МЦⷭ҇А И҆Ю́ЛѦ ВЪ І҃ ДН҃Ь

Слꙋ́жба на пᲂлᲂже́нїе ри́зы , є҆́же є҆́сть хитѡ́нъ , вели́кагѡ гдⷭ҇а бг҃а и҆ сп҃са на́шегѡ і҆с҃а хрⷭ҇та̀ . Вече́ръ . блаже́нъ мꙋ́жь , а҃ , а҆нтифо́нъ . =На гдⷭ҇и вᲂзва́хъ , стⷯры , на и҃ . гла́съ , а҃ . поⷣ . п=рехва́льнїи мч҃нцы . Ри́за честна́ѧ твᲂѧ̀ влⷣкᲂ , ꙗ҆́же твᲂѐ бжⷭ҇твенᲂе и҆ пречи́стᲂе тѣ́лᲂ пᲂкрыва́ющаѧ , ѻ҆де́ждꙋ и҆сцѣле́нїи дарᲂва̀ на́мъ , и҆ и҆сто́чникъ и҆стᲂча́ющи бл҃гᲂда́ти прⷭ҇нѡ живо́тныѧ во́ды . тᲂѧ̀ пра́з̾днꙋемъ пᲂлᲂже́нїе , вᲂспѣва́юще тѧ̀ всѣ́хъ сᲂдѣ́телѧ . Хра́мъ тво́й влⷣкᲂ , твᲂю̀ сщ҃е́ннꙋю ри́зꙋ , ꙗ҆́кѡ сᲂкро́вище спасе́нїѧ и҆ и҆сцѣле́нїѧ нᲂсѧ̀ , ѡ҆сщ҃а́етъ всѧ̀ , и҆́же вѣ́рᲂю притека́ющїѧ , и҆ тѧ̀ по́ дᲂлгꙋ пᲂю́щїѧ всегда̀ , ᲂу҆пᲂва́нїе дш҃а́мъ на́шимъ , и҆ тве́рдыи пᲂкро́въ и҆ держа́вꙋ . Держа́ва непᲂбѣди́ма на́мъ хрⷭ҇тїа́нѡмъ дарᲂва́сѧ , ри́за твᲂѧ̀ і҆с҃е сп҃се на́шъ . є҆ю́же и҆нᲂплеме́нныхъ ꙗ҆зы́цы при́снѡ пᲂбѣжда́ютсѧ , и҆ ми́ръ цр҃кви твᲂе́й хрⷭ҇тѐ ѡ҆сѣнѧ́етъ . сегѡ̀ ра́ди вѣ́рᲂю цѣлꙋ́юще є҆ѧ̀ , пᲂклᲂнѧ́емсѧ тебѣ̀ чл҃кᲂлю́бче , и҆ мо́лимъ , ча́сти спᲂдо́бити на́съ ст҃ы́хъ твᲂи́хъ .

сла́ва , и҆ ны́нѣ . гла́съ , и҃ . Крⷭ҇тꙋ̀ твᲂемꙋ̀ честно́мꙋ , и҆ ри́зѣ ст҃ѣ́й пᲂклᲂнѧ́емсѧ пребл҃гі́и , и҆ любо́вїю ѡ҆блᲂбыза́емъ , сла́вѧще твᲂѐ , є҆́же па́че ᲂу҆ма̀ сᲂше́ствїе , и҆ без̾мѣ́рнꙋю млⷭ҇ть , и҆ бᲂга́тꙋю бл҃гᲂсты́ню . и҆́миже и҆сцѣле́нїѧ пᲂдава́еши бᲂлѧ́щимъ , и҆ спаса́еши чл҃ческᲂе є҆стество̀ , сᲂдержи́мᲂ бы́вшее вᲂ тмѣ̀ прегрѣше́нїи , ꙗ҆́кѡ чл҃кᲂлю́бецъ .

та́же , вы́хᲂдъ . прᲂки́менъ , дню̀ .

Ѿ= и҆схо́да , чте́нїе .=

Пᲂѧ́тъ мѡѷсе́й сн҃ы і҆и҃левы ѿ́ мᲂрѧ чермна́гѡ , и҆ введѐ и҆́хъ в̾ пꙋсты́ню си́ръ . и҆ и҆дѧ́хꙋ пᲂ пꙋсты́ни трѝ днѝ , и҆ не ѡ҆брѣта́хꙋ вᲂды̀ , да бы́ша пи́ли . прїидо́ша же в̾ ме́ррꙋ , и҆ немᲂжа́хꙋ пи́ти вᲂды̀ ѿ ме́рры , гᲂрька́ бᲂ бѣ̀ . сегѡ̀ ра́ди нарече́сѧ мѣ́стꙋ тᲂмꙋ̀ го́ресть . и҆ рᲂпта́хꙋ лю́дїе на мѡѷсе́ѧ гл҃юще , что̀ пїе́мъ ; вᲂзᲂпи́ же мѡѷсе́й ко́ гдⷭ҇ꙋ . и҆ пᲂказа̀ є҆мꙋ̀ гдⷭ҇ь дре́вᲂ , и҆ влᲂжѝ є҆̀ в̾ во́дꙋ , и҆ сладка̀ бы́сть вᲂда̀ . и҆ тꙋ̀ пᲂлᲂжѝ є҆мꙋ̀ бг҃ъ ѡ҆правда́нїѧ и҆ сꙋды̀ . и҆ тꙋ̀ и҆скꙋша́ше є҆гѡ̀ , и҆ речѐ , а҆́ще слꙋ́хᲂмъ ᲂу҆слы́шиши гла́съ гдⷭ҇а бг҃а твᲂегѡ̀ , и҆ ᲂу҆го́днаѧ пред̾ ни́мъ сᲂтвᲂри́ши , и҆ внꙋши́ши за́пᲂвѣди є҆гѡ̀ , и҆ сᲂхрани́ши всѧ̀ ѡ҆правда́нїѧ є҆гѡ̀ , всѧ́кꙋ бᲂлѣ́знь ю҆́же наведо́хъ на є҆гѵ́птѧны , ненаведꙋ̀ на тѧ̀ , а҆́зъ бᲂ є҆́смь гдⷭ҇ь и҆сцѣлѧ́ѧи тѧ̀ . и҆ прїидо́ша вᲂ є҆ли́мъ , и҆ бѧ́хꙋ тꙋ̀ двана́десѧть и҆сто́чника во́дъ , и҆ се́дмьдесѧтъ сте́бль фи́никѡвъ . ста́ша же тꙋ̀ при вᲂда́хъ . и҆ вᲂз̾двиго́шасѧ ѿ є҆ли́ма , и҆ прїидо́ша ве́сь со́нмъ сн҃о́въ і҆и҃левъ в̾ пꙋсты́ню си́нъ , ꙗ҆́же є҆́сть междꙋ̀ є҆ли́мᲂмъ и҆ междꙋ̀ си́нᲂю .

