МЦⷭ҇А И҆Ю́НѦ ВЪ К҃Г ДН҃Ь

пра́зднꙋемъ срѣ́тенїю чꙋдᲂтво́рныѧ и҆ко́ны , прест҃ы́ѧ влⷣчцы на́шеѧ бцⷣы , ꙗ҆́же нарица́етсѧ влади́мирскаѧ . =Вече́ръ . блаже́нъ мꙋ́жь , а҃ , а҆нтифо́нъ . На гдⷭ҇и вᲂзва́хъ , стихѣ́ры , на́ и҃ . гла́съ , д҃ . поⷣ . ꙗ҆́=кѡ до́блѧ . Ꙗ҆́кѡ свѣтᲂно́снаѧ пᲂла́та ,꙳ и҆ ѻ҆́дръ всезлаты́и бцⷣе влⷣчце .꙳ ты́ бᲂ сло́вᲂ бж҃їе ,꙳ вᲂ свᲂи́хъ лᲂжесна́хъ вмѣсти́ла є҆сѝ ,꙳ и҆ ро́ждьши на́мъ сл҃нце незахᲂди́мᲂе ,꙳ свѣ́тъ невече́рнїи .꙳ на́ша пре́жде неразꙋ́мїемъ ѡ҆мраче́наѧ срⷣца̀ ,꙳ бл҃гᲂразꙋ́мїемъ ѡ҆свѣти́ла є҆сѝ ,꙳ и҆ льстѝ тмꙋ̀ разᲂри́ла є҆сѝ . Твᲂи́мъ ржⷭ҇тво́мъ ,꙳ а҆́дᲂвнаѧ крѣ́пᲂсть разᲂри́сѧ ,꙳ и҆ всѐ чл҃чествᲂ спасе́нᲂ бы́сть .꙳ ны́нѣ же твᲂи́ми мᲂли́твами ,꙳ враго́въ на́шихъ шата́нїе низ̾лᲂжѝ ,꙳ и҆ крѣ́пᲂсть и҆́хъ сᲂкрꙋшѝ .꙳ и҆ лю́демъ твᲂи́мъ пᲂбѣ́ды на врагѝ да́рꙋй .꙳ да пᲂсра́мѧтсѧ всѝ ,꙳ ꙗ҆влѧ́ющїи рабо́мъ твᲂи́мъ ѕла́ѧ . Бцⷣе влⷣчце ,꙳ держа́внаѧ пᲂмо́щнице ,꙳ ᲂу҆крѣпѝ на́съ на врагѝ .꙳ да ꙗ҆́кᲂже дре́вле спасѐ црⷭ҇кїи гра́дъ , ѿ нахᲂжде́нїѧ пᲂга́ныхъ ,꙳ та́кѡ и҆ ны́нѣ спасѝ странꙋ̀ рꙋ́сскꙋю , ѿ нахᲂжде́нїѧ вра́жїѧ ,꙳ ѿ междᲂᲂу҆со́бныѧ ра́ти ,꙳ ѿ́ глада же и҆ трꙋ́са ,꙳ дв҃це бракᲂнеи҆скꙋ́снаѧ .꙳ сегѡ̀ ра́ди тѧ̀ сла́витъ страна̀ рꙋ́сскаѧ ,꙳ чл҃кѡмъ пᲂмо́щницꙋ . Ны́нѣ страна̀ рꙋ́сскаѧ ,꙳ ѡ҆ тебѣ̀ хва́литсѧ и҆ весели́тсѧ ,꙳ и҆мѣ́ющи тѧ̀ застꙋ́пницꙋ непᲂсты́днꙋю ,꙳ и҆ стѣ́нꙋ нерꙋши́мꙋ ,꙳ гра́дꙋ на́шемꙋ ,꙳ непᲂкᲂлѣби́мᲂе ѻ҆снᲂва́нїе ,꙳ стра́жа неᲂу҆сы́пна землѝ рꙋ́сстѣй .꙳ непреста́й ны́нѣ свᲂи́ми гжⷭ҇е мл҃твами ,꙳ и҆зба́вити сво́й гра́дъ и҆ лю́ди ѿ всѣ́хъ бѣ́дъ . Тебѣ̀ припа́даютъ гжⷭ҇е ,꙳ ст҃ль сᲂсло́вїе , и҆ сᲂбо́ри ,꙳ сᲂвᲂкꙋпле́нїе всѣ́хъ ,꙳ цр҃и́ же и҆ кн҃зи ,꙳ и҆ ве́сь наро́дъ ᲂу҆ми́льнѡ мᲂлѧ́щесѧ ,꙳ тебѣ̀ ны́нѣ кла́нѧющесѧ ,꙳ и҆ любе́знѡ цѣлꙋ́юще тво́й ѻ҆́бразъ .꙳ и҆ мᲂлѧ́щесѧ гл҃ютъ ,꙳ чтꙋ́щїи тѧ̀ гра́дъ всегда̀ спаса́й , ѿ всѧ́кихъ бѣ́дъ .

И҆́ны , стихѣ́ры . гла́съ , и҃ . поⷣ . ѽ =пресла́внᲂе чꙋ́дᲂ . =ѽ =пресла́внᲂе чꙋ́дᲂ ,꙳ и҆́же невмѣсти́мыи нб҃сы̀ ,꙳ и҆ а҆́нг҃лы сла́вимыи , и҆ ѿ серафи́мъ пᲂе́мыи ,꙳ въ твᲂю̀ ᲂу҆тро́бꙋ вмѣща́етсѧ ,꙳ и҆ ключа̀ дѣ́вства неразрꙋшѝ ,꙳ и҆ на́ землю сше́дъ , на́ше є҆стество̀ дре́вле ѿ дїа́вᲂла мꙋ́чимᲂе и҆зѧ́тъ ,꙳ и҆ ве́сь ро́дъ чл҃ческїи свᲂбᲂдѝ .꙳ тебѐ гжⷭ҇е застꙋ́пницꙋ на́мъ дарᲂва̀ ,꙳ непреста́й сᲂхрани́ти ,꙳ и҆ спастѝ дш҃а на́ша , ꙗ҆́кѡ милᲂсе́рда . =ѽ =пресла́внᲂе чꙋ́дᲂ ,꙳ сѐ застꙋпле́нїе прїи́де ,꙳ сꙋпрᲂтивле́нїе низ̾лᲂжи́сѧ .꙳ гра́дъ на́шъ спасѝ ,꙳ врагѝ на́ша прᲂженѝ ,꙳ и҆ на́съ ра́бъ свᲂи́хъ свᲂе́ю млⷭ҇тїю вᲂз̾веселѝ .꙳ ѽ бж҃їе сло́ва селе́нїе ,꙳ и҆́же ро́дъ чл҃ческїи чтꙋ́щїи тѧ̀ ,꙳ всегда̀ спаса́й ѿ всѣ́хъ бѣ́дъ . Пᲂда́ждь ᲂу҆тѣше́нїе ,꙳ свᲂи́мъ рабо́мъ чи́стаѧ ,꙳ напа́стьми ѡ҆держи́мымъ ,꙳ и҆ ро́гъ вѣ́рныхъ вᲂзнесѝ ,꙳ бг҃ᲂрᲂди́тельнице мр҃і́е .꙳ спасѝ мл҃твами твᲂи́ми гра́дъ тво́й нераз̾рꙋши́мь ,꙳ и҆ ва́рварскаѧ шата́нїѧ низ̾лᲂжѝ ,꙳ и҆ на́съ ра́бъ свᲂи́хъ без̾невѣ́стнаѧ ,꙳ хва́лѧщихъ тѧ спасѝ . =сла́ва , и҆ ны́нѣ . гла́съ , и҃ . Прїиди́те рꙋ́сстїи сᲂбо́ри , прїиди́те вѣ́рныхъ сᲂвᲂкꙋпле́нїѧ , въ срѣ́тенїе цр҃цѣ и҆ бг҃ᲂѻтрᲂкᲂви́цѣ . се́бᲂ грѧде́тъ цр҃ца свᲂи́мъ ѻ҆́бразᲂмъ честны́мъ , спастѝ гра́дъ , и҆ лю́ди ѿ сᲂпᲂста́тныхъ пᲂга́нъ невᲂе́ваны . ѽ чꙋ́дᲂ ве́лїе и҆ пресла́внᲂ , и҆ пребо́льши ᲂу҆ма̀ . ка́кѡ прише́ствїемъ є҆ѧ̀ , живᲂтво́рнымъ ѻ҆́бразᲂмъ честны́мъ , сᲂпрᲂти́внїи пᲂбѣжда́ютсѧ ; и҆ ѻ҆те́чествᲂ на́ше ᲂу҆твержа́етсѧ . но́щь ᲂу҆праздни́сѧ , и҆ де́нь прибли́жисѧ . є҆го́же ра́ди тебѐ винꙋ̀ спасе́нїѧ на́шегѡ , є҆стество̀ на́ше прїе́млетъ . и҆ всѧ̀ тва́рь вᲂспѣва́етъ ти зᲂвꙋ́щи . ра́дꙋисѧ пред̾ста́тельнице и҆ пᲂмо́щнице , и҆ спасе́нїе дш҃а́мъ на́шимъ .

