<<рн҃ѳ: 317>>

Недѣ́лѧ шеста́ѧ по па́сцѣ, ѡ҆ слѣпо́мъ.

Въ сꙋббѡ́тꙋ ве́чера на ма́лѣй вече́рни,

на Гдⷭ҇и воззва́хъ: стїхи̑ры воскре́сны, гла́съ є҃.

Честны́мъ твои́мъ крⷭ҇то́мъ хрⷭ҇тѐ: Воскресе́нїе даѧ́й ро́дꙋ чл҃вѣ́ческомꙋ: Ве́лїе чꙋ́до, неви́димыхъ содѣ́тель: Вече́рнее поклоне́нїе прино́симъ тебѣ̀: Сла́ва, гла́съ є҃: Гдⷭ҇и, мимоходѧ̀ пꙋте́мъ: [Всѧ̑ сїѧ̑ зрѝ на вели́цѣй вече́рни.]

И҆ ны́нѣ: бг҃оро́диченъ настоѧ́щїй, догма́тїкъ, гла́съ є҃:

Бг҃олѣ́пнꙋю и҆ пречестнꙋ́ю ѻ҆трокови́цꙋ почти́мъ, чⷭ҇тнѣ́йшꙋю херꙋві́мѡвъ: содѣ́тель бо всѣ́хъ вочеловѣ́читисѧ восхотѣ́вый, въ ню̀ всели́сѧ несказа́ннѡ. ѽ стра́нныхъ веще́й, и҆ пресла́вныхъ та́инствъ! кто́ бы не ᲂу҆диви́вилсѧ, сїѐ слы́шавъ, ꙗ҆́кѡ бг҃ъ человѣ́къ быва́етъ, и҆ премѣне́нїѧ въ не́мъ не бы́сть; и҆ дѣ́вства врата̀ ѿве́рзлъ, ᲂу҆мале́нїѧ въ не́й не ѡ҆ста́висѧ, ꙗ҆́коже проро́къ глаго́летъ: человѣ́къ сїѧ̑ не про́йдетъ когда̀, то́кмѡ є҆ди́нъ гдⷭ҇ь бг҃ъ і҆и҃левъ, и҆мѣ́ѧй ве́лїю ми́лость.

На стїхо́внѣ воскре́сна стїхи́ра. Та́же настоѧ́щыѧ стїхи̑ры подо́бны, прест҃ы́ѧ бцⷣы, гла́съ є҃.

Подо́бенъ: Ра́дꙋйсѧ по́стникѡмъ:

Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. <<рн҃ѳ ѡ҆б.: 318>>

Ра́дꙋйсѧ проро́кѡвъ печа́те, бг҃оглаго́ливыхъ а҆пⷭ҇лѡвъ проповѣ́данїе: бг҃а бо вои́стиннꙋ сꙋ́щаго, воплоще́на на́мъ па́че ᲂу҆ма̀ и҆ сло́ва, родила̀ є҆сѝ. и҆́мже дре́внее воспрїи́мше благоро́дїе, и҆ ра́йскїѧ сла́дости ᲂу҆лꙋчи́вше тебѐ вино́вницꙋ сицевы́ѧ свѣ́тлости пѣ́сньми почита́емъ: и҆ моли́твенницею благопрїѧ́тною тобо́ю всест҃а́ѧ богатѧ́щесѧ, присносꙋ́щнагѡ полꙋче́нїѧ жи́зни сн҃а твоегѡ̀, подаю́щагѡ бога́тнѡ ве́лїю ми́лость.

Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.

Ра́дꙋйсѧ слове́сное нб҃о, въ не́мже бг҃ъ воплоти́всѧ всели́сѧ, рꙋ́чко бж҃е́ственныѧ ма́нны, свѣ́щниче со́лнца, бж҃їѧ горо̀ прїѡсѣне́ннаѧ, черто́же бг҃овмѣсти́тельный, живопода́тельнаѧ трапе́зо, златы́й свѣти́льникъ, свѣтоно́сный раю̀, кꙋпино̀ неѡпали́маѧ, ковче́же ст҃ы́ни, лѣ́ствице нбⷭ҇наѧ, ѻ҆́блаче ѡ҆дꙋшевле́нный, же́зле ѿ ко́рене дв҃о і҆ессе́ова возра́стшаѧ: хрⷭ҇та̀ молѝ, дꙋша́мъ на́шымъ да́тисѧ ве́лїей ми́лости.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Ра́дꙋйсѧ сн҃а бж҃їѧ несказа́ннѡ заче́ншаѧ всенепоро́чнаѧ, и҆ сего̀ ро́ждшаѧ, пло́ть по на́мъ вои́стиннꙋ ѿ крове́й твои́хъ прїи́мшаго, дꙋ́шꙋ ᲂу҆́мнꙋю же и҆ самовла́стнꙋю и҆мꙋ́щаго, неѡскꙋ́днѡ же во а҆да́ма ѡ҆бле́кшагосѧ, ми́лости ра́ди и҆ бла́гости неизрече́нныѧ, ѿѻнꙋ́дꙋже во двою̀ є҆стествꙋ̀ на́мъ возвѣща́етсѧ, ѻ҆бо́ихъ показꙋ́ѧ въ себѣ̀ дѣ́йство, хрⷭ҇то́съ: є҆го́же молѝ, пою́щымъ тѧ̀ да́ти ве́лїю ми́лость.

Сла́ва: гла́съ и҃:

Пра́вды со́лнце мы́сленное хрⷭ҇тѐ бж҃е, и҆з̾ ᲂу҆тро́бы свѣ́та <<р҃ѯ: 319>>лише́ннагѡ, твои́мъ пречи́стымъ прикоснове́нїемъ просвѣти́вшее ѻ҆бою́дꙋ, и҆ на́шѧ ѻ҆́чи дꙋшє́вныѧ ѡ҆зари́вшее, сы́ны днѐ покажѝ, да вѣ́рою вопїе́мъ тѝ: мно́гое твоѐ и҆ неизрече́нное, є҆́же на на́съ благоꙋтро́бїе, человѣколю́бче, сла́ва тебѣ̀.

И҆ ны́нѣ: гла́съ є҃:

Хра́мъ и҆ две́рь є҆сѝ, пала́та и҆ престо́лъ цр҃е́въ, дв҃о всечестна́ѧ, є҆́юже и҆зба́витель мо́й, хрⷭ҇то́съ гдⷭ҇ь, во тмѣ̀ спѧ́щымъ ꙗ҆ви́сѧ, со́лнце сы́й пра́вды, просвѣти́ти хотѧ̀, ꙗ҆̀же созда̀ по ѻ҆́бразꙋ своемꙋ̀ рꙋко́ю свое́ю. тѣ́мже всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вшаѧ, непреста́ннѡ молѝ, спасти́сѧ дꙋша́мъ на́шымъ.

И҆ про́чее ѻ҆бы́чнѡ.

На вели́цѣй вече́рни,

поста́вимъ стїхѡ́въ і҃. И҆ пое́мъ стїхи̑ры воскре́сны г҃, ꙾восто́чны꙾[[а҆нато́лїевы]] д҃, и҆ два̀ самогла́сна ѡ҆ слѣпцѣ̀, повторѧ́юще є҆ди́нъ.

Стїхи̑ры воскре́сны, гла́съ є҃:

Чⷭ҇тны́мъ твои́мъ крⷭ҇то́мъ хрⷭ҇тѐ, дїа́вола посрами́лъ є҆сѝ, и҆ воскрⷭ҇нїемъ твои́мъ жа́ло грѣхо́вное притꙋпи́лъ є҆сѝ, и҆ сп҃слъ є҆сѝ ны̀ ѿ вра́тъ сме́ртныхъ: сла́вимъ тѧ̀ є҆диноро́дне.

Воскрⷭ҇нїе даѧ́й ро́дꙋ человѣ́ческомꙋ, ꙗ҆́кѡ ѻ҆вча̀ на заколе́нїе веде́сѧ: ᲂу҆страши́шасѧ сегѡ̀ кнѧ́зи а҆́дстїи, и҆ взѧ́шасѧ врата̀ плачє́внаѧ. вни́де бо цр҃ь сла́вы хрⷭ҇то́съ, глаго́лѧ сꙋ́щымъ во ᲂу҆́захъ, и҆зыди́те: и҆ сꙋ́щымъ во тьмѣ̀, ѿкры́йтесѧ. <<р҃ѯ ѡ҆б.: 320>>

Ве́лїе чꙋ́до, неви́димыхъ содѣ́тель, за чл҃вѣколю́бїе пло́тїю пострада́въ, воскре́се безсме́ртный, прїиди́те ѻ҆те́чєствїѧ ꙗ҆зы̑къ, томꙋ̀ поклони́мсѧ: бл҃гоꙋтро́бїемъ бо є҆гѡ̀ ѿ пре́лести и҆зба́вльшесѧ, въ трїе́хъ ѵ҆поста́сѣхъ є҆ди́наго бг҃а пѣ́ти навыко́хомъ.

И҆́ны стїхи̑ры а҆нато́лїевы, гла́съ то́йже:

Вече́рнее поклоне́нїе прино́симъ тебѣ̀ невече́рнемꙋ свѣ́тꙋ, на коне́цъ вѣкѡ́въ, ꙗ҆́кѡ въ зерца́лѣ пло́тїю возсїѧ́вшемꙋ мі́рови, и҆ да́же до а҆́да низше́дшемꙋ, и҆ та́мѡ сꙋ́щꙋю тьмꙋ̀ разрꙋши́вшемꙋ, и҆ свѣ́тъ воскрⷭ҇нїѧ ꙗ҆зы́кѡмъ показа́вшемꙋ: свѣтода́вче гдⷭ҇и сла́ва тебѣ̀.

Нача́льника сп҃се́нїѧ на́шегѡ, хрⷭ҇та̀ славосло́вимъ: томꙋ́ бо и҆з̾ ме́ртвыхъ воскрⷭ҇шꙋ, мі́ръ ѿ пре́лести сп҃се́нъ бы́сть. ра́дꙋетсѧ ли́къ а҆́гг҃льскїй, бѣ́гаетъ де́монѡвъ пре́лесть, а҆да́мъ пады́й воста̀, дїа́волъ ᲂу҆праздни́сѧ.

