<<ѕ҃і: 31>>

Во ст҃ꙋ́ю и҆ вели́кꙋю недѣ́лю па́схи ве́чера.

По ѳ҃-мъ часѣ̀, во свѣти́льничномъ, ѡ҆блачи́тсѧ настоѧ́тель во всю̀ свѧще́ннꙋю ѻ҆де́ждꙋ. И҆ ста́въ пред̾ ст҃о́ю трапе́зою съ кади́льницею, зна́менꙋетъ крⷭ҇тови́днѡ, и҆ возглаша́етъ глаго́лѧ: Благослове́нъ бг҃ъ на́шъ всегда̀, ны́нѣ и҆ при́снѡ, и҆ во вѣ́ки вѣкѡ́въ. И҆ на́мъ ѿвѣща́ющымъ: А҆ми́нь. И҆ то́й начина́етъ: Хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ. три́жды. И҆ мы̀ то́йжде ѿвѣща́емъ три́жды. И҆ глаго́летъ настоѧ́тель преждеречє́нныѧ стїхѝ: а҃-й, Да воскре́снетъ бг҃ъ: в҃-й: Ꙗ҆́кѡ и҆счеза́етъ ды́мъ: г҃-й: Та́кѡ да поги́бнꙋтъ грѣ́шницы: д҃-й: Се́й де́нь, є҆го́же сотворѝ гдⷭ҇ь: Мы́ же на кі́йждо сті́хъ пое́мъ: Хрⷭ҇то́съ воскре́се: по є҆ди́ножды, Сла́ва: Мы́ же: Хрⷭ҇то́съ воскре́се: И҆ ны́нѣ: Мы́ же: Хрⷭ҇то́съ воскре́се: И҆ па́ки настоѧ́тель: Хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ. И҆ мы̀ коне́цъ: И҆ сꙋ́щымъ во гробѣ́хъ живо́тъ дарова́въ. Та́же є҆ктенїа̀ вели́каѧ ѿ дїа́кона: Ми́ромъ гдⷭ҇ꙋ помо́лимсѧ.

[зрѝ] Подоба́етъ вѣ́дати, ꙗ҆́кѡ по внегда̀ нача́ти і҆ере́ю, кади́тъ ст҃ꙋ́ю трапе́зꙋ по ѻ҆бы́чаю и҆ ве́сь ѻ҆лта́рь, ве́черъ, на Гдⷭ҇и воззва́хъ: на ᲂу҆́трени, въ нача́лѣ канѡ́на и҆схо́дитъ и҆ кади́тъ хра́мъ и҆ ли́ки и҆ бра́тїю по ѻ҆быкнове́нномꙋ чи́нꙋ.

Посе́мъ, Гдⷭ҇и воззва́хъ: пое́мъ во гла́съ в҃. поста́вимъ стїхѡ́въ ѕ҃. и҆ пое́мъ стїхи̑ры воскре́сны, г҃, гла́съ в҃.

Пре́жде вѣ̑къ ѿ ѻ҆ц҃а̀ ро́ждшемꙋсѧ бж҃їю сло́вꙋ, вопло́щшемꙋсѧ ѿ дв҃ы мр҃і́и, прїиди́те поклони́мсѧ: крⷭ҇тъ бо претерпѣ́въ, погребе́нїю предаде́сѧ, ꙗ҆́кѡ са́мъ восхотѣ̀: <<ѕ҃і: 31>> и҆ воскр҃съ и҆з̾ ме́ртвыхъ, сп҃се́ мѧ заблꙋжда́ющаго человѣ́ка.

Хрⷭ҇то́съ сп҃съ на́шъ, є҆́же на ны̀ рꙋкописа́нїе пригвозди́въ на крⷭ҇тѣ̀ загла́ди, и҆ сме́ртнꙋю держа́вꙋ ᲂу҆празднѝ: покланѧ́емсѧ є҆гѡ̀ тридне́вномꙋ воскрⷭ҇нїю.

Со а҆рха́гг҃лы воспои́мъ хрⷭ҇то́во воскрⷭ҇нїе: то́й бо є҆́сть и҆зба́витель и҆ сп҃съ дꙋ́шъ на́шихъ, и҆ въ сла́вѣ стра́шнѣй и҆ крѣ́пцѣй си́лѣ, па́ки грѧде́тъ сꙋди́ти мі́рꙋ, є҆го́же созда̀.

И҆ ꙾восто́чны꙾ г҃.[[а҆нато́лїевы]]

Тебѐ распе́ншагосѧ и҆ погребе́ннаго, а҆́гг҃лъ проповѣ́да влⷣкꙋ, и҆ глаго́лаше жена́мъ: прїиди́те ви́дите, и҆дѣ́же лежа́ше гдⷭ҇ь: воскре́се бо, ꙗ҆́коже речѐ, ꙗ҆́кѡ всеси́ленъ. тѣ́мже тебѣ̀ покланѧ́емсѧ є҆ди́номꙋ безсме́ртномꙋ: жизнода́вче хрⷭ҇тѐ, поми́лꙋй на́съ.

Крⷭ҇то́мъ твои́мъ ᲂу҆праздни́лъ є҆сѝ, ю҆́же ѿ дре́ва клѧ́твꙋ, погребе́нїемъ твои́мъ ᲂу҆мертви́лъ є҆сѝ сме́рти держа́вꙋ: воста́нїемъ же твои́мъ просвѣти́лъ є҆сѝ ро́дъ человѣ́ческїй. сегѡ̀ ра́ди вопїе́мъ тѝ: бл҃годѣ́телю хрⷭ҇тѐ бж҃е на́шъ, сла́ва тебѣ̀.

Ѿверзо́шасѧ тебѣ̀ гдⷭ҇и, стра́хомъ врата̀ смє́ртнаѧ, вра́тницы же а҆́дѡвы ви́дѣвше тѧ̀, ᲂу҆боѧ́шасѧ: врата́ бо мѣ̑днаѧ сокрꙋши́лъ є҆сѝ, и҆ верєѝ желѣ́зныѧ сте́рлъ є҆сѝ, и҆ и҆зве́лъ є҆сѝ на́съ ѿ тьмы̀ и҆ сѣ́ни сме́ртныѧ, и҆ ᲂу҆́зы на́шѧ растерза́лъ є҆сѝ.

Сла́ва:

Сп҃си́тельнꙋю пѣ́снь пою́ще, ѿ ᲂу҆́стъ возсле́мъ: прїиди́те всѝ въ домꙋ̀ гдⷭ҇немъ припаде́мъ, глаго́люще: на дре́вѣ <<з҃і: 33>> распны́йсѧ, и҆ и҆з̾ ме́ртвыхъ воскресы́й, и҆ сы́й въ нѣ́дрѣхъ ѻ҆́ч҃ихъ, ѡ҆чи́сти грѣхѝ на́шѧ.

И҆ ны́нѣ: бг҃оро́диченъ:

Пре́йде сѣ́нь зако́ннаѧ, бл҃года́ти прише́дши: ꙗ҆́коже бо кꙋпина̀ не сгара́ше ѡ҆палѧ́ема, та́кѡ дв҃о родила̀ є҆сѝ, и҆ дв҃а пребыла̀ є҆сѝ. вмѣ́стѡ столпа̀ ѻ҆́гненнагѡ, пра́ведное возсїѧ̀ со́лнце: вмѣ́стѡ мѡѷсе́а, хрⷭ҇то́съ, сп҃се́нїе дꙋ́шъ на́шихъ.

Вхо́дъ со є҆ѵⷢ҇лїемъ. Свѣ́те ти́хїй: Та́же, прокі́менъ вели́кїй, гла́съ з҃: Кто̀ бг҃ъ ве́лїй ꙗ҆́кѡ бг҃ъ на́шъ; ты̀ є҆сѝ бг҃ъ творѧ́й чꙋдеса̀. Сті́хъ а҃: Сказа́лъ є҆сѝ въ лю́дехъ си́лꙋ твою̀. Сті́хъ в҃: И҆ рѣ́хъ: ны́нѣ нача́хъ, сїѧ̀ и҆змѣ́на десни́цы вы́шнѧгѡ. Сті́хъ г҃: Помѧнꙋ́хъ дѣла̀ гдⷭ҇нѧ, ꙗ҆́кѡ помѧнꙋ̀ ѿ нача́ла чꙋдеса̀ твоѧ̀. И҆ па́ки: Кто̀ бг҃ъ ве́лїй: По прокі́мнѣ же возглаша́етъ дїа́конъ: И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа, гдⷭ҇а бг҃а мо́лимъ. Посе́мъ чте́тъ є҆ѵⷢ҇лїе настоѧ́тель во ѻ҆лтарѝ, і҆ѡа́нна, зача́ло ѯ҃є: Сꙋ́щꙋ по́здѣ въ де́нь то́й: Коне́цъ: Не и҆мꙋ̀ вѣ́ры. Посе́мъ є҆ктенїа̀: Рце́мъ всѝ: и҆ Сподо́би гдⷭ҇и въ ве́черъ се́й: Та́же: И҆спо́лнимъ вече́рнюю мл҃твꙋ:

И҆ по возгла́сѣ пое́мъ стїхи́рꙋ воскре́снꙋ, гла́съ в҃:

Воскрⷭ҇нїе твоѐ хрⷭ҇тѐ сп҃се, всю̀ просвѣтѝ вселе́ннꙋю и҆ призва́лъ є҆сѝ твоѐ созда́нїе: всеси́льне гдⷭ҇и сла́ва тебѣ̀.

Та́же стїхи̑ры па́схи, гла́съ є҃: Па́сха сщ҃е́ннаѧ: Съ припѣ́вы и҆́хъ. Сла́ва, и҆ ны́нѣ: Воскрⷭ҇нїѧ де́нь: Хрⷭ҇то́съ воскре́се: три́жды, кромѣ̀ конца̀ стїхи́ры. Та́же дїа́конъ: Премꙋ́дрость. Мы́ же: Бл҃гословѝ. Настоѧ́тель: Сы́й бл҃гослове́нъ хрⷭ҇то́съ бг҃ъ на́шъ: И҆ мы̀: Оу҆твердѝ бж҃е: Та́же настоѧ́тель, вмѣ́стѡ: <<з҃і ѡ҆б.: 34>> Сла́ва тебѣ̀ хрⷭ҇тѐ бж҃е: Хрⷭ҇то́съ воскре́се и҆з̾ ме́ртвыхъ сме́ртїю сме́рть попра́въ. И҆ мы̀: И҆ сꙋ́щымъ во гробѣ́хъ живо́тъ дарова́въ. И҆ а҆́бїе глаго́летъ ѿпꙋ́стъ со крⷭ҇то́мъ: Хрⷭ҇то́съ воскресы́й и҆з̾ ме́ртвыхъ: И҆ про́чее, ꙗ҆́коже и҆з̾ѧви́сѧ въ коне́цъ ᲂу҆́трени.

[зрѝ] И҆ цѣлꙋ́емъ ст҃ы́ѧ і҆кѡ́ны. И҆ вхо́димъ въ трапе́зꙋ, и҆ глаго́лемъ: Хрⷭ҇то́съ воскре́се: три́жды. Сла́ва, и҆ ны́нѣ: Настоѧ́тель: Хрⷭ҇тѐ бж҃е бл҃гословѝ: По воста́нїи же ѿ трапе́зы, глаго́лемъ: Хрⷭ҇то́съ воскре́се: три́жды. Сла́ва, и҆ ны́нѣ: Настоѧ́тель: Съ на́ми бг҃ъ свое́ю бл҃года́тїю: И҆ та́кѡ твори́мъ во всю̀ седми́цꙋ свѣ́тлꙋю вече́рни послѣ́дованїе.

Въ понедѣ́льникъ свѣ́тлыѧ седми́цы на ᲂу҆́трени.

Пре́жде нача́ла, вжига́етъ канди̑ла и҆ свѣщы̀ параекклисїа́рхъ. Та́же кле́плетъ въ вели́кїй кампа́нъ, и҆ въ про́чыѧ. И҆ собра́вшымсѧ на́мъ во хра́мъ, і҆ере́й полага́етъ ѻ҆бы́чный покло́нъ настоѧ́телю, и҆ ѿхо́дитъ во ст҃ы́й ѻ҆лта́рь, и҆ взе́мъ кади́льницꙋ стои́тъ пред̾ ст҃о́ю трапе́зою, кромѣ̀ ᲂу҆́бѡ сщ҃е́нническїѧ ѻ҆де́жды, є҆пїтрахи́лїй то́чїю возло́жь све́рхъ ма́нтїи, кади́тъ крⷭ҇тоѻбра́знѡ, глаго́лѧ: Сла́ва ст҃ѣ́й и҆ є҆диносꙋ́щнѣй: И҆ начина́етъ тропа́рь: Хрⷭ҇то́съ воскре́се: три́жды. И҆ на́мъ то́жде ѿвѣща́ющымъ. И҆ пое́мъ: Хрⷭ҇то́съ воскре́се: со стїхѝ є҆гѡ̀, ꙗ҆́коже и҆з̾ѧви́сѧ въ недѣ́лю ᲂу҆́тра и҆ ве́чера. Въ мїрски́хъ же хра́мѣхъ ѡ҆блачи́тсѧ і҆ере́й въ ри́зы. Та́же є҆ктенїа̀ вели́каѧ. И҆ по возгла́сѣ а҆́бїе пое́мъ канѡ́нъ, і҆рмо́съ: Воскрⷭ҇нїѧ де́нь: по два́жды, тропари́ же на і҃, <<и҃і: 35>> съ припѣ́вы: Хрⷭ҇то́съ воскре́се: Въ Сла́ва, и҆ ны́нѣ: глаго́лемъ бг҃оро́дичны гдⷭ҇и́на ѳеофа́на, и҆ гдⷭ҇и́на і҆ѡ́сифа: пи́саны въ недѣ́лю ѡ҆ мѷроно́сицахъ. Катава́сїа ѻ҆́ба ли́ка вкꙋ́пѣ: Воскрⷭ҇нїѧ де́нь: И҆ послѣдѝ: Хрⷭ҇то́съ воскре́се: три́жды. И҆ глаго́лемъ сїѐ во всю̀ седми́цꙋ вкꙋ́пѣ съ і҆рмосы̀ на д҃і. По г҃-й пѣ́сни ѵ҆пакоѝ: Предвари́вшыѧ ᲂу҆́тро: И҆ чте́нїе на а҃-ю кни́гꙋ: Въ нача́лѣ бѣ̀ сло́во: Ѿ і҆ѡа́нна, толкова́нїе златоꙋ́стагѡ, [ѿ сегѡ́ бо днѐ начина́емъ сїю̀ кни́гꙋ, и҆ да́же до всѣ́хъ ст҃ы́хъ соверша́емъ] По ѕ҃-й пѣ́сни, конда́къ: А҆́ще и҆ во гро́бъ: и҆ і҆́косъ, и҆ чте́нїе. И҆ по не́мъ: Воскрⷭ҇нїе хрⷭ҇то́во: три́жды, и҆ Воскре́съ і҆и҃съ ѿ гро́ба: три́жды. И҆ а҆́бїе про́чыѧ пѣ̑сни. ѳ҃-ю пѣ́снь пое́мъ съ припѣ́вы. Та́же є҆ѯапостїла́рїй: Пло́тїю ᲂу҆снꙋ́въ: три́жды.