та́же , вы́хᲂдъ . прᲂки́менъ , дню̀ .

Ѿ= бытїѧ̀ , чте́нїе .=

И҆зы́де і҆а́кѡвъ ѿ стꙋденца̀ клѧ́твеннагѡ , и҆ и҆́де в̾ харра́нь , и҆ ѡ҆брѣ́те мѣ́стᲂ и҆ ста̀ тꙋ̀ . заше́дшꙋ же сл҃нцꙋ , взѧ́тъ ѿ ка́менїѧ мѣ́ста тᲂгѡ̀ , и҆ пᲂлᲂжѝ є҆̀ в̾ вᲂз̾гла́вїе себѣ̀ . и҆ спа̀ на мѣ́стѣ то́мъ , и҆ со́нъ ви́дѣ . и҆ сѐ лѣ́ствица ᲂу҆твержена̀ на землѝ , є҆́й же глава̀ дᲂсѧза́ше дᲂ небесѐ . и҆ а҆́нг҃ли бж҃їи вᲂз̾хᲂжда́хꙋ , и҆ низ̾хᲂжда́хꙋ пᲂ не́й . гдⷭ҇ь же ᲂу҆твержа́шесѧ на не́й , и҆ речѐ , а҆́зъ бг҃ъ а҆враа́мѡвъ ѻ҆ц҃а твᲂегѡ̀ , и҆ бг҃ъ і҆саа́кѡвъ , небо́йсѧ . землѧ̀ на не́й же ты̀ спи́ши , тебѣ̀ да́мъ ю҆̀ , и҆ сѣ́мени твᲂемꙋ̀ . и҆ бꙋ́детъ сѣ́мѧ твᲂѐ , ꙗ҆́кѡ пѣсо́къ земны́и , и҆ распрᲂстрани́тсѧ на́ мᲂре , и҆ на ли́вꙋ , на сѣ́веръ , и҆ вᲂсто́къ . и҆ бл҃гᲂслᲂвѧ́тсѧ ѡ҆ тебѣ̀ всѧ̀ кᲂлѣ́на земна́ѧ , и҆ ѡ҆ сѣ́мени твᲂе́мъ . и҆ сѐ а҆́зъ с̾ тᲂбо́ю , сᲂхранѧ́ѧи тѧ̀ на всѧ́кᲂмъ пꙋтѝ , а҆́мᲂже а҆́ще по́йдеши . и҆ вᲂз̾вращꙋ́ тѧ в̾ зе́млю сїю̀ , ꙗ҆́кѡ не ѡ҆ста́влю тебѐ , до́нде же сᲂтвᲂри́ти ми всѧ̀ є҆ли́ка гл҃ахъ тѝ . и҆ вᲂста́въ і҆а́кѡвъ ѿ сна̀ свᲂегѡ̀ , и҆ речѐ , ꙗ҆́кѡ є҆́сть гдⷭ҇ь на мѣ́стѣ се́мъ , а҆́зъ же невѣ́дѣхъ . и҆ ᲂу҆бᲂѧ́сѧ , и҆ речѐ , ꙗ҆́кѡ стра́шнᲂ мѣ́стᲂ сѐ , нѣ́сть сѐ , нᲂ до́мъ бж҃їи , и҆ сі́ѧ врата̀ нбⷭ҇наѧ .

Ѿ= пррⷪ҇чества і҆єзекі́илева , чте́нїе .=

Бꙋ́детъ ѿ ѻ҆сма́гѡ днѐ и҆ про́чее , сᲂтвᲂрѧ́тъ і҆єре́и , на ѻ҆лтарѝ всесᲂжже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на вᲂсто́къ , и҆ сїѧ̀ бѧ́хꙋ затвᲂре́на . и҆ речѐ гдⷭ҇ь кᲂ мнѣ̀ , врата̀ сїѧ̀ затвᲂре́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквᲂзѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затвᲂре́на . занѐ и҆гꙋ́менъ се́й сѧ́детъ в̾ ни́хъ снѣ́сти хлѣ́бъ . пᲂ пꙋтѝ є҆ла́мскихъ вра́тъ вни́детъ , и҆ пᲂ пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

Ѿ= при́тчей , чте́нїе .=

Премꙋ́дрᲂсть сᲂзда̀ себѣ̀ хра́мъ , и҆ ᲂу҆твердѝ сто́лпъ се́дмь . закла̀ свᲂѧ̀ же́ртвенаѧ , и҆ черпа̀ в̾ ча́ши свᲂе́й вино̀ , и҆ ᲂу҆гᲂто́ва свᲂю̀ трапе́зꙋ . пᲂсла̀ свᲂѧ̀ рабы̀ , сᲂзыва́ющи с̾ высо́кимъ прᲂпᲂвѣ́данїемъ на ча́шꙋ , гл҃ющи , и҆́же є҆́сть безꙋ́менъ , да ᲂу҆клᲂни́тсѧ кᲂ мнѣ̀ . и҆ тре́бꙋющимъ ᲂу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ є҆́же че́рпахъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрᲂсть , да пᲂживетѐ . и҆спра́вите вѣ́дѣнїи в̾ ра́зꙋмѣ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧи же нечести́вагᲂ пᲂрече́тъ себѐ . ѡ҆бличе́нїе бᲂ нечести́вᲂмꙋ мᲂзо́лїе є҆мꙋ̀ . не ѡ҆блича́й ѕлы́хъ , да не вᲂз̾ненави́дѧтъ тебѐ . ѡ҆блича́й премꙋ́дра , и҆ вᲂзлю́битъ тѧ . да́й премꙋ́дрꙋ винꙋ̀ , и҆ премꙋ́дрѣе бꙋ́детъ . сказа́й пра́веднᲂмꙋ , и҆ прилᲂжи́тъ прїима́ти . зача́лᲂ премꙋ́дрᲂсти , стра́хъ гдⷭ҇нь , и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га . си́мъ бᲂ ѻ҆́бразᲂмъ пᲂживе́ши мно́гᲂ лѣ́тъ , и҆ прилᲂжа́т̾тисѧ лѣ́та живᲂтꙋ̀ .

