МЦⷭ҇А ГЕНꙊА́РІѦ ВЪ Ѕ҃ ДН҃Ь

=ст҃о́е бг҃ᲂѧвле́нїе гдⷭ҇а бг҃а и҆ сп҃са на́шегѡ і҆с҃а хрⷭ҇та̀ . =

А҆́ще слꙋчи́тсѧ наве́черїе в̾ про́стъ де́нь , стихᲂло́гїи небыва́етъ . =На гдⷭ҇и вᲂзва́хъ , стихѣ́ры , на́ и҃ . гла́съ , в҃ . Прᲂсвѣти́телѧ на́шегѡ , прᲂсвѣща́ющагᲂ всѧ́кагѡ чл҃ка , ви́дѣвъ прⷣтча крⷭ҇ти́тисѧ прише́дша , ра́дꙋетсѧ дш҃е́ю и҆ трепе́щетъ , рꙋко́ю пᲂказꙋ́етъ є҆гѡ̀ , и҆ глаго́летъ лю́демъ , се́й и҆́же и҆збавлѧ́ѧ і҆и҃лѧ , свᲂбᲂжда́ѧ на́съ ѿ и҆стлѣ́нїѧ . Ѽ без̾грѣ́шныи хрⷭ҇тѐ бж҃е на́шъ сла́ва тебѣ̀ . два́жды .=

И҆зба́вителю на́шемꙋ ѿ раба̀ кр҃ща́емꙋ , и҆ дх҃а прише́ствїемъ свидѣ́тельствꙋемꙋ , ᲂу҆жасо́шасѧ зрѧ́ще а҆́нг҃льскаѧ во́инства . гла́съ же с̾ нб҃сѐ принесе́сѧ ѿ ѻ҆ц҃а , се́й є҆го́же прⷣтча рꙋко́ю кр҃ща́етъ , сн҃ъ мо́й є҆́сть вᲂзлю́бленныи , ѡ҆ не́мже бл҃гᲂи҆зво́лихъ . хрⷭ҇тѐ бж҃е на́шъ сла́ва тебѣ̀ .= два́жды .=

І҆ѡрда́нскїѧ стрꙋѝ , тебѐ и҆сто́чника прїѧ́ша , и҆ ᲂу҆тѣ́шитель в̾ видѣ́нїи го́лꙋбѧ схᲂжда́ше . преклᲂнѧ́етъ ве́рхъ , преклᲂни́выи нб҃са̀ . зᲂве́тъ , и҆ вᲂпїе́тъ бре́нїе зижди́телю , что́ ми пᲂвелѣва́еши ꙗ҆́же вы́ше менѐ , а҆́зъ тре́бꙋю твᲂегѡ̀ кр҃ще́нїѧ . ѽ без̾грѣ́шныи хрⷭ҇тѐ бж҃е на́шъ сла́ва тебѣ̀ . два́жды .

Спастѝ хᲂтѧ̀ заблꙋ́ждьшагᲂ чл҃ка , спᲂдо́билсѧ є҆сѝ в̾ ра́бїи зра́къ ѡ҆блещи́сѧ . пᲂдᲂба́ше бᲂ тебѣ̀ влⷣцѣ и҆ бг҃ꙋ , вᲂспрїѧ́ти на́ша за ны̀ . и҆ тебѣ̀ кр҃щьшꙋсѧ пло́тїю и҆зба́вителю , ѡ҆ставле́нїю спᲂдо́билъ є҆сѝ на́съ . тѣ́мже вᲂпїе́мъ ти , хрⷭ҇тѐ бж҃е на́шъ сла́ва тебѣ̀ . два́жды .

сла́ва , и҆ ны́нѣ . гла́съ , то́иже . Преклᲂни́лъ є҆сѝ главꙋ̀ прⷣтчи , сᲂкрꙋши́лъ є҆сѝ главы̀ ѕмїе́мъ . прїи́де въ стрꙋѝ , прᲂсвѣти́лъ є҆сѝ всѧ́ческаѧ , є҆́же сла́вити тѧ сп҃се , прᲂсвѣти́телѧ дш҃а́мъ на́шимъ .

Вы́хᲂдъ , съ є҆ѵⷢ҇а́лїемъ .= Прᲂки́менъ , дню̀ . А҆́ще ли прилꙋчи́тсѧ наве́черїе пра́здника , в̾ пѧто́къ , ве́черъ . то̀ пᲂе́тсѧ , =прᲂки́менъ вели́кїи . гла́съ , з҃ . Бг҃ъ на́шъ на́ нб҃си и҆ на землѝ , всѧ̀ є҆ли́ка вᲂсхᲂтѣ̀ и҆ сᲂтвᲂрѝ . сти́хъ . Вᲂ и҆схо́дѣ і҆и҃левѣ ѿ є҆гѵ́пта , до́мꙋ і҆а́кѡвлѧ и҆з̾ люді́й ва́рваръ , бы́сть і҆ꙋде́ѧ ст҃ы́нѧ є҆гѡ̀ . сти́хъ . Мо́ре ви́дѣ и҆ пᲂбѣжѐ , і҆ѡрда́нъ вᲂзврати́сѧ вспѧ́ть . сти́хъ . Что́ ти бы́сть мо́ре да пᲂбѣжѐ , и҆ тебѣ̀ і҆ѡрда́нѣ , ꙗ҆́кѡ вᲂзврати́сѧ вспѧ́ть . та́же , Бг҃ъ на́шъ на́ нб҃си и҆ на землѝ , всѧ̀ є҆ли́ка вᲂсхᲂтѣ̀ и҆ сᲂтвᲂрѝ .

Ѿ= бытїѧ̀ , чте́нїе .=

И҆скᲂнѝ сᲂтвᲂрѝ бг҃ъ нб҃ᲂ и҆ зе́млю . землѧ́ же бѣ̀ неви́дима , и҆ не ᲂу҆кра́шена , и҆ тма̀ верхꙋ̀ бе́здны . и҆ дх҃ъ бж҃їи нᲂша́шесѧ верхꙋ̀ вᲂды̀ . и҆ речѐ бг҃ъ , да бꙋ́детъ свѣ́тъ , и҆ бы́сть свѣ́тъ . и҆ ви́дѣ бг҃ъ свѣ́тъ ꙗ҆́кѡ дᲂбро̀ , и҆ разлꙋчѝ бг҃ъ междꙋ̀ свѣ́тᲂмъ и҆ междꙋ̀ тмо́ю . и҆ наречѐ бг҃ъ свѣ́тъ де́нь , а҆ тмꙋ̀ наречѐ но́щь . и҆ бы́сть ве́черъ , и҆ бы́сть ᲂу҆́трᲂ , де́нь є҆ди́нъ . и҆ речѐ бг҃ъ , да бꙋ́детъ тве́рдь пᲂсредѝ вᲂды̀ . и҆ да бꙋ́детъ разлꙋча́ѧ междꙋ̀ вᲂдо́ю и҆ вᲂдо́ю , и҆ бы́сть та́кѡ . и҆ сᲂтвᲂрѝ бг҃ъ тве́рдь . и҆ разлꙋчѝ бг҃ъ междꙋ̀ вᲂдо́ю , ꙗ҆́же бѣ̀ пᲂд̾ тве́рдїю , и҆ междꙋ̀ вᲂдо́ю , ꙗ҆́же над̾ тве́рдїю . и҆ наречѐ бг҃ъ тве́рдь нб҃ᲂ . и҆ ви́дѣ бг҃ъ ꙗ҆́кѡ дᲂбро̀ . и҆ бы́сть ве́черъ , и҆ бы́сть ᲂу҆́трᲂ де́нь втᲂры́и . И҆ речѐ бг҃ъ да сᲂбере́тсѧ вᲂда̀ ꙗ҆́же пᲂд̾ нб҃се́мъ в̾ со́нмъ є҆ди́нъ , и҆ да́сѧ ꙗ҆ви́тъ сꙋ́ша , и҆ бы́сть та́кѡ . и҆ сᲂбра́сѧ вᲂда̀ ꙗ҆́же пᲂд̾ нб҃се́мъ в̾ со́нмы свᲂѧ̀ , и҆ ꙗ҆ви́сѧ сꙋ́ша . и҆ наречѐ бг҃ъ сꙋ́шꙋ зе́млю , а҆ сᲂста́вы вᲂдны́ѧ наречѐ мо́ре . и҆ ви́дѣ бг҃ъ ꙗ҆́кѡ дᲂбро̀ . И҆ речѐ бг҃ъ , да прᲂзѧ́бнетъ землѧ̀ травꙋ̀ сѣ́ннꙋ , сѣ́ющꙋю сѣ́мѧ по́ рᲂдꙋ и҆ пᲂ пᲂдо́бїю . и҆ дре́вᲂ плᲂдᲂви́тᲂе твᲂрѧ́щее пло́дъ , є҆мꙋ́же сѣ́мѧ є҆гѡ̀ в̾ не́мъ пᲂ пᲂдо́бїю на землѝ , и҆ бы́сть та́кѡ . и҆ и҆знесѐ землѧ̀ травꙋ̀ сѣ́ннꙋ , сѣ́ющꙋю сѣ́мѧ по́ рᲂдꙋ и҆ пᲂ пᲂдо́бїю , и҆ дре́вᲂ плᲂдᲂви́тᲂе , твᲂрѧ́щее пло́дъ , є҆мꙋ́же сѣ́мѧ є҆гѡ̀ в̾ не́мъ по́ рᲂдꙋ на землѝ , и҆ ви́дѣ бг҃ъ ꙗ҆́кѡ дᲂбро̀ . и҆ бы́сть ве́черъ , и҆ бы́сть ᲂу҆́трᲂ де́нь тре́тїи .

Ѿ= и҆схо́да , чте́нїе .=

Речѐ гдⷭ҇ь къ мѡѷсе́ю , что̀ вᲂпїе́ши кᲂ мнѣ̀ . гл҃и сн҃о́мъ і҆и҃левымъ . и҆ да сᲂберꙋ́тсѧ . и҆ ты̀ вᲂзмѝ же́злъ сво́й , и҆ прᲂстрѝ рꙋ́кꙋ твᲂю̀ на́ мᲂре , и҆ раздѣлѝ є҆̀ . и҆ да вни́дꙋтъ сн҃ᲂве і҆и҃левы средѣ̀ мо́рѧ по́ сꙋхꙋ . и҆ сѐ а҆́зъ ѡ҆жещꙋ̀ срⷣце фараѡ́нᲂвᲂ и҆ слꙋ́гъ є҆гѡ̀ , и҆ є҆гѵ́птѧнъ всѣ́хъ , и҆ вни́дꙋтъ в̾слѣ́дъ и҆́хъ . и҆ прᲂсла́влюсѧ ѡ҆ фараѡ́нѣ , и҆ ѡ҆ всѣ́хъ во́ехъ є҆гѡ̀ , и҆ ѡ҆ кᲂлесни́цахъ и҆ ѡ҆ ко́нехъ є҆гѡ̀ . и҆ разꙋмѣ́ютъ всѝ є҆гѵ́птѧне , ꙗ҆́кѡ а҆́зъ є҆́смь гдⷭ҇ь . прᲂславлѧ́ющꙋмисѧ ѡ҆ фараѡ́нѣ , и҆ ѡ҆ кᲂлесни́цахъ и҆ ѡ҆ ко́нехъ є҆гѡ̀ . прᲂстре́ же мѡѷсе́й рꙋ́кꙋ на́ мᲂре , и҆ пᲂгна̀ гдⷭ҇ь мо́ре вѣ́трᲂмъ ю҆́жнымъ и҆ нꙋ́жнымъ , всю̀ но́щь . и҆ сᲂтвᲂрѝ мо́ре сꙋ́шꙋ , и҆ раздѣли́сѧ вᲂда̀ . и҆ внидо́ша сн҃ᲂве і҆и҃левы пᲂсредѣ̀ мо́рѧ по́ сꙋхꙋ , и҆ вᲂда̀ и҆́мъ стѣна̀ ѡ҆деснꙋ́ю , и҆ стѣна̀ ѡ҆шꙋ́юю . гна́ша же є҆гѵ́птѧне , и҆ внидо́ша в̾слѣ́дъ и҆́хъ всѧ́къ ко́нь фараѡ́нᲂвъ , и҆ кᲂлесни́цы и҆ вса́дники , пᲂсредѣ̀ мо́рѧ . прᲂстре́ же мѡѷсе́й рꙋ́кꙋ на́ мᲂре , и҆ ᲂу҆стро́исѧ вᲂда̀ кᲂ днꙋ̀ на мѣ́стᲂ . є҆гѵ́птѧне же бѣжа́ша пᲂд̾ вᲂдо́ю , и҆ и҆стрѧсѐ гдⷭ҇ь є҆гѵ́птѧны пᲂсредѣ̀ мо́рѧ . и҆ ѡ҆бра́щшисѧ вᲂда̀ , пᲂкры̀ кᲂлесни́цы и҆ вса́дники , и҆ всю̀ си́лꙋ фараѡ́нᲂвꙋ , и҆дꙋ́щꙋю в̾ слѣ́дъ и҆́хъ в̾ мо́ре . и҆ не ѡ҆ста̀ ѿ ни́хъ ни є҆ди́нъ . сн҃ᲂве же і҆и҃левы прᲂидо́ша по́ сꙋхꙋ пᲂсредѣ̀ мо́рѧ .

Ѿ= и҆схо́да , чте́нїе .=

Пᲂѧ́тъ мѡѷсе́й сн҃ы і҆и҃левы ѿ́ мᲂрѧ чермна́гѡ , и҆ ведѐ и҆́хъ в̾ пꙋсты́ню си́ръ . и҆ и҆дѧ́хꙋ трѝ днѝ в̾ пꙋсты́ни , и҆ не ѡ҆брѣта́хꙋ вᲂды̀ ꙗ҆́кѡ да пїю́тъ . прїидо́ша же въ ме́ррꙋ , и҆ не мᲂжа́хꙋ пи́ти вᲂды̀ ѿ ме́рры , гᲂрька́ бᲂ бѣ̀ . сегѡ̀ ра́ди нарече́сѧ и҆́мѧ мѣ́стꙋ тᲂмꙋ̀ го́ресть . и҆ рᲂпта́хꙋ лю́дїе на мѡѷсе́ѧ , гл҃юще , что̀ пїе́мъ ; вᲂзᲂпи́ же мѡѷсе́й ко́ гдⷭ҇ꙋ , и҆ пᲂказа̀ є҆мꙋ̀ гдⷭ҇ь дре́вᲂ . и҆ влᲂжи́ є҆̀ в̾ во́дꙋ , и҆ ᲂу҆слади́сѧ вᲂда̀ . тꙋ́ бᲂ пᲂлᲂжѝ є҆мꙋ̀ бг҃ъ ѡ҆правда́нїѧ и҆ сꙋды̀ . и҆ тꙋ̀ є҆гѡ̀ и҆скꙋша́ше , и҆ речѐ , а҆́ще слꙋ́хᲂмъ ᲂу҆слы́шиши гла́съ гдⷭ҇а бг҃а твᲂегѡ̀ , и҆ ᲂу҆го́днаѧ пред̾ ни́мъ сᲂтвᲂри́ши , и҆ внꙋши́ши за́пᲂвѣдемъ є҆гѡ̀ , и҆ сᲂхрани́ши всѧ̀ ѡ҆правда́нїѧ є҆гѡ̀ , всѧ́кꙋ бᲂлѣ́знь , ю҆́же наведо́хъ є҆гѵ́птѧнѡмъ , не наведꙋ̀ на тѧ̀ . а҆́зъ бᲂ є҆́смь гдⷭ҇ь и҆сцѣлѧ́ѧи тѧ̀ . и҆ прїидо́ша в̾ є҆ли́мъ , и҆ бѧ́хꙋ тꙋ̀ два̀ на́десѧть и҆сто́чникъ во́дъ , и҆ се́дмьдесѧтъ сте́бль фи́никᲂвъ . и҆ ѡ҆пᲂлчи́шасѧ тꙋ̀ привᲂда́хъ . взѧ́шажесѧ ѿ є҆ли́ма , и҆ прїи́де ве́сь со́нмъ сн҃ѡ́въ і҆и҃левъ в̾ пꙋсты́ню си́нъ , ꙗ҆́же є҆́сть междꙋ̀ є҆ли́мᲂмъ , и҆ междꙋ̀ си́нᲂю .

та́же , гл҃етъ чте́цъ : гла́съ , є҃ . Ꙗ҆ви́лсѧ є҆сѝ в̾ ми́рѣ , и҆́же ми́ръ сᲂтвᲂре́и . Да прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

и҆ пᲂе́мъ : Да прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

сти́хъ , а҃ . Бж҃е ᲂу҆ще́дри ны , и҆ бл҃гᲂслᲂви́ ны . прᲂсвѣтѝ лицѐ твᲂѐ на ны̀ , и҆ пᲂми́лꙋй ны . разꙋмѣ́ти на землѝ пꙋ́ть тво́й , вᲂ всѣ́хъ ꙗ҆зы́цѣхъ спасе́нїе твᲂѐ .= и҆ пᲂе́мъ : Д=а прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

сти́хъ , в҃ . Да и҆спᲂвѣ́дѧтсѧ тебѣ̀ лю́дїе бж҃е , да и҆спᲂвѣ́дѧтсѧ тебѣ̀ лю́дїе всѝ . да вᲂзвеселѧ́тсѧ и҆ вᲂзра́дꙋютсѧ ꙗ҆зы́цы . ꙗ҆́кѡ сꙋ́диши лю́демъ в̾ пра́вдꙋ , и҆ ꙗ҆зы́ки на землѝ наста́виши .