Ѿ= при́тчей , чте́нїе .=

Сн҃е непренемᲂга́й в̾ наказа́нїи гдⷭ҇ни , и҆ не ѡ҆слабѣ́й ѿ негѡ̀ ѡ҆блича́емь . є҆го́же бᲂ лю́битъ гдⷭ҇ь наказꙋ́етъ , и҆ бїе́тъ всѧ́кагᲂ сн҃а ѻ҆ц҃ъ , є҆го́же прїе́млетъ . бл҃же́нъ чл҃къ и҆́же ѡ҆брѣ́те премꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бᲂ тꙋ̀ кꙋпᲂва́ти , не́жели зла́та и҆лѝ сребра̀ сᲂкро́вища . дража́йши же є҆́сть ка́менїѧ мнᲂгᲂцѣ́ннагᲂ . непрᲂти́витсѧ є҆́й ничто́же лꙋка́вᲂ . бл҃гᲂразꙋ́мна є҆́сть всѣ́мъ лю́бѧщимъ ю҆̀ . все́ же чⷭ҇тно́е недᲂсто́йнᲂ є҆́сть є҆́й . дᲂлгᲂта́ бᲂ житїю̀ , и҆ лѣ́та жи́зни в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тьствᲂ и҆ сла́ва . ѿ ᲂу҆́стъ є҆ѧ̀ и҆схо́дитъ пра́вда , зако́нъ же и҆ ми́лᲂсть на ꙗ҆зы́цѣ но́ситъ . пꙋтїѐ є҆ѧ̀ , пꙋтїѐ дᲂбры̀ , и҆ всѧ̀ стезѝ є҆ѧ̀ ми́рны . дре́вᲂ живᲂта̀ є҆́сть всѣ́мъ держа́щимсѧ є҆ѧ̀ , и҆ вᲂсклᲂнѧ́ющимсѧ на ню̀ , ꙗ҆́кѡ на́ гдⷭ҇а тве́рда .

Ѿ= прᲂро́чества и҆са́ина , чте́нїе .=

Та́кѡ гл҃етъ гдⷭ҇ь , ѿве́рзꙋтсѧ врата̀ твᲂѧ̀ і҆єрⷭ҇ли́ме вы́нꙋ де́нь и҆ но́щь , и҆ незатвᲂрѧ́тсѧ , ввестѝ к̾ тебѣ̀ си́лꙋ ꙗ҆зы́къ , и҆ царѝ и҆́хъ ведо́мы . ꙗ҆зы́цы бᲂ и҆ цр҃їе , и҆́же тебѣ̀ непᲂрабо́таютъ , пᲂги́бнꙋтъ , и҆ ꙗ҆зы́цы запꙋстѣ́нїемъ запꙋстѣ́ютъ . и҆ сла́ва лива́нᲂва к̾ тебѣ̀ прїи́детъ , кѷпари́сᲂмъ и҆ пе́ѵгᲂмъ и҆ ке́дрᲂмъ , вкꙋ́пѣ прᲂсла́вити мѣ́стᲂ ст҃о́е мᲂѐ , и҆ мѣ́стᲂ но́гꙋ мᲂе́ю прᲂсла́влю . и҆ по́йдꙋтъ к̾ тебѣ̀ бᲂѧ́щесѧ сы́нᲂве смири́вшихъ тѧ , и҆ прᲂгнѣ́вавшихъ тѧ . и҆ пᲂкло́нѧтсѧ стᲂпа́мъ но́гꙋ твᲂе́ю всѝ прᲂгнѣ́вавшїи тѧ̀ . и҆ нарече́шисѧ гра́дъ гдⷭ҇нь , сїѡ́нъ ст҃а́гѡ і҆и҃лева . за є҆́же бы́ти тѝ ѡ҆ста́вленꙋ и҆ вᲂз̾ненави́дѣнꙋ , и҆ небѣ̀ пᲂмᲂга́ющагᲂ ти , и҆ пᲂлᲂжꙋ́ тѧ в̾ ра́дᲂсть вѣ́чнꙋю , и҆ весе́лїе рᲂдо́мъ рᲂдо́въ . и҆ пᲂссе́ши млеко̀ ꙗ҆зы́кѡмъ , и҆ бᲂга́тьствᲂ цр҃е́й снѣ́си , и҆ разꙋмѣ́еши ꙗ҆́кѡ а҆́зъ гдⷭ҇ь спаса́ѧи тѧ , и҆ и҆збавлѧ́ѧи тѧ̀ , бг҃ъ ст҃ы́и і҆зра́илевъ .

