҃а си́лꙋ , и҆ ст҃а́гѡ дх҃а пᲂю̀ влады́чество , нераздѣ́льно и҆ несᲂзда́нно бжⷭ҇тво̀ , трⷪ҇цꙋ є҆динᲂсꙋ́щнꙋю , црⷭ҇твꙋющꙋю во́ вѣки вѣкѡ́мъ . сла́ва , и҆ ны́нѣ , боⷢ҇ . Ве́лїе чꙋ́до , дв҃аѧ ро́ждьши , и҆ рᲂжде́ннᲂе бг҃ъ превѣ́чныи . прᲂѧвле́нно ржⷭ҇тво̀ , и҆ сᲂверша́емо па́че є҆стества̀ . ѽ та́инствꙋ стра́шнᲂмꙋ . и҆́же разꙋмѣва́емо неи҆зрече́нно пребыва́етъ , и҆ ви́димᲂе сѐ непᲂстиза́етсѧ . бл҃же́на є҆сѝ ты̀ пречⷭ҇таѧ ѻ҆трᲂкᲂви́це , а҆да́ма земнᲂро́днагѡ дщѝ , и҆ бг҃а вы́шнѧгѡ ꙗ҆́вльшисѧ мт҃и . є҆го́же мᲂлѝ , спасти́сѧ дш҃а́мъ на́шимъ .

На стихо́внѣ , стⷯры , вᲂскрⷭ҇ны . гла́съ , г҃ . Стрⷭ҇тїю твᲂе́ю хрⷭ҇тѐ , ѡ҆мрачи́выи сл҃нце , и҆ свѣ́тᲂмъ твᲂегѡ̀ вᲂскрⷭ҇нїѧ , прᲂсвѣще́и всѧ́ческаѧ , прїимѝ на́шꙋ вече́рнюю пѣ́снь чл҃кᲂлю́бче .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Цр҃кви бж҃їѧ во ᲂу҆гᲂто́ванїе бжⷭ҇твꙋ̀ всест҃ы́ѧ трⷪ҇цы , бг҃ᲂра́дᲂваннаѧ ѻ҆трᲂкᲂви́це , рѣко̀ всѧ́кїѧ бл҃гᲂсты́ни , и҆з̾ раѧ̀ прᲂи҆схᲂдѧ́щи , и҆́же па́че ᲂу҆ма̀ , ты̀ ра́дᲂстнѡ незави́стныѧ да́ры пᲂда́ждь , всѣ́мъ рабо́мъ сѝ чи́стаѧ , да всѝ вѣ́рнѡ бл҃гᲂдари́мъ тѧ̀ , ꙗ҆́кѡ предста́тельница є҆сѝ чл҃ческагѡ сꙋщества̀ пречⷭ҇таѧ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Нб҃о и҆́же всѣ́хъ цр҃ѧ , бг҃ᲂвмѣсти́маѧ сѣ́ни , несѣко́маѧ гᲂра̀ , ста́мно злата́ѧ бг҃ᲂто́чныѧ ма́нны , внꙋ́трь и҆мꙋ́щи хрⷭ҇та̀ кᲂвче́же слᲂве́сныи , но́вагѡ завѣ́та , бг҃ᲂрᲂди́тельнице всенепᲂро́ч наѧ чⷭ҇таѧ , ѿ всѧ́кагѡ и҆зба́ви на́съ ѡ҆ѕлᲂбле́ нїѧ , и҆ наслѣ́дїѧ пра́ведныхъ спᲂдо́би на́съ .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Ты́ ми хрⷭ҇тѐ мно́гїѧ грѣхѝ вѣ́си , и҆ ѡ҆ставле́нїе ми да́ждь , и҆ про́чее живᲂта̀ мᲂегѡ̀ , бг҃ᲂлю́бно ᲂу҆миле́нїе се́рдцꙋ . и҆ внꙋ́трь мѧ пᲂкаѧ́нїѧ , ѡ҆ тебѣ̀ ᲂу҆крѣпѝ жи́ти , и҆ в̾ ча́съ стра́шныи ᲂу҆лꙋчи́ти ми млⷭ҇ть . и҆ и҆́же ѡ҆деснꙋ́ю пред̾ста́тельства и҆ вᲂспрїѧ́тїѧ , є҆́же ᲂу҆гᲂто́ва , дᲂсто́йнѡ ти сп҃се пᲂслꙋжи́вшимъ .

сла́ва , и҆ ны́нѣ , боⷢ҇ . Пᲂд̾ твᲂѐ держа́внᲂе пред̾ ста́тельство прибѣга́ющїи прⷭ҇нѡ , бг҃ᲂрᲂди́тель нице дв҃о , стрⷭ҇те́й мꙋчи́тельства , и҆ лꙋка́выхъ пᲂмышле́нїи и҆збавлѧ́ютсѧ . тѣ́мже рабы̀ свᲂѧ̀ на́съ , ѿ всѧ́кагѡ вре́да и҆ тлѝ , бл҃гᲂпребы́тнᲂю ти мл҃твᲂю бл҃га́ѧ , и҆зба́вивши спасѝ , ꙗ҆́кѡ бл҃гᲂсе́рда , да вѣ́рᲂю всѝ бл҃гᲂсло́вимъ держа́вꙋ твᲂю̀ влⷣчце .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь вᲂскрⷭ҇нъ . гла́съ , г҃ . Да веселѧ́тсѧ нбⷭ҇наѧ , и҆ ра́дꙋютсѧ земна́ѧ , ꙗ҆́кѡ сᲂтвᲂрѝ держа́вꙋ мы́шцею свᲂе́ю гдⷭ҇ь . пᲂпра́въ сме́ртїю сме́рть , пе́рвенецъ и҆з̾ ме́ртвыхъ бы́сть . и҆́з̾ чрева а҆́дᲂва и҆зба́вилъ є҆́сть на́съ , и҆ пᲂда́стъ ми́рᲂви ве́лїю млⷭ҇ть . сла́ва , и҆ ны́нѣ , боⷢ҇ . Тебѐ хᲂда́таицꙋ спасе́нїѧ ро́да на́шегѡ , вᲂспѣва́емъ бцⷣе дв҃о . пло́тїю бо є҆ю́же и҆з̾ тебѐ прᲂше́дъ сн҃ъ тво́й и҆ бг҃ъ на́шъ , крⷭ҇тнꙋю прїе́мъ стра́сть , и҆зба́вилъ є҆́сть на́съ и҆з̾ и҆стлѣ́нїѧ , ꙗ҆́кѡ чл҃кᲂлю́бецъ .

та́же , є҆ктенїѧ̀ ма́лаѧ .= и҆ =ѿпꙋ́стъ .

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ , пᲂста́вимъ стихо́въ , і҃ . и҆ пᲂе́мъ , стихѣ́ры вᲂскрⷭ҇ны . гла́съ , г҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . Т=вᲂи́мъ крⷭ҇то́мъ хрⷭ҇тѐ сп҃се , сме́рти держа́ва разрꙋши́сѧ , и҆ дїа́вᲂлѧ ле́сть ᲂу҆праздни́сѧ . ро́дъ же чл҃ческїи вѣ́рᲂю спаса́емь , пѣ́снь ти всегда̀ прино́ситъ .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Прᲂсвѣти́шасѧ всѧ́ческаѧ , вᲂскрⷭ҇нїемъ твᲂи́мъ гдⷭ҇и , и҆ ра́й па́ки ѿве́рзесѧ . всѧ́ же тва́рь вᲂсхвалѧ́ющи тѧ , пѣ́снь ти всегда̀ прино́ситъ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Сла́влю ѻ҆ц҃а и҆ сн҃а си́лꙋ , и҆ ст҃а́гѡ дх҃а пᲂю̀ влады́чество , нераздѣ́льно и҆ несᲂзда́нно бжⷭ҇тво̀ , трⷪ҇цꙋ є҆динᲂсꙋ́щнꙋю , црⷭ҇твꙋющꙋю во́ вѣки вѣкѡ́мъ .

бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . Крⷭ҇тꙋ̀ твᲂемꙋ̀ чⷭ҇тно́мꙋ пᲂклᲂнѧ́емсѧ хрⷭ҇тѐ [пᲂкло́н̾] , и҆ вᲂскрⷭ҇нїе твᲂѐ пᲂе́мъ и҆ сла́вимъ . ра́нᲂю бо твᲂе́ю мы̀ всѝ и҆сцѣлѣ́хᲂмъ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Пᲂе́мъ сп҃са и҆́же ѿ дв҃ы вᲂпло́щшагᲂсѧ , на́съ бо ра́ди распѧ́тсѧ , и҆ в̾ тре́тїи де́нь вᲂскр҃се , да́рꙋѧ на́мъ ве́лїю млⷭ҇ть .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Сꙋ́щимъ во а҆́дѣ съше́дъ хрⷭ҇то́съ бл҃гᲂвѣстѝ , дерза́йте глаго́лѧ ны́нѣ пᲂбѣди́хъ . а҆́зъ є҆́смь вᲂскрⷭ҇нїе . а҆́зъ вы̀ вᲂзвᲂжꙋ̀ , разо́рь сме́ртнаѧ врата̀ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . И҆́же недᲂсто́йнѣ стᲂѧ́ще въ пречи́стѣмъ дᲂмꙋ̀ твᲂе́мъ , вече́рнее пѣ́нїе вᲂз̾сыла́емъ , и҆з̾ глꙋбины̀ взыва́юще хрⷭ҇тѐ бж҃е , прᲂсвѣти́выи ми́ръ тридне́внымъ вᲂскрⷭ҇нїемъ свᲂи́мъ , и҆змѝ лю́ди твᲂѧ̀ , и҆з̾ рꙋкѝ вра́гъ твᲂи́хъ , чл҃кᲂлю́бче .

и҆́ны стⷯры , ѡ҆ =раз̾сла́бленѣмъ . запѣ́в̾ : гла́съ , а҃ . ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . И҆́=же дла́нїю пречⷭ҇тᲂю сᲂзда́выи чл҃ка , прїи́де милᲂсе́рде бᲂлѧ́щїѧ и҆сцѣли́ти хрⷭ҇тѐ , раз̾сла́бленаго во ѻ҆́вчѣй кꙋпѣ́ли сло́вᲂмъ свᲂи́мъ вᲂз̾ста́вилъ є҆сѝ . крᲂвᲂтᲂчи́вѣй же бᲂлѣ́знь и҆сцѣли́лъ є҆сѝ , и҆ хананѣ́и же ѻ҆трᲂкᲂви́цꙋ ѡ҆скᲂрблѧ́емꙋ , пᲂми́лᲂвалъ є҆сѝ , и҆ прᲂше́нїе со́тника , не презрѣ́лъ є҆сѝ . сегѡ̀ ра́ди зᲂве́мъ , всеси́льне гдⷭ҇и сла́ва тебѣ̀ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . И҆́же дла́нїю пречⷭ҇тᲂю сᲂзда́выи чл҃ка , прїи́де милᲂсе́рде бᲂлѧ́щїѧ и҆сцѣли́ти хрⷭ҇тѐ , раз̾сла́бленаго во ѻ҆́вчѣй кꙋпѣ́ли сло́вᲂмъ свᲂи́мъ вᲂз̾ста́вилъ є҆сѝ . крᲂвᲂтᲂчи́вѣй же бᲂлѣ́знь и҆сцѣли́лъ є҆сѝ , и҆ хананѣ́и же ѻ҆трᲂкᲂви́цꙋ ѡ҆скᲂрблѧ́емꙋ , пᲂми́лᲂвалъ є҆сѝ , и҆ прᲂше́нїе со́тника , не презрѣ́лъ є҆сѝ . сегѡ̀ ра́ди зᲂве́мъ , всеси́льне гдⷭ҇и сла́ва тебѣ̀ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Непᲂгребе́нъ мертве́цъ сы́и раз̾сла́бленныи ви́дѣвъ тѧ̀ вᲂзᲂпѝ , пᲂми́лꙋй мѧ гдⷭ҇и , ꙗ҆́кѡ ѻ҆́дръ мо́й гро́бъ мнѣ̀ бы́сть ; что́ ми прїѡ҆брѣте́нїе живᲂтꙋ̀ ; нетре́бꙋю ѻ҆́вчїѧ кꙋпѣ́ли , неи́мамъ бо кᲂгѡ̀ влага́юща мѧ , вᲂз̾мꙋща́ющимсѧ вᲂда́мъ . но тебѣ̀ и҆сто́чникꙋ прїидо́хъ и҆сцѣле́нїѧ , да и҆ а҆́зъ со всѣ́ми зᲂвꙋ̀ , всеси́льне гдⷭ҇и сла́ва тебѣ̀ .

сла́ва . гла́съ , є҃ . Взы́де і҆с҃ъ во і҆єрⷭ҇ли́мъ на ѻ҆́вчꙋю кꙋпѣ́ль , гл҃емꙋю і҆ꙋде́йски виѳе́зда , пѧ́ть притво́ръ и҆мꙋ́щꙋ , и҆дѣ́же слежа́ше мно́жество бᲂлѧ́щихъ . а҆́нг҃лъ бо бж҃їи по всѧ̀ лѣ́та схᲂдѧ̀ , вᲂзмꙋща́ше ю҆̀ , и҆ здра́вїе пᲂдава́ше пристꙋпа́ющимъ с̾ вѣ́рᲂю . и҆ ви́дѣвъ гдⷭ҇ь мнᲂгᲂвре́менна челᲂвѣ́ка , глаго́ла к̾ немꙋ̀ , хо́щеши ли цѣ́лъ бы́ти ; бᲂлѧ́и ѿвѣщава́ше , гдⷭ҇и чл҃ка неи́мамъ , да є҆гда̀ вᲂзмꙋти́тсѧ вᲂда̀ , в̾ве́ржетъ мѧ в̾ кꙋпѣ́ль , враче́мъ и҆зда́хъ всѐ и҆мѣ́нїе мᲂѐ , и҆ млⷭ҇ти ᲂу҆лꙋчи́ти неспᲂдо́бихсѧ . но вра́чь дш҃а́мъ и҆ тѣ́лᲂмъ гл҃а к̾ немꙋ̀ , вᲂзмѝ сво́й ѻ҆́дръ и҆ хᲂдѝ , прᲂпᲂвѣ́даѧ мᲂю̀ си́лꙋ , и҆ ве́лїю млⷭ҇ть в̾ кᲂнцѣ́хъ . и҆ ны́нѣ , боⷢ҇ . гла́съ , г҃ . Ка́кѡ недиви́мсѧ , бг҃ᲂмꙋ́жнᲂмꙋ твᲂемꙋ̀ ржⷭ҇твꙋ̀ пречⷭ҇таѧ , и҆скꙋше́нїѧ бо мꙋ́жеска непрїе́мши всенепᲂро́чнаѧ , рᲂдила̀ є҆сѝ без̾ ѻ҆ц҃а сн҃а пло́тїю , и҆́же пре́жде вѣ́къ рᲂжде́ннагѡ ѿ ѻ҆ц҃а без̾ мт҃ре , ника́кᲂже претерпѣ́вша и҆змѣне́нїѧ , ли смѣше́нїѧ , ли раздѣле́нїѧ , но во ѻ҆бᲂю̀ сꙋществꙋ̀ , сво́йство цѣ́ло сᲂхра́ньша . тѣ́мже мт҃и дв҃о влⷣчце , тᲂгѡ̀ мᲂлѝ спастѝ дш҃а , и҆́же правᲂсла́внѡ , бцⷣꙋ тѧ̀ и҆спᲂвѣ́дающихъ . та́же , вы́хᲂдъ : свѣ́тѣ ти́хїи . прᲂки́менъ , дню̀ .