На литі́и , стихѣ́ры . гла́съ , в҃ . Ꙗ҆́кѡ вᲂи́стинꙋ дре́внѧгѡ кїѡ́та пречестнѣ́е , є҆гда̀ давы́дъ сᲂбра́въ чи́ны ликᲂствᲂва́ше . па́че ны́нѣ бжⷭ҇твенаѧ бг҃ᲂро́дичнаѧ и҆ко́на . є҆́йже пред̾стᲂѧ́тъ ст҃ы́хъ сᲂбо́ри , съ чи́ньми а҆́нг҃лъ . и҆ всѐ хрⷭ҇тᲂимени́тыхъ люде́й мно́жествᲂ , дᲂсто́йнѡ бл҃жа́тъ мт҃рь бж҃їю . и҆ прᲂславлѧ́ютъ рабᲂлѣ́пнѡ , и҆ чтꙋ́тъ и҆ пᲂклᲂнѧ́ютсѧ . и҆ мо́лѧтътисѧ по́ бз҃ѣ , да ми́ръ ᲂу҆мири́ши в̾ правᲂсла́вїи , и҆ ѻ҆те́чествᲂ ᲂу҆тверди́ши . и҆ спасе́ши ѿ всѣ́хъ ѕѡ́лъ твᲂѧ̀ рабы̀ , ꙗ҆́кѡ є҆ди́на бл҃гᲂслᲂве́наѧ . Пред̾стᲂѧ́тъ ти гжⷭ҇е бцⷣе , пред̾ и҆ко́нᲂю пречⷭ҇тагѡ ѻ҆́браза , ст҃ль сᲂсло́вїе , и҆ всѝ лю́дїе , и҆́нᲂцы же и҆ прᲂсті́и , вѣ́дꙋще тѧ вᲂи́стинꙋ пᲂмо́щницꙋ си́льнꙋ и҆ непᲂбѣди́мꙋ , мᲂле́нїѧ принᲂси́ти ѿ всеѧ̀ дш҃и пᲂд̾виза́ютъ , и҆ бдѧ́тъ на мᲂли́твꙋ къ бг҃ꙋ , тре́бꙋюще твᲂеѧ̀ по́мᲂщи , да вᲂз̾дѣ́жеши бг҃ᲂно́снїи сѝ рꙋ́цѣ , и҆ мо́лиши за́ миръ . вᲂньмѝ и҆ ᲂу҆слы́ши влⷣчце , и҆ пᲂда́ждь ᲂу҆тѣше́нїе рабо́мъ свᲂи́мъ , да́же не ѡ҆дᲂлѣ́ютъ ны̀ грѣхѝ на́ша тѧ́жкїѧ и҆ лю́тыѧ . твᲂеѧ́ бᲂ всегда̀ тре́бꙋемъ всѝ по́мᲂщи . гла́съ , и҃ . Пе́рвѣй написа́вшисѧ твᲂегѡ̀ ѻ҆́браза и҆ко́нѣ , є҆ѵⷢ҇а́льскихъ та́инъ бл҃гᲂвѣ́стникᲂмъ , и҆ к̾ тебѣ̀ цр҃цѣ принесе́нѣ . да ᲂу҆сво́иши тꙋ̀ , и҆ си́льнꙋ сᲂдѣ́лаеши спастѝ чтꙋ́щихъ тѧ . и҆ пᲂра́дᲂвасѧ ꙗ҆́кѡ сы́и ми́лᲂстива , спасе́нїю на́шемꙋ сᲂдѣ́тельница . ꙗ҆́кѡ ᲂу҆ста̀ и҆ гла́съ и҆ко́нѣ бы́вши . ꙗ҆́кᲂже и҆ бг҃а внегда̀ зачина́ющи во́ чревѣ , пѣ́снь вᲂспѣ́ла є҆сѝ . сѐ ѿ ны́нѣ бл҃жа́тъ мѧ всѝ ро́ди . и҆ на тꙋ̀ зрѧ́щи глаго́лѧ вкꙋ́пѣ и҆ со́ властїю , с̾ си́мъ ѻ҆́бразᲂмъ бл҃гᲂда́ть мᲂѧ̀ и҆ си́ла . и҆ мы̀ вᲂи́стинꙋ вѣ́рꙋемъ , ꙗ҆́кѡ сѐ рекла̀ є҆сѝ гжⷭ҇е , си́мъ ѻ҆́бразᲂмъ с̾ ва́ми є҆́смь . є҆́йже бл҃гᲂгᲂвѣ́йнѡ пред̾стᲂѧ́ще , пᲂклᲂнѧ́емтисѧ рабѝ твᲂѝ , пᲂсѣтѝ на́съ твᲂи́ми мт҃рьними щедро́тами . гла́съ , з҃ . Гᲂра̀ є҆сѝ вели́каѧ и҆ пресла́внаѧ . па́че гᲂры̀ сина́йскїѧ бцⷣе . ѻ҆на́ бᲂ нетерпѧ́щи сни́тїѧ сла́вы бж҃їѧ , вᲂ ѻ҆́бразѣхъ и҆ сѣ́нехъ , ѻ҆гне́мъ вᲂз̾гара́шесѧ , и҆ гро́ми и҆ мо́лнїѧ та́мѡ бы́ша . ты́ же всегѡ̀ в̾ себѣ̀ бжⷭ҇твенагѡ ѻ҆гнѧ̀ сꙋ́щи бж҃їѧ сло́ва , во́ чревѣ не ѡ҆па́льнѡ нᲂси́ла є҆сѝ , и҆ ѿ сᲂсцꙋ̀ твᲂе́ю млеко́мъ пита́ла є҆сѝ , ма́нїемъ нᲂсѧ́щагѡ всѧ̀ . и҆ мт҃рьне дерзнᲂве́нїе к̾ немꙋ̀ и҆мꙋ́щи , пᲂмᲂзѝ влⷣчце вѣ́рнѡ пра́з̾днꙋющимъ тво́й честны́и пра́здникъ , и҆ незабꙋ́ди ми́лᲂстивнѡ пᲂсѣща́ющи . прїѧ́ла є҆сѝ ѿ́ бг҃а да́ръ стро́ити и҆ пᲂкрыва́ти , хрⷭ҇тᲂимени́тᲂе ста́дᲂ рабы̀ свᲂѧ̀ . сла́ва , и҆ ны́нѣ . гла́съ , ѕ҃ . Тебѣ̀ всѝ ро́ди чл҃честїи , хва́льныѧ да́ры прино́сѧтъ влⷣчце , и҆ мо́лѧтсѧ ꙗ҆́кѡ цр҃цѣ и҆ мт҃ри бж҃їи . прⷪ҇рцы тѧ премꙋ́дрѡ прᲂпᲂвѣ́даша . левви́ти бл҃гᲂслᲂви́ша . а҆пⷭ҇ли и҆ мч҃нцы и҆спᲂвѣ́даша . цр҃їе и҆ кн҃зи пᲂклᲂнѧ́ютсѧ . ст҃ли прᲂпᲂвѣ́даютъ . и҆́нᲂцы и҆ прᲂсті́и бл҃гᲂгᲂвѣ́ютъ . бᲂга́тїи и҆ ᲂу҆бо́зїи , си́рыѧ и҆ вдᲂви́цы и҆ всѧ́къ во́зрастъ , и҆ всѧ́кѡ приспѣ́ѧнїе , ста́рческᲂе и҆ младе́нческᲂе , пᲂд̾ кро́въ тво́й держа́вныи с̾ вѣ́рᲂю прибѣга́емъ . пᲂкры́й и҆ сᲂблюдѝ гжⷭ҇е мᲂли́твами сѝ , и҆ спасѝ ѿ бѣ́дъ дш҃а на́ша .

На стихо́внѣ , стихѣ́ры . гла́съ , и҃ . поⷣ . что́ тѧ и҆менꙋ́емъ а҆пⷭ҇ле . Что́ тѧ нарече́мъ бцⷣе влⷣчце ;꙳ ко́рень ли і҆єссе́ѡвъ ,꙳ и҆́же ѿ тебѐ на́мъ хрⷭ҇то́съ ꙗ҆́кѡ цвѣ́тъ и҆зы́де .꙳ ма́ннꙋ ли , ꙗ҆́же вѣ́рныхъ срⷣца̀ ѡ҆слажда́ющи свᲂи́мъ ржⷭ҇тво́мъ .꙳ рꙋно̀ гедеѡ́нᲂвᲂ ,꙳ на тѧ́ бᲂ хрⷭ҇то́съ ꙗ҆́кѡ рᲂса̀ сни́де ,꙳ и҆ тѧ̀ застꙋ́пницꙋ на́мъ пᲂказа̀ .꙳ є҆го́же мᲂлѝ спастѝ дш҃а на́ша .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хᲂ твᲂѐ . Да всѝ пᲂхва́лимъ вѣ́рнїи ,꙳ такᲂво̀ на́мъ застꙋпле́нїе да́вшꙋ непᲂсты́днᲂе ,꙳ и҆ непребᲂри́мᲂе , на врагѝ ѡ҆дᲂлѣ́нїе пᲂбѣ́днᲂе .꙳ и҆ на́мъ всѣ́мъ спасе́нїе ,꙳ и҆ гра́дꙋ на́шемꙋ стѣ́нꙋ и҆ пᲂкро́въ ,꙳ и҆ ѡ҆снᲂва́нїе непᲂкᲂлѣби́мᲂе .꙳ и҆ ѻ҆те́чествꙋ на́шемꙋ на сꙋпᲂста́ты пᲂсо́бїе ,꙳ и҆ непᲂбѣди́мꙋю пᲂбѣ́дꙋ .

