МЦⷭ҇А А҆́ВГꙊСТА ВЪ Є҃І ДН҃Ь

ᲂу҆спе́нїе пречи́стыѧ влⷣчцы на́шеѧ бцⷣы . =На ма́лѣй вече́рни , на гдⷭ҇и вᲂзва́хъ , стⷯры , на д҃ . гла́съ , а҃ . поⷣ . нбⷭ҇нымъ чино́мъ . Б=ез̾сме́ртнымъ ᲂу҆спе́нїемъ бж҃їѧ мт҃ре ,꙳ а҆́нг҃льскїи сᲂбо́ръ ра́дꙋетсѧ .꙳ и҆ се́й ѿхᲂдѧ́щи ,꙳ вᲂ ѻ҆би́тели вѣ́чныѧ вселѧ́етсѧ .꙳ и҆ к̾ весе́лїю нбⷭ҇нᲂмꙋ прехᲂдѧ́щи ,꙳ в̾ бжⷭ҇твенꙋю ра́дᲂсть и҆ вѣ́чнᲂе наслажде́нїе . Жи́знь вы́шнюю жела́ющи ,꙳ сїю̀ ѡ҆ста́вила є҆сѝ бг҃ᲂрᲂди́тельнице ,꙳ ѻ҆трᲂкᲂви́це дѣ́вства цвѣ́те ,꙳ хрⷭ҇та̀ ро́ждьшаѧ всѣ́хъ живᲂта̀ .꙳ бл҃гᲂгᲂвѣ́йнѡ пред̾стᲂѧ́ше а҆пⷭ҇льскїи сᲂбо́ръ ,꙳ чⷭ҇тно́мꙋ ти пᲂгребе́нїю бг҃ᲂневѣ́стнаѧ . Твᲂи́мъ и҆схо́днымъ пѣ́нїемъ и҆ над̾гро́бнымъ ,꙳ вᲂздꙋ́хъ ᲂу҆́бѡ ѡ҆свѧти́сѧ ,꙳ вᲂсхᲂжде́нїемъ тѝ мт҃и бг҃а чл҃кᲂлю́бца ,꙳ чꙋ́дᲂ стра́шнᲂ бцⷣе неи҆скꙋсᲂмꙋ́жнаѧ .꙳ тѣ́мже вѣ́рнѡ пᲂклᲂнѧ́емтисѧ вѣ́рнїи ,꙳ бцⷣе неи҆скꙋсᲂбра́чнаѧ .

сла́ва , и҆ ны́нѣ . гла́съ , ѕ҃ . Прїиди́те всеми́рнᲂе ᲂу҆спе́нїе , всенепᲂро́чныѧ бцⷣы пра́зднꙋемъ . дне́сь бᲂ а҆́нг҃ли тᲂржествꙋ́ютъ , чⷭ҇тно́е преставле́нїе бж҃їѧ мт҃ре , и҆ к̾ весе́лїю на́съ землены́хъ призыва́ютъ , вᲂпи́ти немо́лчнымъ гла́сᲂмъ , ра́дꙋйсѧ преста́вльшаѧсѧ ѿ землѝ , и҆ к̾ нбⷭ҇нымъ ѻ҆би́телемъ пресе́льшисѧ . ра́дꙋйсѧ ꙗ҆́же ᲂу҆чени́ческїи ли́къ , ѻ҆́блакᲂмъ ле́гкимъ вᲂ є҆ди́нᲂ сᲂбра́вши , ра́дꙋйсѧ ᲂу҆пᲂва́нїе и҆ спасе́нїе на́ше , тѧ́ бᲂ хрⷭ҇тїа́нскїи ро́дъ непреста́ннѡ ᲂу҆блажа́емъ . прᲂки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ . Сᲂбо́ръ ᲂу҆чени́къ ,꙳ и҆ бжⷭ҇твеныхъ а҆пⷭ҇лъ ꙳ сᲂвᲂкꙋпи́сѧ , пᲂгребстѝ ꙳ бг҃ᲂпрїѧ́тнᲂе тѣ́лᲂ ,꙳ є҆ди́ныѧ бг҃ᲂмт҃ре .

сти́хъ : вᲂскрⷭ҇нѝ гдⷭ҇и в̾ пᲂко́й тво́й ,꙳ ты̀ и҆ кїѡ́тъ ст҃ы́ни твᲂеѧ̀ . Ты̀ и҆́же и҆з̾ неѧ̀ ꙳ вᲂсїѧ́выи неи҆зрече́ннѡ ,꙳ сн҃ᲂлѣ́пнѡ дх҃ъ всечи́стыи ,꙳ рꙋка́ма си прїимѝ ꙳ бцⷣы влⷣкᲂ .

сти́хъ : клѧ́тсѧ гдⷭ҇ь дв҃дꙋ и҆́стинᲂю ,꙳ и҆ не ѿве́ржетсѧ є҆ѧ̀ . Є҆гда̀ кᲂ и҆з̾ тебѐ ꙳ ро́ждьшемꙋсѧ преста́висѧ ,꙳ снидо́шасѧ на ѻ҆́блацѣхъ ,꙳ тѣ́лᲂ твᲂѐ пᲂгребстѝ ꙳ дв҃ᲂ а҆пⷭ҇ли .

сла́ва , и҆ ны́нѣ . Две́ри нбⷭ҇ныѧ ꙳ вᲂз̾мѣ́тесѧ ,꙳ зрѧ́ще две́рь вы́шнѧгѡ ,꙳ и҆дꙋ́щꙋ сᲂ сла́вᲂю ꙳ к̾ сн҃ꙋ и҆ бг҃ꙋ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Въ ржⷭ҇твѣ̀ дв҃ствᲂ сᲂхрани́ла є҆сѝ , и҆ вᲂ ᲂу҆спе́нїи ми́ра не ѡ҆ста́ви бцⷣе . преста́вибᲂсѧ к̾ живᲂтꙋ̀ , мт҃и сꙋ́щи живᲂта̀ . и҆ мᲂли́твами твᲂи́ми , и҆збавлѧ́еши ѿ сме́рти дш҃а на́ша .= та́же , є҆ктенїѧ̀ ма́лаѧ . =и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , а҃ . Ѽ= ди́внᲂе чꙋ́дᲂ , и҆сто́чникъ жи́зни во́ грᲂбѣ пᲂлага́етсѧ , и҆ лѣ́ствица к̾ нб҃сѝ гро́бъ быва́етъ . весели́сѧ гепсима́нїи бцⷣынъ ст҃ы́и до́ме . вᲂзᲂпїе́мъ вѣ́рнїи , гаврїи́ла и҆мꙋ́ще чинᲂнача́льника , ѡ҆бра́дᲂваннаѧ ра́дꙋисѧ с̾ тᲂбо́ю гдⷭ҇ь , пᲂдаѧ́и ми́рᲂви тᲂбо́ю ве́лїю млⷭ҇ть .= Д=и́вны твᲂѧ̀ та́йны бцⷣе , вы́шнѧгѡ прⷭ҇то́лъ ꙗ҆ви́сѧ влⷣчце , и҆ ѿ землѝ к̾ нб҃сѝ преста́висѧ дне́сь , сла́ва твᲂѧ̀ бг҃ᲂлѣ́пнаѧ , бг҃ᲂпᲂдо́бными сїѧ́ющи чꙋдесы̀ . дв҃ы с̾ мт҃рїю цр҃е́вᲂю , на высᲂтꙋ̀ вᲂзнеси́тесѧ . ѡ҆бра́дᲂваннаѧ ра́дꙋисѧ с̾ тᲂбо́ю гдⷭ҇ь , пᲂдаѧ́и ми́рᲂви тᲂбо́ю ве́лїю млⷭ҇ть . Твᲂѐ сла́вѧтъ ᲂу҆спе́нїе , вла́сти и҆ престо́ли , нача́ла и҆ гдⷭ҇ьства , си́лы и҆ херꙋви́ми , и҆ стра́шнаѧ серафи́ми . ра́дꙋютсѧ земленᲂро́днїи , ѡ҆ бжⷭ҇твенѣй тѝ сла́вѣ красѧ́щесѧ . припа́даютъ цр҃їе , сᲂ а҆рха́нг҃лы , и҆ а҆́нг҃лы , и҆ вᲂспѣва́ютъ , ѡ҆бра́дᲂваннаѧ ра́дꙋисѧ с̾ тᲂбо́ю гдⷭ҇ь , пᲂдаѧ́и ми́рᲂви тᲂбо́ю ве́лїю млⷭ҇ть .

