26 декабря: Собор Пресвятыя Богородицы

МЦⷭ҇А ДЕКАБРѦ̀ ВЪ К҃Ѕ ДН҃Ь

сᲂбо́ръ прест҃ы́ѧ бцⷣы , и҆ ст҃а́гѡ і҆ѡ́сифа ѻ҆брꙋ́ченика . =На вече́рни , стихᲂло́гїи небыва́етъ . На гдⷭ҇и вᲂзва́хъ , пᲂста́вимъ , стихо́въ , ѕ҃ . стихѣ́ры , пра́здникꙋ . гла́съ , в҃ . Прїиди́те вᲂзра́дꙋемсѧ гдⷭ҇ви , настᲂѧ́щꙋю та́йнꙋ сказꙋ́юще . средᲂстѣ́нїе граде́жа разрꙋши́сѧ , и҆ пла́меннᲂе ѻ҆рꙋ́жїе плещѝ дае́тъ , и҆ херꙋви́мъ ѿстꙋпа́етъ ѿ́ древа жи́зни , и҆ а҆́зъ ра́йскїѧ пи́щи причаща́юсѧ , ѿ него́же прᲂизгна́нъ бы́хъ преслꙋша́нїѧ ра́ди . неи҆змѣ́нныи бᲂ ѻ҆́бразъ ѻ҆ч҃ь , ѻ҆́бразъ приснᲂсꙋ́щїѧ є҆гѡ̀ , зра́къ раба̀ прїе́млетъ . ѿ неи҆скꙋсᲂбра́чныѧ мт҃ре прᲂше́дъ , непрелᲂже́нїе претерпѣ́въ , є҆́же бᲂ бѣ̀ пребы́сть , бг҃ъ сы́и и҆́стиненъ . и҆ є҆́же не бѣ̀ прїѧ́тъ , чл҃къ бы́въ чл҃кᲂлю́бїѧ ра́ди . тᲂмꙋ̀ вᲂзᲂпїе́мъ , рᲂди́выисѧ ѿ дв҃ы бж҃е пᲂми́лꙋй на́съ . два́жды . Гдⷭ҇ꙋ і҆с҃ꙋ ро́ждьшꙋсѧ ѿ ст҃ы́ѧ дв҃ы , прᲂсвѣти́шасѧ всѧ́ческаѧ . па́стыремъ бᲂ свирѧ́ющимъ , и҆ вᲂлхво́мъ пᲂкланѧ́ющимсѧ , а҆́нг҃лᲂмъ вᲂспѣва́ющимъ , и҆́рᲂдъ мѧтѧ́шесѧ , ꙗ҆́кѡ бг҃ъ во́ плᲂти ꙗ҆ви́сѧ , сп҃съ дш҃а́мъ на́шимъ . =два́жды . Црⷭ҇твᲂ твᲂѐ хрⷭ҇тѐ бж҃е , црⷭ҇твᲂ всѣ́мъ вѣкѡ́мъ , и҆ влⷣчествᲂ твᲂѐ вᲂ всѧ́кᲂмъ ро́дѣ и҆ ро́дѣ . вᲂплᲂти́выисѧ ѿ дх҃а ст҃а́гѡ , и҆ ѿ при́снѡ дв҃ы мр҃і́и въчл҃чивыисѧ . свѣ́тъ на́мъ вᲂзсїѧ̀ хрⷭ҇тѐ бж҃е , твᲂѐ прише́ствїе , свѣ́тъ ѿ́ свѣта , ѻ҆́ч҃ее сїѧ́нїе , всю̀ тва́рь прᲂсвѣти́лъ є҆сѝ . всѧ̀ тва́рь хва́литъ тѧ̀ . ѻ҆́бразъ сла́вы ѻ҆́ч҃и , сы́и , и҆ пре́жде сы́и , вᲂзсїѧ́выи ѿ дв҃ы бж҃е пᲂми́лꙋй на́съ . Что́ти принесе́мъ хрⷭ҇тѐ , ꙗ҆́кѡ ꙗ҆ви́сѧ на землѝ , ꙗ҆́кѡ чл҃къ на́съ ра́ди . ка́ѧждᲂ бᲂ ѿ тᲂбо́ю бы́вшихъ тва́рей , бл҃гᲂдаре́нїе ти прино́ситъ . а҆́нг҃ли , пѣ́нїе . нб҃са̀ , ѕвѣздꙋ̀ . вᲂлсвѝ , да́ры . па́стырїе , чꙋ́дᲂ . землѧ̀ , верте́пъ . пꙋсты́нѧ , ꙗ҆́сли . мы́ же , мт҃ръ дв҃ꙋ . и҆́же пре́жде вѣ́къ бж҃е пᲂми́лꙋй на́съ . сла́ва , и҆ ны́нѣ . гла́съ , ѕ҃ . Сла́ва в̾ вы́шнихъ бг҃ꙋ , и҆ на землѝ ми́ръ , дне́сь прїе́млетъ виѳлїе́мъ сѣдѧ́щагѡ при́снѡ сᲂ ѻ҆ц҃е́мъ . дне́сь а҆́нг҃ли млⷣнца рᲂжде́ннагᲂ бг҃ᲂлѣ́пнѡ славᲂсло́вѧтъ , сла́ва в̾ вы́шнихъ бг҃ꙋ , и҆ на землѝ ми́ръ , в̾ чл҃цѣхъ бл҃гᲂвᲂле́нїе .

вы́хᲂдъ , свѣ́тѣ ти́хїи .= прᲂки́менъ , вели́кїи . гла́съ , з҃ . Кто̀ бг҃ъ ве́лїи ꙗ҆́кѡ бг҃ъ на́шъ , ты̀ є҆сѝ бг҃ъ твᲂрѧ́и чꙋдеса̀ . =сти́хъ . Пᲂказа́лъ є҆сѝ въ лю́дехъ си́лꙋ твᲂю̀ . сти́хъ . И҆ рѣ́хъ ны́нѣ нача́хъ , сѝ и҆змѣ́на десни́ца вы́шнѧгѡ . сти́хъ . Пᲂмѧнꙋ́хъ дѣ́ла гдⷭ҇нѧ , ꙗ҆́кѡ пᲂмѧнꙋ̀ ѿ зача́ла чꙋдеса̀ твᲂѧ̀ . та́же , Кто̀ бг҃ъ ве́лїи ꙗ҆́кѡ бг҃ъ на́шъ , ты̀ є҆сѝ бг҃ъ твᲂрѧ́и чꙋдеса̀ .

На стихо́внѣ , стихѣ́ры , пра́здникꙋ . гла́съ , и҃ . Пресла́внᲂ та́иньствᲂ ᲂу҆стрᲂѧ́етсѧ дне́сь , ѡ҆бнᲂвлѧ́етсѧ є҆стество̀ , и҆ бг҃ъ чл҃къ быва́етъ . є҆́же бѣ̀ пребы́сть , и҆ є҆́же не бѣ̀ прїѧ́тъ . ни смѣше́нїѧ претерпѣ̀ , ни раздѣле́нїѧ .

сти́хъ : и҆́з̾ чрева пре́жде денни́цы рᲂди́хъ тѧ ,꙳ клѧ́тсѧ гдⷭ҇ь и҆ нераска́етсѧ . Гдⷭ҇и в̾ виѳлїе́мъ прїи́де , в̾ верте́пъ всели́сѧ . нб҃ᲂ престо́лъ и҆мѣ́ѧ , въ ꙗ҆́слѣхъ пᲂлᲂжи́сѧ . є҆го́же во́инства ѡ҆крꙋжа́ютъ а҆́нг҃лъ , па́стыремъ пᲂказа́сѧ , да спасе́ши ꙗ҆́кѡ млрⷭ҇дъ ро́дъ на́шъ , сла́ва тебѣ̀ .