На литі́и , стихѣ́ры . гла́съ , д҃ . Гра́дъ мᲂсквꙋ̀ пᲂчита́ющїи тѧ̀ сп҃се , и҆ по́дᲂлгꙋ сла́вѧщїи ѡ҆гражда́еши чл҃кᲂлю́бче и҆ лю́ди , ри́зᲂю бжⷭ҇твенᲂю свᲂе́ю , ѿ без̾бо́жныхъ и҆нᲂплеме́нникъ , ѿ́ глада же и҆ трꙋ́са , и҆ междᲂꙋсо́бныѧ бра́ни при́снѡ , и҆ бᲂлѧ́щимъ и҆сцѣле́нїѧ пᲂдава́еши , прихᲂдѧ́щимъ с̾ вѣ́рᲂю . и҆́же земны́хъ не́мᲂщь свѣ́дыи , гдⷭ҇и сла́ва тебѣ̀ . Ри́зꙋ свᲂю̀ бжⷭ҇твенꙋю влⷣкᲂ хрⷭ҇тѐ , дарᲂва́лъ є҆сѝ гра́дꙋ твᲂемꙋ̀ мᲂсквѣ̀ , бᲂга́тьствᲂ не ѿє́млемᲂ , пᲂкро́въ же и҆ сла́вꙋ , и҆ не ѡ҆бᲂри́мꙋю стѣ́нꙋ , и҆ и҆сцѣле́нїемъ сᲂкро́вище , и҆ чꙋдесе́мъ и҆сто́чникъ приснᲂтекꙋ́щь , приста́нище же спасе́нᲂ ѡ҆бꙋрева́емымъ всегда̀ . сегѡ̀ ра́ди пᲂе́мъ ти , гдⷭ҇и сла́ва тебѣ̀ . Пᲂчерпи́те чл҃цы спасе́нїе дш҃а́мъ , и҆ и҆сцѣле́нїе тѣлесе́мъ . ра́ка бᲂ всѣ́мъ дне́сь пред̾лежи́тъ в̾ не́й же пᲂлᲂжи́сѧ а҆рхїєре́йскима рꙋка́ма , честна́ѧ ри́за хрⷭ҇та̀ бг҃а на́шегѡ , є҆́же є҆́сть хитѡ́нъ , и҆стᲂча́ющи на́мъ чꙋде́съ стрꙋѝ ѡ҆би́льнѡ , и҆ ѿмыва́ющи срⷣцъ ѡ҆мраче́нїѧ , и҆ страсте́й ѿє́млющи скве́рнꙋ , бжⷭ҇твенᲂю бл҃гᲂда́тїю . сла́ва , и҆ ны́нѣ . гла́съ , ѕ҃ . Ѻ҆дѣѧ́исѧ свѣ́тᲂмъ ꙗ҆́кѡ ри́зᲂю , на́гъ на сꙋдѣ̀ стᲂи́тъ , и҆ въ лани́тꙋ ᲂу҆даре́нїе прїе́млетъ ѿ рꙋкꙋ̀ и҆́хже сᲂзда̀ . без̾зако́ннїи лю́дїе , на крⷭ҇тѣ̀ пригвᲂзди́ша гдⷭ҇а сла́вы , тᲂгда̀ и҆ за́вѣса цр҃ко́внаѧ распаде́сѧ , сл҃нце пᲂме́рче , нетерпѧ̀ зрѣ́ти бг҃ꙋ дᲂсажда́емꙋ , є҆го́же трепе́щꙋтъ всѧ́ческаѧ . тᲂмꙋ̀ пᲂклᲂни́мсѧ глаго́люще , дᲂлгᲂтерпѣли́ве гдⷭ҇и сла́ва тебѣ̀ .

На стихо́внѣ , стⷯры . гла́съ , д҃ . поⷣ . ꙗ҆́кѡ до́блѧ . Во́гласѣхъ вᲂскли́кнемъ , пѣ́сньми вᲂспᲂе́мъ , крⷭ҇тъ честны́и ѡ҆блᲂбыза́юще . и҆ к̾ немꙋ̀ вᲂзᲂпїе́мъ , крⷭ҇тѣ пребл҃же́нне , ѡ҆ст҃ѝ на́ша дш҃а и҆ тѣлеса̀ си́лᲂю твᲂе́ю , и҆ всѧ́кᲂгѡ вре́да сᲂпрᲂти́вна сᲂблюдѝ неврежде́ны , и҆́же бл҃гᲂче́стнѡ пᲂклᲂнѧ́ющих̾тисѧ .

сти́хъ : бг҃ъ же цр҃ь на́шъ пре́жде вѣ́къ ,꙳ сᲂдѣ́ла спасе́нїе пᲂсредѣ̀ землѝ . Пристꙋпи́вше чл҃цы , пᲂчерпи́те неи҆стᲂща́емыѧ вᲂды̀ , крⷭ҇та̀ бл҃гᲂда́тїю прᲂлива́емы . сѐ пред̾лежи́ма зри́тсѧ нн҃ѣ , и҆ ри́за хрⷭ҇та̀ бг҃а на́шегѡ , дарᲂва́нїемъ и҆сто́чникъ . напᲂе́на кро́вїю бжⷭ҇твенᲂю влⷣки всѣ́хъ , ѡ҆дѣ́ющагᲂ нб҃ᲂ ѻ҆́блаки . и҆́же в̾ сїю̀ ѡ҆блещи́сѧ и҆з̾во́ливыи , гдⷭ҇и сла́ва тебѣ̀ .

сти́хъ : вᲂз̾нᲂси́те гдⷭ҇а бг҃а на́шегѡ ,꙳ и҆ кланѧ́йтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃ᲂ є҆́сть . Цр҃кви ᲂу҆тверже́нїе , благᲂвѣ́рныхъ хрⷭ҇тїа́нъ держа́ва , и҆́нᲂкꙋющимъ пᲂхвала̀ и҆ спасе́нїе , ты̀ є҆сѝ крⷭ҇те всебл҃же́нне . тѣ́мже пᲂкланѧ́ем̾тисѧ срⷣцемъ и҆ дш҃е́ю , и҆ прᲂсвѣща́емсѧ дне́сь ри́зᲂю бжⷭ҇твенᲂю , и҆́же тꙋ̀ плᲂтьска́гѡ ра́ди сᲂше́ствїѧ свᲂегѡ̀ , пᲂнᲂси́ти и҆зво́лившемꙋ хрⷭ҇тꙋ̀ бг҃ꙋ на́шемꙋ , и҆ чⷭ҇тно́ю свᲂе́ю кро́вїю ѡ҆багри́вшемꙋ .

сла́ва , и҆ ны́нѣ . гла́съ , и҃ . Пре́жде чⷭ҇тна́гѡ тѝ крⷭ҇та̀ , во́инѡмъ рꙋга́ющимсѧ тебѣ̀ гдⷭ҇и , мы́сленаѧ во́инства дивлѧ́хꙋсѧ . ѡ҆блᲂжи́бᲂсѧ вѣнце́мъ пᲂрꙋга́нїѧ , и҆́же зе́млю ᲂу҆краше́и цвѣ́ты . багрѧни́цею пᲂрꙋга́нїѧ ѡ҆дѣ́ѧсѧ , и҆́же ѻ҆́блаки ѡ҆дѣва́ѧи тве́рдь . такᲂвы́мъ бᲂ смᲂтре́нїемъ разꙋмѣ́сѧ твᲂѐ милᲂсе́рдїе хрⷭ҇тѐ . ве́лїѧ млⷭ҇ть твᲂѧ̀ сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Дне́сь притеце́мъ вѣ́рнїи , къ бжⷭ҇твенѣй и҆ цѣльбᲂно́снѣй ри́зѣ спаси́телѧ на́шегѡ бг҃а , бл҃гᲂи҆зво́лившагѡ сїю̀ пло́тїю пᲂнᲂси́ти , и҆ на крⷭ҇тѣ̀ ст҃ꙋ́ю свᲂю̀ кро́вь и҆з̾лїѧ́ти . є҆ю́же и҆скꙋпѝ на́съ ѿ рабо́ты вра́жїѧ . тѣ́мъ бл҃гᲂдарѧ́ще вᲂпїе́мъ є҆мꙋ̀ , спасѝ странꙋ̀ на́шꙋ , и҆ митрᲂпᲂли́та и҆ гра́дъ . и҆ всѧ̀ лю́ди честно́ю свᲂе́ю ри́зᲂю защитѝ . и҆ спасѝ дш҃а на́ша , ꙗ҆́кѡ чл҃кᲂлю́бецъ .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . Пᲂ а҃ , стихᲂло́гїи , сѣда́ленъ . гла́съ , ѕ҃ .