На хвали́техъ, Всѧ́кое дыха́нїе: И҆ пое́мъ стїхи̑ры воскре́сны, гла́съ в҃:

Всѧ́кое дыха́нїе и҆ всѧ̀ тва́рь, тѧ̀ сла́витъ гдⷭ҇и, ꙗ҆́кѡ крⷭ҇то́мъ сме́рть ᲂу҆праздни́лъ є҆сѝ, да пока́жеши лю́демъ, є҆́же и҆з̾ ме́ртвыхъ твоѐ воскрⷭ҇нїе, ꙗ҆́кѡ є҆ди́нъ чл҃вѣколю́бецъ.

Да рекꙋ́тъ і҆ꙋдє́е, ка́кѡ во́ини погꙋби́ша стрегꙋ́щїи цр҃ѧ̀; почто́ бо ка́мень не сохранѝ ка́мене жи́зни; и҆лѝ погребе́ннаго да дадѧ́тъ, и҆лѝ воскрⷭ҇шемꙋ да покло́нѧтсѧ, глаго́люще съ на́ми: сла́ва мно́жествꙋ щедро́тъ твои́хъ, сп҃се на́шъ, сла́ва тебѣ̀.

Ра́дꙋйтесѧ лю́дїе и҆ весели́тесѧ, а҆́гг҃лъ сѣдѧ́й на ка́мени гро́бнѣмъ, то́й на́мъ бл҃говѣстѝ, ре́къ: хрⷭ҇то́съ воскре́се и҆з̾ ме́ртвыхъ, сп҃съ мі́ра, и҆ и҆спо́лни всѧ́чєскаѧ бл҃гоꙋха́нїѧ: ра́дꙋйтесѧ лю́дїе и҆ весели́тесѧ.

А҆́гг҃лъ ᲂу҆́бѡ є҆́же ра́дꙋйсѧ, пре́жде твоегѡ̀ зача́тїѧ гдⷭ҇и, бл҃года́тнѣй принесѐ: а҆́гг҃лъ же ка́мень сла́внагѡ <<и҃і ѡ҆б.: 36>> твоегѡ̀ гро́ба въ твоѐ воскрⷭ҇нїе ѿвалѝ: ѻ҆́въ ᲂу҆́бѡ въ печа́ли мѣ́сто, весе́лїѧ ѡ҆́бразы возвѣща́ѧ: се́й же въ сме́рти мѣ́сто, влⷣкꙋ жизнода́вца проповѣ́дꙋѧ на́мъ, тѣ́мже вопїе́мъ тѝ: бл҃годѣ́телю всѣ́хъ, гдⷭ҇и сла́ва тебѣ̀.

И҆ стїхи̑ры па́схи съ припѣ́вы и҆́хъ, ꙗ҆́коже предписа́сѧ во ᲂу҆́трени недѣ́ли. И҆ є҆ктєнїѝ, и҆ ѿпꙋ́стъ. И҆ ча́съ а҃-й. Си́це же быва́етъ слꙋ́жба ᲂу҆́трени во всю̀ седми́цꙋ свѣ́тлꙋю. Твори́мъ же и҆ лїті́ю внѣ̀ ѻ҆би́тели.

[зрѝ] Подоба́етъ вѣ́дати, ꙗ҆́кѡ твори́мъ и҆схожде́нїе дне́сь внѣ̀ монастырѧ̀, предносѧ́ще хорꙋ̑гви. Въ рꙋка́хъ же держа́ще ст҃о́е є҆ѵⷢ҇лїе, честны́й крⷭ҇тъ, и҆ і҆кѡ̑ны воскрⷭ҇нїѧ хрⷭ҇то́ва, пречⷭ҇тыѧ бцⷣы. Пое́мъ канѡ́нъ па́схи съ бг҃оро́дичны, на и҃. И҆ катава́сїа, і҆рмо́съ то́йже. По ѕ҃-й пѣ́сни, послѣдѝ є҆ѵⷢ҇лїа глаго́лемъ: Воскрⷭ҇нїе хрⷭ҇то́во ви́дѣвше: три́жды. Та́же, стїхи́ра: Воскре́съ і҆и҃съ ѿ гро́ба: три́жды. Та́же, з҃-ѧ, и҃-ѧ и҆ ѳ҃-ѧ пѣ́сни. И҆ про́чее моле́бна, ли́стъ а҃і.

На лїтꙋргі́и а҆нтїфѡ́ны па́схи непремѣ́ннѡ, ꙗ҆́коже ᲂу҆каза́сѧ въ недѣ́лю па́схи. Прокі́менъ а҆пⷭ҇ла, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. А҆пⷭ҇лъ въ дѣѧ́нїихъ, зача́ло в҃: Возврати́шасѧ а҆пⷭ҇ли: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̀ гдⷭ҇и: Сті́хъ: Бг҃ъ прославлѧ́емь въ совѣ́тѣ ст҃ы́хъ. Є҆ѵⷢ҇лїе ѿ і҆ѡа́нна, зача́ло в҃: Бг҃а никто́же ви́дѣ нигдѣ́же: Прича́стенъ: Тѣ́ло хрⷭ҇то́во:

На трапе́зѣ быва́етъ ᲂу҆тѣше́нїе вели́кое бра́тїи. <<ѳ҃і: 37>>

Въ понедѣ́льникъ свѣ́тлыѧ седми́цы, ве́чера,

во свѣти́льничномъ, по Хрⷭ҇то́съ воскре́се: и҆ про́чихъ, Гдⷭ҇и воззва́хъ, на гла́съ г҃. Поста́вимъ стїхѡ́въ ѕ҃, и҆ пое́мъ стїхи̑ры воскрⷭ҇ны, гла́съ г҃.

Твои́мъ крⷭ҇то́мъ хрⷭ҇тѐ сп҃се, сме́рти держа́ва разрꙋши́сѧ, и҆ дїа́волѧ пре́лесть ᲂу҆праздни́сѧ: ро́дъ же человѣ́ческїй вѣ́рою сп҃са́емый: пѣ́снь тебѣ̀ всегда̀ прино́ситъ.

Просвѣти́шасѧ всѧ́чєскаѧ воскрⷭ҇нїемъ твои́мъ гдⷭ҇и, и҆ ра́й па́ки ѿве́рзесѧ: всѧ́ же тва́рь восхвалѧ́ющи тѧ̀, пѣ́снь тебѣ̀ всегда̀ прино́ситъ.

Сла́влю ѻ҆ц҃а̀ и҆ сн҃а си́лꙋ, и҆ ст҃а́гѡ дх҃а пою̀ вла́сть, нераздѣ́льное, несозда́нное бж҃ество̀, трⷪ҇цꙋ є҆диносꙋ́щнꙋю, ца́рствꙋющꙋю въ вѣ́къ вѣ́ка.

И҆ ꙾восто́чны꙾ г҃, гла́съ то́йже.[[а҆нато́лїевы]]

Крⷭ҇тꙋ̀ твоемꙋ̀ честно́мꙋ покланѧ́емсѧ хрⷭ҇тѐ, и҆ воскрⷭ҇нїе твоѐ пое́мъ и҆ сла́вимъ: ра́ною бо твое́ю мы̀ всѝ и҆сцѣлѣ́хомъ.

Пое́мъ сп҃са ѿ дв҃ы вопло́щшагосѧ: на́съ бо ра́ди распѧ́тсѧ, и҆ въ тре́тїй де́нь воскре́се, да́рꙋѧ на́мъ ве́лїю млⷭ҇ть.

Сꙋ́щымъ во а҆́дѣ соше́дъ хрⷭ҇то́съ благовѣстѝ: дерза́йте, глаго́лѧ, ны́нѣ побѣди́хъ, а҆́зъ є҆́смь воскрⷭ҇нїе, а҆́зъ вы̀ возведꙋ̀, разрꙋши́въ смє́ртнаѧ врата̀.

Сла́ва:

Недосто́йнѡ стоѧ́ще въ пречи́стомъ домꙋ̀ твое́мъ, вече́рнюю пѣ́снь возсыла́емъ, и҆з̾ глꙋбины̀ взыва́юще хрⷭ҇тѐ бж҃е: <<ѳ҃і ѡ҆б.: 38>> просвѣти́вый мі́ръ тридне́внымъ воскрⷭ҇нїемъ твои́мъ, и҆змѝ лю́ди твоѧ̀ ѿ рꙋкѝ врагѡ́въ твои́хъ чл҃вѣколю́бче.

И҆ ны́нѣ: бг҃оро́диченъ.

Ка́кѡ не диви́мсѧ бг҃омꙋ́жномꙋ ржⷭ҇твꙋ̀ твоемꙋ̀, пречⷭ҇тна́ѧ; и҆скꙋше́нїѧ бо мꙋ́жескагѡ не прїе́мши всенепоро́чнаѧ, родила̀ є҆сѝ без̾ ѻ҆ц҃а̀ сн҃а пло́тїю пре́жде вѣ́къ ѿ ѻ҆ц҃а̀ рожде́ннаго без̾ мт҃ре, ника́коже претерпѣ́вшаго и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ, но ѻ҆бою̀ сꙋщєствꙋ̀ сво́йство цѣ́ло сохра́ншаго. тѣ́мже мт҃и дв҃о влⷣчце, того̀ молѝ сп҃сти́сѧ дꙋша́мъ, правосла́внѡ бцⷣꙋ и҆сповѣ́дающихъ тѧ̀.

Вхо́дъ съ кади́льницею: Свѣ́те ти́хїй: Прокі́менъ, гла́съ з҃: Бг҃ъ на́шъ на нб҃сѝ и҆ на землѝ, всѧ̑ є҆ли̑ка восхотѣ̀, сотворѝ. Сті́хъ: Во и҆схо́дѣ і҆и҃левѣ ѿ є҆гѵ́пта, до́мꙋ і҆а́кѡвлѧ и҆з̾ люде́й ва̑рваръ, бы́сть і҆ꙋде́а ст҃ы́нѧ є҆гѡ̀. Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть. Сті́хъ: Что́ ти є҆́сть мо́ре, ꙗ҆́кѡ побѣ́гло є҆сѝ; и҆ тебѣ̀ і҆ѻрда́не, ꙗ҆́кѡ возврати́лсѧ є҆сѝ вспѧ́ть; И҆ па́ки: Бг҃ъ на́шъ на нб҃сѝ и҆ на землѝ, всѧ̑ є҆ли̑ка восхотѣ̀, сотворѝ. І҆ере́й: Рце́мъ всѝ: и҆ про́чее є҆ктенїѝ: Сподо́би гдⷭ҇и: Та́же, И҆спо́лнимъ вече́рнюю: И҆ по возгла́сѣ,

На стїхо́внѣ стїхи́ра воскре́сна, гла́съ г҃:

Стрⷭ҇тїю твое́ю хрⷭ҇тѐ, ѡ҆мрачи́вый со́лнце и҆ свѣ́томъ твоегѡ̀ воскрⷭ҇нїѧ, просвѣти́вый всѧ́чєскаѧ, прїимѝ на́шꙋ вече́рнюю пѣ́снь чл҃вѣколю́бче.

И҆ стїхи̑ры па́схи, съ припѣ́вы и҆́хъ. Хрⷭ҇то́съ воскре́се: три́жды. И҆ ѿпꙋ́стъ. <<к҃: 39>>

Во вто́рникъ свѣ́тлыѧ седми́цы, на ᲂу҆́трени

быва́етъ всѐ послѣ́дованїе непремѣ́ннѡ, ꙗ҆́коже предписа́сѧ.

На хвали́техъ, поста́вимъ стїхѝ д҃: и҆ пое́мъ стїхи̑ры воскрⷭ҇ны, гла́съ г҃:

Прїиди́те всѝ ꙗ҆зы́цы, ᲂу҆разꙋмѣ́йте стра́шныѧ та́йны си́лꙋ: хрⷭ҇то́съ бо сп҃съ на́шъ, є҆́же въ нача́лѣ сло́во, распѧ́тсѧ на́съ ра́ди, и҆ во́лею погребе́сѧ, и҆ воскре́се и҆з̾ ме́ртвыхъ, є҆́же сп҃стѝ всѧ́чєскаѧ: томꙋ̀ поклони́мсѧ.

Повѣ́даша всѧ̀ чꙋдеса̀ стра́жїе твоѝ гдⷭ҇и: но собо́ръ сꙋеты̀ и҆спо́лни мздо́ю десни́цꙋ и҆́хъ, скры́ти мнѧ́ше воскрⷭ҇нїе твоѐ, є҆́же мі́ръ сла́витъ: поми́лꙋй на́съ.

Ра́дости всѧ̑ и҆спо́лнишасѧ воскрⷭ҇нїѧ и҆скꙋ́съ прїи́мша: марі́а бо магдали́на ко гро́бꙋ прїи́де, ѡ҆брѣ́те а҆́гг҃ла на ка́мени сѣдѧ́ща, ри́зами блиста́ющасѧ и҆ глаго́люща: что̀ и҆́щете жива́гѡ съ ме́ртвыми: нѣ́сть здѣ̀, но воста̀, ꙗ҆́коже речѐ, предварѧ́ѧ вы̀ въ галїле́и.

Во свѣ́тѣ твое́мъ влⷣко, ᲂу҆́зримъ свѣ́тъ чл҃вѣколю́бче: воскрⷭ҇лъ бо є҆сѝ и҆з̾ ме́ртвыхъ, сп҃се́нїе ро́дꙋ человѣ́ческомꙋ да́рꙋѧ: да тѧ̀ всѧ̀ тва́рь славосло́витъ є҆ди́наго безгрѣ́шнаго, поми́лꙋй на́съ.

И҆ пра́здникꙋ стїхи̑ры: Па́сха свѧще́ннаѧ: съ припѣ́вы и҆́хъ. Та́же, Хрⷭ҇то́съ воскре́се: три́жды. Є҆ктєнїѝ и҆ ѿпꙋ́стъ. И҆ ча́съ пе́рвый.

