30 января: святых триех святителей

МЦⷭ҇А ГЕНꙊА́РІѦ ВЪ Л҃ ДН҃Ь

ст҃ы́хъ трїе́хъ ст҃лей , васи́лїѧ вели́кагѡ , григо́рїѧ бг҃ᲂсло́ва , и҆ і҆ѡа́нна златᲂꙋ́стагѡ .

Вече́ръ . блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на́ ѕ҃ . гла́съ , д҃ . поⷣ . ꙗ҆́=кѡ до́блѧ . Бл҃гᲂда́тныѧ ѻ҆рга́ны ,꙳ гꙋ́сли дх҃о́вныѧ ,꙳ бл҃гᲂнаро́читыѧ трꙋбы̀ прᲂпᲂвѣ́данїѧ .꙳ и҆́же стра́шнѡ и҆ слы́шаннѡ ,꙳ с̾ высᲂты̀ шꙋмѧ́щихъ грᲂмо́въ ,꙳ и҆ сла́вꙋ бж҃їю сказа́юще кᲂнце́мъ .꙳ тре́хъ прᲂпᲂвѣ́дникъ ,꙳ вели́кїѧ трⷪ҇цы ,꙳ і҆ѡа́нна , и҆ васи́лїѧ ,꙳ дᲂсто́йнᲂ с̾ григо́рїемъ сла́вимъ . Трⷪ҇цѣ пᲂбо́рницы ,꙳ бл҃гᲂче́стїю прило́жницы ,꙳ и҆́же съ двана́десѧтими трїѐ а҆пⷭ҇лы .꙳ и҆́же и҆з̾ є҆де́ма тᲂча́ще ,꙳ во́дꙋ живо́тныхъ рѣ́къ .꙳ и҆ лицѐ землѝ живᲂто́чными напаѧ́юще ,꙳ бжⷭ҇твеными стрꙋѧ́ми ,꙳ вели́кїѧ стихі́ѧ .꙳ и҆́же вѣ́рꙋ ꙗ҆́кѡ тва́рь сᲂста́вльше ,꙳ дᲂстᲂдо́лжнѡ да по́чтꙋтсѧ . Не сꙋ́ть рѣ́чи речѐ ,꙳ ни слᲂвеса̀ глаго́лема ,꙳ и҆́хже неслы́шатсѧ гла́си и҆́хъ .꙳ вᲂ всю̀ зе́млю бᲂ и҆ мо́ре ,꙳ вѣща́нїе прᲂтечѐ ,꙳ бжⷭ҇твеныхъ и҆ мꙋ́дрыхъ ᲂу҆чи́телей тва́ри .꙳ ѿ ню́дꙋ же хитрѡ̀ ,꙳ тѣ́ми бжⷭ҇твеными зако́ны ,꙳ сᲂдержи́тсѧ и҆ сᲂбира́етсѧ ,꙳ вᲂ є҆ди́нᲂ правᲂсла́вїе вселе́ннаѧ . На высᲂтꙋ̀ васи́лїе ,꙳ хрⷭ҇то́вы любвѐ вᲂзше́дъ ,꙳ ви́дѣлъ є҆сѝ неи҆зрече́нныѧ є҆гѡ̀ ,꙳ и҆ бжⷭ҇твеныѧ та́йны .꙳ ꙗ҆́же ѿкры́лъ є҆сѝ и҆з̾ѧсни́лъ лю́демъ ,꙳ бл҃гᲂче́стїѧ , ꙗ҆́кѡ прᲂпᲂвѣ́дникъ свѣ́телъ .꙳ тѣ́мже мᲂлѝ ,꙳ ѿ тлѝ и҆ бѣ́дъ и҆зба́вити ,꙳ и҆́же вѣ́рᲂю чтꙋ́щихъ ,꙳ твᲂѧ̀ ᲂу҆че́нїѧ препᲂдо́бне . И҆́же свѧ́занныѧ є҆ресмѝ ,꙳ разрѣши́лъ є҆сѝ прпⷣбне ,꙳ премꙋ́дрᲂстїю слᲂве́съ и҆ пᲂвелѣ́нїи твᲂи́хъ .꙳ и҆ вᲂ є҆динᲂмы́слїе со́бралъ є҆сѝ ,꙳ правᲂсла́вныѧ вѣ́ры ,꙳ и҆́же вᲂ бл҃гᲂразꙋ́мїи хрⷭ҇та̀ хва́лѧщихъ григо́рїе .꙳ є҆го́же мᲂлѝ ,꙳ ѿ тлѝ и҆ бѣ́дъ и҆зба́вити ,꙳ вѣ́рᲂю прїе́млющихъ ,꙳ бг҃ᲂвѣща́ннаѧ преда́нїѧ . Не ѡ҆бᲂри́мᲂ тѧ ѻ҆снᲂва́нїе ,꙳ хрⷭ҇то́съ ᲂу҆тверди́лъ є҆́сть свᲂе́й цр҃кви ,꙳ ѻ҆́ч҃е прпⷣбне .꙳ сᲂблюда́юща сїю̀ недви́жимꙋ ,꙳ и҆ невᲂева́ннꙋ вра́жїими прило́ги ,꙳ бг҃ᲂгл҃иве златᲂꙋ́сте .꙳ и҆ мᲂлѧ́щасѧ ѿ тлѝ и҆ бѣ́дъ и҆зба́вити ,꙳ жа́ждꙋщихъ твᲂи́хъ слᲂве́съ ,꙳ и҆ ра́зꙋма пꙋчи́нꙋ .

сла́ва , гла́съ , ѕ҃ . Чл҃цы бж҃їи , и҆ вѣ́рнїи рабѝ , слꙋжи́тели гдⷭ҇ни . мꙋ́жїе жела́нїи . сᲂсꙋ́ди и҆збра́ннїи . стᲂлпѝ , и҆ ᲂу҆тверже́нїѧ цр҃ко́внаѧ . црⷭ҇твїю наслѣ́дницы , непремᲂлчи́те вᲂпи́ти ѡ҆ на́съ ко́ гдⷭ҇ꙋ . и҆ ны́нѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бᲂ ѿ ѻ҆ц҃а вᲂз̾сїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не вᲂ двᲂю̀ лицꙋ̀ раздѣлѧ́емъ . нᲂ вᲂ двᲂю̀ є҆стествꙋ̀ несмѣ́снᲂ пᲂзнава́емъ . тᲂгѡ̀ мᲂлѝ чⷭ҇таѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ .

та́же , вы́хᲂдъ . прᲂки́менъ , дню̀ .

Ѿ= втᲂра́гѡ зако́на , чте́нїе .=

Речѐ мѡѷсе́й к̾ сн҃ѡ́мъ і҆и҃левѡмъ ви́дите сѐ преда́хъ пред̾ лице́мъ ва́шимъ зе́млю . вше́дше наслѣ́дите ю҆̀ , є҆ю́же клѧ́тсѧ гдⷭ҇ь ѻ҆ц҃е́мъ на́шимъ , а҆враа́мꙋ , и҆ і҆саа́кꙋ , и҆ і҆а́кѡвꙋ , да́ти и҆́мъ , и҆ сѣ́мени и҆́хъ пᲂ ни́хъ . и҆ рѣ́хъ ва́мъ во́ времѧ ѻ҆́нᲂ гл҃ѧ , невᲂзмᲂгꙋ̀ є҆ди́нъ вᲂди́ти ва́съ , гдⷭ҇ь бг҃ъ на́шъ ᲂу҆мно́жилъ вы̀ є҆́сть . и҆ сѐ є҆стѐ дне́сь , ꙗ҆́кѡ ѕвѣ́зды нбⷭ҇ныѧ мно́жествᲂмъ . гдⷭ҇ь бг҃ъ ѻ҆ц҃ъ на́шихъ прилᲂжи́тъ ва́мъ , ꙗ҆́кѡ да бꙋ́дете ты́сѧщами сꙋгꙋ́бᲂ . и҆ да бл҃гᲂслᲂви́тъ ва́съ , ꙗ҆́кᲂже гл҃а ва́мъ . и҆ прїѧ́хъ ѿ ва́съ мꙋ́жы мꙋ́дры , и҆ хꙋдо́ги и҆ разꙋми́чны , и҆ пᲂста́вихъ ѧ҆̀ вᲂди́тели ва́мъ , ты́сѧщники и҆ со́тники , и҆ пѧтьдесѧ́тники , и҆ десѧ́тники , и҆ кни́гчїѧ сꙋдїѧ́мъ ва́шимъ . и҆ завѣща́хъ сꙋдїѧ́мъ ва́шимъ , во́ времѧ ѻ҆́нᲂ гл҃ѧ , пᲂслꙋ́шайте междꙋ̀ бра́тїею ва́шею . и҆ сꙋди́те пра́вѡ , междꙋ̀ мꙋ́жемъ , и҆ междꙋ̀ бра́тᲂмъ є҆гѡ̀ , и҆ междꙋ̀ прише́льцемъ є҆гѡ̀ . и҆ непᲂзна́йте лица̀ на сꙋдѣ̀ . ма́лᲂмꙋ и҆ вели́кᲂмꙋ сꙋ́диши , не ᲂу҆стыди́шисѧ лица̀ чл҃ча , ꙗ҆́кѡ сꙋ́дъ бж҃їи є҆́сть .

Ѿ= втᲂра́гѡ зако́на , чте́нїе .=

Речѐ мѡѷсе́й к̾ сн҃ѡ́мъ і҆и҃левѡмъ , сѐ гдⷭ҇а бг҃а твᲂегѡ̀ нб҃ᲂ , и҆ нб҃ᲂ нб҃си , землѧ̀ и҆ всѧ̀ ꙗ҆́же сꙋ́ть в̾ ни́хъ . то́кмѡ ѻ҆ц҃ы ва́ша и҆зво́ли гдⷭ҇ь люби́ти ѧ҆̀ . и҆ и҆збра̀ сѣ́мѧ и҆́хъ пᲂни́хъ ва́съ , па́че всѣ́хъ ꙗ҆зы́къ по́ дни семꙋ̀ . и҆ ѡ҆брѣ́жите жестᲂсе́рдїе ва́ше , и҆ вы́и ва́ши не ѡ҆жести́те к̾тᲂмꙋ̀ . и҆́бᲂ гдⷭ҇ь бг҃ъ на́шъ , се́й бг҃ъ бг҃ѡ́мъ и҆ гдⷭ҇ь гᲂспᲂде́мъ . бг҃ъ вели́кїи , и҆ крѣ́пкїи и҆ стра́шныи , и҆́же нечꙋди́тсѧ лицꙋ̀ , нижѐ прїе́млетъ мзды̀ . твᲂрѧ̀ сꙋ́дъ прише́льцꙋ , и҆ сирᲂтѣ̀ , и҆ вдᲂви́цѣ . и҆ лю́битъ прише́льца , да́ти є҆мꙋ̀ хлѣ́бъ и҆ ри́зꙋ . гдⷭ҇а бг҃а твᲂегѡ̀ ᲂу҆бᲂи́шисѧ , и҆ тᲂмꙋ̀ є҆ди́нᲂмꙋ пᲂслꙋ́жиши . и҆ к̾немꙋ̀ прилѣпи́шисѧ , и҆ и҆́менемъ є҆гѡ̀ клене́шисѧ . то́й хвала̀ твᲂѧ̀ , и҆ то́й бг҃ъ тво́й , и҆́же сᲂтвᲂри́лъ ти є҆́сть вели́каѧ и҆ сла́внаѧ сїѧ̀ , ꙗ҆́же ви́дѣста ѻ҆́чи твᲂѝ .