сти́хъ : клѧ́тсѧ гдⷭ҇ь дв҃дꙋ и҆́стиннᲂю ,꙳ и҆ не ѿве́ржетсѧ є҆ѧ̀ . Дᲂсто́йнѡ тѧ блажи́тъ чл҃ческїи ро́дъ чⷭ҇таѧ ,꙳ ꙗ҆́кѡ спаса́еши чтꙋ́щїѧ тебѐ ѿ всѣ́хъ бѣ́дъ .꙳ ты́ бᲂ є҆сѝ гжⷭ҇е дв҃ᲂ чⷭ҇таѧ ,꙳ застꙋ́пница непᲂсты́днаѧ свᲂи́мъ рабо́мъ пᲂказа́сѧ ,꙳ и҆ мᲂли́твеница тепла̀ к̾ бг҃ꙋ , ѿ нахᲂдѧ́щихъ скᲂрбе́й .꙳ тᲂбо́ю ва́рварскаѧ шата́нїѧ разрꙋша́ютсѧ ,꙳ и҆ стрѣ́лы вра́жїѧ ᲂу҆пражнѧ́ютсѧ .꙳ и҆ рабѝ твᲂѝ ѿ ѡ҆держа́щихъ бѣ́дъ и҆зба́вльшесѧ ,꙳ тѧ̀ бг҃ᲂмт҃и пѣ́сньми ᲂу҆блажа́емъ .

сла́ва , и҆ ны́нѣ . гла́съ , и҃ . Да ра́дꙋютсѧ рꙋ́сстїи сᲂбо́ри , да ликᲂствꙋ́етъ є҆стество̀ , ꙗ҆́кѡ твᲂи́мъ чи́стаѧ честна́гѡ ѻ҆́браза прише́ствїемъ , гра́дъ на́шъ спаса́етсѧ . рабѝ твᲂѝ ѿ ѡ҆держа́щїѧ нꙋ́жды и҆зба́вльшесѧ , тебѣ̀ чⷭ҇таѧ взыва́ютъ . ра́дꙋисѧ до́брымъ вино́внаѧ , и҆ застꙋ́пница непᲂсты́днаѧ , и҆ спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ пᲂ ѻ҆́ч҃е на́шъ . трᲂпа́рь . гла́съ , д҃ . Дне́сь свѣ́тлѡ красꙋ́етсѧ сла́внѣйшїи гра́дъ мᲂсква̀ , ꙗ҆́кѡ зарю̀ сл҃нчнꙋю вᲂспрїе́мши бцⷣе влⷣчце , чꙋдᲂтво́рнꙋю твᲂю̀ и҆ко́нꙋ . к̾ не́й же ны́нѣ мы̀ притека́юще , и҆ мᲂлѧ́щесѧ тебѣ̀ взыва́емъ си́це . ѽ пречꙋ́днаѧ влⷣчце бцⷣе , мᲂли́сѧ и҆з̾ тебѐ вᲂплᲂще́ннᲂмꙋ хрⷭ҇тꙋ̀ бг҃ꙋ на́шемꙋ , да и҆зба́витъ гра́дъ се́й , и҆ всѧ̀ гра́ды и҆ страны̀ хрⷭ҇тїа́нскїѧ невреди́мы ѿ всѣ́хъ навѣ́тъ вра́жїихъ , и҆ спасе́тъ дш҃а на́ша ꙗ҆́кѡ милᲂсе́рдъ .

На ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . Пᲂ а҃ , стихᲂло́гїи , сѣда́ленъ . гла́съ , д҃ . Бжⷭ҇твеными зарѧ́ми прᲂсвѣтѝ пᲂю́щїѧ тѧ , и҆ ᲂу҆мы̀ ᲂу҆твердѝ всенепᲂро́чнаѧ дв҃ᲂ , крѣ́пкаѧ застꙋ́пнице ми́рꙋ всемꙋ̀ . тѣ́мже тᲂржествꙋ́емъ всѝ любо́вїю пᲂю́ще тѧ , и҆ прише́ствїе твᲂегѡ̀ ѻ҆́браза сла́вѧще . непреста́й дв҃ᲂ мᲂли́твами твᲂи́ми , спаса́ѧ рабы̀ свᲂѧ̀ ѿ всѧ́кїѧ бѣды̀ , є҆ди́на бл҃гᲂслᲂве́наѧ . сла́ва , и҆ ны́нѣ . Невѣ́стᲂ бракᲂнеи҆скꙋ́снаѧ , премꙋ́дрᲂсти село̀ пᲂказа́сѧ ᲂу҆тро́ба твᲂѧ̀ бг҃ꙋ сло́вꙋ . ты́ бᲂ є҆ди́на мт҃и бж҃їѧ , бл҃ги́мъ хᲂда́таица ꙗ҆ви́сѧ . всѧ́кихъ страсте́й и҆зба́ви рабы̀ свᲂѧ̀ , непреста́ннѡ вᲂспѣва́ющихъ сла́вꙋ твᲂю̀ .

Пᲂ в҃ , стихᲂло́гїи , сѣда́ленъ . гла́съ , г҃ . Ꙗ҆́кѡ ѕвѣзда̀ мнᲂгᲂсвѣ́тлаѧ взы́де , ѿ вᲂсто́ка къ за́падꙋ , тво́й ѻ҆́бразъ бг҃ᲂмт҃и , ѡ҆зарѝ ско́рби тмо́ю ѡ҆держи́мыхъ . и҆ преще́нїѧ вра́гъ и҆зба́ви , и҆ всѧ̀ тѣ́хъ сѣ́ти разрꙋши́въ ꙗ҆ви́сѧ . пред̾ста́тельнице крѣ́пкаѧ , ѻ҆рꙋ́жїе непᲂбѣди́мᲂе на врагѝ ми́рꙋ всемꙋ̀ . и҆з̾ тебе́ бᲂ всѣ́хъ влⷣка пло́ть прїи́мъ , всѧ̀ чл҃ки ѡ҆бᲂжѝ . сла́ва , и҆ ны́нѣ , то́йже .

Велича́нїе : Дᲂсто́йнѡ є҆́сть велича́ти тѧ бцⷣе , честнѣ́йшꙋю херꙋви́мъ , и҆ сла́внѣйшꙋю без̾ разсꙋжде́нїѧ серафи́мъ . ѱл҃о́мъ и҆збра́нныи : Бж҃е сꙋ́дъ тво́й цр҃ви да́ждь .

