МЦⷭ҇А ѲЕВРАЛѦ̀ ВО В҃ ДН҃Ь

срѣ́тенїе гдⷭ҇а на́шегѡ і҆с҃а хрⷭ҇та̀ . =На ма́лѣй вече́рни стихѣ́ры . гла́съ , а҃ . поⷣ . нбⷭ҇нымъ чи́нѡмъ . Неѡ҆пи́саннᲂе сло́вᲂ и҆ пресꙋ́щнᲂе ,꙳ нбⷭ҇ными прⷭ҇то́лы нᲂси́мᲂе сᲂ сла́вᲂю ,꙳ прїе́млетъ на рꙋкꙋ̀ сѷмеѡ́нъ вᲂпїѧ̀ ,꙳ ны́нѣ ѿпꙋсти́ мѧ пᲂ глаго́лꙋ твᲂемꙋ̀ сп҃се ,꙳ вѣ́рнымъ спасе́нїе и҆ наслажде́нїе . =вⷤ . Младе́нца ви́дѣ тѧ вᲂпїѧ́ше чꙋ́дныи сѷмеѡ́нъ ,꙳ превѣ́чнагᲂ сло́ва ѿ ѻ҆ц҃а рᲂжде́на ,꙳ страшꙋ́сѧ и҆ бᲂю́сѧ ,꙳ рꙋка́ма мᲂи́ми ѡ҆бъѧ́ти тѧ влⷣкᲂ .꙳ нᲂ с̾ ми́рᲂмъ раба̀ твᲂегѡ̀ и҆скі́и ,꙳ ны́нѣ ѿпꙋстѝ ꙗ҆́кѡ млрⷭ҇дъ . Ны́нѣ да ѿве́рзетсѧ две́рь нбⷭ҇наѧ ,꙳ и҆́же ѿ ѻ҆ц҃а без̾ сѣ́мене ро́ждьсѧ бг҃ъ сло́вᲂ ,꙳ рᲂди́сѧ ѿ дв҃ы ,꙳ пло́ть прїе́мъ чл҃чꙋ во́лею ,꙳ ѡ҆бнᲂви́ти є҆стество̀ ꙗ҆́кѡ бл҃гъ ,꙳ и҆ пᲂсади́ти ѡ҆деснꙋ́ю ѻ҆ц҃а . сла́ва , и҆ ны́нѣ . гла́съ , то́йже . самᲂгла́сен̾ . Дне́сь сщ҃е́ннаѧ мт҃и и҆ ст҃и́лища вы́шши , вᲂ ст҃и́лище прїи́де , ꙗ҆́вльши зако́нꙋ закᲂнᲂда́вца , и҆ зако́нꙋ твᲂрца̀ . є҆го́же на рꙋкꙋ̀ прїе́мъ ста́рецъ сѷмеѡ́нъ , ра́дꙋѧсѧ взыва́ше , ны́нѣ ѿпꙋща́еши раба̀ твᲂегѡ̀ , ꙗ҆́кѡ ви́дѣхъ тѧ сп҃са дш҃а́мъ на́шимъ .

На стихо́внѣ , стихѣ́ры , гла́съ , в҃ . поⷣ . до́ме є҆в̾фра́фᲂвъ . Две́ри нбⷭ҇ныѧ ꙳ ѿве́рзитесѧ .꙳ хрⷭ҇то́съ бᲂ в̾ цр҃кᲂвь ꙗ҆́кѡ младе́нецъ ,꙳ мт҃рїю дв҃ᲂю ꙳ бг҃ꙋ и҆ ѻ҆ц҃ꙋ приво́дитсѧ .

сти́хъ : ны́нѣ ѿпꙋща́еши раба̀ свᲂегѡ̀ влⷣкᲂ ,꙳ пᲂ гл҃ꙋ твᲂемꙋ̀ с̾ ми́рᲂмъ . Оу҆́гль прᲂѧвле́исѧ ,꙳ бжⷭ҇твенᲂмꙋ ꙳ и҆са́їи хрⷭ҇то́съ ,꙳ ꙗ҆́кѡ клеща́ми рꙋка́ми бцⷣы ,꙳ ны́нѣ ста́рцꙋ дае́тсѧ .

сти́хъ : свѣ́тъ вᲂ ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆зра́илѧ . Стра́хᲂмъ же и҆ ра́дᲂстїю ,꙳ на рꙋкꙋ̀ влⷣкꙋ ,꙳ сѷмеѡ́нъ держа̀ ,꙳ живᲂтꙋ̀ прᲂша́ше разрѣше́нїѧ ,꙳ пᲂѧ̀ бг҃ᲂмт҃рь .

сла́ва , и҆ ны́нѣ . гла́съ , то́йже . Две́ри нбⷭ҇ныѧ ,꙳ ѿве́рзитесѧ .꙳ хрⷭ҇то́съ бᲂ в̾ цр҃кᲂвь ꙗ҆́кѡ младе́нецъ ,꙳ мт҃рїю дв҃ᲂю ,꙳ бг҃ꙋ и҆ ѻ҆ц҃ꙋ приво́дитсѧ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Ра́дꙋйсѧ ѡ҆бра́дᲂваннаѧ бцⷣе дв҃ᲂ , и҆з̾ тебе́ бᲂ вᲂз̾сїѧ̀ со́лнце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же вᲂ тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

та́же , є҆ктенїѧ̀ ма́лаѧ . и҆ ѿпꙋ́стъ .

На па́вечерницѣ , пᲂ дᲂсто́йнѡ є҆́сть . трⷭ҇то́е , и҆ пᲂ ѻ҆́ч҃е на́шъ . кᲂнда́къ пра́здникꙋ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , а҃ . Гл҃и сѷмеѡ́не , кᲂго̀ нᲂсѧ̀ на рꙋкꙋ̀ в̾ цр҃кви ра́дꙋешисѧ , кᲂмꙋ̀ зᲂве́ши и҆ вᲂпїе́ши , ны́нѣ свᲂбᲂди́хсѧ , ви́дѣхъ бᲂ сп҃са мᲂегѡ̀ . се́й є҆́сть ѿ дв҃ы рᲂжде́исѧ , се́й є҆́сть ѿ́ бг҃а бг҃ъ сло́вᲂ , вᲂплᲂти́выисѧ на́съ ра́ди , и҆ спасы́и чл҃ка , тᲂмꙋ̀ пᲂклᲂни́мсѧ . =три́жды .

Прїимѝ сѷмеѡ́не , є҆го́же пᲂд̾ мра́кᲂмъ мѡѷсе́й зако́нъ пᲂлага́юща , прᲂви́дѣ в̾ сина́и , младе́нца бы́вша , зако́нꙋ пᲂвинꙋ́ющасѧ . се́й є҆́сть зако́нᲂмъ глаго́лавыи . се́й є҆́сть и҆́же вᲂ прᲂро́цѣхъ рече́нныи . вᲂплᲂти́выисѧ на́съ ра́ди , и҆ спасы́и чл҃ка , тᲂмꙋ̀ пᲂклᲂни́мсѧ . три́жды .

Прїи́демъ и҆ мы̀ , пѣ́сньми бжⷭ҇твеными хрⷭ҇та̀ ᲂу҆срѧ́щемъ , и҆ прїи́мемъ є҆гѡ̀ , є҆го́же спасе́нїе сѷмеѡ́нъ ви́дѣ . се́й є҆́сть є҆го́же дв҃дъ прᲂвᲂзвѣстѝ . се́й є҆́сть и҆́же вᲂ прᲂро́цѣхъ глаго́лавыи , вᲂплᲂти́выисѧ на́съ ра́ди , и҆ спасы́и чл҃ка , тᲂмꙋ̀ пᲂклᲂни́мсѧ . два́жды .

сла́ва , и҆ нн҃ѣ . гла́съ , ѕ҃ . Да ѿве́рзетсѧ дне́сь , нбⷭ҇наѧ две́рь без̾нача́льнᲂе бᲂ сло́вᲂ ѻ҆́ч҃ее , зача́лᲂ прїи́мъ лѣ́тнᲂ , не ѿстꙋ́пль свᲂегѡ̀ бжⷭ҇тва̀ . ѿ дв҃ы ꙗ҆́кѡ младе́нецъ четыредесѧтᲂдне́венъ , мт҃рїю во́лею прино́ситсѧ в̾ цр҃кᲂвь зако́ннꙋю . и҆ сегѡ̀ на рꙋкꙋ̀ прїе́млетъ ста́рецъ , ѿпꙋстѝ зᲂвы́и раба̀ влⷣкᲂ . и҆́бᲂ ѻ҆́чи мᲂѝ ви́дѣстѣ спасе́нїе твᲂѐ . прише́дыи в̾ ми́ръ спастѝ ро́дъ чл҃чь , гдⷭ҇и сла́ва тебѣ̀ .

вы́хᲂдъ . прᲂки́менъ , дню̀ .

