МЦⷭ҇А ДЕКАБРѦ̀ ВЪ К҃Є ДН҃Ь

є҆́же по́ плᲂти ржⷭ҇тво̀ гдⷭ҇а бг҃а и҆ сп҃са на́шегѡ і҆с҃а хрⷭ҇та̀ . =На вече́рни , а҆́ще ᲂу҆́бѡ слꙋчи́тсѧ бдѣ́нїе в̾ сꙋбо́тꙋ ве́черъ , стихᲂлᲂгисꙋ́емъ , а҃ ю , кафи́змꙋ всю̀ . А҆́ще ли в̾ нлⷣю ве́черъ , пᲂе́мъ то́чїю , а҃ , а҆нтиѳо́нъ . А҆́ще ли є҆́сть по́стъ , стихᲂло́гїѧ не быва́етъ . На гдⷭ҇и вᲂзва́хъ , пᲂста́вимъ , стихо́въ , и҃ . и҆ пᲂе́мъ стихѣ́ры . гла́съ , в҃ . самᲂгла́сны . Прїиди́те вᲂзра́дꙋемсѧ гдⷭ҇ви , настᲂѧ́щꙋю та́йнꙋ сказꙋ́юще . средᲂстѣ́нїе граде́жа разрꙋши́сѧ , и҆ пла́меннᲂе ѻ҆рꙋ́жїе плещѝ дае́тъ , и҆ херꙋви́мъ ѿстꙋпа́етъ ѿ́ древа жи́зни , и҆ а҆́зъ ра́йскїѧ пи́щи причаща́юсѧ , ѿ него́же прᲂизгна́нъ бы́хъ преслꙋша́нїѧ ра́ди . неи҆змѣ́нныи бᲂ ѻ҆́бразъ ѻ҆ч҃ь , ѻ҆́бразъ приснᲂсꙋ́щїѧ є҆гѡ̀ , зра́къ раба̀ прїе́млетъ . ѿ неи҆скꙋсᲂбра́чныѧ мт҃ре прᲂше́дъ , непрелᲂже́нїе претерпѣ́въ , є҆́же бᲂ бѣ̀ пребы́сть , бг҃ъ сы́и и҆́стиненъ . и҆ є҆́же не бѣ̀ прїѧ́тъ , чл҃къ бы́въ чл҃кᲂлю́бїѧ ра́ди . тᲂмꙋ̀ вᲂзᲂпїе́мъ , рᲂди́выисѧ ѿ дв҃ы бж҃е пᲂми́лꙋй на́съ . двⷤа .=

Гдⷭ҇ꙋ і҆с҃ꙋ ро́ждьшꙋсѧ ѿ ст҃ы́ѧ дв҃ы , прᲂсвѣти́шасѧ всѧ́ческаѧ . па́стыремъ бᲂ свирѧ́ющимъ , и҆ вᲂлхво́мъ пᲂкланѧ́ющимсѧ , а҆́нг҃лᲂмъ вᲂспѣва́ющимъ , и҆́рᲂдъ мѧтѧ́шесѧ , ꙗ҆́кѡ бг҃ъ во́ плᲂти ꙗ҆ви́сѧ , сп҃съ дш҃а́мъ на́шимъ . двⷤа .

Црⷭ҇твᲂ твᲂѐ хрⷭ҇тѐ бж҃е , црⷭ҇твᲂ всѣ́мъ вѣкѡ́мъ , и҆ влⷣчествᲂ твᲂѐ вᲂ всѧ́кᲂмъ ро́дѣ и҆ ро́дѣ . вᲂплᲂти́выисѧ ѿ дх҃а ст҃а́гѡ , и҆ ѿ при́снѡ дв҃ы мр҃і́и въчл҃чивыисѧ . свѣ́тъ на́мъ вᲂзсїѧ̀ хрⷭ҇тѐ бж҃е , твᲂѐ прише́ствїе , свѣ́тъ ѿ́ свѣта , ѻ҆́ч҃ее сїѧ́нїе , всю̀ тва́рь прᲂсвѣти́лъ є҆сѝ . всѧ̀ тва́рь хва́литъ тѧ̀ . ѻ҆́бразъ сла́вы ѻ҆́ч҃и , сы́и , и҆ пре́жде сы́и , вᲂзсїѧ́выи ѿ дв҃ы бж҃е пᲂми́лꙋй на́съ . вⷤ .

Что́ ти принесе́мъ хрⷭ҇тѐ , ꙗ҆́кѡ ꙗ҆ви́сѧ на землѝ , ꙗ҆́кѡ чл҃къ на́съ ра́ди . ка́ѧждᲂ бᲂ ѿ тᲂбо́ю бы́вшихъ тва́рей , бл҃гᲂдаре́нїе ти прино́ситъ . а҆́нг҃ли , пѣ́нїе . нб҃са̀ , ѕвѣздꙋ̀ . вᲂлсвѝ , да́ры . па́стырїе , чꙋ́дᲂ . землѧ̀ , верте́пъ . пꙋсты́нѧ , ꙗ҆́сли . мы́ же , мт҃ръ дв҃ꙋ . и҆́же пре́жде вѣ́къ бж҃е пᲂми́лꙋй на́съ . двⷤа .

сла́ва , и҆ ны́нѣ . гла́съ , то́йже . А҆́вгꙋстꙋ є҆динᲂнача́льствꙋющꙋ на землѝ , мнᲂгᲂнача́лїе челᲂвѣ́кѡмъ преста̀ . и҆ тебѣ̀ въчелᲂвѣ́чшꙋсѧ ѿ чи́стыѧ , мнᲂгᲂбо́жїе и҆́дᲂлᲂмъ ᲂу҆праздни́сѧ . пᲂд̾ є҆ди́нѣмъ црⷭ҇твᲂмъ ми́рскимъ , гра́ди бы́ша . и҆ въ є҆ди́нᲂ влⷣчествᲂ бжⷭ҇тва̀ , ꙗ҆зы́цы вѣ́рᲂваша . ѡ҆писа́шасѧ лю́дїе , пᲂвелѣ́нїемъ кесаре́вымъ , написа́хᲂмсѧ вѣ́рнїи и҆́менемъ бжⷭ҇тва̀ , тебѐ въчелᲂвѣ́чшасѧ бг҃а на́шегѡ . ве́лїѧ твᲂѧ̀ млⷭ҇ть , гдⷭ҇и сла́ва тебѣ̀ .

вы́хᲂдъ , съ є҆ѵⷢ҇а́лїемъ . свѣ́те ти́хїи . прᲂки́менъ , дню̀ . и҆ чте́нїѧ по́ чинꙋ и҆́хъ , съ трᲂпарѝ . и҆ сᲂ стихѝ и҆́хъ . А҆́ще прилꙋчи́тсѧ . на́вечерїе ржⷭ҇тва̀ хрⷭ҇то́ва в̾ пѧто́къ . прᲂки́менъ пᲂе́тсѧ . Кто̀ бг҃ъ ве́лїи ꙗ҆́кѡ бг҃ъ на́шъ . сᲂ стихѝ свᲂи́ми . Пи́санъ в̾ са́мыи пра́здникъ на вече́рни . дневны́и же ѡ҆ставлѧ́етсѧ .

Ѿ= бытїѧ̀ , чте́нїе .=

Въ нача́лѣ сᲂтвᲂрѝ бг҃ъ нб҃ᲂ и҆ зе́млю . землѧ́ же бѣ̀ неви́дима , и҆ неꙋкрашена̀ . и҆ тма̀ верхꙋ̀ бе́здны . и҆ д҆҆х҃ъ бж҃їи нᲂша́шесѧ верхꙋ̀ вᲂды̀ . и҆ речѐ бг҃ъ , да бꙋ́детъ свѣ́тъ , и҆ бы́сть свѣ́тъ . и҆ ви́дѣ бг҃ъ свѣ́тъ ꙗ҆́кѡ дᲂбро̀ . и҆ разлꙋчѝ бг҃ъ междꙋ̀ свѣ́тᲂмъ , и҆ междꙋ̀ тмо́ю . и҆ наречѐ бг҃ъ свѣ́тъ , де́нь , а҆ тмꙋ̀ наречѐ но́щь . и҆ бы́сть ве́черъ , и҆ бы́сть ᲂу҆́трᲂ де́нь є҆ди́нъ . и҆ речѐ бг҃ъ , да бꙋ́детъ тве́рдь пᲂсредѣ̀ вᲂды̀ , и҆ да бꙋ́детъ разлꙋча́ѧ пᲂсредѣ̀ вᲂды̀ и҆ вᲂды̀ , и҆ бы́сть та́кѡ . и҆ сᲂтвᲂрѝ бг҃ъ тве́рдь . и҆ разлꙋчѝ бг҃ъ пᲂсредѣ̀ вᲂды̀ ꙗ҆́же бѣ̀ пᲂд̾ тве́рдїю . и҆ пᲂсредѣ̀ вᲂды̀ ꙗ҆́же бѣ̀ над̾ тве́рдїю . и҆ наречѐ бг҃ъ тве́рдь нб҃ᲂ . и҆ ви́дѣ бг҃ъ ꙗ҆́кѡ дᲂбро̀ . и҆ бы́сть ве́черъ , и҆ бы́сть ᲂу҆́трᲂ , де́нь втᲂры́и . И҆ речѐ бг҃ъ , да сᲂбере́тсѧ вᲂда̀ ꙗ҆́же пᲂд̾ нб҃се́мъ в̾ со́нмъ є҆ди́нъ , и҆ да ꙗ҆ви́тсѧ сꙋ́ша , и҆ бы́сть та́кѡ . и҆ сᲂбра́сѧ вᲂда̀ ꙗ҆́же пᲂд̾ нб҃се́мъ въ со́ньмы свᲂѧ̀ , и҆ ꙗ҆ви́сѧ сꙋ́ша . и҆ наречѐ бг҃ъ сꙋ́шꙋ зе́млю , а҆ со́ньмы вᲂдны́ѧ наречѐ мо́ре . и҆ ви́дѣ бг҃ъ ꙗ҆́кѡ дᲂбро̀ . и҆ речѐ бг҃ъ , да прᲂрасти́тъ землѧ̀ травꙋ̀ сѣ́ннꙋ , сѣ́ющꙋ сѣ́мѧ по́ рᲂдꙋ и҆ пᲂ пᲂдо́бїю . и҆ дре́вᲂ плᲂдᲂви́тᲂ , твᲂрѧ́щее пло́дъ . є҆мꙋ́же сѣ́мѧ є҆гѡ̀ в̾ не́мъ по́ рᲂдꙋ на землѝ , и҆ бы́сть та́кѡ . и҆ и҆знесѐ землѧ̀ травꙋ̀ сѣ́ннꙋ , сѣ́ющꙋ сѣ́мѧ по́ рᲂдꙋ и҆ пᲂ пᲂдо́бїю . и҆ дре́вᲂ плᲂдᲂви́тᲂ твᲂрѧ́щее пло́дъ , є҆мꙋ́же сѣ́мѧ є҆гѡ̀ в̾ не́мъ по́ рᲂдꙋ на землѝ . и҆ ви́дѣ бг҃ъ ꙗ҆́кѡ дᲂбро̀ . и҆ бы́сть ве́черъ , и҆ бы́сть ᲂу҆́трᲂ де́нь тре́тїи .

Ѿ= чи́слъ , чте́нїе .=

Бы́сть дх҃ъ бж҃їи на валаа́мѣ , и҆ вᲂспрїе́мъ при́тчи свᲂѧ̀ . речѐ , ꙗ҆́кѡ дᲂбрѝ до́ми твᲂѝ і҆а́кѡве , и҆ ски́нїѧ твᲂѧ̀ і҆и҃лю . ꙗ҆́кѡ страны̀ ѡ҆сѣнѧ́ющїѧ . и҆ ꙗ҆́кѡ са́дїе при рѣка́хъ , и҆ ꙗ҆́кѡ ски́нїѧ ю҆́же вᲂдрꙋзѝ гдⷭ҇ь . и҆ ꙗ҆́кѡ ке́дри при вᲂда́хъ . и҆зы́детъ чл҃къ ѿ сѣ́мене є҆гѡ̀ , и҆ ѡ҆блада́етъ ꙗ҆зы́ки мно́гими . и҆ вᲂзвы́ситсѧ црⷭ҇твᲂ є҆гѡ̀ , и҆ вᲂз̾расте́тъ . бг҃ъ наста́витъ є҆гѡ̀ и҆з̾ є҆гѵ́пта , ꙗ҆́кѡ сла́вꙋ є҆динᲂро́га є҆гѡ̀ . пᲂѧ́стъ ꙗ҆зы́ки вра́гъ свᲂи́хъ , и҆ то́лщꙋ и҆́хъ и҆змᲂжди́тъ . и҆ стрѣла́ми свᲂи́ми ᲂу҆стрѣли́тъ врага̀ . вᲂз̾ле́гъ пᲂчѝ ꙗ҆́кѡ ле́въ , и҆ ꙗ҆́кѡ ски́менъ . кто̀ вᲂз̾ста́витъ и҆̀ ; бл҃гᲂслᲂвѧ́щїи тѧ̀ бл҃гᲂслᲂве́ни , и҆ прᲂклина́ющїи тѧ̀ , про́клѧти . вᲂсїѧ́етъ ѕвѣзда̀ ѿ і҆а́кѡва , и҆ вᲂста́нетъ чл҃къ ѿ і҆и҃лѧ . и҆ ссѣче́тъ кнѧ́зи мᲂави́тскїѧ , и҆ плѣни́тъ всѧ̀ сы́ны си́ѳѡвы . и҆ бꙋ́детъ є҆дѡ́мъ дᲂстᲂѧ́нїе , и҆ бꙋ́детъ наслѣ́дїе и҆са́въ вра́гъ є҆гѡ̀ . і҆и҃ль сᲂтвᲂрѝ крѣ́пᲂсть .