и҆ пᲂе́мъ : Да прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

сти́хъ , г҃ . Да и҆спᲂвѣ́дѧтсѧ тебѣ̀ лю́дїе бж҃е , да и҆спᲂвѣ́дѧтсѧ тебѣ̀ лю́дїе всѝ , землѧ̀ да́стъ пло́дъ сво́й . бл҃гᲂслᲂви́ ны бж҃е , бж҃е на́шъ бл҃гᲂслᲂви́ ны бж҃е , и҆ да ᲂу҆бᲂѧ́тсѧ є҆гѡ̀ всѝ кᲂнцы̀ землѝ .= и҆ пᲂе́мъ : Д=а прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

сла́ва . и҆ пᲂе́мъ : Да прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

и҆ ны́нѣ . и҆ пᲂе́мъ : Да прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

пᲂсе́мъ , гл҃етъ чте́цъ : Ꙗ҆ви́лсѧ є҆сѝ в̾ ми́рѣ , и҆́же ми́ръ сᲂтвᲂре́и . и҆ пᲂе́тъ са́мъ : Да прᲂсвѣти́ши и҆́же вᲂ тмѣ̀ сѣдѧ́щїѧ , чл҃кᲂлю́бче сла́ва тебѣ̀ .

Ѿ= і҆сꙋ́са на́ввина , чте́нїе .=

Речѐ гдⷭ҇ь кᲂ і҆сꙋ́сꙋ , въ де́нь се́й начина́ю вᲂзнести́тѧ , пред̾ всѣ́ми сынмѝ і҆и҃левыми . да разꙋмѣ́ютъ , занѐ ꙗ҆́кᲂже бѣ́хъ съ мѡѷсе́ѡмъ , та́кѡ бꙋ́дꙋ и҆ с̾ тᲂбо́ю . и҆ ны́нѣ запᲂвѣ́ждь сщ҃е́нникѡмъ взима́ющимъ кᲂвче́гъ завѣ́та гдⷭ҇нѧ , да ꙗ҆́кѡ вни́дете в̾ ча́сть вᲂды̀ і҆ѡрда́нскїѧ , и҆ ста́нете при і҆ѡрда́нѣ . ꙗ҆́кᲂже и҆дѧ́хꙋ сщ҃е́нницы взе́мшїи кᲂвче́гъ завѣ́та вᲂ і҆ѡрда́нъ , и҆ но́ги сщ҃е́нникъ нᲂсѧ́щихъ кᲂвче́гъ ѡ҆мᲂчи́шасѧ , в̾ ча́сть вᲂды̀ і҆ѡрда́нскїѧ . і҆ѡрда́нъ же и҆спᲂлнѧ́шесѧ вᲂ все́мъ ло́жѣ свᲂе́мъ , ꙗ҆́кᲂже во́ дни жа́твы пшени́цы . и҆ ста́ша во́ды схᲂдѧ́щїи свы́ше в̾ со́ньмъ є҆ди́нъ , ѿстᲂѧ́щь дале́че ѕѣлѡ̀ ѿ да́мма гра́да , да́же дᲂ страны̀ карїаѳїари́ма . низ̾схᲂдѧ́щаѧ же сни́де на́ мᲂре а҆рави́тскᲂе , да́же до́ мᲂрѧ сᲂли́щнагѡ , до́ндеже в̾ кᲂне́цъ ѡ҆скꙋдѣ̀ , и҆ лю́дїе стᲂѧ́хꙋ прѧ́мѡ і҆єрихѡ́на . и҆ ста́ша сщ҃е́нницы взе́мшїи кᲂвче́гъ завѣ́та гдⷭ҇нѧ , на́ сꙋсѣ пᲂсредѣ̀ і҆ѡрда́на гᲂто́вы . и҆ всѝ сн҃ᲂве і҆и҃левы преидо́ша по́ сꙋхꙋ , до́ндеже скᲂнча́шасѧ всѝ лю́дїе прехᲂдѧ́ще і҆ѡрда́нъ .

Ѿ= црⷭ҇твъ четве́ртыхъ , чте́нїе .=

Речѐ и҆лїѧ̀ къ є҆лисе́ю , сѣдѝ ᲂу҆́бѡ здѣ̀ , ꙗ҆́кѡ гдⷭ҇ь пᲂсла́ мѧ дᲂ і҆ѡрда́на . и҆ речѐ є҆лисе́й , жи́въ гдⷭ҇ь , и҆ жива̀ дш҃а твᲂѧ̀ , а҆́ще ѡ҆ста́влю тебѐ . и҆ пᲂидо́ста ѻ҆́ба , и҆ пѧтьдесѧ́тъ мꙋ́жъ ѿ сн҃о́въ прᲂро́ческихъ , прїидо́ша и҆ ста́ша прѧ́мѡ и҆з̾дале́че . ѻ҆́ба же ста́ста при і҆ѡрда́нѣ . и҆ прїѧ́тъ и҆лїѧ̀ ми́лᲂть свᲂю̀ , и҆ сви́тъ ю҆̀ , и҆ пᲂразѝ є҆ю̀ во́ды . и҆ раз̾дѣли́сѧ вᲂда̀ сю́дꙋ и҆ сю́дꙋ , и҆ преидо́ста ѻ҆́ба по́ сꙋхꙋ . и҆ бы́сть є҆гда̀ преидо́ста , и҆ речѐ и҆лїѧ̀ є҆лисе́ю , прᲂсѝ что̀ сᲂтвᲂрю̀ тебѣ̀ , пре́жде да́же не взѧ́тъ бꙋ́дꙋ ѿ тебѐ . и҆ речѐ є҆лисе́й , да бꙋ́детъ ᲂу҆́бѡ дх҃ъ и҆́же в̾ тебѣ̀ , сꙋгꙋ́бь вᲂ мнѣ̀ . и҆ речѐ и҆лїѧ̀ , ѡ҆жести́лъ є҆сѝ прᲂси́ти , ѻ҆ба́че а҆́ще ви́диши мѧ взе́млема ѿ тебѐ , бꙋ́детъ ти та́кѡ . а҆́ще ли же не ви́диши , не бꙋ́детъ . и҆ бы́сть и҆дꙋ́щема и҆́ма и҆ гл҃ющема , и҆ сѐ кᲂлесни́ца ѻ҆́гнена , и҆ ко́ни ѻ҆́гнени , и҆ раздѣлѝ междꙋ̀ ѻ҆бѣ́ма . и҆ взѧ́тсѧ и҆лїѧ̀ трꙋ́сᲂмъ , ꙗ҆́кѡ на́ нб҃ᲂ . и҆ є҆лисе́й зрѧ́ше , и҆ вᲂпїѧ́ше , ѻ҆́ч҃е ѻ҆́ч҃е , кᲂлесни́ца і҆и҃лева и҆ ко́ни є҆гѡ̀ , и҆ не ви́дѣ є҆гѡ̀ к̾ тᲂмꙋ̀ . и҆ ꙗ҆́тсѧ є҆лисе́й за ри́зы свᲂѧ̀ , и҆ раздра̀ ѧ҆̀ на́ двᲂе . и҆ взѧ́тъ ми́лᲂть и҆лїинꙋ̀ є҆лисе́й , па́дшꙋю верхꙋ̀ є҆гѡ̀ . и҆ ѡ҆брати́сѧ є҆лисе́й , и҆ ста̀ на́ брезѣ і҆ѡрда́на . и҆ ᲂу҆да́ри во́ды , и҆ не раздѣли́шасѧ . и҆ речѐ є҆лисе́й , гдѣ̀ ᲂу҆́бѡ є҆́сть бг҃ъ и҆лїи́нъ а҆́пѳᲂ . и҆ та́кѡ ᲂу҆да́ри є҆лисе́й во́ды втᲂро́е , и҆ раздѣли́шасѧ во́ды , и҆ пре́йде по́ сꙋхꙋ .

Ѿ= црⷭ҇твъ четве́ртыхъ , чте́нїе .=

Прїи́де неема́нъ кнѧ́зь , царѧ̀ а҆сѷрі́йска , с̾ кᲂлесни́цами , и҆ ко́ньми свᲂи́ми , и҆ ста̀ при две́рехъ хра́ма є҆лисе́ѡва . и҆ пᲂсла̀ є҆лисе́й к̾ немꙋ̀ вѣ́стника глаго́лѧ , ше́дъ и҆змы́йсѧ вᲂ і҆ѡрда́нѣ седми́жды , и҆ ѡ҆брати́тсѧ пло́ть твᲂѧ̀ к̾ тебѣ̀ , и҆ ѡ҆чи́стишисѧ . и҆ раз̾гнѣ́васѧ неема́нъ , и҆ ѿи҆́де . и҆ речѐ , сѐ рѣ́хъ да и҆зы́детъ кᲂ мнѣ̀ , и҆ призᲂве́тъ ѡ҆ и҆́мени гдⷭ҇а бг҃а свᲂегѡ̀ . и҆ пᲂло́житъ рꙋ́кꙋ свᲂю̀ на прᲂка́зꙋ , и҆ ѿи́метъ ю҆̀ ѿ́ плᲂти мᲂеѧ̀ . не до́брѣйши ли є҆́сть а҆рва́нъ и҆ фа́рѳа , рѣцѣ̀ дама́скᲂвѣ , не́же і҆ѡрда́на , и҆ всѣ́хъ во́дъ і҆и҃левыхъ . не ше́дъ ли и҆змы́юсѧ в̾ ни́хъ , и҆ ѡ҆чи́щꙋсѧ . и҆ вᲂзврати́сѧ , и҆ ѿи́де с̾ гнѣ́вᲂмъ . и҆ пристꙋпи́ша ѻ҆́трᲂцы є҆гѡ̀ , и҆ рѣ́ша к̾ немꙋ̀ , гдⷭ҇и а҆́ще бы ве́лїе сло́вᲂ гл҃алъ к̾ тебѣ̀ прᲂро́къ , не бы́ли сᲂтвᲂри́лъ ꙗ҆́кᲂже речѐ к̾ тебѣ̀ , и҆змы́йсѧ и҆ ѡ҆чи́стишисѧ . и҆ сни́де неема́нъ , и҆ пᲂгрꙋзи́сѧ вᲂ і҆ѡрда́нѣ седми́жды , пᲂ глаго́лꙋ чл҃ка бж҃їѧ . и҆ ѡ҆брати́сѧ пло́ть є҆гѡ̀ к̾ немꙋ̀ ꙗ҆́кѡ ѻ҆трᲂча́те ма́ла , и҆ ѡ҆чи́стисѧ .

та́же , гл҃етъ чте́цъ : гла́съ , ѕ҃ . Грѣ́шникѡмъ и҆ мытаре́мъ , за мно́жествᲂ ми́лᲂсти твᲂеѧ̀ ꙗ҆ви́лсѧ є҆сѝ , сп҃се на́шъ . Гдѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ . и҆ пᲂе́мъ : Гдѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

сти́хъ , а҃ . Гдⷭ҇ь вᲂцр҃и́сѧ , и҆ в̾ лѣ́пᲂтꙋсѧ ѡ҆блечѐ . ѡ҆блече́сѧ гдⷭ҇ь в̾ си́лꙋ , и҆ препᲂѧ́сасѧ . и҆́бᲂ ᲂу҆твердѝ вселе́ннꙋю , ꙗ҆́же непᲂдви́житсѧ . гᲂто́въ престо́лъ тво́й ѿ то́лѣ , ѿ́ вѣка ты̀ є҆сѝ .= и҆ пᲂе́мъ : Г=дѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

сти́хъ , в҃ . Вᲂз̾двиго́ша рѣ́ки гдⷭ҇и , вᲂз̾двиго́ша рѣ́ки гла́съ сво́й . вᲂз̾дви́гнꙋтъ рѣ́ки стрꙋѝ свᲂѧ̀ ѿ гласо́въ во́дъ мно́гъ .= и҆ пᲂе́мъ : Г=дѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

сти́хъ , г҃ . Ди́вны высᲂты̀ мᲂрскі́ѧ , ди́венъ в̾ высо́кихъ гдⷭ҇ь . свидѣ́нїѧ твᲂѧ̀ ᲂу҆вѣ́ришасѧ ѕѣлѡ̀ . до́мꙋ твᲂемꙋ̀ пᲂдᲂба́етъ ст҃ы́ни гдⷭ҇и , в̾ дᲂлгᲂтꙋ̀ дні́й .= и҆ пᲂе́мъ : Г=дѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

сла́ва . и҆ пᲂе́мъ : Гдѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

и҆ ны́нѣ . и҆ пᲂе́мъ : Гдѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

пᲂсе́мъ , глаго́летъ чте́цъ : Грѣ́шникѡмъ и҆ мытаре́мъ , за мно́жествᲂ ми́лᲂсти твᲂеѧ̀ ꙗ҆ви́лсѧ є҆сѝ , сп҃се на́шъ . и҆ пᲂе́тъ са́мъ : Гдѣ́ бᲂ бы и҆мѣ́лъ свѣ́тъ тво́й вᲂсїѧ́ти , то́кмѡ на сѣдѧ́щїѧ вᲂ тмѣ̀ , сла́ва тебѣ̀ .

Ѿ= прᲂро́чества и҆са́ина , чте́нїе .=

Та́кѡ гл҃етъ гдⷭ҇ь , и҆змы́йтесѧ , и҆ чи́сти бꙋ́дете . и҆ ѿи҆ми́те лꙋка́вствїе ѿ дш҃ъ ва́шихъ , пред̾ ѻ҆чи́ма мᲂи́ма . преста́ните ѿ ѕо́лъ ва́шихъ . и҆ наꙋчи́тесѧ дᲂбро̀ твᲂри́ти . взыщи́те сꙋда̀ , и҆зба́вите ѡ҆би́дима . сꙋди́те си́рꙋ , и҆ и҆зба́вите вдᲂви́цꙋ . и҆ прїиди́те и҆ и҆стѧ́жемсѧ , гл҃етъ гдⷭ҇ь . и҆ а҆́ще бꙋ́дꙋтъ грѣсѝ ва́ши ꙗ҆́кѡ ѡ҆брᲂще́ни , ꙗ҆́кѡ снѣ́гъ ᲂу҆бѣлю̀ ѧ҆̀ . а҆́ще ли же бꙋ́дꙋтъ ꙗ҆́кѡ ѡ҆червле́ни , ꙗ҆́кѡ ꙗ҆ри́нꙋ ᲂу҆бѣлю̀ ѧ҆̀ . и҆ а҆́ще хо́щете и҆ пᲂслꙋ́шаете менѐ , бл҃га́ѧ землѝ снѣ́сте . а҆́ще ли же не хо́щете , нижѐ пᲂслꙋ́шаете менѐ , ѻ҆рꙋ́жїе вы̀ пᲂѧ́стъ , ᲂу҆ста́ бᲂ гдⷭ҇нѧ гл҃аша сїѧ̀ .

Ѿ= бытїѧ̀ , чте́нїе .=

Вᲂзрѣ́въ і҆а́кѡвъ , и҆ ви́дѣ по́лкъ бж҃їи , ѡ҆пᲂлчи́вшїисѧ , и҆ срѣто́ша є҆гѡ̀ а҆́нг҃ли бж҃їи . рече́ же і҆а́кѡвъ є҆гда̀ ви́дѣ и҆́хъ , по́лкъ бж҃їи се́й , и҆ наречѐ и҆́мѧ мѣ́стꙋ тᲂмꙋ̀ пᲂлцы̀ . пᲂсла́ же і҆а́кѡвъ вѣ́стники пред̾ сᲂбо́ю , кᲂ и҆са́вꙋ бра́тꙋ свᲂемꙋ̀ в̾ зе́млю си́ръ , вᲂ странꙋ̀ є҆до́мскꙋю . и҆ запᲂвѣ́да и҆́мъ гл҃ѧ , си́це рцы́те гдⷭ҇нꙋ мᲂемꙋ̀ и҆са́вꙋ , та́кѡ гл҃етъ ѻ҆́трᲂкъ тво́й і҆а́кѡвъ , с̾ лава́нᲂмъ пᲂжи́хъ , и҆ ᲂу҆кᲂснѣ́хъ дᲂ ны́нѣ . и҆ бы́ша ми вᲂло́ве и҆ ѻ҆слѧ́та и҆ ѻ҆́вцы , и҆ рабы̀ и҆ рабы́ни . и҆ пᲂсла́хъ вᲂзвѣсти́ти гдⷭ҇ви мᲂемꙋ̀ и҆са́вᲂви , да ѡ҆брѧ́щетъ бл҃гᲂда́ть ѻ҆́трᲂкъ тво́й пред̾ тᲂбо́ю . и҆ вᲂзврати́шасѧ вѣ́стницы кᲂ і҆а́кѡвꙋ , гл҃юще , и҆до́хᲂмъ кᲂ и҆са́вꙋ бра́тꙋ твᲂемꙋ̀ , и҆ грѧде́тъ в̾ срѣ́тенїе твᲂѐ . и҆ четы́ре ста̀ мꙋже́й с̾ ни́мъ . ᲂу҆бᲂѧ́жесѧ і҆а́кѡвъ ѕѣлѡ̀ , и҆ недᲂꙋмѣва́шесѧ . и҆ раздѣлѝ лю́ди и҆́же с̾ ни́мъ , и҆ вᲂлы̀ и҆ ѻ҆́вцы , на́ два пᲂлка̀ . и҆ речѐ і҆а́кѡвъ , а҆́ще прїи́детъ и҆са́въ на́ пᲂлкъ є҆ди́нъ , и҆ пᲂсѣче́тъ и҆̀ , и҆ бꙋ́детъ по́лкъ втᲂры́и вᲂ спасе́нїе . рече́ же і҆а́кѡвъ , бг҃ъ ѻ҆ц҃а мᲂегѡ̀ а҆враа́ма , и҆ бг҃ъ ѻ҆ц҃а мᲂегѡ̀ и҆саа́ка . гдⷭ҇и рекі́и ми вᲂзврати́сѧ въ зе́млю бытїѧ̀ твᲂегѡ̀ , и҆ дᲂбро́ ти сᲂтвᲂрю̀ . дᲂво́льнѡ ми бꙋ́ди ѿ всѧ́кїѧ пра́вды , и҆ ѿ всѧ́кїѧ и҆́стины , є҆ѧ́же сᲂтвᲂри́лъ є҆сѝ ѻ҆́трᲂкꙋ твᲂемꙋ̀ , с̾ жезло́мъ бᲂ си́мъ преидо́хъ і҆ѡрда́нъ .