И҆̀же ѿ кꙋстѡді́и наꙋче́ни быва́хꙋ ѿ беззакѡ́нникъ, покры́йте хрⷭ҇то́во воста́нїе, и҆ прїими́те сре́бреники, и҆ рцы́те ꙗ҆́кѡ на́мъ спѧ́щымъ, и҆з̾ гро́ба ᲂу҆кра́денъ бы́сть ме́ртвый. кто̀ ви́дѣ, кто̀ слы́ша, мертвеца̀ ᲂу҆кра́дена когда̀, па́че же пома́зана и҆ на́га, ѡ҆ста́вльша и҆ во гро́бѣ погреба̑льнаѧ своѧ̑; не прельща́йтесѧ і҆ꙋде́е, навы́кните рече́нїемъ прⷪ҇ро́ческимъ, и҆ ᲂу҆разꙋмѣ́йте, ꙗ҆́кѡ то́й є҆́сть вои́стиннꙋ и҆зба́витель мі́ра, и҆ всеси́льный.

Гдⷭ҇и, а҆́дъ плѣни́вый, и҆ сме́рть попра́вый сп҃се на́шъ, просвѣти́вый мі́ръ крⷭ҇то́мъ чⷭ҇тны́мъ, поми́лꙋй на́съ.

И҆́ны стїхи̑ры самогла́сны, ѡ҆ слѣпо́мъ. Гла́съ в҃:

Слѣпы́й роди́выйсѧ, въ свое́мъ по́мыслѣ глаго́лаше: є҆да̀ а҆́зъ грѣ̑хъ ра́ди роди́тельныхъ роди́хсѧ без̾ ѻ҆́чїю; <<рѯ҃а: 321>> є҆да̀ а҆́зъ за невѣ́рїе ꙗ҆зы́кѡвъ роди́хсѧ во ѡ҆бличе́нїе; не домышлѧ́юсѧ вопроша́ти, когда̀ но́щь, когда̀ де́нь; не терпи́та мѝ но́зѣ ка́меннагѡ претыка́нїѧ, не ви́дѣхъ бо сл҃нца сїѧ́юща, нижѐ во ѻ҆́бразѣ менѐ созда́вшаго. но молю́ ти сѧ хрⷭ҇тѐ бж҃е, при́зри на мѧ̀ и҆ поми́лꙋй мѧ̀. [Два́жды.]

Мимоходѧ̀ і҆и҃съ ѿ свѧти́лища, ѡ҆брѣ́те человѣ́ка слѣ́па ѿ рожде́нїѧ, и҆ ᲂу҆милосе́рдивсѧ положѝ бре́нїе на ѻ҆́чїю є҆гѡ̀, и҆ речѐ къ немꙋ̀: и҆дѝ ᲂу҆мы́йсѧ въ сїлѡа́мѣ, и҆ ᲂу҆мы́всѧ прозрѣ̀, сла́вꙋ возсыла́ѧ бг҃ꙋ. сосѣ́ди же є҆гѡ̀ глаго́лахꙋ є҆мꙋ̀: кто̀ твоѝ зѣ́ницы ѿве́рзе, и҆̀хже никто́же ѿ зрѧ́щихъ и҆сцѣли́ти возмо́же; ѻ҆́нъ же возопи́въ, речѐ: человѣ́къ і҆и҃съ глаго́лемый, ѻ҆́нъ мѝ речѐ, ᲂу҆мы́йсѧ въ сїлѡа́мѣ, и҆ прозрѣ́хъ. то́й є҆́сть вои́стиннꙋ, є҆го́же речѐ мѡѷсе́й зако́нѣ, хрⷭ҇та̀ мессі́ю: то́й є҆́сть сп҃съ дꙋ́шъ на́шихъ.

Сла́ва, гла́съ є҃:

Гдⷭ҇и, мимоходѧ̀ пꙋте́мъ, ѡ҆брѣ́лъ є҆сѝ человѣ́ка слѣ́па ѿ рожде́нїѧ, и҆ ᲂу҆дивле́ни бы́вше ᲂу҆ченицы̀, вопроша́хꙋ тѧ̀ глаго́люще: ᲂу҆чи́телю, кто̀ согрѣшѝ: се́й ли, и҆лѝ роди́тели є҆гѡ̀, да слѣ́пъ роди́сѧ; ты́ же сп҃се мо́й возопи́лъ є҆сѝ къ ни́мъ: ни се́й согрѣшѝ, ни роди́тели є҆гѡ̀, но да ꙗ҆вѧ́тсѧ дѣла̀ бж҃їѧ на не́мъ. мнѣ̀ подоба́етъ дѣ́лати дѣла̀ посла́вшагѡ мѧ̀, ꙗ҆̀же никто́же мо́жетъ дѣ́лати. и҆ сїѧ̑ ре́къ, плю́нꙋвъ до́лꙋ, и҆ бре́нїе сотво́рь, пома́залъ є҆сѝ ѻ҆́чи є҆гѡ̀, ре́къ къ немꙋ̀: и҆дѝ, ᲂу҆мы́йсѧ въ сїлѡа́мстѣй кꙋпѣ́ли. ѻ҆́нъ же ᲂу҆мы́всѧ здра́въ бы́сть, и҆ вопїѧ́ше къ тебѣ̀: вѣ́рꙋю гдⷭ҇и, и҆ поклони́сѧ тебѣ̀. тѣ́мже вопїе́мъ и҆ мы̀, поми́лꙋй на́съ. <<рѯ҃а ѡ҆б.: 322>>

И҆ ны́нѣ: бг҃оро́диченъ:

Въ чермнѣ́мъ мо́ри, неискꙋсобра́чныѧ невѣ́сты ѡ҆́бразъ написа́сѧ и҆ногда̀: та́мѡ мѡѷсе́й, раздѣли́тель воды̀: здѣ́ же гаврїи́лъ, слꙋжи́тель чꙋдесѐ. тогда̀ глꙋбинꙋ̀ ше́ствова немо́креннѡ і҆и҃ль: ны́нѣ же хрⷭ҇та̀ родѝ безсѣ́меннѡ дв҃а. мо́ре по проше́ствїи і҆и҃левѣ, пребы́сть непрохо́дно: непоро́чнаѧ по ржⷭ҇твѣ̀ є҆мманꙋ́илевѣ, пребы́сть нетлѣ́нна. сы́й, и҆ пре́жде сы́й, ꙗ҆вле́йсѧ ꙗ҆́кѡ чл҃вѣ́къ, бж҃е поми́лꙋй на́съ.

Вхо́дъ. Прокі́менъ днѐ.

На лїті́и стїхи́ра хра́ма. Сла́ва, гла́съ д҃:

Всѐ житїѐ слѣпы́й но́щь помышлѧ́ѧ, возопѝ къ тебѣ̀: гдⷭ҇и, ѿве́рзи мѝ зѣ̑ницы, сн҃е дв҃довъ сп҃се на́шъ, да со всѣ́ми и҆ а҆́зъ воспою̀ твою̀ си́лꙋ.

И҆ ны́нѣ: бг҃оро́диченъ, гла́съ то́йже:

При́зри на молє́нїѧ твои́хъ ра̑бъ всенепоро́чнаѧ, ᲂу҆толѧ́ющи лю̑таѧ на ны̀ воста̑нїѧ, всѧ́кїѧ ско́рби на́съ и҆змѣнѧ́ющи: тѧ́ бо є҆ди́нꙋ тве́рдое и҆ и҆звѣ́стное ᲂу҆твержде́нїе и҆́мамы, и҆ твоѐ предста́тельство стѧжа́хомъ, да не постыди́мсѧ влⷣчце, тѧ̀ призыва́ющїи. потщи́сѧ на ᲂу҆моле́нїе тебѣ̀ вѣ́рнѡ вопїю́щихъ: ра́дꙋйсѧ влⷣчце, всѣ́хъ по́моще, ра́досте и҆ покро́ве, и҆ спасе́нїе дꙋ́шъ на́шихъ.

На стїхо́внѣ стїхи́ра воскре́сна, гла́съ є҃:

Тебѐ воплоще́ннаго сп҃са хрⷭ҇та̀, и҆ нб҃съ не разлꙋчи́вшасѧ, во гла́сѣхъ пѣ́нїй велича́емъ: ꙗ҆́кѡ крⷭ҇тъ и҆ сме́рть прїѧ́лъ є҆сѝ за ро́дъ на́шъ, ꙗ҆́кѡ чл҃вѣколю́бецъ гдⷭ҇ь, <<рѯ҃в: 323>> и҆спрове́ргїй а҆́дова врата̀, тридне́внѡ воскре́слъ є҆сѝ, сп҃са́ѧ дꙋ́шы на́шѧ.

Та́же, стїхи̑ры па́сцѣ, съ припѣ́вы и҆́хъ, и҆щѝ въ недѣ́лю па́схи на ᲂу҆́трени.

Сла́ва: гла́съ и҃:

Пра́вды сл҃нце мы́сленное хрⷭ҇тѐ бж҃е, и҆з̾ ᲂу҆тро́бы свѣ́та лише́ннаго, твои́мъ пречи́стымъ прикоснове́нїемъ просвѣти́вшее ѻ҆бою́дꙋ, и҆ на́ши ѻ҆́чи дꙋшє́вныѧ ѡ҆зари́вшее, сы́ны днѐ покажѝ, да вѣ́рою вопїе́мъ тѝ: мно́гое твоѐ и҆ неизрече́нное, є҆́же на на́съ бл҃гоꙋтро́бїе, человѣколю́бче, сла́ва тебѣ̀.

И҆ ны́нѣ: Воскрⷭ҇нїѧ де́нь: и҆ про́чее, ꙗ҆́коже предписа́сѧ въ мимоше́дшыѧ недѣ́ли.

Та́же ѿпꙋсти́тельный тропа́рь, гла́съ є҃:

Собезнача́льное сло́во ѻ҆ц҃ꙋ̀ и҆ дх҃ови, ѿ дв҃ы ро́ждшеесѧ на спасе́нїе на́ше, воспои́мъ вѣ́рнїи и҆ поклони́мсѧ, ꙗ҆́кѡ бл҃говолѝ пло́тїю взы́ти на крⷭ҇тъ, и҆ сме́рть претерпѣ́ти, и҆ воскреси́ти ᲂу҆ме́ршыѧ сла́внымъ воскресе́нїемъ свои́мъ.

Бг҃оро́диченъ:

Ра́дꙋйсѧ, две́ре гдⷭ҇нѧ непроходи́маѧ: ра́дꙋйсѧ, стѣно̀ и҆ покро́ве притека́ющихъ къ тебѣ̀. Ра́дꙋйсѧ, неѡбꙋрева́емое приста́нище, и҆ неискꙋсобра́чнаѧ, ро́ждшаѧ пло́тїю творца̀ твоего̀ и҆ бг҃а: молѧ́щи не ѡ҆скꙋдѣва́й ѡ҆ воспѣва́ющихъ, и҆ кла́нѧющихсѧ рождествꙋ̀ твоемꙋ̀. <<рѯ҃в ѡ҆б.: 324>>

Въ недѣ́лю.

