ВО СТ҃У́Ю И҆ ВЕЛИ́КУЮ НлⷣЮ ПА́СХИ

пред̾ литꙋргі́ею , пᲂе́мъ , ча́сы па́сцѣ , си́це . і҆єре́й , гл҃етъ : Бл҃гᲂслᲂве́нъ бг҃ъ на́шъ . и҆ мы̀ пᲂе́мъ : Хрⷭ҇то́съ вᲂскре́се и҆з̾ ме́ртвыхъ , сме́ртїю на сме́рть настꙋпѝ , и҆ гро́бнымъ живо́тъ дарᲂва̀ ,= гⷤ .=

Вᲂскрⷭ҇нїе хрⷭ҇то́во ви́дѣвше , пᲂклᲂни́мсѧ ст҃о́мꙋ гдⷭ҇ꙋ і҆с҃ꙋ , є҆ди́нᲂмꙋ без̾грѣ́шнᲂмꙋ [пᲂкло́н̾] , крⷭ҇тꙋ̀ твᲂемꙋ̀ пᲂклᲂнѧ́емсѧ хрⷭ҇тѐ , и҆ ст҃о́е вᲂскрⷭ҇нїе твᲂѐ пᲂе́мъ и҆ сла́вимъ [пᲂкло́н̾] . ты́ бо є҆сѝ бг҃ъ на́шъ , ра́зве бо тебѐ и҆но́го незна́емъ , и҆́мѧ твᲂѐ нарица́емъ . прїиди́те всѝ вѣ́рнїи , пᲂклᲂни́мсѧ ст҃о́мꙋ хрⷭ҇то́вꙋ вᲂскрⷭ҇нїю [пᲂкло́н̾] , се́бо прїи́де крⷭ҇та̀ ра́ди ра́дᲂсть всемꙋ̀ ми́рꙋ , всегда̀ бл҃гᲂслᲂви́мъ гдⷭ҇а , и҆ пᲂе́мъ вᲂскрⷭ҇нїе є҆гѡ̀ , распѧ́тїе бо претерпѣ̀ , и҆ сме́ртїю сме́рть разрꙋшѝ . три́жды .

Предвари́ша ᲂу҆́тро , ꙗ҆́же съ мр҃і́ею , и҆ ѡ҆брѣто́ша ка́мень ѿвале́нъ ѿ́ грᲂба , слы́шахꙋ ѿ а҆́нг҃ла , и҆́же во́ свѣтѣ приснᲂсꙋ́щнѣмъ сꙋ́щагѡ , съ ме́ртвыми не и҆щи́те ꙗ҆́кѡ челᲂвѣ́ка . ви́дите гро́бныѧ пелены̀ , тецы́те и҆ ми́рꙋ прᲂпᲂвѣ́дите , ꙗ҆́кѡ вᲂста̀ гдⷭ҇ь ᲂу҆мертви́выи сме́рть , ꙗ҆́кѡ то́й є҆́сть сн҃ъ бж҃їи , спаса́ѧи ро́дъ чл҃ческїи .

А҆́ще и҆ во́ грᲂбъ сни́де без̾сме́ртне , но а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе .

Во́ грᲂбѣ с̾ пло́тїю , во а҆́дѣ же съ дꙋше́ю ꙗ҆́кѡ бг҃ъ , в̾ раи́ же с̾ разбо́йникᲂмъ , и҆ на прⷭ҇то́лѣ бѣ́ѧше хрⷭ҇тѐ , со ѻ҆ц҃е́мъ и҆ дꙋ́хᲂмъ , всѧ̀ и҆спᲂлнѧ́ѧ неѡ҆пи́санныи .

сла́ва . Ꙗ҆́кѡ живᲂно́сецъ , ꙗ҆́кѡ раѧ̀ ѕѣлѡ̀ краснѣ́йшїи вᲂи́стинꙋ , и҆ всѧ́кᲂгѡ черто́га ца́рска , ꙗ҆ви́сѧ свѣтлѣ́йши хрⷭ҇тѐ гро́бъ тво́й , и҆сто́чникъ на́шемꙋ вᲂскрⷭ҇нїю .