Ѿ= и҆схо́да , чте́нїе .=

Гл҃а гдⷭ҇ь к̾ мѡѷсе́ᲂви в̾ дн҃ь ѻ҆́нъ , во́ньже и҆зведѐ сн҃ы і҆и҃левы ѿ землѝ є҆гѵ́пта , гл҃ѧ , ѡ҆ст҃и́ ми всѧ́къ первене́цъ первᲂрᲂжде́нъ раз̾верза́ѧ лᲂжесна̀ в̾ сн҃ѣ́хъ і҆и҃левыхъ . и҆ и҆́де мѡѷсе́й , и҆ сᲂбра̀ всѧ̀ лю́ди , и҆ речѐ , по́мните дн҃ь се́й , во́ньже и҆зыдо́сте ѿ землѝ є҆гѵ́пта , и҆́з̾ дᲂмꙋ рабо́ты . рꙋко́ю бᲂ крѣ́пкᲂю гдⷭ҇ь и҆зведѐ на́съ сѣ́мѡ , и҆ сᲂхрани́те зако́нъ є҆гѡ̀ . и҆ бꙋ́детъ ꙗ҆́кѡ а҆́ще введе́тъ ва́съ гдⷭ҇ь бг҃ъ в̾ зе́млю хананѣ́йскꙋ , и҆́мже ѻ҆́бразᲂмъ клѧ́тсѧ ѻ҆ц҃е́мъ ва́шимъ . и҆ ѿлꙋчи́ши всѧ́къ первᲂро́денъ , ѿверза́ѧ лᲂжесна̀ мꙋ́жескъ по́лъ гдⷭ҇ви . и҆ бꙋ́детъ ꙗ҆́кѡ а҆́ще вᲂпро́ситъ тѧ пᲂ си́хъ сн҃ъ тво́й , гл҃ѧ , что̀ сїѐ ; и҆ рече́ши є҆мꙋ̀ , ꙗ҆́кѡ рꙋко́ю крѣ́пкᲂю и҆зведѐ на́съ гдⷭ҇ь ѿ землѝ є҆гѵ́петскїѧ , и҆́з̾ дᲂмꙋ рабо́ты . є҆гда́ же ѡ҆жестѝ фараѡ́нъ не ѿпꙋсти́ти на́съ , пᲂбѝ гдⷭ҇ь всѧ́къ первᲂро́денъ въ землѝ є҆гѵ́петстѣй , ѿ первᲂро́денъ чл҃ческихъ , да́же дᲂ первᲂро́денъ ско́тскихъ . сегѡ̀ ра́ди а҆́зъ пᲂжрꙋ̀ гдⷭ҇ви , всѧ́кᲂгѡ ѿверза́юща лᲂжесна̀ мꙋ́жеска по́лꙋ , и҆ всѧ́кᲂгѡ первᲂрᲂжде́нна сн҃ѡ́въ мᲂи́хъ и҆зба́влю , и҆ бꙋ́детъ вᲂ зна́менїе непᲂкᲂлеби́мᲂ , пред̾ ѻ҆чи́ма твᲂи́ма . ꙗ҆́кѡ та́кѡ речѐ гдⷭ҇ь бг҃ъ вседержи́тель , ꙗ҆́кѡ первᲂрᲂжде́нна сн҃о́въ мᲂи́хъ и҆зба́влю , и҆ бꙋ́детъ вᲂ зна́менїе непᲂкᲂлеби́мᲂ пред̾ ѻ҆чи́ма твᲂи́ма . ꙗ҆́кѡ та́кѡ речѐ гдⷭ҇ь бг҃ъ , ꙗ҆́кѡ первᲂрᲂжде́ннаѧ сн҃ѡ́въ свᲂи́хъ пᲂда́си мнѣ̀ . и҆ бꙋ́детъ всѧ́къ а҆́ще рᲂди́тъ ѻ҆трᲂча̀ мꙋ́жескъ по́лъ , в̾ дн҃ь ѻ҆смы́и ѡ҆брѣ́жете є҆мꙋ̀ пло́ть кра́йнимъ ѡ҆брѣ́занїемъ . и҆ три́десѧть и҆ трѝ днѝ , невни́детъ вᲂ ст҃и́лище бж҃їе к̾ сщ҃е́нникꙋ , до́ндеже и҆спо́лнѧтсѧ дні́е ѡ҆чище́нїѧ . и҆ пᲂ си́хъ принесе́ши гдⷭ҇ви а҆́гнѧ є҆динᲂлѣ́тнᲂ непᲂро́чнᲂ , вᲂ всесᲂжже́нїе . и҆ птенца̀ гᲂлꙋби́на , и҆ го́рличища , при две́рехъ сѣ́ни свидѣ́нїѧ кᲂ ст҃лю . и҆лѝ вмѣ́стѡ си́хъ принесе́тъ пре́д̾ гдⷭ҇емъ два̀ птенца̀ гᲂлꙋби́на , и҆лѝ два̀ го́рличища . и҆ пᲂмо́литсѧ ѡ҆ не́мъ сщ҃е́нникъ , ꙗ҆́кѡ в̾ вᲂзда́нїе вᲂзда́ѧнїю сїѧ̀ мнѣ̀ сꙋ́ть , ѿ всѣ́хъ сн҃о́въ і҆и҃левъ . и҆ прїѧ́хъ и҆́хъ и҆ ѡ҆ст҃и́хъ и҆́хъ себѣ̀ , вмѣ́стѡ первᲂро́денъ є҆гѵ́петскихъ , во́ньже де́нь пᲂрази́хъ всѧ́къ пе́рвенецъ в̾ землѝ є҆гѵ́петстѣй , ѿ чл҃ка дᲂ скᲂта̀ . речѐ бг҃ъ вы́шнїи ст҃ы́и і҆зра́илевъ .

Ѿ= прᲂро́чества и҆са́ина , чте́нїе .=

Бы́сть в̾ лѣ́тᲂ в̾ не́же ᲂу҆́мре і҆ѡзі́ѧ цр҃ь , ви́дѣхъ гдⷭ҇а сѣдѧ́ща на прⷭ҇то́лѣ высо́цѣ , и҆ превᲂз̾несе́нѣ , и҆ и҆спо́лнь хра́мъ сла́вы є҆гѡ̀ . и҆ серафи́ми стᲂѧ́хꙋ ѻ҆́крестъ є҆гѡ̀ , ше́сть кри́лъ є҆ди́нᲂмꙋ , и҆ ше́сть кри́лъ дрꙋго́мꙋ . и҆ двѣма̀ ᲂу҆́бѡ пᲂкрыва́хꙋ ли́ца свᲂѧ̀ , двѣма́ же пᲂкрыва́хꙋ но́ги свᲂѧ̀ , и҆ двѣма̀ лета́хꙋ , и҆ взыва́хꙋ дрꙋ́гъ ко́ дрꙋгꙋ и҆ гл҃ахꙋ , ст҃ъ ст҃ъ ст҃ъ , гдⷭ҇ь саваѡ́ѳъ , и҆спо́лнь всѧ̀ землѧ̀ сла́вы є҆гѡ̀ . и҆ взѧ́тсѧ пред̾ две́рїе ѿ́ гласа , и҆́же вᲂпїѧ́хꙋ , и҆ хра́мъ и҆спо́лнисѧ ды́ма . и҆ рѣ́хъ , ѽ ѻ҆каѧ́нныи а҆́зъ , ꙗ҆́кѡ ᲂу҆мили́хсѧ , ꙗ҆́кѡ чл҃къ сы́и , и҆ нечи́сты ᲂу҆стнѣ̀ и҆мѣ́ѧ , пᲂсредѝ люде́й нечи́сты ᲂу҆стнѣ̀ и҆мꙋ́щихъ а҆́зъ живꙋ̀ , и҆ цр҃ѧ гдⷭ҇а саваѡ́ѳа ви́дѣхъ ѻ҆чи́ма мᲂи́ма . и҆ пᲂсла́сѧ кᲂ мнѣ̀ є҆ди́нъ ѿ серафи́мъ , в̾ рꙋцѣ̀ свᲂе́й и҆мѧ́ше ᲂу҆́гль гᲂрѧ́щь , є҆го́же клеща́ми взѧ́тъ ѿ ѻ҆лтарѧ̀ , и҆ прикᲂснꙋ́сѧ ᲂу҆сто́мъ мᲂи́мъ . и҆ речѐ , сѐ прикᲂснꙋ́сѧ , сїѐ ᲂу҆стна́мъ твᲂи́мъ , и҆ ѿи́метъ без̾зако́нїе твᲂѐ , и҆ грѣхѝ твᲂѧ̀ ѡ҆чи́ститъ . и҆ слы́шахъ гла́съ гдⷭ҇нь гл҃ющь , кᲂго̀ пᲂслю̀ , и҆ кто̀ по́йдетъ к̾ лю́демъ си́мъ ; и҆ реко́хъ , сѐ а҆́зъ є҆́смь , пᲂсли́ мѧ . и҆ речѐ , и҆дѝ , и҆ рцы̀ лю́демъ си́мъ . слꙋ́хᲂмъ ᲂу҆слы́шите , и҆ неразꙋмѣ́ете . и҆ ви́дѧще ᲂу҆́зрите , и҆ не и҆́мате ви́дѣти . ѡ҆дебелѣ́ бᲂ срⷣце люде́й си́хъ , и҆ ᲂу҆ши́ма тѧ́жкѡ слы́шаша , и҆ ѻ҆́чи свᲂѝ смѣжи́ша . є҆да̀ кᲂгда̀ ви́дѧтъ ѻ҆чи́ма , и҆ ᲂу҆ши́ма ᲂу҆слы́шатъ , и҆ срⷣцемъ разꙋмѣ́ютъ , и҆ ѡ҆братѧ́тсѧ , и҆ и҆сцѣлю̀ и҆́хъ . и҆ рѣ́хъ , дᲂко́лѣ гдⷭ҇и ; и҆ речѐ , до́ндеже запꙋстѣ́ютъ гра́ди , є҆́же непᲂжи́ти . и҆ хра́ми , є҆́же небы́ти чл҃кѡмъ . и҆ землѧ̀ ѡ҆ста́влена бꙋ́детъ пꙋста̀ . и҆ пᲂ си́хъ ᲂу҆дᲂлжи́тъ бг҃ъ чл҃ки , и҆ ᲂу҆мно́жатсѧ ѡ҆ста́вшїи на землѝ .

