<<м҃д ѡ҆б.: 88>>

Въ понедѣ́льникъ в҃-ѧ седми́цы а҆нтїпа́схи на ᲂу҆́трени.

Повнегда̀ сотвори́ти і҆ере́ю нача́ло, Сла́ва ст҃ѣ́й: Глаго́лемъ: Хрⷭ҇то́съ воскре́се три́жды, ти́химъ гла́сомъ.

Сїе́ бо глаго́лемъ нача́ло: Хрⷭ҇то́съ воскре́се: въ часѣ́хъ, и҆ вече́рнѧхъ, и҆ повече́рїѧхъ, ѿ сеѧ̀ ᲂу҆́трени недѣ́ли а҆нтїпа́схи, да́же и҆ до вознесе́нїѧ гдⷭ҇нѧ. [Ка́кѡ ᲂу҆́бѡ не и҆звѣсти́сѧ ѡ҆ полꙋ́нощницѣ, ꙗ҆́вѣ ꙗ҆́кѡ въ ке́ллїахъ мню̀ се́й бы́ти пѣва́емѣй, поне́же ᲂу҆́бѡ и҆ та́мѡ си́це нача́ло быва́етъ.]

И҆ а҆́бїе по Хрⷭ҇то́съ воскре́се: Сла́ва въ вы́шнихъ бг҃ꙋ, и҆ на землѝ ми́ръ: И҆ ѻ҆бы́чное шестоѱа́лмїе. є҆ктенїа̀ вели́каѧ. Та́же, Бг҃ъ гдⷭ҇ь: во гла́съ з҃. Тропа́рь пра́здникꙋ: Запеча́танꙋ гро́бꙋ: три́жды. [зрѝ] Се́й тропа́рь глаго́летсѧ чрез̾ всю̀ седми́цꙋ. И҆ стїхосло́вимъ каѳі́смы двѣ̀, а҆ тре́тїѧ рѧдова́ѧ на вече́рни: И҆ та́кѡ пое́мъ ѱалти́рь до к҃а септе́мврїа.

По а҃-мъ стїхосло́вїи сѣда́ленъ воскре́сенъ, гла́съ а҃:

Гро́бъ тво́й сп҃се, во́ини стрегꙋ́щїи, ме́ртви ѿ ѡ҆блиста́нїѧ ꙗ҆́вльшагѡсѧ а҆́гг҃ла бы́ша, проповѣ́дающа жена́мъ воскресе́нїе: тебѐ сла́вимъ тлѝ потреби́телѧ, тебѣ̀ припа́даемъ воскре́сшемꙋ и҆з̾ гро́ба, и҆ є҆ди́номꙋ бг҃ꙋ на́шемꙋ.

Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.

Оу҆мили́тельный: Въ беззако́нїихъ зача́тъ є҆́смь а҆́зъ блꙋ́дный, не смѣ́ю воззрѣ́ти на высотꙋ̀ нбⷭ҇нꙋю, но дерза́ѧ на чл҃вѣколю́бїе твоѐ зовꙋ̀: бж҃е ѡ҆чи́сти мѧ̀ грѣ́шнаго, и҆ спаси́ мѧ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. <<м҃є: 89>>

Мꙋ́чениченъ: Страда́нїѧ похвало́ю, и҆ вѣнцє́въ досто́инствомъ, сла́внїи страстоте́рпцы ѡ҆дѣ́ѧшасѧ тобо́ю гдⷭ҇и: терпѣ́нїемъ бо ра̑нъ беззакѡ́нныѧ побѣди́ша, и҆ си́лою бж҃е́ственною съ нб҃сѐ побѣ́дꙋ прїѧ́ша. тѣ́хъ моли́твами свободѝ ѿ неви́димагѡ врага̀ сп҃се, и҆ спаси́ мѧ.

Сла́ва, и҆ ны́нѣ: бг҃оро́диченъ:

Чꙋ́до чꙋде́съ бл҃года́тнаѧ, въ тебѣ̀ зрѧ́щи тва́рь ра́дꙋетсѧ: зачала́ бо є҆сѝ безсѣ́меннѡ, и҆ родила̀ є҆сѝ неизрече́ннѡ, є҆го́же чинонача̑лїѧ а҆́гг҃лѡвъ ви́дѣти не мо́гꙋтъ: того̀ ꙗ҆́кѡ бг҃а молѝ ѡ҆ дꙋша́хъ на́шихъ.

Та́же чте́нїе въ толкова́нїи і҆ѡа́нна є҆ѵⷢ҇лїа.

По в҃-мъ стїхосло́вїи сѣда́ленъ, гла́съ а҃.

Подо́бенъ: Гро́бъ тво́й:

Прикоснꙋ́выйсѧ рꙋко́ю ре́брѡмъ нестерпи́мымъ близне́цъ ѳѡма̀, не ѡ҆пали́сѧ прикоснове́нїемъ, но пребы́сть ꙗ҆́звы ѡ҆сѧза́ѧ и҆звѣ́стнѣе, и҆ вѣща́ѧ на́съ ра́ди прободе́нномꙋ: ты̀ мо́й гдⷭ҇ь и҆ бг҃ъ мо́й є҆сѝ, а҆́ще и҆ стра́сть претерпѣ́лъ є҆сѝ.

Сла́ва, и҆ ны́нѣ: то́йже. И҆ чте́нїе.

Та́же, Воскрⷭ҇нїе хрⷭ҇то́во ви́дѣвше: є҆ди́ножды, и҆ ѱало́мъ н҃.

[зрѝ] Си́це бо твори́мъ до вознесе́нїѧ гдⷭ҇нѧ, нижѐ Гдⷭ҇ви пое́мъ: глаго́лемъ, но глаго́лемъ ꙗ҆́коже написа́сѧ во і҆рмоло́гїахъ. Нача́ло же твори́мъ ѿ і҆рмосѡ́въ, и҆̀хже и҆ повторѧ́емъ, пою́ще и҆ тропарѝ на ѕ҃. И҆ ст҃а́гѡ мине́и на д҃. По г҃-й пѣ́сни конда́къ, и҆ сѣда́ленъ ст҃а́гѡ. Сла́ва, и҆ ны́нѣ: сѣда́ленъ пра́здникꙋ. По ѕ҃-й пѣ́сни конда́къ пра́здникꙋ, и҆ і҆́косъ. И҆ стїхосло́вимъ Честнѣ́йшꙋю. По ѳ҃-й пѣ́сни є҆ѯапостїла́рїй пра́здникꙋ, два́жды. Сла́ва: ст҃а́гѡ, а҆́ще є҆́сть. И҆ ны́нѣ: пра́здника, дрꙋгі́й свѣти́ленъ. <<м҃є ѡ҆б.: 90>>

На хвали́техъ поста́вимъ стїхи̑ры г҃ ѻ҆смогла́сника, на д҃. Гла́съ а҃:

Пое́мъ твою̀ хрⷭ҇тѐ спаси́тельнꙋю стра́сть, и҆ сла́вимъ твоѐ воскрⷭ҇нїе. [Два́жды.]

Оу҆мили́тельный: И҆ны́й тебѐ мі́ръ дꙋшѐ ѡ҆жида́етъ, и҆ сꙋдїѧ̀ хо́щетъ твоѧ̑ ѡ҆бличи́ти та̑йнаѧ и҆ лю̑таѧ. не пребꙋ́ди ᲂу҆́бѡ въ здѣ́шнихъ, но предварѝ вопїю́щи сꙋдїѝ: бж҃е, ѡ҆чи́сти мѧ̀, и҆ спаси́ мѧ.

Мꙋ́чениченъ: Страстоте́рпцы хрⷭ҇тѡ́вы, прїиди́те лю́дїе, всѝ почти́мъ пѣ́сньми и҆ пѣ́нїи дх҃о́вными, свѣти̑ла мі́ра, и҆ проповѣ́дники вѣ́ры, и҆сто́чникъ приснотекꙋ́щїй, и҆з̾ негѡ́же и҆стека́ютъ вѣ̑рнымъ и҆сцѣлє́нїѧ. тѣ́хъ моли́твами, хрⷭ҇тѐ бж҃е на́шъ, ми́ръ да́рꙋй мі́рови, и҆ дꙋша́мъ на́шымъ ве́лїю ми́лость.

Сла́ва, и҆ ны́нѣ: гла́съ а҃:

Ѳѡма̀ глаго́лемый близне́цъ не бѣ̀ съ ни́ми, є҆гда̀ вше́лъ є҆сѝ хрⷭ҇тѐ заключє́ннымъ, две́ремъ, тѣ́мже и҆ не вѣ́роваше речє́ннымъ є҆мꙋ̀, ѿ невѣ́рїѧ въ вѣ́рꙋ и҆звѣствꙋ́ѧ: не несподо́билъ же є҆сѝ бл҃же, показа́ти є҆мꙋ̀ пречⷭ҇тое ребро̀ твоѐ, и҆ рꙋкꙋ̀ и҆ нѡгꙋ̀ ꙗ҆́звы. ѻ҆́нъ же ѡ҆сѧза́въ и҆ ви́дѣвъ, и҆сповѣ́да тѧ̀ бы́ти бг҃а не на́га, и҆ человѣ́ка не про́ста, и҆ вопїѧ́ше: гдⷭ҇ь мо́й и҆ бг҃ъ мо́й, сла́ва тебѣ̀!

Та́же: Сла́ва тебѣ̀ показа́вшемꙋ на́мъ свѣ́тъ: И҆ є҆ктенїа̀: И҆спо́лнимъ ᲂу҆́треннюю моли́твꙋ на́шꙋ:

На стїхо́внѣ стїхи̑ры гла́съ в҃.

Подо́бенъ: До́ме є҆ѵфра́ѳовъ:

Оу҆стна́ми чи́стыми по́йте, со а҆́гг҃лы человѣ́цы, воскре́сшаго тридне́внѡ и҆з̾ гро́ба, и҆ мі́ръ совоздви́гшаго. <<м҃ѕ: 91>>

Сті́хъ: Похвалѝ і҆ерꙋсали́ме гдⷭ҇а, хвалѝ бг҃а твоего̀ сїѡ́не.

Ꙗ҆ви́лсѧ є҆сѝ сщ҃є́ннымъ твои̑мъ сп҃се а҆пⷭ҇лѡмъ, две́ремъ заключє́ннымъ, тѣ́ми ѡ҆бновлѧ́ѧ на́мъ бжⷭ҇твенный дх҃ъ тво́й.

Сті́хъ: Ꙗ҆́кѡ ᲂу҆крѣпѝ верєѝ вра́тъ твои́хъ, и҆ бл҃гословѝ сы́ны твоѧ̑ въ тебѣ̀.

Ны́нѣ тѧ̀ всецр҃ю̀, ви́дѣвше не ѻ҆чи́ма, но серде́чною любо́вїю бг҃а вѣ́ровавше, въ пѣ́нїихъ велича́емъ.

Сла́ва: ст҃а́гѡ, а҆́ще є҆́сть. И҆ ны́нѣ: гла́съ а҃:

Оу҆ч҃нкѡ́мъ сомнѧ́щымсѧ, во ѻ҆смы́й де́нь предста̀ сп҃съ, и҆дѣ́же бѧ́хꙋ со́брани, и҆ ми́ръ да́въ, ѳѡмѣ̀ возопѝ: прїидѝ а҆пⷭ҇ле, ѡ҆сѧжѝ дла̑ни, въ ни́хже гвѡ́здїѧ вонзо́ша. ѽ до́брое невѣ́рїе ѳѡмино̀, вѣ́рныхъ сердца̀ въ позна́нїе приведѐ, и҆ со стра́хомъ возопѝ: гдⷭ҇ь мо́й и҆ бг҃ъ мо́й, сла́ва тебѣ̀!

