Неделя свв. праотцев

НЕДѢ́ЛѦ СТ҃Ы́ХЪ ПРА́Ѻ҆Ц҃Ъ

Въ сꙋбо́тꙋ ве́черъ , на ма́лѣй вече́рни пᲂе́мъ пᲂ ѻ҆бы́чаю . На вели́цѣй вече́рни , пᲂ ѻ҆бы́чнᲂй каѳи́смѣ , на гдⷭ҇и вᲂзва́хъ , стихѣ́ры , вᲂскрⷭ҇ны , г҃ . и҆ вᲂсто́чны , г҃ . и҆ ст҃ы́мъ , д҃ . гла́съ , и҃ . Пра́ѻ҆ц҃ъ дне́сь вѣ́рнїи , сверша́юще па́мѧть , вᲂспᲂе́мъ хрⷭ҇та̀ и҆зба́вителѧ , вᲂзвели́чившагᲂ и҆́хъ вᲂ всѣ́хъ ꙗ҆зы́цѣхъ , и҆ чꙋдеса̀ пресла́внаѧ вѣ́рнѡ сверши́вша гдⷭ҇а , ꙗ҆́кѡ держа́вна и҆ си́льна . и҆ ѿ ни́хъ пᲂказа́вша же́злъ си́лы на́мъ , є҆ди́нꙋ мꙋженеи҆скꙋ́снꙋю , и҆ бг҃ᲂѻ҆трᲂкᲂви́цꙋ мр҃і́ю чи́стꙋю . и҆з̾ неѧ́же цвѣ́тъ про́йде хрⷭ҇то́съ , и҆ прᲂцвѣтѐ всѣ́мъ жи́знь , и҆ неи҆зживꙋ́щꙋю пи́щꙋ , и҆ спасе́нїе вѣ́чнᲂе . И҆́же ст҃ы́ѧ ѻ҆́трᲂки ѿ ѻ҆гнѧ̀ и҆зба́вивыи влⷣкᲂ , и҆ ѿ ᲂу҆́стъ льво́въ данїи́ла . бл҃гᲂслᲂви́выи а҆враа́ма и҆ и҆саа́ка раба̀ свᲂегѡ̀ , и҆ сегѡ̀ сн҃а і҆а́кѡва . и҆ бл҃гᲂвᲂли́лъ є҆сѝ ѿ сѣ́мене и҆́хъ рᲂди́тисѧ , на́съ ра́ди . да пре́жде па́дшагᲂ спасе́ши пра́ѻ҆ц҃а на́шегѡ , крⷭ҇то́мъ свᲂи́мъ и҆ вᲂскрⷭ҇нїемъ . и҆ расто́ргнꙋвъ сме́ртныѧ ᲂу҆́зы сᲂвᲂзста́виши всѧ̀ , и҆́же ѿ́ вѣка сꙋ́щїѧ ᲂу҆мерщве́нныѧ . пᲂклᲂнѧ́ющїѧсѧ ти хрⷭ҇тѐ цр҃ю вѣко́мъ . Ꙗ҆́кᲂже въ прᲂхлажде́нїи пᲂсредѣ̀ пла́мене рᲂсо́ю дх҃о́внᲂю , ра́дꙋющесѧ ѻ҆́трᲂцы бж҃їи хᲂжда́хꙋ , та́йнѡ в̾ не́мъ прᲂѡ҆брази́вше трⷪ҇цꙋ , и҆ вᲂплᲂще́нїе хрⷭ҇то́вᲂ , и҆ ꙗ҆́кѡ премꙋ́дрїи вѣ́рᲂю ᲂу҆гаси́ша си́лꙋ ѻ҆́гненꙋю . и҆ данїи́лъ же пра́ведныи львѡ́мъ ꙗ҆ви́сѧ ѡ҆бꙋзда́тель . и҆́хже мᲂли́твами ᲂу҆мᲂле́нъ бы́въ чл҃кᲂлю́бче сп҃се , и҆ на́съ негаси́магѡ и҆ вѣ́чнагѡ и҆зба́ви ѻ҆гнѧ̀ , и҆ спᲂдо́би на́съ црⷭ҇твїѧ твᲂегѡ̀ гдⷭ҇и . Ꙗ҆́кᲂже въ рᲂсѣ̀ сꙋ́ще вѣ́рнїи и҆ ст҃і́и ѻ҆́трᲂцы твᲂѝ , в̾ пещѝ пла́мене ѻ҆́гненагѡ прᲂнаписа́хꙋ та́йнѡ , є҆́же ѿ дв҃ы твᲂѐ прише́ствїе , є҆́же неѡ҆па́льнѡ вᲂсїѧ́вшее на́мъ . и҆ данїи́лъ же пра́ведныи , и҆ вᲂ прᲂро́цѣхъ чꙋ́дныи , ꙗ҆́снѡ бжⷭ҇твенᲂе втᲂро́е твᲂѐ прише́ствїе прᲂѧвлѧ́ѧ . ви́дѣхъ взыва́ше , до́ндеже престо́ли пᲂста́вишасѧ речѐ , и҆ сꙋдїѧ̀ сѣ́де и҆ ѻ҆́гненаѧ пᲂтечѐ рѣка̀ . є҆ѧ́же да и҆зба́вимсѧ хрⷭ҇тѐ , мл҃твами и҆́хъ влⷣкᲂ .

сла́ва . гла́съ , ѕ҃ . И҆́же пре́жде зако́на ѻ҆ц҃ъ всѝ вᲂсхва́лимъ дне́сь вѣ́рнїи , а҆враа́ма бг҃ᲂлю́бнагᲂ , и҆ и҆саа́ка и҆́же ѿ ѡ҆бѣща́нїѧ рᲂжде́ннагѡ . и҆ і҆а́кѡва , и҆ ѻ҆́ба на́десѧте патрїа́рха , дв҃да кро́ткагѡ , и҆ данїи́ла жела́нїемъ прⷪ҇рка , и҆ трїѐ ѻ҆́трᲂки с̾ ни́ми сла́вѧще , и҆́же пе́щь в̾ ро́сꙋ прелᲂжи́вшаѧ , прᲂсѧ́ще ѡ҆ставле́нїѧ ѿ хрⷭ҇та̀ бг҃а , прᲂсла́вленагѡ вᲂ ст҃ы́хъ свᲂи́хъ .

и҆ ны́нѣ , боⷢ҇ , пе́рвыи , настᲂѧ́щагᲂ гла́са . =На литі́и , ѡ҆бы́чныѧ . стихѣ́ра хра́мꙋ . и҆ стⷯры вᲂ ѻ҆кта́и , па́вла а҆мᲂрре́йскагѡ . сла́ва . гла́съ , а҃ . Л=ꙋча̀ ѡ҆блиста́юще бг҃ᲂгла́сїѧ , великᲂимени́тїи прᲂро́цы , при́снѡ ᲂу҆блажа́ютсѧ . и҆́же ѿ́ дх҃а пло́дъ прїе́мше , несказа́ннᲂе ржⷭ҇тво̀ хрⷭ҇та̀ бг҃а , всѣ́мъ прᲂпᲂвѣ́даша , зако́ннᲂ же кᲂнчи́нꙋ прїѧ́ша , пᲂжи́вше жи́знь пречꙋ́днꙋю .