Ѿ= и҆схо́да , чте́нїе .=

Сни́де дщѝ фараѡ́нᲂва и҆змы́тисѧ на рѣкꙋ̀ , и҆ рабы́ни є҆ѧ̀ хᲂжда́хꙋ при рѣцѣ̀ . и҆ ви́дѣвши кᲂвче́жецъ в̾ рѣцѣ̀ , и҆ пᲂсла́вши рабы́ню и҆ ᲂу҆держа̀ и҆̀ . ѿве́рзши же , ви́дѣ ѻ҆трᲂча̀ пла́чꙋщесѧ в̾ кᲂвче́жцѣ , и҆ пᲂщадѝ є҆̀ дщѝ фараѡ́нᲂва , речѐ , ѿ дѣте́й є҆вре́йскихъ сѐ є҆́сть . и҆ речѐ сестра̀ є҆гѡ̀ дще́ри фараѡ́нᲂвѣ , хо́щеши ли да призᲂвꙋ́ ти женꙋ̀ дᲂи́лицꙋ ѿ є҆вре́й , и҆ вᲂздᲂи́тъ ти ѻ҆трᲂча̀ . и҆ речѐ є҆́й дщѝ фараѡ́нᲂва , и҆дѝ . ше́дши же ѻ҆трᲂкᲂви́ца , призва̀ мт҃рь ѻ҆трᲂча́те . рече́ же к̾ не́й дщѝ фараѡ́нᲂва , сᲂблюди́ ми ѻ҆трᲂча̀ сїѐ , и҆ вᲂздо́й ми є҆̀ , а҆́зъ же да́мъ ти мздꙋ̀ . взѧ́тъ же жена̀ ѻ҆трᲂча̀ , и҆ вᲂздᲂѝ є҆гѡ̀ . ᲂу҆страби́вшꙋжесѧ ѻ҆трᲂча́ти , введѐ є҆гѡ̀ к̾ дще́ри фараѡ́нᲂвѣ , и҆ бы́сть є҆́й в̾ сн҃а мѣ́стѡ . и҆менᲂва́ же и҆́мѧ є҆мꙋ̀ мѡѷсе́й , гл҃ющи , ѿ вᲂды̀ взѧ́хъ є҆гѡ̀ .

Ѿ= сꙋді́й , чте́нїе .=

Речѐ гедеѡ́нъ к̾ бг҃ꙋ , а҆́ще спаса́еши рꙋко́ю мᲂе́ю і҆и҃лѧ , и҆́мже ѻ҆́бразᲂмъ речѐ , сѐ а҆́зъ пᲂлᲂжꙋ̀ рꙋно̀ ѻ҆́вчее на гꙋмнѣ̀ . и҆ а҆́ще бꙋ́детъ рᲂса̀ на гꙋмнѣ̀ то́кмѡ , а҆ пᲂ все́й землѝ сꙋ́ша , разꙋмѣ́ю ꙗ҆́кѡ спасе́ши рꙋко́ю мᲂе́ю і҆и҃лѧ . и҆́мже ѻ҆́бразᲂмъ речѐ , и҆ бы́сть та́кѡ . и҆ ᲂу҆ра́нивъ гедеѡ́нъ наꙋ́трїе , и҆ и҆сцѣдѝ рꙋно̀ , и҆ и҆стечѐ рᲂса̀ ѿ рꙋна̀ , и҆спо́лнь ѻ҆кри́нъ вᲂды̀ . и҆ речѐ гедеѡ́нъ къ бг҃ꙋ , да не прᲂгнѣ́ваетсѧ ᲂу҆́бѡ ꙗ҆́рᲂсть твᲂѧ̀ на мнѣ̀ , и҆ вᲂз̾глаго́лю є҆щѐ є҆ди́нᲂю , и҆ и҆скꙋшꙋ̀ є҆щѐ рꙋно̀ . да бꙋ́детъ ᲂу҆́бѡ сꙋ́ша на рꙋнѣ̀ то́кмѡ , а҆ пᲂ все́й землѝ рᲂса̀ . и҆ сᲂтвᲂрѝ бг҃ъ та́кѡ , в̾ нᲂщѝ то́й . и҆ бы́сть сꙋ́ша на рꙋнѣ̀ то́кмѡ , пᲂ все́й же землѝ бы́сть рᲂса̀ .

Ѿ= црⷭ҇твъ тре́тїихъ , чте́нїе .=

Речѐ и҆лїѧ̀ к̾ лю́демъ , пристꙋпи́те кᲂ мнѣ̀ , и҆ пристꙋпи́ша к̾ немꙋ̀ всѝ лю́дїе . и҆ прїѧ́тъ и҆лїѧ̀ двана́десѧть ка́менїи , пᲂ числꙋ̀ кᲂлѣ́нъ сн҃о́въ і҆и҃левъ , ꙗ҆́кᲂже глаго́ла є҆мꙋ̀ гдⷭ҇ь , і҆зра́иль бꙋ́детъ и҆́мѧ твᲂѐ . и҆ сᲂзда̀ ка́менїе во́ и҆мѧ гдⷭ҇не , и҆ и҆сцѣлѝ ѻ҆лта́рь раско́панный . и҆ сᲂтвᲂрѝ мо́ре вмѣща́юще двѣ̀ мѣ́ры сѣ́мене ѻ҆́крестъ ѻ҆лтарѧ̀ . и҆ вᲂскладѐ пᲂлѣ́на на ѻ҆лта́рь , и҆́же сᲂтвᲂрѝ . и҆ растеса̀ на ᲂу҆́ды всесᲂжега́емᲂе , и҆ вᲂзлᲂжѝ на пᲂлѣ́на , и҆ ѡ҆бы́де ѻ҆лта́рь . и҆ речѐ и҆лїѧ̀ , принеси́те ми четы́ре вᲂдᲂнѡ́сы вᲂды̀ , и҆ вᲂзлива́йте на всесᲂжже́нїе и҆ на пᲂлѣ́на , и҆ сᲂтвᲂри́ша та́кѡ . и҆ речѐ , ᲂу҆дво́йте , и҆ ᲂу҆дво́иша . и҆ речѐ , ᲂу҆тро́йте , и҆ ᲂу҆тро́иша . и҆ прᲂхᲂжда́ше вᲂда̀ ѻ҆́крестъ ѻ҆лтарѧ̀ , и҆ мо́ре и҆спо́лнисѧ вᲂды̀ . и҆ вᲂзᲂпѝ и҆лїѧ̀ на́ нб҃ᲂ и҆ речѐ , гдⷭ҇и бж҃е а҆враа́мᲂвъ и҆ и҆саа́кѡвъ и҆ і҆а́кѡвль , пᲂслꙋ́шай менѐ гдⷭ҇и , пᲂслꙋ́шай менѐ дне́сь ѻ҆гне́мъ , да разꙋмѣ́ютъ всѝ лю́дїе сі́и , ꙗ҆́кѡ ты̀ є҆сѝ є҆ди́нъ гдⷭ҇ь бг҃ъ і҆и҃левъ , и҆ а҆́зъ ра́бъ тво́й , и҆ тебѐ ра́ди сᲂтвᲂри́хъ дѣ́ла сїѧ̀ всѧ̀ . и҆ ты̀ ѡ҆братѝ срⷣца̀ люде́й си́хъ в̾слѣ́дъ тебѐ . и҆ падѐ ѻ҆́гнь ѿ́ гдⷭ҇а с̾ нб҃сѐ , и҆ пᲂѧдѐ всесᲂжже́нїѧ , и҆ пᲂлѣ́на , и҆ во́дꙋ ꙗ҆́же бѣ̀ в̾ мо́ри , и҆ ка́менїе и҆ пе́рсть всѧ̀ пᲂлиза̀ ѻ҆́гнь . и҆ падо́ша всѝ лю́дїе на лицы̀ свᲂе́мъ , и҆ рѣ́ша , вᲂи́стинꙋ гдⷭ҇ь бг҃ъ , то́й є҆́сть бг҃ъ .

Ѿ= црⷭ҇твъ тре́тїихъ , чте́нїе .=

Реко́ша мꙋ́жїе гра́да і҆єрѷхо́нска къ є҆лисе́ю , сѐ жили́ще гра́да сегѡ̀ дᲂбро̀ , ꙗ҆́кᲂже ты̀ гдⷭ҇и ви́диши . и҆ во́ды ѕлы̀ , и҆ без̾ча́дны . и҆ речѐ є҆лисе́й , прїими́те ми вᲂдᲂно́съ но́въ , и҆ всы́плите тꙋ̀ со́ль , и҆ прїѧ́ша и҆̀ . и҆ и҆зы́де на и҆схо́дъ вᲂда́мъ , и҆ в̾ве́рже тꙋ̀ со́ль . и҆ речѐ , та́кѡ гл҃етъ гдⷭ҇ь , и҆сцелѣ́ютъ во́ды сїѧ̀ . и҆ не к̾ тᲂмꙋ̀ бꙋ́детъ ѿ ню́дъ ᲂу҆мира́ѧ , нижѐ без̾ча́дствꙋющаѧ си́ми . и҆ и҆сцелѣ́ша во́ды до́ дне сегѡ̀ , пᲂ глаго́лꙋ є҆́же глаго́ла є҆лисе́й .

Ѿ= прᲂро́чества и҆са́ина , чте́нїе .=

Та́кѡ гл҃етъ гдⷭ҇ь , во́ времѧ прїѧ́тнᲂ пᲂслꙋ́шахъ тебѐ , и҆ в̾ де́нь спасе́нїѧ пᲂмᲂго́хъ ти . и҆ сᲂзда́хъ тѧ̀ и҆ да́хъ тѧ̀ , и҆ пᲂлᲂжи́хъ тѧ̀ в̾ завѣ́тъ ꙗ҆зы́кѡмъ , є҆́же ᲂу҆стро́ити зе́млю , и҆ наслѣ́дити наслѣ́дїе пꙋсты́ни . гл҃юще сꙋ́щимъ вᲂ ᲂу҆́захъ , и҆зы́дите , и҆ и҆́же вᲂ тмѣ̀ ѿкры́йтесѧ . вᲂ всѣ́хъ пꙋте́хъ пᲂжирꙋ́ютъ , и҆ вᲂ всѣ́хъ стезѧ́хъ па́жити и҆́хъ . не вза́лчꙋтъ ни вжа́ждꙋтъ , ни пᲂрази́тъ и҆́хъ ва́ръ , ни сл҃нце . нᲂ ми́лꙋѧи и҆́хъ призᲂве́тъ и҆́хъ , и҆ сквᲂзѣ̀ и҆сто́чники во́дъ прᲂведе́тъ и҆́хъ . и҆ пᲂлᲂжꙋ̀ всѧ́кꙋ го́рꙋ в̾ пꙋ́ть , и҆ всѧ́кꙋ стезю̀ в̾ па́ствꙋ и҆́хъ . сѐ сі́и и҆здале́ча прїи́дꙋтъ , сі́и ѿ сѣ́вера и҆ мо́рѧ , и҆ні́и же ѿ землѝ пе́рскїѧ . да веселѧ́тсѧ нб҃са̀ , и҆ ра́дꙋетсѧ землѧ̀ . да ве́ргꙋтъ го́ры весе́лїе , и҆ хо́лми пра́вдꙋ , ꙗ҆́кѡ пᲂми́лᲂва гдⷭ҇ь лю́ди свᲂѧ̀ , и҆ смире́ныѧ в̾ лю́дехъ ᲂу҆тѣ́ши . рече́ же сїѡ́нъ , ѡ҆ста́ви мѧ гдⷭ҇ь , и҆ бг҃ъ забы́ мѧ . є҆да̀ забꙋ́детъ жена̀ ѻ҆трᲂча̀ свᲂѐ , и҆лѝ не пᲂми́лᲂвати и҆сча́дїе чре́ва свᲂегѡ̀ . а҆́ще ли же и҆ сѐ забꙋ́детъ жена̀ , нᲂ а҆́зъ незабꙋ́дꙋ тебѐ речѐ гдⷭ҇ь .

є҆ктенїѧ̀ ма́лаѧ . и҆ =вᲂз̾гла́съ , трист҃о́мꙋ : Ꙗ҆́кѡ ст҃ъ є҆сѝ гдⷭ҇и бж҃е на́шъ . =и҆ пᲂе́мъ : трист҃о́е . прᲂки́менъ , ѱл҃о́мъ дв҃дᲂвъ . Гдⷭ҇ь прᲂсвѣще́нїе мᲂѐ , и҆ спаси́тель мо́й , кᲂго́сѧ ᲂу҆бᲂю̀ . сти́хъ . гдⷭ҇ь защи́титель живᲂтꙋ̀ мᲂемꙋ̀ , ѿ кᲂго́сѧ ᲂу҆страшꙋ̀ . а҆пⷭ҇лъ , къ кᲂри́нѳѡмъ . зача́лᲂ , рм҃г . А҆́ще ли нѣ́сть по́стъ , начина́емъ є҆гѡ̀ ѿ пᲂлꙋ̀ . а҆ллилꙋ́їѧ . Ѿры́гнꙋ срⷣце мᲂѐ сло́вᲂ бл҃гᲂ , глаго́лю а҆́зъ дѣ́ла мᲂѧ̀ цр҃е́ви . сти́хъ . красе́нъ дᲂбро́тᲂю па́че сн҃о́въ чл҃ческихъ . є҆ѵⷢ҇а́лїе , ѿ лꙋкѝ . заⷱ҇ , ѳ҃ .

и҆ по́ рѧдꙋ бжⷭ҇твенаѧ литꙋргі́ѧ вели́кагѡ васи́лїѧ . Вмѣ́стѡ дᲂсто́йна пᲂе́мъ : Ѡ҆ тебѣ̀ ра́дꙋетсѧ . прича́стенъ , хвали́те гдⷭ҇а с̾ нб҃съ .

та́же , Пᲂ за а҆мво́ннѣй мл҃твѣ , и҆схо́димъ всѝ въ крⷭ҇ти́льницꙋ . пред̾ и҆дꙋ́щимъ свѣ́щникѡмъ . пᲂ ни́хже дїа́кᲂнᲂмъ и҆дꙋ́щимъ с̾ є҆ѵⷢ҇а́лїемъ , и҆ кади́лᲂмъ . и҆ сщ҃е́нникѡмъ , пᲂ ни́хъ пᲂ ѡ҆бы́чаю , и҆ бра́тїѧмъ пᲂю́щимъ :

трᲂпа́рь . гла́съ , и҃ . Гла́съ гдⷭ҇нь на вᲂда́хъ вᲂпїе́тъ глаго́лѧ , прїиди́те прїими́те всѝ , дх҃ъ премꙋ́дрᲂсти , дх҃ъ ра́зꙋма , дх҃ъ стра́ха бж҃їѧ , ꙗ҆́вльшагᲂсѧ хрⷭ҇та̀ . три́жды . Дне́сь вᲂда́мъ ѡ҆сщ҃а́етсѧ є҆стество̀ , и҆ раздѣлѧ́етсѧ і҆ѡрда́нъ . и҆ свᲂи́хъ во́дъ вᲂз̾враща́етъ стрꙋѝ , влⷣкꙋ зрѧ̀ кр҃ща́ема . Ꙗ҆́кѡ чл҃къ на рѣкꙋ̀ прїи́де хрⷭ҇тѐ цр҃ю , и҆ ра́бскᲂе кр҃ще́нїе прїѧ́ти тщи́шисѧ бл҃же , ѿ прⷣтчевꙋ рꙋ́кꙋ , грѣ́хъ ра́ди на́шихъ чл҃кᲂлю́бче .

сла́ва , и҆ ны́нѣ . гла́съ , то́йже . Прѧ́мѡ гла́сꙋ вᲂпїю́щагѡ в̾ пꙋсты́ни , ᲂу҆гᲂто́вайте пꙋ́ть гдⷭ҇нь . прише́лъ є҆сѝ гдⷭ҇и , зра́къ ра́бїи прїе́мъ , кр҃ще́нїѧ прᲂсѧ̀ , не вѣ́дыи грѣха̀ . ви́дѣша тѧ̀ во́ды , и҆ ᲂу҆бᲂѧ́шасѧ . тре́петенъ бы́сть прⷣтча , и҆ вᲂзᲂпѝ гл҃ѧ , ка́кѡ прᲂсвѣти́тъ свѣти́льникъ свѣ́та ; ка́кѡ рꙋ́кꙋ пᲂлᲂжи́тъ ра́бъ на влⷣкꙋ ; ѡ҆ст҃и́ мѧ и҆ во́ды сп҃се , взе́млѧи ми́рꙋ грѣхѝ .

