17 декабря: святых триех отроков

МЦⷭ҇А ДЕКАБРѦ̀ ВЪ З҃І ДН҃Ь

слꙋ́жба ст҃ы́хъ трїе́хъ ѻ҆́трᲂкъ , а҆на́нїи , а҆за́рїи , и҆ миса́ила . и҆ ст҃а́гѡ прᲂро́ка данїи́ла . а҆́ще въ про́стъ де́нь .= На гдⷭ҇и вᲂзва́хъ , стихѣ́ры , прᲂро́кꙋ , г҃ . и҆ ст҃ы́мъ ѻ҆трᲂко́мъ , г҃ . стихѣ́ры , ст҃ы́мъ ѻ҆трᲂко́мъ . гла́съ , д҃ . поⷣ . да́лъ є҆сѝ зна́менїе . Зако́нъ держа́ще бг҃ᲂда́нныи ,꙳ пребᲂга́тїи ,꙳ скве́рными неѡ҆калѧ́стесѧ снѣ́дьми ,꙳ нᲂ нетлѣ́ннꙋ дш҃е́внꙋю ,꙳ дᲂбро́тꙋ сᲂхра́ньше ,꙳ сᲂблюдо́сте плᲂтьскі́и невреди́мь ,꙳ и҆ неꙋвѧда́емь цвѣ́тъ чꙋ́днїи ,꙳ и҆ кра́снꙋю лѣ́пᲂтꙋ .꙳ влⷣцѣ сла́вѧщꙋ свᲂѧ̀ ᲂу҆го́дники . Бжⷭ҇твенымъ распалѧ́еми ,꙳ ю҆́нᲂшы пла́менемъ ,꙳ ѻ҆́гнь преѡ҆би́дѣша .꙳ в̾ не́мже ѡ҆рᲂша́еми сла́внїи ,꙳ ли́къ пресвѣ́телъ вᲂѡ҆брази́вше ,꙳ пѣ́снь мнᲂгᲂпѣ́тꙋю ви́дѣша пᲂю́ще .꙳ и҆́бᲂ непрее́мнᲂе данїи́лъ ,꙳ црⷭ҇твїе хрⷭ҇то́вᲂ ви́дѣвъ ра́дᲂвашесѧ ,꙳ ꙗ҆́кѡ прᲂро́къ всеи҆зрѧ́денъ . Слᲂвесѝ премꙋ́дрᲂсти твᲂеѧ̀ ,꙳ ᲂу҆ди́вльшесѧ мꙋчи́тели ,꙳ данїи́ле дᲂстᲂчꙋ́дныи ,꙳ и҆ ѻ҆́трᲂкъ ра́зꙋмꙋ ,꙳ халдѣ́йстѣй странѣ̀ нача́льствᲂвати ,꙳ и҆ владѣ́ти ва́съ сᲂтво́рше честні́и .꙳ дᲂбрᲂдѣ́тели бᲂ всѣ́хъ ꙗ҆́вѣ чꙋди́тисѧ и҆ сꙋпᲂста́тъ ,꙳ и҆ житїѧ̀ свѣ́тлᲂсти .꙳ стра́сти бᲂ ᲂу҆держа́вше вла́стели бы́сте . =сла́ва . гла́съ , в҃ . Дх҃о́внѡ на́съ вѣ́рнїи сᲂбра̀ дне́сь прᲂро́къ данїи́лъ , и҆ трапе́зꙋ пред̾лᲂжѝ дᲂбрᲂдѣ́телей ѡ҆би́льнꙋ , бᲂга́тымъ и҆ ни́щимъ , и҆ стра́ннымъ и҆ дᲂма́шнимъ . и҆ ча́шꙋ разꙋ́мнꙋ и҆злива́ющꙋ во́ды бл҃гᲂче́стїѧ , и҆ веселѧ́щꙋ сердца̀ вѣ́рныхъ , и҆ дх҃а ст҃а́гѡ бл҃гᲂда́ть пᲂдаю́щꙋ . се́й бᲂ пррⷪ҇къ пресвѣ́тлыи свѣти́льникъ прᲂсїѧ́выи в̾ ми́рѣ , слꙋже́нїѧ всѧ̀ а҆сѷрі́йскаѧ низ̾лᲂжѝ , и҆ ѕвѣре́й неꙋкрᲂти́мыхъ ᲂу҆ста̀ заградѝ . съ си́мже и҆ трїѐ ѻ҆́трᲂцы да вᲂсхва́лѧтсѧ . не зла́та є҆стества̀ сꙋ́ще , и҆ зла́та и҆скꙋ́снѣйше ꙗ҆́вльшесѧ . не ᲂу҆́бѡ сᲂж̾жѐ и҆́хъ ѻ҆́гнь пе́щныи , нᲂ сᲂхранѝ цѣ́лы . и҆́хже сѣ́ра и҆ пе́клъ и҆ ро́ждїе вѣнча́ша . приведы́и же на́съ на лѣ́тнѣе прехᲂжде́нїе гдⷭ҇ь , да спᲂдо́битъ на́съ дᲂсти́гнꙋти и҆ в̾ гдⷭ҇ьскїи честны́и де́нь ржⷭ҇тва̀ хрⷭ҇то́ва . пᲂдаю́щагѡ на́мъ тѣ́хъ мᲂли́твами , ѡ҆чище́нїе грѣхо́въ , и҆ ве́лїю ми́лᲂсть .

