МЦⷭ҇А А҆́ВГꙊСТА ВЪ Ѕ҃ ДН҃Ь

ст҃о́е преѡ҆браже́нїе гдⷭ҇а бг҃а и҆ сп҃са на́шегѡ і҆с҃а хрⷭ҇та̀ . =На ма́лѣй вече́рни , на гдⷭ҇и вᲂзва́хъ , стⷯры . гла́съ , а҃ . поⷣ . нбⷭ҇нымъ чино́мъ . И҆́же с̾ мѡѷсе́ᲂмъ гл҃авыи дре́вле ,꙳ на гᲂрѣ̀ сѷна́йстѣй ѻ҆́бразы гл҃ѧ ,꙳ а҆́зъ є҆́смь бг҃ъ сы́и , и҆́же дне́сь на гᲂрѣ̀ ѳавѡ́рстѣй преѡ҆бра́жьсѧ ,꙳ первᲂѡ҆бра́знᲂе пᲂказꙋ́ѧ ,꙳ лꙋча́ми ѡ҆блиста́ѧсѧ .꙳ тѣ́мже хрⷭ҇тѐ велича́ю твᲂю̀ си́лꙋ . =вⷤ . Пᲂи́мъ ѡ҆со́бь свᲂѧ̀ хрⷭ҇тѐ ᲂу҆ченикѝ ,꙳ петра̀ і҆а́кѡва и҆ і҆ѡа́нна ,꙳ во́лею на́ гᲂрꙋ си́хъ вᲂзведѐ .꙳ чꙋ́дᲂ стра́шнᲂ пᲂказа́въ непᲂстᲂѧ́ннᲂе ,꙳ бжⷭ҇твенагѡ прише́ствїѧ твᲂегѡ̀ и҆здале́ча ,꙳ приснᲂсꙋ́щнᲂе бл҃гᲂлѣ́пїе . Твᲂегѡ̀ хрⷭ҇тѐ прише́ствїѧ непᲂсти́жимагѡ ,꙳ тре́петни бы́вше а҆пⷭ҇ли дре́вле ,꙳ ни́цы на́ землю па́дше ,꙳ бжⷭ҇твенѣй тѝ дивлѧ́хꙋсѧ си́лѣ .꙳ сл҃нца прᲂсїѧ́въ свѣтлѣ́е бл҃же ,꙳ неи҆зрече́ннᲂю си́лᲂю свᲂе́ю . сла́ва , и҆ нн҃ѣ . гла́съ , и҃ . Мра́къ зако́нныи , свѣ́тлыи преѡ҆браже́нїѧ прїѧ́тъ ѻ҆́блакъ . в̾ не́мже мѡѷсе́й и҆ и҆лїѧ̀ бы́вше , и҆ пресвѣ́тлыѧ сла́вы спᲂдо́бльшесѧ , бг҃ᲂви гл҃ахꙋ , ты̀ є҆сѝ бг҃ъ на́шъ цр҃ь вѣко́мъ .= прᲂки́менъ , дню̀ .=

Настихо́внѣ , стⷯры . глаⷭ҇ , в҃ . поⷣ . до́ме є҆вфра́фᲂв̾ . Дне́сь хрⷭ҇то́съ ꙳ на гᲂрѣ̀ ѳавѡ́рстѣй ,꙳ а҆да́мᲂвᲂ премѣни́въ ꙳ ѡ҆чернѣ́вшее є҆стество̀ ,꙳ прᲂсвѣти́въ бг҃ᲂсᲂдѣ́лавъ .

сти́хъ : твᲂѧ̀ сꙋ́ть нб҃са̀ ,꙳ и҆ твᲂѧ̀ є҆́сть землѧ̀ . Сїѧ́нїемъ дᲂбрᲂдѣ́телей ,꙳ прᲂсвѣ́щшесѧ вᲂпїе́мъ ,꙳ на гᲂрѣ̀ ст҃ѣ́й ,꙳ зрѧ́ще бжⷭ҇твенᲂе ꙳ гдⷭ҇не преѡ҆браже́нїе .

сти́хъ : ѳавѡ́ръ и҆ є҆рмѡ́нъ ,꙳ ѡ҆ и҆́мени твᲂе́мъ вᲂзра́дꙋетасѧ . Сл҃нце ᲂу҆́бѡ ꙳ зе́млю ᲂу҆ѧснѧ́ѧ ,꙳ а҆́бїе захо́дитъ .꙳ хрⷭ҇то́съ же сᲂ сла́вᲂю ѡ҆блиста́въ на гᲂрѣ̀ ,꙳ ми́ръ прᲂсвѣти́лъ є҆́сть .

сла́ва , и҆ ны́нѣ . Ви́дѣша на ѳавѡ́рѣ ,꙳ мѡѷсе́й же и҆ и҆лїѧ̀ ,꙳ и҆́же ѿ дв҃ы ѻ҆трᲂкᲂви́цы ,꙳ бг҃а вᲂплᲂща́ема ,꙳ чл҃кѡмъ на и҆збавле́нїе .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , з҃ . Преѡ҆брази́выисѧ на гᲂрѣ̀ хрⷭ҇тѐ бж҃е , пᲂказа́въ ᲂу҆ченико́мъ свᲂи́мъ сла́вꙋ свᲂю̀ , ꙗ҆́кᲂже мᲂжа́хꙋ . да вᲂзсїѧ́етъ и҆ на́мъ грѣ́шнымъ свѣ́тъ тво́й приснᲂсꙋ́щныи , мл҃твами бцⷣы , свѣтᲂда́вче сла́ва тебѣ̀ .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , стихᲂло́гїѧ небыва́етъ , то́чїю в̾ сꙋбо́тꙋ , ве́черъ . на гдⷭ҇и вᲂзва́хъ , стⷯры , на́ и҃ . гла́съ , д҃ . пᲂ два́жды . Пре́жде крⷭ҇та̀ твᲂегѡ̀ гдⷭ҇и , гᲂра̀ нб҃сѝ пᲂдо́бѧщисѧ . и҆ ѻ҆́блакъ ꙗ҆́кѡ сѣ́нь прᲂтѧза́шесѧ . тебѣ̀ преѡ҆бразѧ́щꙋсѧ , ѿ ѻ҆ц҃а́ же свидѣ́тельствꙋемꙋ . тꙋ̀ бѣ̀ пе́тръ сᲂ і҆а́кѡвᲂмъ и҆ і҆ѡа́ннᲂмъ , ꙗ҆́кѡ хᲂтѧ́хꙋ бы́ти с̾ тᲂбо́ю , и҆ во́ времѧ преда́нїѧ твᲂегѡ̀ , да ви́дѣвше чꙋдеса̀ твᲂѧ̀ , неꙋстраша́тсѧ страда́нїи твᲂи́хъ . и҆́мже пᲂклᲂни́тисѧ на́мъ въ ми́рѣ спᲂдо́би , вели́кїѧ ра́ди твᲂеѧ̀ млⷭ҇ти . Пре́жде крⷭ҇та̀ твᲂегѡ̀ гдⷭ҇и , пᲂѧ́тъ ᲂу҆ченикѝ на́ гᲂрꙋ высᲂкꙋ̀ , преѡ҆брази́сѧ пред̾ ни́ми , лꙋче́ю си́лы ѡ҆зарѧ́ѧ и҆́хъ . сю́дꙋ , чл҃кᲂлю́бїемъ . и҆ ѡ҆бᲂю́дꙋ , вла́стїю , пᲂказа́ти хᲂтѧ̀ вᲂскрⷭ҇нїѧ свѣ́тлᲂсть . є҆го́же и҆ на́съ бж҃е в̾ ми́рѣ спᲂдо́би , ꙗ҆́кѡ млⷭ҇тивъ и҆ чл҃кᲂлю́бецъ . Гᲂра̀ ꙗ҆́же и҆нᲂгда̀ мра́чна и҆ ды́мна , ны́нѣ же честна̀ и҆ ст҃а̀ є҆́сть . на не́йже но́зѣ твᲂѝ стᲂѧ́стѣ гдⷭ҇и . превѣ́чнᲂе бᲂ сᲂкрᲂве́нᲂе та́иньствᲂ , на пᲂслѣ́дᲂкъ ꙗ҆вле́нᲂ сᲂтвᲂрѝ , стра́шнᲂе твᲂѐ преѡ҆браже́нїе , петрꙋ̀ і҆ѡа́ннꙋ и҆ і҆а́кѡвꙋ , и҆́же сїѧ́нїѧ лица̀ твᲂегѡ̀ нетерпѧ́ще , и҆ свѣ́тлᲂсти ри́зъ твᲂи́хъ , ни́цы на землѝ пᲂкрыва́хꙋсѧ . и҆́же и҆ ᲂу҆́жасᲂмъ сᲂдержи́ми , дивлѧ́хꙋсѧ ви́дѧще мѡѷсе́ѧ и҆ и҆лїю̀ , гл҃юща с̾ тᲂбо́ю хᲂтѧ́щаѧ приключи́тисѧ тебѣ̀ . и҆ гла́съ ѿ ѻ҆ц҃а свидѣ́тельствᲂваше гл҃ѧ , се́й є҆́сть сн҃ъ мо́й вᲂз̾лю́бленыи , ѡ҆ не́мже бл҃гᲂи҆зво́лихъ , тᲂгѡ̀ пᲂслꙋ́шайте . и҆́же и҆ да́рꙋетъ ми́рᲂви ве́лїю млⷭ҇ть . На гᲂрѣ̀ высо́цѣ преѡ҆бра́жьсѧ сп҃съ , верхо́вныѧ и҆мѣ́ѧ ᲂу҆ченикѝ , пресла́внѡ ѡ҆блиста́лъ є҆́сть . пᲂказꙋ́ѧ ꙗ҆́кѡ высᲂто́ю дᲂбрᲂдѣ́телей преше́дшїи , и҆ бжⷭ҇твенѣй сла́вѣ спᲂдо́бѧтсѧ . гл҃юща же сᲂ хрⷭ҇то́мъ мѡѷсе́й и҆ и҆лїѧ̀ , пᲂказᲂва́хꙋсѧ ꙗ҆́кѡ живы́ми и҆ ме́ртвыми ѡ҆блада́етъ . и҆ и҆́же дре́вле зако́нᲂмъ и҆ прⷪ҇ро́ки гл҃авыи є҆́сть бг҃ъ . є҆мꙋ́же и҆ гла́съ ѻ҆ч҃ь , и҆з̾ ѻ҆́блака свѣ́тла пᲂслꙋ́шествᲂваше гл҃ѧ , тᲂгѡ̀ пᲂслꙋ́шайте . и҆́же крⷭ҇то́мъ а҆́да плѣни́вша , и҆ ме́ртвымъ да́рꙋюща живо́тъ вѣ́чныи .

сла́ва , и҆ ны́нѣ . гла́съ , ѕ҃ . Прᲂѡбразꙋ́ѧ вᲂскрⷭ҇нїе свᲂѐ хрⷭ҇тѐ бж҃е , тᲂгда̀ пᲂѧ́тъ трѝ свᲂѧ̀ ᲂу҆ченикѝ , петра̀ і҆а́кѡва и҆ і҆ѡа́нна , на ѳавѡ́ръ вᲂзше́дъ . тебѣ́ же сп҃се преѡ҆бразꙋ́емꙋ , ѳавѡ́рскаѧ гᲂра̀ свѣ́тᲂмъ пᲂкрыва́шесѧ . ᲂу҆ченицы̀ твᲂѝ сло́ве , пᲂверго́ша себѐ на лицы̀ землѝ , нетерпѧ́ще зрѣ́ти неви́димагѡ зра́ка . а҆́нг҃ли слꙋжа́хꙋ стра́хᲂмъ и҆ тре́петᲂмъ . нб҃са̀ ᲂу҆бᲂѧ́шасѧ , землѧ̀ вᲂстрепета̀ , зрѧ̀ на себѣ̀ сла́вы гдⷭ҇а .

та́же , вы́хᲂдъ . прᲂки́менъ , дню̀ .