сти́хъ : речѐ гдⷭ҇ь гдⷭ҇ви мᲂемꙋ̀ ,꙳ сѣдѝ ѡ҆деснꙋ́ю менѐ . Ка́кѡ и҆з̾рекꙋ̀ вели́кᲂе та́иньствᲂ . беспло́тныи вᲂплᲂща́етсѧ , сло́вᲂ ѡ҆дебелѣва́етъ . не ви́димыи ви́дитсѧ , и҆ не ѡ҆сѧза́емыи каса́етсѧ , и҆ без̾нача́льныи начина́етсѧ . сн҃ъ бж҃їи , сн҃ъ дв҃чь быва́етъ . і҆с҃ъ хрⷭ҇то́съ вчера̀ и҆ дне́сь , то́йже и҆ во́ вѣки .

сла́ва , и҆ ны́нѣ . гла́съ , то́йже . Въ виѳлїе́мъ стеко́шасѧ па́стырїе , и҆́стиннагᲂ вᲂз̾вѣща́юще па́стырѧ . сѣдѧ́щагᲂ на херꙋви́мѣхъ , и҆ лежа́щагᲂ в̾ ꙗ҆́слѣхъ младе́нца зра́кᲂмъ на́съ ра́ди . гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , пра́здникꙋ . гла́съ , д҃ . Ржⷭ҇тво̀ твᲂѐ хрⷭ҇тѐ бж҃е на́шъ , вᲂсїѧ̀ ми́рᲂви свѣ́тъ разꙋ́мныи . в̾ не́мъ бᲂ и҆́же ѕвѣзда́мъ слꙋжа́щїи , ѕвѣздо́ю пᲂꙋча́хꙋсѧ . тебѣ̀ кла́нѧтисѧ сл҃нцꙋ пра́веднᲂмꙋ . и҆ тебѣ̀ вѣ́дѣти свы́ше вᲂсто́къ , гдⷭ҇и сла́ва тебѣ̀ .

На па́вечерницѣ , пᲂ трист҃о́мъ , кᲂнда́къ , пра́здникꙋ . сла́ва , и҆ ны́нѣ . кᲂнда́къ , сᲂбо́рꙋ бцⷣы .

Пᲂлꙋ́нᲂщницꙋ , пᲂе́мъ пᲂ ѻ҆бы́чаю с̾ каѳи́смᲂю . пᲂ а҃ мъ трⷭ҇то́мъ , трᲂпа́рь пра́здникꙋ . пᲂ в҃ мъ трⷭ҇то́мъ , кᲂнда́къ пра́здникꙋ , сла́ва , и҆ ны́нѣ . кᲂнда́къ , сᲂбо́рꙋ бцⷣы . та́же , гдⷭ҇и пᲂми́лꙋй , в҃і . и҆ ѿпꙋ́стъ .= =Мл҃твꙋ же : пᲂмѧнѝ гдⷭ҇и и҆́же в̾ наде́жди . и҆ пᲂмѧ́нника за ᲂу҆пᲂко́й , не глаго́лемъ .

На ᲂу҆́трени , на бг҃ъ гдⷭ҇ь , трᲂпа́рь пра́здникꙋ , гⷤ . =Пᲂ а҃ , стихᲂло́гїи , сѣда́ленъ . гла́съ , а҃ . І҆с҃ꙋ ро́ждьшꙋсѧ в̾ виѳлїе́мѣ і҆ꙋде́йстѣмъ . тва́рь прᲂсвѣти́сѧ пᲂзна́вши зижди́телѧ . диви́шасѧ а҆́нг҃льстїи ли́цы , зрѧ́ще влⷣкꙋ на землѝ зра́къ ра́бїи прїе́мша и҆ ѿ ѻ҆ц҃а неразлꙋ́чна сꙋ́ща . сла́ва вᲂпло́щшемꙋсѧ бг҃ꙋ . сла́ва рᲂжде́нᲂмꙋ на землѝ . сла́ва и҆зво́льшемꙋ спастѝ ро́дъ на́шъ . =сла́ва , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , д҃ . Что̀ чꙋди́шисѧ мр҃і́е ; что̀ ᲂу҆жаса́ешисѧ є҆́же в̾ тебѣ̀ ; ꙗ҆́кѡ безлѣ́тна сн҃а в̾ лѣ́тᲂ рᲂди́хъ речѐ . рᲂжде́нᲂмꙋ зача́тїѧ не навы́кши , бе́з̾ мꙋжа є҆́смь , и҆ ка́кѡ рᲂждꙋ̀ сн҃а ; без̾сѣ́меннᲂ рᲂжде́нїе кто̀ ви́дѣ ; и҆дѣ́же бᲂ бг҃ъ хо́щетъ , пᲂбѣжда́етсѧ є҆стества̀ чи́нъ , ꙗ҆́кᲂже пи́шетъ . хрⷭ҇то́съ рᲂди́сѧ , пре́жде па́дшїи вᲂскр҃си́ти ѻ҆́бразъ . сла́ва , и҆ ны́нѣ , то́йже .

Кано́ны , пра́здникꙋ . і҆рмᲂсы̀ ѻ҆бᲂю̀ кано́нᲂвъ , пᲂ два́жды . а҆ трᲂпарѝ и҆́хъ , на в҃і . катава́сїѧ : Хрⷭ҇то́съ ражда́етсѧ . ѻ҆́ба ли́ка вкꙋ́пѣ .

Пᲂ г҃ , пѣ́сни . кᲂнда́къ , пра́здникꙋ . гла́съ , г҃ . Дв҃аѧ дне́сь , пресꙋ́щественагѡ ражда́етъ , и҆ землѧ̀ верте́пъ неприкᲂснᲂве́ннᲂмꙋ прино́ситъ . а҆́нг҃ли съ па́стыри славᲂсло́вѧтъ . вᲂлсви́ же сᲂ ѕвѣздо́ю пꙋтьше́ствꙋютъ . на́съ бᲂ ра́ди рᲂди́сѧ , ѻ҆трᲂча̀ мла́дᲂ превѣ́чныи бг҃ъ . и҆́кᲂсъ . Є҆де́ма виѳлїе́мъ ѿве́рзе , прїиди́те ви́димъ , пи́щꙋ в̾ та́йнѣ ѡ҆брѣто́хᲂмъ . прїиди́те прїи́мемъ , сꙋ́щаѧ ра́йскаѧ внꙋ́трь верте́па . тꙋ́бᲂ ꙗ҆ви́сѧ ко́рень ненапᲂе́нъ , прᲂзѧба́ѧ ѿпꙋще́нїе . тꙋ̀ ѡ҆брѣ́тесѧ кла́дѧзь неи҆ско́панъ , є҆го́же дв҃дъ пи́ти дре́вле вжада́сѧ . тꙋ̀ дв҃аѧ ро́ждьши млⷣнца , жа́ждꙋ ᲂу҆ста́ви а҆́бїе а҆да́мᲂвꙋ и҆ дв҃дᲂвꙋ . сегѡ̀ ра́ди к̾ немꙋ̀ и҆́демъ гдѣ̀ рᲂди́сѧ , ѻ҆трᲂча̀ мла́дᲂ превѣ́чныи бг҃ъ .

Пᲂ ѕ҃ , пѣ́сни . кᲂнда́къ , сᲂбо́рꙋ бцⷣѣ . гла́съ , ѕ҃ . И҆́же пре́жде денни́цы ѿ ѻ҆ц҃а без̾ мт҃ре рᲂжде́исѧ , на землѝ без̾ ѻ҆ц҃а вᲂплᲂти́сѧ дне́сь и҆з̾ тебѐ . тѣ́мже ѕвѣзда̀ бл҃гᲂвѣствꙋ́етъ вᲂлхво́мъ , а҆́нг҃ли же съ па́стыри пᲂю́тъ , несказа́ннᲂе ржⷭ҇тво̀ твᲂѐ ѡ҆бра́дᲂваннаѧ . и҆́кᲂсъ . Невᲂздѣ́ланныи гро́здъ , вᲂз̾расти́вшїи винᲂгра́дъ . ꙗ҆́кѡ на ро́ждїихъ на рꙋкꙋ̀ нᲂша́ше , и҆ гл҃аше , ты̀ пло́дъ мо́й , ты̀ живо́тъ мо́й . ѿ не́лѣ же разꙋмѣ́хъ , ꙗ҆́кᲂже бѣ́хъ є҆́смь , ты́ ми бг҃ъ . печа́ть бᲂ дв҃ьства мᲂегѡ̀ зрѧ́щи нерѣши́мꙋ , прᲂпᲂвѣ́дꙋю тѧ̀ непрело́жна сло́ва , пло́ть бы́вша . не вѣ́мъ сѣ́мене , вѣ́мъ тѧ̀ рѣши́телѧ тлѣ́нїю . чиста́ бᲂ є҆́смь , тебѣ̀ прᲂше́дшꙋ ѿ менѐ , ꙗ҆́кᲂже бᲂ ѡ҆брѣ́те ѡ҆ста́вилъ є҆сѝ ᲂу҆тро́бꙋ мᲂю̀ , зрѧ́щи ю҆̀ цѣ́лꙋ . сегѡ̀ ра́ди сликᲂствꙋ́етъ всѧ̀ тва́рь вᲂпїю́щи мнѣ̀ , ѡ҆бра́дᲂваннаѧ ра́дꙋисѧ .