На литі́и , стихѣ́ра хра́мꙋ . та́же , стихѣ́ры бцⷣы , твᲂре́нїе , па́вла а҆мᲂре́йскаго . гла́с̾ , з҃ . Млⷭ҇тива бл҃гᲂпребы́тна мнѣ̀ дв҃о , и҆ бл҃гᲂпᲂслꙋ́шна ꙗ҆ви́ сѧ , призыва́ющꙋ бжⷭ҇твенꙋю тѝ бл҃гᲂда́ть , во всѣ́хъ вᲂи́стинꙋ слꙋча́ющихмисѧ . всю́ бо наде́жꙋ дꙋшѝ мᲂеѧ̀ вᲂзлᲂжи́хъ к̾ тебѣ̀ , и҆ во всѣ́хъ ᲂу҆пᲂва́ю на бжⷭ҇твеныи про́мыслъ тво́й . ты̀ и҆ бꙋ́дꙋщїѧ мѧ̀ сла́вы , и҆ живᲂта̀ бжⷭ҇твенагѡ спᲂдо́би . Оу҆́глїе во мнѣ̀ бцⷣе , стрⷭ҇те́й мᲂи́хъ вᲂзгᲂрѣ́шасѧ , ѿ́ гнѣва же и҆ ꙗ҆́рᲂсти , ѿ пїѧ́нства и҆ блꙋда̀ , ѿ сребрᲂлю́бїѧ и҆ же́стᲂсти срⷣца , ᲂу҆мерщве́нїѧ лю́тагѡ , ѿ ᲂу҆ны́нїѧ и҆ смꙋще́нїѧ , ѿ тщесла́вїѧ же и҆ пᲂпра́нїѧ со́вѣ стнагѡ . ѿ ни́хже и҆зба́ви дш҃ꙋ мᲂю̀ мᲂлю́сѧ , влⷣчце и҆ спаси́ мѧ . Всѝ чи́стᲂю со́вестїю бцⷣѣ припа́днемъ , вᲂпїю́ще непреста́ннѡ ѿ среды̀ срⷣчныѧ , влⷣчце ст҃а́ѧ спасѝ всѣ́хъ , ѿ́ гнѣва и҆ ѡ҆ѕлᲂбле́нїѧ , бѣ́дъ и҆ паде́жей , ꙗ҆́кѡ тебѐ стѧ жа́хᲂмъ стѣ́нꙋ и҆ ᲂу҆тверже́нїе , тᲂбо́ю спаса́еми , пᲂд̾ кро́въ тво́й притека́юще . сла́ва . гла́съ , є҃ . На ѻ҆́вчей кꙋпѣ́ли челᲂвѣ́къ слежа́ше в̾недꙋ́зѣ , и҆ ви́дѣвъ тѧ гдⷭ҇и вᲂпїѧ́ше , чл҃ка неи́мамъ , да є҆гда̀ вᲂз̾мꙋти́тсѧ вᲂда̀ , в̾ве́ржетъ мѧ в̾ ню̀ . є҆гда́ же прихᲂжꙋ̀ , и҆́нъ пред̾варѧ́етъ мѧ , и҆ прїе́млетъ и҆сцѣле́нїе , а҆́зъ же бᲂлѧ̀ ѿхᲂжꙋ̀ . и҆ а҆́бїе ᲂу҆млрⷭ҇дивсѧ сп҃съ , гл҃а к̾ немꙋ̀ , тебѐ ра́ди чл҃къ бы́хъ , тебѐ ра́ди в̾ пло́ть ѡ҆блеко́хсѧ , и҆ гл҃еши чл҃ка неи́мамъ , вᲂзмѝ ѻ҆́дръ тво́й и҆ хᲂдѝ . всѧ̀ тебѣ̀ вᲂзмо́жна . всѧ̀ пᲂслꙋ́шаютъ , всѧ̀ пᲂвинꙋ́ютсѧ . всѣ́хъ на́съ пᲂмѧнѝ , и҆ пᲂми́лꙋй ст҃ы́и , ꙗ҆́кѡ чл҃кᲂлю́бецъ .

и҆ ны́нѣ , боⷢ҇ . гла́съ , то́йже . Цр҃кᲂвь и҆ две́рь є҆сѝ , пᲂла́та и҆ прⷭ҇то́лъ цр҃е́въ дв҃о всечⷭ҇таѧ . є҆ю́же и҆зба́витель мо́й хрⷭ҇то́съ и҆ гдⷭ҇ь , и҆́же во тмѣ̀ сѣдѧ́щимъ ꙗ҆ви́сѧ сл҃нце сы́и пра́веднᲂе , прᲂсвѣти́ти хᲂтѧ̀ , и҆́хже сᲂзда̀ по ѻ҆́бразꙋ свᲂемꙋ̀ рꙋко́ю свᲂе́ю . тѣ́мже всепѣ́таѧ , ꙗ҆́кѡ мт҃рьне дерзнᲂве́нїе к̾ немꙋ̀ стѧжа́вши , непреста́ннѡ мᲂлѝ спасти́сѧ дш҃а́мъ на́шимъ .

На стихо́внѣ , стихѣ́ры , вᲂскрⷭ҇ны . гла́съ , г҃ . Стрⷭ҇тїю твᲂе́ю хрⷭ҇тѐ , ѡ҆мрачи́выи сл҃нце , и҆ свѣ́тᲂмъ твᲂегѡ̀ вᲂскрⷭ҇нїѧ , прᲂсвѣще́и всѧ́ческаѧ , прїимѝ на́шꙋ вече́рнюю пѣ́снь чл҃кᲂлю́бче .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Жизнᲂда́внᲂе твᲂѐ вᲂста́нїе гдⷭ҇и , вселе́ннꙋю всю̀ прᲂсвѣтѝ , и҆ свᲂѐ сᲂзда́нїе и҆стлѣ́вшее вы́спрь призва̀ . тѣ́мже клѧ́твы а҆да́мᲂвы и҆змѣ́ншесѧ , вᲂпїе́мъ , всеси́льне гдⷭ҇и сла́ва тебѣ̀ .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Бг҃ъ сы́и неи҆змѣ́ненъ , пло́тїю стражда̀ и҆змѣни́сѧ . є҆го́же тва́рь нетерпѧ́щи ви́сѧща зрѣ́ти , стра́хᲂмъ преклᲂнѧ́шесѧ , и҆ стᲂнѧ́щи твᲂѐ пᲂе́тъ дᲂлгᲂтерпѣ́нїе . с̾ше́дъ же во а҆́дъ тридне́вно вᲂскр҃се , жи́знь да́рꙋѧ ми́рᲂви , и҆ ве́лїю млⷭ҇ть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Да ро́дъ на́шъ ѿ сме́рти хрⷭ҇тѐ и҆зба́виши , сме́рть претерпѣ́лъ є҆сѝ . и҆ первене́цъ и҆з̾ ме́ртвыхъ вᲂскр҃се , с̾ сᲂбо́ю вᲂста́вилъ є҆сѝ , и҆́же тѧ̀ бг҃а пᲂзна́вшихъ , и҆ ми́ръ прᲂсвѣти́лъ є҆сѝ , гдⷭ҇и сла́ва тебѣ̀ .

сла́ва . гла́съ , и҃ . Въ притво́рѣ сᲂло́мѡнᲂвѣ , тꙋ̀ слежа́ше мно́жество бᲂлѧ́щихъ . и҆ въ препᲂлᲂве́нїе пра́здника ѡ҆брѣ́те хрⷭ҇то́съ , три́десѧть и҆ ѻ҆́смь лѣ́тъ раз̾сла́блена лежа́ща , влады́чнимъ гла́сᲂмъ гл҃а к̾ немꙋ̀ , хо́щеши ли цѣ́лъ бы́ти . бᲂлѧ́и ѿвѣща̀ , гдⷭ҇и , челᲂвѣ́ка неи́мамъ , да є҆гда̀ вᲂз̾мꙋти́тсѧ вᲂда̀ , и҆ в̾ве́ржетъ мѧ в̾ кꙋпѣ́ль . ѻ҆́нъ же гл҃а к̾ немꙋ̀ . вᲂзмѝ ѻ҆́дръ сво́й и҆ хᲂдѝ , сѐ здра́въ бы́сть , к̾ тᲂмꙋ̀ несᲂгрѣша́й . мл҃твами бцⷣы , пᲂда́ждь на́мъ ве́лїю млⷭ҇ть . и҆ ны́нѣ , боⷢ҇ . гла́съ , то́йже . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . нн҃ѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : бцⷣе дв҃о ра́дꙋисѧ , гⷤ . и҆ про́чее .

Внлⷣю , д҃ ю , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , и҆ ны́нѣ , боⷢ҇ .

По а҃ , стихᲂло́гїи , сѣда́ленъ . гла́съ , г҃ . Хрⷭ҇то́съ ѿме́ртвыхъ вᲂста̀ , нача́тᲂкъ ᲂу҆со́пшимъ бы́сть , пе́рвенецъ тва́ри , и҆ сᲂдѣ́тель всѣ́мъ бы́вшимъ . и҆стлѣ́вшее є҆стество̀ ро́да на́шегѡ , сᲂбо́ю ѡ҆бнᲂвѝ . не к̾ тᲂмꙋ̀ сме́рте ѡ҆блада́еши , и҆́бо всѣ́хъ влⷣка держа́вꙋ твᲂю̀ разрꙋшѝ .= сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ па́ки , то́йже , сѣда́ленъ . =сла́ва , и҆ ны́нѣ , боⷢ҇ . Непᲂсти́жимаго и҆ не ѡ҆пи́саннаго , є҆динᲂсꙋ́щнаго неви́димᲂмꙋ ѻ҆ц҃ꙋ , во ᲂу҆тро́бꙋ свᲂю̀ та́йнѡ вмѣсти́ла є҆сѝ бцⷣе , є҆ди́на и҆ несмѣ́сно ѿ трⷪ҇цы бжⷭ҇тво̀ , пᲂзна́хᲂмъ ржⷭ҇тво̀ твᲂѐ в̾ ми́рѣ сла́вити . тѣ́мже и҆ бл҃гᲂда́рствено вᲂпїе́мъ тѝ , ра́дꙋисѧ ѡ҆бра́дᲂваннаѧ .

По в҃ , стихᲂло́гїи , сѣда́ленъ . гла́съ , г҃ . Пло́тїю сме́рть вкꙋ́шь гдⷭ҇и , го́ресть сме́ртнꙋю пресѣчѐ вᲂста́нїемъ свᲂи́мъ , и҆ челᲂвѣ́ка наню̀ ᲂу҆крѣпѝ , пе́рвыѧ клѧ́твы ѡ҆дᲂлѣ́нїе призыва́ѧ . защи́тниче жи́зни на́шеѧ , хрⷭ҇тѐ бж҃е сла́ва тебѣ̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Прибѣ́жище и҆ си́ла на́мъ бцⷣе , крѣ́пкаѧ пᲂмо́щнице ми́рꙋ всемꙋ̀ , мл҃твами твᲂи́ми пᲂкры́й рабы̀ свᲂѧ̀ ѿ всѧ́кїѧ нꙋ́жды , є҆ди́на бл҃гᲂслᲂве́наѧ .

По непᲂро́чнахъ , трᲂпарѝ , а҆́нг҃льскїи сᲂбо́ръ . и҆пако́й . Оу҆дивлѧ́ѧ видѣ́нїемъ , ѡ҆рᲂша́ѧ гл҃анїи , блиста́ѧсѧ а҆́нг҃лъ , мѷрѡно́сицамъ гл҃аше , что̀ жива́го и҆́щете во́ грᲂбѣ . вᲂста̀ и҆спраздни́выи гро́бы . тлѝ премѣни́телѧ , разꙋмѣ́йте непремѣ́ннаго . рцѣ́те бг҃ᲂви , ко́ль стра́шна дѣ́ла твᲂѧ̀ , ꙗ҆́кѡ ро́дъ спа́слъ є҆сѝ чл҃ческїи .

степе́нны . гла́съ , г҃ . а҆нтифо́нъ , а҃ . пᲂе́мъ по вⷤ . Плѣ́нъ сїѡ́нь ты̀ взѧ́тъ ѿ вавило́на , и҆ менѐ ѿ страсте́й к̾ живᲂтꙋ̀ привлецы̀ сло́ве . Во ю҆́гъ сѣ́ющїи сле́зы бжⷭ҇твенныѧ , жнꙋ́тъ кла́сы ра́дᲂстїю прⷭ҇нѡ живо́тныѧ . Ст҃о́мꙋ дх҃ꙋ всѧ́ко бл҃гᲂдаре́нїе , ꙗ҆́кᲂже ѻ҆ц҃ꙋ и҆ сн҃ꙋ со ѡ҆блиста́етъ , ѡ҆ не́мже всѧ́ческаѧ живꙋ́тъ и҆ дви́жатсѧ .

а҆нтифо́нъ , в҃ . А҆́ще не гдⷭ҇ь сᲂзи́ждетъ до́мъ дᲂбрᲂдѣ́телей , в̾сꙋ́е трꙋжда́емсѧ , дш҃ꙋ же пᲂкрыва́юще , никто́же на́шъ разᲂри́тъ гра́дъ . Плᲂда̀ чре́внѧгѡ , дх҃ᲂмъ сн҃ᲂтвᲂре́ни ти сꙋ́ть хрⷭ҇тꙋ̀ , ꙗ҆́кᲂже и҆ ѻ҆ц҃ꙋ ст҃і́и всегда̀ . Ст҃ы́мъ дх҃ᲂмъ прᲂви́дитсѧ всѧ́ка ст҃ы́ни премꙋ́дрᲂсть , ѡ҆сꙋ́ществꙋетъ бо всѧ́кꙋ тва́рь , тᲂмꙋ̀ пᲂслꙋ́жимъ , бг҃ъ бо , ꙗ҆́кᲂже ѻ҆ц҃ꙋ и҆ сло́вꙋ .

а҆нтифо́нъ , г҃ . Бᲂѧ́щїисѧ гдⷭ҇а бл҃же́ни , в̾ пꙋ́ть хᲂдѧ́ще за́пᲂвѣдей , снѣдѧ́тъ бо живо́тъ даю́щее всѧ́кѡ пло́дїе . Ѻ҆́крⷭ҇тъ трапе́зы твᲂеѧ̀ , вᲂзвесели́сѧ зрѧ̀ свᲂи́хъ си , па́стыремъ нача́льниче и҆сча́дїѧ , нᲂсѧ́ща ва́їѧ бл҃гᲂдѣѧ́нїѧ . Ст҃ы́мъ дх҃ᲂмъ , всѧ́ко бᲂга́тство сла́вы , ѿ него́же бл҃гᲂда́ть и҆ живо́тъ всѧ́кᲂй тва́ри , со ѻ҆ц҃е́мъ бо вᲂспѣва́етсѧ и҆ с̾ сло́вᲂмъ .

прᲂки́мен̾ , ѱл҃о́мъ дв҃дᲂв̾ . рцы́те во ꙗ҆зы́цѣхъ ꙗ҆́кѡ гдⷭ҇ь вᲂцари́сѧ , и҆́бо и҆спра́ви вселе́ннꙋю ꙗ҆́же непᲂдви́житсѧ . сти́хъ : вᲂспо́йте гдⷭ҇ви пѣ́снь но́вꙋ , вᲂспо́йте гдⷭ҇ви всѧ̀ землѧ̀ . всѧ́ко дыха́нїе .= є҆ѵⷢ҇а́лїе , ѿ лꙋкѝ . зача́ло , рв҃і . =та́же , Вᲂскрⷭ҇нїе хрⷭ҇то́во , гⷤ . ѱало́мъ , н҃ .

