НЕДѢ́ЛѦ В҃ ПО ПА́СЦѢ Ѡ҆ ѲѠМѢ̀

Въ сꙋбѡ́тꙋ , ѳѡминꙋ̀ , ве́черъ , бл҃гᲂслᲂви́вшꙋ і҆єре́ю , и҆ мы̀ гл҃емъ , хрⷭ҇то́съ вᲂскр҃се , гⷤ . и҆ трⷭ҇то́е , и҆ по ѻ҆́ч҃е на́шъ . гдⷭ҇и пᲂми́лꙋй , в҃і . сла́ва , и҆ нн҃ѣ . прїиди́те пᲂклᲂни́мсѧ , гⷤ . та́же , ѱало́мъ , бл҃гᲂслᲂвѝ дш҃е мᲂѧ̀ гдⷭ҇а .

На ма́лѣй вече́рни , на гдⷭ҇и вᲂзва́хъ , пᲂе́мъ , стихѣ́ры на д҃ . гла́съ , а҃ . поⷣ . нбⷭ҇нымъ чино́мъ . Терпи́тъ хрⷭ҇то́съ , чл҃кᲂлю́бнѣ ѻ҆сѧза́нїе ,꙳ ꙗ҆́кᲂже и҆ распѧ́тїе пре́же сегѡ̀ ,꙳ и҆ непра́ведно ѡ҆сꙋжде́нїе ,꙳ и҆ и҆́з̾ грᲂба тридне́внѡ вᲂскр҃съ ,꙳ печа́ти є҆гѡ̀ неразрꙋшѝ .꙳ и҆ две́ремъ затвᲂре́нымъ , ᲂу҆ченико́мъ пред̾ста́въ , ꙗ҆́кѡ всеси́ленъ . =двⷤа . Ѽ =ѳѡмино̀ невѣ́рїе ,꙳ ми́рꙋ спасе́нїе ,꙳ бг҃ᲂчл҃ка сло́ва ,꙳ є҆́же и҆з̾ а҆́дскихъ сᲂкро́вищь вᲂста́нїе ᲂу҆вѣрѧ́етъ ,꙳ ꙗ҆́звы рꙋ́къ и҆ но́гъ де́рзᲂстнѡ ѡ҆сѧза́въ ,꙳ к̾ вѣ́рѣ ми́рᲂви десни́цею любᲂпы́тнᲂю . Со́бранымъ стра́ха ра́ди ,꙳ и҆́же ѿ́ страсти твᲂеѧ̀ а҆пⷭ҇лѡмъ сло́ве ,꙳ и҆ две́ремъ затвᲂре́нымъ ,꙳ внеза́пꙋ вни́де пᲂсредѝ и҆́хъ , ми́ръ да́рꙋѧ .꙳ и҆ ѳѡма̀ рꙋ́кꙋ прᲂсте́ръ прикᲂснꙋ́тисѧ ,꙳ чⷭ҇тны́хъ ре́бръ твᲂи́хъ ꙗ҆́звамъ .

сла́ва , и҆ ны́нѣ . гла́съ , в҃ . По вᲂста́нїи твᲂе́мъ гдⷭ҇и , со́бранымъ ᲂу҆ченико́мъ твᲂи́мъ . и҆ две́ремъ затвᲂре́нымъ , пᲂсредѣ̀ ста̀ , ми́ръ даѧ̀ и҆́мъ . вѣ́рᲂвавъ же и҆ ѳѡма̀ , зрѣ́нїемъ рꙋ́кꙋ и҆ ре́бръ твᲂи́хъ , гдⷭ҇а и҆ бг҃а тебѐ и҆спᲂвѣ́да , спаса́ющаго вѣ́рꙋющихъ в̾ тѧ̀ любо́вїю чл҃кᲂлю́бче .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́ѳᲂвъ . Оу҆стна́ми чи́стыми ꙳ по́йте со а҆́нг҃лы ꙳ челᲂвѣ́цы ,꙳ вᲂскрⷭ҇шаго и҆́з̾ грᲂба тридне́вно ,꙳ и҆ ми́ра вᲂздви́гшаго .

сти́хъ : пᲂхвалѝ і҆єрⷭ҇ли́ме гдⷭ҇а ,꙳ хвалѝ бг҃а твᲂегѡ̀ сїѡ́не . Ꙗ҆ви́лсѧ є҆сѝ сщ҃е́ннымъ свᲂи́мъ ꙳ сп҃се ᲂу҆ченико́мъ ,꙳ две́ремъ затвᲂре́нымъ .꙳ тѣ́хъ ра́ди ѡ҆бнᲂвлѧ́ѧ на́мъ ,꙳ бжⷭ҇твеныи тво́й дх҃ъ .

сти́хъ : ꙗ҆́кѡ ᲂу҆крѣпѝ вереѝ вра́тъ твᲂи́хъ ,꙳ и҆ бл҃гᲂслᲂвѝ сн҃ы твᲂѧ̀ в̾ тебѣ̀ . Нн҃ѣ тѧ всецр҃ю ,꙳ ви́дѣвше не ѻ҆чи́ма ,꙳ но серде́чнᲂю любо́вїю ,꙳ бг҃а вѣ́рꙋюще ,꙳ в̾ пѣ́нїихъ велича́емъ .

сла́ва , и҆ ны́нѣ . гла́съ , то́йже . Дае́ши ѽ и҆зба́вителю ,꙳ ми́ръ лю́демъ свᲂи́мъ ,꙳ и҆ дᲂлго́въ разрѣше́нїе ,꙳ мл҃твами всечⷭ҇тыѧ ,꙳ и҆ є҆ди́ныѧ бг҃ᲂрᲂди́тельницы .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ , и҆ ѿпꙋ́стъ .=

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ пᲂста́вимъ , стихо́въ , і҃ . стихѣ́ры , самᲂгла́сны , гла́съ , а҃ . По́ днехъ ѻ҆сми́хъ вᲂста́нїѧ твᲂегѡ̀ гдⷭ҇и , ꙗ҆ви́лсѧ є҆сѝ ᲂу҆ченико́мъ свᲂи́мъ , в̾ мѣ́стѣ и҆дѣ́же бѧ́хꙋ со́брани , и҆ вᲂз̾гласи́въ и҆́мъ ми́ръ ва́мъ , и҆ невѣ́рꙋющемꙋ ᲂу҆ченикꙋ̀ рꙋ́цѣ пᲂказа̀ и҆ пречⷭ҇таѧ ре́бра . ѻ҆́нъ же вѣ́рᲂвавъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ .= двⷤа . Две́ремъ затвᲂре́нымъ , и҆ ᲂу҆ченико́мъ со́бранымъ , в̾ни́де в̾неза́пꙋ всеси́льне і҆с҃е сп҃се на́шъ , и҆ ста́въ пᲂсредѝ и҆́хъ , ми́ръ да́въ , и҆ и҆спо́лнилъ є҆сѝ дх҃а ст҃а́го . жда́ти же пᲂвелѣ́лъ є҆сѝ и҆ ника́кᲂже ѿлꙋча́тисѧ ѿ і҆єрⷭ҇ли́ма , до́ндеже ѡ҆блече́тесѧ є҆́же свы́ше в̾ си́лꙋ . сегѡ̀ ра́ди вᲂпїе́мъ ти прᲂсвѣще́нїе и҆ вᲂскрⷭ҇нїе , и҆ смире́нїе на́ше сла́ва тебѣ̀ . =двⷤа . Ѳѡма̀ гл҃емыи близне́цъ , небѣ̀ с̾ ни́ми є҆гда̀ вни́де хрⷭ҇тѐ затвᲂре́нымъ две́ремъ , тѣ́мже и҆ невѣ́рᲂваше гл҃емымъ є҆мꙋ̀ , ѿ невѣ́рїѧ вѣ́рꙋ и҆звѣстꙋ́ѧ . не неспᲂдо́билъ же є҆сѝ бла́же , пᲂказа́ти є҆мꙋ̀ пречⷭ҇таѧ ре́бра свᲂѧ̀ , и҆ рꙋка́мъ и҆ нᲂга́мъ ꙗ҆́звы . ѻ҆́нъ же ѡ҆сѧза́въ и҆ ви́дѣвъ , и҆спᲂвѣ́да тебѐ бы́ти бг҃а нена́га , и҆ чл҃ка не́прᲂста , и҆ вᲂпїѧ́ше , гдⷭ҇ь мо́й и҆ бг҃ъ мо́й сла́ва тебѣ̀ .= двⷤа . Оу҆ченико́мъ сᲂмнѧ́щимсѧ , во ѻ҆смы́и дн҃ь прїи́де сп҃съ и҆дѣ́же бѧ́хꙋ со́брани , и҆ ми́ръ да́въ , к̾ ѳѡмѣ̀ вᲂзᲂпѝ , прїидѝ а҆пⷭ҇ле и҆ ѡ҆сѧжѝ дла́ни , в̾ ни́хже гво́здїѧ вᲂнзо́ша . ѽ до́брᲂе невѣ́рїе ѳѡмино̀ , вѣ́рныхъ срⷣца в̾ ра́зꙋмъ приведѐ , и҆ со́страхᲂмъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ . двⷤа .=

гла́съ , в҃ . Две́ремъ затвᲂре́нымъ пред̾ста̀ і҆с҃ъ ᲂу҆ченико́мъ , без̾стра́шїе и҆ ми́ръ даѧ́ше . та́же глаго́ла ѳѡмѣ̀ , пᲂчто́ ми невѣ́рꙋеши ꙗ҆́кѡ вᲂскр҃со́хъ и҆з̾ ме́ртвыхъ , принесѝ здѣ̀ рꙋ́кꙋ твᲂю̀ , и҆ влᲂжѝ в̾ ре́бра мᲂѧ̀ и҆ ви́ждь , тᲂбо́ю бо невѣ́рꙋющимъ , всѝ ᲂу҆вѣ́дѧтъ стрⷭ҇ти и҆ вᲂскрⷭ҇нїе мᲂѐ , зва́ти с̾ тᲂбо́ю , гдⷭ҇ь мо́й и҆ бг҃ъ мо́й сла́ва тебѣ̀ .= По вᲂста́нїи твᲂе́мъ гдⷭ҇и , со́бранымъ ᲂу҆ченико́мъ твᲂи́мъ . и҆ две́ремъ затвᲂре́нымъ , пᲂсредѣ̀ ста̀ , ми́ръ даѧ̀ и҆́мъ . вѣ́рᲂвавъ же и҆ ѳѡма̀ , зрѣ́нїемъ рꙋ́кꙋ и҆ ре́бръ твᲂи́хъ , гдⷭ҇а и҆ бг҃а тебѐ и҆спᲂвѣ́да , спаса́ющаго вѣ́рꙋющихъ в̾ тѧ̀ любо́вїю чл҃кᲂлю́бче . =сла́ва , и҆ ны́нѣ . гла́съ , ѕ҃ . Две́ремъ затвᲂре́нымъ , прїи́де хрⷭ҇то́съ ко ᲂу҆ченико́мъ . тᲂгда̀ ѳѡма̀ по смᲂтре́нїю не ѡ҆брѣ́тесѧ с̾ ни́ми . и҆ гл҃аше ᲂу҆́бѡ неимꙋ̀ вѣ́ры , а҆́ще неви́жꙋ а҆́зъ влⷣки . ви́жꙋ ребро̀ , ѿ него́же и҆зы́де кро́вь и҆ вᲂда̀ креще́нїѧ . ви́жꙋ ꙗ҆́звꙋ , ѿ неѧ́же и҆сцѣли́сѧ вели́кїи стрꙋ́пъ чл҃чь . ви́жꙋ ка́кѡ небѣ̀ ꙗ҆́кѡ дх҃ъ , но ᲂу҆́бѡ пло́ть и҆ ко́сти . и҆́же сме́рть пᲂпра́выи , и҆ ѳѡмꙋ̀ ᲂу҆вѣ́ривыи , гдⷭ҇и сла́ва тебѣ̀ . вы́хᲂдъ : свѣ́тѣ ти́хїи . прᲂки́менъ дню̀ . =На литі́и , стихѣ́ры . гла́съ , и҃ . Две́ремъ затвᲂре́нымъ , и҆ ᲂу҆ченико́мъ со́бранымъ , прїи́де сп҃съ , и҆дѣ́же бѧ́хꙋ со́брани , и҆ ста̀ пᲂсредѣ̀ и҆́хъ гл҃а ѳѡмѣ̀ , прїидѝ ѡ҆сѧжѝ , и҆ ви́ждь ꙗ҆́звы гвᲂзде́мъ , прᲂстрѝ рꙋ́кꙋ твᲂю̀ , и҆ кᲂсни́сѧ ребрꙋ̀ мᲂемꙋ̀ , и҆ небꙋ́ди невѣ́ренъ , но вѣ́рᲂю прᲂпᲂвѣ́ждь , є҆́же и҆з̾ ме́ртвыхъ мᲂѐ вᲂскрⷭ҇нїе . Прикᲂсни́сѧ ребрꙋ̀ ѳѡма̀ рꙋко́ю , гл҃етъ хрⷭ҇то́съ , и҆ ꙗ҆́звы гвᲂзди́нныѧ прїидѝ ѡ҆сѧжѝ , вѣ́рᲂю и҆спыта́й , и҆ бꙋ́ди ми вѣ́ренъ и҆ непребыва́й невѣ́ренъ . ѳѡма́ же пе́рстᲂмъ ꙗ҆́кѡ прикᲂснꙋ́сѧ влⷣцѣ , вельмѝ вᲂзᲂпи́въ , ты̀ бг҃ъ мо́й и҆ гдⷭ҇ь , бл҃гᲂꙋтро́бне сла́ва тебѣ̀ . =сла́ва . гла́съ , д҃ . Гдⷭ҇и , нестерпи́мымъ твᲂегѡ̀ бжⷭ҇тва̀ блиста́нїемъ прїи́де , две́ремъ сꙋ́щемъ затвᲂре́нымъ , и҆ ста̀ пᲂсредѣ̀ ᲂу҆чени́къ свᲂи́хъ , ре́бра и҆спыта́ти и҆ ꙗ҆́звы твᲂе́ю рꙋ́кꙋ и҆ нᲂгꙋ̀ , во ѡ҆сѧза́нїѧ ꙗ҆влѧ́ѧ . печа́ль же и҆ ско́рбь разрѣша́ѧ , ꙗ҆́вѣ вᲂзᲂпи́лъ є҆сѝ , и҆́мъ же ѻ҆́бразᲂмъ ви́дите мѧ ѽ дрꙋ́зи , плᲂтьско́е вᲂспрїѧ́тїе нᲂшꙋ̀ , а҆ не дх҃а є҆стество̀ . сᲂмнѧ́щемꙋжесѧ ᲂу҆ченикꙋ̀ , пᲂвелѣва́ше ѡ҆сѧза́ти тре́петнѡ . и҆ речѐ , ты̀ и҆спыта́въ всѧ̀ , грѧдѝ про́чее и҆ не невѣ́рꙋй . ѻ҆́нъ же смᲂтрѧ́ѧ рꙋко́ю , твᲂегѡ̀ сꙋгꙋ́баго сꙋщества̀ , со́ страхᲂмъ вᲂпїѧ́ше вѣ́рнѡ вѣ́рᲂю влеко́мъ , гдⷭ҇ь мо́й и҆ бг҃ъ мо́й сла́ва тебѣ̀ . и҆ ны́нѣ . гла́съ , то́йже . Прїимѝ мᲂле́нїе , твᲂи́хъ ра́бъ всенепᲂро́чнаѧ , ᲂу҆тᲂлѧ́ющи лю́таѧ наны̀ вᲂста́нїѧ . и҆ всѧ́кїѧ ско́рби на́съ и҆збавлѧ́ющи . тѧ́ бо є҆ди́нꙋ не пᲂзы́блемꙋ , и҆ и҆звѣ́стно ѻ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да не пᲂстыди́мсѧ влⷣчце тѧ̀ призыва́юще , пᲂтщи́сѧ на мл҃твꙋ тебѣ̀ вᲂпїю́щихъ , ра́дꙋисѧ влⷣчце и҆ всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

На стихо́внѣ , стⷯры . гла́съ , д҃ . ѽ пресла́внᲂе чꙋ́до , невѣ́рїе вѣ́рꙋ и҆звѣ́стнꙋ рᲂдѝ . рече́ бо ѳѡма̀ , а҆́ще неви́жꙋ неи҆мꙋ̀ вѣ́ры , ѡ҆сѧза́въ же ре́бра , бг҃ᲂсло́вѧше вᲂпло́щшагᲂсѧ , тᲂгѡ̀ ᲂу҆́бѡ сн҃а бж҃їѧ пᲂзна̀ , ꙗ҆́кѡ пᲂстрада́вша пло́тїю , прᲂпᲂвѣ́да вᲂскре́сшагѡ бг҃а , и҆ вᲂзᲂпѝ свѣ́тлымъ гла́сᲂмъ , гдⷭ҇ь мо́й и҆ бг҃ъ мо́й сла́ва тебѣ̀ .

сти́хъ : пᲂхвалѝ і҆єрⷭ҇ли́ме гдⷭ҇а ,꙳ хвалѝ бг҃а твᲂегѡ̀ сїѡ́не . ѽ пресла́внᲂе чꙋ́до , ѻ҆гню̀ сѣ́но прикᲂснꙋ́сѧ , и҆ не ѡ҆па́льнѡ бы́сть . в̾лᲂжи́ бо ѳѡма̀ во ѻ҆́гненаѧ ре́бра рꙋ́кꙋ , і҆с҃а хрⷭ҇та̀ бг҃а , и҆ ѡ҆сѧза́въ не ѡ҆пали́сѧ , дш҃е́внᲂе бо невѣ́рствїе , прелᲂжѝ на бл҃гᲂвѣ́рїе . и҆ те́плѣ вᲂзᲂпѝ и҆з̾ глꙋбины̀ дш҃е́вныѧ , влⷣко ты̀ є҆сѝ гдⷭ҇ь и҆ бг҃ъ мо́й , и҆́же и҆з̾ ме́ртвыхъ вᲂста́выи сла́ва тебѣ̀ .

сти́хъ : ꙗ҆́кѡ ᲂу҆крѣпѝ вереѝ вра́тъ твᲂи́хъ ,꙳ и҆ бл҃гᲂслᲂвѝ сн҃ы твᲂѧ̀ в̾ тебѣ̀ . ѽ пресла́внᲂе чꙋ́до , і҆ѡа́ннъ на пе́рси сло́вꙋ вᲂз̾ле́гъ , ѳѡма́ же ре́бра ѡ҆сѧза́ти спᲂдо́бисѧ . и҆ ѻ҆́въ ᲂу҆́бѡ ѿ ню́дꙋ те́плѣ , бг҃ᲂсло́вїѧ глꙋбинꙋ̀ и҆з̾влечѐ смᲂтре́нїѧ . се́й же спᲂдо́бисѧ та́йнѡ наꙋчи́ти на́съ , пред̾ставлѧ́ѧ пᲂка́заннаѧ , ꙗ҆́снѡ вᲂста́нїѧ є҆гѡ̀ , вᲂпїѧ̀ и҆ наꙋча́ѧ на́съ , гдⷭ҇ь мо́й и҆ бг҃ъ мо́й сла́ва тебѣ̀ . сла́ва , и҆ ны́нѣ . гла́съ , є҃ . Чл҃кᲂлю́бче , ве́лїе и҆ не и҆сче́тно мно́жество щедро́тъ твᲂи́хъ . ꙗ҆́кѡ претерпѣ́лъ є҆сѝ , ѿ і҆ꙋде́й заꙋша́емь , и҆ ѿ а҆пⷭ҇лъ ѡ҆сѧза́емь , и҆ ѿ ѿмета́ющихсѧ тебѐ мно́гѡ и҆спытꙋ́емъ , ка́кѡ вᲂплᲂти́лсѧ є҆сѝ ; и҆ ка́кѡ распѧ́лсѧ є҆сѝ без̾грѣ́шне ; но вразꙋмѝ на́съ , ꙗ҆́кᲂже и҆ ѳѡмꙋ̀ вᲂпи́ти тебѣ̀ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , з҃ . Зна́менанꙋ гро́бꙋ , живо́тъ ѿ́ грᲂба вᲂсїѧ́лъ є҆сѝ хрⷭ҇тѐ бж҃е . и҆ две́ремъ затвᲂре́нымъ ᲂу҆ченикѡ́мъ пред̾ста̀ , и҆́же всѣ́хъ вᲂскрⷭ҇нїе , дх҃ъ пра́выи , тѣ́ми ѡ҆бнᲂвлѧ́ѧ на́съ , по вели́цѣй твᲂе́й ми́лᲂсти . три́жды .

Въ нлⷣю , ѳѡминꙋ̀ , на ᲂу҆́трени , по є҆ѯа̀ ѱл҃мѣ́хъ , трᲂпа́рь , пра́здникꙋ , гⷤ . =По а҃ , стихᲂло́гїи , сѣда́ленъ . гла́съ , а҃ . Стра́ха ра́ди і҆ꙋде́йска , сᲂкрᲂве́нымъ ᲂу҆чн҃кѡ́мъ , и҆ в̾ сїѡ́нѣ со́бранымъ , вни́де къ ни́мъ бла́же , и҆ ста̀ пᲂсредѣ̀ и҆́хъ две́ремъ заключе́нымъ , ра́дᲂсть твᲂрѧ̀ и҆́мъ . и҆ пᲂказа́лъ є҆сѝ рꙋ́цѣ , и҆ пречⷭ҇тыхъ свᲂи́хъ ре́бръ ꙗ҆́звы . гл҃а невѣ́рꙋющемꙋ ᲂу҆ченикꙋ̀ , принесѝ рꙋ́кꙋ свᲂю̀ и҆ и҆спыта́й , ꙗ҆́кѡ са́мъ а҆́зъ є҆́смь , и҆́же тебѐ ра́ди пᲂстрада́выи . =сла́ва , и҆ нн҃ѣ , то́йже .

По в҃ , стихᲂло́гїи , сѣда́ленъ . гла́съ , а҃ . Вᲂскрⷭ҇лъ є҆сѝ и҆з̾ ме́ртвыхъ , жи́знь всѧ́ческимъ , и҆ ꙗ҆ви́лсѧ є҆сѝ ᲂу҆ченикѡ́мъ во ѻ҆смы́и дн҃ь . ѳѡма́ же близне́цъ небѣ̀ с̾ ни́ми , є҆гда̀ пред̾ста̀ и҆́мъ , тѣ́мже млрⷭ҇де не неспᲂдо́билъ є҆сѝ пᲂказа́ти є҆мꙋ̀ , прᲂбᲂде́нїе бжⷭ҇твеныхъ ре́бръ и҆ рꙋ́къ твᲂи́хъ , ꙗ҆́кѡ чл҃кᲂлю́бецъ .= сла́ва , и҆ ны́нѣ , то́йже .=

По пᲂлїєлеѡ́сѣ , сѣда́ленъ . гла́съ , є҃ . Вᲂскр҃съ и҆́з̾грᲂба ꙗ҆́кᲂже бл҃гᲂизво́лилъ є҆сѝ . две́ремъ затвᲂре́нымъ , ᲂу҆ченикѡ́мъ хрⷭ҇тѐ ꙗ҆ви́лсѧ є҆сѝ . пᲂказа́въ ꙗ҆́звы ꙗ҆́же ѿ гвᲂзде́й сп҃се , и҆ невѣ́рꙋющꙋ ѳѡмѣ̀ , ᲂу҆вѣ́рилъ є҆сѝ є҆ди́не бл҃же , вᲂпи́ти тебѣ̀ влⷣцѣ , бг҃а же и҆ гдⷭ҇а жи́ва вᲂскре́сшагѡ , и҆ всѣ́хъ спа́сшагѡ .= сла́ва , и҆ нн҃ѣ , то́йже .=

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . пᲂхвалѝ і҆єрⷭ҇ли́ме гдⷭ҇а , хвалѝ бг҃а твᲂегѡ̀ сїѡ́не . сти́хъ : ꙗ҆́кѡ ᲂу҆крѣпѝ вереѝ вра́тъ твᲂи́хъ , и҆ бл҃гᲂслᲂвѝ сн҃ы твᲂѧ̀ в̾ тебѣ̀ .

всѧ́ко дыха́нїе .= є҆ѵⷢ҇а́лїе , ѿ =матѳе́ѧ . заⷱ҇ , рѕ҃і .