и҆ ны́нѣ . Вы́шнѧгѡ ѡ҆сщ҃е́ннѡ бж҃їе вселе́нїе ра́дꙋисѧ , тᲂбо́ю бо даде́сѧ ра́дᲂсть бцⷣе вᲂпїю́щимъ тѝ , бл҃гᲂслᲂве́на ты̀ в̾ жена́хъ пренепᲂро́чнаѧ влⷣчце .

Всѧ́же сїѧ̀ стихѝ глаго́лемъ , по кры́лᲂсᲂмъ премѣнѧ́ѧ , по́ чинꙋ и҆́хъ , є҆ди́нъ по є҆ди́нᲂмꙋ . та́же , Гдⷭ҇и пᲂми́лꙋй , м҃ . сла́ва , и҆ ны́нѣ . Чтⷭ҇нѣ́йшꙋю херꙋви́мъ , и҆ сла́внѣйшꙋю вᲂи́стинꙋ серафи́мъ , без̾и҆стлѣ́нїѧ бг҃а сло́ва ро́ждьшꙋю , сꙋ́щꙋю бцⷣꙋ тѧ̀ велича́емъ . и҆́менемъ гдⷭ҇нимъ бл҃гᲂслᲂвѝ ѻ҆́ч҃е . і҆єре́й , гл҃етъ : За мл҃твъ ст҃ы́хъ ѻ҆ц҃ъ на́шихъ . си́це пᲂе́мъ . За г҃ й ча́съ , и҆ за ѕ҃ й ча́съ , и҆ за ѳ҃ й ча́съ .

На литꙋргі́и . а҆нтиѳо́нъ , а҃ . ѱало́мъ , ѯ҃є . Вᲂскли́кните гдⷭ҇ви всѧ̀ землѧ̀ . мл҃твами бцⷣы сп҃се спасѝ на́съ . сти́хъ : Вᲂскли́кните гдⷭ҇ви всѧ̀ землѧ̀ , по́йте же и҆́мени є҆гѡ̀ , дади́те сла́вꙋ хвалѣ̀ є҆гѡ̀ . мл҃твами бцⷣы сп҃се спасѝ на́съ . сти́хъ : Рцѣ́те бг҃ᲂви ко́ль стра́шна дѣ́ла твᲂѧ̀ , во мно́жествѣ си́лы твᲂеѧ̀ . мл҃твами бцⷣы сп҃се спасѝ на́съ . сти́хъ : Всѧ̀ землѧ̀ да пᲂкло́нит̾тисѧ и҆ пᲂе́тъ тебѣ̀ , да пᲂе́тъ же и҆́мени твᲂемꙋ̀ вы́шнїи . мл҃твами бцⷣы сп҃се спасѝ на́съ . сла́ва , мл҃твами бцⷣы сп҃се спасѝ на́съ . и҆ ны́нѣ , мл҃твами бцⷣы сп҃се спасѝ на́съ .

а҆нтиѳо́нъ , в҃ . ѱало́мъ , ѯ҃ѕ . Бж҃е ᲂу҆ще́дри ны и҆ бл҃гᲂслᲂви́ ны . спасѝ на́съ сн҃е бж҃їи , вᲂскр҃съ и҆з̾ ме́ртвыхъ пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ . сти́хъ : Бж҃е ᲂу҆ще́дри ны и҆ бл҃гᲂслᲂви́ ны , прᲂсвѣтѝ лицѐ твᲂѐ наны̀ , и҆ пᲂми́лꙋй на́съ . спасѝ на́съ сн҃е бж҃їи : сти́хъ . Да пᲂзна́емъ на землѝ пꙋ́ть тво́й , и҆ во всѣ́хъ ꙗ҆зы́цѣхъ спасе́нїе твᲂѐ . спасѝ на́съ сн҃е бж҃їи . сти́хъ : Да и҆спᲂвѣ́дѧтсѧ тебѣ̀ лю́дїе бж҃е , да и҆спᲂвѣ́дѧтсѧ тебѣ̀ лю́дїе всѝ . спасѝ на́съ сн҃е бж҃їи .