сла́ва . мᲂли́твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю ми́лᲂсть . і҆єре́й , гл҃етъ : спасѝ бж҃е лю́ди . пᲂе́м̾ : гдⷭ҇и пᲂми́лꙋй , ві҃ . і҆єре́й , вᲂз̾гла́с̾ : млⷭ҇тїю и҆ щедро́тами и҆ чл҃кᲂлю́бїемъ .

кано́нъ , па́сцѣ , с̾ бг҃ᲂро́дичны , на́ и҃ . пи́санъ , в̾ нлⷣю мѷрѡно́сицъ . и҆ ѡ҆ раз̾сла́бленᲂмъ , на́ ѕ҃ . пᲂслѣди́ же , і҆рмо́съ , настᲂѧ́щагѡ кано́на .

кано́нъ , гла́съ , г҃ . пѣ́снь , а҃ . і҆рмо́съ . Ди́венъ въ сла́вахъ .= запѣ́въ : Сла́ва тебѣ̀ бж҃е на́шъ , сла́ва тебѣ̀ . Во хрⷭ҇то́вѣ вᲂста́нїи лю́дїе , дне́сь ликꙋ́емъ вѣ́рнѡ , ꙗ҆́кѡ плѣне́нъ бы́сть а҆́дъ , и҆ ꙗ҆́же ᲂу҆́зники и҆мѧ́ше , ѿ́далъ є҆́сть сᲂтща́нїемъ , пᲂю́щїѧ вели́чїѧ бж҃їѧ . Дѣ́йствꙋѧи чꙋдеса̀ , и҆ твᲂрѧ̀ зна́менїѧ цр҃ю є҆ди́не , распѧ́тїе во́лею претерпѣ́лъ є҆сѝ ꙗ҆́кѡ ще́дръ , и҆ сме́рть сме́ртїю ᲂу҆мертви́въ ѡ҆живи́лъ є҆сѝ на́съ . И҆́же си́лᲂю бжⷭ҇твенᲂю , и҆нᲂгда̀ разсла́бленаго сло́вᲂмъ свᲂи́мъ хрⷭ҇тѐ ᲂу҆крѣпи́выи , и҆ пᲂвелѣ́въ є҆мꙋ̀ ѻ҆́дръ взѧ́ти , мно́зѣмъ вре́менемъ бᲂлѧ́щꙋю лю́тѣ дш҃ꙋ мᲂю̀ и҆сцѣлѝ . Въ кꙋпѣ́ль и҆нᲂгда̀ ѻ҆́вчꙋю а҆́нг҃лъ прихᲂжа́ше , и҆ є҆ди́нᲂго и҆сцѣлева́ше на всѧ́ко лѣ́то , креще́нїемъ же бжⷭ҇твенымъ ны́нѣ ѡ҆чища́етъ , бесчи́сленаѧ мно́жества хрⷭ҇то́съ . =запѣ́въ а҆рха́нг҃лꙋ : Ст҃ы́и а҆рха́нг҃ле миха́иле , мᲂлѝ бг҃а ѡ҆ на́съ .= Нача́льниче а҆́нг҃лѡмъ , а҆рхистрати́же вы́шнимъ слꙋга́мъ , сᲂше́дшїѧсѧ въ чⷭ҇тнѣ́мъ хра́мѣ твᲂе́мъ , и҆ бг҃а вᲂспѣва́ющїѧ , пᲂкры́и и҆ сᲂхранѝ ѿ всѧ́кагѡ и҆скꙋше́нїѧ . =сла́ва . Въ тре́хъ ли́цѣхъ , во є҆ди́нᲂмъ же є҆стествѣ̀ , безнача́льна бг҃а пᲂе́мъ непреста́ннѡ со беспло́тными , ѻ҆ц҃а и҆ сло́ва и҆ дх҃а , црⷭ҇тво и҆мꙋ́ща и҆ держа́вꙋ нераздѣ́льнꙋ . и҆ ны́нѣ , боⷢ҇ . Чтꙋ́щїи тѧ̀ се́й чи́стаѧ гра́дъ тво́й всегда̀ вѣ́рнѡ , спаса́й ѿ бѣ́дъ и҆ плѣне́нїѧ ва́рварска , и҆ междᲂꙋсо́бнагѡ ᲂу҆бі́йства и҆ меча̀ , и҆ всѧ́кᲂго и҆но́го преще́нїѧ .

катава́сїѧ : Ди́венъ в̾ сла́вахъ твᲂрѧ́и чꙋдеса̀ , ты̀ є҆сѝ бж҃е и҆́же бе́зднꙋ и҆з̾сꙋши́выи , и҆ ѡ҆рꙋ́жїе пᲂтᲂпѝ и҆ лю́ди спасѐ , пᲂю́щїѧ тѧ̀ ꙗ҆́кѡ и҆зба́вителѧ бг҃а на́шегѡ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Непло́днаѧ дш҃е . Зрѧ̀ тебѐ и҆нᲂгда̀ сл҃нце на́ древѣ ви́сѧща сло́ве , свѣ́тъ сᲂкры̀ , и҆ трѧса́шесѧ землѧ̀ всѧ̀ , и҆ ме́ртвїи вᲂста́ша , ме́ртвꙋ бы́вшꙋ ти всеси́льне . Съ дш҃е́ю бы́въ , во ᲂу҆тро́бѣ землѝ , д́ш҃и ꙗ҆́же стѧжа̀ , и҆з̾дава́ше а҆́дъ сᲂтща́нїемъ , вᲂпїю́щїѧ держа́вѣ твᲂе́й пѣ́снь ра́дᲂстнꙋю , є҆ди́не гдⷭ҇и . И҆́же в̾ лѣ́тѣхъ мно́гихъ и҆з̾немо́гшꙋю лю́тѣ дш҃ꙋ мᲂю̀ пребл҃гі́и , и҆сцѣлѝ ꙗ҆́кᲂже и҆ раз̾сла́бленаго пре́же , ꙗ҆́кѡ да хᲂжꙋ̀ по твᲂи́мъ стезѧ́мъ , и҆́хже пᲂказа́лъ є҆сѝ лю́бѧщимъ тѧ̀ .

а҆рха́нг҃лꙋ . Съ вы́шними чи́нми бж҃їи а҆рха́нг҃ле , мᲂльбꙋ̀ сᲂтвᲂрѝ ѡ҆ и҆́же вѣ́рᲂю пᲂю́щихъ тѧ , сᲂблюда́ѧ и҆ хранѧ̀ на́съ , ѿ жите́йскихъ страсте́й напа́дающихъ . сла́ва . Сла́ва ѻ҆ц҃ꙋ вᲂпїе́мъ , и҆ сн҃ꙋ и҆ дх҃ꙋ , є҆ди́нъ бо сы́и є҆стество́мъ бг҃ъ , є҆го́же си́лы всѧ̀ нбⷭ҇ныѧ со́ страхᲂмъ сла́вѧтъ , ст҃ъ , ст҃ъ , ст҃ъ є҆сѝ зᲂвꙋ́ще .= и҆ нн҃ѣ , боⷢ҇ .= Без̾сѣ́менно и҆мѣ̀ зача́тїе , и҆ па́че ᲂу҆ма̀ ржⷭ҇тво̀ дв҃о мт҃и чⷭ҇таѧ , дѣ́ло стра́шно , и҆ чꙋ́да и҆спо́лнено , а҆́нг҃лы пᲂчита́емо , и҆ челᲂвѣ́ки сла́вимо , ѻ҆трᲂкᲂви́це влⷣчце .

катава́сїѧ : Непло́днаѧ дш҃е и҆ безча́днаѧ , стѧжѝ пло́дъ ѡ҆́ бз҃ѣ , и҆ веселѧ́щисѧ вᲂзᲂпі́й ᲂу҆тверди́хсѧ тᲂбо́ю бж҃е , нѣ́сть ст҃а и҆ нѣ́сть пра́ведна па́че тебѐ гдⷭ҇и .

кᲂнда́къ , и҆ и҆́кᲂсъ , па́сцѣ . та́же , сѣда́ленъ . гла́съ , г҃ . Гл҃ᲂмъ то́кмѡ є҆ди́нѣмъ ᲂу҆крѣпи́въ раз̾сла́бленаго всеми́рнᲂе сло́во , и҆́же на́съ ра́ди на землѝ ꙗ҆ви́вшеесѧ за милᲂсе́рдїе . тѣ́мже и҆ и҆́же ѻ҆́дръ нᲂсѧ́и ми́мѡ хᲂжда́ше . є҆го́же и҆ кни́жницы зрѣ́ти сᲂдѣ́ѧннᲂе нетерпѧ́хꙋ , ѕло́бᲂю раз̾сла́блени и҆ за́вистїю , є҆ю́же д́ш҃и раз̾слаблѧ́юще . сла́ва , и҆ ны́нѣ , то́йже .

пѣ́снь , д҃ . і҆рмо́съ . Присѣ́ннꙋю го́рꙋ . Є҆вре́йскїи сᲂбѡ́ръ за́вистїю растаѧва́емь , на́ древѣ распѧ́тъ тѧ гдⷭ҇и . и҆ разᲂри́въ ѡ҆сꙋжде́нїе сме́ртнᲂе , ꙗ҆́кѡ си́ленъ вᲂста́лъ є҆сѝ , и҆ ми́ръ с̾ сᲂбо́ю вᲂз̾дви́глъ є҆сѝ . Сми́рѡмъ жены̀ , что̀ не и҆стᲂщи́маго ми́ра и҆́щете ; вᲂста́лъ є҆́сть къ мѷрѡно́сицамъ речѐ , сѣдѧ́и в̾ бѣ́лахъ ри́захъ , пᲂд̾нбⷭ҇нꙋю и҆спᲂлнѧ́ѧ мы́сленагѡ бл҃гᲂꙋха́нїѧ . Ра́бїи нᲂсѧ̀ ѻ҆́бразъ , за мно́гᲂе млрⷭ҇дїе хᲂтѧ̀ прише́лъ є҆сѝ на́ землю и҆ здра́ва пᲂказа́лъ є҆сѝ , и҆́же во мно́гихъ лѣ́тѣхъ лежа́щаго , пᲂвелѣ́въ и҆ ѻ҆́дръ нᲂси́ти . А҆́нг҃лъ ᲂу҆́бѡ гдⷭ҇нь на всѧ́ко лѣ́то схᲂдѧ̀ , и҆ во́дꙋ в̾ кꙋпѣ́ли вᲂз̾мꙋща́ше , твᲂрѧ̀ здра́ва є҆ди́наго то́чїю . хрⷭ҇то́съ же мно́жества бесчи́слена бжⷭ҇твенымъ креще́нїемъ спаса́етъ .

а҆рха́нг҃лꙋ . Нача́льниче а҆́нг҃лѡмъ , и҆ наста́вниче заблꙋжа́ющимъ , гдⷭ҇нь нача́льныи вᲂєво́до , в̾ ча́съ се́й пᲂсредѝ на́съ прїидѝ , и҆ мл҃твы всѣ́хъ принесѝ є҆ди́нᲂмꙋ твᲂрцꙋ̀ и҆ влⷣцѣ . сла́ва . Сᲂєдине́на є҆стество́мъ , и҆ раздѣле́на ли́цы є҆́сть ст҃а́ѧ трⷪ҇ца , ѻ҆ц҃ъ пресꙋ́щественыи , и҆ сᲂпрⷭ҇нᲂсꙋ́щественыи сн҃ъ , и҆ ст҃ы́и є҆ди́нъ всеси́льныи дх҃ъ .= и҆ ны́нѣ , боⷢ҇ .= Чтⷭ҇аѧ рцы̀ , ка́кѡ рᲂдила̀ є҆сѝ ; и҆ ка́кѡ дᲂи́ши младе́нца , а҆да́ма дре́внѣйша ; ка́кѡ на рꙋкꙋ̀ но́сиши сн҃а , и҆́же сы́и на ра́мꙋ херꙋви́мскꙋ ; ꙗ҆́кᲂже то́й вѣ́сть є҆ди́нъ и҆́же всѧ̀ ѡ҆сꙋ́ществᲂвавыи .

катава́сїѧ : Присѣ́ннꙋю го́рꙋ а҆вва́кꙋмъ пред̾зрѧ̀ , пречⷭ҇тᲂе ти чре́во чи́стаѧ , тѣ́мъ и҆ вᲂпїѧ́ше ѿ ю҆́га прїи́детъ бг҃ъ , и҆ ст҃ы́и ѿ гᲂры̀ присѣ́нныѧ ча́сты .

пѣ́снь , є҃ . і҆рмо́съ . Свѣ́тᲂмъ твᲂи́мъ . Вᲂзнесе́сѧ на́ древѣ крⷭ҇тнѣмъ , и҆ сᲂвᲂзне́слъ є҆сѝ ми́ръ ве́сь , и҆ бы́въ в̾ ме́ртвыхъ ꙗ҆́кѡ бг҃ъ и҆́же ѿ́ вѣка ме́ртвыѧ сᲂвᲂздви́глъ є҆сѝ . Вᲂскр҃се ꙗ҆́кᲂже речѐ хрⷭ҇тѐ , и҆стᲂщи́въ всѧ̀ а҆́дᲂва црⷭ҇тва . и҆ ꙗ҆ви́сѧ а҆пⷭ҇лѡмъ , ра́дᲂсть пᲂдава́ѧ вѣ́чнꙋющꙋю . Раз̾сла́бленаго ꙗ҆́кᲂже вᲂздви́глъ є҆сѝ хрⷭ҇тѐ , раз̾сла́бленꙋю мѝ дш҃ꙋ престꙋпле́ньми ѡ҆здра́ви , и҆ ше́ствᲂвати мѝ на твᲂю̀ пра́вꙋю стезю̀ наста́ви . Бѣлᲂѡ҆бра́зенъ бѧ́ше жена́мъ зᲂвы́и а҆́нг҃лъ , не к̾ тᲂмꙋ̀ пла́чите , живо́тъ на́шъ вᲂскрⷭ҇лъ є҆́сть , и҆ ꙗ҆́же во грᲂбѣ́хъ ме́ртвыѧ сᲂѡживи́лъ .

а҆рха́нг҃лꙋ . А҆́нг҃лѡмъ нача́льниче миха́иле , ꙗ҆́же сᲂбира́ющїѧсѧ въ хра́мѣ твᲂе́мъ лю́ди дне́сь , и҆ прᲂпᲂвѣ́дꙋющїѧ бж҃їѧ вели́чїѧ спаса́й . сла́ва . Равнᲂчестна́ѧ тричи́сленаѧ єди́нице , раздѣле́на вѣ́рнѡ сᲂста́вы , сᲂєди́нена же є҆стество́мъ пᲂзнава́етсѧ , ѻ҆ц҃ъ и҆ сн҃ъ и҆ бжⷭ҇твеныи дх҃ъ .= и҆ ны́нѣ , боⷢ҇ .= Без̾сѣ́меннᲂе зача́тїе твᲂѐ чи́стаѧ , и҆ непᲂсти́жимᲂе пᲂе́мъ рᲂжде́нїе , бл҃жа́ще тѧ ꙗ҆́кѡ мт҃рь твᲂрцꙋ̀ всѣ́хъ и҆ влⷣцѣ .

катава́сїѧ : Свѣ́тᲂмъ твᲂи́мъ невече́рнимъ хрⷭ҇тѐ , ѡ҆зарѝ бж҃е смире́ннꙋю мᲂю̀ дш҃ꙋ , и҆ наста́ви на стра́хъ тво́й , занѐ свѣ́тъ пᲂвелѣ́нїѧ твᲂѧ̀ .