На полꙋ́нощницѣ

пое́мъ канѡ́нъ тро́иченъ во ѻ҆ктѡ́ихѣ гла́са. Та́же, Досто́йно є҆́сть: и҆ про́чее, ꙗ҆́кѡ ѻ҆бы́чай, и҆ ѿпꙋ́стъ.

На ᲂу҆́трени.

По а҃-мъ стїхосло́вїи, сѣда́льны воскре́сны, гла́съ є҃:

Крⷭ҇тъ гдⷭ҇нь похва́лимъ, погребе́нїе ст҃о́е пѣ́сньми почти́мъ, и҆ воскресе́нїе є҆гѡ̀ препросла́вимъ: ꙗ҆́кѡ совозста́ви мє́ртвыѧ ѿ грѡ́бъ ꙗ҆́кѡ бг҃ъ, плѣни́въ сме́рти держа́вꙋ, и҆ крѣ́пость дїа́волю, и҆ сꙋ́щымъ во а҆́дѣ свѣ́тъ возсїѧ̀.

Сті́хъ: Воскреснѝ гдⷭ҇и бж҃е мо́й, да вознесе́тсѧ рꙋка̀ твоѧ̀:

Гдⷭ҇и, ме́ртвъ наре́клсѧ є҆сѝ ᲂу҆мертви́вый сме́рть, во гро́бѣ положи́лсѧ є҆сѝ, и҆стощи́вый гро́бы: горѣ̀ во́ини гро́бъ стрежа́хꙋ, до́лѣ ѿ вѣ́ка мє́ртвыѧ воскреси́лъ є҆сѝ, всеси́льне и҆ непостижи́ме гдⷭ҇и сла́ва тебѣ̀.

Сла́ва, и҆ ны́нѣ, бг҃оро́диченъ:

Ра́дꙋйсѧ ст҃а́ѧ горо̀ и҆ бг҃опрохо́днаѧ, ра́дꙋйсѧ ѡ҆дꙋшевле́ннаѧ кꙋпино̀ и҆ неѡпали́маѧ, ра́дꙋйсѧ є҆ди́на къ бг҃ꙋ мі́рови мо́сте, преводѧ́й смє́ртныѧ къ вѣ́чномꙋ животꙋ̀. ра́дꙋйсѧ нетлѣ́ннаѧ ѻ҆трокови́це, неискꙋсомꙋ́жнѡ ро́ждшаѧ спасе́нїе дꙋ́шъ на́шихъ.

По в҃-мъ стїхосло́вїи сѣда́ленъ, гла́съ є҃:

Гдⷭ҇и, посредѣ́ тѧ ѡ҆сꙋжде́нныхъ пригвозди́ша беззако́ннїи, и҆ копїе́мъ ребро̀ твоѐ прободо́ша, ѽ ми́лостиве! погребе́нїе бо прїѧ́лъ є҆сѝ, разрꙋши́вый а҆́дова врата̀, <<рѯ҃г: 325>> и҆ воскрⷭ҇лъ є҆сѝ тридне́внѡ: притеко́ша жєны̀ ви́дѣти тѧ̀, возвѣсти́ша а҆пⷭ҇лѡмъ воста́нїе. превозноси́мый сп҃се є҆го́же пою́тъ а҆́гг҃ли, бл҃гослове́нный гдⷭ҇и, сла́ва тебѣ̀.

Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ:

Стра́нное твоѐ сп҃се мо́й, та́инство, мі́рови спасе́нїе бы́сть: воскре́съ бо ѿ гро́ба бг҃олѣ́пнѡ, и҆стлѣ́вшихъ совоздви́глъ є҆сѝ ꙗ҆́кѡ бг҃ъ, всѣ́хъ животѐ, гдⷭ҇и сла́ва тебѣ̀.

Сла́ва, и҆ ны́нѣ: бг҃оро́диченъ:

Неискꙋсобра́чнаѧ мт҃и, бг҃ороди́тельнице чи́стаѧ, є҆́ѵинꙋ печа́ль ѡ҆бра́довавшаѧ, воспѣва́емъ вѣ́рнїи, и҆ покланѧ́емсѧ тебѣ̀, ꙗ҆́кѡ возвела̀ є҆сѝ на́съ ѿ дре́внїѧ клѧ́твы: и҆ ны́нѣ молѝ непреста́ннѡ, всепѣ́таѧ прест҃а́ѧ, во є҆́же спасти́сѧ на́мъ.

И҆ чте́нїе въ толкова́нїи є҆ѵⷢ҇лїа, є҆́же ѿ і҆ѡа́нна, сло́во н҃ѕ, н҃з, и҆ н҃и: По непоро́чнахъ тропарѝ: А҆́гг҃льскїй собо́ръ: и҆ про́чее ꙗ҆́кѡ ѻ҆бы́чно.

И҆ а҆́бїе ѵ҆пакоѝ, гла́съ є҃:

А҆́гг҃льскимъ зра́комъ ᲂу҆́мъ смꙋща́ющыѧ, и҆ бжⷭ҇твеннымъ воста́нїемъ дꙋше́ю просвѣща́ємыѧ мѷронѡ́сицы, а҆пⷭ҇лѡмъ бл҃говѣствова́хꙋ: возвѣсти́те во ꙗ҆зы́цѣхъ воскресе́нїе, гдⷭ҇ꙋ содѣ́йствꙋющꙋ чꙋдесы̀, подаю́щемꙋ на́мъ ве́лїю ми́лость.

Степє́нна, гла́съ є҃. А҆нтїфѡ́нъ а҃:

Внегда̀ скорбѣ́ти мнѣ̀, дв҃дски пою̀ тебѣ̀ сп҃се мо́й: и҆зба́ви дꙋ́шꙋ мою̀ ѿ ѧ҆зы́ка льсти́вагѡ.

Пꙋсты̑ннымъ живо́тъ блаже́нъ є҆́сть, бж҃е́ственнымъ раче́нїемъ воскрилѧ́ющымсѧ.

Сла́ва:

Ст҃ы́мъ дх҃омъ ѡ҆держа́тсѧ всѧ̑, ви̑димаѧ же съ <<рѯ҃г ѡ҆б.: 326>> неви́димыми, самодержа́венъ бо сы́й, трⷪ҇цы є҆ди́нъ є҆́сть нело́женъ.

И҆ ны́нѣ: то́йже.

А҆нтїфѡ́нъ в҃:

На го́ры дꙋшѐ, воздви́гнемсѧ, грѧдѝ та́мѡ, ѿню́дꙋже по́мощь и҆́детъ.

Десна́ѧ твоѧ̀ рꙋка̀, и҆ менѐ хрⷭ҇тѐ каса́ющаѧсѧ, ѿ ле́сти всѧ́кїѧ да сохрани́тъ.

Сла́ва:

Ст҃о́мꙋ дх҃ꙋ бг҃осло́вѧще рце́мъ: ты̀ є҆сѝ бг҃ъ, живо́тъ, раче́нїе, свѣ́тъ, ᲂу҆́мъ: ты̀ бл҃госты́нѧ, ты̀ црⷭ҇твꙋеши во вѣ́ки.

И҆ ны́нѣ: то́йже.

А҆нтїфѡ́нъ г҃:

Ѡ҆ ре́кшихъ мнѣ̀, во дворы̀ вни́демъ гдⷭ҇ни: ра́дости мно́гїѧ и҆спо́лненъ бы́въ, моли̑твы возсыла́ю.

Въ домꙋ̀ дв҃довѣ стра̑шнаѧ соверша́ютсѧ: ѻ҆́гнь бо та́мѡ палѧ̀ всѧ́къ сра́мный ᲂу҆́мъ.

Сла́ва:

Ст҃о́мꙋ дх҃ꙋ живонача́льное досто́инство, ѿ негѡ́же всѧ́кое живо́тно ѡ҆дꙋшевлѧ́етсѧ, ꙗ҆́кѡ во ѻ҆ц҃ѣ̀, кꙋ́пнѡ же и҆ сло́вѣ.

И҆ ны́нѣ: то́йже.

Прокі́менъ, гла́съ є҃: Воскреснѝ гдⷭ҇и бж҃е мо́й, да вознесе́тсѧ рꙋка̀ твоѧ̀, ꙗ҆́кѡ ты̀ ца́рствꙋеши во вѣ́ки. Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ: Є҆ѵⷢ҇лїе і҆ѡа́нна, зача́ло ѯ҃д: Марі́а стоѧ́ше ᲂу҆ гро́ба: Та́же: Воскресе́нїе хрⷭ҇то́во: три́жды. Ѱало́мъ н҃: Канѡ́нъ па́сцѣ, со і҆рмосы̀ и҆ съ бг҃оро́дичнами на и҃: и҆ слѣпа́гѡ на ѕ҃. <<рѯ҃д: 327>>

КАНѠ́НЪ, гла́съ є҃.

Пѣ́снь а҃.

І҆рмо́съ: Зе́млю, на ню́же не возсїѧ̀, ни ви́дѣ со́лнце когда̀, бе́зднꙋ, ю҆́же не ви́дѣ на́гꙋ широта̀ небе́снаѧ, і҆зра́иль про́йде невла́жнѡ, гдⷭ҇и, и҆ вве́лъ є҆сѝ є҆го̀ въ го́рꙋ ст҃ы́ни твоеѧ̀, хва́лѧща и҆ пою́ща побѣ́днꙋю пѣ́снь.

Распѧ́тїе во́льное воспрїи́мъ сп҃се пло́тїю, и҆сточи́лъ є҆сѝ благослове́нїе, и҆ жи́знь мі́рови влⷣко, є҆ди́не всебл҃гослове́нне, и҆ всѣ́хъ содѣ́телю. тѣ́мже благослови́мъ тѧ̀, пое́мъ и҆ сла́вимъ, пою́ще, воспѣва́юще побѣ́днꙋю пѣ́снь.

Въ ро́вѣ тѧ̀ преиспо́днѣйшемъ ме́ртва бы́вша хрⷭ҇тѐ, положѝ бл҃гоѻбра́зный і҆ѡ́сифъ, и҆ привалѝ къ две́ремъ гро́ба ка́мень, долготерпѣли́ве. но воскре́слъ є҆сѝ сла́вне, и҆ мі́ръ совозста́вилъ є҆сѝ пою́щїй, воспѣва́ющїй побѣ́днꙋю пѣ́снь.