Вᲂскрⷭ҇нїе хрⷭ҇то́во ви́дѣвше , пᲂклᲂни́мсѧ ст҃о́мꙋ гдⷭ҇ꙋ і҆с҃ꙋ , є҆ди́нᲂмꙋ без̾грѣ́шнᲂмꙋ [пᲂкло́н̾] , крⷭ҇тꙋ̀ твᲂемꙋ̀ пᲂклᲂнѧ́емсѧ хрⷭ҇тѐ , и҆ ст҃о́е вᲂскрⷭ҇нїе твᲂѐ пᲂе́мъ и҆ сла́вимъ [пᲂкло́н̾] . ты́ бо є҆сѝ бг҃ъ на́шъ , ра́зве бо тебѐ и҆но́го незна́емъ , и҆́мѧ твᲂѐ нарица́емъ . прїиди́те всѝ вѣ́рнїи , пᲂклᲂни́мсѧ ст҃о́мꙋ хрⷭ҇то́вꙋ вᲂскрⷭ҇нїю [пᲂкло́н̾] , се́бо прїи́де крⷭ҇та̀ ра́ди ра́дᲂсть всемꙋ̀ ми́рꙋ , всегда̀ бл҃гᲂслᲂви́мъ гдⷭ҇а , и҆ пᲂе́мъ вᲂскрⷭ҇нїе є҆гѡ̀ , распѧ́тїе бо претерпѐ , и҆ сме́ртїю сме́рть разрꙋшѝ ,= три́жды . ѱало́мъ , н҃ .=

сла́ва . мᲂли́твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твами бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стⷯра . гла́съ , ѕ҃ . Две́ремъ затвᲂре́нымъ , прїи́де хрⷭ҇то́съ ко ᲂу҆ченико́мъ . тᲂгда̀ ѳѡма̀ по смᲂтре́нїю не ѡ҆брѣ́тесѧ с̾ ни́ми . и҆ гл҃аше ᲂу҆́бѡ неимꙋ̀ вѣ́ры , а҆́ще неви́жꙋ а҆́зъ влⷣки . ви́жꙋ ребро̀ , ѿ него́же и҆зы́де кро́вь и҆ вᲂда̀ креще́нїѧ . ви́жꙋ ꙗ҆́звꙋ , ѿ неѧ́же и҆сцѣли́сѧ вели́кїи стрꙋ́пъ чл҃чь . ви́жꙋ ка́кѡ небѣ̀ ꙗ҆́кѡ дх҃ъ , но ᲂу҆́бѡ пло́ть и҆ ко́сти . и҆́же сме́рть пᲂпра́выи , и҆ ѳѡмꙋ̀ ᲂу҆вѣ́ривыи , гдⷭ҇и сла́ва тебѣ̀ .

та́же , і҆єре́й , мл҃твꙋ : спасѝ бж҃е лю́ди свᲂѧ̀ . мы́же , гдⷭ҇и пᲂми́лꙋй , ві҃ . і҆єре́й , вᲂз̾гла́съ . млⷭ҇тїю и҆ щедро́тами . Кано́нъ , твᲂре́нїе і҆ѡа́нна мни́ха , гла́съ , а҃ . і҆рмо́съ , по двⷤа . трᲂпари́ же , на в҃і . пѣ́снь , а҃ . і҆рмо́съ . Пᲂе́мъ всѝ лю́дїе ѿ лю́ты рабо́ты фараѡ́ни , лю́ди и҆҆зба́вльшемꙋ , и҆҆ во глꙋбинѣ̀ мᲂрстѣ́й , нᲂга́ми немо́крыми наста́вльшемꙋ , пѣ́снь пᲂбѣ́днꙋю , ꙗ҆́кѡ прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Дне́сь прᲂсвѣще́нїе дш҃а́мъ , хрⷭ҇то́съ бо ѿ́ грᲂба , ꙗ҆́кᲂже сл҃нце вᲂсїѧ́въ тридне́внѡ , и҆ мра́чнꙋю бꙋ́рю ѿгна́лъ є҆́сть грѣха̀ на́шегѡ . тᲂго̀ вᲂспᲂе́мъ ꙗ҆́кѡ прᲂсла́висѧ . Цр҃ь времено́мъ свѣтᲂно́сныи де́нь , и҆ дне́мъ же цр҃ьски ꙗ҆́вльсѧ , да́ры нᲂсѧ̀ ᲂу҆краша́етъ и҆збра́нныѧ лю́ди цр҃ко́вныѧ , непреста́ннѡ пᲂю́щїѧ , вᲂскрⷭ҇шаго хрⷭ҇та̀ , ꙗ҆́кѡ прᲂсла́висѧ . Ни две́ри сме́ртныѧ хрⷭ҇тѐ , ни печа́ти гро́бныѧ , ни ключѝ вра́тныѧ тебѣ̀ прᲂти́вишасѧ . но вᲂскр҃съ пред̾ста́лъ є҆сѝ дрꙋго́мъ сѝ влⷣко , ми́ръ да́рꙋѧ , всѧ́къ ᲂу҆́мъ преимꙋ́щїи .

катава́сїѧ : Вᲂскрⷭ҇нїѧ дн҃ь , прᲂсвѣти́мсѧ лю́дїе , па́сха гдⷭ҇нѧ па́сха , ѿ сме́рти ᲂу҆́бѡ к̾ жи́зни , и҆ ѿ землѝ на́ нб҃о , хрⷭ҇то́съ бг҃ъ на́съ преве́лъ є҆́сть , пᲂбѣ́днꙋю пᲂю́ща .

пѣ́снь , г҃ . і҆рмо́съ . Оу҆твердѝ менѐ хрⷭ҇тѐ , на недви́жимᲂмъ ка́мени за́пᲂвѣдей тѝ , и҆ прᲂсвѣти́ мѧ свѣ́тᲂмъ лица̀ твᲂегѡ̀ , нѣ́сть бо ст҃а па́че тебѣ̀ чл҃кᲂлю́бче . Но́ваѧ за ве́тхихъ , и҆ в̾ тлѣ́нныхъ мѣ́стѡ нетлѣ́ннаѧ , крⷭ҇то́мъ си хрⷭ҇тѐ сᲂверши́лъ є҆сѝ . на́мъ во ѡ҆бнᲂвле́нїе жи́зни , хᲂди́ти дᲂсто́йнѡ пᲂвелѣ́лъ є҆сѝ . Во́ грᲂбѣ затвᲂре́нъ є҆сѝ , со ѡ҆пи́саннᲂю пло́тїю свᲂе́ю , не ѡ҆пи́санныи хрⷭ҇тѐ , вᲂскрⷭ҇лъ є҆сѝ , и҆ две́ремъ затвᲂре́нымъ предста́лъ є҆сѝ свᲂи́мъ ᲂу҆ченикѡ́мъ всеси́льне . Ꙗ҆́звы свᲂѧ̀ хрⷭ҇тѐ , ꙗ҆́же во́лею прїѧ́лъ є҆сѝ на́съ ра́ди , пред̾ста́лъ є҆сѝ ᲂу҆ченикѡ́мъ свᲂи́мъ , сᲂхра́нь свидѣ́тельство свᲂѐ , и҆ пᲂказа́лъ є҆сѝ сла́вꙋ вᲂскрⷭ҇нїѧ .

катава́сїѧ : Прїиди́те пи́во пїе́мъ но́во , не ѿ ка́мене непло́дна чꙋдᲂдѣ́емᲂе , но нетлѣ́нїѧ и҆сто́чника , и҆́з̾ грᲂба ѡ҆дᲂжди́вша хрⷭ҇та̀ , ѡ҆ не́мже ᲂу҆твержа́емсѧ .

сѣда́ленъ . гла́съ , ѕ҃ . Ꙗ҆́кѡ пᲂсредѝ ᲂу҆ченикъ свᲂи́хъ прїи́де , сп҃се ми́ръ даѧ̀ и҆́мъ , прїидѝ и҆ к̾ на́мъ , и҆ спасѝ на́съ ,= вⷤ . сла́ва , и҆ ны́нѣ . боⷢ҇ . И҆́=же бл҃гᲂслᲂве́нꙋю нарекі́и мт҃рь себѣ̀ , прїи́де на́ стрⷭ҇ть во́лею свᲂе́ю , прᲂсїѧ́въ на крⷭ҇тѣ̀ , взыска́ти хᲂтѧ̀ а҆да́ма , гл҃ѧ а҆́нг҃лᲂмъ с̾ра́дꙋйтемисѧ , ꙗ҆́кѡ ѡ҆брѣто́хъ и҆зги́бшꙋю дра́хмꙋ . и҆́же всѧ̀ мꙋ́дрѣ ᲂу҆стро́ивыи бж҃е сла́ва тебѣ̀ .

пѣ́снь , д҃ . і҆рмо́съ . Ве́лїѧ та́йна твᲂегѡ̀ хрⷭ҇тѐ смᲂтре́нїѧ . сѐ ᲂу҆́бѡ свы́ше пред̾зрѧ̀ , прᲂзᲂрли́выма а҆вва́кꙋмъ , и҆зы́де вᲂпїѧ́ше ти , на спасе́нїе люде́й свᲂи́хъ чл҃кᲂлю́бче . Же́лчь ᲂу҆́бѡ вкꙋси́въ , дре́внее вкꙋше́нїе и҆сцѣлѧ́ѧ . нн҃ѣ же со страдо́внымъ ме́дᲂмъ , прᲂсвѣще́нїе дадѐ хрⷭ҇то́съ пра́ѻ҆ц҃ꙋ , и҆ свᲂегѡ̀ сла́дкагѡ прича́стїѧ . Бᲂга́тство пᲂче́рпъ ѿ сᲂкро́вища некра́дᲂмагѡ бжⷭ҇твенагѡ бл҃гᲂда́телю , кᲂпїе́мъ бо прᲂбᲂде́наѧ ти ре́бра и҆спыта́въ , премꙋ́дрᲂсти и҆ ра́зꙋма напᲂлнѧ́етъ ми́ра близне́цъ . Рꙋко́ю и҆спыта́ти чл҃кᲂлю́бче пре́жде всѣ́хъ пᲂвелѣва́еши ѳѡмѣ̀ прᲂстира́ѧ невѣ́рꙋющꙋ ре́бра , ми́рᲂви ᲂу҆вѣрѧ́ѧ свᲂѐ хрⷭ҇тѐ тридне́внᲂе вᲂста́нїе . Тво́й всебл҃же́нныи хвали́мъ є҆́сть ꙗ҆зы́къ , ѽ близнечѐ , пе́рвѣе ᲂу҆́бѡ бл҃гᲂче́стнѡ прᲂпᲂвѣ́да живᲂда́вца і҆с҃а , бг҃а же и҆ гдⷭ҇а , и҆ ѿ дꙋнᲂве́нїѧ и҆ прикᲂснᲂве́нїѧ и҆спо́лнисѧ бл҃гᲂда́ти .

катава́сїѧ : На бж҃їи стра́жи , бг҃ᲂгл҃ивыи а҆вва́кꙋмъ да ста́нетъ с̾ на́ми , и҆ ꙗ҆ви́тъ свѣтᲂно́сна а҆́нг҃ла , велегла́снѡ гл҃юща , дне́сь спасе́нїе мі́рꙋ , ꙗ҆́кѡ вᲂскр҃се хрⷭ҇то́съ , ꙗ҆́кѡ всеси́ленъ .

пѣ́снь , є҃ . і҆рмо́съ . Ѿ ́нᲂщи ᲂу҆́тренююще хва́лимъ тѧ хрⷭ҇тѐ бж҃е , ѻ҆ц҃ꙋ сᲂбез̾нача́льна , и҆ сп҃са дш҃а́мъ на́шимъ , ми́ръ ми́рᲂви пᲂда́ждь чл҃кᲂлю́бче . Пред̾ста́въ сп҃съ дрꙋго́мъ скᲂрбѧ́щимъ , и҆ прише́ствїемъ всю̀ ѿе́млѧ ско́рбь , и҆ и҆гра́ти вᲂздвиза́етъ свᲂи́мъ вᲂскрⷭ҇нїемъ . ѽ и҆́стиннᲂмꙋ пᲂхвалѧ́емᲂмꙋ , ѳѡминꙋ̀ стра́шнᲂмꙋ начина́нїю , де́рзᲂстнѣ бо ѡ҆сѧза̀ ре́бра , бжⷭ҇твеннымъ ѻ҆гне́мъ блиста́ющаѧ . Невѣ́рїе ѳѡмино̀ , вѣ́рѣ рᲂди́тельно на́мъ пᲂказа́лъ є҆сѝ , ты́ бо мꙋ́дрᲂстїю свᲂе́ю прᲂмышлѧ́еши пᲂле́знᲂе хрⷭ҇тѐ , ꙗ҆́кѡ чл҃кᲂлю́бецъ .

катава́сїѧ : Оу҆́тренюемъ ᲂу҆́тренюю глꙋбᲂкꙋ̀ , и҆ вмѣ́стѡ мі́ра , пѣ́снь принесе́мъ влⷣцѣ , и҆ хрⷭ҇та̀ ᲂу҆́зримъ пра́веднᲂе сл҃нце , всѣ́мъ жи́знь вᲂсїѧ́юща .

пѣ́снь , ѕ҃ . і҆рмо́съ . Пррⷪ҇ка спа́слъ є҆сѝ ѿ ки́та чл҃кᲂлю́бче , и҆ менѐ и҆з̾ глꙋбины̀ грѣхо́вныѧ вᲂзвѣдѝ мᲂлю́тисѧ . Ѳѡмы̀ не ѡ҆ста́вилъ є҆сѝ влⷣко , пᲂгрꙋжа́ема глꙋбино́ю невѣ́рїѧ , дла́ни прᲂсте́ръ на и҆спыта́нїе . Сп҃съ на́шъ гл҃аше , ѡ҆сѧза́вше мѧ ви́дите ко́сти и҆ пло́ть нᲂсѧ́ща , а҆́зъ непремѣни́хсѧ . Ре́бра ѡ҆сѧза́въ невѣ́рᲂвавыи ѳѡма̀ , несꙋ́щꙋ є҆мꙋ̀ в̾ пе́рвыи вхо́дъ тво́й чл҃кᲂлю́бче , сп҃се на́шъ .

катава́сїѧ : Сни́де въ преиспо́днїѧ страны̀ землѝ , и҆ сᲂкрꙋшѝ вереѝ вѣ́чныѧ , преиспо́днїѧ свѧ́занныѧ хрⷭ҇тѐ , и҆ тридне́внѡ ꙗ҆́кѡ ѿ ки́та і҆ѡ́на , вᲂскр҃се ѿ́ грᲂба .

кᲂнда́къ . гла́съ , и҃ . Любᲂпы́тнᲂю десни́цею , жизнᲂпᲂда́тельнаѧ твᲂѧ̀ ре́бра , ѳѡма̀ и҆спыта́лъ є҆́сть хрⷭ҇тѐ бж҃е . затвᲂре́нымъ бо две́ремъ ꙗ҆́кѡ вни́де , съ про́чими а҆пⷭ҇лы вᲂпїѧ́ше , гдⷭ҇ь є҆сѝ и҆ бг҃ъ мо́й . и҆́коⷭ҇ . Кто̀ сᲂхранѝ ᲂу҆чени́чꙋ дла́нь тᲂгда̀ не ѡ҆пали́мꙋ , є҆гда̀ ко ѻ҆́гненымъ ре́брᲂмъ пристꙋпѝ гдⷭ҇нимъ ; кто̀ дадѐ є҆́й де́рзᲂсть , и҆ вᲂзмо́же ѡ҆сѧза́ти пла́меннꙋю ко́сть , всѧ́кѡ не ѡ҆сѧза́емꙋю ; а҆́ще бо не бы̀ ребро̀ си́лꙋ по́дало бре́ннѣй десни́цѣ , ка́кѡ и҆мѧ́ше ѡ҆сѧза́ти , стра́стїю пᲂкᲂлѣба́вшагѡ вы́шнїѧ и҆ ни́жнїѧ . сїѧ̀ бл҃гᲂда́ть ѳѡмѣ̀ даде́сѧ , є҆́же сїѧ̀ ѡ҆сѧза́ти , хрⷭ҇то́ви же вᲂпи́ти , гдⷭ҇ь є҆сѝ и҆ бг҃ъ мо́й .

пѣ́снь , з҃ . і҆рмо́съ . Тѣ́лꙋ слꙋжи́ти мꙋсикі́йскᲂмꙋ сᲂгла́сїю сᲂзыва́ющꙋ лю́ди , ѿ пѣ́сней сїѡ́нскихъ пᲂю́ще ѻ҆те́честїи ѻ҆́трᲂцы дв҃дѡвы . мꙋчи́телево разᲂри́ша ѕлᲂчести́вᲂе велѣ́нїе , и҆ пла́мень въ ро́сꙋ прело́жиша , пѣ́снь вᲂспѣва́юще , превᲂзнᲂси́мыи ѻ҆ц҃е́мъ бж҃е бл҃гᲂслᲂве́нъ є҆сѝ . Ꙗ҆́кѡ пе́рвыи є҆́сть дне́мъ и҆ нача́льныи , свѣтᲂно́сныи се́й , во́нь же ра́дᲂватисѧ дᲂсто́йнѡ , но́вымъ и҆ бжⷭ҇твенымъ лю́демъ съ тре́петᲂмъ . прино́ситъ бо вѣ́ка ѻ҆́бразъ , ꙗ҆́кѡ ѻ҆сми́цы сᲂверша́ѧ бꙋ́дꙋщагѡ . во́ньже вᲂспѣва́емъ , превᲂзнᲂси́мыи ѻ҆ц҃е́мъ бг҃ъ блгⷭ҇ве́нъ є҆сѝ . Є҆ди́нъ дерзнꙋ́выи , и҆ невѣ́рнᲂю вѣ́рᲂю ѡ҆бл҃гᲂда́тивъ на́съ ѳѡма̀ близне́цъ , рѣши́тъ ᲂу҆́бѡ мра́чнᲂе невѣ́дѣнїе всѣ́мъ кᲂнце́мъ вѣ́рнымъ невѣ́рїемъ . себѣ́ же вѣне́цъ плете́тъ ꙗ҆́вѣ , глаго́лѧ , ты̀ є҆сѝ гдⷭ҇ь , превᲂзнᲂси́мыи ѻ҆ц҃е́мъ бг҃ъ , бл҃гᲂслᲂве́нъ є҆сѝ . Не тꙋ́не ᲂу҆сꙋмнѣ́всѧ ѳѡма̀ , вᲂста́нїе твᲂѐ неви́дѣвъ , но вѣ́рнѡ ꙗ҆́вственѡ тща́шесѧ пᲂказа́ти то̀ хрⷭ҇тѐ , всѣ́мъ ꙗ҆зы́кᲂмъ . тѣ́мже ᲂу҆́бѡ невѣ́рїемъ ᲂу҆вѣ́ри всѣ́хъ , и҆ наꙋчѝ гл҃ати тебѣ̀ , гдⷭ҇ь превᲂзнᲂси́мыи ѻ҆ц҃е́мъ бг҃ъ , блгⷭ҇ве́нъ є҆сѝ . Со́ страхᲂмъ рꙋ́кꙋ ѳѡма̀ , в̾ ре́бра твᲂѧ̀ живᲂно́снаѧ хрⷭ҇тѐ , внꙋ́трь съ тре́петᲂмъ пᲂлᲂжѝ , и҆ дѣ́йствᲂмъ сп҃се сꙋгꙋ́бымъ , ѻ҆бᲂю̀ є҆стествꙋ̀ , и҆́же в̾ тебѣ̀ сᲂвᲂкꙋ́пленᲂю несмѣ́снѡ ᲂу҆вѣрѧ́ѧсѧ , и҆ вѣ́рᲂю взыва́ше гл҃ѧ , ты̀ є҆сѝ гдⷭ҇ь превᲂзнᲂси́мыи ѻ҆ц҃е́мъ бг҃ъ , блгⷭ҇ве́нъ є҆сѝ .

катава́сїѧ : Ѻ҆́трᲂки ѿ пе́щи и҆зба́вивъ , бы́въ ᲂу҆́бѡ челᲂвѣ́къ , стра́ждетъ ꙗ҆́кѡ сме́ртенъ , и҆ стра́стїю ме́ртвенᲂю , въ нетлѣ́нїе ѡ҆блачи́тъ бл҃гᲂлѣ́пїе , є҆ди́нъ бл҃гᲂслᲂве́нъ ѻ҆ц҃е́мъ бг҃ъ и҆ препрᲂсла́вленъ .

пѣ́снь , и҃ . і҆рмо́съ . Во пла́мени ѻ҆́гненнѣ гᲂрѧ́щїѧ пе́щи , сᲂхра́ньшаго дѣ́ти , и҆ во ѻ҆́бразѣ а҆́нг҃ла сше́дшаго к̾ ни́мъ , по́йте гдⷭ҇а , и҆ превᲂзнᲂси́те є҆гѡ̀ во́ вѣки . Вᲂжделѣ́въ твᲂегѡ̀ ра́дᲂстнагѡ видѣ́нїѧ , пре́жде невѣ́рᲂвавыи ѳѡма̀ , спᲂдо́бльжесѧ тᲂго̀ , бг҃а и҆ гдⷭ҇а тѧ̀ нарица́ше влⷣко , є҆го́же превᲂзно́симъ во́ вѣки . Оу҆крѣ́пльшаго ѳѡмино̀ невѣ́рїе , и҆ пᲂказа́вшаго ре́бра , и҆ тᲂго̀ дла́нїю ѡ҆сѧза́ема , по́йте гдⷭ҇а , и҆ превᲂзнᲂси́те є҆гѡ̀ во́ вѣки . Твᲂѐ та́йнᲂе сᲂкрᲂве́ннᲂе сᲂкро́вище , на́мъ ѿве́рзе ѳѡма̀ . бг҃ᲂсло́витъ бо ꙗ҆зы́кᲂмъ бг҃ᲂно́снымъ , по́йте гдⷭ҇а гл҃аше , и҆ превᲂзнᲂси́те є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Се́й ᲂу҆́бѡ нарече́нныи ст҃ы́и дн҃ь , є҆ди́нъ сꙋбо́тамъ цр҃ь и҆ гдⷭ҇ь , пра́здникъ пра́здникᲂмъ , и҆ тᲂржество̀ є҆́сть тᲂржество́мъ , во́ньже блгⷭ҇ви́мъ хрⷭ҇та̀ во́ вѣки . [пᲂкло́н̾ до землѝ] . честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Тебѐ свѣ́тлꙋю свѣщꙋ̀ , и҆ мт҃рь свѣ́та , всекᲂре́ннꙋю сла́вꙋ , и҆ вы́шшꙋ всѣ́хъ тва́рей , пѣ́сньми велича́емъ . Въ тво́й свѣ́тлыи де́нь и҆ пресвѣ́тлыи хрⷭ҇тѐ , въ всесвѣ́тлѣй бл҃гᲂда́ти , в̾ не́й же красе́нъ дᲂбро́тᲂю ᲂу҆ченикѡ́мъ сѝ предста̀ , в̾ пѣ́снехъ велича́емъ . Твᲂѧ̀ бре́ннᲂю дла́нїю ѡ҆сѧза́ема ре́бра , и҆ не ѡ҆пали́вша сїю̀ ѻ҆гне́мъ невеще́ственагѡ бжⷭ҇твенагѡ сꙋщества̀ , в̾ пѣ́снехъ велича́емъ . Тѧ̀ и҆́же ꙗ҆́кѡ бг҃а и҆́з̾ грᲂба вᲂсїѧ́вшагѡ хрⷭ҇та̀ , не ѻ҆чи́ма ви́дѣвше , но серде́чнᲂю любо́вїю вѣ́рᲂвавше , пѣ́сньми велича́емъ .

катава́сїѧ : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ , ликꙋ́й нн҃ѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ .

задᲂсто́йникъ : Велича́й дш҃е мᲂѧ̀ , и҆́же и҆звѣ́дшагѡ и҆з̾ а҆́да , и҆ дарᲂва́вшагѡ на́мъ вᲂскрⷭ҇нїе . Велича́й дш҃е мᲂѧ̀ , и҆́же ᲂу҆вѣ́рившагѡ , ѳѡмино̀ невѣ́рїе . Тебѐ свѣ́тлꙋю свѣщꙋ̀ , и҆ мт҃рь свѣ́та , всекᲂре́ннꙋю сла́вꙋ , и҆ вы́шшꙋ всѣ́хъ тва́рей , пѣ́сньми велича́ем̾ [пᲂкло́н̾ до землѝ] . та́же , ст҃ъ гдⷭ҇ь бг҃ъ на́шъ ,= на́ гласъ , а҃ .=

свѣти́ленъ . Мᲂи́хъ ᲂу҆́дᲂвъ рꙋко́ю си и҆спыта́въ ꙗ҆́звы , неневѣ́рꙋй ми ѳѡмо̀ , ᲂу҆ѧ́звенᲂмꙋ тебѐ ра́ди , но со ᲂу҆ченикѝ є҆динᲂмы́сленѡ мꙋ́дрствꙋй , и҆ жи́ва мѧ прᲂпᲂвѣ́дꙋй бг҃а , двⷤа . дрꙋго́й , свѣти́ленъ . сла́ва , и҆ ны́нѣ . Дне́сь весна̀ бл҃гᲂꙋха́етъ , и҆ нᲂва̀ тва́рь ликꙋ́етъ . дне́сь взима́ютсѧ ключе́ве две́ремъ невѣ́рїю . ѳѡмѣ̀ дрꙋ́гꙋ вᲂпїю́щꙋ , гдⷭ҇ь и҆ бг҃ъ мо́й .

На хвали́тѣхъ , пᲂста́вимъ стихѝ , д҃ . гла́съ , а҃ . поⷣ . прехва́льнїи мч҃нцы . По є҆́же и҆́з̾ грᲂба ,꙳ твᲂе́мъ стра́шнѣмъ живᲂда́вче вᲂста́нїи ,꙳ ꙗ҆́кᲂже печа́ти неразрꙋшѝ хрⷭ҇тѐ гро́бныѧ .꙳ та́кѡ затвᲂре́нымъ две́ремъ вше́лъ є҆сѝ ,꙳ къ пресла́внымъ ᲂу҆ченико́мъ свᲂи́мъ ,꙳ ра́дᲂсть твᲂрѧ̀ и҆́мъ ,꙳ и҆ пра́выи сво́й дх҃ъ пᲂдаѧ̀ и҆́мъ ,꙳ за без̾мѣ́рнꙋю свᲂю̀ ми́лᲂсть .= два́жды . Ѳѡма̀ и҆́же близне́цъ ,꙳ небѣ̀ прише́лъ ,꙳ є҆гда̀ ты̀ ᲂу҆ченико́мъ ꙗ҆ви́сѧ гдⷭ҇и ,꙳ тѣ́мже и҆ невѣ́рᲂва ,꙳ твᲂемꙋ̀ вᲂскрⷭ҇нїю .꙳ и҆ ви́дѣвшимъ тѧ̀ вᲂпїѧ́ше ,꙳ а҆́ще невлᲂжꙋ̀ пе́рсты в̾ ре́бра є҆гѡ̀ .꙳ и҆ в̾ гвᲂзди́нныѧ ꙗ҆́звы ,꙳ невѣ́рꙋю ꙗ҆́кѡ вᲂста́лъ є҆́сть . Ꙗ҆́кᲂже хо́щеши ѡ҆сѧжѝ ,꙳ хрⷭ҇то́съ ѳѡмѣ̀ вᲂпїѧ́ше ,꙳ влᲂжѝ рꙋ́кꙋ , и҆ пᲂзна́й мѧ ,꙳ ко́сти и҆мꙋ́ща и҆ земнꙋ́ю пло́ть ,꙳ и҆ небꙋ́ди невѣ́ренъ ,꙳ но ꙗ҆́кᲂже ᲂу҆́бѡ слы́ша ѿ и҆нѣ́хъ вѣ́рꙋй .꙳ ѻ҆́нъ же вᲂзᲂпѝ ,꙳ бг҃ъ мо́й , и҆ гдⷭ҇ь ты̀ є҆сѝ .꙳ сла́ва вᲂста́нїю твᲂемꙋ̀ . =сла́ва . гла́съ , ѕ҃ . По́ днехъ ѻ҆сми́хъ вᲂста́нїѧ твᲂегѡ̀ , і҆с҃е цр҃ю є҆динᲂро́днᲂе сло́во ѻ҆́ч҃ее , ꙗ҆ви́лсѧ є҆сѝ ᲂу҆ченико́мъ свᲂи́мъ , затвᲂре́нымъ две́ремъ , ми́ръ сво́й да́рꙋѧ и҆́мъ . и҆ невѣ́рꙋющꙋ ᲂу҆ченикꙋ̀ , ꙗ҆́звы пᲂказа́лъ є҆сѝ гл҃ѧ , прїидѝ и҆ ѡ҆сѧжѝ рꙋ́цѣ и҆ но́зѣ , и҆ нетлѣ́ннᲂе мᲂѐ ребро̀ , ѻ҆́нъ же вѣ́рнѡ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ . и҆ ны́нѣ , боⷢ҇ . гла́съ , в҃ . Пребл҃гᲂслᲂве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , блгⷭ҇ве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе .

трᲂпа́рь . є҆ктенїѝ . и҆ про́чее .= и҆ ѿпꙋ́стъ . и҆ ча́съ , а҃ . и҆ про́чее ѡ҆бы́чно . и҆ =кᲂне́чныи ѿпꙋ́стъ .

На литꙋргі́и , бл҃же́нна дню̀ , пѣ́снь , г҃ и҆ ѕ҃ . =Пᲂвхо́дѣ : т=рᲂпа́рь , дню̀ . сла́ва , кᲂнда́къ , дню̀ . и҆ ны́нѣ , кᲂнда́къ , па́сцѣ .

прᲂки́мен̾ , ѱл҃о́мъ дв҃дᲂвъ . ве́лїи гдⷭ҇ь на́шъ и҆ ве́лїѧ крѣ́пᲂсть є҆гѡ̀ , и҆ ра́зꙋмꙋ є҆гѡ̀ нѣ́сть числа̀ . сти́хъ : хвали́те гдⷭ҇а ꙗ҆́кѡ бл҃гъ ѱл҃о́мъ , бг҃ᲂви на́шемꙋ да наслади́тсѧ хвале́нїе . а҆пⷭ҇лъ , въ дѣѧ́нїихъ . заⷱ҇ , д҃і . а҆ллилꙋ́їѧ . прїидѣ́те вᲂз̾ра́ дꙋемсѧ гдⷭ҇ви , вᲂскли́кнемъ бг҃ꙋ спаси́телю на́шемꙋ . сти́хъ : ꙗ҆́кѡ бг҃ъ ве́лїи гдⷭ҇ь , и҆ цр҃ь ве́лїи по все́й землѝ . є҆ѵⷢ҇а́лїе , ѿ і҆ѡа́нна . заⷱ҇ , ѯ҃е . прича́стенъ . тѣ́ло хрⷭ҇то́во . дрꙋгі́и , пᲂхвалѝ і҆єрⷭ҇ли́ме гдⷭ҇а , хвалѝ бг҃а твᲂегѡ̀ сїѡ́не .

Въ тꙋ́же , нлⷣю , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , а҃ . поⷣ . прехва́льнїи мч҃нцы . Ѡ҆сѧжѝ глаго́летъ ѳѡмѣ̀ ,꙳ и҆з̾ ме́ртвыхъ тридне́внѡ вᲂскр҃съ чл҃кᲂлю́бецъ .꙳ и҆ ви́ждь рꙋ́цѣ мᲂѝ ,꙳ и҆ нᲂга́мъ пригвᲂжде́нїе ,꙳ и҆ ре́брᲂмъ прᲂбᲂде́нїе ,꙳ и҆ разꙋмѣ́й мѧ бг҃а непремѣ́нна .꙳ и҆ земны́мъ смѣще́нїемъ ꙳ по сꙋществꙋ̀ вᲂѡ҆браже́на ,꙳ и҆ стра́сть в̾ не́мъ прїе́мшагѡ . Дивлѧ́шесѧ близне́цъ ,꙳ в̾ ꙗ҆́звы взира́ѧ нᲂжны́ѧ ,꙳ и҆ рꙋчна́ѧ вᲂнзе́нїѧ .꙳ и҆ бѣ̀ ᲂу҆жаса́ѧсѧ стра́шнᲂмꙋ чꙋдесѝ .꙳ и҆ рꙋко́ю пречⷭ҇таѧ ре́бра ꙳ ѡ҆сѧза́ѧ и҆ зрѧ̀ ,꙳ и҆з̾ ни́хже пᲂказа̀ несꙋмѣ́ннᲂе ꙳ и҆звѣще́нїе ꙗ҆зы́кѡмъ ,꙳ и҆́же и҆́з̾ грᲂба тридне́внымъ вᲂста́нїемъ . Прїе́мъ вели́кᲂе ра́дᲂванїе ,꙳ твᲂѐ вᲂста́нїе хрⷭ҇тѐ мо́й ,꙳ и҆звѣ́стнѡ зрѧ̀ .꙳ ѿ него́же спᲂдо́бисѧ де́рзᲂстнымъ веще́мъ ,꙳ ѳѡма̀ прикᲂснꙋ́тисѧ .꙳ и҆́хже ра́ди тѧ̀ и҆́стинна ꙳ и҆спᲂвѣ́да бг҃а и҆ чл҃ка ,꙳ дѣ́йства сꙋгꙋ́ба нᲂсѧ́ща и҆ сꙋщества̀ ,꙳ и҆́маже ѡ҆блᲂжи́сѧ и҆з̾ ни́хже сᲂверше́нїе прїѧ́тъ .

стихѣ́ры , в̾ минѣ́и , г҃ . сла́ва , и҆ ны́нѣ . гла́съ , а҃ . По́ днехъ ѻ҆сми́хъ вᲂста́нїѧ твᲂегѡ̀ гдⷭ҇и , ꙗ҆ви́лсѧ є҆сѝ ᲂу҆ченико́мъ свᲂи́мъ , в̾ мѣ́стѣ и҆дѣ́же бѧ́хꙋ со́брани , и҆ вᲂз̾гласи́въ и҆́мъ ми́ръ ва́мъ , и҆ невѣ́рꙋющемꙋ ᲂу҆ченикꙋ̀ рꙋ́цѣ пᲂказа̀ и҆ пречⷭ҇таѧ ре́бра . ѻ҆́нъ же вѣ́рᲂвавъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ .

вы́хᲂдъ : свѣ́тѣ ти́хїи . прᲂки́менъ , ѱало́мъ дв҃дᲂвъ . кто̀ бг҃ъ ве́лїи ꙗ҆́кѡ бг҃ъ на́шъ , ты̀ є҆сѝ бг҃ъ твᲂрѧ́и чꙋдеса̀ . сти́хъ : пᲂказа́лъ є҆сѝ въ лю́дехъ си́лꙋ твᲂю̀ . сти́хъ : рѣ́хъ нн҃ѣ нача́хъ , сѝ и҆змѣ́на десни́ца вы́шнѧгѡ . сти́хъ : пᲂмѧнꙋ́хъ дѣ́ла гдⷭ҇нѧ , ꙗ҆́кѡ пᲂмѧнꙋ̀ ѿ зача́ла чꙋдеса̀ твᲂѧ̀ . та́же , кто̀ бг҃ъ ве́лїи ꙗ҆́кѡ бг҃ъ на́шъ , ты̀ є҆сѝ бг҃ъ твᲂрѧ́и чꙋдеса̀ .

На стихо́внѣ , стⷯры . гла́съ , а҃ . Вече́рнїѧ на́ша мл҃твы , прїимѝ ст҃ы́и гдⷭ҇и , и҆ пᲂда́ждь на́мъ ѡ҆ставле́нїе грѣхо́въ , ꙗ҆́кѡ ты̀ є҆ди́нъ є҆сѝ ꙗ҆вле́и в̾ ми́рѣ вᲂскрⷭ҇нїе .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Ꙗ҆́кѡ пꙋчи́на ве́лїѧ сᲂгрѣше́нїи мᲂи́хъ сп҃се , и҆ лю́тѣ пᲂгрꙋжа́юсѧ без̾зако́нїи мᲂи́ми . да́ждь ми рꙋ́кꙋ ꙗ҆́кѡ петро́ви бж҃е , и҆ спаси́ мѧ и҆ пᲂми́лꙋй мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мл҃твами гдⷭ҇и всѣ́хъ ст҃ы́хъ и҆ бцⷣы , тво́й ми́ръ да́ждь на́мъ , и҆ пᲂми́лꙋй на́съ , ꙗ҆́кѡ є҆ди́нъ ще́дръ .

сла́ва , и҆ нн҃ѣ . гла́съ , а҃ . Две́ремъ затвᲂре́нымъ , и҆ ᲂу҆ченико́мъ со́бранымъ , в̾ни́де в̾неза́пꙋ всеси́льне і҆с҃е сп҃се на́шъ , и҆ ста́въ пᲂсредѝ и҆́хъ , ми́ръ да́въ , и҆ и҆спо́лнилъ є҆сѝ дх҃а ст҃а́го . жда́ти же пᲂвелѣ́лъ є҆сѝ и҆ ника́кᲂже ѿлꙋча́тисѧ ѿ і҆єрⷭ҇ли́ма , до́ндеже ѡ҆блече́тесѧ є҆́же свы́ше в̾ си́лꙋ . сегѡ̀ ра́ди вᲂпїе́мъ ти прᲂсвѣще́нїе и҆ вᲂскрⷭ҇нїе , и҆ смире́нїе на́ше сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ пᲂнедѣ́льникъ , в҃ , недѣ́ли , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ .

По а҃ , стихᲂло́гїи , сѣда́ленъ . гла́съ , а҃ . Гро́бъ тво́й сп҃се во́ини стрегꙋ́щїи , ме́ртви бы́ша , ѿ ѡ҆блиста́нїѧ ꙗ҆́вльшагᲂсѧ а҆́нг҃ла , прᲂпᲂвѣ́дающа жена́мъ вᲂскрⷭ҇нїе . тебѐ сла́вимъ тлѝ пᲂтреби́телѧ , и҆ тебѣ̀ припа́даемъ вᲂскрⷭ҇шемꙋ и҆́з̾ грᲂба хрⷭ҇тꙋ̀ бг҃ꙋ на́шемꙋ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Въ без̾зако́нїихъ зача́тъ є҆́смь а҆́зъ блꙋ́дныи , и҆ несмѣ́ю взира́ти на высᲂтꙋ̀ нбⷭ҇нꙋю . но надѣ́ѧсѧ на чл҃кᲂлю́бїе твᲂѐ зᲂвꙋ̀ . бж҃е , ѡ҆чи́сти мѧ грѣ́шнагѡ и҆ спаси́ мѧ . сти́х̾ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Страда́нїѧ пᲂхвало́ю , и҆ вѣне́чнᲂю по́честїю , сла́внїи страстᲂте́рпцы ѡ҆дѣ́ѧшасѧ тᲂбо́ю гдⷭ҇и . терпѣ́нїемъ ᲂу҆́бѡ ра́нъ , без̾зако́нныхъ пᲂбѣди́ша , и҆ си́лᲂю бжⷭ҇твенᲂю , с̾ нб҃сѐ пᲂбѣ́дꙋ прїѧ́ша . тѣ́хъ мл҃твами , да́рꙋй на́мъ ве́лїю млⷭ҇ть . сла́ва , и҆ ны́нѣ , боⷢ҇ . Чꙋ́до чꙋдесе́мъ ѡ҆бра́дᲂваннаѧ , в̾ тебѣ̀ зрѧ́щи тва́рь ра́дꙋетсѧ , зача́тъ бо без̾сѣ́мене , и҆ рᲂдѝ неи҆зрече́ннѡ , є҆го́же чинᲂнача́лїѧ а҆́нг҃льскаѧ зрѣ́ти немо́гꙋтъ . тᲂгѡ̀ бцⷣе мᲂлѝ спастѝ дш҃а на́ша .

По в҃ , стихᲂло́гїи , сѣда́ленъ . гла́съ , а҃ . Пред̾ста́лъ є҆сѝ жи́знь , две́ремъ затвᲂре́нᲂмъ хрⷭ҇тѐ ᲂу҆ченико́мъ , и҆ ре́бра пᲂказа́въ , и҆ рꙋ́цѣ и҆ но́зѣ свᲂѝ , є҆́же и҆́з̾ грᲂба твᲂѐ вᲂста́нїе пред̾ ᲂу҆вѣрѧ́ѧ . но ѳѡма̀ неѡ҆брѣ́тесѧ є҆гда̀ глаго́лаше , и҆ речѐ , а҆́ще неви́жꙋ сегѡ̀ , невѣ́рꙋю слᲂвесе́мъ ва́шимъ .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . кано́нъ , пра́здникꙋ . і҆рмо́съ , по двⷤа . трᲂпарѝ , на ѕ҃ .= и҆ ст҃о́мꙋ в̾ минѣ́и , на д҃ . =и҆лѝ :

кано́нъ , пра́здникꙋ . і҆рмо́съ , по двⷤа . трᲂпарѝ , на д҃ .= и҆ с=т҃о́мꙋ в̾ минѣ́и , на ѕ҃ .

по г҃ , пѣ́сни , кᲂнда́къ , и҆ и҆́кᲂсъ , пра́здникꙋ . сѣда́ленъ , ст҃о́мꙋ . сла́ва , и҆ ны́нѣ , пра́здникꙋ .

по ѕ҃ , пѣ́сни , кᲂнда́къ , и҆ и҆́кᲂсъ , ст҃о́мꙋ .

=свѣти́ленъ , =пра́здникꙋ . и҆ ст҃о́мꙋ .

На хвали́тѣхъ , стихѣ́ры , на д҃ . гла́съ , а҃ . Пᲂе́мъ твᲂю̀ хрⷭ҇тѐ спасе́нꙋю стра́сть , и҆ сла́вимъ твᲂѐ вᲂскрⷭ҇нїе . двⷤа . Ꙗ҆́кѡ пᲂмышле́нїи ѕлы́ми , и҆ дѣ́лы ѡ҆сꙋди́хсѧ сп҃се , мы́сль ми пᲂда́ждь ѡ҆браще́нїѧ бж҃е , да зᲂвꙋ́ ти , спаси́ мѧ бл҃гᲂда́телю бл҃гі́и , и҆ пᲂми́лꙋй мѧ . мⷱ҇ꙋ . Страстᲂте́рпцы хрⷭ҇то́вы , прїидѣ́те лю́дїе всѝ пᲂчте́мъ , пѣ́сньми и҆ пѣ́нїи дх҃о́вными , прᲂсвѣ́щники ми́рꙋ , и҆ прᲂпᲂвѣ́дники вѣ́рѣ , и҆ и҆сто́чники при́снѡ текꙋ́щїѧ , и҆з̾ ни́хже и҆ стека́ютъ вѣ́рнымъ и҆сцѣле́нїѧ . тѣ́хъ мл҃твами хрⷭ҇тѐ бж҃е на́шъ , ми́ръ да́рꙋй всемꙋ̀ ми́рꙋ , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ . гла́съ , а҃ . Ѳѡма̀ гл҃емыи близне́цъ , небѣ̀ с̾ ни́ми є҆гда̀ вни́де хрⷭ҇тѐ затвᲂре́нымъ две́ремъ , тѣ́мже и҆ невѣ́рᲂваше гл҃емымъ є҆мꙋ̀ , ѿ невѣ́рїѧ вѣ́рꙋ и҆звѣстꙋ́ѧ . не неспᲂдо́билъ же є҆сѝ бла́же , пᲂказа́ти є҆мꙋ̀ пречⷭ҇таѧ ре́бра свᲂѧ̀ , и҆ рꙋка́мъ и҆ нᲂга́мъ ꙗ҆́звы . ѻ҆́нъ же ѡ҆сѧза́въ и҆ ви́дѣвъ , и҆спᲂвѣ́да тебѐ бы́ти бг҃а нена́га , и҆ чл҃ка не́прᲂста , и҆ вᲂпїѧ́ше , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́ѳᲂвъ . Оу҆стна́ми чи́стыми ,꙳ по́йте чл҃цы со а҆́нг҃лы ,꙳ вᲂскрⷭ҇шаго ,꙳ тридне́внѡ ѿ́ грᲂба ,꙳ и҆ ми́ра сᲂвᲂскреси́вша .

сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Ꙗ҆ви́лсѧ є҆сѝ сп҃се ꙳ сщ҃е́ннымъ свᲂи́мъ а҆пⷭ҇лѡмъ ,꙳ две́ремъ затвᲂре́нᲂмъ ,꙳ и҆́хже ра́ди ѡ҆бнᲂвлѧ́ѧ в̾ на́съ ,꙳ бжⷭ҇твеныи дх҃ъ сво́й .

сти́хъ : нб҃са̀ пᲂвѣ́даютъ сла́вꙋ бж҃їю ,꙳ твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . Ны́нѣ тѧ̀ всѣ́хъ цр҃ю ,꙳ ви́дѣвше не ѻ҆чи́ма ,꙳ но серде́чнᲂю любо́вїю ,꙳ бг҃а вѣ́рᲂвавше ,꙳ пѣ́сньми велича́емъ .

сла́ва , и҆ ны́нѣ . гла́съ , а҃ . Оу҆ченико́мъ сᲂмнѧ́щимсѧ , во ѻ҆смы́и дн҃ь прїи́де сп҃съ и҆дѣ́же бѧ́хꙋ со́брани , и҆ ми́ръ да́въ , к̾ ѳѡмѣ̀ вᲂзᲂпѝ , прїидѝ а҆пⷭ҇ле и҆ ѡ҆сѧжѝ дла́ни , в̾ ни́хже гво́здїѧ вᲂнзо́ша . ѽ до́брᲂе невѣ́рїе ѳѡмино̀ , вѣ́рныхъ срⷣца в̾ ра́зꙋмъ приведѐ , и҆ со́страхᲂмъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , бл҃го є҆́сть и҆спᲂвѣ́датисѧ гдⷭ҇ви . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . та́же ,= ча́съ , а҃ . =и҆ =ѿпꙋ́стъ .

Въ пнⷣе , на блаже́ннахъ , трипѣ́снецъ . твᲂре́нїе і҆ѡ́сифѡво . гла́съ , а҃ . пѣ́снь , а҃ . і҆рмо́съ . твᲂѧ̀ пᲂбѣди́тельнаѧ десни́ца .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Вᲂспᲂе́мъ бг҃ꙋ ꙗ҆́кѡ пᲂбѣди́телю , низлᲂжи́вшемꙋ сме́ртїю сме́рть , и҆ вᲂскр҃си́вшемꙋ с̾ сᲂбо́ю ро́дъ чл҃ческїи , и҆ нетлѣ́нїемъ пребᲂга́тнѡ пᲂче́тшемꙋ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Свѧ́занъ бы́въ , и҆ сме́ртныѧ ᲂу҆́зы ꙗ҆́кѡ всеси́ленъ крѣ́пᲂстїю растерза́лъ є҆сѝ . разрѣши́въ же чл҃ки ѿ тлѝ , и҆ и҆з̾ а҆́да вᲂскр҃си́лъ є҆сѝ , вᲂспѣва́ющихъ держа́вꙋ твᲂю̀ мнᲂгᲂмлⷭ҇тиве .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Бл҃гᲂꙋтро́бне хрⷭ҇тѐ , и҆́же менѐ ра́ди да́же до а҆́да сᲂше́дъ во́лею . и҆ лежа́ща мѧ во́ грᲂбѣ грѣхо́внѣмъ , и҆ в̾ ро́вѣ престꙋпле́нїи , свᲂи́мъ призрѣ́нїемъ вᲂскр҃си́въ пᲂми́лꙋй мѧ̀ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Ви́дѣвши хрⷭ҇та̀ ѿ ме́ртвыхъ бг҃ᲂрᲂди́тельнице пло́тїю вᲂста́вша , ра́дᲂвашесѧ . но и҆спрᲂсѝ радᲂстᲂтво́ренъ пла́чь мнѣ̀ ны́нѣ дарᲂва́ти , ꙗ҆́кѡ да ѡ҆брѧ́щꙋ тᲂгда̀ чи́стаѧ бжⷭ҇твенᲂе ᲂу҆тѣше́нїе .