Тропа́рь пра́здника: Запеча́танꙋ гро́бꙋ: Та́же є҆ктенїа̀: Поми́лꙋй на́съ бж҃е: Посе́мъ і҆ере́й: Сы́й бл҃гослове́нъ хрⷭ҇то́съ бг҃ъ на́шъ: Ли́къ: Оу҆твердѝ бж҃е: И҆ а҆́бїе совокꙋплѧ́емъ ча́съ пе́рвый триѱа́лмный, по ѻ҆бы́чаю. Тропа́рь и҆ конда́къ пра́здника, и҆ ст҃а́гѡ. А҆́ще же ст҃а́гѡ на д҃, конда́къ глаго́летсѧ пра́здника непремѣ́ннѡ: а҆ ст҃а́гѡ конда́къ не глаго́летсѧ. И҆ быва́етъ соверше́нный ѿпꙋ́стъ. И҆ ѻ҆бы́чнаѧ лїті́а въ притво́рѣ.

[зрѝ] Начина́емъ же ѿ дне́сь и҆ междоча̑сїѧ часѡ́въ, по послѣ́довавшемꙋ ᲂу҆ста́вꙋ. Подоба́етъ же вѣ́дати, ꙗ҆́коже написа́сѧ здѣ̀ вослѣ́дованїе въ недѣ́лю ве́чера во свѣти́льничномъ, и҆ въ понедѣ́льникъ во ᲂу҆́трени: си́це да быва́етъ во всѣ́хъ седми́цахъ до вознесе́нїѧ гдⷭ҇нѧ, и҆змѣнѧ́ємымъ стїхи́рамъ ѻ҆смогла́сника, и҆ сѣда́льнѡмъ по ѻ҆бы́чаю. <<м҃ѕ ѡ҆б.: 92>>

На лїтꙋргі́и: бл҃жє́нна трїѡ́ди, пѣ́снь а҃ пра́здника, на ѕ҃. И҆ ѿ сегѡ̀ днѐ во всю̀ пѧтдесѧ́тницꙋ. По вхо́дѣ тропа́рь пра́здника: Запеча́танꙋ гро́бꙋ: и҆ хра́ма бцⷣы, и҆ хра́ма ст҃а́гѡ. Посе́мъ настоѧ́щагѡ ст҃а́гѡ, а҆́ще є҆́сть. Та́же конда́къ хра́ма ст҃а́гѡ. Сла́ва: ст҃а́гѡ: И҆ ны́нѣ: пра́здника: Любопы́тною десни́цею: Хра́ма же хрⷭ҇то́ва, и҆ бцⷣы конда́къ, во всю̀ пѧтдесѧ́тницꙋ не глаго́лемъ. Прокі́менъ а҆пⷭ҇ла, гла́съ г҃: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀. Сті́хъ: Хвали́те гдⷭ҇а ꙗ҆́кѡ бл҃гъ: А҆пⷭ҇лъ дѣѧ́нїй, зача́ло ѳ҃: Речѐ пе́тръ къ лю́демъ: пока́йтесѧ: А҆ллилꙋ́їа, гла́съ и҃: Прїиди́те, возра́дꙋемсѧ гдⷭ҇ви: Сті́хъ: Ꙗ҆́кѡ бг҃ъ ве́лїй гдⷭ҇ь, и҆ цр҃ь ве́лїй по все́й землѝ. Є҆ѵⷢ҇лїе і҆ѡа́нна, зача́ло ѕ҃: Бра́къ бы́сть въ ка́нѣ галїле́йстѣй: Прича́стенъ: Похвалѝ і҆ерꙋсали́ме гдⷭ҇а:

И҆ во всю̀ седми́цꙋ та́кѡ твори́мъ, и҆ во всю̀ пѧтдесѧ́тницꙋ во всѧ̑ недѣ̑ли. И҆ про́чее послѣ́дованїе лїтꙋргі́и. И҆ ѿпꙋ́стъ.

Въ понедѣ́льникъ ве́чера,

на Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры подѡ́бны, гла́съ д҃. Подо́бенъ: Ꙗ҆́кѡ до́блѧ:

Воскре́съ и҆з̾ гро́ба, заключє́ннымъ две́ремъ, предста́лъ є҆сѝ дрꙋгѡ́мъ твои̑мъ всеси́льне, и҆ ѳѡмѣ̀ невѣ́ровавшꙋ, гвозде́й показа́лъ є҆сѝ ꙗ҆́звы, и҆ ребра̀ є҆́же ѿ копїѧ̀ прободе́нїе, ᲂу҆твержда́ѧ и҆ ᲂу҆вѣрѧ́ѧ того̀ сло́ве, ꙗ҆́кѡ <<м҃з: 93>> ты̀ са́мъ є҆сѝ, за милосе́рдїе претерпѣ́вый спаси́тєльныѧ стра́сти.

За мно́гое снизхожде́нїе, и҆ милосе́рдїе безмѣ́рное, моѐ зрѧ̀ и҆стоща́нїе не ᲂу҆сꙋмни́сѧ, но ᲂу҆вѣ́рисѧ бли́знче, гдⷭ҇ь речѐ: ꙗ҆́кѡ са́мъ є҆́смь а҆́зъ пострада́вый, и҆ тридне́венъ и҆з̾ гро́ба воскресы́й, и҆ а҆́дова сокрѡ́вища и҆стощи́вый, и҆ ѡ҆живи́вый ѿ вѣ́ка ᲂу҆ме́ршыѧ.

Оу҆диви́всѧ ꙗ҆́кѡ ᲂу҆зрѣ̀ ѳѡма̀ возопѝ, є҆гда̀ ви́дѣ тѧ̀ всеси́льне: ты̀ є҆сѝ бг҃ъ мо́й и҆ гдⷭ҇ь, вѣ́рꙋю чл҃вѣколю́бче, ꙗ҆́кѡ са́мъ є҆сѝ пострада́вый, и҆ стра̑сти и҆сцѣлѧ́ѧй дꙋ́шъ на́шихъ. кла́нѧюсѧ твое́й держа́вѣ, и҆ мі́рови возвѣща́ю стра́шное твоѐ и҆ всеси́льное воста́нїе.

И҆ мине́и г҃. Сла́ва, и҆ ны́нѣ: гла́съ а҃:

Оу҆ченикѡ́мъ сомнѧ́щымсѧ, во ѻ҆смы́й де́нь предста̀ сп҃съ, и҆дѣ́же бѧ́хꙋ со́брани, и҆ ми́ръ да́въ, ѳѡмѣ̀ возопѝ: прїидѝ а҆пⷭ҇ле, ѡ҆сѧжѝ дла̑ни, въ ни́хже гвѡ́здїѧ вонзо́ша. ѽ до́брое невѣ́рїе ѳѡмино̀, вѣ́рныхъ сердца̀ въ позна́нїе приведѐ и҆ со стра́хомъ возопѝ: гдⷭ҇ь мо́й и҆ бг҃ъ мо́й, сла́ва тебѣ̀.

Свѣ́те ти́хїй:

На стїхо́внѣ стїхи̑ры, гла́съ а҃:

Ѡ҆быди́те лю́дїе сїѡ́нъ, и҆ ѡ҆б̾ими́те є҆го̀, и҆ дади́те сла́вꙋ въ не́мъ воскре́сшемꙋ и҆з̾ ме́ртвыхъ: ꙗ҆́кѡ то́й є҆́сть бг҃ъ на́шъ, и҆збавле́й на́съ ѿ беззако́нїй на́шихъ.

Сті́хъ: Къ тебѣ̀ воздвиго́хъ ѻ҆́чи моѝ.

Ꙗ҆́кѡ помышле́нїи лꙋка́выми, и҆ дѣ́лы ѡ҆сꙋди́хсѧ сп҃се, мы́сль мнѣ̀ да́рꙋй ѡ҆браще́нїѧ бж҃е, да зовꙋ̀: спаси́ мѧ бл҃годѣ́телю бл҃гі́й, и҆ поми́лꙋй мѧ̀. <<м҃з ѡ҆б.: 94>>

Сті́хъ: Поми́лꙋй на́съ гдⷭ҇и, поми́лꙋй на́съ:

Мꙋ́чениченъ:

Є҆́же на сꙋди́щи ва́ше и҆сповѣ́данїе ст҃і́и, де́мѡнѡвъ ѡ҆плева̀ си́лꙋ, и҆ ѿ пре́лести человѣ́ки свободѝ. тѣ́мже и҆ глава́мъ ᲂу҆сѣка́ємымъ, взыва́сте: да бꙋ́детъ, гдⷭ҇и, же́ртва дꙋ́шъ на́шихъ бл҃гопрїѧ́тна пред̾ тобо́ю, ꙗ҆́кѡ тебѐ возлюби́вше неради́хомъ ѡ҆ вре́менной жи́зни, чл҃вѣколю́бче.

Сла́ва, и҆ ны́нѣ: гла́съ в҃:

По воста́нїи твое́мъ гдⷭ҇и, собра̑ннымъ ᲂу҆ченикѡ́мъ твои́мъ, и҆ две́ремъ заключє́ннымъ, посредѣ̀ ста́лъ є҆сѝ, ми́ръ подаѧ̀ и҆̀мъ: вѣ́ровавъ же и҆ ѳѡма̀, зрѣ́нїемъ рꙋкꙋ̀ и҆ ре́бръ твои́хъ, гдⷭ҇а и҆ бг҃а тѧ̀ и҆сповѣ́да, спаса́ющаго ᲂу҆пова́ющыѧ на тѧ̀, чл҃вѣколю́бче.

Ны́нѣ ѿпꙋща́еши: Тропа́рь пра́здника: Запеча́танꙋ гро́бꙋ: И҆ ѿпꙋ́стъ.

Во вто́рникъ вторы́ѧ седми́цы, на ᲂу҆́трени,

на Бг҃ъ гдⷭ҇ь: тропа́рь пра́здника, три́жды.

По а҃-мъ стїхосло́вїи, сѣда́ленъ, гла́съ а҃.

Подо́бенъ: Ка́мени запеча́танꙋ:

Жєны̀ ко гро́бꙋ прїидо́ша ᲂу҆ра́ншыѧ, и҆ а҆́гг҃льское ꙗ҆вле́нїе ви́дѣвшыѧ трепета́хꙋ: гро́бъ ѡ҆блиста̀ жи́знь, чꙋ́до ᲂу҆дивлѧ́ше ѧ҆̀. сегѡ̀ ра́ди ше́дшыѧ, ᲂу҆ченикѡ́мъ проповѣ́дахꙋ воста́нїе: а҆́дъ плѣнѝ хрⷭ҇то́съ, ꙗ҆́кѡ є҆ди́нъ крѣ́покъ и҆ си́ленъ, и҆ и҆стлѣ́вшыѧ всѧ̑ совоздви́же, ѡ҆сꙋжде́нїѧ стра́хъ разрꙋши́въ крⷭ҇то́мъ. <<м҃и: 95>>

Сті́хъ: Гдⷭ҇и да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.

А҆́ще пра́ведникъ є҆два̀ спаса́етсѧ, а҆́зъ грѣ́шный гдѣ̀ ꙗ҆влю́сѧ, тѧготы̀ и҆ ва́ра дневна́гѡ не поне́сшїй; но съ нае́мники є҆динонадесѧ́тагѡ часа̀ причти́ мѧ бж҃е, и҆ спаси́ мѧ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Мꙋ́чениченъ: Ꙗ҆́кѡ до́брїи во́ини є҆диномꙋ́дреннѡ вѣ́ровавше, преще́нїѧ мꙋчи́телей не ᲂу҆боѧ́вшесѧ ст҃і́и, прїидо́сте ᲂу҆се́рднѡ ко хрⷭ҇тꙋ̀, взе́мше честны́й крⷭ҇тъ, и҆ сконча́вше тече́нїе, съ нб҃сѐ побѣ́дꙋ прїѧ́сте. сла́ва ᲂу҆крѣ́пльшемꙋ вы̀: сла́ва вѣнча́вшемꙋ вы̀: сла́ва дѣ́йствꙋющемꙋ ва́ми всѣ̑мъ и҆сцѣлє́нїѧ.