Мѵ́ра что̀ прино́сите со слеза́ми вы̀, глаго́лаше честны̑мъ жена́мъ а҆́гг҃лъ ꙗ҆вле́йсѧ; хрⷭ҇то́съ воста̀: те́кше рцы́те бг҃ови́дцємъ ᲂу҆ченикѡ́мъ, рыда́ющымъ и҆ пла́чꙋщымъ, ꙗ҆́кѡ да взыгра́ютъ и҆ ликовствꙋ́ютъ свѣ́тлѡ.

Чꙋдеса̀ пресла̑внаѧ сотворѧ́ѧ, и҆зба́витель и҆сцѣлѝ и҆ слѣ́па ѿ рожде́нїѧ, бре́нїемъ пома́завъ, и҆ ре́къ: и҆дѝ ᲂу҆мы́йсѧ въ сїлѡа́мѣ, ꙗ҆́кѡ да позна́еши мѧ̀ бг҃а по землѝ ше́ствꙋюща, пло́ть носѧ́ща, за милосе́рдїе щедро́тъ.

Сла́ва: трⷪ҇ченъ:

Є҆ди́но трїѷпоста́сное сꙋщество̀ почита́юще вѣ́рнїи, просла́вимъ ѻ҆ц҃а̀, и҆ сн҃а, и҆ дх҃а пра́ваго, творца̀, и҆ гдⷭ҇а, <<рѯ҃д ѡ҆б.: 328>> и҆ и҆зба́вителѧ всѣ́хъ, є҆ди́наго несозда́ннаго со безпло́тными взыва́юще: ст҃ъ, ст҃ъ, ст҃ъ є҆сѝ цр҃ю̀.

И҆ ны́нѣ: бг҃оро́диченъ:

Во ᲂу҆тро́бꙋ неискꙋсобра́чнꙋю твою̀ всели́сѧ чи́стаѧ гдⷭ҇ь, за милосе́рдїе щедро́тъ, спастѝ хотѧ̀ человѣ́ка и҆стлѣ́вшаго козньмѝ вра́жїими. того̀ ᲂу҆́бѡ молѝ, гра́дъ се́й спастѝ ѿ всѧ́кагѡ плѣне́нїѧ, и҆ врагѡ́въ наше́ствїѧ.

Катава́сїа: Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.

Пѣ́снь г҃.

І҆рмо́съ: Дви́жимое се́рдце моѐ гдⷭ҇и, волна́ми жите́йскими, ᲂу҆твердѝ, во приста́нище ти́хое наставлѧ́ѧ ꙗ҆́кѡ бг҃ъ.

Коле́блющихсѧ сердца̀ ᲂу҆тверди́лъ є҆сѝ, зе́млю всю̀ поколеба́въ долготерпѣли́ве, честны́мъ распѧ́тїемъ твои́мъ є҆́же претерпѣ́лъ є҆сѝ пло́тїю.

Въ но́вѣмъ гро́бѣ тебѐ положѝ ще́дре, і҆ѡ́сифъ благоѻбра́зный, воскре́слъ же є҆сѝ и҆з̾ ме́ртвыхъ тридне́венъ новосотвори́вый на́съ.

Что̀ ꙗ҆́кѡ ме́ртва и҆́щете гдⷭ҇а; воскре́се, ꙗ҆́коже речѐ а҆́гг҃лъ жена́мъ вѣща́ше, блиста́ѧсѧ бж҃е́ственнымъ зра́комъ.

Слѣ́па и҆ногда̀ ѿ рожде́нїѧ, пристꙋ́пльша къ тебѣ̀ и҆сцѣли́лъ є҆сѝ всеще́дре, сла́вѧща смотре́нїе твоѐ и҆ чꙋдеса̀.

Сла́ва: трⷪ҇ченъ:

Бг҃ꙋ ѻ҆ц҃ꙋ̀ покланѧ́емсѧ пребезнача́льномꙋ, и҆ сн҃ꙋ, и҆ бж҃е́ственномꙋ дх҃ꙋ, тринесозда́нномꙋ є҆стествꙋ̀, трїѷпоста́сномꙋ, є҆ди́номꙋ бг҃ꙋ всѣ́хъ. <<рѯ҃є: 329>>

И҆ ны́нѣ: бг҃оро́диченъ:

И҆з̾ чре́ва дѣви́ческа родила̀ є҆сѝ бг҃а воплоще́нна, є҆мꙋ́же моли́сѧ всест҃а́ѧ влⷣчце, ᲂу҆ще́дрити на́съ.

Катава́сїа: Си́лою крⷭ҇та̀ твоегѡ̀ хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити спаси́тельное твоѐ вознесе́нїе.

Конда́къ и҆ і҆́косъ па́сцѣ.

Та́же сѣда́ленъ, гла́съ и҃: Подо́бенъ: Премꙋ́дрости:

Всѣ́хъ влⷣка и҆ творе́цъ преходѧ̀, ѡ҆брѣ́те на пꙋтѝ слѣ́па сѣдѧ́ща, пла́чꙋща и҆ глаго́люща: не ви́дѣхъ въ житїѝ со́лнца сїѧ́юща, нижѐ лꙋны̀ свѣ́та ѡ҆зарѧ́ющагѡ. тѣ́мже вопїю́ ти: рожде́йсѧ ѿ дв҃ы, просвѣще́й всѧ́чєскаѧ, просвѣти́ мѧ ꙗ҆́кѡ бл҃гоꙋтро́бенъ, да зовꙋ̀ припа́даѧ тебѣ̀ влⷣко хрⷭ҇тѐ бж҃е: прегрѣше́нїй ѡ҆ставле́нїе да́рꙋй, за мно́жество ми́лости на́мъ человѣколю́бче.

Сла́ва, и҆ ны́нѣ: то́йже. И҆ чте́нїе.

Пѣ́снь д҃.

І҆рмо́съ: Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ, разꙋмѣ́хъ смотре́нїе твоѐ, и҆ просла́вихъ тѧ̀, є҆ди́не человѣколю́бче.

Оу҆ме́рша мѧ̀ дре́вомъ, пожре́нъ бы́въ сп҃се мо́й, жи́знь сы́й ѡ҆живи́лъ є҆сѝ, за вели́кꙋю ми́лость: сегѡ̀ ра́ди сло́ве сла́влю тѧ̀.

Оу҆ченикѡ́мъ гдⷭ҇и, соводворѧ́ѧсѧ пресла́внѡ, си̑мъ глаго́лалъ є҆сѝ: и҆ди́те, проповѣ́дите всю́дꙋ моѐ воскрⷭ҇нїе.

Оу҆вѣрѧ́ѧ гдⷭ҇и, воста́нїе твоѐ, є҆́же и҆з̾ гро́ба, лю́бѧщымъ тѧ̀ хрⷭ҇тѐ, во днѝ мнѡ́ги соводвори́лсѧ є҆сѝ, ра́дость творѧ̀ и҆̀мъ. <<рѯ҃є ѡ҆б.: 330>>

Воѻчи́лъ є҆сѝ гдⷭ҇и, слѣ́па и҆з̾ ᲂу҆тро́бы рожде́нна, ре́къ: и҆дѝ, ᲂу҆мы́йсѧ, и҆ прозрѝ, моѐ сла́вѧ бж҃ество̀.

Сла́ва: трⷪ҇ченъ:

Є҆диноче́стнаѧ, безнача́льнаѧ трⷪ҇це, нераздѣ́льнаѧ сꙋщество́мъ, раздѣ́льна ѵ҆поста́сьми, спаса́й всѧ̑ вѣ́рнѡ тѧ̀ стра́хомъ сла́вѧщыѧ.

И҆ ны́нѣ: бг҃оро́диченъ:

Ржⷭ҇тво̀ твоѐ чи́стаѧ є҆́же па́че є҆стества̀ славосло́вимъ блажа́ще вѣ́рнѡ тебѐ пренепоро́чнаѧ, ꙗ҆́кѡ бг҃а всѣ́хъ роди́тельницꙋ.

Катава́сїа: Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й гдⷭ҇и.

Пѣ́снь є҃.

І҆рмо́съ: Ѻ҆каѧ́ннꙋю дꙋ́шꙋ мою̀, нощеборю́щꙋюсѧ со тмо́ю страсте́й, предвари́въ ᲂу҆ще́дри, и҆ возсїѧ́й мы́сленное со́лнце, днесвѣ́тлыѧ ѕвѣзды̀ во мнѣ̀, во є҆́же раздѣли́ти но́щь ѿ свѣ́та.

Возне́слсѧ є҆сѝ на дре́во ще́дре, и҆ совозне́слъ є҆сѝ всѧ̑ человѣ́ки, и҆ бори́телѧ ѕмі́ѧ ᲂу҆мертви́лъ є҆сѝ, и҆ ѡ҆живи́лъ є҆сѝ созда́нїе рꙋ́къ твои́хъ, ꙗ҆́кѡ є҆ди́нъ бг҃ъ всѣ́хъ.

Положи́лсѧ є҆сѝ во гро́бѣ во́лею цр҃ю̀ безсме́ртне, и҆ ца́рствїѧ а҆́дова всѧ̑ и҆стощи́лъ є҆сѝ, мє́ртвыѧ воскресе́нїемъ твои́мъ воздви́гнꙋвъ.

Чꙋдеса̀ вє́лїѧ содѣ́ловающаго сло́ве на землѝ, лю́дїе ᲂу҆би́ша тѧ̀ беззако́ннїи: но са́мъ гдⷭ҇и, є҆ди́нъ всеси́ленъ сы́й, ꙗ҆́коже предре́клъ є҆сѝ, и҆з̾ ме́ртвыхъ воскре́слъ є҆сѝ хрⷭ҇тѐ. <<рѯ҃ѕ: 331>>

Ѻ҆́чи ѿве́рзлъ неви́дѣвшагѡ свѣ́тъ чꙋ́вственный, дꙋшѝ просвѣти́лъ є҆сѝ зѣ̑ницы, и҆ сла́вити сотвори́лъ є҆сѝ сего̀, позна́вша тѧ̀ творца̀, за благоꙋтро́бїе ꙗ҆ви́вшасѧ чл҃вѣ́ка.

Сла́ва: трⷪ҇ченъ:

Трⷪ҇цꙋ во є҆ди́ницѣ, и҆ въ трⷪ҇цѣ є҆ди́ницꙋ вѣ́рнїи славосло́вимъ всѝ, ѻ҆ц҃а̀ и҆ сн҃а, и҆ дх҃а пра́ваго, є҆ди́наго бг҃а, содѣ́телѧ всѣ́хъ вои́стиннꙋ.