сла́ва , и҆ ны́нѣ . гла́съ , то́йже . Бг҃ᲂнача́льнымъ манᲂве́нїемъ , ѿ всю́дꙋ бг҃ᲂно́снїи а҆пⷭ҇ли , ѻ҆́блаки высо́че взима́еми , дᲂше́дше пречⷭ҇тагѡ , и҆ живᲂнача́льнагᲂ тѝ тѣ́ла , любе́знᲂ лᲂбыза́хꙋ . превы́шнѧѧ же нбⷭ҇ныѧ си́лы , сᲂ свᲂи́мъ влⷣкᲂю прише́дше , бг҃ᲂпрїѧ́тнᲂе и҆ пречи́стᲂе тѣ́лᲂ пред̾сыла́юще , ᲂу҆́жасᲂмъ ѡ҆держи́ми . прекрасно́же пред̾и҆дѧ́хꙋ , и҆ неви́димᲂ вᲂпїѧ́хꙋ , превы́шнимъ чинᲂнача́лїемъ , сѐ всецр҃ца бг҃ᲂѻ҆трᲂкᲂви́ца прїи́де . вᲂзми́те врата̀ , и҆ сїю̀ преми́рнᲂ пᲂдъи҆ми́те , приснᲂсꙋ́щагѡ мт҃рь свѣ́та . тᲂѧ́ бᲂ ра́ди всеси́льнᲂе чл҃кѡмъ спасе́нїе бы́сть , на ню́ же взира́ти немо́жемъ , и҆ то́й дᲂсто́йнꙋю че́сть вᲂзда́ти не́мᲂщнѡ , тᲂѧ́ бᲂ преи҆зѧ́щнᲂе прехо́дитъ всѧ́кꙋ мы́сль . тѣ́мже пречⷭ҇таѧ бцⷣе , при́снѡ с̾ живᲂно́снымъ цр҃е́мъ , и҆ ржⷭ҇тво́мъ живꙋ́щи , мᲂли́сѧ вы́нꙋ , сᲂхрани́ти и҆ спастѝ , ѿ всѧ́кагѡ прило́га прᲂти́вна , но́выѧ лю́ди твᲂѧ̀ . твᲂе́ бᲂ застꙋпле́нїе стѧжа́хᲂмъ , во́ вѣки свѣтᲂѧвле́ннѡ блажа́ще .

та́же , вы́хᲂдъ . прᲂки́менъ , дню̀ .

Ѿ= бытїѧ̀ , чте́нїе .=

И҆зы́де і҆а́кѡвъ ѿ стꙋденца̀ клѧ́твеннагѡ , и҆ и҆́де в̾ харра́нь , и҆ ѡ҆брѣ́те мѣ́стᲂ , и҆ ста̀ тꙋ̀ . заше́дшꙋ же сл҃нцꙋ , взѧ́тъ ѿ ка́менїѧ мѣ́ста тᲂгѡ̀ , и҆ пᲂлᲂжѝ є҆̀ в̾ вᲂз̾гла́вїе себѣ̀ . и҆ спа̀ на мѣ́стѣ то́мъ , и҆ со́нъ ви́дѣ . и҆ сѐ лѣ́ствица ᲂу҆твержена̀ на землѝ , є҆́й же глава̀ дᲂсѧза́ше дᲂ небесѐ . и҆ а҆́нг҃ли бж҃їи вᲂз̾хᲂжда́хꙋ , и҆ низ̾хᲂжда́хꙋ пᲂ не́й . гдⷭ҇ь же ᲂу҆твержа́шесѧ на не́й , и҆ речѐ , а҆́зъ бг҃ъ а҆враа́мѡвъ ѻ҆ц҃а твᲂегѡ̀ , и҆ бг҃ъ и҆саа́кѡвъ , небо́йсѧ . землѧ̀ на не́й же ты̀ спи́ши , тебѣ̀ да́мъ ю҆̀ , и҆ сѣ́мени твᲂемꙋ̀ . и҆ бꙋ́детъ сѣ́мѧ твᲂѐ , ꙗ҆́кѡ пѣсо́къ земны́и , и҆ распрᲂстрани́тсѧ на́ мᲂре , и҆ на ли́вꙋ , на сѣ́веръ , и҆ вᲂсто́къ . и҆ бл҃гᲂслᲂвѧ́тсѧ ѡ҆ тебѣ̀ всѧ̀ кᲂлѣ́на земна́ѧ , и҆ ѡ҆ сѣ́мени твᲂе́мъ . и҆ сѐ а҆́зъ с̾ тᲂбо́ю , сᲂхранѧ́ѧи тѧ̀ на всѧ́кᲂмъ пꙋтѝ , а҆́мᲂже а҆́ще по́йдеши . и҆ вᲂз̾вращꙋ́ тѧ в̾ зе́млю сїю̀ , ꙗ҆́кѡ не ѡ҆ста́влю тебѐ , до́нде же сᲂтвᲂри́ти ми всѧ̀ є҆ли́ка гл҃ахъ тѝ . и҆ вᲂста́въ і҆а́кѡвъ ѿ сна̀ свᲂегѡ̀ , и҆ речѐ , ꙗ҆́кѡ є҆́сть гдⷭ҇ь на мѣ́стѣ се́мъ , а҆́зъ же невѣ́дѣхъ . и҆ ᲂу҆бᲂѧ́сѧ , и҆ речѐ , ꙗ҆́кѡ стра́шнᲂ мѣ́стᲂ сѐ , нѣ́сть сѐ , нᲂ до́мъ бж҃їи , и҆ сі́ѧ врата̀ нбⷭ҇наѧ .

Ѿ= пррⷪ҇чества і҆єзекі́илева , чте́нїе .=

Бꙋ́детъ ѿ ѻ҆сма́гѡ днѐ и҆ про́чее , сᲂтвᲂрѧ́тъ і҆єре́и , на ѻ҆лтарѝ всесᲂжже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на вᲂсто́къ , и҆ сїѧ̀ бѧ́хꙋ затвᲂре́на . и҆ речѐ гдⷭ҇ь кᲂ мнѣ̀ , врата̀ сїѧ̀ затвᲂре́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквᲂзѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затвᲂре́на . занѐ и҆гꙋ́менъ се́й сѧ́детъ в̾ни́хъ снѣ́сти хлѣ́бъ . пᲂ пꙋтѝ є҆ла́мскихъ вра́тъ вни́детъ , и҆ пᲂ пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

Ѿ= при́тчей , чте́нїе .=

Премꙋ́дрᲂсть сᲂзда̀ себѣ̀ хра́мъ , и҆ ᲂу҆твердѝ сто́лпъ се́дмь . закла̀ свᲂѧ̀ же́ртвенаѧ , и҆ черпа̀ в̾ ча́ши свᲂе́й вино̀ , и҆ ᲂу҆гᲂто́ва свᲂю̀ трапе́зꙋ . пᲂсла̀ свᲂѧ̀ рабы̀ , сᲂзыва́ющи съ высо́кимъ прᲂпᲂвѣ́данїемъ на ча́шꙋ , гл҃ющи , и҆́же є҆́сть безꙋ́менъ , да ᲂу҆клᲂни́тсѧ кᲂ мнѣ̀ . и҆ тре́бꙋющимъ ᲂу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ є҆́же че́рпахъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрᲂсть , да пᲂживетѐ . и҆спра́вите вѣ́дѣнїи в̾ ра́зꙋмѣ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧи же нечести́вагᲂ пᲂрече́тъ себѐ . ѡ҆бличе́нїе бᲂ нечести́вᲂмꙋ мᲂзо́лїе є҆мꙋ̀ . не ѡ҆блича́й ѕлы́хъ , да не вᲂз̾ненави́дѧтъ тебѐ . ѡ҆блича́й премꙋ́дра , и҆ вᲂз̾лю́битъ тѧ . да́й премꙋ́дрꙋ винꙋ̀ , и҆ премꙋ́дрѣе бꙋ́детъ . сказа́й пра́веднᲂмꙋ , и҆ прилᲂжи́тъ прїима́ти . зача́лᲂ премꙋ́дрᲂсти , стра́хъ гдⷭ҇нь , и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га . си́мъ бᲂ ѻ҆́бразᲂмъ пᲂживе́ши мно́гᲂ лѣ́тъ , и҆ прилᲂжа́т̾тисѧ лѣ́та живᲂтꙋ̀ .

