МЦⷭ҇А И҆Ю́ЛѦ ВЪ И҃ ДН҃Ь

ꙗ҆вле́нїе и҆ко́ны прест҃ы́ѧ влⷣчцы на́шеѧ бцⷣы во́ градѣ каза́ни . =Вече́ръ . блаже́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , на́ и҃ . гла́съ , д҃ . поⷣ . ꙗ҆́=кѡ до́блѧ . Ꙗ҆́кѡ прекра́сна сло́вꙋ пᲂла́та , и҆ прⷭ҇то́лъ свѣтᲂнᲂси́выи бцⷣе влⷣчце . сᲂпресто́льнᲂе бᲂ сло́вᲂ ѻ҆́ч҃ее , вᲂ свᲂи́хъ лᲂжесна́хъ вмѣсти́ла є҆сѝ . и҆ ро́ждьши свѣ́тъ незахᲂди́мыи , на́ше ѡ҆мраче́нїе прᲂсвѣти́ла є҆сѝ . ле́сть ѕмїинꙋ̀ ѿгна́ла є҆сѝ , и҆ тлѣ́нїе пᲂтреби́ла є҆сѝ . живо́тъ вѣ́чныи ми́рꙋ дарᲂва́ла є҆сѝ , твᲂи́мъ ржⷭ҇тво́мъ . врата̀ раю̀ ѿве́рзла є҆сѝ . и҆ всѧ̀ бл҃га́ѧ чл҃ческᲂмꙋ є҆стествꙋ̀ дарᲂва́ла є҆сѝ . нᲂ и҆ ны́нѣ гжⷭ҇е твᲂи́ми мл҃твами , и҆збавлѧ́й рабы̀ свᲂѧ̀ ѿ всѣ́хъ бѣ́дъ . Ꙗ҆́кѡ вели́ка сꙋ́щи цр҃ца и҆ мт҃и , на́ нб҃си превысо́кихъ си́лъ цр҃ю , пречи́стѣи сѝ рꙋ́цѣ прᲂсте́рши , мᲂле́бнѡ за ны̀ пред̾стᲂи́ши . и҆ на землѝ ꙗ҆́кѡ держа́внаѧ пᲂмо́щница , бжⷭ҇твенᲂю сѝ и҆ко́нᲂю ,꙳ и҆ дх҃ᲂмъ с̾ твᲂи́ми рабы̀ пребыва́еши , и҆ ве́селѡ спаса́еши , и҆ и҆збавлѧ́еши ѿ всѧ́кїѧ напа́сти , бл҃гᲂче́стнѡ бцⷣꙋ тѧ̀ и҆спᲂвѣ́дающихъ . Ꙗ҆́кѡ златᲂза́рныи ра́й , и҆ мѣ́стᲂ прекра́снᲂе , и҆ бг҃ᲂпрᲂсвѣще́ннᲂе , и҆ дре́вᲂ ст҃о́е , дх҃ᲂмъ ст҃ы́мъ ѡ҆сѣне́нᲂе , вмѣсти́лище свѣ́та невече́рнѧгѡ , тебѐ свѣ́дꙋщимъ , ꙗ҆́снѡ немерца́ющисѧ бжⷭ҇твенᲂю лꙋче́ю , младе́нцемъ твᲂи́мъ свѣ́тиши все́й тва́ри . є҆го́же мᲂлѧ́щи цр҃це бцⷣе , спасѝ лю́ди , к̾ тебѣ̀ прибѣга́ющїѧ ѿ всѣ́хъ бѣ́дъ . Ꙗ҆́кѡ пᲂрфи́рᲂю цр҃ьскᲂю и҆ вѵ́ссᲂмъ , и҆ко́нᲂю твᲂе́ю , и҆ твᲂегѡ̀ сн҃а бцⷣе , цр҃кви бж҃їѧ прᲂсвѣти́вшисѧ , красꙋ́етсѧ чꙋдесы̀ . дне́сь ꙗ҆вле́нїемъ всѣ́хъ сᲂзыва́етъ пра́з̾днᲂвати . па́че сїѧ́нїѧ сл҃нчнагᲂ , бл҃гᲂда́тїю ст҃а́гѡ дх҃а блиста́ющисѧ . на бᲂлѧ́щихъ и҆ недꙋ́жныхъ и҆сцѣле́нїѧ , и҆сто́чники и҆стᲂча́ющи . и҆ всѣ́мъ да́рꙋющи бᲂга́тꙋю млⷭ҇ть .

и҆́ны стихѣ́ры . гла́съ , и҃ . Высо́кїи цр҃ю непᲂсти́жимыи , сᲂ ѻ҆ц҃е́мъ сѣдѧ́и на прⷭ҇то́лѣ , и҆ бжⷭ҇твенымъ дх҃ᲂмъ , бл҃гᲂвᲂли́лъ є҆сѝ рᲂди́тисѧ на землѝ , ѿ дв҃цы неи҆скꙋсᲂбра́чныѧ і҆с҃е . ᲂу҆щедрѧ́ѧ свᲂѐ сᲂзда́нїе чл҃ческᲂе є҆стество̀ , неи҆зрече́нными дᲂбро́тами . прїимѝ твᲂеѧ̀ мт҃ре , принᲂси́мыѧ тѝ за ны̀ мл҃твы , и҆ не пᲂмѧнѝ без̾зако́нїи на́шихъ . нᲂ пᲂми́лꙋй и҆ спасѝ дш҃а на́ша ꙗ҆́кѡ милᲂсе́рдъ . два́жды . Преклᲂни́въ нб҃са цр҃ь сла́вы , сни́де ѡ҆бнᲂви́ти а҆да́ма , престꙋпле́нїемъ всегѡ̀ и҆стлѣ́вшагѡ , всели́тисѧ в̾ тѧ̀ чи́стаѧ дв҃ᲂ . и҆ рᲂди́сѧ ключа̀ дв҃ьства нерꙋши́въ . и҆ на рꙋкꙋ̀ твᲂе́ю смире́нъ младе́нецъ , и҆́же а҆рха́нг҃лѡмъ цр҃ь нᲂша́шесѧ . и҆ ны́нѣ твᲂю̀ мᲂли́твꙋ прїе́млетъ , и҆ прᲂше́нїе твᲂѐ вᲂ все́мъ и҆спᲂлнѧ́етъ бцⷣе , ꙗ҆́кѡ тво́й сн҃ъ и҆ бг҃ъ . є҆мꙋ́же ᲂу҆се́рднѡ мᲂли́сѧ , да спасе́тъ дш҃а на́ша ꙗ҆́кѡ млрⷭ҇дъ . Па́че ски́нїи мѡѷсе́ѡвы , пᲂ ѻ҆́бразꙋ нбⷭ҇нᲂмꙋ сᲂтвᲂре́ныѧ . всю́ тѧ бг҃ъ ѡ҆ст҃и́лъ є҆́сть бцⷣе , дх҃ᲂмъ ст҃ы́мъ ве́сь всели́сѧ в̾ тѧ̀ , всегѡ̀ челᲂвѣ́ка ѡ҆живѝ . тѣ́мъ и҆ твᲂегѡ̀ ѻ҆́браза и҆ко́на , па́че а҆арѡ́нѧ кїѡ́та , напо́лнисѧ бл҃гᲂда́ти бж҃їѧ , и҆стᲂча́етъ ѡ҆сщ҃е́нїе дш҃а́мъ и҆ тѣлесе́мъ . и҆ и҆́же любе́знѡ пᲂклᲂнѧ́ющесѧ , про́симъ ѿ тебѐ вели́кїѧ ми́лᲂсти . да спасе́ши дш҃а на́ша , бл҃гᲂслᲂве́наѧ пᲂмо́щнице .

сла́ва , и҆ нн҃ѣ . гла́съ , и҃ . Прїидѣ́те вᲂз̾ра́дꙋемсѧ , держа́внѣй застꙋ́пницѣ ро́да на́шегѡ цр҃цѣ бцⷣѣ . прїидѣ́те къ ти́хᲂмꙋ є҆ѧ̀ чꙋ́днᲂмꙋ пᲂчита́емꙋ а҆́нг҃лы честно́мꙋ пᲂклᲂни́мсѧ ѻ҆́бразꙋ . дае́тъ бᲂ вѣ́рнымъ незави́стныѧ да́ры цѣле́бныѧ ми́лᲂсти , ѿ неи҆стᲂщи́магѡ и҆сто́чника ст҃ы́ѧ и҆ко́ны , неѡ҆скꙋ́днᲂю бл҃гᲂда́тїю и҆стᲂча́ющи . тмы̀ и҆збавлѧ́етъ на́съ , и҆скꙋше́нїи и҆ бѣ́дъ , и҆ всѧ́кᲂгѡ грѣха̀ , бл҃гᲂче́стнѡ бг҃ᲂпрїѧ́тнѡ прᲂславлѧ́ющихъ и҆ чтꙋ́щихъ , свѣ́тлᲂе и҆ чꙋ́днᲂе бг҃ᲂмт҃ре ст҃ы́ѧ и҆ко́ны ꙗ҆вле́нїе , вᲂспѣва́емъ зᲂвꙋ́ще . ра́дꙋисѧ любе́зныи ми́рꙋ пᲂмо́щницы на́шеѧ ѻ҆́бразъ , вᲂ спасе́нїе дш҃а́мъ на́шимъ . та́же , вы́хᲂдъ . прᲂки́менъ , дню̀ .

Ѿ= бытїѧ̀ , чте́нїе .=

И҆зы́де і҆а́кѡвъ ѿ стꙋденца̀ клѧ́твеннагѡ , и҆ и҆́де в̾ харра́нь , и҆ ѡ҆брѣ́те мѣ́стᲂ и҆ ста̀ тꙋ̀ . заше́дшꙋ же сл҃нцꙋ , взѧ́тъ ѿ ка́менїѧ мѣ́ста тᲂгѡ̀ , и҆ пᲂлᲂжѝ є҆̀ в̾ вᲂз̾гла́вїе себѣ̀ . и҆ спа̀ на мѣ́стѣ то́мъ , и҆ со́нъ ви́дѣ . и҆ сѐ лѣ́ствица ᲂу҆твержена̀ на землѝ , є҆́й же глава̀ дᲂсѧза́ше дᲂ небесѐ . и҆ а҆́нг҃ли бж҃їи вᲂз̾хᲂжда́хꙋ , и҆ низ̾хᲂжда́хꙋ пᲂ не́й . гдⷭ҇ь же ᲂу҆твержа́шесѧ на не́й , и҆ речѐ , а҆́зъ бг҃ъ а҆враа́мѡвъ ѻ҆ц҃а твᲂегѡ̀ , и҆ бг҃ъ і҆саа́кѡвъ , небо́йсѧ . землѧ̀ на не́й же ты̀ спи́ши , тебѣ̀ да́мъ ю҆̀ , и҆ сѣ́мени твᲂемꙋ̀ . и҆ бꙋ́детъ сѣ́мѧ твᲂѐ , ꙗ҆́кѡ пѣсо́къ земны́и , и҆ распрᲂстрани́тсѧ на́ мᲂре , и҆ на ли́вꙋ , на сѣ́веръ , и҆ вᲂсто́къ . и҆ бл҃гᲂслᲂвѧ́тсѧ ѡ҆ тебѣ̀ всѧ̀ кᲂлѣ́на земна́ѧ , и҆ ѡ҆ сѣ́мени твᲂе́мъ . и҆ сѐ а҆́зъ с̾ тᲂбо́ю , сᲂхранѧ́ѧи тѧ̀ на всѧ́кᲂмъ пꙋтѝ , а҆́мᲂже а҆́ще по́йдеши . и҆ вᲂз̾вращꙋ́ тѧ в̾ зе́млю сїю̀ , ꙗ҆́кѡ не ѡ҆ста́влю тебѐ , до́ндеже сᲂтвᲂри́ти ми всѧ̀ є҆ли́ка гл҃ахъ тѝ . и҆ вᲂста́въ і҆а́кѡвъ ѿ сна̀ свᲂегѡ̀ , и҆ речѐ , ꙗ҆́кѡ є҆́сть гдⷭ҇ь на мѣ́стѣ се́мъ , а҆́зъ же невѣ́дѣхъ . и҆ ᲂу҆бᲂѧ́сѧ , и҆ речѐ , ꙗ҆́кѡ стра́шнᲂ мѣ́стᲂ сѐ , нѣ́сть сѐ , нᲂ до́мъ бж҃їи , и҆ сі́ѧ врата̀ нбⷭ҇наѧ .