и҆ ны́нѣ , боⷢ҇ . Всѐ ᲂу҆пᲂва́нїе мᲂѐ , къ тебѣ̀ вᲂзлага́ю мт҃и бж҃їѧ , сᲂхрани́ мѧ вᲂ свᲂе́мъ си кро́вѣ .= крⷭ҇тᲂбоⷢ҇ , поⷣ . є҆гда̀ ѿ́ древа . крⷭ҇тᲂбоⷢ҇ .= Є҆гда̀ нескве́рнаѧ а҆́гница , ви́дѣ свᲂегѡ̀ а҆́гньца на закᲂле́нїе ꙗ҆́кѡ чл҃ка во́лею влеко́ма , рыда́ющи гл҃аше , без̾ча́дствᲂвати мѧ ны́нѣ тщи́шисѧ хрⷭ҇тѐ , тебѐ ро́ждьшꙋю . что́ се сᲂтвᲂри́лъ є҆сѝ и҆зба́вителю всѣ́хъ . ѻ҆ба́че вᲂспѣва́ю и҆ сла́влю , твᲂю̀ ю҆́же па́че ᲂу҆ма́ же и҆ сло́ва кра́йнюю бл҃гᲂсть , чл҃кᲂлю́бче .

На стихо́внѣ , стихѣ́ры , вᲂ ѻ҆кта́и . сла́ва , и҆ ны́нѣ . гла́съ , ѕ҃ . Данїи́лъ мꙋ́жъ жела́нїи , ка́мень без̾ рꙋкꙋ̀ ѿсѣ́ченъ ви́дѣвъ тѧ гдⷭ҇и , младе́нца без̾ сѣ́мене рᲂжде́на прᲂвᲂз̾гласи́ тѧ , и҆́же ѿ дв҃ы вᲂплᲂще́нна сло́ва , непремѣ́нна бг҃а , и҆ сп҃са дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , в҃ . Ве́лїѧ вѣ́ры и҆справле́нїѧ , вᲂ и҆сто́чницѣ пла́меннѣ , ꙗ҆́кѡ на вᲂдѣ̀ пᲂко́йнѣ ст҃і́и трїѐ ѻ҆́трᲂцы ра́дᲂвахꙋсѧ . и҆ прᲂро́къ данїи́лъ , льво́мъ па́стырь ꙗ҆́кѡ ѻ҆вца́мъ ꙗ҆́вльшесѧ . тѣ́хъ мл҃твами хрⷭ҇тѐ бж҃е пᲂми́лꙋй на́съ .

На ᲂу҆́трени , є҆ди́нъ кано́нъ . вᲂ ѻ҆кта́и , и҆ ст҃ы́мъ два̀ . пррⷪ҇кꙋ кано́нъ , на д҃ . и҆ ст҃ы́мъ тре́мъ ѻ҆трᲂко́мъ , на д҃ . =Кано́нъ ст҃ы́мъ , ѻ҆трᲂко́мъ . є҆мꙋ́же краегране́сїе , си́цевᲂ . трѝ ѻ҆́трᲂки пᲂю̀ , и҆ данїи́ла вели́кагᲂ . твᲂре́нїе ѳеѡ́фанᲂвᲂ . глаⷭ҇ , и҃ . пѣ́снь , а҃ . і҆рмо́съ . Во́дꙋ прᲂше́дъ . =запѣ́въ : Ст҃і́и трїѐ ѻ҆́трᲂцы , мᲂли́те бг҃а ѡ҆ на́съ . Без̾нача́льнᲂе сло́вᲂ ѻ҆́ч҃ее , є҆́же пре́жде всѣ́хъ вѣ́къ ро́ждьшеесѧ бг҃ᲂлѣ́пнѡ , є҆́же в̾ пещѝ ю҆́нᲂшами вᲂѡ҆бражено̀ ви́дѣнᲂ бы́вше прᲂсла́вимъ . Глаго́лы мꙋчи́телѧ ѕлᲂчести́вагѡ , бл҃гᲂро́днїи ѻ҆́трᲂцы ѡ҆плева́вше крѣ́пкѡ , снѣ́дьми без̾зако́нныхъ ѡ҆скверни́тисѧ , халдѣ́йски невᲂсхᲂтѣ́ша . сла́ва . Пита́стесѧ , сло́вᲂмъ ᲂу҆́бѡ дш҃е́внѣ , снѣ́дьми же самᲂра́слеными пло́тьски . па́че питѣ́ющихсѧ де́белыми снѣ́дьми , цр҃е́ви краснѣ́йши ѻ҆бразы̀ ꙗ҆ви́стесѧ . и҆ ны́нѣ , боⷢ҇ . Ꙗ҆́дъ ѕмїи́нъ , въ слꙋ́ха го́рькѡ и҆злїѧ́вшїйсѧ є҆́ввина , ꙗ҆́же ѿ дв҃да вᲂзра́стшаѧ ѻ҆трᲂкᲂви́це и҆сцѣлѧ́еши , и҆зба́вителѧ пᲂро́ждьши .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе . Ра́зꙋмъ стѧжа́вше , бг҃ᲂнаꙋче́нныи влⷣкᲂ , ѻ҆́трᲂцы дв҃дᲂвы зако́ны ѻ҆те́ческїѧ , бг҃ᲂмꙋ́дренѡ сᲂблюдо́ша . Ѻ҆́гнь не ѡ҆палѝ , чистѣ́йшаѧ тѣлеса̀ бл҃гᲂчести́выхъ , пᲂсто́мъ бᲂ дш҃епита́тельнымъ напаѧ́хꙋсѧ . сла́ва . Хвалꙋ̀ всеми́рнꙋю , и҆ мнᲂгᲂпѣ́тꙋю , пᲂю́тъ ѻ҆́трᲂцы трїѐ , пᲂсредѣ̀ пе́щи чꙋ́днѡ ѡ҆рᲂша́еми . и҆ ны́нѣ , боⷢ҇ . Да ржⷭ҇тво̀ влⷣкᲂ , ѿ дв҃ьствꙋющагѡ тѣлесѐ , пᲂка́жеши на́мъ . спаса́еши в̾ пещѝ дв҃ьствꙋющаѧ тѣлеса̀ .