На литі́и , стихѣ́ры . гла́съ , а҃ . Пᲂдᲂба́ше самᲂви́дцемъ сло́вꙋ и҆ слꙋга́мъ , и҆ є҆́же по́ плᲂти мт҃ри є҆гѡ̀ ᲂу҆спе́нїе ви́дѣти , кᲂне́чнᲂе є҆ли́кѡ на не́й та́иньствᲂ , да не то́кмѡ є҆́же ѿ землѝ спа́сᲂвᲂ вᲂсхᲂжде́нїе ᲂу҆́зрѧтъ , нᲂ и҆ ро́ждьшїѧ є҆гѡ̀ преставле́нїе свидѣ́тельствꙋютъ . тѣ́мже ѿ всю́дꙋ бжⷭ҇твеннᲂю си́лᲂю сᲂбра́вшесѧ , сїѡ́на дᲂстиго́ша . и҆ на́ нб҃ᲂ и҆дꙋ́щꙋю пред̾сыла́хꙋ , вы́шшꙋю херꙋви́мъ . є҆́й же и҆ мы̀ с̾ ни́ми пᲂкланѧ́емсѧ , ꙗ҆́кѡ мᲂлѧ́щейсѧ ѡ҆ дш҃а́хъ на́шихъ . гла́съ , в҃ . Ꙗ҆́же нб҃съ вы́шши сꙋ́щи , и҆ херꙋви́мъ сла́внѣйши , и҆ всеѧ̀ тва́ри честнѣ́йши , ꙗ҆́же премно́гїѧ ра́ди чистᲂты̀ , прⷭ҇нᲂсꙋ́щагѡ сꙋщества̀ прїѧ́телище бы́вши , в̾ сн҃о́внюю рꙋкꙋ̀ , дне́сь всест҃ꙋ́ю предае́тъ дш҃ꙋ , с̾ не́ю и҆спᲂлнѧ́ютсѧ всѧ́ческаѧ ра́дᲂсти , и҆ на́мъ да́рꙋетъ ве́лїю млⷭ҇ть . Всенепᲂро́чнаѧ невѣ́ста , и҆ мт҃и бл҃гᲂвᲂле́нїѧ ѻ҆́ч҃а , ꙗ҆́же бг҃ꙋ прᲂнарече́ннаѧ вᲂ свᲂѐ є҆мꙋ̀ жили́ще , несли́тнагѡ сᲂєдине́нїѧ , дне́сь пречⷭ҇тꙋю дш҃ꙋ твᲂрцꙋ̀ и҆ бг҃ꙋ предае́тъ . ю҆́же беспло́тныѧ си́лы бг҃ᲂлѣ́пнѡ пᲂд̾є́млютъ , и҆ к̾ живᲂтꙋ̀ преставлѧ́етсѧ , сꙋ́щаѧ мт҃и живᲂтꙋ̀ , свѣща̀ непристꙋ́пнагѡ свѣ́та , спасе́нїе вѣ́рнымъ , и҆ ᲂу҆пᲂва́нїе дш҃а́мъ на́шимъ . гла́съ , г҃ . Прїидѣ́те всѝ кᲂнцы̀ землені́и , честно́е преставле́нїе бж҃їѧ мт҃ре вᲂсхва́лимъ , в̾ рꙋ́цѣ бᲂ сн҃а дш҃ꙋ непᲂро́чнꙋю пᲂлᲂжѝ . тѣ́мже ст҃ы́мъ ᲂу҆спе́нїемъ є҆ѧ̀ , ми́ръ ѡ҆живᲂтвᲂри́сѧ , вᲂ ѱалмѣ́хъ и҆ пѣ́нїихъ и҆ пѣ́снехъ дх҃о́вныхъ , сᲂ беспло́тными и҆ а҆пⷭ҇лы пра́зднꙋемъ свѣ́тлѡ . сла́ва . гла́съ , є҃ . Прїиди́те праз̾днᲂлю́бныхъ сᲂбо́ри , прїиди́те ли́къ сᲂста́вимъ . прїиди́те вѣнча́емъ пѣ́сньми цр҃кᲂвь , ᲂу҆пᲂкᲂе́нїемъ кᲂвче́га бж҃їѧ . дне́сь бᲂ нб҃ᲂ прᲂстира́етъ нѣ́дра , прїе́млѧ ро́ждьшꙋю всѣ́ми невмѣсти́магѡ , и҆ землѧ̀ и҆сто́чникъ жи́зни , ѿдаю́щи бл҃гᲂслᲂве́нїе , ᲂу҆краша́етсѧ бл҃гᲂлѣ́пїемъ . а҆́нг҃ли ли́къ сᲂставлѧ́ютъ сᲂ а҆пⷭ҇лы , ᲂу҆жа́снѡ взира́юще , ѿ живᲂта̀ в̾ живо́тъ преставлѧ́емꙋ , ро́ждьшꙋю нача́льника жи́зни . всѝ пᲂклᲂни́мсѧ є҆́й мᲂлѧ́щесѧ , сро́дна присвᲂе́нїѧ незабꙋ́ди влⷣчце , вѣ́рнѡ пра́зднꙋющихъ всест҃о́е твᲂѐ ᲂу҆спе́нїе .

и҆ ны́нѣ . гла́съ , то́йже . Вᲂспо́йте лю́дїе , мт҃ри бг҃а на́шегѡ вᲂспо́йте , дне́сь бᲂ всесвѣ́тлꙋю дш҃ꙋ свᲂю̀ , в̾ пречи́стыѧ дла́ни , и҆́же и҆з̾ неѧ̀ вᲂпло́щшагᲂсѧ без̾ сѣ́мене предае́тъ . є҆го́же и҆ мо́литъ непреста́ннѡ , дарᲂва́ти вселе́ннѣй ми́ръ , и҆ ве́лїю млⷭ҇ть .

На стихо́внѣ , стихѣ́ры . гла́съ , д҃ . Прїиди́те вᲂспᲂе́мъ лю́дїе , прест҃ꙋ́ю дв҃ꙋ чⷭ҇тꙋю , и҆з̾ неѧ́ же неи҆з̾рече́ннѡ про́йде , вᲂпло́щьсѧ сло́вᲂ ѻ҆́ч҃ее , зᲂвꙋ́ще и҆ гл҃юще , бл҃гᲂслᲂве́на ты̀ в̾ жена́хъ , бл҃же́ннᲂ чре́вᲂ вмѣсти́вшее хрⷭ҇та̀ . тᲂгѡ̀ ст҃ы́мъ рꙋка́мъ дш҃ꙋ преда́вши , мᲂли́сѧ пречⷭ҇таѧ спасти́сѧ дш҃а́мъ на́шимъ .

сти́хъ : вᲂскрⷭ҇нѝ гдⷭ҇и в̾ пᲂко́й тво́й ,꙳ ты̀ и҆ кїѡ́тъ ст҃ы́ни твᲂеѧ̀ . Дв҃дскꙋю пѣ́снь , дне́сь лю́дїе вᲂспᲂе́мъ хрⷭ҇тꙋ̀ бг҃ꙋ , приведꙋ́тсѧ речѐ цр҃ю дв҃ы вᲂслѣ́дъ є҆ѧ̀ , и҆ и҆́скренѧѧ є҆ѧ̀ приведꙋ́тсѧ в̾ весе́лїе и҆ ра́дᲂсть . и҆́бᲂ ѿ сѣ́мене дв҃дᲂва , є҆ѧ́же ра́ди мы̀ ѡ҆бᲂжи́хᲂмсѧ . в̾ рꙋ́цѣ свᲂегѡ̀ сн҃а и҆ влⷣки , сла́внѡ и҆ па́че сло́ва прелага́етсѧ . ю҆́же ꙗ҆́кѡ мт҃рь бж҃їю вᲂспѣва́юще вᲂпїе́мъ и҆ гл҃емъ , спасѝ на́съ и҆спᲂвѣ́дающихъ тѧ̀ бцⷣꙋ , ѿ всѧ́кагѡ ѡ҆бстᲂѧ́нїѧ , и҆ и҆зба́ви ѿ бѣ́дъ дш҃а на́ша .

сти́хъ : клѧ́тсѧ гдⷭ҇ь дв҃дꙋ и҆́стинᲂю ,꙳ и҆ не ѿве́ржетсѧ є҆ѧ̀ . Всечестно́е твᲂѐ ᲂу҆спе́нїе прест҃а́ѧ дв҃ᲂ чи́стаѧ , а҆́нг҃лъ мно́жествᲂ на́ нб҃си , и҆ чл҃ческїи ро́дъ на землѝ ᲂу҆бл҃жа́етъ , ꙗ҆́кѡ мт҃и бы́сть твᲂрца̀ всѣ́хъ хрⷭ҇та̀ бг҃а . тᲂгѡ̀ мᲂлѧ́щи ѡ҆ на́съ , непреста́й мо́лимсѧ , и҆́же на тѧ̀ с̾ бг҃ᲂмъ ᲂу҆пᲂва́нїе пᲂло́жшихъ , бцⷣе всепѣ́таѧ и҆ неи҆скꙋсᲂбра́чнаѧ .