Ѿ= пррⷪ҇чества і҆єзекі́илева , чте́нїе .=

Бꙋ́детъ ѿ ѻ҆сма́гѡ днѐ и҆ про́чее , сᲂтвᲂрѧ́тъ і҆єре́и , на ѻ҆лтарѝ всесᲂжже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на вᲂсто́къ , и҆ сїѧ̀ бѧ́хꙋ затвᲂре́на . и҆ речѐ гдⷭ҇ь кᲂ мнѣ̀ , врата̀ сїѧ̀ затвᲂре́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквᲂзѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затвᲂре́на . занѐ и҆гꙋ́менъ се́й сѧ́детъ в̾ ни́хъ снѣ́сти хлѣ́бъ . пᲂ пꙋтѝ є҆ла́мскихъ вра́тъ вни́детъ , и҆ пᲂ пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

Ѿ= при́тчей , чте́нїе .=

Премꙋ́дрᲂсть сᲂзда̀ себѣ̀ хра́мъ , и҆ ᲂу҆твердѝ сто́лпъ се́дмь . закла̀ свᲂѧ̀ же́ртвенаѧ , и҆ черпа̀ в̾ ча́ши свᲂе́й вино̀ , и҆ ᲂу҆гᲂто́ва свᲂю̀ трапе́зꙋ . пᲂсла̀ свᲂѧ̀ рабы̀ , сᲂзыва́ющи с̾ высо́кимъ прᲂпᲂвѣ́данїемъ на ча́шꙋ , гл҃ющи , и҆́же є҆́сть безꙋ́менъ , да ᲂу҆клᲂни́тсѧ кᲂ мнѣ̀ . и҆ тре́бꙋющимъ ᲂу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ є҆́же че́рпахъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрᲂсть , да пᲂживетѐ . и҆спра́вите вѣ́дѣнїи въ ра́зꙋмѣ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧи же нечести́вагᲂ пᲂрече́тъ себѐ . ѡ҆бличе́нїе бᲂ нечести́вᲂмꙋ мᲂзо́лїе є҆мꙋ̀ . не ѡ҆блича́й ѕлы́хъ , да не вᲂз̾ненави́дѧтъ тебѐ . ѡ҆блича́й премꙋ́дра , и҆ вᲂзлю́битъ тѧ . да́й премꙋ́дрꙋ винꙋ̀ , и҆ премꙋ́дрѣе бꙋ́детъ . сказа́й пра́веднᲂмꙋ , и҆ прилᲂжи́тъ прїима́ти . зача́лᲂ премꙋ́дрᲂсти , стра́хъ гдⷭ҇нь , и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га . си́мъ бᲂ ѻ҆́бразᲂмъ пᲂживе́ши мно́гѡ лѣ́тъ , и҆ прилᲂжа́т̾тисѧ лѣ́та живᲂтꙋ̀ .

На литі́и , стихѣ́ры . гла́съ , в҃ . Ꙗ҆́кѡ вᲂи́стинꙋ дре́внѧгѡ кїѡ́та пречестнѣ́е , є҆гда̀ дв҃дъ со́бравъ чи́ны ликᲂствᲂва́ше , па́че ны́нѣ бжⷭ҇твенаѧ бг҃ᲂро́дичнаѧ и҆ко́на . є҆́йже пред̾стᲂѧ́тъ ст҃ы́хъ сᲂбо́ри , с̾ чи́ньми а҆́нг҃лъ . цр҃и́ же и҆ кн҃зи , и҆ всѐ хрⷭ҇тᲂи҆мени́тыхъ люде́й мно́жествᲂ , дᲂсто́йнѡ бл҃жа́тъ мт҃рь бж҃їю . и҆ прᲂславлѧ́ютъ рабᲂлѣ́пнᲂ , и҆ чтꙋ́тъ и҆ пᲂкланѧ́ютсѧ . и҆ мо́лѧт̾тисѧ по́ бз҃ѣ , да ми́ръ ᲂу҆мири́ши въ правᲂсла́вїи , и҆ цр҃ьскїѧ скѵ́петры ᲂу҆тверди́ши . и҆ спасе́ши ѿ всѣ́хъ ѕѡ́лъ твᲂѧ̀ рабы̀ , ꙗ҆́кѡ є҆ди́на бл҃гᲂслᲂве́наѧ . Пред̾стᲂѧ́тъ тѝ гжⷭ҇е бцⷣе , пред̾ и҆ко́нᲂю пречⷭ҇тагѡ ѻ҆́браза , ст҃ль сᲂсло́вїе . цр҃їе и҆ кн҃зи , и҆ всѝ лю́дїе , и҆́нᲂцы и҆ прᲂсті́и . вѣ́дꙋще тѧ̀ вᲂи́стинꙋ пᲂмо́щницꙋ си́льнꙋ и҆ непᲂбѣди́мꙋ , мᲂле́нїѧ принᲂси́ти , ѿ всеѧ̀ дꙋшѝ , пᲂд̾виза́ютъ и҆ бдѧ́тъ на мл҃твꙋ к̾ бг҃ꙋ , тре́бꙋюще твᲂеѧ̀ по́мᲂщи . да вᲂз̾дѣ́жеши бг҃ᲂно́снїи сѝ рꙋ́цѣ , и҆ мо́лиши за́ миръ . вᲂньмѝ и҆ ᲂу҆слы́ши влⷣчце , и҆ пᲂда́ждь ᲂу҆тѣше́нїе рабо́мъ свᲂи́мъ , да́же не ѡ҆дᲂлѣ́ютъ ны̀ грѣхѝ на́ша тѧ́жкїѧ и҆ лю́тыѧ . твᲂеѧ́ бᲂ всегда̀ тре́бꙋемъ всѝ по́мᲂщи . гла́съ , и҃ . Пе́рвѣй написа́вшисѧ твᲂегѡ̀ ѻ҆́браза и҆ко́нѣ , є҆ѵⷢ҇а́льскихъ та́инъ бл҃гᲂвѣ́стникᲂмъ , и҆ к̾ тебѣ̀ цр҃цѣ принесе́нѣ . да ᲂу҆сво́иши тꙋ̀ , и҆ си́льнꙋ сᲂдѣ́лаеши спастѝ чтꙋ́щихъ тѧ̀ . и҆ пᲂра́дᲂвасѧ ꙗ҆́кѡ сы́и ми́лᲂстива , спасе́нїю на́шемꙋ сᲂдѣ́тельница . ꙗ҆́кѡ ᲂу҆ста̀ и҆ гла́съ и҆ко́нѣ бы́вши . ꙗ҆́кᲂже и҆ бг҃а внегда̀ зачина́ющи во́ чревѣ , пѣ́снь вᲂспѣ́ла є҆сѝ . сѐ ѿ ны́нѣ бл҃жа́тъ мѧ̀ всѝ ро́ди . и҆ на тꙋ̀ зрѧ́щи глаго́лѧ вкꙋ́пѣ и҆ со́ властїю , с̾ си́мъ ѻ҆́бразᲂмъ бл҃гᲂда́ть мᲂѧ̀ и҆ си́ла . и҆ мы̀ вᲂи́стинꙋ вѣ́рꙋемъ , ꙗ҆́кѡ сѐ рекла̀ є҆сѝ гжⷭ҇е , си́мъ ѻ҆́бразᲂмъ с̾ ва́ми є҆́смь . є҆́йже бл҃гᲂгᲂвѣ́йнѡ пред̾стᲂѧ́ще , пᲂклᲂнѧ́емтисѧ рабѝ твᲂѝ . пᲂсѣтѝ на́съ твᲂи́ми мт҃рьними щедро́тами . гла́съ , з҃ . Гᲂра̀ є҆сѝ вели́каѧ и҆ пресла́внаѧ , па́че гᲂры̀ сина́йскїѧ бцⷣе . ѻ҆на́ бᲂ нетерпѧ́щи сни́тїѧ сла́вы бж҃їѧ , вᲂ ѻ҆́бразѣхъ и҆ сѣ́нехъ , ѻ҆гне́мъ вᲂз̾гара́шесѧ , и҆ гро́ми и҆ мо́лнїѧ та́мѡ бы́ша . ты́же всегѡ̀ в̾ себѣ̀ бжⷭ҇твенагѡ ѻ҆гнѧ̀ сꙋ́щи бж҃їѧ сло́ва , во́ чревѣ неѡ҆па́льнѡ нᲂси́ла є҆сѝ , и҆ ѿ сᲂсцꙋ̀ твᲂе́ю млеко́мъ пита́ла є҆сѝ , ма́нїемъ нᲂсѧ́щагѡ всѧ̀ . и҆ мт҃рьне дерзнᲂве́нїе к̾ немꙋ̀ и҆мꙋ́щи , пᲂмᲂзѝ влⷣчце вѣ́рнѡ пра́з̾днꙋющимъ тво́й честны́и пра́з̾дникъ , и҆ незабꙋ́ди ми́лᲂстивнѡ пᲂсѣща́ющи . прїѧ́ла є҆сѝ ѿ́ бг҃а да́ръ стро́ити и҆ пᲂкрыва́ти , хрⷭ҇тᲂи҆мени́тᲂе ста́дᲂ рабы̀ свᲂѧ̀ . сла́ва , и҆ нн҃ѣ . гла́съ , ѕ҃ . Тебѣ̀ всѝ ро́ди чл҃честїи , хва́льныѧ да́ры прино́сѧтъ влⷣчце , и҆ мо́лѧтсѧ ꙗ҆́кѡ цр҃цѣ и҆ мт҃ри бж҃їи . прⷪ҇рцы тѧ премꙋ́дрѡ прᲂпᲂвѣ́даша . лев̾ви́ти бл҃гᲂслᲂви́ша . а҆пⷭ҇ли и҆ мч҃нцы и҆спᲂвѣ́даша . цр҃їе и҆ кн҃зи пᲂклᲂнѧ́ютсѧ . ст҃ли прᲂпᲂвѣ́даютъ . и҆́нᲂцы и҆ прᲂсті́и бл҃гᲂгᲂвѣ́ютъ . бᲂга́тїи и҆ ᲂу҆бо́зїи , си́рыѧ и҆ вдᲂви́цы , и҆ всѧ́къ во́зрастъ , и҆ всѧ́кѡ приспѣ́ѧнїе , ста́рческᲂе и҆ младе́нческᲂе , пᲂд̾ кро́въ тво́й держа́вныи с̾ вѣ́рᲂю прибѣга́емъ . пᲂкры́й и҆ сᲂблюдѝ гжⷭ҇е мл҃твами сѝ , и҆ спасѝ ѿ бѣ́дъ дш҃а на́ша .