Ѿ= и҆схо́да , чте́нїе .=

Речѐ гдⷭ҇ь к̾ мѡѷсе́ю , взы́ди кᲂ мнѣ̀ на́ гᲂрꙋ , и҆ ста́ни тꙋ̀ , и҆ да́мъ ти скрижа́ли ка́менныѧ зако́нъ и҆ за́пᲂвѣди , ꙗ҆́же написа́хъ зако́нити и҆́мъ . и҆ вᲂста́въ мѡѷсе́й и҆ і҆сꙋ́съ пред̾стᲂѧ́и є҆мꙋ̀ , взыдо́ша на́ гᲂрꙋ бж҃їю , и҆ ста́рцемъ рѣ́ша , без̾мо́лствꙋйте тꙋ̀ , до́ндеже вᲂз̾врати́мсѧ к̾ ва́мъ . и҆ сѐ а҆арѡ́нъ и҆ і҆ѡ́ръ с̾ ва́ми . а҆́ще кᲂмꙋ̀ прилꙋчи́тсѧ сꙋ́дъ , да и҆́дꙋтъ к̾ ни́ма . и҆ взы́де мѡѷсе́й на́ гᲂрꙋ и҆ пᲂкры̀ ѻ҆́блакъ го́рꙋ . и҆ сни́де сла́ва бж҃їѧ на́ гᲂрꙋ сѷна́йскꙋю , и҆ пᲂкры̀ ю҆̀ ѻ҆́блакъ ше́сть дні́й . и҆ призва̀ гдⷭ҇ь мѡѷсе́ѧ в̾ дн҃ь седьмы́и , и҆з̾ среды̀ ѻ҆́блака . видѣ́нїе же сла́вы гдⷭ҇ни , ꙗ҆́кѡ ѻ҆́гнь палѧ̀ на версѣ̀ гᲂры̀ , прѧ́мѡ сн҃о́въ і҆и҃левъ . и҆ вни́де мѡѷсе́й пᲂсредѝ ѻ҆́блака , и҆ взы́де на́ гᲂрꙋ . и҆ бѣ̀ тꙋ̀ на гᲂрѣ̀ , четы́редесѧть дні́и , и҆ четы́редесѧть нᲂще́й .

Ѿ= и҆схо́да , чте́нїе .=

Во́ днехъ ѻ҆́нѣхъ , гл҃а гдⷭ҇ь к̾ мѡѷсе́ю лице́мъ к̾ лицꙋ̀ , ꙗ҆́кᲂже а҆́ще кто̀ глаго́летъ кᲂ свᲂемꙋ̀ дрꙋ́гꙋ , и҆ ѿпꙋща́шесѧ в̾ со́ньмъ . слꙋга́ же і҆сꙋ́съ сн҃ъ на́винъ ю҆́нъ , не и҆з̾хᲂжда́ше ѿ ски́нїи . и҆ речѐ мѡѷсе́й ко́ гдⷭ҇ꙋ . се́ ты мнѣ̀ глаго́леши , и҆з̾ведѝ лю́ди сїѧ̀ , ты́ же несказа̀ мнѣ̀ , є҆го́же по́слеши сᲂ мно́ю . ты́ же ми речѐ , вѣ́мъ тѧ па́че всѣ́хъ , и҆ бл҃гᲂда́ть и҆́маши ѿ менѐ . а҆́ще ᲂу҆́бѡ ѡ҆брѣто́хъ бл҃гᲂда́ть пред̾ тᲂбо́ю , ꙗ҆ви́мисѧ са́мъ , разꙋ́мнѡ да ви́жꙋ тѧ . ꙗ҆́кѡ а҆́ще ѡ҆брѣто́хъ бл҃гᲂда́ть пред̾ тᲂбо́ю , и҆ да разꙋмѣ́ю ꙗ҆́кѡ лю́дїе твᲂѝ ꙗ҆зы́къ се́й . рече́ же гдⷭ҇ь к̾ мѡѷсе́ю , а҆́зъ са́мъ пред̾и҆дꙋ̀ пред̾ тᲂбо́ю , и҆ ᲂу҆пᲂко́ю тѧ . и҆ речѐ к̾ немꙋ̀ , а҆́ще не ты̀ са́мъ по́йдеши с̾ на́ми , не и҆з̾ведѝ менѐ ѿ сю́дꙋ . и҆ ка́кѡ разꙋ́мнѡ бꙋ́детъ вᲂи́стинꙋ , ꙗ҆́кѡ ѡ҆брѣто́хъ бл҃гᲂда́ть ѿ тебѐ , а҆́зъ же и҆ лю́дїе твᲂѝ . нᲂ и҆дꙋ́щꙋ ти с̾ на́ми и҆ прᲂсла́вимсѧ , а҆́зъ же и҆ лю́дїе твᲂѝ , па́че всѣ́хъ ꙗ҆зы́къ є҆ли́кѡ и҆́хъ на землѝ є҆́сть . рече́ же гдⷭ҇ь к̾ мѡѷсе́ю , и҆ се́ ти сло́вᲂ є҆́же речѐ сᲂтвᲂрю̀ . ѡ҆брѣ́те бᲂ бл҃гᲂда́ть предᲂ мно́ю , и҆ вѣ́мъ тѧ па́че всѣ́хъ . и҆ глаго́ла мѡѷсе́й , пᲂкажи́ ми сла́вꙋ свᲂю̀ . и҆ речѐ а҆́зъ пред̾ и҆дꙋ̀ пре́жде тебѐ сла́вᲂю мᲂе́ю , и҆ призᲂве́ши и҆́менемъ мᲂи́мъ гдⷭ҇а пред̾ сᲂбо́ю . и҆ пᲂми́лꙋю є҆го́же а҆́ще пᲂми́лꙋю . и҆ ᲂу҆ще́дрю є҆го́же а҆́ще ᲂу҆ще́дрю . и҆ речѐ не вᲂз̾мо́жеши ви́дѣти лица̀ мᲂегѡ̀ . немо́жетъ бᲂ ви́дѣти челᲂвѣ́къ лица̀ мᲂегѡ̀ и҆ жи́въ бы́ти . и҆ речѐ гдⷭ҇ь , сѐ мѣ́стᲂ прѧ́мᲂ мнѣ̀ , и҆ ста́неши при ка́мени , и҆ внегда̀ ми́мᲂ и҆́детъ сла́ва мᲂѧ̀ , и҆ пᲂста́влю тѧ при сква́жнѣ ка́мени , и҆ пᲂкры́ю рꙋко́ю мᲂе́ю над̾ тᲂбо́ю , до́ндеже ми́мѡ и҆дꙋ̀ . и҆ ѿи҆мꙋ̀ рꙋ́кꙋ мᲂю̀ , и҆ тᲂгда̀ ᲂу҆́зриши за́днѧѧ мᲂѧ̀ . лице́ же мᲂѐ не ꙗ҆ви́т̾тисѧ . и҆ ᲂу҆ра́нивъ мѡѷсе́й заꙋ́тра , взы́де на́ гᲂрꙋ сѷна́йскꙋю , ꙗ҆́кᲂже гл҃а є҆мꙋ̀ гдⷭ҇ь . и҆ сни́де гдⷭ҇ь вᲂ ѻ҆́блацѣ , и҆ пред̾ста̀ є҆мꙋ̀ тꙋ̀ мѡѷсе́й , и҆ призва̀ и҆́менемъ гдⷭ҇нимъ , и҆ пре́йде гдⷭ҇ь пред̾ лице́мъ є҆гѡ̀ . и҆ призва̀ гдⷭ҇ь бг҃ъ ще́дръ и҆ млⷭ҇тивъ , дᲂлгᲂтерпѣли́въ и҆ мнᲂгᲂмлⷭ҇тивъ и҆ и҆́стиненъ . и҆ пᲂтща́всѧ мѡѷсе́й прини́къ на́ землю , пᲂклᲂни́сѧ гдⷭ҇ви .

Ѿ= црⷭ҇твъ тре́тїихъ , чте́нїе .=

Во́ днехъ ѻ҆́нѣхъ , прїи́де и҆лїѧ̀ в̾ вирса́вїю , ꙗ҆́же є҆́сть землѧ̀ і҆ꙋ́дᲂва . и҆ ѡ҆ста́ви ѻ҆́трᲂчищь сво́й тꙋ̀ . и҆ то́й по́йде в̾ пꙋсты́ню пꙋ́ть днѐ . и҆ прїи́де и҆ сѣ́де пᲂд̾ сме́рчїемъ . и҆ ᲂу҆спѐ пᲂд̾ садо́мъ , и҆ со́нъ ви́дѣ . и҆ сѐ нѣ́кїи прикᲂснꙋ́сѧ є҆мꙋ̀ , и҆ речѐ є҆мꙋ̀ , вᲂста́ни ꙗ҆́ждь и҆ пі́й . и҆ вᲂз̾зрѣ̀ и҆лїѧ̀ , и҆ сѐ при вᲂз̾гла́вїи є҆гѡ̀ ѻ҆прѣсно́къ пы́ренъ . и҆ кᲂрча́гъ вᲂды̀ . и҆ вᲂста̀ и҆ ꙗ҆дѐ и҆ пи́тъ , и҆ ѡ҆бра́щьсѧ ᲂу҆́спе . и҆ ѡ҆бра́щьсѧ а҆́нг҃лъ гдⷭ҇нь втᲂри́цею , и҆ прикᲂснꙋ́сѧ є҆мꙋ̀ и҆ речѐ , вᲂста́ни ꙗ҆́ждь и҆ пі́й , ꙗ҆́кѡ мно́гъ ѿ тебѐ пꙋ́ть . и҆ вᲂста̀ и҆ ꙗ҆́дъ и҆ пи́тъ . и҆ и҆́де въ крѣ́пᲂсти ꙗ҆́ди тᲂѧ̀ , четы́редесѧть дне́й , и҆ четы́редесѧть нᲂще́й , дᲂ гᲂры̀ хᲂри́вскїѧ . и҆ вни́де тꙋ̀ в̾ пеще́рꙋ , и҆ всели́сѧ в̾ не́й . и҆ сѐ гл҃ъ гдⷭ҇нь к̾ немꙋ̀ , и҆ речѐ є҆мꙋ̀ гдⷭ҇ь , и҆зы́ди и҆ ста́ни на гᲂрѣ̀ пре́д̾ гдⷭ҇емъ . и҆ сѐ гдⷭ҇ь ми́мѡ и҆́детъ , и҆ дх҃ъ ве́лїи и҆ крѣ́пᲂкъ разᲂрѧ́ѧ го́ры , и҆ сᲂкрꙋша́ѧ ка́менїе пре́д̾ гдⷭ҇емъ . и҆ не в̾ дꙋ́сѣ гдⷭ҇ь . и҆ по́ дꙋсѣ трꙋ́съ , и҆ не в̾ трꙋ́сѣ гдⷭ҇ь . и҆ пᲂ трꙋ́сѣ ѻ҆́гнь , и҆ не вᲂ ѻ҆гнѝ гдⷭ҇ь . и҆ пᲂ ѻ҆гнѝ гла́съ хла́да то́нка , и҆ тꙋ̀ гдⷭ҇ь . и҆ бы́сть ꙗ҆́кѡ ᲂу҆слы́ша и҆лїѧ̀ , пᲂкры̀ лицѐ свᲂѐ ми́лᲂтїю свᲂе́ю , и҆ и҆зы́де , и҆ ста̀ бли́зъ пеще́ры . и҆ речѐ гдⷭ҇ь к̾ немꙋ̀ , и҆дѝ и҆ вᲂзврати́сѧ в̾ пꙋ́ть сво́й . и҆ по́йдеши в̾ пꙋ́ть пꙋсты́ни дама́скᲂвы , и҆ пᲂма́жеши є҆лисе́ѧ сн҃а а҆сафа́тѡва , в̾ мѣ́стѡ себѐ прᲂро́ка .