Ѿ= прᲂро́чества и҆са́ина , чте́нїе .=

Та́кѡ глаго́летъ гдⷭ҇ь , вᲂзвесели́сѧ пꙋсты́нѧ жа́ждꙋщаѧ , и҆ да вᲂзра́дꙋетсѧ пꙋсты́нѧ , и҆ прᲂцвѣте́тъ ꙗ҆́кѡ кри́нъ , и҆ да ѿцвѣте́тъ и҆ прᲂзѧ́бнетъ . и҆ да вᲂзра́дꙋетсѧ пꙋсты́нѧ і҆ѡрда́нᲂва , и҆ сла́ва лива́нᲂва дана̀ бы́сть є҆́й , и҆ че́сть карми́лᲂва . и҆ лю́дїе мᲂѝ ᲂу҆́зрѧтъ сла́вꙋ гдⷭ҇ню , и҆ высᲂтꙋ̀ бж҃їю . ᲂу҆крѣпи́тесѧ рꙋ́ки ѡ҆сла́бленныѧ , и҆ кᲂлѣ́на разсла́бленнаѧ ᲂу҆тѣша́йтесѧ . рцы́те малᲂдꙋ́шнымъ мы́слїю , ᲂу҆крѣпи́тесѧ и҆ небо́йтесѧ , сѐ бг҃ъ на́шъ сꙋ́дъ вᲂзда́стъ , са́мъ прїи́детъ и҆ спасе́тъ на́съ . тᲂгда̀ ѿве́рзꙋтсѧ ѻ҆́чи слѣпы́хъ , и҆ ᲂу҆́ши глꙋхи́хъ ᲂу҆слы́шатъ . тᲂгда̀ ско́читъ хро́мыи ꙗ҆́кѡ є҆ле́нь . и҆ ꙗ҆́сенъ бꙋ́детъ ꙗ҆зы́къ гꙋгни́выхъ , ꙗ҆́кѡ прᲂто́ржесѧ в̾ пꙋсты́ни вᲂда̀ , и҆ де́брь в̾ землѝ жа́ждꙋщей . и҆ бꙋ́детъ без̾во́днᲂе въ бла́тᲂ , и҆ в̾ жа́ждꙋщей землѝ , и҆сто́чникъ вᲂдѣ̀ бꙋ́детъ . тꙋ̀ бꙋ́детъ вселе́нїе пти́цамъ , и҆ вᲂдвᲂре́нїе сѵ́ринѡмъ и҆ тро́стїе и҆ бла́та . и҆ бꙋ́детъ тꙋ̀ пꙋ́ть чи́стъ , и҆ пꙋ́ть ст҃ъ нарече́тсѧ . и҆ не ми́мѡ и҆́детъ тꙋ̀ нечи́стъ , нижѐ раз̾сѣ́ѧнїи по́йдꙋтъ пᲂ немꙋ̀ . свѧ́занїи же по́йдꙋтъ пᲂ немꙋ̀ и҆ незаблꙋ́дѧтъ . и҆ небꙋ́детъ тꙋ̀ льва̀ , ни ѿ ѕвѣре́й ѕлы́хъ взы́детъ на́нь , нижѐ ѡ҆брѧ́щетсѧ тꙋ̀ . нᲂ по́йдꙋтъ пᲂ немꙋ̀ , и҆збавле́нїи ѿ́ гдⷭ҇а . и҆ ѡ҆братѧ́тсѧ , и҆ прїи́дꙋтъ в̾ сїѡ́нъ , с̾ весе́лїемъ и҆ ра́дᲂстїю . и҆ весе́лїе вѣ́чнᲂ над̾ главо́ю и҆́хъ , хвала̀ и҆ ра́дᲂванїе и҆ весе́лїе пᲂсти́гнетъ и҆́хъ , ѿи́де бᲂлѣ́знь и҆ печа́ль и҆ вᲂздыха́нїе .

Ѿ= прᲂро́чества и҆са́ина , чте́нїе .=

Та́кѡ гл҃етъ гдⷭ҇ь , жа́ждꙋщїи грѧди́те на́ вᲂдꙋ жи́вꙋ . и҆ є҆ли́цы не и҆́мате сребра̀ , ше́дше кꙋпи́те , и҆ ꙗ҆ди́те и҆ пі́йте без̾ сребра̀ и҆ цѣны̀ , вино̀ и҆ тꙋ́къ . вскꙋ́ю цѣнитѐ сребро̀ не в̾ хлѣ́бы , и҆ трꙋ́дъ ва́шъ не в̾ сы́тᲂсть . ᲂу҆слы́шите менѐ и҆ снѣ́сте бл҃га́ѧ , и҆ наслади́тсѧ вᲂ бл҃ги́хъ дш҃а ва́ша . внꙋши́те ᲂу҆ши́ма ва́шима , и҆ в̾слѣ́дъ и҆ди́те пꙋте́й мᲂи́хъ . ᲂу҆слы́шите менѐ , и҆ жива̀ бꙋ́детъ вᲂ бл҃ги́хъ дш҃а ва́ша . и҆ завѣща́ю ва́мъ завѣ́тъ вѣ́ченъ , препᲂдо́бна дв҃да и҆ вѣ́рна . сѐ свидѣ́тельствᲂ в̾ ꙗ҆зы́цѣхъ да́хъ є҆гѡ̀ , и҆ кн҃зѧ и҆ пᲂвели́телѧ в̾ ꙗ҆зы́цѣхъ . сѐ ꙗ҆зы́цы , и҆́же невѣ́дѧтъ тебѐ , призᲂвꙋ́тъ тебѐ . и҆ лю́дїе , и҆́же неразꙋмѣ́ютъ тебѐ , к̾ тебѣ̀ прибѣ́гнꙋтъ . гдⷭ҇а ра́ди бг҃а твᲂегѡ̀ , и҆ ст҃а́гѡ і҆и҃лева , ꙗ҆́кѡ прᲂсла́вилъ тѧ̀ є҆́сть . взыщи́те гдⷭ҇а , и҆ внегда̀ ѡ҆брѣстѝ ва́мъ тᲂгѡ̀ , призᲂви́те . внегда̀ а҆́ще прибли́житсѧ ва́мъ , да ѡ҆ста́витъ нечести́выи пꙋ́ть сво́й , и҆ мꙋ́жъ без̾зако́ненъ сᲂвѣ́ты свᲂѧ̀ . и҆ да ѡ҆брати́тсѧ к̾ гдⷭ҇ꙋ , и҆ пᲂми́лꙋетсѧ , и҆ к̾ бг҃ꙋ на́шемꙋ , ꙗ҆́кѡ пᲂ мно́гꙋ ѡ҆ста́витъ грѣхѝ ва́ша . не сꙋ́ть бᲂ сᲂвѣ́ты мᲂѧ̀ , ꙗ҆́кᲂже сᲂвѣ́ты ва́ши . ни ꙗ҆́кᲂже пꙋтїѐ мᲂѝ , пꙋтїѐ ва́ши , гл҃етъ гдⷭ҇ь . нᲂ ꙗ҆́кᲂже ѿстᲂи́тъ нб҃ᲂ ѿ землѝ , та́кѡ ѿстᲂи́тъ пꙋ́ть мо́й , ѿ пꙋті́й ва́шихъ , гл҃етъ гдⷭ҇ь . и҆ ᲂу҆мышле́нїѧ ва́ша , ѿ ᲂу҆мышле́нїи мᲂи́хъ . ꙗ҆́кᲂже бᲂ а҆́ще сни́детъ до́ждь , и҆лѝ снѣ́гъ ѿ нб҃сѐ , и҆ не ѿврати́тсѧ ѿ тꙋ́дꙋ , до́ндеже ᲂу҆пᲂи́тъ зе́млю , и҆ прᲂзѧ́бнетъ и҆ да́стъ сѣ́мѧ сѣ́ющемꙋ , и҆ хлѣ́бъ в̾ снѣ́дь . си́це бꙋ́детъ гл҃ъ мо́й , и҆́же а҆́ще и҆зы́детъ и҆з̾ ᲂу҆́стъ мᲂи́хъ , не ѡ҆брати́тсѧ кᲂ мнѣ̀ то́щь , до́ндеже скᲂнча́етъ , всѧ̀ є҆ли́ка вᲂсхᲂтѣ́хъ . и҆ свершꙋ̀ пꙋтѝ мᲂѧ̀ , и҆ ѻ҆бѣ́ты мᲂѧ̀ . с̾ весе́лїемъ бᲂ и҆зы́дете , и҆ с̾ ра́дᲂстїю , наꙋчи́тесѧ . го́ры бᲂ и҆ хо́лми и҆змѣнѧ́тсѧ , ча́юще ва́съ в̾ ра́дᲂсти , и҆ всѧ̀ древа̀ се́льнаѧ вᲂспле́щꙋтъ вѣ́твьми . и҆ в̾ мѣ́стѡ прꙋ́та , взы́детъ кипари́съ . в̾ мѣ́стᲂ же пра́ха , взы́детъ мирси́на . и҆ бꙋ́детъ в̾ гдⷭ҇не и҆́мѧ , и҆ вᲂ зна́менїе вѣ́чнᲂ , и҆ не ѡ҆скꙋдѣ́етъ , речѐ гдⷭ҇ь .

Ѿ= прᲂро́чества и҆са́ина , чте́нїе .=

Та́кѡ гл҃етъ гдⷭ҇ь , пᲂчерпи́те во́дꙋ с̾ весе́лїемъ , ѿ и҆сто́чникъ спасе́ныхъ . и҆ рече́ши в̾ дн҃ь ѻ҆́нъ , по́йте гдⷭ҇а , вᲂспо́йте и҆́мени є҆гѡ̀ . вᲂзвѣсти́те вᲂ ꙗ҆зы́цѣхъ сла́внаѧ є҆гѡ̀ , пᲂмѧни́те ꙗ҆́кѡ вᲂзнесе́сѧ и҆́мѧ є҆гѡ̀ . вᲂспо́йте и҆́мѧ гдⷭ҇не , ꙗ҆́кѡ высо́каѧ сᲂтвᲂрѝ , вᲂзвѣсти́те сїѧ̀ пᲂ все́й землѝ . ра́дꙋйтесѧ и҆ весели́тесѧ , живꙋ́щїи в̾ сїѡ́нѣ , ꙗ҆́кѡ вᲂзнесе́сѧ пᲂсредѣ̀ тебѐ ст҃ы́и і҆и҃левъ .

прᲂки́менъ , ѱл҃о́мъ дв҃дᲂвъ . Гдⷭ҇ь прᲂсвѣще́нїе мᲂѐ , и҆ спаси́тель мо́й , кᲂго́сѧ ᲂу҆бᲂю̀ . сти́хъ . гдⷭ҇ь защи́титель живᲂтꙋ̀ мᲂемꙋ̀ , ѿ кᲂго́сѧ ᲂу҆страшꙋ̀ .

а҆пⷭ҇лъ , къ кᲂри́нѳѡмъ . зача́лᲂ , рм҃г , ѿ пᲂлꙋ̀ . Бра́тїе , нехᲂщꙋ̀ ва́съ невѣ́дѣти , ꙗ҆́кѡ ѻ҆ц҃ы на́ши всѝ , пᲂд̾ ѻ҆́блакᲂмъ бѣ́ша . и҆ всѝ сквᲂзѣ̀ мо́ре прᲂидо́ша . и҆ всѝ ᲂу҆мѡѷсе́ѧ крⷭ҇ти́шасѧ вᲂ ѻ҆́блацѣ и҆ в̾ мо́рѣ . и҆ всѝ то́жде бра́шнᲂ дх҃о́внᲂ ꙗ҆до́ша , и҆ всѝ то́жде пи́вᲂ дх҃о́внᲂ пи́ша . пїѧ́хꙋ бᲂ ѿ дх҃о́внагѡ пᲂслѣ́дꙋющагѡ ка́мене . ка́мень же бѣ̀ хрⷭ҇то́съ .

а҆ллилꙋ́їѧ . Гла́съ гдⷭ҇нь на вᲂда́хъ , бг҃ъ сла́вы вᲂз̾гремѣ̀ гдⷭ҇ь на вᲂда́хъ мно́гахъ .

є҆ѵⷢ҇а́лїе , ѿ ма́рка . зача́лᲂ , в҃ . Вᲂ вре́мѧ ѻ҆́нᲂ , прїи́де і҆с҃ъ ѿ назаре́та галиле́йскагѡ , и҆ крⷭ҇ти́сѧ ѿ і҆ѡа́нна вᲂ і҆ѡрда́нѣ . и҆ а҆́бїе вᲂсхᲂдѧ̀ ѿ вᲂды̀ , ви́дѣ развᲂдѧ́щасѧ нб҃са̀ , и҆ дх҃ъ ꙗ҆́кѡ го́лꙋбь схᲂдѧ́щь на́нь . и҆ гла́съ бы́сть с̾ нб҃сѐ , ты̀ є҆сѝ сн҃ъ мо́й вᲂзлю́бленныи , ѡ҆ не́мже бл҃гᲂвᲂли́хъ .

та́же , дїа́кᲂнства , и҆ мл҃твы . =Пᲂ ѡ҆сщ҃е́нїи же вхо́димъ в̾ цр҃кᲂвь , сᲂставлѧ́емъ ли́къ пᲂю́ще : сла́ва , и҆ ны́нѣ . гла́съ , ѕ҃ . В=ᲂспᲂе́мъ вѣ́рнїи , є҆́же ѡ҆ на́съ бж҃їѧ бл҃гᲂдѣѧ́нїѧ вели́чествᲂ . ѡ҆ на́шихъ бᲂ сᲂгрѣше́нїихъ , бы́въ чл҃къ , на́шимъ ѡ҆чища́етсѧ ѡ҆чище́нїемъ вᲂ і҆ѡрда́нѣ . є҆ди́нъ чⷭ҇тыи и҆ без̾сме́ртныи , ѡ҆сщ҃а́ѧ менѐ и҆ во́ды . и҆ главы̀ ѕмїе́мъ стира́ѧ в̾ вᲂдѣ̀ . пᲂчерпе́мъ ᲂу҆́бѡ во́дꙋ , с̾ весе́лїемъ бра́тїе . бл҃гᲂда́ть бᲂ дх҃а , и҆́же вѣ́рнѡ пᲂчерпа́ющимъ , неви́димѡ пᲂдава́етсѧ , ѿ хрⷭ҇та̀ бг҃а и҆ сп҃са дш҃а́мъ на́шимъ .

та́же , Бꙋ́ди и҆́мѧ гдⷭ҇не бл҃гᲂслᲂве́нᲂ , ѿ ны́нѣ и҆ до́ вѣка . три́жды . ѱало́мъ , л҃г . Бл҃гᲂслᲂвлю̀ гдⷭ҇а на всѧ́кᲂ вре́мѧ . та́же , Дᲂсто́йнѡ є҆́сть .= и҆ ѿпꙋ́стъ .=

А҆́ще ли не прилꙋчи́тсѧ бы́ти литꙋргі́и , то̀ пᲂ скᲂнча́нїи чте́нїѧ паремі́й , трист҃о́е не пᲂе́мъ . нᲂ пᲂ є҆ктенїѝ , прᲂки́менъ , и҆ а҆пⷭ҇лъ , а҆ллилꙋ́їѧ , и҆ є҆ѵⷢ҇а́лїе , ꙗ҆́кᲂже вы́ше ᲂу҆каза́сѧ . Пᲂ є҆ѵⷢ҇а́лїи , є҆ктенїѧ̀ : рце́мъ всѝ . та́же , Спᲂдо́би гдⷭ҇и . и҆ є҆ктенїѧ̀ : и҆спо́лнимъ вече́рнѧѧ мᲂли́твы . пᲂсе́м̾ : Честнѣ́йшꙋю херꙋви́мъ . сла́ва , и҆ нн҃ѣ , гдⷭ҇и пᲂми́лꙋй , вⷤ . гдⷭ҇и бл҃гᲂслᲂвѝ . и҆ ѿпꙋ́стъ .

А҆́ще ли же слꙋчи́тсѧ наве́черїе бг҃ᲂѧвле́нїѧ гдⷭ҇нѧ в̾ сꙋбо́тꙋ , и҆лѝ в̾ нлⷣю . тᲂгда̀ пᲂе́мъ вече́рню , си́це : Бл҃гᲂслᲂви́вшꙋ і҆єре́ю , гл҃емъ , цр҃ю нбⷭ҇ныи . трⷭ҇то́е , и҆ про́чее . ѱало́мъ , бл҃гᲂслᲂвѝ дш҃е мᲂѧ̀ гдⷭ҇а . є҆ктенїѧ̀ вели́каѧ . А҆́ще в̾ сꙋбо́тꙋ ве́черъ , пᲂе́мъ а҃ ю каѳи́смꙋ , всю̀ . А҆ в̾ нлⷣю ве́черъ , пᲂе́мъ то́чїю є҆ди́нꙋ сла́вꙋ . бл҃же́нъ мꙋ́жъ . в̾ про́чїѧ же днѝ , в̾ наве́черїи се́мъ бл҃же́нъ мꙋ́жъ не пᲂе́мъ . нᲂ пᲂ вели́цѣй є҆ктенїѝ пᲂе́мъ . гдⷭ҇и вᲂзва́хъ , на́ гласъ , в҃ . дїа́кᲂнъ , и҆лѝ і҆єре́й , кади́тъ ѻ҆лта́рь , и҆ всю̀ цр҃кᲂвь , и҆ бра́тїю . та́же , пᲂе́мъ стихѣ́ры . и҆ быва́етъ вы́хᲂдъ с̾ є҆ѵⷢ҇а́лїемъ , свѣ́те ти́хїи . прᲂки́менъ , дню̀ . и҆ чте́нїѧ пра́здникꙋ , по́ чинꙋ и҆́хъ . пᲂси́хъ , є҆ктенїѧ̀ ма́лаѧ . трⷭ҇то́е не пᲂе́мъ , нᲂ пᲂ є҆ктенїѝ .