Сла́ва, и҆ ны́нѣ: бг҃оро́диченъ:

Нерꙋши́мꙋю стѣ́нꙋ и҆мꙋ́ще вѣ́рнїи бцⷣꙋ мр҃і́ю, прїиди́те поклони́мсѧ, и҆ припаде́мъ є҆́й: дерзнове́нїе бо и҆́мать къ ро́ждшемꙋсѧ и҆з̾ неѧ̀, и҆ моли́ти, и҆ спаса́ти ѿ гнѣ́ва и҆ сме́рти дꙋ́шы на́шѧ.

По в҃-мъ стїхосло́вїи сѣда́ленъ, гла́съ є҃.

Подо́бенъ: Собезнача́льное сло́во:

А҆пⷭ҇ла всѝ и҆ ᲂу҆ченика̀ хрⷭ҇то́ва восхва́лимъ пѣ́сньми въ па́мѧть є҆гѡ̀: бг҃олѣ́пнѡ бо на́шѧ помышлє́нїѧ, то́й ꙗ҆́звы гвозде́й ѡ҆сѧза́въ, и҆звѣ́стнꙋ вѣ́рꙋ и҆зыска́въ,ᲂу҆твердѝ въ мі́рѣ, и҆ мо́литъ сп҃са, поми́ловатисѧ дꙋша́мъ на́шымъ.

Сла́ва и҆ ны́нѣ: то́йже. <<м҃и ѡ҆б.: 96>>

Та́же, Воскрⷭ҇нїе хрⷭ҇то́во: Ѱало́мъ н҃. Канѡ́нъ пра́здника со і҆рмосы̀ на и҃: и҆ мине́и на д҃. По г҃-й пѣ́сни, сѣда́ленъ мине́и. Конда́къ и҆ є҆ѯапостїла́рїй пра́здника.

На хвали́техъ, стїхи̑ры на д҃, гла́съ а҃:

Крⷭ҇тъ претерпѣ́вый, и҆ сме́рть ᲂу҆праздни́вый, и҆ воскресы́й и҆з̾ ме́ртвыхъ, ᲂу҆мирѝ на́шꙋ жи́знь гдⷭ҇и, ꙗ҆́кѡ є҆ди́нъ всеси́ленъ. [Два́жды.]

Не пренебрезѝ менѐ сп҃се мо́й, лѣ́ностїю грѣхо́вною содержи́ма: воздви́гни моѐ помышле́нїе къ покаѧ́нїю, и҆ твоегѡ̀ вїногра́да дѣ́лателѧ и҆скꙋ́сна покажи́ мѧ, да́рꙋѧ мѝ є҆динонадесѧ́тагѡ часа̀ мздꙋ̀, и҆ ве́лїю ми́лость.

Мꙋ́чениченъ: Сі́и во́ини цр҃ѧ̀ вели́кагѡ, сопроти́вишасѧ повелѣ́нїємъ мꙋчи́телей до́блественнѡ, небрего́ша ѡ҆ мꙋ́кахъ, и҆ пре́лесть всю̀ попра́вше, досто́йнѡ вѣнча́ни бы́вше, про́сѧтъ ᲂу҆ сп҃са ми́ра, и҆ ве́лїѧ ми́лости.

Сла́ва, и҆ ны́нѣ: гла́съ в҃:

Две́ремъ заключє́ннымъ, предста́въ сп҃съ ᲂу҆ченикѡ́мъ, безстра́шїе и҆ ми́ръ даѧ́ше. та́же глаго́летъ ѳѡмѣ̀: что̀ мнѣ̀ не вѣ́рꙋеши, ꙗ҆́кѡ воскресо́хъ и҆з̾ ме́ртвыхъ; принесѝ сѣ́мѡ рꙋ́кꙋ твою̀, и҆ вложѝ въ ре́бра моѧ̑, и҆ ви́ждь. тебѣ́ бо невѣ́рꙋющꙋ, всѝ навыко́ша стрⷭ҇ти и҆ воскресе́нїе моѐ зва́ти съ тобо́ю: гдⷭ҇ь мо́й и҆ бг҃ъ мо́й, сла́ва тебѣ̀.

На стїхо́внѣ стїхи̑ры пра́здника, гла́съ в҃.

Подо́бенъ: До́ме є҆ѵфра́ѳовъ:

Воспои́мъ вѣ́рнїи, непреста́ннѡ со а҆́гг҃лы, хрⷭ҇та̀ воскре́сшаго, тридне́вна и҆з̾ гро́ба, и҆ мі́ръ совоздви́гшаго. <<м҃ѳ: 97>>

Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.

Ѳѡма̀ твоѧ̑ ре́бра, бл҃гоꙋтро́бне, ѡ҆сѧза́въ, къ вѣ́рѣ взы́де: и҆ мы̀ тѣ́мъ тѧ̀ бг҃а про́чее позна́хомъ.

Сті́хъ: Небеса̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

Подае́ши ѽ и҆зба́вителю, ми́ръ лю́демъ твои̑мъ воскре́съ и҆з̾ гро́ба, и҆ мі́ръ совоздви́гнꙋвый ѿ а҆́да, всеси́льне.

Сла́ва, и҆ ны́нѣ: гла́съ ѕ҃. І҆ѡа́нна мона́ха:

Две́ремъ заключє́ннымъ, прише́лъ є҆сѝ хрⷭ҇тѐ ко ᲂу҆ченикѡ́мъ, тогда̀ ѳѡма̀ смотри́тельнѡ не ѡ҆брѣ́тесѧ съ ни́ми. глаго́лаше бо: не и҆мꙋ̀ вѣ́ры, а҆́ще не ᲂу҆ви́ждꙋ и҆ а҆́зъ влⷣки. ᲂу҆ви́ждꙋ ребро̀, ѿѻнꙋ́дꙋже и҆зы́де кро́вь, вода̀, кр҃ще́нїе: ᲂу҆ви́ждꙋ ꙗ҆́звꙋ, ѿ неѧ́же и҆сцѣлѣ̀ вели́кїй стрꙋ́пъ человѣ́ческїй: ᲂу҆ви́ждꙋ, ка́кѡ не бѣ̀ ꙗ҆́коже дꙋ́хъ, но пло́ть и҆ кѡ́сти. сме́рть попра́вый, и҆ ѳѡмꙋ̀ ᲂу҆вѣ́ривый, гдⷭ҇и сла́ва тебѣ̀.

Ѿпꙋсти́тельный тропа́рь, и҆ ѿпꙋ́стъ.

Во вто́рникъ ве́чера,

на Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры, гла́съ а҃.

Подо́бенъ: Прехва́льнїи мꙋ́чєницы:

Ѡ҆сѧжѝ, глаго́летъ ѳѡмѣ̀, и҆з̾ ме́ртвыхъ тридне́венъ воскресы́й чл҃вѣколю́бецъ, и҆ ви́ждь рꙋкꙋ̀ мое́ю и҆ нѡгꙋ̀ ꙗ҆́звы, и҆ ре́бръ прободе́нїе: и҆ позна́й мѧ̀ бг҃а непремѣ́нна, <<м҃ѳ ѡ҆б.: 98>> земны́мъ смѣше́нїемъ по сꙋществꙋ̀ воѡбраже́нна и҆ стра́сть въ не́мъ прїе́мша.

Недоꙋмѣва́шесѧ близне́цъ, ꙗ҆́звы зрѧ̀ ножны̑ѧ, и҆ рꙋчна̑ѧ вонзє́нїѧ, и҆ бѧ́ше ᲂу҆жаса́емь стра́шнымъ чꙋ́домъ: и҆ рꙋко́ю пречи́стое ребро̀ и҆ ѡ҆сѧза́ѧ и҆ ви́дѧ, и҆з̾ ни́хже показа̀ несꙋмнѣ́нное ꙗ҆зы́кѡмъ, є҆́же и҆з̾ гро́ба тридне́вное воста́нїе.

Прїе́млю превели́кое ра́дованїе, твоѐ сп҃се мо́й воста́нїе и҆звѣствꙋ́емое ви́дѧ: ѿ ни́хже сподо́бисѧ де́рзѡстнымъ ве́щемъ ѳѡма̀ прикоснꙋ́тисѧ. тѣ́мже тѧ̀ про́ста проповѣ́дꙋемъ бг҃а и҆ человѣ́ка, дѣ̑йства два̀ носѧ́ща сꙋ́ществєнна, ѿ ни́хже сложи́лсѧ є҆сѝ.

И҆ мине́и, г҃. Сла́ва, и҆ ны́нѣ: гла́съ д҃:

Гдⷭ҇и, нестерпи́мымъ твоегѡ̀ бжⷭ҇тва̀ блиста́нїемъ, две́ремъ прише́лъ є҆сѝ сꙋ́щымъ заключє́ннымъ, и҆ ста́въ посредѣ̀ ᲂу҆ченикѡ́въ, ребро̀ ѡ҆бнажи́лъ є҆сѝ, и҆ ꙗ҆́звъ твое́ю рꙋкꙋ̀ и҆ нѡгꙋ̀ стрꙋ́пы ꙗ҆влѧ́ѧ, печа́ль же и҆ ско́рбь разрѣша́ѧ, ꙗ҆́вѣ возгласи́лъ є҆сѝ: и҆́мже ѻ҆́бразомъ во мнѣ̀ ви́дите, ѽ дрꙋ́зи, пло́ти прїѧ́тїе, не дꙋ́ха ношꙋ̀ є҆стество̀. сомнѧ́щемꙋ же сѧ ᲂу҆ченикꙋ̀ повелѣва́лъ є҆сѝ ѡ҆сѧза́ти тре́петнѡ, ре́къ: и҆спыта́въ всѧ̑, грѧдѝ про́чее не сꙋмни́сѧ. ѻ҆́нъ же ѡ҆щꙋща́ѧ рꙋко́ю твоѐ сꙋгꙋ́бое сꙋщество̀, со стра́хомъ вопїѧ́ше вѣ́рнѡ, вѣ́рою влеко́мь: гдⷭ҇ь мо́й и҆ бг҃ъ мо́й сла́ва тебѣ̀.

Свѣ́те ти́хїй:

На стїхо́внѣ стїхи́ра крⷭ҇тна, гла́съ а҃:

Крⷭ҇тъ водрꙋзи́сѧ на ло́бнѣмъ, и҆ процвѣтѐ на́мъ безсме́ртїе ѿ и҆сто́чника приснотекꙋ́щагѡ ребра̀ сп҃сова. <<н҃: 99>>

Сті́хъ: Къ тебѣ̀ возведо́хъ ѻ҆́чи моѝ:

Прїиди́те лю́дїе воспои́мъ, и҆ поклони́мсѧ хрⷭ҇тꙋ̀, сла́вѧще є҆гѡ̀ є҆́же и҆з̾ ме́ртвыхъ воскресе́нїе, ꙗ҆́кѡ то́й є҆́сть бг҃ъ на́шъ, ѿ пре́лести вра́жїѧ мі́ръ и҆збавле́й.

Сті́хъ: Поми́лꙋй на́съ гдⷭ҇и, поми́лꙋй на́съ:

Мꙋ́чениченъ: Ѽ до́брыѧ кꙋ́пли ва́шеѧ ст҃і́и! ꙗ҆́кѡ крѡ́ви да́сте, и҆ нб҃са̀ наслѣ́довасте, и҆ привре́меннѡ и҆скꙋси́вшесѧ, вѣ́чнѡ веселите́сѧ. вои́стиннꙋ добра̀ ва́ша кꙋ́плѧ: тлѣ̑ннаѧ бо ѡ҆ста́вльше, нетлѣ̑ннаѧ воспрїѧ́сте, и҆ со а҆́гг҃лы ликꙋ́юще, пое́те непреста́ннѡ трⷪ҇цꙋ є҆диносꙋ́щнꙋю.