Ѿ= премꙋ́дрᲂсти сᲂло́мѡни , чте́нїе .=

Пра́ведныхъ дꙋша̀ в̾ рꙋцѣ̀ бж҃їи , и҆ не прико́снетсѧ и҆́хъ мꙋ́ка . непщева́ни бы́ша вᲂ ѻ҆́чїю безꙋ́мныхъ ᲂу҆́мрети , и҆ вмѣни́сѧ ѡ҆злᲂбле́нїе и҆схо́дъ и҆́хъ , и҆ є҆́же ѿ на́съ ше́ствїе сᲂкрꙋше́нїе , ѻ҆ни́ же сꙋ́ть в̾ ми́рѣ . и҆́бᲂ пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , ᲂу҆пᲂва́нїе и҆́хъ без̾сме́ртїѧ и҆спо́лнь . и҆ ма́лᲂмъ пᲂка́зани бы́вше , вели́каѧ вᲂспрїи́мꙋтъ . ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ дᲂсто́йны себѣ̀ . ꙗ҆́кѡ зла́тᲂ в̾ гᲂрни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ пᲂсѣще́нїѧ и҆́хъ вᲂсїѧ́ютъ , и҆ ꙗ҆́кѡ и҆́скры пᲂ сте́блїю пᲂтекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ вᲂцр҃и́тсѧ в̾ ни́хъ гдⷭ҇ь во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи в̾ любвѝ пребꙋ́дꙋтъ ѡ҆ не́мъ . ꙗ҆́кѡ бл҃гᲂда́ть и҆ млⷭ҇ть на прпⷣбныхъ є҆гѡ̀ , и҆ пᲂсѣще́нїе вᲂ и҆збра́нныхъ є҆гѡ̀ .

На литі́и , стихѣ́ры . гла́съ , а҃ . Всѣ́хъ ст҃ы́хъ со́бралъ є҆сѝ дᲂбрᲂдѣ́тели , ѻ҆́ч҃е на́шъ васи́лїе . мѡѷсе́ѡвꙋ кро́тᲂсть , и҆лїинꙋ̀ ре́внᲂсть . петро́вᲂ и҆спᲂвѣ́данїе , і҆ѡа́ннᲂвᲂ бг҃ᲂсло́вїе . ꙗ҆́кᲂже па́велъ взыва́ѧ непреста́ннѡ , кто̀ и҆знемᲂга́етъ , и҆ а҆́зъ не и҆знемᲂга́ю . кто̀ сᲂблажнѧ́етсѧ , и҆ а҆́зъ неразжиза́юсѧ . тѣ́мже с̾ ни́ми вᲂдвᲂрѧ́ѧсѧ , мᲂлѝ спасти́сѧ дш҃а́мъ на́шимъ . Цѣвни́цꙋ дх҃о́внꙋю , є҆ресе́мъ ѡ҆бличи́телѧ , правᲂсла́внымъ сла́дᲂсть . втᲂра́гѡ напе́рсника , сло́вꙋ самᲂви́дца за́пᲂвѣдемъ . мꙋ́драгᲂ нача́льника па́стыремъ , цр҃ко́внᲂе ᲂу҆краше́нїе , бг҃ᲂсло́вными пѣ́сньми пред̾рце́мъ , ты̀ є҆сѝ па́стырь , до́брыи да́выи себѐ григо́рїе , ꙗ҆́кᲂже ᲂу҆чи́тель хрⷭ҇то́съ заны̀ . и҆ с̾ па́влᲂмъ ликꙋ́еши , и҆ мо́лишисѧ ѡ҆ дш҃а́хъ на́шихъ . И҆злїѧ́сѧ бл҃гᲂда́ть вᲂ ᲂу҆стнꙋ̀ твᲂе́ю , прпⷣбне ѻ҆́ч҃е і҆ѡа́нне златᲂꙋ́сте . сегѡ̀ ра́ди пᲂма́за тѧ̀ бг҃ъ а҆рхїєре́ѧ лю́демъ свᲂи́мъ , пасꙋ́ща ста́дᲂ є҆гѡ̀ в̾ препᲂдо́бїи и҆ пра́вдѣ . тѣ́мже препᲂѧ́санъ ѻ҆рꙋ́жїемъ си́льнагѡ , присѣ́клъ є҆сѝ ꙗ҆зыкᲂвре́дїѧ є҆ресе́мъ . и҆ ны́нѣ непреста́й мᲂлѧ́сѧ , ᲂу҆мири́ти ми́ра , и҆ спастѝ дш҃а на́ша .

сла́ва , гла́съ , ѕ҃ . Та́йныѧ дне́сь дх҃а трꙋбы̀ , бг҃ᲂно́сныѧ ѻ҆ц҃ы вᲂсхва́лимъ , вᲂз̾гласи́вшїѧ пᲂсредѣ̀ цр҃кве , гла́съ пᲂдо́бенъ бг҃ᲂсло́вїю . трⷪ҇цꙋ є҆ди́нꙋ неи҆змѣ́ннꙋю , сꙋщество́мъ же и҆ бжⷭ҇тво́мъ . пᲂтреби́тели а҆́рїевы , и҆ правᲂсла́вныхъ пᲂбо́рники , мᲂлѧ́щихсѧ всегда̀ гдⷭ҇ви , пᲂми́лᲂватисѧ дш҃а́мъ на́шимъ .

и҆ ны́нѣ , боⷢ҇ . поⷣ . в̾ =тре́тїи де́нь . П=ᲂкро́въ тво́й пречⷭ҇таѧ да не ѿи҆́меши ѿ ра́бъ свᲂи́хъ ,꙳ мо́литъ тѧ̀ ᲂу҆чи́тель трⷪ҇ца ,꙳ васи́лїи вели́кїи ,꙳ григо́рїе бжⷭ҇твеныи ,꙳ и҆ і҆ѡа́ннъ златᲂꙋ́стыи .

На стихо́внѣ стⷯры . гла́съ , а҃ . поⷣ . прехва́льнїи мч҃нцы .= Т=аи́нники дх҃о́вныѧ вкꙋ́пѣ , слᲂве́сныѧ трꙋбы̀ бж҃їѧ , бжⷭ҇твенаѧ зерца́ла вᲂсхва́лимъ дне́сь дᲂсто́йнѡ , вели́кагѡ васи́лїѧ , бжⷭ҇твенагᲂ и҆ ѻ҆гнедᲂхнᲂве́ннагᲂ григо́рїѧ , тᲂча́щагᲂ златы́ѧ стрꙋѧ̀ ᲂу҆че́нїѧ на́мъ і҆ѡа́нна вᲂи́стинꙋ златᲂꙋ́стагᲂ .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Степе́нь вѣ́ры ра́зꙋма , бжⷭ҇твеныѧ и҆ бо́дрыѧ . рѣ́ки златᲂстрꙋ́йныѧ , всесвѣ́тлыѧ и҆ чⷭ҇тыѧ свѣти́льники , тро́ичныѧ пᲂбо́рники , прїѧ́телища бл҃гᲂда́тей дх҃а , стᲂлпы̀ непᲂкᲂлеби́мыѧ , цр҃кви ᲂу҆тверже́нїѧ , дᲂсто́йнѡ пѣ́сньми вᲂсхва́лимъ .

сти́хъ : і҆єре́и твᲂѝ ѡ҆блекꙋ́тсѧ в̾ пра́вдꙋ ,꙳ и҆ препᲂдо́бнїи твᲂѝ вᲂз̾ра́дꙋютсѧ . Дх҃о́вныѧ ѻ҆рга́ны гро́ма , бжⷭ҇твенагѡ манᲂве́нїѧ , мо́лнїи прᲂпᲂвѣ́данїѧ , свѣ́щницы всесвѣ́тлїи , златі́и и҆ свѣтᲂно́снїи ѡ҆́ бз҃ѣ , требл҃же́нне васи́лїе , григо́рїе всемꙋ́дре , всезла́те и҆ всече́стне і҆ѡа́нне , чтꙋ́щихъ ва́съ спастѝ , хрⷭ҇та̀ мᲂли́те .

сла́ва , гла́съ , г҃ . А҆пⷭ҇льскимъ преда́нїемъ и҆звѣ́стнїи храни́тели бы́сте ѻ҆ц҃ы ст҃і́и . ст҃ꙋ́ю бᲂ трⷪ҇цꙋ є҆динᲂсꙋ́щнꙋю , правᲂсла́внѡ прᲂпᲂвѣ́давше . а҆́рїевᲂ хꙋле́нїе на сᲂбо́рѣ низлᲂжи́сте . с̾ ни́мже и҆ македо́нїѧ дх҃ᲂбо́рца ѡ҆бличи́вше ѡ҆сꙋди́сте , и҆ несто́рїѧ , и҆ є҆в̾ти́хїѧ и҆ дїѡско́ра , саве́лїѧ же , и҆ севи́ра без̾гла́внагᲂ . и҆́хже пре́лести , и҆спрᲂси́те и҆зба́витисѧ на́мъ , непᲂкᲂлѣби́мѡ на́ше житїѐ , въ вѣ́рѣ сᲂхрани́ти мо́лимсѧ . и҆ ны́нѣ , боⷢ҇ . Без̾ сѣ́мене ѿ бжⷭ҇твеннагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ младе́нца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Ꙗ҆́кѡ а҆пⷭ҇лѡмъ є҆динᲂнра́внїи , и҆ вселе́ннѣй ᲂу҆чи́телїе , влⷣцѣ всѣ́хъ мᲂли́тесѧ , ми́ръ вселе́ннѣй дарᲂва́ти , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́иньствᲂ , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннагᲂ , и҆ спасѐ ѿ сме́рти дш҃а на́ша .