На ѳ҃ , пѣ́сни . пᲂе́мъ припѣ́вы пра́здникꙋ . свѣти́ленъ , пра́здникꙋ . Пᲂсѣти́лъ ны є҆́сть свы́ше сп҃съ на́шъ , вᲂсто́къ вᲂсто́кᲂмъ . и҆ сꙋ́щїи вᲂ тмѣ̀ и҆ сѣ́ни ѡ҆брѣто́хᲂмъ и҆́стинꙋ , и҆́бᲂ ѿ дв҃ы рᲂди́сѧ гдⷭ҇ь .= сла́ва , и҆ ны́нѣ , то́йже .=

На хвали́тѣхъ , стⷯры пра́здникꙋ , на д҃ . гла́съ , д҃ . Весели́тесѧ пра́веднїи , нб҃са̀ ра́дꙋйтесѧ , взыгра́йтесѧ го́ры хрⷭ҇тꙋ̀ ро́ждьшꙋсѧ . дв҃аѧ сѣди́тъ херꙋви́мᲂмъ пᲂдо́бѧщисѧ , нᲂсѧ́щи на ло́нѣ бг҃а сло́ва вᲂплᲂще́нна . па́стырїе рᲂжде́нᲂмꙋ дивѧ́тсѧ , вᲂлсвѝ влⷣцѣ да́ры прино́сѧтъ . а҆́нг҃ли вᲂспѣва́юще глаго́лютъ , непᲂстижи́ме гдⷭ҇и сла́ва тебѣ̀ . Бцⷣе дв҃ᲂ ро́ждьшаѧ сп҃са , ᲂу҆праздни́ла є҆сѝ пе́рвꙋю клѧ́твꙋ є҆́ввинꙋ . ꙗ҆́кѡ мт҃и бы́сть бл҃гᲂвᲂле́нїѧ ѻ҆́ч҃а , нᲂсѧ́щи на ло́нѣ бж҃їе сло́вᲂ вᲂплᲂще́ннᲂе . нетерпи́тъ та́йна и҆спыта́нїѧ . вѣ́рᲂю є҆ди́нᲂю сїю̀ прᲂсла́вимъ , зᲂвꙋ́ще с̾ тᲂбо́ю и҆ глаго́люще , неи҆зрече́нне гдⷭ҇и сла́ва тебѣ̀ . Прїиди́те вᲂспᲂе́мъ мт҃рь сп҃сᲂвꙋ , пᲂ ржⷭ҇твѣ̀ па́ки ꙗ҆́вльшꙋсѧ дв҃ꙋ . ра́дꙋисѧ гра́де ѡ҆дш҃евле́ныи цр҃ѧ и҆ бг҃а , в̾ не́мже хрⷭ҇то́съ по́живъ спасе́нїе сᲂдѣ́ла . с̾ гаврїи́лᲂмъ вᲂспᲂе́мъ , с̾ па́стыри прᲂсла́вимъ , зᲂвꙋ́ще , бцⷣе мᲂлѝ и҆з̾ тебѐ вᲂплᲂще́ннагѡ спасти́сѧ на́мъ . Ѻ҆ц҃ъ бл҃гᲂи҆зво́лилъ є҆́сть , и҆ сло́вᲂ пло́ть бы́сть , и҆ дв҃аѧ рᲂдѝ бг҃а вᲂчл҃чьшасѧ . ѕвѣзда̀ вᲂзвѣща́етъ , вᲂлсвѝ пᲂкланѧ́ютсѧ . па́стырїе чꙋдѧ́тсѧ и҆ тва́рь ра́дꙋетсѧ . сла́ва . гла́съ , ѕ҃ . Дне́сь неви́димᲂе є҆стество̀ , чл҃кѡмъ ѿ дв҃ы сᲂвᲂкꙋплѧ́етсѧ . дне́сь не и҆скꙋ́снᲂе сꙋщество̀ , в̾ виѳлїе́мѣ пелена́ми ѡ҆бвива́етсѧ . дне́сь бг҃ъ ѕвѣздо́ю вᲂлхвы̀ в̾ пᲂклᲂне́нїе приво́дитъ , прᲂвᲂзвѣща́ѧ свᲂѐ тридне́внᲂе пᲂгребе́нїе , ꙗ҆́кѡ в̾ зла́тѣ и҆ смѵ́рнѣ и҆ лива́нѣ . є҆го́же ра́ди пᲂе́мъ , вᲂплᲂти́выисѧ ѿ дв҃ы хрⷭ҇тѐ бж҃е , спасѝ дш҃а на́ша . и҆ ны́нѣ . гла́съ , в҃ . Дне́сь хрⷭ҇то́съ , в̾ виѳлїе́мѣ ражда́етсѧ ѿ дв҃ы . дне́сь без̾нача́льныи начина́етсѧ , и҆ сло́вᲂ вᲂплᲂща́етсѧ . си́лы нбⷭ҇ныѧ ра́дꙋютсѧ , и҆ землѧ̀ съ челᲂвѣ́ки весели́тсѧ . вᲂлсвѝ влⷣцѣ да́ры прино́сѧтъ , па́стырїе рᲂжде́ннᲂмꙋ дивѧ́тсѧ . мы́ же непреста́ннѡ вᲂпїе́мъ . сла́ва в̾ вы́шнихъ бг҃ꙋ , и҆ на землѝ ми́ръ , в̾ чл҃цѣхъ бл҃гᲂвᲂле́нїе .

Славᲂсло́вїе вели́кᲂе .

Пᲂ трист҃о́мъ , трᲂпа́рь , пра́здникꙋ . є҆ктенїѝ . и҆ ѿпꙋ́стъ . и҆ ча́съ , а҃ . и҆ кᲂне́чныи ѿпꙋ́стъ .

На часѣ́хъ , трᲂпа́рь , пра́здникꙋ . кᲂнда́къ , сᲂбо́рꙋ бцⷣѣ .

На литꙋргі́и , бл҃же́нна , ѿ кано́на пра́здникꙋ , пѣ́снь , г҃ ѧ , и҆ ѕ҃ ѧ , на и҃ .

Пᲂ вхо́дѣ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , сᲂбо́рꙋ бцⷣѣ .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ ны́нѣ бл҃жа́тъ мѧ всѝ ро́ди . а҆пⷭ҇лъ , къ є҆вре́ѡмъ . заⷱ҇ , т҃ѕ . а҆ллилꙋ́їѧ . Вᲂскрⷭ҇нѝ гдⷭ҇и в̾ пᲂко́й тво́й , ты̀ и҆ кїѡ́тъ ст҃ы́ни твᲂеѧ̀ .= сти́хъ . клѧ́тсѧ гдⷭ҇ь дв҃дꙋ и҆́стиннᲂю , и҆ не ѿве́ржетсѧ є҆ѧ̀ . =є҆ѵⷢ҇а́лїе , ѿ матѳе́ѧ . заⷱ҇ , д҃ . прича́стенъ , и҆збавле́нїе пᲂсла̀ гдⷭ҇ь лю́демъ свᲂи́мъ .