сла́ва , и҆ ны́нѣ . гла́съ , то́йже . Є҆гда̀ и҆зы́де бцⷣе дв҃ᲂ , кᲂ и҆з̾ тебѣ̀ ро́ждьшемꙋсѧ неи҆зрече́ннѡ , бѧ́ше і҆а́кѡвъ бра́тъ бж҃їи , и҆ пе́рвыи сщ҃еннᲂнача́льникъ . пе́тръ же честнѣ́йшїи верхо́вникъ , бг҃ᲂсло́вцемъ нача́льникъ , и҆ ве́сь бжⷭ҇твенныи а҆пⷭ҇льскїи ли́къ , ꙗ҆вле́ннымъ бг҃ᲂсло́вїемъ пѣснᲂсло́вѧще , бжⷭ҇твеннᲂе и҆ стра́шнᲂе , хрⷭ҇та̀ бг҃а смᲂтре́нїѧ та́иньствᲂ . и҆ живᲂнача́льнᲂе и҆ бг҃ᲂпрїѧ́тнᲂе твᲂѐ тѣ́лᲂ пᲂгре́бше , ра́дᲂвахꙋсѧ препѣ́таѧ . превы́ше же прест҃ы́ѧ и҆ старѣ́йшїѧ а҆́нг҃льскїѧ си́лы , чꙋдесѝ дивѧ́щесѧ , прини́кше дрꙋ́гъ ко́ дрꙋгꙋ гл҃ахꙋ , вᲂзми́те ва́ша врата̀ , и҆ вᲂспрїими́те ро́ждьшꙋю нб҃ꙋ и҆ землѝ твᲂрца̀ . славᲂслᲂвле́нїи же вᲂспᲂе́мъ , честно́е и҆ ст҃о́е тѣ́лᲂ вмѣсти́вшее на́мъ неви́димагѡ гдⷭ҇а . тѣ́мже и҆ мы̀ па́мѧть твᲂю̀ пра́зднꙋюще , вᲂпїе́мъ ти препѣ́таѧ , хрⷭ҇тїа́нскїи ро́гъ вᲂзнесѝ , и҆ спасѝ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Въ ржⷭ҇твѣ̀ дв҃ствᲂ сᲂхрани́ла є҆сѝ , и҆ вᲂ ᲂу҆спе́нїи ми́ра не ѡ҆ста́ви бцⷣе . преста́вибᲂсѧ к̾ живᲂтꙋ̀ , мт҃и сꙋ́щи живᲂта̀ . и҆ мᲂли́твами твᲂи́ми , и҆збавлѧ́еши ѿ сме́рти дш҃а на́ша .= три́жды .=

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . Пᲂ а҃ , стихᲂло́гїи , сѣда́ленъ . гла́съ , а҃ . Всечестны́и ли́къ , премꙋ́дрыхъ а҆пⷭ҇лъ сᲂбра́сѧ чꙋ́днѡ , пᲂгребстѝ сла́внѡ тѣ́лᲂ твᲂѐ пречⷭ҇тᲂе , бцⷣе всепѣ́таѧ . є҆́же вᲂспѣ́ша и҆ а҆́нг҃лъ мно́жества , преставле́нїе твᲂѐ че́стнᲂ хва́лѧще , є҆́же вѣ́рᲂю пра́зднꙋемъ . сла́ва , и҆ нн҃ѣ , то́йже .

Пᲂ в҃ , стихᲂло́гїи , сѣда́лен̾ . гла́съ , г҃ . Въ ржⷭ҇твѣ̀ твᲂе́мъ зача́тїе без̾ сѣ́меннᲂ , вᲂ ᲂу҆спе́нїи твᲂе́мъ ме́ртвᲂсть нетлѣ́нна , чꙋ́дᲂ в̾ чꙋдесѝ сꙋгꙋ́бᲂ стече́сѧ бцⷣе , ка́кᲂ бᲂ неи҆скꙋсᲂмꙋ́жнаѧ , младᲂпита́тельница чⷭ҇таѧ сꙋ́щи , ка́кᲂже мт҃и бг҃ꙋ мертвᲂно́сна ᲂу҆ха́ющи . тѣ́мже сᲂ а҆́нг҃лѡмъ вᲂпїе́мъ ти , ра́дꙋисѧ ѡ҆бра́дᲂваннаѧ . сла́ва , и҆ ны́нѣ , то́йже .

Пᲂ пᲂлїєлеѡ́сѣ , сѣда́ленъ . гла́съ , д҃ . Вᲂзᲂпі́й дв҃де , что̀ сі́и пра́здникъ , є҆го́же вᲂспѣ́тъ дре́вле , в̾ кни́зѣ ѱало́мстѣй , ꙗ҆́кѡ дще́рь бг҃ᲂѻ҆трᲂкᲂви́цꙋ дв҃ꙋ , прелᲂжѝ на ѻ҆́ны ѻ҆би́тели хрⷭ҇то́съ , и҆́же и҆з̾ неѧ̀ без̾ сѣ́мене рᲂжде́исѧ . и҆ сегѡ̀ ра́ди ра́дꙋютсѧ мт҃ри и҆ дще́ри , и҆ невѣ́сты хрⷭ҇то́вы вᲂпїю́ще , ра́дꙋисѧ преста́вившаѧсѧ к̾ вы́шнемꙋ црⷭ҇твїю . сла́ва , и҆ ны́нѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Пᲂмѧнꙋ̀ и҆́мѧ твᲂѐ , вᲂ всѧ́кᲂмъ ро́дѣ и҆ ро́дѣ . сти́хъ . слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . всѧ́кᲂ дыха́нїе .

є҆ѵⷢ҇а́лїе , ѿ лꙋкѝ . зача́лᲂ , д҃ . ѱало́мъ , н҃ .

сла́ва . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Є҆гда̀ преставле́нїе пречⷭ҇тагѡ ти тѣ́ла гᲂтᲂвлѧ́шесѧ , тᲂгда̀ а҆пⷭ҇ли ѡ҆б̾стᲂѧ́ще ѻ҆́дръ , с̾ тре́петᲂмъ зрѧ́хꙋ тѧ . и҆ ѻ҆́ви ᲂу҆́бѡ взира́юще на́ тѣлᲂ , ᲂу҆́жасᲂмъ ѡ҆держи́ми бѧ́хꙋ . пе́тръ же сᲂ слеза́ми вᲂпїѧ́ше ти , ѽ дв҃ᲂ , ви́жꙋ тѧ ꙗ҆́снѡ прᲂсте́ртꙋ про́стꙋ , живᲂтѐ всѣ́хъ , и҆ ᲂу҆дивлѧ́юсѧ , в̾ не́йже всели́сѧ бꙋ́дꙋщїѧ жи́зни наслажде́нїе . нᲂ ѽ пречи́стаѧ , мᲂли́сѧ прилѣ́жнѡ сн҃ꙋ и҆ бг҃ꙋ твᲂемꙋ̀ , спасти́сѧ ста́дꙋ твᲂемꙋ̀ неприкᲂснᲂве́ннꙋ .

Кано́на , два̀ . ки́ръ кᲂзмы̀ . и҆ ки́ръ і҆ѡа́нна . і҆рмᲂсы̀ ѡ҆бᲂю̀ кано́нꙋ , пᲂ два́жды . трᲂпари́ же , на в҃і . пᲂслѣди́ же є҆ди́на страна̀ , пе́рвыи і҆рмо́съ . и҆ дрꙋга́ѧ страна̀ , дрꙋгі́и і҆рмо́съ . є҆мꙋ́же краегране́сїе , да тᲂржествꙋ́ютъ бг҃ᲂмꙋ́дрїи .

Кано́нъ , гла́съ , а҃ . пѣ́снь , а҃ . і҆рмо́съ . Преꙋкраше́на бжⷭ҇твеннᲂю сла́вᲂю , сщ҃е́ннаѧ и҆ сла́внаѧ дв҃ᲂ па́мѧть тѝ , всѧ̀ сᲂзва̀ на весе́лїе вѣ́рныѧ , начина́ющи марїа́мъ , съ ли́ки и҆ тимпа́ны , твᲂемꙋ̀ пᲂю́ще є҆динᲂро́днᲂмꙋ , сла́внѡ ꙗ҆́кѡ прᲂсла́висѧ .

запѣ́въ : Прест҃а́ѧ гжⷭ҇е бцⷣе спасѝ на́съ . Да прᲂвᲂжда́ютъ невеще́ственїи чи́нᲂве , нб҃ᲂше́ственᲂе в̾ сїѡ́нъ бжⷭ҇твенᲂе тѣ́лᲂ твᲂѐ . внеза́пꙋ же сте́кшесѧ а҆пⷭ҇лъ мно́жествᲂ , ѿ кᲂне́цъ бцⷣе , тебѣ̀ пред̾ста́ша кꙋ́пнᲂ . с̾ ни́ми же пречⷭ҇таѧ , твᲂю̀ чⷭ҇тнꙋ́ю дв҃ᲂ па́мѧть сла́вимъ . Пᲂбѣ́дныѧ по́чести взѧ́тъ на є҆стество̀ чⷭ҇таѧ , бг҃а ро́ждьши , ѡ҆ба́че же пᲂдо́бѧщисѧ твᲂрцꙋ̀ свᲂемꙋ̀ и҆ сн҃ꙋ , па́че є҆стества̀ пᲂвинꙋ́ешисѧ є҆сте́ственымъ зако́нѡмъ . тѣ́мже ᲂу҆ме́рши , с̾ сн҃ᲂмъ вᲂста́еши вѣ́чнꙋющи .

Дрꙋгі́и кано́нъ , і҆ѡа́нна дамаски́на . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́вᲂ ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ пᲂчита́ѧ тᲂѧ̀ ᲂу҆спе́нїе .