На стихо́внѣ , стⷯры . гла́съ , а҃ . Вмѣсти́лище чи́стᲂе , свѣ́та пречⷭ҇тагѡ бцⷣе . ка́кѡ тѧ̀ рабѝ дᲂсто́йнѡ вᲂспѣва́емъ . ꙗ҆́кѡ ꙗ҆вле́нїемъ пречⷭ҇тыѧ тѝ и҆ко́ны , и҆ превѣ́чнагѡ младе́нца всѣ́хъ ѡ҆свѣща́еши .

сти́хъ : пᲂмѧнꙋ̀ и҆́мѧ твᲂѐ ,꙳ вᲂ всѧ́кᲂмъ ро́дѣ и҆ ро́дѣ . Ѽ дв҃ᲂ нескве́рнаѧ , бг҃ᲂра́дᲂваннаѧ . что́ ти тᲂгда̀ такᲂво̀ бл҃гᲂдаре́нїе принесе́мъ . ꙗ҆́кѡ бл҃же́ннагѡ тѝ ржⷭ҇тва̀ всесїѧ́ющею лꙋче́ю , всѣ́хъ ѿ тлѣ́нїѧ к̾ жи́зни вᲂз̾вела̀ є҆сѝ .

сти́хъ : лицꙋ̀ твᲂемꙋ̀ пᲂмо́лѧтсѧ ,꙳ бᲂга́тїи лю́дьстїи . Ѽ дв҃ᲂ гжⷭ҇е мт҃и зижди́телева . нбⷭ҇нымъ є҆сѝ чинѡ́мъ ра́дᲂванїе . и҆ чл҃ческᲂмꙋ ро́дꙋ бл҃гᲂслᲂве́наѧ пᲂмо́щница . мᲂлѝ ѡ҆ спасе́нїи дꙋ́шъ на́шихъ .

сла́ва , и҆ нн҃ѣ . гла́съ , и҃ . Вᲂспᲂе́мъ лю́дїе свѣ́тлѡ дв҃дскꙋю пѣ́снь , ѻ҆трᲂкᲂви́цѣ невѣ́стѣ бж҃їи , и҆ мт҃ри цр҃ѧ хрⷭ҇та̀ . пред̾ста̀ цр҃ца ѡ҆деснꙋ́ю тебѣ̀ влⷣкᲂ , рѧ́сны златы́ми ѡ҆дѣ́ѧна , и҆ преꙋкра́шена бжⷭ҇твеными бл҃гᲂлѣ́пᲂтами . сїю̀ ᲂу҆́бѡ ꙗ҆́кѡ и҆збра́ннꙋю , и҆ до́брꙋю в̾ жена́хъ , па́че всегѡ̀ ми́ра ᲂу҆дᲂбри́въ , бл҃гᲂвᲂлѝ рᲂди́тисѧ и҆з̾ неѧ̀ , вели́кїѧ ра́ди млⷭ҇ти . и҆ сїю̀ пᲂмо́щницꙋ лю́демъ свᲂи́мъ дарᲂва̀ , спаса́ти и҆ пᲂкрыва́ти ѿ бѣ́дъ , всемᲂгꙋ́щею тѝ и҆ бжⷭ҇твенᲂю си́лᲂю . є҆ѧ́же мᲂли́твами хрⷭ҇тѐ бж҃е пᲂми́лꙋй на́съ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Застꙋ́пнице ᲂу҆се́рднаѧ мт҃и бг҃а вы́шнѧгѡ , за всѣ́хъ мо́лиши сн҃а свᲂегѡ̀ , хрⷭ҇та̀ бг҃а на́шегѡ . всѣ́мъ твᲂри́ши спасти́сѧ , в̾ держа́вныи тѝ пᲂкро́въ прибѣга́ющимъ . всѣ́хъ на́съ застꙋпѝ гжⷭ҇е цр҃це , и҆́же в̾ напа́стѣхъ и҆ ско́рбѣхъ , и҆ в̾ бᲂлѣ́знехъ ѡ҆бремене́ныхъ грѣхѝ мно́гими , пред̾стᲂѧ́щїѧ и҆ мᲂлѧ́щїѧтисѧ ᲂу҆ми́льнᲂю дш҃е́ю , и҆ сᲂкрꙋше́ннымъ срⷣцемъ , пречи́стᲂмꙋ твᲂемꙋ̀ ѻ҆́бразꙋ , и҆ чꙋдᲂтво́рнѣй и҆ко́нѣ , сᲂ слеза́ми невᲂзвра́тнѡ наде́ждꙋ и҆мꙋ́ще на тѧ̀ , и҆зба́витисѧ ѿ всѣ́хъ ѕо́лъ . всѣ́мъ пᲂле́знаѧ да́рꙋй , и҆ всѧ̀ спасѝ бцⷣе дв҃ᲂ . ты́ бᲂ є҆сѝ бжⷭ҇твеныи пᲂкро́въ рабо́мъ твᲂи́м̾ .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . Пᲂ а҃ , стихᲂло́гїи , сѣда́ленъ . гла́съ , г҃ .

Лю́дїе бл҃гᲂчести́вїи , правᲂвѣ́рнїи сᲂбо́ри хрⷭ҇тᲂи҆мени́тыѧ , пристꙋпи́те вѣ́рнѡ всѝ , бжⷭ҇твенᲂмꙋ припа́дающе бж҃їѧ мт҃ре ѻ҆́бразꙋ , и҆́же на и҆ко́нѣ . и҆сцѣле́нїе бᲂлѧ́щимъ , ра́дᲂстнѡ пᲂдава́етъ . ᲂу҆ѧзвлѧ́етъ же ѕлᲂсла́вныхъ , ꙗ҆́кѡ стрѣла̀ ѿ́ лꙋка . на́съ всѣ́хъ веселѧ́щи свѣтᲂви́днѡ . и҆ бл҃гᲂда́тїю ѡ҆зарѧ́юще мл҃твами є҆ѧ̀ . сла́ва , и҆ нн҃ѣ . Всю́ тѧ бг҃ъ ѡ҆ст҃и́лъ є҆́сть дв҃ꙋ до́брꙋю , и҆ непᲂро́чнꙋю в̾ жена́хъ прᲂро́ки прᲂѡ҆брази́въ че́стнѡ . і҆єре́и бл҃гᲂслᲂви́въ , вᲂ ст҃а́ѧ ст҃ы́хъ вселѝ . а҆́нг҃лѡмъ вᲂспита́въ , с̾ нб҃сѐ пи́щꙋ хлѣ́бъ по́давъ . са́мъ же преблагі́и , є҆динᲂро́днᲂе бг҃ъ сло́вᲂ , всели́сѧ в̾ тѧ̀ , и҆ пло́тїю про́йде и҆з̾ тебѐ . тѣ́мжетисѧ пᲂкланѧ́емъ и҆ чте́мъ , ꙗ҆́кѡ вᲂи́стинꙋ и҆́стиннꙋю сꙋ́щꙋю бцⷣꙋ .

Пᲂ в҃ , стихᲂло́гїи , сѣда́ленъ . гла́съ , д҃ . Да ликᲂствꙋ́етъ свѣ́тлѡ вѣ́рныхъ всѐ мно́жествᲂ . рыда́етъ же бѣсо́вскᲂе во́инствᲂ , ви́дѧще мнѡгᲂи҆ме́нныѧ сїѧ́юща пра́здники бж҃їѧ мт҃ре , ᲂу҆бл҃жа́емꙋ бж҃їю мт҃рь , бжⷭ҇твеными пѣ́сньми . и҆дѣ́же бᲂ бг҃ᲂпрїѧ́тнѡ сла́витсѧ , пребл҃гᲂслᲂве́наѧ бцⷣа влⷣчца , бг҃ᲂи҆з̾бра́ннаѧ ѻ҆трᲂкᲂви́ца , непрїѧ́зни паде́нїе . хрⷭ҇тїа́нᲂмъ же крѣ́пкᲂе ᲂу҆тверже́нїе . сла́ва , и҆ ны́нѣ . Ѽ всебл҃гᲂслᲂве́наѧ бцⷣе влⷣчце , бг҃ᲂи҆з̾бра́ннаѧ ѻ҆трᲂкᲂви́це . свѣ́тлᲂе прᲂро́ческᲂе сбытїѐ . а҆пⷭ҇льскаѧ пᲂхвало̀ , и҆ мч҃нческᲂе и҆спᲂвѣ́данїе и҆ вѣ́нче . а҆́нг҃лы что́маѧ , и҆ чл҃ческими ро́ды мнѡгᲂпѣ́таѧ . и҆ всегѡ̀ ми́ра вᲂжделѣ́ннаѧ пᲂмо́щнице , и҆зба́ви рабы̀ свᲂѧ̀ ѡ҆сꙋжде́нїѧ бꙋ́дꙋщагѡ , и҆ є҆́зера ѻ҆́гненагѡ , є҆ди́на бл҃гᲂслᲂве́наѧ .

Пᲂ пᲂлїєлеѡ́сѣ , сѣда́ленъ . гла́съ , в҃ . Правᲂвѣ́рнѡ чтꙋ́щїѧ тѧ̀ , к̾ тебѣ̀ прибѣга́юща , и҆ко́нѣ твᲂе́й ст҃ѣ́й любе́знѡ пᲂклᲂнѧ́ющасѧ , ѽ бж҃їѧ мт҃и спасѝ , и҆ неда́ждь в̾ расхище́нїе сᲂпᲂста́тᲂмъ . нижѐ на́йдꙋтъ на ны̀ всѧ̀ ѕла́ѧ , ꙗ҆́же грѣхѝ на́ша ᲂу҆гᲂто́ваша на́мъ . ни без̾зако́нїѧ на́ша превзы́дꙋтъ на главы̀ на́ша . нᲂ да твᲂѧ̀ мт҃рьнѧѧ к̾ бг҃ꙋ преѡ҆дᲂлѣ́етъ за ны̀ , бг҃ᲂпрїѧ́тнаѧ мᲂли́тва . сла́ва , и҆ ны́нѣ . Пречⷭ҇таѧ твᲂѧ̀ и҆ко́на бцⷣе дв҃ᲂ , врачевство̀ всемꙋ̀ ми́рꙋ дх҃о́внᲂе . к̾ не́й же прибѣга́юще , тебѣ̀ пᲂклᲂнѧ́емсѧ и҆ пᲂчита́емъ , и҆ лᲂбыза́емъ и҆ чте́мъ . и҆сцѣле́ней бл҃гᲂда́ть пᲂчерпа́юще ѿ неѧ̀ . и҆ недꙋ́гъ тѣле́сныхъ , и҆ дш҃е́вныхъ страсте́й , твᲂи́ми мᲂли́твами свᲂбᲂжда́емсѧ .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Пᲂмѧнꙋ̀ и҆́мѧ твᲂѐ , вᲂ всѧ́кᲂмъ ро́дѣ и҆ ро́дѣ . сти́хъ . слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . всѧ́кᲂ дыха́нїе . є҆ѵⷢ҇а́лїе , ѿ лꙋкѝ . зача́лᲂ , д҃ . ѱало́мъ , н҃ .