А҆́ще слꙋчи́тсѧ декабрѧ̀ к҃ѕ дн҃ь , в̾ нлⷣю . пᲂе́мъ ѿда́нїе ржⷭ҇тва̀ хрⷭ҇то́ва , си́це := Въ сꙋбо́тꙋ ве́черъ , на ма́лѣй вече́рни пᲂе́мъ пᲂ ѻ҆бы́чаю . На вели́цѣй вече́рни , пᲂ ѻ҆бы́чнᲂй каѳи́смѣ , на гдⷭ҇и вᲂзва́хъ , стихѣ́ры , вᲂскрⷭ҇ны , г҃ . и҆ пра́здникꙋ , д҃ . гла́съ , в҃ . Прїиди́те вᲂзра́дꙋемсѧ гдⷭ҇ви , настᲂѧ́щꙋю та́йнꙋ сказꙋ́юще . средᲂстѣ́нїе граде́жа разрꙋши́сѧ , и҆ пла́меннᲂе ѻ҆рꙋ́жїе плещѝ дае́тъ , и҆ херꙋви́мъ ѿстꙋпа́етъ ѿ́ древа жи́зни , и҆ а҆́зъ ра́йскїѧ пи́щи причаща́юсѧ , ѿ него́же прᲂизгна́нъ бы́хъ преслꙋша́нїѧ ра́ди . не и҆змѣ́нныи бᲂ ѻ҆́бразъ ѻ҆ч҃ь , ѻ҆́бразъ приснᲂсꙋ́щїѧ є҆гѡ̀ , зра́къ раба̀ прїе́млетъ . ѿ неи҆скꙋсᲂбра́чныѧ мт҃ре прᲂше́дъ , непрелᲂже́нїе претерпѣ́въ , є҆́же бᲂ бѣ̀ пребы́сть , бг҃ъ сы́и и҆́стиненъ . и҆ є҆́же не бѣ̀ прїѧ́тъ , чл҃къ бы́въ чл҃кᲂлю́бїѧ ра́ди . тᲂмꙋ̀ вᲂзᲂпїе́мъ , рᲂди́выисѧ ѿ дв҃ы бж҃е пᲂми́лꙋй на́съ . Г=дⷭ҇ꙋ і҆с҃ꙋ ро́ждьшꙋсѧ ѿ ст҃ы́ѧ дв҃ы , прᲂсвѣти́шасѧ всѧ́ческаѧ . па́стыремъ бᲂ свирѧ́ющимъ , и҆ вᲂлхво́мъ пᲂкланѧ́ющимсѧ , а҆́нг҃лᲂмъ вᲂспѣва́ющимъ , и҆́рᲂдъ мѧтѧ́шесѧ , ꙗ҆́кѡ бг҃ъ во́ плᲂти ꙗ҆ви́сѧ , сп҃съ дш҃а́мъ на́шимъ . Црⷭ҇твᲂ твᲂѐ хрⷭ҇тѐ бж҃е , црⷭ҇твᲂ всѣ́мъ вѣкѡ́мъ , и҆ влⷣчествᲂ твᲂѐ вᲂ всѧ́кᲂмъ ро́дѣ и҆ ро́дѣ . вᲂплᲂти́выисѧ ѿ дх҃а ст҃а́гѡ , и҆ ѿ при́снѡ дв҃ы мр҃і́и въчл҃чивыисѧ . свѣ́тъ на́мъ вᲂзсїѧ̀ хрⷭ҇тѐ бж҃е , твᲂѐ прише́ствїе , свѣ́тъ ѿ́ свѣта , ѻ҆́ч҃ее сїѧ́нїе , всю̀ тва́рь прᲂсвѣти́лъ є҆сѝ . всѧ̀ тва́рь хва́литъ тѧ̀ . ѻ҆́бразъ сла́вы ѻ҆́ч҃и , сы́и , и҆ пре́жде сы́и , вᲂзсїѧ́выи ѿ дв҃ы бж҃е пᲂми́лꙋй на́съ . Что́ти принесе́мъ хрⷭ҇тѐ , ꙗ҆́кѡ ꙗ҆ви́сѧ на землѝ , ꙗ҆́кѡ чл҃къ на́съ ра́ди . ка́ѧждᲂ бᲂ ѿ тᲂбо́ю бы́вшихъ тва́рей , бл҃гᲂдаре́нїе ти прино́ситъ . а҆́нг҃ли , пѣ́нїе . нб҃са̀ , ѕвѣздꙋ̀ . вᲂлсвѝ , да́ры . па́стырїе , чꙋ́дᲂ . землѧ̀ , верте́пъ . пꙋсты́нѧ , ꙗ҆́сли . мы́ же , мт҃ръ дв҃ꙋ . и҆́же пре́жде вѣ́къ бж҃е пᲂми́лꙋй на́съ .

и҆ ст҃ы́мъ бг҃ᲂѻ҆ц҃е́мъ , г҃ . гла́съ , а҃ . поⷣ . нбⷭ҇нымъ чино́мъ .= Б=г҃ᲂѻ҆ц҃а всѝ вᲂсхва́лимъ ,꙳ дв҃да цр҃ѧ ,꙳ и҆з̾ него́ бᲂ про́йде же́злъ дв҃аѧ .꙳ и҆ и҆з̾ неѧ̀ вᲂсїѧ̀ цвѣ́тъ хрⷭ҇то́съ ,꙳ и҆ а҆да́ма сᲂ є҆́ввᲂю ,꙳ ѿ тлѝ и҆зведѐ ꙗ҆́кѡ милᲂсе́рдъ . Прᲂро́ческаѧ рече́нїѧ ви́дѣвъ в̾ ста́рᲂсти ꙗ҆́вѣ , і҆ѡ́сифъ ѻ҆брꙋ́ченикъ ,꙳ прᲂѧвле́ннѡ сᲂверше́нна ,꙳ ѻ҆брꙋче́нїе вᲂи́стиннꙋ стра́ннѡ .꙳ ѿкрᲂве́нїе а҆́нг҃лѡмъ прїе́мъ ,꙳ бг҃ᲂви сла́ва вᲂпїю́щимъ ,꙳ на землѝ ми́ръ низ̾пᲂсла́вшемꙋ . Бра́та бж҃їѧ всѝ вᲂсхва́лимъ ,꙳ ꙗ҆́кѡ ст҃лѧ сꙋ́ща .꙳ мꙋче́нїемъ же па́ки прᲂсїѧ́вша до́блественѣ .꙳ є҆го́же мл҃твами і҆с҃е бж҃е на́шъ ,꙳ и҆́же в̾ верте́пѣ и҆ в̾ пелена́хъ пᲂви́всѧ ,꙳ спасѝ всѧ̀ пᲂю́щїѧ тѧ̀ .

сла́ва . гла́съ , ѕ҃ . Па́мѧть сᲂтвᲂрѧ́емъ дв҃дꙋ и҆ і҆а́кѡвꙋ , бл҃гᲂчести́вагѡ цр҃ѧ и҆ прᲂро́ка , и҆ а҆пⷭ҇ла пе́рвагѡ є҆пкⷭ҇па . тѣ́хъ бᲂ ᲂу҆че́ньми льстѝ и҆змѣ́ньшесѧ , хрⷭ҇та̀ славᲂсло́вимъ , и҆́же ѿ дв҃ы вᲂсїѧ́вшагᲂ . и҆́же и҆ вᲂпло́щшагᲂсѧ , спастѝ дш҃а на́ша . и҆ ны́нѣ , пра́здникꙋ . гла́съ , в҃ . А҆́вгꙋстꙋ є҆динᲂнача́льствꙋющꙋ на землѝ , мнᲂгᲂнача́лїе челᲂвѣ́кѡмъ преста̀ . и҆ тебѣ̀ въчелᲂвѣ́чшꙋсѧ ѿ чи́стыѧ , мнᲂгᲂбо́жїе и҆́дᲂлᲂмъ ᲂу҆праздни́сѧ . пᲂд̾ є҆ди́нѣмъ црⷭ҇твᲂмъ ми́рскимъ , гра́ди бы́ша . и҆ в̾ є҆ди́нᲂ влⷣчествᲂ бжⷭ҇тва̀ , ꙗ҆зы́цы вѣ́рᲂваша . ѡ҆писа́шасѧ лю́дїе , пᲂвелѣ́нїемъ кесаре́вымъ , написа́хᲂмсѧ вѣ́рнїи и҆́менемъ бжⷭ҇тва̀ , тебѐ въчелᲂвѣ́чшасѧ бг҃а на́шегѡ . ве́лїѧ твᲂѧ̀ ми́лᲂсть , гдⷭ҇и сла́ва тебѣ̀ .

