<<а҃і: 21>>

Подоба́етъ вѣ́дати, ка́кѡ пое́тсѧ моле́бенъ на ст҃ꙋ́ю па́схꙋ.

І҆ере́й глаго́летъ: Бл҃гослове́нъ бг҃ъ на́шъ: И҆ мы̀: А҆ми́нь. Та́же і҆ере́й: Хрⷭ҇то́съ воскре́се: три́жды. Та́же, Хрⷭ҇то́съ воскре́се, три́жды, на ли́ки, ꙗ҆́коже пред̾из̾ѧви́сѧ въ нача́лѣ ᲂу҆́трени. По Сла́ва и҆ ны́нѣ: І҆ере́й глаго́летъ: Хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ. Мы́ же: И҆ сꙋ́щымъ во гробѣ́хъ живо́тъ дарова́въ. Та́же, Сла́ва, и҆ ны́нѣ: Ѵ҆пакоѝ: Предвари́вшыѧ ᲂу҆́тро: А҆́ще ли хо́щеши приложи́ти канѡ́нъ ко́егѡ ст҃а́гѡ. И҆ глаго́ли пре́жде тропа́рь ст҃а́гѡ, є҆ди́ножды. Сла́ва, и҆ ны́нѣ: Предвари́вшыѧ ᲂу҆́тро: Посе́мъ канѡ́нъ па́схи, со і҆рмосо́мъ на ѕ҃. Припѣ́въ: Хрⷭ҇то́съ воскре́се: И҆ ст҃а́гѡ, а҆́ще бꙋ́детъ, на д҃. Катава́сїа. По г҃-й, и҆ ѕ҃-й пѣ́сни: Спасѝ ѿ бѣ́дъ: По ѕ҃-й пѣ́сни, конда́къ и҆ і҆́косъ па́схи. Та́же прокі́менъ, гла́съ и҃: Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь. Сті́хъ: И҆сповѣ́дайтесѧ гдⷭ҇ви, ꙗ҆́кѡ бл҃гъ, ꙗ҆́кѡ въ вѣ́къ ми́лость є҆гѡ̀. Та́же ст҃а́гѡ <<а҃і ѡ҆б.: 22>> прокі́менъ. Є҆ѵⷢ҇лїе лꙋкѝ, зача́ло рд҃і. Пото́мъ ст҃а́гѡ. По ѳ҃-й пѣ́сни, за Досто́йно є҆́сть: і҆рмо́съ: Свѣти́сѧ, свѣти́сѧ: Та́же, Хрⷭ҇то́съ воскре́се: три́жды. Посе́мъ ѵ҆пакоѝ: Предвари́вшыѧ ᲂу҆́тро: Сла́ва: тропа́рь ст҃а́гѡ: И҆ ны́нѣ: конда́къ: А҆́ще и҆ во гро́бъ: Та́же є҆ктенїа̀: Поми́лꙋй на́съ бж҃е: Посе́мъ і҆ере́й глаго́летъ: Премꙋ́дрость. Мы́ же, Хрⷭ҇то́съ воскре́се: три́жды. Та́же і҆ере́й, вмѣ́стѡ, Сла́ва тебѣ̀ хрⷭ҇тѐ бж҃е: Хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ. И҆ мы̀: И҆ сꙋ́щымъ во гробѣ́хъ живо́тъ дарова́въ. И҆ ѿпꙋ́стъ со крⷭ҇то́мъ глаго́летъ си́це: Хрⷭ҇то́съ воскресы́й и҆з̾ ме́ртвыхъ: и҆ прѡ́чаѧ, ꙗ҆́кѡ предписа́сѧ въ концѣ̀ ᲂу҆́трени. Посе́мъ возглаша́етъ: Хрⷭ҇то́съ воскре́се. три́жды. Мы́ же ѿвѣща́емъ: Вои́стиннꙋ воскре́се. три́жды. И҆ па́ки пое́мъ: Хрⷭ҇то́съ воскре́се: три́жды. Та́же, Гдⷭ҇и поми́лꙋй. три́жды, съ пѣ́нїемъ.