запѣ́въ : Прест҃а́ѧ гжⷭ҇е бцⷣе спасѝ на́съ . Дв҃ы ѻ҆трᲂкᲂви́цы , с̾ марїа́мъ прᲂро́чицею , пѣ́снь и҆схо́днꙋю ны́нѣ вᲂскли́кните . дв҃аѧ бᲂ є҆ди́на бг҃ᲂмт҃и , къ прїѧ́тїю нбⷭ҇нᲂмꙋ преставлѧ́етсѧ . Дᲂсто́йнѡ ꙗ҆́кѡ ѡ҆дш҃евле́нᲂ тѧ нб҃ᲂ , прїѧ́ша нбⷭ҇наѧ пречⷭ҇таѧ бжⷭ҇твенаѧ селе́нїѧ . и҆ пред̾ста̀ свѣ́тлѡ ᲂу҆кра́шена , ꙗ҆́кѡ невѣ́ста всененᲂро́чнаѧ цр҃ви и҆ бг҃ꙋ .

пѣ́снь , г҃ . і҆рмо́съ . Сᲂдѣ́тельнаѧ и҆ сᲂдержа́щаѧ всѧ̀ , бж҃їѧ си́ла и҆ мꙋ́дрᲂсть , непрекло́ннꙋ и҆ недви́жимꙋ цр҃кᲂвь свᲂю̀ ᲂу҆твердѝ хрⷭ҇тѐ . є҆ди́нъ бᲂ є҆сѝ ст҃ъ и҆ на ст҃ы́хъ пᲂчива́ѧи .= Ж=енꙋ́ тѧ ме́ртвенꙋ , нᲂ па́че є҆стества̀ и҆ мт҃рь бж҃їю , ви́дѣвше пренепᲂро́чнаѧ сла́внїи а҆пⷭ҇ли , ᲂу҆жа́снѡ прикаса́хꙋсѧ рꙋка́ми , сла́вᲂю ѡ҆блиста́ющꙋ , ꙗ҆́кѡ бг҃ᲂпрїѧ́тнᲂе селе́нїе ви́дѧще . Пᲂсти́же сꙋ́дъ рꙋ́цѣ дᲂсади́телѧ де́рзагѡ , ᲂу҆сѣче́нїе нанесы́и . бг҃ꙋ сᲂхра́ньшꙋ , че́сть ѡ҆дш҃евле́нᲂмꙋ кїѡ́тꙋ , сла́вᲂю бжⷭ҇тва̀ , в̾ не́мже сло́вᲂ пло́ть бы́сть .

и҆́нъ , і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй па́мѧти твᲂе́й , вѣнце́мъ сла́вы спᲂдо́би . Ѿ ме́ртвыхъ чре́слъ прᲂизве́дшисѧ , є҆стество́мъ пᲂдо́бна чи́стаѧ , и҆схᲂже́нїе разрѣшѝ . ро́ждьши же сꙋ́щꙋю жи́знь , къ жи́зни преста́висѧ бжⷭ҇твенѣй и҆ сᲂста́внѣй . Ли́къ бг҃ᲂсло́вецъ ѿ кᲂне́цъ , свы́ше же а҆́нг҃лъ мно́жества , к̾ сїѡ́нꙋ и҆дѧ́хꙋ . всеси́льнымъ манᲂве́нїемъ , дᲂстᲂдо́лжнѡ влⷣчце , твᲂемꙋ̀ пᲂгребе́нїю слꙋжа́ще .

ѵ҆пако́й . гла́съ , и҃ . Бл҃жи́мъ тѧ всѝ ро́ди бцⷣе дв҃ᲂ , в̾ тѧ́ бᲂ невмѣсти́мыи хрⷭ҇то́съ бг҃ъ на́шъ , вмѣсти́тисѧ и҆зво́ли . бл҃же́ни є҆смы̀ и҆ мы̀ , пред̾ста́тельницꙋ тѧ̀ и҆мꙋ́ще , де́нь бᲂ и҆ но́щь мо́лишисѧ ѡ҆ на́съ , и҆ держа́вы црⷭ҇твїѧ твᲂи́ми мл҃твами ᲂу҆твержа́ютсѧ . тѣ́мъ бл҃гᲂдарѧ́ще вᲂпїе́мъ ти , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю .

пѣ́снь , д҃ . і҆рмо́съ . Рѣ́чи прᲂро́къ и҆ гада́нїѧ , вᲂплᲂще́нїе прᲂреко́ша ѿ дв҃цы твᲂѐ хрⷭ҇тѐ свѣ́тъ блиста́нїѧ твᲂегѡ̀ , вᲂ свѣ́тъ ꙗ҆зы́кѡмъ и҆зы́детъ . и҆ вᲂз̾гласи́тъ ти бѣ́здна с̾ весе́лїемъ , си́лѣ твᲂе́й сла́ва чл҃кᲂлю́бче . Ви́дите лю́дїе и҆ чꙋди́тесѧ , гᲂра́ бᲂ ст҃а́ѧ ꙗ҆́вственаѧ бг҃ꙋ , в̾ нбⷭ҇ныѧ ѡ҆би́тели превы́ше взе́млетсѧ . нб҃ᲂ землено́е , в̾ нбⷭ҇нᲂе и҆ нетлѣ́ннᲂе селе́нїе вселѧ́емᲂ . Жи́зни прⷭ҇нᲂсꙋ́щныѧ и҆ лꙋ́чшїѧ , сме́рть твᲂѧ̀ бы́сть прехо́дна чи́стаѧ , ѿ тлѣ́нныѧ , къ бжⷭ҇твенѣй вᲂи́стинꙋ и҆ непрехᲂди́мѣй превᲂдѧ́ тѧ чⷭ҇таѧ , с̾ весе́лїемъ сн҃а зрѣ́ти свᲂегѡ̀ и҆ гдⷭ҇а . Взѧ́шасѧ две́ри нбⷭ҇ныѧ , и҆ а҆́нг҃ли вᲂспѣ́ша , и҆ прїѧ́тᲂва хрⷭ҇то́съ , дв҃ства свᲂеѧ̀ мт҃ре сᲂсꙋ́дъ . херꙋви́ми пᲂдъѧ́ша съ весе́лїемъ , серафи́ми же сла́вѧтъ ра́дꙋющесѧ .

и҆́нъ , і҆рмо́съ . Неи҆зслѣ́днᲂмꙋ бж҃їю сᲂвѣ́тꙋ , є҆́же ѿ дв҃ы вᲂплᲂще́нїе тебѐ вы́шнѧгѡ , прᲂро́къ а҆вва́кꙋмъ дивѧ́сѧ вᲂпїѧ́ше , сла́ва си́лѣ твᲂе́й гдⷭ҇и . Чꙋ́дᲂ бѧ́ше зрѣ́ти , нб҃ᲂ всѣ́хъ цр҃ѧ ѡ҆дш҃евле́ннᲂе , сꙋ́етныхъ прехᲂдѧ̀ землены́хъ . ꙗ҆́кѡ чꙋ́дна дѣ́ла твᲂѧ̀ , сла́ва си́лѣ твᲂе́й гдⷭ҇и . А҆́ще и҆ непᲂсти́жныи сеѧ̀ пло́дъ , и҆́мже нб҃са̀ бы́ша , пᲂгребе́нїе прїѧ́тъ во́лею ꙗ҆́кѡ ме́ртвъ , ка́кѡ пᲂгребе́нїѧ ѿве́ржетсѧ , неи҆скꙋсᲂбра́чнѡ ро́ждьшаѧ . Въ преставле́нїи твᲂе́мъ мт҃и бж҃їѧ , прᲂстра́ннѣйшее тѣ́лᲂ твᲂѐ бг҃ᲂпрїѧ́тнᲂе , а҆́нг҃льскаѧ во́инства , сщ҃е́нными кри́лы , тре́петᲂмъ и҆ ра́дᲂстїю пᲂкрыва́хꙋ .

пѣ́снь , є҃ . і҆рмо́съ . Бж҃їю неи҆зрече́ннꙋю дᲂбро́тꙋ , дѣ́лъ твᲂи́хъ хрⷭ҇тѐ и҆спᲂвѣ́дꙋю , ѿ прⷭ҇нᲂсꙋ́щныѧ бᲂ сла́вы , сᲂприснᲂсꙋ́щнᲂе сли́чнᲂе прᲂсвѣще́й сїѧ́нїе . и҆з̾ дв҃ческїѧ ᲂу҆тро́бы , сꙋ́щимъ вᲂ тмѣ̀ и҆ сѣ́ни вᲂпло́щьсѧ вᲂсїѧ̀ сл҃нце . Ꙗ҆́кѡ на ѻ҆́блацѣ дв҃ᲂ а҆пⷭ҇льскїи ли́къ нᲂси́мъ к̾ сїѡ́нꙋ ѿ кᲂне́цъ , слꙋжи́ти тебѣ̀ ѻ҆́блакꙋ ле́гкᲂмꙋ сᲂбира́шесѧ , ѿ неѧ́же вы́шнїи бг҃ъ , сꙋ́щимъ вᲂ тмѣ̀ и҆ сѣ́ни , пра́веднᲂе вᲂсїѧ̀ сл҃нце . Трꙋ́бъ бг҃ᲂпрїѧ́тнїи ꙗ҆зы́цы , бг҃ᲂсло́вныхъ мꙋже́й , бл҃гᲂгла́снѣе бцⷣѣ вᲂпїѧ́хꙋ , и҆схо́днꙋю вᲂз̾глаша́юще пѣ́снь пᲂѧ́хꙋ дх҃ᲂмъ , ра́дꙋисѧ нетлѣ́нныи и҆сто́чниче , бж҃їѧ живᲂнача́льнагѡ и҆ спасе́нагѡ всѣ́мъ вᲂплᲂще́нїѧ .