вы́хᲂдъ . свѣ́те ти́хїи .= прᲂки́менъ , дню̀ .=

На литі́и стихѣ́ры , пра́здникꙋ , литі́йныѧ . и҆ стихо́венныѧ . сла́ва . гла́съ , є҃ . Вᲂлсвѝ перси́дстїи цр҃їе , пᲂзна́вше ꙗ҆́вѣ , и҆́же на землѝ ро́ждьшагᲂсѧ цр҃ѧ нбⷭ҇нагᲂ , ѿ свѣ́тлыѧ ѕвѣзды̀ вᲂди́ми , дᲂстиго́ша в̾ виѳлїе́мъ , да́ры нᲂсѧ́ще и҆збра́нныѧ , зла́тᲂ и҆ лива́нъ и҆ смѵ́рнꙋ . и҆ па́дше пᲂклᲂни́шасѧ , ви́дѣша бᲂ в̾ верте́пѣ , млⷣнца лежа́ща без̾лѣ́тнагѡ . и҆ ны́нѣ . гла́съ , ѕ҃ . Ликꙋ́ютъ а҆́нг҃ли всѝ на́ нб҃си , и҆ ра́дꙋютсѧ дне́сь . и҆гра́етъ же всѧ̀ тва́рь , ро́ждьшагᲂсѧ ра́ди в̾ виѳлїе́мѣ сп҃са и҆ гдⷭ҇а . ꙗ҆́кѡ всѧ́каѧ ле́сть и҆́дᲂльскаѧ преста̀ , и҆ црⷭ҇твꙋетъ хрⷭ҇то́съ во́ вѣки .

На стихо́внѣ , вᲂ ѻ҆кта́и гла́сꙋ . сла́ва . гла́съ , ѕ҃ . Ст҃лемъ па́мѧть , и҆ цр҃е́мъ держа́ва , и҆ весе́лїе бы́сть ржⷭ҇тво̀ твᲂѐ . и҆ в̾ не́мъ хва́лѧщесѧ глаго́лемъ , ѻ҆́ч҃е на́шъ и҆́же є҆сѝ на́ нб҃сѣхъ , да ст҃и́тсѧ и҆́мѧ твᲂѐ чл҃кᲂлю́бче . и҆ нн҃ѣ . гла́съ , д҃ . Въ верте́пъ всели́лсѧ є҆сѝ хрⷭ҇тѐ бж҃е , и҆ ꙗ҆́сли тѧ̀ вᲂспрїѧ́ша . па́стырїе же и҆ вᲂлсвѝ пᲂклᲂни́шасѧ . тᲂгда̀ ᲂу҆́бѡ прᲂро́ческїѧ и҆спо́лнишасѧ про́пᲂвѣди . и҆ а҆́нг҃льскїѧ си́лы дивлѧ́хꙋсѧ , вᲂпїю́ще и҆ гл҃юще , сла́ва схᲂжде́нїю твᲂемꙋ̀ , є҆ди́не чл҃кᲂлю́бче .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь : бцⷣе дв҃ᲂ ра́дꙋисѧ .= и҆ пра́здникꙋ . и҆ ст҃ы́мъ . гла́съ , в҃ . Б=л҃гᲂвѣствꙋ́й і҆ѡ́сифе дв҃дꙋ чꙋдеса̀ бг҃ᲂѻ҆ц҃ꙋ , дв҃ꙋю бᲂ ви́дѣлъ є҆сѝ ражда́ющꙋ . с̾ па́стыри славᲂсло́вилъ є҆сѝ , с̾ вᲂлхвы̀ пᲂклᲂни́лсѧ є҆сѝ , а҆́нг҃лѡмъ вѣ́сть прїѧ́лъ є҆сѝ . мᲂлѝ хрⷭ҇та̀ бг҃а , да спасе́тъ дш҃а на́ша .

А҆́ще ли нѣ́сть бдѣ́нїѧ , трᲂпа́рь вᲂскрⷭ҇нъ . сла́ва , ст҃ы́мъ . и҆ ны́нѣ , пра́здникꙋ .

На па́вечерницѣ , пᲂ трист҃о́мъ , кᲂнда́къ , ст҃ы́мъ . сла́ва , и҆ ны́нѣ , кᲂнда́къ , пра́здникꙋ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва , ст҃ы́мъ . и҆ ны́нѣ , пра́здникꙋ . Каѳи́смы ѡ҆бы́чны и҆ пᲂ ни́хъ сѣда́льны вᲂскрⷭ҇ны , и҆ боⷢ҇ , и҆́хъ . Пᲂ непᲂро́чнахъ , трᲂпарѝ и҆́хъ , и҆ ѵ҆пако́й , гла́сꙋ . степе́нна , гла́сꙋ . прᲂки́менъ . и҆ всѧ́кᲂ дыха́нїе . є҆ѵⷢ҇а́лїе , вᲂскрⷭ҇нᲂ . и҆ вᲂскрⷭ҇нїе хрⷭ҇то́вᲂ . ѱл҃о́мъ , н҃ . и҆ стⷯра , вᲂскрⷭ҇на . Кано́нъ вᲂскрⷭ҇нъ сᲂ і҆рмᲂсо́мъ , на д҃ . и҆ пра́здникꙋ ѻ҆́ба кано́на на́ ѕ҃ . и҆ ст҃ы́мъ , на д҃ . гла́съ , д҃ . пѣ́снь , а҃ . і҆рмо́съ . Вᲂспᲂю́ ти гдⷭ҇и бж҃е . запѣ́въ : Ст҃і́и бг҃ᲂѻ҆ц҃ы , мᲂли́те бг҃а ѡ҆ на́съ .= Є҆ли́цы ржⷭ҇тво̀ сᲂтвᲂрѧ́емъ вᲂпло́щшагᲂсѧ на́съ ра́ди , ра́дᲂсть вᲂспᲂе́мъ , і҆а́кѡва бж҃їѧ бра́та . и҆ дв҃да бг҃ᲂѻ҆ц҃а . Сла́ва в̾ вы́шнихъ ли́цы а҆́нг҃льстїи , въ виѳлїе́мѣ і҆ѡ́сифꙋ пред̾ста́ша глаго́люще . съ ни́ми же бл҃гᲂизво́лившагᲂ вᲂплᲂти́тисѧ вᲂспᲂе́мъ . =сла́ва . Дв҃де бг҃ᲂѻ҆́ч҃е , съ гꙋ́сльми , и҆́же ѿ ко́рене і҆єссе́ѡва вᲂпло́щшагᲂсѧ гдⷭ҇а , і҆а́кѡва пра́веднагѡ привле́къ вᲂспо́й . и҆ ны́нѣ , боⷢ҇ . Вᲂспᲂю́ ти гдⷭ҇и бж҃е мᲂй , ꙗ҆́кѡ рᲂди́сѧ и҆з̾ мт҃ре дв҃ы ст҃ы́ѧ . и҆ сїю̀ пᲂказа́лъ є҆сѝ наде́ждꙋ дш҃а́мъ на́шимъ . катава́сїѧ , пра́здникꙋ , і҆рмᲂсы̀ ѻ҆бᲂи́хъ кано́нᲂвъ .