На лїтꙋргі́и, а҆нтїфѡ́ны па́сцѣ. Прокі́менъ а҆пⷭ҇ла, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆блажа́тъ мѧ̀ всѝ ро́ди. А҆пⷭ҇лъ въ дѣѧ́нїихъ, зача́ло д҃: Ста́въ пе́тръ: А҆ллилꙋ́їа, гла́съ и҃: <<к҃ ѡ҆б.: 40>> Воскрⷭ҇нѝ гдⷭ҇и въ поко́й тво́й, ты̀, и҆ кївѡ́тъ ст҃ы́ни твоеѧ̀. Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀. Є҆ѵⷢ҇лїе ѿ лꙋкѝ, зача́ло рг҃і: Пе́тръ воста́въ: Прича́стный: Тѣ́ло хрⷭ҇то́во прїими́те:

Во вто́рникъ свѣ́тлыѧ седми́цы ве́чера,

на Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры воскре́сны, гла́съ д҃:

Животворѧ́щемꙋ твоемꙋ̀ крⷭ҇тꙋ̀, непреста́ннѡ кла́нѧющесѧ хрⷭ҇тѐ бж҃е, тридне́вное воскрⷭ҇нїе твоѐ сла́вимъ: тѣ́мъ бо ѡ҆бнови́лъ є҆сѝ и҆стлѣ́вшее человѣ́ческое є҆стество̀ всеси́льне, и҆ и҆́же на нб҃са̀ восхо́дъ ѡ҆бнови́лъ є҆сѝ на́мъ, ꙗ҆́кѡ є҆ди́нъ бл҃гъ и҆ чл҃вѣколю́бецъ.

Дре́ва преслꙋша́нїѧ запреще́нїе разрѣши́лъ є҆сѝ сп҃сѐ, на дре́вѣ крⷭ҇тнѣмъ во́лею пригвозди́всѧ, и҆ во а҆́дъ соше́дъ си́льне, смє́ртныѧ ᲂу҆́зы ꙗ҆́кѡ бг҃ъ растерза́лъ є҆сѝ. тѣ́мже кла́нѧемсѧ є҆́же и҆з̾ ме́ртвыхъ твоемꙋ̀ воскрⷭ҇нїю, ра́достїю вопїю́ще: всеси́льне гдⷭ҇и, сла́ва тебѣ̀.

Врата̀ а҆́дова сокрꙋши́лъ є҆сѝ гдⷭ҇и, и҆ твое́ю сме́ртїю сме́ртное ца́рство разрꙋши́лъ є҆сѝ: ро́дъ же человѣ́ческїй ѿ и҆стлѣ́нїѧ свободи́лъ є҆сѝ, живо́тъ и҆ нетлѣ́нїе мі́рꙋ дарова́въ, и҆ ве́лїю млⷭ҇ть.

И҆ ꙾восто́чны꙾ г҃:[[а҆нато́лїевы]]

Прїиди́те воспои́мъ лю́дїе, сп҃сово тридне́вное воста́нїе, и҆́мже и҆зба́вихомсѧ а҆́довыхъ нерѣши́мыхъ ᲂу҆́зъ: и҆ <<к҃а: 41>> нетлѣ́нїе и҆ жи́знь всѝ воспрїѧ́хомъ зовꙋ́ще: распны́йсѧ, и҆ погребы́йсѧ, и҆ воскресы́й, сп҃си́ ны воскрⷭ҇нїемъ твои́мъ, є҆ди́не чл҃вѣколю́бче.

А҆́гг҃ли и҆ человѣ́цы сп҃се, твоѐ пою́тъ тридне́вное воста́нїе, и҆́мже ѡ҆зари́шасѧ вселе́нныѧ концы̀, и҆ рабо́ты вра́жїѧ всѝ и҆зба́вихомсѧ, зовꙋ́ще: животво́рче всеси́льне сп҃се, сп҃си́ ны воскрⷭ҇нїемъ твои́мъ, є҆ди́не чл҃вѣколю́бче.

Врата̀ мѣ̑днаѧ сте́рлъ є҆сѝ, и҆ верєѝ сокрꙋши́лъ є҆сѝ хрⷭ҇тѐ бж҃е, и҆ ро́дъ человѣ́ческїй па́дшїй воскр҃си́лъ є҆сѝ. сегѡ̀ ра́ди согла́сно вопїе́мъ: воскресы́й и҆з̾ ме́ртвыхъ гдⷭ҇и, сла́ва тебѣ̀.

Сла́ва:

Гдⷭ҇и, є҆́же ѿ ѻ҆ц҃а̀ твоѐ ржⷭ҇тво̀, безлѣ́тно є҆́сть и҆ присносꙋ́щно: є҆́же ѿ дв҃ы воплоще́нїе, неизрече́нно человѣ́кѡмъ и҆ несказа́нно: и҆ є҆́же во а҆́дъ соше́ствїе стра́шно дїа́волꙋ и҆ а҆́ггелѡмъ є҆гѡ̀: сме́рть бо попра́въ, тридне́венъ воскрⷭ҇лъ є҆сѝ нетлѣ́нїе подава́ѧ человѣ́кѡмъ, и҆ ве́лїю млⷭ҇ть.

И҆ ны́нѣ: бг҃оро́диченъ:

И҆́же тебѐ ра́ди бг҃оѻте́цъ прⷪ҇ро́къ дв҃дъ пѣ́сненнѡ ѡ҆ тебѣ̀ провозгласѝ, вели̑чїѧ тебѣ̀ сотво́ршемꙋ: предста̀ цр҃и́ца ѡ҆деснꙋ́ю тебѐ, тѧ́ бо мт҃рь, хода́таицꙋ живота̀ показа̀, без̾ ѻ҆ц҃а̀ и҆з̾ тебѐ вочеловѣ́читисѧ бл҃говоли́вый бг҃ъ, да сво́й па́ки ѡ҆бнови́тъ ѡ҆́бразъ, и҆стлѣ́вшїй страстьмѝ, и҆ заблꙋ́ждшее горохи́щное ѡ҆брѣ́тъ ѻ҆вча̀, на ра́мо воспрїи́мъ, ко ѻ҆ц҃ꙋ̀ принесе́тъ, и҆ своемꙋ̀ хотѣ́нїю, съ нбⷭ҇ными совокꙋпи́тъ си́лами, и҆ сп҃се́тъ бцⷣе, мі́ръ, хрⷭ҇то́съ и҆мѣ́ѧй ве́лїю и҆ бога́тꙋю млⷭ҇ть. <<к҃а ѡ҆б.: 42>>

Вхо́дъ съ кади́ломъ: Свѣ́те ти́хїй: Прокі́менъ, гла́съ и҃: Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ къ бг҃ꙋ, и҆ внѧ́тъ мѝ. Сті́хъ: Въ де́нь ско́рби моеѧ̀ бг҃а взыска́хъ. Сті́хъ: Ѿве́ржесѧ ᲂу҆тѣ́шитисѧ дꙋша̀ моѧ̀. Сті́хъ: Бж҃е, во ст҃ѣ́мъ пꙋ́ть тво́й. И҆ па́ки: Гла́сомъ мои́мъ ко гдⷭ҇ꙋ воззва́хъ:

На стїхо́внѣ стїхи́ра воскре́сна, гла́съ д҃:

Гдⷭ҇и, возше́дъ на крⷭ҇тъ, пра́дѣднюю на́шꙋ клѧ́твꙋ потреби́лъ є҆сѝ, и҆ соше́дъ во а҆́дъ, вѣ̑чныѧ ᲂу҆́зники свободи́лъ є҆сѝ, нетлѣ́нїе да́рꙋѧ человѣ́ческомꙋ ро́дꙋ: сегѡ̀ ра́ди пою́ще сла́вимъ животворѧ́щее и҆ сп҃си́тельное твоѐ воста́нїе.

Та́же, па́схи стїхи̑ры съ припѣ́вы и҆́хъ. И҆ про́чее ꙗ҆́кѡ предписа́сѧ, и҆ ѿпꙋ́стъ.

Въ сре́дꙋ свѣ́тлыѧ седми́цы, на ᲂу҆́трени,

вослѣ́дованїе всѐ пра́здника, ꙗ҆́коже пред̾ѧви́сѧ.

На хвали́техъ, поста́вимъ стїхѝ д҃. И҆ пое́мъ стїхи̑ры воскрⷭ҇ны, гла́съ д҃:

Крⷭ҇тъ претерпѣ́вый и҆ сме́рть, и҆ воскресы́й и҆з̾ ме́ртвыхъ всеси́льне гдⷭ҇и, сла́вимъ твоѐ воскрⷭ҇нїе.

Крⷭ҇то́мъ твои́мъ хрⷭ҇тѐ, ѿ дре́внїѧ клѧ́твы свободи́лъ є҆сѝ на́съ, и҆ сме́ртїю твое́ю є҆стество̀ на́ше мꙋ́чащаго дїа́вола ᲂу҆праздни́лъ є҆сѝ: воста́нїемъ же твои́мъ ра́дости всѧ̑ и҆спо́лнилъ є҆сѝ. тѣ́мже вопїе́мъ тѝ: воскр҃сы́й и҆з̾ ме́ртвыхъ гдⷭ҇и, сла́ва тебѣ̀.

Твои́мъ крⷭ҇то́мъ хрⷭ҇тѐ сп҃се, наста́ви на́съ на и҆́стинꙋ твою̀, и҆ и҆зба́ви на́съ ѿ сѣ́тей вра́жїихъ, воскр҃сы́й и҆з̾ <<к҃в: 43>> ме́ртвыхъ, возста́ви ны̀ па́дшыѧсѧ грѣхо́мъ, просте́ръ рꙋ́кꙋ твою̀ чл҃вѣколю́бче гдⷭ҇и, мл҃твами ст҃ы́хъ твои́хъ.

Ѻ҆ч҃ескихъ твои́хъ нѣ́дръ не разлꙋчи́всѧ, є҆диноро́дный сло́ве бж҃їй, прише́лъ є҆сѝ на зе́млю за чл҃вѣколю́бїе, чл҃вѣ́къ бы́въ непрело́женъ, и҆ крⷭ҇тъ и҆ сме́рть претерпѣ́лъ є҆сѝ пло́тїю, безстра́стный бж҃ество́мъ: воскре́съ же и҆з̾ ме́ртвыхъ, безсме́ртїе по́далъ є҆сѝ ро́дꙋ человѣ́ческомꙋ, ꙗ҆́кѡ є҆ди́нъ всеси́ленъ.

Та́же стїхи̑ры па́схи съ припѣ́вы и҆́хъ, и҆ ѻ҆бы́чный ѿпꙋ́стъ. И҆ лїті́а внѣ̀ ѻ҆би́тели. Часы́ же по ѻ҆бы́чаю па́схи.

На лїтꙋргі́и а҆нтїфѡ́ны па́схи, прокі́менъ а҆пⷭ҇ла, гла́съ ѕ҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ. А҆пⷭ҇лъ дѣѧ́нїй: зача́ло є҃: Речѐ пе́тръ къ лю́демъ: А҆ллилꙋ́їа, гла́съ в҃: Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆блажа́тъ мѧ̀ всѝ ро́ди. Є҆ѵⷢ҇лїе ѿ і҆ѡа́нна, зача́ло д҃: Стоѧ́ше і҆ѡа́ннъ: Прича́стный: Тѣ́ло хрⷭ҇то́во:

Въ сре́дꙋ свѣ́тлыѧ седми́цы ве́чера,

во свѣти́льничномъ, по Хрⷭ҇то́съ воскре́се, и҆ є҆ктенїѝ, пое́мъ стїхи̑ры воскре́сны г҃, гла́съ є҃:

Честны́мъ твои́мъ крⷭ҇то́мъ хрⷭ҇тѐ, дїа́вола посрами́лъ є҆сѝ, и҆ воскрⷭ҇нїемъ твои́мъ жа́ло грѣхо́вное притꙋпи́лъ є҆сѝ, и҆ спа́слъ є҆сѝ ны̀ ѿ вра́тъ сме́ртныхъ: сла́вимъ тѧ̀ є҆диноро́дне. <<к҃в ѡ҆б.: 44>>

Воскрⷭ҇нїе даѧ́й ро́дꙋ человѣ́ческомꙋ, ꙗ҆́кѡ ѻ҆вча̀ на заколе́нїе веде́сѧ: ᲂу҆страши́шасѧ сегѡ̀ кнѧ́зи а҆́дстїи, и҆ взѧ́шасѧ врата̀ плачє́внаѧ. вни́де бо цр҃ь сла́вы хрⷭ҇то́съ, глаго́лѧ сꙋ́щымъ во ᲂу҆́захъ, и҆зыди́те: и҆ сꙋ́щымъ во тьмѣ̀, ѿкры́йтесѧ.

Ве́лїе чꙋ́до, неви́димыхъ содѣ́тель, за чл҃вѣколю́бїе пло́тїю пострада́въ, воскр҃се безсме́ртный, прїиди́те ѻ҆те́чєствїѧ ꙗ҆зы̑къ, томꙋ̀ поклони́мсѧ: бл҃гоꙋтро́бїемъ бо є҆гѡ̀ ѿ пре́лести и҆зба́вльшесѧ, въ трїе́хъ ѵ҆поста́сѣхъ є҆ди́наго бг҃а пѣ́ти навыко́хомъ.

И҆ ꙾восто́чны꙾[[а҆нато́лїевы]] г҃, гла́съ то́йже:

Вече́рнее поклоне́нїе прино́симъ тебѣ̀ невече́рнемꙋ свѣ́тꙋ, на коне́цъ вѣкѡ́въ, ꙗ҆́кѡ въ зерца́лѣ пло́тїю возсїѧ́вшемꙋ мі́рови, и҆ да́же до а҆́да низше́дшемꙋ, и҆ та́мѡ сꙋ́щꙋю тьмꙋ̀ разрꙋши́вшемꙋ, и҆ свѣ́тъ воскрⷭ҇нїѧ ꙗ҆зы́кѡмъ показа́вшемꙋ: свѣтода́вче гдⷭ҇и сла́ва тебѣ̀.

Нача́льника сп҃се́нїѧ на́шегѡ, хрⷭ҇та̀ славосло́вимъ: томꙋ́ бо и҆з̾ ме́ртвыхъ воскрⷭ҇шꙋ, мі́ръ ѿ пре́лести сп҃се́нъ бы́сть. ра́дꙋетсѧ ли́къ а҆́гг҃льскїй, бѣ́гаетъ де́монѡвъ пре́лесть, а҆да́мъ пады́й воста̀, дїа́волъ ᲂу҆праздни́сѧ.