Ѿ= прᲂро́чества і҆єзекі́илева , чте́нїе .=

Бы́сть на мнѣ̀ дх҃ъ гдⷭ҇нь , и҆ и҆зведе́ мѧ къ две́ремъ зрѧ́щимъ на вᲂсто́къ . и҆ сѐ сла́ва бг҃а і҆и҃лева , и҆дѧ́ше пᲂ пꙋтѝ вра́тъ зрѧ́щихъ на вᲂсто́ки , и҆ гла́съ пᲂлка̀ , ꙗ҆́кѡ гла́съ сꙋгꙋ́бъ мно́гихъ . и҆ землѧ̀ прᲂсїѧ́сѧ ꙗ҆́кѡ сїѧ́нїе , ѿ сла́вы є҆гѡ̀ ѻ҆́крестъ . и҆ сла́ва гдⷭ҇нѧ вни́де в̾ до́мъ , пᲂ пꙋтѝ вра́тъ зрѧ́щихъ на вᲂсто́ки . и҆ прїѧ́тъ мѧ дх҃ъ , и҆ введе́ мѧ вᲂ дво́ръ внꙋ́тренїи , и҆ сѐ и҆спо́лнь сла́вы хра́мъ гдⷭ҇нь . и҆ ѡ҆брати́ мѧ пᲂ пꙋтѝ вра́тъ ст҃ы́хъ внѣ́шнихъ , зрѧ́щихъ на вᲂсто́ки . и҆ сїѧ̀ бѧ́хꙋ затвᲂре́на . и҆ речѐ гдⷭ҇ь кᲂ мнѣ̀ , врата̀ сїѧ̀ затвᲂре́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквᲂзѣ̀ и҆́хъ , и҆ бꙋ́дꙋтъ затвᲂре́на , ꙗ҆́кѡ и҆гꙋ́менъ сы́и сѧ́детъ въ ни́хъ снѣ́сти хлѣ́бъ пре́д̾ гдⷭ҇емъ , пᲂ пꙋтѝ є҆ла́мскихъ вра́тъ вни́детъ , и҆ пᲂ пꙋтѝ є҆гѡ̀ и҆зы́детъ . и҆ пᲂведе́ мѧ пᲂ пꙋтѝ двере́й сꙋ́щихъ к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнь сла́вы хра́мъ гдⷭ҇нь .

На литі́и , стихѣ́ры . гла́съ , а҃ . Ве́тхїи де́ньми , и҆́же зако́нъ дре́вле в̾ сина́и да́въ мѡѷсе́ᲂви , дне́сь младе́нецъ ви́дитсѧ . и҆ пᲂ зако́нꙋ зако́нꙋ твᲂре́цъ , зако́нъ и҆спᲂлнѧ́ѧ , в̾ цр҃кᲂвь прино́ситсѧ , и҆ ста́рцꙋ дае́тсѧ . прїе́мъ же сегѡ̀ сѷмеѡ́нъ пра́ведныи , и҆ ѡ҆бѣща́нїемъ сбы́тїе ви́дѣвъ сᲂверша́емᲂ , ра́дᲂстнѡ вᲂпїѧ́ше , ви́дѣстѣ ѻ҆́чи мᲂѝ , є҆́же ѿ́ вѣка та́иньствᲂ сᲂкрᲂве́ннᲂе , на пᲂслѣ́дᲂкъ дне́й си́хъ ꙗ҆́вльшꙋсѧ . свѣ́тъ разᲂрѧ́ѧ невѣ́рныхъ ꙗ҆зы́къ ѡ҆мраче́нїе , и҆ сла́вꙋ даѧ̀ но́вꙋ ꙗ҆зы́кꙋ і҆и҃лю . тѣ́мже ѿпꙋстѝ раба̀ твᲂегѡ̀ ѿ сᲂꙋ́зъ сеѧ̀ пло́ти , к̾ нестарѣ́емᲂмꙋ и҆ чꙋ́днᲂмꙋ непреста́ннᲂмꙋ живᲂтꙋ̀ , пᲂдаѧ̀ ми́рᲂви ве́лїю ми́лᲂсть . Дне́сь и҆́же дре́вле мѡѷсе́ᲂви в̾ сина́и зако́нъ пᲂда́въ , зако́ннымъ пᲂвинꙋ́етсѧ велѣ́нїемъ , на́съ ра́ди ꙗ҆́кѡ милᲂсе́рдъ пᲂ на́съ бы́въ . ны́нѣ чи́стыи бг҃ъ , ꙗ҆́кѡ ѻ҆трᲂча̀ ст҃ᲂ , лᲂжесна̀ разве́рзъ чⷭ҇тыѧ , себѐ ꙗ҆́кѡ бг҃ᲂви прино́ситъ , зако́нныѧ клѧ́твы свᲂбᲂжда́ѧ , и҆ прᲂсвѣща́ѧ дш҃а на́ша . гла́съ , в҃ . Є҆мꙋ́же вы́шнїи слꙋжи́телїе мо́лѧтсѧ , до́лꙋ ны́нѣ сѷмеѡ́нъ ве́щныма рꙋка́ма прїе́мъ , бжⷭ҇твенᲂе челᲂвѣ́кѡмъ сᲂедини́тисѧ прᲂпᲂвѣ́да . и҆ челᲂвѣ́ка нбⷭ҇на бг҃а ви́дѧи , ѿлꙋча́ѧсѧ сꙋ́щихъ на землѝ , ра́дᲂстнѡ взыва́ше , и҆́же вᲂ тмѣ̀ сꙋ́щимъ , невече́рнїи свѣ́тъ ѿкрыва́ѧ , гдⷭ҇и сла́ва тебѣ̀ . Дне́сь сѷмеѡ́нъ на рꙋкꙋ̀ гдⷭ҇а сла́вы пᲂд̾е́млетъ , є҆го́же пᲂд̾ мра́кᲂмъ , пе́рвѣе мѡѷсе́й ви́дѣ в̾ гᲂрѣ̀ сина́йстѣй , скрижа́ли даю́ща є҆мꙋ̀ . се́й є҆́сть и҆́же в̾ прᲂро́цѣхъ глаго́лѧи , и҆ зако́нꙋ твᲂре́цъ . се́й є҆́сть є҆го́же дв҃дъ вᲂзвѣща́етъ , и҆́же всѣ́мъ стра́шныи и҆мѣ́ѧи ве́лїю и҆ бᲂга́тꙋю млⷭ҇ть . Сщ҃е́ннагѡ сщ҃е́ннаѧ дв҃аѧ , принесѐ вᲂ ст҃и́лище ст҃лю , прᲂсте́ръ же рꙋ́цѣ сѷмеѡ́нъ , прїѧ́тъ сегѡ̀ ра́дꙋѧсѧ . и҆ вᲂзᲂпѝ , ны́нѣ ѿпꙋстѝ раба̀ твᲂегѡ̀ , пᲂ глаго́лꙋ твᲂемꙋ̀ с̾ ми́рᲂмъ гдⷭ҇и . Зижди́тель нб҃ꙋ и҆ землѝ , на рꙋкꙋ̀ сѷмеѡ́на ста́рца дне́сь нᲂша́шесѧ . то́й бᲂ дх҃ᲂмъ ст҃ы́мъ глаго́лаше , ны́нѣ свᲂбᲂди́хсѧ , ви́дѣхъ бᲂ сп҃са мᲂегѡ̀ . Дне́сь сѷмеѡ́нъ ста́рецъ , в̾ цр҃кᲂвь вхо́дитъ ра́дꙋѧсѧ дх҃ᲂмъ , закᲂнᲂда́вца мѡѷсе́ᲂва , и҆ сᲂверши́телѧ зако́нꙋ на рꙋкꙋ̀ прїѧ́ти . ѻ҆́нъ ᲂу҆́бѡ мра́кᲂмъ и҆ гла́сᲂмъ не ꙗ҆вле́нымъ , бг҃ᲂви́децъ спᲂдо́бисѧ . пᲂкрᲂве́нымъ лице́мъ , є҆вре́ѡмъ невѣ́рнаѧ срⷣца̀ и҆з̾ѡ҆бличѝ . се́й же первᲂвѣ́чнᲂе сло́вᲂ ѻ҆́ч҃ее вᲂплᲂще́ннᲂе пᲂнесѐ , и҆ ꙗ҆зы́кѡмъ ѿкры̀ свѣ́тъ крⷭ҇тъ и҆ вᲂскрⷭ҇нїе . и҆ а҆́нна прᲂро́чица пᲂказа̀ , сп҃са и҆ и҆зба́вителѧ і҆и҃лю прᲂпᲂвѣ́дающи . тᲂмꙋ̀ вᲂзᲂпїе́мъ хрⷭ҇тꙋ̀ бг҃ꙋ на́шемꙋ , бцⷣы ра́ди пᲂми́лꙋй на́съ .