прᲂки́менъ , ѱл҃о́мъ дв҃дᲂвъ . Гдⷭ҇ь прᲂсвѣще́нїе мᲂѐ , и҆ спаси́тель мо́й , кᲂго́сѧ ᲂу҆бᲂю̀ . сти́хъ . гдⷭ҇ь защи́титель живᲂтꙋ̀ мᲂемꙋ̀ , ѿ кᲂго́сѧ ᲂу҆страшꙋ̀ . а҆пⷭ҇лъ , къ кᲂри́нѳѡмъ . заⷱ҇ , рм҃г , ѿ пᲂлꙋ̀ . а҆ллилꙋ́їѧ . Ѿры́гнꙋ срⷣце мᲂѐ сло́вᲂ бл҃гᲂ , глаго́лю а҆́зъ дѣ́ла мᲂѧ̀ цр҃е́ви . сти́хъ . красе́нъ дᲂбро́тᲂю па́че сн҃о́въ чл҃ческихъ .= є҆ѵⷢ҇а́лїе , ѿ= лꙋкѝ . зача́лᲂ , ѳ҃ . та́же , є҆ктенїѧ̀ : рце́мъ всѝ ѿ всеѧ̀ дш҃и . Спᲂдо́би гдⷭ҇и в̾ ве́черъ се́й . и҆ є҆ктенїѧ̀ : и҆спо́лнимъ вече́рнѧѧ . и҆ и҆схо́димъ , на ѡ҆сщ҃е́нїе вᲂдѣ̀ . Пᲂ ѡ҆сщ҃е́нїи же вᲂды̀ , и҆ пᲂ стихѣ́рѣ : Вᲂспᲂе́мъ вѣ́рнїи , гл҃етъ дїа́кᲂнъ є҆ктенїю̀ : пᲂми́лꙋй на́съ бж҃е . та́же , чⷭ҇тнѣ́йшꙋю херꙋви́мъ . и҆ ѿпꙋ́стъ .

И҆ пᲂ ѿпꙋ́стѣ , вжига́етъ параеклисїа́рхъ свѣ́щникъ , и҆ пᲂставлѧ́етъ средѝ цр҃кве . кли́рицы же ста́вше ѻ҆́ба ли́ка вкꙋ́пѣ . и҆ гл҃етъ дᲂмести́къ пра́вагѡ ли́ка , є҆го́же бꙋ́детъ де́нь , трᲂпа́рь пра́здникꙋ . кᲂне́цъ же , трᲂпарѧ̀ , пᲂю́тъ по́ гласꙋ . та́же , лѣ́выи ли́къ глаго́летъ . сла́ва , и҆ ны́нѣ , кᲂнда́къ пра́здникꙋ . а҆ кᲂне́цъ кᲂндака̀ пᲂю́тъ по́ гласꙋ . пра́выи же ли́къ вᲂсхо́дитъ на кры́лᲂсъ , и҆ пᲂю́тъ мнᲂгᲂлѣ́тїе . И҆ и҆схо́димъ в̾ трапе́зꙋ , и҆ ꙗ҆ди́мъ штѝ со́чаны , и҆ кꙋтью̀ . ры́бы же не ꙗ҆ди́мъ .

Вѣ́дати пᲂдᲂба́етъ , Ꙗ҆́кѡ пра́здникъ бг҃ᲂѧвле́нїѧ гдⷭ҇нѧ в̾ кі́и де́нь ни прилꙋчи́тсѧ , пᲂе́тсѧ в̾ на́вечерїи неѳимо́нъ вели́кїи си́це :

Въ но́щи в̾ пᲂдо́бнᲂ вре́мѧ быва́етъ бла́гᲂвѣстъ . и҆ пᲂто́мъ , трезво́нъ вᲂ всѧ̀ ко́лᲂкᲂлы . і҆єре́й же с̾ дїа́кᲂнᲂмъ ѡ҆бо́лксѧ твᲂрѧ́тъ нача́лᲂ , ꙗ҆́кᲂже вᲂ всѧ̀ недѣ́ли . Дїа́кᲂнъ рече́тъ : бл҃гᲂслᲂвѝ влⷣкᲂ . І҆єре́й : бл҃гᲂслᲂве́нъ бг҃ъ на́шъ . и҆ кадѧ́щꙋ і҆єре́ю . глаго́лемъ неѳимо́нъ вели́кїи , ѿ нача́ла . цр҃ю нбⷭ҇ныи . трист҃о́е , и҆ про́чее . с̾ на́ми бг҃ъ . пᲂе́мъ пѣ́нїемъ . Пᲂ а҃ мъ трⷭ҇то́мъ вмѣ́стѡ трᲂпаре́й ѡ҆бы́чныхъ , глаго́лемъ трᲂпа́рь пра́здникꙋ . Пᲂ в҃ мъ трⷭ҇то́мъ вмѣ́стѡ , пᲂми́лꙋй на́съ гдⷭ҇и , глаго́лемъ , кᲂнда́къ пра́здникꙋ . На сла́ва въ вы́шнихъ , и҆гꙋ́менъ ѡ҆блачи́тсѧ сᲂ всѣ́ми і҆єре́и , и҆ дїа́кᲂны . и҆ пᲂ спᲂдо́би гдⷭ҇и въ ве́черъ се́й , пᲂе́мъ :

На литі́и , стихѣ́ры . гла́съ , д҃ .

Ѡ҆дѣва́ѧисѧ свѣ́тᲂмъ ꙗ҆́кѡ ри́зᲂю , на́съ ра́ди пᲂ на́съ бы́ти спᲂдо́билсѧ є҆́сть , вᲂ стрꙋѝ ѡ҆дѣва́етсѧ дне́сь і҆ѡрда́нскїѧ . не са́мъ сїѐ кᲂ ѡ҆чище́нїю тре́бꙋѧ , нᲂ на́мъ сᲂбо́ю смᲂтрѧ́ѧ пᲂрᲂжде́нїе . Ѽ чꙋдесѐ , без̾ ѻ҆гнѧ̀ и҆зварѧ́етъ , и҆ назида́етъ без̾ сᲂкрꙋше́нїѧ , и҆ спаса́етъ и҆́же в̾ негѡ̀ прᲂсвѣща́емыѧ , хрⷭ҇то́съ бг҃ъ и҆ сп҃съ дш҃а́мъ на́шимъ . Тебѐ и҆́же в̾ дс҃ѣ и҆ ѻ҆гнѝ , ѡ҆чища́юща грѣхѝ ми́ра , зрѧ̀ крⷭ҇ти́тель грѧдꙋ́ща к̾ себѣ̀ , ᲂу҆жаса́ѧсѧ и҆ трепе́ща , вᲂпїѧ́ше глаго́лѧ , несмѣ́ю держа́ти ве́рхъ тво́й пречⷭ҇тыи . ты́ мѧ ѡ҆ст҃ѝ влⷣкᲂ ꙗ҆вле́нїемъ свᲂи́мъ , є҆ди́не чл҃кᲂлю́бче . Прїиди́те ᲂу҆пᲂдо́бимсѧ мꙋ́дрымъ дв҃амъ , прїиди́те срѧ́щемъ ꙗ҆́вльшагᲂсѧ влⷣкꙋ . ꙗ҆́кѡ прїи́де , ꙗ҆́кѡ жени́хъ кᲂ і҆ѡа́ннꙋ . і҆ѡрда́нъ ви́дѣвъ тѧ , ᲂу҆бᲂѧ́сѧ и҆ пᲂжда̀ . і҆ѡа́ннъ вᲂпїѧ́ше , несмѣ́ю кᲂснꙋ́тисѧ верхꙋ̀ без̾сме́ртнᲂмꙋ . дх҃ъ схᲂжда́ше в̾ видѣ́нїи го́лꙋбѧ , ѡ҆ст҃и́ти во́ды . и҆ гла́съ с̾ нб҃сѐ , се́й є҆́сть сн҃ъ мо́й прише́дыи в̾ ми́ръ , спастѝ ро́дъ челᲂвѣ́чь , гдⷭ҇и сла́ва тебѣ̀ . Кр҃ща́етсѧ хрⷭ҇то́съ , и҆ вᲂсхо́дитъ ѿ вᲂды̀ . свᲂзво́дитъ бᲂ с̾ сᲂбо́ю ми́ръ , и҆ зри́тъ раз̾вᲂдѧ́щасѧ нб҃са̀ , ꙗ҆́же а҆да́мъ затвᲂрѝ себѣ̀ , и҆ и҆́же с̾ ни́мъ . и҆ дх҃ъ свидѣ́тельствꙋетъ бжⷭ҇тво̀ , пᲂдо́бнᲂмꙋ бᲂ пред̾ти́четъ и҆ гла́съ ѿ нб҃сѐ . ѿ тꙋ́дꙋ бᲂ свидѣ́тельствꙋемыи , сп҃съ дш҃а́мъ на́шимъ . Трепета́ше рꙋка̀ крⷭ҇ти́телева , є҆гда̀ пречи́стᲂмꙋ ти верхꙋ̀ кᲂснꙋ́сѧ . вᲂзврати́сѧ і҆ѡрда́нскаѧ рѣка̀ вспѧ́ть , несмѣ́ѧ прибли́житисѧ тебѣ̀ . ꙗ҆́же бᲂ ᲂу҆стыдѣ́сѧ і҆сꙋ́са на́ввина , ка́кѡ твᲂрца̀ свᲂегѡ̀ ᲂу҆страши́тисѧ нехᲂтѧ́ше , нᲂ всѐ и҆спо́лнилъ є҆сѝ смᲂтре́нїе сп҃се на́шъ , да спасе́ши ми́ръ , ꙗ҆вле́нїемъ твᲂи́мъ чл҃кᲂлю́бче .

сла́ва . гла́съ , и҃ . Гдⷭ҇и и҆спо́лнити хᲂтѧ̀ , ꙗ҆́же ᲂу҆ста́вилъ є҆сѝ ѿ́ вѣка , ѿ всеѧ̀ тва́ри слꙋжи́тели , та́йнѣ свᲂе́й взѧ́лъ є҆сѝ . ѿ а҆́нг҃лъ гаврїи́ла , ѿ чл҃къ дв҃ꙋю , ѿ нб҃съ ѕвѣздꙋ̀ , и҆ ѿ во́дъ і҆ѡрда́на , в̾ не́мже без̾зако́нїе мирско́е пᲂтреби́лъ є҆сѝ , сп҃се на́шъ сла́ва тебѣ̀ .

и҆ ны́нѣ . гла́съ , то́йже . Дне́сь тва́рь прᲂсвѣща́етсѧ , дне́сь всѧ́ческаѧ веселѧ́тсѧ , нбⷭ҇наѧ вкꙋ́пѣ и҆ земна́ѧ , а҆́нг҃ли и҆ челᲂвѣ́цы смѣша́ютсѧ . и҆дѣ́же бᲂ цр҃е́вᲂ прише́ствїе , и҆ чи́нъ прехо́дитъ . теце́мъ ᲂу҆́бѡ на і҆ѡрда́нъ , и҆ ви́димъ всѝ і҆ѡа́нна , ка́кѡ кр҃ща́етъ ве́рхъ нерꙋкᲂтвᲂре́нъ и҆ без̾грѣ́шенъ ; тѣ́мже а҆пⷭ҇льскїи гла́съ припѣва́юще , сᲂгла́снѡ вᲂзᲂпїе́мъ , ꙗ҆ви́сѧ бл҃гᲂда́ть бж҃їѧ спаси́тельнаѧ всѣ́мъ чл҃кѡмъ , ѡ҆зарѧ́ющи и҆ пᲂдаю́щи вѣ́рнымъ ве́лїю млⷭ҇ть .

На стихо́внѣ , стⷯры . гла́съ , в҃ . Вᲂ і҆ѡрда́нстѣй рѣцѣ̀ , ви́дѣвъ тѧ і҆ѡа́ннъ к̾ себѣ̀ грѧдꙋ́ща , глаго́лаше хрⷭ҇тѐ бж҃е , что̀ к̾ рабꙋ̀ прїи́де , скве́рны не и҆мы́и гдⷭ҇и , во́ и҆мѧ же чїѐ тѧ̀ крещꙋ̀ ; ѻ҆ц҃а ; нᲂ тᲂгѡ̀ но́сиши в̾ себѣ̀ . сн҃а ; нᲂ ты̀ са́мъ є҆сѝ вᲂплᲂти́выисѧ . дх҃а ст҃а ; и҆ сегѡ̀ вѣ́си даѧ́ти вѣ́рнымъ ѿ ᲂу҆́стъ . ꙗ҆вле́исѧ бж҃е пᲂми́лꙋй на́съ .

сти́хъ : мо́ре ви́дѣ и҆ пᲂбѣжѐ ,꙳ і҆ѡрда́нъ вᲂзвра ти́сѧ вспѧ́ть . Ви́дѣша тѧ во́ды бж҃е , ви́дѣша тѧ во́ды и҆ ᲂу҆бᲂѧ́шасѧ . к̾ твᲂе́й бᲂ сла́вѣ прᲂти́вꙋ зрѣ́ти херꙋви́ми немо́гꙋтъ , ни вᲂзни́кнꙋ ти серафи́ми . нᲂ со́ страхᲂмъ пред̾стᲂѧ́ще , ѻ҆́вїи ᲂу҆́бѡ но́сѧтъ , ѻ҆́вїи же сла́вѧтъ си́лꙋ твᲂю̀ . с̾ ни́ми же ще́дре вᲂзвѣща́емъ хвалꙋ̀ твᲂю̀ глаго́люще , ꙗ҆вле́исѧ бж҃е пᲂми́лꙋй на́съ .

сти́хъ : что́ ти бы́сть мо́ре , ꙗ҆́кѡ пᲂбѣ́же .꙳ и҆ тебѣ̀ і҆ѡрда́нѣ , ꙗ҆́кѡ вᲂзврати́сѧ вспѧ́ть . Дне́сь нб҃ꙋ и҆ землѝ твᲂре́цъ , прихо́дитъ пло́тїю на і҆ѡрда́нъ , кр҃ще́нїѧ прᲂсѧ̀ без̾грѣ́шныи , да ѡ҆чи́ститъ ми́ръ ѿ ле́сти вра́жїѧ . и҆ кр҃ща́етсѧ ѿ раба̀ влⷣка всѧ́ческихъ , и҆ ѡ҆чище́нїе вᲂдо́ю ро́дꙋ чл҃ческᲂмꙋ да́рꙋетъ . тᲂмꙋ̀ вᲂзᲂпїе́мъ , ꙗ҆вле́исѧ бж҃е на́шъ сла́ва тебѣ̀ .

сла́ва , и҆ ны́нѣ . гла́съ , ѕ҃ . Є҆́же ѿ дв҃ы сл҃нце , ви́дѧ и҆́же ѿ непло́дᲂве свѣти́льникъ свѣ́тлыи , вᲂ і҆ѡрда́нѣ прᲂсѧ́ща кр҃ще́нїѧ , ᲂу҆́жасᲂмъ и҆ ра́дᲂстїю вᲂпїѧ́ше к̾ немꙋ̀ , ты́ мѧ ѡ҆ст҃ѝ влⷣкᲂ бжⷭ҇твенымъ ꙗ҆вле́нїемъ свᲂи́мъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , а҃ . Вᲂ і҆ѡрда́нѣ кр҃ща́ющꙋтисѧ гдⷭ҇и , трⷪ҇ческᲂе ꙗ҆ви́сѧ пᲂклᲂнѧ́нїе , рᲂди́телевъ бᲂ гла́съ свидѣ́тельствᲂваше тѝ , вᲂзлю́бленнагᲂ тѧ сн҃а и҆менꙋ́ѧ . и҆ дх҃ъ в̾ видѣ́нїи гᲂлꙋби́нѣ , и҆звѣ́ствᲂваше слᲂвесѝ ᲂу҆тверже́нїе . ꙗ҆вле́исѧ хрⷭ҇тѐ бж҃е , и҆ ми́ръ прᲂсвѣще́и сла́ва тебѣ̀ . гⷤ .

та́же , Бꙋ́ди и҆́мѧ гдⷭ҇не бл҃гᲂслᲂве́нᲂ ѿ нн҃ѣ и҆ до́ вѣка , гⷤ . и҆ ѱл҃о́мъ , л҃г . Бл҃гᲂслᲂвлю̀ гдⷭ҇а на всѧ́кᲂ вре́мѧ . дᲂ нелиша́тсѧ ѿ всѧ́кагѡ бл҃га . та́же , і҆єре́й , глаго́летъ : Бл҃гᲂслᲂве́нїе гдⷭ҇не на всѣ́хъ ва́съ . Пᲂсе́мъ начина́етъ ѱало́мщикъ : Сла́ва в̾ вы́шнихъ бг҃ꙋ . и҆ є҆ѯа̀ ѱалмы̀ .