И҆̀же ѿ кꙋстѡді́и наꙋче́ни быва́хꙋ ѿ беззакѡ́нникъ, покры́йте хрⷭ҇то́во воста́нїе, и҆ прїими́те сре́бреники, и҆ рцы́те ꙗ҆́кѡ на́мъ спѧ́щымъ, и҆з̾ гро́ба ᲂу҆кра́денъ бы́сть ме́ртвый. кто̀ ви́дѣ, кто̀ слы́ша, мертвеца̀ ᲂу҆кра́дена когда̀, па́че же пома́зана и҆ на́га, ѡ҆ста́вльша и҆ во гро́бѣ погреба̑льнаѧ своѧ̑; не прельща́йтесѧ і҆ꙋдє́е, навы́кните рече́нїємъ проро́чєскимъ, и҆ ᲂу҆разꙋмѣ́йте, ꙗ҆́кѡ то́й є҆́сть вои́стиннꙋ и҆зба́витель мі́ра, и҆ всеси́льный. <<к҃г: 45>>

Сла́ва:

Гдⷭ҇и, а҆́дъ плѣни́вый, и҆ сме́рть попра́вый сп҃се на́шъ, просвѣти́вый мі́ръ крⷭ҇то́мъ чⷭ҇тны́мъ, поми́лꙋй на́съ.

И҆ ны́нѣ: бг҃оро́диченъ:

Въ чермнѣ́мъ мо́ри, неискꙋсобра́чныѧ невѣ́сты ѡ҆́бразъ написа́сѧ и҆ногда̀: та́мѡ мѡѷсе́й, раздѣли́тель воды̀: здѣ́ же гаврїи́лъ, слꙋжи́тель чꙋдесѐ. тогда̀ глꙋбинꙋ̀ ше́ствова немо́креннѡ і҆и҃ль: ны́нѣ же хрⷭ҇та̀ родѝ безсѣ́меннѡ дв҃а. мо́ре по проше́ствїи і҆и҃левѣ, пребы́сть непрохо́дно: непоро́чнаѧ по ржⷭ҇твѣ̀ є҆мманꙋ́илевѣ, пребы́сть нетлѣ́нна. сы́й, и҆ пре́жде сы́й, ꙗ҆вле́йсѧ ꙗ҆́кѡ чл҃вѣ́къ, бж҃е поми́лꙋй на́съ.

Вхо́дъ съ кади́ломъ. Свѣ́те ти́хїй: И҆ прокі́менъ, гла́съ з҃: Внꙋшѝ бж҃е моли́твꙋ мою̀, и҆ не пре́зри моле́нїѧ моегѡ̀. Сті́хъ: Вонми́ ми, и҆ ᲂу҆слы́ши мѧ̀. Сті́хъ: Ꙗ҆́кѡ ᲂу҆клони́ша на мѧ̀ беззако́нїе. Сті́хъ: А҆́зъ къ бг҃ꙋ воззва́хъ, и҆ гдⷭ҇ь ᲂу҆слы́ша мѧ̀, ве́черъ и҆ заꙋ́тра и҆ полꙋ́дне. Та́же: Внꙋшѝ бж҃е моли́твꙋ мою̀, и҆ не пре́зри моле́нїѧ моегѡ̀. Є҆ктенїа̀: и҆ Сподо́би гдⷭ҇и въ ве́черъ се́й: И҆ прѡ́чаѧ всѧ̑, ꙗ҆́коже пред̾ѧви́сѧ.

На стїхо́внѣ, стїхи́ра воскре́сна, гла́съ є҃:

Тебѐ воплоще́ннаго сп҃са хрⷭ҇та̀, и҆ нб҃съ не разлꙋчи́вшасѧ, во гла́сѣхъ пѣ́нїй велича́емъ: ꙗ҆́кѡ крⷭ҇тъ и҆ сме́рть прїѧ́лъ є҆сѝ за ро́дъ на́шъ, ꙗ҆́кѡ чл҃вѣколю́бецъ гдⷭ҇ь, и҆спрове́ргїй а҆́дова врата̀, тридне́внѡ воскре́слъ є҆сѝ, спаса́ѧ дꙋ́шы на́шѧ.

И҆ стїхи̑ры па́схи, съ припѣ́вы и҆́хъ, ꙗ҆́коже предписа́сѧ. Хрⷭ҇то́съ воскре́се: три́жды. И҆ ѿпꙋ́стъ. <<к҃г ѡ҆б.: 46>>

Въ четверто́къ свѣ́тлыѧ седми́цы, на ᲂу҆́трени,

быва́етъ вослѣ́дованїе всѐ, ꙗ҆́коже пред̾ѧви́сѧ.

На хвали́техъ, Всѧ́кое дыха́нїе: поста́вимъ стїхѝ д҃. И҆ пое́мъ стїхи̑ры воскре́сны, гла́съ є҃:

Гдⷭ҇и, запеча́танꙋ гро́бꙋ ѿ беззако́нникѡвъ, проше́лъ є҆сѝ и҆з̾ гро́ба, ꙗ҆́коже роди́лсѧ є҆сѝ ѿ бцⷣы: не ᲂу҆разꙋмѣ́ша, ка́кѡ воплоти́лсѧ є҆сѝ, безпло́тнїи твоѝ а҆́гг҃ли: не чꙋ́вствоваша, когда̀ воскр҃слъ є҆сѝ, стрегꙋ́щїи тѧ̀ во́ини. ѻ҆боѧ́ бо запечатлѣ́стасѧ и҆спытꙋ́ющымъ, ꙗ҆ви́шасѧ же чꙋдеса̀ кла́нѧющымсѧ вѣ́рою та́инствꙋ: є҆́же воспѣва́ющымъ, возда́ждь на́мъ ра́дость и҆ ве́лїю млⷭ҇ть.

Гдⷭ҇и, верєѝ вѣ́чныѧ сокрꙋши́въ, и҆ ᲂу҆́зы растерза́въ, ѿ гро́ба воскр҃слъ є҆сѝ, ѡ҆ста́вль твоѧ̑ погреба̑льнаѧ, во свидѣ́тельство и҆́стиннагѡ тридне́внагѡ твоегѡ̀ погребе́нїѧ: и҆ предвари́лъ є҆сѝ въ галїле́и, въ пеще́рѣ стрего́мый. вели́каѧ твоѧ̀ млⷭ҇ть, непостижи́ме сп҃се, поми́лꙋй и҆ сп҃сѝ на́съ.

Гдⷭ҇и, жєны̀ теко́ша на гро́бъ, ви́дѣти тѧ̀ хрⷭ҇та̀ на́съ ра́ди пострада́вшаго, и҆ прише́дше, ѡ҆брѣто́ша а҆́гг҃ла на ка́мени сѣдѧ́ща, стра́хомъ ѿва́льшемсѧ, и҆ къ ни̑мъ возопѝ глаго́лѧ: воскр҃се гдⷭ҇ь, рцы́те ᲂу҆ч҃нкѡ́мъ, ꙗ҆́кѡ воскре́се ѿ ме́ртвыхъ, спаса́ѧй дꙋ́шы на́шѧ.

Гдⷭ҇и, ꙗ҆́коже и҆зше́лъ є҆сѝ ѿ запеча́таннагѡ гро́ба, та́кѡ вше́лъ є҆сѝ и҆ две́ремъ заключє́ннымъ ко ᲂу҆ч҃нкѡ́мъ твои́мъ, показꙋ́ѧ и҆̀мъ тѣлє́снаѧ страда́нїѧ, ꙗ҆̀же под̾ѧ́лъ є҆сѝ сп҃се долготерпѣли́вый: ꙗ҆́кѡ ѿ сѣ́мене дв҃дова ꙗ҆́звы претерпѣ́лъ є҆сѝ: ꙗ҆́кѡ сн҃ъ же бж҃їй, мі́ръ <<к҃д: 47>> свободи́лъ є҆сѝ. ве́лїѧ твоѧ̀ млⷭ҇ть, непостижи́ме сп҃се, поми́лꙋй и҆ сп҃сѝ на́съ.

Та́же, стїхи̑ры па́схи, съ припѣ́вы и҆́хъ, Хрⷭ҇то́съ воскре́се: три́жды. и҆ ѿпꙋ́стъ. Часы̀ па́схи. На лїтꙋргі́и а҆нтїфѡ́ны па́схи. Прокі́менъ, гла́съ г҃: По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте. Сті́хъ: Всѝ ꙗ҆зы́цы восплещи́те рꙋка́ми, воскли́кните бг҃ꙋ гла́сомъ ра́дованїѧ. А҆пⷭ҇лъ въ дѣѧ́нїихъ, зача́ло ѕ҃: Речѐ пе́тръ: А҆ллилꙋ́їа, гла́съ д҃: Налѧцы̀, и҆ ᲂу҆спѣва́й, и҆ црⷭ҇твꙋй, и҆́стины ра́ди и҆ кро́тости и҆ пра́вды. Сті́хъ: Возлюби́лъ є҆сѝ пра́вдꙋ, и҆ возненави́дѣлъ є҆сѝ беззако́нїе. Є҆ѵⷢ҇лїе ѿ і҆ѡа́нна, зача́ло и҃: Человѣ́къ нѣ́кїй: Прича́стный: Тѣ́ло хрⷭ҇то́во прїими́те:

Въ четверто́къ ве́чера свѣ́тлыѧ седми́цы,

Пое́мъ настоѧ́щее послѣ́дованїе, бы́вшее ѿ гдⷭ҇и́на нїки́фора каллі́ста ѯанѳопꙋ́ла. На прест҃ꙋ́ю гпⷭ҇жꙋ̀ влⷣчцꙋ бцⷣꙋ живопрїе́мный и҆сто́чникъ. Не бо̀ ѡ҆брѣто́хомъ въ тѵ́пицѣ сицева́гѡ послѣ́дованїѧ, но положи́сѧ любвѐ ра́ди прест҃ы́ѧ бцⷣы.

На Гдⷭ҇и воззва́хъ: поста́вимъ стїхѡ́въ і҃, и҆ пое́мъ стїхи̑ры воскре́сны ѻ҆смогла́сника ѕ҃, гла́съ ѕ҃:

Побѣ́дꙋ и҆мѣ́ѧ хрⷭ҇тѐ, ю҆́же на а҆́да, на крⷭ҇тъ возше́лъ є҆сѝ: да во тьмѣ̀ сме́рти сѣдѧ́щыѧ воскреси́ши съ собо́ю, и҆́же въ ме́ртвыхъ свобо́дь, и҆сточа́ѧй живо́тъ ѿ своегѡ̀ свѣ́та, всеси́льне сп҃се, поми́лꙋй на́съ.

Дне́сь хрⷭ҇то́съ сме́рть попра́въ, ꙗ҆́коже речѐ, воскре́се, и҆ ра́дованїе мі́рови дарова̀, да всѝ взыва́юще, пѣ́снь та́кѡ <<к҃д ѡ҆б.: 48>> рце́мъ: и҆сто́чниче жи́зни, непристꙋ́пный свѣ́те, всеси́льне сп҃се, поми́лꙋй на́съ.

Тебѐ гдⷭ҇и, сꙋ́щагѡ по все́й тва́ри, грѣ́шнїи ка́мѡ бѣжи́мъ; на нб҃сѝ са́мъ живе́ши, во а҆́дѣ попра́лъ є҆сѝ сме́рть, во глꙋбины̑ мѡрскі́ѧ; та́мѡ рꙋка̀ твоѧ̀ влⷣко. къ тебѣ̀ прибѣга́емъ, тебѣ̀ припа́дающе мо́лимсѧ: воскр҃сы́й и҆з̾ ме́ртвыхъ поми́лꙋй на́съ.

И҆ны́ѧ стїхи̑ры ꙾восто́чны꙾[[а҆нато́лїевы]], гла́съ то́йже:

Крⷭ҇то́мъ твои́мъ хрⷭ҇тѐ хва́лимсѧ, и҆ воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ. ра́звѣ тебѐ и҆на́гѡ не вѣ́мы.

Сла́ва си́лѣ твое́й гдⷭ҇и, ꙗ҆́кѡ ᲂу҆праздни́лъ є҆сѝ держа́вꙋ и҆мꙋ́щагѡ сме́рти, ѡ҆бнови́лъ є҆сѝ ны̀ крⷭ҇то́мъ твои́мъ, да́рꙋѧй на́мъ жи́знь и҆ нетлѣ́нїе.

Вы́нꙋ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: крⷭ҇тъ бо претерпѣ́въ, сме́ртїю сме́рть погꙋбѝ.

Та́же стїхи̑ры живопрїе́мнагѡ и҆сто́чника, гла́съ то́йже. Подо́бенъ: Всѐ возло́жше:

Стра̑ннаѧ и҆ пресла̑внаѧ нб҃съ влⷣка на тебѣ̀ соверша́ше и҆знача́ла, всенепоро́чнаѧ: и҆́бо свы́ше ꙗ҆́вственнѡ ᲂу҆ка́нꙋ, ꙗ҆́коже до́ждь во ᲂу҆тро́бѣ твое́й бг҃оневѣ́сто, и҆сто́чникъ тѧ̀ показꙋ́ѧ всѐ благо́е врѣ́ющїй, ѻ҆би́лїе же и҆сцѣле́нїй, благодѣѧ̑нїѧ и҆сточа́ющїй всѣ̑мъ незави́стнѡ, тре́бꙋющымъ крѣ́пости дꙋ́шъ, и҆ здра́вїѧ тѣлесѐ, водо́ю благода́ти.

Ма́ннꙋ тѧ̀ нбⷭ҇нꙋю, и҆ раѧ̀ дв҃о и҆сто́чникъ бж҃е́ственный и҆менꙋ́ю, влⷣчце, прїи́скреннѣ: земли́ бо течѐ то́къ, и҆ бл҃года́ть и҆сто́чника твоегѡ̀ четвероча́стїе є҆ѧ̀ покрыва́ющаѧ, <<к҃є: 49>> стра́нными чꙋдесы̀ всегда̀, и҆ всѣ̑мъ проси́маѧ быва́етъ вода̀ пїе́маѧ. тѣ́мже веселѧ́щесѧ хрⷭ҇тоимени́тїи, притека́емъ вѣ́рнѡ, ст҃ы́ню че́рплюще всегда̀ сладкото́чнꙋю.

Стрꙋи̑ и҆сцѣле́нїй и҆сточа́еши дв҃о, вѣ́рнѡ притека́ющымъ и҆сто́чникꙋ твоемꙋ̀ всегда̀ бг҃оневѣ́сто: тꙋ́не бо и҆злива́еши, ѻ҆би́льнѡ и҆ бога́тнѡ недꙋ́гꙋющымъ и҆сцѣлє́нїѧ: слѣпы̑ѧ ви́дѧщыѧ ꙗ҆влѧ́еши ꙗ҆́снѡ, пристꙋпа́ющыѧ къ тебѣ̀: хрѡ́мыѧ мнѡ́гїѧ и҆спра́вила є҆сѝ, и҆ разсла́блєнныѧ стѧгнꙋ́ла є҆сѝ, ᲂу҆мерщвле́на же ѡ҆живи́ла є҆сѝ возлїѧ́нїемъ трегꙋ́бымъ, наводне́нныхъ и҆ ѕлоды́шꙋщихъ стра̑сти и҆сцѣли́ла є҆сѝ.