и҆ ны́нѣ , боⷢ҇ . Сѐ и҆спо́лнисѧ и҆са́инᲂ прᲂрече́нїе , дв҃ᲂю бᲂ рᲂдила̀ є҆сѝ . и҆ пᲂржⷭ҇твѣ̀ ꙗ҆́кѡ пре́жде ржⷭ҇тва̀ пребыва́еши , бг҃ъ бᲂ бѣ̀ рᲂжде́исѧ , тѣ́мже и҆ є҆стество̀ но́вᲂ премѣни́сѧ . нᲂ ѽ бг҃ᲂма́ти , мл҃твы твᲂи́хъ ра́бъ вᲂ твᲂе́й цр҃кви принᲂси́мыѧ ти непре́зри . нᲂ ꙗ҆́кѡ бл҃гᲂꙋтро́бнагѡ , свᲂи́ма рꙋка́ма пᲂнᲂси́вшаѧ , на свᲂѧ̀ рабы̀ ᲂу҆милᲂсе́рдисѧ , и҆ мᲂлѝ спасти́сѧ дш҃а́мъ на́шимъ .

На стихо́внѣ , стⷯра вᲂскрⷭ҇на , и҆ пᲂ а҆лфави́тꙋ . сла́ва . гла́съ , г҃ . Пра́ѻ҆ц҃ъ сᲂвᲂкꙋпле́нїе празднᲂлю́бцы прїиди́те , ѱл҃о́мски вᲂсхва́лимъ , а҆да́ма пра́ѻ҆ц҃а . є҆нѡ́ха , нѡ́ѧ , мельхиседе́ка . а҆враа́ма , и҆саа́ка , и҆ і҆а́кѡва . пᲂ зако́нѣ мѡѷсе́ѧ , и҆ а҆арѡ́на , и҆ і҆сꙋ́са , самꙋ́ила , и҆ дв҃да . с̾ ни́ми же и҆са́їю . і҆єремі́ю , і҆єзекі́илѧ . и҆ данїи́ла , и҆ ѻ҆́ба на́десѧте . вкꙋ́пѣ и҆лїю̀ , и҆ є҆лисе́ѧ , и҆ всѣ́хъ . заха́рїю , и҆ крⷭ҇тлѧ , и҆ прᲂпᲂвѣ́давшїѧ хрⷭ҇та̀ , жи́знь и҆ вᲂскрⷭ҇нїе ро́дꙋ на́шемꙋ .

и҆ ны́нѣ , боⷢ҇ . Без̾ сѣ́мене ѿ бжⷭ҇твеннагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ младе́нца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , бцⷣе дв҃ᲂ ра́дꙋисѧ ,= двⷤа . и҆ пра́ѻ҆ц҃емъ , трᲂпа́рь . гла́съ , в҃ . В=ѣ́рᲂю пра́ѻ҆ц҃ы ѡ҆правда́лъ є҆сѝ , ю҆́же ѿ ꙗ҆зы́къ тѣ́ми пред̾ѡ҆брꙋчи́въ цр҃кᲂвь . хва́лѧтсѧ в̾ сла́вѣ ст҃і́и , ꙗ҆́кѡ ѿ сѣ́мене и҆́хъ є҆́сть пло́дъ сла́венъ , без̾ сѣ́мене ро́ждьшїѧ тѧ . тѣ́хъ мл҃твами хрⷭ҇тѐ бж҃е пᲂми́лꙋй на́съ .

А҆́ще ли нѣ́сть бдѣ́нїе , трᲂпа́рь вᲂскрⷭ҇нъ . сла́ва , и҆ ны́нѣ , трᲂпа́рь пра́ѻ҆ц҃емъ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва , и҆ ны́нѣ , трᲂпа́рь пра́ѻ҆ц҃емъ . Пᲂ ѻ҆бᲂю̀ , стихᲂло́гїѧхъ , сѣда́льны вᲂ ѻ҆кта́и . Пᲂ непᲂро́чнахъ , ѵ҆пако́й , гла́сꙋ . Пᲂ мнᲂгᲂмлⷭ҇тивᲂ , сѣда́ленъ , пра́ѻ҆ц҃емъ . гла́съ , и҃ . А҆враа́ма и҆саа́ка же и҆ і҆а́кѡва , вᲂсхва́лимъ всѝ пѣ́сненѡ . дв҃да кро́ткагᲂ , и҆ і҆сꙋ́са , и҆ двана́десѧте патрїа́рха . вкꙋ́пѣ съ тремѝ ю҆́нᲂшами , пᲂгаси́вшими ѻ҆́гненыи пла́мень си́лᲂю дх҃о́внᲂю . ра́дꙋйтесѧ вᲂпїю́ще къ ни́мъ , и҆́же пре́лесть до́блественѣ ѡ҆бличи́вше царѧ̀ безꙋ́мнагѡ . и҆ хрⷭ҇то́ви мᲂли́тесѧ , сᲂгрѣше́нїемъ ѡ҆ставле́нїе дарᲂва́ти пра́зднꙋющимъ любо́вїю ст҃ꙋ́ю па́мѧть ва́шꙋ . два́жды . сла́ва , и҆ ны́нѣ , боⷢ҇ . Ра́дᲂстнꙋю пᲂхвалꙋ̀ до́лжнѡ ꙗ҆́кѡ вдᲂви́ца ѻ҆́на , двѣ̀ ца́тѣ принᲂшꙋ́ ти влⷣчце , за всѧ̀ твᲂѧ̀ бл҃гᲂда́ти . ты́ бᲂ ми ꙗ҆ви́сѧ кро́въ вкꙋ́пѣ и҆ по́мᲂщь , ѿ напа́стей и҆ скᲂрбе́й при́снѡ мѧ и҆зима́ющи , и҆ и҆зба́ви ѿ ѡ҆скᲂрблѧ́ющихъ мѧ̀ , ѿ срⷣца вᲂпїю́ ти , бцⷣе пᲂмᲂзи́ ми , мᲂлѧ́щи хрⷭ҇та̀ бг҃а , грѣхо́въ ѡ҆ставле́нїе пᲂда́ти . тебе́ бᲂ и҆мѣ́ю наде́ждꙋ ра́бъ тво́й .

степе́нна гла́сꙋ . прᲂки́менъ . всѧ́кᲂ дыха́нїе . є҆ѵⷢ҇а́лїе вᲂскрⷭ҇нᲂ . и҆ вᲂскрⷭ҇нїе хрⷭ҇то́вᲂ . ѱл҃о́мъ , н҃ . и҆ стⷯра вᲂскрⷭ҇на . Кано́нъ вᲂскрⷭ҇нъ сᲂ і҆рмᲂсо́мъ , на д҃ . и҆ ѻ҆трᲂко́мъ , на д҃ . и҆ пра́ѻ҆ц҃емъ , на́ ѕ҃ .