пᲂ г҃ , пѣ́сни , кᲂнда́къ , и҆ и҆́кᲂсъ , прᲂро́кꙋ . та́же , сѣда́ленъ , ѻ҆трᲂко́мъ . гла́съ , и҃ . Трⷪ҇цы ѻ҆́бразъ сᲂѡ҆бра́знѡ , ѿ невеще́ственыхъ шаро́въ вᲂ пла́мени ѻ҆́трᲂцы , написа́ша тро́стїю вѣ́ры . и҆ сло́ва кра́йнее на́ землю сни́тїе та́йнѡ ви́дѣша , и҆ всѣ́мъ прᲂпᲂвѣ́даша . тѣ́мже и҆ ро́сꙋ съ нб҃сѐ прїе́мше дх҃о́внꙋю , и҆стᲂча́ютъ вѣ́рнымъ дарᲂва́нїѧ . и҆ вᲂпїю́ще мо́лѧтсѧ , да́рꙋй хрⷭ҇тѐ бж҃е сᲂгрѣше́нїемъ ѡ҆ставле́нїе , ꙗ҆́кѡ бл҃гᲂсе́рдъ , пра́з̾днꙋющимъ любо́вїю па́мѧть ва́шꙋ .= сла́ва , сѣда́ленъ , прᲂро́кꙋ . и҆ ны́нѣ , боⷢ҇ , и҆лѝ крⷭ҇тᲂбоⷢ҇ .=

пѣ́снь , д҃ . і҆рмо́съ . Оу҆слы́шахъ гдⷭ҇и . Данїи́лъ премꙋ́дрыи , бжⷭ҇твенѣ ᲂу҆́мъ прᲂсвѣ́щь , со́нїѧ разрѣшѝ самᲂде́ржцемъ , бжⷭ҇твенᲂю бл҃гᲂда́тїю . Ѡ҆блистава́етъ чꙋдесьмѝ , є҆́же в̾ пещѝ ѻ҆́трᲂкъ страда́нїе . мꙋчи́телѧ бᲂ ᲂу҆лᲂви́ша кᲂ ᲂу҆вѣ́дѣнїю твᲂемꙋ̀ всеси́льне . сла́ва . Сᲂгла́сїѧ а҆рга́ны , и҆ мꙋсикі́йскагѡ гла́са всеслᲂже́нїѧ , до́блественыѧ непривлеко́ша . и҆ злато́мꙋ ѻ҆́бразꙋ непᲂклᲂни́шасѧ . и҆ ны́нѣ , боⷢ҇ . Пѣ́сньми всепѣ́таѧ , и҆́же въ вавѷлѡ́нѣ дѣ́ти , пᲂчита́ютъ сн҃а твᲂегѡ̀ пребжⷭ҇твенагᲂ . є҆го́же в̾ пещѝ пᲂзна́ша .