пѣ́снь , ѕ҃ . і҆рмо́съ . Глꙋбина̀ страсте́й вᲂста̀ . Вᲂзнесе́сѧ во́лею на́ древо , и҆ пᲂлᲂжи́сѧ ꙗ҆́кѡ ме́ртвъ во́грᲂбѣ , и҆ сꙋ́щїѧ во а҆́дѣ ме́ртвыѧ всѧ̀ вкꙋ́пѣ , сᲂвᲂскр҃си́лъ є҆сѝ хрⷭ҇тѐ бжⷭ҇твенᲂю вла́стїю . А҆́дъ ᲂу҆срѣ́тъ тѧ сло́ве ще́дрыи до́лѣ , ѡ҆гᲂрчи́сѧ , и҆ свѧ́занныѧ ѿдава́ѧ ско́рᲂстїю , твᲂѐ стра́шнᲂе пᲂю́щихъ сп҃се вᲂскрⷭ҇нїе , во́ гласѣхъ немо́лчныхъ . Тѧ̀ бжⷭ҇твенїи ᲂу҆ченицы̀ ви́дѣвше , жи́знь всѣ́хъ и҆́з̾грᲂба вᲂста́вша хрⷭ҇тѐ , любо́вїю мно́гᲂю и҆ нра́вᲂмъ пра́вымъ , и҆ весе́лїемъ дш҃е́внымъ пᲂклᲂнѧ́хꙋсѧ . И҆́же дре́вле на ѻ҆дрѣ̀ бᲂлѣ́зненѣ в̾ лѣ́тѣхъ мно́зѣхъ слежа́и , твᲂи́мъ хрⷭ҇тѐ пᲂвелѣ́нїемъ и҆сцелѣ́въ , и҆ сла́витъ и҆ пᲂе́тъ , бл҃гᲂꙋтро́бїе твᲂѐ бл҃гᲂда́телю .

а҆рха́нг҃лꙋ . А҆́нг҃лѡмъ нача́льниче миха́иле , пред̾стᲂѧ́и прⷭ҇то́лꙋ влⷣчню , прїидѝ пᲂсредѝ на́съ , наставлѧ́ѧ къ стезѧ́мъ жи́зни . и҆́же тебѐ пред̾ста́телѧ те́пла стѧжа́вшихъ . сла́ва . Трⷪ҇цꙋ ли́цы тѧ чтꙋ̀ , є҆ди́ницꙋ же сꙋщество́мъ прᲂпᲂвѣ́дꙋю , без̾нача́льне ѻ҆́ч҃е , и҆ сн҃е , и҆ д́ш҃е пра́выи , бж҃е всѣ́хъ , съ вы́шними стра́шными во́инствы .= и҆ ны́нѣ , боⷢ҇ .= И҆́же всѧ̀ бжⷭ҇твенымъ манᲂве́нїемъ нᲂсѧ́и , держи́мь є҆́сть бцⷣе дв҃о на рꙋкꙋ̀ твᲂе́ю , всѣ́хъ на́съ вᲂсхища́ѧ , ѿ рꙋкѝ рабо́ты лꙋка́вагѡ , ꙗ҆́кѡ ще́дръ .

катава́сїѧ : Глꙋбина̀ страсте́й вᲂста̀ намѧ̀ , и҆ бꙋ́рѧ прᲂти́вныхъ ми вѣ́трѡвъ , но пред̾вари́въ мѧ ты̀ спасѝ сп҃се , и҆ и҆змѝ и҆з̾ тлѝ , ꙗ҆́кᲂже спасѐ ѿ ѕвѣ́рѧ прᲂро́ка .

кᲂнда́къ . гла́съ , г҃ . Дш҃ꙋ мᲂю̀ гдⷭ҇и во грѣсѣ́хъ всѧ́ческихъ , без̾мѣ́стными дѣѧ́ньми лю́тѣ раз̾сла́бленꙋ , вᲂздви́гни бжⷭ҇твенымъ сѝ чл҃кᲂлю́бїемъ , ꙗ҆́кѡ и҆ раз̾сла́бленагѡ вᲂздви́гнꙋлъ є҆сѝ дре́вле , ꙗ҆́кѡ да зᲂвꙋ́ ти спаса́емъ , ще́дрыи да́ждь мѝ хрⷭ҇тѐ и҆сцѣле́нїе . и҆́кᲂсъ . И҆́же рꙋкѝ свᲂеѧ̀ го́рстїю сᲂдержа́и кᲂнцы̀ , і҆с҃е бж҃е . и҆́же ѻ҆ц҃ꙋ сᲂбез̾нача́льныи , и҆ дх҃ꙋ ст҃о́мꙋ сᲂвлады́чествꙋѧи всѧ́кѡ , пло́тїю ꙗ҆ви́лсѧ є҆сѝ , недꙋ́ги и҆сцѣлѧ́ѧ , и҆ стра́сти ѡ҆чи́стилъ є҆сѝ , слѣпча̀ прᲂсвѣти́лъ є҆сѝ , и҆ раз̾сла́бленаго сло́вᲂмъ бжⷭ҇твенымъ сᲂвᲂста́вилъ є҆сѝ , и҆ семꙋ̀ внеза́пꙋ хᲂди́ти , и҆ сво́й пᲂнестѝ ѻ҆́дръ пᲂвелѣ́лъ є҆сѝ на ра́мꙋ взѧ́въ . тѣ́мже всѝ съ ни́мъ вᲂспѣва́емъ и҆ пᲂе́мъ , ще́дрыи хрⷭ҇тѐ да́ждь на́мъ и҆сцѣле́нїе .

пѣ́снь , з҃ . і҆рмо́съ . Пла́мень прᲂхлажде́и . Распрᲂсте́рта тѧ на́ древѣ ꙗ҆́кѡ зрѧ́ше сл҃нце , свѣ́тъ сᲂкры̀ , немᲂгі́и ми́рꙋ свѣти́ти , тебѣ̀ во́лею заше́дшꙋ цр҃ю , на прᲂсвѣще́нїе всѣ́мъ чл҃кѡмъ . Вᲂскр҃слъ є҆сѝ , и҆стᲂщи́въ гро́бы , и҆ плѣни́въ а҆́да си́лᲂю всемо́щнᲂю . тѣ́мже пᲂе́мъ чⷭ҇тно́е твᲂѐ хрⷭ҇тѐ , и҆ бжⷭ҇твенᲂе вᲂста́нїе . Ꙗ҆́кѡ ме́ртва что̀ жива́го и҆́щете ; вᲂста̀ нѣ́сть во́ грᲂбѣ , мѷрѡно́сицамъ вᲂпїѧ́ше дре́вле , блиста́ѧисѧ зра́кᲂмъ бжⷭ҇твеныи а҆́нг҃лъ . Слежа́ща в̾ лѣ́тѣхъ мно́зѣхъ раз̾сла́бленаго , сло́вᲂмъ и҆сцѣли́лъ хрⷭ҇то́съ , вᲂпїѧ́ше , вᲂзмѝ ѻ҆́дръ сво́й и҆ хᲂдѝ , пᲂѧ̀ вели́чїѧ бж҃їѧ .

а҆рха́нг҃лꙋ . Миха́иле нача́льныи вᲂєво́до гдⷭ҇нь , и҆́же вѣ́рнѡ в̾ бжⷭ҇твенѣмъ тѝ и҆ честнѣ́мъ хра́мѣ сᲂбира́ющихсѧ , наставлѧ́й и҆ пᲂкрыва́й ѿ всѧ́ческихъ ѕѡ́лъ , хᲂда́тайствᲂмъ сѝ . сла́ва . Ѽ трⷪ҇це , и҆́же вѣ́рᲂю пᲂю́щихъ тѧ , ꙗ҆́кѡ бг҃а всѣ́хъ и҆ влⷣкꙋ , ѿ всѧ́кихъ напа́стей спаса́й , и҆ твᲂи́хъ бл҃гъ прича́стники сᲂтвᲂрѝ .= и҆ ны́нѣ , боⷢ҇ .= Дв҃ьствꙋеши и҆ ро́ждьши па́че сло́ва , и҆́же пре́жде всѣ́хъ вѣ́къ рᲂди́вшагᲂсѧ , ѿ без̾нача́льна ѻ҆ц҃а несказа́ннѡ . сегѡ̀ ра́ди чⷭ҇таѧ тебѐ ᲂу҆бл҃жа́емъ .

катава́сїѧ : Пла́мень прᲂхлажде́и пе́щныи , и҆ ѻ҆́трᲂки неѡ҆па́льнѡ спасы́и , бл҃гᲂслᲂве́нъ є҆сѝ во́ вѣки гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . А҆́нг҃лми немо́лчнѡ . За́вѣса раз̾дра́сѧ распе́ншꙋтисѧ сп҃се на́шъ , и҆ пᲂдава́ше мертвецы̀ и҆́хъ же пᲂжрѐ сме́рть , и҆ а҆́дъ ѡ҆бнажа́шесѧ , тебѐ зрѧ̀ в̾ преи҆спо́днихъ землѝ бы́вша . Гдѣ́ ти є҆́сть жа́ло сме́рте ; гдѣ́ ти а҆́де нн҃ѣ пᲂбѣ́да ; вᲂскр҃сшꙋ цр҃ю , ᲂу҆мертви́лсѧ є҆сѝ и҆ пᲂги́блъ , и҆ не к̾ тᲂмꙋ̀ црⷭ҇твꙋеши , крѣ́пкїи бо ѿпꙋстѝ и҆́хъ же и҆мѧ́ше свѧ́заныѧ . Тецы́те ско́рѡ вᲂзвѣсти́те а҆пⷭ҇лѡмъ вᲂскрⷭ҇нїе , мѷрѡно́сицамъ ꙗ҆вле́исѧ ю҆́нᲂша вѣща́ше , вᲂскр҃се влⷣка , и҆ с̾ ни́мъ и҆́же ѿ́ вѣка мертвецы̀ пресла́внѡ . Въ лѣ́тѣхъ мно́гихъ слежа́и раз̾сла́бленыи вᲂзᲂпѝ , пᲂми́лꙋй мѧ и҆зба́вителю , недᲂꙋмѣ́нїемъ сᲂдержи́ма , се́й же пᲂвелѣ̀ є҆мꙋ̀ , вᲂзмѝ тща́тельно ѻ҆́дръ сво́й , и҆ пра́вѡ стꙋпа́й .

а҆рха́нг҃лꙋ . Ꙗ҆́кѡ невеще́ственымъ во́ждь , чинᲂнача́льниче си́ламъ , съ ни́ми прᲂсѝ на́мъ сᲂгрѣше́нїемъ и҆збавле́нїе , и҆ и҆справле́нїе же житїю̀ , и҆ та́мᲂшнихъ наслажде́нїе бл҃гъ вѣ́чныхъ . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Несᲂзда́нно и҆ несѣко́мо сꙋщество̀ , трисᲂста́вно бжⷭ҇тво̀ , ѻ҆ц҃а без̾нача́льна бг҃а , и҆ сн҃а , и҆ дх҃а прест҃а́го , пᲂе́мъ сᲂгла́снѡ , серафи́мскꙋю взыва́юще стра́шнꙋю пѣ́снь .

и҆ ны́нѣ , боⷢ҇ . Сви́тᲂкъ тѧ̀ дре́вле зрѧ́ше и҆са́їа прⷭ҇нѡ дв҃о , в̾ не́мъ же пе́рстᲂмъ ѻ҆́ч҃имъ сло́во без̾нача́льнᲂе написа́сѧ , ѿ всѧ́кᲂгѡ без̾слᲂве́сїѧ спаса́ѧ на́съ , и҆́же слᲂвесы́ тѧ сщ҃е́нными вᲂспѣва́ющїѧ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆го̀ во́ вѣки . А҆́нг҃лми немо́лчнѡ в̾вы́шнихъ сла́вимагѡ бг҃а , небеса̀ нб҃съ , землѧ̀ го́ры хо́лми глꙋбина̀ , и҆ ве́сь ро́дъ чл҃ческїи , хвала́ми є҆гѡ̀ ꙗ҆́кѡ твᲂрца̀ и҆ и҆зба́вителѧ бл҃гᲂслᲂви́те [пᲂкло́н̾] .

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . На сина́йстѣй гᲂрѣ̀ . Ты̀ і҆с҃е на́древѣ вᲂз̾выша́емь , сᲂвᲂзне́слъ є҆сѝ на́съ . и҆ пᲂлᲂжи́сѧ во́лею во́ грᲂбѣ , и҆з̾ гро́бъ ме́ртвыѧ вᲂскреси́лъ є҆сѝ всѧ̀ пᲂю́щїѧ держа́вꙋ твᲂю̀ непᲂстижи́мꙋю , и҆ си́лꙋ твᲂю̀ непᲂбѣди́мꙋю . Красе́нъ ѿ́ грᲂба вᲂсїѧ́лъ є҆сѝ , ꙗ҆́кѡ жени́хъ ѿ черто́га , краснѣ́йшїи сло́ве . и҆ раз̾рꙋши́лъ є҆сѝ а҆́дᲂво мра́чнᲂе ца́рство , и҆ ᲂу҆́зники и҆з̾ве́лъ є҆сѝ сᲂгла́снѡ зᲂвꙋ́щїѧ , сла́ва си́лѣ твᲂе́й , сла́ва і҆с҃е бж҃е вᲂста́нїю твᲂемꙋ̀ . Вᲂз̾дыха́нїѧ же и҆ сле́зы нᲂсѧ́ще , с̾ мастьмѝ и҆ сᲂтща́нїемъ , всест҃ы́и гро́бъ дᲂстиго́ша жены̀ . и҆ хрⷭ҇то́вꙋ ᲂу҆чи́ми бѧ́хꙋ вѣ́рᲂю сла́внᲂмꙋ вᲂста́нїю , є҆́же пра́зднꙋемъ в̾ ра́дᲂсти дш҃е́внѣй веселѧ́щесѧ . Пᲂслѣ́дᲂваше здра́вїе тѣ́лꙋ пᲂвелѣ́нїемъ ти хрⷭ҇тѐ , и҆́же и҆ ви́димъ бѧ́ше пре́жде раз̾сла́бленыи , скака́ше ско́рᲂстїю , и҆ ѻ҆́дръ нᲂсѧ̀ на не́мъ же лежа́ше лѣ́та мно́га , пѣснᲂсло́вѧ мно́гꙋю си́лꙋ твᲂю̀ .

а҆рха́нг҃лꙋ . Прᲂсвѣще́нїе на́мъ и҆спрᲂсѝ вели́кїи чинᲂнача́льниче , свѣ́тꙋ вели́кᲂмꙋ прⷭ҇нᲂпред̾стᲂѧ́и . и҆ ᲂу҆мирѝ на́шꙋ жи́знь , и҆скꙋше́ньми всегда̀ ѕмі́евыми , и҆ напа́стьми житїѧ̀ кᲂле́блющими прⷭ҇нѡ дᲂстᲂчꙋ́дне . сла́ва . Свѣ́тъ и҆ свѣ́тᲂве , жи́знь же , и҆ жи́зни , сла́вимъ тѧ бл҃гᲂче́стнѡ , ѻ҆́ч҃е и҆ сло́ве и҆ д́ш҃е ст҃ы́и , трисᲂста́внаѧ є҆ди́нице , и҆ нераз̾дѣли́маѧ держа́во , и҆ бжⷭ҇тво̀ несли́тнᲂе . ст҃ъ , ст҃ъ , ст҃ъ вᲂпїю́ще с̾ вы́шними си́лами .= и҆ ны́нѣ , боⷢ҇ .= Ѿ свѣтᲂно́сныхъ про́йде лᲂже́снъ твᲂи́хъ вели́кᲂе сл҃нце хрⷭ҇то́съ , и҆ ми́ръ прᲂсвѣтѝ пречⷭ҇таѧ ѡ҆сїѧ́ньми свѣ́тлыми , и҆ ѿ тмы̀ и҆зѧ́тъ престꙋпле́нїѧ . тѣ́мже пᲂе́мъ тѧ ꙗ҆́кѡ винꙋ̀ всѣ́мъ до́брымъ бг҃ᲂневѣ́сто .

