МЦⷭ҇А ГЕНꙊА́РІѦ ВЪ А҃ ДН҃Ь

є҆́же по́ плᲂти ѡ҆брѣ́занїе гдⷭ҇а на́шегѡ і҆с҃а хрⷭ҇та̀ .

И҆ па́мѧть и҆́же вᲂ ст҃ы́хъ ѻ҆ц҃а на́шегѡ васи́лїѧ вели́кагѡ . А҆́ще слꙋчи́тсѧ в̾ нлⷣю , сᲂверша́емъ бдѣ́нїе . На ма́лѣй вече́рни , стихѣ́ры вᲂскрⷭ҇ны , пᲂ ѻ҆бы́чаю . сла́ва , и҆ ны́нѣ , боⷢ҇ , гла́сꙋ , ма́лыѧ вече́рни . На стихо́внѣ , стихѣ́ра вᲂскрⷭ҇на гла́сꙋ є҆ди́на . та́же , стⷯры ст҃о́мꙋ . гла́съ , в҃ . поⷣ . до́ме є҆вфра́фᲂвъ . сти́хъ : ᲂу҆ста̀ мᲂѧ̀ вᲂз̾гл҃ютъ премꙋ́дрᲂсть ,꙳ и҆ пᲂꙋче́нїе срⷣца мᲂегѡ̀ ра́зꙋмъ . Хра́мъ всесвѣ́телъ ,꙳ трисл҃нечныѧ зарѝ сы́и ,꙳ ѡ҆зарѧ́еши дш҃а ꙳ пита́ющихсѧ , слᲂвесы̀ ꙳ твᲂи́ми васи́лїе .

сти́хъ : ᲂу҆ста̀ пра́веднагѡ пᲂꙋча́тсѧ премꙋ́дрᲂсти ,꙳ и҆ ѧ҆зы́къ є҆гѡ̀ вᲂз̾гл҃етъ сꙋ́дъ . Трꙋба̀ с̾ нб҃сѐ ,꙳ шꙋ́мъ гла́са твᲂегѡ̀ є҆́сть .꙳ и҆ ѻ҆́гнь , и҆́мже пᲂпалѧ́ютсѧ ꙳ є҆рети́ческаѧ всѧ̀ ,꙳ васи́лїе ᲂу҆че́нїѧ .

сла́ва . Свѣ́тъ є҆ди́нъ трисїѧ́нныи .꙳ раз̾дѣлѧ́ѧ въ трѝ ли́ца .꙳ и҆́мже сꙋщество́мъ ,꙳ а҆́рїѧ низлᲂжи́лъ є҆сѝ ꙳ и҆ саве́лїѧ , васи́лїе . и҆ ны́нѣ . Плᲂтьско́е ѡ҆брѣ́занїе ,꙳ бг҃ᲂвᲂчелᲂвѣ́чьнагѡ сло́ва ,꙳ и҆ па́мѧть васи́лїѧ ꙳ пᲂчита́юще вели́кагѡ .꙳ бцⷣꙋ пᲂчита́емъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , ст҃о́мꙋ . и҆ ны́нѣ , пра́здникꙋ . та́же , є҆ктенїѧ̀ ма́лаѧ . и҆ ѿпꙋ́стъ . А҆́ще ли же в̾ про́стъ дн҃ь слꙋчи́тсѧ бдѣ́нїе не быва́етъ . Вече́ръ . блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стихѣ́ры , на и҃ . гла́съ , и҃ . Схᲂдѧ́и сп҃съ к̾ ро́дꙋ чл҃ческᲂмꙋ , прїѧ́тъ пелена́ми пᲂви́тїе , не вᲂзгнꙋша́сѧ плᲂтьска́гѡ ѡ҆брѣ́занїѧ . ѻ҆смᲂдне́венъ пᲂ мт҃ри . безнача́льныи пᲂ ѻ҆ц҃ѣ . тᲂмꙋ̀ вѣ́рнїи вᲂзᲂпїе́мъ , ты̀ є҆сѝ бг҃ъ на́шъ , пᲂми́лꙋй на́съ . =два́жды . Не ᲂу҆стыдѣ́сѧ пребл҃гі́и бг҃ъ , плᲂтьски́мъ ѡ҆брѣ́занїемъ ѡ҆брѣ́затисѧ . нᲂ да́стъ на́мъ себѐ ѻ҆́бразъ и҆ начерта́нїе , всѣ́мъ кᲂ спасе́нїю . и҆́бᲂ зако́нꙋ твᲂре́цъ зако́ннаѧ и҆спᲂлнѧ́етъ . и҆ прᲂро́къ прᲂрече́нїѧ ꙗ҆́же ѡ҆ не́мъ . и҆́же всѧ̀ сᲂдержа́и го́рстїю , и҆ пелена́ми пᲂви́всѧ , гдⷭ҇и сла́ва тебѣ̀ . два́жды .

И҆́ны стⷯры , ст҃о́мꙋ васи́лїю . гла́съ , д҃ . поⷣ . и҆́же зва́нныи свы́ше . И҆́же тезᲂимени́тнѡ нарече́нъ бы́въ црⷭ҇твїѧ . є҆гда̀ црⷭ҇кᲂе ты̀ сщ҃е́нїе , хрⷭ҇то́въ ꙗ҆зы́къ ст҃ъ , любᲂмꙋ́дрїемъ и҆ хꙋдо́жествᲂмъ ѻ҆́ч҃е ᲂу҆па́слъ є҆сѝ . тᲂгда̀ вѣнце́мъ тѧ̀ ᲂу҆красѝ црⷭ҇твїѧ васи́лїе , црⷭ҇твꙋющими цр҃ю́ѧи всѣ́хъ гдⷭ҇ь , и҆́же ро́ждьшемꙋ сᲂє҆дине́ныи , приснᲂсꙋ́щныи сн҃ъ и҆ сᲂбезнача́льныи . є҆го́же мᲂлѝ , спастѝ и҆ прᲂсвѣти́ти дш҃а на́ша . два́жды . Ст҃льства ѻ҆де́ждами ᲂу҆кра́шенъ , ра́дꙋѧсѧ прᲂпᲂвѣ́далъ є҆сѝ є҆ѵⷢ҇а́лїе црⷭ҇твїѧ , васи́лїе . правᲂсла́вїѧ цр҃кви и҆стᲂчи́въ ᲂу҆че́нїѧ , и҆́миже ны́нѣ прᲂсвѣща́еми , є҆ди́нᲂ бжⷭ҇тво̀ є҆́же вᲂ ѻ҆ц҃ѣ вседержи́телѣ , и҆ вᲂ є҆динᲂро́днѣмъ бж҃їи сло́вѣ , и҆ бжⷭ҇твенѣмъ дс҃ѣ , бг҃ᲂсло́вꙋемъ и҆ сла́вимъ въ трѝ ли́ца нераздѣ́льнѡ . є҆го́же мᲂлѝ , спастѝ и҆ прᲂсвѣти́ти дш҃а на́ша . И҆́же съ нбⷭ҇нымъ сᲂвᲂкꙋплѧ́ѧсѧ ликᲂстᲂѧ́нїи , и҆ сᲂвᲂдвᲂрѧ́ѧсѧ ѻ҆́ч҃е васи́лїе . и҆́хже и҆ житїю̀ пᲂревнᲂва́лъ є҆сѝ , свѣ́тлᲂстїю житїѧ̀ твᲂегѡ̀ . є҆щѐ съ пло́тїю живы́и с̾ сꙋ́щими на землѝ , ꙗ҆́кѡ беспло́тенъ . пита́ющихсѧ бг҃ᲂдх҃нᲂве́ннымъ бг҃ᲂсло́вїемъ твᲂи́мъ , ѿ бѣ́дъ и҆ тмы̀ невѣ́дѣнїѧ , хрⷭ҇та̀ бг҃а на́шегѡ мᲂлѝ , спастѝ и҆ прᲂсвѣти́ти дш҃а на́ша . сла́ва . гла́съ , и҃ . Премꙋ́дрᲂсти рачи́тель бы́въ препᲂдо́бне , и҆ всѣ́хъ сꙋ́щихъ є҆́же к̾ бг҃ꙋ разсꙋди́въ сᲂжи́тельницꙋ , пᲂꙋче́нїе сме́ртнᲂе , в̾лѣ́пᲂтꙋ житїѐ препрᲂвᲂди́лъ є҆сѝ . и҆́бᲂ плᲂтьскі́ѧ стра́сти , вᲂздержа́нїѧ крѣпᲂстьмѝ себѐ ѡ҆блᲂжи́въ , и҆ бжⷭ҇твенагѡ пᲂꙋче́нїѧ зако́нᲂмъ , нерабо́тенъ дш҃е́вныи сᲂблю́лъ є҆сѝ са́нъ . дᲂбрᲂдѣ́тели бᲂга́тьствᲂмъ , всѐ плᲂтьско́е мꙋдрᲂва́нїе пᲂвинꙋ́лъ є҆сѝ дх҃ꙋ . тѣ́мже пло́ть и҆ ми́ръ вᲂзненави́дѣвъ , и҆ мирᲂде́ржца , пред̾стᲂѧ̀ хрⷭ҇то́ви , прᲂсѝ дш҃а́мъ на́шимъ ве́лїю млⷭ҇ть .

и҆ ны́нѣ . гла́съ , то́йже . Схᲂдѧ́и сп҃съ к̾ ро́дꙋ челᲂвѣ́ческᲂмꙋ , прїѧ́тъ пелена́ми пᲂви́тїе , не вᲂзгнꙋша́сѧ плᲂтьска́гѡ ѡ҆брѣ́занїѧ . ѻ҆смᲂдне́венъ пᲂ мт҃ри . безнача́льныи пᲂ ѻ҆ц҃ѣ . тᲂмꙋ̀ вѣ́рнїи вᲂзᲂпїе́мъ , ты̀ є҆сѝ бг҃ъ на́шъ , пᲂми́лꙋй на́съ . вы́хᲂдъ . прᲂки́менъ , дню̀ .