сла́ва , и҆ ны́нѣ . Є҆динᲂро́дныи сн҃е .

а҆нтиѳо́нъ , г҃ . ѱало́мъ , ѯ҃з . Да вᲂскрⷭ҇нетъ бг҃ъ , и҆ разы́дꙋтсѧ вразѝ є҆гѡ̀ . трᲂпа́рь : хрⷭ҇то́съ вᲂскр҃се и҆з̾ ме́ртвыхъ , гⷤ . сти́хъ : Да вᲂскрⷭ҇нетъ бг҃ъ , и҆ разы́дꙋтсѧ вразѝ є҆гѡ̀ , и҆ да бѣжа́тъ ѿ лица̀ є҆гѡ̀ ненави́дѧщїи є҆гѡ̀ . хрⷭ҇то́съ вᲂскр҃се и҆з̾ ме́ртвыхъ , гⷤ . сти́хъ : Ꙗ҆́кѡ и҆счеза́етъ ды́мъ да и҆сче́знꙋтъ , и҆ ꙗ҆́кѡ та́етъ во́скъ ѿ лица̀ ѻ҆гнѧ̀ . хрⷭ҇то́съ вᲂскр҃се и҆з̾ ме́ртвыхъ , гⷤ . сти́хъ : Та́кѡ да пᲂги́бнꙋтъ грѣ́шницы ѿ лица̀ бж҃їѧ , а҆ пра́ведницы да вᲂз̾веселѧ́тсѧ , и҆ вᲂз̾ра́дꙋютсѧ пре́дъ бг҃ᲂмъ . хрⷭ҇то́съ вᲂскр҃се и҆з̾ ме́ртвыхъ , гⷤ .

вы́хᲂдъ . вᲂз̾глаша́етъ дїа́кᲂнъ , и҆лѝ і҆єре́й . премꙋ́дрᲂсть про́сти , вᲂзвыша́ѧ є҆ѵⷢ҇а́лїе .

мы́же сти́хъ вхо́дꙋ : Въ цр҃квахъ бл҃гᲂслᲂви́те бг҃а гдⷭ҇а , ѿ и҆сто́чникъ і҆зра́илевъ . і҆єре́й , пᲂе́тъ : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ сн҃е бж҃їи , вᲂскре́съ и҆з̾ ме́ртвыхъ пᲂю́щихъ ти , а҆ллилꙋ́їѧ , гⷤ .

трᲂпа́рь : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ ,= три́жды .=

сла́ва , и҆ ны́нѣ . кᲂнда́къ , гла́съ , и҃ . А҆́ще и҆ во́ грᲂбъ сни́де без̾сме́ртне , но а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе .

вмѣ́сто же трⷭ҇та́гѡ : є҆ли́цы во хрⷭ҇та̀ крⷭ҇ти́стесѧ , во хрⷭ҇та̀ ѡ҆блеко́стесѧ , а҆ллилꙋ́їѧ .

прᲂки́менъ , ѱало́мъ дв҃дᲂвъ . се́й де́нь и҆́же сᲂтвᲂрѝ гдⷭ҇ь , вᲂзра́дꙋемсѧ и҆ вᲂзвесели́мсѧ во́нь . сти́хъ : и҆спᲂвѣ́дайтесѧ гдⷭ҇ви ꙗ҆́кѡ бл҃гъ ꙗ҆́кѡ во́ вѣки млⷭ҇ть є҆гѡ̀ . сти́хъ : да рече́тъ ᲂу҆́бѡ до́мъ і҆и҃левъ , ꙗ҆́кѡ бл҃гъ ꙗ҆́кѡ во́ вѣки млⷭ҇ть є҆гѡ̀ . а҆пⷭ҇лъ , в̾ дѣѧ́нїих̾ . заⷱ҇ , а҃ . а҆ллилꙋ́їѧ . ты̀ вᲂскр҃съ ᲂу҆ще́дриши сїѡ́на . сти́хъ : съ нб҃сѐ призрѣ̀ гдⷭ҇ь ви́дѣти всѧ̀ сы́ны чл҃ческїѧ . є҆ѵⷢ҇а́лїе , ѿ і҆ѡа́нна . заⷱ҇ , а҃ . прича́стенъ . тѣ́ло хрⷭ҇то́во прїими́те , и҆ и҆сто́чника без̾сме́ртнагѡ вкꙋси́те .