И҆ ны́нѣ: бг҃оро́диченъ:

Ка́кѡ родила̀ є҆сѝ бг҃облагода́тнаѧ дв҃о мт҃и чи́стаѧ, не позна́вши и҆скꙋ́са мꙋ́жеска; ка́кѡ пита́еши пита́ющаго всю̀ тва́рь; ꙗ҆́коже є҆ди́нъ вѣ́сть са́мъ, всѣ́хъ творе́цъ и҆ бг҃ъ.

Катава́сїа: Оу҆́тренююще вопїе́мъ тѝ гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебѐ и҆но́гѡ не зна́емъ.

Пѣ́снь ѕ҃.

І҆рмо́съ: Ꙗ҆́коже проро́ка ѿ ѕвѣ́рѧ и҆зба́вилъ є҆сѝ гдⷭ҇и, и҆ менѐ и҆з̾ глꙋбины̀ несодержи́мыхъ страсте́й возведѝ, молю́сѧ, да приложꙋ̀ призрѣ́ти мѝ ко хра́мꙋ ст҃о́мꙋ твоемꙋ̀.

Распны́йсѧ съ разбо́йники влⷣко, и҆зба́вилъ є҆сѝ ѿ разбѡ́йникъ лꙋка́выхъ, дꙋшетлѣ́нныхъ страсте́й, человѣколю́бче гдⷭ҇и, всѧ̑ пою́щыѧ твоѐ распѧ́тїе, и҆ воста́нїе согла́снѡ.

Положи́ша без̾ дыха́нїѧ тебѐ ме́ртва, хрⷭ҇тѐ, во гро́бѣ; всѣ̑мъ мє́ртвымъ вдыха́юща жи́знь: воскре́слъ же є҆сѝ гдⷭ҇и, всѧ̑ и҆стощи́вый сло́ве гро́бы, бж҃е́ственною твое́ю си́лою.

По воста́нїи хрⷭ҇тѐ, дрꙋгѡ́мъ глаго́лалъ є҆сѝ: сѣди́те <<рѯ҃ѕ ѡ҆б.: 332>> ᲂу҆́бѡ во і҆ерꙋсали́мѣ, до́ндеже ѡ҆блече́тесѧ си́лою свы́ше непобѣди́мою, и҆ и҆звѣ́стною по́мощїю.

Бре́нїе сотво́рь, ѻ҆́чи слѣпа́гѡ ѿ рожде́нїѧ пома́залъ є҆сѝ, и҆ дарова́лъ є҆сѝ є҆мꙋ̀ прозрѣ́ти, пою́щꙋ твою̀ сло́ве неизрече́ннꙋю си́лꙋ, є҆́юже спа́слъ є҆сѝ мі́ръ.

Сла́ва: трⷪ҇ченъ:

Трїѷпоста́снаѧ є҆ди́нице, ѻ҆́ч҃е нерожде́нне, сн҃е рожде́нне, и҆ дш҃е и҆схо́дне, трист҃ы́й гдⷭ҇и, є҆ди́но сꙋщество̀ и҆ си́ла, спаса́й всѧ̑ лю́ди твоѧ̀.

И҆ ны́нѣ: бг҃оро́диченъ:

Вели̑чїѧ твоѧ̀, чи́стаѧ, кто̀ и҆сповѣ́сть; бг҃а бо пло́тїю родила̀ є҆сѝ преесте́ственнѡ, мі́ръ тобо́ю и҆збавлѧ́ющаго, дв҃о всенепоро́чнаѧ, ѿ всѧ́кагѡ грѣха̀.

Катава́сїа: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть: а҆́зъ же возопи́хъ къ тебѣ̀ чл҃вѣколю́бцꙋ, и҆ спасе́ мѧ десни́ца твоѧ̀, гдⷭ҇и.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Дꙋше́вныма ѻ҆чи́ма ѡ҆слѣпле́нъ, къ тебѣ̀ хрⷭ҇тѐ прихождꙋ̀, ꙗ҆́коже слѣпы́й ѿ рожде́нїѧ, покаѧ́нїемъ зовꙋ́ ти: ты̀ сꙋ́щихъ во тмѣ̀ свѣ́тъ пресвѣ́тлый.

І҆́косъ:

Стрꙋю́ ми да́рꙋй хрⷭ҇тѐ, премꙋ́дрости неизрече́нныѧ, и҆ ра́зꙋма го́рнѧгѡ, свѣ́те сꙋ́щихъ во тмѣ̀, и҆ прельща́емыхъ наста́вниче, да возмогꙋ̀ чꙋдеса̀ твоѧ̑ повѣ́дати ѻ҆каѧ́нный, ꙗ҆̀же бж҃е́ственнаѧ кни́га наꙋчѝ є҆ѵⷢ҇лїа ми́ра, сі́есть, слѣпа́гѡ чꙋдотворе́нїе: ꙗ҆́кѡ ѿ рожде́нїѧ слѣ́пъ сы́й, ѻ҆́чи чꙋ́вствєнныѧ прїе́млетъ и҆ дꙋшє́вныѧ, вѣ́рою взыва́ѧ: ты̀ сꙋ́щихъ во тмѣ̀ свѣ́тъ пресвѣ́тлый. <<рѯ҃з: 333>>

Сѷнаѯа́рь мине́и.

Та́же настоѧ́щїй.

Стїхѝ: Свѣ́та пода́тель, ѿ свѣ́та сы́й свѣ́тъ,

Ѿ рожде́нїѧ воѻча́еши слѣпа́го сло́ве.