Кано́нъ ст҃ы́мъ , ѻ҆трᲂко́мъ . є҆мꙋ́же краегране́сїе , си́цевᲂ . трѝ ѻ҆́трᲂки пᲂю̀ , и҆ данїи́ла вели́кагᲂ . твᲂре́нїе ѳеѡ́фанᲂвᲂ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ . запѣ́въ : Ст҃і́и трїѐ ѻ҆́трᲂцы , мᲂли́те бг҃а ѡ҆ на́съ . Без̾нача́льнᲂе сло́вᲂ ѻ҆́ч҃ее , є҆́же пре́жде всѣ́хъ вѣ́къ ро́ждьшеесѧ бг҃ᲂлѣ́пнѡ , є҆́же в̾ пещѝ ю҆́нᲂшами вᲂѡ҆бражено̀ ви́дѣнᲂ бы́вше прᲂсла́вимъ . Глаго́лы мꙋчи́телѧ ѕлᲂчести́вагѡ , бл҃гᲂро́днїи ѻ҆́трᲂцы ѡ҆плева́вше крѣ́пкѡ , снѣ́дьми без̾зако́нныхъ ѡ҆скверни́тисѧ , халдѣ́йски невᲂсхᲂтѣ́ша . Пита́стесѧ , сло́вᲂмъ ᲂу҆́бѡ дш҃е́внѣ , снѣ́дьми же самᲂра́слеными пло́тьски . па́че питѣ́ющихсѧ де́белыми снѣ́дьми , цр҃е́ви краснѣ́йши ѻ҆бразы̀ ꙗ҆ви́стесѧ . боⷢ҇ . Ꙗ҆́дъ ѕмїи́нъ , въ слꙋ́ха го́рькѡ и҆злїѧ́вшїйсѧ є҆́ввина , ꙗ҆́же ѿ дв҃да вᲂзра́стшаѧ ѻ҆трᲂкᲂви́це и҆сцѣлѧ́еши , и҆зба́вителѧ пᲂро́ждьши .

Кано́нъ ст҃ы́мъ пра́ѻ҆ц҃емъ . є҆мꙋ́же краегране́сїе , си́цевᲂ . ѻ҆ц҃е́мъ хвалꙋ̀ в̾ лѣпᲂтꙋ̀ ны́нѣ принᲂша́ю . твᲂре́нїе і҆ѡ́сифᲂвᲂ . гла́съ , а҃ . і҆рмо́съ . Хрⷭ҇то́съ ражда́етсѧ . запѣ́въ : Ст҃і́и пра́ѻ҆ц҃ы , мᲂли́те бг҃а ѡ҆ на́съ . Ѻ҆ц҃е́мъ пѣ́нїе принесе́мъ , пре́жде зако́на , и҆ в̾ зако́нѣ вᲂсїѧ́вшимъ . и҆́же ѿ дв҃ы вᲂсїѧ́вшꙋ гдⷭ҇ꙋ и҆ влⷣцѣ , во́лею пра́вᲂю ᲂу҆го́ждьшимъ . и҆ незахᲂди́магѡ прᲂсвѣще́нїѧ , ны́нѣ наслажда́ютсѧ . А҆да́ма пе́рвагᲂ пᲂчте́мъ , рꙋко́ю пᲂчте́ннагᲂ зижди́телѧ . и҆ всѣ́мъ на́мъ пра́ѻ҆ц҃а бы́вшагѡ , и҆ в̾ се́лѣхъ нбⷭ҇ныхъ сᲂ всѣ́ми и҆збра́нными пᲂчива́юща . сла́ва . А҆́велѧ да́ры прине́сшагѡ дш҃е́ю бл҃гᲂро́днᲂю , прїѧ́тъ всѣ́хъ бг҃ъ и҆ гдⷭ҇ь . сего́же па́ки раз̾бо́йническᲂю рꙋко́ю ᲂу҆мерщве́на , принесѐ к̾ свѣ́тꙋ , ꙗ҆́кѡ бжⷭ҇твена мч҃нка . и҆ ны́нѣ , боⷢ҇ . Рече́нїѧ бжⷭ҇твенагѡ пᲂслꙋ́шаемъ , вᲂпїю́ща хрⷭ҇то́вᲂ ꙗ҆вле́нїе . се́бᲂ в̾ верте́пѣ ражда́етъ ѻ҆трᲂкᲂви́ца неи҆скꙋсᲂбра́чнаѧ . є҆го́же стра́шнᲂе ржⷭ҇тво̀ пред̾вᲂзвѣща́етъ , ѕвѣздᲂсло́вцемъ ѕвѣзда̀ ꙗ҆́вльшисѧ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ вᲂз̾нᲂси́тесѧ . по́йте гдⷭ҇ви всѧ̀ землѧ̀ , и҆ весе́лїемъ вᲂспо́йте лю́дїе , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Ра́зꙋмъ стѧжа́вше , бг҃ᲂнаꙋче́нныи влⷣкᲂ , ѻ҆́трᲂцы дв҃дᲂвы зако́ны ѻ҆те́ческїѧ , бг҃ᲂмꙋ́дренѡ сᲂблюдо́ша . Ѻ҆́гнь не ѡ҆палѝ , чистѣ́йшаѧ тѣлеса̀ бл҃гᲂчести́выхъ , пᲂсто́мъ бᲂ дш҃епита́тельнымъ напаѧ́хꙋсѧ . Хвалꙋ̀ всеми́рнꙋю , и҆ мнᲂгᲂпѣ́тꙋю , пᲂю́тъ ѻ҆́трᲂцы трїѐ , пᲂсредѣ̀ пе́щи чꙋ́днѡ ѡ҆рᲂша́еми . боⷢ҇ . Да ржⷭ҇тво̀ влⷣкᲂ , ѿ дв҃ьствꙋющагѡ тѣлесѐ , пᲂка́жеши на́мъ . спаса́еши в̾ пещѝ дв҃ьствꙋющаѧ тѣлеса̀ .

и҆́нъ , і҆рмо́съ . Первᲂвѣ́чнᲂмꙋ ѿ ѻ҆ц҃а . Пᲂе́тсѧ в̾ ми́рѣ си́фᲂвᲂ к̾ зижди́телю рᲂжде́нїе . и҆́бᲂ в̾ непᲂро́чнѣмъ житїѝ дш҃е́вныѧ любвѐ , тᲂмꙋ̀ вᲂи́стинꙋ ᲂу҆гᲂдѝ . и҆ ны́нѣ вᲂ странѣ̀ живы́хъ вᲂпїе́тъ , ст҃ъ є҆сѝ гдⷭ҇и . Оу҆сты̀ и҆ ѧ҆зы́кᲂмъ и҆ срⷣцемъ , є҆нѡ́съ ди́вныи , призва́ти бг҃ᲂмꙋ́дренѡ влⷣкꙋ всѣ́хъ и҆ гдⷭ҇а , надѣ́ѧсѧ дх҃ᲂмъ . и҆ бл҃гᲂꙋго́днѡ пᲂжи́въ на землѝ , сла́вꙋ вᲂспрїѧ́тъ . сла́ва . Сщ҃еннᲂсло́вїи сщ҃е́нными , є҆нѡ́ха ᲂу҆блажи́мъ . ᲂу҆гᲂди́въ бᲂ бг҃ᲂви преста́вленъ бы́сть в̾ сла́вѣ , ꙗ҆́вльсѧ лꙋ́чши ꙗ҆́кᲂже пи́шетъ , сме́рти . и҆́мже бж҃їи бы́въ ра́бъ прⷭ҇ныи . и҆ ны́нѣ , боⷢ҇ . Нн҃ѣ чаѧ́нїе ꙗ҆зы́кѡмъ ѿ дв҃ы пред̾грѧде́тъ , и҆ виѳлїе́мъ затвᲂре́ныи ѿверза́етъ свѣ́тлѡ є҆де́ма , сло́вᲂ вᲂплᲂща́емᲂе прїе́млѧ , в̾ ꙗ҆́слѣхъ пло́тїю вᲂзле́гшагѡ .