Ѿ= прᲂро́чества михе́ина , чте́нїе .=

Во́ дни ѻ҆́ны гл҃етъ гдⷭ҇ь , сᲂберꙋ̀ сᲂкрꙋше́ннꙋю , и҆ ѿринᲂве́ннꙋю прїимꙋ̀ , ю҆́же ѿри́нꙋхъ , и҆ пᲂлᲂжꙋ̀ сᲂтре́ннꙋю вᲂ ѡ҆ста́нᲂкъ , и҆ ѿринᲂве́ннꙋю в̾ ꙗ҆зы́къ крѣ́пᲂкъ , и҆ вᲂцр҃и́тсѧ гдⷭ҇ь над̾ ни́ми в̾ гᲂрѣ̀ сїѡ́нстѣй ѿ ны́нѣ и҆ во́ вѣки . И҆ ты̀ виѳлїе́мѣ до́ме є҆вфра́фᲂвъ , є҆да̀ ма́лъ є҆сѝ ты̀ ꙗ҆́кᲂже бы́ти в̾ ты́сѧщахъ і҆ꙋ́диныхъ . ѿ тебе́ бᲂ мнѣ̀ и҆зы́детъ старѣ́йшина , ꙗ҆́кѡ бы́ти в̾ кнѧ́жьствᲂ вᲂ і҆и҃ли . и҆схо́ди же є҆гѡ̀ и҆з̾ нача́ла , дне́й вѣ́чныхъ . сегѡ̀ ра́ди да́стъ ѧ҆̀ до́ времене , ражда́ющаѧ рᲂди́тъ . и҆ ѡ҆ста́вшїи бра́тїѧ и҆́хъ вᲂз̾вратѧ́тсѧ к̾ сн҃ѡ́мъ і҆и҃левымъ . и҆ ста́нетъ , и҆ ᲂу҆́зритъ , и҆ ᲂу҆пасе́тъ ста́дᲂ свᲂѐ с̾ крѣ́пᲂстїю гдⷭ҇ь . и҆ в̾ сла́вꙋ и҆́мене гдⷭ҇а бг҃а тᲂмꙋ̀ бꙋ́дꙋтъ , занѐ ны́нѣ вᲂз̾вели́читсѧ да́же дᲂ кᲂне́цъ землѝ .

та́же , вᲂзгласи́тъ чте́цъ : гла́съ , ѕ҃ . Та́йнѡ рᲂди́лсѧ є҆сѝ в̾ верте́пѣ , нᲂ нб҃ᲂ тѧ всѣ́мъ прᲂпᲂвѣ́да . ꙗ҆́кᲂже ᲂу҆ста̀ ѕвѣздꙋ̀ пред̾лага́ѧ сп҃се . И҆ вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

и҆ пᲂе́мъ : И вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

сти́хъ , а҃ . Ѻ҆снᲂва́нїѧ є҆гѡ̀ на гᲂра́хъ ст҃ы́хъ . лю́битъ гдⷭ҇ь врата̀ сїѡ́нѧ па́че всѣ́хъ селе́нїи і҆а́кѡвлихъ . пресла́внаѧ глаго́лана бы́ша ѡ҆ тебѣ̀ гра́де бж҃їи . пᲂмѧнꙋ̀ раа́въ и҆ вавѷлѡ́на , свѣ́дꙋщихъ мѧ . и҆ пᲂе́мъ : И҆ вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

сти́хъ , в҃ . И҆ сѐ и҆нᲂплеме́нницы , и҆ ти́ръ , и҆ лю́дїе є҆ѳїѡ́пстїи , сі́и бы́ша тꙋ̀ , мт҃и сїѡ́нъ , рече́тъ чл҃къ . и҆ чл҃къ рᲂди́сѧ в̾ не́мъ . и҆ то́й ѡ҆снᲂва̀ и҆̀ вы́шнїи . и҆ пᲂе́мъ : И вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

сти́хъ , г҃ . Гдⷭ҇ь пᲂвѣ́сть въ кни́гахъ лю́демъ , и҆ кнѧзе́мъ си́мъ бы́вшимъ въ не́мъ . ꙗ҆́кѡ веселѧ́щимсѧ всѣ́мъ жили́ще в̾ тебѣ̀ . и҆ пᲂе́мъ : И вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

сла́ва . и҆ пᲂе́мъ : И вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

и҆ ны́нѣ . и҆ пᲂе́мъ : И вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ .

пᲂсе́мъ , гл҃етъ чте́цъ : Та́йнѡ рᲂди́лсѧ є҆сѝ в̾ верте́пѣ , нᲂ нб҃ᲂ тѧ всѣ́мъ прᲂпᲂвѣ́да . ꙗ҆́кᲂже ᲂу҆ста̀ ѕвѣздꙋ̀ пред̾лага́ѧ сп҃се . и҆ пᲂе́тъ са́мъ : И҆ вᲂлхвы́ ти приведѐ вѣ́рᲂю пᲂкланѧ́ющїѧтисѧ , с̾ ни́миже пᲂми́лꙋй на́съ . и҆ чтꙋ́тсѧ па́ки пᲂ ѡ҆бы́чаю чте́нїѧ сїѧ̀ .

Ѿ= прᲂро́чества и҆са́ина , чте́нїе .=

Та́кѡ гл҃етъ гдⷭ҇ь , и҆зы́детъ же́злъ ѿ ко́рене і҆єссе́ѡва , и҆ цвѣ́тъ ѿ негѡ̀ взы́детъ . и҆ пᲂчі́етъ на не́мъ дх҃ъ бж҃їи . дх҃ъ премꙋ́дрᲂсти и҆ ра́зꙋма . дх҃ъ сᲂвѣ́та , и҆ крѣ́пᲂсти . дх҃ъ вѣ́дѣнїѧ и҆ бл҃гᲂче́стїѧ . дх҃ъ стра́ха бж҃їѧ и҆спо́лнитъ є҆гѡ̀ . не пᲂ сла́вѣ сꙋ́дитъ , ни пᲂ глаго́ланїю ѡ҆бличи́тъ . нᲂ ѡ҆сꙋ́дитъ пра́вдᲂю смире́ныхъ сꙋ́дъ , и҆ ѡ҆бличи́тъ пра́вᲂстїю сла́вныѧ землѝ . и҆ пᲂрази́тъ зе́млю сло́вᲂмъ ᲂу҆́стъ свᲂи́хъ . и҆ дх҃ᲂмъ ᲂу҆сте́нъ ᲂу҆бїе́тъ нечести́вагᲂ . и҆ бꙋ́детъ пра́вдᲂю препᲂѧ́санъ в̾ чре́сла свᲂѧ̀ , и҆ и҆́стинᲂю ѻ҆бви́тъ в̾ ре́бра свᲂѧ̀ . Тᲂгда̀ пᲂжирꙋ́етъ во́лкъ сᲂ а҆́гньцемъ , и҆ ры́сь пᲂчі́етъ съ ко́злищемъ . и҆ теле́цъ и҆ ле́въ и҆ ю҆не́цъ , вкꙋ́пѣ пᲂжирꙋ́ютъ . и҆ ѻ҆трᲂча̀ ма́лᲂ пᲂведе́тъ и҆́хъ . теле́цъ и҆ ле́въ вкꙋ́пѣ пасꙋ́тсѧ , и҆ вкꙋ́пѣ ча́да и҆́хъ бꙋ́дꙋтъ . и҆ ле́въ ꙗ҆́кѡ во́лъ снѣ́сть пле́вы . и҆ ѻ҆трᲂча̀ мла́дᲂ на пеще́рꙋ а҆́спидскꙋ , и҆ на ло́же пле́мене а҆́спидска рꙋ́кꙋ вᲂз̾лᲂжи́тъ , и҆ несᲂтвᲂрѧ́тъ ѕла̀ , нижѐ и҆́мꙋтъ мᲂщѝ пᲂгꙋби́ти ни є҆ди́нᲂгᲂ же на гᲂрѣ̀ ст҃ѣ́й мᲂе́й . зане́же напо́лнисѧ всѧ̀ землѧ̀ пᲂзна́ти гдⷭ҇а . ꙗ҆́кѡ вᲂдѣ̀ мно́зѣ пᲂкры́ти мᲂрѧ̀ . и҆ бꙋ́детъ в̾ де́нь ѻ҆́нъ ко́рень і҆єссе́ѡвъ , вᲂста́ѧи владѣ́ти ꙗ҆зы́ки . на́нь ꙗ҆зы́цы ᲂу҆пᲂва́ютъ , и҆ бꙋ́детъ пᲂко́й є҆гѡ̀ че́сть .

Ѿ= прᲂро́чества і҆єремі́ина , чте́нїе .=

Сѐ бг҃ъ на́шъ , и҆ неприлᲂжи́тсѧ и҆́нъ к̾ немꙋ̀ . и҆зъѡ҆брѣ́те всѧ́къ пꙋ́ть хꙋдо́жества , и҆ да́стъ и҆̀ і҆а́кѡвꙋ ѻ҆́трᲂкꙋ свᲂемꙋ̀ , и҆ і҆и҃лю вᲂзлю́бленнᲂмꙋ ѿ негѡ̀ . пᲂсе́мъ на землѝ ꙗ҆ви́сѧ , и҆ съ чл҃ки пᲂживѐ . Сїѧ̀ кни́га пᲂвелѣ́нїѧ бж҃їѧ , и҆ зако́нъ се́й быва́ѧи во́ вѣки . всѝ держа́щїисѧ є҆ѧ̀ в̾ живо́тъ , а҆ ѡ҆ста́вльшїисѧ є҆ѧ̀ ᲂу҆́мрꙋтъ . ѡ҆брати́сѧ і҆а́кѡве , и҆ и҆ми́сѧ є҆ѧ̀ . хᲂдѝ прᲂти́вꙋ сїѧ́нїю свѣ́та є҆ѧ̀ . не да́ждь и҆но́мꙋ сла́вы свᲂеѧ̀ , и҆ пᲂле́зныхъ тебѣ̀ ꙗ҆зы́кꙋ чꙋже́мꙋ . бл҃же́ни є҆смы̀ і҆зра́илю , ꙗ҆́кѡ ᲂу҆го́днаѧ бг҃ᲂви , на́мъ разꙋ́мна сꙋ́ть .

Ѿ= прᲂро́чества данїи́лᲂва , чте́нїе .=

Речѐ данїи́лъ навꙋхᲂдᲂнᲂсо́рꙋ , ты̀ цр҃ю ви́дѧше , и҆ сѐ тѣ́лᲂ є҆ди́нᲂ , ве́лїе тѣ́лᲂ то̀ , и҆ ѡ҆бли́чїе є҆гѡ̀ ѡ҆крꙋ́глᲂ , стᲂѧ̀ пред̾ лице́мъ твᲂи́мъ , и҆ видѣ́нїе є҆гѡ̀ стра́шнᲂ . тѣ́лᲂ , є҆мꙋ́же глава̀ ѿ зла́та чи́ста . рꙋ́цѣ и҆ пе́рси и҆ мы́шцы є҆гѡ̀ сре́брѧнѣ , чре́вᲂ и҆ сте́гнѣ мѣ́дѧнѣ . го́ленѣ желѣ́знѣ . и҆ ча́сть нѣ́каѧ скꙋде́льна . ви́дѧше , до́ндеже ѿто́ржесѧ ка́мень ѿ гᲂры̀ без̾ рꙋкꙋ̀ . и҆ пᲂразѝ тѣ́лᲂ , на нᲂгꙋ̀ желѣ́знꙋю и҆ скꙋде́льнꙋю , и҆ и҆стнѝ и҆̀ дᲂ кᲂнца̀ . тᲂгда̀ и҆стни́шасѧ вᲂ є҆ди́нᲂ , скꙋде́ль желѣ́зᲂ мѣ́дь сребро̀ и҆ зла́тᲂ ; и҆ бы́сть ꙗ҆́кѡ пра́хъ ѿ гꙋмна̀ жа́твенагѡ . и҆ взѧ́тъ и҆̀ мно́жествᲂ дᲂхнᲂве́нїѧ , и҆ мѣ́стᲂ не ѡ҆брѣ́тесѧ и҆́мъ . ка́мень же пᲂрази́выи ѻ҆́бразъ , бы́сть в̾ го́рꙋ ве́лїю , и҆ и҆спо́лни всю̀ зе́млю . сѐ є҆́сть со́нїе , и҆ сказа́нїе є҆гѡ̀ речѐ пред̾ царе́мъ ; вᲂста́витъ бг҃ъ нбⷭ҇ныи црⷭ҇твᲂ , є҆́же во́ вѣки не и҆стлѣ́етъ , и҆ црⷭ҇твᲂ є҆гѡ̀ лю́демъ и҆нѣ́мъ не ѡ҆ста́витсѧ . и҆ и҆стни́тъ и҆ и҆змᲂжди́тъ всѧ̀ црⷭ҇твїѧ . и҆ то̀ вᲂста́нетъ во́ вѣки , и҆́мже ѻ҆́бразᲂмъ ви́дѣлъ є҆сѝ . ꙗ҆́кѡ ѿ гᲂры̀ ѿсѣче́сѧ ка́мень без̾ рꙋ́къ , и҆ сᲂтры̀ скꙋде́ль желѣ́зᲂ мѣ́дь сребро̀ и҆ зла́тᲂ . бг҃ъ вели́кїи сказа̀ цр҃е́ви , ꙗ҆́же пᲂдᲂба́етъ бы́ти пᲂ си́хъ . и҆́стиннᲂ со́нїе и҆ вѣ́рнᲂ сказа́нїе є҆гѡ̀ .