На литі́и , стихѣ́ры . гла́съ , в҃ . И҆́же свѣ́тᲂмъ свᲂи́мъ всю̀ вселе́ннꙋю ѡ҆свѧ́щь , на гᲂрѣ̀ высо́цѣ преѡ҆брази́сѧ бл҃же , пᲂказа́въ ᲂу҆ченикѡ́мъ свᲂи́мъ сла́вꙋ свᲂю̀ , ꙗ҆́кѡ ми́ра и҆збавлѧ́еши ѿ престꙋпле́нїѧ . тѣ́мже вᲂпїе́мъ ти , млрⷭ҇де гдⷭ҇и спасѝ дш҃а на́ша . И҆́же на гᲂрѣ̀ ѳавѡ́рстѣй преѡ҆бра́жьсѧ , вᲂ сла́вѣ хрⷭ҇тѐ бж҃е , и҆ пᲂказа̀ ᲂу҆ченикѡ́мъ свᲂи́мъ сла́вꙋ свᲂегѡ̀ бжⷭ҇тва̀ , ѡ҆зарѝ и҆ на́съ свѣ́тᲂмъ твᲂегѡ̀ разꙋмѣ́нїѧ . и҆ наста́ви на стезю̀ запᲂвѣде́й твᲂи́хъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ . И҆́же пре́жде сл҃нца свѣ́тъ хрⷭ҇то́съ , тѣле́снѣ на землѝ жи́тельствꙋѧ , и҆ пре́жде крⷭ҇та̀ всѧ̀ ꙗ҆́же стра́шнагѡ смᲂтре́нїѧ , сᲂвершѝ бг҃ᲂлѣ́пнѡ . дне́сь на ѳавѡ́рстѣй гᲂрѣ̀ , та́йнѡ трⷪ҇цы ѻ҆́бразъ пᲂказꙋ́ѧ . и҆зѧ́щныѧ бᲂ трѝ ᲂу҆ченикѝ , петра̀ і҆а́кѡва и҆ і҆ѡа́нна , на ню̀ вᲂз̾ведѐ на є҆динѣ̀ , и҆ ма́лѡ скры́въ пло́ти вᲂспрїѧ́тїе , преѡ҆брази́сѧ пред̾ ни́ми . ꙗ҆влѧ́ѧ началᲂѡ҆бра́зныѧ дᲂбро́ты бл҃гᲂлѣ́пїе , и҆ то̀ не всѐ сᲂверше́нᲂ , ѻ҆́вᲂ и҆з̾вѣстꙋ́ѧ и҆́хъ вкꙋ́пѣ и҆ щадѧ̀ , да не ка́кѡ сᲂ зра́кᲂмъ и҆ є҆́же жи́ти пᲂгꙋбѧ́тъ . нᲂ ꙗ҆́кѡ мᲂжа́хꙋ вмѣща́ти тѣле́сныма ѻ҆чи́ма стерпѧ́ще . и҆ прⷪ҇ро́кᲂмъ верхо́вныѧ , мѡѷсе́ѧ и҆ и҆лїю̀ приведѐ , непрекᲂсло́внѣ свидѣ́тельствꙋющихъ є҆гѡ̀ бжⷭ҇тво̀ . и҆ ꙗ҆́кѡ то́й є҆́сть и҆́стиннᲂе ѻ҆те́ческагѡ сꙋ́щества сїѧ́нїе , гдⷭ҇ьствꙋѧ живы́ми и҆ ме́ртвыми . тѣ́мъ и҆ ѻ҆́блакъ ꙗ҆́кᲂже сѣ́нь ѡ҆бьѧ́тъ и҆́хъ . и҆ гла́съ свы́ше ѻ҆ч҃ь и҆з̾ ѻ҆́блака шꙋ́мнѡ пред̾свидѣ́тельствꙋющь и҆ гл҃ющь , се́й є҆́сть є҆го́же нетлѣ́ннѡ и҆́з̾ чрева пре́жде денни́цы рᲂди́хъ , сн҃ъ вᲂзлю́бленныи мо́й , є҆го́же пᲂсла́хъ спастѝ , є҆́же вᲂ ѻ҆ц҃а и҆ сн҃а и҆ дх҃а ст҃а́гѡ креща́емыхъ , и҆ и҆спᲂвѣ́дающихъ вѣ́рнѡ , ꙗ҆́кѡ нераз̾дѣ́льна є҆́сть є҆ди́на держа́ва бжⷭ҇тва̀ , тᲂгѡ̀ пᲂслꙋ́шайте . са́мъ ᲂу҆́бѡ чл҃кᲂлю́бче хрⷭ҇тѐ бж҃е , и҆ на́съ ѡ҆зарѝ свѣ́тᲂмъ неприкᲂснᲂве́нныѧ тѝ сла́вы , и҆ дᲂсто́йны пᲂкажѝ наслѣ́дники без̾кᲂне́чнагѡ црⷭ҇твїѧ твᲂегѡ̀ , ꙗ҆́кѡ пребл҃гъ . сла́ва . гла́съ , є҃ . Прїиди́те взы́демъ на́ гᲂрꙋ гдⷭ҇ню , и҆ в̾ до́мъ бг҃а на́шегѡ , и҆ ᲂу҆́зримъ сла́вꙋ преѡ҆браже́нїѧ є҆гѡ̀ , сла́вꙋ ꙗ҆́кѡ є҆динᲂро́днагѡ ѿ ѻ҆ц҃а , свѣ́тᲂмъ прїи́мемъ свѣ́тъ . и҆ прелᲂже́ни бы́вше дх҃ᲂмъ , трⷪ҇цꙋ є҆динᲂсꙋ́щнꙋю вᲂспᲂе́мъ во́ вѣки . и҆ ны́нѣ . гла́съ , то́йже . Зако́нꙋ и҆ прⷪ҇ро́кᲂмъ тѧ̀ хрⷭ҇тѐ , твᲂрца̀ и҆ и҆спᲂлни́телѧ свидѣ́тельствᲂваша , зрѧ́ще вᲂ ѻ҆́блацѣ , мѡѷсе́й бг҃ᲂви́децъ , и҆ и҆лїѧ̀ ѻ҆гнекᲂлесни́чникъ , и҆ неѡ҆пали́мыи нб҃ᲂше́ственникъ , в̾ преѡ҆браже́нїи твᲂе́мъ . с̾ни́миже и҆ на́съ твᲂего̀ прᲂсвѣще́нїѧ спᲂдо́би влⷣкᲂ , пѣ́ти тѧ̀ во́ вѣки .

На стихо́внѣ , стихѣ́ры . гла́съ , а҃ . И҆́же дре́вле с̾ мѡѷсе́ᲂмъ глаго́лавыи , на гᲂрѣ̀ сѷна́йстѣй ѻ҆́бразы , а҆́зъ є҆́смь с̾ тᲂбо́ю глаго́лѧи сы́и , дне́сь на гᲂрѣ̀ ѳавѡ́рстѣй , преѡ҆бра́жьсѧ пред̾ ᲂу҆ченикѝ , пᲂказа̀ началᲂѡбра́знꙋю дᲂбро́тꙋ зра́ка , в̾ себѣ̀ вᲂспрїи́мъ чл҃ческᲂе сꙋщество̀ , и҆ такᲂвы́ѧ бл҃гᲂда́ти свидѣ́телѧ пᲂста́вль , мѡѷсе́ѧ и҆ и҆лїю̀ , ѻ҆бѣ́щники твᲂрѧ́ше весе́лїю , прᲂвᲂзвѣща́ѧ сла́внᲂе крⷭ҇та̀ ра́ди , и҆ спасе́ннᲂе вᲂскрⷭ҇нїе .

сти́хъ : твᲂѧ̀ сꙋ́ть нб҃са̀ ,꙳ и҆ твᲂѧ̀ є҆́сть землѧ̀ . Твᲂегѡ̀ є҆динᲂро́днагѡ сн҃а прᲂви́дѣ дх҃ᲂмъ , плᲂтьско́е къ чл҃кѡмъ прише́ствїе , бг҃ᲂѻ҆ц҃ъ дв҃дъ , и҆з̾ дале́ча к̾ весе́лїю сᲂзыва́етъ тва́рь , и҆ прᲂро́чески взыва́етъ , ѳавѡ́ръ и҆ є҆рмѡ́нъ ѡ҆ и҆́мени твᲂе́мъ вᲂзра́дꙋетасѧ . на сїю́ бᲂ вᲂзше́дъ го́рꙋ сп҃се сᲂ ᲂу҆ченикѝ свᲂи́ми , ѡ҆чернѣ́вшее а҆да́мᲂвᲂ є҆стество̀ , преѡ҆бра́жьсѧ ѡ҆блиста́ти па́ки сᲂтвᲂри́лъ є҆сѝ , претвᲂри́въ є҆̀ , в̾ свᲂегѡ̀ бжⷭ҇тва̀ сла́вꙋ же и҆ свѣ́тлᲂсть . тѣ́мже вᲂпїе́мъ ти , сᲂдѣ́телю всѧ́ческихъ , гдⷭ҇и сла́ва тебѣ̀ .

сти́хъ : ѳавѡ́ръ и҆ є҆рмѡ́нъ ,꙳ ѡ҆ и҆́мени твᲂе́мъ вᲂзра́дꙋетасѧ . Неѡ҆держи́мᲂе твᲂегѡ̀ свѣтᲂли́тїѧ , и҆ неприкᲂснᲂве́ннᲂе бжⷭ҇тва̀ , зрѧ́ще а҆пⷭ҇лѡмъ лꙋ́чшїи , на гᲂрѣ̀ преѡ҆браже́нїѧ без̾нача́льне хрⷭ҇тѐ , бжⷭ҇твенымъ и҆з̾мѣни́шасѧ ᲂу҆́жасᲂмъ . и҆ ѻ҆́блакᲂмъ ѡ҆сїѧ́вшесѧ свѣ́тлымъ , гла́съ слы́шахꙋ ѻ҆ч҃ь , и҆з̾вѣстꙋ́ющь та́иньствᲂ твᲂегѡ̀ вᲂчл҃ченїѧ . ꙗ҆́кѡ є҆ди́нъ є҆сѝ и҆ пᲂ вᲂплᲂще́нїи , сн҃ъ є҆динᲂро́дныи , и҆ сп҃съ ми́рꙋ . сла́ва , и҆ ны́нѣ . гла́съ , ѕ҃ . Петрꙋ̀ і҆а́кѡвꙋ и҆ і҆ѡа́ннꙋ , лꙋ́чшимъ ᲂу҆ченикѡ́мъ твᲂи́мъ гдⷭ҇и , дне́сь пᲂказа́лъ є҆сѝ на гᲂрѣ̀ ѳавѡ́рстѣй , сла́вꙋ бжⷭ҇твеннагѡ свᲂегѡ̀ зра́ка . видѧ́хꙋ бᲂ ри́зы твᲂѧ̀ ѡ҆блиста́вша ꙗ҆́кѡ свѣ́тъ , и҆ лицѐ твᲂѐ па́че сл҃нца . нетерпѧ́ще зрѣ́ти . нестерпи́мᲂе твᲂегѡ̀ сїѧ́нїѧ , на́ землю низ̾па́дахꙋ , ни ка́кᲂже зрѣ́ти мᲂгꙋ́ще , гла́съ же слы́шахꙋ свидѣ́тельствꙋющь свы́ше , се́й є҆́сть сн҃ъ мо́й вᲂзлю́бленныи , прише́дыи в̾ ми́ръ спастѝ чл҃ка .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , з҃ . Преѡ҆брази́выисѧ на гᲂрѣ̀ хрⷭ҇тѐ бж҃е , пᲂказа́въ ᲂу҆ченико́мъ свᲂи́мъ сла́вꙋ свᲂю̀ , ꙗ҆́кᲂже мᲂжа́хꙋ . да вᲂзсїѧ́етъ и҆ на́мъ грѣ́шнымъ свѣ́тъ тво́й приснᲂсꙋ́щныи , мл҃твами бцⷣы , свѣтᲂда́вче сла́ва тебѣ̀ . гⷤ .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . Пᲂ а҃ , стихᲂсло́гїи , сѣда́ленъ . гла́съ , г҃ . Бжⷭ҇твеныѧ тѝ сла́вы сїѧ́нїе , ꙗ҆́кᲂже мᲂжа́хꙋ пᲂказа́лъ є҆сѝ сло́ве бж҃їи ᲂу҆ченико́мъ свᲂи́мъ , на ѳавѡ́рстѣй гᲂрѣ̀ преѡ҆бразꙋ́емь , и҆́миже прᲂсвѣти́хᲂмсѧ и҆ мы̀ пᲂю́ще тѧ , є҆ди́не не и҆з̾мѣ́нне и҆ без̾сме́ртне гдⷭ҇и . тебѣ́ бᲂ вѣ́рᲂю вᲂпїе́мъ , сла́ва хрⷭ҇тѐ црⷭ҇твїю тѝ . сла́ва , и҆ ны́нѣ , то́йже .