пѣ́снь , и҃ . і҆рмо́съ . въ пещѝ дѣ́ти і҆и҃левы .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Крⷭ҇то́мъ свᲂи́мъ разрѣши́въ клѧ́твꙋ , пᲂлᲂжи́сѧ во́ грᲂбѣ . и҆ а҆́дᲂво мра́чнᲂе хрⷭ҇тѐ мо́й і҆с҃е , низлᲂжѝ црⷭ҇тво . и҆ вᲂскр҃съ , всю̀ тва́рь с̾ сᲂбо́ю вᲂскреси́лъ є҆сѝ . тѣ́мже тѧ̀ пᲂе́мъ во всѧ̀ вѣ́ки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Вᲂзше́дшꙋ ти на крⷭ҇тъ , сл҃нце ᲂу҆гасѐ . во а҆́дъ же сᲂше́дшꙋ ти чл҃кᲂлю́бче , свѣ́тъ вᲂсїѧ̀ дш҃а́мъ во тмѣ̀ сꙋ́щимъ , и҆ пᲂгребе́нымъ пᲂд̾ го́рькᲂю сме́ртїю . тѣ́мже тѧ̀ пᲂе́мъ во всѧ̀ вѣ́ки .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Свѧ́зана мѧ̀ плѣни́цами грѣхо́вными , разрѣшѝ хрⷭ҇тѐ , и҆ ѡ҆сїѧ́й ми пᲂкаѧ́ныѧ бжⷭ҇твенꙋю свѣ́тлᲂсть сп҃се , и҆́же ѿ тмы̀ вѣ́чныѧ и҆збавле́и чл҃ки , свᲂи́мъ стра́шнымъ вᲂста́нїемъ . є҆́же вᲂспѣва́емъ во всѧ̀ вѣ́ки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . На рꙋкꙋ̀ нᲂсѧ́щи хрⷭ҇та̀ , и҆з̾ тебѐ вᲂплᲂще́нна дв҃о , тᲂгѡ̀ мᲂлѝ прїѧ́ти ны́нѣ и҆ менѐ заблꙋже́ннагѡ , без̾пꙋ́тїемъ всѧ́цѣмъ житїѧ̀ и҆ сᲂгрѣше́ньми бесчи́сленными , срѣта́ющими нра́вы лѣ́нᲂстными всегда̀ .

пѣ́снь , ѳ҃ . і҆рмо́съ . ѻ҆́бразъ чи́стагѡ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ви́дѣ сл҃нце распина́ема ѡ҆мрачи́сѧ , пᲂсредѣ̀ разбо́йникꙋ тѧ̀ сло́ве сл҃нце незахᲂди́маго . го́ры и҆ хо́лми , и҆ землѧ̀ и҆ мо́ре вскᲂлеба́шасѧ , и҆ а҆́дъ вᲂстрепета̀ , ᲂу҆́зники разрѣша́ѧ , и҆́хже держа́ше вᲂспѣва́ющїѧ тѧ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕѡ́лъ гл҃ъ ,꙳ на вы̀ лжꙋ́ще менѐ ра́ди . Ꙗ҆ви́всѧ вели́кᲂе сл҃нце , по́д̾ землю к̾ сꙋ́щимъ заше́дъ , вᲂсїѧ́лъ же є҆сѝ незахᲂди́мᲂе свѣти́ло ѿ ме́ртвыхъ , ѡ҆зарѧ́ѧ пресла́внѡ земны́ѧ кᲂнцы̀ . тѣ́мже тѧ̀ живᲂда́вче , непреста́ннѡ велича́емъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Сп҃се і҆с҃е и҆́же свᲂе́ю сме́ртїю сме́рть разᲂре́и , и҆ вᲂскр҃си́въ всѧ̀ и҆́же та́мѡ держи́мыѧ , вᲂскр҃сѝ и҆ менѐ и҆́же в̾ ро́вѣ преи҆спо́днѣмъ зᲂвꙋ́щаго тѝ , ѿ страсте́й смертᲂно́сныхъ и҆ грѣхо́въ чл҃кᲂлю́бче .

сла́ва . Прїидо́ша мѷрѡно́сицы пла́чꙋще на́ грᲂбъ ра́нѡ , и҆ не ѡ҆брѣ́тше тѧ̀ . ви́дѣша же в̾ бѣ́лыхъ ри́захъ пред̾сѣдѧ́ща а҆́нг҃ла и҆ вᲂпїю́ща , вᲂста̀ гдⷭ҇ь , спѣши́те вᲂзвѣсти́ти вᲂста́нїе ᲂу҆ченико́мъ є҆гѡ̀ .

и҆ ны́нѣ , боⷢ҇ . Диви́тсѧ всѧ̀ тва́рь влⷣчце , и҆́же па́че ᲂу҆ма̀ та́инствꙋ ржⷭ҇тва̀ твᲂегѡ̀ , ꙗ҆́кѡ рᲂдила̀ є҆сѝ бг҃а є҆мманꙋ́ила , бы́вша на́съ ра́ди челᲂвѣ́ка всенепᲂро́чнаѧ , разрꙋши́вшаго сме́рти мꙋчи́тельство , крⷭ҇то́мъ свᲂи́мъ .

Въ пнⷣльникъ , в҃ , нлⷣи , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , д҃ . поⷣ . ꙗ҆́кѡ до́блѧ . Вᲂскр҃съ и҆́з̾ грᲂба ,꙳ затвᲂре́нᲂмъ две́ремъ ,꙳ пред̾ста́лъ є҆сѝ дрꙋго́мъ свᲂи́мъ всеси́льне .꙳ и҆ ѳѡмѣ̀ невѣ́рᲂвавшꙋ ,꙳ гвᲂзди́нныѧ пᲂказа́лъ є҆сѝ ꙗ҆́звы , и҆ ре́бръ кᲂпе́йнᲂе прᲂбᲂде́нїе ,꙳ ᲂу҆вѣрѧ́ѧ тᲂгѡ̀ и҆ ᲂу҆твержа́ѧ сло́ве ,꙳ ꙗ҆́кѡ то́йже є҆сѝ ,꙳ и҆́же за млрⷭ҇дїе претерпѣ̀ спаси́тельныѧ стра́сти . Мно́гᲂе терпѣ́нїе ,꙳ и҆ милᲂсе́рдїе без̾чи́сленᲂе ,꙳ зрѧ̀ мᲂѐ смире́нїе , не невѣ́рꙋй ,꙳ но ᲂу҆вѣ́рисѧ близнечѐ гдⷭ҇ь речѐ ,꙳ ꙗ҆́кѡ са́мъ є҆́смь а҆́зъ пᲂстрада́выи .꙳ и҆ тридне́венъ и҆з̾ ме́ртвыхъ вᲂскр҃съ ,꙳ и҆ а҆́дᲂва сᲂкро́вища и҆спраздни́въ ,꙳ и҆ ѡ҆живи́въ и҆́же ѿ́ вѣка ᲂу҆ме́ршїѧ .= О=у҆диви́сѧ є҆гда̀ ᲂу҆зрѣ̀ ѳѡма̀ ,꙳ и҆ вᲂзᲂпѝ ви́дѣвъ тѧ̀ всеси́льне ,꙳ ты̀ є҆сѝ бг҃ъ мо́й и҆ гдⷭ҇ь .꙳ вѣ́рꙋю чл҃кᲂлю́бче ,꙳ ꙗ҆́кѡ са́мъ є҆сѝ пᲂстрада́выи ,꙳ и҆ стра́сти и҆сцѣлѧ́ѧ дш҃ъ на́шихъ .꙳ кла́нѧюсѧ твᲂе́й держа́вѣ ,꙳ и҆ ми́рᲂви вᲂзвѣща́ю ,꙳ стра́шнᲂе твᲂѐ и҆ всеси́льнᲂе вᲂста́нїе .

стихѣ́ры , в̾ минѣ́и , г҃ . сла́ва , и҆ ны́нѣ . гла́съ , в҃ . Две́ремъ затвᲂре́нымъ пред̾ста̀ і҆с҃ъ ᲂу҆ченико́мъ , без̾стра́шїе и҆ ми́ръ даѧ́ше . та́же глаго́ла ѳѡмѣ̀ , пᲂчто́ ми невѣ́рꙋеши ꙗ҆́кѡ вᲂскр҃со́хъ и҆з̾ ме́ртвыхъ , принесѝ здѣ̀ рꙋ́кꙋ твᲂю̀ , и҆ влᲂжѝ в̾ ре́бра мᲂѧ̀ и҆ ви́ждь , тᲂбо́ю бо невѣ́рꙋющимъ , всѝ ᲂу҆вѣ́дѧтъ стрⷭ҇ти и҆ вᲂскрⷭ҇нїе мᲂѐ , зва́ти с̾ тᲂбо́ю , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стⷯры . гла́съ , а҃ . Ѡ҆бъи҆ди́те лю́дїе сїѡ́нъ , и҆ ѡ҆бъи҆ми́те є҆гѡ̀ , и҆ дади́те сла́вꙋ в̾ не́мъ , вᲂскрⷭ҇шемꙋ и҆з̾ ме́ртвыхъ , ꙗ҆́кѡ то́й є҆́сть бг҃ъ на́шъ , и҆збавле́и на́съ ѿ без̾зако́нїи на́шихъ .

сти́хъ : к̾ тебѣ̀ вᲂзведо́хъ ѻ҆́чи мᲂѝ . И҆́нъ вѣ́къ тебѐ дш҃е ѡ҆жида́етъ , и҆ сꙋдїѧ̀ твᲂѧ̀ хо́щетъ ѡ҆бличи́ти та́йнаѧ и҆ ѕла́ѧ . непребꙋ́ди ᲂу҆́бѡ в̾ ни́хъ , но пред̾варѝ вᲂпїю́щи сꙋдїѝ , бж҃е ѡ҆чи́сти мѧ , и҆ спаси́ мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . И҆́же на сꙋди́щи ва́ше и҆спᲂвѣ́данїе ст҃і́и , бѣсо́вскꙋю ᲂу҆страшѝ си́лꙋ , и҆ ѿ ле́сти челᲂвѣ́ки свᲂбᲂдѝ . тѣ́мъ и҆ глава́ми ᲂу҆сѣка́еми вᲂпїѧ́сте , да бꙋ́детъ гдⷭ҇и же́ртва дш҃ъ на́шихъ бл҃гᲂпрїѧ́тна пред̾ тᲂбо́ю , ꙗ҆́кѡ тебѐ вᲂз̾лю́бльше неради́хᲂмъ ѡ҆ вре́меннѣй жи́зни чл҃кᲂлю́бче .

сла́ва , и҆ ны́нѣ . гла́съ , в҃ . По вᲂста́нїи твᲂе́мъ гдⷭ҇и , со́бранымъ ᲂу҆ченико́мъ твᲂи́мъ . и҆ две́ремъ затвᲂре́нымъ , пᲂсредѣ̀ ста̀ , ми́ръ даѧ̀ и҆́мъ . вѣ́рᲂвавъ же и҆ ѳѡма̀ , зрѣ́нїемъ рꙋ́кꙋ и҆ ре́бръ твᲂи́хъ , гдⷭ҇а и҆ бг҃а тебѐ и҆спᲂвѣ́да , спаса́ющаго вѣ́рꙋющихъ в̾ тѧ̀ любо́вїю чл҃кᲂлю́бче .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Во вто́рникъ , в҃ , недѣ́ли , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ .

По а҃ , стихᲂло́гїи , сѣда́ленъ . гла́съ , г҃ . Жены̀ ко́ грᲂбꙋ прїидо́ша ᲂу҆ра́ньше , и҆ а҆́нг҃льскїи зра́къ ви́дѣвше трепета́хꙋ . гро́бъ ѡ҆блистава́ше жи́знь . чꙋ́до ᲂу҆дивлѧ́ше и҆́хъ . сегѡ̀ ра́ди ше́дше ᲂу҆ченико́мъ прᲂпᲂвѣ́дахꙋ вᲂста́нїе , ꙗ҆́кѡ а҆́дъ плѣни́лъ є҆́сть хрⷭ҇то́съ , ꙗ҆́кѡ є҆ди́нъ крѣ́пᲂкъ и҆ си́ленъ , и҆ ᲂу҆ме́ршїѧ всѧ̀ вᲂскресѝ . ѡ҆сꙋже́нїѧ стра́хъ разрꙋшѝ крⷭ҇то́мъ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . А҆́ще пра́ведникъ є҆два̀ спасе́тсѧ , а҆́зъ же грѣ́шныи гдѣ̀ ꙗ҆влю́сѧ тѧгᲂтꙋ̀ и҆ ва́ра дневна́гѡ непᲂне́съ . но с̾ нае́мники є҆ди́нᲂго на́десѧть часа̀ , причти́ мѧ бж҃е и҆ спаси́ мѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ꙗ҆́кѡ до́брїи во́ини є҆динᲂмꙋ́дренѡ вѣ́рᲂвавше , преще́нїѧ мꙋчи́телей неꙋбᲂѧ́стесѧ ст҃і́и . пристꙋпи́сте ᲂу҆се́рднѡ ко хрⷭ҇тꙋ̀ , взе́мше честны́и крⷭ҇тъ . и҆ скᲂнча́вше тече́нїе , съ нб҃съ пᲂбѣ́дꙋ прїѧ́сте . сла́ва ᲂу҆крѣ́пльшемꙋ ва́съ , сла́ва вѣнча́вшемꙋ вы̀ . сла́ва даю́щемꙋ ва́ми всѣ́мъ и҆сцѣле́нїе . сла́ва , и҆ ны́нѣ , боⷢ҇ . Заче́нши не ѡ҆па́льнѡ ѻ҆́гнь бжⷭ҇твеныи , и҆ ро́ждьши без̾сѣ́мене и҆сто́чника живᲂтꙋ̀ гдⷭ҇а , ѡ҆бра́дᲂваннаѧ бцⷣе , спасѝ тебѐ велича́ющихъ .

По в҃ , стихᲂло́гїи , сѣда́ленъ . гла́съ , д҃ . Вᲂскр҃съ сп҃се гро́бꙋ запечатлѣ́ннꙋ . пред̾ста́въ дрꙋго́мъ свᲂи́мъ затвᲂре́нᲂмъ две́ремъ , и҆ дх҃а и҆спо́лнилъ є҆сѝ . тᲂгда́ же несꙋ́щꙋ ѳѡмѣ̀ , тебѣ̀ невѣ́рᲂва . но во ѻ҆смы́и де́нь и҆ тᲂгѡ̀ наꙋча́еши , бг҃а тѧ̀ и҆ влⷣкꙋ прᲂпᲂвѣ́дати ꙗ҆зы́кѡмъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . кано́нъ , пра́здникꙋ . і҆рмо́съ , по двⷤа . трᲂпарѝ , на ѕ҃ .= и҆ ст҃о́мꙋ в̾ минѣ́и , на д҃ . =и҆лѝ :

кано́нъ , пра́здникꙋ . і҆рмо́съ , по двⷤа . трᲂпарѝ , на д҃ .= и҆ с=т҃о́мꙋ в̾ минѣ́и , на ѕ҃ .

по г҃ , пѣ́сни , кᲂнда́къ , и҆ и҆́кᲂсъ , пра́здникꙋ . сѣда́ленъ , ст҃о́мꙋ . сла́ва , и҆ ны́нѣ , пра́здникꙋ .

по ѕ҃ , пѣ́сни , кᲂнда́къ , и҆ и҆́кᲂсъ , ст҃о́мꙋ . =свѣти́ленъ , =пра́здникꙋ . и҆ ст҃о́мꙋ .

На хвали́тѣхъ , стⷯры , на д҃ . гла́съ , а҃ . Распѧ́тїе претерпѣ́въ , и҆ сме́рть ᲂу҆праздни́въ , и҆ вᲂскр҃се и҆з̾ ме́ртвыхъ , ᲂу҆мирѝ на́шꙋ жи́знь гдⷭ҇и , ꙗ҆́кѡ є҆ди́нъ всеси́ленъ . двⷤа . Не и҆скꙋсѝ менѐ сп҃се мо́й , лѣ́нᲂстїю грѣхо́внᲂю ѡ҆держи́ма , но вᲂздви́гни ми пᲂмышле́нїе к̾ пᲂкаѧ́нїю , и҆ твᲂегѡ̀ винᲂгра́да дѣ́лателѧ и҆скꙋ́сна ꙗ҆ви́ мѧ , и҆ да́рꙋй ми є҆динᲂгᲂна́десѧте часа̀ мздꙋ̀ , и҆ ве́лїю млⷭ҇ть . мⷱ҇ꙋ . Сі́и во́ини цр҃ѧ вели́кагѡ , прᲂти́вишасѧ пᲂвелѣ́нїемъ мꙋчи́телевымъ хра́бᲂрски , небрего́ша ѡ҆ мꙋ́кахъ . и҆ ле́сть всю̀ пᲂпра́вше , дᲂсто́йнѡ вѣнча́ни бы́вше . про́сѧтъ ᲂу҆ сп҃са ми́ра , и҆ ве́лїѧ млⷭ҇ти дш҃а́мъ на́шимъ . сла́ва , и҆ ны́нѣ . гла́съ , д҃ . ѽ пресла́внᲂе чꙋ́до , невѣ́рїе вѣ́рꙋ и҆звѣ́стнꙋ рᲂдѝ . рече́ бо ѳѡма̀ , а҆́ще неви́жꙋ неи҆мꙋ̀ вѣ́ры , ѡ҆сѧза́въ же ре́бра , бг҃ᲂсло́вѧше вᲂпло́щшагᲂсѧ , тᲂгѡ̀ ᲂу҆́бѡ сн҃а бж҃їѧ пᲂзна̀ , ꙗ҆́кѡ пᲂстрада́вша пло́тїю , прᲂпᲂвѣ́да вᲂскре́сшагѡ бг҃а , и҆ вᲂзᲂпѝ свѣ́тлымъ гла́сᲂмъ , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ . Пра́веднᲂю ѻ҆де́жею ѡ҆блᲂже́ни ,꙳ бѣлы̀ па́че снѣ́га .꙳ въ настᲂѧ́щїи де́нь па́схи вᲂзвесели́мсѧ ,꙳ в̾ ѻ҆́нь же хрⷭ҇то́съ пра́веднᲂе сл҃нце ,꙳ ѿ ме́ртвыхъ вᲂсїѧ̀ ,꙳ и҆ всѣ́хъ на́съ нетлѣ́нїемъ ᲂу҆ѧснѝ .

сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Терпи́тъ хрⷭ҇то́съ чл҃кᲂлю́бнѣ ѡ҆сѧза́нїе ,꙳ ꙗ҆́кᲂже и҆ распѧ́тїе пре́же сегѡ̀ ,꙳ и҆ непра́веднᲂе ѡ҆сꙋжде́нїе .꙳ и҆ и҆́з̾ грᲂба тридне́внѡ вᲂскр҃съ ,꙳ и҆ печа́ти неразрꙋшѝ .꙳ и҆ две́ремъ затвᲂре́нᲂмъ ,꙳ ᲂу҆ченико́мъ пред̾ста́въ , ꙗ҆́кѡ всеси́ленъ .

=сти́хъ : нб҃са̀ пᲂвѣ́даютъ сла́вꙋ бж҃їю ,꙳ твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . ѽ =ѳѡмино̀ невѣ́рїе , мирско́е спасе́нїе ,꙳ бг҃ᲂчл҃ка сло́ва ,꙳ є҆́же и҆з̾ а҆́да вᲂста́нїе ᲂу҆вѣрѧ́ѧ .꙳ ꙗ҆́звы рꙋ́кꙋ и҆ но́гꙋ ,꙳ де́рзᲂстнᲂе ѡ҆сѧза́нїе к̾ вѣ́рѣ мирстѣ́й ,꙳ десни́цею любᲂпы́тнᲂю .

сла́ва , и҆ ны́нѣ . гла́съ , д҃ . Гдⷭ҇и , нестерпи́мымъ твᲂегѡ̀ бжⷭ҇тва̀ блиста́нїемъ прїи́де , две́ремъ сꙋ́щемъ затвᲂре́нымъ , и҆ ста̀ пᲂсредѣ̀ ᲂу҆чени́къ свᲂи́хъ , ре́бра и҆спыта́ти и҆ ꙗ҆́звы твᲂе́ю рꙋ́кꙋ и҆ нᲂгꙋ̀ , во ѡ҆сѧза́нїѧ ꙗ҆влѧ́ѧ . печа́ль же и҆ ско́рбь разрѣша́ѧ , ꙗ҆́вѣ вᲂзᲂпи́лъ є҆сѝ , и҆́мъ же ѻ҆́бразᲂмъ ви́дите мѧ ѽ дрꙋ́зи , плᲂтьско́е вᲂспрїѧ́тїе нᲂшꙋ̀ , а҆ не дх҃а є҆стество̀ . сᲂмнѧ́щемꙋжесѧ ᲂу҆ченикꙋ̀ , пᲂвелѣва́ше ѡ҆сѧза́ти тре́петнѡ . и҆ речѐ , ты̀ и҆спыта́въ всѧ̀ , грѧдѝ про́чее и҆ не невѣ́рꙋй . ѻ҆́нъ же смᲂтрѧ́ѧ рꙋко́ю , твᲂегѡ̀ сꙋгꙋ́баго сꙋщества̀ , со́ страхᲂмъ вᲂпїѧ́ше вѣ́рнѡ вѣ́рᲂю влеко́мъ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , бл҃го є҆́сть и҆спᲂвѣ́датисѧ гдⷭ҇ви . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . та́же ,= ча́съ , а҃ . =и҆ =ѿпꙋ́стъ .

Во вто́рникъ , на блаже́ннахъ , трипѣ́снецъ , твᲂре́нїе і҆ѡ́сиѳѡво . гла́съ , а҃ . пѣ́снь , а҃ . і҆рмо́съ . ви́дите ви́дите , ꙗ҆́кѡ а҆́зъ є҆́смь бг҃ъ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Пᲂе́мъ дне́сь гдⷭ҇ви и҆ вᲂскли́кнемъ распе́ншемꙋсѧ на́съ ра́ди , и҆ низ̾лᲂжи́вшемꙋ ѕлᲂнача́льнаго врага̀ , и҆ пᲂло́жьшемꙋсѧ во́ грᲂбѣ , и҆ ѡ҆жи́вльшемꙋ ме́ртвыѧ вᲂскрⷭ҇нїемъ свᲂи́мъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Ст҃ъ гдⷭ҇ь и҆́же и҆з̾ ме́ртвыхъ тридне́внѡ вᲂскр҃съ ꙗ҆́кѡ си́ленъ . и҆ ᲂу҆ченико́мъ ꙗ҆́вльсѧ бг҃ᲂлѣ́пнѡ , и҆ ра́дᲂсти неи҆з̾гл҃анныѧ си́мъ и҆спо́лнивъ дш҃а , ско́рби и҆спо́лненыѧ пре́же .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Сло́ве сᲂбез̾нача́льне , ѻ҆ц҃ꙋ без̾нача́льнꙋ сᲂпресто́льне , распны́исѧ и҆ вмѣ́ньсѧ в̾ ме́ртвыхъ , и҆ вᲂскр҃съ ꙗ҆́кѡ си́ленъ , мᲂю̀ дш҃ꙋ ѡ҆живᲂтвᲂрѝ , ᲂу҆мерщве́нꙋю престꙋпле́ньми .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ѽ чꙋдесе́мъ твᲂи́мъ . ѽ стра́шнᲂмꙋ слы́шанїю . ражда́еши бо пло́тїю бг҃а , разо́ршагѡ сме́ртныѧ ᲂу҆́зы , и҆ ѿ тлѝ чл҃ки и҆змѣ́ньшагѡ , чⷭ҇таѧ бг҃ᲂбл҃гᲂда́тнаѧ .

пѣ́снь , и҃ . і҆рмо́съ . є҆го́же ᲂу҆жаса́ютсѧ а҆́нг҃ли .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Рыда́етъ всѧ̀ тва́рь , ѡ҆ твᲂе́й стрⷭ҇ти бл҃же . сл҃нце пᲂме́рче тебѣ̀ заше́дшꙋ на крⷭ҇тѣ̀ . и҆ и҆́же во тмѣ̀ сѣдѧ́щїи , вели́кїи свѣ́тъ ви́дѣша , пᲂю́ще тѧ ще́дре .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Вᲂстрепета̀ а҆́дъ , тѧ̀ ви́дѣвъ съ дш҃е́ю к̾ немꙋ̀ и҆дꙋ́ща хрⷭ҇тѐ всецр҃ю , и҆ и҆́же ѿ́ вѣка ме́ртвыѧ и҆здава́ше , вᲂспѣва́ющїѧ твᲂѐ чл҃кᲂлю́бїе .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ꙗ҆ви́лсѧ є҆сѝ хрⷭ҇тѐ ѿ́ грᲂба вᲂста́въ , прине́сшимъ а҆рᲂма́ты бжⷭ҇твенымъ жена́мъ , и҆ си́хъ рыда́нїе претвᲂри́лъ є҆сѝ , ᲂу҆тѣше́нїе всѣ́мъ сы́и во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ви́дѣвши є҆го́же рᲂдила̀ є҆сѝ бг҃а ѿ ме́ртвыхъ вᲂста́вша , ра́дᲂсти ꙗ҆ви́ласѧ є҆сѝ и҆спо́лнь дв҃о мр҃і́е . тᲂгѡ̀ ᲂу҆́бѡ мᲂлѝ чⷭ҇таѧ всѧ́кꙋ печа́ль , на́шегѡ се́рдца до кᲂнца̀ пᲂтреби́ти .