Повторѧ́емъ а҃-ю стїхи́рꙋ.

Сла́ва: гла́съ ѕ҃:

Кто̀ возглаго́летъ си̑лы твоѧ̀ и҆сто́чниче, и҆́же неистоща́емыми чꙋдесы̀ и҆з̾ѡби́лꙋѧй, мнѡ́гаѧ и҆ па́че є҆стества̀ содѣва́еши и҆сцѣле́ньми; ѽле вели́чїй, ꙗ҆̀же всѣ̑мъ и҆злива́еши! не то́кмѡ бо болѣ̑зни неꙋдѡ́бныѧ ѿгна́ла є҆сѝ притека́ющихъ съ любо́вїю, но и҆ дꙋшє́вныѧ стра̑сти и҆змыва́еши ѡ҆чища́ющи всенескве́рнаѧ, всѣ̑мъ подаю́щи ве́лїю ми́лость.

И҆ ны́нѣ:

Кто̀ тебѐ не ᲂу҆блажи́тъ прест҃а́ѧ дв҃о; кто́ ли не воспое́тъ твоегѡ̀ пречи́стагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный: то́йже ѿ тебѐ чи́стыѧ про́йде, неизрече́ннѡ вопло́щсѧ. є҆стество́мъ бг҃ъ сы́й, и҆ є҆стество́мъ бы́въ человѣ́къ на́съ ра́ди: не во двою̀ лицꙋ̀ раздѣлѧ́емый, но во двою̀ є҆стествꙋ̀ несли́тнѡ познава́емый. того̀ молѝ чи́стаѧ всебл҃же́ннаѧ, поми́ловатисѧ дꙋша́мъ на́шымъ. <<к҃є ѡ҆б.: 50>>

Вхо́дъ съ кади́ломъ. Свѣ́те ти́хїй: Прокі́менъ, гла́съ з҃: Возлюблю́ тѧ гдⷭ҇и крѣ́посте моѧ̀, гдⷭ҇ь ᲂу҆тверже́нїе моѐ. Сті́хъ: Бг҃ъ мо́й, помо́щникъ мо́й, и҆ ᲂу҆пова́ю на него̀. Сті́хъ: Хвалѧ̀ призовꙋ̀ гдⷭ҇а, и҆ ѿ вра̑гъ мои́хъ спасꙋ́сѧ. Сті́хъ: Оу҆слы́ша ѿ хра́ма ст҃а́гѡ своегѡ̀ гла́съ мо́й. Та́же: Возлюблю́ тѧ гдⷭ҇и крѣ́посте моѧ̀, гдⷭ҇ь ᲂу҆тверже́нїе моѐ. Рце́мъ всѝ: Сподо́би гдⷭ҇и въ ве́черъ се́й: и҆ прѡ́чаѧ.

На стїхо́внѣ стїхи́ра воскрⷭ҇на гла́съ ѕ҃, ѻ҆смогла́сника:

Воскрⷭ҇нїе твоѐ хрⷭ҇тѐ сп҃се, а҆́гг҃ли пою́тъ на нб҃сѣ́хъ, и҆ на́съ на землѝ сподо́би, чⷭ҇тымъ се́рдцемъ тебѐ сла́вити.

Та́же, настоѧ́щыѧ стїхи̑ры бцⷣы, гла́съ є҃. Подо́бенъ:

Ра́дꙋйсѧ живоно́сный и҆сто́чниче, по морѧ́мъ разлива́ѧй чꙋдеса̀, на всю̀ вселе́ннꙋю. ѻ҆кеа́не ᲂу҆́мный, ні́лѡвы стрꙋи̑ превосходѧ́й и҆злива́нїемъ бл҃года́ти. сїлѡа́ме вторы́й, во́дꙋ и҆сточа́ѧй, а҆́ки ѿ ка́мене пресла́внꙋю, і҆ѻрда́ново же прїе́мый дѣ́йство. ма́нно спаси́тельнаѧ же, ꙗ҆́снѡ быва́емаѧ, ко и҆́щꙋщагѡ тре́бованїю, бога́таѧ вои́стиннꙋ и҆ незави́стнаѧ, хрⷭ҇то́ва мт҃и ѻ҆трокови́це, и҆злива́ющаѧ мі́рови ве́лїю ми́лость.

Сті́хъ: Ѡ҆свѧти́лъ є҆́сть селе́нїе своѐ вы́шнїй.

Пѣ́сньми чꙋ́дными вѣ́рнїи, нбⷭ҇ный ѻ҆́блакъ воспои́мъ, ка́плю нбⷭ҇нꙋю живода́вца хрⷭ҇та̀, на зе́млю нетлѣ́ннѡ ѡ҆дожди́вшꙋю, жи́вꙋ ска́чꙋщꙋю, и҆ и҆сточа́ющꙋю безсме́ртнаѧ: во́дꙋ бж҃е́ственнꙋю, а҆мвросі́ю, не́ктара, никогда́же по питїѝ и҆стлѣва́юща, жа́ждꙋ же та́ющꙋю дꙋ́шы ѿгонѧ́юща. ѿ негѡ́же пїю́щымъ разꙋ́мнѡ, то́ки бж҃є́ственныѧ предлага́ютсѧ ѿ ᲂу҆́мнагѡ чре́ва, точа́ща всѣ̑мъ бл҃года́ть незави́стнꙋю. <<к҃ѕ: 51>>

Сті́хъ: Рѣ́чнаѧ ᲂу҆стремлє́нїѧ веселѧ́тъ гра́дъ бж҃їй.

Ра́дꙋйсѧ, живопрїе́мный и҆сто́чниче, вѣ́чнѡ и҆сточа́ѧ бл҃года́ти, лїѧ́нїе и҆сцѣле́нїй, всѧ́кꙋю недꙋ́гѡвъ крѣ́пость, немощнꙋ́ю и҆ ѕлꙋ́ю ѿгонѧ́ющее, слѣпы́хъ воззрѣ́нїе, и҆ прокаже́нныхъ бжⷭ҇твенное ѡ҆чище́нїе, точа́щее недꙋ́гѡвъ всѧ́кое врачевство̀, всѣ̑мъ притека́ющымъ вѣ́рнѡ къ хра́мꙋ твоемꙋ̀: вели́каѧ ѻ҆́бщаѧ цѣльба̀, безме́зднаѧ вои́стиннꙋ и҆ гото́ваѧ, мт҃и хрⷭ҇та̀ сло́ва, и҆сточа́ющагѡ мі́рови ве́лїю ми́лость.

Сла́ва: гла́съ є҃:

Вострꙋ́бимъ празднолю́бцы въ пѣ́снехъ, воспле́щемъ въ вода́хъ, и҆ возликꙋ́имъ ра́дꙋющесѧ, вѣ́чными то́ками живоно́снагѡ и҆сто́чника: ца́рїе и҆ кнѧ́зи да стека́ютсѧ, и҆ и҆сто́чника бл҃года́ти да че́рплютъ незави́стнѡ: цари́ бо спасѐ, на ѻ҆дрѣ́ же содержи̑мыѧ прикоснове́нїемъ возста́ви. па́стырїе же и҆ всѝ дождено́сный ѻ҆́блакъ, спаси́тельнꙋю во́дꙋ сше́дшесѧ почерпе́мъ. и҆̀же въ недꙋ́зѣхъ свобожде́нїе: и҆̀же въ бѣда́хъ, крѣ́пость: прохлажде́нїе, и҆̀же въ жа́ждѣ: слѣпі́и ѻ҆́чи, глꙋсі́и бл҃гослы́шанїе, ѕлостра́ждꙋщїи и҆сцѣле́нїе: и҆̀же въ сме́ртехъ, живоно́снꙋю: всѝ повсю́дꙋ вѣ̑рнымъ и҆сточа́ющꙋю во́ды спасе́нїѧ, воспле́щꙋще си́це воззове́мъ: присноживы́ѧ то́ки и҆злива́ющаѧ ѿ и҆сто́чника чи́стаѧ, не преста́й дв҃о всегда̀ молѧ́щисѧ ѡ҆ рабѣ́хъ твои́хъ.

И҆ ны́нѣ: гла́съ то́йже:

Воскрⷭ҇нїѧ де́нь: Хрⷭ҇то́съ воскре́се: три́жды. И҆ ѿпꙋ́стъ. <<к҃ѕ ѡ҆б.: 52>>

Въ пѧто́къ свѣ́тлыѧ седми́цы на ᲂу҆́трени

канѡ́нъ па́сцѣ, со і҆рмосы̀, на и҃: и҆ бцⷣы, на ѕ҃:

Канѡ́нъ па́сцѣ, гла́съ а҃:

Пѣ́снь а҃.

І҆рмо́съ: Воскрⷭ҇нїѧ де́нь:

Ѡ҆чи́стимъ чꙋ̑вствїѧ: Нб҃са̀ ᲂу҆̀бо досто́йнѡ да веселѧ́тсѧ:

И҆ канѡ́нъ бцⷣы, є҆гѡ́же краестро́чїе: Нїки́форꙋ каллі́стꙋ тꙋ̀ ѯанѳопꙋ́лꙋ.

[Н] Ны́нѣ и҆сточи́ ми дв҃о бцⷣе и҆сто́чниче, бл҃года́ть даю́щи сло́ва, ꙗ҆́кѡ да воспою́ тѧ и҆сто́чникъ, врѣ́ющїй живо́тъ и҆ бл҃года́ть вѣ̑рнымъ: ты́ бо ѵ҆поста́сное сло́во и҆сточи́ла є҆сѝ.

[І] Врачевство̀ па́че є҆стества̀, хра́мъ тво́й чⷭ҇тна́ѧ, ꙗ҆влѧ́етсѧ всѣ̑мъ ѻ҆трокови́це: ѿ сме́рти бо ꙗ҆́вныѧ притека́ющыѧ вѣ̑рныѧ ꙗ҆́вѣ возставлѧ́етъ, и҆ всѣ̑мъ незави́стнꙋю то́читъ сла́дость.

[К] И҆злива́еши съ нб҃сѐ неистощи́мѡ бл҃года̑ти вои́стиннꙋ є҆ди́на: слѣпѣ́юща бо твори́ши взира́ти къ свѣ́тꙋ, бла́томъ но́вымъ, возгласи́вши свы́ше па́че смы́сла леѡ́нови.

[Н] Ѻ҆́бщее любоче́стїе чл҃вѣ́чества честна́ѧ, ра́дꙋйсѧ мр҃і́е, ра́дꙋйсѧ: всѣ́хъ бо творе́цъ на тѧ̀, ꙗ҆́коже ка́плѧ сни́де ꙗ҆́вственнѡ, и҆сто́чникъ тѧ̀ безсме́ртенъ показа́въ бг҃оневѣ́стнаѧ.

Пѣ́снь г҃.

І҆рмо́съ: Прїиди́те пи́во пїе́мъ:

Ны́нѣ всѧ̑ и҆спо́лнишасѧ: Вчера̀ спогребо́хсѧ тебѣ̀: <<к҃з: 53>>

Бцⷣы подо́бны:

[Ф] Свѣ́тлый тѧ̀ ст҃ы́й хра́мъ влⷣки всѣ́хъ ѻ҆трокови́це вѣ́мъ, и҆ нетлѣ́нїѧ и҆сто́чникъ, во́дꙋ и҆злива́ющъ хрⷭ҇та̀, ѿ негѡ́же напаѧ́емсѧ.

[О] Ѿ твоеѧ̀ бл҃года́ти влⷣчце и҆сто́чниче, самоде́ржцꙋ дае́ши и҆схо́дѡвъ происхожде́нїе содержи́мо лю́тѣ, ка́мене подстоѧ́нїе стра́шное, водо́ю разрѣши́вшеесѧ.

[Р] Тече́тъ бл҃года́ть незави́стнаѧ ѿ тебѐ, бцⷣе дв҃о, ѻ҆би́льнѡ точа́щаѧ, хромі́и ска́чꙋтъ ѡ҆ тебѣ̀, прокаже́нныхъ ѡ҆чища́етсѧ мно́жество, и҆ де́мѡни ᲂу҆гнѣта́ютсѧ.

[О] Всѣ̑мъ дае́ши и҆сцѣле́нїе вѣ̑рнымъ, царє́мъ, простцє́мъ, ни́щымъ, кнѧзє́мъ, ᲂу҆бѡ́гимъ, бога̑тымъ ѻ҆́бще, во́дꙋ и҆злива́ѧй и҆сто́чниче разли́чное и҆сцѣле́нїе.

Конда́къ па́сцѣ: А҆́ще и҆ во гро́бъ снизше́лъ є҆сѝ:

Сѣда́ленъ, гла́съ и҃. Подо́бный: Премꙋ́дрости сло́ва:

Приснотекꙋ́щїй и҆сто́чникъ, и҆ живо́тный, и҆сточа́ѧй стрꙋѧ̀ бж҃е́ственный то́къ, согла́снѡ восхва́лимъ бл҃года́ти просѧ́ще: на кі́йждо бо де́нь и҆сточа́етъ и҆сцѣлє́нїѧ, ꙗ҆́кѡ рѣ́къ течє́нїѧ показꙋ́ѧй малѣ́йшаѧ. тѣ́мже по до́лгꙋ пристꙋпа́юще съ любо́вїю, вѣ́рнѡ почерпе́мъ ѿ и҆сто́чника неисчерпа́емое здра́вїе, вои́стиннꙋ безсме́ртное, ѡ҆роша́ющее вѣ́рнѡ благочести́выхъ сердца̀: ᲂу҆стна́ми возопїи́мъ, ты̀ є҆сѝ вѣ́рныхъ ᲂу҆тѣше́нїе.

Пѣ́снь д҃.

І҆рмо́съ: На бж҃е́ственнѣй стра́жи:

Мꙋ́жескїй ᲂу҆́бѡ по́лъ: Ꙗ҆́кѡ є҆динолѣ́тный а҆́гнецъ: Бг҃оѻц҃ъ ᲂу҆́бѡ дв҃дъ: <<к҃з ѡ҆б.: 54>>

Бцⷣы подо́бны:

[Ѵ] Па́че песка̀ вои́стиннꙋ, и҆ ка́плїй дожде́вныхъ, бы́ша бцⷣе мно́жєства, и҆сто́чника дѣ́лъ твои́хъ, непреста́ннѡ текꙋ̑щаѧ на всю̀ зе́млю бога́тнѡ, и҆ всѧ́каго болѧ́ща лю́тѣ ско́рѡ и҆сцѣлѧ̑ющаѧ.