катава́сїѧ : Первᲂвѣ́чнᲂмꙋ ѿ ѻ҆ц҃а рᲂжде́нꙋ нетлѣ́ннѡ сн҃ꙋ , и҆ въ пᲂслѣ́днѧѧ ѿ дв҃ы , вᲂплᲂще́нꙋ без̾ сѣ́мене , хрⷭ҇тꙋ̀ бг҃ꙋ вᲂзᲂпїе́мъ , вᲂз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

ѵ҆пако́й . гла́съ , в҃ . Въ ро́сꙋ ѻ҆трᲂко́мъ ѻ҆́гнь прелага́шесѧ , рыда́нїе в̾ ра́дᲂсть жена́мъ премѣнѧ́шесѧ . а҆́нг҃лъ бᲂ вᲂ ѻ҆бᲂю̀ слꙋжа́ше чꙋдесѝ . ѻ҆нѣ́мъ ᲂу҆́бѡ в̾ пᲂко́й прелᲂжи́въ пе́щь , си́мъ же вᲂскрⷭ҇нїе вᲂзвѣсти́въ тридне́внᲂе . нача́льниче жи́зни на́шеѧ , гдⷭ҇и сла́ва тебѣ̀ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́иньствᲂ , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Данїи́лъ премꙋ́дрыи , бжⷭ҇твенѣ ᲂу҆́мъ прᲂсвѣ́щь , со́нїѧ разрѣшѝ самᲂде́ржцемъ , бжⷭ҇твенᲂю бл҃гᲂда́тїю . Ѡ҆блистава́етъ чꙋдесьмѝ , є҆́же в̾ пещѝ ѻ҆́трᲂкъ страда́нїе . мꙋчи́телѧ бᲂ ᲂу҆лᲂви́ша кᲂ ᲂу҆вѣ́дѣнїю твᲂемꙋ̀ всеси́льне . Сᲂгла́сїѧ а҆рга́ны , и҆ мꙋсикі́йскагѡ гла́са всеслᲂже́нїѧ , до́блественыѧ непривлеко́ша . и҆ злато́мꙋ ѻ҆́бразꙋ непᲂклᲂни́шасѧ . боⷢ҇ . Пѣ́сньми всепѣ́таѧ , и҆́же въ вавѷлѡ́нѣ дѣ́ти , пᲂчита́ютъ сн҃а твᲂегѡ̀ пребжⷭ҇твенагᲂ . є҆го́же в̾ пещѝ пᲂзна́ша .

и҆́нъ , і҆рмо́съ . Же́ѕлъ и҆з̾ ко́рене . Хвалꙋ̀ принесе́мъ бг҃ꙋ , чтꙋ́ще пѣ́сньми , нѡ́ѧ , вᲂи́стинꙋ сꙋ́ща пра́веднагᲂ . вᲂ всѣ́хъ бᲂ за́пᲂвѣдехъ бжⷭ҇твеныхъ ᲂу҆краша́емь ꙗ҆ви́сѧ , хрⷭ҇то́ви ᲂу҆гᲂди́въ . є҆мꙋ́же пᲂе́мъ вѣ́рнїи , сла́ва си́лѣ твᲂе́й гдⷭ҇и .= Ви́дѣвъ твᲂю̀ бг҃ъ бл҃гᲂро́днагᲂ нра́ва цѣ́лᲂсть , и҆ пᲂ всемꙋ̀ нѡ́е сᲂверше́на , втᲂро́мꙋ ми́рꙋ ꙗ҆́вѣ нача́льника тѧ̀ пᲂказꙋ́етъ , спа́сшагѡ тᲂмꙋ̀ ѿ всѧ́кагѡ ро́да , пᲂто́па чꙋ́вственагѡ сѣ́мѧ , ꙗ҆́кᲂже са́мъ пᲂвелѣ̀ . Нѡ́ѧ сᲂхра́ньшагѡ бж҃їи зако́нъ невреди́мь , и҆ ѡ҆брѣ́тшасѧ тᲂгда̀ пра́ведна в̾ ро́дѣ свᲂе́мъ , и҆ древѧны́мъ спа́сша дре́вле кᲂвче́гᲂмъ без̾слᲂве́сныхъ ро́дъ , пᲂвелѣ́нїемъ вседѣ́тельнымъ , пѣ́сньми бл҃гᲂче́стнѡ ᲂу҆блажи́мъ . =сла́ва . Вино̀ ᲂу҆миле́нїѧ на́мъ и҆стᲂча́етъ чтꙋ́щимъ тѧ̀ , нѡ́е бл҃же́нне па́мѧть твᲂѧ̀ , веселѧ́щи дꙋ́ши и҆ срⷣца̀ всегда̀ , и҆́же чи́стѣ ᲂу҆блажа́ющихъ ѻ҆́бразы твᲂѧ̀ чⷭ҇тны́ѧ , и҆ житїѐ бжⷭ҇твенᲂе . и҆ ны́нѣ , боⷢ҇ . Нн҃ѣ и҆збавле́нїе на́ше в̾ ꙗ҆́слѣхъ вᲂзлежи́тъ , и҆ пелена́ми пᲂвива́етсѧ ꙗ҆́кѡ млⷣнцъ . и҆ вᲂлсвѝ вᲂсто́чнїи цр҃їе прихо́дѧтъ , сегѡ̀ ꙗ҆́кѡ бг҃а и҆ цр҃ѧ ро́ждьшагᲂсѧ ѿ чⷭ҇тыѧ , ви́дѣти и҆ пᲂклᲂни́тисѧ с̾ да́ры вѣ́рнѡ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прᲂзѧ́блъ є҆сѝ , и҆з̾ гᲂры̀ хва́льныѧ присѣ́нныѧ ча́сты прїи́де вᲂпло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . нᲂ ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Наꙋ́чьшесѧ зако́нꙋ сп҃се , не ѿверго́шасѧ твᲂѧ̀ ᲂу҆го́дницы , данїи́лъ вели́кїи , с̾ тремѝ ю҆́нᲂшами бг҃ᲂразꙋ́мными . нᲂ крѣ́пᲂсть прїе́мше є҆́же ѿ тебѐ бл҃гᲂда́телѧ , мꙋчи́телѧ мꙋ́жески пᲂбѣди́ша . Та́йнѡ наꙋча́шесѧ данїи́лъ , чл҃кᲂлю́бче твᲂи́мъ та́йнамъ . на ѻ҆́блацѣ бᲂ ꙗ҆́кѡ сн҃а тѧ челᲂвѣ́ча грѧдꙋ́ща , и҆ ꙗ҆зы́кѡмъ всѣ́мъ ꙗ҆́кѡ сꙋдїю̀ и҆ цр҃ѧ зрѧ́ше , ᲂу҆ма̀ чистᲂто́ю . Оу҆краси́сѧ ѽ дѣ́ти , па́че ка́мене сапфи́ра ва́ше сᲂвᲂкꙋпле́нїе , ꙗ҆́кѡ зарѧ̀ зла́тнаѧ . бл҃гᲂче́стїѧ ре́внᲂстїю распа́льшесѧ хᲂдѧ́ще ра́дᲂстнѡ въ пещѝ , и҆ сᲂбира́юще ли́къ преми́рныи . боⷢ҇ . Данїи́лъ тѧ дв҃ᲂ го́рꙋ прᲂписа̀ ꙗ҆́вѣ бжⷭ҇твеныи , трїе́ же ѻ҆́трᲂцы ви́дѣвше пла́мень ѡ҆рᲂша́ющь , твᲂѐ бжⷭ҇твенᲂе ржⷭ҇тво̀ пѣ́сненѡ вᲂсхвалѧ́ютъ . ꙗ҆́кѡ сп҃са и҆ жи́зни да́телѧ и҆ гдⷭ҇а .

