<<і҃: 19>>

Ѡ҆ часѣ́хъ свѧты́ѧ па́схи и҆ всеѧ̀ свѣ́тлыѧ седми́цы.

Подоба́етъ вѣ́дати, ꙗ҆́кѡ ѿ сегѡ̀ днѐ ст҃ы́ѧ и҆ вели́кїѧ недѣ́ли па́схи, да́же до сꙋббѡ́ты, часы̀ и҆ повече́рїе си́це пою́тсѧ.

Наче́ншꙋ і҆ере́ю: Бл҃гослове́нъ бг҃ъ на́шъ: Хрⷭ҇то́съ воскре́се и҆з̾ ме́ртвыхъ, три́жды.

Та́же глаго́лемъ три́жды:

Воскрⷭ҇нїе хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ і҆и҃сꙋ, є҆ди́номꙋ безгрѣ́шномꙋ. Крⷭ҇тꙋ̀ твоемꙋ̀ покланѧ́емсѧ, хрⷭ҇тѐ, и҆ ст҃о́е воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ, ра́звѣ тебѐ и҆но́гѡ не зна́емъ, и҆́мѧ твоѐ и҆менꙋ́емъ. Прїиди́те всѝ вѣ́рнїи, поклони́мсѧ ст҃о́мꙋ хрⷭ҇то́вꙋ воскрⷭ҇нїю: се́ бо прїи́де крⷭ҇то́мъ ра́дость всемꙋ̀ мі́рꙋ. Всегда̀ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: распѧ́тїе бо претерпѣ́въ, сме́ртїю сме́рть разрꙋшѝ.

Та́же ѵ҆пакоѝ, гла́съ д҃, є҆ди́нощи:

Предвари́вшыѧ ᲂу҆́тро ꙗ҆̀же ѡ҆ марі́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго съ ме́ртвыми что̀ и҆́щете ꙗ҆́кѡ человѣ́ка; ви́дите грѡ́бныѧ пелєны̀, тецы́те, и҆ мі́рꙋ проповѣ́дите, ꙗ҆́кѡ воста̀ гдⷭ҇ь, ᲂу҆мертви́вый сме́рть, ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческїй.

Посе́мъ конда́къ, гла́съ и҃, є҆ди́нощи:

А҆́ще и҆ во гро́бъ снизше́лъ є҆сѝ, безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель, хрⷭ҇тѐ бж҃е, жена́мъ мѷроно́сицамъ вѣща́вый, ра́дꙋйтесѧ, и҆ твои́мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе. <<і҃ ѡ҆б.: 20>>

Та́же и҆ се́й тропа́рь, є҆ди́нощи:

Во гро́бѣ пло́тски, во а҆́дѣ же съ дꙋше́ю ꙗ҆́кѡ бг҃ъ, въ раи́ же съ разбо́йникомъ и҆ на прⷭ҇то́лѣ бы́лъ є҆сѝ, хрⷭ҇тѐ, со ѻ҆ц҃е́мъ и҆ дх҃омъ, всѧ̑ и҆сполнѧ́ѧй неѡпи́санный.

Сла́ва:

Ꙗ҆́кѡ живоно́сецъ, ꙗ҆́кѡ раѧ̀ краснѣ́йшїй, вои́стиннꙋ и҆ черто́га всѧ́кагѡ ца́рскагѡ показа́сѧ свѣтлѣ́йшїй, хрⷭ҇тѐ, гро́бъ тво́й, и҆сто́чникъ на́шегѡ воскрⷭ҇нїѧ.

И҆ ны́нѣ, бг҃оро́диченъ:

Вы́шнѧгѡ ѡ҆сщ҃е́нное бж҃е́ственное селе́нїе, ра́дꙋйсѧ. тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.

Та́же, Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́ч҃е. І҆ере́й, сті́хъ: Мл҃твами ст҃ы́хъ ѻ҆ц҃ъ на́шихъ: Мы́ же рече́мъ: А҆ми́нь. И҆ па́ки глаго́лемъ подо́бнѣ: Хрⷭ҇то́съ воскре́се: три́жды. Сла́ва, и҆ ны́нѣ: Гдⷭ҇и поми́лꙋй. три́жды. Блгⷭ҇вѝ. И҆ ѿпꙋ́стъ пе́рвагѡ часа̀.

Си́мъ же ѻ҆́бразомъ пое́тсѧ за тре́тїй, за шесты́й, пред̾ лїтꙋргі́ею. Та́кожде и҆ пред̾ вече́рнею, за девѧ́тый ча́съ: и҆ за повече́рїе є҆ди́ножды. Та́кожде и҆ за полꙋ́нощницꙋ. [зрѝ] А҆́ще ли не бꙋ́детъ когда̀ по нꙋ́ждѣ лїтꙋргі́и: вмѣ́стѡ и҆з̾ѡбрази́тельныхъ, глаго́лемъ си́це: Хрⷭ҇то́съ воскре́се: три́жды. Воскресе́нїе хрⷭ҇то́во: є҆ди́ножды. Посе́мъ: Предвари́вшыѧ ᲂу҆́тро: Сла́ва: конда́къ: А҆́ще и҆ во гро́бъ: И҆ ны́нѣ: Є҆диноро́дный сн҃е: Посе́мъ блажє́нна ѿ канѡ́на, пѣ́снь г҃ и҆ ѕ҃. І҆ере́й: Премꙋ́дрость. Чте́цъ надписа́нїе а҆пⷭ҇ла, и҆ са́мое чте́нїе. Посе́мъ і҆ере́й є҆ѵⷢ҇лїе. Та́же, Помѧнѝ на́съ гдⷭ҇и: Ли́къ нбⷭ҇ный: И҆ посе́мъ: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: И҆ по Ѻ҆́ч҃е на́шъ: <<а҃і: 21>> конда́къ: А҆́ще и҆ во гро́бъ: Сла́ва и҆ ны́нѣ: бг҃оро́диченъ: Вы́шнѧгѡ ѡ҆сщ҃е́нное: Гдⷭ҇и поми́лꙋй, м҃. Та́же: Є҆ди́нъ ст҃ъ, є҆ди́нъ гдⷭ҇ь і҆и҃съ хрⷭ҇то́съ, во сла́вꙋ бг҃а ѻ҆ц҃а̀. а҆ми́нь. И҆ посе́мъ вмѣ́стѡ, Бꙋ́ди и҆́мѧ гдⷭ҇не: Хрⷭ҇то́съ воскре́се: три́жды. Та́же, ѱало́мъ л҃г: Бл҃гословлю̀ гдⷭ҇а на всѧ́кое вре́мѧ: коне́цъ: не лиша́тсѧ всѧ́кагѡ бла́га. И҆ посе́мъ ѿпꙋ́стъ. И҆ и҆схо́димъ въ трапе́зꙋ.