[К] На стѣсне́нный жены̀ ѿ каркі́на сосе́цъ, вода̀ возлива́етсѧ дв҃о, и҆сто́чника твоегѡ̀ влⷣчце, и҆ а҆́бїе преста́ша стра̑сти смертонѡ́сныѧ стрꙋе́ю, и҆ каркі́нъ про́стѡ и҆зы́ти позна̀.

[А] Недомы́слимое въ тебѣ̀, и҆ па́че є҆стества̀ содѣ́ѧнное є҆́сть ꙗ҆́вственнѡ бцⷣе: вода́ бо быва́етъ и҆сто́чника твоегѡ̀ и҆сцѣле́нїе, недꙋ́гѡмъ смертонѡ́снымъ проти́вное, є҆гѡ́же є҆стество̀ ꙗ҆́вѣ никогда́же вѣ́дѧше.

[Л] При́снѡ ᲂу҆мерщвлѧ́етъ мѧ̀ вра́гъ сла́стными прило́ги, влⷣчце и҆сто́чниче бцⷣе, не пре́зри, предварѝ ско́раѧ по́моще: сегѡ́ же сѣ́тей мѧ̀ и҆зба́ви, да воспою́ тѧ при́снѡ многопѣ́тꙋю.

Пѣ́снь є҃.

І҆рмо́съ: Оу҆́тренюемъ ᲂу҆́треннюю:

Безмѣ́рное твоѐ бл҃гоꙋтро́бїе: Пристꙋ́пимъ свѣщено́снїи:

Бцⷣы подо́бны:

[Л] Глагѡ́ланнаѧ дв҃о ѻ҆трокови́це, и҆сто́чника твоегѡ̀ вои́стиннꙋ чꙋдеса̀, ᲂу҆жаса́ютъ чл҃вѣ́кѡвъ помышле́нїе: па́че бо є҆стества̀ сꙋ́ть, всѧ̑ вѣ̑рныѧ ѡ҆свѧща̑ющаѧ.

[І] Повѣствова̀ рꙋно̀, ма́нна и҆ сїлѡа́мъ, и҆ ка́мень точа́щь, соломѡ́новъ притво́ръ, бл҃года́ть твою̀, і҆ѻрда̑нскїѧ во́ды, и҆ и҆сто́чникъ самарѧны́ни. <<к҃и: 55>>

[С] Ка̑пли твоѧ̀ ѻ҆трокови́це дв҃о, ꙗ҆̀же и҆сто́чника, и҆ ме́ртваго ѡ҆живи́ша, па́че сло́ва содѣ́ѧнное и҆ смы́сла: всѧ̑ бо твоѧ̑ всечⷭ҇таѧ, сло́во побѣжда́ютъ человѣ́ческое.

[Т] Стра̑сти моѧ̀ ѻ҆трокови́це и҆сцѣлѝ, кровотече́нїѧ и҆сто́чникъ и҆зсꙋша́ющи, и҆ лю́тое пла́мене возжже́нїе, и҆ здра́вїѧ преложе́нїе, и҆схо́дѡвъ сою́зъ, и҆ чревотече́нїе.

Пѣ́снь ѕ҃.

І҆рмо́съ: Снизше́лъ є҆сѝ въ преиспо́днѧѧ:

Сохрани́въ цѣ́ла зна́менїѧ: Сп҃се мо́й, живо́е же и҆ неже́ртвенное заколе́нїе:

Бцⷣы подо́бны:

[О] Словеса̀ сло́ва, ꙗ҆́кѡ вои́стиннꙋ и҆сто́чника, воспѣва́емъ тѧ̀ чⷭ҇таѧ: премꙋ́дрости бо глꙋбинꙋ̀ ꙗ҆́кѡ па́че сло́ва ражда́еши, повѣ́сивша на воздꙋ́сѣ тече́нїѧ, и҆ зе́млю на водѣ̀.

[Ѵ] Подшла̀ є҆сѝ лѣ́ствицъ несе́нїе, ѿе́млющее сокрꙋше́нїе и҆̀же та́мѡ живопи́сцѡвъ, ѽ всест҃ы́й и҆сто́чниче! спаса́ѧй лю́ди ѿ трꙋ́са до́мꙋ па́дшыѧ.

[Т] Оу҆трѡ́бы неродѧ́щыѧ непло́дствомъ пре́жде, разрѣша́еши ꙗ҆́вѣ, и҆сто́чника твоегѡ̀ стрꙋѧ́ми: и҆́бо ꙗ҆́кѡ роди́вшаѧ влⷣкꙋ всѣ́хъ. и҆ рожде́нїѧ подае́ши.

[О] Ни сло́во, ни ᲂу҆́мъ, нижѐ ѧ҆зы́къ твоѐ возмо́гꙋтъ чⷭ҇таѧ ржⷭ҇тво̀ похвали́ти, но немощствꙋ́ютъ въ тебѣ̀, и҆ ѡ҆блича́етсѧ фїлосо́фѡвъ че́стность, и҆ ри́торѡвъ красота̀.

Конда́къ, гла́съ и҃. Подо́бенъ: Взбра́нной:

Ѿ неистощи́мыѧ ты̀, и҆сто́чниче бг҃облагода́тный, подае́ши мѝ, точа́щи во́ды твоеѧ̀ бл҃года́ти, <<к҃и ѡ҆б.: 56>> приснотекꙋ́щїй па́че сло́ва: ꙗ҆́кѡ бо сло́во ро́ждшаѧ па́че смы́сла, молю́ ти сѧ, ѡ҆роси́ мѧ бл҃года́тїю, да зовꙋ́ ти: ра́дꙋйсѧ, водо̀ спаси́тельнаѧ.

І҆́косъ:

Нескве́рнаѧ бцⷣе, ро́ждшаѧ сло́во ѻ҆́ч҃ее, пре́жде вѣ̑къ нетлѣ́ннѡ ро́ждшеесѧ, разширѝ моѧ̑ ᲂу҆ста̀, чи́стаѧ, спривносѧ́щи мѧ̀ къ твоемꙋ̀ похвале́нїю, ꙗ҆́кѡ да восхвалю́ тѧ, зовы́й и҆сто́чникꙋ твоемꙋ̀ сїѧ̑: ра́дꙋйсѧ, и҆сто́чниче ра́дости непреста́емыѧ: ра́дꙋйсѧ, то́че добро́ты неизрече́нныѧ. ра́дꙋйсѧ, недꙋ́гѡвъ разли́чныхъ разрѣше́нїе: ра́дꙋйсѧ страсте́й всѧ́кихъ потопле́нїе. ра́дꙋйсѧ стрꙋѐ свѣтови́днѣйшаѧ, здра́вы творѧ́щаѧ вѣ̑рныѧ: ра́дꙋйсѧ водо̀ бл҃года́тнѣйшаѧ недꙋ́гꙋющымъ многоразли́чнѡ. ра́дꙋйсѧ ча́ше ма́нны живото́чныѧ: ра́дꙋйсѧ ба́не и҆ не́ктарю бг҃оизлїѧ́нный. ра́дꙋйсѧ водо̀, премꙋ́дрости невѣ́дѣнїе ѿе́млющаѧ: ра́дꙋйсѧ растворе́нїе се́рдца, пи́щꙋ бж҃е́ственнꙋю и҆злива́ющее. ра́дꙋйсѧ приста́нище неможе́нїѧ и҆сточа́ющаѧ: ра́дꙋйсѧ пла́мень недꙋ́гованїѧ ᲂу҆гаша́ющаѧ. ра́дꙋйсѧ водо̀ спаси́тельнаѧ.

Сѷнаѯа́рь на прест҃ꙋ́ю гпⷭ҇жꙋ̀ влⷣчцꙋ бцⷣꙋ, живопрїе́мный и҆сто́чникъ.

Въ пѧто́къ свѣ́тлыѧ седми́цы, пра́зднꙋемъ ѡ҆бновле́нїе хра́ма прест҃ы́ѧ и҆ гпⷭ҇жѝ на́шеѧ бцⷣы, и҆менꙋ́емагѡ живоно́снагѡ и҆сто́чника. Є҆ще́ же па́мѧть твори́мъ и҆зрѧ́дныхъ и҆ па́че є҆стества̀ чꙋде́съ бы́вшихъ, во ѻ҆́номъ хра́мѣ ѿ бг҃ома́тере. Се́й ᲂу҆́бѡ хра́мъ пе́рвѣе ѡ҆снова́сѧ ѿ царѧ̀ льва̀ вели́кагѡ, и҆́же и҆ маке́ллъ и҆менова́сѧ. Се́й поне́же бѧ́ше бла́гъ и҆ смире́нъ человѣ́къ, за до́брое своѐ намѣ́ренїе и҆ ми́лостивное, є҆́же и҆мѧ́ше, пре́жде не́же бы́ти царю̀, ѡ҆брѣта́ѧйсѧ во ѻ҆́номъ мѣ́стѣ, ѡ҆брѣ́те є҆ди́наго человѣ́ка слѣпа́го, не ви́дѧща ка́мѡ и҆тѝ: и҆ взе́мъ є҆го̀ за рꙋ́кꙋ, ведѧ́ше. <<к҃ѳ: 57>> Дости́гшима же ѻ҆бои́ма та́мѡ бли́зъ, и҆дѣ́же бѧ́ше се́й и҆сто́чникъ, возжада̀ слѣпы́й, и҆ молѧ́ше льва̀, да ѡ҆роси́тъ є҆го̀: и҆́же и҆дѧ̀ во внꙋ́треннее ѻ҆́ное лѣ́са, и҆дѣ́же бѧ́ше древе́съ и҆ насажде́нїй разли́чныхъ и҆спо́лнено, и҆ска́ше воды̀, и҆ не ѡ҆брѣта́ѧй и҆сто́чника, ѡ҆браща́шесѧ а҆́ки ѡ҆тѧгча́емь. И҆ слы́шитъ гла́съ свы́ше глаго́лющь: ѽ львѐ! не ᲂу҆ныва́й, занѐ вода̀, є҆ѧ́же и҆́щеши, бли́зъ тебѐ є҆́сть, и҆ ѡ҆брати́сѧ ѡ҆брѣстѝ ю҆̀. И҆ ле́въ ᲂу҆́бѡ ѡ҆браща́ѧйсѧ, и҆ и҆ща́й мно́гѡ, не ѡ҆брѣ́те є҆ѧ̀. И҆ па́ки слы́шитъ ра́вный пе́рвомꙋ гла́съ, и҆ глаго́летъ є҆мꙋ̀: цр҃ю̀ львѐ, вни́ди во внꙋ́треннюю ча́сть загꙋще́ннагѡ сегѡ̀ лѣ́са, и҆ возмѝ свои́ма рꙋка́ма ѿ сеѧ̀ мꙋ́тныѧ воды̀, и҆ и҆сцѣлѝ жа́ждꙋ слѣпа́гѡ, и҆ пома́жи и҆ помрачє́нныѧ є҆гѡ̀ ѻ҆́чи: и҆ а҆́бїе позна́еши, ка́ѧ є҆́смь, и҆ ѿ мно́гагѡ вре́мене живꙋ̀ на се́мъ мѣ́стѣ. Ле́въ ᲂу҆́бѡ сотворѝ ꙗ҆́коже гла́съ повелѣ̀ є҆мꙋ̀, и҆ а҆́бїе воззрѣ̀ слѣпы́й. И҆ по бг҃ома́тере прорече́нїю, по ма́лѣ вре́мени бы́сть ца́рь ле́въ: и҆ созда̀ та́мѡ ᲂу҆ и҆сто́чника хра́мъ пе́рвый, бога́тою рꙋко́ю, ꙗ҆́коже зри́тсѧ дне́сь. И҆ поне́же быва́хꙋ чꙋдеса̀ множа́йшаѧ на всѧ́кїй де́нь, по мно́гихъ лѣ́тѣхъ і҆ꙋстїнїа́нъ вели́кїй самоде́ржецъ гре́ческїй, поне́же пострада̀ ѕѣлѡ̀ ѿ не́мощи водотрꙋ́дїѧ, и҆ ѡ҆брѣ́те та́мѡ и҆сцѣле́нїе своѐ, хотѧ̀ да́ти воздаѧ́нїе мт҃ри бж҃їей, па́ки созда̀ ѻ҆́ный пе́рвый хра́мъ, и҆ сотворѝ и҆ велича́йшїй и҆ краснѣ́йшїй, и҆́же ѿ мно́гихъ трꙋ́сѡвъ внегда̀ разсѣ́десѧ, послѣдѝ ца́рь васі́лїй македѡ́нскїй, и҆ сы́нъ є҆гѡ̀ ле́въ мꙋ́дрый, па́ки созда́ша и҆ и҆спра́виша и҆̀. Во вре́мѧ и҆́хъ се́й и҆сто́чникъ мнѡ́га чꙋдеса̀ дѣ́йствова: и҆ во́дъ задержа̑нїѧ, и҆ пти́сы, и҆ и҆ны̑ѧ тмочи́слєнныѧ стра̑сти и҆сцѣлѝ: каркі́нскїѧ стра̑сти, и҆ кровотечє́нїѧ мно́гихъ родѡ́въ, и҆́миже стражда́хꙋ царє́вны и҆ и҆ны̑ѧ жєны̀, и҆ разли́чныѧ ѻ҆гнє́вицы, и҆ и҆ны̑ѧ болѣ́зни, и҆ ꙗ҆́звы неисцѣ̑льныѧ, и҆ неплѡ́дныѧ разрѣшѝ: ꙗ҆́кѡ и҆ цари́ца зоѝ непло́ды сꙋ́щи прїѧ́тъ да́ръ ѿ сегѡ̀ и҆сто́чника, сы́на кѡнстанті́на порфѷроге́нита. Воскреси́ же и҆ ме́ртваго, и҆́же бѣ̀ ѿ ѳессалі́и, и҆ приходѧ̀ ко ст҃о́мꙋ и҆сто́чникꙋ ᲂу҆́мре на пꙋтѝ. Є҆гда́ же хотѧ́ше ᲂу҆мре́ти, заповѣ́да кора́бленикѡмъ взѧ́ти є҆го̀ та́мѡ во хра́мъ и҆сто́чника, и҆ возлїѧ́ти на него̀ трѝ ка́ди ѿ ѻ҆́ныѧ воды̀, и҆ тогда̀ погребстѝ <<к҃ѳ ѡ҆б.: 58>> є҆го̀. Є҆́же творѧ́ще кора́блєницы, и҆ возлива́юще на него̀ во́дꙋ, а҆́бїе воскре́се ме́ртвый. По мно́гомъ же вре́мени, хотѧ̀ па́сти вели́кїй хра́мъ ѻ҆́ный, ꙗ҆ви́сѧ бцⷣа, и҆ держа́ше є҆го̀, до́ндеже и҆зы́де во́нъ всѐ мно́жество люде́й, и҆ никто́же вреди́сѧ. Та́ѧжде ст҃а́ѧ вода̀ пива́ема, мнѡ́гїѧ бѣснꙋ́ємыѧ и҆сцѣлѝ: и҆ ѿ темни́цы человѣ́ки свѧ̑занныѧ разрѣшѝ. И҆сцѣли́ же и҆ царѧ̀ льва̀ ѿ каменозаѧ́тїѧ, и҆ жены̀ є҆гѡ̀ ѳеофа́ны ᲂу҆гасѝ ѕѣ́льнѣйшꙋю ѻ҆гне́вицꙋ. И҆ бра́та є҆гѡ̀ стефа́на разрѣшѝ ѿ пти́сныѧ не́мощи. Дарова́ же и҆ слꙋ́хъ і҆ѡа́ннꙋ патрїа́рхꙋ і҆ерꙋсали́мскомꙋ. И҆сцѣлѝ є҆щѐ и҆ си́льнꙋю ѻ҆гне́вицꙋ патрі́кїа тара́сїа, и҆ ма́тере є҆гѡ̀ магїстрі́ссы, и҆ сы́на стѷлїа́нова и҆сцѣлѝ ѿ водозадержа́нїѧ. И҆ нѣ́кꙋю женꙋ̀ и҆́менемъ схі́зїнꙋ свободѝ ѿ чревоболѣ́нїѧ. И҆ царѧ̀ рѡма́на и҆сцѣлѝ, ѿ разрѣше́нїѧ и҆ свѧза́нїѧ чре́ва та́ѧжде вода̀, подо́бнѣ и҆ женꙋ̀ є҆гѡ̀. Призва́нїемъ же то́кмѡ и҆сцѣлѝ всест҃а́ѧ мона́ха пе́перинъ, и҆ ᲂу҆ченика̀ є҆гѡ̀ въ халде́и. Подо́бнѣ и҆ мона́ха матѳе́а, и҆ меле́тїа, и҆̀хже ѡ҆болга́ша царю̀, свободѝ ѿ гнѣ́ва: патрі́кїа же и҆ прѡтоспаѳа́рїа, и҆ и҆ны̑ѧ тмочи́слєнныѧ кто̀ и҆сповѣ́дати мо́жетъ; Нѣ́сть же пра́ведно не воспомина́ти и҆ и҆сцѣле́нїѧ и҆схі́ова: нижѐ кі́й ѧ҆зы́къ мо́жетъ повѣ́дати, є҆ли̑ка чꙋдеса̀ та́ѧжде вода̀ дѣ́йствова, и҆ да́же до дне́сь дѣ́йствꙋетъ, па́че ка́плей дожде́вныхъ, и҆ па́че ѕвѣ́здъ нбⷭ҇ныхъ, и҆ листѡ́въ мно́жества, ꙗ҆̀же въ на́ша времена̀ ви́дѣхомъ. Є҆щѐ и҆сцѣлѝ и҆ и҆ны̑ѧ смертонѡ́сныѧ болѣ̑зни, прока̑зы, свербѡ́ты па́че є҆стества̀, и҆ ѡ҆пꙋхлє́нїѧ жє́нскаѧ, и҆ дꙋшє́вныѧ стра̑сти мнѡ́гїѧ и҆сцѣлѝ, и҆ разли̑чныѧ ѻ҆чны̑ѧ болѣ̑зни. Є҆ще́ же и҆сцѣлѝ вара́гга і҆ѡа́нна ѿ воднотрꙋдова́нїѧ, и҆ дрꙋга́го вара́гга и҆сцѣлѝ ѿ ѕлы́хъ ꙗ҆́звъ, и҆ сщ҃енномона́ха ма́рка ѿ ѻ҆́спы, и҆ каменозаѧ́тїѧ мона́ха заха́рїю. И҆ и҆на̑ѧ мнѡ́жайшаѧ чꙋдеса̀, ꙗ҆́же не возмо́жно є҆́сть и҆счи́слити, ꙗ҆̀же дѣ́йствова и҆ дѣ́йствꙋетъ непреста́ннѡ. Твоеѧ̀ мт҃ре мл҃твами, хрⷭ҇тѐ бж҃е на́шъ поми́лꙋй на́съ. а҆ми́нь.