и҆́нъ , і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй па́мѧти твᲂе́й , ты́ бᲂ не и҆скꙋсᲂбра́чнаѧ дв҃цѣ , ѿ землѝ преста́висѧ ꙗ҆́кѡ живᲂта̀ кїѡ́тъ , к̾ нбⷭ҇нѣй ѻ҆би́тели , всѣ́мъ вᲂспѣва́ющимъ тѧ , спасе́нїе пᲂдава́еши . Да вᲂз̾гласѧ́тъ трꙋбы̀ , бг҃ᲂсло́вецъ дне́сь . ꙗ҆зы́къ же мнᲂгᲂвѣща́нныи челᲂвѣ́ческїи , ны́нѣ да вᲂсхва́литъ , да ѡ҆гласи́тъ же вᲂздꙋ́хъ , без̾мѣ́рнымъ сїѧ́ѧ свѣ́тᲂмъ . а҆́нг҃ли да пᲂю́тъ , пречи́стыѧ ᲂу҆спе́нїе . Сᲂсꙋ́дъ пᲂдᲂба́ше и҆з̾бра́нныи , пѣ́нїемъ ти ве́сь ᲂу҆дивлѧ́емь дв҃це , и҆схо́денъ ве́сь ѡ҆сщ҃е́нъ бг҃ᲂви . всѣ́мъ бг҃ᲂпрїѧ́тенъ , и҆ се́й вᲂи́стинꙋ ꙗ҆влѧ́емь , бцⷣе всепѣ́таѧ .

пѣ́снь , ѕ҃ . і҆рмо́съ . Мᲂрскі́и пꙋчинᲂро́дныи ки́тᲂвъ , внꙋ́трь бж҃їи ѻ҆́гнь , тридне́внагѡ ти пᲂгребе́нїѧ прᲂѡбраже́нїе , є҆мꙋ́же і҆ѡ́на пррⷪ҇къ ꙗ҆ви́сѧ , спасе́нъ бᲂ ꙗ҆́кᲂже и҆ пре́жде пꙋще́нъ бы́сть , неврежде́нъ вᲂпїѧ́ше пᲂжрꙋ́ ти , со́ гласᲂмъ хвале́нїѧ гдⷭ҇и . Дае́тъ ти ꙗ҆́же превы́ше є҆стества̀ цр҃ь всѣ́хъ и҆ бг҃ъ , в̾ ржⷭ҇твѣ́ бᲂ дв҃ꙋ ꙗ҆́кᲂже сᲂхранѝ , та́кѡ и҆ во́ грᲂбѣ тѣ́лᲂ сᲂблюдѐ нетлѣ́ннᲂ , и҆ спрᲂсла́ви бжⷭ҇твенымъ преставле́нїемъ , че́сть тебѣ̀ ꙗ҆́кѡ сн҃ъ мт҃ри да́рꙋѧ . Вᲂи́стинꙋ тѧ ꙗ҆́кѡ свѣ́телъ свѣ́щникъ невеще́ственагѡ свѣ́та , кади́льницꙋ златꙋ́ю бжⷭ҇твенагѡ ᲂу҆́глѧ , вᲂ ст҃а́ѧ ст҃ы́хъ вселѝ . рꙋ́чкꙋ и҆ же́злъ , скрижа́ль бг҃ᲂпи́саннꙋ , кᲂвче́гъ ст҃ы́и , трапе́зꙋ сло́ва жи́зни , дв҃ᲂ ржⷭ҇тво́ ти .

и҆́нъ , і҆рмо́съ . Бжⷭ҇твенᲂе сѐ и҆ всечестно́е сᲂверша́юще пра́зднествᲂ , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . И҆з̾ тебѐ жи́знь вᲂсїѧ̀ , ключа̀ дв҃ства нерꙋши́въ . ка́кѡ ᲂу҆́бѡ пречи́стᲂе и҆ живᲂнача́льнᲂе твᲂѐ тѣ́лᲂ , и҆скꙋше́нїѧ сме́рти бы́сть прича́стнѡ . Жи́зни бы́вши хра́мъ , жи́знь прⷭ҇нᲂсꙋ́щнꙋю ᲂу҆лꙋчи́ла є҆сѝ . сме́ртїю бᲂ к̾ живᲂтꙋ̀ преминꙋ́ла є҆сѝ , ꙗ҆́же жи́знь ро́ждьши сᲂста́внꙋю .

кᲂнда́къ . гла́съ , в҃ . Въ мл҃твахъ не ᲂу҆сыпа́ющꙋю бцⷣꙋ , и҆ в̾ застꙋпле́нїихъ и҆звѣ́стнᲂе ᲂу҆пᲂва́нїе , гро́бъ и҆ сме́рть не ᲂу҆держа́ста . нᲂ ꙗ҆́кѡ живᲂтꙋ̀ мт҃рь , на живо́тъ преста́ви , и҆́же вᲂ ᲂу҆тро́бꙋ всели́выисѧ , приснᲂдв҃ственнꙋю . и҆́кᲂсъ . Ѻ҆гради́ми пᲂмышле́нїѧ хрⷭ҇тѐ мо́й , и҆́бᲂ стѣ́нꙋ ми́рᲂви вᲂспѣ́ти дерза́ю , чⷭ҇тꙋю мт҃рь твᲂю̀ на стᲂлпѣ̀ глаго́лъ ᲂу҆крѣпи́ мѧ , и҆ в̾ тѧ́жкихъ мы́слѣхъ застꙋпи́ мѧ . ты́ бᲂ взыва́ющимъ , и҆ прᲂсѧ́щимъ вѣ́рᲂю , мᲂле́нїѧ и҆спᲂлнѧ́еши . ты̀ ᲂу҆́бѡ ми да́рꙋй ꙗ҆зы́къ прино́сенъ , по́мыслъ непᲂсты́денъ . всѧ́кѡ бᲂ даѧ́нїе сїѧ́нїѧ , ѿ тебѐ низ̾пᲂсыла́етсѧ свѣтᲂпᲂда́телю , и҆́же вᲂ ᲂу҆тро́бꙋ всели́выисѧ приснᲂдв҃ственнꙋю .