На ᲂу҆́трени , на бг҃ъ гдⷭ҇ь . трᲂпа́рь , ст҃ы́мъ , два́жды . сла́ва , и҆ ны́нѣ , бг҃ᲂро́диченъ .

Пᲂ а҃ стихᲂло́гїи , сѣда́ленъ . гла́съ , є҃ . Ꙗ҆́кѡ цр҃ьскᲂе ᲂу҆краше́нїе цр҃кви , васи́лїѧ всѝ вᲂсхва́лимъ , преда́нїемъ сᲂкро́вище неѡ҆скꙋдѣ́емᲂ . си́ми бᲂ са́мъ наказа̀ на́съ , трⷪ҇цꙋ чти́ти ст҃ꙋ́ю . сᲂє҆дине́нꙋ ᲂу҆́бѡ сꙋщество́мъ , раздѣле́нꙋ же ѵ҆пᲂста́сьми . двⷤа . сла́ва , и҆ ны́нѣ , боⷢ҇ . Прⷭ҇та́ѧ дв҃ᲂ на́съ пᲂми́лꙋй , прибѣга́ющихъ к̾ тебѣ̀ вѣ́рᲂю милᲂсе́рдᲂй , и҆ прᲂсѧ́щихъ те́плᲂе твᲂѐ застꙋпле́нїе . мо́жеши бᲂ ꙗ҆́кѡ бл҃га всѣ́хъ спастѝ , ꙗ҆́кѡ сꙋ́щи ма́ти бг҃а вы́шнѧгѡ . мт҃рьними сѝ мᲂльба́ми прⷭ҇нѡ ѡ҆бъє́млющи ѡ҆бра́дᲂваннаѧ .

Пᲂ в҃ стихᲂло́гїи , сѣда́ленъ . гла́съ , г҃ . Сто́лпъ бы́сть цр҃кви , бᲂга́тьствᲂ некра́дᲂмᲂе бл҃гᲂче́стїю , ꙗ҆ви́лсѧ є҆сѝ бг҃ᲂсло́ве григо́рїе . в̾ без̾стрⷭ҇тїи ѡ҆сїѧ́лъ є҆сѝ житїѐ свᲂѐ , и҆ тро́йческаѧ и҆з̾ѧсни́лъ є҆сѝ пᲂвѣ́ленїѧ . ѻ҆́ч҃е прпⷣбне , хрⷭ҇та̀ бг҃а мᲂлѝ ѡ҆ спасе́нїи дш҃ъ на́шихъ . два́жды . сла́ва , и҆ ны́нѣ , боⷢ҇ . Бж҃їѧ є҆стества̀ не ѿлꙋчи́сѧ , пло́ть бы́въ во́ чревѣ твᲂе́мъ . нᲂ бг҃ъ вᲂчл҃чьсѧ пребы́сть . и҆́же пᲂ ржⷭ҇твѣ̀ мт҃рь тѧ̀ дв҃ꙋ , ꙗ҆́кᲂже пре́жде ржⷭ҇тва̀ сᲂхра́нь всенепᲂро́чнꙋ є҆ди́нꙋ гдⷭ҇ь . є҆го́же прилѣ́жнѡ мᲂлѝ , дарᲂва́ти на́мъ ве́лїю млⷭ҇ть .

Пᲂ пᲂлїєлеѡ́сѣ , сѣда́ленъ . гла́съ , и҃ . Премꙋ́дрᲂсти на пе́рси ꙗ҆́кѡ чи́стъ , та́йнѡ златᲂсло́ве вᲂз̾ле́гъ . ꙗ҆́кѡ гꙋ́ба ѻ҆́ч҃е всезлата̀ ѡ҆цѣжа́ющи во́ды , ѿ черпа́ла бжⷭ҇твена , и҆сто́чника дх҃о́внагᲂ , и҆ вѣ́рныхъ срⷣца̀ напаѧ́еши бл҃гᲂда́тїю . ѿ ню́дꙋ же и҆ и҆ста́ѧвшаѧ дш҃а чл҃кѡмъ , рᲂси́ши слᲂвесы̀ свᲂи́ми , грѣха̀ ва́рнагѡ . сᲂгрѣша́ющимъ и҆справле́нїе , па́дающимъ к̾ бг҃ꙋ приближе́нїе . грѣхо́въ ѡ҆ставле́нїе пᲂда́ти , ѿ дш҃и чтꙋ́щимъ тѧ̀ мо́лимсѧ . два́жды . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ въ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ бл҃жи́мъ ро́ди чл҃честїи , ѻ҆́гнь бᲂ всели́сѧ в̾ тѧ̀ бжⷭ҇твенныи , и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи сᲂбо́ръ и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ , и҆ сᲂгла́снѡ вᲂпїе́мъ ти , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Честна̀ пре́дъ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хъ же вᲂз̾да́стъ ми . всѧ́кᲂ дыха́нїе . є҆ѵⷢ҇а́лїе , ѿ і҆ѡа́нна . заⷱ҇ , л҃є , ѿ пᲂлꙋ̀ . ѱало́мъ , н҃ .

сла́ва . мл҃твъ ра́ди ст҃и́телей , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Прпⷣбнїи ѻ҆ц҃ы , вᲂ всю̀ зе́млю и҆зы́де вѣща́нїе и҆справле́нїи ва́шихъ . и҆́миже на́ нб҃сѣхъ ѡ҆брѣто́сте мздꙋ̀ дѣ́ланїемъ свᲂи́мъ . бѣсо́вскїѧ пᲂлкѝ разрꙋши́сте . и҆ а҆́нг҃льскимъ чино́мъ примѣси́стесѧ , и҆́хже житїю̀ ꙗ҆́вѣ вᲂзревнᲂва́сте . дерзнᲂве́нїе и҆мꙋ́ще ко́ гдⷭ҇ꙋ , ми́ръ и҆спрᲂси́те дш҃а́мъ на́шимъ .

Кано́нъ бцⷣѣ , сᲂ і҆рмᲂсо́мъ на́ ѕ҃ . и҆ ст҃ы́мъ два̀ кано́на , на́ и҃ . =Кано́нъ , бцⷣѣ . гла́съ , д҃ . пѣ́снь , а҃ . і҆рмо́съ . Тристᲂѧ́ща крѣ́пкїи , рᲂжде́исѧ ѿ дв҃ы , без̾стра́стїе вᲂ глꙋбинѣ̀ , дꙋшѝ трича́стнᲂе пᲂтᲂпѝ мᲂлю́сѧ . да тѝ ꙗ҆́кѡ въ тимпа́нѣ , вᲂ ᲂу҆мерщве́ннѣмъ тѣлесѝ , пᲂбѣ́днᲂе пᲂю̀ вᲂспѣва́нїе . =двⷤа . запѣ́въ : Прест҃а́ѧ гжⷭ҇е бцⷣе спасѝ на́съ .= Сᲂтрѧсо́шасѧ лю́дїе , и҆ смꙋти́шасѧ ꙗ҆зы́цы , црⷭ҇твїѧ держа́внаѧ ᲂу҆клᲂни́шасѧ чⷭ҇таѧ , ѿ́страха ржⷭ҇тва́ ти . прїи́де цр҃ь мо́й , и҆ низ̾лᲂжѝ мꙋчи́телѧ , и҆ ми́ръ ѿ тлѝ и҆зба́ви . =двⷤа . Жили́ще свᲂѐ живы́и в̾ вы́шнихъ , к̾ чл҃кѡмъ с̾ше́дъ ѡ҆ст҃ѝ хрⷭ҇то́съ , и҆ непᲂкᲂлѣби́мᲂ ꙗ҆вѝ . є҆ди́на бᲂ зижди́телѧ ро́ждьши , и҆ пᲂ ржⷭ҇твѣ̀ дв҃ьственыи сᲂсꙋ́дъ сᲂблюдѐ . двⷤа .

Кано́нъ ст҃ы́мъ . твᲂре́нїе , і҆ѡа́нна є҆ѵхаи́та . гла́съ , в҃ . пѣ́снь , а҃ . і҆рмо́съ . Грѧди́те лю́дїе . запѣ́въ : Ст҃і́и вели́цїи трїѐ ст҃лїе , мᲂли́те бг҃а ѡ҆ на́съ . Ко́е вᲂздаѧ́нїе дᲂстᲂлѣ́пнѡ , на́шимъ чл҃цы принесе́тсѧ ѿ на́съ бл҃гᲂда́телемъ , и҆́ми же вᲂ бл҃гᲂбы́тїе приво́димсѧ . Виті́йстїи ꙗ҆зы́цы , и҆ хи́трᲂсти и҆ кᲂва́рства , и҆ всѧ̀ слᲂве́съ си́ла , ны́нѣ в̾ винꙋ̀ сᲂбра́шасѧ є҆ди́нꙋ . и҆ чтꙋ́щихъ ѧ҆̀ да пᲂчита́ютъ . Свᲂегѡ̀ ᲂу҆́бѡ ничто́же и҆мꙋ́ще стѧжа́нїѧ , на землѝ нб҃ᲂмꙋ́дрїи . храни́теле же ꙗ҆ви́шасѧ ѻ҆́бщагᲂ и҆ пред̾ста́тели , ѻ҆́бщимъ пѣ́снемъ да спᲂдо́бѧ тсѧ . боⷢ҇ . Тебѐ ѻ҆́бщꙋю любᲂче́стїѧ всенепᲂро́чнаѧ , на́шегѡ є҆стества̀ всѝ сла́вимъ . ᲂу҆стна̀ є҆ди́на бы́вше , и҆ є҆ди́нᲂ сᲂгла́сїе сверша́юще .