сла́ва . гла́съ , є҃ . И҆спыта́йте писа́нїѧ , ꙗ҆́кᲂже речѐ вᲂ є҆ѵⷢ҇а́лїи хрⷭ҇то́съ бг҃ъ на́шъ . в̾ ни́хъ бᲂ ѡ҆брѣта́емъ тᲂго̀ ражда́ема , и҆ пелена́ми пᲂвива́ема . вᲂ ꙗ҆́слѣхъ пᲂлага́ема , и҆ млеко́мъ пита́ема . ѡ҆брѣ́занїе прїе́млюща , и҆ сѷмеѡ́нᲂмъ нᲂси́ма . не мнѣ́нїемъ ни привидѣ́нїемъ , нᲂ и҆́стиннᲂю ми́рᲂви ꙗ҆́вльшисѧ . к̾ немꙋ́ же вᲂзᲂпїе́мъ , превѣ́чныи бж҃е сла́ва тебѣ̀ .

и҆ ны́нѣ . гла́съ , то́йже . Ве́тхїи де́ньми младе́нствᲂвавъ пло́тїю , мт҃рїю дв҃ᲂю в̾ цр҃кᲂвь прино́ситсѧ , свᲂегѡ̀ зако́на и҆спᲂлнѧ́ѧ ѡ҆бѣща́нїе . є҆го́же сѷмеѡ́нъ прїе́мъ глаго́лаше , ны́нѣ ѿпꙋща́еши с̾ ми́рᲂмъ пᲂ глаго́лꙋ твᲂемꙋ̀ раба̀ твᲂегѡ̀ . ви́дѣстѣ бᲂ ѻ҆́чи мᲂѝ спасе́нїе твᲂѐ ст҃ы́и .

На стихо́внѣ , стⷯры . гла́съ , з҃ . Оу҆красѝ сво́й черто́гъ сїѡ́не , и҆ пᲂд̾и҆мѝ цр҃ѧ хрⷭ҇та̀ . цѣлꙋ́й мр҃і́ю нбⷭ҇нꙋю две́рь . та́бᲂ прⷭ҇то́лъ херꙋви́мскїи ꙗ҆ви́сѧ . та̀ но́ситъ цр҃ѧ сла́вы . ѻ҆́блакъ свѣ́та є҆́сть дв҃аѧ , нᲂсѧ́щи на рꙋкꙋ̀ , сн҃а пре́жде денни́цы . є҆го́же прїе́мъ сѷмеѡ́нъ на рꙋкꙋ̀ свᲂе́ю , прᲂпᲂвѣ́даѧ лю́демъ влⷣкꙋ сегѡ̀ бы́ти живᲂтꙋ̀ и҆ сме́рти , и҆ сп҃са ми́рꙋ .

сти́хъ : ны́нѣ ѿпꙋща́еши раба̀ свᲂегѡ̀ влⷣкᲂ ,꙳ пᲂ гл҃ꙋ твᲂемꙋ̀ с̾ ми́рᲂмъ . Вᲂсїѧ́вшагѡ пре́жде вѣ́къ ѿ ѻ҆ц҃а , на пᲂслѣ́дᲂкъ же ѿ лᲂже́снъ дв҃ческихъ нᲂсѧ́щи в̾ цр҃кви , неи҆скꙋсᲂбра́чнаѧ мт҃и . и҆́же в̾ сина́йстѣй гᲂрѣ̀ зако́нъ пᲂлᲂжи́вшагѡ , пᲂвелѣ́нїю зако́ннᲂмꙋ пᲂвинꙋ́ющасѧ , принесѐ ст҃лю ста́рцꙋ и҆ пра́ведникꙋ , хрⷭ҇та̀ бг҃а ви́дѣти сꙋ́ща . є҆го́же прїе́мъ на́ рꙋкꙋ свᲂю̀ , прᲂпᲂвѣ́даше вᲂпїѧ̀ , се́й свѣ́тъ ꙗ҆зы́кѡмъ . се́й і҆и҃лю сла́ва , и҆ сп҃съ дш҃а́мъ на́шимъ .

сти́хъ : свѣ́тъ вᲂ ѿкрᲂве́нїе ꙗ҆зы́кѡмъ ,꙳ и҆ сла́вꙋ люді́й твᲂи́хъ і҆зра́илѧ . Є҆динᲂро́днагѡ и҆з̾ без̾нача́льна ѻ҆ц҃а , разве́рзша лᲂжесна̀ без̾сѣ́меннѡ ма́тере . пᲂвинꙋ́ющисѧ зако́на пᲂвелѣ́нїемъ бцⷣа мр҃і́ѧ , и҆́же на пᲂслѣ́дᲂкъ и҆з̾неѧ̀ вᲂпло́щшасѧ , и҆ съ чл҃ки пᲂжи́вша , принᲂша́етъ бг҃ᲂви всѣ́хъ первᲂст҃лѧ , и҆спᲂлнѧ́ющагѡ зако́нъ дре́внѧгѡ закᲂнᲂда́вца . є҆го́же прїе́мъ сѷмеѡ́нъ на рꙋкꙋ̀ свᲂе́ю , прᲂпᲂвѣ́даше лю́демъ , бг҃ъ є҆́сть се́й ѻ҆ц҃ꙋ сᲂбез̾нача́ленъ , и҆зба́витель дш҃а́мъ нашимъ .

сла́ва , и҆ ны́нѣ . гла́съ , и҃ . И҆́же на херꙋви́мѣхъ нᲂси́мыи , и҆ пѣва́емыи ѿ серафи́мъ , дне́сь в̾ бжⷭ҇твеннᲂе ст҃и́лище пᲂ зако́нꙋ принᲂси́мъ , на ста́рческꙋю ꙗ҆́кѡ на прⷭ҇то́лѣ сѣди́тъ рꙋкꙋ̀ . и҆ ѿ і҆ѡ́сифа прїе́млетъ да́ры бг҃ᲂлѣ́пнѡ , ꙗ҆́кѡ сꙋпрꙋ́гъ го́рличища нескве́рнꙋю цр҃кᲂвь , и҆ ѿ ꙗ҆зы́къ но́выѧ лю́ди . гᲂлꙋби́на же два̀ птенца̀ , ꙗ҆́кѡ нача́льникꙋ ве́тхᲂмꙋ же и҆ но́вᲂмꙋ . и҆ к̾ семꙋ̀ ѻ҆бѣ́та , сѷмеѡ́нъ кᲂне́цъ прїе́мъ , бл҃гᲂсло́вѧ дв҃цꙋ мр҃і́ю бцⷣꙋ , страсте́й ѻ҆́бразы и҆́же и҆з̾ неѧ̀ прᲂвᲂз̾гласѝ . и҆ ѿ негѡ̀ и҆ска́ше ѿпꙋще́нїѧ вᲂпїѧ̀ , ны́нѣ ѿпꙋсти́ мѧ влⷣкᲂ , ꙗ҆́кᲂже пре́же вᲂзвѣсти́ ми . ꙗ҆́кѡ ви́дѣхъ тѧ первᲂвѣ́чнагᲂ свѣ́та , и҆ сп҃са гдⷭ҇а , хрⷭ҇тᲂи҆мени́тымъ лю́демъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Ра́дꙋйсѧ ѡ҆бра́дᲂваннаѧ бцⷣе дв҃ᲂ , и҆з̾ тебе́ бᲂ вᲂз̾сїѧ̀ со́лнце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же вᲂ тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе . три́жды .

На ᲂу҆́трени , на бг҃ъ гдⷭ҇ь , трᲂпа́рь , три́жды . =Пᲂ а҃ , стихᲂло́гїи , сѣда́ленъ . гла́съ , а҃ . Ли́къ а҆́нг҃льскїи диви́тсѧ чꙋдесѝ , земле́нїи же гла́сы вᲂзᲂпїе́мъ пѣ́нїе , зрѧ́ще неи҆зрече́ннᲂе бж҃їе сше́ствїе . є҆го́же бᲂ трепе́щꙋтъ нбⷭ҇ныѧ си́лы , ны́нѣ ста́рчи ѡ҆бъе́млютъ рꙋ́цѣ , є҆ди́нагᲂ чл҃кᲂлю́бца . сла́ва , и҆ ны́нѣ , то́йже .=

Пᲂ в҃ , стихᲂло́гїи , сѣда́ленъ . гла́съ , г҃ . Ѿ дв҃ы тѧ вᲂплᲂще́нна хрⷭ҇тѐ , ны́нѣ вᲂспрїѧ́тъ сщ҃е́нныи сѷмеѡ́нъ , ны́нѣ ѿпꙋща́еши взыва́ѧ , раба̀ твᲂегѡ̀ влⷣкᲂ . а҆́нна же непᲂро́чнаѧ прᲂро́чица сла́внаѧ , ны́нѣ и҆спᲂвѣ́данїе и҆ пѣ́нїе принᲂша́ше ти . мы́ же живᲂда́вче вᲂпїе́мъ , сла́ва та́кѡ и҆зво́льшемꙋ .= сла́ва , и҆ ны́нѣ , то́йже .=

Пᲂ пᲂлїєлеѡ́сѣ , сѣда́ленъ . гла́съ , и҃ . Рᲂди́сѧ на землѝ , сᲂбез̾нача́льныи ѻ҆ц҃ꙋ , принесе́сѧ в̾ цр҃кᲂвь непᲂсти́жимыи . ра́дꙋѧжесѧ ста́рецъ на рꙋкꙋ́ тѧ прїѧ́тъ зᲂвы́и , ны́нѣ ѿпꙋща́еши , є҆го́же пᲂсѣти́лъ є҆сѝ пᲂ глаго́лꙋ твᲂемꙋ̀ , бл҃гᲂи҆зво́ливыи спастѝ ꙗ҆́кѡ бг҃ъ , ро́дъ чл҃ческїи . сла́ва , и҆ ны́нѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Пᲂмѧнꙋ̀ и҆́мѧ твᲂѐ , вᲂ всѧ́кᲂмъ ро́дѣ и҆ ро́дѣ . сти́хъ . ѿры́гнꙋ срⷣце мᲂѐ сло́вᲂ бл҃гᲂ . всѧ́кᲂ дыха́нїе . є҆ѵⷢ҇а́лїе , ѿ лꙋкѝ . заⷱ҇ , и҃ .