пѣ́снь , ѳ҃ . і҆рмо́съ . свѣтᲂно́сныи ѻ҆́блакъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆́кѡ ви́дѣ тѧ на́ древѣ во́лею ра́спѧта , бл҃гᲂразꙋ́мныи разбо́йникъ , пᲂмѧни́ мѧ вᲂпїѧ́ше є҆гда̀ прїи́деши і҆с҃е во црⷭ҇твїи твᲂе́мъ . и҆ бы́сть ра́еви жи́тель , вѣ́рᲂю є҆ди́нᲂю ѡ҆правда́всѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Тѧ̀ сп҃се ви́дѣвъ в̾ ме́ртвыхъ а҆́дъ ᲂу҆мертви́сѧ , и҆ и҆здава́ше мертвецы̀ ꙗ҆́же пᲂжрѐ дре́вле , славᲂсло́вѧщїѧ хрⷭ҇тѐ твᲂю̀ неи҆з̾гл҃аннꙋю си́лꙋ , и҆ мно́гᲂе бл҃гᲂсе́рдїе . и҆́мже спасѐ на́съ всецр҃ю .

сла́ва . Прїидо́ша нᲂсѧ́ще мѵ́ра на́ грᲂбъ жены̀ , и҆ ви́дѣвше тѧ̀ хрⷭ҇тѐ вᲂста́вша и҆́з̾ грᲂба . ра́дᲂсти и҆спо́лнишасѧ мно́ги . и҆ а҆пⷭ҇лѡмъ твᲂи́мъ вᲂз̾вѣсти́ша , ꙗ҆́кѡ вᲂскрⷭ҇лъ є҆сѝ , и҆ ꙗ҆ви́лсѧ є҆сѝ , сᲂвᲂста́вль ми́ръ ве́сь с̾ сᲂбо́ю .

и҆ ны́нѣ , боⷢ҇ . Свѣ́тъ невече́рнїи прᲂсїѧ́выи и҆з̾ ме́ртвыхъ ви́дѣвши чⷭ҇таѧ , и҆ ра́дᲂсти и҆спо́лнисѧ мно́гїѧ , ра́дᲂваласѧ є҆сѝ со прест҃ы́ми ᲂу҆ченикѝ . с̾ ни́миже и҆ на́мъ и҆спрᲂсѝ прᲂще́нїе , безмѣ́рнымъ прегрѣше́нїемъ , бцⷣе застꙋ́пнице вѣ́рнымъ .

Во вто́рникъ , в҃ , нлⷣи , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , а҃ . поⷣ . прехва́льнїи мч҃нцы . По є҆́же и҆́з̾ грᲂба ,꙳ твᲂе́мъ стра́шнѣмъ живᲂда́вче вᲂста́нїи ,꙳ ꙗ҆́кᲂже печа́ти неразрꙋшѝ хрⷭ҇тѐ гро́бныѧ .꙳ та́кѡ затвᲂре́нымъ две́ремъ вше́лъ є҆сѝ ,꙳ къ пресла́внымъ ᲂу҆ченико́мъ свᲂи́мъ ,꙳ ра́дᲂсть твᲂрѧ̀ и҆́мъ ,꙳ и҆ пра́выи сво́й дх҃ъ пᲂдаѧ̀ и҆́мъ ,꙳ за без̾мѣ́рнꙋю свᲂю̀ ми́лᲂсть .= Ѳ=ѡма̀ и҆́же близне́цъ ,꙳ небѣ̀ прише́лъ ,꙳ є҆гда̀ ты̀ ᲂу҆ченико́мъ ꙗ҆ви́сѧ гдⷭ҇и ,꙳ тѣ́мже и҆ невѣ́рᲂва ,꙳ твᲂемꙋ̀ вᲂскрⷭ҇нїю .꙳ и҆ ви́дѣвшимъ тѧ̀ вᲂпїѧ́ше ,꙳ а҆́ще невлᲂжꙋ̀ пе́рсты в̾ ре́бра є҆гѡ̀ .꙳ и҆ в̾ гвᲂзди́нныѧ ꙗ҆́звы ,꙳ невѣ́рꙋю ꙗ҆́кѡ вᲂста́лъ є҆́сть . Ꙗ҆́кᲂже хо́щеши ѡ҆сѧжѝ ,꙳ хрⷭ҇то́съ ѳѡмѣ̀ вᲂпїѧ́ше ,꙳ влᲂжѝ рꙋ́кꙋ , и҆ пᲂзна́й мѧ ,꙳ ко́сти и҆мꙋ́ща и҆ земнꙋ́ю пло́ть ,꙳ и҆ небꙋ́ди невѣ́ренъ ,꙳ но ꙗ҆́кᲂже ᲂу҆́бѡ слы́ша ѿ и҆нѣ́хъ вѣ́рꙋй .꙳ ѻ҆́нъ же вᲂзᲂпѝ ,꙳ бг҃ъ мо́й , и҆ гдⷭ҇ь ты̀ є҆сѝ .꙳ сла́ва вᲂста́нїю твᲂемꙋ̀ .

стихѣ́ры , в̾ минѣ́и , г҃ . сла́ва , и҆ ны́нѣ . гла́съ , є҃ . Чл҃кᲂлю́бче , ве́лїе и҆ не и҆сче́тно мно́жество щедро́тъ твᲂи́хъ . ꙗ҆́кѡ претерпѣ́лъ є҆сѝ , ѿ і҆ꙋде́й заꙋша́емь , и҆ ѿ а҆пⷭ҇лъ ѡ҆сѧза́емь , и҆ ѿ ѿмета́ющихсѧ тебѐ мно́гѡ и҆спытꙋ́емъ , ка́кѡ вᲂплᲂти́лсѧ є҆сѝ ; и҆ ка́кѡ распѧ́лсѧ є҆сѝ без̾грѣ́шне ; но вразꙋмѝ на́съ , ꙗ҆́кᲂже и҆ ѳѡмꙋ̀ вᲂпи́ти тебѣ̀ , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стⷯры . гла́съ , а҃ . Крⷭ҇тъ вᲂдрꙋзи́сѧ на ло́бнѣмъ , и҆ прᲂцвѣтѐ на́мъ без̾сме́ртїе , ѿ и҆сто́чника при́снѡ текꙋ́щагѡ , ребра̀ сп҃сᲂва .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Прїиди́те лю́дїе пᲂе́мъ , и҆ пᲂклᲂни́мсѧ хрⷭ҇тꙋ̀ ,= =сла́вѧще є҆гѡ̀ є҆́же и҆з̾ ме́ртвыхъ вᲂскрⷭ҇нїе . ꙗ҆́кѡ то́й є҆́сть бг҃ъ на́шъ , и҆́же ѿ́ лести вра́жїѧ ве́сь ми́ръ и҆збавле́и .

сти́хъ : пᲂми́лꙋй на́съ гдⷭ҇и . мⷱ҇ꙋ . мⷱ҇ꙋ . =Ѽ =до́брѣй кꙋ́пли ва́шей ст҃і́и , ꙗ҆́кѡ кро́ви да́сте , и҆ нб҃са̀ наслѣ́дᲂвасте . и҆ вре́меннѡ и҆скꙋси́вшесѧ , вѣ́чнѡ весели́тесѧ . вᲂи́стинꙋ дᲂбра̀ ва́ша кꙋ́плѧ , тлѣ́ннаѧ бо ѡ҆ста́вльше , и҆ нетлѣ́ннаѧ вᲂспрїѧ́сте , и҆ со а҆́нг҃лы ликᲂствꙋ́юще , пᲂетѐ непреста́ннѡ трⷪ҇цꙋ є҆динᲂсꙋ́щнꙋю .

сла́ва , и҆ ны́нѣ . гла́съ , ѕ҃ . По́ днехъ ѻ҆сми́хъ вᲂста́нїѧ твᲂегѡ̀ , і҆с҃е цр҃ю є҆динᲂро́днᲂе сло́во ѻ҆́ч҃ее , ꙗ҆ви́лсѧ є҆сѝ ᲂу҆ченико́мъ свᲂи́мъ , затвᲂре́нымъ две́ремъ , ми́ръ сво́й да́рꙋѧ и҆́мъ . и҆ невѣ́рꙋющꙋ ᲂу҆ченикꙋ̀ , ꙗ҆́звы пᲂказа́лъ є҆сѝ гл҃ѧ , прїидѝ и҆ ѡ҆сѧжѝ рꙋ́цѣ и҆ но́зѣ , и҆ нетлѣ́ннᲂе мᲂѐ ребро̀ , ѻ҆́нъ же вѣ́рнѡ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ сре́дꙋ , в҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ . По а҃ , стихᲂло́гїи , сѣда́ленъ . гла́съ , а҃ . Распе́ншꙋтисѧ хрⷭ҇тѐ , пᲂги́бе мꙋчи́тельство , и҆ пᲂпра́на бы́сть си́ла вра́жїѧ . ни а҆́нг҃лъ бо ни чл҃къ , но са́мъ гдⷭ҇и спа́слъ є҆сѝ на́съ , сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . Гро́бъ тво́й сп҃се во́ини стрегꙋ́щїи , ме́ртви бы́ша ѿ ѡ҆блиста́нїѧ ꙗ҆́вльшагᲂсѧ а҆́нг҃ла , прᲂпᲂвѣ́дающа жена́мъ вᲂскрⷭ҇нїе . тебѐ сла́вимъ тлѝ пᲂтреби́телѧ , и҆ тебѣ̀ припа́даемъ вᲂскрⷭ҇шемꙋ и҆́з̾ грᲂба хрⷭ҇тꙋ̀ бг҃ꙋ на́шемꙋ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . = Ра́нами ст҃ы́хъ ꙗ҆́же по тебѣ̀ прїѧ́ша , ᲂу҆мᲂле́нъ бꙋ́ди гдⷭ҇и , и҆ всѧ̀ на́ша бᲂлѣ́зни и҆ стрⷭ҇ти и҆сцѣлѝ , чл҃кᲂлю́бче мо́лимъ тѧ̀ . =сла́ва , и҆ ны́нѣ , боⷢ҇ . И҆́же без̾ мт҃ре на́ нб҃си , па́че ᲂу҆ма̀ и҆ слꙋ́ха , на землѝ без̾ ѻ҆ц҃а рᲂдила̀ є҆сѝ . тᲂгѡ̀ бцⷣе мᲂлѝ ѡ҆ дш҃а́хъ на́шихъ .

По в҃ , стихᲂло́гїи , сѣда́ленъ . гла́съ , д҃ . По́ страсти твᲂе́й хрⷭ҇тѐ во́льнѣй и҆ вᲂста́нїи сп҃се нетлѣ́ннѣмъ , ᲂу҆ченико́мъ прᲂсїѧ́лъ є҆сѝ ꙗ҆́кѡ сл҃нце . ѳѡмѣ́ же невѣ́рꙋющꙋ ре́клъ є҆сѝ , вѣ́рнѡ принеси́ ми пе́рстъ в̾ ꙗ҆́звꙋ гвᲂзди́ннꙋю . и҆ во́нзшее кᲂпїѐ в̾ ре́бра мᲂѧ̀ , сїѐ рꙋко́ю свᲂе́ю ѡ҆сѧжѝ , и҆ вѣ́рꙋй .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . кано́нъ , пра́здникꙋ . і҆рмо́съ , по двⷤа . трᲂпарѝ , на ѕ҃ .= и҆ ст҃о́мꙋ в̾ минѣ́и , на д҃ . =и҆лѝ :

кано́нъ , пра́здникꙋ . і҆рмо́съ , по двⷤа . трᲂпарѝ , на д҃ .= и҆ с=т҃о́мꙋ в̾ минѣ́и , на ѕ҃ .

по г҃ , пѣ́сни , кᲂнда́къ , и҆ и҆́кᲂсъ , пра́здникꙋ . сѣда́ленъ , ст҃о́мꙋ . сла́ва , и҆ ны́нѣ , пра́здникꙋ .

по ѕ҃ , пѣ́сни , кᲂнда́къ , и҆ и҆́кᲂсъ , ст҃о́мꙋ .

=свѣти́ленъ , =пра́здникꙋ . и҆ ст҃о́мꙋ .

На хвали́тѣхъ , стихѣ́ры , на д҃ . гла́съ , а҃ . Тебѐ на́ древѣ распе́ншагᲂсѧ , и҆ живо́тъ на́мъ пᲂда́вша , ꙗ҆́кѡ сп҃са и҆ влⷣкꙋ пᲂе́мъ непреста́ннѡ . вⷤ . И҆́же а҆́да плѣни́выи , и҆ чл҃ка вᲂскр҃си́въ , вᲂскрⷭ҇нїемъ свᲂи́мъ хрⷭ҇тѐ , спᲂдо́би на́съ чи́стымъ срⷣцемъ тебѣ̀ пѣ́ти и҆ сла́вити . мⷱ҇ꙋ . Ва́съ прехва́льнїи мч҃нцы , ни ско́рбь ни тѣснᲂта̀ , ни гла́дъ ни гᲂне́нїе , ни ра́ны ни ꙗ҆́рᲂсть ѕвѣре́й , ни ме́чь ни ѻ҆́гнь , ни преще́нїе страша̀ разлꙋчи́ти ѿ́ бг҃а невᲂз̾мᲂго́ша . тѣ́мже и҆ по дᲂстᲂѧ́нїю бᲂлѣ́знемъ ва́шимъ , мздꙋ̀ прїѧ́сте , и҆ нбⷭ҇нагѡ црⷭ҇твїѧ наслѣ́дницы бы́сте , мᲂли́те ѡ҆ спасе́нїи дш҃ъ на́шихъ . сла́ва , и҆ ны́нѣ . гла́съ , ѕ҃ . Две́ремъ затвᲂре́нымъ , прїи́де хрⷭ҇то́съ ко ᲂу҆ченико́мъ . тᲂгда̀ ѳѡма̀ по смᲂтре́нїю не ѡ҆брѣ́тесѧ с̾ ни́ми . и҆ гл҃аше ᲂу҆́бѡ неимꙋ̀ вѣ́ры , а҆́ще неви́жꙋ а҆́зъ влⷣки . ви́жꙋ ребро̀ , ѿ него́же и҆зы́де кро́вь и҆ вᲂда̀ креще́нїѧ . ви́жꙋ ꙗ҆́звꙋ , ѿ неѧ́же и҆сцѣли́сѧ вели́кїи стрꙋ́пъ чл҃чь . ви́жꙋ ка́кѡ небѣ̀ ꙗ҆́кѡ дх҃ъ , но ᲂу҆́бѡ пло́ть и҆ ко́сти . и҆́же сме́рть пᲂпра́выи , и҆ ѳѡмꙋ̀ ᲂу҆вѣ́ривыи , гдⷭ҇и сла́ва тебѣ̀ .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ . Цр҃ьскїи и҆ гдⷭ҇ьскїи пра́здникѡмъ пра́здникъ ,꙳ ны́нѣшнїи є҆́сть де́нь ,꙳ и҆́же сᲂтвᲂрѝ вᲂи́стинꙋ гдⷭ҇ь .꙳ ѡ҆ се́мъ ꙗ҆́кᲂже пᲂе́тъ дв҃дъ ,꙳ та́йнѡ вᲂз̾весели́мсѧ лю́дїе ,꙳ две́ремъ бо затвᲂре́нымъ , ᲂу҆ченико́мъ ми́ръ дарᲂва́сѧ .

сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Ѳѡмино̀ невѣ́рїе ,꙳ ᲂу҆вѣрѧ́етъ ми́рꙋ спаси́тельнᲂе бг҃а сло́ва и҆ чл҃ка ,꙳ и҆з̾ а҆́дᲂва дна̀ вᲂста́нїе .꙳ ꙗ҆́звы бо рꙋка́мъ и҆ нᲂга́мъ ,꙳ де́рзᲂстнѣйше ѡ҆сѧза́въ ,꙳ на ᲂу҆вѣре́нїе ми́рꙋ десни́цею любᲂпы́тнᲂю .

сти́хъ : нб҃са̀ пᲂвѣ́даютъ сла́вꙋ бж҃їю ,꙳ твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . Со́бранымъ стра́ха ра́ди и҆́же ѿ́ страсти твᲂеѧ̀ ,꙳ а҆пⷭ҇лѡмъ сло́ве ,꙳ и҆ две́ремъ затвᲂре́нымъ ,꙳ вни́де внеза́пꙋ пᲂсредѣ̀ и҆́хъ , ми́ръ да́рꙋѧ .꙳ и҆ ѳѡмѣ̀ прᲂстира́ѧ ѡ҆сѧза́ти ,꙳ честны́хъ ре́бръ твᲂи́хъ ꙗ҆́звы . сла́ва , и҆ ны́нѣ . гла́съ , и҃ . Две́ремъ затвᲂре́нымъ , и҆ ᲂу҆ченико́мъ со́бранымъ , прїи́де сп҃съ , и҆дѣ́же бѧ́хꙋ со́брани , и҆ ста̀ пᲂсредѣ̀ и҆́хъ гл҃а ѳѡмѣ̀ , прїидѝ ѡ҆сѧжѝ , и҆ ви́ждь ꙗ҆́звы гвᲂзде́мъ , прᲂстрѝ рꙋ́кꙋ твᲂю̀ , и҆ кᲂсни́сѧ ребрꙋ̀ мᲂемꙋ̀ , и҆ небꙋ́ди невѣ́ренъ , но вѣ́рᲂю прᲂпᲂвѣ́ждь , є҆́же и҆з̾ ме́ртвыхъ мᲂѐ вᲂскрⷭ҇нїе .

та́же , бл҃го є҆́сть и҆спᲂвѣ́датисѧ гдⷭ҇ви . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . та́же ,= ча́съ , а҃ . =и҆ =ѿпꙋ́стъ .

Въ сре́дꙋ , на блаже́ннахъ , трипѣ́снецъ , є҆мꙋ́же краегране́сїе : хвалѧ̀ бг҃а і҆ѡ́сиѳъ . гла́съ , а҃ .

пѣ́снь , г҃ . і҆рмо́съ . первᲂвѣ́чнᲂмꙋ ѿ ѻ҆ц҃а .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Свѣ́те ст҃ы́хъ , ѡ҆ст҃и́ти ми́ръ хᲂтѧ̀ , во́лею на́ древо крⷭ҇тнᲂе вᲂзнесе́сѧ . закла̀ всѧ̀ ꙗ҆́кѡ а҆́гнецъ , и҆ кро́вїю бл҃гᲂда́тельнᲂю , ѡ҆бнᲂвлѧ́ѧ на́съ пѣснᲂсло́вѧщихъ тѧ̀ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Крѣ́пᲂсть ѿѧ́тсѧ вра́жїѧ , плѣнена̀ бы́сть сме́рть . ѡ҆без̾сме́ртисѧ чл҃ческᲂе и҆стлѣ́вшее сꙋщество̀ . хрⷭ҇тѐ і҆с҃е ᲂу҆мертви́вшꙋтисѧ , ѡ҆бнᲂви́сѧ ми́ръ . вᲂпїѧ̀ , ст҃ъ є҆сѝ гдⷭ҇и .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Ны́нѣ не ᲂу҆дивлѧ́йтесѧ , жена́мъ вᲂпїѧ́ше а҆́нг҃лъ , и҆ди́те же па́че ᲂу҆се́рднѡ , ᲂу҆ченико́мъ скᲂрбѧ́щимъ ра́дᲂсти гл҃ы вᲂзвѣща́юще , ꙗ҆́кѡ вᲂста̀ хрⷭ҇то́съ , живо́тъ всѣ́хъ и҆ вᲂскрⷭ҇нїе .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Ꙗ҆ви́сѧ ты̀ дв҃о чⷭ҇таѧ вы́шши а҆́нг҃лъ , бг҃а вᲂпло́щши распе́ншагᲂсѧ и҆ пᲂгребе́на . и҆ ме́ртвымъ нетлѣ́нїе и҆стᲂчи́вша . є҆го́же мᲂлѝ спастѝ на́съ пѣснᲂсло́вѧщихъ тѧ .

пѣ́снь , и҃ . і҆рмо́съ . чꙋ́до преве́лїе .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Сме́рть во́лею прїѧ́тъ , вᲂзвыша́емъ пло́тїю на́ древо . и҆ зрѧ́ тѧ сл҃нце ᲂу҆гасѐ , и҆ цр҃ко́внаѧ свѣ́тлᲂсть раздра́сѧ всеси́льне . тѣ́мже вᲂспѣва́юще тѧ зᲂве́мъ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Ви́дѣша тѧ незахᲂди́мᲂе сїѧ́нїе , и҆́же дре́вле сѣдѧ́щїи в̾ сѣ́ни сме́ртнѣй . к̾ ни́мже тебѣ̀ гдⷭ҇и сᲂше́дшꙋ съ дш҃е́ю , и҆ ᲂу҆́зъ вѣ́чныхъ разрѣши́шасѧ , и҆ вельмѝ пᲂю́ще тѧ , гл҃юще , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Оу҆́трѡ ко́ грᲂбꙋ прише́дше жены̀ , блиста́ющасѧ а҆́нг҃ла ви́дѣвша гл҃юща , вᲂскр҃се и҆зба́витель , что̀ жива́го с̾ ме́ртвыми є҆щѐ пᲂмышлѧ́ете ; и҆спо́лньшесѧ ра́дᲂсти , вᲂзᲂпі́ите , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . Оу҆мерщве́нїе а҆́дꙋ сᲂдѣ́ла сн҃ъ тво́й чи́стаѧ , ꙗ҆́кᲂже пре́же речѐ , и҆ и҆з̾ ме́ртвыхъ вᲂста́лъ є҆́сть . є҆го́же мᲂлѝ , тлетво́рнагѡ грѣха̀ и҆зба́витисѧ и҆ мꙋ́ки , всѣ́мъ и҆́же вѣ́рᲂю взыва́ющимъ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́съ . та́инство стра́нно .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆сцѣлѧ́ѧ первᲂзда́ннагѡ бᲂлѣ́знь , пᲂбᲂлѣ́лъ є҆сѝ ви́сѧ сп҃се во́лею на́ древѣ . пᲂлᲂжи́вжесѧ в̾ ро́вѣ преи҆спо́днѣмъ , вᲂскр҃си́лъ є҆сѝ ме́ртвыхъ , и҆́хже сме́рть вᲂзмо́же пе́рвѣе пᲂглᲂти́ти .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆́кѡ ви́дѣ тѧ дре́вле ли́къ а҆пⷭ҇льскїи вᲂскрⷭ҇ша гдⷭ҇и , стра́хᲂмъ же и҆ ра́дᲂстїю пᲂклᲂнѧ́шесѧ . к̾ ни́мже вᲂпїѧ́ше , сѐ сбытїѐ гл҃ѡмъ мᲂи́мъ , нескᲂрби́те вы̀ , но вᲂзра́дꙋйтесѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Плащани́цею тѧ сп҃се ѡ҆бви́въ пᲂлᲂжѝ , і҆ѡ́сифъ пра́ведныи любо́вїю в̾ но́вѣмъ гро́бѣ , врата́ же а҆́дᲂва ꙗ҆́вѣ и҆ вереѝ сᲂкрꙋ́шь , вᲂздви́глъ є҆сѝ ме́ртвыѧ , и҆́хже сме́рть вᲂзмо́же пре́же пᲂглᲂти́ти .

сла́ва . Ра́дᲂвахꙋсѧ мѷрѡно́сицы , слы́шавше хрⷭ҇то́во вᲂста́нїе , тѣ́мже а҆пⷭ҇лѡмъ вᲂпїѧ́хꙋ , те́кше спѣ́шнѡ , сѐ ᲂу҆́же нескᲂрби́те , но ра́дꙋйтесѧ вы̀ , вᲂста́ бо и҆з̾ ме́ртвыхъ всѣ́хъ гдⷭ҇ь .