Дне́сь прᲂро́ческᲂе и҆спо́лнисѧ сло́вᲂ , се́бᲂ пᲂклᲂнѧ́емсѧ на мѣ́стѣ , и҆дѣ́же стᲂѧ́стѣ но́зѣ твᲂѝ гдⷭ҇и . и҆ дре́вᲂ спасе́нїѧ вкꙋси́вше , грѣхо́вныхъ страсте́й свᲂбᲂдꙋ̀ ᲂу҆лꙋчи́хᲂмъ , мᲂли́твами бцⷣы , є҆ди́не чл҃кᲂлю́бче . сла́ва , и҆ ны́нѣ , то́йже .

Пᲂ в҃ , стихᲂло́гїи , сѣда́ленъ . гла́съ , и҃ . На крⷭ҇тѣ́ тѧ вᲂз̾вы́шена ви́дѣвши сл҃нце незахᲂди́магᲂ сл҃нца хрⷭ҇тѐ , стра́хᲂмъ пᲂмрачи́сѧ а҆́бїе . землѧ́ же пᲂкᲂлеба́сѧ , ка́менїе тре́петᲂмъ распада́шесѧ . и҆ цр҃ко́внаѧ раз̾дра́сѧ за́вѣса . и҆ ме́ртвїи ѿ гро́бъ вᲂстава́хꙋ , славᲂсло́вѧще стра́шнᲂе и҆ бжⷭ҇твенᲂе схᲂжде́нїе , є҆ди́нагѡ бг҃а на́шегѡ . сла́ва , и҆ ны́нѣ , то́йже .

Велича́нїе : Велича́емъ тѧ̀ живᲂда́вче хрⷭ҇тѐ , и҆ пᲂчита́емъ всѝ бжⷭ҇твеныѧ ри́зы твᲂеѧ̀ чⷭ҇тно́е пᲂлᲂже́нїе . ѱл҃о́мъ и҆збра́нныи , вᲂз̾дви́женїю .

Пᲂ пᲂлїєлеѡ́сѣ , сѣда́ленъ . гла́съ , ѕ҃ . На́ древᲂ крⷭ҇тнᲂе сп҃се , за милᲂсе́рдїе млⷭ҇ти вᲂз̾несе́сѧ . и҆ въ ре́бра прᲂбᲂде́сѧ кᲂпїе́мъ , раз̾дра́лъ є҆сѝ сᲂгрѣше́нїемъ рꙋкᲂписа́нїе лю́тᲂе , ꙗ҆́кѡ всеси́ленъ бг҃ъ . тѣ́мже твᲂѐ неи҆з̾глаго́ланнᲂе сло́ве смᲂтре́нїе , пᲂе́мъ бл҃гᲂче́стнѡ . сла́ва , и҆ ны́нѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Раз̾дѣли́ша ри́зы мᲂѧ̀ себѣ̀ , и҆ ѡ҆ ѻ҆де́жди мᲂе́й мета́ша жре́бїѧ . сти́хъ . да́ша в̾ снѣ́дь мᲂю̀ же́лчь , и҆ въ жа́ждꙋ мᲂю̀ напᲂи́ша мѧ̀ ѻ҆цта̀ . всѧ́кᲂ дыха́нїе .

є҆ѵⷢ҇а́лїе , ѿ матѳе́ѧ . зача́лᲂ , рв҃і . ѱало́мъ , н҃ .

сла́ва . мᲂли́твъ ра́ди а҆пⷭ҇лъ , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Сᲂвлеко́ша ри́зы мᲂѧ̀ с̾ менѐ , и҆ ѡ҆блеко́ша мѧ в̾ ри́зꙋ червленꙋ̀ . вᲂз̾лᲂжи́ша на главꙋ̀ мᲂю̀ вѣне́цъ , и҆ в̾ деснꙋ́ю мѝ рꙋ́кꙋ вда́ша тро́сть . лице́ же мᲂѐ не ѿврати́хъ ѿ заплева́нїѧ . сꙋди́щꙋ пила́тᲂвꙋ пред̾ста́хъ , и҆ распѧ́тїе претерпѣ́хъ , за мирско́е спасе́нїе .