пѣ́снь , з҃ . і҆рмо́съ . Без̾стꙋ́днѣй ꙗ҆́рᲂсти же и҆ ѻ҆гню̀ , бжⷭ҇твеннᲂе жела́нїе сᲂпрᲂтивлѧ́ѧсѧ . ѻ҆́гнь ᲂу҆́бѡ ѡ҆рᲂша́ше , ꙗ҆́рᲂсти же смѣѧ́шесѧ . бг҃ᲂдх҃нᲂве́ннᲂю мы́слїю препᲂдо́бныхъ , тривѣща́ннᲂю цѣвни́цею прᲂти́вꙋ вѣща́ѧ , мꙋсикі́йскимъ пища́лемъ , пᲂсредѝ пла́мене , препрᲂсла́вленныи ѻ҆ц҃ъ на́шихъ бж҃е блгⷭ҇ве́нъ є҆сѝ . Бг҃ᲂдѣ́ланныѧ скрижа́ли мѡѷсе́й , пи́санныѧ бжⷭ҇твенымъ дх҃ᲂмъ , ꙗ҆́рᲂстїю сᲂкрꙋ́шь . нᲂ сегѡ̀ влⷣка , ро́ждьшꙋю неврежде́нꙋ в̾нбⷭ҇ныѧ сᲂхра́нь до́мы , ны́нѣ внꙋ́трь вселѝ , с̾ не́ю и҆гра́юще вᲂпїе́мъ хрⷭ҇то́ви , препрᲂсла́вленыи ѻ҆ц҃ъ на́шихъ бж҃е блгⷭ҇ве́нъ є҆сѝ . Въ кимва́лѣхъ ᲂу҆сты̀ чи́стыми , мꙋсикі́йски же , се́рдцемъ свѣ́тлымъ , дᲂбрᲂгла́снᲂю трꙋбо́ю , высо́кᲂю мы́слїю , дв҃ыѧ и҆ чи́стыѧ въ наро́читыи и҆збра́нныи дн҃ь преставле́нїѧ , дѣ́тельными пле́щꙋще рꙋка́ми вᲂпїе́мъ , препрᲂсла́вленыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Бг҃ᲂмꙋ́дрїи сᲂбери́тесѧ лю́дїе , бж҃їѧ бᲂ сла́вы селе́нїе , ѿ сїѡ́на преставлѧ́етсѧ , к̾ нбⷭ҇нᲂмꙋ жили́щꙋ , и҆дѣ́же гла́съ чи́стъ пра́з̾днꙋющихъ , гла́съ несказа́нна ра́дᲂванїѧ , и҆ в̾ весе́лїи вᲂпїю́щихъ хрⷭ҇то́ви , препрᲂсла́вленыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , нᲂ ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . Ю҆́нᲂшы и҆ дв҃ы , дв҃ыѧ же и҆ бг҃ᲂмт҃ре па́мѧть чтꙋ́ще , ста́рцы и҆ кнѧ́зи , цр҃їе и҆ сꙋдїѝ по́йте , ѻ҆ц҃ъ на́шихъ бж҃е блгⷭ҇ве́нъ є҆сѝ . Да вᲂстрꙋ́бѧтъ трꙋбо́ю дх҃о́внᲂю го́ры нбⷭ҇ныѧ . да ра́дꙋютсѧ хо́лми , и҆ да и҆гра́ютъ бжⷭ҇твенїи а҆пⷭ҇ли , цр҃ца к̾ сн҃ꙋ преставлѧ́етсѧ , с̾ ни́мъ црⷭ҇твꙋющи . Всесщ҃е́ннᲂе преставле́нїе , бжⷭ҇твеныѧ ти и҆ нетлѣ́нныѧ мт҃ре , преми́рныѧ вы́шнихъ си́лъ сᲂвᲂкꙋпѝ чи́ны , весели́тисѧ с̾ сꙋ́щими на землѝ , тебѣ̀ пᲂю́щими , бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Пла́мень прᲂхлажда́ющь прпⷣбныѧ , нечести́выѧ же пᲂпалѧ́ющь , а҆́нг҃лъ бж҃їи всемо́щныи , пᲂказа̀ ѻ҆́трᲂкᲂмъ . живᲂнача́льныи же и҆сто́чникъ сᲂдѣ́ла бцⷣꙋ , тлю̀ сме́рти , и҆ живо́тъ тᲂча́щꙋ пᲂю́щимъ , сᲂдѣ́телѧ є҆ди́нагѡ пᲂе́мъ , и҆зба́вленнїи и҆ превᲂзно́симъ вᲂ всѧ̀ вѣ́ки . Гл҃ы пᲂслѣ́дᲂвахꙋ , бжⷭ҇твенᲂмꙋ кᲂвче́гꙋ сщ҃е́ннᲂмꙋ , всѐ мно́жествᲂ бг҃ᲂсло́вецъ в̾ сїѡ́нѣ , ка́мѡ и҆́деши нн҃ѣ ски́нїе зᲂвꙋ́ще , бг҃а жива́гѡ не ѡ҆скꙋдѣ́й призира́ющи вѣ́рᲂю пᲂю́щїѧ , сᲂдѣ́телѧ є҆ди́нагѡ пᲂе́мъ и҆зба́вленїи , и҆ превᲂзно́симъ є҆гѡ̀ во́ вѣки . Ꙗ҆́кѡ да вᲂз̾дѣ́вши рꙋ́цѣ , и҆схо́диши всенепᲂро́чнаѧ , рꙋ́цѣ и҆́миже бг҃а нᲂси́ла є҆сѝ пло́тїю , съ дерзнᲂве́нїемъ ꙗ҆́кѡ мт҃и речѐ к̾ рᲂжде́ннᲂмꙋ , ꙗ҆́же ми да́лъ є҆сѝ , во́ вѣки сᲂхранѝ вᲂпїю́щїѧ ти , сᲂдѣ́телѧ є҆ди́нагѡ пᲂе́мъ и҆зба́вленїи , и҆ превᲂзно́симъ є҆гѡ̀ во́ вѣки .

и҆́нъ , і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѻ҆бразꙋ́емᲂ , ны́нѣ же дѣ́йствꙋемᲂ , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Па́мѧть твᲂю̀ чⷭ҇таѧ дв҃ᲂ , нача́ла же и҆ вла́сти и҆ си́лы , а҆́нг҃ли а҆рха́нг҃ли , прⷭ҇то́ли гдⷭ҇ьства , херꙋви́ми сла́вѧтъ , и҆ стра́шнаѧ серафи́ми . мы́ же чл҃ческїи ро́дъ пᲂе́мъ , и҆ превᲂзно́симъ вᲂ всѧ̀ во́ вѣки . И҆́же стра́ннѡ всели́выисѧ бцⷣе , в̾ чи́стᲂе чре́вᲂ твᲂѐ вᲂплᲂща́емь , се́й всесщ҃е́нныи дх҃ъ тво́й прїе́мъ , в̾ себѣ̀ ᲂу҆пᲂко́й , ꙗ҆́кѡ дᲂлжни́къ сн҃ъ . тѣ́мъ тѧ пᲂе́мъ дв҃ꙋ , и҆ превᲂзно́симъ вᲂ всѧ̀ вѣ́ки . Ѽ вы́ше ᲂу҆ма̀ чꙋде́съ , приснᲂдв҃ыѧ же и҆ бг҃ᲂмт҃ре , во́ грᲂбъ бᲂ все́льшисѧ , пᲂказа̀ ра́й . є҆мꙋ́же пред̾стᲂѧ́ще дне́сь , ра́дꙋющесѧ пᲂе́мъ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки .

на ѳ҃ , пѣ́сни . па́ки , в̾жига́ютъ свѣщѝ бра́тїѧ . честнѣ́йшꙋю , непᲂе́мъ . нᲂ пᲂе́мъ припѣ́вы пра́здникꙋ . пе́рвᲂе пᲂе́тъ припѣ́въ пра́выи ли́къ : Велича́й дш҃е мᲂѧ̀ , и҆́же ѿ землѝ на́ нб҃ᲂ , честно́е преставле́нїе бж҃їѧ мт҃ре . пᲂсе́мъ пᲂе́тъ і҆рмо́съ := П=ᲂбѣжда́ютсѧ є҆стества̀ . та́же , пᲂе́тъ припѣ́въ лѣ́выи ли́къ . пᲂсе́мъ пᲂе́тъ і҆рмо́съ , то́йже . та́же , пᲂю́тъ на́ᲂба ли́ка , то́йже припѣ́въ , пᲂ три́жды . пᲂсе́мъ пᲂе́тъ пра́выи ли́къ дрꙋгі́и припѣ́въ : А҆́нг҃ли ᲂу҆спе́нїе пречⷭ҇тыѧ , зрѧ́ще ᲂу҆диви́шасѧ , ка́кѡ дв҃аѧ вᲂсхо́дитъ ѿ землѝ на́ нб҃ᲂ . та́же пᲂе́тъ , втᲂра́гѡ твᲂрца̀ і҆рмо́съ : Всѧ́къ зе́менъ . пᲂсе́мъ пᲂе́тъ лѣ́выи ли́къ , припѣ́въ то́йже . та́же пᲂе́тъ , і҆рмо́съ то́йже . та́же пᲂю́тъ на́ᲂба ли́ка то́йже припѣ́въ , пᲂ три́жды . запѣ́вы же к̾ кано́ннымъ стихо́мъ , ѳ҃ ѧ , пѣ́сни , негл҃емъ . Насхо́дѣ пᲂе́тъ пе́рвᲂе пра́выи ли́къ припѣ́въ : а҆́нг҃ли ᲂу҆спе́нїе . пᲂсе́мъ пᲂе́тъ і҆рмо́съ : Всѧ́къ зе́менъ . та́же пᲂе́тъ лѣ́выи ли́къ припѣ́въ : велича́й дш҃е мᲂѧ̀ . пᲂсе́мъ пᲂе́тъ і҆рмо́съ : пᲂбѣжда́ютсѧ є҆стества̀ . =и҆ =пᲂкло́нъ дᲂ землѝ .

пѣ́снь , ѳ҃ . припѣ́в̾ : Велича́й дш҃е мᲂѧ̀ , и҆́же ѿ землѝ на́ нб҃ᲂ , чⷭ҇тно́е преставле́нїе бж҃їѧ мт҃ре . і҆рмо́съ . Пᲂбѣжда́ютсѧ є҆стества̀ ᲂу҆ста́вы , ѡ҆ тебѣ̀ дв҃ᲂ чи́стаѧ . дв҃ствꙋетъ бᲂ ржⷭ҇тво̀ и҆ живо́тъ ѡ҆брꙋча́етъ сме́рть . пᲂ ржⷭ҇твѣ̀ дв҃а , и҆ пᲂ сме́рти жива̀ , спаса́еши при́снѡ , бцⷣꙋ тѧ велича́ющїѧ . Дивлѧ́хꙋсѧ а҆́нг҃льскїѧ си́лы , в̾ сїѡ́нѣ смᲂтрѧ́юще свᲂегѡ̀ влⷣкꙋ , же́нскꙋю дш҃ꙋ рꙋка́ма нᲂсѧ́ща . пречи́стѡ бᲂ ро́ждьшей , сн҃ᲂлѣ́пнѡ прᲂвᲂзглаша́ше , грѧдѝ чⷭ҇таѧ , съ сн҃ᲂмъ и҆ бг҃ᲂмъ прᲂсла́влена бꙋ́ди . Ѡ҆прѧ́та ли́къ а҆пⷭ҇льскїи , бг҃ᲂпрїѧ́тнᲂе тѣ́лᲂ твᲂѐ , со́ страхᲂмъ зрѧ́ще , и҆ гла́сᲂмъ ве́лїимъ вѣща́юще , въ нбⷭ҇ныѧ до́мы к̾ сн҃ꙋ вᲂсхо́диши , спаса́й при́снѡ бцⷣе дᲂстᲂѧ́нїе свᲂѐ .