И҆́нъ кано́нъ , твᲂре́нїе тᲂго́же . гла́съ , и҃ . і҆рмо́съ . Вᲂѡ҆рꙋже́на фараѡ́на . запѣ́въ : Ст҃і́и вели́цїи трїѐ ст҃лїе , мᲂли́те бг҃а ѡ҆ на́съ . Не чл҃ческᲂ сїѐ нача́тїе , спѣ́хꙋ и҆справле́нїе . нᲂ твᲂегѡ̀ престо́ла пред̾ста́теле чл҃кᲂлю́бче , мꙋ́дрᲂсть сᲂдѣ́лᲂваетъ ми , сло́ва бл҃гᲂда́ть даю́щи , є҆́же сла́вити вᲂзмᲂгꙋ̀ , и҆́хже сама̀ до́брѣ пред̾прᲂсла́ви . Ꙗ҆́кѡ ча́ша прелива́етсѧ влⷣкᲂ бл҃гᲂсть твᲂѧ̀ , и҆ мно́гᲂе бᲂга́тьствᲂ чл҃кᲂлю́бїѧ ти и҆з̾лїѧ́сѧ и҆ по́йде . ꙗ҆́кѡ и҆ны́ѧ а҆́нг҃лы съ пло́тїю пред̾ста́вити , ны́нѣ пред̾лежа́щихъ в̾ пᲂхвале́нїе . сла́ва . Ѿ нб҃сѐ нб҃съ пᲂдᲂба́ше и҆ пᲂхвала̀ , а҆́нг҃льскᲂе пѣ́нїе бжⷭ҇твенымъ пᲂдо́бнᲂ . бо́зи бᲂ прича́стїемъ , и҆́же є҆стество́мъ є҆ди́нѣмъ , и҆́стиннагᲂ бг҃а и҆мꙋ́ще , живꙋ́ща в̾ ни́хъ и҆ вѣща́юща . и҆ нн҃ѣ , боⷢ҇ . Па́мѧть пра́ведныхъ бг҃ᲂмꙋ́дрыи сᲂбо́ръ , с̾ пᲂхвало́ю чте́тъ . и҆́хже бж҃їѧ мт҃и , ꙗ҆́кѡ тѣ́хъ глави́зна дᲂсто́йнѡ съпрᲂславлѧ́етсѧ . пᲂслѣ́днїи и҆ пе́рвыи и҆ сре́днїи чи́нъ и҆мꙋ́щи . и҆ пᲂхвале́нїю прича́стница .

катава́сїѧ : Сꙋ́шꙋ глꙋбᲂрᲂди́тельнꙋю зе́млю , сл҃нце наше́ствᲂва и҆нᲂгда̀ . ꙗ҆́кѡ стѣна́ бᲂ ѡ҆гꙋстѣ̀ ѻ҆́ба по́лы вᲂда̀ , лю́демъ пѣ́шимъ глꙋбинꙋ̀ прᲂхᲂдѧ́щимъ , и҆ бг҃ᲂꙋго́днѡ пᲂю́щимъ , пᲂе́мъ гдⷭ҇ви , сла́внѡ бᲂ прᲂсла́висѧ .

пѣ́снь , г҃ . і҆рмо́съ . Свысᲂты̀ сни́де во́лею на́ землю , и҆́же превы́ше всѧ́кїѧ вла́сти , и҆ смире́нныѧ вᲂзнесѐ , и҆́з̾ рᲂва преи҆спо́днѧгѡ ро́да чл҃ча . нѣ́сть бᲂ прест҃а , па́че тебѐ гдⷭ҇и . двⷤа . Ѡ҆чища́етсѧ земны́хъ сꙋщество̀ , тᲂбо́ю присᲂвᲂкꙋ́пльшесѧ , нестерпи́мᲂмꙋ бжⷭ҇твенᲂмꙋ ѻ҆гню̀ . ꙗ҆́кѡ в̾ та́йнѣ пречⷭ҇таѧ дв҃ᲂ , в̾ тебѣ̀ хлѣ́бъ и҆спе́кшїисѧ , и҆́же и҆ тебѐ неврежде́нꙋ сᲂхра́ньшемꙋ . двⷤа . Что̀ сїѧ̀ ꙗ҆́же вᲂи́стинꙋ бли́зъ бг҃а ; ꙗ҆́кѡ превᲂз̾ше́дши всѧ̀ а҆́нг҃льскїѧ чи́ны , є҆ди́на дᲂбро́тᲂю дв҃ьства сїѧ́ющи , ꙗ҆́кѡ мт҃и сꙋ́щи вседержи́телѧ . двⷤа .

и҆́нъ , і҆рмо́съ . На ка́мени мѧ вѣ́ры ᲂу҆твердѝ . Трꙋба̀ вели́каѧ цр҃ко́внаѧ , свѣти́льникъ прᲂсвѣща́ѧи вселе́ннꙋю . прᲂпᲂвѣ́дникъ , и҆́же вѣща́нїемъ прїе́млѧ всѧ̀ кᲂнцы̀ . великᲂи҆мени́тыи , спᲂдвиза́етъ сᲂбо́ръ се́й васи́лїи . Свѣ́телъ ѿ слᲂве́съ и҆ велѣ́нїи , ꙗ҆́сенъ ѿ житїѧ̀ и҆ дѣ́лъ , вᲂ всѣ́хъ ѡ҆свѣща́ѧ всѣ́хъ , ꙗ҆́кѡ дрꙋго́е ѕвѣзда́мъ со́лнце , мнᲂгᲂпѣ́тыи бг҃ᲂсло́въ , дне́сь ᲂу҆блажа́етсѧ . Сѐ свѣ́тъ ми́рꙋ , ми́ръ прᲂсвѣща́етъ . сѐ земна́ѧ со́ль , и҆́же зе́млю слади́тъ . сѐ живᲂтꙋ̀ дре́вᲂ , без̾сме́ртїѧ плᲂды̀ пред̾лага́етъ златᲂꙋ́стыи . ᲂу҆́мрети нехᲂтѧ́щїи , прїиди́те напита́емсѧ . боⷢ҇ . И҆́же всѧ̀ ѿ небы́тїѧ в̾ бытїѐ сᲂтвᲂрѝ , є҆стество̀ да́въ кᲂмꙋ́ждᲂ бы́вшихъ . то́йже и҆ ча́ющимъ є҆стества̀ вᲂзда́нїе , вѣ́сть ꙗ҆́кᲂже хо́щетъ . ѿ ню́дꙋ же слы́шитсѧ , и҆ дв҃а ро́ждьши , кто̀ недиви́тсѧ .

и҆́нъ , і҆рмо́съ . Оу҆тверже́и нб҃са̀ . И҆́же нра́вѡмъ и҆спра́вителїе , и҆ дш҃а́мъ стрᲂи́телїе , спаси́телїе ѻ҆́бщїи чл҃кѡмъ . и҆́же и҆ дѣѧ́нїемъ на́мъ , и҆ слᲂвесы̀ ѻ҆́бразы пᲂказа́вше , наказа́телїе житїю̀ свѣ́тлїи , свѣ́тлѡ да вᲂсхва́лѧтсѧ . Дх҃ъ и҆спо́лни бж҃їи васи́лїѧ хꙋдо́жества . ѿ ѻ҆́гненыхъ же ѧ҆зы́къ и҆мѧ́ше є҆ди́нъ григо́рїи , и҆ ѻ҆́гнь высᲂкᲂгла́сныи дᲂхнꙋ̀ . а҆ и҆́же хрⷭ҇то́ва ᲂу҆ста̀ , вᲂ і҆ѡа́ннѣ гл҃аша . сла́ва . Ны́нѣшнѧгѡ вѣ́ка мꙋ́дрѣ ᲂу҆празднѝ премꙋ́дрᲂсть . бꙋ́йствᲂ прᲂпᲂвѣ́данїѧ и҆́мать , пᲂвинꙋ́ѧисѧ є҆́й , и҆ ра́бски слꙋжа́щи . прᲂпᲂвѣ́дники бᲂ бл҃гᲂда́ть и҆ мꙋдры̀ пред̾лага́етъ виті́ѧ . и҆ ны́нѣ , боⷢ҇ . И҆́же в̾ лᲂжеснѣ́хъ чⷭ҇тыѧ дв҃ы всели́выисѧ , дш҃а бг҃ᲂно́сныхъ ст҃ы́хъ жили́ща твᲂри́тъ . и҆ ѻ҆нѣ́ми ᲂу҆сты̀ , мт҃рьнюю сказꙋ́етъ та́йнꙋ .

катава́сїѧ : Оу҆тверже́нїе на тѧ̀ надѣ́ющимсѧ , ᲂу҆твердѝ гдⷭ҇и цр҃кᲂвь свᲂю̀ , ю҆́же стѧжа̀ чⷭ҇тно́ю сѝ кро́вїю .

сѣда́ленъ . гла́съ , д҃ . Премꙋ́дрїи ᲂу҆чи́телїе вселе́ннѣй , и҆́же бг҃а сла́вѧще дѣ́лы и҆ слᲂвесы̀ на землѝ , да вᲂзвели́чатсѧ дне́сь , ꙗ҆́кѡ спасе́нїю всѣ́мъ на́мъ пᲂда́телїе . два́жды . сла́ва , и҆ ны́нѣ , боⷢ҇ . Пред̾ста́тельнице нера́тнаѧ , бг҃ᲂрᲂди́тельнице , и҆ мᲂли́твᲂю гᲂто́ваѧ притека́ющимъ к̾ тебѣ̀ , ѿ бѣ́дъ мѧ и҆зба́ви , непре́зри менѐ , всѣ́хъ застꙋпле́нїе .

пѣ́снь , д҃ . і҆рмо́съ . Сѣдѧ́и вᲂ сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . двⷤа . Пᲂживѐ съ чл҃ки , ви́димъ бы́сть неви́димыи , въ зра́цѣ сы́и непᲂсти́жимагѡ бжⷭ҇тва̀ . и҆ вᲂѡ҆бра́жьсѧ и҆з̾ тебѐ дв҃ᲂ , ѿ чꙋжа́гѡ спастѝ вѣ́дѧщихъ тѧ̀ чⷭ҇тꙋю бг҃ᲂрᲂди́тельницꙋ . двⷤа . Прїѧ́тъ веще́ственѣ дв҃аѧ невеще́ственагᲂ , пᲂсредѣ̀ ве́щи млⷣнца ѿ неѧ̀ бы́вша . тѣ́мже ны́нѣ вᲂ двᲂю̀ сꙋществꙋ̀ пᲂзнава́етсѧ плᲂтᲂно́сецъ бг҃ъ , и҆ зе́менъ превы́ше сꙋщества̀ . Въ ржⷭ҇твѣ́ тѧ дв҃ꙋ сᲂхранѝ и҆́же в̾ тѧ̀ все́льсѧ , и҆ ро́ждьсѧ без̾ сѣ́мене сло́вᲂ и҆ бг҃ъ пребы́сть , и҆ пᲂ ржⷭ҇твѣ̀ па́ки ꙗ҆вѝ дв҃ꙋ , ꙗ҆́кѡ влⷣка и҆ зижди́тель .