Пᲂ в҃ , стихᲂсло́гїи , сѣда́ленъ . гла́съ , д҃ . Вᲂзше́дыи сᲂ ᲂу҆ченикѝ на́ гᲂрꙋ , и҆ сла́вᲂю ѻ҆́ч҃ею ѡ҆блиста́въ . с̾ мѡѷсе́ᲂмъ и҆ и҆лїѧ̀ тебѣ̀ пред̾стᲂѧ́ста , зако́нъ и҆ прᲂро́цы бᲂ ꙗ҆́кѡ бг҃ᲂви слꙋ́жатъ , є҆мꙋ́же сынᲂвство̀ є҆сте́ственѡ рᲂди́тель , и҆спᲂвѣ́даѧ нарица́ше сн҃а , є҆го́же вᲂспѣва́емъ с̾ тᲂбо́ю и҆ дх҃ᲂмъ . сла́ва , и҆ ны́нѣ , то́йже .

Пᲂ пᲂлїєлеѡ́сѣ , сѣда́лен̾ . гла́съ , и҃ . Сᲂкрᲂве́нꙋю мо́лнїю пᲂд̾ пло́тїю , сꙋщества̀ твᲂегѡ̀ хрⷭ҇тѐ . и҆ бжⷭ҇твенагѡ бл҃гᲂлѣ́пїѧ , вᲂ ст҃ѣ́й пᲂказа́лъ є҆сѝ гᲂрѣ̀ бл҃гᲂда́телю , прᲂсїѧ́въ сꙋ́щимъ с̾ тᲂбо́ю ᲂу҆ченикѡ́мъ . и҆ разꙋмѣ́вше непᲂстᲂѧ́ннꙋ сꙋ́щꙋ сла́вꙋ твᲂю̀ . ст҃ъ є҆сѝ вᲂзᲂпи́ша , ꙗ҆́кѡ не пристꙋ́пенъ сы́и , ви́дѣнъ бы́сть пло́тїю ми́рᲂви , є҆ди́не чл҃кᲂлю́бче .= сла́ва , и҆ нн҃ѣ , то́йже .=

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Ѳавѡ́ръ и҆ є҆рмо́нъ , ѡ҆ и҆́мени твᲂе́мъ вᲂзра́дꙋетасѧ . сти́хъ . твᲂѧ̀ сꙋ́ть нб҃са̀ , и҆ твᲂѧ̀ є҆́сть землѧ̀ . всѧ́кᲂ дыха́нїе . =є҆ѵⷢ҇а́лїе , ѿ =лꙋкѝ . зача́лᲂ , м҃є . ѱало́мъ , н҃ .

сла́ва . Всѧ́ческаѧ дне́сь ра́дᲂсти и҆спо́лнишасѧ , хрⷭ҇то́съ преѡ҆брази́сѧ на ѳавѡ́рѣ .

и҆ ны́нѣ . Всѧ́ческаѧ дне́сь ра́дᲂсти и҆спо́лнишасѧ , хрⷭ҇то́съ преѡ҆брази́сѧ пред̾ ᲂу҆ченикѝ свᲂи́ми .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стⷯра . гла́съ , є҃ . Бжⷭ҇тва̀ твᲂегѡ̀ сп҃се ма́лꙋ зарю̀ ѡ҆бнажи́въ , сᲂ вше́дшимъ с̾ тᲂбо́ю на́ гᲂрꙋ , преми́рныѧ твᲂеѧ̀ сла́вы сᲂтвᲂри́лъ є҆сѝ рачи́телѧ . тѣ́мже ᲂу҆жа́снѡ зᲂвѧ́хꙋ , дᲂбро̀ є҆́сть на́мъ здѣ̀ бы́ти , с̾ ни́ми же и҆ мы̀ тебѐ преѡ҆бра́жшагᲂсѧ сп҃са хрⷭ҇та̀ пᲂе́мъ во́ вѣки .

Кано́на , два̀ . ки́ръ кᲂзмы̀ , гла́съ , д҃ . и҆ ки́ръ і҆ѡа́нна , гла́съ , и҃ . і҆рмᲂсы̀ ѡ҆бᲂю̀ кано́нᲂвъ пᲂ два́жды . трᲂпарѝ всѧ̀ твᲂри́мъ , на в҃і .

Кано́нъ , гла́съ , д҃ . пѣ́снь , а҃ . і҆рмо́съ . Ли́цы і҆зра́ильтестїи невла́жными стᲂпа́ми , по́нта чермна́гѡ мᲂрскꙋ́ю глꙋбинꙋ̀ прᲂгна́вше . вса́дники тристᲂѧ́ща врагѝ ви́дѧщи в̾ не́й пᲂгрꙋже́ны , с̾ весе́лїемъ пᲂѧ́хꙋ , пᲂе́мъ бг҃ꙋ на́шемꙋ , ꙗ҆́кѡ прᲂсла́висѧ .

запѣ́въ : Сла́ва гдⷭ҇и преѡ҆браже́нїю твᲂемꙋ̀ . Глаго́лы живо́тныѧ дрꙋго́мъ хрⷭ҇то́съ , и҆ ѡ҆ бжⷭ҇твенѣмъ наказꙋ́ѧ црⷭ҇твїи , речѐ , вᲂ мнѣ̀ ѻ҆ц҃а пᲂзна́йте , свѣ́тᲂмъ ꙗ҆́кѡ ѡ҆блиста́ѧ непристꙋ́пнымъ , въ ра́дᲂсти пᲂю́ще , пᲂе́мъ бг҃ꙋ на́шемꙋ , ꙗ҆́кѡ прᲂсла́висѧ . Си́лᲂю ꙗ҆зы́къ ѡ҆блече́тесѧ дрꙋ́зи и҆ ᲂу҆ченицы̀ , чꙋ́дни же бꙋ́дете в̾ бᲂга́тьствѣ и҆́хъ , ꙗ҆́кѡ сла́вы напо́лнитесѧ . ꙗ҆́кѡ ꙗ҆влю́сѧ свѣтлѣ́е сл҃нца ѡ҆блиста́ѧ , въ ра́дᲂсти пᲂю́ще , пᲂе́мъ бг҃ꙋ на́шемꙋ , ꙗ҆́кѡ прᲂсла́висѧ .= Д=не́сь хрⷭ҇то́съ на гᲂрѣ̀ ѳавѡ́рстѣй прᲂсїѧ́въ , ꙗ҆́снѡ бжⷭ҇твенᲂю заре́ю ꙗ҆́кᲂже ѡ҆бѣща́сѧ , ᲂу҆ченикѡ́мъ ѡ҆бнажа́ѧ зра́ка . лꙋчено́сныѧ же напо́лньшесѧ бжⷭ҇твеныѧ зарѝ , в̾ ра́дᲂсти пᲂѧ́хꙋ , пᲂе́мъ бг҃ꙋ на́шемꙋ , ꙗ҆́кѡ прᲂсла́висѧ .

дрꙋгі́и , кано́нъ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : Сла́ва гдⷭ҇и преѡ҆браже́нїю твᲂемꙋ̀ . Мѡѷсе́й на́ мᲂрѣ прⷪ҇ро́чески , ви́дѣвъ ѻ҆́блакᲂмъ и҆ стᲂлпо́мъ дре́вле ѻ҆́гненымъ , сла́вꙋ гдⷭ҇ню , вᲂпїѧ́ше , и҆зба́вителю бг҃ꙋ на́шемꙋ пᲂе́мъ . Ꙗ҆́кѡ ка́менемъ тѣ́лᲂ пᲂкры́всѧ , видѣ́нїемъ неви́димагᲂ зрѧ̀ , мѡѷсе́й бг҃ᲂви́децъ , взыва́ше , и҆зба́вителю бг҃ꙋ на́шемꙋ пᲂе́мъ . Ты̀ на гᲂрѣ̀ зако́ннѣй , и҆ на ѳавѡ́рстѣй ви́дѣнъ бы́сть мѡѷсе́ю , во́ мрацѣ дре́вле , во́ свѣтѣ же нн҃ѣ непристꙋ́пнѣмъ бжⷭ҇тва̀ .

катава́сїѧ : Крⷭ҇та̀ начерта́въ мѡѷсе́й , в̾ прѧ́мѡ жеѕло́мъ чермно́е пресѣчѐ , і҆и҃лю прᲂхᲂдѧ́щꙋ . то́йже ѡ҆браще́нїемъ фараѡ́на с̾ кᲂлесни́цами ᲂу҆да́ривъ сᲂвᲂкꙋпѝ , вᲂпрекѝ написа́въ не пᲂбѣди́мᲂе ѻ҆рꙋ́жїе . тѣ́мъ хрⷭ҇та̀ вᲂспᲂе́мъ бг҃а на́шегѡ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Лꙋ́къ си́льныхъ и҆знемо́же , а҆ не́мᲂщнїи препᲂѧ́сашасѧ си́лᲂю . сегѡ̀ ра́ди вᲂз̾весели́сѧ , ѡ҆́ гдⷭ҇ѣ срⷣце мᲂѐ . Вᲂ всего̀ а҆да́ма ѡ҆бле́ксѧ хрⷭ҇тѐ , ѡ҆чернѣ́вшее и҆змѣни́въ прᲂсвѣти́лъ є҆сѝ дре́вле є҆стество̀ , и҆змѣне́нїемъ зра́ка твᲂегѡ̀ бг҃ᲂсᲂдѣ́лалъ є҆сѝ . Стᲂлпо́мъ ѻ҆гнезра́чнымъ , и҆ ѻ҆́блакᲂмъ дре́вле , и҆́же въ пꙋсты́ни і҆зра́илѧ веды́и , дне́сь на гᲂрѣ̀ ѳавѡ́рстѣй , неи҆зрече́ннѡ во́ свѣтѣ хрⷭ҇то́съ прᲂсїѧ̀ . Стᲂлпо́мъ ѻ҆гнезра́чнымъ , и҆ ѻ҆́блакᲂмъ дре́вле , и҆́же въ пꙋсты́ни і҆зра́илѧ веды́и , дне́сь на гᲂрѣ̀ ѳавѡ́рстѣй , неи҆зрече́ннѡ во́ свѣтѣ хрⷭ҇то́съ прᲂсїѧ̀ .

и҆́нъ , і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й . жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Ѻ҆сѣнѧ́ющаѧ сла́ва в̾ сѣ́ни пе́рвѣе , и҆ мѡѷсе́ᲂви бесѣ́дꙋющи твᲂемꙋ̀ ᲂу҆го́дникꙋ , ѻ҆́бразъ бы́сть ѡ҆блиста́вшагѡ неи҆зрече́ннѡ , на ѳавѡ́рѣ влⷣкᲂ твᲂегѡ̀ преѡ҆браже́нїѧ . Сᲂвзыдо́ша ти сло́ве є҆динᲂро́дныи вы́шне , а҆пⷭ҇льстїи версѝ , на́ гᲂрꙋ ѳавѡ́рскꙋю . и҆ сᲂпред̾ста́ша ти мѡѷсе́й же и҆ и҆лїѧ̀ , ꙗ҆́кѡ бж҃їѧ слꙋгѝ , є҆ди́не чл҃кᲂлю́бче . Бг҃ъ сло́вᲂ сы́и , ве́сь зе́мленъ бы́сть , всемꙋ̀ бжⷭ҇твꙋ̀ смѣси́въ чл҃чествᲂ . в̾ сᲂста́вѣ свᲂе́мъ є҆́же вᲂ двᲂю̀ сꙋществꙋ̀ . мѡѷсе́й и҆ и҆лїѧ́ же ви́дѣша на гᲂрѣ̀ ѳавѡ́рѣ .