ѱало́мъ , н҃ . сла́ва . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Да ѿве́рзетсѧ две́рь нбⷭ҇наѧ дне́сь , без̾нача́льнᲂе бᲂ сло́вᲂ ѻ҆́ч҃ее , зача́лᲂ прїи́мъ лѣ́тнᲂ , не ѿстꙋ́пль свᲂегѡ̀ бжⷭ҇тва̀ . ѿ дв҃ы ꙗ҆́кѡ млⷣнцъ четыредесѧтᲂдне́венъ , мт҃рїю во́лею прино́си тсѧ , в̾ цр҃кᲂвь зако́ннꙋю . и҆ сегѡ̀ на рꙋкꙋ̀ прїе́млетъ ста́рецъ , ѿпꙋстѝ зᲂвы́и раба̀ влⷣкᲂ . и҆́бᲂ ѻ҆́чи мᲂѝ ви́дѣстѣ спасе́нїе твᲂѐ . прише́дыи въ ми́ръ , спастѝ ро́дъ чл҃чь , гдⷭ҇и сла́ва тебѣ̀ .

Кано́нъ , гла́съ , г҃ . твᲂре́нїе кᲂзмы̀ мᲂна́ха . і҆рмᲂсы̀ , пᲂ вⷤ . а҆ трᲂпарѝ , на в҃і . и҆ па́ки то́йже , і҆рмо́съ пᲂе́мъ , ѻ҆́ба ли́ка вкꙋ́пѣ . пѣ́снь , а҃ . і҆рмо́съ . Сꙋ́шꙋ глꙋбᲂрᲂди́тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бᲂ ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́внѡ бᲂ прᲂсла́висѧ . запѣ́въ : Сла́ва гдⷭ҇и срѣ́тенїю твᲂемꙋ̀ . Дака́плютъ во́дꙋ ѻ҆́блацы , сл҃нце бᲂ на ѻ҆́блацѣ ле́гцѣ нᲂси́мᲂ наста́лᲂ є҆́сть , на нетлѣ́ннꙋю рꙋкꙋ̀ , хрⷭ҇то́съ в̾ цр҃кви ꙗ҆́кѡ младе́нецъ . тѣ́мже вѣ́рнїи вᲂзᲂпїе́мъ , пᲂе́мъ гдⷭ҇ви , сла́внᲂ бᲂ прᲂсла́висѧ . Крѣпи́тѣсѧ рꙋ́цѣ сѷмеѡ́ни , ста́рᲂстїю ѡ҆сла́бленїи . лы́ста же претрꙋжде́на ста́рча пра́вѡ быстро̀ движи́тасѧ , хрⷭ҇тꙋ̀ на срѣ́тенїе , ли́къ с̾ беспло́тными сᲂста́вите , пᲂе́мъ гдⷭ҇ви , сла́внᲂ бᲂ прᲂсла́висѧ . Ра́зꙋмᲂмъ прᲂсте́ртаѧ нб҃са̀ весели́тесѧ , ра́дꙋйжесѧ землѐ . и҆з̾ пребжⷭ҇твеныхъ бᲂ нѣ́дръ хитре́цъ прᲂше́дъ хрⷭ҇то́съ , мт҃рїю дв҃ᲂю бг҃ᲂви ѻ҆ц҃ꙋ прино́ситсѧ младе́нецъ , и҆́же пре́жде всѣ́хъ , сла́внᲂ бᲂ прᲂсла́висѧ .

пѣ́снь , г҃ . і҆рмо́съ . Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю . Первᲂрᲂжде́нъ и҆з̾ ѻ҆ц҃а пре́жде вѣ́къ , первᲂрᲂжде́нъ младе́нецъ и҆з̾ дв҃ы нетлѣ́нны . а҆да́мꙋ рꙋ́кꙋ прᲂстира́ѧ ꙗ҆ви́сѧ . Младᲂꙋ́мна бы́вша пре́лестїю первᲂзда́ннагѡ , па́ки и҆справлѧ́ѧ бг҃ъ сло́вᲂ , младе́нствᲂвавъ ꙗ҆ви́сѧ . Землѝ и҆сча́дїе , па́ки те́кши к̾ не́й , бжⷭ҇тва̀ сᲂѡ҆бра́знᲂе є҆стество̀ сᲂдѣ́тель ꙗ҆́кѡ непрело́жнᲂ , младе́нствᲂвавъ ꙗ҆вѝ .

сѣда́ленъ . гла́съ , д҃ . Младе́нствꙋетъ менѐ ра́ди , ве́тхїи де́ньми . чище́нїемъ прїѡбщева́етсѧ пречⷭ҇тыи бг҃ъ , да пло́ть ᲂу҆вѣ́ритъ ми , ю҆́же ѿ дв҃ы . и҆ си́мъ сѷмеѡ́нъ пᲂꙋча́ѧсѧ , пᲂзна̀ тᲂго̀ бг҃а и҆ чл҃ка , и҆ ꙗ҆́кѡ жи́знь цѣлᲂва́ше . и҆ ра́дꙋѧсѧ ста́рчески взыва́ше , ѿпꙋсти́ мѧ , тѧ́ бᲂ ви́дѣхъ жи́знь всѧ́ческихъ . сла́ва , и҆ ны́нѣ , то́йже .

пѣ́снь , д҃ . і҆рмо́съ . Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бᲂ прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ . Ра́дꙋйсѧ сѷмеѡ́не неи҆зрече́ннымъ таи́нниче , бцⷣа вᲂпїѧ́ше , є҆го́же ѿ ст҃а́гѡ ѡ҆ дре́вле вᲂзвѣсти́тисѧ дх҃а , младе́нствᲂвавша сло́ва хрⷭ҇та̀ на рꙋкꙋ̀ прїимѝ . зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . На него́ же ᲂу҆пᲂва́лъ є҆сѝ сѷмеѡ́не , во́зрастъ дѣ́тищныи , ра́дꙋѧсѧ пᲂд̾имѝ хрⷭ҇та̀ . і҆и҃лю бжⷭ҇твенᲂе ᲂу҆тѣше́нїе . зако́нꙋ твᲂрца̀ и҆ влⷣкꙋ , и҆спᲂлнѧ́ющагѡ зако́нꙋ чи́нъ , зᲂвы́и є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ . Ви́дѣ сѷмеѡ́нъ сло́вᲂ без̾нача́льнᲂе , с̾ пло́тїю ꙗ҆́кѡ на прⷭ҇то́лѣ херꙋви́мстѣ дв҃цею нᲂси́мᲂ , вино́внагᲂ бы́тїю всѧ́ческихъ . ꙗ҆́кѡ млⷣнцꙋ дивѧ́сѧ вᲂпїѧ́ше є҆мꙋ̀ , и҆спо́лнишасѧ всѧ̀ твᲂегѡ̀ хвале́нїѧ .

пѣ́снь , є҃ . і҆рмо́съ . Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́нг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща . Разꙋмѣ́въ бжⷭ҇твеныи ста́рецъ , прᲂѧ́вленꙋю дре́вле прⷪ҇ркꙋ сла́вꙋ , пло́тїю сло́ва зрѧ̀ мт҃рїю держи́ма , ѽ ра́дꙋисѧ вᲂпїѧ́ше чⷭ҇таѧ , ꙗ҆́кѡ прⷭ҇то́лъ бᲂ держи́ши бг҃а , свѣ́та невече́рнѧ , и҆ ми́рᲂмъ ѡ҆блада́юща . Пᲂкло́ньсѧ ста́рецъ , и҆ стᲂпа́мъ бжⷭ҇твенѡ прикᲂснꙋ́сѧ , неи҆скꙋсᲂбра́чныѧ и҆ бж҃їѧ мт҃ре , ѻ҆́гнь речѐ но́сиши чⷭ҇таѧ . млⷣнца бᲂю́сѧ ѡ҆б̾ѧ́ти бг҃а , свѣ́та невече́рнѧ , и҆ ми́рᲂмъ ѡ҆блада́юща . Ѡ҆чища́етсѧ и҆са́їѧ ѿ серафи́ма ᲂу҆́гль прїе́мъ . ста́рецъ вᲂпїѧ́ше бж҃їи мт҃ри , ты̀ ꙗ҆́кѡ клеща́ми , рꙋка́ма прᲂсвѣща́еши мѧ . пᲂда́вши ми є҆го́же но́сиши свѣ́та невече́рнѧ , и҆ ми́рᲂмъ ѡ҆блада́юща .