Сла́ва, и҆ ны́нѣ: гла́съ и҃:

Прикосни́сѧ ѳѡмо̀ рꙋко́ю ре́брѡмъ, глаго́летъ хрⷭ҇то́съ, и҆ ꙗ҆́звы гвозде́й прїидѝ ѡ҆сѧжѝ: вѣ́рою и҆спыта́й, и҆ бꙋ́ди мѝ вѣ́ренъ, и҆ не бꙋ́ди невѣ́ренъ. ѳѡма́ же пе́рстомъ ꙗ҆́кѡ прикоснꙋ́сѧ влⷣцѣ, вельмѝ возопѝ: ты̀ мо́й бг҃ъ и҆ гдⷭ҇ь, бл҃гоꙋтро́бне сла́ва тебѣ̀.

Та́же, Ны́нѣ ѿпꙋща́еши: Ѿпꙋсти́тельный тропа́рь: Запеча́танꙋ гро́бꙋ: Є҆ктенїа̀ и҆ ѿпꙋ́стъ.

[зрѝ] Вѣ́стно бꙋ́ди, ꙗ҆́кѡ въ сре́ды и҆ пѧткѝ предварѧ́ютъ стїхи̑ры крє́стныѧ, та́кожде и҆ сѣда́льны воскре́сны: зане́же гдⷭ҇ь на́шъ пе́рвѣе распѧ́сѧ, посе́мъ же воскре́се и҆з̾ ме́ртвыхъ.

Въ сре́дꙋ вторы́ѧ седми́цы на ᲂу҆́трени.

На Бг҃ъ гдⷭ҇ь: тропа́рь пра́здника.три́жды.По а҃- мъ стїхосло́вїи, сѣда́ленъ кре́стный, гла́съ а҃:

Распе́ншꙋсѧ тебѣ̀ хрⷭ҇тѐ, поги́бе мꙋчи́тельство, попра́на бы́сть си́ла вра́жїѧ: ниже́ бо а҆́гг҃лъ, ни человѣ́къ, но са́мъ гдⷭ҇и спа́слъ є҆сѝ ны̀, сла́ва тебѣ̀. <<н҃ ѡ҆б.: 100>>

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю но́гꙋ є҆гѡ̀, ꙗ҆́кѡ ст҃о є҆́сть.

І҆саа́къ на хо́лмъ возведе́нъ бы́сть, і҆ѡ́на во глꙋбинꙋ̀ низведе́сѧ, и҆ ѻ҆́ба стрⷭ҇ть твою̀ сп҃се ѡ҆бразова́ста. ѻ҆́въ ᲂу҆́бѡ ᲂу҆́зы и҆ заколе́нїе: ѻ҆́въ же погребе́нїе, и҆ жи́знь пресла́внагѡ воста́нїѧ твоегѡ̀. гдⷭ҇и сла́ва тебѣ̀.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди гдⷭ҇и, и҆ всѧ̑ на́шѧ болѣ̑зни и҆сцѣлѝ, чл҃вѣколю́бче, мо́лимсѧ.

Сла́ва, и҆ ны́нѣ: крⷭ҇тобг҃оро́диченъ:

Твоѐ предста́тельство и҆мꙋ́ще пречⷭ҇таѧ, и҆ твои́ми мл҃твами лю́тыхъ и҆збавлѧ́еми, крⷭ҇то́мъ сн҃а твоегѡ̀ вездѣ̀ соблюда́еми, по до́лгꙋ тѧ̀ всѝ бл҃гоче́стнѡ велича́емъ.

По в҃-мъ стїхосло́вїи, сѣда́ленъ, гла́съ а҃.

Подо́бенъ: Гро́бъ тво́й сп҃се:

Прикоснꙋ́выйсѧ рꙋко́ю ре́брѡмъ нестерпи̑мымъ близне́цъ ѳѡма̀, не ѡ҆пали́сѧ прикоснꙋ́тїемъ: но пребы́сть ꙗ҆́звы ѡ҆сѧза́ѧ и҆звѣ́стнѣе, и҆ вѣща́ѧ на́съ ра́ди прободе́нномꙋ: ты̀ мо́й гдⷭ҇ь, ты̀ и҆ бг҃ъ мо́й є҆сѝ, а҆́ще и҆ стрⷭ҇ть претерпѣ́лъ є҆сѝ.

Сла́ва, и҆ ны́нѣ: то́йже.

Воскрⷭ҇нїе хрⷭ҇то́во ви́дѣвше: Ѱало́мъ н҃. Канѡ́нъ пра́здника, со і҆рмосо́мъ, на и҃: и҆ мине́и на д҃. По г҃- й пѣ́сни, сѣда́ленъ мине́и, и҆ є҆ѯапостїла́рїй пра́здника.

На хвали́техъ настоѧ́щыѧ стїхи̑ры крє́стныѧ, на д҃. гла́съ а҃:

Тебѐ на дре́вѣ пригво́ждьшагосѧ, и҆ живо́тъ на́мъ пода́вшаго, ꙗ҆́кѡ сп҃са и҆ влⷣкꙋ пое́мъ непреста́ннѡ. [Два́жды.] <<н҃а: 101>>

А҆́да плѣни́вый, и҆ человѣ́ка воскреси́вый, воскрⷭ҇нїемъ твои́мъ хрⷭ҇тѐ, сподо́би на́съ чи́стымъ срⷣцемъ тебѐ пѣ́ти и҆ сла́вити.

Мꙋ́чениченъ: Ва́съ всехва́льнїи мꙋ́чєницы, ни скѡ́рби, ни тѣснота̀, ни гла́дъ, ни гоне́нїе, нижѐ ра̑ны, ни ꙗ҆́рость ѕвѣре́й, ни ме́чь, нижѐ ѻ҆́гнь претѧ́щїй, разлꙋчи́ти ѿ бг҃а возмого́ша: любо́вїю же па́че къ немꙋ̀, ꙗ҆́кѡ въ чꙋжди́хъ подви́гшесѧ тѣлесѣ́хъ, є҆стество̀ забы́сте, сме́рть презрѣ́вше: тѣ́мже и҆ по достоѧ́нїю трꙋдѡ́въ ва́шихъ мздꙋ̀ прїѧ́сте, нбⷭ҇нагѡ црⷭ҇твїѧ наслѣ̑дницы бы́сте. и҆мꙋ́ще дерзнове́нїе къ чл҃вѣколю́бцꙋ бг҃ꙋ, мі́рови ми́ръ и҆спроси́те, и҆ дꙋша́мъ на́шымъ ве́лїю млⷭ҇ть.

Сла́ва и҆ ны́нѣ: гла́съ и҃:

Две́ремъ заключє́ннымъ, ᲂу҆ченикѡ́мъ собра̑ннымъ, предста̀ сп҃съ, и҆дѣ́же бѧ́хꙋ со́брани, и҆ ста́въ посредѣ̀ и҆̀хъ, глаго́летъ ѳѡмѣ̀: прїидѝ, ѡ҆сѧжѝ, и҆ ви́ждь ѻ҆́бразы гвозде́й. прострѝ рꙋ́кꙋ твою̀, и҆ косни́сѧ ребрꙋ̀ моемꙋ̀, и҆ не бꙋ́ди невѣ́ренъ, но вѣ́рою проповѣ́ждь є҆́же и҆з̾ ме́ртвыхъ моѐ воскресе́нїе.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳовъ:

Ѽ чꙋдесѐ но́вагѡ! ꙳ ѽ пресла́внагѡ ѻ҆́браза! ꙳ ка́кѡ трава̀ не ѡ҆пали́сѧ, ꙳ рꙋка̀ а҆пⷭ҇лова ѻ҆гне́мъ бжⷭ҇тва̀;

Сті́хъ: Во всю̀ зе́млю и҆зы́де:

Потщи́мсѧ и҆ мы̀ ꙳ рꙋ́ки ѡ҆ст҃и́ти, страсте́й ᲂу҆пражне́нїемъ, ꙳ и҆ та́кѡ влⷣчнимъ ꙳ ре́брѡмъ прико́снемсѧ.

Сті́хъ: Небеса̀ повѣ́даютъ сла́вꙋ бж҃їю: <<н҃а ѡ҆б.: 102>>

Ѡ҆бновѝ дꙋшѐ, всѧ̑ твоѧ̑ чꙋ̑вства къ бжⷭ҇твенномꙋ зрѣ́нїю: хрⷭ҇то́съ бо си́це хо́щетъ соверша́тисѧ ѡ҆бновле́нїємъ.

Сла́ва, и҆ ны́нѣ: бг҃оро́диченъ, подо́бенъ:

Ви́ждь мѝ ᲂу҆́мнѡ, премѣне́нїе мі́ра, и҆ ᲂу҆красѝ ꙗ҆̀же внꙋ́трь, добродѣ́тельми ꙗ҆́кѡ ли́ствїемъ дꙋшѐ, и҆ ᲂу҆краси́шисѧ.

Та́же, Бл҃го є҆́сть: Ча́съ а҃. И҆ ѿпꙋ́стъ.

Въ сре́дꙋ вторы́ѧ седми́цы ве́чера,

на Гдⷭ҇и воззва́хъ поста́вимъ стїхѡ́въ ѕ҃. И҆ пое́мъ стїхи̑ры подо́бны, гла́съ в҃. Подо́бенъ: Є҆гда̀ ѿ дре́ва:

Нѣ́дръ не ѡ҆ста́вль ѻ҆ч҃ескихъ, ꙗ҆ви́лсѧ є҆сѝ на землѝ плотоно́сецъ, за бл҃гоꙋтро́бїе хрⷭ҇тѐ, стрⷭ҇ть же и҆ сме́рть прїи́мъ, воскре́слъ є҆сѝ тридне́венъ: две́ремъ заключє́ннымъ внꙋ́трь вше́лъ є҆сѝ, ꙗ҆́кѡ всеси́ленъ. тѣ́мже ребро̀ твоѐ бж҃е́ственное ра́дꙋѧсѧ ѳѡма̀ ѡ҆сѧза́въ, гдⷭ҇а и҆ зижди́телѧ тѧ̀ просла́ви.

Гвоздьмѝ пригвозди́лсѧ є҆сѝ на крⷭ҇тѣ̀, копїе́мъ въ ре́бра прободе́нъ є҆сѝ, же́лчи вкꙋси́лъ є҆сѝ хрⷭ҇тѐ, сме́рть претерпѣ́лъ є҆сѝ, во гро́бѣ положе́нъ бы́въ ꙗ҆́кѡ ме́ртвъ, ꙗ҆́кѡ бг҃ъ же сокрꙋши́лъ є҆сѝ ᲂу҆́зы а҆́дѡвы, и҆ совоскреси́лъ є҆сѝ ꙗ҆̀же ѿ вѣ́ка мє́ртвыѧ. тѣ́мже печа́ти не разрꙋши́въ, твои̑мъ ᲂу҆ченикѡ́мъ ꙗ҆ви́лсѧ є҆сѝ, твоѐ воскресе́нїе ᲂу҆вѣрѧ́ѧ.

Па́сха настоѧ́щїй пра́здникъ: па́сха та́йнаѧ: па́сха <<н҃в: 103>> бж҃е́ственнаѧ: па́сха сп҃си́тельнаѧ: па́сха къ безсме́ртной жи́зни преводѧ́щаѧ на́съ: па́сха всѧ́кꙋю ско́рбь ѿе́млющаѧ ѿ среды̀: па́сха весе́лꙋю блгⷣть даю́щаѧ ᲂу҆ченикѡ́мъ. тѣ́мже ѳѡма̀ вопїѧ́ше: гдⷭ҇ь бг҃ъ мо́й є҆сѝ, плѣни́вый а҆́дова ца̑рствїѧ.