катава́сїѧ : На сина́йстѣй гᲂрѣ̀ , ви́дѣвъ тѧ в̾ кꙋпинѣ̀ мѡѷсе́й , не ѡ҆па́льнѡ ѻ҆́гнь бжⷭ҇твенныи заче́ншꙋю во́ чревѣ . данїи́лъ же тѧ ви́дѣ , го́рꙋ непресѣ́ченꙋ . же́ѕлъ прᲂзѧ́бшїи , и҆са́їѧ взыва́ше , ѿ ко́рене дв҃дᲂва .

задᲂсто́йникъ : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ , ликꙋ́й ны́нѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ [пᲂкло́н̾ до землѝ] . та́же , ст҃ъ гдⷭ҇ь бг҃ъ на́шъ ,= на́ гласъ , г҃ . свѣти́ленъ , па́сцѣ . П=ло́тїю ᲂу҆снꙋ́въ ꙗ҆́кѡ ме́ртвъ , цр҃ь и҆ гдⷭ҇ь , тридне́вно вᲂскр҃се , и҆ а҆да́ма вᲂздви́гъ и҆з̾ тлѝ , и҆ ᲂу҆праздни́въ сме́рть . па́сха нетлѣ́нїѧ , ми́рꙋ спасе́нїе .

и҆ дрꙋгі́и , ѡ҆ раз̾сла́бленᲂмъ . Пред̾ста̀ ꙗ҆́кѡ чл҃кᲂлю́бецъ и҆ всеще́дрыи гдⷭ҇ь , ѻ҆́вчей кꙋпѣ́ли и҆сцѣли́ти недꙋ́жныѧ . ѡ҆брѣ́те же челᲂвѣ́ка слежа́ща мно́гими лѣ́ты , и҆ к̾ немꙋ̀ вᲂзᲂпѝ , вᲂзмѝ сво́й ѻ҆́дръ , и҆ хᲂдѝ пꙋте́мъ пра́вымъ .= сла́ва , и҆ ны́нѣ , то́йже .=

На хвали́тѣхъ , стихѣ́ры , вᲂскрⷭ҇ны . гла́съ , г҃ . =запѣ́въ : хвали́те бг҃а во ст҃ы́хъ є҆гѡ̀ . Прїиди́те всѝ ꙗ҆зы́цы , разꙋмѣ́йте стра́шныѧ та́йны си́лꙋ . хрⷭ҇то́съ бо сп҃съ на́шъ , и҆́же и҆спе́рва сы́и сло́во , распѧ́тсѧ на́съ ра́ди , и҆ во́лею пᲂгребе́сѧ , и҆ вᲂскр҃се и҆з̾ ме́ртвыхъ , є҆́же спастѝ всѧ́ческаѧ . тᲂмꙋ̀ пᲂклᲂни́мсѧ =[пᲂкло́н̾] .

хвали́те є҆гѡ̀ во ᲂу҆тверже́нїи си́лъ є҆гѡ̀ . Пᲂвѣ́даша всѧ̀ чꙋдеса̀ , стра́жїе твᲂѝ гдⷭ҇и , но сᲂбо́ръ сꙋ́етныхъ , и҆спо́лни мздо́ю десни́цы и҆́хъ , скры́ти мнѧ́щихъ вᲂскрⷭ҇нїе твᲂѐ , є҆́же ми́ръ сла́витъ , пᲂми́лꙋй на́съ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ пᲂпремно́гᲂмꙋ вели́чествїю є҆гѡ̀ . Ра́дᲂсти всѧ̀ и҆спо́лнишасѧ , вᲂскрⷭ҇нїѧ и҆скꙋ́съ прїе́мше . ма́рїѧ бо магдалы́ни ко́ грᲂбꙋ прїи́де , и҆ ѡ҆брѣ́те а҆́нг҃ла на ка́мени сѣдѧ́ща , ри́зами блиста́ющасѧ , и҆ гл҃юща , что̀ и҆́щете жива́го с̾ ме́ртвыми ; нѣ́сть здѣ̀ , но вᲂста̀ , ꙗ҆́кᲂже речѐ , предварѧ́ю вы̀ в̾ галиле́и .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Во́ свѣтѣ твᲂе́мъ влⷣко , ᲂу҆́зримъ свѣ́тъ чл҃кᲂлю́бче , вᲂскр҃се бо и҆з̾ ме́ртвыхъ , спасе́нїе ро́дꙋ чл҃ческᲂмꙋ да́рꙋѧ . да тѧ̀ всѧ̀ тва́рь пѣснᲂсло́витъ , є҆ди́наго без̾грѣ́шнаго пᲂми́лꙋй на́съ .

хвали́те є҆гѡ̀ въ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Пѣ́снь ᲂу҆́тренюю мѷрѡно́сицы жены̀ , со слеза́ми принᲂша́хꙋ тѝ гдⷭ҇и , бл҃гᲂꙋха́нїѧ бо вᲂнѧ̀ и҆мꙋ́ще , гро́ба твᲂегѡ̀ дᲂстиго́ша , пречи́стᲂе тѣ́ло твᲂѐ пᲂма́зати тща́хꙋсѧ . а҆́нг҃лъ же сѣдѧ̀ на ка́мени , то́й и҆́мъ бл҃гᲂвѣстѝ , что̀ и҆́щете жива́го съ ме́ртвыми ; сме́рть бо плѣни́въ , вᲂскр҃се ꙗ҆́кѡ бг҃ъ , пᲂдаѧ̀ всѣ́мъ ве́лїю млⷭ҇ть .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Блиста́ѧсѧ а҆́нг҃лъ , на́ грᲂбѣ твᲂе́мъ живᲂтво́рнѣмъ , мѷрѡно́сицамъ гл҃аше , и҆стᲂщи́въ гро́бы и҆зба́витель , и҆спрᲂве́ргъ а҆́да , и҆ вᲂскр҃се тридне́вно , ꙗ҆́кѡ є҆ди́нъ бг҃ъ и҆ всеси́ленъ .

сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Во́ грᲂбѣ тѧ̀ и҆ска́ше , прише́дши во є҆ди́нꙋ ѿ сꙋбо́тъ ма́рїѧ магдалы́ни . неѡ҆брѣ́тши же , сѣ́тꙋющи съ пла́чемъ вᲂпїѧ́ше , ᲂу҆вы̀ мнѣ̀ сп҃се мо́й , ᲂу҆кра́денъ бы́сть всѣ́хъ цр҃ю . сꙋпрꙋ́гъ же живᲂно́сныхъ а҆́нг҃лъ , внꙋ́трь гро́ба вᲂпїѧ́ше , что̀ пла́чеши ѽ же́но ; пла́чꙋ речѐ , ꙗ҆́кѡ взѧ́ша гдⷭ҇а мᲂегѡ̀ ѿ́ грᲂба , и҆ невѣ́мъ гдѣ̀ пᲂлᲂжи́ша є҆гѡ̀ ; ѻ҆на́ же ѡ҆бра́щшисѧ в̾ спѧ́ть , ꙗ҆́кѡ ви́дѣ тѧ , а҆́бїе вᲂзᲂпѝ , гдⷭ҇ь мо́й и҆ бг҃ъ мо́й , сла́ва тебѣ̀ .

сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Є҆вре́и затвᲂри́ша во́ грᲂбѣ живо́тъ , разбо́йникъ же ѿве́рзе ꙗ҆зы́кѡмъ ра́й , вᲂпїѧ̀ и҆ гл҃ѧ , и҆́же со мно́ю менѐ ра́ди распѧ́тсѧ , со ѡ҆бѣ́симисѧ на́ древѣ , и҆ ꙗ҆влѧ́ешимисѧ на престо́лѣ со ѻ҆ц҃е́мъ сѣдѧ̀ . то́й бо є҆́сть хрⷭ҇то́съ сп҃съ на́шъ , и҆мѣ́ѧи ве́лїю млⷭ҇ть . сла́ва . гла́съ , и҃ . Гдⷭ҇и , раз̾сла́бленаго не кꙋпѣ́ль и҆сцѣлѝ , но твᲂѐ сло́во ѡ҆бнᲂвѝ . и҆ нижѐ мнᲂгᲂлѣ́тныи прет̾кнꙋ̀ є҆гѡ̀ недꙋ́гъ , ꙗ҆́кѡ гла́са твᲂегѡ̀ скᲂрѣ́йше дѣ́йство пᲂказа́сѧ , и҆ не ᲂу҆до́бь нᲂси́мꙋю тѧ́жесть ѿве́рже , и҆ бре́мѧ ѻ҆дрꙋ̀ пᲂнесѐ , в̾ пᲂслꙋшество̀ мно́гихъ щедро́тъ твᲂи́хъ , сла́ва тебѣ̀ . и҆ ны́нѣ . гла́съ , в҃ . Пребл҃гᲂслᲂве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе . та́же , трᲂпа́рь . Дне́сь спасе́нїе ми́рꙋ , пᲂе́мъ вᲂскрⷭ҇шаго и҆́з̾ грᲂба , и҆ нача́льникꙋ живᲂтꙋ̀ хрⷭ҇та̀ бг҃а на́шегѡ . разрꙋши́въ бо сме́рть , пᲂбѣ́дꙋ да́стъ на́мъ , и҆ ве́лїю млⷭ҇ть . пᲂсе́мъ , є҆ктенїѝ . и҆ ѿпꙋ́стъ .

чте́цъ , гл҃етъ : а҆ми́нь , сла́ва , и҆ ны́нѣ . гла́съ , д҃ . Оу҆́тренѧѧ бѣ̀ ра́нѡ , и҆ жены̀ прїидо́ша на́ грᲂбъ тво́й хрⷭ҇тѐ , но тѣ́ло не ѡ҆брѣ́тесѧ люби́мᲂе и҆́ми . тѣ́мъ недᲂмы́слѧщимсѧ и҆́мъ , и҆́же блеща́щимисѧ ри́зами пред̾ста́вшїи гл҃ахꙋ , что̀ жива́го с̾ ме́ртвыми и҆́щете ; вᲂста̀ ꙗ҆́кᲂже речѐ пре́жде , что̀ непо́мните глаго́лъ є҆гѡ̀ ; и҆́мже вѣ́рᲂвавше , ви́дѣннаѧ прᲂпᲂвѣ́дахꙋ , но мнѧ́шесѧ лжа̀ бл҃гᲂвѣ́щенїе , та́кѡ бы́ша є҆щѐ со́нни ᲂу҆ченицы̀ . но пе́тръ течѐ и҆ ви́дѣвъ , и҆ прᲂсла́ви твᲂѧ̀ в̾ себѣ̀ чꙋдеса̀ .

та́же , ча́съ , а҃ . ѱалмы̀ , ѻ҆бы́чны . и҆ кᲂне́чныи ѿпꙋ́стъ . На часѣ́хъ , сла́ва . трᲂпа́рь : Да веселѧ́тсѧ нбⷭ҇наѧ . кᲂнда́къ : Дш҃ꙋ мᲂю̀ гдⷭ҇и во грѣсѣ́хъ .

На литꙋргі́и , бл҃же́нна , гла́сꙋ , на́ ѕ҃ .

Во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ , ꙗ҆́кѡ тѣ́хъ є҆́сть црⷭ҇тво нбⷭ҇нᲂе . бл҃же́ни пла́чꙋщїи , ꙗ҆́кѡ ті́и ᲂу҆тѣ́шатсѧ . бл҃же́ни кро́тцыи , ꙗ҆́кѡ ті́и наслѣ́дѧтъ зе́млю .

пᲂе́мъ : Ѿве́ргшаго хрⷭ҇тѐ за́пᲂвѣдь твᲂю̀ пра́ѻ҆ц҃а а҆да́ма , и҆з̾ раѧ̀ и҆з̾гна́лъ є҆сѝ . разбо́йника же ще́дре , и҆спᲂвѣ́давша тѧ̀ на крⷭ҇тѣ̀ , во́нь всели́лъ є҆сѝ , зᲂвꙋ́ща , пᲂмѧни́ мѧ сп҃се во црⷭ҇твїи сѝ .

Гла́съ , г҃ . бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Распе́ншꙋтисѧ хрⷭ҇тѐ , всѧ̀ тва́рь и҆змѣнѧ́шесѧ стра́хᲂмъ ꙗ҆́вѣ , свᲂегѡ̀ влⷣкꙋ тебѐ ви́дѧщи , въ чл҃честѣмъ є҆стествѣ̀ сꙋ́ща . тѣ́мже съ разбо́йникᲂмъ вᲂпїѧ́ше ти , пᲂмѧни́ мѧ , є҆гда̀ прїи́деши во црⷭ҇твїи сѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Сᲂгрѣ́шшїѧ на́съ , сме́ртнᲂю клѧ́твᲂю ѡ҆сꙋди́лъ є҆сѝ , жизнᲂда́вче бж҃е на́шъ . тѣ́лᲂмъ же свᲂи́мъ без̾грѣ́шне гдⷭ҇и пᲂстрада́въ , мертвецы̀ ѡ҆живи́лъ є҆сѝ зᲂвꙋ́ща , пᲂмѧнѝ и҆ на́съ во црⷭ҇твїи сѝ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . На гᲂрѣ̀ мѡѷсе́й рꙋ́цѣ распрᲂсте́ръ , прᲂѡ҆бража́ше крⷭ҇та̀ , а҆мали́ка пᲂбѣдѝ . мы́ же вѣ́рнїи на бѣсы̀ ѻ҆рꙋ́жїе крѣ́пкᲂе тᲂгѡ̀ прїи́мше , вѣ́рнѡ зᲂве́мъ , пᲂмѧнѝ и҆ на́съ сп҃се , є҆гда̀ прїи́деши во црⷭ҇твїи сѝ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Вᲂскр҃съ и҆з̾ ме́ртвыхъ , сᲂвᲂскр҃си́лъ є҆сѝ на́съ ѿ стрⷭ҇те́й , вᲂскрⷭ҇нїемъ тѝ гдⷭ҇и , и҆ сме́ртнꙋю всю̀ си́лꙋ пᲂгꙋби́лъ є҆сѝ хрⷭ҇тѐ . сегѡ̀ ра́ди вѣ́рᲂю ти взыва́емъ , пᲂмѧнѝ и҆ на́съ сп҃се во црⷭ҇твїи сѝ . Мѷрѡно́сицамъ жена́мъ пе́рвѣе ꙗ҆ви́лсѧ є҆сѝ , вᲂскр҃съ и҆з̾ ме́ртвыхъ , сп҃се вᲂзᲂпи́въ , є҆́же ра́дꙋйтесѧ . и҆ тѣ́ми дрꙋгѡ́мъ свᲂи́мъ вᲂзвѣща́ѧ вᲂста́нїе свᲂѐ хрⷭ҇тѐ . сегѡ̀ ра́ди вѣ́рᲂю ти взыва́емъ , пᲂмѧнѝ и҆ на́съ сп҃се во црⷭ҇твїи сѝ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѻ҆ц҃ꙋ и҆ сн҃ꙋ и҆ дх҃ꙋ ст҃о́мꙋ , пᲂклᲂнѧ́емсѧ вѣ́рнїи= [пᲂкло́н̾] ,= трⷪ҇цѣ несᲂзда́ннѣй , и҆́же в̾ трїе́хъ ли́цѣхъ , и҆ во є҆ди́нᲂмъ бжⷭ҇твѣ̀ , при́снѡ ѿ беспло́тныхъ си́лъ , в̾ трїе́хъ сщ҃е́нствїихъ , славᲂсло́вимѣй вѣ́рнѡ .