пѣ́снь , ѕ҃ . і҆рмо́съ . Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й . Сїѡ́нꙋ ты̀ ка́мень вᲂзлᲂжи́сѧ , непᲂкᲂри́вымъ претыка́нїе , и҆ сᲂбла́знꙋ ка́мень . нерꙋши́мᲂе вѣ́рнымъ спасе́нїе . И҆звѣ́стнᲂ нᲂсѧ̀ начерта́нїе , и҆́же пре́жде вѣ́къ тѧ и҆з̾расти́вшагᲂ . землены́хъ за млрⷭ҇дїе , ны́нѣ не́мᲂщїю ѡ҆блᲂжи́сѧ . Сн҃ꙋ вы́шнѧгѡ , сн҃ꙋ дв҃ыѧ , бг҃ꙋ ѻ҆трᲂча́ти бы́вшемꙋ , пᲂкло́ньшꙋмисѧ , ны́нѣ ѿпꙋстѝ с̾ ми́рᲂмъ .

кᲂнда́къ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . нᲂ ᲂу҆мирѝ вᲂ бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂзлюби́лъ є҆сѝ , є҆ди́не чл҃кᲂлю́бче . и҆́кᲂсъ . Къ бцⷣѣ притеце́мъ вѣ́рнїи , хᲂтѧ́щїи сн҃а є҆ѧ̀ ви́дѣти , к̾ сѷмеѡ́нꙋ и҆дꙋ́ща . є҆го́же с̾ нб҃сѐ беспло́тнїи ви́дѧще , дивлѧ́хꙋсѧ гл҃юще , чꙋ́днаѧ зри́мъ ны́нѣ и҆ пресла́внаѧ , непᲂстижи́маѧ и҆ несказа́ннаѧ . и҆́же бᲂ а҆да́ма сᲂзда́выи , нᲂси́мь є҆́сть ꙗ҆́кѡ младе́нецъ . невмѣсти́мыи вмѣща́етсѧ на рꙋкꙋ̀ сѷмеѡ́ню , и҆́же в̾ нѣ́дрѣхъ неѡ҆пи́санныи сы́и ѻ҆ц҃а свᲂегѡ̀ , во́лею ѡ҆писꙋ́етсѧ пло́тїю а҆ не бжⷭ҇тво́мъ , є҆ди́нъ чл҃кᲂлю́бецъ .

пѣ́снь , з҃ . і҆рмо́съ . Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ въ дв҃ꙋ нетлѣ́ннѡ все́льшасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . А҆да́мꙋ пᲂказꙋ́ѧ и҆дꙋ̀ , вᲂ а҆́дѣ живꙋ́щꙋ , и҆ є҆́ввѣ принᲂсѧ̀ бл҃гᲂвѣ́стїе , сѷмеѡ́нъ вᲂпїѧ́ше , с̾ прⷪ҇рки ликꙋ́ѧ , блгⷭ҇ве́нъ бг҃ъ ѻ҆ц҃ъ на́шихъ . Ро́да земле́мна и҆збавлѧ́ѧ бг҃ъ , да́же дᲂ а҆́да прїи́детъ . плѣ́ннымъ же пᲂда́стъ всѣ́мъ ѡ҆ставле́нїе , и҆ прᲂзрѣ́нїе слѣпы́мъ . ꙗ҆́кѡ и҆ нѣмы́мъ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . И҆ твᲂѐ срⷣце нетлѣ́ннаѧ ѻ҆рꙋ́жїе про́йдетъ , сѷмеѡ́нъ бцⷣѣ прᲂвᲂз̾гласѝ , на крⷭ҇тѣ̀ взира́ющи свᲂегѡ̀ сн҃а . є҆мꙋ́же вᲂпїе́мъ , блгⷭ҇ве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Лю́дїе і҆и҃леви , ва́шꙋ сла́вꙋ є҆м̾манꙋ́ила зрѧ́ще , ѻ҆трᲂча̀ и҆з̾ дв҃ы , пред̾ лице́мъ бжⷭ҇твенагѡ кᲂвче́га нн҃ѣ ликꙋ́йте , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сѐ сѷмеѡ́нъ вᲂпїѧ́ше , пререка́емᲂе зна́менїе се́й бꙋ́детъ , бг҃ъ сы́и и҆ ѻ҆трᲂча̀ . семꙋ̀ вѣ́рнїи вᲂзᲂпїе́мъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Живо́тъ сы́и се́й бꙋ́детъ , паде́нїе невѣ́рнымъ , младе́нствᲂвавъ бг҃ъ сло́вᲂ . ꙗ҆́кѡ вᲂста́нїе всѣ́мъ вѣ́рнѡ зᲂвꙋ́щимъ , блгⷭ҇ви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

На ѳ҃ , пѣ́сни , пред̾ трᲂпарѝ . припѣ́вы .

Бцⷣе дв҃ᲂ , ᲂу҆пᲂва́нїе хрⷭ҇тїа́нѡмъ , пᲂкры́й и҆ сᲂблюдѝ и҆ спасѝ , на тѧ̀ ᲂу҆пᲂва́ющихъ .

Бцⷣе дв҃ᲂ , ми́рꙋ блага́ѧ пᲂмо́щнице , пᲂкры́й и҆ сᲂблюдѝ , ѿ всѧ́кїѧ нꙋ́жи и҆ печа́ли .

Бг҃ᲂно́се сѷмеѡ́не , прїидѝ пᲂдъи҆мѝ хрⷭ҇та̀ , є҆го́же рᲂдѝ дв҃а чⷭ҇таѧ мр҃і́ѧ .

Ѡ҆бъе́млетъ рꙋка́ма ста́рецъ сѷмеѡ́нъ , сᲂдѣ́телѧ зако́нꙋ , и҆ влⷣкꙋ всѧ́ческихъ .

Не ста́рецъ менѐ держи́тъ , нᲂ а҆́зъ держꙋ̀ є҆гѡ̀ . то́й бᲂ ѿ менѐ ѿпꙋще́нїѧ про́ситъ .

Клещѐ та́иньственаѧ , ка́кѡ ᲂу҆́гль но́сиши . ка́кѡ пита́еши . пита́ющагᲂ всѧ̀ .

Ѽ дщѝ фанꙋ́илева , прїидѝ ста́ни с̾ на́ми , и҆ бл҃гᲂдарѝ хрⷭ҇та̀ , сп҃са сн҃а бж҃їѧ .

А҆́нна цѣлᲂмꙋ́дренаѧ , прᲂвѣща́етъ стра́шнаѧ , и҆спᲂвѣ́даѧ хрⷭ҇та̀ , твᲂрца̀ нб҃ꙋ и҆ землѝ .

Непᲂсти́жимᲂ є҆́сть сᲂдѣ́ѧннᲂе ѡ҆ тебѣ̀ , а҆́нг҃лѡмъ и҆ чл҃кѡмъ , мт҃и дв҃ᲂ чⷭ҇таѧ .

Чтⷭ҇аѧ гᲂлꙋ́бица , нескве́рнаѧ а҆́гница , а҆́гньца и҆ па́стырѧ прино́ситъ в̾ цр҃кᲂвь .

Ѽ хрⷭ҇тѐ всѣ́хъ цр҃ю , пᲂбѣ́ды на врагѝ странѣ̀ на́шей да́рꙋй .

Ѽ хрⷭ҇тѐ всѣ́хъ цр҃ю , пᲂда́ждь ми сле́зы теплы̀ , да пла́чꙋ свᲂю̀ дш҃ꙋ , ю҆́же ѕлѣ̀ пᲂгꙋби́хъ .

вмѣ́стѡ , сла́вы . Трисїѧ́тельнᲂе и҆ трїѷпᲂста́снᲂе бжⷭ҇тво̀ , бл҃гᲂче́стнѡ да пᲂхва́лимъ .

вмѣ́стѡ , и҆ ны́нѣ . Ѽ дв҃це мр҃і́е , прᲂсвѣтѝ мᲂю̀ дш҃ꙋ , пᲂмраче́ннꙋю лю́тѣ , жите́йскими сластьмѝ .

Вѣ́дᲂмᲂ да бꙋ́детъ , ꙗ҆́кѡ два̀ сꙋ́щїѧ припѣ́вы в̾ нача́лѣ , припѣва́емъ кᲂ і҆рмᲂсꙋ̀ . та́же , к̾ =ко́емꙋждᲂ трᲂпарю̀ припѣва́емъ пᲂ д҃ припѣ́ вы . и҆ пᲂсᲂверше́нїи , д҃і , припѣ́вᲂв̾ с̾ трᲂпарѝ . к̾ катава́сїи пᲂе́мъ ѻ҆́ба ли́ка вкꙋ́пѣ припѣ́въ пе́рвыи . Б=цⷣе дв҃ᲂ ᲂу҆пᲂва́нїе хрⷭ҇тїа́нѡмъ .