И҆ мине́и, г҃. Сла́ва и҆ ны́нѣ: гла́съ д҃:

Ѽ пресла́внагѡ чꙋдесѐ! невѣ́рїе вѣ́рꙋ и҆звѣ́стнꙋю родѝ: ре́клъ бо ѳѡма̀: а҆́ще не ви́ждꙋ, не и҆мꙋ̀ вѣ́ры. ѡ҆сѧза́въ же ре́бра, бг҃осло́витъ воплоти́вшагосѧ, того́жде сн҃а бж҃їѧ позна̀, ꙗ҆́кѡ пострада́вша пло́тїю: проповѣ́да воскре́сшаго бг҃а, и҆ возопѝ свѣ́тлымъ гла́сомъ: гдⷭ҇ь мо́й и҆ бг҃ъ мо́й, сла́ва тебѣ̀.

На стїхо́внѣ, стїхи́ра воскре́снаѧ, гла́съ а҃:

Стра́стїю твое́ю хрⷭ҇тѐ, ѿ страсте́й свободи́хомсѧ, и҆ воскрⷭ҇нїемъ твои́мъ и҆з̾ и҆стлѣ́нїѧ и҆зба́вихомсѧ: гдⷭ҇и сла́ва тебѣ̀.

Сті́хъ: Къ тебѣ̀ возведо́хъ ѻ҆́чи моѝ:

А҆пⷭ҇льскаѧ всесли́чнаѧ цѣвни́ца, ст҃ы́мъ дх҃омъ дви́жимаѧ, безстꙋ́дныхъ бѣсѡ́въ трє́бища ᲂу҆праздни́ла є҆́сть: и҆ є҆ди́наго гдⷭ҇а проповѣ́давши, ꙗ҆зы́ки и҆зба́ви ѿ пре́лести і҆́дѡльскїѧ, и҆ поклонѧ́тисѧ наꙋчѝ трⷪ҇цѣ є҆диносꙋ́щнѣй.

Сті́хъ: Поми́лꙋй на́съ гдⷭ҇и, поми́лꙋй на́съ:

Мꙋ́чениченъ: Всехва́льнїи мꙋ́чєницы, ва́съ ни землѧ̀ потаи́ла є҆́сть, но нб҃о прїѧ́тъ: ѿверзо́шасѧ ва́мъ ра́йскаѧ врата̀, и҆ внꙋ́трь бы́вше дре́ва живо́тнагѡ наслажда́етесѧ: хрⷭ҇то́ви моли́тесѧ, дарова́ти дꙋша́мъ на́шымъ ми́ръ и҆ ве́лїю ми́лость. <<н҃в ѡ҆б.: 104>>

Сла́ва, и҆ ны́нѣ: гла́съ д҃:

Ѽ пресла́внагѡ чꙋдесѐ! ѻ҆гню̀ трава̀ коснꙋ́вшаѧсѧ спасе́сѧ: вложи́въ бо ѳѡма̀ во ѻ҆́гненнаѧ ре́бра рꙋ́кꙋ і҆и҃са хрⷭ҇та̀ бг҃а, не ѡ҆пали́сѧ ѡ҆сѧза́нїемъ. дꙋши́ бо ѕловѣ́рство преложѝ на благовѣ́рїе, те́плѣ возопѝ ѿ глꙋбины̀ дꙋше́вныѧ: влⷣка ты̀ мо́й є҆сѝ и҆ бг҃ъ, и҆з̾ ме́ртвыхъ воскресы́й, сла́ва тебѣ̀.

Та́же, Ны́нѣ ѿпꙋща́еши: Трист҃о́е: и҆ по Ѻ҆́ч҃е на́шъ: тропа́рь пра́здника, и҆ ѿпꙋ́стъ.

Въ четверто́къ вторы́ѧ седми́цы на ᲂу҆́трени,

на Бг҃ъ гдⷭ҇ь: тропа́рь пра́здника, три́жды.

По а҃-мъ стїхосло́вїи, сѣда́ленъ, гла́съ а҃.

Подо́бенъ: Ка́мени запеча́танꙋ:

На крⷭ҇тѣ̀ пригвозди́лсѧ є҆сѝ животѐ всѣ́хъ, и҆ въ ме́ртвыхъ вмѣни́лсѧ є҆сѝ, безсме́ртный гдⷭ҇и: воскре́слъ є҆сѝ тридне́венъ сп҃се, совоздви́гъ а҆да́ма ѿ тлѣ́нїѧ. сегѡ̀ ра́ди си̑лы нбⷭ҇ныѧ вопїѧ́хꙋ тебѣ̀ жизнода́вче: сла́ва бж҃е́ственной стра́сти твое́й хрⷭ҇тѐ: сла́ва воскрⷭ҇нїю твоемꙋ̀: сла́ва снизхожде́нїю твоемꙋ̀, є҆ди́не чл҃вѣколю́бче

Сті́хъ: Во всю̀ зе́млю и҆зы́де вѣща́нїе и҆́хъ:

Премꙋ́дрїи вселе́нныѧ ловцы̀, ѿ бг҃а прїе́мше ми́лостивное, моли́тесѧ и҆ ны́нѣ ѡ҆ на́съ вопїю́щихъ: гдⷭ҇и, спасѝ лю́ди твоѧ̀, и҆ гра́дъ тво́й, и҆ ѿ содержа́щихъ лю́тыхъ свободѝ а҆по́столми дꙋ́шы на́шѧ.

Сті́хъ: Ди́венъ бг҃ъ во ст҃ы́хъ свои́хъ: <<н҃г: 105>>

Мꙋ́чениченъ: Подо́бенъ: Гро́бъ:

Мꙋ́ченики хрⷭ҇тѡ́вы мо́лимъ всѝ, ті́и бо ѡ҆ на́шемъ спасе́нїи про́сѧтъ, и҆ всѝ пристꙋ́пимъ къ ни́мъ съ вѣ́рою. сі́и и҆сточа́ютъ и҆сцѣле́нїй бл҃года́ть, сі́и полкѝ ѿгонѧ́ютъ де́мѡнскїѧ, ꙗ҆́кѡ храни́телїе вѣ́ры.

Сла́ва, и҆ ны́нѣ: бг҃оро́диченъ:

Проро́цы тѧ̀ ꙗ҆́вственнѡ предвозвѣсти́ша ѻ҆трокови́це мт҃рь бж҃їю, и҆ а҆пⷭ҇ли бж҃е́ственнїи въ мі́рѣ проповѣ́даша, мы̀ вѣ́ровахомъ. тѣ́мже всѝ бл҃гочестномꙋ́дреннѡ почита́юще воспѣва́емъ тѧ̀, и҆ бцⷣꙋ гдⷭ҇ьственнѡ при́снѡ и҆менꙋ́емъ.

По в҃-мъ стїхосло́вїи, сѣда́ленъ, гла́съ а҃.

Подо́бенъ: Гро́бъ тво́й сп҃се:

Ви́дѣвъ моѧ̑ ре́бра, не невѣ́рꙋй мѝ бо́лѣе, сло́во ѳѡмѣ̀ невѣ́рꙋющемꙋ вопїѧ́ше, пе́рстомъ мѧ̀ ѡ҆сѧжѝ, и҆ рꙋко́ю и҆спыта́й: и҆ ᲂу҆вѣ́дѣвъ мои́хъ ꙗ҆́звъ зна́мєнїѧ, мі́рови проповѣ́ждь живоно́сное моѐ сїѐ є҆́же и҆з̾ гро́ба воскрⷭ҇нїе.

Сла́ва, и҆ ны́нѣ, то́йже. Воскрⷭ҇нїе хрⷭ҇то́во: Ѱало́мъ н҃. Канѡ́нъ пра́здника, со і҆рмосы̀ на и҃: и҆ мине́и на д҃. По г҃-й пѣ́сни, сѣда́ленъ мине́и. Конда́къ, и҆ є҆ѯапостїла́рїй пра́здника.

На хвали́техъ стїхи̑ры, на д҃, гла́съ а҃.

Воскре́сна:

Бг҃олѣ́пное твоѐ снизхожде́нїе сла́вѧще, пое́мъ тѧ̀ хрⷭ҇тѐ, роди́лсѧ є҆сѝ ѿ дв҃ы, и҆ неразлꙋче́нъ бы́лъ є҆сѝ ѿ ѻ҆ц҃а̀, пострада́лъ є҆сѝ ꙗ҆́кѡ человѣ́къ, и҆ во́лею претерпѣ́лъ є҆сѝ кре́стъ, воскре́слъ є҆сѝ ѿ гро́ба, ꙗ҆́кѡ ѿ черто́га произше́дъ, да спасе́ши мі́ръ, гдⷭ҇и сла́ва тебѣ̀. [Два́жды.] <<н҃г ѡ҆б.: 106>>

Петра̀ и҆ па́ѵла, согла́снѡ восхва́лимъ, лꙋкꙋ̀, матѳе́а, ма́рка, і҆ѡа́нна, а҆ндре́а, ѳѡмꙋ̀, варѳоломе́а, сі́мѡна канані́та, і҆а́кѡва, фїлі́ппа: и҆ всѐ собра́нїе ᲂу҆ченикѡ́въ досто́йнѡ да благопохва́лимъ.

Мꙋ́чениченъ: Ра́дꙋйтесѧ мꙋ́ченицы ѡ҆ гдⷭ҇ѣ, ꙗ҆́кѡ по́двигомъ до́брымъ подвиза́стесѧ, сопроти́вистесѧ царє́мъ, и҆ мꙋчи́тели побѣди́сте, ѻ҆гнѧ̀ и҆ меча̀ не ᲂу҆боѧ́стесѧ, ѕвѣрє́мъ ди́вїимъ снѣда́ющымъ тѣлеса̀ ва̑ша, хрⷭ҇тꙋ̀ со а҆́гг҃лы пѣ́нїе возсыла́юще, ꙗ҆̀же ѿ нб҃съ вѣнцы̀ прїѧ́сте, проси́те ми́ръ мі́рови дарова́ти, и҆ дꙋша́мъ на́шымъ ве́лїю млⷭ҇ть.

Сла́ва, и҆ ны́нѣ: гла́съ д҃:

Ѽ пресла́внагѡ чꙋдесѐ! і҆ѡа́ннъ на пе́рси сло́ва возлежѐ, ѳѡма́ же ре́бра ѡ҆сѧза́ти сподо́бисѧ. но ѻ҆́въ ᲂу҆́бѡ ѿѻнꙋ́дꙋ стра́шнѡ, бг҃осло́вїѧ глꙋбо́кое и҆звлечѐ смотре́нїе: ѻ҆́въ же сподо́бисѧ тайноꙋчи́ти на́съ, представлѧ́етъ показа́нїе ꙗ҆́снѡ воста́нїѧ є҆гѡ̀, вопїѧ̀: гдⷭ҇ь мо́й и҆ бг҃ъ мо́й, сла́ва тебѣ̀.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳовъ:

Печа́ль страсте́й, и҆ помышле́нїй бꙋ́рѧ, дале́че да ѿжене́тсѧ, и҆ та́кѡ процвѣте́тъ весна̀ вѣ́ры.

Сті́хъ: Во всю̀ зе́млю и҆зы́де вѣща́нїе и҆́хъ:

Ꙗ҆ви́лсѧ є҆сѝ сп҃се, сщ҃є́ннымъ твои́мъ а҆пⷭ҇лѡмъ, две́ремъ заключє́ннымъ, тѣ́ми ѡ҆бновлѧ́ѧ на́мъ бж҃е́ственный дх҃ъ дне́сь.

Сті́хъ: Нб҃са̀ повѣ́даютъ сла́вꙋ бж҃їю: <<н҃д: 107>>

Ны́нѣ тѧ̀ всецр҃ю̀, ви́дѣвше не ѻ҆чи́ма, но серде́чною любо́вїю, бг҃а вѣ́ровавше пѣ́сньми велича́емъ.