сла́ва . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , и҃ . Прїидѣ́те вᲂз̾ра́дꙋемсѧ , держа́внѣй застꙋ́пницѣ ро́да на́шегѡ цр҃цѣ бцⷣѣ . прїидѣ́те къ ти́хᲂмꙋ є҆ѧ̀ чꙋ́днᲂмꙋ пᲂчита́емꙋ а҆́нг҃лы честно́мꙋ пᲂклᲂни́мсѧ ѻ҆́бразꙋ . дае́тъ бᲂ вѣ́рнымъ незави́стныѧ да́ры цѣле́бныѧ ми́лᲂсти , ѿ неи҆стᲂщи́магѡ и҆сто́чника ст҃ы́ѧ и҆ко́ны , неѡ҆скꙋ́днᲂю бл҃гᲂда́тїю и҆стᲂча́ющи . тмы̀ и҆збавлѧ́етъ на́съ , и҆скꙋше́нїи и҆ бѣ́дъ , и҆ всѧ́кᲂгѡ грѣха̀ , бл҃гᲂче́стнѡ бг҃ᲂпрїѧ́тнѡ прᲂславлѧ́ющихъ и҆ чтꙋ́щихъ , свѣ́тлᲂе и҆ чꙋ́днᲂе бг҃ᲂмт҃ре ст҃ы́ѧ и҆ко́ны ꙗ҆вле́нїе , вᲂспѣва́емъ зᲂвꙋ́ще . ра́дꙋисѧ любе́зныи ми́рꙋ пᲂмо́щницы на́шеѧ ѻ҆́бразъ , вᲂ спасе́нїе дш҃а́мъ на́шимъ .

Кано́нъ ѻ҆диги́трїю прест҃ѣ́й бцⷣѣ , сᲂ і҆рмᲂсо́мъ , на́ ѕ҃ . і҆рмо́съ , пᲂ двⷤа . твᲂре́нїе сщ҃е́ннᲂ и҆́нᲂка и҆гна́тїѧ . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́вᲂ ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́въ : Прⷭ҇та́ѧ гжⷭ҇е бцⷣе спасѝ на́съ . Ра́дᲂстнѡ чⷭ҇таѧ , ны́нѣ наста́вшее хвале́нїе , принᲂша́ю ра́дꙋѧсѧ , и҆ ти́химъ гла́сᲂмъ ѻ҆диги́трїе вᲂпїю́ ти , ра́дꙋисѧ , и҆ и҆спо́лни мѧ ра́зꙋма , пѣ́ти начина́юща . Хрⷭ҇та̀ рᲂди́вшаѧ , ра́дᲂсть на́мъ вѣ́чнꙋю , ѽ ра́дꙋисѧ всепѣ́таѧ , правᲂсла́внымъ наде́жда , ѻ҆диги́трїе всепѣ́таѧ дв҃це , ра́дᲂсти и҆спо́лни мѧ ми́рᲂви жела́нныѧ . Ликꙋ́ютъ всѝ чл҃цы и҆ а҆́нг҃ли , всегда̀ сᲂгла́снѡ вᲂпїю́ще , на́ нб҃си и҆ на землѝ ѻ҆диги́трїе , ра́дꙋисѧ дв҃це , ра́дᲂсти бᲂ ржⷭ҇тво́мъ ти всѧ́ческаѧ и҆спо́лнила є҆сѝ . Ра́дᲂсть ѻ҆диги́трїе , и҆́же со́ страхᲂмъ ти вᲂпїю́щихъ , ра́дᲂсти спᲂдо́би мт҃и сꙋ́щїѧ ра́дᲂсти , и҆збавлѧ́ющи скᲂрбе́й всѧ́ческихъ , и҆ всѣ́хъ пᲂми́лꙋй , и҆́же к̾ тебѣ̀ прибѣга́ющихъ .

дрꙋгі́и кано́нъ , пра́здникꙋ , на и҃ . гла́съ , то́йже . пѣ́снь , а҃ . і҆рмо́съ , то́йже .

запѣ́въ : Прест҃а́ѧ гжⷭ҇е бцⷣе спасѝ на́съ . Бл҃гᲂгᲂвѣ́ютъ тѝ бцⷣе а҆́нг҃лѡмъ нача́льницы , и҆ ст҃ы́хъ чи́ны че́стнѡ слꙋ́жатъ . пра́веднїи красꙋ́ютсѧ , нбⷭ҇ныхъ хᲂда́таицꙋ бл҃жа́тъ тѧ̀ , кꙋ́пнᲂ же и҆ землѧ̀ и҆ нб҃ᲂ в̾ весе́лїи свѣ́тлѡ вᲂсхвалѧ́ютъ тѧ̀ . и҆ мы̀ грѣ́шнїи млⷭ҇ти про́симъ , ѡ҆зарѝ на́ша срⷣца̀ влⷣчце , вᲂспѣ́ти пѣ́снь ст҃ы́ѧ тѝ и҆ко́ны ꙗ҆вле́нїю . Прїиди́те сᲂбери́тесѧ хрⷭ҇тᲂи҆мени́тїи лю́дїе , ᲂу҆мы̀ та́йнѡ ѡ҆чи́стившесѧ , вᲂ ст҃ꙋ́ю цр҃кᲂвь мт҃ре хрⷭ҇та̀ бг҃а на́шегѡ . и҆стᲂча́етъ бᲂ на́мъ неѡ҆скꙋ́днѡ , ѿ ст҃ы́ѧ и҆ко́ны и҆сто́чникъ дх҃о́венъ , цѣле́бенъ дш҃а́мъ и҆ тѣ́лᲂмъ , пѣ́снь вᲂпїю́щимъ , бл҃гᲂслᲂве́нъ и҆з̾ тебѐ рᲂжде́исѧ бг҃ъ на́шъ . Диви́тъ пренепᲂро́чнаѧ , и҆ ᲂу҆жаса́етъ всѧ́къ слꙋ́хъ . стра́ннᲂ чꙋ́дᲂ бжⷭ҇твенагѡ тѝ ржⷭ҇тва̀ . ка́кѡ херꙋви́мскагᲂ твᲂрца̀ зачала̀ є҆сѝ . ка́кѡ ѻ҆́гнь нестерпи́мыи вᲂ ᲂу҆тро́бѣ нᲂси́ла є҆сѝ . ка́кѡ сꙋ́щꙋю жи́знь пло́тїю ѡ҆блекла̀ є҆сѝ , и҆ живо́тъ всемꙋ̀ ми́рꙋ пᲂрᲂдила̀ є҆сѝ бг҃а кꙋ́пнѡ и҆ чл҃ка . Пᲂд̾ кро́въ тво́й дв҃ᲂ гжⷭ҇е прибѣга́емъ , всѝ ро́ди чл҃честїи . прᲂсвѣтѝ на́съ свѣ́тᲂмъ ржⷭ҇тва̀ твᲂегѡ̀ , грѣ́шныѧ рабы̀ твᲂѧ̀ мᲂлѧ́щїисѧ прилѣ́жнѡ , и҆ кла́нѧющїѧсѧ пречи́стѣй тѝ и҆ко́нѣ , прᲂсѧ́ще ѿ тебѐ прїѧ́ти вели́кїѧ ми́лᲂсти .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Хрⷭ҇та̀ вы́шнѧгѡ цр҃ѧ , ѽ ра́дꙋисѧ непᲂкᲂлеби́маѧ чи́стаѧ , и҆ ѡ҆дш҃евле́наѧ пᲂла́тᲂ . ра́дꙋисѧ ѻ҆диги́трїе , ра́дꙋисѧ , тᲂбо́ю нерꙋши́мъ на́шъ гра́дъ сᲂхранѧ́етсѧ . Вмѣсти́ти є҆го́же невᲂзмо́же тва́рь , вᲂꙋтро́бꙋ неи҆скꙋсᲂбра́чнꙋю , ѻ҆диги́трїе дв҃це , тѣле́снᲂ вмѣсти́ла є҆сѝ . тѣ́мже тѝ ра́дꙋисѧ пᲂе́мъ , по́дᲂлгꙋ велича́юще . Ра́дᲂсть мнᲂгᲂпѣ́таѧ ми́рᲂви , ра́дᲂстнѡ ти пᲂю́ще при́снѡ , вѣ́чнꙋющїѧ чи́стаѧ ра́дᲂсти спᲂдᲂблѧ́емсѧ , твᲂи́ми ма́терними мл҃твами , к̾ ро́ждьшемꙋсѧ и҆з̾ тебѐ ѻ҆диги́трїе . Златꙋ́ю тѧ ста́мнꙋ , и҆ свѣ́щникъ и҆ же́злъ , и҆ трапе́зꙋ чи́стаѧ , призыва́емъ ѻ҆диги́трїе . и҆ гла́съ є҆́же ра́дꙋисѧ , тебѣ̀ прⷭ҇нѡ привнᲂша́емъ , с̾ си́ми же и҆мены̀ .

и҆́нъ і҆рмо́съ , то́йже . Кꙋ́ю тѝ дᲂсто́йнꙋю пᲂхвалꙋ̀ на́ше принесе́тъ кᲂне́чнᲂе немᲂже́нїе ; ꙗ҆́кѡ ꙗ҆вле́нїемъ пречⷭ҇тыѧ тѝ бжⷭ҇твеныѧ и҆ко́ны , незави́стныѧ и҆сто́чники , цѣле́бныѧ и҆стᲂча́еши , вѣ́рнѡ прибѣга́ющимъ к̾ тебѣ̀ рабо́мъ твᲂи́мъ . Бжⷭ҇твеныѧ тѝ и҆ко́ны , ст҃о́е ꙗ҆вле́нїе бцⷣе дв҃ᲂ , ꙗ҆́кѡ свѣтᲂза́рнᲂе вᲂсїѧ̀ на́мъ сл҃нце . пресла́вныхъ чꙋде́съ лꙋча̀ пꙋща́ющи , тмы̀ лю́тыхъ ѡ҆бстᲂѧ́нїѧ ѿгᲂнѧ́ѧ , сщ҃е́нными твᲂи́ми влⷣчце пред̾ста́тельствы . И҆спо́лнила є҆сѝ бл҃гᲂда́ти и҆нᲂгда̀ , первᲂпи́саннꙋю тѝ и҆ко́нꙋ гжⷭ҇е дв҃ᲂ бцⷣе . и҆ нн҃ѣ та́же бл҃гᲂда́ть и҆́стиньствꙋетъ , сїѧ́нїемъ вѣ́ры чꙋде́съ . ꙗ҆́кѡ тᲂѧ̀ ра́ди первᲂпи́санны , кᲂ спасе́нїю вѣ́рнѡ к̾ тебѣ̀ по́ бз҃ѣ прибѣга́ющимъ .= П=ᲂкланѧ́емсѧ бцⷣе твᲂемꙋ̀ пречⷭ҇тᲂмꙋ ѻ҆́бразꙋ , и҆ пресла́дкᲂмꙋ тѝ младе́нцꙋ , превѣ́чнᲂмꙋ и҆ незахᲂди́мᲂмꙋ свѣ́тꙋ хрⷭ҇тꙋ̀ . и҆́миже спасла̀ є҆сѝ ѿ лю́тыхъ ѕо́лъ , и҆ тлѣ́нїѧ сме́ртнагѡ всѐ чл҃ческᲂе є҆стество̀ .