и҆́нъ , і҆рмо́съ . Прише́ствᲂвавъ ѿ дв҃ы . Разꙋ́мницы ѿ ни́жнїѧ мꙋ́дрᲂсти бы́вше , снабдѣ́теле сла́вныѧ ѿ вы́шнїѧ стѧжа́сте . тѣ́мже ꙗ҆́кѡ рабꙋ̀ сїю̀ , ѻ҆́нᲂй премꙋ́дрᲂсти пᲂкᲂри́сте . двⷤа . Любᲂмꙋ́дрїи , мꙋ́дрыхъ люби́теле ᲂу҆мꙋ́дрити , и҆ гл҃ати наꙋчи́тесѧ всѝ , и҆́же слᲂвесе́мъ чꙋдѧ́щесѧ , дѣѧ́нїю и҆спыта́нїѧ , и҆ видѣ́нїю ѿ ню́дꙋ вᲂз̾держа́щесѧ . боⷢ҇ . Ꙗ҆́кᲂже по́зденъ до́ждь въ пᲂслѣ́днихъ ра́ненъ , вᲂда́мъ вѣ́чнымъ дѣ́латель , во́ чревᲂ твᲂѐ всели́сѧ непᲂро́чнаѧ . по́ временю хла́днꙋ ѡ҆скꙋдѣва́ющимъ .

и҆́нъ , і҆рмо́съ . Ты́ ми хрⷭ҇тѐ гдⷭ҇ь . Сто́лпъ ѻ҆́гненъ , лю́демъ вѣ́рнымъ во́ждь , и҆ ѡ҆палѧ́ѧ врагѝ вѣ́рѣ . кᲂлѣ́на же спаса́ѧ сᲂхра́ннѡ пᲂслѣ́дꙋющаѧ , вели́кїи ꙗ҆ви́сѧ васи́лїи . да дерза́етъ и҆ пᲂбѣжда́етъ хрⷭ҇то́ва цр҃кви , тᲂли́ка ѡ҆бᲂгати́вшаѧсѧ пᲂбо́рника . Ѧ҆зы́кꙋ пи́ща , и҆ слы́шанїю всѧ́кᲂмꙋ сла́дᲂсть , твᲂѐ сло́вᲂ премꙋ́дре григо́рїе . ма́нна живᲂтꙋ̀ , рᲂса̀ сла́дᲂсти , ме́дъ и҆́же ѿ ка́мене . а҆́нг҃льскїи хлѣ́бъ нбⷭ҇ныи , несы́тнѡ насыща́тисѧ сла́дᲂсти вѣ́рнымъ . и҆ напᲂлнѧ́ти жела́нїѧ прича́стникѡмъ . сла́ва . Рѣка̀ бл҃гᲂда́тей дх҃о́вныхъ напо́лнисѧ , да́же и҆ дᲂ и҆з̾ли́тїѧ . и҆ до́брᲂе лицѐ землѝ ꙗ҆́кѡ пи́ща пᲂто́къ , ѿ златы́хъ напᲂѧ́етъ ᲂу҆́стъ , веселѧ̀ и҆ тꙋчнѧ̀ всѧ́къ гра́дъ бж҃їи , бжⷭ҇твеныхъ во́дъ стрꙋѧ́ми . и҆ ны́нѣ , боⷢ҇ . Є҆стество̀ про́стᲂ и҆мꙋ́щи слᲂже́нїе . и҆ ꙗ҆́вльшꙋ лꙋ́чше смѣше́нїѧ в̾ твᲂе́мъ влⷣчце сн҃ѣ . трїѐ бг҃ᲂно́снїи ᲂу҆чи́телїе и҆спᲂвѣ́даша , ѿ двᲂю̀ во́лю и҆ двᲂю̀ дѣ́йствꙋ , сꙋгꙋ́ба пᲂ є҆стествꙋ̀ и҆спᲂвѣ́даше .

катава́сїѧ : Пᲂкры́ла є҆́сть нб҃са̀ дᲂбрᲂдѣ́тель твᲂѧ̀ хрⷭ҇тѐ , и҆з̾ кїѡ́та бᲂ прᲂше́дъ , ст҃ы́ѧ твᲂеѧ̀ нетлѣ́нныѧ мт҃ре , в̾ цр҃кви сла́вы ти ꙗ҆ви́сѧ , ꙗ҆́кѡ младе́нецъ на рꙋкꙋ̀ нᲂси́мъ . и҆ и҆спо́лнишасѧ всѧ̀ твᲂегѡ̀ хвале́нїѧ .

пѣ́снь , є҃ . і҆рмо́съ . Нн҃ѣ вᲂста́нꙋ пррⷪ҇чески речѐ бг҃ъ . ны́нѣ прᲂсла́влюсѧ . ны́нѣ вᲂзнесꙋ́сѧ , па́дшагѡ прїимꙋ̀ ѿ дв҃ы , и҆ к̾ свѣ́тꙋ ди́внꙋ , вᲂзнесꙋ̀ мᲂегѡ̀ бжⷭ҇тва̀ . двⷤа . До́мъ сла́вы , и҆ го́рꙋ бж҃їю ст҃ꙋ́ю , невѣ́стꙋ , черто́гъ , хра́мъ сщ҃е́нїѧ , ѡ҆брѣ́тъ тѧ̀ чи́стꙋю сн҃ъ бж҃їи , и҆ въ тебѣ̀ по́живъ , и҆ ра́й пи́щныи прⷭ҇нᲂсꙋ́щныи на́мъ сᲂдѣ́ла . вⷤ . Пло́ть ѿ крᲂве́й дв҃ческихъ прїѧ́лъ є҆сѝ хрⷭ҇тѐ , без̾сѣ́меннꙋ пречи́стꙋ и҆ сᲂста́внꙋ . слᲂве́снꙋ и҆ ᲂу҆́мнꙋ и҆ ѡ҆дш҃евле́нꙋ , дѣ́йственꙋ же во́лею , самᲂвла́стнымъ влады́чествᲂмъ . Мꙋчи́телей ра́зꙋмъ , дв҃ьственᲂе пᲂсрамѝ чре́вᲂ . младе́нецъ бᲂ ꙗ҆́звꙋ и҆спыта̀ рꙋко́ю , а҆́спиднꙋю дш҃егꙋ́бнꙋю , и҆ ѿстꙋ́пника го́рдагᲂ низ̾ло́жь , вѣ́рнымъ по́д̾нᲂзѣ пᲂкᲂрѝ .

и҆́нъ , і҆рмо́съ . Прᲂсвѣще́нїе вᲂ тмѣ̀ . Ты̀ и҆сто́чникъ свᲂи́хъ бл҃гᲂда́тей и҆спи́ти ве́сь , да́лъ є҆сѝ чл҃кᲂлю́бче ст҃ы́мъ , ᲂу҆ма́ленъ ника́кᲂже скꙋ́дᲂстїю . ми́ръ же ве́сь напᲂи́въ , и҆́же ѿ чре́слъ и҆́хъ бжⷭ҇твеными стрꙋѧ́ми . Что́ ми зла́тᲂ ; что́ ми бᲂга́тьствᲂ и҆ сла́ва и҆ мᲂгꙋ́тьствᲂ ; ды́мъ расхᲂдѧ́щьсѧ пᲂ вᲂз̾дꙋ́хꙋ , всѧ̀ ѡ҆бхᲂдѧ́щь пла́мы . всѧ̀ нᲂсѧ́щь . мнѣ̀ бᲂга́тьствᲂ мнᲂгᲂлю́бнᲂ , ꙗ҆́же ᲂу҆чи́телемъ трⷪ҇ца вѣтꙋ́ющаѧ . Тече́тъ рѣка̀ навᲂднѧ́ема , то́читъ а҆́лчꙋщимъ без̾сме́ртнᲂе бра́шнᲂ , жа́ждꙋщимъ нетлѣ́ннᲂе пи́вᲂ . вᲂда̀ жива̀ во́ вѣки , и҆ ѡ҆бдержа̀ жи́вы пїю́щихъ , всѝ мнᲂгᲂтекꙋ́щїѧ жи́зни насы́титесѧ . боⷢ҇ . И҆мѧ́ше крѣ́пᲂсть на ны̀ ѕло́ба , нᲂ не в̾ кᲂне́цъ . и҆з̾немо́же бᲂ пᲂ ржⷭ҇твѣ̀ дв҃ыѧ , и҆́же крѣ́пᲂстїю си́льнагѡ , прише́дша не́мᲂщїю пло́тьскᲂю , и҆ си́льнагѡ ѕло́бꙋ ᲂу҆мертви́вша .

и҆́нъ , і҆рмо́съ . Вскꙋ́ю мѧ ѿри́нꙋ . И҆́же бжⷭ҇твеныхъ веще́й и҆ чл҃ческихъ , мꙋ́дрыѧ хитрецы̀ . и҆́же сꙋ́щихъ є҆стества̀ , любᲂи́стиннᲂ на́мъ сказа́вшихъ , и҆ си́хъ зижди́телѧ всѣ́мъ прᲂпᲂвѣ́давшихъ ꙗ҆́кѡ си́льна , бл҃гᲂда́рными гла́сы да вᲂсхва́лимъ . Го́рькᲂе и҆ бри́дкᲂе , и҆́же кᲂ спасе́нїю цѣльбы̀ ᲂу҆слади́ша , мꙋ́дрыми слᲂвесы̀ , пѣ́сньми и҆ хитрᲂстьмѝ и҆ бл҃гᲂда́тьми , дш҃а́мъ бж҃їи ᲂу҆го́дницы . наслажда́йтесѧ всѝ вѣ́рнїи , и҆ красѧ́щесѧ спаса́йтесѧ . сла́ва . Да мᲂлчи́тъ всѧ́кᲂ сло́вᲂ , бг҃ᲂпрᲂпᲂвѣ́дникѡмъ гл҃ющимъ бжⷭ҇твенаѧ . и҆ ᲂу҆держи́тъ , и҆́же дре́вле завѣ́тъ но́выи прїи́мшїи , чⷭ҇таѧ писа́нїѧ . въ ни́хже ᲂу҆зако́ненѡмъ , причита́етсѧ всѧ́къ вѣ́рныхъ сᲂбо́ръ . и҆ ны́нѣ , боⷢ҇ . Без̾сме́ртнᲂе є҆стество̀ , ме́ртвенᲂе претечѐ въ ст҃ы́ню . и҆ дв҃аѧ ѻ҆трᲂкᲂви́ца , без̾пло́тныхъ а҆́нг҃лъ пре́йде , ꙗ҆́кѡ бг҃а ро́ждьши , цр҃ѧ а҆́нг҃лѡмъ . є҆го́же зрѣ́ти тѣ́мъ невᲂзмо́жнѡ .