Ѿ= бытїѧ̀ , чте́нїе .=

Ꙗ҆ви́сѧ гдⷭ҇ь а҆враа́мꙋ , и҆ речѐ є҆мꙋ̀ , а҆́зъ є҆́смь бг҃ъ тво́й , бл҃гᲂꙋгᲂдѝ предᲂ мно́ю , и҆ бꙋ́ди непᲂро́ченъ . и҆ пᲂлᲂжꙋ̀ завѣ́тъ мо́й междꙋ̀ мно́ю , и҆ междꙋ̀ тᲂбо́ю . и҆ ᲂу҆мно́жꙋ тѧ̀ ѕѣлѡ̀ , и҆ бꙋ́деши ѻ҆ц҃ъ мно́гимъ ꙗ҆зы́кѡмъ , и҆ не нарече́тсѧ к̾ тᲂмꙋ̀ и҆́мѧ твᲂѐ а҆вра́мъ , нᲂ бꙋ́детъ и҆́мѧ твᲂѐ а҆враа́мъ , ꙗ҆́кѡ ѻ҆ц҃а мно́гимъ ꙗ҆зы́кѡмъ пᲂлᲂжи́хъ тѧ . и҆ вᲂзращꙋ́ тѧ ѕѣлѡ̀ , и҆ пᲂлᲂжꙋ́ тѧ в̾ ꙗ҆зы́ки , и҆ ца́рїе и҆з̾ тебѐ и҆зы́дꙋтъ . и҆ пᲂлᲂжꙋ̀ завѣ́тъ мо́й междꙋ̀ мно́ю и҆ тᲂбо́ю , и҆ междꙋ̀ сѣ́менемъ твᲂи́мъ пᲂ тебѣ̀ , в̾ ро́дъ и҆́хъ , в̾ завѣ́тъ вѣ́чныи , и҆ бꙋ́дꙋ и҆́мъ бг҃ъ . и҆ падѐ а҆враа́мъ на лицѣ̀ свᲂе́мъ , и҆ пᲂклᲂни́сѧ гдⷭ҇ви . и҆ речѐ бг҃ъ кᲂ а҆враа́мꙋ , ты́ же завѣ́тъ мо́й да сᲂблюде́ши , ты̀ , и҆ сѣ́мѧ твᲂѐ пᲂ тебѣ̀ в̾ ро́дъ и҆ ро́дъ . и҆ се́й завѣ́тъ є҆го́же сᲂблюде́ши междꙋ̀ мно́ю и҆ тᲂбо́ю , и҆ междꙋ̀ сѣ́менемъ твᲂи́мъ пᲂ тебѣ̀ в̾ ро́ды и҆́хъ . ѡ҆брѣ́жетсѧ ва́мъ всѧ́къ мꙋ́жескъ по́лъ . и҆ ѡ҆брѣ́жете пло́ть кра́йнюю ва́шꙋ , и҆ бꙋ́детъ в̾ зна́менїе завѣ́та междꙋ̀ мно́ю и҆ ва́ми , и҆ междꙋ̀ сѣ́менемъ твᲂи́мъ пᲂ тебѣ̀ , в̾ ро́дъ и҆́хъ . ѻ҆трᲂча̀ ѻ҆смᲂдне́внᲂ , ѡ҆брѣ́жетсѧ ва́мъ , всѧ́къ мꙋ́жескъ по́лъ , в̾ ро́дѣхъ ва́шихъ . и҆ мꙋ́жескїи по́лъ и҆́же не ѡ҆брѣ́жетъ пло́ть кра́йнюю свᲂю̀ вᲂ ѻ҆смы́й дн҃ь , пᲂтреби́тсѧ дш҃а ѻ҆́на ѿ́ рᲂда свᲂегѡ̀ , ꙗ҆́кѡ завѣ́тъ мо́й разᲂри́ла є҆́сть .

Ѿ= при́тчей , чте́нїе .=

Гдⷭ҇ь сᲂзда́ мѧ в̾ нача́тᲂкъ пꙋті́й свᲂи́хъ , въ дѣ́ла свᲂѧ̀ . пре́жде вѣ́къ ѡ҆снᲂва́ мѧ в̾ нача́лѣ . пре́жде зе́млю сᲂтвᲂри́ти , пре́жде прїитѝ и҆сто́чникѡмъ вᲂдны́мъ . пре́жде гᲂра́мъ вᲂдрꙋзи́тисѧ , пре́жде всѣ́хъ хᲂлмо́въ ражда́етъ мѧ . гдⷭ҇ь сᲂтвᲂрѝ страны̀ и҆ пꙋсты́ни и҆ кᲂнцы̀ населены̀ пᲂд̾ нб҃се́мъ . є҆гда̀ гᲂто́вѧше нб҃ᲂ , съ ни́мъ бѣ́хъ , и҆ є҆гда̀ ѿлꙋча́ше себѣ̀ прⷭ҇то́лъ на вѣ́трехъ . є҆гда̀ крѣ́пки твᲂрѧ́ше вы́шнїѧ ѻ҆́блаки , и҆ ꙗ҆́кѡ тве́рды пᲂлага́ше и҆сто́чники пᲂд̾ нбⷭ҇ныѧ . внегда̀ пᲂлага́ти мо́рю предѣ́лъ є҆гѡ̀ , и҆ во́ды не ми́мѡ и҆́дꙋтъ ᲂу҆ста́въ є҆гѡ̀ . и҆ крѣ́пки твᲂрѧ́ше ѡ҆снᲂва́нїѧ землѝ , бѣ́хъ к̾ немꙋ̀ пᲂдо́бна . а҆́зъ бѣ́хъ , ѡ҆ не́йже ра́дᲂвашесѧ . пᲂ всѧ́же днѝ веселѧ́хсѧ пред̾ лице́мъ є҆гѡ̀ , на всѧ́кᲂ вре́мѧ .

Ѿ= при́тчей , чте́нїе .=

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рилᲂ же пра́веднᲂ прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жа , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́стᲂ же є҆гѡ̀ предае́тсѧ нечести́выи . вᲂ ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вствᲂ же пра́ведныхъ бл҃гᲂспѣ́шнѡ . вᲂ бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . вᲂ бл҃гᲂслᲂве́нїи пра́ведныхъ вᲂзвы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жъ же мꙋ́дръ без̾мо́лвїе во́дитъ .

На литі́и стихѣ́ры , ст҃о́мꙋ васи́лїю . и҆́хже пᲂе́мъ на бдѣ́нїи . а҆́ще слꙋчи́тсѧ в̾ де́нь недѣ́льныи . гла́съ , г҃ . Хрⷭ҇та̀ всели́въ в̾ дш҃ꙋ свᲂю̀ , чи́стымъ свᲂи́мъ житїе́мъ , и҆сто́чника жи́зни , сщ҃еннᲂ ꙗ҆вле́нне васи́лїе , рѣ́ки и҆стᲂчи́лъ є҆сѝ ᲂу҆че́нїемъ бл҃гᲂче́стнымъ вселе́ннѣй . ѿ ни́хже напаѧ́еми вѣ́рнїи цр҃ко́внїи лю́дїе , плᲂды̀ ᲂу҆сте́нъ и҆спᲂвѣ́дающе , бл҃гᲂда́ть принᲂша́ютъ . прᲂсла́вльшемꙋ па́мѧть твᲂю̀ во́ вѣки вѣко́мъ . Мѵ́рѡ и҆злїѧ́сѧ на тебѣ̀ бл҃гᲂда́ти , пᲂма́за тѧ̀ сщ҃е́ньствᲂвати , є҆ѵⷢ҇а́лїе црⷭ҇твїѧ нбⷭ҇нагѡ прᲂпᲂвѣ́дати , васи́лїе бг҃ᲂѧвле́нне . хрⷭ҇тꙋ̀ бл҃гᲂꙋха́нїе бы́въ , бл҃гᲂво́нїемъ ра́зꙋма свᲂегѡ̀ вселе́ннꙋю и҆спо́лнилъ є҆сѝ . тѣ́мже гла́сы ра́бъ твᲂи́хъ бл҃гᲂпремѣ́ннѡ прїе́мъ и҆спрᲂсѝ на́мъ чтꙋ́щимъ тѧ ве́лїю млⷭ҇ть . сла́ва . гла́съ , то́йже . Вᲂ сщ҃е́нническꙋю ѻ҆де́ждꙋ ѡ҆блече́нъ , трⷪ҇цѣ пᲂбо́рниче васи́лїе . престо́лꙋ пред̾ста́лъ є҆сѝ сꙋдїинꙋ̀ , в̾ бѣдѣ̀ сꙋ́щи вѣ́рѣ . и҆ страда́льческᲂ прᲂтивле́нїе пᲂказа́въ , ꙗ҆́рᲂсть є҆па́рхᲂвꙋ пᲂсрами́лъ є҆сѝ , грѧдꙋ́щꙋ с̾ держа́вᲂю нече́стїѧ . и҆ неми́лᲂстивнымъ пᲂсѣче́нїемъ претѧ́щꙋ , ᲂу҆се́рднѡ ѻ҆́ч҃е раз̾сꙋди́лъ є҆сѝ . и҆ мꙋ́ченикъ бы́въ и҆з̾вᲂле́нїемъ , вѣне́цъ прїѧ́лъ є҆сѝ пᲂбѣ́ды ѿ хрⷭ҇та̀ , и҆мꙋ́щагᲂ ве́лїю млⷭ҇ть . и҆ ны́нѣ . гла́съ , и҃ . Схᲂдѧ́и сп҃съ к̾ ро́дꙋ челᲂвѣ́ческᲂмꙋ , прїѧ́тъ пелена́ми пᲂви́тїе , невᲂзгнꙋша́сѧ плᲂтьска́гᲂ ѡ҆брѣ́занїѧ . ѻ҆смᲂдне́венъ пᲂ мт҃ри . без̾нача́льныи пᲂ ѻ҆ц҃ѣ . тᲂмꙋ̀ вѣ́рнїи вᲂзᲂпїе́мъ , ты̀ є҆сѝ бг҃ъ на́шъ , пᲂми́лꙋй на́съ .

На стихо́внѣ , стихѣ́ры ст҃о́мꙋ . гла́съ , а҃ . Ѽ бжⷭ҇твенаѧ и҆ сщ҃е́ннаѧ хрⷭ҇то́вы цр҃кве пчело̀ , васи́лїе всебл҃же́нне . ты́ бᲂ бжⷭ҇твенагѡ жела́нїѧ жа́лᲂмъ себѐ вᲂѡ҆рꙋжи́въ , бг҃ᲂме́рз̾скихъ є҆ресе́й хꙋлы̀ ᲂу҆ѧ́звилъ є҆сѝ . и҆ дш҃а́мъ вѣ́рнымъ бл҃гᲂче́стїѧ сла́дᲂсть сᲂкро́вище сᲂдѣ́лалъ є҆сѝ . и҆ ны́нѣ в̾ бжⷭ҇твенѣмъ раю̀ нетлѣ́нныѧ прехᲂдѧ̀ па́жити , пᲂмина́й на́съ пред̾стᲂѧ̀ трⷪ҇цѣ є҆динᲂсꙋ́щнѣй .

сти́хъ : ᲂу҆ста̀ мᲂѧ̀ вᲂз̾гл҃ютъ премꙋ́дрᲂсть ,꙳ и҆ пᲂꙋче́нїе срⷣца мᲂегѡ̀ ра́зꙋмъ . Всѣ́хъ ст҃ы́хъ со́бралъ є҆сѝ дᲂбрᲂдѣ́тели , ѻ҆́ч҃е на́шъ васи́лїе , мѡѷсе́ᲂвꙋ кро́тᲂсть , и҆ и҆лїинꙋ̀ ре́внᲂсть . петро́вᲂ и҆спᲂвѣ́данїе , і҆ѡа́ннᲂвᲂ бг҃ᲂсло́вїе . ꙗ҆́кѡ па́велъ вᲂпїѧ̀ непреста́лъ є҆сѝ , кто̀ и҆знемᲂга́етъ , и҆ а҆́зъ не и҆знемᲂга́ю . кто̀ сᲂблажнѧ́етсѧ , и҆ а҆́зъ не раз̾жиза́юсѧ . тѣ́мже съ ни́ми вᲂдвᲂрѧ́ѧсѧ , мᲂлѝ спасти́сѧ дш҃а́мъ на́шимъ .

сти́хъ : гла́съ , в҃ . ᲂу҆ста̀ пра́веднагѡ пᲂꙋча́тсѧ премꙋ́дрᲂсти ,꙳ и҆ ѧ҆зы́къ є҆гѡ̀ вᲂз̾гл҃етъ сꙋ́дъ . Всѣ́хъ сꙋ́щихъ и҆звы́къ є҆стество̀ , и҆ всѣ́хъ ᲂу҆смᲂтри́въ нестᲂѧ́тельнᲂе , є҆ди́нагѡ ѡ҆брѣ́те некᲂле́блема , пресꙋ́щнагѡ сꙋ́ща сᲂдѣ́телѧ всѣ́хъ . к̾ немꙋ́ же и҆ па́че прилᲂжи́всѧ , не сꙋ́щихъ жела́нїе ѿве́рглъ є҆сѝ . мᲂлѝ и҆ на́мъ бжⷭ҇твенагѡ жела́нїѧ пᲂлꙋчи́ти , сщ҃еннᲂѧвле́нне васи́лїе .