сѣда́ленъ . гла́съ , и҃ . Бжⷭ҇твенїи сло́ва а҆пⷭ҇ли , є҆ѵⷢ҇а́лїѧ хрⷭ҇то́ва велегла́снїи вселе́ннѣй бл҃гᲂвѣ́стницы , бжⷭ҇твенꙋю цр҃кᲂвь сᲂзда́вше , въ прест҃о́е твᲂѐ и҆́мѧ бцⷣе . и҆ к̾ тебѣ̀ гжⷭ҇е прихо́дѧтъ , мᲂлѧ́ще тѧ прїитѝ на тᲂѧ̀ ѡ҆сщ҃е́нїе . ты́ же ѽ бг҃ᲂмт҃и рекла̀ є҆сѝ , и҆ди́те съ ми́рᲂмъ , и҆ а҆́зъ с̾ ва́ми та́мᲂ є҆́смь . ѻ҆ни́ же ше́дше ѡ҆брѣта́ютъ та́мᲂ на стенѣ̀ цр҃кви , твᲂегѡ̀ влⷣчце ѻ҆́браза пᲂдо́бїе . бжⷭ҇твенᲂю пи́санᲂ си́лᲂю , шаро́вными пᲂдо́бїи . и҆ ви́дѣвше пᲂклᲂни́шатисѧ , и҆ прᲂсла́виша бг҃а . с̾ ни́ми же и҆ мы̀ , бжⷭ҇твенѣй тѝ пᲂкланѧ́емсѧ и҆ко́нѣ , прᲂсѧ́ще ѿ тебѣ̀ вели́кїѧ ми́лᲂсти . да́рꙋй сᲂгрѣше́нїемъ ѡ҆ставле́нїе рабо́мъ твᲂи́мъ , є҆ди́на бл҃гᲂслᲂве́наѧ . сла́ва , и҆ ны́нѣ , то́йже .

пѣ́снь , д҃ . і҆рмо́съ . Сѣдѧ́и вᲂ сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречтⷭ҇ыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Ра́дꙋисѧ чꙋ́дᲂ чꙋдесе́мъ , ѻ҆диги́трїе влⷣчце . ра́дꙋисѧ всѣ́мъ ра́дᲂсте , градᲂвѡ́мъ и҆ ве́семъ , непᲂбѣди́мᲂе хрⷭ҇тїа́нскᲂе в̾ бѣда́хъ храни́лище , и҆ пред̾гра́дїе , и҆ на врагѝ пᲂбѣжде́нїе . Ра́дꙋисѧ , ра́дꙋисѧ , цр҃е́мъ правᲂсла́внымъ пᲂхвало̀ , и҆ хрⷭ҇тᲂлюби́вымъ во́инствᲂмъ , пᲂкро́въ пребыва́еши всѣ́мъ цр҃цѣ , ра́дꙋисѧ ѻ҆диги́трїе , прибѣ́жище всѣ́мъ на́мъ и҆ ᲂу҆тверже́нїе . Ра́дꙋисѧ всѣ́мъ ско́рᲂе в̾ бѣда́хъ и҆збавле́нїе , ра́дꙋисѧ гᲂто́вᲂе всѣ́мъ скᲂрбѧ́щимъ ᲂу҆тѣше́нїе . ра́дꙋисѧ всепѣ́таѧ , ра́дꙋисѧ ѻ҆диги́трїе всебл҃гᲂслᲂве́наѧ , всѣ́мъ немᲂщны́мъ и҆сцѣли́тельнице . Ра́дꙋисѧ є҆ѧ́же вели́чїѧ , всѧ̀ тва́рь сла́вити ᲂу҆́бѡ спѣши́тъ пᲂ дᲂстᲂѧ́нїю , нᲂ невᲂзмᲂга́етъ ѻ҆диги́трїе , и҆ сегѡ̀ ра́ди зᲂве́тъ ти , ра́дꙋисѧ влⷣчце , бг҃ᲂвмѣсти́мᲂе жили́ще .

и҆́нъ і҆рмо́съ , то́йже . Пᲂчте́мъ лю́дїе чи́стꙋю в̾ чистᲂтѣ̀ , и҆ко́нꙋ дв҃ыѧ бцⷣы , и҆ тᲂѧ̀ бжⷭ҇твенагѡ мла́денца хрⷭ҇та̀ бг҃а на́шегѡ . и҆ прикаса́емсѧ тѣ́мены , и҆ лᲂбыза́емъ и҆ прᲂславлѧ́емъ со́ страхᲂмъ и҆ тре́петᲂмъ . пᲂчита́емъ бᲂ и҆ко́нꙋ бл҃гᲂче́стнѡ , пᲂчита́емъ и҆ сᲂѡ҆бра́знᲂе тᲂѧ̀ первᲂсꙋ́щее . Дв҃дъ бжⷭ҇твеныи и҆ чꙋ́дныи прᲂро́къ , и҆здале́ча прᲂви́дѣ глаго́лѧ . лицꙋ̀ твᲂемꙋ̀ пᲂмо́лѧтсѧ бᲂга́тїи лю́дїе . мы́ же вѣ́рнїи пᲂкланѧ́емсѧ , и҆ лᲂбыза́емъ честнꙋ́ю и҆ко́нꙋ , дш҃а́ми кꙋ́пнѡ и҆ тѣлесы̀ ѡ҆сщ҃а́емсѧ . Є҆ѵⷢ҇а́лїѧ хрⷭ҇то́ва , бг҃ᲂгла́сныи списа́тель лꙋка̀ , бж҃їимъ манᲂве́нїемъ , всенепᲂро́чныи тво́й написꙋ́етъ ѻ҆́бразъ бцⷣе , и҆ младе́нецъ тѝ превѣ́чныи на рꙋкꙋ̀ вᲂѡ҆брази́въ . к̾ немꙋ́ же притека́ющїѧ напа́стей и҆ бѣ́дъ и҆збавлѧ́еши . и҆ всѧ̀ пᲂкрыва́еши , и҆ спаса́еши твᲂе́ю млⷭ҇тїю . Ты̀ є҆сѝ пᲂхвало̀ и҆ вѣне́цъ ст҃ы́мъ всѣ́мъ ѽ цр҃це . ты̀ ᲂу҆пᲂва́нїе на́ше и҆ пᲂмо́щнице по́ бз҃ѣ . и҆ на тѧ̀ наде́ждꙋ спасе́нїѧ на́шегѡ вᲂзлᲂжи́хᲂмъ всѝ . тебѣ̀ мо́лимсѧ ꙗ҆́кѡ бж҃їи мт҃ри . ѡ҆дᲂждѝ грѣ́шнымъ рабо́мъ твᲂи́мъ , бᲂга́тыѧ сѝ дш҃еспаси́тельныѧ ми́лᲂсти .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бᲂ бракᲂнеи҆скꙋси́маѧ дв҃це , прїѧ́тъ вᲂ ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Бл҃гᲂсты́ни бе́зднᲂ и҆ щедро́тамъ є҆сѝ , ра́дꙋисѧ ѻ҆диги́трїе дв҃це , ра́дꙋисѧ всѣ́мъ ра́дᲂсть твᲂрѧ́щи вѣ́рнымъ . ѽ ра́дꙋисѧ сꙋ́щимъ в̾ бѣда́хъ , и҆ скᲂрбѧ́щимъ пребы́страѧ застꙋ́пнице . Ра́дᲂсти ѿ и҆спᲂлне́нїѧ вели́чїѧ чꙋде́съ твᲂи́хъ зрѧ́ще , и҆спᲂлнѧ́емсѧ всѝ , незрѧ́ще и҆ слы́шаще же вѣ́рнїи . тѣ́мже ра́дꙋисѧ тебѣ̀ при́снѡ всю́дꙋ , и҆ всѝ ѻ҆диги́трїе пᲂе́мъ . Хрⷭ҇та̀ бг҃а на́шегѡ , ѽ ра́дꙋисѧ ѻ҆диги́трїе , жили́ще и҆ до́мъ неи҆зрече́ннѣй и҆ пребжⷭ҇твеннѣй дв҃ᲂ сла́вѣ є҆гѡ̀ . ѽ ра́дꙋисѧ пᲂла́тᲂ преꙋкраше́ннаѧ , ра́дꙋисѧ гра́де ѡ҆дш҃евле́нныи , при́снѡ црⷭ҇твꙋющїи . Ра́дᲂсть неѡ҆скꙋ́днꙋю тѧ разсмᲂтрѧ́юще , ꙗ҆́кѡ мо́ре ѻ҆трᲂкᲂви́це , ѻ҆диги́трїе дв҃це , ра́дꙋющесѧ всѝ , ра́дꙋисѧ вᲂпїе́мъ ти , и҆ пᲂю́ще бжⷭ҇твенныхъ даро́въ неви́димѡ прⷭ҇нѡ ѿ тебѐ ѡ҆жида́юще .