та́же , вᲂзгласи́тъ чте́цъ : гла́съ , ѕ҃ . Вᲂсїѧ́лъ є҆сѝ хрⷭ҇тѐ ѿ дв҃ы , разꙋ́мнᲂе сл҃нце пра́вды . и҆ ѕвѣзда́ тѧ пᲂказа̀ в̾ верте́пѣ вмѣща́ющасѧ , невмѣсти́магᲂ . Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ .

и҆ пᲂе́мъ : Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ .

сти́хъ , а҃ . Гдⷭ҇ь вᲂцр҃и́сѧ , в̾ лѣ́пᲂтꙋ ѡ҆блечѐ . ѡ҆блече́сѧ гдⷭ҇ь в̾ си́лꙋ , и҆ препᲂѧ́сасѧ . и҆́бᲂ ᲂу҆твердѝ вселе́ннꙋю , ꙗ҆́же не пᲂдви́житсѧ . гᲂто́въ престо́лъ тво́й ѿ то́лѣ . ѿ́ вѣка ты̀ є҆сѝ . и҆ пᲂе́мъ : Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ .

сти́хъ , в҃ . Вᲂз̾двиго́ша рѣ́ки гдⷭ҇и , вᲂз̾двиго́ша рѣ́ки гла́съ сво́й . во́змꙋтъ рѣ́ки стрꙋѝ свᲂѧ̀ , ѿ́ гласа во́дъ мно́гъ .= и҆ пᲂе́мъ : В=ᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ .

сти́хъ , г҃ . Ди́вны высᲂты̀ мᲂрскі́ѧ , ди́венъ въ высо́кихъ гдⷭ҇ь , свидѣ́нїѧ твᲂѧ̀ ᲂу҆вѣ́ришасѧ ѕѣлѡ̀ . до́мꙋ твᲂемꙋ̀ пᲂдᲂба́етъ ст҃ы́ни гдⷭ҇и в̾ дᲂлгᲂтꙋ̀ дні́й . и҆ пᲂе́мъ : Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́ем̾ , жизнᲂда́вче сла́ва тебѣ̀ .

сла́ва . и҆ пᲂе́мъ : Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ .

и҆ ны́нѣ . и҆ пᲂе́мъ : Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ .

пᲂсе́мъ , гл҃етъ чте́цъ : Вᲂсїѧ́лъ є҆сѝ хрⷭ҇тѐ ѿ дв҃ы , разꙋ́мнᲂе сл҃нце пра́вды . и҆ ѕвѣзда́ тѧ пᲂказа̀ в̾ верте́пѣ вмѣща́ющасѧ , невмѣсти́магᲂ . и҆ пᲂе́тъ са́мъ : Вᲂлхвы̀ наста́вилъ є҆сѝ на пᲂклᲂне́нїе твᲂѐ , с̾ ни́миже тебѣ̀ велича́емъ , жизнᲂда́вче сла́ва тебѣ̀ . и҆ чтꙋ́тсѧ па́ки чте́нїѧ сїѧ̀ .

Ѿ= прᲂро́чества и҆са́ина , чте́нїе .=

Ѻ҆трᲂча̀ рᲂди́сѧ на́мъ , и҆ сн҃ъ да́стсѧ на́мъ . є҆мꙋ́же вла́сть бы́сть на ра́мѣ є҆гѡ̀ . и҆ ми́рᲂви є҆гѡ̀ нѣ́сть предѣ́ла . и҆ нарица́етсѧ и҆́мѧ є҆гѡ̀ вели́ка сᲂвѣ́та а҆́нг҃лъ . чꙋ́денъ сᲂвѣ́тникъ . бг҃ъ крѣ́пᲂкъ , властели́нъ , кн҃зь смире́нїѧ , ѻ҆ц҃ъ бꙋ́дꙋщагѡ вѣ́ка . привлекꙋ́ бᲂ ми́ръ на́ кн҃зи , и҆ смире́нїе и҆ здра́вїе и҆́хъ . ве́лїѧ вла́сть є҆гѡ̀ . и҆ ми́рᲂви є҆гѡ̀ нѣ́сть предѣ́ла . на престо́лѣ дв҃дᲂвѣ и҆ на црⷭ҇твѣ є҆гѡ̀ сѧ́детъ , и҆спра́вити є҆̀ , и҆ застꙋпи́ти є҆̀ сꙋдьбо́ю и҆ пра́вдᲂю , ѿ ны́нѣ и҆ до́ вѣка . рве́нїе гдⷭ҇а саваѡ́ѳа сᲂтвᲂри́тъ сїѧ̀ .

Ѿ= прᲂро́чества и҆са́ина , чте́нїе .=

Прилᲂжѝ гдⷭ҇ь глаго́лати кᲂ а҆ха́зꙋ , глаго́лѧ , прᲂсѝ себѣ̀ зна́менїѧ ѿ гдⷭ҇а бг҃а твᲂегѡ̀ , вᲂ глꙋбинꙋ̀ , и҆лѝ въ высᲂтꙋ̀ . и҆ речѐ а҆ха́зъ , не и҆́мамъ прᲂси́ти , нижѐ и҆скꙋси́ти гдⷭ҇а . и҆ речѐ и҆са́їѧ , слы́ши ᲂу҆́бѡ до́ме дв҃дᲂвъ , є҆да̀ ма́лъ ва́мъ трꙋ́дъ даѧ́ти челᲂвѣ́кѡмъ , и҆ ка́кѡ гдⷭ҇ви даетѐ трꙋ́дъ . сегѡ̀ ра́ди да́стсѧ ва́мъ зна́менїе , сѐ дв҃аѧ во́ чревѣ прїи́метъ , и҆ рᲂди́тъ сн҃а , и҆ нарекꙋ́тъ и҆́мѧ є҆мꙋ̀ , є҆мманꙋ́илъ . ма́слᲂ и҆ ме́дъ и҆́мать снѣ́сти . пре́жде да́же ᲂу҆вѣ́дѣти є҆мꙋ̀ , и҆лѝ и҆зво́лити ѕло̀ , и҆збере́тъ до́брᲂе . занѐ пре́жде да́же неразꙋмѣ́ти ѻ҆трᲂча́ти дᲂбра̀ и҆лѝ ѕла̀ , ѿри́нетъ ѕла́ѧ , и҆ и҆збере́тъ до́брᲂе . И҆ речѐ гдⷭ҇ь кᲂ мнѣ̀ , прїимѝ себѣ̀ сви́тᲂкъ но́въ вели́къ , и҆ напишѝ в̾ не́мъ писа́лᲂмъ чл҃ческимъ , є҆́же ско́рѡ плѣне́нїе сᲂтвᲂри́ти кᲂры́стемъ , настᲂѧ́тъ бᲂ . и҆ свидѣ́телѧ мѝ сᲂтвᲂрѝ вѣ́рны челᲂвѣ́ки , ᲂу҆рі́ю сщ҃е́нника , и҆ заха́рїю сн҃а варахі́ина . и҆ пристꙋпи́хъ кᲂ прᲂро́чицѣ , и҆ во́ чревѣ прїѧ́тъ , и҆ рᲂдѝ сн҃а . и҆ речѐ мнѣ̀ гдⷭ҇ь , на рцы̀ и҆́мѧ є҆мꙋ̀ ско́рѡ плѣнѝ напра́снѡ и҆спрᲂве́рзи . занѐ пре́жде да́же неразꙋмѣ́ти ѻ҆трᲂча́ти прᲂзва́ти ѻ҆ц҃а и҆лѝ мт҃рь , прїи́метъ си́лꙋ дама́скᲂвꙋ , и҆ кᲂры́сти самарі́йскїѧ . прѧ́мѡ цр҃ю а҆сѷрі́йскᲂмꙋ . Сна́ми бг҃ъ , разꙋмѣ́йте ꙗ҆зы́цы и҆ пᲂкарѧ́йтесѧ . ᲂу҆слы́шите да́же дᲂ пᲂслѣ́днихъ землѝ . мᲂгꙋ́щїи пᲂкарѧ́йтесѧ . а҆́ще бᲂ па́ки вᲂзмо́жете , и҆ па́ки пᲂбѣжде́ни бꙋ́дете . и҆ и҆́же сᲂвѣ́тъ а҆́ще сᲂвѣща́ете , разᲂри́тъ и҆̀ гдⷭ҇ь . сло́вᲂ є҆́же а҆́ще вᲂз̾глаго́лете , не и҆́мать пребыва́ти в̾ ва́съ , ꙗ҆́кѡ с̾ на́ми бг҃ъ .

є҆ктенїѧ̀ ма́лаѧ . и҆ =вᲂз̾гла́съ , трист҃о́мꙋ : Ꙗ҆́кѡ ст҃ъ є҆сѝ гдⷭ҇и бж҃е на́шъ . =и҆ пᲂе́мъ : трист҃о́е . прᲂки́менъ , ѱл҃о́мъ дв҃дᲂвъ . Гдⷭ҇ь речѐ кᲂ мнѣ̀ , сн҃ъ мо́й є҆сѝ ты̀ , а҆́зъ дне́сь рᲂди́хъ тѧ̀ . сти́хъ . прᲂсѝ ѿ менѐ , и҆ да́мъ тѝ ꙗ҆зы́ки , дᲂстᲂѧ́нїе твᲂѐ , и҆ ѡ҆держа́нїе твᲂѐ кᲂнцы̀ землѝ . а҆пⷭ҇лъ , къ є҆вре́ѡмъ . зача́лᲂ , т҃г .= а҆ллилꙋ́їѧ . Речѐ гдⷭ҇ь гдⷭ҇ви мᲂемꙋ̀ , сѣдѝ ѡ҆деснꙋ́ю менѐ , до́ндеже пᲂлᲂжꙋ̀ врагѝ твᲂѧ̀ пᲂд̾но́жїе нᲂга́ма твᲂи́ма . =сти́хъ . же́злъ си́лы по́слетъ тѝ гдⷭ҇ь ѿ сїѡ́на , и҆ ѡ҆дᲂлѣ́еши пᲂсредѣ̀ вра́гъ твᲂи́хъ . сти́хъ . и҆́з̾ чрева пре́же денни́цы рᲂди́хъ тѧ̀ , клѧ́тсѧ гдⷭ҇ь и҆ нераска́етсѧ . є҆ѵⷢ҇а́лїе , ѿ лꙋкѝ . зача́лᲂ , є҃ .= а҆= дню̀ рѧ́дъ , прᲂки́менъ , и҆ а҆пⷭ҇лъ , и҆ є҆ѵⷢ҇а́лїе , въ на́вечерїи , ржⷭ҇тва̀ хрⷭ҇то́ва , и҆ бг҃ᲂѧвле́нїѧ не чте́тсѧ . и҆ по́ рѧдꙋ бжⷭ҇твенаѧ литꙋргі́ѧ вели́кагѡ васи́лїѧ . Вмѣ́стѡ дᲂсто́йна пᲂе́мъ : Ѡ҆ тебѣ̀ ра́дꙋетсѧ . прича́стенъ , хвали́те гдⷭ҇а с̾ нб҃съ . А҆́ще ли не прилꙋчи́тсѧ бы́ти литꙋргі́и , то̀ пᲂ скᲂнча́нїи чте́нїѧ паремі́й , трист҃о́е не пᲂе́мъ . нᲂ пᲂ є҆ктенїѝ , прᲂки́менъ , и҆ а҆пⷭ҇лъ , а҆ллилꙋ́їѧ , и҆ є҆ѵⷢ҇а́лїе , ꙗ҆́кᲂже вы́ше ᲂу҆каза́сѧ . Пᲂ є҆ѵⷢ҇а́лїи , є҆ктенїѧ̀ : рце́мъ всѝ . та́же , Спᲂдо́би гдⷭ҇и . и҆ є҆ктенїѧ̀ : и҆спо́лнимъ вече́рнѧѧ мᲂли́твы . пᲂсе́мъ : Честнѣ́йшꙋю херꙋви́мъ . сла́ва , и҆ нн҃ѣ , гдⷭ҇и пᲂми́лꙋй , вⷤ . гдⷭ҇и бл҃гᲂслᲂвѝ . и҆ ѿпꙋ́стъ , пра́здникꙋ . и҆ пᲂ ѿпꙋ́стѣ , вжига́етъ параеклисїа́рхъ свѣ́щникъ , и҆ пᲂставлѧ́етъ средѝ цр҃кве . кли́рицы же ста́вше ѻ҆́ба ли́ка вкꙋ́пѣ . и҆ гл҃етъ дᲂмести́къ пра́вагѡ ли́ка , є҆го́же бꙋ́детъ де́нь , трᲂпа́рь пра́здникꙋ . кᲂне́цъ же , трᲂпарѧ̀ , пᲂю́тъ по́ гласꙋ . та́же , лѣ́выи ли́къ глаго́летъ . сла́ва , и҆ ны́нѣ , кᲂнда́къ пра́здникꙋ . а҆ кᲂне́цъ кᲂндака̀ пᲂю́тъ по́ гласꙋ . пра́выи же ли́къ вᲂсхо́дитъ на кры́лᲂсъ , и҆ пᲂю́тъ мнᲂгᲂлѣ́тїе . И҆ и҆схо́димъ в̾ трапе́зꙋ , и҆ ꙗ҆ди́мъ штѝ со́чаны , и҆ кꙋтью̀ . ры́бы же не ꙗ҆ди́мъ . А҆́ще ли на́вечерїе ржⷭ҇тва̀ хрⷭ҇то́ва , в̾ сꙋбо́тꙋ , и҆лѝ в̾ недѣ́лю . пᲂ скᲂнча́нїи чте́нїѧ паремі́й , трист҃о́е не пᲂе́мъ . нᲂ пᲂ є҆ктенїѝ прᲂки́менъ , и҆ а҆ллилꙋ́їѧ , тѣ́же стихѝ .= а҆пⷭ҇лъ , къ гала́тѡмъ . зача́лᲂ , с҃з . =є҆ѵⷢ҇а́лїе , ѿ матѳе́ѧ . зача́лᲂ , н҃г . Пᲂ є҆ѵⷢ҇а́лїи , є҆ктенїѧ̀ : рце́мъ всѝ ѿ всеѧ̀ дш҃и . та́же , Спᲂдо́би гдⷭ҇и . и҆ є҆ктенїѧ̀ : и҆спо́лнимъ вече́рнѧѧ , и҆ про́чее всѐ по́ рѧдꙋ . и҆ ѿпꙋ́стъ .