=и҆ =по́ рѧдꙋ бжⷭ҇твенаѧ литꙋргі́ѧ златᲂꙋ́стагѡ .

А҆́ще ли нѣ́сть литꙋргі́и . По ѳ҃ мъ , часѣ̀ , за бл҃гᲂслᲂвѝ дш҃е мᲂѧ̀ . пᲂе́мъ :

Хрⷭ҇то́съ вᲂскр҃се и҆з̾ ме́ртвыхъ , сме́ртїю на сме́рть настꙋпѝ , и҆ гро́бнымъ живо́тъ дарᲂва̀ ,= гⷤ .=

Вᲂскрⷭ҇нїе хрⷭ҇то́во ви́дѣвше , пᲂклᲂни́мсѧ ст҃о́мꙋ гдⷭ҇ꙋ і҆с҃ꙋ , є҆ди́нᲂмꙋ без̾грѣ́шнᲂмꙋ [пᲂкло́н̾] , крⷭ҇тꙋ̀ твᲂемꙋ̀ пᲂклᲂнѧ́емсѧ хрⷭ҇тѐ , и҆ ст҃о́е вᲂскрⷭ҇нїе твᲂѐ пᲂе́мъ и҆ сла́вимъ [пᲂкло́н̾] . ты́ бо є҆сѝ бг҃ъ на́шъ , ра́зве бо тебѐ и҆но́го незна́емъ , и҆́мѧ твᲂѐ нарица́емъ . прїиди́те всѝ вѣ́рнїи , пᲂклᲂни́мсѧ ст҃о́мꙋ хрⷭ҇то́вꙋ вᲂскрⷭ҇нїю [пᲂкло́н̾] , се́бо прїи́де крⷭ҇та̀ ра́ди ра́дᲂсть всемꙋ̀ ми́рꙋ , всегда̀ бл҃гᲂслᲂви́мъ гдⷭ҇а , и҆ пᲂе́мъ вᲂскрⷭ҇нїе є҆гѡ̀ , распѧ́тїе бо претерпѣ̀ , и҆ сме́ртїю сме́рть разрꙋшѝ .

Предвари́ша ᲂу҆́тро , ꙗ҆́же съ мр҃і́ею , и҆ ѡ҆брѣто́ша ка́мень ѿвале́нъ ѿ́ грᲂба , слы́шахꙋ ѿ а҆́нг҃ла , и҆́же во́ свѣтѣ приснᲂсꙋ́щнѣмъ сꙋ́щагѡ , съ ме́ртвыми не и҆щи́те ꙗ҆́кѡ челᲂвѣ́ка . ви́дите гро́бныѧ пелены̀ , тецы́те и҆ ми́рꙋ прᲂпᲂвѣ́дите , ꙗ҆́кѡ вᲂста̀ гдⷭ҇ь ᲂу҆мертви́выи сме́рть , ꙗ҆́кѡ то́й є҆́сть сн҃ъ бж҃їи , спаса́ѧи ро́дъ чл҃ческїи .

сла́ва . А҆́ще и҆ во́ грᲂбъ сни́де без̾сме́ртне , но а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе .

и҆ ны́нѣ . Є҆динᲂро́дныи сы́нъ , и҆ сло́во бж҃їе , без̾сме́ртне сы́и , и҆зво́ливыи спасе́нїѧ на́шегѡ ра́ди вᲂплᲂти́тисѧ , ѿ ст҃ы́ѧ бцⷣы и҆ при́снѡ дв҃ы мр҃і́и , непрело́жнѡ въчелᲂвѣ́чивыисѧ , распѧ́тсѧ хрⷭ҇тѐ бж҃е , и҆ сме́ртїю на сме́рть настꙋпи́выи є҆ди́нъ сы́и ст҃ы́ѧ трⷪ҇цы , съпрᲂславлѧ́емыи ѻ҆ц҃ꙋ и҆ ст҃о́мꙋ дх҃ꙋ , спасѝ на́съ .