и҆́нъ , і҆рмо́съ . Бг҃ъ сы́и ми́ра .= Хвала́ми бжⷭ҇твеными да пᲂчте́тсѧ си́мъ , ѻ҆те́ческᲂе бл҃гᲂслᲂве́нїе приплᲂди́въ , и҆ пре́д̾ бг҃ᲂмъ бл҃гᲂꙋго́денъ ꙗ҆́вльсѧ , и҆ къ пра́ѻ҆теческимъ ликѡ́мъ причте́сѧ . и҆ вᲂ странѣ̀ живы́хъ ра́дᲂстнѡ пᲂчива́етъ . Ви́дѣти спᲂдо́бисѧ ꙗ҆́кѡ дрꙋ́гъ бж҃їи а҆враа́мъ де́нь зижди́телѧ свᲂегѡ̀ , и҆ и҆спо́лнь быва́етъ ра́дᲂсти дх҃о́вныѧ . сегѡ̀ ᲂу҆́бѡ ᲂу҆ма̀ пра́вᲂстїю чтꙋ́ще ᲂу҆блажи́мъ всѝ , ꙗ҆́кѡ хрⷭ҇то́ва бжⷭ҇твена пра́ѻ҆ц҃а . =сла́ва . Ви́дѣлъ є҆сѝ ꙗ҆́кᲂже є҆́сть мо́щнѡ чл҃кꙋ ви́дѣти трⷪ҇цꙋ . и҆ тꙋ̀ ᲂу҆гᲂсти́лъ є҆сѝ ꙗ҆́кѡ дрꙋ́гъ при́сныи , пребл҃же́нне а҆враа́ме . тѣ́мже мздꙋ̀ прїѧ́лъ є҆сѝ стра́ннагѡ гᲂще́нїѧ , є҆́же бы́ти без̾чи́сленымъ ꙗ҆зы́кѡмъ ѻ҆ц҃ъ вѣ́рᲂю . и҆ ны́нѣ , боⷢ҇ . По́лныи и҆злива́етсѧ пло́тїю на́съ ра́ди , и҆ нача́лᲂ без̾нача́льныи прїе́млетъ . ѡ҆бнищава́етъ же бᲂга́тыи , и҆ сло́вᲂ сы́и бг҃ъ , в̾ ꙗ҆́слѣхъ без̾слᲂве́сныхъ вᲂз̾лежи́тъ ꙗ҆́кѡ младе́нецъ , вᲂзва́нїе всѣ́мъ , и҆́же ѿ́ вѣка сᲂдѣ́лᲂваѧ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ сᲂвѣ́та ти а҆́нг҃ла , ми́ръ пᲂдава́юща , пᲂсла́лъ є҆сѝ на́мъ . тѣ́мъ бг҃ᲂразꙋ́мїѧ к̾ свѣ́тꙋ наставлѧ́еми , ѿ́ нᲂщи ᲂу҆́тренююще , славᲂсло́вимъ тѧ̀ чл҃кᲂлю́бче .

пѣ́снь , ѕ҃ . і҆рмо́съ . Бе́здна грѣхо́внаѧ и҆ прегрѣше́нїи бꙋ́рѧ мѧ смꙋща́етъ , и҆ вᲂ глꙋбинꙋ̀ нꙋ́жнꙋю рѣ́етъ ѿча́ѧнїѧ , нᲂ са́мъ крѣ́пкꙋю рꙋ́кꙋ ми прᲂстрѝ ꙗ҆́кѡ петро́ви , и҆ ѿ тлѝ бж҃е мо́й вᲂз̾веди́ мѧ . Ѡ҆блада́вше є҆сте́ствеными страстьмѝ си́лᲂю сло́ва , странѣ̀ ꙗ҆зы́къ халдѣ́йскихъ вла́стеле бы́сте . вѣ́сть бᲂ дᲂбрᲂдѣ́тель че́сть пᲂда́ти стѧжа́вшимъ ю҆̀ , ѽ дв҃дᲂви мꙋ́дрїи внꙋ́цы . Въ ме́ртвᲂсть данїи́лъ живᲂно́снꙋ ѡ҆дѣ́ѧвсѧ дре́вле , и҆́же ꙗ҆́кѡ бг҃а халде́ѡмъ ѕлᲂчести́внѡ мни́магѡ ᲂу҆бива́етъ , снѣ́дїю ѕмі́ѧ ѕла́гѡ . сщ҃е́нники же ѕлᲂчести́выѧ , мꙋ́дрѣ ᲂу҆би́лъ є҆́сть . боⷢ҇ . Ми́лᲂстива ми сꙋдїю̀ и҆ сн҃а твᲂегѡ̀ бцⷣе дв҃ᲂ , твᲂи́ми мᲂли́твами бы́ти в̾ де́нь сꙋ́дныи , и҆зба́вити же лю́тыхъ , мт҃и ᲂу҆мᲂлѝ . на тѧ́ бᲂ є҆ди́нꙋ ᲂу҆пᲂва́нїе вᲂзлᲂжи́хъ .

и҆́нъ , і҆рмо́съ . Оу҆тро́ба і҆ѡнꙋ . Ѻ҆́бразъ хрⷭ҇то́вы стра́сти бы́лъ є҆сѝ ꙗ҆́вѣ , і҆саа́че преблаже́нне , вᲂз̾вᲂди́мь ѻ҆́ч҃имъ бл҃гᲂпᲂкᲂре́нїемъ на закᲂле́нїе . сегѡ̀ ра́ди ᲂу҆бл҃жа́ешисѧ и҆ ра́бъ бж҃їи вᲂи́стинꙋ ꙗ҆ви́сѧ бли́жнїи , сᲂ всѣ́ми пра́ведными всели́всѧ . Ꙗ҆ви́сѧ і҆а́кѡвъ ᲂу҆го́дникъ вѣ́ренъ всѣ́хъ бг҃ꙋ . тѣ́мже и҆ бра́всѧ сᲂ а҆́нг҃лᲂмъ , ᲂу҆́мъ зрѧ́и бг҃а нарече́сѧ . и҆ спѧ̀ , бжⷭ҇твенꙋю лѣ́ствицꙋ ви́дѣ , на не́йже бг҃ъ ᲂу҆твержа́шесѧ , пло́тїю ѡ҆бло́жсѧ за бл҃гᲂсты́ню . сла́ва . Любѧ̀ і҆ѡ́сифъ кᲂ ѻ҆ц҃ꙋ бл҃гᲂпᲂкᲂре́нїе , в̾ ро́въ вве́рженъ бы́сть . про́данъ бы́въ , вᲂ ѻ҆́бразъ зако́льшагᲂсѧ и҆ пᲂгре́бшагᲂсѧ хрⷭ҇та̀ . житᲂда́вецъ же є҆гѵ́птꙋ бы́сть , цѣлᲂмꙋ́дръ бы́въ и҆ пра́веденъ . цр҃ь же страсте́мъ и҆́стиненъ . и҆ ны́нѣ , боⷢ҇ . Мла́дᲂ на землѝ ѻ҆трᲂча̀ пᲂзна́сѧ , сы́и сᲂ ѻ҆ц҃е́мъ при́снѡ и҆ дх҃ᲂмъ . пелена́ми же пᲂвива́етсѧ , и҆́же зе́млю пᲂвива́ѧи мгло́ю ꙗ҆́вѣ , и҆ в̾ ꙗ҆́слѣхъ без̾слᲂве́сныхъ вᲂзлежи́тъ . сегѡ̀ ны́нѣ пред̾пра́зднꙋемъ бжⷭ҇твенᲂе без̾сѣ́меннᲂе ржⷭ҇тво̀ .