Вѣ́дати пᲂдᲂба́етъ , Ꙗ҆́кѡ пра́здникъ ржⷭ҇тва̀ хрⷭ҇то́ва въ кі́и де́нь ни прилꙋчи́тсѧ , пᲂе́тсѧ в̾ на́вечерїи неѳимо́нъ вели́кїи си́це :

Въ но́щи въ пᲂдо́бнᲂ вре́мѧ быва́етъ бла́гᲂвѣстъ . и҆ пᲂто́мъ , трезво́нъ вᲂ всѧ̀ ко́лᲂкᲂлы . і҆єре́й же съ дїа́кᲂнᲂмъ ѡ҆бо́лксѧ твᲂрѧ́тъ нача́лᲂ , ꙗ҆́кᲂже вᲂ всѧ̀ недѣ́ли . Дїа́кᲂнъ рече́тъ : бл҃гᲂслᲂвѝ влⷣкᲂ . І҆єре́й : бл҃гᲂслᲂве́нъ бг҃ъ на́шъ . и҆ кадѧ́щꙋ і҆єре́ю . глаго́лемъ неѳимо́нъ вели́кїи , ѿ нача́ла . цр҃ю нбⷭ҇ныи . трист҃о́е , и҆ про́чее . с̾ на́ми бг҃ъ . пᲂе́мъ пѣ́нїемъ . Вмѣ́стѡ трᲂпаре́й ѡ҆бы́чныхъ , глаго́лемъ трᲂпа́рь пра́здникꙋ . вмѣ́стѡ , пᲂми́лꙋй на́съ гдⷭ҇и пᲂми́лꙋй на́съ , глаго́лемъ , кᲂнда́къ пра́здникꙋ . На сла́ва в̾ вы́шнихъ , и҆гꙋ́менъ ѡ҆блачи́тсѧ сᲂ всѣ́ми і҆єре́и , и҆ дїа́кᲂны . и҆ пᲂ спᲂдо́би гдⷭ҇и в̾ ве́черъ се́й , пᲂе́мъ :

На литі́и , стихѣ́ры . гла́съ , а҃ .

Нб҃ᲂ и҆ землѧ̀ дне́сь , прⷪ҇рчески да вᲂзвеселѧ́тсѧ . а҆́нг҃ли и҆ чл҃цы , дх҃о́внѡ да тᲂржествꙋ́ютъ , ꙗ҆́кѡ бг҃ъ пло́тїю ꙗ҆ви́сѧ , сꙋ́щимъ вᲂ тмѣ̀ и҆ сѣ́ни сѣдѧ́щимъ , рᲂжде́исѧ ѿ дв҃ы . верте́пъ и҆ ꙗ҆́сли прїѧ́ша тᲂгѡ̀ . па́стырїе чꙋ́дᲂ прᲂпᲂвѣ́даютъ . вᲂлсвѝ ѿ вᲂсто́къ в̾ виѳлїе́мъ да́ры прино́сѧтъ . мы́ же хвалꙋ̀ недᲂсто́йными ᲂу҆стна́ми , а҆́нг҃льски тᲂмꙋ̀ принесе́мъ . сла́ва в̾ вы́шнихъ бг҃ꙋ , и҆ на землѝ ми́ръ . прїи́де бᲂ ча́ѧнїе ꙗ҆зы́кѡмъ , прїи́де и҆ спасѐ на́съ ѿ рабо́ты вра́жїѧ . Нб҃ᲂ и҆ землѧ̀ дне́сь сᲂвᲂкꙋпи́сѧ , ро́ждьшꙋсѧ хрⷭ҇тꙋ̀ . дне́сь бг҃ъ на́ землю прїи́де , и҆ чл҃къ на нб҃са̀ взы́де . дне́сь ви́димъ є҆́сть пло́тїю , и҆́же є҆стество́мъ неви́димыи , чл҃ка ра́ди . сегѡ̀ ра́ди и҆ мы̀ славᲂсло́вѧще вᲂзᲂпїе́мъ є҆мꙋ̀ , сла́ва в̾ вы́шнихъ бг҃ꙋ , и҆ на землѝ ми́ръ . дарᲂва́ бᲂ прише́ствїе твᲂѐ , сп҃се на́шъ сла́ва тебѣ̀ . Сла́ва въ вы́шнихъ бг҃ꙋ , в̾ виѳлїе́мѣ слы́шꙋ ѿ беспло́тныхъ дне́сь , и҆́же на землѝ ми́ръ бл҃гᲂвᲂли́вшемꙋ ти бы́ти . ны́нѣ дв҃аѧ нб҃съ ши́рши , вᲂсїѧ́ бᲂ свѣ́тъ ѡ҆мраче́нымъ . и҆ смире́ныѧ вᲂзнесѐ , и҆́же а҆́нг҃льски пᲂю́ща , сла́ва в̾ вы́шнихъ бг҃ꙋ . И҆́же пᲂ ѻ҆́бразꙋ и҆ пᲂ пᲂдо́бїю и҆стлѣ́вша престꙋпле́нїемъ , ви́дѣвъ і҆с҃ъ , преклᲂни́въ нб҃са̀ сни́де . и҆ всели́сѧ вᲂ ᲂу҆тро́бꙋ дв҃чꙋ неи҆змѣ́ннѡ , да в̾ не́й и҆стлѣ́вшагᲂ а҆да́ма ѡ҆бнᲂви́тъ , зᲂвꙋ́ща , сла́ва ꙗ҆вле́нїю твᲂемꙋ̀ и҆зба́вителю мо́й бж҃е .

сла́ва . гла́съ , є҃ . Вᲂлсвѝ перси́дстїи цр҃їе , пᲂзна́вше ꙗ҆́вѣ , и҆́же на землѝ ро́ждьшагᲂсѧ цр҃ѧ нбⷭ҇нагᲂ , ѿ свѣ́тлыѧ ѕвѣзды̀ вᲂди́ми , дᲂстиго́ша в̾ виѳлїе́мъ , да́ры нᲂсѧ́ще и҆збра́нныѧ , зла́тᲂ и҆ лива́нъ и҆ смѵ́рнꙋ . и҆ па́дше пᲂклᲂни́шасѧ , ви́дѣша бᲂ в̾ верте́пѣ , млⷣнца лежа́ща без̾лѣ́тнагѡ . и҆ ны́нѣ . гла́съ , ѕ҃ . Ликꙋ́ютъ а҆́нг҃ли всѝ на́ нб҃си , и҆ ра́дꙋютсѧ дне́сь . и҆гра́етъ же всѧ̀ тва́рь , ро́ждьшагᲂсѧ ра́ди в̾ виѳлїе́мѣ сп҃са и҆ гдⷭ҇а . ꙗ҆́кѡ всѧ́каѧ ле́сть и҆́дᲂльскаѧ преста̀ , и҆ црⷭ҇твꙋетъ хрⷭ҇то́съ во́ вѣки .

На стихо́внѣ , стихѣ́ры . гла́съ , в҃ . Ве́лїе и҆ пресла́внᲂе чꙋ́дᲂ сᲂверши́сѧ дне́сь . дв҃аѧ ражда́етъ , и҆ ᲂу҆тро́ба не и҆стлѣва́етъ . сло́вᲂ вᲂплᲂща́етсѧ , и҆ ѿ ѻ҆ц҃а не ѿлꙋча́етсѧ . а҆́нг҃ли с̾ па́стыри сла́вѧтъ , и҆ мы̀ с̾ ни́ми вᲂпїе́мъ , сла́ва въ вы́шнихъ бг҃ꙋ , и҆ на землѝ ми́ръ .

сти́хъ : гла́съ , и҃ . и҆́з̾ чрева пре́жде денни́цы рᲂди́хъ тѧ ,꙳ клѧ́тсѧ гдⷭ҇ь и҆ нераска́етсѧ . Дне́сь ражда́етъ дв҃аѧ , твᲂрца̀ всѣ́хъ . є҆де́мъ прино́ситъ верте́пъ , и҆ ѕвѣзда̀ пᲂказꙋ́етъ хрⷭ҇та̀ сл҃нца сꙋ́щимъ вᲂ тмѣ̀ . с̾ да́ры вᲂлсвѝ пᲂклᲂни́шасѧ , вѣ́рᲂю прᲂсвѣща́еми . и҆ па́стырїе ви́дѣша чꙋ́дᲂ , а҆́нг҃лѡмъ вᲂспѣва́ющимъ и҆ глаго́лющимъ , сла́ва в̾ вы́шнихъ бг҃ꙋ .

сти́хъ : гла́съ , в҃ . речѐ гдⷭ҇ь гдⷭ҇ви мᲂемꙋ̀ ,꙳ сѣдѝ ѡ҆деснꙋ́ю менѐ . Гдⷭ҇ꙋ і҆с҃ꙋ ро́ждьшꙋсѧ в̾ виѳлїе́мѣ і҆ꙋде́йстѣмъ , ѿ вᲂсто́ка прише́дше вᲂлсвѝ , пᲂклᲂни́шасѧ бг҃ꙋ вᲂчл҃чьшꙋсѧ . и҆ сᲂкро́вища свᲂѧ̀ ᲂу҆се́рднѡ ѿве́рзше , да́ры честны́ѧ принᲂша́хꙋ . и҆скꙋше́нᲂ зла́тᲂ , ꙗ҆́кѡ цр҃ю вѣко́мъ . и҆ лива́нъ , ꙗ҆́кѡ бг҃ꙋ всѣ́хъ . ꙗ҆́кѡ тридне́внᲂмꙋ же мертвецꙋ̀ смѵ́рнꙋ , без̾сме́ртнᲂмꙋ . всѝ ꙗ҆зы́цы прїиди́те пᲂклᲂни́мсѧ ро́ждьшемꙋсѧ , спастѝ дш҃а на́ша .

сла́ва . гла́съ , д҃ . Весели́сѧ і҆єрⷭ҇ли́ме , тᲂржествꙋ́йте всѝ лю́бѧщїи сїѡ́на . дне́сь вре́менныи разрѣши́сѧ сᲂꙋ́зъ ѡ҆сꙋжде́нїѧ а҆да́мᲂва . ра́й на́мъ ѿве́рзесѧ . ѕмі́й ᲂу҆праздни́сѧ . ю҆́же бᲂ прельстѝ пе́рвѣе , ны́нѣ ᲂу҆зрѣ̀ сᲂдѣ́телевꙋ бы́вшꙋю мт҃рь . Ѽ глꙋбина̀ бᲂга́тьства премꙋ́дрᲂсти , и҆ ра́зꙋма бж҃їѧ . ꙗ҆́же и҆схᲂда́таивши сме́рть все́й пло́ти , грѣхо́вныи сᲂсꙋ́дъ , спасе́нїѧ нача́лᲂ бы́сть ми́рꙋ всемꙋ̀ , бцⷣы ра́ди . младе́нецъ бᲂ ражда́етсѧ и҆з̾ неѧ̀ , всесᲂверше́нныи бг҃ъ , и҆ ржⷭ҇тво́мъ дв҃ьствᲂ запечатлѣва́етъ . плени́цы грѣхо́вныѧ разрѣшѝ пелена́ми , и҆ младе́нства ра́ди є҆́ввины ᲂу҆врачꙋ́етъ и҆́же в̾ печа́лѣхъ бᲂлѣ́зни . да ликᲂвствꙋ́етъ ᲂу҆́бѡ всѧ̀ тва́рь , и҆ да и҆гра́етъ , ѡ҆бнᲂви́ти бᲂ є҆ѧ̀ прїи́де хрⷭ҇то́съ , и҆ спастѝ дш҃а на́ша . и҆ ны́нѣ . гла́съ , то́йже . Въ верте́пъ всели́лсѧ є҆сѝ хрⷭ҇тѐ бж҃е , и҆ ꙗ҆́сли тѧ̀ вᲂспрїѧ́ша . па́стырїе же и҆ вᲂлсвѝ пᲂклᲂни́шасѧ . тᲂгда̀ ᲂу҆́бѡ прⷪ҇рческїѧ и҆спо́лнишасѧ про́пᲂвѣди . и҆ а҆́нг҃льскїѧ си́лы дивлѧ́хꙋсѧ , вᲂпїю́ще и҆ глаго́люще , сла́ва схᲂжде́нїю твᲂемꙋ̀ , є҆ди́не чл҃кᲂлю́бче .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Ржⷭ҇тво̀ твᲂѐ хрⷭ҇тѐ бж҃е на́шъ , вᲂсїѧ̀ ми́рᲂви свѣ́тъ разꙋ́мныи . в̾ не́мъ бᲂ и҆́же ѕвѣзда́мъ слꙋжа́щїи , ѕвѣздо́ю пᲂꙋча́хꙋсѧ . тебѣ̀ кла́нѧтисѧ сл҃нцꙋ пра́веднᲂмꙋ . и҆ тебѣ̀ вѣ́дѣти свы́ше вᲂсто́къ , гдⷭ҇и сла́ва тебѣ̀ . гⷤ .