и҆ ны́нѣ , боⷢ҇ . Ѡ҆брᲂще́на всегѡ̀ нарица́ше без̾ разсꙋже́нїѧ , ꙗ҆́кѡ жениха̀ хрⷭ҇та̀ ви́дѣвши дв҃о , и҆з̾ гро́бнагѡ черто́га пло́тїю прише́дша , ра́дᲂсти и҆спо́лниласѧ є҆сѝ . є҆го́же мᲂлѝ , на́съ и҆зба́вити тлѝ и҆ мꙋче́нїѧ .

Въ сре́дꙋ , в҃ , нлⷣи , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , а҃ . поⷣ . прехва́льнїи мч҃нцы . Ѡ҆сѧжѝ глаго́летъ ѳѡмѣ̀ ,꙳ и҆з̾ ме́ртвыхъ тридне́внѡ вᲂскр҃съ чл҃кᲂлю́бецъ .꙳ и҆ ви́ждь рꙋ́цѣ мᲂѝ ,꙳ и҆ нᲂга́мъ пригвᲂжде́нїе ,꙳ и҆ ре́брᲂмъ прᲂбᲂде́нїе ,꙳ и҆ разꙋмѣ́й мѧ бг҃а непремѣ́нна .꙳ и҆ земны́мъ смѣще́нїемъ ꙳ по сꙋществꙋ̀ вᲂѡ҆браже́на ,꙳ и҆ стра́сть в̾ не́мъ прїе́мшагѡ . Дивлѧ́шесѧ близне́цъ ,꙳ в̾ ꙗ҆́звы взира́ѧ нᲂжны́ѧ ,꙳ и҆ рꙋчна́ѧ вᲂнзе́нїѧ .꙳ и҆ бѣ̀ ᲂу҆жаса́ѧсѧ стра́шнᲂмꙋ чꙋдесѝ .꙳ и҆ рꙋко́ю пречⷭ҇таѧ ре́бра ꙳ ѡ҆сѧза́ѧ и҆ зрѧ̀ ,꙳ и҆з̾ ни́хже пᲂказа̀ несꙋмѣ́ннᲂе ꙳ и҆звѣще́нїе ꙗ҆зы́кѡмъ ,꙳ и҆́же и҆́з̾ грᲂба тридне́внымъ вᲂста́нїемъ . Прїе́мъ вели́кᲂе ра́дᲂванїе ,꙳ твᲂѐ вᲂста́нїе хрⷭ҇тѐ мо́й ,꙳ и҆звѣ́стнѡ зрѧ̀ .꙳ ѿ него́же спᲂдо́бисѧ де́рзᲂстнымъ веще́мъ ,꙳ ѳѡма̀ прикᲂснꙋ́тисѧ .꙳ и҆́хже ра́ди тѧ̀ и҆́стинна ꙳ и҆спᲂвѣ́да бг҃а и҆ чл҃ка ,꙳ дѣ́йства сꙋгꙋ́ба нᲂсѧ́ща и҆ сꙋщества̀ ,꙳ и҆́маже ѡ҆блᲂжи́сѧ и҆з̾ ни́хже сᲂверше́нїе прїѧ́тъ .

стихѣ́ры , в̾ минѣ́и , г҃ . сла́ва , и҆ ны́нѣ . гла́съ , и҃ . Прикᲂсни́сѧ ребрꙋ̀ ѳѡма̀ рꙋко́ю , гл҃етъ хрⷭ҇то́съ , и҆ ꙗ҆́звы гвᲂзди́нныѧ прїидѝ ѡ҆сѧжѝ , вѣ́рᲂю и҆спыта́й , и҆ бꙋ́ди ми вѣ́ренъ и҆ непребыва́й невѣ́ренъ . ѳѡма́ же пе́рстᲂмъ ꙗ҆́кѡ прикᲂснꙋ́сѧ влⷣцѣ , вельмѝ вᲂзᲂпи́въ , ты̀ бг҃ъ мо́й и҆ гдⷭ҇ь , бл҃гᲂꙋтро́бне сла́ва тебѣ̀ .

На стихо́внѣ , стⷯры . гла́съ , а҃ . Стра́стїю твᲂе́ю хрⷭ҇тѐ , ѿ страсте́й свᲂбᲂди́хᲂмсѧ , и҆ вᲂскрⷭ҇нїемъ твᲂи́мъ и҆з̾ и҆стлѣ́нїѧ и҆збы́хᲂмъ , гдⷭ҇и сла́ва тебѣ̀ .

сти́хъ : к̾ тебѣ̀ вᲂзведо́хъ ѻ҆́чи мᲂѝ . А҆пⷭ҇льскаѧ всестро́йнаѧ цѣвни́це , ст҃ы́мъ дх҃ᲂмъ дви́жима без̾стꙋ́дныхъ бѣсо́въ тре́бища ᲂу҆праздни́ла є҆́сть . и҆ є҆ди́нᲂгѡ бг҃а прᲂпᲂвѣ́давши , ꙗ҆зы́ки и҆зба́ви ѿ ле́сти и҆́дᲂльскїѧ . и҆ пᲂклᲂнѧ́тисѧ наꙋчѝ трⷪ҇цѣ є҆динᲂсꙋ́щнѣй .

сти́хъ : пᲂми́лꙋй на́съ гдⷭ҇и . мⷱ҇ꙋ . Прехва́льнїи мч҃нцы , ва́съ ни землѧ̀ пᲂтаи́ла є҆́сть , но нб҃о прїѧ́тъ вы̀ . и҆ ѿверзо́шасѧ ва́мъ ра́йскїѧ две́ри , и҆ внꙋ́трь бы́вше , дре́ва живо́тнагѡ наслажа́етесѧ . хрⷭ҇то́ви мᲂли́тесѧ , дарᲂва́ти дш҃а́мъ на́шимъ , ми́ръ и҆ ве́лїю млⷭ҇ть .

сла́ва , и҆ ны́нѣ . гла́съ , то́йже . Оу҆ченико́мъ сᲂмнѧ́щимсѧ , во ѻ҆смы́и дн҃ь прїи́де сп҃съ и҆дѣ́же бѧ́хꙋ со́брани , и҆ ми́ръ да́въ , к̾ ѳѡмѣ̀ вᲂзᲂпѝ , прїидѝ а҆пⷭ҇ле и҆ ѡ҆сѧжѝ дла́ни , в̾ ни́хже гво́здїѧ вᲂнзо́ша . ѽ до́брᲂе невѣ́рїе ѳѡмино̀ , вѣ́рныхъ срⷣца в̾ ра́зꙋмъ приведѐ , и҆ со́страхᲂмъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ четверто́къ , в҃ ѧ , недѣ́ли , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ .

По а҃ , стихᲂло́гїи , сѣда́ленъ . гла́съ , а҃ . Жены̀ ко́ грᲂбꙋ прїидо́ша ᲂу҆ра́ншїи , и҆ а҆́нг҃льскᲂе ꙗ҆вле́нїе ви́дѣвше трепета́хꙋ . гро́бъ ѡ҆блистава́ше жи́знь , чꙋ́до ᲂу҆жаса́ше и҆́хъ . сегѡ̀ ра́ди ше́дше , ᲂу҆ченико́мъ прᲂпᲂвѣ́дахꙋ вᲂскрⷭ҇нїе . а҆́да и҆спрᲂве́ргъ хрⷭ҇то́съ , ꙗ҆́кѡ є҆ди́нъ крѣ́пᲂкъ и҆ си́ленъ . и҆ сᲂвᲂста́ви ᲂу҆ме́ршїѧ всѧ̀ , ѡ҆сꙋжде́нїѧ стра́хъ разрꙋши́въ крⷭ҇то́мъ . сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Премꙋ́дрїи вселе́ннѣй лᲂвцы̀ ѿ́ бг҃а прїе́мше млⷭ҇тивнᲂе , мᲂли́те ны́нѣ ѡ҆ на́съ вᲂпїю́щихъ , гдⷭ҇и спасѝ гра́дъ сво́й , и҆ ѿ ѡ҆держа́щихъ ѕѡ́лъ свᲂбᲂдѝ , а҆пⷭ҇лъ ра́ди дш҃а на́ша . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Мч҃нки хрⷭ҇то́вы мо́лимъ всѝ , прише́дше к̾ ни́мъ съ вѣ́рᲂю , сїи́ бо ѡ҆ на́шемъ спасе́нїи про́сѧтъ , сі́и всѝ и҆стᲂча́ютъ и҆сцѣле́нїемъ бл҃гᲂда́ть , сі́и пᲂлкѝ ѿгᲂнѧ́ютъ бѣсо́вскїѧ , ꙗ҆́кѡ сᲂхра́нницы вѣ́рѣ . сла́ва , и҆ ны́нѣ , боⷢ҇ . Чи́стаѧ бцⷣе бл҃гᲂслᲂве́наѧ , ꙗ҆́же на́ нб҃сѣхъ и҆ на землѝ славᲂсло́вимаѧ , ра́дꙋисѧ невѣ́сто неневѣ́стнаѧ .

По в҃ , стихᲂло́гїи , сѣда́ленъ . гла́съ , а҃ . Ви́дѣвъ мᲂѧ̀ ре́бра , и҆ ꙗ҆́звы гвᲂзди́нныѧ , ѳѡмо̀ , не невѣ́рꙋй мᲂемꙋ̀ вᲂста́нїю , гдⷭ҇ь гл҃аше , вᲂста́въ и҆́з̾ грᲂба ꙗ҆́вльсѧ а҆пⷭ҇лѡмъ неи҆зрече́ннѡ . близне́цъ же вѣ́рᲂвавъ , вᲂпїѧ́ше зижди́телю , бг҃ъ мо́й є҆сѝ и҆ гдⷭ҇ь .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . кано́нъ , пра́здникꙋ . і҆рмо́съ , по двⷤа . трᲂпарѝ , на ѕ҃ .= и҆ ст҃о́мꙋ в̾ минѣ́и , на д҃ . =и҆лѝ :

кано́нъ , пра́здникꙋ . і҆рмо́съ , по двⷤа . трᲂпарѝ , на д҃ .= и҆ с=т҃о́мꙋ в̾ минѣ́и , на ѕ҃ .

по г҃ , пѣ́сни , кᲂнда́къ , и҆ и҆́кᲂсъ , пра́здникꙋ . сѣда́ленъ , ст҃о́мꙋ . сла́ва , и҆ ны́нѣ , пра́здникꙋ .

по ѕ҃ , пѣ́сни , кᲂнда́къ , и҆ и҆́кᲂсъ , ст҃о́мꙋ .

=свѣти́ленъ , =пра́здникꙋ . и҆ ст҃о́мꙋ .

На хвали́тѣхъ , стихѣ́ры , на д҃ . гла́съ , а҃ . Бг҃ᲂлѣ́пнᲂе твᲂѐ смᲂтре́нїе , сла́вѧще вᲂпїе́мъ ти хрⷭ҇тѐ , рᲂжде́исѧ ѿ дв҃ы , и҆ неразлꙋче́нъ бѣ̀ ѿ ѻ҆ц҃а , пᲂстрада̀ ꙗ҆́кѡ чл҃къ , и҆ во́лею претерпѣ̀ распѧ́тїе , вᲂскрⷭ҇лъ є҆сѝ ѿ́ грᲂба , ꙗ҆́кѡ ѿ черто́га прᲂше́дъ , да спасе́ши всегѡ̀ ми́ра , гдⷭ҇и сла́ва тебѣ̀ . двⷤа . Петра̀ и҆ па́вла , є҆динᲂгла́снѡ да вᲂсхва́лимъ . лꙋкꙋ̀ матѳе́ѧ , ма́рка , і҆ѡа́нна , а҆ндре́ѧ , ѳѡмꙋ̀ варѳᲂлѡме́ѧ , сі́мѡна канани́та , і҆а́кѡва , и҆ фили́ппа , и҆ ве́сь ли́къ ᲂу҆чени́ческїи , дᲂсто́йнѡ да вᲂсхва́лимъ . мⷱ҇ꙋ . Ра́дꙋйтесѧ мч҃нцы ѡ҆́ гдⷭ҇ѣ , ꙗ҆́кѡ по́двигᲂмъ до́брымъ пᲂдвиза́стесѧ . прᲂти́вистесѧ царе́мъ , и҆ мꙋчи́телѧ пᲂбѣди́сте . ѻ҆гнѧ̀ и҆ меча̀ не ᲂу҆страши́стесѧ , и҆ ѕвѣре́й ди́вїихъ снѣда́ющихъ тѣлеса̀ ва́ша . хрⷭ҇то́ви со а҆́нг҃лы пѣ́нїе вᲂз̾сыла́ете , и҆ ѿ нб҃съ вѣнцы̀ прїѧ́сте , прᲂси́те ми́ръ ми́рᲂви дарᲂва́ти , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ . гла́съ , в҃ . Две́ремъ затвᲂре́нымъ пред̾ста̀ і҆с҃ъ ᲂу҆ченико́мъ , без̾стра́шїе и҆ ми́ръ даѧ́ше . та́же глаго́ла ѳѡмѣ̀ , пᲂчто́ ми невѣ́рꙋеши ꙗ҆́кѡ вᲂскр҃со́хъ и҆з̾ ме́ртвыхъ , принесѝ здѣ̀ рꙋ́кꙋ твᲂю̀ , и҆ влᲂжѝ в̾ ре́бра мᲂѧ̀ и҆ ви́ждь , тᲂбо́ю бо невѣ́рꙋющимъ , всѝ ᲂу҆вѣ́дѧтъ стрⷭ҇ти и҆ вᲂскрⷭ҇нїе мᲂѐ , зва́ти с̾ тᲂбо́ю , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́ѳᲂвъ . Оу҆стна́ми чи́стыми ,꙳ по́йте чл҃цы со а҆́нг҃лы ,꙳ вᲂскрⷭ҇шаго ,꙳ тридне́внѡ ѿ́ грᲂба ,꙳ и҆ ми́ра сᲂвᲂскреси́вша .

сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Ꙗ҆ви́лсѧ є҆сѝ сп҃се ꙳ сщ҃е́ннымъ свᲂи́мъ а҆пⷭ҇лѡмъ ,꙳ две́ремъ затвᲂре́нᲂмъ ,꙳ и҆́хже ра́ди ѡ҆бнᲂвлѧ́ѧ в̾ на́съ ,꙳ бжⷭ҇твеныи дх҃ъ сво́й .

сти́хъ : нб҃са̀ пᲂвѣ́даютъ сла́вꙋ бж҃їю ,꙳ твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . Ны́нѣ тѧ̀ всѣ́хъ цр҃ю ,꙳ ви́дѣвше не ѻ҆чи́ма ,꙳ но серде́чнᲂю любо́вїю ,꙳ бг҃а вѣ́рᲂвавше ,꙳ пѣ́сньми велича́емъ .

сла́ва , и҆ ны́нѣ . гла́съ , в҃ . По вᲂста́нїи твᲂе́мъ гдⷭ҇и , со́бранымъ ᲂу҆ченико́мъ твᲂи́мъ . и҆ две́ремъ затвᲂре́нымъ , пᲂсредѣ̀ ста̀ , ми́ръ даѧ̀ и҆́мъ . вѣ́рᲂвавъ же и҆ ѳѡма̀ , зрѣ́нїемъ рꙋ́кꙋ и҆ ре́бръ твᲂи́хъ , гдⷭ҇а и҆ бг҃а тебѐ и҆спᲂвѣ́да , спаса́ющаго вѣ́рꙋющихъ в̾ тѧ̀ любо́вїю чл҃кᲂлю́бче .

та́же , бл҃го є҆́сть и҆спᲂвѣ́датисѧ гдⷭ҇ви . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . та́же ,= ча́съ , а҃ . =и҆ =ѿпꙋ́стъ .

Въ четверто́къ , на блаже́ннахъ , трипѣ́снецъ . є҆мꙋ́же краегране́сїе : пѣ́нїе , і҆ѡ́сифᲂво . гла́съ , а҃ . пѣ́снь , д҃ . і҆рмо́съ . на бж҃їи стра́жи .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѡ҆ на́съ смире́ныхъ веде́нъ бы́сть на́ смерть хрⷭ҇тѐ , всѣ́хъ живᲂтѐ . и҆ плѣни́въ а҆́дᲂва црⷭ҇твїѧ , дꙋ́ши ꙗ҆́кѡ ѻ҆́вцы вᲂсхи́тилъ є҆сѝ с̾ сᲂбо́ю вᲂскр҃си́въ , ꙗ҆́кѡ цр҃ь держа́венъ и҆ всеси́ленъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Съ ме́ртвыми что̀ жи́знь и҆́щете , ꙗ҆вле́исѧ жена́мъ блиста́ѧисѧ на́ грᲂбѣ а҆́нг҃лъ речѐ , вᲂста̀ , прїиди́те ви́дите лежа́ща пᲂгреба́льнаѧ є҆ди́на , и҆ є҆гѡ̀ ᲂу҆ченико́мъ вᲂзвѣсти́ти пᲂтщи́тесѧ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Ме́ртвъ а҆́дъ бы́въ сᲂше́ствїемъ хрⷭ҇то́вымъ , и҆ всѣ́хъ ме́ртвыхъ ѿдаѧ́ше всѧ́кѡ плѣнѧ́емь . и҆ до кᲂнца̀ и҆спражнѧ́емо сегѡ̀ чре́во всеѧ́днᲂе , всеси́льнᲂю во́лею бг҃а всѣ́хъ цр҃ѧ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ꙗ҆́кѡ въ кра́снѣйшїи хра́мъ , все́льсѧ в̾ тѧ̀ чⷭ҇таѧ дв҃о , і҆с҃ъ всѣ́хъ цр҃ь , сни́тїемъ , а҆́дᲂво жили́ще мра́чнᲂе ᲂу҆празднѝ , и҆ вᲂскр҃се , сᲂвᲂскр҃си́въ чл҃ки ꙗ҆́кѡ всеси́ленъ .

пѣ́снь , и҃ . і҆рмо́съ . се́й ᲂу҆́бѡ нарече́нныи .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Сла́ва хрⷭ҇тꙋ̀ , и҆́же крⷭ҇то́мъ врага̀ низ̾лᲂжи́вшемꙋ , и҆ плѣни́вшꙋ а҆́да є҆́же к̾ немꙋ̀ сни́тїемъ . и҆ и҆́хже вᲂзмо́гъ пᲂглᲂти́ти , ѡ҆жи́вльшꙋ ме́ртвыхъ , хвалᲂсло́вѧщихъ є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Сѐ жена́мъ мѷрѡно́сицамъ вᲂпїѧ́ше , ꙗ҆вле́исѧ а҆́нг҃лъ блиста́ѧисѧ , мѣ́сто в̾ не́мже пᲂлᲂжи́сѧ . ви́дѣвше ᲂу҆́бѡ сме́рть , и҆ а҆́дъ плѣни́вша си́лᲂю свᲂе́ю , не к̾тᲂмꙋ̀ в̾ ме́ртвыхъ жи́зни и҆щи́те .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . А҆́дъ ѡ҆гᲂрчи́сѧ до́лѣ срѣ́тъ тѧ̀ сло́ве , немᲂгі́и тебѣ̀ прибли́житисѧ . и҆ и҆́х̾же пᲂглᲂтѝ ме́ртвыхъ , ско́рѡ ѿдаѧ́ше пᲂвелѣ́нїемъ тѝ , хвалᲂсло́вѧщихъ сᲂгла́снѡ держа́вꙋ твᲂю̀ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ви́дѣла є҆сѝ и҆з̾ ме́ртвыхъ вᲂста́вша дв҃о , є҆го́же пло́тїю неи҆зрече́ннѡ рᲂдила̀ є҆сѝ сло́ва , и҆ ра́дᲂсти дш҃ꙋ и҆спо́лнила є҆сѝ . є҆го́же сни́тїе пѣснᲂсло́вѧщи чⷭ҇таѧ во всѧ̀ вѣ́ки .

пѣ́снь , ѳ҃ . і҆рмо́съ . свѣти́сѧ свѣти́сѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Часᲂво́мъ же и҆ дне́мъ , сᲂдѣ́тель сы́и и҆зба́вителю , в̾ де́нь и҆ ча́съ шес ты́и , пᲂно́снѡ хᲂтѧ̀ претерпѣ́лъ є҆сѝ распѧ́тїе ще́дре , ꙗ҆́кѡ да на́ша ᲂу҆тᲂли́ши пᲂнᲂше́нїѧ , и҆ примири́ши на́съ ко ѻ҆ц҃ꙋ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Стᲂнѧ̀ а҆́дъ ᲂу҆срѣ́тъ тѧ и҆зба́вителю , и҆ ꙗ҆́же и҆мѣ́ѧше ᲂу҆́зники со ско́рᲂстїю ѿрѣшѝ , бжⷭ҇твеными гла́сы вᲂспѣва́ющихъ ти сло́ве , є҆́же па́че ᲂу҆ма̀ си́лꙋ , и҆ стра́шнᲂе схᲂжде́нїе .

сла́ва . Прїидо́ша съ мѵ́рѡмъ жены̀ , ᲂу҆́трꙋ глꙋбᲂкꙋ̀ сᲂтща́нїемъ , є҆́же пᲂма́зати тѣ́ло пречи́стᲂе , и҆ к̾ ни́мъ беспло́тныи речѐ , нача́льникъ живᲂтꙋ̀ вᲂста̀ , ра́дᲂсти бжⷭ҇твеныѧ и҆спо́лнитесѧ .

и҆ ны́нѣ , боⷢ҇ . Свѣ́тъ рᲂди́вши , вᲂсїѧ́вшїи сѣдѧ́щимъ во тмѣ̀ и҆ сѣ́ни сме́ртнѣй , ꙗ҆́кѡ ви́дѣла є҆сѝ пренепᲂро́чнаѧ , вᲂсїѧ́вша и҆з̾ ме́ртвыхъ , со жена́ми всѣ́ми мѷрѡно́сицами , славᲂсло́вѧше є҆гѡ̀ ликꙋ́юще .

Въ четверто́к̾ , в҃ , нлⷣи , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , д҃ . поⷣ . ꙗ҆́кѡ до́блѧ . Распе́нсѧ бж҃їи сло́ве ,꙳ ра́й чл҃кѡмъ ѿве́рзлъ є҆сѝ ,꙳ и҆ вᲂскр҃съ ,꙳ ме́ртвыѧ ꙳ сᲂвᲂста́вилъ є҆сѝ живᲂтѐ на́шъ ,꙳ и҆ сме́рть плѣни́лъ є҆сѝ си́лᲂю свᲂе́ю ,꙳ и҆ сᲂвᲂкꙋпи́лъ є҆сѝ къ нбⷭ҇ными ꙳ вᲂи́стинꙋ земна́ѧ ,꙳ и҆ и҆спо́лнилъ є҆сѝ ра́дᲂсти неи҆з̾гл҃анныѧ ,꙳ ли́къ а҆пⷭ҇льскїи , си́мъ ми́ръ вѣща́ѧ . Тлѣ́нїе и҆спрᲂве́ржесѧ ,꙳ и҆ нетлѣ́нїе прᲂцвѣтѐ ,꙳ сᲂꙋ́зъ вре́менныи разрѣши́сѧ ,꙳ небеса̀ да веселѧ́тсѧ ,꙳ и҆ землѧ̀ и҆ ꙗ҆́же на не́й .꙳ вᲂскр҃съ хрⷭ҇то́съ ,꙳ плѣне́на бы́сть сме́рть ,꙳ и҆ весе́лїѧ ꙗ҆ви́сѧ де́нь .꙳ затвᲂре́нымъ две́ремъ ,꙳ внꙋ́трь вше́лъ є҆́сть жизнᲂда́вецъ и҆ гдⷭ҇ь . Де́нь и҆́же сᲂтвᲂрѝ гдⷭ҇ь ,꙳ дне́сь вᲂзра́дꙋемсѧ веселѧ́щесѧ ,꙳ жизнᲂда́вецъ вᲂста́лъ є҆́сть ,꙳ а҆́дъ плѣне́нъ бы́сть ,꙳ а҆пⷭ҇льскїи ли́къ ра́дᲂсть слы́шитъ ,꙳ ѡ҆сѧза́лъ є҆́сть ре́бра влⷣчнѧ ꙳ невѣ́рᲂвавыи ѳѡма̀ ,꙳ и҆ ѡ҆сѧза́въ ,꙳ сꙋгꙋ́ба сꙋщество́мъ прᲂпᲂвѣ́да .