Воскрⷭ҇нїе хрⷭ҇то́во ви́дѣвше: три́жды. и҆ Воскр҃съ і҆и҃съ: <<л҃: 59>>

Пѣ́снь з҃.

І҆рмо́съ: Ѻ҆́троки ѿ пе́щи и҆зба́вивый:

Жєны̀ съ мѵ́ры бг҃омꙋ́дрыѧ: Сме́рти пра́зднꙋемъ ᲂу҆мерщвле́нїе: Ꙗ҆́кѡ вои́стиннꙋ сщ҃е́ннаѧ:

Бцⷣы подо́бны:

[Ѵ] Почерпи́те недꙋ́гꙋющїи и҆сцѣлє́нїѧ: всечи́стаѧ бо то́читъ ѿ бжⷭ҇твеннагѡ и҆сто́чника сла́дость и҆́стиннꙋю, пото́къ сла́дости вои́стиннꙋ врѣ́ющїй, тѣ́мже и҆ вѣ́рою то́ки незави̑стныѧ поче́рпемъ всѝ.

[Ѯ] Оу҆дивлѧ́ютъ слы́шащыѧ влⷣчце, стра̑ннаѧ твоѧ̑ чꙋдеса̀, всѧ̑ вѣ̑рныѧ: нѣмы̑ѧ бо и҆ глꙋхі̑ѧ, ꙗ҆́кѡ бл҃гоглагѡ́ливыѧ показꙋ́етъ вода̀ твоѧ̀, стра́ждꙋщыѧ же лю́тѣ врачꙋ́етъ, и҆ и҆сцѣле́нїе да́рꙋетъ.

[А] Возво́диши ѿ пе́щи скорбе́й, ѡ҆роша́ющи вода́ми ѿ стра́ннагѡ и҆сто́чника, пристꙋпа́ющыѧ къ тебѣ̀ чи́стаѧ: каркі́нскїѧ бо ра́ны свобожда́етсѧ человѣ́къ, прокаже́нна же и҆сцѣлѧ́еши, и҆ распале́нїе ᲂу҆гаси́ла є҆сѝ.

[Н] Ю҆́нѡши и҆ ѻ҆трокови̑цы влⷣчцꙋ, и҆ всѝ человѣ́цы вѣ́рою ѿ дꙋшѝ восхва́лимъ свѣ́тлѡ: сокрꙋшє́нїѧ бо гное́вицъ, и҆ вре́ды лꙋка́выхъ, и҆ ѡ҆то́ки, и҆ разсла́бленнаго и҆сцѣлѝ.

Пѣ́снь и҃.

І҆рмо́съ: Се́й нарече́нный и҆ ст҃ы́й де́нь:

Прїиди́те но́вагѡ вїногра́да: Возведѝ ѻ҆́крестъ ѻ҆́чи твоѝ: Ѻ҆́ч҃е вседержи́телю:

Бцⷣы подо́бны:

[Ѳ] Бж҃е́ственнꙋю и҆сто́чникъ и҆ честнꙋ́ю во́дꙋ и҆злива́етъ тво́й дв҃о: водны́хъ бо тече́нїе вспѧща́етъ ѕѣлѡ̀, <<л҃ ѡ҆б.: 60>> призыва́нїемъ бж҃е́ственнымъ бл҃года́ти. тѣ́мже тѧ̀ почита́емъ, и҆сто́чниче, во вѣ́ки.

[О] Всѝ честнꙋ́ю живото́чнꙋю во́дꙋ воспои́мъ мꙋ́дреннѣ: ѕлодыха́нїѧ бо то́къ по страна́мъ ᲂу҆ставлѧ́етъ, и҆ свобо́дное твори́тъ происхожде́нїе. ѽле твои́хъ чꙋде́съ, чи́стаѧ бг҃ороди́тельнице!

[П] Ка́ѧ, всепѣ́таѧ, восхва́лѧтъ ᲂу҆ста̀ рождества̀ твоегѡ̀ стра́нное; но и҆ ᲂу҆́мъ кі́й бы чꙋде́съ и҆сто́чникъ и҆зслѣ́довалъ, и҆ сло́во и҆зглаго́лало; нѣ́сть є҆стествꙋ̀ крѣ́пость, твои̑мъ чꙋди́тисѧ.

[О] Всѧ̀ ѡ҆ тебѣ̀ сме́рти держа́ва разори́сѧ внеза́пꙋ, ѽ цр҃и́це и҆ гпⷭ҇жѐ: и҆́бо цр҃ѧ̀ безсме́ртнагѡ, живо́тъ ты̀ и҆сточи́ла є҆сѝ, во́дꙋ, ма́ннꙋ, хрⷭ҇та̀ во вѣ́ки.

Пѣ́снь ѳ҃.

І҆рмо́съ: Свѣти́сѧ, свѣти́сѧ:

Ѽ бж҃е́ственнагѡ, ѽ любе́знагѡ: Ѽ па́сха ве́лїѧ и҆ сщ҃е́ннѣйшаѧ:

Бцⷣы подо́бны:

[Ѵ] Во́ды всѧ̀ превосхо́дитъ, ѻ҆трокови́це чⷭ҇таѧ, и҆сто́чника твоегѡ̀ вода̀, ꙗ҆́вѣ да́рꙋющаѧ свобожде́нїе недꙋ́гѡвъ лю́тыхъ, и҆ дꙋша́мъ всѧ́кое здра́вїе, ꙗ҆́кѡ па́че є҆стества̀ и҆злива́емаѧ.

[Л] Рѣши́тель недꙋ́гѡвъ но́вый сѐ сїлѡа́мъ, и҆сто́чника твоегѡ̀ дв҃о, зри́мъ всѝ: ѻ҆́чи бо прїе́млетъ ѻ҆гнѧ̀, вси́ же здра́вїе при́снѡ къ животꙋ̀ прїе́млемъ.

[О] Здра́вїѧ и҆́щꙋщїи притецы́те ко и҆сто́чникꙋ: ѻ҆трокови́ца бо дв҃а жи́тельствꙋетъ при водѣ̀. ликꙋ́й и҆ весели́сѧ <<л҃а: 61>> вѣ́рныхъ мно́жество си́це, ꙗ҆́коже подоба́етъ: и҆́же бо прїи́детъ къ хра́мꙋ, воздаѧ́нїе проше́нїй прїе́млетъ.

[Ѵ] Возвы́сисѧ и҆сто́чника твоегѡ̀ вода̀ вы́ше нб҃съ, и҆ землѝ бє́здны то́ки претечѐ: сїѧ̀ є҆́сть пи́ща дꙋшѝ, питїѐ вѣ́рныхъ, ме́дъ и҆з̾ ка́мене, и҆ ма́нны раздаѧ́нїе.

[Е] Весели́ши дв҃о царѧ̀ преесте́ственнѣ, и҆сточа́ющи бл҃года́ть ѿ и҆сто́чника присносꙋ́щнꙋю, семꙋ̀ подава́ющи на врагѝ крѣ́пость, побѣ̑ды при́снѡ, здра́вїе и҆ ми́ръ, и҆ проше́нїй и҆сполне́нїе.

Є҆ѯапостїла́рїй пра́здникꙋ: Пло́тїю ᲂу҆снꙋ́въ:

И҆ и҆сто́чникꙋ. Подо́бенъ:

И҆сто́чникъ є҆сѝ вои́стиннꙋ воды̀ живы́ѧ, влⷣчце: и҆змыва́еши ᲂу҆́бѡ недꙋ́ги дꙋ́шъ и҆ тѣле́съ лю̑тыѧ, прикоснове́нїемъ твои́мъ є҆ди́нымъ то́кмѡ, во́дꙋ спасе́нїѧ хрⷭ҇та̀ и҆злива́ющи.

На хвали́техъ, Всѧ́кое дыха́нїе: поста́вимъ стїхѡ́въ и҃. И҆ пое́мъ стїхи̑ры воскре́сны ѻ҆смогла́сника д҃, гла́съ ѕ҃:

Крⷭ҇тъ тво́й гдⷭ҇и, жи́знь и҆ воскрⷭ҇нїе лю́демъ твои̑мъ є҆́сть, и҆ надѣ́ющесѧ на́нь, тебѐ воскрⷭ҇шаго бг҃а на́шего пое́мъ: поми́лꙋй на́съ.

Погребе́нїе твоѐ влⷣко, ра́й ѿве́рзе ро́дꙋ человѣ́ческомꙋ: и҆ ѿ и҆стлѣ́нїѧ и҆зба́вльшесѧ, тебѐ воскрⷭ҇шаго бг҃а на́шего пое́мъ: поми́лꙋй на́съ.

Со ѻ҆ц҃е́мъ и҆ дх҃омъ хрⷭ҇та̀ воспои́мъ, воскрⷭ҇шаго и҆з̾ ме́ртвыхъ, и҆ къ немꙋ̀ вопїи́мъ: ты̀ живо́тъ є҆сѝ на́шъ, и҆ воскрⷭ҇нїе, поми́лꙋй на́съ.

Тридне́венъ воскрⷭ҇лъ є҆сѝ хрⷭ҇тѐ ѿ гро́ба ꙗ҆́коже пи́сано є҆́сть, совоздви́гнꙋвый пра́ѻтца на́шего. тѣ́мже тѧ̀ и҆ сла́витъ ро́дъ человѣ́ческїй, и҆ воспѣва́етъ твоѐ воскрⷭ҇нїе. <<л҃а ѡ҆б.: 62>>

И҆ бцⷣы стїхи̑ры, гла́съ в҃. Подо́бенъ: До́ме є҆ѵфра́ѳовъ:

Вода̀ и҆сто́чника, спаси́тельнаѧ є҆́сть всѣ́мъ немощствꙋ́ющымъ: пристꙋ́пимъ вѣ́рою, бл҃года́ть почерпе́мъ.

Кла́дѧзь живото́чный и҆сто́чника безсме́ртнагѡ, пристꙋпа́ющымъ любо́вїю, и҆сцѣле́нїй подае́тъ и҆злїѧ́нїе неисчерпа́емое.

Оу҆крѣплѧ́етъ дꙋ́шы вода̀ дв҃ыѧ: и҆̀же въ скве́рнахъ страсте́й, притеце́мъ ко ѻ҆трокови́цѣ, и҆ сїѧ̑ и҆змы́емъ.

Рꙋ́чка сщ҃е́ннаѧ, и҆ ма́нна незави́стнаѧ и҆з̾ пречⷭ҇тыѧ ᲂу҆тро́бы, и҆злива́етъ влⷣкꙋ: потре́бꙋ всѧ́ческꙋю поче́рпемъ.