катава́сїѧ : Оу҆тро́ба і҆ѡ́нꙋ младе́нца невредѝ , мᲂрскі́и ѕвѣ́рь , і҆а́кѡва прїѧ́тъ . въ дв҃цꙋ ᲂу҆́бѡ все́льсѧ сло́вᲂ , и҆ пло́ть прїи́мъ , про́йде сᲂхранѝ неи҆стлѣ́ннꙋ . и҆́же бᲂ непᲂстрада̀ и҆стлѣ́нїѧ , ро́ждьшꙋю сᲂхранѝ неврежде́ннꙋ .

кᲂнда́къ . гла́съ , ѕ҃ . Рꙋкᲂпи́саннагᲂ ѻ҆́браза непᲂче́тше , нᲂ неѡ҆пи́саннымъ сꙋщество́мъ вᲂѡ҆рꙋ́жшесѧ , требл҃же́ннїи . в̾ тꙋзѣ̀ ѻ҆́гненѣй прᲂсла́вистесѧ . пᲂсредѣ́ же пла́мене непᲂстᲂѧ́ннагѡ стᲂѧ́ще , бг҃а призва́сте , ᲂу҆скᲂрѝ ще́дрыи , и҆ пᲂтщи́сѧ ꙗ҆́кѡ млⷭ҇тивъ , на́ пᲂмᲂщь на́шꙋ . ꙗ҆́кѡ мо́жеши хᲂтѧ́и . и҆́кᲂсъ . Прᲂстрѝ свᲂю̀ рꙋ́кꙋ , є҆́юже прїѧ́ша и҆скꙋше́нїе , є҆гѵ́птѧне бᲂрю́щесѧ , и҆ є҆вре́и бᲂри́ми . не ѡ҆ста́ви же на́съ , да непо́жретъ на́съ сме́рть жа́ждꙋщаѧ на́съ , и҆ сатана̀ ненави́дѧи на́съ . нᲂ прибли́жисѧ на́мъ , и҆ пᲂщадѝ дш҃а на́ша , ꙗ҆́кᲂже пᲂщадѣ̀ и҆нᲂгда̀ ѻ҆́трᲂки свᲂѧ̀ , и҆́же в̾ вавѷлѡ́нѣ , непреста́ннѡ сла́вѧщихъ тѧ , и҆ вве́рженыѧ тебѐ ра́ди в̾ пе́щь , и҆ ѿ сеѧ̀ вᲂпїю́щихъ ти , ᲂу҆скᲂрѝ ще́дрыи , и҆ пᲂтщи́сѧ ꙗ҆́кѡ млⷭ҇тивъ на́ пᲂмᲂщь на́шꙋ . ꙗ҆́кѡ мо́жеши хᲂтѧ́и .

пѣ́снь , з҃ . і҆рмо́съ . Дѣ́ти бл҃гᲂчести́выѧ в̾вавилѡ́нѣ , тѣ́лꙋ злато́мꙋ непᲂклᲂни́шасѧ , нᲂ пᲂсредѝ пе́щи пла́менны прᲂхлажда́еми , пѣ́снь вᲂспѣва́хꙋ гл҃юще , бл҃гᲂслᲂве́нъ бг҃ъ ѻ҆ц҃ъ на́шихъ . Гла́съ бг҃ᲂлюбе́зенъ пᲂѧ́шесѧ и҆з̾ среды̀ ѻ҆гнѧ̀ , вседержи́телю . а҆за́рїѧ бᲂ бжⷭ҇твеныи ли́къ сᲂста́вль . пѣ́снь вᲂспѣва́ѧ гл҃аше , бл҃гᲂслᲂве́нъ бг҃ъ ѻ҆ц҃ъ на́шихъ . Цѣ́вница ю҆́нᲂшъ , бг҃ᲂсло́вѧше всѣ́хъ бг҃а и҆ вседержи́телѧ , и҆́же тѣ́мъ в̾ пещѝ ꙗ҆́снѡ ꙗ҆́вльшагᲂсѧ . и҆ пѣ́снь вᲂспѣва́хꙋ , глаго́люще , бл҃гᲂслᲂве́нъ бг҃ъ ѻ҆ц҃ъ на́шихъ . Трѝ , и҆́же в̾ пещѝ в̾ве́рженыѧ ви́дѣвъ цр҃ь , ꙗ҆́кѡ ᲂу҆зрѣ̀ четве́ртагѡ видѣ́нїе , сн҃а превѣ́чнагᲂ бж҃їѧ всѣ́мъ вᲂзᲂпѝ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . И҆мѣ́ѧ прᲂсщ҃е́нъ бжⷭ҇твенᲂю заре́ю ᲂу҆́мъ , данїи́ле бг҃ᲂбл҃же́нне , дв҃ыѧ ржⷭ҇тво̀ ꙗ҆́вѣ пред̾ви́дѣвъ , та́йными ѻ҆́бразы вᲂѡ҆бража́емᲂ . бл҃гᲂслᲂве́нъ вᲂпїѧ́ше бг҃ъ ѻ҆ц҃ъ на́шихъ .

и҆́нъ , і҆рмо́съ . Ѻ҆́трᲂцы вᲂ блазѣ́й . Да вᲂспᲂе́тсѧ а҆на́нїѧ а҆за́рїѧ миса́илъ , с̾ данїи́лᲂмъ , пе́щь ᲂу҆гаси́вше ѻ҆́гненꙋю , и҆ львѡ́мъ ѡ҆бꙋзда́вше стремле́нїѧ , и҆ хрⷭ҇то́ви сᲂгла́снѡ пᲂю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Зако́ннѡ пᲂстрада́въ в̾ напа́стѣхъ , и҆ непреста́нныхъ ско́рбѣхъ , ᲂу҆го́дникъ нарече́сѧ і҆́ѡвъ бж҃їи , всеи́стинныи , кро́тᲂкъ , неѕло́бивъ , пра́въ сверше́нъ , непᲂро́ченъ , вᲂпїѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Вѣ́рᲂю мѡѷсе́ѧ , а҆арѡ́на же , и҆ і҆ѡ́ра пᲂчте́мъ . вᲂсхвалѧ́юще и҆ і҆сꙋ́са , и҆ леві́ю преѡ҆сщ҃е́ннѣйшагᲂ , гедеѡ́на же и҆ самѱѡ́на , и҆ взыва́емъ бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ , боⷢ҇ . Сѐ ꙗ҆́кᲂже прᲂречѐ прᲂро́къ , вᲂ ᲂу҆тро́бѣ зача́тъ неи҆скꙋсᲂбра́чнаѧ бг҃а , и҆ рᲂди́ти ꙗ҆́вѣ и҆́детъ в̾ верте́пѣ виѳлїе́мли . є҆мꙋ́же всѝ пᲂе́мъ ѻ҆ц҃е́мъ бж҃е бл҃гᲂслᲂве́нъ є҆сѝ .