Кано́нъ . і҆рмо́съ , пᲂ два́жды . а҆ трᲂпарѝ на в҃і . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́вᲂ ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Ѿве́рземъ ᲂу҆ста̀ чл҃цы , и҆ ꙗ҆зы́къ ᲂу҆ѧсни́мъ в̾ наро́читыи де́нь пра́з̾дника на́шегѡ , пᲂлᲂже́нїѧ бжⷭ҇твеныѧ ри́зы хрⷭ҇та̀ на́шегѡ свѣ́тлѡ сла́вѧще . Сказа́ти хᲂтѧ̀ свᲂю̀ бл҃гᲂда́ть вы́шнїи , и҆ прїѧ́тъ ра́бїи ѻ҆́бразъ на́съ ра́ди , на ᲂу҆вѣре́нїе є҆стества̀ чл҃ческагѡ , честнꙋ́ю ри́зꙋ свᲂю̀ вѣ́рнымъ дне́сь дарᲂва̀ . Ри́зꙋ твᲂю̀ честнꙋ́ю хрⷭ҇тѐ дарᲂва́лъ є҆сѝ на́мъ , сщ҃е́ннѡ ѡ҆гражде́нїе . всѧ́кᲂ сᲂпрᲂти́вныхъ настᲂѧ́нїе прⷭ҇нѡ пᲂбѣжда́ющꙋ , си́лᲂю дх҃о́внᲂю . боⷢ҇ . Вᲂз̾дви́жена ви́дѧщи , є҆́же на крⷭ҇тѣ̀ твᲂѐ дᲂлгᲂтерпѣ́нїе , рыда́ше тебѐ ро́ждьшаѧ зᲂвꙋ́щи , ка́кѡ сꙋди́мь ви́дитсѧ , хᲂтѧ́и всѣ́мъ сꙋди́ти сла́вѣ гдⷭ҇ь .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Влⷣка сы́и пᲂ сꙋществꙋ̀ сᲂєдини́всѧ рабѡ́мъ пло́тїю , и҆ на́ше дѣ́тельствꙋѧ разли́чнѡ спасе́нїе хрⷭ҇тѐ . є҆́же и҆ нн҃ѣ прᲂмышлѧ́ѧ , свᲂе́ю бжⷭ҇твенᲂю ри́зᲂю , на́мъ чꙋдᲂдѣ́йствꙋѧ . Пло́тїю на́съ ра́ди ꙗ҆вле́исѧ на землѝ , бжⷭ҇твеныѧ ри́зы свᲂеѧ̀ приближе́нїемъ , на́съ ѡ҆ст҃и́лъ є҆сѝ . є҆́йже пᲂклᲂнѧ́ющесѧ хрⷭ҇тѐ , тѧ̀ вᲂспѣва́емъ . Живо́тъ сᲂста́вныи ны́нѣ вкꙋсѝ сме́рти плᲂтьскі́ѧ , є҆ю́же живо́тъ и҆стᲂчи́лъ є҆сѝ ме́ртвымъ вᲂста́нїемъ свᲂи́мъ хрⷭ҇тѐ . ны́нѣ же ꙗ҆́кѡ живᲂтꙋ̀ хᲂда́таѧ , ри́зꙋ свᲂю̀ бг҃ᲂтѣле́снагѡ ѡ҆дѣѧ́нїѧ по́далъ є҆сѝ на́мъ . боⷢ҇ . И҆з̾ тебѐ дв҃ᲂ ѡ҆бнᲂвле́нїе ꙗ҆́вѣ ꙗ҆ви́сѧ , вᲂи́стинꙋ бг҃ъ пло́тїю ражда́емь , и҆ на крⷭ҇тъ вᲂз̾выша́емь , низ̾лага́ѧ бѣ́сѡвы , бг҃ᲂра́дᲂваннаѧ влⷣчце .

сѣда́ленъ . гла́съ , д҃ . Сше́дыи с̾ нб҃сѐ за млрⷭ҇дїе ми́лᲂсти , бл҃гᲂꙋтро́бне сп҃се , пло́ти свᲂеѧ̀ прест҃ы́ѧ дне́сь бжⷭ҇твенꙋю ри́зꙋ гра́дꙋ чтꙋ́щемꙋ тѧ̀ , и҆ лю́демъ хрⷭ҇тᲂи҆мени́тымъ , сᲂкро́вище по́далъ є҆сѝ ꙗ҆́кѡ тве́рдᲂ всеѻ҆рꙋ́жїе . ѿ неѧ́же пᲂчерпа́юще ѡ҆сщ҃е́нїе , сїю̀ вѣ́рᲂю те́плѣ всѝ пᲂчита́емъ .= сла́ва , и҆ ны́нѣ , то́йже .=

пѣ́снь , д҃ . і҆рмо́с̾ . Неи҆зслѣ́днᲂмꙋ бж҃їю сᲂвѣ́тꙋ , є҆́же ѿ дв҃ы вᲂплᲂще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вᲂпїѧ́ше , сла́ва си́лѣ твᲂе́й гдⷭ҇и . Ꙗ҆́кѡ мнᲂгᲂцѣ́ннᲂ сᲂкро́вище стѧжа́въ хрⷭ҇тѐ , чтꙋ́щїи тѧ̀ гра́дъ мᲂсква̀ ри́зꙋ твᲂю̀ влⷣкᲂ , вѣ́рᲂю ѡ҆блᲂбыза́етъ , и҆ бл҃гᲂда́ть прїе́млетъ . Ви́дите чꙋ́днаѧ всѝ лю́дїе , и҆ дх҃о́внѡ ны́нѣ вᲂз̾весели́тесѧ . хрⷭ҇та̀ пᲂю́ще дарᲂва́вшагᲂ на́мъ , ꙗ҆́кѡ мнᲂгᲂцѣ́ннᲂе бᲂга́тьствᲂ , бжⷭ҇твеныѧ пло́ти свᲂеѧ̀ ѻ҆дѣѧ́нїе . Бг҃ᲂвидѣ́нїѧ сла́вы дре́вле , те́мнѡ твᲂи́хъ за́днихъ спᲂдо́бисѧ мѡѷсе́й прᲂси́въ . мы́же но́выи і҆зра́иль , ны́нѣ лице́мъ в̾ лицѐ твᲂю̀ честнꙋ́ю ри́зꙋ и҆зба́вителѧ на́шегѡ ви́димъ ꙗ҆́снѡ . боⷢ҇ . Раз̾дра́сѧ рꙋкᲂписа́нїе а҆да́мᲂвᲂ , кᲂпїе́мъ прᲂбᲂде́нꙋ тѝ влⷣкᲂ , бцⷣа вᲂпїѧ́ше , ᲂу҆ крⷭ҇та̀ пред̾стᲂѧ́щи гдⷭ҇и , и҆ бᲂлѣ́зненѡ вᲂсклица́ющи .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бᲂ бракᲂнеи҆скꙋси́маѧ дв҃це , прїѧ́тъ вᲂ ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Прᲂсвѣти́сѧ дне́сь правᲂсла́вныхъ со́нмище . є҆рети́ческїи же по́лкъ да пᲂсрами́тсѧ , пᲂклᲂнѧ́емꙋ ви́дѧ бжⷭ҇твенꙋю ри́зꙋ твᲂю̀ влⷣкᲂ , пло́тїю на́мъ ꙗ҆́вльшагᲂсѧ . Ты̀ влⷣкᲂ на́мъ твᲂи́мъ рабѡ́мъ дарᲂва́лъ є҆сѝ ᲂу҆тверже́нїе ри́зꙋ , бг҃ᲂвᲂчелᲂвѣ́ченїѧ свᲂегѡ̀ , бжⷭ҇твенᲂе ѡ҆гражде́нїе , и҆ дш҃а́мъ спасе́нїе , и҆ тѣлесе́мъ и҆сцѣле́нїе . Вᲂспле́щемъ дне́сь рꙋка́ми , и҆ вᲂскли́кнемъ гла́сᲂмъ хвале́нїѧ гдⷭ҇ви . се́бᲂ вᲂи́стинꙋ прїи́де и҆ ꙗ҆ви́сѧ , всѧ̀ ѡ҆зарѧ́ѧ вѣ́рныѧ , бжⷭ҇твеныѧ ри́зы пᲂлᲂже́нїемъ . боⷢ҇ . Пло́тїю є҆го́же рᲂдила̀ є҆сѝ сы́на бг҃ᲂра́дᲂваннаѧ ꙗ҆́кѡ ви́дѣ , на́ древѣ вᲂз̾дви́жена , пла́чемъ и҆спо́лнисѧ , и҆ дᲂлгᲂтерпѣ́нїю є҆гѡ̀ дивлѧ́шесѧ вᲂи́стинꙋ . тѣ́мже велича́ше є҆гѡ̀ схᲂжде́нїе .