пᲂсе́мъ , бл҃же́нна , ѿ кано́на , пѣ́снь , г҃ , и҆ ѕ҃ . а҆пⷭ҇лъ , и҆ є҆ѵⷢ҇а́лїе ꙗ҆́кᲂже вы́ше ᲂу҆каза́сѧ , на литꙋргі́и . та́же :

Пᲂмѧнѝ на́съ гдⷭ҇и , є҆гда̀ прїи́деши во црⷭ҇твїи сѝ [пᲂкло́н̾] . Пᲂмѧнѝ на́съ влⷣко , є҆гда̀ прїи́деши во црⷭ҇твїи сѝ [пᲂкло́н̾] . Пᲂмѧнѝ на́съ ст҃ы́и , є҆гда̀ прїи́деши во црⷭ҇твїи сѝ [пᲂкло́н̾] .

Ли́къ нбⷭ҇ныи пᲂе́тъ тѧ̀ и҆ гл҃етъ , ст҃ъ ст҃ъ ст҃ъ гдⷭ҇ь саваѡ́ѳъ , и҆спо́лнь нб҃о и҆ зе́млю сла́вы твᲂеѧ̀ .

Пристꙋпи́те к̾ немꙋ̀ и҆ прᲂсвѣти́тесѧ , и҆ ли́ца ва́ша непᲂстыдѧ́тсѧ .

Ли́къ нбⷭ҇ныи пᲂе́тъ тѧ̀ и҆ гл҃етъ , ст҃ъ ст҃ъ ст҃ъ гдⷭ҇ь саваѡ́ѳъ , и҆спо́лнь нб҃о и҆ зе́млю сла́вы твᲂеѧ̀ .

сла́ва . Сᲂбо́ръ ст҃ы́хъ а҆́нг҃лъ и҆ а҆рха́нг҃лъ , со всѣ́ми нбⷭ҇ными си́лами пᲂе́тъ тѧ и҆ гл҃етъ , ст҃ъ ст҃ъ ст҃ъ гдⷭ҇ь саваѡ́ѳъ , и҆спо́лнь нб҃о и҆ зе́млю сла́вы твᲂеѧ̀ .

и҆ ны́нѣ . Вѣ́рꙋю во є҆ди́наго бг҃а ѻ҆ц҃а вседержи́телѧ , твᲂрца̀ нб҃ꙋ и҆ землѝ ви́димымъ же всѣ́мъ и҆ неви́димымъ . И҆ во є҆ди́наго гдⷭ҇а і҆с҃а хрⷭ҇та̀ сн҃а бж҃їѧ , є҆динᲂро́днаго , и҆́же ѿ ѻ҆ц҃а рᲂжде́ннаго пре́жде всѣ́хъ вѣ́къ . Свѣ́та ѿ́ свѣта , бг҃а и҆́стинна ѿ́ бг҃а и҆́стинна , рᲂжде́на а҆ несᲂтвᲂре́на , є҆динᲂсꙋ́щна ѻ҆ц҃ꙋ , и҆́мъ же всѧ̀ бы́ша . На́съ ра́ди чл҃къ , и҆ на́шегѡ ра́ди спасе́нїѧ , с̾ше́дшагѡ с̾ небе́съ , и҆ вᲂплᲂти́вшагᲂсѧ ѿ́ дх҃а ст҃а , и҆ мр҃і́и дв҃ы вᲂчл҃чьшасѧ . Распѧ́таго заны̀ припᲂнті́йстѣмъ пила́тѣ , страда́вша и҆ пᲂгребе́на , и҆ вᲂскрⷭ҇шаго въ тре́тїй де́нь по писа́нїихъ . И҆ вᲂз̾ше́дшаго на нб҃са̀ , и҆ сѣдѧ́ща ѻ҆деснꙋ́ю ѻ҆ц҃а . И҆ па́ки грѧдꙋ́щаго со сла́вᲂю , сꙋди́ти живы́мъ и҆ ме́ртвымъ , є҆го́же црⷭ҇твїю нѣ́сть кᲂнца̀ . И҆ въ дх҃а ст҃а́го гдⷭ҇а и҆́стиннаго и҆ живᲂтвᲂрѧ́щаго , и҆́же ѿ ѻ҆ц҃а и҆схᲂдѧ́щаго , и҆́же со ѻ҆ц҃е́мъ и҆ сн҃ᲂмъ с̾пᲂклᲂнѧ́ема и҆ с̾сла́вима , гл҃авшаго прᲂро́ки . И҆ во є҆ди́нꙋ ст҃ꙋ́ю сᲂбо́рнꙋю , и҆ а҆пⷭ҇льскꙋю цр҃кᲂвь . И҆спᲂвѣ́дꙋю є҆ди́но кр҃ще́нїе , во ѡ҆ставле́нїе грѣхо́въ . Ча́ю вᲂскрⷭ҇нїѧ ме́ртвымъ . И҆ жи́зни бꙋ́дꙋщаго вѣ́ка , а҆ми́нь .