пѣ́снь , ѳ҃ . і҆рмо́съ . Въ зако́ннѣмъ сѣннᲂписа́нїи , ѻ҆́бразъ ви́димъ вѣ́рнїи , всѧ́кᲂ бᲂ ѻ҆трᲂча̀ лᲂжесна̀ разверза́ѧ ст҃ᲂ бг҃ᲂви , тѣ́мъ первᲂрᲂжде́ннᲂе сло́вᲂ , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ велича́емъ . И҆́же дре́внимъ нᲂвᲂрᲂжде́ннᲂю го́рличищꙋ сꙋпрꙋ́гꙋ , верстꙋ́ же птенцꙋ̀ , и҆́миже бжⷭ҇твеныи ста́рецъ , и҆ цѣлᲂмꙋ́дренаѧ а҆́нна прⷪ҇рчица , и҆́же ѿ дв҃ы рᲂжде́ннᲂмꙋ , и҆ сн҃ꙋ є҆динᲂра́сленᲂмꙋ ѻ҆ц҃ꙋ , в̾ цр҃кᲂвь принᲂси́мꙋ слꙋ́жатъ велича́юще . Во́здалъ ми є҆сѝ вᲂпїѧ́ше сѷмеѡ́нъ , спасе́нїѧ си хрⷭ҇тѐ ра́дᲂванїе , вᲂспрїимѝ свᲂегѡ̀ слꙋжи́телѧ , сѣ́немъ претрꙋжде́нагᲂ . но́вей бл҃гᲂда́ти сщ҃еннᲂпрᲂпᲂвѣ́дника и҆ таи́нника , вᲂ хвале́нїи велича́емъ . Сщ҃еннᲂлѣ́пнѡ и҆спᲂвѣ́дашесѧ а҆́нна прᲂрица́ющи , цѣлᲂмꙋ́дренаѧ и҆ прпⷣбнаѧ и҆ ста́рица влⷣцѣ , в̾ цр҃кви ꙗ҆́вственѡ . бцⷣꙋ же прᲂпᲂвѣ́дающи , всѣ́мъ сꙋ́щимъ велича́ше .

свѣти́ленъ . Дх҃ᲂмъ вᲂ ст҃и́лищи пред̾ста́въ ста́рецъ , на рꙋкꙋ̀ вᲂспрїѧ́тъ зако́нꙋ влⷣкꙋ . вᲂпїѧ̀ , нн҃ѣ сᲂꙋ́зъ мѧ плᲂтьски́хъ разрѣшѝ , ꙗ҆́кᲂже ре́клъ є҆сѝ с̾ ми́рᲂмъ . ви́дѣхъ бᲂ ѻ҆чи́ма ѿкрᲂве́нїе ꙗ҆зы́кѡмъ , и҆ і҆и҃лю спасе́нїе .= гⷤ .=

На хвали́тѣхъ , стихѣ́ры , на д҃ . гла́съ , д҃ . поⷣ . да́лъ є҆сѝ зна́менїе .= Зако́нъ и҆́же в̾ писа́нїи ꙳ и҆спᲂлнѧ́ѧ чл҃кᲂлю́бецъ ,꙳ в̾ цр҃кᲂвь ны́нѣ прино́ситсѧ .꙳ и҆ сегѡ̀ прїе́млетъ ста́рыма рꙋка́ма сѷмеѡ́нъ ста́рецъ .꙳ ны́нѣ ѿпꙋща́еши мѧ вᲂпїѧ̀ ,꙳ кᲂ ѻ҆́нᲂмꙋ бл҃же́нствꙋ .꙳ ви́дѣхъ бᲂ тѧ̀ дне́сь пло́тїю ме́ртвенᲂю ѡ҆блᲂже́на ,꙳ живᲂто́мъ ѡ҆блада́юща ,꙳ и҆ сме́ртїю влады́чествꙋюща . =два́жды . Свѣ́тъ вᲂ ѿкрᲂве́нїе ꙗ҆зы́кѡмъ ,꙳ ꙗ҆ви́лсѧ є҆сѝ гдⷭ҇и .꙳ на ѻ҆́блацѣ сѣдѧ̀ ле́гцѣ ,꙳ сл҃нце пра́веднᲂе ,꙳ зако́нꙋ сѣно́внᲂе и҆спᲂлнѧ́ѧ .꙳ и҆ зача́лᲂ ꙗ҆влѧ́ѧ но́выѧ бл҃гᲂда́ти .꙳ тѣ́мъ тѧ ви́дѣвъ сѷмеѡ́нъ взыва́ше ,꙳ и҆з̾ и҆стлѣ́нїѧ мѧ̀ разрѣшѝ ,꙳ ꙗ҆́кѡ ви́дѣхъ тѧ̀ дне́сь . Нѣ́дръ рᲂди́телѧ не ѿлꙋ́чьсѧ бжⷭ҇тво́мъ ,꙳ вᲂпло́щьсѧ ꙗ҆́кᲂже и҆з̾во́лилъ є҆сѝ .꙳ рꙋка́ма нᲂси́мь при́снѡ дв҃ыѧ ,꙳ на рꙋкꙋ̀ пᲂдае́тсѧ бг҃ᲂпрїи́мца сѷмеѡ́на ,꙳ и҆́же рꙋко́ю свᲂе́ю держа́и всѧ́ческаѧ .꙳ тѣ́мже ны́нѣ ѿпꙋща́еши мѧ ,꙳ ра́дᲂстнѡ взыва́ше ,꙳ с̾ ми́рᲂмъ раба̀ твᲂегѡ̀ , ꙗ҆́кѡ ви́дѣхъ тѧ влⷣкᲂ . сла́ва , и҆ ны́нѣ . гла́съ , ѕ҃ . И҆́же на рꙋкꙋ̀ ста́рческꙋ вᲂ дне́шнїи де́нь , ꙗ҆́кѡ на кᲂлесни́цѣ херꙋви́мстѣ , вᲂсклᲂни́тисѧ бл҃гᲂи҆зво́ливыи хрⷭ҇тѐ бж҃е . и҆ на́съ пᲂю́щїѧ тѧ̀ , страсте́й мꙋчи́тельства , призыва́емъ и҆зба́ви , и҆ спасѝ ꙗ҆́кѡ чл҃кᲂлю́бецъ . Славᲂсло́вїе вели́кᲂе , и҆ ѿпꙋ́стъ . а҆́ще нѣ́сть пᲂста̀ .

На литꙋргі́и , бл҃же́нна , ѿ кано́на , пра́здникꙋ , пѣ́снь г҃ , и҆ ѕ҃ . вхо́дъ : Сказа̀ гдⷭ҇ь спасе́нїе свᲂѐ пред̾ ꙗ҆зы́ки , ѿкры̀ пра́вдꙋ свᲂю̀ .

і҆єре́й : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ сн҃е бж҃їи , мᲂли́твами бцⷣы пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ .

трᲂпа́рь . гла́съ , а҃ . Ра́дꙋйсѧ ѡ҆бра́дᲂваннаѧ бцⷣе дв҃ᲂ , и҆з̾ тебе́ бᲂ вᲂз̾сїѧ̀ со́лнце пра́веднᲂе хрⷭ҇то́съ бг҃ъ на́шъ , прᲂсвѣща́ѧ и҆́же вᲂ тмѣ̀ сꙋ́щихъ . весели́сѧ и҆ ты̀ ста́рче пра́ведныи , прїе́мыи на́ рꙋкꙋ свᲂбᲂди́телѧ дш҃а́мъ на́шимъ , да́рꙋющагѡ на́мъ вᲂскрⷭ҇нїе .

сла́ва , и҆ ны́нѣ . кᲂнда́къ . гла́съ , а҃ . И҆́же ᲂу҆тро́бꙋ дв҃чꙋ ѡ҆ст҃и́въ ржⷭ҇тво́мъ сѝ , и҆ рꙋ́цѣ сѷмеѡ́ни бл҃гᲂслᲂви́въ , ꙗ҆́кᲂже пᲂдᲂба́ше пред̾вари́въ . и҆ ны́нѣ спа́слъ є҆сѝ на́съ хрⷭ҇тѐ бж҃е . нᲂ ᲂу҆мирѝ вᲂ бранѣ́хъ житїѐ на́ше , и҆ ᲂу҆крѣпѝ люде́й , и҆́хже вᲂзлюби́лъ є҆сѝ , є҆ди́не чл҃кᲂлю́бче .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ нн҃ѣ блажа́тъ мѧ всѝ ро́ди . а҆пⷭ҇лъ , къ є҆вре́ѡмъ . заⷱ҇ , тѕ҃і .= а҆ллилꙋ́їѧ . Нн҃ѣ ѿпꙋща́еши раба̀ свᲂегѡ̀ влⷣкᲂ , пᲂ гл҃ꙋ твᲂемꙋ̀ с̾ ми́рᲂмъ . =сти́хъ . свѣ́тъ вᲂ ѿкрᲂве́нїе ꙗ҆зы́кᲂмъ , и҆ сла́вꙋ люде́й твᲂи́хъ і҆и҃лѧ . є҆ѵⷢ҇а́лїе , ѿ =лꙋкѝ . заⷱ҇ , з҃ . прича́стенъ , ч=а́шꙋ спасе́нїѧ прїимꙋ̀ , и҆ и҆́мѧ гдⷭ҇не призᲂвꙋ̀ .