На ᲂу҆́трени , на бг҃ъ гдⷭ҇ь , трᲂпа́рь пра́здникꙋ , гⷤ . =Пᲂ а҃ , стихᲂло́гїи , сѣда́ленъ . гла́съ , д҃ . Стрꙋѝ ѡ҆ст҃и́лъ є҆сѝ і҆ѡрда́нскїѧ , держа́вꙋ сᲂкрꙋши́лъ є҆сѝ грѣхо́внꙋю , хрⷭ҇тѐ бж҃е на́шъ . преклᲂни́лъ є҆сѝ дла́ни себѐ прⷣтчевѣ , и҆ спа́слъ є҆сѝ ѿ льстѝ чл҃ческїи ро́дъ . тѣ́мже тѧ мо́лимъ , спасѝ дш҃а на́ша . сла́ва , и҆ ны́нѣ , то́йже .=

Пᲂ в҃ , стихᲂло́гїи , сѣда́ленъ . гла́съ , є҃ . І҆ѡрда́нскими стрꙋѧ́ми ѡ҆бло́жсѧ , и҆́же свѣ́тᲂмъ пресла́внѡ ѡ҆дѣва́ѧисѧ . в̾ ни́хже а҆да́мᲂвᲂ є҆стество̀ ѡ҆бнᲂви́лъ є҆сѝ , сᲂкрꙋ́шшеесѧ ѕлы́мъ преслꙋша́нїемъ сло́ве бж҃їи . тѣ́мже тѧ̀ вᲂсхвалѧ́емъ , и҆ ст҃о́е твᲂѐ всѝ славᲂсло́вимъ ꙗ҆вле́нїе .= сла́ва , и҆ ны́нѣ , то́йже .=

Пᲂ пᲂлїєлеѡ́сѣ , сѣда́ленъ . гла́съ , д҃ . І҆ѡрда́нѣ рѣко̀ , что̀ ᲂу҆диви́сѧ , зрѧ̀ неви́димагᲂ на́га ; ви́дѣхъ и҆ вᲂстрепета́хъ речѐ . и҆ ка́кѡ сегѡ̀ нехᲂтѣ́хъ ᲂу҆страши́тисѧ и҆ заитѝ , а҆́нг҃ли є҆гѡ̀ ᲂу҆страши́шасѧ зрѧ́ще . ᲂу҆страши́сѧ нб҃ᲂ , и҆ землѧ̀ вᲂстрепета̀ . и҆ смѧте́сѧ мо́ре , и҆ всѧ̀ ви́димаѧ и҆ неви́димаѧ . хрⷭ҇то́съ ꙗ҆ви́сѧ на і҆ѡрда́нѣ ѡ҆ст҃и́ти во́ды . сла́ва , и҆ нн҃ѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Мо́ре ви́дѣ и҆ пᲂбѣжѐ , і҆ѡрда́нъ вᲂз̾врати́сѧ вспѧ́ть . сти́хъ . что́ ти є҆́сть мо́ре , ꙗ҆́кѡ пᲂбѣжѐ . и҆ ты̀ і҆ѡрда́нѣ , ꙗ҆́кѡ вᲂз̾врати́сѧ вспѧ́ть . всѧ́кᲂ дыха́нїе .

є҆ѵⷢ҇а́лїе , ѿ ма́рка . зача́лᲂ , в҃ . ѱало́мъ , н҃ .

сла́ва . Всѧ́ческаѧ дне́сь ра́дᲂсти и҆спо́лнишасѧ , хрⷭ҇то́съ ꙗ҆ви́сѧ на і҆ѡрда́нѣ .

и҆ нн҃ѣ . Всѧ́ческаѧ дне́сь ра́дᲂсти и҆спо́лнишасѧ , хрⷭ҇то́съ крⷭ҇ти́сѧ ѿ і҆ѡа́нна .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Бг҃ъ сло́вᲂ ꙗ҆ви́сѧ пло́тїю ро́дꙋ чл҃ческᲂмꙋ , стᲂѧ́ше крⷭ҇ти́тисѧ вᲂ і҆ѡрда́нѣ , и҆ глаго́лаше к̾ немꙋ̀ прⷣтча , ка́кѡ прᲂстрꙋ̀ рꙋ́кꙋ , и҆ прикᲂснꙋ́сѧ версѣ̀ , держа́щемꙋ всѧ́ческаѧ ; а҆́ще и҆ ѿ мр҃і́и є҆сѝ младе́нецъ , нᲂ вѣ́мъ тѧ̀ бг҃а превѣ́чна . и҆ пᲂ землѝ хо́диши , пѣва́емыи ѿ серафи́мъ . и҆ ра́бъ влⷣкꙋ кр҃ща́ти ненаꙋчи́хсѧ . непᲂстижи́ме гдⷭ҇и сла́ва тебѣ̀ .

Кано́на два̀ , і҆рмᲂсы̀ пᲂ два́жды . а҆ трᲂпарѝ , на в҃і . пᲂслѣди́ же пе́рвыи ли́къ , а҃ гѡ кано́на і҆рмо́съ . а҆ дрꙋгі́и ли́къ , в҃ гѡ кано́на і҆рмо́съ . Кано́нъ , кᲂзмы̀ мᲂна́ха . гла́съ , в҃ . пѣ́снь , а҃ . і҆рмо́съ . Глꙋбинѣ̀ ѿкры́лъ є҆́сть дно̀ , и҆ по́ сꙋхꙋ свᲂи́хъ и҆зво́дитъ . в̾ не́й пᲂгрꙋ́жь сᲂпрᲂти́вныѧ , крѣ́пкїи вᲂ бранѣ́хъ гдⷭ҇ь , ꙗ҆́кѡ прᲂсла́висѧ . запѣ́в̾ : Сла́ва гдⷭ҇и бг҃ᲂѧвле́нїю твᲂемꙋ̀ .= А҆=да́ма и҆стлѣ́вшагѡ ѡ҆бнᲂвлѧ́етъ вᲂда́ми і҆ѡрда́нскими , и҆ ѕмїе́мъ главы̀ гнѣздѧ́щимсѧ сᲂкрꙋша́етъ , цр҃ь вѣкѡ́мъ гдⷭ҇ь , ꙗ҆́кѡ прᲂсла́висѧ . Ѻ҆гне́мъ бжⷭ҇тва̀ невеще́ственымъ , въ пло́ть веще́ственꙋ ѡ҆дѣ́ѧвсѧ . і҆ѡрда́нскᲂю ѡ҆блага́етсѧ вᲂдо́ю , вᲂплᲂще́исѧ ѿ дв҃ы гдⷭ҇ь , ꙗ҆́кѡ прᲂсла́висѧ . Скве́рнꙋ ѿмыва́ѧ чл҃кѡмъ , си́ми ѡ҆чи́щьсѧ вᲂ і҆ѡрда́нѣ . и҆́мже вᲂсхᲂтѣ́въ ᲂу҆пᲂдо́бисѧ , и҆́же бѧ́ше пребы́въ . сꙋ́щїѧ вᲂ тмѣ̀ прᲂсвѣща́етъ гдⷭ҇ь , ꙗ҆́кѡ прᲂсла́висѧ .

Дрꙋгі́и кано́нъ . і҆ѡа́нна мᲂна́ха . гла́съ , то́йже . і҆рмо́съ . Пꙋ́ть мᲂрскі́и вᲂлнꙋ́ѧсѧ пѣ́нами , сꙋ́хъ ꙗ҆ви́сѧ . і҆зра́ильты прїе́млѧ . си́нѧ же пꙋчи́на триста́ты є҆гѵ́петски , пᲂтᲂпѝ ѕѣлѡ̀ , вᲂдᲂсла́ненъ гро́бъ , си́лᲂю крѣ́пкᲂю , десни́цею влады́чнею .= запѣ́въ : Сла́ва гдⷭ҇и бг҃ᲂѧвле́нїю твᲂемꙋ̀ . О=у҆́трꙋ ꙗ҆́вльшꙋсѧ чл҃кѡмъ свѣтᲂно́снꙋ . ны́нѣ ѿ пꙋсты́ни к̾ вᲂда́мъ і҆ѡрда́нскимъ , цр҃ю преклᲂни́лъ є҆сѝ сл҃нце свᲂю̀ вы́ю , ли́ка мра́чна рᲂдᲂнача́льника вᲂсхити́ти , скве́рны же всѧ́кїѧ ѡ҆чи́стити тва́рь . Без̾нача́льне вᲂда́ми спᲂгре́бшатисѧ сло́ве , плᲂвы́и прево́диши и҆стлѣ́вшагᲂ ле́стїю . сеѧ̀ несказа́ннѡ вы́ше ꙗ҆ви́въ , дарᲂва́нїе держа́внѡ . се́й вᲂз̾лю́бленныи , ра́венъ же мѝ ѻ҆́трᲂкъ є҆стество́мъ .

пѣ́снь , г҃ . і҆рмо́съ . Крѣ́пᲂсть даѧ́й цр҃ю на́шемꙋ гдⷭ҇ь , и҆ ро́гъ хрⷭ҇та̀ свᲂегѡ̀ вᲂз̾нᲂсѧ̀ , ѿ дв҃ы ражда́етсѧ , грѧде́тъ же кᲂ креще́нїю . тѣ́мъ вѣ́рнїи вᲂзᲂпїе́мъ , нѣ́сть ст҃ъ ꙗ҆́кᲂже бг҃ъ на́шъ . Непло́днаѧ дре́вле и҆ безча́днаѧ лю́тѣ , дне́сь весели́сѧ хрⷭ҇то́ва цр҃кви . вᲂдо́ю и҆ дх҃ᲂмъ , сн҃ᲂве бᲂ ти сѧ рᲂди́ша , вѣ́рᲂю взыва́юще , нѣ́сть ст҃ъ , ꙗ҆́кᲂже бг҃ъ на́шъ . Ве́лїимъ гла́сᲂмъ в̾ пꙋсты́ни вᲂпїе́тъ прⷣтча , хрⷭ҇тꙋ̀ ᲂу҆гᲂто́вайте пꙋтѝ , и҆ стезѝ бг҃ꙋ на́шемꙋ пра́вы сᲂдѣ́лайте , вѣ́рᲂю взыва́юще , нѣ́сть ст҃ъ ꙗ҆́кᲂже бг҃ъ на́шъ .

и҆́нъ , і҆рмо́съ . Є҆ли́цы дре́внихъ и҆з̾рѣши́хᲂмсѧ сѣ́тей , бра́шна льво́мъ сᲂтре́ны зꙋбы̀ , ра́дꙋемсѧ и҆ раз̾ши́римъ ᲂу҆ста̀ , сло́вᲂмъ плетꙋ́ще ѿ слᲂве́съ пѣ́нїѧ , є҆́же ѡ҆ на́съ ви́дѣсте дарᲂва́нїѧ .= О=у҆мерщве́нїе пе́рвїе насади́выи тва́ри , ѕвѣ́рѧ ѕлᲂдѣ́йственнагѡ вᲂѡ҆бра́жсѧ въ є҆стество̀ . ѡ҆мрача́етсѧ плᲂтски́мъ прише́ствїемъ . ᲂу҆́трꙋ ꙗ҆́вльшꙋсѧ прише́дъ кᲂ влⷣцѣ , сᲂкрꙋши́ти свᲂю̀ вражде́бнꙋю главꙋ̀ . Влече́тъ к̾ себѣ̀ бг҃ᲂзда́ннᲂе є҆стество̀ , ᲂу҆тро́бы мꙋчи́телѧ , пᲂгребе́нїе предѣ́лы . ражда́етсѧ ᲂу҆́бѡ землены́мъ ѡ҆бнᲂвле́нїе , дѣ́лᲂ держа́внᲂ сᲂверша́ѧ влⷣка . прїи́де бᲂ , то́й ѡ҆чи́стити хᲂтѧ̀ .

ѵ҆пако́й . гла́съ , є҃ . Є҆гда̀ ꙗ҆вле́нїемъ свᲂи́мъ прᲂсвѣти́лъ є҆сѝ всѧ́ческаѧ , тᲂгда̀ сла́нᲂе невѣ́рїѧ мо́ре пᲂбѣжѐ . і҆ѡрда́нъ до́лѣ текі́и вᲂзврати́сѧ , къ нб҃сѝ вᲂзвᲂдѧ̀ на́съ . нᲂ высᲂто́ю бжⷭ҇твеныхъ за́пᲂвѣдей твᲂи́хъ сᲂблюдѝ хрⷭ҇тѐ бж҃е , мᲂли́твами бцⷣы , и҆ пᲂми́лꙋй на́съ .

пѣ́снь , д҃ . і҆рмо́съ . Оу҆слы́шахъ гдⷭ҇и гла́съ тво́й и҆́же речѐ , гла́съ вᲂпїю́щагѡ въ пꙋсты́ни , ꙗ҆́кѡ вᲂз̾грѣмѣ̀ над̾ вᲂда́ми мно́гими , твᲂемꙋ̀ свидѣ́тельствꙋѧ сн҃ꙋ . ве́сь бы́въ сꙋ́щемꙋ , дх҃ᲂмъ же вᲂзᲂпѝ , ты̀ є҆сѝ хрⷭ҇то́съ , бж҃їѧ мꙋ́дрᲂсть и҆ си́ла . Ѡ҆чища́емᲂ сл҃нце кто̀ ви́дѣ , прᲂпᲂвѣ́дникъ вᲂпїе́тъ , пресвѣ́тлагѡ є҆стество́мъ , да тебѐ вᲂда́мъ сїѧ́нїе сла́вы ѻ҆́ч҃и , ѻ҆́бразъ прⷭ҇нѡсꙋ́щагѡ ѡ҆мы́ю ; и҆ сѣ́нᲂ сы́и ѻ҆гню̀ прикᲂснꙋ́сѧ твᲂемꙋ̀ бжⷭ҇твꙋ̀ ; ты̀ є҆сѝ хрⷭ҇то́съ , бж҃їѧ мꙋ́дрᲂсть и҆ си́ла .= Ꙗ҆ви́сѧ бжⷭ҇твенᲂе , є҆́же и҆мѣ̀ бл҃гᲂгᲂвѣ́нїе мѡѷсе́й прилꙋ́чьсѧ тебѐ . ꙗ҆́кѡ бᲂ въ кꙋпинѣ́ тѧ вᲂзгла́шша разꙋмѣ̀ , а҆́бїе ѿвратѝ лицѐ . а҆́зъ же ка́кѡ тѧ̀ ви́жꙋ ꙗ҆́снѡ ; и҆лѝ ка́кѡ рꙋко́ю кᲂснꙋ́ тѧ ; ты́ бᲂ є҆сѝ хрⷭ҇то́съ , бж҃їѧ мꙋ́дрᲂсть и҆ си́ла . Д=ш҃е́внᲂе сверша́ѧ мꙋ́дрѣ , и҆ сло́вᲂмъ пᲂчита́емь , бездꙋ́шныхъ стыжꙋ́сѧ . а҆́ще бᲂ крещꙋ́ тѧ , клеве́тна ми є҆́сть ѻ҆гне́мъ дымѧ́щаѧсѧ гᲂра̀ . пᲂбѣ́гшее же мо́ре на́ двᲂе , і҆ѡрда́нъ си́це вᲂзвра́щьсѧ . ты́ бᲂ є҆сѝ хрⷭ҇то́съ , бж҃їѧ мꙋ́дрᲂсть и҆ си́ла .

и҆́нъ , і҆рмо́съ . Свѣ́тᲂмъ блеща́сѧ та́йнагѡ зрѣ́нїѧ , пᲂѧ̀ прᲂро́къ земле́ныхъ ѡ҆бнᲂвле́нїе . вᲂз̾глаша́етъ ꙗ҆зы́кᲂмъ , дх҃ᲂмъ дви́жимᲂмъ , вᲂплᲂще́нїе ꙗ҆влѧ́ѧ неи҆зрече́нна сло́ва . и҆́мже си́льныхъ держа́вы сᲂтро́шасѧ . По́сланъ ѿ ѻ҆ц҃а пресвѣ́тлᲂе сло́вᲂ , но́щи ѿгна́ти ѕлᲂмра́чнᲂе стремле́нїе , и҆ и҆скᲂрени́ти грѧде́ши чл҃кѡмъ грѣ́хъ . сы́ны же привлещѝ твᲂи́мъ кр҃ще́нїемъ бл҃же свѣ́тлы , ѿ стрꙋ́й і҆ѡрда́нскихъ . Са́мᲂе прᲂви́дѣвъ нарече́ннᲂе сло́вᲂ , ꙗ҆́снѡ прᲂпᲂвѣ́дникъ вᲂпїе́тъ тва́ри . се́й пре́жде менѐ , втᲂры́и пло́тїю , сᲂѡ҆бра́зенъ прᲂсїѧ̀ бжⷭ҇твенᲂю си́лᲂю , вражде́бныи на́шъ ѿѧ́ти грѣ́хъ . Па́жить к̾ себѣ̀ живᲂтво́рнꙋ нᲂсѧ̀ , ᲂу҆лᲂвлѧ́етъ ѕмїе́мъ гнѣ́зда текі́и , ѕло́бы мирскі́ѧ низ̾лага́ѧ , бг҃ъ сло́вᲂ . запина́етъ же , запе́ншагᲂ всеми́рныи ро́дъ . сегѡ̀ пᲂтре́бль , ѡ҆чища́етъ тва́рь .

пѣ́снь , є҃ . і҆рмо́съ . І҆с҃ъ живᲂтꙋ̀ нача́льникъ , разрѣши́ти ѡ҆сꙋжде́нїѧ прїи́де , а҆да́ма первᲂзда́ннагѡ . ѡ҆чище́нїѧ же ꙗ҆́кѡ бг҃ъ нетре́бꙋѧ , па́дшагѡ ѡ҆чища́етъ вᲂ і҆ѡрда́нѣ , в̾ не́мже враждꙋ̀ ᲂу҆би́въ , преимꙋ́щь всѧ́къ ᲂу҆́мъ , ми́ръ пᲂдава́етъ . Сше́дшимсѧ без̾ числа̀ лю́демъ , ѿ і҆ѡа́нна крⷭ҇ти́тисѧ , са́мъ пᲂсредѣ̀ и҆́хъ ста̀ . прᲂвᲂзгласи́ же пред̾стᲂѧ́щимъ , кто̀ пᲂказа̀ непᲂкᲂри́вїи , гнѣ́ва ва́мъ ᲂу҆клᲂни́тисѧ , хᲂтѧ́щагѡ бы́ти . плᲂды̀ дᲂсто́йны хрⷭ҇то́ви сᲂтвᲂри́те , настᲂи́тъ бᲂ ны́нѣ , и҆ ми́ръ пᲂдава́етъ . Дѣ́латель же и҆ зижди́тель пᲂсредѣ̀ стᲂѧ̀ , ꙗ҆́кѡ є҆ди́нъ всѣ́хъ срⷣца̀ и҆спыта́етъ , ѡ҆чище́нїѧ же лᲂпа́тꙋ рꙋко́ю прїе́мъ , всеми́рнᲂе гꙋмно̀ премꙋ́дрᲂ разлꙋча́ѧ , непло́дїе палѧ̀ , бл҃гᲂпло́днымъ вѣ́чныи живо́тъ да́рꙋетъ .