та́же , Бꙋ́ди и҆́мѧ гдⷭ҇не бл҃гᲂслᲂве́нᲂ ѿ ны́нѣ и҆ до́ вѣка , пѣ́нїемъ три́жды . пᲂсе́мъ , ѱл҃о́мъ , л҃г . Бл҃гᲂслᲂвлю̀ гдⷭ҇а на всѧ́кᲂ вре́мѧ . дᲂ нелиша́тсѧ ѿ всѧ́кагѡ бл҃га . та́же , і҆єре́й , глаго́летъ : Бл҃гᲂслᲂве́нїе гдⷭ҇не на всѣ́хъ ва́съ . Пᲂсе́мъ начина́етъ ѱало́мщикъ : Сла́ва въ вы́шнихъ бг҃ꙋ . и҆ є҆ѯа̀ ѱалмы̀ и҆ всѐ по́ рѧдꙋ .

На ᲂу҆́трени , на бг҃ъ гдⷭ҇ь , трᲂпа́рь пра́здникꙋ , гⷤ . =Пᲂ а҃ , стихᲂло́гїи , сѣда́ленъ . гла́съ , а҃ . Въ ꙗ҆́слѣхъ на́съ ра́ди без̾слᲂве́сныхъ пᲂлᲂжи́сѧ дᲂлгᲂтерпѣли́ве сп҃се , младе́нствᲂвавъ во́лею . па́стырїе же тѧ̀ вᲂспѣ́ша сᲂ а҆́нг҃лы , взыва́юще , сла́ва и҆ хвала̀ и҆́же на землѝ рᲂжде́ннᲂмꙋ , и҆ ѡ҆бᲂжи́вшемꙋ земленᲂро́дныхъ сꙋщество̀ . =сла́ва , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , г҃ . Превѣ́чнагᲂ и҆ непᲂстижи́магᲂ , сᲂприснᲂсꙋ́щнагᲂ неви́димᲂмꙋ ѻ҆ц҃ꙋ , вᲂꙋтро́бѣ пло́тїю нᲂси́ла є҆сѝ бцⷣе , є҆ди́нᲂгᲂ неслїѧ́нныѧ трⷪ҇цы бжⷭ҇тва̀ . прᲂсїѧ̀ бл҃гᲂда́ть твᲂѧ̀ в̾ ми́рѣ препѣ́таѧ . тѣ́мже непреста́ннѡ вᲂпїе́мъ , ра́дꙋйсѧ чⷭ҇таѧ дв҃ᲂ мт҃и .= сла́ва , и҆ нн҃ѣ , то́йже .=

Пᲂ пᲂлїєлеѡ́сѣ , сѣда́ленъ . гла́съ , д҃ . Прїиди́те ви́димъ вѣ́рнїи , гдѣ̀ рᲂди́сѧ хрⷭ҇то́съ . пᲂслѣ́дꙋемъ про́чее а҆́мᲂже и҆́детъ ѕвѣзда̀ , с̾ вᲂлхвы̀ вᲂсто́чными царѝ . є҆го́же а҆́нг҃ли пᲂю́тъ непреста́ннѡ та́мѡ , па́стырїе свирѧ́ютъ пѣ́снь дᲂсто́йнꙋю . сла́ва в̾ вы́шнихъ глаго́люще , и҆́же дне́сь в̾ верте́пѣ ро́ждьшемꙋсѧ ѿ дв҃ы бцⷣы , в̾ виѳлїе́мѣ і҆ꙋде́йстѣмъ .= сла́ва , и҆ ны́нѣ , то́йже .=

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . И҆́з̾ чрева чрева пре́жде денни́цы рᲂди́хъ тѧ , клѧ́тсѧ гдⷭ҇ь и҆ нераска́етсѧ .= сти́хъ . р=ечѐ гдⷭ҇ь гдⷭ҇ви мᲂемꙋ̀ , сѣдѝ ѡ҆деснꙋ́ю менѐ , до́ндеже пᲂлᲂжꙋ̀ врагѝ твᲂѧ̀ пᲂд̾но́жїе нᲂга́ма твᲂи́ма . всѧ́кᲂ дыха́нїе .

є҆ѵⷢ҇а́лїе , ѿ матѳе́ѧ . зача́лᲂ , в҃ . ѱало́мъ , н҃ .

сла́ва . Всѧ́ческаѧ дне́сь ра́дᲂсти и҆спо́лнишасѧ , хрⷭ҇то́съ рᲂди́сѧ ѿ дв҃ы .

и҆ нн҃ѣ . Всѧ́ческаѧ дне́сь ра́дᲂсти и҆спо́лнишасѧ , хрⷭ҇то́съ рᲂди́сѧ в̾ виѳлїе́мѣ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Сла́ва в̾ вы́шнихъ бг҃ꙋ , и҆ на землѝ ми́ръ , дне́сь прїе́млетъ виѳлїе́мъ сѣдѧ́щагѡ при́снѡ сᲂ ѻ҆ц҃е́мъ . дне́сь а҆́нг҃ли млⷣнца рᲂжде́ннагᲂ бг҃ᲂлѣ́пнѡ славᲂсло́вѧтъ , сла́ва в̾ вы́шнихъ бг҃ꙋ , и҆ на землѝ ми́ръ , въ челᲂвѣ́цѣхъ бл҃гᲂвᲂле́нїе .

Кано́на , два̀ . і҆рмᲂсы̀ ѡ҆бᲂю̀ кано́нᲂвъ , пᲂ два́жды . трᲂпари́ же и҆́хъ , на в҃і . по́слѣ же , а҃ й , ли́къ , а҃ гѡ кано́на , і҆рмо́съ . а҆ дрꙋгі́и ли́къ , в҃ гѡ кано́на , і҆рмо́съ . Кано́нъ , кѵ́ръ кᲂзмы̀ , и҆мѣ́ѧ краегране́сїе си́цевᲂ : хрⷭ҇то́съ в̾челᲂвѣ́чивсѧ , є҆́же бѣ̀ бг҃ъ пребыва́етъ . гла́съ , а҃ . пѣ́снь , а҃ . і҆рмо́съ . Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ вᲂз̾нᲂси́тесѧ . по́йте гдⷭ҇ви всѧ̀ землѧ̀ , и҆ весе́лїемъ вᲂспо́йте лю́дїе , ꙗ҆́кѡ прᲂсла́висѧ .

запѣ́въ : Сла́ва гдⷭ҇и ржⷭ҇твꙋ̀ твᲂемꙋ̀ . И҆стлѣ́вша престꙋпле́нїемъ , пᲂ бж҃їю ѻ҆́бразꙋ бы́вшагᲂ , всего̀ и҆стлѣ́нїѧ сꙋ́ща лꙋ́чша , ѿпа́дша бжⷭ҇твеныѧ жи́зни , па́ки ѡ҆бнᲂвлѧ́етъ мꙋ́дрыи сᲂдѣ́тель , ꙗ҆́кѡ прᲂсла́висѧ . Ви́дѣвъ зижди́тель ги́блема чл҃ка , рꙋка́ма є҆го́же сᲂзда̀ , прекло́нь нб҃са̀ схо́дитъ . сего́ же ѿ дв҃ы бжⷭ҇твеныѧ чи́стыѧ , всего̀ ѡ҆сꙋществꙋ́етъ . вᲂи́стинꙋ вᲂпло́щьсѧ , ꙗ҆́кѡ прᲂсла́висѧ . Мꙋ́дрᲂсть сло́вᲂ бж҃їе , и҆ си́ла , сн҃ъ сы́и ѻ҆ч҃ь , и҆ сїѧ́нїе , хрⷭ҇то́съ бг҃ъ , си́лъ ᲂу҆таи́всѧ , є҆ли́кѡ преми́рныхъ , и҆ є҆ли́кѡ на землѝ , и҆ вᲂчл҃чьсѧ ѡ҆бнᲂви́лъ є҆́сть на́съ , ꙗ҆́кѡ прᲂсла́висѧ .

Дрꙋгі́и кано́нъ . гла́съ , то́йже . твᲂре́нїе кѵ́ръ і҆ѡа́нна . і҆рмо́съ . Спасѐ лю́ди чꙋдᲂдѣ́ѧ влⷣкᲂ , мо́крꙋю мо́рѧ во́лнꙋ и҆зсꙋши́въ дре́вле , во́лею же ро́ждьсѧ ѿ дв҃ы , стезю̀ прᲂхо́днꙋ нб҃сѐ пᲂлᲂжѝ на́мъ , є҆го́же пᲂ сꙋществꙋ̀ , ра́вна ѻ҆ц҃ꙋ же и҆ земны́мъ сла́вимъ .

запѣ́въ : Сла́ва гдⷭ҇и ржⷭ҇твꙋ̀ твᲂемꙋ̀ .= И҆=з̾несѐ чре́вᲂ сщ҃е́ннᲂе сло́вᲂ , ꙗ҆́вѣ неѡ҆па́льнᲂю живᲂпи́саннᲂ кꙋпино́ю . смѣше́на зра́кᲂмъ чл҃кᲂбж҃їемъ . є҆́ввы ѻ҆каѧ́нныѧ ᲂу҆тро́бы , ѿ клѧ́твы дре́внїѧ разрѣша́юща го́рькїѧ . є҆го́же земле́нїи сла́вимъ . Пᲂказа̀ ѕвѣзда̀ є҆́же пре́жде сл҃нца сло́вᲂ , прише́дшее ᲂу҆ста́вити грѣхѝ вᲂлхво́мъ , ꙗ҆́вѣ вᲂ ᲂу҆бо́зѣмъ верте́пѣ , млⷭ҇тивагᲂ тебѐ , пелена́ми по́вита . є҆го́же ра́дꙋющесѧ ви́дѧхꙋ самᲂго̀ чл҃ка и҆ гдⷭ҇а .

пѣ́снь , г҃ . і҆рмо́съ . Первᲂвѣ́чнᲂмꙋ ѿ ѻ҆ц҃а рᲂжде́нꙋ нетлѣ́ннѡ сн҃ꙋ , и҆ въ пᲂслѣ́днѧѧ ѿ дв҃ы , вᲂплᲂще́нꙋ без̾ сѣ́мене , хрⷭ҇тꙋ̀ бг҃ꙋ вᲂзᲂпїе́мъ , вᲂз̾дви́гнꙋвыи ро́гъ на́шъ ст҃ъ є҆сѝ гдⷭ҇и . И҆́же дх҃нᲂве́нїѧ прича́щьсѧ лꙋ́чшагѡ а҆да́мъ пе́рстныи , и҆ къ тлѣ́нїю пᲂпᲂлзе́сѧ же́нскᲂю ле́стїю , хрⷭ҇та̀ ѿ жены̀ ви́дѧ вᲂпїе́тъ , и҆́же менѐ ра́ди пᲂ мнѣ̀ бы́въ , ст҃ъ є҆сѝ гдⷭ҇и . Сᲂѡ҆бра́зенъ бре́ннᲂмꙋ ᲂу҆ма́ленїю , раствᲂре́нїемъ хрⷭ҇тѐ бы́въ . и҆ прича́стїемъ пло́ти го́ршаѧ , по́давъ бжⷭ҇твенагѡ є҆стества̀ . зе́мленъ бы́въ , и҆ пребы́въ бг҃ъ . и҆ вᲂздви́гнꙋвыи ро́гъ на́шъ , ст҃ъ є҆сѝ гдⷭ҇и . Виѳлїе́мѣ весели́сѧ , кн҃зе́мъ і҆ꙋ́дᲂвымъ сы́и цр҃ь . і҆и҃лѧ бᲂ пасы́и , на ра́мꙋ херꙋви́мскꙋ , и҆з̾ тебѐ про́йде хрⷭ҇то́съ ꙗ҆́вѣ . и҆ вᲂз̾дви́гнꙋвыи ро́гъ на́шъ , надᲂ всѣ́ми вᲂцр҃и́сѧ .

и҆́нъ , і҆рмо́съ . Прїидѝ к̾ пѣ́нїю ра́бъ свᲂи́хъ , бл҃гᲂда́телю , врага̀ смирѧ́ѧ вᲂз̾несе́нꙋю гᲂрды́ню . терпѧ́ же всеви́дче грѣха̀ . превы́ше непᲂкᲂле́блемᲂ ᲂу҆тверже́ны , бл҃же пѣвцы̀ степе́немъ вѣ́ры . И҆з̾ невѣ́сты пречⷭ҇тыѧ , пребᲂга́тᲂе ржⷭ҇тво̀ ви́дѣти па́че ᲂу҆ма̀ спᲂдо́бльсѧ , ли́къ свирѧ́ющихъ , преклᲂнѧ́шесѧ стра́ннымъ ѻ҆́бразᲂмъ . чи́нъ же пᲂю́щихъ беспло́тныхъ , цр҃ѧ хрⷭ҇та̀ без̾сѣ́мене вᲂпло́щшасѧ . Высᲂто́ю црⷭ҇твꙋѧй небе́съ , милᲂсе́рдїемъ сᲂверша́етъ є҆́же ѡ҆ на́съ , ѿ без̾невѣ́стныѧ ѻ҆трᲂкᲂви́цы . невеще́ственъ сы́и пре́жде , нᲂ по́слѣ же сло́вᲂ ѡ҆дебелѣ́вшᲂ пло́тїю , да па́дшагᲂ к̾ себѣ̀ вᲂзведе́тъ первᲂзда́ннагᲂ .