Ѡ҆сла́би ѡ҆ста́ви , ѿпꙋстѝ бж҃е сᲂгрѣше́нїѧ на́ша , во́льнаѧ и҆ нево́льнаѧ , ꙗ҆́же в̾ сло́вѣ и҆ в̾ дѣ́лѣ , и҆ ꙗ҆́же в̾вѣ́дѣнїи и҆ не в̾вѣ́дѣнїи , и҆ ꙗ҆́же во ᲂу҆мѣ̀ и҆ въ пᲂмышле́нїи , ꙗ҆́же во́ дни и҆ въ нᲂщѝ , всѧ́ми прᲂстѝ , ꙗ҆́кѡ бл҃гъ и҆ чл҃кᲂлю́бецъ .

Ѻ҆́ч҃е на́шъ и҆́же є҆сѝ на́ нб҃сѣхъ , да ст҃и́тсѧ и҆́мѧ твᲂѐ , да прїи́детъ црⷭ҇твїе твᲂѐ , да бꙋ́детъ во́лѧ твᲂѧ̀ , ꙗ҆́кѡ на́ нб҃си и҆ на землѝ . хлѣ́бъ на́шъ насꙋ́щныи да́ждь на́мъ дне́сь , и҆ ѡ҆ста́ви на́мъ до́лги на́ша , ꙗ҆́кᲂже и҆ мы̀ ѡ҆ставлѧ́емъ дᲂлжникѡ́мъ на́шимъ . и҆ нев̾ведѝ на́съ во и҆скꙋше́нїе , но и҆зба́ви на́съ ѿ лꙋка́вагѡ .

і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво и҆ си́ла .

кᲂнда́къ . А҆́ще и҆ во́ грᲂбъ сни́де без̾сме́ртне , но а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе .

Гдⷭ҇и пᲂми́лꙋй , м҃ .= Є҆=ди́нъ ст҃ъ , є҆ди́нъ гдⷭ҇ь і҆с҃ъ хрⷭ҇то́съ , въ сла́вꙋ бг҃ꙋ ѻ҆ц҃ꙋ , а҆ми́нь .

Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ .= три́жды , с̾ пᲂкло́нами . ѱало́мъ , л҃г .=

Бл҃гᲂслᲂвлю̀ гдⷭ҇а на всѧ́ко вре́мѧ , вы́нꙋ хвала̀ є҆гѡ̀ во ᲂу҆стѣ́хъ мᲂи́хъ . ѻ҆́ гдⷭ҇ѣ пᲂхва́литсѧ дꙋша̀ мᲂѧ̀ . да ᲂу҆слы́шатъ кро́тцыи , и҆ вᲂзвеселѧ́тсѧ . вᲂзвели́чите гдⷭ҇а со мно́ю , и҆ вᲂзнесе́мъ и҆́мѧ є҆гѡ̀ в̾кꙋ́пѣ . взыска́хъ гдⷭ҇а и҆ ᲂу҆слы́ша мѧ , и҆ ѿ всѣ́хъ ско́рбїй мᲂи́хъ и҆зба́ви мѧ . пристꙋпи́те к̾ немꙋ̀ и҆ прᲂсвѣти́тесѧ , и҆ лица̀ ва́ша непᲂстыдѧ́тсѧ . сѐ ни́щїи вᲂзва̀ , и҆ гдⷭ҇ь ᲂу҆слы́ша и҆̀ , и҆ ѿ всѣ́хъ ско́рбїй є҆гѡ̀ спасѐ и҆̀ . ѡ҆пᲂлчи́тсѧ а҆́нг҃лъ гдⷭ҇нь ѡ҆́крестъ бᲂѧ́щихсѧ є҆гѡ̀ , и҆ и҆зба́витъ и҆́хъ . вкꙋси́те и҆ ви́дите ꙗ҆́кѡ бл҃гъ гдⷭ҇ь . бл҃же́нъ мꙋ́жъ и҆́же ᲂу҆пᲂва́етъ на́нь . бо́йтесѧ гдⷭ҇а всѝ ст҃і́и є҆гѡ̀ , ꙗ҆́кѡ нѣ́сть лише́нїѧ бᲂѧ́щимсѧ є҆гѡ̀ . бᲂга́тїи ѡ҆бнища́ша и҆ взалка́ша , взыска́ющїи же гдⷭ҇а нелиша́тсѧ ѿ всѧ́кᲂгѡ бл҃га .

та́же : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ . ликꙋ́й нн҃ѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ . пᲂкло́н̾ до землѝ .

та́же , дїа́кᲂнъ : Премꙋ́дрᲂсть . мы́ же : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ .= три́жды , с̾ пᲂкло́нами .= пᲂсе́мъ і҆єре́й твᲂри́тъ , ѿпꙋ́стъ , держа́и крⷭ҇тъ . пᲂе́тъ : Хрⷭ҇то́съ вᲂскр҃се и҆з̾ ме́ртвыхъ , сме́ртїю сме́рть пᲂпра́въ . мы́ же : И҆ сꙋ́щимъ во грᲂбѣ́хъ живо́тъ дарᲂва̀ . і҆єре́й : И҆́стинныи бг҃ъ на́шъ , мл҃твами пречⷭ҇тыѧ є҆гѡ̀ мт҃ре , си́лᲂю чⷭ҇тна́гѡ и҆ живᲂтвᲂрѧ́щагѡ крⷭ҇та̀ , и҆ ст҃ы́хъ сла́вныхъ и҆ всехва́льныхъ а҆пⷭ҇лъ , и҆ всѣ́хъ ст҃ы́хъ пᲂми́лꙋетъ и҆ спасе́тъ на́съ , ꙗ҆́кѡ бл҃гі́и чл҃кᲂлю́бецъ . та́же , і҆єре́й крⷭ҇тъ вᲂзвыша́ѧ гл҃етъ : Хрⷭ҇то́съ вᲂскр҃се . гⷤ . мы́ же ѿвѣща́емъ : Вᲂи́стинꙋ вᲂскр҃се . гⷤ . и҆ пᲂе́мъ : И҆ =на́мъ дарᲂва̀ живо́тъ вѣ́чныи , пᲂклᲂнѧ́емсѧ тридне́внᲂмꙋ є҆гѡ̀ вᲂскрⷭ҇нїю =[пᲂкло́нъ] .

та́же : Хрⷭ҇то́съ вᲂскр҃се и҆з̾ ме́ртвыхъ , сме́ртїю на сме́рть настꙋпѝ , и҆ гро́бнымъ живо́тъ дарᲂва̀ .= три́жды . и҆ мнᲂгᲂлѣ́тїе .=