и҆ =ѿ кано́на , пѣ́снь ѕ҃ , на д҃ . Гла́съ , то́йже . бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . И҆́=же дре́вле на ѻ҆дрѣ̀ бᲂлѣ́зненѣ в̾ лѣ́тѣхъ мно́зѣхъ слежа́и , твᲂи́мъ хрⷭ҇тѐ пᲂвелѣ́нїемъ и҆сцелѣ́въ , и҆ сла́витъ и҆ пᲂе́тъ , бл҃гᲂꙋтро́бїе твᲂѐ бл҃гᲂда́телю .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . И҆́же дре́вле на ѻ҆дрѣ̀ бᲂлѣ́зненѣ в̾ лѣ́тѣхъ мно́зѣхъ слежа́и , твᲂи́мъ хрⷭ҇тѐ пᲂвелѣ́нїемъ и҆сцелѣ́въ , и҆ сла́витъ и҆ пᲂе́тъ , бл҃гᲂꙋтро́бїе твᲂѐ бл҃гᲂда́телю . сла́ва . Трⷪ҇цꙋ ли́цы тѧ чтꙋ̀ , є҆ди́ницꙋ же сꙋщество́мъ прᲂпᲂвѣ́дꙋю , без̾нача́льне ѻ҆́ч҃е , и҆ сн҃е , и҆ д́ш҃е пра́выи , бж҃е всѣ́хъ , с̾ вы́шними стра́шными во́инствы . и҆ ны́нѣ , боⷢ҇ . И҆́же всѧ̀ бжⷭ҇твенымъ манᲂве́нїемъ нᲂсѧ́и , держи́мь є҆́сть бцⷣе дв҃о на рꙋкꙋ̀ твᲂе́ю , всѣ́хъ на́съ вᲂсхища́ѧ , ѿ рꙋкѝ рабо́ты лꙋка́вагѡ , ꙗ҆́кѡ ще́дръ .

пᲂвхо́дѣ . трᲂпа́рь , дню̀ . сла́ва , кᲂнда́къ , дню̀ . и҆ ны́нѣ , кᲂнда́къ , па́сцѣ .

прᲂки́менъ , ѱало́мъ дв҃дᲂвъ . бꙋ́ди гдⷭ҇и млⷭ҇ть твᲂѧ̀ на на́съ , ꙗ҆́кᲂже ᲂу҆пᲂва́хᲂмъ на тѧ̀ . сти́хъ : ра́дꙋйтесѧ пра́веднїи ѡ҆́ гдⷭ҇ѣ . а҆пⷭ҇лъ , в̾ дѣѧ́нїихъ . заⷱ҇ , к҃г . а҆ллилꙋ́їѧ . млⷭ҇ти твᲂѧ̀ гдⷭ҇и во́ вѣки вᲂспᲂю̀ . сти́хъ : ꙗ҆́кѡ речѐ во́ вѣки млⷭ҇ть сᲂзи́ждетсѧ . є҆ѵⷢ҇а́лїе , ѿ і҆ѡа́нна . заⷱ҇ , ді҃ . прича́стенъ , тѣ́ло хрⷭ҇то́во . дрꙋгі́и , хвали́те гдⷭ҇а с̾ небе́съ .

Въ тꙋ́же , нлⷣю , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , и҃ . поⷣ . Ѽ =пресла́внᲂе чꙋ́до . =Ѽ пресла́внᲂмꙋ чꙋдесѝ ,꙳ твᲂре́цъ всѧ́ческихъ плᲂтᲂно́сецъ бы́въ .꙳ и҆ въ на́шемъ ѡ҆бнища́вшѣмъ є҆стествѣ̀ ,꙳ хᲂтѧ̀ ꙗ҆́кѡ млрⷭ҇дъ с̾ чл҃ки пᲂжи́ти .꙳ и҆ чꙋде́съ мно́жество ꙗ҆вѝ ,꙳ во ᲂу҆́жасъ є҆вре́ѡмъ .꙳ тѣ́мже и҆сцѣли́въ раз̾сла́бленаго ,꙳ речѐ є҆мꙋ̀ , вᲂзмѝ ѻ҆́дръ сво́й и҆ хᲂдѝ ,꙳ и҆ и҆дѝ в̾ до́мъ сво́й . Сп҃се бж҃е мо́й и҆ гдⷭ҇и ,꙳ па́дшїѧ чл҃ки вᲂскр҃си́ти хᲂтѧ̀ ,꙳ на землѝ ꙗ҆́кѡ чл҃къ хᲂдѧ̀ ,꙳ и҆ и҆сцѣле́нїѧ твᲂрѧ̀ недꙋ́гѡмъ .꙳ тѣ́мже прише́лъ є҆сѝ ,꙳ ко ѻ҆́вчѣй кꙋпѣ́ли .꙳ цѣ́ла вᲂздви́глъ є҆сѝ и҆нᲂгда̀ ,꙳ раз̾сла́бленаго сло́вᲂмъ свᲂи́мъ ,꙳ три́десѧть и҆ ѻ҆́смь лѣ́тъ лежа́ща . За́вистїю є҆вре́и снѣда́еми ,꙳ и҆ бл҃гᲂдѣѧ́нїѧ твᲂѧ̀ ,꙳ пребл҃гі́и гдⷭ҇и ,꙳ в̾ винꙋ̀ твᲂрѧ́ще ,꙳ и҆ враждо́ю раз̾жига́еми ,꙳ без̾зако́ннꙋюще ѻ҆нѝ въ зако́нѣ ,꙳ прⷭ҇нѡ тебѐ и҆ска́хꙋ ᲂу҆би́ти ,꙳ сꙋ́щꙋю жи́знь сꙋбо́ты ра́ди ,꙳ ꙗ҆́кѡ всегѡ̀ чл҃ка пᲂказа́лъ є҆сѝ здра́ва ,꙳ и҆́же раз̾сла́бленаго пе́рвїе .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , а҃ . И҆́же дла́нїю пречⷭ҇тᲂю сᲂзда́выи чл҃ка , прїи́де милᲂсе́рде бᲂлѧ́щїѧ и҆сцѣли́ти хрⷭ҇тѐ , раз̾сла́бленаго во ѻ҆́вчѣй кꙋпѣ́ли сло́вᲂмъ свᲂи́мъ вᲂз̾ста́вилъ є҆сѝ . крᲂвᲂтᲂчи́вѣй же бᲂлѣ́знь и҆сцѣли́лъ є҆сѝ , и҆ хананѣ́и же ѻ҆трᲂкᲂви́цꙋ ѡ҆скᲂрблѧ́емꙋ , пᲂми́лᲂвалъ є҆сѝ , и҆ прᲂше́нїе со́тника , не презрѣ́лъ є҆сѝ . сегѡ̀ ра́ди зᲂве́мъ , всеси́льне гдⷭ҇и сла́ва тебѣ̀ .

На стихо́внѣ , стихѣ́ры . гла́съ , г҃ . Твᲂи́мъ крⷭ҇то́мъ хрⷭ҇тѐ сп҃се , сме́рти держа́ва разрꙋши́сѧ , и҆ дїа́вᲂлѧ ле́сть ᲂу҆праздни́сѧ . ро́дъ же чл҃ческїи вѣ́рᲂю спаса́емь , пѣ́снь ти всегда̀ прино́ситъ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Вече́рнюю пѣ́снь прино́симъ ти хрⷭ҇тѐ с̾ кади́лᲂмъ , и҆ пѣ́сньми дх҃о́вными , пᲂми́лꙋй и҆ спасѝ дш҃а на́ша .

сти́хъ : пᲂми́лꙋй на́съ гдⷭ҇и . мⷱ҇ꙋ . Ве́лїѧ крⷭ҇та̀ твᲂегѡ̀ гдⷭ҇и си́ла , вᲂдрꙋзи́бᲂсѧ на мѣ́стѣ , и҆ дѣ́йствꙋетъ в̾ ми́рѣ , и҆ пᲂказа̀ ѿ ры́барей а҆пⷭ҇лы , и҆ ѿ ꙗ҆зы́къ мч҃нки , да мо́лѧтсѧ ѡ҆ дш҃а́хъ на́шихъ .

сла́ва , и҆ нн҃ѣ . гла́съ , а҃ . Непᲂгребе́нъ мертве́цъ сы́и раз̾сла́бленныи ви́дѣвъ тѧ̀ вᲂзᲂпѝ , пᲂми́лꙋй мѧ гдⷭ҇и , ꙗ҆́кѡ ѻ҆́дръ мо́й гро́бъ мнѣ̀ бы́сть ; что́ ми прїѡ҆брѣте́нїе живᲂтꙋ̀ ; нетре́бꙋю ѻ҆́вчїѧ кꙋпѣ́ли , неи́мамъ бо кᲂгѡ̀ влага́юща мѧ , вᲂз̾мꙋща́ющимсѧ вᲂда́мъ . но тебѣ̀ и҆сто́чникꙋ прїидо́хъ и҆сцѣле́нїѧ , да и҆ а҆́зъ со всѣ́ми зᲂвꙋ̀ , всеси́льне гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ . є҆ктенїѧ̀ .= и҆ =ѿпꙋ́стъ .

Въ пнⷣльникъ , д҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , вⷤ . сла́ва , и҆ ны́нѣ , боⷢ҇ . =По а҃ , стихᲂло́гїи , сѣда́ленъ . гла́съ , г҃ . Хрⷭ҇то́съ ѿ ме́ртвыхъ вᲂста̀ , нача́тᲂкъ ᲂу҆со́пшимъ бы́сть , пе́рвенецъ тва́ри , и҆ сᲂдѣ́тель всѣ́мъ бы́вшимъ . и҆стлѣ́вшее є҆стество̀ ро́да на́шегѡ , сᲂбо́ю ѡ҆бнᲂвѝ . не к̾ тᲂмꙋ̀ сме́рте ѡ҆блада́еши , и҆́бо всѣ́хъ влⷣка держа́вꙋ твᲂю̀ разрꙋшѝ . =сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Живꙋ́щи на землѝ дш҃е мᲂѧ̀ пᲂка́йсѧ , пе́рсть бо во́ грᲂбѣ непᲂе́тъ , ни ѿ сᲂгрѣше́нїи и҆збавлѧ́етъ , вᲂзᲂпѝ хрⷭ҇тꙋ̀ бг҃ꙋ , срⷣцевѣ́дче сᲂгрѣши́хъ , пре́жде да́же не ѡ҆сꙋ́диши менѐ , пᲂми́лꙋй мѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Бл҃гᲂдꙋ́шїе терпѣ́нїѧ ва́шегѡ , пᲂбѣдѝ ко́зни ѕлᲂнача́льнаго врага̀ , страстᲂте́рпцы всехва́льнїи , сегѡ̀ ра́ди вѣ́чнᲂмꙋ спᲂдо́бистесѧ бл҃же́нствꙋ , но мᲂли́тесѧ гдⷭ҇ви хрⷭ҇тᲂлюби́выхъ люде́й спастѝ ста́до , мч҃нцы сꙋ́ще и҆́стинѣ . сла́ва , и҆ ны́нѣ , боⷢ҇ . Нбⷭ҇наѧ со́ страхᲂмъ ра́дᲂвахꙋсѧ , и҆ земна́ѧ с̾ тре́петᲂмъ дивлѧ́хꙋсѧ , є҆гда̀ пречⷭ҇тыи гла́съ на́йде натѧ̀ бцⷣе , є҆ди́но бо тᲂржество̀ ѻ҆бᲂи́мъ вᲂсїѧ̀ , є҆гда̀ первᲂзда́ннаго ѿ сме́рти и҆зба́ви . тѣ́мже и҆ со а҆́нг҃лѡмъ вᲂпїе́мъ ти , ра́дꙋисѧ чⷭ҇таѧ дв҃о мт҃и .

По в҃ , стихᲂло́гїи , сѣда́ленъ . гла́съ , д҃ . Ꙗ҆́кѡ бг҃ъ и҆ гдⷭ҇ь вᲂз̾дви́глъ є҆сѝ и҆́же и҆нᲂгда̀ раз̾сла́бленаго , ре́къ вᲂзмѝ сво́й ѻ҆́дръ , и҆ менѐ вᲂз̾дви́гни сло́ве и҆́же во грѣсѣ́хъ мно́гихъ слежа́щаго . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , ѡ҆ раз̾сла́бленѣмъ , на и҃ . и҆ в̾ минѣ́и , на д҃ .

На хвали́тѣхъ , стⷯры , на д҃ . гла́съ , г҃ . Прїиди́те всѝ ꙗ҆зы́цы , разꙋмѣ́йте стра́шныѧ та́йны си́лꙋ . хрⷭ҇то́съ бо сп҃съ на́шъ , и҆́же и҆спе́рва сы́и сло́во , распѧ́тсѧ на́съ ра́ди , и҆ во́лею пᲂгребе́сѧ , и҆ вᲂскр҃се и҆з̾ ме́ртвыхъ , є҆́же спастѝ всѧ́ческаѧ . тᲂмꙋ̀ пᲂклᲂни́мсѧ [пᲂкло́н̾] . двⷤа . Мно́жицею пѣ́нїе сᲂдѣва́ѧ , ѡ҆брѣто́хсѧ грѣхѝ скᲂнчава́ѧ . ꙗ҆зы́кѡмъ ᲂу҆́бѡ мᲂи́мъ пѣ́нїѧ вѣща́ю , дш҃е́ю же непᲂдо́бнаѧ мы́слю , но ѻ҆бᲂѐ и҆спра́ви хрⷭ҇тѐ бж҃е пᲂкаѧ́нїемъ , и҆ пᲂми́лꙋй мѧ . мⷱ҇ꙋ . Ст҃ы́хъ мч҃нкъ па́мѧть , прїиди́те лю́дїе всѝ пᲂчте́мъ , ꙗ҆́кѡ пᲂзо́ръ бы́ша а҆́нг҃лѡмъ и҆ чл҃кѡмъ , пᲂбѣ́дѣ вѣнцы̀ ѿ хрⷭ҇та̀ прїѧ́ша , и҆ мо́лѧтсѧ ѡ҆ дш҃а́хъ на́шихъ . сла́ва , и҆ ны́нѣ . гла́съ , є҃ . На ѻ҆́вчей кꙋпѣ́ли чл҃къ слежа́ше в̾недꙋ́зѣ , и҆ ви́дѣвъ тѧ гдⷭ҇и вᲂпїѧ́ше , чл҃ка неи́мамъ , да є҆гда̀ вᲂз̾мꙋти́тсѧ вᲂда̀ , в̾ве́ржетъ мѧ в̾ ню̀ . є҆гда́ же прихᲂжꙋ̀ , и҆́нъ пред̾варѧ́етъ мѧ , и҆ прїе́млетъ и҆сцѣле́нїе , а҆́зъ же бᲂлѧ̀ ѿхᲂжꙋ̀ . и҆ а҆́бїе ᲂу҆млрⷭ҇дивсѧ сп҃съ , гл҃а к̾ немꙋ̀ , тебѐ ра́ди чл҃къ бы́хъ , тебѐ ра́ди в̾ пло́ть ѡ҆блеко́хсѧ , и҆ гл҃еши чл҃ка неи́мамъ , вᲂзмѝ ѻ҆́дръ тво́й и҆ хᲂдѝ . всѧ̀ тебѣ̀ вᲂзмо́жна . всѧ̀ пᲂслꙋ́шаютъ , всѧ̀ пᲂвинꙋ́ютсѧ . всѣ́хъ на́съ пᲂмѧнѝ , и҆ пᲂми́лꙋй ст҃ы́и , ꙗ҆́кѡ чл҃кᲂлю́бецъ .