ѵ҆пако́й . гла́съ , и҃ . И҆́же ѿ нача́тᲂкъ ꙗ҆зы́къ нб҃ᲂ тѝ принесѐ , лежа́щемꙋ млⷣнцꙋ въ ꙗ҆́слѣхъ , ѕвѣздо́ю вᲂлхвы̀ призва́въ . и҆́хже и҆ ᲂу҆дивѝ не ски́петры ни прⷭ҇то́лы , нᲂ пᲂслѣ́днею нището́ю . что́ бᲂ хꙋ́ждьше верте́па , что́ же ли смире́ннѣе пеле́нъ , в̾ ни́хже ѡ҆блиста̀ бжⷭ҇тва̀ твᲂегѡ̀ бᲂга́тьствᲂ . гдⷭ҇и сла́ва тебѣ̀ .

пѣ́снь , д҃ . і҆рмо́съ . Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прᲂзѧ́блъ є҆сѝ , и҆з̾ гᲂры̀ хва́льныѧ присѣ́нныѧ ча́сты прїи́де вᲂпло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твᲂе́й гдⷭ҇и . Є҆го́же дре́вле прᲂречѐ і҆а́кѡвъ , ꙗ҆зы́кѡмъ жда́нїе хрⷭ҇тѐ , ѿ кᲂлѣ́на і҆ꙋ́дѡва вᲂсїѧ́лъ є҆сѝ . и҆ си́лꙋ дама́скᲂвꙋ , самарїи́скїи же плѣ́нъ прише́лъ є҆сѝ и҆з̾прᲂврещѝ , ле́сть премѣнѧ́ѧ в̾ вѣ́рꙋ бг҃ᲂлѣ́пнꙋ . сла́ва си́лѣ твᲂе́й гдⷭ҇и . Вᲂлхва̀ дре́вле валаа́ма , слᲂве́съ ᲂу҆ченикѝ мꙋ́дрыѧ , ѕвѣздᲂблюсти́тели , ра́дᲂсти и҆спо́лнилъ є҆сѝ . ѕвѣзда̀ ѿ і҆а́кѡва вᲂсїѧ́въ влⷣкᲂ , ꙗ҆зы́кѡмъ нача́тᲂкъ ввᲂди́мᲂмъ , прїѧ́тъ же ꙗ҆́вѣ да́ры тебѣ̀ прїѧ́тны принᲂсѧ́щихъ , сла́ва си́лѣ твᲂе́й гдⷭ҇и .= Ꙗ҆́=кѡ на рꙋно̀ во́ чревᲂ дв҃ыѧ сше́лъ є҆сѝ до́ждь хрⷭ҇тѐ , и҆ ꙗ҆́кѡ ка́плѧ на́ землю ка́плющаѧ . є҆ѳїѡ́пїѧ и҆ фарси́съ , и҆ а҆рави́тьстїи ѻ҆́стрᲂви же , сава̀ , ми́дѧнскꙋю всю̀ зе́млю держа́щїи припадо́ша ти сп҃се . сла́ва си́лѣ твᲂе́й гдⷭ҇и .

и҆́нъ , і҆рмо́съ . Ро́да челᲂвѣ́ча ѡ҆бнᲂвле́нїе , дре́вле пᲂѧ̀ прᲂро́къ а҆вва́кꙋмъ прᲂвᲂзвѣща́етъ , ви́дѣти неи҆зрече́ннѡ спᲂдо́бивсѧ ѻ҆́бразъ . мла́дᲂ дѣ́тище бᲂ и҆з̾ гᲂры̀ дв҃ыѧ , и҆зы́де лю́демъ на ѡ҆бнᲂвле́нїе сло́вᲂ . Ра́венъ прᲂизы́де чл҃кѡмъ вы́шнїи , во́лею пло́ть прїи́мъ ѿ дв҃ы , ꙗ҆́дъ ѡ҆чи́стити ѕмі́евы главы̀ . всѧ̀ привᲂдѧ̀ к̾ свѣ́тꙋ живᲂно́снᲂмꙋ , бг҃ъ сы́и , ѿ вра́тъ без̾со́лнечныхъ . Ꙗ҆зы́цы и҆́же дре́вле тле́ю пᲂгрꙋже́ни , па́гꙋбы ѕѣлѡ̀ вра́жїѧ ᲂу҆бѣжа́вше , вᲂзно́сѧтъ рꙋ́ки съ пᲂхвала́ми , є҆ди́нагᲂ чтꙋ́ще хрⷭ҇та̀ , ꙗ҆́кѡ бл҃гᲂда́телѧ , к̾ на́мъ млⷭ҇тивнѡ прише́дшагᲂ . Ѿ ко́рене и҆зра́стши і҆єссе́ева дв҃ᲂ , ᲂу҆ста́вы прешла̀ є҆сѝ чл҃ческагѡ сꙋщества̀ . ѻ҆́ч҃ее ро́ждьши превѣ́чнᲂе сло́вᲂ , ꙗ҆́кᲂже и҆звᲂлѝ са́мъ , запечатлѣ́ннᲂю ᲂу҆тро́бᲂю прᲂитѝ , и҆стᲂща́нїемъ стра́ннымъ .

пѣ́снь , є҃ . і҆рмо́съ . Бг҃ъ сы́и ми́ра , ѻ҆ц҃ъ щедро́тамъ , вели́кагѡ сᲂвѣ́та ти а҆́нг҃ла , ми́ръ пᲂдава́юща , пᲂсла́лъ є҆сѝ на́мъ . тѣ́мъ бг҃ᲂразꙋ́мїѧ к̾ свѣ́тꙋ наставлѧ́еми , ѿ́ нᲂщи ᲂу҆́тренююще , славᲂсло́вимъ тѧ̀ чл҃кᲂлю́бче . Въ рабѣ́хъ кесаре́вымъ пᲂвелѣ́нїемъ написа́тисѧ пᲂко́рьсѧ . и҆ на́съ рабы̀ сꙋ́ща врагꙋ̀ и҆ грѣхꙋ̀ свᲂбᲂди́лъ є҆сѝ хрⷭ҇тѐ . ве́сь и҆́же пᲂ на́съ ѡ҆бнища́въ . и҆ пе́рстнагѡ ѿ самᲂгѡ̀ смѣше́нїѧ и҆ ѻ҆бще́нїѧ ѡ҆бᲂжи́лъ є҆сѝ . Сѐ дв҃аѧ ꙗ҆́кᲂже дре́вле речѐ , во́ чревѣ прїе́мши рᲂдила̀ є҆́сть бг҃а вᲂчл҃чьшасѧ , и҆ пребыва́етъ дв҃ᲂю . є҆ѧ́же ра́ди сми́ршесѧ с̾ бг҃ᲂмъ грѣ́шницы , бцⷣꙋ сꙋ́щꙋю вᲂи́стиннꙋ вѣ́рнїи вᲂспᲂе́мъ .

и҆́нъ , і҆рмо́съ . И҆з̾ но́щи дѣ́лъ ѡ҆мраче́нныѧ льстѝ , ѡ҆чище́нїе на́мъ хрⷭ҇тѐ бо́дреннᲂ , ны́нѣ сᲂдѣва́ющимъ пѣ́снь ꙗ҆́кѡ бл҃гᲂда́телю . прїи́деши даѧ̀ ᲂу҆до́бенъ пꙋ́ть . пᲂ немꙋ́ же хᲂдѧ́ще ѡ҆брѧ́щемъ сла́вꙋ . Лю́тꙋю враждꙋ̀ ю҆́же к̾ на́мъ влⷣка ѿсѣка́ѧ па́ки , плᲂтьски́мъ прише́ствїемъ . да держа́щагᲂ раз̾рꙋши́тъ дш҃етлѣ́ющагᲂ . ми́ръ сᲂчета́ѧ с̾ невеще́ствеными сꙋществы̀ . пᲂлᲂжи́въ пристꙋ́пна , ро́ждьшагᲂ тва́ри . Лю́дїе ви́дѣша дре́вле ѡ҆мра́чнїи , по́ днехъ свѣ́тъ вы́шнїѧ свѣ́тлᲂсти . ꙗ҆зы́ки же бг҃ᲂви наслѣ́дїе сн҃ъ прино́ситъ , пᲂдаѧ̀ та́мѡ неи҆зрече́ннꙋю бл҃гᲂда́ть , и҆дѣ́же мно́жайшїи прᲂцвѣтѐ грѣ́хъ .

пѣ́снь , ѕ҃ . і҆рмо́съ . Оу҆тро́ба і҆ѡ́нꙋ младе́нца невредѝ , мᲂрскі́и ѕвѣ́рь , і҆а́кѡва прїѧ́тъ . въ дв҃цꙋ ᲂу҆́бѡ все́льсѧ сло́вᲂ , и҆ пло́ть прїи́мъ , про́йде сᲂхранѝ неи҆стлѣ́ннꙋ . и҆́же бᲂ непᲂстрада̀ и҆стлѣ́нїѧ , ро́ждьшꙋю сᲂхранѝ неврежде́ннꙋ . Прїи́де вᲂпло́щьсѧ хрⷭ҇то́съ бг҃ъ на́шъ , и҆́з̾ чрева є҆го́же ѻ҆ц҃ъ пре́жде денни́цы ражда́етъ . правле́нїѧ же держа̀ пречⷭ҇тыхъ си́лъ , въ ꙗ҆́слѣхъ ско́тїихъ вᲂзлежи́тъ , и҆ пелена́ми пᲂвива́етсѧ . разрѣша́етъ же мнᲂгᲂплете́нныѧ плени́цы прегрѣше́нїи . Ю҆́нᲂ и҆з̾ а҆да́ма , ѻ҆трᲂча̀ смѣше́нїѧ , рᲂди́сѧ сн҃ъ , и҆ вѣ́рнымъ да́стсѧ . бꙋ́дꙋщемꙋ вѣ́кꙋ , се́й є҆́сть ѻ҆ц҃ъ , и҆ кн҃зь . и҆ нарица́етсѧ вели́ка сᲂвѣ́та а҆́нг҃лъ . се́й крѣ́пᲂкъ бг҃ъ є҆́сть , держа́и ѻ҆́бластїю всю̀ тва́рь .

и҆́нъ , і҆рмо́съ . Плᲂвы́и і҆ѡ́на въ мꙋтѣ́хъ мᲂрски́хъ , прїитѝ мᲂлѧ́шесѧ , и҆ бꙋ́рю ᲂу҆тᲂли́ти . ᲂу҆нзе́нъ же а҆́зъ мꙋча́щагѡ стрѣло́ю . хрⷭ҇тꙋ̀ вᲂспѣва́ю ѕлы́хъ гꙋби́телю , ско́рѡ прїитѝ к̾ мᲂе́й лѣ́нᲂсти . И҆́же бѣ̀ и҆спе́рва ᲂу҆́ бг҃а , бг҃ъ сло́вᲂ , ны́нѣ ᲂу҆твержа́етъ не́мᲂщнᲂе дре́вле , ви́дѣвъ сᲂхрани́ти є҆́же пᲂ на́съ сꙋщество̀ . и҆́мже себѐ втᲂры́мъ ѡ҆бще́нїемъ , а҆́бїе прᲂѧвлѧ́ѧ страсте́й свᲂбо́днᲂе . Грѧде́тъ на́съ ра́ди , ѿ а҆враа́мль чре́слъ , лю́тѣ па́дшїѧ во́ мрацѣ прегрѣше́нїи , сн҃ы вᲂздви́гнꙋти до́лꙋ пᲂни́кшихъ . и҆́же во́ свѣтѣ живы́и , и҆ в̾ ꙗ҆́слѣхъ чрез̾ дᲂстᲂѧ́нїе , ны́нѣ бл҃гᲂи҆зво́ливъ въ чл҃ческᲂе спасе́нїе .

кᲂнда́къ . гла́съ , г҃ . Дв҃аѧ дне́сь , пресꙋ́щественагѡ ражда́етъ , и҆ землѧ̀ верте́пъ неприкᲂснᲂве́ннᲂмꙋ прино́ситъ . а҆́нг҃ли съ па́стыри славᲂсло́вѧтъ . вᲂлсви́ же сᲂ ѕвѣздо́ю пꙋтьше́ствꙋютъ . на́съ бᲂ ра́ди рᲂди́сѧ , ѻ҆трᲂча̀ мла́дᲂ превѣ́чныи бг҃ъ . и҆́кᲂсъ . Є҆де́ма виѳлїе́мъ ѿве́рзе , прїиди́те ви́димъ , пи́щꙋ в̾ та́йнѣ ѡ҆брѣто́хᲂмъ . прїиди́те прїи́мемъ , сꙋ́щаѧ ра́йскаѧ внꙋ́трь верте́па . тꙋ́бᲂ ꙗ҆ви́сѧ ко́рень ненапᲂе́нъ , прᲂзѧба́ѧ ѿпꙋще́нїе . тꙋ̀ ѡ҆брѣ́тесѧ кла́дѧзь неи҆ско́панъ , є҆го́же дв҃дъ пи́ти дре́вле вжада́сѧ . тꙋ̀ дв҃аѧ ро́ждьши млⷣнца , жа́ждꙋ ᲂу҆ста́ви а҆́бїе а҆да́мᲂвꙋ и҆ дв҃дᲂвꙋ . сегѡ̀ ра́ди к̾ немꙋ̀ и҆́демъ гдѣ̀ рᲂди́сѧ , ѻ҆трᲂча̀ мла́дᲂ превѣ́чныи бг҃ъ .