и҆́нъ і҆рмо́съ , то́йже . Всѧ́кᲂ пречⷭ҇таѧ вᲂспѣ́тᲂе тебѣ̀ хвале́нїе , всегда̀ вели́чествᲂмъ сла́вы твᲂеѧ̀ пᲂбѣжда́етсѧ . и҆́бᲂ па́че го́рнихъ ᲂу҆мо́въ превᲂзвы́сисѧ , ро́ждьши непристꙋ́пнагᲂ и҆ стра́шнагᲂ всѣ́хъ цр҃ѧ и҆ бг҃а . нᲂ ꙗ҆́кѡ ми́лᲂстива , и҆ ско́раѧ челᲂвѣ́кѡмъ пᲂмо́щница , вᲂнмѝ мᲂле́нїю ра́бъ свᲂи́хъ , и҆ да́рꙋй твᲂѧ̀ по́мᲂщи . И҆дѣ́же ѡ҆сѣ́нитъ бл҃гᲂда́ть твᲂѧ̀ бцⷣе , стра́хᲂмъ и҆счеза́ютъ дѣ́мᲂни , и҆ разрꙋша́етсѧ ѕлᲂко́зненᲂе тѣ́хъ мечта́нїе . бѣ́гаютъ ро́ди че́рнїи . ра́дꙋетжесѧ вѣ́рныхъ всѐ мно́жествᲂ , тебѣ̀ пѣ́снь хва́льнꙋ ѿ́ срⷣца вᲂпїю́ще . ра́дꙋисѧ бжⷭ҇твеныи пᲂкро́ве дш҃а́мъ на́шимъ . Без̾ ѻ҆́чивымъ сла́дкᲂ ви́дѣти дае́тсѧ , глꙋхи́мъ слы́шанїе , нѣмы́мъ бл҃гᲂгл҃анїе , хрᲂмы́мъ хᲂжде́нїе , прᲂкаже́ннымъ ѡ҆чище́нїе , бѣснꙋ́ющимсѧ цѣлᲂмꙋ́дрїе , и҆ и҆́же в̾ бᲂлѣ́знехъ разли́чныхъ и҆сцѣле́нїе , ѡ҆сѣне́нїемъ пречⷭ҇тыѧ тѝ бцⷣе и҆ко́ны . Не ᲂу҆мᲂлчи́мъ никᲂли́же бцⷣе , ѱалмы̀ и҆ пѣ́сньми вᲂспѣва́ти вели́чїѧ ти ѡ҆бра́дᲂваннаѧ . бг҃а бᲂ вᲂи́стинꙋ вᲂплᲂти́вшагᲂсѧ рᲂдила̀ є҆сѝ , на спасе́нїе на́ше , и҆ всеми́рнᲂе и҆збавле́нїе .

пѣ́снь , ѕ҃ . і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднествᲂ , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Хрⷭ҇та̀ чⷭ҇таѧ прїе́млющи , гла́съ є҆́же ра́дꙋисѧ . ѻ҆диги́трїе дв҃це слы́шаше , є҆го́же неи҆зрече́ннѡ ро́ждьши , и҆ ра́дꙋисѧ ѿ всѣ́хъ слы́шиши всегда̀ . Ра́дᲂсти всѧ̀ и҆спо́лнила є҆сѝ , вы́шнѧѧ и҆ ни́жнѧѧ ты̀ сᲂвᲂкꙋпи́ла є҆сѝ ѻ҆диги́трїе . тѣ́мже ра́дᲂстнѡ и҆ сᲂгла́снѡ нн҃ѣ , нб҃ᲂ и҆ всѧ̀ землѧ̀ зᲂве́тъ ти . Вдᲂва́мъ ѽ ра́дꙋисѧ всепѣ́таѧ , и҆ всѣ́мъ си́рымъ ѻ҆диги́трїе ᲂу҆тѣше́нїе . ра́дꙋисѧ всѣ́мъ и҆стᲂча́ющи ни́щимъ , бᲂга́тьствᲂ неи҆стᲂщи́мᲂе . Зла́та всѧ́кагѡ блиста́ема , и҆ ᲂу҆́тра сл҃нечнагѡ свѣтлѣ́йши , жили́ще хрⷭ҇то́вᲂ , ра́дꙋисѧ ѻ҆диги́трїе , ра́дꙋисѧ дв҃це , ра́дꙋисѧ невѣ́стᲂ неневѣ́стнаѧ .

и҆́нъ і҆рмо́съ , то́йже . Бжⷭ҇твенагᲂ ти ржⷭ҇тва̀ дв҃ᲂ гжⷭ҇е , пребᲂга́таѧ бл҃гᲂда́ть , ю҆́же дре́вле и҆з̾глаше́нїемъ предала̀ є҆сѝ , пречи́стагѡ ти ѻ҆́браза и҆ко́нѣ , неѡ҆скꙋ́днѣ дѣ́йствꙋетъ , вели́каѧ же и҆ пресла́внаѧ , вᲂ спасе́нїе и҆́же на тѧ̀ надѣ́ющимсѧ . И҆дѣ́же прᲂславлѧ́етсѧ ст҃о́е и҆́мѧ ѡ҆бра́дᲂванныѧ бцⷣы , тꙋ̀ всѧ́ческихъ благи́хъ и҆сто́чницы прᲂлива́ютсѧ . прїиди́те в̾ чистᲂтѣ̀ челᲂвѣ́цы . се́бᲂ ꙗ҆вле́нїемъ бжⷭ҇твеныѧ дв҃ы и҆ко́ны , сказꙋ́етъ цр҃цынᲂ прише́ствїе , на спасе́нїе всѣ́мъ вѣ́рнымъ . Цѣле́нїѧ бᲂлѣ́знемъ , ѿгна́нїе же страсте́мъ , и҆ дш҃епита́тельнᲂе спасе́нїе , грѣхо́въ прᲂще́нїе , и҆ вѣ́чнᲂе и҆збавле́нїе , и҆з̾ пречⷭ҇тыѧ ти и҆ко́ны влⷣчце , вѣ́рнѡ прихᲂдѧ́ще прїе́млемъ , бг҃ᲂмт҃и всенепᲂро́чнаѧ . Къ тебѣ̀ гжⷭ҇е прибѣга́ютъ ро́ди правᲂвѣ́рныхъ , про́сѧтъ вели́кїѧ ми́лᲂсти . и҆ прїе́млютъ неѡ҆скꙋ́днѡ , и҆́же в̾ недꙋ́зѣхъ и҆сцѣле́нїе . въ страстѣ́хъ премѣне́нїе . в̾ печа́лѣхъ ᲂу҆тѣше́нїе . и҆стᲂчѝ и҆ мнѣ̀ влⷣчце ка́плю дш҃еспаси́тельнꙋю , да сᲂ всѣ́ми и҆ а҆́зъ пᲂю̀ твᲂѐ вели́чїе .

кᲂнда́къ . гла́съ , и҃ . Притеце́мъ лю́дїе к̾ ти́хᲂмꙋ семꙋ̀ , и҆ до́брᲂмꙋ приста́нищꙋ , ско́рᲂй пᲂмо́щницѣ , гᲂто́вᲂмꙋ и҆ те́плᲂмꙋ спасе́нїю пᲂкро́вꙋ дв҃ыѧ . ᲂу҆скᲂри́мъ на мᲂли́твꙋ , и҆ пᲂтщи́мсѧ на пᲂкаѧ́нїе , и҆стᲂча́етъ бᲂ на́мъ неѡ҆скꙋ́дныѧ млⷭ҇ти пречⷭ҇таѧ бцⷣа . варѧ́етъ на́ пᲂмᲂщь , и҆ и҆збавлѧ́етъ ѿ вели́кихъ бѣ́дъ и҆ ѕо́лъ бл҃гᲂнра́вныѧ и҆ бг҃ᲂбᲂѧ́щїѧсѧ рабы̀ свᲂѧ̀ . и҆́кᲂсъ . Смы́слъ ѡ҆чи́стивше и҆ ᲂу҆́мъ , притеце́мъ к̾ бцⷣѣ свѣ́тлѡ пѣ́сньми ᲂу҆блажа́юще , пречи́стагѡ є҆ѧ̀ ѻ҆́браза бг҃ᲂно́снꙋю и҆ко́нꙋ . и҆ прᲂславлѧ́емъ тꙋ̀ и҆ чте́мъ , и҆ припа́дающе пᲂклᲂнѧ́емсѧ , ꙗ҆́кѡ само́й сꙋ́щи ѻ҆́нᲂй , а҆ не ꙗ҆́кѡ и҆но́й . небо̀ терпи́тъ ᲂу҆чꙋжа́тисѧ и҆ко́ннᲂе и҆́мѧ свᲂегѡ̀ первᲂѡ҆бра́знагѡ . пᲂчита́етъбᲂсѧ первᲂѡ҆бра́знᲂе и҆ко́нᲂю . си́це бл҃гᲂче́стнѡ бжⷭ҇твенїи ѻ҆ц҃ы преда́ша на́мъ и҆ наꙋчи́ша . и҆ а҆́ще кто̀ непᲂклᲂнѧ́етсѧ бг҃ᲂро́дичнѣ и҆ко́нѣ , а҆наѳе́ма да бꙋ́детъ . пᲂсрамлѧ́етъ бᲂ и҆ пᲂгꙋблѧ́етъ нечтꙋ́щїѧ ю҆̀ . и҆збавлѧ́етъ же ѿ вели́кихъ бѣ́дъ и҆ ѕо́лъ , бл҃гᲂнра́вныѧ и҆ бг҃ᲂбᲂѧ́щїѧсѧ рабы̀ свᲂѧ̀ .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , нᲂ ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . Ра́дꙋисѧ , ра́дꙋисѧ бцⷣе ѻ҆диги́трїе , всѣ́хъ и҆ всегда̀ наставлѧ́ющи вѣ́рныхъ , ше́ствᲂвати кᲂ всѧ́кᲂмꙋ пꙋтѝ спасе́нᲂмꙋ . ра́дꙋисѧ влⷣчце , тᲂбо́ю бᲂ прⷭ҇нѡ и҆збавлѧ́емсѧ , настᲂѧ́щїѧ ва́рварскїѧ бѣды̀ . Ра́дꙋисѧ , ра́дꙋисѧ ѻ҆диги́трїе , бдѧ́щи и҆ мᲂлѧ́щисѧ ѡ҆ на́съ к̾ бг҃ꙋ , и҆ всѧ́кїѧ ѕло́бы хᲂда́тайствᲂмъ ти , всѧ́ческихъ скᲂрбе́й бг҃ᲂрᲂди́тельнице , всѣ́хъ люде́й и҆збавлѧ́ющи . Ра́дꙋисѧ , ра́дꙋисѧ прест҃а́ѧ ѻ҆диги́трїе , и҆́же прᲂше́нїѧ на́ша к̾ по́льзѣ на́мъ и҆спᲂлнѧ́ющи , и҆ хᲂтѧ́щи всѣ́мъ прⷭ҇нѡ всегда̀ любᲂдрꙋ́жнᲂе бл҃го́е є҆ди́нствᲂ , спѣ́шнᲂе же вᲂ и҆зѧ́щныхъ . Ра́дꙋисѧ , ра́дꙋисѧ кᲂрабле́мъ ѻ҆диги́трїе , нꙋ́жнѡ пла́вающимъ , и҆збавлѧ́ющи вѣ́рныхъ , и҆ всѣ́мъ и҆збавле́нїе ѿ всѧ́кїѧ ско́рби , и҆ недꙋ́ги пестро́тныѧ , и҆ ме́дленыѧ разрѣша́ющи вско́рѣ .