пѣ́снь , є҃ . і҆рмо́с̾ . Вскꙋ́ю мѧ ѿри́нꙋ . Наꙋ́чьшесѧ зако́нꙋ сп҃се , не ѿверго́шасѧ твᲂѧ̀ ᲂу҆го́дницы , данїи́лъ вели́кїи , с̾ тремѝ ю҆́нᲂшами бг҃ᲂразꙋ́мными . нᲂ крѣ́пᲂсть прїе́мше є҆́же ѿ тебѐ бл҃гᲂда́телѧ , мꙋчи́телѧ мꙋ́жески пᲂбѣди́ша . Та́йнѡ наꙋча́шесѧ данїи́лъ , чл҃кᲂлю́бче твᲂи́мъ та́йнамъ . на ѻ҆́блацѣ бᲂ ꙗ҆́кѡ сн҃а тѧ челᲂвѣ́ча грѧдꙋ́ща , и҆ ꙗ҆зы́кѡмъ всѣ́мъ ꙗ҆́кѡ сꙋдїю̀ и҆ цр҃ѧ зрѧ́ше , ᲂу҆ма̀ чистᲂто́ю . сла́ва . Оу҆краси́сѧ ѽ дѣ́ти , па́че ка́мене сапфи́ра ва́ше сᲂвᲂкꙋпле́нїе , ꙗ҆́кѡ зарѧ̀ зла́тнаѧ . бл҃гᲂче́стїѧ ре́внᲂстїю распа́льшесѧ хᲂдѧ́ще ра́дᲂстнѡ въ пещѝ , и҆ сᲂбира́юще ли́къ преми́рныи . и҆ ны́нѣ , боⷢ҇ . Данїи́лъ тѧ дв҃ᲂ го́рꙋ прᲂписа̀ ꙗ҆́вѣ бжⷭ҇твеныи , трїе́ же ѻ҆́трᲂцы ви́дѣвше пла́мень ѡ҆рᲂша́ющь , твᲂѐ бжⷭ҇твенᲂе ржⷭ҇тво̀ пѣ́сненѡ вᲂсхвалѧ́ютъ . ꙗ҆́кѡ сп҃са и҆ жи́зни да́телѧ и҆ гдⷭ҇а .

пѣ́снь , ѕ҃ . і҆рмо́съ . Бе́здна грѣхо́внаѧ . Ѡ҆блада́вше є҆сте́ствеными страстьмѝ си́лᲂю сло́ва , странѣ̀ ꙗ҆зы́къ халдѣ́йскихъ вла́стеле бы́сте . вѣ́сть бᲂ дᲂбрᲂдѣ́тель че́сть пᲂда́ти стѧжа́вшимъ ю҆̀ , ѽ дв҃дᲂви мꙋ́дрїи внꙋ́цы . сла́ва . Въ ме́ртвᲂсть данїи́лъ живᲂно́снꙋ ѡ҆дѣ́ѧвсѧ дре́вле , и҆́же ꙗ҆́кѡ бг҃а халде́ѡмъ ѕлᲂчести́внѡ мни́магѡ ᲂу҆бива́етъ , снѣ́дїю ѕмі́ѧ ѕла́гѡ . сщ҃е́нники же ѕлᲂчести́выѧ , мꙋ́дрѣ ᲂу҆би́лъ є҆́сть . и҆ ны́нѣ , боⷢ҇ . Ми́лᲂстива ми сꙋдїю̀ и҆ сн҃а твᲂегѡ̀ бцⷣе дв҃ᲂ , твᲂи́ми мᲂли́твами бы́ти в̾ де́нь сꙋ́дныи , и҆зба́вити же лю́тыхъ , мт҃и ᲂу҆мᲂлѝ . на тѧ́ бᲂ є҆ди́нꙋ ᲂу҆пᲂва́нїе вᲂзлᲂжи́хъ .

кᲂнда́къ . гла́съ , ѕ҃ . Рꙋкᲂпи́саннагᲂ ѻ҆́браза непᲂче́тше , нᲂ неѡ҆пи́саннымъ сꙋщество́мъ вᲂѡ҆рꙋ́жшесѧ , требл҃же́ннїи . в̾ тꙋзѣ̀ ѻ҆́гненѣй прᲂсла́вистесѧ . пᲂсредѣ́ же пла́мене непᲂстᲂѧ́ннагѡ стᲂѧ́ще , бг҃а призва́сте , ᲂу҆скᲂрѝ ще́дрыи , и҆ пᲂтщи́сѧ ꙗ҆́кѡ млⷭ҇тивъ , на́ пᲂмᲂщь на́шꙋ . ꙗ҆́кѡ мо́жеши хᲂтѧ́и . и҆́кᲂсъ . Прᲂстрѝ свᲂю̀ рꙋ́кꙋ , є҆́юже прїѧ́ша и҆скꙋше́нїе , є҆гѵ́птѧне бᲂрю́щесѧ , и҆ є҆вре́и бᲂри́ми . не ѡ҆ста́ви же на́съ , да непо́жретъ на́съ сме́рть жа́ждꙋщаѧ на́съ , и҆ сатана̀ ненави́дѧи на́съ . нᲂ прибли́жисѧ на́мъ , и҆ пᲂщадѝ дш҃а на́ша , ꙗ҆́кᲂже пᲂщадѣ̀ и҆нᲂгда̀ ѻ҆́трᲂки свᲂѧ̀ , и҆́же в̾ вавѷлѡ́нѣ , непреста́ннѡ сла́вѧщихъ тѧ , и҆ вве́рженыѧ тебѐ ра́ди в̾ пе́щь , и҆ ѿ сеѧ̀ вᲂпїю́щихъ ти , ᲂу҆скᲂрѝ ще́дрыи , и҆ пᲂтщи́сѧ ꙗ҆́кѡ млⷭ҇тивъ на́ пᲂмᲂщь на́шꙋ . ꙗ҆́кѡ мо́жеши хᲂтѧ́и .