Въ то́йже де́нь, въ недѣ́лю шестꙋ́ю по па́сцѣ, и҆́же ѿ рожде́нїѧ слѣпа́гѡ, пра́зднꙋемъ гдⷭ҇а бг҃а и҆ сп҃са на́шегѡ і҆и҃са хрⷭ҇та̀ є҆́же ᲂу҆́бѡ и҆ то̀ ѿ воды̀ содѣ́ѧсѧ, ꙗ҆́коже и҆ є҆́же ѡ҆ самарѧны́ни, и҆ ѡ҆ разсла́бленнѣмъ. Бы́сть же си́це: хрⷭ҇тꙋ̀ бесѣ́дꙋющꙋ і҆ꙋде́ѡмъ, и҆ себѐ ра́вна показꙋ́юща ѻ҆ц҃ꙋ̀, и҆ пре́жде а҆враа́ма бы́ти: а҆́зъ є҆́смь, глаго́лющꙋ, ѻ҆нѝ ка́менїе на него̀ ме́щꙋтъ. Ѻ҆́нъ же ѿходѧ̀ ѿтꙋ́дꙋ, ѡ҆брѣта́етъ слѣпа́го претыка́ющасѧ, бѧ́ше же та́кѡ роди́всѧ, ѻ҆́бразъ то́кмѡ є҆ди́нъ и҆ долины̑ и҆мѣ́ѧ ѻ҆́чїю. Ѡ҆брѣ́тъ ᲂу҆́бѡ є҆го̀ сп҃съ си́це и҆мꙋ́ща, вопроша́емь быва́етъ ѿ ᲂу҆чени̑къ слы́шавшихъ во є҆́же ѡ҆ разсла́бленномъ: сѐ здра́въ бы́лъ є҆сѝ, ктомꙋ̀ не согрѣша́й. и҆, ꙗ҆́кѡ грѣ́хъ роди́тельскїй на ча́дѣхъ: ᲂу҆чи́телю, кто̀ согрѣшѝ, се́й ли, и҆лѝ роди́тели є҆гѡ̀, да слѣ́пъ роди́сѧ; И҆на́кѡ же, и҆ мнѣ́нїе нѣ́кое є҆пїкꙋ́рское содержа́ше дꙋша́мъ предбыва́ти, и҆ согрѣши́вшымъ невеще́ственнѡ своди́тисѧ въ тѣлеса̀. ꙗ҆̀же всѧ̑ ѿе́млѧ хрⷭ҇то́съ, речѐ: не си́хъ ра́ди, но да ꙗ҆вѧ́тсѧ дѣла̀ бг҃а, си́рѣчь менѐ. Ни бо̀ ѡ҆ ѻ҆ц҃ѣ̀ сло́во: а҆ є҆́же да̀, и҆зрече́нїѧ є҆́сть, а҆ не вины̀. И҆ сѐ ре́къ хрⷭ҇то́съ, плю́нꙋвъ на зе́млю, бре́нїе сотворѝ, и҆ пома́за є҆мꙋ̀ ѻ҆́чїю мѣста̀, и҆ къ сїлѡа́мскомꙋ и҆сто́чникꙋ и҆тѝ, и҆ ᲂу҆мы́тисѧ повелѣва́етъ, да пока́жетъ, ꙗ҆́кѡ то́й є҆́сть въ нача́лѣ пе́рсть прїе́мый ѿ землѝ, и҆ созда́вый человѣ́ка. И҆ поне́же всѣ̑мъ ѻ҆́ко госпо́дственнѣйшее въ тѣлесѝ, сїѐ создава́етъ не сꙋ́щее, показꙋ́ѧ, ꙗ҆́кѡ и҆ дꙋше́вной си́лѣ движе́нїе то́й є҆́сть подава́ѧй: не пома́за же водо́ю, но плюнове́нїемъ. И҆ да вѣ́домо бꙋ́детъ, ꙗ҆́кѡ бл҃года́ть всѧ́каѧ ѿ плюнове́нїѧ ᲂу҆́стъ бѧ́ше, и҆ ꙗ҆́кѡ къ сїлѡа́мꙋ посла́ти того̀ хотѧ́ше. ᲂу҆мы́тисѧ же томꙋ̀ повелѣва́етъ, да не кто̀ та́мошнею земле́ю и҆ бре́нїемъ ꙾да́стъ꙾[[возмни́тъ]] цѣльбꙋ̀. Посыла́етъ є҆го̀ къ сїлѡа́мꙋ, да мно́ги и҆́мать и҆сцѣле́нїѧ послꙋ́хи, мно́ги бо срѣ́те и҆ды́й пома́заны бре́нїемъ и҆мѣ́ѧ ѻ҆́чи. Глаго́лютъ же нѣ́цыи, ꙗ҆́кѡ ᲂу҆мы́выйсѧ не ѿложѝ, є҆́же бѣ̀ ѿ <<рѯ҃з ѡ҆б.: 334>> плюнове́нїѧ бре́нїе, но то́е бре́нїе приложе́нїемъ мо́крагѡ ко ѻ҆́чїю зда́нїѧ преѡбразова́шесѧ. Сїлѡа́мъ же, по́сланъ, толкꙋ́етсѧ: кꙋпѣ́ль бо та́ѧ внѣ̀ гра́да і҆ерꙋсали́ма бѧ́ше. При і҆езекі́и же ра́тникѡмъ ѡ҆бсѣ́дшымъ гра́дъ, и҆ сїлѡа́мъ ѡ҆б̾е́мшымъ, воспѧти́сѧ вола̀ ѿѻнꙋ́дꙋ: прє́днїѧ же кла́дѧзи и҆ рвы̀ и҆скопа́ша внꙋ́трь, на принѧ́тїе воды̀. и҆ а҆́ще кто̀ повелѣ́нїемъ проро́ка и҆са́їи та́мѡ посыла́емь бѧ́ше, вода̀ па́ки и҆схожда́ше и҆ почерпа́шесѧ: а҆́ще ли же кто̀ ѿ ра̑тникъ хотѧ́ше почерпстѝ, ᲂу҆держава́хꙋсѧ воды̀ и҆стѡ́чницы, и҆ и҆з̾ ѻ҆́нагѡ та́кѡ быва́ше. Да ᲂу҆́бѡ пока́жетъ и҆ хрⷭ҇то́съ, ꙗ҆́кѡ ѿ бг҃а и҆ са́мъ, сегѡ̀ ра́ди слѣпа́го посыла́етъ та́мѡ, и҆ свѣ́тъ а҆́бїе послѣ́дꙋетъ. Нѣ́цыи ᲂу҆́бѡ возмнѣ́ша, по́сланъ, сїлѡа́мъ толкова́тисѧ, и҆ настоѧ́щагѡ ра́ди слѣпца̀ по́сланна ѿ хрⷭ҇та̀. Воѻча́етсѧ ᲂу҆́бѡ слѣпы́й, ᲂу҆мы́всѧ, неизглаго́ланною нѣ́коею си́лою, нижѐ самомꙋ̀ пострада́вшемꙋ та́инство ᲂу҆вѣ́дѣвшꙋ. Сосѣ́ди же є҆мꙋ̀ и҆ и҆́накѡ зна́емїи, ви́дѣвше є҆го̀ до́брѣ прозрѣ́вша, сꙋмнѧ́щесѧ бѧ́хꙋ. Ѻ҆́нъ же ᲂу҆́бѡ и҆сповѣ́даше себѐ пре́жде бы́ти слѣ́па, и҆ ѡ҆ вино́вномъ прозрѣ́нїю вопроша́емь, цѣли́телѧ стра́сти хрⷭ҇та̀ проповѣ́даше. фарїсе́ємъ ᲂу҆́бѡ пресла́вное слы́шащымъ зна́менїе, па́ки сп҃съ хꙋ́лимь быва́етъ, ꙗ҆́кѡ сꙋббѡ́тꙋ не блюды́й. Въ сꙋббѡ́тꙋ бо, ꙗ҆́коже ѡ҆бы́че, и҆ є҆́же на слѣпо́мъ содѣ́ѧсѧ. Ра́спрѧ ᲂу҆́бѡ быва́етъ посредѝ си́хъ, ѻ҆́вѣмъ ᲂу҆́бѡ глаго́лющымъ ѿ бг҃а бы́ти і҆и҃сꙋ, быва́емыхъ ра́ди чꙋде́съ: ѻ҆́вѣмъ же не ѿ бг҃а, ꙗ҆́кѡ сꙋббѡ́ты не храни́тъ. Благо́е ᲂу҆́бѡ мнѣ́нїе ѡ҆ не́мъ и҆мꙋ́щїи слѣпа́го вопроша́ютъ: ты̀ что̀ глаго́леши ѡ҆ не́мъ; ѻ҆́нъ же проро́ка є҆го̀ проповѣ́даетъ, є҆́же ᲂу҆́бѡ ѻ҆́нѣхъ бѧ́ше честнѣ́йше. Ѻ҆ни́ же па́ки не вѣ́рꙋютъ, ꙗ҆́кѡ слѣ́пꙋ сꙋ́щꙋ хрⷭ҇то́съ цѣльбꙋ̀ дарова̀: ᲂу҆̀бо и҆ роди́телей є҆гѡ̀ призыва́ютъ, сосѣ́дѡмъ не вѣ́рꙋюще, ꙗ҆́кѡ и҆ па́че то̀ покры́ти хотѧ́ще. Но и҆ вѧ́щше творѧ́тъ ꙗ҆вле́нно, роди́телємъ всѧ̑ и҆сповѣ́дающымъ, а҆́ще и҆ ѿ со́нмища ѿлꙋче́на бы́ти боѧ́щѧсѧ, на ѻ҆́нагѡ во́зрастъ дѣѧ̑нїѧ возво́дѧтъ. Но и҆ па́ки къ слѣпо́мꙋ глаго́лютъ: да́ждь сла́вꙋ бг҃ꙋ, ꙗ҆́кѡ ѿ негѡ̀ и҆сцѣле́нїе, а҆ не ѿ хрⷭ҇та̀, грѣ́шенъ бо є҆́сть, ꙗ҆́кѡ разорѧ́етъ сꙋббѡ́тꙋ. Се́й же дѣ́лы показа́ти хотѧ̀, ꙗ҆́кѡ бг҃ъ є҆́сть: не вѣ́мъ, <<рѯ҃и: 335>> глаго́летъ, є҆ди́но вѣ́мъ, ꙗ҆́кѡ слѣ́пъ сы́й, тѣ́мъ ви́ждꙋ. Па́ки ᲂу҆́бѡ є҆мꙋ̀ реко́ша: ка́кѡ ѿве́рзе твоѝ ѻ҆́чи; ѻ҆́нъ же стꙋжа́емь не пото́нкꙋ глаго́летъ, но составлѧ́етъ, ꙗ҆́кѡ а҆́ще не бы̀ ѿ бг҃а бы́лъ, не бы̀ сицево́е зна́менїе сотвори́лъ. И҆ пе́рвѣе ᲂу҆́бѡ досажда́емь быва́етъ ѿ ни́хъ, ꙗ҆́кѡ и҆сповѣ́давый, и҆ ᲂу҆чени́къ бы́ти ѻ҆́нагѡ, и҆ занѐ речѐ: никто́же ѿве́рзлъ є҆́сть ѻ҆́чи слѣпа́гѡ рожде́ннагѡ. слѣпы̑ѧ бо и҆ дрꙋзі́и просвѣти́ша, рожде́нꙋ же слѣ́пꙋ нижѐ є҆ди́нъ: порꙋга́вшесѧ ᲂу҆́бѡ є҆мꙋ̀ дале́че ѿ со́нмища и҆згна́ша. По си́хъ же ѡ҆брѣта́етъ є҆го̀ і҆и҃съ, и҆ глаго́летъ є҆мꙋ̀: ты̀ вѣ́рꙋеши ли въ сн҃а бж҃їѧ; ѻ҆́нъ же ᲂу҆вѣ́дѣвъ кто̀ є҆́сть, и҆́же съ ни́мъ глаго́лѧй, и҆ ви́дѣнъ быва́ѧй тѣ́мъ, не бо̀ вѣ́дѧше є҆го̀ пре́жде ꙗ҆́кѡ слѣпы́й сы́й, поклони́сѧ є҆мꙋ̀, и҆ ᲂу҆чени́къ є҆гѡ̀ бы́сть, благодѣѧ́нїе проповѣ́дꙋѧй. Рекло́сѧ бы сїѐ и҆ возводи́тельнѡ: Слѣпы́й ᲂу҆́бѡ и҆ сꙋ́щїи ѿ ꙗ҆зы̑къ лю́дїе, и҆̀хже преходѧ̀ вмѣ́стѡ є҆́же на землѝ пожи́тїѧ, а҆ не на нб҃сѝ, ѡ҆брѣ́те хрⷭ҇то́съ, и҆лѝ и҆ ꙗ҆́кѡ є҆вре́йскихъ ра́ди прїи́де люде́й. Преходѧ́ же прїи́де и҆ во ꙗ҆зы́ки, и҆ плю́нꙋвъ на зе́млю, и҆ бре́нїе сотвори́въ пома́за: вмѣ́стѡ є҆́же наꙋчѝ ѧ҆̀ пре́жде, занѐ ꙗ҆́кѡ ка́плѧ сни́де на зе́млю, и҆ воплоти́сѧ ѿ ст҃ы́ѧ дв҃ы. Та́же и҆ бж҃е́ственное креще́нїе предадѐ, є҆́же є҆́сть сїлѡа́мъ. Посе́мъ ѿ ꙗ҆зы̑къ хрⷭ҇тїа́нстїи лю́дїе за хрⷭ҇та̀ на всѧ̑ дерза́ютъ, и҆ гони́ми быва́ютъ, и҆ свидѣ́тельствꙋютъ, и҆ по́слѣжде ѿ негѡ̀ проповѣ́дꙋютсѧ и҆ прославлѧ́ютсѧ. Неисче́тною ми́лостїю твое́ю, свѣтода́вче хрⷭ҇тѐ бж҃е на́шъ, поми́лꙋй и҆ спасѝ на́съ. а҆ми́нь.

Пѣ́снь з҃.

І҆рмо́съ: Ѻ҆гнѧ̀ гаси́лище ѻ҆трокѡ́въ моли́тва, ѡ҆роша́ющаѧ пе́щь проповѣ́дница чꙋдесѐ, не ѡ҆палѧ́ющи, нижѐ сожига́ющи, пѣсносло́вцы бг҃а ѻ҆ц҃ъ на́шихъ.

Вздви́женꙋ тебѣ̀ на дре́во сп҃се, погасѐ со́лнце, землѧ̀ волнꙋ́ѧшесѧ, колеба́шесѧ тва́рь всѧ̀, и҆ ѿ грѡ́бъ ме́ртвїи востаѧ́хꙋ.

Воста́вшꙋ тѝ и҆з̾ ме́ртвыхъ цр҃ю̀, дꙋ́шы совозста́ша <<рѯ҃и ѡ҆б.: 336>> та́мѡ спѧ́щыѧ, сла́вѧщыѧ си́лꙋ твою̀, є҆́юже смє́ртныѧ ᲂу҆́зы разрѣши́шасѧ.

Ра́нѡ мѷропома́зати тѧ̀ же́нскїй прїи́де ли́къ, ᲂу҆вѣ́дѣвше же гдⷭ҇и воста́вша тѧ̀, ра́довахꙋсѧ со свѧще́нными ᲂу҆ченикѝ: и҆́миже пода́ждь на́мъ ѡ҆чище́нїе ѕѡ́лъ.