и҆́нъ і҆рмо́съ , то́йже . Прїидѣ́те пᲂчерпе́мъ ѿпꙋще́нїе , ѿ неи҆стᲂщи́магѡ и҆сто́чника , тᲂча́щагѡ ст҃ы́ню пречⷭ҇тыѧ и҆ко́ны дв҃ыѧ . и҆ тᲂѧ̀ пречи́стагѡ младе́нца бж҃їѧ сло́ва , на́съ ра́ди вᲂчл҃чьшагᲂсѧ . к̾ немꙋ́ же вᲂзᲂпїе́мъ , тво́рче и҆зба́вителю препрᲂсла́вленыи , сᲂ ѻ҆ц҃е́мъ и҆ дх҃ᲂмъ бж҃е бл҃гᲂслᲂве́нъ є҆сѝ . Неꙋсы́пнꙋю чи́стаѧ , и҆ бг҃ᲂпрїѧ́тнꙋю и҆мꙋ́щи мᲂли́твꙋ , и҆ не преѡ҆дᲂлѣ́емꙋю держа́вꙋ крѣ́пᲂсти , враго́въ на́шихъ шата́нїе є҆́же на ны̀ разᲂрѝ , и҆ вы́ѧ и҆́хъ по́д̾ нᲂзѣ вѣ́рнымъ лю́дѧмъ на́шимъ низ̾лᲂжѝ . да вᲂз̾весели́мсѧ ѡ҆ тебѣ̀ рабѝ твᲂѝ , сн҃ꙋ твᲂемꙋ̀ вᲂпїю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ра́дꙋемсѧ и҆ весели́мсѧ вѣ́рнїи лю́дїе , чꙋ́днᲂмꙋ ꙗ҆вле́нїю и҆ко́ны пречⷭ҇тыѧ влⷣчцы бцⷣы . рѣка́ бᲂ ꙗ҆ви́сѧ неи҆счерпа́ема , цѣле́бнꙋю во́дꙋ тᲂча́щи . слѣпы́мъ бᲂ ви́дѣти дае́тъ , и҆ глꙋхи́мъ слы́шанїе . хрᲂмы́мъ хᲂжде́нїе . и҆ всѣ́мъ и҆́же в̾ недꙋ́зѣхъ без̾ме́зднѡ и҆сцѣле́нїе . Неи҆спы́танна глꙋбина̀ , недᲂвѣ́дᲂмᲂ та́иньствᲂ , непᲂсти́жимъ ѻ҆́бразъ дв҃ᲂ зача́тїѧ твᲂегѡ̀ . зача́тїе без̾ сѣ́мене . бе́з̾ мꙋжа ржⷭ҇тво̀ . беспло́тныи вᲂплᲂти́сѧ . превѣ́чныи младе́нствꙋетъ . сн҃ъ бж҃їи , сн҃ъ тебѐ дв҃ыѧ быва́етъ . є҆мꙋ́же вᲂпїе́мъ , бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емᲂ , ны́нѣ же дѣ́йствꙋемᲂ , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Ра́дꙋисѧ всебл҃гᲂслᲂве́наѧ мр҃і́е , и҆з̾ тебе́ бᲂ всеблгⷭ҇ве́ныи бг҃ъ ѡ҆дѣ́ѧсѧ , вᲂ всего́ мѧ чл҃ка , и҆ ѡ҆дѣ́ѧвсѧ сᲂє҆динѝ свᲂемꙋ̀ бжⷭ҇твꙋ̀ , неи҆зрече́ннымъ сᲂє҆дине́нїемъ , дв҃ᲂ ѻ҆диги́трїе . ра́дꙋисѧ ѡ҆бра́дᲂваннаѧ , ра́дᲂсте всего̀ ми́ра . Ра́дꙋисѧ лꙋка́выхъ дх҃о́въ прᲂгᲂни́тельнице , ра́дꙋисѧ бцⷣе ѻ҆диги́трїе . ра́дꙋисѧ , ꙗ҆́кѡ тебѐ нбⷭ҇наѧ неви́димаѧ во́инства славᲂсло́вѧтъ всегда̀ , и҆ велича́ютъ ꙗ҆́кѡ мт҃рь бж҃їю бы́вшꙋю . ра́дꙋисѧ ꙗ҆́же ни́жнѧѧ сᲂчета́вши с̾ вы́шними . Ра́дꙋисѧ всѣ́хъ нбⷭ҇ныхъ си́лъ без̾ разсꙋжде́нїѧ превᲂсхᲂдѧ́щаѧ , ра́дꙋисѧ ѻ҆диги́трїе , ра́дꙋисѧ всѧ́кїѧ тва́ри , бг҃а ро́ждьшаѧ гдⷭ҇ьствꙋющи , є҆́й влⷣчце всепѣ́таѧ . ра́дꙋисѧ пребыва́еши дв҃ᲂю чⷭ҇таѧ и҆ пᲂ ржⷭ҇твѣ̀ . Ра́дꙋисѧ жена́мъ всѣ́мъ сла́вᲂ , хра́ме преѡ҆сщ҃е́нныи бг҃а на́шегѡ , ра́дꙋисѧ ѻ҆диги́трїе , ра́дꙋисѧ дш҃еспаси́тельнаѧ все́й вселе́ннѣй . ра́дꙋисѧ пᲂкрыва́ющїи ѻ҆́блаче небе́съ ши́ршаѧ . ра́дꙋисѧ мирᲂпᲂло́жнице , бжⷭ҇твеннагѡ ми́ра пᲂлна̀ .

и҆́нъ і҆рмо́съ , то́йже . Оу҆́мъ а҆́нг҃льскїи , и҆ чл҃ческїи ᲂу҆жаса́етсѧ бцⷣе . ка́кѡ бг҃а нбⷭ҇нагᲂ лᲂжесна́ми ѡ҆бье́мши вᲂплᲂти́ла є҆сѝ ; ка́кѡ младе́нца ро́ждьши , ꙗ҆́кѡ сн҃а на рꙋкꙋ̀ но́сиши ; є҆го́же ᲂу҆жаса́етсѧ тва́рь и҆ трепе́щꙋтъ го́рнїи прⷭ҇то́ли , вᲂпїю́ще непреста́ннѡ . ст҃ъ ст҃ъ ст҃ъ є҆сѝ бж҃е , препѣ́тыи и҆ превᲂзнᲂси́мыи во́ вѣки . Ра́дꙋисѧ сꙋ́щаѧ ра́дᲂсте всегѡ̀ ми́ра , сᲂ а҆рха́нг҃лᲂмъ гаврїи́лᲂмъ вᲂпїе́мъ тѝ бцⷣе . ра́дꙋисѧ вмѣсти́лище невмѣсти́магᲂ . ра́дꙋисѧ бл҃гᲂда́тнаѧ нᲂси́лᲂ бжⷭ҇тва̀ всегѡ̀ . ра́дꙋисѧ а҆да́мᲂвᲂ вᲂзва́нїе с̾ тᲂбо́ю гдⷭ҇ь , тебѐ ра́ди с̾ на́ми спаса́ѧ на́съ . є҆го́же пᲂе́мъ и҆ превᲂзно́симъ во́ вѣки . Ко́рень і҆єс̾се́ѡвъ ѡ҆сщ҃е́нныи , ко́рень грѣха̀ на́шегѡ и҆сто́ргнꙋла є҆сѝ . же́злъ а҆арѡ́нᲂвъ прᲂцвѣ́тшїи , жизнᲂда́телѧ цвѣ́та и҆зрасти́вши хрⷭ҇та̀ . рꙋ́чкᲂ маннᲂпрїе́мнаѧ . сме́рти всю̀ си́лꙋ сᲂкрꙋши́ла є҆сѝ , и҆ в̾ пᲂро́дꙋ жи́зни вᲂзвела̀ є҆сѝ , ро́дъ чл҃ческїи . тѣ́мже тѧ̀ пᲂе́мъ , до́брыхъ вино́внꙋю . Ты̀ пᲂхвала̀ хрⷭ҇тїа́нѡмъ є҆сѝ влⷣчце . ты̀ ѻ҆рꙋ́жїе на врагѝ , и҆ стѣна̀ к̾ тебѣ̀ прибѣга́ющимъ . тѧ̀ и҆ ны́нѣ на́ пᲂмᲂщь призыва́емъ гжⷭ҇е , неда́ждь враго́мъ вᲂз̾нести́сѧ на́ люди твᲂѧ̀ , и҆́же тебѐ нехва́лѧтъ , ни сн҃а твᲂегѡ̀ бцⷣе , и҆ твᲂе́й и҆ко́нѣ некла́нѧютсѧ . си́хъ пᲂбѣдѝ , и҆ дш҃а на́ша спасѝ .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋисѧ пребл҃же́ннаѧ , бцⷣе чи́стаѧ прⷭ҇нѡ дв҃ᲂ . Ра́дꙋисѧ свѣщѐ , свѣ́тъ невече́рнїи пᲂне́сшаѧ , и҆ в̾ ржⷭ҇твѣ̀ твᲂе́мъ мнᲂгᲂбо́жїѧ тмꙋ̀ разрꙋши́вшаѧ , и҆ а҆́дᲂвы про́пасти и҆зба́вльшаѧ лю́ди . ра́дꙋисѧ ѻ҆диги́трїе бцⷣе , дᲂбро́тъ всѣ́хъ пред̾хᲂда́таице . Ра́дꙋисѧ землѐ , и҆з̾ неѧ́же кла́съ прᲂзѧ́бшїи нбⷭ҇ныи вѣ́рнымъ , и҆ ми́ра всегѡ̀ дш҃егꙋ́бнагѡ гла́да и҆зба́ви , разꙋ́мнаѧ и҆ ѡ҆дш҃евле́наѧ . ѽ ра́дꙋисѧ винᲂгра́де , и҆́же гро́здъ живо́тныи ро́ждьшаѧ , бцⷣе чи́стаѧ ѻ҆диги́трїе . Ра́дꙋисѧ та́йныхъ цвѣто́въ , прекра́сныи сꙋ́щїи раю̀ . ра́дꙋисѧ мт҃и дв҃ᲂ , неви́димыхъ ра́зꙋмъ , чистᲂто́ю страннᲂлѣ́пнѡ пᲂбѣ́ждьши бг҃ᲂрᲂди́тельнице . ра́дꙋисѧ ѻ҆трᲂкᲂви́це , ра́дꙋисѧ ѻ҆диги́трїе , всеми́рнᲂе чꙋ́дᲂ и҆ слы́шанїе . Лѣ́тᲂ живᲂта̀ на́шегѡ , про́чее сᲂхранѝ неврежде́нѡ , пᲂмᲂже́нїемъ твᲂи́мъ дв҃ᲂ ѻ҆трᲂкᲂви́це . и҆ спᲂдо́би кᲂне́цъ бл҃гі́и пᲂлꙋчи́ти на́мъ , вᲂспѣва́ющимъ тѧ и҆ взыва́ющимъ , ра́дꙋисѧ всебл҃же́ннаѧ бцⷣе чⷭ҇таѧ ѻ҆диги́трїе .