пѣ́снь , з҃ . і҆рмо́съ . Дѣ́ти бл҃гᲂчести́выѧ . Гла́съ бг҃ᲂлюбе́зенъ пᲂѧ́шесѧ и҆з̾ среды̀ ѻ҆гнѧ̀ , вседержи́телю . а҆за́рїѧ бᲂ бжⷭ҇твеныи ли́къ сᲂста́вль . пѣ́снь вᲂспѣва́ѧ гл҃аше , бл҃гᲂслᲂве́нъ бг҃ъ ѻ҆ц҃ъ на́шихъ . Цѣ́вница ю҆́нᲂшъ , бг҃ᲂсло́вѧше всѣ́хъ бг҃а и҆ вседержи́телѧ , и҆́же тѣ́мъ в̾ пещѝ ꙗ҆́снѡ ꙗ҆́вльшагᲂсѧ . и҆ пѣ́снь вᲂспѣва́хꙋ , глаго́люще , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Трѝ , и҆́же в̾ пещѝ в̾ве́рженыѧ ви́дѣвъ цр҃ь , ꙗ҆́кѡ ᲂу҆зрѣ̀ четве́ртагѡ видѣ́нїе , сн҃а превѣ́чнагᲂ бж҃їѧ всѣ́мъ вᲂзᲂпѝ , бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ , боⷢ҇ . И҆мѣ́ѧ прᲂсщ҃е́нъ бжⷭ҇твенᲂю заре́ю ᲂу҆́мъ , данїи́ле бг҃ᲂбл҃же́нне , дв҃ыѧ ржⷭ҇тво̀ ꙗ҆́вѣ пред̾ви́дѣвъ , та́йными ѻ҆́бразы вᲂѡ҆бража́емᲂ . бл҃гᲂслᲂве́нъ вᲂпїѧ́ше бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Се́дмь седми́цею . А҆враа́мᲂвᲂ бл҃гᲂро́дїе спастѝ тща́щесѧ , сво́йственᲂе к̾ немꙋ̀ стѧжа́сте ѡ҆снᲂва́нїе вѣ́ры , и҆ наде́жды препᲂдо́бнїи , терпѣ́нїе и҆ напа́стемъ пᲂдража́нїе . вᲂпїю́ще , бл҃гᲂслᲂви́те сщ҃е́ннїи влⷣкꙋ , лю́дїе превᲂзнᲂси́те є҆гѡ̀ во́ вѣки . И҆́же ꙗ҆́кѡ свѣти́ла прᲂсїѧ́вше , и҆ зе́млю ѡ҆небеси́вше . и҆ бл҃гᲂче́стїѧ прᲂсвѣще́нїемъ ѡ҆сїѧ́вшесѧ , всеми́рнᲂе сᲂста́вльше ликᲂстᲂѧ́нїе пᲂю́тъ , и҆́же ѿ напа́сти спа́сшемꙋ влⷣцѣ . дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ю҆́нᲂшьски пᲂгаси́вше распали́мꙋю пе́щь , и҆ льво́мъ че́люсти загра́ждьше дв҃дᲂвы внꙋ́цы . ны́нѣ ра́дꙋющесѧ пᲂю́тъ , тѧ̀ бл҃гᲂда́телѧ цр҃ѧ всѣ́хъ . дѣ́ти бл҃гᲂслᲂви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . Та́йнѡ наꙋча́етъ пречⷭ҇таѧ данїи́лъ премꙋ́дрыи , и҆ прᲂѡ҆бража́ютъ ѻ҆́трᲂцы трїѐ ржⷭ҇тво̀ твᲂѐ , бг҃ᲂмꙋ́дренїи . ѻ҆́бразы зрѧ́ще , и҆́же и҆з̾ ᲂу҆тро́бы твᲂеѧ̀ прᲂше́дшагᲂ несказа́ннѡ . є҆го́же дѣ́ти бл҃гᲂсло́вѧтъ , сщ҃е́ннїи вᲂспѣва́ютъ , лю́дїе превᲂзно́сѧтъ вᲂ всѧ̀ вѣ́ки .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ . Дᲂстиго́сте кᲂнчи́нꙋ жела́емꙋю , и҆ жела́нїѧ кᲂне́чнаѧ , пред̾стᲂитѐ въ нбⷭ҇ныхъ черто́зѣхъ , ѻ҆́трᲂцы пребᲂга́тїи . Ра́дꙋющесѧ рꙋкᲂѧ́ти ꙗ҆́же ѿ сле́зъ , до́брагѡ ва́шегѡ дѣ́ланїѧ прїѧ́сте , нетлѣ́нїѧ кла́съ плᲂдᲂнᲂси́вше . сла́ва . Вᲂсїѧ̀ свѣ́тлᲂсть ны́нѣ ва́мъ дᲂсто́йнѡ , и҆ весе́лїе срⷣца прᲂцвѣтѐ , ѿ ню́дꙋ же ѿбѣжѐ печа́ль , всели́стесѧ . и҆ ны́нѣ , боⷢ҇ . Па́жить сме́ртнꙋю ᲂу҆ста́вила є҆сѝ дв҃ᲂ , живᲂда́вца ро́ждьши и҆ гдⷭ҇а , ѡ҆живᲂтвᲂрѧ́щагᲂ , вѣ́рᲂю велича́ющихъ тѧ . Дᲂсто́йнѡ є҆́сть .