пѣ́снь , з҃ . і҆рмо́съ . Ѻ҆́трᲂцы вᲂ бл҃зѣ́й вѣ́рѣ вᲂспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не ᲂу҆бᲂѧ́шасѧ . нᲂ пᲂсредѝ пла́мене стᲂѧ́ще пᲂѧ́хꙋ , ѻ҆ц҃е́мъ бг҃ъ бл҃гᲂслᲂве́нъ є҆сѝ . Па́стырїе свирѧ́ющїи ᲂу҆жа́снѡ свѣтᲂѧвле́нїе пᲂлꙋчи́ша . сла́ва бᲂ гдⷭ҇нѧ ѡ҆блиста̀ и҆́хъ . и҆ а҆́нг҃лъ вᲂспо́йте вᲂпїѧ̀ , ꙗ҆́кѡ рᲂди́сѧ хрⷭ҇то́съ . ѻ҆ц҃е́мъ бж҃е бл҃гᲂслᲂве́нъ є҆сѝ . Внеза́пꙋ с̾ сло́вᲂмъ а҆́нг҃лᲂвымъ нбⷭ҇наѧ во́инства , сла́ва вᲂпїѧ́хꙋ бг҃ꙋ в̾ вы́шнихъ , на землѝ ми́ръ , в̾ чл҃цѣхъ бл҃гᲂвᲂле́нїе . хрⷭ҇то́съ вᲂсїѧ̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Гл҃ъ что̀ се́й , реко́ша па́стырїе . прише́дше ви́димъ бы́вшее бжⷭ҇твенагѡ хрⷭ҇та̀ . виѳлїе́ма же дᲂше́дше , с̾ ро́ждьшею пᲂклᲂнѧ́хꙋсѧ , вᲂспѣва́юще , ѻ҆ц҃е́мъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Всѣ́хъ цр҃ѧ ᲂу҆кᲂри́ша любо́вїю , без̾чи́сленнᲂ ꙗ҆рѧ́щасѧ , привлече́ннїи ѻ҆́трᲂцы , мꙋчи́телѧ ѕлᲂбо́жнᲂе ꙗ҆зыкᲂвре́дїе . и҆́хже неприкᲂснꙋ́сѧ ѻ҆́гнь мно́гїи . влⷣцѣ глаго́лютъ , во́ вѣки бл҃гᲂслᲂве́нъ є҆сѝ . Слꙋгѝ ᲂу҆́бѡ неи́стᲂвнѡ пᲂпалѧ́етъ , спаса́етъ же всепалѧ́щїѧ со́ страхᲂмъ ю҆́ныѧ , седмᲂчи́сленымъ раз̾же́нїемъ вᲂзвы́шена . и҆́хже вѣнча̀ пла́мень незави́стнѡ , гдⷭ҇ви пᲂдаю́щꙋ бл҃гᲂче́стїѧ ра́ди ро́сꙋ . Пᲂмо́щниче хрⷭ҇тѐ чл҃кѡмъ , прᲂти́внᲂе гада́нїе , вᲂплᲂще́нїе неи҆з̾гл҃аннᲂе и҆мѣ́ѧ , пᲂсрами́лъ є҆сѝ , бᲂга́тьствᲂ ѡ҆бᲂже́нїѧ нᲂсѧ́и , вᲂѡ҆бра́жсѧ ны́нѣ . є҆го́же ра́ди ᲂу҆пᲂва́нїемъ , свы́ше в̾ преиспо́днїи прїидо́хᲂмъ мра́къ . Злѣ̀ неꙋдержа́ннѡ вᲂзвыша́емыи , нечи́стѡ бѣсѧ́щїисѧ ѿ развраще́нїѧ ми́ра , низлᲂжи́лъ є҆сѝ всемо́щнѣ грѣ́хъ , и҆́хже привлечѐ пре́жде . дне́сь же ѿ сѣ́тей спаса́еши . вᲂпло́щьсѧ во́лею бл҃гᲂда́телю .

пѣ́снь , и҃ . і҆рмо́съ . Чꙋ́дᲂ преве́лїе , рᲂсᲂда́вицꙋ вᲂѡ҆бразѝ пе́щь ѻ҆́бразᲂмъ . ꙗ҆́же бᲂ прїѧ́тъ не ѡ҆палѝ ю҆́ныхъ , та́кᲂже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пᲂю́ще вᲂзᲂпїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превᲂзно́ситъ є҆гѡ̀ во́ вѣки . Влече́тъ вавѷлѡ́нѧ дщѝ , ѻ҆́трᲂки плѣне́ныѧ дв҃дᲂвы ѿ сїѡ́на к̾ себѣ̀ . дарᲂно́сцы же сле́тъ вᲂлхвы̀ дѣ́ти , дв҃дᲂвѣ бг҃ᲂпрїѧ́тнѣй дще́ри мᲂлѧ́щасѧ . тѣ́мъ вᲂспѣва́юще пᲂе́мъ , да блгⷭ҇ви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . Ѻ҆рга́ны ᲂу҆клᲂни́ша плаче́вныѧ пѣ́сни , не пᲂѧ́хꙋ бᲂ въ землѝ чꙋжде́й ѻ҆́трᲂцы сїѡ́нᲂвы . вавѷлѡ́нскꙋю же разрѣша́етъ ле́сть всю̀ , и҆ мꙋсикі́йскїѧ сᲂста́вы , в̾ виѳлїе́мѣ вᲂсїѧ́въ хрⷭ҇то́съ . тѣ́мъ вᲂспѣва́юще пᲂе́мъ , да блгⷭ҇ви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . Кᲂры́сть вавѷлѡ́нъ црⷭ҇тва сїѡ́нѧ , и҆ плѣне́нᲂе бᲂга́тьствᲂ прїѧ́тъ . сᲂкро́вища же хрⷭ҇то́съ въ сїѡ́нъ сегѡ̀ , и҆ цр҃ѧ ѕвѣздо́ю наставлѧ́ѧ ѕвѣздᲂблюсти́телѧ приво́дитъ . тѣ́мъ вᲂспѣва́юще пᲂе́мъ , да блгⷭ҇ви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки .

и҆́нъ , і҆рмо́съ . Оу҆тро́бꙋ неѡ҆пали́мꙋ прᲂѡ҆бразꙋ́ютъ дв҃чꙋ , и҆́же в̾ ве́тсѣ ѻ҆гне́мъ пали́мїи ю҆́нᲂши . па́че є҆стества̀ ражда́ющꙋ запечатлѣ́ннꙋ . ѡ҆бᲂѧ́ же сᲂдѣва́ѧ чꙋдᲂдѣ́йства є҆ди́нъ , лю́ди к̾ пѣ́нїю вᲂз̾ставлѧ́етъ бл҃гᲂда́тель . Па́гꙋбы ᲂу҆бѣжа́вши , є҆́же ѡ҆бᲂжи́сѧ пре́лестїю , непреста́ннѡ пᲂе́тъ и҆злїѧ́вшагᲂсѧ сло́ва , ю҆́нᲂшьски всѧ̀ с̾ тре́петᲂмъ тва́рь . несла́внꙋ пᲂхвалꙋ̀ бᲂѧ́щисѧ прино́ситъ , тлѣ́нна сꙋ́щи , а҆́ще и҆ мꙋ́дрѣ терпѧ́щи . Грѧде́ши прельще́ныѧ на па́жить ѡ҆браща́ѧ . до́брѣ цвѣтꙋ́щꙋю па́че сло́ва , и҆ сїѧ́ющꙋю высо́кᲂсть , ꙗ҆зы́кѡмъ вᲂста́нїе , чл҃ческагѡ є҆стества̀ , си́лꙋ нꙋ́жнꙋю , чл҃кᲂꙋбі́ица ᲂу҆гаси́ти . мꙋ́жъ же ꙗ҆́вльсѧ , и҆ бг҃ъ прᲂмышле́нїемъ . На ѳ҃ пѣ́сни , вжига́ютъ свѣщѝ бра́тїѧ . Честнѣ́йшꙋ непᲂе́мъ .

пѣ́снь , ѳ҃ . припѣ́въ : Велича́й дш҃е мᲂѧ̀ , и҆́же в̾ верте́пѣ ро́ждьшагᲂсѧ цр҃ѧ хрⷭ҇та̀ . і҆рмо́съ . Та́инствᲂ стра́ннᲂ ви́жꙋ , и҆ пресла́внᲂ . нб҃ᲂ сꙋ́щꙋ пеще́рꙋ , престо́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хже вᲂз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ [два́жды , с̾ пᲂкло́ны] .

Велича́й дш҃е мᲂѧ̀ , и҆́же в̾ верте́пѣ ро́ждьшагᲂсѧ цр҃ѧ хрⷭ҇та̀ . Оу҆жа́снᲂ тече́нїе зрѧ́ще вᲂлсвѝ неѡ҆бы́чнᲂ но́выѧ ѕвѣзды̀ , нн҃ѣ сїѧ́ющꙋ нб҃съ свѣтлѣ́е . хрⷭ҇та̀ цр҃ѧ прᲂзна́менᲂваша на землѝ , ро́ждьшагᲂсѧ в̾ виѳлїе́мѣ , на спасе́нїе на́ше .= вⷤ .=

Велича́й дш҃е мᲂѧ̀ , и҆́же в̾ верте́пѣ ро́ждьшагᲂсѧ цр҃ѧ хрⷭ҇та̀ . Нᲂвᲂрᲂжде́ннᲂе , вᲂлхво́мъ гл҃ющимъ , ѻ҆трᲂча̀ цр҃ь , є҆го́же ѕвѣзда̀ ꙗ҆вѝ , гдѣ̀ є҆́сть ; тᲂмꙋ́ бᲂ пᲂклᲂни́тисѧ прїидо́хᲂмъ . ꙗ҆рѧ́сѧ и҆́рᲂдъ смꙋща́шесѧ , хрⷭ҇та̀ ᲂу҆би́ти , бг҃ᲂбо́рецъ шата́ѧсѧ .= два́жды .=

Велича́й дш҃е мᲂѧ̀ , и҆́же в̾ верте́пѣ ро́ждьшагᲂсѧ цр҃ѧ хрⷭ҇та̀ . И҆спыта̀ и҆́рᲂдъ лѣ́тᲂ ѕвѣзды̀ , є҆ѧ́же вᲂжде́нїемъ вᲂлсвѝ в̾ виѳлїе́мѣ пᲂкланѧ́хꙋсѧ хрⷭ҇тꙋ̀ с̾ да́ры . є҆ѧ́же ра́ди кᲂ ѻ҆те́чествꙋ наставлѧ́еми , лю́тагᲂ дѣтᲂꙋбі́ица ѡ҆ста́виша пᲂрꙋ́гана .= два́жды .=

и҆́нъ , припѣ́въ : Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ дв҃ꙋ пречи́стꙋю бцⷣꙋ . і҆рмо́съ . Пᲂдᲂба́ше ᲂу҆́бѡ на́мъ , ꙗ҆́кѡ без̾ бѣды̀ стра́хᲂмъ , ᲂу҆до́бь мᲂлча́ти . любо́вїю же дв҃ᲂ , пѣ́снь слᲂжи́ти , си́лᲂю ѡ҆бᲂстре́ннᲂю , дѣ́лᲂ є҆́сть дра́гᲂ . нᲂ ѽ мт҃и си́лꙋ , є҆ли́кᲂ же бы́сть и҆звᲂле́нїе да́ждь [два́жды , с̾ пᲂкло́ны] .

Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ дв҃ꙋ пречи́стꙋю бцⷣꙋ . Ѻ҆́бразы несвѣ́тлы , и҆ сѣ́ни преведе́ны . ѽ мт҃и чи́стаѧ ви́дѣвше сло́вᲂ но́вꙋ ꙗ҆́вльшꙋсѧ ѿ вра́тъ заключе́ныхъ . мнѧ́щїи же и҆́стиннꙋю свѣ́тлᲂсть , дᲂсто́йнѡ твᲂю̀ бл҃гᲂслᲂви́мъ ᲂу҆тро́бꙋ . три́жды .

Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ дв҃ꙋ пречи́стꙋю бцⷣꙋ . Жела́нїе пᲂлꙋчи́вше и҆ бж҃їѧ прише́ствїѧ хрⷭ҇тᲂкра́снїи лю́дїе спᲂдо́бльшесѧ . ны́нѣ ᲂу҆тѣша́ютсѧ па́ки бы́тїемъ , ꙗ҆́кѡ живᲂно́снꙋ бл҃гᲂда́ть дае́ши дв҃ᲂ чи́стаѧ , пᲂклᲂни́тисѧ сла́вѣ . три́жды .

та́же , на схо́дѣ , припѣ́въ : Велича́й дш҃е мᲂѧ̀ , и҆́же в̾ верте́пѣ ро́ждьшагᲂсѧ цр҃ѧ хрⷭ҇та̀ . і҆рмо́съ . Та́инствᲂ стра́ннᲂ ви́жꙋ , и҆ пресла́внᲂ . нб҃ᲂ сꙋ́щꙋ пеще́рꙋ , престо́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хже вᲂз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . припѣ́въ : Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ дв҃ꙋ пречи́стꙋю бцⷣꙋ . і҆рмо́съ . Пᲂдᲂба́ше ᲂу҆́бѡ на́мъ , ꙗ҆́кѡ без̾ бѣды̀ стра́хᲂмъ , ᲂу҆до́бь мᲂлча́ти . любо́вїю же дв҃ᲂ , пѣ́снь слᲂжи́ти , си́лᲂю ѡ҆бᲂстре́ннᲂю , дѣ́лᲂ є҆́сть дра́гᲂ . нᲂ ѽ мт҃и си́лꙋ , є҆ли́кᲂ же бы́сть и҆звᲂле́нїе да́ждь . пᲂкло́н̾ дᲂ землѝ .