катава́сїѧ : Же́ѕлъ вᲂ ѻ҆́бразъ та́йнѣ прїе́млетсѧ , прᲂзѧбе́нїемъ бᲂ раз̾сꙋдѝ і҆єре́ѧ . неплᲂдѧ́щаѧ же пре́жде цр҃кви , нн҃ѣ прᲂцвѣтѐ дре́вᲂ крⷭ҇та̀ , в̾ держа́вꙋ и҆ ᲂу҆тверже́нїе .

сѣда́лен̾ . гла́съ , д҃ . Чл҃ческᲂе премѣне́нїе , є҆́же сᲂ сла́вᲂю твᲂе́ю сп҃се на втᲂрѣ́мъ и҆ стра́шнѣмъ твᲂе́мъ прише́ствїи пᲂказа́въ . на гᲂрѣ̀ ѳавѡ́рстѣй преѡ҆брази́сѧ , и҆лїѧ̀ и҆ мѡѷсе́й гл҃аста с̾ тᲂбо́ю . и҆ трѝ ѿ ᲂу҆чени́къ спризва̀ , и҆ ви́дѣвше сла́вꙋ влⷣкᲂ блиста́нїѧ твᲂегѡ̀ , ᲂу҆жасо́шасѧ . и҆́же тᲂгда̀ си́мъ свѣ́тъ сво́й ѡ҆сїѧ́выи , прᲂсвѣтѝ дш҃а на́ша . сла́ва , и҆ ны́нѣ , то́йже .

пѣ́снь , д҃ . і҆рмо́съ . Оу҆слы́шахъ сла́внᲂе смᲂтре́нїе твᲂѐ хрⷭ҇тѐ бж҃е , ꙗ҆́кѡ рᲂди́сѧ ѿ дв҃ы , да ѿ ле́сти и҆зба́виши вᲂпїю́щїѧ ти , сла́ва си́лѣ твᲂе́й гдⷭ҇и . Зако́нъ в̾ сѷна́и писа́нїемъ вᲂѡбража́ѧ хрⷭ҇тѐ бж҃е , вᲂ ѻ҆́блацѣ и҆ ѻ҆гнѝ и҆ мра́цѣ , и҆ въ ви́хрѣ ꙗ҆ви́лсѧ є҆сѝ нᲂси́мъ . сла́ва си́лѣ твᲂе́й гдⷭ҇и . Да ᲂу҆вѣ́риши сла́внᲂе смᲂтре́нїе свᲂѐ хрⷭ҇тѐ бж҃е , ꙗ҆́кѡ сы́и пре́жде вѣ́къ , и҆ то́й же на ѻ҆́блацѣ вᲂсхᲂжде́нїе пᲂло́жь . на ѳавѡ́рѣ неи҆зрече́ннѡ прᲂсїѧ́лъ є҆сѝ . Сᲂглаго́люще пред̾стᲂѧ́хꙋ , рабᲂлѣ́пнѡ тебѣ̀ влⷣцѣ хрⷭ҇тꙋ̀ , к̾ ни́мже па́рᲂю ѻ҆гнѧ̀ и҆ мра́ка , и҆ то́нкимъ хла́дᲂмъ бесѣ́дᲂвалъ є҆сѝ . сла́ва си́лѣ твᲂе́й гдⷭ҇и . Вᲂзвѣща́хꙋ сла́внᲂе крⷭ҇та̀ ра́ди твᲂегѡ̀ , на ѳавѡ́ръ прише́дша , и҆́же вᲂ ѻ҆гни́ тѧ и҆ кꙋпинѣ̀ дре́вле , пред̾ви́дѣ мѡѷсе́й , и҆ взѧ́тыи на кᲂлесни́цѣ ѻ҆́гненѣй и҆лїѧ̀ хрⷭ҇тѐ .

и҆́нъ , і҆рмо́съ . И҆з̾ пло́ти твᲂеѧ̀ лꙋчѝ бжⷭ҇твеныѧ и҆з̾хᲂжда́хꙋ , прᲂро́кᲂмъ и҆ а҆пⷭ҇лѡмъ . тѣ́мже нача́льницы ви́дѧще вᲂпїѧ́хꙋ , сла́ва си́лѣ твᲂе́й гдⷭ҇и . И҆́же кꙋпинꙋ̀ сᲂхрани́выи неврежде́нꙋ , прикᲂснꙋ́вшꙋюсѧ ѻ҆гню̀ , мѡѷсе́ю , бг҃ᲂсїѧ́ннꙋю пло́ть пᲂказа̀ влⷣкᲂ , пᲂю́щꙋ , сла́ва си́лѣ твᲂе́й гдⷭ҇и . Скры́сѧ заре́ю бжⷭ҇тва̀ , чꙋ́вственᲂе сл҃нце . ꙗ҆́кѡ на гᲂрѣ̀ ѳавѡ́рстѣй , ви́дѣ тѧ преѡ҆бразꙋ́ема і҆с҃е мо́й . сла́ва си́лѣ твᲂе́й гдⷭ҇и . Ѻ҆́гнь не ѡ҆палѧ́ѧ ве́щи тѣле́сныѧ , ви́дѣнъ бы́сть невеще́ственъ . ꙗ҆́кᲂже мѡѷсе́ю и҆ а҆пⷭ҇лѡмъ ꙗ҆ви́сѧ , и҆лїи́ же , влⷣкᲂ є҆ди́нъ ѿ двᲂю̀ , вᲂ двꙋ̀ сᲂверше́нꙋ є҆стествꙋ̀ .

катава́сїѧ : Оу҆слы́шахъ гдⷭ҇и смᲂтре́нїѧ твᲂегѡ̀ та́иньствᲂ , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ .

пѣ́снь , є҃ . і҆рмо́съ . Ѿ свѣ́та ѿгна́выи первᲂро́днагѡ па́гꙋбꙋ . ꙗ҆́кѡ во́ свѣтѣ дѣ́ла пᲂю́тъ тѧ хрⷭ҇тѐ сᲂдѣ́телѧ , во́ свѣтѣ твᲂе́мъ пꙋтѝ на́ша напра́ви . Пред̾ лице́мъ ти го́ры ᲂу҆клᲂни́шасѧ , свѣ́тъ бᲂ и҆ пред̾ нᲂга́ма , нб҃ᲂте́чныѧ лꙋчѝ хрⷭ҇тѐ сл҃нце прїи́де , зра́къ зе́мленъ ꙗ҆́кѡ прїѧ́ти бл҃гᲂвᲂли́лъ є҆сѝ . Сѐ сп҃съ вᲂпїѧ́хꙋ мѡѷсе́й и҆ и҆лїѧ̀ ᲂу҆ченикѡ́мъ , на гᲂрѣ̀ ст҃ѣ́й ѳавѡ́рстѣй ѡ҆глаша́емымъ , хрⷭ҇то́съ , є҆го́же дре́вле прᲂвᲂзвѣсти́хᲂмъ сꙋ́щагѡ бг҃а . Неи҆змѣ́ннᲂе є҆стество̀ , чл҃ческᲂмꙋ примѣ́шьсѧ , ѡ҆би́льнѡ невеще́ственагѡ бжⷭ҇тва̀ , свѣ́тъ и҆з̾ѡ҆бнажи́въ а҆пⷭ҇лѡмъ , неи҆зрече́ннѡ вᲂсїѧ̀ . Тѧ̀ невеще́ственᲂе сїѧ́нїе вᲂ ѻ҆те́честѣй сла́вѣ , ᲂу҆ченицы̀ ꙗ҆́кѡ ви́дѣвше вᲂсїѧ́вша хрⷭ҇тѐ , тебѣ̀ вᲂпїѧ́хꙋ , во́ свѣтѣ твᲂе́мъ пꙋтѝ на́ша напра́ви .

и҆́нъ , і҆рмо́с̾ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . нᲂ ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Вѣтꙋ́ющїи ꙗ҆зы́къ , твᲂегѡ̀ вели́чества немо́жетъ вѣща́ти , ꙗ҆́кѡ держа́й живо́тъ бᲂ , и҆ сме́ртїю влады́и , пред̾ста́вилъ є҆сѝ на ѳавѡ́рстѣй гᲂрѣ̀ , мѡѷсе́ѧ и҆ и҆лїю̀ , свидѣ́тельствꙋюща твᲂѐ бжⷭ҇тво̀ . И҆́же рꙋка́ма неви́димыма , сᲂзда́въ пᲂ ѻ҆́бразꙋ свᲂемꙋ̀ хрⷭ҇тѐ чл҃ка , началᲂѡ҆бра́знꙋю свᲂю̀ в̾ сᲂзда́нїи дᲂбро́тꙋ , пᲂказа́лъ є҆сѝ . не ꙗ҆́кѡ вᲂ ѻ҆́бразѣ , нᲂ ꙗ҆́кѡ са́мъ сы́и пᲂ сꙋществꙋ̀ , бг҃ъ бы́сть и҆ чл҃къ . Смѣ́шьсѧ неслїѧ́ннѡ , ᲂу҆́гль гᲂрѧ́щь пᲂказа̀ на́мъ бжⷭ҇тва̀ . пᲂпалѧ́ющь ᲂу҆́бѡ грѣхѝ , дꙋша́ же прᲂсвѣща́ющь . на ѳавѡ́рстѣй гᲂрѣ̀ мѡѷсе́ю сᲂ и҆лїе́ю , ᲂу҆ченико́мъ же старѣ́йшїѧ ᲂу҆диви́лъ є҆сѝ .

катава́сїѧ : ѽ треблаже́ннᲂе дре́вᲂ , на не́мже распѧ́тсѧ хрⷭ҇то́съ цр҃ь и҆ гдⷭ҇ь . и҆́мже паде́сѧ и҆́же дре́вᲂмъ прельще́и , тᲂбо́ю прельще́нъ бы́стъ , хрⷭ҇то́ви пригво́ждьшемꙋсѧ пло́тїю , пᲂдаю́щемꙋ ми́ръ дш҃а́мъ на́шимъ .

пѣ́снь , ѕ҃ . і҆рмо́съ . Внегда̀ скᲂрбѣ́хъ , вᲂзᲂпи́хъ ко́ гдⷭ҇ꙋ , и҆ ᲂу҆слы́ша мѧ бж҃е спасе́нїѧ мᲂегѡ̀ . Сїѧ́нїѧ па́че сл҃нца , свѣ́тъ ꙗ҆снѣ́йшїи , сп҃съ прᲂсїѧ̀ на ѳавѡ́рѣ , на́съ прᲂсвѣти́лъ є҆́сть . Вᲂзше́дъ на́ гᲂрꙋ ѳавѡ́рскꙋю , преѡ҆брази́сѧ хрⷭ҇тѐ , и҆ ле́сть всю̀ ѡ҆мрачи́въ , на́съ прᲂсвѣти́лъ є҆сѝ . Тѧ̀ бг҃а пᲂзна́вше сла́внїи а҆пⷭ҇ли . на ѳавѡ́рѣ же хрⷭ҇тѐ ᲂу҆ди́вльшесѧ , кᲂлѣ́ни преклᲂни́ша .

и҆́нъ , і҆рмо́съ . Ѡ҆чи́сти мѧ сп҃се , мно́га бᲂ без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бᲂ вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Ꙗ҆́кѡ ве́лїе и҆ стра́шнᲂ , ᲂу҆зрѣ́сѧ видѣ́нїе дне́сь , с̾ нб҃сѐ чꙋ́вственᲂ . ѿ земли́ же без̾ разсꙋже́нїѧ , ѡ҆блиста̀ сл҃нце пра́вдѣ , мы́сленѡ на гᲂрѣ̀ ѳавѡ́рстѣй . Пре́йде ᲂу҆́бѡ сѣ́нь зако́на и҆з̾немо́гши . прїи́де же ꙗ҆́вѣ хрⷭ҇то́съ и҆́стина . мѡѷсе́й вᲂзᲂпѝ на ѳавѡ́рѣ , ви́дѣвъ твᲂѐ бжⷭ҇тво̀ . Сто́лпъ ѻ҆́гненыи , хрⷭ҇та̀ преѡ҆бража́ема . ѻ҆́блакъ же ꙗ҆́вѣ бл҃гᲂда́ть дх҃а , ѡ҆сѣни́вшꙋю на ѳавѡ́рѣ , пред̾сказа́ша ꙗ҆вле́ннѣйше .