Сла́ва, и҆ ны́нѣ, гла́съ ѕ҃:

По дне́хъ ѻ҆сми́хъ воста́нїѧ твоегѡ̀, і҆и҃се цр҃ю̀, є҆диноро́дный сло́ве ѻ҆́ч҃їй, ꙗ҆ви́лсѧ є҆сѝ ᲂу҆ч҃нкѡ́мъ твои̑мъ, заключє́ннымъ две́ремъ, ми́ръ тво́й подаѧ̀. и҆ невѣ́рꙋющемꙋ ᲂу҆ченикꙋ̀ зна́мєнїѧ показа́лъ є҆сѝ: прїидѝ, и҆ ѡ҆сѧжѝ рꙋ́цѣ и҆ но́зѣ, и҆ нетлѣ̑ннаѧ моѧ̑ ре́бра. ѻ҆́нъ же вѣ́ровавъ, вопїѧ́ше тебѣ̀: гдⷭ҇ь мо́й и҆ бг҃ъ мо́й, сла́ва тебѣ̀.

Ча́съ а҃-й. И҆ ѿпꙋ́стъ.

Въ четверто́къ вторы́ѧ седми́цы ве́чера,

на Гдⷭ҇и воззва́хъ: поста́вимъ стїхѡ́въ ѕ҃. И҆ пое́мъ стїхи̑ры подо́бны, гла́съ а҃.

Подо́бенъ: Нбⷭ҇ныхъ чинѡ́въ:

Пра́вды ѻ҆де́ждею ѡ҆бложе́ни бѣ́лою па́че снѣ́га, въ настоѧ́щїй па́схи де́нь возвесели́мсѧ, во́ньже хрⷭ҇то́съ ꙗ҆́кѡ пра́вды сл҃нце, ѿ ме́ртвыхъ возсїѧ́въ, всѣ́хъ на́съ нетлѣ́нїемъ ᲂу҆ѧснѝ.

Цр҃ь и҆ гдⷭ҇ь, пра́здникѡвъ пра́здникъ ны́нѣшнїй є҆́сть де́нь, є҆го́же вои́стиннꙋ сотворѝ гдⷭ҇ь: во́нь, ꙗ҆́коже пое́тъ дв҃дъ, та́инственнѡ возвесели́мсѧ лю́дїе, две́ремъ бо заключє́ннымъ, ᲂу҆ченикѡ́мъ ми́ръ дарова̀.

Ѳѡмино̀ невѣ́рїе, мїроспаси́тельное бг҃очеловѣ́ка сло́ва, є҆́же ѿ а҆́довы темни́цы воста́нїе ᲂу҆вѣрѧ́етъ, ꙗ҆́звы рꙋ́къ <<н҃д ѡ҆б.: 108>> и҆ но́гъ де́рзостнѣе ѡ҆сѧза́вшее, ко ᲂу҆вѣре́нїю мїрско́мꙋ, десни́цею любопы́тною.

И҆ мине́и, г҃. Сла́ва, и҆ ны́нѣ: гла́съ в҃:

Две́ремъ заключє́ннымъ, предста́въ і҆и҃съ ᲂу҆ченикѡ́мъ, безстра́шїе и҆ ми́ръ даѧ́ше. та́же глаго́летъ ѳѡмѣ̀: почто̀ мѝ не вѣ́рꙋеши, ꙗ҆́кѡ воскресо́хъ и҆з̾ ме́ртвыхъ; принесѝ сѣ́мѡ рꙋ́кꙋ твою̀, и҆ вложѝ въ ре́бра моѧ̑, и҆ ви́ждь: тебѣ́ бо невѣ́рꙋющꙋ, всѝ навыко́ша стра́сти и҆ воскресе́нїе моѐ зва́ти съ тобо́ю: гдⷭ҇ь мо́й и҆ бг҃ъ мо́й, сла́ва тебѣ̀.

Свѣ́те ти́хїй: На стїхо́внѣ стїхи̑ры, гла́съ а҃.

Крⷭ҇тнаѧ: Неразрꙋши́маѧ стѣна̀ на́мъ є҆́сть честны́й крⷭ҇тъ сп҃совъ: на́нь бо надѣ́ющесѧ, спаса́емсѧ, всѝ.

Сті́хъ: Къ тебѣ̀ возведо́хъ ѻ҆́чи моѝ:

Воскре́сна: Вечє́рнїѧ на́шѧ моли̑твы прїимѝ ст҃ы́й гдⷭ҇и, и҆ пода́ждь на́мъ ѡ҆ставле́нїе грѣхѡ́въ, ꙗ҆́кѡ є҆ди́нъ є҆сѝ ꙗ҆вле́й въ мі́рѣ воскрⷭ҇нїе.

Сті́хъ: Поми́лꙋй на́съ гдⷭ҇и, поми́лꙋй на́съ:

Мꙋ́чениченъ: Моли́твами гдⷭ҇и всѣ́хъ ст҃ы́хъ и҆ бцⷣы, тво́й ми́ръ да́ждь на́мъ, и҆ поми́лꙋй на́съ, ꙗ҆́кѡ є҆ди́нъ ще́дръ.

Сла́ва и҆ ны́нѣ: гла́съ и҃:

Прикосни́сѧ ѳѡмо̀ ребрꙋ̀ рꙋко́ю, глаго́летъ хрⷭ҇то́съ, и҆ ѻ҆́бразы гвозде́й прїидѝ ѡ҆сѧжѝ, вѣ́рою и҆спыта́й, и҆ бꙋ́ди мѝ вѣ́ренъ, и҆ не бꙋ́ди невѣ́ренъ. ѳѡма́ же пе́рстомъ ꙗ҆́кѡ прикоснꙋ́сѧ влⷣцѣ, вельмѝ возопѝ: ты̀ мо́й бг҃ъ и҆ гдⷭ҇ь, бл҃гоꙋтро́бне, сла́ва тебѣ̀.

Та́же, Ны́нѣ ѿпꙋща́еши: И҆ про́чее ѻ҆бы́чно, ꙗ҆́коже пред̾ꙋказа́сѧ. <<н҃є: 109>>

Въ пѧто́къ вторы́ѧ седми́цы на ᲂу҆́трени,

на Бг҃ъ гдⷭ҇ь, тропа́рь пра́здника, три́жды. По а҃-мъ стїхосло́вїи сѣда́ленъ, гла́съ а҃. Подо́бенъ: Ка́мени запеча́танꙋ:

Крⷭ҇та̀ твоегѡ̀ дре́вꙋ покланѧ́емсѧ чл҃вѣколю́бче, ꙗ҆́кѡ на не́мъ пригвозди́лсѧ є҆сѝ животѐ всѣ́хъ. ра́й ѿве́рзлъ є҆сѝ сп҃се, вѣ́рою прише́дшемꙋ къ тебѣ̀ разбо́йникꙋ, и҆ сла́дости сподо́бисѧ, и҆сповѣ́даѧ тѧ̀: помѧни́ мѧ гдⷭ҇и. прїимѝ ꙗ҆́коже ѻ҆́наго, и҆ на́съ зовꙋ́щихъ: согрѣши́хомъ всѝ, бл҃гоꙋтро́бїемъ твои́мъ не пре́зри на́съ.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.

Воскре́сна: Гро́бъ тво́й, сп҃се, во́ини стрегꙋ́щїи, ме́ртви ѿ ѡ҆блиста́нїѧ ꙗ҆́вльшагѡсѧ а҆́гг҃ла бы́ша, проповѣ́дающагѡ жена́мъ воскрⷭ҇нїе. тебѐ сла́вимъ тлѝ потреби́телѧ, тебѣ̀ припа́даемъ воскре́сшемꙋ и҆з̾ гро́ба, и҆ є҆ди́номꙋ бг҃ꙋ на́шемꙋ.

Сті́хъ: Ди́венъ бг҃ъ во ст҃ы́хъ свои́хъ бг҃ъ і҆и҃левъ.

Мꙋ́чениченъ: Страда́нїѧ похвало́ю, и҆ вѣне́чною по́честїю, сла́внїи страстоте́рпцы ѡ҆дѣ́ѧшасѧ тобо́ю гдⷭ҇и. терпѣ́нїемъ бо ра́нъ беззако́нныхъ побѣди́ша, си́лою же бж҃їею ѿ нб҃съ побѣ́дꙋ прїѧ́ша. тѣ́хъ моли́твами, хрⷭ҇тѐ бж҃е, да́рꙋй на́мъ ве́лїю твою̀ ми́лость.

Сла́ва, и҆ ны́нѣ: крⷭ҇тобг҃оро́диченъ. Подо́бенъ: Гро́бъ тво́й:

Нескве́рнаѧ а҆́гница, а҆́гнца и҆ па́стырѧ ви́сима ме́ртва на дре́вѣ ви́дѧщи, рыда́ющи вѣща́ше, мт҃рски крича́щи: ка́кѡ претерплю̀ твоѐ є҆́же па́че сло́ва, сн҃е мо́й, снизхожде́нїе, и҆ вѡ́льнаѧ страда̑нїѧ, бж҃е пребл҃гі́й; <<н҃є ѡ҆б.: 110>>

По в҃-мъ стїхосло́вїи сѣда́ленъ, гла́съ а҃. Подо́бенъ: Гро́бъ тво́й:

Бл҃же́нъ є҆сѝ ты̀, ꙗ҆́звы ѡ҆сѧза́вый лꙋ́чшагѡ ребра̀: сїѐ велича́йшее чꙋ́до а҆да́ма и҆сцѣли́вшее, и҆ на́мъ вѣ́ровавшымъ неги́блемое блаже́нство и҆схода́таившее, самѣ́ми рече́ньми чⷭ҇тны́хъ а҆пⷭ҇лѡвъ, є҆гѡ̀ воскресе́нїе.

Сла́ва, и҆ ны́нѣ: то́йже.

Та́же, Воскресе́нїе хрⷭ҇то́во ви́дѣвше: Ѱало́мъ н҃.

Канѡ́нъ пра́здника, со і҆рмосы̀, на и҃: и҆ мине́и, на д҃. По г҃-й пѣ́сни, сѣда́ленъ мине́и. Конда́къ и҆ є҆ѯапостїла́рїй пра́здника.

На хвали́техъ стїхи̑ры на д҃, гла́съ а҃.

Кре́стнаѧ: Крⷭ҇то́мъ твои́мъ хрⷭ҇тѐ, є҆ди́но ста́до бы́сть а҆́гг҃лъ и҆ человѣ̑къ, и҆ є҆ди́на цр҃ковь, нб҃о и҆ землѧ̀ весели́тсѧ, гдⷭ҇и сла́ва тебѣ̀. [Два́жды.]

Воскре́сна: Пое́мъ твою̀, хрⷭ҇тѐ, сп҃си́тельнꙋю стра́сть, и҆ сла́вимъ твоѐ воскрⷭ҇нїе.

Мꙋ́чениченъ: Страстоте́рпцы хрⷭ҇тѡ́вы, прїиди́те лю́дїе всѝ почти́мъ пѣ́сньми и҆ пѣ́нїи дх҃о́вными, свѣти̑ла мі́ра, и҆ проповѣ́дники вѣ́ры, и҆сто́чникъ приснотекꙋ́щїй, и҆з̾ негѡ́же и҆стека́ютъ вѣ̑рнымъ и҆сцѣлє́нїѧ. тѣ́хъ моли́твами хрⷭ҇тѐ бж҃е на́шъ, ми́ръ да́рꙋй мі́рови, и҆ дꙋша́мъ на́шымъ ве́лїю ми́лость.