пѣ́снь , ѕ҃ . і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднествᲂ , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Ме́ртвымъ живо́тъ вᲂсїѧ̀ . слѣпы́мъ же свѣ́тъ прише́ствᲂва . немᲂщны́мъ лю́тѣ врачевство̀ ѿве́рзесѧ . и҆ всѣ́мъ спасе́нїе дне́сь прибли́жисѧ . Вᲂда́мъ тѧ̀ живᲂтекꙋ́щїи и҆сто́чникъ свѣ́мы влⷣкᲂ , и҆ пᲂчита́емъ бжⷭ҇твенꙋю ри́зꙋ твᲂю̀ , ѿ неѧ́же и҆сцѣле́нїѧ всегда̀ вѣ́рнїи пᲂчерпа́емъ . Стра́нствꙋетъ всѧ́къ ра́зꙋмъ , живᲂно́сныѧ пло́ти твᲂеѧ̀ ви́дѧ бжⷭ҇твенᲂе ѻ҆дѣѧ́нїе . и҆ прᲂсвѣще́нїе и҆стᲂча́ѧ пᲂклᲂнѧ́ющимсѧ тебѣ̀ . боⷢ҇ . Приста́нище бꙋ́ди ми всенепᲂро́чнаѧ , в̾ пꙋчи́нѣ лю́тыхъ пла́вающꙋ . ꙗ҆́же бѣ́дствꙋющꙋю всю̀ тва́рь , ржⷭ҇тво́мъ свᲂи́мъ бг҃ᲂрᲂди́тельнице спасла̀ є҆сѝ .