катава́сїѧ : Во́днагѡ ѕвѣ́рѧ вᲂ ᲂу҆тро́бѣ , дла́ни і҆ѡ́на крⷭ҇тᲂѡ҆бра́знѡ распрᲂсте́ръ , спасе́ннꙋю стра́сть прᲂѡбража́ше ꙗ҆́снѣ . тѣ́мъ и҆ тридне́внѡ и҆з̾ше́дъ , преми́рнᲂе вᲂскрⷭ҇нїе прᲂписа́ше , пло́тїю пригвᲂжде́на хрⷭ҇та̀ бг҃а . и҆ тридне́внымъ вᲂскрⷭ҇нїемъ , ми́ра прᲂсвѣ́щшагѡ .

кᲂнда́къ . гла́съ , з҃ . На гᲂрѣ̀ преѡ҆брази́сѧ , и҆ є҆ли́кѡ вмѣща́хꙋ ᲂу҆ченицы̀ твᲂѝ , сла́вꙋ твᲂю̀ хрⷭ҇тѐ бж҃е ви́дѣвше , да є҆гда́ тѧ ᲂу҆́зрѧтъ распина́ема , стрⷭ҇ть ᲂу҆́бѡ разꙋмѣ́ютъ во́льнꙋю , ми́рᲂви же прᲂпᲂвѣ́дѧтъ , ꙗ҆́кѡ ты̀ є҆сѝ вᲂи́стинꙋ ѻ҆́ч҃ее сїѧ́нїе . и҆́кᲂсъ . Вᲂста́ните лѣни́вїи , и҆́же всегда̀ ни́зꙋ пᲂни́кшїи в̾ зе́млю , дꙋшѝ мᲂеѧ̀ по́мыслы . вᲂзми́тесѧ и҆ вᲂзвы́ситесѧ на высᲂтꙋ̀ бжⷭ҇твенагѡ вᲂсхᲂжде́нїѧ . притеце́мъ к̾ петрꙋ̀ и҆ к̾ зеведе́ѡвыма , и҆ вкꙋ́пѣ сᲂ ѻ҆́нѣми ѳавѡ́рскꙋю го́рꙋ дᲂсти́гнемъ , да ви́димъ с̾ ни́ми сла́вꙋ бг҃а на́шегѡ . гла́са же ᲂу҆слы́шимъ , и҆́же свы́ше слы́шаша , и҆ прᲂпᲂвѣ́даша ѻ҆́ч҃ее сїѧ́нїе .

пѣ́снь , з҃ . і҆рмо́съ . А҆враа́мстїи дре́вле в̾ вавѷлѡ́нѣ ѻ҆́трᲂцы , в̾ пещѝ пла́мень пᲂпра́вше хвала́ми вᲂпїю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ѡ҆блиста́вшесѧ свѣ́тᲂмъ не пристꙋ́пныѧ сла́вы , на ѳавѡ́рстѣй гᲂрѣ̀ а҆пⷭ҇ли , хрⷭ҇то́ви вᲂпїѧ́хꙋ , ѻ҆ц҃ъ на́шихъ бж҃е блгⷭ҇ве́нъ є҆сѝ . Сїѧ́нїемъ бжⷭ҇твенагѡ шꙋ́ма , и҆ рᲂсᲂда́тельнымъ ѻ҆́блакᲂмъ хрⷭ҇тѐ , и҆ заре́ю твᲂе́ю наслажда́еми , а҆пⷭ҇ли пᲂѧ́хꙋ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Въ непристꙋ́пнѣ свѣ́тѣ , ꙗ҆́кѡ ви́дѣ тѧ пе́тръ , на ѳавѡ́рстѣй гᲂрѣ̀ ѡ҆блиста́вша хрⷭ҇тѐ , вᲂзᲂпѝ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Съ нача́льникᲂмъ жи́зни хрⷭ҇то́мъ сꙋ́ще , дѣ́ти зеведе́ѡвы , ꙗ҆́кѡ и҆спꙋстѝ зра́къ свѣ́та , вᲂзгремѣ́ша , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , блгⷭ҇ве́нъ є҆сѝ гдⷭ҇и бж҃е во́ вѣки . Ны́нѣ ви́дѣна бы́ша а҆пⷭ҇лѡмъ неви́димаѧ , бжⷭ҇тва̀ во́ плᲂти . на гᲂрѣ̀ ѳавѡ́рстѣй ѡ҆блиста́вша , вᲂпїю́щимъ , блгⷭ҇ве́нъ є҆сѝ гдⷭ҇и , бж҃е во́ вѣки . Оу҆жасо́шасѧ стра́хᲂмъ , ᲂу҆ди́вльшесѧ бл҃гᲂлѣ́пїю , бжⷭ҇твенагѡ црⷭ҇тва , на гᲂрѣ̀ ѳавѡ́рстѣй а҆пⷭ҇ли вᲂпїю́ще , бл҃гᲂслᲂве́нъ є҆сѝ гдⷭ҇и бж҃е во́ вѣки . Ны́нѣ неꙋслы́шанаѧ ᲂу҆слы́шана бы́ша , без̾ ѻ҆ц҃а бᲂ сн҃ъ ѿ дв҃ыѧ , ѻ҆те́ческимъ гла́сᲂмъ сла́внѡ свидѣ́тельствꙋетсѧ , ꙗ҆́кѡ бг҃ъ и҆ чл҃къ , то́йже и҆ во́ вѣки . Пло́тїю не бы́сть вы́шнемꙋ , сꙋщество́мъ же сн҃ъ вᲂзлю́бленъ , пре́жде сы́и , на́мъ прибли́жилсѧ є҆сѝ непрело́жнѡ , бл҃гᲂслᲂве́нъ є҆сѝ гдⷭ҇и бж҃е во́ вѣки .

катава́сїѧ : Безꙋ́мна за́пᲂвѣдь мꙋчи́телѧ ѕлᲂчести́вагѡ , людьмѝ пᲂкᲂлеба̀ , ды́шꙋща преще́нїемъ и҆ ѕлᲂхꙋле́нїемъ бг҃ᲂстꙋ́днымъ . ѡ҆ба́че трїе́хъ ѻ҆́трᲂкъ неи҆скꙋсѝ ꙗ҆́рᲂсть ѕвѣ́рьскаѧ , ни ѻ҆́гнь снѣда́ѧи . нᲂ ды́шꙋщꙋ хла́днᲂмꙋ дх҃ꙋ , сᲂ ѻ҆гне́мъ сꙋ́ще пᲂѧ́хꙋ , препѣ́тыи ѻ҆ц҃ъ на́шихъ бж҃е блгⷭ҇ве́нъ є҆сѝ .

пѣ́снь , и҃ . і҆рмо́съ . Въ вавѷлѡ́нѣ ѻ҆́трᲂцы , бжⷭ҇твеннᲂю ѡ҆палѧ́еми ре́внᲂстїю , мꙋчи́телѧ и҆ пла́мене преще́нїе мꙋ́жески пᲂпра́вше , и҆ пᲂсредѝ ѻ҆гнѧ̀ вве́ржени , прᲂхлажда́еми пᲂѧ́хꙋ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Манᲂве́нїемъ всѧ̀ нᲂсѧ́и , нᲂга́ма пречⷭ҇тыма , на́ гᲂрꙋ взы́де хрⷭ҇то́съ , на не́й же па́че со́лнечныѧ лꙋчѝ ѡ҆блиста̀ лице́мъ . и҆́же зако́нꙋ старѣ́йшїѧ и҆ бл҃гᲂда́ти , пᲂказа̀ пᲂю́щїѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Непристꙋ́пнᲂю сла́вᲂю , на гᲂрѣ̀ ꙗ҆́вльсѧ неи҆зрече́ннѡ ѳавѡ́рстѣй . неѡ҆держи́мыи и҆ незахᲂди́мыи свѣ́тъ , ѻ҆́ч҃ее сїѧ́нїе , тва́рь ᲂу҆ѧсни́въ , чл҃ки ѡ҆бᲂжѝ пᲂю́щїѧ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Сщ҃еннᲂлѣ́пнѡ стᲂѧ́ще , мѡѷсе́й же и҆ и҆лїѧ̀ на гᲂрѣ̀ ѳавѡ́рѣ , бжⷭ҇твенагѡ начерта́нїѧ ꙗ҆́снѡ сᲂста́въ ви́дѣвше хрⷭ҇та̀ , вᲂ ѻ҆те́честѣй ѡ҆блиста́вша сла́вѣ , вᲂспѣва́хꙋ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . И҆́же во́мрацѣ бжⷭ҇твенагѡ ра́ди ꙗ҆вле́нїѧ , лицѐ прᲂсла́висѧ и҆нᲂгда̀ мѡѷсе́ᲂвᲂ . хрⷭ҇то́съ же ꙗ҆́кѡ ри́зᲂю свѣ́тᲂмъ и҆ сла́вᲂю ѡ҆дѣва́етсѧ . свѣ́тъ бᲂ самᲂдѣ́теленъ сы́и , ѡ҆зарѧ́етъ пᲂю́щїѧ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Ѿ свѣтᲂро́дна ѻ҆́блака , хрⷭ҇та̀ ᲂу҆ченицы̀ нᲂси́ма , зрѧ́ще на ѳавѡ́рѣ , и҆ ни́цы на́ землю па́дше , ᲂу҆́мъ прᲂсвѣ́щше , сᲂ ѻ҆ц҃е́мъ сегѡ̀ пᲂѧ́хꙋ и҆ дх҃ᲂмъ . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

и҆́нъ , і҆рмоⷭ҇ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти блгⷭ҇ви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Оу҆слы́шавше влⷣкᲂ , ѿ ѻ҆ц҃а свидѣ́тельствꙋема , и҆ ꙗ҆́кѡ чл҃ческа тве́рдѣйша зра́ка , зрѣ́ти лица̀ твᲂегѡ̀ блиста́нїѧ нетерпѧ́ще , твᲂѝ ᲂу҆ченицы̀ на́ землю ни́цъ па́дахꙋ , стра́хᲂмъ пᲂю́ще , сщ҃е́ннїи блгⷭ҇ви́те , лю́дїе превᲂзнᲂси́те є҆гѡ̀ во́ вѣки . Црⷭ҇твꙋющимъ є҆сѝ цр҃ь прекрасе́нъ , и҆ и҆́же всю́дꙋ владѧ́щимъ гдⷭ҇ь си́льникъ бл҃же́нъ , и҆ во́ свѣтѣ живы́и непристꙋ́пнѣ . є҆мꙋ́же ᲂу҆ченицы̀ ᲂу҆ди́вльшесѧ , мѡѷсе́й же и҆ и҆лїѧ̀ вᲂпїѧ́хꙋ , дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки . Ꙗ҆́кѡ нб҃ᲂмъ владꙋ́щꙋ , и҆ земле́ю гдⷭ҇ьствꙋющꙋ , и҆ преи҆спо́дними ѻ҆́бласть и҆мꙋ́щꙋ , хрⷭ҇тѐ пред̾ста́ша ти , ѿ землѝ ᲂу҆́бѡ а҆пⷭ҇ли , ꙗ҆́кѡ с̾ небеси́ же ѳезви́тѧнинъ и҆лїѧ̀ , мѡѷсе́й же ѿ ме́ртвыхъ . пᲂю́ще сᲂгла́снѡ , лю́дїе превᲂзнᲂси́те є҆гѡ̀ во́ вѣки . Оу҆ны́нїѧ ражда́ющїѧ печа́ли на землѝ ѡ҆ста́виша , а҆пⷭ҇лѡмъ и҆з̾бра́ннїи чл҃кᲂлю́бче , ꙗ҆́кѡ тебѣ̀ пᲂслѣ́дᲂваша , кᲂ и҆́же ѿ землѝ прелᲂже́нїю бжⷭ҇твенагѡ житїѧ̀ . тѣ́мже и҆ пᲂ дᲂстᲂѧ́нїю твᲂегѡ̀ бг҃ᲂѧвле́нїѧ пᲂѧ́хꙋ ᲂу҆лꙋ́чше . лю́дїе превᲂзнᲂси́те є҆гѡ̀ во́ вѣки .