сла́ва . гла́съ , ѕ҃ . И҆́же бл҃гᲂда́ть чꙋдесе́мъ с̾ нб҃сѐ прїе́мъ , и҆ ле́сть и҆́дᲂльскꙋю ѡ҆бличи́въ ᲂу҆че́ньми . ст҃лемъ є҆сѝ сла́ва и҆ ᲂу҆тверже́нїе , пребл҃же́нне васи́лїе , и҆ всѣ́мъ прпⷣбнымъ ᲂу҆че́нїѧ ѻ҆́бразъ . дерзнᲂве́нїе и҆мѣ́ѧ к̾ бг҃ꙋ . тᲂгѡ̀ мᲂлѝ спасти́сѧ дш҃а́мъ на́шимъ .

и҆ ны́нѣ . гла́съ , и҃ . Непᲂстыдѣ́сѧ пребл҃гі́и бг҃ъ , пло́тьскимъ ѡ҆брѣ́занїемъ ѡ҆брѣ́затисѧ . нᲂ да́стъ са́мъ себѐ ѻ҆́бразъ и҆ пᲂд̾писа́нїе , всѣ́мъ кᲂ спасе́нїю . и҆́бᲂ зако́нꙋ твᲂре́цъ , зако́ннаѧ и҆спᲂлнѧ́етъ , и҆ пррⷪ҇къ прᲂпᲂвѣ́данїѧ ѡ҆ не́мъ , и҆́же всѧ̀ сᲂдержа́и го́рстїю , и҆ въ пелена́хъ пᲂви́выисѧ , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь , ст҃о́мꙋ . гла́съ , а҃ . Вᲂ всю̀ зе́млю и҆зы́де вѣща́нїе твᲂѐ , ꙗ҆́кѡ прїе́мши сло́вᲂ твᲂѐ , и҆́мже бг҃ᲂлѣ́пнѡ наꙋчи́лъ є҆сѝ , и҆ є҆стество̀ сꙋ́щихъ ᲂу҆ѧсни́лъ є҆сѝ , чл҃ческїѧ ѻ҆бы́чаи ᲂу҆краси́лъ є҆сѝ , црⷭ҇кᲂе сщ҃е́нїе ѻ҆́ч҃е препᲂдо́бне васи́лїе . мᲂлѝ хрⷭ҇та̀ бг҃а , да спасе́тъ дш҃а на́ша .

сла́ва , и҆ ны́нѣ , пра́здникꙋ . гла́съ , то́йже . И҆́же на прⷭ҇то́лѣ ѻ҆гнезра́чнѣмъ в̾ вы́шнихъ сѣдѧ́и , сᲂ ѻ҆ц҃е́мъ без̾нача́льнымъ , и҆ бжⷭ҇твенымъ твᲂи́мъ дх҃ᲂмъ , бл҃гᲂвᲂлѝ рᲂди́тисѧ пло́тїю на землѝ , ѿ дв҃ы неи҆скꙋсᲂмꙋ́жныѧ і҆с҃е , сегѡ̀ ра́ди ꙗ҆́кѡ челᲂвѣ́къ ѻ҆смᲂдне́внᲂ ѡ҆брѣ́засѧ . сла́ва пребл҃го́мꙋ твᲂемꙋ̀ и҆звᲂлѣ́нїю . сла́ва неи҆зрече́ннᲂмꙋ твᲂемꙋ̀ смᲂтре́нїю . сла́ва є҆́же к̾ на́мъ чл҃кᲂлю́бнᲂмꙋ твᲂемꙋ̀ сᲂше́ствїю , є҆ди́не мнᲂгᲂми́лᲂстиве . и҆ ѿпꙋ́стъ .

На па́вечерницѣ , кᲂнда́къ ст҃о́мꙋ . сла́ва , и҆ ны́нѣ . кᲂнда́къ пра́здникꙋ .

Пᲂлꙋ́нᲂщницꙋ , пᲂе́мъ пᲂ ѻ҆бы́чаю с̾ каѳи́смᲂю . пᲂ а҃ мъ трⷭ҇то́мъ , трᲂпа́рь пра́здникꙋ . пᲂ в҃ мъ трⷭ҇то́мъ , кᲂнда́къ пра́здникꙋ . та́же , гдⷭ҇и пᲂми́лꙋй , в҃і . и҆ ѿпꙋ́стъ .= =Мл҃твꙋ же : пᲂмѧнѝ гдⷭ҇и и҆́же в̾ наде́жди . и҆ пᲂмѧ́нника за ᲂу҆пᲂко́й , не глаго́лемъ .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , двⷤа . сла́ва , ст҃о́мꙋ . и҆ ны́нѣ , пра́здникꙋ . =Пᲂ а҃ , стихᲂло́гїи , сѣда́ленъ . гла́съ , а҃ . Всѣ́хъ твᲂре́цъ и҆ влⷣка ми́рꙋ , и҆́же сы́и сᲂ ѻ҆ц҃е́мъ и҆ дх҃ᲂмъ гᲂрѣ̀ , ꙗ҆́кѡ младе́нецъ ѡ҆брѣ́заетсѧ на землѝ ѻ҆смᲂдне́венъ . вᲂи́стинꙋ бжⷭ҇твена же и҆ чꙋ́дна дѣ́ла твᲂѧ̀ . ты́ бᲂ влⷣкᲂ на́съ ра́ди ѡ҆брѣ́засѧ , ꙗ҆́кѡ сы́и зако́нꙋ и҆спᲂлне́нїе . сла́ва , и҆ ны́нѣ , то́йже .=

Пᲂ в҃ , стихᲂло́гїи , сѣда́ленъ . гла́съ , д҃ . Ꙗ҆́кѡ сы́и бе́здна челᲂвѣкᲂлю́бїѧ , ѡ҆дѣ́ѧсѧ влⷣкᲂ в̾ зра́къ ра́бїи . и҆ пло́тїю ѡ҆брѣ́засѧ , да́рꙋѧ всѣ́мъ челᲂвѣ́кѡмъ вели́кꙋю твᲂю̀ млⷭ҇ть .= сла́ва , и҆ ны́нѣ , то́йже .=

Пᲂ пᲂлїєлеѡ́сѣ , сѣда́лен̾ . гла́съ , є҃ . Ꙗ҆́кѡ црⷭ҇кᲂе ᲂу҆краше́нїе цр҃кви , васи́лїѧ всѝ вᲂсхва́лимъ , и҆́же ᲂу҆че́нїемъ сᲂкро́вище не ѡ҆скꙋдѣ́емᲂ . си́хъ бᲂ ра́ди то́й наказа̀ на́съ , трⷪ҇цꙋ чти́ти ст҃ꙋ́ю , сᲂє҆дине́нꙋ ᲂу҆́бѡ сꙋщество́мъ , раз̾дѣле́нꙋ же сᲂста́вми . сла́ва , и҆ ны́нѣ . гла́съ , д҃ . И҆́же є҆стество́мъ неви́димыи , ны́нѣ ви́димь є҆́сть пло́тїю . сло́вᲂ несо́зданнᲂе , ны́нѣ ѿ дв҃ы чи́стыѧ ражда́емᲂ зи́ждетсѧ . тѣ́мже и҆ пᲂ зако́нꙋ на́съ ра́ди въ челᲂвѣ́цѣхъ , ꙗ҆́кᲂже ѻ҆смᲂдне́венъ ѡ҆брѣ́заетсѧ младе́нецъ . тᲂмꙋ̀ ᲂу҆́бѡ пᲂклᲂни́мсѧ , ꙗ҆́кѡ сп҃сꙋ на́шемꙋ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Оу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи пᲂ вселе́ннѣй . всѧ́кᲂ дыха́нїе .

є҆ѵⷢ҇а́лїе , ѿ і҆ѡа́нна . заⷱ҇ , л҃ѕ . ѱл҃о́мъ , н҃ .

сла́ва . мᲂли́твъ ра́ди ст҃лѧ , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . И҆злїѧ́сѧ бл҃гᲂда́ть вᲂ ᲂу҆стнꙋ̀ твᲂе́ю прпⷣбне ѻ҆́ч҃е . и҆ бы́сть па́стырь хрⷭ҇то́вѣ цр҃кви , ᲂу҆ча̀ слᲂве́сныѧ ѻ҆́вцы , вѣ́рᲂвати в̾ трⷪ҇цꙋ є҆динᲂсꙋ́щнꙋю , вᲂ є҆ди́нᲂмъ бжⷭ҇твѣ̀ .

Кано́нъ , пра́здникꙋ , твᲂре́нїе стефа́нᲂвᲂ , и҆ і҆ѡа́ннᲂвᲂ . і҆рмо́съ , пᲂ двⷤа . трᲂпари́ же , на д҃ . и҆ ст҃о́мꙋ , на и҃ . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Сла́ва тебѣ̀ бж҃е на́шъ , сла́ва тебѣ̀ .= Ѻ҆=сма́гѡ вѣ́ка нᲂсѧ̀ ѻ҆́бразъ бꙋ́дꙋщагѡ , твᲂе́ю хрⷭ҇тѐ прᲂсвѣща́етсѧ и҆ ѡ҆сщ҃а́етсѧ во́льнᲂю нището́ю , в̾ се́й бᲂ зако́ннѡ ѡ҆брѣ́засѧ пло́тїю . Ѡ҆брѣ́занїе прїе́млетъ ѻ҆смᲂдне́внᲂе хрⷭ҇то́съ , свᲂегѡ̀ ржⷭ҇тва̀ . и҆ сегѡ̀ дне́сь сѣ́нь ѡ҆прѧ́таетъ , свѣ́тъ вᲂсїѧ́ѧ но́выѧ бл҃гᲂда́ти .

И҆́нъ кано́нъ , ст҃лю васи́лїю . гла́съ , и҆ і҆рмо́съ , то́йже . =запѣ́въ : Ст҃лю хрⷭ҇то́въ васи́лїе , мᲂлѝ бг҃а ѡ҆ на́съ . Твᲂемꙋ̀ гла́сꙋ пᲂдᲂба́ше прїитѝ васи́лїе , нача́ти хᲂтѧ́щимъ хвалы̀ твᲂѧ̀ . нᲂ ѻ҆́ч҃е мᲂльбꙋ̀ прїе́мъ , ѡ҆бы́чай пᲂдава́й незави́стнѡ на́мъ . Дᲂбрᲂдѣ́телей ты̀ же́стᲂкїи ше́ствᲂвалъ є҆сѝ пꙋ́ть , въ гла́дкїи дᲂсти́глъ є҆сѝ , и҆ несᲂпрᲂти́вныи нбⷭ҇ныи вᲂсхо́дъ . и҆ всѣ́мъ ꙗ҆ви́сѧ ѻ҆́бразъ васи́лїе . Страстно́е взыгра́нїе тᲂмѧ́щее пло́ть , любᲂмꙋ́дрїѧ жела́нїемъ наказа́лъ є҆сѝ . тѣ́мже въ нетлѣ́нныхъ вᲂдвᲂрѧ́ешисѧ црⷭ҇твїихъ , ѻ҆́ч҃е васи́лїе . Дш҃е́вныѧ стра́сти , бл҃гᲂпᲂтре́бнѡ васи́лїе , вкꙋ́пѣ же и҆ тѣле́сныѧ , дх҃о́внымъ пᲂсѣ́клъ є҆сѝ мече́мъ . себѐ влⷣцѣ же́ртвꙋ прине́слъ є҆сѝ . =сла́ва . Ты̀ бы́въ неи҆зрече́ннымъ таи́нникъ васи́лїе , хрⷭ҇то́вꙋ црⷭ҇твїю наꙋчи́лъ є҆сѝ сщ҃е́нне ѻ҆́ч҃е . ꙗ҆́вѣ трⷪ҇ческїи свѣ́тъ ѡ҆блиста́лъ є҆сѝ на́мъ . и҆ ны́нѣ , боⷢ҇ . Кто̀ и҆зрещѝ твᲂѐ дᲂсто́йнѡ вᲂзмо́жетъ , є҆́же па́че сло́ва зача́тїе . бг҃а бᲂ рᲂдила̀ є҆сѝ пло́тїю пречⷭ҇таѧ , на́мъ ꙗ҆́вльшасѧ сп҃са и҆ гдⷭ҇а .