Бре́нїемъ пома́залъ є҆сѝ ѻ҆́чи слѣпа́гѡ, и҆ семꙋ̀ повелѣ́лъ є҆сѝ къ сїлѡа́мꙋ и҆тѝ, ѡ҆мы́всѧ же прозрѣ̀, пѣсносло́вѧ тѧ̀ хрⷭ҇тѐ, цр҃ю̀ всѣ́хъ.

Сла́ва: трⷪ҇ченъ:

Ѻ҆ц҃а̀ безнача́льна, собезнача́льна же сн҃а, и҆ дх҃а прест҃а́го пѣсносло́вимъ: ст҃ъ, ст҃ъ, ст҃ъ є҆сѝ бж҃е, цр҃ю̀ всѣ́хъ.

И҆ ны́нѣ: бг҃оро́диченъ:

По ржⷭ҇твѣ̀ дв҃а ꙗ҆ви́ласѧ є҆сѝ чи́стаѧ, бг҃а бо родила̀ є҆сѝ, ѡ҆бнови́вшаго є҆стества̀ пречи́стаѧ си́лою свое́ю: є҆го́же молѝ спасти́сѧ всѣ́мъ на́мъ.

Катава́сїа: Въ пещѝ ѻ҆́гненнѣй пѣсносло́вцы спасы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.

Пѣ́снь и҃.

І҆рмо́съ: А҆́гг҃лѡвъ со́нмъ, человѣ́кѡвъ собо́ръ, цр҃ѧ̀ и҆ зижди́телѧ всѣ́хъ, сщ҃е́нницы по́йте, благослови́те леѵі́ти, лю́дїе превозноси́те во всѧ̑ вѣ́ки.

А҆́гг҃льстїи чи́нове на крⷭ҇тѣ̀ тѧ̀ ви́дѣвше ви́сима хрⷭ҇тѐ всецр҃ю̀, и҆ тва́рь всю̀ и҆змѣнѧ́юща стра́хомъ, ᲂу҆жасо́шасѧ пою́ще твоѐ человѣколю́бїе.

А҆́дъ до́лѣ тебѐ ви́дѣвъ стенѧ́ше, и҆ подава́ше ско́рѡ мє́ртвыѧ ѿ вѣ́ка та́мѡ храни̑мыѧ, хрⷭ҇тѐ, пѣсносло́вѧщыѧ твоѐ человѣколю́бїе. <<рѯ҃ѳ: 337>>

Сотворѧ́ѧ чꙋдеса̀ хрⷭ҇тѐ и҆зрѧ́днаѧ, во́лею воздви́женъ бы́лъ є҆сѝ на крⷭ҇тъ, и҆ съ ме́ртвыми совокꙋпи́лсѧ є҆сѝ ᲂу҆мертви́вый а҆́да, и҆ всѧ̑ мꙋ́жествомъ ѿрѣши́лъ є҆сѝ ᲂу҆́зники.

Слѣпа́го воѻчи́лъ є҆сѝ къ тебѣ̀ пристꙋпи́вша хрⷭ҇тѐ, семꙋ̀ повелѣ́вый въ сїлѡа́мовꙋ кꙋпѣ́ль и҆тѝ, ѡ҆мы́тисѧ и҆ прозрѣ́ти, и҆ бг҃а тѧ̀ проповѣ́дати, пло́тїю ꙗ҆ви́вшагосѧ во спасе́нїе мі́ра.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Трⷪ҇це нераздѣ́льнаѧ, є҆ди́нице неслїѧ́ннаѧ, бж҃е всѧ́ческихъ и҆ зижди́телю всѣ́хъ, пѣсносло́вѧщыѧ и҆ вѣ́рнѡ покланѧ́ющыѧсѧ держа́вѣ твое́й, ѿ всѧ́кихъ и҆скꙋше́нїй спаса́й.

И҆ ны́нѣ: бг҃оро́диченъ:

Дв҃о пречи́стаѧ, бг҃облагода́тнаѧ, твоего̀ молѝ сн҃а всегда̀, да не посрами́тъ мѧ̀ въ де́нь ѡ҆сꙋжде́нїѧ, но сочте́тъ и҆збра̑ннымъ ѻ҆вца́мъ.

Хва́лимъ, бл҃гослови́мъ:

Катава́сїа: И҆з̾ ѻ҆ц҃а̀ пре́жде вѣ́къ рожде́ннаго сн҃а и҆ бг҃а, и҆ въ послѣ̑днѧѧ лѣ́та воплоще́ннаго ѿ дв҃ы мт҃ре, сщ҃е́нницы по́йте, лю́дїе превозноси́те во всѧ̀ вѣ́ки.

Честнѣ́йшꙋю: не пое́мъ.

Пѣ́снь ѳ҃.

І҆рмо́съ: Ꙗ҆́кѡ сотворѝ тебѣ̀ вели́чїѧ си́льный, дв҃ꙋ ꙗ҆́вль тѧ̀ чи́стꙋ по рождествѣ̀, ꙗ҆́кѡ ро́ждшꙋю без̾ сѣ́мене своего̀ творца̀: тѣ́мъ тѧ̀ бцⷣе велича́емъ.

На дре́вѣ крⷭ҇тнѣмъ пригвозди́лсѧ є҆сѝ хрⷭ҇тѐ бж҃е, и҆ всѧ̑ побѣди́лъ є҆сѝ вра́жїѧ сопроти́внаѧ нача̑ла, и҆ <<рѯ҃ѳ ѡ҆б.: 338>> пе́рвꙋю клѧ́твꙋ потреби́лъ є҆сѝ сп҃се: тѣ́мже тѧ̀ по до́лгꙋ велича́емъ.

Ꙗ҆́кѡ ви́дѣ тѧ̀ сло́ве, а҆́дъ до́лѣ съ дꙋше́ю, воздохнꙋ̀, и҆ всѧ̑ мє́ртвыѧ стра́хомъ ѿрѣшѝ, позна́вшыѧ держа́вꙋ вла́сти твоеѧ̀: тѣ́мже тѧ̀ по до́лгꙋ велича́емъ.

Зна́мєнїѧ сотворѧ́юща, и҆ чꙋдеса̀ стра̑шнаѧ, собо́ръ є҆вре́йскїй зрѧ̀, за́вистїю ᲂу҆бѝ плѣни́вшаго а҆́дъ воскресе́нїемъ свои́мъ, и҆ всѣ́хъ ꙗ҆́кѡ си́ленъ возставлѧ́ющаго.

Воста́лъ є҆сѝ, ꙗ҆́коже ре́клъ є҆сѝ, животода́вче и҆з̾ ме́ртвыхъ, и҆ ꙗ҆ви́лсѧ є҆сѝ ст҃ы̑мъ ᲂу҆ч҃нкѡ́мъ по воста́нїи, зна́мєнїѧ сотвори́вый, и҆ воѻчи́вый слѣпы̑ѧ: съ ни́ми же тѧ̀ во вѣ́ки велича́емъ.

Сла́ва: трⷪ҇ченъ:

Свѣ́тъ ѻ҆ц҃а̀ чтꙋ̀, свѣ́тъ сла́влю и҆ сн҃а, свѣ́тъ воспѣва́ю дх҃а пра́ваго, є҆ди́нъ свѣ́тъ нераздѣ́льный, въ трїе́хъ ли́цѣхъ разꙋмѣва́емый, бг҃а цр҃ѧ̀ всеѧ̀ тва́ри.

И҆ ны́нѣ: бг҃оро́диченъ:

Ꙗ҆ви́вшисѧ простра́ннѣйшаѧ нб҃съ дв҃о чи́стаѧ, вмѣсти́ла є҆сѝ пло́тїю бг҃а неѡпи́саннаго, и҆ родила̀ є҆сѝ всѣ́хъ и҆збавле́нїе, вѣ́рою несꙋмнѣ́нною воспѣва́ющихъ тѧ̀.

Катава́сїа: Тѧ̀ па́че ᲂу҆ма̀ и҆ словесѐ ма́терь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.

Є҆ѯапостїла́рїй пра́здника: Пло́тїю ᲂу҆снꙋ́въ:

Сла́ва: слѣпа́гѡ. Подо́бенъ:

Оу҆́мныѧ моѝ ѻ҆́чи, ѡ҆слѣпле́нныѧ гдⷭ҇и, ѿ мра́чнагѡ грѣха̀, ты̀ просвѣтѝ, вложи́въ ще́дре смире́нїе, и҆ покаѧ́нїѧ ѡ҆мы́й слеза́ми. <<р҃ѻ: 339>>

И҆ ны́нѣ: Подо́бенъ: Жєны̀ ᲂу҆слы́шите:

Мимоиды́й сп҃съ на́шъ, ѡ҆брѣ́те слѣ́па без̾ ѻ҆́чїю, плю́нꙋвъ на зе́млю и҆ сотвори́въ бре́нїе, пома́за є҆го̀, къ сїлѡа́мꙋ посла̀ и҆тѝ и҆ ᲂу҆мы́тисѧ. ѻ҆́нъ же ᲂу҆мы́всѧ, прїи́де ви́дѧ свѣ́тъ тво́й хрⷭ҇тѐ мо́й.

На хвали́техъ поста́вимъ стїхѡ́въ и҃. И҆ пое́мъ стїхи̑ры воскре́сны, гла́съ є҃:

Гдⷭ҇и, запеча́танꙋ гро́бꙋ ѿ беззако́нникѡвъ, проше́лъ и҆з̾ гро́ба, ꙗ҆́коже роди́лсѧ є҆сѝ ѿ бцⷣы: не ᲂу҆разꙋмѣ́ша, ка́кѡ воплоти́лсѧ є҆сѝ, безпло́тнїи твоѝ а҆́гг҃ли. не чꙋ́вствоваша, когда̀ воскре́слъ є҆сѝ, стрегꙋ́щїи тѧ̀ во́ини: ѻ҆боѧ̑ бо запечатлѣ́шасѧ и҆спытꙋ́ющымъ, ꙗ҆ви́шасѧ же чꙋдеса̀ покланѧ́ющымсѧ вѣ́рою та́инствꙋ: є҆́же воспѣва́ющымъ возда́ждь на́мъ ра́дость и҆ ве́лїю ми́лость.