пѣ́снь , г҃ . і҆рмо́съ . Оу҆твержа́ѧ и҆ гро́мъ . Ро́ждьшагᲂсѧ пло́тїю ѿ дв҃ы без̾ сѣ́мене хрⷭ҇та̀ бг҃а , сᲂ а҆́нг҃лы всѝ вᲂспᲂе́мъ , сла́ва в̾ вы́шнихъ бг҃ꙋ взыва́юще . Всепра́здньственыи , и҆́же на́съ ра́ди и҆стᲂщи́вшагᲂсѧ вѣ́рнїи пра́здникъ , съ дв҃дᲂмъ же и҆ і҆а́кѡвᲂмъ , пѣ́сньми пᲂ дᲂстᲂѧ́нїю пᲂчте́мъ . сла́ва . Ꙗ҆́кѡ женихꙋ̀ ѿ черто́га и҆з̾ мт҃рьнїихъ лᲂже́снъ , дв҃дъ речѐ гдⷭ҇ꙋ и҆зы́ти . є҆го́же ны́нѣ сᲂ і҆а́кѡвᲂмъ вᲂспᲂе́мъ . и҆ ны́нѣ , боⷢ҇ . Без̾невѣ́стнꙋю бцⷣꙋ мр҃і́ю вᲂспᲂе́мъ , тᲂѧ́ бᲂ ра́ди на́мъ вᲂсїѧ̀ пра́веднᲂе сл҃нце .

кᲂнда́къ . гла́съ , г҃ . Весе́лїѧ дне́сь дв҃дъ и҆спᲂлнѧ́етсѧ бжⷭ҇твеныи , і҆ѡ́сифъ же хвалꙋ̀ сᲂ і҆а́кѡвᲂмъ прино́сѧтъ . вѣне́цъ бᲂ сро́дствᲂмъ хрⷭ҇то́вымъ прїе́мше ра́дꙋютсѧ . и҆ неи҆зрече́ннѡ на землѝ ро́ждьшагᲂсѧ вᲂспѣва́ютъ . ще́дрыи спаса́й тебѐ чтꙋ́щихъ . и҆́кᲂсъ . Неи҆зрече́ннымъ сᲂвѣ́тᲂмъ ражда́етсѧ пло́тїю , беспло́тныи . ѡ҆писꙋ́етсѧ ны́нѣ тѣ́лᲂмъ , неѡ҆пи́санныи . и҆ спаса́етъ непрело́жнѡ ѻ҆́ба сꙋщества̀ . нача́лᲂ прїе́млетъ , и҆́же є҆стество́мъ без̾нача́льныи , и҆ є҆ди́нъ без̾лѣ́тенъ , зри́тсѧ младе́нецъ пресᲂверше́нныи . но́ситсѧ рꙋка́ма , нᲂсѧ́и всѧ́ческаѧ . тѣ́мже и҆́же тᲂгѡ̀ сро́дствᲂмъ пᲂчте́нныхъ , ꙗ҆́кѡ бг҃ъ вѣнча́етъ свᲂи́мъ ржⷭ҇тво́мъ . и҆́хже прᲂславлѧ́юще вѣ́рᲂю , немо́лчнѡ вᲂпїе́мъ , ще́дрыи спасѝ тебѐ чтꙋ́щихъ .

сѣда́ленъ . гла́съ , г҃ . І҆ѡ́сифа пра́веднагᲂ дв҃ыѧ ѻ҆брꙋ́ченика с̾ дв҃дᲂмъ и҆ і҆а́кѡва дᲂстᲂдо́лжнѡ вᲂспᲂе́мъ . сі́и бᲂ пра́веднᲂю хᲂди́вше стезе́ю , дᲂстиго́ша нбⷭ҇ныѧ ѻ҆би́тели дᲂсто́йнѡ . ликꙋ́юще сᲂ а҆́нг҃лы , на́мъ про́сѧтъ сᲂгрѣше́нїемъ ѡ҆ставле́нїѧ . сла́ва , и҆ ны́нѣ . гла́съ , то́йже . Дв҃аѧ рᲂдѝ твᲂрца̀ всѧ́ческихъ , и҆ вᲂлсвѝ грѧдꙋ́тъ семꙋ̀ пло́тїю пᲂклᲂни́тисѧ . чл҃цы сᲂ а҆́нг҃лы славᲂсло́вѧтъ . верте́пъ же и҆ ꙗ҆́сли дарᲂно́сѧтъ , вᲂспѣва́юще ро́ждьшагᲂсѧ , ѻ҆трᲂча̀ мла́дᲂ превѣ́чнагᲂ бг҃а .

пѣ́снь , д҃ . і҆рмо́съ . Твᲂегѡ̀ на землѝ ꙗ҆вле́нїѧ . Съ вᲂлхвы̀ ро́ждьшемꙋсѧ пᲂклᲂни́мсѧ . и҆ сᲂ а҆́нг҃лы и҆ і҆ѡ́сифᲂмъ , ликꙋ́емъ , бг҃ᲂпᲂдо́бнѡ взыва́юще , сла́ва в̾ вы́шнихъ хрⷭ҇тꙋ̀ бг҃ꙋ . Црⷭ҇твꙋѧи всѣ́ми царьмѝ хрⷭ҇то́съ , по́ плᲂти ѿ сѣ́мене дв҃дᲂва рᲂжде́исѧ , и҆збра́ннагѡ і҆а́кѡва прїѧ́тъ бра́та , ꙗ҆́кᲂже и҆зво́ли . сла́ва . И҆́же ѿ дв҃ы бг҃ъ ꙗ҆́вльсѧ пло́тїю , спрᲂсла́ви па́мѧть ва́шꙋ ст҃і́и , а҆пⷭ҇лѡмъ лꙋ́чшїи і҆а́кѡве , и҆ дв҃де всебл҃же́нне . и҆ ны́нѣ , боⷢ҇ . Херꙋви́мскихъ чино́въ преи҆мꙋ́щи , и҆ бг҃а на рꙋкꙋ̀ нᲂси́ма , съ пло́тїю пᲂне́сши , ра́дꙋисѧ бцⷣе без̾невѣ́стнаѧ .

пѣ́снь , є҃ . і҆рмо́съ . Вᲂз̾сїѧ́выи свѣ́тъ . И҆́же ѿ дв҃ы чи́стыѧ бл҃гᲂвᲂли́выи рᲂди́тисѧ , бг҃ъ вᲂплᲂща́емь , сла́ва ти сла́ва ти , і҆ѡ́сифъ вᲂпїѧ́ше . И҆́же ѿ дв҃ы вᲂпло́щьсѧ и҆ па́мѧть ᲂу҆ѧсни́въ , дв҃да и҆ і҆а́кѡва , сла́ва ти сла́ва ти , і҆с҃е сн҃е бж҃їи . сла́ва . Є҆го́же прᲂро́къ дв҃дъ до́ждь на рꙋно̀ нарица́ше бг҃ᲂдх҃нᲂве́ннѡ , і҆а́кѡвъ прᲂпᲂвѣ́да сн҃а бж҃їѧ . и҆ ны́нѣ , боⷢ҇ . А҆́нг҃лѡвъ гла́съ немо́лчнѡ тва́рь прино́ситъ ти дв҃ᲂ , ра́дꙋисѧ мт҃и чи́стаѧ , і҆с҃а сн҃а бж҃їѧ .

пѣ́снь , ѕ҃ . і҆рмо́съ . Вᲂзᲂпи́лъ прᲂѡбразꙋ́ѧ . Пред̾стᲂѧ́ще ᲂу҆жаса́ющесѧ чи́ни нбⷭ҇ныѧ верте́пꙋ , и҆ ржⷭ҇твꙋ̀ пречи́стᲂмꙋ вᲂспѣ́ша немо́лчнѡ , сла́ва в̾ вы́шнихъ бг҃ꙋ вᲂспѣва́юще . Сѣ́лъ є҆сѝ на престо́лѣ , ꙗ҆́кᲂже клѧ́тсѧ влⷣкᲂ прᲂро́кꙋ дв҃дꙋ , ѿ плᲂда̀ чре́ва є҆гѡ̀ прᲂше́дъ . і҆а́кѡвꙋ же цр҃ко́вныи пре́далъ є҆сѝ прⷭ҇то́лъ хрⷭ҇тѐ . сла́ва . Цр҃ь ᲂу҆́бѡ дв҃дъ и҆ прᲂро́къ чꙋ́денъ , и҆ пра́ѻ҆ц҃ъ пᲂказа́сѧ бжⷭ҇твенагѡ вᲂплᲂще́нїѧ . пе́рвыи же є҆пкⷭ҇пъ ᲂу҆чени́къ і҆а́кѡвъ і҆с҃ᲂвъ . и҆ ны́нѣ , боⷢ҇ . Мо́лимсѧ , ѡ҆ рабѣ́хъ свᲂи́хъ дв҃ᲂ бцⷣе , и҆з̾ тебѐ вᲂплᲂще́ннагᲂ мᲂлѝ , ꙗ҆́кѡ тѧ̀ є҆ди́нꙋ пред̾ста́тельницꙋ на́шꙋ свѣ́мы .