И҆ стїхи̑ры па́схи, по ѻ҆бы́чаю и҆́хъ. Є҆ктєнїѝ, и҆ ѿпꙋ́стъ. И҆ ча́съ пе́рвый. Часы̀ па́схи.

На лїтꙋргі́и, а҆нтїфѡ́ны па́схи. Прокі́менъ днѐ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. И҆ бцⷣы: Вели́читъ дꙋша̀ моѧ̀ гдⷭ҇а: А҆пⷭ҇лъ дѣѧ́нїй, зача́ло з҃: Вкꙋ́пѣ пе́тръ и҆ і҆ѡа́ннъ: И҆ бцⷣы, къ фїлїпписі́ѡмъ, зача́ло с҃м. А҆ллилꙋ́їа, гла́съ а҃. И҆сповѣ́дѧтъ нб҃са̀ чꙋдеса̀ твоѧ̀ гдⷭ҇и. Сті́хъ: Бг҃ъ прославлѧ́емь въ совѣ́тѣ ст҃ы́хъ. Сті́хъ: Слы́ши дщѝ и҆ ви́ждь и҆ приклонѝ ᲂу҆́хо твоѐ. Є҆ѵⷢ҇лїе днѐ: и҆ бцⷣы, ѿ лꙋкѝ, зача́ло н҃д. Прича́стный: Тѣ́ло хрⷭ҇то́во прїими́те: И҆ бцⷣѣ.

Въ пѧто́къ свѣ́тлыѧ седми́цы ве́чера,

по є҆́же Хрⷭ҇то́съ воскре́се: и҆ є҆ктенїѝ, на Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры воскре́сны, гла́съ и҃:

Вече́рнюю пѣ́снь, и҆ слове́снꙋю слꙋ́жбꙋ, тебѣ̀ хрⷭ҇тѐ прино́симъ: ꙗ҆́кѡ бл҃говоли́лъ є҆сѝ поми́ловати на́съ воскрⷭ҇нїемъ.

Гдⷭ҇и, гдⷭ҇и, не ѿве́ржи на́съ ѿ твоегѡ̀ лица̀: но бл҃говолѝ поми́ловати на́съ воскрⷭ҇нїемъ.

Ра́дꙋйсѧ, сїѡ́не ст҃ы́й, мт҃и цр҃кве́й, бж҃їе жили́ще, ты́ бо прїѧ́лъ є҆сѝ пе́рвый, ѡ҆ставле́нїе грѣхѡ́въ, воскрⷭ҇нїемъ.

꙾Восто́чны꙾[[а҆нато́лїевы]] трѝ, гла́съ то́йже:

Є҆́же ѿ бг҃а ѻ҆ц҃а̀ сло́во, пре́жде вѣ́къ ро́ждшеесѧ, въ послѣ̑днѧѧ же времена̀, то́ежде ѿ неискꙋсобра́чныѧ вопло́щшеесѧ во́лею, распѧ́тїе сме́ртное претерпѣ̀: и҆ дре́вле ᲂу҆мерщвле́ннаго человѣ́ка сп҃сѐ свои́мъ воскрⷭ҇нїемъ.

Є҆́же и҆з̾ ме́ртвыхъ твоѐ воскрⷭ҇нїе славосло́вимъ хрⷭ҇тѐ, и҆́мже свободи́лъ є҆сѝ а҆да́мскїй ро́дъ ѿ а҆́дова мꙋчи́тельства: и҆ дарова́лъ є҆сѝ мі́рови ꙗ҆́кѡ бг҃ъ жи́знь вѣ́чнꙋю, и҆ ве́лїю млⷭ҇ть.

Сла́ва тебѣ̀ хрⷭ҇тѐ сп҃се, сн҃е бж҃їй є҆диноро́дный, пригвозди́выйсѧ на крⷭ҇тѣ̀, и҆ воскр҃сы́й и҆з̾ гро́ба тридне́венъ.

Сла́ва:

Тебѐ сла́вимъ гдⷭ҇и, во́лею на́съ ра́ди крⷭ҇тъ претерпѣ́вшаго, и҆ тебѣ̀ покланѧ́емсѧ всеси́льне сп҃се: не ѿве́ржи на́съ ѿ лица̀ твоегѡ̀, но ᲂу҆слы́ши и҆ сп҃си́ ны воскрⷭ҇нїемъ твои́мъ, чл҃вѣколю́бче. <<л҃в: 63>>

И҆ ны́нѣ: бг҃оро́диченъ:

Цр҃ь нбⷭ҇ный за чл҃вѣколю́бїе на землѝ ꙗ҆ви́сѧ, и҆ съ человѣ́ки поживѐ: ѿ дв҃ы бо чⷭ҇тыѧ пло́ть прїе́мый, и҆ и҆з̾ неѧ̀ проше́дый съ воспрїѧ́тїемъ: є҆ди́нъ є҆́сть сн҃ъ, сꙋгꙋ́бъ є҆стество́мъ, но не ѵ҆поста́сїю. тѣ́мже соверше́нна того̀ бг҃а, и҆ соверше́нна чл҃вѣ́ка вои́стиннꙋ проповѣ́дающе, и҆сповѣ́дꙋемъ хрⷭ҇та̀ бг҃а на́шего: є҆го́же молѝ мт҃и безневѣ́стнаѧ, поми́ловатисѧ дꙋша́мъ на́шымъ.

Вхо́дъ: Свѣ́те ти́хїй: Прокі́менъ гла́съ и҃: Да́лъ є҆сѝ достоѧ́нїе боѧ́щымсѧ тебѐ гдⷭ҇и. Сті́хъ: Ѿ конє́цъ землѝ къ тебѣ̀ воззва́хъ. Сті́хъ: Покры́юсѧ въ кро́вѣ кри́лъ твои́хъ. Сті́хъ: Та́кѡ воспою̀ и҆́мени твоемꙋ̀ во вѣ́ки. И҆ па́ки: Да́лъ є҆сѝ достоѧ́нїе боѧ́щымсѧ тебѐ гдⷭ҇и. Та́же, є҆ктенїа̀, Сподо́би гдⷭ҇и въ ве́черъ се́й: и҆ прѡ́чаѧ.

На стїхо́внѣ стїхи́ра воскрⷭ҇на, гла́съ и҃:

Возше́лъ є҆сѝ на крⷭ҇тъ і҆и҃се, снизше́дый съ нб҃сѐ: прише́лъ є҆сѝ на сме́рть животѐ безсме́ртный, къ сꙋ́щымъ во тьмѣ̀ свѣ́тъ и҆́стинный: къ па́дшымъ всѣ́хъ воскрⷭ҇нїе, просвѣще́нїе, и҆ сп҃се на́шъ, сла́ва тебѣ̀.

Та́же стїхи̑ры па́схи, съ припѣ́вы и҆́хъ: Хрⷭ҇то́съ воскре́се: три́жды. И҆ ѿпꙋ́стъ

Въ сꙋббѡ́тꙋ свѣ́тлыѧ седми́цы на ᲂу҆́трени,

вослѣ́дованїе всѐ, ꙗ҆́кѡ предписа́сѧ.

На хвали́техъ стїхи̑ры воскре́сны на д҃, гла́съ и҃:

Гдⷭ҇и, а҆́ще и҆ сꙋди́лищꙋ предста́лъ є҆сѝ ѿ пїла́та сꙋди́мый, но не ѿстꙋпи́лъ є҆сѝ ѿ прⷭ҇то́ла со ѻ҆ц҃е́мъ <<л҃г: 65>> сѣдѧ́й: и҆ воскр҃съ и҆з̾ ме́ртвыхъ, мі́ръ свободи́лъ є҆сѝ ѿ рабо́ты чꙋжда́гѡ, ꙗ҆́кѡ ще́дръ и҆ чл҃вѣколю́бецъ.

Гдⷭ҇и, а҆́ще и҆ ꙗ҆́кѡ ме́ртва во гро́бѣ і҆ꙋдє́и положи́ша: но ꙗ҆́кѡ цр҃ѧ̀ спѧ́ща во́ини тѧ̀ стрежа́хꙋ, и҆ ꙗ҆́кѡ живота̀ сокро́вище, печа́тїю печа́таша: но воскрⷭ҇лъ є҆сѝ, и҆ по́далъ є҆сѝ нетлѣ́нїе дꙋша́мъ на́шымъ.

Гдⷭ҇и, ѻ҆рꙋ́жїе на дїа́вола крⷭ҇тъ тво́й да́лъ є҆сѝ на́мъ: трепе́щетъ бо и҆ трѧсе́тсѧ, не терпѧ̀ взира́ти на си́лꙋ є҆гѡ̀: ꙗ҆́кѡ мє́ртвыѧ возставлѧ́етъ, и҆ сме́рть ᲂу҆празднѝ. сегѡ̀ ра́ди покланѧ́емсѧ погребе́нїю твоемꙋ̀ и҆ воста́нїю.

А҆́гг҃лъ тво́й гдⷭ҇и, воскрⷭ҇нїе проповѣ́давый, стра̑жи ᲂу҆́бѡ ᲂу҆страшѝ, жена́мъ же возгласѝ глаго́лѧ: что̀ и҆́щете жива́гѡ съ ме́ртвыми; воскр҃се бг҃ъ сы́й, и҆ вселе́ннѣй жи́знь дарова̀.

Та́же стїхи̑ры па́схи, съ припѣ́вы и҆́хъ: Хрⷭ҇то́съ воскре́се: три́жды. Є҆ктєнїѝ, и҆ ѿпꙋ́стъ, и҆ ча́съ пе́рвый. Часы̀ па́схи.

На лїтꙋргі́и а҆нтїфѡ́ны па́схи. Прокі́менъ а҆пⷭ҇ла, гла́съ г҃: Гдⷭ҇ь просвѣще́нїе моѐ, и҆ сп҃си́тель мо́й, когѡ̀ ᲂу҆бою́сѧ; Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ; А҆пⷭ҇лъ дѣѧ́нїй, зача́ло и҃: Держа́щꙋсѧ: А҆ллилꙋ́їа, гла́съ є҃: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ. Є҆ѵⷢ҇лїе і҆ѡа́нна, зача́ло а҃і: Прїи́де і҆и҃съ и҆ ᲂу҆ченицы̀ є҆гѡ̀: И҆ про́чее лїтꙋргі́и. Прича́стенъ: Тѣ́ло хрⷭ҇то́во прїими́те:

По ѿпꙋ́стѣ лїтꙋргі́и, и҆дꙋ́щымъ бра́тїѧмъ и҆з̾ цр҃кве въ трапе́зꙋ, пре́жде несе́тъ дїа́конъ а҆́ртосъ, без̾ ѻ҆́браза воскрⷭ҇нїѧ хрⷭ҇то́ва. Параекклисїа́рхꙋ же съ бра́тїею въ то̀ вре́мѧ ᲂу҆дарѧ́ющымъ во всѧ̑ зво́ны. Въ трапе́зѣ же внегда̀ сѧ́дꙋтъ бра́тїѧ, кела́рь <<л҃г: 65>> раздроби́въ хлѣ́бъ, во все́й седми́цѣ воздвиза́емый, вмѣ́стѡ прест҃ы́ѧ, раздае́тъ бра́тїѧмъ пре́жде ѻ҆бы́чнагѡ и҆́хъ ꙗ҆де́нїѧ, и҆ та́кѡ потреблѧ́емъ и҆̀. Пе́рвѣе ре́кше: Хрⷭ҇то́съ воскре́се: Та́же: Ѻ҆́ч҃е на́шъ: И҆ бл҃гослове́нїе ѻ҆бы́чное трапе́зы. И҆ сѣда́емъ ꙗ҆́сти. Чте́цъ же начина́етъ чте́нїе. На трапе́зѣ ᲂу҆тѣше́нїе ве́лїе бра́тїи. Воста́вше же ѿ трапе́зы, пое́мъ: Хрⷭ҇то́съ воскре́се: три́жды. Бл҃гослове́нъ бг҃ъ ми́лꙋѧй, и҆ пита́ѧй на́съ: Та́же, Сла́ва тебѣ̀ гдⷭ҇и, сла́ва тебѣ̀ ст҃ы́й: Сла́ва, и҆ ны́нѣ: Гдⷭ҇и поми́лꙋй. три́жды. Блгⷭ҇вѝ. И҆ взе́мъ дїа́конъ хлѣ́бъ ѻ҆бы́чный, во все́мъ лѣ́тѣ возвыша́емый трема̀ пе́рсты, ѻ҆бѣ́ма рꙋка́ма, зна́менꙋетъ и҆́мъ панагїа́рь крестови́днѡ, глаго́лѧ: вмѣ́стѡ, Вели́ко и҆́мѧ ст҃ы́ѧ трⷪ҇цы. Хрⷭ҇то́съ воскре́се: [Є҆ди́ножды.] На́мъ ѿвѣща́ющымъ: Вои́стиннꙋ воскре́се. Та́же надносѧ̀ ча́сть над̾ ѻ҆́бразъ бг҃оро́дичный глаго́летъ: Прест҃а́ѧ бцⷣе, помога́й на́мъ. Мы́ же: Тоѧ̀ моли́твами хрⷭ҇тѐ бж҃е, поми́лꙋй и҆ спасѝ на́съ. И҆ глаго́лемъ: Бл҃жи́мъ тѧ̀ всѝ ро́ди: и҆ і҆рмо́съ ѳ҃-ѧ пѣ́сни: Свѣти́сѧ, свѣти́сѧ: съ тропарѝ ѻ҆бѣ́ма є҆ѧ̀, и҆ па́ки: Свѣти́сѧ, свѣти́сѧ: Та́же глаго́летъ настоѧ́тель [а҆́ще же нѣ́сть, глаго́летъ і҆ере́й]: Въ премнѡ́гїѧ мольбы̑ преблагослове́нныѧ влⷣчцы: Мы́ же рече́мъ: Тоѧ̀ моли́твами: І҆ере́й же: Ми́лостивъ и҆ ще́дръ гдⷭ҇ь, пи́щꙋ дадѐ боѧ́щымсѧ є҆гѡ̀. Мы́ же: Хрⷭ҇то́съ воскре́се: три́жды. Трист҃о́е. По Ѻ҆́ч҃е на́шъ: Ѵ҆пакоѝ: Предвари́вшыѧ ᲂу҆́тро: Сла́ва, и҆ ны́нѣ: А҆́ще и҆ во гро́бъ: Гдⷭ҇и поми́лꙋй. три́жды. Бл҃гословѝ. Бл҃гослове́нъ бг҃ъ ми́лꙋѧй, и҆ пита́ѧй на́съ ѿ свои́хъ бога́тыхъ дарѡ́въ: Мы́ же рече́мъ: А҆ми́нь. И҆ проще́нїе ѻ҆бы́чное.

Си́це же твори́мъ, и҆ до ѿда́нїѧ пра́здника па́схи.