Сла́ва, и҆ ны́нѣ: гла́съ и҃. А҆нато́лїа:

Две́ремъ заключє́ннымъ, ᲂу҆ченикѡ́мъ собра̑ннымъ, предста̀ сп҃съ, и҆дѣ́же бѧ́хꙋ со́брани, и҆ ста́въ посредѣ̀ и҆̀хъ, глаго́летъ ѳѡмѣ̀: прїидѝ ѡ҆сѧжѝ, и҆ ви́ждь ѻ҆́бразы гвозде́й, прострѝ рꙋ́кꙋ твою̀, и҆ косни́сѧ ребрꙋ̀ моемꙋ̀, и҆ не бꙋ́ди невѣ́ренъ, но вѣ́рою проповѣ́ждь, є҆́же и҆з̾ ме́ртвыхъ моѐ воскресе́нїе. <<н҃ѕ: 111>>

На стїхо́внѣ стїхи̑ры пра́здника, гла́съ д҃.

Подо́бенъ: Ꙗ҆́кѡ до́блѧ:

Распе́нсѧ, ра́й человѣ́кѡмъ ѿве́рзлъ є҆сѝ, и҆ мє́ртвыѧ совоздви́глъ є҆сѝ животѐ на́шъ, и҆ воскре́слъ є҆сѝ, и҆ сме́рть плѣни́въ си́лою твое́ю, и҆ совокꙋпи́въ нбⷭ҇нымъ вои́стиннꙋ земна̑ѧ, и҆спо́лнилъ є҆сѝ весе́лїѧ безчи́сленнагѡ, бж҃їй сло́ве, ли́къ а҆пⷭ҇льскїй, си̑мъ ми́ръ вѣща́вый.

Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.

Тлѣ́нїе и҆спрове́ржесѧ, нетлѣ́нїе процвѣтѐ, сою́зъ вре́менный разрѣши́сѧ: нб҃са̀ да веселѧ́тсѧ, землѧ̀ и҆ подзє́мнаѧ: воскре́се бо хрⷭ҇то́съ, плѣни́сѧ сме́рть, весе́лый ꙗ҆ви́сѧ де́нь, заключє́ннымъ две́ремъ, внꙋ́трь вше́лъ є҆сѝ жизнода́вче и҆ гдⷭ҇и.

Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

Въ де́нь, є҆го́же сотворѝ гдⷭ҇ь дне́сь, возра́дꙋемсѧ веселѧ́щесѧ, жизнода́вецъ воста́лъ є҆́сть, а҆́дъ плѣне́нъ бы́сть, а҆пⷭ҇льскїй ли́къ ра́дость слы́шитъ: ѡ҆сѧза́лъ є҆́сть ре́бра влⷣчнѧ невѣ́ровавый ѳѡма̀, и҆ ѡ҆сѧза́въ, сꙋгꙋ́бое сꙋщество̀ проповѣ́да.

Сла́ва, и҆ ны́нѣ, гла́съ и҃:

Прикосни́сѧ ѳѡмо̀ ребрꙋ̀ рꙋко́ю, глаго́летъ хрⷭ҇то́съ, и҆ ѻ҆́бразы гвозде́й прїидѝ ѡ҆сѧжѝ, вѣ́рою и҆спытꙋ́й, и҆ бꙋ́ди мѝ вѣ́ренъ, и҆ не бꙋ́ди невѣ́ренъ. ѳѡма́ же пе́рстомъ ꙗ҆́кѡ прикоснꙋ́сѧ влⷣцѣ, вельмѝ возопѝ: ты̀ мо́й бг҃ъ и҆ гдⷭ҇ь, бл҃гоꙋтро́бне, сла́ва тебѣ̀.

Та́же, Бл҃го є҆́сть и҆сповѣ́датисѧ гдⷭ҇ви: Ча́съ а҃- й. И҆ ѿпꙋ́стъ. <<н҃ѕ ѡ҆б.: 112>>

Въ пѧто́къ вторы́ѧ седми́цы по па́сцѣ ве́чера,

ѻ҆бы́чнаѧ каѳі́сма.

На Гдⷭ҇и воззва́хъ: стїхи̑ры самогла́сны, гла́съ а҃:

Две́ремъ заключє́ннымъ, ᲂу҆ченикѡ́мъ собра̑ннымъ, вше́лъ є҆сѝ внеза́пꙋ всеси́льне і҆и҃се бж҃е на́шъ: и҆ ста́въ посредѣ̀ и҆̀хъ, ми́ръ да́въ, и҆спо́лнилъ є҆сѝ ст҃а́гѡ дх҃а: жда́ти же повелѣ́лъ є҆сѝ, и҆ ника́коже разлꙋча́тисѧ ѿ і҆ерꙋсали́ма, до́ндеже ѡ҆блекꙋ́тсѧ є҆́же съ высоты̀ си́лою. тѣ́мже вопїе́мъ тѝ: просвѣще́нїе, и҆ воскресе́нїе и҆ ми́ре на́шъ, сла́ва тебѣ̀.

По дне́хъ ѻ҆сми́хъ воста́нїѧ твоегѡ̀ гдⷭ҇и, ꙗ҆ви́лсѧ є҆сѝ ᲂу҆ченикѡ́мъ твои́мъ на мѣ́стѣ, и҆дѣ́же бѧ́хꙋ со́брани, и҆ возгласи́въ и҆̀мъ: ми́ръ ва́мъ, невѣ́рꙋющемꙋ ᲂу҆ченикꙋ̀ рꙋ́цѣ показа́лъ є҆сѝ, и҆ пречи́стое ребро̀. ѻ҆́нъ же вѣ́ровавъ вопїѧ́ше тебѣ̀: гдⷭ҇ь мо́й и҆ бг҃ъ мо́й, сла́ва тебѣ̀.

Ѳѡма̀ глаго́лемый близне́цъ, не бѣ̀ съ ни́ми, є҆гда̀ вше́лъ є҆сѝ хрⷭ҇тѐ заключє́ннымъ две́ремъ. тѣ́мже и҆ не вѣ́роваше речє́ннымъ є҆мꙋ̀, ѿ невѣ́рїѧ въ вѣ́рꙋ и҆звѣствꙋ́ѧ: не несподо́билъ же є҆сѝ бл҃же, показа́ти є҆мꙋ̀ пречи́стое ребро̀ твоѐ, и҆ рꙋкꙋ̀ и҆ ногꙋ̀ ꙗ҆́звы. ѻ҆́нъ же ѡ҆сѧза́въ и҆ ви́дѣвъ, и҆сповѣ́да тебѐ бы́ти бг҃а не на́га, и҆ человѣ́ка не про́ста, и҆ вопїѧ́ше: гдⷭ҇ь мо́й и҆ бг҃ъ мо́й, сла́ва тебѣ̀.

Та́же мине́и, г҃. Сла́ва: гла́съ ѕ҃:

Две́ремъ заключє́ннымъ, прише́лъ є҆сѝ хрⷭ҇тѐ ко ᲂу҆ченикѡ́мъ, тогда̀ ѳѡма̀ смотри́тельнѡ не ѡ҆брѣ́тесѧ съ <<н҃з: 113>> ни́ми. глаго́лаше бо: не и҆мꙋ̀ вѣ́ры, а҆́ще не ᲂу҆ви́ждꙋ и҆ а҆́зъ влⷣки. ᲂу҆ви́ждꙋ ребро̀, ѿѻнꙋ́дꙋже и҆зы́де кро́вь, вода̀, креще́нїе: ᲂу҆ви́ждꙋ ꙗ҆́звꙋ, ѿ неѧ́же и҆сцѣлѣ̀ вели́кїй стрꙋ́пъ человѣ́ческїй: ᲂу҆ви́ждꙋ, ка́кѡ не бѣ̀ ꙗ҆́коже дꙋ́хъ, но пло́ть и҆ кѡ́сти. сме́рть попра́вый, и҆ ѳѡмꙋ̀ ᲂу҆вѣ́ривый, гдⷭ҇и сла́ва тебѣ̀.

И҆ ны́нѣ: бг҃оро́диченъ, гла́съ а҃:

Всемі́рнꙋю сла́вꙋ ѿ человѣ̑къ прозѧ́бшꙋю, и҆ влⷣкꙋ ро́ждшꙋю, нбⷭ҇нꙋю две́рь воспои́мъ марі́ю дв҃ꙋ, безпло́тныхъ пѣ́снь и҆ вѣ́рныхъ ᲂу҆добре́нїе. сїѧ́ бо ꙗ҆ви́сѧ нб҃о, и҆ хра́мъ бж҃ества̀: сїѧ̀ прегражде́нїе вражды̀ разрꙋши́вши, ми́ръ введѐ, и҆ црⷭ҇твїе ѿве́рзе. сїю̀ ᲂу҆́бѡ и҆мꙋ́ще вѣ́ры ᲂу҆твержде́нїе, побо́рника и҆́мамы и҆з̾ неѧ̀ ро́ждшагосѧ гдⷭ҇а. дерза́йте ᲂу҆̀бо, дерза́йте лю́дїе бж҃їи, и҆́бо то́й побѣди́тъ врагѝ ꙗ҆́кѡ всеси́ленъ.

Свѣ́те ти́хїй: Прокі́менъ днѐ.

На стїхо́внѣ стїхи̑ры воскре́сныѧ, гла́съ а҃:

Вечє́рнїѧ на́шѧ мл҃твы, прїимѝ ст҃ы́й гдⷭ҇и, и҆ пода́ждь на́мъ ѡ҆ставле́нїе грѣхѡ́въ, ꙗ҆́кѡ є҆ди́нъ є҆сѝ ꙗ҆вле́й въ мі́рѣ воскрⷭ҇нїе.

Сті́хъ: Гдⷭ҇ь воцари́сѧ, въ лѣ́потꙋ ѡ҆блече́сѧ.

Ѡ҆быди́те лю́дїе сїѡ́нъ, и҆ ѡ҆б̾ими́те є҆го̀, и҆ дади́те сла́вꙋ въ не́мъ, воскре́сшемꙋ и҆з̾ ме́ртвыхъ: ꙗ҆́кѡ то́й є҆́сть бг҃ъ на́шъ, и҆збавле́й на́съ ѿ беззако́нїй на́шихъ.

Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.

Прїиди́те лю́дїе воспои́мъ, и҆ поклони́мсѧ хрⷭ҇тꙋ̀, сла́вѧще є҆гѡ̀ и҆з̾ ме́ртвыхъ воскресе́нїе, ꙗ҆́кѡ то́й є҆́сть бг҃ъ на́шъ, ѿ пре́лести вра́жїѧ мі́ръ и҆збавле́й. <<н҃з ѡ҆б.: 114>>

Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.

Стра́стїю твое́ю хрⷭ҇тѐ, ѿ страсте́й свободи́хомсѧ, и҆ воскрⷭ҇нїемъ твои́мъ и҆з̾ и҆стлѣ́нїѧ и҆зба́вихомсѧ, гдⷭ҇и сла́ва тебѣ̀.

Сла́ва, и҆ ны́нѣ: гла́съ є҃:

Чл҃вѣколю́бче, ве́лїе и҆ безприкла́дное мно́жество щедро́тъ твои́хъ, ꙗ҆́кѡ долготерпѣ́лъ є҆сѝ, ѿ і҆ꙋдє́й заꙋша́емь, ѿ а҆пⷭ҇ла ѡ҆сѧза́емь, и҆ ѿ ѿмета́ющихсѧ тебѐ многоиспытꙋ́емь. ка́кѡ воплоти́лсѧ є҆сѝ: ка́кѡ распѧ́лсѧ є҆сѝ безгрѣ́шне; но вразꙋмѝ на́съ, ꙗ҆́кѡ ѳѡмꙋ̀, вопи́ти тебѣ̀: гдⷭ҇ь мо́й, и҆ бг҃ъ мо́й, сла́ва тебѣ̀.

Та́же: Ны́нѣ ѿпꙋща́еши: Тропа́рь: Запеча́танꙋ гро́бꙋ:

Є҆ктенїа̀, и҆ ѿпꙋ́стъ.