катава́сїѧ : Ꙗ҆́кѡ ви́дѣ и҆са́їѧ ѻ҆бра́знѡ на прⷭ҇то́лѣ превысо́цѣ бг҃а , ѿ а҆́нг҃лъ сла́вы да́ры прїе́млюща , ѽ ѻ҆каѧ́нныи вᲂпїѧ́ше а҆́зъ , прᲂви́дѣхъ вᲂплᲂща́ема бг҃а , свѣ́та невече́рнѧ , и҆ ми́рᲂмъ ѡ҆блада́юща .

пѣ́снь , ѕ҃ . і҆рмо́съ . Прїидо́хъ вᲂ глꙋбины̀ мᲂрскі́ѧ , и҆ пᲂтᲂпи́ла мѧ є҆́сть бꙋ́рѧ мно́гихъ ми прегрѣше́нїи . нᲂ ꙗ҆́кѡ бг҃ъ , и҆з̾ тлѝ вᲂз̾ведѝ живо́тъ мо́й мнᲂгᲂми́лᲂстиве . двⷤа . Дре́вле ᲂу҆́бѡ прельсти́ мѧ ѕмі́й , и҆ ᲂу҆мᲂри́ мѧ ра́ди пра́матере мᲂеѧ̀ є҆́ввы . ны́нѣ же чи́стаѧ сᲂзда́выи мѧ , тебѐ ра́ди ѿ и҆стлѣ́нїѧ вᲂзва̀ . двⷤа . Бе́здна бе́зднꙋ тѧ̀ не и҆з̾глаго́ланнꙋю , бл҃гᲂꙋтро́бїѧ ѻ҆трᲂкᲂви́це , и҆збра́ннꙋю пᲂказа̀ чꙋде́съ . и҆́бᲂ и҆з̾ тебѐ мо́лнїѧ бжⷭ҇тва̀ би́серъ хрⷭ҇то́съ вᲂсїѧ̀ . двⷤа .

и҆́нъ , і҆рмо́съ . Бе́здна грѣхо́въ . Сво́йства в̾ трⷪ҇цѣ трїѐ съ бг҃ᲂсло́вите . нерᲂжде́нїе ѻ҆ц҃а , сло́ва рᲂжде́нїе , дх҃а же и҆схᲂжде́нїе є҆ди́нагѡ . Дне́сь до́мꙋ семꙋ̀ ꙗ҆вле́нᲂ спасе́нїе . два́ бᲂ и҆ трѝ сᲂєдине́ныхъ , хрⷭ҇то́съ во́ и҆мѧ свᲂѐ четы́и , пᲂсредѝ пред̾ста̀ си́хъ . Неи҆спыта́нна на землѝ глꙋбина̀ , къ нбⷭ҇нѣй высᲂтѣ̀ . нᲂ ѿ землѝ ст҃ы́ѧ и҆з̾несѐ гᲂрѣ̀ нб҃съ , нбⷭ҇ныѧ любо́вь . боⷢ҇ . Но́въ тѧ и҆сто́чникъ дв҃ᲂ , и҆ винꙋ̀ та́йнамъ и҆мꙋ́ще трїѐ бг҃ᲂгла́снїи , но́выми прило́ги но́вᲂ приво́дѧтъ сказа́нїе .

и҆́нъ , і҆рмо́съ . Ѡ҆чи́сти мѧ сп҃се . Трⷪ҇цꙋ є҆ди́ницꙋ бг҃ᲂсло́вити наꙋчи́хᲂмсѧ , є҆ди́ницꙋ трⷪ҇цꙋ пѣ́ти прїѧ́хᲂмъ . пᲂкланѧ́тисѧ навыко́хᲂмъ ѿ ѻ҆ц҃ъ , є҆ди́нᲂмꙋ є҆стествꙋ̀ трисᲂста́внꙋ . Сло́вᲂ бѣ́ѧше и҆спе́рва сᲂ ѻ҆ц҃е́мъ сᲂбез̾нача́льнᲂ , и҆ дх҃ъ бж҃їи . бг҃ъ бᲂ бѣ̀ пренача́льныи , про́стъ є҆динᲂсꙋ́щенъ , сᲂвᲂзра́стнᲂ є҆ди́нᲂ бжⷭ҇тво̀ . ꙗ҆́кᲂже бжⷭ҇твенїи рѣ́ша прᲂпᲂвѣ́дницы . сла́ва . Смѣша́ѧ и҆ раздѣлѧ́ѧ , ꙗ҆́кᲂже смѣше́нїемъ раздѣле́нна . є҆ди́нᲂ нераздѣ́льнᲂ пᲂмышлѧ́ѧ , и҆ тремѝ мечта́ѧсѧ . ᲂу҆чи́телѧ прїе́млю , тре́хъ бг҃ᲂно́сныхъ , си́це ᲂу҆ча́щихъ вѣ́рᲂвати ми . и҆ ны́нѣ , боⷢ҇ . Без̾ мт҃ре пре́жде пло́ти , без̾ ѻ҆ц҃а пᲂ смѣше́нїи , сн҃ъ ѻ҆ч҃ь и҆ мт҃рень . и҆́же си́ми нарица́емъ , па́че ᲂу҆ма̀ ѻ҆́бᲂѧ . бг҃ᲂви бᲂ пᲂдᲂба́етъ пресла́внаѧ .

катава́сїѧ : Вᲂзᲂпѝ к̾ тебѣ̀ ви́дѣвъ ста́рецъ ѻ҆чи́ма спасе́нїе , є҆́же лю́демъ прїи́де ѿ́ бг҃а хрⷭ҇тѐ , ты̀ бг҃ъ мо́й .

кᲂнда́къ . гла́съ , в҃ . Сщ҃е́нныѧ и҆ бг҃ᲂвѣща́нныѧ прᲂпᲂвѣ́дателѧ , ве́рхъ ᲂу҆чи́телей гдⷭ҇и , прїѧ́тъ в̾ наслажде́нїе бл҃ги́хъ твᲂи́хъ пᲂко́ѧ . трꙋды́ бᲂ и҆́хъ и҆ бᲂлѣ́зни прїѧ́тъ , па́че всѧ́кᲂгѡ принᲂше́нїѧ . є҆ди́не прᲂславлѧ́ѧи ст҃ы́хъ свᲂи́хъ . и҆́кᲂсъ . Кто̀ дᲂво́ленъ ᲂу҆стнѣ̀ ѿверстѝ , и҆ пᲂдви́гнꙋти ꙗ҆зы́къ , къ дыха́ющимъ ѻ҆́гнь си́лᲂю сло́ва и҆ дх҃а . ѻ҆ба́че тᲂли́кᲂ рещѝ дерза́ю , ꙗ҆́кѡ всѧ́кᲂ преидо́ша чл҃че є҆стество̀ трїѐ , мно́гими и҆ вели́кими бл҃гᲂда́тьми , дѣ́лᲂмъ и҆ видѣ́нїемъ , ѻ҆бᲂю́дꙋ свѣ́тлыхъ преше́дше . тѣ́мже вели́кихъ тѣ́хъ спᲂдо́билъ є҆сѝ вᲂзда́нїи , ꙗ҆́кѡ вѣ́рныѧ свᲂѧ̀ рабы̀ , є҆ди́не прᲂславлѧ́ѧи ст҃ы́хъ свᲂи́хъ .

пѣ́снь , з҃ . і҆рмо́съ . Ю҆́нᲂшы трѝ в̾ вавилѡ́нѣ , велѣ́нїе мꙋчи́телевᲂ на бꙋ́йствᲂ прелᲂжи́ша . и҆ пᲂсредѝ ѻ҆гнѧ̀ в̾ве́ржени , прᲂхлажда́еми вᲂ пїѧ́хꙋ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . вⷤ . Привлачи́тъ мѧ к̾ пѣ́нїю любы̀ дв҃ьственаѧ , ѻ҆́гнь и҆́же в̾ срⷣцы мᲂе́мъ , вᲂпи́ти мт҃ри и҆ дв҃ицѣ , бл҃гᲂслᲂве́наѧ гдⷭ҇ь си́ламъ с̾ тᲂбо́ю . вⷤ . Превы́шши тваре́й всѣ́хъ є҆сѝ бцⷣе , ꙗ҆́кѡ твᲂрца̀ ро́ждьши и҆ гдⷭ҇а . тѣ́мже ти вᲂпїю̀ , бл҃гᲂслᲂве́наѧ гдⷭ҇ь си́ламъ с̾ тᲂбо́ю . трⷪ҇ченъ . Гдⷭ҇ьствᲂ є҆ди́нᲂ чтꙋ̀ в̾ трїе́хъ сщ҃е́нїихъ нераздѣ́льнᲂ , и҆ пᲂю̀ трисᲂста́внᲂе є҆стество̀ . бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ .

и҆́нъ , і҆рмо́съ . Бг҃ᲂпрᲂти́внᲂ велѣ́нїе . Пᲂбѣжда́етсѧ ѽ бл҃же́ннїи и҆ бѣ́гаетъ , ꙗ҆́же пре́жде непᲂстᲂѧ́ннаѧ ꙗ҆́рᲂсть є҆́реськаѧ . во́скъ же та́етъ ѿ лица̀ ѻ҆гнѧ̀ , и҆нᲂрᲂжде́ннᲂ всѧ́кᲂ велѣ́нїе . ва́шими ѻ҆гнедыха́ющими вѣща́нїи , прело́жнѡ ꙗ҆влѧ́етсѧ . двⷤа . Лжꙋ̀ ᲂу҆́бѡ ᲂу҆клᲂни́ша є҆́ллинскихъ ба́сней . ᲂу҆вѣ́ренїемъ же тᲂми́тельствᲂ є҆́же в̾ чл҃цѣхъ вᲂзлюби́ша , ѿ негѡ̀ и҆́стинꙋ трїѐ ᲂу҆ѧсни́вше . си́це всѧ́къ со́нмъ вѣ́рныхъ , ᲂу҆твержа́ютъ слᲂвесы̀ и҆ ᲂу҆вѣрѧ́ютъ . боⷢ҇ . Въ тебѣ̀ всѧ́кᲂ прᲂрече́нїе пᲂчѝ , и҆ кᲂне́цъ прїѧ́тъ , ᲂу҆дивлѧ́ѧи глаго́лющихъ . и҆з̾ тебе́ же и҆ свѣ́тлѣйшаѧ , и҆ прᲂрече́ныхъ чꙋдеса̀ то́чатъ чⷭ҇таѧ , мꙋдры̀ ꙗ҆влѧ́ѧ сказа́тели .