Пᲂ пᲂлїєлеѡ́сѣ , сѣда́ленъ . гла́съ , а҃ . Бл҃же́нна є҆сѝ ты̀ бцⷣе чи́стаѧ . вели́чествїѧ твᲂѧ̀ кто̀ вᲂспѣ́ти мо́жетъ , є҆́же чꙋ́дᲂ стра́шнᲂ , и҆ чꙋ́дᲂ ве́лїе сᲂдѣ́ѧвши . твᲂи́ми мл҃твами бг҃ᲂмт҃и , чтꙋ́щїи тѧ гра́дъ всегда̀ свᲂбᲂжда́етсѧ , ѿ всѣ́хъ бѣ́дъ . тмы̀ и҆ меча̀ , пᲂга́ныхъ плѣне́нїѧ , и҆ всѧ́кагѡ гнѣ́ва . тѣ́мже мы̀ зрѧ́ще , честно́е ѻ҆́браза твᲂегѡ̀ прише́ствїе , хва́лимъ ꙗ҆́кѡ цр҃цꙋ , вᲂспѣва́юще вѣ́рнїи слᲂвесы̀ , тѧ̀ чⷭ҇таѧ блажа́ще глаго́лемъ , бцⷣе чи́стаѧ , мᲂлѝ вᲂплᲂще́ннагᲂ и҆з̾ тебѐ , спасти́сѧ дш҃а́мъ на́шимъ . сла́ва , и҆ ны́нѣ , то́йже .

степе́нна , д҃ гᲂ гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . Пᲂмѧнꙋ̀ и҆́мѧ твᲂѐ , вᲂ всѧ́кᲂмъ ро́дѣ и҆ ро́дѣ . сти́хъ . слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . всѧ́кᲂ дыха́нїе . є҆ѵⷢ҇а́лїе , ѿ лꙋкѝ . зача́лᲂ , д҃ . ѱало́мъ , н҃ .

сла́ва . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жествᲂ сᲂгрѣше́нїи на́шихъ .

Пᲂми́лꙋй мѧ бж҃е пᲂ вели́цѣй млⷭ҇ти твᲂе́й пᲂ мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , в҃ . Гᲂто́висѧ всечестны́и гра́де мᲂсква̀ , на срѣ́тенїе дв҃ы бг҃ᲂмт҃ре , се́бᲂ грѧде́тъ к̾ тебѣ̀ свѣ́тлᲂе вели́кᲂе сл҃нце , ѿ вра́тъ затвᲂре́ныхъ . тма́ же ско́рби твᲂеѧ̀ ѿгᲂнѧ́етсѧ . свѣ́тъ же твᲂегѡ̀ весе́лїѧ и҆спᲂлнѧ́етсѧ . бꙋ́рѧ сᲂпрᲂти́вныхъ вѣ́тръ ᲂу҆ставлѧ́етсѧ . мꙋ́жїе и҆ сщ҃е́нницы , в̾ печа́лѣхъ сла́дкᲂе ᲂу҆тѣше́нїе прїе́млютъ . цр҃цѣ є҆ди́нᲂй пᲂклᲂнѧ́ютсѧ , мᲂлѧ́щесѧ глаго́лютъ . пречⷭ҇таѧ дв҃ᲂ , мᲂльба́ми твᲂи́ми и҆зба́ви рабы̀ свᲂѧ̀ ѿ всѧ́кїѧ бѣды̀ и҆ печа́ли .

Кано́нъ пᲂхвалы̀ бцⷣѣ , сᲂ і҆рмᲂсо́мъ , на́ ѕ҃ . и҆ пра́здникꙋ , на́ и҃ . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́вᲂ ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́в̾ : Прест҃а́ѧ гжⷭ҇е бцⷣе спасѝ на́съ . Прᲂсвѣтѝ влⷣчце дш҃а на́ша , заре́ю бжⷭ҇тва̀ твᲂегѡ̀ . и҆ па́че ᲂу҆ма̀ бл҃гᲂда́тїю сѝ , незави́стныи да́ръ пᲂда́ждь ми , вᲂспѣ́ти тѧ̀ , ꙗ҆́кѡ пᲂмо́щницꙋ чл҃ческᲂмꙋ сꙋществꙋ̀ препѣ́таѧ , вѣ́рнᲂе застꙋпле́нїе . и҆ на врагѝ пᲂбѣ́дꙋ , странѣ̀ на́шей да́рꙋй . Прїиди́те сᲂбери́тесѧ рꙋ́сстїи сᲂбо́ри , въ пречестны́и хра́мъ всенепᲂро́чныѧ влⷣчцы . и҆ вᲂзᲂпі́йте ᲂу҆ми́льнѡ , мᲂлѧ́щесѧ честно́мꙋ ѻ҆́бразꙋ , взира́юще къ живᲂтво́рнѣй и҆ко́нѣ , бцⷣе без̾невѣ́стнаѧ хва́лѧщихъ тѧ̀ спасѝ . Тво́й бг҃ᲂмт҃и всечⷭ҇тны́и ѻ҆́бразъ , бг҃ᲂгла́сныи є҆ѵⷢ҇а́лїѧ хрⷭ҇то́ва списа́тель , пребжⷭ҇твеныи лꙋка̀ написа́въ , твᲂрца̀ всѣ́хъ на твᲂю̀ честнꙋ́ю рꙋ́кꙋ вᲂѡ҆бразѝ . к̾ немꙋ́же притека́ющїѧ , напа́сти и҆ печа́ли и҆збавлѧ́еши , и҆ всѧ̀ пᲂкрыва́еши , свᲂе́ю млⷭ҇тїю . Хра́мъ прекра́сныи , сᲂдѣ́тель всѣ́хъ є҆ди́нꙋ тѧ̀ ѡ҆брѣ́тъ , в̾ тѧ̀ всели́сѧ , и҆ чл҃ки ѡ҆бᲂжѝ . к̾ немꙋ́же за ны̀ бцⷣе мᲂли́сѧ , спастѝ на́съ ѿ пᲂга́ныхъ плѣне́нїѧ , и҆ всѧ́кїѧ и҆ны́ѧ ско́рби нахᲂдѧ́щїѧ на ны̀ . да твᲂегѡ̀ дне́сь ѻ҆́браза срѣ́тенїе , всече́стнѡ пра́з̾днꙋемъ .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Всѐ пᲂмышле́нїе ѿве́ргше бг҃ᲂмꙋ́дрїи , прїиди́те въ срѣ́тенїе , прекра́снѣй зарѝ , держа́щѣй пресвѣ́тлꙋю лꙋчꙋ̀ , всѧ̀ прᲂсвѣща́ющꙋ , и҆ млⷭ҇тїю ве́сь ми́ръ ѡ҆бᲂга́щшꙋ . Тво́й бг҃ᲂмт҃и всечестны́и ѻ҆́бразъ , чꙋдᲂтво́рнꙋю и҆ко́нꙋ , рꙋ́сстїи кн҃зи стѧжа́вше , ꙗ҆́кѡ застꙋпле́нїе крѣ́пкᲂ , и҆ стѣ́нꙋ нерꙋши́мꙋ . на врагѝ пᲂбѣ́дꙋ , странѣ̀ на́шей да́рꙋй .= Ѻ҆́=блакъ свѣтᲂза́рныи пᲂказа́сѧ , рᲂсо́ю бл҃гᲂда́ти , всѧ̀ ѡ҆мыва́ющи тѣле́сныѧ скве́рны , и҆ дш҃а прᲂсвѣща́ющи , є҆ди́на всепѣ́таѧ . Дре́вᲂ мнᲂгᲂпло́днᲂ ꙗ҆ви́сѧ , пи́щею неги́блющею всѧ̀ насыща́ющи . дꙋша́ же веселѧ́щи . бг҃ᲂневѣ́стᲂ чи́стаѧ . дᲂбрᲂдѣѧ́нїѧ всѣ́мъ и҆стᲂчѝ , и҆ ѿ скᲂрбе́й нꙋ́жныхъ спасѝ .

сѣда́ленъ . гла́съ , д҃ . Наро́ди бг҃ᲂлюби́вїи , прїиди́те въ срѣ́тенїе . се́бᲂ прихо́дитъ дв҃аѧ всѣ́хъ прᲂро́къ превы́шши . честны́мъ свᲂи́мъ ѻ҆́бразᲂмъ , живᲂтꙋ̀ да́телѧ ми́рꙋ , на рꙋкꙋ̀ и҆мѣ́ющи , гра́дъ сво́й сᲂхрани́ти стра́ждꙋщїи , ва́рварскꙋю де́рзᲂсть низ̾лᲂжи́ти . вᲂѡ҆брази́тисѧ всѣ́мъ храни́тельница тверда̀ , держа́ва и҆ ѡ҆гражде́нїе вѣ́рнѡ мᲂлѧ́щимсѧ . сла́ва , и҆ ны́нѣ , то́йже .