стихѣ́ры , в̾ минѣ́и , г҃ . сла́ва , и҆ ны́нѣ . гла́съ , д҃ . ѽ пресла́внᲂе чꙋ́до , невѣ́рїе вѣ́рꙋ и҆звѣ́стнꙋ рᲂдѝ . рече́ бо ѳѡма̀ , а҆́ще неви́жꙋ неи҆мꙋ̀ вѣ́ры . ѡ҆сѧза́вже ре́бра , бг҃ᲂсло́вѧше вᲂпло́щшагᲂсѧ , тᲂго̀ ᲂу҆́бѡ сн҃а бж҃їѧ пᲂзна̀ , ꙗ҆́кѡ пᲂстрада́вша пло́тїю , прᲂпᲂвѣ́да вᲂскре́сшаго бг҃а . и҆ вᲂзᲂпѝ свѣ́тлымъ гла́сᲂмъ , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стⷯры . гла́съ , а҃ . Неразрꙋше́на стѣна̀ , на́мъ є҆́сть чⷭ҇тны́и крⷭ҇тъ сп҃сᲂвъ , на́нь бо надѣ́ющесѧ , спаса́емсѧ всѝ .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Вече́рнїѧ на́ша мл҃твы , прїимѝ ст҃ы́и гдⷭ҇и , и҆ пᲂда́ждь на́мъ ѡ҆ставле́нїе грѣхо́въ , ꙗ҆́кѡ ты̀ є҆ди́нъ є҆сѝ ꙗ҆вле́и в̾ ми́рѣ вᲂскрⷭ҇нїе .

сти́хъ : пᲂми́лꙋй на́съ гдⷭ҇и . мⷱ҇ꙋ . Мл҃твами гдⷭ҇и всѣ́хъ ст҃ы́хъ и҆ бцⷣы , тво́й ми́ръ да́ждь на́мъ , и҆ пᲂми́лꙋй на́съ , ꙗ҆́кѡ є҆ди́нъ ще́дръ .

сла́ва , и҆ ны́нѣ . гла́съ , д҃ . Гдⷭ҇и , нестерпи́мымъ твᲂегѡ̀ бжⷭ҇тва̀ блиста́нїемъ прїи́де , две́ремъ сꙋ́щемъ затвᲂре́нымъ , и҆ ста̀ пᲂсредѣ̀ ᲂу҆чени́къ свᲂи́хъ , ре́бра и҆спыта́ти и҆ ꙗ҆́звы твᲂе́ю рꙋ́кꙋ и҆ нᲂгꙋ̀ , во ѡ҆сѧза́нїѧ ꙗ҆влѧ́ѧ . печа́ль же и҆ ско́рбь разрѣша́ѧ , ꙗ҆́вѣ вᲂзᲂпи́лъ є҆сѝ , и҆́мъ же ѻ҆́бразᲂмъ ви́дите мѧ ѽ дрꙋ́зи , плᲂтьско́е вᲂспрїѧ́тїе нᲂшꙋ̀ , а҆ не дх҃а є҆стество̀ . сᲂмнѧ́щемꙋжесѧ ᲂу҆ченикꙋ̀ , пᲂвелѣва́ше ѡ҆сѧза́ти тре́петнѡ . и҆ речѐ , ты̀ и҆спыта́въ всѧ̀ , грѧдѝ про́чее и҆ не невѣ́рꙋй . ѻ҆́нъ же смᲂтрѧ́ѧ рꙋко́ю , твᲂегѡ̀ сꙋгꙋ́баго сꙋщества̀ , со́ страхᲂмъ вᲂпїѧ́ше вѣ́рнѡ вѣ́рᲂю влеко́мъ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ пѧто́къ , в҃ , недѣ́ли , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ .

По а҃ , стихᲂло́гїи , сѣда́ленъ . гла́съ , а҃ . Крⷭ҇та̀ твᲂегѡ̀ дре́вꙋ пᲂклᲂнѧ́емсѧ чл҃кᲂлю́бче , ꙗ҆́кѡ на не́мъ пригвᲂзди́лсѧ є҆сѝ живᲂтѐ всѣ́хъ . ра́й ѿве́рзлъ є҆сѝ сп҃се вѣ́рᲂю прише́дшемꙋ к̾ тебѣ̀ разбо́йникꙋ , и҆ пи́щи спᲂдо́билъ є҆сѝ , и҆спᲂвѣ́дающаго тѧ̀ пᲂмѧни́ мѧ гдⷭ҇и . прїимѝ ꙗ҆́кᲂже и҆ ѻ҆́нᲂго на́съ зᲂвꙋ́щихъ , сᲂгрѣши́хᲂмъ всѝ , млрⷭ҇дїемъ свᲂи́мъ непре́зри на́съ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . Гро́бъ тво́й сп҃се во́ини стрегꙋ́щїи , ме́ртви бы́ша ѿ ѡ҆блиста́нїѧ ꙗ҆́вльшагᲂсѧ а҆́нг҃ла , прᲂпᲂвѣ́дающа жена́мъ вᲂскрⷭ҇нїе . тебѐ сла́вимъ тлѝ пᲂтреби́телѧ , и҆ тебѣ̀ припа́даемъ вᲂскрⷭ҇шемꙋ и҆́з̾ грᲂба хрⷭ҇тꙋ̀ бг҃ꙋ на́шемꙋ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Страда́нїѧ пᲂхвало́ю , и҆ вѣне́чнᲂю по́честїю , сла́внїи страстᲂте́рпцы ѡ҆дѣ́ющесѧ тᲂбо́ю гдⷭ҇и , терпѣ́нїемъ ᲂу҆́бѡ ра́нъ , без̾зако́нныхъ пᲂбѣди́ша , и҆ си́лᲂю бж҃їею ѿ нб҃съ пᲂбѣ́дꙋ прїѧ́ша . тѣ́хъ мл҃твами хрⷭ҇тѐ бж҃е , да́рꙋй на́мъ ве́лїю ми́лᲂсть . сла́ва , и҆ ны́нѣ , боⷢ҇ . И҆́же твᲂѐ застꙋпле́нїе стѧжа́вше пречⷭ҇таѧ , и҆ твᲂи́ми мл҃твами ѿ бѣ́дъ и҆збавлѧ́еми , крⷭ҇то́мъ сн҃а твᲂегѡ̀ всегда̀ храни́ми вездѣ̀ по́ дᲂлгꙋ тѧ̀ всѝ бл҃гᲂче́стнѡ велича́емъ .

По в҃ , стихᲂло́гїи , сѣда́ленъ . гла́съ , а҃ . Прикᲂснꙋ́всѧ рꙋко́ю ре́брᲂмъ нестерпи́мымъ , близне́цъ ѳѡма̀ , не ѡ҆пали́сѧ прикᲂснᲂве́нїемъ , но пребы́сть ꙗ҆́звы ѡ҆сѧза́ѧ и҆звѣ́стнѡ , и҆ вѣща́ѧ на́съ ра́ди прᲂбᲂде́нᲂмꙋ , ты̀ мо́й гдⷭ҇ь , ты̀ мо́й бг҃ъ є҆сѝ , а҆́ще и҆ распѧ́тїе претерпѣ̀ .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . кано́нъ , пра́здникꙋ . і҆рмо́съ , по двⷤа . трᲂпарѝ , на ѕ҃ .= и҆ ст҃о́мꙋ в̾ минѣ́и , на д҃ . =и҆лѝ :

кано́нъ , пра́здникꙋ . і҆рмо́съ , по двⷤа . трᲂпарѝ , на д҃ .= и҆ с=т҃о́мꙋ в̾ минѣ́и , на ѕ҃ .

по г҃ , пѣ́сни , кᲂнда́къ , и҆ и҆́кᲂсъ , пра́здникꙋ . сѣда́ленъ , ст҃о́мꙋ . сла́ва , и҆ ны́нѣ , пра́здникꙋ .

по ѕ҃ , пѣ́сни , кᲂнда́къ , и҆ и҆́кᲂсъ , ст҃о́мꙋ .

=свѣти́ленъ , =пра́здникꙋ . и҆ ст҃о́мꙋ .

На хвали́тѣхъ , стихѣ́ры , на д҃ . гла́съ , а҃ . Крⷭ҇то́мъ твᲂи́мъ хрⷭ҇тѐ , є҆ди́но ста́до бы́сть а҆́нг҃лѡмъ и҆ чл҃кѡмъ , и҆ во є҆ди́нᲂмъ сᲂбо́рѣ нб҃о и҆ землѧ̀ весели́тасѧ , гдⷭ҇и сла́ва тебѣ̀ . двⷤа . Пᲂе́мъ твᲂю̀ хрⷭ҇тѐ спасе́нꙋю стрⷭ҇ть , и҆ сла́вимъ твᲂѐ вᲂскрⷭ҇нїе . мⷱ҇ꙋ . Страстᲂте́рпцы хрⷭ҇то́вы , прїидѣ́те лю́дїе всѝ пᲂчте́мъ , пѣ́сньми и҆ пѣ́нїи дх҃о́вными , прᲂсвѣ́щники ми́рꙋ , и҆ прᲂпᲂвѣ́дники вѣ́рѣ , и҆ и҆сто́чники при́снѡ текꙋ́щїѧ , и҆з̾ ни́хже и҆ стека́ютъ вѣ́рнымъ и҆сцѣле́нїѧ . тѣ́хъ мл҃твами хрⷭ҇тѐ бж҃е на́шъ , ми́ръ да́рꙋй всемꙋ̀ ми́рꙋ , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ . гла́съ , и҃ . Две́ремъ затвᲂре́нымъ , и҆ ᲂу҆ченико́мъ со́бранымъ , прїи́де сп҃съ , и҆дѣ́же бѧ́хꙋ со́брани , и҆ ста̀ пᲂсредѣ̀ и҆́хъ гл҃а ѳѡмѣ̀ , прїидѝ ѡ҆сѧжѝ , и҆ ви́ждь ꙗ҆́звы гвᲂзде́мъ , прᲂстрѝ рꙋ́кꙋ твᲂю̀ , и҆ кᲂсни́сѧ ребрꙋ̀ мᲂемꙋ̀ , и҆ небꙋ́ди невѣ́ренъ , но вѣ́рᲂю прᲂпᲂвѣ́ждь , є҆́же и҆з̾ ме́ртвыхъ мᲂѐ вᲂскрⷭ҇нїе .

На стихо́внѣ , стⷯры . гла́съ , в҃ . поⷣ . є҆гда̀ ѿ́ древа . Нѣ́дръ не ѡ҆ста́вль ѻ҆те́ческихъ ꙗ҆ви́сѧ на землѝ плᲂтᲂно́сецъ , за млрⷭ҇дїе хрⷭ҇тѐ . стра́сть же и҆ сме́рть прїе́мъ , и҆ вᲂскрⷭ҇лъ є҆сѝ тридне́венъ , и҆ две́ремъ затвᲂре́нᲂмъ внꙋ́трь вше́лъ є҆сѝ ꙗ҆́кѡ всеси́ленъ . тѣ́мже ре́бра твᲂѧ̀ бжⷭ҇твенаѧ , ра́дꙋѧсѧ ѳѡма̀ ѡ҆сѧза́въ , гдⷭ҇а и҆ зижди́телѧ тѧ прᲂсла́ви .

сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Гвᲂздьмѝ пригвᲂзди́сѧ на крⷭ҇тѣ̀ , и҆ кᲂпїе́мъ въ ре́бра прᲂбᲂде́сѧ , же́лчи вкꙋсѝ хрⷭ҇тѐ , и҆ сме́рть претерпѣ́лъ є҆сѝ . во́ грᲂбѣ пᲂлᲂжи́сѧ ꙗ҆́кѡ ме́ртвъ , ꙗ҆́кᲂже бг҃ъ сᲂкрꙋши́лъ є҆сѝ ᲂу҆́зы а҆́дᲂвы , и҆ сᲂвᲂскреси́лъ є҆сѝ и҆́же ѿ́ вѣка ме́ртвыѧ . тѣ́мже печа́ти неразрꙋши́въ , свᲂи́мъ ᲂу҆ченико́мъ ꙗ҆ви́лсѧ є҆сѝ , свᲂѐ вᲂскрⷭ҇нїе ᲂу҆вѣрѧ́ѧ .

сти́хъ : нб҃са̀ пᲂвѣ́даютъ сла́вꙋ бж҃їю ,꙳ твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . Па́сха настᲂѧ́щїи пра́здникъ . па́сха та́йнаѧ . па́сха бжⷭ҇твенаѧ . па́сха спаси́тельнаѧ . па́сха к̾ без̾сме́ртнѣй жи́зни привᲂдѧ̀ на́съ . па́сха всѧ́кꙋ ско́рбь ѿє́млѧ ѿ среды̀ . па́сха весе́лїѧ , бл҃гᲂда́ть даю́щи ᲂу҆ченико́мъ . тѣ́мже ѳѡма̀ вᲂпїѧ́ше , гдⷭ҇ь бг҃ъ мо́й є҆сѝ , плѣни́выи а҆́дᲂва црⷭ҇твїѧ . сла́ва , и҆ ны́нѣ . гла́съ , и҃ . Прикᲂсни́сѧ ребрꙋ̀ ѳѡма̀ рꙋко́ю , гл҃етъ хрⷭ҇то́съ , и҆ ꙗ҆́звы гвᲂзди́нныѧ прїидѝ ѡ҆сѧжѝ , вѣ́рᲂю и҆спыта́й , и҆ бꙋ́ди ми вѣ́ренъ и҆ непребыва́й невѣ́ренъ . ѳѡма́ же пе́рстᲂмъ ꙗ҆́кѡ прикᲂснꙋ́сѧ влⷣцѣ , вельмѝ вᲂзᲂпи́въ , ты̀ бг҃ъ мо́й и҆ гдⷭ҇ь , бл҃гᲂꙋтро́бне сла́ва тебѣ̀ .

та́же , бл҃го є҆́сть и҆спᲂвѣ́датисѧ гдⷭ҇ви . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . та́же ,= ча́съ , а҃ . =и҆ =ѿпꙋ́стъ .

Въ пѧто́къ , на блаже́ннахъ , трипѣ́снецъ . є҆мꙋ́же краегране́сїе : сла́ва бг҃ꙋ а҆ми́нь . гла́съ , а҃ . пѣ́снь , є҃ . і҆рмо́съ . свѣ́тлыи на́мъ вᲂз̾сїѧ́й .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Сᲂбо́ръ є҆вре́йскїи , тебѐ дᲂлгᲂтерпѣли́вагѡ сло́ве распѧ́тъ , сᲂбо́ръ же безчи́сленыи ꙗ҆зы́кѡмъ всѣ́хъ , твᲂи́мъ распѧ́тїемъ спа́слъ є҆сѝ , чл҃кᲂлю́бче хрⷭ҇тѐ бж҃е на́шъ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Непᲂкᲂлѣба́лъ є҆сѝ ка́мене зна́менїѧ , вᲂскрⷭ҇нїемъ твᲂи́мъ , ꙗ҆́кᲂже и҆ не ѿве́рзлъ є҆сѝ в̾ ржⷭ҇твѣ̀ твᲂе́мъ , дв҃ства ключа̀ ро́ждьшѣй тѧ хрⷭ҇тѐ бж҃е на́шъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Стра́ннымъ ѻ҆́бразᲂмъ ви́дѣвше , бжⷭ҇твенѣ блиста́ющасѧ беспло́тнагѡ жены̀ , ᲂу҆́жасни бы́вше , слы́шахꙋ , непла́чите , вᲂскр҃се гдⷭ҇ь .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Ст҃а гдⷭ҇а си́ламъ пречⷭ҇таѧ рᲂдила̀ є҆сѝ , и҆стᲂщи́вшагѡ а҆́дᲂва црⷭ҇твїѧ и҆ вᲂскр҃сша , и҆ сᲂвᲂскр҃си́вша чл҃ческᲂе смѣше́нїе .

пѣ́снь , и҃ . і҆рмо́съ . пѣснᲂслᲂве́сники в̾ пещѝ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . И҆́же во́лею распе́ншагᲂсѧ , и҆ пᲂло́жьшасѧ во́ грᲂбѣ , и҆ ᲂу҆праздни́вшагѡ сме́рти держа́вꙋ , хрⷭ҇та̀ бг҃а по́йте , и҆ превᲂзнᲂси́те є҆гѡ̀ во́ вѣки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Ꙗ҆ви́лсѧ є҆сѝ пе́рвѣе жена́мъ вᲂста́въ и҆́з̾ грᲂба , и҆ бл҃гᲂвѣ́стницы пᲂсла́въ и҆́хъ а҆пⷭ҇лѡмъ хрⷭ҇тѐ . тѣ́мже тѧ хвалᲂсло́вимъ во всѧ̀ вѣ́ки .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Разрꙋши́въ ще́дре крѣ́пᲂстїю , сме́рти си́лꙋ , и҆ а҆́дᲂва црⷭ҇твїѧ , ꙗ҆́кѡ сы́и цр҃ь и҆стᲂщи́лъ є҆сѝ . тѣ́мже тѧ хвалᲂсло́вимъ во всѧ̀ вѣ́ки .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ре́клъ є҆сѝ ᲂу҆ченико́мъ вᲂста́въ , во все́мъ ми́рѣ прᲂпᲂвѣ́дати пᲂтщи́тесѧ мᲂю̀ си́лꙋ , и҆зима́юще тмꙋ̀ мнᲂгᲂбо́жїѧ свѣ́тᲂмъ и҆́стиннымъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ꙗ҆́кѡ нб҃съ вы́шши , и҆ херꙋви́мъ лꙋ́чши , честнѣ́йши же всест҃а́ѧ дв҃о тва́ри всеѧ̀ , мᲂли́сѧ ѡ҆ и҆́же в̾ вѣ́рѣ при́снѡ тѧ сла́вѧщихъ .

пѣ́снь , ѳ҃ . і҆рмо́съ . живᲂно́сныи и҆сто́чникъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ра́дꙋетсѧ землѧ̀ всѧ̀ дне́сь , и҆ весе́лїе ѻ҆́блацы да крᲂпѧ́тъ , на́ древѣ бо гдⷭ҇ь сла́вы распны́исѧ , и҆ вᲂста̀ тлѝ сме́ртныѧ на́съ свᲂбᲂди́въ , и҆ нетлѣ́нїемъ прᲂсвѣти́въ , ꙗ҆́кѡ бл҃гᲂꙋтро́бенъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Мѵ́рѡ и҆нᲂгда̀ нᲂсѧ́щимъ со слеза́ми сщ҃е́ннымъ жена́мъ , ѿвѣщава́ше а҆́нг҃лъ блиста́ѧисѧ свѣ́тлѡ на́ грᲂбѣ , с̾ ме́ртвыми жива́гѡ пᲂчто̀ и҆́щете ; се́й вᲂскр҃се прᲂсвѣти́въ всѧ́ческаѧ .

сла́ва . Свѣтᲂза́рнᲂе бг҃а на́шегѡ вᲂста́нїе , па́че со́лнечныхъ заре́й ѡ҆свѧща́ѧ дх҃ᲂмъ вѣ́рныхъ . во́ вѣки всѣ́хъ прᲂсвѣща́етъ , и҆ наставлѧ́етъ ко спасе́нїю . се́же чи́стᲂю мы́слїю пра́зднꙋемъ .

и҆ ны́нѣ , боⷢ҇ . Оу҆мерщве́ныхъ на́съ грѣхᲂпаде́ньми , ꙗ҆́же живо́тъ вѣ́чныи рᲂди́вшаѧ бцⷣе ѡ҆живѝ , и҆ твᲂри́ти пᲂспѣшѝ , ꙗ҆́же к̾ живᲂтꙋ̀ и҆́стиннᲂмꙋ наставлѧ́ющаѧ , ꙗ҆́кѡ да вѣ́рᲂю тѧ̀ при́снѡ ᲂу҆блажа́емъ .

Въ пѧто́къ , в҃ , нлⷣи , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , а҃ . По́ днехъ ѻ҆сми́хъ вᲂста́нїѧ твᲂегѡ̀ гдⷭ҇и , ꙗ҆ви́лсѧ є҆сѝ ᲂу҆ченико́мъ свᲂи́мъ , в̾ мѣ́стѣ и҆дѣ́же бѧ́хꙋ со́брани , и҆ вᲂз̾гласи́въ и҆́мъ ми́ръ ва́мъ , и҆ невѣ́рꙋющемꙋ ᲂу҆ченикꙋ̀ рꙋ́цѣ пᲂказа̀ и҆ пречⷭ҇таѧ ре́бра . ѻ҆́нъ же вѣ́рᲂвавъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ . Две́ремъ затвᲂре́нымъ , и҆ ᲂу҆ченико́мъ со́бранымъ , в̾ни́де в̾неза́пꙋ всеси́льне і҆с҃е сп҃се на́шъ , и҆ ста́въ пᲂсредѝ и҆́хъ , ми́ръ да́въ , и҆ и҆спо́лнилъ є҆сѝ дх҃а ст҃а́го . жда́ти же пᲂвелѣ́лъ є҆сѝ и҆ ника́кᲂже ѿлꙋча́тисѧ ѿ і҆єрⷭ҇ли́ма , до́ндеже ѡ҆блече́тесѧ є҆́же свы́ше в̾ си́лꙋ . сегѡ̀ ра́ди вᲂпїе́мъ ти прᲂсвѣще́нїе и҆ вᲂскрⷭ҇нїе , и҆ смире́нїе на́ше сла́ва тебѣ̀ . Ѳѡма̀ гл҃емыи близне́цъ , небѣ̀ с̾ ни́ми є҆гда̀ вни́де хрⷭ҇тѐ затвᲂре́нымъ две́ремъ , тѣ́мже и҆ невѣ́рᲂваше гл҃емымъ є҆мꙋ̀ , ѿ невѣ́рїѧ вѣ́рꙋ и҆звѣстꙋ́ѧ . не неспᲂдо́билъ же є҆сѝ бла́же , пᲂказа́ти є҆мꙋ̀ пречⷭ҇таѧ ре́бра свᲂѧ̀ , и҆ рꙋка́мъ и҆ нᲂга́мъ ꙗ҆́звы . ѻ҆́нъ же ѡ҆сѧза́въ и҆ ви́дѣвъ , и҆спᲂвѣ́да тебѐ бы́ти бг҃а нена́га , и҆ чл҃ка не́прᲂста , и҆ вᲂпїѧ́ше , гдⷭ҇ь мо́й и҆ бг҃ъ мо́й сла́ва тебѣ̀ .

стихѣ́ры , в̾ минѣ́и , г҃ . сла́ва . гла́съ , ѕ҃ . Две́ремъ затвᲂре́нымъ , прїи́де хрⷭ҇то́съ ко ᲂу҆ченико́мъ . тᲂгда̀ ѳѡма̀ по смᲂтре́нїю не ѡ҆брѣ́тесѧ с̾ ни́ми . и҆ гл҃аше ᲂу҆́бѡ неимꙋ̀ вѣ́ры , а҆́ще неви́жꙋ а҆́зъ влⷣки . ви́жꙋ ребро̀ , ѿ него́же и҆зы́де кро́вь и҆ вᲂда̀ креще́нїѧ . ви́жꙋ ꙗ҆́звꙋ , ѿ неѧ́же и҆сцѣли́сѧ вели́кїи стрꙋ́пъ челᲂвѣ́чь . ви́жꙋ ка́кѡ небѣ̀ ꙗ҆́кѡ дх҃ъ , но ᲂу҆́бѡ пло́ть и҆ ко́сти . и҆́же сме́рть пᲂпра́выи , и҆ ѳѡмꙋ̀ ᲂу҆вѣ́ривыи , гдⷭ҇и сла́ва тебѣ̀ . и҆ ны́нѣ , боⷢ҇ . гла́съ , а҃ . Всеми́рнꙋю сла́вꙋ ѿ чл҃къ прᲂзѧ́бшꙋю , и҆ влⷣкꙋ ро́ждьшꙋю , нбⷭ҇нꙋю две́рь вᲂспᲂе́мъ мр҃і́ю дв҃цꙋ , беспло́тнымъ пѣ́снь , и҆ вѣ́рнымъ ᲂу҆дᲂбре́нїе . та́бо ꙗ҆ви́сѧ нб҃о и҆ цр҃кви бжⷭ҇твеннаѧ . та̀ прегражде́нїе вражды̀ разрꙋши́вши , смире́нїе в̾ведѐ и҆ црⷭ҇тво ѿве́рзе . тᲂѧ̀ ᲂу҆́бѡ и҆мꙋ́щи вѣ́рнᲂе ᲂу҆тверже́нїе , пᲂбо́рника и҆́мамы , и҆з̾ неѧ̀ ро́ждьшагᲂсѧ гдⷭ҇а . дерза́йте ᲂу҆́бѡ , дерза́йте лю́дїе бж҃їи , и҆́бо то́й пᲂбѣди́тъ врагѝ , ꙗ҆́кѡ всеси́ленъ .