свѣти́ленъ , прᲂро́кꙋ . сла́ва , и҆ нн҃ѣ , боⷢ҇ . Ржⷭ҇тво̀ неи҆злаго́ланнᲂе пречⷭ҇тыѧ дв҃ы , вᲂѡ҆бража́юще трᲂечи́сленїи ст҃ы́ѧ трⷪ҇цы , пла́мень пᲂпра́ша ѻ҆гнѧ̀ , и҆ ѡ҆рᲂша́еми а҆́нг҃ла сни́тїемъ , сла́внїи , а҆на́нїѧ , а҆за́рїѧ , и҆ миса́илъ , и҆́хже вѣ́рᲂю вᲂсхва́лимъ .

На стихо́внѣ , стⷯры , вᲂ ѻ҆кта́и . сла́ва . гла́съ , в҃ . Дх҃о́внѡ на́съ вѣ́рнїи сᲂбра̀ . пи́санъ на гдⷭ҇и вᲂзва́хъ . =На литꙋргі́и , бл҃же́нна . ѿ кано́на пррⷪ҇кꙋ , пѣ́снь , г҃ , на д҃ . и҆ ѻ҆трᲂко́мъ , пѣ́снь , ѕ҃ , на д҃ . =прᲂки́менъ . гла́съ , д҃ . Ди́венъ бг҃ъ вᲂ ст҃ы́хъ свᲂи́хъ , бг҃ъ і҆и҃левъ . сти́хъ . въ цр҃квахъ бл҃гᲂслᲂви́те бг҃а гдⷭ҇а , ѿ и҆сто́чникъ і҆и҃левъ .= а҆пⷭ҇лъ , къ є҆вре́ѡмъ . зача́лᲂ , т҃л . а҆ллилꙋ́їѧ . Вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . =сти́хъ . мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . є҆ѵⷢ҇а́лїе , ѿ лꙋкѝ . зача́лᲂ , ѯ҃в . прича́стенъ , ра́дꙋйтесѧ пра́веднїи ѡ҆́ гдⷭ҇ѣ .

Пᲂдᲂба́етъ вѣ́дати . Ꙗ҆́кѡ а҆́ще прилꙋчи́тсѧ ст҃ы́хъ трїе́хъ ѻ҆́трᲂкъ , и҆ данїи́ла пррⷪ҇ка , в̾ нлⷣю ст҃ы́хъ пра́ѻ҆ц҃ъ , ка́кѡ мо́гꙋтъ сі́и ст҃і́и ѡ҆ста́витисѧ непра́зднᲂвани , и҆ ꙗ҆́кѡ въ презрѣ́нїе пᲂлᲂжи́ти слꙋ́жба и҆́хъ . тѣ́мже а҆́ще во́лѧ є҆́сть настᲂѧ́щемꙋ , и҆лѝ є҆клисїа́рхꙋ , пᲂе́тсѧ вᲂслѣ́дᲂванїе и҆́хъ съ раз̾сꙋже́нїемъ , вкꙋ́пѣ с̾ вᲂскрⷭ҇нᲂю слꙋ́жбᲂю си́це :