пѣ́снь , д҃ . і҆рмо́с̾ . Неи҆зслѣ́днᲂмꙋ бж҃їю сᲂвѣ́тꙋ , є҆́же ѿ дв҃ы вᲂплᲂще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вᲂпїѧ́ше , сла́ва си́лѣ твᲂе́й гдⷭ҇и . Го́рꙋ преве́лїю , ю҆́же данїи́лъ ви́дѣ , ѿ неѧ́же ка́мень ѿсѣче́сѧ без̾ рꙋкѝ , и҆ всѧ̀ сᲂбла́зны и҆стнѝ . вѣ́рныѧ прᲂсвѣтѝ . и҆́стиннᲂе свѣтᲂза́рнᲂе со́лнце пᲂказа̀ , лꙋча́ми прᲂсвѣща́ющи , бцⷣе прⷭ҇нѡ дв҃ᲂ . Вᲂѡ҆рꙋжа́ютсѧ на́ люди твᲂѧ̀ , чи́стаѧ бцⷣе , сы́нᲂве а҆га́рѧнъ , ѕлы́и сᲂвѣ́тъ твᲂрѧ́ще . гра́ды разᲂрѧ́юще , вѣ́рныѧ пᲂгꙋблѧ́юще . нᲂ ты̀ всепѣ́таѧ свᲂе́ю млⷭ҇тїю , всѧ̀ низ̾лᲂжѝ . и҆зма́ильтѧне врагѝ пᲂкᲂрѝ , странѣ̀ на́шей . Не́бᲂ ѡ҆дш҃евле́нᲂ є҆ди́на бг҃ᲂмт҃и , свѣ́тъ ве́лїи прїе́мши , всѧ̀ прᲂсвѣща́ющи , тмꙋ̀ держа́щихъ бѣ́дъ раз̾женѝ . и҆ на́съ вы́шнѧгѡ прича́стїѧ спᲂдо́би . Давы́дъ пред̾ кивѡ́тᲂмъ ликᲂствꙋ́етъ , леви́ти же вᲂспѣва́ютъ . па́че же пред̾ тᲂбо́ю бг҃ᲂрᲂди́тельнице чи́стаѧ , рꙋсі́ѧ хвала́ми ꙗ҆́кѡ цр҃цꙋ вᲂспѣва́етъ , гла́сы мᲂле́бными прилѣ́жнѡ ти вᲂпїю́щи . ра́дꙋисѧ застꙋ́пнице гра́дꙋ на́шемꙋ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бᲂ бракᲂнеи҆скꙋси́маѧ дв҃це , прїѧ́тъ вᲂ ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Тебѐ бг҃ᲂмт҃и вели́кїи вᲂ прᲂро́цѣхъ и҆са́їѧ , прᲂви́дѣ дх҃ᲂмъ , ᲂу҆́гль и҆мѣ́ющꙋ во́ чревѣ . вѣ́рныѧ прᲂсвѣща́ющь , и҆ сᲂбла́зны всѧ̀ пᲂжига́ющь , спаса́ѧ ро́дъ чл҃чь . Же́злъ а҆аро́нᲂвъ прᲂзѧбла̀ є҆сѝ , и҆ ѕло́бныи ко́рень и҆сто́ргнꙋла є҆сѝ , дв҃ᲂ бг҃ᲂневѣ́стнаѧ , живᲂтꙋ̀ да́телѧ ро́ждьши ми́рꙋ . є҆го́же мᲂлѝ , семꙋ̀ гра́дꙋ спасти́сѧ ѿ мно́гихъ напа́стей . Ны́нѣ ᲂу҆́бѡ пристꙋпи́те съ весе́лїемъ , бг҃ᲂи҆збра́ннᲂе ста́дᲂ рꙋ́сстїи сᲂбо́ри , всечⷭ҇тнѣ́й бж҃їи мт҃ри , чⷭ҇тны́и є҆ѧ̀ ѻ҆́бразъ , любе́знѡ прїими́те . се́бᲂ бл҃гᲂда́ть неи҆зчерпа́емаѧ , во́ды тᲂча̀ бжⷭ҇твеныѧ неѡ҆скꙋ́днѡ . є҆ѧ́же вѣ́рнїи пᲂчте́мъ , и҆ честно́мꙋ ѻ҆́бразꙋ є҆ѧ̀ пᲂклᲂни́мсѧ . Ѿ ко́рене і҆єссе́ѡва , дре́вᲂ вᲂз̾растѐ всѣ́мъ живо́тнᲂе . пло́дъ ᲂу҆́бѡ прᲂзѧбѐ , вᲂ ᲂу҆тро́бѣ твᲂе́й дв҃ᲂ чи́стаѧ , всѧ̀ лю́ди насыща́ющи свᲂе́ю ми́лᲂстїю .

пѣ́снь , ѕ҃ . і҆рмо́съ . Бжⷭ҇твенᲂе сѐ и҆ всечⷭ҇тно́е сᲂверша́юще пра́зднествᲂ , бг҃ᲂмꙋ́дрїи бж҃їѧ мт҃ре , прїиди́те рꙋка́ми вᲂспле́щемъ , ѿ неѧ̀ ро́ждьшагᲂсѧ вѣ́рᲂю сла́вѧще . Ѿ тебѐ бг҃ᲂмт҃и и҆стечѐ пᲂто́къ сла́дкїи , всѧ̀ напалѧ́ющи лю́ди , дш҃а́мъ и҆змыва́ющи скве́рны , бцⷣе влⷣчце , спасѝ всѣ́хъ пᲂкланѧ́ющихсѧ вѣ́рнѡ , честно́мꙋ ѻ҆́бразꙋ твᲂемꙋ̀ . Всѝ ᲂу҆́бѡ сᲂвᲂкꙋ́пльшесѧ вкꙋ́пе , вᲂспᲂе́мъ чи́стꙋю дв҃ꙋ , бг҃ᲂи҆збра́ннꙋю лѣ́ствицꙋ і҆а́кѡвлю . гедеѡ́нᲂвᲂ же рꙋно̀ . ра́дᲂсти хᲂда́таѧ , крѣ́пᲂсть и҆ пᲂхвалꙋ̀ спаса́емымъ , бг҃ᲂрᲂди́тельницꙋ чи́стꙋю . Сѐ ны́нѣ весе́лїе приближа́етсѧ , ско́рбь же пᲂтреблѧ́етсѧ , вѣ́рнїи спаса́ютсѧ , ꙗ҆́кѡ ѿ и҆сто́чника ра́дᲂсть пᲂчерпа́юще , вы́нꙋ хвала́ми вᲂспѣва́ютъ , ра́дꙋисѧ чⷭ҇таѧ влⷣчце , спасе́нїю на́шемꙋ нача́тᲂкъ , и҆ всѣ́мъ вѣ́рнымъ стѣна̀ и҆ пᲂхвала̀ . Пᲂда́ждь на́мъ по́мᲂщь мᲂльба́ми сѝ пречⷭ҇таѧ бцⷣе , ско́рби ᲂу҆́бѡ нахо́дѧтъ на ны̀ , и҆ печа́ли ᲂу҆мнᲂжа́ютсѧ , вразѝ ѡ҆пᲂлча́ютсѧ . нᲂ ты̀ пречи́стаѧ пред̾ста́въ и҆зба́ви , враго́мъ на́шимъ шата́нїѧ низ̾лᲂжѝ , на врагѝ пᲂбѣ́дꙋ да́рꙋй , да пᲂсра́мѧтсѧ всѝ ꙗ҆влѧ́ющїи рабо́мъ твᲂи́мъ ѕла́ѧ .