и҆́нъ , і҆рмо́съ . Врага̀ те́мна и҆ скве́рнагѡ , ꙗ҆́да ѡ҆чище́нїемъ , дх҃а и҆змᲂве́ни , на но́въ наста́хᲂмъ небла́зненныи пꙋ́ть , ввᲂдѧ́щь в̾ непристꙋ́пнꙋю ра́дᲂсть . є҆ди́нѣмъ пристꙋ́пенъ , и҆́мже бг҃ъ примири́сѧ . Ви́дѣвъ зижди́тель , во́ мрацѣ прегрѣше́нїи плени́цами неи҆збѣ́жными , є҆го́же вᲂѡ҆бразѝ пе́рсты , пᲂставлѧ́етъ пᲂдо́бїе вᲂздви́гъ гᲂрѣ̀ . ны́нѣ вᲂ мнᲂгᲂтекꙋ́щихъ вᲂда́хъ , ѡ҆мыва́ѧ стꙋда̀ дре́внѧгѡ , а҆да́мᲂва ѕла́гѡ нра́ва . Сᲂ бл҃гᲂче́стїемъ притеце́мъ прилѣ́жнѡ , кᲂ и҆сто́чникѡмъ пречⷭ҇тымъ , тече́нїѧ спасе́нагѡ . сло́вᲂмъ смᲂтрѧ́юще , ѿ нетлѣ́нна пᲂчерпа́ла , принᲂсѧ́щїѧ жа́жди бжⷭ҇твеныѧ , ми́рᲂви пребыва́ющїѧ ѿ нежа́дна недꙋ́га .

пѣ́снь , ѕ҃ . і҆рмо́съ . Гла́съ слᲂвесѐ , свѣти́льникъ свѣ́та , денни́ца сл҃нцꙋ прⷣтча . в̾ пꙋсты́ни пᲂка́йтесѧ всѣ́мъ вᲂпїе́тъ лю́демъ и҆ ѡ҆чи́ститесѧ , се́бᲂ пред̾стᲂи́тъ хрⷭ҇то́съ , ѿ тлѝ ми́ръ и҆збавлѧ́ѧй . Ро́ждьсѧ нетлѣ́ннѡ ѿ́ бг҃а и҆ ѻ҆ц҃а , ѿ дв҃ы крᲂмѣ̀ скве́рны вᲂплᲂща́етсѧ хрⷭ҇то́съ . є҆мꙋ́же встꙋ́гъ и҆́же ѿ на́съ слᲂвесѝ сᲂчта́нїѧ , рѣши́ти неꙋдо́бь ᲂу҆чи́тъ прⷣтча , земнᲂро́дныѧ ѿ льстѝ и҆збавлѧ́ѧ . Ѻ҆гне́мъ крⷭ҇ти́тъ кᲂне́чнымъ хрⷭ҇то́съ прᲂти́вныѧ , а҆ не бг҃а мꙋ́дрствꙋющихъ є҆гѡ̀ . дх҃ᲂмъ же ѡ҆бнᲂвлѧ́етъ вᲂдо́ю бл҃гᲂда́ти , разꙋ́мливыѧ бжⷭ҇тва̀ є҆гѡ̀ , ѿ прегрѣше́нїи и҆збавлѧ́ѧ .

и҆́нъ , і҆рмо́съ . И҆́стиннᲂ ꙗ҆́вствᲂва с̾ пресла́внымъ гла́сᲂмъ ѻ҆ц҃ъ , є҆го́же и҆́з̾ чрева ѿры́гнꙋ . є҆́й речѐ , се́й сᲂвᲂзра́стенъ сн҃ъ сы́и свѣтᲂза́ренъ , и҆з̾ гᲂры́ тѧ чл҃ча ро́да . сло́вᲂ же мᲂѐ жи́вᲂ , и҆ чл҃къ прᲂмышле́нїемъ . Ѿ глꙋби́ннагѡ лва̀ , тревече́рнїи стра́нныи прᲂро́къ внꙋ́треннихъ валѧ́ѧсѧ , а҆́бїе прᲂи҆зы́де , па́ки бытїѧ̀ спасе́нїе ѿ ѕмі́ѧ чл҃кᲂᲂу҆бі́ица , всѣ́мъ ꙗ҆влѧ́ѧ в̾ пᲂслѣ́днѧѧ лѣ́та . Ѿве́рстꙋ нб҃ꙋ всесвѣ́тлыхъ писа́нїи , ᲂу҆чени́къ зри́тъ ѿ ѻ҆ц҃а пᲂсыла́емь . пребыва́ющь же дх҃ъ на пречи́стѣмъ сло́вѣ , наше́дъ ꙗ҆́кѡ го́лꙋбь неи҆зрече́ннымъ ѻ҆́бразᲂмъ . лю́демъ же ꙗ҆влѧ́етсѧ , прише́дшимъ кᲂ влⷣцѣ .

кᲂнда́къ . гла́съ , д҃ . Ꙗ҆ви́лсѧ є҆сѝ дне́сь вселе́ннѣй , и҆ свѣ́тъ тво́й гдⷭ҇и зна́менасѧ на на́съ , и҆́же в̾ ра́зꙋмѣ пᲂю́щихъ тѧ̀ , прїи́де и҆ ꙗ҆ви́сѧ свѣ́тъ неприкᲂснᲂве́нныи . и҆́кᲂсъ . Галиле́йскꙋ ꙗ҆зы́кꙋ , заꙋлѡ́нѣ странѣ̀ , и҆ нефѳали́млѣ землѝ . ꙗ҆́кᲂже речѐ пррⷪ҇къ , свѣ́тъ вели́къ вᲂсїѧ̀ хрⷭ҇то́съ . ѡ҆мраче́нымъ свѣтла̀ ꙗ҆ви́сѧ зарѧ̀ , и҆з̾ виѳлїе́ма ѡ҆блиста́ющи , па́че же и҆з̾ мр҃і́и гдⷭ҇ь , все́й вселе́ннѣй вᲂсїѧ́етъ зарѧ̀ сл҃нце пра́вды . тѣ́мже и҆́же ѿ а҆да́ма назі́и , прїиди́те всѝ ѡ҆блече́мсѧ во́нь , да сᲂгрѣ́емсѧ , пᲂкрыва́етъ бᲂ нагі́ѧ , и҆ прᲂсвѣща́етъ те́мныѧ , прїи́де и҆ ꙗ҆ви́сѧ свѣ́тъ неприкᲂснᲂве́нныи .

пѣ́снь , з҃ . і҆рмо́съ . Ю҆́нᲂши вѣ́рныѧ в̾ пе́щь ѻ҆́гненнꙋю влѣ́зша , шꙋмѧ́щь дх҃ъ хла́денъ невреди́мы сᲂхранѝ , и҆ бж҃їѧ а҆́нг҃ла схᲂжде́нїе . тѣ́мже въ пла́мени прᲂхлажда́еми бл҃гᲂда́рственнѡ пᲂѧ́хꙋ , препѣ́тыи ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . Ꙗ҆́кᲂже на́ нб҃си съ тре́петᲂмъ и҆ чꙋ́дᲂмъ , пред̾стᲂѧ́хꙋ вᲂ і҆ѡрда́нѣ си́лы а҆́нг҃льскїѧ , смᲂтрѧ́юще тᲂли́ка бж҃їѧ схᲂжде́нїѧ . ꙗ҆́кѡ держа́и превы́шнихъ во́дъ сᲂста́въ , въ вᲂда́хъ плᲂтᲂно́сецъ стᲂѧ́ше , бг҃ъ ѻ҆ц҃ъ на́шихъ . Ѻ҆́блакъ дре́вле и҆ мо́ре , бжⷭ҇твенагѡ прᲂѡбража́хꙋ креще́нїѧ чꙋ́дᲂ . въ ни́хже дре́внїи крⷭ҇ти́шасѧ , и҆схᲂдѧ́ще зако́ннїи лю́дїе . мо́ре же бѣ̀ ѻ҆́бразъ вᲂдѣ̀ . и҆ ѻ҆́блакъ дх҃ᲂви . и҆́ми же сᲂверша́еми пᲂе́мъ , бл҃гᲂслᲂве́нъ є҆сѝ зᲂвꙋ́ще , гдⷭ҇и бж҃е во́ вѣки . Всѝ вѣ́рнїи , ѡ҆ не́мже сᲂверше́нїе прїѧ́хᲂмъ , бг҃ᲂсло́вѧще немо́лчнѡ сᲂ а҆́нг҃лы , прᲂсла́вимъ ѻ҆ц҃а и҆ сн҃а и҆ дх҃а ст҃а́гѡ . се́бᲂ трⷪ҇ца сᲂста́вми є҆динᲂсꙋ́щнаѧ , є҆ди́нъ же бг҃ъ . є҆мꙋ́же пᲂе́мъ , бл҃гᲂслᲂве́нъ є҆сѝ гдⷭ҇и бж҃е во́ вѣки .

и҆́нъ , і҆рмо́съ . И҆спалѝ вᲂдо́ю ѕмі́евы главы̀ , пе́щнагѡ высо́кагѡ пла́мене , ю҆́нᲂши и҆мꙋ́щи бл҃гᲂчести́выѧ ᲂу҆тѣ́шивыи . ѕлᲂко́знꙋю мглꙋ̀ ѿ грѣха̀ , всю́ же чи́ститъ рᲂсо́ю дх҃о́внᲂю . Тебѐ вᲂѡ҆бража́ѧ а҆сѷрі́йскїи пла́мень , в̾ не́мъ стᲂѧ́щїѧ в̾ ро́сꙋжесѧ прелага́ѧ . тѣ́мже вᲂда̀ ны́нѣ ѡ҆блача́ющи сѐ , пᲂпалѧ́етъ тлю̀ ѕло́бнꙋю хрⷭ҇тѐ , сᲂкрᲂве́нꙋю , ѿ пᲂпᲂлзнᲂве́нїѧ призыва́ющїѧ стезѝ . Раздѣ́льшꙋсѧ і҆ѡрда́нꙋ дре́вле , сквᲂзѣ̀ мо́ре прᲂхо́дѧтъ лю́дїе і҆и҃льстїи . тебѐ крѣ́пкагᲂ сᲂдержа́ща тва́рь , наставлѧ́еми . ны́нѣ вᲂда́ми написꙋ́ѧ , к̾ нетлѣ́ннѣй и҆ пᲂле́знѣй стезѝ . Навыко́хᲂмъ пе́рвїе всепа́гꙋбныи пᲂто́пъ , ми́лᲂстивнѡ тѧ всѣ́хъ въ тлю̀ привестѝ . и҆́мже тревели́каѧ сᲂтвᲂрѧ́ѧ , и҆ стра́ннаѧ . ны́нѣ же пᲂто́пльшаѧ хрⷭ҇тѐ грѣ́хъ бл҃гᲂстра́стїемъ , и҆ чл҃кѡмъ спасе́нїѧ .

пѣ́снь , и҃ . і҆рмо́съ . Та́йнꙋ пресла́внꙋ вавилѡ́нскаѧ пᲂказа̀ пе́щь , и҆сто́чшаѧ хла́дъ . ꙗ҆́кѡ стрꙋѧ̀ хᲂтѧ́ше неприкᲂснᲂве́нныи ѻ҆́гнь , прїѧ́ти і҆ѡрда́нстей и҆ стерпѣ́ти пло́тїю крⷭ҇ти́ма зижди́телѧ . є҆го́же бл҃гᲂслᲂвѧ́тъ лю́дїе , и҆ превᲂзно́сѧтъ вᲂ всѧ̀ вѣ́ки . Ѿлᲂжѝ стра́хъ ве́сь , и҆зба́витель прⷣтчи и҆зречѐ . мнѣ́ же пᲂвини́сѧ , ꙗ҆́кѡ бл҃го́мꙋ , мнѣ̀ пристꙋпѝ , се́бᲂ є҆стество́мъ бы́хъ , мᲂи́мъ пᲂвелѣ́нїемъ пᲂкᲂри́сѧ , и҆ крⷭ҇ти́ мѧ сше́дшагᲂ , є҆го́же бл҃гᲂслᲂвѧ́тъ лю́дїе , и҆ превᲂзно́сѧтъ вᲂ всѧ̀ вѣ́ки . Гл҃ы ꙗ҆́кᲂже ᲂу҆слы́ша крⷭ҇тль влⷣчни , съ тре́петᲂмъ дла́нь прᲂстира́етъ . ѡ҆ба́че же рꙋко́ю кᲂснꙋ́всѧ версѣ̀ зижди́телѧ свᲂегѡ̀ , кре́щшемꙋсѧ вᲂпїѧ́ше , ѡ҆ст҃и́ мѧ , ты́ бᲂ є҆сѝ бг҃ъ мо́й , є҆го́же бл҃гᲂслᲂвѧ́тъ лю́дїе , и҆ превᲂзно́сѧтъ вᲂ всѧ̀ вѣ́ки . Трⷪ҇цы ꙗ҆вле́нїе вᲂ і҆ѡрда́нѣ бы́сть . та́мѡ бᲂ пребжⷭ҇твенᲂе є҆стество̀ ѻ҆ц҃ъ вᲂзгласѝ , се́й креща́емыи сн҃ъ вᲂзлю́бленныи мо́й . дх҃ъ же прїи́де к̾ пᲂдо́бнᲂмꙋ , є҆го́же бл҃гᲂслᲂвѧ́тъ лю́дїе , и҆ превᲂзно́сѧтъ вᲂ всѧ̀ вѣ́ки .

и҆́нъ , і҆рмо́съ . Свᲂбо́дна ᲂу҆́бѡ тва́рь пᲂзнава́етсѧ , сн҃ᲂве же свѣ́та и҆́же дре́вле ѡ҆мраче́ннїи . є҆ди́нъ сто́нетъ тмы̀ пред̾ста́тель . ны́нѣ да бл҃гᲂслᲂви́тъ ве́селᲂ вино́внагѡ , пре́жде страстно́е ꙗ҆зы́къ всенаслѣ́дїе . Ѻ҆́трᲂцы бг҃ᲂви́днѡ вᲂ ѻ҆гнѝ прᲂхлажда́еми заре́ю тремѝ свѣтлᲂстьмѝ , ꙗ҆́вѣ пᲂка́зᲂваше . превы́ше є҆стества̀ смѣше́нїемъ чл҃ческимъ . ѡ҆палѧ́юще рᲂсо́ю , крᲂмѣ̀ всѧ́кїѧ па́гꙋбныѧ льстѝ . Да ᲂу҆бѣли́тсѧ всѧ́кᲂ земно́е є҆стество̀ , ѿ паде́нїѧ ны́нѣ на́ нб҃ᲂ вᲂзвᲂди́мᲂ . є҆мꙋ́же всѧ̀ сᲂблюда́ютсѧ сло́вᲂмъ . текꙋ́щими стрꙋѧ́ми ѡ҆мы́вшисѧ , сᲂгрѣше́нїи пре́жнихъ ᲂу҆бѣжѐ , пресвѣ́тлѡ и҆змᲂве́нѡ . На ѳ҃ пѣ́сни , вжига́ютъ свѣщѝ бра́тїѧ . Честнѣ́йшꙋ непᲂе́мъ .

пѣ́снь , ѳ҃ . припѣ́въ : Велича́й дш҃е мᲂѧ̀ , и҆́же вᲂ і҆ѡрда́нѣ кре́щшагᲂсѧ гдⷭ҇а . і҆рмо́съ . Недᲂꙋмѣ́етъ всѧ́къ ꙗ҆зы́къ хвали́ти тѧ дᲂсто́йнѡ , низꙋмѣ́етъ же ᲂу҆́мъ преми́рныи пѣ́ти тѧ бцⷣе . всѧ́ бᲂ бл҃га́ѧ сꙋ́щи вѣ́рꙋ прїимѝ , и҆́бᲂ любо́вь вѣ́си бж҃їю на́шꙋ . ты́ бᲂ хрⷭ҇тїа́нѡмъ є҆сѝ застꙋ́пнице тѧ велича́емъ [два́жды , с̾ пᲂкло́ны] .

Велича́й дш҃е мᲂѧ̀ , и҆́же вᲂ і҆ѡрда́нѣ кре́щшагᲂсѧ гдⷭ҇а . Дв҃де прїидѝ дх҃ᲂмъ к̾ прᲂсвѣще́ннымъ . ны́нѣ пристꙋпи́те , по́й к̾ бг҃ꙋ вѣ́рᲂю , гл҃ѧ , прᲂсвѣти́тесѧ . сѐ ни́щїи вᲂзва̀ , а҆да́мъ в̾ паде́нїи . и҆́бᲂ тᲂгѡ̀ ᲂу҆слы́ша гдⷭ҇ь , прише́дъ стрꙋѧ́ми і҆ѡрда́нскими , тлѣ́ннагᲂ же ѡ҆бнᲂвѝ .= два́жды .=

Велича́й дш҃е мᲂѧ̀ , и҆́же вᲂ і҆ѡрда́нѣ кре́щшагᲂсѧ гдⷭ҇а . И҆са́їѧ , и҆змы́йтесѧ и҆ ѡ҆чи́ститесѧ гл҃етъ , лꙋка́вствїѧ пре́д̾ гдⷭ҇емъ ѡ҆ста́вите . жа́ждꙋщїи на́ вᲂдꙋ жи́вꙋ и҆ди́те , крᲂпи́тъ бᲂ вᲂдо́ю ѡ҆бнᲂвлѧ́ѧ хрⷭ҇то́съ , пристꙋпа́ющїѧ к̾ немꙋ̀ вѣ́рᲂю , и҆ к̾ живᲂтꙋ̀ нестарѣ́ющемꙋсѧ , креща́етъ дх҃ᲂмъ . два́жды .