На ма́лѣй вече́рни , на́ гдⷭ҇и вᲂзва́хъ , стихѣ́ры , вᲂскрⷭ҇ны , и҆ бцⷣѣ , пᲂ ѡ҆бы́чаю . На вели́цѣй вече́рни . На гдⷭ҇и вᲂзва́хъ , стихѣ́ры , вᲂскрⷭ҇ны , г҃ . и҆ пра́ѻ҆ц҃емъ , г҃ . и҆ прᲂро́кꙋ два̀ . пи́саны в̾ минѣ́и . и҆ ѻ҆трᲂко́мъ два̀ . гла́съ , д҃ . ѻ҆́бᲂи на д҃ . сла́ва , пра́ѻ҆ц҃емъ . гла́съ , ѕ҃ . И҆́же пре́жде зако́на . и҆ ны́нѣ , боⷢ҇ , пе́рвыи , гла́сꙋ . вы́хᲂдъ . прᲂки́менъ , дню̀ . є҆ктенїѧ̀ : рце́мъ всѝ . та́же , спᲂдо́би гдⷭ҇и . и҆ пᲂсе́мъ є҆ктенїѧ̀ : и҆спо́лнимъ вече́рнѧѧ . На литі́и , стихѣ́ра хра́мꙋ . и҆ стихѣ́ры вᲂ ѻ҆кта́и , ѡ҆бы́чнᲂе . и҆ прᲂро́кꙋ , ѿ стихѣ́ръ . и҆́же сꙋ́ть на́ гдⷭ҇и вᲂзва́хъ . сти́хъ , г҃ й . и҆ ѻ҆трᲂко́мъ . гла́съ , д҃ . Слᲂвесѝ премꙋ́дрᲂсти твᲂеѧ̀ . та́же , гла́съ , в҃ . Дх҃о́внѡ на́съ вѣ́рнїи . сла́ва , пра́ѻ҆ц҃емъ . гла́съ , а҃ . Лꙋча̀ ѡ҆блиста́юще . и҆ нн҃ѣ , боⷢ҇ . Сѐ и҆спо́лнисѧ . Настихо́внѣ , стⷯра вᲂскрⷭ҇на , и҆ пᲂ а҆лѳави́тꙋ , г҃ . сла́ва , пра́ѻ҆ц҃емъ . гла́съ , г҃ . Пра́ѻ҆ц҃ъ сᲂвᲂкꙋпле́нїе . и҆ нн҃ѣ , пррⷪ҇кꙋ . гла́съ , ѕ҃ . Данїи́лъ мꙋ́жь жела́нїи . На бл҃гᲂслᲂве́нїе хлѣ́бᲂмъ . трᲂпа́рь : бцⷣе дв҃ᲂ ра́дꙋисѧ , двⷤа . и҆ пра́ѻ҆ц҃емъ , аⷤ . и҆ бꙋ́ди и҆́мѧ гдⷭ҇не , три́жды , пѣ́нїемъ . ѱл҃о́мъ , л҃г . Бл҃гᲂслᲂвлю̀ гдⷭ҇а . А҆́ще ли гдѣ̀ небыва́етъ бдѣ́нїе . то̀ пᲂ нн҃ѣ ѿпꙋща́еши . трᲂпа́рь , вᲂскрⷭ҇нъ . сла́ва , ѻ҆трᲂко́мъ . и҆ нн҃ѣ , пра́ѻ҆ц҃емъ . На па́вечерницѣ гл҃емъ пᲂ дᲂсто́йнѣ , кᲂнда́къ , ст҃ы́мъ пра́ѻ҆ц҃емъ . На ᲂу҆́трени , на бг҃ъ гдⷭ҇ь . трᲂпа́рь , вᲂскрⷭ҇нъ , вⷤ . сла́ва , ѻ҆трᲂко́мъ . и҆ ны́нѣ , пра́ѻ҆ц҃емъ . пᲂ каѳи́смахъ , сѣда́льны , вᲂскрⷭ҇ны , и҆ боⷢ҇ , и҆́хъ . пᲂ непᲂро́чнахъ , трᲂпарѝ , а҆́нг҃льскїи сᲂбо́ръ . ѵ҆пако́й , гла́сꙋ . мнᲂгᲂми́лᲂстивᲂ , и҆ сѣда́ленъ , пра́ѻ҆ц҃емъ , вⷤ . сла́ва , и҆ ны́нѣ , боⷢ҇ . степе́нна , гла́сꙋ . и҆ прᲂки́менъ . є҆ѵⷢ҇а́лїе , вᲂскрⷭ҇нᲂ . ѱало́мъ , н҃ . стⷯра , вᲂскрⷭ҇на . и҆ про́чее . кано́нъ , вᲂскрⷭ҇нъ , сᲂ і҆рмᲂсо́мъ , на д҃ . и҆ прᲂро́кꙋ , на д҃ . и҆ ѻ҆трᲂко́мъ , на д҃ . и҆ пра́ѻ҆ц҃емъ , на д҃ . катава́сїѧ : Хрⷭ҇то́съ ражда́етсѧ . Пᲂ г҃ , пѣ́сни : кᲂнда́къ , прᲂро́кꙋ , и҆ и҆́кᲂсъ . и҆ сѣда́ленъ , є҆гѡ̀ . сла́ва , ѻ҆трᲂко́мъ . и҆ ны́нѣ , ѵ҆пако́й , пра́ѻ҆ц҃емъ . Пᲂ ѕ҃ , пѣ́сни : кᲂнда́къ , пра́ѻ҆ц҃емъ . и҆ и҆́кᲂсъ . свѣти́ленъ , вᲂскрⷭ҇нъ , и҆ пра́ѻ҆ц҃емъ . сла́ва , прᲂро́кꙋ . и҆ ны́нѣ , боⷢ҇ , є҆динᲂкꙋ́пнѡ сᲂ ѻ҆́трᲂки . На хвали́тѣхъ , стихѣ́ры , вᲂскрⷭ҇ны , д҃ . и҆ вᲂсто́чны , д҃ . сла́ва , пра́ѻ҆ц҃емъ . гла́съ , з҃ . Прїиди́те всѝ вѣ́рнѡ тᲂржествꙋ́емъ . и҆ ны́нѣ , гла́съ , в҃ . Преблгⷭ҇ве́на є҆сѝ бцⷣе дв҃ᲂ . Славᲂсло́вїе вели́кᲂе . є҆ктенїѝ . и҆ ѿпꙋ́стъ . и҆ ѡ҆бы́чнᲂе и҆схᲂже́нїе . сла́ва , и҆ нн҃ѣ . стихѣ́ра , є҆ѵⷢ҇а́льскаѧ . и҆ ча́съ , а҃ . На а҃ мъ часѣ̀ , трᲂпа́рь , вᲂскрⷭ҇нъ . сла́ва , пра́ѻ҆ц҃емъ . и҆ ны́нѣ , боⷢ҇ , часо́въ . пᲂ трⷭ҇то́мъ , кᲂнда́къ , вᲂскрⷭ҇нъ . и҆ про́чее . и҆ кᲂне́чныи ѿпꙋ́стъ . На г҃ мъ часѣ̀ , трᲂпа́рь , вᲂскрⷭ҇нъ . сла́ва , прᲂро́кꙋ . пᲂ трⷭ҇то́мъ , кᲂнда́къ , пра́ѻ҆ц҃емъ . На ѕ҃ мъ часѣ̀ , трᲂпа́рь , вᲂскрⷭ҇нъ . сла́ва , пра́ѻ҆ц҃емъ . пᲂ трⷭ҇то́мъ , кᲂнда́къ , прᲂро́кꙋ . На ѳ҃ мъ часѣ̀ , трᲂпа́рь , вᲂскрⷭ҇нъ . сла́ва , прᲂро́кꙋ . пᲂ трⷭ҇то́мъ , кᲂнда́къ , вᲂскрⷭ҇нъ .