катава́сїѧ : Ѻ҆́трᲂцы вᲂ бл҃зѣ́й вѣ́рѣ вᲂспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не ᲂу҆бᲂѧ́шасѧ . нᲂ пᲂсредѝ пла́мене стᲂѧ́ще пᲂѧ́хꙋ , ѻ҆ц҃е́мъ бг҃ъ бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти блгⷭ҇ви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . А҆враа́мᲂвᲂ бл҃гᲂро́дїе спастѝ тща́щесѧ , сво́йственᲂе к̾ немꙋ̀ стѧжа́сте ѡ҆снᲂва́нїе вѣ́ры , и҆ наде́жды препᲂдо́бнїи , терпѣ́нїе и҆ напа́стемъ пᲂдража́нїе . вᲂпїю́ще , бл҃гᲂслᲂви́те сщ҃е́ннїи влⷣкꙋ , лю́дїе превᲂзнᲂси́те є҆гѡ̀ во́ вѣки . И҆́же ꙗ҆́кѡ свѣти́ла прᲂсїѧ́вше , и҆ зе́млю ѡ҆небеси́вше . и҆ бл҃гᲂче́стїѧ прᲂсвѣще́нїемъ ѡ҆сїѧ́вшесѧ , всеми́рнᲂе сᲂста́вльше ликᲂстᲂѧ́нїе пᲂю́тъ , и҆́же ѿ напа́сти спа́сшемꙋ влⷣцѣ . дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки . Ю҆́нᲂшьски пᲂгаси́вше распали́мꙋю пе́щь , и҆ льво́мъ че́люсти загра́ждьше дв҃дᲂвы внꙋ́цы . ны́нѣ ра́дꙋющесѧ пᲂю́тъ , тѧ̀ бл҃гᲂда́телѧ цр҃ѧ всѣ́хъ . дѣ́ти бл҃гᲂслᲂви́те , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . боⷢ҇ . Та́йнѡ наꙋча́етъ пречⷭ҇таѧ данїи́лъ премꙋ́дрыи , и҆ прᲂѡ҆бража́ютъ ѻ҆́трᲂцы трїѐ ржⷭ҇тво̀ твᲂѐ , бг҃ᲂмꙋ́дренїи . ѻ҆́бразы зрѧ́ще , и҆́же и҆з̾ ᲂу҆тро́бы твᲂеѧ̀ прᲂше́дшагᲂ несказа́ннѡ . є҆го́же дѣ́ти бл҃гᲂсло́вѧтъ , сщ҃е́ннїи вᲂспѣва́ютъ , лю́дїе превᲂзно́сѧтъ вᲂ всѧ̀ вѣ́ки .

и҆́нъ , і҆рмо́съ . Чꙋ́дᲂ преве́лїе . Дне́сь и҆́же ѿ́ вѣка бжⷭ҇твенꙋю па́мѧть сверша́емъ , честны́хъ ѻ҆ц҃ъ , а҆да́ма , а҆́велѧ же , и҆ си́фа . нѡ́ѧ , и҆ є҆нѡ́са . є҆нѡ́ха и҆ а҆враа́ма . мелхиседе́ка , и҆ і҆́ѡва . і҆саа́ка вѣ́рнагѡ , и҆ і҆а́кѡва . блгⷭ҇ви́те те́плѣ , вᲂпїю́ще гдⷭ҇а , и҆ превᲂзно́сите є҆гѡ̀ во́ вѣки . По́лкъ бг҃ᲂгла́сныи бжⷭ҇твеныхъ ѻ҆ц҃ъ , да вᲂсхва́лимъ , вара́ка , и҆ нафа́на , є҆леаза́ра , і҆ѡсі́ѧ . и҆ дв҃да и҆ є҆фѳа́ѧ . самꙋ́ила , и҆́же пре́жнѧѧ зрѧ́и , и҆ че́стнѡ взыва́ѧ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . Пᲂхвалꙋ̀ пѣ́сненѡ принесе́мъ бж҃їимъ прᲂро́кѡмъ , вᲂсхвалѧ́юще і҆ѡсі́ѧ , и҆ михе́ѧ , сᲂфо́нїѧ , и҆ а҆вва́кꙋма . заха́рїю , и҆ і҆ѡ́нꙋ . а҆гге́ѧ же , и҆ а҆мѡ́са . и҆ сᲂ а҆вді́емъ малахі́ѧ , и҆ наꙋ́ма . и҆са́їю , і҆єремі́ю , и҆ і҆єзекі́илѧ . кꙋ́пнѡ данїи́ла , и҆ и҆лїю̀ , и҆ є҆лисе́ѧ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Глаго́лы трⷪ҇ческими , прест҃ꙋ́ю вᲂспᲂе́мъ вѣ́рнїи трⷪ҇цꙋ . ѻ҆ц҃а без̾нача́льна , сн҃а же , и҆ пра́вагѡ дх҃а ст҃а́гѡ , є҆ди́ницꙋ трисᲂста́внꙋ . ю҆́же всѧ́кᲂ дыха́нїе сла́витъ . зᲂвꙋ́ще , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . и҆ ны́нѣ , боⷢ҇ . Ꙗ҆ви́сѧ ѿ дв҃ческихъ хрⷭ҇тѐ крᲂве́й вᲂплᲂща́емь , неи҆з̾глаго́ланнымъ сло́вᲂмъ . и҆ ꙗ҆́кѡ младе́нецъ сᲂверше́нъ в̾ верте́пѣ , премно́жествᲂмъ бл҃гᲂсе́рдїѧ і҆с҃е ражда́ѧсѧ . ѕвѣзда́ же тѧ и҆з̾ дале́ча пᲂказа̀ ѕвѣздᲂсло́вцемъ . по́йте вѣ́рᲂю зᲂвꙋ́ще и҆ превᲂзнᲂси́те є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Чꙋ́дᲂ преве́лїе , рᲂсᲂда́вицꙋ вᲂѡ҆бразѝ пе́щь ѻ҆́бразᲂмъ . ꙗ҆́же бᲂ прїѧ́тъ не ѡ҆палѝ ю҆́ныхъ , та́кᲂже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пᲂю́ще вᲂзᲂпїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ небе́сными вѡ́и тѧ̀ велича́емъ . Дᲂстиго́сте кᲂнчи́нꙋ жела́емꙋю , и҆ жела́нїѧ кᲂне́чнаѧ , пред̾стᲂитѐ въ нбⷭ҇ныхъ черто́зѣхъ , ѻ҆́трᲂцы пребᲂга́тїи . Ра́дꙋющесѧ рꙋкᲂѧ́ти ꙗ҆́же ѿ сле́зъ , до́брагѡ ва́шегѡ дѣ́ланїѧ прїѧ́сте , нетлѣ́нїѧ кла́съ плᲂдᲂнᲂси́вше . Вᲂсїѧ̀ свѣ́тлᲂсть ны́нѣ ва́мъ дᲂсто́йнѡ , и҆ весе́лїе срⷣца прᲂцвѣтѐ , ѿ ню́дꙋ же ѿбѣжѐ печа́ль , всели́стесѧ . боⷢ҇ . Па́жить сме́ртнꙋю ᲂу҆ста́вила є҆сѝ дв҃ᲂ , живᲂда́вца ро́ждьши и҆ гдⷭ҇а , ѡ҆живᲂтвᲂрѧ́щагᲂ , вѣ́рᲂю велича́ющихъ тѧ .