кᲂнда́къ . гла́съ , и҃ . Къ вᲂзбра́ннᲂй вᲂєво́дѣ и҆ застꙋ́пницѣ дв҃ѣ и҆ бцⷣѣ , въ чи́стѣй со́вѣсти вѣ́рᲂю ᲂу҆тверди́вшесѧ , рꙋ́сстїи наро́ди , невᲂзвра́тнѡ наде́ждꙋ и҆мꙋ́ще притеце́мъ , па́че же к̾ чꙋдᲂтво́рнᲂмꙋ є҆ѧ̀ и҆ прест҃о́мꙋ ѻ҆́бразꙋ , и҆ вᲂзᲂпїе́мъ є҆́й , ра́дꙋисѧ невѣ́стᲂ неневѣ́стнаѧ . и҆́кᲂсъ . А҆́нг҃лъ пред̾ста́тель , съ нб҃сѐ по́сланъ бы́сть рещѝ бцⷣе , ра́дꙋисѧ , и҆ сᲂ беспло́тнымъ гла́сᲂмъ вᲂплᲂща́ема тѧ зрѧ̀ гдⷭ҇и , ᲂу҆жаса́шесѧ и҆ стᲂѧ́ше зᲂвы́и к̾ не́й такᲂва́ѧ , ра́дꙋисѧ є҆ѧ́же ра́ди ра́дᲂсть вᲂсїѧ́етъ , ра́дꙋисѧ є҆ѧ́же ра́ди клѧ́тва и҆сче́знетъ . ра́дꙋисѧ па́дшагѡ а҆да́ма вᲂз̾ва́нїе , ра́дꙋисѧ сле́зъ є҆́ввинъ и҆збавле́нїе . ра́дꙋисѧ высᲂто̀ неᲂу҆до́бь вᲂсхᲂди́маѧ чл҃ческими по́мыслы , ра́дꙋисѧ глꙋбино̀ неᲂу҆до́бь зри́маѧ и҆ а҆́нг҃льскима ѻ҆чи́ма . ра́дꙋисѧ ꙗ҆́кѡ є҆сѝ цр҃е́вᲂ сѣда́лище , ра́дꙋисѧ ꙗ҆́кѡ но́сиши нᲂсѧ́щагѡ всѧ́ческаѧ . ра́дꙋисѧ ѕвѣздо̀ ꙗ҆влѧ́ющаѧ сл҃нце , ра́дꙋисѧ ᲂу҆тро́бᲂ бжⷭ҇твенагѡ вᲂплᲂще́нїѧ . ра́дꙋисѧ є҆ѧ́же ра́ди ѡ҆бнᲂвлѧ́етсѧ тва́рь , ра́дꙋисѧ є҆ѧ́же ра́ди пᲂклᲂнѧ́емсѧ твᲂрцꙋ̀ , ра́дꙋисѧ невѣ́стᲂ неневѣ́стнаѧ .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , нᲂ ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . Ꙗ҆́кѡ пᲂрфи́рᲂю и҆ ви́ссᲂмъ , червле́нᲂю хлами́дᲂю дв҃ᲂ бцⷣе влⷣчце , гра́дъ тво́й тᲂбо́ю ѡ҆дѣ́ѧсѧ , хрⷭ҇та̀ велича́етъ , и҆ прише́ствїе честна́гѡ твᲂегѡ̀ ѻ҆́браза сла́витъ , ꙗ҆́вльшасѧ па́че лꙋ́чь сл҃нчныхъ , и҆ немра́чнымъ свѣ́тᲂмъ прᲂсвѣща́юща , велегла́снѡ хва́лѧщихъ тѧ . Скрижа́ли бг҃ᲂпи́санныѧ пе́рстᲂмъ дх҃о́внымъ , в̾ ꙗ҆́рᲂсти мѡѷсе́й сᲂкрꙋшѝ . нᲂ в̾ тебѣ̀ чⷭ҇таѧ , пресла́вныи твᲂре́цъ всели́всѧ , невре́днꙋ тѧ сᲂхранѝ . є҆мꙋ́же пᲂе́мъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Прїимѝ свᲂи́хъ ра́бъ мᲂльбы̀ , пречⷭ҇таѧ дв҃ᲂ бцⷣе , непᲂстᲂѧ́ннꙋю бꙋ́рю ᲂу҆ти́ши , мᲂли́твами твᲂи́ми . и҆ сᲂвѣ́ты прᲂти́вныхъ вра́гъ раз̾женѝ , напа́дающихъ на ста́дᲂ твᲂѐ всенепᲂро́чнаѧ влⷣчце . Тебѐ є҆ди́нꙋ пᲂмо́щницꙋ ро́дꙋ чл҃ческᲂмꙋ . бцⷣе мр҃і́е , зижди́тель всѣ́хъ ржⷭ҇тво́мъ свᲂи́мъ назнамена̀ . и҆ прᲂро́цы прᲂѡ҆брази́ша , ѻ҆́въ тѧ̀ две́рь , и҆́нъ же тѧ̀ ло́жницꙋ бж҃їю . и҆ мы́ же тѧ̀ вᲂспѣва́емъ рᲂди́тельницꙋ бж҃їю , и҆ хᲂда́таицꙋ къ бг҃ꙋ , и҆ застꙋ́пницꙋ , ѿ всѣ́хъ ѕо́лъ нахᲂдѧ́щихъ на ны̀ .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емᲂ , ны́нѣ же дѣ́йствꙋемᲂ , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Ка́кѡ тѧ дв҃це пᲂ дᲂстᲂѧ́нїю вᲂспᲂе́мъ , по́мᲂщь тве́рдꙋю , храни́тельницꙋ живᲂта̀ на́шегѡ , и҆ хᲂда́таицꙋ непрело́жнꙋ , къ сн҃ꙋ свᲂемꙋ̀ и҆ бг҃ꙋ на́шемꙋ . є҆го́же вᲂспѣва́емъ , и҆ превᲂзно́симъ во́ вѣки . Цвѣ́те прекра́сныи , и҆ вᲂнѧ̀ пи́щнаѧ , ѡ҆бл҃гᲂꙋха́еши бцⷣе мр҃і́е всѧ̀ , и҆ спаса́еши , и҆ ѿ недꙋ́гъ и҆сцѣлѧ́еши , бѣ́сы прᲂгᲂнѧ́еши . тѣ́мже ти вᲂпїе́мъ , ра́дꙋисѧ пᲂмо́щнице всѣ́мъ мᲂлѧ́щимсѧ вѣ́рнымъ . Сто́лпъ ꙗ҆́вльшисѧ бг҃ᲂмт҃и , нахᲂжде́нїѧ прᲂти́вныхъ ѿгᲂнѧ̀ . тѧ́ бᲂ чтꙋ́щимъ срⷣцемъ те́плымъ , ꙗ҆ви́сѧ стѣна̀ и҆ ѡ҆гражде́нїе , и҆ спасе́нᲂе прибѣ́жище .= Д=в҃дски вᲂспѣва́емъ ти пѣ́снь , го́рꙋ бж҃їю тѧ̀ и҆менꙋ́юще , пречⷭ҇таѧ дв҃ᲂ . и҆сто́чника бᲂ сꙋ́щимъ прⷭ҇нѡтекꙋ́щагᲂ и҆стᲂчѝ . є҆го́же пᲂе́мъ , и҆ превᲂзно́симъ во́ вѣки .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃ᲂ . Ра́дᲂсти хᲂда́таице , вᲂз̾веселѝ на́шъ смы́слъ , вᲂпи́ти тебѣ̀ бцⷣе чи́стаѧ . ра́дꙋисѧ храни́тельнице на́ша , держа́ва и҆ ѡ҆гражде́нїе , и҆ спасе́нᲂе прибѣ́жище . Да вᲂсхва́лѧтъ сᲂгла́снѡ тѧ̀ нб҃ᲂ и҆ землѧ̀ . ꙗ҆́кѡ живᲂтꙋ̀ да́телѧ ми́рꙋ ро́ждьши . ра́дꙋисѧ ти́хᲂе приста́нище , живо́тныѧ вᲂды̀ и҆сто́чниче неи҆счерпа́емыи влⷣчце . Сᲂбра́вшесѧ дне́сь лю́дїе , вᲂ срѣ́тенїе пречⷭ҇тыѧ бж҃їѧ мт҃ре , вᲂспᲂе́мъ ꙗ҆́же винᲂгра́да мы́сленагѡ гре́знъ нᲂсѧ́щꙋ , вино̀ и҆стᲂча́ющь всегда̀ , и҆ весе́лїѧ всѣ́хъ и҆спᲂлнѧ́ющь . ꙗ҆́кѡ бцⷣꙋ по́ дᲂлгꙋ сла́вѧщихъ . Бжⷭ҇твенаѧ рѣка̀ , во́дъ живо́тныхъ всѧ̀ ᲂу҆до́лїѧ напᲂѧ́ющи . на́ша сᲂбла́зны бг҃ᲂмт҃и пᲂгрꙋзѝ , и҆ дᲂ кᲂнца̀ пᲂтребѝ .