На стихо́внѣ , стⷯры . гла́съ , а҃ . Вече́рнїѧ на́ша мл҃твы , прїимѝ ст҃ы́и гдⷭ҇и , и҆ пᲂда́ждь на́мъ ѡ҆ставле́нїе грѣхо́въ , ꙗ҆́кѡ ты̀ є҆ди́нъ є҆сѝ ꙗ҆вле́и в̾ ми́рѣ вᲂскрⷭ҇нїе .

сти́хъ : гдⷭ҇ь вᲂцр҃и́сѧ ,꙳ в̾лѣ́пᲂтꙋсѧ ѡ҆блечѐ . Ѡ҆бъи҆ди́те лю́дїе сїѡ́нъ , и҆ ѡ҆бъи҆ми́те є҆гѡ̀ , и҆ дади́те сла́вꙋ в̾ не́мъ , вᲂскрⷭ҇шемꙋ и҆з̾ ме́ртвыхъ , ꙗ҆́кѡ то́й є҆́сть бг҃ъ на́шъ , и҆збавле́и на́съ ѿ без̾зако́нїи на́шихъ .

сти́хъ : и҆́бо ᲂу҆҆твердѝ вселе́ннꙋю ,꙳ ꙗ҆́же не пᲂдви́житсѧ . Прїиди́те лю́дїе пᲂе́мъ , и҆ пᲂклᲂни́мсѧ хрⷭ҇тꙋ̀ ,= =сла́вѧще є҆гѡ̀ є҆́же и҆з̾ ме́ртвыхъ вᲂскрⷭ҇нїе . ꙗ҆́кѡ то́й є҆́сть бг҃ъ на́шъ , и҆́же ѿ́ лести вра́жїѧ ве́сь ми́ръ и҆збавле́и .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Стра́стїю твᲂе́ю хрⷭ҇тѐ , ѿ стрⷭ҇те́й свᲂбᲂди́хᲂмсѧ , и҆ вᲂскрⷭ҇нїемъ твᲂи́мъ и҆з̾ и҆стлѣ́нїѧ и҆збы́хᲂмъ , гдⷭ҇и сла́ва тебѣ̀ .

сла́ва , и҆ ны́нѣ . гла́съ , є҃ . Чл҃кᲂлю́бче , ве́лїе и҆ не и҆сче́тно мно́жество щедро́тъ твᲂи́хъ . ꙗ҆́кѡ претерпѣ́лъ є҆сѝ , ѿ і҆ꙋде́й заꙋша́емь , и҆ ѿ а҆пⷭ҇лъ ѡ҆сѧза́емь , и҆ ѿ ѿмета́ющихсѧ тебѐ мно́гѡ и҆спытꙋ́емъ , ка́кѡ вᲂплᲂти́лсѧ є҆сѝ ; и҆ ка́кѡ распѧ́лсѧ є҆сѝ без̾грѣ́шне ; но вразꙋмѝ на́съ , ꙗ҆́кᲂже и҆ ѳѡмꙋ̀ вᲂпи́ти тебѣ̀ , гдⷭ҇ь мо́й и҆ бг҃ъ мо́й сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ сꙋбо́тꙋ , в҃ , недѣ́ли , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ .

По а҃ , стихᲂло́гїи , сѣда́ленъ . гла́съ , а҃ . Гро́бъ тво́й сп҃се во́ини стрегꙋ́ще , ѿ ѡ҆блиста́нїѧ ꙗ҆́вльшагᲂсѧ а҆́нг҃ла ме́ртви бы́ша , прᲂпᲂвѣ́дающа жена́мъ вᲂскрⷭ҇нїе . тебѐ сла́вимъ тлѝ пᲂтреби́телѧ , тебѣ̀ припа́даемъ вᲂскрⷭ҇шемꙋ и҆́з̾ грᲂба , є҆ди́нᲂмꙋ бг҃ꙋ на́шемꙋ . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Жены̀ ко́ грᲂбꙋ прїидо́ша ᲂу҆ра́ньшїи , и҆ а҆́нг҃льскᲂе ꙗ҆вле́нїе ви́дѣвше трепета́хꙋ . гро́бъ ѡ҆блистава́ше жи́знь , чꙋ́до ᲂу҆жаса́ше и҆́хъ . сегѡ̀ ра́ди ше́дше , ᲂу҆чн҃кѡ́мъ прᲂпᲂвѣ́дахꙋ вᲂскрⷭ҇нїе . а҆́да и҆спрᲂве́ргъ хрⷭ҇то́съ , ꙗ҆́кѡ є҆ди́нъ крѣ́пᲂкъ и҆ си́ленъ . и҆ сᲂвᲂста́ви ᲂу҆ме́ршїѧ всѧ̀ , ѡ҆сꙋжде́нїѧ стра́хъ разрꙋши́въ крⷭ҇то́мъ .= сла́ва , и҆ ны́нѣ , боⷢ҇ . Г=аврїи́лꙋ прᲂвѣща́вшꙋ тѝ дв҃о , є҆́же ра́дꙋисѧ . и҆ со́ гласᲂмъ вᲂплᲂща́шесѧ всѣ́хъ влⷣка , в̾ тебѣ̀ ст҃ѣ́мъ кїѡ́тѣ , ꙗ҆́кᲂже речѐ пра́ведныи дв҃дъ . ꙗ҆ви́сѧ прᲂстра́ннѣйши небе́съ , пᲂнᲂси́вши зижди́телѧ свᲂегѡ̀ . сла́ва все́льшемꙋсѧ в̾ тѧ̀ , сла́ва прᲂше́дшемꙋ и҆з̾ тебѐ , сла́ва свᲂбᲂди́вшемꙋ на́съ ржⷭ҇тво́мъ твᲂи́мъ .

По в҃ , стихᲂло́гїи , сѣда́ленъ . гла́съ , а҃ . Ви́дѣвъ мᲂѐ ребро̀ , не невѣ́рꙋй ми мно́жае , сло́во ѳѡмѣ̀ невѣ́рꙋющꙋ вᲂпїѧ́ше , пе́рстᲂмъ мѧ ѡ҆сѧжѝ , и҆ рꙋко́ю и҆спыта́й , и҆ пᲂзна́въ гвᲂзди́нныѧ ꙗ҆́звы , ми́рᲂви прᲂпᲂвѣ́дꙋй , живᲂно́снᲂе мᲂѐ сїѐ и҆́з̾ грᲂба вᲂскрⷭ҇нїе .= сла́ва , и҆ ны́нѣ . Б=л҃же́нъ є҆сѝ ты̀ а҆пⷭ҇ле , ꙗ҆́звꙋ ѡ҆сѧза́въ лꙋ́чшихъ ре́бръ , и҆́же сею̀ вели́кꙋю ꙗ҆́звꙋ чл҃ка и҆сцѣли́вшꙋю , и҆ на́мъ вѣ́рᲂвавшимъ непᲂги́бельнᲂе бл҃же́нство и҆схᲂда́таивъ , є҆ди́нѣмъ гл҃ᲂмъ . тѣ́мже ст҃о́е вᲂскрⷭ҇нїе пра́зднꙋемъ .

та́же , вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . кано́нъ , пра́здникꙋ . і҆рмо́съ , по двⷤа . трᲂпарѝ , на д҃ .= и҆ ст҃о́мꙋ , є҆мꙋ́же є҆́сть хра́мъ , на д҃ . и҆ =въ минѣ́и , на д҃ . =свѣти́ленъ , =пра́здникꙋ .

На хвали́тѣхъ , стⷯры , на д҃ . гла́съ , а҃ . Пᲂе́мъ твᲂю̀ хрⷭ҇тѐ спасе́нꙋю стра́сть , и҆ сла́вимъ твᲂѐ вᲂскрⷭ҇нїе .= Распѧ́тїе претерпѣ́въ , и҆ сме́рть ᲂу҆праздни́въ , и҆ вᲂскр҃съ и҆з̾ ме́ртвыхъ , ᲂу҆мирѝ на́шꙋ жи́знь гдⷭ҇и , ꙗ҆́кѡ є҆ди́нъ всеси́ленъ . И҆́же а҆́да плѣни́въ , и҆ чл҃ка вᲂскр҃си́въ , вᲂскрⷭ҇нїемъ свᲂи́мъ хрⷭ҇тѐ , спᲂдо́би на́съ чи́стымъ срⷣцемъ , тебѣ̀ пѣ́ти и҆ сла́вити . Бг҃ᲂлѣ́пнᲂе твᲂѐ смᲂтре́нїе сла́вѧще , вᲂпїе́мъ ти хрⷭ҇тѐ , рᲂжде́исѧ ѿ дв҃ы , и҆ неразлꙋ́ченъ бѣ̀ ѿ ѻ҆ц҃а , пᲂстрада̀ ꙗ҆́кѡ чл҃къ , и҆ во́лею претерпѣ̀ распѧ́тїе , вᲂста̀ и҆́з̾ грᲂба ꙗ҆́кѡ жени́хъ ѿ черто́га прᲂше́дъ , да спасе́ши всегѡ̀ ми́ра , гдⷭ҇и сла́ва тебѣ̀ . =сла́ва , и҆ ны́нѣ . гла́съ , ѕ҃ . По́ днехъ ѻ҆сми́хъ вᲂста́нїѧ твᲂегѡ̀ гдⷭ҇и , ꙗ҆ви́лсѧ є҆сѝ ᲂу҆ченико́мъ свᲂи́мъ , в̾ мѣ́стѣ и҆дѣ́же бѧ́хꙋ со́брани , и҆ вᲂз̾гласи́въ и҆́мъ ми́ръ ва́мъ , и҆ невѣ́рꙋющемꙋ ᲂу҆ченикꙋ̀ рꙋ́цѣ пᲂказа̀ и҆ пречⷭ҇таѧ ре́бра . ѻ҆́нже вѣ́рᲂвавъ вᲂзᲂпѝ , гдⷭ҇ь мо́й и҆ бг҃ъ мо́й сла́ва тебѣ̀ .

На стихо́внѣ , стихѣ́ры . гла́съ , а҃ . поⷣ . прехва́льнїи мч҃нцы . По є҆́же и҆́з̾ грᲂба ,꙳ твᲂе́мъ стра́шнѣмъ живᲂда́вче вᲂста́нїи ,꙳ ꙗ҆́кᲂже печа́ти неразрꙋшѝ хрⷭ҇тѐ гро́бныѧ .꙳ та́кѡ затвᲂре́нымъ две́ремъ вше́лъ є҆сѝ ,꙳ къ пресла́внымъ ᲂу҆ченико́мъ свᲂи́мъ ,꙳ ра́дᲂсть твᲂрѧ̀ и҆́мъ ,꙳ и҆ пра́выи сво́й дх҃ъ пᲂдаѧ̀ и҆́мъ ,꙳ за без̾мѣ́рнꙋю свᲂю̀ ми́лᲂсть .

сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Ѳѡма̀ и҆́же близне́цъ ,꙳ небѣ̀ прише́лъ ,꙳ є҆гда̀ ты̀ ᲂу҆ченико́мъ ꙗ҆ви́сѧ гдⷭ҇и ,꙳ тѣ́мже и҆ невѣ́рᲂва ,꙳ твᲂемꙋ̀ вᲂскрⷭ҇нїю .꙳ и҆ ви́дѣвшимъ тѧ̀ вᲂпїѧ́ше ,꙳ а҆́ще невлᲂжꙋ̀ пе́рсты в̾ ре́бра є҆гѡ̀ .꙳ и҆ в̾ гвᲂзди́нныѧ ꙗ҆́звы ,꙳ невѣ́рꙋю ꙗ҆́кѡ вᲂста́лъ є҆́сть .

сти́хъ : нб҃са̀ пᲂвѣ́даютъ сла́вꙋ бж҃їю ,꙳ твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . Ꙗ҆́кᲂже хо́щеши ѡ҆сѧжѝ ,꙳ хрⷭ҇то́съ ѳѡмѣ̀ вᲂпїѧ́ше ,꙳ влᲂжѝ рꙋ́кꙋ , и҆ пᲂзна́й мѧ ,꙳ ко́сти и҆мꙋ́ща и҆ земнꙋ́ю пло́ть ,꙳ и҆ небꙋ́ди невѣ́ренъ ,꙳ но ꙗ҆́кᲂже ᲂу҆́бѡ слы́ша ѿ и҆нѣ́хъ вѣ́рꙋй .꙳ ѻ҆́нъ же вᲂзᲂпѝ ,꙳ бг҃ъ мо́й , и҆ гдⷭ҇ь ты̀ є҆сѝ .꙳ сла́ва вᲂста́нїю твᲂемꙋ̀ .

сла́ва , и҆ нн҃ѣ . гла́съ , и҃ . Две́ремъ затвᲂре́нымъ , и҆ ᲂу҆ченико́мъ со́бранымъ , прїи́де сп҃съ , и҆дѣ́же бѧ́хꙋ со́брани , и҆ ста̀ пᲂсредѣ̀ и҆́хъ гл҃а ѳѡмѣ̀ , прїидѝ ѡ҆сѧжѝ , и҆ ви́ждь ꙗ҆́звы гвᲂзде́мъ , прᲂстрѝ рꙋ́кꙋ твᲂю̀ , и҆ кᲂсни́сѧ ребрꙋ̀ мᲂемꙋ̀ , и҆ небꙋ́ди невѣ́ренъ , но вѣ́рᲂю прᲂпᲂвѣ́ждь , є҆́же и҆з̾ ме́ртвыхъ мᲂѐ вᲂскрⷭ҇нїе .

та́же , бл҃го є҆́сть и҆спᲂвѣ́датисѧ гдⷭ҇ви . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . та́же ,= ча́съ , а҃ . =и҆ =ѿпꙋ́стъ .

Въ сꙋбо́тꙋ , на блаже́ннахъ , четверᲂпѣ́снецъ . є҆мꙋ́же краегране́сїе : пᲂю̀ пе́рвыи гла́съ . гла́съ , а҃ . пѣ́снь , ѕ҃ . і҆рмо́съ . ѡ҆бы́де на́съ .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Пригвᲂзди́ша тѧ на крⷭ҇тѣ̀ без̾зако́ннїи є҆вре́и дᲂлгᲂтерпѣли́ваго , и҆́х̾же де́рзᲂсть сл҃нце зрѧ̀ а҆́бїе и҆ лꙋна̀ , свѣ́тъ сᲂкры́ша , и҆ ме́ртвїи вᲂста́вше , тѧ̀ хрⷭ҇тѐ вᲂспѣва́хꙋ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Да то́чатъ го́ры сла́дᲂсть дне́сь , и҆ лю́дїе да ра́дꙋютсѧ , вᲂскр҃се бо тридне́внѡ хрⷭ҇то́съ , разрѣ́шь сме́ртныѧ бᲂлѣ́зни . тѣ́мже тᲂмꙋ̀ вѣ́рнїи сᲂгла́снѡ всѝ хвалꙋ̀ принесе́мъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Ꙗ҆́кѡ ᲂу҆тренева́ша хрⷭ҇тѐ на́ грᲂбъ тво́й жены̀ бг҃ᲂмꙋ́дрыѧ , ви́дѣша а҆́нг҃ла вᲂз̾вѣща́юща и҆́мъ , твᲂѐ свѣтᲂно́снᲂе вᲂскрⷭ҇нїе , и҆ вᲂз̾гласѝ , мѵ́рѡ живо́мꙋ что̀ ны́нѣ принᲂша́ете .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Лᲂжесна̀ твᲂѧ̀ чи́стаѧ невреди́въ , рᲂди́выисѧ ꙗ҆́кᲂже и҆зво́ли , и҆ неразрꙋ́шь печа́ти гро́бꙋ , вᲂскр҃се ꙗ҆́кᲂже вᲂсхᲂтѣ̀ , всѧ́ бо бл҃га́ѧ твᲂри́тъ ꙗ҆́кѡ живᲂда́вецъ и҆ всеси́ленъ .

пѣ́снь , з҃ . і҆рмо́съ . тебѐ мы́сленнꙋю бцⷣе пе́щь .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Распны́исѧ влⷣко со двѣма̀ разбо́йникᲂма , и҆ ѻ҆цта̀ напᲂе́нъ бы́въ , и҆ заꙋше́нїе пᲂд̾е́мъ на́съ ра́ди дᲂлгᲂтерпѣли́ве , во́лею всѧ̀ претерпѣ́лъ є҆сѝ , и҆ вᲂскр҃се тридне́внѡ , прехва́льныи ѻ҆ц҃ъ на́шихъ бж҃е , бл҃гᲂслᲂве́нъ є҆сѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Мертвᲂлѣ́пнѡ і҆ѡ́сифъ снѧ́тъ ѿ́ древа , и҆ пᲂгребе́нїю предадѐ любе́знѡ , тѣ́ло твᲂѐ пречⷭ҇тᲂе , любо́вїю ѡ҆блᲂбыза́ше , и҆ ра́дꙋѧсѧ вᲂпїѧ́ше ти , прехва́льныи ѻ҆ц҃ъ на́шихъ бж҃е , бл҃гᲂслᲂве́нъ є҆сѝ .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Съ ме́ртвыми жива́гѡ что̀ и҆́щете , глаго́лаше ꙗ҆вле́исѧ а҆́нг҃лъ пла́чꙋщимсѧ жена́мъ ; и҆ что̀ мѵ́рѡ принᲂша́ете ; но ше́дше ᲂу҆ченико́мъ є҆гѡ̀ рцы́те , ᲂу҆мертви́выисѧ вᲂста̀ хрⷭ҇то́съ , не к̾ тᲂмꙋ̀ кры́йтесѧ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . Въ жена́хъ є҆ди́на ѡ҆бра́дᲂваннаѧ , пᲂда́телѧ бо ра́дᲂсти а҆рха́нг҃лᲂвѣмъ гла́сᲂмъ , ра́дᲂстнѡ рᲂдила̀ є҆сѝ . тѣ́мже тѧ̀ чте́мъ , и҆ сн҃ꙋ твᲂемꙋ̀ зᲂве́мъ , прехва́льныи ѻ҆ц҃ъ на́шихъ бж҃е , бл҃гᲂслᲂве́нъ є҆сѝ .

пѣ́снь , и҃ . і҆рмо́съ . впещѝ дѣ́ти і҆и҃левы .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Лю́дїе тѧ пре́жде невѣ́рнїи є҆вре́и є҆́мше , и҆ за́вистїю вᲂз̾несо́ша на крⷭ҇тъ враже́бнѡ , нехᲂтѧ́ще вᲂпи́ти тебѣ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ѡ҆блᲂбыза́ше любо́вїю і҆ѡ́сифъ , тѣ́ло и҆спрᲂси́въ , и҆ во́ грᲂбѣ пᲂлᲂжѝ ꙗ҆́кѡ ме́ртво . са́мъ же сᲂкрꙋши́лъ є҆́сть хрⷭ҇то́съ сме́рти всѧ̀ ключѝ , вереи́ же и҆ врата̀ , и҆ тридне́внѡ вᲂскрⷭ҇лъ є҆́сть .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ꙗ҆́кѡ сы́и мѵ́рѡ мы́сленᲂе , ѕѣлѡ̀ ра́нѡ прїидо́ша пᲂма́зати тѣ́ло твᲂѐ , же́нскїи ли́къ , и҆ ѡ҆брѣто́ша а҆́нг҃ла вᲂпїю́ща к̾ ни́мъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

пᲂмѧнѝ на́съ гдⷭ҇и ,꙳ є҆гда̀ прїи́деши во црⷭ҇твїи сѝ . боⷢ҇ . Непрело́жна рᲂдила̀ є҆сѝ сн҃а бжⷭ҇твенымъ сꙋщество́мъ мр҃і́е бл҃гᲂслᲂве́наѧ , а҆́ще и҆ ꙗ҆ви́сѧ на́съ ра́ди пло́тїю , ꙗ҆́кᲂже бл҃гᲂи҆зво́ли . є҆мꙋ́же вᲂпїе́мъ , всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . ѻ҆́бразъ чи́стагѡ .

пᲂмѧнѝ на́съ влⷣко ,꙳ є҆гда̀ прїи́деши во црⷭ҇твїи сѝ . Ста́лъ є҆сѝ влⷣко на́ древѣ крⷭ҇тнѣмъ , и҆ всѧ̀ ꙗ҆зы́ки къ ра́зꙋмꙋ привле́клъ є҆сѝ гдⷭ҇и , и҆ ра́й ѿве́рзлъ є҆сѝ , є҆го́же затвᲂри́ша пре́же пра́ѻ҆ц҃ы , вкꙋше́нїемъ дре́ва . тѣ́мже тѧ всѝ велича́емъ .

пᲂмѧнѝ на́съ ст҃ы́и ,꙳ є҆гда̀ прїи́деши во црⷭ҇твїи сѝ . Въ ро́вѣ ꙗ҆́кѡ ме́ртва пᲂлᲂжи́ша тѧ жи́зни пᲂда́телѧ и҆ стрᲂи́телѧ , и҆ гро́бнаѧ хрⷭ҇та̀ дре́вле бл҃гᲂѡ҆бра́зныи і҆ѡ́сифъ , и҆ никᲂди́мъ , и҆ же́нскїи сᲂбо́ръ с̾ ни́ми пѣ́ша , и҆ жа́лᲂстнѡ рыда́юще , бг҃ᲂлѣ́пнѡ тѧ велича́хꙋ .

сла́ва . Ве́сь прᲂсвѣще́нїе и҆ жела́нїе , ве́сь сп҃се мо́й ᲂу҆тѣше́нїе , и҆ ᲂу҆тверже́нїе , всѣ́мъ ты̀ є҆сѝ , и҆́же бл҃гᲂче́стнѡ пра́зднꙋющимъ , ст҃о́е и҆ тридне́внᲂе вᲂста́нїе твᲂѐ , є҆ди́не ще́дре , є҆го́же ра́ди тѧ̀ всѝ велича́емъ .

и҆ ны́нѣ , боⷢ҇ . Пло́ть ѿ твᲂи́хъ всенепᲂро́чнаѧ лᲂже́снъ , во́лею вᲂспрїѧ́тъ всесᲂверше́ныи , разꙋ́мнꙋ пᲂи́стинѣ и҆ ѡ҆дш҃евле́нꙋ . и҆ пᲂлага́етсѧ ѻ҆те́ческимъ наслѣ́дїемъ пречⷭ҇таѧ в̾ нбⷭ҇ныхъ , и҆ с̾ не́юже па́ки прїи́детъ .

На литꙋргі́и . прᲂки́мен̾ , ѱл҃о́мъ дв҃дᲂвъ . ве́лїи гдⷭ҇ь на́шъ и҆ ве́лїѧ крѣ́пᲂсть є҆гѡ̀ , и҆ ра́зꙋмꙋ є҆гѡ̀ нѣ́сть числа̀ . сти́хъ : хвали́те гдⷭ҇а ꙗ҆́кѡ бл҃гъ ѱало́мъ , бг҃ᲂви на́шемꙋ да наслади́тсѧ хвале́нїе .= дрꙋгі́и . дш҃а и҆́хъ во бл҃ги́хъ вᲂдвᲂрѧ́тсѧ . а҆пⷭ҇лъ , въ дѣѧ́нїихъ . заⷱ҇ , є҃і . =и҆ заꙋпᲂко́й , къ сᲂлꙋ́нѧнѡмъ . заⷱ҇ , с҃о .= а҆ллилꙋ́їѧ . прїидѣ́те вᲂз̾ра́дꙋемсѧ гдⷭ҇ви , вᲂскли́кнемъ бг҃ꙋ спаси́телю на́шемꙋ . =сти́хъ : пᲂхвалѝ і҆єрⷭ҇ли́ме гдⷭ҇а , хвалѝ бг҃а твᲂегѡ̀ сїѡ́не . и҆ заꙋпᲂко́й , сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь . є҆ѵⷢ҇а́лїе , ѿ і҆ѡа́нна . заⷱ҇ , ѳ҃і . и҆ дрꙋго́е , заꙋпᲂко́й , ѿ і҆ѡа́нна . заⷱ҇ , ѕ҃і . прича́стенъ . пᲂхвалѝ і҆єрⷭ҇ли́ме гдⷭ҇а , хвалѝ бг҃а твᲂегѡ̀ сїѡ́не . и҆ заꙋпᲂко́й , бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь , па́мѧть и҆́хъ в̾ ро́дъ и҆ ро́дъ .