катава́сїѧ : Хва́лимъ , блгⷭ҇ви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Бл҃гᲂслᲂви́те дѣ́ти , трⷪ҇цы равнᲂчи́сленнїи , сᲂдѣ́телѧ ѻ҆ц҃а бг҃а . по́йте сᲂше́дшагѡ сло́ва , и҆ ѻ҆́гнь в̾ ро́сꙋ претво́ршагѡ . и҆ превᲂзнᲂси́те всѣ́мъ живо́тъ даю́щагѡ , дх҃а прест҃а́гѡ во́ вѣки всѧ̀ .

пѣ́снь , ѳ҃ . і҆рмо́съ . Ржⷭ҇тво́ ти нетлѣ́ннᲂ ꙗ҆ви́сѧ , бг҃ъ и҆з̾ бᲂкꙋ̀ твᲂе́ю про́йде . пло́ть нᲂсѧ̀ ꙗ҆ви́сѧ на землѝ , с̾ чл҃ки по́жилъ є҆́сть , тѧ̀ бцⷣе тѣ́мъ всѝ велича́емъ . Оу҆жа́сни но́вымъ свѣтᲂли́тїемъ , внеза́пꙋ ᲂу҆ченицы̀ ѡ҆свѣ́щшесѧ , дрꙋ́гъ дрꙋ́га зрѧ́хꙋ . ᲂу҆ди́вльшежесѧ , и҆ к̾ землѝ прекло́ньшесѧ , тебѣ̀ влⷣцѣ всѣ́хъ пᲂклᲂни́шасѧ . Шꙋ́мъ и҆з̾ ѻ҆́блака пᲂсыла́шесѧ бг҃ᲂгла́сенъ , и҆звѣствꙋ́ѧ чꙋ́дᲂ . ѻ҆ц҃ъ бᲂ свѣ́тᲂмъ , се́й є҆́сть сн҃ъ вᲂзлю́бленныи мо́й , а҆пⷭ҇лѡмъ вᲂпїѧ́ше , тᲂгѡ̀ пᲂслꙋ́шайте . Но́ваѧ ви́дѣвше и҆ пресла́внаѧ , гла́съ ѻ҆те́ческїи внꙋши́вше , на ѳавѡ́рѣ слᲂвесѐ слꙋгѝ , ѿ и҆з̾ преѡ҆браже́нїѧ первᲂѡбра́знагѡ . се́й є҆́сть вᲂпїѧ́хꙋ сп҃съ на́шъ .= Ѻ҆́=бразе непремѣ́нныи сꙋ́щагѡ , недви́жима печа́ть . неи҆змѣ́нне сн҃е , сло́ве , мꙋ́дрᲂсте и҆ мы́шце , десни́це , вы́шнѧгѡ си́лᲂ , тѧ̀ вᲂспѣва́емъ сᲂ ѻ҆ц҃е́мъ же и҆ дх҃ᲂмъ .

и҆́нъ , і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бᲂ чре́ва бы́въ ᲂу҆́бѡ чл҃къ . тѣ́мже тѧ̀ пречи́стꙋю бцⷣꙋ , вѣ́рнїи велича́емъ . Да свᲂѐ пᲂка́жеши ꙗ҆́вѣ , неи҆з̾рече́ннᲂе втᲂро́е сни́тїе . ꙗ҆́кѡ да вы́шнїи бг҃ъ ꙗ҆ви́шисѧ , стᲂѧ̀ пᲂсредѝ бᲂгѡ́въ а҆пⷭ҇лъ на ѳавѡ́рѣ . мѡѷсе́ѧ и҆ и҆лїю́ же , не и҆з̾рече́ннᲂ ѡ҆сїѧ́лъ є҆сѝ . тѣ́мже вси́ тѧ хрⷭ҇тѐ велича́емъ . Прїиди́те мы̀ пᲂслꙋ́шавше лю́дїе , вᲂз̾ше́дше на́ гᲂрꙋ ст҃ꙋ́ю пренебе́снꙋю , невеще́ственᲂ ста́немъ во́ градѣ жива́гѡ бг҃а . и҆ ᲂу҆́зримъ мы́сленᲂ , бжⷭ҇тво̀ невеще́ственᲂ ѻ҆ц҃а и҆ дх҃а , в̾ сн҃ѣ є҆динᲂро́днѣмъ ѡ҆блиста́ющее . Привле́клъ є҆сѝ любо́вїю мѧ̀ сп҃се , и҆ премѣни́лъ є҆сѝ бжⷭ҇твенымъ сѝ жела́нїемъ . нᲂ пᲂпалѝ ѻ҆гне́мъ невеще́ственымъ грѣхѝ мᲂѧ̀ , и҆ насы́титисѧ твᲂеѧ̀ пи́щи спᲂдо́би . да ѻ҆бᲂѐ и҆гра́ѧ , велича́ю бл҃же вели́чїѧ ти .

катава́сїѧ : Та́инъ є҆сѝ бцⷣе ра́й , невᲂздѣ́ланнᲂ вᲂз̾расти́вши хрⷭ҇та̀ , и҆́мже крⷭ҇тнᲂе и҆ живᲂно́снᲂе на землѝ насажде́нᲂ бы́сть дре́вᲂ . тѣ́мъ ны́нѣ вᲂз̾нᲂси́мꙋ , пᲂкланѧ́ющесѧ є҆мꙋ́ тѧ велича́ем̾ .

свѣти́ленъ . Свѣ́те неи҆змѣ́нныи сло́ве , свѣ́та ѻ҆ц҃а нерᲂжде́нна , в̾ ꙗ҆вле́ннѣмъ свѣ́тѣ твᲂе́мъ , дне́сь на ѳавѡ́рѣ свѣ́тъ ви́дѣхᲂмъ ѻ҆ц҃а , свѣ́тъ и҆ дх҃а , свѣ́тᲂмъ наставлѧ́юща всю̀ тва́рь . гⷤ .

На хвали́тѣхъ , стихѣ́ры . гла́съ , д҃ . поⷣ . и҆́же зва́нныи свы́ше . Пре́же чⷭ҇тна́гѡ крⷭ҇та̀ твᲂегѡ̀ ꙳ и҆ страда́нїѧ ,꙳ пᲂи́мъ и҆́хже прᲂраз̾сꙋди́лъ є҆сѝ ,꙳ ѿ сщ҃е́нныхъ ᲂу҆чени́къ ,꙳ на ѳавѡ́рскꙋю влⷣкᲂ вᲂз̾ше́лъ є҆сѝ го́рꙋ ,꙳ пᲂказа́ти вᲂсхᲂтѣ́въ си́мъ сла́вꙋ свᲂю̀ .꙳ и҆́же ви́дѣвше тѧ̀ преѡ҆бразꙋ́ема ,꙳ и҆ па́че сл҃нца прᲂсїѧ́вша ,꙳ ни́цы па́дше , си́лѣ твᲂе́й ᲂу҆диви́шасѧ . взыва́юще ,꙳ ты̀ без̾лѣ́тенъ свѣ́тъ є҆сѝ хрⷭ҇тѐ ,꙳ и҆ сїѧ́нїе ѻ҆́ч҃ее .꙳ а҆́ще и҆ во́лею пло́ть ꙗ҆ви́сѧ неи҆з̾мѣ́нне . двⷤа . И҆́же пре́жде вѣ́къ сы́и бг҃ъ сло́вᲂ ,꙳ и҆́же свѣ́тᲂмъ ꙳ ꙗ҆́кᲂже ри́зᲂю ѡ҆дѣѧ́исѧ ,꙳ преѡ҆бразꙋ́емь пред̾ ᲂу҆ченикѝ свᲂи́ми ,꙳ па́че сл҃нца сло́ве прᲂсїѧ́лъ є҆сѝ .꙳ мѡѷсе́й и҆ и҆лїѧ́ же тебѣ̀ пред̾ста́ша ,꙳ ме́ртвымъ и҆ живы́мъ тѧ̀ гдⷭ҇а пᲂвѣ́дающе .꙳ и҆ твᲂѐ сла́вѧще ,꙳ неи҆з̾рече́ннᲂе смᲂтре́нїе и҆ млⷭ҇ть ,꙳ и҆ мно́гᲂе млрⷭ҇дїе .꙳ и҆́мже спа́слъ є҆сѝ ми́ра .꙳ грѣхо́мъ пᲂгиба́юща . Ѿ дв҃ческагѡ ѻ҆́блака тѧ рᲂжде́на ,꙳ и҆ пло́ть бы́вша ,꙳ и҆́же на гᲂрѣ̀ ѳавѡ́рстѣй ꙳ преѡ҆бразꙋ́ема гдⷭ҇и ,꙳ и҆ ѻ҆́блакᲂмъ свѣ́тлымъ тѧ ѡ҆крꙋже́на ,꙳ гла́съ рᲂди́телевъ , вᲂз̾лю́блена тѧ сн҃а ,꙳ ᲂу҆ченикѡ́мъ пред̾стᲂѧ́щимъ тебѣ̀ ꙗ҆́вѣ сказа́ше .꙳ ꙗ҆́кѡ є҆динᲂсꙋ́щна , и҆ є҆динᲂпрⷭ҇то́льна .꙳ тѣ́мже пе́тръ ᲂу҆дивлѧ́ѧсѧ ,꙳ дᲂбро̀ є҆́сть здѣ̀ бы́ти гл҃аше .꙳ невѣ́дыи є҆́же глаго́лаше .꙳ бл҃гᲂдѣ́телю мнᲂгᲂми́лᲂстиве . сла́ва , и҆ ны́нѣ . гла́съ , и҃ . Пᲂѧ́тъ хрⷭ҇то́съ петра̀ , і҆а́кѡва и҆ і҆ѡа́нна , на́ гᲂрꙋ высᲂкꙋ̀ є҆ди́ны , и҆ преѡ҆брази́сѧ пред̾ ни́ми , и҆ прᲂсвѣти́сѧ лицѐ є҆гѡ̀ ꙗ҆́кѡ сл҃нце , ри́зы же є҆гѡ̀ бы́ша бѣлы̀ ꙗ҆́кѡ свѣ́тъ . и҆ ꙗ҆ви́шасѧ мѡѷсе́й и҆ и҆лїѧ̀ с̾ ни́мъ глаго́люща , и҆ ѻ҆́блакъ свѣ́телъ ѡ҆сѣнѝ и҆́хъ . и҆ сѐ гла́съ и҆з̾ ѻ҆́блака глаго́лющь , се́й є҆́сть сн҃ъ мо́й вᲂз̾лю́бленныи , ѡ҆ не́мже бл҃гᲂвᲂли́хъ , тᲂгѡ̀ пᲂслꙋ́шайте .

Славᲂсло́вїе вели́кᲂе , и҆ ѿпꙋ́стъ .