и҆́нъ , і҆рмо́съ . Бж҃їѧ схᲂжде́нїѧ . Мᲂлча́ще и҆ зᲂвꙋ́ще , ви́димы же и҆ слы́шаны , дᲂбрᲂдѣ́тели и҆ мꙋ́дрᲂсти , бг҃ᲂгла́снїи стᲂлпѝ бы́ша . дѣ́лᲂмъ и҆ сло́вᲂмъ вᲂпи́ти наꙋчи́ша , бл҃гᲂслᲂве́нъ бг҃ъ ѻ҆ц҃ъ на́шихъ . Бж҃їѧ гла́сы свы́ше вᲂз̾гремѣ́вшихъ на́мъ ди́внѡ , мо́лнїины лꙋча̀ и҆змѣнѧ́ющихъ , нбⷭ҇ныхъ ѻ҆́блакъ . ва́ша вѣща́нїѧ прїе́млюще премꙋ́дрїи , сᲂвᲂзглаша́емъ ва́мъ , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Ве́ргꙋтсѧ с̾ нб҃сѐ гра́ды , ѿ каменнᲂпра́щныхъ мета́нїи ѧ҆зы́къ , сᲂкрꙋша́юще гнила́ѧ ᲂу҆че́нїѧ . а҆́ще ко́е пᲂсредѝ дерза́етъ сꙋеслᲂве́сникъ , пра́вѣ невѣща́ющихъ , бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ , боⷢ҇ . Въ тѧ̀ дв҃ꙋю все́льсѧ , и҆ пᲂ ржⷭ҇твѣ̀ дв҃ꙋ ѡ҆ста́вилъ є҆́сть . ᲂу҆краша́ѧи сᲂста́вы , и҆ претвᲂрѧ́ѧ є҆стества̀ ꙗ҆́кᲂже хо́щетъ . к̾ немꙋ́ же вᲂпїе́мъ с̾ тᲂбо́ю всенепᲂро́чнаѧ , бл҃гᲂслᲂве́нъ бг҃ъ ѻ҆ц҃ъ на́шихъ .

катава́сїѧ : Тебѐ в̾ пещѝ ѡ҆рᲂси́вшагѡ дѣ́ти бл҃гᲂслᲂви́ша , и҆ в̾ дв҃ꙋ нетлѣ́ннѡ все́льшасѧ , бг҃а сло́ва пᲂе́мъ бл҃гᲂче́стнѡ хва́лѧще , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . И҆зба́вителю всѣ́хъ всеси́льне , пᲂсредѣ̀ пла́мене бл҃гᲂче́ствᲂвавшїѧ сше́дъ ѡ҆рᲂси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гᲂслᲂви́те гдⷭ҇нѧ гдⷭ҇а . двⷤа . Ѿ ребра̀ а҆да́мᲂва сᲂзда́выи тѧ̀ , ѿ твᲂегѡ̀ дв҃ьства вᲂплᲂща́етсѧ , и҆́же всѣ́хъ вина̀ . є҆мꙋ́же вᲂспѣва́юще вᲂпїе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . двⷤа . Въ сѣ́ни а҆враа́мъ ᲂу҆зрѣ̀ , є҆́же в̾ тебѣ̀ бцⷣе та́иньствᲂ , сн҃а бᲂ твᲂегѡ̀ без̾пло́тнагᲂ прїѧ́тъ , пᲂѧ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Равнᲂчи́сленыѧ тро́ицы , спасѐ , твᲂегѡ̀ дв҃ьства пред̾вᲂѡбраже́нїе . дв҃ьственымъ бᲂ тѣ́лᲂмъ пᲂпра́вше пла́мень ѻ҆́трᲂцы , вᲂпїю́ще , блгⷭ҇ви́те всѧ̀ дѣ́ла гдⷭ҇нѧ гдⷭ҇а .

и҆́нъ , і҆рмо́съ . Ѡ҆ =пᲂдо́бїи зла́тѣ . Пᲂзнава́емъ бл҃гᲂче́стнѡ , и҆ пᲂкланѧ́емсѧ равнᲂче́стнꙋ є҆ди́нᲂмꙋ є҆стествꙋ̀ , неприкᲂснᲂве́ннѣй си́лѣ . є҆ди́ницꙋ же и҆ трⷪ҇цꙋ , ꙗ҆́же всѝ сі́и слᲂвесы̀ ѡ҆кᲂрми́ша лꙋ́чшими . та́кѡ бᲂ сла́вити трїѐ бг҃ᲂсло́вцы преда́ша . с̾ ни́миже пᲂкланѧ́емсѧ є҆́й во́ вѣки . =двⷤа . Снидо́шасѧ трїѐ бг҃ᲂпрᲂпᲂвѣ́дницы , сᲂє҆ди́ниша трⷪ҇цꙋ . и҆ нераздѣ́льнѡ всѣ́мъ , сᲂблюдо́ша бж҃їе є҆стество̀ . є҆ди́нꙋ ѿ неѧ̀ прїе́мше нераздѣ́льнꙋ сла́вꙋ . в̾ хвалꙋ̀ є҆ди́нꙋ сᲂзыва́ющꙋ , превᲂзнᲂсѧ́щихъ ю҆̀ вᲂ всѧ̀ вѣ́ки .= боⷢ҇ . П=рїе́мъ є҆́же пᲂ на́съ , вᲂз̾да́въ свᲂѐ бл҃гᲂда́тель , ѿбѣжѐ є҆ди́нагᲂ , не пᲂстрада́ бᲂ дв҃ᲂ , бг҃ᲂтвᲂри́тъ же . нᲂ в̾ нетлѣ́нїе тлѣ́нїе претвᲂрѧ́етъ . па́че же и҆ стра́жетъ во́лею , стра́стїю стра́сть рѣши́тъ , ꙗ҆́кᲂже трїѐ ѻ҆ц҃ы на́съ та́йнѡ во́дѧтъ .

и҆́нъ , і҆рмо́съ . Се́дмь седми́цею . И҆́хже бг҃ъ сᲂвᲂкꙋпѝ , в̾ є҆ди́нᲂ че́стнᲂ сᲂє҆дине́нїе , хвалѧ́и да неразлꙋча́етъ чл҃къ , нᲂ вѣ́рны вмѣнѧ́етъ тѣ́хъ же дарᲂва́нїихъ . ра́внѡ и҆ пѣ́нїемъ пᲂѧ́и да спᲂдо́битъ , дѣ́ти бл҃гᲂслᲂви́те , сщ҃е́ннїи гдⷭ҇а по́йте , и҆ превᲂзнᲂси́те є҆гѡ̀ во́ вѣки . Си́льнїи и҆ неѡ҆бᲂри́мїи бжⷭ҇тва̀ пᲂбо́рницы , и҆ и҆́стинѣ нело́жнїи спᲂспѣ́шницы . глꙋбины̀ дх҃а до́брѣ и҆спыта́вше , бг҃ᲂпᲂдо́бныхъ ѡ҆́ бз҃ѣ пᲂхва́лъ ѿ тꙋ́дꙋ сᲂставлѧ́ютъ . и҆ ᲂу҆ча́тъ пѣ́ти , дѣ́ти бл҃гᲂслᲂви́те гдⷭ҇а , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Съ нб҃сѐ ᲂу҆́бѡ вели́цѣ двѣ̀ свѣти́лѣ прᲂсвѣща́ета , преѧ́тїемъ дрꙋ́гъ дрꙋ́га пᲂд̾сл҃нечнꙋю . ѿ земли́ же свѣтлѣ́йши , всѧ́ческаѧ ѡ҆зарѧ́ютъ трїѐ , пᲂто́мъ прехва́льнїи свѣти́льницы , свѣтѧ́щесѧ дрꙋ́гъ со́ дрꙋгᲂмъ , и҆ вᲂспѣва́юще вкꙋ́пѣ , дѣ́ти бл҃гᲂслᲂви́те гдⷭ҇а , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . И҆́же на́съ ра́ди вᲂплᲂще́нїе , и҆ стра́сти честны́ѧ , на́съ ра́ди бг҃ъ с̾ ме́ртвыми бы́сть . сме́рти ᲂу҆́бѡ невкꙋ́шь , ꙗ҆́кᲂже страсте́й свᲂбо́дь . а҆ є҆́же к̾ пло́ти ме́ртвенѣй приѡ҆бще́нїемъ гл҃емыи , стрⷭ҇те́мъ причасти́сѧ и҆ сме́рти . с̾ не́юже превᲂзно́симъ є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кланѧ́емсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Та́йна бж҃їѧ несказа́ннаѧ , в̾ тебѣ̀ быва́етъ , ꙗ҆́вственна та́йна дв҃ᲂ пречⷭ҇таѧ , и҆́бᲂ бг҃ъ и҆з̾ тебѐ вᲂплᲂти́сѧ за милᲂсе́рдїе . тѣ́мже тѧ̀ ꙗ҆́кѡ бцⷣꙋ велича́емъ . двⷤа . Зри́мъ ꙗ҆́кѡ кри́нъ тѧ пречⷭ҇тꙋю , чистᲂто́ю ѡ҆дѣ́ѧнꙋ , бжⷭ҇твенымъ дх҃ᲂмъ , пᲂсредѣ̀ те́рнїѧ сїѧ́ющꙋю , и҆ бл҃гᲂꙋха́нїѧ и҆спᲂлнѧ́ющꙋю , и҆́же тебѐ и҆́скренᲂ велича́ющихъ . вⷤ . Тлѣ́ннᲂ прїе́мъ земно́е є҆стество̀ , и҆з̾ твᲂегѡ̀ всенепᲂро́чнаѧ чре́ва нетлѣ́нныи , в̾ себѣ̀ пᲂказа̀ нетлѣ́ннѡ , за бл҃гᲂꙋтро́бїе . тѣ́мже тѧ ꙗ҆́кѡ бцⷣꙋ велича́емъ . И҆́же всѣ́ми владѧ́щаѧ тварьмѝ , лю́демъ сѝ да́рꙋй пᲂбѣ́днᲂе ѡ҆дᲂлѣ́нїе , непᲂкᲂри́вагᲂ пᲂд̾ло́жьши по́д̾нᲂзѣ цр҃е́ви , да тѧ̀ ꙗ҆́кѡ бцⷣꙋ велича́емъ .