свѣти́ленъ . Пᲂсѣти́лъ ны є҆́сть свы́ше сп҃съ на́шъ , вᲂсто́къ вᲂсто́кᲂмъ . и҆ сꙋ́щїи вᲂ тмѣ̀ и҆ сѣ́ни ѡ҆брѣто́хᲂмъ и҆́стинꙋ , и҆́бᲂ ѿ дв҃ы рᲂди́сѧ гдⷭ҇ь . два́жды . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , д҃ . Весели́тесѧ пра́веднїи , нб҃са̀ ра́дꙋйтесѧ , взыгра́йтесѧ го́ры хрⷭ҇тꙋ̀ ро́ждьшꙋсѧ . дв҃аѧ сѣди́тъ херꙋви́мᲂмъ пᲂдо́бѧщисѧ , нᲂсѧ́щи на ло́нѣ бг҃а сло́ва вᲂплᲂще́нна . па́стырїе рᲂжде́нᲂмꙋ дивѧ́тсѧ , вᲂлсвѝ влⷣцѣ да́ры прино́сѧтъ . а҆́нг҃ли вᲂспѣва́юще глаго́лютъ , непᲂстижи́ме гдⷭ҇и сла́ва тебѣ̀ . Бцⷣе дв҃ᲂ ро́ждьшаѧ сп҃са , ᲂу҆праздни́ла є҆сѝ пе́рвꙋю клѧ́твꙋ є҆́ввинꙋ . ꙗ҆́кѡ мт҃и бы́сть бл҃гᲂвᲂле́нїѧ ѻ҆́ч҃а , нᲂсѧ́щи на ло́нѣ бж҃їе сло́вᲂ вᲂплᲂще́ннᲂе . нетерпи́тъ та́йна и҆спыта́нїѧ . вѣ́рᲂю є҆ди́нᲂю сїю̀ прᲂсла́вимъ , зᲂвꙋ́ще с̾ тᲂбо́ю и҆ глаго́люще , неи҆зрече́нне гдⷭ҇и сла́ва тебѣ̀ . Прїиди́те вᲂспᲂе́мъ мт҃рь сп҃сᲂвꙋ , пᲂ ржⷭ҇твѣ̀ па́ки ꙗ҆́вльшꙋсѧ дв҃ꙋ . ра́дꙋисѧ гра́де ѡ҆дш҃евле́ныи цр҃ѧ и҆ бг҃а , в̾ не́мже хрⷭ҇то́съ по́живъ спасе́нїе сᲂдѣ́ла . с̾ гаврїи́лᲂмъ вᲂспᲂе́мъ , с̾ па́стыри прᲂсла́вимъ , зᲂвꙋ́ще , бцⷣе мᲂлѝ и҆з̾ тебѐ вᲂплᲂще́ннагѡ спасти́сѧ на́мъ . Ѻ҆ц҃ъ бл҃гᲂи҆зво́лилъ є҆́сть , и҆ сло́вᲂ пло́ть бы́сть , и҆ дв҃аѧ рᲂдѝ бг҃а вᲂчл҃чьшасѧ . ѕвѣзда̀ вᲂзвѣща́етъ , вᲂлсвѝ пᲂкланѧ́ютсѧ . па́стырїе чꙋдѧ́тсѧ и҆ тва́рь ра́дꙋетсѧ . сла́ва . гла́съ , ѕ҃ . Є҆гда̀ вре́мѧ , є҆́же на́ землю прише́ствїѧ твᲂегѡ̀ , пе́рвᲂе написа́нїе вселе́ннѣй бы́сть . тᲂгда̀ хᲂтѧ́ше чл҃кѡмъ написа́ти и҆мена̀ , вѣ́рꙋющимъ ржⷭ҇твꙋ̀ твᲂемꙋ̀ . сегѡ̀ ра́ди такᲂво́е пᲂвелѣ́нїе ѿ кесарѧ̀ вᲂз̾гласи́сѧ . вѣ́чнᲂмꙋ бᲂ твᲂемꙋ̀ црⷭ҇твїю прише́дшꙋ ѡ҆бнᲂви́тисѧ . тѣ́мъ ти прино́симъ и҆ мы̀ заимѣ́ннагѡ даннᲂсло́вїѧ , правᲂсла́вна бᲂга́тьства бг҃ᲂсло́вїе , ꙗ҆́кѡ бг҃ꙋ и҆ сп҃сꙋ дш҃а́мъ на́шимъ . и҆ ны́нѣ . гла́съ , в҃ . Дне́сь хрⷭ҇то́съ , в̾ виѳлїе́мѣ ражда́етсѧ ѿ дв҃ы . дне́сь без̾нача́льныи начина́етсѧ , и҆ сло́вᲂ вᲂплᲂща́етсѧ . си́лы нбⷭ҇ныѧ ра́дꙋютсѧ , и҆ землѧ̀ съ челᲂвѣ́ки весели́тсѧ . вᲂлсвѝ влⷣцѣ да́ры прино́сѧтъ , па́стырїе рᲂжде́ннᲂмꙋ дивѧ́тсѧ . мы́ же непреста́ннѡ вᲂпїе́мъ . сла́ва въ вы́шнихъ бг҃ꙋ , и҆ на землѝ ми́ръ , в̾ чл҃цѣхъ бл҃гᲂвᲂле́нїе .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , а҆нтиѳо́нъ , а҃ . ѱало́мъ , р҃і . гла́съ , в҃ . И҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ в̾ сᲂвѣ́тѣ пра́выхъ и҆ со́нмѣ . мл҃твами бцⷣы сп҃се спасѝ на́съ . сти́хъ . И҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ в̾ сᲂвѣ́тѣ пра́выхъ и҆ со́нмѣ . мл҃твами бцⷣы сп҃се спасѝ на́съ . сти́хъ . Ве́лїѧ дѣ́ла гдⷭ҇нѧ , и҆зы́скана вᲂ всѣ́хъ во́лѧхъ є҆гѡ̀ . мл҃твами бцⷣы сп҃се спасѝ на́съ . сти́хъ . И҆спᲂвѣ́данїе и҆ велелѣ́пᲂта дѣ́лᲂ є҆гѡ̀ , и҆ пра́вда є҆гѡ̀ пребыва́етъ в̾ вѣ́къ вѣ́ка . мл҃твами бцⷣы сп҃се спасѝ на́съ . сла́ва . мл҃твами бцⷣы сп҃се спасѝ на́съ . и҆ ны́нѣ . мл҃твами бцⷣы сп҃се спасѝ на́съ .

а҆нтиѳо́нъ , в҃ . ѱало́мъ , ра҃і . Бл҃же́нъ мꙋ́жъ бᲂѧ́исѧ гдⷭ҇а , в̾ за́пᲂвѣдехъ є҆гѡ̀ вᲂсхо́щетъ ѕѣлѡ̀ . спасѝ на́съ сн҃е бж҃їи , рᲂди́выисѧ ѿ дв҃ы пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ . сти́хъ . Си́льнᲂ на землѝ бꙋ́детъ сѣ́мѧ є҆гѡ̀ , ро́дъ пра́выхъ бл҃гᲂслᲂви́тсѧ . спасѝ на́съ сн҃е бж҃їи . сти́хъ . Сла́ва и҆ бᲂга́тьствᲂ в̾ дᲂмꙋ̀ є҆гѡ̀ , и҆ пра́вда є҆гѡ̀ пребыва́етъ в̾ вѣ́къ вѣ́ка . спасѝ на́съ сн҃е бж҃їи . сти́хъ . Вᲂсїѧ̀ вᲂ тмѣ̀ свѣ́тъ пра́вымъ , млⷭ҇тивъ и҆ ще́дръ и҆ пра́веденъ . спасѝ на́съ сн҃е бж҃їи . сла́ва , и҆ ны́нѣ . Є҆динᲂро́дныи сн҃е .

а҆нтиѳо́нъ , г҃ . ѱало́мъ , р҃ѳ . гла́съ , д҃ . Речѐ гдⷭ҇ь гдⷭ҇ви мᲂемꙋ̀ , сѣдѝ ѡ҆деснꙋ́ю менѐ , до́ндеже пᲂлᲂжꙋ̀ врагѝ твᲂѧ̀ пᲂд̾но́жїе нᲂга́ма твᲂи́ма . трᲂпа́рь : Ржⷭ҇тво̀ твᲂѐ хрⷭ҇тѐ бж҃е на́шъ . сти́хъ . Речѐ гдⷭ҇ь гдⷭ҇ви мᲂемꙋ̀ , сѣдѝ ѡ҆деснꙋ́ю менѐ , до́ндеже пᲂлᲂжꙋ̀ врагѝ твᲂѧ̀ пᲂд̾но́жїе нᲂга́ма твᲂи́ма . Ржⷭ҇тво̀ твᲂѐ хрⷭ҇тѐ бж҃е на́шъ . сти́хъ . Же́злъ си́лы по́слетъ тѝ гдⷭ҇ь ѿ сїѡ́на , и҆ ѡ҆дᲂлѣ́еши пᲂсредѣ̀ вра́гъ твᲂи́хъ . Ржⷭ҇тво̀ твᲂѐ хрⷭ҇тѐ бж҃е на́шъ . сти́хъ . Съ тᲂбо́ю нача́льствᲂ в̾ де́нь си́лы твᲂеѧ̀ , в̾ свѣ́тлᲂстехъ ст҃ы́хъ твᲂи́хъ . Ржⷭ҇тво̀ твᲂѐ хрⷭ҇тѐ бж҃е на́шъ .

вхо́дъ . И҆́з̾ чрева пре́жде денни́цы рᲂди́хъ тѧ̀ , клѧ́тсѧ гдⷭ҇ь и҆ нераска́етсѧ .

і҆єре́й , пᲂе́тъ : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ сн҃е бж҃їи , рᲂди́выисѧ ѿ дв҃ы пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ .

трᲂпа́рь . гла́съ , д҃ . Ржⷭ҇тво̀ твᲂѐ хрⷭ҇тѐ бж҃е на́шъ , вᲂсїѧ̀ ми́рᲂви свѣ́тъ разꙋ́мныи . в̾ не́мъ бᲂ и҆́же ѕвѣзда́мъ слꙋжа́щїи , ѕвѣздо́ю пᲂꙋча́хꙋсѧ . тебѣ̀ кла́нѧтисѧ сл҃нцꙋ пра́веднᲂмꙋ . и҆ тебѣ̀ вѣ́дѣти свы́ше вᲂсто́къ , гдⷭ҇и сла́ва тебѣ̀ .

сла́ва , и҆ ны́нѣ . кᲂнда́къ . гла́съ , г҃ . Дв҃аѧ дне́сь , пресꙋ́щественагѡ ражда́етъ , и҆ землѧ̀ верте́пъ неприкᲂснᲂве́ннᲂмꙋ прино́ситъ . а҆́нг҃ли съ па́стыри славᲂсло́вѧтъ . вᲂлсви́ же сᲂ ѕвѣздо́ю пꙋтьше́ствꙋютъ . на́съ бᲂ ра́ди рᲂди́сѧ , ѻ҆трᲂча̀ мла́дᲂ превѣ́чныи бг҃ъ .

вмѣ́стᲂ же трист҃а́гѡ : Є҆ли́цы вᲂ хрⷭ҇та̀ крⷭ҇ти́стесѧ , вᲂ хрⷭ҇та̀ ѡ҆блеко́стесѧ , а҆ллилꙋ́їѧ .

прᲂки́менъ , ѱл҃о́мъ дв҃дᲂвъ . Всѧ̀ землѧ̀ да пᲂкло́нит̾тисѧ и҆ пᲂе́тъ тебѣ̀ , да пᲂе́тъ же и҆́мени твᲂемꙋ̀ вы́шнїи . сти́хъ . вᲂскли́кните гдⷭ҇ви всѧ̀ землѧ̀ , по́йте же и҆́мени є҆гѡ̀ . а҆пⷭ҇лъ , къ гала́тѡмъ . зача́лᲂ , с҃ѳ .= а҆ллилꙋ́їѧ . Нб҃са̀ пᲂвѣ́даютъ сла́вꙋ бж҃їю , твᲂре́нїе же рꙋ́кꙋ є҆гѡ̀ вᲂзвѣща́етъ тве́рдь . =сти́хъ . де́нь днѝ ѿрыга́етъ глаго́лъ , и҆ но́щь но́щи вᲂзвѣща́етъ ра́зꙋмъ . є҆ѵⷢ҇а́лїе , ѿ матѳе́ѧ . зача́лᲂ , г҃ . прича́стенъ , и҆збавле́нїе пᲂсла̀ гдⷭ҇ь лю́демъ свᲂи́мъ .

=на трапе́зѣ же , =ᲂу҆тѣше́нїе бра́тїѧмъ дᲂво́льнᲂ же и҆ дх҃о́внᲂ , в̾ пᲂслꙋша́нїе бжⷭ҇твенныхъ писа́нїи . =в̾ =не́мже чте́мъ сло́вᲂ златᲂꙋ́стᲂвᲂ , є҆мꙋ́же нача́лᲂ . дре́вле ᲂу҆́бѡ патрїа́рхъ .

Пᲂдᲂба́етъ же вѣ́дати и҆ ѡ҆ се́мъ . а҆́ще пра́здникъ ржⷭ҇тва̀ хрⷭ҇то́ва слꙋчи́тсѧ бы́ти в̾ сре́дꙋ и҆ пѧто́къ

разрѣша́емъ ᲂу҆́бѡ , мирѧ́нᲂмъ на́ мѧсᲂ и҆́нᲂкᲂмъ же , на сы́ръ и҆ ꙗ҆́ица . и҆ ꙗ҆ди́мъ ᲂу҆́бѡ ѿ ржⷭ҇тва̀ хрⷭ҇то́ва пᲂ всѧ̀ днѝ , дᲂ на́вечерїѧ ст҃а́гѡ бг҃ᲂꙗ҆вле́нїѧ . мирсті́и ᲂу҆́бѡ мѧ́сᲂ . и҆́нᲂцы же сы́ръ и҆ ꙗ҆́ица .