катава́сїѧ , пе́рвыи ли́къ , пᲂе́тъ : Глꙋбинѣ̀ ѿкры́лъ є҆́сть дно̀ , и҆ по́ сꙋхꙋ свᲂи́хъ и҆зво́дитъ . въ не́й пᲂгрꙋ́жь сᲂпрᲂти́вныѧ , крѣ́пкїи вᲂ бранѣ́хъ гдⷭ҇ь , ꙗ҆́кѡ прᲂсла́висѧ .

дрꙋгі́ѧ страны̀ ли́къ , пᲂе́тъ : Пꙋ́ть мᲂрскі́и вᲂлнꙋ́ѧсѧ пѣ́нами , сꙋ́хъ ꙗ҆ви́сѧ . і҆зра́ильты прїе́млѧ . си́нѧ же пꙋчи́на триста́ты є҆гѵ́петски , пᲂтᲂпѝ ѕѣлѡ̀ , вᲂдᲂсла́ненъ гро́бъ , си́лᲂю крѣ́пкᲂю , десни́цею влады́чнею .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Сло́вᲂ вᲂпло́щьсѧ пребᲂга́тнᲂе , в̾ вᲂспрїѧ́тїе зако́на ѡ҆брѣ́засѧ . и҆спе́рва же бжⷭ҇твенꙋю бл҃гᲂда́ть , и҆ жи́знь нетлѣ́ннꙋю на́мъ пᲂдадѐ . Зако́на и҆спо́лнитель , не ꙗ҆́кѡ сꙋпрᲂти́венъ бг҃ꙋ сы́и хрⷭ҇то́съ , вᲂплᲂти́выисѧ пᲂказа̀ , и҆ спᲂдо́би во́лею ѡ҆брѣ́затисѧ ѻ҆смᲂдне́внѡ .

Ст҃о́мꙋ . і҆рмо́съ , то́йже . Спритечѐ хрⷭ҇то́вꙋ , и҆ спрᲂсїѧ̀ па́мѧть твᲂѧ̀ ѻ҆́ч҃е ржⷭ҇твꙋ̀ . є҆го́же несказа́ннᲂе та́иньствᲂ , свᲂи́ми ᲂу҆че́ньми ꙗ҆́вѣ сᲂтвᲂри́лъ є҆сѝ . Стра́хᲂмъ гдⷭ҇нимъ ᲂу҆твержа́емь , нача́лᲂ бᲂ мꙋ́дрᲂсти се́й є҆́сть . любо́вїю лꙋ́чшею впери́сѧ премꙋ́дрᲂсти , ѽ васи́лїе . Наказа́нїѧ бы́въ всѧ́кᲂгѡ и҆спо́лнь , не то́кмѡ до́льнѧгѡ и҆ пᲂпира́емагѡ , мно́гѡ же па́че лꙋ́чшагѡ , ꙗ҆ви́лсѧ є҆сѝ свѣ́тъ ми́рᲂви васи́лїе . сла́ва . Васи́лїе премꙋ́дре , вше́лъ є҆сѝ дѣѧ́нїемъ . и҆ дѣѧ́нїе вше́ствїе видѣ́нїѧ бжⷭ҇твенѣйша пᲂказа̀ , и҆ сꙋ́щихъ ра́зꙋмꙋ наꙋчи́лъ є҆сѝ ꙗ҆́вѣ . и҆ ны́нѣ , боⷢ҇ . Без̾ сѣ́мене во́ чревѣ бг҃а зачала̀ є҆сѝ , и҆ ражда́еши несказа́ннѡ вᲂплᲂща́ема . на́нь же зрѣ́ти несмѣ́ютъ чⷭ҇таѧ нбⷭ҇ныѧ си́лы , прⷭ҇нѡ дв҃ᲂ .

катава́сїѧ : Крѣ́пᲂсть даѧ́й цр҃ю на́шемꙋ гдⷭ҇ь , и҆ ро́гъ хрⷭ҇та̀ свᲂегѡ̀ вᲂз̾нᲂсѧ̀ , ѿ дв҃ы ражда́етсѧ , грѧде́тъ же кᲂ креще́нїю . тѣ́мъ вѣ́рнїи вᲂзᲂпїе́мъ , нѣ́сть ст҃ъ ꙗ҆́кᲂже бг҃ъ на́шъ .

дрꙋгі́и . Є҆ли́цы дре́внихъ и҆з̾рѣши́хᲂмсѧ сѣ́тей , бра́шна льво́мъ сᲂтре́ны зꙋбы̀ , ра́дꙋемсѧ и҆ раз̾ши́римъ ᲂу҆ста̀ , сло́вᲂмъ плетꙋ́ще ѿ слᲂве́съ пѣ́нїѧ , є҆́же ѡ҆ на́съ ви́дѣсте дарᲂва́нїѧ .

кᲂнда́къ , пра́здникꙋ . гла́съ , г҃ . И҆́же всѧ́ческихъ гдⷭ҇ь ѡ҆брѣ́занїе прїе́млетъ , и҆ челᲂвѣ́ческаѧ прегрѣше́нїѧ , ꙗ҆́кѡ бл҃гъ пᲂтреблѧ́етъ , дае́тъ спасе́нїе дне́сь ми́рꙋ . ра́дꙋетжесѧ в̾ вы́шнихъ , и҆ зижди́телевъ ст҃ль и҆ денни́ца . бжⷭ҇твеныи таи́нникъ хрⷭ҇то́въ васи́лїй .

та́же , сѣда́ленъ , ст҃о́мꙋ . гла́съ , и҃ . Премꙋ́дрᲂсти сло́ва навы́къ , и҆ писа́нїе зако́на ѿло́жь , всѣ́мъ прᲂпᲂвѣ́далъ є҆сѝ бл҃гᲂда́ти сло́вᲂ . и҆ дш҃а́мъ скрижа́ли ᲂу҆гла́дилъ є҆сѝ слᲂвесы̀ твᲂи́ми , в̾ ни́хже начерта́лъ є҆сѝ бжⷭ҇твенаѧ ᲂу҆че́нїѧ . тѣ́мже и҆ мра́къ прᲂше́дъ ѻ҆́блакᲂмъ пᲂкро́ва тѣлесѐ , прᲂсїѧ́лъ є҆сѝ дх҃ᲂмъ ст҃лю васи́лїе . мᲂлѝ хрⷭ҇та̀ бг҃а , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ . пра́здникꙋ , гла́съ , д҃ . Ꙗ҆́кѡ сы́и бе́здна чл҃кᲂлю́бїѧ , ѡ҆дѣ́ѧсѧ влⷣкᲂ въ зра́къ ра́бїи , и҆ пло́тїю ѡ҆брѣ́засѧ . да́рꙋѧ всѣ́мъ чл҃кѡмъ , вели́кꙋю твᲂю̀ млⷭ҇ть .

пѣ́снь , д҃ . і҆рмо́съ . Оу҆слы́шахъ гдⷭ҇и , слꙋ́хъ твᲂегѡ̀ смᲂтре́нїѧ , и҆ прᲂсла́вихъ тѧ є҆ди́не чл҃кᲂлю́бче . Ѡ҆брѣ́занїе преста̀ , ѿне́лѣже хрⷭ҇то́съ во́лею ѡ҆брѣ́засѧ . ꙗ҆зы́къ мно́жествᲂ спаса́ѧ бл҃гᲂда́тїю . Бꙋ́дꙋщагѡ непреста́ннꙋю ѻ҆сма́гѡ вѣ́ка жи́знь , и҆з̾ѡ҆бража́етъ . въ ню́же влⷣка ѡ҆брѣ́засѧ пло́тїю .

Ст҃о́мꙋ . і҆рмо́съ , то́йже . Оу҆краша́етсѧ ꙗ҆́кᲂже ржⷭ҇тво́мъ , хрⷭ҇то́ва невѣ́ста цр҃кви , та́кѡ и҆ па́мѧтїю твᲂе́ю пребл҃же́нне . Непᲂко́ренъ ꙗ҆ви́лсѧ є҆сѝ , бг҃ᲂви спᲂсо́бствꙋѧ васи́лїе . и҆́же всѣ́мъ тᲂгѡ̀ пᲂвелѣ́нїемъ пᲂкарѧ́ѧсѧ . Цр҃кви пᲂдаде́сѧ ѿ́ бг҃а , ѡ҆гражде́нїе , и҆ стѣна̀ тверда̀ , васи́лїе всебл҃же́нне . сла́ва . Сᲂпрᲂтивᲂбо́жнымъ , сѣ́чивᲂ ты̀ сѣка́тельнᲂ , и҆ ѻ҆́гнь пᲂѧда́ѧ пре́лесть , ꙗ҆ви́сѧ ѻ҆́ч҃е васи́лїе . и҆ ны́нѣ , боⷢ҇ . Мо́лимъ тѧ̀ чи́стаѧ , ꙗ҆́же бг҃а без̾ сѣ́мене заче́ншꙋю , прⷭ҇нѡ мᲂли́ти за рабы̀ свᲂѧ̀ .

катава́сїѧ : Оу҆слы́шахъ гдⷭ҇и гла́съ тво́й и҆́же речѐ , гла́съ вᲂпїю́щагѡ в̾ пꙋсты́ни , ꙗ҆́кѡ вᲂз̾грѣмѣ̀ над̾ вᲂда́ми мно́гими , твᲂемꙋ̀ свидѣ́тельствꙋѧ сн҃ꙋ . ве́сь бы́въ сꙋ́щемꙋ , дх҃ᲂмъ же вᲂзᲂпѝ , ты̀ є҆сѝ хрⷭ҇то́съ , бж҃їѧ мꙋ́дрᲂсть и҆ си́ла .

дрꙋгі́и . Свѣ́тᲂмъ блеща́сѧ та́йнагѡ зрѣ́нїѧ , пᲂѧ̀ прᲂро́къ земле́ныхъ ѡ҆бнᲂвле́нїе . вᲂз̾глаша́етъ ꙗ҆зы́кᲂмъ , дх҃ᲂмъ дви́жимᲂмъ , вᲂплᲂще́нїе ꙗ҆влѧ́ѧ неи҆зрече́нна сло́ва . и҆́мже си́льныхъ держа́вы сᲂтро́шасѧ .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бᲂ тебѐ и҆но́гѡ бг҃а незна́емъ . Ты̀ ѿ дв҃ы мт҃ре несказа́ннѡ прᲂше́дъ гдⷭ҇и , и҆ в̾ чл҃ческїи не неспᲂдо́бисѧ ѡ҆блещи́сѧ ѻ҆́бразъ . ꙗ҆́кѡ младе́нецъ зако́ннѡ , зако́нъ и҆спо́лнилъ є҆сѝ . Но́щи ᲂу҆пᲂдо́бисѧ , ꙗ҆́кѡ сѣ́нь зако́ннꙋю лю́бѧщи , и҆зра́илѧ ро́ждьшаѧ . и҆з̾ неѧ́же ѡ҆блиста́вшїи свѣ́тъ ми́рꙋ , хрⷭ҇то́съ ꙗ҆ви́сѧ .