и҆́нъ і҆рмо́съ , то́йже . Тебѐ тве́рдꙋю пᲂмо́щницꙋ , ро́дꙋ чл҃ческᲂмꙋ бцⷣе мр҃і́е , ли́къ прᲂро́ческїи мнᲂгᲂѡ҆бра́знѡ прᲂвᲂзвѣстѝ . сѣ́нь ст҃ꙋ́ю , нб҃съ прᲂстра́ннѣе . скрижа́ль бг҃ᲂпи́саннꙋю , и҆ кꙋпинꙋ̀ неѡ҆пали́мꙋю . две́рь бг҃ᲂпрᲂхо́днꙋю , го́рꙋ же и҆ лѣ́ствицꙋ и҆ мо́стъ , и҆ же́злъ прᲂцвѣ́тшїи . мы́ же вᲂи́стинꙋ бцⷣꙋ тѧ̀ велича́емъ . Та́йна глꙋбины̀ ржⷭ҇тва̀ твᲂегѡ̀ , ᲂу҆́мъ а҆́нг҃льскїи ᲂу҆жаса́етъ дв҃ᲂ . и҆ пречи́стаѧ и҆ко́на бѣ́сы прᲂго́нитъ . и҆ ли́ца нечести́выхъ ѡ҆мрача́етъ , и҆ в̾ стꙋ́дъ пᲂрѣва́етъ нетерпѧ́тъ бᲂ взира́ти на си́лꙋ є҆ѧ̀ , бѣ́гаютъ же и҆ и҆счеза́ютъ . мы́ же любе́знѡ пᲂкланѧ́емсѧ и҆ лᲂбыза́емъ , и҆ тѧ̀ бцⷣе велича́емъ . Пред̾ста́тель сы́и не ѿстꙋпи́мъ к̾ вы́шнемꙋ цр҃ю , ꙗ҆́кѡ и҆мꙋ́щи мт҃рьне дерзнᲂве́нїе непᲂсты́днᲂ . в̾ ми́рѣ глꙋбо́цѣ правᲂсла́вныхъ житїѐ ᲂу҆твердѝ . и҆ бл҃гᲂвѣ́рныхъ люде́й на́шихъ вᲂзвы́си . и҆ всѧ̀ пᲂле́знаѧ да́рꙋй всегда̀ рабо́мъ твᲂи́мъ , да тѧ̀ бцⷣе велича́емъ . ѽ всеми́лᲂстиваѧ хрⷭ҇тїа́нѡмъ пᲂмо́щнице , немо́жетъ тѧ̀ вᲂспѣ́ти дᲂсто́йнѡ ᲂу҆́мъ челᲂвѣ́ческїи , и҆ а҆́нг҃льскїи , ꙗ҆́кѡ всеѧ̀ тва́ри честнѣ́йши , нбⷭ҇ныхъ и҆ земны́хъ сла́внѣйши . всѣ́хъ бᲂ рᲂдила̀ є҆сѝ твᲂрца̀ и҆ бг҃а . нᲂ ѽ влⷣчце прїимѝ ми́лᲂстивнᲂ , ꙗ҆́же тебѣ̀ ѿ́ срⷣца вᲂз̾лᲂжи́хᲂмъ пѣ́снь , спаса́й на́съ всегда̀ . на тѧ́ бᲂ надѣ́емсѧ .

свѣти́ленъ . Да пᲂчте́тсѧ всепѣ́таѧ мт҃и бж҃їѧ , жи́знь сꙋ́щꙋю ро́ждьши хрⷭ҇та̀ бг҃а на́шегѡ , ра́йскимъ две́ремъ ѿверзе́нїе , и҆ всегѡ̀ ми́ра ѡ҆чище́нїе . к̾ живᲂтꙋ̀ вᲂз̾веде́нїе . се́й є҆́сть прᲂро́кѡмъ глаго́лавыи . тᲂмꙋ̀ пᲂклᲂни́мсѧ , бг҃ꙋ и҆ сп҃сꙋ дш҃а́мъ на́шимъ . сла́ва , и҆ ны́нѣ . Прїидѣ́те вѣ́рнїи с̾ чистᲂто́ю вᲂз̾вели́чимъ пречⷭ҇тыѧ мт҃ре бг҃а на́шегѡ , чꙋ́днꙋю и҆ко́нꙋ , и҆ бжⷭ҇твенагѡ младе́нца сп҃са хрⷭ҇та̀ . є҆го́же ꙗ҆́кѡ ро́ждьшаѧ на рꙋкꙋ̀ нᲂси́вши , и҆ мт҃рьне дерзнᲂве́нїе к̾ немꙋ̀ и҆мꙋ́щи , непреста́ннѡ мо́литъ заны̀ , и҆ пᲂдае́тъ рабо́мъ свᲂи́мъ бᲂга́тыѧ ми́лᲂсти .

На хвали́тѣхъ , стихѣ́ры , на д҃ . гла́съ , д҃ . Прᲂсла́вимъ вѣ́рнїи ѡ҆бра́дᲂваннꙋю бцⷣꙋ . па́че же вᲂ ᲂу҆стѣ́хъ на́шихъ всегда̀ , ст҃о́е и҆ бл҃гᲂслᲂве́нᲂе и҆́мѧ є҆ѧ̀ . не преста́ннѡ прибѣга́юще , къ пречи́стѣй є҆ѧ̀ бг҃ᲂно́снѣй и҆ко́нѣ . то́ю бᲂ ѡ҆брѣта́емъ всѧ̀ бл҃га́ѧ и҆ пᲂле́знаѧ , ꙗ҆́же на землѝ . и҆ ꙗ҆́же на вᲂздꙋ́сѣ запина́нїѧ ѿ бѣсо́въ , и҆ въ мѣ́ста лю́таѧ мꙋ́ченаѧ притерза́нїѧ . ᲂу҆вы̀ а҆́ще не сїѧ̀ влⷣчца пред̾ва́рши расто́ргнетъ , грѣ́хъ на́шихъ рꙋкᲂписа́нїе , и҆ спасе́тъ ѿ ѕо́лъ дш҃а на́ша . двⷤа . Да рыда́етъ вѣ́чнѡ со́нмъ ѕлᲂчести́выхъ , не и҆спᲂвѣ́дающихъ тѧ̀ ржⷭ҇тво́мъ чи́стꙋю бг҃ᲂрᲂди́тельницꙋ , и҆ не пᲂклᲂнѧ́ющихсѧ пречи́стѣй ти и҆ко́нѣ , вѣ́рнїи же лю́дїе вᲂз̾ра́дᲂвашасѧ , и҆спᲂвѣ́дающе тѧ и҆́стиннꙋю дв҃ꙋ бцⷣꙋ , ꙗ҆́кѡ вᲂи́стинꙋ рᲂдила̀ є҆сѝ пло́тїю хрⷭ҇та̀ бг҃а на́шегѡ . тлѣ́нїе а҆да́мᲂвᲂ пᲂпра́ла є҆сѝ , и҆ грѣхѝ всегѡ̀ ми́ръ ѡ҆чи́стила є҆сѝ , жи́знь без̾кᲂне́чнꙋю дарᲂва́ла є҆сѝ . ра́йскїи вхо́дъ вѣ́рнымъ ѿве́рзла є҆сѝ , бжⷭ҇твенымъ тѝ ржⷭ҇тво́мъ . є҆го́же мᲂлѝ , спасти́сѧ на́мъ пᲂю́щимъ вѣ́рнѡ твᲂѐ та́иньствᲂ . Ра́дꙋетсѧ ᲂу҆́бѡ и҆ весели́тсѧ , неи҆з̾рече́ннᲂю ра́дᲂстїю , всѐ мно́жествᲂ бл҃гᲂчести́выхъ . припа́дающе же пᲂклᲂнѧ́ютсѧ , всѝ бл҃гᲂгᲂвѣ́ютъ бж҃їи мт҃ри , съ бᲂѧ́знїю . бл҃гᲂдарѧ́ще сїю̀ по́ бз҃ѣ ꙗ҆́кѡ бг҃а , тᲂли́кихъ превели́кихъ бл҃гъ хᲂда́таицꙋ , в̾ не́же жела́ютъ а҆́нг҃ли прини́кнꙋти , дарᲂва̀ бцⷣею вѣ́рнымъ хрⷭ҇то́съ бг҃ъ на́шъ , и҆мѣ́ѧи премно́жествᲂ щедро́тъ , и҆ вели́кꙋю пребᲂга́тꙋю ми́лᲂсть .

сла́ва , и҆ нн҃ѣ . гла́съ , и҃ . Ст҃а́ѧ ти и҆ сᲂѡ҆бра́знаѧ и҆ко́на бцⷣе дв҃ᲂ , бл҃гᲂда́тїю твᲂе́ю пребᲂга́тыи сꙋ́щїи и҆сто́чникъ , кипѧ́щїи все́й пᲂд̾сл҃нечнѣй , и҆ свѣтѧ́щїй всемꙋ̀ ми́рꙋ , свѣтᲂлꙋ́чными ст҃а́гѡ дх҃а сїѧ́ньми , и҆сцѣле́нїи свѣтлᲂстьмѝ . ты́ бᲂ бг҃а сло́ва пло́тїю несказа́ннѡ рᲂдила̀ є҆сѝ , ѿ бл҃гᲂвѣ́стника гаврїи́ла си́цеваѧ слы́шавши . ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю . и҆ дх҃ъ ст҃ы́и ѡ҆сѣни́тъ тѧ̀ к̾ зача́тїю . та́кᲂже рекла̀ є҆сѝ , к̾ первᲂпи́саннᲂй твᲂегѡ̀ ѻ҆́браза и҆ко́нѣ , на тꙋ̀ зрѧ́щи , съ тᲂбо́ю мᲂѧ̀ бл҃гᲂда́ть . и҆ сло́вᲂ твᲂѐ со́ властїю и҆ко́нѣ бы́сть . и҆ ѻ҆́бразъ и҆ гла́съ , и҆ си́ла и҆ дѣ́лᲂ , и҆ всѧ́къ ᲂу҆́мъ превᲂсхᲂдѧ́щаѧ бжⷭ҇твенаѧ бл҃гᲂда́ть , съ пребыва́ѧ вѣ́чнѡ . зна́менїѧ и҆ чꙋдеса̀ непреста́ннѡ сᲂдѣва́ѧ , и҆ дш҃епᲂле́знᲂе и҆сцѣле́нїе , всѣ́мъ вѣ́рнѡ прихᲂдѧ́щимъ , твᲂи́ми бг҃ᲂма́терьними непреста́нными к̾ бг҃ꙋ мᲂли́твами .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , ѿ кано́на , пра́здникꙋ , пѣ́снь г҃ ѧ , и҆ пѣ́снь , ѕ҃ ѧ , на и҃ .

Пᲂ вхо́дѣ , а҆́ще ли хра́мъ гдⷭ҇ьскїи : трᲂпа́рь , хра́мꙋ , и҆ пра́здникꙋ . сла́ва , кᲂнда́къ , хра́мꙋ . и҆ ны́нѣ , пра́здникꙋ .

Пᲂ вхо́дѣ , а҆́ще ли хра́мъ бцⷣѣ , и҆лѝ ст҃ы́мъ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ ны́нѣ блажа́тъ мѧ всѝ ро́ди . а҆пⷭ҇лъ , къ є҆вре́ѡмъ . заⷱ҇ , т҃к . а҆ллилꙋ́їѧ . Слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . сти́хъ . лицꙋ̀ твᲂемꙋ̀ пᲂмо́лѧтсѧ бᲂга́тїи лю́дьстїи . є҆ѵⷢ҇а́лїе , ѿ лꙋкѝ . зача́лᲂ , н҃д . прича́стенъ , ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призᲂвꙋ̀ .