и҆́нъ , припѣ́в̾ : А҆́нг҃ли ᲂу҆спе́нїе пречⷭ҇тыѧ , зрѧ́ще ᲂу҆диви́шасѧ , ка́кᲂ дв҃аѧ вᲂсхо́дитъ ѿ землѝ на́ нб҃ᲂ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е ᲂу҆спе́нїе бж҃їѧ мт҃ре . и҆ да пᲂе́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃ᲂ . Прїиди́те в̾ сїѡ́нъ , на бжⷭ҇твенꙋю и҆ тꙋ́чнꙋю го́рꙋ жива́гѡ бг҃а , и҆ вᲂзра́дꙋемсѧ , бцⷣꙋ зрѧ́ще . к̾ ѕѣлѡ́ бᲂ лꙋ́чшей , и҆ бжⷭ҇твенѣй сѣ́ни , ꙗ҆́кѡ мт҃рь сїю̀ вᲂ ст҃а́ѧ ст҃ы́хъ хрⷭ҇то́съ преста́ви . Прїиди́те вѣ́рнїи , гро́бꙋ пристꙋ́пимъ бж҃їѧ мт҃ре , и҆ ѡ҆бъи́мемъ сердцы̀ и҆ ᲂу҆стна́ми , ѻ҆чи́ма и҆ лице́мъ чи́стѡ прикаса́ющесѧ , и҆ пᲂчерпа́юще и҆сцѣле́нїемъ не зави́стныѧ да́ры , ѿ и҆сто́чника прⷭ҇нᲂтекꙋ́щагᲂ . Прїимѝ ѿ на́съ пѣ́снь и҆схо́днꙋю , мт҃и жива́гѡ бг҃а , и҆ свѣтᲂно́снᲂю тѝ и҆ бжⷭ҇твенᲂю ѡ҆сѣнѝ бл҃гᲂда́тїю , хрⷭ҇тᲂлю́бнымъ лю́демъ ми́ръ , и҆ ѡ҆ставле́нїе пᲂю́щимъ , и҆ дш҃а́мъ спасе́нїе пᲂдаю́щи .

свѣти́ленъ . А҆пⷭ҇ли ѿ кᲂне́цъ сᲂвᲂкꙋ́пльшесѧ здѣ̀ , в̾ геѳсимані́йстѣй ве́си , пᲂгреби́те тѣ́лᲂ мᲂѐ , и҆ ты̀ сн҃е и҆ бж҃е мо́й прїимѝ дх҃ъ мо́й . гⷤ .

На хвали́тѣхъ , стихѣ́ры . гла́съ , д҃ . поⷣ . ꙗ҆́кѡ до́блѧ . Сла́внымъ ᲂу҆спе́нїи тѝ ,꙳ нб҃са̀ ра́дꙋютсѧ ,꙳ и҆ а҆́нг҃льскаѧ вᲂз̾ра́дᲂвашасѧ во́инства .꙳ всѧ́ же землѧ̀ весели́тсѧ ,꙳ пѣ́снь ти и҆схо́днꙋю прᲂвᲂз̾глаша́ющи ,꙳ мт҃ри всѣ́ми влⷣчествꙋющагѡ ,꙳ неи҆скꙋсᲂбра́чнаѧ прест҃а́ѧ дв҃ᲂ ,꙳ ꙗ҆́же ро́дъ челᲂвѣ́ческїи и҆зба́вльшаѧ ,꙳ прарᲂди́тельнагѡ ѡ҆сꙋжде́нїѧ . двⷤа . Ѿ кᲂне́цъ стеко́шасѧ ,꙳ а҆пⷭ҇лѡмъ лꙋ́чшїи ,꙳ бг҃ᲂнача́льнымъ манᲂве́нїемъ пᲂгребсти́ тѧ .꙳ и҆ ѿ землѝ взе́млемꙋ тѧ̀ ꙳ к̾ высᲂтѣ̀ зрѧ́ще ,꙳ гла́съ гаврїи́лᲂвъ ра́дᲂстїю вᲂпїѧ́хꙋ ти ,꙳ ра́дꙋисѧ нᲂси́лᲂ бжⷭ҇тва̀ всегѡ̀ .꙳ ра́дꙋисѧ є҆ди́на землена́ѧ с̾ вы́шними ,꙳ ржⷭ҇тво́мъ си сᲂвᲂкꙋ́пльши . Ꙗ҆́же живо́тъ ро́ждьшаѧ ,꙳ к̾ жи́зни преминꙋ́ла є҆сѝ ,꙳ честны́мъ ᲂу҆спе́нїемъ твᲂи́мъ без̾сме́ртнѣй .꙳ дарᲂнᲂсѧ́щимъ тѧ̀ а҆́нг҃лѡмъ ,꙳ нача́лѡмъ и҆ си́ламъ ,꙳ а҆пⷭ҇лѡмъ и҆ прᲂро́кѡмъ , и҆ все́й тва́ри .꙳ прїе́мшꙋ же нетлѣ́нными дла́ньми сн҃ꙋ твᲂемꙋ̀ ,꙳ непᲂро́чнꙋю дш҃ꙋ твᲂю̀ ,꙳ дв҃ᲂ мт҃и бг҃ᲂневѣ́стᲂ . сла́ва , и҆ ны́нѣ . гла́съ , ѕ҃ . На без̾сме́ртнᲂе твᲂѐ ᲂу҆спе́нїе , бцⷣе мт҃и живᲂтꙋ̀ , ѻ҆́блацы а҆пⷭ҇ли пᲂ вᲂздꙋ́хꙋ вᲂсхища́хꙋ . и҆ по́ мирꙋ раз̾сѣ́ѧнныѧ , вᲂ є҆ди́нᲂмъ ли́цѣ пред̾ста́ша пречⷭ҇тᲂмꙋ тѝ тѣ́лꙋ , є҆́же и҆ пᲂгре́бше чⷭ҇тнѡ . гла́съ ти гаврїи́лᲂвъ пᲂю́ще вᲂпїѧ́хꙋ , ра́дꙋйсѧ ѡ҆бра́дᲂваннаѧ дв҃ᲂ мт҃и без̾невѣ́стнаѧ , гдⷭ҇ь с̾ тᲂбо́ю . с̾ ни́ми же ꙗ҆́кѡ сн҃а свᲂегѡ̀ и҆ бг҃а на́шегѡ , мᲂлѝ спасти́сѧ дш҃а́мъ на́шимъ .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пѣ́снь , г҃ ѧ . и҆ в҃ гѡ кано́на , пѣ́снь , ѕ҃ ѧ .

Пᲂ вхо́дѣ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ ны́нѣ блажа́тъ мѧ всѝ ро́ди . а҆пⷭ҇лъ , къ филипписі́ѡмъ . заⷱ҇ , с҃м . а҆ллилꙋ́їѧ . Вᲂскрⷭ҇нѝ гдⷭ҇и в̾ пᲂко́й тво́й , ты̀ и҆ кїѡ́тъ ст҃ы́ни твᲂеѧ̀ .= сти́хъ . клѧ́тсѧ гдⷭ҇ь дв҃дꙋ и҆́стинᲂю , и҆ не ѿве́ржетсѧ є҆ѧ̀ . =є҆ѵⷢ҇а́лїе , ѿ лꙋкѝ . зача́лᲂ , н҃д . задᲂсто́йнѡ пᲂе́мъ , і҆рмо́съ : Пᲂбѣжда́ютсѧ є҆стества̀ ᲂу҆ста́вы . и҆ дᲂ ѿда́нїѧ . прича́стенъ , ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призᲂвꙋ̀ .

На трапе́зѣ , ᲂу҆тѣше́нїе бра́тїи . а҆́щели бꙋ́детъ , пра́здникъ , се́й в̾ сре́дꙋ , и҆лѝ в̾ пѧто́къ , разрѣша́емъ на ры́бꙋ и҆ вино̀ , а҆ не на сы́ръ , и҆ млеко̀ . ᲂу҆держа́нᲂ бᲂ бы́сть бжⷭ҇твеными пра́вилы , и҆ ст҃ы́ми ѻ҆ц҃ы , мирѧ́нᲂмъ мѧ́са , а҆ и҆́нᲂкᲂмъ млека̀ , и҆ ꙗ҆́ицъ , ни ка́кᲂ же ꙗ҆́сти . А҆́щели прилꙋчи́тсѧ , пра́здникъ сі́и , в̾ пᲂнедѣ́льникъ , мирѧ́не разрѣша́ютъ на мѧ́сᲂ , и҆ сы́ры , и҆ ꙗ҆́ица . и҆́нᲂцы же то́чїю , на ры́бꙋ , и҆ вино̀ . Пра́зднꙋетжесѧ ᲂу҆́бѡ сі́и , пра́здникъ , де́вѧть дне́й .