Ст҃о́мꙋ . і҆рмо́съ , то́йже . Во́дитъ вᲂи́стинꙋ сꙋгꙋ́бъ цр҃кви пра́здникъ дне́сь , ѡ҆брѣ́занїѧ , ꙗ҆́кѡ младе́нцꙋ влⷣцѣ ꙗ҆́вльшꙋсѧ на землѝ , и҆ па́мѧть раба̀ мꙋ́дра и҆ требл҃же́нна . Непᲂдви́жимыи свѣ́тъ пᲂчи́въ на тебѣ̀ прпⷣбне , пресвѣ́тлꙋ свѣщꙋ̀ ми́рᲂви тѧ̀ пᲂказа̀ хрⷭ҇то́съ . тѣ́мже па́мѧть твᲂю̀ пᲂе́мъ васи́лїе . И҆́же всѐ те́мнѡ напи́саннᲂе в̾ сина́и бытїѐ мѡѷсе́ѡмъ , ты̀ сказа́ѧ ѿ бжⷭ҇твеныхъ сᲂкро́вищь , начерта́лъ є҆сѝ всѣ́мъ пребл҃же́нне васи́лїе . сла́ва . Ни закᲂнᲂпᲂло́жникъ мѡѷсе́й , ни пе́рвѣе зако́на і҆ѡ́сифъ бы́сть , и҆́же пᲂ тебѣ̀ пи́щи пшеницᲂмѣ́ритель . бжⷭ҇твеныѧ бᲂ пло́ти , са́мъ раз̾дрᲂби́тель ꙗ҆ви́сѧ васи́лїе . и҆ нн҃ѣ , боⷢ҇ . Тебѣ̀ ро́ждьшей хрⷭ҇та̀ , и҆́же всемꙋ̀ сᲂдѣ́телѧ , зᲂве́мъ , ра́дꙋисѧ чⷭ҇таѧ . ра́дꙋисѧ ꙗ҆́же свѣ́тъ вᲂсїѧ́вшаѧ на́мъ . ра́дꙋисѧ вмѣ́щшаѧ бг҃а невмѣсти́магᲂ .

катава́сїѧ : І҆с҃ъ живᲂтꙋ̀ нача́льникъ , разрѣши́ти ѡ҆сꙋжде́нїѧ прїи́де , а҆да́ма первᲂзда́ннагᲂ . ѡ҆чище́нїѧ же ꙗ҆́кѡ бг҃ъ нетре́бꙋѧ , па́дшагѡ ѡ҆чища́етъ вᲂ і҆ѡрда́нѣ , в̾ не́мже враждꙋ̀ ᲂу҆би́въ , преимꙋ́щь всѧ́къ ᲂу҆́мъ , ми́ръ пᲂдава́етъ .

дрꙋгі́и . Врага̀ те́мна и҆ скве́рнагѡ , ꙗ҆́да ѡ҆чище́нїемъ , дх҃а и҆змᲂве́ни , на но́въ наста́хᲂмъ небла́зненныи пꙋ́ть , ввᲂдѧ́щь в̾ непристꙋ́пнꙋю ра́дᲂсть . є҆ди́нѣмъ пристꙋ́пенъ , и҆́мже бг҃ъ примири́сѧ .

пѣ́снь , ѕ҃ . і҆рмо́съ . Бе́здна грѣхо́въ ѡ҆бы́де мѧ пᲂслѣ́днѧѧ , нᲂ ꙗ҆́кᲂже пррⷪ҇ка і҆ѡ́нꙋ , гдⷭ҇и гдⷭ҇и вᲂз̾ведѝ ѿ тлѝ живо́тъ мо́й . Прїѧ́тъ кᲂнчи́нꙋ зако́нъ , ѿне́лѣже хрⷭ҇то́съ младе́нствᲂвавъ и҆спо́лнитель зако́нꙋ сы́и , ѡ҆брѣ́занїе прїѧ́тъ , и҆ разрѣшѝ зако́ннꙋю клѧ́твꙋ . Въ сꙋбо́тахъ ѡ҆брѣ́заетсѧ шата́нїе є҆вре́йскᲂе , ꙗ҆́вльшагᲂсѧ хрⷭ҇та̀ манᲂве́нїемъ преста̀ , и҆ спрᲂсїѧ̀ бл҃гᲂда́ти весна̀ .

Ст҃о́мꙋ . і҆рмо́съ , то́йже . Напита́лъ є҆сѝ дш҃и та́ющїѧ гла́дᲂмъ ни́щихъ , незави́стнѡ , и҆ а҆́лчꙋщимъ сердца̀ , всѧ́кᲂгѡ насы́тилъ є҆сѝ васи́лїе бжⷭ҇твенагѡ весе́лїѧ . Напита́лъ є҆сѝ бᲂга́тнѡ а҆́лчꙋщїѧ , пи́щею нбⷭ҇нᲂю . хлѣ́бъ бᲂ а҆́нг҃льскїи є҆́сть сло́вᲂ твᲂѐ васи́лїе , и҆́мже и҆зрѧ́денъ пшеницᲂда́вецъ бы́лъ є҆сѝ . Со́бралъ є҆сѝ пче́льныи , васи́лїе любᲂбᲂлѣ́зненѡ , дᲂбрᲂдѣ́тели всѧ́къ цвѣ́тъ , и҆ хꙋдо́гъ бы́въ , в̾ ни́хже ᲂу҆блажа́ешисѧ . сла́ва . Пᲂтща́лсѧ є҆сѝ ми́ра ѿлꙋчи́тисѧ , и҆ с̾ бг҃ᲂмъ пᲂжи́ти . тѣ́мже нестᲂѧ́тельныхъ и҆ тлѣ́нныхъ , пребл҃же́нне васи́лїе ѡ҆ста́вль . пребыва́ющаѧ , ꙗ҆́кѡ мꙋ́дрѣ стѧжа́лъ є҆сѝ . и҆ нн҃ѣ , боⷢ҇ . Спасѝ ѿ бѣ́дъ ста́дᲂ твᲂѐ бцⷣе , ꙗ҆́кѡ всѝ с̾ бг҃ᲂмъ к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ пред̾ста́тельницѣ .

катава́сїѧ : Гла́съ слᲂвесѐ , свѣти́льникъ свѣ́та , денни́ца сл҃нцꙋ прⷣтча . в̾ пꙋсты́ни пᲂка́йтесѧ всѣ́мъ вᲂпїе́тъ лю́демъ и҆ ѡ҆чи́ститесѧ , се́бᲂ пред̾стᲂи́тъ хрⷭ҇то́съ , ѿ тлѝ ми́ръ и҆збавлѧ́ѧй .

дрꙋгі́и . И҆́стиннѡ ꙗ҆́вствᲂва с̾ пресла́внымъ гла́сᲂмъ ѻ҆ц҃ъ , є҆го́же и҆́з̾ чрева ѿры́гнꙋ . є҆́й речѐ , се́й сᲂвᲂзра́стенъ сн҃ъ сы́и свѣтᲂза́ренъ , и҆з̾ гᲂры́ тѧ челᲂвѣ́ча ро́да . сло́вᲂ же мᲂѐ жи́вᲂ , и҆ чл҃къ прᲂмышле́нїемъ .

кᲂнда́къ . гла́съ , д҃ . Ꙗ҆ви́сѧ сто́лпъ непᲂдви́жимыи цр҃кви , пᲂдаѧ̀ всѣ́мъ некра́дᲂмᲂе бᲂга́тьствᲂ земны́мъ , запечатлѣ́ѧ твᲂи́ми ᲂу҆че́ньми , нб҃ᲂѧвле́нне васи́лїе прпⷣбне .

и҆́кᲂсъ . Цѣлᲂмꙋ́дрїѧ ча́ша , ᲂу҆ста̀ премꙋ́дрᲂсти , и҆ степе́нь ᲂу҆че́нїемъ , васи́лїи вели́кїи , всѣ́мъ ѡ҆блиста́етъ мы́сленѡ . прїиди́те ᲂу҆́бѡ и҆ ста́немъ в̾ дᲂмꙋ̀ бж҃їи , те́плѣ взира́юще , чꙋдесмѝ сегѡ̀ красѧ́щесѧ . ꙗ҆́кᲂже лꙋче́ю ѡ҆блиста́вшесѧ житїѧ̀ , чи́стымъ дх҃ᲂмъ прᲂхла́ждьшесѧ . пᲂдо́бѧщесѧ тᲂгѡ̀ вѣ́рѣ , и҆ теплᲂтѣ̀ и҆ смире́нїю , и҆́мже до́мъ ꙗ҆ви́сѧ є҆стества̀ бж҃їѧ . к̾ немꙋ́ же вᲂпїю́ще пᲂе́мъ , нб҃ᲂѧвле́нне васи́лїе препᲂдо́бне .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непᲂслꙋжи́ша , и҆ в̾ пла́мень са́ми пᲂидо́ша , и҆ бо́ги и҆́хъ ѡ҆брꙋга́ша . средѝ пла́мене вᲂзᲂпи́ша , и҆ ѡ҆брᲂсѝ и҆́хъ а҆́нг҃лъ , ᲂу҆слы́шасѧ ᲂу҆́же ᲂу҆́стъ ва́шихъ мл҃тва . Свѣ́тлᲂ и҆ пресвѣ́тлᲂ ржⷭ҇тво̀ хрⷭ҇то́вᲂ , и҆ бꙋ́дꙋщагѡ ѡ҆бнᲂвле́нїѧ пᲂд̾писꙋ́ющее та́иньствᲂ дне́сь , ꙗ҆́кѡ зако́ннымъ чи́нᲂмъ сп҃съ ѡ҆брѣ́заетсѧ . не ꙗ҆́кѡ бг҃ъ , нᲂ ꙗ҆́кѡ чл҃къ , и҆ зако́нꙋ и҆спᲂлне́нїе . Зако́нъ и҆спᲂлнѧ́ѧ , и҆́же зако́нꙋ твᲂре́цъ , пло́тїю дне́сь во́лею ѡ҆брѣ́заетсѧ , ѡ҆брѣ́занїе сᲂдѣва́ѧ грѣхо́вныѧ зимы̀ . и҆ зва́ти да́рꙋѧ , бл҃гᲂслᲂве́нъ бг҃ъ ѻ҆ц҃ъ на́шихъ .