и҆́нъ , і҆рмо́съ . Та́инствᲂ стра́ннᲂ .= Крѣ́пᲂстїю твᲂе́ю дре́вле . си́лы сᲂтвᲂри́ша дще́ри гдⷭ҇и , а҆́нна , и҆ і҆ꙋди́ѳь , и҆ девѡ́ра , ѻ҆́лда же , і҆аи́ль , є҆сѳи́рь , и҆ са́рра , марїа́мъ же мѡѷсе́ѡва , и҆ рахи́ль и҆ реве́ка , и҆ рꙋ́ѳъ , велемꙋ́дреныѧ . Ꙗ҆́кѡ ᲂу҆гаси́вшїѧ ѻ҆́трᲂки ст҃ы́ѧ пе́щь , сщ҃е́ннѡ пᲂчте́мъ , кꙋ́пнѡ с̾ данїи́лᲂмъ прᲂро́кᲂмъ , и҆ всѧ̀ пра́ведныѧ ꙗ҆́вѣ . пре́жде зако́на ѡ҆блиста́вшїѧ до́брѣ , и҆ в̾ зако́нѣ влⷣцѣ ᲂу҆гᲂди́вшїѧ . Премꙋ́дрїи бжⷭ҇твенїи прᲂро́цы бы́вше , а҆враа́мᲂвы внꙋ́цы , є҆́же ѿ а҆враа́ма и҆ і҆ꙋ́ды ро́ждьшеесѧ сло́вᲂ бж҃їе , прᲂвᲂзвѣсти́ша дх҃ᲂмъ . тѣ́хъ мᲂльба́ми і҆с҃е всѧ̀ ᲂу҆ще́дри . =сла́ва . Ѡ҆ст҃и́сѧ всѧ̀ тва́рь па́мѧтїю ва́шею , и҆ тᲂржествꙋ́ющи зᲂве́тъ ра́бски , вᲂпїю́щи , мᲂльбꙋ̀ гдⷭ҇ви при́снѡ принᲂси́те бл҃же́ннїи , ᲂу҆лꙋчи́ти вѣ́чныхъ бл҃гъ хва́лѧщимъ ва́съ . и҆ ны́нѣ , боⷢ҇ . Ѡ҆бᲂлкі́исѧ в̾ мѧ̀ , ѿ дв҃ы пред̾грѧде́тъ , и҆ в̾ верте́пѣ ражда́етсѧ , сло́вᲂ ѻ҆́ч҃ее без̾ примѣ́са , ликꙋ́й тва́ре , гла́сы бл҃гᲂда́рствеными велича́ющи тᲂгѡ̀ , є҆́же за милᲂсе́рдїе , всест҃о́е сᲂше́ствїе .

катава́сїѧ : Та́инствᲂ стра́ннᲂ ви́жꙋ , и҆ пресла́внᲂ . не́бᲂ сꙋ́щꙋ пеще́рꙋ , престо́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ни́хъ же вᲂз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ .= Дᲂсто́йнѡ є҆́сть .=

свѣти́ленъ вᲂскрⷭ҇нъ . сла́ва , и҆ нн҃ѣ . пра́ѻ҆ц҃емъ . Свѣ́тъ вели́кїи ѿ неи҆скꙋсᲂмꙋ́жныѧ дв҃ы , и҆́же ѿ а҆да́ма прᲂсвѣти́ти к̾ виѳлїе́мꙋ тщи́тсѧ . тѣ́мже вᲂзвѣща́етъ чꙋ́дᲂ пра́ѻ҆ц҃ъ , преꙋкраше́ннаѧ па́мѧть .

На хвали́тѣхъ , стⷯры , вᲂскрⷭ҇ны . сла́ва . гла́съ , з҃ . Прїиди́те всѝ вѣ́рнѡ тᲂржествꙋ́емъ и҆́же пре́жде зако́на ѻ҆ц҃ъ , а҆враа́ма и҆ и҆́же с̾ ни́мъ , мᲂле́бнꙋю па́мѧть , і҆ꙋ́дᲂвᲂ племѧ̀ дᲂсто́йнѡ пᲂчте́мъ . и҆́же в̾ вавилѡ́нѣ ѻ҆́трᲂки ᲂу҆гаси́вшїѧ пе́щныи пла́мень , ꙗ҆́кѡ трⷪ҇ческїи ѻ҆́бразъ , с̾ данїи́лᲂмъ вᲂсхва́лимъ . прᲂро́ческаѧ рече́нїѧ и҆звѣ́стнѡ держа́ще сᲂ и҆са́їемъ велегла́снѡ вᲂзᲂпїе́мъ , сѐ дв҃аѧ во́ чревѣ прїи́метъ , и҆ рᲂди́тъ сн҃а є҆мманꙋ́ила , є҆́же є҆́сть с̾ на́ми бг҃ъ .

и҆ ны́нѣ , гла́съ , в҃ . Преблгⷭ҇ве́на є҆сѝ бцⷣе дв҃ᲂ , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ . и҆ кᲂне́чныи ѿпꙋ́стъ .

На литꙋргі́и , бл҃же́нна , гла́сꙋ , на́ ѕ҃ . и҆ пра́ѻ҆ц҃емъ , пѣ́снь г҃ ѧ , на д҃ .

Пᲂ вхо́дѣ , а҆́ще ли хра́мъ хрⷭ҇то́въ : трᲂпа́рь , вᲂскрⷭ҇нъ , и҆ пра́ѻ҆ц҃емъ . кᲂнда́къ , вᲂскрⷭ҇нъ . сла́ва , пра́ѻ҆ц҃емъ . и҆ ны́нѣ , хра́мꙋ .

Пᲂ вхо́дѣ , а҆́ще хра́мъ бцⷣы : трᲂпа́рь , вᲂскрⷭ҇нъ , и҆ хра́мꙋ , и҆ пра́ѻ҆ц҃емъ . кᲂнда́къ , вᲂскрⷭ҇нъ . сла́ва , пра́ѻ҆ц҃емъ . и҆ ны́нѣ , хра́мꙋ .

Пᲂ вхо́дѣ , а҆́ще ли хра́мъ ст҃ы́мъ : трᲂпа́рь , вᲂскрⷭ҇нъ , и҆ пра́ѻ҆ц҃емъ , и҆ хра́мꙋ . кᲂнда́къ , вᲂскрⷭ҇нъ . сла́ва , хра́мꙋ . и҆ ны́нѣ , пра́ѻ҆ц҃емъ .

прᲂки́менъ гла́сꙋ . и҆ дрꙋгі́и , пѣ́снь ѻ҆ц҃е́мъ . Бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ , хва́льнѡ и҆ прᲂсла́вленѡ и҆́мѧ твᲂѐ во́ вѣки . сти́хъ . ꙗ҆́кѡ пра́веденъ є҆сѝ ѡ҆ всѣ́хъ , и҆́хже сᲂтвᲂри́лъ є҆сѝ на́мъ . а҆пⷭ҇лъ , рѧ́дъ нлⷣи . и҆ дрꙋгі́и , к̾ кᲂласа́емъ . заⷱ҇ , сн҃з . а҆ллилꙋ́їѧ . Мѡѷсе́й и҆ а҆арѡ́нъ вᲂ і҆єре́ѡхъ є҆гѡ̀ , и҆ самꙋ́илъ въ призыва́ющихъ и҆́мѧ є҆гѡ̀ . сти́хъ . призыва́хꙋ гдⷭ҇а , и҆ то́й пᲂслꙋ́шаше и҆́хъ . є҆ѵⷢ҇а́лїе , рѧ́дъ нлⷣи . и҆ дрꙋгі́и , ѿ =лꙋкѝ . заⷱ҇ , ѻ҃ѕ . =прича́стенъ , хвали́те гдⷭ҇а с̾ нб҃съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ . Блюдѝ , и҆ зрѝ і҆єре́ю , да неѡ҆ста́виши сицево̀ є҆ѵⷢ҇а́лїе , а҆́ще ка́кѡ прилꙋчи́тсѧ бы́ти , пᲂ предѝ ѿ сеѧ̀ недѣ́ли , ꙗ҆́вѣ ꙗ҆́кѡ на рѧдꙋ̀ . и҆ да рече́ши и҆́нᲂ престꙋпи́въ на и҆нꙋ́ю недѣ́лю , ᲂу҆ста́внагѡ ра́ди пᲂвелѣ́нїѧ .

<< Previous

Contents

Next >>