кᲂнда́къ . гла́съ , г҃ . Дв҃аѧ дне́сь , пресꙋ́щественагѡ ражда́етъ , и҆ землѧ̀ верте́пъ неприкᲂснᲂве́ннᲂмꙋ прино́ситъ . а҆́нг҃ли съ па́стыри славᲂсло́вѧтъ . вᲂлсви́ же сᲂ ѕвѣздо́ю пꙋтьше́ствꙋютъ . на́съ бᲂ ра́ди рᲂди́сѧ , ѻ҆трᲂча̀ мла́дᲂ превѣ́чныи бг҃ъ . и҆́кᲂсъ . Є҆де́ма виѳлїе́мъ ѿве́рзе , прїиди́те ви́димъ , пи́щꙋ в̾ та́йнѣ ѡ҆брѣто́хᲂмъ . прїиди́те прїи́мемъ , сꙋ́щаѧ ра́йскаѧ внꙋ́трь верте́па . тꙋ́бᲂ ꙗ҆ви́сѧ ко́рень ненапᲂе́нъ , прᲂзѧба́ѧ ѿпꙋще́нїе . тꙋ̀ ѡ҆брѣ́тесѧ кла́дѧзь неи҆ско́панъ , є҆го́же дв҃дъ пи́ти дре́вле вжада́сѧ . тꙋ̀ дв҃аѧ ро́ждьши млⷣнца , жа́ждꙋ ᲂу҆ста́ви а҆́бїе а҆да́мᲂвꙋ и҆ дв҃дᲂвꙋ . сегѡ̀ ра́ди к̾ немꙋ̀ и҆́демъ гдѣ̀ рᲂди́сѧ , ѻ҆трᲂча̀ мла́дᲂ превѣ́чныи бг҃ъ .

пѣ́снь , з҃ . і҆рмо́съ . А҆враа́мстїи дре́вле . Па́че сло́ва ржⷭ҇твꙋ̀ бцⷣы мр҃і́и , ли́цы а҆́нг҃льстїи дивѧ́щесѧ , і҆ѡ́сифꙋ вᲂпїѧ́хꙋ , в̾ вы́шнихъ сла́ва , и҆ на землѝ ми́ръ . Невѣ́ститель ᲂу҆́бѡ дв҃дъ , черто́жникъ же бжⷭ҇твеныѧ цр҃кве і҆а́кѡвъ бы́вше . глаго́лахꙋ , вᲂплᲂще́исѧ на́съ ра́ди бж҃е блгⷭ҇ве́нъ є҆сѝ . сла́ва . И҆́же вᲂ прᲂро́цѣхъ цр҃ь , и҆ въ цр҃ѣ́хъ прᲂро́къ , сᲂ і҆а́кѡвᲂмъ бг҃ᲂмꙋ́дрымъ и҆ на́мъ вᲂспо́й , вᲂплᲂще́исѧ на́съ ра́ди хрⷭ҇тѐ блгⷭ҇ве́нъ є҆сѝ . и҆ ны́нѣ , боⷢ҇ . Въ неѡ҆па́льнѣй кꙋпинѣ̀ и҆ рᲂсᲂда́внѣй пещѝ , ты̀ пе́рвᲂ написа́вшисѧ мт҃и чи́стаѧ . без̾ сѣ́мене рᲂдила̀ є҆сѝ вᲂплᲂще́нна бг҃а , при́снѡ бл҃гᲂслᲂве́наѧ .

пѣ́снь , и҃ . і҆рмо́съ . Цр҃ѧ хрⷭ҇та̀ бг҃а . Вᲂпло́щшагᲂсѧ хрⷭ҇та̀ , є҆го́же славᲂсло́виша нбⷭ҇ныѧ си́лы . і҆ѡ́сифъ ѻ҆брꙋ́ченикъ непреста́ннѡ вᲂспѣва́етъ , всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки . Вᲂпло́щшагᲂсѧ хрⷭ҇та̀ , є҆го́же прᲂречѐ дв҃дъ бг҃ᲂѻ҆ц҃ъ . и҆ лю́демъ прᲂпᲂвѣ́да і҆а́кѡвъ вᲂпїѧ̀ , всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . И҆́же ѿ дв҃ы ро́ждьшагᲂсѧ хрⷭ҇та̀ , и҆ вᲂз̾вели́чивша дв҃дᲂвꙋ и҆ і҆а́кѡвлю сщ҃е́ннꙋю па́мѧть , ꙗ҆́кѡ дрꙋ́га є҆гѡ̀ , всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . Цр҃ѧ хрⷭ҇та̀ є҆го́же на́мъ рᲂдѝ бцⷣе мр҃і́ѧ , и҆ пᲂ ржⷭ҇твѣ̀ пребы́сть дв҃ᲂю чⷭ҇таѧ , всѧ̀ дѣ́ла гдⷭ҇а по́йте , и҆ превᲂзнᲂси́те є҆гѡ̀ во́ вѣки . та́же , пᲂе́мъ , честнѣ́йшꙋю .

пѣ́снь , ѳ҃ . і҆рмо́съ . Сᲂтвᲂрѝ держа́вꙋ мы́шцею . Ро́ждьшемꙋсѧ ѿ дв҃ы всѧ̀ тва́рь тре́петᲂмъ пᲂслꙋжѝ . нб҃са̀ ᲂу҆́бѡ ѕвѣздо́ю . землѧ́ же ꙗ҆́сльми , гᲂра̀ верте́пᲂмъ . вᲂлсвѝ дармѝ , па́стырїе чꙋдесе́мъ . а҆́нг҃ли же сла́ва в̾ вы́шнихъ бг҃ꙋ . Цр҃ь ѿ па́стырей дре́вле ᲂу҆́бѡ дв҃дъ бы́сть . ѿ кᲂлѣ́на же і҆ꙋ́дᲂва и҆ цр҃ьска ты̀ і҆а́кѡве , па́стырь пᲂказа́сѧ вᲂпло́щшагᲂсѧ а҆́гньца вы́шнѧгѡ , сн҃а бж҃їѧ . сла́ва . Виѳлїе́мѣ ны́нѣ весели́сѧ , гра́дъ бы́въ но́вагѡ дв҃да . и҆ сїѡ́не вᲂз̾вѣща́й цр҃квамъ старѣ́йшинствᲂ , ѻ҆́бщее весе́лїе , всѣ́хъ цр҃ѧ . и҆ тᲂгѡ̀ ᲂу҆го́дники ны́нѣ вᲂспрїи́мши . и҆ ны́нѣ , боⷢ҇ . А҆́нг҃льстїи сᲂбо́ри тѧ̀ бг҃ᲂрᲂди́тельнице сла́вѧтъ , и҆ чл҃ческїи ро́дъ тѧ̀ непреста́ннѡ пѣ́сньми пᲂчита́етъ . ты́ бᲂ бжⷭ҇твенымъ ржⷭ҇тво́мъ , земле́ныѧ с̾ нбⷭ҇ными сᲂвᲂкꙋпи́ла є҆сѝ . тѣ́мже тѧ̀ пᲂчита́емъ .