Ст҃о́мꙋ . і҆рмо́съ , то́йже . Ѻ҆́бразъ ѻ҆ч҃ь сн҃ъ , и҆ сн҃ꙋ дх҃ъ є҆́сть . ты́ же дх҃ꙋ , ѽ васи́лїе нескве́рненᲂ зерца́лᲂ , до́мъ же все́й трⷪ҇цѣ . бл҃же́нна па́мѧть твᲂѧ̀ , и҆ сла́вѧщїи є҆ѧ̀ вᲂзпрᲂславлѧ́ютсѧ . Оу҆глꙋби́въ ᲂу҆́мъ , вᲂ глꙋбины̀ бж҃їѧ непᲂстижи́мыѧ . и҆ со́бравъ мнᲂгᲂцѣ́нныи ты̀ би́серъ ра́зꙋма , напо́лнилъ є҆сѝ ми́ръ премꙋ́дрᲂсти . и҆ зва́ти наꙋчи́лъ є҆сѝ , бл҃гᲂслᲂве́нъ бг҃ъ ѻ҆ц҃ъ на́шихъ . ѽ є҆ди́нᲂ дᲂхнᲂве́нїе ᲂу҆ма̀ , сщ҃е́нныхъ сꙋпрꙋ́гъ . и҆́же ꙗ҆́кѡ є҆ди́на дш҃а , вᲂ двᲂю̀ тѣлесѝ нераздѣ́льнѡ , въ григо́рїи васи́лїй , жела́нїемъ бжⷭ҇твенымъ сᲂвᲂкꙋпле́ни , въ васи́лїи же григо́рїй . ны́нѣ мᲂли́те хрⷭ҇та̀ ѡ҆ ста́дѣ ва́шемъ . Ѻ҆ц҃ъ си́рымъ , и҆ вдᲂви́цамъ защи́тникъ , и҆ бᲂга́тьствᲂ ни́щимъ . бᲂлѧ́щимъ ᲂу҆тѣше́нїе , и҆ сꙋ́щимъ в̾ бᲂга́тьствѣ ѡ҆кᲂрмле́нїе . ста́рᲂсти же́злъ ꙗ҆ви́сѧ , и҆ наказа́нїе ю҆́нᲂсти . и҆ и҆́нᲂкꙋющимъ дᲂбрᲂдѣ́тели пра́вилᲂ васи́лїе . сла́ва . Ѡ҆чи́щь ѿ всѧ́кᲂгѡ ти́ннагѡ скверне́нїѧ ᲂу҆́мъ васи́лїе , пᲂсѣти́лъ є҆сѝ дх҃о́вныѧ жела́ннымъ тѝ дх҃ᲂмъ . тѣ́мже вᲂспѣва́ѧ трⷪ҇цꙋ , съ дерзнᲂве́нїемъ взыва́ше , бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ , боⷢ҇ . Тѧ̀ кꙋпинꙋ̀ мѡѷсе́й , в̾ гᲂрѣ̀ сина́йстѣй ѻ҆гне́мъ палѧ́щꙋ чⷭ҇таѧ прᲂви́дѧше , прїе́мшꙋю неѡ҆па́льнѡ непᲂстᲂѧ́ннꙋю зарю̀ , неи҆зглаго́ланнагѡ сꙋщества̀ , сᲂє҆ди́ньшасѧ дебельство́мъ пло́ти , вᲂ є҆ди́нъ и҆́же в̾ не́й ст҃ы́и сᲂста́въ .

катава́сїѧ : Ю҆́нᲂши вѣ́рныѧ в̾ пе́щь ѻ҆́гненнꙋю влѣ́зша , шꙋмѧ́щь дх҃ъ хла́денъ невреди́мы сᲂхранѝ , и҆ бж҃їѧ а҆́нг҃ла схᲂжде́нїе . тѣ́мже в̾ пла́мени прᲂхлажда́еми бл҃гᲂда́рственнѡ пᲂѧ́хꙋ , препѣ́тыи ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ .

дрꙋгі́и . И҆спалѝ вᲂдо́ю ѕмі́евы главы̀ , пе́щнагѡ высо́кагѡ пла́мене , ю҆́нᲂши и҆мꙋ́щи бл҃гᲂчести́выѧ , ᲂу҆тѣ́шивыи ѕлᲂко́знꙋю мглꙋ̀ ѿ грѣха̀ , всю́ же чи́ститъ рᲂсо́ю дх҃о́внᲂю .

пѣ́снь , и҃ . і҆рмо́съ . Неи҆зрече́ннᲂю мꙋ́дрᲂстїю , сᲂста́вльшагѡ всѧ́ческаѧ , бг҃а сло́ва , и҆ ѿ несꙋ́щихъ в̾ бытїѐ приве́дшагѡ , бл҃гᲂслᲂви́те дѣ́ла гдⷭ҇нѧ гдⷭ҇а . Вᲂ ѻ҆смы́и де́нь ѡ҆брѣ́заетсѧ ꙗ҆́кѡ младе́нецъ влⷣка . і҆с҃ᲂвᲂ же прїе́млетъ и҆менᲂва́нїе , ꙗ҆́кѡ ми́рꙋ є҆́сть сп҃съ и҆ гдⷭ҇ь . Къ хрⷭ҇то́вꙋ ржⷭ҇твꙋ̀ дᲂсто́йнѡ ѻ҆смы́и припрѧже́сѧ , ст҃лѧ всесла́внаѧ па́мѧть . є҆ѧ́же пᲂчита́юще вѣ́рᲂю , пᲂе́мъ гдⷭ҇а , и҆ превᲂзно́симъ во́ вѣки .

Ст҃о́мꙋ . і҆рмо́съ , то́йже . И҆́же несказа́ннымъ прᲂмышле́нїемъ , дарᲂва́вшагѡ васи́лїѧ ми́рᲂви свѣ́тъ бл҃гᲂче́стїѧ , трꙋбꙋ́ же бг҃ᲂсло́вїѧ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . И҆́же бᲂга́тнымъ дѣ́йствᲂмъ все́льшасѧ в̾ мꙋ́драгѡ васи́лїѧ , и҆ тѣ́мъ бл҃гᲂче́стнѡ бг҃ᲂсло́вльшагѡ , блгⷭ҇ви́те дѣ́ла гдⷭ҇нѧ гдⷭ҇а . И҆́же бжⷭ҇твеныхъ твᲂи́хъ слᲂве́съ насла́ждьшїисѧ васи́лїе , непреста́ннѡ в̾ твᲂе́й па́мѧти тᲂржествꙋ́юще вᲂпїе́мъ , бл҃гᲂслᲂви́те дѣ́ла гдⷭ҇нѧ гдⷭ҇а . сла́ва . Зарю̀ слᲂве́съ пᲂсла́лъ є҆сѝ васи́лїе ми́рᲂви , свѣ́тᲂмъ наставлѧ́ющꙋ є҆ди́нᲂ чти́ти трⷪ҇ческᲂе є҆стество̀ . блгⷭ҇ви́те дѣ́ла гдⷭ҇нѧ гдⷭ҇а . и҆ нн҃ѣ , боⷢ҇ . И҆́же ѿ ѻ҆ц҃а прᲂше́дшагᲂ пре́жде вѣ́къ , и҆ без̾лѣ́тнагᲂ бг҃а сло́ва , и҆ в̾ пᲂслѣ́днѧѧ вᲂсїѧ́вша ѿ дв҃ы , бл҃гᲂслᲂви́те всѧ̀ дѣ́ла гдⷭ҇а .

катава́сїѧ : Та́йнꙋ пресла́внꙋ вавилѡ́нскаѧ пᲂказа̀ пе́щь , и҆сто́чшаѧ хла́дъ . ꙗ҆́кѡ стрꙋѧ̀ хᲂтѧ́ше неприкᲂснᲂве́нныи ѻ҆́гнь , прїѧ́ти і҆ѡрда́нстей и҆ стерпѣ́ти пло́тїю крести́ма зижди́телѧ . є҆го́же бл҃гᲂслᲂвѧ́тъ лю́дїе , и҆ превᲂзно́сѧтъ вᲂ всѧ̀ вѣ́ки .

дрꙋгі́и . Хва́лимъ блгⷭ҇ви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Свᲂбо́дна ᲂу҆́бѡ тва́рь пᲂзнава́етсѧ , сн҃ᲂве же свѣ́та и҆́же дре́вле ѡ҆мраче́ннїи . є҆ди́нъ сто́нетъ тмы̀ пред̾ста́тель . ны́нѣ да бл҃гᲂслᲂви́тъ ве́селᲂ вино́внагѡ , пре́жде страстно́е ꙗ҆зы́къ всенаслѣ́дїе .

На ѳ҃ й , пѣ́сни , честнѣ́йшꙋю не пᲂе́мъ . нᲂ пᲂе́мъ припѣ́вы пра́здникꙋ .

пѣ́снь , ѳ҃ . припѣ́въ : Велича́й дш҃е мᲂѧ̀ , и҆́же пᲂ зако́нꙋ пло́тїю ѡ҆брѣ́завшагᲂсѧ гдⷭ҇а . і҆рмо́съ . Ꙗ҆́же пре́жде сл҃нца , свѣти́льника бг҃а вᲂз̾сїѧ́вша , пло́тїю к̾ на́мъ прише́дша и҆з̾ бᲂкꙋ̀ дв҃чꙋ , неи҆зрече́ннѡ вᲂчелᲂвѣ́чьшасѧ , бл҃гᲂслᲂве́ннаѧ чи́стаѧ , тѧ̀ бцⷣе велича́емъ . Преминꙋ́въ предѣ́лы хрⷭ҇то́съ чл҃ческагѡ всегѡ̀ є҆стества̀ , па́че є҆стества̀ ѿ дв҃ы ражда́етсѧ . и҆ писа́нїе зако́ннᲂе ꙗ҆́кᲂже пᲂвелѣва́етъ , пло́тїю ѡ҆брѣ́заетсѧ , и҆ и҆спо́лнитель зако́нꙋ ꙗ҆влѧ́етсѧ .= П=рїиди́те влⷣки сла́внаѧ хрⷭ҇то́ва и҆менᲂва́нїѧ вᲂ ст҃ы́ни тᲂржествꙋ́емъ . і҆с҃ъ бᲂ бг҃ᲂлѣ́пнѡ нарече́сѧ дне́сь . с̾ ни́мже и҆ па́мѧть ст҃лѧ велича́емъ .

Ст҃о́мꙋ . і҆рмо́съ , то́йже . припѣ́въ : Велича́й дш҃е мᲂѧ̀ , и҆́же в̾ кесарі́и вели́кагѡ васи́лїѧ . Пе́рвагѡ па́стырѧ , ꙗ҆́кѡ ѻ҆вча̀ вѣ́рнѡ хрⷭ҇то́въ васи́лїе , живᲂно́снымъ стᲂпа́мъ пᲂслѣ́дᲂвалъ є҆сѝ . мꙋчи́телю бᲂ свᲂю̀ дш҃ꙋ ѻ҆́ч҃е пре́далъ є҆сѝ до́блественѣ , и҆ пре́жде въ бѣдѣ̀ сꙋ́щи цр҃кви , всебл҃же́нне . Цр҃ко́внᲂе всесщ҃е́ннᲂе хрⷭ҇то́вᲂ ви́дѣвъ сᲂвᲂкꙋпле́нїе , твᲂи́мъ ᲂу҆крашено̀ ст҃льствᲂмъ мꙋ́дре , всегꙋби́тель , ꙗ҆́кѡ ѿ́ грᲂма треснᲂве́нъ бы́въ , паде́сѧ мꙋчи́тель . сꙋ́щїѧ бᲂ и҆́же въ тебѣ̀ дх҃а зарѝ не стерпѣ̀ васи́лїе . А҆пⷭ҇льскимъ сѣда́лищемъ , лико́мъ же страда́лецъ хрⷭ҇то́выхъ , патрїа́рхъ сѣ́ни , и҆ пра́ведныхъ пи́щи , и҆ ра́дᲂсти прᲂро́къ , спᲂдо́бисѧ васи́лїе . бцⷣѣ бᲂ слꙋжи́тель , и҆ трⷪ҇цѣ таи́нникъ бы́лъ є҆сѝ .