На стихо́внѣ , стихѣ́ры . гла́съ , г҃ . Зна́менїи и҆ чꙋде́съ ви́дѧще си́лꙋ , и҆́же за́вистїю ѡ҆держи́ми и҆ си́льнїи ѕло́бᲂю , невѣ́рᲂвахꙋ ꙗ҆́кѡ ты̀ є҆сѝ сн҃ъ бж҃їи , и҆ стрᲂи́тель всѣ́хъ , и҆́же и҆ раз̾сла́бленаго здра́ва пᲂказа̀ сло́вᲂмъ .

сти́хъ : млⷭ҇ти твᲂѧ̀ гдⷭ҇и во́ вѣки ,꙳ вᲂспᲂю̀ въ ро́дъ и҆ ро́дъ . Ви́дѣвше сꙋбо́тѣ храни́телїе , раз̾сла́бленаго стѧ́гнꙋта въ сꙋбо́тꙋ , и҆ дш҃е́ю ѡ҆мрача́хꙋсѧ , ꙗ҆́кѡ непᲂдᲂба́етъ въ сꙋбо́тꙋ цѣли́ти , и҆ сквернѧ́хꙋ сꙋбо́тꙋ , винꙋ̀ пᲂвѣ́дающе зако́ннѡ кни́жницы вᲂпїѧ́хꙋ .

сти́хъ : ꙗ҆́кѡ ре́клъ є҆сѝ ,꙳ во́ вѣки ми́лᲂсть сᲂзи́ждетсѧ . Сꙋбо́тѣ самᲂгѡ̀ твᲂрца́ тѧ и҆ гдⷭ҇а , невѣ́дѧще и҆́же сꙋбо́тꙋ хранѧ́щїи , ѡ҆ раз̾сла́бленагѡ стѧ́гнꙋтїи рᲂпта́хꙋ , ѡ҆ є҆́же в̾ сꙋбо́тꙋ бы́вшемъ , ꙗ҆́кѡ недᲂбро̀ гл҃юще взѧ́ти ѻ҆́дръ , в̾ де́нь сꙋбо́тныи .

сла́ва , и҆ ны́нѣ . гла́съ , и҃ . Гдⷭ҇и , раз̾сла́бленаго не кꙋпѣ́ль и҆сцѣлѝ , но твᲂѐ сло́во ѡ҆бнᲂвѝ . и҆ нижѐ мнᲂгᲂлѣ́тныи прет̾кнꙋ̀ є҆гѡ̀ недꙋ́гъ , ꙗ҆́кѡ гла́са твᲂегѡ̀ скᲂрѣ́йше дѣ́йство пᲂказа́сѧ , и҆ не ᲂу҆до́бь нᲂси́мꙋю тѧ́жесть ѿве́рже , и҆ бре́мѧ ѻ҆дрꙋ̀ пᲂнесѐ , в̾ пᲂслꙋшество̀ мно́гихъ щедро́тъ твᲂи́хъ , сла́ва тебѣ̀ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе : вᲂскр҃се сп҃съ . гла́съ , г҃ . пѣ́снь , а҃ . і҆рмо́съ . предѣлѧ́емᲂе мо́ре .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вᲂзше́дъ на высᲂтꙋ̀ , плене́нїе и҆́же во а҆́дѣ сᲂдержи́мᲂе , ꙗ҆́кѡ крѣ́пкїи прїѧ́лъ є҆сѝ сп҃се , и҆ сᲂвᲂскр҃си́лъ є҆сѝ с̾ сᲂбо́ю . тридне́венъ и҆́з̾ грᲂба вᲂскр҃съ чл҃кᲂлю́бче ꙗ҆́кѡ всеси́ленъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Въ ме́ртвыхъ жива́гѡ что̀ и҆́щете мѷрѡно́сицамъ речѐ ᲂу҆́грᲂба свѣтᲂѡ҆бра́зенъ а҆́нг҃лъ , и҆нᲂгда̀ ꙗ҆влѧ́ѧсѧ . ѿше́дше ско́ро а҆пⷭ҇лѡмъ вᲂзвѣсти́ти пᲂтщи́тесѧ , сегѡ̀ вᲂста́нїе .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Оу҆мерщве́на дре́вле тебѐ сп҃се , и҆ пᲂлᲂже́на в̾ но́вѣмъ гро́бѣ , ви́дѣвъ а҆́дъ , ве́сь ме́ртвъ пребы́сть и҆ без̾дѣ́ленъ . ме́ртвїи же всѝ , твᲂи́мъ вᲂста́нїемъ живᲂно́снымъ ра́дꙋющесѧ ѿ ᲂу҆́зъ раз̾рѣши́шасѧ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Вᲂплᲂще́нна гдⷭ҇а неи҆зрече́ннѡ , и҆з̾ пречⷭ҇тыхъ крᲂве́й твᲂи́хъ бцⷣе , и҆ на́съ ра́ди сме́рть пло́тїю вᲂспрїе́мша , и҆ вᲂскрⷭ҇ша ви́дѣвши и҆́з̾ грᲂба , ра́дᲂстнѡ сла́вѧще и҆ велича́ше .

пѣ́снь , и҃ . і҆рмо́съ . вавѷло́нскаѧ пе́щь .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Распѧ́таго гдⷭ҇а дре́вле ви́дѣ сл҃нце , сᲂкры̀ свѣ́тъ , и҆ ка́менїе распаде́сѧ , го́ры пᲂкᲂлѣба́шасѧ , и҆ землѧ̀ вᲂстрепета̀ , и҆ и҆́же дре́вле ᲂу҆́зницы , ѿ ᲂу҆́зъ разрѣши́шасѧ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Внегда́ тѧ сло́ве всеси́льне ви́дѣ а҆́дъ всесмѣ́шныи ꙗ҆́вѣ к̾ себѣ̀ и҆дꙋ́ща , вᲂстрепета̀ , и҆ всѣ́хъ ме́ртвыхъ ѿрѣша́ше , вᲂспѣва́ющихъ держа́вꙋ и҆ бл҃гᲂꙋтро́бїе твᲂѐ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Гдⷭ҇ь вᲂста̀ , всѝ вᲂскли́кнемъ , и҆ рꙋка́ма вᲂспле́щемъ вѣ́рнѡ , и҆ ли́ки сᲂста́вимъ , сегѡ̀ си́лꙋ прᲂпᲂвѣ́дающе , и҆ вᲂпїю́ще , всѧ̀ дѣ́ла по́йте гдⷭ҇а , и҆ превᲂзнᲂси́те є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Зачала̀ є҆сѝ всенепᲂро́чнаѧ , всѧ̀ сᲂдержа́щаго , и҆ тᲂгѡ̀ рᲂдила̀ є҆сѝ пло́тїю , плѣни́вша сме́рть сме́ртїю тридне́внᲂю . є҆го́же мᲂлѝ , дш҃и мᲂе́й стра́сти ᲂу҆мертви́ти и҆ спасти́ мѧ .

пѣ́снь , ѳ҃ . і҆рмо́съ . кꙋпино́ю и҆ ѻ҆гне́мъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Краснѣ́йшїи хрⷭ҇тѐ , ка́кѡ ти за́йде на крⷭ҇тѣ̀ дᲂбро́ты свѣ́тлᲂе . ка́кѡ терпи́тъ землѧ̀ , зрѧ́щи тѧ̀ ви́сѧща . ка́кѡ непра́веднᲂе претерпѣ̀ закᲂле́нїе твᲂѐ . пᲂе́мъ мно́гᲂе твᲂѐ и҆ неи҆зрече́ннᲂе сло́ве сᲂше́ствїе .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Тридне́внымъ ти пᲂгребе́нїемъ , плѣне́нъ бы́сть вра́гъ , и҆ ѿ а҆́дᲂвыхъ ᲂу҆́зъ ѿрѣши́шасѧ мертвецы̀ . ᲂу҆мертви́сѧ сме́рть , и҆стᲂщи́шасѧ црⷭ҇тва а҆́дᲂва . тѣ́мже тѧ живᲂда́вче в̾ пѣ́снѣхъ чтꙋ́ще велича́емъ .

сла́ва . Вѣ́чныи живᲂтѐ , ка́кѡ вкꙋсѝ на́съ ра́ди сме́рть хᲂтѧ̀ сп҃се . ка́кѡ сᲂше́лъ є҆сѝ въ ме́ртвыхъ , и҆́же всѣ́мъ вᲂскрⷭ҇нїе , и҆ и҆стᲂщи́лъ є҆сѝ а҆́дᲂва сᲂкро́вища . тѣ́мже тѧ̀ бл҃гᲂда́рственѡ в̾ пѣ́снѣхъ чтꙋ́ще велича́емъ .

и҆ ны́нѣ , боⷢ҇ . И҆зба́ви гра́дъ и҆ лю́ди прибѣга́ющїѧ к̾ тебѣ̀ , бг҃ᲂрᲂди́тельнице чⷭ҇таѧ рᲂди́вшаѧ хрⷭ҇та̀ , ѿ всѧ́кᲂгѡ сᲂпрᲂти́внагѡ гнѣ́ва , и҆ плѣне́нїѧ , и҆ ꙗ҆зы́къ нахᲂжде́нїѧ , ꙗ҆́кѡ да тѧ̀ по́дᲂлгꙋ в̾ пѣ́снѣхъ велича́емъ .

Въ то́йже , пнⷣльникъ , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , а҃ . И҆́же дла́нїю пречⷭ҇тᲂю сᲂзда́выи чл҃ка , прїи́де милᲂсе́рде бᲂлѧ́щїѧ и҆сцѣли́ти хрⷭ҇тѐ , раз̾сла́бленаго во ѻ҆́вчѣй кꙋпѣ́ли сло́вᲂмъ свᲂи́мъ вᲂз̾ста́вилъ є҆сѝ . крᲂвᲂтᲂчи́вѣй же бᲂлѣ́знь и҆сцѣли́лъ є҆сѝ , и҆ хананѣ́и же ѻ҆трᲂкᲂви́цꙋ ѡ҆скᲂрблѧ́емꙋ , пᲂми́лᲂвалъ є҆сѝ , и҆ прᲂше́нїе со́тника , не презрѣ́лъ є҆сѝ . сегѡ̀ ра́ди зᲂве́мъ , всеси́льне гдⷭ҇и сла́ва тебѣ̀ .= двⷤа . Н=епᲂгребе́нъ мертве́цъ сы́и раз̾сла́бленныи ви́дѣвъ тѧ̀ вᲂзᲂпѝ , пᲂми́лꙋй мѧ гдⷭ҇и , ꙗ҆́кѡ ѻ҆́дръ мо́й гро́бъ мнѣ̀ бы́сть ; что́ ми прїѡ҆брѣте́нїе живᲂтꙋ̀ ; нетре́бꙋю ѻ҆́вчїѧ кꙋпѣ́ли , неи́мамъ бо кᲂгѡ̀ влага́юща мѧ , вᲂз̾мꙋща́ющимсѧ вᲂда́мъ . но тебѣ̀ и҆сто́чникꙋ прїидо́хъ и҆сцѣле́нїѧ , да и҆ а҆́зъ со всѣ́ми зᲂвꙋ̀ , всеси́льне гдⷭ҇и сла́ва тебѣ̀ .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , є҃ . Взы́де і҆с҃ъ во і҆єрⷭ҇ли́мъ на ѻ҆́вчꙋю кꙋпѣ́ль , гл҃емꙋю і҆ꙋде́йски виѳе́зда , пѧ́ть притво́ръ и҆мꙋ́щꙋ , и҆дѣ́же слежа́ше мно́жество бᲂлѧ́щихъ . а҆́нг҃лъ бо бж҃їи по всѧ̀ лѣ́та схᲂдѧ̀ , вᲂзмꙋща́ше ю҆̀ , и҆ здра́вїе пᲂдава́ше пристꙋпа́ющимъ с̾ вѣ́рᲂю . и҆ ви́дѣвъ гдⷭ҇ь мнᲂгᲂвре́менна челᲂвѣ́ка , глаго́ла к̾ немꙋ̀ , хо́щеши ли цѣ́лъ бы́ти ; бᲂлѧ́и ѿвѣщава́ше , гдⷭ҇и чл҃ка неи́мамъ , да є҆гда̀ вᲂзмꙋти́тсѧ вᲂда̀ , в̾ве́ржетъ мѧ в̾ кꙋпѣ́ль , враче́мъ и҆зда́хъ всѐ и҆мѣ́нїе мᲂѐ , и҆ млⷭ҇ти ᲂу҆лꙋчи́ти неспᲂдо́бихсѧ . но вра́чь дш҃а́мъ и҆ тѣ́лᲂмъ гл҃а к̾ немꙋ̀ , вᲂзмѝ сво́й ѻ҆́дръ и҆ хᲂдѝ , прᲂпᲂвѣ́даѧ мᲂю̀ си́лꙋ , и҆ ве́лїю млⷭ҇ть в̾ кᲂнцѣ́хъ .

На стихо́внѣ , стⷯры . гла́съ , г҃ . Прᲂсвѣти́шасѧ всѧ́ческаѧ , вᲂскрⷭ҇нїемъ твᲂи́мъ гдⷭ҇и , и҆ ра́й па́ки ѿве́рзесѧ . всѧ́ же тва́рь вᲂсхвалѧ́ющи тѧ , пѣ́снь ти всегда̀ прино́ситъ .

сти́хъ : к̾ тебѣ̀ вᲂз̾ведо́хъ ѻ҆́чи . Разсѣ́ѧннаго ми ᲂу҆ма̀ сᲂберѝ гдⷭ҇и , и҆ ѡ҆лѧдѣ́вшее срⷣце мᲂѐ ѡ҆чи́сти , ꙗ҆́кѡ петрꙋ̀ даѧ́ ми пᲂкаѧ́нїе . ꙗ҆́кѡ мытарю̀ вᲂздыха́нїе , и҆ ꙗ҆́кѡ блꙋдни́цѣ сле́зы , да ве́лїимъ гла́сᲂмъ взыва́ю ти , бж҃е спаси́ мѧ , ꙗ҆́кѡ є҆ди́нъ млрⷭ҇дъ и҆ чл҃кᲂлю́бецъ .

сти́хъ : пᲂми́лꙋй на́съ гдⷭ҇и . мⷱ҇ꙋ . Ве́лїѧ мч҃нкъ твᲂи́хъ хрⷭ҇тѐ си́ла , во грᲂбѣ́хъ бо лежа́ще , и҆ дꙋ́хи прᲂго́нѧтъ , и҆ ᲂу҆праздни́ша вра́жїю вла́сть вѣ́рᲂю трⷪ҇ческᲂю , пᲂдви́гшисѧ по бл҃гᲂче́стїи .

сла́ва , и҆ ны́нѣ . гла́съ , и҃ . Въ притво́рѣ сᲂло́мѡнᲂвѣ , тꙋ̀ слежа́ше мно́жество бᲂлѧ́щихъ . и҆ въ препᲂлᲂве́нїе пра́здника ѡ҆брѣ́те хрⷭ҇то́съ , три́десѧть и҆ ѻ҆́смь лѣ́тъ раз̾сла́блена лежа́ща , влады́чнимъ гла́сᲂмъ гл҃а к̾ немꙋ̀ , хо́щеши ли цѣ́лъ бы́ти . бᲂлѧ́и ѿвѣща̀ , гдⷭ҇и , челᲂвѣ́ка неи́мамъ , да є҆гда̀ вᲂз̾мꙋти́тсѧ вᲂда̀ , и҆ в̾ве́ржетъ мѧ в̾ кꙋпѣ́ль . ѻ҆́нъ же гл҃а к̾ немꙋ̀ . вᲂзмѝ ѻ҆́дръ сво́й и҆ хᲂдѝ , сѐ здра́въ бы́сть , к̾ тᲂмꙋ̀ несᲂгрѣша́й . мл҃твами бцⷣы , пᲂда́ждь на́мъ ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ . є҆ктенїѧ̀ .= и҆ =ѿпꙋ́стъ .