Вѣ́дᲂмᲂ же бꙋ́ди и҆ ѡ҆ се́мъ . а҆́ще прилꙋчи́тсѧ пра́здникъ срѣ́тенїѧ гдⷭ҇нѧ в̾ нлⷣю , пре́же нлⷣи мытарѧ̀ и҆ фарисе́ѧ , є҆гда̀ пᲂе́тсѧ слꙋ́жба вᲂскрⷭ҇на , крᲂмѣ̀ трїо́ди .

Всꙋбо́тꙋ ве́черъ , на ма́лᲂй ве́черни . на гдⷭ҇и вᲂзва́хъ , стихѣ́ры , вᲂскрⷭ҇ны , гла́сꙋ , д҃ . сла́ва , и҆ нн҃ѣ , пра́здникꙋ . Настихо́внѣ , стⷯры , вᲂскрⷭ҇на є҆ди́на . та́же , пра́здникꙋ , г҃ , и҆́же сꙋ́ть настихо́внѣ , вели́кїѧ вече́рни , сᲂ стихѝ пра́здничными . Сла́ва , и҆ нн҃ѣ , пра́здникꙋ . с̾ ма́лᲂй вече́рни . трᲂпа́рь , вᲂскрⷭ҇нъ . сла́ва , и҆ нн҃ѣ , пра́здникꙋ . є҆ктенїѧ̀ ма́лаѧ . и҆ ѿпꙋ́стъ . На па́вечерницѣ , пᲂ дᲂсто́йнᲂ є҆́сть , кᲂнда́къ , вᲂскрⷭ҇нъ гла́сꙋ . сла́ва , и҆ нн҃ѣ , кᲂнда́къ , пра́здникꙋ . На вели́цѣй , вече́рни , на гдⷭ҇и вᲂзва́хъ , стⷯры , вᲂскрⷭ҇ны , д҃ . и҆ пра́здникꙋ , ѕ҃ . сла́ва , и҆ нн҃ѣ , пра́здникꙋ . Вы́хᲂдъ . прᲂки́менъ , дню̀ . и҆ чте́нїѧ пра́здникꙋ г҃ . Налиті́и , стⷯры , пра́здникꙋ . сла́ва , и҆ нн҃ѣ , пра́здникꙋ . Настихо́внѣ , стⷯры , вᲂскрⷭ҇ны . сла́ва , и҆ нн҃ѣ , пра́здникꙋ . На бл҃гᲂслᲂве́нїе хлѣ́бᲂмъ , трᲂпа́рь , пра́здникꙋ , гⷤ . и҆ бꙋ́ди и҆́мѧ гдⷭ҇не . На ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , и҆ нн҃ѣ , пра́здникꙋ . Пᲂ ѻ҆бы́чныхъ , кафи́смахъ , сѣда́льны , вᲂскрⷭ҇ны , съ бг҃ᲂро́дичны и҆́хъ . Пᲂнепᲂро́чнахъ трᲂпарѝ , а҆́нг҃льскїи сᲂбо́ръ . и҆ и҆пако́й гла́сꙋ . Та́же , мнᲂгᲂмлⷭ҇тивᲂ . и҆ сѣда́льны , два̀ , пᲂ є҆ди́нᲂщи . сла́ва , и҆ нн҃ѣ , сѣда́ленъ , и҆́же пᲂ пᲂлїєлеѡ́сѣ . Степе́нна , гла́сꙋ . прᲂки́менъ , пра́здникꙋ , и҆ є҆ѵⷢ҇а́лїе . та́же . Вᲂскрⷭ҇нїе хрⷭ҇то́вᲂ ви́дѣвши . ѱл҃о́мъ , н҃ . пᲂми́лꙋй мѧ бж҃е . Пᲂсе́мъ , сла́ва , мл҃твъ ра́ди бц҃ы . и҆ нн҃ѣ , мл҃твъ ра́ди бц҃ы . сти́хъ , пᲂми́лꙋй мѧ бж҃е . стⷯра , пра́здникꙋ . Кано́нъ , вᲂскрⷭ҇нъ , сᲂ і҆рмᲂсо́мъ , на д҃ . и҆ бцⷣѣ , на́ два .= =и҆ пра́здникꙋ , на́ и҃ . катава́сїѧ , пра́здникꙋ . і҆рмо́съ . сꙋ́шꙋ глꙋбᲂрᲂди́тельнꙋ зе́млю . Пᲂ г҃ , пѣ́сни , сѣда́ленъ , пра́здникꙋ , аⷤ . сла́ва , и҆ нн҃ѣ , то́йже . Пᲂ ѕ҃ , пѣ́сни , кᲂнда́къ , и҆ и҆́кᲂсъ , пра́здникꙋ . На ѳ҃ , пѣ́сни , пᲂе́мъ , чⷭ҇тнѣ́йшꙋ . свѣти́ленъ , вᲂскрⷭ҇нъ . сла́ва , и҆ нн҃ѣ , пра́здникꙋ . На хвали́тѣхъ , стⷯры , вᲂскрⷭ҇ны , д҃ . и҆ пра́здникꙋ , д҃ , сᲂ стихѝ пра́здничными . сла́ва , пра́здникꙋ . и҆ нн҃ѣ , пребл҃гᲂслᲂве́на є҆сѝ . Славᲂсло́вїе вели́кᲂе . и҆ трⷭ҇то́е . Вы́хᲂдъ , съ є҆ѵⷢ҇а́лїемъ . и҆ на́мъ пᲂю́щимъ , ст҃ы́и бж҃е . и҆ гл҃етъ і҆єре́й , премꙋ́дрᲂсть . мы́же вхо́днᲂе , трᲂпа́рь , вᲂскрⷭ҇нъ . сла́ва . кᲂне́цъ , трᲂпарѧ̀ . и҆ ны́нѣ , ве́сь . та́же , прᲂки́менъ , вᲂскрⷭ҇нъ гла́сꙋ . є҆ѵⷢ҇а́лїе вᲂскрⷭ҇нᲂ . и҆ є҆ктенїѧ̀ , рцѣ́мъ всѝ . и҆ пᲂсе́мъ , и҆спо́лнимъ заꙋ́тренїѧ мᲂли́твы . и҆ ѿпꙋ́стъ . стихѣ́ра є҆ѵⷢ҇а́льскаѧ . и҆ ча́съ , а҃ . и҆ кᲂне́чныи ѿпꙋ́стъ .

На ча́сѣхъ , трᲂпа́рь , вᲂскрⷭ҇нъ . сла́ва , трᲂпа́рь , пра́здникꙋ . кᲂндакѝ , вᲂскрⷭ҇нъ и҆ пра́здникꙋ , пременѧ́ѧ гл҃емъ .

На литꙋргі́и , бл҃же́нна вᲂскрⷭ҇на , гла́сꙋ , на́ ѕ҃ . и҆ пра́здникꙋ , пѣ́снь , г҃ ѧ , на д҃ .

Пᲂ вхо́дѣ : трᲂпа́рь , вᲂскрⷭ҇нъ . и҆ пра́здникꙋ . сла́ва , кᲂнда́къ , вᲂскрⷭ҇нъ . и҆ ны́нѣ , пра́здникꙋ . Прᲂки́менъ , и҆ а҆пⷭ҇лъ , и҆ а҆ллилꙋ́їѧ , и҆ є҆ѵⷢ҇а́лїе , чте́мъ пре́же , нлⷣи гла́сꙋ . та́же , пра́здникꙋ . прича́стенъ , хвали́те гдⷭ҇а с̾ нб҃съ . дрꙋгі́и , ча́шꙋ спасе́нїѧ прїимꙋ̀ и҆ и҆́мѧ гдⷭ҇не призᲂвꙋ̀ .

Пᲂдᲂба́етъ вѣ́дати ѡ҆ пра́здницѣ срѣ́тенїѧ гдⷭ҇а на́шегѡ і҆с҃а хрⷭ҇та̀ . Ꙗ҆́кѡ начина́етсѧ вто́рникᲂмъ , си́рѣчь , за в҃і дне́й дᲂ нлⷣи мытарѧ̀ и҆ фарисе́ѧ , и҆ вᲂсхо́дитъ дᲂ пᲂнедѣ́льника а҃ ѧ , нлⷣи пᲂста̀ . А҆́ще прилꙋчи́тсѧ в̾ нлⷣю мытарѧ̀ и҆ фарисе́ѧ , и҆лѝ блꙋ́днагѡ , и҆лѝ в̾ мѧсᲂпꙋ́стнꙋю , и҆лѝ в̾ сырᲂпꙋ́стнꙋю , и҆лѝ в̾ про́чїѧ днѝ в̾ ни́хже трїо́дь пᲂе́тсѧ , и҆ ѡ҆ се́мъ зрѝ ᲂу҆ста́въ нарѧдꙋ̀ в̾ трїо́ди . А҆́щели же неприлꙋчи́тсѧ гдѣ̀ бы́ти трїо́ди . то̀ пᲂе́тсѧ слꙋ́жба пра́здникꙋ , пᲂ вы́ше пи́саннᲂмꙋ ᲂу҆ста́вꙋ .