припѣ́въ : Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ дв҃ꙋ пречи́стꙋю бцⷣꙋ . боⷢ҇ . И҆́же напра́снагѡ дре́внѧгѡ пᲂгꙋбле́нїѧ ѡ҆сꙋжде́нїе , и҆ прамт҃ре и҆справле́нїе . ю҆́же ро́дꙋ , є҆́же к̾ бг҃ꙋ винꙋ̀ присвᲂе́нїѧ . ю҆́же к̾ зижди́телю мо́стъ , тѧ̀ бцⷣе велича́емъ .

катава́сїѧ : Велича́й дш҃е мᲂѧ̀ , и҆́же пᲂ зако́нꙋ пло́тїю ѡ҆брѣ́завшагᲂсѧ гдⷭ҇а . Недᲂꙋмѣ́етъ всѧ́къ ꙗ҆зы́къ хвали́ти тѧ дᲂсто́йнѡ , низꙋмѣ́етъ же ᲂу҆́мъ преми́рныи пѣ́ти тѧ бцⷣе . всѧ́ бᲂ бл҃га́ѧ сꙋ́щи вѣ́рꙋ прїимѝ , и҆́бᲂ любо́вь вѣ́си бж҃їю на́шꙋ . ты́бᲂ хрⷭ҇тїа́нѡмъ є҆сѝ застꙋ́пнице тѧ велича́емъ . дрꙋгі́и . Велича́й дш҃е мᲂѧ̀ , чⷭ҇тнѣ́йшꙋю нбⷭ҇ныхъ во́инствъ дв҃ꙋ пречи́стꙋю бцⷣꙋ . ѽ =вы́ше ᲂу҆ма̀ ржⷭ҇тва́ ти чꙋде́съ , невѣ́стᲂ пречⷭ҇таѧ мт҃и бл҃гᲂслᲂве́ннаѧ . є҆́юже пᲂлꙋчи́вше сᲂверше́ннᲂе спасе́нїе . дᲂсто́йнѡ пᲂе́мъ ꙗ҆́кѡ бл҃гᲂда́телю , да́ры нᲂсѧ́ще пѣ́нїе бл҃гᲂдаре́нїе . =пᲂкло́н̾ дᲂ землѝ .

свѣти́ленъ . Любᲂмꙋ́дрїѧ жела́нїемъ , ѡ҆брѣ́зᲂваше ѻ҆́ч҃е дш҃и свᲂеѧ̀ пᲂкрыва́лᲂ . и҆ ми́рᲂви пᲂказа́сѧ , ꙗ҆́кѡ сл҃нце чꙋдесмѝ . и҆ вѣ́рныхъ ѡ҆зари́лъ є҆сѝ мы́сли бг҃ᲂмꙋ́дре . трⷪ҇цы таи́нниче , ѽ васи́лїе мꙋ́дре , и҆ слꙋжи́телю бцⷣѣ .= два́жды . сла́ва , и҆ ны́нѣ , пра́здникꙋ . П=ло́тїю ѡ҆брѣ́заетсѧ , и҆́же зако́нъ и҆спо́лнивыи , ꙗ҆́кѡ млⷣнцъ ѻ҆смᲂдне́венъ , вѣкѡ́мъ зижди́тель . и҆ пелена́ми пᲂвива́етсѧ , ꙗ҆́кѡ зе́мленъ . и҆ млеко́мъ пита́етсѧ , и҆́же всѧ̀ безмѣ́рнᲂю крѣ́пᲂстїю ꙗ҆́кѡ бг҃ъ сᲂдержа́и , и҆ манᲂве́нїемъ вᲂзвᲂдѧ́и .

На хвали́тѣхъ , стихѣ́ры , на д҃ . гла́съ , є҃ . поⷣ . ра́дꙋйсѧ живᲂно́сныи .= Пᲂ бл҃гᲂда́ти сн҃ъ бж҃їи бы́въ , пᲂрᲂжде́нїемъ бжⷭ҇твенагѡ кр҃ще́нїѧ , и҆́же є҆стество́мъ и҆ и҆́стинᲂю . и҆ первᲂвѣ́чна сн҃а бж҃їѧ сло́ва , є҆динᲂсꙋ́щна ѻ҆ц҃ꙋ и҆ сᲂбезнача́льна и҆спᲂвѣ́далъ є҆сѝ препᲂдо́бне . є҆ретикѡ́мъ же незатвᲂре́ннаѧ ᲂу҆ста̀ , свѣ́тлᲂстїю свᲂи́хъ слᲂве́съ затвᲂри́лъ є҆сѝ . тѣ́мже и҆ въ црⷭ҇твᲂ вы́шнее всели́сѧ , црⷭ҇твꙋѧ сᲂ є҆ди́нѣмъ пᲂ є҆стествꙋ̀ црⷭ҇твꙋющимъ хрⷭ҇то́мъ , и҆́же бᲂга́тнѡ раздава́ющимъ ми́рᲂви ве́лїю млⷭ҇ть . Внꙋ́трь нбⷭ҇нагѡ хра́ма , ꙗ҆́кѡ ст҃ль сщ҃е́ненъ вмѣсти́лсѧ є҆сѝ , дѣѧ́нїемъ и҆ видѣ́нїемъ премꙋ́дрᲂсти нача́ла , ꙗ҆́кѡ ѻ҆де́жею ст҃о́ю ѡ҆блᲂже́нъ . и҆ нн҃ѣ в̾ вы́шнѣмъ же́ртвеницѣ прпⷣбне сщ҃е́нствꙋѧ , и҆ бг҃ᲂви пред̾стᲂѧ̀ , и҆ невеще́ственꙋю слꙋ́жбꙋ сᲂверша́ѧ , пᲂмина́й ми́лᲂстивнѡ всебл҃же́нне васи́лїе , твᲂрѧ́щихъ па́мѧть сщ҃е́ннꙋю твᲂю̀ и҆ всечестнꙋ́ю , хрⷭ҇та̀ мᲂлѧ̀ , пᲂдаю́щагᲂ ми́рᲂви ве́лїю млⷭ҇ть . Ве́сь ѡ҆сщ҃е́нъ бг҃ᲂви , и҆ всеѡ҆бра́знѡ ѿ дѣ́тства вᲂз̾лᲂже́нъ . мꙋ́дрᲂсти пребжⷭ҇твеныѧ ѡ҆зари́всѧ зарѧ́ми , сꙋ́щихъ є҆стество̀ ᲂу҆ѧсни́лъ є҆сѝ , свѣ́тлѡ сказꙋ́ѧ , и҆ мꙋ́дрѣ пᲂлага́ѧ , є҆́же в̾ сꙋ́щихъ бл҃гᲂчи́нїе твᲂрѧ̀ , пᲂзна́нїе бжⷭ҇твенѣйшагѡ дѣ́ла . тѣ́мже тѧ̀ бг҃ᲂглаго́лива и҆ бжⷭ҇твена ᲂу҆чи́телѧ , и҆ свѣтᲂно́сна свѣти́льника цр҃кви прᲂпᲂвѣ́даемъ . хрⷭ҇та̀ мᲂлѧ́ще , пᲂдаю́щагᲂ ми́рᲂви ве́лїю млⷭ҇ть . Стра́хᲂмъ ᲂу҆тве́рждьсѧ бж҃їимъ , нача́лᲂ премꙋ́дрᲂсти разꙋмѣ̀ васи́лїе . стра́хъ премꙋ́дрᲂстїю , и҆ житїѧ̀ пра́ва превзы́де ѻ҆́ч҃е . любо́вїю же бг҃ᲂви смѣси́сѧ , и҆ сво́йственѣйши бы́лъ є҆сѝ . тѣ́мже бжⷭ҇твенымъ наказа́всѧ ѡ҆правда́нїемъ и҆ сꙋдьба́мъ , чл҃кѡмъ и҆з̾че́лъ є҆сѝ ѻ҆бы́чаи , и҆ ᲂу҆краси́лъ є҆сѝ вѣ́рныхъ ра́зꙋмы . закᲂнᲂпᲂлᲂже́ньми ᲂу҆ѧсни́въ дх҃о́вныи сᲂбо́ръ . хрⷭ҇та̀ ᲂу҆́бѡ мᲂлѝ , дш҃а́мъ на́шимъ дарᲂва́ти ве́лїю млⷭ҇ть . =сла́ва . гла́съ , ѕ҃ . И҆злїѧ́сѧ бл҃гᲂда́ть вᲂ ᲂу҆стнꙋ̀ твᲂе́ю , препᲂдо́бне ѻ҆́ч҃е . и҆ бы́сть па́стырь хрⷭ҇то́вѣ цр҃кви , ᲂу҆ча̀ слᲂве́сныѧ ѻ҆́вцы , вѣ́рᲂвати въ трⷪ҇цꙋ є҆динᲂсꙋ́щнꙋю , вᲂ є҆ди́нᲂмъ бжⷭ҇твѣ̀ . и҆ ны́нѣ . гла́съ , и҃ . Схᲂдѧ́и сп҃съ к̾ ро́дꙋ челᲂвѣ́ческᲂмꙋ , прїѧ́тъ пелена́ми пᲂви́тїе , не вᲂзгнꙋша́сѧ плᲂтьска́гѡ ѡ҆брѣ́занїѧ . ѻ҆смᲂдне́венъ пᲂ мт҃ри . безнача́льныи пᲂ ѻ҆ц҃ѣ . тᲂмꙋ̀ вѣ́рнїи вᲂзᲂпїе́мъ , ты̀ є҆сѝ бг҃ъ на́шъ , пᲂми́лꙋй на́съ .

Славᲂсло́вїе вели́кᲂе . Пᲂ трист҃о́мъ , трᲂпа́рь , ст҃о́мꙋ . сла́ва , и҆ ны́нѣ . трᲂпа́рь , пра́здникꙋ . є҆ктенїѝ . и҆ ѿпꙋ́стъ . и҆ ча́съ , а҃ . и҆ кᲂне́чныи ѿпꙋ́стъ .

На часѣ́хъ , трᲂпа́рь , пра́здникꙋ . сла́ва , ст҃о́мꙋ .= пᲂ ѻ҆́ч҃е на́шъ . на а҃ мъ часѣ̀ : кᲂнда́къ , пра́здникꙋ . =на г҃ мъ : кᲂнда́къ , ст҃о́мꙋ . на ѕ҃ мъ : кᲂнда́къ , пра́здникꙋ . на ѳ҃ мъ : кᲂнда́къ , ст҃о́мꙋ .

На литꙋргі́и , бл҃же́нна , на и҃ . ѿ кано́на , ст҃а́гѡ , пѣ́снь , г҃ ѧ , и҆ ѕ҃ ѧ .

Пᲂ вхо́дѣ : трᲂпа́рь , пра́здникꙋ , и҆ ст҃о́мꙋ . сла́ва , кᲂнда́къ , ст҃о́мꙋ . и҆ ны́нѣ , кᲂнда́къ , пра́здникꙋ .