кᲂнда́къ . гла́съ , д҃ . Ѻ҆дѣѧ́нїе нетлѣ́нїѧ , спаси́тельнагѡ цѣле́нїѧ , всѣ́мъ чл҃кѡмъ , влⷣкᲂ дарᲂва́лъ є҆сѝ , свᲂѐ бжⷭ҇твенᲂе сᲂкро́вище чⷭ҇тнꙋ́ю ри́зꙋ , є҆́же є҆́сть хитѡ́нъ . є҆ю́же живᲂно́снꙋю и҆ ст҃ꙋ́ю пло́ть вᲂчелᲂве́ченїѧ свᲂегѡ̀ ѡ҆дѣ́ѧти бл҃гᲂи҆зво́лилъ є҆сѝ . тᲂѧ̀ жела́нїемъ прїе́млюще свѣ́тлѡ пра́з̾днꙋемъ . стра́хᲂмъ же и҆ любо́вїю ꙗ҆́кѡ бл҃гᲂда́телю вᲂспѣва́юще зᲂве́мъ тѝ хрⷭ҇тѐ , сᲂхранѝ вᲂ смире́нїи митрᲂпᲂли́та , и҆ всѧ̀ лю́ди , пᲂ вели́цѣй свᲂе́й млⷭ҇ти . и҆́кᲂсъ . ѽ пресла́внᲂе чꙋ́дᲂ , какᲂво̀ бж҃їе дарᲂва́нїе рꙋ́с̾стѣй землѝ дарᲂва́сѧ , ри́за є҆ю́же без̾грѣ́шныи гдⷭ҇ь ѡ҆дѣ́емь , сїю̀ небл҃гᲂда́рнїи лю́дїе ѿ да́льнихъ стра́нъ , ꙗ҆́кѡ да́ръ нѣ́кїи в̾ цр҃ьствꙋющїи гра́дъ мᲂсквꙋ̀ принесо́ша . тᲂгда̀ ᲂу҆́бѡ є҆ѧ̀ бл҃гᲂвѣ́рныи цр҃ь миха́илъ , сᲂ ѻ҆ц҃е́мъ свᲂи́мъ филаре́тᲂмъ патрїа́рхᲂмъ , не ꙗ҆́кѡ зе́менъ да́ръ , нᲂ ꙗ҆́кѡ нбⷭ҇нꙋю жи́знь вели́кимъ жела́нїемъ , и҆ сᲂ свидѣ́тельствᲂмъ дх҃о́внымъ ра́дᲂстнѡ прїѧ́ста , и҆ бг҃ᲂлѣ́пнымъ пᲂкланѧ́нїемъ влⷣцѣ хрⷭ҇тꙋ̀ бг҃ꙋ на́шемꙋ , бл҃гᲂда́рьственаѧ хвале́нїѧ вᲂз̾да́ша , си́це гл҃юще . сла́ва ти гдⷭ҇и , ꙗ҆́кѡ премно́гїѧ ра́ди бл҃гᲂсти твᲂеѧ̀ рꙋ́с̾скꙋю странꙋ̀ на́шꙋ назира́еши . сла́ва ти влⷣкᲂ , ꙗ҆́кѡ бл҃ги́мъ сᲂкро́вищемъ ст҃ы́ни свᲂеѧ̀ держа́вꙋ , ю҆́же да́лъ є҆сѝ на́мъ ѡ҆бᲂгаща́еши . сла́ва ти ст҃ы́и , ꙗ҆́кѡ бг҃ᲂтѣле́снꙋю свᲂю̀ ри́зꙋ , на спасе́нїе на́мъ дарᲂва́лъ є҆сѝ , пᲂ вели́цѣй свᲂе́й млⷭ҇ти .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , нᲂ ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . Всѧ́къ градъ ра́дꙋетсѧ пра́з̾днꙋѧ вѣ́рнѡ съ но́вымъ сїѡ́нᲂмъ , цр҃їе и҆ кнѧ́зи , бᲂга́тїи и҆ ᲂу҆бо́зїи . ꙗ҆́вльшꙋсѧ дне́сь бжⷭ҇твенᲂмꙋ твᲂемꙋ̀ хрⷭ҇тѐ ѻ҆дѣѧ́нїю , свѣтᲂда́тельными и҆сцѣле́нїи . Черто́гъ бж҃їи и҆збра́нныи , в̾ честнѣ́мъ се́мъ черто́зѣ , вѣ́рᲂю ри́зꙋ твᲂю̀ влⷣкᲂ пᲂлᲂже́нꙋ а҆рхїєре́йскима ѡ҆сщ҃е́нныма рꙋка́ма . ю҆́же пᲂчита́емъ , ꙗ҆́кѡ бл҃гᲂчести́выи пᲂкро́въ . Ѻ҆бнᲂвлѧ́етсѧ всѧ́къ пристꙋпа́ѧ вѣ́рᲂю , и҆ ст҃ы́и ѡ҆блᲂбыза́ѧ кᲂвче́гъ , держа́щїи твᲂю̀ влⷣкᲂ хрⷭ҇тѐ свѣтᲂви́днꙋю ѻ҆де́ждꙋ . Скве́рны всѧ́кїѧ дш҃е́вныѧ чисти́тельна є҆́сть , твᲂѧ̀ влⷣкᲂ хрⷭ҇тѐ бжⷭ҇твенаѧ ѻ҆де́жда , пᲂкрыва́ющаѧ живᲂно́снᲂе и҆ пречⷭ҇тᲂе тѣ́лᲂ твᲂѐ . Сщ҃е́нницы в̾ пра́вдꙋ ѡ҆блецы́тесѧ всѝ , и҆ прпⷣбнїи вᲂз̾ра́дꙋйтесѧ свѣ́тлѡ , се́бᲂ дарᲂва̀ на́мъ свѣти́льникъ хрⷭ҇то́съ , ст҃ы́ѧ пло́ти свᲂеѧ̀ ѻ҆де́ждꙋ , дш҃а́мъ и҆ тѣлесе́мъ вᲂ спасе́нїе . боⷢ҇ . Бг҃ᲂрᲂди́тельнице дв҃ᲂ , тебѐ чтꙋ́щїи гра́дъ , гла́да и҆ трꙋ́са и҆ ѡ҆ѕлᲂбле́нїѧ всѧ́кагѡ спаса́й , и҆ ꙗ҆зы́ческагѡ нахᲂжде́нїѧ , и҆ сᲂпрᲂти́внагѡ вре́да .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емᲂ , ны́нѣ же дѣ́йствꙋемᲂ , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Сᲂверше́нъ сы́и пᲂ сꙋществꙋ̀ , бг҃ъ и҆ чл҃къ ви́дѣнъ бы́сть , сᲂверше́нᲂ спаса́ѧ пᲂ ѡ҆бᲂемꙋ̀ свᲂѧ̀ вᲂи́стинꙋ сво́йства , ꙗ҆́кѡ бг҃ъ бᲂ , бг҃ᲂчл҃ческїи ѻ҆́бразъ ᲂу҆вѣрѧ́ѧ . и҆ бжⷭ҇твеныѧ пло́ти свᲂеѧ̀ ри́зꙋ на́мъ , ꙗ҆́кѡ стѣ́нꙋ и҆ пᲂкро́въ дарᲂва́лъ є҆сѝ . Вᲂз̾несѝ ро́гъ бж҃їи сло́ве , и҆спᲂвѣ́дающихъ тѧ̀ бг҃а и҆ чл҃ка , и҆ бжⷭ҇твенѣй ри́зѣ твᲂе́й пᲂклᲂнѧ́ющихсѧ , є҆ю́же и҆сцѣле́нїе всѣ́мъ вѣ́рнымъ дарᲂва́сѧ . и҆ ᲂу҆праз̾дни́же пᲂга́ньскаѧ шата́нїѧ , невѣ́дꙋщихъ твᲂеѧ̀ си́лы бжⷭ҇твеныѧ . Свѣ́титсѧ твᲂѧ̀ сᲂбо́рнаѧ и҆ а҆пⷭ҇льскаѧ цр҃кви , пᲂлᲂже́нїемъ ри́зы твᲂеѧ̀ . сла́вы бᲂ свѣ́тъ на́мъ дарᲂва́лъ є҆сѝ хрⷭ҇тѐ , бжⷭ҇твеныѧ пло́ти твᲂеѧ̀ ѻ҆дѣѧ́нїе , є҆ю́же на́съ прᲂсвѣтѝ вᲂ спасе́нїе . мы́же вѣ́рᲂю и҆ любо́вїю тꙋ̀ пᲂчита́емъ . боⷢ҇ . Ви́дѣвши ᲂу҆снꙋ́вша на́ древѣ хрⷭ҇та̀ , и҆́же всѣ́мъ бо́дрᲂсть пᲂдава́юща , бжⷭ҇твенꙋю и҆ спасе́нꙋю , мт҃и всенепᲂро́чнаѧ , вᲂсклица́нїемъ пла́каше и҆ взыва́ше , что̀ сїѐ но́вᲂе чꙋ́дᲂ , ѡ҆живлѧ́ѧи всѧ̀ ᲂу҆мира́етъ хᲂтѧ̀ .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃ᲂ . Пᲂе́мъ бг҃ꙋ пѣ́снь бл҃гᲂда́рнꙋю , и҆зво́лившемꙋ бᲂга́тьствᲂ превели́кᲂ на́мъ пᲂда́ти , стѣ́нꙋ не ѡ҆бᲂри́мꙋ , и҆ небла́зненᲂ ᲂу҆тверже́нїе , бжⷭ҇твеныѧ пло́ти свᲂеѧ̀ ѻ҆дѣѧ́нїе , є҆ѧ́же чтꙋ́ще вѣ́рнїи велича́емъ . ѽ па́че ᲂу҆ма̀ чꙋде́съ твᲂи́хъ гдⷭ҇и , и҆́же сᲂтвᲂрѝ на́мъ , на тѧ̀ надѣ́ющимсѧ . ꙗ҆́кᲂже бᲂ и҆мѣ̀ неи҆зрече́ннᲂ ржⷭ҇тво̀ , та́кѡ стра́ннѡ всѣ́мъ пᲂказа̀ , бжⷭ҇твеныѧ пло́ти свᲂеѧ̀ ри́зꙋ , кᲂ и҆сцѣле́нїю и҆ прᲂсвѣще́нїю чтꙋ́щимъ тѧ̀ . Пред̾лᲂжи́сѧ ны́нѣ честна́ѧ ра́ка , держа́щи бжⷭ҇твенꙋю ри́зꙋ и҆зба́вителѧ на́шегѡ хрⷭ҇та̀ . и҆ ꙗ҆́кѡ и҆сто́чникъ свѣ́та , зарю̀ и҆сцѣле́нїемъ и҆спꙋща́ющи , и҆ тмꙋ̀ недꙋ́гᲂмъ ѿгᲂнѧ́ющи . є҆ѧ́же любо́вїю цѣлꙋ́емъ . боⷢ҇ . Прᲂсвѣтѝ чⷭ҇таѧ , и҆́же любо́вїю чтꙋ́щихъ и҆ велича́ющихъ тѧ̀ , и҆ раз̾рꙋшѝ стрⷭ҇ти на́ша . тѣ́мъ ѻ҆трᲂкᲂви́це ᲂу҆крᲂтѝ бꙋ́рю , и҆ лꙋка́вагѡ сᲂбла́зны ѿ среды̀ ѿженѝ . а҆га́рѧн̾скаѧ ча́да , ты̀ бцⷣе пᲂкᲂрѝ , странѣ̀ на́шей , мл҃твами сѝ .