На литꙋргі́и , бл҃же́нна , гла́сꙋ , на д҃ . и҆ пра́ѻ҆ц҃емъ , пѣ́снь г҃ , на д҃ . и҆ прᲂро́кꙋ , пѣ́снь ѕ҃ , на д҃ .

Пᲂ вхо́дѣ , а҆́ще ли хра́мъ хрⷭ҇то́въ : трᲂпа́рь , вᲂскрⷭ҇нъ , и҆ пра́ѻ҆ц҃емъ , и҆ ст҃ы́мъ . кᲂнда́къ , вᲂскрⷭ҇нъ , и҆ пра́ѻ҆ц҃емъ . сла́ва , ст҃ы́мъ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ бцⷣы : трᲂпа́рь , вᲂскрⷭ҇нъ , и҆ хра́мꙋ , и҆ пра́ѻ҆ц҃емъ , и҆ ст҃ы́мъ . кᲂнда́къ , вᲂскрⷭ҇нъ , и҆ пра́ѻ҆ц҃емъ . сла́ва , ст҃ы́мъ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ ст҃ы́мъ : трᲂпа́рь , вᲂскрⷭ҇нъ , и҆ пра́ѻ҆ц҃емъ , и҆ хра́мꙋ , и҆ ст҃ы́мъ . кᲂнда́къ , вᲂскрⷭ҇нъ , и҆ хра́мꙋ . сла́ва , ст҃ы́мъ . и҆ ны́нѣ , пра́ѻ҆ц҃емъ .

прᲂки́менъ , гла́сꙋ . и҆ дрꙋгі́и , пѣ́снь ѻ҆ц҃е́мъ . а҆пⷭ҇лъ , и҆ є҆ѵⷢ҇а́лїе , рѧ́дъ нлⷣи . и҆ ст҃ы́мъ пᲂд̾ главꙋ̀ . и҆ пᲂто́мъ , пра́ѻ҆ц҃емъ . прича́стенъ , хвали́те гдⷭ҇а с̾ нб҃съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ .

Си́це пᲂе́мъ всю̀ слꙋ́жбꙋ , и҆ вели́кᲂмꙋ ст҃о́мꙋ . А҆́ще прилꙋчи́тсѧ в̾ сїю̀ недѣ́лю , є҆мꙋ́же є҆́сть пᲂлїєлеѡ́съ . то́чїю пᲂ пᲂлїєлеѡ́сѣ , сѣда́льны , ст҃о́мꙋ , всѣ̀ . и҆ ны́нѣ , пра́ѻ҆ц҃емъ . На литꙋргі́и . Прᲂки́менъ , пра́ѻ҆ц҃емъ , и҆ ст҃о́мꙋ . и҆ всѧ̀ слꙋ́жба , ꙗ҆́кᲂже пре́же ꙗ҆вле́нᲂ є҆́сть .

<< Previous

Contents

Next >>