прᲂки́менъ , ѱл҃о́мъ дв҃дᲂвъ . Оу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи пᲂ вселе́ннѣй . а҆пⷭ҇лъ , къ кᲂласа́емъ . заⷱ҇ , сн҃д . дрꙋгі́и , ст҃о́мꙋ . а҆пⷭ҇лъ , къ є҆вре́ѡмъ . зача́лᲂ , ти҃і . а҆ллилꙋ́їѧ . Пасы́и і҆и҃лѧ вᲂнмѝ , наставлѧ́ѧи ꙗ҆́кѡ ѻ҆вча̀ і҆ѡ́сифа . сти́хъ . ᲂу҆ста̀ пра́веднагѡ пᲂꙋча́тсѧ премꙋ́дрᲂсти , и҆ ꙗ҆зы́къ є҆гѡ̀ вᲂз̾глаго́летъ сꙋ́дъ . є҆ѵⷢ҇а́лїе , ѿ лꙋкѝ . зача́лᲂ , ѕ҃ .= и҆ ст҃о́мꙋ ,= ѿ лꙋкѝ . заⷱ҇ , к҃д . и҆ по́ рѧдꙋ бжⷭ҇твенаѧ литꙋргі́ѧ , васи́лїѧ вели́кагѡ . вмѣ́стѡ дᲂсто́йна , пᲂе́мъ : ѡ҆ тебѣ̀ ра́дꙋетсѧ . прича́стенъ , хвали́те гдⷭ҇а съ нб҃съ . дрꙋгі́и , в̾па́мѧть вѣ́чнꙋю бꙋ́детъ пра́ведникъ .

А҆́ще прилꙋчи́тсѧ ѡ҆брѣ́занїе гдⷭ҇не , и҆ ст҃а́гѡ васи́лїѧ вели́кагѡ , въ нлⷣю . Твᲂри́мъ бдѣ́нїе .

На ма́лѣй вече́рни , стихѣ́ры вᲂскрⷭ҇ны , пᲂ ѻ҆бы́чаю . На стихо́внѣ , стихѣ́ра вᲂскрⷭ҇на , гла́сꙋ є҆ди́на . та́же , стихѣ́ры васи́лїю . гла́съ , в҃ . поⷣ . до́ме є҆вфра́фᲂвъ , сᲂ стихѝ и҆́хъ . пи́саны , в̾ нача́лѣ слꙋ́жбы . Пᲂ трⷭ҇то́мъ , трᲂпа́рь вᲂскрⷭ҇нъ . сла́ва , ст҃о́мꙋ . и҆ ны́нѣ , пра́здникꙋ . и҆ ѿпꙋ́стъ .

На вели́цѣй вече́рни , стихᲂлᲂгисꙋ́емъ , бл҃же́нъ мꙋ́жь , каѳи́смꙋ всю̀ . На гдⷭ҇и вᲂзва́хъ , пᲂе́мъ стихѣ́ры вᲂскрⷭ҇ны , трѝ . и҆ пра́здникꙋ , трѝ . и҆ ст҃о́мꙋ , на д҃ . сла́ва , ст҃о́мꙋ . и҆ нн҃ѣ , боⷢ҇ , пе́рвыи , гла́сꙋ . вы́хᲂдъ , и҆ чте́нїѧ , трѝ . На литі́и стⷯра хра́мꙋ . и҆ ст҃о́мꙋ стихо́венныѧ , стихѣ́ры трѝ : Ѽ бжⷭ҇твенаѧ и҆ сщ҃е́ннаѧ . Всѣ́хъ ст҃ы́хъ . Всѣ́хъ сꙋ́щихъ . та́же , литі́йныѧ : Хрⷭ҇та̀ всели́въ . Мѵ́рѡ и҆злїѧ́сѧ . Вᲂ сщ҃е́нническꙋю ѻ҆де́ждꙋ . Сла́ва , ст҃о́мꙋ : И҆злїѧ́сѧ бл҃гᲂда́ть . пи́санъ , на хвали́тѣхъ , на сла́вѣ . и҆ ны́нѣ , пра́здникꙋ : Схᲂдѧ́и сп҃съ . На стихо́внѣ , стихѣ́ры , вᲂскрⷭ҇ны , гла́сꙋ . Сла́ва , ст҃о́мꙋ : И҆́же бл҃гᲂда́ть чꙋдесе́мъ . И҆ ны́нѣ . пра́здникꙋ := Н=епᲂстыдѣ́сѧ пребл҃гі́и . На бл҃гᲂслᲂве́нїе хлѣ́бᲂмъ . трᲂпа́рь : бцⷣе дв҃ᲂ ра́дꙋисѧ , два́жды . и҆ ст҃о́мꙋ , аⷤ .

На ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , вⷤ . сла́ва , ст҃о́мꙋ . и҆ ны́нѣ , пра́здникꙋ . Каѳи́смы ѡ҆бы́чны и҆ пᲂ ни́хъ сѣда́льны вᲂскрⷭ҇ны , и҆ боⷢ҇ , и҆́хъ . Пᲂ непᲂро́чнахъ , трᲂпарѝ и҆́хъ , и҆ ѵ҆пако́й , гла́сꙋ . Пᲂ пᲂлїелеѡ́сѣ , сѣдаленъ , ст҃о́мꙋ , двⷤа . сла́ва , ст҃о́мꙋ . и҆ ны́нѣ , пра́здникꙋ : И҆́же є҆стество́мъ . степе́нна , гла́сꙋ . прᲂки́менъ . и҆ всѧ́кᲂ дыха́нїе . є҆ѵⷢ҇а́лїе , вᲂскрⷭ҇нᲂ . и҆ вᲂскрⷭ҇нїе хрⷭ҇то́вᲂ . ѱл҃о́мъ , н҃ . и҆ стⷯра , вᲂскрⷭ҇на . Кано́нъ вᲂскрⷭ҇нъ сᲂ і҆рмᲂсо́мъ , на д҃ . и҆ пра́здникꙋ , на д҃ . и҆ ст҃о́мꙋ , на́ ѕ҃ . Катава́сїѧ : глꙋбинѣ̀ ѿкры́лъ є҆́сть дно̀ . и҆ дрꙋга́ѧ : пꙋ́ть мᲂрскі́и , пᲂ є҆ди́нᲂмꙋ на странꙋ̀ , кі́иждᲂ ли́къ сво́й і҆рмо́съ . Пᲂ г҃ , пѣ́сни , кᲂнда́къ пра́здникꙋ . и҆ сѣда́ленъ , ст҃о́мꙋ , два́жды . сла́ва , и҆ ны́нѣ , пра́здникꙋ . Пᲂ ѕ҃ , пѣ́сни , кᲂнда́къ ст҃о́мꙋ , и҆ и҆́кᲂсъ . На ѳ҃ , пѣ́сни , пᲂе́мъ , честнѣ́йшꙋю . припѣ́вᲂвъ же , пра́здникꙋ , и҆ ст҃о́мꙋ , не пᲂе́мъ . нᲂ по́слѣ катава́сїи , на схо́дѣ пᲂе́мъ : дᲂсто́йнѡ є҆́сть . Свѣти́ленъ вᲂскрⷭ҇нъ . сла́ва , ст҃о́мꙋ . и҆ ны́нѣ , пра́здникꙋ . На хвали́тѣхъ , стⷯры вᲂскрⷭ҇ны , д҃ . и҆ ст҃о́мꙋ , на́ д҃ . гла́съ , є҃ . стихи́ же глаго́лемъ ,= сти́хъ : ᲂу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . =сти́хъ : сщ҃е́нницы твᲂѝ ѡ҆блекꙋ́тсѧ в̾ пра́вдꙋ , и҆ прпⷣбнїи твᲂѝ вᲂзра́дꙋютсѧ . Сла́ва , стихѣ́ра є҆ѵⷢ҇а́льскаѧ . И҆ ны́нѣ , преблгⷭ҇ве́на є҆сѝ бцⷣе дв҃ᲂ . Славᲂсло́вїе вели́кᲂе . трᲂпа́рь вᲂскрⷭ҇нъ , то́чїю . є҆ктенїѝ . и҆ ѿпꙋ́стъ . и҆ ча́съ , а҃ . на а҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , вᲂскрⷭ҇нъ . и҆ кᲂне́чныи ѿпꙋ́стъ . на г҃ мъ часѣ̀ : трᲂпа́рь , вᲂскрⷭ҇нъ . сла́ва , ст҃о́мꙋ . кᲂнда́къ , пра́здникꙋ . на ѕ҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , ст҃о́мꙋ . на ѳ҃ мъ часѣ̀ : трᲂпа́рь , вᲂскрⷭ҇нъ . сла́ва , ст҃о́мꙋ . кᲂнда́къ , вᲂскрⷭ҇нъ .

на литꙋргі́и , бл҃же́нна , гла́сꙋ , на́ ѕ҃ . и҆ ст҃о́мꙋ , пѣ́снь , г҃ ѧ , на д҃ .

Пᲂ вхо́дѣ : трᲂпа́рь , вᲂскрⷭ҇нъ , и҆ пра́здникꙋ , и҆ ст҃о́мꙋ . кᲂнда́къ , вᲂскрⷭ҇нъ . сла́ва , ст҃о́мꙋ . и҆ ны́нѣ , пра́здникꙋ .

недѣ́лѧ , пред̾ прᲂсвѣще́нїемъ .

прᲂки́менъ , ѱл҃о́мъ дв҃дᲂвъ . Спасѝ гдⷭ҇и лю́ди свᲂѧ̀ , и҆ бл҃гᲂслᲂвѝ дᲂстᲂѧ́нїе свᲂѐ . сти́хъ . къ тебѣ̀ гдⷭ҇и вᲂз̾зᲂвꙋ̀ , бж҃е мо́й непремᲂлчѝ ѿ менѐ . и҆ ст҃о́мꙋ : Оу҆ста̀ мᲂѧ̀ вᲂз̾глаго́лютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . а҆пⷭ҇лъ , недѣ́лѧ , пред̾ прᲂсвѣще́нїемъ , к̾ тимᲂѳе́ю . заⷱ҇ , сч҃и . дрꙋгі́и , а҆пⷭ҇лъ , къ кᲂласа́емъ . заⷱ҇ , сн҃д . а҆ллилꙋ́їѧ , нлⷣи , пред̾ прᲂсвѣще́нїемъ . Бж҃е ᲂу҆ще́дри ны̀ и҆ бл҃гᲂслᲂви́ ны , прᲂсвѣтѝ лицѐ твᲂѐ на ны̀ и҆ пᲂми́лꙋй ны̀ . и҆ ст҃о́мꙋ , сти́хъ . Пасы́и і҆и҃лѧ вᲂнмѝ , наставлѧ́ѧи ꙗ҆́кѡ ѻ҆вча̀ і҆ѡ́сифа . сти́хъ . ᲂу҆ста̀ пра́веднагѡ пᲂꙋча́тсѧ премꙋ́дрᲂсти , и҆ ꙗ҆зы́къ є҆гѡ̀ вᲂз̾глаго́летъ сꙋ́дъ . є҆ѵⷢ҇а́лїе , нлⷣи , пред̾ прᲂсвѣще́нїемъ , ѿ ма́рка . зача́лᲂ , а҃ . и҆ дрꙋго́е , є҆ѵⷢ҇а́лїе , ѿ =лꙋкѝ . заⷱ҇ , ѕ҃ . =прича́стенъ , хвали́те гдⷭ҇а с̾ нб҃съ . дрꙋгі́и , въ па́мѧть вѣ́чнꙋю бꙋ́детъ пра́ведникъ .

вѣ́дᲂмᲂ же бꙋ́ди сїѐ . ꙗ҆́кѡ литꙋргі́ѧ вели́кагѡ васи́лїѧ сᲂверша́етсѧ , на са́мыи де́нь па́мѧти є҆гѡ̀ сщ҃е́нныѧ . за дᲂсто́йнѡ на литꙋргі́и , ѡ҆ тебѣ̀ ра́дꙋетсѧ .