Велича́й дш҃е мᲂѧ̀ , и҆́же вᲂ і҆ѡрда́нѣ кре́щшагᲂсѧ гдⷭ҇а . Сᲂблюда́емсѧ бл҃гᲂда́тїю вѣ́рнїи , и҆ печа́тїю . ꙗ҆́кѡ бᲂ гꙋби́телѧ бѣжа́ша пра́га жи́дᲂве , дре́вле ѡ҆крᲂва́влена . та́кѡ и҆ на́мъ , и҆схо́днᲂе бжⷭ҇твенᲂе сѐ , па́ки бытїѧ̀ ба́нѧ бꙋ́детъ . ѿ сю́дꙋ и҆ трⷪ҇цы ᲂу҆́зримъ свѣ́тъ незахᲂди́мыи .= два́жды .=

и҆́нъ , припѣ́въ : Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ , дв҃ꙋ пречⷭ҇тꙋю бцⷣꙋ . и҆́нъ , і҆рмо́съ . ѽ вы́ше ᲂу҆ма̀ ржⷭ҇тва́ ти чꙋде́съ , невѣ́стᲂ пречⷭ҇таѧ , мт҃и бл҃гᲂслᲂве́ннаѧ . є҆ю́же пᲂлꙋчи́вше сᲂверше́ннᲂе спасе́нїе . дᲂсто́йнѡ пᲂе́мъ ꙗ҆́кѡ бл҃гᲂда́телю , да́ры нᲂсѧ́ще пѣ́нїе бл҃гᲂдаре́нїѧ [два́жды , с̾ пᲂкло́ны] .

Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ , дв҃ꙋ пречⷭ҇тꙋю бцⷣꙋ . Оу҆ви́дѣхᲂмъ мѡѷсе́ѡви кꙋпино́ю ꙗ҆вле́наѧ , грѧдѝ стра́нными ᲂу҆ста́вы сᲂдѣ́ланнаѧ . ꙗ҆́кѡ бᲂ спасе́сѧ ѻ҆́гнь нᲂсѧ́щи дв҃аѧ , свѣтᲂно́сна ро́ждьши бл҃гᲂда́телѧ . вᲂ і҆ѡрда́нскихъ же стрꙋѧ́хъ ꙗ҆вле́нна . три́жды .

Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ , дв҃ꙋ пречⷭ҇тꙋю бцⷣꙋ . Ма́жеши сᲂверша́ѧ чл҃ческᲂе сꙋщество̀ , цр҃ю без̾нача́льне дх҃а ѡ҆бще́нїемъ , стрꙋѧ́ми чⷭ҇тыми ѿмы́въ тмы̀ . крѣ́пᲂсть же пᲂсра́мль вᲂз̾вы́шенꙋю , ны́нѣ в̾ беспреста́ннѣй вᲂзда́ти житїѐ .= три́жды .=

та́же , на схо́дѣ , припѣ́въ : Велича́й дш҃е мᲂѧ̀ , и҆́же вᲂ і҆ѡрда́нѣ кре́щшагᲂсѧ гдⷭ҇а . і҆рмо́съ . Недᲂꙋмѣ́етъ всѧ́къ ꙗ҆зы́къ хвали́ти тѧ дᲂсто́йнѡ , низꙋмѣ́етъ же ᲂу҆́мъ преми́рныи пѣ́ти тѧ бцⷣе . всѧ́ бᲂ бл҃га́ѧ сꙋ́щи вѣ́рꙋ прїимѝ , и҆́бᲂ любо́вь вѣ́си бж҃їю на́шꙋ . ты́ бᲂ хрⷭ҇тїа́нѡмъ є҆сѝ застꙋ́пнице тѧ велича́емъ .

припѣ́въ : Велича́й дш҃е мᲂѧ̀ , честнѣ́йшꙋю нбⷭ҇ныхъ во́инствъ , дв҃ꙋ пречⷭ҇тꙋю бцⷣꙋ . і҆рмо́съ . ѽ вы́ше ᲂу҆ма̀ ржⷭ҇тва́ ти чꙋде́съ , невѣ́стᲂ пречⷭ҇таѧ , мт҃и бл҃гᲂслᲂве́ннаѧ . є҆ю́же пᲂлꙋчи́вше сᲂверше́ннᲂе спасе́нїе . дᲂсто́йнѡ пᲂе́мъ ꙗ҆́кѡ бл҃гᲂда́телю , да́ры нᲂсѧ́ще пѣ́нїе бл҃гᲂдаре́нїѧ . пᲂкло́н̾ дᲂ землѝ .

свѣти́ленъ . Ꙗ҆ви́сѧ сп҃съ бл҃гᲂда́ть и҆ и҆́стина , вᲂ стрꙋѧ́хъ і҆ѡрда́нскихъ , и҆ сꙋ́щїѧ вᲂ тмѣ̀ и҆ сѣ́ни спѧ́щїѧ прᲂсвѣти́лъ є҆́сть . и҆́бᲂ прїи́де и҆ ꙗ҆ви́сѧ свѣ́тъ неприкᲂснᲂве́нныи . два́жды . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , а҃ . Свѣ́тъ ѿ́ свѣта , вᲂсїѧ̀ ми́рᲂви хрⷭ҇то́съ сп҃съ на́шъ , ꙗ҆вле́исѧ бг҃ъ . семꙋ̀ лю́дїе пᲂклᲂни́мсѧ . Ка́кѡ тѧ хрⷭ҇тѐ рабѝ влⷣкꙋ дᲂсто́йнѡ пᲂчте́мъ , ꙗ҆́кѡ въ вᲂда́хъ всѣ́хъ на́съ ѡ҆бнᲂви́лъ є҆сѝ . Ты̀ вᲂ і҆ѡрда́нѣ кр҃щьсѧ сп҃се на́шъ , во́ды ѡ҆ст҃и́лъ є҆сѝ , дла́нїю раба̀ рꙋко́ю держи́мь , и҆ стра́сти ми́рꙋ и҆сцѣлѧ́ѧ . ве́лїе та́иньствᲂ ꙗ҆вле́нїѧ твᲂегѡ̀ , чл҃кᲂлю́бче сла́ва тебѣ̀ . И҆́стинныи свѣ́тъ ꙗ҆ви́сѧ , и҆ всѣ́мъ прᲂсвѣще́нїе да́рꙋетсѧ . кр҃ща́етсѧ хрⷭ҇то́съ с̾ на́ми , и҆́же всѧ́кїѧ вы́шши чистᲂты̀ , вни́тїемъ сщ҃е́нїѧ в̾ вᲂда́хъ , и҆ дш҃а́мъ сїѐ ѡ҆чище́нїе быва́етъ . зе́мленᲂ ꙗ҆вле́нᲂе , и҆ вы́ше нб҃съ разꙋмѣва́емᲂе . ба́нею спасе́нїе . вᲂдо́ю дх҃ъ , пᲂгрꙋже́нїѧ ра́ди , и҆́же к̾ бг҃ꙋ на́шъ вᲂсхо́дъ быва́етъ . чꙋде́сна дѣ́ла твᲂѧ̀ , гдⷭ҇и сла́ва тебѣ̀ .

сла́ва . гла́съ , ѕ҃ . Вᲂда́ми і҆ѡрда́нскими ѡ҆дѣ́ѧсѧ сп҃се , ѡ҆дѣѧ́исѧ свѣ́тᲂмъ ꙗ҆́кѡ ри́зᲂю . и҆ преклᲂни́лъ є҆сѝ главꙋ̀ прⷣтчи , и҆́же не́бᲂ и҆змѣ́ривыи пѧ́дїю , да ѡ҆брати́ши ми́ра ѿ льстѝ , и҆ спасе́ши ꙗ҆́кѡ чл҃кᲂлю́бецъ .

и҆ ны́нѣ . гла́съ , в҃ . Дне́сь хрⷭ҇то́съ на і҆ѡрда́нъ прїи́де крⷭ҇ти́тисѧ . дне́сь і҆ѡа́ннъ каса́етсѧ версѣ̀ влⷣчнѣ . си́лы нбⷭ҇ныѧ ᲂу҆жасо́шасѧ , пресла́внᲂе ви́дѧщи та́иньствᲂ . мо́ре ви́дѣ и҆ пᲂбѣжѐ , і҆ѡрда́нъ ви́дѣвъ вᲂзврати́сѧ . мы́ же прᲂсвѣ́щшесѧ вᲂпїе́мъ , сла́ва в̾ вы́шнихъ бг҃ꙋ , и҆ на землѝ ми́ръ , в̾ чл҃цѣхъ бл҃гᲂвᲂле́нїе .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , а҆нтиѳо́нъ , а҃ . ѱало́мъ , рг҃і . Вᲂ и҆схо́дѣ і҆зра́илевѣ ѿ є҆гѵ́пта до́мꙋ і҆а́кѡвлѧ и҆з̾ люді́й ва́рваръ . мл҃твами бцⷣы сп҃се спасѝ на́съ . сти́хъ . Бы́сть і҆ꙋде́ѧ ст҃ы́нѧ є҆гѡ̀ , і҆зра́иль ѻ҆́бласть є҆гѡ̀ . мл҃твами бцⷣы сп҃се спасѝ на́съ . сти́хъ . Мо́ре ви́дѣ и҆ пᲂбѣжѐ , і҆ѡрда́нъ вᲂз̾врати́сѧ вспѧ́ть . мл҃твами бцⷣы сп҃се спасѝ на́съ . сти́хъ . Что́ ти бы́сть мо́ре да пᲂбѣжѐ , и҆ тебѣ̀ і҆ѡрда́нѣ ꙗ҆́кѡ вᲂз̾врати́сѧ вспѧ́ть . мл҃твами бцⷣы сп҃се спасѝ на́съ . Сла́ва . мл҃твами бцⷣы сп҃се спасѝ на́съ . И҆ ны́нѣ . мл҃твами бцⷣы сп҃се спасѝ на́съ .

а҆нтиѳо́нъ , в҃ . ѱало́мъ , рд҃і . Вᲂзлюби́хъ ꙗ҆́кѡ ᲂу҆слы́ша гдⷭ҇ь гла́съ мᲂле́нїѧ мᲂегѡ̀ . спасѝ на́съ сн҃е бж҃їи , крⷭ҇ти́выисѧ вᲂ і҆ѡрда́нѣ пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ . сти́хъ . Ꙗ҆́кѡ приклᲂнѝ ᲂу҆́хᲂ свᲂѐ мнѣ̀ , и҆ во́ дни мᲂѧ̀ призᲂвꙋ̀ . спасѝ на́съ сн҃е бж҃їи . сти́хъ . Ѡ҆бъѧ́ша мѧ̀ бᲂлѣ́зни сме́ртныѧ , бѣды̀ а҆́дᲂвы ѡ҆брѣто́ша мѧ̀ . ско́рбь и҆ бᲂлѣ́знь ѡ҆брѣто́хъ , и҆ и҆́мѧ гдⷭ҇не призва́хъ . спасѝ на́съ сн҃е бж҃їи . сти́хъ . Ми́лᲂстивъ гдⷭ҇ь и҆ пра́веденъ , и҆ бг҃ъ на́шъ ми́лꙋетъ . сла́ва , и҆ ны́нѣ . Є҆динᲂро́дныи сн҃е .

а҆нтиѳо́нъ , г҃ . ѱало́мъ , рз҃і . И҆спᲂвѣ́дайтесѧ гдⷭ҇ви , ꙗ҆́кѡ бл҃гъ ꙗ҆́кѡ в̾ вѣ́къ ми́лᲂсть є҆гѡ̀ . трᲂпа́рь : Вᲂ і҆ѡрда́нѣ кр҃ща́ющꙋтисѧ гдⷭ҇и . сти́хъ . Да рече́тъ ᲂу҆́бѡ до́мъ і҆и҃левъ ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . Вᲂ і҆ѡрда́нѣ кр҃ща́ющꙋтисѧ гдⷭ҇и . сти́хъ . Да рече́тъ ᲂу҆́бѡ до́мъ а҆арѡ́нь , ꙗ҆́кѡ бл҃гъ ꙗ҆́кѡ в̾ вѣ́къ млⷭ҇ть є҆гѡ̀ . Вᲂ і҆ѡрда́нѣ кр҃ща́ющꙋтисѧ гдⷭ҇и . сти́хъ . Да рекꙋ́тъ ᲂу҆́бѡ всѝ бᲂѧ́щїисѧ гдⷭ҇а , ꙗ҆́кѡ бл҃гъ ꙗ҆́кѡ в̾ вѣ́къ млⷭ҇ть є҆гѡ̀ . Вᲂ і҆ѡрда́нѣ кр҃ща́ющꙋтисѧ гдⷭ҇и .

вхо́дъ . Бл҃гᲂслᲂве́нъ грѧды́и во́ и҆мѧ гдⷭ҇не , бл҃гᲂслᲂви́хᲂмъ вы̀ и҆́з̾ дᲂмꙋ гдⷭ҇нѧ , бг҃ъ гдⷭ҇ь и҆ ꙗ҆ви́сѧ на́мъ .

і҆єре́й , пᲂе́тъ : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ сн҃е бж҃їи , крⷭ҇ти́выисѧ вᲂ і҆ѡрда́нѣ пᲂю́щихъ ти , а҆ллилꙋ́їѧ , а҆ллилꙋ́їѧ , а҆ллилꙋ́їѧ .

трᲂпа́рь . гла́съ , а҃ . Вᲂ і҆ѡрда́нѣ кр҃ща́ющꙋтисѧ гдⷭ҇и , трⷪ҇ческᲂе ꙗ҆ви́сѧ пᲂкланѧ́нїе , рᲂди́телевъ бᲂ гла́съ свидѣ́тельствᲂваше тѝ , вᲂзлю́бленнагᲂ тѧ сн҃а и҆мѧнꙋ́ѧ . и҆ дх҃ъ в̾ видѣ́нїи гᲂлꙋби́нѣ , и҆звѣ́ствᲂваше слᲂвесѝ ᲂу҆тверже́нїе , ꙗ҆вле́исѧ хрⷭ҇тѐ бж҃е , и҆ ми́ръ прᲂсвѣще́и сла́ва тебѣ̀ .

сла́ва , и҆ ны́нѣ . кᲂнда́къ . гла́съ , д҃ . Ꙗ҆ви́лсѧ є҆сѝ дне́сь вселе́ннѣй , и҆ свѣ́тъ тво́й гдⷭ҇и зна́менасѧ на на́съ , и҆́же в̾ ра́зꙋмѣ пᲂю́щихъ тѧ , прїи́де и҆ ꙗ҆ви́сѧ свѣ́тъ неприкᲂснᲂве́нныи .

вмѣ́стᲂ же трист҃а́гѡ : Є҆ли́цы вᲂ хрⷭ҇та̀ крⷭ҇ти́стесѧ , вᲂ хрⷭ҇та̀ ѡ҆блеко́стесѧ , а҆ллилꙋ́їѧ .

прᲂки́менъ , ѱл҃о́мъ дв҃дᲂвъ . Бл҃гᲂслᲂве́нъ грѧды́и во́ и҆мѧ гдⷭ҇не , бг҃ъ гдⷭ҇ь и҆ ꙗ҆ви́сѧ на́мъ . сти́хъ . и҆спᲂвѣ́дайтесѧ гдⷭ҇ви ꙗ҆́кѡ бл҃гъ , ꙗ҆́кѡ в̾ вѣ́къ млⷭ҇ть є҆гѡ̀ . а҆пⷭ҇лъ , къ ти́тꙋ . зача́лᲂ , т҃в . а҆ллилꙋ́їѧ . Принеси́те гдⷭ҇ви сн҃ᲂве бж҃їи , принеси́те гдⷭ҇ви сн҃ы ѻ҆́внѧ . сти́хъ . гла́съ гдⷭ҇нь на вᲂда́хъ , бг҃ъ сла́вы вᲂз̾гремѣ̀ гдⷭ҇ь на вᲂда́хъ мно́гахъ .= є҆ѵⷢ҇а́лїе , ѿ= матѳе́ѧ . зача́лᲂ , ѕ҃ . прича́стенъ , ꙗ҆ви́сѧ бл҃гᲂда́ть бж҃їѧ спаси́тельнаѧ всѣ́мъ чл҃кѡмъ .

на трапе́зѣ быва́етъ ᲂу҆тѣше́нїе бра́тїи ве́лїе . ꙗ҆́мы , ры́бꙋ , и҆ ма́слᲂ . и҆ пїе́мъ , пᲂ г҃ , ча́ши ме́дꙋ . мирсті́иже мѧ́сᲂ , а҆́ще бꙋ́детъ и҆ в̾ сре́дꙋ и҆лѝ в̾ пѧто́къ . и҆ чте́тсѧ сло́вᲂ златᲂꙋ́стᲂвᲂ . є҆мꙋ́же нача́лᲂ . всѝ мы̀ вᲂ бл҃гᲂдꙋ́шїи .