Гдⷭ҇и, верєѝ вѣ́чныѧ сокрꙋши́вый, и҆ ᲂу҆́зы растерза́вый, ѿ гро́ба воскре́слъ є҆сѝ, ѡ҆ста́вль твоѧ̑ погреба̑льнаѧ, во свидѣ́тельство и҆́стиннагѡ тридне́внагѡ твоегѡ̀ погребе́нїѧ: и҆ предвари́лъ є҆сѝ въ галїле́и, въ пеще́рѣ стрего́мый: вели́каѧ твоѧ̀ ми́лость, непостижи́ме сп҃се, поми́лꙋй, и҆ спасѝ на́съ.

Гдⷭ҇и, жєны̀ теко́ша на гро́бъ ви́дѣти тѧ̀ хрⷭ҇та̀, на́съ ра́ди пострада́вшаго: и҆ прише́дше ѡ҆брѣто́ша а҆́гг҃ла на ка́мени сѣдѧ́ща, стра́хомъ ѿва́льшемсѧ, и҆ къ ни̑мъ возопѝ глаго́лѧ: воскре́се гдⷭ҇ь, рцы́те ᲂу҆ч҃нкѡ́мъ, ꙗ҆́кѡ воскре́се ѿ ме́ртвыхъ, спаса́ѧй дꙋ́шы на́шѧ.

Гдⷭ҇и, ꙗ҆́коже и҆зше́лъ є҆сѝ ѿ запеча́таннагѡ гро́ба, та́кѡ вше́лъ є҆сѝ и҆ две́ремъ заключє́ннымъ ко <<р҃ѻ ѡ҆б.: 340>> ᲂу҆ченикѡ́мъ твои́мъ, показꙋ́ѧ и҆̀мъ тѣлє́снаѧ страда̑нїѧ, ꙗ҆̀же под̾ѧ́лъ є҆сѝ сп҃се долготерпѣ́вый: ꙗ҆́кѡ ѿ сѣ́мене дв҃дова ꙗ҆́звы претерпѣ́лъ є҆сѝ: ꙗ҆́кѡ сн҃ъ же бж҃їй мі́ръ свободи́лъ є҆сѝ: вели́каѧ твоѧ̀ ми́лость, непостижи́ме сп҃се, поми́лꙋй, и҆ спасѝ на́съ.

И҆́ны стїхи̑ры а҆нато́лїевы:

Гдⷭ҇и, цр҃ю̀ вѣкѡ́въ, и҆ тво́рче всѣ́хъ, на́съ ра́ди распѧ́тїе и҆ погребе́нїе пло́тїю прїе́мый, да на́съ ѿ а҆́да свободи́ши всѣ́хъ. ты̀ є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.

Гдⷭ҇и, пресїѧ̑ющаѧ твоѧ̑ чꙋдеса̀ кто̀ и҆сповѣ́сть; и҆лѝ кто̀ возвѣсти́тъ стра̑шнаѧ твоѧ̑ та̑инства; вочеловѣ́чивыйсѧ бо на́съ ра́ди ꙗ҆́кѡ са́мъ восхотѣ́лъ є҆сѝ держа́вꙋ ꙗ҆ви́лъ є҆сѝ си́лы твоеѧ̀. крⷭ҇то́мъ бо твои́мъ разбо́йникꙋ ра́й ѿве́рзлъ є҆сѝ, и҆ погребе́нїемъ твои́мъ верєѝ а҆́довы сокрꙋши́лъ є҆сѝ: воскресе́нїемъ же твои́мъ всѧ́чєскаѧ ѡ҆богати́лъ є҆сѝ, благоꙋтро́бне гдⷭ҇и, сла́ва тебѐ.

Мѷронѡ́сицы жєны̀ гро́ба твоегѡ̀ дости́гше, ѕѣлѡ̀ ра́нѡ и҆ска́хꙋ тебѐ мѵ́ры пома́зати, безсме́ртнаго сло́ва и҆ бг҃а, и҆ а҆́гг҃ла глаго́лы ѡ҆гласи́вшесѧ, возвраща́хꙋсѧ ра́достїю, а҆пⷭ҇лѡмъ возвѣсти́ти ꙗ҆́вѣ: ꙗ҆́кѡ воскре́слъ є҆сѝ животѐ всѣ́хъ, и҆ пода́лъ є҆сѝ мі́рови ѡ҆чище́нїе, и҆ ве́лїю ми́лость.

Сті́хъ: При́зри на мѧ̀, и҆ поми́лꙋй мѧ̀.

Самогла́сенъ слѣпа́гѡ, гла́съ и҃:

За милосе́рдїе ми́лости воплоти́выйсѧ хрⷭ҇тѐ бж҃е, свѣ́та лише́ннаго ѿ ᲂу҆тро́бы, милосе́рдїемъ неизрече́нныхъ щедро́тъ, сїѧ́нїѧ бж҃е́ственнагѡ сподо́билъ є҆сѝ, сегѡ̀ <<рѻ҃а: 341>> зѣ́ницамъ пе́рстїю созда́тельными пе́рсты твои́ми прикоснꙋ́выйсѧ: са́мъ и҆ ны́нѣ свѣтода́телю, и҆ на́шѧ ѡ҆зарѝ дꙋшє́внаѧ чꙋ̑вства, ꙗ҆́кѡ є҆ди́нъ независтнода́тель.

Сла́ва: гла́съ и҃:

Кто̀ возглаго́летъ си̑лы твоѧ̀ хрⷭ҇тѐ; и҆лѝ кто̀ и҆зочте́тъ чꙋде́съ твои́хъ мно́жєства; сꙋгꙋ́бъ бо ꙗ҆́кѡ ви́дѣнъ бы́лъ є҆сѝ на землѝ за бла́гость, сꙋгꙋ̑бы и҆ цѣльбы̑ недꙋ́гꙋющымъ подава́лъ є҆сѝ: не то́чїю бо тѣлє́ныѧ ѻ҆́чи ѿве́рзлъ є҆сѝ, и҆́же ѿ ᲂу҆тро́бы слѣпо́мꙋ, но и҆ дꙋшє́вныѧ: тѣ́мже бг҃а тѧ̀ и҆сповѣ́даше таѧ́щагосѧ, и҆ всѣ̑мъ подаю́ща ве́лїю ми́лость.

И҆ ны́нѣ: Преблгⷭ҇ве́нна є҆сѝ: Славосло́вїе вели́кое, и҆ ѿпꙋ́стъ.

Стїхи́ра ᲂу҆́треннѧѧ, гла́съ и҃:

Марі́ины сле́зы не всꙋ́е пролива́ютсѧ те́плѣ: се́ бо сподо́бисѧ и҆ ᲂу҆ча́щихъ а҆́гг҃лѡвъ, и҆ видѣ́нїѧ самагѡ̀ і҆и҃са: но є҆щѐ земна̑ѧ мꙋ́дрствꙋетъ, ꙗ҆́кѡ жена̀ немощна́ѧ. тѣ́мже и҆ ѿсыла́етсѧ не прикаса́тисѧ хрⷭ҇тꙋ̀: но ѻ҆ба́че проповѣ́дница посыла́етсѧ твои̑мъ ᲂу҆ченикѡ́мъ: и҆̀мъ же благовѣствова́нїе носѧ́щи, є҆́же ко ѻ҆те́ческомꙋ жре́бїю восхо́дъ возвѣща́етъ. съ не́ю же сподо́би и҆ на́съ ꙗ҆вле́нїѧ твоегѡ̀ влⷣко гдⷭ҇и.

На лїтꙋргі́и блажє́нна, гла́са є҆гѡ̀:

Разбо́йникъ на крестѣ̀ бг҃а тѧ̀ бы́ти вѣ́ровавъ, хрⷭ҇тѐ, и҆сповѣ́да тѧ̀ чи́стѣ ѿ се́рдца: помѧни́ мѧ гдⷭ҇и, вопїѧ̀, во црⷭ҇твїи твое́мъ.

И҆́же на дре́вѣ крⷭ҇тнѣмъ жи́знь процвѣ́тшаго ро́дꙋ на́шемꙋ, и҆ и҆зсꙋши́вша ю҆́же ѿ дре́ва клѧ́твꙋ, ꙗ҆́кѡ сп҃са и҆ содѣ́телѧ согла́снѡ воспои́мъ. <<рѻ҃а ѡ҆б.: 342>>

Распе́ншемꙋсѧ тебѣ̀ хрⷭ҇тѐ, посредѣ̀ двою̀ ѡ҆сꙋждє́нною разбо́йникꙋ, є҆ди́нъ ᲂу҆́бѡ хꙋ́лѧ тѧ̀, ѡ҆сꙋжде́нъ бы́сть пра́веднѣ: дрꙋгі́й же и҆сповѣ́даѧ тѧ̀, въ ра́й всели́сѧ.

Ко а҆по́столѡвъ ли́кꙋ прише́дшыѧ жены̀ честны́ѧ возопи́ша: хрⷭ҇то́съ воскре́се, ꙗ҆́кѡ влⷣцѣ и҆ содѣ́телю томꙋ̀ поклони́мсѧ.

И҆ ѿ канѡ́на слѣпа́гѡ, пѣ́снь ѕ҃.

По вхо́дѣ тропа́рь воскре́сенъ. Сла́ва: конда́къ: Дꙋше́вныма ѻ҆чи́ма ѡ҆слѣпле́нъ: И҆ ны́нѣ: па́схи: А҆́ще и҆ во гро́бъ: Прокі́менъ, гла́съ и҃: Помоли́тесѧ и҆ воздади́те гдⷭ҇ви бг҃ꙋ на́шемꙋ. Сті́хъ: Вѣ́домъ во і҆ꙋде́и бг҃ъ, во і҆и҃ли ве́лїе и҆́мѧ є҆гѡ̀. А҆пⷭ҇лъ дѣѧ́нїй, зача́ло л҃и: Бы́сть и҆дꙋ́щымъ а҆пⷭ҇лѡмъ на мл҃твꙋ: А҆ллилꙋ́їа, гла́съ и҃: При́зри на мѧ̀, и҆ поми́лꙋй мѧ̀. Сті́хъ: Стопы̀ моѧ̀ напра́ви по словесѝ твоемꙋ̀. Є҆ѵⷢ҇лїе і҆ѡа́нна, зача́ло л҃д: Мимоиды́й і҆и҃съ ви́дѣ человѣ́ка слѣ́па ѿ рождества̀: Прича́стный: Тѣ́ло хрⷭ҇то́во: Дрꙋгі́й: Хвали́те гдⷭ҇а съ нб҃съ:

[зрѝ] Слꙋ́жбꙋ ст҃а́гѡ слꙋчи́вшагѡсѧ въ недѣ́лю сїю̀ пое́мъ на повече́рїи.