и҆́нъ , і҆рмо́съ . Без̾нача́льна рᲂди́телѧ . Сѐ ва́ше дѣ́ланїе и҆ па́ства , зане́же вели́ки бᲂлѣ́зни претерпѣ́сте . вᲂ є҆ди́нᲂ сᲂше́дшесѧ вкꙋ́пѣ , тре́хъ ва́съ прїе́мше , ѻ҆́бщꙋ и҆́мать пᲂхвалꙋ̀ , ва́ше сла́дкᲂе сᲂбра́нїе . Не ѡ҆бᲂю́дꙋ ѻ҆́стръ ме́чь бл҃гᲂда́ть , нᲂ трегꙋ́бᲂ ѻ҆́стръ на бᲂрю́щихъ тꙋ̀ пред̾лага́етъ , є҆ди́нъ небᲂсᲂкᲂва́ненъ ме́чь , тремѝ зарѧ́ми наѡ҆щре́нъ при́снѡ на́ брань , трисїѧ́ннагᲂ є҆ди́нагᲂ бжⷭ҇тва̀ . Ва́ше житїѐ на́ нб҃сѣхъ бѧ́ше пресла́внїи , и҆ пло́ть нᲂсѧ́ще нескве́рнꙋ . и҆́же чи́стѡ ны́нѣ живꙋ́щїи на землѝ , мы̀ пита́ющесѧ , вы́шнѧѧ мᲂли́те , и҆ мы́слити и҆ дѣ́лати . боⷢ҇ . Стѣснѧ́етъ мѧ ширᲂта̀ вели́чїи твᲂи́хъ влⷣчце , пᲂдавлѧ́ю сло́вᲂ ѿ ча́стᲂсти , и҆ пресла́внѡ ми прихо́дитъ , недᲂвѣ́дати ѿ бл҃гᲂꙋмѣ́нїѧ . тѣ́мже и҆́же тᲂли́кѡ тѧ̀ вᲂзвели́чивша сла́вимъ .

и҆́нъ , і҆рмо́съ . Оу҆диви́сѧ ᲂу҆́бѡ . Взѧ́тсѧ тро́ичнаѧ дᲂбрᲂдѣ́тель , и҆ всѧ́ческаѧ сла́вы и҆спо́лни . дрꙋгꙋ́ю на́мъ лꙋчꙋ̀ вᲂсїѧ́вши трисвѣ́тлꙋ , ꙗ҆́кѡ свᲂѐ сїѧ́нїе , нбⷭ҇ныхъ тайнᲂво́децъ . и҆́ми же на бжⷭ҇твенᲂе ѻ҆́нᲂ видѣ́нїе , бл҃гᲂче́стнѣ наставлѧ́емсѧ . Нѣ́сть дво́ица в̾ тре́хъ , мᲂльбы́ бᲂ ко́ждᲂ прино́ситъ . пе́рвыи несы́и , є҆динᲂче́стныхъ прехᲂдѧ̀ . прїѡ҆бща́ют̾жесѧ па́че дрꙋ́жнѣй пᲂбѣ́дѣ ра́дᲂстнѡ . невмѣща́ет̾бᲂсѧ та́мѡ за́висти де́рзᲂсть , пᲂгꙋблѧ́ющей є҆динᲂмышле́нїе . сла́ва . Ѻ҆ц҃а бл҃гᲂче́стїе , свᲂи́хъ первᲂрᲂжде́нныхъ сн҃о́въ пᲂказа́вши . ча́да ражда́етъ при́снаѧ , и҆ непᲂро́чныѧ тѣ́ми , сверша́емыѧ дх҃ᲂмъ , и҆́же живо́тъ гл҃авшимъ в̾ ни́хъ . и҆ спастѝ про́сѧтъ дᲂ кᲂнца̀ ми́ръ , и҆́же ѿ ни́хъ наслѣ́дᲂваша . и҆ ны́нѣ , боⷢ҇ . Сн҃а бг҃а жива́гѡ , премꙋ́дрыхъ бг҃ᲂсло́вецъ сᲂбо́ръ прᲂпᲂвѣ́да твᲂегѡ̀ сн҃а , ѿ ѿкрᲂве́нїѧ ѻ҆́ч҃а . не ѿ́ плᲂти и҆ кро́ве , сѐ ᲂу҆вѣ́дѣвши , мт҃и бж҃їѧ . тѣ́мже и҆ тѧ̀ дв҃цꙋ ꙗ҆́вльшꙋсѧ , мт҃рь и҆ бцⷣꙋ вᲂзвели́чилъ є҆́сть .

катава́сїѧ : Въ зако́ннѣмъ сѣннᲂписа́нїи , ѻ҆́бразъ ви́димъ вѣ́рнїи , всѧ́кᲂ бᲂ ѻ҆трᲂча̀ лᲂжесна̀ разверза́ѧ ст҃ᲂ бг҃ᲂви , тѣ́мъ первᲂрᲂжде́ннᲂе сло́вᲂ , ѿ ѻ҆ц҃а без̾нача́льна сн҃а , первᲂрᲂжде́на и҆з̾ мт҃ре неи҆скꙋ́сныѧ бра́кꙋ велича́емъ . Дᲂсто́йнѡ є҆́сть .

свѣти́ленъ . Трѝ свѣтᲂза́рныѧ свѣти́льники , па́че сл҃нечныхъ лꙋ́чь , ѿ свѣтᲂнача́льныѧ трⷪ҇цы . и҆ трисл҃нечныѧ є҆ди́ницы , па́че є҆стества̀ смѣ́шены , бг҃ᲂно́сныѧ вᲂсхва́лимъ ѻ҆ц҃ы . два́жды . сла́ва , и҆ ны́нѣ , боⷢ҇ . Тебѐ пѣ́сньми немо́лчными ᲂу҆блажа́емъ дв҃ᲂ , ꙗ҆́кѡ ѿ трⷪ҇цы є҆ди́нᲂгѡ во́ чревѣ нᲂси́вши бцⷣе бжⷭ҇твеными рꙋка́ми , пресꙋ́щнᲂе сло́вᲂ , непрело́жнѡ и҆ не и҆з̾мѣ́ннѡ .

На хвали́тѣхъ стихѣ́ры , на д҃ . гла́съ , ѕ҃ . поⷣ . в̾ =тре́тїи де́нь . Васи́лїи бжⷭ҇твеныи ᲂу҆́мъ ,꙳ григо́рїе бж҃їи гла́съ ,꙳ і҆ѡа́ннъ всекра́сныи свѣти́льникъ .꙳ трїѐ вы́шнїѧ трⷪ҇цы ᲂу҆го́дницы ,꙳ и҆ слꙋжи́тели да спрᲂсла́вѧтсѧ . =двⷤа . Бл҃гᲂда́ть превᲂзмо́же ,꙳ вѣ́ра ᲂу҆крѣпи́сѧ ,꙳ и҆ и҆спо́лнишасѧ всѧ̀ ра́зꙋма бж҃їѧ ,꙳ за а҆пⷭ҇лъ и҆ ᲂу҆чи́тель ра́ди ,꙳ спасе́нїемъ ѡ҆бᲂгати́хᲂмсѧ . Небе́снаѧ та́иньства ,꙳ челᲂвѣ́ча навыче́нїѧ .꙳ бл҃гᲂда́темъ сте́кшемсѧ всю́дꙋ сᲂ и҆справле́ньми ,꙳ пᲂбѣжда́ющемъ всѧ́кᲂ сло́вᲂ ,꙳ тре́хъ ст҃ы́хъ ᲂу҆диви́лъ є҆́сть .

сла́ва . гла́съ , то́йже . До́брїи рабѝ , блазі́и и҆ вѣ́рнїи , до́брїи дѣ́лателїе винᲂгра́да хрⷭ҇то́ва , вы̀ тѧгᲂтꙋ̀ дневнꙋ́ю пᲂне́сше , и҆ да́нныи ва́мъ тала́нтъ вᲂзрасти́вше , и҆ пᲂ ва́съ ше́дшимъ незави́дѣсте . тѣ́мже две́рь нбⷭ҇наѧ ва́мъ ѿве́рзесѧ , вни́дите в̾ ра́дᲂсть влⷣки хрⷭ҇та̀ , мᲂлѧ́щесѧ ѡ҆ на́съ ст҃і́и ᲂу҆чи́телїе .

и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце сᲂ ст҃ли , пᲂми́лᲂватисѧ дш҃а́мъ на́шимъ .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна на и҃ , ѿ а҃ гѡ кано́на , ст҃ы́мъ . пѣ́снь , г҃ . и҆ ѿ втᲂра́гѡ , пѣ́снь , ѕ҃ .

Пᲂ вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : трᲂпа́рь хра́мꙋ , и҆ ст҃ы́мъ . сла́ва , кᲂнда́къ ст҃ы́мъ . и҆ ны́нѣ , хра́мꙋ .

Пᲂ вхо́дѣ , а҆́ще хра́мъ ст҃ы́мъ : трᲂпа́рь хра́мꙋ , и҆ ст҃ы́мъ . кᲂнда́къ хра́мꙋ . сла́ва , ст҃ы́мъ . и҆ ны́нѣ , кᲂнда́къ : застꙋ́пнице хрⷭ҇тїа́нѡмъ .

прᲂки́менъ , ѱл҃о́мъ дв҃дᲂвъ . Вᲂ всю̀ зе́млю и҆зыдо́ша вѣща́нїе и҆́хъ , и҆ в̾ кᲂнцы̀ вселе́нныѧ гл҃ы и҆́хъ . сти́хъ . нб҃са̀ пᲂвѣ́даютъ сла́вꙋ бж҃їю , твᲂре́нїе же рꙋ́кꙋ є҆гѡ̀ вᲂз̾вѣща́етъ тве́рдь . а҆пⷭ҇лъ , къ є҆вре́ѡмъ . зача́лᲂ , тл҃д .= а҆ллилꙋ́їѧ . Сщ҃е́нницы твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂз̾ра́дꙋютсѧ . =є҆ѵⷢ҇а́лїе , ѿ матѳе́ѧ . заⷱ҇ , а҃і . прича́стенъ , вᲂ всю̀ зе́млю и҆зыдо́ша вѣща́нїе и҆́хъ , и҆ в̾ кᲂнцы̀ вселе́нныѧ гл҃ы и҆́хъ .

<< Previous

Contents

Next >>