[зрѝ] И҆звѣ́стно же бꙋ́ди, ꙗ҆́кѡ канѡ́ны ѡ҆ ᲂу҆со́пшихъ ѻ҆ктѡ́иха настоѧ́щагѡ гла́са, по всѧ̀ сꙋббѡ́ты въ пѧтдесѧ́тницѣ до́лжни сꙋ́ть пѣ́тисѧ, въ пѧтка́хъ ве́чера, на повече́рїахъ.

Въ сꙋббѡ́тꙋ в҃-ѧ седми́цы по па́сцѣ на ᲂу҆́трени

на Бг҃ъ гдⷭ҇ь: тропа́рь пра́здника, три́жды.

По а҃-мъ стїхосло́вїи сѣда́ленъ, гла́съ а҃:

Гро́бъ тво́й сп҃се во́ини стрегꙋ́щїи, ме́ртви ѿ ѡ҆блиста́нїѧ ꙗ҆́вльшагѡсѧ а҆́гг҃ла бы́ша, проповѣ́дающагѡ жена́мъ воскрⷭ҇нїе. тебѐ сла́вимъ тлѝ потреби́телѧ, тебѣ̀ припа́даемъ воскрⷭ҇шемꙋ и҆з̾ гро́ба, и҆ є҆ди́номꙋ бг҃ꙋ на́шемꙋ.

Гла́съ то́йже. Подо́бенъ: Ка́мени запеча́танꙋ:

Жєны̀ ко гро́бꙋ прїидо́ша ᲂу҆ра́ншыѧ, и҆ а҆́гг҃льское <<н҃и: 115>> ꙗ҆вле́нїе ви́дѣвшыѧ трепета́хꙋ: гро́бъ ѡ҆блиста̀ жи́знь, чꙋ́до ᲂу҆дивлѧ́ше ѧ҆̀. сегѡ̀ ра́ди ше́дшыѧ ᲂу҆ченикѡ́мъ проповѣ́дахꙋ воста́нїе: а҆́да плѣнѝ хрⷭ҇то́съ, ꙗ҆́кѡ є҆ди́нъ крѣ́покъ и҆ си́ленъ, и҆ и҆стлѣ́вшыѧ совоздви́же всѧ̑, ѡ҆сꙋжде́нїѧ стра́хъ разрꙋши́въ си́лою крⷭ҇та̀.

Сла́ва, и҆ ны́нѣ: бг҃оро́диченъ:

Гаврїи́лꙋ вѣща́вшꙋ тебѣ̀ дв҃о, ра́дꙋйсѧ, со гла́сомъ воплоща́шесѧ всѣ́хъ влⷣка въ тебѣ̀ ст҃ѣ́мъ кївѡ́тѣ, ꙗ҆́коже речѐ пра́ведный дв҃дъ: ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀. сла́ва все́льшемꙋсѧ въ тѧ̀, сла́ва проше́дшемꙋ и҆з̾ тебѐ, сла́ва свободи́вшемꙋ на́съ ржⷭ҇тво́мъ твои́мъ.

По в҃-мъ стїхосло́вїи сѣда́ленъ, гла́съ а҃.

Подо́бенъ: Ка́мени запеча́танꙋ:

Стра́ха ра́ди і҆ꙋде́йска, сокровє́ннымъ ᲂу҆ч҃нкѡ́мъ, и҆ въ сїѡ́нѣ сѡ́браннымъ, вше́лъ є҆сѝ къ ни̑мъ бл҃же, и҆ ста́лъ є҆сѝ посредѣ̀ и҆̀хъ, две́ремъ заключє́ннымъ, радостотворѧ́й: и҆ показа́лъ є҆сѝ и҆̀мъ рꙋ́цѣ, и҆ пречⷭ҇тыхъ твои́хъ ре́бръ ꙗ҆́звы, глаго́лѧ невѣ́рꙋющемꙋ ᲂу҆ченикꙋ̀: принесѝ рꙋ́кꙋ твою̀ и҆ и҆спыта́й, ꙗ҆́кѡ са́мъ а҆́зъ є҆́смь, тебѐ ра́ди пострада́вый.

И҆ чте́нїе. Та́же: Воскресе́нїе хрⷭ҇то́во ви́дѣвше: Ѱало́мъ н҃.

Канѡ́нъ пра́здника, со і҆рмосы̀, на ѕ҃: и҆ ст҃а́гѡ, є҆гѡ́же є҆́сть хра́мъ, на д҃: и҆ мине́и, на д҃. По г҃-й пѣ́сни конда́къ, и҆ сѣда́ленъ мине́и. Сла́ва и҆ ны́нѣ: пра́здника. По ѕ҃-й пѣ́сни конда́къ пра́здникꙋ, и҆ і҆́косъ. По ѳ҃-й пѣ́сни є҆ѯапостїла́рїй пра́здникꙋ.

На хвали́техъ стїхи̑ры воскрє́сны, на д҃, гла́съ а҃:

Пое́мъ твою̀ хрⷭ҇тѐ спаси́тельнꙋю стра́сть, и҆ сла́вимъ твоѐ воскрⷭ҇нїе. <<н҃и ѡ҆б.: 116>>

Крⷭ҇тъ претерпѣ́вый, и҆ сме́рть ᲂу҆праздни́вый, и҆ воскресы́й и҆з̾ ме́ртвыхъ, ᲂу҆мирѝ на́шꙋ жи́знь гдⷭ҇и, ꙗ҆́кѡ є҆ди́нъ всеси́ленъ.

А҆́да плѣни́вый, и҆ человѣ́ка воскреси́вый воскрⷭ҇нїемъ твои́мъ хрⷭ҇тѐ, сподо́би ны̀ чⷭ҇тымъ срⷣцемъ тебѐ пѣ́ти и҆ сла́вити.

Бг҃олѣ́пное твоѐ снисхожде́нїе сла́вѧще, пое́мъ тѧ̀ хрⷭ҇тѐ: роди́лсѧ є҆сѝ ѿ дв҃ы, и҆ неразлꙋче́нъ бы́лъ є҆сѝ ѿ ѻ҆ц҃а̀: пострада́лъ є҆сѝ ꙗ҆́кѡ чл҃вѣ́къ, и҆ во́лею претерпѣ́лъ є҆сѝ крⷭ҇тъ. воскре́слъ є҆сѝ ѿ гро́ба, ꙗ҆́кѡ ѿ черто́га произше́дъ, да спасе́ши мі́ръ: гдⷭ҇и сла́ва тебѣ̀.

Сла́ва, и҆ ны́нѣ: гла́съ ѕ҃:

По дне́хъ ѻ҆сми́хъ воста́нїѧ твоегѡ̀, і҆и҃се цр҃ю̀, є҆диноро́дный сло́ве ѻ҆́ч҃їй, ꙗ҆ви́лсѧ є҆сѝ ᲂу҆ч҃нкѡ́мъ твои̑мъ, заключє́ннымъ две́ремъ, ми́ръ тво́й подаѧ̀, и҆ невѣ́рꙋющемꙋ ᲂу҆ченикꙋ̀ зна́мєнїѧ показа́лъ є҆сѝ: прїидѝ, ѡ҆сѧжѝ рꙋ́цѣ и҆ но́зѣ, и҆ нетлѣ̑нныѧ моѧ̑ ре́бра. ѻ҆́нъ же вѣ́ровавъ, вопїѧ́ше тебѣ̀: гдⷭ҇ь мо́й, и҆ бг҃ъ мо́й, сла́ва тебѣ̀.

На стїхо́внѣ стїхи̑ры пра́здникꙋ, гла́съ а҃.

Подо́бенъ: Прехва́льнїи мꙋ́чєницы:

По є҆́же и҆з̾ гро́ба твое́мъ стра́шномъ жизнода́вче воста́нїи, ꙗ҆́коже печа́тей не разрꙋши́лъ є҆сѝ хрⷭ҇тѐ гро́бныхъ, та́кѡ заключє́ннымъ две́ремъ, вше́лъ є҆сѝ къ пресла̑внымъ а҆пⷭ҇лѡмъ твои̑мъ, радостотворѧ̀ и҆̀мъ, и҆ пра́вый тво́й дх҃ъ подаѧ̀ и҆̀мъ, за безмѣ́рнꙋю твою̀ ми́лость.

Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.

Ѳѡма̀ и҆́же и҆ близне́цъ не бѣ̀ прише́лъ, є҆гда̀ ты̀ <<н҃ѳ: 117>> ᲂу҆ч҃нкѡ́мъ ꙗ҆ви́лсѧ є҆сѝ гдⷭ҇и: тѣ́мже не вѣ́рова твоемꙋ̀ воскресе́нїю, и҆ ви́дѣвшымъ тѧ̀ вопїѧ́ше: а҆́ще не вложꙋ̀ пе́рста въ ре́бра є҆гѡ̀ и҆ гвозде́й ꙗ҆́звы, не вѣ́рꙋю, ꙗ҆́кѡ воста́лъ є҆́сть.

Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

Ꙗ҆́коже хо́щеши ѡ҆сѧжѝ, хрⷭ҇то́съ ѳѡмѣ̀ вопїѧ́ше, вложѝ рꙋ́кꙋ, и҆ позна́й мѧ̀ кѡ́сти и҆мꙋ́ща, и҆ земно́е тѣ́ло, и҆ не бꙋ́ди невѣ́ренъ, ра́внѡ же со и҆ны́ми ᲂу҆вѣ́рисѧ. ѻ҆́нъ же возопѝ: бг҃ъ мо́й и҆ гдⷭ҇ь ты̀ є҆сѝ, сла́ва воста́нїю твоемꙋ̀.

Сла́ва, и҆ ны́нѣ: гла́съ то́йже:

Оу҆ченикѡ́мъ сомнѧ́щымсѧ, во ѻ҆смы́й де́нь предста̀ сп҃съ, и҆дѣ́же бѧ́хꙋ со́брани, и҆ ми́ръ да́въ, ѳѡмѣ̀ возопѝ: прїидѝ а҆пⷭ҇ле, ѡ҆сѧжѝ дла̑ни, въ ни́хже гвѡ́здїѧ вонзо́ша. ѽ до́брое невѣ́рїе ѳѡмино̀, вѣ́рныхъ сердца̀ въ позна́нїе приведѐ! и҆ со стра́хомъ возопѝ: гдⷭ҇ь мо́й и҆ бг҃ъ мо́й, сла́ва тебѣ̀.

И҆ про́чее ᲂу҆́трени. Тропа́рь: Запеча́танꙋ гро́бꙋ: Є҆ктенїа̀, и҆ ча́съ пе́рвый, и҆ ѿпꙋ́стъ, и҆ ѻ҆бы́чнаѧ лїті́а въ притво́рѣ.

На лїтꙋргі́и и҆з̾ѡбрази́тєльнаѧ, и҆ ѿ канѡ́на пра́здника, пѣ́снь ѳ҃, на ѕ҃. Прокі́менъ, гла́съ г҃: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀. Сті́хъ: Хвали́те гдⷭ҇а, ꙗ҆́кѡ бл҃гъ: А҆пⷭ҇лъ дѣѧ́нїй, зача́ло є҃і: Слы́шавше а҆пⷭ҇ли: А҆ллилꙋ́їа, гла́съ и҃: Прїиди́те возра́дꙋемсѧ гдⷭ҇ви: Сті́хъ: Похвалѝ і҆ерⷭ҇ли́ме гдⷭ҇а: Є҆ѵⷢ҇лїе і҆ѡа́нна, зача́ло ѳ҃і: Ви́дѣвше человѣ́цы зна́менїе: Прича́стенъ. Похвалѝ і҆ерⷭ҇ли́ме гдⷭ҇а: По семꙋ́ же воѡбраже́нїю пое́мъ по всѧ̑ сꙋббѡ̑ты до вознесе́нїѧ хрⷭ҇то́ва.