Дᲂсто́йнѡ є҆́сть . свѣти́ленъ , вᲂскрⷭ҇нъ . сла́ва , ст҃ы́мъ . Сᲂ і҆а́кѡвᲂмъ вᲂспᲂе́мъ сла́внымъ гдⷭ҇нимъ бра́тᲂмъ , дв҃да бг҃ᲂѻ҆ц҃а , і҆ѡ́сифа же бжⷭ҇твеннагᲂ бг҃ᲂро́дичина ѻ҆брꙋ́ченика . хрⷭ҇то́вꙋ бᲂ бжⷭ҇твенᲂмꙋ ржⷭ҇твꙋ̀ пᲂслꙋжи́ша во́ градѣ виѳлїе́мѣ бг҃ᲂлѣ́пнѡ . сᲂ а҆́нг҃лы вᲂлхвы́ же и҆ па́стырьми , тᲂмꙋ̀ пѣ́снь пᲂю́ще , ꙗ҆́кѡ бг҃ꙋ и҆ влⷣцѣ . и҆ ны́нѣ , пра́здникꙋ . Пᲂсѣти́лъ ны є҆́сть свы́ше сп҃съ на́шъ , вᲂсто́къ вᲂсто́кᲂмъ . и҆ сꙋ́щїи вᲂ тмѣ̀ и҆ сѣ́ни ѡ҆брѣто́хᲂмъ и҆́стинꙋ , и҆́бᲂ ѿ дв҃ы рᲂди́сѧ гдⷭ҇ь .

На хвали́тѣхъ , стихѣ́ры вᲂскрⷭ҇ны , д҃ . и҆ пра́здникꙋ , д҃ . гла́съ , д҃ . хвали́те є҆гѡ̀ вᲂ стрꙋ́нахъ и҆ ѻ҆рга́нѣхъ . Весели́тесѧ пра́веднїи , нб҃са̀ ра́дꙋйтесѧ , взыгра́йтесѧ го́ры хрⷭ҇тꙋ̀ ро́ждьшꙋсѧ . дв҃аѧ сѣди́тъ херꙋви́мᲂмъ пᲂдо́бѧщисѧ , нᲂсѧ́щи на ло́нѣ бг҃а сло́ва вᲂплᲂще́нна . па́стырїе рᲂжде́нᲂмꙋ дивѧ́тсѧ , вᲂлсвѝ влⷣцѣ да́ры прино́сѧтъ . а҆́нг҃ли вᲂспѣва́юще гл҃ютъ , непᲂстижи́ме гдⷭ҇и сла́ва тебѣ̀ .

всѧ́кᲂ дыха́нїе да хва́литъ гдⷭ҇а . Бцⷣе дв҃ᲂ ро́ждьшаѧ сп҃са , ᲂу҆праздни́ла є҆сѝ пе́рвꙋю клѧ́твꙋ є҆́ввинꙋ . ꙗ҆́кѡ мт҃и бы́сть бл҃гᲂвᲂле́нїѧ ѻ҆́ч҃а , нᲂсѧ́щи на ло́нѣ бж҃їе сло́вᲂ вᲂплᲂще́ннᲂе . нетерпи́тъ та́йна и҆спыта́нїѧ . вѣ́рᲂю є҆ди́нᲂю сїю̀ прᲂсла́вимъ , зᲂвꙋ́ще с̾ тᲂбо́ю и҆ глаго́люще , неи҆зрече́нне гдⷭ҇и сла́ва тебѣ̀ .

сти́хъ : и҆́з̾ чрева пре́жде денни́цы рᲂди́хъ тѧ ,꙳ клѧ́тсѧ гдⷭ҇ь и҆ нераска́етсѧ . Прїиди́те вᲂспᲂе́мъ мт҃рь сп҃сᲂвꙋ , пᲂ ржⷭ҇твѣ̀ па́ки ꙗ҆́вльшꙋсѧ дв҃ꙋ . ра́дꙋисѧ гра́де ѡ҆дш҃евле́ныи цр҃ѧ и҆ бг҃а , в̾ не́мже хрⷭ҇то́съ по́живъ спасе́нїе сᲂдѣ́ла . с̾ гаврїи́лᲂмъ вᲂспᲂе́мъ , с̾ па́стыри прᲂсла́вимъ , зᲂвꙋ́ще , бцⷣе мᲂлѝ и҆з̾ тебѐ вᲂплᲂще́ннагѡ спасти́сѧ на́мъ .

сти́хъ : речѐ гдⷭ҇ь гдⷭ҇ви мᲂемꙋ̀ ,꙳ сѣдѝ ѡ҆деснꙋ́ю менѐ . Ѻ҆ц҃ъ бл҃гᲂи҆зво́лилъ є҆́сть , и҆ сло́вᲂ пло́ть бы́сть , и҆ дв҃аѧ рᲂдѝ бг҃а вᲂчл҃чьшасѧ . ѕвѣзда̀ вᲂзвѣща́етъ , вᲂлсвѝ пᲂкланѧ́ютсѧ . па́стырїе чꙋдѧ́тсѧ и҆ тва́рь ра́дꙋетсѧ .

сла́ва . гла́съ , и҃ . Кро́вь и҆ ѻ҆́гнь , и҆ па́ра ды́ма , чꙋдеса̀ на землѝ ꙗ҆́же прᲂви́дѣ і҆ѡ́иль . кро́вь вᲂплᲂще́нїе , ѻ҆́гнь бжⷭ҇тво̀ . па́ра же ды́ма дх҃ъ ст҃ы́и , наше́дыи на дв҃ꙋю , и҆ ми́ръ ѡ҆бл҃гᲂꙋха́выи . ве́лїе та́иньствᲂ твᲂегѡ̀ вᲂчл҃ченїѧ , гдⷭ҇и сла́ва тебѣ̀ .

и҆ ны́нѣ . гла́съ , в҃ . Преблгⷭ҇ве́на є҆сѝ бцⷣе дв҃ᲂ , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ .

Славᲂсло́вїе вели́кᲂе , и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . ча́съ , а҃ . на а҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , вᲂскрⷭ҇нъ . и҆ кᲂне́чныи ѿпꙋ́стъ .

на г҃ мъ часѣ̀ : трᲂпа́рь , вᲂскрⷭ҇нъ . сла́ва , ст҃ы́мъ . кᲂнда́къ , пра́здникꙋ .

на ѕ҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , ст҃ы́мъ .

на ѳ҃ мъ часѣ̀ : трᲂпа́рь , вᲂскрⷭ҇нъ . сла́ва , ст҃ы́мъ . кᲂнда́къ , вᲂскрⷭ҇нъ .

На литꙋргі́и , бл҃же́нна , гла́сꙋ , на́ ѕ҃ . и҆ пра́здникꙋ , пѣ́снь г҃ , на д҃ .

Пᲂ вхо́дѣ : трᲂпа́рь , вᲂскрⷭ҇нъ , и҆ пра́здникꙋ , и҆ ст҃ы́мъ . кᲂнда́къ , вᲂскрⷭ҇нъ . сла́ва , ст҃ы́мъ . и҆ ны́нѣ , сᲂбо́рꙋ бцⷣы .

прᲂки́менъ , гла́сꙋ , и҆ ст҃ы́мъ . Ди́венъ бг҃ъ вᲂ ст҃ы́хъ свᲂи́хъ , бг҃ъ і҆и҃левъ . сти́хъ . въ цр҃квахъ бл҃гᲂслᲂви́те бг҃а гдⷭ҇а , ѿ и҆сто́чникъ і҆и҃левъ . а҆пⷭ҇лъ , рѧ́дъ . и҆ ст҃ы́мъ , а҆пⷭ҇лъ , къ гала́тѡмъ . заⷱ҇ , с҃ . а҆ллилꙋ́їѧ , гла́сꙋ , и҆ ст҃ы́мъ . Пᲂмѧнѝ гдⷭ҇и дв҃да , и҆ всю̀ кро́тᲂсть є҆гѡ̀ . є҆ѵⷢ҇а́лїе , рѧ́дъ . и҆ ст҃ы́мъ , є҆ѵⷢ҇а́лїе , ѿ матѳе́ѧ . заⷱ҇ , д҃ . прича́стенъ , хвали́те гдⷭ҇а съ небе́съ . дрꙋгі́и , ра́дꙋйтесѧ пра́веднїи ѡ҆́ гдⷭ҇ѣ .

<< Previous

Contents

Next >>