свѣти́ленъ . Да пᲂчте́тсѧ дне́сь бг҃ᲂмт҃и зижди́телѧ ро́ждьшаѧ , ра́йскихъ двере́й ѿверзе́нїе . и҆ всегѡ̀ ми́ра ѡ҆чище́нїе , пᲂбѣ́дꙋ да́вши на́мъ на врагѝ . ѡ҆ се́й бᲂ пррⷪ҇ки гл҃аша , то́й пᲂклᲂни́мсѧ . сла́ва , и҆ ны́нѣ . Пресвѣ́тлаѧ дне́сь млⷭ҇тивнаѧ свѣ́тлᲂсть , бж҃їѧ бл҃гᲂда́ть , всѧ̀ ра́дᲂстнѡ ѡ҆дᲂждѧ́етъ нбⷭ҇ными тꙋ́чами . на стезѝ сла́дкїѧ направлѧ́ющи бцⷣе влⷣчце , всѣ́хъ пᲂзна́вшихъ тѧ земны́хъ , прⷭ҇нѡ дв҃ᲂ . ны́нѣ бᲂ всѧ̀ землѧ̀ рꙋ́сскаѧ ра́дꙋетсѧ , вѣ́рᲂю тѧ сла́вѧщи .

На хвали́тѣхъ , стихѣ́ры . гла́съ , д҃ . поⷣ . ꙗ҆́кѡ до́блѧ .= Наста́вницꙋ тѧ заблꙋ́ждьшимъ ,꙳ и҆ приста́нище спаси́тельнᲂ ,꙳ въ пꙋчи́нѣ влⷣчце и҆ въ бꙋ́ри ,꙳ и҆ вᲂ и҆скꙋше́нїихъ и҆ въ печа́лѣхъ .꙳ хрⷭ҇то́съ тѧ всѣ́мъ пᲂказа̀ ,꙳ сн҃ъ тво́й и҆ бг҃ъ на́шъ ,꙳ вѣ́рнѡ прихᲂдѧ́щимъ тѝ .꙳ є҆го́же мᲂлѝ ,꙳ ѿ ѕлы́хъ бѣ́дъ и҆зба́витисѧ ,꙳ вѣ́дꙋщимъ бцⷣꙋ тѧ̀ вᲂи́стинꙋ . =двⷤа . Тлѣ́нїе пᲂтреби́ла є҆сѝ ,꙳ и҆ бᲂлѣ́знь всепѣ́таѧ дре́внюю всю̀ ,꙳ ржⷭ҇тво́мъ свᲂи́мъ .꙳ живо́тъ бᲂ ми́рᲂви ро́ждьши ,꙳ и҆ сме́рть разрꙋши́вши ,꙳ и҆ бᲂлѣ́зни бл҃га́ѧ и҆сцѣлѧ́еши ,꙳ вѣ́рнѡ ѻ҆́браза твᲂегѡ̀ чꙋдеса̀ вᲂспѣва́ющихъ ,꙳ и҆ любо́вїю кла́нѧющихсѧ ,꙳ и҆ чтꙋ́щихъ ст҃ꙋ́ю и҆ чⷭ҇тнѣ́йшꙋю наста́вницꙋ . Ꙗ҆́кѡ и҆сто́чникъ тѧ препѣ́таѧ ,꙳ живᲂта̀ и҆ бл҃гᲂда́ти .꙳ ꙗ҆́кѡ чꙋдесе́мъ тѧ и҆сто́чника ,꙳ и҆ цѣльбꙋ̀ страсте́мъ дш҃е́внымъ и҆ тѣле́снымъ .꙳ ꙗ҆́кѡ быстринꙋ̀ ѡ҆ставле́нїѧ ,꙳ ми́лᲂсти щедро́тъ неи҆счерпа́емᲂе мо́ре ви́дѧще .꙳ тебѣ̀ припа́даемъ всѝ ѡ҆скᲂрблѧ́емїи нн҃ѣ ,꙳ прᲂсѧ́ще всѝ разрѣше́нїѧ ,꙳ бꙋ́дꙋщагѡ мꙋче́нїѧ . сла́ва , и҆ ны́нѣ . гла́съ , и҃ . И҆́же на херꙋви́мѣхъ ꙗ҆здѧ́и , и҆ пѣва́емыи ѿ серафи́мъ , сше́лъ є҆сѝ съ нб҃сѐ прᲂро́чески бла́же , и҆ всели́сѧ вᲂ ᲂу҆тро́бꙋ чи́стꙋ . ю҆́же а҆́нг҃ли вᲂспѣ́ша та́йнѡ . ра́дꙋисѧ ра́дᲂстнаѧ дв҃ᲂ , не ѡ҆бъѧ́тнагѡ ꙗ҆́кѡ бг҃а во́ чревѣ свᲂе́мъ прїе́мши па́че сло́ва , ѿ невѣ́рїѧ в̾ вѣ́рꙋ ми́ра превᲂдѧ́ща . сла́ва тебѣ̀ хрⷭ҇тѐ , є҆ди́не мнᲂгᲂми́лᲂстиве и҆ чл҃кᲂлю́бче . Славᲂсло́вїе вели́кᲂе , и҆ ѿпꙋ́стъ .

На литꙋргі́и , бл҃же́нна , ѿ кано́на , пѣ́снь г҃ ѧ , и҆ ѕ҃ ѧ , на и҃ .

Пᲂ вхо́дѣ , а҆́ще ли хра́мъ гдⷭ҇ьскїи : трᲂпа́рь , хра́мꙋ , и҆ пра́здникꙋ . сла́ва , кᲂнда́къ , хра́мꙋ . и҆ ны́нѣ , пра́здникꙋ .

Пᲂ вхо́дѣ , а҆́ще ли хра́мъ бцⷣѣ , и҆лѝ ст҃ы́мъ : трᲂпа́рь , пра́здникꙋ . сла́ва , и҆ ны́нѣ . кᲂнда́къ , пра́здникꙋ .

прᲂки́менъ , пѣ́снь бцⷣы . Вели́читъ дш҃а мᲂѧ̀ гдⷭ҇а , и҆ вᲂз̾ра́дᲂвасѧ дх҃ъ мо́й ѡ҆́ бз҃ѣ сп҃сѣ мᲂе́мъ . сти́хъ . ꙗ҆́кѡ призрѣ̀ на смире́нїе рабы̀ свᲂеѧ̀ , се́бᲂ ѿ нн҃ѣ бл҃жа́тъ мѧ всѝ ро́ди .

а҆пⷭ҇лъ пре́же дню̀ . та́же , а҆пⷭ҇лъ , бцⷣѣ , къ филипписі́ѡмъ . заⷱ҇ , с҃м . а҆ллилꙋ́їѧ . Слы́ши дщѝ и҆ ви́ждь , и҆ приклᲂнѝ ᲂу҆́хᲂ твᲂѐ . сти́хъ . лицꙋ̀ твᲂемꙋ̀ пᲂмо́лѧтсѧ бᲂга́тїи лю́дьстїи .

є҆ѵⷢ҇а́лїе пре́же дню̀ . пᲂто́мъ , бцⷣѣ , ѿ лꙋкѝ . заⷱ҇ , н҃д . прича́стенъ , ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призᲂвꙋ̀ .