На литꙋргі́и . а҆нтиѳо́нъ , а҃ . гла́съ , в҃ . Вᲂскли́кнѣте бг҃ᲂви всѧ̀ землѧ̀ , по́йте же и҆́мени є҆гѡ̀ , и҆ дади́те сла́вꙋ хвалѣ̀ є҆гѡ̀ . мл҃твами бцⷣы сп҃се спасѝ на́съ . сти́хъ . Вᲂскли́кнѣте бг҃ᲂви всѧ̀ землѧ̀ , по́йте же и҆́мени є҆гѡ̀ , и҆ дади́те сла́вꙋ хвалѣ̀ є҆гѡ̀ . мл҃твами бцⷣы сп҃се спасѝ на́съ . сти́хъ . Гла́съ гро́ма твᲂегѡ̀ в̾ кᲂлесѝ , ѡ҆свѣти́ша мо́лнїѧ твᲂѧ̀ вселе́ннꙋю . пᲂдви́жасѧ , и҆ тре́петна бы́сть землѧ̀ . мл҃твами бцⷣы сп҃се спасѝ на́съ . сти́хъ . И҆спᲂвѣ́данїе и҆ велелѣ́пᲂтꙋсѧ ѡ҆блечѐ , ѡ҆дѣ́ѧсѧ свѣ́тᲂмъ ꙗ҆́кѡ ри́зᲂю . мл҃твами бцⷣы сп҃се спасѝ на́съ . сла́ва . мл҃твами бцⷣы сп҃се спасѝ на́съ . и҆ ны́нѣ . мл҃твами бцⷣы сп҃се спасѝ на́съ .

а҆нтиѳо́нъ , в҃ . Го́ры сїѡ́нскїѧ ре́бра сѣ́верᲂва , гра́дъ цр҃ѧ вели́кагѡ . спасѝ на́съ сн҃е бж҃їи , преѡ҆брази́выисѧ на гᲂрѣ̀ пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ . сти́хъ . Го́ры сїѡ́нскїѧ ре́бра сѣ́верᲂва , гра́дъ цр҃ѧ вели́кагѡ . спасѝ на́съ сн҃е бж҃їи .= сти́хъ . И҆= в̾ведѐ ѧ҆̀ в̾ го́рꙋ ст҃ы́ни свᲂеѧ̀ , гᲂра̀ сѝ ꙗ҆́же стѧжа̀ десни́ца є҆гѡ̀ . спасѝ на́съ сн҃е бж҃їи . сти́хъ . Го́рꙋ сїѡ́ню ю҆́же вᲂз̾любѝ , и҆ сᲂзда̀ ꙗ҆́кѡ и҆нᲂро́гъ ст҃ы́ню свᲂю̀ . спасѝ на́съ сн҃е бж҃їи . сла́ва , и҆ ны́нѣ . Є҆динᲂро́дныи сн҃е сло́вᲂ бж҃їе .

а҆нтиѳо́нъ , г҃ . Надѣ́ющїисѧ на́ гдⷭ҇а , ꙗ҆́кѡ гᲂра̀ сїѡ́нъ непᲂдви́житсѧ во́ вѣки . трᲂпа́рь . гла́съ , з҃ . Преѡ҆брази́выисѧ на гᲂрѣ̀ хрⷭ҇тѐ бж҃е , пᲂказа́въ ᲂу҆ченико́мъ свᲂи́мъ сла́вꙋ свᲂю̀ , ꙗ҆́кᲂже мᲂжа́хꙋ . да вᲂз̾сїѧ́етъ и҆ на́мъ грѣ́шнымъ свѣ́тъ тво́й прⷭ҇нᲂсꙋ́щныи , мл҃твами бцⷣы , свѣтᲂда́вче сла́ва тебѣ̀ . сти́хъ . Надѣ́ющїисѧ на́ гдⷭ҇а , ꙗ҆́кѡ гᲂра̀ сїѡ́нъ непᲂдви́житсѧ во́ вѣки . Преѡ҆брази́выисѧ на гᲂрѣ̀ .= сти́хъ . Го́ры ѡ҆́крестъ є҆гѡ̀ , и҆ гдⷭ҇ь ѡ҆́крестъ люде́й свᲂи́хъ ѿ ны́нѣ и҆ до́ вѣка . Преѡ҆брази́выисѧ на гᲂрѣ̀ . =сти́хъ . Гдⷭ҇и кто̀ ѡ҆бита́етъ в̾ жили́щи твᲂе́мъ , лѝ кто̀ всели́тсѧ в̾ гᲂрѣ̀ ст҃ѣ́й твᲂе́й . Преѡ҆брази́выисѧ на гᲂрѣ̀ . вхо́днᲂе : Гдⷭ҇и пᲂслѝ свѣ́тъ тво́й , и҆ и҆́стинꙋ твᲂю̀ , та́ мѧ наста́виста и҆ в̾ведо́ста мѧ вᲂ ст҃ꙋ́ю го́рꙋ твᲂю̀ .

і҆єре́й : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ сн҃е бж҃їи , преѡ҆брази́выисѧ на гᲂрѣ̀ пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ .

трᲂпа́рь . гла́съ , з҃ . Преѡ҆брази́выисѧ на гᲂрѣ̀ хрⷭ҇тѐ бж҃е , пᲂказа́въ ᲂу҆ченико́мъ свᲂи́мъ сла́вꙋ свᲂю̀ , ꙗ҆́кᲂже мᲂжа́хꙋ . да вᲂз̾сїѧ́етъ и҆ на́мъ грѣ́шнымъ свѣ́тъ тво́й приснᲂсꙋ́щныи , мᲂли́твами бцⷣы , свѣтᲂда́вче сла́ва тебѣ̀ .

сла́ва , и҆ нн҃ѣ . кᲂнда́къ . гла́съ , то́йже . На гᲂрѣ̀ преѡ҆брази́сѧ , и҆ є҆ли́кѡ вмѣща́хꙋ ᲂу҆ченицы̀ твᲂѝ , сла́вꙋ твᲂю̀ хрⷭ҇тѐ бж҃е ви́дѣвше , да є҆гда́ тѧ ᲂу҆́зрѧтъ распина́ема , стра́сть ᲂу҆́бѡ разꙋмѣ́ютъ во́льнꙋю , ми́рᲂви же прᲂпᲂвѣ́дѧтъ , ꙗ҆́кѡ ты̀ є҆сѝ вᲂи́стинꙋ ѻ҆́ч҃ее сїѧ́нїе .= и҆ трист҃о́е .=

прᲂки́менъ , ѱл҃о́мъ дв҃дᲂвъ . Ꙗ҆́кѡ вᲂз̾вели́чишасѧ дѣ́ла твᲂѧ̀ гдⷭ҇и , всѧ̀ премꙋ́дрᲂстїю сᲂтвᲂри́лъ є҆сѝ . сти́хъ . бл҃гᲂслᲂвѝ дш҃е мᲂѧ̀ гдⷭ҇а , гдⷭ҇и бж҃е мо́й вᲂз̾вели́чилсѧ є҆сѝ ѕѣлѡ̀ . а҆пⷭ҇лъ , ѿ сᲂбо́рнагѡ пᲂсла́нїѧ петро́ва , чте́нїе . заⷱ҇ , ѯ҃є . а҆ллилꙋ́їѧ . Твᲂѧ̀ сꙋ́ть нб҃са̀ , и҆ твᲂѧ̀ є҆́сть землѧ̀ . сти́хъ . бл҃же́ни лю́дїе вѣ́дꙋщїи вᲂскликнᲂве́нїе . є҆ѵⷢ҇а́лїе , ѿ матѳе́ѧ . заⷱ҇ , ѻ҃ . прича́стенъ , гдⷭ҇и во́ свѣтѣ лица̀ твᲂегѡ̀ по́йдемъ , и҆ ѡ҆ и҆́мени твᲂе́мъ вᲂзра́дꙋемсѧ во́ вѣки .

На трапе́зѣ ᲂу҆тѣше́нїе бра́тїи . А҆́ще среда̀ , и҆лѝ пѧто́къ , разрѣша́емъ на ры́бꙋ и҆ вино̀ .

пᲂдᲂба́етъ вѣ́дати . ꙗ҆́кѡ преда́нїе и҆́мамы ѿ ст҃ы́хъ ѻ҆ц҃ъ , ѿ спасе́нагѡ сегѡ̀ пра́здника , преѡ҆браже́нїѧ , зᲂба́ти гро́здїе , бл҃гᲂслᲂве́нїе прїе́мши ѿ і҆єре́ѧ . И҆ принесе́нꙋ бы́вшꙋ в̾ цр҃квь гро́здїю , и҆ пᲂ а҆нафо́рѣ раз̾дрᲂбле́нꙋ . Гл҃етъжесѧ сїѧ̀ мл҃тва , на бл҃гᲂслᲂве́нїе гро́здїѧ . і҆єре́й , рече́тъ . Бж҃е спаси́телю на́шъ , бл҃гᲂслᲂви́выи винᲂгра́дъ , на рещѝ є҆динᲂро́днагѡ сн҃а твᲂегѡ̀ гдⷭ҇а и҆ бг҃а сп҃са на́шегѡ і҆с҃а хрⷭ҇та̀ , и҆ тѣ́мъ пло́дъ без̾сме́ртїѧ на́мъ дарᲂва̀ . са́мъ и҆ нн҃ѣ пло́дныи сі́и винᲂгра́дъ бл҃гᲂслᲂвѝ , и҆ на́съ рабы̀ свᲂѧ̀ вкꙋша́ющїѧ ѿ негѡ̀ и҆́стиннагѡ винᲂгра́да прича́стники сᲂтвᲂрѝ . неврежде́нꙋ жи́знь на́шꙋ сᲂхранѝ , и҆ ми́ръ на́мъ всегда̀ да́рꙋй . и҆ вѣ́чными твᲂи́ми не ѿє҆́млемыми дарᲂва́нїи , жи́знь на́шꙋ ᲂу҆красѝ , мл҃твами пречⷭ҇тыѧ влⷣчцы на́шеѧ бцⷣы и҆ прⷭ҇нѡ дв҃ы мр҃і́и , и҆ всѣ́хъ ст҃ы́хъ ѿ́ вѣка ᲂу҆го́ждьшихъ тебѣ̀ . ꙗ҆́кѡ бл҃гъ и҆ чл҃кᲂлю́бецъ , бг҃ъ є҆сѝ , и҆ тебѣ̀ сла́вꙋ вᲂз̾сыла́емъ без̾нача́льнᲂмꙋ ѻ҆ц҃ꙋ сᲂ є҆динᲂро́днымъ тѝ сн҃ᲂмъ , и҆ съ прест҃ы́мъ и҆ бл҃ги́мъ и҆ живᲂтвᲂрѧ́щимъ тѝ дх҃ᲂмъ , нн҃ѣ и҆ при́снѡ и҆ во́ вѣки вѣко́мъ , а҆ми́нь .

Внима́й . ꙗ҆́кѡ а҆́ще кто̀ ѿ бра́тїи снѣ́сть гро́здїе , пре́жде си́цевагѡ пра́здника . то̀ преслꙋша́нїѧ запреще́нїе да прїи́метъ , и҆ да невкꙋ́ситъ гро́здїе чре́зъ ве́сь а҆́вгꙋстъ мцⷭ҇ъ , ꙗ҆́кѡ запᲂвѣ́данныи ᲂу҆ста́въ презрѣ́въ . ꙗ҆́кѡ да ѿ сегѡ̀ навы́кнꙋтъ и҆ про́чїи пᲂвинᲂва́тисѧ , ᲂу҆ста́вꙋ ст҃ы́хъ ѻ҆ц҃ъ . Сїе́ же запреще́нїе да быва́етъ , и҆ блюдꙋ́щимъ винѡгра́ды бра́тїи . Гро́здїю же на трапе́зѣ пᲂ пра́здницѣ се́мъ , три́жды , в̾ недѣ́лю , пᲂдᲂба́етъ пред̾лага́тисѧ бра́тїи . си́рѣчь , в̾ пᲂнѣ́дельникъ , в̾ сре́дꙋ , в̾ пѧто́къ , да вкꙋша́ютъ бра́тїѧ . Се́й ᲂу҆ста́въ быва́етъ , и҆ на смо́квахъ , и҆ над̾ про́чими ѡ҆вᲂщьмѝ . ꙗ҆́вѣ ꙗ҆́кѡ времена̀ и҆́хъ , ко́е кᲂгда̀ приспѣ́етъ . Сїѧ́ же глаго́лемъ крᲂмѣ̀ принᲂси́мыхъ блюдꙋ́щимъ смо́кви и҆ раздае́мымъ , снѣда́ютъ бᲂ сїѧ̀ .