свѣти́ленъ . Срⷣца мᲂегѡ̀ стрꙋ́пы , ѿ мно́гихъ грѣ́хъ прᲂзѧ́бшїѧ мѝ и҆сцѣлѝ сп҃се , ꙗ҆́кѡ дш҃а́мъ и҆ тѣ́лѡмъ вра́чь . и҆ пᲂдаѧ̀ прᲂсѧ́щимъ прегрѣше́нїемъ прᲂще́нїе , и҆ недꙋ́гᲂмъ всѣ́мъ и҆сцѣле́нїе , ѿ честны́ѧ ти и҆ бг҃ᲂтѣле́сныѧ ри́зы бл҃гᲂда́ти спᲂдо́би , ꙗ҆́кѡ бл҃гъ и҆ всеми́лᲂстивъ . сла́ва , и҆ ны́нѣ , то́йже .

На хвали́тѣхъ , стⷯры , на д҃ . гла́съ , д҃ . Зако́нꙋ твᲂрца̀ ѿ ᲂу҆ченика̀ кꙋпи́ша без̾зако́ннїи . и҆ ꙗ҆́кѡ престꙋ́пника зако́нꙋ тѧ̀ , пила́тᲂвꙋ сꙋди́щꙋ пред̾ста́виша , зᲂвꙋ́ще распнѝ є҆гѡ̀ , и҆́же в̾ пꙋсты́ни си́хъ ма́нны напита́вшагᲂ . мы́ же хрⷭ҇тѐ страсте́мъ твᲂи́мъ , и҆ честнѣ́й ри́зѣ пᲂклᲂнѧ́ющесѧ , вѣ́рᲂю сп҃се зᲂве́мъ , пᲂми́лꙋй на́съ . два́жды . Живᲂно́снаѧ тѝ ре́бра , ꙗ҆́кѡ и҆з̾ є҆де́ма и҆сто́чникъ и҆стᲂча́ѧ , цр҃кᲂвь твᲂю̀ хрⷭ҇тѐ , ꙗ҆́кѡ слᲂве́сенъ ра́й напаѧ́етъ . ѿ сю́дꙋ раз̾дѣлѧ́етсѧ в̾ нача́ла , в̾ четы́ре є҆ѵⷢ҇а́лїѧ , ми́ра напᲂѧ́ющи , тва́рь веселѧ́щи . тѣ́мъ всѝ притека́емъ пᲂклᲂнѧ́ющесѧ ст҃ѣ́й ри́зѣ твᲂе́й , вѣ́рᲂю зᲂве́мъ , сп҃се пᲂми́лꙋй на́съ . Распина́ема тѧ̀ хрⷭ҇тѐ , всѧ̀ тва́рь ви́дѧщи трепета́ше , ѡ҆снᲂва́нїѧ землѝ пᲂкᲂлеба́шасѧ стра́хᲂмъ держа́вы твᲂеѧ̀ . во́ини же тᲂгда̀ ри́зы твᲂѧ̀ раз̾дѣли́ша себѣ̀ , и҆ ѡ҆мати́смѣ твᲂе́й мета́ша жре́бїѧ . ю҆́же ны́нѣ пред̾лᲂже́нꙋ зрѧ́ще вѣ́рнїи , стра́хᲂмъ и҆ любо́вїю зᲂве́мъ тᲂѧ̀ ра́ди сп҃се пᲂми́лꙋй на́съ . сла́ва , и҆ ны́нѣ , гла́съ є҃ . И҆збавле́нїе цѣ́нꙋ вели́кꙋю , пречи́стꙋю кро́вь свᲂю̀ и҆зво́лилъ є҆сѝ да́ти на́съ ра́ди без̾грѣ́шне хрⷭ҇тѐ мо́й , всѣ́мъ хᲂтѧ́и спасе́нїе пᲂлꙋчи́ти . тѣ́мже вᲂспѣва́емъ твᲂѐ сла́внᲂе хᲂтѣ́нїе , и҆ пᲂкланѧ́ющесѧ чте́мъ , кᲂпїѐ и҆ гꙋ́бꙋ и҆ тро́сть . с̾ си́ми же ст҃ꙋ́ю и҆ честнꙋ́ю ри́зꙋ твᲂю̀ . ю҆́же на бг҃ᲂтѣле́снѣй пло́ти свᲂе́й , на́съ ра́ди грѣ́шныхъ пᲂнᲂси́лъ є҆сѝ . и҆́миже да́рꙋеши всѣ́мъ на́мъ , нетлѣ́нїе и҆ жи́знь , прᲂсвѣще́нїе и҆ ве́лїю млⷭ҇ть .

Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , на и҃ . ѿ кано́на , пѣ́снь , г҃ ѧ , и҆ ѕ҃ ѧ .

Пᲂ вхо́дѣ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ .

прᲂки́менъ , ѱл҃о́мъ дв҃дᲂвъ . Вᲂз̾нᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ , ꙗ҆́кѡ ст҃ᲂ є҆́сть . сти́хъ . гдⷭ҇ь вᲂцр҃и́сѧ да гнѣ́ваютсѧ лю́дїе . а҆пⷭ҇лъ , к̾ кᲂри́нѳᲂмъ . заⷱ҇ , рк҃є . а҆ллилꙋ́їѧ . Пᲂмѧнѝ со́нмъ тво́й и҆́же стѧжа̀ и҆спе́рва . сти́хъ . бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѝ землѝ . є҆ѵⷢ҇а́лїе , ѿ ма́рка . зача́лᲂ , ѯ҃з . прича́стенъ , зна́менасѧ на на́съ свѣ́тъ лица̀ твᲂегѡ̀ гдⷭ҇и .