Во вто́рникъ , д҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , вⷤ . сла́ва , и҆ нн҃ѣ , боⷢ҇ . =По а҃ , стихᲂло́гїи , сѣда́ленъ . гла́съ , г҃ . Пло́тїю сме́рть вкꙋ́шь гдⷭ҇и , го́ресть сме́ртнꙋю пресѣчѐ вᲂста́нїемъ свᲂи́мъ , и҆ челᲂвѣ́ка наню̀ ᲂу҆крѣпѝ , пе́рвыѧ клѧ́твы ѡ҆дᲂлѣ́нїе призыва́ѧ . защи́тниче жи́зни на́шеѧ , хрⷭ҇тѐ бж҃е сла́ва тебѣ̀ . =сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Дᲂко́лѣ дш҃е мᲂѧ̀ прилѣжи́ши сᲂгрѣше́нїемъ ; дᲂко́лѣ прїе́млеши пᲂкаѧ́нїю презрѣ́нїе ; прїимѝ во ᲂу҆мѣ̀ сꙋ́дъ бꙋ́дꙋщїи , вᲂзᲂпі́й хрⷭ҇тꙋ̀ бг҃ꙋ , срⷣцевѣ́дче , сᲂгрѣши́хъ , пᲂми́лꙋй мѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Сїѧ́ете вѣ́рᲂю пресвѣ́тлаѧ свѣти́ла ст҃і́и , бл҃гᲂче́стїѧ рачи́телїе страстᲂте́рпцы прехва́льнїи , мꙋчи́телей бо ра́нъ не ᲂу҆бᲂѧ́вшесѧ , и҆́дᲂльскᲂе ѕлᲂче́стїе низлᲂжи́сте , пᲂбѣ́дꙋ и҆мꙋ́ще непᲂбѣди́мꙋю , крⷭ҇тъ и҆́стинныи . сла́ва , и҆ ны́нѣ , боⷢ҇ . Млⷭ҇тивагѡ во́ чревѣ нᲂси́вши , прибѣга́ющїѧ пᲂд̾ кро́въ тво́й , и҆ прᲂсѧ́щихъ ѿ дш҃и бжⷭ҇твенꙋю твᲂю̀ по́мᲂщь , влⷣчце ᲂу҆ще́дри и҆ ми́лᲂсти спᲂдо́би , є҆гда̀ пред̾ста́немъ влⷣцѣ тва́ри , и҆зба́ви чⷭ҇таѧ ѻ҆гнѧ̀ вѣ́чнагѡ , и҆ всѧ́кᲂгѡ ѡ҆сꙋжде́нїѧ .

По в҃ , стихᲂло́гїи , сѣда́ленъ . гла́съ , г҃ . Винꙋ̀ ѡ҆брѣ́тше всегѡ̀ тѣлесѐ , раз̾сла́бленыи за́вистїю . и҆́же въ сꙋбо́тꙋ раз̾сла́бленаго стѧ́гнꙋтїе пᲂмышлѧ́юще гл҃ахꙋ , недᲂсто́итъ цѣли́ти в̾ сꙋбо́тꙋ , разᲂри́ти ѻ҆те́ческихъ сꙋбо́тъ пᲂко́ище . зако́нꙋ тебѐ невѣ́дꙋще влⷣкꙋ , и҆ и҆сцѣли́телѧ дш҃а́мъ на́шимъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , ѡ҆ раз̾сла́бленѣмъ , на и҃ . и҆ в̾ минѣ́и , на д҃ .

На хвали́тѣхъ , стⷯры , на д҃ . гла́съ , г҃ . Пᲂвѣ́даша всѧ̀ чꙋдеса̀ , стра́жїе твᲂѝ гдⷭ҇и , но сᲂбо́ръ сꙋ́етныхъ , и҆спо́лни мздо́ю десни́цы и҆́хъ , скры́ти мнѧ́щихъ вᲂскрⷭ҇нїе твᲂѐ , є҆́же ми́ръ сла́витъ , пᲂми́лꙋй на́съ . двⷤа . Спаси́ мѧ гдⷭ҇и бж҃е мо́й , ты́ бо всѣ́мъ є҆сѝ спасе́нїе . бꙋ́рѧ мѧ страсте́й смꙋща́етъ , и҆ тѧгᲂта̀ без̾зако́нїи мᲂи́хъ пᲂгрꙋжа́етъ мѧ . да́ждь ми рꙋ́кꙋ по́мᲂщи , и҆ к̾ свѣ́тꙋ вᲂз̾веди́ мѧ пᲂкаѧ́нїѧ , ꙗ҆́кѡ є҆ди́нъ млрⷭ҇дъ и҆ чл҃кᲂлю́бецъ . мⷱ҇ꙋ . Царе́й и҆ мꙋчи́телей стра́хъ ѿри́нꙋша хрⷭ҇то́вы во́ины , и҆ бл҃гᲂдерзнᲂве́ннѡ и҆ мꙋ́жески тᲂгѡ̀ и҆спᲂвѣ́даша , всѧ́ческимъ гдⷭ҇а бг҃а и҆ цр҃ѧ на́шегѡ , и҆ мо́лѧтсѧ за дш҃а на́ша . сла́ва , и҆ ны́нѣ . гла́съ , и҃ . Гдⷭ҇и , раз̾сла́бленаго не кꙋпѣ́ль и҆сцѣлѝ , но твᲂѐ сло́во ѡ҆бнᲂвѝ . и҆ нижѐ мнᲂгᲂлѣ́тныи прет̾кнꙋ̀ є҆гѡ̀ недꙋ́гъ , ꙗ҆́кѡ гла́са твᲂегѡ̀ скᲂрѣ́йше дѣ́йство пᲂказа́сѧ , и҆ не ᲂу҆до́бь нᲂси́мꙋю тѧ́жесть ѿве́рже , и҆ бре́мѧ ѻ҆дрꙋ̀ пᲂнесѐ , в̾ пᲂслꙋшество̀ мно́гихъ щедро́тъ твᲂи́хъ , сла́ва тебѣ̀ .

На стихо́внѣ , стихѣ́ры . гла́съ , г҃ . Свы́ше схᲂдѧ̀ а҆́нг҃лъ , вᲂз̾мꙋща́ше на времена̀ во́дꙋ во ѻ҆́вчей кꙋпѣ́ли , є҆ди́нᲂго то́чїю цѣ́ла сᲂтвᲂрѧ́ѧ . но хрⷭ҇то́съ бесчи́сленаѧ мно́жества кр҃ще́нїемъ , и҆ не во́ времѧ спаса́етъ .

сти́хъ : млⷭ҇ти твᲂѧ̀ гдⷭ҇и во́ вѣки ,꙳ вᲂспᲂю̀ въ ро́дъ и҆ ро́дъ . И҆́же ᲂу҆́ды раз̾сла́блены , и҆мꙋ́щаго твᲂѐ сло́во пᲂказа̀ влⷣко , є҆́же и҆ ѻ҆́дръ нᲂси́ти твᲂи́мъ пᲂвелѣ́нїемъ , кꙋпѣ́ль ѻ҆́вчаѧ не и҆сцѣлѝ , но твᲂѐ бесчи́сленᲂе милᲂсе́рдїе .

сти́хъ : ꙗ҆́кѡ ре́клъ є҆сѝ ,꙳ во́ вѣки ми́лᲂсть сᲂзи́ждетсѧ . Си́ла твᲂѧ̀ и҆ сло́во бѧ́ше всеси́льно , сн҃е бж҃їи и҆ сло́ве . и҆ бо́льше си́хъ дѣ́йство , и҆́же ча́ющаго пᲂказа̀ свидѣ́тельство ѻ҆дра̀ , и҆́же нᲂси́мыи непреста́ннѡ .

сла́ва , и҆ ны́нѣ . гла́съ , є҃ . На ѻ҆́вчей кꙋпѣ́ли челᲂвѣ́къ слежа́ше в̾недꙋ́зѣ , и҆ ви́дѣвъ тѧ гдⷭ҇и вᲂпїѧ́ше , чл҃ка неи́мамъ , да є҆гда̀ вᲂз̾мꙋти́тсѧ вᲂда̀ , в̾ве́ржетъ мѧ в̾ ню̀ . є҆гда́ же прихᲂжꙋ̀ , и҆́нъ пред̾варѧ́етъ мѧ , и҆ прїе́млетъ и҆сцѣле́нїе , а҆́зъ же бᲂлѧ̀ ѿхᲂжꙋ̀ . и҆ а҆́бїе ᲂу҆млрⷭ҇дивсѧ сп҃съ , гл҃а к̾ немꙋ̀ , тебѐ ра́ди чл҃къ бы́хъ , тебѐ ра́ди в̾ пло́ть ѡ҆блеко́хсѧ , и҆ гл҃еши чл҃ка неи́мамъ , вᲂзмѝ ѻ҆́дръ тво́й и҆ хᲂдѝ . всѧ̀ тебѣ̀ вᲂзмо́жна . всѧ̀ пᲂслꙋ́шаютъ , всѧ̀ пᲂвинꙋ́ютсѧ . всѣ́хъ на́съ пᲂмѧнѝ , и҆ пᲂми́лꙋй ст҃ы́и , ꙗ҆́кѡ чл҃кᲂлю́бецъ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе : пѣ́нїе і҆ѡ́сифᲂво . гла́съ , г҃ . пѣ́снь , в҃ . і҆рмо́съ . ꙗ҆́кѡ тꙋ́ча на тро́скᲂтъ .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Ѱало́мски вᲂскли́кнемъ , пле́щꙋще рꙋка́ми весе́лїѧ , и҆з̾ ме́ртвыхъ бо живᲂда́вецъ вᲂста̀ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вᲂз̾ше́лъ є҆сѝ хрⷭ҇тѐ на́ крⷭ҇тъ тво́й , препᲂѧ́савсѧ си́лᲂю . и҆ вᲂскр҃слъ є҆сѝ и҆з̾ ме́ртвыхъ , ꙗ҆́кᲂже пред̾речѐ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Бѣлᲂѡ҆де́женъ а҆́нг҃лъ , ви́дѣнъ бы́сть жена́мъ вᲂпїѧ́и вᲂскр҃се , сы́и вᲂскрⷭ҇нїе вѣ́рнымъ и҆ спасе́нїе .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Пᲂма́зати тща́щесѧ и҆дѧ́хꙋ жены̀ ко́ грᲂбꙋ , вᲂскр҃сша же ви́дѣвше пᲂклᲂнѧ́хꙋсѧ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ꙗ҆́кѡ заꙋ́тренее сл҃нце , пред̾нᲂсѧ́щи дв҃о на рꙋкꙋ̀ , вᲂсїѧ́ла є҆сѝ на́мъ , и҆́же во тмѣ̀ сꙋ́щимъ .

пѣ́снь , и҃ . і҆рмо́съ . а҆́нг҃лъ ми немо́лчнѡ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Сᲂбо́ръ закᲂнᲂпрестꙋ́пенъ є҆вре́йскїи , на́ древѣ тебѐ распѧ̀ , и҆́же дре́ва ра́ди чл҃кѡмъ бы́вшїи вре́дъ , влⷣко и҆сцѣлѧ́юща бжⷭ҇твенѣ . тѣ́мже тѧ гла́сы ра́дᲂстными , при́снѡ пᲂе́мъ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ра́венъ ѻ҆ц҃ꙋ хрⷭ҇тѐ и҆ дх҃ꙋ сы́и , крⷭ҇тъ претерпѣ́лъ є҆сѝ , и҆ вмѣни́всѧ в̾ ме́ртвыхъ . црⷭ҇твїѧ а҆́дᲂва и҆стᲂщи́лъ є҆сѝ пресла́внѡ , и҆ вᲂскр҃съ сᲂвᲂз̾дви́глъ є҆сѝ с̾ сᲂбо́ю всю̀ тва́рь .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . А҆́де всеѧ́дче ; гдѣ̀ жа́ло твᲂѐ ; гдѣ́ ти сме́рте пᲂбѣ́да . вᲂскр҃сшимъ и҆з̾ ме́ртвыхъ ᲂу҆мертви́лсѧ є҆сѝ , спаси́телемъ хрⷭ҇то́мъ є҆ди́нѣмъ жизнᲂда́вцемъ . є҆го́же со ѻ҆ц҃е́мъ и҆ дх҃ᲂмъ вѣ́рнїи вᲂспѣва́емъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Да ѡ҆бᲂжи́тъ чл҃чество бг҃ъ , чл҃къ бы́сть и҆з̾ тебѐ всенепᲂро́чнаѧ чⷭ҇таѧ . є҆го́же и҆́з̾ грᲂба краснѣ́йша ви́дѣла є҆сѝ прᲂше́дша , ꙗ҆́кѡ пᲂбѣди́телѧ а҆́дꙋ . и҆ ра́дᲂсти и҆спо́лниласѧ є҆сѝ .

пѣ́снь , ѳ҃ . і҆рмо́съ . на сѷна́йстѣй гᲂрѣ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆́кѡ а҆́гнецъ к̾ закᲂле́нїю приведе́нъ бы́сть влⷣко во́лею і҆с҃е , не вᲂпїѧ̀ ни зᲂвы̀ ꙗ҆́кᲂже пи́шетъ . сме́ртїю бо свᲂе́ю сло́ве на́съ ѡ҆без̾сме́ртивъ , пѣснᲂсла́вѧщихъ твᲂю̀ стра́сть пречⷭ҇тꙋю , и҆ є҆́же и҆з̾ а҆́да стра́шнᲂе ѡ҆жи́тїе .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Сᲂкрꙋше́нныхъ на́съ ѡ҆бнᲂви́лъ є҆сѝ і҆с҃е всѣ́хъ цр҃ю , честны́мъ и҆ стра́шнымъ вᲂскрⷭ҇нїемъ твᲂи́мъ , ᲂу҆ченико́мъ же смире́нїе твᲂѐ си́мъ по́далъ є҆сѝ чл҃кᲂлю́бче . є҆́же на́мъ да́рꙋй , пѣснᲂсла́вѧщимъ твᲂѐ бжⷭ҇твенᲂе вᲂста́нїе .

сла́ва . Честно́е мѷрѡно́сицъ сᲂбра́нїе , прїи́де ско́рᲂстїю ко ст҃о́мꙋ влⷣко гро́бꙋ твᲂемꙋ̀ , є҆́же пᲂма́зати тѧ вѣ́рнѡ , в̾ бѣ́лахъ же ри́захъ ви́дѣша сѣдѧ́ща а҆́нг҃ла , и҆ тѣ́мъ вѣща́юща , что̀ с̾ ме́ртвыми жива́го зрѣ́ти хо́щете .

и҆ ны́нѣ , боⷢ҇ . Свѣтᲂда́вца рᲂдила̀ є҆сѝ и҆ гдⷭ҇а , две́ри сꙋ́щи свѣ́тꙋ , є҆го́же и҆́з̾ грᲂба ѡ҆блиста́вша ви́дѣвши , и҆спо́лнисѧ ра́дᲂсти . но тᲂгѡ̀ мᲂлѝ дв҃о , пла́чь ми дарᲂва́ти ра́дᲂстенъ , хᲂда́тайственъ чи́стаѧ та́мᲂшнемꙋ ᲂу҆тѣше́нїю .